SUDDEN AT BAY (Cowboy) - (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: SUDDEN AT BAY (Cowboy) 1 - 12

Unread post by Ngaia » April 16th, 2018, 6:52 pm

SUDDEN AT BAY
Chapter - 12
Valmawia Chhakchhuak Mcf

"Doc, chibai le!"

Art Cotton-a awki chu a hniamin a nelawm loh kher mai. Rul tur nei a khawih ta emaw tih mai tur hian Hight-a chuan kawngkhar handle chu rang zet hian a thlah a, tlan chhuah mai a han tum a.

"Chhuak rih love," Art-a chuan a lo ti a. A awka chhuak chu a hma ai chuan a dam zawk deuh na a, tualthah chakna a in phumru tlat tho a. Che hauh lo a puakruk a a tin tun mai chuan a rilru puthmang chu a hril chhuak chiang hle bawk. Puakruk cheng a han kau zawng chuan a kut zungchal chang chu a var pap a. A kut chu a chet leh vaih chuan mitthi a ni mai tih Hight-a chuan a hrechiang hle. A ngaihtuahna chu a vak kual zung zung a, engtin nge hetah hian a lo kal dawn tih an hriat theih? Silaimu an neih tlem dan tur an chhut chhuak em ni ang? A inthlahdul a, hmel buai nak chung hian "Hetah hian enge in tih?" tiin a han zawt a.

Art Cotton-a chuan nui then thu chung hian "Kan rawn lawilut satliah mai mai mawle. A inlen pawhna khua bawk a!" a ti a, a puakruk chu a ti che zoh a, "I thianten i kawngka bula i ding reng kha mak an tih loh nan rawn lut vat mai teh," a han ti zui a.

Ban phar chungin Hight-a chu a rawn lut a, Art Cotton-a chuan Whitey lam chu a hawi a, "Pawn lamah mi hmuh i nei em?" tiin a han zawt a. Tukverh bula ding Whitey chuan a lu a thing a, "Tumah an awmlo, Art," a ti a.

Cotton-a chuan Art-a lam chu a hawi a, hmai zangthal hu hian Hight-a chu a thlek a. "Doc, i thianpa Green-a kha sakawr in lama a rawn let leh danah kan mit lak pen a duh tih a hriat a...tunah a rawn tir chhuak ta che a, engvangin nge amah kha a rawn kal tlang mai loh?" tiin a han zawt a. Hight-a chu a ngawi reng a. Art Cotton-a chuan "Engvangin nge i ko kal? Sawi vat rawh," a ti nghut a.

Hight-a chuan "Ka inthiarfihlim veleh rawn chhuah ve an tum a ni," a han ti a. Art Cotton-a chuan a lu a thing nur nur a, a meng thip rum mai bawk a. "Doc, chutiang a ni lovang, thudik sawi nan chance vawikhat chiah ka pe leh ang che. Engvanga heta rawn tir che nge an nih?" thum chhur mai hian a han ti leh a.

Hight-a chuan "Billy a inhliam a, a enkawlna tur damdawi rawn lak ka tum a ni," a han tih chuan "Kan naupang chuan darkar chanve kal taah khan tukverh atangin min rawn kap tih kan hre reng. Amah kan hmu alawm," Whitey chuan a lo ti a.

Art Cotton-a chuan "Chuti anih chuan......Doc, dawt min hrilh leh ta a ni maw?" a ti a.

"Dawt ka sawi lo,.....ka...."

Art Cotton-a chuan Doc Hight-a chuba hmaiah a kutphah hnunglamin a han beng zui a. Doc Hight-a chu a per dawrh a, bang a va deng dawt a. Art-a zungbun hrawl zetin a tih kak avangin a biang ki atang chuan thisen a rawn far zaih zaih a.

Hight-a chuan khur zawih zawih chunga a kut phar chhuak chungin "Thudik a ni ka sawi ni," a la ti ta hram a. "Thudik i sawi lo," tih pahin Art-a chuan a pan hnai a. Hight-a chu a hnek thal ta tawp mai a. Art Cotton-a chu a meng sen rum tawh mai a, a rawn din chilh leh a.

Hight-a chuan "Tlanbo turin min hrilh a ni," harsa ti fe hian a han ti a. Vin zet hiam Cotton-a chuan "Dawt sawi suh. Tlanbo tum nila in lam i pan lo tawp ang," a lo ti a. A kut chu a hum ruh a, "Engvangin nge sawi rawh," a han ti tuarh a. Hight-a chuan tawlhsawn pahin "Nilo......thudik a ni ka sawi," a la ti ta fan a. Cotton-a chuan Hight-a chu a tham kang lawp a, hnai zeta melh run chung chuan "Thudik chu sawi vat rawh Doc, chuti lo chu tun tum chu ke lehlam tliak ringawt chuan i chhuak tawh hauh lovang," tiin a han vau a. Hight-a chuan a lu a thing nawk nawk a, "Nang.....nang hi i lo ni maw? Ka hriat dan........"a tih lai mek chuan Art Cotton-a chuan "Dave Rodgers-a a nih i lo ring a ni maw? Ni e, a ni phei chu a awm ve ngei alawm. Mahse i ke ti tliaktu kha a ni hleinem," nui then thu chungin a lo tih khum a.

Hight-a chu thinrimna namenloin a rawn tuam a. Hepa hi a ke tih tliah saktu a lo ni reng mai. A thinrimna chuan a hlauhna chu a hnawtbo ta vek a. Inngaihtuah hmanloin leh a hnu lam tur pawh dawn hman loin Art-a chu a hmaiah chil a chhak ta thawt mai a. Chu chu a thiltih azawngah a la huaisen thlak ber a, a inchhir zui nghal bawk a ni.

Art Cotton-a chuan thinrim hmel ner nung chungin Hight-a chu a hnek ta bur mai a. Hight-a hnar chu a tliak ri rawp a, thisen a rawn far zawih zawih a. Pindan chu a vir muai muai hian a hria a, chutah a thim mup a, a han harh chhuah leh chuan hmai lei siin a lo tlu reng mai a.

