SUDDEN - IN THE RANGE ROBBER (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: SUDDEN - IN THE RANGE ROBBER (Completed)

Unread post by Ngaia » March 25th, 2018, 12:12 pm

SUDDEN - IN THE RANGE ROBBER
AUTHOR : OLIVER STRANGE (1930)
Chapter 21
Rozami Pachuau

Frying Pan neitupa chuan a ranch lam pana Cowboy pathum lo tlan a hmuh chuan "Engtizia nge ni leh ta?" a ti a. Anni pawh chuan a neitupa an rawn hmuh chuan an lukhum an phawk a, an lo tlan chak sauh a, Ginger-a leh Dirty-a leh Simple-a an lo ni a. Leeming-a chuan an thuam famkim nen an lo kal tih a lo hmu thuai a. "In dam em naute u? Enge duh in neih le?" a lo ti a. Ginger-a chuan "Min chhawr theihna i neih chuan hna a ni kan duh ni" a han ti a. Leeming-a chuan mak ti tak hian "YZ Ranch in chhuahsan maw? Engtizia nge?" a lo ti a. Dirty-a chuan, "Tarman an min duh tlat lo" a lo ti a. Leeming-a chuan, "Enge ani duh loh mai mai theih em ni in nih?" a han ti leh a. Ginger-a chuan, "E, a intih neitu nak alaia. Putara nen inţawmah a insawi a, Simon-a lo damlo vei nen. Blaynes-phei chu a duh duhin a chawk kawi mai a ni" tiin a hrilhfiah a.

"Hmm vawinah Simon-a chu ka zuk ti ti pui ange, Bunkhouse-ah zuk innghat ula, puar takin chaw zuk ei phawt rawh u. Dirk-a hnenah khan YZ in an duh leh hma che u chu ka ruai dawn che u tih han hrilh ula, in putara ka zuk hmuh hunah zawng, in kir leh mai ang." Leeming-a chuan a lo ti a. Simple-a chuan, "Ka lo kal ve i duh emaw chu" a lo ti a. Leeming-a chuan "A ţha viau a mahse Simon-a khan Tarman-a nena a Ranch inţawm te kha a sawi thut thut reng a, a lo ti tak tak pawh a ni mai thei a, chuti te a nih phei chuan a zia lo viau ang. Ka zuk hmu phawt anga lo nghak mai teh u. Green-a chanchin in hre lo maw?" a han ti a. "Hre miah lo mai, a kalbo hlen dawn ta aniang" Ginger-a chuan a lo ti a. Leeming-a chuan, "A awihawm vak loh chu. Ani kara Outlaw lehnghal, helaia awmah pawh ka duh lo ve" a han ti a. Thinrim ţeuh hian Ginger-a chuan "Outlaw phei zawng a ni maithei a, mahse a patling em mai a, man tuma zawngtu tam tak ai hian ka duh daih asin" a lo ti a. Leeming-a chu a nui mai a.

Bunkhouse-ah chuan an lo lawm hle hlawm a. Simon-a chanchin te an lo zawt nual a. Chutah Green-a chanchin an sawi kai zel a, Marshal Tonk an a rawn zawn laia Leeming-a lo tihdan te chu Charlie-a chuan a lo hrilh a. "Nimin khan a rawn zawng ve bawk a, Kan putara lo tih dan chu hria ula mak in tih ve hmel a ni. Tonk-a pawh a thin chu a rim ngang mai a, mahse a silai lah a khawih ngam bawk si lo. A ding reng mai a, a hote chu a hnungah an ding ţhap mai a, dan kengkawhtu a nih thu te chu a sawi vel a. Kan putara lah chuan "Nang hi maw? Hetiang hmelchhia, zu bur ke ringawtin dan kengkawh ka tum e te i tih chuan, dan chu a lo tlahniam ta hle zuk nia. Kal vat la a ni mai. Chutilo zawng dan kengkawhtu azawnga tlaktlailo ber ni mahla, ka that palh ang che" a han ti leh nghal a. Tonk-a chuan a en kul mai a, "Leeming, i tihdan chu ka theihnghilh kher lovang" a han ti a. Kan putara lah chuan a nuih mai a. "Nun i duh chuan theihnghilh lo reng rawh." a han ti zui lehnghal a, tahzet zawng Marshal chu meikhup zulin a kal ta nal nal mai a ni" a ti a. "Job-a zawng a an hi a hlawk na a, a dik ania" Lucky-a chuan a lo ti a.

Chaw an eikham a, coffee an in zawh chuan Foreman Dirk-a chuan hna a sem ta a. An insiam a, mahni sakawr ţheuh an phih awh sang sang lai chuan Dirty chuan hla taka mi lo kal hi a hmu ta a. "Tu emaw chu saw a lo kal a, a hmanhmawh phian mai lehnghal a," a han ti a. An han hawi phei chuan mi pakhat hi sakawr chunga kun thana lo chuang, chak taka lo tlan hi an han hmu a, chutihlai chuan Leeming-a pawh a lo tel phei ve leh tawh a. "A kun danah Snap-a a nih hmel hle mai. Kun hian boruak kan su tlem deuh a, a tlan chak theih deuh e a ti ţhin a, enge ni ta ang aw?" Ginger-a chuan a lo ti a. "Tarman-a a kaphlum anga, an rawn um anga, an rawn um a ni ang" Frying Pan cowboy pakhat chuan a lo ti a. Leeming-a chuan, "Snap-a, chutia tlan chi a ni hleinem. A lo kap anih pawhin a ţang ral raih ang" a lo ti ve a.

Reilote hnuah chuan a lo thleng ta a, a sakawr tlan chak lai chu a tiding chawih mai a, vaivut chu a khu rum rum mai a. An rin ang ngeiin Snap Lunt-a chu a lo ni a. A sakawr aţanga a chhuk veleh chuan Leeming-a chu a han hmachhawn a, "I dam maw Job, Norry a lo kal em?" a han ti a. Leeming-a chuan, "Ka hmu hleinem, engatinge?" a lo ti a. Snap-a chuan "Nimin khan sakawr chunga chuangin a leng chhuak a, a lo la haw hlek lo mai a. Khaw lam lah ka zuk en tawh a, a kal bawk si lo. Helamah te a lo kal a ni dah law maw tiin ka lo kal a ni. Chutia a lo kal loh si chuan tawhsual a tawk a ni mai awm mang e aw" a ti vang vang a. "Chhe heu! Helai ram zet chu eng a ti zo ta nge maw ni le?" thinrim sen ţawn ţawn chungin Leeming-a chuan a han ti a. "Eng tawhsual nge tawk a i rin deuh a?" a han ti leh a.

Snap-a chuan "Rin ngaihna pawh ka hre bik lo, Blue-a chungah a chuang ngei mai a, a lo hel ţha leh te pawh a ni mai thei a. Tin, Apache hote pawh a tawng fuh pawh a ni maithei bawk. Chulovah bawng rukhmang ho hian an lo man ta te pawh a ni thei ang. Engpawhnise, ama thu ngawt chuan kan putara chu a awm bosan lovang tih chu a chiang a ni" a ti a. "Chuti maw? An ke zungţang hmawr pawh a an lo khawih vaih chuan van chhalin chhia ka chham a, an lu vun ka lip loh taka leh" Leeming-a chuan a ti a, a mite ho chu a han en a, tumahin hna an thawk lo tih a han hrechhuak thar thut emaw ni dawn ni, Leeming-a chuan "Tlaktlailo ho, engatinge khatia min en reng ni? Ei tur tam tawk leh sakawr buatsaih thuai thuai ta che u. Nula chu kan hmuh hma chu he ranch hna hi kan thawk tawh lovang. Kil tin kil tang khawrh chhuak leu rawh u. Dirk-a, lo ho rawh. YZ ah ka kal anga, Tarman-a chu ka zuk ti ti pui teh ang. Chutah chuan min rawn hmu ang che u" a ti a.

A mite en zui chuang hlek lo chuan a in lamah chuan a kal ta a. Anni ho pawh chu an insiam sang sang a, pawl hrangah an inţhen a, thu a pek tawh ber chuan a mite chuan an duh ang takin an ti ang tih chu a hria a ni. Green-a leh Larry-a awmna pindan lam chu a pan a. A han sawi zawh chuan Larry-a thinrim chu mawnga hawlh ang mai hi a ni a. Green-a ve thung chu a ngawi reng a, a hmui han inseh ruh dan aţang erawh chuan Leeming-a thusawi chu a hria tih a lang chauh a. Larry-a chu a vei sek mai a, "Engtinnge kan tih dawn?" a han ti hlawl a. A ţhianpa chuan, "A bul ţan nan chuan ţhut hle hle zir phawt la a ţha ang. Arpui, mu ţham ţhelh ang maia awm tur em ni?" a lo ti a. Larry-a chuan "Nangni'n engmah tih tum hek lo che u mawle" a lo ti ve thung a. Job-a chuan, "Engtinnge i ngaih?" a lo ti ve a.

