SUDDEN - RIDES AGAIN (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: SUDDEN - RIDES AGAIN (Completed)

Unread post by Ngaia » April 15th, 2018, 1:25 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 7
(Rozami Pachuau)

Dugout khua ațanga Hell City kal theihna chu kawng khat chauh a awm a, chu kawng chu tawlailirin a zawh theih țawk țawk a. Kawng chu tlang karah ki kawi deuh mai hian a kal chhova, kawngsir lehlam chu lung bang hlir a ni a, lehlam ve thung chu kham sang deuh mai hi a ni thung a. Hell City khaw luh dawnah chuan kawngkhar lian deuh mai thinga siam hi a awm a. Chu chu Setana hote chuan englai pawhin an veng tlat reng a ni. A khaw chhung chiah chu tlang hlirin a hual vel a, chung tlangte pawh chu lungbang ang mai an ni a, a lai chu a kiar a, khawthlang lamah chuan khua ațanga chhuah theihna hmunah pawh chuan kawngkhar an siam a, chu pawh chu chhun zan zawmin an veng reng bawk a.

Khaw chhung ti mai ila, hmun zawl zau laiah chuan thinga sak in tlemte a awm a, dawr leh Saloon pawh a awm ve a, khua a cheng mi tam zawk te chu khaw hualtu lungbang pukah an cheng deuh ber zawk a. Chutiang puk kotlang pakhatah chuan Scar-a leh a țhiante pahnih chu sakawr ațang chuan an chhuk a, an pathum chuan an ngui hle hlawm a. An hotupa chuan, "In report loh theih chu a ni awm si lova," a han ti a. Pakhat chuan, "Ni e, hrilh lo mah ila, a hre leh thovang, a hre daih tawh pawh a ni mai thei. Dugout khua a kan thil tawh pawh a hriat ran em kha," a lo ti thuai a.

Scar-a chuan, "Tun țumah hi chuan, tu'n nge kan chanchin hrilh thei ang? Min kaptute kha chuan an hrilh lo tawp ang. Mexican pahnih te kha an thi ve ve bawk si. Squint-a pawh kha a thi tawh a nih ka ring. A thih loh chuan a lo lang ve daih tawh ang," a han ti a. Scar-a țhianpa chuan, "Kan chanchin hi kan pu chuan a hre vek tawh thovang. Kan va hlawhchham si a, chanchin kan hrilh vat loh zawngin a thin kan tirim zual mai mai a ni," a ti a. Pakhat zawk pawh chuan, "Ni e, Daggs-a thusawi chu a dik a ni. Kan hlawhchham miau si a, a mawh chu kan phur mai tur a ni," a lo ti bawk a. Scar-a pawh chuan, "I ti dik e, Roger, hauh tur chuan inpuahchah rawh ule," a ti ve ta a.

Scar-a te pathum chu puk chhungah chuan an lut a, kawngkhar pakhat hi a lo awm a, Scar-a chuan a han kik a, mi pakhat hian a rawn hawnsak thuai a. Chu pa chu fit 5 emaw leka sang hi a ni a, a taksa leh a âwm pharhte chu a lian hle mai a, a ke erawh chu a tawiin a taksa nen chuan a inchawih lo kher mai a, piangsual ang maiin a ban pawh chu a sei em em bawk a. A pianhmang chuan mihring aiin zawng lam a pawl zawk mah a ni. Scar-a chuan, "I dam em, Silver? Kan pu, 'Chief' hmuh kan duh e," a han ti a. Silver-a chuan kawngkhar chu a hawng zauva, pindan chhungah chuan an inzui lut ta hlawm a.

An luhna chu pindan zau deuh mai hi a ni a, bangah chuan kawmawl ang deuh, puan țha chi hi an zar a, chhuatah pawh chuan chhuat phah dup nuam deuh mai hi an phah vek bawk a. Tukverh pahnih chauh a awm a, pindan chhunga țhutthleng leh dawhkan awm te pawh chu man to tak tak vek hi an ni a. Țhutthleng, savawm hmul phah chungah hian 'Chief' chu a lo thu a. An hotupa, Chief chu kum 30 pawh a la ni lovang tih a hawiher ațang ngawt pawhin a lang chiang hle a. A hmui chin hnuai lam chauh lang thei turin a hmai chunglam chu a tuam tlat a. Cowboy inchei dan pangngai ang maiin a inchei na a, a thawmhnaw inbel chu puan țha tak tak hlir a ni thung a. Puakruk pahnih a kawm saruha siam ve ve a pai a.

A hma zawna an din ațang mai pawhin Scar-a te ho chu an zam em em tawh a. An pu chuan, "In hlawhchham leh ta pek maw?" a lo ti nghal chawt mai a. Scar-a chuan phatmar a han tum chiam a, mahse an pu chuan, "Dawt sawi chu tum harsa duh ting suh, thil awmdan zawng zawng chu ka hre vek a. Țum khatnaah khan mi pali in ni a, tun țumah hian paruk in ni tawh a. Mi pakhat hneh tur hian mi engzat fakau nge in mamawh dawn," a ti ta zel a. Daggs-a chuan, "Tun țumah hi chuan pahnih an ni asin," a han ti a. An pu chuan nuihzat tih hriat deuh maiin a dar a han chhin a, "Chu pawh nise, pathumin pakhat in tih rawn thei tihna a ni a. Squint-a hi khawiah nge a awm?" a ti a.

Scar-a chuan, "I hria emaw kan ti asin," a ti ve khanglang a. An pu chuan rum deuh mai hian a han melh a, Scar-a chu a inchhir hnuhnawh hle a, a sawt tawh chuang silova, an pu chuan, "Ka hre tawh meuh mai, mahse in tlanchhiat chhan hi, engtinnge dawta in phatmar dawn hriat ve ka duh vang mai a ni. Engpawhnise, tun chinah chuan Green-a hi tumahin in khawih tur a ni lo, amah hi duhna chhan ka nei a ni. Țumhnih in hlawhchham tawh a, a țumthumna chu a tawpna ber a ni tawh ang. Silver, chhuah tir rawh," a ti ta a.

Ui ang maiin an pu pindan ațang chuan mei khupin an chhuak ta a. Anmahni chenna pindanah an va lut a, Squint-a, ama khuma a lo țhu chu an va hmu ta a. Squint-a chuan thinrim deuh maiin, "Dawihzep ho, engvanga min phatsan ngawt nge in nih?" tiin a lo hau nghal bawrh bawrh mai a. Scar-a chuan, "Tih theih engmah nei hek lo i, an hnunglam ațanga rawn beih let kha kan tum a, mahse, tlang kha lawn chi rual a lo ni si lova, tihngaihna a awm ta ngang lo a ni. Engahnge i tawmna ngaiah khan i tawm reng loh?" a ti a. Squint-a chuan, "Ka tawm reng alawm, mahse ka sira lung kha an rawn kap vak mai a, a sawhkhawkin ka malpuiah a fuh ta hlauh a ni," a ti a.

Rogger-a chuan, "Engtinnge helai hi i lo thlen theih?" a ti a. Squint-a chuan, "Silver-a ka hmu fuh hlauhva, min paw haw ta mai a ni. Silver-a hi a lo chak takzet mai, tlang kara a kal theih zia lah chu, sathar ang mai a ni," a ti a. Scar-a chuan, "Silver-a vang a nih chu, Setana'n kan chanchin a lo hriat, min lo enthla reng a nih chu," a han ti a. Squint-a chuan, "Min lo enthla hlauhva, ka vannei ngawt a ni. Silver-a khan min pui lo se chu, helai hi ka lo thleng zo hauh lovang. Green-a kha ka hma zawnah dintir a, silaia tin ka duh ber mai," a han ti a.

Scar-a chuan, "I duh ang chiaha i tih zawh hnuah chuan i țawihralna turin kuang i mamawh nghal ngei ang le. Kan pu in Green-a chu khawih a phal leh ta lo tlat a ni," a ti a. Squint-a chuan, "Engati maw?" a han ti hu a, mak a tih em avangin a meng bial nasa hle a. Scar-a chuan, "A duhna chhan chiah chu a sawi lo, min hrilh theihnghilh a ni ngei ang," fiamthu tih hriat takin, nui deuh sangin a han ti a. Squint-a chuan, "Kan pu in a phal emaw phal lo emaw phuba chu ka la tho ang, hei hi a thlawna tuar ka tum lo," tih pahin a malpui hliam chu a han beng thak thak a. Scar-a chuan, "Chuti a nih zawngin kan la ngai hle dawn che a nih chu," a ti a.

Sudden-a te pahnihin Double K Ranch an va then lai chuan Keith-a leh Langley-a te pahnih chu an lo awm dun a. An va kalna chanchin kimchang takin Frosty-a chuan Keith-a te pahnih chu a hrilh vek a. Keith-a chuan, "Kan bawngah Merry-a te chhinchhiahna an lo chhu a maw? Engvanga chutianga ti kher chu nge an nih?" a ti a. Frosty-a chuan, "Jim-a ngaihdanin nang leh Merry-a te hi inhuattir an tum a ni ang," a lo ti hlak a. Langley-a chuan, "Chu zawng, thil awihawm loh pawl tak a ni ang," a lo ti a. Keith-a chuan, "Engvanginnge a awihawm loh tehchiam ang? A chhan dang țha zawk i hria em ni?" vin fe hian a han ti a.

Frosty-a hnenah thung chuan, "Merry-a'n eng angin nge a ngaih ve?" a ti a. Frosty-a chuan, "Merry-a pawhin Jim-a ngaihdan hi a țawmpui chiah a ni. Bawng pawh chu a lei nghal mai dawn a, hralh tur che in min chah nghal a ni," a ti a. Keith-a chuan, "Chhinchhiahna chhutute chu i hriat zawng an ni em?" a ti leh a. Frosty-a chuan, "An meichhemna bula lo awmte chu Mexican ve ve an ni a, midang pathum te erawh chu, Black Sam-a Saloon chhungah Jim-a nena intibuai te bawk kha an ni. Pakhat erawh chu kan hmu thei ta lo a ni," a ti a.

Keith-a chu a ngawi vang vang a, tah chuan, "Thil theih loh chu a ni na a, in kal tur hi hre lawk an ang riauvin ka hria," a han ti a. Frosty-a pawh chuan, "An hre lawk ni ngeiin a lang. An meichhem pawh chu ram hla tak ațang pawhin hmuh theih ngei tur chiin an tilui ni ngeiin a lang," a ti ta a. A thusawi chu ngaisang awmlo deuh maiin Langley-a chu a han nui a. "Setana hi dawithiam niawm chuan an sawi na a, chutiang thilte chu an hriat theih ka ring lo tawp mai, in va kalna lam ramri hrulah kha chuan kan kal khat teh asin," a ti a. A thusawi chu a inchhir nghal zat bawk a.

Keith-a chuan, "Chuti a lo ni maw? Rustler (Bawng rukhmang) ho tan kawng i lo hawn zau em vang zuk nia, sawlai ramah sawn bawng kan hloh zin em em. Rustler ho hmuh theih ngei turin engahnge 'Welcome' tih i tar law law loh?" a ti el ta a. Langley-a thinrim chu a meng tal tap a, "Hell City do tur chuan ka chak tawk lo a ni. Mahse tunah hi chuan do lo thei kan ni tawh lovang," tih pahin Sudden-a te pahnih chu awmze nei tak hian a han melh a. Keith-a chuan, "Vawina an thil va tihah heng mi pahnih hi thiam loh i tum a nih zawngin i rilru thlak vat rawh. An vaia an kaphlum vek lo chu pawi ka ti ngawt a ni. Green, biak che ka duh ania," a ti a.

Frosty-a te pahnih an kal sawn veleh Keith-a chuan, "Langley-a hi enge i ngaih dan?" tiin Sudden-a chu a zawt ta nghal a. Sudden-a chuan, "A lakah hian engmah ngaihdan ka la nei lo," ti ngawtin a chhang a. Keith-a chuan, "Kan naute zinga țhenkhat hi chuan an ngeihlo hle niin ka hria," a ti a. Sudden-a chuan, "Foreman hman tlak deuh te hi chuan ngainat an hlawh loh vek pawhin huat hi an hlawh duh viau a ni. Hell City khaw hotu chuan țhuihhruai engzat nge a neih?" a ti daih a. Keith-a chuan, "Mi sawi danin 30 ațanga 50 inkar vel a nei a ni awm e," a ti a.

Sudden-a chuan, "Ho sawmli vel a nei a nih ber chu. Ho chu zozai nei si, an zinga a pangngaite bawk ka tawng leh țhin hi a mak viau mai," a han ti a. Keith-a pawh chuan, "A ni ngawt mai, hmuh che inringin an chang che pawh a ang viau a ni. Langley-a sawi ang khan indo kan hmabak ni ta ngeiin a lang," a han ti zet a. Amah vek chuan, "An hotupa, hmaituama chu ka fapa a ni tih an hrilh tawh che em?" a ti ta a. Sudden-a chuan, "Min hrilh tawh a, mahse min hrilhtute chuan, i fapa a nih an ring tak tak lo," tiin a chhang a.

Keith-a chuan, "Thil awmdan ngun taka chhui chuan ka fapa a nih chu rinhlelh chi vak a ni lo. Ka fapa pawh chu lo ni ta tehreng mahse, a thil tihsual avang hian rorelna a chunga thlentir chu kan mawh a ni tho," a han ti a. A thusawi chuan a rilru a tihhah nasat zia chu a hmelah pawh a lang chiang hle a. A fapa sual avanga a rilru nat zia chu Sudden-a chuan a hre thei nghal vek mai a. Keith-a bawk chuan, "Engtia tih zel nge i tum dawn le?" a ti ta a. Sudden-a chuan, "Kei chuan eng tehchiam mah tih ka tum lo, a chet hun a lo thleng tawh zawkin ka hria. Frosty-a nen hian, henglai ram chanchin hi hrechiang turin thawk chhuak leh ila a țhain ka ring," a ti a, Bunkhouse lamah a kal ta nghal a.

Bunkhouse chhungah chuan Frosty-a te pahnihin Rustler ho an umbo thu an lo sawi tui hle a, an zinga pakhat chuan, "Tim-a leiba an la ta a nih chu," a han ti a. Lanky-a thung chuan, "Mexican sawm rual pawh thi mahse, Tim-a an thah avanga an leiba rulhnaah chuan ka pawm chuanglo," a ti a, thudang an sawi kai zel a. Turvey-a chuan, "Buaina kan chawk chhuak dawn ta ni berin ka hria.... Bawng tlemte hloh ai chuan, mihring nunna hloh chu ka ui zawk daih. Bawng mai mai ai chuan mihring nunna chu a hlu zawk si a," a ti a. Turvey-a thusawi zin em em chu la hre rengin, Frosty-a chuan, "Dollar sawm chauh vanga mi pakhat i kahhlum kha engnge i ngaihdan?" a han ti a. Turvey-a chuan, "Khangte chu a dang daih alawm," a ti thlarawk a.

