MY VALENTINE'S By HK Renthlei (Completed)

[Ngaia]

MY VALENTINE'S

Hk Renthlei

Eps - 7


Inrinni chaw ei kham hnuah Akima'n Rinpuii rawn hruaiin a in luah tura kal turin min rawn sawm a, pickup in a bungrua a rawn phurh tir nghal chu a hnungah zui ve in, in chu kan thleng a.

Bungrua rem ngai ang ang kan rem a, khum a awm sa a vangin a mutbu kan phah sak leh nghal vek a, chhun chawlh hunah chuan kan inpeih thawthang chu a ni tawh mai. Parawl tur a ni bawk a, bungrua a ngah lem lova, kan zo thuai nghe nghe.

Thingpui in zawha tihfel tur tlem a la awm na in, Akiman chawlh a rawt tak tlat avangin thingpui inin kan chawl ta phawt a.

"In chau viau lo maw?"

"Chau lo ve, bungrua a tam lem lo bawk a, a hahdam phian," Rinpuii chuan a lo ti var a.

Tlaiah chaw ei nghal tur anih kha aw, in lo theihnghilh leh ang e,"

"Teuh lo mai, ei lam te chu theihnghilh chi nang mawle!" Ka lo ti ve vat a, kan nui ta dar dar a.

"Nia, kan nula senior ei thei a awm bawk a, ei leh in tui tawk kan siam dawn nia." A tih chuan ka tûm ta bar a.

An pahnih chuan an nui kar kar a, ka lo haw khawp mai.

"Rawngbawl kha in pahnih kutah ka dah ania, sa leh thildang pawh ka lei vek tawh a, khalaiah khan a awm ang, keini pathum bakah mi pathum ka sawm a, ka țhiante an ni a, kawm an nuamin, an fel a, nangni paw'n in nel nghal mai ang."

"Tehreng mai, i thu vek alawm Sir," nui sang chung hian ka ti deuh kher a. Min melh hrawk mai.

Thingpui ina kan chawlh zawh hnu ah tihtur la awm chu kan ti leh nghal zung zung a. Kan tihfel meuh chuan rawngbawl alo hun leh nghal der mai.

"Khai a, rawngbawl a hun nghal der a nih hi. I țhian sawm tur te chu an changkang awm si a, keini pahnih lah hi kan țawp dun si, intihfaina hunte min pe vela, hetiangte chuan i țhiante bulah min zahpui leh si ang e aw," ka ti a.

"Eng ang pawhin awm ula, in nalh tho tho alawm, in chei vak a ngai lo. Duh leh ka țhiante an lo kal hunah ka in enkawltu an nih hi ka ti mai dawn alawm," nui hawk hawk chunga a tih chuan Rinpuii nen chuan a samah kan țham a, a na ti chu a țhen chawk chawk mai.

"Duhtawk teh u, a nih leh intihfaina hun ka pe ang che u," a ti chul a, kan nui nasa ngei mai.

"Hmm, ngai lo mai rawh se, tihian țawp deuhin i țhiante chu kan lo hmachhawn mai dawn nia, min zahpui tak leh i thu thu," Rinpuii nen chuan kan ti vat a.

"Nangni pahnih zahpuitu chu mi â tak a nih a ngai ang," nui var var chunga a tih chuan kan nui hawk hawk a.

"Ti tak tak lo pawh ni la, a lawmawm tho ve," Rinpuiin a tih chuan ka lo bu nghat.

Rinpuii nen rawng kan bawl mawlh mawlh lai chuan Akima chu engtiklaiin nge a chhuah pawh kan hre lo. Polythene khai chung hian a lo lut a, Rinpuii nen chuan kan en dun ho ringawt.

"In zawh tawh chuan intifai rawh u, inthlakna chu polythene ah khan a awm." A tih chuan makti zetin polythene chu kan en a, engtinnge maw kan hak tawk pawh a hriat ni?

"Engtinnge kan hak tawk tur i hriat a?" Ka lo ti var a.

"Kha kha a ni mai," tih ringawtin min chhang.

Polythene chhung kan en chuan Rinpuii nena kan hak tur kawr leh puanfen a lo awm a, underwear leh bra alo awm bawk. In enin kan nui tawp.

"Sa kha ala hmin lo deuh a, a dang chu kan peih vek tawh, lo vil lawk la, kan han intifai ve ange, Hlute, in bual tlang mai ang hmiang," nui rah rah chung hian a ti a.

"In van zak lo e...! Bathroom hran a awm ve ve kha, towel pawh a thar a awm diam kha."

"Enge zahna tur awm a, hmeichhia ve ve kan nia lawm," Rinpuiin a tih chuan a lo chek nghek ringawt.

"Kal thuai ula, han inbual vat teh u, țhiante pawh an lo thleng țep a nia, in inbual chhungin an lo thleng hman mai thei a ni." A tih leh chuan hmanhmawh takin bathroom kan pan ta sawk sawk a.

Kan inbual zo, kan inthlak fel hnu chuan inhnuaiah kan chhukthla a, Akima țhiante pawh an lo thleng tawh tih hriat tak hian an țawng lang lang mai.

Rinpuii nen an awmna panin kan kal a, kan thlen chuan ka ding nghal chawt. Makti zetin ka melh ta reng mai. Min sutu pa kha a ni chiang lutuk. Akima nen an inhria ang tih ngaihna ka hre hauh lo. Rin ngaihna pawh ka hre hek lo. Ani pawh chuan mit khap miah lovin min lo en ve ngar a, a hmuh hnu ka ni tih hria ni awm tak hian a kiai sak a.

"Lo kal rawh u, hei hi ka țhiante chu an nih hi." Tiin min ko lut a.

Akiman an hming a sawi diat diat a, "Hei hi Lalțanpuia a ni a, Puia tiin kan ko mai, hmeichhia hi Mabiaki, chuan hei hi Zomuansanga a nih hi. Rinpuii nen chuan hawihhawm chhuahin kan chibai ve a, kan hmingte a sawi ve bawk. Zomuansanga zawn ka thlen chuan a lo nui suk a, kan in chibai paha ka kut a vawnna chu a nghet cherh chawrh hle.

Ka kut a vawn chiah chuan ka thisen a khang ta mai emaw tih tur hian ka awm a, ka hit mup a, ka lum leh up up a, ka awmdan chu ka sawifiah thiam lo. Ka hai chiai chiai ni berin ka hria.

Ka kut a vawnna a thlah meuh chuan ka thaw huai mai. Ka taksa chu namen lovin a țang a, ka lungphu rawn rang ta lutuk chu tihngaihna hre lo zet hian ka dawm ta ringawt.

"Engtinnge i awm a, i țha em?" Min ngaihtuah hmel tak hian Akima chuan a lo ti vat a.

"Ka țha e, ka lu a rawn hai deuh alawm mawle," tih pahin Zomuana chu ka melh zeuh va, ani lah chuan nuihzat hmel zet hian min lo melh a, ka mit ka la sawn rang kher mai. Nula senior tia sawi ka ni ve tawh a, engvanga naupangchhia ang maia ka awm ni? Khapa vang vek kha a ni.

Choka lam min panpui a, tui ka inkhawlh khawlh a. Ka hmuh leh pawh ka rin tawh lo, ka ngaihtuahna luah reng tu ka hmuh leh thut avang a ni tih ka hre ru reng si a, nuam lo ka tiin Akima lakah pawh ka inthlahrun phah leh zual a ni.

"I țhiante chu va kawm leh tawh rawh, min ngaihtuah suh, ka țha tawh alawm,"

"Tak tak maw? I țhat loh vaih chuan nuam ka ti dawn miah lo ania, vawiina ka chhawr nasat lutuk vang che a ni ngei ang."

"Teuh lo mai, chutiang pawh a ni lo, choka lam hi ka lo buaipui rih ange," ka tih chuan ngaihngam chiah lo niawm tak hian min en vang vang a, a tawpah chuan a kal ve ta hram a, ka thaw huai mai.

Inchung bathlar panin ka chhova, ka hawi kual a, tlangte chu romei vangin a paw chiai a, lung a ti leng duh kher mai.

"Hetah ilo awm reng a ni maw?" Tih thawmah chuan ka phu zawk mai. A aw ațang chuan tunge tih en lo mahila ka hre lutuk. Vawikhat a aw ka hriat ațang khan ka hai theih ka ring tawh lo. Ka thinlungah hian chiang taka chhinchhiah tlatin a awm a ni.

"Keimah em ni i tih?" Ka tih chuan a nuih a zat hmel kher mai.

"Nangmah lo hetah an awm silova," nuih za hmel zet hian a ti a.

"Oh! Ni e, ka tihpalh," ka ti leh nawk nawk a. A nuih a za zual sauh a.

"Ka tihpalh, ka rawn tibuai che a, tumah an awm ka rin loh vanga lo chho ka nia, Kima nen hian engtinnge in in hriat a?" Akima tia a ko ve miah lo chu mak ka lo ti deuh va. Ka ngaihtuahna ho zet vang chuan ka kiai sak a.

Ka rilru hria niawm tak hian a nui suk a, "Mak i va ti awm ve a, kan inkoh dan alawm, hmeichhiate anga koh nem duai hi ka thiam ve lova," a tih leh chuan ka nui ve tawp.

"Kan naupan laiin School kan kal ho țhin alawm,"

"Anih tak chu,"

"Anih nangni zawk? Engtia inhria nge in nih a?" Ka ti ve thung a.

"Keini pawh chutiang deuh chu, kan inhmu chu ka lawm khawp mai," a tih leh chuan makti zetin ka en a.

"Nangni pahnih kha lo chhuk tawh ula," tia min rawn koh avang chuan kan chhukthla ve ta a.

Chaw kan ei chu ka beisei aiin ka eitui daih mai. Kan chawhmeh siam an fak liam liam chuan nuam ka lo tiru veng veng mai.

"I hna chu i tluang zel amaw?" Akima'n Zomuana hnena a tih chuan ka lo melh zauh va. In ep chiaha țhu kan ni bawk a, ka melh leh zauh zauh țhin a, ani pawhin min lo melh ve leh reng țhin.

"Tluang a ni mai e, hna a tam deuh țhin tih mai loh chu."

"Nupui neih lam te hi i la rilruk ve lo em ni?" Akima zawhna chuan a nuih a tiza tih hriat zet hian a khi suk a.

"Kan la inang reng chu a nih hi," a ti awlsam mai a. Kan nui dar dar mai.

"Puia te pawh chu engtiknge tih huk in tum ve dawn a?"

"A rei tawh lovang, ni lawm ni Mabiak?" A ti deuh kher a.

"Nia, a rei tawh lovang, a changtupa ber hi a la inpeih thei lova," Mabiakin a tih chuan kan nui leh dar dar a.

Kan chaw ei chu rin ai takin kan hlim ta phian a. Hmeichhe hovin kan tihfel lai chuan mipa ho chu țhutkhawmna hmunah an titi a.

"Kima, i țhiannu nen hian kan thawk tlang i ti em ni kha?" Tia zawhna ri chuan ka beng a verh zar a. Ngaithla lo ang taka lan tum chung chuan ka beng ka dawh ran mai.

"Aw, ni e, tinge a?"

"Engmah ni love," a ti leh hlauh si a.

"Engmah lo chu a nih ka ring lo, nang hian i duh ru deuh a ni lo maw?"

"Chutiang lam pawh a ni lo," tia chhanna chuan min tihnual rawih thei. Kei hi engemaw ka hriat a, ka beisei reng reng ni? Tleirawl pawh ka ni tawh hleinem le!

Hna chungchang lam an sawi ta daih a. Kan tihfel hnu chuan Mabiaki pawh an zingah a țhu phei ve ta nghal a.

"Thingpui hang in duh em?" Ka zawhna avang chuan an lo hawi deuh țhap a. Zomuansanga vang chuan ka lai leh ringawt tawh.

"Lo siam ta che," Akima zawk chuan a ti a.

Thingpui ka chhuang nghal a, Rinpuii nen chuan kan titi dun malh malh a.

"Ka pa a dam lova, ni hnih khat chawlh dila haw ka tum deuh va," a tih chuan ka en zawk.

"Engtik ațangin nge a damloh va?"

"Nizan ațang khan a nia, nichin mai khan ka nuin min rawn hrilh a, a na hle a ni awm e!" A tih chuan ka khawngaih kher mai.

"A pawi ka tihpui hle mai che, mahse i haw hunah ka ngai ngawt ang che."

"In thingpui lum chu..."

"Aw, ka lo siam nghal." Ka ti vat a. Ka siam zawh chuan ka va sem nghal a.

"Helamah lo țhu phei ve ta che u, in in thlahrun hmel bik em mai," Akiman a tih chuan, "Ni e," an lo ti ve vat a. Zomuana chiahin engmah a sawi lo na in, min en chîk hle tih erawh ka hre thei mai a ni.

"Thingpui siam a ngai si alawm," ka lo ti ve vat.

"Rawn inchawi phei ve rawh u,"

"Awle," tih pahin choka ka pan leh a, Rinpuii nen chuan kan thingpui tur chawiin Akima bulah chuan kan țhu ve ta a.

"Kima, a tu zawk hi nge i bialnu ni a?" Puia'n a tih chuan ka en vat a, Akima lah chu nuihza tih hriat lutuk hian a nui hawk hawk a. Keini pahnih chu kan lai dun khawp mai.

"Eng zawhna nge ni ta ngai â Puia?" Ala nui hawk hawk mai.

"Zawhna țha tak mawle, hmana i sawi țhin kha a tuemaw zawk zawk hi an nih ka lo ring deuh mai mai a!" a tih chuan Akima hmel chu ka lo en vat a. A sen ve awp awp in ka hria.

"Chutiangte inzawh ngai a ni ami, i hre duh viau anih te chuan a ruk deuh tal pawhin i zawt thei reng si a!" Ka lo ti hlak a.

"A pawi lo ve, Hlute, a sawi dik. Puia, i hre chak viau anih chuan chu nu chu ka hmu tawh alawm," a tih chuan makti zetin kan en hlawm a.

"Min la hmelhriattir aniang chu, i hmu tawh anih chuan," Zomuana chu a nui var var a.

"Mahse...amah ka la hrilh hleinem,"

"Khai aw...! I hmuh tawh te chuan tinge i hrilh mai lohva?" Puia chuan a lo ti vat a.

"Nia, hun ala awm lo em a ni. Ka hmuh lehna a la rei silova, han hrilh mai turin." A zak ve deuh a ni ngei ang.

"Karleh ni 14 khi ka birthday ania, in vai hian ka sawm leh vek che u ania, in lo kal leh ngei a ngai ang," Akima bawk chuan a ti leh a.

"Wow! Nuam leh dawn mange, intur lamte engtinnge ni ang?" Puia chuan a lo ti nghal ham ham a.

"Kha lam kha chu lungngaihna tur a awm lo, in tur leh eitur chu a awm sa vek tawh,"

"Țhian dang pawh in rawn sawm thei ang, Zomuan, nang pawh i bialnu kha rawn hruai ve la, kei chu Hlutei te pahnih hi ka kawp mai ang," Akiman a tih chuan Zomuana ka melh vat a. Ani pawh chuan min lo melh ve chiah bawk. Kan mit a intawng chiah chu ka thawk a tawp ta mai emaw ka ti hman hial. Ka lungphu rang ta dat dat chu an hriat ka hlau kher mai. Rang lutukin ka mit ka lasawn nghal vat a, ka thaw ham ham mai.

"Akim, kei chu ka hman ka ring lo, thawhțanah chawlh ka dil anga, eng chen nge ka chawlh dawn ka hre si lova, mahse rawn hman hram chu ka tum ang," Rinpuii chuan a lo ti ve vat a.

"Engvangin maw? Enge i hman lohna chhan tur chu, chhuanlam țha tawk tak a ngai ang aw...!"

"Ka pa a țha vak lova, ka haw a ngai alawm, tlaiah khan ka nu'n min rawn bia a,"

"Tinge chutiang te chu nichin khan i sawi nghal mai lohva, i țhian ka ni lovem ni?"

"Ka tihpalh, in hlim lai a, chutiang thu lo hrilh che u chu a inthlahrunawm alawm."

"Inthlahrunna tur engmah a awm hleinem, pawi ka tihpui lutuk che, engmah hre lovin i rilru put dan tur pawh kan lo hre lo ania." Midang pawh chuan pawi an tih thu an sawi ve tliar tliar a.

"Akim, ka hawsan mai ang che u," Rinpuiin a tih chuan, "keipawh a rual hian ka haw ve nghal mai ange," ti ve in ka ding chhuak nghal a.

"Chuti anih leh haw vek mai ang u," Puia te pahnih pawh chuan an rawn ti ve a.

"Nangin Bike i keng a, Rinpuii hi phur haw nghal mai la, keiin Hlutei hi ka thlah ang e," Zomuana hnenah chuan a ti a.

Kan inzui chhuak ta țham țham a. Bike an lo ken ve ve avangin Puia leh Mabiaki an inphur a, Zomuana leh Rinpuii an inphur bawk a, kei pawh Akima car ah chuan ka lut ve nghal bawk. Zomuana'n an tlanchhuah hma lawka mitmeng danglam zeta min rawn melh chuan ka lo ip chawih a, ka sa nghal ham ham thei.

Engvanginnge Zomuana min melh apianga ka taksa ah danglamna a thlen ziah hi mak ka tiin a ngaihna ka hre lo kher mai. Akima bulah pawh kha leh chen ka awm tawh a, danglamna ka nei ngai der silo. Ka la hriatchian loh mihringin hetiang em a ka taksa a danglamna a thlen thei hi mak tih loh rual a ni lo a ni.

Puia te pahnihin hma an hruai a, Zomuana ten an zui a, a hnung berah keinin.

"Ka țhiante chu enge i hmuh dan?" Akima min zawhna avang chuan ka phu zawk a.

"Er...aw...an fel hmel hlawm khawp mai," ka ti țha ve mai a.

"Puia leh Mabiaki kha an inzui rei ve tawh asin. An nu leh pa ten inneih an phal lova, an inthlah thei chuang silova, an khawngaihthlak khawp mai. Hetiang hi ka tawn ve ka hlau tlat," a ti duah a.

"Anih chu, tunlaiah te chuan nu leh pa hetiang em em hi an awm tawh lo asin mawle," ka lo ti ve nang nang a.

"Rinpuii chu a zialo hle tak tak mai a, a rilru a hrehawm viau ang," Ngaihtuah vang vang chung hian a ti a.

"Ni e, a zialo khawp mai. Mahse a țha ve leh turah ngai phawt mai ang, eng em a ti lovang chu maw!"

