SUDDEN - RIDES AGAIN (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: SUDDEN - RIDES AGAIN (Completed)

Unread post by Ngaia » April 15th, 2018, 1:31 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 19
(Rozami Pachuau)

Double K ranch-ah ve thung chuan, Joan-i chuan a theih ang tawkin Keith-a damlo chu a enkawl hnuah pawnah a chhuahsan a, Mady-i'n Keith-a chu a enkawl ve ta thung a. Intiharh turin Joan-i chuan sakawr chungchuan a rilruk a, tichuan a sakawrah a lawn hman chiah tihin Langley-a'n a rawn hmu ta a. Tun hnai deuh lawk ațang khan Langley-a hian nuam lo tihna a nei thar ve a, thil tam tak a ngaihtuah bawk a ni. Chuvangin Joan-i hnenah pawh chuan, "Ka pi, kal hla vak suh, tunlai chu buaina mak tak tak a tam a, kan awmdan hi a ralți viau a ni," a ti a. Joan-a chuan fimkhur turin a intiam thuai a, a sakawr chu a tlantir ta a.

Mel khat vel sakawra a chuan hnuin amah rawn tawk tura sakawr chungchuang pakhat lo kal chu Joan-i chuan a va hmu a, sakawr chungchuang chu naupang kum 12 mi vel tur hi a ni a. Joan-i bul a lo thlen veleh a sakawr a tiding a, a lukhum a phawk vat a, "Ka pi, Joan Keith-i i ni em?" a han ti a. Joan-i chuan, "Ni e, khawi lam ațanga lo kal nge i nih?" a ti a. Naupang chuan, "Sawlai deuh ațang sawn, mi pakhatin min tir a ni," a ti a, Joan-i chu Lehkha, a ip chhunga inthun a pe ta a.

Joan-i chuan, "Lehkha petu che chu eng ang mi nge?" a ti a. Naupang chuan, "Cowboy angin a inchei a, a mitmu rawng chu a dumpawl a ni. A biang te tak tein a ser bawk. Min tirh manah pawisa tlem min pe a ni," a ti ta a. Joan-i chuan lehkha chu tu rawn thawn nge a hre thei nghal vek a, a kutziak a hria mai nilovin naupang chuan a hmel landante a sawi vek tawh bawk si a. Tichuan, hlim em em chungin naupang chu pawisa a pe a, ani chuan lawmthu a hrilh veleh a sakawr chu a tlantir ta nghal a.

Naupang liam fel veleh Joan-i chuan lehkha ip chu a hawng a, a chhunga lehkhaah chuan heti hian a inziak a. "Dear Joan, Vawiin chawhnu dar thumah Coyote Canyon ruam tawn tirhah ka lo awm ang, hmuh che a țul a, min hlawhchham tir lo hram ang che. Your Jeff," tiin. Joan-i chuan lehkha chu vawithum a chhiar chhuak zet a, tichuan Coyote Canyon lam a pan ta nghal a. Lehkha ziaktuin, 'Lo kal rawh' a tihna hmun chu a va thleng ta thuai a, tumah a hmuh loh avangin kawng chhak hmun biru lai deuhah a nghak ta a.

Rei pawh a la nghak hman lo tihin ramtin ațangin sakawr chungchuangin amah chu an rawn hual ta khup khup mai a. Chung mi panga te chu Setana țhuihhruai 'Imp' ho an ni tih pawh Joan-i chuan a hrethiam ta a. "Engti zia nge ni? Enge in duh?" a han ti a. Hmana, Sam-a saloon chhunga amah tibuaitu bawk kha tuna mi pangate zinga hotu hi a ni lehnghal a. Nui deuh țha chungin, "Kan Chief, Jeff-a a lo kal theih loh avangin a hnena hruai tur chein min rawn tir a ni," a han ti a.

A lehkha thawn hmuh kha, Hell City Lalpa, Setana'n a mah bum nana a thawn a ni tih pawh Joan-i chuan a ngaihtuah chhuak nghal a. Lehkhathawn a lo ngaihhlut em em chu a nuai hlawm tawp a, a thlauh thla ta a. Hell City-a an hruai vaih chuan a chan chhiat tur zia a hre tlang vek a, chuvangin, tlanchhiat tumin a sakawr chu a tlantir ta phut mai a. Mahse Outlaw pahnihin an um phak thuai a, Scar-a chuan, "Țha taka i kal dawn chuan engtin mah kan ti lovang che. Tlanchhuah i tum dawn anih chuan kan phuar hlawm mai ang che," tiin a vau ta a. Joan-i chuan hnial chi a ni lo tih a hria a, țha takin a zui ve ta mai a.

Khawthlang lam gate ațangin Hell City-ah chuan an lut a. Khawchhung an va lut a, mihring hmuh tur an vang hle a, in a tlem bawk si a. Joan-i chu a han hawi vel a, lungbanga puk lo awm thluah chu a hmuhin, mihring chenna atan an hmang a ni tih a hre ta a. Khawchhunga mihring tlem lo awm pawh chu danglam bik lova khawdanga awm ve mai bawk ni hian an lang a, mahse lungbang bula ban phun a hmuh erawh chuan a phu chiang hle a ni. Banah chuan mi pakhat hi an lo phuar bet a, a kawr an hlih sak vek a, a hnungzangah chuan an vuakna hnuhma a sen țuak mai a, Joan-i chuan tunge a nih a zawt a. Scar-a chuan, "Benjy-a nih hi. Hei vang hi a nia, khawthlang lam gate-ah khan kan hmuh loh," a ti a.

Setana chenna puk an thlen veleh sakawr ațangin an chhuk a, puk kawngkhar chu Silver-a'n a lo hawnsak a. Silver-a hmel rapthlak deuh chu a hmuhin Joan-i chu a kimki chawih mai a, Scar-a chuan, "Lut rawh, a seh lovang che," a han ti a. Hlau deuh tak chungin Silver-a chu a pel ta a. Pindan chhungah chuan Setan-a chu a lo țhu a, Joan-i hmel a hmuh veleh a ding thuai a, inti hawihhawm fahranin a han bu ngaih a. "Joan, i lo kal duh chu a lawmawm ngawt mai," a ti a, ţhutthleng a pe nghal a. Joan-i chuan, "Heta lo kal hi hnial thei ka ni hlei nem, i mi rawn tirh sawn phuar behah min vau alawm," a han ti a.

Scar-a chuan, "Tlanchhuah a tum anih kha," a lo ti ve thuai a. Setana chuan, "Keima thiam loh a ni. Hmuh che ka chak lutuk avangin ka rawn hruai loh che chuan khaihlumah ka vau anih kha," a ti a. Scar-a hnenah chuan, "Nizanah chuan nang nen hian buaina kan nei a, nang hian min kap hliam a, keiin ka kaphlum che a nih awm chu," a han ti leh a. Scar-a chu a meng phâwk hle a, "I thusawi chu a ngaihna ka hre lo tawp mai," a han ti a.

Setana chuan, "Sudden-a'n chutiang chuan gate vengtu a hrilh a, gate vengtu chuan a lo chhuah ta mai a ni. Ka thupek khauh tak kha a hre reng si a, a bawhchhe ta a ni," a ti a. Scar-a chuan Benjy an hren kha a hrechhuak phut a, "E, chuvang chu a lo ni maw?" a ti ta a. Setana chuan, "Ni e, tun chinah chuan a tisual leh ngai tawhin ka ring lo. Hei, in tui a halin ka ring," tih pahin pawisa a pe a, anni ho chu an chhuak ta a.

Setana chuan, "Joan, hmu tur che in keimah ka lo kal thei lova, pawi ka ti ngawt mai, tih tur ka neih thut avangin ka hman ta lo a ni," a han ti a. Joan-i chuan, "Pawna mi pakhat khawngaihthlak tak saw vaw turin em ni i hman loh?" a han ti deuh ngat a. Engto awm lo takin Setana chuan, "Saw saw maw? Inthununna thil mai mai a ni. Ka hote hi an bawraw em a, a khat tawka thununna zirtir an ngai a ni," a ti a. Joan-i chuan, Setana hi Jeff-a a ni lo tih pawh a hre vek tawh a, chuti chung pawhin Jeff-a ang a la ti em em thova. Jeff-a kha la hmu lo phei chu nise, he pa hi Jeff-a a ni lo tih a hre dawn miah lo a ni.

Setana chu a vei nghauh nghauh a, tah chuan, "Joan, sawi tur ka ngah mai a, ka hmu che chu ka lawm takzet a ni," a han ti a. Joan-i chuan, "Sawi tur i neih chu khawngaihin sawi thuai la, ka haw tawh ange, ka thang bo rei tawh em mai," a ti a. Setana chuan, "Khawiah mah i kal dawn lo. Tun ațang chuan ka awmna apiang chu i hawnna tur, i in a ni tawh dawn a ni. Ka nula nih nge i duh a, ka nupui? I duh zawk zawk i thlang thei ang. A eng zawk emaw chu i ni ngei tur a ni," a ti ta a.

Joan-i chu a zuang tho phat mai a, "I â ta em ni?" a han ti a. Setana chuan, "Ni e, nang hi ka âtchilh tawh che a ni. Vawikhat ka chhuah tawh che a, tun țumah hi chuan ka chhuah dawn tawh lo che. Kumkhuain ka kawl tawh dawn che a ni" a ti a.

Joan-i chu a țhu hnawk mai a, he misual do let dan tur hi a rilru zawng zawngin a ngaihtuah a. Setana hi Jeff-a a ni lo tih Joan-i chuan a hre si a, mahse hre lo anga awm a țha zawkin a ring ta tlat a. "Jeff, hmarua ang leka min en hi ka lo ring ngai miah lova. Min ngaina tak tak a nih chuan, tunah hian min chhuah anga, ranch-ah ka kir tawh tur a ni. Ka pa Keith-a pawhin min lo ngaihtuah tawh hle ang," a ti a. Setana chuan mak ti deuh maiin, "Ka pa, Keith-a te i tih, a thi tawh a lawm," a han ti a.

Joan-i chuan, "A thi lo, a intipalh a, a na viau a, mahse a la dam. Theih ang tawka ka enkawl a mamawh em em a ni. Khawngaih takin min chhuah hram rawh," a ti a. Setana chuan, "Ni love, kei pawhin ka mamawh che alawm," a ti tlat a. Joan-i chuan, "Ka bo tih a hriat palh hlauh zawngin i pa chuan a thih phah thei hial ang," a han ti a. Setana chuan, "Chuvang tak chuan ka hren rih che a țul leh zual a ni," a ti a. Silver-a hnenah thu a pe bawk a, enge an sawi pawh Joan-i chuan a hre thei lova. Rei loteah Silver-a chuan Belle Dalroy a rawn hruai lut ta a.

Setana chuan, "Belle, hei hi Miss Joan-i a ni a, hun engemaw chhung chu i pindan a țawm che a ngai a, țha taka enkawl turin ka duh che a ni," a ti a. Belle chuan, "Ka hrethiam e, Jeff, ka bulah chuan a him ang. Miss Joan, i kal ang le," a ti a. Joan-i chu a dinna ngaiah a la ding ta reng a. Setana chuan a va hnaih a, vin zet maiin, "Ka rilru ka thlak hma hian zui vat mai rawh. Hetah hi chuan a hotu ber ka ni tih hi i theihnghilh tur a ni lo," a ti a. Hreh tak chungin Joan-i chuan Belle chu a zui ta a.

Belle chenna chu Setana chenna puk piah chiahah a ni a, an va thleng thuai a. Pindan chhung an luh veleh Belle chuan, "Hei, kan thleng ta," a ti a. Joan-i chu țhutna a kawhhmuh a. Ani chu ngawi rengin a țhu a, a kun tlat bawk a. Belle chuan, "Hmanah Jeff-a hi i ngaina em em țhin tiraw? A danglam i ti tawh viau ang chu," a han ti a. Joan-i chuan, "Ni e, ramsa ang chiah a lo ni ta a nih hi," a ti a. Belle chuan, "Mipate hian ramsa anna an nei deuh vek zel a ni," a ti a.

