SUDDEN - RIDES AGAIN (Completed)

[Ngaia]

SUDDEN - RIDES AGAIN
AUTHOR : OLIVER STRANGE (1938)
CHAPTER - 13
(Rozami Pachuau)
www.storyfb.com mizo story thar englai pawhin chhiar tur a awm reng

Kawtthler vei lamah Sudden-a chuan Sakawr in chu a va hmu a, a sakawr chu a thlung ta a. Sakawr in bulah chuan thinga sak, in pakhat kawngka luchunga, 'Dirk's Saloon' tih intar hi a awm bawk a. Sudden-a chu Saloon chhungah chuan a lut ta a. A neitupa chauh a lo awm a, riahna tur hmun a neih leh neih loh Sudden-a chuan a zawt a. Hmun a awm tih a hriat veleh a sakawr zin leh Rifle a va la a, a riahna tur pindan chhungah a dah a, pawnah a chhuak leh ta thuai a. Khawthlang lam panin a kal a, thui vak lo a kal hnuin kawngkhar Gate a va hmu a, a lo luhna lam ang chiah bawk khan, he laiah pawh hian Gate a awm ve a ni tih a hria a, a let leh ta thuai a.

Saloon awmna zawn kawtthlerah chuan mihring leng lek kalkawng te tak te hi a lo awm a. Sudden-a chu a phei zel a, lungbang puk lo awm chu a va hmu a, puk chhunga hmeichhia, Anita-i lo țap pawh chu Sudden-a chuan a hmu ta nghal a. Thawm a hriat veleh Anita-i chu a lo dak chhuak thuai a. Sudden-a chu a hmuhin, "Enge i la duh cheu? Min tihrehawm tawk tawh hle a ni lawm ni?" a lo ti a. Sudden-a chuan, "Thawm ka hriat ațangin țanpui ngai an awm niin ka ngai a, ka pui thei mahna ka ti a ni," a han ti a.

Anita chuan, "Nang, Setana Badge kawr âwma tar hian maw min țanpui ang? An tihhlum laia nui chunga lo thlirtu hian mitthi i tinung leh thei em ni?" a lo ti leh a. Sudden-a chuan, "Ka pi, min ring sual a ni. Nuih hi ka heh tehchiam lova, an thiltih khan ka nuih a tiza lo chiang hle bawk. A thiltih sual an man chiang si a, ka tan, puih ngaihna a awm miahlo a ni," a ti a. Anita chuan, "I tidik a ni. Setana hian engkim a hre thei vek zel a, ramhuai thiltihtheihna mak tak a nei a ni. Tunah ngeite pawh hian....," a tih lai mekin, Sudden-a chuan, "Mihring pangngai ve mai bawk a ni. Mahse enthlatu, spy a ngahin, a nei țha em a, hlawh pawh a pe țha bawk a ni ang," a ti ta a.

Anita pawh chuan mittui tla zawih zawih chungin, a țah chhan ti hian a sawi ta a. "Pedro-a ruang kha an rawn zawn lut a, phum ka lo dil a, mahse puk ko lehlam ațang hian an theh thla ta mai a, na ka ti em a ni," a ti a. Sudden-a chu puk kotlangah chuan a va dak a, thlang lam fit za vela sangah chuan thing hnah a zuk hmu thei a. Anita hnenah chuan, "Ka pi, ruang chu ka zawng anga, ka zuk phum sak mai ang che," a han ti a. Anita chuan Sudden-a chu beisei deuh mai hian a han en a, "Min phum sak theih phawt chuan, ka......" a ti hman chauhva, Sudden-a chuan, "Ho mai mai," a ti a, pawnah a chhuak ta nghal a.

Sudden-a chuan huang ațangin a sakawr a va la chhuak a, khawthlang lam gate panin a kal ta a. A vengtu pawhin engmah sawi lovin Sudden-a chu gate a lo hawn nghal mai a. Tichuan Anita chenna puk hnuai zawn chu panin Sudden-a chu a kal ta zel a. Harsa lo takin Pedro ruang pawh chu a va hmu a. Hmanrua engmah a neih loh avangin lung leh lung inkarah ruang chu a zalh a. Lung lian tak takin a chhilh leh a, lungbangah chuan kross chhinchhiahna a chemtein a ker a, a kir chho leh ta a.

Khaw thim dawn țepin Anita chenna puk chu a han thleng a, Anita pawh chuan a lo la nghak reng a. Sudden-a hnenah chuan, "Hetiang hmun hreawm bera țhian neih hi a thlamuanthlak tak tak a ni. I thil mi tihsak hi ka theihnghilh dawn lo reng reng. Puih ve theihna che ka neih dawn phawt chuan min hre reng ang che," a lo ti a. Sudden-a chuan, "Engmah tihsak che ka nei hlei nem," a han ti hram a.

Anita erawh chuan, "Chu chu i ngaihdan a ni maw? I thiltih hi Setana'n a hriat vaih chuan Pedro-a ang khan, kan pahnih hian min hrem dun ngei ang," a ti ta a. Sudden-a chuan, "Setana chu kan hrilh dawn hlei nem," a han ti phawt a, tah chuan, nui chungin, "Dam takin le, ka pi," a ti a, a chhuak ta nghal a. Sudden-a kal ta chu Anita chuan a thlir zui vawng vawng a. "Eng vanga helai hmunah hian lo awm ve nge a nih ang? Outlaw dangte hi a ang ve lo tawp mai," a ti rilru neuh neuh a.

Dirk-a Saloon chhunga Sudden-a a va luh lai chuan midang sawmhnih vel zet an lo awm tawh a, a țhenin zu an in a, a țhen an inlehkhaden a. Bar bula dingin Muley-a pawh chuan zu a lo in ve mek a, zing lama a thiltih kha nuam ti deuh mai hian a la sawi sur sur a, tițha a inti tawk bawk a, a țawng pawh chu a ring lung lung viau a. A kianga ding vete pawh chuan a thusawi deuh chiah chu an lo ngaithla a, a bula ding pakhat chuan, "I vaw na lutuk deuh niin ka hria," a han ti a.

Muley-a chuan, "Teuh lo mai, ka khawih țan dawn chauhva, min thihsan ta mai alawm mawle. Tunlai chu kan pu hian, Mihring tling leh tuarchhel a hmu zo tawh meuh lo a ni ang. Mipa ka ni chu an inti ve bawk a, an tuar zuau zia hlawm mai hi nuih an tiza ngawt a ni," a han ti a. Pindan chhunga mite chu a han thlek kual a, Sudden-a pawh chu a va hmu a, reilote a han en a, mahse ramdang mi hmel niawm tak chu a va hmu a, a bula dingte chu awmze nei fe hian mit a han siai khum suk a. Tleirawl țhutna lam chu a pan phei a, a zawn siahah a va ding a, aw vin zet hian, "Ka va hmu ngai lo che ve, tunge i hming?" a han ti a. Tleirawl chuan, "Ben Hold-a ka ni a, vawiina lo thleng ve chauh ka ni," a ti a.

Muley-a chuan, "Lo kal thar apiangin zu an chawi ziah asin, i chawi ve dawn em?" a ti a. Ben Hold-a chuan, "Mister, i tlai lu deuh a ni, pawisa ka nei tawh lo, chawi tur a ni tih lo hre hma deuh ila chuan......," a ti hman chauhva, Muley-a chuan beng hupin Hold-a chu a beng ta chawrh mai a, Ben Hold-a chu chhuat laiah a țhu ta hnawk mai a. Muley-a chu intithei fahran hian Ben Hold-a țhutnaah chuan a han țhu a, Sudden-a hnenah chuan, "Hetiang hi alawm kal thar si, zu pawh chawi duh lo kan tih țhin dan chu," a han ti a. Sudden-a chuan Muley-a chu a va pan hnai a, "Kei pawh hi kal thar bawk ka ni a, mahse, nanga in tur kher chuan zu ka chawi dawn lo. Engtia min tih nge i tum le?" a ti ta mai a.

Sudden-a chu a hlauh avangin Muley-a chuan chhan ngaihna a hre mai lova, Sudden-a bawk chuan, "Dawihzep pa, hruihrual chu nei ve ila, tukin zinga i vuak ang khan kan vaw ve tur che, mahse ka neih miau loh avangin......," tih leh Muley-a khabea hnek a rual ta nghal a. Muley-a chu a leng lawp a, chhuat laiah chuan a țhu ta hnawk mai a. Muley-a'n engmah a ti ngam dawn chuang lo tih a hriatchian em avangin Sudden-a chuan Ben Hold-a chu pawna chhuah puiah a sawm a, an pahnihin an chhuak ta a.

Pawna an awm hnuin Sudden-a chuan, "Engvanga hetah hian lo kal ve nge i nih?" a ti a. Ben Hold-a chuan, "Pawisa khelhna a ka leiba rulh nan pawisa ruk ka tum a, an hrechhuak a, ka țhiante pahnih nen min um ta chiam mai a, anni pahnih chu an man a, kei hi chu min man hman ve ta lo a ni. Min lo man ve se ka ti ngawt zawk mai," a han ti a. Sudden-a chuan, "I bei la tidawng mai suh, mahse, tun chinah chuan zu leh lehkhaden hi chu thlah tawh la a țha ang," a han ti a. Ben Hold-a chuan lawmthu te a hrilh nual a, an ințhen ta thuai a. Sudden-a pawh chuan a riahna hmun a pan ta nghal a.

A tuk khawvar hnuin Ben Hold-a nen an inhmu leh a. Ben Hold-a chuan, "Tukin zingah khan tlan chhuah ka tum a, mahse gate vengtuin, "Phalna tello chuan i chhuak thei lovang,' min lo ti a, ka lo kir leh a ni," a ti a. Sudden-a chuan, "Heta țanga chhuah hi thil awlai lo deuh a ni. Hun remchang lo nghak rih la, ka la pui thei maithei che a ni," a ti a. Ben-a chuan a kalsan leh ta nghal a. Chawhnu lamah Sudden-a chu Setana hmu turin a va kal a. Belle Dalroy pawh a lo awm ve nghe nghe a. Belle chuan, "Mister Sudden, min puih avang khan i lakah ka ba nasa tak zet a ni," a han ti a. Setana chuan, "Belle, i bat chu ka koah a innghat tawh zawk a ni," a han ti a.

Sudden-a hnenah chuan, "I țhiante zinga pakhat huatthu i sawi a, thil pawi leh atthlak tak a ni lovang maw?" tih pahin Belle lam a hawi a, "I lo kir leh thuai ka beisei anga, i lo kir leh hunah chuan tun aia rei zawk hi kan zingah i awm ve tawh em ang chu," a han ti a. Sudden-a chuan, "Ka lo kir leh thuai ang," a ti a, a chhuak ta nghal a. Sudden-a chhuah hnuin Setana chuan, "Kha mihring khan zir tur a la ngah hle mai," a han ti a. A thusawi awmzia chu hai chi rual a ni si lova, Belle chu a han thaw huai a. Setana chuan, "I khawngaih deuh elo?" a han ti leh a. Belle chuan, "Khawngaih tehchiam lo ve. Mahse, amah kha ka haw lo," ti ngawtin a chhang a.

Thim hlimah Double K panin Sudden-a chu a chhuak a, gate a thlen dawn laiin mi pakhat kawrfual ha, sam te pawh khuh bo vek hian a lo tiding a, "Thil pakhat chauh hrilh tur chein ka lo nghak che a ni. Hell City-ah hian lo kir tawh reng reng suh," a han ti a. Amah chu Belle Dalroy-i a ni tih pawh Sudden-a chuan a hre ta nghal a, a hnenah chuan, "Ka pi, ka sahimna min ngaihtuah pui avangin ka lawm e, mahse lo kir leh lo thei ka ni lo. Thil.....," a tih lai mekin, Belle chuan, "Zilhna fing pawm thei lo chi i nih chu ka hre ta. I thu a ni a, tih theih dang engmah ka neilo," a ti a, a kalsawn ta thuai a. Thil tam tak ngaihtuah chungin Sudden-a pawh chuan Double K Ranch chu a pan ta zel a.

Sudden-a'n Double K Ranch a va thlen lai chuan Merry-a leh Langley-a leh Keith-a te an lo țhu khawm a, Sudden-a chu pindan chhung a luh veleh an pathum chuan puakrukin an lo tin nghal a, Keith-a chuan, "Eng ti tura lo kal nge i nih? Bawngrual i thuhruk tawh mai avangin insawifel theih i inring a ni maw?" a lo ti nghal chawt mai a. Sudden-a chuan, "Ka pu, i thusawi awmzia hi ka hrethiam lo tawp mai," a han ti a. Keith-a chuan, "Nizan khan kan hmar lam ramri hrula kan bawng za aia tam a bova, Merry-a bawng pawh chutiang zat vel chu a bo bawk," a han ti a. Langley-a chuan, "Bawngrual kha Frosty-a nen in khalhkhawm a ni si a," a ti a.

Sudden-a chuan, "I thu min pek vanga khalhkhawm kan ni. Engpawhnise, bawngrual chu, 'I ru min tihna a ni maw'?" a han ti a. Langley-a chuan, "Ni chiah e, phat tum harsa duh lo mai rawh. An hmu che a, i sakawr chal var lai kha a langsar teh a nia," a ti ta a. Sudden-a chuan, "Tuin nge min hmu?" a ti a. Langley-a chuan, "Mi tam takin an hmu che, i kawppui Frosty-a ngei pawhin a hmu che," a ti a. Sudden-a chuan, "An mit a var hle a nih dawn chu, kei lah....," a tih lai mekin Langley-a chuan, "Red Rock khuaa kal anga insawi i tum a ni maw? I kal lo tih pawh ka hre vek," a ti ta zel si a. Sudden-a pawh chuan, "Red Rock kal ka tum loh zia leh Hell City-a kal ka tum zawk thu ka pu hi ka hrilh vek kha," a ti ve ta a.

Keith-a chuan, "Ka hna thawk turin emaw i kal dawn ka ti a, i hna i lo va thawk zawk a nih chu. Min tihder chiang kher mai," a ti ta a. Langley-a chuan, "Sudden, i fing hle mai, mahse bawngruk nana i sakawr kher kher i lo hmang chu, i fing hlel deuh a ni," a han ti a. Merry-a chuan a lu a han thing a, "Langley, i thusawi chu a dik pawh a ni maithei. Mahse ka mi rin tawhte han rinhlelh leh hi ka harsa tih zawng a ni. Ken, engtia tih nge i tum dawn le?" a ti a. Kenneth Keith-a chuan, "Bawng rukhmang thawidamna chu kawngkhat chauh a awm, Langley, puakruk kha laksak rawh. Tlanchhiat a tum vaih chuan kaphlum nghal ang che," a ti ta a.

Sudden-a rilru chu a kal thui hman hle a ni. A inmantir mai chuan an khaihlum tak tak duh ngei dawn tih a hre si a. Chuvangin, zawh tur kawng khat chauh a tan a awm tih a hria a, tlemin a han inthlah zawi hret a, Langley-a'n a rawn pan hnaih lai takin, a kut veilam a thlakthla thut a, hmuh hmanloh khawpa rangin a puakruk a phawi a, an lu chung zawna khawnvar inkhai chu a kap a, pindan chhung chu a thim ta vek a. Chutih lai la la chuan Sudden-a chu a kun zauh a, tukverh darthlalang zawn chu a va zuan a, pawnah a tlanchhuak ta a.

Keith-a te pathum pawh chuan puakruk an hmet puak ve ngei a, mahse an rin loh ang taka Sudden-a a chet avangin Sudden-a chu an kap fuh ta chuang lova. Pawnah an tlanchhuak vat a, chuti chung pawhin Sudden-a sakawr tlan ri chauh an hre hman ta a. Langley-a chuan Cowboy dang koh khawm a han tum a, mahse Keith-a chuan, "Kan zinga a awm lai pawhin kan chelh thei tawh lo a ni si a, thimthamah te zawng in va man thei chuang lovang. Mu tawh zawk rawh," a ti a. Langley-a pawh chu a kalsawn ta a. Merry-a chuan, "A tlanchhuak ta hi ka lawm zawk, thil awmdan ngaihtuah chuan Green-a hian a ru ngeiin a lang a, mahse, a ruk ka ringlo. Thil hriat kim loh enge maw kan nei ngei a nih ka ring tlat," a ti a.

Keith-a chuan, "Chu chu i rindan a nih zawngin i ruai tawh dawn nia," a han ti a. Merry-a chuan, "A lo kir leh phawt chuan ka ruai em em ang. I foreman Langley-a ang hlir pathum hi chu a hen em em ang," a ti a. Chutih lai chuan Joan-i pawh a lo lut ve ta a. Thil awmdan an lo hrilh hnu chuan, "Green-a'n bawng a ruk duh ka ring thei lo," a ti ve ta nghal mai si a. Merry-a chuan, "A tam zawk ngaihdan chu a dik ngei ang," tih pahin Keith-a darah chuan a han beng thuk a. Keith-a erawh chuan, "In ngaihdan chu ka la țawmpui chuang lo che u. Ka man theih phawt chuan ka la khaihlum tho ang.... i hote zinga tel turin ruai ngawt mah la," a ti ta a.

An umzui lo a ni tih a hriatchian veleh Sudden-a chuan a sakawr a dintir a, hmun rem laiah a chhuk a, sakawr zin hnunglama a kawmawl chu a la thla a, hnim hnuai hmun biru laiah a mu ta a. Khawvar hnuin, zai thawmin Sudden-a muhil chu a tiharh a, a mutna bul hnîmbuk chu a keuva, a han en chhin a, a lam pana Frosty-a sakawr chungchuang lo kal chu a va hmu a, aw thum fe hian, "I ban phar vat rawh, ka boruak thianghlim hip tur i rawn tichhe vek tawh alawm. Engvanga ka mu lai min rawn tiharh reng reng nge i nih?" a han ti a.

A tirah chuan Frosty-a chu a phu chiang hle a, mahse a țhianpa aw a ni tih chu a hre thei thuai a, "I duh leh min kaphlum la a ni mai," tih pahin Sudden-a awmna a rawn pan zel a, Sudden-a chu a hmuh veleh, "Hlauthawng duh suh, tumahin min zui lo ve," a han ti a. Sudden-a chuan, "Mi zawng turin i lo kal a ni maw?" a han ti a. Frosty-a chuan, "Ni e, Jim, thil awmdan ka hrethiam lo tawp mai, min hrilhfiah vek teh," a ti ta chawt mai a. Sudden-a chuan, "Kei pawhin ka hrethiam chiah bik hlei nem. Bawng bo laiin, a bona hmunah i awm ve em?" a ti a.

Frosty-a chuan, "Awm ve e. Outlaw 12 rual velin kiltin ațangin min rawn kap thut mai a, dan chi rual lohvin bawng chu an khalh bo ta vek mai a, an hotupa chuanna sakawr chu, i sakawr Nigger-a ang chiah hi a ni. Ka hmu chiang thei lo na a, an hotupa chuan a hmai a tuamin ka hria, in in ang takzet a ni, Jim," a ti a. Sudden-a chuan, "Engpawhnise, kei leh Nigger hi chu kan ni thei lo. Hell City-ah kan awm dun daih a ni," a ti a. Frosty-a chuan, "Uai, Red Rock-ah i kal na nge?" a han ti ha a. Sudden-a chuan, "Kal ka tum lo sa reng a, Keith-a pawh ka hrilh nghal vek a ni. Setana'n a hote zinga tel ve turin min duh a, tel ngei pawh ka tum bawk. Ka tel si loh chuan Double K Cowboy ho hian min khaihlum mai ang tih a hlauhawm a ni," a ti ta a.

Frosty-a chuan, "Double K Ranch-a kir leh kher lo pawhin ram dangah kalna tur a tam tho alawm," a han ti a. Sudden-a chuan, "Ka tih ni hlek si lo, tisual anga lang turin ka tlanchhiat phah ang maw? Chutiang chu tunhmain ka ti tawh țhin, tunah chuan ka sim tawh. Tun țumah hi chuan ka vaw let ve dawn," a ti ta a. A thin a rim tak zet a ni tih pawh Frosty-a chuan a hria a, chuvangin a ngawi vang vang a, tah chuan, "Jim, puih i ngaih phawt chuan sawi mai ang che, chu chu ka lo kal chhan tak pawh a ni zawk. Ka țhian țhenkhatte pawhin puih che an duh ve ngei ang," a han ti a.

Sudden-a chuan, "A lawmawm a nih chu. Engpawhnise, Hell City hi nuaibo ka tum a, chu chu tumah hrilh rih lo la a țha ang. Engtin nge ka chet zui zel dawn phei chu ka la hre chiah lo. A ruka Hell City khaw chhunga luh theihna ka hmuchhuak a ni," a ti a. Chumi hmun awmna lai chu ziak meuhvin Frosty-a chu a han kawhhmuh phawt a, tah chuan, "Helai hmun hi zawng chhuak la, mahse ka thu i hmuh phawt loh chuan engmah i ti tur a ni lo, 'Badge' kha i la nei maw? A țha e, i la mamawh mai thei a ni," a ti ta a. Frosty-a chuan, "Thu min pek veleh kan lo tlan nghal vat ang. Tunah hian khaw chhunga luh i tum em ni?" a ti a. Sudden-a chuan, "Tum e," ti chauhvin a chhang a, Frosty-a chuan a kalsan ta a.

