OUTLAW’S CODE (Cowboy) - (Completed)

[Ngaia]

OUTLAW’S CODE
BUNG XIII
Lettu- PL Liandinga
Type, Mama Renthlei.

Nb,,Post hmasa ah khan 13 a len kim loh avangin ka rawn recap ta mai e,.

Slade chu general chuan a fak nep lam niin Grey-a chuan a hria a. Slade nen chuan an han in chibai a, Slade-a kut chu a nem thap mai. General chuan, “Slade nang ang hian midang ka fak thei ngai lovang.Tuna ka sawm che ang hian ni dangah min pui turin ka sawm ngai bawk hek lovang che. Rinky, puih theihna che thil dang ka la nei em?” a han ti a. Rinky chuan, “Mr. Slade-a hi a hun thlakhat chhungmin pek theih dawn leh dawn loh hriat ka duh khawp mai,” a ti a. Slade-a chuan, “Eng ang hun gnei i duh? A enga pawh chu ni se kei chuan O’Riley-a min ngenna a nih vangin ka hnial thei hlei nem,” a lo ti a.
General chuan, “Slade i fel lutuk. Ka ring ngam ang che tih ka hre sa reng a ni. Rinky tana i thil tih hi chu ka chunga ti tluk chiah i ni, chu chu ka tiam a che,” a han ti a. Slade chuan, “A that chu,” a ti a. Rinky hnenah chuan, “I tih hun hunah i hnenah chuan ka lo kal ve ang,” a ti a. Rinky chuan, “General, a tawpna atan thil pakhat ngen leh che ka duh. Tunah hian Slade-a hi ka hruai nghal ang e,” a ti a. Minit hnih chhung lekin kawtthlerah an chhuak phei a, Rinky chuan thil awmdan chu Slade chu a hrilhfiah ve ta a.
“He khua kan chhuahsan veleh, a… tunah ngei pawh hian a ni tawh mai. I nunna hi hlauhthawnawm takin a awm tawh a ni. General khan henglai tlangte hi nangma siam ang maiin i hrechiang niin a sawi a, henglai tlangte hi fan chip chep ka duh a ni. San Vincente lan theihna zawng zawng hi chu hnehtaka fan ka duh a ni. Chung fang tur chuan a kawng i hria ange?” a han ti a. Slade-a chuan kawngsir chu melhin a lu chu tlemin a thing a, “Henglai tlangte hi mahni siam ang tak tak chuan tuma’n an hre lo. Ka hrilh mai ang che. Heng tlangah te hian kalin rei tak chu rangkachak ka zawng tawh a. A lemte pawh ka ziak thei a, kum engemawzat chu ka lo belbul tawh a ni. Mahse ka hre tak tak lo.
“Thlasik apiangin kawng hlui kha a ral zel a, nipuiah kawng thar a lo chhuak zel a. A sang lai deuhah khi chuan leimin te, tuilian te’n ram hi a hmel a thlak zung zung mai a ni. Mahse i duhna hmun apiangah chuan ka hruai theih che ka inring. Chutichung chuan a hmelhmang leh a awmdan hi chu kimchang tak chuan ka hre lo. Tumahin chutiang tak chuan an hre lovang, a ram chhunga beram vulhtu te ngei pawh hian an hre lovang,” a ti a. Rinky chuan a lu a lo bu nghat nghat a.
Rinky chuan, “I sawi hmangin i hre tawk hle niin a lang a. I duh chuan min hruai dawn nia. Pawisa engzat nge i phut ang?” a ti a. Slade chuan induhna tel miah lo hian, “Nitina hlawh nei chi chuan ka inhlawh lo. Mahse tunah chuan ka rethei ta em mai a. Ka theihna apianga pawisa hui luh hi ka tum ta a ni. I duh zat zat min hlawhtir rawh,” a ti a. Grey-a chuan, “Engmah hi a phu tawk lova tih ka duh lova, phu loh tawpa thil tih hi ka duh bawk hek lo. Nikhatah dollar sawmhnih ni se a pawi dawn em ni?” a ti a.
Slade-a chuan, “Dollar sawmhnih chu a tam lutuk ang,” a ti a. Rinky chuan, “Nangin rem i tih chuan kei chuan rem ka ti khawp mai. Thlakhat lai pawh kan thang mai thei. Mahse thlakhat ai chuan a rei loh hram ka beisei. Eng ang sakawr nge kan mamawh ang?” a ti a. Slade-a chuan, “Sabengtung a chung chuanna mi kan mamawh ang. Chu chu tlang ramah chuan a tha ber,” a ti a. Grey-a chuan, “Sabengtung chu an tuan a tha lo em alawm,” a ti ve thung a. Slade-a chuan, “A him ber hi a tha ber a ni mai. Hmun tam takah chuan kawng a chhuk ang a, a thenah chuan hniak khat leka zauah kal a tul a. Sabengtung lo chuan an tei thei lo. Helai San Vincente-ah hi chuan Sabengtung tlan chak ve fe fe pawh an nei asin. Henglai ami chu Spanish sabengtung a ni a, Audalusian-ho vulhna atanga lak a ni nghe nghe. Khawvela sabengtung tha ber ber te an ni,” a ti a.
Rinky chuan, “Sakawr pakhat chu kan hruai ve ang chu, Sakawr nu sen uk kha,” a ti a. Slade-a chuan, “Sakawr nu chu i hruai lo mai the ang. Min tikhawtlai mai mai,” a ti a. Rinky chuan, “Min ti buai lovang,” a ti a. Slade-a chuan, “Khawmuala nghapui chhuah ang chauh a ni ang,” a la ti hram a. Grey-a chuan, “Tlangrama piang a ni alawm. Kaih kher pawh a ngai lovang. Min rawn zui ve mai dawn a ni,” a ti ta zel a. Slade-a chuan, “Sabengtung kan chuanna tur pahnih leh thuamphur tur pahnih kan mamawh a ni,” a la ti ta cheu a. Grey-a chuan, “Kan chuanna tur sabengtung pahnih leh ka sakawr chauh chu kan hruai dawn nia. Thawmhnaw zan lam chi hlir kan keng ang,” a ti leh a. Slade-a chuan, “I thu thu le,” a ti ve mai a. Duh lohna lantirin lungawi lo hmel a pu miah lo, mahse a lawm vak lo tih chu a hriat theih a.
Rinky chuan, “Henglai tlangte hi i hrechiang hle a. Kei pawhin thil ken tlem a tha tih ka hre ve bawk. Zantinin kan inphelh dawn a, tuktinin kan intel tha leh dawn si a. Silai i kap thiam em?” a han ti a. A thusawiah chuan huat tur engmah a awm lo, tlang takin a duh chu a sawi chhuak ve tawp mai a ni. Slade-a chuan, “Sa te chu ka pel ve bawk thin,” a ti a. Rinky chuan, “A nih puakruk i kap thiam em?” a ti ta zel a. Slade-a chuan, “Puakruk maw? Ka kap fo mai. Mahse ka ring tawk zo chiah lo a ni,” a ti a.
Rinky chuan, “A that chu. Puakruk lam chu i sawi tawh lo vang. Rifle chu sazuk aia lian tham deuh kah nan kan mamawh mai thei a ni. I hrethiam em?” a ti a. Slade-a chuan, “Midangin min tihbuai i hlau niin ka hria. I sawi lem lo nain,” a ti a. Rinky chuan, “Sawi pawh ka tum lo. I hriattur pakhat chu – kan hmuh theiha mi lo kal reng reng chu kan hmelma angah ngai phawt mai rawh, ring bawk ang che. Ingring rengin kan pahnihin kan awm ang,” a ti a. Slade-a chu a bu nghat a. Slade-a chuan, “San Vincente tlangram velah chuan chutiang chu a tul reng a ni. Heng tlangah te hian outlaw te rukruk hmang ve hrim hrim te leh misual chi hrang hrang hi an kat nuai nawk a ni.
“Buaina a chhuah apiangin tlangah hian misual an bihruk belh ziah a. Misual ve hrim hrim, buaina chhuah vang pawh ni lova tlanlut an awm belh reng bawk a ni. Tunah chuan chung bakah chuan a bik deuh hlekin hmelma kan nei a ni ve mai. Nei lo mah ila engti kawng zawng pawhin henglaiah hi chuan mit men kar a tul reng reng ani,” a ti a. Rinky chuan a lu a bu ve nghat nghat a. Rinky chuan, “Ka buaina hi min sutkianpui dawn nia. Sabengtung chu va kai rawh. Henglaiah hian dollar engzatnge an chhiar ve?” a ti a. Slade-a chuan, “Sabengtung tha tak chu dollar za vel a ni ang. Chu aia tha lehzual, tlangkarah pawh sathar ang maia kal thei tur chu dollar zahnih a ni ang,” a ti a.
Rinky chuan, “A va to ang reng ve,” a ti a. Slade-a chuan, “I hmanna tur ngaihtuah chuan to love,” a ti mai a. Rinky chuan, “Chuti a nih chuan a tha ber chi chu va la rawh. Hei le pawisa. Heihian sabengtung man bakah eitur leh kawmawl leh a zin chu a daih ang. Tula i hriat rawn lei nghal ang che,” a ti a. Slade-a chuan, “A tul chin chu ka hria ang,” a lo ti a. Rinky pawisa pek chu a la a, a chhiar a, a akbo ta a. “Darkar khat chhungin ka tifel vek hman ang,” a ti a. Rinky chuan, “Darkar chanve-ah i peih thei hram lo maw?” a han ti a. Slade-a chuan, “Chuti takin hun a hlu a ni maw?” a han ti a. Rinky chuan, “Hlu e. Hemi khua ka chhuahsan nan phei hi chuan minit tin hi a hlu tawh a ni,” a ti a. Slade-a chuan, “Chuti a nih chuan lo inpeih sa thlap rawh,” a ti a.
Rinky chuan, “A tha lutuk, ka lo ti zar zar ang e. Khawiah nge kan inhmuh ang?” a ti a. An inhmuhna tur an inhrilh hnu chuan an inthen ta nghal a. Rinky chu hriamhrei zawrhna dawr lamah a kal a. Chutah chuan chemte te chi atanga shotgun thlengin an zuar a. Rinky chuan Winchester pahnih, mu sawmpang pai thei chi a lei a. Puakruk pahnih a lei bawk a, a mu tamtawk tak a lei a. A chennaah a kal leh a, a intel a, a sakawr nu sen uk chu sakawr in atangin a kai chhuak bawk a. A sakawrzin a put chhuah a, kawt lama a kal lai chuan Slade-a chu sabengtung pahnih nen chuan a lo thleng a. A sabengtung rawn lei te chu han en mai chuan sabengtung naran ang mai an ni a. Dar pheng te deuh, beng sei tak tak satliah ve mai an ni a. Mahse han en chian chuan an ke te chu a ngil em em a, sabengtung dang angin an dul an ak ve hnuk lo bawk a. An mitte chu a vam ham mai a, an meng kuau a, inpeih sa at hian an lang bawk a.
Slade-a chuan, “An pahnih hian dollar zaruk man a ni. Pakhat kalnaah tawh phawt hi chuan pakhat hi chu a kal ve ngei ngei ang. Kum hnih chhung zet an inzui tawh a. Henglai tlangram kawngte hi chu an hre hneh em em bawk. Lei minte pawh keini bengin a hriat hma daihin an hre thei a, eitur awm lohna hmunah pawh an cher che ve mai lo. Engemaw mai mai pawh chawah an ring thei a ni. Tin, an tih tawh chu an bansan lo reng reng bawk,” a ti a.
Rinky chuan, “Reilote chhungin i hrechiang hman hle mai a,” a han ti a. Slade chuan, “A enkawltu Mexican pa hnen atanga ka hriat a nia. Nitina pakhat talh zel tlukin a hrechiang a ni. Ka laksawn dawn phei chuan a ui lutuk a, a mittui a tla hial asin. Heng sabengtung te hi chu an tha takzet a ni,” a ti a. Rinky chuan, “Kan chhuak nghal mai ang,” a ti a. An thawmhnaw chu an siam fel a, an chhuak ta a. An pahnih chuan sabengtung chungah an chuang ve ve a, an hnungah chuan Rinky Sakawr nu chuan kaih pawh ngai lovin a rawn zui ve zel a. Thui lote an kal hnu chuan Slade-a chuan khua chu a han lehhawi a, “Eng buaina pawh tawk dawn ila, buaina leh buaina inkarah kan awm a ang ta hle mai,” a ti a. Rinky-a chuan, “Tunah mai pawh hian buaina chu kan chungah a lo thleng tawh reng mai thei a ni,” a ti ta a.

