DAM DIAI RUAM THURUK BY Toni DA Ralte Ahmangaihi

[Ngaia]

DAM DIAI RUAM THURUK..!
.
(Love Story hi ka hne hrih a ni e. Min hrethiam teh u)
.

“YMA Information Centre atangin..khawtlang mipuite hriat tur kan han puang ange. Lalhriatpuia leh Lalnunpuii te unau zawng turin thawhchhuah leh tur a ni e. Pu Liankhuma in kawtah innghahkhawm tur a ni, YMA memberte tlawmngai taka thawkchhuak leh turin kan han inngen leh a ni e” a rawn ti vau vau a. Tukthuan kan kil lai a ni a, ka nu chuan chaw min khawrh pahin,”Vawiin chu kal ve lo mai la ka va ti deuh ee, I la damchiang silo a” a ti a.
.
“kal leh rawh se, hmundangah a awmbo char char a, tun hun hi kan khawtlang tana a theihna a lantir ve hun a nih hi” a lo ti hluk hluk a. Ka pa hi Chhakchhuak hnam a ni a, a tawngkam hi a ti hluk hluk ve thin reng a. A hre thanglo tan chuan nelawm lem loh tak a ni a, mahse, hrechiangte erawh chuan an ngaina in, an chhiat thatah pawh an rawn ve ber a ni thin a. Ka nu erawh Sailo Lal savuta thlah kal zel a ni thung a, lunglian fahran, zaidam leh thinnel tak erawh a ni. A tawngkam chhuak hi a dam dap a, a thu a fing viau zel bawk. Kan khaw Primary School II ah Headmistress hna a thawk mek a. Ka pa erawh Contractor a ni a, mi dik leh thil felhlela kut sil zel thin mi anih vang erawh chuan a contractor nihna chu mi contractor te angin kan hlawkpui ve lem lo.
.

Kan khua Zopui hi Mamit Distric chhunga awm ani a, a khawthleng a nuamin, boruak a zo vah mai a. A mi chengte pawh kan vun a dikin, kan hmeltha tlang hle. In 750 vel dawn chu kan ni awm e. Thingtlang khaw lian tak a nih ber chu. Branch YMA pawh 3 a awm ve a, kei erawh hi chu kan khuaah ka awm tam lo viau a. Pawl sawm ka passed a tangin Shillong-ah lehkha zirin ka awm ta char char a. Ka haw ve chang paw’n Aizawla ka pi leh pute bulah ka tal tam zawk thin. Hmanni lawk khan M.Phil (History) ka zo a, P.hd tih tuma bul ka la tan leh hma siin kan khaw lamah ka haw ve a. a chhan pawh insak kan tum vang a ni. Unau pali kan ni a, upa ber dawttu ka ni a, ka u hmeichhia chu pasal neiin, Aizawlah an inbengbel tawh a. Ka nau chiah Mipa hi chu ram hnathawh lam tuipui rumrut a ni a. Kan huan a enkawl a, a puitling thawkhat tawh viau. Kan teber nula erawh pawl 12 a passed hnuah SSA hnuaiah primary zirtirtu hna ahmu ve hlauh mai a. IGNOU_ah BA a ti tha leh a, kan khuaah ngei thawk turin kan khawtlang hruaitu ten hma an la a, a thawk thei ta hlauh a. Chhungkaw khawsak nuam ve pangngai tak zawng kan ni e.
.

Kan khuaa ka haw hma ni khat ah chiah Lalhriatpuia te unau hi an bo a. Kei erawh kan khua ka thlenhma in ka pute inah kar 1 vel ka awm tawh a, ka kal that loh vangin ka haw thei lawk lo ani bawk e. Kan khua ka thleng a, mibo zawn angai nghal ta si. Ka hrisel loh avang hian ka nu hian min ngaihtuah deuh thin a tin ni. Kan chhungkaw lam chu duhtawk I la..unau bo te chanchin hi a tlangpui ka han sawi a nge.
.

Hriatpuia leh Nunpuii hi inchhangbung chiah an ni a, Hriatpuia hi kum 13 niin, anau hi kum 11 a ni thung. A nu leh pate hi nikumah khan an nu uirena avangin an inthen a. An pa Pu Sawma hi mi hrisel lo tak, hah taka hnathawk theilo, bawksawp ve deuh reng mai hi a ni a. An nu erawh nu viak tha tak, hrisel ve tawk tak, thau mawi tawk tak a ni a. Fa pahnih an neih hnuah an naupangber a chhiat a, nau a la pai zui leh ta lo a ni. An pa bawrhsawmna vang nge phei zawng kan hre lo, an thenawm tlangval lakah a uire ta a! vawi 3 lai an inman hnuah Pu sawma thinin a tuar ta bik lova, a hnawtchhuak ta a ni. Rini (uirenu) chu an khua, kan khaw thenawm Ralvan khuaah a haw phei ta nghal a. A uirena nen lah innei tange an ti chuang lem hlei lova. An pa a duhkhawp lo tih chu khawtlang mite ngaihdan a ni. Pu Sawma te chu khawsak harsa ve tak an lo ni bawk nen, hnathawktu ber a han awm tak lohah chuan an tlahniam chak khawp mai.
.

Fu huan zau deuh an neih chu a hralh ta ngawt a, a fate pahnih zirna chhunzawm nan a hralhna pawisa chu a dahtha ve hmak a ni. Pa zawiawi tak, fate hmangaih tak a ni tih ka hria. A fu huan hralhna thenkhat chuan Dawr a hawng ve a, a farnuten an puihrawn bawk a, an pafa thum eikhawp tur chu an dawr chuan a thawk chhuak ve ta thuai a, miten an lo khawngaih bawk nen..A fate chuan hringtunu na na na chu theihnghilh hmin thak thei hek lo le..anu te khuaah chuan an zin fo a! khaw inhnaih tak, chawhma kal zen zawn kan ni a. Kan khua ai chuan a te zawk a,Friday chawhnu-ah anu bula Pathianni hmang tura an chhuak chu anute khua chu an lut ta lo reng reng a! an nu mangangin a pasal hlui a va hrilh chuan an buai zo ta a. A zan la la in chhungkhatten an han zawng thuak thuak a. Theireh takin an reh vawng vawng mai si. A tuk-ah chuan khawtlang hruaitute hnenah thlenin, Thalai zawng zawng deuhthaw chuan kan zawng ta a ni. Mahse, hmuh tur reng an awm lo.
.

Vawiin hi an bo atanga ni 4-na chiah a ni a, nizanah ka kalna chhuak lehin ka khua te a sik leh a. Ka tha a za tehchiam lo khawp mai. Mahse, ka pa sawi ang khan thawhchhuah ngei chu tul tihna ka nei a, Pu Sawma ka khawngaih vang pawh ani pakhat awm e. Ka nau mipa nen chuan kan insiam malh malh a, a hma ang bawkin ka pa chuan, “Khawi hmunah pawh mizo tlangval in nih angin zawmthaw leh inthlahdah takin awm loh tur, upate zai ngai zelin zuk che ula; zahmawh fiamthu te kha zuk nuihpui ve hawk hawk suh u. Chhiat tawk chhungte mit tikham zawnga chet loh hi kan puihna langsar tak a ni” a ti nghut nghut a. Ani pawh hi a thawk chhuak ziah a, mahse, a kawng a herh hlauh mai a, tuarchhel hle mahse, han chet chhuahpui chi ni hek lo le..ka nu chuan chaw liantawk min funsak a, puan hlap pahnih a tumtel a, ka ipte-ah chuan a dah bawk a. “Kan mibote hi nungdama in hmuh a rinawm tawh loh a, a ruang inhmuh hunah an lo tit ek tawh viau maithei, puan hi ruang khuh nan in hmang dawn nia” a ti siam siam a. Ka nu nge nge..
.

“I lo chhuah leh theih pawh ka ringlo asin” ka thianpa Zuala chuan a lo ti a. Ani hi kan Branch YMA Treasurer a ni a, tlangval tlawmngai leh huaisen tak, lian thelhthawlh, hmelchhe lo tak; zaidam zet hi a ni a. Suahsual rawngbawlte tan chuan a tawrhhlelhawm viau thung. Hmeithai fa anihna hi a inbawhbeh tir ngailo , hna a thawk nasa a. Sawhthing hmun tin 4 hmun a nei riap mai ! Pathianin a thawhrimna te malsawmsakin a sawhthing te chu a hralh chhuak nasa ta a. Tunah chuan in leh lo tha tak a din tawh a. Anu leh a farnu te nen harsa em em lovin an khawsa tawh a ni. Ka thianpa mahnise a nun tluang leh tlang tak avang chuan ka ngaisang fo thin.
.

