MY VALENTINE'S By HK Renthlei (Completed)

[Ngaia]

MY VALENTINE'S

HK Renthlei

Eps - 1


Ka school bang haw chu ke a kal ka châk deuh avangin țhiante, motora an chuan sap sap lai chuan keimahin kawngah ka kal ngauh ngauh a.

Chutia ka kal mek lai chuan ka hnunglam ațang hian hmeichhe pakhat tuemaw hian min lo bia a.

"Hlutei kha i ni tiraw?" Min betu hmel chu ka en vat a, ka hmelhriat erawh a ni hauh lo nain, ani erawh chuan min hriat hmel em em thung. A hmelțha hle lehnghal a. Kei aiin a sang lo deuh hlek. A thawmhnaw hak ațang chuan khawsa thei tak ani tih a lang bawk.

"Aw ni e, mahse, ka van hre mai lo che ve," ka tih chuan a nui sak ringawt.

"Min hre tawh lova maw? Mahni țhiannu ber pawh han hriat tawh loh chuh." A la nui sang zui. Keilah chuan ka la hre chhuak thei chuang lo.

"Han insawi mai teh, mi hi ka hre thei lo lutuk a," ka ti ta tawp a.

"Rinpuii, school kan kal ho țhin kha. Mak thei țhin e...!

"Awi, a ni maw? A rei tawhin i hmel a dang lutuk a, ka hre tawh lo che alawm, khawiah nge i thawh tak a? Kan in chibai țha leh hnuhnawh.

"Min hre duh tawh lo anih ka lo ring a, ka thinrim hman țep asin. Ha..ha..! Umm, Treasury office ah ka thawk a, nang zawk?"

"Kei chu High school ah zirtirtuin ka thawk a," ka ti ve mai.

"Aizawlah ami in la awm reng a?" Ka ti leh nghal zat a.

"Aw ni e, mahse Lunglei lama min rawn sawn tak avangin niminah ka lo phei a, vawiinah hna ka zawm nghal anih hi." Nui var var pahin a ti a.

"In i luah nge, khawiah nge i innghah reng reng a?" Ka ti leh a.

"In luah chu ka tum a, mahse luah mai tur hi a vang reuh lutuk a, tunah chuan ka nutei te inah ka innghat rih," a ti țha ve mai.

"Chuti chu kan inah vawikhat tal chaw ei i ba tihna anih chu," ka tih leh chuan a nui var var.

"Tehreng mai, ka lo ei ngei ngei ang. Kha ka ti khawtlai ta vek si che a, i phone number min pe la, ka lo call dawn che nia," tih pah chuan phone number chu kan in pe nghal mawlh mawlh.

"Anih, ka tlai tawh si a, ka kal phawt ange, remchangah kan inah chuan chaw ei pahin, i lo riak nghal bawk anga," ka ti leh a.

"Awle, kan la inhmu zel dawn alawm, inkawmna hun tam zawk kan la nei ang chu mawle," a tih hnu chuan ka kalsan ta nghal.

In ka thlen chuan a lo tlai tawh hle mai a.

"I va rawn tlai ve a, thil țha lo a awm em ni?" Ka nu chuan min ngaihtuah hmel zet hian a lo ti vat a.

"Ka țhiannu nen kan inhmu alawm mawle, school ka kalpui țhin ania, hna avangin hetah Lungleiah an rawn sawn a," tia chhang pah chuan ka roomah inthlak turin ka kal nghal a.

"Han inthlak zo la, chaw kan ei nghal mai dawn nia," ka nu chuan min la au zui hram.

Ka inthlak zawh hnu chuan chaw ei turin ka room ațang chuan ka chhuak lehnghal a. Mut dawnah ka inbual tawh mai aniang chu.

Chaw ei dawhkan kan kil țhap a, kan ei hma in kan naupang ber chuan țawngțaina hmangin chaw kan ei ta nghal a.

Chaw kan ei chu vawiina kan hun hman dan țheuh kan sawi a, ka naute pahnih pawh an la naupang deuh bawk nen, an chetchhiatna an han sawi dun chu chaw ei lai e ti lo chuan kan nui nasa ngei mai.

Zanriah eikham chuan kan chhungin T.v kan en a, kan chhungkua hi inkawmngeih tak kan nih avang hian chhungkaw dang ka awt lem lo khawp mai.

Ka hming chu 'Rohluzuali' a ni a, 'Hlute' tiin min ko mai țhin. Kan chhungkua hi panga kan ni a, unau pathum niin, a upa ber ka ni a, ka nau te hi mipa ve ve an nih avang in ka nu hi a buai thei em em. Keilah school kal a lo ngai ve țhin bawk nen, ka pa lah a hna a pension tawh a, kei chiah hi eizawngtu ka ni tawh mai. A theih hram chuan ka nu leh pa hi chhâwk theih ka duh a ni. Kan unau tana an lo thawhrim tawhna ka ngaihtuahin an hah ka phal tawh lo bawk a, a zawng a za chuan a thawk tawh lova, phal lo eng ang mahila, hnathawk lova awm hi a thiam thlawt bawk silova, a remchang ang apiang chu ka nu hian thawh ala tum hram țhin.

Ka naute pahnih hi an thâ duh angin ala chhawr theih lova, school an la kal tlat bawk si a, ka naute nen hian kan kum a inthlau hle a, ka nu leh pa hian keimah chauh min nei dawn emaw an tih tawh hnuah ka naute pahnih hi an nei leh hnuhnawh an ni a, ka chhangchiah nen phei chuan kum ruk laiin kan inthlau nghe nghe.

Tunah hian kei phei chu kum sawmthum pali niin, nula senior tia koh theih hial ka ni tawh. Chuti anih chuan ka chhang chiah chu kum sawmhnih pariat a ni ve tawh tihna a nih chu.

Țhenkhat, pasal nei tawh tura min ti tawk an lo awm leh țhin. Mahse pasal neih lam hi ka rilruah a lang tawh lo. Vawikhat ka tisual tawh a, tihsual nawn leh ka hlau a ni. Mipa hrim hrim hi ka ring lo pawh a ni lo, mahse bum nawn in ka awm leh ang tih mawlh ka hlauh avangin ka ngaihsak chhunzawm duh tawh lo.

A rûk tak chuan ka nu pawh hian min manganpui tih ka hria. Mahse ka bulah engmah a sawi ngai lo. Pawi ka ti lem lo bawk.

Min duhtu chu an awm ve țhin ngei alawm, mahse ka duh zawng an nih loh mai bakah țhian atan bak chuan mipa hi ka mamawh lem tawh rih lo a ni e.

T.v kan en zawhah in mangțha liam liam chungin mu turin kan room țheuh kan pan ta nghal a.

Ka room ka luh a, ka phone lo eng zeuh zeuh ka hmuh chuan ka en vat a, mahse ka lak hmain, alo tawp leh hman chiah. Tunge tih ka en chuan Rinpuii alo ni a, ka call let nghal vat.

Phone alo lak veleh chuan, "Ka roomah ka phone ka dah a, mu turin ka room ka lut chiah alawm mawle, eng thil nge ni ta a?" ka ti nghal sawt sawt.

"A, eng ni love, engtikahnge kan inhmuh leh theih ang tih ka lo ngaihtuah a, i hman theih hun min hrilh la..."

"Nia tiraw, tunlai chu exam a hnaih deuh tawh avang hian school hi kan ngawrh riau mai a, ka van hre mai love aw...! Inrinniah lo leng la a ni mai alawm, kan inte chu i hriatsa tho kha," ka ti ve nghal vat.

"Nia, a pawi lo ang, keini pawh kan buai thei khawp mai."

"Rawn hruai kher i ngai em law'ng chu maw? Tlaiah chaw ei turin rawn kal la, i riak nghal bawk anga," ka ti leh a.

"Nia, pawi lovang. Office kal loh ni ania, a zia deuh alawm, anih ka dah ania, muttui le, Inrinni chuan kan inhmu dawn nia," Phone a dah hnu chuan ka nui sak. Kan school kal lai vel ka mitthlaah a rawn lang nghal uar uar.


Flashback:


School kal tur chuan ka insiam mawlh mawlh a, kum sawm pariat ka ni tawh a. Ka chhang chiah hian kum sawmpahnih na a hmang mek thung. Ka kum phu lohvin ka lian in ka sang a, ka rualpuiah chuan ka lian ber in ka sang ber. A chang chuan ka len a, ka san bik em avang hian ka zak thei țhin khawp mai.

Class 12 ka zir mek a, kan exam a hnaih tawh em avangin school ka kal bak ka chhuak ngai lo. Len phei chu ka leng ngai lo hrim hrim. School-a țhian ka kawm bak pawnlamah ka kawm ngai lo tluk a ni. Inchhungah ka nu a indaih lo em em a, puih a ngaih țhin avangin len ai chuan ka nu puih ka thlang zawk.

Rinpuii nen hian class khatah kan awm tlang a, school ah chuan ka kawm ber a ni. Ani tih lohvah chuan mipa kawmngeih deuh ka nei a, a hming chu Rinkima a ni. 'Akim' tiin kan ko mai țhin.

Kan pathum chuan school compound chhung khawi kipah pawh kan inzui țhin. Akima te hi an hausa a, kan pathum eitur hi a rawn keng fova, Rinpuii nen chuan kan inthlahrung thei țhin khawp mai.

"Eitur i rawn keng ziah bik a, keinin leina kan nei ve țhin silova, a zahthlak thei em mai," Akima hnenah chuan ka ti a.

"Engvanginnge i zah a? Zahna chhan tur a awm hleinem, ka rawn keng a ni ve mai a. Ka eitur rawn ken hi i ei duh lo anih chuan..."

"Ka ei duh loh thu ka sawi hleinem, leina ka nei ve silova, a inthlahrunawm ka ti mai alawm," ka ti leh nghat.

"Nia, a inthlahrunawm alawm, Hlutei sawi kha a dik chiah, kan inthlahrun vang ania, nangni chu keini ang in ni ve lo alawm, huatah la suh aw...! Rinpuii chuan alo ti ve vat.

"Nangni pahnih hi engemaw in hriat a, Vawiin chu in zia a va dang ve mawle!" Akima tih ngaihna hre lo chuan a ti ta ringawt.

"Kan dinhmun a inthlau em alawm, kan tan a nuam lo. Eitur leina kan nei ve silova, nangin eitur min pe reng bik a, keinin pek ve tur che kan nei bawk silova, chuvang mai mai chu mawle," ka ti leh nghal a.

"Ni e, i eitur rawn ken kan ei duh loh vang a ni lova, kan lawm lutuk zawk, i zar kan zo thei hi. Mahse kan tan a inthlahrunawm zia hi min hriatpui la..." Rinpuii'n a rawn ti ve leh vat bawk.

"Huh! Nangni pahnih lah hi in la țangdun zui lehnghal. Anih chuan eitur ka lo keng tawh lovang a, naktuk ah in hawihil anga a ni mai alawm, a nih loh leh hna in neih hunah min la rul dawn nia," nui put put chung hian a ti leh a.

"Awle," tiin Rinpuii nen chuan kan chhang rang ngei mai.

Kan exam a hnaih tawh em avangin lehkha zir kan ngawrh hle mai. Kan țhian thum pawh chuan class-ah bak pawnlamah kan inzui chhuak tawh rih lo. Exam zawh hunah ka tihțhat ve viau chuan zirtirtu hna ka dil ang ka ti ran a. Kum sawmpariat ka ni ve tawh a, ka hmu ve hlauh anih chuan kan chhungkaw dinhmun pawh a zia phah hle dawn a ni.

Exam naa tihțhat loh ka hlauh em avangin ka nu pawhin kan exam lai chuan engmah ka tih a phal lova, keilah ka lehkha zir ringawt ka lo âtchilh thung. Mahse lehkha ka zirtheihna anih dawn phawt chuan ka nu chuan min awl hreh teuh lo mai.

Kan examnaah pawh ka tițha thawkhat chuan ka hria. Mahse Board a nih avangin vanneih leh vanduai kar a ni bawk si a. Ka rilru a hrehawm tak zet a ni. Mahse ka chhan dan ka ngaihtuah let chuan ka fail em chu ka ring lo a ni.

Result chhuah ni chuan ka nu puiin ka insu a, ka naute an la rintlak bawk siloh. Inchhung chet zawng zawng chu ka nu nen kan ti vek țhin. Mahse ka nu hian ka naute hi mipa an nih avang hian engmah tih loh a phal chuang lo. Inchhungah an phak ang tawk tih tur a hrilh a, an lo ti ve mai țhin. Nu tam tak fate tihtur ai pawh tihsak zelin an faten engmah an thiam loh phah țhin ang te hi ka nu duhloh zawng tak a ni.

Chutia kan buai lai tak chuan pawnlam ațang hian, "A u, i pass ania aw," ka nau in a rawn ti lut nghal a. Ka awih thei lo. Ka lawm lutuk chu ka nu ka kuah nghal thuai mai.

Chutia ka nu nena kan lo inkuah lai chuan kan V.c.p (Pu Rama)alo lut a, "Hlute, i pass țha khawp mai, hei i result i en duh em?" Tih pah chuan result lehkhabu hi a rawn keng a, kan han en chu 1st Div. ah ka lo pass reng mai. Ka lawm lutuk chu ka au lo chauh mawle. Pu Rama pawh chuan min lawmpui ngang mai.

Ka pa lawm lutuk pawh chu a țap lo chauh a ni. Kan chhungkua chu hlimna avangin kan mittui a tla lo chauh hlawm.

"A lawmawm hle mai, i pass țha bawk a, kha pass lawm nan..." tiin Pu Rama chuan pawisa min pe a.