OUTLAW’S CODE
BUNG XIV
Lettu-PL Liandinga
Chawhnu Ni chu a sa rum rut mai a. Tlang chin chu an thleng tan ta a. Cactus leh lungpui a tam hle a. Thing tona hmunte chu an thleng zel a, mahse an piahlamah chuan thlaler, eng atan maha hman tlak loh chu a inpharh duai a. Grey-a chuan a thil tum chu Slade-a hnenah a hrilh lovang ti a a lo tiam tawh avangin an tawng tlem dun hle a. Slade-a hriat tur chu – Grey-a chu a hruai dawn a, englai pawhin hlauthawnawmah an nunna chu a awm dawn tih a ni. A bak engmah hriat vak tur a nei ve lo.
Ni pawh chu a hniam ta hle a, Slade-a chuan, “Grey, puakruk hi i hmang nasa viau em?” a rawn ti ta a. Rinky chuan, “Hmang bawk,” tiin a lo chhang a. Slade-a chuan, “Puakruk hi chu a tangkaina tak tak pawh ka la hmu ngai lo. Khawthlang lamah leh Mexico velah te rei tawk tak chengin puakruk an hmang chu ka hmu tam tawk ve hle a, an intibuai te pawh ka hmu thin. Mahse tukverh darthlalang te kap kehin bungbel vel chu an kap rethei viau. Ceiling te leh bangte pawh an kap chik hrup thin. Mahse mihring an kah chuan a hliam tawkin an inkap thin ni deuh berin ka hria,” a ti a.
Rinky chuan, “Chu puakruk chu i ring tawk na nge?” a ti a. Slade chuan, “Ring tawk lo. Ka sawi tum tak chu : Rifle hi a muangchang zawk nain a innghahna tlak zawk,” a ti ta a. Grey-a chuan, “Ni e, a rin tlak zawk daih,” a lo ti ve mai a. Slade-a chuan, “Puakruk bawk chu—boruaka lungtum vawrh leh tin keh vawr te hi boruaka a kan laiin an kap fuh hman tihte hi chu ka hre ve fo thin. Mahse chutianga an ti lai chu ka la hmu ngai miah lo. Nang i hmu tawh em?” a ti ta zel a.
Rinky-a chuan, “Hmu tawh e,” a lo ti leh mai a. Slade-a chuan, “I hmu tak tak maw? Tunge chutianga kapte chun?” a ti a. Grey-a chuan, “Keima’n ka kap a ni,” a ti a. Slade-a chuan, “Han ti leh the le,” a ti ta mai a. A awih lo tih hi a hriat reng a. A sakawr atang chuan a kun hniam a, an kalkawnga lungpui chunga lung te reuh te te tlem te chu a chhar a. Slade-a chuan, “Min entir duh em?” a ti leh a. Grey-a chuan, “I ringhlel a ni maw? A nihleh lung kha han vawrh teh le,” a ti ve ta a.
Slade-a chuan, “Khi le pakhat chu,” a ti a. An hma lam pen sawm velah chuan lung hi a han vawrh a. Chu lung chu a llen deuh hlek avangin a vir lai pawh chu chiang takin a hmuh theih a. Grey-a chuan, “Kha kha zawng infiah nan chuan a lian em mai,” a lo ti a. A tih pah chuan en mang lo hian a han kap a. Chu lung chu a keh darh vek a. Slade-a chuan, “A va nalh em. A nalh kher mai. Rifle chuan thil harsa chu a ni lo, mahse puakruka kah atan chuan khatiang kha chu ka lo ring ngai hlei nem. Mahse mihring kah chu lung kah nen chuan thil dang daih a ni. Lung chu boruaka a leng lai pawh ni mahse,” a la ti cheu a.
Rinky chuan, “Kha pathum lai i la keng a, a vai khan boruakah vawrh rawh,” a ti ve leh ta thung a, a nui sang a. Slade-a chuan, “Lei an thlen hmain i kapfuh vek hman ang maw?” a ti a. Rinky chuan, “Aw,” a ti mai a. Slade-a chuan, “I hlah miah lovang maw?” a ti leh zel a. Rinky chuan, “Hlah miah lovang,” a ti ve hmiah a. Slade-a chuan, “Kha le,” tih pahin a sakawrzinah chuan ding deuh, theihtawpa sangin an hma lamah chuan lung chu a vawrh ta a. Rinky chuanm hmanhmawh takin a kap mai lo. Chung lung te chuan an san vawrtawp an thlen thlengin a nghak a. A pakhat chu a bo nghal daih a. A han kap leh a, a thelh a. A vawithumna chuan pakhat chu a dahbo leh a, a vawilina pawh chuan lung pakhat la awm chu lei a thlen hmain a kap darh leh ta vek a.
A thiltih chu ngaisang lo deuh maiin Rinky chuan a puakruk chu a thunkhat leh mawlh mawlh a. Slade-a chuan a lu a kun a, thutak fe hian, “Ka lo chhaw ngawt mai. Mexico-ah ka cheng rei lutuk a, engmah hi ka ring ngam ta thin lo a ni. Tunah chuan a tih theih tih chu ka hrechiang ta takzet mai,” a ti a. A lu a thing nak nak a, “Khatianga veilam leh dinglama kap thei kha an awm tih pawh ka ringhlel ta lo. Nang i thei em Grey?” a han ti a. Rinky chuan, “Khatiang tia te chu ka veilam chuan khatiang tluka hlaah chuan ka kap fuh thei lovang. Mahse mihring lung (heart) tiat lung (stone) chu hlah miah lovin ka kap fuh thei ngei ang,” a ti a.
Rinky chuan a thusawi chu inchhuan vanga sawi a ni lo. A dik avangin a sawi ve mai chauh ni hian a lang a. A nunna leh a puakruk kah thiamna chu a inzawm tlat a. Slade-a chuan, “I hrilhfiah pawh ka phut tawh lo, puakruk chungchanga ka thusawi kha ka la kir leh vek a,” a ti a. An ngawi dun ta reng a. A thianpain chuti taka puakruk chanchin a hre chak ta mai chu Rinky chuan mak a ti deuh hle. A hriat loh vang mai mai pawh a ni thei, mahse Rinky chuan a nuihzat deuh tlat. Chuvangin a thianpa chu ngun taka enthlak a tum ta tlat a.
An kalna chu a tlang a sang tial tial a, inbiak pawh an in be hman ta lo reng reng a. Ni tlak velah chuan San Vincente lan theihna tlang an chuan chhuak ta a. Grey-a ngaihdan chuan an chunglama tlang, khawimaw lai velah chuan John Ray chu a awma nih a ring tlat a. Khawsak mawl taka khawsain San Vincente chun John Ray chuan anchhia a lawh mawlh mawlhin a ring tlat a ni. San Vincente lan theihna hmun chu kal pelin hmun dangah an kal leh ta zel a. Ruamah an lut a, chu ruam chu a thuk khawpa a thum rum rum nghe nghe a. Chumi ruam chu an chuan chhuak a, phaizawl rai tha deuh mai an va thleng leh a. Chulaiah chuan hnimte pawh a tova, chung hnim pet chuan bawng leh beram an tla noh noh bawk a.
An hmaah chuan khaw te tak te hi a awm a, chuta tang chuan eng a lo de sep sep a. Slade-a chuan, “Sawlaiah sawn khualbuk a awm asin, kan va belbul dawn em ni?” a ti a. Rinky chuan, “Khualbuk maw? Khualbuk hi nghawng inzai bunsak nan a remchang viau asin,” a lo ti daih a. Slade-a chuan, “Saw khualbuk saw maw? Saw khualbuk saw chu khawvela mi chhaw ber leh rinawm ber ber te’n an enkawl asin. Henglai tlangrama chengte hi chuan chemte a kher chhuah phakah pawh rnagkachak hmu se an buaipui peih lovang. An pawisa hmuh chu beram hmul man emaw, kel sa man atang emaw chauha an hmuh ani. Thil danga an hmuh chu pawisa tak takah an ngai lo reng reng. Helaiah chuan i him tawk khawp ang,” a ti ta zel a.
Grey-a pawh chuan a remti ve ta a. Khuaah chuan an lut a. A hmunah chuan Rinky sakawr sen uk chuan a zui ve zel a. An va kal chuan khualbuk chu Slade-a sawi ang mai chu a lo ni a. A sak nan lung deuh vek an hmang a, lung a tam em avangin chirh lah lei han belna tur awm angahte pawh chuan lung chher tha tak tak an rem vek a. Rinky-a te chu an sakawr atangin an chhuk a, an sakawrte chu sakawr-Inah an dah ta a.

[Ngaia]

OUTLAW’S CODE
BUNG XV
Lettu-PL Liandinga
Khualbukah chuan mi an tam lo hle, khualbuk neitu leh a nupui, a fapa upa ber leh naupang te reuhte te pathum pali vel an lo awm a. Chhiahhlawh pakhat an ruai a, chu chuan a thawh theih zawn zawng chu a thawk vek a. Chubakah chuan mipa naupang akhat an ruai bawk a. Chu chuan sakawr a enkawl a, kuli a ni nghal a, kuli hna thawk chungin tirhkah a ni nghal a, thing fawmtu a ni bawk a, a tul apiang a thawk tho bawk a. Sakawr leh Sabengtung reng reng chu ngun takin a en zel a, an ngaihah chuan sabengtung tha tak pakhat chuan sakawr pahnih a hen tlat ani.
Grey-a chuan Slade-a ngaihdan chu a dik tih a va hmuh chuan a lawm hle a. An awmna phairuam atanga an bul vel tlangte a han thlir chuan an kalna tur chu sakawr tak tak kal nan chuan a chi loh deuhin a hre ve leh ta zawk a. Mahse a sakawr doll chun ngun takin a la enkawl reng thova. Chu sakawr chu sakawr ang pawhin a en tawh lova, thian ang maiin a en tawh zawk a. A sakawr chu reitak a kawl tawh tlat a ni. A sakawr chu buhpawlin a hrufai a, a hmul pawh a lo mam ta zaih a. A taksa khawilai hmul mah chu han rang deuh hlek pawh a awm lo. A kaisawn a, a chaweina tur hmunah a hruai ta a.
Sakawr-In enkawltu naupang chuan chutiang sakawr mai mai (Sabengtung ni ve lo) chuti taka a enkawl uluk mai chu mak a ti hle a, a lo en reng a. Slade-a pawh chuan a lo en ve reng bawk a. Slade-a chuan, “I vanneihna zungbun ang deuhah i ngai a ni maw?” a lo ti a. Grey-a chuan, “Tlan thut ka duh chuan tlan thut nan a remchang ber a ni. Sabengtung chu chak taka tlan nan chuan a tha lo. Ka sakawr hi chu tlang ramah chuan ka mamawh lo mai thei. Mahse sakawr tlan chak tak ka neih loh ai chuan tlangramah chuan silai neih loh pawh ka thlang zawk hial ang,” a ti mai a.
Khualbukah chuan an lut ta a. Khualbuk neitupa chuan chhuang deuh maiin a pindan tha ber chu a lo khawhhmuh a. Slade-a chuan, “I duhzawng a ni em?” a han ti a. Chutihlai chuan Rinky chuan pindan chu ngun gein a lo thlek kual vang vang a. Rinky chuan, “Duhzawng teh reng e. Ka duhloh ber chu kan chunga inchung inzar duai khi a ni mai. Kan chungah khian arsite pe ta ut zawk se nuam ka ti zawk ngei ang. Kan him zawk em em bawk ang,” a ti a. Slade-a chuan a lu a thing a, “Buaina pawh lo awm se kha puakruk tuan tha deuh deuh pahnih i nei alawm,” a ti ve thung a.
Grey-a chuan Slade chu a nuiih a za hle ni hian a hria a. Puakruk chu la ring tawk tak tak zo lo fo ni hian a hre bawk a. Chawei pindanah an lut thla ta a. An chawei chu Grey-a ei ngai loh zawng tak ni mahse tui a ti ve thova. Chaw an ei kham chuan an mu ta a. Zanah chuan thli a lo thaw a, a vawt hle mai a. Puanin an inkhuh tlat a, Grey-a phei chu a muhil nep hle. Mit lehlam meng chung leh beng lehlam chhi ran chungin a mu an tih hi dawt muhlum tawp zawng a ni lo tawp mai.
Zanlai a pel hret tihah chuan a lo harh a. A taksate chu a inring nghal vek a. A pindanah chuan zawite a tawng ri sep a awm tlat a ni. A han nghak leh hret a, pindan kil lehlam atang chuan, “Grey,” a rawn ti a. Rinky chuan zawite in, “eih,” a lo ti a. Aw chuan, “I hria em?” a rawn ti leh a. Grey-a chuan, “Engmaw?” a lo ti a. Slade-a chuan, “Khulai, sakawr-In atang khuan tawng ri a awm a ni. Zawite tein an tawng. Eng vangin nge tun ang hunah khulaiah mi an awm ang?” a ti a. Rinky chuan ngun deuh maiin a han ngaithla a.
Thli tleh chu a reh a. Thli fim chhete pawh a tleh tawh lova, a reh vung vung mai a. Zan chu a vawt tawlh tawlh bawk a. Slade-a chuan fimkhur takin zawi sap hian, “I hria em?” a han ti a. Rinky chuan, “Engmah ka hre lo,” a lo ti a. Slade-a chuan, “Thlang lamah khuan engemaw chu a awm a ni. Tu’n emaw kan sabengtungte kha a lo ngaina lutuk palh a ni mai thei a ni. Ka zuk chhuk ang a, zuk enfel ila a thain ka ring,” a ti a. Grey-a chuan, “Sabengtung te chu an ruk duh ka ring lo. Mu mai mai rawh,” a ti ve thung a. Slade-a chuan, “Ni love ka zuk chhuk ange,” a ti ve tlat a.
Mut puan theh hlim sawk sawk thawm hi a hriat theih a, Grey-a chu a mutna atang chuan a tho thuai a, “Mi mawl lutuk, A tul takzet a nih phawt chuan keimah ka zu kal ngei tur a ni,” a ti a. Chutiang khawvawta a aia upa han chhuahtir chu a ni thei ngangin a hre lova. A thin a rum zawk hial a. Slade-a chuan, “Nang chu kal love, ka kal zawk ange, ka vun hi i vun tluk bawk a chhah a ni ve tho.” a ti tlat a. Rinky chuan, “Ka tho fel der tawh. Khawnge eng a awm?” a ti a. “I khum bul dawhkan te reuhte chungah khan,” Slade-a chuan a lo ti a.
Rinky-a chuan, “A ni tak,” a ti a. A ipte chu a han dap a, nawhalh a phawrh a, laltin chu a dap hmu a, a veilam chuan laltin chu a chelh a, a kut dinglam chuan nawhalh chu a nawt a. A nawhalh chu a thi leh nghal vat a. A phun nang nang a, nawhalh dang a dap leh a. Slade chuan a muthmun atang chuan, “Heng Mexican nawhalh man tlawm tak tak hrep hi a chhe lutuk,” a ti nang nang a. Rinky-a pawh chuan, “A chhe ngawt mai,” a han ti ve leh hram a.
A nawhalh nawt tur chuan a inring leh ran tawh a. Mahse a la nawt mai duh lo. A nawhalh nawh hmasak zawk khan an pindan kawngkhar chu zau fein a inhawng ni tlatin a hria a. A mut dawn khan kawngkhar kha ngun takin a kalh vek si a. Mahse tunah hian a inhawngin a hre ta tlat a ni. A awm a nual lo tawp bawk. Vawt tih vang pawh ni lovin a mur er er a. Rinky- chuan, “Saw laiah sawn Sweedish nawhalh ka nei a, ka va la ange,” a ti ta zawk a. Slade-a pawh chuan, “Sweedish nawhalh hi a tha ber chi a ni,” a lo ti ve bawk a. Mahse Rinky-a chu a khum lam ni lo kawngkhar lam panin a vak phei ta daih a.
A kut veilam chuan dawhkan chu a dap phei zai zai a. Pindan hmelhmang chu a mitthlain a chhui reng bawk a. A lo luh khan kawngkhar a kan chiah khan a hma chiahah dawhkan a awm a. Chu dawhkan bulah chuan tunah a awm a, a awmdan chu a chhui ta a. Pen thum vel a pen chuan kawngkhar chu a thleng mai dawn tihna a ni. Chuvangin zim te tein pen kua lai a pen phei ta zawk a. A kut dinglam chuan a puakruk a zak hnuaia a pai chhuah leh zanah pawh a lakthlak ngai reng reng loh chu a hum ran a. A kut veilam chuan kawngkhar pawh hawnna vawnban chu a va dap ta a.
A ke lawng chuan puan a dai a, chu puan chu mihring taksaa inbel lai ang maiin a lum thar thar a.

