CRUSH BY Zonuni Leo (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: CRUSH BY Zonuni Leo (Completed)

Unread post by Ngaia » May 14th, 2018, 6:33 pm

CRUSH-7

Nupui/Pasal sun natzia ka hre ve ta a. Kei anga kawppui sun ho hi ka lainat em em thin. Kei chu hna ka nei a, Ka pasalin ka hrehawm lohna tur sum tam tak min hnutchhiah bawk. Kapa te pe letlo phei ila hmeithai hausa ber pawl ka ni hial awm e.

Fa kan neilo a, Pa neihloh vanga lainatawm tur an awmlo. Nu leh Pa min ngaihtuah em emtu leh unaute ka nei a, Thenkhat chu inhlawhfa, an fa la te tak tak pawh an thi ve tho si. Vanduai min ti te pawh an awm ngei ang, mahse vanduaina karah pawh lawmna chhar tur alo awm zel alo ni...

Te-i dawrah kan awm a, a thawmhnaw lo thleng ho chu en pahin ka dahfel pui mawlh mawlh a.

"Zothana hi engtinnge i tih dawn?"

Te-i ka en ha a, "Engtinnge ka tih ang? Zothana ka ti mai" ka nui hawk hawk a.

"Ka fiamthu lo, Mam, Ani anga hmangaihtu che hi i hmu tawhlo ang"

"I tho A chu ani lo maw? Nge kan inentir dawn?" Ka thiannu hi a chianglo anih ka ring..

"I chhul lam kha a fel vek tiraw??" Hmanni khan a inentir tak e...

"Mimawlnu.. Engmah hi i hrethiamlo tak tak emawni le?"

"Hriatthiam tur engnge awm? Hriatthiam awlsam hian sawi ve mai la.." ka lo ti hlar a.

"Thinchhe ropui si..i englai hi nge maw a duh em em ka hrethiamlo"

"Tuin maw??"

"Ele...Zothana lo tuin nge nang ang mimawl hi duh tlat ang che?"

Ka ngawi hmak.... Ka thiannu hi a chiang tawhlo tak tak ani.

"Te, kan zu zin harh dawn emni?? Inentir pahin"

"I kal duh ami? Kanu nen zu kal ula, hruai ka duh a, ka hman silo, i kalpui chuan min pui hle ani mai" a la ti tak deuh deuh a, henu hian a man thlawtlo.

"Nangmah i tel a ngai"

"Ka hmanlo, ka buai lutuk. Dawr hawn belh ka tum leh nghal"

"Sum ringawt ngaihtuah suh aw.. I hriselna hi a pawimawh ania" thlem pah titih in ka nuih var var a.

"Ka tha vek, Kanu chu zu hruai mai rawh"

"I tha hleinem.. I chhul kha check nawn tir ang"

"Eng chuan nge ka thalo tih rintir che, ka tha mah mah anih hi"

"I thusawi atang khan i chianglo tih a lang reng alawm... Zothana chungchang.."

Ka sawi zo hmanlo. Za lutukin a rawn nui a. A chianglo ngei anih hi tih melhin ka lo melh thung. Ani lah chu a za tawlh tawlh emaw tih mai tur...

"Engnge nita tlawrh tlawrh??" Zothana alo lut a. Min en reng leh pek..

"Awi....ka pum ana, lo thu rawh..." Tei chuan a pum a dawm vang vang a. A bulah Zothana a thu a. Kei ka la ding reng..

"Ka thiannu hian ka A deuhah ngaiin inentir turin min lo nawr mek a..." a sawi thui hlau zetin ka lo inrawlh vat a.

"Khawnge i kal a??" ka lo ti sap a.

"Dawr ka tlawh a, Ka rawn kual lawk anih hi.. " Zothana chu jeans leh Tshirt a ha a. Sneakers bunin hmuh a nuam hle.

"Awi... Inlo awm vek a. Ava Lawmawm ve, hawh u.. Kan Tlangval hian min treat thei" Ruati a lo lang hlawl a. A rawn ri nghal bawrh bawrh bawk..

"Ni e, a dik chiah.. Hawh u.." tih leh Min kaih an rual a. Tlangval lian thelh thawlh chuan min en vung vung a, min rawn zui ve mai bawk aa...

Kan pali chuan kan thu thap a. Order an lak zawh chuan Ruati bawk chuan.."Awhaw... Theihnghilh ka nei, pawimawh lutuk..Te, min va kalpui lawk rawh.Kan lo let leh vat ang" ka thiante pahnih hmanhmawh zeta inkai chhuaklai chu hrilhhai zetin ka thlir liam a.

"Zui ve mai duh hmel i pu" Zothana chu a nui hak a. Ka va en chuan kan mit a in tawng sawk leh nghal, rangzetin ka hawisawn a.

Ka ngawi reng a. Ka zam ta riau anih chu.. Ka lungngaih leh hrehawm lai zawng zawng khan ka kiangah a awm fo thin a. Mahse, tun hnu hian ka danglam ta nge?? Zothana hi a danglam zawk?? A laka ka awmdan hi a dang ta riau, ka thunun thei silo.

Eitur an rawn chhawp a, ngawirengin ka ei a. Zothana chuan min en reng tih ka hria. Naupang chhia ka ni tawhlo a. Pasal nei hial tawh ka ni bawk, hetiang mai mai a zam tur hi ka ni tawhlo hrim hrim. Mahse, ka zam tlat si.. Ruati leh Tei an lolang thei bawk silo.

"Rinpui, Damdawiinah min kalpui lawk thei angem??" Zothana hian ka puih vawikhat min dilna. Kei chuan a puihna ka dawng zing tawh hle, ka chhiar senglo..

"Tunge awm a??"

"I hmuh duhtak tur mawle.." a nuih chuan Kanpa kha ka hrechhuak zawk mai. A hmain ka lo ngaihtuah ngai reng renglo. Ka hmu inang ta riau anih chu...

"Awle, mahse, car ka keng ve tho va"

Kan bill a pe a, ka lo nghak a.. A pek zawh chuan kan kal zui nghal.

"Ka rualin kal mai la, hetah ka dah phei leh mai ang che" a then sak a. A kut sei thlurh chuan a khabe a tuai vut vut a. Hmuh a nuam hle..

"Awle, Te-i te kan hrilh ange aw"

A motor dahna kan thleng der a. Thu lutin Te-i ka be nghal.....

"Khawnge in awm?"

"Dawrah...nangni zawk?"

"Zothana nen Damdawiin ah kan kal dawn a.. Ka lo phei leh ang"

Awmze nei hian Te-i chu a rawn nui hawr hawr niin ka hria. Ka dah daih a.

"Oh.. Durtlangah maw?" ka ti sap a.

Kanpa boral hnu hian vawikhatmah ka la kal leh talo. A chetsualna zawn kan thlen chuan ka awmdan a dik chiahlo.

"Hahdam rawh.." Zothana tawngri damthlup mai chuan thlamuanna min pe niin ka hria. Motor din theihna zau deuh kan thlen chuan a ding a. Ka kut a rawn vuan a...

"Rinpui, liamtir tawh rawh... Hmalam i pan a hun tawh viau ani" a aw-ah chuan na tak tuar ang mai ani...

"Ka pan mek chu anih hi.." zawitein ka phun sap a. A hre pha tho tih ka hria..

"Ka nawr lui ngailo ang che" a ti sup a. A tlanchhuak leh nghal a. A thusawi awmzia chu ka hrethiamlo. Engvang chuan nge ka nawr lui ngailo ang che a tih??

Damdawiin kan thlen chuan kan kal chhan te chu pitar leh putar, fa neilo anni a, enkawltu neilo anlo ni bawk.

