SUDDEN - MAKES WAR (Completed)

Episode nei ho a hlawm a dahkhawmna

Moderator: writers

Rozami pachuau
Posts: 163
Joined: March 17th, 2018, 7:40 pm

SUDDEN - MAKES WAR (Completed)

Unread post by Rozami pachuau » April 10th, 2018, 9:51 pm

SUDDEN - MAKES WAR.
AUTHOR : OLIVER STRANGE (1942)
CHAPTER 1
(Rozami Pachuau)
www.storyfb.com mizo story thar englai pawhin chhiar tur a awm reng


" Ka mihring zawn hi hetah hian i awm em!?"
Chu aw hre pha, chulaia awmte chuan aw lo chhuahna lam chu an en thap a. Khawthlang lamah chuan chutiang tawngkam chu inchona anga ngaih a ni thin. Chu zawhna zawttu Cowboy chu kum 20 mi vel chauh ni hian a lang a. A lo thlirtu pakhat chuan a sira thu chu a han bekbawr a, ani chuan "Rainbow lama Circle Dot neitu Dan Dover-a anih saw!" a lo ti a.

Dan Dover-a chu Paradise Saloon kawtah chuan a ding kak taih mai a. A hmaa dingte chu a han melh kual vel a, dollar nawi pahnih leh Mexican Silver dollar pakhat chu phawrhin a han theh kual vel a. Mi an lo pung khawm tam ta deuh tihah chuan, "Ka mi zawn chuan pistol a hman thiam bakah mi huaisen a ni tur a ni.. In hria em? Chutiang mi in awm chuan heng pawisa nawi te hi in hlawh bakah ka pe ang che u.... Ngawi ru.. Ngawi ru.... Pakhat te te in tawng rawh u, beng pahnih chauh ka neih hi hria ula ... " tiin a han melh kual a. Lo ngaithlatute zinga pakhat chuan, "Sazupui beng chen zeta sei i nei tih kan hai hleinem!" a lo ti zauh a, an haw haw dar² a.

Dover-a chuan, "In awm lo anih dawn hi" tih pahin pawisa nawi pathum chu a han vawr a, a man leh a, a kutphah a han char leh chuan pahnih chauh a lo awm tawh a. Pawisa nawi pahnih chu a han hum leh a, a kut a han pharh leh chuan hmuh tur a lo awm tawh lova, "Nichina ka pawisa nawi ken kha khawnge an awm tak chu le !? Boruakah a leng kual vel em ni?" tiin a kut dinglam chuan boruak chu a han man vel a. Dover-a kutphahah chuan pawisa nawi te kha an lo awm kim leh vek tawh a, lo entute chu lawmin an nui ta dar² a. "A harsa lo... Pawisa neih hi.... a harsa zawk chu .... a ni mai !" a han ti leh a.

"Thiante u, la kalsawn suh u, thildang ka hmuh ang che u" tih pahin Dover-a chuan, mi pakhat, ngawi renga lo thlir ve rengtu chu a han melh deuh bik a. Chu mikhual chu, pa sang lam, dar pharh hlai hlep hlawp, kawng fek nalh tak mai, pian tha tak leh, khabe ruh kual mawi tak hi a ni a. A sam chu a dum hlak a ni a, a mitmeng a pawl ram bawk. Sakawr thlunna ban nghengin Dover-a che vel chu a lo thlir ve reng a ni. Cowboy pangngai ve mai niin a lang. A lukhum parh hlai hlep hlawp, nghawngawrh hlui tak leh thawmhnaw hlui tak² a inbel atang chuan a danglam tehchiam lo, mahse a kawng hren hlai hlep hlawp te, lehlam lehlama pistol fual taka a pai te leh a pistol kawm hmum hlarh, enkawl ngun tih hriat tak mai te han hmuh chuan mi namai lo tih chu a hriat theih mai a.

Dan Dover-a chuan, "Tunge lo pen chhuak dawn.. ?" mikhual pa la melh reng chung chuan a han ti a. Pawi sak neih loh hmel takin leh thawm zawi angreng takin mikhual chu a lo pen chhuak a, "Ka'n tum chhin ang chu.. Eng thil nge i han tih chhuah leh dawn a..?" a han ti a. Dover-a chu a lo nui sak a, pawisa nawi pakhat chu a kut hmawrin a keng va a, a ban chu a char ngil a, "Heti hian i lo keng anga, pen sawmpahnih a hla atang in ka rawn kap fuh siah dawn a ni" a ti a. Cowboy sam dum chuan, "Nia mawle!" a lo ti mai a, Pawisa nawi pakhat chu a keng a, a ding ta a. A kut bawr kah palh hlau hmel pawh a pu chuang lo.

Dan Dover-a chu pen sawmpahnih a pen a, a ding ta a. A pistol chu a phawi a, a han tin ta vang² a. Chutah, a pistol chu a puak ta thuai a, mikhual pawisa ken pawh chu a leng nghal lawp mai a. Mipui chu an haw² dur² mai a. Mikhual pa chuan a pawisa nawi kenna kut vei lam chu a kekawr ipte ah chuan a zen daih a , Dover-a hnenah chuan, "Khai le.. Ka kah ve hun a ni ta!" a ti ta mai a, mipui chu an ngawi leh ta thuap mai a. Dan Dover-a chuan pawisa chu a keng ve ta a, mikhual pa chu pen sawmhnih a han pen a, tumahin a kut ding lam che lai chu an hmu hman lo. A kawng zawna silai puak de zawr chauh chu an hmu hman a. Dover-a pawisa ken lai chu a per lawp mai bawk a, chu veleh a entute chu an au leh ta hluah² mai a.

Tin pawh tin lova, rang lutuk a a han kap fuh chu mak an ti hlawm kher mai! Mi pakhat chuan, "E khai!! Kha tiang silai chelek rang leh kah thiam kha an la awm ngai lovang!!" a rawn ti chhuak phawng mai a. Dover-a pawh chu a meng phawk chiang hle.. "Khatiang pistol kah thiam kha ka la hmu ngai lo.. Ka thiam viau emaw ka lo ti thin a, i lakah chuan naupang chumchiap lek ka lo nih hi!! Ti teh, dang a rochar zo dawn alawm.. Dang hnawnna i ngaihtuah teh ang" a ti a, Saloon-ah chuan an inzui phei ta a, kilkhata dawhkan chu an kil dun ta a. A lo thlirtute zinga pakhat chuan, "An sawi Sudden-a pawh hi khatiang em² in a thiam lovang!" tiin a enzui vang² mai a.

Dover-a chuan Mexican silver dollar chu a han en vang² a, a lai takah leh a sir deuhah chuan kahna hnu a lang a, "A lai hi ka kahna a ni ang, ka tin ngun bawk a" a han ti a. Mikhual pa chuan vaihlo a han zial a, a kut zungchal hmawr chu tlemin a thi deuh ser² a ni tih Dover-an a han hmuh chuan, "Ka tawng sual palh a ni" a ti vat a. Mikhual pa chuan, "Engmah tham a nih loh hi, ka lo che palh zawk aniang," a ti mai a. Chutah, "Han inhmelhriat ila mawle.. Kei hi James Green ka ni a, khawi khua atang mahin ka lo kal lova, khawi hmun mah pan tum bik ka nei hek lo. Hmun hrang² hmuh kual hi ka chak zawng tak a ni bawk," a han ti a. Dan Dover-a chuan, "Kan inhmu chu ka lawm ngawt mai. Kei hi Dan Dover-a ka ni a, ka pa chuan Circle Dot Ranch a nei a, chu² ka enkawl pui a ni. Heta tang hian mel sawmnga vela hla a ni, i hre tawh thin em?" a ti a. Jim-a chuan lu thin pahin, "Helai ram chhehvel ka rawn thlenna vawikhat chauh a ni. Enge buaina..... ?" a han ti a. Dover-a chuan, "Buaina kan neih thu ka sawi em ni?" a lo ti let a.

