SUDDEN AT BAY (Cowboy) - (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

SUDDEN AT BAY (Cowboy) - (Completed)

Unread post by Ngaia » April 3rd, 2018, 5:46 pm

sudden.jpg
sudden.jpg (18.39 KiB) Viewed 26889 times

SUDDEN AT BAY
Re-type : Valmawia Chhakchhuak Mcf

Hahtaka type tu te hi an hahman lo zahsak hram turin kan ngen a che u, mi thenkhatin mahni a type ve peih mang si lo in, a re-type tu hming delete in post mai in ching thin a, a then phei chuan zahna nei hauh lo in mahni hmingte in lo dah thul a zia lo e mai. In hming tih lan in duh ve a nih chuan type ve mai thin teh u, a mi pangai lo zia e mai...


Chapter - 1

"I rawn chhuak dawn nge ka rawn luhchilh dawn che?" Chu thu chu sin deuh rat leh nem lampanga phuh chhuah a ni na a, tharum thawh mai hniallohna a pai ru tlat thung. Zing boruak thiang tak karah chuan a fiah tha lauh lauh hle bawk a. Chu thu rawn phuhchhuak tu chu tlangval la naupang tak, tawng duh hmel tak mai hi a ni a. Levis kekawr hlui khek khawk leh hnathawh thawmhnaw phawkphaw hraw zet hi a inbel a, a pheikhawk bun te pawh chu an thar fahran tawh lo hle.

Chu tlangvalin khua a rawn luh a, khuaa saloon awmchhun, 'The Oasis' an tih kawta sakawr atanga a chhuk laia kawtthlera mi tlem a zawng lo awm te chu, chu thu a han phuhchhuah takah chuan an inthiarfihlim vat hlawm a. Kawngkhar leh tukverh phen atangin chu tlangval, saloon kawngkhar hmachhawn a, a kawnga a puakruk zeh Army Colt phawi mai inpeih a, kâk deuh taia ding chu an rawn bih dek dek hlawm a.

Tlangval chuan, "Buck Cotton, panga thleng ka chhiar ang a, chuti chung pawha i la rawn chhuah duhloh fo chuan ka rawn luhchilh dawn che ania," a han ti leh a.
Saloon tukverh leh in dang atang te chuan chik zeta thlirtu an awm a ni tih tlangval chuan a hai lo.
A lo thlirtu te zinga pakhat chuan, "Saw rawlthar saw Lazy H. Ranch ami, Billy Hornby kha a ni lawm ni? Buck Cotton-a nen chuan engemaw inhmuh thiamlohna an neih le?" a han ti a. A bula mi chuan, "Ka hre bik hauh lo mai, a enga pawh chu lo ni se, a thin a rim ngang zawng anih saw," a lo ti a. A rawn tawngchhuak hmasa kha a bu nghat a. He khuaah hian Cotton-a te chhungkua nena buaina neih chu thil hrisello ber a ni tih tlang hriat a ni a. Chuvangin chu tlangval la naupang tak mai pawh chuan tullo tawpah a nunna a hralh niin a lang.
"Pakhat," Hornby chuan a han ti a, "Pahnih, pathum, pali, panga!" A mi cho a chu a la rawn chhuah tak loh fo avangin Hornby chuan "Buck, ka rawn luhchilh dawn che a nia," a ti ta a.

Ratwing door su hawnga saloon a tlangval lut an hmuh chuan saloon tukverh hrul atanga amah lo thlirtu te chu bangah an bet chawih chawih hlawm a. A la hma deuh bawk a, saloon ah chuan mi sawm chuang awrh chauh an awm a. Chungho chuan tlangvalin a cho pa, bar dawhkan sir tawp lama ding chu "Engtin tak che ang maw?" tiin an thlir thap hlawm a.
Hornby-an a rawn choa chu tlangval la naupang ve tak tho, kum sawmhnih mi vel chauh hi a ni a. Thawhnaw dum fai zet mai a inbel a, a boot bun pawh chu chhe hran lo tak a ni. A pianhmang pawh chu a chhelo zek a, a hmel sen uk deuh kharh thin chu a dang deuh lap a. A heh a pet ruh tlat bawk a. Tanpui tu hmuh mai beiseiin pindan chhung ami te chu a melh kual ruai a, mahse tuman rawn inrawlh an tum lo. Thinrim tawpkhawka amah rawn luhchilhtu chu lo hmachhawn an chak tehchiamlo ni ngei tur a ni.
Buck Cotton-a chuan a heh ro zet chu ângin, "Hornby, ka hmachhawn lovang che. Nang nen hian inhmuh thiamlohna kan nei lo," a han ti a.

Lazy H tlangval chuan "Kan nei chiang khawp mai. I puakruk kha phawi la a ni ringawt mai, vervekpa," vin zet hian a lo ti a.

Bar nghaktu, pa sang tak, chal kawlh rul mai chuan hmuh theih ngei tura a kut pahnih dah chhuak chungin Hornby chu a hnaih phei a, "Billy, in bengdai hram teh. He thil hian buaina lian zawkah a hnuk lut ang che tih a hlauhawm teh ania. Thil tha lo zawk a thlen hmain i sakawrah lawn la, khua hi chhuahsan zawk mai teh," thlem ti tih hian a han ti a.
Billy Hornby chuan "Blass, nang chuan i zu um bak lo buaipui ve duh suh. He thil hi kei leh sawlaia utawk inkar saw a ni," a lo ti hmiah mai a. Bar sir leh lama Buck Cotton chu "Uicho ang lekin i thi tlaw mai dawn nge mipa angin min bei let ve dawn?" tiin a han cho zui a.

Inbeih a duhlo tih entirnan Buck Cotton-a chuan a kawng zawn atangin a kut a rawn lek chhuak a, hriat theih chang chang hian "Billy, engvanga ka chunga thinrim nge i nih ka hre love......i lakah silai ka chuh heklo ang," a han ti a. Anmahni lo thlirtute lam chu a hawi a, "In zavaiin ka thu hretu te in ni. Puakruk ka chuh dawn lo. Ka unaute......" a ti hman chauh a, Billy Hornby chuan "I
unaute ho nen chuan anchhedawngin awm rawh u," a lo ti tuar a, puakruk a chuh nghal a. Buck Cotton-a chu a tin rap a, silaimu leng lak tawn palh hlauin midang ho chu an lo tawlhsawn rawk rawk hlawm a. Hornby chuan "I nihna ang chiahin uicho angin ka thih tir che a ngai dawn ta anih hi. Chu chu i phu tawk lek a ni," a han ti a. Puakruk cheng chu a kut zungpuiin a kuai kau nghal a, Buck Cotton-a hlau lutuk chu bar nghengin a ip chawih a, a ding khur hlawk hlawk mai a.

"Hornby, che tawh suh,"
Tlangval chu a ding mar zawt a, silaimu thlawhchhuah tira a thil tum hlen tur chuan a kut zungpui thlah chauh a hmabak mek laiin rawn inrawlh an awm ta tlat.
"Nauva, i silai cheng kau kha sût rawh, muangchangin,"

Hornby-a tih loh midang ho chuan thupek rawn chhakchhuaktu, inchei uluk tak, sam tuak var va tawh, a vest kawr awma arsi lem intar lam chu an hawi thap a.

An zinga pakhat chuan, "Hlauh mai a! Buck Cotton-a saw kan chân ngei dawn niin ka lo ngai hman tawh asin le," a han ti a. A bula mi chuan, "Harry Parris-a saw second sawm velin rawn tlai ni sela chuan kan chan ngei ang," a lo ti ve a. Midang pakhat chuan fiamthu tih hriat tak hian, "Manganlai taka min chhanchhuak thin tu sheriff kan nei hlauh hi chu a vanneihthlak teh e," a lo ti ve bawk a. A tawng dan atang chuan sheriff chu a nuihsawh hle tih a hriat theih a.

Sheriff chu muangchangin bar lam pan chuan a rawn phei chhut chhut a, a puakruk chu a vilik zauh a, "Billy, i silai kha thlauh rawh. Ka puakruk hian a tin zawn nasa che a nia," a han ti a.
Puakruk thlauh mai lo chuan Billy chu a han tawi khawmuang leh rih a. Sheriff in a silai a kau rik takah chuan hreh zetin a puakruk chu a thlauh ri ta dat a.

Parris-a chuan, "Hornby, muangchangin tawlhsawn rawh," tiin thu a han pe a. Hornby-a chu hnunglamah pen hnih a tawlh sawn a. Chu veleh Buck Cotton-a chuan a silai thlauh kha a chhar vat a, Hornby-a thin hnun zawnah chuan a han tin a. Tunah chuan a hlau thlabar hmel kha a reh tawh a, ngeiawm zeta nui then sawng chung hian " Tawhkhirhpa, tu maw kahhlum i tum kha?" a ti phar phar a.

Hornby chuan, "I thianpa rawn inrawlh hma khan lo kaphlum daih che ila a tha tur, dam reng tlak i ni thlawt si lova," a lo ti a.
Buck Cotton-a chuan "I hmui kha chip ringawt mai rawh, i tawng hnem lu hrat a ni. Chuti lo chu ka chip hlen tir mai ang che," tiin Hornby chu a han vau a.
Parris-a chuan, "Buck, inbengdai rawh. Khawi hmun mah a thleng chuang lovang. Nauva......." a ti a, Hornby-a lam chu a hawi a, "Enge i thiltih hi a awmzia? Engvanga khua rawn chawk buai a, kan tualchhung mi hlun berte zinga pakhat rawn ti buai nge i nih?" tiin a han zawt a.

Billy Hornby chuan "Amah kha zawt la a ni mai alawm. A chhan chu a hriat vek kha," bung zet hian a lo ti a.

Buck Cotton-a chuan nuamlo a tih hmel hle a, mahse a han in sangmar a, "Min rawn tibuai ringawt mai a ni. A thusawi kha enge a awmzia ka hre hauh lo," a ti ta a. Parris-a chuan pawr deuh chhur hian "Hornby, i thiltih hi i sawifiah hle a ngai ang. A unaupa thah i tum chhan hi Sim Cotton-an a hre duh ngei dawn ani," a han ti a.

Hornby-a chuan a dar a chhin ak a, a chetzia atang chuan eng thu pawh sawi se thiam chang chuanglo turah a inngai ni hian a lang ber a. Deu sawh awka zet hian "I boss chuan ka thusawi a ngai pawimawh duhin i ring a maw?" Sheriff chu a han tih khum a.
Parris-a chuan "Sim Cotton hi ka boss a ni lo tih hre tawh ang che. Helai chheh vela dan ken kawh hi ka hna a ni a, tuma'n min thunun lo," a lo ti hmuk a.
Hornby chuan ngaihpawimawh loh hmel fe hian "A lo nih tak chu Harry, vawk pawh hian thla an nei asin," a lo tih khum a. Buck Cotton chuan "Nester, tawng fimkhur deuh rawh," vin zet hian a lo ti a.

Parris-a chuan "He thil atanga i tal chhuah meuh chuan i upa sawt ngei ang mawle. Ralthuam nena mi sawisak..." a la tih mek lai chuan Hornby-a chuan "Parris, i thil tum chu ti tlang mai rawh. Thiam inchantir tum duh lem suh. Sim Cotton-an a rawih chhan che chu ti mai rawh," a lo ti a.

Blass-a, bar nghaktu kha a rawn inrawlh ve ta a. "Billy, chutin ti reng reng suh. Dan ang thlapin i chungthu rel a ni ang. A ni dawn lawm ni Harry?" a han ti a. "Ni dawn e," sheriff chuan a han ti tak na a, a thusawi chu rin ngam chi a nih leh nih loh hriat har tak a ni. Bar nghaktupa chuan "Tlangval, chuti anih chuan thil awmdan i sawi thei dawn anih chu. Jury......."a la tih lai mekin Hornby-a chuan "Jury i ti elaw? Cotton-a te ho thlankhawm maw? Blass, helaiah hian hruizen bakin ro an rel ngai hleinem. Midang engemaw zat chunga an tih ang bawkin Cotton-a te ho chuan tlanbo tuma min puhin min kaphlum mai ang," a lo ti a.

Buck Cotton chuan "Ngawi chip cham rawh," a lo ti thawt a. Hornby-a hmaiah chuan a beng zui thuai a. Hornby-a hmui kak atang chuan thisen a rawn far chhuak zaih zaih a. Hornby-a chu a tawlh let dawrh a, a kut a hum ruh ve nghal a. Chu veleh sheriff chuan puakrukin a hnungzang a rawn hawlh nghal a, Hornby chuan a kut hum ruh chu a phelh a, Cotton-a chuan a bekah a rawn ben sak leh ta a.
Bar nghaktu chuan, "Ngawi lawk teh u, ......." a ti hman chauh a, Parris-a chuan puakrukin a rawn tin a, "Blass, lo inrawlh ve suh," a lo ti hmuk a.
Buck Cotton-a chuan Hornby chu a han beng leh thuai a, "I rorum hle maw kha? I farnu induh zet pawh kha a rorum khawp mai. Tunah chuan induh thei a ni tawhlo a ni lawm ni?" pawr zet hian a han ti a. Billy Hornby-a thinrim lutuk chu mihring rawl pawh ni awm lo tak hian a rawn rum chhuak a, Buck Cotton-a chu a tawlhlet dawrh mai a.

"Mi bawlhhlawh pa," tih thawt pahin Hornby-a chuan Buck Cotton-a hrawka reh tumin a kut a rawn phar chhuak a, Buck Cotton-a chu a tawlhlet dawrh a, Sheriff Parris-a pawh chuan then sung chungin a puakruk chuan Hornby-a tukkhum chu a han tin zawn a.

Silai vawi hnih a rawn puak thuai thuai a, silaimu pakhat zawk chuan Buck Cotton-a puakruk Colt Army model chu a thlawh phei lawp a. Bar hnunglama zu um intung chu a va deng keh rawp a. Silaimu pakhat zawk chuan sheriff ban dinglamah chuan a rawn deng a.Sheriff chu a vir nawk a, a puakruk chu a han hmet puak ve na a, pawngpaw hmeh puah mai anih avangin pawikhawih a nei lo. Silai rawn hmet puaktu lam chu phawk zet hian a han en a. Buck Cotton pawh chuan rawn inher pahin puakruk phawi tumin a kut chu a kawngbawr lamah a han vai thla a. Aw hian "Han inngaihtuah nawn teh," thum chhak hian a rawn ti a. Chu awka chhuak chu a ringlo hle na in a hlauhawm ru riau a, chuti maia han palzam chi a ni tlat lo. Parris-a chuan "Mister.......tunge i nih?" tham deuh tuak hian a rawn ti chhuak a.

Silai rawn hmetpuak tu chuan "Green tiin min ko," tiin a chhang a. Saloon bang nghengin a ding a, uai deuh dara a cigarette peh khu chu ceiling lamah a zam chho ngiai ngiai a. Green-a chu cowboy naran ni ve mai hian a lang a. Kum sawmhnih mi vel, kawng fek ret rawt, dar pharh hlai hlap mai hi a ni a. Cowboy thawmhnaw pangngai kawr dum pawl hlui lam deuh leh savun chap (kekawr chhana an hren beh thin) a inbel a, silk puan hlai tak a awrh a, boot ke artui sang tle var mai hi a bun bawk a. A kawngbawr tawn tawn a fual deuh hnaka a puakruk pai chauh chuan cowboy naran a nilo tih a tilang a ni.
A hmui hmai chu a met fai vang a, a hmai chu nisa tuar ngun tih hriat tak hian a uk deuh kharh a. A biang ki ruh chu sang ve deuh phei sela chuan Indian emaw tih mai tur a ni ngei ang. A kareh atang chuan nuih a heh hmel hle na a,a mitmeng erawh rum tak a ni thung.

"He mikhual hian a inrawlhna hi enge anih a hrelo anih hi," ti rilru chungin Parris-a chuan bar nghaktupa lam chu a hawi a, "Blass, hepa rawn intah luhna hi enge a nih chiah han hrilhfiah teh," a han ti a. Green-a chuan "Buaina a ni mai alawm. Ralthuam nei ve lo thah tumna a awm phawt chuan ka inrawlh ve ziah thin. Nang kha awm hle hle rawh," a han ti a. Buck Cotton-a, puakruk lo ban ru da da lai chu a ding mar zawt a. Green-a chuan "Mi thah ka hreh vang liau liau a warning pe che ka nih kha," Cotton-a hnenah chuan a ti bul hmak a.

