SUDDEN - IN THE RANGE ROBBER (Completed)

[Ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 7
(Rozami Pachuau)

A tukah chuan Hatchett khaw kawtthler awm chhunah chuan mi pakhat hi chak zet hian sakawr chungah a lo chuang a. Khawlaiah chuan tumah pawh a hmu mang lova. Folly Saloon hmaah chuan a sakawr chu a tiding chawih a. A chhuk a, Saloon chhung lam chu a pan ta a. Pa hnar kem ngel ngawl, tawi, sa tha hmen hmawn hi a ni a. Saloon chhung a han luh chuan khawlai ang deuh bawk chuan awm pawh chu an lo awm mang lova, mi pahnih hian dawhkanah phur awm lo zet hian lehkha an lo deng a. Pakhat chu zu zuartu bulah a ding a, Silas nen chuan an lo inbe mawlh² a. Chupa lo ding a hmuh veleh hnarkema chu a ding chawih mai a. Mahse, han kir leh nan chuan a tlai lutuk tawh si. Silas-a chuan a awmdan chu a lo hmu kiau a.

"I dam maw, Snub?" (Snubnose tih hi hnarkem tihna a ni) Silas chuan a lo ti a. Green-a, Silas-a bula lo ding ve reng chuan Snub tih hming lam rik a'n hriat veleh chuan a hming putu chu a en thuai a, mahse han ngaihven tehchiam awmin a lang lova. Snub-a chuan lehkha lo deng te chu a han be luam a. Silas-a rawn pek um chu a thli a , a han tlak khalh a. "Double X lam in tha tlang maw?" Silas chuan a han ti leh a. "Kan tha tlang a ni mai ang chu. Mahse Injun hovin bawng paruk ngawt min laksak leh a, Dex-a pawh a thinrim kher mai." Snub-a chuan a ti a.

Green-a chu a en hrek² a. A rilru te² in "Hmana a hming an thian pakhatin a han sawi rik palh zauh kha a bula mi chuan hre tak ang maw" a ti a. Mahse, hre awm pawha Green-a chu a lan loh avang chuan a ngaih chu a tha deuh hlek a. Vaihlo a zial a, tan tumin a han pet a. Nawalh hi a han nawt a. A fawh kai hma chiahin silai a lo ri thruai a, a nawalh fung ken lai chu a bung hmawk mai a. A han ri leh thruai a, a meizial peh lai chu a chanve velah hian a chhum leh hmawk a. A han ri leh thruai a, a hmui bul chenah hian a meizial peh chu a bung leh hmawk a, a hmuiah chuan lehkha them leh vaihlo bang hi a kai liai ta chauh mai a.

"Engtizia nge..?" a han ti dawn a, a bul lawka engmah pawisak nei hranpa awm lo zeta ding, hlim hmel tak si kawng bula lo khu chho liai² chu a han hmu a. "Ka'n fiamthu ve mai² anih kha. Tih chak ah ka neih tawh a. Khai! I zial kha ka tihchhiat sak vek si che a, tirawh, churut lam thung i han zu dun teh ang," tih pahin Silas-a hnenah chuan phawrh turin a han zaizir a. Dawhkanah chuan pawisa a dah a, Snub-a chu a hnungchhawn leh ta mai a, a chhuak ta a.

Mahse, Snub-a chuan engdang a ngaihtuah thei lo. Zel ang deuh hian a awm ha mai a, "Vawi thum, kawng bul atanga kah lehnghal. Ka en reng ania, a che pawh ka hmu hman si lo. Tunge maw ni le?" a ti a, a hawi hau mai a. "YZ mithar a nih kha" Silas-a chuan a lo ti a. "Ka hria alawm, mahse tunge ni?" Snub-a chuan a la ti talh a. A han nui khur deuh dar² a, "Kha² maw ni Poker Pete-an thah a tum chu? Anih hrim chuan chang teh se, keizawng, a eng lai mah kha ka hauh lo ve," a ti ta hial a. "I hnar kha a lo vanvadak em zawk a, Juda mi chu ni la, a kah hnuhnun ber tal kha chuan i hnar chu a chhawk tel ngei ang le. I vannei hle mai," Silas-a chuan a lo ti a.

"Chu² a dik a ni. Engtizia nge ni Silas, nang pawh, Snab, zel hmu ang hrim a khatia in men phawk hru mai?" lo lut thar Snap Lunt-a chuan a a rawn ti a. "I rawn hmu hman lo maw, Snap?" Silas-a chuan a lo ti a. "Hmu e, kawngkharah ka ding reng alawm, a kap thiam ang reng viau mai," Lunt-a chuan a ti mai a. "Ang reng a..? Khai², nang meuh pawhin i tluk ka ring hlek hlei nem," Snub-a chuan a ti a. Snap Lunt-a chu a nui deuh sak a. "Tluk kher lovang. Mahse, vaihlo kha zial leh la, ka'n tichhin ve ang chu?" a lo ti a. "Ni lul lo ve, keimahah kher chuan chhin lul lo ve. I tluk em² ang. A ai aiin i thiam ta ve ang. Khai! Silas, he mihring hi thildang han pe teh khai. Fiamthu te chu a la ti leh nghal zuk nia. Snap, engtinnge i ngaih?" Snub-a chuan a han ti leh a. "Khatiang kha a fiamthu thawh dan anih chuan kei chu ni ila, a fiamthu thawh chak lai deuh niawm a ka rin lai chuan amah kha mel khata hlaah ka hel trang² mai ang," Lunt-a chuan a lo tih san leh mai a.

Chutihlai chuan an mi sawia chu dawrah a va kal a. A neitupa kum 60 mi lai niawm tak chu amah chauhin a lo awm a, "Silai ri te ka hriat tak, eng thil nge ni ta?" a lo ti a. Green-a chuan, "Cowboy pakhat han in tithei vel mai² ania, eng pawi mah a khawih law" a ti mai a. Vaihlo leh silaimu te a lei a, Sikret zialna khawl a zawrh leh zawrh loh te a zawt a, a lo zuar lova. Chulai rama a awm rei tawh leh tawh loh te a zawt ta zel a. Dawrkai pa chuan Hatchett khaw din tantu a nih zia leh Simon Putara te nena lo lut ho an nih thu te a lo hrilh a. Green-a chuan Simon-a chanchin chu a zawt zui zel a. Nupui pawh hruai lovin a fanu leh Red Indian hmeichhe pakhat, a fanu enkawltu nen chauh an lo lut a, an lo kalna ram chu Texas a ni tih te, a lo kal tirh deuh chuan mikhual an lo kal tawh chuan a biru zel thin a, an hmel a hriatchian hnu ah chauh a inlan ngam thin a ni tih te chu dawrkai chuan a lo hrilh a.

Chutihlai tak chuan kawtlai a Hotel kawt a Poter Pete-a kal chu a han hmu a. Chu chu Snub-a khan a rawn pan a, khawlaia se se a thu an sawi lai chu an lo en reng a, Snub-a chu a kal leh ta a. "He pawisa khelh ching, hman tlak loh zet, Poker Pete in tih hi engtik atanga lo awm tawh nge?" Green-a chuan a han ti a. Putar hlauthawng chuan tawng ri lo turin a lo zap lawm² a. "Khai, khai, khai, au vak² mah ta che. Chutiang phei chu a ni lo ka ti hlek lova, a aia sual zawk pawh nih pawh a ni ang. Mahse helaiah hi chuan thil a tithei asin. Amah han kalh deuh hlek tawh hi chu an dam rei ngai lo ania. A awm pawh a ni chiah lo, hotel-ah tunah chuan a awm a, a lo zin zawk thin a ni awm e" a lo ti a. "Khai! Chu.. Min tihlau ta hle mai a," Green-a chuan nui chungin a ti a. "Mangtha le" a ti a, a chhuak ta a.

Khawlaiah Hotel zawn a thlen chuan a'n ding deuh hlek a, "Kha mihring khan a tlanchhia chu min ti tawh lawng chu maw?" a ti a, a kal leh ta zel a. Khua atanga Mel thum ah YZ kawng leh Double X peng chu a va thleng ta a. A ngaihtuah vang² a, Double X peng lam chu a zawh ta tlat a. Leisekawt zim deuh hi a va lut chiah tih chuan hnunglam atanga sakawr lo kal thawm hi a hre ta a. Chulam kawnga a kal chu tuma hmuh a duh loh avangin kawng sirah chuan a peng a, a biru ta a. Reilo te ah Poker Pete-a chu amah chauhin a lo kal a. Green-a chuan a sakawr hnar chu a lo hup trawk² a, tichuan, an thawm hre lovin Pete-a chuan a kal pel ta a. Mahse reiloteah a mi zuia chu a hmu ta hlek lo mai a. Fimkhur deuh chuan a kal zel a, kawng bul lawka ruam deuh atanga mei khu lat² hina va hmu ta a.

Thawm dim thei ang berin a sakawr chu a thlung a, ke in a pan ve ta a. Poker Pete-a leh Snub-a chuan mei an kil a, an lo titi dun a. An titi Green an a va man ve chinah chuan Pete-a chuan Snub-a chu a lo hau a. "Pali pawhin engti tiha chhuah leh nge maw in nih le? Han that fel law² ula a tha mai tur, chutianga han khai vel ngawt te chu a atthlak ngawt a ni." a lo ti a. "Thih ngei a rinawm em bawk a ni. Engtin kher² nge maw a chhuah leh pawh ka hre lo ve" Snab-a chuan a ti a. "Tu'n emaw a chhuah tih a hriat reng alawm. Hei ang hi, he mihring hlauhawm zia pawh hi i hrilh hriat tak² theih dawn loh ka ti." Pete-a chuan a han ti leh a. "E.. E.. E.. Chu kher chu ka rinhlelh em ni i rin" Snub-a chuan a ti let ve a. "Nichinah pawh khan kahna hun i nei reng a, a hnung a chhawn che a, kah ahnekin milim ang maiin i ding zum reng ringawt si" Pete-a chuan a ti leh a.

"I lo hmu elo?"
"Hmu lo ve, a hmu te'n min hrilh alawm. A hlau hle an tih che kha."
"An tidik chiah anih chu. Dan pangngai chuan ngam loh han neih bik chu ka hreh thin a, mahse, nichin kher kha chuan ka silai han khawih ve zoh ila chu tuna hetia titi tur pawh hi ka awm tawh lovang tih ka hrechiang a. Ani lah khan silai kha khawih ve se min ti hle niin a lang a. Mahse, nun hi ka la ning hranpa lova, zawhte angin nunna pakhat pawh ka nei bawk si lo a ni," Snub-a chuan a ti a.

"Mai² a, thah theih loh khawpa silai kah thiam ka hre lo ve. Mahse, i hlauh tlat chuan le.."
"Hlau e, mahse chumi avang chuan tupawh ka hlau emaw i lo ti palh ange, i duh² a min tih te hi i lo tum palh ange"

"Mi a pa.. Chutianga tih ka tum hleinem che. Kan thawh tlan dial² hi a tul e ka ti anih zawk chu. He mihring hi a lo inrawlh ve sek si a, tih boral a tul ka tihna a nih chu," Pete-a chuan a lo ti a. "A tha alawm. Nangin han bei ta che. Pete, vanneihna zawng² ka duhsak a che. Thlan atan duh bik lai te i neih chuan sawi la, chutah ngei chuan keimah ngeiin ka rawn phum ang che" Snub-a chuan a tihsan mai a. "Vawikhat pawh kha i that thelh tawh a ni lawm ni?" a la ti tak deuh² a. "Khangte chu ka vanduai alawm" Pete-a chuan a lo ti ve mai a.

"Spider-a pawh hrilh .." a ti hman chauh a, Pete-a chuan, "Mi a pa.. Hming lam ri mah ta che mawle" a lo ti thuai a. (Spider - Maimawm). "Tunge maw helai ram pilrilah lo hria a i rin le? Sakawr hian em ni sawi leh se i tih?" Snub-a chuan a lo ti a. "Aw... Mi a hlir ka lo thawhpui che u anih hi mawle. Thil reng² keimah ngeiin ka tih loh chuan a buai leh nuai thin. A tu mi a kher² in nge maw Bub-a pawh chu lo that che u le? Khaih, khiah, khaih, a sawi leh dawn ta zuau² e. Khai, haw la, ka sawi zawng² kha i thiante hrilh la, kan vaia hmingin i hmaia kua kha chip hram² teh khai." Pete-a chuan a ti a, a kalsan ta a.

Snub-a chuan Pete-a a zui ve hma chuan Green-a chuan a nghak reng a. A kal hnu chuan a lo chhuak ve a. A kal pah chuan a thil hriat chu a ngaihtuah neuh² a. Tunah chuan bawng rukhmang ho chu mingo, Red Indian anga inchei an ni ngei tih leh an vai anih loh pawhin Double X cowboy chu chung thilah chuan an inrawlh ngei tih chu a hrechiang ta a. Bud-a thattu hming pawh a hre teuh hle a. Chubakah, hming pakhat 'Spider' tih chu a hriat belh bawk a. Tunhma lama mei nei taka an lo fiamna te kha a hrechhuak a, chu thil chu ngaihtuah tham tak niin a ring a ni. "Thil a buai tan dawn chauh a ni mai awm mange", a ti a, YZ peng a lo thlen chuan a zawh ta a. Darkar khat lek a kal hnu chuan YZ pawh chu mel hnih khat lek a lo ni ta a. Mahse, a thil chhut chu a la ngaihtuah chhuak thei lem lo.

Tlang pang, lungpui kara a kal laiin a sakawr chuan a beng a tun ta hru² mai a. A han hawi chhoh nak chuan sakawr pakhat, thlamuang awm fahran a tla, a lakam pawh a zin chunga ban that diam si hi a han hmu ta a. Chu sakawr chu a man a, a han au vak a, "Min pui rawh u" tih thawm niawm tak hi a hre viai² a. Tichuan, au thawm awmna lam nia a hriatah chuan a kal ta a. Tlang chung zawl deuh hi a han thleng a, a pang chu a awih nasa mai a, hmun khat laiah phei chuan lei minna niawm tak hi a lo awm a. Chu leimin chu a han hawi thla a, ko atanga hlam ruk lai awmah chuan thing te tak te bul zawl deuh hlekah hian Norry lo in uai tang hram² chu a zuk hmu ta a. "Lo uai hram² rawh. Ka lo kal e" a ti a. A hruizen chu a sakawr zin filawrah chuan a han thlung a. Amah chu a zakah a inhling hlauh a, ama sakawr pangngai, hmin tha zawk chu a lo ni hlauh a, a rintlak zawk a ni.

Norry awmna bul a zuk thlen chuan a kut dinglamin a han kuah nawlh a. "Min kuah tlat rawh le. Sakawr khian min pawt chho mai ang" a ti a. A'n au that a, sakawr chuan a pawt chho ta a. A kut awl lam leh a ke chuan leiko an su tur chu a veng hram² zel a. A tawp a tawpah ko chu an chhuak ta hlawl a. Norry chu a chauh em avangin tawng pawh a tawng peih lova, a tuithawl a tui chu a han intir a, a lo harh ta deuh a. "Khawnge ka awm?" a'n ti ha a. Mahse, "Ka hre leh e, ka thutna lei a tawlh a, min tawlh pui a ni tak e. Engtinnge min rawn hmuh a?" a ti leh thuai a. Green-a chuan a va hmuh dan leh a chhanchhuah dan te hawihawm takin a hrilh ta a.

Norry in lawmthu te a hrilh zawh chuan, "Thildang min tih sak turin ka la ngen cheu dawn che a ni," a han ti a. "Ka lawm ngawt ang chu" Green-a chuan a lo ti a. "He ka tawhsual tawh thu hi ka pa hrilh lo turin ka duh che a ni. A chhan chu a neih chhun tak meuh² ka ni a. Hetia sakawr chung chuanga han len vel hi ka thlahlel a, ani hian min ngaihtuah thei em² mai si a, hetia ka chetsual hi a hriat hlauh chuan ka len pawh a phal tawh lovang" a ti ta a. "Sawi ka tum awzawng... " Green-a chuan a han ti zuau a, a pa hnena sawi a, thangthat lak tum niawm in a ngai ni a rinna a han nei thut a, sawi pawh a sawi zawm ta lova.

"Kei hi a neih chhun liau² ka ni si a," Norry chuan a'n ti leh a. "Chu.. I nu pawh i hre lovang maw?" tiin Green-a chuan a lo zawt vat a. "Hre lo. Nu ka nei lo tih theih hial awm ka nia sin. Nu te hmel mitthla tal pawha han hriat loh chu a hreawm ngawt asin" Norry chuan a ti a. Green-a chu a bu nghat a. "Mahse, nang chu pa tal i nei alawm. Nu leh pa te hi zawng an hlu em mai a. Chutiang nei ve lova seilen hi zawng mi kan an loh phah deuh nge² zawng a ni" a lo ti a. A han sawi danah ama thu a sawi tih a hriat bawk a , Norry chuan a khawngaih ve leh chhawng hle mai a. "A danglam viau maithei e, i nei lo anih chuan" a han ti a.

"Nei lo. Nu leh pa ka hriat ve chhun chu Red Indian pitar, piute chi (hnam) leh a pasal chauh a ni mai a. Sakawr zuarin an vak kual thin a. Chuvangin kei chu Red Indian zinga seilian ka ni. Chu putar chuan, "Mingo i ni e" min ti a, engtizia a chutianga an hnena lo awm nge ka nih lah min hrilh duh si lo. A ruk a min ruk pawh an ni mai thei. Tichuan, an sakawr zawrh lai leitu bawng vulh mi pakhat chuan min lei ta a. Ani chuan fa angin min enkawl ta a ni. Chupa chu pa tha zet mai hi a ni a, chhungte dang a nei bik lo." Green-a chuan a ti a. "A thi tawh em ni?" Norry chuan a lo ti a, Aw.. Kum thum vel a ni ta. Anin min thihsan achin chu laina bulbal deuh han neih pawh ka nei ta lo" Green-a chuan a ti a.