[Ngaia]

OUTLAW’S CODE
BUNG XVI
Lettu-PL Liandinga
Rinky-a hmai bulah chuan silai a puak ta thawr a. A puakruk humna lam kut chu a han vai kual pawp a. Mahse a beisei angin mihring luruh a chhu ta lo tawp a. Mihring taksa nem laiah a chhu ta dawp zawk a. A chhut rual chiah chuan hmalamah a zuang dawrh a, chuta mihring taksa niawm tak chu a va rek nghal a. An let dun tawp tawp a. Rinky puakruk humna kut chuan bang a va tauh dawt a, a puakruk pawh chu a kut atang chuan a tla ta a. A chakna tur ber hmanrua a hloh ta. A sualpuipa lah chu bawngpa ang maiin a chak a. Mahse Rinky taksa zang veh vawh chu insual thiamna tha zang tak maiin a thuam ve tlat a ni.
A sualpuipa taksa awmdan chu a kuta a va tawh atangin khaw enga en ang maiin a hrechiang a. Second khat lek hnuah a sualpuipa chu a nghawng a elhsak ta vak a. Rinky chuan insual chu tharum neih vanga thiam a ni lo, a zir ngat a a thiam chhuah a ni. Henglai tlangramah chuan in-zawng-man bak thiam thil thawh an nei lo. A sualpuipa nghawng chu a dik tawh lo tih a hria a, mak a ti hle a. Chutia mak tia a din lai chuan a sualpuipa chu a tal chhuak thut a, a tlan ta chiam mai a.
Chutihlai bawk chuan Slade chu teng deuh maiin a rawn au tuar a, Rinky chu a rawn tlan pel thuak a. Rinky pawh chu a tho thuai a, khaw thim riai ruai hnuaiah chuan a sualpuipa tlanchhe lai chu a va hmu hman vuai a, a hnungah chuan Slade-a chu engmah ken nei lovin a theihtawpin a tlan ve bawk a. Slade-a chu chutianga hriamhrei engmah keng lova a tlan ve ngawt avang chuan Rinky chuan a haw zawk hial a, mahse Slade-a huaisenna chu a ngaisang tlat bawk ani. Chutah zawng O’Riley-an Slade-a a lo rin em em nachhan chu a hrefiah thiam ve ta chauh a ni.
Rinky chuan a theihtawpin a um ve ta nghal a. A hma lamah chuan a hma a tlante pahnih chu kailawnah an zuangthla a va hmu a. Slade-a chuan a ke chu boruakah a vawr vak a, a lu lam lei hawiin a zuang thla nghe nghe a. A thum tawk a, chumi hmunah vek chuan Rinky chu a rawn zuang ve nghal vak a, a kut leh kein a inchhanhim hram a, a tlan leh nghal char char a. A hma lamah chuan a mi umpa chu a tlan ve zel bawk a. Chutihlai chuan Ina awmte chu an lo harh vek tawh a. Pindan hnuailama a chhuk lai chuan kawngka a rawn inhawng a, a thlen-in nu chu a lo lang nghal a. A inthiam lo chu a tawlhkir a, bang chu a let zawngin a deng rawk a. A han insiamrem leh meuh chuan a hmaa kawngkhar chu a inkhar rawk hman tawh a.
Rinky chuan umzui pawh a tum duh tawh lo. Reiloteah chuan sakawr tlan thawm a hria a. Tualthat tumtipa chu a tlan chhuak ta. Pindanah chuan khawnvar an rawn chhi a. Rinky-a an rawn hmuh chuan an rawn bial tiau tiau a. Thil awmdan an rawn zawt tliar tliar a. Rinky chuan an thlen in pa hnenah chuan, “An mutna lam pantir vek rawh. Nang chu ka rualin kan pindanah lo chho la. Ka thianpa kha a tla a, a na hle mai thei a ni, engmah buaina tur a awm lo, tualthah an rawn tum satliah mai a ni,” a ti a. An thlen in pa chu a chhungte mu tura a hrilh hnu chuan Rinky nen chuan Slade-a awm na lamah chuan an han chho a.
Slade-a chu step bulah chuan a lo mu a, a lu atang chuan thisen a lo chhuak nguai nguai a. An zawn a, khumah an mut a, a lo harh ve ta mai a. Slade-a chuan, “Misual ka zuan a lawm le. Ka zuan thelh lehnghal a. Tih chu ka tibuai ve fu. Mahse tlemin ka intipem ta hlauh a ni, ka tha e. Ka lu-ah hian biak In dar chhe chi a ri zing deuh e tih mai loh chu na dang engmah ka nei lo,” a rawn ti a. Rinky chu hriat theih loh tawp hian a rak nang nang a. Mihliam chu ngun takin a en vel a.
Thui a ngai mai thei a, tuam ringawt pawhin a tha thei mai thei a ni. Ringlo deuh chungin an thlen In pa chu chunglai velah chuan doctor emaw doctor anga awm an awm leh awm loh a han zawt a. An thlen In pa chuan, “Doctor aia tha Padre Jose-a a awm alawm,” a ti a. A fapa upa ber chu Padre Jose ko tur chuan a tir ta nghal a. Slade-a chu a rawn thu chhuak thut a, “Puithiam chuan hetiang thil hi a hre mang teuh lo em mai,” a rawn ti a. Mahse an thlen In pa chu a nui mai a. “Padre Jose hi Puithiam a ni lo. Doctor pawh a ni lo. Engkim a ni ringawt mai. A lokal anga in hre ve mai ang,” a rawn ti a.
Slade-a chuan Rinkt hnenah chuan, “An khaw damdawi thiam a ni ngei ang ka ring. Khaw tinah hetiang hi pahnih emaw pakhat emaw chu an nei ve ziah a sin. Doctor pass-na certificate puitling neite ai chuan anni chuan a pan pawh an pan duh zawk ngei ang. An inchhiar tlawm khawp lehnghal. Pawisa pek dawn pawhin, ‘I pawisa kha akbo rawh’ tih an ching zek lehnghal. Engpawh ni se han inentir phawt ila. Heng misualho hian hnimhnah chanchinte hi an hre hrep a sin. Chutiang chu hliam enkawl nan chuan a tangkai phian si,” a ti a.
Darkar khat hnu velah chuan Father Joseph chu a lokal a. Pa buang ther thawr a ni a, mahse a vun chu mingo ve reng thlaler nisa in a em buan a ang hle. Mexican vun buang ve reng niin a lang lo. Pa hmelchhe tak a ni a, a inmet fai vei hawn a. A hnar chu a te hle a, a mithmul buk tak hnuaiah chuan a mitkhur thuk tak atang chuan a meng kar mai a. A hmel tidanglamtu ber pakhat chu a sam chu a ni. A sam chu a var a, a koki thlengin a zuah nguau nghuau a, chu chu Indian-ho tihdan in puanin a hreng bet tlat a. A inchei dan en chuan beram vengtu rethei ber ang chiah hi a ni. A sahmul kawr lianpui hak pawh chu a hlui tawh em avangin a hring lek lek tawh a. A thuamhnaw lumna chu a tla fai deuh vek tawh a, a lumna ber a puan pawr a tlak tawh avang chuan a mam muat tawh nghe nghe a.
Father Joseph chuan Grey-a leh Slade-a chu Spanish tawng mawi tak si, bul deuh fein a han bia a, Slade-a hliam chu a en ta a. Slade-a chu che lova ni engzat emaw a awm chuan a hliam chu a ping leh mai ang tiin a hrilh a. An zin dawn chuan a hliam chu a thui a ngai anga, amah pawhin a thuisak mai thei ang tiin a hrilh bawk a. Grey-a chuan nghah a that a rin thu a han sawi a. Slade-a chuan, “I hun a hlu si a, hetiang mai maiin i hun ka tikhawtlai thei nang. Kan pu-a hi thuitir mai ila, a thar ang maiin ka dam leh mai ang,” a lo ti a.
Mahse Rinky-a chuan a remti thei tlat lo. Chumi zana thil thleng avang chuan Slade-a chu Rinky-a buainaah chuan a inrawlh ve tlat tawh a, chuvangin a hliam chung leh tha lo chung chunga han hruai ve zel pawh chu a tha lova. Chubakah a hliam chu a pun mai thei a, a pun vaih chuan an inenkawl leh hman tawh lovang a, enkawltu pawh an hmu tawh hek lovang. Padre chu thil awmdan an han hrilh a, Padre a pawh chu a bu ve nghut nghut a.
Father Joseph chuan beram vun kawnghren hlai fe hi a hreng a, a kawnghren chu a verh pawp thluah a, chungah chuan bawm hi engemaw zat a khai bawk a. Chutiang bawm pakhat chu a hawng a, a chhungah chuan bawm te lehzual engemaw zat hi a lo awm leh a. Chung bawm zinga pakhat chu a hawng a, a chhunga thil awm chu tui lumah a pawlh ta a. A rim chu a na hle mai lehnghal a. Chutah a hliam chu fimkhur fein a sil leh a, a hmuamhma chu a hmet phui a, tuiluma a puan chiah chuan a bel a, nalh fein hliam tuamna chuan a kawkalh zawng leh a dung zawngin Slade-a khabe rinchhan chuan a tuam ta a.
Father chuan, “I ka ang lovin i tawng thei ang. Ni khatah vawi khat chaw i ei thei bawk ang, a tuamna kan phelh apiangin,a ti a. Grey-a chuan, “Tunge a tuamna chu thlak thin ang?” a lo ti a. Father chuan, “Keima’n. Ka chenna chhawlbuka ni thum in lo chen duh chuan. Ni thum ral hnu chuan a hmuamhma hi a dam hman ang. Mahse tihtur ka tih chu a zawm zat zat tur a ni thung ang. Chutah chuan a tuamna pakhat ringawt hian a chelh hneh tawh ang a, lukhum a khum anga, a kal leh thei mai ang,” a ti a. Father chuan Grey-a banah a dawm a, “A rual zelin kal rawh. A tawng darkar khat ngaihthlak hi kum khat sikula kal ai chuan a hlawk zawk,” a ti a. Grey-a chuan, “Khawiahnge i chen ve?” tiin a zawt a.
Father chuan, “Heta tang chuan mel khat vel a ni ang. Tlang karah mawle. Hmunmawi tak mai ani, ka awmnaah chuan tuma’n an tibuai lovang che u, a thlamuanthlak ngawt asin,” a ti a. Grey-a chuan Slade-a hnenah chuan, “Thlamuanna chu kan duh ber alawm. Heta chen ai hi chuan tlanbo daih pawh ka duh zawk. Min umtute hian min rawn hnaih riau ani. Heta awm ai hi chuan hmun faiah awm ringawt ila kan tan a remchang zawk daih ang,” a ti a. Slade-a pawh chuan then lovin fiah takin, “Chutiang chuan ngai duh suh, henglai tlangram vel misual mai mai hi an ni ang. San Vincente atanga lokal an ni lovang,” a ti a.
Rinky chuan, “Tlangram misual mai mai an ni lo. Ringruh thuai chhumna dana elh a, talput thei an awm lo reng reng. Tlangram misual vakvel mai maiin kawngkhar kalhna nalh lutukin an hawngthei lovang. Kha kawngkhar kha a chhung lama hawn a nih loh chuan a pawn lam atangin nalh lutukin an hawng tihna ani mai. A hawngtu chu pa fel lutuk a ni tihna a ni leh a. Kan awmna pindan zauzawng kha han chhut the. Misual si, a bawksi chu ni se a lo lut thuk lutuk hman ang. Mahse kawngkhar hawngtupa kha chuan fimkhur takin a nghak ta tlat a ni. Chuvangin Slade, nizana min rawn beitu khan a tihtur chu a hrechiang lutuk tlat a, a hrechiang mai ni lovin a thiam pawh a thiam em em bawk a ni. Chuvangin San Vincente atanga lokal a ni a, nakin lawkah thosiin kan lu bula mi a vir sek ang mai hian min la rawn vir sek dawn ani,” a ti ta a.
Slade-a chuan a awih lo hle hian a lang a, a nui sak duh chauh a. Rinky chuan Slade-an engmah a ngaih pawimawh tak tak lohzia chu mak pawh a ti hle a. A hun kal tawha a vanduai em avangin engmah hi a la thutak duh tawh lo a ni mai thei a ni. Chuvangin tunah pawh hian luruh keh vek theihna thil ni mahse a nui tlat a ni. Rinky leh Slade-a chuan Father sawmna chu pawmin Father chenna lam chu pan an tum ta a. An chhuah dawn chuan an ei man chu pek an han tum a, an thlenna pa chuan an pawisa pakhatmah chu a la duh ta hlek lo mai a. Ama sawidan chuan an mikhualte chu an chhung zing ami an ni ve e a ti mai a ni. Chubakah a Ina riah laia miin an rawn tihbuai avangin an lei a ba zawk ni hialin a la sawi ta deuh deuh a. Rinky te chuan engmah an pe thei ta lo a ni.