Sudden-a pawh chu Dugout khua, Black Sam-a in panin a kal ve ta a. Khuaa mite chuan Sudden-a chanchin an la hre ve hmanblo hlauhva. Sam-a ina chaw a ei laiin Keith-a leh Merry-a te bawng bo thu an sawi nak nak a. Naylor chuan, "Keith-a leh Merry-a te hi inkawp sela, Hell City-a mi, rukru ho saw phindarh vek sela a ni mai," a han ti a. Birth-a chuan, "A harsa viau ang. Hell City-ah chuan vawikhat chu ka kal tawh a, hmun hnih ațang chauhvin khaw chhungah chuan a luh theih a. Chulai hmun chu mi paliin Rifle nen an ven phawt chuan, an let engemaw zata tam pawhin an tawntlang thei lovang," a ti a. Chutiang thu chu an sawizawm ta zel a.

Chaw a eikham veleh Sudden-a chu a tho va, Hell City panin a chhuak ta nghal a. Hell City luhna gate a luh dawn țepin a lam panin Belle Dalroy-i sakawr chungchuanga lo kal chu a hmu a. Belle chuan, "E, i lo kir leh dawn a ni maw? I luhlul kher mai," a han ti a. Sudden-a chuan, "Kir leh lo thei ka ni lo. E, a sakawrah a chuantir phal che a ni maw? Sakawr țha pawl tak niin ka hria," tih pahin a va kun hnai a, Belle chuanna sakawr nghawng chu a va chul a. Sakawr chaldar zawna rawngvar la kai deuh liai chu a hmu ta a. Belle hnenah chuan, "Chief hmuh ka duh a, a awm ang em?" a han ti a.

Belle chuan, "Awm e, I ât hle loh chuan, i kawr âwma i Badge tar kha i phihthla anga, ram hla takah i kal ngei ang," awmze nei tak hian a han ti a. Sudden-a hian Dugout a chhuahsan hnu lawkin, Setana lem inziahna Badge kha a kawr âwmah a lo tar hman tawh a ni. Sudden-a chuan, "Nang pawh, engah nge i tlanbo mai loh? Hell City-ah hian i awm reng?" a ti ve ta a. Belle chuan, "Misual pakhat ka that a, hmeichhia ka nih avang chauhin min khaihlum an tum ta a, Jeff-a'n min chhanchhuak ta a, Hell City-ah hian min hruai ta a ni," a ti a. Sudden-a chuan, "Hmai tuam lova a awm lai i hmu tawh reng em?" a ti ta daih a. Belle chuan, "Ka la hmu miah lo. Thlalak min entir a, thlalaka hming inziak chu, 'Jefferson Keith' tih a ni," a ti a.

Sudden-a chuan, "A ngainat ber nula bula a awm lai ngei pawha, a hmai a tuam tlat reng mai chu a mak teh e," a han ti zui zauh a, amah vek chuan rang deuh maiin, "Ka sawi loh tawp tur, ka rilru ka sawi chhuak palh a ni," a han ti leh a. Belle chuan, "Kei hi min ti a nih chuan min hrechiang lo hle tihna a ni. A bungrua ang chauh ka ni a, a duh duha duat leh hrem turin ka awm ve mai a ni. Huatna chauh lo chu a rilruah thildang a leng lo reng reng a, a huatna tipuitling tur chuan thilsual engpawh tih hnial a nei miah lo. Chuti chung chuan.....," a ti a. Sudden-a chuan lawmthu a hrilh a, a kalsan ta a.

[Ngaia]

SUDDEN - RIDES AGAIN
AUTHOR : OLIVER STRANGE (1938)
CHAPTER - 14
(Rozami Pachuau)

A pindan chhungah Sudden-a a lo luh veleh, Setana chuan, "I va lo kir leh hma ve? Double K Ranch-ah chuan an lo lawm vak lo che em ni?" nui chung hian a han ti a. Sudden-a chuan, "Langley-a'n min khaihlum a chak em a, a theih anga rangin ka lo tlanchhia a ni," a han ti a. Ranch chhunga a chunga thil lo thleng zawng zawng kha Setana chu a hrilh vek a. Setana chuan, "Tihnat loh tur i nih thu Langley-a kha ka hrilh tawh si a, ka thu a zawm lo ngam a ni maw? A pawi lo ve, ka duh ang takin tunah chuan bawng ruk hmang angin an ngai tawh che a, Hell City-ah lo chuan ramdangah i him tawh dawn lo a ni. Huaisen leh inringtawk hlein ka ngai che a, chuvangin ka hnuaiah min dawttu angin i thawk ve tawh anga, ka hnen ațangin thupek i dawng anga, midangte hnenah i pe chhawng țhin dawn a ni," a ti ta a.

Sudden-a chuan, "Mikhual ka ni si a, an chunga awm tur chuan min pawm duh lo maithei asin," a han ti a. Setana chuan, "I puakruk pai kha inchei nan em ni i tih? Engpawhnise, rilru hahna tur chu pakhat chauh i nei. Butch-a aiawhin amah i lan dawn a, a lâwm vak lovang. Butch-a chu i hria em?" a ti a. Sudden-a chuan a hre lo tih a hrilh a, Setana chuan, "Butch-a aiawhtu tur ka duh a, a aiawhtu tur chu, amah Butch-a aia thei zawk a ni ngei tur a ni. Chuvangin, Butch-a chu i duh duha tih atan, i kutah ka dah a ni, i hrethiam em?" a ti a.

Sudden-a chuan thil awmzia chu a hrechiang hle a, a hrethiam a ni tih pawh Setana chu a hrilh nghal a. Setana chuan, "A țha e, Khawiah nge i chen ang?" a ti a. Sudden-a chuan, "Puk chhunga chen ai chuan, Saloon-a chen ka thlang zawk. Helai hi chu a pik riauvin ka hria," tih pahin pindan chhung chu a han en kual a. Pindan thim lai berah chuan țhelret puan a inzar a. Puanah chuan, mihring tiata lianin, gunman lem hi a inziak a. Gunman chuan puakruk a hum a, a mitmengte pawh chu a nelawm loh kher mai a. Chu chu a hmuhin Sudden-a chuan, "I milem tar chu a mawi hle mai," a ti a.

Setana chuan, "I hmuh thiam ve zawng tak a nih ka ring," a han ti a. Sudden-a chuan, "Ni e, a puakruk ken dan saw a dik lo, a lek sâng lutuk. Sawtiang anga sânga a lek chhuah hman hma sawn a thi hman daih ang. Mihring tak tak a ang hle mai, a mit pawh saw che tlatin ka hria," a ti a. Setana chuan, nui chungin, "Che angin an hmu fo reng asin," a ti a. Sudden-a chu a chhuak ta a.

Sudden-a a chhuah hnu lawkin Setana chuan, "Butch, i lo chhuak thei tawh ang," a han ti a. Milem ziakna puanzar phen ațangin Butch-a chu a lo chhuak ta a. Tualthahte chu eng atan mah a ngai lo a, khawngaihna nei miah lo a ni tih Butch-a hmelah chuan a lang chiang hle mai a, Setana hnenah pawh chuan, "Khami kha maw, engah nge nichinah khan min kah hlum tir mai loh? A awlsam dawn tehlul vei nen," a han ti a. Setana chuan, "Chutiang maia thih chu atan a vanneihthlak lutuk ang. Thlabar mangang em ema siam phawt ka duh a ni," a ti a.

Butch-a chuan, "I huat zia chu ka hrethiam e, mahse min lo that zawk hlauh maithei a sin. Chu chu i ngaihtuah tel reng em?" a ti a. Setana chuan, "Tehreng mai, mahse Dollar 500 hlawh hi thil awlai lo tak a ni. Mahse i aiin phawirang zawk tura i ngai a nih chuan.....," a han ti a. Butch-a chuan, "Teuh lo mai. A tirah Dollar 500 thu hi min hrilh lova, chuvang mai chu a ni," a ti a, a chhuak ta nghal a. Setana chuan, "Ui cho, i va that emaw a thi zawkah i țang emaw, a eng kâwng pawhin ka hlawk dawn tih i hre phak si lova," ama hriat tawk lekin a han ti zui hram a.

Pawna a chhuah hnuin Sudden-a chu a han thaw huai a, Setana pindan chhunga milem intar mit kha a che ngei a ni tih a hrechiang a, Setana khan vengtu țha tak a nei a ni tih pawh a hrethiam nghal vek a. A tan fimkhur a țul zia a hrechiang zual sauh bawk a ni. Nilengin chanchin thar hriat tur ngaihven chung leh a khaw awmdan en thlithlai reng chungin Hell City chhungah chuan a vak kual vel a, khawthim hnuin Saloon panin a kal ta a. Anita-i chenna puk zawn a thlen laiin thimtham zing ațangin, "Mi pakhatin thah che a tum a, in inhmachhawn hunah a kut dinglam kha hlauhawm zawka chu a ni tih hria ang che," Anita-i aw tih hriat deuh mai hian a han ti a. Sudden-a chuan lawmthu a hrilh sap a, a kalpel ta thuai a.

Sudden-a chu Saloon hnunglam ațangin ama pindanah a lut hmasa zet a, a puakruk pahnih chu a mu tharin a thun khat vek a, a puakrukte chu chhiatna engmah a awm lo tih a hriatchian hnuah chauh a chhuak leh ta a. Saloon-ah chuan a va lut a, Bar nghengin a ding a, pindan chhunga mite chu a han en kual a. Scar-a leh a țhiante pawh lehkha dengin dawhkan pakhat an kil bial a. Tin, pindan chhunga mite chuan nghah nei niawm takin a khat tawkin kawngkhar lam chu an thlir deuh reng a, Sudden-a chu an rawn melh leh zeuh țhin a. Reivak lo an awm hnuin Dirk-a nupuiin Sudden-a chu a rawn pan a, "Pawnah mi pakhatin a hmu duh che," a rawn ti a. Sudden-a chu fimkhur tak chungin pawnah a chhuak ta a.

Amah ko chhuaktu, Ben Hold-an Sudden-a chu a hmuh veleh a hnenah chuan, "Zaninah, Saloon ah hian Butch-a'n thah che a tum a ni. Vawinah Muley-a zuruiin, i vuinaa lo tel turin mi tam tak a sawm tih ka hria, chuvangin tlanbo thuai la a țha ang," a han ti a. Sudden-a chuan, "Buaina hi zawng lo la, mahse buainain a nangching che a nih erawh chuan tlanchhe lovin lo hmachhawn ve zawk rawh," a han ti a. Ben Hold-a chuan, "Engpawhnise, chance i nei lo reng reng, a hlah miah lo ang che," a han ti leh hram a. Sudden-a chuan, "Themthiam ber pawhin vawikhat tal chu a hlah palh thei tho, vawi khat hlah palh chu pawi thui thei tak a ni," a ti a. Bar bulah bawk a va ding leh a, mei țan kai a tum lai takin Saloon kawngkhar chu a inhawng a, Butch-a a lo lut ta a.

A lo luh veleh saloon chhunga țawng ri leh thawm dang chu a reh tak duk avangin lo luta chu Butch-a a ni tih pawh Sudden-a chuan a hrethiam ta mai a, Butch-a chu ngun deuh mai hian a en ta a. Butch-a chuan a kawngbawr veilamah, puakruk pakhat chauh a pai a, veilama phawi tur niawm takin a puakruk kawm pawh chu a hnunglam hawiin a pai sa a. Dinglama phawi tur chu nise, puakruk kawm chu hma lam hawia pai awm tak hi a ni si a. Anita-i lah khan a kut dinglam veng ngun turin Sudden-a hi a hrilh tlat bawk si a. Chuvangin Sudden-a chuan ngun leh zualin Butch-a chu a han en a, thil awmdan hrethiam ta hian a inngai a.

Butch-a chu Sudden-a dina bul lawkah chuan a lo kal a, zu no dawm chungin, "He zu hi enge anga i hriat?" tiin Sudden-a chu a han zawt ta a. Sudden-a chuan, "A tui viauin ka hria," a ti a. Butch-a chuan, "Kei chuan, a tui lo tawp ka ti ve thung, engtia tih nge i tum ve dawn?" a han ti nghal chawt mai a. Sudden-a chuan, "Tui tih zawng a in ang lo maiah ka ngai. Engpawhnise, zu hi ka zawrh a ni miau lo va," a ti a. Intihbuai a hnai tawh hle tih hriain pindan chhunga mite chuan an thiltih lai bansanin Sudden-a te pahnih chauh chu an en tawh a. Thawm dang hriat tur pawh a awm tawh miah lova, Butch-a chuan Sudden-a chu sir deuh hâ hian a han thlek a, "Fiamthu thawh ngaina chi i ni maw? Puakruk pahnihte chu i la pai leh ta nghal a," a han ti leh a.

Sudden-a chuan, "I mitmeng a la fiah hle mai," a tihsan mai a. Butch-a chuan, "Mi sawm lai ka kap hlum tawh a, chung zinga pariatte chuan puakruk pahnih an pai vek a, puakruk pahnih pai ching ho hi chu engahmah ka ngai lo. Nangpawh i puakruk paina kawnghren kha phelh la, țhingțhiin chibai min buk la, tichuan ka ngaidam mai ang che," a ti ta a. Sudden-a chu a han ding mar a, "I thih hma hian thlawkbo ringawt la a ni mai," a han ti a. Chu veleh Butch-a chu a ding mar zawt a, a puakruk phawi tur niawm takin a kut veilam chu a thlak thla a, mahse a che rang tehchiam lo va, Sudden-a pawh chu puakruk phawi turin a inralring ve thuai a.

Kut veilama puakruk chu phawi ta lovin, Butch-a kut dinglam chu a phe zawk a. A kawrchung chhunglam a zen lut a, a zak hnuai veilam ațangin puakruk a phawi chhuak thut a, a hmet puak ta nghal a. Butch-a puakruk leh Sudden-a puakruk chu a ri rual țhawt a, Butch-a khup chu a thlep hnawk a, a han țhingțhi a, tah chuan hmai lei siin a tlu ta a. Sudden-a chuan a kut veilama a puakruk hum lai chu a bawmah a khung a, a biang lo thi ser ser chu a hru a, Saloon neitu hnenah chuan, "Puakruk dang a chuh thut avang khan min bum teuh kher mai," a han ti a.

Scar-a chu a lo kal hnai a, Butch-a ruang chu a han en a, Sudden-a hnenah chuan, "Thil awmdan hi kan Chief-in a hre duh ngei ang le," a han ti a. Sudden-a chuan, "Scar, chutiang lam chu lo lungkham vak duh suh. Kan Chief chu keimahin ka hrilh ve mai ang," a ti a. Scar-a chuan, "Engtik ațang khan nge i thupek zawm tur ka lo nih?" a ti a. Sudden-a chuan, "Tun ațang hian," tih pahin Scar-a kawrâwmah a va țham a, na deuh mai hian a han sâwi nawk nawk a, a theh per ta dawrh mai a. Scar-a chuan, Sudden-a mitmeng leh chezia reng reng chu a hmuhin hnial mai mai chi a ni tawh lo tih a hria a, chuvangin engmah sawi leh ngam lovin a ngawi ta daih a.

Sudden-a chuan, "Ngaihdan dang sawi tur i nei tawh lo maw? I fing hle mai. Ngaithla rawh u. A mah dawttua awm turin Chief-in min ruat a, chu chu remti ve lo in awm a nih chuan tunah hian sawi chhuak nghal ula, naktuk zingah Hell City hi in chhuahsan tur a ni," a han ti leh a. Tuman engmah an sawi loh avangin Sudden-a chuan, "A țha e, ka hmingin, ka kaisan lawm nan zu in in vek thei ang," a ti a. Cowboy ho chuan phur zetin Bar an pan ta nghal a.

Saloon ațanga a chhuah hnuin Sudden-a chuan Setana awmna puk a pan nghal a, Setana hnenah pawh thil awmdan zawng zawng a va hrilh vek a. Setana chuan, "Scar-a kha khati khera tih a ngai em ni?" a lo ti a. Sudden-a chuan, "Ngai e, min pawisa lo em a, zirtir a ngai a ni. I milem tar sawn puakrukin min tin reng si a, awm a ti nuam lo hle mai. A mit zawnah sawn vawi hnih chauh kap chhin ila pawi i ti em?" a ti ta a.

Setana chuan, "Kap chhin lovang, ka milem ngainat zawng tak a ni a, ka roh hle bawk," a ti a. Setana hlauthawng mitmeng chu a hmuh hman avangin Sudden-a chu a nui sak a. Setana hian englai pawhin vengtu a nei reng tih pawh a hrechiang hle tawh a, Setana hnenah chuan, "Ka tifiam mai mai a nih kha.... ka bawng rukte chu i hralh tawh em?" a ti a. Setana chuan, "La hralh rih lo, hmun him laiah ka thuhruk tir rih a ni," a ti a. Sudden-a chu a chhuak ta a.

Scar-a leh a țhiante pathum pawh chu an inngaihtuah nasa hle a, Scar-a chuan, "Sudden-a te ho nen hi chuan Hell City-ah hian kan leng ngang lo a ni. Kan thah thuai loh chuan....," a ti hman chauhva. Squint-a chuan, "Nia, kan thah veleh tlanchhiat nghal a ngai ang, kan Chief lakah hian kan tlatlum tawh vak lovin ka hria, Sudden-a hi kan thah a ni tih a hriat leh phei chuan a fel lo hle ang," a lo ti thuai a. Scar-a chuan, "Tlanchhe dawn pawh ni ila, kut ruaka tlanchhiat chu ka tum lo. Kan pu bawng ruk kha kan ruk theih chuan kan țhatpui thei viau ang," a han ti a.

Chu veleh Daggs-a chuan, "A ni tak, a vengtu lah Mexican pahnih chauh an ni si a, a awlsam ngawt ang," a lo ti ve bawk a. Scar-a chuan, "Bawngrual chu Double K ho ruk niawm takin tih kan tum anga, kan pu thin a rim teh ang chu. Pedro-a vang khan Mexican pahnihte pawh kha an thin a la rim ngawt ang chu, kan zingah an tel ve duh phei chuan bawng min khalhpuitu atan an țha ngawt ang chu," a ti a. Scar-a chuan, "Chuti tur em ni dawn? pali aiin pahnih chu an chak lo zawk a ni lawm ni?" a ti ta a.

A tuk zing chaw eikham hnuah Saloon tukverh ațangin khawthlang lam gate pana Scar-a sakawr chungchuang Sudden-a chuan a hmu a. Rang takin pawnah a va chhuak a, sakawra chuangin Scar-a chu a zui ru ve ta a. Hla tawk deuh ațangin a zui ru zel a, tlang kar kawng chhe tak tak karah rei tak a zui hnuin Scar-a chu lungpui lian deuh mai pahnih inkarah hian a lut ta a. A luh hnu rei vak lovah Sudden-a chuan a zui lut ve ta a. Chulai hmun chu thleng ang maia kum hi a ni a, Scar-a chuan bawng awmna hmun chu a va thleng a, chutilaiah chuan thinga sak in pakhat hi a awm a. In ațang chuan Mexican pahnih hi an lo chhuak a, Scar-a te nen chuan an inbiak hnuin inchhungah chuan an lut ho ta a.

Sudden-a chuan a han en chiang a, bawngrual chu zanga lai an tlin a ring a. Tichuan a rilru a siam thuai a, Merry-a Ranch, Twin Diamond panin a sakawr chu chak deuh maiin a tlantir ta a. Merry-a ranch a va thlen chuan, "Nizan khan hmanhmawh takin min chhuahsan ta mai si a, eng ti tura lo kal nge i nih le?" Merry-a chuan alo ti a. Sudden-a chuan, "Khaihlum mai atan chuan ka la in ui ve deuh a ni, i bawng bo hmuh kir leh ngei i duh ka rin avangin ka lo kal leh mai a ni," a ti a.

Merry-a chuan, "I pu thar chu i phatsan nghal mai dawn a ni maw? Kha, a badge pawh i la vuah reng si a," a ti a. Sudden-a chuan, "E, ka lo theihnghilh palh a ni, nang pawhin theihnghilh la, sawichhuak leh tawh lo hram ang che, i bawngrual chu hmuh kir leh i duh a nih zawngin, a awmna hmun ka hrilh thei ang che," a ti ta a. Bawngrual a hmuhna lai chu Merry-a chu a hrilh ta a. Merry-a chuan, "I hmuhna lai chu, Devil's Bowl a nih chu, Bawng 500 vel maw i hmuh? Keith-a nen kan bawng a nih ngei dawn chu," a ti a. Sudden-a chuan, "A ni maithei, mahse an khela chhinchhiahna chu ka va hmu phak chiah lo," a ti a.

Merry-a chuan, "Mexican pahnih chauhvin maw bawngrual chu veng? A awlsam hle dawn a nih chu. Tunah zawng Keith-a pawhin a hrethiam tawh ang che," a han ti a. Sudden-a chuan, "Ka pu Keith-a chu hrilh lo la ka duh zawk. Engpawhnise, muang vak lo la a țha ang. Scar-a'n a va tlawh chhan kha ka hre chiah lova, bawngrual chu khalh chhuah an tum pawh a ni mai thei," a ti a. Merry-a chuan, "Darkar khat ral hmain kan thawk chhuak thei mai ang. Tin, i duhdan a nih miau si chuan Keith-a hnenah pawh i thil min hrilh hi ka zep tlat ang. Tun chinah min mamawhna i neih phawt chuan tu emaw rawn chah la, kan lo kal nghal a ni mai," a ti a. Sudden-a chuan lawmthu a hrilh hnuin, Hell City panin a kirsan leh ta a.