Kan hmalam ka thlir chuan bike pawh ka hmu tawh lo. An tlan chak hle a ni ngei ang. Kan inkawt kan thlen veleh ka chhuk a, "Lo pên i tum em?" Ka tih chuan, "Peng tawh lo mai ang e, zan a rei tawh dawn tlat," tiin a car a tinung a, a tlan leh ta nghal a.

Keipawh inchhungah lutin ka room ka pan nghal a. Ka inthlak zawha ka mut chuan ka mitthlaah Zomuana hmel a rawn lang zut zut a. A mitmeng thûk raihin min melh na te chu theihnghilh rual a ni lo. Ka thinlungah hian nemnghehin a awm tawh tlat.

'Kha pa kha ka duh ta mai em ni le?'



@######@######@######@

[Ngaia]

MY VALENTINE'S

Hk Renthlei

Eps - 8


Nizan ka mu kha chhunlama ka chet hah deuh vang a ni ngei ang, ka chau lo emaw ka tih kha ka lo chau viau a ni ang chu, khum ka deh rual rual kha chuan ka muhil nghal mai lo tih chu ka hria. Mahse engtiklaiin nge ka lo muthilh ka hre hauh lo. Kha mihring ngaihtuah chung khan ka lo muhil a ni ngei ang.

Engvanga kha pa kha ngaihtuah reng nge ka nih pawh ka hre lo ve. Ngaihtuah loh ka tum ngial pawhin ka thei lo chu a ni e. Ka ngaihtuahna zawng zawng a luahkhat nghal vek mai a ni. A aw ri thum deuh chhar te, a mitmeng zim deuh san a min melh run mai leh a pian nalh fahran mai, a chak a ni tih hriat hliah hliah mai te chu theihnghilh chi rual a ni lo a ni.

Khatiang mipa kha ka tawn awm pawh ka la hre lo. Tawng tawh ni ila chuan theihnghilh phal mai chi a ni lo a ni. A sam buk lam lek lek leh a khabe hmul tlem a zuahte chu a inhmeh em em lehnghal a. Umm, a engkim mai kha a fuh vel vek a ni. Mahse ka chan loh tur zunah uai ka tum tawh lo. A hmaa ka tawn ang kha tawn leh chu ka zuam tawh lo a ni. Kha mihring tlaktlai lo leh bum hmang vanga ka nun a chhiat teuh zia te kha ka ngaihtuah chhuak uar uar mai.

Theihtawpa theihnghilh tuma ka beihna avang chauhva tun hi thleng thei ka ni. Chuvangin Zomuana pawh hi engtikahmah ka ta a ni thei dawn lova, ka lo ngaihtuah ve vak vak a țulna a awm lo a ni.

Ka mutna ațanga tho vatin, ka intifai a, ka nu'n rawng a lo bawl mek a, vawiin hi chawlhni(Sunday) tih ka theihnghilh chiang lutuk.

"I tho ve tawh maw? Akima in chu in peihfel sak thei maw?" Ka nun alo tih chuan, "Aw, peihfel e, a nuam reuh khawp mai."

"Bawihi, Akima hi pasal atan i duh mai lo em ni? Ani hian a duh che tih ka hmu thei asin," ka phu zawk a, ka nu chu ka en vat. Ka nu pawh chuan chiang takin min lo en ve a.

"Akima'n min duh anga maw? Hmeichhe duh deuh a neih thu a sawi chu ka hria,"

"A awmdanah te hian i hrethiam miah lovem ni? A ngaihtuahzia che leh a ngaihsak zia che hi engmah i hrethiam miah lova maw?" Mak ka ti telh telh. "Ka bulah engmah a sawi bawk silova." Ka ti a.

"A sawi lo reng ang chu mawle, i mizia ațang hian sawi âwmah a ngai lo aniang chu!"

"Khai a, ka nu, i fiamthu a ni zawk lo maw?" Ka ti hliai mai.

"Fiamthu ah i ngai amaw? Engpawh nise, i duh lo anih chuan nawr luih che pawh ka tum lo. Mahse Akima tluka mipa țha hi chu i tawng tawh lo mai thei a nia." Ni e, ka nu hian a tidik a ni.

Akima chu a țha lutuk ringawt. Mahse țhian ang bakin ka hmangaih thei silova. Ka lakah chutiang rilru a pu te anih chuan engtinnge ka tih tak ang le? A hmeichhe sawi țhin kha ka lo ni em ni? Ka nih loh hram ka beisei a, A rilru ka tihnat ka duh dawn silova.

Â! Chutiang lam chu ngaihtuah tawh lovang, rawngbawl kan peih hnu reiloteah chaw kan ei nghal a.

Kan eikhamah inkhawm turin kan insiam nghal sang sang a, inkhawm banah Akima nen Rinpuii te in lama kal rawt ila a țha ang. Ka phone nghal vat a.

"Akim, inkhawm i tum em? Inkhawm banah Rinpuii te inah leng lawk ila, i hman ang em?"

"Hman loh na tur pawh a awm hleinem, inkhawm ka tum lova, i ban hunah min lo call mai dawn nia," a ti a.

"Awle, anih ka dah ania," phone off in ka insiam nghal mawlh mawlh a.

Ka inkhawm thusawi tu a din chuan ka mut a chhuak kher mai. Inkhawm laia mutthluk hi ka duh miah loh leh ka tihngai miah loh a ni a, mahse tun țum ka inkhawm zet chu ka muthlu nasa lutuk a, thuchah sawi pawh engmah ka hre lo. A vawikhatna atan ka inkhawm chu ka hlawkpui lo kher mai.

Kan ban hnuah in lam ka pan vat a, ka inthlak leh nghal sawk sawk. "Hello, Akim, inkhawm kan bang chiah a, i hman dawn tawh em?" Tiin ka phone nghal a.

"Aw, ka rawn phei nghal e,"

Sitting room ah ka lo nghak a, Rinpuii hnenah kan kal tur thu ka hrilh tawh bawk a. Ani pawhin min lo beisei reng tawh mai thei a ni.

Akima a lo thlen chuan, "Pa, ka nu lo hrilh mai rawh aw, kan kal a nia," tih leh chhuah ka rual a, Akima motorah chuangin kan tlan ta nghal a.

Rinpuii te in kan thlen chuan amah chauhvin a lo awm a, kan thleng chu a lawm hmel kher mai.

"In lo kal chu ka van lawm tak! Ka nu'n min lo phone leh a, nimin lam aia a țhat deuh thu a rawn sawi a, ka lawm tak tak a ni. Nizan lam te khan an inbeisei tawh lo a ni awm e."

"A van lawmawm ve mawle! Phei chu i tum tho ang em?" Ka lo ti ve vat a.

"Aw, naktukah chawlh ka dil anga, ka hmuh chuan a tlaia tlaiin ka phei nghal ang," a tih chuan Akima nen kan lo bu nghat nghat a.

"I pa chu aw...lo dam țha vat se ka ti hle mai. Lo let leh vat tum ang che aw," ka lo ti a.

"Ni e, ka birthday chu rawn hman hram i tum dawn nia, mahse i pa a țhat loh viau chuan ka phut lui chuang lo che, țhiante nena hman ho hi a nawm ve em vang leh i tel lova hman ka duh loh vang a nia," Akima chuan a lo ti ve vat a.

"Nia, ka pa awmdan a zir a ni mai. Ka hna pawh hi chawlh reng theih chuang lova, rawn hman hram chu ka tum dawn nia, mahse engmah ka tiam thei lo che u,"

"Ni e, ni e, helam chu eng to vak duh suh, i pa chu dam țha se a tawk mai." Akiman a ti leh a.

"Engpawh nise, naktuk school in la chawl tiraw?"

"Aw, engatinge?" Ka lo ti vat a.

"Min lo kalpui la, bazarah kan kal nghal lawk anga," a tih chuan, "Awle," ka lo ti vat.

"Keipawh ka lo kal ve dawn," Akiman a tih chuan Rinpuiin, "Ngai lo, i tel vena chi a ni lo." A lo ti vat a.

"Enge ka tel ve na chi a nih lohna, ka lo kal tho tho ang," a tih leh chuan Rinpuii hnial ngaihna hre tawh lo chuan a 'aw' ta ringawt a.

Khua te a lo tlailam ta bawk a, A tuka inhmuh leh tiam chungin kan in mangțha ta a.

Kan haw kawngah chuan kan titi phei bawrh bawrh a. Chutia kan tlan mek lai chuan bike pakhat hi min tawk zawng chiah hian a lo tlan a, kan bul hnai alo thlen chuan a ding chawt a, Zomuansanga lek niin! Akima pawh chu a ding ve vat a.

"Nangni pahnih chu khawilamah nge in han fawr kual a?" Ngeiawm lek lek hian a rawn ti a.

"Rinpuii te inah kan va leng lawk a nih hi. A pa damlo chanchinte kan va zawt chiang alawm mawle, nang zawk?"

"Khawiah emaw ka kal zawk mawle, anih ka kal leh nghal mai ang," a tih pah chuan min rawn melh zawk a. A bike tinungin a tlan leh ta nghal daih a.

"Hepa tak hi chu aw!" Tih pahin Akima chu a nui hak hak a.

"Ani nen khan engtinnge in in hriat teh daih a?" Ka ti vat a.

"College kan kal ațanga inhria kan nia lawm, mahse, kan hnathawh duhzawng a inan tak loh avangin kan inkawm ta vak lova, helamah min rawn sawn ve takah chuan kan inkawm leh ta chu a nih ber hi," a tih chuan mak ka ti ang reng viau. An mizia a inpersan em a ni.

"Anih tak chu mawle," a ri chuan ka ti chhuak hram a.

"Mak i van ti awm ve a, nia, makti pawh nila, a awm ve tho alawm, kan mizia a inang lo em a ni," a ti ve mai bawk a.

Kan in kan thlen leh meuh chuan rawngbawl a lo hun leh der tawh mai. Inchhunga inzui luh pahin, "Ei ve leh nghal mai la," ka ti a.

"Nia, ei ve nghal mai rawh," ka nu'n kan țawng ri hriain a lo ti ve nghal zat bawk a.

"Nangma min sawmna ringawt chu nise, ka hnial ang che, mahse i nu'n min sawm tel miau si a, ka hnial lo mai ange," nui var var chung hian a ti leh a.

"Ngeiawm pa leh! Chimawm thiam bawk si!"

"Ngeiawm min ti lovin, fel min tih em kha maw!" Ka nu leh pa pawh an lo nui ve var var mai. Akima bula awm hi ka nu leh pa hian nuam an ti hle a ni. Ani lah hian a titi pui thiamin, an lawm tawk hi a tithiam en bawk a ni.

Rawngbawl pawh ka nu tih ve ngai lovin kan pahnihin kan bawl dun vek a, nuam a tih hmel kher mai.

"Tihian nupa ni ta mai ila, a nuam awm reuh," a ti zuk a, a nui suk lehnghal. Keilah ka lo lai ve tumhrang lehnghal.

"I ti nuihzatthlak e a!"

"Engvangin maw?"

"Engvang mahin!" Hetianga min chhaih hian ka lai țhin tih a hriat vangin chhaih nuam min tih phah fo. Huat dawna huat theih miah siloh a, țawngkam hman hi a hrat em em bawk.

A tuk pawh school kan la chawlh avangin Rinpuii bazar kalpui tumin Akima nen bawk kan inzui chhuak leh ta a. Mi hmuhah chuan inngaizawng kan ang ngawt ang, mahse kan inngaizawng der silova.

Rinpuii kan sawm phei a, ani pawh a lo insiam peih fel vek tawh bawk. A thawmhnaw dahna bag nen kawtah min lo nghak a, kan thlen veleh motorah a rawn lut ve nghal a, an office panin kan chhuak ta phawt a.

Rinpuii te office kan thlen chuan chawlh a dilna tur a tifel nghal vek a, a tihfel veleh inzui zelin Counter-ah Aizawl kal tur chawhnu chhuak ticket kan la nghal bawk. A bag kan dah nghal bawk a. Bazar lam panin kan inzui leh ta țham țham a.

"He pa lo kal hian thil a ti bam vek dawn," Ka beng bulah Rinpuii chuan a rawn ti sa sa a.

"Tinge?"

"Nangni pahnih khan min rel s'u aw...!"

"Kan rel lo che," Rinpuiin a lo ti vat a.

Bazar chhungah a tlan lut nghal a. Rinpuii nen kan chhuak vat a. "Tikhan min lo nghak lawk rawh, kan rei lovang," Rinpuiin Akima hnena a tih nghal sawk sawk chuan makti zetin ka en a. Ka zui ve nghal mai bawk.

Akima kal ve a duh lohna chhan ka hre ta thuai reng a. "Ka haw dawn si a, ka pa awmdan azirin ka lo phei theih lawk loh takah Akima birthday present tur lei ka duh vang a nia," a tih chuan ka nuih a ti za in, naupanchhiatthlak ka ti ang reng khawp mai.

"Hre mahse a pawi viau ami a?" Ka lo ti vat a.

"Tuna ka pek te chuan ala hma bawk si a, ka lo phei hman leh ka pe anga, ka hman loh tak leh ilo pe mai dawn alawm, ka awmdan tur a hriat rih tlat silohva, pek loh ka hreh ve bawk si alawm,"

"Ni ve tho mai, ka lo kawl sak dawn che nia," ka ti ve ta a. Akima bula kan inzui phei leh chuan motorah ngawi rengin a lo țhu a. "In va rei ve a, ka hriat ve loh tur thil enge awm a?" Alo ti hmuk a.

Rinpuii nen in enin kan nui hak mai. "Mipa hriat veloh tur thil mawle!" Ka lo ti vat a.

"Anih khawilamah nge kan kal dawn?"

"Restaurant ah chawl ila," ka lo ti vat a.

"Ala hma lo ami?"

"Hma tawh lo, Rinpuii a kal mai tawh dawn si a, thlah pah ani mai alawm," ka ti leh thuai a.

"Nia, chawl ang u, ka ngai dawn bawk si che u a!" Rinpuiin a lo ti ve vat bawk.

ONO Restaurant ah chawlin, kan ei duh zawngte kan lam a, chutia kan nghah mek lai chuan Zomuana leh hmeichhe pakhat rawn inzui lut hi ka mitsirin ka hmu a, mahse hmu lo ang chiaha awmin menu chu ka thlir vel mai mai a.

Akima chuan Zomuana te pahnih rawn lut chu a lo hmu chu niin, a lo au vat a. "Helamah min lo zawm ve ula," a ti a. Anni pahnih chu an rawn hawi phei thuai a. Min hmuh veleh min rawn pan ta nghal a.

"Nangni pathum chu, ka hmuh che u ka ring hleinem, enge in tih a?" A rawn ti a.

"Rinpuii haw tur kan thlah lawk dawn anih hi!" Akima chuan a ti vat a. Țhutna dang chu a kawhhmuh a, Rinpuii nen kan țhu dun a, Akima a mahin, Akima bulah chuan ka ep chiahah a țhu nghal a, a bulah a hmeichhe kalpui kha a țhu bawk a.

Kan eitur an rawn dah pahin an eitur an chah ve nghal a. Ei pahin midang chu an titi mawlh mawlh a, ngawi rengin ka ei mawlh mawlh thung a.

"I va ngawi thei ve a?" Min rawn zawt tu chu ka en vat a. Zomuana chuan min lo en ngur mai a. Rang lutuka ka mit la sawn lehnghal vatin, zah vang chuan ka sen awp awp a.

Kan ei zo tawh bawk nen, kal ka rawt ta vat a. "Kal tawh ila, Rinpuiin a nang hman lo palh ang," ka ti ta ringawt a. Chhuanlam dang sawi mai tur ka hre lo a ni.

"Ni e, pawi lovang, anih kan kalsan mai ang che u, Rinpuii la thlah kan ngai si a, ni 14 chu aw, i theihnghilh ange," tiin Zomuana hnenah Akima chuan a ti a.

"In va hmanhmawh ve. Nia, kan lo tum dawn nia," tih ve pahin min rawn melh zauh chu hmu in hmundang ka melh ta daih a.

"Rinpuii nen pawnah kan lo va nghak ang che," tih pahin Rinpuii nen chuan kan inzui chhuak ta nghal a.

A hnu reiloteah Akima pawh a rawn chhuak ve ta a. A motorah chuangin Ticket lakna Counter chu kan pan ta nghal a. Kan thlen chuan minute sawm vel chiah chhuah nan a lo awm tawh a, a bag vel te an hlan fel hnu chuan passenger dang nghah pahin amah pawh sumo ah a țhu lut a, reilotea chhuah mai inpeihin an țhu ta țham a.

Passenger dang an lo thlen hnu reiloteah chuan chanchin inhrilh reng tura inchah lawm lawm pahin an tlanchhuak ta nghal a. Kan in bye bye liam ta. Keini pawh motorah lutin in lam panin kan tlan veleh ta nghal bawk.

In kan panna kawngah chuan ngawi rengin kan tlan miah miah a. Kan rilruah erawh chuan Rinpuii bak a awm lo ang a tihtheih awm e.

"A pa chu a beisei aiin lo țha se ka ti kher mai," ka ti chhuak phawng mai a.

"Ni e," tih ringawtin min chhang a, min rawn melh zauhva.

"Ka khawngaih em mai. Ka pa damlo zeuh zeuh pawh hrehawm ka tih nâkalaiin; a hrehawm dawn em mai,"

"Hmm, damloh hi chu a hrehawm vek a ni. Na tak nih leh phei chu a hrehawm lehzual. Thudang daih, Zomuana bialnu kha enge i hmuhdan?" A zawhna avang chuan ka sen awp awp a. Min en lo hlauh chu ka lawm kher mai.

"A bialnu tih ka lo hre miah lova, a chhiat loh kha le!" Tiin ka chhang ta ringawt. Tukverh lam ka hawi vang vang hnuah car seat nghengin ka maimitchhing ta daih a. Kha nu kha a bialnu maw ni a? A hmelțha hle in a inchei danah an khawsa thei viau ang tih a lang reng mai. Kei nen chuan tehkhin chi pawh kan ni lo. Ani ang el pha tur chuan kan dinhmunin a zir ve lova, Zomuana pawh beisei ngam tur ka nih loh zia ka hriatchhuah thar phah leh hial a ni.

Theihnghilh tuma ka bei nasa hle a, tlem chuan ka thei ve deuh. Bialnu a nei tih hre reng chungin ka thinlung hi amah duhna avangin a sahal a. Ka lungphu ri te hian a hmingte hi an lam hial niin ka hre țhin. He mihring hi duh hle mahila, engtikahmah 'ka duh a ni' tih hi a hre tur a ni lo.