Joan-i chuan, "Heta țang hian chhuah theihna reng reng a awm lo em ni?" a ti a. Belle chuan, "Hell City ațanga chhuah theihna hi kawngthum chiah a awm. Kha puanzar, tukverh anga kuaah khan zuang chhuak la, hnuai lam fit 80 vela thukah i tla mai ang. Chu lo chu, gate pahnih ațangin a chhuah theih. Nizanah khan Sudden-a pawh gate pakhat zawk ațang chuan a chhuak a, a chhuahtirtu gate vengtu chu banah an phuar bet a, an vaw na kher asin," a ti a. Joan-i chuan, "Sudden-a'n thiltih sual enge a neih?" a ti leh a.

Belle chuan, "Ka hre bik chiah lo. Tlanchhuak ta lo chu nise....," a ti a. Sudden-a an man dan te, a hnu leh lama an hrem zui dan te pawh a sawi ta vek a. Setana chu a sual thei ang berin a sawi lui ngat zel a. Joan-i pawh chuan, "Ka rin ai daihin Jeff-a chu a lo sual tawh a nih chu," a ti a. Thu tam tak an sawi dun zel a, a tawpah Joan-i chuan, "Engvanga hetah hian awm ve nge i nih?" tiin a zawt ta a.

Belle chuan, "Khaihlum aiah heta awm hi ka thlang ta zawk a ni," a ti a. Joan-i chuan, "Khaihlum a! Engti zia nge?" a han ti ha a. Belle chuan, "Mi pakhat thi tlak khawpa sual ka that a, mahse mihring dan siam chawp hi chuan a ngaihtuah tel lo a ni. Tui takin mu ang che, Hell City hian vawiinah an pu hnathawh rapthlak tak an hmu a, zaninah chuan thawm pawh a reh hle ang," a ti a, thudang an sawi zawm ta lova.

Tlai lamah chuan Double K Cowboy ho chu an buai nasa tawh mai a. Cowboy hnathawk lo haw apiang hnenah Langley-a chuan, "I chuanna tur sakawr dang buatsaih vat rawh. Dar hnih velah khan sakawra chuangin Miss Joan-i a kal chhuak a, tun thlengin a lo la kir lo. Zawn a ngai a ni," a lo ti zel a. A hrilh apiang chuan rang takin a thu an awih nghal zel bawk a. Cowboy lo thleng hnuhnung ber a hrilh zawh veleh Langley-a chu pindan chhungah a lut a, a rifle a la a, pawnah a chhuak leh thuai a, chutihlai tak chuan, "Langley, i kut kha dahsawn hlek suh," mi pakhat hian a lo ti a.

Langley-a chu a hawi let thuai a, a hnung lamah chuan sakawr dum chunga țhuin Sudden-a'n amah chu puakrukin a lo tin reng tawh mai a, Sudden-a bawk chuan, "Buaina zawnga lo kal ka ni lova, biak che ka duh a ni. Enge i ngaihdan?" a han ti a. Langley-a chuan kawngkhar kiangah a rifle a tung a, "Lo lut ta che," a ti a. Langley-a chu puakruka la tin reng chungin sakawr ațangin Sudden-a chu a chhuk a, pindan chhungah Langley-a chu a zui lut a, "Engati nge i hote hi i tirhchhuah?" a han ti a.

Langley-a chuan, a tirhchhuah chhan a sawi hnuin, " Miss Joan-i chuan sakawr chungchuan a thiam hle a, mahse a sakawr a tlu palh thei thova. Nang, enge i rindan?" a ti a. Sudden-a chuan, "Miss Joan-i chu Hell City-ah a awm ka ring," a ti ta a. Langley-a chuan, "A awm anih chuan a ngaihțhat thlak khawp ang chu. Jeff-a'n a lo hmu ngei anga," a ti a. Sudden-a chuan, "Anih hlawm tak chu," a han ti phawt a, amah vek chuan, "Langley, tlang takin zawhna ka zawt dawn che a, thudik tak min hrilh hram ang che. Keith-a hi engvanga phiarru leh phatsan nge i nih?" a ti a.

Langley-a thinrim chu a sen awp awp mai a, rei fe a ngawih hnuin, "Nanga hriat a ngai lo," a ti a. Sudden-a chuan, "A ngai ang," a ti a. Langley-a mitmeng chu a hmuhin, "Langley, tum duh ting suh, i hman chuang lovang," tiin a vau ta a. Langley-a chu a inngaihtuah vang vang a, a ngaihdan sawi chhuah mai chu țha zawkin a ring ta a, tichuan, "Jeff-a a tihdan ka hmuhin, Keith-a hi ka țan thei tawh lo a ni. Jeff-a pawh 'tlangval țha' a ni chu ka ti chuang lo. Mahse a pa hian chance a pe lo reng reng a ni. Englai pawhin a vau reng a, a ti hel zo vek a ni. Jeff-a leh Miss Keith-i hian, he ranch hi lo enkawl se ka ti a ni, chu chu ka duhdan a ni, tunah chuan i hre ta a nih chu," a ti a.

Sudden-a chuan, "Anih, midangin ranch hi neih tum ta se puih i tum miah lo tihna a ni maw?" a ti leh a. Langley-a chuan, "Keith-a hmingpu si lovin rawn neih tum se chuan a theih anga rangin khawvel lo la awm turah thawn ka tum ang," a ti a. Sudden-a chuan, "A țha anih chu, nang nen hian kan inrem vak lova, a tir te ațang khan kan intawng sual hrim hrim a ni. Mahse tunah hi chuan ka ngaina țan viau tawh che a, inring rawh le.... thil mak tak ka hrilh dawn che. Hell City Lalpa, hmaituama hi Jeff-a a ni lo," a ti ta a.

Langley-a chuan Sudden-a chu makti deuh mai hian a en ta reng mai a. Chutah, ring deuh mai hian a han nui chhuak a, "I thusawi chu awih theiin mi ring amaw? Naupang te, khup chen lek a nih lai ațanga lo enkawl tawh hian Jeff-a chu hai theiin min ring amaw? Ka nuih i tiza hle mai," a han ti a.

Sudden-a chuan, "Chuti a lo ni maw? A nih leh hei pawh hi nuih leh ta che. Keith-a kha mahnia inkap pawh a ni lo, Jeff Keith-a ni ngeia in hriat khan a kap lui ngat a nih kha," a ti ta a. Langley-a chuan, "Mahse, Jansen-a sawi dan kha" a ti hman chauhva, Sudden-a chuan, "Keith-a khan mi hriat a duh loh avangin sawi tura a hrilh angin Jansen-a chuan a sawi chhawng ve mai a ni," a ti ta zel a.

Langley-a chu a inngaihtuah buai hle a, "Chutiang thil chu Jeff-a'n a ti duh tawp lovang," a han ti thlarawk a. Sudden-a chuan, "Keith-a an kah lai khan Jeff-a te chu Dugout khua ațanga mel tam takah a awm daih a ni," a ti a. Langley-a chuan, "Tunah hian Jeff-a chu khawiah nge a awm?" a ti a. "Ka la sawi duh rih lo, Hell City ah chuan a awm lo, a hmai pawh a tuam bawk hek lo. I hriat loh avangin kawng dik lo i zawh niin ka hria a, chuvangin ka rawn pan mai che a ni. Rukru ho tawmkhawmna phindarh turin Double K ranch Cowboy te hi engzat nge tel ve duh ang?" Sudden-a chuan a ti ta a.

Langley-a chuan, "I thu min hrilh hi a dik anih ngai chuan kan vaiin kan tel duh ang. Mahse....," a ti hman chauh a, Sudden-a chuan, "Turvey-a chu a tel ve duh lovang' tih i tum em ni?" a lo ti thuai a. Langley-a chuan nuam ti lo deuh chung hian, "Turvey-a hi chu a danglam deuh hlek a ni. Kan zinga a lo tel vena pawh kum khat a la tling kher lovang," a ti a. Sudden-a chuan, "Setana kawp tura sawmtu che pawh Turvey-a bawk hi a ni lawm ni?" a ti a. Langley-a'n a ni tih a hrilh chuan Sudden-a chuan, "He ta a lo tel hma hian Turvey-a chu Hell City-ah a awm tawh țhin a ni tih pawh ka hria asin," a ti ta zel a.

Langley-a chuan thinrim zet hian, "Naktuk zingah Turvey-a chu a bang nghal ang," a ti ve ta a. Sudden-a chuan, "Ni rih love, i ban tir mai chuan thil tam tak an hriat phah ang. Hell City bei tura kan inpeih fel vek hma chuan kan thiltih tur hi kan zep tlat anga, kan thup tlat tur a ni. Ka thil hrilh che hi Frosty-a lo chu hrilh hauh lovang che, Frosty-a erawh chuan engkim a hre vek a ni," a ti a.

"Mitthi ang maiin engmah ka sawi chhuak lovang. Green, i chungah hian ka lo sual viau țhin a, Wanted lehkha pawh kha i ipte ațangin ka ru chhuak a, bawng ru angin ka hmehbel bawk che a, khatiang thil zawng zawng kha Jeff-a pui anga ka inngaih vanga ti mai ka ni," tiin zak deuh hlek chung hian Langley-a chuan Sudden-a chu a hrilh ta a.

Langley-a vek chuan, "Setana khan Jeff-a tih dan leh țawng dante a zir thiam em em a, Jeff-a chauhvin hre tura ka ngaih, a naupan lai chanchinte kha a hre em em vek mai a, chuvangin min bum chiang em a ni. Eng pawh ni se, tunah hian ngaihdam dil che ka duh a ni. Tin....," a tih lai mek chuan Sudden-a chuan, "Chutiang lam chu sawi tam a ngai lo, kan vaiin Joan-i te nen Setana hian min bum vek a ni. I hote an lo thleng dawn tawh ang, ka kalsan tawh ang che, chibai kan inbuk lai hi min rawn hmuh chuan a fel lo ange," a ti a, pawnah a chhuak a, a sakawr chungah a chuang ta a.

Sudden-a liam hnu pawh chuan Langley-a chuan thil tam tak a la ngaihtuah zel a, Joan-i bo ta pawh hi ama thiamloh ni tel ten a hria a, 'Steve Langley, Joan-i chunga thil țha lo a thlen vaih chuan hal hlum daih tlak i ni ang' tiin amah leh amahte chu a inhau ta hial a.

Khawthim tirh ațang vel chuan Cowboy ho chu an lo thleng țan tawh a, mahse Joan-i chanchin hria tumah an awm lova. Frosty-a chu a lo thleng hnuhnung ber a, Langley-a te awmna bul a lo thlen chuan a sakawr a tiding chawt a, Langley-a lehkha pek pah chuan, "He lehkha hi Coyote Canyon-ah ka chhar a ni a, ka chharna hmuna hnuhma ka hmuh chuan Joan-i chu mi panga velin an hruai niin a lang," a han ti a, Cowboy ho chuan lehkha chu an inpe chhawng zel a.

Turvey-a chuan, "Thil țul lo puiah kan lo intibuai ve mai a nih hi, a bialpain a nghak peih lova, chuvangin a bialpa zui a, putar kalsan chu a thlang zawk a ni ngei ang. Ama thu ngeia zui a nih chu a chiang a ni," a han ti a. Frosty-a chuan, "I daw chiang hle mai, hnuhma ka hmuh ațangin Joan-i chu an hruai lui ngei a ni," a ti leh a. Turvey-a chuan, "Hnuhma i va hmuh chu....," a ti hman chauh a, Langley-a chuan, "Sawi a ngai tawh lo, zanin chuan engmah kan ti thei tawh chuang lo, Chaw ei ula, hma takah mu ang che u, Frosty, biak che ka duh ania," a lo ti thuai a.