OUTLAW’S CODE
BUNG XVII
Lettu-PL Liandinga
Father Joseph-a chenna chu a tuk zingah an va thleng a. An thil va hmuh chu a nep lo viau mai. A beramte a tlattirna hmun chu tlangkar hmun, chumi phaizawl intanna chu a ni a, chulai hmun chu hmun azawnga hmun rualrem lo ber mai a ni hial awm e. Lungpui lianpui pui a insir khup a, chubakah pine thing hi pahnih te, pathum te in a ding khup bawk a. Chunglai karah chuan hnim a to ve a, chung chu kel leh beram tlemte hian an pet a, thenkhatte phei chu tlangsang deuhah an han tla lang lang hlawm a. Chulai ruam chu a thuk em avangin nipui sen sat lai tak pawhin chhunah ngat pawh ni a hmu mumal lo nghe nghe a. Chutiang hmun daihlimah chuan Father chuan a chenna In chu a sa a ni.
Father In chuan pindan pakhat chauh a nei a, tukverh pakhat mah a nei lo. A kawngkapui chu a ni mai. Chu a kawngkapui pawh chu savun khai, Indian puan-In anga awm hi a ni ringawt a. An va thlen hma chuan pa pakhat hi kawngkaah chuan bawp khawkherhin a lo thu mai mai a, an lokal a hmuh veleh chuan ke lawngin an lam pan chuan a theihtawpin a rawn tlan ta a ni. Mahse a rawn thlen hma chuan a ban a vai a, a kut a thing chiam bawk a, Father bul a lo thlen chuan nghakhlel lutukin a zuang kual zak zak mai a. Chu pa chu pa hmeltha tak a ni, mahse a lungngaih hmel tlat.
Lawrence Grey-a chuan Spanish tawng chu a pianpui tawng ai mahin a thiam a, Mexican tawnglerh leh tawng upate pawh a hre vek thova. Mahse chu tlangval tawng chu a hre fuh meuh lo. A hriat dan ber chuan a hma ni chuan ramhuai a lokal a, chu ramhuai chu amah lo tibuai fo tu a nih leh nih loh a hre tawh hek lo. Chu ramhuai chuan Maria a neih vaih chuan a lung (heart) a ei zawhsak ang tiin a lo vau ni berin a hria a. Father Joseph chuan, “Chu pa chu va zawng rawh, i hmuh theih chuan hetah rawn hruai nghal la, Maria pawh rawn hruai nghal ang che,” a tihsan a.
Chu pa chu tlangkar ruamah chuan hmanhmawh deuhin a tlanliam ta nghal a. Padre Jose (Father Joseph) chuan chu pa tlanliam lai chu a en reng a, chu pa chu a kawrte a leng phe vuai vuai a, mahse chu pa chanchin chu Father chuan sawi lovin inchhungah a hruai lut a. Padre Jose chuan Slade chu kawkin, “Hetah hian i mu ang. A chhan chu kan khawvawt hi i hriselna atan a tha lo mai thei a ni. Tunah mu la, che che lo la a tha ang. I thian leh kei hi chu pawnah pine hnah phahin kan mu mai ang,” a ti a. Slade-a chuan, “I in ka luahlansak thei lovang che,” a ti a.
Father Joseph chu nelawm takin a nui a, “Helai ruam zawng zawng hi ka In a ni. Helaia i hmuh hi chu a pindan a nuam lo lai ber a nih hi,” a tihsan ta daih a. A sawi pah chuan a bul vel chu a kutin a han kawk kual a. Rinky chuan Slade-a hnenah chuan saptawngin, “Awm mai mai rawh. Kan thian-a hi mithianghlim anih hi. A hnen atanga tanpuina i dawn nasat poh leh a ni chuan van atangin lawmman a dawng nasa mai dawn a ni,” a lo ti a. Father hnenah chuan, “Father, hetah hian engnge i ei thin?” a ti a.
Padre Jose chuan, “Thlai hnah hring ka ngah mai, kel hnute a awm bawk. Kel hnute atanga ka siam sapsaum ka nei bawk. Sapsaum chu khuaah te ka hralh thin,” a lo ti a. Rinky leh Slade-a chuan Father awmnaah chuan ni thum cham an tum ta a. Chu ni thum chhung chu ni thum chhung rau rau ah chuan a rei pawl tak a ni awm e. Mahse an awm tantirh chuan a ralmuanthlak ang reng kher lawi si mai. Rinky chu engmah dang ti lovin kawr ruamah chuan a silai kengin a chho ta a. Fing hnih vel a chho va, hnimbuk atanga lo chhuak sazuk sawmpahnih vel tur hi a hmu ta a. Chung sazukte chu an rawn dakchhuak a, Rinky chu hlau lo deuh maiin an rawn en a, Rinky pawh chuan a silai tin lai chu a tim deuh hial a. A duh duh chu hlah miah lovin a kap thlu thei ngei ang. A duh leh a lian ber mai, ding lawr zuah chu a kap let tawp thei anga, a duh leh a pa pakhat chum deuh bet bawt chu a kap zawk thei tho bawk.
Chung sazukte chuan an hnim peh lai chu an pehsan leh ta mawlh mawlh a. Rinky pawh chuan a silai chu a la thla leh ta a. An zinga pakhat chauh chu a tawlhsawn duh a ni. Chung sazukte chu khawi ngam an ni mai lo maw? Rinky chu a kut phar chhuak chung in a va kal hnai a. Chul mai a va tum a, mahse chul em chu a chul theih lova. An tawlh hla hret hret hlawm a. Rinky chu an chenna lam pan chuan a haw leh ta a. A hawn kawngah chuan kham sava pahnih a kapthla hram a, chu chu a hawn ta a. Father Joseph hnenah chuan chung sazukte chu an khawi a nih leh nih loh a zawt ta a. Father Joseph-a chuan, “Ka fapa, henglaiah chuan tumahin ramsate an that ngai hlei nem, inthahna hian anchhia a thlen a ni. I silai nena i vak chhuak lai chu lo hmu che ila ka lo hrilh tur che hi a ni a. Mahse a pawi love, ka huana sava pahnih lek thah chu a pawi lo. Anchhe lo thlen dan chanchin chu ka hrilh duh ang che’ngem?” a han ti a.
Grey-a chu kawngka bulah chuan a thu a, Inchhungah chuan Slade-a pawh chu hahdam takin a mu a, a khabe tuamna chu a mar tehchiam loh avangin vaibel a la zu thei thova. Father Joseph-a chuan tortilla siam tumin vaimim a nuai sauh sauh a, a bul sumah chuan a deng leh ta nghal a. Father Chuan, “Helai kawr ruam hnarah khian chhungkaw hausa tak mai an awm thin a. Tunah hian helai ruam hmar lampan khian chho la, lungpui kailawn niawm tak i han hmu anga, chu chu i lawn chhuah chuan a tlang chung chu a lo zawl anga, chu chu lungpui leh hnim bawrchhawrin a khuh vek ang.
“Chumi bulah chuan In ropui tak, a chanve chauh i hmu ang. A chanve chu a ral tawh. An rapchhia a ni. Chu lo pawh thil dang i la hmu ang, chu In hnunglam chu kham a ni a, chu chuan chhim lam atanga thli lum lo tleh chu a dang tlat a. Thawnthu chu hetiang deuh hi a ni-
“Vawikhat chu unau pahnih hi an awm a, chu unau pahnihte chu tlang chunga Inah chuan an cheng a, ngaihzawng an intawm tlat mai a. A upa zawk chuan a nei ta a, a naupang zawk pawh chu Inah chuan a cheng zui ve ta zel thova, chutia an inchen pawlh avang chuan a unaupa chua haw ta tial tial mai a. A tawpah chuan an sakawr tha ber ber nen an ramchhuak dun a, an lokir leh chuan sakawrah a khampheiin a rawn phur haw a. A sawi dan chuan tihpalh thil thuin a kaphlum a ni awm e. A ruang chu Inah chuan an zalh a, zanah chuan a u nupui chu a u ruang bulah chuan a tap a, thlipui a lo tleh thut a, an bul kham atang chuan lungpui a lo tla a, an pa nen chuan chu In chanve chu lungpui chuan a delh phum ta daih mai a ni. Chu chu Pathian hnathawh a ni e an ti,” a han ti a.
Rinky chuan, “Pathian chuan hna a va thawk rum ve. A nupui chuan engnge a tih tak?” a han ti a. Father chuan, “Tunge hria ang? Tunhma chuan a nungchang a tha vak lo a ni mai thei. Mahse hriat chianna engmah ka nei lo. A unau naupang zawk Fernando Garcias, dam aia ramchhuah thlahlel zawk chuan chuta tang chuan ramchhuah a bansan a, silai pawh a hum leh ngai tawh lo. A ram chhunga silai kah pawh a khap tlat bawk a ni. Sava pahnih i thah pawh hi hria se chuan a tina duh mai thei che a ni, ka mikhual i ni chung pawh hian. Chuvang chuan sazukte pawh hian intihnat kan ching lo tih hi an hria a, an ngampa riau a ni,” a ti a.
Slade-a chuan, “A ruka that duhtuten an kap fo ang maw?” tiin a lo zawt a. Father chuan, “Thil fello tak tak chu a thleng fo mai. Mahse tunah chuan mite hian henglai vela silai chelek hi vanduainaah an ngai a, khilai tlang chunga awm pawh khian chu vanduaina chu a tuar niin an ngai a ni. Chu chu a nia ka han hrilh duh tak che u chu ni,” a ti a. Rinky chuan, “Kan thianpa Garcias chu khilaiah chuan a la cheng ta reng em ni?” a lo ti a
Father chuan, “Cheng reng e. A nundan pawh mak danglam tak a ni. A unaupa leh a unaupa nupui an thih hnu chuan nupui nei leh tawh loh a intiam a. Mahse a hmeichhe tihboral tak kan ti mai ang che, thleng nan chuan hmeichhe dang a zawng a, naupang hmeltha deuh mai a va hmu a, a rawn hawn a, a fa angin a enkawl zui ta a ni. Garcias chuan a pawisa a hloh vek a, a rante chu khawkhengin a tihhlumsak a, a ram luah hawhtuten a then chu an ruksak a. Chhiahhlawh ang maiin a nung ta a. Chutichung pawhin a hmeichhe lakluh chu a enkawl reng thova. Chu a hmeichhe lakluh chu tunah chuan puitling a ni tawh a, amah ang mihring an vang kher nghe nghe a sin. Thiante u, sualnain rilrua thiltha a rawn tuh dan hi in hmu thiam em? Chutiang bawk chuan Fernando Garcias pawh chu sual atangin thaah a rawn insiam chhuak ta a ni,” a ti a.
Rinky chuan, “Garcias-a chuan a unaupa chu a that reng em ni?” tiin a zawt a. Father chuan, “Tunge hria ang? Hei hna dang ka nei ta tlat mai. Saw an lokal saw in hmu em?” a han ti ta daih a. Mi pathum an lam pana lokalte chu a kawk a.

T Lalrin Mawii
Lalzawnchhuaha Renthlei.
Lalnunmawia Mawitea Fanai.

[Ngaia]

OUTLAW’S CODE
BUNG XVIII
Lettu-PL Liandinga
Type..Mama Renthlei

Post
T mawii.
Mi pakhat hi sakawr te takte chungah a rawn chuang a, sabengtung chungah nula a rawn chuang bawk a, an pahnih chuan a hma lawka Rinky-a ten an hmuh tlangval khan a rwan zui a. Father chuan Rinky-a hnenah chuan, “Mipa sakawr chunga chuang saw Cordoba a ni a, thil tha lo tam tak a ti tawh a, chemte leh silai chinchang hi a hre hle. A incheina te saw han en la saw, a det sawr sawr saw, a lukhum parh a saw rangkachak a tle vat vat bawk a. Sabengtung chunga chuang saw Maria a ni. Nichinga in hmuh tawh tlangval lokal mek saw Juan Gil a nih saw.
“Juan Gil leh Maria saw an innei dawn a, engkim an peih fel vek tawh a, Cordoba hi a lokal a, an inneih vaih chuan Juan-a nghawng hi a zai chhumsak ang tiin a rawn vau a. Tunah hei ka rorelsak nghakin min rawn pan a nih hi. Roreltuah ka tang dawn a ni,” a ti a. Grey-a chu a chek tlak a, “Cordoba hi nghaisa deuh hlek la a dik ang,” a lo ti a. Father chuan, “A ni mai thei,” a ti sap a. Rinky chuan, “An vai hian i rorel nghakin an lokal a nimaw?” a ti leh ta a. Slade-a pawh chuan hriat ve a chak avangin a mutna atang chuan a lo thova, kawngka bulah chuan a lo chhuak phei ve a.
Father Joseph-a chuan, “In hrethiam vek ang chu. Heng mite hi tihdan pangngai angin court-ah han kal dawn se thui tak an zin a ngai a. Dan hremi an rawih a ngai leh anga, an ram chanve vel hralhin an in ei zo anga, kumhnih chhung vel thu remna nghakin lungngai reng rengin an awm ang. Mahse ka hnenah an lokal chuan engmah senso tur an nei lo. Chubakah vawikhatah ka lo rel fel sak nghal mai bawk si. Hetiang thil hi ka tih chak zawng a ni lo. Mihring leh mihring ro inrelsak hi thil harsa tak a ni. Fel taka ro inrelsak phei chu a harsa leh zual. A tih theih loh tluk a ni mai. Mahse he hna hi ka koah a innghat ni berin a lang a, ka thawk mai dawn reng bawk a ni. Tha taka ka relsak theih loh pawhin tha lotaka rel chu ka tum lo a ni,” a ti a.
Father thu han sawi dan chu chapona tel lo, mawl angreng tak hi a ni a, Rinky pawh chuan Father chu a endan a tidanglam ta daih bawk a. Mi pathumte pawh chu an lokal zel a. An kiang an lo thlen chuan Juan Gil chuan Maria chu a zakah a dawm a, a chuanna sabengtung atang chuan a hlang thla ta a. Maria chuan Father chu a han be sap a, Rinky-te pahnih a hmuh chuan a sen tan tan a, Father chuan, “Hemite hi ka thian tha tak tak pahnihte an ni a, an kiangah hi chuan ka hnena i sawi tur ang chu engmah sawi hreh suh ang che. Tunge hekna thu rawn pu lut? Juan Gil nangmah i ni em?” tiin a zawt nghal a.
Cordoba chu mupui ang maia hmelchhia a ni a. Pa ria deuh dar pharh chhe zet, mitmeng rawng tak, meng fiah kak, vun hang fe hi a ni. Chuti taka hmelchhe si chuan ngaihsanawm vena lai riau a nei tlat a. A kawrte chu a pianpui ni mai awm hian a in hmeh a, a mawi pui zek lawi a. Father-te pathum chu a rawn melh vat a, chutah Juan Gil chu a melh leh ta a. Juan Gil chuan cho fein a lo en ha a. Cordoba chuan Juan Gil chu a kawk a, “Amah khan thusawi a duh ang chu. Kei chuan engmah sawi duh ka nei lo. Juan Gil, i sawi tur chu sawi rawh,” a ti ta a.
Juan Gil chuan phur fein kum nga lai kal taa Maria a lo hauh lawk thu chu a sawi a. Chutihlai chuan Maria chu kum sawmpahnih leka upa a la ni a, Juan GIl chu kum sawmpanga a ni tawh a. Chutihlai chuan Juan Gil chuan Maria nu leh pate chuan chhan pawh chhang harsa duh lovin an lu an thinkhum a. Chutihlai vek chuan Juan Gil chu kutdawh tu\luk chauha hausa a ni reng a. A nu leh pate pawh chu kutdawh nen danglamna awm chuan lo hial akhawpa rethei an ni bawk a. Chutih chung pawhin a beidawng mai duh lo.
Juan Gil chuan kum nga chhung zet chu chhun leh zan zawm takmeuh meuhin hna a thawk ta a. A ran vulh pawh a lo pung tial tial a, In te hial a lo sa thei ta a. Chutah Maria nu leh pate hnenah kalin a hnathawh chu a entir hlawm a. Juan Gil-a hnathawh an han hmuh chuan Maria chu Juan Gil chuan a nei thei ang tiin an tiam ta a. Chu chu tunhma thlaruk kalta khan a ni. Thil engkim an tifel vek a, mi zawng zawng pawhin Juan Gil chuan Maria chu a nei dawnah an ngai vek bawk a. Chutah buaina-hmelchhe-phak-a hi a rawn inlan ta a ni. He mihring, ramhuai, mi tenawm, mi hrawk leh pawisaip suattu pherh hrep hian Juan Gil-a chu a that ang tiin a rawn vau ta a ni. Chu chiah chu thu awmdan chu a ni.
Father Joseph-a chuan Cordoba lam chu a han hawi a, “Cordoba heng hi thu dik a ni reng em?” tiin a zawt a a. Cordoba chuan, “Dik e, thudik tak hlir a ni,” a lo ti a. A hmelah danglamna engmah a awm lo. Father chuan, “Juan Gil-a nghawng hi i zai chhumsak ang tiin i intiam em ni?” a han ti a. Cordoba chuan, “Aw,” a ti leh mai a. Father chuan, “Maria hi i duh a ni maw?” a ti ta a. A hmel awmdan leh a pawisak lohzia a hmuh chuan Rinky chu a tim er er a. Father chuan, “Maria enkawl tur hian In te, ramte i nei reng em ni?” a ti a. Cordoba chuan, “Nei lo,” a ti leh a. Father chuan, “Ram i nei em,” a ti leh a. Cordoba chuan, “Ka kutte hi an chak tehchiam lo. Lo neitu ang chuan hna ka thawk thei lo. Chubakah ke huh per pur a awm te, thli vawt tak tak tuar te hi ka thei lo hle. Chutiang chu beram vulhtute chuan an tuar thei hle si a, kei chuan a engamah chu ka tuar ve thei lo,” a ti ta deuh deuh a.
Father chuan, “Pawisa khawl sa i nei em?” tiin a zawt leh ta a. Cordoba chuan, “Aih, pawisa khawlsa ka nei lo,” a ti a. Father chuan, “Chuti si engahnge he hmeichhia hi i it ni? Enkawlna tur, In leh lo engmah i nei hlei nem,” a ti ta a. Cordoba chuan, “Ka enkawl thei alawm,” a lo ti leh a. Father chuan, “Engtinnge i en kawl ang? Min han hrilh the,” a ti leh ta a. Cordoba chuan, “Entir na – hetiang te hian,” tih pahin a kut nem thep thawp chuan a kawnghren a chemte pai kawm chu a khawih a, a puakruk kawm chu a khawih nghal bawk a.
Father chuan nula lam chu a hawi a, “He pa Juan Gil hian a hmangaih che a, neih a duh che a ni. Chutiang bawkin Cordoba pawhin neih che a duh a. Sawi tur i nei em?” a ti a. Chu nula chu naute lem ang maiin a ding a. Father chu a han melh a, a meng zau kawk kawk nghe nghe a. Nula chuan, “Engnge sawi tur ka neih ang? Ka nu leh paten sawi tur chu an sawi vek tawh alawm. Juan Gil hi nei turin min ti a ni,” a ti a. Father chuan, “Chuti Cordoba hi i ngaihmelh a ni maw?” a lo ti a. Nula chuan, “Keima’n maw? A chungah engnge ka tih?” a lo ti let ve a. Father chuan, “Cordoba hi han en the,” tiin nula chu a va melh a.
Nula chuan lehlam a hawisan nain Cordoba chu a va melh a. Corboba chu a lo meng tle ra a, a chhe kher mai. Nula chuan a mit a lasawn vat a, a hmai a sen ta tawn tawn a. Father Joseph-a chuan, “Juan Gil, nupui i mamawh a, mahse Maria hi chu i mamawh lo. Maria hi nei pawh ni la, i hnen atangin kum khat chhungin a tlanbo daih ang. Chuvangin i neih pawhin nupui dang neih nan insenso leh tho angai ang. Chu chu i tan thil tha a ni dawn em ni?” a han ti a. Juan Gil chu a thaw kawk kawk a, chu thu chu a thinlung takin a pawm thei tlat lo. Father chuan, “Maria hi en rawh, a sen tawn tawn hi, Cordoba hi a hmangaih a ni,” a ti ta a.
Juan Gil chuan, “Father Joseph! Corboba hi misual tak a ni,” a’n ti vak ringawt a. Father Joseph-a chuan, “Chuvang tak chuan a ni Maria hian a hmangaih ni. I inah haw la, theihnghilh daih rawh,” a ti a. Juan Gil chuan, “Ka thi mai ang. Kum nga chhung zet…” a ti hman chauh a. Father chuan, “Zan khat emaw i mu tha thei lo deuh anga, chumi hnuah zawng i beramte, i bawng tlatna ram pharh tha tak tak mai te i han ngaina zui leh anga, hlim takin hna i thawk leh mai ang,” a ti a. Juan Gil chuan a kut a nuai nawk nawk a, “A pa hnenah ka lo tiam…” Father chuan, “Chutiang lam chu Cordoba kutah a awm vek ang. Tunah zawng bengchheng lovin kal rawh. I sawi tam tawk ta e. Engkim ka sawi ang kha a ni mai,” a ti ta hmiah mai a.
Van atanga thupek lo tla niawm fahranin a kal ta a. Rinky chuan mak a ti kher mai. Juan Gil chu mumal lo deuhin a kal a, a inchhuih buai nawk nawk a, a lu a kun tlat bawk a. Cordoba pawh a khur hlawk hlawk bawk a. Cordoba chuan, “Father Joseph, min ring em ni?” a han ti a. Father Joseph-a chuan, “Ring e, ka fapa,” a lo ti a. Cordoba chuan van lam a han en a, “Pathian ropui ber,” a han ti ve luam a. Father Joseph pawh chu lawmthu pawh hrilh lovin sabengtung chungah chuan Maria chu a hlang a. Amah pawh chu a sakawrah a lawn a, an awmna ruamah chuan an chhuk thla dun ta a. Father Joseph chuan, “En ta che u, kan inunauzia hi,” a han ti a.