Buck Cotton-a chuan "I tawng theih ang bawkin hmelma hmachhawn pawh i theih ngei ka ring. I lo hre rihlo na a, i lo inrawlh ve na hi i nun ti tawitu tur a ni tih i la hre thuai ang," a han ti a. Green-a chuan "Min ti hlau hlum dawn alawm mawle. Hlauh luat avangin ka khup pawh a inkhawng hlawk hlawk mai," a lo tih khum a. Hornby-a hnenah chuan "Kan sarivaithun pahnih te kha kalsanin kawngkhar lam saw pan teh," a han ti a. Hornby-a chuan hrilh anih ang chuan a ti nghal a. Green-a pawh chu kawng khar lam pan chuan a tawlhphei ve nghal a. Buck Cotton-a te thlabar pawhin ngai an awh leh deuh tawh a. Cotton-a chuan "Green, ramri lam pan nghal i tan a tha ang. Helai vela i tal tam chuan i nunna khan naia sen pawh a tluklo ang," insehruh teuh chung hian a han ti a.
Hornby-a chuan "Green, a sawi dik chiah a nia. He khua hi Sim Cotton-a thuhnuaia awm a ni a, min hlin fuh vaih chuan vankai chaw pawh kan ei hman lovang," a ti sar sar a.

Green-a chu a bu nghat a, "Pawnah sawn i sakawr a awm maw?" tiin Billy chu a han zawt a. A ni chu a lo bu nghat a, Green-a vek chuan "A that chu, khua hi i chhuahsan vat teh ang," a ti a. Chutah Cotton-a te hnenah chuan "Ka tin tawh hi chu ka kap thelh khat viau ania, kawngkharah hian in ring rawn fan chhuak lo ula in tifuh ang," a han ti a.
Buck Cotton-a chuan vin teng zet hian "Mikhualpa, i theih lai khan thlawkbo vat mai teh. Ka unau ten ui chuang thahin an rawn that ngei dawn che a nia," a lo ti a.

Green-a te pahnih chu kawngka bulah chuan an tawlh phei a, chutih lai chuan saloon kawngkaah chuan pa sang zet mai hi a rawn lang ta a. Sheriff Parris-a hmel hlim ta sawt a han hmuh chuan Green-a chuan inher a han tum a, rawn kal thar pa chuan a luah puakruk kawmin a rawn chhu ta chawrh mai a. Green-a chu a thu hnawk a, chupa chuan Billy Hornby-a bengah chuan a rawn man a, phih per dawrh pahin a han chhu zui a. Billy Hornby pawh chu nikhaw hreloin a let ve ta reng mai a. Reiloteah Green-a te pahnih chu ui thi hnuh takin jail lam panin an hnuk phei ta dawr dawr a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 4th, 2018, 10:21 pm

SUDDEN AT BAY
Chapter - 2

"Hei hi ringtute chawlhlawkna Paradise an tih hi anih ngai chuan rilru a tihnual rawih alawm mawle," Sudden-a rawn harhchhuak chuan a ti bal bal a. Billy Hornby chuan a lo nuih tha a. A thian chhar thar chu a han thlek a, a lu a thing nar nar a. "Mr. Green, kan ngaihdan a inang chiah anih chu," a han ti a.
An pawr dun phang mai a, an thawmhnaw te chu a paw thur a, an rang nuau bawk a. Billy-a chal kak atanga thisen rawn chhuak chu a khir uar mai a, Green-a sam chu thikhar in a char chuat mai bawk a. Nikhaw hrelova an awm laia kawtthler rualremlo zet mai a dim baksaklo a an hnuhna avang khan an hmai leh kutte chu a pilh pheng phung mai a. Green-a chuan "Kan ke rekah min hnuk anih hmel hle mai," a ti a. A ke leh kut an phuarna chu a han endik a. 'Min phuar nghet kher mai," a han ti a. A han tal chhin a, ti thang takin an phuar tih hriat reng hian an phuarna hrui chu a tawlhsawn chhin eih lova. "Min dahna hi jail em ni?" tiin Hornby chu a han zawt a.

Hmel ngui zeta an khungna pindan chep zet mai melh kual pah chuan Hornby-a chu a bu nghat a, "Saloon ep chiaha awm ania," a han ti phawt a, "Mr. Green, i mi puihna avang khan lawmthu ka la hrilh hauhlo che a......" a la tihlai mekin Green-a chuan "Sawi tham engmah a awm loh kha;" a lo ti thuai a, chutah "Ka thiante chuan Jim tiin min ko thin," a han ti zui a. Hornby-a chu a en vang vang a, tun atana a thilhriat duh ber chu a zawt ta a.
Green-a zawhna chhangin Billy chuan "Buck-a kha an unau zinga naupang ber a ni a, midang te chu Art-a leh Sim-a te an ni a. Art-a nen chuan in inrual vel ang. An upa ber Sim-a chu kum sawmthum leh panga vel a ni," a ti a.
Green-a chuan "He khaw hming pawh hi an pa ber hming chawia sak a nih ngei dawn chu. Amah a la dam em?" tiin Billy chu a han zawt leh a. Billy chuan a lu a thing a, "Zeke putara chu nikum hmasa lam khan a thi tawh. American Civil War a a tel hnuin helai ramah hian a rawn pem lut a, khua atanga hmar lamah sawn Cottonwood ranch a din a.Khua atanga chhimlam mel 50 vela hlaah sawn sipai hmunpui Fort Lane an tih chu a awm thin a. Zeke-a chu sumdawn thiam tak mai ani a. Sipai ho chuan han chawlh hahdamna leh intihhlimna hmun an mamawh dawn tih hriain a ranch leh Fort inkar kawng chanve velah chuan saloon dinin dawrte a siam ta a. Texas atangin a laina hnai te a chah lut bawk a. Chuti chuan he khua hi a lo ding tan ta a, Cotton Town tia vuah a lo ni ta a ni," a ti charh charh a.

Hrethiam takin Sudden chuan a lu a lo bu nghauh nghauh a. Army ho thil an supply avangin pa tam tak chu an ding chhuak reng a ni. "Fort ah chuan bawngsa leh sakawr a supply thin ani maw?" a han ti a.

Billy chuan "Supply thin e. An thil mamawh ang zawng zawng chu a tum vek a, tumah an inrawlh ve theilo. A hnu deuhah chuan sipai ho chu an insawn ta a ni," a ti a. "Engtik hun laiin nge?" tiin Sudden chuan a han zawt a. Billy Hornby chuan "73 vel khan, tunah chuan Fort chu a ram tawh. Mexican beram vulhtu tlem a zawng an khawsa a, anni ho tih loh chu mel za huam chhungah tumah khawsa an awm lo. Helai phaizawl ti hulum tu chu Cotton town chiah hi a ni. Helai vela chengte hi chu Cotton-a te thu thua awm an ni a, Zeke-a a thih khan Sim-an a rawn thlak a, tunah chuan he khua hi a ta a ni. A duh duh in lal a hrawt kual vel a, Cotton-a te dodal tu chu....." a ti a, a kut zungchal chu a nghawng zawnah a kham pheiin a han lek a. "Anih leh nang hi?" tiin Green-a chuan a zawt zui ta zel a. Billy chuan "Khua atanga chhim lamah sawn rancu chhete Lazy H ka nei ve a. Ka pa chuan Zeke-a thih rual vel bawk khan min boral san a, theih tawp chu ka han chhuah ve tak na a, hmasawn a har khawp mai," a ti a. "Khawiah nge i bawng i hralh thin?" tiin Green-a chuan a zawt leh a. Billy chuan "Silver City ah. Mahse keimahni ngeiin kan hralh phalsak kan ni lova, Cottonwood ranch in min leisak a, anni ho chuan Silver City ah an va hralh ta thin a ni," a ti a.

Green-a chuan "Bawng man chu awm an tih ang tawk an pe mai thin che u i tihna a ni maw? Silver City lama mahni bawng hralh tum an awm miah nange?" a ti ha a.
Billy chuan "Tualchhung mi pahnih khat chuan an tum tawh. Zan lama rûn an tawhloh pawhin lambuna an bawng hnawhdarhsak vek an tawk leh mai thin. An sim chiang khawp mai. Chuta tang chuan bawng hralh tur nei reng rengin i he lovin Cotton-a te an pan nghal chat zel mai a ni," a ti ta a.
"Cotton-a te chuan kawng lakah buaina an tawk ve ngai hauhlo ang maw?"

"An tam tham avangin tuman an tibuai ve ngamlo niin an inchhal.......ni e, buaina an tawk ve ngai lo."

Sudden chu inngaihtuah bing tih hriat tak hian heh pet fan chungin a han thu ngawi vang vang a. Khum ruh zetah chuan a thut dan chu siam remin a kut leh a ke chu a han mar a, "An mi phuar dan chu Indian ho min phuar emaw tih mai tur alawm mawle," a ti bal bal a. A awmdan chu a hma aiin a nuam zawk deuh na a, a taksa pum pui mai chu a sil vel them thum mai a. "Chu, Cotton-a te chuan in bawng leh in thil mamawh man a bithliah sak che u tihna a ni maw?" a han ti a.

Billy chuan "Ni chiah e, a sawiseltu an awm vaih chuan kawmkarah lu ruh keh buaihin an ruang an chhar mai thin," a ti a.
Sudden-a chu a inngaihtuah buai hle a. Cotton-a te chet dan chu khawthlang lam ramah chuan thil thar a ni lo. Lincoln county ah pawh hetiang thil avang hian indona namen lo a chhuak nghe nghe a ni. "Ranch neitu tenau emaw tualchhung miten emaw do dalna an lantit ngai hauhlo em ni?" tiin Billy chu a han zawt a.
Billy chuan "Mi tlemte, an thil tih dan dodal ngam an awm a, mahse an chan a chhe thei em a ni," a ti ngui raih a. Green-a chuan "Anih leh ka rawn inrawlh ve na thil kha enge anih chiah chu le?" tiin a zawt ta a.
Billy-a hmel chu a rum sawt a. "Jim, sawiloh ka thlang zawk na a, i hriat ve ngei a tulin ka hre tlat si. Tukin khan kan ram fangkualin ka vak chhuak a, in ka han thlen chuan ka farnu, kum 18 mi chu chhuatah a lo let reng mai a. A kawr te chu a tet hne hnu mai a," a ti a, a in pet ruh fan fan a. Chutah "Thlabarna in a khat a, mahse hliam erawh chuba tuar lo. Buck Cotton-a a rawn kal thu a sawi a, ka chet lak dan tur a hriat reng avangin a bak chu engmah min hrilh duh lo. Ka kal bo hun a chang reng a ni awm e. Chutichuan.....," a ti a, a thinrim lutuk chu a in thing nawk nawk a. "Fort hluia mexican hmeichhe pakhat hnenah ka dah a, Bâk, hremhmun thlawhchhuahsan tluk zeta hmanhmawhin khua ka rawn pan ta a. Ka farnu enkawl tura Doc Hight-a ka tirh hnu in Cotton kha ka zawng ta a ni. A bak chu i hriat vek kha," a ti a.

Green-a chu a ngawi vang vang a, chu tleirawl thin so thut chuan thil tha lo tak a hmachhawn tir ta a ni. "Cotton-a te ho chuan engtia min tih nge an tum ang aw?" ama hriat tawk lek hian a han ti sap a. Billy-a chuan chil a chhak thawt a, "Hun remchang ka neih lai khan lo thah daih tur," a ti nghat a. Green-a chuan "I thah mai chuan chet a tum ve si lova, thiamloh i chang mai lovang maw? Kha Parris-a khan thiamloh chantir che a châk nasa mai bawk si a," a lo ti a. Chutah a farnu enkawl tu chungchang chu Billy-a chu a zawt ta a.
Billy chuan "Jenny chu Doc Hight-an a enkawl thei ang. An inneih thuai tawh ka ring nghe nghe. Kan bathlara an khawsak dun vel dan atangin an rial rei tawhin ka ring lo," a ti a.
Green-a chu a nui sak a, "He Doc Hight-a hi pa tha tak niin a lang a, khuaah hian rin ngam tur dang an awm angem?" a han ti a. Billy chuan ban charh hian "Bar nghaktu Blass kha pa tha tak a ni na a, Cotton-a te thuhnuaia kun a ni tlat mai a. Oasis saloon saw cotton-a te ta ania, Bob Davis-a, store neitu leh khua atanga chhim lama ranch neitu te nau zinga pahnih vel chu an rin ngamin ka ring. Chumi te ho zawng chu an ni mai. Jim, he khua hi Cotton-a te ta anih hi. He thila ka han hnuklut ve che hi pawi ka ti takzet a ni," a ti a.

Green-a chuan a chhanglo a, tanin pindan zimte chu chik tak hian a melh kual a, an dahna pindan chu feet ruk bial awrh tur chauha zau hi a ni a. Chhuatah chuan buhpawl a in chap a, eng leh boruak luhna turin feet sarih vela sangah hian tukverh zimte hi a inhawng a. Tukverhah chuan thir tlawn a inkham bawk a. Kawngkhar chu Oak thinga siam awmkhauh zet mai hi a ni a. Bang chu chirh leh lung char khawma siam a ni a. Green-a chuan "Min phuar hauhlo mahse tlanchhuah theih a in beisei awmloh kher mai," a ti bal bal a. Green-an pindan a thlek kual vel lo en rengtu Billy chuan "I ngaihthlak duh ka rin loh avangin a tirah khan a beidawnthlak zia ka hrilh duhlo che a nih kha," a lo ti a. Green-a chu a nui sak a, "Keimah ngeiin han belhchian ka duh ve reng reng a," a ti mai a. Billy chuan "Jail aia an sak rinawm awmchhun chu Bank chauh saw a ni," a lo ti a.

Thudang an sawi leh hma in kawngkhar kalhna chu a ri rak rak a. Kawngkhar chu a rawn inhawng a, sheriff Parris-a a rawn lang ta a. Kawng dawm meuh hian a mitang pahnih te chu a thlir vung vung a, a nui then thu bawk a. A hnungah chuan pa pahnih sa tha deuh mai shotgun keng hi an ding bawk a. Parris- chuan "Rebel Army (American Civil War laia sal neih duh lam, chhimlam sipai) pawh zuk ang che u a mawle. In lu ah engin emaw a tlak che u a ang hle mai," a ti zut zut a. Amah rawn hnaih zawktu hnenah chuan "An kut leh ke phuarna hi han phelh sak teh. Nangni pahnih kha fimkhur hle ang che u. Rackson hian thinphut a nei a, a kut zungchal hi a chet palh hlauh ange," a han ti a.

An ke phuarna an phelh hnu chuan an ke mu tih reh tumin an per tak tak a. Green-a zawhna chhangin Parris-a chuan "Khawiah maw in kal ang? Saloon ah in chungthu relsak turin hruai in ni dawn alawm," a ti a, a nui zui huk huk a. Billy chuan "Engvangin maw?" a lo ti ha a.

Parris-a chu a ha, meizial ur un(g) lang thu hian a han nui a, "Dan kengkawhtu duty lai tihbuai vang te, ralthuam hmanga sawisak vang te, vantlang nun kal tluang pangngai tihbuai vangte, khawchhunga silai ti puak a dan kengkawhtu kahhliam vangte, helna chawh chhuah tum vangte leh tualthah tum vangte in mawle. Haman-a aia sanga khai kan theihna tur che u chhan tam tak a awm a ni," a ti ta duah mai a.

"Min khaihlum ang maw?" Green-a kut chu phuar tlat a niin mi pahnih in shotgun nen an dinchilh reng na a, a awka chhuak chu a nelawm loh em avangin Parris-a chu a tawlhlet dawrh a. "Veng ngun rawh u," a ti tial ruan a.
Green-a chuan "Min ven ngun a ngai hle reng ang," a han ti phawt a, "Eng dan leh dun phiangsen nge helaiah hian i lekkawh?" tiin sheriff chu a zawt ta a.