"Ka lawm lutuk e," tia pawisa lak pah chuan ka chhang let thuai.

"Hna i zawng nghal dawn em ni? I zawn nghal dawn chuan ka theih ang angin puih che ka tum dawn nia, min hrilh dawn nia aw, anih ka va haw phawt ange," tih pah chuan a chhuak ta nghal a.

Zanriah ei hma chuan ka pa in, "Chhung inkhawm nei phawt ang u, Pathian hnenah lawmthu sawi kan ba nasa em mai," tiin țawngțaina hun a hmang nghal.

High School zirtirtu hna a ruak tih ka hriat veleh ka dil nghal a, interview te ka neih zawh hnu chuan ka tlin leh tlin loh a tuklama ngaichang turin min thlah a.

In ka thlen chuan ka helhhawlh nge ni ka eng tih tha mah a tho thei lo. Ka nu pawhin min nuih tawp ringawt.

Zan ka mu te chu ka muhil thei lova, hetiang em em a rilru hrehawm hian ka la awm lo. Ka ngaihtuahnaah a lut ngut ngut a, ka tling ve hlauh a nih chuan tih leh ka tling lo a nih chuan tihah ka inkhâp buai reng mai.

A tuk zingah chuan phak chuapin ka thova, zanah ka mutțhat vak loh avangin ka mit te chu a thip kher mai.

Ka inphih fai sawk sawk a, ka nu ei rawngbawl pui turin choka ka pan nghal.

Kawngka kik thawmah chuan ka nu nen kan in en vat. Keilah ka thin alo phu hmanhmawh. Kawngka ka va hawn chuan envelope hian lehkha ka dawng a, ka phelh sawk sawk a, a chhung ka en chuan ka tling tih min hrilhna a lo ni a, lawm vanga rak chulin ka nu chu ka kuah a, ka virpui lo chauh a ni.

"Nu, pa, ka tling a nih chu. Ka van lawm em!" Hlim takin ka ti a. Ka nu leh ka pa pawh chuan min lawmpui ve tih hriat tak hian an nui var var mai.

"Engtik ațanga thawk nghal tur in nge an tih che?" Ka nu chuan min zawt a.

Ka han en chiang leh a, "Karleh ațanga zawm nghal mai turin min ti anih hi."

"Pathian hnenah lawmthu sawi mawlh mawlh tur kan ni e, a lawmawm em mai," ka pa chuan alo ti ve chuar chuar a.

Ka hna ka zawm ni chuan ka zam kher mai. Ka thlen chuan inhmelhriattirna te min neihpui vek a, an fel hlawm kher mai.

Hetia ka hna ka thawh hnu lawk hian a ni, ngaihzawng ka nei ve tak ni! Mahse bumin ka awm ang tih ngaihna reng hre lovin kha mihring kha ka lo ring ve a. Ka hrechhuak hma hlauh chu ka vannei kher mai.

Kha mihring khan ngaihzawng nei reng chungin min lo kawp a, a tirah chuan ka hrechhuak mai lo. Keimah chauh min duh anga a awm thiam em avangin rinhlelhna reng ka nei lo.

Țumkhat bazara ka chhuakin hmeichhe pakhat raipuar nena an kal dun ka hmuh chuan makti zet hian ka en reng a, an pahnih chuan an induh hmel riauvin ka hria a, chîk zetin ka thlir reng a, min hmuh ve lo bawk a, ka tan pawh thlir a awlsam phah a ni.

Chutia ka en reng lai chuan a hmeichhe dul chu khawihin a nui sak a, tuman an hmu lo emaw tih tur hian an khawsa a, an khawsak dan chu mak ka ti kher mai. Chutia ka en reng lai chuan a fawp ta zauh a, ka bing mum mumin ka hria.

In ka thlen veleh ka room-ah lut nghalin, khumah ka bawk thlawp a. Ka mittui a luang nghal zawih zawih mai.

Zana alo len chuan ka zawt ta nghal a, chutah chuan a nupui a ni tih a sawi ta nghe nghe. Ka thinrim lutuk chuan khua pawh ka hmu lo, "Min hawsan rawh, vawikhat pawh i hmel ka hmu duh tawh lo." Ka tih chuan a chhuak ta hna hna a. Kha kha ka hmuh tawpna leh a chanchin ka hriat tawpna a ni ta a ni.


End of Flashback:


Tunah chuan ka thawk rei ve tawh bawk a, nuam pawh ka ti tawh hle a ni. Rinpuii nena kan inhmuh lehna chuan ka naupan deuh lai hun leh ka nunhlui ngaihawm loh tak min hriatchhuahtir a ni ringawt alawm le.

Ka hriatlohvin suangtuahna nen ka lo muhil daih chu niin:

Zing ka harh chuan ka mutna chu niin alo chhun uar tawh a. Thawh ka hai chiang kher mai. Nidanga thawh ka hriat țhin tehlul nen.

Vawiin chu School ah eng tak tawng ang imaw!



@#######@######@######@

[Ngaia]

MY VALENTINE'S

HK Renthlei

Eps - 2


School kal tur chuan ka insiam mawlh mawlh a, ka room chu ka chhuahsan a.

"Nu, Pa, ka kal nghal ania aw," tih pah chuan pawnah ka chhuak nghal.

"Awle, nuam deuhin hun i hmang dawn nia," ka nu chuan min rawn au zui hram.

Ka thawhna school hi kea kal phâkna lek a ni bawk a, ke in ka kal mai zel, lirthei neih loh chu thuhran nise; ka thleng țep tih chuan car nalh zet mai hian min rawn tlan pel fua a, ka phu dawrh nghe nghe.

School kawt ka thlen chuan min tlan pel fua tu car chu a lo ding reng tawh a. 'Tunge maw ni le?' tiin ka ngaihtuah nauh nauh.

School office ka thlen chuan ka thawhpuite an lo thleng hlawm tawh a, ka tlai chhe viau lo chuan ka hria. Thawktu hi paruk kan awm a, kan indaih lo theiin keimah chiah hmeichhia ka la ni zui. Mipa rual zinga han awm chu a chang chuan nuam duh lo ve țhin khawp mai.

"Hlute, ilo thleng ve ta maw? Principal thar kan nei dawn ani awm e...!" Ka thawhpuite zinga mi pu Zuala chuan a lo ti vat a.

"Ani maw? A lo kal tawh ami a?" Zawi sapin ka ti a.

"Aw, Principal room-ah a awm mek." Pu Zuala chuan a ti leh a.

Chutia kan lo inbiak mawlh mawlh lai chuan Principal leh mipa pakhat hi an rawn inzui chhuak a, principal bula ding ka hmu chiah chu mak tih vangin ka meng kâwk mai. Ani pawhin min rawn en ve chiah a, mak ti takin kan in melh dun reng ringawt.

"Nang maw?" Ka ti vak ringawt. Rinkima hmel ka hmuh chuan mak ka tiin a ngaihna ka hre lo kher mai. Principal leh ka thawhpui dangte chuan maktih hmel zet hian min en ho mai.

"Nangni pahnih chu in lo inhre tawh a ni maw?" Principal in a tih chuan ka lo bu nghat a.

"Anih chuan nangni pahnih chu inhmelhriattir in ngai lo anih chu. Midang hi kan hmelhriattir ange," tih pahin a inhmelhriattir ta hlawm a. Keipawh chuan a mawiah ka chibai ve tho mai.

"Engemaw avangin ka chhuah a ngai thut a, ka aiawhtu tur a nih hi. Ka hrilh lawk loh che u avangin min hrethiam dawn nia. Vawiin chu inhmelhriattirna ni a ni bawk a, naktuk ațanga rawn țan nghal mai tur a ni. Vawiinah school kalphung vel leh Naupang ho hmelhriattirna kan nei nghal anga, kan school dinhmunte a hriat nghal duh takin." Principal chuan a ti a.

"I van ngaihawm dawn ve!" Ka lo ti thuai a, a nui ve suk mai.

"Keipawhin ka ngai ngawt ang che u, thawhpui in nuam bawk si," Principal chuan a ti ve nuah nuah mai.

Akima kan school principal tur a ni chu rin harsa ka tiin, ka hmuh leh avang erawh chuan ka lawm hle bawk. Mahse kan principal tur a ni tawh si a, a hma ang kha chuan kan inpawh theih ka ring lo a ni.

"Țha takin kan thawk tlâng hlawm dawn nia, school vel hi kan han thlithlai phawt ange," Akima chuan tih pahin principal nen chuan an chhuak dun ta nghal a.

"Kan principal thar tur chu a hmelțha hle mai. Kan nula neih chhun tan hian kan hauh dawn em ni? Hlute, țan la hle rawh aw..." Tiin min fiam nghal sap sap hlawm.

"In ho em mai a, nupui a nei tawh ang chu mawle!" Ka ti ve nghal vat.

"Tlangval ala ni tih an sawi ka hre tlat. Bakah a melh dan che kha kan hrethiam ve ania aw...!" Nui put put chung hian pu Hminga chuan a ti leh a.

Ka thawhpuite hi nupui nei deuh vek an ni hlawm a, kei hmeichhe awmchhun leh nula awmchhun hi fiam nuam min tiin, ka lo senior ve tawh bawk nen, pasal nei tur hian min duh ve tawh hle tih tilang lem lo mahse an awmdan leh an țawngkam ațang hian ka hrethiam ve tho.

"Pasal ka neih chuan in bulah ka thawk thei tawh dawn lo asin, in kianga thawh nuam ka la tih chhung chuan pasal ka la nei dawn teuh lo mai," ka tih chuan an nui dar dar a.

Chutia kan lo nuih dar dar lai chuan Akima leh principal chu an rawn lut ta a, kan ngawi nghal țhap.

"Tinge in nuih tawp daih a, kan hre ve chak ania," Principal chuan a rawn ti lut a.

"Hlutei hi kan lo fiam alawm mawle," pu Hminga chuan nui suk suk chung hian a han ti a. Ka lei ka lo chhuah khum zauh ringawt.

"Vawiin chu ka haw phawt ange, naktuk lamah kan inhmu leh țheuh dawn nia," midang hnena a tih zawh chuan ka lam a lo hawi a, "Min lo zui lawk thei em?" Tih pah chuan pawnlam a pan nghal a.

"Kha maw, zui nghal vat rawh. Tlangval ala ni tih kha hre reng la," Pu Hminga'n a tih chuan an lo nui leh dar dar a. Ka lei chhuah khum zauh pah chuan kawngkhar lam chu ka pan ve nghal vat.

Car bula min lo nghak rengtu lam chu pan nghalin, min hmuh veleh chuan a lo nui var var mai.

"Mak ka ti hle mai. Hetah i thawk ve ang tih rinngaihna ka lo hre miah lova, ka hmu leh thei che chu ka lawm khawp mai," Akima chuan a ti a.

"Keipawh ka hmu che chu mak ka ti ve tho alawm. Kan principal ila ni dawn zui. Mahse ka pu en dawn miah lo che ania," ka ti nghal tawng ringawt.

"Chi nang mawle, min zah viau a ngai ang aw...!" A nui var var a. A lo lang upa ve ta in, A hmel pawh a țha tawh zawk bawk.

"Nupui ila nei lo ami a?" Ka ti leh a.

"Nei nang, nupui neih tur pawh kan hmu zo lo a nih hi,"

"Awihawm loh em mai a, i neih daih tawh ka ring asin," ka ti leh vat.

"Nang pawhin i nei bik chuang ami?"

"Nei bik nang," ka ti țha ve mai bawk.

"Zaninah ka lo leng dawn ania, i phal em?" A ti leh a.

"Phal lo ta ila, ilo leng tho ang em?" Tia ka chhan chuan, "Leng tho vang." A ti țha ve mai bawk. Ka lo nui sang mai.

"Tak taka, ilo leng dawn nia, anih ka lut phawt ange aw," ka tih chuan a lu a bu nghut a, car chhungah chuan a lut a, a ban rawn vaiin a tlan chhuak ta nghal a. A liam thlengin ka thlir zui ta vang vang a.

Office chhung ka luh chuan min lo fiam nghal nak nak a. An nui țha hlawm lehnghal. Tihngaihna hre lo zet hian ka țhutnaah ka țhu ve nghal a.

"In class lak turah kal mai mai teh u, kei chu first ka awl ania," ka tih chuan class la tur chuan an tho ta sap sap a.

Midangin Class an lak chhung zawngin a dawt leh class ka lak tur subject ka in en lawk a, ka zawh hnu chuan tihtur dang awm tawh rih hek lo le; whatsapp ah ka lut mai mai a, inbox kan en chu number ka hriat ngai miah loh ațang hian a lo ni a, a dp kan en chu Akima lek lo niin. Engtinnge ka number alo neih hman ka hre hauh lo. Min dil miah bawk silo; Principal nen an chhuah dun khan a lo dil a nih ka ring ta ber.

Ka chhang nghal vat a. "Engtinnge ka number i neih a?"

"Kei te chu ka țuan a țha em! Kha ti kha a ni mai. I che ve hman mang lovang," tiin nui hmel a rawn dah a. Ka nui ve sak tho.

Reilote kan inkawm emaw ka tih chhungin dar a lo ri a, țhiante an rawn lut sap sap a. "Class ka lak a hun tlat, ka dah phawt ania," tia phone off-in Class la tur chuan ka kal ve ta nghal a.