Frosty-a te pahnih chu Langley-a pindanah an inzui lut a, Langley-a chuan, "Green-a nen kan inbia a, thu tam tak min hrilh asin, ka mit a lo del rei hle a ni, midangte ang bawkin Setana hi Jeff-a a ni lo tih i lo hre daih tawh a ni maw?" a ti a. Frosty-a chuan, "Jima'n min hrilh duh lawk si lova, kei pawh ka hriatna a la rei hlei nem," a ti a. Langley-a chuan, "Jim-a hian a lo hre reng si a, ka fak takzet a ni. Jim-a awmna i hriat phawt chuan naktuk zingah he lehkha hi i pe dawn nia. Tih theih dang enge ka neih?" a han ti a.

Frosty-a chuan, "Jim-a'n tih tur min hrilh hma loh chuan kan awmdan pangngaiin kan awm rih mai a ni ang chu. Lehkha a hmuh phawt chuan tih tur chu min hrilh mai ang," a ti a. Kal nghal mai a han tum a, mahse Langley-a chuan a kal hma lawkin, "Jim-a nen chuan chibai kan inbuk asin," beisei nei deuh mai hian a han ti a.

Frosty-a chuan Langley-a rilru chu a hrethiam nghal mai a, ngawi rengin a kut a han pe a. Langley-a nen chuan chibai an inbuk ta a. Tichuan, tunhma zawng zawnga an lo in hriatthiam lohna zawng zawng chu an lo theihnghilh ta a, țhianah an lo insiam thar leh ta a. Bang awng ațanga an ti ti lo ngaithla rutu an awm tih erawh chu Langley-a te pahnih chuan an hre miah lova, an hriat lohvin an thusawi lo ngaithla rutu chuan Bunkhouse lam a pan ta thuai a.

Frosty-a chuan varțianah Twin Diamond ranch in chu a va thleng a, Sudden-a, Jeff-a leh Merry-a te mu lai chu a va kai tho a. Pindan chhunga an awmkhawm hnuin, Merry-a chuan, "Engti zia nge ni ta le?" a han ti a. Frosty-a chuan, "Jim, i lo ring dik chiah mai," tih pah chuan a lehkhathawn ken chu a pe ta a. Lehkha chu an pathum chuan an chhiar țheuh a. Jeffa'n a han chhiar ve chu a hmel chu a dur nasa mai a, "Kan misual pa chuan ka kutziak ang te pawh a lo thiam leh zel a nih hi. By Christmas! Amah vanga Joan-i hian, mittui far khat pawh a sen chuan a chak lo viau ang, Jim, engtin nge kan tih ang?" a ti a.

Sudden-a chuan, "Kan la chak tawk lo, kan la che thei rih lovang," a ti a. Jeff-a chuan, "Misual pa kuta Joan-i dah reng mai chu tumah kan kal duh lo a nih pawhin kei.....," a ti hman chauh a, Sudden-a chuan, "Ngawi rih teh, hei hi ka ngaihdan chu a ni. Dugout khuaa Keith-a a kah chhan pawh kha nangmah hi a man theih nan che a ti a niin ka ring. Mahse Keith chhungkaw hming a chhiat ai chuan tiin Keith-a khan a zep ta tlat si a, chuvangin tunah hian a man theih nan che Joan-i hi a la bo leh ta a ni. Nang lah hian va inbarh luh phet i tum si a. Setana chuan amah chu Jeff Keith-a emaw ti a la hai reng turin Joan-i chu a beisei ngeiin ka ring. Mahse Jeff-a a ni lo tih pawh Joan-i chuan a lantir duh bikin ka ring lo a ni," a ti a.

Merry-a chuan, "Chu chu thil awmdan a ni ngei ang, Jeff, nang hi i pawimawh ber tawh a, Setana'n a man leh hlauh che chuan kan chhe vek ang," a lo ti bawk a.

Jeff-a chuan beidawng deuh maiin a kut a han phar a, "Ka dinhmun chu a hrehawm hle mai, mahse in thusawi chu a dik si a, ka chesawn lo tawp ang. Ka thinrim ka phusa leh chiam mai țhin a, min ngaidam ang che, Jim," a ti ve ta a. Sudden-a chuan, "Ka dem lova che, hetia awm chawrh chawrh hi chu i tan a hrehawm tur zia ka hriatthiampui khawp mai che a, mahse a țul miau si a. Merry, duh hun huna koh theih mai turin vawiinah hian i hote i awmtir thei ang em?" a ti a. Merry-a chuan, "Thei tehmeuh mai," a ti a.

Sudden-a chuan, "A țha a nih chu. Kan chet vat vat a țul tawh a ni. Sheriff Dealtry-a be turin ka va kal anga, hawn pahin Dugout ka rawn tlawh nghal ang. Ka va hlawhtlin ve ve chuan Hell City chu kan bei dawn nia," a ti a. Frosty-a chuan, "Jim, enge ti ve tura min duh?" a han ti zauh a. Sudden-a chuan, "I ka kha chip tlat rawh, a vaiin," nui chung hian a han ti a. Frosty-a'n a chhan let hmain Sudden-a chuan a chhuahsan ta daih a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:31 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 20
(Rozami Pachuau)

Red Rock Sheriff office chhunga a luh hnuin Sudden-a chuan, "Sheriff, kan inhmuh hmasak ber țum kha i la hrereng em?" tiin a han zawt a. Sheriff Dealtry-a chuan, "Hre tehreng e, Bank pawisa dollar singli ka humsak ni a nih kha," a ti a. Sudden-a chuan, "Ni e, i humhim sak theihna chhan pawh tawlailir an lambun dawn tih Holda'n a lo hrilhlawk vang che a nih kha. A hriatlawk theih dan Hold-a khan a hrilh che em?" a ti a. Sheriff chuan, "Hrilh nual e, mi pakhat Suddena'n a tir niawm takin Hold-a chuan a sawi a nih kha. Sudden-a chu tunge a nih pawh ka hre miah lo na a, a thusawi chu ka ring ta ngawt mai a ni," a ti a.

Sudden-a chuan, "Tunah chuan Sudden-a chu tunge a nih i hre ta a, i hmaa ding hi ka ni. Tawlailir lo lambuntute zingah khan ka tel ve a, mahse chhan țha tak a awm vangin kan thiltih tum kha kan țhulh thei si lova, a chhan chu nakin lawkah i hre mai ang. Min hmuh ni khan min dap chiah la, ka ipteah Setana badge pawh i hmu ve ngei ang," a ti a. Sheriff chuan, "Lungina khung tur chi nge i nih a, lawmthu hrilh tur chi tih pawh ka hrethiam ta lo che," a ti a.

Sudden-a chuan, "Lawmthu hrilh chu thlang mai la, i him zawk ang. Kan inhmuh ni khan Jeff-a chanchin ka sawite kha i la hrereng phawt ang a. Jeff-a chu rukru rual hotuah a insiam thu leh tawlailir lambuntute pawh ama hote bawk an nih thute pawh i sawi kha. Mahse i hresual a ni, rukru rual hotu pa chu Jeff-a ni lovin, Lafe Lander-a a ni zawk," a han ti a. Sheriff chuan, "Jeff-a țhianpa maw?" a ti a. Sudden-a chuan, "Ni e, mahse țhian tiha sawi chi an ni chiah lo," a ti a.

Jeff-a niawm taka Lafe Lander-a chet thute, Keith-a a kah thute leh Joan-i a rukbo thute pawh a sawi chhuak ta vek a. A thusawi tlangkawm nan, "Lafe Lander-a chu puakruk kap thiam tak a ni a, 38 pahnih a pai reng bawk, chu chuan awmzia a nei em?" a ti a. Sheriff chuan, "Nei teh meuh mai. Ka fapa an kahhlumna a taksa ațanga puakruk mu kan phawrh kha, 38 bawk a ni, Keith-a chu a fihlim ta a nih chu," a ti a. Sudden-a chuan, "Ni chiah e, Lafe Lander-a chuan i fapa a kahhlum thu pawh min hrilh ngei a ni," a ti a.

Sheriff chu a han ding a, "Mister, nangmah hi outlaw sawmli inhlawm khawm pawh ni mah la, pawi ka ti lo. I lei ka ba nasa em em a ni, rulh theih dan che ka nei a nih phawt chuan min hrilh mai rawh. A hmasa berin mi ka va pun anga, Setana chu kan khaihlum phawt tur a ni," a ti ta a. Sudden-a chuan, "Sheriff, la ngawi rih lawk teh, thiltih awlsam tak chu ni se, kei pawh hian Setana chu i kutah hian ka rawn pe mai ang che," a ti a. Hell City beih harsat dan turte, mi sawmli rual velin thih hlau miah lova venhim an tum tur thute a sawi ta vek a. Sheriff chuan, "Kan indo dawn tihna a nih mai chu, a țha e, naktuk zingah Twin Diamond-ah chuan kan lo kal ang... mahse keimah chauh chuan ka lo kal bawk hek lovang," a ti a.

Sudden-a chuan a chhuahsan ta nghal a. Dugout khaw chhunga a lut chu an hmu duh hle mai a. Jansen-a dawrah a lut a, a hmuh veleh thudang sawi miah lovin, "Jansen, dawt sawi ching i ni," a ti nghal chawt mai a. Cowboy-te tan chuan dawt sawia inpuh ringawt pawh hi intihbuaina leh inkahhlumna chhan ber pakhat a tling fova. Puakruk a chuh vaih chuan a thi nghal dawn a ni tih Jansen-a chuan a hrechiang a, a ngawi ta reng a.

Sudden-a bawk chuan, "Miin an kap lai hmu reng chung siin, Keith-a kha mahni inkap angin i sawi tlat a ni. I dawt sawi khan tunah chuan țangkaina a nei tawh lo. Ni a i rin angin Setana hi Jeff-a a ni lo," a ti ta a. Jansen-a chuan ring lo teh mah se, Sudden-a thusawi chu hnial chiah a ruat bawk si lova, "Engtin nge i hriat theih?" a han ti a. Sudden-a chuan, "Hriat tumin Hell City-ah ka va kal a ni. Miss Joan Keith-i chanchin kha i hre tawh em?" a ti a. Jansen-a chuan, "Engmah ka hre hlei nem, a chungah thil țha lo a thleng em ni?" a ti a.

Sudden-a chuan, "Nizan khan Setana Imp hovin an la bo daih a ni," a ti ta a. Jansen-a thinrim lutuk chuan a kut a humruh a, "Hmanah khan Setana hote chu vawikhat i sawisa tawh a, sawisak leh an ngaiin i hre ve lo maw?" a ti a. Sudden-a chuan, "Naktuk zingah, Hell City chu va beih kan tum a, Dugout khua hian min pui ve thei ang em?" a ti a. Jansen-a chuan, "Puih theih che u chu kan duh țheuh ang. Engti turin nge min duh?" a ti a. Sudden-a chuan, "I hote nen, naktuk zingah Steve Langley-a hnenah lo kal ula, mahse kan thiltih tum hi zep tlat ang che u. An inring lo lai va beih thut kan tum a ni," a ti a.

Chutih lai chuan dawr hnunglam ațangin tleirawl pakhat hi a lo lut a, "Kei pawh ka kal ve ang. Hei, ka pa rifle pawh ka nei a, ka hmang ve thiam tho," a ti a. Jansen-a chuan, "Bud, nakinah kan la sawidun dawn nia," a lo ti thuai a. Sudden-a hnenah chuan, zawite hian, "Bud-a pa hi Setana'n a khaihlum a ni. He thilah hian merry-a a tel ve dawn em?" a ti a. Sudden-a chuan, "Tel ve dawn e, Red Rock khaw Sheriff pawhin a hote a rawn hruai dawn bawk. Dan ang takin engkim kan ti dawn a ni. Dam takin le," a ti a, a chhuak ta a.