Green-a chuan, "Tarman-a a niang ka ring. Simon-a Ranch lei luih sak nan emaw nula chu neih luih a tum emaw a ni ang ka ring. Thil awm thei pakhat leh chu, i Ranch rawn beih an tum vanga i mite i tirh bo zawh nan an ti pawh a ni thei ang. I tir bo vek tawh ang maw?" a lo ti a. Leeming-a chuan, "Chaw chhum chauh lo chu tir zo vek ang chu. An rawn beih dawn pawhin kan huam mai a ni ang chu. Kei pawh YZ lamah ka kal dawn. In che ve theilo hi a pawi a nih hi" a han ti a. "Chet kan tum e, khawiahnge kan sakawr te i dah?" Green-a chuan a lo ti a. Tichuan Leeming-a chuan a hrilh a, an duh ang ang lo inzawn chawp ve mai turin a ti bawk a, a kalsan ta a. Anni pahnih chu an insiam mawlh mawlh a, an in siam zawh chuan chawchhum pa hmuh loh turin an chhuak ve ta a.

Larry-a chuan kalna lam tur a han zawt a, Green-a chuan, "Cross Dumb-bell kan pan ngil phawt anga, chuta a lo awm chuan Job-a hote i va pun anga, kan mang ţhak ang" a han ti a. Tunhmaa a lo kal tawhna a nih avangin kawng chin pawh Green-a chuan a hre vek a, a hnai berah pumpelhin an kal a. Hmun ţhenkhat lai chu mawi teh mahse mawi a hmu hman lo. A pawnlangah chuan thinrimin lang lo mahse, a chhunglam chu a tawtin a tawt tlat a. Tarman-a te ang kuta Norry han awm tur chu a han ngaihtuah ngawt pawhin a tawt a ni. Thim hma deuhin an tumna chu an va thleng a. Ranch in pahnih aţanga meikhu a lo chhuah cham cham avangin an awm lai a ni tih chu a hre mai a.

Green-a chu a sakawr aţangin a chhuk a, thawm dim thei ang berin an sakawr huang chu a han pan hnai a, a han enchiang a, a lo kir leh hmel chu a rum kher mai. "A sakawr ka hmu a, chuvangin Foreman awmna inah sawn a awm a ni phawt mai a. Ka va kal dawn a ni. Darkar khat chhunga ka chanchin i lo hriat loh chuan kal nal nal la, Job-a leh a hote va pun ang che" a ti ta a. "Kan pahnihin kal ila kan tithei zawk ang a. Zualko chauh nih leh ţhin hi ka ning deuh tawh asin mawle" Larry-a chuan a lo ti nang nang a. Green-a chuan, "I lu hi i beng pahnih kar dantu mai bakah hmanna i hre mawlh lo em maw ni le? Ni lo ve, min dem duh lo mai rawh. Tih dan dang a awm chuang lo. Silai ri i hriat pawhin rawn inrawlh reng reng suh. YZ lam pan thuai zawk ang che" a lo ti a "Mahse.. " Larry-a chuan a han ti a, a han hawi nak chuan a ţhianpa chu a lo bo hman daih tawh mai a, "Kan mihring pa zet hi chu" a ti nawi ta mai mai a.

Green-a chu ngaw in a in a dep hnaihna laiah chuan a vak phei a. A lo thim tawh bawk a, in hnunglam pan chuan a tlanphei ta a, bang bul chu him takin a va thleng a. Kawngkhar chu herh kalh mai a lo ni bawk a, a herh hawng a, thawm dim deuhin a vak phei ta a. A han bih chuan Jeff-a, amah chauha awma dawhkana milem lo ziak malh malh hi a va hmu a. A milem ziah chu a nuihzatthlak deuh emaw ni, amah chuan a nui ang vur vur a. A thil ziak ngawt chu a ngaihtuah ni ngei tur a ni, a hnunglam kawngkhar pawn inhawng ru hreuh hreuh pawh chu a hmu hlek lova. "Phar rawh" tih thawm a hre ta mai a. Rang fahran hian a lehhawi vat a, silai kua leh a kengtu hmel a han hmuh chuan a ban chu a phar ta a. "Sudden-a" a han ti ngawt a, Green-a chuan, "A dik ang. Ţawng ring lo la, dawt sawi hlek suh. Khawiah ge Miss Peter?" a han ti a. Chutih chhung zawng chuan Jeff-a chuan a phuartu chu nuihsawh awm zet hian a en kul mai a. Green-a chuan hmu se zawng a ngaih pawh a ţha nep sawt tur.

Kawngkhar inkalh hi a han hmu a. "I awm em Miss Norry?" a han ti dek dek a, "Aw, tunge ni?" tiin a lo chhang a. Tunge a nih a hrilh a, kawngkhar a sut chhiat laia lo inthiarfihlim turin a hrilh bawk a. Kawngkhar chu a han su vak a, vawikhat sutnaah a Tala chu a chhe nghal a. A va luh chuan Norry chu khum chhe zetah a hma lama a kut phuar chungin a lo ţhu a. A phuarna te chu a han zai chat thuai thuai a, "Engmah sawina hun kan nei lo, i chhuak vat ang. Larry a'n sakawr nen sawtah min lo nghak reng ania" a han ti a. Green-a chuan Norry chu a inzui tir a, an chhuak ta. Thui fe chu an kal tluang zel a, a hnuai ber chhuat an zuk thleng ţep tih chuan hruizen a pal ta hlauh mai a, kailawnah chuan a bingbilet thla ta a. Midang pahnih hian an rawn bawr a, a lu-ah chuan hit mup khawp hian an han vua a, nikhua a hre ta lova.

A lo harh chhuah chuan Jeff-a a hnutchhiahna pindanah khan a lo awm a. A kalsan lai nen kha chuan a letling ta hu mai a, amah chu phuarbeh a lo ni ve ta thung a ni. An vaiin an lo awm ţhap tawh a, haw em em hian an lo en ţhap mai a, Norry erawh chu a awm ve lova. Tarman-a chu ti-el tih hriat fe hian a han kun a, "Beisei loh taka kan inhmuh thut chu le. Kan lo lawm dan che a hleihluak lu deuh anih pawhin i lo kir leh hi kan nau te'n an lawm lutuk vang leh awm rih deuh atana an duh vang che a ni tih i hrethiam a ni ang chu" a han ti a. Green-a chu a luna vei nen thih mai bak chu eng dang han beisei tur neiin a inhre lo. Mahse hmusit tih hriat fe a nui chung hian, "Ka phunnawi lo ve" a han ti ta a. "Pasalţha dik tak aw a nih chu. Outlaw huaisena chu nula hmelţha-i chhanchhuak tur chuan thih huamin a lo kal a, a nghawngah tak a va awk si a tiraw? Mahni te a hetiang tih tum reng reng te chu a huaisen thlak deuh e ti rawh Sudden?" Tarman-a chuan a lo ti vel a. Green-a chuan, "Nih pawh a ni ta ve ang. I chan a ţha ta a nih hi" a ti mai a. Larry-a awm ve chu an hre lo tih a han hre ta a, a lawm hle a.

Tarman-a chuan, "Ţha chiang e. Chu achhapah ka thil tum dante pawh ka hriattir vek ang chî a, tichuan, i chungthu chu kan la ngaihtuah ang chu" a lo ti a. Dexter-a chuan, "Khaihlum nghal ila a ni mai alawm, a hre hnem lutuk tawh reng reng." a lo ti ve zauh a. Tarman-a chu a lo inher thut a, Dexter-a chu a han melh kawk mai a, a lo tawm im chawih chawih mai a. "Ka tih tak tak hma in tam tak a la hriat belh dawn asin. Midang pawh lo inrawlh tum chuan an hre bawk ang. Khai le, kan rorel tur chu i ţan ang u le" a han ti a. A kut lehlam lehlam a inkawm tangin a ding to mai a, a hotu hmel luah mai a. A rilru te te chuan Green-a chuan a thiltihtheihna chu a dik lo zawngin a hmang mai pawh a, thil ti thei hmel chu pu hle in a hria a. Amah pawh a duh ang hlirin thil a kal rih bawk a, a hlim hmel fu reng mai. Ngun taka Green-a chu en chungin a han nui suk a, "Kan dinhmun chu hetiang hi a ni. Simon Putara a thih vaih chuan YZ hi ka ta tur a ni" a han ti a.

Blaynes-a chuan "A fanu hminga a dah mai phei in" a lo ti a. (he ţawngkam hi ka hrethiam lo, mahse a ngai angin ka lo dah mai e. RZ) "A fanu a ni lo, inlaichinna pawh an nei hek lo. An lo nei a nih pawhin tun aţang hi chuan a chat nghal e. Frying Pan leh an hotupa Leeming-a'n an hmuh loh tur zawngin a hote a tir bo zo vek mai a, ven loh in a awm si. Naktuk zingah kan duh duh kan va laksak mai anga, tah chuan, kan duhna ang zat a hralh pawh a hnial tawh lo ta ve ang. Chutia Ranch pahnih chu ka ta a nih hunah chuan helai vel chu ka thu thu a ni tawh ang. Tin, naktuka kan va laksak leh tur te nen chuan bawngrual pawh sanghnih lai kan lo nei tawh anga, chu chu in vaia tana 'note' tel chhah tawk tak tihna a nih chu. Chu achhapah ka Ranch a thawk tur chu mi ka duh ţeuh dawn bawk a, a duh apiang tan hlawh ţha tak hlawh theihna a awm bawk ang. In lo hresual palh ange, ka karkalak a zau dawn ania, ka lama ţang chu in tisual lovang" Tarman-a chuan a ti ta a.