Frosty-a chuan, "Ni e, Dollar sawm kha chu i ta a ni a, tuna bawng an rukbo hi chu kan pu ta a ni miau mai a," nui chung hian a han ti leh hram a, midang chu an nui zo ta a. Turvey-a chuan chhan leh a han tum a, mahse inhnialna a chhuak ngei dawn ni a hriain, a pumpelhna zawngin Lazy chuan, "Mister, Setana chuan engtin nge a tiha in rin le?" a lo ti ta daih a. Turvey-a chuan, "Thlabarin a kapkarah a mei a vaw zep anga, a tlanchhe par par mai ang chu..... kei pawh ni ila kan mi huaisen Frosty-a hian ka luvun min hihsak a tum tih ka hriat phawt chuan, meikhupin ka tlanchhe ve mawlh ang," a lo ti ta thuai a. Frosty-a chuan, "Luvun hih tur pawh i nei hlei nem mawle, lukawlh," a han ti a, an nui zo leh ta vek a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:25 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 8
(Rozami Pachuau)

A tuk zingah Sudden-a te pahnih chu a hma ni a an kalna ngaiah bawk khan an va kal leh a. Mexican ruangte kha chu tu ten emaw an lo la bo daih tawh a, an mei chhemna hnuhmate pawh kha an lo tireh leh vek tawh bawk a. Sudden-a chuan, "Tu te'n emaw an hnuhma thup an tum a nih hi, heta țang hian Hell City chu engtia hla nge ni ang?" a ti a. Frosty-a chuan, "Mel riat vel aniang. Saw mi, kan piah tlang saw kan zawh chhoh zel a ngai ang, va kal i rilruk deuh em ni?" a ti a. Sudden-a chuan, "Min sawm hma chuan mahni thua kal mai chu ka tum rih lo," ti chauhvin a chhang a. Bawng tla darh zawng khawm tur an nih avangin an ințhen a, 'puakruk vawihnih kan hmeh puah vaih chuan a rang thei ang bera in pan nghalah' tiin an intiam lawk bawk a.

Frosty-a chu khawchhak lam panin a kal a, Sudden-a erawh chu khawthlang lam panin a kal thung a. Thui fe a kal tawh hnuin, Sudden-a chuan tlangdung pakhat hi a zawh chhova, tlang chhip hmun zawl lai chu a han thleng a, a piah hla vak lovah chuan, tlang te tak te te a bawk fir fer hlawm a, chunglai hmun chu a rualrem vak lo nghe nghe a. Chu lam chu pana a kal laiin, sakawr thlabar khek ri vak hi a hre ta thut mai a. Sakawr pawh chu a lo lang nghal a, hlauh nei tih hriat deuh mai hian a tlan chiam mai a. Sudden-a chuan a han enchiang a, sakawr chunga chuang chu a hmuh veleh, "E khai, Hmeichhia a ni reng mai. Engti zia nge ni ang.....?" ti a a inngaihtuah laiin, sakawr lo tlan chhuahna hmun ațang bawk chuan Keite lian deuh mai hi a lo tlan chhuak a, sakawr chu a rawn um ta zel a.

Hmeichhia chuan sakawr lakam pawh vuan tawh lovin, sakawr zin chu a vuan a, a inham tang hram hram a. Sakawr chu a thunun tawh miah lo tih pawh Sudden-a chuan a va hre thei nghal a. Sakawr hmalam, hla vak lovah chuan ruam thuk deuh mai, ft 1000 dawn laia thuk a awm tih pawh Sudden-a chuan a hria a, an tlan zel dawn si chuan, inring hman lovin ruamah chuan an tla ngei ang tih pawh a hria a. Tichuan anmahni tlan khalh tumin a sakawr chu a theih anga chakin a tlantir ta chiam mai a.

A sakawr sira a hruihrual chu a la chhuak a, sakawr ke rahchhanah a han ding mar a, Hmeichhe chuanna sakawr an va um
phak dawn lai takin, sakawr nghawngah hruizen chuan a va phih âwk ta a. A chuanna sakawr chu Sudden-a chuan a tlan zawihtir hret hret a, hmeichhe sakawr chu a pawt ding thei ta a. An awmna piah lawka an tlanna mual chu a bung vut a, tlemin Sudden-a chu muangchang deuh se zawng, hmeichhia leh a chuanna sakawr chu ruamah chuan an tla dun tur hi a ni tawh mai a.

Hlauhawm pakhat chu a pumpelh tawh a, mahse, a dang a la awm ta fo a ni. Chuvangin Sudden-a chuan a Rifle a phawi chhuak a, Sakei lo tlan lai chu a chalah a va kap a, Sakei chu a hlawm nghal tawp mai a. A sakawr chu ding tlat tura a hrilh hnuin, Sudden-a chu sakawr ațangin a chhuk a, a tlan phei thuai a, hmeichhia chu a va pawm thla a, "Ka pi, hlauh tur engmah a awm tawh lo ve. I țha em? Engtin nge i awm?" a han ti a. Hmeichhia chuan, "Ngaihtuah ka ngai tawh lo ve, engvanga ka sakawr hi tlan ta phut nge a nih ka hrethiam reng reng lo. A tal phut avangin, a lakam ka vawn lai pawh ka thlah a, ka thunun thei ta lo reng reng a ni," a ti a.

Sudden-a chuan, "Sakei rilțamin eitur a mamawh vang a ni," a ti a. Hmeichhia chu a han hawi kir thuai a, Sudden-a bawk chuan, "Tunah zawng a mamawh tawh lo," a ti ta thuai a. Hmeichhia chuan, "Chuvang chu a lo ni maw i Rifle i hmeh puah," a ti a, Sudden-a chu ngun deuh mai hian a han thlek ta a. Sudden-a pawh chuan hmeichhia chu ngun deuh mai hian a han thlek ve bawk a. Hmeichhia chu amah aiin a la upa bik lovang tih pawh Sudden-a chuan a hre thei nghal a. Nula hmelchhe lo tak, mitmeng mawi deuh mai, sang tawk tak, piannalh zet mai hi a ni a.

Reilote ngawi renga an in thlek tawn hnuin Nula chuan, "Sakei chaw a ka awm loh avangin lawmthu pawh ka la hrilh lo che a...... Engpawhnise, kei aiin ka sakawr sa hi sakei sawn a thlang zawk pawh a ni maithei," nui chung hian a han ti a. Sudden-a chuan, "Eitur thil tuihnai a hriat phawt zawngin nang ai hian i sakawr hi a thlang hauh lovang," awmze nei deuh hian a han ti ve ngat a. Nula chu a nui sak a, "Sakei kha i kah hmain, ka chuanna sakawr kha engvanga tiding nge i nih? Lo hlah palh ta hlauh la chuan.....," a han ti a.

Sudden-a chuan, "I tidik viau, mahse hlah ka inring chiahlo a ni," tih pahin an piah lam chu a va melh zeuh a. Nula chuan Sudden-a enna lam panin a va kal thuai a, mahse a lo kir leh vat a, "Min ngaidam rawh, khamah ka tla dawn hnai tih reng ka lo hrelo a ni. Thihna ngei tur lakah min lo hum a, chuti chung pawhin thiamloh chantir che ka tum vang hian ka zak ngawt mai. Engtia lawmthu hrilh tur che nge i nih......," a tih lai mekin Sudden-a chuan, "Ka pi, lawmthu sawi engmah a ngailo. Eng ni-ah emaw chuan min la pui ve maithei asin," a ti ta thuai a.

Nula chuan, "Puih theih hun che ka neih ve phawt zawngin ka tlanchhe lo tawp ang. Mahse, tunah hian tu lakah nge lei ka bat tih hriat ka duh a ni," a ti a. Sudden-a chuan, Jim Green-a a nih thu leh Keith-a hnuaia thawk a nih thu a hrilh ta a. Nula chuan, "Double K Ranch-a thawk i nih si chuan in ram chin i kal pel hla deuh hlek a ni lo maw?" a han ti a. Sudden-a chuan, "Mi thar ka la nia, henglai ram chinchang hi hriat ka chak a, helai hmunah hian ka lo chho ta mai a ni," a ti a.

Rei vak lo an la ding dun a, sakawr thu te an la sawi nual a, Nula chuan, "Ka kalsan tawh ang che. Min puih nasat zia hi ka hre reng ang," a ti ta a. Sudden-a chuan, "Kan inhmu leh ngai tawh dawnlo tihna em ni ang?" a han ti leh hram a. Nula chuan, "Ka hre bik lo le, tum lawkna pawh awm lovin mak tak maiin kan inhmu ta si a. Hetiang bawk hian kan la inhmu leh pawh a ni mahna," a ti a. Chibai buk tumin a kut a phar chhuak a, Sudden-a nen chuan chibai an inbuk a, Nula chu sakawra chuangin a kalsawn ta nghal a.

Nula kalliam hnu chuan, a hming a zawh theihnghilh tih Sudden-a chuan a han hrechhuak a, pawi a ti hle na a, engmah a sawt tawh chuang si lova, sakawra chuangin a lo kalna lamah a kir thla ve leh ta a. Thui vak lo a kal hnuin Frosty-a nen an intawk a, Frosty-a chuan, "Nichin deuh lawk khan Rifle ri ni awm tak ka hria asin," a han ti a. Sudden-a chuan, "I hre dik chiah, Sakei ka kap a nih kha," a ti a. Frosty-a chuan, "I kaphlum em?" a ti leh a. Sudden-a chuan, "Kaphlum e..... Henglai velah hian, B. D chhinchhiahna hmang an awm i hria em?" a ti a. Frosty-a chuan rang fahranin, "Hre lo, kan sakei khelah pawh chhinchhiahna engmah kan chhu ngai bawk hek lo," nui chung hian a han ti a. Sudden-a chuan, "In chhu ngai lo a ni ta ve ang, i khelah pawh chhinchhiahna engmah ka hmulo," a han ti ve thuai a. Ngawi rengin tlang karah chuan an chhuk dun ta zel a.

Thui fe ngawi renga an kal hnuin Frosty-a chu za deuh mai hian a nui chhuak ta phut mai a. Nui satliah mai pawh ni lovin, a khek hian a han khek leh nghal a. An chuanna sakawrte pawh chu an phu chiang hle aniang, an lim nghal zawk mai a. Sudden-a pawh chu a tla țhelh a, mahse, a sakawr chu a thunun leh thuai a, lungawilo zet mai hian, "I â ta emaw ni le? Engvanga chuti tehchiama han nui nge maw i nih reng reng le?" a ti a. Frosty-a chuan, "Thil hriatchhuah ka nei thut a ni," a ti a, a nuihza chu a la insum hram hram a. Sudden-a chuan, "A tirah nuihna chang hre si lovin, tunah hian i nuih a za leh hnuhnawh lawi si a ni maw?" hmusit awm fe hian a han ti a. Frosty-a chuan, "Nia mawle! B.D. i tih kha, Biangno duhawm i tihna a ni thei angem?" a han ti a.

Sudden-a chuan a chhan loh avangin amah vek chuan, "A hmel a țhain a pianhmang pawh a nalh alawm. Mahse, Sakeite pawh hi an nalh ve zer zawr hle a, nel vak chi erawh an ni lem lo," a ti leh ta thuai a. Sudden-a chuan a nghawnga zuk chul pahin a sakawr hnenah chuan, "Nigger, mi a thlauh chu ei ve duh miah suh, a pawi theih zia pawh hei, i hriatchian tawh khawp hi. A chang chuan rilru pangngai pu ve dawn dawnin a lang țhin a, mahse......," a tih lai mekin Frosty-a chuan, "Jim, ngawi mai mai teh. B.D. tih chu Belle Dalroy tihna a ni a, Hell City-a cheng a ni. Chuvangin, thil awmdan chu chiang takin min hrilh ve la a ni mai," a ti ta a.

Sudden-a chuan, Nula, Belle Dalroy-i nena an inhmuh dan zawng zawng kha a hrilh ve ta vek a. Frosty-a chu a han faifuk raih a, "Jim, he nula hi Setana nen hian inkawp tlat an ni asin. A hmel chu țha hle mah se, a rilru erawh chu kha tak a ni," a ti ta a. Sudden-a chuan, "Engpawhnise, ka chungah lawm hlein a lang a, Hell City kan tlawh hunah a la țangkai viau mai thei a ni," a ti a. Frosty-a chuan, "Kan te i ti elo? Min telh ve hlek suh. Hell City-a kal ai chuan a tak taka kal mai pawh ka thlang zawk," a ti ta a. (Hell - Hremhmun, City - Khawpui)

Hell City luhna kawngkhar lian vengtu chuan engmah sawi lovin, Belle Dalroy chu kawng a lo hawnsak thuai a. Belle chu khaw chhungah a lut a, Setana chenna hmun a pan ta nghal a. Setana chenna puk kawngka vengtu pawh chuan Belle chu a lo chhuah leh a, tin puk chhung, kawngkhar hnuhnung ber pawh chu Silver-a chuan a lo hawnsak thuai a, Belle chu hnunglam ațangin it deuh mai hian a thlir zui vung vung a. Belle Dalroy-i, pindan chhunga a luh lai chuan Setana chu puk tukverh bulah a lo ding a, "Sakawra chuan chu a nuam emaw chu?" a lo ti a. Belle chuan, "A nuam a, a nuam lo bawk," ti ngawtin a chhang a.

Setana chu a han inher a, Belle bawk chuan, "I bula ka awm lai chauh tal hi chuan i hmai hi tuam lo la ka ti ngawt mai," a han ti a. Setana chuan, "Ka hrilh fo tawh che kha, thu ka tiam tlat a ni. Chu lo rengah, ka tan țangkaina a awm tlat a ni. Thil hriat theih loh leh hriat ngai loh hian, mi mawlte a hip a ni. Thil țha berte pawh hi nin chang a awm ve thei tho asin. Ka ngaihdanin, nupate pawh hian hmai chu tuam vek se, nupa hlim lo hmuh tur an tlem phah sawt ngei ang," a ti ta a. Belle Dalroy chuan, "Jeff, chu chu i ngaihdan a nih tak tak zawngin, kei pawhin hmai ka tuam ve mai ang," nui chung hian a han ti a. Mahse, Setana chuan, "Nupa thu sawi nan chauh ka hmang a nih kha. Nupa ni ve lo thu sawi ka ni lo," a han ti a.

Belle chu a meng rum hle a. Mahse, Setana chuan a haider tlat a, a hnenah pawh chuan, "Vawinah khan khawnge i kal?" tiin a zawt ta daih a. Belle chuan, "Chhim lamah, mual pharh zau deuhah khan ka kal a, mual tawpah pawh kham sang deuh a awm. Ka kalna lai ram hming chu ka hre lo," a ti a. Setana chuan, "Battle Mesa-ah i kal a nih chu. Hmanlaiin, tuna kan chenna hmunah hian Hopi Indian ho an cheng țhin a, mahse Battle Mesa-ah chuan an va kal chhuak a, Apache hovin an lo that ta vek a ni. Helai hmunah hian awm reng chu nise, tumahin an khawih hauh lo tur, an ât vang chauh a ni. Helai hmun hi chu venhim awlsam tak a ni a, helaia awmte hi chu tuma luh chhuah theih chi kan ni lo," a ti a.

Belle Dalroy chuan, "Jeff, i ngaih a ngam hle a ni maw? Eng niah emaw zawng, Governor-in beihpui a la rawn thlak ngeiin ka ring tlat a ni," a ti a. Setana chuan, "Beihpui pawh thlak dawn mah se ka hre thovang, a thiltih tum dan zawng zawng nen. Chu chu ka hriat theih i ringlo a ni maw? Vawinah pawh khan i va kalna turah Sakei laka fimkhur turin ka chah ta lo che a, fimkhur a țul zia chu i hriat kha! Mikhual kha awm lo sela chuan tunahte hian Mesa kham hnuaiah khan i ruang chu Sihal leh sahel ei hovin an tlan noh noh tawh ang chu," a ti ta a.

Mak a tih em avangin Belle chu a meng phawk nasa hle a, "Min lo hmu a ni maw?" a han ti ha a. Setana chuan, "He pindan hi ka chhuahsan miah lo, mahse, i thihna ngei tur hmun pana i sakawrin a tlanpui lai che kha ka thlir reng che a ni. I tan, vanneihthlak takin, Cowboy sakawr chunga chuang khan i sakawr kha a rawn phih âwk a, nangmahni umtu, Sakei pawh kha a kap hlum ta a nih kha. Tlangval hmantlak pawl tak a ni.... Mister Green-a, Double K Ranch-a hnathawk kha," a ti ta a. Setana thil hriat chian zia chu a ngaihtuahin Belle chuan mak a ti em em a, a mah tak tak hi a kal chhuak lo tawp ang tih Belle chuan a ring tlat bawk si a, chuti chung pawha thil engkim a lo hre thei mai chu Belle tan thil mak a tling a ni.