Red Rock Khaw pana Sudden-a a kal lai vel bawr khan Hell City khawchhunga Setana pindanah Turvey-a a lut ve mek a. Turvey-a chuan, "Keith-a chu a damchhuak leh dawn a ang viau mai. Mahni pa meuh han kah chu i kut a khur ve a ni ngei ang. Tin, Joan-i i ru bo hi i tisual viau a ni," a ti a. Twin Diamond leh Double K hovin rawn beih che an tum a ni," a ti a. Setana chuan, "Double K i sawi tel ve elo? Langley-a chu a â ta em ni?" a ti a. Turvey-a chuan, "Langley-a chuan a rilru a thlak ta thut a ni. Double K ram saw Keith chhungkaw ta ni ngei turin a duh a ni," a ti ta a.

Turvey-a hian a thuruk a hre ve a ni ang tih Setana chuan a hmutlang nghal vek mai a, amah hi chhawrna nei tawh lovin inhre phei se chuan thah nghal mai pawh Setana chuan a duh hial a, mahse la țangkai dawnin a hre tlat si a. Tichuan insum hram hram chungin, "He thu hi engtin nge i hriat theih?" tiin Turvey-a chu a zawt ta zawk a. Turvey-a chuan, "Nizanah Langley-a leh Frosty-a inbe lai a rukin ka ngaithla a, thil engkim ruahmantu chu Sudden-a hi ni ngeiin a lang," a ti ta a.

Setana chuan Sudden-a chu hlauhna tak a nei țan ta a. A thiltih apiang Sudden-a vang hian a hlawhchham zel niin a hre bawk a. Mahse phuba lak duhna hlira a khah avangin thildang pawh a ngaihtuah hman meuh tawh lova, "Chu, Cowboy 12 rual lekin Hell City hi lak theih an inring a maw?" a han ti a. Turvey-a chuan, "Dugout khua sawn an pui duh maithei a ni. Dugout khuaah sawn kan lar tehchiam lo," a ti a. Setana chuan, "Sumdawng ho sawn maw min bei ve ngam ang?" hmusit fe hian a han ti leh hram a. Turvey-a chuan, "Sumdawng ho pawhin silai an nei ve thova, an silai pawhin mu a nei ve tho a ni," a ti a.

Setana chuan, "Ni e, mahse an tum an fuh kherin ka ring lo," a la ti fova. Amah vek chuan, "Eng hunah nge min beih an tum?" a han ti leh a. Turvey-a chuan, "Ka hre thei chiah lo. A rei tawh lovang. Joan-i hi lak let leh vat an tum tih chauh ka hria," a ti a. Setana chuan, "An la kir dawn lo. Turvey, i thu min hrilh hi a țangkai hle mai. Engmah sawi chhuak lo turin fimkhur hle ang che. Double K-ah chuan va kir leh la, chinchang hriat zui tum hram ang che. Hei," a ti a, pawisa ip a pe a. Turvey-a chuan, "Ka bang tawh, tukin zingah Langley-a min melh dan kha a hrisel lo em a, kir lehna chi niin ka hre tawh lo," a ti a. Setana chuan, "A pawi hle mai, mahse hetah pakhatin kan pung dawn a ni mai alawm, min kalsan rih rawh. Tihtur ka ngah em a ni," a ti a, Turvey-a chu a chhuak ta nghal a.

Setana chu a inngaihtuah nasa mai a, "Jeff-a khan, thil awmdan a sawi chhuak anih loh vek pawhin, Sudden-a khan a ring dik a ni phawt mai. Kan zingah chuan Turvey-a chiah kha thil awmdan hrechiangtu a ni a, Rangkachakin ka tlawn lungawi phawt anga, nakin deuhah silaimu ka la pe ang. Tunah rih chuan hmanraw țha tak Joan-i ka la kawl a, mahse min rawn hneh palh tak hlauhvin Joan-i pawh, heta awm reng chu a fel lo ang," a ti a, tichuan Belle ko turin Silver-a a tir ta a.

Belle a lo luh veleh Setana chuan țhutna a lo kawhhmuh vat a, "Tam tawk takin Hell City hi an rawn run dawn a, min hneh ta se, i chungah eng thil nge lo thlenga i rin?" a han ti a. Amah tihțhaih a tum ni berin a hria a. Belle chuan, "A hnehtute zinga tu berin emaw, nupuiah min nei mai ang chu," a ti a. Setana chuan, "Sheriff kutah an pe ang che anga, i chung thu a tharin an ngaihtuah mai dawn tihna a ni," a ti ta a. Belle chu a inngaihtuah fim thuai a, "Enge i duh?" a ti ta a.

Setana chuan, "Joan-i nen thawn bo che u ka tum a ni. Vawiin chawhnuah in chhuak ang, Silver-a'n a hruai ang che u," a ti a. Belle chuan, "Hmeichhe pahnih... Silvera'n maw min hruai ang?" a han ti a. Setana chuan, "Ani lo hi chu tumah dang rin ka nei lo, in him em em ang," a ti a. Belle chuan, "Engati nge i lo kal ve theih loh?" a ti leh a. Setana chuan, "Hetah hian ka awm a țul a ni, nakinah ka la rawn zawm ve ang che u," a ti a. Belle chuan, "Ka kal lo tawp ang," a ti ta a.

Setana chuan, "Inpeih vat rawh, kal chhuah a ngaihna chhan hi Joan-i kha chu hrilh ve kher a ngai lovang. Nangma tana țha tur anih loh chuan ka tirbo duh lovang che tih hi ring mai rawh," a ti a. Belle rilru chu a nem leh thuai a. "Jeff, ka âtchilh che a ni ringawt tawh mai. A chang hi chuan that thei hial țhin che in ka inring a, a chang erawh thung hi chuan....," a tihlai mekin Setana chuan, "Ka tan thih pawh i huam leh thung si țhin a ni maw? Tunah hi chuan ka tana nung turin ka ngen zawk che a ni," a ti ta a.

Belle chhuah hnuin Setana chuan, "Silver-a a ko lut a, tihtur engkim chiang takin a hrilh vek bawk a. A thupek ang taka engkim a tih phawt chuan lawmman pek a tiam nghal bawk a. A lawmman hmuh tur chu enge a nih a hriat veleh Silvera'n, "Ka pu, i thu ang chiahin engkim ka ti vek ang," a ti a. Setana chuan, "I hlawhchham vaih chuan ka that ang che.... muangchangin. Ka lak ațang hian i biru thei lovang, ka thluak hian a hmu tlang thei a ni," a ti a, a vau zui leh hram a. Silver-a chu a chhuak ta a.

Hell City an rawn beih huna lo inven dan tur kawng Setana chuan a ngaihtuah ta nghal a. Dar a vuak tir a, gate vengtu pahnihte chauh lo chu, kawtlaiah an lo chhuak vek a, a laiah Setana chu a va ding a, puithu fe hian ban a han phar a, "Țhiante u, Twin Diamond ho leh Double K hovin Hell City hi an rawn bei dawn a ni tih hriattirin ka awm a, engtin nge kan tih ang?" a han ti a. Outlaw ho chuan, "Kan do let ang," tiin an au a. Setana chuan, "Ka ngaihdan min pawmpui avangin ka lawm e. Bawngvulhtute hian henglai ram zawng zawng hi an ta bik tura siam emaw an ti a. A ni lo tih hi hriattir an ngai a ni. Gate pahnih ațang chauh lo chuan Hell City-ah hian an lut thei lova," tih pahin chunglam a han hawi chhova, "Van ațangin an lo tla thla dawn te a nih ngawt si loh chuan," a han ti leh a.

Outlaw ho chu an phur țan tawh hle a, an khua chu hum thei ngei dawnin an inngai a ni. Setana bawk chuan, "Chuvangin gate pahnih hi ngun takin kan veng tur a ni. Rifle hmang thei țhiauvin in veng anga, vanduai an awm palh pawha an hmun luah nghal vat thei turin in inring reng tur a ni ang. Silai leh a mu tam tawk kan nei a, khawthlang lam gate-ah Scar-a'n a ho anga, khawchhak lam gate-ah Turvey-a'n. Kan hneh vaih chuan mitin hnenah rangkachak tlang 20 zel ka pe ang. Tin, nangmahni tan in sahimna tura bei in ni dawn tih hi hrereng ang che u, chuvangin, lainatna in lantir a ngai lovang," a ti a.

Outlaw ho chu an phur nasa mai a, an ri chul a, chung ho chu Setana chuan a hmusitin a nuihzat em em a ni. Mifingin an duhdan anga awm tura mimawl zawk an thunun theih dan hi a mak a ni. Pawisa tlem leh țawngkam thiamna tlem hmangin mimawl zawkte chu hmanraw țha takah an chher thei vek a, an nunna hial pawh chan an lo huam thei zel mai a ni tihte Setana chuan a ngaihtuah a. 'In va mawl hlawm tak em' ti rilru reng chungin a kal kiansan ta a.

Outlaw ho ve thung chu mi pawhraw leh misual tak tak hlir awmkhawm an ni bawk a, indo te chu an hlau lo reng reng a, an châk zawk em em a ni. Rifle leh a mu pawh chu an va la zel a, outlaw pakhat erawh chuan a la ve duh lova, "I hman thiam sa i silai chu nupui ang deuh a ni... a hlui deuh in a nalh tehchiamlo pawh a ni maithei, mahse i ring ngam tlat," a ti a. A țhen chuan, "Silai aiin chemte ka thlang zawk, luvun hih nan pawh a țha a ni," an ti bawk a, an phur tlang hle a ni.

An kalnaah chuan Setana a tel ve dawn lo a ni tih a hriat chuan Joan-i chu a lawm hle a, Silver-a chu piangsual, hmelchhe em em ni mah se, Setana bula kal ai chuan Silver-a bula kal chu Joan-i chuan a thlang zawk daih a ni. Belle pawh chu puanzar phenah a insiam mawlh mawlh a, a inpeih veleh a rawn chhuak nghal a. Mipa ang chiahin a inchei a, kekawr leh pheikhawk ke artui sang chi te, nghawnga awrh chi rawmawl pawh a inbel kim biai a. Nui chungin, "Enge ka an?" a han ti a.

Joan-i'n a chhan hma chuan, "I nalh ngawt mai, Belle, i hmai chu tuam ve la, keimah ang i ni mai," hnunglam ațangin Setana chuan a lo ti thuai a. Belle chuan, "I hmai tuamna kha ka lo hawh ang chu," a ti a. Setana chuan, "Infiamna hun kan nei tawh lo, in chuanna tur sakawr pawhin a nghak reng tawh che u," a han ti a. Setana pindanah an lut phei ta a.

Pawnah chuan outlaw ho chu an vir buai nasa mai a. Rifle kengin ram tinah an tlan kual vel ruai hlawm a, amah chhan turin an lo thawk dawn a ni ang tih Joan-i chuan a ring tlat a ni. Setana pindan chhunga an luh hnu chuan Setana chuan chhuatlaia kawngkhar invuah chu a pawt hawng ta a. Belle chuan, "A ruka chhuahnate i lo nei a ni maw,Jeff? Joan, a thuruk tam tak pawh kan la hriatbelh zel maithei asin," a ti a, kailawnah chuan an chhuk a. Jeff Keith-a tanna puk kha an zuk thleng a, pindan anga puk sir kaw zawn chu Setana chuan a pan phei ta a.