Class room ka luh chuan naupang ho hnenah chuan an exam a hnaih tawh avangin lehkha zir taima turin ka hrilh mawlh mawlh a. Ka vannei khawp mai, ka class lak lai hian naupang ho hi an awm țha theiin an fel thei em em a, midangin an inhlei theih thu an sawi fo țhin hian kei chu sawi tur ka hre ve ngai lo. Țhiante ho pawhin mak an tih thu an sawi sap sap țhin. "Engtinnge i tih bik țhin le?" Tiin min zawt hial reng a.

"Ani te chu nula a nia, a hmel a țha bawk si a, nula an lawm ve tawh anih hi," tiin min fiam phah fo.

"In ti awm ang lo thei em mai a," tih bakin chhan ngaihna ka hre țhin lo. Zah vanga ka sen awp awp zel hi hmuh nuam min tih vang hian min fiam an țhulh phah duh der lo.

Ban a hun ta der mai, ka thaw huai a, naupang zinga theihpatawpa țawng reng chu a hahthlakin, Ka aw pawh a chau vek thei. Mahse naupang zinga awm hi nuam ka tiin, zirtirtu ka lo ni hi ka inchhir chuang lo.

In lam pan chuan ke bawkin ka kal leh a, kan in leh kan school hi a inhlat vak lo ka tih tawh kha. Minute sawmpanga kal lek a ni a, in ka thlen chuan ka pa chiah a lo awm.

"Pa, khawiahnge ka nu?" Ka luh rual rualin ka zawt a.

"Țhenawmnu damlo a kan lawk anih kha, alo haw leh thuai ang," ka pa chuan a ti mai a.

"Chuti chu ka han inthlak anga, rawng kan bawl ange, Mama te an lo la bang ve nange a?"

"Bang tawh e, inkhel turin an chhuak leh nghal anih kha, ni e, han inthlak la, rawngbawl chu nangman ti mai rawh, i chau viau ang tih chu ka hria a, i nu lo haw chin tur a hriat tlat silova," a tih chuan chhang tawh lovin ka room ah chuan inthlak turin ka lut nghal a.

Ka inthlak zawh hnuah rawngbawl turin ka chhuak leh nghal a. Dawhkanah chuan chawhmeh siamtur ka nu'n a lo chhawpchhuak sa diam bawk a, chaw chhum vil pahin chawhmeh dang siam tur awmsa ka buatsaih nghal mawlh mawlh a.

Ka peih țep tawh tih chuan ka nu alo haw ve nghal a, rawn luh pahin, "I lo haw tawh ani maw? Duh aiin ka rei ta alawm mawle, țhenawm nu chu alo na reuh riauva, rawn hawsan leh vat kha ka hreh deuh si a, mahse ilo haw tawh hlauh zawk a, a tihzia hle mai. I peih tawh em ni?" a rawn ti lut nghal bawrh bawrh a.

"Aw, ka peih țep e, hei hi ilo vil hman lawk em? Chaw ei hma in kan intifai lawk ange," ka ti a.

"Han intifai rawh, i chauh awm tehlul nen," ka nu hi chu min ngaihtuah țhin teh e.

Ka thawmhnaw ka la a, bathroom ka pan nghal a, kan in hi a len vak loh avangin bathroom hi kan ințawm a la ngai a, in kan sak theih hun ka nghakhlel khawp mai. Engtikah emaw chuan kan la sa ve thei mahna le!

Ka inbual zawh hnu chuan ka naute pawh an lo haw ve ta a, an han inbual leh hnu chuan chaw kan ei ta a.

Kan tih țhin dan angin zanriah ei hma in chhungkaw țawngțaina kan nei ziah a, chumi hnu ah chaw kan ei chauh țhin. Chhungkaw inngeih tih takah kan inhau khâtin, a țhenin fiamthu an thawh a, kan nui dar dar țhin. Țhenawmte pawh hian kan chhungkua min hrechiang bawk a, kan ina lo len luh hi nuam an ti thei hle a ni.

Zanriah kan eikham a, ka tihfel hnu chuan sitting room ah reilote kan țhu leh țhap a, chumi hnu ah ka naute pahnih chu lehkha zir turin an room an pan dun ta nghal a.

Ka room ka pan dawn lai tak chuan kawngkhar kik ri ka hria a, ka va hawn chuan Akima leh Rinpuii pawna lo ding reng chu ka hmu a, hemi te pahnih hi engtiklaiin nge an lo inhmuh leh hman tawh ni?

"Lo lut rawh u," tiin kawng ka kian a. An lo lut ve nghal vat.

Sitting room-a ka nu leh pa țhu chu ka hmelhriattir nghal a. "Nu, pa, hei hi ka school kal laia ka țhiante an nih hi," ka tih chuan an in chibai nghal vat hlawm.

"In van fel ve a, kan inah te in rawn len a!" Ka pa in a ti a.

"Nia, kan fel vang alawm, kan lo len ni," nui țha chung hian Akima chuan a lo ti ve vat a. Ka pa nuih a za kher mai.

"Kan mutsan ang che u, tikhan lo inkawm rawh u," tih pah in a tho țuih țuih a. Ka nu nen inzuiin an room ah an lut ta a.

"Engtinnge nangni pahnih hi in lo inhmuh leh hman bik a?" Ka tih chuan, "Kei chu ka țuan a țha, ka tih mawlh mawlh kha," Akima zawk chuan nui țha chung hian a ti a.

"Ni e, i ti dik, a hma ang reng tho kha ila nih dawn hi," Rinpuii en in kan nuih vak vak a.

"Min nuih zat suh u aw, School ah i chak lo viau ang mawle," Akima bawk chuan a ti leh a.

Maktih hmel zetin Rinpuii chuan min en tawn a. "Enge in sawi awmzia hi, min hrilh ve r'u aw...!"

"Ka thawhna school principal thar anih hi. Vawiinah keipawhin ka hre chiah alawm, ka hmu chu mak ka ti teh asin aw..." ka lo ti vat.

"A van lawmawm ve le...! Tun hma ang khan kan inhmu khawm leh fo thei dawn a," Rinpuii'n a tih chuan Akima nen a thusawi kan pawm dun kher mai.

"Ni e, Valentine's Day hi ka birthday ania, hmanpui tur kan hmu zo ve mang hlawm silova, kan pathum bakah țhian dang ka lo sawm anga, kan lawm dawn nia," Akima'n a tih leh chuan Rinpuii nen kan lo nui leh vak vak. Luck lo ho awmkhawm!

"Thingpui kan lum ange aw..." tih pahin choka ka pan nghal a.

Tray-a thingpui kengin sitting room chu ka pan leh nghal a, thingpui in pah chuan Akima birthday lawm dan tur vel sawiin kan ti ti siam siam a.

"I thawhna tur chu bialnu neih a va har duh dawn ve aw!" Rinpuii'n Akima hnenah chuan a ti a. Min lo melh pah zauh.

"Nia, har dawn khawp mai. A awmchhun lah nula senior lutuk tawh a ni bawk si," tih pahin a nui hak hak.

Ka lo melh nghek thung.

"Hlutei tan pawh hmuh a har ve tho alawm, nupui nei lai vek an ni bawk si a, in pahnihin nula leh tlangval awmchhun in ni a, in inkawp hmiah anga a ni mai alawm," nui put put chung hian Rinpuii chuan a ti leh a.

"Kan chang teuh lo mai. Khawilaiah emaw a hung țha viau tawh ang chu mawle!" Ka lo ti ve vat.

"Teuh lo mai. Chutiang ang te chu awm se, ka nei daih tawh ang chu..." Akima'n a tih leh chuan kan lo nui leh nghek.

"In nui ring thei si, a zahthlak em mai. Zan a rei tawh tehreng nen nula senior ni awm reng pawh in lo nih hi," Akima bawk chuan a ti leh a.

"Kan nuih rin vanga senior pawh kan nih loh hi," Rinpuii'n alo ti vat.

"Ni chiah," ka lo tuihnih ve vat bawk.

"Hui ha! In hahthlak dun em mai a, haw tawh mai ang, naktuk class țan hun a ni tawh si a, kan la inhmu leh fo dawn nia," tih pahin a tho vut. Rinpuii nen chuan kan in melh zauh a.

"Nia, zan a rei tawh si, kan haw phawt ange, nidangah kan la inkawm leh dawn nia," tiin Rinpuii chuan Akima a zui ve nghal a.

"In ti tak tak elo, a fiamthu mai mai emaw ka tia, a nih chuan pawn thleng ka lo thlah ang che u," tih pahin pawn thleng ka zui chhuak a, kan in mangțha hnu ah an tlan zui ta nghal a. Keipawh chu ka lut ve nghal bawk.

Ka room ka luh hnu chuan keimahin ka la nui sak sak a. Min hmutu awm ta se chuan mawl min ti awm mange!

Ka lo mutui hle a ni ang, ka nu in vawi thum lai min koh hnuah ka harh chauh a, "I van mutui awm ve a, ka koh zin tehlul che nen," a tih chuan ka nui var var.

A chhan hre silo hian School kal ka phur em em ringawt mai!


@######@######@######@

[Ngaia]

MY VALENTINE'S

HK Renthlei

Eps - 3



Phur takin school chu ka kal leh ta a, ka thlen chuan pahnih an lo awm tawh a, Akima alo la thleng ve lo.

Tinge maw ka phur em em reng ni? Ka ngaihtuah ngial pawhin a chhan ka hre thei lo.

A hnu ah chuan țhian dangte pawh an rawn thleng ve ta sap sap a. "Morning, va hma ve a, i tûkchhuak a țha deuh a ni maw?" A ngai te bawkin min rawn fiam leh a.

"Nia, tukin chu ka hma ve deuh," ka ti ve mai a.

A hnu deuhah Akima pawh a rawn thleng ve nghal bawk. Kan principal hlui pawh a chawl ta.

"Morning, in va hma hlawm ve a, tukin chu ka tlai deuh alawm mawle," a rawn ti lut nghal bawrh bawrh a.

Midang pawh chuan nui chungin an lo lawm ve tliar tliar a. "Vawiin chu țha deuhin aw...!" Tih pahin a room bikah chuan a lut ta nghal a.

Dar a rik chuan a rawn chhuak leh a, "Vawiin chu ka bul țanni a ni bawk a, Devotion ka va hmang ange," tih pah chuan a chhuak nghal vut a.

A chhuah hnuah pu Hminga chuan, "Kan principal thar tur chu a hmel en ang a ni dawn miah lo mai a," a ti a.

"Ngati maw?" Ka lo ti vat.

"A hmel en khan a khawvel mi hmel tehlul nen," a ti ringawt. Kan lo nui țha hlawm.

"A ni reng asin, mi hi an hmel ațang ringawta teh tur a ni lo ania," ka lo tih zawm zat.

"I van thaw dik tak em! Nang nge nge, nula senior ni awm pawh ilo ni e," nui țha chung hian a ti leh a. Ka run tawk a lo tling leh hmanhmawh.

"Senior min ti chhen teh suh u, ka hmuh zawh loh vanga senior ka ni bik lo ania aw...!" Ka tih chuan an vaiin an nui ta vek a. Keipawh ka nui ve leh ta tho.

Akima rawn luh pawh chuan kan lo la nui dar dar hlawm a.

"Tlaiah naupang kan ban hma tir anga, meeting nei lawk ang u," a tih chuan lu kan bu nghat nghat hlawm a.

Class la tur chuan kan kal ta sap sap a. First ka neih avangin ka class tur ah ka kal nghal vat a.

"Good morning miss,"

"Good morning, sit down."

Hming ka lam zawh hnu chuan ka zirtir nghal mawlh mawlh a. Ka subject bikah hi chuan an thiam lovang tih hlauvin theihtawp chhuah chuan ka zirtir ve in ka hria a. Ka zirtirna piahlamah erawh anmahni zir peih leh peih loh a ni tawh mai a, ka mawhphurhna a awm tawh lo.

Tlaiah naupang kan ban hma tir a, keini zirtirtu ho chu kan awm hnufual ta a.

"Kan zirtir danah hian hmasawnna tur enge kan neih kan thlir ho dawn a ni," tiin Akima chu Principal a nih angin a rawn ding chhuak hmasa ber a.

Kan sawi ho ta liam liam a. Kan hlawkpui hlawm viau chuan ka hria.

"A hmain hetiang hian kan la ti ngai lova, hetia kan inhmu khawm hi a țha khawp mai," kan zinga senior ber Pu Hminga chuan a ti a.

"Ni e," kan lo ti tliar tliar a.

"Chuti anih chuan a khât tawkin kan ti zeuh zeuh tawh ang. Hma kan sawnna te kan thlir ho țhin dawn nia. Hei lo pawh hi rawtna țha zawk hria in awm anih chuan hreh lovin, in sawi zel dawn nia, tunah chuan kan haw thei tawh e," Akima'n a tih leh chuan haw turin kan insiam sap sap.

"Ka rualin haw ta che, ka thlah ang che," Akima'n a tih chuan midang ho chu an lo nui tat tat hlawm.

"I haw na a kual thui mai mai, ke a haw nuam ka ti mah zawk," thawhpuite mitmei ven a na duh ngei mai.

"Haw ve mai la, a sawm duh phawt ahnu che," an lo ti ve vat hlawm.

"A hla lo em alawm," ka ti ve mai a.

"Hla lo mahse, ka thlah duh che chu lawm hle zawk la..." Akima chuan nui suk chung hian a ti a.

"Anih leh le, ka thleng hma ting ting a ni mai alawm," ka tih ve hnu chuan kan inzui chhuak ta a.

Kan in mangțha liam liam hnu ah Akima car ah chuan ka lut ve nghal a, kan tlan chhuak ta nghal a.

"Min hruai haw kher a ngai hleinem, a hnaih tehlul nen," ka la ti hram a.