Mi pakhat hian a nakah a rawn chhir dawt mai a, a taksa pumpui mai chu a na tek chuaih a, nikhaw hreloin a awm leh ta a. A rawn harh chhuah leh chuan an hnuk tho lawp a, nam chhuah an han tum a. Mahse a meng thei reng reng lo mai a. Art Cotton-a chuan a hnar a hnek tliah avang khan a hnar atang chuan thisen a rawn luang chhuak nguah nguah reng a. Cotton-a chuan a mit a tih del sak ta mai anih hlauthawng tak chungin a mit chu harsa ti fe hian a han chul a. Mahse a hlauhthawn ang chuan thil a lo awm lo hlauh a. Zawi zawiin a rawn meng chhuak thei ta a. Cotton-a chuan a kawrchung awma thamin bangah a nem bet a, Doc Hight-a chuan a ke hmanga din a han tum a, mahse a ke chu a lo zawi vek mai a. Cotton-a chuan engthil emaw hi a han zawt a, Hight-a chuan a lu a thing ringawt a. Thei leh theilo hian "Hremhmunah......liam rawh," a han ti hram a.

Hight-a lu chu a ri chawrh a, nikhaw hreloin a let hlawm leh ta reng mai a. Cotton-a chu thinrim hmel chuar nung chungin a hawi sawn a, Nick-a hnenah chuan "Nick, tui han la teh," a han ti a. Nick-a chuan tui chu a va la thuai a, Cotton-a chu a pe a. Art Cotton chuan tui chuan Hight-a hmai chu a han leih puat a. Doc Hight-a chu zawite hian a rawn rum chhuak a, a hmai chu harsa ti deuh mai hian a han chul a. Han thawh a tum a, mahse a hlawhchham chiang hle.

Art Cotton-a chuan Doc Hight-a chu a phih tho lawp a, "Doc, i la huaisen fo em? Nge ka zawhna kha min chhang dawn?" vin zet hian a han ti a. Hight-a chu zawhte in sazu a thing ang mai hian dimlo baksak hian a thing nawk nawk a. Hight-a chuan harsa ti fe hian "Art, min that nghal la i tan a tha zawk ang. Chuti lo chu ka la that tho tho ang che. Pathian pawhin min hriatpui......" a ti hman chauh a, Art Cotton-a thinrim lutuk chu a te tuarh a. Hight-a chu bang deng dawt khawpin a nam per lawp a. Hight-a chu engmah hreloin a let hlawm leh ta reng a, chhuatah chuan a thisen a rawn luang ngiai ngiai a.

Whitey chuan "Art, i that ta mai ani maw?" phawk zet hian a lo ti a. Art-a chuan "Engmah in lo sawi ve tur a awm lo," a ti nghut a. Vawilehkhatah a nui chhuak thut a, thâm deuh tuak hian "Engah nge a tirah khan ngaihtuah chhuah nachang ka lo hriat loh?" a rawn ti chhuak a.

Nick-a leh Whitey chu an inmelh zauh a. Art Cotton chu a â ta em ni ang?

"Art, eng thil nge ni ta?"

"In hrethiam nange?"

Whitey-a te pahnih chuan lu an thing a, Art Cotton-a chuan "Sim-an chhawrna awm miahlo leh laktlakloah min ngai a. A mi tawngkhum dan avang khan a la inchhir ngawt ang. In hre dawn alawm. Ka lamah in tang dawn em?" a han ti a.

Whitey chuan rang zetin a lu a bu a, "Tehreng mai, Art," ti a. Art-a chuan "A tha e. Ka mamawh dawn che u a ni. Doctor thawmhnaw kha han hlip teh u," a ti ta a. Chutah Nick-a lam chu a hawi a, "Nick, nang khan i thawmhnaw kha hlip bawk la," kil khatah hlauh hmel zeta Nick-a lo ding khawng reng hnenah chuan a han ti a.

Nick-a chu a han tawi khawmuang deuh a. Art-a thin chuan a tuar ta lo a. "Inhlip thuai rawh," a ti tuarh a. Nick-a chu a inhlip ta sawk sawk a. Whitey pawh chuan Doc Hight-a thawmhnaw chu a hlip fel ta a.

Art-a chuan "Ka thil ruahman chu in hre thei tawh em? Nick, Doc Hight-a thawmhnaw kha inbel rawh," a ti zut zut a. Nick-a chuan Art-a thupek ang chuan a ti thuai a. Whitey chu a nui vur vur a, "Doc Hight-a hi a kir leh an lo beisei......" a tih lai mek chuan Art Cotton-a chuan "A dik chiah. Doc Hight-a hi Hornby-a enkawlna tur damdawi la tura rawn kal pawh a ni tak tak maithei. Anih loh vek pawhin silaimu emaw tui in tur emaw an tlachham a, lam turin an rawn tir pawh a ni maithei bawk. Engpawh nise, kir leh ngei tura ngaih a ni tih a chiang a. Kan nuai chimih theih dan tur chu chuan min hmuhchhuahtir a......" a ti a, a kut zungtang chu a han piai ri fuk a, "Hetiang tluka awlsam hian," a han ti a.

Nick-a pawh chuan Doc Hight-a thawmhnaw chu a inbel fel ta a. A kut chu a humin a phelh sek a. Art Cotton-a chuan "Sim, naia sen pawh ka tluk lo maw? Kan la hre dawn alawm," a ti nghut nghut a, chutah a hote chu thiltih dan tur a hrilh ta a.
********************

Kawtthler leh lam a khat tawka silai an han pawng kah leh ngawt thin tih loh chu silai ri dang hriat tur a awm ta rihlo a. Bob Davis-a thlakin Sudden-a chu tukverh bulah a ding ve thung a. Davis-a chuan in hnunglam bang kila coffee bel a haichhuah hmangin coffee a lum a. Coffee rim chu boruakah chuann a nam cham cham a.

Billy chuan "Ril a tam duh hle mai. Zing thingpui leh chhang bak kha engmah ka la hmawm leh ta lo a," a rawn ti chhuak hlawl a. Sudden-a chuan "He thil hi a fel veleh bawngsa ti hem hmin hrawl tawk ka leisak ang che," a lo ti a.
Billy-a chu a nui sak a, "Bawngsa ti lian tawk, sawngbawl dan tur dik taka sawngbawl, mawm hlap mai, alu kan thahnem tawk nen, a behbawm enge maw zat bean tih vel nen......ka mitthla in ka hmu reng mai," a han ti chiam a.

Sudden-a chuan "Apache ho zinga seilian i ni hial lo maw? Zahngaihna dil khawpa hrehawm tuar tir i thiam riau mai," nui chung hian a lo ti a. Davis-a awmna lamah a phei a, "Nang chauh hi i ni lova.........." a tih lai mekin tukverh lam pan mek, Davis-a chuan "Doc pawh a rawn kal ta e," a han ti a.