Dawhkana lehkhabu lo awm chu Joan-i chuan a han chhiar chhin a, a kawmah chuan Jefferson Keith tih hi a lo inziak a, Setana'n a koh avangin tukverh bulah chuan Belle nen chuan an phei dun ta a. Tukverh ațang chuan hruizena siam leihlawn hi an thlang lungbangah chuan a uaithla a. Belle chuan, "Jeff, khuta chhuk tur khuan min ti em lovang chu maw?" a han ti a. Setana chuan, "Chhuk turin thu ka pe che u a ni," a han ti a. "A chat lovang, a dawl ang che u," a ti zui nghal zat a. Ranch-a chetla țhang a ni bawk a, Joan-i chuan kham sang tih velte chu hlauhna a nei lova. "Kei ka chhuk thla hmasa ang," a lo ti thuai a.

"Ni love, hmelțha aiin upa a hmasa zawk tur a ni ang, Belle, nang hmasa rawh," awmze nei fe hian Setana chuan a lo ti a, Belle ngei tawk a tling kher mai. A thinrim vang ngawt pawh chuan a hlauhna pawh chu a ziaawm sawt a, tukverhah chuan a lawn a, leihlawn chu a zawh chhuk ta a. Kham chanve vel a thleng thla tawh ang tih ah chuan hruizen chu a then nasat em avangin Belle chu chhuk ngam tawh lovin a awmna ngaiah chuan a awm ta reng a. "Ding suh, thih i duh loh chuan chhuk zel rawh," chunglam ațang chuan Setana chuan a lo ti lung lung a. Belle chu zawi zawiin hruizen leihlawnah chuan a chhuk a, lei a thleng ve ta mai a.

Setana chuan, "Khai le, Joan, i chhuk ve ni, kaltir che chu ka hreh hle a, mahse ni hnih khat chauh a ni ang," a han ti a. Joan-i chuan Setana chu a la haider tlat a, "Jeff, thil awmdan hi ka hrethiam lo tlat mai, min tihnat chu i duhin ka hre si lova," a han ti a. Setana chuan, "Engkim ka la hrilhfiah vek ang che," tih pah chuan Joan-i chu ngun deuh mai hian a en a, "Joan, ka fawp chak hle mai che," a han ti a. Thil awmdan Joan-i chuan a hrechiang hle a, hrilh nawn ngai lovin hruizen leihlawnah chuan a chhuk ve thuai a.

Chunglam leh hnuailam chu en duh lovin a hma zawn lungbang chu a en lui tlat a. Lei a thlen dawn țep chuan mi pakhat chuan zo em em hian a lo pawm ta nawlh mai a. A hlangthlatu chu Joan-i chuan a han en a, Silver-a a ni tih a hre mai a. Silver-a chuan, "Sawta saw sakawr chu, i kal nghal ang u," a ti a. An piah lawkah chuan sakawr pali dang a ding a, pakhat chu thuam phurtu a ni a, sakawra an chuan kim hnu chuan Silver-a ho chuan an kal ta thuai a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:31 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 21
(Rozami Pachuau)

A tuk zingah chuan Twin Diamond ranch ina lo thleng hmasa ber te chu Langley-a te, Frosty-a leh Lazy-a te an ni a, Sudden-a an hmuh veleh Langley-a chuan, "Dugout ațang chuan mi 10 an lo kal a, mahse thil pakhat kan lo ngaihtuah tel loh chu, Turvey-a a bo daih mai a, a kalna tur chin pawh hriat harsa vakin a lang lo," a han ti a. Sudden-a chuan, "Turvey-a'n engmah a hre ve chuang hlei nem," a ti a. Langley-a chuan, "Nizan Frosty-a nen kan inbiak lai khan a lo ngaithla ru maithei a ni. Lazy-a sawi hmangin Turvey-a chuan zanriah chaw pawh a ei tlai viau a ni awm e," a ti ta zel a.

Thudang an sawi leh hmain pindan chhungah Jeff-a a lo lut a, "By Christmas, Steve Langley a ni reng mai. I dam em, Tar phunchiar?" hlim hmel deuh mai hian a rawn ti a. Langley-a chu a inher thuai a, chibai buk turin Jeff-a kut chu a lo vuan a, "Pu Jeff, ka hmu leh che chu ka lawm takzet a ni," a ti a. Jeff-a chuan, "Min va en ngun ve, ka hmai tuamna puan i zawng rilru deuh em ni?" a ti a. Langley-a chuan, "Puakruka kah atan chauh lo chuan ani hmel kha chu ka hmu duh tawh lo," a ti ta a. Sudden-a chuan, "Chu zawng tum duh lo mai rawh, keima pual a ni," a lo ti a. "Sheriff Dealtry-a pawh a lo thleng ve ta," a tih chhunzawm a. "Jeff, nang va be teh," a ti nghal a.

Jeff-a chuan a dar a chhin ak a, Sheriff chu a va pan hnai ta a, "I dam em, Sheriff?" a va ti a. Sheriff chu sakawr ațanga chhuk hlim hlawl a ni a. Jeff-a chu ngun deuh mai hian a han en a, "E khai, Jeff, i lakah hian ka thin a lo rim viau țhin a, mahse thil ka hriatsual vang a lo ni," a ti a. Thudang pawh sawi chuang lovin Jeff-a chuan, "Dan-a kâptu kha ka ni lo, inkawmngeih tak kan ni a, khami zan pawh khan inhnial chu kan inhnial a, mahse ka tlanchhiat tak avang khan engkim a buai ta vek a ni," a han ti a.

Sheriff chuan, "Ni e, a landan kha a chhe viau a ni," a han ti a. "Tlanbo ta lo ni la chuan.... 'chuan' tih hi khawvela thumal ngaihnawm ber pawl a niin ka hria. Nimina Green-a thu min hrilh khan engkim a ti chiang ta vek a ni. Tunah hi chuan ka silaia a hmai....," a ti leh hman chauhva, Sudden-a chuan, "Palina i ni, Chance i nei tawh lo," a lo ti thuai a. Amah vek chuan, "Ho engzat nge i rawn hruai theih?" a ti leh ta thuai a. Sheriff chuan, "Sawm leh pahnih an ni a, mahse rintlak tak tak hlir an ni. Tihdan tur ruahman i nei tawh em?" a ti a.

Chutih lai chuan Langley-a leh Merry-a te pawh an bulah chuan an lo ding ve leh tawh a. Merry-a chuan, "Hell City hi hmun hnihah chauh luh theihna a awm a, chuvangin hmun hnihah ințhen ila a țha ang. A ruala kan beih theihna tur pawh a ni ang a, Jim, enge i ngaih ve dan?" a lo ti a. Sudden-a chuan, "Tihdan dang a awm lovang, Merry, Dealtry-a te nen helam sir ațang hian bei ula, Dugout leh Double K hovin lehlam sir ațangin rawn bei se a țha ang," a ti a. Merry-a chuan, "Nangin enge tih i tum, Jim?" a ti ta a.

Sudden-a chuan, "Mi tlem te, silai rang taka kap thei tur ka mamawh dawn a, tihpalh thil thuin, Hell City-a luh theihna tur kawng ka hmuchhuak palh a, hmun hnih ațanga nangni hovin in beih bawk si chuan chulai hmun chu an veng ngun vak lo maithei a ni. An hriat lohva Hell City kan luh theih hlauh chuan an hotupa pawh kan man thei hlauh maithei a. Eng pawh ni se, Gate chhung chu hnunglam leh hmalam ațangin kan kap thei dawn tihna a ni ang. Langley, enge nang i ngaih ve dan?" a ti ta a.

Langley-a chuan, "I ngaihdan chu țha hlein ka hria. Double K hna chanpual niin ka ngai a, chuvangin nangmah zui tur chuan mi pathum kan awm phawt....," a tih lai mek chuan, "Midang pawh ka ko khawm thuai thei ang, an vaiin zui che an duh ngei ang," a han ti leh a. Mahse Sudden-a chuan, "Gate-ah bei sela a țha ang, va ko nghal rawh," a ti ta a. Langley-a chu a chhuak thuai a, sakawra a chuan hnuin Sudden-a chuan, "Kan innghah khawmna tur hmun kha i hria maw?" a han ti a. Langley-a chuan, "Hria e, mahse Jim, khalai hmun kha engtia hre ve nge i nih?" a han ti a. Sudden-a chuan, "Nangman min kawhhmuh alawm," nui chung hian a han ti a. Langley-a chuan, "Anih nek tak chu," a ti a, a sakawr a tlantir ta nghal a.

Rei vak lo hnuah Gate beitu turte chu an ințhen darh a, Hell City panin an chhuak ta a. Darkar khat vel zet sakawra an chuan hnuin Merry-a leh Sheriff hote chuan gate chu an va thleng dawn ta a. An kalna kawng chu lungbang sang deuh deuh mai inkarah a lut tlang a, a zim lai takah gate lian deuh thinga siam chu a awm bawk a, gate sir tuaka lungbang chu lawn chi rual a ni lova, Dealtry-a chuan a sakawr a tiding a, "Merry, beih an va harsa dawn ve le. A bul hnaiah pawh sawn engtin nge kan kal theih ang?" a han ti a. Merry-a chuan, "Kawng kawi laiah hian kan sakawr kan hnutchhiah ang a, zawi zawiin kan hnaih phei aniang chu," a ti a.

Sheriff Dealtry-a chuan, "Chance kan pe phawt ang e," a ti a. Merry-a'n a hnial hma hmain a sakawr a kaltir ta mai a. Inbiak a duh a ni tih entir nan Red Indian ho tih dan angin a kut dinglam chu kutphah hmalam hawiin a phar chhuak a, gate lam chu a pan phei ta zel a. Thui pawh a la thleng hman lo tihin gate chhunglam ațangin Scar-a a rawn dak chhuak a, "I lo thleng thui tawk tawh. Tunge i nih a, enge i duh?" a lo ti a. Dealtry-a chuan, "Red Rock khaw Sheriff ka ni a, Lander-a ka zawng a ni," a ti a. Scar-a chuan, "Lander-a chu tunge ni a? A hming pawh ka la hre ngai tawp love," a ti a.

Dealtry-a chuan, "Puansenin a hmai a tuam a ni, amah chu rawn chhuah ula, nangni pawh inpe vek ula, danin a phal chin, a dam thei ang berin in chungthu pawh ngaihtuah a ni ang, chubak ka tiam thei lo a che u," a ti a. Scar-a chuan, "Keiin ka tiam theih che chu hei hi a ni," tih pahin a puakruk a phawi a, "Thih i duh loh chuan rang takin bo nghal rawh," a ti a. Dealtry-a sakawr chuanna dul hnuai tak chu a kâp a, "Kha bak a thlawnin silai mu ka seng dawn tawh lo," tiin a vau zui leh nghal a. Dealtry-a chu a țhiante zingah a kir leh nghal a, sakawr ațangin a chhuk ta a. Phen tur remchang apiang an phen zel a, gate chu an kap țan ta a, gate-a mite pawh chuan an rawn kap let ve a, rei lo teah gate lehlam zawka silai ri te pawh chu an hre thei ta a.

Dugout khua leh Double K cowboy ho beih tur gate pawh chu thil huphurhawm tak a ni ve tho mai a. Gate sir lehlam chu lungbang sang tak hi a ni a. Lehlam thung chu kham awih deuh mai hi a ni a. An hotu atan Lanky-a ruat a ni a. Lanky-a chuan a hmalam gate chu a han en a, "Engdang a ni love, thlawh theihna turin thla kan mamawh a ni. Thla kan neih theih tur awm chhun lah chu van phaiphuleng nen a inkawp tlat awm si a. Hei, Jansen-a khan eng silai nge i ken?" a ti a.

Jansen-a chuan, "Sharp Rifle a nih hi, a mi nghawng a na viau na a, a mu a lian a, kah chu na tak a ni," a ti a. Lankey-a chuan, "I hmang thiam em?" a ti a. Jansen-a chuan, "Kei aia hmang thiam zawk an awm ngei ang," a ti a. Lankey-a chuan, "Ka rifle hi hmang la, kha kha ka lo hmang chhin ang e," a ti a, silai chu an inthleng ta a. Lankey-a chu khuar rem laiah a va bawk a, Sharp silai chuan ngun deuh maiin a han tin a, a hmet puak ta dur mai a.