"Hruai haw che ka chak em em vang a ni lo ania," lehlam hawia nui var var chung hian a ti a.

"I ngeiawm mai e a, i motor a ka chuang duh chu lawm hle zawk teh," nui chungin ka chhang ve a.

Kan in kan thleng thuai a, "Lo lut ve rih la," tia ka sawm chuan, "Nidangah le, taka, in luah tur min lo zawnpui teh aw..." tih pah chuan a tlan chhuak nghal daih.

Ka en liam ringawt. A chanchin ka lo zawt chiang miah lo chu ã ka inti hnuhnawh hle mai. Inchhung ka luh chuan ka nu'n rawng alo bawl mek a.

"I va lo haw hma ve a,"

"Nia, Akima'n min rawn thlah a, ka lo thlen hma phah a nih hi," ka ti ve mai.

"I țhianpa chu a fel hmel khawp kha mawle."

"Nia, ani te chu school kan kal lai ațang tawhin a fel reng alawm," ka ti ve mai.

"Nupui ala nei lo chu mak ka ti hle mai. A hmelțhat tehlul nen!" Ka nu'n a tih leh chuan ka room pan in ka kal daih. Eng eng emaw a sawi leh chiam palh ang tih ka hlau.

Ka inthlak zo ka nu bula ka let leh chuan a lo la buai khawp mai a, "Enge ka lo tih ve dawn," ka ti vat a.

"Ka chawhmeh kan kha lo chawk phawt teh," a ti a. Ka chawk nghal rawk rawk.

"Nu, țhenawmnu damlo kha a boral ania," ka nau in a rawn tih chuan ka nu nen kan hawi phawk chiang kher mai.

"Chuti chu, ka va kal ange aw, in tih fel te a ngai awm si a." Ka nu melh pahin ka ti a.

"Va kal rawh," a tih chuan hmanhmawh takin ka insiam nghal mawlh mawlh a, ka tlan chhuak ta nghal vat.

Ka thlen chuan tu vak an lo la awm lova, inchhung vel kan singsa fel a, tihfai ngai kan tihfai hnu chuan midang pawh an rawn thleng ve țak țak a.

Reiloteah tlangau in chhiattawh thu a rawn puan chuan mite chu an rawn kal ta sup sup a. Keini pawh tihtur dang zawngin kan phe ve vat vat bawk.

Kan zawh hnu chuan zanlama tlaivar turin ka haw a, in ka thlen chuan chaw ei an lo siam mek a, "Kan lo siam tawp mai asin, țhalai tlaivar hmain kan va lang ve zawk ang e," ka nu'n a ti a.

"Ni e, va kal rawh, kei pawh, in rawn haw hnuah ka kal ve dawn nia, mahse lo haw hma la, ka tlai chuan a zahthlak ania," ka ti a. Chaw kan ei ta nghal a.

Kan ei kham chuan ka nu leh ka pa chu mitthi inah an kal ta nghal vat a. Keipawh hmunte ka tifel nghal sawk sawk a, ka room ah lutin kal thei nghal mai tur chuan ka insiam peih diam a.

Rinpuii kalpuia sawm ka tum a, ka phone ka en mek lai chuan ka phone a rawn ri a, rawn call tu chu tudang ni lovin Akima a lo ni a, "Hello, enge ni ta?"

"Zanin chu lo len ka tum ania," a rawn ti a.

"Pawi lutuk, mitthi kan nei hlauh va, tlaivar a ngai dawn a," ka ti a.

"Chuti anih phei chuan ka lo kal ve ang, min lo nghak rawh," tih pah chuan phone chu a dah nghal daih.

Pawi lo mai, Rinpuii kalpuia sawm ka lo tum tawh na in, Akima lo kal tur chu ka lawm tho mai, kalpui tur ka nei lo nen.

Akima pawh chu a lo thleng thuai a, ka nute lo haw nghah pahin thingpui kan in a, "In luah tur chu i hre mai thei em?" A ti a.

"Ka hre hauh lo mai, zawn chuan a awm ka ring," ka ti țha ve mai.

"Min lo zawnpui la, mi ina awm reng chu a inthlahrunawm duh em mai," a ti leh a.

"Nia, kan zawng dawn nia,"

"Anih loh pawhin in inah hian min lo awmpui ve zawk ula, kan pahnihin a rualin kan kal thei anga," nui țha chung hian a han ti leh a.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


"Kan in angah te chuan i awm duh tawp nang, i ti ve mai mai anih kha."

"Ti mai mai ni ila, ka sawi chhuak dawn em ni?" A ti ve leh tlat.

"Mutna tur pawh a awm lo,"

"Ha..ha..! In ina ka awm chu i hlauh hmel hle mai a, engvang nge ni ang le?" A han tih leh chuan ka lo melh nghek.

Ka nu leh pa an lo haw chuan kan kal ve ta nghal a. Kan thlenin kal an lo awm ve nual tawh a, kan lut chu min lo en deuh țhap a, nula senior mah ni ila, ka zak ve deuh. Mipa ka kalpui an la hmu ngai lo bawk nen, a awm ve viau tho e...!

A hnuah chuan rei pawh min en tawh chuang lo. Zai lah chu rinai takin a tui phian lehnghal. Keima tawkah pawh ka zai tui kher mai. Zun zunga kan chhuak lawk tih loh chu Akima nen chuan kan țhu char char a. Hmeichhe hovin an rawn melh leh zauh zauh țhin chu ka hmu reng a, hmelțha an ti a nih ka ring. Ani lah chu engmah hre lo ang hmiahin a awm ngaiin a awm miah miah thung.

Naktukah emaw engtikah emaw chuan Akima vangin kan veng nula ho chuan min be țha dawn tih ka hre kiau mai. Keimahin ka nui sak a.

"Khatiangin mahniin an nui vur vur ngai lo," a tih chuan ka en vat. Min lo hmu ru reng tih ka hre mai.

"Ka nui vur vur lo aw..."

"I nuih vur vur kha, enge i ngaihtuah reng reng a?" Zawi sapin a rawn ti leh a.

"I hre mai lo mi? Hmeichhe hovin an en duh em che hi, kan inhria tih an hriat chuan nangmah vang hian biak țhat ka hlawh mai thei asin," ka ti let sap a.

Alo nui ve suk ringawt.

"Khai a, an zingah hian ka duh tur awm ang ka hmu hauh lo ania, chubakah ka bulah nula hmelțha tak a țhut laiin nula dang ka lo melh anga maw, awm ang lo lutuk," a tih chuan ka nghawk sawk ringawt.

"Țawngthei bawk sia," ka ti hlak.

"Zai mai mai teh, ngaihtuah loh tur tur kha ngaihtuah tawh suh," nui var var chung hian a ti leh a.

"I van chhe tak!"

"Chhia min tih loh tawp kha."

"Hui ha, ka hnial peih tawh lo che," ka ti ta thlâwt a.

"Kha kha a ni mai." Zawi te te mi hriat phâk loh tur si hian kan phun sep sep a. He pa bula awm zet chu nuihza insum a har duh ngei mai.

Zanlaiah chuan thingpui leh sawhchiar an rawn sem a, ka rilțam ka pum a ri lo chauh tawh nen, ka lawm kher mai.

"I ril a van țam tawh awm ve a," tih pah chuan a nui sawng a, ka ngei tawk a tling leh khawp mai.

"Țam e mawle," ka ti ve mai bawk.

"Ei hi chu i duh ve ngawt mai, hman ațang tawhin," a ti leh ngat.

Kan school kal lai a rawn sawi chhuah leh chuan ka nui hak.

"Nui ring suh, mitthi inah kan awm hi," a tih leh chuan ka ngawi hmak. Ani lah chu a nuih a za tulh tulh thung. A kun a, a nui dir char char mai chu ka ngei lutuk a, ka chúm lo chauh a ni.

Thusawi a awm leh zauh țhin tih loh chu țha takin kan zai tlaivar ta țhak a. Zing alo nih chuan tihfel ngai kan tifel nghal zung zung a, in lam panin kan inzui phei leh ta a.

"Vawiin chu school ka kal thei dawn silova, min hrethiam mai dawn nia, tihian i hnenah ka sawi nghal ni mai rawh se," ka ti awlsam êt a.

"Awle, keipawh ka kal peih lo kher mai, i kal loh phei chuan patling hlir kan awm dawn ania, a nuam dawn lo em mai."

"Thingpui lo in phawt la, chumi hnu ah i haw dawn nia, nge chaw ei ve nghal mai la?" Ka ti leh a.

"Thingpui chu in ila, mahse chaw chu ka ei lovang, ka tlai palh ange," a tih chuan inchhungah kan inzui lut ta nghal a. Ka nu te pawh an lo tho tawh a, "Nu, thingpui a awm em? Kan lo in ang chu, hei Principal liana hian a in châk deuh va," ka ti a.

"Chuti kher chuan min ti suh aw..."

Ka nu pawh chu a lo nui ve var var a. Thingpui min siam sak chu dawhkan kilin kan in dun a.

"Vawiin chu i țhiante ho an khua a van har dawn ve mawle!" Akima chuan a ti leh a.

"Lo har ve mai mai teh se, tak taka, ka awm lohvin nuam an ti daih zawk ang," ka ti a.

"Kei phei chuan nuam ka ti khawp ang," a ti a, a nui pah sang mai.

"Van ngeiawm tak, vawiin chu mutthlûk awih loh aw," ka ti ve nghal zat.

"Teuh lo, ka muthlu ve ngai lo, a chhuah tak viau leh ka lo kal mai ang."

"Ka awm dawn teuh lo mai, thingpui lumnaah ka awm dawn," ka ti a.

"Ka lo kal i hlau em mai, ka lo kal tawh miah lovang," titau der tih hriat zet hian a hawi vei hmak.

"Pawi miah lo, min be țha der tu an awm lovang a, a lawmawm zawk a ni mai."

"Rohluzual, i va'n ngeiawm thiam tak e aw...!"

"Enge Lalrinkim?" Ka han ti ve ngat a.

"Sual thiam si, luhlul bawk si...!"

"A dang ila hria em?"

"Ka hnial peih tawh lo che, i țawngthei zet zawt em mai," a tih chuan ka nui ta nghek a.

"Nizana min tihdan ang chiah anih kha," ka ti zui leh zat.

"Huh, ka haw dawn, sual thiam em mai," tih pah chuan a tho nghal uaih.

"La țhu ve rih la, ila ninawm ve alawm," nui sang chunga ka han tih leh chuan ka banah min man in, a lamah min pawt dawrh a, ka kut hnunglamah a elh a, na tiin ka țhen tlawk tlawk.

"Khatiang khan min ti leh ang em?" tiin hnai zetah min melh run a. Kan taksa chu a insi lo chauhva, ka hmai zawnah chuan a rawn thaw lum ham ham mai. Reilote chhung chu kan in melh reng a, a hnuah min vawnna chu a thlah ve ta țawk a. Ani leh ni lo angin a khur dar dar nia!

Maktiin ka en reng a, a hmelah chuan engmah a tilang lo na in, a mitmeng erawh chuan thu tam tak a sawi thung. Mahse enge tih ka hrethiam lo.



@######@######@######@

[Ngaia]

MY VALENTINE'S

HK Renthlei

Eps - 4



Akima haw hnu chuan inbual ka duh avangin ka room ah ka lut a, ka inthlakna tur la in, bathroom ka pan nghal a.

Akima awmdan leh mitmeng kha ka mitthlaah a cham reng a, ka lu ka thing leh nawk nawk a. Ka nu pawhin makti zetin min melh leh reng țhin.

"Enge maw i ngaihtuah a, khatia i lu i thin vak vak le?"

"Engmah," ka ti deuh hmak. Ka nu makti hmel ka hmuh chuan ka chhandan ka ngaihtuah a, khatiangin ka nu ka la chhang ngai miah silova, keimahah dik lo a awm tih a lo hre thei mai.

"Ka tihpalh ka nu, khatianga chhang tir che ka ni lo asin mawle, ka rilru a buai deuh alawm mawle, eng pawh nise, kan inbual phawt ange," tiin bathroom ah ka lut ta nghal a.

Engvanginnge khatiang mitmeng khan Akima khan min en le? Ani nen chuan țhian kan ni si a, ngaihzawng enin min en em ni zawk le? Â... ka ngaihtuah tawh lovang, kei chuan țhian ang bakin ka en thei dawn chuang lo.

Ka inbual zawh chuan mitthi in lama thingpui lum tur chuan ka chhuak nghal a. Ka nu leh ka pa te pawh an kal ve nghal tho bawk.

Thingpui lumna ka thlen chuan zanlama ka rin ang chiah chuan nula ho chuan Akima chanchin chu min lo zawt ta ngei a. Nuam chu ka ti vak lo, mahse țha tak chuan ka hrilh ve tho.

"I bialpa a ni em?" tia min zawh chuan ka nuih a za ngei mai.

"Teh nang, ka țhianpa a nih kha," ka ti ve mai a, an awih lo hle nachungin min zawt zui tawh lem lo.

A naupang deuh thingpui kan sem tir a, thu an awihin, tirh pawh an nuam a, an fel ve khawp mai.

Tlaiah chuan rawngbawl tur midang an awm bawk a, ka hawsan ta a, ka chau ve ngang mai. In ka thlen chuan ka mutchhuak lutuk chu ka khumah bawk thlawpin ka lo muhil nghal daih chu niin; ka nu in chaw ei turin min rawn ko va, ka harh chauh.

"Nu, tinge min kaihthawh mai lohva?" Ka ti a.