“Innghahkhawm chhung hian Thanpuii te inah thingpui hang zu in ila” ka ti a. A nui tawi tak a, a phur vak lo tih ka hrethiam. Thanpuii hi ka tleirawl chhuah atanga ka ngaihzawng a ni a, reitak kan inhmuh loh chhung pawha ka tana rinawm tluantling a ni thin. A chhungte pawn min iai bik lova, unau hmeichhia hlir pa 5 an ni a. A pa Pu Rothuama hi pa taima rumrut a ni a, lo te hi an nei zau thei rap. Thanpuii hi an unau zinga naupang ber dawttu a ni a, an upaber chuan pasal a nei tawh a. Thanpuii u chiah Ruati chuan Hriatpuia te unau bo hma niah khan pasal a um a! ..chutak chu ani ka thianpa Zuala mitmeng tinguitu chu a ni. Reitak an inngaizawng tawh a, Pu Rothuama te pawhin mitmei chhia an hmuh ngailo. Ruati chu Thanpuii chhangtu chiah a ni a, Thanpuii hi ka bialnu nilose Ruati chu ka bialnu ka nihtir ang tih tur khawpa Thanpuii nen inang an ni a. An hmeltha a, an vun a nalhin, an ti a mamin a dip hle, an lo fel tel lehzel bawk nen. Inleng pawh an ngah thin hle. Ka haw zawk chang pawn Zuala nen kan rim dun mai thin.
.

Ka haw hma thlakhat velah Zuala hian a rilru nawmloh thu min rawn hrilh fo tawh a. Ruati chu Aizawl atanga zirtirtua rawn awmthar nen an inhnimhnai riau niawmin a rawn sawi a. Ruati mitmei hmulose chu tlangval chuan a vir a vir peih a rinloh thu te, Ruati nu ngei pawhin a biak that zia te a rawn sawi a. Mak ka ti lem lo. Ruati nu hi milian ngaisang ve chi kha ani miau a! Zuala hlauh ang ngeiin Ruati leh tlangval chu tlandunin, an chanchin a hre ta ngailo a, hriat pawh a duh hek lo. Pu Rothuama thin a rim viau niawm tak a ni. Thanpuii erawh chuan a u chu a tan tlat! “U Ruati hian U Puia (mikhual tlangval) hi a duh ve lo hrim hrim. A huat mahnak alai a, U Zuala bak a hmangaih lo; hrehwm a tih thu leh ka nuin a duhpui avanga a nin zia a sawi fo a lawm, khami zan, an tlandun hma zanah khan Uzuala hi a lo leng a. An in hau a, Uzuala hian ‘ I tlangvalpa nen chuan hlim takin awm rawh u. Ka kut ka sil e’ a lo ti aniawm e. A mangang em em a. A tukah khan min kohtir a tum a. Uzuala lah ramah a lo riak daih bawk si! Chhuna Upuia lo leng chuan, Uzuala leh Ralvan khuaa a bialnu hlui a hmuh dun thu leh inru niawm taka thlam lam an pan thu a rawn sawi a. U Ruati chu a thinrim ta em em a. Mi rilru lian tih takah zanah khan kan mut tawh hnuah Upuia kha a zuichhuak ta mai anih ka ring..a hmangaih leh duh vang a nilo hrim hrim” a ti tlat a! zuala ka hrilh chuan a nui mai a.
.

“Thanpuii pawh hi ka ringzo chiah tawh hleinem. A u nen thiamchan nan chhuanlam an siam mai mai a nih chu” a ti nghat nghat a ni. Ruati te tlandun buaithlakna chu..Puia chhungte awmna leh tute nge tih reng reng an hrelo chu a ni. Pu Rothuama chuan, “Tihian han inkawl sela, kan lam miau loh chuan angaihthalo hi a rawn hawng leh tho tho ang. Min timualpho lutuk, lam pawh a tulna ka hrelo. Zuala, tlangval fel lutuk nen an inzui reng emaw tih laia mipa dang lo um reng reng mai chu..ka hmuh phakah chuan awmse, ka vaw sil khawp ang” a ti hmiah reng a. Anu erawh chuan kamkhat pawhin a fanu thlavang chu a hauh ngam lo.
.

Saphai lui kan thlengthla a, Hmun 4 –ah kan inthen darh a. Zuala nen pawh kan pawl a la inang zel a. Keini pawl chu Saphai lui lama kal tur kan ni a. Hetianga mi bo hi tunhmain kan la neih awm ka hre lo. Tuitla erawh an awm zeuh zeuh a. Khaw inlungrual tak kan ni a. Mizo tlawmngaihna pawh kan la bosal lo e. Saphai lui chu Ralvan khua nen kan inramrina ani a. Ralvan khaw thalai engemawzah an lo thleng bawk a, chhiatna lam mahnise, fiamthu thawha lo nui ham ham tawk kan awm ve reng a. Zelthel deuha che erawh kan awm lovin ka hria. Saphai lui atanga 1 km tlinglo deuhah DAM DIAI RUAM a awm a. Ruam rai nuam zet mai; thlifim tamna, ngaw tha takin a hual vel a ni a. Ralvan panna kawngah an chho char char a. Hah taka an chhoh hnuah kawng chhuk thuilo tak an kal a, tichuan he ruam hi an pawh a. An thlansa te tidaiin an chawl hahdam thin a. Chuvanga Dam diai Ruam tih hming phuah an ni. A ruam tak zuk pawh chuan a thim deuh ruai thei hial; a chhan chu ngaw dur khup in a hual vel anih vang a ni. Helai ngaw hi Ralvan VC ten an humhalh tlat a, a la chhah tha hle reng a ni.
.

Saphai luikamah riahbuk kan sual a. Riak tura kal kan nilo naa..A hranpaa kal leh tho angaih dawn avangin, khawlamah buhfai leh pawnthuah la turin rawlthar fel deuhte an tir a. Kan khaw ram leh Ralvan ram chu a dapa dap chhuah kan tum ta ani ber mai. Zuala nen thinthip vung vung khawpa tuihal dangchara Saphai lui ruam kan fan hnuah beidawngin riahbuk lam kan pan a. A ngui bur mai chuan ka nuih a tiza lek lek. Nuih ngam chi niin ka hre bawk silo. Eirel kan buatsaih a. Diktak chuan Phairama awm reng ka nih vang nge ka tha a no in, nilenga thlansa phulkaia vah tawh hnua eirel han bawl leh chu ka chak lo takzet. Mut hle hle ka chak a, ka damtha vak lo bawk nen. Mahse, keini aia kal hla zawk, chauh hmel tak takte pawh phurber ang maia thothang thaa an chet avang chuan lo awl der der chu nuam ka ti bik silo. Tui ka chawi a, thing tlem ka fawm bawk a. Mei kan chhep hluah a, sapui laka invenna a ni fawm ang chu. Riahbuk pakhatah mi 20 zel kan inkulh a. A nuam thamin, kan chaw lak pawh a tha tlang e.
.

THILMAK !!
.
Zanriah eikham chuan meipui hualin kan thukhawm let a. Titi phungleng kan vawrh a. Kan khawpa pathlawi, fiamthu thiam zet, cher thing theng, a zuheh vanga a nupui fanauten an chhuahsan tawp..misual erawh nisilo chuan kan awmna lui “Saphai lui” an tih chhan chu a sawi a, ka ngaithla uluk hle.
.
“A hma chuan he lui hi Ramri lui kan ti mai thin a. A kum tak chu ka hre ta lo, keipawh thingnawi fawm rual chauh ka la nih lai hian ania. Pem thar an awm a, khawchhak lam atanga lo pem an niawm e. An pa chu maksak deuh, hram phawhraw thei deuh hi a ni a. An nu erawh ti dim dem, hlauthawng hmelpu reng hi a ni a. Fapa pathum harh zet zet an nei a. Zankhat chu pa ber hoin chakai chhitin he lui hi an fang a. Zingah pawh an lo la haw theih loh vangin nuber mangang chuan thenawm khawvengte a pun ta tawp a. Mi thahnemngaite chu an tlan liam vat a. Lui mawng lam zawh ho chuan Ngunchhina iptepui leh dumbur an chhar a, ngaihthalo taka an kal zel hnuah naupang pahnih chu an hmu ta mial a! mahse, an taksa chu anal pur a, an mit chu an khap fek fek ringawt mai! Tawng pawh an tawng peih lo. Zawhna chhang chi ziazang an nih loh vangin mi thenkhatin an zawn haw a, thenkhat chuan pa ber leh naupang pakhat zawng turin lui mawnglam chu an zawh ta zel a.
.

Lengkir an thleng ta a, helna kawnga kal an han tum chu kawng kha a lo bo daih mai! Mak an ti nasa mai a. Hel ngaihna a awm ta silo. Lengkir chu sang lutuk chu a nilo a, a hnuaia li erawh a thuk hle niawmin an sawi. Lengkirah chuan an zu dak vang vang a, chutia an dah lai chuan, Ngunchhina aw in “Ka fate pahnih ka pe tawh che a, kei lehzel pawh min beisei amaw? Tun tum zawng thih thlengin kan inbei ang” a tih ri hi an hria a. Mak ta em em chu an thawm hriat chu lengkir tawpa li tling lung atanga an hriat a ni tlat chu a ni. An han au vak vak thin, a reh hmak bawk si. Tihdan tur rela an thutkhawm lai chuan, “Thiante u, Thanruala (naupang bo pakhat an la hmuh loh kha) chu ka iptepui in chharna bul lungpui chungah a awm e. Min hawnsan tawh rawh u. Tiandawli (a nupui) bulah khan ‘khawiahmah in pem kawi tawh loh nan ani (amah Ngunchhina chu) chuan a nun a hlan ta’ inlo ti dawn nia” tiin Ngunchhina aw ngei mai chuan a rawn ti leh ta a!! rawlthar deuh phei chuan an hlau tawh viau a ni.
.