Setana bawk chuan, "I chanchin engmah i hrilh em lovang chu maw?" a han ti leh a. Belle chuan, "I thei alawm, chungte pawh chu i hre vek lawm ni?" a ti deuh hlak a. Setana chuan, "Hre vek e, thlah che a tum pawhin i duh lo a nih kha, I fing hle mai. Ka zawhna chhan che chu.....," a ti hman chauh va, "Dawt ka sawi dawn leh dawn loh hriat i duh vang lek a ni maw?" a lo ti thuai a. Setana chuan, "Ni chiah e, Silver-a chauh lo hi chu tumah ka ring lo reng reng a ni. Silver-a hi chuan min phatsan aiin thih pawh a thlang zawk ang," a ti a. Belle chuan, "Silver-a hi chu mahni rilru pawh hman nachang hre lo, ramsa ang chauh a ni," a ti a.

Setana erawh chuan, "I ti dik viau, mahse, tunah hian thu chu pe ila, nang pawh hi a pawtsawm nghal vek mai ang che. Tunah chuan, he mikhual Green-a hnenah hian ka duh ang taka lawmthu ka hrilh theih nan, thil ka ruahman a ngai ta a ni," a han ti a. A hmelah erawh chuan lawmthu sawi a tum loh zia chu a lang chiang hle a. Amah vek chuan, "Tun chinah chuan mahni chauhvin i vak chhuak tawh tur a ni lo, i tan a hlauhawm lutuk," a han ti leh a. Belle chuan, "Jeff, heta awm reng mai hi chu a ninawm em a, ka ngaihdanin....," a ti hman chauhva, Setana chuan, "Lungina awm ang chiah a ni' tih i tum a ni maw?" a lo tih khalh a, Belle chu a sen țawn țawn mai a, a ngawi ta daih a.

Zanin chu a tawi deuh maithei a, in lo hrethiam dawn nia. A bu ami, a bung dah dan ang anga dah tawp hian a fuh zawkin ka hria. A changin a sei deuh anga, a changin a tawi deuh anga. Chuan, advertistment link khu in lo click hram hram dawn nia aw...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:26 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 9
(Rozami Pachuau)

Kar khat lai a ral tawh hnuin tlai khat chu Sudden-a'n a ipkhai a phawrh a, a lehkha pakhat a bo tih a hrechhuak ta a. A lehkha bo chu Wanted lehkha, amah Sudden-a man thei apiang hnena Dollar 500 pek tiamna leh, chu lehkha chu Texas ram Fourways khaw Sheriff chhuah a ni nghe nghe a. Chu lehkhaah chuan Sudden-a sakawr awmdan hmangte, amah Sudden-a pianhmang leh hmel landante pawh a inziak vek nghe nghe a. He an lehkha chhuah hi rei deuh tawh mah se, Sudden-a hmel nen an la tehkhin phawt chuan amah Jim Green-a tia inchhala hi Sudden-a tih mite'n an la hre thei dawn tho a ni. Chu chu hre rengin Sudden-a chuan an pu Keith-a chenna in a pan ding nghal a.

Sudden-a, inchhung a lo luh veleh Keith-a chuan, "Buaina enge i neih le Green?" a lo ti thuai a. Sudden-a chuan, "Tunah rih chuan buaina engmah ka nei lo, tunge ka nih a, eng ang mi nge ka nih pawh hre lo khan min ruai nghal mai a.....," a tih lai mekin Keith-a chuan, "A tira ka ngaihdan kha engmah ka la thlak chuang lo," a lo ti thuai a. Sudden-a chuan, "Chanchin thar engpawh lo hria ni la, i mi ngaihdan lo thlak miah lo turin ka ngen duh che a ni. Lehkha an rawn entir maithei che a, lehkhaah chuan tu emaw niin ka lang a, ka ni reng bawk a, i lakah hian a tawp thlengin ka rinawm dawn tih ka hrilh duh che a ni," a ti a.

Keith-a chu a ngawi vang vang a, Sudden-a chu a han melh a, a hmelah chuan danglamna a hmu bawk si lova. Chutah, "Green, i thil ngen chu a mak hlein ka hria," a han ti a. Sudden-a chuan, "Ni e, thil namai lo tak a ni," a ti ve mai a. Keith-a chuan, "A nih leh i duh ang chuan tih ka tum ang. I tunhma nun chu keini lo lungkham tehchiam tur a awm ka hre lo. Sheriff ten an lungkham viau a nih ngawt loh chuan," a ti a. Sudden-a chuan, "Ka lawm e, ka pu," a ti a, a chhuak ta a.

Sudden-a kal tâ chu Keith-a chuan a thlir zui reng a, thothang țha deuh maia a pen thauh thauhte chu a hmuhin, "A kal dante chu Keite ang mai niin ka hria... tunhmain eng thil tak lo ti tawh țhin ang maw? Tum nei lova vak vel mai mai chu a ang thei chiahin ka hre si lova" a tih rilruk lai takin Langley-a a lo kal thut a. Keith-a chuan, "Setana chanchin thar report tur i nei em?" tiin a lo zawt thuai a. Langley-a chuan, "I mi mawl rawih thar, Green-a ka ni inti khan hei hi a thlauh palh a, en ve teh reng, i beng verh zawng tak a niin ka ring," a ti a. Sudden-a manna tura wanted lehkha chhuah chu a pe ta nghal a.

Ngun taka a chhiar hnuin Keith-a chuan, "Hei hi amah a nih si chuan, engvanga keng zel nge a nih?" a han ti a. Langley-a chuan, "Heng Killer ho hi chu chapo tak an ni. Green-a hi Sudden-a a ni ngei ang tih chu rinhlelh rual a niin ka hre lo. He Sudden-a hi Texas rama a chet vel laiin, Turvey-a pawh Texas-ah a awm ve a, man tum an tam em avangin Sudden-a chu a tlanchhe ta a ni. Sudden-a tak hi chu Turvey-a hian a hmu lova, mahse, a țhianpa Sudden-a hian a thahsak a, Sheriff leh a hote'n Sudden-a chu an um ta chiam a niawm e," a ti a.

Keith-a chu a inngaihtuah nasa hle a, nichin lawka Green-a'n a lo hrilh lawk kha tunah hian a lo thleng dik ta ni ngeiin a hria a. Green-a khan, he Wanted lehkha hi a hloh tih a hriat veleh amah, Keith-a hi a rawn hrilh a ni ngei ang tih pawh a ring tlat bawk a. Langley-a hnenah chuan, "Engvanga helai ramah hian lo kal nge ni a i rin?" tiin a zawt ta a. Langley-a chuan, "Hell City-a kal a tum a ni phawt ang. Mahse Roden-a nen an intihbuai tak avangin, Hell City-ah chuan tlatlum vak dawnin a inring lo anga, chuvangin, nangin hna i lo pek tak si-ah chuan lawm takin a pawm ta nghal mai a niin ka ring," a ti a. Keith-a chuan, "Thil chhut chhuah i thiam kher mai," a han ti a.

Langley-a chuan, "Ka chhut dan hi a dik ngei ngei ang. Tin, i mi rawih lai hian enthlatu angin Setana'n lo rawih leh chhawn a duh ngeiin ka ring tlat a ni," a ti ta zel a. Keith-a chuan, "I tidik maithei," a ti a. Langley-a chuan, "Ka tidik teh meuh ang. Chuvangin a pawimawh ta ber chu, he pa hi engtia tih nge i tum dawn tih hi a ni. Kei chu ni ila, Ranch ațang hian a rang thei ang berin ka hnawtchhuak nghal ang," a ti ta a. Keith-a chuan awmze nei deuh mai hian, "Ama phalna kan lak hmasak theih phawt chuan, hnawh pawh kan hnawtchhuak thei mai ang chu," a han ti zet a.

Amah vek chuan, "Tak taka, Green-a hi Sudden-a a nih i ring a, a lo nih tak tak si chuan kan hmelmate lamah a țang ang tih a hlauhawm em em zawk a ni. Kan kianga a awm phawt hi chuan amah kan enthla thei em em zawk ang. I thil hriat hi midangin an hre ve em?" a ti ta a. Langley-a chuan, "Tumah dang ka hrilh lo, mahse, Turvey-a'n a lo sawi darh mai thei," a ti a. Keith-a chuan, "A sawi darh tawh a nih chuan tih leh ngaihna a awm tawh lo a ni mai. Green-a hnenah khan a tunhma nun i engto loh thute hrilh la, kei phei hi chu a chanchin engmah hre ve lo angin min sawi dawn nia. Homer-a nen inkawp tir reng la, diklo deuh hleka a chet vaih chuan, a hotu i ni miauva, i thu thu le, mahse i chesual palh ang tih ka hlau hle mai," a ti a.

Langley-a kal hnu chuan Keith-a chu a inngaihtuah nasa hle a. Green-a hi Sudden-a a ni ang tih chu a ringnghet tlat a, ama chanchin an sawi chu a dik ang tih thu kha Green-a ngei khan a lo sawi lawk tawh bawk si a. Sudden-a anga Outlaw hmingthang, Hell City-a kal tum a nih si lohva, heng laia a lo awm ve ngawt mai hi Keith-a chuan hriatthiam har a ti ber a ni.... 'Steve-a khan min hlauhthawnpui viau a, a ngaihdan kha a dik zawk pawh a ni maithei, mahse ka ring thei tlat lo,' a ti rilru a, a rilru chu a sawi chhuak ta hial a.

Chutih lai tak chuan, "Engmaw i rin theih tlat loh chu? Hmar lamin chhimlam an hneh zawk tih maw i rin theih loh, an hneh asin, keipawh ka tel ve ngei alawm," aw ring deuh mai hian a rawn ti a. Keith-a chu a ding thuai a, "E, Martin Merry, lo lut teh, ka bawng pali i ruk thute ka lo hre nual asin," a han ti a. Merry-a chuan, "A man pe tur chein keimah ngei ka lo kal a nih hi," a ti a. An ti ti dun luam a, chutih lai chuan Joan-i pawh a lo lut ve a, "E, Mister Merry, i lo leng a ni maw? I aw niin ka hre reng a ni," a han ti a. Merry-a chuan, "Mi thar, hmelțha deuh in neih avang maiin, 'Mister' ti kher zawngin min ko lo tawp la a ni mai," a han ti a, an infiam zui zel a. Keith-a chuan, "Inhau inhau teh suh u, ka ril a țam riau mai. Joan, i hmangaihna Green-a pek i tum tak tak hmain ka thil hrilh tur che hi ngun takin ngaithla hmasa phawt teh," a han ti a. Tichuan, Green-a chanchin a hriat thar zawng zawng chu a sawi chhuak ta vek a.

Twin Diamon Ranch neitu Merry-a chuan, "Green-a chu Gunman maw a lo nih? Sudden-a hming chu hre fo țhinin ka inhria. Engtia tih nge i tum dawn le, Ken?" a ti a. Keith-a chuan, "Amah enthlak rih phawt ka tum a, thil tihsual a tum lo ni a ka hriat phawt chuan Hell City hi phin darhtir vek ka tum dawn a ni," a ti a. Merry-a chuan Joan-i chu a han melh zauh a, Joan-i hmel chu a dur nasa hle a, a riru hah chhan awm pawh Merry-a chuan rindan a nei nghal mai a, Keith-a hnenah chuan, "Hell City a phin darh dawn a nih si chuan a tihdan kawng khat chauh a awm, kawng dang thlan zawk tur reng a awm lovang. Green-a chuan Jeff-a chanchin hi a hre ve tawh em?" a ti ta a. Keith-a chuan, "Aw" ti chauhvin a chhang a, a chhanna chu a bung tâwk bawk a, chu lam chu an sawi zawm ta lo reng reng a.

Bunkhouse chhunga Cowboy dang ten amah an melh deuh hrek hrek dan ațang pawhin Sudden-a chuan thil fel lo tak a awm a ni tih chu a hre thei nghal a. Wanted lehkha a hloh kha tu ber emaw chuan a vawrh darh nasa hle a ni tih pawh Sudden-a chuan a hre thei nghal mai a. Langley-a'n a falin pawnah a ko chhuak a, an pahnih chauhva an awm dun veleh, "Kan puin min tir a, tu emaw ni, nang hi Texas ram outlaw, Quick,..... ni lo, Sudden-a niawmin kan pu hnenah an sawi che a, kan pu thin a rim takzet a, ban nghal tur chein min hrilh a ni," a ti ta chawt mai a.

Langley-a chu a daw a nih ngei Sudden-a chuan a ring tlat a. Mahse, hrehawm ti awm tak chungin, "Chutiang mi chu a lo ni maw? Ka chhuak nghal ang a, Black Sam-a'n min lo pui duhin ka ring," a han ti a. A rin ang ngeiin a thusawi chu Langley-a duh loh zawng tak a lo ni chiah a, chuvangin, "La ngawi rih teh. Thu i peih ran zia reng mai hi Sudden-a niawm tak zawng i lo nih reng hi. Kan pu chuan ban che chu a tum ngei a, mahse thil atthlak tak a nih tur zia leh, chhawrna tur che kan ngah zia kan pu chu ka hrilh a, nang hi ka țan ta che a, kan pu pawhin a rilru a thlak leh ta nghal mai a ni. Ka ngaihdan hi chu min țawmpui fo reng a ni," a ti ta a.

Sudden-a chuan, "I va ti lawmawm ve le, Steve, ka chanchin hi tu berin nge kan pu hrilh?" a han ti a. Langley-a chuan, "Ka hre lo, tu hnen ber ațanga hria nge a nih pawh kan pu chuan a sawi duh lo. Tu'n emaw a lo hre palh hlauh che a ni awm e," a ti thlarawk a. Sudden-a chuan, "Ka lawm ngawt mai, ramdanga insawn chu ka hreh viau asin. Kan awmna hi Ranch nuam leh țha pawl tak niin ka hria," a ti a. Langley-a chuan, "Jeff-a'n min ho phei sela chuan, Ranch hi tun ai daih hian a nuam zawk ang. Kan zinga țhenkhatte hi chuan, kan pu Jeff-a'n min ho leh se kan ti takzet a ni. Kan pu Keith-a hi chu a tar tawh em a, a chhaw sâwt ngawt asin. Ani hi a thih hlauh phei chuan hmeichhe thuhnuaia awm chu tumahin kan duh lo," a ti ta zel a.

Sudden-a chuan, "Kei pawhin ka duh bik lo tawp mai. Engpawhnise, Jeff-a chu sual i ti tehchiam lo a ni maw?" a ti a. Langley-a chuan, "A rothap zia chu phat chi rual zawng a ni lo, mahse hruaitu tling tak leh thilphal tak a ni. Ka thusawi hi awih mai turin ka beisei ngam lo che a, mahse, min rinhlelh zawngin amah chu va hmu ngei la a țha ber ang," a ti a. Sudden-a chuan, "Hell City-ah chuan lawm ka hlawh vakin ka ring lo," nui chung hian a han ti a. Langley-a chuan, "Chu lam chu ngaihtuah buai duh vak suh. Amah hmu tura kal i nih phawt zawngin tumahin an lo tibuai ngam lovang che," a ti a. Sudden-a chuan, "Jeff-a chu i hrechiang hle a ni maw?" a ti ta zel a.