A tirah chuan an hre nghal mai lova, mahse a hnua an hriat leh danin, silaimu chuan gate a deng tlang a, gate hnunga outlaw pakhat a kâp tlang a, a hnunga outlaw pakhat ding pawh engmah ti thei lovin a va siam bawk a ni. Lankey-a chuan, "Silai chapo tak a nih reuh hi mawle, hetiang ang paruk hi chu nei ila, gate saw kan kâp darh vek thei ang," tih pahin a mu ruak chu a paih chhuak a, a mu dang a thun leh ta thuai a.

Sudden-a leh a hote chu khuarkhurum an lut thla tawh a, mahse Langley-a leh Sudden-a chuan vengtu an awm ang tih hlauvin hma an hruai zel a. Midang an awm lo tih an hriat hnu chuan an vaiin puk pathumna thleng an chhuk ta a. Chuta an awmlai chuan an hnuaia țawng ri, "A ninawm ber kan chang a nih hi, Flicksy, enge chanchin?" tih ri chu Sudden-a te chuan an hre ta a. Flicksy chuan, "A fel lo khawp mai, Sharp rifle an nei a, gate pawh an kap chhe nasa tawh mai. Turvey-a leh midang pahnih pawh an thi tawh, hliam pawh an tam tawh mai," a ti a. A țhianpa chuan, "Anni lam enge an an ve thung?" a han ti a.

Flicksy-a chuan, "Ka hre lo, ka dak chhuak ngam bawk si lova, pakhat chu ka kâp hlum chiang khawp mai," a ti a. An thusawite chu Sudden-a te chuan an hre thei vek a. Thawm dim takin an hnuai puk panna kailawnah chuan an chhuk ta a. Vengtu pahnih chu puk kotlangah chuan pawn lam hawiin an țhu a, Sudden-a chuan harsa lo takin chu mite pahnih chu a va bawhthlu a, a va phuar bet ta thuai a. Sudden-a chuan, "Jeff leh Frosty-a'n min zui sela, Miss Joan-i leh Setana kan zawng anga, midang hi chuan Dugout khuaa mite lo luh theihna turin gate saw in va bei dawn nia," a ti a. A țhiante pahnih nen Setana chenna puk an pan ta nghal a.

Sudden-a chuan puk kawngka chu a va chhir hawng țhuai a, chutih lai tak chuan trap door inkhar ri an hre nghal a. Sudden-a chuan, "Min lo hmu reng a nih dawn hi," a ti a. Trap door chu a va hawng a, a hnuai ah chuan a lut thla leh a, tukverhah a dak chhuak thuai a, an hnuailam hla takah Setana chu sakawr chunga a chuang chu a zu hmu hman chauh a, Setana chu a bo ta thuai a, tukverh ațang chuan hruizen leihlawn pawh lungbangah chuan a la uaithla a.

Jeff-a chuan, "Ka zui ve thei ang em?" a han ti a. Sudden-a chuan, "Thei ang; sakawr kan neih hunah. Chak lo zawk a nih pawha a tlanchhiat theihna turin engkim a lo ruahman lawk vek a nih hi. Amah mai a ni si a, hun kan khawhral mai mai a ni," a ti a, chunglamah an lawn chho ta thung a. Pawn an han chhuah chuan khawchhak lam gate chu a lo chhe vek tawh a, Double K cowboy ho chuan outlaw ho chu an um let zel bawk a.

Silai ri te, mihring na tuar ri te leh thinrim ang thawmte chu hmuntinah a hriat theih a, Sudden-a chuan, "Rei lo te hnuah khua hi kan la thei tawh ang. Amaherawhchu, Joan-i awmna min hrilh theitu tur kan zawng phawt tur a ni," a han ti a. Chutih lai chuan puk pakhat ațangin Lazy-a chuan hmeichhe pakhat a rawn nawr chhuak a, chu hmeichhia chu Anita a lo ni hlauh a, Lazy-a chuan, "Hei, Frosty, ka thil chhar hi han en ve teh," phur zet hian a han ti a.

Sudden-a chuan, a va pan hnai thuai a, "Lazy, kan țhian țha tak i va chhar hlauh a nih hi. Him taka i lo ven avangin lawmthu ka hrilh a che," a han ti a. Lazy-a chuan, Anita ban a chelh lai chu sa ta thut ang mai hian a thlah ta vat a. Sudden-a chuan, "Tunah chuan a tlan chhuak rih a, mahse Miss Keith-i kan zawng a nih hi," a ti a. Anita chuan, "Niminah khan Setana'n hmeichhe dang pakhat nen khan Silver-a hovin a thawn bo a nih kha, khawthlang lam panin an kal lai ka zuk hmu a ni," a ti ta a.

Chutih lai tak chuan khawthlang lam gate pawh Twin Diamond ho pawhin an rawn bawh tlang ve ta a. Outlaw ho pawh chu puk hrang hrangah an tlan lut hlawm a. Hell City chu an la ta a ni. Sheriff leh Merry-a te pawh Sudden-ate bulah an lo tlan thuai a, thil awmdan an hriat meuh chuan an lunghnur hle zel a. Sudden-a chuan, "Frosty-a leh Jeff-a nen sakawr kan neih veleh kan umzui nghal ang," a han ti a.

Dealtry-a chuan, "Kei pawh ka lo tel ve ang. Merry, helai hi lo chinfel pui la, kan lo kir leh lawk loh chuan i lo kal ve dawn nia," a ti a. Sudden-a pawh chuan, "Merry, Miss Anita hi țha takin lo enkawl ang che. A lakah hian kan ba nasa em em a ni, ka chhaw mange, Merry, in sakawr khawiah nge in hnutchhiah? Gate piah lawkah maw? A țha e, kan hmang nghal dawn nia," a ti zung zung a, rei vak lo hnuah sakawra chuangin khawthlang lam an pan ta a

Thui fe an tlan hnuin kawng peng pahnih an va thleng a, zawh zawk tur an hre nghal mai lova. Sudden-a chuan hnuhma a han en vel a, kawng pakhat zawkah chuan puanthem a chhar ta hlauh mai a. Rawmawl tlâng hi a lo ni a, a tlângah chuan J tih hi a lo ințhui a, Sudden-a chuan, "Zawngtu an awm hunah an kalna chin an hriat theih nan Joan-i'n a rawmawl tlâng a pawtthler a, a lo thlauh a nih ngei hi," a ti a. Rawmawl chu Jeff-a a pe a, kawng peng pakhat zawk chu an zawh ta a. Frosty-a chuan, "Helai hmun hi Bosville Bank pawisa dollar singli ka rawkna hmun a nih hi," tih pahin nui deuh sangin Sheriff Dealtry chu a han melh a.

Sudden-a chuan, "Frosty, hrilh chiang law law rawh, chuti lo zawng Sheriff hian lunginah a khung mai tur che asin," a lo ti a. Sakawr tlantir reng chungin Frosty-a chuan Bank rawktu Setana hote an lo lambun thu chu kimchang takin a sawi ta vek a. Sheriff Dealtry-a chuan Sudden-a chu mak ti deuh mai hian a han melh a, "Jim, mi mak tak i lo nih hi, sual lam kawng i zawh palh hlauh a nih chuan helam kawng hi chu rawn zawh lo hram la ka ti ngawt mai, ngaihdan kan siam ang a, kan siam sual ziah awm si a," a ti a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:32 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 22 (Last chapter)
(Rozami Pachuau)

Devil's Bowl ațanga mel riat velah chuan ruam deuh zawk pakhat hi a awm ve a. Ruam sir lehlam chu ram chhengchhe deuh mai hi a ni a, lehlam chu ruam rem deuh a ni a. Lehlam kil tawpah chuan thing hmun a awm a, chu chu, 'Painted Valley' an ti a, chumi pukah chuan Joan-i leh Belle chu zankhat an riak tawh a, thing hlim hnuaiah an țhu dun a, an piah lawk lung chungah chuan Silver-a chu a țhu a, a hawi vel ruai a. Tin, an sakawrte pawh chu a zin phah sa vekin thing bulah a thlung a.

Joan-i chuan, "A rukin sakawr thlunna hmun saw va thleng ila kan tlan chhuak thei ang em?" a han ti a. Belle chuan, "Thei mah ila tlan chhuah chu ka duh hlei nem! Ei tur pawh kan nei lova, henglai ram palailenga vah vel hi ka thil duh loh ber pawl a ni. Chu lo rengah Silver-a sawn silai a kawl bawk a," a ti a. Chutiang lam chu an sawi zawm ta reng reng lo a.

Chhun lai velah Silver-a chu an awmna lam panin a lo tlan chhuak a, "A lo kal ta, a hmanhmawh awm hle mai," a han ti a. A lo thlen laia lo awm ve ngawt pawh a duh loh avangin Joan-i chu puk chhungah a lut ta thuai a. Silver-a chuan, "Hmuak turin a lo in pen parh a ni maw? A hmel chu a chhe lo viau, mahse a aia chhe lo ka hre tlat," a han ti a. Amah a ti a ni tih hre reng chungin Belle chuan, "I lei kha veng țha rawh, chuti lo chu i pu in a hleh sak daih mai tur che a nia," a ti a. Ni dang ang chu ni se, Silver-a chu a zam hle tur hi a ni a, mahse he mi țum hi chuan engmah hlau lo tawp ang maiin a nui ve vur vur mai a.

Belle-te awmna bul a lo thlenin Setana chuan a sakawr chu a dintir chawt a, a chhuk ta nghal a. A sakawr leh amah chu chau ve ve hle hian an lang a. Belle pawh chuan, "Engti zia nge ni ta?" a han ti a. Setana chuan, "Hell City an la ta. Ka tlan chhuak hman hlauh a, mahse pathumin min rawn umzui a, an zingah chuan Red Rock Sheriff pawh a tel ve," a ti a. Belle chuan, "Engvanga tel ve nge a nih?" a ti leh a. Setana chuan, "A fapa ka kâh hlum sak a ni. Thin a rim mang e, an lo hnai hle tawh ang, Mel hnih pawh a tling tawh lovang. Helaiah lah hian bihrukna tur pawh a awm bawk si lova," a ti a.

Belle chuan, "Tunah hian tlan chhuak nghal vat ula...," a ti chauh a, Setana chuan, "Min umphak thovang, kan hnu kan thup thei awm bawk si lo," a ti ta zel a. Belle chuan, "Jeff, tihder dan ka hria, man an tum ber hi nang hi i ni si a, kan bum thei ang," a han ti a, a ngaihdan chu a sawi ta thuai a. Setana chuan, "A țha, i lo fing kher mai. Chutiang chuan min tihsak duh ang maw?" a han ti a. Belle chuan, "Chu aia tam zawk leh nasa zawk pawh ka tihsak duh ang che chu..... i la hre mai ang. Silver-a hi lang lo turin tir bo la, i hmai tuamna kha min pe bawk rawh. I sakawr, pluto hi puk kotlangah i dintir anga, i faifuk veleh ka tih tur chu ka ti nghal ang," a ti a.

Setana chuan, "Belle, thluak i lo nei țha kher mai, California rama Willow Ben ka pan dawn a, chutah chuan min rawn zawng la, khawvel hi kan la hneh dawn nia," a ti a, a hmai tuamna leh kawrchung chu Belle a pe a, lehlam a hawisan nghal thuai a, sakawr dum chu puk piah zawk kovah chuan a va dah a, a zin erawh chu a thlak nghal a. Chutih lai chuan ruam tawn tirha sakawr chungchuang pathum lo lang chu a va hmu a, rang takin a biru a, a faifuk ta a.