A hmaa ka ngaihzawng neih ai khan ka thinlung a la na dawn tih ka hre kiau mai si a. Ka thinlung hliama a awm leh tur chu duh lo teh mahila, Keia dan theih a ni miau silo. Tun apangin ka na țan chu a ni der mai si. A kianga hmeichhia awm ka hmuh ațangin ka thinlungah nâ a awm tawh a ni. Chu chu tuma tihreh theih rual a ni tawh lo.

In kan thlen lai hre lo khawpin ka ngaihtuahna ka lo kawm a ni tih ka hre chiah.

"Kan thleng tawh ania, i harh em?" Ka muhilah ngaiin min kova. Ka meng chhuak diar diar a. Kan kawtah kan lo ding reng tawh mai. Ka chhuk vat a, "I lo peng dawn em?"

"Peng tawh lo mai ang, naktuk chu school kal kan ngaih tawh kha aw...naktukah kan inhmu dawn nia," tiin a tlan leh nghal daih a.

Inchhungah lut ve nghal vatin, "Nu, pa, ka lo haw e, in awm em?" Ka ti a.

"Awm e, i van lo haw hma ve a, Rinpuii chu a kal ta ami?"

"Aw, kal ta e, rawng i bawl tawh em ni?"

"La bawl lo deuh, ala hma deuhva."

"Ka inthlak anga, ka lo bawl dawn nia, mama te an lo la haw nange a?" Tih pahin inthlak turin ka room ka pan nghal a.

Ka inthlak zawhah ka nu nen rawng kan bawl dun leh ta a. Kan bawl zawh hnu lawkah ka naute an lo haw ve ta bawk a.

Zanriah ei kan peih hnu ah chhungkuain Pathian hnenah inkawltirna kan nei leh phawt a, chaw kan ei ta nghal a.

Kan eikhama ka tihfel vek hnu ah kan kawngkhar an rawn kik dat dat a. Ka va hawn nâk chuan le, ka rinloh leh beisei loh lutuk hmel ka hmu chu lut tura sawm mai nachang ka hre lawk lo lehnghal.

"Ka lo lut thei ang em?" Ka harh zawk a, kawng ka kian nghal a, nui sak chungin a rawn lut ve nghal a.

"Ka lo beisei miah lo che a?" zawi tein ka ti sap a.

"A lang reng alawm." tih pahin sitting room a pan nghal a.

A pian nalh tak leh paa zet mai chu hnunglam ațangin ka thlir vang vang a. Zomuansanga chuan kan inah enge lo tih a tum ve teh tlat le?



@######@######@######@

[Ngaia]

MY VALENTINE'S

Hk Renthlei

Eps - 9


Zomuansanga kan ina a rawn lang hlawl chu mak ka ti kher mai. Sitting room panin kan inzui ta nghal a.

Sofa ah țhu in a ep ah chiah ka țhu a. Min en ngar avang chuan ka zamin ka khur ru der der a. Ka zamzia a hria ang tih erawh ka hlau kher mai.

Ka nu leh pa țhenawm te ina an leng a, ka naute pahnih an leng bawk si. Kan pahnih chauhva awm chu ka zam in sawi tur reng ka hre lo.

"Kima nen hian eng inkungkaihna nge in neih?" min zawhna avang chuan ka phu zawk a.

"Țhian bak kan ni lo," tiin ka chhang sap a.

"I thusawi chu awih turin min beisei em lovang chu maw?"

"Chu chu engvanga min zawt nge i nih? I tan enge a țangkaina?" Ka zawt let ve khauh a.

"Ka duh vang che in.." a chhanna avang chuan makti zetin ka ang pham mai a.

"Awihawm loh lutuk. Bialnu i neih reng kha."

"Ha..ha..! Kha nu kha ka bialnu a ni lo."

"Kima paw'n bialnu i nei tih a sawi reng alawm,"

"Oh! I thik deuh tihna ami?" Ka sen awp awp chu hmuhnawm tih hmel zet hian min en reng a.

"Teuh lo mai, thik tur pawhin nang nen hian kan inngaizawng reng reng ami?"

"Ngaizawng love, mahse kan țan thei alawm,"

"Hah! Kawplai nei lakah ka intibuai ve ngai lo."

"Kawplai ka nei lova, nang pawhin i nei bawk hek lo,"

"Ka neih leh neih loh i hria em ni?"

"Hre tehreng mai. Kima bak i kawp ngai tlat lova, Kima nen lah kan inngaizawng lo i ti bawk si a, chuvangin kawplai nei lo ve ve kan inkawp thei a ni mai lawm ni?"

"Ka duh lo ve."

"Oh! I duh chiang khawp mai, kha i mitmenga min duhna lang kha ka hmuh hmaih i ring hauh lovang chu tiraw?"

Ka meng khup ta zal zal a. Ka inthup ve hle emaw ka ti a, mahse a lo hre reng si. Ka zak lutuk chu ka kun ta reng mai a.

Ka bulah rawn insawn pheiin ka si chet hian a țhu a. Amah en turin min kuai dak a, a mitah tak ka en chuan mitmeng de sawr sawr hian min melh a, ka sa pup pup a, ka taksa chu awmngaihna hre lo ang mai hian a za chhuak vekin ka hria. A rawn kun hniam riai riai a, "Ka hmuh hmasak ber ni ațang che khan he thil hi tih ka chak tawh," a ti nghut a, a aw pawh chu a zawi tham sap mai.

A tirah chuan ka han țang ve viau na a, ka thinlungin hnar tura a duh ang chu ka taksa chuan a zawm ve thei tlat lo mai. Ka taksa chu a lamah hip beh tlata awm ang mai hian a chesawn thei tawh lo. Kan hmui a insik takah chuan ka thaw halh a, a ni pawh a rum nghut mai. Chutah duhthawh lutuk hian min fawp ta a, a lei hmanga ka ka chhung an suasam chu ka taksa chuan alo dawngsawng țha kher mai.

"I hmelțha in, ka duh lutuk che," min fawh karlakah chuan a rawn ti leh sup a. Ka mur chhuak vek mai. A hmuiin ka beng kawm te a nul thuak thuak a, nawmna hian min fan chiai chiai reng mai a ni.

"Min kuahin, min chul ve rawh," a ti leh sup a. A nghawngah ka kut lehlama kuahin lehlamin ka chul ve ta ruai a, a thaw hawk hawk mai.

Kan inmamawhna a sang telh telh a, duhtawk leh khamtih reng a awm thei lo. A tawpah chuan ka inlahrang thei ta hram a, "Duhtawk ang," tiin. Ka aw pawh a khur deuh dar dar thei. Ani pawh a dang chuang lo. Ka chal leh a chal siktirin a thaw huai huai a, inenin kan nui ta ringawt.

"Hetianga ka taksa tidanglam theitu nang ang hi ka la tawng lo, ka hmuh che apiangin hetianga khawih che hi ka châk țhin. Ka duh che ka tih kha ka ti mai mai lo ania," a ti leh a. Châkna avangin a aw pawh a chhum bung rum mai.

A țawngkam ringawtin ka taksa a tihdanglam theihzia chu mak tak a ni. "Min duh ve a ni tiraw?" A aw sexy zetah chuan ka tuiral lo chauh.

"Umm," tih bakin ka chhang thei lo. Ni e, ka duh a ni tih ka pha lo. Ka hmuh tirh ațanga ka ngaihtuahna luah rengtu chu hepa ngei hi a ni.

A tawpah chuan ka inlahrang thei ta hram a, ka aw thian kharh kharh pahin, "Thingpui ka va lum ange," ka ti a. Ka tho ta nghal a.

Thingpui kan in mek laiin ka nu leh pa leng pawh an lo haw ve ta a, ka thaw huai mai. A lakah khan sihhnip hmel zet khan ka awm ta si a, engangin nge min ngaih ang tih pawh ka ngaihtuah ngam lo.

"Mambawih, inleng i nei a ni maw? Khawilam mi nge ni a?" Ka pa'n min zawh chuan, "Ka țhianpa Zomuansanga, Lunglei khua ve tho hi a nia, hmanni Akima inluah ni ațang khan kan inhria a, zanin chu a rawn leng ve a nih hi."

"Anih tak chu, i van fel ve a, lo leng ziah ang che aw," ka nu'n a lo ti ve vat a.

"Ni e, ka lo leng ziah tawh ang," tiin min rawn en pah chuan a nui suk a.

"Mambawih, thingpui chu min lo siam ve la," ka pa'n a tih leh chuan thingpui ka va siam sak leh nghal vat. Ka nu leh pa chuan Zomuana chu an be bawrh bawrh a, Zomuana pawhin kawm dan a thiam kher mai. Ka lo nui ru sak a.

"Naktuk Kima birthday chu tel i tum em?" Min zawhna avang chuan ka melh zawk a.

"Aw, tel loh chuan a birthday neitu a zahawm alawm le!" Ka ti ve mai a.

"Engpawh nise, ka va haw tawh ange, vawikhat lenna a rei deuh len chu a țha ngai lo," tih pahin thawh a tum uaih a.

"Ala hma alawm mawle, tinge i hmanhmawh em em a?" Ka pa in a lo ti ve vat a.

"Zan danga lo len leh hunah he pa hi a leng rei thei em mai tiin Hlutein min ning palh ang," a tih chuan ka nu leh pa chu an nui hawk hawk a. Ka lo melh rum hle thung a, ani lah chuan ngaihpawimawh loh hmel fe hian a kiai suk duh chauh.

Veranda thleng ka thlah a, pawn kan chhuah veleh a lamah min pawt hnai dawrh a, a hmui lum hiam mai chuan ka hmui a rawn chuktuah leh nghal vat. "He thil hi ka zawngchhang dawn țan tlat mai," tih pahin a nui suk a. "Anih muttui phawt aw," tih lehin a bike ah lawn kai nghalin a tinung a, a ban a rawn vai zauh a, a tlanchhuak ta nghal a. "Muttui le," a hre pha tawh dawn lo tih hre reng chungin ka phun sap a. Inchhungah ka lut nghal thuai a.

Ka nu leh pa pawh mu turin an room an lo pan dawn mek a, keipawh ka room panin ka kal ve ta nghal a.

School ka ban hma avangin Akima present lei turin bazarah ka chhuak nghal a. Min kalpui a tum sateh na in, ka hnial thei ta hram.

Tumah present ka la pek ngai loh avangin lei tur ka hre lo kher mai. Enge a duh ang tih pawh ka hrethiam pha lova, ngaihtuah ngaihna lah ka hre hek lo. Umm, ka lei ang ang chu a pawm leh vek thovang. Mipa hman chi perfume chu ka hmu hlauh mai, chu chu ka present mai ang tiin ka lei ta a. Ka tuam tir nghal vek bawk.

Present ka leina dawr ațanga ka chhuak chiah chu ka hmaah tak bike a lo ding chawt a, ka han en chuan Zomuana a lo ni a, "I lei zo tawh em ni?" Engtinnge dawrah thil ka lei tih a hriat le? Makti zetin ka en ringawt.

"Engtinnge i hriat a?" Ka ti vat a.

"I lut lai ka hmu che a, ka lo nghak che mawle! Haw i tum nghal mai em ni?"

"Ka haw nghal mai lohvin, eng dang nge ka tih chuan ang?" Ka tih chuan a nui suk a.

"Keipawh present lei ka tum a, ka la lei lo, min kalpui la, ka thlah haw dawn che nia," a tih chuan bike ah lawn ve nghalin, kan tlan ta a.

A present lei tur kan lei fel hnu chuan kan in lam pana tlan ta mai lo chuan khawiah nge min kalpui dawn tih pawh ka ngaihtuah thiam lo. A tlan mawp mawp a, in pakhat nalh zet kawtah chuan a ding ta chawt a.

"Khawi hmun nge min hruaina hi?" Ka ti a, hlauhthawnin ka khat nghal a.

"Hlauthawng duh suh, kan inah ka hruai che a nih hi, ka chhungte hmuh tir che ka duh vang ania," a tih chuan ka thaw huai mai.

"Min hrilh lawk ve mai ta che," ka tih chuan a nui suk ringawt.

Ka banah chelhin Inchhungah min kai lut a, zui loh theih loh ni hek lo le, min kaih ang ang chuan ka awm ta ringawt a. A chhungten ka hmel an hmuh huna mak an tih dan tur chu ka ngaihtuahin ka huphurh ngei mai.

"Ka chhungte chuan an duh lutuk ang che," tia min hnem chu a tum ve khawp na in, a mi hnemna chuan awmzia a nei lo kher mai. Mahse kan han lut chu ka beisei loh leh ka hlauhthawn lutuk ang chu a thleng ta hauh lo mai le!

"Lo kal rawh u, kan lo beisei miah lo che u na in, kan hmu che chu kan lawm lutuk," Zomuana nu niawm tak chuan a lo ti sawk sawk a. Midang pawh chuan min lo lawm ve liam liam a, ka zah pawh a reh ta deuh.

An chhungkua chu an rual bik lem lo khawp mai. A nu leh pa, Zomuana nau mipa a awm bawk. Chu zawng chu an ni e.

A nu phei chuan min hmu chu a lawm zual emaw tih turin min lawm bik a, fanu an neih loh vang leh an fapain hmeichhia an ina a hruai luh vawikhatna ni mai awmin a awm a, ka tan pawh a lawmawm lam a ni e. Zomuana nena kan la inzui rei loh zia ka ngaihtuah erawh chuan a nu leh pa hmu tura min hruai chu ka inthlahrung ru kher mai.

Rei mawi tawk kan țhut hnu chuan Zomuana chuan a chhungte hnenah, "Hlutei hi ka va thlah tawh ange, a chhungten an lo ngaihtuah palh ang e," tih pahin ka banah bawk kaiin min chhuahpui leh ta a.

"Anih, i lo leng leh vat dawn nia," tiin min thlah ve liam liam a.

Kan in lam pana a tlan lai chuan, "I chhungte chu an fel hle mai, engvanga tun thlenga nupui la nei lo nge maw i nih le?" Ka ti lang lang a.

"Nang ka tawn ațang che hian a hriat mai law'm ni?" A lo ti let vat a.

"Ah," chhan ngaihna reng ka hre lo. A hmaa a nundan engmah ka hre lova, engang mizia nge a neih ka hre hek lo. A chhungte ațang kha chuan misual tak chu a nih ka ring lo. Ka la hrechiang lo hle na in, he mihring hian ka thinlung zawng zawng a luah vek nghal.

In kan thleng ta, ka chhuk vat a, "Zanin chu ka rawn sawm ang che,"

"Mahse, Rinpuii alo phei tawh a, kan pahniha kal kan lo tum tawh asin," ka ti niah niah a.

"Phone mai rawh. Anih loh pawhin Kima hruai turin ka lo hrilh mai ang." ka chhan let leh hma in a tlanchhuak ta daih a.

Inchhung ka luh chuan, "I va tlai ve a?" Ka nu'n a lo ti nghal vat a. Nuam lo ka ti ru kher mai.

"Zomuanan an inah min kalpui alawm mawle," ka ti ve mai a.

"A chhungte chu eng ang mi nge an nih a?"

"An fel khawp mai, kan chhungkua ai pawhin an tlem zawk," ka ti deuh kher a. Ka nu chu a nui huk mai.

"Zanin chu fimkhur taka awm tur aw, hmingchhiatna hi ho te a ni țhin. Hmeichhe tan phei chuan vawikhat hmingchhiat hian damchhung a daih an tih kha," tiin ka nu min zilh mawlh mawlh na chu ka ngaithla reng a.

Ni e, ka nu hian a sawi dik a ni. Hmingchhe zawnga khawsak loh hram ka tum ang. Nula senior nih tawh lama hmingchhiat te zawng ka duh teuh lo mai.

"Hello! Zanin chu..." Rinpuii call pick pahin ka ti a.

"Kan kalrual ang chu ka ti ania, Zomuana'n min rawn call a, a kalpui dawn che tih thu a sawi a, engtiklaiin nge nangni pahnih hi in lo inzui a?" A rawn ti nghal zung zung a.

"Nakinah ka hrilh ang che, phone a sawi chi pawh a nih loh hi, Akima'n rawn hruai che a tum em?" Ka ti a.

"Aw, min rawn phone alawm, a awmdan a mak lutuk a,"

"Engtizawngin maw?"

"Rilrua vei nei deuh țeuh ang hian a țawng a."

"A va mak tak ve! Anih ka dah phawt, zanah kan inhmu dawn nia,"

"Lawk, ka kawr rawn thawn che kha ilo hmu em? Kha kha zanina i hak tur atana ka rawn hawn che anih kha,"

"La hmu nang, ka van lawm ve aw...zaninah enge ka hak ang ka lo ti rilru mek a, ka lawm lutuk ania," tiin zanlama inhmu tura intiam chungin phone kan dah ta a.

Ka huphurh rualin ka helhhawlh bawk si, ka awmdan chu ka sawifiah thiam phak bak a ni e. Ka insiam mawlh mawlh a, Rinpuii kawr min rawn hawn chu a nalh kher mai. Zanin atana hak tur liau liau a țhui niawm tak a ni. Kawrfual hnalh mai a ni a, a kawng chin chunglam chu taksa rem chiaha țhui a ni a, a kawng ațangin a arh hliai a, ka pen zawng chuan a fawn delh delh thei. Hnute lang lo chiah chiaha nghawng zau a ni a, a sexy kher mai.

Ka mit hnawihin, ka hmuiah lipstick tlem ka hnawih hlek a, ka hmai ka hnawih leh hlek bawk. Pheikhawk pencil heel ka kawr hak rem tur ka bun bawk a. Ka sam chu chunglamah ka vial chho vek a, ka nghawng var hai mai chu a lang sar kher mai. Darthlalang a ka han in en chu midang daih niin ka inhre hial mai. Kawrfual ka ha ngai lo na in, zanin atan chuan a pawi lo viau e.

Ka purse la in, ka room chu ka chhuahsan ta a, chokaa ka nu lo chhuakin min rawn hmuh chuan min chhuan ve hmel zet hian a nui var var a, ni e, a fanu neihchhun ka ni ve miau alawm le...zanin chu ka lang nalh ve bawk em lah tak a!

Rei pawh ka nghah hmain Zomuana chu a rawn thleng ve nghal mai a, a rawn nalh leh kher mai. A hmelțhain a palian si a, eng thawmhnaw pawh ha se, a inhmeh vek mai a ni. Min han hmu chu a meng phar ve ak mai. Ka lo nui sak a, zanin chu bike keng lovin motor a rawn keng ve tlat.

