THE SICILIAN (Book I &II) By Mario Puzo (Completed)

Episode nei ho a hlawm a dahkhawmna
Loma hmar
Posts: 123
Joined: March 20th, 2018, 11:51 pm

Re: THE SICILIAN By Mario Puzo. Chapter 1 - 11(b)

Unread post by Loma hmar » May 6th, 2018, 10:33 pm

Chapter 13A

Sicily rama Mafia chief te chuan Don Croce nena inhmuhkhawm chu an rawt ta nge nge a. Don Croce chu Mafia chief-te zinga hotu bera an ngaih a ni a. direct tak chuan an chungah ro a rel lem lo, anmahni pual lal ram an nei theuh a ni. Mafia chuan hmanlai lalram hun a, a chak leh thiltithei ber idonaa pui tura an inhlawmkhawm a, rorel tura an ruat hi a ang ber mai. Don Croce chuan tharum ni lovin, a finna te, mi hiptheihna a neih te leh mi zahkai tak a nihna avangtein an chunga ro reltu a ni ber e. An duh dan hrang hrang chu an zavaia hlawkna turin hmun khata insawrbingin ro a rel thin.

Don croce chu an chunga a fimkhur a ngai hle. sipai hran an nei theuh a, Assasin te, tura hrai hlum tu leh inreh ngawta nunna latu te leh Lupara hmang chauha mi that thin te pawh an nei hrang thlap hlawm. Chutiang lamah chuan ama chakna nen a inhen hlawm viau mai bawk. Chuvang tak chuan a ni Don chuan Turi Guilianno chu a pasalthate hotu tura a duh chhan ni. Eng emaw kawng zawng tak chuan heng mite hi an fing hle a, thenkhat phei chu Sicily rama fing vervek ber pawh an ni maithei. Don Croce-an a thiltihtheihna a zauh zel pawh chu an thik lem lo, amahah rinna an nghat tlat a. mahse khawvela mifing ber pawhin tihsual chang a nei ve thin a, tun tuma Guilianno chungchang hi chu a rilru ngaihtuahna tam tak zinga hlawhchhamna lo lang awmchhunah an ngai a ni.

A ruk thei ang ber leh venhimna khauh tak hnuaiah, Palermoa Hotel Umberto huanah chung mafia chief parukte tan chuan chawchhun ropui tak a buatsaihsak ta a ni.

An zinga hlauhawm ber leh thu pawh tlang taka sawi thin ber chu Don Siano a ni a, ani hian Bisacquino khuaah ro a rel a, midang ten an aiawha tawng tura an ruat chu pawmin hawihhawm der takin an aiawhin a sawi ta a ni.

“My Dear Don Croce, Kan zah zia che hretu i ni a, keimahni leh kan chhungte tungnung lehtu i ni a, i chungah thil tam tak kan ba a ni. Tuna kan han tawng chhuak pawh hi i hnathawk tur thovin a ni. He bandit Guilianno hi a lo chak ta mah mah a, kan ngaihdan pawh a dang nasa ta lua e. Naupang mai a ni chungin kan thuneihna leh keimahni mi pawisa ta lo sawt riau a ni. Kan client zahawm ber berte atangin tlereuhte a ru a, kan ramneitu hausa ber berte atangin Olive, Grep leh Vaimimte a laksak thul. Hei tunah ngaihthah theih hauh loh inzah lohna tawp min hmuh leh ta a; kan humhimna hnuaia awm tih a hriat reng Prince Ollorto chu a ru bo a nih kha. chuti chungin i la ngawi reng a, amah nen inthian thatna tur i la zawng reng tho va. A chak tih chu ka hria, mahse kan chak zawk lo em ni? hetiang zela kan kal tir chuan a chak tial tial lo ang em ni? He zawhna hi tun hi tihfel hun a ni tih kan za vai hian kan remti tlang vek a ni. A chakna tih thuanawp nan chuan engpawh kan ti tur alawm. Prince Ollorto ruk bona kha kan ngawih bo pui a nih vaih chuan Sicily ram pumah mi nuihzatbur mai kan ni dawn a ni.”

Don Croce chu a sawi zawng zawng pawmpui ni awm takin a bu nghut nghut a, mahse engmah a sawi lo. Guido Quintana, chuta awm te zinga te nau ber chu lo tawng chhuakin, “Montelepre Mayor ka niin mi zawng zawngin friends ho zinga tel ka ni tih an hre vek a, mahse tumah thubuai rem tur emaw dikna duhin emaw thilpek pe tur takngial pawhin ka hnenah an lo kal ngai lo. Guilianno chuan khawchhungah ro relin nangmahni mi tha tak takte thinurna chawh thawh a duh loh vang chauhin min la chen tir hram hram a ni ber. mahse eizawnna kawng ka dap thei tlat lo a, thuneihna ka nei hek lo, ka awm ve tawp a ni ber. guilianno a dam chhung chuan montelepre-ah chuan Friends of friends-in awmzia a nei lo a ni. He pa hi ka hlau lem lo, vawikhat chu ka hmachhawn tawh a, bandit a nih hma khan, hlauh tur mi a niin ka hre lo. He rorelna hian a phal phawt chuan tihboral ka tum mai ang. Ruahmanna ka siam vek tawh a, Tihhlum tura in pawmpuina ka nghak a ni chauh tawh zawk a ni.”

Caltanissetta khua a mi Don Piddu leh Piani Dei Greci khua a mi Don Arzana chuan an lu an lo bu nghat nghat a. Don piddu chuan, “Eng nge harsa tur awm? Kan thu hriatna nen tang kawpin a ruang chu Palermo kan thlen anga a vuinaah inneihnaa kal ang maiin kan kal mai tur alawm.” a ti a.

Chief dang ho, Villamura khua a mi Don marcuzzi te, Particino khua Don Buccila leh Don Arzana te chuan an pawm pui thu an lo sawi a. Mahse Don Croce chuan nghak ta thap a.

Don Croce-a lu ropui tak chu rawn dak chhuakin, a hnar zum vurh chuan a tawng pahin a mal mal chuan a han hmachhawn a. “thian duhtak te u, in duhna zawng zawng kha ka pawmpui vek che u. Mahse he mi hi in ngai hniam deuh niin ka hria. a kum phu lovin a fing a, huaisen lamah pawh kan tluk rual a ni lo. awlsam taka thah mai theih a ni lo vang. Chubakah ka tan chauh ni lo, kan zavaia tan hian hun lo la awm tura chhawrna awm dawnin ka hre tlat a ni. Communist lo hrangin Sicily mipuite chhanchhuaktu beisei hial khawpin an la tirethei dawn a, chutah chuan Guilianno hi anmahni chhanchhuak tura an tahawh lohna tura kan tih a ngai a ni. Chung mia hovina Sicily-a ro an rel chuan eng nge lo thleng tur tih chu hrilh kher in ngai awm lo e. Guilianno chu kan lama tang tura kan hmin a ngai a ni. Amah tihlum turin kan dinhmun hi a la chiang tawk tlat lo.”

Don chu a thaw huai a, chhang chu eiin wine-in a han tleng thla duak a, dim tein napkin chuan a hmui a hru a, “thil pakhat min tihsak teh u, a tawp nan amah hmin turin min beih tir leh teh u. a lo hnial a nih chuan a chunga tih in duh ang chu in ti dawn a nia. A chhanna chu nithum hnuah ka pe ang che u. inremna chhawrnahawm tak a awm theih nan vawikhat chiah ka han bei leh ang e.” a ti a.

Don Sianno chu remtih avanga bu hmasa ber a ni. Chubakah, mi rilru fim tan tualthah chak avanga nithum lek pawh nghah theih loh thu a awm dawn em ni? An kal hnu chuan Don Croce chuan a chenna Villaba-ah chuan Hector Adonis chu a ko ta a.

Don Croce chuan, “I Godson laka ka dawhtheih bak a lo thleng ta a ni.” hnial theih hauh lo hian chu pa tereuhte hnenah chuan a ti a.

“Tunah chuan kan lama tangin emaw min do emaw tur a ni tawh.Prince Ollorto rukbo kha keimah min zah lohna nasa tak a ni a, mahse ngaihdam leh theihnghilh ka la tum fan a ni. A la naupang a, amah ang kum ka nih tuma ka tumna sang tak kha ka hre reng thin. Ka sawi fo tawh angin, ka ngaina a ni. Min ring rawh, a theihna hi ka hlut viau a ni. Ka thachhang dawltu nih a duh chuan ka hlim takmeuh ang. Mahse thil tak takah a dinhmun a hre tur a ni. Mahse chief dangte zingah amah ngaisang tehchiam lo leh hrethiam chiah lo an awm nual. Ka chelh hlawm reng thei lo ang. Chuvangin i godson hnenah chuan tuna ka hrilh te hi va hrilh la, a chhanna chu a tlai berah naktukah min han hriattir ang che, a bak chu ka nghak thei lo ang.”

Adonis chuan a hlau hle, “Don Croce thlarau lam leh tisa lama i thilphal zia hi ka hria alawm, mahse Turi chu mi ngawhngo tak a niin tleirawl dangte ang bawka mahni thiltihtheihnaa innghat mi tak a ni a. Tanpuitu nei lo a lo ni lo bawk si nen. Friends nena indona a lo thlen chuan, a chak dawn lo tih chiang mahse thil erawh a tichhe thei viau dawn a ni. Eng nge lawmman lam te tiam theih ka nei em?”

Don chuan, “Hei hi tiam ang che, friends ho zingah dinhmun sang tak a chang ang a, ka rinawmna leh hmangaihna a chang bawk ang. Chubakah kumkhuain tlangah khian a cheng thei dawn lo a, van tlang zinga awm a, a chhungte thlazar hnuaia dan chhunga awm a duh hun a lo la thleng ang. Chutiang hunah chuan sicily ramah hian kei lo chu chutiang buaipui sak thei tumah an awm lo, kei lahin chutiang tih chu ka chak sakkhai bawk si. dik takin ka sawi a nih chu.” Don chuan rin loh theih miah loh leh hnial theih miah lohin a sawi a ni.