A tuk khawvar hnuin, Sudden-a chu Saloon chhungah a țhu a, Scar-a pawh a lo lut ve a. Mexican pakhat hi chau awm deuh maiin a lo lut a, chutah Scar-a chu a rawn pan hnai a, a rukin reilote an inbia a, chuta Scar-a hmela thil lo lang ațang chuan, Merry-a leh a hote'n Setana bawng ruk dahkhawm chu an laksak leh a ni tih pawh Sudden-a chuan a hre thei ta nghal a. Setana chenna lam panin a chhuak ta a.

Setana chuan chanchinbu a lo chhiar a, Sudden-a hnenah chuan, "Bosville khaw Bank mi paliin an rawk a, Dollar 30,000 leh bill dangte an la a, pawisa kawltu an kaphlum a, an tlanbo ta daih a nih chu. Thil ka ruahman fel bawk a, ka hote hi an hlawhchham ngai lo," a han ti a, a chapo hle a. Sudden-a chuan, "Dollar 30,000 chu a tlem lo hle si a, i hote chuan tlanbopui an tum mai tur asin, Bosville khua chu a hla lo viau a ni lawm ni? An va thang rei tawh si ve?" a ti a. Setana chuan, "Min phatsan tawh nungdamin tumah an la chhuak ngai lo. Bosville khua chu mel 50 vel zet a ni a, kawngkual lam an zawh pawh a ni maithei asin," a ti a.

Chutih lai chuan Silver-a'n Mexican pa kha a rawn hruai lut a, hauh hlau tak chung siin, Mexican chuan, "Ka pu, Twin Diamond Cowboy 12 velin min rawn bei thut mai a, ka țhianpa chu an kaphlum a, kan bawng ven zawng zawng pawh an khalh bo ta vek a ni, Ka biru a, kei hi chu min that ve ta lo chauh a ni," a han ti a. Setana chuan a puakruk a phawi chhuak thut a, Mexican pa tin pahin, "Ka bawngrual min tihbo sak a, nangmah avangin, miin nuihza siam nan min hmang dawn a ni. Chuvangin, i thi tur a ni," a ti a, a puakruk chu a kau a.

"Twin Diamond rual chu engtinnge an lo hneh tehlul ang? A thawi damna chau pawl ber niin ka ngai," tiin Sudden-a chuan a lo țâwng khalh a. Sudden-a vek chuan, "He pa hian tlanchhe mai lovin chanchin a rawn thlen che a, i tan a rinawm hle a ni zawkin ka ngai," a lo ti ta a. Setana pawh chuan, a thiltih tum danin awmzia a neih loh zia chu a hrechhuak thut a, Mexican hnenah chuan, "Tun țumah chauh hi chuan ka ngaidam ang che, mahse he mi thu hi i sawichuah vaih chuan..... chhuak nghal rawh," a ti a. Mexican, Benito-a chuan, amah lo chhantu Sudden-a chu lawm tak hian a han melh zauh a, pawnah a chhuak ta a.

Setana chuan mahni insawithiam tumin, "Benito kha kahhlum ka tum tak tak hlei nem, vau nan ka ti chauh a nih kha. Tu'n emaw min phatsan tih a chiang a ni," a ti a, a ngawi vang vang a, tah chuan, "Engvanga min phatsan nge i nih Sudden?" a ti ta a. Sudden-a chu a țhen sak a, "I ring sual chiang hle. Min khaihlum tumtu Keith-a hnenah a bawngrual ka pe kir duh ang maw? Chu bakah bawngrual awmna pawh chu ka hre bawk si lova, Chuvangin Merry-a hote zinga tu berin emaw, in bawngrual dahna hmun a hmuchhuak palh hlauh a ni zawk ang," a ti a. Setana chuan, "I tidik maithei e. Tun țumah hi chuan an che țha zawk a, mahse an la inchhir ang," a ti a.

Pawna a chhuah hnuin Sudden-a chuan ngaihdan țha deuh mai a nei thar thut a, tichuan, Double K ranch ram panin khua ațang chuan a chhuak ta thuai a. A rin ang ngeiin, Double K ramri hmar lamah Frosty-a chu a va hmu a, amah chauhvin a awm a ni tih a hriatchian veleh a va pan hnai a, "Twin Diamond hovin in bawng bo an pe kir leh che u a ni maw?" a han ti a. Frosty-a chuan, "Nia mawle, a hote aia Merry-a hote thei zawka an lan avangin kan pu lah chu a thinrim nasa mai a, Langley-a pawh a vau nasa teh asin," a ti a.

Sudden-a chuan, "In pu hi tihlawm a harsa hle mai. Engpawhnise, Setana vuaklet theih dan kawng hre ta ila, in ti duh angem?" a han ti a. Frosty-a chuan, "Duh dawn lawm ni, Twin Diamond ho kha i chhawr anih ka ring a, min hrilh lo la, mahse.....," a ti hman chauh a, Sudden-a chuan, "Saloon kawngkhar ang maiin i ka i âng zing si a, thuruk engmah hrilh tlak i ni lo," a han ti zet a, amah vek chuan, "Tak taka, ngun takin lo ngaithla la," a ti a, Bosville khaw Bank rawk thu chu Frosty-a a hrilh phawt a, tah chuan,

"Bank rawktute chu vawiin tlaiah khawthlang lam gate ațangin Hell City an rawn luh ka ring a. Hell City luh dawn țepin kawng kawi nghat a awm kha, bihrukna tur pawh a tam a, kha laiah khan Lazy-a nen chauh lo chang ula, in lo tiding anga, harsa lo takin an pawisa chu in chhuhsak thei mai ang. An sakawr in um bosak vek anga, pawisa chu Merry-a hnenah in pe anga, Bosville Sheriff hnenah pe chhawng leh turin Merry-a chu in hrilh dawn nia. Bank rawktute chu khawthlang lam gate-a an lo kal loh chuan in vanduai deuh tihna a ni mai," a ti ta a. Hell City lam panin Frosty-a chu a kalsan leh ta daih a.

A tuk zingah Dirk-a saloon-a a awm laiin Sudden-a chu Silvera'n a rawn kova, "Kan puin hmuh che a duh a ni. Lo kal vat rawh, a thin a rim nasa mai," a ti a. Sudden-a chuan a zui ta nghal a. Puk chhung an va luh veleh Setana chuan, "Bosville bank rawktu ka hote kha nizanah miin an lo rawk leh chhawng a ni. Bosville ațanga lo kir tur an nih thu kha nang chauhin i hre si a, tlaiah khawiah nge i awm?" a lo ti nghal chawt mai a. Sudden-a chuan, "Tlai ațangin Dirk-a Saloon chhungah lehkha ka deng a, zanlai velah kan bang chauh a ni. Khawi lam ațanga lo kal tur nge an nih leh eng huna lo thleng tur nge an nih pawh min hrilh si lova, an lo thleng tawh reng reng em?" a ti a.

Setana chuan, "Thleng tawh e, kein an lo haw a, an sakawr pawh an hloh vek a, an pawisa leh an silaite chenin an lo laksak vek a ni," a ti a. Sudden-a chuan, "Pawisa chu thukruin nang hi an tihder theih che chuan i lak ațangin hlauh tur engmah an nei dawn lo tihna a ni mai a......," a han ti a. Setana chuan, "Chu zawng a ni thei lovang," a ti tlat a. Sudden-a chuan, "Bosville chanchinbu hi nang chauhin i la si lova, mi tam takin bank rawk thu chu hriain.....," a ti leh hman chauh a, Setana chuan, "Midang puh thluk i chak hle niin ka hria," a lo ti thuai a.

Sudden-a chuan, "I hote chu zanlai pelh hmain em ni an lo rawk?" a ti a. Setana chuan, "Ni e," a tih veleh, Sudden-a chuan, "Chuti, engati nge min puh țalh i tum fo? Pakhat chauh ka ni a, ka inphel darh thei si lova, nizana ka awmna chu, i hote 20 rual zetin an hrilh thei vek ang che chu. Inngaihtuah fing deuh teh," a ti a. Pawna chhuah tumin a han pen hman chiah a, puakruk a ri țhuai mai a. Sudden-a chuan rang lutuk tak maiin a puakruk pahnih a phawi chhuak a, pakhatin Setana chu a tin a, a dangin milem intar chu a tin bawk a, "Engtizia nge ni ta mai?" vin deuh mai hian a han ti a.

Setana chu che miah lovin a ding a, "Ka hre bik lo, Silver," a han ti tuarh a. Milem inziak puanzar phen ațangin, puakruk la khu vat vat hum chungin Silver-a chu a lo chhuak a. "Ka tifai dawn a, a puak palh ta mai a ni. Tumah kah ka tum lo," a han ti a. Setana chuan, "Tu zawk emaw hi min kap palh mai ang asin, nakinah i chungthu ka la ngaihtuah ang," a han ti phawt a, Sudden-a lam a hawi a, "Tihpalh liau liau a nih kha, he mi â pa hian silai chinchang a hre lo reng reng a ni," a han ti a.

Sudden-a chuan, "A ni ngei ang," tih pahin milem intar chu a va pan hnai a, a han en chiang a, "I vannei hle mai, Milem puakruk hmawr zawn chiah hi a kapfuh a nih hi. En chian hle loh chuan a kahna pawh a hmuh theih lova, i milem duh tak hian a chhiat phah lo hlauh mai," Setana hnenah chuan a han ti a. Pawna chhuah pahin Silver-a darah chuan a han beng thak a, "Hmelțha, hrehawm ti lutuk duh suh. I hlah rau rau chuan fuh teuh leh teuh loh a in ang vek," nui chung hian a han ti a, pawnah a chhuak ta daih a.

Sudden-a chhuah hnu lawkah chuan Setana chuan, "Silver, ka thu hmu lova engvanga puakruk hmet puak mai nge i nih?" a han ti a. Silver-a chuan, "A puakruk phawi a tum emaw ka ti a, a kap fuh palh ang che tih ka hlau a, ka kap ta mai a ni," a han ti a. Setana chuan, "Ka muhil hlei nem, Suddena'n min nuihzat zia kha i hria em? Tun chinah i tihsual leh vaih chuan Muley-a ka vuaktir ngei ang che..... piangsual tlawktlaw pa, ka hmuh phak lovah chhuak vat rawh," a ti ta a.

[Ngaia]

SUDDEN - RIDES AGAIN
AUTHOR : OLIVER STRANGE (1938)
CHAPTER - 15
(Rozami Pachuau)

Silvera'n Anita-i puk zawn a thlen laiin Anita-i chuan, "Ka khua a har em mai, lo leng ve rawh," a lo ti miau si a, be țhatu pawh la tawng ngai lo a ni si a, hmeichhe hmelțha tawk takin leng tura a lo sawm mai chu mak ti rilru deuh tak chungin Silver-a chuan a han en chiang a, puk chhungah chuan an lut ta a. Anita chuan zu a lo pe a, a lo be țha hle a, "Kan Chief țhian i ni si a, i chakin, thil i ti thei bawk si a, ka ngaisang ngawt țhin che asin, kan pu hian biak pawh a be chhe ngam ve chein ka ring miah lo," a han ti a. A zu in avangin a pawr țan deuh hlek bawk a, "Mi han vau khanglang a, duh ila chuan a ringruh pawh ka elh tliak vek thei ang chu," Silver-a chuan a ti a.

Anita chuan, "Nang hi chu a tina tak tak ngam lovang che. Mahse mi pakhat a khungbo ang hian a hrem ve mai ang che tih ka hlau a ni," a ti ta a. Silver-a chuan, "Mi pakhat a khungbo thute hi i lo hre ve a ni maw?" a han ti a. Anita chuan, "Hre ve nual e, tunge a nih phei chu ka hre lova, nang chauh hian chaw i pe țhin tih leh kan puin tuma hmuh a phal lo tih chauh ka hria a ni," a ti a. Silver-a chuan Anita chu a han melh a, va pawm mai hi a chak em em a, a hnenah chuan, "Nang nen hian inkawp awm tak kan ni. Ka pual ve tur hmeichhia ka duhna a rei tawh asin," a ti ta a.

Anita chuan, "La hmanhmawh rih suh, hmeichhia hi chu rim kan ngai a, pawng lak mai theih kan ni ve lo asin," a ti a, zu a thlit sak leh a, Mi pakhat an khungbo chanchin bawk chu a zawt leh a. Silver-a chuan, "Tunge a nih pawh ka hre bik lo, mahse, kan pu hian a veng ngun em em a, a chhuah a hlau em em bawk, 'Ka hmanraw țha ber a nih hi a ti țhin," a ti a. Anita chuan, "Chu pa chu hmuh ve ka duh em mai, Amah hmu turin vawi khat chauh chu min hruai ve ang che aw," tiin a ngen ta a.

Silver-a chuan, "Chu pa awmna pindan kal tur chuan kan pu pindan kaltlang a ngai a, i thlawk theite a nih ngawt si loh chuan ram dang ațangin chu pa awmna pindanah chuan luh theih chi rual a ni lo. A awmna lai chu kan pu chenna puk hnuai zawnah a ni, chhuat laiah luh thlakna a awm a, a luh thlakna laiah chuan kawngkhar 'trap-door' a awm a, chu chu kan puin a kalh a, a chahbi pawh a kawl tlat a ni. Ti teh, in pawm phawt mai teh ang," a ti a, a ding ta a. Mahse Anita chuan, "Khaih, ka rilru i la hneh chiah lo, I duh leh nidangah i lo kal leh dawn nia," a ti a. A beisei loh ang tak zawkin Silver-a chu a chhuak ve ta mai a.

Ni hnih lai a ral hnuin, khaw thim hnuah, Saloon-a Sudden-a lut tur Anita chuan a hmu fuh hlauh a, a chenna pukah a ko phei a, an pahnih chauha an awm hnuin, "Min ring ngam lo maithei a, mahse ka rilru hrilh che ka duh a ni. Pedro-a kha ka ngaina em em a, keimah vang liau liauva thi a ni bawk a, a phuba laksak ka tum a ni. Tunah hian Setana tihnat dan kawng țha tak ka hre tawh a, a bawng bo emaw, Bosville bank ațanga pawisa ruk sa chhuhsak ai pawhin, pawi a tih zawk tur thil pakhat a awm a ni," a han ti a. Sudden-a chuan, "Bawng bo thu leh Bosville chanchinte hi engtin nge i hriat theih?" a ti a.

Anita chuan, "Mipate hian zu an in a, an kam tam phah țhin. A thuruk vawnhim a duh chuan Setana hian Hell City-ah hian zu leh hmeichhia reng reng awm ve a phal tur a ni lo," a ti a. Sudden-a chuan, "Heng thu te hi engvanga min hrilh nge i nih?" a ti a. Anita chuan, "Setana laka phuba la tur hian keimah chauh chuan ka tlin dawn lova, nang hian Setana hi i ngaina vak lo niin ka hre si a, chuvangin puitu ni turin ka beisei che a ni," a ti a. Silver-a nen an inbiakna zawng zawng kha Sudden-a chu a hrilh ve vek phawt a, chutah, "Setana'n a thuhruk chu tunge a nih a, engvanga thukru tlat nge a nih ang?" a ti a.

Sudden-a chuan, "Ka hre lo le. Setana chu kan zawh ngawt loh chuan, hriat ngaihna a awm lo a ni. Setana kan zawh loh vek pawhin Setana'n lungin tang anga a khunga chu kan zawh a ngai ang," a ti a. Anita chuan, "Min puih phawt chuan kan zawt thei mai ang, min pui duh ang em?" a ti ta a. A theih phawt chuan puih a duh thu Sudden-an a sawi veleh Anita chuan, "Setana chenna kaltlang lovin, chu pa awmna chu thlen theih a ni lo tih Silver-a khan a sawi si a. 'I thlawk thei a nih ngawt si loh chuan kawng dang a awm lo' Silvera'n a tih kha eng a tihna nge ni ang?" a ti ta a.

Sudden-a chuan, "Heng lai puk reng rengah hian, boruak leh khaw eng luhna kua a awm zel alawm," a ti a. Anita chuan, "A ni dawn tak, chu pa awmna pukah chuan, hruizen nen in thlakthlain emaw, lawn chhoh emaw a theih ang em?" a ti leh a. Sudden-a chuan, "Naktukah ka enchhin anga, luh theih dan kawng a awm maithei a ni," a ti a, a chhuak ta a. A chhuah hnu chuan, "Setana'n lungin tang anga a khungboa chu tu tak ni ang maw? Governor Bleke-a hote pahnih kha an thi ve ve tawh si a. Hmanraw țha ber anga Setana'n a ngaih bawk si chuan.....," ti rilru neuh neuh chungin Sudden-a chu Saloon-ah bawk a lut leh ta a.

A tuk zing khawvar veleh Sudden-a chu Hell City ațangin khawthlang lam gate-ah a chhuak a, Pedro-a ruang a chharna hmun kha a pan ta nghal a. Rei fe, sakawra a kal hnuin chulai hmun chu a va thleng a, a chhak lam chu kham awih deuh ang mai hi a ni a, kham panga puk kotlang lo langte pawh chu Sudden-a chuan a hmu thei a. Pedro-a ruang awmna kha Anita chenna puk zawn vel chiah a ni a. Anita-i chenna ațanga hnuai lam, ft 20 vela hniam, tlema dinglam deuh hretah chuan puk pakhat a awm leh a, chu chu Dolver-a an dahna kha ni ngeiin a hria a, chu mi puk hnuai hla vak lovah chuan puk dang pakhat Sudden-a chuan a han hmu leh a, "Khi khi a ni ngei ang," a ti rilru a. Tichuan, kham panga thing țo te, vawn ban tur leh rahchhan remna lai tur te ngun deuh maiin a han thlek kual leh zet a, chungte chu rilru mitthlaa vawng tlat chungin Hell City lamah a kir leh ta a.

Saloon chhunga a luh veleh Saloon neitu Dirk-a chuan, "Setana'n hmuh che a duh a ni ngei ang, Silvera'n vawi hnih lai a rawn lam tawh che kha," a lo ti a. Sudden-a chuan Setana chenna puk a pan nghal a. Sudden-a hmel a hmuh veleh Setana chuan, "Thawh tur pawimawh tak i nei dawn ta e, khawchhak lam ațanga lo kal, dak phurtu tawlailirin vawiin tlaiah Red Rock khua a lut dawn a. Bank-a dah tur Dollar 40,000 a rawn phur dawn a, khua ațanga mel nga velah ruam pakhat a awm kha, kha laiah khan tawlailir chu i lo lambun dawn nia. Kha lai ruam kha i hria em?" a lo ti a. Sudden-a chuan, "Hria e, mahni chauhin em ni ka beih dawn?" a ti a. Setana chuan, "Ni lo ve, Scar-a leh a țhiante pathum i hruai ang. Mi panga tan chuan thil harsa lo tak a ni ang," a ti a.

Sudden-a chuan, "Scar-a te chu ka va zawng ange," a ti a, a chhuak ta nghal a. Ben Hold-a a va zawng chhuak a, a hmuh veleh, "Hell City chhuahsan i duh em?" a ti a. Holt-a'n a duh thu a hriatin Sudden-a chuan, "Sakawr i nei maw? A țha e. Red Rock khuaah i va kal anga, Sheriff i va zawng chhuak anga, ho tam tak hruaiin khua ațanga mel 7 vela hlaah dak phurtu tawlailir va hmuak turin hrilh ang che. Red Rock-ah chuan tumahin an hriat che ka ring lo. Chuvangin, dak phurtu tawlailir rawk tumtu, Outlaw hovin an man che niawmin i sawi anga, i tan buaina tur engmah a awm lovang," a ti a. Ben Hold-a chuan, "Min hrilh ang chuan tih ka tum ang. Mahse Hell City hi engtin nge ka chhuahsan theih ang?" a ti a. Sudden-a chuan thiltih dan tur leh tih tur ngun taka a hrilh hnuin Saloon lam panin a kalsan ta nghal a.

Sudden-a beisei ang ngeiin saloon-ah chuan Scar-a leh a țhiante pathum chu an lo țhu khawm a. An hnenah chuan, "Tun ațanga minute 20 ah khawthlang lam gate ațangin kan chhuak ang," Sudden-a chuan a ti a, a chhuak leh ta nghal mai a. Scar-a chuan, "A inti thunei vei hle mai maw? Reilote chu a thu kan la awih rih ang. Chumi hnuah erawh chuan.....," a han ti hmak a. Daggs-a chuan, "Dollar 1,000 insem tur kan nei tawh mai dawn si a, reilote a thu hnuaia awm rih lawk chu ka hnial vak lo," a han ti a. Squit-a chuan, "Kha pa kha eng tikah nge kan....," a tih lai mekin Scar-a chuan, "Tawlailir kan lambun hnuah a ni ang chu. Kan hlawhchham palh hlauh takin, Sudden-a kha hotu anga ngaih a ni bawk a, kan pu in a hauh tur leh a mawhphurtu tur chu amah kha a ni dawn asin," a ti a. A ngaihdan chu țha an ti tlang hle a ni.