Laban-a chuan, "Helai chhehvel Lalpa maw?" a lo ti a. Tarman-a chuan, "Ni dawn chiang e, min ringhlel mah ta che u. Naute u, sum na na na zawng a tam dawn" a han ti leh a. A hote chu an lawm hmel tlang kher mai a, Blaynes-a erawh chu a lawm hmel vak lo. Thi rim deuh hian, "Nula hi engtia tih nge i tum?" a lo ti ve thung a. Tarman-a chuan chiang deuhin a han en te te a, "Ka duh duha tih ka tum mawle" a ti ta a. "Ka chanpual turah nangmah ngeiin i sawi kha" aw khur dar dar hian Blaynes-a chuan a han ti leh a. Tarman-a chuan nui deuh chung hian, "Khang te chuan amah ka la hmu lo alawm." a lo ti leh a, an nui dur dur mai a. Blaynes-a erawh zawng a nuih a za ve lo. A ding kawh tau mai a, rul mi chuk tuma han ding pawh hi a ang hle mai a. "Ka chan tura tih tawh a ni a, neih ka tum a ni, Ranch khing nen. Min thlim han tum vaih teh Tarman, i thil tih tum hi ka ti khawlo vek ang. Governor hnena inpek hial a ngaih pawhin a pawi ka ti lo." a ti ta a.

Tarman-a chuan mak ti deuh hian a en a, nula chungchangah chuan buaina chu a awm a ring a, mahse heti em chuan Blaynes-a hian a ti ngam ang tih reng a lo ngaihtuah lo. Reilo te ah chuan a rilru a siam ta a, "Khai, mai mai a, nula hmelţha te chu an tam alawm Blaynes, ani kher hi i duh a nih chuan le. I nei poh a ni ang chu, ka duhtawka ka chen hnu-ah" a ti ta a. A han tih dan kher kher chu a huatthlala em mai a, Blaynes-a tih thinrim tumna liau liau a ni tih chu an hre vek a, an ngawi ţhap mai a. Blaynes-a pawh chu che lo chang lovin a ding kawh tau mai a. Nakin deuhah zawng a kut bawr chu a chet ta a. A han mu ke ţha ţha a, a silai chu a khawih ta a. A lo entute bengah chuan a ri rual hi ni maiin an hria a, mahse YZ Foreman chu a awp rawk a, a hmalamah a tlu a, a silai chu a thlauh ta a. A chalchang lo let chuan a kuttum chu Tarman-a a han hmuh a, "Web-a, min that chu a ni. Mahse chinghne nunrawng pa, i hun a hla vak tawh bik lo ve aw" a han ti hram a. A let tawp a, a che ta lova. Tarman-a chuan kah leh tumin a lo la tin reng a, mahse ţul ta lova a hriat avangin a silai chu a paiah a khung ta a.

"Naute u, a mi tihdan leh silai a chuh hmasak dan te kha in hre vek a, a lam ţang in awm emaw chu" a han ti a. Blaynes-a an thiam loh thu chu an lo sawi hlawm a. "A ţha e, a chanpual chu pawl sumah a lut ang. Ka duh nek lo ve" Tarman-a chuan a ti a, Mi pahnihin ruang chu an zawn chhuak ta a. "Khai le, kan ţhianpa chungthu hi i ngaihtuah tawh ang ule. Khaihlum remti apiangin ban phar rawh ule" Tarman-a bawk chuan a han ti leh a. West-a chauh lo chu pindan chhunga awm zawng zawng chu an phar suau mai a. Tarman-a chuan a han enkual a, "Eheu! I lo lar hranpa vak lo a nih dawn hi Sudden, rem ti lo chu pakhat chauh a nih hi. Engti zia a remti lo nge i nih West?" tiin a han zawt a. Amah chauh chu phar ve lo a ni bawk a, West-a chuan, "Ngawi teh, hotupa, hetiang deuh hian ka ngai a ni. He mihring hi a nung chunga man chuan dollar singhnih man a ni a, a thih chuan engmah. Helaia lo khaihlum ngawt chu pawisa hlu tak paih kan ni ber mai a, khaihlum tur thova chutiang pawisa min pe a, lo la chhawng duh an awm tho avangin" a lo ti a.

"Ni khawp mai. A thil hriat hi a sawi vek anga, enge kan anga i rin?" Dexter-a chuan a lo ti a. West-a chuan, "Tun ang tho hi kan ang ang. I lu kha mawi nan i hmanglo ang bawkin ngaihtuah nan pawh i hmang lo a nih hi. A mantu thu aiin a man a, Outlaw thu chu tunge lo ring duh a i rin? Lo rin ahnekin a lo mantu Tarman-a, Sheriff engemaw zat man theih tawh loh man a, sawrkar hnena ţha taka hlantu, mi hausa leh nghal chungah chuan lawmthu an sawi kur liai luai ang chu mawle" a han ti ve leh a. "A ni dawn tak e, naute u, a ti dik a ni. West-a, i ti ţha kher mai. Kan sa seh sem hunah pawh ka theihnghilh lovang che" Tarman-a chuan a han ti a. Green-a lam chu a han hawi a, "Chawlhkar hnih khat damna tur hun i la nei anih chu Sudden" a ti ta a.

Green-a chuan chhang pawh a chhang lo. Blaynes-a thi tur thusawi kha a bengah a la cham reng a. He pa hi kum kha leh chen thah tuma a lo zawn chu lo ni rengin. A lo inphut ta deuh bakah hmuihmul te a lo nei ta bawk a, a sam a lo inhnawih danglam vei nen, a lo hre lo pawh chu a mak hranpa lem lo ve. Tih leh, 'Spider' han tih aţang chuan rinhlelh nachang te pawh lo hriat awm tak (maimawm tihna ve ve a ni). Tarman-a chu a lo hnai a, "Min kalh thei te khan i han inring vel a tiraw? Ka ngam ta che a nih hi ka ţhian. Nula thu chu..." a han ti chauh a. "I lei bawlhhlawh khan a hming pawh hi sawi pawh sawi suh. Ram ui tluk tal chuan huaisenna nei la chu, min phuar hi i phelh anga, kan han insual tur. Mahse nei mawlh hek lo che, putar leh chhantu nei lo nula sawisak te hi i ngam tawk a nih hi" Green-a chuan a lo ti a.

Tarman-a thinrim chu a sen ta ţun ţun mai a. Mahse a insum hram hram a, "Chuti maia chhuah chu beisei suh aw. Khaihlum mai tur i nih leh nula chu ka kuta awm a ni tih hre reng chuan dam phiangsen rawh. Nupuia neih te chu ka tum teuh lo ania aw" a ti ta zawk a. Green-a chuan thinrim ti lang chuang hlek lo hian, "Ka mihring hmuh tawh azawngah i la lem ber awm e. I hming pawh Tarman-a emaw ni Web-a emaw ni, a tu a pawh chu lo ni la, vawikhat zawng ka sawisak tawh che kha tiraw?" a han ti ve ngat a. Tarman-a chu a sen leh ţun ţun mai a. A kuttum a han hum sek a, "West-a, Durran-a nen khan he pa hi kalh khum ula, veng ţha rawh u. Chuti lo zawng khaihlumtu hna ka lo tih khalh tak tak dawn e" a ti ta a. West-a chuan a kai chho a, Durran-a chuan a zui bawk a. An chhoh pah chuan West-a chuan, "A teuh ther ther hle mai a unaupa. Khatiang bak kha zawng tihngaihna ka hre lo a ni. Rul lak ata min chhan kha ka la theihnghilh law" a ti ru sap a. Kawngkaah chuan a'n nem lut sawk a, a khar a, a kalh ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 12:13 pm

SUDDEN - IN THE RANGE ROBBER
AUTHOR : OLIVER STRANGE (1930)
Chapter 22
Rozami Pachuau

A tuk zinga Hatchett khua aţanga Stiffy haw chuan a hnunglama sakawr tlan ri ţuk ţuk hi a hria in a inhria a. A sakawr chu kawngsirah a pen pui zauh a, a lo enthla ta a. An rawn tlan pel ta ngei a, a han hmuh chian chuan "Frying Pan an ni khawp mai. Nawmsip bawlna atana kal lah an nih hmel si loh. Cross Dumb-bell an pan a ni phawt mai si a, Jeff-a han hrilh vat tur a nih hi" a ti a, pumpelhah a theih ang tawka chakin a tlan ta a. Cross Dumb-bell a han thlen chuan kawngkhar chu a han kik dawt dawt a, Jeff-a chuan a lo hawn a, "Enge ni ta Stiffy, i tui a hal em ni?" a lo ti a. Stiffy-a chuan, "Frying Pan ho an lo kal a, an lo thleng ţep ang. Pumpelhah chuan ka lo kal na a, a pumpelh tehchiam loh hi. Sawmpanga lai an ni lehnghal a, indo tum an nih hmel khawp mai" a ti a.