A'n ngawi deuh vang² a, Norry rilru a awm chu a suangtuah a, a rin chhan ta a, "Chutiang si, engtizia a mahni in a bawng i vulh ve mai lohva, hetia, cowboy hna ka thawh tak pawh i ti mai thei a, chu ka thian neih chhun chu lungchhe tak leh rilru na em² a thi a ni. A chhan chu a nupui chuan an inneih atanga reiloteah a thih san a. A fanu neihchhun lah chu kan inchhar hma chuan hmelma pakhat in a ruksak si a, midangin a thil neih zawng² an lo rawk vei nen. Tichuan, min hnutchhiah theih chhun chu chung mi pahnih te chunga phuba lakna tur thu chauh a ni ta a ni. Chu phuba chu lak ka tum a, keima chungchanga an thiltih vang ni lovin ka thian hriat ve chhun an lo tih retheih luattuk avang zawk chuan," a han ti ta zel a.

A han sawi hmangah chuanna thil tum chu a tum ruh hle a ni tih a hriat bawk a, Norry hmulthi chu a ding ur² a. Red Indian ho phuba lak dan te a ngaihtuah a, chutiang deuh chuan a la ve dawn a ni phawt awm si a. "An lo thih hman hlauh chuan an vannei ngawt a ni ang. Mahse an la dam em² ang. Kan ram hi a zau tham a, tunah kum 3 chauh ka la zawng a ni," Green-a chuan a la ti deuh² a. An han ngawi dun leh vang² a. Green-a chuan inthiamlo deuh hian, "Ka tisual der a ni, enge maw ka hriat a, ka chanchin hlimawm lo zet chu ka hrilh tak vak² che chu le?" a ti leh ta a.

"Mai² a, pawi tih pui hle che mah ila ngaihnawm ka tih nak alaia. Chung mite chu hmu lo la ka ti e," Norry chuan a ti thuai a. "Chuti chu nupui fanau pawh nei lo la min ti tihna zuk nia," Green-a chuan a lo ti sap a. "Khai le, hei, Ranch pawh kan thleng dawn tawh bawk a, lonhan kal hmasa la a tha ang" a'n ti leh a. Norry chuan lawmthu a'n hrilh nawn leh a. Phuba lakna rilru pu rana lo enthla rengtu an awm tih hre hlek lo chuan an inthen ta a. Green-a chuan a lo nghak deuh hlek a.

Norry'n, in a han thlen hnu deuh lawk chuan a pa a han hmu, a hmelah chuan a lo lawm lo hle tih a hriat bakah, "Green-a nen in lengdun tih ka lo hria a," a lo ti leh nghal a. "Tu'nnge chutiang hrilh che?" Norry chuan a han ti a. "Chungte zawng i sawi tur a awm lo, ka zawt che anih chu" a pa chuan a ti ta khur² mai a. "Len zawng ka leng ngei mai a, ka lo haw lamin Green-a chu ka hmu a, thui lo deuh chu kan lo kal dun alawm. Kan mi chhawr te ka biak hi i phal lo em ni a?" Norry chuan a ti ta a. "Chutiang a ni lo. Mahse tun lawka Blaynes an a rawn tih ang deuhin hepa kher hi chu a la thar deuh a, a chanchin lah hi engmah a sawi duh si lo." Simon Putara chuan a ti tun tun a.

"Chu.. Blaynes-a a ni maw, chutiang te lo hrilh che," Norry chuan a ti a. "Ani lam zawng huat tum lo la, Foreman a ni a, a thil hmuh pawimawh te chu min hrilh vat tur a ni reng a ni" Simon-an a tih chuan, "Ka chungah kher zawng Foreman a ni lo ve. Chuvangin ka thiltih min lo enthla tur zawng a ni lo chiang emai, kan enthlak hmang pa chu. Green-a te chu nungchang mawi takin a awm a, a chanchin hriat loh tih thu ah chuan min hrilh teuh nghe² asin," Norry chuan a ti ve ta a, a pa chu a hrilh chhawng ve ta nghal a. A sawi zawha a pa hmel dur te chu a han hmu a. "Ka pa, engtizia nge ni ta?" hlauthawng takin a han ti a.

Simon-a chu thutthlengah chuan a thu zawi hnawk a. "Ka ruhseh vei bawk hi mawle. A chang chuan a na deuh viau thin a. Ka lo tar ve ta a ni ber e. Green-a chungchang chu mi tha tak a ni ta ve ang, in intawn remchang changa han kawm te phei chu ka remti lo hlek lova, mahse he Ranch hi i la nei mai dawn a, a hotu tur i nih dawn avangin a tu a te mah hi kawmngeih lutuk lo la ka duh a ni" a ti ta a. "Tunah pawh hotu chu ka ni tho alawm," Norry chuan a lo ti a. "A ni khawp mai. Putar chawp² hian i ho a ni ber e. Lo thinrim deuh anga ka lan palh pawhin min ngaidam rawh aw," Simon-a chuan a ti ta a. "Ngai lul lo ve, mi a pa... " a ti a, Norry chuan a pa chu a fawp ta nawk² a. A rilru chuan, "Chutiang zawng i chungthu-ah chuan a ni ve lo ve aw, Mr Ratler Blaynes," a ti a.

[Ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 8
(Rozami Pachuau)

Nigger Putara chuan inleng a nei a. Dawhkan paw rang fiap fuap hi an kil taih mai a. Zu in pahin an ti ti sap sap hlawm a. Paruk lai an ni a. Poker Pete-a chuan a vawk mit zim sin sen chuan a melh kual hrak² a. Ani leh Dexter-a chu a thu sa deuh te an ni a. "Ratler, he mihring, Green-a hi kan thah hma chu in Ranch lam chu bei rih lo ila a tha ang. Frying Pan lam te pawh bei rih ila a tha ang, bawng pawh an nei tha fu awm ania" Poker Pete-a chuan a han ti a. An pui tlang hle a. Dexter-a phei chuan hman ni a lo va en thlithlai thu te a sawi a, thlaler kaltlang bawk a, an bawng ruk chu khalh tur a ni ang tih te an rel tel a. Tin, Frying Pan neitupa, Leeming-a chuan Simon Putara ruk emaw a tih an rin thu te chu an sawi hlawm a.

Kawngka a inhawng thut a, mi pakhat a lo lut ve a, Snap Lunt-a a ni. "E.. Snap, i lo thleng ta maw? Lo thu rawh" Pete-a chuan a lo ti thuai a. Snap-a chuan, "Ka awm rei dawn lo" a lo ti a. A han chhan dan hmangah lungawia lo kal a ni lo tih chu a hriat mai a. "In zing ata hi ka bang dawn tih rawn hrilh tur che u a lo kal chauh ka ni," a han ti leh a. A ban thlah thla zawi hnakin a ding a, a thu han sawiin a a den dan chu a thlir ran mai a. A thil han sawi chu thih theihna thil a ni tih chu a hre reng a, mahse a hming a lo thanna chuan a chhan mai² a ni tih pawh a hria. Tlanchhiat chhuah leh a tul takin tih thu-ah a lo kal tlai lui a. Kawngkhar pawh chu khar lovin a rawn kalsan reng a ni. "I sim tlai hnuhnawh hle mai tiraw?" Pete-a chuan a lo ti a.

"Nih pawh a ni ang. Nangni aia tha ah ka inngai phei chu a ni lo. Amaherawhchu keimahni thawhpui ngei² te chemte a vihhlum te leh mi, nung chunga kham a, mulukawlh chaw atana khaihlum tumte hi ka tihzawng a ni ve lo a ni." Snap-a chuan a ti a. "Aw.. Bub-a te kha chu tihpalh a thah a ni a, i han sawi pakhat leh kha fiamthu mai² alawm, Snap" Dexter-a chuan a lo ti a. "Ngawi teh, Dex, chu thu kher chu awih thei awm deuh bulah i la sawi zawk dawn nia. Engpawh nise, ka bang a ni. Sawi tur nei in awm em?" Snap-a chuan a han ti leh a. An vai chuan a cho a ni ber a. An ngawi thrap mai a. Kah zawng an kaphlum thei tih chu an hre meuh mai. Mahse a kut, mu ke ang mai chu a'n phe zauh anga, engzat chiah nge a kahhlum ve theih dawn tih chu an hre ngam lo.

Tichuan, Poker Pete-a chuan a lu a'n thing deuh a. "A pawi ka ti khawp mai, Snap, mahse zalenna ram ania lawm. Min puan lawng chu ka ti mai a" a ti ta a. "I tidik anih chu. Mi puan zawt² hi ka tih ngai loh a ni a. Tun ataka han thar thawh leh phei chu ka tum lo. Ka hriat ang² chu ka zep ang" Snap-a chuan a ti a. "Anih leh min do dawn tihna em ni ang?" Blaynes-a chuan a lo ti ve a. "Hlawh min pe tu hna ka thawk dawn a ni mai a, chu² i duh² in ngai rawh" Snap-a chuan a tihsan leh a. "Chu, Snap, sakhua i nei tihna a ni maw?" Post Adam an tih chuan a lo ti ve a. "Teh meuh mai, hei hi ka tawngtaina bu anih hi. Pianthar i duh deuh em ni?" Snap-a chuan a ti a, a puakruk kawm chu a beng thek² mai a. A'n ding kawh deuh a, zuan tum ang hrim hian a kut pahnih chu a silai kawm bulah chuan a phar kak ta mai a.

Tah chuan, Poker Pete-a bawkin a lo thelh leh a, "Inkahna a awm lovang, ka sawi tawh angin Snap-a pawh a bang duh anih chuan a bang thiang a ni. Sawi tur dang i la nei em ni, Snap, i tui ve na loh tur sawi tur kan nei ania" a lo ti a. "Hei chauh hi, tuna ka thiltih chungchang a min hnial duhtu in awm chuan ka awmna tur chu in hria alawm" Snap-a chuan a ti ta a. Post Adam-a chu a en bik a, a meng zim san mai a, chubaka inchona a awm kher lovang. Mahse, Adam-a chuan a chhang lo. Huai phei zawng huaisen ve tak a ni. Mahse, Snap-a zawng, tih namai a ni lo a ni. Snap-a chuan a'n nghak deuh hlek a, deusawh deuh hian a nui vak a, a hnungtawlh chhuak ta a. A sakawr tlan ri an hriat hma chu tumah tawng ngam pawh an awm lo.

"Mi tangkai deuh kan chan ta anih kha. Amah kha a rinngam em maw ni dawn le?" Dexter-a chuan a'n ti a. "Kei chuan rintlakin ka ring lo. Min puan em² ang. Tunah khan Pete-a khan kah thu min han pe mai se a tha tur a," Adam-a chuan a lo ti a. "Chutiang chuan i ring amaw? I duh angin atthlak takin lo ti ila chu a tlem berah mi tangkai dang pathum emaw pali emaw lai kan chan phah dawn asin. A tluka rang kan awm loh tawp hi. Ani lah inpeih sa khan a lo kal a ni bawk vei nen. Engpawh ni se, chutia rintlaka in rin loh chuan tihbo dan chu a awm mai alawm. YZ lam a pan a, pumpelh a kalin a la lehkhalh theih zan ang chu. Lo channa remchang lah a tam a, mahse keizawng, min bansan chhan chu ka hre lo na a, a rin ngam chuan ka ring a ni," Poker Pete-a chuan a lo ti a.

Midang fuihpawrh siin amah chu a inthiarfihlim et si a. Post Adam-a chu a lo tho vat a. Snap-a chona, a lo dawnsawn ngam si loh kha hre rengin, "Nakina inchhir leh ai chuan tuna tih chian nghal law² chu a tha e. Tunge min zui dawn che u?" a rawn ti ta a. An zinga pakhat Dutch-a an tih chuan "Ka lo kal ange, kha pa te kula kha ka ngei zawng a ni reng²" a lo ti a. "Midang" Adam-a chuan a lo ti leh a. "Mi pakhat lambun tur chuan pahnih chu a tawk em² lawm ni? Enge in la hlauh cheu?" Ratler-a chuan a lo ti a. "Hlauh kan la nei anih pawhin nang kher chu i ni lovang le" Adam-a chuan a ti a, an chhuak ta a.

Rifle han ri thruai² chu Green-a chuan a hriat veleh a rikna lam chu a pan thla a. A lansarh lutuk dawn avangin tlang chung pang deuhah a chhuk a. Silai han rik danah chuan mi pahnihin mi pakhat an beih rawn niin a hria a. Pakhat zawk awmna ni a a hriat chu a pan ta a. YZ chhinchhiahna pu sakawr inthlung chu a zuk hmu thuai a, a piah lawkah chuan Snap Lunt-a lo bawk zan chu a zuk hmu thuai a. "E.. Hey, Snap, engtizia nge ni ta?" a han ti a. Kawlphe ang maia rang hian Snap-a chu a lo let vat a, a kut veilam in a silai chu a han chuh dawn a, mahse a rawn betu chu a hmuh veleh chuan a thulh leh ta a. "Kawng ka kal tha lai mi pahnihin min rawn kap a, pakhat phei chuan ka lukhum min kah thlak sak leh nghal a, tun ai hian inchi 4 velin lo sang deuh ila chu tunah chuan ka tingtang tum tur ka thlang nauh² tawh ta ve ang" Snap-a chuan a lo ti ve a.

"Tute nge an nih i hria em?" tiin Green-a chuan a han zawt a. "Ka hre chiah lo na a, rin chu ka nei. I lo awm ve dawn anih chuan sawlaia lung phenah sawn awm la a tha a, i lo tel ve kher phei chu ka phut lo ania" Snap-a chuan a ti a, "Ka tum tlat a ni. Pahnihin pakhat beih rawn reng² chu a fel ka ti lo. Chu lovah, mi lambun reng² hi ka huat zawng a ni" Green-a chuan a lo ti ve ta tlat a. "I titha e, anih leh i han barakhaih teh ang. Ka silai khu atang hian an rawn kap ber a, a kap hnuhnung kah veleh i lo ti chi ai dawn nia" Snap-a chuan a ti a. A hnu lawkah chuan a lo ri thawr a, chuveleh Snap-a chuan a han kap ve a. Chutah pakhat chuan Snap-a silai khuk na lai ti niawm tak hian a rawn kap khem hlawk mai a. A rawn kap hnuhnungtu awmna lai niawmah Green-a chuan vawi hnih a han kai thruai² a, boruak thiang karah chuan na tuar thawm niawm tak an hre ta a.

"An kap fuh che elo?" pakhatin a han ti hi an hre nghal a. "Ka beng a rawn kap thawi alawm mawle. Tehchai a, khauhriang emaw a nih a, khati taka a insawn ran chu le" tiin pakhat chuan a lo chhang a. "Chu² Dutch-a a nih chu. Pakhat chu Post Adam-a, ka hrechiang e. Khai, lo inring leh rawh le, ka han kap leh ange" Snap-a chuan a ti a, a han kap leh a. An rawn chhang leh ngei a. Tah chuan, a veilam zawk tin chuan Green-a chuan a han kap leh thruai² a, na tuar thawm niawm tak hi an hre leh ta a.
"I inkah tir leh pek elo?"
"Pahnih an ni ta khawp mai. Engtinnge hlam thum danah a rual deuh thaw a a kah theih ang? Lo kal la, ka ban hi min va tuam sak thuai la ani mai. Khalaia mi a ang maia pawt ² a ngai lo," Pakhat chuan alo ti teu hlur a.

"Dutch-a chu hlim lo deuh a ang hle mai a. Pa phun nuah² chi a ni maw?" Green-a chuan a lo ti a. "Han hmu chiang thei ngat ila chu a phun tawh hlek lo tur. An tlanchhe tawh phawt ang" Snap-a chuan a lo ti a. Minute sawmpanga lai an han nghak leh a. Snap-a chuan a han kap leh a, an reh ta vang² a. An kah leh pawhin an rawn chhawn ta lova, an kal ta ah ngaiin an lo ding chhuak ta a. Snap-a chuan a lukhum pawp chu a han en a, "Boruak luhna a tam deuh dawn ta a nih hi. Mahse keini ang thluak lum mi deuh tan chuan a tha zawk e," a han ti a. "Ka lawm e" nui deuh sak in Green-a hnenah chuan a han ti a.

"Mai² a, chutia lawmthu sawi a ngai hleinem Snap, enge huatna che an neih?" Green-a chuan a lo ti a. Snap-a chuan a lu a thing a. "A tawp thlengin i lam trang ka ni tih bak chu engmah ka hrilh thei lo che" a lo ti a. "Ka lawm e" Green-a chuan a lo ti mai a. Tichuan, ngawi rengin YZ lam chu an pan dun ta a. A rilru te² in Green-a chuan "Snap-a chuan han sawi duh se chu a hriat loh tam tak a hrilh theih dawn vei nen" a ti a. Mahse, a sawi phei zawng a ring lo. A lo kawppui thin te nen eng thu-ah emaw an inhau anga, a bansan a nih chu a ring nghet a. Mahse, mawi lo leh huatthlala taka chutia thah an rawn tum hnu pawhin a thian hluite chu a la phatsan lovin an chanchin pawh a la puan duh chuang lova, chungte hlei² avang chuan Green-a chuan, chu pa te tak te, silai kah thiama chu a ngaihsan phah a.