Zothana an hmuh chuan hlim takin anlo be bawrh bawrh a. An vawikhat inhmuhna anilo tih hriat takin an innel khawp mai.

"Rinpuii maw i nih? Kan hmuh chakna che a rei tawh asin" Pitarte-in a tih chuan angaih na hrelo zetin ka nuih var var a. Zothana ka en lah chuan Putar nen anlo inkawm a, hre awm pawhin a awmlo.

Pitar leh Putar te chu rethei hle mahse an hlimin an bula awm a nuam a, Lei hausakna hian a tibuailo dun hle tih an titi atang chuan ka hrethei..

"Bawihi, Kan Rin Pathian hi a hausa em a, kan buai angailo, a hun takah min ngaihtuahtu tur Amite a rawn tir zel mai ani. Tihian Keini chu kan kal mai dawn a, A hnena kan awm hun chuan Amah fak bak tihtur kan nei dawnlo" Putarin a tih chuan ka mittui tla chu ka dang theilo..

Mite hian Pathian hi anlo va ring thiam em.. Kei hian ka tluklo takzet ani. Zothana chu a tawngtai a, an mamawh a kensak te chu pe in anmahni enkawltu Doctor a hmu leh a.

Pitarte chu a nui var var a, " Bawihi, i vannei takzet ani.. Khatiang Vantirhkoh tlangval kha an vang teh ania" a tih chuan za em em in ka lo nui hawk hawk a.

An bula awm anuamin a hahdamthlak hle mai. Kan haw kawngah Zothana chuan nuam ka tih leh tih loh min zawt a.

"A nuam ka ti khawp mai, min hruai chu ka lawm takzet ani" ka nun min ti harh sawng sawngtu te anni reng ani.

"Min kalpui peih chuan ka rawn sawm ziah ang che" a ha var rual thah langa a nuih hi chuan a hmeltha takzet...

Chuta tang chuan Zothana chuan Damdawi-in kaltur in min rawn sawm fova. Zui loh ka hlau thin hle. Keipawh chuan Kanu hnen atangin laphiar ka zir tlauh tlauh a. Midangte pektur kawrlum ka phiarte chuan min tihlim takzet ani.

Zothana hian Dawr hmun thum laiah neiin a buai thin hle. Chutihrualin Damdawiin hrang hrang hi a kalkual ngei ngei a, tanpui ngai leh mi harsate hi a zawng khawm thin ni ber in ka hria. Mi tamtak tan chuan 'Vantirhkoh' tih loh theih pawh alo nilo e..

Anu leh Pate erawh chu Apa pension hnuah Shillongah an awm a, An chhungte tam zawk erawh Aizawlah awmin Anu leh pate chuan an rawn tlawh zeuh zeuh thin. Rev. Johna nupui, Zohmingi chiah kha a pianpui unau alo ni bawk.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 6:33 pm

CRUSH-8

Zothana nen kan inzui tam ta viau mai. Keimah chauha ka awmlaite hian ka lo ngaihtuah leh vung vung thin. Engtikah emaw chuan nupui ala nei ngei anga, a nupui chu hmeichhe vannei tak ala ni bawk ang.

Ka thiante hian engemaw changa min dem tum fo mahse kei ang pasal sun tawh leh fanei theilo lehnghal chu engatan mah a tihloh tur thu ka hrilh thin. Veng hrang hrang atanga thusawi tura sawmna a dawn vangin Maman a zui thin a. Keini ho pawh zui turin min sawm thin na-in kan la zuilo thung.

A makpa John nen hian an inkawmngeihin unau an ang ka ti thin. Kan Inah pawh John chu lokal zauh zauhin a bula awm a hahdam a, Zothana nen in anna tamtak annei a ni.

Zothanan a inah chawhlui a buatsaih dawn vangin kal turin kan insiam a. Rotei phei chu a inpeihna a rei tawh hle. Rotei hi kan hnenah a awmrei tawh bawk nen, tuman mihrang angin kan enlo. Hlawh tha tak kan pe a, a fel reuh bawk a. Unau angin kan en vek ani.

"Mami, i hman tawh em?" Chu zawhna chu Ka u hian vawi tam tak min zawt tawh.

"Hman tep...Mam, Te-i lo phone la, anlo thleng dawn tawh em?" uluk zetin ka sam ka khuih a. A lo sei ve tawh hle.

Kawrfual khup khuh ka ha a, a nghawng a zau lo va. A ban kiu thleng ani bawk. Pumps ka lei thar chu ka bun a. Ka sam ka herh kawih sa vek tawh chu ka thlah tawp a. Clutch keng in Ka hman der.

Ka hmaiah makeup ka hmang manglo. Makeup hman vak hi ka ngaina lova, ka hmang khat hle. Living roomah Mama phone hmang mawlh mawlh chungin alo tei sek a. Hepa hi chu a thu hle hle thei thlawtlo. Kanu a chhun a, a taima em em bawk.

Rotei pawh varandaah alo awm a. An inpeih na a rei dun tawh bawk a. A nin tawh hmel hle. "U, i nalh reuh lutuk" a tih chuan ka nuih var var a...

Reuh !! Ni e, 5"2 chauha sang ka ni ka tih tawh kha.. Ka lianlo nangin kanpa khan ka nalh thu min hrilh fo thin. Ka mitmeng lian kel kawl leh mithmul sei er zet chu a zahawm min tihsak in, mihip thei tak tiin min sawi thin a, ka ni tak tak nge phei chu ka hrelo....

Te-i ten kalsan mai tura min hrilh vangin kan kalsan a, Zothana In a hnai bawk a, Ke-in kan pan, kan thlen chuan mi anlo tam tawh hle. Anu leh pate chu Maman alo hmelhriat tawh a, inhmelhriatna te neiin apa chu Zothanan a chhun hle. Anu erawh nu fel leh zaidam tak anih hmel.

Zothana In hi a kawtzawl a zauin chhah taka cementa zut vek ani a. Chutah chuan thutthleng an rem put a. Kan hmazawnah chuan musical instrument a inrem teuh bawk...

Amah Zothana erawh ka hmulo. Ei leh In a duh tan an sem reng a. Boruak a nuam tak zet ani. Dar 1:30 ah Zothana pa lo ding chhuakin thu a sawi a. A fapa nen a an inan dan chu mak ka ti.
"Vawin chu Pathian Faknan hun kan hmang ang, kan theihtawpin fak mah ila, kan fak zo seng dawnlo, kan zai anga, a duh kan lam ang" tiin a fate music lama an tuizia leh an tleirawl lai tlem a sawi chhunzawm a. Kan nui dar dar mai.

A sawi zawhah inchhung atangin Zothana a rawn lang hlawl a, John-an Drums, Annu Zohmingin keyboard, mi pakhat ka hriat loh in guitar perh ve leh in Zothana chu mike hmaah guitar nen a thu a.

"Tunhun min hruai thlengtu Pathian fakin awm rawh se...

"Kan nunah harsatna, lawmna a thleng fova
Lungngaihna, lawmna kan chungah engpawh thleng se,
Lalpa, Nang chauh Ka fak ang che ti thei turin kan tana Nun hlantu, Pathian tan kan nung ve dawn lawmni??
Tiin
Ka hla duh em em, C.Lalzarmawia hla, 'Nang fak zel che' hla ropui tak kha a rawn sa a, ka hriat fo hnu nimahse a hla tlar tin mai chuan min deng dawt dawt ni maiin ka hria...