Sudden-a chuan tukverh atangin pawnlam chu a han thlir ve a, "Billy, thil che zauh pawh i hmuh vaih chuan kap nghal pawp ang che," a han ti a. Davis-a chuan kawngkhar hawlhkalhna chu a phawi a, kawngkhar chu a nam kau a, pawn lam bih dak dak chung chuan "Doc, hmanhmawh rawh," a han ti a. Sudden-a chuan "Kawng khar kha khar vat rawh," a ti ta thut mai a. Davis-a chu a phu zawk a, Sudden-a lam chu a rawn hawi a. Chutih lai chuan Hight-a ni ngeia an ruat chu hmalamah a zuang dawrh a. Chumi rual chuan midang pahnih hi kawngkhar lam pan chuan kun chungin an rawn tlan phei nghal a, silai a puak thuai a, Davis-a chu hnunglamah a tawlh dawrh a, a thal ta tawp mai a.

Billy-a au thawt pahin Sudden-a kut pahnih chu a phe zawk a, mi pathum hi kawngkharah chuan an rawn lang a, silai an hmet puak zawt zawt a. An zinga pakhat chu Art Cotton-a a ni tih Sudden-a chuan a hre thei a. In chhungah chuan an rawn zuang lut ta a.

Sudden-a nak chu thir linga deh ang mai hian a rawn sa zawk a. Puakruk chu a han hmetpuak leh a, Hight-a lemchang pa khan a dul a dawm chawt a, pawnah a tlu chhuak ta a. A la dam chhun chu Billy-an a rawn kap thlu ve nghal a. Sakawr in chhungah chuan zen khu a zam chuai chuai a. An kah thluk te zinga pakhat chu a rum ngul ngul a, Art Cotton-a kha a lo ni a. Harsa ti fe hian a puakruk chu a han lek kang a. A hmeh per dawn lai tak chuan Sudden-a puakruk hmawr chu a de zawk a, Cotton-a chu a inthing nawk a, a puakruk chu a thlauh ri dawt a, che zui tur a awm ta lo. Sudden-a chu muangchangin a rawn ding mar a, a puakruk pai that pah chuan "Tih a tul miau a ni," a han ti sap a. Pawn lam chu a va en a, chutah "Tukverh pan vat rawh, kawtthler saw," Billy-a hnenah chuan a ti thut a. Billy-a chu tukverh lamah chuan a zuang phei thuai a. Silai a hmet puak nghal zawt zawt a. Cottonwood mi enge maw zat, an tawmna atanga rawn chhuak ho chu an tlan darh nghal thuai a. Reiloteah tukverh chu an rawn kah rawn ta a. Tukverh biang chu silaimu chuan a deng khawk hlawk hlawk mai a. Billy-a chu a kun hniam thuai a, Sudden-a chu a va en a, ani chu chelo changloa let hlawm reng, Bob Davis-a bulah chuan a lo thingthi mek a. Muangchangin a rawn tho a, kawngkhar chu a khar a, a kalh hnu chuan "A thi tawh," Billy-a hnenah chuan a han ti sap a. Billy-a chu a ngawi reng a, Davis-a coffee chhuanso barh barh chu a han en a, chutah bang lam hawiin a ding ngawi ta reng a.

Sudden-a chuan Art Cotton-a te ruang chu a melh zauh a, lu thing nar nar chungin tukverh lam a pan ta a. Kawngkhar bulah chuan Hight-a thawmhnaw inbel pa kha thisen chiahpiah nuaihin a lo let hlawm reng a. "Doc chu an that ta anih hmel hle mai, keini pawh min that lo chauh zawng anih kha," tiin a phun sap sap a.

Hnehna changtu zawk ang ni mahse Sudden-a te pahnih chu an hlim hranlo kher mai. Sim Cotton-a hired killer pathum chu hremhmunah liam mahse a man a tam em a ni.

Sudden-a chuan a puakruk mu chu Art Cotton-a gunbelt atanga a silaimu lak chuan a thun khat a. Engemaw chen a ngawih vang vang hnu chuan "Kawtthler lamah hmuh i nei em?" tiin Billy chu a han zawt a. Billy-a chuan "Tumah hmuh tur an awmlo," a ti zawi raih a. Bang hrulah ngil auh hian a ding a, a kawrah chuan thisen tharlam a val kalh a. Sudden-a chuan "Kha, thisen a chhuak leh elo?" tiin a han zawt a.

Billy chuan "Ka chetpui vang anih hi," a lo ti thuai a. Chutah "Doc Hight-a kha......." a tih lai mekin Sudden-a chuan "Pawna mi sawn a thawmhnaw a inbel a, a inah sawn che vel hmuh tur a awm bawk silo a," awmze nei tak hian a lo ti a.

Engemaw chen an ngawih dun vang vang hnu chuan Billy chuan "A man kan chawi tam hle mai," a ti nghat a. Sudden-a pawh chuan sawi tur a van kher mai. Ngawi rengin tukverh lam chu a pan a, pawnlam a en a, "A tlai tawh hle mai. Khua a thim thuai tawh dawn anih hi," a han ti a. Engemaw chen ngawi renga mahni ngaihtuahna kawma an thut hnu chuan Billy chuan "Jim, khaw thim hmain min rawn beih leh i ring em?" a rawn ti chhuak a. Sudden-a chuan a dar a chhin ak a, "Sawi a har khawp mai. Kan pahnih chauh kan ni tawh tih an hre ngei anga, nghah khawtlai Sim-a khan tul a tilo maithei. Mahse a hote la dam zat a zir pawh a ni ang chu," a ti a.

"Khua an nghah thim vaih chuan chance kan nei tlem hle ang," Billy-a chuan a ti bal bal a.

Inring taka silai hum reng chungin pawnlam chu an va en a, hmun hnih khatah chuan khawnvar a inchhi tawh a. Boruak chu a reh ruih a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 17th, 2018, 8:09 pm

SUDDEN AT BAY
Chapter - 13

Sakawr in chhungah chuan mi pahnihte chu thil lo thleng leh tur nghakin an thu ngawi reng a. Billy-a chu bang nghengin a thu a, a dinglamah chuan tukverh a awm avangin chesawn vakloin pawnlamah chuan an hmelma ten an rawn pan hnaih leh hnaih loh a va hmu thei a. Thawm awmloin darkar khat vel zet chu khua chuba reh ngaiin a reh tlawk tlawk tawh a. Silai puak ri hriat tur a awmlo a, rawn beih tum thawm hriattur a awm heklo. Thawm reh lai chu chuhin Sudden-a chuan Billy-a hliam chu a tuam that sak a. A kawr chu pawtthlerin a naka inches ruk vela sei, silaimu in a thawi kakna chu a tuam ve nghal a.