Upa min pakhat chuan, “Nguna, chutiang tur a nilo e, I nupui fanaute I ngaihtuah lawm ni, lo kir leh rawh..khawnge I awm?” tiin a au let ve a. Mahse, Ramsa (?) hram nghur nghur thawm bak hriat tur a awm lo. Chutah vawilehkhatah lengkir hnuaia tui chu sang takah a rawn invawrh suau a, Saphai lian em em, rapthlak zet hi lengkirah chuan a rawn dak ta hru mai anih chu!! An teh nghal hak a. Chu Saphai chu mihring ang tak hian a nui (nui chiah lo, a ka zau taka anga thawm mak deuh chhuah) ta a. Zun cheh phung te pawh an awm hial aniawm e. Tichuan, saphai chu li thuk takah chuan a tlum lut leh ta nghal a ni.
.
Thanruala pawh Ngunchhina sawi ang khan an hmu leh a, a meng var vek a, a kaih niin an hria. Saphai bei zui ngam erawh an awm lo aniang, tuman an sawi zui tawh lo, a lian em em a, mihring te chu awlsam takin a dawlh thei ang tih hriatsa a ni. Tiandawli bula thil awmzia an han sawi chuan a tap hawm hawm a, chutih rual chuan thawveng hawk hmel hi pu a. A hlauhthawng hmel te kha a reh ta daih niin an sawi. Thil awmzia an han zawh chian chuan an pa chu dawi lam thil ti thin anih thu leh a hmelma pakhat chu saphai a dawlhtir a, chu a hmelpa laina pakhat, dawi lam thiam em em chuan phuba lak tumin, saphai hmangin a veh ta reng a. hmun ralmuang nia an hriatna hmunah an pem kual nasa, mahse, saphai chuan a umzui zel si. Helai hmunah rawn pem lehin phuba chu lakin a awm ta nge nge anih awm chu! An fate nal pilh pelh pawh kha saphaiin a lo dawlh tawh, a luak chhuah leh an lo ni a. Mahse, an damchhuak ta hlauh a, Thanruala erawh in thlenpui atanga darkar 3 velah mangang taka rak nawk nawk chungin a chatthla zui ve ta a ni. Tiandawli chuan vai pasalah neiin a pasalte ram lamah an pem leh tawh a ni. Khatiang thil mak avang khan “Saphai lui” chu a lo piang ta a, mahse, tuman saphai chu an hmu zui leh tawh lo a ni” a ti charh charh a. Ngaihnawm kan ti tlang aniang, kan ngawi duk hlawm mai.
.

Mei kan chhawm that leh hnu chuan mut zai kan rel ve tan a. Zuala nen puan khat kan insintawm a, a vawt lem lo bawk a, a nuam tawk viau. Hla vak loah sihal a u ruah ruah a, sava chiar nak nak thawm pawh a la reh lo e. Ka muhil tan siar siar tihah chiang em ema “HMINGPUI” tia min kotu awri avangin ka harh ta hlawl mai le..ka mit ka men rualin sava chiar nak nak thawmte kha areh nghal duk mai! Awri chu ka ngaichang leh a, ka bengchhe ri anih ka ring ta deuh a. Zuala hnungchhawnin ka saisir a. Mutthilh chu ka tum leh a. Ka muhil leh ta tihah “Hmingpui” a rawn ti leh ta dut mai. Mahse, ka hlau miah lo, a chhan chu ka thianpa Zuala aw a ni tlat! Lehhawi tuma ka insiamrem lai chuan ka nak nemah min lo kheuh zeuh a, ka lehhawi a, a lam chu ka va hawi chiah chu ka thu chhuak hlawl mai. Rapthlak ti zetin Zuala chu ka melh ta reng a.
.

A mit chu a meng pual hru a! a sam kir lek lek, buk ve angreng deuh kha a tho sung mai bawk a! a hmui tisawiin a ha var tak chu a then thu bawk a. Thianpa mahnise, a insiamchhiat dan chu hmuh nuam ka ti hauh lo mai. Meipui chu a rem tan tawh a, midang chu an muhil vek niawm tak a ni. A then chu an hnar tluar tluar nghe nghe. Chetlak dan tur pawh hrelo a, hamhaih taka ka thianpa ka melh reng lai chuan, Ka tukhum zawnah chiah hian Ruati aw ngei mai hian “Hmingpui” a rawn ti leh ta. Ka inrin hmain ka rak thawt mai. Ka mumang a lo ni silo. Zuala chu ka zuk melh leh a, a mit chuan chiang zetin min lo melh ve kul mai a! a ha chu a then tawh lova..khur der der chungin a zakhnuaiah ka zuk ban a..mahse, ka sir leh hnunglam, hmalam ..aaa..khawi hmun atang pawh chuan min rawn ko ta nuai nuai mai! Tumah an harh theilo chu mak ka ti a ni..tlangvala pumpa han au vak chu ka zak ve bawk si..
.

Chutah kawta meipui kan chheh chu thli rawn thaw vuk hian a chhem hlum ta hmiah lehnghal..thla chu a eng vak lo a, mahse, Zuala mitin min la en kur tih erawh ka hriatna thazam te hian min hrilh a ni. Mipa ka ni alawm le..tiin ka lighter ka la chhuak a, ka han talh eng va va a. Mei chhem tur chuan ka tho chhuak a; midang mu ho chu harh vese ka duh vangin ka pal phei nawk nawk hlawm a. Vanneih a siamin kan val upa harhvang tak chuan a aw a rawn thian ta kharh kharh mai. Mei chu ka chhem tha leh a, lui mawng lam chu ka thlir a, dumde thlawk noh noh bak ka zuk hmu lo, a thim thla ruai bawk nen. Bukah ka lut leh a. Zuala bulah chuan ka inthawlh ngam tawh thlawt lo. Zuala bul chiaha mu chu dim zetin ka nawr phei a, a bula mu nena an inkarah chuan ka inthawlh ta than a. Ka sana ka en a, Dar 1:23 AM chiah chiah a lo ni.
.

Ka rilru chu a kalthui ta kher mai. Ruati aw ka han hre ta ngawt kha eng nge a chhan ni ang? Ti nge Zuala kha tikhan a awm ? zuala chu ka va thlek a, tui zeta muhil ang mai hian a lo thaw sak sak a. Ka hlauhna ai chuan mak ka tihna a nasa zawk. Thlahrang leh ramhuai te hi an awm chu ka ring a. Mahse, ka la tawn loh avangin ka hlau miah lo. Ka pa hi pa rorum tih takah kan tet lai atangin min hrual nasa a, ramhnuaiah phei chuan kan vak dun nasa thin. Ramhuai awm hi a ring ve lo a, hlauh chu khawilamah ani mai. A fate pawh huaisen turin min fuih fo thin, engpawh tawk ula in fiah hma loh chuan in rinthuin sawi ve ngawt suh u. In fiah hnuah induh leh in hlau chauh dawn nia’ a ti thin. Mahse, tun tuma ka thil tawn erawh chu rapawm lamah a kal a, ka thianpa a lo ni chhap bawk nen..chutianga mumal lo taka ka ngaihtuahna ka kawm lai chuan ka hriat loh karin ka lo muhil ve ta mai a. Mak ka tih leh em em chu Zuala bula ka lo mu leh chu a ni..eng nge thleng zel ang le?!
.

Chiktaka min lo en rengtu Zuala chuan, “Thil diklo a awm ami? I kal na a chhuak leh ami?” a rawn ti a. Ka phu zawk mai. Tukhthuan tur kan rel lai te chuan ka rilru ka kawm mawlh mawlh a; keimahin ka thawk mawp mawp mai a ni. Mi thusawi ka hre lo a, min lo chiktu an awm tih pawh ka hre hek lo.
.
“Thianpa, nizan I awmdan kha chu mak ka ti khawp mai” ka ti ta hmiah a. Bangbo hmel deuhin a hawi hu a. “Engtin nge ka awm?” a ti a. Midang hriat phak lohna turah ka kai phei a, thil awmzia chu ka sawi ta vek a. Kei aimaha maktih hmel hian min melh tlawk tlawk a.
.
“Nizan khan ka chau bawk nen..mumang bo thak khawpin ka muhil a. I sawi chu engmah ka hre lo a ni” a ti dam dap a. Ka ringhlel lo, eng thil emaw in a tibuai a ni. Ruati chungchang ka sawi chuan a bengkhawn viau naa ngaihthlak duh lo ang maiin namnul a tum a. A bialnu a hmangaih em em chu a thi tawh nge eng nge a tawh kan hre silo a, diktak chuan nizana Ruati aw ka hriat atang khan Ruati chu engemaw tak a tawk ani ang tih ka ring nghet tlat tawh. Chutiang chiah chuan Zuala pawh chuan a ngaihtuah anih ka ring. Puia nen an inruk atang khan an inbe pawp ta lo hrim hrim kha ania, Pu Rothuama lah intipa ve tak anih vangin biakpawh vel kha tul a tilo bawk nen. Thanpuii leh anu chuan Puia call an tum a, a swithoff tlat a ni. Ruati erawh a phone chhiat lai anih vangin a kenglo hrim hrim a. Chutiang chu thil awmdan anih avangin ngaihthatna chi niin ka hre tawh lo.
.