"Harsatna tam tak i tawk a,
Sual vanga hliam i tawrh a tam hle, mahse....
I Phurrit zawng zawng kalsan a,
A hnena chawl turin Lalpan a sawm che a, A nghak reng che ani...."

A sawi zawh lamah Music an rawn play a. Zothana zai chu a thiam kher mai, a ti tak tak tih a hriatin a aw a mawi bawk nen... Kei hian A zaithiam tih reng reng ka lo hrelo lehnghal.

"Aw...mittui nen..Hringnun vuiliamin...
Thihna hlim kawr ruam zawh mah la..
Fak hla sa a i zai hunah,
Angel hlim hmel tawn ka nuam.."

Helai chang a sak lai phei chuan mittui nen ka va en chuan min lo en ve reng a.. Chutiang em em a sa nung leh min khawih chu ka la tawng ngailo.

Hla hrang hrang an sa a, achangin kan vaiin kan zai a. Praise and worship hlawk thlak leh nuam tak ani. A kaihruaitupa in a hnehsawh in a ti thang tih a hriat a. A zawng zawngin Pathian a fak bawk..

Dar 4:00 ah bang in chawei an siam lai chuan inchhung lamah kan lut vek a. A in a zau in a thawveng bawk a. Mi kan tam viau khan ka hria a, mahse a hmun hmain a zawh hrim vang nge... Kan tam vak ang pawn a lang leh chuanglo.

Te-i leh Ruati nen kan ding a. Kan piah deuhah Mama a awm bawk. Kanu leh Pate kha anlo kal ve a, ka zawng ru deuh a. Ka hmu ta miahlo.

"Zawn nei i va ang ve?" ka bulah Zothana alo ding a. Kan inlenhleih viau. Pheikhawk sang nen pawh A dar ka pel tawk tawk ani. Blazer leh formal pants a ha a, leather shoes a bun a, a inhmehin hmuh a nuam hle..

"Kanu te kha ka hmuin ka hre sia, ka hmu ta lo va" ka lo ti niah niah a.

"Kapa te nen an thu ho alawm, i ril atam tawh em?" min ngaihtuah aw ni a ka hriat thin a ang...

"Tam love, A nuam ka ti lutuk, tihfo chi ani" ka nui var var a.

"Zothan, i la zai thin tih ka lo hre reng reng hleinem.. vawin chu Pathian ka hnenah a awm reng ni maiin ka hria" Te-in a tih chuan Ruati chuan "Kei pawh" alo ti ve a.

"Hawh u, Hall-ah i thu ang u" Zothana kan zui phei dam dam a. Mama chu nula pakhat bulah khunkhan zetin alo ding a. Kan ko velo, Tei leh Ruati lah chuan an chhaih chak a, an thla an laksak thul, ka lo khap thung.

Kan kalna hmunah chuan thutthleng nalh tak tak alo awm teuh va. Kan thu a, kan lam pana lokal chu Model Rinkimi ani, ka hmuh lohna a reita hle mai. Kanpa ka hrechhuak lo theilo.

Zothana chu ka bulah a thu a, min dip runin ka hria. A mak ani.. Engngemaw chen atang khan Zothana, ka hnaiha a awm hi ka hrethei riau ..

"In dam maw?? Kan inhmuh lohna a rei ta hle mai" Rinkimi chu a nuisang a. Amah ah chuan danglam a awm

"Dam e, i awm lo nge i vang hle mai" a hmeltha tak chu ka en vang vang a.

"Nia, ka awmloh rei deuh vang aniang. Hlim deuhin hmang ru aw.." tih pahin a kalsawn leh nghal a.

"A piangthar ve tawh a" Zothana chu ka en ha a...

"A lawmawm hle mai" sawi tur dang ka hrelo. Ka haw miah lo. Rinkimi hi awmlo se, kan nupa khan Pathian kan hmu kherlo ang. Kan nupa in Pathian kan hmuhnan Rinkimi hmanrua-ah a hmang a, Amah vangin kan nupa thlarau chhandamin a awm a.

A hmanrua Rinkimi chuan mi dem leh hmingchhiat a hlawhchhuak a. Ka lainat zawk hial anih chu mawle. Ka hriatfiah hma kha chuan ka haw em em ve tho.

Ei an peih tawh thu an rawn sawi chuan Pawn lamah kan inzui chhuak a. Dawhkan leh chair a tam a, hahdam takin kan ei a. Ka ei nual mai..

Zothana chuan min ngaihtuahin abula awm a hahdamthlak a. A mit leh ka mit erawh a intawng fuh zing khawp mai.

Kan haw dawn chuan min thlah a, khua thim tawh mahse thla a eng a, a ziaawm khawp mai. Zothana chu ka bulah kalin Te-i leh Ruati an tawng bawrh bawrh a, Rotein min hawsan tawhin, Mama a nula zuite nen kan hawsan a. Ruati leh Te-in an sawizui kawngtluan ani ber mai..

Motor a rawn tlan a, kawnglai taka ka kal vang nge Zothanan min rawn kai a. Motor tlanliam hnua ka kut laksawn ka tum chuan ala phallo zui. Ka tum zui ta biklo a, a nuam erawh ka ti veng veng....

Te-in Kan kawtah motor alo dah a, an haw zui nghal a, Zothana chu ala haw velo. Rotei alo awm tawhlo a, a room lamah a awm tawh a nih hmel...

"Reilo te ka bulah hian lo thu teh" Zothanan a tih chuan ka en ha a, "Lawkin..." a tihnawn chuan ka va thu ve mai a. Mahse, ka khur dar dar thung.

"Rinpui...." ka khabeah dawmin Amah en turin min kuaidak a...

A rawn kun hniam a, ka lo chhing ringawt..
"Meng teh...khawngaihin.." ka men chuan kan hmui a inhnaih tawh hle..

Kawngkhar a rawn ri a, ka tho nghal zawt.. Zothana nui hak chu ka ngei kher mai...

"In hawna a rei tawh em?? Ma-i kha ka va thlah lawk a" Mama alo lut a, a hmel a hlim hle.

Rangzetin inchungah chhuanlam siamin ka chhohsan a, ka chhuk tawhlo.

Mama kha lo haw lo se engthilnge thleng ang? Zothana hian ka lakah eng rilru nge a put ve ang? Muthilh har ka ti hle mai....

*******************************

"Mambawih, Thlasik a hnai tawh a, i kawr lum phiar zozai hi engtia tih nge maw i tum le?" Kanu bulah ka phei a. Kawrlum nalh danglam deuh a phiardan min zirtir chu ka zawh hnaih tawh vangin a zawhdan tur zawtin ka va kal leh ani.

"Nu, i la hre mai ang.. Kumin chu Kapa in Home a bungraw semna ah kalpui turin min duh a..."

"A tha alawm, chumi huna semah chuan emni i tih a??" Kanu pawh a upa ve zel a. A mit pawh a tha tawhlo.....

"Nilo e, Home velah chuan thilpek an dawng nasa a, Home a awm silo, thilpek dawng ve em emlo hi mi tam tak an awm alawm" ka tih lai chuan Kapa gateah alo lut ve mek a.

"Pa, in committee chu in va bang hma ve" a thutna tur ka lo dahsak a.

"Ni e, kan lungrual hma khawp mai. Thalai ho-in Zothana hi thusawi leh zaia rawngbawlna nei turin sawm an duh a. Kan remti tlang khawp mai"

Kan pathum-in varandaah kan thu a. Tetein thingpui a rawn siam bawk....