Hector adonis-an tlang lama a godson hmu tura a kal chuan a inngaihtuah buaiin Turi tan chuan a hlauh thawn pui hle. tlang leh chiang faka sawi a tum ta a. Guilianno chuan an inhmangaih tawnna chu Don Croce nena inzwmna ai pawha pawimawh hmasa a ni tih hrethiam se a duh a ni. A han thlen chuan chhawrdawh-ah hian chair leh dawhkan te lo inhungin Guilianno leh Pisciotta chu an lo awm dun a. Guilianno hnenah chuan, “A falin ka biak che a ngai a ni.” a ti nghal tawng a.

Pisciotta chuan thinrim takin, “Pa tereuhte, Turi hian ka lakah thuruk a nei lo.” a ti a.

Turi chuan a hmuhsitna chu ngaipawimawh duh lovin, dam tak hian,“ Ka thil hrilh tur hi a duh chuan Turi hian a hrilh leh mai ang che, a thu a ni. mahse ka hrilh ve thei lo che, mawh ka phur ngam tlat lo.” a ti a.

Guilianno chuan Pisciotta darah chuan a beng thak thak a, “Aspanu, min kalsan mai ta che, i hriat tur thil a nih chuan, ka hrilh em em ang che.” Aspanu chu a tho vut a, Adonis chu rei tawk tak a en vang vang hnuah a kalsawn ta tawk a.

Adonis chuan a han nghak vang vang a, chutah, “Turi, ka godson i ni a, nausen i nih lai atang tawhin ka hmangaih tawh che a ni. Ka zirtir chein i chhiar tur lehkhabu ka pe thin che a. Outlaw i lo nih pawhin ka tanpui reng thin che. he khawvela damchhan ka neih tlemte zinga pakhat i ni. Chutichungin i unaupa Aspanu-an min hmuhsitna a tihlan pawhin sawiselna emaw khapna emaw i chhak chhuak miah lo a nia.” a ti a.

Guilianno chuan, “Ka nu leh pa tih lohah chuan ka rin ber i ni alawm,” a ti a.

“Aspanu pawh,” lungawi lo takin Adonis chuan a lo ti a, “Rin tlak ni tur chuan thisen chhuah a chak mah mah lo maw?”


Guilianno chuan a mit takah a en a, Adonis chuan a hmela rinawmna lo lang chu a hmu chiang hle, “Ni e, ka inpuang mai ang e, nang ai chuan Aspanu chu ka ring zawk ngei alawm. Mahse naupangte ka nih lai atang tawhin ka hmangaih tawh che a, i lehkhabute hmangin ka rilru i hawng a, ka nu leh pate i pawisa hmangin i pui bawk a. buaina ka tawhin thian tha dik tak i ni. Mahse Friends of friends ho nen ininhnim hnai tlat a ni, tunah pawh chuvang bawka lo kal i niin ka hre tlat mai.”

Adonis chuan a godson thil hriatlawk theihna chu ropui leh mak a ti leh hle a ni. A sawi tur chu a sawi ta a, “Don Croce nen inremsiamna in neih a ngai a ni,” a ti a. “friends of friends ho hi France lal emaw, italy lal emaw Mussolini meuh pawh khan a tichhe pumhlum thei lo. Anmahni nena indo chuan chak zawk nih i beisei thei lovang. Chuvangin insiamremna nei tura ngen tur chein ka lo kal a ni. A tirah Don Croce hmaah i thingthi a ni thei, mahse hun lo la kal zel turah i dinhmun tur tunge sawi thei? ka zahawmna leh i nu hming chhalin ka hrilh che nih chu. Don Croce chuan i finna hi a dah sangin nangmah a hmangaihna a tiak mek a ni. a roluahtu, a fapa ngainat ber i ni dawn a ni. Mahse tun dinhmunah chuan a angchhunga i awm a tul tlat a ni.”

Turi chu a thilsawi chuan a khawih chein a la thutak hle tih a hmu thei, phur deuh zawkin, “turi, i nu han ngaihtuah teh. Tlangah hian kumkhuain i cheng reng thei dawn lo. kum khata ni reilote chhung chauh hmu turin i nunna i thap thin a nia, mahse Don Croce nen chuan ngaihdamna tluantling i nei thei asin.”

Chu tlangval chuan a ngaihtuahna sawrkhawmin rei ngial a han ngawi a, chutah thutak zet hian, “A hmasa berin i rilru ngilna avang hian lawmthu ka hrilh a che,” a han ti phawt a, chutah, “Thil awhawm tak zawng a ni a, mahse retheite zalenna atan ka lo inhlan tawh a, friends ho chuan chu tumna chu an neih ka ring lo. Mihausa leh Rome-a politician ho rawngbawlsaktu an ni a, chungte lah chu ka hmelmate an ni thung si. Lo nghakin i en ang hmiang. Prince Ollorto chu rubovin an kezungte chu ka rahhrualsak ngei alawm, mahse Guido Quintana chu a dam ka la phal sak a, ka mihmuhsit tak a ni asin. Don Croce ka zah avangin ka la dawh hram hram zawk a ni, chu chu hrilh ang che. Intluk tlang renga thawk dun kan nih hun, kan duhna a inkalh loh hun hi ka nghakhlel hle tih hi lo hrilh la, hrilh nawn fo ang che. Chief dangte chungchangah chuan, an duh ang chu ti rawhse, ka hlau hlawm love.”

Rilru rit tak chungin Adonis chuan chu chhanna chu Don Croce hnenah chuan a thlen a, ani chuan chubak beisei lo hrim hrim niawm takin a lu lianpui chu a bu nghut nghut a.


[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 8th, 2018, 9:36 pm

Chapter 13B

Chu mi hnu thlakhat a liam chuan Guilianno thah tumna vawithum lai a awm ta a ni. Guido Quintana chu che hmasa ber tura tih a ni a. uluk takin tih dan tur a riruan vek a. tlang atanga a lo chhuah thlakin Guilianno chuan kawng hman rim deuh mai hi a nei a. chu kawng sir velah chuan phul hmun hnim to duah hluahna hmun a awm a, chutah chuan Quintana chuan beram rual thahnem tak a tlat tir a. Heng beramte hi beram vengtu pathum fel hmel tak takin an veng a; chu mite Corleone khua a mi, Quintana than hluite ho an ni zawk a.

Kar khat dawn lai chu chung beram vengtute chuan Guilianno tlang atanga a lo chhuk an hmuh chuan zah taka chibai lo bukin, hmanlai tih danin a kut fawh an dil thin. guilianno chuan tha takin a be ve mai thin; beram vengtute chu a changa a pawla tel thin an ni a, a pawla tel thar tur mi a melh pah fo thin reng a ni. Bodyguard nen emaw Pisciotta nen emaw a zin fo thin avangin hlauhawm awm turah a ngai lem lo, Pisciotta chauh pawh mi pahnih hen lai tur a ni si a. Beram vengtute chuan ralthuam an keng ngai lova, ralthuam thuhrukna tur awm lek lovin thawmhnaw an te te an inbel bawk thin.

Mahse beram vengtute chuan lupara leh amu dahna kawnghren chu beram rual zinga beram thenkhat dulah an hreng bet reng thin a. Guilianno amah chauha a lo kal emaw vengtu a neih tlem deuh lai an nghak a ni chauh zawk. Mahse Pisciotta chuan chung beram vengtute an nelawm lutuk vang te, beram rual tam tak lo lan thut avangte chuan rnghlelin, a mirawih enthlatute hmangin thuchiang a hre ta vat a. chung beram vengtute chu Quintana mi rawih tualthah hmang an ni tih a hre chhuak ta a ni.

Pisciotta chuan hun a khawhral tam lo. A ma pawl bik ami mi sawm hruaiin chung beram vengtute chu an hual a. Uluk takin tu beram nge an ven tih te, engtia rei ne an ven tawh, an nu leh pate hming, an pianna khua leh an nupui fanaute hming nen lam a zawt chhuak a, anni chuan inrintawk hmel takin an chhang a, mahse Pisciotta chuan dawt an sawi tih fiahna a hmu ta a ni.

Ran rual zingah chuan an ralthuam thuhruk chu an hmu chhuak ta a. Pisciotta chuan chung beram vengtu lemchang hi chu tihhlum nghal mai a duh a. Mahse Guilianno chuan a phal lo, pawi engmah an khawih hman lo va, thil tisual tu zawk chu Quintana chu a ni.

Tichuan chun misual ho chu Montelepre khawchhungah beram rualte chu khalh luh tir an niin kawtthlerah chuan an zai tir a, “Lo kal ula, Turi Guilianno thil thlawnpek hi rawn la rawh u, In tin tan beram no, Turi Guilianno malsawmna chu.” tiin. Beram vengtute chuan a duh apiangte tan chuan beram chu talhin a vun te an lih sak ta zel a ni.

“Hre reng rawh u,” Pisciotta chuan a ti a, “Palermo-a dawrnghaktu chhe lo ber ang maa lawm hle turin ka duh che u a ni, chan nei ve ang maiin, tin, kan lawmna thu hi Guido Quintana hnenah min han thlen sak ang che u.”

Don Siano chuan rauhmanna a siam lawk lem lo. Guilianno do zawnga che tura Passatempo leh Terranova te tham turin palai pahnih a tir a. Mahse Don siano chuan Passatempo te ang meuh pawh a laka rinawm thei turin Guilianno-an a hmin thei tih a hrethiam phak lo a ni. Tun tumah awh Guilianno chuan an thih a phal lo leh a. Mahse Passatempo chuan Hruihrual vuakna awm chuk nen palaite chu a thawn kir a ni.