Parris-a chu ngeiawm zet hian a han then suk a, "Eng dan nge ka lekkawh i hre thuai dawn alawm. Kal rawh u, thuai vat," vin zet hian a han ti a. Deputy pakhat zawk chuan a shotgun chu a han ti che zoh a, mitang pahnih te chu kawtthlerah an chhawm chhuak ta a. Kawtthlerah chuan mi an lo thahnem hle a, saloon a an hruai luh chuan mi an rawn inhnawh lut nghal tup tup a, an tawng mur mur bawk a. Bang hrula thutthleng leg dawhkan an hnawl khawmah chuan thuthmun an rem a. Saloon pindan lai tak chu tih ruah a ni a, saloon hnunglam bang hrulah chuan chair leh dawhkan hi a inhung a. Green-a leh Hornby chu tlar hmasaa thutna awlah chuan an thuttir a, deputy pahnih te khan an laitat a. An zinga thenkhat chu nimin lama thil thleng hmu ve tu te kha an ni a. Buck Cotton leh Billy Hornby te buainaa rinloh taka rawn inrawlh mikhual tlangval chu an hmu duh nasa mai a.

"Ding vek rawh u," tiin Parris-a chu a han au thawt a. Mi te chu an ding suau a, Green-a te pahnih pawh chu deputy te chuan an phih ding zawt a. Green-a chuam saloon kawngkhar lam chu a va en a, pa te reuh te, hang lam deuh, suit buang ha hi a rawn lut mek a. A hmel chu a pawr chap a, a thawmhnaw inbel te chu an bal khek khawk hle a. Zu heh tih hriattak hian a meng sen ram mai bawk a. Mipui zing atang chuan pa pakhat hian "Judge, i han lem hmasa phawt dawn em ni?" a rawn ti a. Aw rawn chhuahna lam chu judge chuan thip zet hian a melh ram ram a. A dinglama deputy meng kal ralh a hmuh chuan Green-a chuan kawngka lam chu a en thuai a.

Midang pawh chu kawngkhar lamah chuan an hawi thup a. Saloon-ah chuan palian zet mai pahnih hi an rawn lut ve mek a, mi chu an phun mar mar a.
Green-a chuan mi pakhatin "Sim-a leh Art-a saw an rawn kal ka ring reng a ni," a tih ri hi a hre thei a. Chumi te pahnih chu Buck Cotton-a unaute chu an ni ngei mai le. A cigarette zial lai chauh ngaihtuah anga lang chung hian Cotton-a te pahnih chu chik zet hian a lo melh ru reng a.
Art Cotton-a chu sang tak, ria lam deuh hi a ni a. A sam dum hlap mai chu tawi tak hian a met a. A hmel pawh chu a chhia tia han chhiar chi a ni hran lo. A kamsir atanga a biang dinglama ser inkham chho chuan a hmui chu pawt ner deuh lo phei sela chuan pa hmeltha tak ni thei tur a ni. A mitmeng chu a thipin tualthah hrehlohna a inphum tel tlat a. Cowboy thawmhnaw pangngai a inbel a, a kawng dinglamah chuan puakruk hrawl zet hi a pai ruang mai a.

Mi mit latu zawk chu a u zawk chu a ni. Sim Cotton chu palian zet mai, feet ruk vela sang, dar pharh hlai hlup mai hi ani a. A kum a upat ve deuh tawh avangin a dul chu a kiar ve deuh tawh a. Han en mai pawhin thupe thang ani tih hai rual a ni lo. A mexican lukhum 'sombrero' khuh phak baka a sam rawn lang chu vutbuak rawng a ni a. A mit pahnih te chu a inhnaih em avangin vawk te pawh a ang thei lek lek a. A thawmhnaw inbel te chu vaivutin a bawh paw hle nachungin a man a to tih hi a hriat hliah hliah a. A dul zawnah chuan sana chain tangkaruaa siam hi a inkhai a. Ngeng ngulh hian pindan chhungril lam chu a rawn pan phei a. An hnungah chuan pa sang zet mai, Cotton-a te unau aia sang daih hi ngawi rengin a rawn lut ve a. Amah chu meng thip zet mai niin a sam chu a dar vaw suau suau hian a zuah a. A hnar chu tliak tawh tih hriat tak hian a per thlur a. Thuthmun an han rem leh hnu chuan chupa en chung chuan Green-a chuan Billy chu a han nghawk salh a.

Billy chuan "Cotton-a te gunman rawih, Chris Helma anih saw," a ti sap a. Green-a chuan Chris Helma gunbelt chei mawi leh a holster, mexican pawisa chhut sawih a cheimawi te chu a en vang vang a, "A ralthuam ilo vel a uluk danah a phawirang thawkhat viau ta ve ang," ama hriat tawk lek hian a ti sap a.
An judge putar khan thing tubohin dawhkan a chhu a, "Court tan a ni ta," a han ti a. A kut eng pap mai a han hmuh chuan Green-a chuan "A muthilh lai tih loh chuan zu no a dawm reng duh hmel hle mai," a han ti sap a. Billy chu a bu nghat a, tawngchhuah a tum lai tak chuan a bula deputy thu khan shotgun hmawrin a nakah a rawn nawr sawk a. Harry Parris-a chu a rawn tho tuih tuih a, dawhkan hmaa thuhretu dinna lam chu a pan phei chhut chhut a. Parris-a chuan "He court hi judge Kilpatrick-a kaihhruaina in neih a ni dawn a. Hnunglam ho kha lo bengchheng tawh suh u. Norris, mitang pakhat zawk kha rawn hruai phei rawh," a ti lung lung a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 12th, 2018, 8:31 pm

SUDDEN AT BAY
Chapter - 2

"Hei hi ringtute chawlhlawkna Paradise an tih hi anih ngai chuan rilru a tihnual rawih alawm mawle," Sudden-a rawn harhchhuak chuan a ti bal bal a. Billy Hornby chuan a lo nuih tha a. A thian chhar thar chu a han thlek a, a lu a thing nar nar a. "Mr. Green, kan ngaihdan a inang chiah anih chu," a han ti a.
An pawr dun phang mai a, an thawmhnaw te chu a paw thur a, an rang nuau bawk a. Billy-a chal kak atanga thisen rawn chhuak chu a khir uar mai a, Green-a sam chu thikhar in a char chuat mai bawk a. Nikhaw hrelova an awm laia kawtthler rualremlo zet mai a dim baksaklo a an hnuhna avang khan an hmai leh kutte chu a pilh pheng phung mai a. Green-a chuan "Kan ke rekah min hnuk anih hmel hle mai," a ti a. A ke leh kut an phuarna chu a han endik a. 'Min phuar nghet kher mai," a han ti a. A han tal chhin a, ti thang takin an phuar tih hriat reng hian an phuarna hrui chu a tawlhsawn chhin eih lova. "Min dahna hi jail em ni?" tiin Hornby chu a han zawt a.

Hmel ngui zeta an khungna pindan chep zet mai melh kual pah chuan Hornby-a chu a bu nghat a, "Saloon ep chiaha awm ania," a han ti phawt a, "Mr. Green, i mi puihna avang khan lawmthu ka la hrilh hauhlo che a......" a la tihlai mekin Green-a chuan "Sawi tham engmah a awm loh kha;" a lo ti thuai a, chutah "Ka thiante chuan Jim tiin min ko thin," a han ti zui a. Hornby-a chu a en vang vang a, tun atana a thilhriat duh ber chu a zawt ta a.
Green-a zawhna chhangin Billy chuan "Buck-a kha an unau zinga naupang ber a ni a, midang te chu Art-a leh Sim-a te an ni a. Art-a nen chuan in inrual vel ang. An upa ber Sim-a chu kum sawmthum leh panga vel a ni," a ti a.
Green-a chuan "He khaw hming pawh hi an pa ber hming chawia sak a nih ngei dawn chu. Amah a la dam em?" tiin Billy chu a han zawt leh a. Billy chuan a lu a thing a, "Zeke putara chu nikum hmasa lam khan a thi tawh. American Civil War a a tel hnuin helai ramah hian a rawn pem lut a, khua atanga hmar lamah sawn Cottonwood ranch a din a.Khua atanga chhimlam mel 50 vela hlaah sawn sipai hmunpui Fort Lane an tih chu a awm thin a. Zeke-a chu sumdawn thiam tak mai ani a. Sipai ho chuan han chawlh hahdamna leh intihhlimna hmun an mamawh dawn tih hriain a ranch leh Fort inkar kawng chanve velah chuan saloon dinin dawrte a siam ta a. Texas atangin a laina hnai te a chah lut bawk a. Chuti chuan he khua hi a lo ding tan ta a, Cotton Town tia vuah a lo ni ta a ni," a ti charh charh a.

Hrethiam takin Sudden chuan a lu a lo bu nghauh nghauh a. Army ho thil an supply avangin pa tam tak chu an ding chhuak reng a ni. "Fort ah chuan bawngsa leh sakawr a supply thin ani maw?" a han ti a.

Billy chuan "Supply thin e. An thil mamawh ang zawng zawng chu a tum vek a, tumah an inrawlh ve theilo. A hnu deuhah chuan sipai ho chu an insawn ta a ni," a ti a. "Engtik hun laiin nge?" tiin Sudden chuan a han zawt a. Billy Hornby chuan "73 vel khan, tunah chuan Fort chu a ram tawh. Mexican beram vulhtu tlem a zawng an khawsa a, anni ho tih loh chu mel za huam chhungah tumah khawsa an awm lo. Helai phaizawl ti hulum tu chu Cotton town chiah hi a ni. Helai vela chengte hi chu Cotton-a te thu thua awm an ni a, Zeke-a a thih khan Sim-an a rawn thlak a, tunah chuan he khua hi a ta a ni. A duh duh in lal a hrawt kual vel a, Cotton-a te dodal tu chu....." a ti a, a kut zungchal chu a nghawng zawnah a kham pheiin a han lek a. "Anih leh nang hi?" tiin Green-a chuan a zawt zui ta zel a. Billy chuan "Khua atanga chhim lamah sawn rancu chhete Lazy H ka nei ve a. Ka pa chuan Zeke-a thih rual vel bawk khan min boral san a, theih tawp chu ka han chhuah ve tak na a, hmasawn a har khawp mai," a ti a. "Khawiah nge i bawng i hralh thin?" tiin Green-a chuan a zawt leh a. Billy chuan "Silver City ah. Mahse keimahni ngeiin kan hralh phalsak kan ni lova, Cottonwood ranch in min leisak a, anni ho chuan Silver City ah an va hralh ta thin a ni," a ti a.

Green-a chuan "Bawng man chu awm an tih ang tawk an pe mai thin che u i tihna a ni maw? Silver City lama mahni bawng hralh tum an awm miah nange?" a ti ha a.
Billy chuan "Tualchhung mi pahnih khat chuan an tum tawh. Zan lama rûn an tawhloh pawhin lambuna an bawng hnawhdarhsak vek an tawk leh mai thin. An sim chiang khawp mai. Chuta tang chuan bawng hralh tur nei reng rengin i he lovin Cotton-a te an pan nghal chat zel mai a ni," a ti ta a.
"Cotton-a te chuan kawng lakah buaina an tawk ve ngai hauhlo ang maw?"

"An tam tham avangin tuman an tibuai ve ngamlo niin an inchhal.......ni e, buaina an tawk ve ngai lo."

Sudden chu inngaihtuah bing tih hriat tak hian heh pet fan chungin a han thu ngawi vang vang a. Khum ruh zetah chuan a thut dan chu siam remin a kut leh a ke chu a han mar a, "An mi phuar dan chu Indian ho min phuar emaw tih mai tur alawm mawle," a ti bal bal a. A awmdan chu a hma aiin a nuam zawk deuh na a, a taksa pum pui mai chu a sil vel them thum mai a. "Chu, Cotton-a te chuan in bawng leh in thil mamawh man a bithliah sak che u tihna a ni maw?" a han ti a.

Billy chuan "Ni chiah e, a sawiseltu an awm vaih chuan kawmkarah lu ruh keh buaihin an ruang an chhar mai thin," a ti a.
Sudden-a chu a inngaihtuah buai hle a. Cotton-a te chet dan chu khawthlang lam ramah chuan thil thar a ni lo. Lincoln county ah pawh hetiang thil avang hian indona namen lo a chhuak nghe nghe a ni. "Ranch neitu tenau emaw tualchhung miten emaw do dalna an lantit ngai hauhlo em ni?" tiin Billy chu a han zawt a.
Billy chuan "Mi tlemte, an thil tih dan dodal ngam an awm a, mahse an chan a chhe thei em a ni," a ti ngui raih a. Green-a chuan "Anih leh ka rawn inrawlh ve na thil kha enge anih chiah chu le?" tiin a zawt ta a.
Billy-a hmel chu a rum sawt a. "Jim, sawiloh ka thlang zawk na a, i hriat ve ngei a tulin ka hre tlat si. Tukin khan kan ram fangkualin ka vak chhuak a, in ka han thlen chuan ka farnu, kum 18 mi chu chhuatah a lo let reng mai a. A kawr te chu a tet hne hnu mai a," a ti a, a in pet ruh fan fan a. Chutah "Thlabarna in a khat a, mahse hliam erawh chuba tuar lo. Buck Cotton-a a rawn kal thu a sawi a, ka chet lak dan tur a hriat reng avangin a bak chu engmah min hrilh duh lo. Ka kal bo hun a chang reng a ni awm e. Chutichuan.....," a ti a, a thinrim lutuk chu a in thing nawk nawk a. "Fort hluia mexican hmeichhe pakhat hnenah ka dah a, Bâk, hremhmun thlawhchhuahsan tluk zeta hmanhmawhin khua ka rawn pan ta a. Ka farnu enkawl tura Doc Hight-a ka tirh hnu in Cotton kha ka zawng ta a ni. A bak chu i hriat vek kha," a ti a.

Green-a chu a ngawi vang vang a, chu tleirawl thin so thut chuan thil tha lo tak a hmachhawn tir ta a ni. "Cotton-a te ho chuan engtia min tih nge an tum ang aw?" ama hriat tawk lek hian a han ti sap a. Billy-a chuan chil a chhak thawt a, "Hun remchang ka neih lai khan lo thah daih tur," a ti nghat a. Green-a chuan "I thah mai chuan chet a tum ve si lova, thiamloh i chang mai lovang maw? Kha Parris-a khan thiamloh chantir che a châk nasa mai bawk si a," a lo ti a. Chutah a farnu enkawl tu chungchang chu Billy-a chu a zawt ta a.
Billy chuan "Jenny chu Doc Hight-an a enkawl thei ang. An inneih thuai tawh ka ring nghe nghe. Kan bathlara an khawsak dun vel dan atangin an rial rei tawhin ka ring lo," a ti a.
Green-a chu a nui sak a, "He Doc Hight-a hi pa tha tak niin a lang a, khuaah hian rin ngam tur dang an awm angem?" a han ti a. Billy chuan ban charh hian "Bar nghaktu Blass kha pa tha tak a ni na a, Cotton-a te thuhnuaia kun a ni tlat mai a. Oasis saloon saw cotton-a te ta ania, Bob Davis-a, store neitu leh khua atanga chhim lama ranch neitu te nau zinga pahnih vel chu an rin ngamin ka ring. Chumi te ho zawng chu an ni mai. Jim, he khua hi Cotton-a te ta anih hi. He thila ka han hnuklut ve che hi pawi ka ti takzet a ni," a ti a.

Green-a chuan a chhanglo a, tanin pindan zimte chu chik tak hian a melh kual a, an dahna pindan chu feet ruk bial awrh tur chauha zau hi a ni a. Chhuatah chuan buhpawl a in chap a, eng leh boruak luhna turin feet sarih vela sangah hian tukverh zimte hi a inhawng a. Tukverhah chuan thir tlawn a inkham bawk a. Kawngkhar chu Oak thinga siam awmkhauh zet mai hi a ni a. Bang chu chirh leh lung char khawma siam a ni a. Green-a chuan "Min phuar hauhlo mahse tlanchhuah theih a in beisei awmloh kher mai," a ti bal bal a. Green-an pindan a thlek kual vel lo en rengtu Billy chuan "I ngaihthlak duh ka rin loh avangin a tirah khan a beidawnthlak zia ka hrilh duhlo che a nih kha," a lo ti a. Green-a chu a nui sak a, "Keimah ngeiin han belhchian ka duh ve reng reng a," a ti mai a. Billy chuan "Jail aia an sak rinawm awmchhun chu Bank chauh saw a ni," a lo ti a.