Hriatpuia te unau zawng tur chuan kan inpuahchah leh tan a. Zuala nen a hranga kal chu zeplohah chuan ka hreh riau! Mahse, sawi chhuah nuam ka ti silo.Vanneihthlakin a rual khatin kan kal dawn ta hlauh a. Mizo nih hi ava lo nuam tak em..thahnemngai taka mibo kan han zawn atang chuan mizo ka lo ni hi vannei ka inti takzet a ni. Nachhawkna mum 2 ka hmawm a, kan chhuak ta a. Tuntum chu Dam diai Ruam depah kan vak a. A ruam tak chu kan va pawh chiah lo deuh a. Mibote chu kan au vak vak hlawm a. Ngaw chhung kan lut tan tihah boruak chu a vawt nghal ruih a! thlansa pawh a dai sawng sawng mai. A ruam a rai thain, thing dingte chu an upat hmel tawh hlawm kher mai. Awrawl tawp tawpin Hriatpuia chu kan ko a. Chhawntu reng a awm silo.
.
“Kha..rul” ka tih rual chuan, Zuala chuan rang zetin Rul ngan lian fe mai chu a chempui hriat zet chuan a lu a chhawk hmawk mai. An lo tlankhawm tak tak a, a chuk hman lo chu kan vannei hle. Rul lu bung chu kan phum a, a taksa erawh kan khai a. Kan kal leh ta a.
.
“Hmingpui” ka phu zawk mai. Ruati aw ani leh tlat! Ka hawi kual vat a. Chunglam atangin min rawn ko leh a. Ka hawi chho a, engmah ka hmu lo. Ka hmaa Zuala kal chu a ding chut a! a rawn lehhawi a. A mit chu a sen ram a. “Ti nge’ ka lo ti satliah a. “Ruati aw kha I hre ve em?” a rawn ti ta mai! Ka ding ngil zawt mai. A lo hre ve chiang a nih chu..
.
“Aw I hre ve e lo? “ ka lo ti vat a. A nui tawi leh tak a. Ngawi rengin a kal leh ta mai a. Kawng phihrit deuh kan kal lai chuan, ka ke ka chhep sual a, ka inhamtang hman tawh silo a, ka tawlh thla ta zel a, Zuala chuan min rawn ban a, min ban pha silo. Ka dul thip zawk zawk chu ka hria, ka kang dawrh a, a thim mup mai. Chuan, a vawt em em bawk!
.
“Hmingpui, Hmingpui” min sawi nawk nawktu an awm tih ka hria, ka che thei silo. Phun sur sur thawm ka hria, eng nge an sawi ka hre thei silo.
.
“nangmah vang anih hi..engkim hi nangmah vang” Ka thianpa Zuala aw chu chiang takin ka hria, lehlam tawngri erawh a riat nawk nawk ni mai hian ka hria. Ka lu chu tuiin a rawn theh huh a. “Thianpa, harh rawh, I thi thiang lo a nia” a ti hrawk hrawk a. Thinrim awrawl tih ka hai bik lo.
.
Ka mit chu ka han meng siar siar a. Phe ruai hian ka nu niawm tak hi ka han hmu a. Ka mit chu ka khap sak sak a. Fiah takin ka hmu thei ta hlawm a. Min ngaihtuah hmel zeta ka chal lo deptu ka nu chu ka melh ta reng a. Ti nge hetah ka nu ka hmuh? Ramhnuaiah ka awm anih kha..Lei phihrit deuhah ka tlu palh a, ka lum anih kha mawle..nichin lawkah pawh Zuala leh tuemaw inbiakna ka la hria a lawm..mahse, tunah khaw nge Zuala chu? Ka nak veilam rawn na zawk zawk avang chuan ka then chak chak a. ka nu chuan , “Kha nachhawkna hi ei rawh..i nak leh I dul vel hi a pilh hrut a lawm.mahse, I vannei zawk, I lumna kha a sang viau ani awm e, a hnuai lah kha lengkir hlui an tih mai, Saphai lui lo pianchhan kha a ni lehnghal..khata I tla lut lo kha a lawmawm lutuk zawk” a ti charh charh a. “Awihawmloh..saphai li te chu lui mawngah lawm a wm” ka rilru in ka ti a. Ka tawngchhuak theilo a ni zawk e.
.

Buhhawp min barh a, ka la tawng miah lo chu mak an ti ru deuhin ka hria. Tawng chu ka tum alawm..hnawhtu a awm zel a tin ni. Thanpuii pawn zanah min rawn kan a. A kut nel thepin ka na lai a han zut vel te chu nuam dangdai tak a ni. Ani nen hian sex kan la hmang lova, zep thu a chenglo ka la virgin a! virgina nupui neih ka tum tlat a ni. Ni 2 leh zankhat lai ka ngawih hnuah..zanriah eikhamah ka tum lawk pawh ni miah lohin, “Ka nu, Ruati kha a thi anih ka ring” ka ti ta a! an mengphawk kher asin le..chutihlai tak chuan mitthi dar a rawn ri ta val val a!
.
Zuala a rawn lut a, “Mibo te chu an hmu tawh a, an lo thi tawh a, an taksa pawh a chhe tawh khawp mai” a rawn ti lut a. Zo artui min rawn humsak tat a..”Khaw nge an hmuh?” ka lo ti var a. Ka tawng duh ve ta chu mak a ti deuh aniang, min rawn en haw a..”I lumna thlang lawka lengkir hnuaiah khan an lo awm reng alawm..chutihrual chuan thilmak deuh ..” a tih lai chuan..
.
“Ruati ruang maw?” ka lo ti ringawt a! a mitmenga maktihna lo lang chu hai chi a nilo. “Ruati ruang anih leh nih loh chu ka hre lo, mahse, Hriatpuia te unau ruang an hmuhna thlanga lungpui chungah lu bung taksa a lo let ve reng a, a lu erawh an hmu zo tawh lo aniang, a taksa chu a chhe tawh lutuk a, chulai hmunah chuan an phum ta ngawt mai a ni”
.
“Ani chiang lutuk..Ruati” ka lo ti tuarh a! ka dara min rawn khawih pahin, “Thanpuii te chhungkua I ti ralkhel ange..fiahna awm lo chuan tikhan sawi tawh lo hram teh” a lo ti sup a. Keipawn ka awmdan leh ka tawngkam chhuak chu ka hrethiam bik reng reng lo. Thildang a rilru pek nan ka lum vel lai chanchin kha ka zawt a.
.
“Khatia I lum takah kha chuan thiante ka ko chul a, ka rawn chhuk nghal a, I lum thui hrep lehnghal a, I thi ngei dawn anih hi ka ti hman hial a sin. Reife ka rawn zwn hnuah che tui ti chip chepa I let reng chu ka rawn hmu ta a. Ruang hmuhna chhak lawk anih vang nge thil rimna tak ka hre nghe nghe. Ka thiante ka au a, engmah I hre silo a, ka hlauthawng hman asin. Tichuan kan zawn hawng che a, Thil rimna tak a vang khan tlangval thenkhat ngihthalo chuan I tlakna bul vel chu vawiinah anva fang leh a, rin ang ngeiin ruang chu an hmu ta a ni. I lumna atang khan lengkir kha a hnai sia, lum thleng la chuan ..thianpa, nungdamin kan inhmu kherin ka ring tawh lo” a mitmenga min ngaihtuahna lo lang chu a lem a tello. Mahse, midang lo thlen hma niawm taka a biak kha tu nge? Chu chu zawh ka duh a..a mak lutuk..ka ngam tlat lo.
.