"I la sawi lo na in ka hre mai a ni. Buaina in neih avang in silai kah thiam i zawng anih ka lo ring a..... Ka silai hi Hire chi a ni lo.... "
"Hire lam pawh a ni lo... Ka mi duh chu mahni inveng him thei chin an ni tur a ni. Hmanni lawk khan kan cowboy pakhat kahhlum a ni a, tunhnai teah pahnih an hliam leh bawk..!!"
"Engtia hliam nge?"
"Hnimbuk phen atanga lambun an ni".
"Rinhlelh deuh in nei em?"
"Nei e, kan thenawm Wagon Wheel ho sawn kan ram min rawn chuhpui a, an ngam tawkin kan ram thenkhat lei an tum a, kan lo remti si lova, kan indo titih ta a ni!"
"Engtik atangin nge ni tawh?"

"A rei fu tawh mai. Ka la naupang deuh a, kum sawm lai a liam tawh nghe² in ka hria. Chutihlai chuan ka puin Ranch a enkawl a, mahse, nikhat chu tuemaw in a kaphlum ta mai a. Chutihlaia Wagon Wheel Ranch neitupa Tom Trenton-a chu ka pa u, Red Rufe-a chuan a thattuah a puh a. Mahse, Tom Trenton-a chuan a lo nuih san mai a, ka pa Rufe-a thinrim chuan, pistol a phawi a, kah mai a han tum a, midangin an lo thelh hman hram a.... A hnu lawkah chuan Tom Trenton-a ruang chu an Ranch piah lawkah chhar a ni a, a chal darah tak kah a ni. Mi tam tak chuan ka pa Red Rufe-a kah anih an ring a, chuvangin, ka patea chu a tlanbo a ngai ta a.. Trenton ho hian Sheriff hi an thunun tlat bawk si a. Ka pa Rufe-a chu bibo mahse kan buaina chu a tawp chuang lova, chuvang tak chuan ni, tunah pawh kan la inngur reng ni".

"Chu... I pa chuan buaina a chingfel zo lo a ni maw?"
"A ni mai ang chu! Ka nu thih atang khan ka pa hi a danglam riau tawh mai a, kei lah hi ka la naupang deuh bawk si a, kan cowboy ho chu tha tak² vek an ni nachungin pa fing leh remhria, ralthuam chelek thiam tak hotu atan an mamawh a ni".

Green-a chu a'n ngawi deuh vang² a, Texas rama a awmlai te chu a han ngaihtuah a. Dan-a ang rual anih lai te kha a han suangtuah let a, "I pa chu ka hmu ange" a ti ta a. Dan-a chuan lawm hmelpu tak hian, "Engtikah nge i hmuh theih ang?" tiin a han zawt a. Jim-a chuan, "Ka kal nghal thei mai ang" a ti a. "A that chu, sawlaiah sawn thil tihfel tur ka la nei a, lo va kal hmasa la, ka rawn umzui ang che," tiin Dan-a chuan an Ranch kawng chu a hrilh ta a. Chutah, "Sawlai pawna sakawr dum lian deuh saw lei thei phei ila chuan ka rawn umphak leh thei thuai ang che," a han ti zui a.

"I lei thei lovang".
"I va hre awm ve? A neitupa i ni elo?"
"Ni e."
"Sakawr i nei tha kher mai!! Ka hmuh tirh atang khan ka awt lutuk a, ka ru lek² asin! Ka pa chu va hmu tawh khai, i rin aiin a fel maithei. Mahse, rilru paukhauh leh luhlul ve deuh ania!"
Jim-a chu a lo nui suk a, "Kei pawh hi chutiang mi deuh bawk chu ka ni a, luangthli chhemna lam apiang a thle tawn mai² mihring zawng rinna nghahna tlak an ni ngai lo" a lo ti a.



Link:
BBcode:
HTML:
Hide post links
Show post links

Rozami pachuau
Posts: 163
Joined: March 17th, 2018, 7:40 pm

Unread post by Rozami pachuau » April 10th, 2018, 9:52 pm

SUDDEN - MAKES WAR.
AUTHOR : OLIVER STRANGE (1942)
CHAPTER 2
(Rozami Pachuau)

Kawng lakah chuan Jim Green-a chuan a sakawr 'Nigger' ti a a koh mai chu a be thin a, a sakawr chu a thian kawm mawlh² mai a. Tlangram kawng chheng chhe tak a zawh fe hnu chuan tlang hniam deuh, chhip zawl put mai chu a zawh leh ta a. A hmuh phak chinah chuan lungpui lian pui² hi van lam hawi zawngin an ding chho khep khup mai a, lungpui khawkrawk karah chuan cactus (kum za par kan tih mai) leh thingkung hniam te², buk lih leih an to thluah bawk a. Sudden-a chuan, "Rainbow ram chin chu kan hlat tawh lovang. Kan tlangvala khan min hrilh dik anih chuan Circle Dot chu chhim lam deuh khu anih ka ring. Nigger, kawng chu i bo em lovang chu maw?" a han ti a. Nigger chuan a rawn thlek ve hu a, a ha var tak lang thei chuan a rawn thren thru mai a. Sudden-a bawk chuan, "A tha e, i nuih theih hun lai anih hi. Nui rawh le... Kan nui rei vak tawh lo maithei ania" a han ti leh a.

Melkhat vel zet a kal hnu chuan wagon kal theihna khawp a zau, kawng lo phir thaih hi a va hmu ta a. Kawng pakhat zawk chu chhimthlang lam panin a peng a. Chu kawng chu a lun lo zawkin a lang a. Chu² sudden-a chuan a zawh ta a. "He kawng tawpah hi chuan Ranch a awm ngei ang chu. Keini ang mikhual tan hi chuan tu Ranch pawh ni se, a pawi tam pui lo vang chu," a han ti sap a. Chu kawng chu a kikawi ang reng khawp mai a, mahse a chhiat lem loh avangin mel engemaw zat chu nuam takin a zawh zel thei a. Chutia thlamuang taka a tlan lai chuan rifle ri a hre ta a. Nigger-a chuan a beng a chhi nghal hru a, Sudden-a chuan a han thlamuan a, "Hlau suh, vala, min kah loh hi! Kan hmalam saw niin ka hria. Helai velah hian hmelma chu kan nei hran lo nain, i fimkhur ve reng² teh ang." tiin Nigger-a chu a han bia a.

A sakawr chu chak deuhin a han kheng tlan a, melkhat vel lai an tlan hnu chuan kawngkawi pakhata sakawr lo ding hi a va hmu ta a. A piah lawka pa pakhat, bawk khupa lo let reng chu a va hmu leh nghal a. Han en thuak chuan sakawr atanga tla niawm tak hian a lang a. Mahse, a hnungzanga thisen avang chuan a thih chhan awm chu hai rual a ni lo. Sudden-a chu a han hawi kual a, sakawr khela Circle Dot Ranch chhin chhiahna chuang kalh chu a va hmu ta a. Dan Diver-a hlauhthawn thil chu a lo thleng ta ngei mai. Sudden-a chu sakawr atangin a chhuk vat a. Ruang chu a va pan phei a, a thih dan enchian tumin leh khawilam atanga rawn kah nge tih hriat tumin a han en hnai a. Silaimu chuan a zang ruh chu su tliakin a chuap a khawih tel ni ngei tur a ni.

"Ban phar rawh, rang deuhin.."

Sudden-a kun lai chu a thu ngil awt mai a. Kawng vela vaivut a tam em avang chuan, mi pali, sakawr chung chuang lo kal thawm pawh chu a hre mai lo a ni. Rifle kaw hmawr pahnih chu a han melh kual a. A ban chu a koki pel lovin a han phar a, "E.. Pute u, in lokal chu a tihzia hle mai," a han ti a. Pakhat chuan, "Enge thil awmzia?" a rawn ti a. Chupa chu pa tawi lam deuh, tawr tha tak leh, fin vervek hmel fahran mai hi a ni a. A hmuihmul chu sei fahran hian a kual thla a, a kawr hmaa arsi intar chu langsar tak hian a tle sar² bawk a. Chupa chu Sheriff Foxwell-a, a thiante leh hmelma te pawhin 'FOXY' (Sihal ang maia vervek)ti a an koh mai thin chu a ni. Mi ngainatawm leh nelawm a.ni ngai lo.