Sudden-a chuan "Mei a zial a, a pak khu hlat hlat a. Billy-a chuan "Thil awmdan hi an hre ve vek awm si a, engvanga tualchhung mite pawh hian min rawn puih tum hauhlo nge maw an nih le?" a rawn ti nang nang a. Sudden-a chuan "Sim Cotton-a hi ramhuai hlauh taka an hlauh vang anih hi," a lo ti mai a. Billy chuan "Chu phei chu ka hria alawm. Mahse silai hmang thei paruk tal chu awm ila Sim Cotton-a leh a chekawi ho hi umboin he khua hi kan ti zalen thei ni mai tur," a lo ti a.

Sudden-a chuan "Sim Cotton-a hi tlanchhe ta se he khua hian enge a an ang tih i ngaihtuah ngai em?" Billy hnenah chuan a han ti a. Billy chuan "Ngaihtuah ngai dawn lawm ni. Nitinin tumah hlauh tur neiloin mahni thil thar chhuah leh siam chhuah kan hralhin kan duh ang angin zalen takin kan indawr kual ang a, kan duh dan danin ei kan zawng tawh mai dawn a ni," phur zet hian a lo ti a.

Sudden- chuan "Mahse mitinin an duh dan ang anga eizawnna an dap theih chuan bawngte vulh ve in nang pawh nek chepin i awm maithei asin," a han ti a.

Billy chuan "Chutiang zawngin ka lo ngaihtuah ngai miah hleinem. I tidik maithei e. Thil hi i hre dik thei riau a ni. I upa teh chiam bik silo a......" a ti a.

Sudden-a chuan "I ti lawmawm e," ti chauhin a chhang a. Billy-a chuan "Thil engkim mai hi chhut dan i thiam zel a, puakruk phawi lah chu i rang em em mai bawk si. Kei aiin i upa teh chiam bik si lo. Tin, engtin nge hetiang khawpa silai chelek i zei bik theih le?" a ti leh zel a. "Vanneih vang liau liau a ni ang," Sudden chuan a ti a. Mahse a awka chhuak chu a nguiin thil thalo tak hriat chhuah a nei tih a lang reng a. Billy-a chuan "Jim, i rilru tihnat ka tum a ni lova....." a tih lai mek chuan Sudden-a chuan "Theihnghilh hmiah rawh. Mi thenkhat thil zir chhuah dan hi chu a dang deuh thin reng a nia," a lo ti a.

Sudden-a chuan a hun kal tawh te a ngaihtuah chhuak a, tleirawl cher ria thler thlawr anih lai chuan Piute Indian putar sakawr zuar hnung a zui thin a. Enge maw chen an in zui hnuah chu Indian putar chu a pa dik tak a nilo tih a hrechhuak ve chauh a. Chumi hnu chuan Bill Evesham-a hnenah a awm leh a. Chu rancher ngilnei tak mai chuan Piute putar hnen atang chuan a lei chhuak a ni. A hmingte a phuahsak a, mi pahnih a zawnna lama a thil tawn duhawm lo tak leh a chetdan avangin 'Sudden' tiin a hming chu hriat lar a lo ni ta a ni.

Billy-a chuan "He thil hi nikhat thil thua thleng pawh angin ka hrelo. Damchhung hun pumpui tluk ni maiin ka hria," a han ti bal bal a. Sudden-a chuan nui chungin "A rei tawh bawk a ni ang, kei pawh ka upa ta sawtin ka inhria," fiamthu in a lo ti a.

Billy-a chuan bang chu a chum dat a, "He ni hi lo thleng lo tawp se tha tur," a han ti ngawt a. Sudden-a chuan "Chance za a sawm nga kan la nei alawm. Sim Cotton-a hian a rawn thawh chhuah pui zat mi a kawl tawh bik hleinem. Keinin mi pahnih kan hloh laiin a ni chuan sawm pahnih a hloh tawh a," a lo ti a. Billy-a chuan "Amah tiamloin pali vel an la awm tho alawm. Sim-a phawi khalh tur chuan nang pawh i inbuatsaih a ngai hle ang," a han ti a.

"Chu a rang viau elo?"

"Rattler tluk zet mawle. A puakruk phawilai chiah chu ka la hmulo a, a hmu tawhte chuan Texas Outlaw 'Sudden' an tih huai huai pawh hi a lakah chuan a che hman bikin an ring mang hleinem," a ti a. Sudden-a chu a ngawi reng a, mahse a hmel chu a dur deuh sawt thung a. Engtikah tak rawn che leh ang maw?

Darkar chanve hnu chuan an hmelma ho chu an rawn che chhuak ta a. Fimkhur takin Billy-a chuan tukverh atang chuan pawnlam a han thlir a. Vawilehkhatah a silai chu a lekkawh thut a, a kau ri nghal rak a. Sudden-a pawh chuan tukverh pakhat chu a pan nghal vat a, Billy-a chuan "Flag ni awm tak jail tukverh a saw an vai e," a han ti a.

Sudden-a chuan jail lam chu a han en ve a. Flag var bal zet hi tukverha rawn rawlh chhuakin an vai lauh lauh a. "In remna flag emaw ni le? Enge maw an hriat tak le?" tiin a phun sap sap a.

Jail kawngkhar chu a rawn inhawng a, flag kengin mi pakhat hi a rawn chhuak a. Tuin emaw flag kenga kawtthler a chhuak turin thu a pe ni ngei tur a ni. Hreh hmel zet hian kawtthlerah chuan a rawn chhuak thla a, Billy chuan "Kilpatrick-a a ni maw? A thil tih saw a hreh hmel kher mai," a han ti a.

An judge putar chu sang fea flag lek chungin kawtthlerah chuan a rawn phei a. Billy-a chuan "Inbiak an duh anih dawn saw. A khup inkhawng ri avangin saw kel tar sawn mi tawng ri a hre thei pawhin ka ring nek lo," a ti bal bal a. Sudden-a chu a nui sak a, "A zam kher mai tak a!" a han ti a. Chutah "Judge, rawn kal zel rawh. Mahse fimkhur hle ang che," tiin Kilpatrick chu a va au a.