"I u Mama pawh hi a rim ngawrh ve viau ani maw?" Kapa chu a nuisak a, a lawm hle tih ka hria

"Aw...Anti ve tak tak aniang, mahse Pa, Doctor mo neih chu ka huphurh deuh asin"

"Mambawih, i ho mai mai lutuk.. A Doctor lo lai zawng kan nei mai dawn alawm, i u hi a naupang tawhlo a, tupawh rim se...kei ka lo lawm viau asin"

Kapa chuan engang mi pawh rim se a lawm takzet dawn tih ka hria. A pasal nei berin fa ka hring silo a, Tu neih a nghakhlel ve tawh takzet ani.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 6:33 pm

Crush-9

Thlasik ani tawh a, boruak pawh a vawt tan ta viau mai. Chhunah Pangpar kan sawisa a, ka veina a rei tawh bawk a, ka thawveng huai mai.

Tlai khaw thim hma deuh chuan Zothana In bul, ka rilru hah changa ka kal fona chu ka kal khat ta em a, ka va kal a, tumah an awmlo bawk a, a reh raih mai.

Ka mit ka chhing vang vang a, boruak vawt tawh viau mahse nuam ka ti viau. Zothana In atangin keyboard tum a zai a rawn ri chhuak a, uluk taka ka ngaihthlak chuan Zothana aw ani tih ka hria..

A hlasak chu ka hre ngailo, mahse, a nalhin a satu chuan tihtakzetin a sa tih a hriat a. A thu a tha bawk nen, ka ngaithla reng a...
Hla dang a sa a, ka lo ngaithla zel bawk..

Ka lo muhil ni ngei tur ani. Ka men chuan khua alo thim vek tawh."Muthilh i awlsam hmel hle mai" hnunglam atanga Zothanan a rawn tih chuan ka en nghal a, a thim tawh bawk nen, ka hmu thei lo...

"I zai kha ka lo ngaithla a..." ka tih chuan a nuisak a.

"I awmna a rei tawh em?" ka bulah a rawn thu a. Thudun mah ila, Kan inhmu theilo. Zothana ln kawt atanga eng chuan kan awmna piah deuh chauh chu a en phak a..

"Rei tawh tho mai, ka va phei tawh ange" thawh ka tum a, Zothanan ka banah alo vuan a.

"La thu lawk ang, ka thlah dawn che nia, inkhawm loh zan ani bawk a"

Ka thu ve leh mai a...

"Rinpui, tleirawlte i nih atang khan ka nghak tawh che a..." Zothana aw chu a ringlo. Mahse, a fiah viau thung..

"Engtinmaw?? Ani tak tak maw...??" Mak ka ti ....

"Ni e, I la naupang a, khang hunlai khan vawi tamtak hrilh che ka tum thin. mahse, ka hreh em a, ka puitlin theilo ani" a nui hak a.

"Engvangin??" ka lo ti vat a.

"Min hnawl dawn ni a ka hriat vangin i lakah inrintawkna ka neilo" a tih chuan alam ka hawi a. A hmel hmuhtheih ka chak hle.

"Reitak ka awm bova. I chanchin hi ka ngaihven fo thin, hlawhtling taka lo let a, neih che kha ka tum ber ani"

"Vawikhat pawh sawi lovin maw?" ka tan chuan a mak em ani..

"Ni e, i chanchin ka ngaihven reng a, pasal i nei dawn tih ka hriat khan ka mangang takzet a... Pathian ka au nasa khawp mai"

Mak ka ti bawk si, sawitur ka hre hlawllo.

"Pathian min chhanna i hre duh em?" a tih chuan ka lo bu nghauh a. Min hmu theilo tak e...

"Amah ring turin min ti a, Ka ring bawk. Mahse, pasal i nei tho si, na ka ti takzet a.."

Ka ngawireng a..

"Thil tamtak ka zirchhuak a. Harsatna leh hrehawmna atanglo chuan Pathian hmel hi a fiah theilo. Hrehawm ka tawrh nasat poh leh Pathian hmel ka hmufiah tulh tulh thung"

Zothana kan star laite ka ngaihtuah chhuak a, khang hunlai a min lo duh ve reng chu awih har ka la ti fo mai...

"Pasal i neih khan ka buai khawp a," a ngaihtuah let ani ngei ang, a ngawi vang vang a.
"Mahse, ka buaina atangin min la chhuak a, engkima lungawi dan min zirtir a, lungawi thiam tur chuan lungwi lohna atanga zir ka mamawh alo ni."

A ngaihnawm ka ti... Ka lo 'mn' ringawt a.

Min rawn kuah a, ka lo danglo..a darah ka lu ka nghat a

"Ka rin Pathian chuan ahnena ka dilna che min ngaithla a, ka ta ila ni dawn tih hi ka hria, mahse eng kawng in nge ka hnenah i lokir dawn ka hre hauhlo."

"Zothan, A mak ka ti.. Nula ka ni tawhlo a, Fa ka nei theilo maithei bawk..." ka ngawi vang vang a.

"Rinpui, Fa neih chungchang chu Pathian thu thu ani.."

"Nia...mahse..."

"Nula i nilo emaw, pasal sun pawh ni la, Nangmah Rinpuii i nih chhung chuan ka hmangaih ang che" a aw chu zawi mahse a fiah hle thung.

Ka lawm takzet ani. Kei hi chutiang khawpa hmangaih tlak chu ka ni reng em? Kei aia tha tamtak a hmu dawn tih ka hria. Kei hi engvanga vannei em em nge ka nih ka hrelo

A kutin ka khabeah a rawn dawm a, a chetdan nghakin ka lo awm tawp a, ka hlim ani...

Ka hmuiah a rawn fawp a, ka lo fawp let vang vang a.

"Rinpui, i inpeih hun nghaka ka awmlai khan nasa takin dawhtheihna ka zir a, nangmah atang hian thil tamtak Lalpan min zirtir ani" a tih chuan Kei tehlul vanga hrehawm a tawrh tawh tamtak chu ka lo ngaihtuah a, ka zak a, ka lawm viau tho si...

"Zothan" a hming bak lo chu sawi tur reng reng ka hrelo.

Zothan-an min thlah a, kan inzui lut chu Maman min lo en vung vung a.

"Nangni pahnih chuhh... Engtia rawn haw dun nge innih?"

"Kan inhmu fuh a, Mam, naktuk zan tan hun ani tawh bawk a, kan vaiin kan inkhawm thei ang maw?" Kanu te vengah naktuk zan atangin Zothana thusawi tura an rawih hun ani tawh tih ka hrechhuak a.

"Thei e a... Keini pahnih chu kan phei hma dawn nia, zai tur khan an beisei bawk che a, i thei ang tiraw?"Mama hi Kanute venglamah Thalai hruaitu ani a. Tunah pawh la niin min awmpui vang hian Veng alo dang nen, a buai phah thin viau mai.

Zothana leh Mama inkawm chu ka roomah ka chhohsan a. Kan room bathlarah thu in ka inngaihtuah veng veng a. Harsatna tam tak ka tawk a, Zothana sawi angin harsatna atangin Pathian ka hmu a, harsatna tamtak tawk inti ve mah ila, Pathian atang erawh in lawmna tur hlir ka chhar leh thung lawi si. A mak ani..

Harsatna tawklo ila chuan ka awm pangngaiin ka la awm ngei ang, A hunah ka inkhawmin Kohhran thiltihte pawh ka ngai pawimawh viau tho vang. Ka seilenna in a zir a, Kohhran hi ka hmu hniam ngailo. Mahse, Ka thlarau erawh chhandam a la ni kher lo thei bawk, Chiangtakin ka hria, Ani chuan kan pawnlam landan hnawlin chhungril lam a en tlat si a...