Sudden-a chuan khawthlang lam gate chu a va thleng a, gate vengtu hnenah chuan, Gate hi lo hawng lawk mai rawh. Ka kawppui turte an tlai a, muangchang hman kan ni tawh lo," a ti a, Gate chu a vengtu chuan a hawng ta a, a hawng fel hman chiah tihin Sudden-a chuan, "Saw, pakhat chu a lo kal e," a ti a. Ben Hold-a sakawr chungchuang chu a lo kal hnai a, an bul a lo thlen dawn țepin Sudden-a chuan, "Kan zinga tel ve tur chu a nih loh hi. Thu engemaw min hrilh tur a nei a niang," a han ti a. A sawi fel hman chauh a, Hold-a chuan a sakawr a kheng thut a, gate-ah chuan a tlan tlang ta zawk mai a.

Kah zui tumin gate vengtu chuan a puakruk a han phawi chhuak a, mahse Sudden-a chuan, "I chhuahtir hi mi zawng zawngin hria se i ti em ni?" a ti a. Gate vengtu chuan, "Ka tuar tur a rapthlak em asin," a han ti a. Sudden-a chuan, "Chief-in a hriat chuan a rapthlak bawk ang, mahse kei hi chuan ka hrilh dawn lova, nangin i hrilh bawk si loh chuan, ramdang ațanga chhuak a nih leh nih loh tuin nge hria ang? E, saw, ka țhiante pawh an lo kal ta," a ti a, tichuan Scar-a te ho nen an tumna lam panin an kal ta a.

Sudden-a chuan Scar-a te pali chu hma a hruaitir zel a, amah kahhlum an tum duh mai ang tihte pawh a ngaihtuah tel vek a, chuvangin, puakruk phawi mai turin a inring ru ran reng a. Darkar tam tak an kal hnuin, thing hnah buk tak tak awmna lai an kal pel dawn țep tawh a. Scar-a leh a țhiante chu an ding a, Sudden-a chuan a va um phak nghal a. Scar-a chuan, "Kan thleng ta. Kan piah lawkah sawn Red Rock panna kawng chu a awm," a han ti a. An awmna lai chu tawlailir lo lambunna tura hmun remchang deuh hi a ni reng a. Kawng sir tuakah chuan hnimbuk sang tak tak a tam si a.

Sudden-a chuan, "Sakawra țhu chungin kawng sir tuakah hian insem darh ila, thu ka pek hma chuan tumahin silai hmeh per loh tur a ni," a ti a, Tawlailir lo kal tur chu an nghak ta a. Darkar chanve zet an nghah hnuin, an thlang lam ruam ațanga tawlailir lo chho chu an zuk hmu ta a. Sudden-a chuan tihngaihna a hre lo hle a, tawlailir chu rawk a, a hnu lehah an pawisa ruksak pek kir leh dan ngaihtuah chu a tan kawng awmchhun ni maiin a hria a. Chhan țha tawk tak awm si lova, tawlailir chu an rawk si loh chuan, a tan Hell City-ah kir leh ngaihna a awm dawn lo a ni.

A rilru a siam fel hman chiah tihin rifle a ri ta zawt mai a, tawlailir vengtu chu tawlailir ațangin a tla țhelh a, mahse a inhamtang leh hram a. Sudden-a chuan, "Tu'n ge silai hmet puak?" a han ti a. Daggs-a chuan, "Keiman, i chhuah tak ngial dawn alawm, lo kal rawh u le," a han ti a. Mahse an chetsawn hmain Sudden-a chuan, "A che chhuak hmasa chu ka kap a ni mai. Kan piah lam saw en rawh u," a han ti a.

An piah hla vak lovah chuan sakawr chungchuang pariat hian, a theih anga chakin an sakawr an rawn tlantir a, silai ri an hriat avangin Sudden-a te awmna zawn chu an rawn kap zui ta chiam a. Daggs-a chu an rawn kap fuh hlauh mai a, a tlu ta a. Sudden-a chuan a zuk thlek zawk a, "A thi tawh," a ti a, silaiin an rawn kap zui zel bawk si a, an lo kalna lamah chuan a theih anga chakin an sakawr an kirtir ve ta a.

Mel tam fe an tlan hnuin, tumahin an um zui tawh lo a ni tih an hrechiang a. Scar-a chuan, "Tu'n emaw min phatsan a ni phawt mai, sakawr chungchuang mite zinga pakhat kha Sheriff a ni tlatin ka hria," a han ti a. Squint-a chuan, "Kan thiltih tur hi tukinah khan kan hre chauh a ni si a, midang va hrilh theihna hun a awm lo reng reng, engtin nge kan tih tak ang le?" a han ti a. Sudden-a chuan, "Thil awmdan report turin in pathum hian Hell City-ah kir leh ula, kei chu an pawisa phurh kha engtin nge an tih zel hriat tumin Red Rock-ah ka va kal ange. Hun remchang dang kan hmu leh thei hlauh mahna," a ti a, a kalsan ta nghal a.

Sudden-a chuan Red Rock khua chu hla fe a kal hual a, khawthlang lam ațangin a lut ta a. Khaw chhungah chuan mipui an lo phusa nasa hle a. Sudden-a chuan saloon a pan nghal a, zu no dawm chungin dawhkan pakhat bulah a va țhu a. Rei pawh a la țhu hman lo tihin pa lian fe, sam sen deuh buai hian a rawn pan phei a, "Mikhual i ni ang maw?" a han ti a. Sudden-a chuan, "Ni e, Sheriff, in khua hi in phusa nasa viau mai a, engtizia nge?" a lo ti a. Sheriff chuan, "Rukru hovin dak phurtu tawlailir lo lambun an tum a ni," a ti a, thil awmdan zawng zawng Sudden-a chu a hrilh ta vek a.

Sudden-a chuan, "Chuvang chu a ni maw, mi han belhchian chhan? I hun i khawh ral thlawn mai a nih ka ring. Hmar lam ram ațanga lo kal ka ni, mi pakhat Merry-a hmuh ka tum a ni. Merry-a chu i hria em?" a ti a. Sheriff chuan, "Hria e, pa sang tak, cher ria țhal mai, Twin Diamond ranch neitu a nih kha," a han ti a. Sudden-a chuan, "Chu ngei chu a ni ka zawn. Mahse a lo danglam ta hle a nih dawn chu. Pa tawilam deuh, thau tak kha a ni țhinin ka hria," nui chung hian a han ti a.

Chu veleh Sheriff bawk chuan, "I sakawr ka hmu a, a khela chhinchhiahna in chhu erawh kha chu ka hrethiam vak lo a ni," a ti a. Sudden-a chuan, "JG tih kha ka hming bul a ni a, ka hming chu James Green a ni," a ti a. Sheriff chuan, "Kei pawh Sim Dealtry ka ni a, he khuaah hian kum sawm lai Sheriff-ah ka țang ve ta," a ti a, chibai an inbuk ta nghal a. Sudden-a chuan, "Twin Diamond ram bulah khan mi pakhat Keith-a an tih khan ram a nei ve țhin a. Fapa, kawm nuam deuh, harh tak mai a nei țhin a, a fapa kha a la awm em?" a han ti a.

Sheriff chuan, "Hun rei tak chu ka hmu tawh lo. Țhian sual kawm a ching a, zu in leh pawisa khelhte a ching zel a, mi pakhat a kaphlum ta a. Chu phei chu a thiam loh pawh a ni chiah lo. Chu pa chuan a phawi hmasa zawk a, mahse....," a ti a, a han ngawi deuh vang vang a, heh pet tlat chungin, "Ka fapa Dan-a chu hnunglam ațangin zan thim hnuaiah an lo kap a. Dan-a an kah hma lawk, chu mi zan vekah chuan, Jeff Keith-a leh Dan-a chu an inhnial buai a ni awm e. Ka fapa an kah zan ațang chuan Jeff Keith-a pawh chu a bo ta daih a, chuvangin ka fapa chu Jeff-a kahhlum ni ngeiin kan khaw mipuite hi chuan an ngai ta a ni," a ti a.

Sudden-a chuan, "Nang, enge i ngaih ve dan?" tiin Sheriff chu a zawt ta a. Sheriff chuan, "Ngaihdan siam pawh ka thiam lo. Midangte hriat ve miah loh thil hriat ka nei a ni. Jeff Keith-a chuan, a puakruk 44 englai pawhin a pai țhin tih ka hria a, ka fapa taksa ațanga silai mu an phawrh erawh chu 44 a ni tlat lo. Inhnial ralah erawh chuan puakruk dang pawh chu a lo hmang thei thova," a ti a. Sudden-a chuan, "Chutih hun lai vela bo ve, midang an awm em?" a ti a. Sheriff chuan, "Awm ve e, Jeff Keith-a'n a kawm fo țhin, Lafe Lander-a pawh a bo ve a, mahse ni thum hnu lawkah a lo kir leh mai a. Khaw chhak lam kal tum niawmin a insawi a, a kal bo leh ta thuai a ni," a ti a.

Sudden-a chuan, "I fapa chu Lafe Lander-a chuan huatna a nei reng em?" a ti leh a. Sheriff chuan, "Ka fapa Dan-a chuan Lafe Lander-a chu a ngaina lo hle a. Jeff Keith-a nen an inhauhna chhan pawh Lafe Lander-a chu a ni awm e. Dan-a'n Lafe Lander-a a ngainat loh thu Jeff-a hnenah chuan a sawi a ni awm e," a ti ta a. Sudden-a chuan, "Jeff Keith-a chu enge a chanchin ni ta zel?" a ti a. Sheriff Dealtry chuan, "Ka hre bik chiah lo. A pain a hnawtchhuak a, a tuithlar nghal a ni awm e. A kalbo hnu rei vak lovah Outlaw rual hnawksak deuh mai an lo awm ta a, an hotupa chu Jeff Keith-a a nih ringte pawh an awm nual a," a ti a.

Setana badge chu Sudden-a entir pahin, "Hei hi enge i ngaihdan?" a han ti a. Sudden-a chuan, "Enge a nih pawh ka hrethiam meuh lo. Khawi ațanga i chhar nge?" a ti ta rawk a. Sheriff chuan, "Tawlailir lambun tumtute zinga pakhat kan kaphlum a, chu pa chuan, hei hi a kawrâwmah a tar a ni. Mi țhenkhat sawi danin he badge hian, chu pa chu Jeff Keith-a hote zingah a tel ve a nih zia a tilang a ni awm e. Bank-ah kal ka duh a, ka chhuahsan tawh mai ang che, Merry-a chu chibai mi han buk dawn nia," a ti a, a chhuak ta nghal a.

[Ngaia]

SUDDEN - RIDES AGAIN
AUTHOR : OLIVER STRANGE (1938)
CHAPTER - 16
(Rozami Pachuau)

Khawvar hnuin Sudden-a chuan Red Rock khua chu a chhuahsan a, Hell City a pan leh ta a. Hell City a thlen hnuin a sakawr chu sakawr huangah a va dah a, Dirk-a saloon-ah a lut ta nghal a. Scar-a leh a țhiante pahnih an lo awm a, an hlawhchham thu Setana hnenah an hrilh tawh em tih Sudden-a chuan a han zawt a. Scar-a chuan, "Keini hian maw kan hlawhchham thu report ang? Teuh lo mai. A hotu i ni bawk a, i tih tur alawm," a han ti a. Sudden-a chuan, "A lawmawm a nih chu, ka duh ang takin ka report thei dawn tihna a ni mai alawm," nui chung hian a han ti a.

Sudden-a hian, anmahni a va puh anga, thiam loh a va chantir thei mai dawn tih Scar-a chuan a hrethiam nghal a. Chuvangin, "Ka lo kal ve zawk ange," a han ti a. Sudden-a chuan, "I thu thu le," a ti a, a chhuak ta a. Scar-a pawh chuan a zui chhuak ta a. Pawna an chhuah hnuin Scar-a chuan, "Nang aia kan thlen hmasak zawk thu hi chu sawi tel kher a ngai lovang," a han ti leh hram a. Sudden-a chuan, "In thleng tawh tihte chu a hriat loh i ring chuang em ni?" a tihsan mai a.

Sudden-a sawi lawk ang chiahin an hmel a hmuh veleh Setana chuan, "Scar, Hell City i lo thlenna darkar riat a ni tawh a, engvangin nge i hmel ka la hmuh loh?" a lo ti thei nghal mai a. Scar-a chuan Sudden-a kawk chungin, "He pa hi zawt ta che, min hotu a ni a, thil a tihsual nasat zia chu a hrilh chiang thei viau ang che," a ti a. Setana chuan, "Chu, in hlawhchham a ni maw?" Sudden-a hnenah chuan a ti a.

Sudden-a chuan, "Hlawhchham ang chu, kawppui tur mihring hnaisai lo tak tak min pekte chuan, hlawhtlin ngaihna awm hek lo. Ka thupek chu zawm duh se, Daggs-a khan silai a hmet puak ve rih lovang a, kan lo chang a ni tih an hriat hmain Sheriff leh a hote kha chu kan kaphlum thei vek ang chu, mahse ka thupek an zawm duh loh avangin kan hlawhchham phah ta a nih kha," a ti a. Setana chuan, "Chutiang chu thil awmdan a ni maw?" tiin Scar-a chu a zawt ta a. Scar-a chuan, "Daggs-a kha a hmanhmawh lutuk a lawm maw le, Chu lo rengah, vengtu an awm dawn tih kha min hrilh lawk bawk si lova," a han ti zauh a. Setana chuan, "I chhuak thei ang," a ti a. Scar-a chu a chhuak ta a.

Setana chuan, "I tan tih ngaihna a awm lo a nih chu. Engpawhnise, kan zinga i lo tel ve achin, thil tluang taka a kal thei lo tawp mai hi a mak viau a ni," a han ti a. Sudden-a chuan, "Red Indian ho tihdanin, i pathian i ti thinrim a, i damdawi a chak tawh lo a ni ang. Chutiang chu, keini hian, 'ka vanneihna a bo ta' tiin kan sawi țhin," a ti a. Setana chu za lo deuh mai hian a han nui a, "Chu chu mi țangkai lote chhuanlam a ni. Ka hote dik loh avanga ka thiltih kaltluang lo zeuh zeuh hi chu thil pawimawh lo tak a ni. A tawpah chuan ka thil tum chu ka la hlawhtling tho vang," a ti a. Sudden-a pawh chu a chhuak ta a.

Frosty-a hmuh duhna a neih tlat avangin Sudden-a chuan khaw thlang lam gate a pan nghal a, gate vengtu chu Holt-a chhuah laia, vengtu ngai bawk kha a lo ni hlauh a. Sudden-a chuan, "Hold-a kha a lo kir leh tawh em?" tiin vengtu chu a zawt a, ani chuan a la kir loh thu a hrilh a. Sudden-a chuan, "Chief hnen ațanga lo chhuak hlim hlawt ka ni a, Hold-a chhuah thu hi a la hre miah lo. Niminah thil fel lo tak a awm a, Hold-a chhuah vang kha a ni maithei, chuvangin, a chhuah thu kha zep tlat rawh. I hrethiam mai em?" a ti a. Vengtu chuan, "Hrethiam tehmeuh mai," a ti a.

Gate ațanga a chhuah hnuin Sudden-a chuan Belle a chhanchhuahna hmun kha a pan nghal a, Double K ramri chhungah a luh hnuin, mei a chhem a, hmun biru lai ațangin a nghak ta a. Chunglai chhehvelah chuan Frosty-a a awmin a ring a, a mei chhem chu Frosty-a'n a rawn hmuh a beisei a ni. Tichuan, darkar chanve lai a nghah hnuin sakawr chungchuangin Frosty-a chu a lo lang ta ngei a, Sudden-a chuan, "Mei kha timit la, hetah hian lo kal teh," a han ti a. Frosty-a chuan, "Kei hi lo kal lovin, Langley-a lo kal ta zawk se, engtin nge i tih ang?" a han ti a.

Sudden-a chuan, "Langley-a chu lo kal se ka bibo daih mai ang. Engpawhnise, zaninah hian thawh tur i nei," a han ti a. Frosty-a chuan, "Lawmthu hrilh chu min beisei hlek suh. Enge ka thawh tur chu, thil mawlte, 'tualthah' tih ang reng lek em ni, ka thawh tur chu?" fiamthu hian a han ti a... Sudden-a chuan, "I hming ropui tak, țha sa tihchhiat theihna lam thil chu a ni lo. Merry-a hnenah i va kal anga, sakawra zin phah sa pahnih i hawh sak anga, ka hmun kawh hmuh laiah che khan i lo kal dawn nia. Hruizen pahnih rawn keng la, kha lai hmunah khan ka lo nghak ang che," a ti ta a. Frosty-a chuan, "Enge kan tih dawn?" a han ti a.

Sudden-a chuan, "Thil ri i hriat theihna i beka thil hlai pui kha helam hawi hian han dah teh," a ti te te a, tah chuan, Setana'n lungin tang a kawl nia a hriat dan zawng zawng leh chu lungin tang chu chhanchhuah a tum thute a hrilh ta vek a. Frosty-a chuan, "Tang chu tunge a nih pawh i hre si lova, a thiltih sual man, a phu tawk chauh hmu pawh a ni maithei asin," a han tih chuan, Sudden-a chuan, "Thil i chhut sual duai a ni. A mamawh avang leh duhna a neih avangin Setana'n a tantir a, chuvang chauh chuan Setana kut ațanga lak bo ka duh a ni, min pui duh dawn em?" a ti ta a. Frosty-a chuan, "Duh awm teh e. Eng ang mi nge maw ni a min ngaih reng reng le?" lungawi lo deuh tak awm hian a han ti a.

Sudden-a chuan, "Ka hrilh che chuan i thinrim dawn em a, hrilh che ka chak lo kher mai," nui chung hian a han ti phawt a. Tah chuan, thutak deuh maiin, "Fimkhur hle a ngai ang. Setana'n min hriatchhuah hlauh chuan nungdamin kan chhuak lovang," a han ti leh thuai a. Frosty-a chuan, "Jim, i thiltih tum chhan hi ka hrethiam lo tawp mai. Setana'n misual anga lantir che a tum tih phei chu ka hria... mahse, i thiltih tum chhan bulpui ber hi enge ni?" a ti a. Sudden-a chuan, "Ka hrilh che chuan, 'I rilru a buai ta a nih hi' i ti ang. Zaninah chuan thil hriatchhuah thar pawh kan nei maithei. Ka hnuhma thup turin ka kalsan tawh ang che," a han ti a.

Frosty-a chuan, "Enge i tih dawn?" a han ti a, Sudden-a chuan, "Ka rui dawn. Dam takin le," a ti a, Frosty-a'n thudang a sawi leh hmain Sudden-a chu a sakawrah a zuangkai a, chak deuh maiin a tlantir ta nghal a. Frosty-a chuan, "A mak teh e, a fiamthu thawh leh thutak a sawi pawh a hriat hran theih mang si lova. Thih hlauhawmah pawh, 'lo kal rawh,' min tih chuan, châk takin ka zui zel mai si a, a mizia hi ka hrethiam phak reng reng lo mai, 'ka rui dawn' a tihte kha, eng a tihna tak ni ang maw? Țawng tam lo tura min hrilhna a ni awm e," a ti rilru neuh neuh a. A lo kalna lam panin a sakawr chu a tlantir ve ta a.

Sudden-a'n 'ka rui dawn' a tih kha chu, a fiamthu a lo ni hauh lo mai a! Hell City chhuahsan si lo anga lan a duh tlat a ni. Chuvangin, Hell City a thlen hnuin, tlai lamah Dirk-a saloon-ah lut nghalin khawthim veleh zu a in țan ta a, rui sawt hle hian a lang a, a bengchheng sawt em em bawk a, zu umkhat a tlak hnuin a dang a dil belh leh a, zu chu in tak tak lovin lei chhuatah a leih baw lai chu tumahin an hmu lem lo a. Dirk-a zu um rawn ken chu Sudden-a chuan ding chungin a rawn la a, mitmeng da va fe chung hian Dirk-a chu a han melh a, "He khuaa mi tumah hian min hau thei lovang, bar chhunga mi zawng zawng pawh hi insualah ka cho chiah..... ding ngil thei ila chuan," a han ti a.

A țawng rin em avang chuan pindan chhunga mite chuan a țawng chu an hre thei vek a. Um ami chu noah pawh thli chhuak chuang lovin Sudden-a chuan a han in piap a, rui lutuk tawh, din pawh ding țha hlei thei lo niawm takin a țhu ta hnawk a. Dirk-a chuan, "Kan vai pawh hian min ngam vek ang, tumahin an cho lovang che, no khat chauh in leh la, tui takin i mu mai ang," tiin naupang chhe thlem takin a han thlem a. Chutia a han tih pah chuan bar chhunga mite chu a mit chuan a han siai pah zauh a. Sudden-a chuan, "I fing... i fel.... i tidik, mu tawh teh ang," a han ti a, a han ding dawn a, mahse a han kang deuh uaih a, a țhu leh ta hnawk a, muhil niawm takin a thle kual ta a.