Jeff-a hlim hmel chu rang zet hian a chuai a, "Khai aw! Lo kal la, nangmah ngeiin Spider-a va hrilh rawh" a ti ta a. An va luh chuan Tarman-a leh Pete-a chu an lo awm dun a. Tarman-a chuan a lo ngaithla vung vung a, "A ţha a nih chu. Nakina la nuai bo tho tho tur, tunah kan nuai bo hlauh anga a ni mai alawm. Anmahni'n min rawn pan na na na chuan tunge min thiam lo thei ang? Sawmpanga lek an ni a, keini, sawmhnih kan ni a, phen tur nei ţha zawk lehnghal. Khai! Silaimu leh ei tur, in tur kha chhekkhawl rawh u. Hetah hian ţan kan khawh ang. Frying Pan ho chu kan do tur tho tho an ni a, kan chimih vek chuan a ţha a nih chu" a ti ta a.

Tichuan a hote chuan nui a infiam zel chungin an awmna chu an buatsaih sauh sauh a. Bangah chuan thingtum lian pui pui an tung ţhut mai a. Han beih theihna lai awmchhun chu tukverh leh kawngkhar a ni mai a. Tukverh lah chu kawngkhar rinawm pui pui, silai hmawr leng leka verh kuak chuk hi an ni hlawm lehnghal a. Chutiang hmuna lo ţan tawh ber chuan han thlaphanna chhan tur hi awmin a lang lo. Tarman-a erawh chu a hote hmuhah ngaih ţhalo ang chuan a awm duh hauh lo na a, a rilru tak chuan a zam a ni. Poker Pete-a pawh chutiang bawkin. "Leeming-a chuan engtinnge maw chuti teh thuai a a lo hriat hman chu aw?" a ti vang vang a. Tarman-a chuan, "Green-a kha amah mai a ni lo ni ngei tur a ni. Eng hunah emaw a lo lan loh chuan Frying Pan va pun vat tura tih a nei ni tur a ni. Lo ngaihtuah nachang kan hre lo mai mai a ni. Mahse Pete, an vaia thah phiar tur a ni" tiin a lo chhang a.

Pete-a chu ngaih ţha lo zet hian a bu liam mai mai a, pawn aţanga lo au hi an hre ta a. An han bih chuan mi pakhat, sakawr chunga chuang hi a lo ni a. Leeming-a a ni. Tarman-a chuan kawngka chu a'n hawn tir a, kawngka biang ngheng chung chuan, "Enge duh i neih a?" a han ti a. "A hmasa in i hmui kha ka duhlo phawt. In awmna hi kan hual chhuak vek tawh a, kawng khat chauh chhuah theihna in nei. Chu chu Green-a leh nula kha him piala in rawn chhuahin. Tichuan, kan kalsan mai ang che u - tun ţum chu" Leeming-a chuan a lo ti a. Tarman-a chuan, "I ti lo teh ang! Tun aţanga second nga hnu a hmuh theih a i la awm chuan ka kap che a ni mai" a lo ti a. Tichuan, inbiak remna awm thei ang chu a tawp ta. Inkah chu an peih ţhap mai a.

Larry-a leh Ginger-a chu in hnung lamah tlanchhuak ru tur veng pahin an ţang a, an han inkap ţan ta a. Tukverh kawngkhar kua aţang chuan an rawn kap ţhin a, chu chu Ginger-a chuan a kaw lai vel chu a va kap sek sek a, a rawn kaptu chu a reh ta daih mai a. "Ka kap fuh a ni awm mange" a ti a, han enfiah tuma a han tho kang deuh ar ar chu a lukhum an rawn thawi sak leh nghal a. Larry-a chuan silaimu lo chhuahna kaw lai chu a han kap ve vak vak ringawt a. Ginger an awmhmun a'n khuar fel leh chuan a kah ngai hlir hi a kap tlut tlut mai a. Larry-a mak ti chuan, "Enge maw i kah le?" a han ti a. "Van khi mawle mi â pa. Kawngkhar kawpza saw kah chhiat ka tum a ni. A veilam zawk saw kah fuh theih i inrin chuan lo kap rawh" Ginger-a chuan a lo ti a.

Larry an Ginger-a kah lam a'n enchian nak chuan a kawpza chu a lo chhe ţep tawh mai a, lawm zet hian a lehlam chu a kap ve ta a. An lo kap chhe lek lek tawh tih chuan an hnunglam aţangin Snap Lunt-a chu a lo kal a, Leeming-a tirh angin a rawn fang kualin a rawn fuih vel a lo ni. An thil kah chu Larry chuan a lo hrilh a. "Chu, tihdan ţha zet a nih dawn chu. Kan ţhiante pawh ka'n hrilh kual ange. Kawngkhar zawng zawng kan kah chhiat ngat chuan uihli tawmna pawh a awm tawp nang. Vaihlo i nei lo maw?" Snap-a chuan a han ti a. Larry-a chuan, "Aw, lehkha leh nawalh leh a zukna tur hmui lamin ka nei asin, a vai chuan em ni i duh?" a lo ti a. Snap-a chuan, "Hmui tello chuan a vaiin ka duh e" a ti a, ren lo baksak hian a han zial a.

Snap-a kal hnu chuan an tum ve ve chu an kap leh ta ngat ngat a. Mahse an thil tum an rawn hria nge ni, in a mi te chuan an rawn kap ngawrh ve ta hle mai a. Larry chu vawi hnih an rawn kap thawi tawh a, a ţhianpa pawh a chiau deuh ţung a, "I eng laiah nge an kah fuh?" Larry chuan a han ti a. Ginger-a chuan, "Ka thluak takah mawle mi chhaw pa! Lo kal la, ka ban tliak hi va tuam rawh. Thisen a chhuak zo dawn alawm" a lo ti hlur mai a. "Ka thluakah a??? I lu si renga tin pawhin kap se, nanga thluak te zawng an kap fuh hlei lawng e." Larry-a chuan a la ti hram a. A va tuam sak ta a.

An kawngkhar kah chu a tla lek lek tawh a, Larry-a chuan Ginger-a chu lo tin ran turin a hrilh a. Vawihnih hi a'n kap leh a, tukverh kawngkhar chu a tla ta duai duai mai a. Ginger-a chuan a lo kap ţhuai a, pakhat chu tlu ngei hian a hmu a. Larry chuan a'n kap ve vat a, a dang tlu lai ni awm tak hi an hmu thei bawk a. Tichuan, an ţhian te pawhin kawngkhar kah chhiat chu an lo tum ve bawk a, ţanhmun ţha zawka ţang mah ni se inchhunga mi te chu an mangang zaw mah ange tih mai tur hi a ni ta a. Kawngkhar chhia avang ngawt chuan pasarih lai hi an lo thi tawh reng a. Mahse, dan chep an ni bawk a, Tarman-a tih loh chu ţan ral raih tum an ni hlawm a.

Tarman-a erawh chu a hote ngaihtuahna nei hauh lovin a relhru zul zul a, Norry awmna pindanah chuan a han lut a. Norry phuar hlawm reng chu a pu thla nawlh a, kawngkhar lam chu a pan pui ta a. A'n hawng duk duk a, vawilehkhatah a chhuak ta thut mai a. Pawnlama mite chuan mak an lo ti hle mai a, mahse a rin ang ngeiin tuman an lo kap lo. "Min lo tihbuai vaih chuan nula hi a thi a ni mai." a han ti a. Muangchangin sakawr huang lam a pan a, zin a bel chhungte pawh chuan Norry chu a nghat ngam lo. Amah a lian bawk a, a dip pawh a dip tham lo aniang, awlsam takin a bel a, a chuang ta a. "Min rawn um chuan ka that a ni mai. Dam takin ule" a ti a, a kal ta a.

Green-a pawhin a awmna pindan aţang chuan a lo hmu ve kiau a, chhuah tuma a kut phuarna a lo tal fat fat lai chuan kawngkhar chu a rawn inhawng thut a, West-a a rawn lut hlawl mai a. "Ka rawn ti lawk thei lo a ni. Durran an chahbi a keng tlat a" a rawn ti a. Green-a chuan, "Khawiah nge Durran-a chu?" a lo ti a. West-a chuan, "A thi tawh. Midang pawh an thi bawk viau tawh. Tarman bawlhhlawha lah chuan nula a pu a, min kalsan tawh si. Hei, i silai leh kawnghren, hemi dep, in danah hian tukverh zuanthlak theihna a awm a, kan mi dawihzep pa kha va umpha hram ang che. Nula kha pu tlat lo se zawng keipawn ka'n kah hlum chian dawn var var nen" a ti a. Green-a chuan, "Hei, i lei ka ba nasa ta hle mai a, ka theihnghilh lovang" a ti a. West-a chuan, "Mai mai a, khawi nge ka awm loh an lo hre hman ange, ka va phei leh tange" a ti a, a kal leh ta a.

Green-a pawh chu a chhuak phei ve nghal a, Norry an dahna pindanah chuan a va lut a, tukverh a hawn dawn lai takin pawn lamah chuan pen thawm hi a hre ta a. Kawngkhar rawn hawn veleh a hawngtu in rawn hmachhawn siah turah chuan a lo ding ta a. Pawna mi chuan, "Khawnge maw a awm le? Durran-a khan pindan te ah a ti si a, nula pindanah hian a awm a ni khawp ang. Engtia kalh loha a awm chu le, mi â ho.." a ti niah niah a. Kawngkhar chu a rawn hawng a, Poker Pete-a chu a lo lut hlawl mai a. "I chemte kha thlauh rawh" Green-a chuan a lo ti a. Pete-a chuan a hreh hle mai a. Mahse a hma a mi leh a silai chu a'n en ţhin a, hreh thei niin a inhre ta lova, a thlauh thla ta a. "Tunge phelh che a, khawnge nula?" a han ti a. Green-a chuan "Tarman-an a vun bawlhhlawh zet hum nan a kalpui tawh" a lo ti a.

