EL-CY BY Jona Fanai Jr.

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

EL-CY BY Jona Fanai Jr.

Unread post by Ngaia » June 3rd, 2016, 12:47 am

EL-CY
-------
Khuma mu pah chuan Lalnunsanga hla sak Di hlui tih chu ka ngaithla a. Ka mitthlaah chuan hmân a ka hmangaih L.c.i chu a lo lang thar iarh iarh a. A zunzam chuan min lo fan chiai chiai a.

Ni e, khawvel inher zel vang hian a hma ang kha chuan ka rilruah a thar reng tawh lem lo. Thar tir reng pawh ka duh hek lo a. Mahse, ka duh loh vang ngawt a theihnghilh thei ka ni si lo. Ka hriatchhuah a piangin ka thinlung hian a lo hmangaih zia leh a ni ai a lal dang anawm loh zia ka hrechhuak leh thin. Di hlui chu chang tawh mahla i hlui mawlh si lo.

Fur lai a nih vangin kan inchung a tang chuan Tui chu a lo far tluk tluk a. Ka nu nen chuan a farna laiah chuan Chawhtawlh leh bucket kan dawh zui a. Ruah tam tham deuha a sur tawh hi chuan kan buai thei hle a, kan inchhung chu a huh chiau pur thin.

Mission veng mawng lam, khasi veng road phei veng tlabirh lamah chuan mi building tha pui pui karah kan in hlui leh upa tawh takah chuan ka nu nen chuan kan cheng ve rek rek a. Kapa min boral sanna pawh kum 8 lai a lo ni ve ta reng mai. Ka nu lah nu hrisllo tak, sciatica vei a lo ni bawk si nen a hmel pawh a naupan ngaihtuah chuan a tar hle tawh a.

Pa leh unau ka neih loh vangin ka mal em em a, pa ber chan changa chhungkaw khawsak leh in leh lo, ka nu enkawl chu loh theih lohin ka mawrhphurhna a ni ta. Ka nu hi hrisello viau mahse nu taima leh awm mai mai thiam lo, mi inthlahrung mi tak hi a ni a. A theih ang angin mi kuva rah te thelin sum tlem azawng tal lo hmuh ve hram hram a tum tlat thin. Kan retheih em vangin damdawi tha leina kan nei lo a, ka nu chu tha takin enkawl thei ni ila chu anatna pawh hi la dam thei tur chi niin doctor-te paw'n ansawi nghe nghe a.

Kanin chu han enkual vel pawhin thil hlu engmah hmuh tur leh chhuan tur a awm lo. A ruak huai a, thutthlengsei hlui tawh lam pahnih chu a langsar ber a ni. Bangah chuan ka pa boral a anralna pangpar hlui tawh tak chu a inkhai a, chu chu kanin cheimawina awmchhun a ni leh mai. Bed room chu plywood hlui tawh takin a in pingdang ve hram hram a, chhuat lah chu thingphel la ro chiang lutuk lo hman a nih avangin a che nasa hle a,a kau huau hlawm a.

Kan in chhiat zia leh kan tlakbal zia te, kan retheih zia te hi sawi vek dawn ila in awih lo hial zawk ang. Tin, ka tan pawh mahni dinhmun angial angan lutuk a han sawi chu a nuam chiah lo, mahni intih mualphona mai a ni dawn si. Chumi a vang a mahni dinhmun zahpui thei ka ni chuang si lo a.

A chang chuan khawvel hi a nunrawng mah mah ni hian ka hre thin! Duhsak bik neiin keini ang mirethei tan hian vanneihna te hian min kal kân bik ni hian ka hria. Eng kan ti bik nge heti tak a kan awm bik a, anchhia hial kan chungah a tla bik em ni? Tih thleng a ngaihtuah chang ka nei fo mai. Dinhmun a tleu tawh laklawh chuan mite hriat loh hian thil tha lo pui pui ngaihtuah fo chang a tam mai. Mahse, chhia leh tha hriatna hian min la pawt ding hram hram a ni.

Kan dinhmunin a zir ve miau loh a vangin nitin inhlawh chu ka hna a ni mai a. Thildang tih pawh chak ve thin mah ila hun hian remchanna min pe ve phal si lo. Ka nuin min tur ngun a vang leh a phal ngang loh vangin inhlawh chungin college chu ka la zawm ve hram hram a. Principal hriatthiamna a vangin regular loin, ka hman chang chang a class kal min phal sak hlauh a, a chungah ka lawm ngawt mai.

Tunlai anga semester system a kan kal ve loh avangin attendence a la pawimawh lutuk lem lo a. Test a awm loh vangin kumtawp exam chu exam awmchhun a nih bawk a vangin inhlawh duh tan pawh a la zia angreng fu a. Mahse, night college awm tawh lo a day shift a anlet ta vek hian class kal paha inhlawhfak a ti buaithlak ta deuh a.

A chang chuan kar tluanin college kal miah loh tum ka nei fo a, ka kal tum pawhin kar khatah ni 3 bak ka kal hman ngai lo.

Kut durh thup trat trat chunga class ka kal ve chang te hian ka kal khat em a vangin ka mikhual thei hle a, mahni dinhmun hriatnain min pawh hniam tawh nak laiin hmelhriat pawh nei ve mang lo a han awm ve ngawt thin chu hrehawm ka ti thei hle mai. Hnathawhnaah kha chuan kan dinhmun anga hniam ve tak tak te nen bianga thlan luang ngiai chung khan inpawh takin kan nui ho dar dar kha a ni a. Nuam pawh ka ti zawk daih mai. College-ah zawng nunphung a inthlau em mai, incheinaah lah kan inthlau lutuk a nuam ka ti thei lo.

College-ka kal ve thin trum chuan min ngaihsak tu pakhat ka nei ve tlat mai. Lalchhanhimi, upper republic a awm a ni. L.c tiin an ko thin a. Nula tlawn tlai tha tak, pian zei tak, hmel ngaihla awm deuh mai a ni a. Hmeltha vur ti a sawi tur ni lo mahse a pumrua leh a pian chuan mipa a hip angreng hle mai.

L.c.i hi hriat chianna em em ka la nei lo nain ankhawsak a hniam lo ang tih ka ring a, thian kawm nuam ti mi tak niin ka hre bawk a. Ka dinhmun ka hriat chian em a vangin va hnaih ka tum hran lo a, min ngaihsak ve deuh tu awm chhun a nih vang erawh chuan ka ngaina khawp mai. Ngaihzawng lamah erawh a en a en ngam chi rual ka nih loh vangin chutiang zawng chuan ka en ngai lo a, ka ngam lo bawk a.

L.c pawhin chutiang zawng chuan min en ka ring bik lo. Ka inthlahrun thin em vang leh thian kawm tur ka neih loh em a vang chuan min khawngaih a nih ka ring zawk.

Class off laite chuan midangte chu college canteen leh college bul restaurant velah chuan thil tui tak tak eiin anin hnawh puar hlawm a. Kei chu mi hmuh hlau takin college hnuai garages kilah chuan ka tifin chu a rukin ka ei mawlh mawlh a. Mi hmuh ka hlau thei thin hle mai. Midangte chuan annei a anthawh chhuah ni lem lovin an inchei nalh em em a, anduh duh anei in anin a ka sawisel phak a awm lo. Mahse kan dinhmunin a zir miau loh vangin ka tan chuan inthlahrunna min belhchhahtu a ni zel mai.

Kawtah chuan midang ho chu hlim taka nuiin aninkawm ho dial dial a. Class kal si lo a college kal ve ringawt pawh anawm nual thin. Thenkhat erawh corram board hmaa lo thu nileng ta mai mai pawh anawm nual, mahse, chung ho chu ka sawisel phak anawm lo a, anni anga duh ang ang a khawsa thei ni ve ila kei ngei pawh ka awmdan tur a ni maithei. Mahse, ka dinhmunin chutiang tih ve chu min khap sak a. Ti ve ngat ila chu midang mawipui ang chu ka tan chuan nuihzat hlawhna mai a ni dawn si.

Ka tifin ka eizawh chuan ka thiankawm ve theihna hmun libraryah chuan ka lut a, ka awm tamna ber a nih a vangin ka inthlahrung lutuk lem lo a. Lehkhabu tha ka neih ve loh a vangin ka tan chuan library hi a tangkai khawp mai. Ka kal loh chhunga ka zir ve lohte chu ka enkual thuak thuak a.

Lehkhabu hrang hrang ka chin kual lai chuan L.c.i chu a lo lut ve mek a, min hmuh chuan a nui sak a. Ka bulah chuan a lo thu ve nghal a.

L.c.i hi ka ngaizawng hauh lo a, ka ngaihzawn ngam a ni hek lo. Ka bula a lo thut chuan ka inhlawhfakna a ka kut chik hrup maite leh a durh kehna hnu pawr fep maite chu hmu lo se ka duh. Dik tak chuan ka dinhmun diktak hi hre vek lo se ka duh a ni. Ka kut chu ka thukru tawk tawk a.

L.c.i chuan ' tunlai chu class i lo va kal khat ve? Enge i tih thin a?' a ti a.

Sawi tur ka van angreng khawp mai. Ka thiltih thin diktak chu sawi ila min kawm duh loh phah mai angem? Mahse, min kawm ve duh awmchhun chu dawt hrilh chu thil tih chi a ni si lo. Ka taksa chu a lum pup pup a, chu zawhna kher chu chhan har ka va ti tak em!

Hmai sen pawp pawp chung chuan "ka inhlawhfa thin a" ka ti tham tiak a. A ni chuan min lo melh reng mahse en pawh ka en ngam ve lo.
"a nih tak chu, claz i kal khat thin lutuk a, ka lo zawng ru deuh fo thin che a sin"
"claz regular taka kal hi ka hman ve lo a ni. Inhlawh reng ka ngai bawk si a" ka ti a.
"Ka ngaisang hle mai che, claz kal paha inhlawh thin hi antam lo a sin, ka ngaisang zual sawt che" a ti a.