Dirk-a chuan, "A in tam tawh bawk a, a zo tawh ngang lo a nih hi, zaninah chuan a harhchhuak leh tawh lovang, min zawnpui ula, khumah i mut ang u," a ti a. Hma a hruai a, mi pahnihin Sudden-a chu a riahna khum lamah an zawn chho ta a. A pindan chhung an luhpui veleh Sudden-a chu a han meng uan a, "Min thlah rawh u, ka ding thei," a ti a, a tal thla a, pindan chhungah chuan a pai chawn chawn a. Chhunglam ațangin kawngka chu a kalh a, aw țeng chhe zet hian, "Mu..... dawn, min tiharh phawt chu ka that zel ang," a han ti a.

Pawna dingte chuan khuma Sudden-a mu lai thawm chu an hre thei vek a. An zinga pakhat chuan hawn a han tum a, puakruk a rawn ri țhuai a, a lu chung zawn kawngkhar chu a rawn pawp hawk a. Chhunglam ațang chuan Sudden-a chuan, "Min kaitho suh u' ti na na na a, min tihharh te in tum elo?" a han ti niah niah a. Dirk-a te pathum chuan Bar lam an pan ta thuai a. An pen thawm a reh veleh Sudden-a chu a khumah a țhu chhuak a, 'Zaninah chuan mi tibuai tawh lovang' tih rilru pu chung chuan kawngkhar chu thingin a va do belh a, a hruizen inkual chu a la a, a nghawngah a vet a, tukverh ațangin a chhuak a, harsa lo takin pawnah chuan a chhuak ta a.

A lukhum chu a mit khuh deuh thawin a kuai kun a, Hell City ațanga chhuahna ruk a hriat lam chu a pan ta nghal a, chulai hmun chu hmana Langley-a'n Hell City khaw luh nana a hman kha a ni. Sudden-a chuan Hell City a ruka luh theihna puk chu a va thleng a, thawm dim tak chungin puk chhungah chuan a lut ta a. Thui vak lo a kal hnuin puk vengtu pakhat chauh a awm tih a hre ta a, vengtu chuan, țhu chungin meilum a lo ai a, Sudden-a chu hnunglam a chhawn a, a rifle pawh chu a bul, bangah chuan a tung a. Sudden-a chuan vengtu chu a hnaih phei hret hret zel a, mahse thingțang a rap ri ta hlauh mai a, puk vengtu chu a tho thut a, a rifle chu a chuh nghal a.

Chutih lai tak chuan Sudden-a chuan a va zuan a, a theih anga nain vengtu khabeah chuan a va hnek chawrh mai a, vengtu chu a tlu ta a. Sudden-a chuan puk vengtu chu a phuarbet ta tlat a, a kâ a hnawh sak a, tichuan puk kil sira kailawn indawhah chuan a lawn chhova, puk chungnung zawkah chuan a han chuang chhuak a. Chutiang bawk chuan kailawn dang pahnih a zawh chhuak leh a, puk kotlang a han thleng ta a, puk kotlanga a chhuak lai chu, puakruka tin chungin Frosty-a chuan, "Nang i ni maw? Zu rui emaw ka hmuh dawn ka lo inti asin," nui chung hian a han ti a.

Sudden-a chuan, "Hei, min hmu reng alawm. Nichin deuh lawk kha chuan, ka ruih lutuk avangin min zawn a, kal pawh ka kal thei hlei nem, ka chah ang che khan, sakawr pahnih leh hruizen chu i lo keng em?" a ti a. Frosty-a'n a keng tih a hrilh veleh Sudden-a chuan, "Min zui rawh le," a ti a, Frosty-a sakawr rawn kaihah chuan a chuang a, khawthlang lam panin a kal ta nghal a. Sudden-a'n hma a hruai a, Frosty-a chuan sakawr pakhata lo kal chungin Sudden-a chu a zui ve zel a. Mel tam fe an kal hnuin Hell City awmna kham hnuai chu an va thleng ta a. Sudden-a chuan thing pil a thel var lai chu a va hmu a, "Hei hi kan thlen tawpna tur chu a ni ta," a han ti a.

Sakawr ațangin an chhuk a, an lu chung zawn lungbang chu Frosty-a chuan a han thlek chhova, lungbang lawn chi rual loh khawpa ding ngil hi ni maiin a hmu si a. Sudden-a hnenah pawh chuan, "Jim, tum duh ting lo mai rawh, i lawn thei chuang lovang. Chhanchhuah i tuma pawh chuan khama lo chhuk ai khian, a awmna ngaia awm a thlang maithei a ni," a han ti a. Sudden-a chuan, "A ni maithei, mahse, ka lawn chho dawn a, ani pawh chu a lo chhuk thla mai ang. Ka țe deuh țhat chuan, lo insaseng vat ang che. Ka rawn dek chak viau maithei a ni," fiamthu hian a han ti a. Khamah chuan a lawn chho țan ta a.

Vawn ban tur leh rahchhan turte pawh, a hmaa a lo en lawk tawh avangin Sudden-a chuan harsa lo takin a hmu thei zel a, chuti chung pawhin, kham chu a awih em a, hma a sawn chak lo hle a. Hnuai lam ațanga lo thlirtu Frosty-a chu a thusawi hrechiang lova lo ngaithlatu tan chuan, a țawngțai emaw tih mai tur hian a phun mawlh mawlh bawk a. Minute sawm a ral hnu chuan Sudden-a chu a han chawl lawk a, fit sawm chauh a la lawn hman a, Frosty-a hnenah chuan, "Ka chhaw mang e," a han ti a. Frosty-a chuan, "I chhaw ka hai lo," a han ti hmak a.

Sudden-a chuan, "Khi, feet sawmhnih vela sang, ka lu chung zawna lung tohlawt khi i phih awk thei angem?" a han ti a. Frosty-a chuan, phihawh tumin a hruizen chu a han vawrh chhova, mahse a vawm fuh lova. Sudden-a chuan, "I bawng vente chuan an hlimpui ngawt țhin chein ka ring a ni," tiin a zuk chhaih hram a. Engmah sawi lovin Frosty-a chuan a han vawm nawn leh a, a han vawm âwk ta a. Mihring a dawl dawn emaw tiin a han uai chhin a, tah chuan hrui chu Sudden-a man turin a zawnah a then phei ta a.

Sudden-a chuan a lo man a, harsa lo takin hruiah chuan a va uai chhova, lung tohlawt awmna a han thleng thuai a. Hruizen chu a phelh a, a dang a ken tawh avangin hruizen chu a thlak thla leh ta a. Zawi zawiin a lawn sang hret hret zel a, rei fe a beih hnuin hnuailam ațanga thlirtu, Frosty-a chuan, "I hi, puk awmna zawn chu a thleng chho ta reng mai! A thih hunah pawh vanramah chuan a luh nge nge dawn khi..... dan chi rual a ni lovang," ama hriat tawk lek hian a han ti sap a.

Sudden-a chu a hah tawh kher mai a, puk ko hnuai chu a vuan a, a inham kai ta a. Rei fe a han chawl a, tah chuan bawkvakin puk chhungah chuan a lut phei a, hlam hnih emaw lek a vah hnuin, tukverh inhawng a va thleng ta a. Tukverhah pawh chuan a kharna engmah a awm chuang lova, puk awng chu tukverh anga hman a ni nghal mai a, mahse a zar phuina turin a sirah chuan puanzar a inkhai a. Tukverh ațang chuan puk chhung chu a lang chiang hle a ni. Puk chhungah chuan Sudden-a lam hawi zawngin mi pakhat hi a țhu a, a bulah lalțin a hung a, lalțin engah chuan lehkha a chhiar malh malh a. A hnung puk kil sirah chuan kailawn hi a awm bawk a.

Sudden-a chuan a han en chiang a, puk chhunga lo țhu chu Setana nen in ang hle hian a hria a, a pianhmang leh a thawmhnaw inbelte pawh chuan Setana ânna tak a nei vek a, mahse Setana ai chuan tlema naupang deuh hret hian a lang a, hmai a tuam ve lo bawk a. Chu pa chuan a lehkha chhiar lai chu a dah a, Sudden-a lam hawiin a rawn dak chhuak ta a. A hmel a han hmuh chuan Sudden-a chu a thaw huai a, a hmaa rindan a neih chu a lo dik chiah a ni tih pawh a hre ta nghal a. Puk chhunga awm hnenah chuan, "I dam em?" a han ti a.

Puk chhunga lo țhu chu a tho phat mai a, mak ti deuh maiin Sudden-a chu a en reng a, a hnenah chuan, "Tunge i nih a, engtin nge hetah hian i lo awm theih?" a han ti a. Sudden-a chuan, "I țhian ka nia, khamah hian ka rawn lawn chho a ni," a ti a. Chu pa chuan, "I rawn lawn chho amaw? Thiltih theih loh tawp a ni," a han ti leh a. Sudden-a chuan, "Hei, min hmu ngei a, thlawhna turin thla pawh ka neih loh hi," nui chung hian a ti ta a. Chu pa chuan, "Engvanga lo kal nge i nih?" a ti leh zel a.

Sudden-a chuan, "Heta țang hian ka hruai chhuak dawn che a ni," a ti a. Ani chuan, "He puk chhuahsan châkna hi ka nei lova, ka duh bawk hek lo," a ti a. Chutih lai tak chuan, kawngkhar hawnna inkhar ri rak hi a hria a, chu pa bawk chuan, "Lo kal tur an awm a nih chu, i theih lai hian kal bo thuai rawh," a han ti a. Sudden-a chuan puakruk a phawi a, chu pa chu tin chungin, "Tukverh sira puanzar phenah hian ka ding dawn a, min hmuhchhuah vaih chuan, min hmu chhuaktu nen a rualin in thi nghal ang," a ti a, puanzar phenah chuan a ding ta thuai a.

Puk chhung, kailawn tawpna kawngkhar, 'trap door' chu a inhawng a, kailawnah chuan Setana a lo chhuk thla ta a, puk chhunga lo awm hnenah chuan, "Ka țhian, i tawng ri niawm takte kha ka hre tlat si a, ka hresual em ni zawk?" a han ti a. Ani chuan, "I hresual lo ve. Ka la nung a ni tih inhriattir na tur hian ka țawng fo a ni. Puk chhungah hian min phum ta emaw ka lo ti hial țhin. Pawn boruak thianghlim hip leh tur hian thil ka huam thui ngam tawh viau ang," a lo ti a.

Setana chuan, "Tukverh puanzar saw i hlim țha lova, boruak thianghlim i hip thei lo a nih hi," tiin tukverh awmna lam chu a pan phei a. Chu veleh ani chuan, "Vawt ka tih vangin ka hawng zau duh lo anih kha. Ka awm ve theihna ni si lo, khawvel hmel hmuh pawh hi ka duh lo a ni. A chang chuan, sakawra ka chuan laite kha ka ngaihtuah chhuak a, sava hram ri leh tui luang ri hawk hawkte pawh ka bengah a cham reng țhin. Heta ka awm reng chuan ka la â mai ang tih ka hlau a ni," a han ti a.

Setana chuan, "Ka hriatthiampui khawp mai che, mahse tih ngaihna vak ka hre tlat si lo a ni. Tukin zingah ngei pawh khan a fapa thattu zawng chhuak thei hnenah Sheriff Dealtry-a chuan, Dollar 1,000 pek a la tiam ta sauh sauh si a, ram tinah enthlatu a dah vek bawk a, ka hote lah hian, Dollar tlemte pawhin, mahni unaute ngei pawh an hralh duh vek hlawm awm si a. Heta i awm hi i himna tur kawng awm chhun a ni mai, kawng dang kawhhmuhtu che an awm a nih chuan i hmelmate an ni tihna a ni mai," a ti a.

Lungin tang chuan, "Danglam chuang lo, a pangngai bawk a nih chu, ka kianga i awm lai leh zel hi chuan i hmai tuam hi a ngai em ni?" a ti a. Setana chuan, "Vawi tam tak ka hrilh tawh che kha. Ka thutiam ka bawhchhe thei lo tawp a ni. Mi mak, tuma hriat loh anga ka lan hian, mi mawl zawkte chungah thu ka nei thei a, min ngaihsan phah em em a ni," a ti a. Ani chuan, "Engpawhnisela, zalen taka awm ka chak ber tawh a, engtikah nge pawnah ka chhuah ve theih ang?" a ti a.

Setana chuan, "Rei nghah a ngai tawh kher lovang. Sheriff Dealtry-a'n accident a tawh palh chuan....," a han ti țan chauhva, chu pa chuan, "Chutiang thilsual leh bawlhhlawh tihnaah chuan tel ve ka duh lo," a ti ta a. Setana chuan, "Sheriff Dealtry-a tihhlum ka tum vanga chu thu chu sawi ka ni lo. Dealtry-a hi Sheriff țha tak a ni a, mahse hmelma nei lovin Sheriff țha a nih theih tlat si lova, chuvangin, a hmelmate zinga tu ber emawin amah chu an lo that a nih pawhin a mawhphurtu nih ka tum lova, ka sun tehchiam dawn bawk hek lo. Dam takin le," a ti a. Kailawnah chuan a chhova, trap door chu a khar leh ta a.

Setana chhuah hnuah Sudden-a chu pindan chhungah chuan a lut ve ta a. Tang chuan, "Mister, thil awmzia chu i hriat ve vek tawh kha. I hun i rawn khawhral thlawn mai mai a ni," a han ti a. Sudden-a chuan, thudang sawi miah lovin, "Ken duh i neih apiang tunah hian la khawm nghal rawh," a han ti a. Chu pa chuan, "Ka țhianpa thusawi kha i hria a, thil awmdan zawng zawng i hriat vek tawh kha. Ka tan, he puk chhunga la awm hi a țul rih tlat a ni," a ti a. Chu veleh Sudden-a chuan a puakruk a phawi a, chu pa chu tin chungin, "Phuar hlawm kher i duh a nih si loh chuan insiam vat rawh," tiin a vau ta a.

Chu pa pawh chuan hnial chi a ni lo tih a hriatin, "A nih ka zui ang che," a ti a, a lukhum a khum ta nghal a. Sudden-a chuan a hruizen ken chu a han phelh a, dawhkan ke pakhat chu a vaw bal a, a lai takah hruizen a hling a, dawhkan ke chu tukverhah chuan a va kham chhin a. Tukverh chu a zim bawk a, dawhkan ke chu tukverh biangah chuan a leng thei a, tah chuan, hrui hmawr lehlam chu khamah a thlak thla ta a. Puk chhunga lo awm zawk chuan, "Engah nge hrui hmawr hi nghet taka i thlun mai loh?" a han ti a. Sudden-a chuan, "Tu emaw an lo lut thut anga, awlsam taka min umzui mai theih loh nan, kan chhuk hunah hrui hi lak bo nghal ka tum a ni. Khai le, chhuak hmasa la, ka zui ang che," a ti a. Tichuan, chu pa chu hruiah chuan a uai thla țan ta a.

Puk chhungah engmah ti lovin a lo awm rei tawh bawk a, lungbang tlawh chungin, hruizen uaithlak chu a tan thil hahthlak tak a tling a. Tichuan, thui fe a uai thlak tawh hnuin, sakawr hnar tum ri a han hria a, sakawrah chuan, a hnunga rawn zuitu chu tlansan daih mai duhna a rilruah a lo lut thut a, mahse lei a zuk thlen veleh mi pakhat hian, "Khawiah nge Jim-a a awm?" a lo ti nghal chawt mai a. Chu pa chuan a chhan hmain Sudden-a chu an bulah a rawn tla thla thum țawk mai a, "Heta hi ka awm e," a han ti a, a ding mar thuai a, a han indap vel a, "Ruh tliak engmah a awm lo ve, engvanga min lo chelh vat lo nge maw i nih chu le?" Frosty-a hnenah chuan a han ti a.

Frosty-a chuan, "Leh mai mai țhin a. Hmanhmawhna thut enge maw i neih reng reng le?" a han ti ve thung a. Sudden-a chuan, "Dawhkan ke ka kamna puk ko (Tukverh biang) kha a bal a nih ka ring. Ka remhriatna kha a țha tawk chiah lo deuh a ni ang," a ti a. Frosty-a chuan, "A ni ang, lo ri thla fua ka hriat kha, dawhkan ke a lo nih lek dawn chu," a ti ve ta a.

Sakawra an chuan hnu pawhin an mi chhanchhuah chu a ngawi reng a. Frosty-a chuan Sudden-a hnenah thil awmdan zawh chian a han tum a. Mahse Sudden-a chuan, "Nakinah i la hre vek mai ang. Sawi nawn kher a buaithlak," a tihsan mai si a. Tichuan ngawi rengin Merry-a te ranch, Twin Diamond lam an pan ta a. Zanlai velah ranch in chu an va thleng a, zan a rei tawh hle nain Merry-a chu a lo la meng a, kawngkhar chu a lo hawn a, "E, lo lut teh u," a lo ti a. An va chhanchhuaha chu a lut hnuhnung ber a, a lukhum chu a mit zuk chhin țhelhin, kun deuh mai hian a khum tlat a.

Merry-a chuan, "Chanchin enge awm le?" a han ti a. Frosty-a chuan, "Chanchin eng teh chiam mah a awm lo, i sakawr kan rawn pe kir leh dawn mai che a ni. I hruizen pawh ka hawh tel nghe nghe asin," a ti a. Merry-a chuan, "Ranch in pumpui pawh hi engah nge i hawh law law loh?" a han ti a. Frosty-a chuan, "Thing tuah tur kan mamawh lem lo a ni," nui chung hian a han ti a. Merry-a pawh chuan nui chung bawkin, "A nih hlawm tak chu, Jim, engtiziaa, tun ang huna lo leng nge in nih le?" a ti a.

Sudden-a chuan mi a va chhanchhuah thu chu Merry-a a hrilh ta vek a. Merry-a chuan, "Thih pawh huama i va chhanchhuaha hi tunge a nih le?" a han ti a. An va chhanchhuaha chuan, "Tuma tihbuai lova mahni chauhva awm mai mai ka duh a ni," aw thum fe hian a lo ti a. A lukhum chu Sudden-a chuan a han kaih dak sak a, Merry-a hnenah chuan, "Tunge a nih i hriat ka ring, han en chiang teh," a ti a. Merry-a chuan a han en chiang a, mak ti em ema meng phâwk fe chung hian, "Uai, Jeff Keith-a a ni reng mai, Hmai tuam Setana kha tunge ni ta si ang?" a ti ta a.

Frosty-a chuan mak a ti em em thova, "Jeff-a hian min hrilhfiah theiin ka ring," a han ti thlarawk a. Jeff-a chuan thinrim em em maiin Sudden-a lam a hawi a, "Fing tawk hlein i inhre bawk a, nangman hrilh ta che," a han ti el deuh ngat a. Sudden-a chuan, "Nia mawle, Setana hming invuaha kha chu Lafe Lander-a a ni a, Outlaw leh rukru rual hotupa a ni a, nangmah niawm takin a in lantir a ni," a ti a. Sudden-a thusawi chu Jeff Keith-a chuan a awih lo kher mai a, a hnenah pawh chuan, "Chutiang thu awmze nei lo lutuk chu awih thei dawnin min ring a ni maw?" a han ti a.

Merry-a chuan, "Boy, Jim-a thusawi chu a dik a ni. I inchei ang chiahin a inchei a, i aw ang takin a aw te pawh a ti danglam a, a hmai a tuam tlat bawk a, nangmah hre chiang tak tak tute pawh a bum thei zel a, Setana chu nangmah hi i niin an ring vek a ni," a lo ti ta a. Amah vek chuan, "I țawngkam hman zin em em, 'By Chrismas' tihte thlengin Setana chuan i tih dan a zir ve vek a ni," a han ti leh a. Jeff Keith-a chuan, "Keimah anga lan a duh lohna tur chhan țha tak a awm si a, ka hrethiam lo tawp mai," a la ti hram a.

Sudden-a chuan, "Heti zawng hian ngaihtuah ve teh. Lafe Lander-a leh a hote chuan, henglai chheh vel ramah hian bawngte an ru a, mi an that a, pawisa te an ru fova, a mawh chu nangmah hian i phur vek zel a. Lafe Lander-a chu nangmah hi ni ngeiin an hre țheuh si a, a dinhmun hlauhthawnawm nia a hriat hunah, Lafe Lander-a chuan, a hmai tuamna a phih thla ang a, a tlanbo daih anga, a thiltih sual zawng zawng chu i tih tluk chiah a lo ni tawh anga, ani, him taka a awm laiin nang hian a mawh chu i phur dawn a ni. Tun thleng hi chuan, i țhian anga i ngaih, hmai tuam chunga i hnena lo kal țhina kha Lafe Lander-a a ni tih hretu chu nangmah chauh i ni si a. I ruang an chhar hunah hmai tuam chunga i lo awm si chuan, Lafe Lander-a chu a fihlim hmiah anga, nang hi misual ber Setana thihin i thi tawh mai dawn a ni. A hmanraw țha ber niawmin a sawi che a, a lo tidik chiah a nih hi," a ti ta a.

Jeff Keith-a chu a han thaw huai a, tah chuan, "I thusawi chu rin theih harsa khawpa mak a nih chu, mahse thil awmdan nen a inrem chiah a ni. Lafe-a chuan puk kha ka chhuahsan a phal lo reng reng a, 'I tan a hlauhawm lutuk' a ti tlat a, a hote'n min phatsan mai dawn niawm takin a sawi țhin a....," a han ti zet a. A rilruah thil dang a lo lut leh thut a, Sudden-a hnenah chuan, "Engah nge Red Rock khuaah min kalpui zawk loh? Red Rock khuaah chuan min hlawkpui zawk daih ang chu?" a ti leh ta daih a.