A silai chu a paiah a han thun leh te te a, "Nang pawh, tun hi i hun hnuhnung a ni. Remchang ka pe ang che a, mihring pangngai angin han ti ve teh. I silai chuh rawh le" a han ti leh a. "Kei tehlul in enge ka han tih hman ang le?" Pete-a chuan a ti a. Green-a chuan, "Kei, phuar hlawma ka awm a, nang, chemte nen min thah tuma i lo thawh ai thawt chuan tih theih i nei zawk ang chu. Mihring! hun ka nei lo ania, i silai chu chuh rawh" a han ti leh a. "Keimah leh keimah ka invui dawn lo." tiin Pete-a chuan a ban chu a phar chho a, "I duh leh mi kap ta che" tih pahin a kut dinglamin a nghawnga chemte pai chu a zuk phawi zauh mai a. Chuveleh Sudden-a chuan a kut veilamin Pete-a banrekah chuan a va hmer sak a, a'n pawt dawrh a, dinglamin a'n hnek leh ţhuai mai a. Pete-a chu a tlu zawi hnawp a, a tluk pahin ama chemte ken chu a zuk bawh lehnghal a, a thi der mai a.

Green-a chuan a rawmawl var chu tukverhah a vai lap lap a, muangchangin a chhuak ta a. Larry chuan a ţhiante ho lo kah tum chu a lo au tuar tuar a, an kap lo chauh phei zawng a ni. Inchhunga mi te erawh chuan an theih tawpin kah hlum tumin an lo kap thung a, mahse mi tlan lai, kawi hun hre tak zawng kah fuh awlai lo tak a ni a, hnim zing chu him takin a va thleng ta a. Larry chuan Rifle leh sakawr zin leh hruizen nen a lo nghak a, tichuan, Blue-a chu a va man a, Tarman-a kalna lamah chuan um turin a kal ve ta a. A kal dawn chuan Larry-a chuan, "Lo kal ve theihna tur a nih phawt chuan ka kum khat hlawh ka pe phal zan mai" a lo ti a. "Ni lo ve, helam hi lo pui zawk rawh. Leeming-a chu Pete Poker-a leh midang zawng zatve lai chu an thi tawh tih lo hrilh ang che" Green-a chuan a ti mai a, silaimu a bula lo ving thuakah erawh chuan a biru ve ta chauh a.

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 12:13 pm

SUDDEN - IN THE RANGE ROBBER
AUTHOR : OLIVER STRANGE (1930)
Chapter 23
Rozami Pachuau

Green-a chuan Blue-a chu a tur sauh sauh mai a. A hnu aţangin Tarman-a chuan Big Rock lam a pan tih a hria a. A hnu chhui a har lo bawk a, a sakawr lo chak zawk bawk nen, a hnaih sawt hle in a inhria a. Lui pakhatah chuan Tarman-a chuan tui a in ngei a ni tih chu a hnuhma aţang chuan a lang a, Ţiaupho a a hniakah pawh chuan tui a la luan luh mek avangin a hla tawh lo tih chu a hre thei a. Amah chuan tui chu a'n in a, a sakawr pawh chu a duhtawk a han intir ve phawt a, a kal leh ta zel a. A silai te chu a mu inthun ţha an nih leh nih loh chu a'n enfel te te a. A hnu lawkah chuan a hmalam mel chanve dawn laia hla a Tarman-a kal chu a va hmu ta a. Tarman-a pawhin a lo hmu ve thuai a, a sakawr chu a tur ve ni ngei tur a ni, an han tlan chak deuh a. Mahse mi pahnih phur lehnghal chuan Blue-a umphak loh tur chuan an tlan thei lo tih chu Tarman-a han leh hawi chuan a hre ta a ni ang. A lo ding a, a sakawr ata a chhuk a, a rifle a phawi ta zawk a.

Green-a chuan a hmu reng a, mahse engtia han tih ngaihna dang lah a awm lova, a hnunga Norry a awm tlat si avang chuan han kah ve ngam lah a ni si lova, a pan zel ringawt ta mai a. Yard za vel lai a va thlen chuan Tarman-a chuan ngun zet hian a lo tin a, a hmetpuak ta a. Blue-a chu a ding uaih mai a. A chunga chuang chu a sir zawng hian a tla thlawrh mai a. Tarman-a chuan kah leh mai inringin a awm a, sakawr hlauhlawp chu a reh chuan Blue-a chuan a pu chu a va hnim duk duk a. "Ka fuh a ni" lawm zet hian Tarman-a chuan a ti a. Norry beidawng lutuk chuan aw a lo chhuah deuh a, Tarman-a chuan a han leh hawi a, "Sudden-a a thi ta. Kei hi i pasal a min neih nge nge a ngai dawn a nih hi. Engtikah emaw zawng Tarman-an a thil duh reng reng chu a nei ţhin tih hi i la hre nge nge ang. Saw, sakawr lah a awm bawk a, kan mi â ho khan bawngrual kha an lo insem loh chuan ka nei vek bawk ang" a han ti a.

A rifle chu a kawmah a han khung a, a sakawr chu a kai a, Green-a mu reng lam pan chuan a kal ta a. A bul a va thlen chuan a silai chu a'n phawi a, a hmai tak chu a kiu veilam kual kara a awm avangin a hmu ţha thei lova, a kut dinglam chu a phar zawi reng a, a ke te pawh chu zawi vek niawm hian a lang a. A silai chuan a'n tin a, "Thih zawng i thi chiang e. Mahse a malsawm atan vawikhat tal chu ka'n kap leh hram ang che ka ţhian" a ti a, a han tin a. Chutihlai tak chuan Norry chuan a sakawr chu a lo ti ding thut mai a, a han lehhawi a, a lakam kha a dawm si avangin Tarman-a chu a pawt her lawih mai bawk nen, Tarman-a chu a phun nuah nuah a, chutihlai chuan, "Tarman, phar vat mai rawh" tih thupek khauh zet hi a hre ta mai a. Rang zet hian a lo leh hawi a, a ban chu a phar ta a. Green-a chu a la mu reng a, mahse a kut dinglamin puakruk chu a lo hum reng tawh a. Tarman-a en kal chung chuan a lo tho a. Tarmana'n a mitmeng a'n hmuh chuan a ip chawih mai a, khatia silaia tin rengtu awm reng tih hre reng chung pawha thi der ngam chu hlauh chi a ni reng a ni.

"I silai kha a paiah khung rawh" Green-a chuan a han ti leh a. A khung zal zal mai a. Green-a pawhin a khung ve bawk a. "Khai le, Web-a, Tarman-a emaw ni i nih zawk hi. Tuma laka i la tih ngai hlek loh tunah hian inrinna hun ka pe dawn che a ni. I duh hun hunah i silai chuh rawh le" a ti ta a. "Inrinna hun a? Nang aiin ka muang zawk tih hre rengin nula bula han intih theih vel i duh a ni maw? I ti lo teh ang." Tarman-a chuan a ti ta a. Sudden-a chuan a silai a phawi a, a hmelma pa ralthuam laksak tur chuan a va hnaih a, "Hnunglam hawi rawh" a han ti a. Tarman-a chuan a han hawi a, mahse a her chhuak thut a, a sakawr lakam chuan Green-a hmai takah chuan a hlap ta ţhuai mai a. A lo in ringlo kher bawk a, Green-a chu a pai chawn mai a. Chutihlai tak chuan Tarman-a chuan a bawh zui ta a, an inbei leh ta vak mai a. Green-a lahin a silai chu a thlauh tawh si, Noreen-i hmuhah chuan kuttumin an inbei ta ţiang ţiang mai a.

Reife an inbeih hnu pawh chuan a tu mah mah chuan chak zawk hmel an pu thei bik lo. Nakin deuhah zawng Green-a chuan a hnek tlu ta hlauh mai a. A tluk paha a kut han phar chuan Green-a silai thlauh kha a va khawih chiah mai a. Mahse a taksa in a hliah deuh bawk avangin Green-a chuan chutiang a ni tih a hmu si lo. "I han inti thi leh dawn em ni? Min han thawh tir te te ang maw?" Tarman-a chuan a han ti a. Green-a chuan, "Mi, a tluk laiin ka khawih ngai lo. Uicho dawihzep tak ngial pawh" a lo ti a. "Kei zawng chutiang ka ni ve ngai lo, hneh tumin ka bei a ni" tih pahin Tarman-a chu a lo tho ţual ţual a, a kut dinglam chu a hnungah a dah deuh ţut ţut a, "Lo kal teh" a han ti leh a. Green-a chuan a rawn pan ngei a. Tarman-a chuan a lo kap ta ţhuai mai a. Silaimu in a han fuh veleh chuan Green-a chu a awn chawn mai a, mahse a tluk pah chuan a kut veilam chuan a silai pakhat chu rang lutuk hian a'n phawi a, a'n kap ve hram a. Tarman-a chu a ţe tuar a, bawkkhupin a tlu ta a. Green-a pawh chu a tlu ve nghal a, lu insi deuh thaw chuan an tlu dun ta a ni.