"Nizan i tlaivar a, vawiinah i buai nileng leh bawk si, ka khawngaih che alawm, kaihthawh loh mai che ka tum a, mahse zana kal i duh leh dawn si a, chaw ei a hun tawh tho nen, ka kaitho ta mai che a nih kha."

Ka phone kan en chu miscall alo awm țeuh mai. Akima leh Rinpuii call na a awm nual. Rinpuii ka call back vat a.

"Hello, phone ila thei miah lova," a rawn ti a.

"Ka lo muhil daih alawm, nizan ka tlaivar a, vawiin ka buai nileng leh bawk si a, ka chau lutuk mutchhuak bawk si, in ka thleng chu ka lo muhil nghal daih a," nui hak hak chung hian ka ti a.

"Nizanah min rawn hrilh ve tur che alawm, Akima pawh i hrilh tho si a,"

"Rawn sawm che ka tum lai takin Akima'n min rawn call a, ka sawm em em pawh a ni lo, ani hi chu mahni in 'bawrti' hi a ni ve a," ka han tih chuan phone ațangin a rawn nui nasa mai.

"Zanah Akima rualin ka rawn kal ve dawn nia, a nih ka dah phawt, chaw ei kan tum tawh a, kan ei phawt ange, zanlamah kan inhmu dawn nia," tiin phone a dah ta a.

Akima phone ka tum leh zet na in, zanah an rawn kal dawn tho a, tiin ka be duh ta lem lo. Chaw ei turin min lo nghak reng tawh ang tiin ka room chu ka chhuahsan a.

Min lo nghak țhap mai, ka inthlahrung ve det.

Chaw ei kan siam pah chuan, "Nu, ka țhiante rawn kal ve an tum a, an tițha khawp mai, an awmna a hlat tehlul nen," ka ti a.

Ka nu pawh chuan, "Ni e, an fel khawp mai, hetiang hun ah hian alawm kan tel ve țhin tur. Kan chungah a thleng thei ve vek a ni tih hriat reng tur. Mama te pahnih pawh kal rual in ni ve tawh a, kal ve țhin ang che u." A ti a.

"Ni e, kal ve zel tur," ka pa pawh chuan ka nu thusawi chu pawmpui tih hriat tak hian a lo ti ve boh a.

Chaw kan ei khama ka inpeih vek hnu chuan ka țhiante pahnih pawh chu an lo thleng ve nghal mai.

"In van hma ve a? Lo țhu phawt rawh u," ka lo ti sawk sawk.

"Nia, hei zanin chu enge maw a hriat ni, nizan lamah hmuh țha a hmu a ni ngei ang, rawn kal loh a hlau teh ania," Rinpuii chuan a lo ti vat a.

"Teuh lo em mai a," Akima chuan a lo ti ve vat.

"Vawiin kan thingpui lumnaah pawh i chanchin min zawt nasa teh ania aw, nizana ka sawi lawk ang khan," ka ti deuh kher.

"Nangni pahnih bula awm chu hahthlak em mai, engtinnge maw ka lo kawm theih țhin che u zawk le!" A ti ta ringawt a.

Rinpuii nen chuan kan nuih za chu kan in melh zauh a.

"Anih kan kal dawn em ni? Zanin chu kan rei lovang, nizan tlaivar ani si a," tih pah chuan kan inzui chhuak ta țham țham a.

Kan thlen a, kan luh chuan an lo țhu leh far tawh hlawm, kan lut chu min lo en leh deuh țhap bawk. Rinpuii nen chuan senior tawh tih takah kan zak țhak lo. Țhutna awl ah chuan kan pathum chuan Akima laitat in kan țhu țham a. Hmeichhe ho chuan Akima chu an en duh hle a, an rawn melh leh zeuh zeuh țhin. Rinpuii pawh chu veng dang ami a nih vang nge an en duh viau mai bawk. A bikin mipa hovin.

"Kan veng nula leh tlangval mit in la dun khawp mai," an pahnih bulah chuan ka ti sa sa a.

"Chuti chu in vengah hian in luah tur chu min lo zawnpui vat la," Akima'n a tih chuan Rinpuii chu a lo nui hak a. Nui ri ngam si lo hian a kun ta daih ringawt.

"Sawi tur hi hre viau teh suh. Nuih In in sum thei silo," Akima chuan a ti leh a.

"Vel a che, nang zawk hi alawm sawi tur hria chu," Rinpuii chuan a lo ti ve vat bawk.

Kan han zai chu hla sak a nuam kher mai. Thingpui in hunah leh thusawi a awm zeuh tih lohah chuan kan zai mawlh mawlh. Zai a nuam khawp mai. Rinpuii leh Akima paw'n zai nuam an ti ve ani ngei ang, maimitchhing meuhin an zai ve bawk.

Zan hmasa kan tlaivar avangin ban hma an rawt a, kan in lam panin kan inzui phei leh ta hnak hnak hlawm.

"Thingpui in leh phawt ila, in haw dawn nia," ka ti a. Inchhungah kan inzui lut leh ta dial a.

Thingpui ka lum nghal thuai thuai a, ka siam zawhah sitting room ah ka chawi phei a, kan ri hlut bawk.

"Zanin chu ka beisei ai daihin zai a nuam ka ti," Rinpuiin a ti a.

"Keipawh ka zaitui teh mai ania, Hlutei hi chu a zai ve pawh ka hre lo," hepa hi chu min khei hlak dan tur hi a hre thei ania.

"Ngawi mai mai teh, i zaithiam loh bei bui nen," ka tih chuan a nui ta vak.

"Mipa ve si, la nui ring em em zui," ka han ti leh zat zat. Ka nui duh țhak lo.

"Nang nu hi, i van châk dawn lo tak!" Tih pah chuan min rawn man a tum a, ka lo tawlhsawn hman vat, a nui hawk hawk a, a tawpa tawpah chuan ka nui ve ta tho.

"A inti mi tak rei thei thlawt lo, Rinpui, hawsan daih ang," Akima'n a tih leh chuan ka chum awk a. A nui nasa zual sauh.

"Ngeiawm lutuk suh aw, i duh leh nang chu haw la, Rinpuii chu a riak dawn," ka han ti ve ngat.

Kan infiam vel chu Rinpuii chuan nuih za zet hian min lo thlir reng a, "In van naupang chhia tak, nula senior leh tlangval senior inkawm ah chuan in la naupang chhia ber ang mawle," a tih meuh chuan kan nui ta hawk hawk a.

"Haw tawh ila, a tlai tawh viau ania," Rinpuii'n a tih chuan Akima pawh chu alo bu nghut.

"Naktukah kan inhmu leh dawn nia, kan va haw phawt ange, riah i phal ve bawk silova," nui hak hak chung hian Akima chuan a ti leh a.

"Nia, haw teh u, min ti changel hmun," ka ti ve ngat.

Kawngkhar thleng ka thlah a, an liam thleng ka thlir zui vang vang. Kawngkhar ka kalh fel hnu chuan mu turin ka room ka pan ve ta nghal a.

Tlailama ka muthilh sek avang khan ka muhil lawk thei lova, whatsapp ka en a, rei pawh ka en peih leh bawk silo, youtube ațangin video te ka en ta vel mai mai a, atawpa tawpah chuan mutchhuakin min rawn zem chiai chiai a, ka phone off in ka muhil ve ta thuai a.

Zing ka tho chu nizan ka mu hnem bawk a, ka harh kawkin ka hria. Parda ka hawn chuan ni a lo la chhuak lova, ka tho hma hle mai. Tukin chu ka nu kan awl ve tawh ange, ka intihfai hnu chuan choka ka pan a, thingpui ka lum a, siam sa vekin flask ah ka dah a, rawng ka bawl țan ta nghal a. Ka zawh hnaih tawh lamah ka nu pawh a rawn tho ve ta bawk.

"Tukin chu i va hma ve a," choka rawn luh pahin ka nu chuan a ti a.

"Nia, thawh hai ka hlau lutuk a, ka harh veleh ka tho nghal vat mawle," ka ti ve mai.

"I naute va kaitho ta che, class an tlai palh ange," a tih chuan ka naute kaitho tur chuan an room ka pan a, va kaihthawh ka tum chuan an lo tho ve mek a, "E, in tho tawh maw? Rawn kaihthawh pawh in ngaih loh hi maw!" Tih pah chuan ka kalsan leh ta nghal a.

"Nu, rawng ka bawl zo tawh a, chaw ei hma in kan in tleuh zawk ange, ka pa hi ala tho lo ami?" Ka ti a.

"Nizanah a khua a sik a, a tho peih lo anih kha," a tih chuan ka pa hmu turin an room ka pan vat.

"Pa, i khua a sik a ni maw? Tunah engtinnge i awm a?" Ka tih chuan a lo meng siar siar a.

"Nia mawle, ka khua a sik ringawt a, mahse tunah chuan a sik tawh rih love, ka zia deuh tawh," a ti a.

"Damdawiinah in entir turin ka nu nen kal ula, kalpui che ka duh viau na in, nimin ka chawl tawh bawk si, chawlh leh pawh chu a nuam bawk silo."

"Ni e, va kal rawh, i nu nen chuan kan kal dawn nia,"

"Lo haw hma ka dil dawn nia," tih pah chuan insil turin ka chhuahsan leh ta a.

"Mambawih, chaw ei kan peih tawh ania, i naute class an tlai palh ange," ka nu chuan min lo au va.

"Ka zo țep, lo siam mai ula," ka tih chuan chaw ei an siam thawm ka hre nghal. Ka naute pawh mipa e tilo a an fel ve na chu, engmah tih hreh an nei lo hi a ni. A țul ang ang an thawk ve bawrh bawrh a, inchhung chêt pawh kan awmloh chuan an ti mai zel. Ka nu paw'n a thlamuanpui ve tawh takzet a ni.

Chaw ei khamah school kal turin ka insiam nghal a, "Nu, ka kal ania," tih pahin ka chhuak a, kawngpui ka kal lai chuan ka bulah car pakhat hi a lo ding chawt a, ka han en chu Akima a lo ni a, "Lo lut vat rawh," tih pahin car kawngkhar a hawng a, ka lut ve nghal vat.

"Helamah te enge i tih a?"

"In luah tur min zawnpui duh mang silova, ka zawng ta mai."

"I hmu em?"

"Hmu e, a țha in, a tawk tiu teu khawp mai."

"In luah tur a vãn tehlul nen, a va lawmawm ve a," ka lawmpui tak zet a ni.

"Vawiinah an lo tifel anga, tun Inrinni hian insuanluh ka tum a, min pui ve la a țha ang,"

Min sawm lo mahse inluah a tum ni chuan puih ka lo rilruk thova, mahse ka sawi lang lem lo.

"Min sawm duh chu ka lawm e, Rinpuii i sawm ve em?"

"La sawm rih lo, nakinah ka sawm mai ang."

"Ni e, i tih dan dan a ni mai alawm,"

"Hlute...!"

"Enge?"

"Engvanga tun thlenga pasal la nei lo nge i nih a?"

"Nang pawh,"

"Ka hmeichhe duh tak ka hmuh leh hun atan ka khêk mawle,"

"Chu...ila hmu lo em ni?"

"Hmu tawh e, mahse ani paw'n ala hre lova,"

"Khai aw, i duh tih pawh ila hrilh lova maw?" Ka nui hawk hawk a.

"Anih nang, i duh zawng ila hmu lo nge i nei duh lo hrim hrim?" Thutak zeta, a tih chuan ka en ho mai.

"Ka la hmu lo chu a nih hi, ka hmuh hun meuh chuan..." sawi zo duh lovin ka ngawi ta daih a, min rawn melh zawk a, hmalam a en leh nghal daih. Tukin a awmdan chu danglam ka tih em avangin ka melh leh zawk țhin a, ani lah hmalam enin car a khalh mawlh mawlh thung.

Inbe tawh miah lo chuan school chu kan thleng ta a, office chhung kan luh chuan maktih hmel zet hian min lo en a, mahse reilote bak a ni lo.

"Naktuk hi study leave kan neih tir ve dawn em?" Ka tih chuan an lo 'aw' tliar tliar hlawm a.

"Chuti chu class lak pahin kan puang dawn nia," Akima chuan a rawn ti ve boh a.

Class la tur chuan kan kal ta sang sang a, a tukleh lawk exam a nih mai tawh avangin zirtirna pawh ka pe ngawrh khawp mai. Naupang hnenah pawh exam naa țha taka an tih theih nana fuih bak chu tihtheih ka nei tawh lo.

"Naktuk tuk leha in exam tawh dawn a, chuvangin naktuk chu study leave kan nei ang, in lamah țha takin in zir dawn nia,"

Naupang ho lawm chu an haw haw dar dar a. School chawlh hi chu a nuam ve bawk em a ni. Keipawh zep lovah chuan kan chawl tur chu ka lawm ru khawp mai.

Ban a lo hun chuan, "Ka haw nghal mai dawn ania," tih pahin ka chhuak nghal nalh a. Akima'n hawpuia min sawm leh ka hlau pawh a ni mahna! Tukin zinga a awmdan kha a bula awm nuam min tihtir loh phah vek alawm!

Pawn ka chhuak chiah tihah, "Min lo nghak ve la," titu avang chuan ka pen lai ka ding chawt. Ka hawi let vat a, Akima chuan min lo melh run mai.

"Engvanga ka bula haw hreh tlat țhin nge maw i nih le?"

"Ka haw hreh pawh a ni lo," ka ne ne kual vel ta mai mai a.

"Lut rawh," tiin Car kawngkhar chu a hawng a, ka luh veleh kawngkhar chu a khar a, a țhutna tura a țhut fel hnu chuan a tlanchhuak ta nghal a.