In an va thlen chuan cowboy ho chuan chaw an lo ei dawn laih² a. An pahniha an va lut chu Ratler-a chuan mak a tih hmel hle mai tih chu Green-a chuan a hmu a. Snap-a pawhin hmu ve niawm takin, a tu a mah hrilh bik pawh nei lem lo hian, "Tunah zet chuan helai vel pawh kan lum tran dawn ta. Vawiin tlaiah khan Cut ruamah Double X pahnihin min lambun an lo tum a," a han ti a. "Chutia lo, tute nge ni?" Simple-a chuan a lo ti vat a. "Post Adam-a leh Dutch" Snap-a chuan a lo ti vat a. "Engtinnge i hriat, anmahni i hmu em ni?" Ratler-a chuan a lo ti a. "An aw ka hria alawm. Dutch-a chu kan hliam hlek a, pakhat chuan ka lukhum a rawn thlawh ve a, nikhua lo ho" Snap-a chuan a ti a.

"I va ti tha ve, enge maw an huatna che le?" Dirty chuan a lo ti ve a. Snap-a chuan Blaynes-a chu a hmaiah ngei a han en vang² a. "Thupek a ni ang. Anmahni ngawt chuan chutiang tih chu an ngam lo tawp ang" a han ti a. "Double X ho khi an ninawm ta deuh reng² mai ka ti. Han zirtir hlek a hun tawhin ka hria" Dirty chuan a lo ti leh a. "Chutiang thu sawi suh. Mahni hna pawha kan buai a, kan indaih loh nak alaia. Duh leh Snap-a chuan amahin bei ang hmiang" Blaynes-a chuan a lo ti thuai a. "A ni maw! Mahse lambun ching ho a beih dawn phawt chuan kei chu pui turin ka inpeih reng a ni" Dirty chuan a lo ti talh a.

Chaw ei khamin Green-a chu a chhuak a, sakawr huang hungnaah chuan a thu a. Zan chu a thim viau mai a, thla a la chhuak rih lo bawk a. Bunkhouse lamah chuan thawm chu a la awm map² reng a. A rilru te² chuan, "Hlim awm tak leh sual engmah tih tum awm lo tak chuan an awm tak huai² a, tu te emaw chuan tualthah leh rukruk chu an lo phiar reng a ni si a," tiin a ngaihtuah a. Simon-a in lam chu a han hawi chho a. Tukverh chu a lo eng phat a, "Noreen in eng tak ti ang maw?" tiin a ngaihtuah ta zel a. A hnunglama lo kal ru zal² chu a hmu reng² lo. "I ban phar rawh" rawn ti thum chhak hi a hre ta a.

A han phar chuan silai kua hi hnai deuhah hian a lo bih reng tawh mai a. Larry lek chu lo niin. "I lo va awlsam ve mawle" a lo ti bai² a. "Awlsam ang chu" tih pahin Green-a chuan a silai chu a han pet len sak ta daih mai a. A lo zuangthla nghal a, Larry-a chu a bawhbet ta ran mai a. Vaivut a a thianpa hmai tat nawk² chung chuan, "Ania sin, tih thinrim pawh ka awlsam hle asin" a ti a. "Tho rawh, keite pa, vawi li 'Ka pa' ka ti ang che. Ka hnungzang ruh leh ka kut zungtang te hi tih tliah emaw i tum le?" Larry-a chuan a ti ve chul mai a. Tah zawng Green-a chu a tho ta a. A in beng fai thuak² a, a thianpa chu a han beng fai leh a, "A tawk e, chhuat phah pawh ka nih bik loh hi, chuti thawr² a min ben, khati te a min han tih vei, engmah ka hrilh duh hlek lawng che mawle" Larry chuan a lo ti a.

"Sawi mai rawh. Chuti lo chu 'i pa' hian a sawisa leh hlek ang che" Green-a chuan a lo ti a. Sakawr huang hungnaah an thu dun a. Larry chu a han tawlh hla te² a. "Bawng rutu te hi ka hre tawh" thutak deuh hian a han ti a. "Thinghnah hi ni berin ka hria, thli a han tleh nghin chang apiang hian an ru thin niin ka hria" a ti leh ta lek si a. Green-a kut hnung zawnga han ben a tum chu a lo thle hman hlauh a, "Chu lo pawh nula hmelthai nen in leng dun tih pawh ka hria. Chuvangin tun chinah chuan Don-a ka ti tawh ang che. 'Don Juan' tihna ania" Larry chuan a ti leh a. "A a teh suh, puitlin ve te pawh a hun tawh hi. Eng hming pawh chuan min lo ko mai² mahla ka hnial lo ve. Mahse, kan leng dun tih chu tu hrilh che nge?" Green-a chuan a han ti a. "E le.. Ratler-a mawle. I lar loh hlauin a phe ruai alawm." Larry chuan a ti a.

Green-a chu a ngawi vang² a. He tlangval hi rinngam niin a ring ta a. "Thil hrilh tur che ka nei" a ti ta a. "Sawi ta che, Zawhte - Tlang -Lal - Ropui, ka pumin ka lo ngaithla e." Larry-a chuan a lo ti a. Tichuan, zawite hian Snub-a, a tihdan te chu a hrilh ta a. YZ cowboy tumah tun hnaia khua a leng an la awm loh avangin Blaynes-a tih loh chuan chu thil chu tuman an la hre lova. Blaynes-a lahin chu thil kher chu a zep tlat si a. Snap-a, a zuk hmuh chhun lahin a awih lem bawk si lo. Tichuan, Larry-a chuan sawi chhawn leh dan tur ngaihtuahin a lo sawi nawn ve zel a. Noreen-i tla a chhanchhuah thu a han hrilh zawh chuan, "I vannei nge² thin ka ti. Kei, Foreman nih ka hauh e" Larry chuan a lo ti sap a.

"Kha, eng thu atthlak deuh nge i lo sawi leh tak mai mai?" Green-a chuan a lo ti a. "E le, chutiang chu thawnthuah pawh dan pangngai alawm. Tlangvala chu in kang ata ut thial thualin a lo zuang chhuak a, nula sam sei deuh, mittui tla zawih² chu a rawn pawm chhuak a...Nangma sakhmel tha ve si lovah khan hetia tawng i thlahdah reng chuan mittui a luang hnem fe mai tur ania" Larry an a tih laiin, "Kan thudang alai chuan Snap-a awmdan hi engtinnge i ngaih?" tiin Green-a chuan a zawt ta thung a. Snap-a an lo lambunna a a va inrawlh ve dan te kha a hrilh ta zel a. "A mak hle tak mai a, han sawi duh se chu a that vei nen. Mahse, Snap-a zawng mi dik tak ania, ka lo ngaihsan zawng tak ania sin" Larry-a chuan a ti ve a.

"He thil hi bawng ruk satliah mai² aiin a lian daih niin a lang. Thupetu tu emaw lian tak a awm ni ngei tur a ni. Mahse, engmah han hriat bul bal lah chu ka nei si lo. Lo vei ve vak pawh hi a sawt lo a ni." Green-a chuan a ti a. "Ni e, ngawi teh, Don-a, nei la ka ti ngawt mai ka ti" Larry chuan a lo ti leh a. "Nauva, fing deuh teh khai. Hetiang nula hmeltha te in vawikhat min hmuh tawh chuan hawi pawh min hawi leh duhin em ni i rin? Chu lo rengah hmeichhe lam ngaihtuah thei ka la ni lo reng². He thil hi a fel hunah chuan hna ka nei a ni" Green-a'n a han tih chuan, "Mi pahnih tih theih chi a nih phawt chuan min telh ve ang che aw" Larry chuan a lo ti vat a. "Ka lawm e" Green-a chuan a ti a. Lawm pawh a lawm tak² a ni. "Mai² a, Foreman hna chu ka hauh a nih chu. Mangtha le, kei chu ka mu tawh teh ang" Larry-a chuan a ti a, a kalsan ta a.

Green-a chu a la thu reng a, Noreen-i tukverh lam chu a han en leh a. Larry-a dem velna chu a rilruah a la cham reng a. Hetiang nula hmeltha leh hausa si hian ani ang mai² hi a lo ngaizawng ve thei dawn tak emaw ni chu aw? A awm lo lutuk hle chuan a hre na a, a ngaihtuah lo thei si lo. Loh theih loh laia a tih mah ni se, chu lovah a tih lai pawh kha a hre mumal meuh lo pawhin lang mahse Noreen-in a kuah lai te, a ban nem dan te kha a hre reng mai. In leh lo nei a, nupui fanau nena awm ve tur awm ang te in a mitthla chuan a in hmu deuh a. Ani, nu leh pa pawh nei lo, chu chauh ni lovin laina hnai takngial pawh nei lo leh englai pawha mahni a vak² mai tan chuan chutiang han suangtuah ngawt pawh chu thlemna lian tak niin a hria a. Chutianga a han ngaihtuah chu amah leh amah chu a in nuihzat leh a, "A khai, ka zuau sawt riau mai" a ti a. Mu tura a kal hma in Noreen-i tukverh lam chu a han melh hram a.

[Ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 9
(Rozami Pachuau)

Frying Pan chu YZ atanga khawthlang lama awm a ni a. (A thring eee an Ranch hming hi )An bawng neih ang² chu hralh tura an khalh khawm lai a ni a. Zan khat chu Lucky leh charley chuan an bawng rual khalh khawm sa chu an veng a. Chutianga bawng rual tam tham chu an pahniha an kal dun zel chuan ramsa ilo fahran in an rawn bei tur pawh an hmu kim thei dawn lo ve tiin an vak hrang a. Charley chuan thawm hi a hre ta a. A'n en vang² a, tumah a hmuh si loh avang chuan, "Lucy, nangmah em ni?" a han ti rawk a. Chhanna reng lah a awm si lo. Chutia a ngaihna hre lova a hawi vel chuan mihring sakawr chung chuang niawm tak hi a hmu thawi ta a. A dang pawh hmu leh in a inhria a. Chu veleh a silai a han khawih vat a. Han tlak hlak niawm tak hi a hre leh a. A mi hmuh pakhat chu a han che hlek a.

Charley-a chu an rawn phih awk chu a ni ta mai a, a tlak hma in silai chu vawi hnih a han hmet puak hman hram a. Lei a thlen chuan a chalah pakhatin a lo vaw vak a, engmah hre lovin leiah chuan a tlu zal ta der a. Rawn beitu te zinga an hotu niawm tak chuan, "Ti vat² rawh u. He pa hian silai kha a hmet per hman khanglang si a, reiloteah an lo kal mai ang. Kan khalh theih tawk awm kha khalh hrang ula, a bak chu kan kal lohna lamah um darh vek rawh u" a ti ta a. Chutianga an la tih mek laiin Lucky chu a lo tlan a. "Charley, khawiah nge i awm? I silai ri kha ka lo hria a, enge ni ta?" a rawn ti bawrh² a. Tumahin an rawn chhan loh danah chuan thil fel lo a awm tih a hre ta mai a. A silai chu a phawi a, a'n kap thruai² mai a. A rawn beitu zinga pakhat chu a te thrawt mai a. A thianpa chuan a ban chu a han chet vel a, a lo ri fua a, Lucky chu sakawr chungchuang thrang phei chu ni lo se, tlakna tawp tur hian a rawn fuh a. Tichuan, Lucky chu thei leh thei lovin Ranch lamah a tlan ta a.

Frying Pan ava thlen chuan a neitupa Job Leeming-a leh a foreman Dirk Iddon hovin an lo bawihsawm a, a awm chung deuh a thal tlum thuk tak mai chu Dirk-a chuan a han phawi a. Apache thal ngei niin a hria a, Dirk-a chuan a theih ang² in a han tuam a. A tih zawh chuan Whiskey tlemte a han in tir a, (in ve chak in awm ) Lucky-a chu a lo harh ve ta deuh a. An rawn beih chanchin a hriat ang² chu a hrilh a. Leeming-a thin chu a rim mai pawh a ni lo, ani hi zawng a thinchhe deuh a, tawngka lamah pawh 'Job-a thin' tih hi chulai velah chuan a ri reng a.

An vaiin bawng rutute rawn beihna lai panin a chhuak ta a. An va thlen chuan nikhaw hre lovin charley-a chu an va hmu a. Mahse an han bawihsawm hnu chuan a lo harh a, mi pakhat chuan Ranch lamah a hruai haw ta a. An han en vel chuan za bawr vel chu ru in a dang chu an um darh niin an hria a. Dirk-a ho chuan mi panga velin a rutute Red Indian ni ngeia an rin chu chhui zui se, Lemming-a hovin a la bang an umdarh te chu lo khalh khawm turin an rel ta a.

Chawhnu lam hi a ni a, YZ Foreman chu intithei fe hian Bunkhouse-ah chuan a lo lut a. "Green, Putara'n a hmu duh che. Red Indian hovin Fring Pan bawng tam fe an ruk sak a. Khi, pu Thin-a pawh a awm khi" a rawn ti a. Green-a chu a kal nghal ta a. Simon-a leh Leeming-a chuan an lo nghak reng tawh a. "A ranch an beih kha i hre tawh em?" Simon-a chuan a lo ti a. "Tunah khan Blaynes-a khan a sawi teh nual kha mawle, a kimchang phei chuan ka hre lo." Green-a chuan a ti a. "Nizan, zan leh khan a ni a, ka mite pahnih an hliam nghe² a, enge i ngaihdan?" Leeming-a chuan a ti a. "A vanduaithlak hle mai a" Green-a chuan a ti a. "A vanduaithlak a? Nang hi a ni lawm ni bawngruk tireh tur kha? I lo kal achinah reh ahnekin a pung tawlh² mai si a. Kebul aia i tlaktlaina pawh ka hre nek lo ve" Leeming-a chuan a ti bawrh² a.

Green-a chu a sen ap² mai a, a ka chu a chip hmak a. Leeming-a chu a vei ruai a, "Ka hlawh hi pawisa pakhat tal i thawh ve em?" Green-a chuan a ti khauh a. Leeming-a vei ngat² chu a ding chawih a, a awmdan dik loh zia han thailanna mah ni se, a thin a rim em avangin a hre chang lo. "Chungte enge sawi a ngaihna?" a rawn ti ve thung a. A aw pawh san duh chuang hlek lo chuan Green-a lah chuan, "Eng vang pawhin mawle, ka hna ka thawh that loh a, min hau theitu pakhat chiah a awm a, chu² hlawh min pe tu hi a ni" a lo ti leh mai a. A tawng ring lem lo na a, awmze ril tak a nei a, Leeming-a chu a ding leh chat a, a han en vang² a. "Huai pawh chu i huai ka ti. Pawisa sen pahnih lek hlawhah pawh kan...." a han ti chauh a. "A tawk e, jona, nang pawh ka inah i lo leng a, ka mi rawih hnenah thu i sawi tih inhria la, i thinchhe lutuk kha i siamthat deuh loh chuan buaina a la thlen nge² dawn che zawng anih hi" a lo ti a.

Tah chuan Leeming-a chu a ngawi vang² a, vawilehkhatah chuan a nui ta thut mai a. "Simon, i tidik e, kei zawng, ka at hi a chhuak leh thut thin alawm mawle. A tu mah² huatthu sawi tum ka ni lo. Frying ah khi chuan min hrethiam tawh viau a, ka nu leh ka pa phei chuan, ' i ha pawh a to hma in a awmtu che i hau nek a' te min ti thin asin." Green-a hnenah bik chuan, "Ngaih loh lamah i ngai em lawng chu maw" a ti ta a. Nui chung hian Green-a chuan, "Ngai teh suh e" a lo ti a. A hmel han en reng² pawhin a thinrim chu a reh chiang ngei lah tak a, chu² a dawihzep vang ni theiin Green-a chuan a hre lo. Chuvang chuan chu pa chu a ngainat phah ta viau a. Tichuan, tha takin Frying Pan bawng bo thu te chu an sawi ho ta a. Green-a chuan Red Indian ruk a ni lo tih chu ring mai ni lovin a hriatin a hria a ni tih te a hrilh ta a. Tin, he thil hi bawng ruk mai hi a tawp na tur a nih loh tur thu zia leh mumal nei taka pawl indin, hotu lawk tak khawiah emaw neia tih anih a rin thu pawh a sawi a.

A kal tak hnu chuan Simon-a leh a inleng pa chuan ama chanchin chu an sawi zui zel a. Leeming-a chuan Green-a chu hnelma lama tang ni lo atan a duhthu te leh a ngainat mi anih thu te hial Simon-a chu a hrilh a. "Blaynes-a chuan a ti mang lo viau mai a, bawng ruknaah te pawh telna a nei te in a ring asin" Simon-a chuan a han ti a. "Mai² a, nanga Foreman ve mai² hi, a huat vang anih mai² chu" Leeming-a chuan a tihsan mai a. Chutihlai chuan Norry pawh a lo kal ve ta a. Chaw ei peih a ni tawh tih a rawn hrilh a. Green-a chungthu a a ngaihdan Leeming-a a lo zawhna chu "Kei zawng, ka mangan laia min lo chhan tawh avangin ka ngaihdan chu a lai kher lo anga, mi tha tak anih ka ring a" Norry chuan a ti a.

[Ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 10
(Rozami Pachuau)

Hatchett khua zawng a te in a kilkhawr bawk a, tlawhtu pawh a nei tlem hle a, mi hausa deuh phei chuan an tlawh ngai meuh lo. Chuvang chuan Mr joe Tarman leh a thianpa Mr Seth Laban lo zin pawh chu an langsar hle mai a. An kalna lam apiangah zah tak leh ngaisang takin an lo lawm zel a. Joe Tarman-a chu pa lianpui mai, feet 6 chung lam, dar pharh tha fu hi a ni a, amah kum 40 hnuai lam a la ni bawk a, a chak hmel fu mai a. A sam te, mit hmul leh hmui hmul chenin a dum tha bawk a, han en mai chuan hmel tha tak hi a ni a, sawisel tum a en tu tam tak erawh chuan a hmai chu a thau lutuk a, a mitzim deuh pahnih chu a inhnaih lutuk tih theih tur chu a ni. Mahse nula za a sawmkua pakua chuan Tarman-a chu hmeltha-ah an ngai ngei ang.