A tum thumna chu Guido Quintanna atang bawkin a ni a, chutah zet zawng Guilianno pawh a insum thei ta bik lo.

Montelepre-ah chuan Puithiam thar hi a lo thleng a. Puithiam vak vel niin a taksaah chuan krista khenbeh a niha a hliam chhinchhiahna apu tam hle. Chawlhni tuk khat chu Biakin pakhatah mass neiin a hliam thianghlimte chu a entir hlawm a.

A hming chu father Dodana niin pa inkhaithli thlerh thlawrh, zuan zang tak a ni a. thlakhat chhung lekin montelepre-ah chuan a lar hman hle, hna rum thawh pawh pawisa miah lo a ni a; loneitute chu an vaimim te a seng pui a, nu upa lam damlote lah sual puanna nei turin in lamah te a pan thin bawk. Chawlhni vawikhat chu biakin kawtah mass a neih zawhin a lo ding a, a fapa tana eng nge tih theih a neih tih a lo zawh chuan Maria Lombardo chuan mak a ti lem lo.

“A thlarau thi thei lo chu i ngaihtuah pui tih a chiang reng mai,” Father chuan a ti a. “Nangmah kana a lo kal leh hunah ka hnenah rawn tir la sual puanna ka lo neih pui ang e.”

Maria Lombardo chu a sakhawmi viau nachungin puithiamho hi a ngaina lem lo, mahse he puithiam hi chuan a lem tlat. Turi chuan sual puanna chu a nei lovang tih a hria, mahse puithiam hnenah chuan a thil ngen chu a fapa hrilh a nih tur thu a sawi a. Father Dodana chuan, “amah pui tur chuan tlangah pawh ka kal mai ang, ka tih tur chu hremhmun a liam mai tur thlarau bo chhanchhuah a ni. Mihringin a tih tur chu a ti tur a ni si a.” a ti a.

Kar khat a liam hnu chuan Guilianno chuan anu chu a tlawh ta ngei a. Ani chuan puithiam chu hmua sualpuanna nei tur chuan a lo ngen chiam a, Father chuan sakrament te pawh a lo chan tir maithei a, sual puanna a neih chuan a thinlung a nem deuh a beisei a ni.

A nu rin loh takin Turi chuan a ngaihven hle. Puithiam hmuh chu a remti mai ni lovin biakin atanga an ina hruai turin Pisciotta chu a tir ta bawk a. Father Dodana a lo lan chuan Guilianno rinhlelh ang chiahin a chevel chu tharum thawh thang ang mai a ni a; hrisel leh chak tak a nih bakah Guilianno chu a khawngaih uchuak mah mah bawk a ni.

Father Dodana chuan, “Ka fapa, a falin i khum pindan lamah i sual puanna ka ngaihthlaksak thei ang che, tin Lalpa zanriah ka theh sak bawk ang che. ka thilte chu hetah hian a awm vek a ni.” Thingremte a ken chu a kuk karh karh a. “Tichuan i thlarau chu i nu thlarau ang maia thianghlim a lo ni tawh ang a, sual thiltih avanga i lo thi palh hlauh a nih pawhin, vanramah i kal tlang nghal thei dawn a ni.”

Maria Lombardo chuan,“ in tan leh Father thianghlim tan hian Coffee leh ei tur ka va buatsaih ang e,” a ti a, choka lam a pan ta nghal a.

“Hetah hian sual puanna chu ka nei thei alawm,” Turi chuan nui chungin a ti a.

Father Dodana chuan Aspanu Pisciotta chu a han en a, “I thianpa hian room hi a chhuahsan a ngai a ni.”

Turi chu a nui hawk a, “ka sualna te chu mi zawng zawng hriat a ni alawm. Newspaper-ah a chhuah chuaih chuaih hi. Engpawh ni se, ka thlarau chu thil pakhat tih lovah chuan a thianghlim asin, rinhlelhna ka nei hma riau tih ka inpuang e. I zak zeh thingremte chhungah khan eng nge awm tih en ka chak khawp mai.”

“Sakrament chhang a ni e,” father Dodana chuan a ti a, “Ka entir ang che.” Thingremte chu hawn a tum lai takin Pisciotta chuan a tukkhumah pistol a lo chuktuah nghal a, Guilianno chuan Thingrem te chu a laksak ta a. An mit leh mitah an han inen dun vang vang a, chutah Guilianno chuan thingrem chu a hawng ta a. serh leh sanga hman chi puan nem inthlep chungah hian Automatic Pistol hi a lo awm a.

Pisciotta chuan Guilianno hmel lo danglam sawt, a mitmeng thinurna avanga rawn thim ta raih chu a hmu a.

Guilianno chuan thingrem chu a chhin a, Puithiam chu a en a, “Tawngtai dun tura biakina kan kal a ngaiin ka hria,” a ti a. “I tan tawngtaina kan hlan ang a, Quintana tan kan hlan bawk ang. Lalpa hnenah Quintana thinlung atanga sual thiltih la kiang tur leh nangma thinlung atanga duhamna la bo turin in kan tawngtai ang. engzat chiah nge pek che a tiam?”

Father Dodana chu a lungngai lem lo, a hmaa tualthah tum pa kha harsa lo takin an chhuah tir tlat. a dar a chhin ak a, nui chungin, “Sawrkarin i luman an tiam bakah cheng maktaduaih nga.”

“Man man tak a nih chu,” Guilianno chuan a ti a, “i vanneihna atana i beihna hi ka dem lo che, mahse ka nu i bum a, chu erawh ka ngaidam thei lo. Puithiam tak tak i ni em?”

“Keimah hi maw?” father chuan tham lo zetin a ti a, “A teuh lo mai, mahse tumahin min rinhlelh ka ring lo.”

An pathum chuan kawtthlerah chuan an chhukthla ta a, Guilianno chuan thingrem te chu a keng a, Pisciotta chuan hnung lamah a zui bawk a. Biakin chhungah chuan an lut a, Guilianno chuan Father chu maichamah chuan a thingthit tir a. Chutah thingrem te atang chuan automatic chu phawrh chhuakin, “Tawngtai nan minute khat i nei e.” a ti a

A tuk zingah chuan Guido Quintana chu Coffee dawra coffee in tumin a tho chhuak a, kawngkhar a hawn chuan zing ni chhuakin a rawn chhun thin chu hlimthla lianpuiin a dang tih a hriat chuan a ngaihna a hre lo hle. Chutah Kraws lian tak mai hi a inchhungah chuan a rawn tlu lut a, a mah chu a delh thlu tep nghe nghe. Chu kraws-ah chuan silaia kah chik nuk Father Dodana chu a inkhengbet a.

Don Croce chuan chung hlawhchhamna te chu a han ngaihtuah a. Quintana pawh chu kam khat a niin, Mayor a nihna anga a tih tur tha taka ti mai turin leh a nih loh chuan Montelepre mipuite hian sorkar an nawr palh mai ang tiin. Guilianno chuan a dawhtheihna a hloh ta tih a chiang hlein Friends ho laka indo a puang maithei bawk. Don Croce chuan Guilianno-an a phuba lak dana a tlin zia chu a hre reng bawk a. Thah tuma beihna vawikhat chiah tih a ni ang a, a hlawhchham thiang lovang. Don Croce chu a tawpah chuan a chet chhuah a ngai ve ta a ni. A duhdan thin leh tum dan ni miah lovin, a assasinte zinga tha ber, Stefano Andolini, Fra Diavalo tia hriat lar chu a tir ta a ni.

Wait for Chapter 14. (Chapter 2 tal tih ka tum viau a, current nizan atanga kan neih loh chu kan nei ve chiah a, type na hun a awm ngang lo a ni e.)
[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 10th, 2018, 8:31 pm

Chapter 14A

Montelepre-a sipai ho kulh chu Carabinieri za aia tam mahin an pun belh ta a. Guilianno-an a chhungte hnena tlai hun a hman thin pawh a khat ta raih mai, carabinieri hovin an rawn hual ru thut ang tih a hlau ru reng thin.

Tlai khat chu a pain America-a an awm lai chanchin a sawi a ngaihthlak lai chuan ngaihdan pakhat a nei ta thut a ni. Salvatore putara chuan a thian hlui leh a mi rin em em, America-a a awm pui thin leh Sicily lama a ruala kir ve te nen wine an in dun a. Kir leh tur khawpa an atna chu an indem tawn a. Chupa chu Alfio Dorio a ni a, Mistiri a ni. Ani chuan Guilianno-a pa chu America-a an awm tan kum, Godfather, Don Corleone hnena an thawh hma si chanchin chu a hrilh nawn a. Tui hnuaia leiverh lian tak siamnaah an inhlawh a ni. New Jersey lam hawiin nge an verh Long Island lam hawiin tih thuah an han inhnial leh rih a. Lui luang lai hnuaia hna thawh rapthlak ziate chu sawi thar lehin, Tui lo chelh dingtu tube te a chhiat palh chuan sazu ang maiin an tla vawn vawn mai dawn tih te an sawi a. chutah chuan a ni Guilianno chuan ngaihdan a chharchhuah tak ni. Heng mi pahnih leh puitu rinawm takte nen hian tlang bulthut leh an in inkar pen za lekah hian leiverh an siam thei ngei ang. A luhna chu lung lian tak hmangin a thuhruk theih ang, In lam pang ami chu thawmhnaw bawm hmangin emaw chokaa Stove-in emaw a thuhruk mai theih ang. Chu chu tih hlawhtlin theih a nih chuan a duh hun hunah inah a haw thei mai dawn a ni.