Sudden-a chuan Jeff-a rilru chu a hmu tlang nghal vek a, a hnenah chuan, "Sheriff Dealtry-a chuan hmuh che chu a duh ngei a, mahse, nangmah a hmuh theihna turin Dollar 1,000 pek erawh chu tuma hnenah a tiam lo. Kha thu kha chu dawt bawk a ni," a ti a. Jeff-a chuan, "Chuti si, engah nge i lo kal?" a han ti leh hram a. Sudden-a chuan, "Hell City nuaibo turin i pa in min ruai a, ani chuan a rilru a thlak tawh a, kei hi chuan ka la thlak ve lo a ni," ti chauhvin a chhang a. Jeff-a chuan, "Mahni hrin, a fapa ngei that turin Gunman a ruai a ni maw?" thinrim deuh maiin a ti ta a. Sudden-a chuan, "Ni lo, ti na lo tur chein i pa chuan thu min pe zawk a ni," a ti a.

Jeff-a'n a pa hmusit awm tak mai a thu a han sawi chu Merry-a chuan a tuar zo ta ngang lova, "Jeff, Tleirawl thinlung khauh tak i ni țhin tih ka hria, ka țan hram hram țhin che a, tunah pawh hian sual lam kawng i dai thuk tawh hle emaw kan tih laia thil awmdan kan hrechhuak ta hi ka lawm takzet a ni. Mahse i pa hi mi țha tak a ni a, ka țhianpa a ni bawk a, ka beng hriata a hming sawichhiat hi ka phal lo reng reng a ni," a han ti a, a thinrim chu a reh leh thuai a, amah vek chuan, "Keimahin ka sawichhia a nih ngawt si loh chuan," nui chung hian a ti leh thuai a.

Jeff Keith-a chuan, "Min ngaidam rawh, Mart, ka rilru a buai em a ni.... min puih in tum nasat zia hi ka hrethiam em em a, thil pakhat min tiam dawn phawt chuan, ti tura min duh apiang ka ti zel ang. Ka chanchin hi Double K ranch-a mite'n an hre ve tur a ni lo. A thiltih danah ka pa chu a thiam a ni maithei, mahse he buaina hi ka chinfel a, hmai fai taka a hmaa ka lan hma loh chuan....," a ti a, a ngawi ta daih a. Merry-a chuan Jeff-a rilru chu a hrethiam em em a, "Chu chu i tih tur chiah a ni, ka hrethiam a che, Keith-a hi mi induh tak, inchhuang thei tak a ni a, a rilru pawh a na em em a ni. Chuvangin he thilah hian fiahna țha tawk tak kan nei ngei tur a ni ang, a hmasa berin nang hi engtinnge kan tih ang che?" a ti a.

Sudden-a chuan, "He ranch-ah hian awm rih se a țha ber ang, mahse khawiahmah chhuak lo turin a fimkhur hle tur a ni ang. Setana khan a hmuh fuh leh vaih chuan kan chhe vek ang, tunah chuan ka kalsan tawh ang che u," a ti a. Jeff-a chuan chibai buk tumin a kut a phar chhuak a, "Lawmthu hrilh che ka duh a ni, mahse i tan kir leh kher a ngai em ni?" a han ti a. Sudden-a chuan Jeff-a kut chu vuan chungin, "Kir leh lo thei ka ni lo. Ka mutna pindan kawngkhar kha an tichhe lo a nih chuan ka him tihna a ni mai. Mart, i sakawr chu Frosty-a hian a rawn hawn leh mai ang," a ti a. Frosty-a nen an chhuak ta nghal a.

Thui fe an kal hnuin Frosty-a chuan, "Jim, i kal hma khan, i chhanchhuah tur kha Jeff-a a ni tih i hre sa a ni maw?" a ti a. Sudden-a chuan, "Hre lawk bik lo ve, Setana kha vawi hnih vel a che chhe tawh a. Ni anga inlantir a tumna hi ni lova rinna ka nei tlat a," a ti a. Frosty-a chuan, "Tunah hian Jeff-a hi mi hmaah in larchhuak mai ta ni sela chuan, Setana a nih loh zia....," a ti hman chauh va, Sudden-a chuan, "Jeff-a hi a inlar chhuah mai chuan, Sheriff Dealtry-a'n a man anga, Lafe Lander-a chu a tlanbo daih mai ang, Lafe Lander hi a tlanbo si chuan Jeff-a hi Setana a ni lo tih tunge ring thei ang? Chuvangin nghah rih a țha ber a ni," a ti ta a.

Khawvar dawn țepin Hell City luh rukna kawngka, puk kotlang kha a va thleng a, a sakawr Frosty-a kuta a hlan hnuin Sudden-a chuan puk chhung lam chu a pan thla ta nghal a. Puk vengtu a phuarhlawm pawh kha a kalsan dan ngai rengin a la awm a. Sudden-a chuan a phuarna chu a phelh a, "He thil hi Chief-in a hriat vaih chuan a that duh ngei ang che, Kei chuan engmah ka sawi dawn lova, nang pawhin sawi lo la, i him zawk ang," a ti a. Vengtu chuan engmah a sawi chhuak ngam lovang tih ringin a riahna in lam a pansan ta nghal a.

A chhuahna tukverh ațang bawkin sudden-a chuan a pindan chhung a pan leh ta a. Kawr pawh phelh lo leh pheikhawk pawh phelh lovin a mu ta nghal a, rei loteah a muhil ta mai a. A muttui lai tak chuan Saloon neitu Dirk-a chuan a rawn kaitho ta a. Sudden-a chu la rui deuh niawm takin a phun deuh nang nang a, kawngkhar chu a va hawng a, Dirk-a chuan, "Chief-in hmuh a duh che a, Scar-a a rawn tir a, a thin a rim hle a ni awm e, kal nghal vat rawh," a rawn ti a. Sudden-a chuan a puakruk paina kawnghren a sawi chhing a, Dirk-a chu a zui chhuak ta a. Scar-a chuan Sudden-a chu Bar-ah a lo nghak a, a lo kal a hmuh veleh chuan, "Ti rawh i kal nghal ang, muan chi a ni lo," a lo ti thuai a, an chhuak dun ta nghal a.

Setana chenna puk chhung an va thlen veleh Setana hmaa ding, Anita chu a hmu nghal a, an sir lehlamah chuan Silver-a a lo ding bawk a. Thil fel lo tak a awm a ni tih Sudden-a chuan a ring nghal mai a. Setana chuan thinrim deuh mai hian a lo melh a, "Engtin nge?" ti ringawtin Scar-a chu a zawt a. Scar-a chuan, "Nizan dar riat velah a ruih lutuk avangin an zawn a, a khumah an muttir a, Dirk-a'n a han kaitho chawp a, Bar-ah ka lo nghak a ni. Tin, a sakawr pawh huangah ka hmu a, tun hnai maiah chuan a chungah tumah an chuang lo tih pawh ka hria," a han ti a. Setana chuan Sudden-a chu, "Nang chu i fihlim a nih chu," a han ti a.

Sudden-a chuan, "Engtizia nge, in thu pawh ka hre ve si lova, thil awmdan min hrilh la, lawmthu pawh ka hrilh thei ang che chu," a han ti a. Setana chuan, "Ka tana mi pawimawh tak, ka mikhual min rukbo sak a ni. Mikhual ka nei a ni tih pawh kei leh he mihring tling lo chauh hian kan hria a. He mi tlawktlaw hian zu a lo va rui a, Hmeichhe hnenah hian a lo va sawi ta mai a ni," a han ti a. Sudden-a chuan, "Chuti, Silver-a hi chu a fihlim ve a nih chu," a ti a. Setana chuan Anita chu thil awmdan a zawt leh ta thung a.

Anita chuan, "Ka hrilh zo vek tawh che a lawm. He pa hian min vau avangin zu ka pe a, a rui ta lutuk a, mi pakhat, amah chauha puk chhunga lungin tang anga a awm thu te a sawi nual a, a thusawi chu ka nin zawng tak a ni a, ngaihthlak pawh ka ngaithla țha mang lo," a han ti a. Setana chuan chu nu chu ngun deuh mai hian a han en a, "I daw chiang hle mai, i rilrute pawh hre vek thei hi, min tihder i tum a ni maw? I bialpa a thih avangin, phuba lak i tum a nih kha. Tu nen nge in intiam rual min hrilh dawn nge....," a ti a, a vau ta a. Anita chuan, "Chutiang thil engmah ka hre lo," a ti tlat a.

Setana chuan Anita kawrâwmah a va țham a, a va phih vak mai a. Anita kawrâwm chu a thler kawk a, Setana chuan Muley-a a ko ta nghal a. Kawngkhar hnung, hmun thim lai ațangin Muley-a chu a lo chhuak a, Anita kawrâwm țet zawn chu hmuhnawm ti deuh mai hian a han en a. Setana chuan, "Muley, he nu hi vawi ruk vua la, a inpuan hma chu nitin vawi ruk i vaw ziah tur a ni," a ti ta a. A lakah a tlâktlum tawh loh avangin Muley-a chu Anita chungah a thin a rim em em a. Chuvangin, vuak pawh chu châk tak te hian a châk a.

Tichuan vuak nghal mai a han tum a, mahse Sudden-a chuan, "Setan, he nu hi i vuak avangin hlawkna engmah i hmu chuang lovang. Engmah hrilh tur che a hre chuang lo. I mikhual kha chu keiman ka chhuah a nih kha," a lo ti ta a. Scar-a chuan Sudden-a nakah puakruk hmawra tin chungin, "Lo inrawh ve hlek suh," tiin a lo vau a. Mahse Sudden-a chuan, "Hman zan lawk khan Silver-a zurui hi Anita chenna puk chhungah a uang chiam mai a, a insawi pawimawh hle a. Lungin tang anga mi pakhat i kawl thute pawh a sawi nual a. Tichuan, lung bangah khuan ka lawn chhova, nizana i lo luh lai khan, tukverh puanzar phenah khan ka awm reng asin, he hmeichhia hian engmah a hre ve lo," a ti ta a.

Setana chuan, "Nangmah hi lo zuk ni hrep che a, Muley, inring rawh le," a ti a. Sudden-a chuan, "Setan, thil theihnghilh i nei. Uicho Pedro-a ang kha ka ni ve lova, hmeichhia ka ni bawk hek lo. Min vuak avang maiin ka sawi duh loh chu min sawi tir thei chuang lovang. Ka thih leh lek phei chuan i țhian Lafe Lander-a kha chu i hmu leh tawh ngai miah lovang," a ti a.

Sudden-a'n Lafe Lander-a hming a sawi veleh Setana hmel chu a danglam nghal daih a, rei lote a han inngaihtuah a, tah chuan, "Scar, Muley-a nen in chhuak thei ang, hmeichhia pawh hi hruai chhuak nghal rawh u, khua hi a chhuahsan tur a ni lo," a ti a, an pathum chuan an chhuak ta a. Setana bawk chuan, "Silver, i fimkhur tawk lo deuh niin a lang. I hna thawk turin kal nghal rawh," a ti leh ta a. Silver-a pawh chu puk kawngka lehlamah chuan a chhuak nghal a, mahse milem inkhai hnungah chuan a ding leh dawn a ni ang tih Sudden-a chuan a ring tlat a.

An pahnih chauhva an awm hnuin Setana chuan, "Sudden, tlang takin thu ka hrilh mai ang che, ama tana țha tur ka ngaihtuah avangin mikhual kha ka hreng rih tlat mai a ni zawk. A fapa thattuah Sheriff Dealtry-a'n a puh avangin amah kha a zawng mek a, Dealtry-a fapa kha keima thah a ni si a. Lander-a leh Dealtry-a fapa chu an inngeih vak loh avangin, Lander-a thahah an ngai tlat si a. Ka thil tihsual avanga Lander-a'n a tuar chu ka remti lova, chuvangin Lander-a chu hetah hian ka awmtir ta mai a ni," a ti a. Sudden-a chuan engmah pawisa lo niawm takin, "Lander-a chu i tuar ai tuar tir la, nang hi i fihlim hlauh anga a ni mai alawm," a han ti a.

Setana chuan, "A ni ngawt mai, mahse Lander-a kha ka țhian a ni miau alawm," a ti a. Sudden-a chuan, "Thil ka lo tisual der a nih chu, tih tum ka neih tawh chu ngaihtuah mang lovin ka ti nghal ngawt zel a, hlawkna awm hlek si lovah lungbang lawn harsa lutukah khuan ka lawn a, ka lo inti hah thlawn mai mai a nih chu," a han ti a. Setana chuan, "Tunge pui che?" a han ti a. Sudden-a chuan, "Ka sawi duh lo, i hote zinga mi pawh a ni lo. Amah phei chuan engmah pawh a hre ve lo, sakawr min pe ve chauh a ni," a ti a.

A beisei loh ang takin Setana chuan zawt zui zel ta lovin a ngawi zui ta a, "Lander-a chu tunah hian khawiah nge a awm?" tiin a zawt zui ta daih zawk a. Sudden-a chuan, "Ka hre bik lo, ka chhuahtir ve ringawt mai a ni. Ka hruai kir leh mai ang," a ti ta rawk a. Setana chuan, "Engvanga lo inrawlh buai ve ringawt nge i nih ka hrethiam lo tawp mai," a ti a. Sudden-a pawh chuan, "Kei pawhin ka hrethiam chuang lo, lungin hi ka haw hrim hrim a, lungbang khu lawn harsa awm taka a lan avangin, min cho tlatin ka hre bawk a, chuvang chu a ni ber ang," a ti a.

Setana chuan, "Lander-a chu va zawngin rawn hruai kir leh i tum dawn em ni ang?" a ti a. Sudden-a chuan, "Hmuh leh hram ka tum ange," a ti a, a chhuak ta a. Vaihlo lei turin dawrah a va lut a, a hnungah Silver chuan a rawn zui a, silaimu bawm ruk a rawn lei a, a chhuak leh ta daih a. Sudden-a chuan, "Engatan nge a tih zawh zai chu le?" a han ti a. Dawr neitu chuan, "A pu ta tur aniang. Amah chauh saw silaimu .38 hmang țhin a ni a, inthemthiam nan a hmang nasa em em a ni," a ti a. Chu mi thu chu, Sheriff Dealtry-a a hmuh huna zawhfiah turin Sudden-a chuan a rilruin a vawng ta tlat a.

Sudden-a chhuah hnuin Setana chu a inngaihtuah buai hle a. Jeff-a kha Double K ranch emaw Twin Diamond-ah emaw Red Rock khuaah emaw a kal ngam lo tawp anga, a bibo rih lawk a ni ngei ang. 'A awmna Sudden-a khan a hriat phawt chuan a awmna hmunah Sudden-a khan min hruai ngei ang!' a ti rilru a. Tichuan Silver-a a ko lut a, a hnenah chuan, "Sudden-a kha enthla turin mi ruat rawh, hmuh phak lovah a awm phawt chuan i beng pahnih hi ka pawhthlak sak ang che, i hmelchhiat hi a belhchhah nge nge ang," a ti a. Silver-a chu pawnah a chhuak nghal a, a puin a hmuh phak loh hnu chuan kuttum a han lek khum a, a kalsawn ta thuai a.

Silver-a chhuah hnu lawkah Setana pindanah chuan Belle Dalroy-i a va lut ve thung a, țhutthlengah chuan mal thui fe lang thei ngei turin bawp khawkherhin a han țhu ngat a. Setana hnenah chuan, "Jeff, engtizia nge lungawi lohna riau i nei em ni?" a han ti a. Belle ke ler ațanga lu chhip thlengin Setana chuan ngun deuh mai hian a han thlek a. Joan-i nen a rilruin a han khaikhin a, Joan-i chu Belle hian la tluk lo hlein a hria a, Belle zawhna pawh chu chhang lovin, "Dugout khuaah i va kal a, Joan-i nen in va inhmu a ni maw?" a han ti a.

Belle chuan, "I ring dik hle mai. Joan-i kha ka hmu ngei a, mahse awm ve lo ang maiin min kalpel ringawt mai a ni. Joan-i nupuia neih aiin, i roluah tur chu i paih bo phal ta zawk a ni maw?" a ti ta a. Setana chuan, "Nupui tur chu mahni thlan ngei ka duh a ni, mahse ka lo thlang sual a ni. Thiltih sual chu siam țhat leh a theih tho," awmze nei deuh mai hian a ti a. Belle chuan, "Jeff, i in ngaihlu hle mai maw? I awmdan zawng zawngte hi ngaihtuahin Joan-i chuan a la duh fo chein i ring em ni?" a ti a.

Setana chuan, "Hmangaihna hian thil nasa tak a ti thei a, kawng pawh a zawng chak a, engkim a ngaidam zel a ni," a ti ta a. Belle thinrim chu a rum nghat a, a tho phat a, pawnah a chhuak ta daih a. A hlawhtlinna ber tur, a hmanraw țha ber Jeff-a a bo tak daih avangin Setana chu a inngaihtuah nasa hle a, Jeff-a chu man kir leh theih a nih si loh chuan...... Belle nena an thusawi dun ațang khan thiltih tur țha deuh mai a chhar chhuak a, a thil ngaihtuah chu tih hlawhtlin dan kawng a ngaihtuah ta zel a ni.

[Ngaia]

SUDDEN - RIDES AGAIN
AUTHOR : OLIVER STRANGE (1938)
CHAPTER - 17
(Rozami Pachuau)

Jeff Keith-a chuan Twin Diamond ranch-ah pawh chuan lungin tang ang tho niin a inngai a, duh duha vah chhuah a chak em em mai a. Merry-a chu a fala a hmuh veleh, "Jim-a i tih hi tu nge a nih chiah? Ka pa in a ruai tawh lo a nih si chuan, Hell City hi engvanga la do fo nge a nih?" a ti a. Merry-a chuan Sudden-a chanchin a hriat zawng zawng a sawi zawh vek hnuin, "Bawng rutu angah Setana khan a hmehbel avangin, Sudden-a hian phuba lak a tum aniang," a ti a.

Ni hnih lai a ral hnuin Jeff-a chuan lungin tang ang maia awm chu a ning ta hle mai a. Merry-a hnenah sakawr hawh a dil a, "Kum hnih chhung ngawt puk chhungah khan ka awm tawh a, sakawr chunga chuana ram tawite tal pawh han fan vel ka chak takzet a ni," a ti a. Merry-a pawh chuan hnial chi nia a hriat loh avangin sakawr chu a hawhtir a, "Double K ranch chu lut lo hram ang che" a ti a. Jeff-a chu phur takin a chhuak ta a. Thui fe a kal hnu chuan a insum zo ngang lova, Doble K ranch ram chhung chu a lut ta nge nge a.

A pa ram chu a han thlir a, a ram a țha em em mai si a. Kar loa a ta la ni mai tur, a luhlul vang leh a pa thu a awih loh avanga chang lo tur a nih tak mai si avang chuan a rilru chu a na hle a. Merry-a hrilh kha a hrechhuak thut a, kir leh a tum lai tak chuan ralkhata sakawr chak deuh maia tlan hi a va hmu ta a. Sakawr chungah chuan hmeichhia a chuang a, sakawr lakam chu a chah avangin sakawr chu thunun theih a ni tawh lo a ni tih pawh Jeff-a chuan a hmu nghal mai a. Chu sakawr chak taka tlan chu um turin a sakawr chu Jeff-a chuan chak takin a tlantir ve ta nghal a. Thui fe an in um hnu chuan hmeichhe chuanna sakawr lakam chu a sakawr ațang chuan a va man ta a.

Chu sakawr chunga chuang chu a han en chiang a, Joan-i a lo ni reng mai a. He hmeichhia pawh hi a ât vanga a kalsan, thildang zawng zawng aia atan chuan hlu a ni tihte a hrechhuak ta zel a. Joan-i chuan, "Nang i ni maw? I hmaituamna kha khawiah nge ni a?" a han ti a. Jeff-a chuan, "Hmai ka la tuam ngai lo reng reng," tiin a chhang a, Joan-i chuan, "I ti tak tak em ni?" a han ti leh hram a. Jeff-a chuan, "Thil tihsual ka chin zingah dawtsawi kher hi chu a tel ve lo," a ti a. Joan-i chuan, "Chuti, amah kha...., " a tih lai mekin Jeff-a chuan, "Hell City hotupa, ka pa pawhin ni-a min ngaiha kha maw?" lungawi lo zet hian a ti ta mai a.

Joan-i chuan, "Kan vaiin Setana hi emaw i nih kan ti vek asin. Amah ngei nen pawh kan inbia a," tiin Setana nena an inhmuh thu leh an chanchin kha kim takin Jeff-a chu a han hrilh phawt a, tah chuan, "Danglam ta hlein hre mah ila rinhlelh ngaihna hre hek lo i, Setana kha i ni emaw ka ti reng asin. I chetzia leh i chanchin zawng zawngte pawh a hrechiang hle a nih ka ring," a ti ta a. Jeff-a chuan thinrim deuh maiin, "Min la hrechiang dawn chauh a ni, tunah chuan engmah tithei ka la ni rih lo. Red Rock khuaah Sheriff Dealtry-a fapa thattu anga ngaih ka nih avangin, man tura zawn mek ka ni," a ti a.