Sudden-a chuan, " Helai hmun ka rawn thlen hma mel khat vela ka kal laiin rifle ri ka hria a, a rikna lam panin ka tlan ta a, hei hi ka va hmu ta a ni," a han ti a. Mi pakhat chuan, "A khai a! Pu Dover-a a ni reng mai ka ti!" a han ti a. Sheriff leh a hote chu an sakawr atang chuan an zuang thla thuai² a. Chutihlai chuan mi pathum chuan Sudden-a chu silaiin an lo tin nghal a. Sheriff chuan ruang chu a han en kual vel a, "An lam bun anih hi. A pistol pawh a bawmah ala awm e. Khawnge a rifle hi?" tiin a han zawt a.

"A sakawra saw.."
An zinga putar deuh ber chuan, "Kan mikhual hian thil awmzia min hrilh thei ang chu," a han ti a. Sheriff chuan, "Hick, lo tawng ve lo la a tha ang, keiman ka'n chingfel ange... Mikhualpa chu.. Engtia helai lo awm tlat nge i nih?" a han ti a. Sudden-a chuan, " Circle Dot lamah hna ka va beisei teh ang tiin ka lo kal a ni," a han ti a.

"A ni maw? Dover-a nen hian in inhmelhriat em ni?"
"Inhmelhriat lo ve, helai ram hi ka vawikhat hmuhna a la ni nghe² asin"
"A nih tak chu! Circle Dot-ah hna beisei a kal i tum thu i sawi a. Dover-a ruang bulah i lo ding a, rawk tum ni awm taka i lo dap vel lai kan rawn hmu che a.... Awle, thingkung a tam bawk a, hun kan khawhral mai² hman lo.. Ged, i hruizen kha i keng maw? A valh han siam ta che," Sheriff chuan a ti ta mai a. Ged-a chuan hruihrual chu a rawn phawrh nghal a, Sudden-a chuan, "Min tih thaih in tum elo," a han ti a.

"Tum hran lo ve, kan khaihlum dawn che a ni,"
"Ka lawm e, min urhlum ang tih ka hlau zawk asin!, mahse, han enchiang leh deuh ula, helam atangin ka lo kal a, saw lam atanga kah a nih hmel bawk si a, in zinga mi tupawh hi a kaphlumtu chu in ni thei a ni," Sudden-a chuan a han ti a. Sheriff chuan, "Huh!! In sawi fihlim chu tum duh lo la a ni mai!" a ti chhum hmak a. Khaihlum a tum tak² a ni tih hriain Sudden-a chuan midang pathum te chu a han en a.
"In remti maw?"

Hicks-a chuan, "Sheriff thu² ania lawm, Foxy, khuaah te pawh hruai phei phawt ila," a han ti a. Sheriff chuan, "I sawi ang khan ka thu ania lawm. Tunah hian pa fel leh zahawm tak mai chu a ruang kan hmu ta a, a thattu lah kan man nghal a. Rainbow-ah hian inthahna a tam tawh lutuk a, ka ti tawp vek dawn!, Ged, hruihrual nen khan lo phei rawh le!" a ti ta a.

Chutihlai chuan Sudden-a chu hnunglamah a zuang phei vat a, hmuh hman lohin a pistol pahnih chu a kut ah a lo hum hman reng tawh a, mi pali te chu a hma chhawn ta a. A chet ran em avang leh an lo inrin hman loh avangin an rifle chuan an tin ve hman ta lo a ni. Sudden-a chuan hmalama kun deuh chung hian mi pali te chu a han melh kual a, a mitmeng chu a thip kher mai! "Awle, Sheriff, nang kha, hremhmuna zuang lut turin lo inpeih rawh le! In pali khan second 4 chhungin in thi fai vek thei tih hria ang che u. I. Silai te kha paih ula, van lam hawiin ban phar chho rawh u.. Mar deuha in phar loh chuan.. Pathian nung renga hmingin......"

Sheriff leh a hote chuan an silai te chu an paih thla nghal a, ban an phar ta a. Sudden-a chuan, "A tha e, khati tur kha a ni, tikhan... Naupang fel tak angin awm ula, in na lo maithei a ni," a han ti zui a. Sheriff chuan, "Dan i zah lo tih i inhria em?" thinrim zet hian a han ti a. Sudden-a chuan, "Dan ka zah lohna ka hre lo. Dan dik tak awmsa, diklo taka kenkawh tumtu thu ka awihlo a ni mai zawk," a ti a.

Chutihlai tak chuan sakawr a lo tlan ri tak² a, Dan Dover-a chu a lo lang ta hlawl mai a. Sudden-a chuan, "Hei, min rawn umpha tho alawm, ... mahse i tlai deuh a ni e, " a lo ti a. Dan Dover-a chuan ruang chu a han melh zawk a , sakawr chung atang chuan a zuangthla nghal a, ruang sirah chuan a va thingthi a, "Ka pa... Ka pa..!" a han ti a. Chutah, "An that ta nge² maw!.. Ka lo awm lo chu a pawi mang e! Hei hi tu hnathawh nge?" tiin a han melh kual a. Sheriff chuan Sudden-a chu a han en a, "Kha pa kha a niin ka ring," a lo ti a. Dan Dover-a chuan, "I thluak tet ang bawkin i rin dan pawh a kalsual anih hi! Mi a ho... Hemi hian ka pa a hre lo.. Circle Dot-a thawk tura kan lak thar a nih hi!" a lo ti let a. Sheriff chuan, "Mi thar pawh nise, i pa that tura rawih pawh a ni maithei asin, kan va hmuh lai khan i pa ruang alo rawk mek a ni," tifuh inti hnel tak hian a han ti a.

Dan-a chuan a pa ipte chu a han zen a, pawisa chu rawn phawrh pahin, "Mi rawk a thiam vaklo anih dawn hi, rukru mawl ber pawhin hengte chu an hmaih duh lovang," a ti a. "He mikhual hi i hria em ni?" Hicks-a chuan a lo ti vat a.
"Tukin zing khan kan inhmu a, ka rawn tirh anih hi".

"I pa hi rawn hmu tur che in i chah em?" tiin Sheriff chuan a rawn zawt ve nghal a. Dan-a chuan a pa chu amah hmu turin a chah lo a ni tih a hria a, chung mite chu a ringhlel nghal mai a. "I silai chuh rawh," tiin Sheriff chu a cho ta a. Mahse, Sheriff chuan silai chu chuh a tum lova, "Dover,.. Ka ban ka phar hi" a lo ti a. "I duh chuan thlakthla la.." Sudden-a chuan a rawn ti nghal vat a. Sheriff chu a buai ta map mai a. Rifle te chu thlauh vek tawh mahse, pistol chu an la pai si. He mikhual, pawisak nei lo hmelpu tak mai hmaah hian silai a chelek ngam lo deuh a ni. "Buaina siamtute thelh zawk tura Sheriff ka ni a, chuvangin ka silai chu ka chuh lovang," a ti ta a.

Dan Dover-a chuan thinrim tak mai hian, "A ni maw!.. In pu, tualthah hmanga hnenah chuan va kir ta ula, in theihtawp in chhuah thu chu va hrilh rawh u," a ti ta a. Sudden-a chuan, "An Rifle leh puakruk te chu hetah hian an kalsan tur a ni," a lo ti a. Meng nur tak chungin Sheriff leh a hote chuan an puakruk chu an thlauhthla leh ta a. Sakawr chungah chuan an zuangkai a, inher pahin Sheriff chuan, "Hemi chungchang hi Rainbow chuan an theihnghilh mai lovang," a ti a. Dan Dover-a chuan, "Ni e, mi pakhatin mi pali a hands-up dan leh an silai te a chhuhsak vek thute in rawn hrilh ve dawn nia. Rainbow khua sawn nuihzat tur an neih khat em hi! Sody-a dawrah in silai te hi kan rawn thawn anga, dawt in sawi loh zia an hriat theih nan," a ti a. Sheriff chuan lungawilo tak chungin a hote chu a tlan liam pui ta a.