Thudang an sawi leh hma in kawngkhar kalhna chu a ri rak rak a. Kawngkhar chu a rawn inhawng a, sheriff Parris-a a rawn lang ta a. Kawng dawm meuh hian a mitang pahnih te chu a thlir vung vung a, a nui then thu bawk a. A hnungah chuan pa pahnih sa tha deuh mai shotgun keng hi an ding bawk a. Parris- chuan "Rebel Army (American Civil War laia sal neih duh lam, chhimlam sipai) pawh zuk ang che u a mawle. In lu ah engin emaw a tlak che u a ang hle mai," a ti zut zut a. Amah rawn hnaih zawktu hnenah chuan "An kut leh ke phuarna hi han phelh sak teh. Nangni pahnih kha fimkhur hle ang che u. Rackson hian thinphut a nei a, a kut zungchal hi a chet palh hlauh ange," a han ti a.

An ke phuarna an phelh hnu chuan an ke mu tih reh tumin an per tak tak a. Green-a zawhna chhangin Parris-a chuan "Khawiah maw in kal ang? Saloon ah in chungthu relsak turin hruai in ni dawn alawm," a ti a, a nui zui huk huk a. Billy chuan "Engvangin maw?" a lo ti ha a.

Parris-a chu a ha, meizial ur un(g) lang thu hian a han nui a, "Dan kengkawhtu duty lai tihbuai vang te, ralthuam hmanga sawisak vang te, vantlang nun kal tluang pangngai tihbuai vangte, khawchhunga silai ti puak a dan kengkawhtu kahhliam vangte, helna chawh chhuah tum vangte leh tualthah tum vangte in mawle. Haman-a aia sanga khai kan theihna tur che u chhan tam tak a awm a ni," a ti ta duah mai a.

"Min khaihlum ang maw?" Green-a kut chu phuar tlat a niin mi pahnih in shotgun nen an dinchilh reng na a, a awka chhuak chu a nelawm loh em avangin Parris-a chu a tawlhlet dawrh a. "Veng ngun rawh u," a ti tial ruan a.
Green-a chuan "Min ven ngun a ngai hle reng ang," a han ti phawt a, "Eng dan leh dun phiangsen nge helaiah hian i lekkawh?" tiin sheriff chu a zawt ta a.

Parris-a chu ngeiawm zet hian a han then suk a, "Eng dan nge ka lekkawh i hre thuai dawn alawm. Kal rawh u, thuai vat," vin zet hian a han ti a. Deputy pakhat zawk chuan a shotgun chu a han ti che zoh a, mitang pahnih te chu kawtthlerah an chhawm chhuak ta a. Kawtthlerah chuan mi an lo thahnem hle a, saloon a an hruai luh chuan mi an rawn inhnawh lut nghal tup tup a, an tawng mur mur bawk a. Bang hrula thutthleng leg dawhkan an hnawl khawmah chuan thuthmun an rem a. Saloon pindan lai tak chu tih ruah a ni a, saloon hnunglam bang hrulah chuan chair leh dawhkan hi a inhung a. Green-a leh Hornby chu tlar hmasaa thutna awlah chuan an thuttir a, deputy pahnih te khan an laitat a. An zinga thenkhat chu nimin lama thil thleng hmu ve tu te kha an ni a. Buck Cotton leh Billy Hornby te buainaa rinloh taka rawn inrawlh mikhual tlangval chu an hmu duh nasa mai a.

"Ding vek rawh u," tiin Parris-a chu a han au thawt a. Mi te chu an ding suau a, Green-a te pahnih pawh chu deputy te chuan an phih ding zawt a. Green-a chuam saloon kawngkhar lam chu a va en a, pa te reuh te, hang lam deuh, suit buang ha hi a rawn lut mek a. A hmel chu a pawr chap a, a thawmhnaw inbel te chu an bal khek khawk hle a. Zu heh tih hriattak hian a meng sen ram mai bawk a. Mipui zing atang chuan pa pakhat hian "Judge, i han lem hmasa phawt dawn em ni?" a rawn ti a. Aw rawn chhuahna lam chu judge chuan thip zet hian a melh ram ram a. A dinglama deputy meng kal ralh a hmuh chuan Green-a chuan kawngka lam chu a en thuai a.

Midang pawh chu kawngkhar lamah chuan an hawi thup a. Saloon-ah chuan palian zet mai pahnih hi an rawn lut ve mek a, mi chu an phun mar mar a.
Green-a chuan mi pakhatin "Sim-a leh Art-a saw an rawn kal ka ring reng a ni," a tih ri hi a hre thei a. Chumi te pahnih chu Buck Cotton-a unaute chu an ni ngei mai le. A cigarette zial lai chauh ngaihtuah anga lang chung hian Cotton-a te pahnih chu chik zet hian a lo melh ru reng a.
Art Cotton-a chu sang tak, ria lam deuh hi a ni a. A sam dum hlap mai chu tawi tak hian a met a. A hmel pawh chu a chhia tia han chhiar chi a ni hran lo. A kamsir atanga a biang dinglama ser inkham chho chuan a hmui chu pawt ner deuh lo phei sela chuan pa hmeltha tak ni thei tur a ni. A mitmeng chu a thipin tualthah hrehlohna a inphum tel tlat a. Cowboy thawmhnaw pangngai a inbel a, a kawng dinglamah chuan puakruk hrawl zet hi a pai ruang mai a.

Mi mit latu zawk chu a u zawk chu a ni. Sim Cotton chu palian zet mai, feet ruk vela sang, dar pharh hlai hlup mai hi ani a. A kum a upat ve deuh tawh avangin a dul chu a kiar ve deuh tawh a. Han en mai pawhin thupe thang ani tih hai rual a ni lo. A mexican lukhum 'sombrero' khuh phak baka a sam rawn lang chu vutbuak rawng a ni a. A mit pahnih te chu a inhnaih em avangin vawk te pawh a ang thei lek lek a. A thawmhnaw inbel te chu vaivutin a bawh paw hle nachungin a man a to tih hi a hriat hliah hliah a. A dul zawnah chuan sana chain tangkaruaa siam hi a inkhai a. Ngeng ngulh hian pindan chhungril lam chu a rawn pan phei a. An hnungah chuan pa sang zet mai, Cotton-a te unau aia sang daih hi ngawi rengin a rawn lut ve a. Amah chu meng thip zet mai niin a sam chu a dar vaw suau suau hian a zuah a. A hnar chu tliak tawh tih hriat tak hian a per thlur a. Thuthmun an han rem leh hnu chuan chupa en chung chuan Green-a chuan Billy chu a han nghawk salh a.

Billy chuan "Cotton-a te gunman rawih, Chris Helma anih saw," a ti sap a. Green-a chuan Chris Helma gunbelt chei mawi leh a holster, mexican pawisa chhut sawih a cheimawi te chu a en vang vang a, "A ralthuam ilo vel a uluk danah a phawirang thawkhat viau ta ve ang," ama hriat tawk lek hian a ti sap a.
An judge putar khan thing tubohin dawhkan a chhu a, "Court tan a ni ta," a han ti a. A kut eng pap mai a han hmuh chuan Green-a chuan "A muthilh lai tih loh chuan zu no a dawm reng duh hmel hle mai," a han ti sap a. Billy chu a bu nghat a, tawngchhuah a tum lai tak chuan a bula deputy thu khan shotgun hmawrin a nakah a rawn nawr sawk a. Harry Parris-a chu a rawn tho tuih tuih a, dawhkan hmaa thuhretu dinna lam chu a pan phei chhut chhut a. Parris-a chuan "He court hi judge Kilpatrick-a kaihhruaina in neih a ni dawn a. Hnunglam ho kha lo bengchheng tawh suh u. Norris, mitang pakhat zawk kha rawn hruai phei rawh," a ti lung lung a.

(Min lo post sak mai teh. Fb story group leh whatsapp group ah khan. Vawiin chu signal ka nei chhe ltk a)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 12th, 2018, 8:32 pm

SUDDEN AT BAY
Chapter - 3

Judge hmaa Green-a din tir anih lai chuan pungkhawm ho chu an phun mar mar a. Judge Kilpatrick-a chuan Green-a chu a han thlek a, "I hming?" a han ti a.

"James Green."

"I eizawnna?"

"Bawng ven."

"Green, khawilam chhuak nge i nih?"

"Texas-a seilian ka ni a, Tucson lamah hna ka thawk thin."

"Cotton townah hian engti tura rawn kal nge i nih?"

Green-a chuan "Tih tur engmah ka nei hran lo. Rawn paltlang ka tum satliah mai a ni," a ti a. Kilpatrick-a chuan Parris-a lam chu a hawi a, "Harry, enge i charge na chu? Eng thil sual ti ah nge i puh a?" tiin a han zawt a.

Parris-a chuan mipui lam chu a hawi a, a han insang mar a. Inti thupui fun fahran hian "Ralthuam hlauhawm nena pawikhawih, officer duty lai a tih buai chu keimah hi ka ni..... Khaw huam chhunga puakruk hmeh puah, anmahni kap tum tu kah hliam....chungte chu an thil tihsual te an ni," a han ti a. A thusawi ngaithla tu te chu tim deuh tak chung hian an lo nui hak a. Green-a chuan Sim Cotton-an a mitmei ru reng tih a hmu a. Sim Cotton-a chu muangchangin a han nui a, nui thawm chu a ring sauh a. Sim Cotton-a nui hmel a reh rual chuan nui thawm chu a reh ve nghal a. "Order," tih pahin Kilpatrick-a chuan thing tuboh in dawhkan a han chhu ri bur a, "I thil sawi, Green-a i puhna chu hriatpuitu i nei em?" tiin sheriff chu a han zawt a.

Parris-a chuan "Mister, mi sawmhnih vel zetin mit ngeiin an hmu alawm. Rem i tih chuan anmahni ka ko chhuak thei.....," a han ti a, Sim Cotton-an a lu a lo thing a hmuh chuan a riat nawi ta mai mai a. Judge Kilpatrick-a pawh chuan "Harry, chutiang a tul lovang. Court hian i thusawi chu a pawm e," a lo ti thuai a. Reilote a han inngaihtuah a, "Green, thil hlu deuh kawl i nei em?" tiin a zawt ta a.
Green-a chuan "Pawisa i tihna anih chuan jail a min dah hma chuan dollar sawmnga leh pariat vel ka nei a, mahse tunah chuan ka nei tawh lo," a ti a. Kilpatrick-a chuan sheriff chu a han en a, ani chu a lo bu nghat a. "Kan mitang te chu an ralthuam kan laksak rualin an thil neih pawh kan la tel zel thin," a lo ti thuai a. Chutah "Green-a hian a sawi ang zat pawisa chu a nei ngei alawm. Thildang lehkhathawn, tunge anih ti chiang thei tu lehkha tih vel chu pakhatmah kawl a nei lo. Pawisa tih loh a kawl chu puakruk pahnih ani mai. Enkawl ngun ani tih a hriat em em mai lehnghal a," a han ti a.
Kilpatrick-a chuan "Green, thilsual chi li tia puh i ni a, thil namai lo tak vek anni lehnghal. Mikhual, tunge anih pawh finfiah theih loh, pawisa tlem a zawng kawl i ni a, awmhmun nghet neilo a vak vel mai mai i ni tih chu chuan a ti lang a ni. Nang ang mihring hi Cotton town hian kan mamawh lo. Puh i nihna chi li chu engtin nge i chhan let dawn? I pha dawn nge a dik i ti mai dawn?" a han ti a.
Green-a chuan "Chu chuan enge danglamna a neih chuan ang?" a lo ti a. Mi thenkhat chu an lo nui hak a, nui thawm rawn chhuahna lam chu Sim Cotton-a chuan thip zet hian a han melh run run a.

Judge Kilpatrick-a chuan "I fiamthu thawh chuan i chet dan ang chiahin dan leh thupek i pawisak loh zia a tilang chiang khawp mai," a ti a. Dawhkan chu a chhu ri dawt a. "Thil dang sawi tur i la nei em?" a han ti a.

Green-a chuan "Ka ngah mai. A hmasa berin in sheriff leh saw tlangval saw an pawikhawih tur.....," tih pahin Buck Cotton-a lamah chuan a han thle zauh a, "Ralthuam nei ve lo an that tur ka dang mai a ni. Enge ti se min tih? Thu chungin an tual that lai lo thlir se min ti em ni?" a han ti a.

Judge chuan "Green, Sheriff khan tual thah tumah a puh che a, i thusawi khan a puhna che a chhanglet hauh lo. Sheriff hi kut i thlak reng em?" a han ti a.

"A tual thah tum ka lo dang kha kutthlak i ti anih chuan thlak e,"

"I silai i hmet puak em?"

"Hmet puak e, ka..."

"Mi tang silai an laksak i pe kir leh em?"

Green-a chuan a dar a chhin ak a, "Thu lai la tur siin a zavaiin i hre fai vek niin a lang. Thudik hre siloin thu i lo ti tlu sa vek anih dawn hi," a ti ta a.

Kilpatrick-a thinrim chu a sen tawn tawn a, dawkan a chum bur a, "Ngawi chip cham rawh, Court i zah lo leh lutuk," vin zet hian a han ti a.

Green-a chuan "Ka zahlo tih mai chuan i court ka zah loh zia hi a sawifiah phak lo zawk a ni," a lo ti hmiah a. Sim Cotton-an Kilpatrick-a a mitmei zauh chu a va hmu a. Kilpatrick-a chu chair nghen chhan nghengin a thu awn a, rawmawl sen bal zet hian a hmai chu a han hru a. "Court hian an puhna che kha dik vekah a pawm a, dollar sawmnga leh pariat i chawi ang a, khaw ramri thleng hruai i ni ang a, chutah chuan chhuah i ni ang. He khua hian nang ang mi bawlhhlawh hi chawm a peih ka ring lo," a han ti a.

Green-a chuan "Chutiang chu i ngaihdan anih chuan he khua hian utawk ki nei judge atan nei ta sela chuan tun ai thlawt chuan a changkang zawk daih ang," a han tih khum a.

Sim Cotton-a khan Green-a chu a rawn pan hnai a, "Tlangval, i tawng huai pang pang kher mai. I vanneihna hi um thui lutuk suh ang che," a ti nghut a. Green-a chuan "He khua hian loh theih lohin i thusawi chauh an pawm ani lawmni?" a han ti deuh sak a. Cotton-a chuan "Dim takin i chungthu ka rel tir a, i vannei hle a ni. Mahse Cotton town ah hian rawn let leh tawh hauh lo la i ti fuh ang," a ti a. A aw rawl chu a vinin a ring hranlo na a, chemtea intin tluk zet a hlauhawm a ni tho a ni. Sim Cotton-a chuan Green-a chu a kalsan a, a thutna hmunah deputy khan Green-a chu a hruai phei leh ta a.

Thut pahin Green-a chuan a dar a chhin ak a, a thut duh loh vaih chuan deputy pahnih te chuan an shotgun chuan an verh kaw chuk mai dawn a ni tih a hre reng a ni. Then deuh tha chungin Cotton town tualchhung mi ho chu hmusit tih hriat deuh mai hian a han melh kual a. Judge hmaa Billy Hornby-a ding chu an lo thlir leh thup tawh a.

"Enge i hming?" tiin Kilpatrick chuan Billy chu a han zawt tan a. Billy Hornby chuan "Ka hming te zawng i hriat reng kha, Kilpatrick. Ka eizawnna leh ka chenna pawh i hria a, vak rawlai mai mai ka ni lo tih pawh i hriat kha," a lo ti a.

Harry Parris-a khan puakruka Billy tin pahin "Zawhna chu tha takin chhang rawh. Judge kha a tulloah tihbuai tum hauh suh," a rawn ti a. Sim Cotton-a chuan "Harry, thu rawh," tiin thu a lo pe a. Chu thupek chu Parris- chuan a zawm rang kher mai. A thu tur hmanhmawh lutuk chuan deputy pakhat zawk ke chu a pal a, a thu hnawk mai a. Mi thenkhat chu za fe hian an lo nui a. Cotton-a te unau chu an nui ve hauhlo a. Green-a chuan Art Cotton-a chu chik zawkin a han en a, Art Cotton-a chu a kap kara a kut seipui mai dahin a thu a. Hmalam a en ngur a, engmah hmu leh ngaihtuah hmel pawh a pu lova.

Judge chuan Billy-a chhanna chu a ngaihthlak zawh chuan an puhna sawi turin Parris-a chu a han sawm a. Parris-a chuan pawr zet hian "Judge, puhna ka ngah mai. Mahse a lian ber chu tualthah tum a ni," a ti lung lung a. A lo thlirtu te chu an phun sap sap a, Judge putar chuan dawhkan chu a han chhu ri a, tawng thawm pawh chu a reh ta a. Judge chuan "A ziaawm ta deuh. Hornby, an puhna che chu i pawm nge thiamlohna neilo i inti?" tiin Billy-a chu a han zawt a.