Kilpatrick-a chu a ding a, "Silai ka kenglo ania. Min lo kap mai ange.........silai ka keng lo," a han ti a. Sudden-a chuan "I tan silai ken loh a tha zawk reng a ni. Rawn kal hnai la i sawi duh chu han sawi teh. Mahse i thiante ho kha fimkhur hlawm rawh se. Thin phut ka nei thar a, min ti phawklek tu an awm vaih chuan i thinhnunah khan ka verh a ni mai," a han ti a. Kilpatrick-a chuan hrawk bawk kal rawk khawpin chil a lem khawlh a. Chelo changlo in a din ngaiin a ding reng a. A chalah chuan thlan a rawn bawl tuam tuam a, a hmaiah chuan a luangthla nguai nguai a. Flag pawh chu a thlah lo chauh a ni. Sudden-a chuan "Judge, i lem rihlo emni? Tukin lama i khurh nep tehlul nen engtizia nge ni ta?" tiin Kilpatrick-a chu a han au a.

Kilpatrick-a chuan thinrim zet hian "Ka khur awzawng lo mai. A tlai lutuk hma hian he khua hi chhuahsan turin ka rawn hrilh dawn che u anih hi," a ti vin hlur a. Sudden-a chuan "Hun remchang min pe dawn amaw?" a han ti a. Kilpatrick-a chuan "Sim Cotton-an in duh phawt chuan tha taka kaltir che u a duh a ni," a han ti a. Sudden-a chuan "A va fel ve le," a han tih el phawt a, "Thil phut a nei ngei ang maw?" tiin a zawt ta a. Kilpatrick-a chuan "Thil hote mawle, Green. Kan naua kha rawn hlan la, nang chu nungdamin i chhuak thei ang. I remtih loh chuan a khamphei zawngin in awmna kha in chhuahsan ang," a han ti a. Sudden-a chuan "Tar kiringpa, i vun tlaktlailo leh rimchhe zet kha ka silaimu in a verh hma in kawtthler atang khan inthiar fihlim la, in boss hnenah chuan ani nen inremsiam ai chuan setana nena inremsiam pawh ka duh zawk tih hrilh ang che," a ti ta a. Kilpatrick-a chun "Green, i inngaihtuah chianglo a ni," a han ti leh hram a.

Sudden-a chuan thu in a chhang tawh lo. Kilpatrick-a ke dinglam atanga inches khat vel leka hla chu a va verh khu sat a. Kilpatrick-a chu a te thawt a, bak lengin jail lam pan chuan a tlan phei ta a.

Sudden-a te pahnih chu an innuih tha a, Billy-a chuan "Jim, i ti lawmawm e. Min kalsan daih thei i ni,,,,,,"a la tihlai mekin Sudden-a chuan "Kal chiah ila chuan ka hnungzang silaimuin a verh hmain yard sawmhnih pawh ka thleng hman lovang tih ka hriat vang mai anih kha. Chuvangin lawmthu min hrilh buai duh suh. Him dama awm ka la thlahlel rih mai a ni," a lo tih san a.

Billy-a chuan "Anih hrep tak chu. A him zawnga thiltih i thiam khawp mai. Kei hi Ulyness S.Grants ka nia," a tih khum a.

"Ka hmuh hnu i niin ka hre reng ani," nui chung hian a han ti phawt a. A hma aia thutak zawkin "Sim Cotton-a hian khatianga thil a rawn tih kha ka lo ring rilru reng a. Enge a tum ber nia i rin?" a han ti a.

Billy-a chuan "Han rin ngaihna ka hre hauhlo mai. A enga pawh chu nise thil tha tak zawng a ni lovang tih a hriat mai a," a lo ti a. Billy-a chuan a sawi dik ani tih rei vak loah an hre ta mai reng a ni. Kilpatrick-an Sudden-a te thiandun mit a lak pen lai chuan Sim Cotton-a hote chu an lo buai ve hle a. An zinga pahnih chuan in phen atanga khaw hmarlam fem an pan a. Pakhat zawk chu Ricky-a kha a ni a. Sudden-an a lu a a chhutna kha rawmawl bal zet hian a tuam a. Pakhat zawk chu sa tha deuh mai Roffe-a an tih chu a ni a. General store atangin khawnvartui tin hnih an la a, sakawr in chu hnunglam atangin an rawn pan ta a. Sakawr in bang chu fimkhur takin an rawn hnaih phei a, hnah ro leh bawlhhlawh dang an thawh khawm a, sakawr in bang hrulah chuan an chhep a, khawnvartui chu an leih a, bang vel te chu an theh huh bawk a. An leih bang chu bawlhhlawh chhekkhawm chungah an dah a. Roffe-a chuan "Nghawng a nei ang maw?" a ti sur sur a. Ricky-a chuan "Nei se a tha zawk ang. Chuti lo chu Sim Cotton-a ho hian kan ral vek a ni mai," a ti a. Sim Cotton-a chuan cowboy pahnihte chu meipui hmanga um chhuah a, kawtthlera lo kahhlum a tum a ni.
Rick-a chuan a lu a han bu nghat a, chu veleg Roffe-a chuan bawlhhlawh chhehkhawm chu nawhalhin a dep kai ta a. Chutihlai chu Sudden-an Kilpatrick-a tih thaihnan silai a hmeh puah lai tak kha a ni. Mei chu a alh ding nghal hlup a, Ricky-a te pahnih chu rang takin an inthiarfihlim nghal a.

Nui then thu chungin Sim Cotton-a chuan kawtthler a thil kal dan chu a lo thlir reng a. Kilpatrick-a chu petek nawk nawk chung hian jail lam pan chuan a rawn tlan dawr dawr a, he putar hi rintlakloh hle mahse, amah bakah a hote pahnih chauh an dam tawh avangin tirh tur dang an awm tlat lo a ni.

A hote pahnih chu eng chen chiah nge a lakah an la rinawm zui ang tih a ngaihtuah a."Uicho ho! Hnehtu ka nih hlauh chuan hlawh tam zawk an phut ngei anga, ka chan a chhiat chuan an put bo daih ang chu," tiin a phun sup sup a. Green-a khan U.S Marshal chu chah tak tak pawh nise U.S Marshal rawn thlen hmain Green-a leh naupang chu an thi ngei tur a ni.
Kilpatrick-a chu thaw huam huam chung hian a rawn petek lut nawk nawk a, Sim Cotton-a chuan "Tar chhaw pa! Silaimu khan i thluak verhsak che sela a tha zawk tur," a lo tih khum a. Ricky leh Roffe pawh an rawn thleng ve chiah a. Sim Cotton-a chuan a puakruk kau sa chu a lek hniam thuai a. Tukverh atangin Ricky chuan sakawr in chu a va thlir a, "Sakawr in chu a kang ngei dawn e," phur zet hian a rawn ti chhuak a. Sim Cotton-a chu ngawi reng hian a lo bu nghut a. Tukverh lam chu a pan phei a, sakawr in chu a han thlir ve a. Mei chuan sakawr in bang chu a kang tan tawh a, meialh chu a puak ri tuk tuk a. Sim Cotton-a chuan "Kang ral rawh u. Sawnchheho, kang rawp vek rawh u," a ti a, ngaihthlak nuamlo zet hian a han nui zui a.