Min ngaihsan tak tak vang a nih chu ka ring hran lo. Tuman inhlawhfa chunga claz kal mai maite chu anngaisang hran lo tih ka hria. Mahse, ka lawm tho, ka lawm lutuk tlat.

" ka fel vang pawh a nilo, kan dinhmunin a zir miau loh vangin inhlawhfa lo thei ka ni si lo a. Chuvang chauh zawk chu a ni" ka ti a.

Class lak a lo hun leh tak a vangin kan chhuak dun ta a. Kan subject a inan a vang leh kan honours subject pawh a in an vek a vangin L.c.i nen hian section khatah kan awm dun a. Kan sectionah hian student 250 zet kan awm a vangin inhriat kim pawh a harsa hle a.

L.c.i hnena ka dinhmun ka puang ta vek chu nuam ka ti chiah lo khawp mai. Min hmusit ang a min kawm duh loh phah ka hlau a ni. Mahse, chumi a vang mai a min kawm duh ta lo a nih chuan pawi tihna em em ka ni hran lo e. Ka kawm phak a ni lo a ni mai a.

Claz banah chuan L.c.i chuan Gate bulah chuan min lo nghak reng a lo ni a. A bul ka thlen chuan min lo nuih seih a, a mawi reuh khawp a sin. Gate pawnah chuan kan chhuak dun a Auditorium panna step bula thutna ansiamah chuan kan thu dun a.

L.c.i chuan ka chanchin kimchang tak leh kan chhungkaw dinhmun chu hrilh turin min phut ta mauh mai a. Ka sawi hreh viau mai. Ka chanchin kimchang a hriat chuan min hmusit lutuk ang. Min phut miau a vang chuan kan chhungkaw chanchin leh kan retheih zia chu ka hrilh ta vek a. Ka thusawi lai chu chiang takin min en reng a, min khawngaih hle tih a hmel a tang chuan ka hmu thei a.

A chanchin tlangpui pawh min hrilh ve a, mahse, a sawi tha vak duh lo. Ka inthlahrun a hlau a nih ka ring. A nu leh pa te chuan sawrkar hna chhete anthawh ve ve thute min hrilh a. A hnu ah officer ve ve annih thu midang hnen a tangin ka hre leh tho a. L.c.i chuan pianpui unau a nei tawh lo a, a unau mipa in a naupan laiin a boral san tawh a ni.

L.c.i nun dan hi mak ka ti ngawt mai! Mi hausa tak anni a, duh duh nei thei a ni chungin a nun leh incheina te chu a simple em em a. Claz kal nan pawh skuty te nei a duh ang ang a awm thei a nih vei teh reng nen a neilo ber ang hrimin a awm ve bawrh bawrh a. A nun lah chu a hlim em em bawk si a.

Hun rei tak kan thut dun hnu chuan claz dang ho pawh an lo bang a. A thiante ho anlo kal tak bawk a vangin L.c.i nen chuan in kham lo tak chungin kan inthlah ta rih a.

L.c.i nen kan inkawm tum kha kar tawp lam kha a ni a. Kan dinhmun leh kan retheih dan zawng zawng kha zep lova ka sawi tak vek a vang khan eng ang chiahin nge min ngaih ang tih chu ka ngaihtuah neuh neuh a. Keiang fahrah a kara inhlawh chawp reng ngai chu eng ualah chuan min ngaih ka ring lo. Min kawm duh loh phah a nih pawhin ka dem chuang lo. Ka tawn than pangngai anih a vangin tawrh dan tawk ka thiam em em ang.

Kan hnathawh lai kan zawh tawh a vangin hnathawh tur dang ka zawng leh fat fat a. Vanneihthlak ka ti dawn nge vanduai thlak ka ti zawk dawn? Kan principal chu kan inah lo kalin kan collegeah lungrem hna thawh tur a awm thu min lo hrilh hlauh mai a. Huphurh ru tak lawm tak siin hnaruak ka hmuh chu thawk turin kan inbe fel leh ta a. Hnathawh hreh nei thiang lo tih takah hnathawh tur chu ka hmu thei fu mai a. Ka nu pawh a lawm thin khawp mai.

Kan college science laboratory thar sakna turin college building bulah chuan hna kan thawk tan ta nghal a. A chim tur ven nan Lung kan remta. Lung rem hi ka tih than tawh avangin ka thiam ve tawh hle ani.

Mahni kalpuite ngei ngei hmuh lai a hnathawh kawr nena inhlawh chu a lo nuam hauh lo mai. Nalh tak taka incheiin student ho chuan min kal pel fua fua a. Ka hmel lo hre tawh tlemte chuan min melh hrek hrek a. Min ngaisang lo tih hriat tak a min sawi zui sep sep thawm hriat phei chuan anuam mawlh lo. Nuam lo mahse ka tawrh angai miau si a.

Kan principal pawh hi harsa tak a sikul kal a, inhlawhfa chunga bei tang tanga tun dinhmun hi thleng thei a ni. Mizorama kan officer lian tak takte pawh hi a hun laia harsatna leh hrehawm tamtak tuar a zirte anni. Chu chu a ropuina lai tak ani bawk a. Mahse, anthawhrimna te hmuh kanin anhlawhtlin hnu chiah kan hmuh sak thin si a tiin ka ngaihtuah neuh neuh a.

Kan lung rem leh tur ka chher mam leh tur ka thlek vang vanga, formula hi a tam mawlh lo, mipa tu tan pawh thiam loh tur a awm lo. Chhut mam leh tuma ka hnung lam en miah lo a tuboh ka ban laichuan ngalrek bawr ka man nawlh mai a, ka phu chiang hle mai. Ka han en nak chuan L.c.i chuan min lo fiama ka tuboh lak tur chu a kein a lo thai sawn a lo ni.

L.c.i chuan min lo nuih seih a. A thiante hmeltha leh inchei nalh tak tak zingah pawh min zahpui hmel reng a pu lo a. "i chau tawh em? A tihdan ka lo zirtir dawn che a mi" tiin min fiam bawrh bawrh a. Ka bulah chuan a la thu ta ang sauh sauh a. He nu tak hi chu aw a va han danglam tak em. Ka hah a tidam sawng sawng thei nia.

Min be siam siam a, ka kut char khawro rum tawhte, ka thlan luang ngiai ngiaite leh ka hnathawhna thuamhnaw bal leh rimchhe takte chu ten hmel reng a pu lo a. A mi ngainatna chung thil te chuan anti danglam lo hle tih ka hria. Ka lawm ngawt mai.

Kar tluanin claz pawh kal ve hman lovin hna ka thawka. L.c.i pawh chuan a khat tawkin ka hnathawhnaah chuan min lo kan ziaha. Kuva leh eng ilo eitur min lo ken a, anzirlai ka hriattur awm chinte min lo hrilh a. Ka va lawm thei tak em. L.c.i zawng thian danglam tak a va ni em. Ka tana a hlutna hi ka damchhung zawngin ka rul seng tawh lovang.

Ka thiante, ka hnathawh pui ho te chuan L.c.i min ngaihsak dan anhmuh chuan inngaizawngah riak min ngai a, min dem fiam a, L.c.i hmelthat leh piannalh antih zia anhan sep chho a. Inngaizawng hauh lo mah ila a ruk tak chuan nuam ka lo tiru thei hle thin.

Kar hnih zet kan thawh hnu chuan kan lungrem chu kan zo ta. Claz ka kal khat a vangin ni hnih khat tal chu kal ka duh a. ka inhlawh regular deuh hi chuan ka nu nen chauh kan ni bawka kan hautak lutuk lo a kan mamawh zualpui chu ka phuhruk ve thei mai thin a.

Claz ka kal leh ni chuan L.c.i chuan min lo lawm thiam leh hle mai. Diktak chuan L.c.i chu awm lo se college kal hi ka huphurh thei ngawt ang. Amah a vang chauha phur ve ta em em ka ni si a.

Claz banah chuan L.c.i chuan thil pek tur che ka nei a, mahse, kanin a i lo len loh chuan ka pe dawn lo che a ti mauh mai si a. Ka va'n huphurh tak em. Andinhmun a hniam lo tih ka hre ru ve vek si a. Thenawm awmthei deuhte ina chuankai pawh inthlahrun nak laiin anni in kher kher a len chu ka zak a ni.

L.c.in min sawm luih tlat a vang chuan hreh chung chungin ka zui ta nge nge a. Ka rin leh ka suangtuah phak bakin anin chu a lo nuamin a ropui daih mai. An furniture leh bungbel velte lah chu uluk taka enkawl tih hriat takin a fai hlarh a. A inrem dan a tang chuan anin enkawlna pawh a tha hle ang tih a hriat a. Lehkhabu chhuara anlehkhabu a tang pawh chuan mi hawi her zau tak anni tih a lang reng mai.

Awmpui annei miah lo chu mak ka ti leh hle bawk a. L.c.i chuan Thingpui a lum a, kan inah pawh a lo len ve ngei tur thu a la sawi tak deuh deuh a.

Teuh lo mai. L.c.i chu kan inah a lo leng tur a nilo. Anin leh kanin ka ngaihtuah dun pawhin a theih toh. A ni chuan kan in chu Bawng in pawh min tihsak se a awm lohna ka hre miah lo ang. Kan khawsak phung reng a inthlau em mai.

Ka ha dawn chuan L.c.i chu a roomah chuan a lut a, kum tira tanga note anlak zawng zawng chu computer a type sa xerox vek chu min pe ta a.

L.c.i te in ka chhauh san hnu chuan ka thaw huai a. Diktak chuan hetiangang in ropui taka awm hi nuam ka ti ve lo. Inthlahrun reng a ngai a ka thiam lo.