Puk ațang chuan mipa anga inchei, Setana kawrchung ha a, puan sena hmai tuam a lo tlan chhuak a, sakawr dum chungah a lawn kai a, chak deuh maiin a tlantir ta nghal a. Mi pathumte pawh chuan sakawr chungchuang chu an rawn hmu a, an um ve ta chiam mai a. Setana chuan, "Duhtawkin um rawh u. Pluto-a a chauh meuh chuan in hmuh phak lovah ka tlanbo hman tawh ang. Belle, an kah hlum hlauh che chuan a pawi viau ang. Amaherawhchu, Willow Ben-a beidawng taka min la zawnna tur chu i pumpelh dawn tihna a ni mai. Willow Ben khua hi a lo awm ngai reng te a nih chuan," a ti a.

Sakawr chungchuang chu an liam fel chiah tihin Setana chu puk piah zawkah chuan a va lut a, zawi te hian, "Joan," a han ti a. Puk chhunga hmeichhia chuan a rawn hmu a, thil rapthlak tak hmu ta ang maiin Setana chu hnunglamah tlemin a han tawlh kir a, "Uai, nangmah zawk maw? Min tihder ngam a ni maw?" a han ti a. Belle chuan, "Ngam e. I tana țha ka ngaihtuah avangin, he thil hi ka ti ngam a ni," a ti a.

Hmai khuhna tel lova Setana hmel lo lang chu a hmuh vawikhatna chiah a la ni a, nunrawn hmel hle hian a hria a. Setana kut bawr dinglam chuan a puakruk kawm a hnaih sawt hle a, Belle pawh chuan a thih teuhzia chu a hrechiang em em bawk a. Setana hnenah chuan, Jeff, Double K chu i chang tawh lova, Joan-i khan i tan țangkaina enge a neih? Kei hi ka danglam a, i mize anpui, khawvel laka hel ve ngam ngat ka nih hi. Tun țumah hi chuan i hloh ta a, mahse nang ang hi chuan i la bei nawn leh tho dawn a, chutih hunah chuan, i hlawhtling ve tawh ngei ang," a han ti a.

Setana pawh chuan a puakruk kawm chu a thlah ta a. Belle chu a han per ţak ţak a, thinrim deuh maiin, "Khatiang hmeichhia nawi lutuk, thla khat leka i nin mai tur ai khan, kei hian enge it awm lohna ka neih bik? Hmanah pawh, 'hmangaihna hian thil nasa tak a ti thei a, kawng a dap chhuak thei a, a ngaidam țhin a ni' i tih kha, ka hmangaih che a, kawng pawh ka dap chhuak tawh a, ngaihdam erawh chu i tih ve tur a ni ta," a ti a.

Nula hmelțha leh duhawm tawk tak mai si, a tana inpe zo em em a hmuhin, Setana rilru meuh pawh tlemin a nem ve deuh a, a hlawhchhamnate pawh theihnghilhin Belle chu a han pawm a, "I tidik a ni. Ka mit a lo del rei....," a tih lai mekin, ui kawlh rum ri niawm tak hi a hria a, hnunglam a hawi thuai a. Puk kawngkaah chuan kun deuh ngulin, ban pahnih phar chhuakin Silver-a chu a lo lut a, Setana hnenah chuan, "Kha kha ka nula a ni. Țha taka ka enkawl chuan pek min tiam tawh kha," a rawn ti ta a. Belle chuan, thinrim deuh maiin Setana chu a en a, "Chutiang chuan i lo tiam a ni maw? He... ramsa kutah hian min pek i lo tum a ni maw?" a ti a.

Setana chuan, "Belle, i tana țha tur ka ngaihtuah avangin ka tiam ta a nih kha. A kuta pek che hi ka tum lo reng reng," a ti a. A thusawi chu Belle chuan a awih lo tih pawh Setana chuan a hre thei mai a. Silver-a chu, "Chhuak rawh" tiin a vau leh ta a. Silver-a chuan, "Hmeichhia kha ka duh tawh, ka la nghal dawn tunah," a ti a, a rawn hnaih ta zel mai a. Hmeichhia a duhna chuan a pu a hlauhna zawng zawng pawh a ti bo zo vek tawh a, a puin a tiam tawh angin, a lawmman hmuh tur chauh chu a rilruah a khat tawh a ni.

Silver-a leh zelin a thu a han hnial ngam ta chu Setana chuan a tuar zo ta ngang lova, a puakruk a phawi a, Silver-a âwmah a va kap ta a. Silver-a chu a eu awrh a, mahse a la rawn pan hnai ta cheu mai a. Setana chuan vawikhat a han kap leh a, chutah zawng Silver-a chu a ding chawt a, a lu a thle tawn luk luk a, a tlu ta a. Belle chuan Silver-a chu a en reng a, Setana hnenah chuan, "A va han rapthlak em, tualthah hi pawi i ti miah lo a ni maw?" a han ti a. Setana'n a chhan let hmain, "Lander, ka nghak che a nia," pawn ațangin, mi pakhatin a rawn ti ta a.

Setana chuan, midang tam tak pawh khawngaihna nei hauh lovin a lo that tawh țhin a, a vanglai ni si, taksa pawh la chak em em si chu, thihnain pawnah a lo nghak ve ta a ni. Setana rilru mangang lutuk chuan engmah a ngaihtuah thei tawh lova, pawn ațangin Sudden-a chuan, "Lander," a han ti nawn leh ngat a. Tunah chuan puitu tur pakhatmah nei lovin, Setana chu amah chauhvin a ding ve ta a ni. Chuvangin puitu țha a neih chhun, Silver-a a lo that ta mai te kha a inchhir hnuhnawh em em a, a hlauhna chu hnawhbo tumin a han nui a, "Min mamawh hle a nih dawn chu," a ti a, hreh em em chungin pawnah chuan a chhuak ta a.

Sudden-a chu puk ațanga pen 15 vela hlaah a ding a, a kut pahnih chu a thlak thla a, a bulah tumah an awm lo tih Setana'n a han hriat chuan Silver-a a lo that ta mai kha a inchhir em em a. Sudden-a hnenah chuan, "Eng atan nge min tih?" a han ti a. Sudden-a chuan, "I thil bat min rul turin ka rawn zawng che a ni. Mi pakhat zawng chhuak tura tirh ka ni a, mahse ka chhan chhuah tura chu, that lo thei lovin nang hian min siam ta a ni. Amah chu Dolver-a a ni," a ti a.

Sudden-a thu sawi awmzia chiang taka a han hriat meuh chuan Setana chu a thinrim thar leh ta thut mai a, a thinrim em avangin a hlauhna pawh chu a theihnghilh leh ta vek a. He pa, Governor mi rawn tirh hian kawng tinrengah tlan khalhin, a thil lo ruahman zawng zawngte pawh a hlawhchham phah ta vek a ni si a. Chung chu a ngaihtuahin Setana rilruah chuan Sudden-a thah chakna ringawt a khat ta a. Midang tumah an awm lova, pakhat leh pakhat inbei tur an ni tih te Setana chuan a ngaihtuah chhuak a, puakruk kah lah chu thiam ve tawkin a inhre bawk si a. Tichuan, "Enthlatu mi tenawm ber chu i lo ni maw? Engah nge min kah nghal mai loh?" a ti a.

Sudden-a chuan, "I pek ve ngai reng reng loh, 'Chance' ka pe che a ni. Kan inpan tawn anga, kan pen zat kan chhiar zel anga, 'pathum' ka chhiar veleh kan puakruk kan phawi dawn nia," a ti a. Tichuan, 'pakhat' tih pahin hmalamah pen khat ve ve an pen chhuak a, 'pahnih' tih pahin an pen leh a, mahse pathum chhiar thlen hmain Setana chuan a puakruk a phawi a, a hmet puak ta nghal a. Setana chu che rang teh mah se, a kut phe chu Sudden-a chuan a hmu rang em em a, chuvangin a kawngbawr dinglama a puakruk pai chu, mita hmuh hman loh khawpa rangin a phawi chhuak a, a kawngbawr zawn vel ațangin a hmet puak ta a. Setana chu a kimki chawih a, bawkkhupin a tlu a, lei a ham ta vak vak a.

Sudden-a chuan puakruk la hum reng chungin Setana chu a va pan hnai a, mahse kah nawn leh pawh a lo ngai tawh lova. Silver-a hmuh la inbeiseiin Sudden-a chuan puk lam chu a pan phei zel a, mahse Silver-a ni lovin puk ațang chuan Belle a lo chhuak a, Setana ruang chu en chungin, "A tawp thlengin a rinawm lo tluan chhuak zak a nih hi," a han ti a. Sudden-a chuan, "Miss Keith-i hi khawiah nge a awm?" a ti a. Belle chuan thil awmdan chiang takin a hrilh a, Sudden-a chuan, "I lo chhanchhuah avangin i lei kan ba a nih chu," a han ti a.

Mahse Belle chuan, "A tana țha ka ngaihtuah vang ni lovin, hnawk ka tih vangin ka kaltir ta mai zawk a ni," a ti a. A rilru chhung khawi lai berah emaw chuan rinawmna a la awm a ni tih pawh Belle thusawi ațang chuan a chiang hle a, amah vek chuan, "Engtin nge min tih ve dawn le?" a ti a. An piah hla fea an awmna lam pana sakawr chungchuang pahnih lo kal chu Sudden-a chuan a han kawk a, "Pakhat zawk saw, Red Rock khaw Sheriff a ni a. Nang chu ni ila, sakawrah hian ka chuang ang a, a theih anga rangin ka tlan bo nghal ang," a ti a.

Sudden-a thu sawi awmzia chu Belle chuan a hrethiam em em a, chuvangin, "Mi țha tak i lo nih hi. Theih chu ni se....," a ti țan chauh a, Sudden-a chuan, "An lo thleng thuai tawh ang. A zin mawi deuh inphahna sakawr zawk saw hmang rawh," a han ti nawn leh a. Chu sakawr chu Setana sakawr a ni a, Hell City chu kutruakin a chhuahsan hauh lovang tih pawh an hrechiang ve ve a, Sudden-a rilru chu hre rengin leh lawm em em chungin Belle chu sakawrah chuan a lawnkai a, a tlantir ta nghal a.

Sheriff Dealtry-a te pawh an lo thleng ve thuai a, Belle chu an rawn hmu hman lo hlauh a. Dealtry-a chuan Setana ruang chu a han kuai zangthal a, a chal darah puakruk mu luhna a lo thi ser ser a, "Lander-a a nih ngei hi, Jim, i sakawr ke a bai hlauh chu a vanneihthlak hle mai, nang chu awm lo la, a tlanchhuak ngei dawn a nih hi. Kan va um....," a tih lai mekin Sudden-a chuan, "Miss Dalroy-i'n min hrilh a, ka hre tawh asin. Setana remruat ni lovin Belle remruat zawk a lo ni a. An chhuah dawnin Belle chu Setana inchei ang chiahin a inchei a ni awm e. Setana phei chuan a tlanchhe zawk kha Belle emaw a ti a, mahse Belle chuan Miss Joan-i kawr hak lai a thlengpui a ni," a ti a.

Dealtry-a chuan, "Ni e mawle, Miss Joan-i chuanna sakawr kha a țlan chak nasa si a, kan um nasa teh asin. Jeff-a'n a va kap a, a va fuh hlauh a, chuti ni suh se, tunah pawh hian Joan-i chu an la um phak kher lovang. Mahse silai ri a hriat avangin a sakawr chu a tiding ta mai a, kan va um phak ve thei ta chauh a ni. Pa pathumin hmeichhe pakhat puakruka kan tin lai chu i hmuh ve atan ka it ngawt mai, Jeff-a'n a thil tih sual a hriat laia a hmel chu hmuh a nuam lo hle mai. Chuvangin Frosty-a nen hian, ram dangah tih tur pawimawh zawk neiin kan inhre ta thuai a, anni pahnih chu kan kalsan ta a ni. Belle Dalroy chu khawiah nge a awm ve tak?" a ti a.

