ZOTHANTLUANGA !! -Toni DA Ralte Ahmangaihi

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

ZOTHANTLUANGA !! -Toni DA Ralte Ahmangaihi

Unread post by Ngaia » May 31st, 2016, 4:52 pm

ZOTHANTLUANGA !!



“Engmah I hrethiam chuang lovang; ka sawi peih lo” titau tih hriat zet hian a ti chang rat a. A hmel chu a thutak ran mai. A mitah ka en a, a mitmeng uk kharhah chuan tawrhna thuk tak ka hmu tel tlat ani. He mipa naupang hi ka student ani a, keiai a kum engemaw zat a naupang ani. He college a ka thawh tirh chuan kan zirlai naupangte chu mi hlim thei leh kawm nuam tak tak niin ka hria; he mipa naupang rawn lan ve hma kha chuan. Tun kum tir atangin college a rawn zawm ve a. Thian a kawm ngai lova, a maltlat thin. Class ah pawh tumah a be ngailo; a thu tawp a, zirlai hi a ngaihven lemlo tih a hriat khawp mai.





“enteh, Tluanga, harsatna ineih chuan sawi hreh suh aw” ka ti sap a. Chu chu zirtirtu in a zirlai naupang a tihdan tur reng pawh niin ka hria. Khathil thleng kha..ni e, nimin tlaiah ka haw tur chu mipa pahnihin min lo umzui a, zirlai ve ve anni.



“miss, Zothantluanga kha toiletah a in zai thi a” tiin thaw hlawp hlawp in min lo hrilh a. Ka hamhaih kher mai. Rang takin midang kan pun a, toilet kan zuk thlen thlak chuan a ban thi chu a lo sil fai mek a, maktih hmel zet hian min lo en hu bawk a. A chhan ka han zawh ngial pawn a ngawi ngal mai, puitling chhia leh tha hre rual ani ve tawh a, in tihluih a, in nawrseh vak chi ni pawn ka hre lo, ka subject bik History alak avanga han in ti ta tu leh zirtirtu dangte pawn min hmehbel deuh bik anih vang maiin ka ngaihsak ani. Mahse zanah ka han ngaihtuah nawn ngial a; min kap tlat, harsatna anei anih ringin puih theih dan kawngte a awm mial takin tiin tunah hian kan in hmachhawn mek ani.





“Harsatna ka neilo, ka duh chu keimaha awm ani” a ti tawi tak a. Mipa chu niila, min va chaldelh reuh ve tia han melhrum tawh tur ka ni. Mahse ka hriatthiam theih siloh hian min zem tlat.



“Awle, atha e, mahse mahni intihnat erawh I ching tawh tur anilo” ka han ti hram a.A nui hul hak a, ka mitah chiang takin min rawn en a, ka lo zam hman lek lek anih chu..hrep tak a!!



Kar aliam a; engmah ala thleng leh ta lo. Inrinni zan 1 erawh chu ka lu anat deuh avangin mut hma ka tum a, ka in tihfai laiin ka phone alo nghawr dut dut a, ka han lak chuan ..thaw ri hrawp hrawp hian minlo chhawn ta mai. Harsa tih hmel zet hian “miss, keimah ka nia, khawngaihin min lo hruai thei angem? “ tiin a awmna hmun a rawn sawi a. Motor ka lachhuak a, ka va hruai ta a. Zu rim anam lova; damdawi rui hmel lah apu hek lo. A bek chu alo dawm vung vung a, a kut ka han la thla a, alo thi tuam tuam a, a kak thuk zek lehnghal. Ka nu hi nurse ani tho bawk a, kan inah ka hruai haw ta a. A lu leh a chawn thuk vak lova kak chu ka nu in a thui sak nghal a, engmah ka la zawt duh lo, a hlauhthawn ka hlauh bakah a chau tih a hriat si a, ka mut hahdam tir ta hrih a.





“kha..thingpui hi in rawh le..chuan nizan thilthleng kha min hrilh phal chuan..?” Ka han ti tan a. Kut khur dar dar in no chu a chawi a, kan ral lehlam tlang chu a thlir vang vang a. Thawk hawk pah hian, “miss, ka zak ani”



teh tawl chuan.



“min hriatchian hun chuan min hmusit ngawt ang” an chhungkaw boruak anih ka ring deuh a.



“I duh phawt chuan I in bunruak thei ania” tih pahin a hnungzang chu ka chul a. A nui a, a nui hmel ka hmuh tawh ah chuan a tak tak ala ang berin ka hria.Sunday ni mah se, ka inkhawm ta lo mai; ka chhungte pawn hawihhawm takin an be siam siam a, a zak ani tih chu ka hre tho a, chu chuan amah min khawngaihtir zual. Kan chhungkua hi pali chauh kan ni hrim hrim bawk a, ka nu leh pa leh ka patea leh kei kan ni mai. Puitling thiau kan ni tawh bawk a, kan bengchheng lem lo.