Sheriff leh a hote tlan lian hnu chuan Dover-a chuan Sudden-a chu en pahin, "I bang leh mai dawn em ni?" a han ti a. Sudden-a chuan, "Dawn lo ve, kha Sheriff lem chang thiam khan ka rilru a khei riau a ni." a lo ti a. Dan Dover-a pa ruang chu sakawrah chuan an phuar bet a, Sudden-a chuan a lo lambuntu lo awmna lai vel niawm a a hriat chu a han endik a, an lo channa hmun niawm takah chuan silaimu shell ruak .38 chu a hmu ta mai reng a. Meivap paih nawi te pawh a lo awm a. Chubak ah sakawr lo dinna hmunah chuan sakawr buang hmul hi a lo tla nial bawk a. Sudden-a chu kawngpui lamah a chhuk leh phawt a , a thil hmuhte chu Dan-a a han hrilh ve a, Dan Dover-a chuan, "Trenton-a chuan vaibel chu a zu ngei mai!" a ti a. Sudden-a chuan, "Chumi avang ngawt chuan, uicho pawh kan khaihlum si nang!" a ti a.

Ngawi rengin ruang nen chuan Circle Dot Ranch chu an pan ta a. In an thlen hma deuh chuan pa pakhat, upa lam tawh hian a lo hmuak a, sakawr chunga ruang a hmuh veleh chuan a meng phar awrh mai a, chhia a han chham zauh a.. "E khai! Engtizia nge ni ta mai!?" a rawn ti a. Dover-a chu sakawr chung atangin a zuang thla a, hmel ngui tak chung hian, "Ka pa an kaphlum a ni, Burke" a ti chuai raih a. "Nakinah kan inhrilh chiang dawn nia," a ti a.

Dan Dover-a pa, Ranch neitupa ruang chu dim takin inchhungah chuan an zawn lut ta a. Chutihlai chuan tlangval pakhat, dawldang leh cher angreng tak mai hian a lo thlir vawng² mai a, a hmai hupin a tap ta zawih² mai a. Chu tlangval, la tleirawl tak mai chu Sudden-a chuan a va hnaih a, "A vanduai thlak ngawt mai tiraw, mahse, thi tur theuh kan ni tih hria ila, tuar dan thiam hi a tha a ni," a va ti a. Chu tleirawl chuan, "Tuar thiam mai chu a har ngawt ang. Pu Dover-a hi awm lo se chuan miin engahmah min ngai lovang... Ani ber kher hian engatinge min thihsan le?" a ti a, a khuh zui nghal ta bawrh² a.

Link:
BBcode:
HTML:
Hide post links
Show post links

Rozami pachuau
Posts: 163
Joined: March 17th, 2018, 7:40 pm

Unread post by Rozami pachuau » April 10th, 2018, 9:52 pm

SUDDEN - MAKES WAR.
CHAPTER 3
(Em cee Hmar)

Rei vak lo hnuah chuan Burke-a a lo chhuak a, Sudden-a chu a rawn be ta a. “I chanchin Dan-an min hrilh tawh a, ka lawm ngawt mai. I ṭanpuina azarah misual ho chu hneh theih ngei ka beisei a ni. Inti mikhual miah suh ang che.” a ti a. Sudden-a chuan, “Mi engzat nge thawk che u?” tiin a han zawt a. Burke-a chuan, “Mi pariat chauh. Kei hi an pa ber ka ni mai, kum 20 lai ka awm tawh a ni.” a ti a..

“Forman em ni i nih?”
“Ni love. Putar-a khan engkim a enkawl vek a. Forman tak kan nei ngai lo.”
“Tunah Putar chu a thi ta si a...?”
“Ngawi teh, Pu......”
“Jim, tiin min ko mai rawh.”

Tlai chawei hun hma chu Burke-a leh Sudden-a chuan titi khawchang an sawi dun a. Ranch kalhmang leh chanchin vel chu an sawi dun a ni. Zanriah chu Dan-a te nen an kil ho a. An eikham hnu chuan chanchin kimchang takin Dan-a chuan Burke-a chu a hrilh ta vek a. Chutia a han sawi chuan a ngaisang rilru hle mai a.
Dan-a chuan, “Ka pa kha engvanga lo chhuak nge a nih reng reng?” tiin Burke-a chu a han zawt a. Ani chuan, “Nangmah hmu tur chein a lo kal a, ani chuan a hmuh thu che leh i pa chu khua a lo kal tura i chah thu a rawn sawi a, i pa chu a lo kal ta mai a ni,” a ti a.

“Ka pa hi lo kal turin ka chah reng reng lo. Tihhlumna tur remchang zawngin dawt an phuahchawp a ni tih a hriat hle mai!”

Sudden-a chuan, “I awm leh awm loh hre turin tu emaw enthlatu an indah anih dawn chu. I hote hi i hrechiang hlawm em?” tiin Dan-a chu a han zawt a.

“Mi pakhat tihloh chu ka hre vek.”

“chu chu tunge ni.”

“Flint-a.”

“Flint-a hi chuan hna a thawk ṭha hle asin. ”Burke-a xhuan a rawn ti a. Sudden-a chuan, “Enthlatu chuan a ṭha thei ang bera lan chhuah chu an tum ṭhin reng ani. Tunge tleirawl awm ve saw.?” a han ti a. Dan-a chuan, “A hming tak ka hre lem lo, a sawi ṭha duh vak lova. New York lam chanchin hi a sawi fo mai a, chuvangin. 'Yorky' tiin kan ko ta mai a. Chu chu a hming ani mai. Chuap lam dik lohna a vangin a sawngnawi em em bawk a, a vakvai rilṭam ka pain a rawn hawn a ni.” a ti a.

An han titi chhunzawm zel hnu chuan Jim-a chu Foreman a awm turin a duh hle mai a. Mahse Jim-a chuan a hnial a. “Ni love. Burke-a hi Foreman ni zawk rawh se. Kei chu duh duhnaa kal kual theih a thil hriat zung zung hi ka duh a, miin an lo zawh che u pawhin ‘Mi vakvai' min ti mai ula, tichuan hnathawh a awlsam phahin thil ka hre chhuak rang thei zawk ang.” a ti ta tlat a.

Burke-a chu Foreman atan chuan an ruat fel ta nge nge a. Sudden-a erawh chu hmelma do let dan ngaihtuah a ama thu thua tla hrang turin an tifel ta a..

Dan-a chuan ,“Jim, i duh chuan i inhnamhnawih thui hmain inhnuhdawhna hun a la awm e,” a han ti leh a. Sudden-a erawh chuan, “Ni love, thiltih ka tum tawh reng rengin a tawp thlen rak hi ka duhdan a ni a, tunah chuan mut ani ka tum tawh ni. Chhum dum leh chhah ber piah lamah pawh khian Eng a la awm ani tih hi hre reng ta che u,” a ti a.

Zing chaw an eikham fel deuh chauh tih chuan Hicks-a a lo thleng hlawl mai a. Dan-a hnenah chuan, “Nimin thilthu ah khan Sheriff in Sordy-a dawrah thil ngaihtuah nawn ṭhain a hria a, in lo kal thei ang em?” a rawn ti a. Dan-a chuan kal a duh hran lo. Mahse, Sudden-a chuan, “An thu ang chuan awm phawt ila thiltih dan pawh kan hriat chhuah phah mial mai thei asin” a han tih chuan Dan-a chuan, “Kan rawn kal ange” a ti ve ta a.