Putar pahnihte chuan thil theih loh a ni tih an hrilh a. Mahse a nu chu chu ngaihdan avanga rawn phur tharin , a fapa chu a duh hun hunah a lo haw thei ang a, thlasik khawvawh laiin a ma khum ngeiah a mu thei dawn a ni tiin a phur hle. Alfio Dorio chuan a ruk thei ang ber a ngaih dawn avangin mi tlemte chauh hman theih a nih tur thu te, zanah chauh thawh theih a nih dawn avangin chutiang leiverh siam tur chuan hun a duh rei hle ang. Chubakah harsatna la awm dang a la awm cheu, leivung chu hriat chhuah lohvin khawiah nge an paih ang? Helai lei lung hi chu lung hlir a ni mai a, Lung lian tak lo awm ta se engtinge ni ang? hnathawka an chhawr ten lo zep thei lo palh ta se? An duh lohna chhan ber a rei lo berah kumkhat tal a ngai dawn tlat a ni. Hun duh rei tur tih an sawizinna chhan ber chu an thinlung kil khatah Guilianno chu dam rei lo tura an ngaih tlat vang a ni tih Guilianno chuan a hria a. A nu pawh chuan chutiang chiah chuan a lo hre ve a ni.

A nu chuan, “Ka fapain a nunna chhan him thei tur thil a dil che u a, in ti peih lo a nih chuan keiman ka ti mai ang. Kan tum chhin tal thei alawm. Kan tha sen bak eng nge hloh tur kan neih chuan? Thuneitu lam pawhin hmuchhuak pawh ni se eng nge an tih theih chuang ang? kan ram a nia kan duh duh kan ti thei alawm. thlai leh wine dah thatna tur kan siam kan ti mai ang chu. Ngaihtuah teh u, he leiverh hian Turi nunna a la chhan him mai thei asin, thlantui sen ral nan a tha tawk tho lo maw?”

Hector Adonis pawh chu a awm ve a. Leilaihna atana lehkhabu rawn tur leh hmanraw pawimawhte a rawn ken tur thu a sawi a. Thil pawimawh leh an remtih pui tak mai rawn sawi chhuakin, Via Bella-a in pakhat pawh tur leiverh peng an siam ang a, chu chu leiverh kawngka hriat chhuah a nih palh emaw, hrilhrutu an awm palh a tlan chhuahna atan a ni ang. He leiverh peng hi an lai hmasa ang a, a pate thian dun leh Maria lombardo bakin an hre lo ang. laih chhung a rei lutuk dawn lo a ni.

Tu In nge tha ber ang tiin rei ngial an sawiho va. Guilianno-a pa chuan Aspanu Pisciotta te in chu a han rawt a, mahse rang takin Guilianno chuan a lo hnial a. Pisciotta te in chu rinhlelh sa a nih avangin ngun taka enthlak reng a ni a. An chhung an rual a, hretu an tam dawn tlat a ni. Chubakah, Pisciotta leh a chhungte hi an inti tha vak lem lo, apa tak a thih a, a nuin pasal dang a neih kha, Pisciotta hian a ngaidam thei tawh lo a ni.

Hector Adonis chuan a ma in chu a han rawt a, mahse a hlat lutuk bakah Guilianno chuan a Godfather chu hlauhawm taka din tir a duh lo a ni. Leiverh chu hmuh chhuah a nih chuan a in neitu chu man ngei a ni dawn tlat a ni. An chhung dangte leh thian dangte in te pawh ngaihtuah a niin hnawl ani zel a, a tawpah Guilianno-a nu chuan, “Mi pakhat chiah ti thei tur a awm, amah chauha cheng a niin heta tanga in linaa awm a ni. A pasal chu Carabinieri ten an that a, a haw hlawm hle a ni. Ka thian tha ber a niin Turi hi a naina hlebawk a, mipa naupang a nih atanga a puitlin thlengin a hmu ve a ni. Tun thlasik chhung khan tlang lamah pawh eitur a thawn ve a ni lo’mni? Ka thian dik taka ni a, amah chu ka ring pumpuhlum a ni.”

a han chawl hlek a, chu tah, “La Venera.” Ni e, an sawi ho atang reng khan chu hming chu a sawi chhuah an lo nghak reng a ni. a tir atang khan La Venera chu an rilrua awm hmasa ber a ni vek reng a. Sicilian mipa an ni a, chutiang rawtna chu an sawi ve thei tlat si lo a ni. La Venera chuan lo remtiin lo thang chhuak palh ta se, a hming a chhe kumkhua tawh dawn a ni. Hmeithai naupan te a niin a mimal nun leh amah chu mipa lanaupang tan a inpe dawn a ni a. sicily-ah hian tumahin nupuiah an neiduh lo ang a, an zah loh phah hial thei bawk. Turi aiin kum 15 vel zetin a upa tih chu a dik ngei a, a hmeltha em em lo chungin, mi hipna ngah tak a ni a, a mitmengah pawh ‘nung’ a la awm tlat. Hmeichhia leh mipa chu leiverh avangin an awm fal dawn a ni a. an inhmangaih mai lovang tih a sawi theih tlat loh, sicilian chuan mipa leh hmeichhia a fala an awmin, eng anga kum lama inthlau pawh nise, insum theihna a bo thin niin an ngai tlat a ni.

Chuvangin a ina leiverh avang chuan Guilianno nunna a chhanhim theih rualin hmingchhiatna nasa tak a hlawh ve thei tlat a ni. Guilianno tih loh midang zawng chu Turi-a sex lama a la fihlim avang chuan an ngah a tha tawh lova. Chutiang chu sicilian mipaah an vang hle bawk si, ani lah chuan sex lam a ngaithei lo lek lek niin a lang si. A mite tam zawk chu Palermo-a nawhchizuar kawm turin an kal thin a. Aspanu lah chu inngaihzawnna hmingchhiatthlak zetah a inhambuai bawk. A bandit chief pahnih Terranova leh passatempo lah chuan hmeithai rethei tak an ngaizawng a, thilpek an pe awl lo bawk. Passatempo phei chu inngaihzawnna lam ai maha pawngsual lam rawngkaia beih ngaina zawk a ni a, Guilianno-a thupek avangin a insum ta mai pawh a. Guilianno chuan a miten mi an pawngsual chuan tihhlum ngei tur a ti a ni.

Heng thil zawng zawng avang hian Guilianno-a nuin a thiannu hming a rawn sawi chhuah chu an nghak ru tham a ni. a rawn sawi chhuah chuan mak an ti leh lawi si a, Maria Lombardo chu sakhaw mi tak a ni a, khawchhung nulate anmahni hruaitu hmeichhe puitling tel lova kawtthler vela an tam viau chuan nawhchizuar tia koh hreh hlek lo a ni. mahse Maria Lombardoin a hriat ang an hre ve tlat lo. Chu chu la venera chu a fa neihnaah enkawlna mumal a dawn loh avangin nau a paithei tawh lo tih hi. A fapa eng ti kawng zawng pawha a him thei ang bera enkawl turin a thiannu chu a thlang fel tawh tih an hre hek lo. A fapa chu outlaw luman nei a ni a, hmeichhe tan chuan phatsan awl tak tur a ni. a la naupangin a hrisel tha a, hmeichhia a mamawh hle bawk; Hmeichhe upa lam naupai thei lo leh, inneih lam hawi lo tur hmeichhia tluka remchang tunge awm chuang ang? Chubakah bandit nupui nih chu a duh tawh lo ang, a tuar tam tawk tawh a, a mithmuh ngeiah a pasal chu thah a nih kha. Ruahmanna tha tak a ni, La Venera hmingthatna chauhin a tuar dawn a, amah (La Venera) chuan thutlukna a siam a ngai a ni. A pawm a nih chuan chung zawng zawng chu ama mawhphurhna a ni tawh ang.

Chumi hnu ni reilotea Guilianno-a nuin La Venera hnena ngennna a siam chuan La venera chuan chapopui zawk tak leh lawm takin a lo phal a, mak a ti zawk hle. La venera chu a fapa laka chak lo riau nia a hriat chu nemnghetin a inhria. Lawm avanga mittui tla chunga La venera kut a vawt sak lai chuan, ni rawh se, tiin a ngaihtuah a. Leiverh peng chu thla li hnuah zawh fel a ni a, leiverh pui ber erawh chuan kumkhat lai a la duh ang. A dan ngai tein Guilianno chua khawchhunga lut ruin an in a pan a, chaw lum tha tak a ei hnuah khum lum nuam takah a mu thin. Mahse nipui a thawt dawn tepah pawh leiverh chu hman a ngai vak lem lo. Carabinieri veivakte chu Via Bella lamah chuan lo chhukin an inthuam rip hle, Guilianno-a guard te chu a bulhnai in velah chuan biruin indo mai thei turin an inring a, mahse carabinieri ho chu an kal tlang ta mai a. Mahse an rawn let leh lamin Guilianno-a te in chu an rawn run mai ang tih hlauhthawn thuah a nu leh pate rooma kawngkhar ruk atangin leiverhah chuan a lut ta a ni.

Chu leiverh peng chu thingphel a chunga vaivut nawi dah hmanga thuhruk a ni a, chutiang chuan leiverh pui bera hnathawktu ten an hmu lo thei dawn a ni. Guilianno chuan vaivut te hu tifai hmasain thingphel chu a phawk a, leiverhah chuan minute 15 lai a hman hnuah La Venera in zawn chu a thleng a. chuta kawngkhar ruk, chokaa awm chu stove lian tak delh tir a ni a. Guilianno chuan a hmaa an lo duan lawk signal hmangin a han kik karh karh a. a nghak vang vang a, a kik leh a. silaimu tawn a hlau lo, mahse chulai thim chu a tih deuh tlat a ni. A hnu deuhah a chungah chuan thawm a lo awm a, kawnkhar ruk chu a inhawng a, mahse stove rit tak awm ve avang chuan a inhawng vek lovin, Guilianno leng tawk chauhin a inhawng a, tleng tih tihin a chokaah chuan a chuang chhuak ta a ni.