Langley-a chuan, "Ka hrechiang khawp asin. Naupang te a nih lai ațang tawhin he Ranch-ah hian kan inzui tawh țhin a, zui leh ngei ka la tum tlat bawk a ni. Green, thil pakhat ka hrilh ang che, a tirah khan ka ngaina vak lo che a, mahse tunah chuan ka rilru ka thlak tawh a ni. Chuvangin nang nen hi chuan kan inhrethiam dun tawh khawpin ka hria. Ka thu hrilh che kha ngun takin ngaihtuah la, Setana chu hmuh i duh phawt chuan a hmuh theih dan kawng ka zawnpui thei ang che. I hrethiam em?" a ti a. Sudden-a chuan a hrethiam kher mai. He Foreman, Langley-a hian a thawhna pa Keith-a hi phatsan a hnial miah lova, Keith-a paihthlaka, a aiah a fapa Jeff-a chu dah a duh a ni tih pawh Sudden-a chuan a hmu tlang nghal vek a ni. Chuvangin thu tam pawh sawi tawh lovin, Langley-a nen chuan an ințhen ta thuai a.

Rei vak lovah Sudden-a chu Bunkhouse chhungah chuan a va lut leh a. Cowboy hovin amah an lo endan chu a lo dang leh hman daih tawh a, Langley-a khan thu engemaw tak a lo sawi hman a ni ang tih Sudden-a chuan a ring mai a. Turvey-a chuan, "Green, Texas ram ațanga lo kal niin an lo sawi che a, Texas ram chu nuam tak niin ka hria, mahse, Sheriff an tam hle a, chu chuan a nawm tur angin a ti nuam lo chauh a ni," a lo ti a. Sudden-a chuan, "I lo awm hrep tawhna ania, i hrechiang ngawt ang chu," awmze nei fe hian a han ti let ve ngat a. Cowboy ho chu an nui ta ham ham a. Turvey-a chuan, "Texas ramah ka awm tawh tih tu'n nge hrilh che?" a han ti a.

Sudden-a chuan, "Texas ram chanchin hrechiang awm taka i insawi avangin ka rin thuin ka sawi ve mai a nih kha, Rouge-a ho nen chuan in inkawp em lovang chu maw?" a ti ta daih a. Turvey-a chuan, "Rouge-a i tih chu a hming pawh ka la hre ngai lo. Rouge-a chu i țhianpa em ni?" a ti a. Sudden-a chuan muang fe mai hian, "Rouge-a chu sual lutuk tak mai hi a ni ve a, mahse amah ringtute lakah chuan sual lo tak a ni thung, amah aia sual hi ka hmu tam tawh khawp mai. A puakruk kah thiam zia erawh chu sawi tham a tling a ni," a han ti a. Chu veleh Turvey-a chuan, "Mai mai a, Rouge-a tluka themtlaw hi an vâng viau ang. Kan pindan bang pawh hi kap dawn se, pindan chhungah hian a awm a nih ngawt si loh chuan a hlah thovang," a ti ta a. Green-a thangah a awk tih a inhre leh thuai a, mahse a sâwt tawh chuang si lova.

Sudden-a chuan, "Kei aiin Rouge-a chu i hrechiang zawk a nih dawn chu," a ti ta a. Turvey-a chuan, "Mi sawi ka hriat ka sawi chhawng ve mai mai ania, amah tak chu ka la hmu ngai miah lo," a han ti leh hram a. Mahse Lazy-a chuan, "A chanchin pawh la hre ngai lo niawm takin, 'a hming pawh ka la hre ngai lo' i tih tawh kha," a lo ti ve ta si a, Turvey-a chhan ngaihna hre lo chu a ngawi ta a. Sudden-a chuan Turvey-a chu hriatthiam harsa a ti hle mai a, Rouge-a hote zinga tel ve a nih leh nih loh pawh chu chiang takin a hre thei bawk si lova, helai hmunah hian eng ti turin nge a lo awm ve tih pawh Sudden-a chuan a ngaihtuah zui ta zel a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:27 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 10
(Rozami Pachuau)

A tuk zingah chuan Sudden-a chuan a bungrua a hai lui leh ngat a, wanted lehkha chu a la hmu chuang lova. Hman duhna a neih a rin avanga chu wanted lehkha chu keng a ni reng a ni. Tunah hian a duhna ang takin an hmang ta tho bawk a, hmu leh ta lo pawh ni se pawi a ti lem lo a ni. A sakawr zin bel tura sakawr huang a pan lai chuan Keith-a nen an intawk a. Keith-a chuan, "Homer-a nen in inkawp thei viau niin ka hria a, inkawp zui zel turin Langley-a hnenah pawh ka sawi sak tawh che kha," a ti a, thudang engmah sawi lovin a kalsawn leh ta mai a.

Keith-a chezia chu Sudden-a chuan mak a ti hle mai a. 'Langley-a khan dawt min hrilh a nih loh vek pawhin Keith-a hian engmah hre lo anga lan a tum a ni phawt ang. Engpawhnise, min ring ngam tawh vak lova, ka chevel min en thlithai turin Frosty-a an ruat tih chu a chiang a ni. Frosty-a tehreng pawh hi khawiah nge a awm le?' ti rilru neuh neuh chungin a sakawr zin chu a phah a, a phuarna hrui a pawh mar mek laiin, "I ban phar rawh," hnunglam ațangin mi pakhat hian a rawn ti a, Sudden-a hnungzangah chuan puakruk niawm tak hian a lo hawlh a.

Sudden-a chu a han ding mar a, ban phar mai tum niawm tak hian a kut a han lek chho a, rang deuh mai hian a han inher thut a, a hnunga mi pakhat lo ding chu a pawm chawt a, an pahnih chuan an tlu dun ta a. Sudden-a chu a chung zawkah a țang hlauhva, a bawhbeha chu a hmuh veleh Sudden-a chu a tho leh thuai a, a kawra vaivut kai beng fai pah chuan, "I â lutuk, khatiangtea i rawn tih, i ringruh kha ka elhtliak palh anga sin," a ti ta a. Frosty-a pawh chu a tho ve thuai a, la thaw hap hap chung chuan, "I chet ran dan reng mai hi 'Sudden-a' tih awm reng i lo nih ngei hi," a han ti a.

Sudden-a chuan, "E, i lo hre ve tawh a ni maw?" a han ti a. Frosty-a chuan, "Turvey-a a kamtam em a, ka hre vek tawh alawm," a ti a. Sudden-a chuan, "Turvey-a chuan kan pu Keith-a a hrilh a ni maw?" a han ti leh a. Frosty-a chuan, "Ka hre lo, a lo hrilh tawh a nih chuan engvanga la ban lo che nge a nih?" a ti ta daih a. Sudden-a chuan, "Hell City-a ka awm aiin heta ka awm hi a duh zawk aniang," a tihsan mai a. Frosty-a chuan, "Kei pawh, chu chu ka rindan a ni. I kal tawh ang hmiang," a ti ta a. Tichuan an sakawr an buatsaih a, Ranch ațang chuan an chhuak dun ta a.

Thui fe ngawi renga an kal hnu chuan Frosty-a chuan, "Jim, ka awih thei lo tawp, an sawi anga misual i nih hi chu ka ring theilo," a tichhuak ta phawng mai a. Sudden-a chuan Frosty-a rilru chu a hrethiam nghal vek a, chuvangin, ama tihsual ni hlek si lova outlaw a lo nih dan zawng zawngte, amah man tuma Sheriff tam takin an um țhin dan zawng zawngte chu a hrilh ta vek a. Thil awmdan a hriat takah chuan Frosty-a chuan, "Jim, i vanduai hle mai, thil awmdan hi midang ka hrilh ve thei angem?" a han ti a. Sudden-a chuan, "Zep rih la ka duh zawk. Cowboy țhenkhat hian, Jeff-a'n Ranch hi nei kir leh se an duh zawk niin ka hria a, nang, chu chu i duh dan a ni ve em?" a ti ta a.

Frosty-a chuan, "Min ruaitu chu Keith-a hi a ni a, ka rinawmna pawh amah chauh hi ka pe dawn, ka țhiante zinga a tam zawk pawhin chu chu an duh dan a ni. Kan pu hi thinchhe hle mah se, a rilru chhungril chu a chhe miahlo a, kan zinga țhenkhatte hi chuan an hua pawh a ni mahna," a ti ta a. Sudden-a chuan thildang sawi tur pawh a la ngah hle a, Frosty-a chu thil tam tak hrilh loh țhaa a hriat avangin engmah dang a sawipui duh ta lo a ni. Reife an kal rual hnu chuan an ințhen a, an kal hrang ta a.

Mahni chauha a kal hnuin amah lo enthlatu an awm leh awm loh Sudden-a chuan a hriat loh avangin a fimkhur em em a, hmun biru lai zelah a sakawr chu a kaltir ngat zel a. Hla vak pawh a la thleng hman lo tihin sakawr dang pen ri a hre ta a, a sakawr chu hnimbuk phenah a dintir vat a, a lo nghak ta a, amah enthla turin Frosty-a khan a rawn zui ru ni ngeiin a ring a ni. Mahse, Langley-a sakawr chunga chuanga hnimbuk kar ațanga lo chhuak hi Sudden-a chuan a rin loh takin a hmu ta zawk a, Langley-a chu Coyote Canyon lam pan chuan a kal zel a, Sudden-a chuan a zui ru ta a.

Sudden-a'n Langley-a chu a zui zel a, an kalna ruam tawpah chuan mual awih chho deuh hi a lo awm a. Chulai hmunah chuan far thingte pawh a lo tam sawt hle mai a, Sudden-a chu mualah chuan thui fe a chhoh hnuin mual chhip zawl chu a chuang chhuak ta a. Chulai velah chuan thingbuk leh hnimbuk tak tak a lo tam tawh mai a, Sudden-a chuan Langley-a pawh chu a hmu thei ta lova, sakawr chik ri hriain chu ri lo chhuahna chu a piah deuh lawka thing buk piah lam ațanga lo chhuak ni ngeiin a hria a. A sakawr ațang chuan a chhuk a, ri lo chhuahna hmun chu kein a pan ta a.

Hla vaklo a kal hnu chuan hmun fai deuh lai chu a va thleng ta a. Thingkung pakhatah hian Langley-a sakawr chu a lo inthlung a, Langley-a erawh chu hmuh tur a lo awm tawh lo a. Sudden-a chu a han hawi kual vel a, Langley-a sakawr thlunna bul lawkah chuan khuarkhurum thuk hmel deuh mai hi a va hmu ta a. Khuarkhurum awmna bulah chuan thing pakhat hi a awm a, thingah chuan hruizen a inthlung bawk a, hruizen chu khuarkhurumah chuan a uaithla a. Khuarkhurum chu a thim em avangin engmah hmuh thei a ni lova, hruizenah chuan Sudden-a chu a uaithla ta a.

Sudden-a zuk țumna hmasa ber chu lung ker kuak, pindan anga siam hi ni maiin a lang a, a chhungah chuan thil a awm hnawk nuai bawk a. Bangkil sir pakhatah chuan leiverh ang mai hian a kaw phei hawk a, bang sir kuaah chuan khaw eng ni awm tak hi a lo chhuak a. Sudden-a chuan pindan chhung chu a han belchiang a, kailawn dang pawh a lo la awm ta fova, kailawnah chuan Sudden-a chu chhuk a han tum a, mahse mihring țawng ri niawm tak hi a hre ta a. Leiverh chu a sei vak lova, a tawp pawh Sudden-a chuan a thleng ta thuai a, khaw eng pawh a va hmu ta ngei a.

A hnuailam chu a zuk thlir thla a, kawtthler niawm tak, lungbang pahniha karcheh hi a zuk hmu a. Lungbangah pawh chuan tuna a awmna lai ang chiah bawk hian, puk niawm tak a inverh ve thluah a. Lei seh china puk an siamte chu chunglama mite ai chuan a lian zawk vek a. Tin, puk kawngka țhenkhatah chuan thinga siam kawngkharte pawh a invuah nual hlawm a. Sudden-a'n hnuailam a thlir reng lai chuan, lei hrula awm puk pakhat ațang chuan Langley-a chu a lo chhuak a, kawtthler chu a kân phei a, lungbang lehlama puk kawngka pakhatah chuan a lut leh ta thuai a. A kawr âwm a, Setana lem (Badge) a tar pawh chu Sudden-a chuan chiang deuh mai hian a zuk hmu thei nghe nghe a.

Tichuan, a sakawr thlunna lam panin Sudden-a chu a awmna hmun ațang chuan a chhuak ta thuai a. A khaw zuk hmuh chhuah chu Hell City a nih ngei a ring a, tin, wanted lehkha pawh kha Langley-a chuan Setana kutah a pek ngei pawh a ring bawk a. Chu chu a tir ațanga a rawn ken chhan tak pawh a nih avangin, wanted lehkha Setana kuta a awm ta chu Sudden-a chu a lawm em em zawk a ni. Tin, a thil hmuh chhuah pawh hi, Hell City a zuk luhna turah chuan vengtu tu emaw tal chu an awm a ring bawk a. Mahse a hun a lo thlen phawt hma chuan, vengtu an awm leh awm loh chu Sudden-a chuan a lungkham teh chiam lo a ni.

Double K Ranch Foreman, Langley-a chuan a mi zawna chu a va hmu ta ngei a, ani chu Silver-a nen pindan pakhatah an lo awm dun a. A mitmeng, a hmai tuamna kara lo lang chu a hmuhin Langley-a chuan tunhma zawng aiin a thip ta riau hian a hria a. Setana chuan Langley-a chu țhutna lo kawhhmuh pahin, "Eng ti turin nge i lo kal?" a han ti a. Langley-a chuan, "I hna thawk turin mawle, hei, ngun takin han thlir ve teh," tih pahin lehkha phek, a ipte ațangin a phawrh chhuak a, setana chu a pe ta a.

Sudden-a thil bo, wanted lehkha chu Setana chuan ngun deuh mai hian a han thlek a, tah chuan, "He pa hi, Texas ram ațanga chah turin min ngen i tum em ni? Ka țhian, chu zawng a buaithlak lutuk ang. Chu lo rengah chah kher ngai lovin ama thuin a lo kal ve mai ang," a han ti a. Langley-a chuan, "Tunah hian a lo thleng reng tawh asin," a ti ta a. Setana chu thinrim awm deuh mai hian a han țhu mar a, "By Christmas, tumahin a lo thlen thu chu min hrilh si lova, a lo thleng dawn tih pawh min hrilh bawk hek lo. An chak lo.....," a tih lai mekin, Langley-a chuan, "Jeff, la ngawi rih teh, he thu hi kei chauh lo chuan tumahin an la hre ve lo. Sudden-a chuan, 'Jim Green' tiin a hming a invuah chawp a, tunah hian kan Ranch-ah a thawk ve a ni," a ti ta a.

Setana chuan, "E, kha kha maw? A chanchin sawi tur enge i neih?" a han ti a. Langley-a chuan, "He Sudden-a hi chhawr nahawm tak a ni ang. Scar-a leh a hote a sawisak dante kha i hria anga, bawng khela chhinchhiahna chhutu Mexican pahnihte kaphlumtu pawh kha Homer-a leh Sudden-a bawk hi an ni. Kan pu Keith-a lahin a ngaina viau niin a lang si a, chuvangin i thu hnuaiah i dah theih chuan a țangkai thei viau ang," a ti a. Setana chuan, "A rilru leh ngaihdan hriat tumin Sudden-a chu i dek chhin tawh reng em?" a ti a. Langley-a chuan, "Dek chhin tawh e, i hote zinga tel ve turin ka thlem chiam tawh a, mahse a 'aw' nghal mai lem lo, awlsam taka thlem thluk chi niin a lang lo, mahse nang hi chuan i thlemthlu thei thovang," a ti a.