Khawvel hi chu a fair ka ti lo. Thenkhat malsawmna tinreng a vur a thenkhat min ensan bawk si. In ropui tak tak a cheng te chuan kan dinhmun hi min hriatthiam pui chu sawi loh midangte nundan hi anchhut sak peih lo hrim hrim.

L.c.i chu a lo leng ve tur a ni lo. Leng tur pawhin ka sawm hlek lovang. Kan in leh anin a inthlau lutuk. Kan inah chuan thutthlengsei hlui tawh tak pahnih kha kan thil hlu neih chhun a ni mai si a. Kan dinphmun chiang tak hi a lo hmu ve tur a ni lo.

Kalkawngah chuan vaipa hian buara var ung tawh tak kawt chungin "thirsia a awm em" a lo ti lauh lauh a.

Ni e, vai thir chhe zawng tiin kan hmusit em em a, dik tak chuan mizo ten thir chhia kan zawng a, kan zawn sa chu anlei mai zawk a ni. Anni chuan thir chhia hmangin annupui fanaute anchawm a sin. Thir chhia ti a kan chhuih lum mai mai kha anchhuang tuia thir tha siam nan anhmang leh hlauh a. Chu chu a ni khawvel chu! Chhe lua a awm lo. Miin tih tak taka thil a tih chuan ahlawhtling thin.

Ka hman hun lai tak a nih a vangin claz pawh thahnem ngai takin ka kal a. Ka kal ve tum hi chuan hlawk pui ka tum ve hle thin. Class off lai chuan L.c.i nen chuan kan inkawp chawt a, a bula awm a hahdam thlakin mi hriatthiamna a ngah em em a. A bulah hi chuan thinlung takin ka nui ve thei thin a.

Chhun chawlh hunah mawlh hian ka buai thin. Mite anga canteen vela chawlhna ka neih ve loh a vangin tifin ka pai mai a. Lunch break ah tawh chuan L.c.i chu ka thlim a, min hmuh loh turin ka hel hram hram thin.

Ka awmdan chu a lo hre ru vek nimaw nikhat chu garage a motor phena ka tifin ka hawn mek lai chuan motor pakhat phen a tang hian camera a lo de zawk mai a. Ka zakin a ngaihna ka hre lo ngei mai. Mi thil ruk tumah min ngai em mi niang aw ka ti rilru neuh neuh a.

Chutihlai chuan motor phen a tang chuan L.c.i chu a lo nui chhuak chiam a. Min lo enthla ru reng a nimaw. Ka va han run tak. Ka nuih pawh a za ve lo, ka thin a rim lek lek. Ka zah a vang chuan ka hmaite chu a sen awp awpin ka hria. Ka tifin ei lai te chu min la eipui zui leh ta nghal a. He nu tak hi chuh.!

"tifin ei tur pawhin min sawm ve duh lo ah. . Min thlim vel maw? I phakar hle mai" a la ti zui. Mimah zah nak a laiin ka thin a ur bawk si.

'i duh leh pai va la a ni mai a lawm' ka ti a. Ka melh rum vak a. A mah lah chu a la nui awr awr a. Mimah mi hriat hlau a thawm dim ve thin nak a laiin.

"ni dawn tak, naktuk a tang chuan ka pai ve tawh ngei ngei ang. Chuan min ei pui duh a ngem?" a ti a.

Ka thinrim der ve laklawh tawh. Chhan pawh ka chhang duh lo a. A ni lah chuan min tih lungawi tumin min fiam a, min nuih tiah tiah a. Min nek salh salh a. A hmui a zum a a nui hmawn hmawnta. Thinrim rei theih pawh a ni lo.

Claz banah chuan L.c.i chuan gate bulah chuan min lo nghak miah lo chu mak ka ti hle mai. Nidangah chuan nise min lo nghak ang a, min lo nuih seih ang a. A bag chu ka kokiah a lo hmeh bel leh chawt chawt ang a. Ka inhlawhfakna kut chik thap hrup chu hre lo niawm takin a vuan ang a, kan thutna thinah chuan thuin hlim takin a nui leh awr awr awm si a.

Thil engemaw hmanhmawh thlak deuh a nei a nih vangin min hawn san a nih ka ring a, rilru khingbai tak chung chuan ka kal ta hnak hnak a. L.c.i hmel hmu lo a ka haw chu ka ruak huaiin ka hria a. Ka rilru a nuam lo hle mai. He nu tello hi chuan ka nun hi nunruak, mumang ang mai a niin ka hria. A mak ngawt mai.

In ka thlen chuan ka nu a lo awm lo a. Ka thuam hnaw chu ka hlip sawk sawk a Towel koki a bat chungin underpants chauh hain inbual tur chuan ka faifuk chhuak hlarh hlarh a. Chutihlai tak mai chuan L.c.i chu kawngka ah chuan a lo dak heu mai. Ka hmu thut chu ka zak lutuk a room-ah chuan ka tlan lut chawn chawn a. Ka va han haw tak. Ka kekawrte mawng pawp kha a lo hmu hman a ngem le? A tha lo zawk ka hak tum tak a ni si a ka zak lutuk.

Room a tang chuan ka chhuak ngam tawh lo. A ni lah chu a nui awr awr a. Ka va phawk chiang che ve. I lo sexy hle mai a ti a a nui awr awr a.
'engatinge i lo len?'
"ka lo leng ve duh a ni mai a lawm. Min sawm duh bawk si lo a. I phalna lak hmasak kher a ngai a mi"
'ngai ngai, ka phalna lo chuan lo len ka phal lo, haw nghal rawh'
A lo leng hi ka hua a ni. Lo leng tur a ni lo a sin. Kanin hi a hmu tur a ni lo.
"ka haw dawn chuang lo. Ka haw hun chu ka thu thu a ni mai" a nui pah awr awr a. Ka va han ngei tak.
'haw rawh. Ka inbual dawn?'
"pindan a tangin inleng ankawm ngai lo. Lo chhuak rang mai rawh"
ka in ha tha sawk sawk a. Mahni inah pawh inthlahrun a na duh kher mai. Tukhum thak lo pui hiat nauh nauh pah chuan ka chhuak ta nge nge a.
'engtinnge kan in i lo hriat theih a?'
"ka lo zui ru che maw le"
'i va han zak theilo tak. Hmeichhia zawkin mipa han zui ruk te chuh'
Ka tawngkam chu a mawi lem lo tih ka hria. Mahse, ka hua a, ka thinrim takzet a ni. A lo leng hi ka hua.
"in kawmchhakte uite lo chu zui ru tu pawh i neih chai loh kha, ngawi mai mai teh" tiin L.c.i chu a la nui tak deuh deuh a.

Dik chu a dik ve angreng viau lawi sia. Kan thenawmte uite Buangi hian min star vang pawh ni chuang lovin ka hnathawk tur leh ka chhuak tur reng reng hi min zui a ching a. Ka hnawt haw fo mai.

Tih ngaihna tak pawh ka hre tawh lo he nu hi chu. Min hmuhsit vang ti dawn ila ka hnathawk lai pawh min zahpui lova midang tam tak zingah thian ka neihchhun, min kawm serh ngai lo tu a ni bawk si a.

L.c.i chu kan thutthlengsei hlui tawh takah chuan a thu a, kan banga ka pa anralna pangpar ung leh hlui tawh tak chu a thlek vang vang a. Kan in chhung chu ka melh kual a, bungbel chhe fahrah ve tak tak te, kan in bang hlui tawh tak te leh kan Darthlalang keh vang a kan thawm tup tawhte chu ka zahpui thar hle mai. Ka zahpui tak tak vawikhatna ni hialin ka hria.

Anni in ve thung kha chu chhawng sang tak nilo mahse a nuamin a fai tha em em a, engkim mai chu tunlai tak leh fai tha tak vek a ni si a. Kanin nena khaikhin chuan vanram a ni ringawt. An thutnate chu sofa dup nuam tak tak a ni si a. An pangpar khawite chu nalh tak tak, uluk taka enkawl a ni tih a hriat.

Mahse, keichuan pangpar lem hi ka ngaina lo. Mihring ang chauh a ni. Nalh ve tak si mahse rimtuina pakhatmah nei lo, pawn lam mawina chiah nei a chhung lam belhchian dawl lo a ni. Chu chiah chu a ni mihring khawsak phung chu.

L.c.in kan bang hlui tawh tak a enkual lai chuan thil ka hrechhuak thut a. Rang takin ka tho vat a kan Calender tar chu ka han letling sawk sawk a. L.c.i lah chuan thil pawimawh a awm a nih ringin a enchak ta tlat. Kan inchuh a,a thler ka hlau si. A thler vaih chuan kan chhungkaw budget a buai leh ngei dawn si a.

'i en ve pawh a ngai lo. In inah pawh engmah ka en pui lo che, in t.v takngial pawh min entir bik lo' ka ti tlat a. Kan calender hi kan tan chuan a pawimawh lutuk. Ka nu nena engkim kan chhinchhiahna a ni.

A thler ka hlauh em si a vang chuan ui chung chungin ka entir ta nge nge a. A en lai chuan a lo nui chhuak awr awr a. Ka va han ngei tak.

Ni e, mi hmuh tir chi loh tamtak a awm a ni. A bul tan phat jannuary ni 1 leh a tawp lam December 25 a pentui sen a 'SA EI NI' tih hawrawppui a ka ziah te chu a lo hmu a ni. Chutiang hun bak keini chhungkaw tan sa eina chance a awm miau loh avangin he hun lo thleng tur hi keini nufa hian kan nghakhlel a sin.

Chutah ka nuin hawrawp chhe tak a Vawkte lak ni, vawkte til lakni tih vel a lo ziahte chu a chhia a chhiain a ziak lian vei fu si a. A zia lo duh khawp mai.