Sudden-a chuan, "Sakawr pakhat a kim lova, amaherawhchu, Belle sakawr chungchuang chu ka hmu hauh lo mai," a ti a. Belle sakawra a lawnkai lai khan lehlam a hawi daih tih erawh chu Sudden-a chuan a sawi tel lo a ni. Frosty-a chuan, "Jim, Lander-a hi hetah hian a awm tih engtin nge i hriat theih?" a ti a. Sudden-a chuan, "Lui ruam kan pelh lai khan, puk chhunga Silver-a lut lai ka hmu a, chumi hnu lawkah silai ri ka hre ta a ni. Silver-a ruang pawh puk chhungah hian kan hmuh mai ka ring a ni," a ti a. A rin ang ngeiin Silver-a ruang pawh chu an hmu ta thuai a, Silver-a chuan, a kawngbawrah puakruk a lo pai ve nghe nghe a.

Sudden-a chuan, "Setana khan amah chhanchhuak theitu tur ber a kaphlum a, a tisual chiang hle a ni," a ti a. Sheriff Dealtry-a chuan, "Silver-a hi chu kan phum nghal ang a, Lander-a ruang erawh hi chu kan phurh haw a ngai ang. Midangte pawhin an hmuh ve a ngai ang. A hmai tuamna puan sen a tel lo chu a pawi hle mai," a ti a. Frosty-a chuan, "A tel alawm. Kawnglakah khan ka chhar a, Miss Joan-i khan a thlauh a nih ka ring," tih pahin a ipte ațangin rawmawl sen a phawrh ta a. Tichuan, sakawr zinah hruizena phuar behin Hell City khaw lalpa ruang chuan a lalna ram chhe tawh chu a pan ta a ni.

Nula leh tlangval, sawi tur ngah em em si chu, ngawi rengin sakawrah an țhu a, rei fe hnuah a mipa zawk chuan, "Joan, him taka i awm hi ka lawm takzet a ni. Mahse hetah hian engvanga awm nge i nih?" a ti a. Joan-i chuan Belle thil ruahman dan chu a sawi hnuin, "Ka kal loha, ani a kal chuan, misualpa nen khan kan pahnih chauhin kan awmdun dawn tihna a ni si a. Amah kha ka pui a ni tih phei chu ka hre thova, mahse tlansan kha ka châk em a ni. Belle khan 'an kâp ngei ang che' min tih avangin ka sakawr kha a theih anga chakin ka tlantir ta mai a ni," a ti a.

Jeff-a chuan, "Ka kâp fuh palh hlauh ang che tih ka hlau hnuhnawh ta ngawt mai. Kap fuh che ila chuan engtikahmah ka in ngaidam thei lovang. Thil pawi ber chu, kan misualpa chu a tlan bo hman awm si a, mi tam takin min la ringhlel fo dawn a nih hi. Mahse, Dealtry-a khan a fapa chu Lander-a kah hlum a ni tih a hre tawh a, ka hahdam sawt mai," a ti a. Joan-i chuan, "Ka va lawm em, Jeff, Double K-ah i lo kir ve tawh ang chu maw?" a ti a. Jeff-a chuan, "Kir ve ang, a nih nih ka ni ve tawh mai ang," a ti a. Joan-i chuan, "Chuti, hawh i hmanhmawh ang," a ti a.

Jeff-a chuan, "I hnenah hian sawi ngam tur pawh niin ka inhre lo, mahse puk chhunga ka tan lai khan pasal nei tawh angah ka han suangtuah chhin che a, hrehawm ka ti takzet a ni. Joan, khawngaih takin min hrilh la....," a ti a. Joan-i chuan, "Jeff, a chhe ber nia ka ruat lai che pawh khan ka duhna che hi a ngai reng a ni," a ti a. An chuanna sakawrte pawh chuan thil awmzia an hrethiam ve a ni chek ang. A nih loh vek pawhin inbiak duhna an nei ve hrim hrim a ni phawt ang a, Jeff-ate pahnih hriatpui hauh lovin insi rial hian an kal dun ta a. Tichuan, Jeff-a pawhin kut phar chhuah chauh a hmabak ve ta a ni.

Sudden-a te'n Hell City an va thlen leh meuh chuan Merry-a te hovin outlaw ho chu an lo khawm vek tawh a, Scar-a erawh chu inkahnaah a thi tawh a, an zingah chuan Dirk-a pawh a tel ve a. Sudden-a chuan, "Dirk-a hi chu dawrkai ve mai a ni a, nupui fanau te pawh a nei a, thil sual tihnaah a tel ve lo," a ti a. Sheriff Dealtry-a chuan a chhuahtir ta nghal a.

Tih tur dang a awm tawh lo bawk a, kal pahin Frosty-a leh Sudden-a chu Twin Diamond panin an kal ta thuai a. Kal pahin Frosty-a chuan, "Setana sakawr zin kha ka hmu miah lo. Belle khan a la ta a nih ka ring. A chhungah pawisa a tam hle awm si a, engah nge i zui ve mai loh?" a ti a. Sudden-a chuan, "Tih tur dang ka la nei a, hmeichhia ka la ngaihtuah hman rih lo," a ti a. Frosty-a pawh chuan a zawt nawn ngam leh ta lova.

A khumah Keith-a chu, lukhamin a inkam ţhu a. Pindan chhungah chuan Merry-a, Sherrif Dealtry, Sudden-a, Frosty-a leh Langley-a te pawh an awm ve a, Joan-i pawh chu khum bulah chuan a ţhu ve a. Thil awmdan chanchin tlangpui Keith-a an hrilh hnuin kawngkhar chu a rawn inhawng a, pindan chhungah chuan Jeff-a a lo lut a. Keith-a chuan vin zetin, "Rochan tur i paih hnu hmuh kir leh theih beiseiin i lo kal a ni maw?" a lo ti a. Jeff-a chuan, "Ni love, ka pa, ngaihdam dil turin ka lo kal a ni. Thildang engmah ka beisei lo," a lo ti a. Keith-a chuan, "I thusawi chuan rilru a khawih hle mai. Mahse, dawt a ni, rochan tur beiseiin he hmeichhia hi hmangaih ang takin i lang der mai mai a ni," a ti ta a.

Merry-a chuan, "Keith, ka ţhian i ni a, dam ţha ve chu ni la, ka sawi harh deuh hlek ang che. Ka..," a tih lai mekin Keith-a chuan, "Merry, lo inrawlh ve suh. Joan, he pa hi i neih vaih chuan kut ruakin i chhuak ang. Chu chuan, danglamna a siam ngei ang tiraw?" a ti leh a. Joan-i chuan, "Engmah a danglam chuang lovang," a ti a. Jeff-a chuan, "Ka tan, Arizona ram hausakna zawng zawng aiin Joan-i hi a hlu zawk em em a ni. Tunah chuan ka harhchhuak tawh a, hei hi i ngaihdan a nih chuan pawi ka ti ngawt mai," a ti a, chhuah nghal mai a tum ta a. Merry-a chuan, "Jeff, min lo nghak rawh, ka Ranch-ah kan kaldun..," a tih lai mekin Keith-a hmel chu a va hmu a, a tawp ta chawt a.

Ruahsur zawha ni a lo lang ang mai hian Keith-a hmel chu a danglam tawh a, "Merry, ka fapa min ruksak dawn em ni?" a han ti a. Jeff-a chuan a hrethiam thuai a, a tlan phei a, a pa kut chu a va vuan a, hlim deuh mai hian, "Ka pa," a ti ta a. Keith-a chuan, "Boy, min ngaidam rawh, Joan-i vangin ka chhin che a nih kha," a ti a, an kut pahnih chu a buk thuah a, "Double K-ah hian Keith hming a dai tur a ni lo," a ti a. Merry-a chuan, "Keith, min bum chiang hle mai, ka ranch-in, fanu leh fapa thar ka nei dawn emaw ka lo inti tawh asin," a ti a. Frosty-a nui hmel a hmuh veleh, "Ka in chu cheimawi deuh a ngai ngei ang a," a han ti leh thuai a.

Frosty-a pek chuan, "Chei teh chiam a ngai lovang. A chhuat te, a chung te, a bang te thlak a ngai ang tih chauh a ni, a nghahchhan, a leilung chu a rinawm khawp alawm," a ti a, an nui zo ta vek a. Midang chhuah vek hnuin Jeff-a chu a hnuhnung fal a, "Ka pa, min ngaihdam avangin ka lawm takzet a ni," a han ti a. Keith-a chuan, "Ho mai mai, ka dam loh avangin thil tam tak ngaihtuahna hun ka nei a, inchhirna tur pawh ka ngah mai. I ţhiante saw va kawm rawh," a ti a.

Hapta kar engemaw zat a ral hnuah Sheriff Dealtry-a chuan Sudden-a hnenah chuan, "Engtizia nge, kal bo i tum ta a ni maw, Jim?" a han ti a. Sudden-a chuan, "Ni e, Tucson khuaah tu'n emaw min lo nghak a ni," a ti a. Sheriff chu a nui suk a, "Nula a ni ngei ang maw?" a han ti a. Sudden-a chuan, "Ni lo, min nghaktu chu, pa tawi lam deuh, sam var va mai a nia, 'Bleke' tiin an ko ţhin," a ti a. Sheriff chuan, "Governor Bleke-a maw?" a ti a. Sudden-a chuan, "Ni e, 'vuina tur, pangpar thawn tur em ni aw?' a ti hial tawh ang," a ti a. Sheriff chuan, "Chu, a hnen aţanga lo kal i ni maw? I va ngawi thei ve," a ti a.

Sudden-a chuan, "A mi tirh pathumna ka ni," a ti a, midang pahnihte chanchin chu a hrilh nghal a, "An ţawng tam lu deuh a nih ka ring," a ti bawk a. Sheriff chuan, "Engmah ti lovin a ngawi ta mai mai emaw kan lo ti asin. I chungah a lawm hle dawn a nih chu," a han ti leh a. Sudden-a chuan, "Chibai buk a? 'I tiţha e, Jim' tih mai bak, engmah ka hlawh chhuak lovang. Mahse, chu baka thil ngaihthlak nuam chu a vang hlein ka hria," a ti a. Sheriff chuan a pawhdawh aţangin lehkha a rawn phawrh chhuak a, Sudden-a pek pahin, "Hei hi Landera'n a lo ak a, i tan awmzia a nei em?" a ti a.

Lehkha chu Sudden-an hmana a hloh, wanted lehkha bawk kha a ni a. Sudden-a chu a nui sak a, "Hmanrua atana ka rawn ken a nih hi. He lehkha hian thawnthu sei tak a nei a ni," a ti a. Sheriff chuan, "Ka tan hriat tam teh chiam a ţul lo," a ti ta thuai a. Zu um a la chhuak a, hreh tak chungin ţhian ţha inţhen turte'n an tih ang chiah hian muangchangin no an dawm dun a, chumi hnuah Sudden-a chu pawnah a chhuak ta a.

Sudden-a sakawr chungchuang lai leh kawtthlera, a sakawr muangchanga a kal lai chu Sheriff Dealtry-a chuan kawngkhar aţangin a thlir zui reng a. Ralkhat hla feah Sudden-a chu a liam fel ta tih veleh Sheriff Dealtry-a chuan, "I tiţha e, Jim," a han ti a, pindan chhungah a luhsan ta a...

www.storyfb.com mizo story thar englai pawhin chhiar tur a awm reng
A TAWP TA..
(Next-ah 'Sudden' Oliver Strange-a ziah lo chang leh rawh u aw... )

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)