Setana chuan, "Sudden-a hian i pawi enge a sawi?" a ti ta thut mai a. Langley-a chuan Setana mitmeng chu ngun deuh mai hian a han en a, a rilru, a ngaihtuahna chhungril ber pawh a hmu tlang vek thei hialin a hre ta a, nuamlo ti deuh tak chungin, "Ka pawi engmah a sawi ka hre lo, amah hi huatna hranpa engmah ka neilo," a ti ta rawk a. Setana chuan, "Min hmu turin a lo la kal ve mai ang... a ngam phawt chuan," a ti a. Langley-a chuan, "E, chona anga a ngaih phawt chuan rawn hmuh che chu a tum ngei ang le. A lakah hian fimkhur taka chet a ngai a ni, Cowboy naran ang mai a ni ve lo," a ti ta a.

Setana chuan, "Ka duhdan ang takin a chungthu ka la ngaihtuah ang. Taka, bawng, kum thum vela upa ka la duh belh dawn a, lak mai theih turin lo ruahman ang che. Hei, i hlawh tur chu, I hlawh hi phu tawk turin thawh zel tum ang che," a han ti deuh ngat a, dawhkanah pawisa a dah chhuak nghal bawk a. Langley-a chuan pawisa chu a la a, heti khawpa amah hmusittu Setana chu vawm let nana hman a chak rilru hle a, mahse a ngam bawk si lova. Pawnah a chhuak a, Silver-a chuan kawngkhar a va hawnsak a, a khar leh thuai a, pindan chhungah chuan țhen deuh vur vur chungin a lo lut a.

Setana chuan, "Silver, enge i nuihzat deuh ber?" a lo ti a. Silver-a chuan, "Chief, tumah danglam bik an awm lo, an in ang vek niin ka hria. Mahni induhtawk, chapo leh hawi sang fein i pindanah hian an lo lut a, thuhnuairawlh leh meikhupin an chhuak leh ziah a ni. Mi i thunun theih dan hi mak ka ti a ni," a ti a. Setana chuan, "Mi chunga thuneihna hi ka pianpui ve a ni. He Gunfighter, Sudden-a thunun tura ka sawizawi lai hi naktukah i hmu mai ang," a ti ta a.

Setana rin ang ngawtin a tuk zingah Sudden-a chuan Hell City chu a tlawh ta mai bik lo. Double K Ranch a va thlen leh hnuin Langley-a chuan chona ang ni lovin, Sudden-a hnenah chuan, "Setana'n hmuh che a chak ngawt asin," tiin a hrilh ta zawk a. Ngaisang awm lo zet hian Sudden-a chuan, "Ka la inngaihtuah ange, eng niah emaw chuan ka va la tlawh ve mahna," a ti duh lek chauhva. Langley-a chuan, "Inngaihtuah rei lutuk suh, Setana hian dawhtheihna a nei vak lo hle ania," a han ti leh hram a.

Sudden-a chuan rum deuh mai hian Langley-a chu a han melh a, "Kei pawhin dawhtheihna hi ka ngah vak bik lo asin. Hmai pawh tilang ngam lo, rukru hmaa inlan tur hian ka hmanhmawh peih hlei nem," a ti ta a. Langley-a chuan, "A hmaa i din hunah chuan i țawng a la nem ve zat mai ang," a han ti a. Sudden-a chuan, "A ni maithei, mahse min hmu tur chuan a nghah rih a ngai ang. Keima duh hun takah amah chu ka la hmu ang," a ti a.

A sawi ang ngeiin ni tam fe a ral hnuah chauh Hell City panna kawng zawhin Sudden-a chuan tlangpanga kawng invet chu a zawh chhova. Kawng sir lehlam chu kham awih bung vut mai hi a ni a, lehlam lah chu lungbang a ni mai bawk a. Hell City luhna kawngkharpui chu a han thleng ta hram a. A thlen veleh kawngkhar chu a lo inhawng nghal a, mi pakhat Rifle keng hian, "Sudden-a i ni em?" tiin a lo zawt nghal chawt mai a. Sudden-a chuan, "Chu chu mi tam takin min kohna a ni," a ti a.

"Nang hi chu chhuah tur chein thu min pe a, mahse i muang lu deuh mah a ni. Kan chief hian innghahtir a duh lo teh asin," a ti a. Sudden-a chuan, "Chuti a ni maw, kei pawhin ka duh bik hlei nem, tunah pawh hian min chelh ding rei lu deuh tawh mahin ka hria," a han ti a. Amah vek chuan, "Ka muan chhan hi i pu pawh ka hrilh.......," a tih lai mekin kawngkhar vengtu chuan, "Hrilh lo hram rawh," a ti ta thuai a, Sudden-a pawh chuan a kal pel ta nghal a.

Sudden-a chuan hmannia, Langley-a luhna kawngka zawn kha a va thleng a, a kawt laiah chuan mi pathum, țawp fahrana inthuam, hmui leh khabe hmul buk tak leh lukhum, kun deuh maia khum hi an lo ding khawm a. Sudden-a chuan, "In pu khawiah nge a awm?" a han ti a. An zinga pakhat chuan engmah sawi lovin puk kawngka zawn chu a kut zungțangin a han kawk ringawt a. Sudden-a sakawr chu awt awm deuh mai hian a'n thlek vat vat hlawm a. Chu chu a hmuhin Sudden-a chuan, "Ka sakawr hi khawih lo hram ang che u. In khawih chuan..... a chil hlum nghal che u a ni mai. Ani'n a tihhlum loh che u pawhin keimahin ka that tho tho ang che u," a han ti a.

Pathumte chuan Sudden-a chu hmusit tih hriat ngawih ngawih hian an han thlek a, hmui ner nang nang chungin an zinga pakhat chuan, "Thu min han pe ngamtu chu tunge maw i nih hrep le?" a han ti a. Sudden-a chuan, "Ka hming chu Sudden-a a ni," tih pahin a puakruk pahnih a phawi chhuak nghal țhawt a, "Ban phar rawh u," tih pahin a vau zui ta nghal a. Sudden-a mitmeng chu an hmuhin a thu chu hnial chi a ni lo tawp tih an hria a, "Tlan rawh u," tih pahin outlaw pakhat pheikhawk keartui lehlam chu a'n kah thlaksak nawlh mai a, anni pathum chu hmanhmawh deuh maiin an tlanchhe ta a.

Mi pathumte chu an bo hman chiah tihin Sudden-a chuan puk kawngka chu a puakruk kawmin a'n chhu dawt dawt a. Silver-a'n kawngkhar chu a rawn hawng thuai a, inchhunga lut turin Sudden-a chu a hui a, an pahnihin an inzui lut ta nghal a. Pindan chhungah chuan Setana chu amah chauhvin a lo țhu a, lehkha hi tui awm deuh maiin a lo chhiar a, Sudden-a te pahnih lo lut pawh chu hre lo ang maiin a ngaihsak lo reng reng a. Sudden-a pawh chu Setana bulah chuan a va țhu a, a lukhum a han kuai dak a, muangchangin mei a zial ta a. Reiloteah Setana chuan a lehkhabu ken lai chu a la thla a, Sudden-a hnenah chuan, "Sudden-a i ni em?" tiin a zawt ta a.

Sudden-a chuan, "Chu hming chuan min ko țhin. Nang hi, Setana chu i ni ang maw?" a han ti ve a. Ani chuan, "Chu hming chu keima invuah chawp a ni, i va lo kal har ve," a han ti a. Sudden-a chuan, "I faifuk veleh, lo tlan mai tur ka ni em ni? Tu ui khawi mah ka ni hlei nem," a ti a. Setana mitmeng chu a danglam chuang lo na a, a hmui a han chip hmak dan ațang chuan Sudden-a thusawi chu a haw hle tih a lang chiang viau a. Thinrim insum tih hriat tak chungin, "Pawnah khan silai ri ka hria a, engtizia nge ni?" a han ti leh a. Sudden-a chuan, "I misual khawite zinga pathumin nun dan mawi an tlachham em a, ka'n zirtir anih kha," a ti a. Setana chuan, "Keimah min zawngchhuak turin em ni Arizona ramah hian i lo kal?" a ti leh ta zel a.

Sudden-a chuan, "Dugout khua ka lo thlen hma kha chuan i hming hi hriat pawh ka hre lo, khawthlang lamah chuan rukru rual naran hi chu an tam em a, thil thar leh maksakah pawh ka ngai hlei nem, ka vak vel mai mai a ni... hmun hrisel zawk zâwng turin," a ti a. Setana mitmeng chu a thip kher mai! Sudden-a hi chapo hlein a hria a, hmeh zawi a chak em em bawk a, a hnenah chuan, "Thil entir tur che ka nei a, i en zawh hnuah ka thusawi hi kan la chhunzawm leh dawn nia," a han ti a, Silver-a chu zaizirin a han bia a. Silver-a chuan chhuatphah chu a han phawk a, chhuatlaia luh thlakna kawngkhar lo invuah chu a hawng a, kailawnah chuan a chhuk thla ta a. Setana pawh chuan amah zui turin Sudden-a chu a han hui a, an pahnihin kailawnah chuan an chhuk dun ve ta nghal a.

An zuk luh thlakna pindan pawh chu Setana lo țhutna pindan ang chiah bawk kha a ni a, mahse, țhutthleng leh dawhkan hmuh tur erawh chu a awm ve lova. Bang sir lehlam ațangin khaw eng a lo lut thei a, pindan chhung chu a thim viau nghe nghe a. Kil khatah chuan pawnchhe dahkhawm niawm tak hi Sudden-a chuan a va hmu a, puanchhia emaw a tih chu a han rum hak a, chu veleh mihring a ni tih Sudden-a chuan a hre ta nghal a. Setana chuan, "A la dam maw? A țha e," a han ti a. A țawngka chhuak ațang ngawt pawh chuan khawngaihna a neih loh zia chu a lang chiang em em mai a, chuvangin, Sudden-a chuan, "Enge a tihsual?" a han ti a.

Setana chuan, "Arizona ram Governor hi i hre lo tawp ang maw?" tih pahin Sudden-a chu ngun deuh maiin a han melh a. A hmai tuamna awng kar ațanga a mitmeng lo lang chu thil hmuh nuam lo ber pawl a tling a ni. Sudden-a chu a han nui hak a, "Sheriff ho hi ka hriat phak chin an ni mai. Sheriff achin chunglam chu tumah hriat ka nei lo," a ti a. Setana chuan, "Arizona ram Governor hian min ngaihven em em a, a chungah ka lawm ngawt mai. Enthlatu pahnih a rawn tir tawh a, a rawn tirh hmasak zawk chu phum mai theih turin ka thawn kir tawh a, duhtawk ka ngah hunah chuan hei pawh hi ka la thawn kir leh dawn a ni. Langley-a'n puakruk kah thiam hle niawmin a sawi che a, chhin che ka tum a ni. Silver, han tungding teh," a ti ta a.

Silver-a chuan chhuatlaia mihring tlu chu awlsam deuh mai hian a han phih ding ta a, chutah zet chuan, Sudden-a meuh pawh insum harsa a ti kher mai. Chutiang khawpa mihring khawngaihthlak chu tunhma pawhin Sudden-a chuan a la hmu ngai lo. Chu pa kawr hak lai chu a țet chhe vek tawh a, a cher zia lah chu ruhkawl ang mai hi a ni tawh a. A ban leh a kete pawh chu a taksaah hrui thlunzawm ang maiin a uai zawi vek bawk a, thisen a neih tawh loh avangin a hmel pawh chuan minung hmel aiin mitthi hmel a ang tawh zawk a, a mit khurte pawh chu a thuk tawh em avangin luruha mitmu invuah ang chauh hian a mitmengte pawh chu a lang tawh a ni.

A thil hmuhin amah a tihhrehawm zia chu thup tumin Sudden-a chu a insum nasa hle a, pawisa lo tawp anga lan a tum hram hram a. Governor Bleke-a mi tirh hnuhnung zawk, Dolver-a chu tunah hian a hmu ta a, mahse a tlai lutuk ta a ni. Dolver-a hi ni engemaw zat chu a la dam maithei a, mahse a tan damchhuah leh chu beisei chi rual a ni tawh lo. Hreawm rapthlak tinreng tuarin a tawpah a la thi leh tho dawn a ni tih pawh Sudden-a chuan a hmu tlang nghal vek a ni. Chuvangin, thei inti awm taka a kutchhuak thlirtu Setana chu kah lirh nghal tawp mai a han duh deuh thut thut a. Mahse Setan-a hi Keith-a fapa a ni miau si a, amah hi lo thi ta pawh ni ngawt mah se, a thlaktu, a aiawhtu an lo chhuak leh tho dawn a ni.

Setana hi kaphlumin Hell City ațang hian nungdamin chhuak thei ta tehreng pawh nise, Sudden-a hian a thawh tur chu a la thawk zo lo reng reng a ni. Hell City-ah hian rukru ho chu an la khawsa zui zel tho ang a, hotu dang an nei leh dawn tho bawk si a. Chu chu hre rengin Sudden-a chu a insum hram hram a, Setana hnenah chuan, "A ke leh a bante hi, engti ziaa hetia zawi vek nge a nih?" a ti a. Remhria inti awm fahranin Setana chuan, "A khup ruh leh a kiu ruhte kan vaw tliak vek a ni, heti hi chuan harsa taka phuarbeh kher pawh a ngailo a ni. Governor chuan, tunah takte hian han hmu ve thei se ka ti ngawt mai," a ti a, Silver-a hnenah chuan thu a han pe leh a.

Silver-a chuan a veilamin Dolver-a chu a pawm ding a, a kut dinglamin a chhip samah a han kuai dak awrh mai a. Setana chuan, "Zawi zawia, inchi khat lek leka intihhlum thu an sawi hi i hre tawh țhinin ka ring. He pa hian nitin, inchi khat lek lekin a thlan a hnaih hret hret a ni. Hei a chal ațanga a chhipvir zawn thlenga kak chho reih hi i hmu em? Helai hi nitinin ka kap thuk hret hret zel a, eng niah emaw chuan a thluak ka la pawh ngei dawn a, chutih hunah chuan.......," awmze nei deuh mai hian Sudden-a chu a han melh a.

Dolver-a chu thei leh theilo hian a han meng chhuak țawk țawk a, tuihal dang ro tih hriat ngawih ngawih hian, "Khawngaih takin min kaphlum nghal rawh," a han ti a. A aw pawh chu a tham zo vek tawh a. Setana chu ngaihthlak hrehawm deuh mai hian a han nui a, "A dil pangngai bawk min dil leh ta," a han ti a. Pen li lai hnunglamah a han tawlhkir a, a puakruk a phawi chhuak a, a tin zawn a, vawi khat chiah a hmet puak a. Dolver-a na tuar chu a inthing nawk nawk a, a chhip kak tawh sa chu a lo thi chhuak leh ta a.

Themthiam inti awm fahranin Setana chuan Sudden-a chu a han melh a, "Hetiang hi alawm themthiam ka tih ve chu, ka țhian, puakruk paifual," a han ti deuh ngat a. Setana puakruk kah thiam zia chu ngaisang awm lo deuh maiin Sudden-a chuan, "I tițha viau, mahse he pa hi che ve theiin, a kuta puakruk hum ve chu nise.....," a tih lai mekin Setana chuan, "Ka kah ang khan i kap ve dawn em ni?" a lo ti thuai a. Sudden-a chuan, "Thei awm teh e, thil che miah lo kahte chu harsa hek lo," a lo ti a. Setana chuan, "A harsat loh chuan fiah ngat rawh," a han ti a.