Kan inzui chhuak ta a, a motora ka țhutluh hnu ah a ni pawh a rawn țhu lut ve nghal vat. A tlanchhuah hnu reiloteah a ding leh chawt a. Min rawn en vang vang a, Tleirawl zakzum ang maiin ka lo lai leh tawp tawh nia...

"I hmel ka hmuh a, fawh che ka chak zia hi i hrethiam pha lovang," tih pahin a thaw halh a. Keipawh ka thawk a buai nghal vek. Ka lungphu rang lutuk chu a hriat hlauvin ka dawm nghal vang vang a, he pa bula ka awm apianga danglamna ka nei ziah țhin hi mak tak a ni.

Ka kutah bawm tereuhte hi a rawn dah a, "Enge a?" Ka ti vat a.

"Hawng la i hre mai ang," ka han hawn chuan țhi nalh zet mai hi bawm chhungah chuan awmin, Zomuana chu ka en leh vat a, "Hei hi ka ta tur maw?" Ka ti bah nuai a.

"Hmm, i ta tura ka lei ania, vawiin hi Valentine's day ani a, present anih kha."

"A mawi lutuk, mahse engmah pek tur che ka nei ve silova,"

"Hei hi min pe mai rawh," tiin ka thinzawn chu a rawn khawih a. Ka hrethiam lo hmel chuan a nuih a tiza kher mai.

"Ngaihzawngte pawh i nei ve nual tawh awm sia, hetiang mai mai pawh hriatloh te chu," tiin a nui ta kur kur a. Ka lo melh rum ngang mai.

"Anih leh, țhi chu min han awrhtir la," ka ti ta nghat a.

Țha deuhin min awrhtir ve ta mai a, min awrhtir paha a kutin ka taksa a deh hlekna chuan ka taksa ah nghawng a nei rang kher mai. Ka taksa awmdan chu hrethiam niawm tak hian a chul pah zauh a, ka lo zauthau nghal der mai. Enge ka chungah thleng ta mai le!

Akima te in kan thlen meuh chuan an lo kim titih der tawh a, keimahni chauh min lo nghak niawm tak hian kan lut chiah chu min lo en nghal vat hlawm. Akima chu ka bulah a lo kal vat a, "I nalh kher mai," ka beng bulah a rawn ti sa sa a. Ka lo nuih sak a. Zomuana hmel chu a rum kher mai. Mahse a inthup leh thuai a.

"Happy birthday," tih pahin present ka lei chu ka pe nghal a. Lak pahin, "Ka lawm e, mahse engvangin nge ka lakah zep i neih a?" Ka beng bula tih leh sap pahin Zomuana chu a melh zauhva, ka lo hrethiam nghal vat. Chhuahchhalh ka tawk nghal der mai!

Mipa lamin intur an dawm far a, kei erawh hetiang lam hi ka la in ngai lova, in tumna pawh ka nei lem lo. Rinpuii nena țhu dunin kan ti ti mawlh mawlh a, "Engkim zep lovin min hrilh vek rawh, engtik ațangin nge ani nen sawn in inzui a?" A laka ka zep nia a hriat avangin a lungawi lo ve ngang mai.

"Kan inkawpna chu ala rei lo." Tiin kan pahniha Pizza Hot Restaurant a kan chawlh ni a, ka hmuh thute ka hrilh chuan mak a ti kher mai.

"Chuvang a ni maw, Akima inluahnia i hmuh pawh khan i lai deuh khan ka hre reng a," tih pahin a nui kar kar a.

"Niang chu, amah ka hmuh leh a bul hnaiha ka awm hian ka awmdan hi a danglam ziah țhin a," ka tih chuan mawl min tih hmel lutuk hian a nui ta kiah kiah a. Ka haw khawp mai a, mi hriat ka hlauh ve nakalaiin.

"I hmangaih a ni lo maw? Chu pawh chu i hre leh pek tawp nang," tia min fiamna chu amah zawkin a nuihpui leh hawk hawk a. Ka ngaihtuah chiang a, ngaihzawng nei tura experience ka neih lohzia hrechiangtu a ni si a, keipawh ka nuih a za ve leh hnuhnawh a, kan pahnih chuan kan nui dir ta char char a.

Music play in, a țhen an lam a, keini erawh dawhkan pakhat kilin kan titi char char thung a, kan nui dun leh hak hak țhin.

"In va hlim hmel ve a, rawn zawm ve che u in remti em?" Tih aw ka hriat chuan ka phu zawk mai. Khawvela ka hmuh peih loh ber mai leh ka mihring huat lutuk mai ka hmaa lo ding reng nen chuan kan in melh ta siah mai a. A hmel chu zu in nasa tih hriat zet hian a puam ûk a, tunah pawh hian a rui hle lehnghal. Engtinnge Akima nen an inhriat le? A ngaihna ka hre lo kher mai.

"Lo țhu ve la," Rinpuii zawkin a lo chhang vat a. Kan pahnih inkar engmah ala hre lo bawk nen, a awm ve tho mai.

"I dam maw? I nalh ngaiin ila nalh reng a nih hi, hman aiin i nalh daih tawh zawk alawm le," a țawngdan vel chuan ka luak a tichhuak hluah hluah.

"Ka la dam chu anih hi, tinge i nupui i rawn hruai ve lohva?" Ka tih chuan Rinpuiin makti zet hian min lo en tawn sek a.

"Kan ințhen daih tawh alawm, ila hre nange a, nang ka lo....!" A ti hman chauhva.

"Rinpui, bathroom-ah kan kal lawk ange," tih pahin ka thova, he pa bula awm ai chuan inthirfihlim daih ka duh zawk.

Chutia bathroom pana kal ka tum chu ka ban rekah a lo man chawt a, "Min thlah vat rawh," thinrim zetin ka ti a.

"Hmanah khan ka thlah tawh che a, tunah phei chuan i lo nalh leh zual tawh si a, ka thlah tawh dawn lo che." A rui chu a țawng ring bawk si a, a țawng hre pha te chu an lo hawi ta țhap a. Ka zak lutuk chu hawi pawh ka hawi chhuak ngam tawh lo.

Akima chu ka bulah alo kal vat a, ka bana vuana min kaihsawn a tum lai tak chuan mi pakhat hian ka banah vuanin pawnlamah min kaichhuak ta a, ka țang nasa teh na in, ka hneh der silova, a hmel ka han en chu Zomuana alo ni a, ka thaw huai mai.

Ngawi rengin a motorah min nam lut a, kawngkhar chu a lock nghal hmiah a, inchhung lam a pan leh a, Akima a biak zawh chuan a rawn chhuak leh nghal thuai a. A motorah rawn lutin reilote chu ngawi rengin a țhu a, ka lakah a lungawi lo em ni le? Ka hlau ru khawp mai.

"Kha pa nen khan inzawmna in nei tawh em ni? Engvanga khatianga rawb ti che kha nge a nih?" A thinrim insum chu a bek a thisen zam chu a pawng dat dat a.

"Eng inzawmna mah kan nei lo,"

"Inzawmna nei silo, i lakah engvangin nge khatianga a chet vak a, thudik min hrilh rawh?"

"Hmanlai thil tawh a ni e, ani nen khan kan inkawp țhin a, mahse nupui neilai alo ni a, min lo bum reng a, ka hrechhuak hma ta hlauh zawk alawm,"

"Anih i hmangaih reng reng em?"

"Teuh lo mai, zanin kha kan ințhen hnua ka vawikhat hmuh lehna ani. Engtinnge Akima nen an inhriat le?" Mak ka ti takzet a ni.

"Akima cousin pasal tih i hre nange? A nupui nen an ințhenna a rei tawh a, a zu in nasat lutuk avangin helamah an rawn dah phei alawm,"

"Akima cousin pasal maw lo ni a? Akima hian kan chanchin kha a lo hre ve ngei ang le? Chuvang chu em ni zanina a birthday ah a lo kal ve le? Akima rinhlelhna in ka khat nghal a.

"Ngaihtuah duh tawh suh, kan pahniha kan awm chuan a tawk a ni mai lawm ni?" Tih pahin min kuah a, Akima in chhuahsanin kan tlan thui tawh hle.

A motor a tihdin veleh a ban tha chak zet chuan min kuah hlu hlu a, ka rilru pikna zawng zawng a kiang vek thei nia, a awm nghengin ka thaw dep dep a, kan thinphu ri bak thawm dang a awm eih lo.

Zawi muanga ka khabe tikangin amah chu ka en a, a mitmeng thim raihah chuan takna ka hmu thei. Zawi muanga rawn kun hniamin kan hmui a insik takah chuan duhthawh zetin kan inkeih ta mawlh mawlh a, kan infawh karlakah kan thaw dun leh halh halh țhin a.

"Ka mamawhzia che leh, zanina i nalh zia hi i inhria em? Ka duh lutuk che. Ka damchhung atan ka VALENTINE'S ni rawh." Thawp sata a tih chuan ka mur er er a. He mihring hi ka hmangaih a ni tih ka hrechhuak ta. A kianga ka awm apianga ka danglam ziah țhin hi ka hmangaih vang a lo ni.

Kan taksa innawk reng ta chu chhunglamah min nawr et et a, kan kut lah a awm hle hle thei lo. Kan inchul kual ruai a, kan thawk chham thleng kan infawp ngawih ngawih a, kan inhip tawnna chak lutuk chu kan tihtawp vat a ngai a ni.

Thaw halh halh chung hian, "Duhtawk ang," ka aw khur dar dar chu a hriat loh hram ka beisei. Ani pawh insum tih hriat zet hian a thaw ham ham a.

"Ka nupui ni tawh mai rawh, innei tawh mai ang, i hmel hmuha suh tawka kuah theih siloh che chu min hrem a ni ringawt alawm," tih pahin hnuailam a melh a, a nui suk lehnghal. A melhna ka han en ve chu a kap zawn lo kawhluah mai chu ka hmu ve ta a, ka nui ve tawp ringawt.

"Haw ang, chutilo chu ka insum zolo palh ange," tih pahin a motor a tinung a, motor hma darthlalangah ka in en zawk a, ka hmel ka hmu chiah chu ka phawk chiang kher mai. Ka hmai chu a sen vek a, a phelhphang mai bawk si a, sex hmang zo hlim ang mai hian ka tai hlar lehnghal.

Min rawn melh zawk a, "Tikhan i nalh lutuk ringawt," a la ti zui. Ka chum awk a. Alo la nui hawk hawk zui.

"Akima hnenah khan eng thu nge i sawi a?" Ka ngaihtuah chhuak thut a, ka zawt nghal.

"Engmah nilove, ka hruai haw tur thu che leh a ina tihmualphova i awm avanga ka lungawi loh thu ka hrilh mawle,"

"Mipa țhenkhat hi an lo zaktheilo em mai, Akima chu ka lakah a inthlahrunphah viau ang â...!" Ka ti vang vang a.

Akima birthday chu nuam paw'n ka hmang thei ta lo. Kan boruak a chhe ta vek si a, ka khawngaih zawk kher mai, a inpuahchah nasat ve tehreng nen; Mahse kha mihring laktlak loh zet kha awm ta lo se chuan tunah hian Zomuana nen hun hlimawm tak kan hmang dun der awm silova.

Valentine's Day hlimawm tak ka hmang a ni ringawt alawm!



@######@######@######@

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Eps - 10


Akima birthday kan hman ațangin nihnih bak ala ral lova, khami zan ațang khan Akima pawh ka hmu tawh ngai lo. Kan ina lo kal chu sawiloh, school ah a lo kal ngai bawk silo. Chawlh a lak leh lak loh lah ka hre der bawk silo. Enge a chhan ni ang le? Rin ngaihna ka hre der lo mai.

Chhungkua hi hlim takin a lo awm reng theih hauh loh mai le! Keini chhungkua pawh hlim takin kan awm emaw kan tih laiin, kan naupang ber chu a țhian kawm zir loh vang nge, zu in a ching tih kan hriat meuh chuan ka nu leh pa rilru a na kher mai.

Inchhungkhurah sual a chhuah a, a ruih apiang lahin nu leh pa a vin khur khur reng a, ka hauh nasat poh leh a zualkai emaw tih turin a sual tawlh tawlh a. Ka chhang chiah hi Police a interview naah a tling ve hlauh mai. An post ah a awm nghal bawk nen. Kan lawm hle rualin kan naupang ber awmdan erawh chuan lu a tihai țhin ngei mai.

Ka nu leh pa pawh rilru hah vangin an tar bawih bawih a. Ka nu leh pa hringtu ngei pawh zah nachang reng a hre lo. Kei erawh min hlau ve deuh hlek a, Inchhungah a ang nghek nghek a, kawngkhar a chhuih ri țhuai țhuai a, tun hmaa chhungkua hlim taka kan awm hun lai ka ngaihtuah phei chuan ka nu leh pa ka khawngaih lutuk hi a rukin ka mittui a tlak phah fo țhin.

Ka school kal haw inchhung ka lut chiah chu ka nu leh pa Pawisa a lo dil a, an pek duh loh avangin a lo inhrosa leh nasa mai, "He in hi ka ta a nih hi, in duh leh chhuak rawh u," Ka nu leh pa chu a lo ankhum tawn tawn a.

Ka nu leh pa lah chuan tihngaihna hre lo zetin an lo thlir reng ringawt. "Lalnunsang, i zak nange a, nangmah vang hian kan inchhung pawh a khawloh zawh vek tawh hi. Zahna chang hre ve teh aw, thawhchhuah nei silo hian ka rui e, i ti a, inchhungah i in hrosa chiam chiam ringawt mai. Ka nu leh pa hi zahin hlau ve deuh teh. A zahthlak em mai. Khua pawh kan hawi ngam tawh hleinem," ka ti a.

"Nang kha lo țawng ve suh, ka duh leh ka rui ang, ka thu thu a ni."

"Mamte, i nu leh pa hi min khawngaih lovem ni? Zu in tawh lul suh aw," ka nu chuan a lo ti ve țawk țawk a. Ka pa paw'n hauh chu a duh reng. Mahse a thinrim lutuk in tih loh loh a tih phah a hlauh avangin ngawihah a tlak ta ringawt a. A hauh vek vek chuan a insum thei dawn lo tih ka hre ve vek thova, a ngawi reng pawh chu ka thiam lutuk.

"Pawisa min pe rawh u," a ti leh khur khur a.

"Mamte, i ruih tawh em kha, duhtawk ve tawh la," ka nun a tih chuan, "Lo ngawi hmak rawh,"

Ka pa thinin a tuar ta lova, "I thawhchhuah pakhatmah a awm lova, i u te thawhchhuah vek ani a, i pa ka awm reng chung pawhin min zahna pakhatmah nei lo mai che, hetiang tur hian em ni kan hrin che," ka pa thinrim lutuk chuan a awm a dawm vawng vawng a. A na a chhuak leh tih a hriat reng mai.

Ka lo dawm vat a, "Lalnunsang, engvang mahin pawisa ka pe lovang che, i duh leh i thawhchhuahin rui la, inchhungah hian inhrosak tum tawh bawk hek suh," ka ti ve hmak a.

Thinrim lutuk hian kawngkhar chhir hawn țhuai pahin a chhuak ta nghal a. Ka nu chu mittui tla zawih zawihin a indawm kun ta reng a. Ka pa pawh a thaw kawk kawk mai. Lalnunsanga vanga ka nu leh pa in min damrei pui lo anih vaih chuan ka nau mah nise, ka ngaidam thei angem ka hre lo a ni. Mama hnenah pawh a nau awmdan kan sawi chuan pawi a tiin, tihngaihna a hre bik der lo mai.

"U, chawlh ka neih veleh lo haw ka tum dawn nia," tih ngaihna hre lo zetin phone a kan inbiak chuan a rawn ti a.

"Awle, lo haw ngei ngei tum ang che aw, nang i awm chuan a hlau deuh ang che, ka nu leh pa lah a hlau der bawk silo, kei chu tlemin min la hlau ve deuh a, mahse a ruih tawh chuan engmah a ngaihtuah tawh lo, keipawh min hlau hek lo."

"Anih ka dah phawt ang, kan duty a hun tawh tlat. Nidangah kan inbe leh dawn nia," tiin phone a dah ta a.

Mama lo haw hunah chuan mipa a ni bawk a, a u zawk ta chu tlemin a hlau ve deuh mahna le!

Kan Inchhung thil thleng vanga rilru hahtaka ka awm avangin Zomuana lam reng ka lo ngaihtuah tawh miah lo mai. Mak pawh ka inti, mahse kan inchhung vang hian a lakah pawh ka inthlahrung zo vek tawh. Biak chak hle mah ila, ka be ngam silo. Akima lah a reh hmak a, kan inbe ngai bawk silo, Rinpuii nen kan inbe zeuh zeuh a, ani nen lah kan inhmu khat khawp.

School ban veleh in lam panin ka haw nghal vang vang a, kan inchhung vang hian pawnlam nuam ka ti lova, ka nu leh pa ka ngaihtuah lutuk vangin ka taksa pawhin a tuar ve khawp mai. A tana țawngțaisak bak tihtheih kan nei lo a ni.

"Min van be duh lo ve a," phone ka lak rual chuan ka ti a.

"Ka buai thei em alawm, Akima'n a lo be ngai che em?" Ka ti a.

"Aw, Aizawlah a phei tih i hre miah nange a?"

"Hre nang, chawlh a la tih pawh ka hre hleinem, ka hmu ngai lo ka lo ti deuh reng a, chulam chu ka lo ngaihtuah miah lova," ka ti ve mai a.

"Hlute, engtikah nge kan inhmuh theih ang? Thil hrilh tur che ka nei a,"

"Ka van hre mai lo ve aw...ka nu leh pa hi ka ngaihtuah deuh a, lo leng mai la, i riak nghal daih anga,"

"Nia, a pawi lo viau ang, kan inhmu khat tawh bawk si a."

"Ni e, lo riak rawh, engtiknge ni ang, i office chawlh hunah ni ta se..."

"Nia, Inrinni ah ka lo kal dawn nia."

"Bawihi, lo tlan vat teh?" Ka nu chuan min rawn au a.

"Ka nu'n min au rih tlat, phone ka dah phawt ange, Inrinni chu lo kal ngei ngei ang che, anih Mangțha phawt le."

Phone dahin ka chhuak nghal vat a. "Enge ni a?" Ka pa awmdan ka hmuh chuan hlauhthawnnain ka khat nghal.

"Nu, damdawiin pan mai ang," ka ti nghal sawk sawk.

"Ni e, nangin motor lo va ngaihtuah ta che, a rang thei ang bera damdawiin kan thlen vat a ngai ania," a tih chuan rang lutukin ka tlanchhuak a.

Khua a tlai tawh si a, Motor lah chu a vang phian lehnghal. A rawn tlan zeuh zeuh țhin a. Chung rawn tlante lah chu private motor a ni zel bawk si.