A hnung zui Seth Laban-a erawh chu a dang hle. Pa zang kul deuh, tawi hmem hmawm a ni a, kum sawmli leh sawmnga inkar mi vel a ni a, hnar sei deuh, chal zuih tat mai, khabe pial vat mai hi a ni a. A mit lah chu a zim sen mai a, han en reng² hian buikelek te pawh a ang dawn² a. Budha sakhaw zui, thih hnu a pian chhawn leh zel ringtu thenkhat te tan chuan tuna a lo pian hma hi chuan Laban-a chu sazu a ni ngei ang tih a rinawm hle a. Thenkhat leh phei chuan tunah pawh sazu a la ni alawm mawle an ti awm e. Lo ti an awm pawhin an tisual tam pui kher lovang.

Chu mite pahnih chu an lar kher bawk a, Folly Saloon-ah chuan an lo lut chauh a, mi awm zawng² chu zu an han lei sak phawt mai a. An lo zin chhan an zawhna chu Tarman-a chuan, "Khua kan han chuan vel zawng a ni a, bawng vulh nan ram tha tak niin an sawi a. Thil awmdan a zir a ni ang chu, awm pawh chu kan awm hlen mai thei e." tiin a chhang a. Silas chuan ran neitute chuan an hralh duh kher lovang tih a han sawi chuan thenkhatin bawng ruk hmang an tam thu tan chhanin, hralh thuai se an vannei zawk ang tiin an lo sawi bawk a.

Tichuan, bawng ruk hmang thu te an sawi zel lai chuan kawngkhar inhawng atang chuan khawlaia nula pakhat sakawr chunga cowboy chuan a chuang, kamis ha, kekawrtlawn ha at mai, cowboy ho tih dan takah, 'en zawh pawha en leh tul thin' hmeltha tak hi Tarman-a chuan a va hmu a. A bulah chuan cowboy sang zeih zawih hian a sakawr tha fe mai, lakam dawm reng chung hian a lo ding bawk a. Tunge a nih a zawt ta hial a. Silas chuan a lo hrilh a, a bula ding cowboy chu an mi rawih thar, Green-a a ni tih lamin a hrilh a. Tarman-a chuan chutih lai la² chuan chu nula leh sakawr chu neih a tum ta a.

Chumite pahnih chu an chanchin hmun dangah an lo sawi ve mek a ni tih pawh hre hlek lo chuan an ti ti mawlh² a. Noreen-i chuan Green-a chu Hatchett khua a lo thlen khan chutia a sakawr bula lo ding chu a rawn hmu a. Hmanni a a kalpui avanga a pa hauhna kha hrechhuakin biak pawh be lovin kal pelh mai hi a rilruk deuh a. Mahse a hreh leh deuh a, hreh ang reng tak chuan a be ta hram a. "Engatinge i tih mai loh?" Green-a chuan a lo ti a.
"Eng maw?"
"E... Min be lova kal zel..."
"Chutiang awzawng ka rilruk lo ve. A tirah kha chuan ka rilruk deuh a, a chhan chu hmanni khan enthlatu pakhatin min lo hmu a, ka pa in min hau deuh a"
"Keini ang cowboy satliah bula kal chu a remti lo anih dawn chu " Green-a chuan a lo ti sap a.

Noreen-i chuan a theihtawp in a hrilhfiah a, a pa chu a chhan hram² a. Tichuan an ti ti zel a. A sakawr, Blue-a chanchin te an sawi kai a. Chutihlai chuan Hotel neitupa Rayne-a chuan a mikhualpa Tarman-a leh a hnungzuitu Laban-a chu a rawn hruai a, "Morning Miss Norry. Hei, ka mikhual Tarman-a, Joseph Tarman-a nen hian inhmelhriat ve ta che u" a rawn ti a, Noreen-i chu chibai a lo buk a. Tarman-a chuan, "Hetia ka rawn inrawlh ve mai avang hian min ngaidam langin, mahse ka han hmuh veleh che hmelhriat thuai² che ka chak si a, i pa pawh rawn tlawh thuai ka tum asin," a ti a. "Ka pa nen chuan kan lawm khawp ang chu" Noreen-i chuan a lo ti a.

"Kei tak ania lawm ang ni, ka thil zawhna hmasa ber tur chu kha sakawr, in chhinchhiahna pu kha engzat nge a chhiar tih hi a ni ang, thil pakhat chauh tih loh chu ka hmuh tawhah chuan ka la ngainat ber a ni hial awm e," Tarman-a chuan a han ti leh a. A nui vur² a, Noreen-i chu a en vawng² a. Noreen-i pawhin amah fakna a ni tih a hrethiam mai a. "He sakawr hi ka pa ta pawh a ni lova, he tlangval ta hi ania," a han ti a, Green-a chu a kawk a. Tarman-a chuan hmusit awm deuh hian Green-a chu a en a, "Dollar za in ka lei ang chu" a ti a. "Ka phal lo" Green-a chuan a ti bul hmak a.
"Zahnihin?"
Green-a chuan a lu a thing mai a.
"Anih Zathumin?"

A vela awm te chuan mak an lo ti hle tawh mai a. Cowboy hlawh han ngaihtuahin zathum te chu an thlaruk hlawh lai a lo ni a. Green-a chuan a hralh mai ring leh ring lo te chuan pawisa an lo inchawi hman pek a. "Ka zuar lo ve" Green-a chuan a lo ti mai a. Tarman-a chuan mak a ti ta hle mai a. Chutia a thlaruk hlawh lai tur pawha a han hralh phal lo chu a haw dawn² a. A thil duh tawh phawt chu nei thei a lo inngai ve thin a ni bawk a, tlawm a ngai ta riau mai a. "Ngawi teh, cowboy, nangni ho zawng thil engkim hi in huam zel thei bawk a. I sakawr manah khan dolkar Zali ka dahkham anga, eng inkhel chi pawh i duhzawng berin inkhel ang hmiang," a han ti leh a.

"Chutiang ka khel duh lo" Green-a aw chu a vin deuh dawn hian a hriat a. "Amaherawhchu, sana en chiahin minute minute 5 i chuan theih chuan ka pe ang che." a han tih zawm leh a. A entute chu mak tiin an hawi ka hau hlawm mai a. A thla riat hlawh pawha a hralh phal loh chutia a han pe leh dawn ang lawi si chu amah Tarman-a pawh chuan a hrethiam meuh lo a ni ang, a in ngaihtuah vung² a. "Anih leh aw. mahse, mikhual naran lak atangin thilpek hi ka dawng mai² lova, ka lo chuan theih pawhin- ke pali nei chuan theih lohna pawh hi ka la neilo bawk a, dollar zathum chu i pawm hram a ni ang chu" a ti ta a. "Nangma duh dan dan le" Green-a chuan a lo ti leh mai a.

Tunah chuan thlirtu pawh an tam tawh a, a khaw pa chhuakin an lo thawk tawh emaw tih mai tur hi a ni. Khawlai zau lai chu an han kian awl ta a. Tarman-a chu a han zuangkai thoh mai a, a len ang hu in, inthazo tak angin a lang a. Second 5 awm vel chu Blue-a chu a han ding vung² a. Vawilehkhatah chuan le, a te tuar a, a zuang ta vak² mai a. A chung chuang tana han insiam thatna hun pawh pe lek lo chuan a zuang vel thul, a eu thul. Mahse Tarman-a chu a tla mai bik lo, thei leh thei lovin a in vuan tang hram² a. A lu te chu a thle tawn sawk² mai a. Blue-a chu a han zuang leh vak a, a ke hmalam hian a'n tum chhawk a, a ke hnunglam chu a'n vawr leh vak a. Tah zet zawng Tarman-a pawh chuan a tlin ta lova, bawkkhup thlawrhin a tla ta a. Green-a chuan zawi sap hian, "Second sawmsarih panga chiah" a lo ti sap a. A sana chu a ipteah a khung a, a sakawr chu a va man ta a.

Tarman-a chu a hnung zuitupa Laban-a chuan a rawn kaitho a. A hmai chu thlan nen, thi nen, vaivut nen a berh liai luai mai a. A hmel pawh a hma lawka inti nelawm em² kha a lo dur ta em² mai a. A silai chu a'n dap vel a, sakawrin a vawrh vel naah khan a awmna dik takah pawh chuan lo awm tawh lovin a hnung lamah a lo insawn daih tawh niin. A thil tum chu sakawr kah chu a ni tih a hmelah pawh hai rual a ni lo. "Ti teh vaih" thum chhaka lo ti hi a hre ta a. A'n hawi nak chuan silai kua hi a va hmu ta siah mai a, Green-a chuan a lo tin reng chu niin. Tarman-a tih ngaihna hre lo chuan, "Dollar Zanga in min lei tir rawh, a nghawng tan atan ka duh reng² e," a han ti ta a. "I neih zawng² pawhin i lei lovang, i neih theih dan kawng awm chhun chu, i bei tawh a, mahse i hlawhtling si lo" Green-a chuan a lo ti leh nghal then a, a kalsan nal² a. A hma lawka khati taka zuanga hel si kha dam zun hian a kal leh ta mai ang lawi si a.

Tarman-a chuan nula kha a han melh vel a, mahse a lo kalbo tawh a. A tlawm lai kha a lo hmuh ve ngei chu a ring a, a thin a rim zual sauh a, mahse a insum hram² a. "Khai le, thiante u, vawin zet chu, Joe Tarman-a ka tlawm a ni ber e. Ke pali neiin min vawrh thlak vawikhatna a la ni bawk a, lawm tlak hial niin ka hria e. A thu hrimah vaivut pawh, tin hmun dap zet tur ka lem hman awm asin mawle. Chuvangin tirawh u, Saloon-ah dangro hnawnna lam i zawng ang u khai. Lehkha te pawh kan deng ang chu mawle." a ti ta a. Lo thlirtute lawm zawng tak a lo ni a. Chutihlai tak chuan Poker Pete-a pawh chu a lo lang ve chiah a, an han inhmelhriat te² a, Saloon-ah chuan Tarman-a chawi tur chuan zu chu an in ta dar² a. Pawisa an han khel a, tah chuan, dollar za zet hi Tarman-a chuan a'n hlauh leh a. Chumi tum pawh chuan, "Vawina ka vanduaina tumhnihna hi khawinge i'n lawm leh teh ang u" a ti a, a awm zawng² chu zu a leisak leh a. Tunah chuan le, a nelawm leh ta hle a. Mahse, a thinrim lai hmel lo hmu te chuan Tarman-a chu nel sual awl tak tur a ni tih chu an theihnghilh mai lo.

Green-a leh Tarman-a an indawr tirh lai vel khan Noreen-i chu a lo in thiarfihlim deuh a, mahse en zawng a en lo phal bik lo. Green-a kal lai pawh kha a lo hmu reng a. Khawthlang kawtchhuah lam a pan danah amah hmuh a kaldun loh dan a ngaihtuah a ni tih a ring a. Engemaw kawngah chuan a lawm na a, a rilru tak chuan a beidawng titih deuh a. Tarman-a kha a'n ngaihtuah leh a, a inchei dan te chu pangngai tak hmel a pu a, a hmel lah a chhe si lo. A mihring zia tak² erawh chu rinthu mai lo chu tunah chuan han sawi theih a nei lova. Mahse sakawr atanga a tlak lai vel leh vaivut atanga a lo tho chhuak hmel kha zawng a duhawm mawlh lo. Noreen-i chuan a rilru te² in, "Green-a hi tla ta se, engtin tak ti ve ang maw?" a ti a. Sakawr kah mai a tum ve chu a ring lo. Chutih ahnekin amah han paihthla theitu chu a ngaihsan mah² zawk a ring a. Ani leh Tarman-a chu an dang deuh a ni tiin a ngaihtuah dan a siam fel a, a ngaihtuah zui duh ta lova.

[Ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 11
(Rozami Pachuau)

Noreen-i hnenah khan "kan lo leng dawn e" a ti bawk a. Tarman-a leh Laban-a chu leng turin an thawk chhuak ta a. Kawngah chuan helai vel a an lo kal chu an vanneih thu te an sawi dun a. Laban-a chuan, "Rel kawng lo chhuah hunah phei chuan.." a han ti zauh a. Mahse a thianpa chuan a lo khap thuai a. Tichuan, Joe Tarman-a chuan Noreen-i a lo it thu leh neih a tum thu te, chubakah sakawr pawh kha neih a tum zia te a sawi a. "Khai, ngawi teh, Joe, thil kan tifel dawn trep a, helai vel ranch zawng² Lalpa i ni trep tawh a, hmeichhia te zawng sawi teh suh khai. Lola,(Tarman-a nupui, mexican mi) pawh khan hmeichhe chungchanga inthen a nih kha a hlauh ber reng ni" Laban-a chuan a lo ti a.

"Hmeichhia a kara mexican mai² te chuan lo hlau ve mai² ang hmiang. Kha nula leh sakawr kha chu ka nei dawn a ni"
"Sakawr neitupa kha zawngin a phal loh khawp kha maw!"
"Phal lo ang hmiang, tun hma te pawhin ka duh tawh chu a neitute'n phal lo thin teh mahse ka neih tho thin kha i hre ta lovem ni?"
"A ni khawp mai. Mahse, kha pa kher kha zawng a namai lo viau ang"
"A ni ang reng viau mai. Kha pa kha ka hmu tawh than in ka hria. Khawiahnge ka hre si lo"

Ranch an lo thlen chuan Simon Putara chuan hawihhawm takin a lo lawm a. Tin, Cowboy ho pawhin Bunkhouse lamah chuan chu mite pahnih lo leng chanchin te chu an lo sawi a. Tin, Hatchett khua a Blue-a chunga chuang chanchin kha lo lut thar an awm apiangin a bul atanga sawi leh ziah a ngai bawk a. Dirty-a khua a a lo zuk len lai tak a lo ni hlauh a, a lo hmu niin. Han sawi vel lah chu chak sa khaiah a neih a, a sawi a sawi mai a.

Chaw ei kham a Green-a chhuak chu Ginger-a chuan a zui chhuak thuai a. "Indian ho awmna a kal lo tur chuan min la ti em?" a han ti a. "Ti e, he thil neitu hi i hre lo maw?" Green-a chuan a lo ti a, Sikret zialna khawl kha a han phawrh a. Ginger-a chuan a hre lova. Mahse, Green-a chuan Hatchett khua a dawrkai pa hnena a zawrh leh zawrh loh a zawh thu te kha a han hrilh a. Tin, vawin a a zuk len leh khan chu dawrkai pa chuan mi pakhat, Mex an tih mai, Dexter-a hnena thawkin a rawn lam thu te a lo hrilh thu te chu a hrilh ta a. Tah chuan, Ginger-a chu a sa phat mai a, Mex-a leh Bud-a kha hmanah an inbei deuh tawh a, inkah tum a an indin chilh reng tawh chu Bud-a chuan a silai a phawi ran zawk avangin Mex-a chu a tlawm ta a. Tin, Bud-a pawh chuan kap ta lovin a silaiin a lu ah a vuak sak tih thu te chu a hrilh a.

A han sawi zawh chuan Ginger-a chuan Hatchett khua a kal a tum ta nghal a. Green-a pawh chuan, "Kei pawh, ka kal dawn" a lo ti a. An chhuak ta a. Thui an kal hmain Snap Lunt-a khan a rawn umphak a, an kalho ta a. Green-a chuan a tul te ah lo chuan lo inrawlh ve chu a tum lo. Amaherawhchu diklo taka a thianpa Ginger-a an tih tur erawh chu ven a tum chauh a ni. Ani Ginger-a lah mi thah tumin a kal a, Green-a pawhin khap phei zawng a tum lem lo. Khua an zuk thlen chuan Folly Saloon kawtah chuan sakawr dawrzawn khat lai tur hi a lo inthlung a. Green a'n hma a hruai a, an va lut ta a.

Mi an lo tam viau mai a, dawhkan hrang² chu an lo kil taih mai a. Dawhkan pakhatah chuan Tarman-a leh a chekawi te, Poker Pete-a te nen chuan an lo khel a. Poker Pete-a chuan Green-a chu a lo hmuh veleh chuan a inkhelah chuan tui em² ni awm tak hian a hawi leh ta vat mai a. Green-a chuan a thiante pahnih mit chu an bul hnai zawka dawhkan, mi panga in an kilah chuan a fu hle tih chu a hmu nghal a. Chung ho zinga pahnih Snub-a leh Nugget-a chu Green-a chuan a hmelhriat ve a. An zinga pakhat, pa tawi deuh, tawr tha deuh chuan a ban dinglam chu harsa ti tak hian a chet thei tih chu Snap-a chuan a han hmuh chuan a kiai sak a.