Billy chuan chapo hmel taka dak deuh ar chung hian "Thiamlohna ka nei lo," fiah lauh hian a han ti a. Kilpatrick-a chuan "Chuti anih chuan jury hoin i chungthu rel se i duh tihna em ni?" a han ti a.

Billy chuan "Dawn lawm ni. Kan rannung ho intihhlimna siam sak pawh a tha ve alawm," a lo ti a. Kilpatrick-a chuan"I duh chu i hmu ang. He court hian dik takin i chungthu a rel ang," inti thupui fun fe hian a han ti charh charh a.

Billy chuan "Ka thiamthu sawi nghal mai ila pawi i ti em lovang ti raw?" a lo ti a. Kilpatrick-a hmel chu a dur khap a. "Court hi zah ve deuh ang che, Nauva," a ti bul hmak a. Sim Cotton-a chu a lo bu nghat a. "Tlangval, i lei kha veng fimkhur deuh tawh ang che," Billy-a hnenah chuan a ti bung nghut a. Billy chuan "A tul lem em ni? Enge danglamna a neih chuan?" a lo ti a.
Cotton-a chuan "Tunah hian sum tam tak chawi thei dinhmunah i ding a, sum kawl pakhatmah i neih siloh avangin i ranch saw i chan mai a tul maithei a ni," a ti a. Billy-a chu a sen tawn tawn mai a, sum phei chu neih a nei hauh lo. Mahse a ranch chu chuti maia chan chu a tum lo bur ringawt mai a ni.

Kilpatrick-a chuan "Khaile Nauva, i chungthu chu jury rel i duh amaw?" a han ti a, Billy chu a bu nghat a. Judge chuan "Lawman, jury tur chu han thlang chhuak teh," Sheriff hnenah chuan a ti ta a.

Parris-a chuan "Judge, jury tur chu ka thlang fel vek tawh," a ti a. Buck Cotton-a bula thu ho chu a han nuih a, "Judge bulah hian thutna han rem teh u le," a ti ta a.
Parris-a jury thlanchhuah ho hmel a hmuh a, Billy Hornby-a hmel dur zual sauh chu Green-a chuan a lo hmu reng a. Tih theih engmah a neih siloh avangin Billy-a chuan a lu a thing nar nar ringawt a. An zinga tam zawk chu a hmuh ngai pawh annih hlawm loh avangin Buck Cotton-an ami chhawrte zinga mi enge maw zat a thlang chhuak a ni tih a hre thei mai a. Pawisak neih loh hmel tak hi an ni lehnghal a.

Judge chuan "Sheriff, jury ho kha he case chungchang hi han hrilh ve teh," Parris-a hnenah chuan a han ti a. Parris-a chu Cotton te unau hma hmun awlah chuan a tawlh phei a, Billy Hornby chu a kut zungpuiin a kawk zoh a. "Hepa hi tukin zing dar sawm vel khan khuaah a rawn lut a, saloon kawta dingin Buck Cotton that tura rawn kal anih thu a au chhuahpui ta chiam mai a. Thah a tum chhan erawh chu a sawi lo. Chutihlai chuan Buck-a chu saloon-ah a awm a, kawtthlera intihbuai a duh loh avangin min ko turin mi a rawn tir ta a. Saloon lam chu ka pan ta vat a. Hepa hian puakruka Buck-a kahhlum a tum lai takin ka va inrawlh hman ta hlauh a ni. Buck-a chuan silai pawh a kawl ve lo..." a tih lai chuan Billy chuan "Dawt anih chu. Silai a kawl reng kha," a lo ti a.

Kilpatrick-a chuan "I thusawi chu a dik ngei ani tih hriatpuitu i nei em?" tiin Billy chu a han zawt a. Billy chuan "Nei chiang e. Green-a hian a hmu ve vek alawm. Ani lawmni Jim?" a han ti a. Green-a chu a bu nghat a, "Cotton-a chuan silai chu a kawl ngei alawm," a ti a.

Green-a thusawi chu Kilpatrick chuan ner nung chung hian a lo ngaithla a. Buck Cotton-a chu a en a, "Bucky,ralthuam chu i kawl reng emni?" tiin a han zawt a. Buck Cotton chuan rang zet hian "Teuhlo mai, Uncle Martin, Judge ka tihna," a lo ti a.
Pungkhawm ho chu an lo nui deuh hak a, judge chuan a melh ram ram a. Chutah jury ho lam hawi chuan a inher a, "Jury ho khan hei hi lo chhinchhiah rawh u. Kan mitang thusawi hriatpui tu chu thiltih sual avanga hrem hmabak ve tho a ni a. Kan tualchhung mite zinga zahawm berin an thusawi chu dawt ani tih a sawifiah a ni," a han ti charh charh a. Sim Cotton-a chu a han nuih a, ani chu a lo bu nghut a. "Jury ho hian tu thusawi nge rintlak tih chu an hrethiam mai ang," a han ti a. Jury sawm pahnih te chu an lo bu rual thup a.

Judge Kilpatrick-a chuan "Harry, sawi zel rawh," sheriff hnenah chuan a han ti a. Parris-a chu a han inhmuam up te te a, "Buck-an a cho let duh tak miau loh avangin he tlangval hi a â ta ani ber mai. A mitmengah thisen chhuah chakna a lang ta a. Buck-a chu kahhlum tho a tum thu a sawi a, a chhan erawh chu a sawi chuang lo. Chutihlai tak chuan ka va lut ve ta a ni," a ti zut zut a, sawi fuh intih hmel zet hian a han hawipir kual vel a.

Kilpatrick-a chuan "Hornby, thiam thu sawi tur i nei em?" tiin Billy chu a han zawt a, Billy chuan "Thudik chu khawimaw laiah a awm a, mahse a hmuchhuak tur chuan tun aia i hawi zau zawk fe a ngai ang," a han tih khum a.

Judge chuan "Thudik chu kan hmuchhuak ngei ang tih ring mai rawh," bung zet hian a lo ti a. "Sheriff, sawi zawm zel rawh," a han ti zui a.

Parris-a chuan "Hornby-a pawikhawih tur hruaichhuah ka tum lai tak chuan hepa, Green-a hi a rawn inrawlh thut mai a. Vawi hnih min kap a, a silaimu pakhat zawk chuan min thelh a, pakhat chuan ka banah a fuh a...." a ti a, a ban tuamna bandage thi kai chu a hlim lang a. "Ka vannei zawk hle a ni. Ka silai erawh chu ka thlauh phah thung. Silai ri hria in Chris Helma a rawn tlanlut a, thil awmdan a hmuh veleh he mi te pahnih hi a kuk thlu a, jail lamah kan hnuk phei ta a ni," a han ti leh zut zut a.

Kilpatrick-a chuan "He mi tang hian Buck Cotton thah a tum i ti maw kha?" a han ti a.

Sheriff chuan "Martin, khaw pumpui hriat tur khawpa ringin a au kual vel mawle. Hriatpuitu tam tak ka ko thei....." a tih lai mekin Kilpatrick-a chuan "A tul lovang," tiin a kutin a lo zap a. Jury ho lam chu a hawi a, "In zingah khan Hornby-an Buck Cotton-a thah a tum thu hria emaw, thah a tumlai hmu emaw in awm em?" tiin a han zawt a. An zinga tam zawk chu an lo hu nghat nghat hlawm a. An zinga pakhat hnar ruh tliak tawh tih hriattak hi a rawn ding chhuak a, "Kei hian ka hmu chiang khawp mai, Judge," a han ti a. Kilpatrick-a chu a bu nghat nghat a. "He case hi kan zo fel dawn ta a ang khawp mai. He kan mitang pa hian ralthuam kent ve lo thah a tum tih hriatchian a ni a. Silai nen thah tumin a vau tih finfiah a ni bawk a. Sheriff a rawn inrawlh avang chauha a thil tum puitlin hmanlo tih fin fiah a ni bawk," a ti a. Billy-a lam chu a hawi a, "Sawi tur i neih loh chuan thutawp siam turin jury ho hi ka hrilh mai dawn ania. Sawi duh i nei anih chuan court zahlo takin i ka ang tawh suh ang che," a han ti a.
Billy chuan "He court hi zah loh theih anihna pawh ka hre lova, he thil atang hian fihlim thei pawh ni ila kan sarivaithun rimchhepa hi ka hmachhawn leh tho ang," a lo ti a.

Kilpatrick-a chuan "Chuti anih chuan i tum hmasak pawh khan dan i ni tih a fiah anih chu," a ti nghat a, jury ho lam chu a hawi a, "Jury, in duh tawk in ngaithla tawh em?" a han ti a.

Hnartliakpa kha a rawn ding chhuak leh a, "Kan duhtawk khawp mai judge, thutawp siam turin kan tan thildang ngaihthlak a tul tawg lo. Kha tleirawl khan chiang takin thil a tisual a ni," a ti a. A thusawi a hriat chuan Billy chu a inpet ruh a, mahse a chesawn chuanglo a. Pungkhawm ho chu an phun mur mur a, mi thar hmel hmu ta ang hian Billy chu hmuh chian tumin an dak huang huang a.

Kilpatrick-a chuan a awm a han thian kharh kharh a, dawhkan chu thing tubohin a han chhu ri a. Tawng ri a reh fel ta tih chuan "Hornby, thiamloh chantir i ni a, hremna tur che han puan chhuah hi ka tan thiltih chakawm loh tak ani," a han ti vei ngial a. Thehhmeh ang mai hian a reh ngawih ngawih a, Art Cotton-a meuh pawhin judge thusawi leh tur ngaichangin a ring a fan a. Sim Cotton-a chu bawp khawkherhin a thu awn duai thung a, churut a pet khu hluah hluah a.

Kilpatrick-a chuan Billy Hornby lam chu a hawi a, "Territorial lungina awm turin sheriff hian a hruai ang che. Hna rim taka thawk chungin kum sawm chhung i tang dawn a ni. Ka thutlukna tih hlawhtlin chungchangah sheriff hian mawh a phur ang," a ti ta a. Dawhkan chu a chhu ri dawt a, a tho taih taih a, bar lam a pan phei a, bar nghaktu chuan whisky um khat leh no a lo chhawp thuai a. Kilpatrick-a chuan tuisik emaw tih mai tur hian whisky no khat chu a han tlak pawp a, Sim Cotton-a khan "Blass, zu kha han sem teh. Kan zavaiin i han in teh ang u," a ti lung lung a. Pungkhawm ho chu hlim zetin an lo au a.

Billy chuan "A lar phah sawt ang chu. Nakin lawkah uicho tluk leka anmahni a cheibawl avangin lawmthu an hrilh leh dawn chu a ni si a," a ti bal bal a. Parris-a chuan "Hornby, ngawi chip cham ringawt mai rawh," vin zet hian a lo ti a. Billy-a chuan "Ka duh hun hunah ka kâ ka âng ang. I hnen atang hian thupek ka dawng dawn lo," a lo tih khum a.

Parris-a chuan "Santa Fe lam pana kan thawh chhuah hun chuan ka thuhnuaiah i kun chiang viau ta ve ang," a ti nghut a. Green-a leh Billy te chu sheriff office ah an hruai phei a, tang pindana Billy a khung hnu chuan Sheriff chuan "Khua atanga hruai chhuah i ni dawn a, khaw ram huam chin in thlen hunah silai hmeh puah a ni ang," a ti a, deputy tawi zawk lam chu a hawi a, "Dan, Jerrry nen Green-a hi in hruai dawn nia. Kawng dik tak a zawh zui zel tih hrechiang ang che u," a han ti a.

An thusawi awmze nei tak chu Green-a chuan a hai hauhlo a. Jaila an awm dun laia Billy thusawi kha a hre chhuak zawk a, Green-a chuan "Ka kal hma in kan nau kha ka hmu thei angem?" a han ti a. Parris-a chuan "Kawngkhar phen atangin i be thei ang, minute khat chhung chiah. Dan, va zui rawh, uluk takin va veng ang che," a ti a. Green-a leh deputy chu tang pindan lamah chuan an in zui phei a. Kawngkhar chu tala hrawl zet mai pahnih hian an lo kalh a. Green-a chuan "Billy, min hre thei em?" a han ti a.

Billy chuan "Hre thei e, Jim, fimkhur hle ang che. Ka thil hrilh che kha theihnghilh hauh suh," a rawn ti a. Kawngkhar chu a chhah em avangin a aw chu a fiahlo hle a. Green-a chuan ring fe hian "Lo beidawng hauh suh," a han ti a.

"Ka beidawng dawn lo. Jim, nangmah zawk kha inveng ngun ang che,"

"Nang pawh Billy,"

Dan-a chuan "In inbe rei tawk tawh. Minute khat a ral tawh," a ti nghut a. Green-a chu office lamah a hruai lut leh ta a. Parris-a chuan "Enge an sawi?" tiin Dan chu a han zawt a. Ani chuan Green-a te inbiakna kha a han hrilh a. Parris-a chu a bu nghut nghut a. Chutah tur zeta Green-a melh chung hian "He naupang chhanchhuak tur hian rawn kir leh i tum a va nih hmel ve?" a han ti bul hmuk a.

Green-a chuan "Tih theih engmah ka neih loh hi. He khua ka rawn lut ta kher kher kha ka inchhir ngawt mai," a lo ti zaih a. Parris-a chuan "I thu phuh chhuah dan a dik ta," a ti hmuk a, a deputy hnenah chuan "Chhuah pui tawh rawh ule," a ti ta a.

Green-an "Ka silai kha min pe kir dawn nange?" a han tih chuan Parris-a chuan deusawh zet hian "I kalna turah hian silai i mamawhlo kher ang," a lo tih khum a. Deputy te hnenah chuan "Dan, Jerry, chhuahpui tawh rawh u. Hnathawh tur ka ngah ania," a han ti a.

Deputy pahnih te chuan Green-a chu an hruaichhuak a, sakawrah an hlang a. Kawtthler chu a ruak huai a, saloon bathlara mi tlem a zawng lo awm te chuan an rawn thlir thap a. Chhimlam panin khua chu an chhuahsan ta a. Khua an pelh fel hnu chuan deputy pahnih te chu an hnufual a, Green-a chu yard thum vela hlaah an chhawm a, chu ai chuan an hnaih duh hauh lova. Green-a chuan a hnungzang chu hit cham cham hian a hria a. Mexican hranghlui hoin 'ley del fuego' an tih mai, ziakloa dan an neih, tang tlanchhuah tumte an kahhlum thin dan an sawi chu a lo hre ve tawh a. Mi tupawh thiin emaw nungdamin emaw man tura 'wanted' annih phawt chuan bounty hunter tam tak te chuan ven buai ngailo turin chhuanlam ho tak siamin an kaphlum mai thin.

Green-a chuan ama hriattham lek hian "Tlanchhuah tum chi a ni lo. Chu chu ti tura min duh ber a ni tlat," a ti sap sap a.

Ding khawmuangloin an kal zel a, Green-a chu a han tal chhin thin a, mahse an phuar ngheh em avangin beisei a bo duh kher mai. Deputy pahnih te chu a tu mah mah tawng chhuaklo in an ngawi reng a. Kahhlum theihna hun remchang melhin Green-a chu chik zetin an en reng a.

Green-a chuan ni a han en a. Ni awmdan atanga chhutin chawhnu lam dar khat vel anih a ring a. Deputy te chu an che har tawh hauhlo ang le. Ni a sa hle na in a thisen zam chu a rawn vawt raih raih a. Eng chen nge an kal tawh ang? Mel nga, mel sarih vel chu a ni tawh ngei ang. A insum hle na a, ngawih reng chu a nin tak em avangin Green-a chuan ring fe hian "Tui a va hal ve mawle," a rawn ti chhuak a.

Jerry chuan "Kan inpeih fel hunah i in dawn nia. Kal zel ringawt phawt mai rawh," a rawn ti a. Ngawi rengin an kal ta zel a. Boruak chu a reh vawng vawng a, ni a sa rum rut mai a. Sava hmel hmuh tur pawh a awm lova. Lungpui chunga laiking inpho chhuak takngial pawh hmuh tur a awm hek lo. Chulai hnuchhawn ram chu thlan in chhung tluk zeta khawhar thlak a ni. Mel khat vel an kal leh hnu chuan Dan-a chuan "Helai hi ni rawh se. Sakawr atang khan chhuk rawh le, Green," a ti ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 12th, 2018, 8:32 pm

SUDDEN AT BAY
Chapter - 4

"I chhaw leh lutuk!"