OUTLAW’S CODE
BUNG XIX
Lettu-PL Liandinga
Type..Mama Renthlei

Father Joseph-an a suahdur a lak a, huana hnathawk tura a kal lai chuan Rinky-te pahnih chuan a chanchin an sawi sap sap a. Slade-a chuan, “Kan putara hi a ti tak tak nge maw a ti der mai mai le?” a han ti a. Rinky chuan, “Eng angin ngei i ngaih?” tiin a zawt ve thung a. Slade-a chuan, “A tider mai mai a ni, pa fing tak chu a ni a, hnimhnah chanchin a hre tih chauh a ni,” a ti a. Rinky chuan, “Engahnge chutiang a nih i rin,” tiin a zawt a.
Slade-a chuan, “E le, tumah hi khatiang taka fing an awm lo tlat. Engemaw zawng chuan a der mai nihna lai hi kan nei theuh a ni. Ani pawh hi keini ang bawkin a der mai a ni. He laiah hian sakhua avanga hmun fianriala cheng angin a awm a, a chetdan han en hian a thau fu mai si a, nun nuam hi a ngaina ve fu bawk, a mitvun chuarte hi han en la, a tawngtai nasat vang leh a lungngaih vang chu a ni miah lo. A mut heh vang chauh a nih hi,” a ti ta daih mai a.
Rinky chuan In chu chhuahsanin hnunglam chu a va en a. Father chu a lo awm si lova, ruamah chuan a zu kal mai mai a. A lo haw leh thuai a. A lo haw leh chuan a thianpa chu a lo awm ta hlek lo mai a. Slade-a chu a lo bo ta daih a. Ama duh thu chuan Slade-a chu a kalbo hlek lovang, chuti tunge hruaibo ta ang? Slade-a hnu chu a chhui ta a, a hnuchhui pawh chu atir chuan a awl kher mai. Slade-a chuan moccasin ang deuh a bun a. Chuvangin a pheikhawk chu savun nem tak, a hnuai mam zai, keartui nei lo a ni. Chutiang chu rangkachak zawnga vah velnaah Slade-a chuan a awlsam zawk tih a sawi tlat a ni.
Rinky-a chuan Father chenna In atanga hla lo teah chuan Slade-a pheikhawk hnu chu a hmu ta mai reng a, ram lam a kawk va nghe nghe a. Rinky-a chuan chumi rinchhan chuan hmalam chu pen sawmnga zet a va chhui a, mahse a hnu chu a hloh leh ta deuh a. Dinglam leh veilam ngun taka en chungin a rinna lai chu a han zawh chiam a, mahse a hmu leh ta miah lova.
Chutichung pawhin Slade-a ai chuan kal thui thei zawk leh kal chak thei zawka a inngaih tlat avangin a hma lamah a kal ta zel a. A kalna turah chuan lungpui a tam tial tial a, thing a tlem tial tial ve thung a. Father-in a sawi tawh angin lungpui leihlawn niawm tak chu a han hmu ta a. A bulah chuan lui a luang a, lui chu tuikhawhthlaah chuan a inkhawhthla thum dur dur a. A sir deuhah chuan Rinky chu a chho ve ta a. Lungpui vel chu a lo nal kher mai a, pat ek in a bawh luai nghe nghe a. A lawn a hahthlak kher mai. Mahse a chung a han chhuah chuan a hahna chu lawm naah a chang ve ta thung a.
A chung zawlah chuan ruam te reuhte, mawi tak hi a lo awm a, ‘tahchuan lui a luang a, chu lui chu a ni, a hnuaia inkhawh thum dur dur kha. Hla feah chuan Garcia-a In chu a va hmu a, a chanve chauh chu a ding luah mai a. Chu In bung chu nichin lawka bung niawm tak hian a lang. A lungpui tla bangte chu tla leh mai tur awm tak hian a lang a. Rinky rawn chhuah chhohna atang chuan In panna kawng chu a insial reih a, chu kawngah chuan Rinky chu a kal ta a. Fimkhur the mahse lungpui phen atanga a lo chhuah a, a piah a luikam bul fai laia nula thu a hmuh chuan a phu chiang kher mai. Chu nula kiangah chuan thehlei a awm teuh nghe nghe a. Thehlei pakhat phei chu a ko kiah a lo chuang a, a then chu a malchungah an thu a, a thente chuan a khup chunga chuangin englo an lo ei mawlh mawlh bawk a. Rinky-a mak ti lutuk chuan ngawi rengin a en reng a.

OUTLAW’S CODE
BUNG XX
Lettu-PL Liandinga
Type..Mama Renthlei.

Chu nula chu chhiahhlawh fanu ni mai awm hian a inchei a. Thawmhnaw mawl ber chi inbelin mawza pawh bun lovin, a kerekah te leh a banah te chuan ngun to lo tih hriat tak mai hi a bun ve chuai bawk a. A incheina ti mak tu tak chu a nghawnga rangkachak thi lian tawk tak a awrh chu a ni. Nula chuan thehlei te chu chaw a pe a, a kut chu zawitein a chet them them a. A mitmeng hnuai reih rawih leh a hmel tum hmak mai chuan a ti thutak hle a.
Chu nula chuan amah chu a rawn en reng a ni tih pawh Rinky chuan a lo hre lo hial a. Nula chuan, “A pawi love, kal zel rawh. I lokal avangin an darh lovang,” a rawn ti ta a. A tawng chu Rinky chuan ngun deuh maiin a lo ngaithla a, a zawi hle a, a tham bawk a, khawsik vei hlimhlawt ni awm tak a ni. Rinky chuan nula aw a han hriat chuan a zauthau hle a. Chutah saptawngin a tawng tih Rinky chuan a hrechhuak thut a, mak pawh a ti hle a.
Rinky chuan, “Khawpuia cheng thin i ni maw? I aw ah a lang tlat a ni,” tih pahin a lukhum a phawk a. Nula chuan, “Cheng lo, Khawpuiah ka cheng ngai lo. Mahse hman deuh lai khan ka vannei a, mi pakhat, puakruk phawirang si, fel si hi Texas atangin an rawn um chhuak a, San Vincente-ah a chawl a, San Vincente-ah pawh chuan a leng leh ta pek lova, kan Inah an rawn um lut a, rei tak kan chen pui ta a ni. A ke na a pun a, a ke a hloh thelh nghe nghe asin, Father Joseph chu lo awm lo phei se a ke chu a hloh ngei ang. Chuta a ke a nat tak avang chuan kan Inah rei tak a chen a ngai ta a, saptawng ka thiam phah ve ta sawt a ni. Mahse a dam veleh kan sabengtung a hawh a, a kalchhuak leh ta mai a ni?” a ti a. Rinky-a chuan, “In sabengtung a ru i tihna a ni maw?” a lo ti a.
Nula chuan, “A tirah chuan a ru emaw kan ti a. Mahse rei lote hnuah chuan sabengtung man let thum zet tur chu pawisa min rawn thawn leh ta a ni. Chuta chin chu ka piancham lo thlen apiang leh christmas te, Isua thawhlehni (Easter) te hian pawisa thanhnem tak tak min rawn thawn ta ziah mai a ni. A pawisa chu kan dawng thei lovang tih han hrilh tur pawhin a awmna chin kan hre ve tlat si lo. Ka dah tha a, kan lo nghak ngawt mai a ni,” a ti a. Rinky-a chuan, “Eng lam nge a sumdawnna chu?” a han ti a.
Nula chuan hmel danglam miah lo hian, “Bank rawk hi a ni deuh ber mai. A chang chuan pawisa lem chher te pawh a ching bawk. Mahse pawisa lem chher chu a ninawm a ti tlat, hun a duh rei a, a buatsaih vel a ngai nasa bawk. I hrethiam mai lo’m ni?” a ti a. Rinky-a chuan, “Ka hre ve chiah lo. Chu pa chu tunge a hming?” tiin a zawt ta a. Nula chuan, “Heta a awm lia chuan Leonard Smith a inti a, a hming tak tak kan hre lo. A sam a sen a, nui mawi tak, a nuih chuan mi tihlim thei tak a ni. An rama haw leh a chak em em bawk,” a ti a. Rinky-a chuan, “Pawisa zawng leh turin maw?” a ti leh ta zel a.
Nula chuan, “Nilo, chutiang a ni lo. Hei helaia thehlei ang mai hian lal ang maiin a khawsa thin. I hrethiam em? Chutia nuam taka a awm lai chuan mi pakhat a lokal a, a lallukhum paihsakin a mit khing a rawn hupbehsak ta a ni. Chu pa chu hmuh leh a duh a ni. Heta a awm lai chuan rangtaka puakruk phawia kah nghal hi nitin darkar khat a zir ziah asin. A che lai han hmuh chu a nuam khawp mai,” a ti a. Rinky chuan, “Tunge a lallukhum hlihsaktu chu?’ a lo ti a. Nula chuan, “A hming chu Rinky Dink a ni,” a ti a. A mitthlain chu samsena chu a hmu a, a nui sak a. Nula bawk chuan, “Rinky Dink han tih chu hming nuihzatthlak tak a niin ka hria,” a ti a. Rinky-a chuan, “A nuizatthlak khawp mai,” a lo ti ve mai a.
Nula chuan, “Ka duhlai samsena chuan Rinky Dink chu a haw tlat a ni,” a ti leh ta a. Rinky-a chuan, “A mit a tihdelsak vangin maw?” a ti a. Nula chuan, “Aih. A chhan zawk chu Rinky Dink chu misual, sual leh chhawng a nih vangin. Misualte aiin a sual a, ruktute a rawk leh chhawng a. Leonard-a ngaihdan phei chuan chutiang chu tenawm rau rau ah pawh a uih tel tlat niin a sawi,” a ti a. Rinky-a chuan, “A tenawm bawkin ka ring, engemaw kawng zawng chuan. Eizawn dan phung pangngai a ni lo tlat alawm. He i mi sawi pa hi ka hmu tawh tlatin ka hria. A mit dinglam hnuaiah khuavang tereuhte a nei em?” a ti a.
Nula chuan, “Chu chiah chu a nih chu. Tunge a hming ? Leonard Smith em ni?” a lo ti a. Rinky-a chuan, “Aw, Leonard Smith ni e. Missouri Slim a ni bawk a, Goodtime Harry a ni bawk. Harry the Hop a ni bawk, chu lo pawh hming dang a ngah mai,” a ti a.
Nula chuan, “A chanchin sawi a nuam fu mai. Rinky Dink a huatzia kha aw… Mangtha tia min kalsan lai pawhin Rinky a hneh theih ngei nana tawngtai turin min ti hial asin. Chumi hnuah chuan ka tawngtai ta ziah nghe nghe a ni. Ni tinin,” a ti ta a. Rinky-a chuan, “I vannei tehchian lo a nih chu,” a lo ti bauh a.
Nula chuan, “Engvangin maw?” a ti a. Rinky chuan, “A hun khawhral thlak mai mai tih ka ngaihtuah vel mai mai alawm,” a ti leh mai a. Nula chuan, “Khawhralthlak a?” a han ti a. Rinky-a chuan, “Thla kalta lawk khan Rinky-a nen chuan an inhmu alawm, Leonard Smith-a chu a vannei tehchiam lo a ni,” a ti a. Nula chuan, “Karei! Chuti chuan engtinnge ni ta zel?” a lo ti a. Rinky-a chuan, “Missouri thiam lo pawh a ni chiah lo. A theihtawp zawngin a bei alawm. Thian pahnih a hruai a, Rinky-an lehkhaden a den laiin a hnunglamah an lokal a, mahse Rinky lehkhaden puipa chu pa fel deuh mai a lo ni hlauh a. Dawhkan hnuaiah Rinky chu a va kheuh a, tichuan Rinky chu a sir lamah a let tawp a, chhuata lum tawp tawp chungin a kap ta a ni,” a ti a.
Nula chuan, “Tichuan engtin nge ni ta zel,” a ti ta zel a. Rinky-a chuan, “A ri ta rum rum mai a. Mahse Missouri tan chuan tah a chhuak duh ngawt ang. Ban pakhat chauh a nei tawh. A veilam a ni lehnghal. A khawngaihthlak ngawt mai,” a ti a. Nula chuan, “Chu Rinky-a hnunglam atangin maw a beih?” a han ti a. Rinky-a chuan, “Aw, Missouri chu a fimkhur thei riau alawm,” a ti mai a.

[Ngaia]

OUTLAW’S CODE
BUNG XXI
Lettu-PL Liandinga

Type..Mama Renthlei.
Post..T mawii.