“ka pa hi ka la hmu lo hrim hrim a; sawn ka ni a, ka nu hian ka pianhlim in ka pi {anu nu} kutah min hnutchhiah a; ka pi leh pute chuan min enkawl seilian a, ka nu chuan pasal neiin tunah an bulah ka awm mek ani. Ka pi leh pute kha la thi lo chu nise an bulah ka la awm ang, min thihsan atang khan ka putea te chhung chuan min millo a; miss, irinaiin hna te hi ka thawk nasa ang; eirawngbawl pawh ka thiam vek”



Ka lo nuih var var a..a kut chu ka vawnsak a, amit a mittui tling piau chuang hian, “ka pahrawn hi zu ngawlvei ani a, ka nu nen fa pathum an nei a, college ka kalna te hi keima thawhchhuah ang vek ani, tihian tlai banah kan inluahna te hna ka thawhsak a, I bulah chuan ka zep lo ang, damdawi pawh ka vawrh tawh asin.Pawisa hi ka tan ahlu em a, alakluhna thianghlim leh hlim loh pawh ka ngaihtuah thei lo ani. Ka pahrawn chu zu ngawlvei anih vangin ka nu kutthlak a ching a, ka han chhan ve te hian hriamhrei nen min bei a; ka nu lahin min tan ngam ngai silo.”



“ka naute chuan chhiahhlawh chei hian min chei ni berin ka hria; ka nu leh ka pa thiamloh ania, min enkawl dan in zir hek lo. Chuan, nikum hmasa atang khan ka beidawng lutuk in damdawi tih ka ching chho ta a, pawisa ka nei ngai si lova, ka ru ta zeuh zeuh a. Hnawhchhuah pawh ka tawk zing, mahse belh tur ka hre silo, tumah hian min mamawh ve lo niin ka hria a, thian ka kawm ngam lova; tumah hi ka hmachhawn ngamlo ani zawk. Damdawi hmanga OD ka tum pawn ka thi thei silo, lehkha zir ve zel ka la duh si avangin ka sim ta a. Tun dinhmun hi ka thleng ve ta ani.





“nizanah khan kan chaw eilaiin ka nau in chaw in min vawm a; kan inhnial thinrim deuh avangin. A lu ah ka kuk a, ka pa thinrimin min sah atum a, inchungte avangin ka thi lo hram anih hi; miss, kei chu dam nuam pawh ka ti lo; tinge Pathian hian hetiang tur ringawta min lo piantir ve le? amak tiraw? A fair tur ani asin, Pathian anih chuan” a maimichhing vang vang a. A kut chu ka lo hum ngawt ngawt mai; ka vanneih bik zia ka hriatchhuah rualin midangte nun ka lo hrethiam lo fo thin chu ka inthiamlo hle mai.



“Tluanga, apawi hle mai, I chhel ka ti lutuk, lungngai suh, Pathian a awm alawm; tihian kan inah awm ve phawt rawh aw” tiin ka nu leh pa pawh rawn hmasa lo chuan ka han rawt nghal rap a!



“ni love, ka nu bulah ka pa chanchin ka zawt tha leh anga, ka zawngchhuak mai ang. A zahthlak, ka chunga inthatna ah ka lawm e” tiin min hnar a. Ka chhungte hnena a chanchin ka han sawi chuan anlo khawngaih ve hle mai a; a hliam te damchiang phawt se, apa pawh kan zawnpui ang tiin thu kan ti tlu ta a.A thawmhnaw thenkhat va lak ngaiin ka hria a, kan va kal a. An inchhung chu a lo tlabal angreng hle mai a; apahrawn hnartawk hlur chuan a nupui leh fate chu a lo vin ang tuar tuar a.



“a engmah hi he inchhungah hian a awm tur anilo, la fai vek rawh u” a ti hmuar hmuar a. Anu chuan ti dai chung hian” mama, mi ina awm ringawt te chu mawi pawh a mawi lo, lo haw leh phawt la; kan ngaihtuah tha leh dawn nia” alo ti ve a.



“nu, ka pa chanchin min hrilh la; a tawk mai, chuzawng chu ilaka ka beisei theih awmchhun ani tawh” a chhungril natna chu ka hriatthiam pui asin.