"Hlute, i van mangan hmel ve a?" ka hnunglama aw ri avang chuan ka hahdam nghal suai suai thei.

"Ka pa awmdan a diklo thut a, damdawiin kan pan vat a ngai a ni, motor ka chang a, a vang lutuk."

"Ka lo hruai ang che u," tih pahin inchhungah kan inzui lut vat a.

"Aw haw, nang i ni maw? I lo kal hlauh chu a van tihzia em!" Ka nu'n Zomuana hmel a hmuh chuan a lawm hmel kher mai.

Zo lutuk hian ka pa chu a pawm chhuak nghal a, motor kawngkhar ka lo hawng vat a, kawngkhar ka nu'n a kalh zawh hnuah a hnungah ka pa a țhutpui nghal a, kei a hma seat-ah. Damdawiin pan chuan a tlan ta nghal a.

Kan thlen chuan Doctor leh nurse te an che zung zung na in, ka pa chuan natna awm tawh ngailohna hmunah min kalsan ta der mai. Ka bing mupin ka hria. Chutihlai tak chuan ka thinlung hi huatna hlirin a khat. Lalnunsanga huatna, ka nau ni mahse, ka pa natna hre reng chungin a nundan a sim duh lova. Nu leh pa rilru tina zawng hlirin a khawsa a, atawpah zawng a nunna in a tlin ta ngang lo a ni.

He mihring hi lo haw in, a hmel ka hmuh leh hunah chuan engtinnge ka tih dawn pawh ka hre lo. Nu leh pa hmangaihna pawh nei lo mihring hi ka nau a ni thei ngai lovang.

Ka nu țap hawm hawm chu ka en reng ringawt. Ka țap thei lova, ka thinrim em em ringawt mai a ni.

"Mambawih, ka bulah hian lo țhu teh," ka nu bulah ka țhu ve nghal vat. Tihtur țul ang ang chu Zomuanan a lo tifel vek a, ka pa ruang phurtu tur pawh a lo be fel vek bawk. Mama pawh phone a biain a hrilh nghal bawk a.

"I nau hi ngaidam ang che aw, nakinah chuan a la sim ve mai ang," ka nu chuan mittui tla zawih zawihin a ti a.

"Nu, ka nau chu a ni tehmeuh mai, mahse amah vanga ka pa hi thi ah ka ngai hmiah. Hetiang hian khawsa lo se chu ka pa hian min la dampui ngei ang." Ka ti hmak a.

"Chutiangin an ngai ngai lo, a ât vang a nih hi, i pa vang pawh hian a nun a siamțha mai thei asin," a ti leh a.

Ni e, mihring siamțhat nan khawdur a ngai an ti a, ka pa thihna hian Nunsanga hi kawngdik zawh tir hram se ka ti a ni.

"Kan kal thei e," Zomuana chuan a rawn ti a.

Ka pa ruang chu zuiin Zomuana motorah chuan ka chuang a, YMA information ah an lo au vek tawh a, mahse kawngka kan lo kalh avangin tala vaw chhia in, inchhung an lo singsa vek tawh a, Nunsanga pawh a țhu ngui bar a. Tun atan chuan a hmelah inchhirna a lang thei.

Ka pa hmel pawh a en ngam lo, a mittui a tla lova, mahse a hmel chiang taka hmutu tan chuan hai ruallohvin ka pa boral chu pawi a ti tih a hriat theih a ni.

"Hlute, an be duh che," Zomuana'n ka phone a ken chu min rawn pe a.

"Aw, keimah," tiin phone chu ka chhang a. Akima a lo ni a.

"Hlute, I pa chanchin ka lo hria a, pawi ka ti lutuk. Hei, tunah ka lo tlan mek a nia, lo lungngai reng reng suh,"

"Ka lawm lutuk e," tiin phone ka dah ta a. Akima aw ka hriat chuan ka pa nen an inkawmngeihzia leh a fiam nasat theih zia te ka ngaihtuah chhuak a, ka hnuk a ulh țeuh mai. A lo kal ve tur pawh chu ka lawm rual rualin ka pa min hriatchhuahtirtu a ni si.

"Nu, Akima'n a lo kal mek thu a rawn sawi a," ka nu hnena ka sawi chuan a țap leh ta zawih zawih a.

"Mambawihi pa, Akima a lo kal ve asin, rawn tho la, lo hmuak ta che, tinge i ngawih reng a? A bula awm nuam i tih țhin em kha mawle," a țah hla chham vang chuan ka mittui a lo tla ve zawih zawih.

Rinpuii pawh a lo thleng ve a, "Ka bang chiah a, ka rawn tlan nghal a nih hi," tiin ka bulah a rawn țhu ve a.

Mama a awm bawk silova, Zomuanan mi lo kal apiang a lo chhawn a, ka hmangaih a ni tih ka inhre tawh bawk a, ka lawmna a sang kher mai.

Hmeichhe ho mit a la ngang mai. A pian nalh zet leh a darpharh hlai hlep hlawp te chuan a thawmhnaw hak apiang a inhmehtir zel bawk si. A hmelțha tak mai te chu ennin har ka ti a ni. Thihna vang chu ni lo se, fawh vawng vawng ka chak a ni. Hui ha, pa te boral lai laia, hetiang lam lo ngaihtuah daih te chu, tihchi loh lutuk mai, Zomuana hmelțhat lutuk vang vek a ni.

Tlaivar tura țhalai rawn kal khawm ka hmuh chuan ka ngaihtuahna a la peng ta daih a. Mitthi kan neihin tlaivar a ngaih chuan tlaivar turin ka kal ve fova, kan chunga thleng turah ka lo dah ngai lo. Mahse kan chunga a rawn thlen ve takah chuan țhalaite hlutzia ka hrechiang lehzual.

Akima pawh rawn thleng ve in, kan bulah a rawn țhu ve nghal a. A hmel kan hmuh meuh chuan kan țap bang deuh tawh pawh kan han tharthawh leh rih. Ka nu phei chu a lung a chhe zual kher mai.

"I chau lo ami? I rawn tlanna a thui si a," ka ti vat a.

"Chau lo ve, keini te chu ngaihtuah kan ngai hleinem, saw, makpa interview a nei a ni maw? A tițha khawp alawm, makpa interview ka nei ve hman ta silova," tiin min siai zauh a, ka lo melh lai tak a ni bawk nen, ka chum țaih a. Nuih za si, nui ngam silo hian ka awm a, Pa te boral lai laia nuih vur vur lah mawi bawk silo, a hrehawm duh ngei mai.

Zankhuaa zaiin țhalai te an tlaivar a, ka chhang chiah Mama pawh a lo thleng ve tawh a. Ka pa thihna vang chu ni lo se an puten rawn kal an phal miah lovang.

Lalnunsanga pawh engtiklaiin nge a bo pawh ka hre lo. A awm ve reng emaw ka ti a, pawnah chhuakin ka thlithlai a, kan inbul thim chin leh mi awmlohna laia a țhu chu ka hmu a, ka va pan hnaih chuan lungchhe taka țap ri ka hria a, ka ding chawt mai.

"Ka pa, min ngaidam rawh aw, keimah vang a ni, keimah vang vek a ni, i fapa hi ka lo sual em a ni," a ti mawlh mawlh a.

A bulah zawitein ka va kal a, ka thawm hriain a lo hawi vat. Min hmuh veleh a mittui a hruhul sawk sawk a, a kal nghal daih. Ka thlir zui ringawt.

Chutia ka thlir reng lai chuan ka lam pana mipakhat lo kal chu ka hmu a, a thim si a, ka hmuchiang thei lo na in, Zomuana ang ka ti riau a, a lo hnaih zel chuan ka ring dik. Zomuana a ni ngei e.

"Hetah ilo awm daih a, inchhungah ka hmu silo che a, ka rawn zawng che."

"Nia, ka inthiarfihlim lawk anih hi,"

"Hlute, intipachang hram hram rawh, midang pawhin an tawng ve vek tho asin,"

"Ni e, a dik alawm, mahse ka rilru tina zual tu chu a natna chu thuhran, hlim takin mual liam tal se ka duh ania, a hun tawp lamah hlimna aiin rilru natna nen mual a liam ta hi a ni."

"Ni e, mahse, a eng zawnga thil thlir tum hram hram rawh aw. Min mamawhna apiangah ka awm zel dawn alawm, ka kalsan tawp lovang che."

"Ka lawm e, nang hi awm lo la chuan kan mualpho nasat dan tur hi ngaihtuah pawh ka ngaihtuah ngam lo zawk."

"Chutiang ngaihtuah suh, ka tihtheih a awm a nih phawt chuan ka ti zel mai ang, lungngai reng reng suh," tih pahin a awm nghengin min kuah vawng vawng a. Ka rilru pikna te chu reilote mah nise a kiang huai mai.

"Lut ila, midangin mak min lo ti palh ange," ti leh in inchhungah ka lut ta a. Ani erawh pawnlamah a țhu thung.

A tukah chuan ka pa thlah tura lo kal khawm chu an tam ngei mai, ka beisei phak bak a ni. Thlanmual thlenga zuitu pawh an tam nangiang mai. Mi te zarah mualpho lova kan awm thei hi ka lawm a ni. Ka lungchhiat zawng zawng lawmnaah a chantir tih ang deuhin ka mittui a hul hmak a, khawhar hla an sak te chu ka sa tui em em mai lehnghal a, mittui seng lova ka awm thei chu ka lawm zawk a ni.(A senior thlak in ti hial lo maw?)

Ka pa kan vuiliam hnuah țhenrual țha te kan ina chuangkaiin an titi sap sap hlawm a, rinai takin ka nu pawhin a tuarthiam zawk. Ka pa khan a natna kha kan hriat silohvin alo tuar na em a ni.

Rinpuiin min riahpui a, Akima pawh inriak anga awmin min tihhlim dan ringawt a zawng a, a nuih pawh ka nui nasa teh e. Zomuana pawh țhalai ho ban tawh hnuah reilote la awm hnufualin thingpuite kan in leh a, A mitmei ka veng lutuk chu keimah ka inhrem a ni ringawt alawm le! Akima lah chuan a tilui a ni tih hriat miah siloh hian ngeiawm ni bawk silovin Zomuana chu a kher a kher a, anih loh leh min ngaihzawng cheibawl thul. Zomuana'n min melh leh run run țhin chu ka mitsirin ka hmu leh țhin.

A tawpah chuan a tho ta nulh a, ka en vat a, a lungawi loh hmel kher mai.

"Ka haw tawh mai ange," a ti a. A kal ta nghal a. Pawnah ka zui chhuak vat a. A kiang ka thlen rual rualin a lamah min lo pawt hnai dawrh a, "Kima saw hnaih tawh suh," a ti nghut. A thaw ham ham mai.

"Engvangin nge ka hnaih i phal lohva?" Ka ti ve vat.

"Mipa dang kianga i awm hi ka duh lo a ni,"

"Engvangin? Ani te chu ka țhian ania lawm,"

"Țhian satliah chu a nih ka ring lo. A endan che saw ka hai i ring em ni a?"

Makti zetin ka en a, "Engmaw i sawi kha?"

"Engmah, theihnghilh rawh."

"Theihnghilh rawh a, enge theihnghilh tur awm a?" Ka ti ve ngat.

"Min ngaidam rawh, ka thikthu chhiatvang a ni e, mipa dang kianga i awm ka hmuh hian ka thinrim țhin,"

Zomuana'n Akima a thik anga maw? Mipa dang hrim hrim pawh, haha, nuihzatthlak zawk hian...Ka thinlung neitu zawk a ni tih a inhriatloh vang a nih dawn hi.

"Zomuan..."

"Hmm, tihian awm rih ang, min kuahna a tinghet sauh sauh. A rawn kun hniam deuh a, dim tein ka hmui a rawn fawp de de a. A aia uarin ka lo fawp let vat. Maktih vangin a chawl dat a, mahse a rei lo, duhthawh zetin kan infawp ta tawn tawn a. Kan inthlah meuh chuan kan thaw a chham lo chauh. Chal insiktirin kan inmelh ran a, kan nui dun sak a.

"Va lut tawh rawh, an ngaih a țhalo palh ange, ka thlen veleh ka lo bia ang che,"

"Kal liam phawt la, ka lut ang," ka ti ve tlat a.

Nui suk chunga motor ah lutin a tinung nghal a, a tlan liam ta a. Keipawh inchhungah ka lut ve nghal thuai a.

"Kha i hmuia kha engemaw a kai ania," nui duh miah lova Akima'n a tih chuan ka hmui ka khawih vat a. A nui ta nghek nghek mai.

"Hmela leh! Min tihder a ni maw?" Ka tih chuan midang pawh chu an lo nui ve nasa ngei mai. Ka zak leh lai lutuk chu ka room ah ka tlanlut nghal daih.

"In thiltih i puang a ni ringawt alawm le!" La nui vur vur chung hian Akima chuan ka rooma rawn lut pahin a ti a.

"Khawiahnge Rinpuii?"

"Rinpuii vengtu ka ni em ni?"

"I ni ka ti kher hleinem, i hmu mial em ka ti ania,"

"I hmu em, i ti silova,"

"Ngeiawm pa, chimawm bawk si, chhuak teh, biak tlak loh lutuk mai."

"A biak tlak pawh i hmu silo anih hi." La nui vur vur chunga tiin a chhuak ve ta mai a.

"Enge min hrilh tur i neih chu?" Rinpuii rawn lut mek hnenah chuan ka lo ti nghal tawng mai.


@######@######@######@

[Ngaia]

MY VALENTINE'S

Hk Renthlei

Eps - 11


"Enge hrilh tur che ka nei i tih kha? Tunah min hrilh tawh la," ka room a Rinpuii a lo luh chuan ka lo ti vat a.

"Akima nen hian...." a ngawi dat a, a zam ve deuh a ang khawp mai.

"Enge sawi mai la," ka lo ti vat a.

"Akima nen hian kan induh a," mak pawh ka ti lo, ni se ka duh a thleng chu ka lawmpui em em zawk.

"A van lawmawm ve a, in pahnih hian ni ula, ka lo ti reng asin."

"Khai a, nangmah a duh che tih ka hria alawm, mahse Zomuana nen in ni ta daih si a, a beisei ngam ta lo che aniang."

Akima'n min duh tih an sawi vawihnih ngawt ka hre ta chu mak ka ti kher mai.

"Kei hi Akima'n min duh anga maw? Awihawm loh lutuk anih chu."

"A dik alawm, nangmah hi a hmeichhe duh a sawi țhin kha i ni alawm," a tih leh chuan ka kâ ho ringawt.

"Engpawh nise, ani nen in inkawp chu ka lawmpui lutuk che u ania," ka ti ta ringawt a.

"Ni e, țhian angin kan inkawm vek a, keipawh hetiang lam hian ka en lo hrim hrim, mahse engtiklai ațang khan nge ka hre lo, amah hi ka duh em em ringawt a, ani pawh chutiang ve tho chu alo ni awm e," nui har har chung hian a ti a.

"Kan inhrechiang hlawm bawk a, pasal atan pawh a țha viau ang chu." Tih ve pahin kan nui dun ta hawk hawk a.

Mu turin kan inbuatsaih a, ka pa boral avanga ka lungngaihna pawh Rinpuii te pahnih hian min chawkhlim bawk a, ka nun nguai ruih tur pawh an tizangkhai khawp mai.

Thawh tlai hlau tak chungin kan mu ta a, mahse ka muhil thei lo. Rinpuii muthilh hnuah pawh ka la meng reng mai. Zomuana ka ngaihtuah a, hepa hi ka hmangaih a ni. Ka ngaihtuahna avang chuan ka nui sak a.

He mihring tluka ka taksa tidanglam thei hi ka la tawng lo. Ngaihzawng neih ka tum miah tawh loh laiin Zomuana ka tawng a, ani hian ka chhungrila khawhar rukna awm chu min tihreh sak chiang kher mai.

A kianga ka awma ka marphu rang zaih zaih țhin te, ka thawkdan thlenga a danglam țhinte chu mipa dang kianga ka awm in a thleng ngai der silo. Tleirawl ngaihzawng nei hlim ang maiin a bulah chuan ka zakzum em em lehnghal. A mitmeng de ser sera min han melh țhin te hi ka tuiral lo chauh a ni.

Ka hmangaih ani tih hrilh ka ngam ngang lo, sawichhuak hmasa zawk nih ka duh der lo mai. Eng angin nge min lo ngaih ang tih ka hre silova, min lo hmangaih ve ta si lo se, ka tan a zahthlak mai mai dawn si; min duhna ringawt avang chuan rei kan inkawp thei kher lovang le!

Ka ngaihtuahna ka kawm mawlh mawlh lai chuan ka lo muhil daih chu niin; ni chhuakin ka hmai a chhun sat tak ah chuan ka harh hlawl mai.

Ka kiangah chuan Rinpuii alo mu tawh hauh lo. Thawh ka hai a ni maw? Thawhhma ka tum ve tehreng nen chuan.

Ka tho vat a, keimah chauh ka lo la mu chu niin, midang zawng chu an lo tho vek tawh a, an lo buai mam mam khawp mai. Ka intihfai sawk sawk hnu chuan ka pui ve ta mawlh mawlh hlawm a.

Zomuana pawh zingkarah lo phei velehin a lo buai ve nasa mai. Ka nu pawh a lawm kher mai. Mama pawh nikhat chauh an pu ten chawlh an pek avangin naktuka kal leh nghal turin ticket a la sa a. Ka khawngaih khawp mai. Nunsanga erawh zing ațangin a bo leh hmak tawh. Ka thin a tirim hlur mai a ni.

"Ka u, ka hlawh leh i hlawh kan khawl anga, insak hi er ve teh ang aw..." Maman a tih chuan ka lawm kher mai.

"Ni e, ka rilruah a awm reng a, mahse tihngaihna ka hre silova, i lo sawi hlauh chu a tihzia hle mai. Kan tum dawn nia."

"Engpawh nise, loan pûk te pawh kan dil anga, ka nu pawh kan hrilh dawn nia, a remti tho ang."

"Ni e, i ngaihtuahna chu a țha ka ti lutuk. Insak hi ka rilrukna a rei tawh a, ka pa damlai te khan lo sa thei ila chuan aw..." tukverh lam hawiin ka ngawi ta vang vang a.

Mama pawh a ngawi reng a, kan ngaihtuahna chu thuhmun tho a ni ngei ang le!