Chutia L.c.i a nuih hmawn hmawn lai chuan ka nu dawr kal pawh nutrela pack keng chung chuan a lo haw ve mek a. A hmelhriat ngailoh nula hmeltha zet mai a fapa nen a hmu dun chu a mumang lamah a man phak ngai loh a nih a vangin a enduh hle mai a, a kalna pawh a en chang tawh lo a niang kan kawngka biangah chuan a bata slipper chat hmawkin a lo inchhuih lut ta teh reng a. A va zia lo duh tak em.

Ka nu chuan ka thiannu chu Thingpui siam ngei turin min duh a. A chhuanlum sa chu ka thlum a, a paw in ve pha ta lo chuan asen thlumin ka siam a. A hmeh lam erawh kan nei fahrah thei si. Mahse, ka nu hian Bal (bane) hi a ngaina em a, a chhum ve reng thin a. Chhuarah pawh chuan bane la lum vat vat chu ka hmu mai reng a.

Bal hi a hrisel em a vangin hnam changkang leh mizo zingah pawh inla changkang chin hi chuan anngaina fu roh a. Keini pawhin bal kan ngaina hi kan changkanna awm ve chhun a ni awm e.
Thingpui hmeh atan chuan Bal chhum la lum vet vet chu ka chhawp a, L.c.i pawh chuan anchhungin bal anngainat thu chu a sawi thuai a, ka lawm rilru hle mai.

L.c.i chuan Bal chu a han la a, kheh a tuma sak a tih hmel hle mai. Ka han la ve a. Karei! A hel vek. Kanu ka han zawh chuan chhum tura tuiluma a sil a la chhum hman loh a lo ni. Ka va han zak leh tak em. Hnar aw te te tih angai zing ta hle mai. Chhuara ka dah leh turin kan thleng rem sa ka la ti tla rum rum zui. Che a lai laklawh zo. L.c.i lah a nui awr awr zel tawh mai si, kei tak pawh nui lo thei ka ni lo. A. . . Inleng hi kan nei khat em a, inleng neih tawh hi chuan awmdan kan thiam lo a ni keini nufa hian.

L.c.i haw chu thui tak thleng ka thlah a, a kal liam thleng chuan ka thlir zui a. A liam dawn chuan min bie bie pahin naktuk chu claz ang aw. .tifin ka lo pai ve ang a ti lauh a. A nui thaw zui. Ka va han ngei thin tak he nu hi chu. Ka ngei rei phal tak tak chuang si lo.

A tukah chuan inhlawhna ka hmuh mai loh a vangin claz kal tur chuan ka insiam leh mawlh mawlh a. Mite chuan naktukah eng ber nge ka hak ang tiin zan lam a tangin an dress tur an ngaihtuah lawk a ni ngai a. An hak tur neih tam vangin anbuai thin a. Ka tan erawh chung thil te chu vana rah ang a ni.

Ka khum hnuai a tang chuan ka pheikhawk neih chhun chu ka pawt dawk zawk a ka nu pawn fen ka hmuh remchan hmasak ber chuan a hmuhloh hlanin ka hru nawk nawk a. Ka mawza chu ka khumbul tukverh biangah chuan ka vaw khu chum chum a. Ka jeans kekawr second hand hlui tawh tak chu ka ha a, kawr hak turah chuan ka buai lo. Nimina ka hak loh zawk kha a ni leh mai.

Engatinge pathian hian vanduai tur a min lo siam bik le? Hetiang khawpa retheia khawvel hmachhawn ai chuan he khawvelah hian lo tiang lo law law i la tha tur hi a ni a. Mite chuan claz kal turin thuamhnaw tha leh man to tak tak,a chhuak thar leh tun lai hlir aninbel thin si a. Keini zawng kan pa chhe em a ni.

Claz kal tur chuan ka inpeih at tawh a, L.c.i khan tifin kha a pai tak tak a ngem le? A ni pui roh khan a pai tak tak ang a chawhmeh tui deuh deuh a pai ang a, keiin nutrila ringawt ka pai leh chuan a nuam miah lo ang tiin ka tifin pai turah chuan ka buai ta hle mai. Amah vang vek a ni. Ngatinge L.c.i hi ka lo tawn kher kher le. Lo tawng lo law law ila a tha zawk tur. Mahse,a ni kher ka tawng hi ka vannei bawk si.

Ka kal kawngah chuan ka ngaihtuahna chu ka sawr bing hle mai a. Retheih hrehawm zia hi mite hian min dawn pui miah si lo. Mihring nun hi enge a nih reng reng le? Kan piang a, kan seilian a,kan upa emaw upa lo emaw, mihring chu thi vek tur kan ni. Kan thih hnuah chuan mihring hi enge kan nih? Ka ruang kilin mi tamtak an lo kal ang a, mitthi ruang ankil a ni. Ka kuang chhungah ka taksa anzalh ang a, ka taksatchu mitthi ruang a lo ni ang. Ka taksa kuanga dah chu thlanmualah anvui liam anga mitthi vui a lo ni leh anga. He khawvelah hian hming pawh nei tawh lovin ka hming chu mitthi a lo ni tawh dawn si.

Khawvel nun hi a van ho tak em! Kan tawp hunah chuan milian leh mite pawh rual khai takin mitthi hming kan pu vek dawn si a. Chu hun chiah chu a ni keini miretheite kan ropuia ngaihsak kan hlawh ve hun tur chu tiin ka ngaihtuah neuh neuh a.

College ka thlen chuan L.c.i pawh a lo awm tawh a, a thian changkang tak takte bulah chuan hlim taka titiin annui har har a, min hmuh chuan min lo nuih sak a, a thiante bulah chuan kan sa eini vel kha a sawi loh hram ka beisei.

Claz off lai chuant L.c.i nen chuan kaninkawm reng a. Kei ang mirethei bakberh lutuk L.c.in mi zinga zahpui miah lo a min kawm duh hi chu a mak ngawt mai.

Lunch break hunah chuan L.c.i chuan min lo mit sir zeuh a, kan claz kawngka bulah chuan min lo nghak a. Garage ah chuan kan tifin chu kan eidun a, a tih ngailoh a thil a nih avangin chutiang thil thar chuan a ti lawm hle tih a hmel a tang chuan a hriat a.
L.c.i nun zia hi chu a mak ngawt mai, min hmusit ti dawn ila min ngaina ve em em bawk si. Kan dinhmun zawng zawng pawh a mit ngeiin a hmu vek si a. Min hmusit lo ti dawn ila engatinge ka awmdan anga awm ve kher a tum si le. .? A awmdan thin pawh a ni bawk si lo a. Ka rilru chu a inbuk tawn nasa hle mai a.

Claz banah chuan L.c.i chuan gate bulah chuan min lo nghak leh a. A tihdan ngaiin ka kut chik thap hrua chu a kut nem nalh chuan a lo vuan a, a bag chu min hmehbel leh nghal chawt a. Ka kut lehlama L.c.i kut no tak vuan chungin ka kut lehlam chuan L.c.i bag chu ka khai hnak hnak a. Kan thutna thinah chuan kan thu dun leh ta a.

L.c.i chu min hnaih takin a thu a, thil pakhat ngaih theih loh ka nei.
'L.c, i pa minister a ni em?' ka ti a.
"aih ni lo, i hriat tawh reng kha"
'i pu tal minister a ni em?' ka ti leh a. Mak tih hmel takin min en a. Contract hna ka mamawh ta thut a nih a ring melhin min melh a.
"aih, nilo ngatinge?"
'a nih chuan ka pheikhawk rap tawh suh'
L.c.i chu a nui awr awr a, min chum taih taih a. L.c.i nui hmel hi chu a tha ngawt mai, a thinlung takin a nui thin si a.
'L.c, engvangin nge min kawm duha? keini ang mirethei lutuk min kawm duh hi mak ka ti ngawt mai' ka ti a.
"keipawhin ka hrethiam bik chiah lo.ih. .ih. .ka hmuh hmasak ber ni a tang che khan i hmel hi ka ngainat zawng tak a nia" a ti a.

'kan inchhungkhur awmdan zawng zawngte, kan retheih ziate i hre vek si a' ka tih lai chuan min melh nur teh e. Ka sawi tum ka sawi hma chuan min lo tawng khalh zung zung a.

"chutiang zawng chuan thil sawi ziah tawh suh ka tih che kha. Zoramah hian mihausa leh thil ti thei tak tak antam lutu. Annun erawh a hlim lovin zan pawh muhil thei lo khawpa nun hlim lo antam lutuk. Chung mi hausa ho chuan neihbelh duhin anbuai a, an chantawkah anlungawi thei ngai lo. Chutiang mi chu anrethei zawk a sin. Nangchuan chung zawng zawng aia hlu hlimna inei a, i hausa fe zawk a sin" a ti a.

L.c.i nunzia tak hi chu aw! Ka va ngaisang thin tak em. Amah a vang hian inhlawh pawh hrehawm ka tih loh phah a, claz kal pawh nuam ka tih phah em em si a.

L.c.i hi ka nunah eng ang chiah nge a nih le? Engatinge ka ngainat tak em em le? Ka thian tha tak nimahse ka thian tha satliah ringawt chu niin ka hre tawh lo. Ka hmangaih em ni ang le? Teuh lo. . L.c.i te ang hmangaih te chu ka tan thil tih chi a ni lo hrim hrim.

'L.c, ni e nangmah a vang hian ka nun hi nuam ka tih phah a, khawvel hi nuam ka ti thar thin a sin' ka ti a. Ka rilru tak tak ka sawi a ni.

L.c.i chuan ngaih la takin min melh ralh a, ka kut chik thap hrup leh ka inhlawhna a vanga ka kut durh keh char tak te chu a kut no tak chuan a chul heuh heuh a.

"ngatinge ngaihzawng lam hi i ngaihtuah ngai miah loh a?" a ti a.
'l.c, keini ang tan ngaihzawng neih ngam chi a ni hleinem. Neih ve chak ngawih ngawih mah ila kan retheihna hian nei ngam turin min siam lo a ni' ka ti hman dek dek a L.c.i chuan-
"khamaw a sawi leh ta. Retheih hi sawi ziah suh. Rethei leh hausain hmangaihnaah ramri a kham dawn a mi? Mirethei ber pawhin hmangaihna a nei a, hausa ber pawhin hmangaihna a nei tho a. Rethei leh hausa inkarah hmangaihna enge a danglamna?" a ti a.