Khawharinah min kalsan a. Ka nu nen chauh kan awmdun a.
.
“Nu, Ruati tlangval Puia kha inthawhpui anilawmni? An chhungte chanchin pawh engmah I hre lo amaw?” ka ti hlawl a! mitmeng a maktihna nen min melh a, “Ruati ringawt pawh chu I ngaihtuah le aww…ni e, Puia kha misual tak chu a nilo, mahse, a proud ve deuh a. A chhungte chanchin ka zawh pawn ‘chhungte ka neilo, vanlaia tla ka nia’ a ti mai thin a. Mahse, vawikhat chu a ruih tumin hetiang hian min hrilh ve a..” ka nu hian min pai laiin ka pa chuan nuthlawi a luhkhung daih a! ka nu rilru na lutuk chu mi a ang maiin a khawsa hial a ni. Unau pawh pahnih ka nei ve a, mahse, ka ute chu an chanchin ka hre tawh ngailo. Ka nu chu a rilru hah em vangin rethei tak leh hrisello takin min pai a, ka pian hlim hian a thi nghal a ni! Raicheha thi anih ber chu..tichuan, ka pi tar tawh takin min enkawl a, kum 5 ka nihin ka pi chu a thi a. Ka putea nupui a sual em vangin ka putea mangangin hnuchham inah min dah ta a.
.
Hnuchham in atang chuan fa atan min la leh a, min la tute chu Ganja zuar an ni a, kan hausa khawp mai. Ka tleirawl chhuah atangin Ganja ngawl ka vei tawh a ni. Tichuan, lehkha ka zir chho ve zel tho a. Ka pa chu zankhat thilthuin a thi thut mai a, ka nu lah chu zu nen lu a sun a, pasal a nei ta vat a. A pasal leh a fate chuan min ngeih der lo mai a. Pawl 12 ka passed hlimin ka nu bulah ka pa thurochhiah hmuh ka duh thu ka hrilh a, a rukin ukil bulah min hruai a. Ka pa chuan, Aizawl veng hulum taka a in chu ka hmingin a lo dah a. Chubakah pawisa fai cheng Nuai 10 lai min lo dah bawk a. A bak chu ka nu chantur a ni thung. Ka nu pasalin min pawm ve theih siloh avangin ka pa in min rochunah chuan ka indang a, ka pawisa chantur pawh ka la chhuak nghal bawk. A rukin ka hausa ve im em anih chu..Ganja ka nghei a, theihtawpin zirna lam ka uar a, mahse, ka graduate zawh hlimah zirtirtu hna hi ka dil a, ka hmu ta hlauh sia! Lehkha zir san zel chu ka bansan ta a ni” tiin..
.

“Anih leh Ruati khan a duh ve tak tak em ni?”
.
“Duh awkawng lo e; ka bulah pawh a rawn tap tawh alawm..a nu sawn a duhpui tlat a. Puia pawh keimah ngei hian mi inkar tibuai lo turin ka hrilh thin a lawm..’engmah I hre ve lo’ a ti zel a”
.
“An inruk lai khan Zuala hi ramah a riak tak tak ami?”
.
“Umm a riak niawm tak a ni. Ruati khan puia kha a duh ve ta niin angai a, a rilru na lutuk kha a riakbo ta mai anih ka ring”
.
“Ruati duhlo chung chu Puia chuana ru thei dawn em ni?”
.
“Chutak chu lawm mak ka tih..a duhlo hle sia, engtin nge a inruktir leh mai theih tih hi” a ti ve thliam a. Mut chhuakin min zem chiai chiai a,..
.

“Hmingpui, Dam Diai Ruamah..” ka khum bula Ruati ding reng chu ka melh reng a. A sam chu a thlah hnuang a, a hmel chu a dang bai mai. A ral tial tial a, a bo ta daih a. ka mumang nge a tak tak tih ka hre lo. A thusawi mawlh khan ka rilru a tibuai a ni.
.
Ka taksa na te pawh a tha chho ve zel a; ka ngaihthat lohna erawh a pung tual tual thung si. Thanpuii te inah ka leng zut a, zankhat chu a chhungte mut tawh hnuah “Thanpui, Ruati te chanchin hi inngaihven ngai silo a, an dam nge an thi tih tal te chu ngaihven a tha lo maw?” ka ti ta phawng mai a.
.
“Ka nu nen kan sawi fo a lawm. Hmannia ka u kawngteii Aizawl han zin lah khan a han zawng hmu reng reng silo! U puia in niawm takah chuan a han kal ngei a, mahse, a lo inkalh bur mai si a..tihngaihna tak pawh kan hre tawh lo”
.
Ka insum theilo chuan ka mumang leh Saphai luikama thil thleng te kha ka hrilh ta vek a. A meng phawk khawp mai. “Hmingpui, avan mak em em, keipawh I lum zanah khan mangtha lo zet ka mang a, ka u ka lo hmu a, ‘ Thanpui, Uzuala hi hlat rawh..” tih ringawt hi a lo sawi a, ka harh chuan ka thlanin min lo bual huh vek mawle..ka nu ka hrih a, ani pawh a ngaihtha lo khawp mai” a ti a. Ka rilru a vak thui ta kher mai.
.
Ka nu leh pate ka sawipui a, mangchhiain min kalsan ngai hek lo. Zuala erawh ka hlat ta viau mai! A lo lengte anih ngawt loh chuan, kan inkawm ta mang lo. Ramah a riak reng bawk nen. Ka thianpa hi hlat ngawt nachhan tur ka hrelo naa..Ruati chanchin sawipui ka tum apianga thildang a sawi daih zel hi ka hrethiam tawh lo.A rilru nat vang ringawt chu ni theiin ka hre tawh lo a ni. Tichuan, zan khat chu Pu Rothuama chu khunkhan takin ka titipui ta a. Thil awmzia ka hrilh fai leng a, Zuala ka rinhlelh thu pawh. Ani pawh a inngaihtuah muk ve hmel khawp mai. Rem kan ruat ta a, Aizawlah Puia chhungkhat te han zawng chhuakin, chinchang han hriat tum sela..chuta thil awmdan a zira chetlak zel chu kan tum ta a ni.
.
“Thianpa, tunlai chu min ngaihsak lo hle mai. I hmelhriat satliah mai ang chauhin min en tawh a, ka hrethiam lo” a ti a. A mitmeng chu a ngui hle. Khawngaihna thuk ka nei a, mahse, ka hnaih ngam silo.
.
“Thianpa, naktuk hian Ruati ngaihven turin apa a kal dawn asin” ka ti ta a. A mitmeng chu ka en reng a, a meng phelh phat tih chu ka va hmu thei. Engdanga min chhang ta lo chuan, “Thianpa, thanpuii hi neih I tum em?” a ti ta daih a!
.
“Pathianin rem a tih phawt chuan..” a ner sak a. “Neih tlak a nilo” a ti hmak a. Ka tawng leh hmain a tho a, a chhuak ta daih a..ka bangbo reilo. Zuala hian Thanpuii nen kan inkarah hem thlak a tum tih ka nemnghet hmak.Pu Rothuama ngaihchan chu a ni ta.Zanriah kan ei laiin Thanpuii nu a rawn tlanlut a, “Hmingpui, Thanpui..” a ti a…a thaw hlawp hlawp a. Ka tho vat a, ka ngaih a tha lo takzet! A mah lah chu hlauhthawn hmel zet hian a meng tal tawp tawp bawk si..
.
“Thanpuii a bo!!” a ti thei ta hram a! ka tliak hnawp niberin ka hria. Eng sawi set set lovin ka pa chempui ka chuh thut a, ka thianpa zuala te inlam panin ka tlan ta chiam mai a. Inah chuan anu leh a nau an lo awm a, thinrim zetin, “Khaw nge Zosagzuala hi? Ka that dawn a ni. Thanpuii a hruaibo man hi a la hmu ngei ang” ka ti tuar tuar a. Anu chuan hlauhthawn hmel zetin , “Hmingpui, insum hram rawh. Mama chu tukinah ramah riak lut turin a chhuak a” a ti a. Ka rinhlelhna chu a zual telh telh mai. Mangang takin ka chhuak leh a, Thanpuii te inlam panin ka kal nghal a. Mi an lo pungkhawm tiai tawh a. Anu leh anau te nen chauh an awm a, a u nula kha Aizawlah a pa zuiin a kal ve si. An thlaphang hle tih ka hrethiam mai. Ka so bulh bulh mai.
.

“Tukin atang khan a awmdan a diklo tan a. Chaw pawh a eitlem khawp mai. A che reng reng kha phelh phung ani mai. Chaw eikhamah thing kan phur dawn a tia..a chhuak nghal ani mai. Tlaiah thleng pawh a lo la haw loh avangin ka nu ngaitha lo chuan kawtchhuahah a va hmuak a. Chutah chuan, Pu saiate feh hawngin a em leh hnam an rawn chhar thu an hrilh a, chumihnu lawkah Thanpuii chu em leh hnam telloa Dam Diai Ruam lam pana a kal thu naupang lui kal haw in an rawn sawi leh a! ka nu a rawn hawng a, chaw kan eisan a. A thim thet thet tawh bawk si, ka nu chuan “I u mingpuia ka va hrilh ange” a tia..” tih chu Thanpuii nau thusawi a ni.
.