Green-a hnenah chuan, "Dutch-a sawn saw mi avang sawn anchhia min lawh ka ring ngawt mai. I tel ve tih kha an hre si lova, anmahni an ni tih ka hriat ring se chuan an inkhel pawh hi an bang tawh ang chu. Saw pa, cher threi thrawi, Snub-a hma a thu saw Post Adam-a a nih saw, kan luh chinah chuan a awm a nuam thei ta meuh lo a ang hle mai" Snap-a chuan a han ti a. A panga na chu Ginger-an a han melh rum dan a hmuh chuan Green-a chuan tunge a nih zawh hranpa ngaiin a hre lo. A che fuh thei manglo hi ni ngei tur a ni a, a lehkhaden chan ai chu vawithum a paihna a ni ta. A han paih leh thak a, vaihlo hi a han zial a. A zial thiamlo kher bawk a, a bula thu Nugget-a chuan, "Khawnge i zialna kha?" a lo ti a. "Ka ti bo tawh" a ti hmak a.

"Khawiah?" Green-a chuan a lo ti tuar a. A aw chu malsawmna dilsakna aw a ni lovin, a ring kher bawk a, chulai hmun chu a reh nghal duk mai a. Ginger-a chu dawhkan nghenga ding mai² tawh lovin a lo ding char a, Mex-a lam chu a lo hawi siah tawh a. Mex-a chuan han chhan ngaihna a hre dawn lova, mahse nakin deuhah chuan "Nang a lo hriat tur a awm pawh ka hre lo ve" a ti ta a. "Hriat ka tum a ni" Ginger-a chuan a ti a. Mex-a zial khawl chu dawhkanah chuan a han theh phei a, "Kha² i ta a ni lawm ni?" a han ti a. Mex-a chuan a lo chhar a, a han enchiang a. A bul vela mite chu an tawlh hla hrat² mai a, ani Mex-a pawh chu a lo ding ve a, "Lo ni pawh ni se, enge nang a lo sawi tur awm? Ka hloh a, i lo chhar a ni mai alawm, lawmman te i beisei em ni?" a han ti a.

Double X cowboy pakhat chu a lo nui hak a, mahse Ginger-a hmel hmu te chuan nuihna chi a ni lo tih an hre vek a. An inkarah chuan an lehkha lo denna dawhkan chauh kha a awm tawh a, hnai fe ah chuan an in hmachhawn ran mai a. Ginger-a chuan a awm a poh deuh a, a kut dinglam chu a uai thlak tir zar mai a. A hmaa mi chu a hmaiah ngei chiang zet hian a en a, "Engtikah leh khawiahnge i hloh?" a han ti a. "I duh leh hremhmunah zuk kal la, ka hlohna chu zuk zawt chhuak rawh" Mex-a chuan a lo ti nghat a. "Chutiang thleng² kal a ngai lo, kha², Bud-a ruang bula chhar a nih kha, tualthah hmang leh rukhmang pa," Ginger-a chuan a ti ta a.

Mex-a chu a thil tih tum hreh deuh niawm takin inngaihtuah ang hian a han awm a. "Mi dawheh deuh i ni" tih pahin a silai chu a chuh ta a. Silaimu leng lakin a den hlau tak² karah chuan a rual deuh thaw in a'n ri thruai² a. Mex-a chu tawng chhuah tum a tawng chhuak zo si lo hian dawhkan chu a bawh ta rawp a. A silai chu chhuatah chuan a thlauh ta a. Ginger-a chu a la ding ran mai a, a mi thah chu a en reng a, "Thianpa, i hmingin ka han that ta a, ani pawhin min that ve anih hi" a ti a, a bula thutthlengah chuan a awp ta rawp a. Chutah zawng mite chuan thawm an nei leh ngam ta a. Green-a leh Snap-a chuan Ginger-a chu an bawihsawm a, an han enchian chuan silaimu chuan a nakruh inkarah chiah a su tlang a, a sa huat lai a khawih pawilo tih leh a thisen chhuah hnem vangin a chau a ni tih chu an hre ta a.

"A teuh hle mai a, hei ai hian veilam hret se chu an pahnihin an kal dun ngei dawn anih hi" Snap-a chuan a ti a, Green an a tuam vel chu a lo pui a. Chutia an lo buai lai tak chuan kawngkhar chu a rawn inhawng sawk a, Marshal hi a lo lut ta a. Pa tawi, thau hmawm hmawm, hmai bawr hlai mat, sen tan si, mit tung kak deuh, zim te si inhnaih chen hi a ni reuh a. Hatchett khua a zahtu a hmuh ve chhun te chu ama hnuaia thawk te chauh chu an ni tih chu a rin theih nghal hle a. Silai te chu pahnih hi a pai ve tra mai a, a badge (arsi lem) chu a awmah hian langsar fe in a tar a. "Engtizia nge ni leh ta mai? Buaina chhuah hmain tu emaw tal pawhin min rawn hrilh thei lovem ni?" a han ti a.

Mi tam fe chuan lo hrilhfiah tumin an lo sawi noh² mai a, "Khai, khai, khai, ka beng a chhet hlei nem, bengchhet ka duh hek lo. Tunge ni a thi hi?" a han ti leh a. Mitthi chu a thian te'n an lo zawn sawn tawh a, kawmawl hian an lo khuh a. Marshal Tonk-a chuan a va hnaih a, a han keu a, "Mex-a a ni maw? A thinhnun takah an kap anih hi. Mi pakhatin thil kalhmang chu min han hrilh teh se" a han ti zui a. Post Adam-a chuan a lo hrilh ta a. "Hetiang hian a ni. Intihhlim nan kan lo inkhel fiam mai² a, hlim tak leh muang taka kan lo awm laiin Ginger-a leh Snap Lunt-a leh he pa hi an lo lut a. Tichuan, Ginger-a chuan Mex-a hi a rawn hau nghal ta bawrh² mai a. Bawng rukhmangah te a puh a, Bud-a thattuah te chenin a puh ta a. A that lo tih leh Injun ho thah a ni tih chu keini ngei pawhin kan hre si a. Tichuan, Mex-a chuan mi dawheh a ni tih han hrilh pahin a silai a phawi ta a ni" a lo ti a.

"Inring ve² ngat a inbei an ni a, in lambun an ni lo" Snap Lunt-a chuan a lo ti sap a. Chutia Snap-a lo tih danah chuan hmana an lambun kha anmahni an ni tih a hria emaw ni dawn chu tiin Adama chuan a ngaihtuah a, a rilru leh a awm chu a nuamlo hle mai a. Mahse tha tak phei chuan a chhang leh a, "Inring ve² pawh an ni ang. Mahse Mex-a khan buaina siam a tum lova, Ginger-a khan a ti lui zawk a ni" tiin.

Mi tam takin chu² an lo pui ta a. Marshal Tonk-a chuan a lukhum chu a'n pawt dak deuh a, a han hawi vel a. Chutihlai chuan Green-a chu Poker Pete-a hnung lama ngawi renga lo ding hi a va hmu a. Tonk-a lam hawi a a lo bu nghat pawh chu a lo hmu ru kiau a. "Post, i sawi chu a dik aniang. Ginger-a hi lunginah kan khung hi a tha ang" Marshal chuan a ti a. A hnunglam atang chuan ring vak lo hian Green-a chuan, "Marshal, han ring tha leh teh" a lo ti sap mai a. A aw ah chuan vauna aw ri a tel lem lo, amah pawh chu a ding satliah mai a ni. "Nang hi, ngaihtuah rawh. Dan aiawhtu ka nih hi" Tonk-a chuan a han ti thar² a. "A lawmawm anih chu. Ka Marshal hmuh tawh thenkhat te chuan dan aiawh lovin dan lo ai hi an awh thin asin" Green-a chuan a lo ti leh mai a.

"Nih pawh a ni ang chu. Mahse, chu² kei atan enge awmzia a neih? He khua hi chu ka thu² anih hi. Nang pawh hi i lo thlen ni kha chuan hmu che ila chu lunginah ka khung daih ang che tih hre rawh, YZ ah pawh i kal lek lo tur" Marshal chuan a han ti pung² a. "Chuti a ni maw? Engvangin maw?" Green-a chuan a lo ti a. "Mi tha tak i lo velh vangin mawle, engvangin te i la tih ngam?" Tonk-a chuan a lo ti leh a. Green-a chu a nui ta chiam mai a, "Aw, Chu mi tha tak chu pawisa khelh ching, mi bawlhhlawh tak, tunah pawh ngawi hle² hi a ni maw" a ti ta a. Tonk-a chuan Pete an a lo melh rum zia pawh chu hmu lo chuan, "Chuti te zawngin ti suh aw. A lo tawng ve loh pawhin hetah ka awm tih a hriat vang a ni mai alawm" a lo ti zel a.

"A hna bawlhhlawh thawk turin maw?" Green-a chuan a han ti leh ngat a, chuveleh chuan a awmdan chu a danglam ta thut mai a. "Marshal, nangma thatna tur ngei ka han hrilh teh ang che. Kha, i arsi lem bel kha sikai kah tlang zawh loh a ni lova, han bihruk nan lah a lian tawk hek lo. Chutiang chu a ni tih chu nang aia mi tha tam takin an lo fiah asin. A hmutu zawng² in an inkah kha inring ve² a inkap an ni tih an hre vek a. Tin, Mex-a kha a thiamlo a ni tih a lang chiang em² bawk a ni. Nang hi chuan thupek i hmu tih ka hria a. Mi tha i tih khan a rawn pek lai che pawh kha ka lo hmu kiau a ni. Khatiang kha zawng tih tur a ni ngai lo, Marshal, in thiltih i puan vek anih hi - mi tha-a pawh i chungah a lawm tawh reng² hlei nem. Khai le! Pu te u, rawtna ka siam dawn a, Ginger-a hi ka rualin YZ-ah haw zawk rawh se tih hi, khawngaih takin tu emaw takin min pui em?" Green-a chuan a han ti a.

"Lawm takin ka pui e" Snap-a chuan a lo ti a. "Ka lawm e ka pu" Green-a chuan a han ti te² a, "Hei, pu te u, rawtna a awm a, puitu a awm bawk a. Tunah vote i la ang ule. Rawtna pui apiangin ban an phar ang, engmah hum lovin" a han ti leh a. A sawi pah chuan amah chuan a ban chu a han phar a, a kut lehlam chuan puakruk a lo hum reng tawh mai a. Snap-a chuan Green-a tih ang chuan a ti ve thuai a, a nui var² mai a. Double X cowboy te chu an lo phar duh lo hlauh dah law maw tiin beisei takin a en bik a. Chuta awm zawng² chuan chu fiamthu chu thil rapthlak takah a tawp thei a ni tih hria chuan an phar ta sung² mai a. Marshal pawh chu a phar hnuhnungah a tang lo kher mai.

Green-a chuan a han en vel a, "Lungrual takin kan remti anih hi. Ginger, heti takin i lo lar tih ka lo hre ngailo. Nang, Snap, vote hi hmuh hmaih ka lo nei hlauh anga, kan chhiar that leh chhungin Ginger-a hi a sakawrah lo va chuan tir ta che" a han ti leh a. Snap-a, hun rei tawk a pek hma chu silai keng chung chuan a awm deuh a. A tawk ta ange a tih ah chuan a hnungtawlh chhuak ta a. A chhuah pah chuan Marshal hnenah chuan, "Kha maw.. Marshal, i ti diklo tawp anih hi. Mi zawng² in, inring ve² a inkap an ni tih rem ti in ban an phar vek a. Nang ngei pawh kha i phar kha" a han ti leh hram a.

"Hei hi a tawpna ni dawn hek lo maw le" Tonk-a chuan a lo ti a. Green-a chuan, "A ni dawn tak e! Mahse, Marshal, lo hmanhmawh duh suh" a ti leh a. Tichuan, a put chhuak a, Kawngkhar chu a khar ta a. Snap-a chuan Ginger-a chu a lo va kalpui a, ani chu a sakawrah chuan a zuangkai nghal a, a'n nghak deuh hlek a, kawngkhar chu a rawn inhawng dawn dek dek hian a hmu a. Pa tawi deuh lu zawn awm vel ni a a rinah chuan a han kap a, a rang² in a inkhar leh vat a. A nui vak² a, "Marshal, lo hmanhmawh duh suh ka tih kha" a han ti leh nghal a, a kalsan ta a.


SUDDEN - IN THE RANGE ROBBER
AUTHOR : OLIVER STRANGE (1930)
Chapter 12
Rozami Pachuau

Bud-a thih thu a phuba lak kawngah chuan ngaihdan hrang a tam hle mai. Ginger-a thiante chuan an Amen zan a. Blaynes-a erawh chuan thil atthlak berah a sawi a. Simon-a hnena a han report na ah phei chuan Green-a fuihpawrh vang vekah a sawi a. "Silai kah thiama eizawng chi hmel a pu riau in ka hria a ni" a ti hial a. Simon-a erawh chuan a rawtna chu a pui hranpa lo. He Green-a hi ngainatna riau a nei a, chuti chung chuan hlauhna te pawh a nei dawn dawn a. Helaia a lo lang hlawl mai hi thil rapthlak tak tum a nei nge ni a, a lo vak thleng satliah mai² tih hi a ngaihtuah nasa hle thin a. Mahse a chhanna duhthusam lah a hre thei si lo.

"Tunah chuan Dexter-a pawhin min rawn beih a chak tawh mai dawn a ni. Chu lovah Tonk-a pawh lungin a khungna thupek nen eng hunah pawh a lo lang mai thei vei nen." Blaynes-a chuan a lo ti leh a. "Mai² a, khu mihring khu maw? YZ a ka hmuh vaih chuan Marshal a ni emaw ni lo emaw ka sawisa hle dawn a nia. Dexter-a chuan indo a duh leh kan indo mai tur a lawm. Ani thu ² a awm lah kan nih hleih loh" Simon-a chuan a ti ta mai a. A foreman chuan makti em² hian a en reng mai a.

"Engvanga Lunt-a kha kahhlum lo tum nge ni a i rin ve?" Simon-a chuan a han ti leh a. "Rin dan chiah pawh ka nei lo. Mahse mimal inhuatna a ni ang chu ka ti mai. Simon, Double X ho khi ka tran emaw te i lo ti ange. Thu min pe chhin teh, ka naute ho ka hruai anga, an vaiin ka han chimih thrak mai tur asin" Blaynes-a chuan a lo ti ve a. "An duh anih chuan anmahnin min rawn bei hmasa rawh se. Amaherawhchu, an duh chuan indo chu ka hnial lo tih ka sawi kha hre reng rawh. An thu hi chu.... " sawi zawm lo chuan Blaynes-a chu kal turin a zaizir ta zawk a. Lungawilo tak hian Blaynes-a chu a kal ta a. A kal pahin Green-a leh Noreen-i, sakawr huang bula an lo ti ti chu a va hmu a.

Green-a chuan a sakawr chu a lo la chhuak hlim hlawl hi a ni a. Noreen-i chuan Ginger-a hliam chu tlawh a tum a ni. Chutia an inhmuh takah chuan Noreen-i chuan Ginger-a hliam chungchangah leh Mex-a thih thu ah chuan Green-a chu a lo chhuahchhal deuh a. Green-a chuan, "Ginger-a chu puitling a ni ve tawh a. Bud-a chu a thianpa a lo ni bawk a. A thiltih chu tih awm lo a ni lo ve" tiin a chhan hram² a. Chutia an ti ti lai chuan sakawr chungchuang pahnih lo kal hi Green-a chuan a va hmu a. "Saw, i thiante pawh an lo len leh tawh saw!" a ti a. "Chuti taka thian neih awlsam chu ka ni lo asin. I duhzawng an ni mang nange?" Noreen-i chuan a han ti a. "Ni suh e, mahse an ni pawhin min duh bik hlei lova. A pawi phei chu ka ti viau mai a, mahse kan in ang reng anih chu maw" Green-a chuan a ti a, a tlansan ta daih mai a.

Noreen-i chuan Ginger-a chu a zuk en ta a, rei tak a awm nghe² a. Ginger-a chuan Green-a chu a lo fak mawlh² mai a. "Kha mihring kha chu a nep lo ania, kawppui tlak a ni" ti te in a lo fak a. Kawng dang teh chiam a tihna phei zawng ni lo mahse Noreen-i chuan a lo in ngaihbel deuh a, a zak dawn dawn a.

Chutihlai chuan Green-a chu hman a bawngrual hnu an chhui a, an hlohna lai pan khan chak takin a tlan a. A va thlen chuan kawr bawk kha a zawh chho leh ta a. Chu lui chu lengkir sang deuh mai hian a tawp ta emaw tih mai tur hian a titawp titih a. Sakawr nena han lawn zia lah a ni si lova, a bul vel a han thlir mai² lai chuan lengkir thut chiah laia thing kara tui luang lut kar² te chu a han hmu a. An zar te chu luikam leh lam leh lama mi chu lui rawn zar chuan an insi deuh rual mai a. Chu² a han keu sawt² a, Green-a chu a va luh nak chuan lengkir bulthut chiahah chuan puk zau tak, tui luan luhna chu a va hmu ta a.

Sakawr chungchuang han kal nan em chuan puk ko chu a hniam deuh avangin a chhuk a, a sakawr chu a kai a, a lut ta a. A en danah chu puk chu a thui vaklo a ni ang tih chu a ring a. Fimkhur takin tui thuk leh thuk loh te pawh chu ngun taka dap chung zelin a kal a. Lui chhuat chu lung chang tak mai a lo ni a. Tui chuan thuk lo te hian a dap chhuak vek bawk a. Puk tawp leh lam a va thlen chuan thing lian tawk tak hi a lo inkham a, mihring han kham luih tih a hriat viau nghe² a. Chu thing chu a han la sawn a, a sakawr nen chuan an va chhuak hlawl mai a. Mahse a hma lam chu ngun takin a han en te² a, thanga awh leh chu a duh tawh loh avangin.