'ni e,L.c, hmangaihna dik tak chuan hausa leh rethei a thliar hrang lo a. Hmangaihna chuan retheih a huam a, nawmsak pawh a phu hle a ni. Mahse, tuna kan khawvel hman hi ngaihtuah teh. Mihring nunphung leh khawsak phung a inthlau tulh tulh a, dinhmun inthlau lutukte chu anin kawp rem thei tak tak tawh lo a nih hi. Anmahni inhmangaih mahse khawvel leh annu leh pa te hian harsatna anthlen tho thin' ka ti a.



A hnuai ah conti...
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 3rd, 2016, 12:47 am

"nang hi chu i puitlingin thil hi i thlir kual nasa thei si a i ropui ngawt bik mai. Ih. .ih. ."
'enge ih. .ih chu'
"i hnarkuaah spiderman a uai nel nel"
'hmeli leh min hrilh that ve tur a lawm'
L.c.i chuan thutak fein " ka hmuh tirh a tang che khan ka ngainat zawng tak i ni a, kha ni a tang khan ka ngaihtuahna zawng zawng hi i luah vek a, ka ngaina telh telh cheta, ka hnaih telh telh bawk che a"
'chuan?'
"hmeichhia zawkin hetiang thu sawi hi zak lo pawh min ti mai thei a, mahse, nangin sawi hmasak i tum bawk si lo a min hrethiam dawn nia aw"
A chil a lem khalh a, a thil sawi tur chu huphurh hmel takin a maimitchhing diar diar a, ka kut chu a hum nghet sauh sauh a, a heh sen no nalh tak chu a pet fan fan a.
'tiang zawngin ka ngai lo. L.c, sawi zel rawh'
"ih. . Ka ngaina takzet che a ni"
'l.c,kei pawhin ka ngaina lutuk che'
"ka hrethiam lo, hmangaihna hi ka la hre lova, ka hrethiam hek lo. Mahse, thinlunga awm reng hi hmangaihna a nih chuan ka hmangaih che a ni ang" a ti sep a.

A va mak ngai em! Ka beisei phak loh leh rin ngam ngai miah loh L.c.in min hmangaih thu a sawi ta mai chu! Ka lawm bawk si.

'l.c, iti tak tak amaw? Kei fahrah rethei tak hi min hmangaih thei ang maw? Enge min hmangaih chhan? Engmah ka ni bawk si lo' ka ti mawlh mawlh a.
"ka hmangaih chhan che ka hre lo. Ka hmuhtirh a tang che khan ka thinlungah i awm tawp mai a ni"
'l.c, chupawh lo nise ka englai nge min hmangaih chhan ka hrethiam thei lo a ni. Mite chu anhmelthat vangte, anhausak vangte, annungchang mawi tak anduh vangte, mihring inhmangaihna chuan chhan a nei tur a ni'
"ka hmangaihna hian chhan a neih ka hre ve lo a. I engber nge ka duh tiin i taksa bung hrang hrangte, inun leh i dinhmun zawng zawng hi then sawm vek ta se, a engbernge i duh minti ta se thlan tur ka hre lovang. A vaiin ka hmangaih a ni tawp mai".
'chuti ngawt a ni lo ang. Ka hmel hmu lo la min hmangaih ngawt thei lo ang. Ka hmelah emaw,ka nungchangah emaw,ka engemaw berah hmangaih tirtu che awm lo se min hmangaih ngawt thei lovang'
"i dinhmun nen lam khan ka hmangaih che. I hmel ringawt hmangaih chhan ta ila vawikhat accident tawh palhah a chhe vek thei,i thatna a chuai hunah ka hmangaih dawn lo che tihna a ni ang. I sum leh pai ka thlir a nih chuan chu pawh chuan tawp hun a nei thin si. Chhan leh vang awma hmangaihna chu tum chawp hmangaihna, hmangaihna pawn langah ka ngai. Kei chuan chhan leh vang awm lovin ka hmangaih che" a ti sep a.

He nu tak hi chu a va ropui bik tak em! Vantirhkoh kawngbo mihring zinga lo awm ve ta ngawt a ni mai zawk lo maw? A nun tlang leh nunnem dep te, a aw dam leh hmel ngaihnobei tak te hi a va tha chiang tak em.

'l.c, i tidik ngawtmai. Kei chuan itan tlinna reng ka nei lo a, ka dinhmun lah hmangaih tlak a awm si lo. Min pgmangaih vang hian ka va lawm em' ka ti a.

Kan inhmangaihna thu puan chhuah lo nita min lawmpui ni awm fahranin thlifimte chu a lo thaw heuh heuh a. L.c.i sam chhawlleng chu a chhem tle siau siau a. A va hmuhnawm tak em. A rimtui inhnawih rim chu ka hnarah chuan a cham veng veng a. L.c.i kut no nalh tak chu ka hmer vawng vawng a,a kuttin te chu eng rawng dang mahin a pawlh buai si lo. Theih nise han pawm vawng vawng ka va chak tak em. Mahse,kan awmna hmunpin a zir miau si lo a.

Midang claz la nei ho chu anlo bang tan tawh a, keini pawh nidang aimahin kan thu rei a. L.c.i kianga awm chu thlahlel hle mah i la kan inthen rih a ngai si. Tunah chuan hmangaihna a suih zawm kan ni tawh a, inthen mah ila kan thinlung chu a inthen ve tawh dawn si lo a.
Kan kal dawn chuan L.c.i chu kabeng bulah a lo kun zeuh a, 'ka hmangaihche' a ti thawp sat a. Ka tih ve beisei takin min melh sawr sawr a. Keipawhin a bengbulah chuan zawi sapin 'i bengek hi kher a ngai a nih hi' ka ti mai chuh a treu nasa ras mai.

Ni a ral a, thla a liam a, kum a lo vei leh mai thin. Chu hun inher chuan mihring nun leh ngaihtuahna dang dangin a her pui fo thin. Chutiang hun inher rengah chuan hun kal tawh chu koh kir rual a ni tawh lo a, hun lo awm tur lah lo thleng tura beisei chauh a nih a vangin kan hmalam hun chu Tuifinriat mawng leh van boruak kan hriat loh tluk zetin kan hre si lo. Chuti a nih si chuan kan chanchin kan siamna hun chu tun hun chiah hi a ni. I zan mut hmunah i vawiin hun hman i ngaihtuah let ngai em? Siam that ngai lai tamtak i hmu fo ngei ang.

Van rang chhum a paw chiai a, ahnu darkar khat liamah i hmuh leh chuan a awmna ngaiah a awm tawh hauh lo ang. Thliin a len kual vel mai mai a, a chang chuan hmuh tur a awm tawh ngailo. Ka hringnun hman dan kawng chu ka chhut neuh neuh a, lawng karfung neilo,tuifin riat fawnin a duhna lam hawia a len kual mai mai anga mi hnaisai lo ka nih ngat zawngin he khawvelah hian ka ding chhuak dawn lo tih ka hrechiang. He ka nun hian nitin indona a hmachhawn reng a lo ni. Hnehna chang tur chuan ka hmaa lawmman la turin bei dawng lova ka beih a ngai a ni.

Favang thli a lo thaw tan tawh a, boruak nuam tak kan hmang tan dawn ta reng mai. College pawh ka kal khat lehta hle mai. Mite anga khawsa thei ni ve ila zawng college life nawm hun lai a ni tih ka hre reng mai. Exam hmachhawn a la hla a, kan hma lawka M.Z.U sports awmtur inbuatsaihin slogan anzir mup mup ang a, item neitur ten uluk takin enghelh awm miah lovin anin buatsaih ang. Mahse, keichu chutianga tel ve hman ka ni lo a, vawiin ka hnathawhah hahdam deuh zawkin engtinnge ka thawh ang tih ngaihtuah a ngai a ni.

L.c.i nen pawh kan inhmu khat viau a, mahse,a mah zawk hi a lo leng leh zeuh thin a. A chhan pawh anin a ka len ngam tawh miau loh vang a ni. Ka hmuh loh hlek chuan ka ngai thei em em a, ka hnathawh laite hian ka lo ngaihtuah leh veng veng thin a, ka ngai thei lutuk hi ka zan thangharh zun zungte hian anin lam hawiin kan zung leh ringawt thin. A zia phah chuang der si lo a.

Inrinni zing khat chu kan thenawmpa chuan min lo thawng tho zing angreng hle mai a. I chemte kha lo la chhuak la lo hmanhmawh rawh, k.s sawisak tur kan nei a ti ta mai a.

He mi zan hi chuan mami varte khan min luhkhung tawh lova thawh pawh a phurawm deuh hlek. Ka inperh tho zawk a, hmaiphih ai chuan mitek nuaithlak a sam zawk vangin ka nuai nawk nawk a, ka bek sam lah chu ka la delh sual pir vawh lehnghal a.

Ka chemte ka tat hriam sawk sawk a, ka thianpate inhnuaia ka va luh nak chuan kan thenawm pa chuan k.s chu duat hmel fahran hian a lo zut heuh heuh a. Chu k.s chu k hmuh phat a tangin ka it hle mai, ka chil te lam lam a ti put.

Thau kan tiha thau tak ni si lo, cher tih dawna cher hauh silo, fuke invuah rem zat leh a tawk chauha mam nalh, inkhaithli nalh hnep mai hi a ni lawmni mizoten ria chumbat kan tih chu. Ni e, chutiang khawpa tlawntlai tha, inthawina beramno thianghlim angmai a selna awm lo a ni. Khawia tanga lo chhuak nge kan hre lo ve ve a, a pian leh murna kan hre hek lo. Kan thenawmpa hian K.s sawisak hi nuam a ti thei hle a, a inhnuaiah hian k.s engzat chiah nge a sawisak hlum tawh ka hriatpui chiah lo a. Ka hriat ve kilh kelh ngai ka ti hran lo.