"Engvanga min pehhel tum nge i nih a, tukina ka thil sawi vang kha a ni tiraw?"

"Pehhel che ka tum pawh a ni lo,"

"Anih engvang nge?" A tih leh chuan chhan ngaihna reng ka hre lo.

"Zanah Rinpuii nen kan rawn kal anga, ka inluah tur chungchang chu kan sawi dawn nia, thildang pawh," a nui suk a. Ka lo ngawi reng ringawt.

Eng thildang nge maw ni dawn ni? Nge keimah hi ka dik lo zawk pawh ka hre tawh love a!

In kan thlen chuan car ațangin ka chhuk thla thuai a, "I lo lut dawn lo em ni?"

"Zanah kan lo kal dawn tho a, ka lo lut lo mai ang e," tih pahin a car chuan a tlanliam leh ta nghal a.

A tlanliam hnu ah in chhung ka pan ve ta chauh. Tumah an lo awm lo va, ka pa entir tura an kal an lo la haw lo a nih ka ring mai a. Inthlak sawk sawkin rawng ka bawl nghal a.

Ka phone a lo rik chuan ka en vat a, Rinpuii a lo ni a, "Hello,"

"I bang chiah ami a?"

"Bang chiah tawh lo ve, rawng ka bawl mek a,"

"Akima'n min lo bia a, zanah inhmuh khawm a ngai a ti a, engemaw a awmzia le? Hepa tak hi chu min tihlauthawng țhin a nia,"

"Ka hre bik lo, chutia pu berin a tih te chuan kan hnial ngam nang," ka tih chuan a nui hak hak a.

"Chuti anih leh zanah kan inhmu dawn nia, eng tak ni ang maw?" Ti chungin phone a dah ta a.

Rinpuii chu a hrilh duh miah loh danah surprise a tum chiang. Hemi te pahnih hi inngaizawngin innei se ka ti kher mai. A hrilh duh lo anih chuan ka lo hrilh bik kha a tihchi silova. A hriat hun hunah hre mai teh se...!



@######@######@######@

[Ngaia]

MY VALENTINE'S

Hk Renthlei

Eps - 5


Zanriah eikham hnu chuan kan chhungin sitting room-ah kan țhu dial a, "Pa, vawiin chuan engtinnge an lo tih che a?" Ka ti a.

"Khawsik satliah alo nia, damdawite min chawh a, kha ka ei nghal a, ka zia tawh khawp mai." A tih chuan ka lawm kher mai. Natna dangte a nih ka lo hlau lutuk a. Ka thaw huai nghe nghe.

"Mama, nangni pawh lehkha zir leh tawh rawh u, in exam a hnaih tawh kha," ka nu chuan a ti a.

"Nu, police an la dawn a, dil ve ka tum asin," Mama (Zuala, ka chhang chiah)chuan a ti a.

"Police ber kher te chu," ka nu in a ti nuah nuah a.

"Mama, a pawi teuh lo ania, tunlaiah hna a vang tawh si a, i tlin hlauh chuan a țha daih zawk. Mahse zu in phah nan i hmang hlauh ang e," ka lo ti vat a.

"Teuh lo mai, police zu in lo pawh an tam em mai,"

"Ni e, Police țhenkhat zu in an awm vang hian Police zawng zawngin zu an in vek kher lo," ka lo ti veleh a.

"Keipawh sawmpahnih ka zawh hunah ka dil ve ang," kan pang ber(Nunsanga) chuan a lo ti ve vat bawk.

"Umm, țha takin lehkha i zir anga, i dil ve dawn nia," ka nu'n a tih veleh phur takin lehkha zir tur chuan an room an pan ta nghal a.

"Ka mutsan dawn che u ania," ka pa'n a tih pah chuan room lam a pan ve ta vat a. Ka nu'n a zui lut nghal bawk.

Țhiante pahnih pawh chu an va rawn kal har ve mawle tia ka lo ngaihtuah mek lai chuan kawngkhar kik ri ah ka va hawng vat a, kawngka bulah an lo ding reng mai. An motor thawm ka hre miah silova.

"In va lo kal har ve a, mut ka lo tum tawh mai asin."

"Chuti chu kan let leh mai dawn em ni?" Rinpuii lam hawi chuan nui hak hak chung hian a ti a.

"Chimawm pa, lo lut mai mai teh u."

"Chimawm min ti viau na in, min ngaih hle kha aw..."

"Lut ang u, enge sawi tur a neih te pawh lo ngaithla ila," Rinpuii'n inchhung pan pah chuan a ti a.

Sitting room-ah kan țhu țhap a, inti puithu fahran hian Akima chuan, "Zanin kan lo kal chhan chu eng dang a ni lo ve..." a ngawi leh ta daih a. A nui duh țhak lo lehnghal.

"Sawi vat mai teh, eng thil nge ni a, pawimawh awm deuh khan i sawi bawk si a," Rinpuii'n a ngaihna hre lo zeta a tih chuan ka nui ta phut a, Akima inti mitak hmel leh Rinpuii hawihai hmel chuan ka nuih a ti za ngang mai. A tawpa tawpah chuan kan nui zo ta vek a.

"Lalrinkim, min tihder a ni maw? I van ngeiawm tak e aw...!"

"Ka tihder che pawh a ni lo, Inrinni hian inluah ka tum a, min pui ve ang chu ka ti mawle," a ti ta then mai si a.

"I van ho tak, chungte chu pangngai deuhin min hrilh ve mai ta che."

"Hei, tunah pangngai takin ka hrilh reng che hi," keilah ka lo nui char char thung.

"Nang pawh ilo hre sa vek a ni maw? Nangni pahnih hi engtinnge maw ka tih dawn che u le?" Beidawn hmel deuh hian a ti ta ngawt a.

"Ka hre sa bik hleinem, vawiinah min hrilh ve chauh a, rawn hrilh na hman che a awm loh bakah, zana in lo kal chuan i hre dawn tho va tiin ka hrilh ta lo law law che anih kha," ka tih chuan a lungawi ve ta mai bawk.

"Puih pawh ka pui duh dawn em maw ni le," nui rah rah chung hian a ti a.

"Tihfai chu an tifai vek tawh a, Hlutei te in nen a inhlat vak lo, a nuam reuh phian asin," Akima chuan a ti leh a.

"Nia, kan pui dawn che nia, mahse i luah hunah chaw ei khawm i ti ngei ngei tur a ni," Rinpuiin a tih leh chuan ka lo zawm ve vat a.

"Tehreng mai, ka birthday a hnai tawh bawk a, kan lawm bawk ang chu mawle."

"Tlangval senior birthday lawm chu kan phur zawng tak alawm, ni lawm ni, Hlute?"

"Yes, țhian hmelțha deuh deuh sawm bawk la, chhas tur pawh kan melh pah ang chu," ka tih chuan an nui nasa ngei mai.

"Ve tak che chuan, ka sawm ngei ang, hmelțha deuh țhian ka nei alawm, i duhzawng a nih ngei pawh ka beisei," ti chung hian min en vang vang a. A hmelah chuan engmah lang lo mahse, a mitmengah chuan engemaw a lang zawk a, mahse a rei loh em avangin ka hmusual emaw ka ti hman hial.

"Thingpui ka va lum ange," tih pahin choka ka pan a, ka lum zawh hnu chuan sitting room panin ka chawi phei ta a.

"Kha in rawh u le," tih pahin dawhkanah chuan ka hung a.

Thingpui in pah chuan kan hnathawh dante kan sawi mawlh mawlh hlawm a. Akima nen chuan kan thawhna a inang bawk nen, kan titi a rual phian a, a changin Rinpuii a lo inrawlh zeuh tih loh chu kan titi a ngaithla ngar ngar.

"I subject bikah enge an an?"

"Ka zirtir țha thawkhat chuan ka hria, an mahniin an zir țhat peih leh peih loh a ni tawh mai."

"Kei chu ka hrethiam rih lo, ka țanna a la rei lo em mai, mahse an thiam viau chuan ka hria. Oh, taka, naktuk enge i tih ang, kan chawl si a, in chu min hmuhpui ve la,"

"Ka hre rih lo le, a hun lo thleng phawt se," ka ti ve mai a.

"In duh tawk dawn tawh em? Nangni pahnih hian min thlim in tum a ni maw?" Nin hmel zet hian Rinpuii chuan a lo ti niah niah a.

"Nia, duhtawk mai ang, kan titi a man pha ve lo a nih hi, a tauh leh hma hian kan hawpui ange."

"Ka tau lo e aw...! In thusawi ka man ve lo em alawm, thildang sawi ni ula chuan ka pawiti lova." Rinpuiin a tih chuan Akima chu a lo nui hawk hawk a.

"Aw ni e, haw a ngen leh tawh a nih hi, Inrinni chu ka beisei dawn che u ania, theihnghilh awih miah loh!" Tih pah chuan a ding nghal uaih a.

Kawngka thleng ka thlah a, "Helai bak hi chu ka lo chhuak lo mai ang e,"

"Ni e, anih mangțha le," tih pahin an tlan ta a. Kawngka kalhin ka room ka pan ta nghal bawk.

Akima ka ngaihtuah let leh in a nungchang inthlak reng chu mak ka ti khawp mai. A mitmenga engemaw lang leh zawk țhin kha enge niang aw ka ti vang vang. Tunge a hmeichhe duhtak chu ni ang le? Tun thlenga nupui a la neih loh danah a duh viau anih ka ring.

Mipa ka ngaihsak loh vang a pasal la neilo pawh ka ni lova, miten senior min ti pawh nise pawi ka ti lem lo. Ka hmangaih leh min hmangaih em em tu ka tawn hunah pasal chu ka la nei ve mai ang. Mi min sawina te zawng engahmah ka ngai teuh lo. Ka hmuh loh tak leh neilovin ka nula reng anga a ni mai alawm.

Hna ka nei a, chhungkua ka enkawl theih a, ka nu leh pa ten rei tak min dampuiin, chhungkua hlim taka kan awm tluka hlu ka tan a awm chuang hleinem le!

Ka ngaihtuahna vakvel ruai chungin ka lo muhil daih chu niin, ka harh leh meuh chuan khua alo var der tawh mai.

Ka tho vat a, bathroom ah lutin ka intifai nghal sawk sawk a, ka nu pawh alo tho ve chiah bawk.

"Nu, nizanah ka pa a khua a sik leh em?"

"Sik lo ve, mut pawh kan mu țha khawp mai."

"Thingpui kan chhuang nghal ange aw, naupang an exam dawn vangin vawiin chu study leave kan pe a, mahse nizan khan Akima'n a in luah tur enpuiah min sawm a, ka enpui dawn nge dawn lo pawh ka la ngaihtuah lo," ka ti a.

"Chutia nang meuh a sawm che chuan enpui mawlh rawh."

"Kan rei pawh ka ring lo, Inrinni ah luah luh a tum a, Rinpuii nen pui turin min phut bawk si a, ka chawlh ve theih hun pawh inchhungah ka awm hman dawn lo anih hmel hle mai."

"Chutia nangni meuh a phut che u chuan pui ang che u, in țhianpa a ni bawk si a, nangni lo te chu țhian dang a neih bik loh hi."

"Thawmhnaw suk tur hi ka su vat vat ange, nangin rawng lo bawl leh mai la," ka nu hi awl hram ka tum pawh hian ka hman lo leh țhin hi hrehawm ka ti.

"I naute pawhin min pui thei tawh tho alawm, ngaihtuah vak duh suh."

Thingpui ka in zawhah thawmhnaw suk tur bal bawm ami chu ka la a, machine ah dahin ka nuai tir nghal a, chumi pah chuan ka nu pawh ka pui tho.

Ka insuk zawh meuh chuan chaw ei a hun leh ta mai bawk. Ka pa pawh alo tho chhuak ve peih a, ka lawm kher mai. Chhungkua a pakhat tal damloh hi chuan rilru a hrehawm hma thei em mai.

Chaw kan ei kham fel vek hnuah Akima pawh a lo thleng ve ta hlawl a. "Vawiin chu kan chawl si a, inchhungah tihtur i nei ang tih ngaihtuah miah lovin ka lo sawm thawt thawt che a, i hman loh viau chuan ka phut lui lo che ania," inthlahrung takin a ti a.

"A tihtur a lo inhmakhua diam tawh alawm, va kal rawh u," ka chhan hma in ka nu chuan a lo ti a.

"Ka pi, ka lawm lutuk ania, in chungchang engmah hriatthiam ka nei ve silova, ka tibuai khawp mai che u," a țawngkamah chuan inthlahrung tak tak pawh a ang ve khawp mai.

"Anih ka va kalpui ange, kan rei loh hram ka beisei,"

"Kan rei lovang," tih pah chuan a kal ta nghal vut a. Ka zui ve mai bawk.

A inluah tur hmun kan thlen chuan ka beisei loh deuh mai a lo ni a, a hma pawha kan veng in saka nalh ka lo tih ber mai a ni a, a vannei kher mai. A sak dan a nalhin a changkang a, a hmunhma lah a zau nuam si, luah man pawh a to viau ngei ang. Kan in ațangin minute sawm kal lek a la ni zui. Helaia inluah tur a hmu thei chu mak ka tih tawk a lo tling leh khawp.

"A van nalh vele, kan veng in sakah chuan nalh ka tih pawl tak a ni asin," ka ti halh a.

"I duh zawng ani chu ka lawm hle mai, tirawh, a chhungah lut ang hmiang," a tih leh chuan kan inzui ta a. Chabi spare a kawl bawk a, awlsam takin kan lut nghal mai a.