Joan-i chu a thaw hawk a, "Jeff, chutiang thilte chu i ti thei tak tak lovang," a han ti a. Jeff-a chuan, "Ka thah leh thah loh pawh ka hre chiah lo. Dealtry-a fapa nen chuan kan inhau ngei a, mahse ka ruih em avangin engmah chiangkuangin ka hre lo a ni. Ka that niawmin Lander-a'n a sawi tlat si a, hnial ngaihna ka hre bawk si lova. Bibo turin min hruai ta a, nung chunga phum ang maiin puk chhungah ka tawm ta tlat mai a ni. Chutia ka tawmbo hlan chuan, thil sual tinreng ti țhin ang maiin ka hming a lo chhe nasa em em bawk si a, ka che buai zo vek tawh a ni, Joan," a ti a.

Joan-i chuan, "Jeff, engkim a fel leh vek mai ang, ka pa Keith-a pawhin i chanchin hi hriat nuam a ti khawp ang, a pui duh ngei bawk ang che. A rilru i tina em a, tih lungawi pawh a harsa tawh a, mahse.....," a tih lai mekin Jeff-a chuan, "Ka pa chu ka chanchin engmah la hrilh rih suh. He buainaah hian mahnia lut ka ni a, mahni bawkin ka chingfel leh tur a ni. Engmah sawi lo turin min tiam rawh. Min tiam duh loh vaih chuan he ram hi ka chhuahsan anga, ka lo kir leh tawh ngai lovang," a ti ta a. Joan-i chuan, "I thu thu ni rawh se, chet zui zel dan tur i nei tawh em?" a ti a.

Jeff-a chuan, "Nei rih lo. Hell City ațanga min hruaichhuaktu Cowboy, Jim-a an tih kha ka ring ngawt mai a ni. Pa mak tak a niin ka hria. Rin ngam tur chi a nih leh nih loh pawh ka hrethiam tawh lo," a ti a. Joan-i chuan, "Kei chu ka ring, ring ve mai rawh," a han ti a. Jeff-a chuan, "Nang berin i rin ngam phawt chuan ramhuai pawh ni se, ka ring ngam ve mai ang," nui chungin a han ti phawt a, tah chuan, "I sakawr lakam hi siamțhat a ngai a ni," a ti a, a siamsak ta nghal a.

A siamțhat hnuin, Joan-i chuan lawmthu a hrilh a, Jeff-a chuan, "By Chrismas! Joan, ka hmu che chu ka lawm takzet a ni. Helamah hian sakawr chungchuangin i lo kal leh ang em?" a ti a. Joan-i chuan, "Ka lo kal leh maithei a ni," tih pahin chibai buk tumin a kut a han pe a. Jeff-a chuan Joan-i kut chu a la lawk a, a kutphah chu a fawh sak ta a. Joan-i chuan, "Jeff-a pangngai chiah kha i la ni maw?" nui chungin a han ti a. Jeff-a chuan, "Ni love, kawng tam takah ka danglam tawh a, kawng khatah erawh chuan a pangngai chiah ka la ni," awmze nei tak hian a han ti a, a sakawr a tlantir ta nghal a.

*************************************

Langley-a chuan, "Nimin zingah i kal chhuak lo maw?" a han ti a. Setana chuan, "Kal chhuak lo, engvanga min zawt nge i nih?" a ti a. Langley-a chuan, "Joan-i nen anmahni ram chhungah in inbe lai ka hmu tlat che a ni. Mahse ka hmuha chuan a hmai pawh a tuam ve lova, sakawr dum chungah pawh a chuang ve bawk hek lo. Chuti chung pawhin in in ang hlein ka hria," a ti a. Setana chuan, "Chu zawng chu em ni i hmuh?" a ti a. Langley-a chuan, "Min hmuh ka hlauh avangin ka va pan hnai ngam lova, an ințhen dawn chuan Joan-i kut mipa chuan a fawh sak a ni," a han ti a.

Chu mi thu a hriat chuan Setana mitmeng chu a thip nasa mai a. Rei lote a han ngawi rih a, tah chuan, "I pu Keith-a chu Dugout khuaah a la kal ngai em?" a ti a. Langley-a chuan, "La kal ngai e, naktuk zingah pawh hian a kal ang," a ti a. "Jeff, engnge tih i tum?" a ti leh a. Setana chuan, "I hriat tur țul ka tih chu ka hrilh mai ang che, zawh kher ka ngai lo," a ti ta hlur mai a. Langley-a pawh chu thinrim rilru deuh tak chungin pawnah chuan a chhuak ta a.

Hla vak lo a kal hman tihin Sudden-a nen an inhmu ta a. Sudden-a chuan, "E heu, Langley-a kha ni rengin," a han ti a. Langley-a chuan thinrim fein, "Ka hming lam kher suh," a han ti a. Sudden-a chuan, "Ka chunga thuneitu, ka foreman pawh i ni tawh lo tih hre reng rawh, kan inhmuh hnuhnun ber țum khan min khaihlum i tum nasa mai lehnghal," a ti ta a. Langley-a chuan, "Thupek ka zawm a ngai a nih kha, an man hnuah che lak chhuah ruk che ka tum alawm," a ti ta rawk a. An din dun lai chuan Silver-a'n, "Hei Sudden, Chief-in hmuh che a duh," a rawn ti a..

Sudden-a chuan Setana chenna puk a pan nghal a. Pindan chhunga a va luh veleh Setana chuan, "Lander-a chu khawiah nge a awm?" a lo ti nghal chawt mai a. Sudden-a chuan, "Ka hmu miah lo. A tlanbo daih tawh aniang," a han ti thlarawk a. Setana chuan, "Niminah Double K ram chhungah mi pakhatin Joan-i a be lai a hmu a ni," a ti a. Chu thu chu Sudden-a chuan mak a ti tak tak a. Setana hnenah pawh chuan, "Lander-a'n Joan-i chu a hre dawn em ni?" a ti a. Setana chuan, "A hre lovang, an intâwng palh mai mai aniang. I hlawhchham chuan...," a ti a, a ngawi ta daih a. Sudden-a pawh chuan Setana vauna chu hre rengin pawnah a chhuahsan ta a.

Sudden-a chhuah hnuin Setana chu a inngaihtuah nasa hle a, 'Jeff-a chu a ni thei lovang.... Joan-i a hmu ngam lo tawp ang... mahse,' a ti rilru a. A mitthlain Joan-i sakawr chungchuang laite kha a han hmu a, Joan-i a itna chuan a rilru a tihah leh zual a. Tunhma zawng kha chuan, Double K ram chauh a lo it țhin a, tunah erawh it dang a nei tel ta a. Midangin Joan-i kut hmawra an fawp tih a hriat ringawt pawhin a thik em em a, a ât phah lo chauh a ni ta. A chanchin zawng zawng hre vek chung pawhin Joan-i khan Jeff-a hi a lo ngaina tho maithei a ni.

'Ţhian duh tak Jeff, ngaihdam theih loh tawpkhawk thil sual rapthlak titu angin ka lantir dawn che a, chutah zet chuan midang zawng zawngin an hua ang che a, i hming an lam rik ngawt pawhin hmeichhe tam tak chuan an khurh phah thei ang. Chutih hunah chuan hmangaihna pawh huatnaah a inlet tawh ang. Mi zawng zawngin an huat dawn che avangin i him theihna hmun awm chhun, Hell City-ah bawk i lo kir leh mawlh ang. Tichuan engkim ka kutah a awm vek tawh dawn a ni,' a ti rilru a.

Tichuan, a thiltih hun tur, a thil ruahman chu ngaihtuah chungin an piah ram lam chu a thlir a, a it em em nula leh hausakna leh thiltihtheihna zawng zawng a kuta a awm hun tur chu a suangtuah a, mahse a hmanraw țha ber, Jeff-a la botu Sudden-a chu anchhia a han lawh a, 'Naktuk lo thleng leh phawt sela, Jeff-a chu a lo kir leh ngei ang. Chutih hunah chuan ka hmaah a țhingțhi tawh ang,' a ti rilru ta ran a.

Keith-a chu a hausa leh ram nei zau ber a ni bawk a. Dugout khua a tlawh chang pawhin an lo lawm em em țhin a, dawr hrang hrang a tlawh țhin a, a thil mamawh lei duhte a tihfel zawh vek hnuin Black Sam-a saloon ah a kal leh ziah țhin a. Chutiang chuan kartin vawi khat Dugout khua chu a tlawh ziah țhin a. Tukin zingah pawh hian tih tur dang zawng zawng a tih zawh hnuin Sam-a saloon-ah an inkawm khawm ta a.

Jansen-a chuan, "Keith, kan khua i rawn tlawh țhin hi kan lawm takzet a, hriselna țha tak nei zel turin kan duhsak em em che a ni tih hriattir nan...," a ti a, zu no ken lai chu a han tlak pap a. An bula awm ve mi paruk pawh chuan an no ken lai chu an tlak rual pap a. Keith-a chu a bu nghat a. "Țhiante u ka....," a ti hman chauhva, kawngkhar bula mi pakhat, za deuh maia lo nui chuan a thusawi chu a pawt chat ta hmiah a. Saloon chhungah chuan Scar-a leh a țhiante panga in an pu Setana chu an rawn zui lut ta a.

Setana chuan a lukhum chu a mit zuk chhin țhelhin a zuk kai kun a, a hmai a tuam bo vek a, a mit leh a kâ zawn chauh a rek pawp a, Scar-a leh a țhiante chuan puakruk an phawi sa vek a. Setana chauhvin puakruk a hum ve lova. Tin, an vaiin Setana badge an kawrâwmah an tar țheuh bawk a. An chetsual vaih chuan thihna rapthlak a lo thleng mai dawn a ni tih hriain Black Sam-a chuan Keith-a hnenah, "Kan nu hmuh i duh a nih chuan helamah hian min zui mai....," a tih lai mekin Keith-a mitmeng chu a han en chiang a, a sawmna chu a thlawn mai tih a hriatchian em avangin a ngawi ta daih a.

Keith-a chu a han ding mar a, a bula awmte hnenah chuan, "Țhiante u, in chungah ka lawm takzet mai. Dugout khua hian hma a sawn zel nan ka duhsakna entir nan zu kan in ho țhin a. Tunah hian rukru rual tawmkhawmna Hell City nuai chhiat vek theihna turin zu i in ho ang u. Hell City nuai bova a awm phawt chuan Dugout khua hian hma a sawn dawn tihna a ni si a. Khai le, Hell City a ral vek theih nan," tiin a zu no chu a han lek sang a, mahse a hmui a thlen hmain Setana chuan a puakruk a phawi a, Keith-a no ken lai chu a kap keh ta pawp mai a.

Keith-a chuan a kut huh chu a hru hul te te a, "Sam, no dang min han pe teh. Ka la in hman lo ve," aw muang ban zet mai hian a han ti ta a. Scar-a chuan, "Tumah che suh u, no kap keh tur ringawt chuan ka puakruk hi ka hmet per ve dawn lo a nia," tiin a lo vau ta a. Sam-a chuan kut khur dut dut chungin Keith-a chu no dang a han pe leh a, Keith-a chuan muangchangin a han ban a, no chu dawhkanah a hung ta a.

Setana chuan Keith-a chu hmusit tih hriat deuh mai hian a han nuih a, "Shakespeare-a chuan, khawvel hi lemchanna hmun a ni e', a ti a, a lo dik viau a nih dawn hi. Lemchang ni lovin mihring pangngai anga khawsa țhin chu ni la, tunah pawh hian min kap duh nghal ngei ang," a han ti a. Keith-a chuan, "Vanduaithlak takin he khawvela awm tirtu che hi ka ni a, khawvel ațanga hruai chhuaktu atan chuan khaihlumtute kutah ka dah a ni," a ti a. Setana chuan, "Min khaihlum ni chu nang chuan i hmu dawn lo," a han ti a.

Keith-a chuan, "Chu, min that turin i lo kal a ni maw? Mahni pa that i ni ang a, i hmingthanna chu a famkim takzet dawn a nih chu," a ti el ta a. Setana chuan, "By Christmas! A chhe zawnga ka hmingthanna chhan hi tunge ni? Luhlul, mahni thuduh lutukin a fapa beidawngin a siam a, a hnawtchhuak a, a tuithlar nghal a, beidawnna khur thuk berah a luhtir ta anih hi. I fapa pawh ni ila, i nupuiin tlangval a neih vang chauh a ni ang," a ti ta a.

A nupui thi tawh, a hmangaih em em hmingte thlenga he misual hian a han sawichhe ta mai chu Keith-a tan tuar a harsa takzet a ni. Setana chu va zuan mai tum niawm tak hian a han melh a. "Dawt sawi hmang, rilru bawlhhlawh, tenawm ber! Ka fa i ni emaw ni lo emaw....," a ti a, a thusawi lai chu a tawp chawt a, lu a han thing a, Setana chuan, "I țawng tam lutuk, i puakruk phawi la a ni mai," tiin a chho ta a. Setana, a fapa ni ngeia a ruat chu thin tihrimna tlak pawh ni tawh lova ngaiin Keith-a chuan a kut a han kuangkuah a, chu veleh, Setana chuan a puakruk a phawi a, Keith-a chu a petek dawrh a, bar dawhkan chu a vuan a, a tlu ta nghal a.

Black Sam-a mangang lutuk chuan Keith-a chu a va hnaih a, a bulah a zuk țhingțhi a. Setana chuan, "Che lovin in dinna ngaiah ding țheuh rawh u. A thi tawh, in pui thei tawh chuang lovang. A phu tawk ang chiah a hmu a nih hi. A zakhnuaia a puakruk pai kha phawi tum lo sela chuan....," a tih lai mekin, Black Sam-a chuan, "Puakruk a pai lo reng reng, englai mahin a pai ve ngai lo," a han ti a. Sama thusawi chu ngaihsak lovin Setana chuan Jansen-a lam a hawi a, "A phum lam lo ngaihtuah turin i rin theih ang chu maw? I rin theih dawn loh chuan ka....," a han ti thuai a. A thinrim hrikthlak nan Jansen-a chuan, "Ka lo phum mai ang," a han ti thuai a.

Setana chuan, "Țawng fimkhur deuh rawh. Tunah chuan Double K ranch neitu dik tak ka ni tawh a, ka....," a ti hman chauhva. Jansen-a chuan, "I tel lovin Dugout khua hi kan khawsa thei, kan mamawh vak lo a che. I pawisa ruk sa tel lo pawhin Dugout khua hi a nung thei tho," a ti ta zel a. Midangte pawh chuan lu an lo bu ve nghauh nghauh a. Setana chuan, "In fimkhur hle loh zawngin eng niah emaw Dugout hi khawramah a la chang ngei ang," ti a vau chungin a hote nen an chhuak ta a.

Setana te chhuah hnu pawhin Black Sam-a chu Keith-a bulah a țhingțhi ta fova, midang chu a kutin a han hui a, "A la nung, mahse a hliam hi a na khawp mai. Kan ramhuai khan a kap nawn leh mai ang tih ka hlauh vangin ka sawi ngam lo a ni," a han ti a. Damdawi lam thiam bera an neih Jansen-a chuan Keith-a chu a va bel chiang ta thuai a, a hliam chu a theih ang angin Jansen-a chuan a han tuam phawt a, tah chuan, "A dam chhuak leh zo kherin ka ring lo. Hei bak chu tih theih ka nei ta lo, Whisky pe ila, a na tawrh hi a ziaawm deuh mahna," a ti ta lek a.

Tichuan, Keith-a chu zu an han tulh a, harsa ti tak chung hian a lo meng chhuak a, thil awmdan a hriat theih veleh, a bula mite hnenah chuan, "Accident a nih kha hre reng rawh u... in vaiin ka silai ka hrufai a, a puak palh ta a ni," a han ti a. A sawi tum chu an hrethiam nghal vek a, Jansen-a pawh chuan, "Kan hrethiam e, Keith," a han ti a. Keith-a chuan, "A țha... inah min hruai rawh u," a ti a, a maimitchhing a, nikhaw hre lovin a awm leh ta nghal mai a. Sam-a chuan, "A lo harhchhuak leh anga, a ranch-ah kan la thlen lo tih a hriat si chuan, a thinrim lutuk a thi nghal thei hial ang. Mihring luhlul ka hmuhah chuan Keith-a hi a ber a tling a ni," a han ti a.

An thirdeng pa chuan, "Kawmawlin a zawnna kan siam sak anga, paliin kan zawn anga, min chhawk turin pahnih kan hruai bawk anga, ranch in chu kan thleng thei mai ang, Polter, Red Rock khuaah va tlan la, Doctor va ko rawh. A lo kal duh loh takin i puakruk pai nghal ang che," a han ti a. Keith-a zawnna tur chu an buatsaih ta nghal a. Naylor-a chuan ama hriat tawk lekin, "Accident...a! Kan misuala chu a awm ngei ang.... Accident a ni bawk hek lovang. A ni lo chiang hle ang," a han ti sap a.

A chenna puka a awm hnuin Setana chu a hlim rilru hle a, 'An vaiin Keith-a chenin ka bum thei a nih kha. Tunah chuan chanchin a darh zau thuai anga, Jeff-a pawh ka hnenah a lo kir leh ngei ang. Tunah chuan Setana hi a bo tawh anga, Jeff-a pawh ka hnenah a lo kir leh ngei ang. Lander-a pawh a bo rih anga, nakinah mi hausa tak ranch lei tur angin a lo lang leh dawn a ni. Vawiina khaihlum an duha kha, nakin lawkah chuan an la tlawn em em anga, a pheikhawk hrukfai sak hial an duh ngei ang. Chutih hunah chuan Lander-a'n Double K chu a neitu țha, Joan-i chawpin a nei tawh dawn a ni. Mahse chumi hmain Sudden-a hi nuaibo a ngai a ni. Thil a hre tam lutuk ta,' a ti rilru a, a hlim takzet tawh a ni.

Setana chu hlim taka a inngaihtuah laiin a pindan chhungah Belle Dalroy a lo lut a, "Dugout khuaah chanchin thar enge awm le?" tiin a zawt nghal chawt mai a. Belle chuan mak ti awm fe hian, "Tu'n nge hrilh che... tih leh Dugout khaw chanchin pawh chu i hre leh vek tawh ang chu," a han ti hmak a. Setana chuan, "Min hrilh ta che," a tihsan mai a. Belle chuan, "Tukin zingah Black Sam-a saloon-a a awm laiin, Keith-a chuan puakruk a tipuak palh a, a thi a nih chu," a ti ta a.

Amah inkap anga Keith-a chu a lan si chuan a thil lo ruahman zawng zawng a thlawn vek dawn tih Setana chuan a hria a, tichuan, "Chu chu tuin nge hrilh che?" vin zet hian a han ti a. Belle chuan, "Dawr neitu nupui, Mrs Janseni'n min hrilh a ni. Keith-a a inkah palh lai pawhin Jansen-a chu a bulah a awm ve reng a, chuvangin a hrechiang a ni," a ti ta zel a. Setana chuan, "Chu pawh nise, i thil hriat chu dawt a ni. Keith-a chu mahni inkap ni lovin, midangin an kaphlum a nih kha. Kei pawh ka awm ve reng alawm, ka hrechiang a ni," a ti ta a.

Belle chuan Setana mitmeng chu ngun deuh mai hian a han en a, thil awmdan a man chhuak nghal ta mai a, a hnenah pawh chuan, "Mahni pa, i pa ngei i kaphlum a maw?" a han ti a. Setana chuan thinrim deuh mai hian, "Ka pa, mi hnuaihnung berte zinga cheng lo thei lova min siamtu, min that tura Outlaw ruaitu chu a hlawhchham hnu pawha, ama kut ngeia min thah tumtu, ni e, ka kaphlum a nih kha. Tih nawn leh theih pawh nise, lawm takin ka kap leh duh thovang," a ti a.

Belle chuan Setana thusawi chu mak a ti em em a, thudik a ni ang tih pawh a ring si a. Thil tum nei ve ran a nih avangin a rilruah thildang a lo lut ve thuai a, Setana hnenah chuan, "I ngaihdan leh i duh dan angin thil i ti a ni miau a..... Mahse Double K ram chu Joan-i kuta i pek vang ngawtin hlawkna enge hmuh i inbeisei?" a ti ta a. Setana chuan, "Ka thlen tumna pen khatin ka hnaih a ni. Joan-i chungah thil engemaw a lo thlen palh hlauh chuan.... Engpawhnise, ka ro chan ai ka neih kir leh theih dan kawng hnih a awm - Double K ram chu lak luih emaw, Joan-i chu nupuia neih emaw a ni mai," a ti a.

Belle chuan, "Joan-i'n a nei duh lo mai thei che asin," a han ti leh hram a. Setana chuan, "My dear Belle, ka duh anga awm tura mi rilru ka hneh theih zia i la hrechiang lo anih hi. Luhlulna hi natna thawidam theih loh a ni hlei nem," a ti ta a. Belle pawh chu a ngawi ta daih a. Setana hian Joan-i chu a neih si chuan a thil tum, a lo beisei ve ber chu a thlawn zo vek dawn tih Belle chuan a hrechiang em em a.... chuvangin 'thil mak lutuk chu a lo thleng tak tak thei lovang, a lo thleng dawn anih pawhin,' ti a ngaihtuahin a rilru a siam ve ta sauh sauh a.