Inhnuaia ka chhuk chuan Zothana alo la awm a, min enreng chuan ka lai titih deuh tlat leh nghal.

"I lo chhuk chuan tawngtai ila, i ei ang u, Zothana pawh ka chelh anih hi"Maman alo ti a. Rotei koin, Ka thu nghal a.

Mama a tawngtai a, kan ei chuan ka bulah Zothana thuin Mama leh Rotei min hmachhawn zawngin an thu a. Lung a awi veng veng mai....

Kan eikham fel chuan Living roomah kan thu a, "Zanin chu Ma-i te Inah kan kal dun dawn emni? A nau saw kawm a ngai riau a..."Maman a tih chuan a rukin pawi ka lo ti..

Zothana chuan min en vang vang a. "A natna kha emni?"

"Ni e, tunlai chu an tam riau anih hi"Maman a tih chuan Ma-i nau depression vanga buai an sawi tih ka hria. Keini chhungkua pawh hian kan tawngtaipui nasa ve hle.

"Rinpui, kan va kal ang aw?" Zothana'n a tih chuan maktih hmel zetin Mama'n min lo en a.

"Awle..nidangah ka zui ve ang che u" Mama hmel chu enin ka nuisak a.

An thianduna an inzui chhuah hnu chuan uluk takin an tan ka tawngtai sak a. A vawt bawk a, khumah ka mu a, ka lo muhil daih zui.

Zothana thusawi tan zan anih vangin Kanu te venga inkhawm turin kan insiam mawlh mawlh a. Ka u leh Zothana chuan an tum lawk angin min kalsan tawh. Keini Rotei nen kan inkhalh chhuak thung.

BiakIn kan thlen chuan anlo thahnem tawh viau va. Keini pawh Biakin tual bak kan chang tawhlo. Heti taka anlo hlut chu ka lawm khawp mai. Zai anuamin Thalai buatsaih ani bawk a, thalai lo pawh an tam viau tho bawk.

"Khawngaihna" Thupui hmangin Pathian thuchah kan ngaithla a. A ngaihnawmin a ropui khawp mai. Ni e, Kei hi khawngaih vanga Chhandam ka ni. Zothana thusawi dan hi thalai zinga rawngbawl awm ngawih ngawih niin ka lo hre thin. A sawi ve hluah lemlo a, mahse, a thusawiah erawh a chiang hle tih a hriat ngawih ngawih thung.

Thu a sawi zawh chuan Pathian fakna hla sa in a zai a, mipuiin kan lo zawm bawk a. Kan zavaia dingin Lalpa kan fak a, kan zai tuiin tawp mai loin hla dang dang kan sa zel a. A nuam takzet ani.

Inkhawm banah Kanu te Inah kan kawi a. Zothana chu ka motorah a rawn chuang a. Motor a kenglo tih ka lo hrelo. Rotei pawh Mama bulah ngawirengin a insawn tharh a. Maman zawhna zawt mitmenga min en thin chu ka haider, sawina hun ala awmlo ani.

"I rawn inkhawm chu ka lawm khawp mai, Rinpui" Zothana chu ka en a, ka nui var var bawk.

"Thusawitu annei tha em a, kan chan phal nang" ka kut chu la in a rawn hum vang vang a.

Kanute In kan thlen chuan kan kawi dawn tih hria -in kan thiante ho anlo awm nak nak a. Kanpa nena kan inngaihzawn khan Pathian a tello a, hlim chang pawh kan ngah ve viau tho. Mahse Inngaihzawnna-a Pathian a tel hian alo hlimawm zual a, a hahdam thlak bawk..

Mama tleirawl lai thian, URsa alo awm tel ve a, ka chibai lawp lawp mai. A nun zawng zawng Pathian tan alo hlan ve tawh a. A thatlai hun erawh Lalpa tello a a hman vangin ataksa pawh a chhe tawh hle.

Ka bulah Zothana a thu a, Tetei-te thianhoin thingpui an sem a. Zothana thusawi chu ka lo en leh reng thin. URsa testimony sawi chuan min khawih hle. "Pathian tello a hlimna zawn chu mualphona, lungngaihna ka hlawhchhuak a. Ka thlarau mit Lalpan a tih men chuan AIDS natna rapthlak tak ka lo vei tawh si"

"Lalpa nena Thatlai chen" pawimawhzia Zothana nen an sawi chu ka lo ngaithla reng a, ngaihnawm ka tiin ka hlawkpui viau mai.

Kanu te In atanga kan haw chuan a tlai tawh viau... Zothanan ka car a khalh a. Maman kan awmdan maktih hmel taka min en leh thin chu ka hmu ru reng a, In thlen hnu-ah insawifiah ngei ngei ka ngai dawn tih ka hre nghal. Zothana pawh a chelh lo, a mangtha zung zung a. Ka nuih a tiza hle...

"Le..... Sawitur kan neiin ka hria" ka khumah a rawn thu a, kei ka inthlak mek bawk.

"Eng thil maw?" Ka hrereng a, ka haider...

"Zothana nen in inkarah hian engnge awm? in inmelh vel dan hi..."

ka nui hawk hawk a."Engtinnge kan inmelh a?"

"Engemaw a awm tih ka hria..." ka u chu mipa naupang luhlul zet a ang..

"Mam, Zothana hian hunrei tak min nghah tawh thu a sawi a..."

"Ka hria..."

"Maw?? i hria maw?"

"Hrelo an awm nang, i pawm ta mi?"

"Aw... Engnge i ngaihdan?"

"Ka lawm khawp mai, A nghak rei tawh takzet. Pathian remruat ani" Mama'n a tih chuan ka lo nui ringawt.

"Nui ringawt suh, Zothana aia Pathian ring hi ka la hmu ngailo, i vannei khawp mai" Ka u chuan min lawmpui hle tih ka hria..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 6:34 pm

Crush-10

Ka phone riin min tiharh a. Ka muttui tehreng nen..

Ka la chiah chu engmah ka sawi hmanlo. Tei a rawn au chul a, ka beng atangin phone ka dah hla nghal...

"Engnge ka news hriat hi? Misualnu, eng thil nge ka hriat hi??" a va hunlo thin tak!!!

Zing hma tawkah Mama te nen badminton an khel ziah a. Vawi za tam min sawm tawh nangin ka la kal ve miahlo..

"Ka mu leh dawn..." mutchhuak aw zeta ka tih chuan arawn nui hawr hawr A....

"Em em ache, chhunah lo phei ngei ngei rawh, bungrua alo thleng a. Min puih ka ngai" min biak chhan diktak a sawi chiah e...

Te-i hi sumdawng tur a piang ani kan ti fo thin. A bula awm anuamin a duhna ah chuan midang tihlawm mai pawh a awlsam hle.

"Awle"

Phone ka dah nghal a, theihtawp chhuahin muthilh ka tum leh ... Ka tum nasat poh leh ka harh tulh tulh a, ka van ngei tak em.. ka tawngtai a..Sana ka en chuan dar 7 alo ri tep tawh.

Mama chu alo inbual fai leh vang tawh. Rotein tual a lo tifai mawlh mawlh bawk a.
"i va tho hma ve, u" a lo tih chuan ka then sak a.

"Lalte-i'n min rawn phone a, ka mutluih ngial pawn ka muhil thei tawhlo...." tui ka in pawp pawp a. Ka va pui ve nghal a.

"Tei chuan rawn be ziah che se a that chu" Maman a tih chuan ka va melhrum nasa mai..

"Tukin chu kan tho A deuh anilo maw?" Zothana aw ka hriat chuan ka hawi phei vat a. A lo nui var var a.