"In a kang e. Sakawr in hi an hal a ni," Billy chuan a rawn ti chhuak a. Kalsawn mai a han tum a, inchhungah chuan meikhu a rawn zam lut nguai nguai tawh a.

Sudden-a chuan "Kalsawn suh, kawtthler saw en reng rawh. An rawn thawk chhuak maithei ania," a lo ti thuai a. A thingthi nghal rap a, chutihlai chuan Billy-a silai chu vawihnih a han puak a, "Jim, i ti dik leh ta. Tukverhah pakhat a rawn dak a, a zawngchhanglo maithei ani," a han ti zui a.

Sudden-a chuan bucket in tui a thal a, bang kang hluah hluah chu a han theh a. Mei chu a han rem deuh a, reiloteah a alh leh ta hluai a. Sudden-a chuan a theih anga rangin bucket chuan tui a thal a, meialh chu a theh ta ngat ngat a. Mei chu a han rem deuh thin a, mahse in chakte chu an ro tawh em avang leh khawnvartui avang khan a alh leh mai thin a. Barrel a tui pawh chu a zo tep tawh a. Sudden-a chuan tui chu a thal leh a, meialh chu a han theh leh a.

Sudden-a chuan tui chu a han thal leh dawn a, thal tham a lo awm tawh hauh lo mai a, anchhe lawhin a phun sap a.

Kawtthler lam ngun taka thlir chungin Billy chuan, "A rem ta em ni ?" tiin Sudden-a chu a han zawt a.

Sudden-a chuan, "Teuh lo mai. Tui kan nghei ta lehnghal," a lo ti a. An han in en he haw a. Billy-a chuan, "Tihngaihna a awm ta lo a ni maw ?" a han tih chuan Sudden-a chuan, "Chil chhak hlum kan tum mai a ni ang chu," a lo ti a.
Billy-a chuan nuih a han tum a, mahse a hlawhchham chiang kher mai. Anchhe lawhin a phun ta mawlh mawlh a.

Mei chu a alh leh ta dur dur a, tlungte pawh a man kai ta zel a. A sat tak em avang leh meikhu luih luih avang chuan sakawr in a tawm reng pawh chu a theih loh thuai dawn tih a lang reng a.

Chet lak dan tur ngaihtuahin Sudden-a chu a inngaihtuah buai hle a. Billy-a chuan a jacket hmangin buhpawl a mei si rawn tla chu a vaw chawt chawt a. Inpek erawh chu an tum lo bur ringawt mai a ni.

Jail atang chuan Sim Cotton-a aw hian,"Green,min hre thei em ?"tiin a rawn au ta a.

Sudden-a chuan, "Ka hre thei che,"tiin a au let a.

Sim Cotton-a chuan , "Inpe ula in tan a tha zawk ang. Tunah khan hremhmun a vur tlang vawrh luh ang chauh in ni. Minute sawm ral hmain in kang khan a chim hnan dawn che u tih a lang reng a, tawngtaina hla pawh in chham hman lovang," a rawn ti lung lung a.

Sudden-a chuan hnial a han tum zet a, Billy-a dar hliam atanga thisen tharlam rawn chhuak a hmuh chuan a tul thut pawha inthiarfihlim thei chi a ni lo tih hriain, " A tha e, Cotton, kan rawn chhuak dawn e," a ti ta a.

Billy-a chuan, "Ni lo Jim," a lo ti thawt a,"Uicho tluk lekin min lo kaphlum nghal dawn tih hriat sa a ni," a han ti zui a. Chutih lai chuan liang chu a rawn chim a, meialh chuan buhpawl awm khawm chu a man a, a alh nghal zuai zuai mai a.

Sudden-a chuan, "Billy, kan chhuah vat loh chuan minute nga bak kan dam chuang lovang," a han ti a. A awka chhuakah chuan manganna leh thlaphanna a lang lova, thinrimna namen lo a lang zawk a ni.

"In silai rawn theh chhuak hmasa ula banphar chungin rawn chhuak rawh u," Sim Cotton-a chuan a rawn ti leh lung lung a.

Sudden-a chuan,"Billy, i silai kha theh chhuak rawh," tih pahin Billy-a chu puakrukin a tin ta a. Billy-a chu a meng kau zawk a," Jim, i tlawm theih ka lo ring ngai hleinem," thinrim zet hian a han ti a.

Sudden-a chuan,"Pasaltha thi nih ka duh hleinem. I silai chu vawm chhuak rawh," vin zet hian a lo ti a.

Anchhe lawh chungin Billy-a chuan a puakruk chu a theh chhuak a, Sudden-a pawh chuan a puakruk pahnih chu tukverhah chuan a theh chhuak ve ta a. Kawngkhar lam pan chuan an tlan phei a, meikhu chu an hak bawrh bawrh a. Meisa lutuk atanga inven nan an hmai an kuti n an hliah chawn chawn a.

Sudden-a chuan kawngkhar hawlh kalhna chu a phawi a, kawngkhar chu a nam hawng a, meikhu luih luih karah chuan an petek chhuak ta nawk nawk a. An thawmhnawte chu meisi in a kang pawp hrep hrup a, an thaw huam huam mai bawk a.

An khaw hmuh a han fiah deuh hnu chuan an hmaa rifle chhuak hlui chi kenga Sim Cotton-a lo ding run chu an hmu ta a. Sim Cotton-a chuan nuamti tih hriat zet hian "Rannung tenawm ho, in ban kha phar vat rawh u, nuam ka han chen dawn anih hi," a ti zut zut a. Mei chu a alh ri dur dur a, sakawr in chung pawh a kang chim tep tawh a. Reiloteah a pum tluk tawh mai dawn a ni.