Zanlai a ni tawh chungin La venera chuan a hmeithai kawr dum chu a la inbel reng tho va, a pasal thihna pawh kum thum lai a ni tawh a. Kelawngin a lo awm a. mawza pawh a bun lo, Guilianno-an chhuat a luh chho chiah chuan a ke chu hmu nghalin, a hmai vun buang deuh thak leh a sam dum tha tak lakah chuan a ke chu a var thain a no hle tih a hmu thei a. a vawikhatna atan Guilianno chuan a hmai chu khawchhunga nu upa lam tam tak angin a hlai ve vak lem lo tih a hri a, kil thum nei lek lek a ni zawk a. a mit chu paw thim raih a ni a. kawngkhar ruka theh mai inpeih ni awm takin thlengin lungalhthei ling vam ham hi a lo keng a, Guilianno a hmuh chuan thaw ta huai niawm takin Stoveah chuan a dah kir leh ta a. Hlau hmel a pu deuh bawk.

Guilianno chuan, “An veivak satliah mai mawle, Barrack lama an kir leh hunah ka kal leh mai an. Lungngai suh, kawtthlerah ka thiante an awm alawm,” tiin a thlamuan a.

An nghak ta a. La Venera chuan coffee te siam sakin an titi dun ta a. La Venera chuan a pasal ang khan hlauthawng hmel a pu lem lo tih a hria a, tukverh atangin pawn lam a bih ve sek lo va, thawm ri ring deuh a awmin a phawklek ve hek lo. hahdam taka awm hmel a pu a. a hriat loh chu Guilianno chuan a canchin te a lo hriat tawh avangin chutianga awm tur chuan a inzir nasa hle tih hi. chutianga inringtawk taka a awm chuan Venera pawh a ti thlamuang a, khawchhung thil thleng chanchin vel sawiin an ti ti ta a ni.

Kar hnih a liam leh chuan, Guilianno chu a hnenah chuan a kal leh ta a ni. A chhungte tlawha a kal chuan a nu leh pa chu an lo lawm hle a. a nu chuan a chawhmeh duhzawng tak siam sakin an chhum chhung chuan tuiluma inbualna te a siamsak a. Chutih lai chuan a Spy pakhat chu lo kalin carabinieri ten Montelepre khua an hual mek thu leh Maresciallo chu Bellampo Barrack atangin Guilianno-a te in dap tuma sipai pawl nen an rawn chhuah mek thu a rawn thlen a.
[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 10th, 2018, 11:03 pm

Chapter 14B

Guilianno chu leiverah chuan a lut ta nghal a, ruah tui lut avangin a lo chiau pur a, chirh vel avangin kal pawh a harsat phah hle, amah chu a berh luai mai bawk a. La Venera-i choka a chuan chhuah chuan a thawmhnaw chu a berh vekin a hmai pawh a dum nuau a ni.

La Venera-in a lo hmuh chuan a lo nuih hawk hawk a, Guilianno chuan chu chu a nui a hmuh vawikhatna a ni hial. “Moor ho ang mai alawm i nih,” a lo ti a. Guilianno-a rilru chu naupang rilru natin a han na deuh zawk a. Moor ho chu sicily-a ennawm chhuahnaah chuan misuala chantir an ni fo va, a nunna hlauhthawnawm khawpa pasaltha ni lovin, misual ang maiin a lo hmu em ni ang? La Venera-in a rilru engtin emaw a ti na tih a hriat chuan, “I inbualna tur ka han siam ang e.” a ti a, “Ka pasal thawmhnaw hlui kha tlem te chu a la awm a, i thawmhnaw ka tihfai chhungin i lo ha dawn nia.”

Chutiang hun hlauhawma inbual tur chuan a hlauthawng ang a, a lo hnial a ring deuh a. A pasal khan a rawn tlawh tum pawhin hlauthawng reng rengin a awm a, thawmhnaw a phelh ngai lo a, a ban phak lovah ralthuam a dah ngai hek lo. Mahse Gulianno chu lo nuiin a jacket chu a phelh a, a silaite pawh chu thingrem chungah chuan a dah mai a.

Tui tih lum chhung chu hun a duh deuh a. Coffee pein an nghah pah chuan a inleng pa chu a han en a, Angel ang maia hmeltha a nih hi mawle, tiin a ngaihtuah a. Mahse chu chuan a tibuai lutuk lem lo, a pasal kha hmeltha tak a niin thah a ni tho a. a mah tihlumtu silaimu kha chuan a ti hmelchhe tawk hle, tiin a ngaihtuah a.; sicily-ah chuan an hmel avanga mi hmangaih chu a finthlak vak lo. A thih khan a tap nasa viau a, mahse chhungrilah chuan hahdam huaiin a inhre zawk a ni. Bandit a nih atang khan a tan chuan athi daih tawh a ni. Nitinin tlang lamah emaw khaw hla deuh takah emaw a thih hun hi a lo chang reng thin. Mahse a mithmuh ngeiah kahhlum a ni ta si. Chuta tang chuan hmingchhiatna zahthlak tak chu a tlanchhiat san thei ta lo a ni. Bandit a nih vang ni lovin, a thih dan ropui lo tak leh huaisen taka thi a nih loh avang chuan. Carabinieri hmaah inpein that lo turin an khawngaihna a ngen a, mahse a nupui hmuh lai ngeiin an tihlum a nih kha. A fanuin a hmu ve lo chu a lawmawm hle, Pathian zahngaihna a ni.

Turi Guilianno chuan itna mit mengin a en tih chu a han hmu a. A pasala hote khan chutiang chuan an en fo tih a hria. Mahse Guilianno chuan thlem thluk a tum hauh lo ang tih a hria; a nu a zahna avangte leh leiverh siam phal tura a inpekna a zah sakna avang te chuan.

Guilianno chu mahni a a inbual theih nan living room lamah chuan a kalsan ta a. A kal hnu chuan Guilianno chu inphelhin inbualna hmunah chuan a lut a. A bul lawka hmeichhia awm reng chunga chutia saruaka han awm chu a zauthau hle. Uluk taka a inbual zawh chuan La venera pasal thawmhnaw chu a inbel leh ta a. Kekawr chu a chhing deuh a, kawr pawh chu a awmah a tawt deuh avangin a chung lama kilhna pahnihna chu kilh lohin a dah a ngai hial thuk bula towel lo awm chu pawnchhia aia u awrh hi a ni a. a inhruk pawh chuan a la huh chup tho a ni. Venera retheih zia chu a hre chhuak phut a, a nu kaltlanga pawisa thawn a tum ta ran a.

A inhak zawh chuan Guilianno chuan La Venera chu a ko a, a ni chu choka lamah chuan a lo phei a, “I lu i la su hleinem, rannungin bu an chhep nual ang chu!” pitarin an tu te an tih dan ang maiin a luah chuan vuanin tui dehna lamah chuan a hruai a.

Guilianno chuan a kut lum ham ham chu a hre thei a. Chutia a lu a suk sak paha taksa leh a mal velin a rawn nawk vel chuan Guilianno chuan a hnute leh dul vel chul sak heuh heuh a chak kher mai.

A suk zawh chuan Venera chuan choka thutthleng pakhatah chuan thut tirin a lu chu a hruk hul sak sawk sawk a. a sam chu a seiin a kawrnghawng a khuh phak hial a ni.

“Movies-a english pa tawrawt ang mai alawm i nih le, i lu meh a ngai a nih hi. Mahse chokaah chuan ni lovin, ei tur a ti bawlhhlawh hlauh ang e, room dangah lo kal rawh.”

La Venera chuan room te deuh zawk pakhatah hian a hruai lut a, dawhkan lian lo tak hi a laiah chuan a lo awm a, chutah chuan thlalak hrang hrang, a pasal thi tawh leh a fanu thi tawh thalak te, a then chu La Venera leh a chhungte thlak te a ni a. A nulat lai thlalakah, thawmhnaw nalh zawk leh hlim hlim hun laia a hmelthat zia a hmuh chuan Guilianno chuan mak a ti zawk hle. A single thlalak pawh a awm a, chu chuan a rilru a dek deuh zawk a ni. chutianga hmeltha nei tur chuan a pasal chuan eng anga thil sual nasa tak ti ang maw, tiin a ngaihtuah zawk a.

“Khang thlalak te kha en suh,” Venara chuan lungngaih hmel taka nui chungin a ti a, “Khawvel hian min tihlim dawn a ni tih ka rin hun laia mite an nih kha.” He rooma a hruai luh nachhan pakhat chu heng thlalakte hi hmu se a tih vang a ni tih a hre ru reng thova.
Chutia a lu met tura a inbuatsaih lai chuan pawn lama Jeep tlan ri chu an hria a, “Chokaa i silaite kha ka va lak dawn che em ni? Nuam i tih phah deuh ang em?”

Guilianno chuan dam thlapin a en a, tih phawk lek a duh lo a ni. Chu Jeep-ah chuan Guilianno-a te in run tum carabinieri an khat vek a ni tih an hre ve ve a. Mahse Guilianno chuan thil pahnih a hre tlat: carabinieri te heta an lo kala kawngkhar thir kham pela luh an tum chuan Pisciotta leh a mite chuan an lo that vek ang tih leh choka an chhuahsan hma khan kawngkhar ruk chungah khan stove kha a dah a, tumahin an hawng thei lovang tih hi.

Dam taka a kuta vuan chungin, “Ni lo ve, Kha bakcheh khan ka hrawka zai i tum a nih ngawt loh chuan ka silaite chu ka mamawh hran lo ve,” an nui dun hawk hawk a.