Thlannghahni/țhutni a ni bawk a, țhenrual țhate an lo kal khawm leh liam liam a, nilenga zaiin kan inkhat in an awm a, min hnem ngei mai. Ka pa ka ngaih reh lo mahse, a tan a nuam tawh zawk dawn ani tih ka ngaihtuah hial țhin. Dam thlahlel hle mah ila, natna tuara dam reng ai chuan thih a nuam zawk ngei ang le! Mahse, thih erawh chu ka la duh hauh silo.

YMA hun pawh a tawp thleng țhalaite an rawn kal țha kher mai. Kan phu vang a ni hauh silo. YMA hi awm lo ta se, khawhar in kal tur te, thlanlai turte an awm awm der silova. Nu leh pa lah bang bik hek lo.

Mama pawh a hna lama kal a hun tawh avangin loh theih loh vangin a kal ta a, a rilru pawh a hrehawm ve khawp mai. Mahse tihngaihna dang awm hek lo le, khawvel a ni miau si a.

Nunsanga kan naupang ber pawh ka pawh ka pa boral avangin a nundan a sim ang chu tih nakalaiin, sim te chu khawilam, a nasa sauh lehnghal a. Rilru a tihah țhin khawp mai. Ka nu pawhin tihngaihna a hre tawh bik lo. Kan enliam ta rih tawp a. Engtikah emaw chuan ala sim ve mai ka ring a ni.

Ka pa thih ațangin karhnih a liam ta, kan hna ngai țheuh kan thawk a, ka pa boral tawh nen, ka nu chu a khua a har theiin inah lah duh angin ka awmpui hman der silova, ka khawngaih țhin khawp mai.

"Hello," phone lak pahin ka ti a. Akima a lo ni a. A chawlh ala zawh loh avangin Aizawl lamah a phei leh lawk a ni a.

"I ha kha lo tuaihriam ang che aw."

"Engvangin maw?"

"I țhiannu Rinpuii nupuiah neih ka tum a, Rinpuii hrilh hma che in a rukin ka rawn hrilh hmasa che anih hi, nang chu ka best ah pawh best ber i ni si a," ka nui sak ringawt.

"Vel a che, Rinpuii min hrilh hun nghak ve mai ta che," ka ti hlak a.

"Aw, ka hrilh chak che alawm, nangte chu...!" A ngawi dat a.

"Enge kei chu?"

"A, engmah ni love, ka hrilh hmasak che avang hian lawm hle mai teh," a nui hak hak a.

"Phone ațanga min hrilh lovin, hmaichhanah min hrilh thei mai lovem ni?"

"Hmaichhanah chuan ka zam ve deuh a," a la rawn nui hawk hawk a.

"Tenawm mai e a, zamna chhan tur awm lo em mai a!" Tiin ka nui ve hak hak mai.

"Anih ka dah ania," tiin phone a dah ta a. Kan inbiak zawh hnuah pawh ka la nui sang reng mai.

"Eng thil nge i hriat a, i nuih reng le?" Ka nu'n a tih chuan, "Akima leh Rinpuiin inneih an tum a ni awm e," ka ti a, ka nu pawh a lawm ve kher mai.

"Nu, chaw ei min lo siam teh," Nunsanga rui lo haw chuan a ti a.

"Mamte, tinge maw i ruih reng le, i nu hi min khawngaih ve la..." rilru nat hmel zet hian a ti a. Ka lo khawngaih kher mai.

"Ni e, ka nu hi i khawngaih ve lovem ni? Ka pa lah a boral tawh bawk si. Khawngaihin insiamțhat hi tum ve tawh rawh," ka han tih ve chuan thinrim zetin min en a, engmah erawh a sawi lo.

Chaw ei kan siam sak a, ngawi rengin a ei a, a kham veleh ngawi reng bawkin a chhuak leh ta nghal a. A chhuah pahin kawngkhar a khar ri bur mai. Ka nu hmel ka en chuan a mittui a lo tla zawih zawih a, ka kuah vat a, keipawh ka lung a chhe kher mai.

"Nu, i rilru tihrehawm duh suh aw, engtikah emaw chuan ala sim ve mai ang," tiin ka hnem ve mawlh mawlh. A hnemtu zawk pawh hi engteh ual ka ni bik silo.

Zomuana pawh a hna avangin Aizawlah a zin a, ka hmuh loh hlek chuan ka ngai hman em em a, min biak loh hlek chuan keimahah kim lo tlata inhriatna ka nei țhin.

"Hlute, naktukah enge i tih ang? Engemaw sawipui tur che ka nei a," Phone a, Rinpuii țawng chu ka ngaithla a.

"School kan chawl tawh a, inah ka awm ang, tihtur em em pawh ka nei lo."

"Chuti anih chuan ka lo kal dawn nia,"

"Awle, hmuh che pawh ka chak lutuk alawm," tiin phone chu ka dah a.

In chhung ka tifel mawlh mawlh a, mahni tawkah ka buai ve khawp mai. Ka insuk karlakah inchhung ka hawl pah bawk a, ka phone lo ri ve chhen lah chuan ka hna a ti sawt lo kher mai.

"Aw, enge ni ta?"

"Hi, sweety, ka ngai lutuk tawh che, min lo ngai ve em?" thawp sata titu aw ah chuan ka tuiral lo chauh. Min kohdan lah chu nidanga min koh dan nen lah a inang der lo lehnghal. Ka mur sung sung thei alawm le.

"Umm,"

"Umm tih ringawta chhan ka duh lo."

"Anih engtinnge ka chhan chuan ang che."

"Țawngka in sawi ve rawh."

"Ka zak e a,"

"Nula senior..." a sawi zawh hma hma in, "Nula senior ka nih chu ka hai bik lo. Țawngkam ah lah hian in hmang thla zen mai," ka ti hlak a. A nui hawk hawk mai.

"I van duhawm tak, tunah tak hian i kianga awm ka chak. I hmui thlum dep dep kha fawh vawng vawng ka chak," a thusawiin ka taksa a fan dan chu sawi thiam theih pawh a ni lo.

"Ngawi mai teh," ralkhat ațanga a țawngkam pawh hian min tihdanglam theih zia hi a mak zawk.

"I lai vel a ni maw? Lawmawm reuh lutuk mai."

"Engtiknge lo haw i tum a?"

"Lo haw vat se min ti em?"

"Umm, ti tho mai,"

"Oh! ka lo haw vat chu i duh lo a va ang ve!" Ka lai țhin tih a hriat avang hian min chhaih vel lah hi nuam a ti em em lehnghal.

"Umm, i lo haw vat dawn nia," ka chhanna avang chuan a nui leh hawk hawk mai.

"Ka lo haw hunah palai ka rawn tir tawh mai dawn ania, i tello chuan ka awm thei tawh lo," ka thinlung hi lawm vangin a zuang zawkin ka hria.

"Chungte chu ilo haw huna sawi chauh chi a nih chu,"

"Ka lo haw vat ang, naktuk hi ka la awm anga, a tuk lehah ka lo haw ang. Ka lo haw veleha palai tir turin ka pate pawh ka hrilh vek tawh. Anni pawhin min remtihpui thlap ania. Anih hna kan thawk leh lawk ange, ka dah ange."

Phone chu ka en tlawk tlawk ringawt a. Ka ngaihtuahna a vakvel ruai mai. Pasal nei tur hian ka inpeih meuh em? Ka nu leh ka naute avang hian pasal han neih mai chu ka zuam lo deuh a ni.

Tlaia ka nu lo haw hnenah Zomuana thusawi chu ka lo hrilh vat a.

"Nu, Zomuanan ka lo haw veleh palai ka rawn tir dawn a ti a."

"A va lawmawm ve a, min ngaihtuah vangin pasal neih lohte kha i lo tum ringawt ange, nei ngei ngei ang che, i nauten nupui a chhia a țha an la nei ve anga, mo kan neih hunah hrehawm i ti lutuk ang, hmeichhia chu pasal kan neih hi kan mawina a ni asin,"

"Ni khawp mai. Mahse..."

"Mahse...tih a ngai lo. A neih duh phawt che chuan nei ngei ngei ang che, i nau pawn hna a nei ve tawh a, kan hrehawm lutuk nang. I hma ka ngaih vang a nih hi."

"Awle, ka lo inngaihtuah ange," ka ti ta ringawt a.

Ka muthmunah pawh ka ngaihtuahna ka la siam fel hleithei lo. Ka naute hi chu ka ngaihtuah lem lo, mahse ka nu ber hian ka ngaihtuahna a tibuai a ni. Ka nau Nunsanga hi hetiang hian khawsa lo phei se chuan ka ngaihtuah nêp deuh tur!

Zomuana hi ka hmangaih a, reife chu kan inkawp tawh bawk, mahse pasal neih lam ka lo ngaihtuah tel hauh lo. Min duh tih țawngka chuan a sawi fo na in, min hmangaih thu erawh a la sawi hauh lo. Chuvang chu ani mahna pasala neih lam ka lo ngaihtuah hauh loh ni. Ka ngaihtuah ngial pawhin ka huphurh ngawih ngawih.

Tleirawl ât laia pasal neih vat hi a lo fuh ta riauva hriatna ka nei a, senior tawh hnua pasal neih tum chu a huphurhawm ngawih ngawih mai a ni. Rilruah chhungkua a tla na lo thei silova.

Engpawh nise, ngaihtuah vak vakin engmah awmzia a neilo. A nih nih ni tawh mai ang. Zomuana chu ka tan chuan a țha lutuk ringawt. A lehlamah chuan vannei tak ka ni lawi bawk si. Ani te angin min duh ve chu lawm zawk tur ka ni tih pawh ka hai lo. A, engpawh nise, muthilh tum phawt teh ang. Hmangaihte kianga awm tluka hlu a awm hleinem le!

Zing hma takah ka tho a, ka nau Sangtea(Nunsanga) pawh a lo awm ve mial mai. Dawhkan kilin thingpui a lo in a, keipawh ngawi rengin thingpui ka inthlit a, dawhkan ka kil ve a.

Sangtea chuan min melh leh zuk zuk țhin a, ka mitsirin hmu reng mahila, ka hmu lo der tlat thung. A hmelah chuan nuam a ti chiah lo niin ka hria. Tukin chu a inthlahrung ve dûk mai.

Thingpui a in zawh chuan ngawi rengin a chhuak a. Khawiah nge a kal țhin a, enge a tih țhin pawh kan hre lo. A changin zanhnih dawn te a riak bo va, a hnuah a lo haw leh tawp a. A hmel lah chu a zu in vangin a tla ve kawk mai. A hmelțhat ve țhin tehlul nen.

Han hau ve țhin mahila, engahmah a ngai der mai silo. A tawpah phei chuan hauh pawh hau peih tawh lovin kan enliam tawp tawh mai a ni. Inchhung bungrua em a la hralh ve lova, kan vannei zawk a ni e.

Inah tal hian chaw te ei ve se kan ti țhin. Mahse a awmdanah hian a inthlahrung ve deuh nge ni khawi khawiah nge a inhnawh puar lah kan hre der lo mai. Ngaihsak lo pawh min ti ngei ang, mahse kan ngaihsak lutuk, a rukin a kalna tur awm anga kan hriatah chuan kan zawng ru ve fo. Mahse hmuh tur leh tawn tur a awm eih lo mai.

Chaw ei khama tihtur awm ang ang ka tihfel mek laiin Rinpuii pawh a lo thleng ve ta a.

"Lo țhu rawh, ka thiltih lai hi kan zo lawk ange, thingpui hang te kha lo chhuang la, ka hman țep." Ka lo ti vat a.

Sitting room ah ka nu nen țhu in thingpui hang in pahin an titi malh malh a. Keipawh ka tihtur ka zo thuai a, "Thingpui chu min siam kep em?" An bula țhut phei pahin ka ti a.

"Aw, kha lo la ve mai teh,"

"Tikhan lo inkawm ula, ka va muzal teh ang, ka kawng a nuam lo em mai," tih pahin ka nu chu bedroom lam panin a kal ta nghal a.

"Ni e, va mu hahdam daih rawh," ka ti vat a.

"I nau hi a la rui reng ani maw? A mak e, a fel țhin tehlul nen, tinge a sim theih miah loh le! A pawi em mai," Rinpuii chuan a ti vang vang a.

"Ni e, tihngaihna pawh ka hre tawh rih lo. Ka pa boral khan a sim ve mai ang chu ka ti ania, a zual telh telh zawk anih hi. Ka nu hi ka khawngaih zawk."

"Anih chu mawle, Mama kha chu a fel tiraw?"

"Aw, ani chu a ngaihtuahawm loh, a puitling em mai."

"Engtinnge Akima'n a duh che tih i hriatloh theih zawk le?" Thudang daih a rawn sawi chuan ka nui ringawt.

"Khai a, hetiang lamin ka lo en hleinem, rin ngaihna pawh ka hre lo hrim hrim. Vawikhat erawh kha chu ka ringhlel ve hman deuh a, mahse a awmdan pangngai ang tho khan a awm leh si a, ka hresual anih hi ka ti mai."

"Hetiang lamah hi chuan i tlaw ve ngawt mai," nui put put chung hian a ti a.

"Nia, hetiang lam hi ka ngaihsak tawk lo ve em bawk a ni."

"Anih, Akima birthday zana tibuaitu che kha...?"

"Khapa chanchin kha chu sawi lo zawk teh ang. I thil min hrilh tur chu han sawi tawh teh." Ka ti ta daih a

"Nia, Akima nen inneih kan tum a, mak i ti viau lo maw? Hetia Akima nen kan inzui ta daih hi!"

"Ti teh nang, inkawp ula ka lo ti țhin lutuk asin, ka lawmpui teh mai che u ania."

"Țhian atan ka duh che a, nang lo chu hman tur ka hre miah lo ania."

"Khai a, a tihchi loh vang."

"Enge a tihchi lohvang? Ka ring dawn che ania. Tlanchhiat tum duh suh."

"Tlanchhiat ka tum pawh a ni lo, anih engtikahnge in tum deuh a?"

"A ni tur kan la tifel chiah lova, Aizawlah invawn a ngai dawn si a." A tih leh chuan ka nu ka ngaihtuah chhuak zawk mai.

"Ka nu hi engtinnge ka kalsan theih anga, kei chu min hmang lo mai rawh, ka nau lah hetiang hi a dinhmun a ni bawk si. Ka nu lah a damțha bawk silo. Min hrethiam mai la, keimah chuan ka hreh a ni hran lo. Ka dinhmun hi a khirh em asin, engpawh nise, ka nu ka lo be rawn ve phawt anga, ka lo hrilh leh dawn che nia."

"Ni e, i dinhmun chu ka hrethiam lutuk alawm, ka phut luih vang che a ni lo ania, mahse nangmah ngei hian min dinpui la ka duh vang a nia."

"Umm, engpawh nise, ka nu ka lo rawn ve phawt dawn nia, bakah in la tifel chuang lo a ni lawm ni?"

"Tifel chuang nang, mahse ka lo thawt lawk che a nih hi."

"Zanin chu lo riak ve leh mai rawh, naktukah office kal pahin i haw mai dawn nia."

"Chhungte ka hrilh lawk silova, a nuam lo alawm,"

"Tunah phone in kan hrilh mai dawn nia."

"Anih leh le," Ha..ha..! "Thlemsam min ti awm!" A nui rah rah mai.

"Ti teuh lo mai a," ka lo ti ve vat.

Phone in a chhungte kan be nghal a, an lo phal ve mai bawk. Titi pahin chhun hmeh tur kan siam dun a, ka nu mu pawh a rawn tho ve ta a.

"Nu, i zia deuh em?"

"Ka zia tawh khawp mai," Rinpuii en pahin, "Zanin chu riak ve rawh aw," a ti a.

"Ka lo tum alawm."

Thingpui kan in mek lai chuan Sangtea chu a rawn haw ve hlawl mai.

"Sangte, thingpui kan in dawn a, i duh ve angem?"

"Duh lo, ka mu dawn." Tih nghut pahin room-ah a lut ta daih a.



@######@######@######@

[Ngaia]

MY VALENTINE'S

Hk Renthlei

Eps - 12


Zomuana Aizawl kal pawh a reh ta hmak mai. Alo haw nge haw lo pawh ka hre hek lo. Min biak hmasak loh chuan biak ka tum bik der lo mai.

Rinpuii te inneihna turah țhian a țang tura min tihna chu ka nu vangin ka hnial thei hram a, nuam lo chu ka ti kher mai. Mahse Rinpuii pawhin min hrethiam thova, ka lawm khawp mai. An inneihnaah erawh chuan kal hram ka tum ang tiin ka thlah tawp.

"Pasal i neih hunah ka lo kal ve lo ani mai,"

"Pasal neih lam ka rilruah a lut rih lo, ala hla viau ang," fiamthua ka chhanletna chu a nuihpui ar ar a.

"Chu chu thudik anih hram beisei ila,"

Kan sawi mek lai pawh chuan Zomuana thusawi kha ka hre rauh rauh mai.

Zanriah kan eikham hnu reivakloah kan kawngkhar chu an rawn kik ri a, ka va hawn nak chuan Zomuana a lo ding reng mai. Beisei loh lutuk hmu ka nih vang leh a lo haw dawn tih pawh ka hriat loh avangin ka hamhaih atalangin lut tura sawm mai nachang pawh ka hre lo.

"Kha ti khan min thlir reng mai dawn nge min luhtir dawn?" A nuih a zat hmel kher mai.

"Oh, tihpalh, lo lut rawh, ka lo beisei hauh lo che a."

"A hmuhtheih mai e, nge keimah lo midang beisei i nei zawk?"

"Chulam pawh a ni lo, ilo haw dawn tih ka hre silova..."

"Surprise anih hi," a nui vur vur mai. Inchhungah kan inzui lut a, Ka nu leh Rinpuiin an hmuh chuan mak an ti ve kher mai.

Sitting room-a țhu pahin kan titi hlawm a, Rinpuii te innei tur chu a lawmpui ve hmel khawp mai.

"Keini pawh hi ti ve tawh ila a țha ang," a tih chuan Rinpuii chu a lo nui vak a. Ka nu pawh a khi ve suk mai. Keilah ka lo zak em em thung.

"In pahnih hian inneih in tum amaw?" Ka nu'n a tih chuan Zomuana chuan, "Hlutei a inpeih phawt chuan ka duh reng alawm." Fiamthu maia sawi emaw an lo tih kha a fiamthu hauh lo tih ka nu leh Rinpuii chuan an hre ta a. Kei pawhin chuti maia a sawichhuah ka lo ring lo bawk nen, ka hamhaih chiang kher mai.

"A van lawmawm ve, a chi tur anih hi kan lo ti hman tawh asin, chutia nangin nupuia neih i duh anih chuan nei daih rawh," nui har har chung hian Rinpuii chuan a lo ti a. Ka lo melh rum ngang mai.