Thla chanve liam hnu chuan apa chu kan zawngchhuak ta hlawl mai. Kan ina a awmchhung chuan kan mitmei veng reng rengin hun a hmang a; hnathawh tur hi a zawng ani tawp, sekrek hna thlengin. Ka nu phei chu a awl hneh khawp mai; college erawh ka rualin a kal a, zanah a chhuak ngai lo.Ka chhungte pawn mihrang anga en harsa an ti a, ka pa phei chuan a fapa ang hialin a duat tawh ani. A pa kan zawnhmuh zan chuan apa leh anupui te nen chawhlui kan kil ho a.Apa chu sumdawng niin an khawsak pawh a ziaawm hle; tin, anuhrawn chu mifel tak alo ni a; fapa anlo neilo bawk nen, an han inhmuchhuak chu an lawm tlang hle.Apa te bula a insawn tawh dawn vangin chumizan chuan kan pahnihin kan mengrei fal a. Diktak chuan kan inngaina tawh em em ani.





A mizia naupangchhia tak kara thutak taka a puitlinna zia a rawn lanchhuahtir thin te; a taimakna te, a rualpui mipa dang ang lo taka hmalam hun thiam taka athlir thin te chu ka chhuang thin.



“Ess, {miss tia min koh fo ka phal tawh lova, min u duh chiah biklo aniang} ka ngai ngawt ang che, nang?”



“ngai dawn lutuk che, lehkha zir tha viau ang che”



“ka lo leng thin ang aw, iphal chuan”



“phal lutuk tlat”



“mahse inrim ang type ve tawh in aw” nuihza insum tih hriat zet hian ahan ti a. Ka en haw a, kan nui dun hawk hawk a.





Ka khua ahar thin hle, a awmlai kha chuan titipui te kha anuam a; fiamthu te thawh thin. College a kan inhmuh chang bak ka hmu ta ngai mang lo. Vengte alo inhlat bawk nen, vawi 4 vel chu a rawn leng a; mahse exam te a hnai tawh nen, a reh ta vang vang mai. Exam zawh ni chuan min lo nghak a. A bulah chuan an class ami tho Seni hi alo ding bawk a, an pahniha ka han hmudun chu an inhmeh hle a ka hriat rualin keimaha diklo, nuamlo tihna a rawn awm ta tlat. Ka thik tihna anih ber chu.An in a leng tura min sawm ngun em avangin kan in khalh phei ta poh a, ahnungah an thu a, an nui dun leh har har thin.



“ess, Seni hi min ngaizawng asin”



“oh,,va luck bik ve, atha alawm”



“tak tak maw? I phal ami?”



Ka va melh chuan kan mit leh mit chu a intawng sak a, hnuailam ka bih vat. Ka aia naupang lakah ka tlawm ang maw?!!



“ka phal kher angai hleinem, neilo rual pawh ini tawh lova” ka ti thei hram a.



“ngaihzawng chu ka neihna a rei tawh mai”



“ehe..ivan lerh awm ve a, engmah isawi ngai silo”



“ka zak ve tho lawm..chuan Seni chu tinge niang?” atihdan angin a ti leh sek sek mai.



“ni ula, a tha lutuk alawm” ka sawi lai khan ka maimichhing. Ka en ngam tlat lo.





Rinpuia chuan ka kut chu a vuan a, a kheuh neuh neuh a; hepa hi ka bialpa thar ani.Tlangval puitling leh zahawm tak, chhungkaw pangngai tak an ni a; a hmel pawh a chhe lo. Ka nu phei chuan makpa atan a iai lem lo tih ka hria, zantin alo leng a, kan innel tawh hle.Zothantluanga pawh apa in Bangalore lama zirna chhunzawm turin a hreh chung chung a tirliam a, a chang chuan a nun chu mak ka ti, khalehchen pahrawn hrawnin hrehawm leh baihvai takin alo awm a, tunah chuan anun letling thawk ani ta. A pa hi ahmuchhuak lovang tih ka hlauhpui leh hnhnawh thin.Ka ngai thei em em, ni e, ka zep dawn lo, phaia a chhuk dawn zan chuan alo leng a, balcony ah kan pahnih in kan thudun a.



“min ngai angem?” ngenngawl takin a ti a.



“tehreng mai” a haw tur gate thleng ka thlah a, tihpalh thilthu takmeuh in ka inchhuih palh a, a awmah ka va bei thlawp a, rang leh nghet takin min lo kuah a, a thaw lum ham ham leh a lungphu ri pawh ka hre thei. Harhchhuak hmasaah ka tang a, lai tak chungin ka insaseng a, kan in mangtha ta anih kha..khata amitmeng ah khan hundanga ka hmuh ngailoh min mamawhna ka hmu ani. Nau ang leh nuta anga en ka duh, ka tum, tinge maw a awlsam miah loh le?!! a chhuk atanga thla1 hnuah Rinpuia arawn lang ta ani.





“Min van ngai ve lo tak” vui aw taka a rawn tih tum chuan ka biak khat zia ka hrechhuak a.