An chung zawnah chuan sang takah hian mulukawlh hi an lo vir nghal vut vut hman tawh a. "ka hmuh tawh azawngah chuan insual hmuhnawm ber a la ni awm e" aw hian a rawn ti hlawl mai a. Aw a'n hriat veleh chuan Noreen-i chu a han hawi a, Laban-a, a sakawr aţanga lo chhuk mek chu a va hmu ta a. A ţhianpa chu a va kai zangthal a, mak ti deuh hian a en reng mai a. "I thi chiang bawk ta ve ang Joe, kah hliamin a a kut veilama a kah lehnghal.. Mit leh mit inkarah chiah. A hming pawh a lo phu hi mawle. Midang awm ta lo chu kei hian in ro chu ka khawm poh a ni ang chu" tih pahin Norry chu a'n melh a. "Joe-a duh ang che chuan kei chuan ka duh lo che ania, mahse Simon-an pawisa tam fe in a lei duh hmel che a ni". Green-a chu a'n kawk a, "A la thi hlek lo ka ti. A la thaw alawm." a han ti leh a. Norry chu a va pan a, a ban phuar te chu a va zaichah sak a, a sakawr aţang chuan a hlang thla ta. "Khai, min han phuar pui rawh le. A nung chunga lak chuan dollar singhnih a man ania. Mahse eng eng emaw tih te i lo rilruk palh ange, ka kap hreh dawn hlek lo che ania" a han ti a.

Noreen-i chu chutia vau kher pawh a ngai lo, han bawihsawm chu a duhthusam a nih avangin. An phuar zawh chuan sakawra hlan pui tur chuan a han sawm a. "Khai, a tuar lovang" Norry chuan a lo ti a. "Hrilh ang chuan ti vat mai rawh." tih pahin Laban-a chuan a han tin uaih mai a. A tinna kut a la phar lai chuan, aw hian "A dang pawh kha phar nghal rawh" a rawn ti ta. Chu aw chu Laban-a chuan a hre nghal mai a. A beng te chu a hlauh lutuk avang chuan a kiu chum chum hian a hria a. Green-a an bawihsawm lai khan khua an lo hawi lo deuh niin, an hnungah Snap Lunt-a chu a lo ding reng tawh mai a. A mitmeng lah chu ramhuai mitmeng ni awm tak hian a rum ul mai a. "Nang i ni maw Snap? Miss Peter-i hruai haw thei tur chiahin i lo thlen hlauh le. Tih ngaihna ka lo hre lo asin. Joe-a leh Sudden-a chu an inbei a,.." Laban-a chuan a lo ti a. Snap-a chuan silai chuan a tin a. Laban-a chuan nula hlat deuh tura a duh vanga ngai chuan a tawlh hnung ta a. Hnung zawnga a pen apiang chuan Snap-a chuan hma zawngin a rawn pen ve zel a. Pen sawmhnih lai an pen hnu chuan Laban-a chuan "Engtizia nge maw ni le Snap, sawi duh i neih chuan..." a han ti hman chauh a, "Tawlh zel rawh" Snap-a chuan a lo ti a.

Laban-a chuan a hnunglam chu a'n en nak chuan kham sang em em mai chu a lo hnaih hle tawh mai a. Pen khat han pen leh vaih se chu tla sawm vek tur a ni tih chu a inhre ta a, hlauvin a khur zawih zawih mai a. "Tawlh rawh" vin zet hian Snap-a chuan a han ti leh a, a beng chunglam chu a'n kap hek hlawk mai a. Laban-a mangang chu a bawkkhup a, khawngaihna a dil ta a. Mahse thingbul lakah khawngaihna dil se a dang chuang kher awm lo ve. Snap-a chuan a'n hnaih leh sauh a, "Seth, i liam thla dawn reng reng, thi in emaw, a eng zawk chu nge i duh" a han ti a. A sawi ang ngei chuan a ti dawn. He mihring hi Snap-a ngaihin nung tlak a ni lo ang bawkin thi tlak pawh niin a hre lo. Mahse Noreen-i chuan a lo tuar ta ngang lova, Snap-a banah chuan a va vuan a, "Khawngaihin kal tir mai rawh Snap. Min tina lova, a tum chu engpawh ni se, Mister Green-a pawh min bawihsawm pui asin. Ţhat te pawh a ţha chhawm ve tawh mahna" a ti ta ngawt a.

"Ţhat te chu sawi duh suh. Misual a ni a, dam tir leh hi khawvel tana pawi nasa tak khawih kan ni ang le. Mahse Miss Norry, i sawi nawn leh a ngai lovang. Vawikhat i sawi thil engkimah a tawk e" Snap-a chuan a ti a, Laban-a silai chu a laksak a, "Kal rawh. Mahse hei hi hre rawh. Kan inhmuh leh vaih zawngin min rawn hmuh hmusak tum ang che. Chuti lo zawng kei chuan ka hmuhna apiangah ka kap nghal mai dawn che ania" a ti ta a. "Chaw pawh nei lovin min kaltir mai dawn em ni?" Laban-a chuan a han ti leh hram a. "Kal vat mai rawh. Nunna i la nei a, chu zawng chu a ni ka pek dawn che" Snap-a chuan a lo ti a.

Labana kal an enliam hnu in Green-a chu an va hnaih a, ani pawh a lo harh tawh a, "Sakawr zinah min phuar bet ula, ka tih theih ka ring a." a lo ti a. An phuar bet a, zawi te in an kal ta a. A han bu deuh lawp ţhin a. Nakin deuhah phei chuan a ţawngvai ta nawk nawk mai a. Tarman-a te, Bill Eavesham-a te, Larry-a te leh Norry hming te chu a rawn sawi nawk nawk ţhin a. Noreen-i chu a thlaphang hle mai a. Tarmana'n a han kah chiah khan chu pa, hming pawh nei mumal hlei lo, rapthlak thei ang bera thanga chu a tan enge a lo nih chiah a hre chhuak a. A hmel dang vek mai, sakawr chunga chuanga buk buk chu a han en a, kal pah chuan a tih ngai hlek loh angin a ţawngţai ta hial a. A tuar ngang dawn ta lo em ni aw a tih laiin Snap-a chuan "Saw saw, in kha ania, an lo intifel tawh a nih dawn saw" a ti ta a.

An va thlen chuan Snap-a sawi ang ngeiin an lo insingsa fel duak tawh a, kal mai tumin an sakawr te an lo buatsaih fel mek a. Green-a chu sakawr chung ata an han hlang thla a, kawmawl phahah hian an muttir a, nikhua a rawn hre ve ta bawk a. "I va ţha em?" Leeming-a chuan a lo ti vat a. "Aw, helam pawh in lo inthianfai tawh a ni maw?" Green-a chuan a lo ti a. "Saw mite chauh tih loh chu thianfai tawh" tih pah chuan Leeming-a chuan mi panga, phuarhlawm ţheuh, sakawr chunga chuang hi a han kawk a. Pakhat chu West-a a ni a, Green-an a rawn hmu tih a hriat veleh chuan a lo nui sak a. "Dam takin le ţhianpa. Ani i thah avang leh nula i rawn hruai kir theih avangin ka lawm e" a lo ti a. Green-a chu na ti tak chungin a han in beng kang a, "Job, saw saw chu chhuah rawh. Ka nunna a hum a, Tarman-a um thei turin min chhuah bawk a ni" a han ti a.

"In-ah hian a lo awm ve a, ka bawng te pawh a ru ţhin ang, ka mite pawh kah pawh a kap ţhin ta ve ang" Job-a chuan a lo ti a. West-a chuan "Khai, ţhianpa, midangte ang hian kan hmabak ang chu ka hlen ve mai ange" a lo ti bawk a. "A chhuak tur a ni. Amah avang chauhin keipawh ka thi lova, miss Norry pawh.." Green-a chuan a han ti a. Leeming-a pawhin a remti ve ta a. Tichuan West-a tel lovin midangho chu Frying Pan cowboy ho chuan khaihlum turin an piah ngaw-ah chuan an kalpui ta a. West-a chu an rin angin a kalbo mai lo. Larry hnenah chuan, "Ka awm rih dawn. Tichuan, a dam hunah lawmthu te pawh ka sawi thei mahna" a ti mai a. A leiba a han rulh fel hnu chuan Green-a chu nikhaw hre lovin a awm leh ta a.