[Ngaia]

SUDDEN - RIDES AGAIN
AUTHOR : OLIVER STRANGE (1938)
CHAPTER - 18
(Rozami Pachuau)

Chumi ni vek, chawhnu lamah Setana chenna puk ațanga Scar-a, Coger-a leh Squint-a te chhuak lai chu Sudden-a'n a va hmu a, hlim deuh mai hian an nui ham ham a, mahse Sudden-a chu an va hmuh veleh an ngawi țhap a, zawite hian an ti ti zui ta zel a. Sudden-a chuan ngaihțhat lohna riau a nei tawh a, Setana'n amah hi a ning tawh ang tih pawh a ring bawk a. Kawtthler sir lehlama a awm laiin, amah rawn tawk turin Anita chu hmai tuam chungin a lo kal a, Sudden-a bul zawn a thlen laiin zawite hian, "Scar-a te hovin thah che an tum a, fimkhur rawh," a han ti sap a, a kal pel ta nghal a.

Sudden-a chu vaihlo lei turin dawrah a lut ta thuai a, a lo chhuah leh chuan, Scar-a te ho chu an lo bo hman tawh a. Scar-a te pathum hian anmahni thua thah tum an ni lovang tih Sudden-a hian a ring tlat bawk a. Chuvangin, Setana'n thu a pe anih pawh a ring nghal bawk a. Tichuan inring rengin a piah lawka thing in awmna lam chu a pan phei ta zel a. In awmna zawn a va thlen lai takin sir lehlam lungpui phen ațangin Scar-a te pathum chu puakruk hum chungin an lo ding chhuak a, Scar-a chuan, "Sudden, i ban phar vat rawh, i hun a lo thleng ta," a ti a. Sudden-a chu rang deuh maiin a vei lamah a zuang phei dawrh a, in sir, thing dahkhawmna phenah a zuang lut ta a.

Chutih lai chuan indawt zatin puakruk vawithum a han ri nghal a. Sudden-a pawh chuan puakruk a phawi nghal a, vawihnih a han hmet puak ve a. Mu khat chuan Scar-a lukhum a va thlawh a, pakhat erawh chuan Coger-a a va fuh a, Coger-a chu lung phen ațangin a lo țhu chhuak a, a puakruk la hum reng chungin bawkkhupin a tlu ta reng a. Scar-a chuan, "Hei, Sudden, nangmah man tur che hian thu kan hmu a, khua ațangin chhuah theihna tur an veng vek bawk si a, in pe țha mai ta che," a va ti a. Sudden-a chuan, "Min man tura lo kal in nih chuan lung phena biru mai mai lo khan lo chhuak ula min rawn man ta che u," a han ti a.

Sudden-a chu va kap tur chuan lung phen ațanga anmahni inlan kher a ngai a, an dak chhuak zauh a, Sudden-a awmna zawn chu an va kap leh phauh țhin a. Mahse Sudden-a chuan, Squint-a beng lehlam a rawn kap fuh a, Scar-a bekah a rawn kap thawi bawk a. Sudden-a chu a inngaihtuah nasa hle a. Scar-a te hian, amah hi rawn kap thei kher lo mah se, a tan tlanchhuahna tur a awm chuang si lova. Scar-a te pathum hi kaphlum vek pawh nise, Outlaw dangin amah hi an lo kap fuh ve tho dawn tih chu a chiang bawk si a.

Inpek mai tur em ni ang ti a a ngaihtuah lai takin a hnung lamah thawm a hria a, a han lehhawi thuai a, hnunglam ațanga amah rawn vehtu, Muley-a chuan a rawn zuan ta thut mai a, Sudden-a chuan a puakruk chu vawikhat chiah a hmet puak hman a, chuti chung pawhin Muley-a chuan a rawn bawh thlu tho mai a. Scar-a leh a țhian pawh chuan Sudden-a tlu lai chu an rawn hmu hman a, rang deuh maiin an rawn pan phei ta a.

Sudden-a chuan amah bawh bettu chu a han bawh tla thuai a, mahse a ding fel hman chiah tihin Scar-a leh Squint-a chuan puakruk in an lo tin hman reng tawh a, Scar-a chuan, "I ban phar vat rawh. Squint, a puakruk hi laksak la, a dang pai ruk a nei emaw dap nghal rawh," a ti a. Sudden-a puakruk chu a laksak a, chutah Squint-a chuan, "Hei, Muley, nangmah vangin kan man thei ta, tho vat rawh," tiin Muley-a chu a han sawi nawk nawk a, tah chuan, "A khai, a thi reng tawh mai," a ti a. Sudden-a chu an hruai a, an pu awmna pukah an hruai lut ta nghal a.

A pindan chhunga mi pathum lo lutte chu Setana chuan a han en a, Sudden-a chuan, "Min hmuh i duh a nihte chuan engah nge i sawi mai loh?" a han ti a. A zawhna pawh chu chhang lovin Setana chuan, "Khawiah nge i rukbova chu? I hmu tawh em?" a ti a. Sudden-a chuan, "Ka hmu lo, khawiah nge a awm pawh ka hre lo," a ti a. Setana chuan, "I daw! A tir ațang khan dawt hlir min la hrilh a ni. Sudden-a Outlaw an tih hi i ni nge, hei pawh hi dawt bawk em ni?" tih pahin, Wanted lehkha, Sudden-a tihbo kha a han phawrh ta a.

Sudden-a chuan, "Entir che a duh avangin a ni maw Langley-a khan a lo ruk? Ni e, Outlaw, Sudden-a chu ka ni. Ka awmna pangngaiah him tawk lova ka inhriat avangin ka kal chhuak a, henglai ramah hian inhlawhna ka zawng ta a. Nang leh Langley-a hian bawng ruk hmang angin min hmehbel lo ula chuan, tunah pawh Double K ramah ka la thawk reng ang chu, ka lo thlen ni pawhin i hote pali nen kan intibuai tawh bawk," a ti a. Setana chuan, "Ka hria, ka ngaihtuahna i lama i hip theihna turin, ka hote i lo tibuai a nih pawh ka ring bawk a. Wanted lehkha a Sudden-a an tih hi i ni ngei chuan a lang," a ti a.

Sudden-a chuan, "Ka puakruk kha min pe kir leh la, ka nih chian zia chu i hre mai ang," a ti a. Sudden-a thusawi chu hre lo tawp angin leh a rilru sawi chhuak niawm takin Setana chuan, "A ni thei lovang, nang ang hi chu a ruai duh lovang," a han ti a. Chutah Sudden-a chu thinrim deuh mai hian a han melh a, "Eng ang pawhin zep tum mah la, thudik chu ka la hrechhuak thovang. Muley-a kha inpeih turin hrilh rawh u," a han ti a. Scar-a chuan, "Muley-a chu a thi tawh," a ti a, a thih dan pawh Setana chu a hrilh ta nghal vek a.

Setana chu a inngaihtuah vang vang a, tah chuan, "Muley-a i thah avang khan him mai turah chuan inruat duh lem suh. Hmanah khan ka inthemthiamna 'target' kha min tihchhiatsak tawh a, tunah hian khami ai kha i awh tur a ni," a ti a. Silver-a hnenah tih tur a hrilh a, Sudden-a chu a hruai chhuak ta a. Pedro-a an vuakna hmunah bawk khan Sudden-a chu an hruai a, hnunglama ban phun chu nghengin an dintir a. A taksa pum, a lu chauh che thei chuan Silver-a chuan a phuar bet ta a. A lukhum pawh a pawhthlak sak nghal a, in koh khawmna dar an vaw ta a.

Dar a rik chuan Outlaw ho leh hmeichhiate pawh chu an lo tlan khawm thuai a. Setana pawh chu an zingah chuan a rawn kal tel ve a. Mipui bengchheng chu a'n khap reh phawt a. Chutah, "He pa hi mi phatsan hmang a ni. Kan vaia hmelma a ni, chuvangin tunah hian ka hrem dawn a ni," a han ti lung lung a. A puakruk pai chu a han phawi chhuak a, vawikhat a han hmet puak a. A lu chung zawna puakruk mu lut thawm pawh chu Sudden-a chuan a hre thei a. Setana chuan, "Ka kap sang lutuk deuh a ni maw, silai kah ka zir khât ta deuh a ni. Ka zir khat nachhan pawh i hre thei mai em?" a ti a. Vawikhat a han kap leh a, a hma aiin a kap hniam deuh a, "A ziaawm deuh," a han ti leh a.

Vawikhat a han kap leh a, Sudden-a chuan a lu chung zawn chu thaw deuh faih hian a hria a. Setana chuan vawikhat dang a han kap leh a. A lu chu thirling deh ang maia sa hian Sudden-a chuan a hre ta a. Setana chuan, "Sudden, i thi ve țan dawn a nih tâk hi, naktukah ka thil duh min hrilh loh chuan zawi zawiin thihna kawng i zawh zel ang.... Dolver-a ang chiah bawk khan, ngun takin ngaihtuah rawh," mipui lam a hawi a, an hnenah chuan, "A bul hnaia kal emaw, bia emaw in awm anih chuan a tuar ai in tuar ang," tiin a han vau te te a, a puaruk chu a pâiah a khung a, a chenna puk lam panin a kal ta a.

Miin an țin san vek tawh tihah chuan Sudden-a chuan an phuarna hrui chu tal chah a han tum a, tal chah mai mai chi a ni lo tih a hre ta a. A tuk zinga a chan tur a han ngaihtuah a, Dolver-a anga hrehawm tak tuar tur a nihnate chu a hrechiang em em a ni. Khua a lo thim a, Sudden-a bul hnaia kal ngam pawh an awm lova, mahse a hnunglamah chuan tlu tur niawm takin mi pakhat hi a pai țak țak a, a phun niah niah bawk a. Tunge a nih pawh Sudden-a chuan a hre thei lova. A hnunglama mi chuan zawite hian, "Jim," a han ti a.

Sudden-a chuan, "Frosty," a ti hman chauh a, Frosty-a chuan, "Nakinah; hrui hi ka'n phelh phawt anga, kan chhuak vat dawn nia," a ti a. Sudden-a chuan, "Engtin nge i lo luh theih?" a han ti a. Frosty-a chuan, "Nangman min kawhhmuh khuarkhurum ațang khan ka lo lut a, vengtu pakhat chauh a awm a, ka pistol kawmin a tukhumah ka chhu a, min chhuah phal ta hram a ni," a han ti a. Sudden-a chuan, "A chhuahtir phal leh kher dawn che em ni?" a ti a.

Nui kar kar chung hian Frosty-a chuan, "Engmah pawi tihna a nei lovang, ka chhutna avang khan a muhil alawm," a han ti a. Frosty-a'n a phuarna a phelh zawh chuan Sudden-a chu a han zi mar ar ar a, an phuarna ban chu lungbang bul a nih hlauh avangin tumahin an hmu thei lova. Sudden-a chuan, "Tikhan kal ta la, Twin Diamond-ah kan inhmu leh dawn nia. Nigger-a ka va la ange, min ngaihtuah duh suh, tih dan tur ka ruahman lawk tawh," a ti a, an ințhen ta a.

Sudden-a chuan Saloon lam a pan phei a, saloon awmna zawn kawngkhar a thlen dawn țepin mi pakhat hi a lo chhuak a. A kawng bawrah chuan puakruk paina chi kawnghren bawr zet mai hi a hreng a. Chu pa chu a han en chiang a, Scar-a a ni tih Sudden-a chuan a hre ta mai a, Saloon kil thim laiah chuan a lo chang ta a. Scar-a'n a awmna zawn a lo thlen chuan Sudden-a chuan a lo zuan thut a, a theihtawpa na hian Scar-a khabeah chuan a lo hnek a, Scar-a chu thi ang der hian a mu ta a. A kawnghren hren chu Sudden-a chuan a phelh thuai a, ama kawnghren ngei a lo ni lehnghal a. A kawnghren chu a hreng sawk sawk a, a sakawr Nigger-a awmna lam chu a pan ding nghal a.

Harsa lo takin Nigger-a chu a va la chhuak ta a, a zin a phah a, khawthlang lampang gate a pan ding ta zel a. Gate vengtu chu mithar a lo ni tawh a, Sudden-a hnenah chuan, "Phalna i neih loh chuan ka chhuah thei lovang che," a lo ti a. Sudden-a chuan, "Pass-te i sawi ngam a ni maw, hawng vat la a ni mai. Scar-a leh Chief an inhliam a, Red Rock-ah Doctor ko turin ka kal dawn a ni," a han ti a. Vengtu pawh chuan țha takin a chhuah ve ta mai a, chutah, "Scar-a chu engtin nge a awm?" a han ti a. Sudden-a chuan, "Ka puin a kaphlum nghal a nih kha, nang pawh min hawn duh lo ni la chuan i thi ve nghal a ni mai," a han ti a. Sudden-a chu a chhuak ta nghal a.

Sudden-a'n Twin Diamond a va thlen lai chuan khua a var teuh tawh hle mai a. A sakawr chu a huangah a dah a, a zin erawh chu ranch in țhutna pindan chhungah a pu lut thung a. Tumah an lo awm lova, ţhutthlengah chuan a țhu hnawk a, a muhil zui ta thuai a. A hnu lawkah chuan Frosty-a pawh a lo lut ve ta a. Frosty-a pawh chu kar lovah a muhil ve ta thuai a. Merry-a zing tho chuan, Sudden-a te pahnih mu reng chu a va hmu a, "Mi țhenkhat hi chu an ngampain an tlangnel mang e," a han ti a, Anni pahnih chu an harh nghal a, Frosty-a chuan, "Merry, i dam em?" a han ti a.

Merry-a chuan, "In thil duh chu in la ngah vek tawh ang maw?" fiamthu hian a han ti a. Frosty-a chuan, "Teuh lo mai, bur khat pawh kan hmu lo, a um chawp hian i mutpui țhin a ni maw?" a han ti a. Merry-a chuan, "Ni love, pum chhunga mi chauh a ni ka mutpui țhin ni," nui chung hian a han ti a. An pathum chuan thingpui leh chhang an in ho ta a. An inthun puar hnu chuan, Merry-a chuan, "Enge chanchin thar awm?" a han ti a. Frosty-a chuan, "Keith-a inkah palh kha i hre tawh em?" a han ti a.

Jeff Keith-a han kimki deuh chawih chu Sudden-a chuan a lo hmu a, Keith-a chuan engmah a sawi chuang lova, Merry-a thung chuan, "Keith-a a inhliam maw, a na em?" a han ti a. Frosty-a chuan, "Red Rock Doctor sawi danin a damchhuak leh maithei," a han ti a. Merry-a chuan, "Keith-a chu tuarchhel deuh ania, chu zawng a dam chhuah leh dawn chu, engvanga inkap palh nge maw a nih le?" a han ti zel a. Frosty-a chuan a hriat ang ang chu a hrilh chhawng ta a. Merry-a chuan makti awm deuh mai hian a lu a han thing a, "I thusawi chu mak riauin ka hre mai, a dik theiin ka hre lo," a ti a.

Sudden-a chuan, "A dik lo reng a ni, nimin zing khan Setana chu a hote nen Dugout khuaah an va kal a. Black Sam-a saloon chhungah Keith-a chu a va hmu a, a kap ta a ni. Keith-a'n a puakruk chuh tum niawm takin Setana chuan a sawi lehnghal a," a ti ta a. Chu thu chu a hriat veleh Jeff-a chu a ding nghal phat mai a, pawna chhuah nghal mai a han tum a, mahse Sudden-an a lo dang thuai a, "Khawiah nge i kal dawn?" a han ti a. Jeff-a chuan, "Hell City-ah misual thluak kap darh turin ka kal dawn a ni," thinrim deuh mai hian a ti ta a. Sudden-a chuan, "Hell City-a i luh vaih chuan Setana duhthusam chiah a ni mai. La nghak rih zawk rawh," a ti a. Jeff-a chuan hreh tak chungin a țhutna a pan leh ta a.

Frosty-a chuan, "Jansen-a leh Keith-a rawn zawntute zawng zawng sawi dan a in ang vek si a, engvanga dawt sawi kher nge an nih?" a ti a. Sudden-a chuan, "Keith-a'n sawi tura a tih vang a ni ang chu, chapo leh inchhuang ve tak mai a ni a," a tih lai mek chuan Frosty-a chuan, "Ama fapa ngeiin a kap a ni tih miin an hriat a duh lo a ni maw? Chutiang chu a tih duh tur tak chi a ni. Mahse amah ngei pawhin a kaptu chu a fapa a niin a hre tlat a, chu chu a pawi ber a ni ta a ni," a ti a.

Merry-a chuan, "Keith-a hi dem theih chi vak pawh a ni lo, Setana hi a fing em a, kan vaiin min bum thei vek a ni," a ti a, thil engemaw hi a hmu thar thut a, "Frosty, engchen nge 'Imp' i nih ve tawh?" tiin a zawt ta thut a. Frosty-a chu a țhen sak a, a kawrâwma badge intar chu a pawtthla ta nghal a, "Ka lo theihnghilh daih tawh a ni, nizanah chuan a țangkai teh a sin, Hell City ka thlen veleh saloon ka lut nghal a," a han ti dek dek a. Sudden-a chuan, "I lut reng ang chu, a mak hlei nem," a lo ti thuai a. Frosty-a chuan, "I chen tamna țhin a ni tih ka hriatchian em avangin hmuh ngei che ka tum a, saloon-ah chuan ka lut hmasa ber a, Setana nena in intihbuai thute ka hre ta zel a....," tiin chanchin dangte pawh chu a sawi ta zel a.

Setana'n Sudden-a a hrem thute a hriat zawh vek tawh hnuin Merry-a chuan, "Jim, Setana chuan i hnen ațangin enge hriat a duh?" a ti a. Sudden-a chuan, "Hei, Jeff Keith-a awmna hi min zawt a ni. Ka sawi tawh angin Keith-a hi a hmanraw țha ber a ni, Keith-a hi a hnena a awm chhung chuan Setana chu a thiltihah a hlawhtling dawn tih a chiang a, Keith-a tel lo hi chuan Setana chan chu a chau viau maithei," a ti a. Chu chu Jeff Keith-a'n a hriat veleh Sudden-a chu a en thuai a, "Keimah min phatsan aiin chung zawng zawng chu tuar i huam a maw?" a ti ta a.

Sudden-a chuan, "Mi thu hnial hi nuam ka ti ve hrim hrim a, chu lo rengah, i awmna hi Setana chu hrilh leh mah ila ka thil tuar tur chu a nep chuang lovang," a ti a. Jeff-a chuan, "Nichina ka chhuak tur min dang pawh kha, a mak love, mahni thu ka duh avang leh ka luhlul avangin thil tam tak ka tisual tawh a, Mr. Green, i lei ka ba nasa tawh hle a ni," a han ti a. Sudden-a chuan, "Ka țhiante chuan ka hming hmasa zawkin min ko țhin asin," tih pah chuan a kut a phar chhuak a, Jeff-a chuan Sudden-a chu chibai buk pahin, "Ka lawm e, Jim, engtin nge ka tih tak ang?" a ti ta a.

Sudden-a chuan, "Hell City hi tihchhiat vek ka tum dawn a ni. Merry, i hoten min pui duh ang em?" a ti a. Merry-a chuan, "An duh loh i ring zawk em ni? Dan pawh tum ila ka dang zo chuang lovang. Frosty, i țhiante pawhin, Jim-a hi an pui duh vek dawn lawm ni?" a ti a. Frosty-a chuan a chhang nghal mai lova chuvangin Sudden-a zawk chuan, "An duh ve thovang. Keith-a kaptu hi an hriat phawt chuan Dugout khua pawhin min pui duh vek ang. Red Rock khaw Sheriff a tel ve duh ang em tih erawh chu ka hre thei chiah lo," a ti a.

Jeff-a pawh chuan, "Sheriff Dealtry-a chu mi țha tak a ni a, a pui duh ngei ang che," a lo ti ve a. Sudden-a chuan, "Ka va kal anga, amah chu ka va bia ange. Chutih hlan chuan thawm engmah kan nei tur a ni lo. Jeff, nang chu hetah hian tawm tlat ang che. Hetah hi chuan an zawng lo tawp ang che," a ti a. Joan-i hmuh leh a chak em avang chuan a rilru a hnual hle a, mahse Sudden-a thu chu hnial reng a tum ta lova. Luhlul leh mahni thu duh thei tak a ni țhin a, a awmdan a inthlak nasa hle a ni.

Sudden-a chhuah thu Silvera'n a rawn hrilh laia Setana thinrim zia chu a rapthlak hle mai. A puakruk pahnih a phawi chhuak a, a milem puanzar hmaiah tak chuan a puakruk mu ral țhakin a han kap phawt a, a puakruk chu leiah a paih a, tah chuan, "Mi â, engah nge hetah i din reng? Kal kual la, thil engemaw tal hriat tumin zawt vel ta che. Naupang pakhat, sakawr chunga chuang thei tur rawn tir bawk ang che," a ti a, Silver-a chu a chhuak ta nghal a.

Setana chu dawhkan bulah țhuin, ngun deuh maiin lehkha pakhat a ziak a, a zawh veleh a lehkha ziak chu en chungin, 'Hei hian Joan-i chu ka hnen a rawn hruai thleng ngei ang. Joan-i'n ani chu a rawn thlen leh bawk ang. Keith-a a thi tawh bawk si a, a tawpah chuan ka hlawhtling dawn tho tho,' a ti rilru a, a hlim ta deuh sawt a.