Ka thianpa chuan a nghawngah a zai pawp a, a dulah dimna tel miah loin a vit pawp a,ka lo en reng a, mi rap lek lek. A nghang a tang chuan thisen a lo chhuak zuai zuai bawk si. A kapah a zai a, a ril a phawrh ta mai. A mahlah chuan nuam tih hmel takin a la nui thru zui.

A sa chu ka sahsawm pui a, a thi per chhawk chhawk khawpa kan sah zawh chuan chu Kel sa (k.s) chu a fanu b'day lawmna a eitur a tan thianghlim takin kan siam ta nghal a.

L.c.i nen inhmuhna hun nei khat viau mah ila claz ka kal hman ve leh ta. Ni thum chu ka awl thei dawn ani. Nidang ang bawkin L.c.i nen chuan hlim takin hun kan hmang dun a, tlai banah chuan kan thutna thinah chuan kan thu dun leh a. Hetihlai hian L.c.i hi kan college a tlangval chhe lo deuhin a ngaizawng tih ka hria. A ruk tak chuan ka thik hle a, ka dinhmun ka enin chan mai ka hlau a ni. Kei ngawt ai chuan chupa chu a thlanawm fe dawn tih ka hria, anhausain bike nalh tak a la nei zuia, a hmel a thain a changkang hle tih ka hria. Ka khinpui a tan em chuan a turu deuh a ni.

L.c.i rilru chu hre ve hle tawhah ka inngai a, chuti maia rilru nghet lo pu duh turmi a nih ka ring lo. Mi nghet tak, rilru sawhsawn mai mai ngai lo. Thuamhnaw chhuak thar a piang lawm chi a ni ve tlat lo. Mahse, Ka hre fuh em?

L.c.i nen chuan kan thutna ngaiah chuan kan thu dun a. Min thlahlel takin ka kut thap hrup chu a chul heuh heuh a. A mah ngaizawngtu a vanga ka rilru buaina chu sawi tlang vek ka duh a ni.
'L.c, heti mai hi ka ni si a, min hmangaih reng thei a ngem?' ka tia.
"i mak e mai! Min ring lo thei lutuk. Ka hmangaih hmasa ber ini a, ka thinlung hi i hawng tawh a, ka thinlungah ziaka dahta ni tawh a sin. Hmangaihna inhlan tawh te chu hlan kir leh theih a ni tawh ngai lo" a ti a.
'mahse, kei aia tha mitamtak i hmu teuh si a, i rinawm reng thei dawntami?'
"i tan ka inhlan tawh a, ka thinlung zawng zawng hi ita a ni a sin. Pakhat tana rinawm chu a harsa dawn em ni?"
'ka hlauthawng fo thin a ni. Kan dinhmun inthlau lutuk ringawt pawh hian min pawt then ang tih ka hlau a sin. I hmangaihna hian lipui thuk takah min chen puiin, vau kam a hlimna par chu hmu ve lovin lipui thuk takah chuan min hnutchhiah ka hlau a ni'
"teuh lo mai, ka hmangaihna che chuan hlimna tlangsangah a dintir zawk ngei ang che"
'tlang chu a san poh leh a hualtu kham a sang thin a, hlimna thlifim lo thawt mek laiin lungngaihna kham sangah chuan min nam thla leh si lo ang maw?'
"i tan engtik lai pawhin ka ti ang a, i hmangaih hmasa, i kalsan leh maitur nih ai chuan i hmangaih hnuhnungber nih a, i taksa ruangam thlenga changtu nih ka duh zawk ngei ang. Ka hmangaihna che hian kum khua a daih dawn si a"
L.c.i rinawm zia ka hria,ka va lawm tak em. Ka thaw a veng huai mai.

Nikhat chu claz ka kal niin buaina ka tawk ta tlat mai. L.c.i ngaizawng tupa khan kan chanchin a lo hre vek a, l.c.in a duh loh chhan chu keimah vang a ni tih a hria a.

College thlenhma a campus chhung siah chuan min lo chang a, hemite thian ho hi awmthei tak tak annih hlawm a vangin thian pawh anngah hle a, hemi tum pawh hian anthian rual paruk lai anawm a.

Anbul ka thlen chuan L.c.i ngaizawng tupa ber chuan min lo pan a, ka awmah min lo tham nghal chawt a, 'L.c.i hi ka bialnu a nih hi min lo tibuai tawh suh' a ti a. Ka ngawi renga, engmah sawi k duh lo. Ka tawng chhuah chuan ka tawng min sawisak rawn dawn tih ka hre nghal mai.

Ka tawng loh a vang chuan a kuttum chu ka pumpelh chuang lo. 'ka thu sawi chu i hria em? Nang hmeithai fa berh ve tak hian ka bialnu min lo chuh pui maw'tiin min hnek nghal thuai a. Min hnek fuh em a vang chuan leiah chuan ka tlu thlawrh a. A thiante ho pawh chu anlo tlan khawm nghal a, min bawr nghal luih luih a. Min sawisa nasa khawp mai. Ka hmai leh hmui a tang chuan thisen a lo chhuak lum pup pup a. Ka hmai chu a vung nghal luk bawk a.

Chutia tawh sual ka tawh tak a vang chuan claz pawh kal thei lovin ka haw ta a. In ka thlen chuan darthlalang hmaah ka inen chuan ka hmai chu a lo duk vek a.

Chumi tum chu L.c.i nen kan intawn a tang a buaina ka tawh hmasak berna a ni.

L.c.i chu kan inah a lo leng a, a hmel en reng reng chuan a hlim lo hliah hliah tih a hriat a. Keichu min sawisakna avang khan khawlaiah ka la chhuak ngam lo a, hlawh pawh ka inhlawh thei lo a.
Ka hmai la duk chur maite chu a entlawk tlawk a. A mah a vanga tuar ka ni chu pawi a ti hle tih ka hre mai.

"A pawi ka van ti tak em, ansual ngawt mai, ka duh loh vanga nang antuar tir che hi chu ka hrethiam lo a ni" a ti tlawk tlawk a.

Ka hmai chu dim takin a chul a, "engtiang a tam harsatna paltlang tur pawh awm se tuar hram hram ang aw, kan imwhmangaihna hi engmahin min then thei lnvang' a ti a. L.c.i nen kan infawh hmasak bernan kan infawp ta vawng vawng a.

Kan zei lo dun khawp mai. A vawikhatna ve ve a nih miau a vangin zei viau ngaihna a awm lo hrim hrim bawk a.

L.c.i hi chuan min va tihlim thian tak em, a lo thlen a tang khan ka na reng reng ka hretawh mang miah lo, damdawi tha tak a lo ni. L.c.i chu tlai ban hun thlengin a lo leng a. Kan hlimdun zia kha aw. A lo len hmasak ber tuma ka chet chhiat zia kha a sawi chhuak a. Kan nui vak vak a. Keipawh ka zak duh tawh bik lo.

Tlai claz ban nang tawk turin L.c.i chu a haw a, ka hmai vung vang chuan thlah pawh ka thlah ngam lo a. L.c.i a haw chiah chuan ka nun chu a ruak huaiin ka hria. Khawharna chuan min lo zem chiai chiai a. Heti taka L.c.i ka hmangaih mai hi a va mak tak em. Ka phu loh pui leh ka cho rual loh anîh vei nen.

Kum a tawp dawn hnai tawh a, thlasik boruak chu a vawt hle a, kum dang zawng aiin a vawt hial ang. Ka nu chu sciatica bakah asthma vei a nih a vangin thlasik khawvawt chuan a hmet chau hle mai a, a taksa a chak loh bakah hritlang puiin a man leh bawk nen ka buai thei zak zak hle mai. Chutîh hunah pawh chuan L.c.i chuan ka nu chu a lo kan fo a, inhlawha ka chhuah hlan te hian ka nu chu a lo awmpui thin a.

L.c.i chuan ka nu chu a duat em em a, a kawm bawrh bawrh mai thin a, ka nu lah hi thil sawi phawng phawng mi a nih a vang in thu nuihzat thlak deuh deuh sawi phawng a chinga, chu chu L.c.i chuan a lawm thei em em a, anhlim dun thei hle thin. Ka nu pawhin L.c.i chu a ngaina .em em a, ka bulah te hian a fel thu bak sawitur a hre ngai lo. L.c.i hi zawng kan nufa tan hi chuan a va hlu tak em.

Thlasik khawvawt chuan ka nu chu a hmet chau ta hle mai a, a taksa chak loh em a vang chuan natna dang chi hrang hrangin a tlakbuak ta bawk si a. Hritlangin a lo man leh zel bawk si nen. Zan khawvawtah chuan a thawhah a lo zual ta bawk si a, enkawl a ngai nasa ta hle mai.

Mite Lal piancham lawm tura aninbuatsaih tluk tluk lai chuan keichu inhlawh lo thei ka ni lova, kan eichawp bakah ka nu damdawi leina tur a lo ngai leh zel bawk si nen hah pawh sawi lova inhlawh tang tang ka ngai a ni. Chhun lamah ka inhlawh a, zan lamah erawh ka nu buaipui a ngai thung a. A muttheih thin loh a vangin kan tlaivar zantin a ni ngawt mai thin a.

Chhun lama chhuah san lo thei ka nih loh a vangin ka nu ngaihtuah tak chungin inhlawhin ka chhuak a. Chhun lamah hi chuan boruakte a lo lum ta deuh bawk nen ka nu pawh chu tlemin a zia deuh thin réng bawk a. Ka chhuah san hlan chuan L.c.i chuan a hman chang a piangin ka nu chu a lo awm pui thin a, ka nu chu kawm hlim hram hram tumin a lo awmpui nileng thin a ni. L.c.i tak hi chu aw keini nufa tan chuan kan thlamuanna a va ni chiang tak em. A ni tluka kan nufa tana inpe zo hi anawm tawh lovang.