Sudden-a duhthusam ang takin Setana chuan a sawm ta a, mahse a duhdan a thup theih nan, a thiltih tur chu ngaihsak awm lo deuh maiin Sudden-a chuan dar a han chhin ak a, a puakruk pakhat chu a phawi chhuak a, ngun deuh mai hian a han tin a, a hmet puak ta a. Dolver-a chal kak tak ațanga inchi khat vela hnuaiah Sudden-a puakruk mu chu a va lut a, Dolver-a chu a zawi nghal hnawk mai a, Silver-a pawh chuan a thlah thuai a, Dolver-a chu chhuat laiah chuan bawkkhupin a tlu ta thlawp mai a.

Setana chuan thinrim deuh maiin, "Mi â, fimkhur lo lutuk, i kaphlum tawh alawm, kahhlum ve nghal mai tur em maw i nih chu le," a han ti a. Sudden-a hrehawm ti lutuk chuan Setana vauna leh a thusawite reng reng pawh chu a hrechang tawh lova, mahse a inngaihtuah fim leh ta thuai a, Setana hnenah pawh chuan, "Ka lo themthiam fahran lo a nih dawn hi. Ka puakruk hian a kap hniam deuh tih ka lo theihnghilh leh țhin a ni. Mister, i lo themthiam takzet a nih hi," a han ti a.

Fakna ri a hriat avang leh Sudden-a'n thiam loh a inchantir avangin Setana thinrim chu a zuai leh thuai a, "Ka hote chuan, 'Chief' tiin min ko țhin asin," a han ti a. Sudden-a chuan, "I hote zinga tel ve chu ni ila chuan kei pawhin 'Chief' ti a koh che chu ka hreh lo. Mahse, tunah hi chuan i hote zinga tel ve ka la ni lo. Ruang bula awm reng hi thil nuamlo tak niin ka hria a, chhuahsan ila, thil awmdan tur i sawi zawm zel teh ang," a han ti a. Tichuan a khawngaih zawk avanga a nunna a laksak, Dolver-a ruang chu Sudden-a chuan a han melh leh zauhva, pindan chungnung zawkah chuan Setana nen an inzui chhuak leh ta a.

A tira Setana lo țhutna pindanah khan an han lut a, Sudden-a chuan, "Enge ti tura min duh le? Bawng ru turin em ni min duh ber?" a ti ta a. Setana chuan, "Bawng ruk hi chu Keith-a tihthinrim nana hmanrua lek a ni. Keith-a hi tihthinrima, beidawng, manganga siam zeta, chumi hnuah inhmachhawn ngeia kahhlum ka tum a ni," a ti a. Sudden-a chuan, "Keith-a chu i pa ngei niawmin an sawi si a!" a han ti a. Setana chuan, "A fapa ka ni tawh lo, min hnawtchhuak a, 'Ka fa hming pu tlak pawh i ni tawh lo, i hmel pawh hi ka hmu duh tawh lo' min ti a, chuvangin Keith-a hming chu chhawm tawh lovin hming dang ka invuah a, ka hmel a hmuh ngai tawh loh tawp nan, ka hmai pawh ka tuam ta tlat a nih hi. Mahse, 'By Christmas' ka ro luah tur chu min thaibo sak thei lovang, thil kalhmang chu i hre thiam tawh em?" a ti ta a.

Sudden-a chuan thudang tehchiam sawi lovin, "I ro luah tur ram saw, ram țha tak niin ka hria," a ti duh lek chauhva. Mak ti rilru fe hian Setana chuan Sudden-a chu a han en a, mahse Sudden-a hmelah chuan a rilru engmah a lo lang chhuak si lova, chuvangin, "Tunah chuan kan inhrethiam tawh bawk a, va kir leh la, Langley-a'n ka thupek a hrilh chhawng zel ang che. Hei hi hrereng ang che, Ka lakah i rinawm loh vaih zawngin min bum tumtute leh ka hmelmate ka nghaisak dan chu i mit ngeiin i hmuh tawh kha," a ti a. Sudden-a chuan, "Vau vang maia zam chhe mai chi ka ni ve lo, chuvangin a zam thei zawkte tan i vauna chu khek țha zawk rawh. Dam takin le," a ti a, pawnah a chhuak ta a.

Hell City a chhuahsan fel hmain Sudden-a thinrim rilru hah chu a han thaw hawk a, a rilru a siam nasat zia leh la chet nasat a tumzia chu a hmelah a lang chiang hle a ni. A lo kal chhan pakhat, a nunna chhanchhuah a tum, Dolver-a chu rei tak hreawm tuara thi leh tho tur a nih avangin Sudden-a hian a kaphlum ta a, chu ber chuan Sudden-a rilru a tina a ni. Chuvangin, 'Dolver-a dinhmuna ding kha ni ila, ka tih anga ti tur khan ka țhianțha ber chu ka beisei ngei ang. Ka tan, kawngdang a awm ngang lo a ni,' a ti rilru neuh neuh a, chu pawh chuan a rilru hahna chu a chhawk chuang miah lo. Chuti khawpa a thil tih hreh, ti lo thei lova siamtu Setana chuan a leibat a la rul tlingtla ngei tur a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:27 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 11
(Rozami Pachuau)

Joan Keith-i chuan, a sakawra țhu chungin a chhak lam tlang chu a thlir vawng vawng a, 'Khawilai berah khian emaw Hell City chu a awm a, chu khua chuan Jeff-a nun a tichhe vek tawh a, amah chauh pawh ni lovin, ka nun pawh a tichhe tel vek a nih hi,' a ti rilru neuh neuh a. Chutia a inngaihtuah lai tak chuan, "Ni e, a pawi ngawt mai, mahse, putarte hian mahni thu an duh lutuk a, khawngaihna an tlakchham miau si chuan," hnunglam ațangin mi pakhat hian a rawn ti chhuak ta phawng mai a. Joan-i chu a han lehhawi thuai a, a hnunglam ațanga lo kal mi pakhat sakawr chungchuang chu a hmu ta a.

Joan-i rawn betu chuan rawmawl senin a hmai a tuam a, a hmui chin hnuailam chauh a lang thei a. A chuanna sakawr dumte, a spur vuah, tangkaruaa siamte, a Cowboy thawmhnaw inbelte chu Joan-i chuan ngun deuh mai hian a han en a, chu pa chuan, "Joan, sakawr chungchuan i la thiam hle zel a ni maw? I sakawr pawh kha a hmingah 'Plute' ka sa a, a inhmeh ka ti ngawt asin," a han ti a. A țawngka chhuakte chu a nelawm loh ema a hriat avang leh a mitmengte pawh chu duhawm loh ema a hriat avangin Joan-i chu a ngawi reng a.

Chu pa bawk chuan, "Hmuh nuam min ti lo hle niin a lang a, hmanah chuan inkawm ngeih tak kan nih țhin kha," a han ti leh a. Joan-i chuan, "Tunahte hian la ngaina leh kawmngeih viau turin min beisei em ni? Ka hmelhriat, ka kawmngeih țhina kha i ni tawh lo. I lo danglam rapthlak ta em a nih hi," a han ti a. Ani thung chuan, "Nang pawh i lo danglam..... duhawm ta ngawt mai, hmanah kha chuan naupang duhawm tak i ni țhin a, tunah chuan nula duhawm tak i lo ni ta. Tun chinah chuan kan inhmu zing deuh ngei tawh tur a ni," a ti a.

Joan-i chuan, "Hetia, hmai thupa i intih danglamnate, i nundan țhalo takte hi i bansan si loh chuan kan inhmu thei tawh lovang. Jeff, i nundan hi i bansan thei angem? I pa....," a ti hman chauhva, Setana chuan, "Ani chuan min hua, thei sela chuan min man a, min khaihlum nghal a duh a ni. A duhna chu puitlin turin Texas ram ațangin Killer pawh a ruai tih ka hria, I duh ang chu ka tan thiltih theih a ni tawh lo. Ka chunga thil lo thleng, ka kâwng hi zawh zel lo thei ka ni tawh lo," a ti a.

Joan-i chuan, "I kâwng chuan khaihlumna hmunah hruai lut dawn che mah se, i zawh zel tho anga maw?" a han ti a. Setana chuan, "Ni e, mahse, khaihlumna hmunah chuan min hruai lut dawn lo. Heng lai mi mawl ho hian, mahni inthup a, hminglem invuaha, hun remchang a awm apianga hlawkna tlemte uma midangte rawk țhinah min ngai a ni. Sum leh pai ringawt hi engatan mah ka ti lo, sum leh paiin thiltihtheihna min pek erawh hi chu ka ngaisang a ni. Joan, danglam ta hlein min hria a, i hre dik e. Ka nihna dik tak hi ka hrechhuak tawh a, tum lian tak ka nei a ni," a ti a.

Joan-i thung chuan, "I thil tum hi a lo nep hle mai, Outlaw rual hotu, an Chief nih i lo tum a nih chu," a han ti a. Setana chuan, "Hei hi zawng thil lian zawk ka hmuh theihna tura rahbi hmasa chauh a la ni. Arizona hmar lam ram zau ber neitu ka nih hunah chuan, ka tunhma nunte hi chu theihnghilhin a awm vek tawh ang. Khawvel hian mi hlawhtling leh thiltitheite chu a ngaidam zo vek zel a ni. Mi hausate dinhmun chu nang ngei pawhin i hria alawm," a han ti a.

Joan-i chuan, "I ngaihdan chu thil atthlak ber a ni. Sawrkar pawhin......," a tih lai mekin, Setana chuan, "Sawrkar chu a la buai lutuk a, khawthlang lam hi a la ngaihtuah thleng phaklo. A ngaihtuah thlen hunah meuh chuan kei chu ka lo intinghet hman tawh dawn a, mi zahawm tak ka lo ni hman tawh dawn. Tuna mi hausa leh ran vulhtu lian ber berte pawh hian a tirah chuan bawngrukin bul an țan ve chauh bawk a ni. Tuna an ram luah lai ngeite pawh hi, anmahni ta tak ni lovin, an ruk, ta anga an chei ve mai bawk a ni. Kei pawhin ka chan tur dik tak Double K ram ațang hian bul ka țan ve dawn a ni," a ti ta a.

Joan-i chuan, "Double K hi Keith-a ram a la ni rih a, amah hi hrisel lo leh tar pawh a la ni bawk hek lo," a han ti a. Setana chu ngeiawm deuh mai hian a han nui a, "A vanglai tak pawh hian tawhsual a tawk thei asin," a ti a. A thusawi awmzia chu Joan-i chuan a hrethiam nghal vek a, thinrim hmaisen awp awp chungin, "Nangmah hringtu, i pa ngei a ni si a," a han ti a. Setana chuan, "Ni e, a fapa, a hming vuah tlak pawh ni tawh lova min ngaitu, ka thih hun nghakhlel taka thlirtu hi!" a ti a. Joan-i chuan, "Chu zawng, ka awih lo tawp mai," a han ti hmak a. Setana chuan, "Ka thusawi chu a dik a ni. Hriat theihna kawng ka nei a ni," a ti a.

Joan-i chuan, "Enthlatu, i spy rawihte hi i ring em em a ni maw?" a ti a. Setana chuan, "Tumah ka ring lo, ka hriat theihna chu keimah ațanga lo chhuak a ni. Mi mawl zawkte chuan dawithiamna, magic leh thiltih makahte an puh a, mahse thil lo thleng tur hriat lawk theihna, thilpek ka nei a ni. Tukin zingah pawh hian, hetah hian i lo kal dawn tih ka hre lawk vek a ni," a ti ta a. Joan-i chuan, "Chu zawng, thil theih loh tawp a ni. In ka chhuahsan dawn thlengin helama kal tumna hi ka nei lo reng reng. Tum lawk miah lovin ka lo kal a ni," a ti tlat a.

Setana thung chuan, "Chu pawh nise, ka hre lawk thova, hei hmu tur chein ka lo kal a nih hi. Hmuh che hi ka chak em em a ni. Kawng tam takah lo danglam tawh mah ila, kawng khatah chiah ka la danglam lova, chu chu i laka ka rilru put dan hi a ni. Tun thleng hian hmeichhe dang reng ka rilruah an la leng miah lo," a ti a. Joan-i chuan, "I thusawi chu ti ti tualleng ka hriat nen chuan a in ang lo kher mai," a han ti a. Setana chuan, "Dan pangngai angin ti ti tualleng hi chu a daw țhin a ni. Lungina tang ngei tur hmeichhe pakhat ka chhanchhuak a, mahse ani chuan ka rilruah hian hmun a nei lo. Joan, nang chauh hi a ni ka ngainat ni. Kan putara, mahni thu duha hi awmlo.....," a ti hman chauhva, Joan-i chuan, "Chutiangin i pa sawichhe suh," a ti ta hlar mai a.

Setana chuan, "A mak mang e! I thisen zawmpui, i pa tak tak pawh a ni miah si lova," a han ti a. Joan-i erawh chuan, "Ka tan chuan 'pa' a tling a, fanu in a pa a hmangaih angin kei pawhin ka hmangaih a ni. Jeff, hua che ni ta berin ka inhria," a ti ta a. Setana chuan Joan-i mitmeng te, a biang leh a hmui sen țha em em maite, a samzai, thliin a han chhem chet velte chu ngun deuh mai hian a en reng a. A rilruah chuan châkna țha lo tak a lo chhuak a, Joan-i hnenah chuan, "Chu chu i ngaihdan a ni a, mahse, a dik lo. Keith-a'n min hnawhchhuah lai kha chuan min ngainat ve em kha," a ti a.

Joan-i chuan, "A tirah khan lo ngaina ta teh reng che pawh ni ila, ka ngainatna che chu tunah hi chuan i tibo zo vek tawh," a ti ta a. Chuveleh Setana chuan, "Chu zawng, a ni theilo. Muhil angin, i mi ngainatna chu a lo chawl rih pawh a ni maithei. Vawi khat chauh pawh fawp che ila, i muhil lai chu ka kaitho leh ngei ngei ang," a ti a. Joan-i thin a sa phat mai a, "Teuh lo mai, nang, mahni pa ngei thah tumtu......," tih pahin kalsawn mai a han tum a. Mahse, Setana chuan a sakawr a kheng kal thut a, khing khatin Joan-i kawngbawrah a va kuah a, khing lehlamin a banrekah a vuan nghal bawk a, "Joan, tal vak tum teh suh, ka ta tur i ni, eng ni-ah emaw chuan, Double K ramah hian ro kan la rel dun ngei dawn a ni," a han ti a.

Joan-i chu a tal chiam a, mahse a tal chhuak thei mai si lova. Fawh tumin Setana chuan a bei nasa sawt hle a, Joan-i chu a sir lehlamah a thle vak a, a khing lehlamin Setana biangah a beng ta chawrh mai a. Setana thinrim chuan, "Enge min ben na vei chu le, i duh tak tak a ni maw? Ka'n .......," a tih lai mekin, "Lady kha thlah rawh, thih i duh loh chuan, tunah khan thlah nghal vat rawh," aw ngaihno bei lo deuh mai hian a rawn ti ta a. Setana chuan Joan-i chu a thlah vat a, amah betu chu hmuh tumin a han hawi let a, sakawr dum chunga chuang chu a hmu ta nghal a.

Sakawr dum chungah chuan Sudden-a chuan a puakruk kurkumah a kut zungchal a thil lut a, a puakruk chu a vaivir mawp mawp mai a, a puakruk vaivir ngawt chu ngaihtuaha, thildang ngaihtuah tel miah lo hian a lang lehnghal a. Setana chuan, "Tu'n nge lo inrawlh ve tura hrilh che?" thinrim deuh mai hian a han ti a. Sudden-a chuan, "A duh loh tawp anga hmeichhia chhanchhuak tur hian, tuman min hrilh kher ka ngai lo," a tihsan mai a. Setana chuan, "Chutiang thil a ni hlei nem. Ani nen hi chuan țhian hlui kan ni asin, kan ni lo'm ni Joan?" a ti a.