Fred Motta Bank neitu, Sim Cotton-a laichin unaupa pindan pakhat chhungah chuan kutphaha han in beng thawm hi a ri fiak thak a.Pindan chu zimte a ni a,dawhkan,bati,chair tlem azawng leh mutna tur thingphel dawh chauh a awm a. Chu pindan chu in neitupa chuan in lama a hna tul zual khawih nan a hmang thin a,khua a Sim Cotton-a rawn kal tum chuan mut hahchawlh nan a hmang thin a ni.
A unaupa benna avanga Buck Cotton-a hmui kak atang chuan thisen a rawn hnam tiam tiam a," Mahse Sim..."a ti tan chauh a, Sim-a chuan, "Mahse Sim," vin zet hian a lo ti a, chutah,"Lu lian thluak thawl lutuk! Vawi engzatnge nester ho tibuai tawh lo tura ka hrilh che. Vawi engzat nge sawi vat rawh nauva," a ti khur khur a.
Buck Cotton-a chuan,"Vawi tam tak min hrilh tawh Sim," a ti khur dat dat a.
Sim Cotton-a chuan,"Chuti chung chuan an hmeichhe pakhat i la khawih buai tak si a maw? Ka pa khan i pianlai khan i thlunglu ah thluak a lo thun hmaih ni tur a ni," a han ti a.
Art-a lam chu a hawi a," Art, doctor chuan enge a sawi?"tiin a han zawt a.
Art Cotton-a, kut kuangkuah a ngawi reng a lo thu chu a rawn dak chhuak a, "A thlabar hle tih mai loh chu that lohna dang a nei lem lo niin a sawi. Chil min chhak tak a nâp hmel lehnghal,"a ti a. Buck Cotton-a hnenah chuan," Tun tum chu i thlang sual hle a ni Bucky. Hmeichhe chhawnchhaih i chak leh hun chuan Fort hlui lamah i kal tawh dawn nia," a han ti a.
Sim Cotton-a chuan,"Hmeichhia i khawih buai leh vaih chuan i vun kha ka hik ang a, mitin hmuh turin vantlang sakawr in bangah ka khai ang," a lo ti ve thung a.Awka dam deuh zawk hian, "He khua hi ka ta liau liau a ni a. Nester ho hi kan tih lungawi loh vaih chuan hmunpui lama mi dan hre mi an chah anga,ka pa hunlai a Apache ho nen a kan buaina kha chu nep tak a ni ang,"a lo ti a.
Art Cotton-a chuan,"Sim, hmunpui lama an danhre mi te chu an ka kan lo hup hmiah anga, engkim a fel vek a ni mai alawm," a lo ti a.
Sim Cotton-a chu a ner suk a," Ngaihtuahna fing tak a nih chu,"a han tih el phawt a, "Anni chu lo dahbo ta la enge kan chungah lo thleng ang, thluak ngah ho? Enge kan tawh tur ka han hrilh ang che u. Midang an rawn tir leh mai ang. Chumi hnu chuan min rial mai mai tawh lovang. Helai phairuam hi chuti mai a hloh ka tum lo. In hria em? Nester, tute emaw avangin kum kha leh chen kan lo humhalh hi chân ka tum hauh lo," a ti tun tun a. Buck Cotton-a chu tur zet hian a han melh a, "Ka thu hmu lova Lazy H ram chhung i dai leh vaih chuan i inchhir hle ang," a ti nghut a.
A aw ka chhuak chuan ngaihno a bei loh em avangin Buck Cotton-a chu a dang sawp sawp mai a, "Sim, i thu lo chuan engmah ka ti tawh lovang," tiin a intiam ta a.
Sim Cotton-a chuan,"Chutiang tur chu a ni reng a ni," a ti hmuk a.
Art Cotton-a chu a tho a, a ham bui bui a. Tukverh lamah chuan a phei a, kawtthler lam chu a han bih a. Motte in chu kawtthler hmarlam hmawr tawng, Bank bul chiaha awm a ni a. Tukverh atang chuan kawtthler dung tluan chu a lang thei vek a.
Art Cotton-a chuan," Khua chu a reh tha khawp mai. Kha nester tleirawl kha a thiante hovin rawn chhanchhuah an tumin i ring em Sim," a han ti a.
Sim Cotton-a chuan, "An tana tha tur an hriat phawt chuan tum hauh lo se a tha ang. Chubakah zaninah Helman-an a chhahpui dawn kha," a lo ti a.
Buck Cotton-a chuan, "Keimah min chinfel tir la ka duh asin mawle," a ti bal bal a.
Sim Cotton-a chuan, "He thilah hian Art-a nen hian in inrawlh ve tur a ni lo. Nester ho hi a lo thlawna tih lungawi tum kan ni lo tih kha hria ang che u. Twin Peaks inkara tuikhuah kan siam puitlin hnu chuan he khua hi namen lovin a thang dawn a, a thununtu kan ni dawn a ni. Ram man, in hmun man leh thil dang tam tak hlep tur kan nei dawn a ni," a ti zut zut a. Chutah, "Mahse thla leh hma chuan bul a tan theih dawn lohva, chumi hma chuan engpawh tawk ila kan insum hram hram tur a ni. Buaina a awm phawt chuan Chris Helma kan chinfel tir zel tur a ni. Dan hre mite pawh lokal sela an mawhpuh ber tur chu Helma a ni mai," a han ti zui a. A ngawi leh vung vung a, ti fuh intih hmel fe hian, "Kum hnih kalta atanga deputy a rawih a nihna lehkha Parris-a ka siam tir a, keini chu eng thil pawh thleng se kan fihlim hlauh a ni mai. He khaw tawp zet hi lunghlu tluk zet a la hlu tur a nih hi," a ti a, a nui zui huah huah a. Chutah dam thluam hian, "Bucky, Chris Helma hnenah khan amah hmuh ka duh thu min va hrilh sak teh," Buck Cotton-a hnenah chuan a ti a.
Buck Cotton-a chu a chhuak nghal vat a. Reiloteah Chris Helma chu a rawn tleng a. Rawn luh pahin, "Marin putara kha a tawng tam lu deuh a, ka rawn buaipui zawk alawm mawle," a han ti a.
Sim Cotton-a chu a rawn dak chhuak vat a," Zu rui chhe thei lutuk! A tibuai viau che alo?" a han ti a. Helma chuan," Tibuai lutuk hran love. Khumah ka mut a, ka puakruk kawmin a bekah ka chhut sak a. A rawn harh chhuah hun chuan a tlukna lama a insawh palhna ah a ngai mai ang," a ti a.
Sim Cotton-a chu a bu nghat a. A han vei ngut ngut a, a gun fighter hnenah chuan,"Kan mi tang kha nang hian buaipui la ka duh a ni," a han ti a.
Helma chu a bu nghat a. Sim Cotton-a chuan, "Helma, he naupang hi a tawng tam vaih chuan a pawi thui thei dawn tlat a ni," awmze nei fe hian a han ti a.
Helma chuan," Sim, i rilru ti buai duh suh, ka kutah dah mai rawh," a lo ti a. Cotton-a chu a bu nghut a. Kal tum in Helma chu a in her a, mahse a rawn hawi let leh a," Pakhat zawk kha Green-a in ti em ni kha?" a han ti a.
"Engtizia nge?"
"Khawiah emaw chuan ka hmu tawh tlat in ka hria. Khawi hmun nge a nih chiah ka hre chhuak thei silova......ka ngaihruatna mai mai pawh a ni maithei e,"
Sim-a chuan a kut a rawn phar chhuak a, "Khawi lai hmun a hmu tawh nge nia i in hriat? Dan kengkawhtu em ni a nih?" a han ti a.
Helma chuan," Texas pawh a ni mai thei. Ka la hrechhuak leh mai ang," a ti ban charh a.
Art Cotton-a chuan, "A tu a pawh lo nise a pawi hleinem. Tunah chuan eng han ti thei chi a ni tawh nang," a lo ti a, ama thusawi chu ring fe hian a han nuih zui a.
Sim-a chuan sana a phawrh a, a han en a," Dar khat leh a chanve. Chaw ei turin i chhuak ang u," a ti a.
Chulai phairuam lalpa chuan a thiltih rapthlak tak kha a theihnghilh ta hmiah a. Billy Hornby-a thihna tur thu a ti thlu fel chiah a. Green-a chungchang chu chhete pawhin a ngaihtuah zui duh tawh lo. Art-a sawi ang khan eng han ti thei chi ni dawn tawh hek lo.