A lu chu a met tan ta a, fimkhur leh tlem te te a chep thlain a cheh thlak chu thlengah chuan a dah zel a. Guilianno chuan a cheh rik ngaithla pah chuan banga La Venera pasal thalalak intar chu a en a, suamhmn ropui tak Candeleria chu. Mahse Sicily ram bung tereuhte chauha ropui a ni, tiin a ngaihtuah a. A thalai rilru chapona chuan chu pa chu a el ru nghal der mai a ni.

Rutillo Candeleria chu pa hmeltha tak a ni a. Carabinieri ten an kah hlum khan kum 35 chauh a ni. Khawvel do zawnga kut thawhtu leh tharum hmanga an thil tum tih hlawhtlin tum tu dang te ang bawkin, Mahnia dan insiam chawp a chu mi hmanga society-a rorel tum dang te angin, a tawpah chuan a tualthi ve ta a ni.

Thlengah chuan sam tan thlak sa chu a vum ve thar tawh a. Guilianno chuan La venera malin a hnungzang a rawn sik chu a hre thei a, a taksa lumna chu a kawr hak chhanah pawh chuan a hre vang vang thei. A chal sam a tan dawn a hma lama a rawn din chuan hlat deuh a tum viau nangin a kun hniam a ngai tlat a, a awm bawr pawng lah chuan a hmui a rawn si tep thin. A taksa rmtui tak chuan Guilianno biang chu a tisa ham ham a. Sam cheh thlak a thlenga dah tura La Venera-in a va ban chuan a malpui chu Guilianno banah tak a innghat a, a thawmhnaw hak chhah tak chhanah pawh a mam that zia a hre thei. a taksa chu a khauh nghal tang a. A ni chuan a la rawn nek na deuh deuh zui nen, a pawnfen hlim chho a a mal zut sak lo tura insum hram hram chungin, “Samsona leh Delili ang mai kha kan ni ang em?” a ti fiamthu zauh a.

Ani chu a tawlhhla thut a. Guilianno rin loh takin a mitah chuan mittu a tling pam a. Inngaihtuah hman miah lovin Guilianno chuan a kutin a ban a, a lamah chuan a pawt hnai a, ani chuan bakcheh chu thlengah chuan a dah ta a.

A lusun thawmhnaw chhungah chuan Guilianno chuan zen lutin a mal sa ham ham chu a zut sak a, a ni chu lo kun hnaiin a hmuiah chuan ei zawh vek tum ni awm hrimin a rawn fawp a. ramsa koham tak ang mai an ni, pakhat chu kum thum chhung zet hmeithai tawh a ni a, pakhat ve thung chu tleirawl hrisel tha tak hmeichhe hmangaihna la tem ngai lo a ni thung a. (Sipai chhuti khat leh KS jail tang fiamthute pawh min ti hrechhuak e a :lol: )

Guilianno chuan amah leh a khawvel chu a theihnghilh a ni ber e. La Venera taksa chu a duhawm takzet a, a pangti lum tak chuan a ruh thlengin a fan chhuak vek a ni. a hnute lah chu a suangtuah phak bakin a nemin khawih a nuam a. A hmeithai thuam chuan a lo thup bovin fing takin a lo veng reng mai chauh a ni. An siamchawp thuam hlipin daltu reng awm lovin chhuat laiah chuan hmangaihna an chen dun ta a. La venera chu, “Turi, Turi,” tiin a phun sep sep a, a bak engmah a sawi lo. La Vera rimtuina leh a taksa lum ham hamah chuan a intulut vek a ni ber e. An zawh hnu chuan, la venera chuan bedroom lamah a hruai a, hmangaihna an chen dun leh a.

Zingah chuan hma lam kawngkhar atangin Guilianno chu a chhuak a. Fimkhur lo takin, mahse a silaite a jacket chhunga thukru vekin a chhuak a. A nu hnena inmangtha tura a kal hman loh tur thu leh a him a ni tih hriattira lo hrilh hre turin a chah a. Chutia langsar taka a kal chu a hlauhthawnpui hle. Khawchhungah chuan Guilianno-an sipai tlemte a dah tih leh a chhuah hma hret khan kawngkhar hawngin Pisciotta hnenah warning a va pe lawk a, carabnieri lo kal apiang lo dahtha hmak hmak turin thu a va pe tih a hre miau lo a ni.

In mangtha nan zak deuh takin a fawp a, “Eng tikah ne min rawn hmu leh ang,” tiin a phun sep a.

“Ka nu tlawh tura ka lo kal leh hunah,” Guilianno chuan a ti a, “tlangah chuan zan tin ka suangtuah thin ang che.”

Chu thu chuan a tihlim takmeuh a ni.

Chhun lai takah Guilianno-a nu hmu tur chuan a kal a. Maria Lombardo chuan a hmel a lo hmuh phat atangin thil thleng chu a lo hre thei nghal a ni. La Venera chu a kum aia kum sawm laia naupang hmel a pu a. A mitmeng chu a nung sar a, a biang chu a tai tek bawk a, kum li tling thelh hnua a vawikhat nan thawmhnaw dum ni lo a inbel ve ta a ni. Maria Lombardo chu a rinawmna avang te, a huaisenna avangte chuan a thiannu chungah a lawm hle, A ruahmanna zawng zawng a hlawhtlin avang chuan a lungawi hle bawk.
[*]Loma_Hmar[*]

Link:
BBcode:
HTML:
Hide post links
Show post links

Loma hmar
Posts: 123
Joined: March 20th, 2018, 11:51 pm

Unread post by Loma hmar » May 12th, 2018, 5:31 pm

Chapter 15

Spaniard hoin bawng an talh thin ang maia phur leh thathoa mihring inthah hreh lohna Sicily ramah meuh pawh, Corleone khaw mipuite atna leh tualthah an hreh lohna chu rapthlak lawt lak leh mite tihkhai a ni. Olive kung khat lek inchuh avang pawhin chhungkua a mang thak te, Tui inchuh avanga thenawm te that duh mai leh mi nu emaw fanu emaw an ngaihmelh avang maia nunna chan te hmuh leh hriat tur a awm fo thin. Fiends of friends meuh pawh Corleone khaw ho lakah chuan engmah an ni lo, Don Croce an remna a rawn thlen hma kha chuan Corleone khaw ho lakah hian an mite tam tak an hloh nghe nghe.

Chutiang khua atang chuan Stefano Andolini chuan hming lem, Fra Diavalo tih chu a hlawh chhuak a ni. Chumi awmzia chu Unaupa Ramhuaia tihna a ni.

Don Croce chuan Stefano Andolini chu corleone atang chuan a ko ta a, tih dan tur hrilhin, Guilianno-a pawl a zawm ang a, an rinna a hlawh chhuak phawt ang. Thil tih tur dang Don croce hnen atanga a dawn hma chuan chutah chuan a awm rih ang. A awm chhung chuan Guilianno-a chak dan dik tak te, Passatempo leh Terranovate a laka an rinawm dan chin te a rawn hrilh ang. Pisciotta rinawmna chu sawi ngai lova chiang sa a niin eng nge a chak lohna lai chauh hriat a tul thung ang. Hun remchang a awm veleh Andolini chuan Guilianno chu a that dawn a ni.

Andolini chuan Guilianno ropuia chu a hlau hran lem lo. Pawisa kheltuin a thil tih dan ring tawka hloh theia a inngai lo ang hian, tu mahin an khum theih a in ring bik lo a ni.

A ruala kal turin Picciotti pahnih a thlang a, Picciotti chu tualthah dan zir mek, Mafia-a la intulut chiah lo, chutiang tura inbuatsaih mek sawina a ni a. Zin ip leh Lupara kengin guilianno-a lal ram tlang lam chu an pan a, Pisciotta kaihhruai patrol vak vel chuan rang takin an lo hmu nghal a.

Pisciotta chuan Andolini-an an chanchin a sawi chu ngeng ngalhin a lo ngaithla a. Corleone-a vantlang chawkbuaitu pakhat a thah avangin Carabinieri leh Security ten an zawng niin andolini chuan a sawi a, chu chu thil dik tak a ni a. Mahse Andolini-an a hrilh tel loh chu Carabinieri leh Police te chuan iahna engmah an nei lo va, thu zawhfiah turin an zawng mai chauh a ni tih hi. Chu lah chu Don Croce-a hmalakna avangin a hming mai chauh tur a ni zui. Andolini chuan a bula kal ve picciotti te pawh chu tualthahnaa an puih avanga zawn mek an nih thu a hrilh bawk a. chu pawh chu thudik a ni a, mahse chung thu a sawi lai chuan Andolini chuan nuam lo tih na tak a nei lian hle. Pisciotta chuan a hmelhriat hrep tawhin an chanchin a hriat hnu an hrilh ang mai hmelpuin a lo ngaithla a ni.

Guilianno chuan tlangah chuan Guilianno-a pawl zawm an inbeisei vanga lo kal an nih thu a hrilh a. Chutah a card huai ber chu a phawrh ta a, Guilianno-a pain a pawmpuina hming ziak awm thlap ngei chu. Amah, Stefano Andolini chu America-a Don Vito Corleone-a cousin a ni tih a sawi bawk a. Pisciotta chu a lo bu nghat a. Andolini chuan sawi zawm lehin, Don Vito Corleone chu Corleone khuaah Andolini hming puin a lo piang a, a pa chu thah a niin amah pawh naupang mai a ni chungin thah tuma veh a ni. America-ah tlan chhiain chutah chuan Godfather ropui tak a lo ni ta a ni. A pa phuba la tura Sicily-a a lo let leh chuan Stefano chu a picciotti te zinga pakhat a ni nghe nghe. Chumi hnua a lawmman lam turin America-ah Don chu a zu tlawh a. chutah chuan Guilianno-a pa, Long Island-a Don Corleone-a kulh sakna tura Brick siam hna thawk mek nen chuan an inhmu ta a ni. Thian tha tak an ni chho va, tlang lama Andolini a lo chho hma pawh hian Salvatore Guilianno putara malsawmna dawng turin Montelepre-ah a kal kual nghe nghe a ni.