Joan-i chuan Setana zawhna chu chhan pawh a chhang duh lova, Sudden-a hnenah zawk chuan, "Green, i lo kal chu ka lawm tak zet a ni," a ti a. Sudden-a chuan, "Ka pi, Ranch in lam pan nghal la a țha ang. Tibuai leh tawh lo tur che in he rannung hi ka lo buaipui ange. Heng lai ram hi chu mahni chauhva kalna chi a ni lo, ramsa kawlh a tam lutuk," awmze nei deuh mai hian a han ti a. Joan-i pawh chuan, "A dik ngawt mai," a ti a, Setana chu melh pawh melh chhin duh eih lovin a sakawr chu a tlantir ta a.

Joan-i a liam fel chiah tihin Setana chuan, "I thiltih dan hi enge a awmzia? Ka lamah i țang nge min do?" tiin Sudden-a chu a chhuahchhal ta a. Sudden-a chuan, "E le, i lamah ka țang zawk mawle. Hna țha tak ka thawh sak che a nih hi. Tunah hian a landan chuan Keith-a hnuaia thawk ka nih hi. A fanuin puih a ngaih laia pui duh lova ka lo thlir reng siin Keith-a chuan eng chen nge min la ruai duh se i tih?" a ti ve ta thung a. Setana chuan, "Joan-i khan a hmu hlei nem che," a han ti hram a.

Sudden-a chuan, "Min hmu asin, nang i ni tih ka hriat theih hma pawhin in bul hnai teah ka awm hman tawh a ni," a ti a. Setana chuan, "Thil tidiklo palh pawh ni ila, hlawh ka pekte zinga mi hian ka dik lohna min kawhhmuh hi rem ka ti lo reng reng a ni," a ti a. Sudden-a chuan, "Chuti a nih zawngin kan inhriatthiamna kha ka hnuk kir leh e. Mi â, chhaw lutuk tan engkim chan huamin ka inpe palh a nih chu. Hmeichhe pangngaiin a ngaihdam theih loh tawp tur thil atthlak tak tih i tum a, ka lo dal che a nih chauh zawk kha," a ti ta a.

Setana chu a inngaihtuah vang vang a, Sudden-a thusawi chu dik a ti ve tlat a. Nula duhawmna khan amah hi a lo bual ât vang khan mawi lo takin a lo che palh tur, he tlangval hian a lo hum zawk a ni tih pawh a hrethiam nghal vek a. He tlangval hi chhawrna a la ngah tur zia a hre reng bawk a, chuvangin aw nem takin, "I thusawi chu a dik a ni. Joan-i hmelțhatna khan min bual ât avangin atthlak takin ka lo che palh a nih kha, pawi ka ti ngawt mai. Hmeichhe țanpui ngaite puih hi tihdan phungah i nei ve tawh a nih hi mawle," nui chungin a ti a, Belle Dalroy-i chanchin kha a sawi nghal bawk a.

Sudden-a chuan, "Miss Dalroy-i khan a hrilh che a ni maw?" a han ti ta thuai a. Setana chuan, "Hrilh kher ka ngai lo. Hell City chhuahsan miah lo pawhin Miss Dalroy-i, i chhanchhuah lai kha ka hmu thei vek tho che a ni," a han ti a. Sudden-a awih lo hmel chu a hmuhin amah vek chuan, "Midangte hmuh theih loh, hmu thei tlat an awm tih hi i ring lo a ni maw?" a han ti leh thuai a. Sudden-a chuan, "Chutiang mi chu ka hmu tawh țhin. Chutiang mi chuan, in hnamhnawihna an ngah lutuk a, an tluk chhiat phah chawk," a ti a. Setana chuan, "Ka thusawi dik zia chu pawm turin ka tilui thei lo a che. Mahse, thil sawi lawk duh pakhat ka nei. Kan inhmuh thu hi sawi lo turin Joan-i khan a ngen leh ngei ang che, dam takin le, ka țhian. Ka lo ring țhelh deuh che pawh a ni maithei, kan hlawkna ve ve ngei tur, thil tam tak kan la ti dun thei ngei ang," a ti a, a sakawr chu an chhak tlang lam panin a tlantir ta nghal a.

Sudden-a chuan, "Ka țhian' te min ti khanglang a, a țhian nih ai chuan, rul muk nena ințhian pawh ka thlang zawk, kaphlum nghal mai ila, a țha zawk tur. Mahse Joan-i khan a ruktea a ngainatna kha a la nei tlatin ka hre si a, thil a ti harsa zo vek a ni," a ti rilru neuh neuh a, Ranch in lam panin a kal ve ta nghal a. Ranch in a va thlen hmain Joan-i chuan sakawra chuangin a rawn hmuak a, lawmthu a rawn hrilh nual a, chubakah, "Thil ropui tak vawihnih min tih sak tawh a, vawithum min tihsak turin ka ngen nghal dawn che a ni. Kha mi chanchin kha ka pa'n a hriat hlauh chuan a thin a rim lutuk anga, a tih loh tur thil pawi tak a tih phah mai ang tih ka hlau a ni," a ti a.

Sudden-a pawh chuan, "Ka pi, i thu thu a ni. Sawi lo tura min duh phawt chuan ka sawi miah lovang. Tunge a nih kha a hmain rindan lo nei tawh chu ni lo ila.....," a han ti a. Joan-i chuan, "Kei pawhin ka hrethiam bik lo..... tunhma pawhin luhlul tak leh mahni thu duh tak chu a ni țhin reng a, mahse khatiang taka mawi lo leh zahthlaka che duh kha a nih ka hre ngai lo. Mihring pangngai pawh ang ta lo lek lekin ka hria, a lo lang upa ta riauin ka hre bawk," a han ti a.

Sudden-a chuan, "Mahni chunga dik lo taka thil lo thleng ngaihtuah fona hian mi a ti upa hmain mihring nun a tikha duh em em a ni," thu tak deuh mai hian a ti ta a. A rilru tak tak sawi chhuak a ni tih pawh Sudden-a hmelah chuan a lang chiang em em bawk a. Joan-i rilru hah thawidam nan ama ngaihdan pawh ni miah lovin, "Miin an ngaih ang ngawt hi a lo ni lo tawp maithei a, rin ai daihin a lo țha zawk pawh a ni maithei asin. Chutiang mi chu an awm ve fo a ni," a han ti leh hram a.

Sudden-a thusawi chuan Joan-i chu a inngaihtuahtir nasa hle mai a. Amah (Sudden-a) hi, chutiang mi chu a lo ni ve thei ang em? Sudden-a ngei pawh hi Killer sual ber angin a hming a thang nasa em em si a, miin an lo hresual palh a ni ve thei dawn lawm ni? Chungte chu ngaihtuah chungin Joan-i chuan, "Green, ka lawm tak zet a ni," a han ti nawn leh a, a sakawr chu a tlantir ta nghal a. Joan-i chu thlir zui reng chungin Sudden-a chuan, "Mi â țhenkhatte hi chu vanramah i hnuk lut thei dawn chuang lo tawp a nih hi," a ti ta hial a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 15th, 2018, 1:27 pm

SUDDEN - RIDES AGAIN
AUTHOR : OLIVER STRANGE (1938)
CHAPTER - 12
(Rozami Pachuau)

Green-a chu Sudden-a a lo ni tih a hriat ațanga kar khat lai a ral leh hnuin, Ranch in bathlara Sudden-a lo kal chu Keith-a chuan a han hmu a, Sudden-a chuan, "Ka pu, ni hnih vel chawlh ka duh a, i hote hian pawisa hman tur an neih a, intihhlimna an zawn chang hian khawi lai nge an pan țhin?" a han ti a. Mak ti rilru deuh tak chungin Keith-a chuan, "Hnathawh i ning țan țawh mai elo? Red Rock khuaah va kal la, i sum chu i khawh ral thuai thei ang. Hmeichhia, zu, pawisa khelhnate pawh a kim vek. I duh phei chuan puakruka inkah pui tur pawh i hmu thei ang," a ti a. Sudden-a chuan, "Red Rock pan turah insawi ila, a țhat dawn chu. Mahse, Hell City-a kal ka tum a ni," a ti ta a.

Keith-a mak ti lutuk chu a mengphâwk nasa hle a. "Nun i ning tawh hle a ni maw? Hell City-ah chuan an hmuh veleh an kâphlum nghal ang che," a han ti a. Sudden-a chuan, "Ka tunhma nihna kha i theihnghilh a ni," awmze nei fe hian a han ti a. Mahse, Keith-a chu a ngawih reng avangin Sudden-a bawk chuan, "I hnena ka sawi lawk tawh, ka tunhma chanchin țha lo tak an sawi i la hre lo a ni maw?" a ti leh ta thuai a. Keith-a chuan, "I tunhma chanchin an sawi chu ka hria, mahse ka haider a ni. Engmah zawh che pawh ka tum bawk hek lo," a ti a. Sudden-a chuan, "Ka lawm e, ka tunhma chanchin avangte chuan Setana hian min hmuh a duh ka ring a ni," a ti a.

Keith-a chuan, "I chanchin a hre tawh te a nih chuan hmuh che chu a duh mai thei," a han ti a. Sudden-a chuan, "Setana hi dawi, magic thiam niawm takin Black sam-a khan a sawi a, Setana hian engkim a hre thei vek zel a ni awm e," a ti a. Keith-a chuan, "Black Sam-a chuan, mitdawivaih leh thil mak lam chi reng reng hi a awih vek a, a ring em em zel a ni. Sam-a ngaihdan i hriat vang maia Hell City-a kal chu a him lo hlein ka hria," a ti a. Sudden-a chuan, "Sam-a ngaihdan vang mai a ni lo. Kan țhiante zawng zawngin Sudden-a ka nih hi an hre tawh a, kan zinga țhenkhat hi Setana mi rawih, enthlatu an ni ngeiin ka hria a," a ti ta a.

Keith-a chuan, "A tu ber hi nge Setana spy chu lo ni?" a ti a. Sudden-a chuan, "Ka la sawi thei chiah lo. Engpawhnise, Frosty-a leh Lazy-a te pahnih hi chu an ni lo phawt.... pawisa hman tur tlakchhâm loh lai an neih tlat loh avang hian," a han ti a. Keith-a chu a inngaihtuah nasa hle a. Duh se la chuan tumah hrilh lovin Sudden-a hi a tlanbo daih thei tho tih a chiang a. Red Rock khua va tlawh tur niawm taka a insawina chhan pawh hi, lo kir leh a tum vang ni ngeiin a rinawm bawk si a. Chu chu hre rengin Keith-a chuan, "Green, engvangin nge Hell City-ah chuan va kal i duh?" a ti ta a.

Sudden-a chuan, "Setana chu va hmu tur leh a chenna hmun va en thlithlai ka duh vang a ni ber. Nangmah hi phatsan duh turin Setana chuan min lo ring ngei ang a, chu chu thil remchangah hman ka tum a ni. Taka, i fapa thlalak i kawl em?" a ti ta daih a. Keith-a chuan, aw ban deuh tak hian, "Nei lo, ka neih zawng zawng chu ka pawtsawm vek tawh.... Green, va fimkhur hle ang che. I bo chhan chu i duh ang takin Langley-a hnenah ka lo sawi ang," a ti a. Sudden-a chu a chhuak ta nghal a. Mahse Ranch insir lehlama a kal laiin, tukverh pakhatah Joan-i a lo dak chhuak a. "Bang phen ațangin i thusawi kha ka lo hre ve a, hei, a kal bo hma lawka Jeff-a thlalak ka kawl asin," tih pahin Sudden-a chu thlalak a lo pe ta a.

Sudden-a chuan thlalak chu a han thlek vang vang a, Jeff-a thawmhnaw inbel, a kawnghren leh a puakruk paite pawh chu Setana puakruk pai leh thawmhnawte nen khan a in ang em em a, a hmui hmai tak erawh chu, thlalaka mi hi, tlema la naupang zawk leh hlim hmel pu zawkin a lang a. Tin, a biang dinglama inrin riak chu a hmuhin Joan-i pawh chu a han kawhhmuh ve nghal a. Joan-i chuan, "Te tak tein a ser a, hei chauh hi a ngai a la anna a ni mai. Kan naupan laia a intauhna ser a nih hi. Tun hma zawng kha chuan Setana an tih hi, Jeff-a ni lo tura ka duh em avangin a ni tak tak lovang tihte ka lo ring țhin a, mahse a biang ser ka'n hmuh meuh kha chuan..... ," a ti a.

A thusawi chu chhunzâwm harsa a tih em avangin Sudden-a thlalak ken lai chu ngawi rengin a laksak ta a. Sudden-a pawh chuan, "Kawng dik lo lam lo zawh tawh mah se, lo kir lehin kawng dik lam a zawh leh thei tho alawm," tiin Joan-i chu a hnem ta a. Joan-chuan, "Ni e, kawng dik zawh leh theihna tur chance Jeff-a hian la nei ve leh hram se ka duh tak zet a ni," a han ti sap a. A thusawi chu Sudden-a chuan a hrethiam nghal mai a, Setana chu va that lo turin Joan-i hian a ngen a ni tih a lang chiang em em si a. Thudang an sawi leh hmain Keith-a'n Joan-i chu a rawn au ta hlauh a, Sudden-a chu a kalsawn ta thuai a.

Tlai chaw ei laiin Red Rock khuaa kal a tum thu leh an puin a phalsak thu Sudden-a chuan a sawi chhuak ta a. Frosty-a pek chuan, "I hi, kan pu chu a â ta thut a nih loh vek pawhin zu a rui a ni ngei ang. Khawnge, ka va dil ve vat teh ang, hun remchang țha tak a nih chu. Jim, ka lo kal ve dawn a nia," tih pahin a chhuak ta vat a. Mahse a lo kir leh thuai a, pindan chhunga mite chuan nuihzat tak chungin a va kalna chanchin an lo zawt a. Frosty-a chuan, "Kan pu chuan, pawi a tih thu leh a hote zinga fel leh hmantlak ber pahnih a ruala chawlhtir a theih loh thu min hrilh a, chuvangin a ât loh zia chu a chiang a ni. Kei hi min chawlhtir phal lo mah se, nangni ho hi a chawlhtir phal lo ang che u tihna zawng a nih loh chu," a han ti a, an nui zo ta a.

Chutih lai chuan Langley-a'n Sudden-a chu pawnah a ko chhuak ta a. A fala an awm dun hnuin, "Kan puin Red Rock-a i kal tur thu min hrilh a, eng chen nge thangbo i tum?" a han ti a. Sudden-a chuan, "Ni hnih, ni thum vel aniang," a han ti a. Langley-a chuan an chhak tlang lam chu kut zungpuia kawk chungin," I hrilh ve tawh em?" a han ti leh a. Sudden-a chuan, "Setana maw? Hrilh lo, ka nunna zawng zawng nen, a hnena intulut chu ka ni hlei nem," a tihsan mai a.

Langley-a chuan, "I chanchin hi Setana'n a hriat loh i ring a ni maw?" a ti ta zel a. Sudden-a chuan, "A hriat leh hriat loh chu ka lungkham tehchiam lo. Amaherawhchu, a hre thovang. Saw, chanchin thar hrilh turin Turvey-a a chhuah mek saw," a ti a. Turvey-a sakawr tlan liam tur chu Langley-a pawh chuan a va hmu ve hman a, Sudden-a hnenah erawh chuan, "Green, i hresual let der a ni. Turvey-a hi chu zanina bâwng vengtu tur a ni asin," a ti a. Langley-a thusawi chu ring miah lo chungin Sudden-a chuan, "A nih tak chu, ka lo hresual a ni ang," a ti ta rawk a.