Sudden-a chuan "Min tawlhsawn tir deuh la a tha ang, chuti lo chu meisa hian min hem hmin mai ang," a han ti a. Cotton-a chu a bu nghut a. A tawlh let a, Sudden-a te pahnih pawh chu tawlhsawn turin a han hui a. Billy-a chu a ngawi reng a, a thianpa hmel pawh chu a en hek lo. Sim Cotton-a chuan "He khaw pumpui hmuhah hian thiltih tur ka nei a ni. Lo en rawh u," a ti a, a han thle zoh a. Sudden-a te pahnih chuan cottonwood rider pahnihin tualchhung mi ho silai nena kawtthlera an rawn chhawm phei chu an hmu ta a. Tualchhung mi ho chu namen lohin an thlabar tih a lang reng mai a.

Sim Cotton-a chuan "Cottonwood mipuite hian in thi lai hmel hi an hmu dawn a. Ka kawng dal a pawi zia an hrechiang tawh ngawt ang. He khua hi in rawn kal hma daih atang khan ka khua a ni a, ani zui zel bawk dawn a ni," a ti nghut nghut a. Piah deuhah chuan Ricky-a leh Roffe-a te khan tualchhung mi ho chu an dinkhawm tir a, an kun nghiai hlawm a.

Sudden-a chuan zam hmel fe hian "Mr. Cotton, rawng taka, thiamthu sawi ve na hun pawh min pe miahlo a min thah i tum em ni?" a han ti a. Thinrim zeta Billy lo rum nghat chu ngaihsak duhloin "Mahni inven nana thilti mai kan ni," a han ti leh a. Sim Cotton-a chu teng pherh chhe zet hian a han nui a. Tualchhung mi ho lam chu a hawi a, "An tlawm hneh zia leh an zam zia hi in hmu maw? Sim Cotton-a kawng daltu te chan chu a lang chiang hle a ni lawm ni?" nuamti zet hian a ti zuah zuah a. A rifle chu phur zet hian a lekkual vut vut a. Vawilehkhatah Sudden chuan Billy chu a nekthlu tawp a, a silai paih chhuahna lamah khan a lum phei ta tawp tawp a. Dawihzep tia a lo puh chetdan a hmuh chuan Billy-a mak ti lutuk chu a meng zau kawk kawk mai a.

Ricky-a chu "Sim, inring rawh," tiin a au chhuak thawt a. Tualchhung mi ho pawh chu an tlan darh nghal a. Sim Cotton-a chu a rawn inher a, a rifle chuan Sudden-a chu a rawn tin a. Sudden-a chuan puakruk chu a rawn vuan chawt a, thingthit chhuah pahin a han hmet puak thuai a, Sim Cotton-a pawh chuan a rifle chu a hmet puak ve hman a. Sim Cotton-a chal darah tak mai chuan Sudden-a puakruk mu .45 chuan a verh siah a, a taksa in lei a deh meuh chuan a lo thi fel der tawh a. Ricky-a chuan Billy chu a han kap a, Billy-a bul vaivut chu a khu lawih a. Sudden-a chuan a puakruk chu vawi hnih a han hmet puak leh zawt zawt a. A thinhnuna silaimu pahnih ngawt a luh avangin Ricky-a chu a let hlawm tawp a, che zui tur a awm ta lo.

Roffe-a silai chu a puak zawt zawt a, a lo thlirtute chuan Sudden-a inthing deuh nawk chu an hmu a. Chumi rual chuan a silai hmawr chu a de zawk zawk a, Roffe-a chu a te thawt a, a tal awrh a, a thinhnun leh a lu a silaimu lut tuar lovin a thal ta tawp a. Sudden-a chu a khup lehlam hmangin a thingthi a, a mita thisen rawn luang lut chu a han hru fai a. Mitmeng phe ruai chungin a gunbelt a puakruk mu chu phawi a han tum a. Billy-a chu a rawn tho a, Sudden-a lama rawn tlan phei pahin "Green!" tiin a au thawt a.

Sudden-a chuan a lu a thing nawk nawk a, a rawn kotu chu tu aw nge anih a hre hrang thei hek lo. Tualchhung mite chu an au nuaih nuaih a, mahse Sheriff bathlara rifle nena Buck Cotton-a rawn chhuak an hmuh chuan an thawm chu a reh nghal duak a. Buck Cotton-a chuan bu lak lak chung hian Sudden-a te chu a rawn pan phei a, tap deuh pur chung hian "Ka chunga i thiltih avang hian ka kap chik hrup dawn che a ni. Sim-a i that a.......i nester thianpa nen khan thil in ti khawlo zo vek a ni. Green, ka sawi chu i hria em?" a han ti a.

Silai a ri thuai a, mahse Buck Cotton-a silai puak ri erawh a ni hauh lo. Chu silaimu chu Doc Hight-a puakruk Army Colt hlui tawh tak atanga rawn thlawk chhuak a ni. Doctor hmai chu tunge anih hriat harsa khawpin a vung luah a, a duk thliah thluah bawk a. Kawtthler lai takah a ding a, a hmelah chuan phuba lak chakna leh huatna mai lo chu hmuh tur a awm lo. A silaimu chuan Buck Cotton-a rifle chu a thlawh per lawp a, Buck Cotton-a chu a pai dawt dawt mai a.

Doc Hight-a chuan "He khua hi eng khua nge ni ngai? Nangmahni chhanhimtu che u thah anih dawn laiin in ding mai mai amaw? Zalenna chang tura bei tur in ni tih in inhre thlawt nange?" a ti tuarh tuarh a.

Buck Cotton-a chuan te ruai ruai chungin a rifle thlauh kha a zuan ta thut mai a. Roffe-a vawn pahin "Green, ka that dawn che," a ti tuarh a. Sudden-a chu hmalamah a han pen a, chutah thawm danglam tak a hre ta. Ramsa kawlh rawl ang mai a tualchhung miho au thawm a lo ni a. Tualchhung mi ho chuan chinghne koham rual ang maiin Buck Cotton-a chu an bawr rawn a. Sudden-a chuan "Nilo," a han ti thawt a, mahse tumahin a tawng chu an hre changlo reng reng a ni.

Sudden-a chuan zawi zawiin thil awmdan a rawn hre chhuak a. A fiah tawlh tawlh a, sakawr in kang te, ...... a hnu lama thil thlengte nen a hre chhuak chho zel a. A han meng chhuak a, mi pakhat hian "A rawn harh chhuak ta," a tih ri hi a hria a.