(Chapter pakhat chiah a awm ta. He chapter-ah hian Tarman a thih hma khan Green-a hian Petterson-a chauh ni lo, amah pawh chu rei tak a lo zawn tawh zia te, a pa Eaveshama phuba a laksak dawn thu te kha han sawi ta se a ti ngaihnawm zual awm mang e tih te ka lo ngaihtuah mai mai a.. Ka type lai khan ka phuah belh dawn maw ni aw ka ti rum rum a ni 😝 Rz )

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 25th, 2018, 12:13 pm

SUDDEN - IN THE RANGE ROBBER
AUTHOR : OLIVER STRANGE (1930)
Chapter 24 (Last chapter)
Rozami Pachuau

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Nikhaw hre lova YZ a an hawpui hnu chawlhkar thumnaah chuan damlo kan theih ni hmasa ber chu Noreen-i chuan a hawng ta a. Noreen-i chu a enkawltu ber anih avangin a phal chinah ţheuh chauh a entute chuan an en thei a, an lo lut indawt zut mai a. West-a pawh chu a lo lut ve a, "Ka lawm hle mai ţhianpa" a rawn ti a. "Kan inrul chiahah ngai mai ila" Green-a chuan a lo ti then a. West-a chuan a lu a thing a, "Ni lo ve, hetah hian ka awm ve tawh dawn" a ti a. "A va lawmawm ve, ka lo beisei deuh reng asin" Green-a chuan a ti a. Chutah Simon Putara leh Frying Pan neitu Job Leeming-a chu an lo lut ve leh a. A bawng rual hote an lo la kir leh tawh bawk a, Leeming-a chu a hlim hmel hle mai a. "E khai, hetiang enkawltu ka neih ve dawn ngat chuan hliam ve te pawh a chakawm thei dawn dawn alawm le" a rawn ti chul a.

"A.. Hei, miss Noreen-i hi a lo ţha em kher pawh a, ka ţha chhuak leh thei chauh a ni." Green-a chuan a lo ti a. Noreen-i zak chu a lo sen deuh ap ap a, Job-a chuan a lo hmu dun kiau a. "Hei, Simon-a nen hian kan inhnial deuh a, Green-a, i ngaihdan hriat ka duh a ni. Ka cowboy zinga pathum, a ţha ţha lehnghal, YZ an bansan hnu a ka hnena lo thawk ten YZ a kir leh an duh deuh a, Simon-a lahin a lo fuih ru vel a. A tidik lo deuhin ka hria a ni" Leeming-a chuan a han ti a. Green-a chu a nui deuh tet tet a, "Nih pawh a ni mai thei a, mahse Ginger-a leh Dirty-a leh Simple-a te tello chuan kan khawsa thei lovang mawle" a lo ti a.

"Kan khawsa thei lovang a?" Job-a a lo ti hu a. "Zat leh zatin Ranch hi kan insem tawh a, Foreman a ni nghal asin. Chu chu ka bat a niin ka hria" Simon-a chuan a lo ti a. "Ba teh reng ang. Chu bak pawh. Mahse mak ka tih chu engkim i hmuh phak a mi tawh phawt neih vek i tum bik hi a ni. Kei, helaiah mi duhtawk rawih tur pawh nei lo leh in lam lo enkawltu pawh nei lovin ka awm a." a'n ti a. Noreen-i chu a han melh a, a lu a lo thing na na a. "Engkim neih tum tak vek mai. Ngawi teh, kan ţhianpa hian tunhma chanchin kha a nei nual a ni lawm ni kha?" a han ti zui a.

Chutia tunhma thil a'n sawichhuah takah chuan Simon-a hlim hmel chu a chuai ta vek mai a. Mahse tumahin engmah an sawi hmain Tonk-a chu a lo lut ta a. A hnung lawkah Larry-a chuan a rawn zui a. "Marshal hian lo luh ţalh a tum si a, buaina a chhuah ka hlauh vangin ka rawn hruai ngawt a ni. Mahse hotupa, thu min pek phawt chuan a benga khai chhuah chu ka lawmthu a ni anga, ka chak zek zek ania" a rawn ti a. "A ţha e, Larry" Simon-a chuan a lo ti a. Larry-a chhuah hnu chuan "Tonk-a, enge i duh?" a han ti a. Khuma Green-a mu chu kawk vu chungin, "Kha kha" Marshal chuan a lo ti a. Noreen-i chuan, "Lak sawn tur chuan a la chau lutuk" a lo ti thuai a.

"E khai! Ka ring lo. Khaihlum leh tho turin dam teh viah a ngai hleinem" Tonk-a chuan a han ti zauh a. Simon-a thinin a tuar ta lova, a lo dingchhuak thut a, a silai chu a'n chuh mai dawn a, Tonk-a chu a hnungtawlh zuk mai a, "Ngawi teh Simon, dan lo kalh chu a sawt lovang. He pa hi man tura duh a ni a, pawnah sawn ka hote dawrzawn khat laiin man tumin an nghak reng a ni," a han ti a, Simon-a chu a ţhu leh ta a. "Engtia tih nge i tum a?" a han ti leh a. Tonk-a chuan, "Big Rock-ah ka hruai ang a, chuta ţangin khawpui lamah lung In ţha tak tak awmnaah an hruai ang mawle" tiin a chhang a. Noreen-i chuan, "A dam deuh chu in nghak thei em em tur a ni" a lo ti a. Tonk-a chuan, "Tichuan, in lo chhuah leh anga maw? Ni lo ve, tunah ngei hian a lo kal ve tur a ni" a ti tlat a.

"A lo kal lovang. Job-a, naupang ho lo va khawm rawh. He pa min han tham loh dan reng reng mai hi" Simon-a chuan a lo ti ve thung a. Leeming-a chu han fuih hranpa a lo ngai lo nasa mai a, a tho nghal uaih mai a. Simon-a lah a tawt deuh ţeuh tawh mai si. Chutihlai chuan khuma mu chu a lo ţawng ve ta a, "In sawia ber ka ni bawk a, tlem chu ka'n sawi ve ang chu. Naupang ho pawh koh a ngai lovang. Miss Noreen-i hian ka kawr kha min han pek theih chuan," a lo ti a. Marshal chuan a silai a phawi thuai a, "A silai kha i pek vaih chuan tunah a thi nghal a ni mai" a lo ti a. "Â â teh suh Tonk-a, i lo luh tirh ata kha ka tin reng tawh che ania. Uţawk, nang ang sawisak nan chuan silai phei chu ka mamawh lem lo na a," Green-a chuan a lo ti mai a.

A puansin hmawrah chuan puakruk hmawr hi a lo lawr reng mai lah tak a. Tonk-a chuan a silai vawn lai chu a thlah ruai ruai mai a. Green-a chuan a kawr chu a la a, a chhung thlehna chu a'n phawtthler hawk a, lehkha leh arsi lem hi a rawn phawrh ta a. Khum chungah chuan a han theh thal tap a, "Kha kha Deputy Sheriff Badge a ni a, hei hi ka ta a ni tih Governor Bleke-a thupek a nih hi. Marshal, hei hian ka duh chuan lungina khung thei che ka ni tih a tilang a ni" a han ti ta a. Kut khur dur dur chung chuan Marshal chuan a han la a. A lem te hi a lo ni ange tiin a han en a, a tak ngei a ni tih chu a hre nghal mai a. "Mahse, Sudden-a, Outlaw kha i ni si a, Governor hian a hre lo a ni ang" a la ti ţalh a.

Sudden-a chuan, "Thawnthu tawi te ka'n hrilh ang che, Marshal" a ti a, "Hman deuh tawhah khan mi pahnih hmuh duh em em mai ka nei a," tiin a'n ţan a. Ngaithlatute hmel chu a han nuih sak a, "An awmna tak hriatna ka neih loh avangin rei fe zawn ngai dawnin ka hria a, chutihlai chuan Governor in mi ţhenkhat sual deuh tih chimih duh a lo nei nual tih ka lo hria a. Tichuan, ani hna leh ka hna chu thawh kawp theih ni a ringin he hna hi ka dil ta a. Min lo la ngei a, mahse ka badge hi mi ţhenkhat angin ka tarlang ve duh lo. Tichuan, sual chi tinreng chu min burbun zo ta a. Tam tak ka tih niawm tak an sawi te chu a tihna hmun aţanga mel za tama hlaa ka awm laia tih te pawh a ni hlawm a. Tichuan, ka hming chu a lo thang ta hle a. Governor chuan remchanga hmangin min man apiangin nungchunga a hnen chu min hruai thlen chuan dollar singhnih hlawh tur a phal ta a. Nungchung lo chuan engmah hmuh loh tur a ni a. Hei, hmanni a Big Rock aţanga ka lehkha thawn min chhanna, helai ka tihfel zawha amah hmu tura min tihna pawh ka la kawl asin" a ti a, lehkha dang a rawn phawrh leh a.

Mahse Marshal chu a meng val ku ku mai a, lehkha en zai reng a rel tawh lo. Engtin tak min ti ang maw tiin a nghak ngawt ngawt tawh a ni ber mai a. Sudden-a chuan, "Governor Bleke-a hi i la hre lo pawh a ni maithei. A hming hi a pu zo hle asin. (Bleke - rapthlak) Thilsual tih chingte lakah chuan Tarman-a leh Poker Pete-a lehkha kan hmuhte kha ka entir chuan nang pawh hi a hmuh duh ngei che ka ring. Hlawh kha an pe ţha teh chiam lo che maw? In ruk khawm sa insemnaah chuan chanpual nei ve tur i ni lawm ni kha?" a'n ti sak a. Tah zet zawng Tonk chapo hmel zawng zawng chu a reh vek mai a. A ding sai hluk hluk mai a. Green-a chu a han en vang vang a.