Burke-a chuan Sakawr tawlailir chu a khalha, a hnungah chuan cowboy panga inkah peih at chuan an zui bawk a, khua an han luh chun mipui mit chu an la kher mai. Lo thlirtute zing ami, Sellar-a an khaw mistiri chuan Sudden-a a han hmuh chuan, “Khu laia samdum khu tunge?” a han ti a. A kianga ding Evans-a chuan “Foxy-a te ho silaia lo tintu kha a ni ngei ang. Circle Dot tan a thawk anih vaih chuan Dave Dover-a thah khan kawngro a sut phah vak lovang le” a lo ti a.

"Wagon Wheel nen an la in dawr a ni lawmni. Chutianga i ṭawngchhuah ngam chu le? Nun hi i kham ta zawk em ni?

“Kei chuan kham love.. Wagon Wheel lam chuan an kham zawk ani ang. Ṭrenton-a thu thu a awm pawh hi a ninawm tawh ani”

"Ni chiah e. Kuang pawh ka peih fel der tawh. Dave Dover-a ni lo midang luah khah a tan ka duh ngei mai. Dave-a kha thinchhe hle mahse mi diktak a ni tlat si. Ka ui ngawt a sin”

Rainbow chu khawte tak tê a ni a, Saloon pahnih vel a awma, Khualzin te phei chuan, Saloon khu awm lo phei se chuan Rainbow-te chu khua a chhiar chi pawh ani hlei nem an tih khum mai mai ṭhin a. Sody-a saloon ah chuan an lo kal khawm hlawm a. Sheriff leh a ṭhuihhruai te ho chu Dave Dover-a haw tute vek an ni. Circle Dot ho an lo luh chuan Sheriff chuan, “I ho te hi an lo tel ve kher a ngai em ni” a lo ti a. Dan-a chuan “Ka duh leh ka hruai ang chu i thu em ni” a lo ti let a. Sheriff leh Dan-a chu an in hnial titih ta mai a.

Ruang sira ṭhingṭhi a lo kun mek tarmit bun mi pakhat kum sawmthum chuang tawh chu a rawn hawi chhuak a. “Sheriff in inhnial mai mai ngaithla turin em ni ka zu in lai min rawn koh" a ti a, Foxy-a chuan “I report chu han sawi ta che Malachi.!" a lo ti let a. Doctor Malachi chuan “Nang chuan Doctor min ti kher rawh. Eng report nge ka pek ang che? He pa hi a thi tawh a, darkar sawmpanga lai a thi tawh a ni. Tunlai nangni mi huaisen tuh danin hnunglam aṭanga kah ani.. Silai mu hi i en ve duh em?Dollar nga min pe nghal rawh” a lo ti a.

Foxy-a chuan mak ti deuh hian a lo en a. Doc kan hriat loh engmah min hrilh belh hleinem. Dollar nga i la phut leh nghal a maw?” a han ti a. Malachi chuan “Ni e Sheriff, hei hi hre lawk bawk ang che, i dam loh laia enkawl hman loh che a ka buai palh chuan a pawi ngawt ang” a ti ta salh mai a.
Sheriff chuan Malachi chu a hnial hneh dawn loh tih a hria a. Thu dangah a pakai ta daih a. “Aw le, kan mikhual pa hian a ruang hmuh dan te han sawi sela..” a ti a.

Sudden-a chu a lo ding a. Zinga Dan Dover nen an inhmuh lai aṭangin a sawi chho ta a.
Foxy-a chuan, “Aw le, a dang chu ka hria” a lo ti a.

Bar a ṭang chuan mipakhat hian “Foxy chu ruang bulah a thattu niawm tak iva nangching a, i tih dan pangngai in ti nge a hmunah chuan i khaihlum nghal mai loh” a lo ti a.

“A ni maw! keipawh i dinhmun angah khan ding ve i la chuan ka rilru ka thlak ve ngei ang!”

An nui ta hak a. Bar lam aṭang bawk chuan “Roreltu turte hnenah khan i rilru i thlak leh thut chhan te chu i hrilh ve dawn lawmni” a rawn ti leh a.. “Roreltu turte chuan an hriat duh chu an hre vek tawh alawm” tiin Sheriff chuan a lo chhang a.

“Chuti chu tuna kan rorel tawp dan tur pawh an hre vel tawh ang chu!”

Sheriff chuan hmel dur khuih chung chuan hnunglama rawn ṭawng tupa lam chu a han hawi a. “A ṭul ka tih chuan ka rawn ang che” a ti nghut a.

Doctor chuan “Min râwn man dollar nga a ngai ang. I hnen aṭang phei chuan pek lawk kher ka ngai ang” a rawn ti a, a lo ngaithlatute chu an nui dur dur mai a..

Sheriff chuan “Dan i zah lo lutuk” a han ti hluk a. Doctor Malachi chuan “Dan te i sawi ve e law? a sipel pawh i thiam ka ring lo sipel thiam lo lehnghal tu phei chuan a kenkawh te chu hnai lo” a lo ti let ve leh a. Lehlam hawi in zu chu a in thlit leh ta kar kar mai a.

Sheriff chuan thaw huai chungin Dan-a lam chu a han hawi a “Sawi tur i nei em” ahan ti a. Dan-a chuan “Nei teh reng mai” a han ti a. Hmelhriat loh pakhat in a pa a bum chhuah dan te chu a han sawi a. “Ka pa kha ka chah miah lo..A chah tu pawh kha rin ka nei mai” a han ti zui a.

Roreltute nen chuan thu chu an han sawi ho a. Sheriff lam chuan Sudden-a chu puh ngial tum mahse. Dan Dover-a te lam chuan an ṭan tlat a.. Sheriff chuan “Tuna kan hriat dan chuan Dave Dover-a hi silai a kahhlum ani a. A kaphlumtu erawh chu hriat ala ni lo” a ti ta a.

Doctor Malachi chuan “Hriat nise chuan tuna inhmuhkhawm pawh hi a ṭul miah lovang” a rawn ti leh a. “Sheriff, kan In nuam tak saw rawng hnawih thar ka duh hunah ka la rawn hruai ang che” a han ti zui leh hram a.

Sudden-a chuan “Saw pa sawn dan a va han ngaisang lo ve” a ti chhuak hial a. Mahse Dan-a chuan “Doctor-a hi chu a dan ve ania. Foxy-a han chhaihkawlh vel leh sawisak hi nuam atih zawng ve a nia. A mak reuh khawp mai! Mahse kei chuan ka ngaina ru ve tlat asin” a ti a.

Link:
BBcode:
HTML:
Hide post links
Show post links

Rozami pachuau
Posts: 163
Joined: March 17th, 2018, 7:40 pm

Unread post by Rozami pachuau » April 10th, 2018, 9:53 pm

SUDDEN - MAKES WAR.
CHAPTER 4
(Em cee Hmar)

Chumi ni chawhnu lam chuan khua atanga mel chanve vel leka hla thlanmual te tak te ah chuan Dan-a chu a ding vang vang a, zawite hian. "Ka pa, min hneh dawn chuang lo a nia." a han ti sap a. A hnunglam atang chuan pa lian tak leh tawr tha deuh mai hian a rawn hnaih a.

A pawi ngawt mai, Valte. Mahse. lungngai duh suh. Pathian thusawi tute thusawi a dik ngai te a nih chuan Vanram ah i nu nen an awm dun ang chu. Thil Pakhat hrilh duh che ka nei. Tanpui theihna che ka neih phawt chuan ka inpeih reng a nia." a ti sup a.

Dan-a chuan. I ti lawmawm e. Pu Bowdyr. Ka hre reng ang. Thiantha ka la mamawh dawn chauh a ni,” a lo ti a.

“I mi chhawr thar hi a that hmel riauin ka hria asin.. A chanchin enge i hriat?”

“Engmah hriat ka nei lo. Risk ka la tawp mai.”

“A chang chuan risk lakte pawh hi a ṭul ṭhin reng a ni. I ti fuh viauin ka ring tlat.”