“Seni I be ngai em?” ka lo ti daih thung.



“engmah a awm tawh lo” ka thaw huai a, mahse keimahah thil awm a awm ve ta thung si.Zan1 min lo call tumin thiltih laklawh lai ka neih avangin Rinpuia’n alo la a, an in be rei lem lo. Ka mut dawn ah alo call leh a.



“tun hi ka biak hnuhnun ber che ni rawh se” a ti mak thin asin.



“tinge?”



“I bialpa khan min thik tih ka hria, sawiloh tur ka sawi palh a” Rinpuia a haw hma nachhan te kha ani thei mailo maw..



“sawi la, enge?”



“awmzia a awm tawh lo, mangtha aw..miss” vawi engzatnge biak ka tum tawh, a off ta char char mai. Ka mangang ngei mai, Rinpuia chu ka han zawt thin, “I nau kha arilru akim chiah lo aniang” tih chiah a sawi. Ka thinrim nghe nghe. A awmdan tehthut avang chuan mut pawh ka muhil tha thei lo, kiltin ka rilruin a dap, min hua? Enge a chhan? Ka hrechhuak ta..ka rilru ang tho hi alo pu ve tihna ani.





A roommate phone number ka nei thei ta hlauh, apa te atangin. Ka zuk be ta.



“sawi vat rawh” ala titau anih chu..



“ka ngai lutuk che a”



“chu te chu maw?”



“ih..ka ngai ringawt lo che”



“I bialpa kha” ava man chak reuh tak.



“a pawimawh ber lo, mahse ka hrethiam tawh lo”



“umm,ka lo haw ang” leh hmiah mai a! a luhlul nasa si, keimah vanga alo haw vaih chuan apa ten min huat phah ka hlau si.





A lo haw ta ngei e, alo thlen zan in min rawn pan nghal; Rinpuia awmlaiin..shit!! ka bulah a rawn thu a, a ngawi reng a, Rinpuia chuan ahnar atum dat dat a.



“biak lawk che ka duh ani, afalin”



“inleng ka neih hi” a hawihhawmlo chu ka ngei thut ani.A tho a, achhuak ta daih, ka rilru anuam leh silo. Rinpuia pawh thil awmzia ka hrilh ta tawp, a lungawi lo hmel chu hmuh anuam fahran lo. Mahse mite pawh anin then ve tho lawm, hmangaih ten malsawmna an chan theih nan hmangaihtun a tuar atul si thin tih anih tak kha mawle..Rinpuia nen kan inthlah lai chuan gate atang chuan arawn lut ve leh ta chiah, Rinpuia nen chuan anin hmachhawn ta ran mai.



“I ngampa reuh hle mai” Rinpuia aw ani.



“tihpalh, min hrethiam rawh, ka ngai tawh em ani”



Min rawn pan a; a mitmeng hriam hraih ah chuan namen lova phurna hi ka hmu ani; chu chuan min ti thlamuang ve ngawt. Hnai setsawtah min en a, a nui lek lek a,



“I bialpa bula ka sawi chu ka hrilh tawh ang che aw..ani kha ka hmangaih a, I tihnat vaih chuan damkhawchhuah inring suh..ka ti ani” a ti thawp sat a.Thla eng chuan ahmai chu a chhun a vangin chiang takin a hmel ka hmu thei, dawt asawi lo tih pawh.



“hei hi ka zawt duh che ani, min hmangaih tih ka hria, min nei duh angem?” a ti leh a.



Rinpuia mawngphe ka va hmu hman, ka thawveng ta hawk mai; hepa hi ka hloh tur anilo, ka neilo anih chuan ka inhrem kumkhua dawn tih ka chiang em em tlat..thutlukna siam harsa ka tihloh tum tak ani awm e.



“aw, ka nei ang che..Pathianin rem atih chuan”



“Pathian chuan remti hram se ka ti”



“ka beisei”



“min lo nghak dawn tiraw? Naaaa, ngai lehlo, kan inneih zawhah ka zirzawm mai ang”



“ka nghak thei che lawm, zirzo phawt rawh”



“keiman ka chawm bawk ang che..umm..” ka bu nghat a. Kan hmalam hunah engthilnge kan tawn dawn tih hrechang lo lek in kan in fawp vawng vawng a..Hmangaihna hian tu nunah mah ramri akham lova; kum chhuanlama hmangaihte thlah ho hian eng thiltha nge maw an hmuh bik chuan le?? hmangaih neih hi a awlsam lova, hmangaihte thlah hi a awlsam lo lehzual ani..



“miss, min neih dawn vangin ka hlim em em ani” a nui hmel mawi zia leh a lem anih loh zia chu kei leh thla eng chuan kan hmu thei ani.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)