"Engtinge min ngaih dawn zawng ka hre lo. Ngawi teh, i hmuhnawm loh em mai. Nang chu ni ila, Tonk-a, ka zinbo daih ang, zin vah vel hi hriselna atan pawh a ţha e an ti asin, i mamawh em hi! Rang takin hla takah suahsual rawngbawlna hmun dang zawng vat mai rawh" Sudden-a chuan a han ti leh a. A aw chu a danglam thut mai a. "Mahse hei hi hre rawh. Ka awmna vel boruak hip pha a i lo awm leh ka hmuh vaih che zawngin ka nuaibo ang che" a ti ta a. Khup sai hlawk hlawk chungin Marshal chu a chhuak ta a. Kawng a khar hnu in damlo chuan, "Kha kha a tawpna anih kha. Hatchett khuaah phei chuan mi ţhenkhat, Marshal hnung lo zui ţhin kha chu an awm na a, mahse an ţha ve chhawm em ang chu" a han ti leh a. "Tonk-a hi midik a nih chu ka ring lo reng ţhin a, mahse Tarman-a mi a ni ang tih chu ka lo ngaihtuah ngailo" Simon-a chuan a lo ti a.

"Tarman-a khan bawngrual mai a duh a ni lo, ram hi a duh a ni. YZ hi neih zet a, Frying Pan pawh silai mua lei leh a tum a ni. Ngawi teh u, rel kawng hi Big Rock-a lo lutin Hatchett Folly hi lo thleng ta mai se, in Ranch hi eng ang chiaha hlu tur nge in ngaihtuah tawh ngai em?" Green-a chuan a han ti a. Leeming-a chu a faifuk raih a, "Uai! Chutiang a lo ni maw? Mahse, a ni dawn em maw ni le?" a lo ti a. Green-a chuan, "A ni alawm. Chu chu Tarman-a khan a hria a ni" a ti a. "Ngawi teh tlangval, i lakah hian kan ba hnem tawlh tawlh mai chu a ni a. Job-a nen hian Sudden-a chuan Governor hnena sawipui te pawh a ngai ang a, kan theih ang angin kan sawipui ang chu te kan lo ti vel a, mahse, chutah pawh chuan keini puih i lo ngai bawk si lo. Ka bat rulh dan tur pawh hi ka hre ta lo ka ti. Ka lawm tak tak a ni" Simon-a chuan a lo ti ta ngawt a.

Simon-a te ţhiandun chang lo pawh chu lawm ve dang an lo awm a. Damlo chu duh taka lo en vawng vawngin Noreen-i chu a lo nui ver ver a. Chutia a han en reng lai chuan Green-a chuan a nghawng hi engemaw zawng ni awm tak hian a han dap chu a lo hmu a. "Hei hi em ni i zawn?" a lo ti a. Rangkachaka siam locket hi a lo entir a, a pawnah chuan bawnglu lem hi a awm a. "Silaimu khan a hrui a lo thawi chat ţhelh a, a bo hlauvin ka lo la a ni" Noreen-i chuan a lo ti a. Rang lutuk maiin Simon-a chuan a lo phihthla ta a, "Khawia i neih nge?" tiin a hmeh hawn rukna chu a'n hmet a, a inhawng ta a. Kut khur dur dur chunga a han en chuan, nula naupang lam deuh hmelţha zet thla hi a lo awm a. An rawn kap leh ta emaw tih mai tur hian Simon-a chu ţhutthlengah chuan a ţhu hnawk mai a. "Engtia i neih nge tih ka zawt a che" a ti ta a.

"Ka hriat theih tirh ata ka neih reng a ni. Bill Eavesham-a chuan a hmu ve lova, mahse ka awmna ţhin Piute nupa chuan, ka nu thla a ni ange min tihsak a," Green-a chuan a lo ti a. "Ni, ka nupui thla maw? Ka fapa Donald-a chuan a bo lai chuan a awrh chiah tak asin" tiin khuma damlo mu chu chibai a han buk a. "Ka fapa, ka fapa, min ngaidam thei tak ang emaw chu le? Norry phei chu lo awm lo se chu ka khaihlum tir daih tawh awm si che a," Simon-a chuan a ti ta a. A la damkawr chau nen a mualpho ţep hi a ni a, ani Green-a pawh a hnuk te a ulh ţeuh mai a. Mahse a inti pachang a, fiamthu ti tak hian, "Chutih zawngah chuan ka pu, kan inrul chiah a nih zawk chu. Keipawh kah hlum che tuma lo kal ka ni alawm" a lo ti a.

Leeming-a chuan a lo zawm thuai a, "Mahse, i kap ta hleinem. Ngawi teh, Simon, a mak hle e. I bawngrual a ru ni a i hriat lai ngat pawh khan he tlangval hi ngaina lo thei lovin i insawi tak kha mawle" a lo ti a. "A nia sin, ka hrethiam theilo reng a ni. Ka hmuh hnu hmel ang deuhva han hriat chang te pawh ka nei a, mahse ka hrechhuak thei si lo. En teh u, anu asin a chhun" Simon-a chuan alo ti a. An han en hlawm a, a lo ni ngei tak a. Tichuan Green-a chuan a naupan lai zawng zawng leh tunhnai a Governor Bleke-an Hatchett Folly vela bawng ruk tam avanga a rawn tirh thleng chuan a hrilh ta vek a.

A sawi zawh chuan Simon-a chuan, "Ka fapa, ka zak kher mai a! Min lo kaphlum der pawh ni la, a dik zawk tur. Thuhriltu tena an sawi hi a dik ngai chuan tunah hian thil awmdan chu Bill Eavesham-a pawhin a hre tawh ang chu maw, Ani kher kher in a lo hmuh che le? Ka in ngaidam thei dawn lo anih hi." a ti ta hial a. A aw chu a khur dar dar tawh reng a. A damkawr chak lo vei nen, a mualpho dawnin a inhre deuh a, Job-a chuan, "Khai, ti teh ţhianpa, ka damlo en pawh hi kan ti phawklek lutuk dawn hi. Keini pahnih chu i chhuak ang khai. Naupangte pawh, i fapa thar Donald-a chanchinte chu i zuk hrilh teh ang," a lo ti ta a. "Kan fanu pawh" tiin duh takin Noreen-i chu a han en a, "A dang chuang lawng ti rawh Norry?" Simon-a chuan a han ti a.

Noreen-i chuan a kuah chuk chuk a, "Dang chuang nang maw le mi â pa, kal vat rawh u. Chutilo zawng in pahniha enkawl in ngai leh nghe nghe ange" a lo ti ve a. An chhuah tak hnu chuan Green-a chuan, "Pa han chhar thar meuh chu a phawklek theih hle mai a! Larry-a chu a nui var var ang chu. Nula chhaih buai thei taka min ngaih avangin ka hmingah Don-a a lo phuah a, hmeichhia ka ngaihtuah hman loh vei nen," a han ti a. "Hmelţhai chauh tih loh chu," Noreen-i chuan a lo ti. "Tunge hrilh che?" tiin Green-a chuan n lo zawt a. "E, nangman i khawsik laiin i sawi alawm" Noreen-i chuan a ti a. An sawi zawm hma chuan silai a lo ri ta tuar tuar mai a, Noreen-i chu a phawk hra mai a. Mahse damlo chu a lo nui var var a, "Naupang ho a hrilh ta a nih dawn chu. Lo nghak deuh se ka ti asin le" a lo ti a.

Noreen-i ngaihna hre lo chuan, "Engah maw?" a lo ti a. "Kalsan an har nep deuh ang chu ka ti" Green-a chuan a ti a. Nula chuan mak ti deuh hian a en reng mai a. "I rokhawm tur chhuhsak ngawt tur chuan ka awm hi i lo ring reng reng em ni? Nang, hei leh chena fanu anga lo awm ţhin. Chutianga ka tihin Tarman-a aia sual ka ni ang asin," Green-a chuan a han ti leh a. "Mahse, han chan leh che chu a tuar lo tawp ang. Pa ţha theih tawp a ni a, mahse a fapa bo hi chu a sawi zing ngawt asin." Noreen-i chuan ama hlimna ngei tur sawi chhuak a, sawi bo thei a ni tih hre ranin a lo ti a.

Green-a chu a ngawi vang vang a, a in ngaihtuah a, a ţha ber ni a a rin ang chuan rilru a siam ta a. "Har zawng a harsa ngawt ang. Mahse Ranch hi zawng ka chhuhsak dawn lo che a ni. Ka kal ang, chu chu kawng awmchhun a ni" a ti ta a. Noreen-i pawh chuan a rilru a lo siam fel ve tawh a, a nui seih a, phun se se hian, Tak tak maw Don-a? Ka Ranch, i Ranch ti lovin, 'Kan Ranch' kan ti mai thei lawm ni?" a rawn ti chhuak ve ta a. Green-a chuan a hrethiam mai lova, a han hriatthiam hnu chuan Noreen-i chu a hmer vawng vawng a, ani Norry chuan a hmangaih mitmeng chu hmu ngam lovin a hmai chu a awmah chuan a lo thukru a, "I ti tak tak em ni, Nula?" Green-a chuan a han ti ngawt a, chhanna hranpa phei zawng a hre lo. Mahse Noreen-i chu a kuah nghet telh telh a, "Hriatthiam har ka va ti em!!" a ti ta hial a.


www.storyfb.com mizo story thar englai pawhin chhiar tur a awm reng
A TAWP TA...
ka inchuks tir ta lo mai a nih kha, nuam in ti lutuk palh ang 😂😂😂 Next chu Sudden - Rides Again aw. Hell city kan khuainuai ang -RZ

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)