*"Helai hi ni rawh se. Sakawr atang khan chhuk rawh le, Green," khua atanga ngawi renga mel engemaw zat an kal hnu chuan Dan-a chuan a han ti a. Green-a chuan deputy pahnihte chu a han en a, Norris chuan a zin hnunglama phuar beh suahdur te fel ren rawn hi a lo phelh mek a. Chutiang suahdur chu sipai hovin an vah velnaa an ken thin a ni nghe nghe.
Dan-a chuan shotgun a Green-a tih pah chuan," Chhuk rawh ka tih kha,"vin zet hian a han ti a. Green-a chuan a dar a chhin ak a, sakawr atang chuan muangchangin a chhuk ta a. Dan-a chuan sakawr atanga a chhuk lai chu silaiin a lo tin reng a, Norris-a chuan suahdur chu leiah a theh thla a, sakawr atang chuan a chhuk a, Green-a leh Dan-a te inkar a tla zep lo turin a kal kual a, Green-a chu a hnunglam atangin a rawn pan hnai a.
Norris-a chuan,"I kut kha hnunglamah lek rawh," tiin Green-a chu thu a han pe a. Green-a chuan a kut chu a han lekkawh a,a kut phuarna chu Norris-a chuan a zaichah sak a. Muangchangin a tawlh sawn a, sakawr zina a shotgun dah chu a la a,Dan-a sakawr atanga a chhuk lai chuan Green-a chu a lo tin ve thung a.
Dan-a chuan suahdur chu a melh zoh a,"Lai tan rawh le," tiin thu a han pe a.
Green-a chuan,"Ka kut mu te pawh ka han ti reh ve phawt ang chu mawle," a lo ti a.
Norris-a chuan,"Lai vat la a ni mai. Nghah khawtlai a ngai lo," a han ti a. A thianpa chu a han nuih suk a.
Green-a chuan a kut chu a han lek mar a,chutah kawng dawm chungin deputy pahnihte chu a en a,"Chance min pe miah lova thah min tum a ni maw?" a han ti a.
"Lei chu lai ringawt rawh,"
"Keima thlan tur zawng ka lai hauh lovang."
Dan-a chuan a thianpa chu a melh zoh a,"Kan hnial buai duh dawn em ni?" a han ti a. Norris chuan,"A tul hran lo khawp mai,"a lo ti nghut a.
Dan-a chuan, "Tawngka ngawt chuan a rilru na hi kan thawi dam sak thei lovang a," a han tih chuan Norris-a chu ngeiawm zet hian a lo then sak a, "Thlem buai a ngai lo. I lo dawm bet dawn nge keimah zawkin?" a han ti a.
Dan-a chuan," I laipui khan lo tin la a tawk mai, lo tawlh kiang deuh bawk la. A rilru na leh ngui hi chawhharh kan tum ang e," a ti ta a.
Norris-a chuan, "Ka chan tur tlem tal min zuah ve dawn nia. A ruh chu ti tliak em suh ang che," a ti zut zut a.
Dan-a chuan a shotgun chu leiah a dah a. Green-a rilru chu a vak kual zung zung a. Norris-a tawng dan atang khan chu mite pahnih chu Doc Hight-a ke baina chhan a ni thei ang em? tihte a ngaihtuah a.
Dan-a chuan,"Khai le, cowboy, min han hnial buai leh teh," a han ti a.
Green-a chuan," Ni e, mawle. Ka silai te kha min han pe teh u ," a lo ti a. Dan-a leh Norris-a nena an inkar hlat zawng chu a mitin a teh ru reng a, vawi leh khatah rang zet hian pen thum a pen chhuak thut a, Dan-a leh Norris-a inkarah chuan a tlazep ta a. Norris-a chuan, "Dan, bawk vat rawh, min hliah a nia," a ti chul a. Dan-a bawk tur chu Green-a chuan a bawh phei a, Dan-a chuan a lo pawm bet chawt a. Meng sen rum chungin a rum ngul ngul a, a thianpa thusawi chu hre awm pawhin a lang lo.
Norris-a chuan," Dan, thlah rawh. I beng a chhet em ni? Thlah la ka kap dawn nia," tiin a au tuarh tuarh a. Sir lamah a per sawn a, a shotgun cheng chu a pahnihin a kau a. Dan-a chuan thinrim meng tur ngun chung hian a lu a thing a, a hnungzang ruh tih tliah sak tumin Green-a chu a kuah nghet sauh sauh a.
Green-a chuan a kut chu a lek chho hrat hrat a, Dan-a khabe ah chuan a theihtawp tak meuhin a nem ta nghek mai a. Dan-a chu a eu awrh a, a dawmna chu a thlah nghal a. Rang zet hian Green-a chuan Dan-a puakruk chu a pawt phawi zawk a, Dan-a zakhnuai atang chuan Norris-a chu a va kap a, a bawk nghal thlawp a.
Green-a silaimu chuan Norris-a mit leh mit inkarah a va verh siah a. Tluk pahin Norris-a chuan a shotgun chu a han hmet per ve hram a.
Shotgun kaw hmawr atanga musep rawn thlawk chhuak chuan Dan-a chu a hnawl leng lawp a, lungtum zingah a va tla hlawm tawl mai a.
Green-a chu a rawn tho a, puakruk kau sa reng chungin deputy pahnihte chu a han en a. Han en mai pawhin Norris-a chu a thi chiang hle tih a hriat nghal a. Lungtum zinga Dan-a let hlawm reng chu a pan phei a, shotgun mu khan a lo verh chik hrup mai a.
Green-a chuan a lu a thing nar nar a," Naute u, tih chi-ai in lo sam hle mai," a han ti sap a.Norris-a shotgun thlauh kha a chhar a, a mu a thun khat a. Norris-a gunbelt chu a phelh sak a, a hren hnu chuan puakruk pakhat zawk kha a kekawr kawngah a zep a," Mahni silai ngei mai han kawl a chakawm kher mai," tiin amah leh amah chu a han inbia a. Chung lamah chuan mulukawlh an rawn thlawk kual pup pup a.
Green-a chu a engemaw chen a din ngaiin a han ding vang vang a. Chutah, a dar a chhin ak a, sakawrah a lawn, hnunglam hawi let hauh lovin hmar lam panin chak zetin a sakawr chu a tlan tir ta par par a, A liam fel nghakin mulukawlh ho chu miruang bul a Oak thing zarah chuan an fu ngawi run hlawm a.
Chawhnu tlang her a ni a, nisa rum rut mai chuan cotton town chu a em tlawk tlawk a. Kawtthler chu mihring hmel hmuh tur awm lovin a ruak huai a. Vantlang sakawrin hlima ui bawk chu a ham bai bai a, thawm chhete pawh hriat tur awm lovin cotton town khua chu a reh tlawk tlawk mai a, chu ui pakhat tih mai loh chu thilnung han che vel hmel hmuh tur a awm hek lo. Cotton Town chu khawthlang lam ram a khaw dangte ang tho a ni a. In te chu khaw kawtthler sir tawn tawnah chuan mumal lo zet hian a intlar bang a. Inte chu vaivutin a bawh paw thur hlawm a, kawtthler chu sakawr tawlailirin a dai chik nek nuk a.
Kawtthler hmarlam dep vel lam sira in lian ber chu jail a ni a, a dawt chiah chu sheriff office a ni a. Chumi piahah chuan Judge Kilpatrick-a in a awm a. Jail ep chiahah chuan vantlang sakawr in a awm a, sheriff office epah chuan Oasis Saloon a awm bawk a. Bank neitu Mott-a in chu kawtthler hmarlam fem a awm bank dep chiahin a ding a, chumi epah chuan general store a awm a. Bank chu chu khuaa in zawng zawngah chuan a ziaawm ber a ni. Heng in lian deuh ho tih loh hi chu lung leh chirh a sak, in tlabal fe fe an ni hlawm a. Kawm karte chu an tawpin tin chhia, saidawium ruak leh tumbleweed (hnim chikhat) an let rem rum a.
Green-a chuan thingbuk hlim atang hian chu khua, khawram niawm tak chu a thlir vang vang a," A reh in a chul rep rawp hle mai," a han ti a. A sakawr chu a rawn dak a, a chik nghur nghur a. Green-a chuan a hnar a han ben sak pah in," Nig, awm mai mai teh. Helaiah hian kan awm tih an hre thuai tawh dawn a nia. Billy-a doctor sawi kha khawi ber nge a in ni ang aw?" a han ti a. Inding tlar chu a han thlir kual a, kawtthler chhim lam dep a in te fel ren rawn enkawl uluk tih hriat bik tak a hmuh chuan a mit a fu ta chat a. Kawtzawl huan chhunga Cottonwood thing ding hnuaiah chuan sakawr pakhat hi a inthlung a.
"Saw saw a nih ngei dawn saw," Green-a chuan a ti sap a.
Green-a chuan a sakawr chu lei (bridge) ban pakhatah chuan nghet takin a thlung a, lui chu a dai kai a, kawrte ruam hi a zawh chho a. Chu kawrte chu fur lai chuan tui a luang ve thin tih leh Benito lui chu a fin a ni tih a hriat theih mai a. Kawrte chuan hmarlam hawiin doctor in lam chu a chhun a. Reilote ah Green-a chuan doctor in chu a thleng ta a. Doc Hight-a bak midang awm lo se ti rilru tak chungin in hnunglam kawngkhar chu a han kik a, a kut bawr chu a puakruk kawm bulah a thlakthla nghal a.
Reilote ah inchhung lamah chuan thawm a rawn awm a, kawngkhar chu a rawn inhawng a, pa pakhat la naupan hmel tak kum sawmthum vel awrh tur, san lam a pa vantlang hi a ni a, tarmit a bun a, a sam chu a tuak phauh phauh a.
Doctor chuan," Enge ni ta?" tiin Green-a chu a han zawt a.
"Ka rawn lut thei ang em?"
"Enge i duh?"
"Doc, ka hming chu Green-a a ni a, chu chuan i tan awmzia a nei em?"
Hight-a hmel chu a danglam ta daih a, kawngkhar chu a hawng zau a," Billy-a tanpuitu kha maw! Rawn lut rawh khai rang tak in," a ti ta zung zung a. Kawng khar that pahin in hnung lam chu a melh kual zung zung a, chumi hnu chuan tukverh atangin kawtthler chu a han bih leh a,"Hetia i rawn kal lai hi hmu tu che an awm em?" tiin Green-a chu a zawt a, mahse a chhanna pawh nghak lovin. "I thluak a buai ta chu a ni em lo maw? Eng ti tur a rawn kal nge i nih?" a han ti zui a.
Green-a chuan,"Ka thluak a buai hran lo. Kan tlangval kha rawn lak chhuah ka tum a ni," a ti a.
Hight-a chuan," Pathian leh! Green, i â ta em ni? Khua hi Cotton-a mi leh sa in an khat a sin. Kei pawh hi an zinga mi ka lo ni ve reng maithei a sin," a han ti a.
Green-a chuan," Ka nunna ka dah kham hial reng a ni," a ti mai a.
Hight-a chu a han ngawi vang vang a," Billy-an ka chanchin a hrilh che em ni?" tiin Green-a chu a han zawt a, Green-a chu a lo bu nghat a. Hight-a chuan." Anmahni huat na chhan tur chu ka nei ngei mai, Mister Green, mahse......." a la tih lai mekin Green-a chuan," Ka thiante chuan Jim tiin min ko thin, Doc," a lo ti a.
Hight-a chu a nui sak a," A tha e, Gr.........Jim. Engtinnge kan deputy nunrawng zet pahnihte lak atang khan nungdama i chhuah theih?" tiin a zawt ta a.
Green-a chuan," A buaithlak viau reng a ni," a han tih chuan Hight-a hmelah chuan beiseina a rawn lang a," Kha Dan Rogger-a kha engtin....."a tih lai chuan Green-a chuan,"A thi tawh. Damdawi lam thiam chu........"
Hight-a chu a phu deuh zawk a," Engtin nge i hriat ? Tumah ka la hrilh lo a sin,"
Green-a chuan," A mah Dan-an a sawi alawm.......a thih hma khan," a ti a." Billy-a chu jail-ah em ni a la awm?" tiin Hight-a chu a zawt a.
"Ka hriat theih chinah chuan a la awm e,"
"Mi engzatin nge veng?"
"Ka hre hauh lo mai Jim."
Green-a chu a ngawi vang vang a. Hight-a chuan," Jim, i ti tak tak lovang tiraw(h)? Mi pakhat chauhin jail tang chhanchhuah a nungdama Cotton Town chhuahsan pui chu thil khirhkhan tawpkhawk a ni ngei ang," a ti ta a. Green-a chuan a dar a chhin ak a," Kan nau saw kalsan thei ka ni tlat lo," a ti ban charh a.
Hight-a chuan." A tihchi loh lutuk i ti thei lovang," a lo ti thuai a.
Green-a chuan," Keiin ka chhanchhuah theih loh tuin nge thei chuang ang?" bung zet hian a han ti a. Hight-a chu a ngawi ta rauh rauh a, Green-a chu a tawng a tam avang khan a inthiam lo leh hnuhnawh a," Doc, min hrethiam ang che, i chunga ka lungawi loh vang a ni lo ania," a han ti a.
Hight-a chuan,"Ka hrethiam alawm Jim, mi pakhat chauh tan chuan......mi panga/paruk pawhin puibawm mahse Cotton-a te gun fighter ho hi an huphurh awm em a ni," a ti a.
Green-a chuan," Gun fighter a ruai e law?" ngaihven tak hian a lo ti thuai a.
Doctor chuan," Ruai e. A hote zinga pali panga vel chu tualthah a eizawng thin an ni, hruai chhuaktu che pahnih ang khan Jim, engtin chiah nge tih an tum che?" a han ti tha leh a.
Green-a chuan," Thah a min phum nghal an tum a, an thil tum ka thulh tir ta a nih kha," ti chauh in a chhang a," Rorelna hmuna pa sang deuh mai ka hmuh kha tunge a nih?" tiin a zawt ta daih a.
Hight-a chuan," Helma i tihna em ni? Palian zet puakruk pahnih pai em ni?" a lo ti thuai a.
"Ni e," tiin Green-a chu a bu nghat a.
Doctor chuan," Chris Helma, Cottonwood ranch foreman a nih kha," a ti ta a.
Green-a chuan," El paso a tual a thah avangin zawn lai 'Wanted' a ni asin," a han tih chuan, Hight-a chuan," A mak ka ti lo khawp mai," a lo ti a.
Green-a chuan," He khaw chanchin hi Billy-an min hrilh nual tawh a. Eng chen nge Cotton-a te thuhnuaiah a kun tawh?" tiin Hight-a chu a han zawt a.
Hight-a chuan," Zeke Cotton-a hunlai chhiar tel chuan kum sawm vel zet a ni tawh ang. Engkim mai hi an thuhnuaia awm a ni a. An thu hmu lo chuan tuman thil an rawn zuar thei lova, tuman helai phairuam atang hian thil an hralh chhuak thiang hek lo. Bank, saloon saw Blass-a an luah hawhtir a, a sum chauh a awm a, pawisa puk tute chu an duh zat zat a pung an thing mai a ni," a ti charh charh a.
Green-a chuan," Dodal an awm phawt chuan thil tha lo an tawk zel mai ani maw?" a han ti a.
Doc Hight-a chuan," Ni chiah e. Ka kal dan atang hian an chet dan chu ka tichiang ber a ni," a awka chhuak chu ngaihno a bei lovin ngaihthlak a nuam lo kher mai. Engemaw chen an ngawih vang vang hnu chuan," Chhim lamah sawn helai phairuam a in bengbel chak tak tak an awm a. Benito lui piah lamah sawn pahnih khat chuan thlai chingin in leh lo an rawn din a. Mahse chawhbuai leh tihthaih reng renga awm ningin an in suan chhuak rang khawp mai. Khua atanga chhimlam mel sawma hlaah sawn kawng pengthuam a awm a, chutah chuan......' Hei hi Zeke a kawng a ni- kawng pakhat zawk hi zawh rawh' tih a in tar reng thin nghe nghe a sin. Rawn pem lut thar tur te hian lo lawm an hlawh ngai reng reng lo," a han ti leh a.
Green-a chu a bu nghat nghat a. Hight chuan," He thilah hian engvanga rawn inrawlh ve nge i nih? Billy Hornby-a emaw kei emaw Cotton Town emaw pawh hian engpawh lo tawk ta ila i tan pawimawhna a nei em ni?" tiin Green-a chu a zawt ta chawt a.
Green-a chuan," Doc, chumi chungchangah chuan sawi tur a tam mai a, hun kan nei kher lovang," a ti a.
Hight-a chuan Green-a hmachhawnin thuthmun a rem a. Green-a hnenah chuan ngen ngawl aw tak hian "Chuti anih chuan kai tawi mai rawh. He thil i ngaihvenna chhan hi min hrilh la, tanpui theihna che ka nei maithei asin," a ti ta a.

Phawk fe hian Green-a chuan "Engti kawngin maw?" a lo ti ha a. Hight-a chu a rawn kun hnai a, "Enge maw chhuanlam siamin jail-ah ka va kal ang a, vengtu engzat nge an indah ka va en dawn a ni," a ti a. Green-a chuan phawk fe hian Hight-a chu a en a, "He khuaah hian huaisenna nei an awm miah lo emaw ka lo ti asin," a ti sap a. Chutah "Chutiang chu i inhuam amaw?" tiin Hight-a chu a han zawt a. Hight-a chuan "Ka thil hriat duh kha min hrilh phawt a thu a ni ang chu," a lo ti a.
Green-a chu a han ngawi vang vang a. "Mi pahnih ka zawng a, an hming chu Peterson leh Webb-a an ni. I hriat mi an ni maithei," a ti ta a. Hight-a chu a han inngaihtuah a, "An hming chu ka hriat ngai a ni lo tawp mai. Mahse helai velah hi chuan hming hian awmzia a neilo khawp a.....Engvanga anni pahnih chu zawng nge i nih?" tiin Green-a chu a han zawt a. "Leiba rulh tur ka nei a ni," a lo ti a. Chu thu a han sawi chuan Green-a aw chuan ngaihno beina a neih loh em avang leh a mitmeng chu a rum tak sawt avangin mi pahnih te chu Hight-a chuan a awt lo kher mai.

Hight-a chuan "Green, tunge i nih chiah?" tiin a zawt ta chawt mai a.
Green-a chuan "Ka hming chu James Green a ni a, mahse Texas-ah chuan hming dang min vuah a, 'SUDDEN' tiin min ko thin," a ti ta a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 12th, 2018, 8:33 pm

SUDDEN AT BAY
Chapter - 5

Sudden! Helai hmun chengker tak thleng hian Texas outlaw leh gunfighter hmingthang lutuk Sudden-a hming hre lo an awm lo tih theih a ni a. Hight-a pawh chuan a chanchin engemaw zat a hria a. Tuna amah hmachhawn a ding, pa tawng zawi tak hi khawthlang lam ram a gunfighter hmingthang ber Sudden-a an tih huai huai a lo ni reng mai. Lawless khaw tudaitu, Sudden........

Green-a chuan, Hight-a thu ngawi vang vang chu a en vang vang a, "Cotton-a mi rawih ho nen thuhmun kan nih leh nih loh i ngaihtuah a ni maw? A tha e, thudik ka han hrilh law law ang che Doc, " a ti a, loh theih loh a outlaw a lo nih dante, luman a nei a, ' bounty hunter' hovin thah tuma an zawn reng dante kimchang tak in a sawi ta vek a. A thusawi khar nan, " Ka chanchin i hriat tam zawk chu dawt an ni ang. A then erawh chu an dik thung ang. Ka thil hrilh che a tang khan a dik lo chu thliar hrang ve tawh mai rawh, " a ti a.
Hight-a chuan a kut a rawn phar chuak a, Sudden-a ( tun atang chuan Sudden-a tiin kan ziak tawh ang) chu kut thing in chibai a buk a, " Jim, Sudden-a i nih chuan i chanchin an sawi tam zawk hi dawt a ni tih ka ring ngam e, " a ti a, pindan lehlamah a bai phei a, tiang hawl tur nen a rawn let leh a, " Ka va kal anga kan tlangval chu enge a an ka va tlawh ange. A farnu ngaihtuahawm a nih loh thu pawh ka va hrilh ang e, " a ti ta zung zung a. Kawngkhar bul a thlen chuan a rawn leh hawi a, " Hetah hian lo awm reng la, tumah lo in hmuh tir hauh suh ang che, ka rei lovang, " a ti a.
Sudden-a chu a bu nghat a, Hight-a chu a bai chhuak ta saih saih a. Kha pa kha Sudden-a an tih huai huai chu a lo ni reng maw ? A awki hniam tak leh a hmel pawisawi lo tak leh Hell City-a a chet dan an sawi te kha a hre chhuak a. Jail house a thlen chuan kawng khar chu a han kik karh karh a.
Hight-a chu minute sawm leh panga vel a thang ta a. Tukverh atang chuan Sudden-a chuan jail atang kawtthler a Hight-a rawn bai chuak saih saih chu a va hmu ta a. Hight-a han che vel chu a hmanhmawh loh em avang leh angaihṭhat hmel em avangin Suddena chu anui sak a, "Phili, buaichung hi a ṭhalo reng ani," a ti sap a. Highta chu arawn thleng ta a," Jim, kan tlangval chu ala awm a, vengtu pawh pakhat chauh an dah niin alang," a rawn ti luam a,
" A tu berin nge veng, Helma em ni?"
" Nilo,Jacksona an tih kha niin ka hria, Sheriff chu achhun mu leh ta ani ang."
Suddena chuan "amutui lai kan tih harh loh hram ka beisei, ati a,a nui sak a.Phur fe in chibai an han in buk leh rih a, Sudena chuan, " i ti lawmawm e, doctor, silai chelek aṭul loh hram han beisei phawt ila, silai ri i hria anih pawhin rawn inrawlh tum ve suh ang che.ka chanchin miin an zawt che nih chuan mak ti awm takin awm ng che.min la hmu ngai hauhlo, hrethiam em?" a ti ta zung zung a,
Highta chu abu nghat a,"Kan tlangval sakawr tur hi engtinnge kan tih dawn?" a han ti a, Suddena chuan ," Doc, i sakawr ruksak mai che ka lo tum asin, Billya sakawr zinga pakhat ilo laksak mai aniang chu ,a farnu pawhin apawiti lemin ka ring lo,! nui var var chung hian alo ti a, Highta chu a sen deuh ṭan ṭan a,Billya'n a farnu leh Doc Highta chungchang thu asawi kha adik ani tih ahre thei nghal mai a.Hight chuan, " Sakawr chu la rawh khai,vannei turin duhsakna ka hlan ache,! ati ta a.
Thudang sawi leh tawh loin Suddena chu in hnunglam kawngkharah chuan achhuak a, Sakawr in phen aṭangin kawtthler chu han thlir a,Kawtthler chu mihring hmel hmuh tur awmloin ala ruak ta huai a.A ui hmuh pawh kha alo kalbo tawh a," Ka thlir rei poh leh alang zau tawlh tawlh mai" a ti sap a, A stetson lukhum chu amit hliahin apawt kun a, kekawr ipte zen chungin Kawtthlerah chuan achhuak phei ta a. Buaina tawk thut thei dinhmunah ading tih inhria in amit a lenkual reng a,abeng achhi ngun em em bawk a.
Reilo te ah kawtthler chu kan pheiin Jail chu a thleng phei ta a. Jail bathlar ah chuan alawn chho a, kawngkhar chu ahan kik karh karh a, jail chhunglam aṭang chuan chair tihtawlh ri hi ari ṭhat a,pen thawm arawn awm a, aw hian, " Tunge ni?" a rawn ti a, Suddena chuan " Helma ka nia, Jackson, rawn hawng teh" a han ti a, kawngkhar kalhna chu a ri rak a,kawngjhar chu arawn in hawng ta a,.Rang zetin Suddena chuan apuakruk leh Deputy hnar chu achuktuah a, " I au chhuah vaih chuan i thi ani mai,Mr Jackson, tawlhlut nghal rawh," pawr chherchhawr hian ahan ti a, Suddena chu thi daih tawha angaih avangin Jacksona mak ti lutuk chu namen lo hian ameng phawk hru mai a, a khur dur dur mai bawk a,."Inher rawh," Suddena chuan ati nghat a, Jacksona chuan chu thupek chu azawm rang kher mai, a in her fel veleh chuan Suddena chuan puakruk kawmin alu ah achhutsak chawrh a.Jacksona chu nikhaw hre loin alet hlawm tawl a, Suddena chuan akut leh ke ah nghet zetin aphuar sak nghal a,A gunbelt chu a hreng a, mitang dahna pindan lamah chuan aphei ta a, Kawngkhar chu a hawng a, Billya chu bek dawm chungin alo ṭhu kun ngal mai a, Suddena chuan, "Khatiang hmel i put reng kha chuan ka thinlung i hneh har khawp ang," ahan ti a,Billy chu arawn dak chhuak a, ahan thaw hawk a, " Jim, engtin...." ati hman chauh a, Suddena chuan" Zawhna in zawh hman anilo tho vat teh," alo ti a,Nortis ahnena Gunbelt leh puakruk alaksak kha ahan vawrh phei a, "i chhuak vat teh ang, ka ṭhianpa muhil kha aharh hma in" a han ti a. Gunbelt hren mawlh mawlh pahin Billy achuan," Jim, Ka hmuh leh che ka lo ring tawh hauh hlei nem, engtinnge i tlanchhuah theih zawk?" tiin ahan zawt a,.Suddena chuan " Nakinah kan sawi dawn nia, heta ṭang hian i chhuak phawt teh ang, Kawtthler lehlamah sawn Sakawr a awm a, Doc Highta ta ania, Sakawr chu lei lamah i kaithla dawn nia,Lei (Bridge)ah chuan ka lo awm ang a, min rawn umzui dawn nia, ka sawi chu i hrechiang em?" a lo ti zung zung a, Billya chuan, Hrechiang e,Jim,min ngaihtuah duh suh,..a ti a.ahmel aṭang chuan engemaw tak ngaihtuah ni a alan avangin Suddena chuan, " Billy, i ṭha maw?" tiin azawt ta chawt a.Billya chuan apuakruk kawm abeng thak a, "Ka ṭha e,Jim,kal tawh rawh, keipawh ka chhuak nghal ang," ati a.Chalchuar deuh nang chungin Jail hnunglam kawngkhar chu ahawng a, mi hmuh tur an awmlo tih ahriat hnu chuan kawmkar kawng aṭang chuan Lèi lam a pan ta a, Doctor in lam kha Billya hmel hmuh tumin ahan thlir a, arei deuh hnu pwh chuan Billya hmel hmuh tur a awm thei ta hauh lo mai a, Jail Building chuan a hliah pawh ani mahna!. A sakawr Nigger chu apan phei a, a thlunna phelh atum lai tak chuan Billy Hornby a aw in" Buck Cotton, rawn chhuak rawh" atih ri chu a hre ta a.Billya chuan Saloon lam alo pan leh chu niin.