Nula chuan a malchunga thehlei a chawi lai chu leiah a nghat a. “Inah sawn i kal dawn em ni?” a ti a. Rinky-a bulah chuan a ding a, a sang tha kher mai. Rinky-a pawh tlema a lo sang deuh hlek lo chu a inchhir hle a, nula chu duat tak maia han chhuk bih theih rual a ni lo, a mit leh a mit chu an inzawl tawk chauh a, Rinky-a tlawmngai chu a rukin a dingdihlip awk awk a. Rinky-a chuan, “Ina leng tur sawn tu sawmna mah ka dawng si lo alawm. Father Joseph-a hnen atangin ka lo tei chho mai mai a ni. Ram han en thlithlai vel mai mai ka tum a,” a ti a.
Nula chuan, “Lokal rawh. Ka pa chuan mikhual, vaibel zu a, zu no dawm chunga titipui hi a duhzawng tak a ni. Thuthar te hi a hre chak riau a, kum thum chhungin pawnlamah a vak chhuak thin a ni,” a ti a. Rinky-a chu a lawm kher mai. Kawng chu a zauh that em avangin a rualin an kal thei nghe nghe a. Rinky-a chuan, “Hetianga awm hi a nuam em? Hetianga awm hi i dunzawng em ni?” tiin a zawt a. Nula chuan, “Nuam ve bawk a, sabengtung te, sakawrte kan nei a, a chungah kan chuang thei bawk. Eitur kan ngah tawk a, vur tlak huna intihlum nan thingtuah tur kan ngah tawk bawk si. Sikula ka luh chhung hi chuan nuam ka ti khawp mai,” a ti ta a.
Rinky-a chuan, “Sikulah i kal e law?” tiin ahan zawt a. Nula chuan, “He hmun atang kal chhuah ka tum lai hi chuan ka tihna a nia,” a ti leh ta daih a. Rinky-a chuan makti fein, “chu engnge i sawi awmzia chu,” a han ti a. Nula chuan, “Tleirawl tinte’n an sawi ang awmzia hi. I tlanchhuak tawh a, i puakdarh tawh a. Chuvang chuan i hmalah lungawina a lang a ni. Lehkhabu ziak tham zet khawpin thil i tawng hnem tawh ka ti ngam ngat mai,” a ti ta deuh deuh mai a. Rinky chuan mitmeng pawisawi lo tih hriat ngawih ngawih hiana han melh a, “Engvangin nge chutia i tih mai ka hre ve thiam phak ta lo tawp mai,” a ti ta a.
Nula chuan a kut a piai ri fak a, “Smith kha nang angin tuma’n an hrechiang ve lovang, khawvel hi a hman tam tawk a, hmun hrang hranga a vah hnem tawk phawt loh chuan. Hetia i hnena thusawi ringawt chung hian i hming lem ka hrilh thei ang che ka ti ngam ngat mai,” a ti leh at a. Rinky-a chuan, “I theih ka ring lo, helaiah hian ka la cheng tlem em mai,” a lo ti a. Nula chu a nui a, “Smith chuan i chanchin chu i pianhmang tel lovin chuti taka tam min hrilh i ring em ni? Rinky Dink chu pa vun sen deuh si, vun ngo tak a ni tihte pawh min hrilh vek asin,” a ti ta mai a. Rinky chu a bu nghat nghat a, “A dik, lo ngaihtuah ve tawh awm tak,” a ti ta ngawt a.
Nula chuan, “I hnunglam atangin a rawn bei tak tak che em ni,” tiin a zawt leh ta thung a. Rinky-a chuan, “Aw,” ti chauhin a lo chhang a. Nula chuan, “A chantawk chiah a chang a nih chu, pawi chu ka tihpui khawp mai. Helaiah a lokal a, kan nun min rawn chawh harhsak tawh asin,” a ti a. Rinky chuan, “I sawi anga i puandarh ve hunah chuan engnge i tih tak ang?” tiin a zawt a. Nula chuan, “Thil ka en vel ang. Mihringte, hmun te ka hmu ang a, ka kawnga vanneihna lo tla chu ka chhar nghal bawk ang,” a ti a. “I chanchin min hrilh zawk the. Rinky, khawvelah hian engnge i tih? Smith khan thudik tlemte tal min lo hrilh reng em?” a ti ta a.
Rinky-a chuan, “Engnge a hrilh che?” tiin a zawt let a. Nula chuan, “A sawidan chuan ‘tuanrang’ an tih ang chi hi i ni a ti. Lungbang hniak ruka sangah pawh i tlanchhuak thei a, kawngkhar kalhna kuaah pawh i vak lut thei a, darthlalang no, tuia khat pawh hi mihring thinlung tintu puakrukah i chantir thei a, chu lo pawh i chanchin dang a sawi teuh mai Rinky. Mr Dink tiin em ni ka koh dawn che?’ a han ti nghal zaih a.
Rinky-a chuan, “Rinky tih chu ka duhtawk mai. Ka tih thin chu ka hrilh ang che—ka vakvel a, engkim hi a samkhai zawngin ka ngai vek mai a ni. Mahse ka zinnaah ka inkeng hnawk teuh ngai lo. Saw saw em ni In chu? Saw, thing kara lo lang saw?” a han ti a. Nula chuan, “Ni e,” a ti a, a tualzawl an va thlen chuan nula chuan, “Ka pa ka’n zawnsak ang che. Sawlai pindanah sawn lo thu la, mahni Ina awm angin lo khawsa ve mai rawh,” a ti a. A kalsan nghal a.
Chu In chu Rinky chuan tawih a ti kher mawi. A in hmuh tawh a zawngah la tawih berin a hria a. Nulain a kawhhmuh pindan lam chu a va pan a. Chu pindan chu library angreng hian an cheibawl a. Lehkhabu phei chu a tam lem lo. Rinky chuan lehkhabu chhuar atang chuan Don Quixote tih bu chu a han la thla a, a han keu zawng chuan a phek kar atangin vaivut a lo tla chuai chuai a. Chu lehkhabu ziak chanve zet chu a chhiar hleih theih tawh loh a. A kawm pawh chu a chhe tawhin a tla darh tep tawh bawk a.
Lehkhabu chu a awmna hmunah chuan a dah leh a. Chu In chu a han en vel a, a awmna pindan chu engemaw zawng chuan tan-In te pawh a ang rum rum mai. Engemaw zawng chuan hmanlai te hriattirin beiseite pawh a tibo rum rum lawi si a ni. Hetiang hmunah hian nula kha a cheng chu a ni tak si a! Rinky-a rilru ah chuan thil hrang hrang a lo lut ta nuai nuai mai a. Hla taka Marshal te, Pittsburg-a mitthi lek lek mu reng – Forbes-a te, Forbes-a chhungte sual tak tak, Forbes-a ro khawm duh vanga Forbes-a thil tum tihhlawhchhamsak tumtute, mi mak John Ray-a, mak taka bo ta daih te, hla taka Sheriff te, Jarvis-a thi tawh hnu te, General O’Riley te, Slade te, Father Joseph te, Murcio te, khualbuk nghaktute leh he Isabella Garcias-i pahrawnte hi.
A hnunglam atang chuan, “Ka pu khawngaihtakin lo hawi lawk the,” hawihhawm fein mi pakhat hian a rawn ti ta a. A rawn sawitu chuan English a hmang lova, Spanish a hmang a. Rinky chu a va hawi let a, kawngkhar thirkham karah chuan pindan lehlama Cordoba hmai tung rawt chu a va hmu a. A mit lehlam chuan ulhbun kaw lian chi ngul chu a lo melh ra nghe nghe a.

OUTLAW’S CODE
BUNG XXII
Lettu-PL Liandinga

Hun remchang bawh thut ralah chuan Rinky Dink chu khawvela hun remchang hmuh hmaih ngai lo ber a ni ngei ang. Mahse hun remchang zawn nan pawh thil tih theih miah loh hun a awm thin a, chutiang thil engmah tih theih loh hunte zinga pakhat chu ulhbun hmaah hian a ni. Rinky phei chuan ulhbun hi a ngaina a ni lova, mu sepa savate, ramsa te reng reng pawh phuh duh lo mi a ni. Sava kah nan te chuan rifle hi a duh a, a hnaih deuh chuan puakruk hman leh mai a duhdan a ni. Tunah pawh hian ngawi rengin tha takin a kut chu a lu chungah a phar chho ve mai a, “A ni tak e, Cordoba, mi ngam rih a ang viau mai,” a ti tha thliam a.
Chutih lai tak chuan Rinky chuan a thutna, thutthleng ban nei nena hnunglama inleng thluk dawrh a, tlak paha, puakruk phawi a, lei thlen hma a tukverh lam va kah vak mai chu a rilruk deuh a. Mahse Cordoba awm lohna lam atang chuan, “Senor Grey, bumna engmah thawh tum suh,” a rawn ti leh ta a. A han lehhawi a, tualzawl lam atanga kawngkhar pui chu a chanve chauh a inhawng a, ulhbun phir lehnghal chuan a lo melh ve reng mai a. Ni a sat em avangin ulhbun kengtu pahnih chu a hmuh chian theih meuh loh nghe nghe a. Rinky chuan pa valai vel tur, sa tha tak, sam dum help hlawp, sam sei tak chu a va hmu a. Chu pa chuan, “I thlen-In pa Garcias hi ka nia. Ka hmanhmawh deuh avangin tunah lawmthu ka’n chhakchhuak nghal rum rum mai ange. Senor, ka lo nghak reng tawh che asin. Ka fanuin hetah i awm tih min rawn hrilh khan ka lawm khawp asin,” a ti a. Rinky-a chuan, “Khawvel hi a lo zau tehchiam lo a nih hi,” a han ti ngawt a.
Garcias-a chuan, “A zau lo zet zawng a nih hi. Mahse ban pharna tur leh han inher velna tur chuan a zau tawki thovang. Cordoba ngun takin tin rawh aw. Aw, khati khan a tha. Khati kha chuan i silai hmawrin mi kawk ta lo,” a ti a, pindan chhungah chuan muang fe in a lo pen lut a. Bang bulah chuan a lokal a, a silai chuan hlauhthawnawm miah lovin Rinky chu a tin thei ta a.
Garcias-a chuan, “Pu duhtak Grey, tunah chuan tukverh lam pan sawn i kal ang a, silai hmawrin i awm a nghen thlengin i kal zel dawn nia. Zuang thut suh aw… Chhuatah bawh thut pawh tum hek suh. Daikat sawt mai tur chanin ka chang che a nia. Engemaw i tih thut hi kan beisei ru tlat bawk. Silaite hi musep, a khat tawk aia tam maha thuna nih hi. Hnaiteah pawh a phuh darh tha viau ang. Pahnih hnih chu sawi thu cheng lo, pakhat ringawt pawhin he silai hi chuan mitdel pawhin an kaphlum thei thovang che. Chutiang chu tuna i dinhmun hi a ni. Tunah zawi muangin tho rawh le. A tha e, zawitein tukverh lam kha pan rawh le. Ulhbun hmang tura min hrilhtu hi pa fing deuh mai zawng a ni maw le,” a ti zut zut a.
Cordoba hmel chhe deuh mai, then tha pawh chu lungawinain a khat ve a. Grey-a pawh chu a awmin silai hmawr a va nawr thleng chuan tukverh lam panin a kal a. Garcias-a chuan, “Khati kha chuan a tha khawp ang. Angel hnute deh tuk niawm takin vanlam banin zawi muangin i ban kha han phar mar lehzual teh le. Ka dap dawn che a nia, Che hlek suh, ka silai hi ka zakhnuaiah ka hawlhlut anga, a hmawr lehlam, a kaw lam chuan i hnungah a la nawr reng dawn che a ni. Ka kutzungchal pakhatin a hmehperna ka hmet ang a, a per zo thovang chu, a per awl dan chu i hre ve mai ang, samzai pawhin a pawhper theih tho asin. Ka kut lehlamin ka dap dawn che a ni. Ka dap chhung zawng chein che hlek suh ang che. Ka thusawi chu vawng tlat ang che,” a han ti a.
Garcias-a chu zawitein a nui hak hak a, hneh deuh maiin Rinky-a chu a dap ta zaih zaih a. Rinky chu a zangkhai hmel hmel nen Garcias-a chuan thil thanhnem fe a phawrhchhuak a. A zakhnuai tawn tawnah chuan puakruk a phawrhchhuak a, chubakah a kawngah chuan puakruk dang a la phawrhchhuak ta cheu a. Bowie Knife chemte rit lelh lawlh hi a rawn phawrh bawk a. Chu chemte chu a zum zuih that em avangin a rihna ringawt hmang pawh chuan a pum chuan mihring taksaa inthawlh lut zo ngei tur a ni hian a lang a. Garcia chuan, “Kha zawng kha a ni,” a han ti a.
Tukverh pawnlam atang chuan Cordoba chuan, “A kut phuarna tur thir ka kawl asin,” a rawn ti a. Garcias-a chuan, “A kut phuarna turin thir maw? Heng a kut no nem thip thepte hi kutkawla tihbeh chi an ni hleinem. Harsatna chhete pawh awm lovin an putru zel zel mai asin. Kutkawl siamsa reng reng chu a tan hian a lian lutuk vek ni berin a lang. Mahse hruizen chuan a tih theih mai ang. Pawn atang khan min han pe rawh. A ngai leh love, hruizen chu a tha leh lovang, a aia tha hrui ka nei leh zawk e. Cordoba, ngun lutukin lo veng rawh. I ven ngun leh ngun loh hi i ipte puar leh puar loh hriltu a ni tih hre reng bawk ang che,” a ti a.
Cordoba chuan, “Ka veng alawm. Kham sava chhaw deuh mai sihal riltamin duhtawka a veh ang maiin ka veng e. Eng vangin nge heti taka he pa hi veng ngun tura min tih le aw…?” a ti a. Garcias-a chuan, “An fin vangin maw le. Hun remchang pek ve hi an tum miah lo. An ngaihtuahna that vangin Pathian chuan malsawm hlawm rawh se. Thianpa, tunah chuan i kut kha la thla tawh rawh le. Zawitein, che thut thut lovin, i hnunglamah rawn dah chhuak la. Aw, khati tak khan a ni. Thianpa, i fing hleuh hleuh hle mai. Pawi ka tihpui takmeuh che ani. Heti hian chuan a tha tawh ang. Khai le, Cordoba, ka ulhbun hi ka dah dawn a nia. Keng kut chanchin ngah tak tak maite hi ka thiana hnungzang sang tawk takah hian ka han phuar bet dawn a ni. Ka phuar laia a khuh a chhuah emaw, a tawng emaw, a tal emaw vaih chuan a kaw hnih hnih khan a taksaah hian i ruah thawt mai dawn nia. A thi emaw, a nungin emaw kan ipte chu a puar phah ve reng reng dawn a ni,” a ti zut zut a.
Cordoba chuan, “Fimkhur tura hrilh ka ngai lo. A tul chuan hremhmun lamah nuamti takin ka tir liam mai dawn. Pathian khawngaihna a zarah hemi kan hlawh pawisa hian nupui ka nei anga, a tihzia dawn mange. Senor Garcias, khawvela nula hmeltha ber mai chuan mi lo nghak reng tawh si a, sentinnge tun ang hunah ka fimkhur loh duh ang ni?” a ti a. Garcias-a chuan, “I fimkhur chuan a tha a nih chu,” a ti mai a. A ulhbun chu a dah a, Rinky chuan a hnunglama hrui a sam ri chu a hria a. Tawng an phalsak lo nain a taksa tiche lovin a tawng lui hram hram a.
Rinky-a chuan, “Eng vangin nge min la zuah reng ni? Ka thih pawha ka luman a ngai reng a nih tho si chuan engvangin nge min zuah reng?” tiin a zawt ta a. Garcias-a chuan zep hauh lo hian, “Kan nula kha silai ri hre turin ka duh hlei nem. Hmeichheho hi an fing ve zek asin. Isabella pawh hian a taksa mawi tak chhungah hian hriatna tha tak a pai ve tlat asin. Chu mai a ni ‘nem, valbawih, ka chhuatte hi thisena tihbawlhhlawh ka duh lo asin. Chu mai pawh a la ni lo fo, min ruaitu leh lawmman min petu tur hian a theih hram chuan reilote biak che a duh a ni. Biak phawt a, thah che a duh a ni,” a ti a.
Rinky-a chuan, “A that nasat chu,” a lo ti a. Garcias-a chuan hrui valh sa chu a tisual tih hriat reng reng hian anchhia a lawh nauh nauh a, a dang a valh tha leh a. Rinky-a chuan, “Heta hi Cordoba mi khawngaihthlak pawh a awm a tirawh?” a han ti a. Chu Mexican pa chu a then tha a, “Cordoba mi khawngaihthlak a? Vawiina keimah leh keimah ka in khawngaih ngat chuan ka damchhung hmanral leh turah hian vanneihna dawng lo tawp mah ila ka pawiti lo,” a lo ti a. Rinky-a chuan, “A ni e tirawh, aw, a tha e. Ni mai mai the se. Mahse Father Jose-an a hrilhfiah theih loh che chuan mak ka ti ngawt ang,” a la ti ta zel a.
Cordoba chuan, “Engnge min hrilhfiah ang?” a ti a. Rinky-a chuan khawngaih hmel tak maiin, “Rindan i la nei thei na fo nge?” a ti a. Cordoba chuan, “Eng rindan maw? Mi thianghlim ang maia thil chiang sa chungah hian rindan leh rin-dun engtinnge ka neih theih ang?” a ti a. Rinky-a chu a thaw hap a, “A ni tak, Father Joseph hi a lo rintlak kher em a tin a ni. Anni pahnih pawh khan Father Joseph-a hnena an hruai lai che khan hei hi an lo hrechiang hle ni tur a ni,” a ti ta zel a. Cordoba chuan, “Eng pahnih maw?” a la ti ta deuh deuh a. Rinky-a chuan, “Eng pahnih maw a? a bumtu che pahnih maw le. Tudang nge ni se i tih?” a ti leh ta a.
Cordoba chuan a silai chiah chu en lovin Rinky chu tlemin a rawn en a, “Eng pahnih maw?” a han ti nawn leh ngat a. Rinky-a thin chu a phu dawt dawt a, mahse a insum hram hram a. A han nui sak a, “Nula leh Juan Gil-a ngei kha maw le. Ni khat vela thangbotir bak che hi engnge beisei dang nei se i tih? Tunah chuan i tan inrawlh lehna tur pawhin a tlai lutuk ta. Tunah chuan lungmuang takin biak-Inah an awm tawg ngei ang,” a ti leh ta a. Cordoba chu a thaw hawk a, “Pathiannu Thianghlim,” a han ti luam a. Chutah a awmdan dchu a inhre chhuak thut a, a silai a hum nghet leh sauh a.
Corboda chuan, “I awm ka tinna silai hi ka laksawn i beisei a ni maw, chumi kawngah chuan mi a let tawp i ni mai,” a ti leh ta zawk a. Rinky-a chuan, “Cordoba mi khawngaihthlak nangni ang misual tenawm buaipui tur hian keini ang mi thi tep hi inhawlh buai duhin i ring em ni? Ka khawngaih tho tho mai che. Bum i lo awl em mai,” a han ti ve ngat a. Cordoba chu a thlan a tla zawih zawih tawh mai a, “Dawt vek a nih chu. Maria chuan min hmangaih a ni. Kha mi a pa kha neih a hlauh avangin reitak chhung chu hremhmun pate-ah a cheng a ni ringawt a ni,” a ti ve thung a.
Rinky-a chu a nui leh sak a, “Cordoba ngaithla the, hmeichhe ngainat loh zawng tak mai hian i fing pek a nih hi. Nangni ang choak thuro thla tawn mai mai, hmelchhe lutuk si hi hmeichhiain an ngainat i ring reng reng em ni? I ti zia lo hiu heu hle mai, darthlalang emaw, dil emaw, mahni thla hmuh theihna tur i la tawng fuh lo a ni awm e,” a ti a. A hnunglamah chuan Garcias-a chuan a kut chu a phuar mawlh mawlh a, a phuar fel a, a phuar nat em avangin Rinky-a taksa a zu dehna lai phei chu a khuar dawk a, a na em em bawk a. Garcias-a pawh chu a lawm tawk hle mai.
Cordoba lah chu a mangang lutuk tawh a, tawng a’n tum zet a, harsa a tih em avangin vawihnih lai chu a thulh nghe nghe a. “Juan Gil uichopa chu a nghawng ka zai chhumsak ang, amah pawhin chu chu a hre ve reng ang,” a han ti hram a. Rinky-a chuan, “Cordoba mi khawngaihthlak, tunah hian tualchhung pulis pahnihin an nghak reng tawh che tih i hre nange. Chu mite pahnih chu silai kapthiam, thelh zen zen duh lo, Juan Gil-a te nupa rawn hnaihtu apiang lo hnar tur a an tih a ni nghe nghe asin,” a la ti ta deuh deuh a. Cordoba mangang lutuk chu tawng pawh tawng tha thei lovin, “I daw,” tiin a rum in a rum ringawt a.
Thinrim fein Garcias-a chuan, “Engati mai mai nge ni Cordoba, engnge in sawi tak chiam mai? Fimkhur rawh?” a lo ti ve bawk a. Rinky-a chuan, “Uiin vuakna hruihrual a tlanchhiatsan angin thudik tlanchhiatsan a tum a nih hi. He hmunah hian a biangnovi hmuh tuma a lokal laiin a biangnovi chuan Biak-Ina inneihna dar rimawi chu a lo ngaihthlaksan a nih pek hi. Cordoba, han ngaihtuah the, Juan Gil-a khan thil rawt engemaw chu nei lo sela chuan hetiangin a lak zam mai mai i ring em ni?” a han ti a. Cordoba chuan Rinky hmel chu a han en zawk a, chutihlai kar te mai chuan Grey-a chuan a kut chu a hnunglam atangin a rawn vai chhuak zawk a, ulhbun ngul chu a vuan ta a.