Jumper leh jogger pants a ha a, Adidas running shoe a bun bawk, a thlan nasa tih hriat takin a huh hlap mai.. A chhelo em em tho.

"Lokal teh, zanin inkhawm kha praise and worship anga kalpui chu tha ka lo ti ve khawp mai... "Mama chu varandaah a rawn thuchhuak a. Zothana pawh gateah rawn lutin, Mama nen an thudun a..

Rotei nen chuan kan thawk mawlh mawlh a. An inkawmna erawh ka beng ka chhi kar a, ka hre ve vek tho.

"Thalai hian a ngai ngawr ngawra kal hi an ning thin a, thalai leh mi hla te hip kan duh chuan danglam deuha inkhawm te pawh kan ngaihtuah a ngai ani. Thu hi hla ania, hla pawh thu ani an tih tho kha tiraw?"
Zothana thusawi chu dik ka lo tihpui khawp mai.

"Rinpui, vawin chawhnu lam chu damdawiin kan tlawh dawn emni?"

"Te-i dawrah ka phei dawn a, i hman hunah min lo sawm mai la" ka tih chuan a remti tih entir nan a bu nghauh a..

Chaweikhamah ka insiam a, bomber jacket dum leh jeans chhunglum ka ha a, sneakers bunin Te-i dawr lamah ka inkhalh chhuak nghal.

"I van lo thleng har ve, enrawh.. Heng hi engtia rem nge tha ang??"Te-i chuan a hma a thawmhnaw intiang teuh chu alo kawk a. A chhawr hoin anlo hual thap bawk.

Ka thiam zawng hi a hria ania, kan ti nghal zung zung a. Kan tihfel chuan hahdam zetin kan thu a. A chhawr hote pawh an kal darh zo tawh.

"Mam, Zothana chu ka lawmpui ngawt mai. Ani ang mi tha i tawng leh hi i vannei bik ngawt mai"

"Ni e, ka vannei tiraw?? Zothanan min lo duhreng thin tih ka hriat khan mak ka ti lutuk a, sawitur pawh ka hrelo reng reng" ka sam chu ka tawn tha mawlh mawlh a.

"Hmanah chuan keipawn ka hrelo. Mahse, tunhnu hi chuan ka hre viau thung. Engtik emaw chuan alam i la hawi ngei hi ka ring ve tho va.."

"A mak ngawt mai. Zothana hi ka zah riau thin, A zahawm i ti ve em?" ka tih chuan a nui vak vak a.

"Bialpa te zah tlat chuhh..tak takin Zothana hi a felin nelawm viau mahse zahawm riau ka ti ve tho"

Thil dang dang sawiin kan pahnih chuan kan nui dun leh nasa tawh....

"Nakinah damdawiin kal turin min rawn sawm dawn a. Lokal ve la..."

"Awi.. A va chakawm ve. Mahse engtinnge ka chhuahsan theih ang, dawr pakhat zawk kal ka la ngai bawk si... Nidangah ani mai" Te-in a tih chuan ka ngaihtuahnaah thil dang daih alo lut.

Te-i leh Zothana ka lo khaikhin a. Sumdawng ve ve, Tein dawr pahnih a nei a, Zothanan pathum...an buai dun hle. Tei chu a sumdawnna vang hian inkhawm hmanloh chang a ngahin khawidangah mah a chhuak hmanlo. Sum hi i dah pawimawh lutuk tiin ka sawisel zauh zauh thin.

Zothana erawh midangte tan hun a insiam a, Sum aiah a petu a dah pawimawh ber a, chuvang chuan malsawmna pawh a dawng niin ka hria...

Zothanan min rawn sawm chuan a car bawkin kan kal leh a. Tun tum chu Zemabawk Cancer Hospital lam kan pan thung. Zothana damlo hoin anlo hre viau zel mai chu mak ka ti.

Mipa Naupang Kum 4 mi lek, thisen cancer ka hmuh chuan ka mittui a tla ringawt nia. Anu leh pa hnathawk nasa tih hriat tak, ro bam mai chu an chauh hmel takzet a. Han en ringawt pawhin khawsak awlsam annih loh zia a lang bawk. Naupang tein Zothana a hmuh chuan alo nui var var a. A pawm a lo ngen chat lehnghal.

Khawvelah hian dinhmun chhe ve tak tak hi anlo va tam em.. Mipa naupang nu chu ka bulah a rawn thu a, a fapa a thlir changa A mit a rilru natna langchhuak chu hmuh hrehawm ka ti takzet ani.

"Engtikahnge in hriatchhuah?" ka tih chuan pawnlam a thlir vang vang a.

"Thla thum hmalam khan ania, a hrisello hrim hrim ah kan ngai thin, kan tan khawpui kal a harsa a, kan Khua a hla bawk nen, kan fa dangte enkawltu kan neilo va. Nitin kan feh loh chuan kan nghei ani bawk si..." a inhnit hraih a. Kei pawn ka lo tahpui ani leh deuh mai.

"Kan mangan em em laiin Pu Zothana dawra thawk kan Khua amiin kan chanchin hi a lo hrilh a. Ani pawh a tanpuina dawng tawh, a dawra thawk zawm ta ani awm e. Pu Zothana chu kan Khua-ah lokal in helamah min hruai phei a. Kan fate pawh a dawra thawkten lo awmpuiin chhunah chuan ama Inah midangin anlo awmpui thin"

Mipa naupang pawmtu Zothana chu ka en reng a. Ka ngaisang takzet ani. Mipa naupang thusawi chu ngaithlain a nui var var a.

"Kan fapa enkawlna zawng zawng hi Aman min tumsak vek a, ka fapa pawh hian a ngaina in a sawi reng mai. A damchhung a rei tawh dawnlo a, kan tihsak theihloh a awh zawng leh a tihchak a piang a tihsak a. Pathian thu hrilhin keini nupa pawh tunah chuan mithar kan ni ve ta anih hi"

Ka mittui tla chu ka hru sawk sawk a. Ka hawichhuah chuan Zothanan min lo en reng tih ka hria. Mipa naupang chuan kan haw a phalloh vangin rei tawk tak kan awm hnu-ah a muthilh laiin kan hawsan a. Ka thinlung chhung hi a tawt up up ni berin ka hria.. Ka lainat em ani..

"Zothan, mi engzatnge i tanpui tawh?" a motor khalh chu hnehsawh zetin a control a. A rawn nui chhuak hawk hawk a...

"Tlemte..." a tih chuan ka awihlo hle. Zothana hian engtikahmah min hrilh miahlo ang..

"Vawin kan kalna chu ka thinlung a zing mup mai" ka lainat bawk si, tidam thei ila, tihdam ka chak ani. Naupang hlim rual leh rilru thianghlim takin khatiang natna rapthlak a tuar kha ka lainat em ani. Puitling nise ka lainatna a nep deuh mahna..

"Rinpui, Khawvela cheng kan nih vang in mahni hmazawn theuhah buaina hrang hrang kan tawk a. Sual a zalen a, A duh duha a tal theihna ani tlat si a, Pathian khawngaihna vang chauha tanpui theia awm kan ni, A rawngbawl min phalsak hi kan vannei takzet" A sawi dik ka ti...

"Ni e, Zothan.. Mahse, an dinhmun kha an lainat awm emai.. Fa dang chu engzatnge anneih? Min hrilh ve miahlo a..." ka vui tih ka aw-ah a hrethiam ang.

"A nau pahnih annia, pakhat Kum 2 hmeichhe naupang leh a teber thla 8 anni. Cancer kha an fapa neihchhun ani a. An fate hi an fel reuh a, enkawl an harlo hlauh a, Kan vannei khawp mai"

Ka thaw hawk a. Khawvel hi fairlo ka ti em em anih chu...