Ka nu chu a ni telin a hniam hret hret a, chhun lamah pawh ka chhuah san ngam ta lova, a chhun a zanin ka awmpui tawp a. L.c.i pawh a hman chang a piangin a lo kal bawk a. Ka nu hi mi inthlahrung tak a nih a vangin ka chungah takngial pawh a inthlahrung thei em em a, 'min ngaihtuah lutuk thin a, i chau lutuk ang' tiin awm hahdam deuh turin min ngen hial zawk a. Mahse, ka sen tet lai a tang khan ka hrehawm a hlauh a vangin vawi engzatnge ka tan a tlaivar ang a, ka damlo min enkawlin zan engzat nge a tlaivar ang. Ka tana a thiltih ngaihtuah chuan atana ka tih ve hi engmah a la ni reng reng lo.

Chutia a hniam tak chinah chuan themawm khawvengte chuan min lo lenpui a, zan lamah thalai tlawmngai ten min tlaivar pui a, mizo nih hi a lova nuam tak em. Anni'n min tuamhlawm lo se zawng kan mual pho hle dawn si a. Ka thla pawh a muang huai mai. Ka nu chu a chak lo telh telh a. Dec 23 zinglamah chuan rethei awm tawh lohna hmunah he khawvel a keimah chauha vakvai turin min kalsan ta.

Ka nu boral chu ka tuar tak meuh meuh a, kan inchhung chu a ruak huai a, han hawi ila ka nu sulhnu hlir a ni si a. Thutthleng seia khawhar tak a kan thut dun laite kha ka rilruah a thar lo thei lo. Ngawi renga eirawng a bawl melh melh leh natna khuma a mut bèm laite khan a hlut zia ka lo ngaihtuah ngai reng reng lova. Mahse, khang hunlaite khan a lo va hlu tak em. Tunah chuan he khawvelah hian ka mal ngawih ngawih si a.

Lal piancham lawm turin mitin anphe suau suau a, thenrual thate antin tan a, keimah chuan khawhar takin kan inah chuan ka tawm chawt a. Kumdang ang kha chu nise 'sa ei ni' tiin hlim takin hun kan hmang leh tur a nih vei nen tunah chuan ka mittui kai chhuak tu mai a lo ni ta si a. Krismas pawh mi zinga hmang ve lovin khawhar takin ka tawm chawt a.

L.c.i chuan ka khawhar lutuk hlauvin a hunawl neih ang angah chuan min lo kawm hlim turin a lo kal ziah a, a lo kal tawh hi chuan ka rilru pawh a zang huai a, ka khawhar pawh a zia sawt thin. A ni chiah hi khawvela min hmangaihtu awm chhun a ni si a, ka thla a ti muang huai thin. L.c.i lo len hnuhnun ber tum chuan kumhlui thlah zan chu ka nu pualin kan pahnih a kan ina tlaivar kan rawt a. Kan phur khawp mai. A ni pawhin a nu leh pate a dil a, ka chanchin anhriat chuan min lo lainat hle a, L.c.i lo kal pawh chu anrem ti ta a.

31st ni chu a lo thleng a, zan hun lo thleng tur chu ka nghakhlel em em a, kan inchhung ruak takte chu ka tifai sauh sauh a, ka theih ang tawkin ka inbuatsaih a. L.c.i nen zan hun hlimawm tak kan hmang tur chuan minti hlim a ni. Zanah chuan a lo thlen hun tur chu ka thlir reng a, a lo thleng thei mai silo a, ka nghahhlelh lutuk vangnge hunte chu tlai chak riauvin ka hria. Zan tir lama a lo thlen tak loh a vang chuan zan rei lam deuhah a lo kal dawn a ni ang tiin ka nghak reng a. Zan lai thleng pawhin ka nghak chhuak zo ta reng reng lova. Lunghnur tak chung chuan ka mu ta a, ka muhil thei chuang der lo.

Nidang ang chu nise atukah chuan lo kalin a lo kal theih loh chhan min hrilh ngei awm si a, mahse, a tukah te, a tuk leh ahte, chumi kar chuan a lo lang ta miah lo a. Ka ngaih a tha lovin ka rilru a nuam lo takzet a, an inah lah ka leng ngam ngang si lo a, hrehawm tiin ka tuar tlawk tlawk mai a ni. L.c.i chuan min phatsanin duh dang a lo nei ta a ni ang tiin thil tamtak ka ngaihtuah hial thin. Midang a lo nei ta a nih chuan he khawvelah hian ka va mal dawn em!

Kar khat a liam hnu chuan nikhat chu L.c.i chu a lo lang ta nawlh a. A mit chu a bui luk a, a sen rum bawk a. A taksa te chu natna khirhkhan tak tuar ang mai hian a cher kiam a. Min hmuh veleh chuan min pawm thlawp a, ka awm a hmai phumin a tap ta hawm hawm a.

'a va pawi tak em! Tunah chuan hmangaih tlak ka awm tawh lo, i tan ka tling tawh lo' tiin a tap hawm hawm a.

'L.c, enge i sawi awm zia, khawvel a ka hmangaih awm chhun i ni a, ka tan i tling tawk a sin'
"i hrethiam lo a ni, i tan ka tling tawh lo a, i hmangaih tlak ka ni tawh lo a ni"
'L.c, ka van hrethiam lo ve, enge chu chu a awm zia?'
"aw. .! A va pawi tak em! I tan tiin ka thianghlimna kha ka vawng tlat a, mahse, tunah chuan. . . Kha zanah khan ka thiante kha lo hnar tlang law law ila i tan ka la tling dawn si a" tiin a kut pahnihin a lu a dawm a, a kun tlawk tlawk a.
'L.c, engthil nge i tawn a, min phatsan ta em ni? Kei chuan ka hmangaih tawh che a, ka kal san thei tawh lovang che'
L.c.i chuan a heh a pet fan fan a. A sam tla hniang kar a a mit meng phelh phang kara a mittui tling piaute chu a va mawi tak em. A thil sawi chuan min thawn em avangin hnem ngaihna pawh ka hre bik lo. Ka thinlung chu a na vawng vawng a.
"Ka phatsan lo che a, ka phatsan ngai lovang che. Mahse, i ngaihdam tlak ka ni tawh lo a ni. Tunah chuan. ." a insum zo lo chu a mit meng mawi tak a tang chuan dan rual lohin a mittui chu a lo sur zung zung a.

A thutna a tang chuan ka kai thova thutthlengseiah chuan ka thut that tir a. 'L.c, thil engkim min hrilh tlang vek rawh' ka ti a. Harsa ti tak chungin tihian a sawi ta a.

"31st zan khan i bula lo kal tur khan ka insiam mawlh mawlh a, chutihlai chuan ka thiante ho anlo kal a, 'thian ho kan inhmu khawm khat tawh si a, zanin chu Makimi te inah hmang ho ila kan ti a kan lo sawm che' an ti a. Nangmah nen kan inhmuh dawn a vang khan ka hnial a, ka lo kal lo mai ang ka ti a. Mahse, 'zan ala hma tho a, lo kal phawt la reivak lo i awm hnuah i kal leh zawk anga, inhmuhkhawm a chak awm a lawm' an ti tlat si a. Ka pa dil ula ka ti a, andil chuan 'thian ho innih te chuan kal ve mai rawh se'tiin a phal ve ta mai si a. Ka zui chhuak ta a.

Makimite in kan thlen chuan an lo awm teuh tawh a, Michael-a (an college a ngaizawng tu pa kha) te thian ho pawh anlo awm a. Hla ring takin anlo play a, an lam luih luih a, anrak vak vak bawk a. Inchhung chu zu rim a nam hum hum a, anni ho pawh chu anrui vek hlawm tawh a. Kan va luh chuan min lo welcome tha tawh hle a. Zu chu min intir ve antum a, midang ho chuan anin vek a, ka in ve duh lo a. Bear tal hi inrawh an ti a, min tulh antum a mahse min ti lui thei chuang lo. Engmah i duh si lova a nuam lo theitui tal i in turin kan lei ang anti a, thei tui lei tur chuan anin tir ta nghal a.

Ka thian te ho hi zu in thin anni hran lova, mahse, hetiang hun angah hi chuan an in ve zeuh zeuh thin a. Awm lo pawh ka ti hran lo. Anruih tawh hlawm avang chuan anbengchheng hle a. Makimi chhungte lah chu apute inah a damlo riah pui turin ankal vek si a, mitmei ven a ngai bawk si lo a, anlam vak vak a, sofa-ah chuan thuin an che vel chu ka en mai mai a, ka nuih tlawrh tlawrh a.

Ka theitui min lei sak chu a lo thleng a, Makimi chuan siam turin choka lamah chuan a phei pui a, Michaela pawh chu a va phei ve a, mahse, rei lo teah a lo let leh mai a. A hnu deuhah chuan Makimi chuan ka theitui in tur chu a lo chawi phei a. Thil dang ka hnar vek a vangin nuam lo anti ang tih ka hlauh avangin ka hnial sak duh ta lova.

Theitui in pah chuan anlam lai chu ka thlir reng a, no khat siamsa chu ka in zo thei hram a. Ka thil in a tanga rei vak loah chuan ka taksa chu a zawi tan ta em em a, ka khaw hmuh te chu a fiah lo tan a, inthin harh tumin ka lu te chu ka thing nawk nawk a, a zia thei ta reng reng lo mai a, ka zawi telh telh a, ka taksa chu a che thei ta reng reng lova. Ka khawhmuh te chu a fiah thei tawh lo a, ka rilru erawh a la harhfim a ni ang anthawm pawh ka la hre vek a.