Rainbow an va thlen chuan Bowdyr-a chu ama Saloon, 'Parlour Saloon' a tih maiah chuan a lut a. Dan-a pawh chuan a zui lut ve nghal a. Parlour chu Sody-a Saloon aiin a te deuh zawk a. Mahse, Saloon dang ang thoin piano te leh inkhelhna chi hrang hrangte leh lamna hmunawl te thlengin a awm kim ve vek a. darthlalanglian leh puanzar nalh tak takte chuan a chhung chu a ti phuisui in a ti nuam ve hle mai a.


Chumi ni chuan Parlour neitu Ben Bowdyr chuan Circle Dot rider ho chu a thleng hlawm· "On the House' tiin zu chu a thlawnin a intir hlawm a. Ben Bowdyr-a chuan titi pahin Wagon Wheel chanchinte chu a sawi chho zel a. Trenton-a chu Wagon Wheel neitu ni mahse ani ai chuan Chesney Garstone, khawchhak lam atanga lokal chu a thu zawk mah a ni tihte chu a sawi a.


Bowdyr-a thukhawchang chu Sudden-a chuan ngun takin a ngaithla a. Chesney Garstone-a chu palian tak mai leh kum sawmthum leh sawmli inkar vel a ni a,a mitmeng chu a paw ram mai a ni tih a sawi lai mek chuan Parlour Saloon-ah chuan a lo lut ve ta hlawl mai a.

"Dover-a hmuh tumin ka lo kal a ni. Vanduaina a tawh thu kha nichin mai khan ka hre ve a, Bend atangin ka lo thleng hlim hlawl a ni," a rawn ti ta a

Dan-a chuan. "Chu, Bend-ah te i va kal a maw?" a lo ti thuai a. Garstone-a chuan. "Kal chiang e nimin zing khan ka kal a, zan ka riak nghal alawm.” tiin a chhang a.

"Thu i pek fel vek hnuin a ni ang maw? Bend-a awm angin i insawi a, Bundy-a sawi danin in hote chu in atanga mel sawm vela hla ah an awm bawk a. Zeb-a pawhin thawnthu phuahchawp tur a nei ve ngei ang!

“E heu! I pa thattu ah min ring elaw ?"

“Ring love. Thil awmzia ka sawi a nih zawk chu.”

Garstone-a chuan a thinurna chu a ti lang duh chuang lova. "Dover. ka hrethiam a che. I rilru pawh a hah viauin ka ring a ni. Mahse, thil sawi lawk ka duh a. in ramah sawn tui hman sen loh in nei a, keini lahin duh khawp kan nei si lova..... in ram tui awmna thenkhat saw min sahthlak thei lawm ni ? A man chu thahnem tawk tak kan pe ang che ?" a ti ta a

Dan-a chuan, "Engtik atang khan nge Wagon wheel hi i lo neih a?”

"Ka nei lova, Trenton-a hmingin ka dil che a ni zawk .Enge i sawi dawn?”

“Thil pakhat ka hril ang che ka pa kaphlumtu chu ka hnenah rawn hlan phawt la, chutah chauh chuan ka be thei ang che."

Garstone-a thin chuan a tuar ta lova. "Bowdyr.Dover-a min chhan dan hi i hre ve a. Indo a duh a nih hi...kan indo ngei bawk ang!" a ti ta tun tun mai a

“Chu. hnunglam atanga kah i tum tihna em ni ?” Bowdyr-a chuan a lo ti khauh a. Garstone-a chuan, "Tum love. Circle Dot hi ka nuai bo hmarh mai dawn a ni han ti chhuak a. Dan Dover-a chuan, "Khawchhak mi siIai pai ve tawh ang che....i la mamawh dawn chauh,” tiin a han au zui a.

Bowdyr-a chuan. "Dan. a rilru i hre phak lo a ni. Eng buaina pawh tawk ila, tun dinhmunah chuan mi tam tak chuan an thiam dawn lo che a ni. Tha taka rawn biak a tum thu leh i lo chhan dan kha khawtlangah a puangzar ngei awm si a." a ti a. Dan-a chuan, "Ka pawi ti lo. A duh ang ang chuan min sawi ang hmiang. Jim. enge i ngaih ve dan? a han ti a. Jim-a chuan. "Pa hlauhawm tak chu a ni ngei ang Silai pawh a rukin a pai rengin ka ring,” a lo ti a.

An hawn kawngah chuan an titi malh malh hlawm a. Circle Dot Cowboy hote chu fiamthu duh ve tak tak an ni hlawm a. An zinga mi, Tiny an tih chu a palian bera ni a. An zinga ngawichawi ber chu-Noisy- ti in an ko bawk a. Bob Dister-a leh Tiny an tih chu kawngtluanin an infiam a, an ri nak nak hlawm a.

Ranch-ah chuan putar pakhat, sam tuak var vau mai, zang kul deuh hi a lo awm a. A tlangval lai chuan pa pian tha tak a ni ang tih hriat tak hian a dar pharh chu a hlai tha viau a, a sek tha hle a ni. Hunch(zangkul-a) tiin an ko mai thin a. Hunch-a chuan, "Enge Dave-a chanchin?” tiin a rawn zawt a. Dan Dover-a chuan muangchangin a pa thih dan chanchin te chu a han hrilh a. Chu putar chu a meng dur hle ta mai a, a hmai chu a sen ap ap mai a. Ngawi rengin ramhnuai lam a pan a. thing luang pakhatah chuan a hreipui chu a han chek bur, hnímbuk lam pan chuan a bibo ta daih a

Dan-a chuan, "Ka pa thian pakhat ve a nih kha Kum hnih vel kalta khan a lo kal a, thingtuah tur min rawn zawrh a. kan piah lawkah sawn In te taktê ah amahin a cheng a. kan thingtuah hi chu ama min rawn tumsak vek a ni." tiin Hunch-a chanchin chu Jim-a a han hrilh ve a.

Chutih lai chuan kawngka sirah Yorky chu lungngaih hmel zet hian a lo thu a. Dan-a hnenah chuan. "Pu ber a thi ta si a. min hnawtchhuak tawh mai dawn em ni?" a han ti a. Dan-a chuan. "Hnawtchhuak love a chutiang thute khawi lam atangin nge i hriat tak? a lo ti thuai a. Yorky chuan, "Flint-an a sawi alawm Chhawr tlak i ni si lova, hetah i awm thei tawh lovang min ti a. a ti chuai raih a

"Mai mai thin a, Flint-a thu a ni hleinem....i duh chen chen hetah hian i awm ang," tih pahin Dan-a chu Inchhungah chuan a lut ta a. Sudden-a chuan Yorky chu a han en vang vang a. "Sakawr chungah chuang la. pawn lam boruak te va dawng ta che," a ti a.

Yorky chuan, "Putar pawh khan min ti thin a. mahse a sawt lo. Thlai chi tiak tir ang lek ka ni...sakawr chungah pawh ka chuang ve theiin ka ring lo,” a ti a. Sudden-a chuan. "Thlai chi tiak tir pawh thingkung lian leh khauh takah a thang thei alawm," a ti a. "Yorky. sakawr chung chuan ka zirtir ang che." han ti zui leh a.

A tuk zingah chuan Sudden-a chuan sakawr pakhat chu a rawn kai chhuak a. Sakawr chu a sual nge sual lo tiin a han en chhin phawt a, sakawr chunga a han zuankai veleh chuan a khek tuarh a, a lim ta puat puat mai a. Sudden-a chu sakawr chungchuan thiam tak ni lo sela chuan a tla na hle awm e. Mahse, sakawr chauhhma chu a bet lui tlat a. A tawp a tawpah chuan sakawr Shut-eye (Muthlu-a) tia an koh mai chu khur dur durin a ding ta a.

Sudden-a chu a zuangthla ta a, a han hawi kual vel chuan Flint-an nui sang chunga a lo en chu a hmu a. Sudden-a chuan saddle hnuai chu a han en a. Choya hling buk hi a lo awm a. Chutiang hling chu hling zum leh khauh tur nei chi hi a ni a. Chu hling chuan sakawr chu a lo chhun a, na tuarin a lo zuang vel hi a lo ni a.