Anu erawh a tap a tap ringawt mai a ni. Thanpuii phei hi chu a duat bik emaw tih tur ania, an inpawh bik reng bawk a. Hmanni lawkah unau bo te avangin khawtlang kan buai tawh a, tunah ka hmangaih em em leh ka nupui hual chu chin hriat lohin a bo ve leh ta chu ani sia! Kan valupa chuan engvanga Zuala kha ringhlel nge ka nih min zawt ta reng a..a chinchhuakin ka sawi ta vek a! mak an tih hmel hlawm khawp mai. Thanpuii ‘neih tlak a nilo’ min tihsak dan ka han ngaihtuah te khan..Thanpuii hi a lo ngaizawng ve reng anilo maw? Ruati nen an inan em vang pwh a ni thei a. Ka ngaihtuahna a kal thui zel a, Thanpuii te ina len ka rawt a pianga a hnial zel te kha a lo ngaihzawn ruk vang ani thei angem? Ka damloh laia Thanpuiin min rawn kan laia a rawn luh ve tum pawh khan..”Thanpuii hi chu Ruati pawn a tlukloh kha ania” te atih tak kha mawle..Thanpuii haw dawnah pawh ava thlah anih kha..
.

Thanpuii ngei pawn “U zuali hi a mizia a mak tawh e, a chetdan hi ka hlau tlat” a ti tawh a lawm..ka thianthaber nia ka ngaihin ka bialnu min rukbo sak amaw?! Ka thinrimna hrikthlak tu tur ka va mamawh tak..A zan azan chuan Thanpuii kalna lamah chuan thalai engemawzat chu kan liam thla ta a. Thenkhat erawh Zuala te lo lamah a riah leh riahloh finfiah turin an kal a. Dam Diai Ruam chu ralkhat atang chuan a thim ruih mai a, khutah khuan ka hmangaihber chu a lo tlu reng maithei asin. Thinphu zawih zawihin ka pan thla zel a. Thawm reh duk chuan ngaihte pawh a titha lo deuh e. Ruam kan lut tan dawn tihah bak lian fe pahnih hi an rawn thlawk chhuak phut mai a. Kan phu dual mai. A vawt in a thim ruih bawk si, meichher kan chhi thluah a. Thenkhatin Thanpuii an lo ko a, chhangtu reng a awm silo.
.
“Hmingpui” Ruati aw ka han hre leh ta thut chu ka phu dawrh a. Tlemin ka kal fal deuh a, ka hawi ruai ruai a. Ka hmazawna dumde thlawk nel nel chu ka va hmu a, ka rilru in mitthi thlarau hi dumde-ah an chang thin alawm..tiin ka va pan a. “Hmingpui” a rawn ti tham leh tiak a. Ka insumzo tawh lo, “Ruati, I duh chu sawi rawh. Khaw nge Thanpuii?” ka ti khur dat dat a. Dumde chu ka zui zel tho a; hmana ka lumna lei phihrit hmun kha ka thleng tih ka hrethiam ta. Hlauhthawnna hlir hian ka khat a, lengkir hnuaiah khan Thanpuii ruang chu a lo let ve reng angem..tiin..ka hmaa kawi hrui ka man dawn chiah tihin..pawttu awm ang mai hian ka tawlhkir ta dawrh mai! A chhan hriat silohin hlauhna mak takin min tuam chiai a, tukhum sam a tho fuk mai le..ka hnungzang lah hlauhna avangin a za mer mer bawk a..ka bulah chuan tuemaw a ding ve ni hian ka hria a; min lo melh kur ni tlatin ka hria a ni.

A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***

[Ngaia]

Hmalam ka pan ngam ta thlawt lo a. Ka thiante awmna lam pan tuma ka pen rual chiah chuan, “U, saw saw U Ruati a van ang..a damlo mi le” naupang aw hian a rawn ti a. Khawi atanga lo chhuak nge tih ka hre hauh lo. “Anih saw..ehe..saw sir Puia , .” mipa naupang aw ri a ni. Ka mitsulh mai. Khang naupang pahnih thita te awri ngei kha anih ka ring. An thlarau chuan eng nge maw min hrilh an tum chu le? Tunah chuan Ruati ka ngaihven lo..thanpuii hmuh ka duh a ni. Chak zetin ka lim chho puat puat a, ka thiante bul ka han thlen chuan min zawn an lo tum mek a, ka kal fal deuh avangin an lo hlauthawng aniawm e. Zan hnuaiah chuan engmah hmuh theih ni hek lo. Hlawhchhamin kan haw ta phawt.
.
Mak tak maiin chumizan chuan ka mutui kher mai. Zingkarah Thanpuii te inlamah ka va phei a. Anau Mpi bulah chuan, “I u khan phone a keng em?’ ka ti a. A lu a thing a, roomah a lut a. Thanpuii phone chu ka kutah a rawn hmehbel a, anu erawh a inthiar mek a, rei pawh awmlovin ka haw phei ta nghal a. Thanpuii phone chu ka han check a, ka message a lo tlar thla dul a. Zuala msg rawh hmuh tur a awm lo. A call list ka han en chuan, “LN” tia a save hian vawi 3 a rawn call a. A bak a awm lo. Msg chu ka han check tha leh a, LN tih nen a an inbiakna chu ka hmetchhuak a..”U zuala ka hlau” Thanpuii msg leh “Fimkhur rawh” tia LN tihin a chhanletna a ni. Chu zawng chu..LN tih chu ka phone in ka han call a, switch off hmak. Tu tak ni ang maw?? Tukthuan eikhamah chuan an inlam panin ka thawk phei ve leh a. Mpi chu LN tih chu a hriat leh hriat loh ka zawt a; a hrelo.
.
Dam Diai Ruam chu kan tuam leh a, hah mahila ka hmangaih tan chuan pawi ka tilo. Khawnge a awm ang? A riltam tawh ngawt ang..min ngai angem le? Nge a ruang chauh hian min lo nghak tawh ang? Ka rilruin ka tawngtai mial mial a. Ka lumna hmunah khan ka va kal leh ta ngawt a. Fimkhur takin ka kal zel a, Zuala ka hmuh huna ka awm dan tur ka suangtuah a, ka inhrosa kuk kuk ani ber e. Lengkir ka thleng tep tihah “Kan hmu e. “ tih au ri avng chuan ka ding chawt a! Rang takin ka tlan chho puat puat a. Ruam rai kawnah chuan a lo thu sawp niah a! Thanpuii chuan min hmuh veleh min rawn pan nghal ka ring a, mahse, min melh reng ringawt! Engmah a sawi lo.
.

In kan thleng a, an inkhatin kan thu hmur a. Zuala hmel hmuh tur awmlo erawh mak ka ti viau! “Zuala vek ani tiraw?” tia ka zawh chuan a bu nghat a. Lungchhe takin min en a, zah pawh sawiloin ka pawm ta chawt a. Thil thlen dan hriat chak kan tam si a..
.
“thingphur tura ka chhuak kha Uzual nen kan inhmu a; ka u te tlan dun atang khan Uzuala hi ka hlau tawh hrim hrim a. Biak pawh be lovin ka kalpel a; mahse, min zuiru reng lo niin; kan inum ani ta ber mai. Ka em leh hnam chu ka dah lawk a, Saphai lui lam panin ka tlan ta chiam a. Min um zel bawk si. Mipa zawk na na na chuan min rawn nagching ta thuai a! min manbet a, Dam Diai Ruam lam min pan pui a. Saphai li lengkir lamah min hnuk thla a, ka ka a hnawh tlat avangin ka au chhuak thei silo. Tichuan, lungpui nghengin min thut tir a. “I U Ruati khan min phatsan tawh a, nang hi Ruati nen danglamna innei lo a, chuvang chuan ka bula awm tur I ni. Tun atang chuan ka ta I ni tawh” a ti a. Ka tap pur a. A chak bawk si, “ka thu I awih angem?” a tih chuan ka lu ka bu a, tichuan, ka kut a phuarna te chu a rawn phelh a, chutia a phelh veleh chuan ka theihtawpa na in a kapah ka tlawh nghek a, chak tawkin ka veilam ngaw-ah ka tlanlut nghal a. Biru titihin ka tlan a. Ka lut thuk telh telh a. Ka bo ta der mai.
.