"A fairlo takzet ani, i kal a pianga kal ve ka duh ania aw.. Durtlang a Kapi leh Pute kha engnge an an?"

"Anni kha chu an chhuak tawh a, an nupa khan huan lamah chen an duh vangin an awm a, an tha tawh viau.. Ka tlawh khat khawp mai" MC kan thleng a, Zothana chu a dawr tlawh lawk a duh vangin a tlang a.

"Te, Kumin Christmas chu midangte tan ka hmang ve tawh ang" maktih hmel zetin min en a.

"Eng thlarau nge maw i chan le??"

"I hrethiam dawnlo, kan kal leh veleh Ruati nen in lokal ve ngei ngei a ngai, ka haw dawn... Inkhawm ka tlai ang" tih leh chhuah ka rual a. Ka awmdan chu ka hau-in min lo enreng tih ka hria...

Ni e, Kei hi ka danglam ani. Ka tan kha leh chen kha ka lo nung tawh a, midangte tana nun ve ka tumna ringawt pawh hian min tihlim khawp mai.

Zanah Zothanan min rawn sawm chuan kan lo inpeih vek tawh a. Zanin chu Zothana motorah kan vaiin kan kal a. Kan thlen chuan anlo thu leh teuh hman tawh. A chhung kan chang ve hlauh a. Mama leh Zothana erawh an thutna tur bik an pan thung. Zaninah Mama hi a chair dawn ani.

Mama leh Zothana sawilawk angin kan inkhawm a, kan zai a, reilo te te Pathian thuchah sawiin kan zai leh zel a. Pathian Biak nawmzia keipawhin ka hre thar ve zel mai.

Zothana chu a rawngbawlpui tleirawlin a zai chhawk zauh zauh bawk a, Ni e.. A hahthlak viau ang, mahse, hah hmel a pulo mai nilo in a hlim hmel takzet ani.

"Isuan ro a rel e" kan vaia kan sak lai chuan Isuan kan Biak In chhungah chuan ro arel mek niin ka hria, kan theihtawpin kan zai a. Hetiang tak hian Pathian fak hi a nuam tih lo hre hma deuh ila ka ti ngawih ngawih mai. Zothana te anga Thatlai hun zawng zawng Lalpa tan ka lo hmanglo chu inchhirin ka mittui a luang ani...

Banah Kapa in lengkawi turin min sawm nangin zanin chu kan haw tlang a. Zothana chuan a tie pawtthawlin a coat a phelh a. A kamis chu a huh vek nia..Motor Maman a khalhsak a, kan pahnihin a hnungah kan thudun a. Min rawn nghen chuan nuam ka ti veng veng mai.

A nui suk a, "A nuam em? Zanin chu.."

Rotein a lo chhang vat a. "Zanin ang reng renga Pathian fak nuam ka tih leh ka nun min chhuilet nasa kha ka la hre miahlo"

"I lo ti ve elaw.. Rote, keipawh ka thatlai hun zawng zawng Lalpa tan ka lo hmanglo kha ka inchhir a sin" ka lo ti vat a. Zothana chuan ka kut a rawn hum vang vang a.

"A nia sin, thalai tamtak hian kan hrelo a, Keimahni in hlimna kan zawng a, Lalpa thulo in nupui pasal kan innei a, a tawp chu tahna hlir ani. Lalpa nen ngaihzawng a neih theih a, a hlim theih bawk, Lalpa nena nupui pasal zawng tisual an awm ngailo" Maman a tih chuan dik ka ti hle mai. Ni e, Mama pawh hi Lalpa tan a inpe in a nun pawh a hlim viau bawk.

Nupui a nei har, i hmu zo lo ami? tiin kan fiam fova. Ani chuan Pathian a rawn a, Pathian a nghak a, a in nghat ngam bawk. A tluklo tu hian fiamthu thawhnan kan lo nuihzat vel mai mai ani tihte pawh ka hrethiam ve ta..

Zothana a lo leng kawi a, A kamis chu ka phelh tir a, Mama Tshirt a ha a. "Rinpui, naktuk chu naute te kha i lo awmsak thei angem? A enkawltunu ber hi a hman dawnlo a" a tih chuan ka chhang rang kher mai.

"Lutuk mai, Tein lo phei leh rawh ati a. Mahse, Ani chuan ka tello pawh in a ti thei a."

"Naktuk chaweikhamah i lo hruai mai dawn emni?"

"Awle..."

"Thianpa, Ma-i nau pawh kha zanin khan an rawn inkhawmpui a, i lo hmu em?" Mama chuan engtinnge a hmuh ka hrelo. A chair na atangin midang hmuh a awl viau ani mahna...

"Ka lo hmulo anih chu... A va lawmawm ve, BiakIn lokal a duh ringawt pawh chu..."

"Ni e, kan tawngtaina hi Lalpan a chhang zel ani. I hla phuah kha i zo tawh em?" Maman a tih chuan Zothana chu ka lo en kal a. Hla a phuah tih ka lo la hre ve miahlo.

"Zo tawh e. Naktuk zanah ka sa ang chu ka lo ti a.. Naktuk tlaiah Johna te nupa anlo phei dawn a, lo chhuk la.. Kan zirho lawk dawn mi?"

Maman a chhan hma chuan "Ka hre ve chak ania, ka tel ve duh"

Ka chalah nalo tein a rawn pen a,"Nang chu a theihloh... BiakInah i ngaithla dawn nia" a mit min siai khum zeuh va. Ka lo titau der chu annui dar dar a...

Zothana haw meuh chuan alo tlai tawh hle mai. Muturin ka room lam ka pan nghal a...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 6:34 pm

Crush-11

Chaweikham veleh Zothana Inah ka chhuk a. Naute zawk pawmin a u chu motor lemah a lo chuang a, an hmuhnawm em vang chuan ka ding reng a. Ka pasal niin fate nei ve ila tih ngaihtuahin ka hlim veng veng mai.

"Engchennge khalaiah khan i din dawn?" Engtiklai atangin nge ka awm tih a hriat ka hrelo. A lo hawi miah silo..

A bulah kal hnaiin "Engtinnge ka awm tih i hriat? Min hmu der silo" an bul thuthlengah ka thu a, ka bulah a rawn thu ve a.

"Ka bula i awm hre turin hmuh kher che ka mamawh hleinem, vawin chu ilo awm thei tak tak ang maw?" chiangzetin min en a. Ka nui hak a...

"Min ringlo viau teh suh, tlailamah chuan an duh tawh miahlo ang che" ka nui kawr kawr a.

"An unau hi duhloh pawh anneilo. Pathian rorel dan hi a mak asin" a ti sup a.

Naupang thawmhnaw inchhungah ka han la a, kan In lamah kan chhohpui a, a te zawk ka pua a, an thawmhnaw ka khai bawr bawk. A u zawk Zothanan pawmin a toys an keng bawk a.

Kalkawnga kan tawh ho chuan min fiamin min lo nuihzat hlawm hle. Ni e, chhungkua kan ang viau ang chu...

Gate a kan luh chuan Mama varandaah alo thu a. "Ekhai... Nangni chhung chu in va bawr ve" tih pahin a nui hawk hawk a. Rotei lo tlanchhuakin Ani phei chuan kan thla alo la char char bawk.

"U, enteh... An unau hi an fel lutuk a, an lainatawm zawk, an harsat thu kha i sawi a, an taksa tha viau si hi mak ka ti" Naupang pahnih Rotei nen kan bual a. Kan buai dun hle. An hmel lah hi ka hmu tha reuh phian lehnghal..