[Ngaia]

OUTLAW’S CODE
BUNG XXIII
Lettu - PL Liandinga

Tunge kut tuanranna innghahna hi hria ang le? Kut tuanranna hi zawng ngaihtuahna atanga rawn intuh lutin hriatna thazam chhe zawkah lokal in thahruiah a rawn zam ve mai a ni. Chutiang chu anih avangin chu Mexican pawh chuan Rinky-a chu kah tumin tin reng mahse, a rilru a la inpeih hman tlat loh avangin Rinky-a hmela thildang tih tumna lo lang pawh chu a tlankhalh hman ta lo. A kut zungtang dinglam zungchal chuan a silai hmehperna chu a vuan reng mai le. Mahse engtinnge a hmeh hman ang? A han hriatchhuah a a han hmehper pawh chuan Rinky-a chuan silai ngul chu a lo dawm kang hman tawh a. Chunglamah a puak ta thawr a. Rinky-a dar chungah chuan a kaw hnih chuan hneh takin a phuh phei satliah ta mai mai a ni.
Silai nghawr chuan Cordoba chu a phih dawrh a, a vir thelh nghe nghe a. Rinky-a kut veilam chu a silai dawm chhohna avangin a lu chungah a la awm daih a, mahse chuti chung chuan Garcias-a n a rawn man veleh chuan tlemin a inhere a, a lehhawi a, Garcias-a chu a kuaikun a, a kuttum chuan Garcias-a beng chunglam chu a tauh nghal chawrh a. Rinky-a chuan a hnek zawh veleh a kut chu a thlah zawi nghal vat a, Garcias-a pawh chu hnung zawngin a pai tawk tawk a, a khup a zawi thut a, inbeng kan tumin a kut chuan lei a beng tawk tawk a.
Pawnlam atang chuan Cordoba chu a thiltihsual vangin a harh chhuak tan ve mek a. A puakruk chu a dap thuai a, mahse a han phawi chhuah fel meuh chuan Rinky-a chuan dawhkan atangin puakruk pahnih chu a lo la fel hman reng tawh a. Cordoba duhtawk a tling thawkhat hle. Pa huaisen tak zawng a ni ve nain vanneihna thil ringawta innghah chu a ngam ve i khaw lo mai. Nichin lawk khan a ngaihtuahna inlulmleh muan lutuk vangin thil a ti khawlo tawh a, tunah lek phei chuan a tan han tihnawn leh rual a ni tawh lo. A hmelmapa chanchin mi sawi a hre ve zeuh zeuh a, chuvangin a hmel ma pa lak atanga vanneihna beisei ai chuan lunghalna puak mai tur bawh pawhin vanneihna chan a inrinawm zawk a ni.
Chutiang chu a nih avangin Cordoba chu a zuang per vat a. Tukkhum chhir nawk nawk chungin a tlanchhe ta a, Rinky-a tan chuan kah phak rual a ni ta lova. Rinky-a kah phak loh a hla a thlen hnu pawh chuan a han insiamtha a, theihtawpin Garcias-a In hnunglama a sakawr thlun lam pan chuan a tlan ta a. In chhungah ve thung chuan Garcias-a chu a ding mar theih tawh loh avngin a pai tawk tawk a, bang a va su a, a thingthi ta hnawk a. Chu chu Rinky-a chuan a hmuh chuan sawisak zui tum ta lo chuan tukverh lamah a phei a, Cordoba ulhbun thlauh chu a va hnuk lut a. Tukverh lam chu a tan chuan hlauhthawnawm a ni ta lo.
Chuti chung pawh chuan Rinky-a chuan Garcias-a nikhaw hre mumal lo chu a pan hnai mai duh lo. Zawhte0inb sazu a thlir ang mai hian ngawi rengin a thlir a, dawhkan lam chu a pan a, a hriamhrei an laksakte chu a va khawm a, reilote chhungin a kawrhnuaiah chuan a dahbo ta vek a. Chutihlai chuan Garcias-a chu a ke a din tumin a rawn inpuahchah ve mek a, mahse Rinky-a chuan a silai chu a khawih pawh a la khawih chhin duh lo. Chu chu Garcias-a chuan a hrethiam mai, chet thawh se Rinky-a chuan a ti a, mahni inven nan emaw kahhlum mai a tum a ni. Mahse Garcias-a tan chuan chet rual a ni lo. Kei tein utawk a tham beh chuan utawk tan tal chu thil tih chi loh tak a ni tlat. Chuvangin Rinky-a chet chu a nghak ta zawk a.
Tualzawlah chuan pen ri a lo awm a, Isabella Garcias chu pindanah chuan a rawn lut leh ta a. Chumi te pahnih chu a han mel tawn a, “Silai ri ka hria khan thil tha lo tak thleng turah ka ruat a, mahse tumah intina in awm lo a ni maw?” a rawn ti a. Rinky-a te pahnih chu a melh tawn zawk zawk a, a pate-a lah chuan, “Ka at vang chauh a ni. Kan inhmuh phat atangin ramchhuah chunchang kan sawi nghal a, i pa hian he silai hi a rawn la a, keiin vawikhat kah a varak pasarih ka kah thluk thu ka hrilh a, tichuan…. I hre mai lo’m ni?” a han ti zaih a.
Rinky-a chuan in chunglam chu a kawk a, Garcias-a hnenah chuan, “Heti taka ka che tawp mai hi pawi ka ti khawp mai,” a han ti a. Garcias-a chuan intih mitak a tum hram hram a. A chala thlan bawl chu a han hru a, “ka phu thut a ni, Isabella, silai ri ka han hre thut kha engin emaw mi deng ta niin ka hre tlat mai alawm maw le,” a ti a. A kutin a thin a dek a, a nui hawk hawk a. Isabella chuan mitmeng fiah fein a han en a, “Intihharh i mamawh a nih kha. Cognac (Zu) ka rawn lak ang che. Phung ang maiin kha i hmai pawh a danglam nasa alawm. Kum sawm laia upa ta sawt hmel i pu e,” a ti a. A chhuahsan ta a. Garcias-a chuan nula chu tihdin tum niawm takin a han zaizir chiam a, mahse a rilru a thlak leh hman a. Rinky-a hmaah chuan lungawilo hmel takin a ding a, “Engtinnge ni dawn?” a han ti a.
Rinky-a chuan muangchangin, “Ka hre nang. I thiltih kha i duh vang renga i tih a ang ngawt mai. Chu chuan ka lai a khei riau a ni. Ramsa sual um tluk zeta min um pek ni. Hei hi i In a ni a, helaiah hian i fanu sawmna angin ka lo kal ve bawk asin,” a ti a. Garcias-a chuan a mit a khap sawk a. Hrehawm tizual sauh hian a lang a, “Thudik tak ka hrilh dawt mai ang che—Helaiah hian mihring pangngai angin i lokal lo. Dollar singnga kal thei angin a ni i lo lan,” a ti ta a.
Rinky-a chuan, “Dollar sinngnga maw ni? Min thah chuan dollar singnga i hlawh dawn tihna ani maw?” a ti a. Garcias-a chuan, “Ni e, dollar singnga. Dollar sanghnih chu Cordoba hnenah ka pe ve bawk ang a, chu mai chu a ni. Dollar singnga hlawh tur chuan ka ti nawn leh ngat duhin ka inring asin,” a han ti a. Rinky-a chuan, “Engvangin maw? Helaiah hian nangma duhthlan renga tuma chimbuai lohva khawsa niin ka hre si che a?” a han ti a. Garcias-a chuan, “Nih chu ni e. Hetah hian ka cheng ang a, ka dam chhung chu ka cheng bawk ang. Mahse nula hi engtinnge ni dawn? A zia i hre lo a nih hi. A taksa peng tin mai hi khawvel pawn eng hmuh chakin a phu zek zek asin. I nghawng pawh kha chuvangin ka zaichhum duh ang. I thisen te kha ka chhuah sak theih che chuan Isabella tana rangkachak dar tui luang tlukah ka ngai dawn a ni,” a ti ta deuh deuh a.
Rinky-a a va melh a, a thutnaah chuana han thu kun a, a kutin a hmai a hup a, khawsik pui vei niawm takin a khur ta zawih zawih a. Kawngkhar lam chu a han kawk a, “I dawt pachhe tak tak i hrilh te kha a awih teuh lovang. A hre vek thovang. Engkim hi a hrethiam vek. Thil dik lo a awm tih chu a hre vek ang. Chuvang chuan ani kha a chhuah, cognac la turin a chhuak reng reng lo. Dawt mawihnai kan phuahchawp theih nan hun min pe a nih lek kha,” a ti a. A han nui a, a nui pawh hi tawh lovin a rum hi a ni ber a. Rinky-a chuan he a hmaa thu pa in hmana ramchhuahna vanduaina a tawh dante chu a hrechhuak uar uar a.
Rinky-a chuan, “Garcias, mihring reng reng hian kan nun hun chhung khawilai emaw ber hi chu thup kan duh theuh alawm. A chang chuan kan thluak te a buai a, a chang chuan zu te kan inchiam a, mumal lo takin kan khawsa thin. Kan thiante ngei pawhin chutiang hun chu mi hriatreng sak lo turin kan duh theuh. Keimahni pawhin hriatreng kan duh na hek lo. Chutiang hun chu kan tawn tawh theuh tih chu i hre ve reng alawm. Nang pawh hian chutiang hun i lo tawn tawhte chu theihnghilh daih la, insiam tha leh ta che. Nula hnenah pawh i lu a hai thut a ni tiin kan lo sawi ang a, kei pawh hmai mam patin ka lo daw zar zar nang e,” a han ti a.
Garcias-a chuan zaizirin pawi a tih thu leh lawmthu a han sawi pawlh a. Nula pawh chu a lo lut ve leh ta a. Rinky-a chu ngun fein a rawn melh a, a pami chu khawngaih hle hian a lang bawk a. Cognac chu a thli a, a pami chu mu zal turin a ti bawk a. Garcias-a pawh chuan rem a ti ve ta mai a. Remti lo thei dinhmunah a ding tawh tlat lo. A mutzal duh si loh chuan a thusawi chu dawt chiang tak a ni tih a tilang dawn tlat a ni. Nula chuan Garcias-a chu pindan dangah a kailut ta a. Rinky-a hnenah chuan a lokir leh thuai ang tiin a hrilh a, a sawi ang ngeiin a lokir leh ta thuai reng a.
Nula chuan, “Ka pa kha a dik lo hle mai. Ka hruai phei lai pawh khan a la khur nasa hle a, a ka te a var pap bawk,” a ti a. Rinky-a chuan, “Thil lo thlen dan kha a ti the thut em a, han buai viau pawh a awm ve bawk a ni,” a ti a. Nula chu a rawn hawi chhuak a, Rinky-a chu chiang fahranin a hmaiah ngei mai a rawn melh ta a. “Vawi sang tam engzah nge ka pate-a beng bulah hian silai puak tawh ang aw?” a ti ta a. Rinky chuan engmah sawi lovin a dar a chhin ak ringawt a.
Nula bawk chuan, “Chubakah kha ulhbun kha musepa thun a ni lehnghal a. A nih leh eng vangin nge henglai hmun savate chauh lo chu kah tur awm lohna hmunah hian miin silai musep tam tawk tak a thun ang ni? Sava lah chu kan kap ngai lo hle si?” a ti ta deuh deuh mai a. Nula chuan zaizirin ceiling lam chu a kawk a, “Silai mu denna kha ka hmu thei tho asin. Mi paruk nunna chu la thei ngei tur khawpin a kah kha a na a ni,” a ti leh ta zel a. A han ngawi hlek a, Rinky-a melh reng chung chuan, “Chuvangin thudik tak min han hrilh the, library –ah khan eng thil chiah nge lo thleng?” a ti ta a.
Rinky-a chuan, “Silai a puak a nih kha,” a lo ti sam et a. Nula chu a nui a, “Ka lo luh hmain dawt phuahchawp tur in in lo ngaihtuah chhuak hman tih chu ka hria. Nimahsela…. Nangmah chuan silai kha i keng lo tirawh?” a ti a. Rinky-a chuan, “Engtinnge i hriat,” a han ti a. “Khatiang thil tipalh tur chuan silai i tawk hnem tawh lutuk,” a ti ringawt a. Rinky-a chuan, “A va lawmawm ve. Chu chauh chu a ni ka sawiduh. Library-ah khan silai chu a puak ngei a, mahse tumahin hliam an tuar lo,” a ti leh t a.Tualzawl bulah chuan an ding a, nula chuan, “Tunah hian sawi mai la a tha ang, nakinah ka la hre leh tho thovang,” a la ti ta hram a. Rinky-a chuan, “Father Joseph rawn turin ka haw rih dawn. Ka kal thui tawh em mai. A thurawn ka’n ngaithla leh rih phawt ange,” a ti ta a.
OUTLAW’S CODE
BUNG XXIV
Lettu – PL Liandinga