Khua a rawn thim a, kawng chin ka hre tawh silo, min lo zawn tak mialin tiin thingluang bulah ka thu tlaivar ta a. Mahse, ka lo muhil a. Ka harh chuan khua a lo var tawh a, kawng pawh tumin ka vak leh ta vak vak mai a ni” a ti a. Ka lainat kher mai.
.
“Nangmah chauha Saphai lui lama I kal kha Lianzualte lui kal haw lam khan an hmu che niawm khan an sawi sia” valupa Denga chuan a lo ti a. A mittui hruk pahin, “Ni e, kha khan Lianzuala te kha mitmeiin ka hrilh nasa asin, Lianzuala te thawm a hriat veleh khan kawngchhakah a biru nghal a; I tawng vaih chuan anmahni chawp hian ka that vek ang che u” tiin min vau a , chem hriam zet a keng bawk sia, ka sawi ngam ngang lo a ni, naupang mai an la ni bawk si” a ti a. A kut chu ka va vuan a, ka khawngaih takzet a ni. Zuala chunga thinrim tlangval thaza rual ho chuan an in suasam tumin an lova rikrap hman a. Mahse, khawtlang hruaitu ten an khap thei hram a. Zanriah ei a hun tawh avangin zan a leng leh tura inthlahin ka haw phei ta a.
.
Ka haw phei chu Pu Rothuama Aizawl kal haw nen kan intawk a, min man chawt a, “Lo let leh mai teh” a ti sup a. Thil diklo awma ka hriat avangin ka let leh ta a.An in kan thlen chuan a han thu khawmuang a. Thanpuii chuan hlauhthawn hmel deuh hian a lo en a. Pu Rothuama chuan muangcharh hian, “Hmingpui, Puia chanchin kan hriat chhun chu khatia an tlan dun hnu ni 3-naah khan Aizawla a in chu hralhin a kalbo leh ta nghal mai niawm a ni. Ruati phei chu tuman an hmu ve lo, chhung leh khat a nei bawk silo a; a nu lah in engmah a lo hre ve hauh bawk silo; tihngaihna ka hre ta lo khawp mai” ..
.
Chutihlai tak chuan thawm bengchheng tak a rawn awm a. pawnlam thawm chu a thum nghal hak a. Thinrim inhrosa karah thuneih hmel taka pa pakhat tawng lawng lawng a ri bawk a. Kawngka zawna ding te chu an teh hak a..Police Uniform ha , pa zahawm hmel tak hi a rawn lut a. A hnungah chuan ka la hmuh ngailoh mipa pakhat hi a rawn lut bawk a; kutkawl a bun a. A hnungberah chuan Ka thianpa, tuna ka hmelma lo nita Zuala chu a rawn lut a, a hmai chu a khem nian a, tlangval kut za ho kut a tuar hlek ani mahna. A ipte pui chu a zen rak rak a. Kan hmaah chuan a ding a, a kut chu a phawrh a..Karei!! Ruhro tih dawna tisa la filh zo chiah silo, lu bung rapawm zet hi a chhipsama thamin Pu Rothuama hmaah chuan a lek kang a, “Hei le..i fanu Remruati chu..” a ti thum chhak a! a mitmeng chu huatna hlir hian a khat a ni ber.
.
Thanpuii chu ka va kuah a, a lo khur zawih zawih mai, thlabar mangang takin zuala chu a han melh tawk tawk a. Zuala chuan kei chu hmuhsit hmel zet hian min rawn melh a, “Ka thianthaber chuan ka bialnu thattu kha anei dawn a maw?’ a ti ta a!!thawm chu a reh tlawk tlawk mai. Pu Rothuama makti hmel chu ka ngaihven hman lo; ka bialnu Thanpuii min kuahna pawh ka ngaihsak hman tawh hek lo. Zuala hmaah chuan va dingin, “Tenawmpa, tun thleng pawn I thiltih te kha zep I la tum amaw? Khawi nge thih thlengin I han inbei law law teh ang” ka ti tuar tuar a..A kawr awmah ka va tham a, ka sawi nawk nawk a. A mitmeng fim tak chuan min melh ngawt ngawt a, a nui hmel chuan min ti thinur zual a. Police chuan min lo phih sawk a!
.
“Nang kha awm mai mai rawh. I thianpa puihna avang chauha tualthattu te man thei kan nih hi” min ti ta zek a!
.
“Le..Thanpui, I chhungte leh khawtlang mite hi thudik han hrilh ta che, I thurualpui pa hian engkim a sawi vek tawh ania” tih pahin , Mikhualpa bengah chuan a piai nawk nawk a. Zuala chuan thah chak hmelpu hian Thanpuii chu a lo melh ngawt ngawt bawk a. Thil thlen dan hi a mak lutuk..engmah chu ka hrethiam lo.
.

“In sawi awmzia pakhatmah ka hrelo” a ti tham chhal a. “Chiah maw..Hriatpuia te unau bo hma zana thil thleng kha ka sawi dawn em ni? Nge I bialpa Puia hi ka sawitir zawk dawn? “ Zuala chuan sehchilh nawk nawk hian a ti a..”I bialpa PUIA!!” ka bengah a ri ring viau!
.
“Awle, ka sawi ang. Ka thiltih kha tilo theilo ka nih vang a ni e. Upuia hian ka u kha a duh takzet a, mahse, ka u in uzuala lo chu a hmangaih thei silo. Upuia nen hian kan inkawm thei viau a. A chanchinte ka zawt fo thin. Tichuan remruatna thalo tak ka nei ta a. A hausak zia te ka hria a, a sum neihsak dan ka ngaihtuah ta a. A bulah chuan, ‘ ka u hi I neih theih nan theihtawp ka chhuah anga, mahse, hlawh min pek angai ang ‘ ka ti a. A lo inhuam kher mai. Kan tum dan chuan ka u a neih rualin Aizawla a in chu a hralh anga, pawisa chu zat leh zatin kan insem ang tiin. Chutia kan inkawm ngun tak hnu chuan ka ngaina ta viau mai a! ka bialpa Hmingpuia lah a lo haw ngai bawk silo. Ka u tihpui tum si khan amah Upuia chu ka ngaizawng titih ta ringawt a! mahse, ka sawi chhuak ngai lo. Uzuala bulah ka u leh upuia te awmdan mak ka tih thute ka sawi ta zauh zauh a. Tlang thang khawpin an lo awm ta hial a. Mahse, hemi chhung zawng hian ka u hi vawikhatmah a pelhe ngailo tih hretu ka ni. Uzuala pawh hrilhfiah a tum thin a, mahse, kawng ka tiping zel thin. Nikhat chu Upuia nen lo ah kan kal a, thlamah chuan ka lo tum ruk ang ngeiin kan chesual ta a! pawi ka ti hauh lo. A chhan chu Upuia zun khan min phuar nghet lutuk tlat! Ka u pawh ka tan a hnawksak ta thuai a. Chutiang taka sihhnip chu Upuia chuan min beisei zui ta zel a, ka lo inphal rai ve hmiah hmiah bawk a! mahse, ka u nen an than tawh miau avangin tuman min ringhlel ngailo. Chutiang khawpa atana ka inphal hnuah pawh Upuia chuan ka u a beiseina chu a la dahbo thei lova, chu chuan min run ta em em a; na hi ka ti thin hle ani.
.

Phuba ringawt ka ngaihtuah a. Kha thil thlen hma zana uzuala lo leng haw hnu lawk khan message ka va thawn a, “ka ute hi tlan dun an tum in ka hria; naktuk zanah Dam Diai Ruamah lo chang rawh “ tih ka va thawn a. Ka u chuan Uzuala chu engang pawn hrilhfiah pawh tum mahse, a bengkhawn duh tawh lo hrim hrim a, Chuta karah ka u phone chu tuiah ka thlaksak a, a chhiat a vangin an inbiak pawh theih lohna a rei tawh a ni. Uzuala’n ka u hmuh tuma a bekbawr chang chuan Upuia ka hrilh var a, a chawk buai zel thin. Tichuan, naupangte bo hma zan khan ka u bulah “Uzuala’n Dam diai Ruamah a lo nghak dawn che, tlan dun mai rawh u” ka ti a. An hmakhua ngai niawm takin ka awm a. Ka ti tak tak reng bawk. Inru daih se, Upuia chu pumbilh ila ka duh a ni. Hmingpuia a lo haw dawn tih ka hre bawk nen, hmanhmawh taka chet a ngai a ni.
.
Upuia bulah chuan “ka u nen tlan dun rawh u, Uzuala thinthawkin ruk a tum ania” ka ti thung. Uzuala leh ka u inru lai hmu ve se, a beidawng anga, ka bulah a lo let ka beisei a ni. Kan pathumin Dam Diai Ruam lam chu kan pan ta a. Upuia chuan engvanga kal ve nge ka nih min zawt a, ka u bula dawt ka sawi thu leh ka kal ve loh chuan a hruai theih dawn loh thu ka hrilh a, A awih ve mai. Rilru innag lo takin kan kal tham tham a. Uzual ka call tlang thei tawh silo. Ruam kan han lut chu Uzuala hmel hmuh tur a awm ta silo, ka mangang tan ta. Ka u lah chuan min zawt chhen si. Upuia lah a bangbo bawk. Chutia kan han inhnial takah chuan thudik chu sawilo theiloin ka awm ta a. Ka u chu a thinrim em em a; Upuia nen kan chetsual tawh thu a hriat phei chuan ka pa bula hrilhah min vau a..
.
Upuia lah ka bumna vangin a thinrim bawk. Ka u chu haw a tum ta a, Upuia chuan a umzui ta a. Ka thinlung a na ta em em a, ka bula phulraw chang tha tak, tiangkawm atana an suih, an hluihlawn leh tak niawm tak hi ka chuh vat a. Rilru so bulh bulh chungin ka u chu ka va pan a, eng sawi set set lovin a luah ka hlap ta thuai a! a tlu nghal a, a rawn thawh leh hmain ka hlap leh pawp a! chechang tur a awm ta lo.
.
“Tunah chuan I nupui ka nihna dal thei an awm ta lo” tiin upuia chu ka va pan a. Rapthlak tih hmel zetin min lo melh reng a. “Ka that ve nghal zawk dawn che em ni?” ka ti a. Min hlau khawp mai. Tichuan, rem ka ruat ta a, ka u ruang chu kawng thlangah kan paih a, Upuia chu khaw thenawm a kal tur leh a tuka helai hmuna inhmu leh turin ka ti a. A rawn kallo anih chuan, ka u chu ama thah ani tiin ka report ang tiiin ka vau a. min hlauh tawh em vangin ka thu a kawi angilin a zawm a ni. Tichuan keimah chauhin ka haw ta a. Ka u thlarau chuan min zui ve zel ni hian ka hria a, min khawih thei chuanglo tiin ka inti paukhauh tlat a. Kawngah tumah ka tawk lo bawk a, ka thawveng huai mai.
.