"Tak taka, ka pi, ka nu leh pa bulah pawh ka sawi tawh a, palai rawn tirh ka tum a, Hlutei lah hian a ngaihtuah che avangin engmahin min chhang duh silova, i phalna ka lak a ngai anih hi."

"A neitu tur berin a tih dan dan ani mai. Kei chuan pasal nei se ka duh alawm, a nauten nupui an nei anga, hrehawm a la ti dawn chauh a ni." Ka nu chuan a lo ti ve vat a.

"Chuti chu palai ka lo tir vat dawn nia."

An țawng mawlh mawlh lai chuan thingpui lum turin ka phei ta daih a. Rinpuiin ka hnungah min lo zui vat.

"Hlute, i vannei dawn e, nei ngei ngei ang che, a hmangaih che tih ka hria a nia."

"Min hmangaih amaw? Awihawm loh a nih chu."

"Ania lawm, Akima in luah zan ațang khan ka hmu thiam vek asin. A duh che piah lamah a hmangaih che tih a lang vek alawm, umm, nang hi chu i tlaw ve lutuk a, i hrethiam leh pek lovang," a nui kar kar a.

"Hah! Ve tak a che! Nang pawh Akima nen inneih tum lo ula chuan keimah ang hi ila ni ve thovang," ka han tih chuan kan nui dun tlawrh tlawrh mai.

"In thingpui lum chu a va so har tawh ve a?" Zomuana'n a rawn ti dut dut a.

"Ka siam zo," tih pahin ka chawi phei nghal a. Rinpuii nen nui hak hak chungin kan inzui phei leh ta a.

"Engtiknge invawn in tum reng reng a?" tiin Zomuana chuan a zawt a.

"Zaninah palai an kal leh anga, naktukah chuan a hriat theih tawh ang, keipawh leave ka dil a hun tawh a ni. Thil inruahman vel a ngai tawh dawn si a. Hlutei min dinpui se ka tih tehlul nen, a thei dawn silova, bakah experience atan pawh," nui sanga min melh ralh pah hian a ti kher a.

"Khati'n min melh kher suh aw, ka dinpui che chuan mi mit ka la daih zawk anga, inneih niah i tum bur mai tur ania," nui var var pahin ka ti ve hlak a. Zomuana pawh a nui ve suk suk mai.

"Ka mutsan mai ang che u, tunlai chu ka taksa hi a chaklo zual em mai," tiin ka nu chuan room a pan ta nghal a.

Keini ho chu kan la titi liam liam a, a tawpah chuan Zomuana chu a rawn ding chhuak ta hlawl a. "A tlai tawh khawp mai, ka haw tawh ange," a ti a.

"A la hma alawm le," ka lo ti vat a.

"Anih chuan kan inneih vat a ngai anih chu." Tih pahin kawngkhar lam a pan a.

Chhang lovin ka nui tawp a, ka zui ve ta ringawt. Kawngkhar kan pel chiah tihah a lamah min pawt dawrh a, ka petek nawk mai. Min vuan nghet viau lo se chu ka tlu chiang viau ang.

A awm nghengin min kuah hlu hlu a, ka chhipah a lu nghatin a thaw ham ham a, "Hetiang hian awm reng thei ila."

Talchhuah tuma ka taksa ka tihchet chuan, "Reilote tihian awm lawk ang, i kianga awm a, hetia tih hi ka châkna a rei tawh lutuk." A tih chuan talchhuah ka tum tawh bik lo.

A hmuiin ka hmui a rawn zawng a, ka khabe ah min kuai dak a. "Ka hmuh loh che a, hrehawm ka tihzia hi, ka ngai lutuk che."

A țawngkam chuan min ti tuiral lo chauh. Ka kaiza tha te hi a zawi vek theiin ka hria. Reivaklo chhung chu duhthawh zetin kan infawp tawn tawn a. Kan inthlah meuh chuan kan thaw a chham dawn emaw tih mai turin kan thaw dun halh halh mai.

Reilote emaw kan tih chhungin a lo tlai leh duai tawh mai. "Ka va haw phawt ange, inneih lam chu lo ngaihtuah ang che. Naktuk lamah ka nu leh pa ka sawipui anga, An remti ngei bawk ang."

"Ka lo inngaihtuah dawn nia,"

"Anih muttui aw," tih pahin min fawp leh vang vang a. A kal ta chu ka ruak huaiin ka hria. Inchhung lam panin ka lut ta hnak hnak a. Ka thinlung a kalpui ta hial emaw tih tur khawpin a kal ta chu ka ngui rawih mai.

Zomuana nen chuan tibuaitu awm miah lovin hun rei fe chu kan inngaizawng ve ta. Kan inkarah inhriatthiamlohna tih ang reng vel hi a awm ve lo.

Rinpuii pawh chawlh a la a, keipawh an inneiha kal turin min phut bawk a, kalsak ve ngei chu ka tum a. Sangtea pawh tunlai chu a nun pawh a zawi deuh a, ka nu nen kan lawm kher mai. Chuti anih chuan inneihnaah pawh ka kal theih ka ring hial a ni.

Zomuana sawi ang chiah khan palai hmel an lo lang ta. Ka nau Mama pawh phone in kan hrilh a, a lawm ve hmel khawp mai. Kan rel ang ang a pawm thu sawiin, chawlh dil a tum thu a rawn sawi ve luam mai. Kan inneih ni tur leh a hunte an peih fel nghal vek bawk.

Rinpuii Aizawl haw tur chu an inah Zomuana nen kan thlah a, a hlim hmel khawp mai. Ka lawmpui rual rualin ka lung a leng lawk kher mai.

"Rinpui, kan school kal lai vel ka ngaihtuah chhuah chang hian ka lung leng țhin. Tihian inneih chu in tum ve ta mai chu a ni si a."

"Ni e tiraw, keipawh ka ngaihtuah let chang hian ka lung a leng țhin."

"In lunglenna aho em mai. I duh ber i nei tawh dawn a, a lawmawm daih zawk alawm. Keipawh hi neih thuai thuai ka duh asin," Zomuana chuan a lo ti hluk a.

"I duh reng ang chu, nangpawh tlangval senior i ni ve tawh tho si alawm le!" Rinpuiin nui har har chunga a tih chuan ka lo nui ve hawk hawk mai. Zomuana erawh a lo ner nawng thung.

Reife chu fiamthu leh thutak chawhpawlhin kan titi a. A tawpa tawpah chuan, "Kan haw tawh mai ange, hei a tlai mai dawn, naktukah tluang takin i kal dawn nia," tiin kan thlah ta a.

Pawn thleng kan inzui chhuak a, Zomuana bike ah chuangin inneih nia inhmu tura intiam chungin kan tlanchhuahsan ta nghal a.

Kan in kan pan mai dawn emaw ka tihlaiin, ani lo lamah min tlanpui ta daih a. "Khawiahnge min kalpui dawn?" Ka ti chul mai.

"Bengchheng suh, miin i duh lo chung ka hruailuiah che an ngai mai tur ania," a tih chuan ka ngawi ta hmak a.

Hmun thengthaw nuam zet mai kan thlen chuan ka hawi kual a, vanlam ka han thlir a, arsi an pe tuar mai. Thla lah chu a eng em em lehnghal a. Current vangin thla en leh en loh pawh ka lo hre miah lo a nia, tlang dung te chu a lang ruih mai a, zan thla eng hnuaiah chuan a lang nalh kher mai.

"A van mawi em!" tih halh pahin Zomuana chu ka en a, ani lah chuan ngawi rengin min lo thlir reng chu niin; ka sen ap ap a.

"Ka mitah chuan i mawi daih zawk," tih pahin a lamah min pawt hnai a, a awm nghengin min kuah ta vawng vawng a. A thinphu ri dup dup chu ka bengin a hrechiang kher mai.

Keipawh ka dang chuang lo. Kan thinphu chu a inthumrawn dawt dawt in ka hria. Pialtlêp țhutna nuam zet maiah chuan a țhu a, a kapkara min țhuttir chungin min kuah a. Kan taksa chu a insi ran mai a, ka thinphu dat dat zawnah chuan a kut a dah a, ka darah a khabe nghatin hmalam thui tak chu kan thlir dun a.

"Nang nena hetia awm tluka duh leh thlakhlelh hi ka nei lo, hrilh che ka duhna a rei tawh, mahse hun fal ka hmu thei silova; Hlute, ka hmangaih che, ka hmuh hmasak ber ațang che khan ka duh tawh che," a aw thum deuh chuan a ti sup a.

"Engmaw i sawi kha?" Ka hresual emaw tiin ka zawt nawn leh ngat a.

"Ka hmangaih che, tlem te tal paw'n min hmangaih ve em?" A ti leh sup a.

"Ka hmangaih che alawm, min hmangaih hi ka ring pha lo a ni. Min duh ringawtah ka lo ngai a," ka tih meuh chuan kan hmui a intawng nghal chat. Thawchham lek leka kan infawh hnu chuan kan innuih sak a.

"Min hmangaih avangin ka lawm e, min lo hmangaih ve lovang tih hlauhna vangin ka lungphu te hi a kal dik lo vekin ka hre hial asin." Ka nui hak a.

Reife kan țhut hnu chuan in lam panin kan haw leh ta a.

In ka thlen a, ka khuma ka muthnuah pawh Zomuana nena kan hun hman dun ka ngaihtuah atalangin muhil thei lovin ka let sek a. Kei hian ka hmangaihthu ka sawichhuak a, ka thawl huaiin ka hria.

Zingah phone ri vangin ka harh zawk a. "Umm," mut chhuak tak ham bai bai chungin ka chhang a.

"Ila mu elo, hei kan chhuak dawn chiah a, ka rawn hrilh che anih hi. Kan thlenah ka rawn hrilh leh dawn che nia." Tiin phone a dah ta a.

Ham bai bai chunga thovin intihfai turin bathroom ka pan ta nghal a. Ka beisei loh leh rinloh lutukin Sangtea'n rawng a lo bawl ka hmuh chuan ka hnuk a ulh hial mai. Kha chen zu vanga a buai hnuah hetiang hian a fel leh ang tih tunge ring ang ni?

"Rawng i bawl ani maw? I van fel ve a." Ka ti hlut a.

Rang zetin a rawn hawi phei a, a nui suk mai. Hmana ka nau kha ka hmu let leh chu lawm vangin ka thinlung hi a zuang dawrh lo chauh a ni.

Ka țhutna bula lo pheiin ka kutah a vuan a, "U, ka awmdan diklo tak avang khan min ngaidam ang che aw..ka pa kha keimah vanga thi ah ka ngai a, zu in loh ka tum ve ngar ngar a, mahse ka pa ka ngaihtuahnaah a rawn lut zel a, ka thinlung tawt lutuk a reh beiseiin ka in ta vak vak a, mahse awmzia reng a nei lo. Ka nu ka ngaihtuah leh a, ka awmdan hi ka sim loh chuan ka pa ang khan ka nu pawh hi ka chân mai ka hlau ta a ni. Mahni inthiamlohnain ka khat a, hrehawm ka ti lutuk asin, min ngaidam ang che." a tih chuan mittui tla pur chungin kan inkuah dun a.

Hnunglama insut ri hraih kan hriat chuan kan en dun vat a. Ka nu chu lawm avangin a mittui a lo tla ve zawih zawih mai. Kan chhungkua a hlimna thar rawn thleng chu Pathian hnenah lawmthu sawiin ka nu chuan țawngțaina a nei ta nghal a.

Ka nu hmel chu hmuh theihin a țha sawt sawt a. Sangtea vanga a rilru hahna ten an kiansan ve ta bawk nen.

Chaw ei laia ka phone rawn rik chuan ka la vat a, Hlutei call a lo ni a. "Hello, khawilainge in thlen tawh a?" ka han ti zang vah a.

"Hlutei a ni em?" A aw chu ka hriat ngai a ni miah lo mai. Ngaihțhatlohna ka nei nghal a. Tinge midang daihin Hlutei phone ațanga min rawn biak le!

"Aw, ni e, enge ni ta?"

"Call hnuhnung ber kan en ațangin nangmah hi a biak hnunhnun ber ini si a, kan rawn call tawp che. He phone neitu chuanna sumo hian tunah accident a tawk a, thi an awm nual a, he phone neitu pawh hi a boral zingah a tel ve..." a ti chauh va.

"A ni thei lo, ka duh thei lo. Rinpui, enge thil awmzia ni ngai. Ka phal thei lo. Tinge min kalsan tak? Engtinnge Akima a awm anga?" Ka phone chu ka nauvin min lo laksak vat a, an inbiakna pawh engmah ka hre tawh lo. Ka pik mup mup a, ka â vekin ka hria.

Ka phone a lo rik leh pawh chuan ka nauvin a lo la zel a, "U, an be duh che," tih pahin phone chu min pe a.

"Umm,"

"Hlute, a van mak ve, ka awih thei lo. Thudik a ni lo tiraw? Engtinnge Rinpuii hian min kalsan theih!" Akima insut ri ka hriat meuh chuan ka insum zo ta lo. Chhuak zet hian ka țap ta hawm hawm a. Kan pathum hian inthlah miah lovin school kan kal chhung zawng kan inkawm a, tunhnua kan han inhmuh khawm leh ațang hian kan inpawh leh zual chauh a nia. Akima tan pawh a nupui mai tur ni mahse, a țhian, kan pahniha kan țhian ințawm a ni si.

"Ka rawn kal dawn," tih pahin ka phone chu ka off nghal a.

Zomuana pawhin a hriat veleh rang lutukin kan inah a rawn tlan phei a. Bike keng lovin motor a rawn keng a.
"I thawmhnaw ken tur han siam la, kan kal dawn nia," a tih chuan ka en ho ringawt. Rang lutukin ka room ah a lut a, bag ah ka thawmhnaw a duh ang ang a hnawh tawp tawp a ni ngei ang, a rawn khaichhuak a.

Ka pa thih pawh khan hetiang hian ka awm silova, accident a nih vangin a mi den dan a dang a ni mai thei a ni.

"Ka pi, Hlutei chu ka hruai ange, lo ngaihtuah lutuk suh ang che. Ka awm alawm, Sangte, i nu kha lo enkawl țha ang che aw..." a tih chuan Sangtea pawh chu a bu nghut mai.

Pawnah min kaichhuak nghal dawr dawr a, a motor kawngkhar hawngin passenger seat ah min țhuttir hnu chuan amah pawh driver seat ah țhu in, a tlanchhuak ta nghal a.

Ngawi rengin kan tlan mawp mawp a. An chetsualna hmun pawh zawhna chang reng ka hre tawh lo. Zomuana'n a hre em ang chu maw!

Eitur leia a ding zawk tih loh chu kan tlan leh char char a. "Khawilaiahnge an chetsual? Zawhna chang ka lo hre miah lova," ka ti chhuak phawng a.

"Thenzawl thlen hma in, tunah chuan Thenzawl damdawiinah an la dah rih," a tih chuan ka mittui a hnam sawk. Dawmhlumtu pawh nei lova, a boral chu ka lainat kher mai. Nizan te khan hlim taka inkawmin, hetiang dinhmun hi a ding ang tih rinngaihna reng kan hre silova. Tukin lamah nise, a kal dawn țepah min la rawn be hram te kha ania. Kha kha a aw ka hriat tawpna ber a ni ang tih rinngaihna reng ka hre silo.

Kan thlen meuh chuan Rinpuii chhungte ho pawh an lo thleng ve nghal a, kan han țap leh hawm hawm hlawm mai. Tihngaihna awm der silo. Akima hmel ka hmuh chuan ka lungchhiat a zual a, kan pahniha inkuah chungin kan țap dun ngar ngar mai. Mipa zawk a nihna angin a inti paukhauh hram hram a, a hmelah erawh a rilru natzia a lang thei hial a ni.

Zomuana pawh kan bulah a rawn kal ve a, "Kima, ka tawrhpui kher mai che. Nizan te khan hetiang hi a thleng ang tih rinngaihna kan hre der silo. A pawi tih bak chu sawi tur ka hre bik lo a ni."

"Ni e, a pawi a nih ber hi."

Aizawl panpui tur chuan kan inpeih ta a, Akima chu kan motor kenah chuang ve in, Aizawl lam pan chuan kan inzui ta diah diah a. Rinpuii nu leh pa, a unaute ho chu an țap nasa ngei mai. Chhungte tan chuan a nat dan tur ka hriatthiampui kher mai.

Rinpuii te inkawt kan thlen chuan inchhunga awm te chu kan thleng tih hriain, an lo chhuak sap sap a. Accident a tawk tih hria an lo tam tawh bawk a, mi an lo tam hman kher mai.

Rinpuii hun hnuhnung chuan lung a tiawi lo kher mai. Akima paw'n a tuar hle a ni tih a hriat hliah hliah a. A hmel pawh a tla ve dâwk mai.

Zankhuaa tlaivar a nih hnuah a tukah Rinpuii chu thlahliam a ni ta. Ka țhian neihchhun, ka unau ang maia ka enin mual min liamsan chu nâ ka tiin, awmngaihna ka hre lo a ni. Ka kiangah Zomuana awm rengin, englaimahin min kalsan lo tih theih a ni. A mitmenga min khawngaihna lang chhuak chung hian min en vang vang a, kan inkawm ngeihzia hretu a nih ve avangin min tawrhpui ve em em mai a ni.

Rinpuii thih ațanga karkhat hnuah Lunglei lam panin kan haw ve ta hram a, Rinpuii nu leh pa te chuan min chelh ve nasa hle na in, haw lo thei lo kan nih avangin, nidanga kal leh intiam chungin kan hawsan ta a. Rilru a pik duh kher mai.



@######@######@######@

[Ngaia]

MY VALENTINE'S

Hk Renthlei

Eps - 13



Rinpuii boral hnuah thla khat a liam leh tawh a. Kan inneih hun lah a hnai tial tial si. Ka huphurh ngawih ngawih mai, Hmangaih ber neih dawn te chuan hlim awm tak ka ni a, mahse hlim harsa ka ti a ni. Rinpuii awm ve se, tih ringawt hian ka ngaihtuahna a luah khat a. Rinpuii nena kan sulhnu tam tak ka hmuh țhin hian ka lung a leng țhinin ka ngai thei lutuk.

Zomuana nen kan inneih ni a thlen nan karhnih chiah hun a awm ta, helama ka rilru ka pek loh chuan Zomuana ka tihlunghnur ka hlau bawk si. Lehlamah min kamrittu a awm bawk si. Ka nun hi a van hahthlak tak em! Hetiang ringawt chuan ka â thei mai ang.