Mi pakhat hian a rawn bih hnai a, tleirawl hmel a ni a.
Chutah nula tleirawl te hmel a hmu leh a.An in an danah unau ni ngei tur an ni.Mi pakhat hmai vung luah khem nen nuan hmel hi a hmu leh a.Insualna ah a tel ni ngei tur a ni.
Sudden-a chu a han maimitchhing vang vang a, a rawn men chhuah leh
chuan fiah takin thil a hmu thei ta a, "Hello, Doc," a han ti a. Doc Hight-a chuan,"A va lawmawm tehlul em, i dam chhuak ta maw!" a lo ti thuai a.

Nikhaw hre lova Lazy H a Sudden-a an hruai atang khan ni sawm zet a ral tawh a.Chair nuam taka thu chungin Billy Hornby-an nikhaw hre lova a awm atanga thil thleng a sawi chu a ngaithla a. A bulah chuan hmel hlim takin Jenny Hornby leh Doc Hight-a an thu ve a.Doc High-a chu ban a awrh hlan nghe nghe a.
Billy-a chuan,"Cotton-a te ho chu tumah hmuh tur an awm ta lo.Banker Fred Moot-a pawh kha a tlanbo nghal a, a hmanhmawh viau a ni ang, a bungrua leh a thawmhnaw pawh pakhatmah a chhuahpui hman lo,"a ti a
Hight-a chuan "Pawisa a la hman lo kha a tihzia ngawt mai," a lo ti ve bawk a. Chutah,"Mi pakhat, Mr.Sandberg-a a lokal a,Territorial Legislature a an Land Inspector a ni a. "Twin Peaks a sawrkarin tuikhuah a tum thu kan lo hre lo chu mak a ti ngawt asin. An tuikhuah tumna hmun chu heta tanga hlalo te phaizawl tawpah khian alo ni nghe nghe awm e," a ti a.

Billy-a chuan, "Thil thlen dan kha kan lo hrilh a. Ani chuan Sim Cotton-a a hmuh tawh thu leh a chan tur tawk chiah a hmu nia a ngaih thu a sawi nghe nghe asin," a lo ti ve a.

Henry Hornby-a chuan , "Tun atanga reilote ah tuikhuah a ni ang a, tuite la in helai ram lei chhe deuh lai pawh thlai chinna hmun tha takah an chang dawn a. Chumi hre reng chuan Sim Cotton-a khan helai chhehvel hi a thuhnuaia dah a lo tum a lo ni reng alawm mawle," a ti charh charh a.

Billy-a chuan,"Nang chu rawn kal lo la chuan a thuhnuai a kunin a hnenah tui lakna man chhiah tam tak kan chawi ngei dawn a ni. Helaiah hian eng vanga rawn kal nge i nih ? I rawn teilut ve mai mai em ni ?"tiin a zawt a.

Sudden-a chuan Billy-a chu a han en vang vang a, chutah,"Chutiangte engvanga min zawt nge i nih ?"a ti ta a.

Billy-a chuan,"Ka hre..... bik lo...... Jim. Tu'n emaw a rawn tir che a nih kan ring deuh mai mai ania," buh deuh niah hian a lo ti a.

Sudden-a chuan,"Tu'n emaw Buck Cotton-a nen ka rawn thlen ni takah in inti buai dawn tihte, Sim Cotton-a leh a hote nen kan indo dawn tihte, meipuiin stable ah min kanghlum tep dawn tihte hriain min rawn tir a nih i ring em ni? Chu zawng ni em love, ka rawn vak lut ve satliah mai ania," nui chung hian a lo ti a.

Thil dang an sawi leh hnu chuan Doc Hight-a chuan," Mi thar an rawn pem lut zel ang a, Jim tanpuitu khua a dan kengkawhtu tur kan mamawh dawn a, i awm hlen thei mai lawm ni?" tiin Sudden-a chu a sawm ta a.

Sudden-a chu hmel ngui tak chung hian a nui sak a," In zinga awm chu ka chak khawp mai. Mahse hnathawh tur ka nei tlat a ni," tiin Hight-a chu a hnial ta a.

Hight-a chuan nui var var chungin, "A pawi hle na a,midang tha tak kan nei lawm hei, Billy-a hi," a han tih chuan Billy-a chuan," Kei hi Town Marshal ah ka tang ang maw? Tu'n nge Lazy 'H' hi enkawl ta ang?"a lo ti ha a. Mahse nui hmel a pu leh thuai a, "Doc leh Jenny te nupa an awm dawn tak alawm," a ti ta a.

Jenny chuan Sudden-a lam chu a hawi a,"Jim, kan inneihna chu i hmang ve hman dawn lawm ni?" a han ti a.

Sudden-a chuan, "Ka chak khawp mai. Mahse, Doc-an sakawr chungchuang thei ka ni a a hriat ve leh chhuah ka duh tlat," a lo ti a.

Jenny chuan, "David, kan inneih hnuah chauh sakawr chung a chuang thei a ni tih i hrilh dawn nia," a ti ta a.

Ni reilote hnuah chuan mi pathumte chuan Hight-a inah inthlahna hun an hmang a. Pawn lamah chuan stable thar sa thawm an ri bur bur a.

Pawnah a chhuak a, Sudden-a chuan, "Tunah chuan nun thar a intan dawn ta a,mite pawhin Cotton-a te ho kha chu theihnghilh hun an la nei ve mai ang,"a ti a. Billy-a darah chuan a beng thak thak a, "Billy, dam takin le, tumah lo sualin lo tibuai tawh lovang che," nui var var chung hian a han ti a. Mahse Billy-a hmel chu a ngui raih mai a.

Sudden-a chu a sakawr dum lian tak chungah chuan a lawn a. "Dam takin le,Jim," tiin Billy-a chu a phun sap sap a.

Sudden-a chuan a thiantha tak pahnihte chu an en a,"Green Valley,khaw hming a vuah a rem ve viau mai," a han ti a. A kut a phar a, sakawr chu hmar lam hawiin a kal tir ta a.

Billy-a leh Doc Hight-a chuan Sudden-a chu an thlir zui reng a. Billy-a chuan, "Jim-a thusawi kha ka ngaihtuah a. He khua hi Green Valley tia vuah turin min duh ni ngeiin ka hria," a han ti a.

Doc Hight-a chuan, "A ni ngei ang. Khaw hming dangdai tak chu a ni ngei ang. Mahse a chawi chhan nen a inphu hliah hliah a ni," a ti ta a.

A tawp ta.......

(Like tu leh comment tu te chungah lawmthu ka sawi mawlh mawlh e)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)