A chhunglam pawh chu a nalhin a hnum țha kher mai. Luah loh tih pawh a hriat loh a ni. A faiin a thianghlim sar mai bawk si. Inchung pan chhohna step nalh zet mai a awm bawk a, tah chuan chhovin a chhung vel kan en leh chuan ka thaw huai mai, a nalh em a ni. Room lian tak tak pali vel a awm a, Bathlar a awm kual vek a, khawhawina a rem em em bawk nen.

"Hmm, a nalh in a nuam kher mai, i vannei tak zet a ni," ka tih chuan a lo nui sak a. Ka hawi kual vel chu hmuhnawm tih hmel zet hian min lo thlir reng a, keilah chu ka hawi nasa reng lah tak a!

"I lung a dum zan amaw?"

"Tehreng mai, hei aia țha leh nalh chu i hmu mai mai lovang," ka tih leh chuan a bu nghat nghat.

"Choka i hmu duh em?"

"Duh e," tih pah chuan inhnuai lam chu kan pan thla leh ta a.

Choka pawh chu duhthusam bawk a ni. Ka rilru tak chuan hetiang in neih ve ka chakna a zual sauh thung. Inchunga room tinah lah khan bathhroom a awm vek lehnghal. Kan in nen chuan khaikhin chi pawh a ni lo.

"I duhtawk i hmu maw?"

"Hmm, lutuk ringawt," ka nui var var a.

"Chuti chu kan chhuak leh tawh mai dawn em ni? Engmah bungrua ala awm bawk silova, thingpui han intir che pawh chak viau mah ila..."

"A pawi hleinem, I luah luh hunah chaw kan ei nghal dawn tho alawm," nui chunga ka tih chuan a lo nui ve var var.

"I chungah ka lawm lutuk e,"

"Engvanginnge lawmthu min hrilh ringawt a? Engmah ka tih loh hi!"

"Engkim min tihsak asin," makti zetin ka melh a, a mitmeng de zauh chu ka hmu zuai a, mahse a reh leh vat.

"Kal ang hmiang," a tih chuan ka bu nghat a, kan inzui chhuak leh ta hnak hnak a.

Pawn kan thlen a kawngka a kalh lai chuan in bul vel chu ka lo thlir kual leh mai mai a, a hmunhma leh a in hi chu a nalh mawle, a neitu te pawh hian an ui viau ania ka rin ni. Aizawl lamah an pem san ta daih si a, enkawltu an dah chuan a tifai reng zel țhin.

Car chhung ka luh thlengin ka la thlir zui hram a, Akima chuan min nuih tawp.

"Khai, duhtawk tawh teh, i mit a tla ange," kan nui dun ta hawk hawk a.

"Rinpuii hmuh atan ka awt ve kher mai," ka tih chuan a nui nasa zual sauh.

"Khatia i awm khan i naupang chhia in, i lawmawm reuh tawp." nui țha chunga a tih chuan ka lo melh nghek thung.

"Ka naupang chhia lo ve..."

"Aw...aw...ni e, nula senior i nih kha ka lo theihnghilh tak alawm le," Hepa hi chu van chimawm chiang tak em!

In kan thlen chuan, "Thingpui min hlawhtir mang silova, kan inah hian lo in mai ta che,"

"I chimawm min ti fova, nang tluka chimawm hi an awm lovang e,"

"Kei chu ka chimawm ve hleinem, nangma min tihkhawloh vek alawm, ka chhun tawh che a nih hi."

"Nangni pahnih awm tlang hi inhnial turah in ngai hmiah tawh a ni maw?" Ka nu chuan a lo ti ve vat a.

"Ka pi, i fanu hi min hnial zawt zawt tawh lo turin hrilh teh."

"Nang pawn min hnial reng tho alawm," ka la ti fan a.

"Duh tawk ve em em teh u, inhnial reng mai," ka nu nuihza bawk si chuan a ti ta thlawt a.

"Kha, chimawmpa thingpui chu in rawh le," a hmeh nen ka chhawp nghal a.

"I in luah tur chu i duhthu a sam amaw?" tiin ka nu chuan a zawt a.

"Duhthusam khawp mai. Hlutei duhthusam pawh a ni ngang aniang, a en kham thei hleinem," a lo ti vat a.

"A va lawmawm ve a, chutianga inluah tur i hmu hlauh chu."

"Ni e, ka vannei khawp mai, nangni nen kan inhlat vak lo bawk a, zahtheihloh chhuahin chaw te pawh ka lo ei fo a ngai mai thei a ni," a tih chuan ka nu nuih za lutuk chu a nui hawk hawk mai.

Hetiang khawpa ka nu nuih nasat hi ka hre tawh ngai lo. Akima bula awm chu nuam a ti ve ngang mai. A ngainat phah sauh lehnghal.

"Tehreng mai, i lo ei ziah dawn nia,"

"Ringawt a, mahni a in sawm chawp leh hmiah nia," nui kar kar chung hian ka ti a.

"I nu phalna ka la vek tawh. I thu lo khawp mai." Kan inhnial fo pawh hi ngaiah ka nei hman hial a ni.

"Tlaiah chaw ei ve nghal la," ka nu'n a tih chuan mit min lo la siai zauh zui.

"A, nidangah le, in ka luah hunah phei chuan rawngbawl ka peih dawn silova, ka lo ei fo a ngai ang," ta deuh deuh chuan. Ala nui sang zui.

"Ni e, kan in chu i in ang tho a ni ve alawm," ka nu a be thiam bawk a, ka nu pawh a nui ve reng mai.

"Ka haw tawh ang e, Hlutein min nin tak tak hma hian," a ti leh deuh kher a. Min hmer tel lo hian engmah a sawi thiam tawh lo a niang. Chimawm leh lutuk mai.

"Zanah i kal leh dawn em?" Ka ti vat a.

"Engatinge, leng leh turin min duh ami?"

"Chulam pawh a ni lo,"

"Ka hrethiam e, ka lo len loh chuan khawhar i hlau a ni maw?"

"Teuh lo mai, ka mut hma duh vang mawle!" Ka tih chuan ka biangah piaiin, "Duhawm reuh lutuk," tih pah chuan a kal nghal nal nal.

Ka nu lo nui ruh ruh chu ka en nghal thuai a.

"I țhianpa zet chu, a ngainatawm hle mai,"

"Chimawm bawk," ka lo ti zui vat.

"Amah kha i duh mai lo mi?" Ka nuin nui chunga a tih chuan maktizeta en in, "Chu chu engvanga min zawt nge i nih?"



@######@######@######@

[Ngaia]

MY VALENTINE'S

Hk Renthlei

Eps - 6


Ka nu thusawi chu mutnaah makti zetin ka ngaihtuah chhunzawm a. Akima hian min duh anga maw? Ani nen chuan țhian ang bakin kan inen hauh silova.

Min duh theihna chhan tur awm ang ka ngaihtuah ngial pawhin ka hre thei lo. School kal lai ațangin kan pathuma kan inkawm chawt țhin piah lamah ngaihzawng anga inkawmna a la awm miah lo lehnghal. Aizawlah an chhungkuain an pêm a, chuta țang chuan tun ah ka hmu leh chauh a ni a, chutianga han rintheih turin a khawsa der bawk silo.

Ngaihzawng nei tur hian ka lo la inpuahchah ngai miah lova, neih tumna rilru pawh ka pu hek lo.Mite anga ka thinlung deng dawttu ka la hmuh loh vang te pawh a ni mahna le! Mahse chutiang ang chu a thlen ka ring der bawk silo. Thawnthu a thleng țhin ni mai awma mawi a ni. Ani khan min duh hauh lovang tih ka hrechiang, kei aia țha a hmu țeuh ang chu. Nge, a hmeichhe duh tak chu ala hmu rih lo zawk? A enga pawh chu nise, ka lo ngaihtuah vak na tur a awm hleinem le!

School kal tur chuan ka insiam mawlh mawlh a, naupang exam țanni a nih vangin thlen hma ka duh avangin hmanhmawh deuhin ka insiam vat vat a.

"Nu, pa, ka kal ania," tih pahin pawnah ka chhuak nghal a. Akima min lo sawm leh ka hlauh avangin ka kal thuai thuai a. Ka beisei ang ngeiin ka hmu lo hlauh. Tinge tun a taka hmuh ka hreh em em le!

School ka thlen chuan naupang ho an lo ri nak nak a. Office-ah ka lut nghal a, tumah an lo la kal lo hlauh. Ka subject question sem tur ka en fel lai chuan an lo thleng ve ta țak țak a.

"Morning, hma ve a," nui chungin an rawn ti lut a.

"Nia, exam țanni a ni si a tiin ka kal hma mawle,"

"Nang hi chu i hna i hrechiang a ni tiraw, hetiang hi a țha a ni," min fak der na pawh nise ka nui ve sak tho.

"Nangni pawh in ni ve tho alawm, kei aiin in țha fe zawk," ka tih lai takin Akima lo lut chu ka mitsirin a hmu reng a.

"Morning, in va hma hlawm ve a," a tih chuan midang chuan an lo chhawn ve tliar tliar a. Engmah sawi lovin ka lo melh tawp ringawt.

"Tukin chu i mood a țha vak nange a," nui sang chung hian a ti a.

"Țha teh reng mai." Ni e, ka țha lutuk mah mah zawk.

Ka phone alo rik chuan ka pick vat a, "Hello!"

"Vawiin in bang hma ang em?" Rinpuii chuan a rawn ti lang lang a.

"Ka hre rih lo tlat, an exam zawh hma dan azir aniang chu, enge ni ta a?"

"I ban hma chuan bazarah min kalpui lawk la ka ti mawle,"

"Awle, ka lo tum dawn nia, ka hman tak leh ka rawn hrilh dawn che nia."

"Okay." Phone a dah a. Ka hawichhuah nâk chuan Akima chuan min lo melh run a, ka hawi sawn rang kher mai. Tinge maw hepa hi a danglam tak em em le? Nge keimah zawk?

"Exam hall-ah naupang an awm vek tawh a, eng subject nge an tih hmasak ber dawn? Zawh bik nei lo hian a ti a.

"Ka subject leh pu Hminga subject," ka lo ti vat.

"Chuti anih chuan kal nghal vat rawh u."

Pu Hminga nen chuan kan inzui chhuak ta a, kan chhuah hnu lawkah pu Hminga chu a rawn nui ri hawk a. "Enge i nuih a?"

"Kan principal khan a duh chiang che tih ka hre mai."

"Chungte a nuihzatthlak vak a mi?" Ka lo ti hlak.

"Nangni pahnih hi in in ngeih viau dawn emaw ka ti a, engemaw in inkarah a awm em ni a?"

"Engmah a awm lo, kan inngeih lo hran lo bawk," tih pahin Hall-ah ka luhsan nghal daih. A la nui kur kur zui.

Naupangin exam paper an chhan mawlh mawlh lai chuan pu Hminga thusawiin ka ngaihtuahna a la peng chu duh lovin ka lu ka thing nawk nawk a, min lo duh tak tak ta ni se, ka hmangaih thei dawn silova, a rilru ka tihnat sak mai mai dawn a, hetia țhian anga inkawm reng hi ka duhzawk a ni.

"Miss, paper," tia an rawn au chuan ka ngaihtuahna ațang chuan ka harh zawk a. Paper lamtu hnenah chuan ka pe nghal a, ngawi renga chhang mawlh mawlhin inentawn tuma in be su su pawh an awm lo. An felfai khawp mai.

Ka subject bik an zawh vek hnuah an answer paper vel ka check leh a, ka dawhkan lam panin ka chhuak ta nghal a. Subject dang exam leh tur neite an chhuak leh nghal a.

Nikhat atan subject khat te te exam tur an ni a, ka subject pawh vawiin atan a zo na in, answer paper en nghal ka duh avangin ka en nghal mawlh mawlh. Ka en zawh meuh chuan midang pawh an lo lut ve chiah a.

"E heu, i zo nghal der bik elo?"

"Zo nghal der mai." Akima en pahin, "Sir, ka zo tawh si a, ka haw hma thei mai em?" ka ti a.

"I va hmanhmawh ve a..."

"Nia...!"

"Umm, haw mai rawh, i hmanhmawh bawk si a,"

"Ka lawm e," tih pahin ka chhuak a. Rinpuii ka phone nghal a. "Ka bang hma thei hlauh e, ka rawn kal nghal a nia, khawiah nge ka rawn hmuh ang che?"

"Kan office ah lo kal mai ta che."

"Awle," tih pah chuan ka phone ka dah a, kal nghal mai ka tum chuan ka banah nghet zeta rawn man tu avang chuan ka hawi phawk kher mai.

"Enge tih i tum a, i hmanhmawh em em ni?"

"Ka tihtur lehzel chu i hriat duh pawh ka lo ring hleinem,"

"Ngeiawm viau lo mai teh, tukin ațangin i mizia a dang daih a, min pehhel tum reng che a hriatna ka neih tlat hi engvang nge ni ang tih ka hre chak khawp mai."

"Pehhel che ka tum pawh a ni lo."

"Anih engvang nge?"

"Chutiang engmah a awm lo, i ngaihdan mai mai anih chu."

"Ka ngaihdan mai mai a ni lo. Nangte hian min lo duh deuh te hi a ni lo maw?" Nui țha chung hian a ti ta a.

"Teuh lo lutuk ringawt," uar fahran hian ka ti a. Engvanga chutiangtea min ngai nge maw a nih le?

"Ha..ha..anih tak chu, awle, i kalna turah chuan kal tawh rawh, i tlai ang e," nuih zat hmel zet hian a ti a. Ka melh rawm rawm mai.