Thui lote a kal a, a han lehhawi a, tualzawl luhna kawngkhar bula ding chu Rinky Dink chuan a va hmu a. Nula chuan a rawn thlir zui vawng vawng a, a lukhum a phawk a, nula chu a va vai a, ngaw karah chuan a pilbo ta a. Tunhmaa a hriat ngai loh tawp thil, tanpui ngaia inhriatnate pawh chu Rinky Dink chuan a lo nei ta rum rum a. Nula hnena a sawi ang chiah khan Father Joseph a thurawn chu a dil ta a. An chenna hmuna a va kal chhuan an chenna hmun chu mihring chenna ai mahin thlan hmun ang zawk sauh hian a hria a. Slade-a pawh chu hnahchhawl phah chungah chuan a lo mu leh tawh a.
A kalbo chhan chu Rinky-a chuan a han zawt a. Slade-a chuan sehchilh deuh chungin, “Son, ka at vang a ni. Khilai ruam khian mi aikaih tlat a ni. Ka chhova, nghakuai ka han chiah alawm. Ka kal loh chuan thi mai dawnin ka inngai tlat a ni,” a ti a. Rinky-a chuan, “Ruam hnar lamah khian maw?” a ti a. Slade-a chuan, “Aw, a hnar lam si, a pengah khian. Sangha awm duhna awm tak chu ka han hmu a, sangha pawh ka han hmu, mahse kan sachheho chuan ka nghakuai reng reng an rawn hnaih duh lo,” a ti a.
Rinky-a chuan lehlam a hawisan a. Chutiang nghakuai chiah mai maiin mihring a zet at theih dan te chu a ngaihtuah neuh neuh a. Kawngkhar atang chuan a lo hawikir leh deuh a, “Slade, helaiah hian kan hmelmate chuan kan tan thil an ti harsa zo vek dawn a ni,” a han ti ringawt a. Garcias-a Ina a kal thute chu a hrilh a, mahse nula telna lam thil reng reng chu a pehhel deuh vek a. A sawi zawh chuan Slade-a chuan, “Ka hrethiam e, kan chet nghal mai a tul a ni. Chutiang taka an rawn kal hnaih tawh chuan heta tang hian kar lovah an um chhuak mai ang che. Ka pem chhete hi chu eng tham mah a ni lo. Mi thar ang maiin ka chak tawh a ni,” a lo ti a.
Rinky-a chuan, “Slade, i na kha min thah tumtu kut lawnga man i tum vanga lo awm a ni a. Tunah hian khat chung khan kaltir chein lo pun ta sela, engtinnge ni ang? Pathian hmingin chutiang chu ka ti lul lovang. Hetah hian kan awm anga, ni hnih chhung chu ka la hnawt kiang thei ang,” a ti a. Slade-a chu a kalsan a, in hnunglamah chuan Father Joseph-a chuan lei a lo let a, a va pan hnai a.
Rinky-a chuan, “I thurawn ka mamawh a ni,” a va ti a. Father chuan, “Putar tan chuan thurawn tluka mi hnena thil pek tur remchang a vang hle. Helaia hi thutna min zarhlim turin thing a awm a, helaia hi lungpui pahnih thutthleng tur a awm a, chhuat phah atan phaitual hnim a awm bawk a, van dumpawlin kan chungah min zar bawk a. Eng thil atthlak nge i tih min han hrilh tawh teh le,” a ti ta a.
Rinky-a chuan, “Thil atthlak ka ti tih ka sawi hlei nem. I thurawn ka duh ka ti mai alawm,” a ti ta a. A thutpuipa chuan, “Miin thil eng emaw tak, pawi a tih em em a tih si loh chuan thurawn hi engahmah a ti lo,” a lo ti a. Rinky-a chuan, “Mexico-ah hian mi pakhat hmu turin ka lokal a. Chupa hmu tur chuan min hruaitu ka mamawh a. Min hruaitu chu keimah avangin na taka hliamin a awm a. Min hruaitu that chhuah chhung chuan a bula ka awm ve a tul a, chutih lai vek chuan hmelmate’n ka luvun hih an tum a ni,” a ti a. Father chuan, “I thianpa chu hetah hian hnutchhiah la, a tel lovin kal mai rawh,” a ti a.
Rinky-a chuan, “Min hruaitu atan ka mamawh alawm,” a ti a. Father chuan, “Midang zawng mai rawh,” a ti leh ta a. Rinky-a chuan, “Midang chu ka zawng hmu thei ngei ang. Mahse tun ami ang em hi chuan ka ring ngam dawn lo a ni. Senor Slade hian mi huaisen tih dan diktakin a nunna ngaihsak miah lovin ka nunna min chhanhimsak a tum tawh tlat,” a ti a. Father chuan, “Senor Slade-a hi pa huaisen tak chu a ni. Mahse midang i la hmu thei thovang. Midang zawn chu a tha zawk ang. Hetah Senor Slade-a hi awmin i awhna thang angin a awm thei lovang,” a ti ta tlat a. Rinky-a chuan, “Chuti maiin ka kalsan thut thei lovang,” a ti ve leh a. Father chuan, “I thei ang ka ring. Helaia awmtirtu che hi thildang a awm a ni,” a ti ta a.
Rinky chuan, “Eng maw?” a han ti a. Father chuan Rinky-a pawh hrilh ni chuang miah lovin, “Engin nge tleirawl tehi hruaikawi thin? Pakhatna – pawisa, pahnihna – thil hriat ngai loh hriat chakna, pathumna – nula hmeltha te. Helaiah hi chuan pawisa a awm lo. Thil hriat loh hriat chak tur chuan thil mak tak tak i tawng hnem tawh lutuk. Chuvangin nula a ni tihna a ni mai. Maria kha i lo ngaina lutuk hman palh em ni? Teuh lo, i duhzawng mi a ni lo. Chuti a nih chuan Isabella Garcias a ni mai,” a ti ta a. Rinky-a chuan, “Ramhuai i pai deuh roh a nih hi. Chutiang chu rin pawh rin ngaihna i hre lovang tirawh Father?” a ti a.
Father chuan, “A awl em alawm. Kawr ruama i chho lai kha ka hmu che a. I kalna khan Casa Garcias a chhun riah tih ka hre tlat bawk a. Chutah lu kun chungin i lo haw a, chuti a nih chuan Isabella Garcias a ni lo thei dawn em ni?” a ti a. Rinky-a chuan, “Isabella nen chuan a pa Inah kan kal asin. Garcias hi engtinnge i ngaih?” a ti a. Father chuan, “Ka ngaihtuah ngai mang lo. Pathian thilsiamte zinga pakhat a ni ve maiin ka ngai a, mahse ka ngaihtuah ngai lo tlangpui hle,” a ti leh a. Rinky-a chu a nui a, “Garcias chuan ka awhna turin thang a lo kam lawk diam a, Cordoba – Maria thianpa khan a tanpui nghe nghe a. Min dangbet a, a buaithlak kher asin. Mahse vanneihna thil thuah ka tlan chhuak thei hram a ni. Ka insingsak velnaah silai a puak palh a. Tumah chu kan hliam lo. Cordoba chu a tlanbo a, Nula chu engnge tih hre turin a lo lut a–”, a ti a. Father chuan, “Accident a awm i ti elo?” a han ti a.
Rinky-a chuan, “Ramhuai i pai a nih chiah hi,” a han ti ringawt a. Father chuan a lu a thing a, “Hman lai chuan tleirawl ka ni ve tawh a, hmangaihna khurah hian ka tla lut ve tawh bawk,” a han ti a. Rinky-a chu a thaw hap a, “Engnge ka tih tak ang min han hrilh the,” a ti a. Father chuan, “Thurawn tha tak hi chuan zawm a hlawh lo hle. Thurawn tha leh himthlak ber chu helai ruam chhuahsan a, Slade-a pawh hi ka kianga kalsantir che hi a ni a. Slade-a chu i kawp duh tlat chuan a dam hnuah hmun dang inhmuhna tur tiampui a ni mai. Mahse chutiang thurawn tha leh i vun venghim tur chu nang, buaina tawn chaka tha tiza mi chuan buaina a tawh loh chuan a thlarau lam tuihalna a tuar zo lovang a, a thi thei mai ang. Chuvangin hei hi ka thurawn che chu a ni : Hetah hian awm la, hlauhawm lo thleng tur chu hmachhawn la, duat takin lo kuangkuah rawh. Isabella pawh hi hmangaih rum rut mai rawh. Bia la, i mangah te mangphan chuai chuai la, chumi hnuah zawng khuanu rel ang takin i nih nih tur chu i ni mai ang. Chu chu ka thurawn che chu a ni,” a ti ta a.
Rinky-a chu a meng zau kawk a, “Senor, ka rilru dik tak sawi chhuak ni hialin i lang. Kei pawhin ka rilru sawi dawn ila kha baka dikin sawi ngaihna ka hre chuang lovang,” a han ti a. Chu beram vulhtu putar pui chuan a kut, buang ther thur, thap hruih mai chu a han vai a, “Upatna hian engemaw chenah khawvel finna min pe asin. Eng ang mi chiah nge i zawn min han hrilh teh le,” a ti a. Rinky-a chuan, “Ka mi zawn chu a thi tawh pawh a ni mai thei. A hming chu John Ray a ni a. Engemaw lai chuan a hausa em em a, San Vincente-ah a cheng tawh thin,” a han ti a.
Father chuan, “John Ray maw? Kei pawhin ka hre tawh asin, San Vincente atanga helai thleng a rawn thang tur chuan titi hlawh tak nih a ngai asin. Mahse chung hun lai chu hmanlai kha a ni tawh a. Kum sawmpanga chhung zet chu miin John Ray-a chanchin an sawi hi ka hre ta lo,” a ti a. Rinky-a chuan, “A thi tawh a ni ang, ka ring,” a ti ve a. Father chuan, “A ni mai thei, chutiang kawngah chuan kei chuan mihring hi vawikhat chauh kan thiin ka ring lo, vawi tam tak kan thih ka ring tlat. Vawiina mihring kan hmuhte hi tunhma kum sawm kaltaa an nih ang kha tunge ni reng thei awm i? Mahse he John Ray hi chu a thi chiang bal tawh ang. A dam lai chuan a chanchin hian sawi a hlawh ngawt asin. Henglai tlangram hmun chengkerah te pawh hian an sawi fo mai,” a ti a.
Rinky-a chuan, “A thi tawh pawh a ni mai thei. Mahse thi tawh ni se eng vangin nge ka luman atan dollar singnga lai mai an la phal cheu?” a ti a. Father chuan, “Singnga maw? Dillar singnga maw? A va tam em em ve. Eng vangin nge chuti taka tam an phal nachhan?” a lo ti a. Rinky-a chuan, “He John Ray-a hi ka hmuh hlauh chuan John Ray-a chuan pawisa tam tak a nei mai dawn si,” a ti a. Father chuan, “Hriatthiam han tum sa teh ma ila a harsa teh zawng a nih hi. John Ray chu i hmuh chuan John Ray-a chuan pawisa tam tak a hui dawn tihna a ni a, chumi avang ringawt chuan midangin John Ray chu i hmuh theih loh nan dan che an tum a ni maw? A va mak em, ka thian. Chuti John Ray-a pawisa hmuh tur chu a tam hle tihna a ni maw?” a han ti a.
Rinky-a chuan, “Dollar maktaduai ruk. Chu zawng chu a ni. Dollar maktaduai ruk. Duh chuan peso-ah a la chantir theih lehnghal. Mr. John Ray-a tan dollar maktaduai ruk, ka hmuh theih phawt chuan,” a ti a. Father chu a faifuk raih a, “Chutiang vel chu a ni anga, John Ray-an a khawhral tak kha. Aw nie, chu aiin a tam daih ang. John Ray kha a va khawngaihthlak em. Hetiang te hi hria sela chuan a thlan chhungah pawh a tal tawp tawp duh hial ang. A thlan atang chuan lo tal chhuak vaih se chuan a thlarau ringawt pawhin chutiang pawisa tam nei tur chuan a rawn umzui duh ngei ang che,” a ti a. A han ngawi hlek a, “Ka fapa, nang pawh hi John Ray a hmu chhuak tur chuan pawisa tam tawk takin an ruai che a ni ngei ang maw?” a han ti a.
Rinky-a chuan, “I hre mai lo’m ni? Nichinah pawh i sawi tawh kha. Tihtur neiin ka inhria a. Ka thian pakhatin min lo sawm bawk si a…” a han ti a. A nui sak a, hla taka marshal hah hmel tak mai chu a mitthlain a han hmu a. Marshal chu ‘thian’ tia chhal ngam chi niin a hre ve reng reng a. Chutah, “Ka hmanral tur min tumsak a, chubakazhzhh tlem chu hlawh ka nei ang, engzat chiah nge ka hlawh dawn chu ka hre lo,” a han ti a, Father chuan, “A nawmna i hlawh bawk dawn lo’m ni?” a lo ti a. Rinky-a chuan, “A ni tak, a nawmna ka hlawh dawn a ni,” a ti ve a. Father chuan, “Tunah zawng hei thian hliam i awmpui a, hmelmain an hualvel che a, nula hmeltha tawk tak, at phah rum rum tham a lo awm bawk a, eng thurawn nge ka pek theih ang che ka fapa? Hei chauh hi ka pe thei ang che. I nunna hlu lo deuh mai hi englai pawhin hlimpui hle mai teh. Tunah zawng a dam chu i la dam hi. Nang chauh lo chu he khawvel a mite zawng zawng hi mitthi vek an ni,” a ti ta a.

Sunday Present a tan w.