A hmaah chuan phaizawl hmun hring dup mai hi mel khat laia sei tur leh a vanglam chu mel chanve dawn lai tur hi a lo awm dup mai a. Chung karah chuan bawng hi an lo tla sap² a, za emaw lai an ni awm e. Tichuan a biru thei ang ber zelin a kal a, thingbuk karah Buk a va hmu ta a. Luah loh pawh chu a ang viau mai a. Fimkhur takin chung bawng tla te chu an pang a chhinchhiahna hmuh duhin a hnaih hret² zel a. Nakinah chuan a va hmu ta a. Chu² duhtawk lovin pakhat chu a han phih awk a, a han phuar a, a phet thlu a, a han enchian chuan Frying Pan chhinchhiahna, thirbel lema thirbel lem dang chhut belh a zawm kual vel hi a ni tih a hmu chiang ta a.

A hmuh chian hnu chuan a bawng pheh thluk chu a han phelh a. A rawn beih hmain a sakawr chungah chuan a zuangkai thuai a. Chuveleh silai a lo ri thak a, a bulah, a lu thawi thuak hian a lo ving thuak mai a. Kah ve pawh tum lovin a tlanchhe ta a. An rawn kah leh pawh chuan a lukhum a rawn fuh a, a pawp hawk mai a. A tlan zel a, puk ko a va thlen chuan a chhuk a, a rifle a phawi a, leiah a bawk ang thler thlawrh a, a lo kap ve ta a. A kah hmasak zawk chuan a rawn mntute pahnih a pakhat zawk sakawr chu a tlu tawp mai a. Pakhat zawk chu han tlanchhiat tum niawm takin a han in singsa a. Mahse a sakawr bawk chu Green-a chuan a va kah thluk sak leh ta a. Tichuan, thlamuang takin a haw ta a.

Ranch a va thlen chuan Tarman-a te thiandun pawh kha an lo la leng a. An bulah chuan a sakawr ata a han chhuk a. "Green, min hmu duh em ni?" Simon-a chuan a lo ti a. "Thil hrilh tur che ka nei a" tih pah chuan Simon an office atana a hman ber pindan lam chu a han mitmei ralh a. Mahse putara chuan a lo hre duh lem lova, "Han sawi la, kan thiante hian min lo ngaithiam em ang chu. Tarman-a hi chu i hre tawh tiraw?" a lo ti a. Green-a chuan chu pa chu a han en a, "Hria e, ka sakawr ka hawh tir tawh a" a ti ta a. Tarman-a chu tualthah duh awm khawp hian a han meng rum a, mahse reiloteah chuan a nui ve ta vak² a, "Ka chuang rei lo kher e ti rawh" te a lo ti ta a. "Khai le, i thil sawi tur chu sawi rawh le" Simon-a chuan a lo ti ta a. Green-a chuan a han hrilh ta vek a. Simon-a chu a lawm hmel kher mai. "Chung mi pahnih te chu i hria emaw chu?" a lo ti a. "Hre lo, mahse Mexican an ang viau mai" Green-a chuan a ti a. "Silai kah pawh an thiam viau mai" a ti zui leh a.

Blaynes-a lo vah chhuah lai a ni hlauh a, Green-a ho chuan cowboy dang awm² chu pun a, Frying Pan va hrilh tur chuan Simon-a chuan a tir ta a. Chu veleh Seth Laban-a chuan haw a tum ve ta a. Green-a chuan Larry te, Dirty te chu a sawm a, Frying Pan chuan an tlan ta a. An va thlen chuan Leeming-a chuan lawm zetin a lo dawngsawng a. Green an an kal chhan a han sawi zawh erawh chuan rei tawk tak a han ang leh te² a. Tichuan, Leeming-a ho chuan a foreman awm loh hlan a lo nih ve bawk avangin an kal chhuak ve ta nghal a.

Bawng awmna ruam an va thlen chuan bawng awzawng chu hmuh tur a lo awm ta lo mai a. Green an sakawr a kah hlum sak te erawh kha chu an va hmu a. Mulukawlhin an lo ei fe hman tawh a. Chutia bawngrual ber lo awm ta si lo chu an han vak darh sang² a, bawng pakhat chu hnim karah an va hmu ta nawlh a. A pang a chhingchhiahna an lo tih danglam tawh chu an han en chuan Frying Pan ta ngei a ni tih chu hai rual lohvin an hre thei a. An tih danglam dan chu fing an ti hle a. "An va thiam reng² ve mawle, khawiah tak hralh ang maw?" Leeming-a chuan a ti vang² a. An khalh tak zelna hnuhma zawng chuan an han vak darh leh sang² a, an hmu ta lem lo bawk a, beidawngin an haw leh ta a.


SUDDEN - IN THE RANGE ROBBER
AUTHOR : OLIVER STRANGE (1930)
Chapter 13
Rozami Pachuau

A tuk zing tukthuan ei lai chuan Blaynes-a chu 'Ka tih reng kha' tih hmel hi a pu a. Green-a chu a han en a, "Bawng rukhmang ho chu in va man ta lo maw?" a han ti a.
"Man lo"
"In enna lai a dik lo anih chu. Job-a te nen in va tei bo mai² chhung khan Frying Pan bawng za rual zet chu an lo ruk leh kha. Chu pawh chu i hre lawng maw?"
Green-a chuan mak ti deuhin a en reng a. Chu thil chu a lo hre lo ngei mai a, mahse a huat tak a chu ti el ni awm taka a han zawt vel chu a ni. "Ka hriat tawh i ring tihna em ni chu?" a han ti let sak a.

Foreman Blaynes-a chuan a chhang hreh deuh a. A hma lawkin Simon-a hnenah Green-a chu bawng rukhmang ho nena thawkho niawm takin a lo han sawi tawh a. Chubakah Leeming-a hova an va kalna pawh chu Frying Pan bawng, an kal hlana a thiante'n an lo ruk theih nana a dawt phuahchawp ni te in a sawi a. Chulovah amah a va kalnaah khan mi pahnih sakawr a kah sak te kha a thiante an nih avangin anmahni kap lovin an sakawr a kahsak a ni ang, ti te in a lo han sawi tawh a. Ngam se chu tunah pawh hian "Aw" han tih paha silai chuh chu a duh em² mai a. Mahse a ngam mawlh si lo. Green-a lahin a hmaiah ngei chuan a en kal mai a, amah bawk chu a lo tawng leh ta a, "Blaynes, i silai kha dah teh" tiin. Amah chuan a kawnghren a hlip nghal a, mahse Blaynes-a chuan hlih zai a rel ve hlek lo mai a. "Hlip ve rawh mi dawihzep pa" Green-a chuan a han ti tuar mai a.

Blaynes-a chuan chutia han tih chu a tuar ta lo a ni ang chu, a kawnghren lam chu a khawih vat a, mahse a kawnghren hlip tur chu ni lovin a silai a chuh dawn a ni tih chu Green-a chuan a lo hrethiam nghal a. An inkar awl chu a zuan phei dawrh a, Blaynes-a silai phawina lam banrekah chuan a man ta a. A hmer vak mai a, pakhat chuan a silai a tin tumin a bei nasa mai bawk a. Mahse thirchakai a cheh chu nepte a ni ange, tih mai turin Green-a chuan a hmer nghet si a. A thaw chu a sa phat² mai a. "Silai chu thlauh thla vat rawh, Uicho" Green-a chuan a han ti leh a. Mahse, chutianga a tih vang ni hranpa lovin, a kutbawr a zawi zawh tawh avang chuan Blaynes-a chuan silai chu a thlauh ta a. Chuveleh, Green a'n a hmer chu a thlah a, a han tawlh hrat a, a kut dinglamin a han hnek thruai mai a. A khabe takah a han dawm fuh bawk a, a kilah chuan nikhaw hre lovin a tlu thlawp mai a. Green-a chu engmah sawi lo chuan a chhuak ta daih a.

"E heu! Sipai sakawr khen pawh ka duh zawk a" Durran-a chuan a lo ti hial a. "Silai keng ve lo te, silaia beih te a han tum vei a, a chawh ngawt alawm" Dirty chuan a lo ti a. "A ti diklo phei chu a ni ang, mahse Foreman ve lem chuan a hote zinga pakhat thu² a tih chu a duh bik lo a ni mai alawm mawle" tiin Durran-a chuan a lo chhang a. "Ani pawh hian a thu² a min dah a tum tur a ni lo reng a ni. Chu² Ratler-a zir tur pakhat chu a ni ve reng² a ni" Dirty-a chuan a la ti talh a.

A chhuak ta kha Green-a chuan Simon-a chu a han zawng a, a office-ah ngui hmel deuh hian a han hmu a. "Thil eng engemaw hi i hriat a tulin ka hria. Tunah khan i Foreman hian i bawng rutute nena inthurual niawm in min puh a, min kah a tum avangin ka hnek ta mai nghe² a. Min ban la a tha in ka ring" Green-a chuan a han ti tawng mai a. Simon Putara chuan chu cowboy chu a en vang² a. Mi hi lo dawr hnem ve hle tawhin a in ngai a, ama lungawi tawk na³ chuan an mizia awm pawh hre thei thuaiin a inngai thin a. Hepa erawh hi chu a hre thei lo. Green-a hi misual a nih chu a ring lo, ngainatna riau a neih kha a rilruah a lo lut thar leh a. Chu cowboy han ban ngawt chu a thei lo tih a hre ta a.

"Enge i tih ang?"
"Heng lai velah chuan ka awm thovang. Bum che ka tum lovang. Ka la bum hek lo che. Chu² ka theih hun²ah ka fiah dawn a ni. Mahse, he Ranch hi Blaynes-a nen a kan awm nan chuan a lian tawk lo a ni. Min khawih a tum leh vaih chuan a tawpna a ni ang..ama tan"

A han sawi dan hmangah chuan han uang a, chapo pawh a ni lem lo na in, a thusawi chu a hlen ngei ang tih chu han rin loh rual a ni lo. Blaynes-a leh Green-a chu a duh zawk a thlang dawn tihna a ni ta ber mai a. Tih dan tur a hrechhuak ta a. "Kei chuan ka puh ve hleinem che. Blaynes-a lah ka hnenah a lo thawk rei tawh si a, ka ban che ang chuan kal tho se, mahse ka hnen atang chuan hlawh la reng tho ta la, tichuan, i duh ang deuh pawhin i ti thei zawk anga" a ti ta a. Green-a chuan a han ngaihtuah vang² a. Hna thawk lem lo anga khuaah emaw a awm mai² chuan bawng rukhmang ho pawhin an hlau lo anga, an bawngruk te pawh ngampa deuh te pawhin an tih ngam leh a ring a. "Nia mawle. Amaherawhchu ban ka dil che a, min ban a ni tih chu i theihnghilh palh ange" a ti ta a.

"Ni e, ka foreman i lo velh thu ah kan inhau hrep a, biak pawh kan inbe duh tawh lo ni rawh se" tiin pawisa tel Putara chuan a rawn phawrh a. A han chhiar a, "Kha.. Hei hi i hlawh ka bat sa reng ni se, thla khat hlawh hi la lawk bawk la, khuaah nei nung deuha chet te pawh i duh ange" tiin a pe ta nghal a. Green-a chuan lo lak pahin "Hotel-ah ka awm anga. I ranch lei duh te hi an awm khiat lo maw? Rawn dawn che ka tihna ania" a han ti a. "Awm lo ve. Tarman-a erawh kha chuan a han sawi thawi deuh a, mahsela a mi dawnna a hniam lu deuh em mai a, ka nuihsan ta mai² a. Engatinge mi zawh?" Simon-a chuan a lo ti a.

"Ka rin thu mai² ania. A nih leh, ka insiam anga, Blue-a hi chu ka chhawm zel mai ang chu maw?"
"Teh reng e. Ka pe tawh che alawm"

A va insiam lai chuan Ginger-a, la dam fel lo tih chauh lo chu tumah an awm lova. Ani chuan, Blaynes-a lo harh chhuak leh a nasat zia a lo hrilh nual a. "Kha, i insiam danah chuan zin thui deuh tum i va ang ve" tiin a han zawt a. "Khaw thleng chauh phei chuan ka kal anga, mahse ka awm rei deuh maithei a, min mamawhna te in neih chuan Hotel-ah ka awm ang. Mangtha le, Ginger" a ti a, Green-a chuan a chhuahsan ta a. Bang awng atang chuan Ginger-a chuan Green-a kal chu a lo bih reng a. Blue-a chungah a chuang a, ama sakawr pangngai a kaih danah chuan rin dan a nei mai a.

Tlaia Dirty leh Simple leh Larry lo haw chu Ginger-a chuan a lo hrilh a. An paliin thinrim deuh mai hian an inrawt khawm ta a. Simon putara han hmuh chu an titlu ta a. Sakawr chunga chuang lova ke a an han kal ngat danah chuan an lawm lo a ni tih chu Simon-a, lo hmutu chuan a lo hre nghal a. "Nau te u, engin nge ei ta che u?" a lo ti thuai a. "A chungah thil i ti dik lo in kan hria a ni" Larry-a chuan a han ti a. "Min ban ve rawh" Dirty-a chuan a lo ti ve a, "Ginger-a tan pawh kan sawi kep nghal e" Simple-a chuan a lo ti ve bawk a.

Putara chu a ngawi vung² a, "Mi a ho, ka mi rawih pakhat ka ban chungchangah nangni tehlul hian enge sawi tur in neih? Ban in duh anih chuan ka ban phiar ang che u. Mahse thluak tlem a zawng in nei anih chuan heta ta hi in chhuak hmanhmawh anga, nangmahni hna chauh hi in ngaihtuah tur a ni ang. Chu² Green-a pawhin a tih dan tur che u a ni em² ang. Ka thinrim tak² hma hian kal hmanhmawh mai rawh u" a ti ta phiar² mai a. Lungawi lo zet chuan an haw leh ta a. Ginger-a khum bulah bawk chuan an inngaihtuah khawm leh ta a. Ginger-a chuan khuaah pakhat zuk kal a, Green-a zuk hmu turin a lo hrilh a. Tha an ti tlang hle a. Kal tur chuan lehkhaden in ai an han en a. Larry-a kal a tlu a. Tichuan, a zan duty ai lo duty tur chu ai an en leh a, lawm takin a tlukna apiang chu kal mai tur a ni, an inthian tlan em avangin.

Larry-a chu a kal ta a. A mi zawn chu Folly Saloon-ah Silas-a bulah a zuk hmu a. Larry an a kal chhan a han hrilh zawh chuan "Mi a ho a ti che u maw? A tidik chiah anih chu. Tunge mi pangngai si, ama rawih te thu a awm duh reng² ang ni? A lo ban nghal phiar lo che u chu a va mak ve" Green-a chuan a lo ti ve mai a. "Nangmah tanpui nana ti kan nia sin mawle" lungawi vak lo chuan Larry-a chuan a han ti a. "Ka hria alawm. Mahse YZ a in thawh reng khian mi tanpui thei zawk tih hi i thluak bawmah khan thun ta che. Henglai velah hian thil bawlhhlawh tak mi te'n an ti mek a, chu² helai ram ka chhuahsan hmain ka lungdum zana tih fihlim ka duh a ni. I hriat leh tur pakhat chu Cowboy hna nei lo, henglaia cham bang mai² ka ni a, min bantu pawl phei chu hmuh pawh hmu duh manglo ka ni tih hi a ni ang. Ka mamawh hunah che u chuan ka rawn hriattir thuai ang che u. Job-a i hmu hnai lo maw?" Green-a chuan a han ti a.

"Kei chuan hmu lo, mahse Wood an Simple-a hnena a lo sawi hmangin a thin a rim hle awm e. Rukhmang ho lah hi an hna-ah hian an muthlu mai² lo hle leh nghal a"
"Engtik ni ah emaw chuan an chesual lai chu ka la man em² thovang"
"Kan thudang alai chuan Dona, kei hi chu lo bang ve mai ila, midangin YZ lam chu an lo enthla thei tho anga, a tha mai lovang maw? Heng tualthah hmang ho zinga mahni chauh a tal chu a tha lovang e."
"Ni lo ve. Tunah rih chuan keimahin ka'n tal ange. Naupang fel tak ang maiin YZ lam panin kal chhet² haw leh ta zawk tawh. In foreman lakah pawh hawihhawm viau ula, kei erawh hi chu min be tha duh mang suh u"

"I han sawi hnuhnung ber chu tih a har lo teh ang chu, phivawk pa" Larry-a chuan a han ti hmak a. Tarman-a leh Laban-a leh Pete-a lo kal lai tak chuan a kal tauh san ta hmak a. Marshal pawh a lo tel ve hnak² a. An pali chuan dawhkan pakhatah hian lehkha an va deng ta a. Chutihlai chuan Green-a chuan Silas-a chu a lo ti ti pui a. YZ atanga a ban thu te chu a than chhuah ranna ber tur ni a a rin avangin a hrilh mawlh² a. "Chuti chu Leeming-a hnen lama thawhna zawng mai lovin ka hnenah i awm rih ang chu maw" tiin Silas chuan a zawt a. Green-a chuan a lu a thing a, "Ka chawl rih ang. Tin, rangkachak pawh ka zawng ve mai thei a ni" a ti a. Chutihlai chuan Pete-a chuan a rawn melh ralh a. "Nugget Putara hi chu a hlawk hranpa vak lo a ni anga, a hlawk anih pawhin kan hnen lamah hi chuan hlawkna chu a rawn hmang ngai lo a ni phawt ang" Silas-a chuan a ti a. "Mahse, a awm bawkin ka ring tlat a ni. Hun lah ka ngah a, han tih chhin ve reng² ka duh a ni." Green-a chuan a la ti talh a. A chhuak ta a.