Tichuan, a tukah chuan thingphurh chhuanlamin Saphai lui lam chu ka pan leh ta a. Dam Diai Ruamah chuan Upuia chuan min lo n ghak reng tawh a. Ka u ruang chu dah that dan tur kan ngaihtuah a, tupawn hmuse, tu ruang nge tih an hriat loh nan a lu chu ka tan ta a. A taksa chu kan zawn a, lengkirah khan kan paih ta a ni. Mahse, Hriatpuia te unau khan min lo hmu reng chu niin, an tlanchhia chu kan um a. Tihngaihna awm hek lo, Hriatpuia kha chu ka sat a, anau kha chu ka rekhlum a ni. Tichuan, lengkirah khan kan paih leh ta a ni. Upuia chu zui haw ka tum ta a. Mahse, kan han ngaihtuah chiang a; miten min ringhlel dawna kan hriat vangin amah chu bibo leh hrih phawt turin leh boruak a ziaawm hunah Aizawla inhmuh kan tiam a. Engpawh thlengse, amah chu mawhphurtu anih dawn thu leh tualthattu tia ka hek dan tur te ka hrilh vek a. Min hlau bawk a, ka thu chu a zawm loh ngam ka ring lo.
.

Tichuan, hun a lo kal a, Uzuala hian min ringhlel tlata hriatna ka nei a, ka hlauthawng ta a. Tum aia hmaa Aizawla chhoh angai dawn niin ka hria a. Upuia pawn In a hralh tawh thu leh champhai lama in a lei tawh thute min rawn hrilh a. Tichuan, hmanni zingah khan Min lo bia a, Dam Diai Ruama min lo nghah thu leh chutatanga Ralvana phei a, Ralvan atanga Aizawl chhoh a duh thu a rawn sawi a. Mak chu ka ti deuh a, mahse, kan khua atanga Aizawl chhoh chu a awlsam dawnlo tih ka hria a, tin, mi bo angah min ngaiin, ni 7 hnuah min vui mai se tih ka duh bawk a. Tikhan ka chhuak ta a. Mahse, Ruamah chuan Upuia hmel reng hmuh tur a awm lo. Call ka tum a, a tlang thei silo. Reitak ka nghak a, khua a thim zui ta a. Min rawn zawn lai khan ka lo muhil tak tak a, engmah ka hrelo a ni. Ka harh chuan ka sawi tawh ang khan ka vak ka vak a.Nangni khan min rawn hmu ta a ni”
.

Pu Rothuama rum nghut ri ka hriat rual chuan, Thanpuii chu chhuatah a hnuk thla a, thinrim sehchilh nawk nawk hian, “Mi tenawmnu, I u I that a maw? Naupang pawisawilo te pawh kha I lo that a maw? Mipuite u , min hrethiam teh u, he mihring hi dam reng tlak a nilo e” tih leh a ulhbun silai a va chuh nghal a! police leh YMA hruaitu thenkhatte chuan an lo dawm bet vat a.A thisen zam te chu a pawng tawlh tawlh mai. Thanpuii nu leh nau erawh an tap tlawk tlawk a. Puia chu a kun chal a, thianpa Zuala erawh inringtawk takin a ding lah a.
.

“Ruati te tlan hma zana min lo text atang khan thil diklo awmin ka hre tawh. Ruati hi ka ringlo bur a nilo; ka luhlul ve laklawh mai a ni. Khamizan khan Ruamah khan ka rawn kal a, mahse, inlo haw hman tawh a ni. Ruang erawh ka hmu ve lo. Naupang bo kan zawn laia Hmingpuia mumang leh thiltawn te avang khan ngaihthatlohnain ka khat tawh a. Hmingpuia lumna hmun thlang lawka ruang kan hmu te, lu neilo ruang kan hmuhte khan ka sahal tawh a ni. A chhan chu Ruati ruang ngei ani tih ka hai hauh lo. Tih danglam tumin a taksa te kha sat hliam seng sung mah ula..ka hmangaih kha ka hai ngailo. Tu thah nge tih ka hriat siloh avangin a rukin ka chhui zel a. Nikhat chu in inah ka lo kal a, I lo muhil a, remchangah hmangin I phone chu ka check ta a. A chhan pawh ka hre lo..nang leh puia bak rinhlelhna ka nei lo.
.
Ka rin ang ngeiin LN tih nen inlo in be nasa mai a. A number chu ka la a, ka farnu phone atangin ka call a, a aw ka hriat rual khan Puia a ni tih ka hre nghal. Tichuan, Aizawl ah ka chho ta a, Puia awmna chu I u (Kawngteii) ka zawt a. Nilengin ka chang a, ka vanneih asiamin ka chang chhuak ta hlauh mai. Tichuan ka zuiru a, hotelah a lo thleng a. Zanah nangma message angin text ka thawn a. “Aizawlah ka awm. Ka phone ah lo call/ text suh. Ka pa in min ringhlel a,” tiin lo chhuak turin ka thlem thlu a. A lo chhuak chu a inrinloh laiin ka hlap nghek a. Ka thianpa Zartea (kan vengpa , Aizawla inluaha khawsa) puihna zarah a inluahah kan haw pui a. A lo harh chuan ka dawp ta a. Mi dawihzep tak anih vangin a inpuang fai ta leng a ni. Tichuan, police kutah hlanin, nang chu tih mangan che ka duh ve vang hrim hrimin, Puia kha khatiang khan ka rawn biaktir che anih kha..i u thlarau ka zah em avangin ka that ve lo ang che. Mahse, hremna chu I pumpelh hauh lovang.
.
Vawi engzat nge I u thlarau rethei tak hian ka mutui lai min kaihthawh tawh a, Dam Diai Ruam a kal tura min nawr thin I hria em? Zan engzat nge mittui tla chunga I u lu zawnga ka vah thin pawh I hria em ni? Ka thianthaber Hmingpuia thluak pawh I suk sak a, ani leh keima inkarah hem I thlak a. Ruama I vahvaih chhung khan Puia chu kan khuaah ka rawn hawnpui a, mi hmuh vak ka la duh loh vangin, nangmah zawng tura an chhuak deuh vek kha ka lawm khawp asin. Tunah chuan I u phuba chu ka la ta e, I u pawh thlamuang takin a chawl hahdam thei tawh ngei ang” a mittui tling khat vek chu a khap per sak sak a..ka hnar hi arbawm tiat lawih in ka hmu a ni. Ka zak a ni..KA ZAK..
.

“thianpa, ka haw lo che ania aw..” thil thlen atanga ni 2 hnuah a rawn leng a, kei chu pawn ka chhuak ngam tawh lo.
.
“Zuala, min ngaidam rawh aw”
.
“Tihsual I neilo’
.
“Ka lum lai a nikhaw hreloa ka awm lai khan tu nge I biak mawlh mawlh kha..chuan Saphai lui kama kan riahnaa I insiamchhe chiam kha eng nge a awmzia?” ka buai rukna ani.
.
“I lum hnua ina kan hruai haw hnu che khan, Thanpuii kha a lo kal ve a. A rawn tap pur a, a rawn bawh rawk rawk che a, I na tuar kha I rak thawt a, kha vang khan ka hau anih kha..” a va ho leh si ee!!
.
“Saphai luikama kan riah zan khan keipawn I mumang ang chiah kha mang vein, min hmuh dan ang chiah khan ka hmu ve che asin!!” chu zawng a ho ta lo..vawiin thlengin ka la hrethiam lo..
.
Dam Diai Ruama I rawn kal ve anih ngai chuan, kawng bul maia thlanlung mawi taka ker inphun I hmu ang..
.
“Nunrawnna tenawm leh vertherna tawrhhlelhawm in..
A par vul lai taka , a parmawina a thliahsak..ka hmangaihi
Zalna laikhum hi ..ka tan hahdamna run a lo ni e”
.
Tih inziak I hmu anga..”khawvel hi ava fair lo emm” tiin phun zui miah suh ang che aw..Chantawka lungawi thei mipa diktak Zuala mitmeng I tawn hma chuan…
.
THE END

[machhuangi kawlni]

Van ngaihnawm tak em.. Tiang hi ka ngaihnawm tiang hi ka ngaihnawm tih chi a nia...