Chung thu a ngaihthlak lai chuan Pisciotta chuan inngaihtuah muk tak hmel a pu a. he pa hi a ring hlawl lo, a sam sen thur leh a hmel tualthah hmang hmelpu tak te chu. Picciotta pahnihte lan dan pawh chu a ngaina tehchiam lo.

Pisciotta chuan, “Guilianno hnenah ka hruai angche u, mahse in lupara te kha in ah dan ngai reng khan ak ang che u, phalna in hmu a nih chauh loh chuan la thla hauh suh ang che u.” a ti a.

Andolini chu a nui then sung a, nelawm thei ang berin, “Ka hria che alawm Aspanu, ka ringtawk che alawm. Ka Lupara hi la la, chutiang bawkin i mite hian ka thiante ta hi la bawk se, Guilianno kan biak hnuah chuan min pe let leh em em ang.”

“In ralthuam keng tura ramsa chhawr kan ni lo ve, nangmahniin keng rawh u.” Guilianno awmna hmun tlang chung zawl lamah chuan a hruai ta hlawm a.

Tlang chung zawlah chuan mi sawmnga aia tam mah hi an silai tifai leh hmanruate siamthain an lo awm laih laih a. Guilianno chu dawhkana lo thuin a entlangna chuan a lo thlir kual mek a.

Pisciotta chuan Guilianno chu a va be hmasa a, thil awm dan zawng zawng chu a hrilh hnuah, “Turi, Ka hmuh dan chuan ‘moldy’ niin ka hria.” ‘Moldy’ chu Sicilian tawng upa, enthlatu sawina a ni.

“I hmuh tawh hnu niin i hria a maw?” tiin Guilianno chuan a zawt a.

“Emaw hriat tawh hnu emaw a ni ang,” Pisciotta chuan a ti a, “Ka hriat hnu a ang riau a, mahse sam sen hi an vang riau a, hrechhuak tur chu ka ni.”

“La Venera atanga hria i nih kha. Malpelo tiin a sawi a, a hming andolini a ni tih a hre lo a ni. A chanchin min hrilh ve alawm. a pasala pawl kha a zawm ve a, a zawm hnu thlakhatna velah a pasal chu Carabinieri ten lambunin an that a ni. La Venera pawhin a ring miah lo, bumna chi hrang hranga khat a ni, a ti a ni.” Guilianno chuan a ti a.

Silvestro chu an bulah a lo kal a, “Saw samsenpa saw ring hlek suh, Palermo Headquarters-ah Carabinieri Commandant tlawh tura a lo kal ka hmu tawh a ni.” a ti a.

Gulianno chuan, “Montelepre-ah zuk kal ula ka pa rawn hruai rawh u, chumi chhung chuan he pa hi veng tha ang che u.” a ti a.

Pisciotta chuan Terranova chu Guilianno-a pa hruai tur chuan a tir a, chutah mi pathum leia thute lam pan chuan a kal a. Kunin Andolini-a silai chu a han la a. Midang ho chuan chung mi pathum te chu chinghniain an saseh tur an hual tuau tuau ang mai hian an rawn hual hnai a. “Tunah chuan i ralthuam hi lo ken chhawk tawh che ila pawi i ti lo ang chu maw,” nui sawng chungin a zawt a. Andolini-a hmel chu rei lo te a han buai deuh zawk a, a han nui lui deuh a, chutah a dar a chhin ta uk a. Pisciotta chuan silai chu a mite zinga pakhat chu a pe a.

A pawlte an inrin theih nan reilote a han nghak hlek a, chutah Andolini-a thiante silai chu lak tumin a han ban leh a. pakhat zawk chuan, a sula vang ai maha hlauh vang zawkin Piscotta chu a lo nem kiang dawr a, a silai chu a hum ta chat a. chu tah le, rulin a lei a chhuah zawk ang mai a rangin, Pisciotta chuan chemte a lo hum reng tawh a, hma lama bawh pheiin chu picciotto hrawk chu a tai thler ta hrawk a. chu tlang sang oruak thiang tak chu thisen lo chik chhuak zur zur chuan a tibawlhhlawh zo ta a. Picciotto chu a sir zawngin a tlu hnawk a. Pisciotta chu a kun hniam a, a kut a vai leh zauh a, a zo der mai. Ruang chu kawrte ruamah a tlawh lut nghal zat bawk a.

Guiliannoa pawlte chuan kah mai inpeihin silai chuan an tin ta fur a. Leiah thuin Andolini chuan a ban chu sang takah a phar a, zahngaihna ngenin a hawi kual a. Mahse Picciotto pakhat chuan a silai chu banin inher a tum a. A hnunga lo ding reng Passatempo chuan, phur avanga then sung chungin a pistol chu chu pa luah chuan a kap ruak thak a. Silai ri chu a thangkhawk raih raih a. An vai mai chuan tumah an che chang ta lo va. Andolini hmel chu a dang vek a, hlauh avangin a khur zawih zawih bawk a, passatempo chuan a pistol chu a la hum reng bawk a.

Guilianno chuan a awmna tlang hmawr lam deuh atang chuan zawi raihin, “ruang te kha dah bo ula, kha samsenpa kha ka pa lo kal hma loh chu thingah thlung bet rawh u,” a rawn ti a.

Ruang te chu tahrangah dahin lung khi karah an paih ta a, a chungah chuan a rim chhiat loh nan lungin an chhilh leh vek a. An phum hma chuan Passatempo chuan mitthi taksa chu dapin a lepse leuh a, a tih dan ve reng a ni. Guilianno chuan chutianga a tih chu a khap fo thin, mahse he tiang lamah kher hi chuan awmzia a nei tam pui lo thin khawp mai.

Darkar sarih vel zet a liam hnu, thim hnu feah chuan Guilianno-a pa chu camp rawn thlenpui a ni ta hram a. Andolini chu an phuarna thing atang chuan rawn hruaiin puk pakhat, khawnvar inchhitna hmunah chuan an hruai a. andolini awm dan a hmuh chuan Guilianno-a pa chu a thinrim kher mai.

“He mi hi ka thian a ni asin,” Guilianno hnenah chuan a ti a. “America-ah Godather tan kan thawk dun thin a. Lo kalin i pawl a zawm thei ang a, tha taka enkawl a nih tur thu ka hrilh a ni.”

Andolini chu kut thingin chibai a buk a, “Ngaihdam ka dil e, ka fapa hian thil hriatthiam loh a nei emaw miin i chungchang an sawi a lo hre palh emaw a ni ang e.” a han chawl hlek a, a thian hlui chu ti taka hlau hmel a pu a hmuh chuan hrehawm a ti hle, Andolini chu hlauhna avangin din pawh a ding tha thei meuh lo a ni si a.

Andolini chuan an that ngei dawn niin a hria a, chung zawng zawng pawh chu an iamna maiah a ngai a ni. a tukkhum chu silaimu dawn mai a inrin avangin a za mer mer a. Guilianno a lo ngaihhniam avanga a a intihna avang chuan a tap lek lek a ni. Rang tak maia a thiante pahnih thah a nih khan a deng na hle bawk.

Guilianno putara chuan a thianpa chu a fapa lakah dinhmun hlauhawm takah a ding tih a hre thei a, chutah, “Turi, thil min tihsak turin vawi engzat nge ka ngen tawh che. Eng thil pawh nise ngaidam la, kal tir mai teh. America-ah khan ka chungah a tha em em a, Baptisma i chan pawh khan thilpek a thawn che asin. Ka ringa a thian ka nihna hi ka ngaihlu a ni,” a ti a.

Guilianno chuan, “Tunah chuan i rawn finfiah ta bawk a, khual zahawm anga enkawl a ni tawh ang. Kan pawl zinga tel zui a duh a nih pawhin kan lo lawm e.” a ti ta a.

Guilianno-a pa chu Montelepre lamah sakawra hruai kir a ni leh ta a, a kal hnu chuan Guilianno chuan Andolini chu a falin a be ta a.

“Candeleria nena in chanchin kha ka hria asin,” a ti phawt a, “Candeleria pawl i zawm khan Don Croce-a Spy i ni a, thlakhat hnu lekah Candeleria chu a thi ta nih kha. A nupui khan a l hrereng che asin. A thil min hrilh atangin thil awm dan chhui chhuah chu thil har a ni lo. Sicilian ho hi mi rinawm lohna chhuichhuah kawngah hian kan that viau hi. Outlaw pawl tam tak an bo pil hmak hmak a, Thuneitu te an fing thar ta thut bawk. He tlangah hian thuin ni leng lengin ka ngaihtuah thin. Palermo-a thuneitute ka han ngaihtuah a, a hmain hetiang em hian an fing var ngai lo. Chutah Rome-a Minister of Justice leh Don Croce te inkungkaihna ka han hre leh a, an pahnih zingah hian Don Croce chu a fing zawk hle tih hi nang leh keiin kan hrechiang hle. Tichuan Rome tana heng Outlawte thianfaitu chu Don Croce a ni tih a hriat ta mai a ni. Ka nghak a, ka nghak ta veng veng a, eng vanga Don Croce chu rawn che har viau nge ni ang tih ka ngaihtuah thin, luman tam ber ka ni si a. Ti chuan, vawiinah nangni pathum kha ka entlang hmangin ka hmu che u a, ti hian ka ngaihtuah a, “Ah, Samsenpa leh bawk chu, ka hmu chu ka va lawm ve,” tiin. Mahse ka thah tho che a ngai dawn a ni. Ka pa tih hrehawm ka duh dawn loh avangin i ruang chu dah bo hmak a ni ang.”