Langley-a'n a kalsan hnuin Sudden-a chu a mahin a la țhu reng a, Langley-a nen hian thawk dun anga ngaih chu an ni na a, Langley-a hian amah hi a ngainat loh zia Sudden-a hian a hrechiang em em a. Turvey-a pawh kha Setana hnena kal tur a nih ngei pawh a ring tlat bawk a. 'Red Rock khuaah chuan eng ang takin min hmuh lo tum ang maw?' ti a hlim taka inngaihtuah chungin Bunkhouse lam a pan ve ta a.

A tuk zingah Sudden-a chu Dugout khuaah a va kal a, Black Sam-a inah a lut nghal a. Sudden-a hmel a hmuh ațangin Sam-a awmdan chu a danglam nghal daih mai a, hlauh nei tih hriat deuh mai hian kawngkhar lam chu a khat tawkin a en deuh reng a. Sudden-a pawh chuan, "Buaina enge i neih le? Natna kai theih chi vei ang maiin min țih deuh riauvin ka hria, a chhan a awm em?" a ti ta chawt mai a. Sam-a chuan, "Hei, lehkha hi kawngkhar awnga an rawn rawlh luh, tukin zingah khan ka chhar a, han chhiar ve teh. He khua hi ka chhuahsan a ngai dawn ta a ni," tih pahin Sudden-a chu lehkha them te tak te hi a pe ta a. Lehkhaah chuan heti hian a lo inziak a.

"Vawikhat i tihsual leh chuan khaihlum i ni ang - Setana"

Sudden-a'n lehkha a chhiar zo chu a nui chhuak nghal hawk mai a. "Sam, Dugout khaw chhuahsan chu la hmanhmawh vak suh. He lehkha hi ngun takin chhiar la, lehkhathiam ziak a nih loh zia chu i hre thei ang. A sipel sualte pawh khi i hmu lawm ni?" a han ti a. Chu veleh Sam-a chuan, "A ni tak maw, hei hi Jeff-a ziak a ni thei lo tawp ang," a ti ve ta a. Sudden-a chuan, "Hei hi chu kan țhian, Scar-a ziak a ni phawt ang, tihțhaih che a tum a nih dawn hi. Lehkha hi ka lo kawl ange," a ti a, a ak ta a. Rei vak lo hnuah, "Red Rock-ah ka va kal ange," tih pahin pawnah a chhuak ta nghal a.

Hell City luhna kawngkhar vengtu pawhin Sudden-a chu a lo chhuah nghal mai a, chuvangin, amah an beisei ni ngeiin Sudden-a chuan a ring a. A rin ang ngeiin Setana pindan chhung a luh veleh, "I Red Rock panna kawng chu a va kual ve?" Setana chuan a lo ti nghal chawt mai a. Sudden-a chuan mak ti awm taka lan tum chungin, "E, hrilhtu i nei țha hle mai maw?" a han ti a. Setana chuan, "Mahni tana țha hre tan chuan thu thawntu neih țul zia hi a chiang a ni. Joan-i khan engmah sawi lo turin a ngen che em?" a ti a. Sudden-a chuan, "I ring fuh kher mai," a ti duh chauhva.

Setana chuan, "I duh leh rinthu sawi mai mai angah chuan min ngai rawh. Thildang pakhat ka hrilh leh ang che. A tir te ațangin Red Rock khuaah kal i tum miah lo," a ti a. Sudden-a chuan, "Chu pawh chu thil chhutchhuah harsa lo tak a ni..... hetah hian ka lo kal miau si a," tih pahin a ipte ațangin lehkha them a phawrh a, Setana chu pek pahin, "Hei pawh hi i lo hre lawk tawh maithei a ni. I naupan laia, duat taka lo enkawl tawh țhintu che a nih pawh ka ring a, hetia Negro putar han vau chiam mai hi i thiltih duh dan a nih chu ka ring chiah lo," a ti a, a lehkha hmuh dante pawh Setana chu a hrilh ta vek a.

Lehkha a chhiar laia Setana thinrim mitmeng chu hmuh a nuam lo kher mai. Silver-a a tirchhuak nghal a, chhuatlaiah chuan a vei tawn sek mai a. Rei vak lo hnuah Silver-a chu a lo kir a, a hnungah Scar-a'n a rawn zui lut a. Setana chuan Scar-a ke bulah lehkha chu a han theh thla a, "Hei hi enge a awmzia?" vin deuh mai hian a han ti a. Scar-a chuan lehkha chu a chhar a, a han bih zawk a, "Ka hrelo......," a han ti hman chauhva. Setana puakruk phawi lai leh ama âwm zawn a rawn tin chu Scar-a chuan a hmu ta a. Setana chuan, "Vawikhat chauh pawh i dâwt chuan, i țawng leh tawh ngai lovang," tiin Scar-a chu a vau ta a.

Scar-a chuan a pu mitmeng chu a han enchiang a, a pu puakruk humna kut zungțangte chu a han en leh a, puakruk chu a hmet per țep a ni tih pawh a lang chiang nasa mai si a. Tiril khur zawih zawih chungin, "Chief, i pawi sawi ka tum vang a ni miah lova, kan Negro pa kha a intitheiin a chapo riau mai a, hmana, a dawra thil lo thleng pawh kha i la hriat reng ka ring a. Chuvangin, amah tihțhaih nan leh tih hreawm nana ka ziak a nih kha," a ti ta a. Setana chuan, "Ka thu lovin thil i ti ngam a, ka hming chhalin thil i lo ti lehnghal a. Vawikhat chauh hetiang thil hi i tih leh chuan mulukawlh ei atan, i ruang, thingzarah ka tar ang. I lehkha ziak ngei kha, i chunga thil lo thleng tur a ni tih hre reng rawh. Silver, chhuahpui nghal vat rawh," a ti a. Scar-a leh Silver-a chu an chhuak dun ta a, Silver-a erawh chu a lo lut leh vat a.

Setana chuan, "I tilawmawm khawp mai. Heng mi mawl ho hian, Lal leh hotu pakhat chauh an nei tih hi an hriat nawn fo a ngai a ni," Sudden-a hnenah chuan a han ti a. Sudden-a chuan, "Nichinah khan i kaphlum duh tak tak ang em?" a ti a. Setana chuan, "Duh awm teh e. Ka duh dâwn tih pawh Scar-a khan a hrechiang hle ang. Nang hi chuan i ring lo a ni maw? Ngawi rawh, tihtur dang pakhat ka la nei a, i la hmu ve mai ang," a ti a, Silver-a hnenah thu a pe nghal a. Silver-a chuan kawngkhar a va hawng a, mi pahnih hian an karah, mi pakhat hi an rawn kai lut a, an hnungah midang paruk laiin an rawn zui lut bawk a.

An mi rawn hruai luh chu Mexican a ni a. Setana hmaa an va dinpui meuh chuan a khur nghal zawih zawih mai a. Setana chuan, "Big Dend thiltihnaah khan Bank chhunga va lut a, pawsa va la chhuaktute zingah khan i tel ve tiraw?" a han ti a. Mexican chuan, "Aw, ka pu," tiin a chhang a. Setana chuan, "Kha mi țum khan Dollar 500 i zep ru a, i chan ai i tilian a, midangte chan ai erawh chu i titlem ta thung a ni," a ti a. "Ka pu, ka tihsual palh a ni. Ka hmanhmawh em em a, engmah ka ngaihtuah chiang hman lova, chuvangin...," a tih lai mekin,

Setana chuan, "Pawisa i zep ru tih hi ka hrechhuak leh thei ang tih pawh i ngaihtuah hman lo a ni maw? Mi â pa, I hriat phak loh thiltihtheihna mak tak ka nei a, engkim hi ka hre thei vek asin. Ngaithla rawh, rangkachak pawisa tlang khat chu i hmeichhia, Anita-i hnenah i pe a, a bang zawng chu i kawmawl hnuaiah i thukru a nih kha. Chungte pawh chu ka hre thei vek asin. Rinawm tura ka laka i chhechham i bawhchhia a, i țhiante i rawk a, an chan ai i laksak bawk. I thiltih sual hi a mal chauh pawhin thihna tham ve ve a ni," a ti ta a.

Mexican chuan a nunna la lo tura dil a tum a, mahse țawng pawh a țawng chhuak thei tawh lova, Setana bawk chuan, "Hrem tur chu i ni a, mahse i chungah zah ka ngai ang," a han ti a. Beiseina sang tak neia, Mexican han meng chu Sudden-a chuan a hmu chiang em em a, mahse a beisei loh ang takin Setana chuan, "Vawi 50 chauh an vua ang che," a ti ta a. Mexican chuan chu chu a hriat veleh, mangang tawpkhawk aw tih hriat ngawih ngawihin, "Ka pu, min vuaktir lul suh. I duh leh min kaphlum mai la, mahse min vuaktir lo hram rawh," a ti a. Țhingțhit a han tum a, mahse, a vuantute chuan an kai ding a, pawnah an hruai chhuak ta nghal a. Chhuah pahin Mexican chu a la rak ta chul a.

An chhuah veleh Setana chuan, "Silver, engkim chu va buatsaih la, i peih fel hunah min rawn hrilh dawn nia," a ti a. Sudden-a chuan, "Vawi 50 an vuak chuan a thi ngei ang," a ti a. Setana chuan, "Ni e, mahse amah vang khan, a thiltih sual kha midangin an tisual ve ngam tawh dawn lova, chuvangin, mi tam tak la thihna ngei tur a pumpelh tir dawn a ni. Hetiang hi a lawm, tunlai khawvel finna an tih chu. Mi tam tak an nun theih nan tia chhuanlama hmangin, tualthattute pawh hi an khaihlum țhin ni," a ti a. Chutih lai chuan Dar ri an hria a, Setana chuan, "Sudden, mi an vaw lai i en tawh ngai em? Lo kal rawh, hmuhnawm tak a ni," a ti a, a chhuak ta nghal a.

Hreh em em mah se, hnial chi a ni lo tih a hriat avangin Sudden-a pawh chuan a zui ve ta a. Tualzâwl zau lai berah chuan ban pakhat hi a inphun a, a sirah chuan, lungbang nghengin dar lian deuh mai hi an khai bawk a. An mi hrem tur, Mexican chu a ban khinghnih an phar chhoh tir a, banah chuan a kut pahnih chu an phuarbet tlat a. A kawngbawr achin chunglam an phelh ruak vek a. A bulah chuan, pa tawr țha deuh mai hi hruihrual kengin a ding a, midang sawmli rual velin an dinhual tlat a. He mexican hian, an pawisa chan ai a lo eiruk sak bawk avangin, amah thlirtute hmelah chuan khawngaihna hmuh tur a awm lo reng reng a ni.

Outlaw ho chuan Setana leh Sudden-a chu kawng an lo kian thuai a, bial chhungah chuan an lut dun ta a. An hnunglamah chuan outlaw pakhat hian, "Vawi 25 thleng a la dam chuan, Dollar 5 ka chawi ngam," a han ti a. A bula mi chuan, "Kan inchawi ang, Pedro hi tuarchhel deuh ania, i chawi chiang hle ang," a han ti a. Pakhat zawk chuan, "Amah vawtu tur Muley-a ngaihzawng hi Pedro hian a lan hlauh mai a, chuvangin Muley-a hian a dim lo kher ang," a han ti a. An thusawi chu Sudden-a te pahnih chuan an hre thei vek a. Setana pawh chuan, "Chuvang chu alawm, a vawtu tura Muley-a kher hi ka thlanna chhan. Vaw na deuh tura fuih leh hrilh a ngai dawn miah lo tihna a ni," a ti a.

Setana'n vuak thu a pek hma chiahin mipui kar ațangin hmeichhe pakhat a lo chhuak a, Setana ke bulah a rawn bawkkhup a, "Ngaidam hram rawh. A retheihna hmusitin amah dem nan leh hmuhsit nan ka hmang a, chuvangin pawisa kha a ru ta mai a ni, keimah vang liau liaua ru a ni. Kei hi min hrem zawk rawh. Pedro-a hi zawng, a derdep si a, in vuak phawt chuan a thih phah ngei ngei ang," tiin a rawn ngen ta a. Setana mitmeng chu a han enchiang a, a ngenna chu a thlawn a ni tih a hre thei nghal mai a. Setana pawh chuan, "He hmeichhia hi la sawn vat rawh u," tiin a hote hnenah chuan thu a pe ta a.

Hmeichhia chu a han tal chiam a, a beidawng thinrim lutuk chuan Setana chu a kawk a, "Ramhuai bawlhhlawh, Pathian thinurna meiin rawn kang che rawh se!" a han ti a. A bula mite chuan hruai bo tumin a banah an vuan a, mahse Setana chuan, "Awm tir ve zawk rawh u. A bialpa natuar lai hi lo thlir ve sela, thu kam khat chauh pawh a chhak chhuah leh chuan Pedro-a tuar tur hi a letin a pung ang," a ti ta a. Hmeichhia chu a țhu hnawk a, hmai hupin a țap a, a kun ta tlat a. Muley-a chuan, duhzawng dang neia, amah lo kalsantu hmeichhia chu a han en a, Pedro a vuak apianga hmeichhe rilru na ve tur chu a ngaihtuahin, a duh ang taka phuba la turah a inngai a, a phur em em thung a.

Setana'n vuak thu a pek veleh Muley-a chuan Pedro chu a vaw țan ta a. Pedro chuan ngawi rengin a tuar a, mahse vawi 20 aia tam vuak a tuar hnu chuan a taksa a zawi hnawk a, a lu a kun a, che lovin a awm ngaiin a awm ta reng a. Muley-a chuan a va pan hnai a, Pedro-a chhip samah chuan a va țham a, "Uai, a thi tawh a ni khanglang ka ti. Teh chai chuan! Ka duhtawk ka ngah hmain min thihsan phiangsen chu le," a ti a, a rak ta nuah nuah a. Setana chuan inti puithu fahran hian, "Rorelna chu hlenchhuahin a awm ta," a han ti a. Chu veleh outlaw ho chu an kal darh ta a.

Setana bawk chuan, "Țhiante phatsan ching leh thlim hmangte ka hrem dan hi enge anga i hriat?" tiin Sudden-a chu a zawt ta a. Sudden-a chuan, "I hote lakah i tlaktlum phah viau a ni lawm ni?" a ti duh lek chauh va. Setana chuan, "Min hua a, mahse min hlau tlat a ni, chu chu ka duh dan tak pawh a ni zawk. Hlauhna hian thil a tih duh ang a ti ngam țhin lo a ni. Hlauhna hi nun khalh ngiltu ber a ni ta a ni, chuvangin, an la nung hram hram a ni ber. Chu chu i ngaihtuah ve tawh ngai em?" a ti a.

Sudden-a chuan, "Chu zawng, ka rilruin a phak ve lo. Tuna ka lungkham ber chu... khawiah nge ka mut ang a? Ka sakawr hi khawiah nge ka riahtir ang? tih chauh a ni. Double K Ranch-ah chuan naktuk tlaia kir leh tur chauh ka ni si a," a ti ta a. Setana chuan, "Silver-a'n i riahna tur chu a kawh hmuh ang che. Sakawr in chu sawlaiah sawn a awm. Hei hi i kawr âwmah khan kilhbet ve la, kan zinga tel ve i ni tawh tih kan naute'n an hria ang a, buaina i pumpelh thei ang," a ti a. Sudden-a chuan, "Buaina an lo siam takah pawh thlanmual zau tawk in nei em ang chu," a han ti a. Setana chuan, "Hmun chu a awm zel ang," a lo ti then a.


Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)