Kan inneihna tur vel buaipuia hun ka hman takah chuan ka rilru tlemin a lo zangkhai ve ta deuh va. Ka ngaihtuahna insawrbing lutuk tur min chhanhimtu a ni ringawt alawm.

Ka nau Mama pawh kan inneihna hun hmang tura chawlh a dil angin a rawn haw ve ta a. Ka nu pawh a hlim kher mai. Sangtea lah a nungchang țha lo a thlah ta hmak bawk nen. Kan chhungkua chu ka pa awmloh hnua kan hlim lehna hmasa ber a ni hial awm e.

Zomuana lah a hnaah a buai ve theih em avangin duh ang pawhin kan inhmu zing thei lova. Kan inneih hmaa a hna zualpui tihzawh hman a duh avangin thawh pawh a thawk rim narawh e.

Engkim peihfel vek ni tawh mahse, a duh uluk em avangin tihsual palh awm thei tur leh hmaih palh awm thei tur zawng zawng a enfel leh vek a. Keiphei chuan engmah ka ti ve lo. A kutah ka dah hmiah a, anin a lo buaipui vek mai a ni.

Ka nu nen pawh ka ken tur kan buaipui a, kan chhungkua hi ka bulh ve em avang hian tumah han pur tur chhungte kan nei lem lo. Mama hlawh leh ka hlawh bakah, Mama'n GP puk a dil kha a a hmu hlauh bawk a, chu chuan kan mamawh zawng zawng deuh thaw a phuhruk a, ka lawm kher mai.

Kan inneih nan karkhat ala awm tihah Zomuana pawh a hna zualpui a tifel tawh bawk nen, kan inah a rawn leng a. Inah kan chhungkua te in kan lo awm țhap a. Mama nen pawh an inkawmngeih hmel khawp mai.

"Inneih hma in picnic lawk ila," tia a rawt dek dek chu Mama leh Sangtea phur zawng tak mai a lo ni a.

"Khawiah nge kan picnic anga?" Sangtea chuan a lo ti vat.

"JB Resort ah. In duh angem?"

"Yes, lutuk ringawt. Ka chak tawh hle mai. Engtikniah nge ni anga?" Sangtea chuan a lo ti leh a.

"Kan kal dawn nia, in duh hun hunah a ni mai. Nuam in ti viau ang." Zomuana'n a tih leh chuan an hlim ngei mai.

Picnic ni an ruatah chuan kal turin kan inbuatsaih nasa hle a. Kan chhungkua leh Zomuana te chhungkua kan ni mai a, Zomuana te motor pahnihah kan leng vek bawk a, Chaw eikhamah chhuakin JB Resort kan pan ta a.

Kan thlen chuan nuam kan ti hlawm kher mai. Chhungkuaa insiam mai tur kan ni bawk a, Zomuana nu leh ka nu pawh an inkawmngeih khawp mai. Ka pa awm ve se, a hlim ve tur zia ka ngaihtuah a, ka ngui rawih mai. Rinpuii thlengin ka ngaihtuah a.

"Enge i ngaihtuah leh tak vung vung a? Rinpuii boral ațang hian mahnia inngaihtuah veng veng i ching thar riau mai." Rawn titu Zomuana avang chuan ka ngaihtuahna ata ka harh zawk mai.

"Ka pa leh Rinpuii ka lo ngaihtuah a, aw ve se nuam an ti ve dawn em alawm."

"Ni khawp mai. Mahse thil kal tawh hnu ngaihtuah vak vak hian engmah min thlen lo a nia."

"Ni e, ngaihtuah tawh loh ka tum pawhin harsa ka ti leh țhin. A la reh ve mai ang."

"Nuam i ti em?" Thudangah a pakai ta daih a.

"Nuam khawp mai. Kal leh fo chi anih hi. Chhungkaw picnic naa ka vawikhat kalna," ka tih chuan a nui hawk hawk a.

"Keini chu kan picnic fo țhin asin."

"Kan dinhmunin a zir loh bakah kan hman lo em alawm, Țhian ho picnic naah pawh ka tel ngai chuang lo."

"Chuti anih nuam deuha hun hman i ngai anih chu. Tirawh, tui cheng ang, i thiam em?"

"Teuh lo mai a, ka ngam lo." Ka tih chuan a nui leh vur vur a.

"Min nuihzat viau suh aw...! Tui cheng turin hun ka nei hleinem." Ka ti hmak a.

"Lo kal rawh, ka zirtir ang che," tih pahin swimming pool nawm hmel zet lampan chuan min kai hlawk hlawk a.

"Tuichen thawmhnaw pawh ka nei lo," chhuanlam ka zawg țang țang a.

"Tikhan min lo nghak la, tuichenna tur thawmhnaw ka lo la ange. Lo kal sawn miah suh. Anih loh chuan....!" Tih pahin a kal nghal nal nal.

Reiloteah a rawn let leh nghal a. Bikini a rawn lak chu hak ka han tum a, "Hetiang hi ka ha duh teuh lo mai, ka zak e a!"

"A zahthlak loh. Ha mai mai teh, tuichhungah i awm daih dawn alawm mawle," a tih leh chuan tuilo chung chungin ka ha ve ta hram a. Ka inpawt ka inpawt mai chu min nuih min nuih lehnghal.

"Engemaw i inpawh sek le? Țha tak khan awm mai mai teh," ka beng bulah a rawn kun hniam a, zawi sap hian, "I nalh lutuk, hmangaihna chenpui che ka chak kher mai," enge a sawi awmzia ka ngaihtuah chian hmain tuiah a dive nghal daih a. Ka en zui ringawt.

"Lo kal rawh le, ka lo zirtir ang che, thil zir thiam tak i nih leh nih loh en ang hmiang," nui ruh ruh chungin a ti a.

Tuiah chuan muangchangin ka lut a, Zomuana'n min lo chelh vat a, tuichen ka zir chu ka thiam lawk thei silo nen, ka nui nasa ngei mai. A tawpah chuan ka thiam ve ta mai a, nuam pawh ka ti ve ta khawp mai.

"I thiam chak kher mai. Thildang zir pawh i thiam vat ngei ang," awmze nei zet hian a ti a. A nui ruh ruh bawk. Ka lo melh nghek thung.

Ka nu leh Zomuana nu leh pa ten rawng an bawl a. Tui kan chen zawh chuan an rawngbawl pui turin kan kal ve tak na in, puih ngai lovin an lo zo duak tawh mai.

"Lo va inkawm leh rawh u, kan zo tawh alawm," an tih chuan hmundangah kan kal sawn leh ta nge nge a.

"Chaw kan ei tawh mai dawn em ni? Kan tlai lutuk chuan a chi lohvang," Zomuana nu'n min rawn auh chuan kan chhukthla ve ta vat a. Kan han in au khawm a, chaw kan ei ta nghal a. An siam tuiin ka ei hnem kher mai.

Kan ei zawh hnu reivak lovah chuan haw zai kan rel ta a. Nuam kan ti tlang bawk aniang, kan haw lam pawh kan ri chul hlawm mai.

"Ka haw tlang phawt anga, zanlamah ka lo kal dawn nia," tiin Zomuana chuan kan inkawtah min chhuktir a. Inchhung panin kan lut ta dial a.

"Vawiin chu a nuam kher mai," Mama chuan a ti a.

"Ni e, a nuam tak tak a ni, ka kal leh chak khawp mai. Remchangah u Zomuana hnenah sawi leh ila a țha ang," Sangtea pawh chuan a lo ti ve vat a.

"Khai a, a inthlahrunawm alawm le! Anmahni vekin an tum si a, kan kal leh te chuan an hek lutuk dawn asin." Ka nu'n a lo ti ve vat thung a.

"An hausa alawm, keini pawh a u te pahnihin hlawh an nei ve thova, kan kal leh thei thovang chu!" Sangtea chuan a ti leh a.

"Ni e, țha takin hna te han thawk vela, keini pawhin sum te kan khawl anga, kan la kal leh dawn nia," Mama chuan a lo ti ve vat.

"Nu, i chau viau lo maw?" Ka ti a.

"Chau lo ve, engmah ka ti ve hleinem, Zomuana nu leh pa kha an fel bawk a, min awl char char alawm," tih pahin a nui var var. Keipawh room panin ka kal nghal thuai a.

Ka phone ri ah chuan ka la vat a, ka han en chu Akima a lo ni a, Khai a, Akima lam ka lo theihnghilh hmak alawm le!

"Hello!"

"Hlute, min theihnghilh tawh a ni maw?" A aw chu nidang a ang lo tawp.

"Theihnghilh lo ve, i aw chu tinge a?"

"Engtinnge ka aw chu a awm a?" A ti leh a.

"Ruih nei i va ang ve?"

"Umm, i ring dik, ka rui alawm, ka rilru hi a na lutuk."

"Tinge khatianga i awm a?"

"Ni e, ka hmangaih ber nangin pasal min neihsan dawn a, ka nupui hual lah accident vangin ka chân leh bawk a. Ka nun hi a hrehawm asin." Sawi tur hre lovin ka ngawi reng a. Akima'n min hmangaih tih a țawngkama a sawi vawikhatna a ni. Ka thaw halh a. Chhanngaihna ka hre lo kher mai.

"I rui a nih kha," ka ti ringawt.

"Ni e, ka rui alawm, ka rilru nâ chhawk nan zu ka in a nih hi." A ti mai a.

"Engtikațangin?"

"Rinpuii thih hnu min hawsan ațang khan."

Rinpuii thih avangin a hna pawh Aizawl lamah an transfer kha a ni a, engtinnge a khawsak zel ka hre chhunzawm tawh lova, phone lah ka phone tawh ngai bawk hek lo. Hnem tu tur chu ka ni ve asin mawle, mahse min duh tih ka hriat ațang khan biak nuam ka ti tawh lo a ni. A rilru ka tihnat belhchhah mai mai dawn si a.

"Rinpuii boral chu i tuar ang tih ka hria alawm, mahse zu in phah kher tur a ni lo asin, zu hian rilru natna a chhawk thei lo, chhâwk ahnekin a tizual zawk."

"I ti dik khawp mai. Mahse chatthla hmak khawpa ka ruih hian ka tan chuan a zia asin, ka ngaihtuahna a chawl vek țhin. Mahse zanin chu ka ngai lutuk che a, min biak i tum tawh bawk silova, ka rawn be tawp che anih hi."

"Khawngaihin in tawh suh, i tan a țha lo ania."

"Min lo ngai ve țhin em?" Chhan ngaihna hre lovin ka ngawi reng a.

"Ka hrethiam e, nang chuan min ngai ve tawh lo anih hi, ni e, nang chu pasal nei mai tur i ni tawh alawm, kei te chu min hre reng tawh nang, mahse maw, Hlute, ka hmangaih che tih tal hi chu lo hre ve reng ang che aw..." phone a dah nghal daih a.

Thaw halh chungin ka phone chu ka en ringawt. Akima ka ngaihtuahin ka khawngaih bawk si, mahse țhian ang bakin ka en thei silo. A rilru tihnat ka duh lo asin le! Țhian angin awm dun reng thei zawk ila a țha mai tur...

Ka phone rawn ri leh thutah chuan ka ngaihtuahna ațangin ka harh zawk a, "Hello,"

"Zanin kha ka hman lo tlat. Naktukah khawiah emaw hruai che ka duh ania, ka rawn lam ang che, lo inpeih har suh ang che aw." A tih chuan ka thaw huai mai. "Awle, a pawi hleinem."

"I bula awm a, kuah che a fawh vawng vawng che ka chak lutuk," a rawn tih leh chuan ka nui hak.

"Nui suh, ka châk tak tak ania. I taksa nalh zet kha kan inneih hunah chuan ka ta a ni tawh dawn si a. Min hrem rei tawh mah mah lo maw? Ka nghakhlel takzet a nia." A țawngkam avang chuan ka lungphu a rang a, ka mur er er mai.

"Ka hrem che tih pawh ka lo hre miah lova."

"Kan inneih zanah i châk lo vang mawle!" Tih pahin a nui ri hak a. Min hmu thei lo tih hre tho mahila, ka zak chu ka sen ap ap tho.

"Anih ka dah ange, tihtur pawimawh deuh ka nei thut alawm mawle, ka hmangaih che, muttui phawt le." Phone en chungin ka nui var var mai.

Mahse ka nui rei lo kher mai. Akima bawkin ka ngaihtuahna a luah a, engtia tihchi nge maw ni dawn le? Hmaichhanah hmu in hrilhfiah thei ila chuan a zia deuh mai thei a ni. Chu pawh ka ring chiah lo bawk si. Rilru a van tihah tak em!

Zomuana'n bike in min rawn lam a, kan chhuak dun ta a, enge kan tihtur engmah a sawi lo, a khalh mawp mawp a, keilah a hnungah beiin ngawi rengin ka ngaihtuahna ka kawm a.

"Sweety, enge i ngaihtuah a, ka biakna reng i chhan theih lohva?" A rawn tih chuan ka harh kawk mai. Kan kal tumna kan thleng tawh a ni ngei ang, a bike pawh a lo tithi tawh a lo ni a. Kei hi engemaw ka hriat a, inngaihtuah veng veng ka chin tak tlat ni.

"Ka tihpalh lutuk, thildangin ka rilru a luah hneh deuh hlek a ni," ka ti sep a.

"Min hrilh ve la, ka pui thei mai thei che asin."

"A, engmah a ni love, Rinpuii thih ațang khan hetia mahni inngaihtuah veng veng hi ka hrat ta riau va, enge a chhan pawh ka hre lo. Kan kalna tur kan thleng tawh em ni?" Ka ti nghal zat a.

"Umm, thleng tawh e. Engpawh nise, i rilru tibuaitu chu i inpeih hun hunah min hrilh turin ka lo nghak reng ange."

Kan dinna bul vel chu ka en kual a, in pakhat nalh zet mai hi a lo ding a, a sak dan lah chu a hmanlai ang reng hle na in, a nalh kher mai.

"Hei hi tu in nge?" Ka ti halh a.

"Kan honeymoon hmanna tur a nih hi. Kan in." Tih pahin inchhung lam panin min kai lut ta a.

A pawnlam landan aiin a chhunglam chu a lang nalh lehzual kher mai. Ka thaw ham ham a, in nalh zet zet chu ka hmu ve nual tawh a, Akima in luah pawh kha a nalh hle na in, hei zet hi chu Akima inluah pawh khan a tluk lo a ni. Hawina lam apiangah mittlaina tur ka hmu a. Inchung panna step te chu duhthusama nalh leh mawi a ni.

"I duhzawng a ni em?" A rawn tih chuan ka thaw huai a.

"Umm, a nalh lutuk ringawt. Hei hi kan in tur maw?" Ka ti hliai a. Ka hlim hmel a hmuh meuh chuan a nui ve var var mai.

"Aw ni e, kan in tur anih hi. I duhzawng a ni chu ka lawm kher mai." Tih pahin min rawn pan hnai a, kan hmui a inzawng dun nghal chat. Engmah ngaihtuah hman lek lovin kan infawp mawlh mawlh a. Kan lungphu ri dup dup bak thawm dang hriattur reng a awm lo.

Engtiklaiinnge ka kawr hak a inphelh hman pawh ka hre lo. A ni pawhin a kawr alo phelh vek tawh. Sofa ah min mut riai riai a, ka chungah bawkin kan taksa lawng innawk vel vang chuan kan thaw dun ham ham a. Thaw halh halh chungin ka taksa chu a chul kual ruai a, ka hnute hmur a ka sa ham hamin a rawn fawh meuh chuan nuam tih vangin ka eu zawk mai. Ka khur der der a. Ani pawh a thawk dan a dik hauh lo mai. Hnuailamah a fawp thla zel a, a kut pawh a awm hle hle hauh lo mai. Khawihna lai tur hre tak hian a duhna lai chu a khawih chat chat mai.

Ka rum ngher ngher a, ka panty phelh a tum chiah chuan ka harh kawk mai. A kut ka vawn beh sak a. Ani pawh chu a tawp ve nghal chat.

"Duhtawk ang," lawi zetin ka ti a. Ka la khur dar dar mai.

Ka awmah a hmai phumin a thaw ham ham a. Min rawn melh chhova, a mitmenga tisa chakna la chambang chu rei pawh en ngam lovin ka maimitchhing daih a. A nui hak zui.

Kan inha sawk sawk a, ka zak lutuk chu melh pawh ka melh ngam tawh lo. Hmangaihna min chenpui hman teuhzia ka ngaihtuah chuan rapthlak ka inti kher mai. Innei tur ni mahila, inneih zanah ngei nupa kan nihna kan tilang turah ka ngai a. Harhchhuak hma lo ila chuan tunah hian ka thianghlimna ka hloh ngei ang le. Inneih hmaa mipat hmeichhiatna hman hi ka huat zawng tak a ni a, ka thil huat tak mai chu keimah ngeiin ka bawhchhe țep zawng a ni e.

In lam panin ngawi rengin bike chuan kan inphur haw leh ta a. Kawng kawi kan thleng chiah chu truck lo tlan nen kan insu ta dawt mai. Kei chu kawngsirah ka lum a, Zomuana erawh motor hnuaiah thisen baw nuaih hian a lo awm a, truck pawh a ding chawt.

Ka au tuar a, engtinmah ka awm ve lo, ka vannei tawp. Mahse, Zomuana kha...! Ka va pan phei chuan a mit meng hram hram chung hian min lo en țawk țawk a. A hmui phun sep sep chuan enge a sawi tih ka hre thei lo.

Truck hnuai ațang chuan an la chhuak a, thisen a hloh hnem em avang chuan ka hlauthawng kher mai. Ambulance call turin ka au vak vak a, car pakhat hi a rawn tlan hlauh mai, zah pawh sawi lovin ka lo phar tawp.

Car a chuang chung chuan damdawiin kan pan ta nghal a. Car chhunhah chuan Zomuana chu ka be mawlh mawlh a, "I thi thei lo, min kalsan suh aw, nang leh zelin min kalsan chuan engtinnge ka awm ang," ka ti mawlh mawlh a.

Damdawiin kan thlen chuan Doctor ten hmanhmawh takin an en nghal sawk sawk a. Thisen a hloh hnem em avangin nikhaw hre lovin a awm a, ka manganzia chu. Ka rilru in ka țawngțai mawlh mawlh ringawt.

"Lalpa, khawngaihin thihtir lul suh aw...!"

"Mambawih, mambawih, harh teh, engtinnge i awm a?" Min rawn sawi nawk nawk ah chuan ka harh hlawl a, meng phelh deuh phung leh mittui tling piau chung hian ka nu chu ka en a, a thaw huai mai.

"Ka mumang alo ni reng a ni maw?" ka ti sap a.


@######@######@######@