Chutia ka awm lai chuan Makimi chu a lo kal a, 'thiannu, i nuam sam vak nange?' a ti a, 'aw, ka awm dan hi ka hrethiam lo, ka chau ngawih ngawih' ka ti thei hram a. Makimi chuan ' ka khumah i lo mu zal dawn nia' tiin min kuah tho a, a room- lamah chuan min kuah phei ta a. A khuma ka mutte chuan ka zawi vek a, thawm a reh vek a vangin ka rilru pawh a harh deuh sawt a.

Ka meng ngam tawh lo a, ka maimitchhing tlat a, muhil si lo harhfim bawk si lovin ka awm ta reng a. A hnu fe ah chuan room kawngka chu a lo inhawng a, ka mutna lam chu tu emaw hian a lo pan a, ka bulah chuan a lo thu a. Tunge tih en tur pawhin ka meng thei tawh lo. Ka zawi ngawih ngawih a. Chet pawh ka che sawn thei tawh lo a.

Tu emaw chuan ka chalah a lo khawih a, ka biang velah chuan a zut a, hre reng mah ila ka che thei tawh si lo. Ka bulah chuan a lo mu a, blancket min sin tir a. Ka biang leh ka awm vel, ka taksa chu a zut kual ta zel a, au chhuah ka tum a ka thei si lo. Ka biangah te chuan a fawp a, ka kawr a phelh a, ka kekawr te chu a phelh zel a, min phelh ruak ta vek a. Tichuan, ka chungah chuan a lo bawk a. Na ka ti em em a, mahse ka che thei der si lo.

Zing lamah chuan ka han harh a, ka harh thut chu ka awmna chu mak ka ti em em a. Ka han hawi kual a ka bulah chuan michaela mu chu ka hmu thut a, ka phu dawrh a. Kei lah chu thuamhnaw pakhat mah ka lo inbel lo tih ka hrechhuak nghal a, blancket chu ka han theh hlim chu karei!

Michael-a nen chuan saruak vekin kan lo mu a nih chu! Ka phu chiang lutuk. Ka thil tawn chu ka hrethiam ta nghal a, ka rilru na chu ka tap nghal hlawp hlawp a. Michael-a chu ka ten ngawih ngawih. Ka rilru chu a harh kawk kawk a, ka theih ang angin thawh ka han tum a ka sil hle mai. Harsa ti takin ka tho a, ka inha sawk sawk a, tap chungin ka chhuak ta nghal a.

In ka thlen chuan ka nu ka hmuh veleh ka pawm chawt a, ka tap ta hawm hawm a. Ka nu hrilh hai chuan min kuah tawp ringawt a. A hnuah chuan engatinge bawihte? Tiin min zawt a, zan lama ka tawh sual tawh dan zawng zawng chu ka sawi ta vek a. Chutihlai chuan ka pa a lo kal bawk a, ka nu chuan ka thil tawn chu a hrilh nghal mawlh mawlh a, anthin a rim ve hle mai a.

Ka sawi hmaih loh tur pakhat chu ka pa leh Michael-a pa hi tette atanga inkawm, tun thleng pawha la inkawm reng thin anni a, aninngaina hle thin a. Ka pa chuan Michael-a pa chu phone hmasak thaa a hriat a vangin a phone ta nghal a. Michaela pa te pawh chu anthinrim kher mai.

Mahse, thil mak deuh chu maw Michael-a pa chuan ka pa hnenah ngaihdam dilin hetiang thil te a lo thlen takah chuan intih mualpho viau ai chuan palaite lo tir ila innei maise la tiin ka pa hnenah chuan a ngen a. Ka pa pawh chuan a chan chhe zawk ka nih tho a vang leh a nih tur ang a nih tawh tho a vangin palai anlo kal pawh chuan an lo remti ta a nih chu! Tunah chuan ka huat ber leh ka hmangaih miah loh nupui ka ni dawn ta". .tiin a mittui chu a lo luang leh ngiai ngiai a.

L.c.i chu thiam lohna ka nei lova, a duh reng vanga thleng a ni hek lo. Ka khawngaih a, ka hmangaih bawk a. Ka tana a tlin lohna tur reng ka hre lo. A ni tluka hmangaih leh min hmangaihtu anawm tawh dawn si lo.
Rem kan ruat dun ta a, tunah chuan duhthlan tur pakhat chiah kan nei ta, tlan dun mai loh chu tih theih kan nei ta love. Lo inru pawh ni ila khaw chhungah chuan awm ngam chi a ni dawn lo. Khawiahnge kan kal tak ang? Chhungkhat hnai belh tur ka hre ve bawk si lo. Mahse, L.c.i zawk chuan a hre leh ta mial mai, college a athian kawm pakhat thingtlang hmun hla taka awm chu pan mai tha a ti a. A thiannu te chhung chu fel tak anni a, a hmain vawikhat a zin tawh nghe nghe a. Tichuan, hun remchang hmasa leh a hmanhmawh thei ang bera tlan dun chu kan rel ta a.

A sei lutuk dwn e kaitawi tawh mai ang aw. L.c.i chuan chinchang engmah hriattir lova kal bo ngawt a hreh a vangin a thian kawm ber Tetei hnenah chuan kan chhuah bo hnua a chhungte lo hrilh lawk turin a hrilh a. Chu chu kan pahniha min pawt thentu tur a ni dawn tih reng kan hre lawk lo.

Tukthuan eikhamah chuan L.c.i lo thlen hun nghakin kan inkawtah chuan kan Taxi hman tur nen chuan kan lo nghak ran tawh a. Ka helhhawlh nge ka phur over mah mah zawk lo thleng har hi ka ti khawp a. Minute 20 vel zet kan nghah hnu chuan a lo thleng ve ta. A thuamhnaw chu kan load mawlh mawlh a, kan inpeih ta at mai le. Tuna tanga reiloteah chuan khawvel a ka hmangaih leh min hmangaihtu awm chhun nen hlim takin kan awm dun tawh dawn a ni.

Kan chhuak dawn chiah tihah chuan Car pakhat hi kan bulah chuan a lo ding dawt a. Car chhung a tang chuan michael-a leh a thian te ho chu anlo chhuak nghal a. Engkhaw sawi lovin L.c.i nen chuan min pawt chhuak a. L.c.i anCar chhunga annam lut lai chu ka hmu hman a. Kei chu min hnek ta nghal bawrh bawrh a. Ka theih tawpin ka bei let a, taxi driver chuan min khawngaih ngang ani ang min lo chhan bawk a. Mahse, antam em a atan chhe zawkah kan tang ta, min sawisak rawn a, chutihlai chuan thenawm ho anlo tlan khawm a. Michael-a te chuan L.c.i chu hruaiin antlan liam ta nghal a.

Chuta tang chuan mu leh mal reng ka nei thei ta lova, nun hi ahlutna ka chhut thiam tawh lova, engkim hi beidawnna vek ni hian ka hria a. Ka nun chu a ruak ngawih ngawih a, ruak vek e ti lo chuan amah lah chu a awm reng si. A zunzam chuan min phuar a, min ching chau ta hnep a.

Hmangaihna hian hringnun a khalh ngil thei a, a ti chhe vek thei bawk. L.c.i chu pawnah chhuah anphal tawh lova,anveng tlat a, kan inhmu leh thei tawh lo. Vawikhat chu a thiannu hnen a tangin lehkha ka dawng nawlh a, tawite hian a inziak a. 'ka thawk tawp thlengin ka hmangaih ang che. Min ven tlat a vangin i hmel pawh ka hmu thei dawn ta lo a nih hi, min ven reng avangin thu sei ziak hman ka ni lo a, heichiah hi ka hrilh nawn ang che- ka hmangaih che a, ka hmangaih reng ang che' tiin.

L.c.i te inneih tuk chuan inneih darri te chu ka tan chuan hriat a va hrehawm tehlul em. Rilru vakvai ruai chungin ka tei chhuak a, an inneihna ah chuan kal ka chak ta tlat a, pawh ngam si lovin ralkhat a tang chuan thla anla lai chu ka thlir reng a. L.c.i chu vawikhat mah a nui miah lo. Rilru natak chungin ka indawm kun ngawih ngawih a.

Thla li zet a liam ta. L.c.i te nupa chu ka hmu zeuh zeuh a, rilru natak chungin ka thlir vawng vawng a, min hmuh loh na'n ka hel tang tang thin. Ka hmuh a piangin ka rilruah a thar a, thar reng e ti lo chuan a hlui tawh si. Theihnghilh ka tum a piangin a pung a, ka theihnghilh tam poh leh ka hrechhuak tam ting a ni mai si. Ka thinlung chu a puak darh a, a keh sawm vek a, a keh them tin te chuan L.c.i ka hmangaihna an au chhuah pui reng a.

Ka nun khawhar tireh turin hel pawl pakhatah ka inpe ve ta a. Hetihlai hian Mizoramah hel pawl lian tak a ding chho mek a. Mirethei nun beidawng, anchanai takngial pawh chang pha lo te, lehkha thiam tak tak duhsaktu anneih ve loh a vanga rim taka anthawh rah seng thei lova awm te, sawrkar kal dan phung duh lo tu te leh eiru do duh tute chuan hel pawl andin ta ngawt a. Anduh ber chu anchanai chang ve tura sawrkar nawr te, hna zawn kawngah mirethei te pawh lak ni ve rawhse tih te, eiru nasa tak takte ruk bo a, ansum eiruk chhuh sak a ni. Chu pawlah chuan mithiam tak tak an awm fur a, thalai tamtak ten anbawh ruih ruih a. Chu pawlah chuan ka lut ve ta a ni.

Khumah ka mu a, L.c.i zunzam chuan min fan chiai chiai a, ka mitthlaah a lo thar iarh iarh a, ka bengthlaah te chuan a aw te chu a fawn riai riai a. Ka mittui chu a lo luang ngiai ngiai a. "L.c, we shall meet beyond the river" ka ti sep a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)