Flint-a pan phei pahin Sudden-a chuan. "Engatinge he thing buk hi saddle hnuaiah i lo dah?" a han ti a. Flint-a chuan. "Ka fiamthu anih kha." a lo ti a.

"Yorky hi chuang vaih se chuan a tlahlum thei mai ang tih i hria em?”

“Hria e. Mahse i chuan chhin hmasak ka ring sa a ni”

“Chuti chu. nang leh keia inkarah thil fello tihfelngai a awm anih chu ! Choya hling chhun natzia hi i hria em ?

"Hre lo. Ka hel zel thin."

"A ni maw 2 tih pahin Sudden-a chuan rang lutukin Flint-a kawrawmah chuan a va tham a, choya hling buk chungah chuan a han thuttir hnawk mai a. Flint-a chu a te tuarh nghal a. A rawn thawh chhuah pah chuan a pistol a han phawi a. Mahse. Sudden-a chuan a lo pet thlak sak nghal a, a hmaiah tak chuan a hnek nghal thuai mai a.
Flint-a chu a thu leh ta hnawk mai a.
Choya hling chuan a lo chhun leh a, hling phawi tum chuan a han bei vel a, a kutte chu a lo chhun leh zel si a. "Min han then pui ta che u mawle !" tih pahin cow-boy dangte chu a han au tuar tuar a.

Cowboy ho te pawh chuan an rawn pui ta thuai a. Flint-a chuan a pistol chu chhara pai that leh mai tum hian a awm a, mahse pai tha ta lo chuan Sudden-a chu a tin ta thut mai a. “Tumah che suh u!" a han ti nghal tuarh a. "Han kap van teh ! Kan khaihlum nghal ang che," Dan-a chuan a lo ti a.

Flint-a chuan. "Tuma lo inrawlh ve a tul lo Green, lo hawi teh le!" a ti a. Green-a rawn hawi veleh kah mai a tum a ni. Mahse a kap hman chuang lo. Engtik laiin nge Sudden-a chu a chet a hre hman lo, Sudden-a pistol kaw hmawr chu a melh ta ran mai a. Jim Green-a chuan. "Hmet puak la, hremhmun kan kal dun a ni ma alawm." a han ti let a. Mahse. Flint-a huaisenna chuan a tlin lo. Jim-a mitmeng thip tak mai leh puakruk lakah chuan a khup ta zal zal mai a. A puakruk chu a pai a. Dan-a lam chu a han hawi a. "Ka bang e."a han ti deuh nghat a.

Dan-a chuan, "Nichin atang khan ka ban tawh che. a lo ti ve a Flint-a chuan, "Hetiang outfit chhe lutuk ho zingah hian ka tel peih tawh lo reng a ni !" a han ti leh salh a, a sakawr lam chu a pan phei a. Dan-a chuan "Kha sakawr Kha ka ta anih kha. I chuang thei tawh lovang. a ti ta a.

Flint-a chu a lo vir zawk a, "Ke in min kal tir i tum a ni maw " a han ti a.

“Tum e. I rawn thawh tirh pawh khan sakawr i nei lova. I lo luh tirh ang khan i chhuak leh tur a ni.”

Flint-a thinur lutuk chu a sen awp awp mai"Dover. i la hre dawn khawp mai," tiin a han vau a. Rainbow khaw lam pan chuan a kal ta talh talh a. Sudden-a chuan "Keimah avangin mi pakhat i chan ta anih hi." Dan-a hnenah chuan a han ti a. Dan-a chuan. "Flint-a te ang mi bawlhlawh tello pawh hian hna chu kan thawk thei thoin ka ring." a lo ti a.

Link:
BBcode:
HTML:
Hide post links
Show post links

Rozami pachuau
Posts: 163
Joined: March 17th, 2018, 7:40 pm

Unread post by Rozami pachuau » April 10th, 2018, 9:54 pm

SUDDEN - MAKES WAR.
CHAPTER 5
(Em cee Hmar)

Flint-a kal liam hnu chuan York pawh sakawrah a lo lawn kai ve tawh a. Blister-a chuan,"Yorky,i chhuk duh hunah a mei lamah khan tawlh thla mai lovang che Chutilo chu a kheng nghek mai ang che," a ti a

Tiny chuan, "l tih harh deuh reng a ngai ang.A hnar ring nasa ania." a lo ti a. Cowboy pakhat chuan,“A tawngvai thin a ni awm lehnghal ania, Noisy amah in a pawt tam thei zawk an ti ” a rawn ti ve leh a, an nui ta dar dar a.

Sudden-a pawh chu a sakawr chungah chuan lo zuangkai ve chiah a. Yorky nen chuan ramhnuai lam panin an tlan liam ve ta nghal a. Far thing hmun vel boruak thiang tak dawng turin Yorky chu thing hmunah chuan a han chawl a. Sudden-a chu hmun en thlithlai turin a tlan leh ta thung a.

Dan-a nen chuan reilote an titi dun a. Sudden-a chuan, "Dan, ka chanchin engemaw hriat i duhin k ring a. Ka han hrilh ang che”a ti ta a.Tunhma lam deuh tawha mi pakhatin a thih dawna phuba laksak tura a intiam tir thu te. chumi ni atanga tun thlenga zawn lai a neih thu te chu a sawi ta vek a..

Sudden-a chuan"....Chuvangin alawm...khulai luite ang mai khuan awmhmun khuar thei lova ka vah reng ni...Tunah hian ka mi zawn te chu ka la hmu lova..Mahse ka la hmuh ngei ka ring.” a han ti charh charh a.

Thui vaklo an kal dun hnu chuan an inthen ta a.Sudden-a chu a la kal hla hman lo tih chuan, "Min tanpui ru..!tia hmeichhe au ri a hre ta a. Au ri a hriatna lamah chuan a sakawr chu a tlan tir vata Chirhdum a núla leh Dan Dover-a ding lai hu a zuk hmu ta a.

Dan-a chuan. Jim, lokal ve suh. I hrui khan i rawn vawrh phak angem ?" tiin a lo au a

"Phak ang,” Jim-a chuan a lo ti thuai a.

“Rawn vawrh thuai teh.He dum hian min hip bet tlat mai...... Kan pil tial tial lehnghal ania!"

Sudden-a chuan hun khawhral chi a ni lo tih a hria a, rang takin a hruihrual chu a han vawrh a. Dan-a chuan a lo man a, nula zakhnuaiah chuan a tawn vat a.Sudden-a chuan a lo pawt chhuak a, chumi zawhah Dan-a chu a pawt chhuak veleh ta a. Nula chu hlauthawngin a la khur zaih zaih mai a, a hmel chu a var lap mai a.Sudden-a chuan a hruihrual chu a han vawrh leh a, nula sakawr chu a zuk hling chat a, vaukamah chuan a hnuk chhuak ve leh ta a. Nula chuan lawmthu te a han hrilh a, tuia a tlak dan velte chu a han hrilh a.

“...... Lui mawng lamah ah chirhdum a awm tih hre lovin ka sakawr hi daikai tir ka tum a. Mahse. ka tang ta a ni...”a ti a.

."In chungah ka le wm takzet a ni. Ka patea pawhin lawmthu hrilh che u duhin ka ring. Wagon Wheel ah lo kal u la...E.... ngtizia nge ?" a han ti a

Dan-a hmel chu a lo danglam nasa tawh mai a.Nula hnenah chuan “Tunge i nih a..?”tiin ahan zawta. Nula chuan, "Beth Trenton-i ka nia. Nang zawk le a lo ti let a.

“...Dan Dover-a ka nia, chu chuan awmzia a nei em?"

"Nei e. Mahse, min chhanhim avangin ka lawm lo chuang love"

“Lawm duh suh. In chhungkaw zinga mi tanpuitu nih hi ka duh lo reng reng a. Hrelo a ka lo tanpuina che pawh hi theihnghilh nghal a ni ka duh!"