Andolini chuan reilote chhung chu a thinrimna avangin a hlauhna chu a theihnghilh a, “I pa i bum ngam ang maw? Chutichung chuan Sicilian fapa i la inti a maw?” Leiah chil a chhak thuai a, “A nih chuan min that la hremhmunah liam nghal ang che.”

Pisciotta, Passatempo leh Terranova pawh chuan mak an ti hle. Mahse a hma pawhin a lo tihrilhhai fo tawh tho a ni. Guilianno-a, mi zahawm tak, a thusawia a din tlat thin thu uanpui thin leh mi dangte pawh dikna chungchang hrilh fo tu chuan, misual tak ang maiin thil a ti leh thut a ni. Andolini thah a tum chu an hnial a ni lo va, Andolini ang za lai, ni lo sangkhat lai pawh a that thei ang chu. Mahse a pa hnena a thutiam bawhchhiain a bum tur chu an ngaihah chuan ngaihdam theih loh niin a lang tlat a ni. Silvestro chiah chuan a hrethiam a, “A pa rilru nem vang ngawtin kan vaia dinhmun hlauhawma kan din a rem lo a ni.” a ti a.

Guilianno chuan Andolini hnenah chuan zawi raihin, “Pathian hnenah thlamuanna dil rawh le,” Passatempo chu a mitmei zauh a, “Minute nga i nei ang.”

Andolini-a sam sen tak chu tho ta suau ni maiin a hriat, “Min thah hmain Abbot Manfredi be hmasa phawt rawh,” a ti buai nuaih a.

Guilianno chuan makti takin a en a. Andolini chuan sawi zawm lehin, “A laka bat i neih thu leh eng pawh a dil thei ang che tih i hrilh kha.” Guilianno chuan a thutiam chu a la hrechiang zet mai. Engtinnge he pa hian a hriat theih zawk le?

Andolini chuan sawi zawm lehin, “A hnenah chuan kal ila, Ka nunna atan a ngen ngei ang.”

Pisciotta chuan hmusit rawngkai deuhin,“ Turi, thu thawn kengtu a kal chhung leh a lo kir leh nan nikhat lai a duh leh ang chu, chubakah Abbot chuan i pa aiin i chungah thuneihna a nei nasa zawk em ni?” a ti a.

tun tumah pawh Guilianno chu an rin loh takin a awm leh ta a ni, “A kut kha phuar ula, kal theihna tawk turin a ke pawh kha phuar rawh u. Mi sawm min pe ula, monastery-ah chuan ka va hruai ang e, Addot chuan a nunna zuahsak tura a lo ngen lo a nih chuan, sualpuanna hnuhnung te pawh a nei ang chu. Ka tihlum ang a a ruang chu phum turin puithiam ho hnenah ka hnutchhiah mai ang.” a ti a.

Guilianno leh a pawl ten Monastery an va thlen chuan ni a sang tawh hle a, puithiam ho pawh hnathawkin an chhuak mek hlawm a ni. Abbot ngei chu anmahni lo lawm tur chuan gate-ah chuan a lo kal a. An mi tang a hmuh chuan a hlauhthawn hmel hle, chutah a kut a phar chhuak a. Steano Andolini chu chu putar kuah tur chuan a tlan phei a, a biang tawn tawna fawh sak chungin, “Father, Heng mi te hian min thah an tum a ni, nangmah chauhin min chhanhim thei e.”

Abbot chu a bu nghat a, a lam pana lo kal mek Guilianno lamah chuan a kut chu a phar a. Guilianno chuan a hrethiam ta vek a ni. ‘Father’ tia Andolini-an a kohna aw ki kha, miin puithiam an ko dan ang ni lovin, fapain a pa a ko dan angin a ni tlat.

Abbot chuan, “He mi nunna hi ka dil a che, ka hnena i thilthlawn pek angin.” a ti a.

Guilianno chuan Andolini phuarna te chu a phelh a, “I ta a ni e.” a ti a.

Andolini chu leiah a tlu hnawk a. A hlauhna nasa tak chuan a tichak lo hle a ni.

Abbot chuan ding turin a pui a, Guilianno hnenah chuan “Dining room lamah lo kal rawh u, i mite ei tur ka lo pe ang che u. Tin, eng nge kan tih tur tih pawh sawiho a ngai e.” Andolini lam chu a hawi a, “Ka fapa, Hlauhawmna lak a ta i la fihlim vek lo, Heng zawng zawng hi a hriat chuan Don Croce-an eng tin nge a ngaih ang? Kan sawiho a ngai a ni, a nih loh chuan i bo a ni mai.”

Abbot chuan coffee room tereuhte hi a nei hrang a, chu tah chuan nuam takin an thu ta hlawm a. naupang zawkte pahnih tan chuan chhang leh cheese te chu an rawn lak a.


Abbot chuan Guilianno lam hawi paha nui deuh chungin, “Ka sualna tam tak zinga pakhat a nih hi, Tleirawl mai ka nih laia ka fa a nih hi. Sicily ramah hian tumahin puithiam thil tih a ni tih an hre lo. Chu hmingchhiatna chu thup tlat a niin a nu chuan Andolini a nei ta a ni. Sum tam tak sen ral a niin Biakinah chuan ka awm thei ta a. Mahse van lam thu chu tuma hrilh lawk theih ni hek lo le, he pa hi tualthah hmang a lo ni chho ta a ni. Sualna tam tak ngaihdam nai ka nei chungin he thil hi ka kraws put a ni ta reng a nih hi.”

Andolini lam a hawi chuan Abbot aw ki chu a dang daih a, “Uluk takin ngaithla rawh ka fapa, a vawihnihna atan ka lakah bat i nei ta a nih hi. I rinawmna kha tunah chuan Guilianno hnenah a ni tawh a ni.”

“Don hnenah i kir thei dawn tawh lo a, amah ngeiin eng vanga midang pahnih that si a i nunna zuah bik nge a nih? tih a lo zawt ang che a, phatsanna rim a hriain chu chu i thihna a ni mai dawn a ni. i thil tih tur chu, Don hnenah chuan engkim puang la, Guilianno a pawla tel zel i dil tur a ni. Chutah chanchin i hrilh zel ang a, friends of friends leh Guilianno-a sipai inkara inzawmna angin i awm tur a ni. Keimah ngei don hnenah chuan ka kal ang a, he thil hlawk tur zia ka hrilh ang. A tana tha lo lo tur tawka Guilianno laka i rinawm tur thu ka hrilh bawk ang a. Chutah chuan Guilianno mphatsan mai tur angin a ngai dawn che a ni. Mahse Guilianno laka i rinawm reng loh chuan hremhmun thlengin anchhia ka lawh ang che. I pa anchhia chu thlan i liampui dawn a ni.” a ti a.

Abbot chu Guilianno lam chu hawi lehin, “Thil min tihsak leh turin ka ngen duh che a ni, My Dear Guilianno, ka fapa hi i pawlah tel tir rawh, i lakah a rinawm reng ang tih ka chiang a ni.”

Guilianno chuan uluk takina a ngaihtuah a. Hun han rei deuh se, Andolini-a ngainatna chu a hlawhchhuak tho an tih chu a chiang a. chu bakah a pa, Abbot chu a be lo chauh tih a hre bawk. Inphatsanna chance chu a tlemin chu lah ven theih a ni ang. andolini chu Operation thenkhatah hotuah a tangkai viau ang a, chuzawng ai chuan Don Croce-a lalram chanchin hriatna hnar tha tak a ni ang.

Guilianno chuan, “Don Croce chu eng nge i hrilh ang,” tiin a zawt a.

Abbot chu a ngawi vang vang a, “Don Croce chu ka be phawt ang a, min ngainatna tak a nei a ni. chutah kan en ang chu. Ka fapa chu i tel tir dawn em?”

“Awle, ka tel tir ang e,” a ti phawt a, “Mahse min phatsan a nih chuan i tawngtaina kha hremhmun kawng atanga kir tir leh turin a chak tawk lovang.”

Steano Andolini chu inrintawn awm lohna hmuna khawsa thin a ni a, chuvang chu a ni maithei e, a hmel pawh tualthah hmang hmel chiah chiah a nih nachhan. Kum lo kal turah chuan in khai chunga lemziak mi ang maiin, thihhna hruihrual chuan a thlung reng dawn tih a hria. Mahse duhthlan tur chuang a awm tlat lo a ni. Guilianno atanga lo chhuak zahngaihna nasa tak avanga him dam a ni chuan a rilru a khawih hle. Guilianno chauh chu hlauhlawpa siamtu awmchhun a ni.

Chumi ni atang chuan Stefano Andolini chu Guilianno pawlah chuan a tel ta a. A kawlhrawnna leh sakhawmi taka nih lawi sina chuan a hming lem, Fra Diavalo chu Sicily ram pumah hmingthang takin a siam ta a ni. Sakhawmi nia hriat a nihna thung erawh chu chawlhni a lo nih apiangin mass nei turin biakinah a kal thin a. Father Baniamino puithiam a nihna hmun Villaba khuaah a kal kher thin. Sual puanna a neihna ah chuan Guilianno pawlte chanchin pawimawh chu Don Croce hnena hrilh chhawn leh turin a rawlruk ta thin a ni. Mahse Guilianno-an hrilh tur a hrilh chin chiah a hrilh thin thung.

Book II ended. Book I & II chhiartu zawng zawng chungah lawmthu ka sawi e. Reilote ka chawl ang a, Book III lamah kan inhmu leh vat dawn a nia. Guilianno hi a dam khawchhuakin Michaela hnen a thleng ang em? Lo chang zel phawt teh.

BOOK III Link viewtopic.php?f=6&t=6628&p=18159#p18159
[*]Loma_Hmar[*]

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)