A chhuah tak hnu chuan Tarman-a ho lehkhadeng chuan an sawi zui ta a. "Rangkachak a zawng dawn maw? A hlawhtlin chiah chu a rinawm lo ve. Cowboy hna nei lo lah hian rangkachak zawn hi zuk tum mawlh² hlawm a mawle" Marshal chuan a han ti a. "A zawn tak² i ring elo?" Pete-a chuan a lo ti a. "Sawi zawng a sawi rin hle kha. A sawi ring lutuk deuh a ni. Kan rin nana ti mai² a ni ta ve ang. A zawng lai ngei ka hmuh phawt loh chuan ka awih dawn lo" Pete-a chuan a la ti hram a. "A.. Pete, kei zawng min tibuai tawh lovang. YZ atangin a bang tawh alawm" Marshal chuan a lo ti a. "Ni e, vawin chawhnu khan ka han lenlai chiahin Blaynes-a a tihlum thelh alawm. Simon Peter-a pawh a lawm lo ngawt asin. Mi tangkai tak a ni ang." Tarman-a chuan a lo ti a.

"Mr Green-a hi zawng mulukawlh chaw ah ka siam dawn" Pete-a chuan a lo ti bal² a. "Chu² ka hnial reng hleinem, Pete, mahse hmang hmasa zet la, han ngaihtuah chiang teh." Tarman-a chuan a lo ti a. A han tawng hmangah chuan thuneihna nei hi a ang viau mai a. Pete-a pawh chuan hnial a tum ta lem lova. Tarman-a chuan a sawi zel a, "Fort-a lo kal turin mi pakhat, henglai mite hmelhriat loh koh tir la, lo thlem sela, kawl pawh chu a lo kawl hlen thei asin" tiin. Pete-a chuan a han ngaihtuah vang² a, "I tidik leh ta pek e Joe, California ka tir anga, mikhual a ni a, amah pawhin rangkachak a lo zawng ve tawh thin nghe² a, a tha viau tak ang" a ti ta a.

Green-a chuan dawhkanah suahdurte leh bawngtuthlawh te leh rawngkachak zawng mite hmanraw dang² a va lei a. Tin, nghakuai te pawh a lei tel a. Tichuan, chu mi ni a a hnathawh chu tha tawka ngaiin ngaihtha takin a mu ta a. A tuk zinga a chhuak ta chu a lo hmu apiang chuan an lo nuih ver² hlawm a. Khua a pelh hnu deuh chuan Norry kha a tawk ta a. Green-a sakawr thil phurh vel chu a han en vang² a. "Kha, Blue-a i phurh tir lova a lawmawm hle mai. Ani chuan phur se, a tah a chhuak dawn em mai. Engtizia nge YZ i chhuahsan a?" a lo ti a. "Foreman nen inhnialna kan nei alawm mawle" Green-a chuan a ti a.

A han sawi hmangah chuan a lungngaih hmel bawk a, Noreen-i chuan han hnem zui zel hi a rilruk a, "Blaynes-a chu i that thelh niawmin ka pa'n min hrilh a. Hei, inhauh hmang tak i ni ta ve ang. I lo kal chinah reng buaina a chhuak hnem tawh mai" a han ti a. Mahse a tum ang chuan Green-a chuan a lo huat sak duh ta lawi si lova, "Chu, bawng bo thu-ah pawh min dem ve deuh elo?" Green-a chuan a lo ti duh lek a. "Chung te zawng ka ti lo tih chu i hre reng alawm mawle. Engahnge maw ka tanna hi min phehtir bik zel le?" Noreen-i chuan a ti leh a. "In hau ka hman vang a ni ta ve ang. Kei zawng, buaina chawhchhuah hi ka hrat ve reng ania" Green-a chuan a han ti leh mai a.

Mahse, a han sawi danah chuan mahni inthiam lohna nei a an em avang chuan Green-a chu a khawngaih letling ta a. "Hei, hmelma lah i ngah sawt nasa mai si a, engahnge maw i kalbo daih mai loh le?" a han ti leh a. "Chu, kalbo daih se min ti a ni maw?" Green-a chuan a lo ti leh lawi si a. A han ngaihtuah chuan chu pa chuan a thurawn chu lo pawm ta mai se, amah zawk chuan pawi a ti viau dawn niin a hria a, "I lei ka ba teuh si a, tawhsual tawk lo turin ka duhsak che a ni" a ti ta a. "Ka engmah i ba lo ve, hmelma siam thu chu hmelma pawh nei lo khawp a mi pawimawh lo nih hi zawng ka thlakhlelh zawng pawh a ni hranpa lo. Chuvangin kalbo zawng ka tum lo" Green-a chuan a ti leh a.

"Chu, i chapo vang maiin i nun chan hial pawh i lo huam tihna a ni maw?" Noreen-i chuan a han ti leh a. "A ni bawk a, thil dang te pawh le" nui chungin Green-a chuan a ti mai a, "He lai velah hian rangkachak a awmin ka ring tlat a ni. Zawn ka tum" a han ti leh a. Noreen-i chuan a han en vang² a. Green-a kher in rangkachak a zawn chu a ring therte lo. Mahse a tum han zawt sa teh mahse a hrilh dawng chuang lo tih a hre bawk a, "I vanneih hle ka beisei tak meuh a" a ti ta ngawt a. "Ka lawm e, ka pi. Ka beisei ang ka hmuh chuan vannei tih chunglam ka ni ang" tih pahin Green-a chuan Noreen-i mit siah-ah chuan a han en a. Noreen-i chu a zak deuh a, a sakawr chu a han kheng tlan a, a tlan ta daih a. A hmuh theih chhung chu Green-a chuan a en zui vawng² a.

Chhunlai velah chuan rangkachak zawnna tur lui chu a va thleng ta a. Han bunna tur hmun remchang melh chung zelin lui chu a zawh a. Remchang awm deuha a ngaihah chuan a han bung a, tiauvut chu a han thlei teh thin a, rangkachak hmel awm reng² a hmu lo mai a. A han insawn pawhin a hlawhtling thei si lo. A tawpah zawng a ning ta deuh a, nghakuai a chiah ta zawk a. A vanneih asiamin pahnih pathum chu a awk ta mai a, zanriah hmehah a siam a, a mu ta a. A tuk zingah chuan a ngai te bawkin a han thawk leh a. Enthlatu awm tlata hriatna a nei a. Tichuan ngunthluk zet niawm chuan a bei tlauh² a. A rin ang ngeiin rei vakloah chuan mi pakhat sakawr chungchuang hi a lo kal ta a.

An inbiak luam hnuin lo kal thara chuan Green-a tiau han thlei vel dan chu thiam lo a ti em² mai a. A sakawr ata a chhuk a, a han tihsak a. Ani chuan alo thiam kher mai a. Tichuan, Green-a chuan chaw ei ve turin a sawm ta nghal a. Nghakuai an chiah a, sangha pahnih an han man te² a, chu² chawhmehah an siam a, chaw chu an ei dun ta a. An chaw eikham chuan a mikhual chuan a hming chu Dick West a ni a, mahse California tiin an ko ber thin a ni tih te a hrilh a. Amah chu an chhak hla deuh hleka Ranch pakhata thawk a nihte a hrilh bawk a. An chhinchhiahna Green an a zawh chuan Crossed Dumb-bell a ni tih a hrilh a.

"I rangkachak zawnah chuan tui viau lo la chu kan zingah lo thawk ve la tha tur. Hlawh chu thla khatah dollar sawmnga lek phei chu a ni a, mahse chumi bakah hlawkna insem a ni a. Chu² thla tin hlawh aiin a tam a ni" tiin Green-a chu a thlem ta a. "A that hmel hle tak chu mawle" Green-a chuan a lo ti ve a. "Tha tak a ni, Jeff-a lah pa tha zet a lo ni vei nen" California chuan a la ti ta zel a. "Chu² in hotu maw?" Green-a chuan a han ngaihtuah vang² a. Rukhmangho chuan chhawr nahawm takah an ngai emaw, a nih loh vek leh a awhna tur thang an kamna emaw a ni phawt mai a. Mahsela, thawhna Ranch a thawh chu a tum ve ta a. A rangkachak zawnna thuam vel chu a han thukru te² a, an kal dun ta a.

Hmana puk a luhna kha an va thleng a, phaizawl chu an kal pel a, hmana Frying Pan hova bawng rual hnu an chhui tawpna, tui tawpna ni awm tak bawk, lengkir sang tak awmna kha an va thlen chuan California chu a chhuk a, an piah hnim pik deuh karah chuan a va lut a. Thingphel rinawm pui² hlai tak² pahnih hi a lo awm a. Chu² an zawn a, luiah chuan an dawh kai a, an kal ta a. Thingphel chu an dah tha leh a, chuta tanga an hnu chu California-a chuan a sakawr zina kawmawl hlingin leiah chuan a hnuk a, a tireh vek a.
"Kha, Indian ho tihdan tha deuh asin, min zui rutu awmin i ring deuh elo?"
"Ni hranpa lo ve. He lui hi kan kawng kan ber a ni a, mahse tlang zarh vak kan duh lo a ni."

Kawng kawi deuh² ah hian a kalpui a, mahsela kawng mumal tak, bawngrual pawh kalna thin chu a ni a. Lui pakhat chu an va thleng leh a. Tahchuan, tui in tur hian California chu han chhuk tumin a ke leh lam chu a nghah chhan ata a phawi fel chiah tih chuan a sakawr chu a ding ta vak mai a. California chu a lo inring lo kher bawk a, a tla ta a. Hnim bukah hian a zuk tla tlum thawih mai a. Chu veleh chuan a lu atanga tawng awm lekah hian rul lian tawk tak hian chuk tumin a lo din ar mai a. A chuk thelh tihah chuan Green-a chuan a'n kap thawr mai a, rul chu lu bungin a tal ta tawp² mai a, California chu a lawm kher mai. A lo tho a, "A va hnai ther² ve le, thianpa, ka lawm tak meuh a ni. Ka rulh ve theihna che a awm phawt chuan a tawp thlengin ka phat lovang che. Rul anga ka hlauh hi a awm mang lo asin. Silai hman i thiam awm mange" a rawn ti ta a.

"A.. han tin hman ni tawh hek lo. Chu lovah i hna sawi kha chan ka duh si lova," Green-a chuan a ti mai a. Ranch an va thlen chuan California-a chuan an hotu hnenah chuan Green-a chu a va hruai a, hna chu a dil sak ta a. An hotupa Jeff-a, pa te, ke kual pem pawm chuan, "Ka ruai ang che. I hna tur thupek awih a, dilchhut loh tur a ni mai. Kalpui rawh, Dick" a lo ti a. Bunkhouse-ah chuan cowboy dang upa deuh te, ru ra awm pui² sawm dawn lai hnenah chuan Green-a chu Dick-a chuan a han hmelhriat tir a. An chaw ei laia an ti ti chu Green-a chuan ngun takin a ngaithla a. Mahse, engmah han hriat that a nei lo, Spider-a hming han lam rik leh zauh ri chu a hre ta a. A bula thu Dick-a hnenah chuan tunge a nih a'n zawt a, "A hotu ber, hetah chuan a awm meuh lo" Dick-a chuan a lo ti a.

A hnuaia advertistment link khu min lo click sak hram hram ru aw..

[Ngaia]

SUDDEN - IN THE RANGE ROBBER
AUTHOR : OLIVER STRANGE (1930)
Chapter 14
Rozami Pachuau

Tarman-a zawng thil han khek veng² chi a ni lo bawk a, Simon-a ranch ah chuan a leng zing hle mai a. A neitupa leh a fanu chu kawmngeih a tum em² mai a. Noreen-i pawhin a hmel te a lo tha puak si a, a mizia awm hrechiang thei mah suh se, sakawr chung chuangin a lenpui ve zauh² tawh reng a. Ni khat chu Green-a thu an sawi chhuak ta a. "I cowboy ban tak kha a la awm a ni maw? A sakawr pawh Hotel sakawr huangah a la awm a ni. Chu lovah pawh Double X cowboy thenkhatin mi rura awm pui² te nena an kalho an hmu tlat a ni. Thurual pui tur dang a duh ang a hmu ta a ni phawt ang," Tarman-a chuan a han ti a. "Ka lo ban ta chu a tha a nih chu" Simon-a pawhin a ti ve mai a.

Noreen-i erawh chuan engmah a sawi ve lo. Tarman-a hian Green-a hi a thik a ni tih a hre reng a. Mahse a thu han sawi tak chu a phuahchawp ngawt a nih chu a ring lova. Tarman-a chuan nuam ti zet hian Green an bawng ruk sa chhinchhiahna a ti danglam lai miin an hmuh thu te chu a sawi vel a. Noreen-i rilru chu a na hle mai a. A hnu deuhah Ginger-a damlo a va en pawh chuan a hrilh ve ta hial a. Ani lah chuan a lo awihlo nasa mai a. "Ngaihtuah duh suh, Miss, ani kha zawng pa dik tak ania. Chutia Hatchett khaw hovin an lo sawichhiat nasat deuh phei chuan ka thiante nen kan zuk leng anga, kan la zuk hrilh chiang ange, silai nen" a lo ti a.

Hetih lai hian Tarman-a sawi ang ngei chuan Green-a chu Jeff-a chuan an bawng ruk sa chhinchhiahna ti danglam turin a tir a. A en reng a, a hna han thawk reng² chu tlin hluah² hian a hria a. Mahse Green-a chuan chutianga a han tih danglam apiang chuan chhinchhiahna ruk, amah chauh hriat theih tur hi a siam zel a. Tam tawk tak a tih hnu chuan Jeff-a chuan tih tak zet hian, "I hna i tlin ngei mai. Chawlh te pawh i phu tawh e, lo chawl tawh rawh. Amaherawhchu, khuaa kal turin mi pakhat chu ka duh viau mai" a lo ti ta a. "I kal peih ange maw chu?" a han ti leh a. "Lawm takin ka kal ange, engtikah nge kal tur?" Green-a chuan a lo ti vat bawk a. "I peih chuan tunah pawh hian kal nghal mai tur. Zan pawh i han riak nghal mai anga, zingah i lo haw mai ang chu"Jeff-a chuan a ti a. Lehkha ip, thalhrit a ngun taka char hi a pe a, "Amah a awm lo maithei a, Hotel-ah i hnutchhiah mai dawn nia, chhanna ngai pawh a ni law" a ti a.

Green-a chuan lehkha ip chu a la a, a pawnah chuan 'MARWAY' tih inziak hi a hmu a, a ak ta a. Thui a kal hmain Dick-a chuan a rawn umphak ve a. "Enge ni ta, Jeff an thil min chah theihnghilh a nei em ni?" Green-a chuan a lo ti a. "Nei lo ve, I duh leh kal ve rawh min ti a, ka lo kal mai a ni. Khawpui han tlawh ve hrim² pawh ka chak a" tiin Dick West-a chuan a chhang a. An ti ti dun zel naah Dick-a chuan a dawp deuh hlek niin a hria a. A chanchin chu engmah a sawi pui duh lem lova, "Mi pakhat, a hming, Webb-a, palian deuh, sam sen i hmu tawh ngai em?" tiin Green-a chuan a zawt ta phawng mai a. "Ka hmuh awm pawh ka hre hlek lo mai. Engatinge?" tiin Dick-a chuan a lo zawt let a. "Rukru mawle, mahse amah chuan bawngvulh mi niin a insawi thung a." Green-a chuan a ti a. A han tawng dan chu mak a ti deuh a, Dick-a chuan Green-a chu a han en hial a, "I thian chu a ni lo phawt mai maw?" a han ti a. "Ni lul lo ve, ka talh dawn a ni" Green-a chuan a ti a.

Thim thut²ah khua chu an thleng ta a. Hotel-ah an innghat fel sawk² a. Lehkha chu an dah a, an leng chhuak dun ta a. Vaihlo an tlakchham avangin dawrkaipa chu an tlawh hmasa ber a. Ani chuan, "Rangkachak laihchhuahna chu i la hmu em lo maw?" a lo ti a. "E khai, i hmanrua min lei tir kha a vannei lo a ni. Nghakuai erawh kha chu a hman theih bawk e. Chanchin enge?" Green-a chuan a lo ti a. "Chanchin dang a awm pawh ka hre lo. Marshal erawh kha chuan mi pakhat rangkachak zawng chanchin kha chu a sawi duh viau mai a, chu pa chu ni ila chuan rikrum te a awm tak dahah tiin sakawr chak tak chu hnai vai deuhah ka dah reng awm e" Dawrkaipa chuan a lo ti a. "Tonk-a hi ama inrin ang he hu phei chuan a hlauhawm hlei lo na a, kei, chu pa chu ni ila chu i chungah ka lawm hle ang" Green-a chuan a han ti ve kher a.

An chhuahsan ta a. Folly Saloon chu an pan a, an va luh chuan "I dam maw Silas?" a han ti a. Snap Lunt-a leh Nigger-a (a sakawr emaw te kha in lo ti leh truh ange) leh Durran-a te pawh an lo awm ve a. "In dam maw? Ti rawh u, i in ho ang u" a han ti a. Snap-a chuan a rawn pan a, "Teh reng mai" a ti a. Midang pahnihte erawh chu an in kiltawih deuh a, an kal hrang ta daih a. "Uai! Zu nghei turin chhia an chham tawh emaw ni le?" Green-a chuan a han ti a. "Ni hranpa lo ve, sawta saw Blaynes-a a awm a, i bula awm an in thlahrung deuh te pawh a ni mahna" Snap-a chuan a lo ti sam et a.