Nula chuan,“Kar khat chu ka cham ve ta a.ka chungah hian thil thalo ka la tawng lova. Nang chiah hi i danglam a ni ! tiin Beth-i chu a sakawr chungah chuan a zuangkai a, Wagon Wheel lam panin a tlan ta daih a.Dan-a leh Jim-a chuan an en zui vang vang a. 'Nu la hmeltha leh pian nalh tak a ni..... Trenton ni kher lo se la aw..”

Dan-a chuan,“Vawiin chu hmun dangah ka lokal daih zawk lo a ni.Trenton kher kher ka han chhan chhuak chu!”a han ti vang vang a.

Sudden-a chuan“Inahh va haw la, thawmhnawro va inbel rawh khai, kei pawh ka lo haw har lovang e”a ti a.Dan-a chu in lam panin a haw ta a

Sudden-a erawh chuan Dover-a pa an kahhlumna hmun va tlawh leh turin a kal ta a. A rin loh deuh maiin Hunch-a a lo awm ve reng mai a. Hunch-a chuan a lo lambun tu bihrukna hmun niawm tak chu a lo dap vel a.Eng tak hriat chhuah chu tum ni maw? ti rilru chungin Sudden-a chuan a lo thlir reng a. Hunch-a kalbo hnu chuan Sudden-a chu thil en chiang turin a chhuk ve ta chauh a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni.

Hrechiang duh tan Contact : 9612099411 / 9862016122


Rozami pachuau
Posts: 163
Joined: March 17th, 2018, 7:40 pm

Unread post by Rozami pachuau » April 11th, 2018, 11:09 am

SUDDEN - MAKES WAR.
CHAPTER 6
(Em cee Hmar)

Circle Dot ho chuan kar khat chhung chu buaina tawk lovin hun an hmang ral a. Yorky-a pawh chuan a hriselna lamah hma a sawn ve hret hret zel a. Nitinin far thing rimtui leh boruak thianghlim dawng turin a chhuak ve ta reng a, Sudden-a chu khuaah a va kal a Yorky enkawl dan turah Doc Malachi chu a va rawn a, zu te in dunin an inkawmngeih ta phian a.

Doc Malachi leh Sudden-a inbialk lai tak chuan pa lian tak, inchei nalh zeih zawih, kum sawmruk vela upa hi Parlour saloon-ah chuan a lo lut ve a. Sudden-a chu a rawn be nghal chawt a. "Khua i lo lut tih ka lo hria a. ka fanu i lo chhanchhuah avangin lawmthu ka hrilh duh che a ni.”

Sudden-a chuan. "A chhantu zawk chu Dan Dover-a a ni e," a lo ti a. “A ni lo. Nang chu awm lo la an pahnihin an tla hlum ang. A reng thuah Dan Dover-a chuan lawmthu lo beisei suh se ! Ti daih ila. Dover-a hian engzat hlawh turin nge a rawih che?"

"Thlatin Dollar sawmli a ni ang chu ka ti mai”

"Dollar sawmriat hlawh turin ka hnenah rawn thawk ta che. Trenton-a ka ni a, Wagon Wheel saw ka ta a ni.

“Ni love, ka pu.”

“I duh lo maw ? Ka Foreman hlawh aia tam hlawh turin ka sawm che a, i hnial fithla ang maw ?"

“I Foreman aia ka hlawh tam phei chuan Kan inhmu thiam lo thuai ang. Ni love, ka pu, pawisa ah hian ka innghat vak lova. Circle Dot-ah chuan ka awm zawk ange."

“I va han å em ! Circle Dot ranch chu an tla sawprawp tep tawh asin mawle. Ka lo ring sual che anih hi!" Trenton-a chuan a ti ta a. Sudden-a chuan, "Tunhma pawhin min ring sual chawk thin reng a ni. Ka luhlul ve deuh pawh a ni mahna," a lo ti liam mai a. Trenton-a chu lungawi vaklo hmelpu chungin, "Anih leh le," tin a chhuak ta a.

Bowdyr-a chuan, "Kha, a thlemna che chu pawm ta lo chu ania, fimkhur viau a ngai dawn ta. Dan Dover-a tana i thawh a duh lo a, a tan i hnawk dawn tlat si a, dahthat mai che pawh a tum maithei ania," Sudden-a hnenah chuan a han ti a. Sudden-a chu a lo nui mai a, pawnah a chhuak ta a. Silaimu zawrhna dawrah chuan a va kal a. 38 silaimu i nei em?" tiin dawr nghaktu chu a han zawt a

"Nei e. I duh em ni ?

“Duh hranpa love. rawn lei thin an awm em?”

"Awm ve thin e a. Cirele Dot rider pakhat Lafe Potter-a khan a rawn lei ṭhin a.Mahse,an kahhlum aṭang kha chuan tuma 'n an rawn lei ngai ta lo."

Tlai chawei lai chuan Sudden-a chuan Dan Dover-a chu Potter-a thih dan a zawt a. Dover-a chuan “Tu emaw ni in a kaphlum a. a neih chhun zawng pawh Sheriff-in a khawm vek a, ani sawn a kawl in ka ring, a ti a

A tuk zingah chuan Sudden-a leh York an inzui chhuak leh ta a. Chumi ni chuan tui an hleuh thung a. An inbual zawh chuan Sudden-a chuan kawrthar, kekawr thar leh Cowboy pheikhawk sang thar hi Yorky-a chu a pe ta a. Yorky-a lawm lutuk chu lawmthu sawi ngaihna va pawh a hre lo zawk a, Dave Dover-a tih loh kha chu, amah khawngaihtu leh lainatu tak tak an awm theih a lo ring ngai lo a ni. Jim-a chungah chuan a lawm em em mai a.

Beth Trenton-i chuan a hma nia a tlak hlum thelhna hmun chu a lo tlawh mek a. A sakawr chu tuiah chuan kal luih tir a han tum a,mahse,a kal duh ta miah lova.Chutilai tak chuan a hnunglam aṭangin aw hian "Mi zawng zawngah i la â ber awm e ! Engvanga luh leh tum nge i nih?" a rawn ti ta a.

Beth-i chuan a han en a, Dan Dover-a a lo ni a. “Luh tir ka tum tak tak hleinem, helai hmun hi a la hria nge hre lo ka enchhin mai mai alawm,”

“Lo la hrelo sela chuan a ngai ang bawkin i tla leh dawn tihna ania!”

“Eh.... Nangman min rawn chhan chhuak leh ang chu. Ti daih ila, ka patea ram chhungah hian enge i rawn tih a ?"

"I patea ram a ni hleinem ! Helai ram hi chu ka ram chhung a ni a. sawlai lungpui tohlawt saw kan inrina a ni."

“Chuti chu....ka lokal sual zawk a ni maw?”

"Ni chiah e. Mahse. nang chu i duh hun hunah i lo lut thei ang. Mahse, i patea leh a hote erawh chu Ka phal lo!”

Beth-i chu ngawi rengin a haw leh ta a. A patea chuan, "Beth, khawnge i i kalbo daih a ?" a lo ti a.

"Nimina ka thih thelhna hmun ka va tlawh leh a ni !"

“Kal tawh suh. Dan Dover-a leh a hote'n an lo hmu leh hlauh ang che."

“Thih huamin min rawn chhan anih kha.

“Thi daih mahse pawi ka ti hranpa lo ! Thi se ka lawm zawk ang," tih pahin Trenton-a chu inchhungah chuan a lut ta daih a..Beth-i chuan a en zui vang vang mai a.Trentin leh Dover inkarah hian inhmelmakna thuk tak a awm tih chu a hre ta mai a. Ani mikhual mai tan chuan a ngaihna hriatthiam chu a har hle mai..

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)
Post Reply
  • Similar Topics
    Replies
    Views
    Last post

Who is online

Users browsing this forum: No registered users and 20 guests