Oasis saloonah chuan Buck Cotton a awm lova,Suddenan Billya lak chhuah hma darkar chanve vel khan a unaute rualin Ranch lam apan ve hman tawh ani. An kalsan hma chuan Sim Cottona chuan Sheriff chu uluk takin thiltih dan tur ahrilh nghe nghe ani.

Khua an chhuahsan hmain Sim Cottona te ho chu an in hmukhawm a,Kil khat aṭhuin Sim Cottona thusawi chu an Banker Motta chuan uluk zetin angaithla a, Harry Parrisa chuan kut khur deuh dur sur chunga lukhum tlang zut sek chung leh a khat tawk a hmui liak huh hlup hlup chung hian Sim Cottona thusawi chu angaithla ve bawk a,Sim cottona chuan ,"Saw naupang sawn min zarbuai leh tawh hauh lo se ka suh ani.Ka sawi chu i hrethiam em? bo hlen turin ka duh....buaina siam tawhlo tur leh ṭawngchhuak tawh hauhlo turin ka duh ani.Nangmah pui turin Helma hi ka hnutchhiah ang," ati nghut nghut a.Parrisa chuan Helma chu amelh zoh a, "Sim, chutiang angailo ang, ka nauten anlo ching fel mai ang," a han ti a.Helma zawk chuan an va vahchhhuahna lamah an chau viau maithei asin,Hna hahthlak an thawk ngai silova, ani lawm ni Harry? alo ti a.
Parrisan " chutiang...ala tih lai mekin, Sim cottona chuan..He thil hi buarchuar hauh lova chin fel ka duh a, Chumi awm zia chu Helma kutah hian awm se, ka tihna anih chu,alo ti a.

Buck Cottona chuan," kan uicho pa saw ka kutah dah ula ka duh asin maw le,. Alakah bat ka nei tlat mai a, alo ti ve khanglang a. Sima chuan "Nang hian maw !!!!" a ti a, uar fe hian ahan nui a," ka lo hriat dan chuan Oasis saloona arawn cho ṭum che pawh khan, hlauh luat vangin zun i cheh phung mai ani lawm ni? Nilove, nauva, saiip chhunga zawhte no pathum tuia chiahhlum tur pawhin ka ring tawk lo che" a han ti zui a,.Buck Cottona thinrim lutuk chu a sen ṭawn ṭawn a,a heh chu apet fan fan a, mahse a u rothap zia chu ahriat chian avangin a chhang ngam der silo.

Parrisa chuan," Sim, i sawi ang ang chu aṭha ani mai alawm, mahse..atih lai chuan Sim Cottona chuan, mahse mahse tih angailo. Patling hnathawk thei anga lan hi tum ve fo teh suh," alo tih khum a.

Parrisa chuan ahmui aliak huh a," Sim, lo ngaithla teh, chutianga ṭawngkhum tur chu ka ni bik lo ang...ati hman chauh a, Sima mitmeng rapthlak zet chu ahmuh avangin angaaw ta daih a. Art Cottona kha arawn dakchhuak a," Sim, Harriss hi thil han hrilh ve ila i ti deuh em ni? arawn ti ve ta a, chu thu ahriat chuan Parrisa chu adingkhawng hneh kher mai. A mihring hmuh tawhah Art Cottona chu kuttum hmanga insual thei ber mai leh che bawlhhlawh thei ber mai ani miau a, a kuttum hmanga mi a sawisak lai tlukin Art Cottona hi ahlim ngailo, tihtur ani hial a, Cotton Wood ranch bawng ru tu an man pakhat namen loa asawisa lai Parrisa hian ahmu tawh nghe nghe ani. Chupa in thisen chiahpiah nuaih chunga zahngaihna adil lai hmel te chu Parrisa chuan amitthla in ahmu a, Zahngaihna dil hmel pu hian Sim Cottona chu a en ta ringawt mai a, Sim an" Art, chutiang aṭul lovang," a han tih chuan Parrisa chu alo thaw huai mai a,Sim Cottona vek chuan, " A ngaihtuah ringawt pawhin Harris a hi thlabarin athi lo chauh anih hi," ahan ti leh a, uar fe hian a han nui zui a.
An han ngawi zui ṭhap a, Sim Cottona bawk chuan, " Helaiah hian tihtur kan nei tawhlo bawk a, Ranch lam ka pan teh ang Buck, i sakawr kha hnutchhiah ang che. Helma hian sakawr ṭha deuh amamwh dawn tlat..Helma, arang thei ang in rawn kir leh ang che, Art, nang chu hetah hian lo awm rih la, engkim akal tluang tih rawn hria ang che, Bucky, i kal ang le," a ti ta zung zung a,.Sakawrah an lawn a, Cotton wood ranch cawboy pakhat leh Helma leh Arta chu hnutchhiahin khua chu an chhuahsan ta a. An liam fel hnu chuan Arta te pathum chuan Saloon lam an pan a, Billy Hornbyan Bucka arawn cho lai chuan pawisa an lo khel mek a.

Chhun reh lai tak mai a Billya rawn au thut chuan, Cotton wood mi chhawr, Ricky an tih chu ati phu zawk a, chair chu a ngheng tlu a, chhuatah chuan athal ta hawl hawl mai a, Art Cottona chu arum nghut a,Rickya tlu turin abawh avang chuan chhuatah chuan alet thla ve a, Blassa no lo nawt fai mek chuan athiltih lai chu atawp chawt a, ading mar zawt mai a,Mahse Helma, zuang tho paha apuakruk pai zei zet mai a apawtdawk zawk lai chu ahmu hman lo. Arta leh Rickya an rawn thawh chhuah lai chuan Helma chuan, " Kan sazupui khawi chuan abawm a su ani maw" a han ti nghut a, Blassa lam chu a hawi a, I ka kha i an vaih chuan i hna i hloh nghal ang a, undertakerin hna an nei ve thung ang," tiin ahan vau a.

Saloon pawn lamah chuan BiLly chuan Bucka chu a han au nawn leh a, Sakawr thlunna aBuck sakawr a awm avang chuan amah chu saloon chhungah a awm ni ngei turah a ngai ani. Helma chuan a ṭhiante lam chu a hawi a, Art, Ricky nen khan hnunglam kawngkharah chhuak ula, Hnunglam a ṭangin kan naua saw rawn hual ula, i han fiam hlek teh ang, " a ti a.Arta te pahnih chu hnunglam kawngkharah chuan an chhuak a, Helma pawh chuan thawm nei hauh loin Saloon kawngkgar lam chu apan ve nghal a, Bar nghaktu Blassa chuan beidawng zetin tukverh lam chu athlir ta reng ringawt a.

Helma chuan " Vawikhat bak warning ka pe dawnlo che nia," Blassa hnenah chuan ahan ti a, .A aw ka chhuak chu a dam hle na a, au chhuak vaih sela chuan Helma chuan a that nggal dawn ani tih Blassa chuan a hrechiang hle. Blassa chu Pa huaisen ve thawkhat tak chu ni mahse, mi â nileng a ni tlat lo. Ngawireng leh chesawn loin a awmna ngaiah chuan a ding ta reng ringawt a, " i thu thu le Helma," a ti ta ngawt a.Helma chu abu nghat a, saloon kawngkhar chu ahawng a,pawnah a chhuak a, akawnghren a akut zungpui bilh lut chungin sidewalkah chuan ading a. "Naua, Bucky a awmlo a, keimah ka awm thung, " a han ti a, kawtthlerah chuan achhukthla a, penthum apen hnu chuan a ding a, ahan chet vel danah chuan a in ring tawk tih hi a hriat hliah hliah mai a.Billy chuan Kawtthler chu a thlir tawn sek mai a, Gun fighter hmachhawn alo in beisei hauhlo a, khawilam nge tih pawh hre loin a pen swn ta ringawt a.

Helma chuan, " Khawihmun emaw pan i tum deuh em ni?" alo ti a, a awki chu a sang chuang loin adam thlap nain, amitmeng chu arumin tualthah a chak zek zek tih hi a lang reng mai a, Billy chuan a chal a chuar nang a, Buck Cottona phawikhalh tur chuan silai a chelek thiam ve tawk tih a hria, mahse....Gunfighter meuh hmachhwn tur chuan...Thil che ahmuh avangin a han en thuai a, Art Cottona leh Ricky an an rawn panhnai chu a hmu ta a, Helma chuan nui ṭhen deuh ṭhu chung hian," Tlanbo daih tur khawp pawhin finna i nei nange? Tunge chhuah reng reng che? " a han ti a,.Billya chuan alu a thing ringawt a, Greena kha a in thiar fihlim hman mai thei e.

Art Cottona chuan" Naua, ala chhuaktu che chu sawi la, i tan aṭha zawk ang,he khua ami hi an ni ngei ang a, amah biak ka duh ani," arawn ti a,Billya chuan, Kei...Keimaha rawn tlanchhuak ka ni,tuman min puilo" a ti tlat a,Cottona chu abu nghuta, Billya thusawi chu a awihloh hmel kher mai.Rickya hnenah,..Ricky, jailah va kal la va en dik teh," tiin thu a han pe a,Ricky chu a kal ta nghal a, Cottona chuan Billy chu a rawn pan phei a, abul lawk a thlen chuan Billy chuan, A hla tawk tawh ,Tawlhsawn rawh," alo ti ṭhawt a, Helma chuan nui sung chungin," kan zawhte chuan ha anei ṭha awm kher mai," a han ti a.

Art Cottona chuan, " Naua, puakruk min phawrhkhum i tum em ni? Min phawikhalh thei pawh nila,,chu phei chu ka rung chiah lo a,Helma hi i phawi khalh theih i ring em ni?" alo ti a,
Billy chuan keipawhin ka ring bik chiah lo, mahse, i rawn tawlh hnaih leh chuan ka rualin i thi ve tho ang," a lo ti mai a. Cottona chu a nui suk a,Billy thusawi chu angaih pawimawhloh hmel kher mai, arawn pen hnai leh a,

"Pen tawh suh Cotton,"

Chu aw, kawtthler sir lehlam aṭanga rawn ri chhuak chu anelawm loh em avangin Art Cottona chu a ding chawt a, aw rawn chhuahna lam hawi a inher pahin, Helma chuan akutbawr chu puakruk kawm lamah athlak thla zawk a,.Mahse Suddena kut khinghnih a puakruk ahmuh chuan a ding khawng ta reng mai a,chutah a dar a chhin a, din pangaiin a ding ta a, Sheriff in sir a ṭang a suddena rawn chhuah phei lai chuan Jail lam chu ahan melh zauh a, amitmeng a hmuh chuan Sudden chu anui sak a," in ṭhianpa khan arawn puih che u in beisei a nih chuan theihnghilh hmiah rawh u,loh theihlohin a muhil ta anih kha," a han ti a, akut dinglama apuakruk hum chu a han melh zauh a," ka puakruk ngul ka ti kawi ṭep lehnghal" a han ti zui a.

Atr Cotton chu anchhe lawhin a phun sup a," chutiang kawng chuan aniang maw he tlangval hi atlanchhuah theih? Norrisa leh Rodgera pawh khan thildang an tawk bik lo ang" , a han ti a.

Sudden chuan,,,i ring dik chiah, mahse i lak nat hmello hle mai, alo ti a.
Cottona chuan,,i tukzal theiha an awm anih chuan mitlawktlaw ber an nih chu,, ati tun tun a,
Suddena chuan,,,in mi chhawrte an ni a, engvangin nge in zirtir ngun deuh loh? Khaile, inbiakna lam chu dubtawk ila, in gunbelt kha leiah thehthla rawh ule.mahse fimkhur viau ang che u...ati ta a.Cottona chuan phun nuah nuah chungin a gunbelt chu aphelh a, vaivut zingah chuan athlauh ta a.A tawlhsawn lai chu Suddena chuan amelh zauh a,
Chumi kar second chanve pawh tlinglo turah chuan Helma chuan a puakruk achuh ta thut mai a, Suddena chu a zuangzawk a, Helma bekah chuan Puakrukin a han hlap a, Helma chu a ṭhingṭhi rawp a, a puakruk chu lekkawh ala tum ta fo a,Greena chuan a puakruk ngul chuan ahan hlap leh a,Helma chu Bawng chehthluk ang maiin athal ta hut a,.

Sussena chuan, Mi ṭhenkhat hi chu an rilru hmin ahar ṭhin ngawt mai" a han ti phawt a, i unaute hi khawnge an awm? tiin Art Cotton chu a zawt ta a, Cotton chuan, Hetah an awmlo, awm sela chuan i thu chhakchhuah dan adang ngawt ang," vin fe hian alo ti a.

Sudden chuan," thil in ruahman fel vek tawh ani lawm ni? Norris leh Rodgeran min chhuah pui ang khan, Helma hian thui vaklo chu ka ṭhianpa hi chhawmchhuah atum ani lawm ni?, nangni ho hi engtin emaw tak zawng tih in ngai ani" ati ta sak sak a.

Arta chuan a chil a chhak ṭhuai ṭhuai a,i chan ṭhat lai chuan i ṭawng lian pung pung khawp mai, mister, silai kha kenglo la chuan chuti tehlua chuan i ṭawng lianin ka ringlo, a han ti a, an thawm hria chuan tualchhung mi engemaw zat an lo pungkhawm tawh a, phawt zet hian Suddena te ho chu an lo thlir a,..🐎

Zanin chu Pute Valmawia ka rawn chhawk leh zawk e,

11:32 pm ,ka kut a kham lutuk e,ka mut a chhuak bawk si, chhiar nuam ule,,(Tmwii).

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)