Green-a chuan a han en chuan kil khatah chuan Pete-a te nen, Laban-a nen, Tarman-a nen lehkha an lo deng a. "Nang hian i va pawisa si lo em!" a han ti a. Snap-a chu a nui sak a, "Chuti takin Blaynes-a hi ka hlau lem lo ve" a ti mai a. An in ho ta a. Silas-a chuan, "Kei a lo sawi ve tur phei zawng a awm lem kher lo anga, mahse fimkhur deuh teh. Tu ten emaw an beisei deuh che ania" a lo ti a. Chutia tih pah chuan Tarman-a te lam chu a en phei a. Chutihlai tak chuan naupang hi a lo lut a, lehkha ip hi Pete-a chu a rawn pe a. Green-a chuan chu lehkha ip chu a hre mai a. Pete-a chuan a han hawng a, an nui ta ham² a. Tah chuan, engemaw chu a awm dawn tih chu Green-a chuan a hre ta mai a. Double X Cowboy ho an rawn thlen belh leh ta nghal a. A rilru te² chuan a lam tang tur awm mang si lovin amah do tur lam chu an pung tual² mai hian a hria a.

Chutih lai chuan Larry-a leh Dirty-a chu an lo lut ve ta a. Khua a zu no hnih khat han lem zawk a, lehkha reilo te han den tuma lo kal mai an ni a. Mahse Green-a an hmuh takah chuan an hlim hle a. "E khai, hei, Dirty, kan vannei hle mai. Kan thianpa, rangkachak laichhuak theia'n a laihchhuah sa Snapa'n a lo tlanpui a nih hi. Ti rawh, i fin ve ang. Tichuan, hman pawh a hmang tam thei mahna, a khawl hnem tawh awm si a" Larry-a chuan a rawn ti bawrh² a. Chutihlai chuan Marshal Tonk-a pawh chu a lo lut ve a, Tarman-a te awmna lam chu a pan phei a. Green-a chuan amah beih an tum tih hre awm lo takin Larry-a te thian dun chu a be luam a. Dick West-a erawh chu a ngaih a tha thei tawh lova, "Khai, chhuak vat teh, beih che an tum a nih hi, i che ve hman hlek lo ang e" a lo ti a.

Zawm tum pawh ni se, a lo tlai hret tawh hi a lo ni reng a. Chutih lai tak chuan Tarman-a te ho inkhel chu an bang a, an lo dingchhuak hlawm a. "Khai le, Silas, kan vai atan han thli rawh le" a han ti a. Tarman-a chuan Green-a chu a en bing a "Mahse, pakhat erawh chu telh suh, bawng ruk hmang nen zu in ho ka duh lo ania" a han ti ngat mai a. A sawi zo chiah tihah Tarman-a chu a ding fal ta nalh mai a. Silaimu zawng tumah thlei bik nei a ni si lova, a kaptu tum loh mah nise a kalna lam apianga na thlen mai thei a nih avangin mite chu an in saseng sap² hlawm a. Green-a chuan a chhang nghal mai lem lo. Mi chu an ngawi thruap mai a. Green-a chu a lo ding mar ve deuh a, "Tarman, sakawr chung chuan ai em kha chuan silai kah chu i thiam ka beisei" a han ti chhuak ve ta a.

Chutia, a lo chetsual tawhna, a zah em² na lehnghal han sawi lan kher chu Tarman-a chuan na a ti hle mai a. A in seh ruh a, silai han chuh mai tur niawm tak hian a che deuh a, mahse Marshal chu a rawn inrawlh ta vat a. Silaia tin reng chuan, "Inkahna a awm lovang. A awm ber pawhin keiman ka kap ang. Silai khawih tum hmasa keiman ka kap dawn che u a ni. Inhnialna in neih pawhin pawnah inhnial rawh u" a rawn ti ta a. Tah chuan, Green-a chu a nui ta vak² mai a. Tarman-a chuan ani nena inkah tak² chu a lo tum awzawng lova, Marshal chu thelhtu atan a lo va chah lawk tih te chu a hre ta a. Tarmana'n a lo hnial der vel leh Tonk a'n a lo chhan dan, "A theih loh a ni, Mr Tarman. Dan hi ka kenkawh a ngai a ni" a han ti vel te pawh chu a hrethiam ta uar² mai a.

"Marshal, silai kha thlauh thla rawh. Ka tin reng che ania" tih hi Tonk-a chuan a hre ta mai a. A han hawi nak chuan Green-a silai dinglam zawk chuan a kawng bawr lawk atang chuan a thinhnun zawn chiah hi a lo tin reng tawh mai a. Tonk-a chuan Green-a chu a en reng a ni tiin chhia hial pawh chham thei tur niin a inhria a. Englai khan nge a silai chu a lo phawi hman pawh a hre lo reng² a. Tichuan, Marshal chuan a silai chu a thlauh thla ta a. Green-a chuan a silai chu a paiah a khung ve ta a. Tarman-a chu a han en a. "Khai le, Marshal chu a lo inrawlh tawh lovang. Tarman, a sawi tur a sawi zo tawh. Thupek pawh a awih e, in thiltih tumah chuan hemi dawt zel hi ege ni?" a han ti a.

"Enge i sawi pawh ka hrethiam lo ve. He Marshal hi lo inrawlh lo se zawng lawm takin kan han inkap tur ania" Tarman-a chuan a lo ti a. "Marshal chu a rawn inrawlh tawh dawn hleinem" Green-a chuan a ti a. "Nih pawh a ni ang. Mahse a remtih loh thu kha a rawn sawi tawh a, nangin Dan pawisakna nei lo mahla kei chuan ka pawisa asin" Tarman-a chuan a lo ti vat a. Green-a chuan, "I Dan hriat chu mahni inhumna dan lek a ni ta ve ang." a han ti leh hram a. Tarmana'n a run zia a hmel a lang ahan hmuh chuan "Ngaihdan dang i nei emaw chu?" a han ti zui leh sak a. Thinrim zetin Tarman-a chuan "Nei e, tualthah hmang, i silai tel lova tumah sual ngamlo i nih ka ring. I silai kha dah teh. Tiam chin awm hlek lovin ka han that teh ang che. Engtin emaw chu i ngaih?" a lo ti a.

Green-a chuan a awh nana thang an kam emaw tiin "Lo dah ta ila, ka duh hunah ka nei leh ngei ang tih tunge lo en feltu ni ang?" tiin a han zawt chiang a. Rang zet hian "Keiman ka lo en fel ang. Ka hnenah min han pe la, i duh hunah chuan i nei leh mai pawh ni lovin Dan dik takin in insual ang. Chuti anih loh chuan tu emaw chu meikhu ah a zamral dawn a ni mai" Snap-a chuan a lo ti vat a. Double X pawl lam melh kal chung chuan Larry-a leh Dirty-a pawh chuan, "Ni e" an lo ti bawk a. Tah chuan engdang sawi lo chuan Green-a chuan a kawnghren chu a phelh a, Snap-a chu a pe ta a. A kawrchung te, Spur te pawh chu a phelh vek a. Pindan chu an han kian awlzau deuh a. An tawnzau lamin an phelh dun ta zel a.

Tarman-a chu a lianin a lo inphut tawk hle mai a. A darah leh a banbulah te chuan tihrawl hi a sek tun mai a. A pa len hu in a intha zo hrep mai lehnghal a. Mahse a khingpui pa tur pawh chu tha hlir emaw tih mai tur hian a sek hian a sek phiar fat mai bawk a. A han in hum sek phei chu kahpathir aia nem chuang bik lo ange tih mai tur a ni. Snap Lunt a'n, "I aiin a palen zawk hi, chuvangin inbawh chilh tir reng² lo la, amah chauh ngaihtuah rawh. Thildang zawng² chu keiman ka lo en thli thlai vek ange" tih a lo hrilh ruk pawh chuan Green-a chu a nui var² mai a. Han en reng² hian a zam lo tih hi a lang hluah² a. A bu nghat a, thurawn tha tak a ni tih pawh a hre mai a. A hneh dawn nge dawn lo zawng a hre lo na a, han insual hrim² mai chu a chak et² tawh mai a.

Snap a'n thu a pek veleh chuan an inbei ta a. A tu amah mah chuan boxing kalhmang chu an hre lo. Khawthlang ram insual dan pangngaiin serh leh sang awm lo leh lutuk neih hlek lova inbeih tur a ni tih chu an pahnih chuan an hria a. Han endiktu hranpa pawh an awm lem lo a. A maha inruat chawp Snap-a mai lo chu. Ani chuan ngun takin a en reng a. A kut chu a kawnghren atangin a dah hla ngailo. An in hel an in hel hnu chuan Tarman-a chuan a rawn bei thut a, theihpatawp tak meuh hian Green-a lu a hnek tum chuan a han bei ta a. A hnek pawh chu a lo na kher mai. A tumna lai takah hnek fuh phei se chu an insual chu a tawp nghal maiin a rinawm.

Mahse, Green-a chu a lo thle hman hlauh a, Tarman-a chuan a lu a hnek fuh lo chuan a koki ah a hnek duh ta a. Chuti chung pawh chuan Green-a chu a pai trawng² mai a, a tlu thelh zawng a ni. Chuveleh chuan Tarman-a tantu lam chu an lo haw haw a. Blaynes-a phei chuan pawisa inchawi pui tur a lo zawng a, "A let zel inchawi pawh ka ngam, a lian zawk hi ka chuam e" a lo ti a. Snap-a chuan, "Inchawi ang hmiang, sawmnga leh za in" a lo ti a. "A tha, midang ngam in awm em?" tih pah chuan Blaynes-a chuan, "Dirty leh Larry-a chu a han melh leh kher a. "Teh reng mai. In inchawi zat ang chiah chuan ka ngam ve e" anni pahnih chuan an lo ti a. Tichuan, Tarman-a a chak loh vaih chuan Blaynes-a chuan cheng zathum chawi tur a nei ta a. Green-a a chak loh erawh chuan Snap-a leh Dirty te thiandun chuan a hnenah dollar sawmnga theuh an pe dawn ta a ni.

Chutihlai chuan Tarman-a chuan han hnek fuh leh tum hian a bei nasa mai a. Mahse Green-a chuan a kut veilam chuan a lo dang thin a. Chutia a tih pah chuan a ke hian a han thai zauh thin a. Chutianga a tih chu na teh vak lo mahse, sawtna tak zawng a nei. Tarman-a ning chuan han bawhchilh tum hian a va hnaih a, a han tin uaih a, mahse Green-a chu a lo thle zeuh a, a kuttum veilam in a dulah a han hnek a. A dinglam chuan a khabe ah a han dawm leh siah a. Chubakah silaimu funkhawm ang mai a ruh kuttum chuan a dul thuarah rang zet hian a han hnek leh a. Tarman an a hnek fuh ve hma chuan a tawlh kir san leh daih si a.

Tichuan, Tarman-a thinrim chuan a rawn bawh chilh lui leh a. Tah zawng indan pawh an tum tawh lo. An in hnek dun mawlh² mai a. Rei fe chu chutiang chuan an inbei ta chiam² mai a. Nakinah zawng an hah dun ta ngang a, tuma hrilh lo chuan an inthen hlawl mai a. Thaw an han la dun ta rih a. Green-a biang chu a kak hlaih a, a mit lehlam chu a meng che² hi a ni mai a. Tarman-a pawh a hmui hnuailam hi a kak a, a mit tawn² hi a bui luk bawk a. Rei chawl lo chuan an inbei leh ta a. An chawl rei lo na vang² in Green-a chu a lo hahdam hman viau mai a. A rilru pawh a siam thar sauh² a. Khatiang bawh chilh kha chuan a aia lian bei a ni a, a ding chang lovang tih a hrechhuak leh ta a.

Tarman-an a rawn bei tur chu a lo tawlh kian san leh zauh thin a. Chutia a tawlhna lamah chuan a hlauh ang ngei ngeiin a tlu palh ta hlauh mai a. A rang rangin Tarman-a chuan a rawn nangching a, a darah a kuah ta tlat mai a. A kuah lah chu a nghet phian mai si a. Mahse a kuahna a lo sang deuh hret zawk a, Green-a chuan hmun leh hmunah a lo hnek zawt zawt mai a. Tarman-a kuahna chu a nghet em kher bawk a, Green-a chuan Pindan te chu vir muai muai hian a hre ṭan tawh a, a kiltu te pawh chu a hmu riai ruai chauh hi a ni tawh a. Mahse, chumi lai tak chuan Tarman-a pawh chuan Green-a hnek chu a lo tuar ta bik lo a ni ang chu, a kuah chu a thlah ta hlawl mai a, an pahnih chuan an lum hrang tawp a. Thawh zawng an rawn tho dun tak na a, han inbeih leh chu an peih ta lo emaw tih tur hian an ding hle hle mai a.

A lo entute pawh chuan 'an inhneh tawk dawn ta em ni ang aw' an lo ti hman tawh a. Chutihlai chuan Blaynes-a ṭhahnemngai lutuk chuan, "Saw, Tarman, i hnek chauh der tawh saw. Va pan la, va that nghal law law rawh" a lo ti a. Snap-a chuan a lo en reng a, a kut han in hum ruh te chu a lo hmu reng a. "Blaynes, kan inchawi kha a leta tihsan i duh lawm ni?" a lo ti a. Blaynes-a chuan, "Teh reng mai. Mahse, ka rawk che a ni ringawt awm teh e," a lo ti a. "Min rawk pawh chu ni se, i chhia leh ṭha hriatna thiang takin i ti thei tho em ang chu. A nih leh, a letin kan tipung anih chu" Snap-a chuan han ti leh a. Green-a hnenah chuan, "Lo nghak la, lo ching hrep ang che," a han ti zui ve nghal a.

Ngah rei vak pawh a ngai lova, Tarman-a chuan a khingpuipa chauh hmel tak chu han thah law law tum hian chhechham chungin a lo thawk phei a, han hnek hlum der hi a han tum a. Mahse, Green-a chu a lo inring nasa mai a, a hmaa a tih anga lo tawlhsawn lovin Tarman-a ban chu a kut veilam chuan a lo dang a, Tarman-a chu a her lawih mai a. A khabe vei lam chu han hnek rem zet hian a rawn dawh kher bawk a. Green-a chuan rang zet mai hian a kut dinglam chuan a tha neih zawng zawng hian a han hnek ṭhuai mai a. Tarman-a chu a thle sawk mai a, a tlu ta zuah mai a. A hnek na kher bawk a, a hnektu pawh chuan a tuar bik lova, a hnek thluk chu a bawhzui ta hnawk mai a.

Green-a chu a lo tho leh thuai a. Tarman-a thawh nghak chuan a han ding ren rawn a. Mahse, Tarman-a chu thingtum ang maiin a mu hle hle mai a. Thawk zawng a thaw hlawp hlawp na a, nikhua a lo hre tawh der lo mai niin. An insual chu a tawp ta chu a ni reng mai a. Nakin deuhah chuan ţawng nachang an hre ta a, a ri ta nuaih nuaih mai a. Snap-a chuan Green-a chu a silai te a lo pe thuai a, "Thil egemaw an phiar leh tawh anih hi. Hnunglam kawngkaah sawn lo va put ru mai rawh" a han ti sap a. Tichuan, an bengchheng karah chuan tuma hmuh loh in Green-a leh Larry-a te thiandun chu an put ru ta a, Hotel lam an pan ta a. A hnu lawkah Snap-a leh West-a chuan an rawn zawm ve ta a.

"Blaynes-a khan man tir che a tum a, Marshal kha a fuih vel a, keiin Tarman-a pawh a man tel tur a ni, ka tih lai takin Tarman-a chu a lo harh ta a. Tonk-a chu a rawn hau hrep nghe nghe a. Tunah chuan Tonk-a pawh a inhre tawh hle ta ve ang" Snap-a chuan a rawn ti a. "Don, engtinnge i awm tak ang" Larry-a chuan a lo ti a. Green-a chu a nui var var a, "Engtin teh vak nge awm se min tih? Hetah khum ka nei a, zanin chu a pum a luah ka tum a ni" a ti mai a. An han thlem teh pawhin a tum chu sawhsawn a tum si lova, a thiltum dang lah chu a hrilh duh bawk si lo. "Min lo ţan avangin ka lawm khawp mai. keizawng, maltlat chi ka ni a, ka lar loh zia lah chu zu nghei sawi mawitu ho zinga zu no ang chauh ka ni a, tun bak lo inrawlh ve tur che u in ka phal tawh lo che u. Ka ngaihtuah awm lovang. Chu zawng chu ka hrilh thei che u a ni" Green-a chuan a ti mai a.

Midang an chhuah hnu chuan Snap-a hnenah chuan, "Snap, Tarman-a hi eng chen nge i hriat tawh?" a han ti a. A insum theih tehlul ţhin vei nen, chu zawhna kher kher chu a lo beisei loh em avangin Snap-a meuh pawh a hmel a danglam deuh hial a. A han ngawi vang vang a, "Chu zawng, Green, ka hrilh theih loh te zinga pakhat a ni" a ti ta a. Chutiang bak phei zawng Green-a pawhin a beisei lem lo. Snap-a chhanna chu a pawm ve thliam mai a. Snap-a zawng ama awmdan leh thi duh leh tih duh loh zawng nei hranpe ve hrim hrim a ni a. Han zawh zui tehchiam mi a ni lo tih chu Green-a chuan a hre mai a.

An haw kawngah chuan Larry leh Dirty chuan an thiante, hmu ve lo hnena han sawi hlan an nghakhlel em em mai a. Snap-a erawh chuan Green-a zawhna kha a ngaihtuah neuh neuh a, "Thil a hre thei mange aw" a ti chhuak phawng a. "Kan kalsan ta mai chu ania" Dirty chuan ngaihthalo deuh hian a lo ti ve a. "A ngaihtuah awm lovang" Snap-a chuan a lo ti mai a.