Ka kal nghal sawk sawk a. Hnunglama a nui ri hawk hawk chu ka la hre thei hial mai.

Rinpuii te office ka thlen chuan min lo nghak reng tawh chu niin, kan inzui chhuak nghal a.

"Enge bazarah tih i tum a?"

"Kawr ka țhuitir a, min enpui ang chu ka ti."

"Van ho e aw, hmanhmawh em emin ka rawn kal ve a, chutiangte chu nangmah pawhin i kal ve thei tho si a," ka ti nang nang mai.

"Theih te chu thei e, mahse i kalpui kha ka duh alawm, ka treat vek dawn che nia,"

"Anih chuan ka rawn kal ta sa sa bawk a, kal vat ang," bazar lam pan chuan kan kal ta nghal a.

I ril a țam em? Engmah ila ei bik lovang tiraw?"

"Ei nang, ka zo fel a, ka rawn kal nghal nal nal anih hi."

"Chuti chu chawl hmasa phawt ang hmiang, kei chu ka rilțam tawh lutuk, khawiah nge kan chawlh ang?" A tih chuan, "Pizza Hot Restaurant ah chawl ila, tah chuan a tui thei lutuk," tiin kan inzui ta a.

Kan luh chuan an lo awm ve nual a, room 1 ah kan țhu ve ta nghal a. Menu keu in kan ei duh zawng kan en a, lehkha them min pekah chuan kan eitur chu ka ziak a, kan eitur ziahna lehkha an rawn lak hnuah Rinpuii chuan, "Helaiah hian ka la chawl miah lo anih hi. Pawnlam ațanga en ang ani miah lo, a changkang reuh tlat," a tih chuan ka lo nui sak.

Kan eitur chah an rawn dah a, kan ei dun mawlh mawlh lai chuan, "Tunlai hi Akima nungchang hi danglam deuhvin i hre ve em?" Ka ti ta phawng a.

"Engtizawngin maw?"

"Ka hre chiah lo. A hma a kan inkawm țhin dan ang kha a pha tawh lova hriatna ka nei tlat a," ka tih chuan a lo ngawi vang vang a.

"Chutianga a danglam pawh ka hre ve hauh lo mai. A va mak awm ve a, ka lo chîk tawh dawn nia," a tih chuan ka bu ve ta nghat a.

Kan ei na man pe tura Rinpuii'n counter lam a pan lai chuan pawnah ka lo nghak a, chutia pawna ka din lai chuan mi pakhat hian min rawn su sawk mai a. Ka tlu tur bana rawn dawm pah chuan, "Ka tihpalh, i țha em?" Ka han en chuan a lianin a sang țha hle a, a bulah chuan naupang ang mai niin ka lang alawm le, a hmelțha tia sawi tur chu a ni lova, mahse a hmelah chuan ka hriatthiam siloh suai a awm tlat.

En zawh pawha en nawn leh a ngai an tih ang chi hi niin ka hria. Ka melh ta reng mai a, ani pawh chuan min lo melh run mai. Kan mit a intawng chiah chu țek den ang mai hian ka taksa hi a hit chhuak vek thei. Hetiang mipa hi khawvel chu sawiloh Mizoramah an awm theih ka ring lo. Ka awmdan ang chu thawnthu ah chauh awm turah ka lo ngai țhin a, a taka ka tawn ve pawh ka ring ngai lo.

"Aw, ka țha alawm," ka ti sap a.

Chupa ka hriatngai loh leh ka hmu leh ang em tih pawh ka hriat loh chu a nui suk a, a kal leh nghal ta mai a, ka en zui vang vang ringawt. Ka thinlung chu khawiah nge a kal dawn tih hriatchâkna in a khat a, mahse umzui tur erawh chuan huaisenna ka nei lo thung.

Rinpuii'n min lo nghawk tak sawkah chuan ka harh chhuak zawk mai. "Enge i ngaihtuah veng veng le, khatianga i awm kha ka vawikhat hmuhna che, nangmahah hian diklo a awm a ni lo maw?" Zawhna mitmeng hlir ka hmu. Keipawhin ka awmdan kha ka hrethiam bik lo. Kha mihring kha hmuh leh châknain ka khat zawk a ni.

"Ka hre bik lo," tih pah chuan chupa kal liamna lam chu ka melh leh zauh a. Ka en na lam thlir chungin, "Tunge i hmuh a, mitthi tawh hmel hmu ang maiin i hmel a dâng vek alawm le!"

"Tumah ka hmu lo," engtinnge ka sawi fiah ang ni?

"Anih chuan kal ang," tih pah chuan kan inzui leh ta hnak hnak a.

A kawr țhui tir na kan thlen chuan, "Maruat, I zo tawh em? Rawn lam ka tum a," a ti nghal tawng a.

"A pahnihin ka zo ve ve tawh alawm," Maruati chuan a ti a.

"Țhui man engzatnge i tih ang, min tlawm ve deuh ang chu!"

"Nia, a puanthan man leh a țhuina manah 2500 a nia, nâ i ti em?"

"Ti love, kan ha chhin dawn em ni, Hlute?"

"Ha rawh, a nalh lutuk ringawt," ka lo ti ve thuai a.

"Pakhat hi i ta tura ka țhuitir ania, surprise a nih hi," nui var var chungin a ti a.

"Eng â, ka ta tur maw? A ngai ve zel hleinem." Ka lawm viau na in, ka inthlahrung zawk.

"Ha mai mai teh, i vun rawng nen khan i inhmeh dawn teh ania," a tih chuan lawm takin ka ha ve ta mawlh mawlh a.

"Kha, ka tih reng kha, i inhmeh lutuk,"

"Ni e, i inhmeh lutuk," Maruatin a lo ti zawm zat.

"Ka lawm lutuk e," tiin ka nui var var mai.

"Haw tawh ila," a tih chuan ka lu bu nghatin kan inzui chhuak leh ta a.

"Min kalpui bawk si a, i hawna tur ka lo treat leh ang che," tiin pawisa min pek a tum leh a.

"Ni em em lo ve, kawr min leisak tawh a, a lawmawm lutuk alawm," tiin ka hnar ve ta tlat a. Min tilui thei ta bik lo.

Auto lo tlan chu pharin ka chuang ta nghal a, "Anih ka kalsan mai ang che," tih pahin kan tlan ta nghal a.

In ka thlen meuh chuan dar nga a ri tawh. "I van tlai ve a," ka nu'n a tih chuan ka inthlahrung ve det.

"Nia, Rinpuii'n bazara kalpuiah min sawm a, duh aiin kan tlai alawm mawle, kawr a țhuitir a, min lo țhui kêp lehnghal a, ka lawm tak tak ani," tih pahin kawr chu ka hmuh a, ka nu pawh chuan nalh a tih ve hmel khawp mai.

"I vannei hle mai, i rawn haw tlai si a, ka lo ngaihtuah lutuk hman che alawm,"

"Ka tihpalh a ni, hetiangin kan tlai ang tih ngaihna ka hre lo alawm,"

"Han inthlak la, chaw kan ei dawn nia," a tih chuan ka room panin ka kal ta nghal vat.

Ka inthlak thuai thuai a, chaw ei turin ka chhuak leh nghal a. Choka a ka pa lo awm ka hmuh chuan, "Pa, vawiin lam enge i an a?"

"Ka țha lutuk tawh e, chaw ei in siam nghal mai dawn em ni?"

"Kan țawngțai phawt ang chu, mami i naute han ko ta che," a tih chuan ka naute ko turin an room ka pan a, ka koh chuan an lo kal ve nghal mai bawk.

Țawngțaina kan hman zawh hnuah chaw ei kan siam a, kan ei ta nghal a.

"Mam, in exam chu i chhang țha em?" Ka ti a.

"Chhang țha turah ka in ngai."

"A lawmawm anih chu, țang nasa hle ang che aw, Sangte, nangpawh țang hle rawh aw."

Sangtea pawh chu alo bu ve nghat nghat a.

Zanriah ei kham hnu chuan tih tur hi a vang thei țhin si a, T.v en ka peih bawk silo, ka room-ah lutin ka online ta mai mai a. Mahse ka ngaihtuahnaah vawiin a ka mipa hmuh kha a rawn lang nghal a, khawiahnge a awm anga, Lunglei khua hi a ni ve reng em? Tih lah ka hre der bawk silo. A mitmeng thûk zet maia min melhna ka ngaihtuah let leh phei chuan ka la mur ar ar thei nia.

"Mami, i țhianpa a lo leng ania," tia ka nu min rawn koh vang chuan ka chhuak vat a. Akima bak a ni leh lovang.

"I lo leng a ni maw?"

"In in lo lenna tur ka hre si lo chu anih hi," nui hak hak chung hian a ti a.

"Zanin chu i lo len pawh ka lo ring lova,"

"Engvang ngawtin maw?"

"Tikhan lo inkawm rawh u, ka mutsan dawn che u ania," tih pahin ka nu chuan room a pan nghal a.

"Tinge Rinpuii i lo hruai ve lohva?"

"Ka rawn len apiangin ka hruai zel dawn tihna ami?"

"Ah, ni chuang love, in pahnihin in rawn kal dun țhin tho si a."

"Nia, zanin chu ka sawm lo mai. Pawi i ti viau em ni?"

"Ti chuang lo ve, thingpui ka va lum phawt ange," tih pah chuan choka ka pan nghal a.

Thingpui chawia ka phei leh hnu chuan kan ngawi dun vang vang a, nidanga kan inkawm țhin ang lo takin sawi tur kan van dunin, Rinpuii awm ve se ka ti kher mai.

"I subject chu an tihțhat hmel hlawm em?" a tawpah chuan a rawn țawng chhuak hlawl a.

"Aw, an tițha hlawm khawp mai," ka ti ve mai a.

"Tunlai i zia hi a danglam tlata ka hriat chu le! Engvang nge tih ka ngaihtuah a ni."

"Danglam em ni? Ka danglam pawh ka lo hre hleinem," ka ti ve mai a.

"Danglam tehreng mai. Min hmu peih tawh lo ang maiin i awm alawm,"

"Ka lo hre miah lova, nangmah zawk hi i danglam anga, min puh i tum te hi a ni lo maw?"

"Ve a che, kei chu ka ngai reng,"

"Keipawh," ka tih chuan a nui hawk.

"In luah chu ka huphurh ang reng, rawngbawl ber hi ka peih lova,"

"Chuti chu chaw i nghei fo dawn anih chu mawle," ka nui san san a.

"Ka nghei ai chuan in inah ka lo ei zel mai ang, i nu pawn a remtih vek tawh kha maw!" nui țha chung hian a ti a.

"Nupui neih ila duh bawk siloh chuan awmpui la mai la," ka tih chuan a nui suk a.

"Engemaw hleka nupui nei tawh la tih reng mai. Min nei mai la...! Rawng min bawlsak tur talin..."

"Teuh lo lutuk," ka tih chuan a nui ta hawk hawk a.

"Inrinni a ka luah fel chuan tlaiah ka țhian dangte sawmin chaw kan ei ho nghal dawn nia,"

"Engzatnge kan nih dawn a?"

"Keini pathum bakah ka țhiante pathum an nia, mipa pahnih leh hmeichhe pakhat, Rinpuii nen rawngbawl chu in kutah ka dah dawn ania,"

"I thu vek alawm sir."

"Khati khan min han ko leh teh, vawiin te kha school chu ni lo se, i chak lo viau ang mawle," a tih chuan ka nui hak hak a.

"Principal i nia, khati khan ko lo che ila, zah lo viau ah che min ngai dawn asin, lawm hle zawk teh,"

"Nia, a dik ve tho mai. Mahse i kâ ațanga chhuakah chuan a ni deuh huih in ka hria," a tih chuan kan nui dun ta hawk hawk a.

"Ka birthday ah chuan in ka luah hman tawh dawn bawk a, kan party ang chu mawle,"

"Engtiknge ni kha?" Tia ka zawh chuan a lungawiloh hmel ngang mai.

"Ni 14 february hi. Valentine's Day a ni nghe nghe mawle."

"Hmanpui tur nei lo ho kawikhawm i tum deuh em ni?" Nui var var chung hian ka ti a.

"A ni mai aniang chu. Hmanpui tur nei pawh kan sawm tho ang chu mawle."

"Chhas zawnnan hmang nghal hlauh ila a țhat dawn chu," ka tih chuan a nui huk ringawt.

"Zawnpui i ngai em law'ng chu maw?" Sana bih zauh pahin a ti a. "A va lo tlai tawh ve a, i bula awm hi chuan dar hi alo kal leh duai zel."

"Khanglang a che, i kâ hi chu a kaw ve ngawt mai."

"Kâ kaw lo an awm em ni?" Nui sang chunga a tih leh chuan, "Sawi tur lah hi i hre zûl mai a, hnial hrat lutuk mai," ka ti hlak a. Ani lah chu a nuih a za tulh tulh lehnghal.

"Anih min lo thlah rawh le, min nin hma hian haw vat țhin ila, min ngai tawlh tawlh mai ang,"

Hepa tak hi chuh! A changin a nungchang han danglam leh zawk țhin mahse thil engmah hi a la thutak run ve lova, hei tak hi a bula awm nuam min tihtir tu a ni.

Akima haw hnu chuan ka room panin ka mu ve ta nghal a. Mutchhuakin min zem chiai chiai a, ka muhil ta bawrh bawrh a. Ka mangah vawiina mipa ka hmuh kha ka lo hmu leh a. Zing ka harh chuan ka ui kher mai.

Vawiin ah exam kan zo dawn a, rilru hah pawh a veng ve deuh mahna le!


@######@######@######@