"Ni e tiraw.. Pathian malsawmna an dawng anih hi. Vawin chu nilengin kan inzir dawn anih ber hi" ka tih chuan kan nui dun nasa mai. Mama pawh alo buai ve nasa, Zothana a let leh nghal a, kan pathum chuan naupang pahnih buaipuiin kan vir buai, kan zeilo tlang bawk si..

Mama chu chau zetin living roomah a thu hnawk a. Naute u-in a ngen zel vangin sakei ah a chang a, a chungah chuangin naute chu a nui iarh iarh reng a...

"Mam, min lo chhawk lawk teh, Ma-in min lo call tlat" thaw hluam hluama a tih chuan ka nuih a tiza kher mai...

A te zawk ka paw mu a, a u erawh khuma mut a duh vangin khumah kan mut a, an mut a tuiin an hmel chu enin ka tah anti chhuak leh thin.

Nu leh pa annei ve a, an u chu engmah an hriatthiam hmain natna khirh takin a tlakbuak bawk, an nu leh pa ten an u enkawlin an buaipui thei silo.

Ka dara kut rawn nghat chu ka en chho va. Zothana alo ni.
"Kan nau awmtu chu a nau awmte aiin a tahbelh ani maw?"a ti sup a.

A kut chu lain ka hum sak ringawt.

"Khawnge i kal a..? I va lo let hma ve"

Ka bulah a rawn thu a, ka kut a hum chu a lang ve manglo. A inlenhleih em ani.

"Helam hian vawin chu min pawt tlat, nizanah an u kha a tha vaklo va. Ka kal dawn a"

"Kal ve duh viau mah ila, ka kal thei silo a.. Ka zuilo mai ang che"

Ka hmuiah a rawn fawp zeuh va.

"Ni e, Mama nen kan va kal mai ang.. Ka fate i pawlai hmuh ka chak tawh hle mai" a tih chuan ka za chiai chiaiin ka hria..

Mama insiam peihsa vekin alo chhuak a. An pahnih chuan an inzui chhuak lai chu ka thlir reng a..

Zothana nen kan inkawp hnu hian ka hlimin Amah ka ngaihtuah ringawt pawh hian ka hahdam em em thin. Min lo dem lo ula, Ka pasal hmasa nen kha chuan danglam tak ani.

Tlai thimdawn, naute te chu kan hraipuar vek hnuah anmahni enkawltuten an rawn la a. Ka khua a har nghal veng veng nia..

Kan inhnawh puar a, Rotei nen chuan kan naute te chanchin bak sawitur kan hrelo. Inkhawm turin kan insiam a, Mama lo haw chu Zothana Inah a eitawh thu sawiin inkhawm turin kan chhuak a.

Zanin kan inkhawm chu 'Chhandamna' thu Zothanan a sawi a, mi tam tak sawi hre tawh mah ila, Ani anga sawifiah leh nung chu ka la ngaithla ngailo.

A sawi reilo va. A hlaphuah 'Inpumpekna' a sak chuan Biak In chhung chu a reh thuap a. A satuin a sa thiamin tihtakzetin a sa bawk nen, a ngaihnawmin Lalpa tana ka inpek loh zia ka hmu a, ka zakin min vel ani ringawt mai.

Inkhawm ban chuan kan haw tlang nghal a, Tei leh Ruati anlo lang hlawl a. Mama leh Zothana an rawn inzui lut bawk..

"A thalo riau mai a, zanin chu kan va phei dawn emni? Anu leh pa lah chu an tap an tap mai lehnghal" Mama chuan rilru hah hmel zetin a sam a tuai thur a.

Te-i leh Ruati chu anla hre velo bawk nen, an bo dun hle...

Keiin ka hrilhfiah a, ka hrilhfiah zawh chuan anni pahnih pawh kal turin an inpe ve nghal. Ka nau awm chungchang te hrilhin kan thlalak Rote-in a hmuh bawk a. Anni pawh chuan an lainat ve em em bawk.

Damdawiin kalkawngah Ma-in min lo chang a. Maman a phur a, keini ho chu Zothana motorin kan kal thung. Ruati motor chu kan kawtah kan kalsan a...

Damdawiin kan thlen chuan dar 10 ari der tawh. Mipa naupang an hmuh chuan Te-i leh Ruati chuan sawitur reng reng an hrelo. Ma-i chu naupang specialist ani bawk a. A tangkaiin Cancer Doctorte nen pawh anlo inhre tha hle.

Ka rilru ipik lutuk chu pawnah ka chhuak a. Kalfal deuhin thutna lo awm chu ka hmu a. Ka tawngtai nghal mawlh mawlh a. Ka thawl huaiin ka hria.

"Tawngtaina aia ropui hi Khawvelah a awmlo. Nunna a tawp dawn a, manganna vawrtawp kan tawh hian sum leh hausakna in tangkaina anei lova.Thiamna in tawp chin neiin a pawimawh ngailo. Tawngtaina erawh chuan muanna leh damna min thlen thin" Zothana chu ka bulah a rawn thu a. A sawi dik ka ti hle.

Te-i leh Ruati pawh kan bulah anlo ding ve reng a. "Zothan, a dik khawp mai. Zanin chu ka ngaihtuahna a danglam vek, keimah ka inen a. Ka zak ngawih ngawih ani" a mittui a hru zauh va. Hetianga Te-i awm hi ka la hmu ngailo.

"Ni e, keimah ringawt ka lo inngaihtuah te hi ka zak hluah hluah, ka tawt up upin ka hria" Ruatin alo ti ve bawk a. Kan pali chuan kan tawngtai a. Lungngaihna karah pawh lawmna tur a lo awm zel mai, Lalpa vangin..

Damdawiin kan luh leh chuan Anu leh pate chuan lawmthu anlo sawi mawlh mawlh a. Kan eitur kente chu an tan a hlut zia an sawi nasa hle. Ruati leh Tei chu an tawng manglo. An hnuk a ulh in, an lainat em ani. Ma-i chu Doctor niin mi tamtak lo hmu thin ani a, a ziaawm hle.

Zan dar 12:00 pelh hnu chuan a ziaawm chho leh ta viau va. Keini ho pawhin kan hawsan a. Ruati leh Tei kan thlah hnuah a tlai tawh bawk nen, Zothana pawh inchhung ka luh hnu chuan a In lamah a inkhalh tlang a.

Zanin ka mu chu ka tawngtai nasa bawk a. Ka mutui phian mai.

Ka phone a rik chuan ka harh hlawl a. Sana ka en a, dar 10 a lo ri der tawh. Rangzetin ka inperh tho nghal a. Min lo betu chu Zothana ani "Rinpui, Bawiha chuan min kalsan chiah.... Ka Inah kan rawn phei dawn a, ilo zu chhuk thei angem?" chau aw zeta a rawn tih chuan ka tah a chhuak nghal tun a nih chu...A mu ve ta miahlo anih hmel

"Awle Awle...."

Inhnuaiah ka chhuk a, Rotei chanchin hrilhin hmanhmawh zetin ka insiam a. Kan pahnih chuan Zothana Inah kan tlanthla nghal a. Naute pahnihte chuan min lo ngen a, Rotei nen kan pua a, an la hlim viau lehnghal.

Inlam chu anlo tifel vek tawh a, thenawm dangte pawh lo lutin kan ri nak nak a. Naute nu chu Thawhah rei tak nei, inenkawl lo alo ni a, tuman kan lo hrelo, a taksa chau nen nikhawhrelo in a awm a. A fapa ruangin Zothana In a luh chuan a fapa zuiin a chatthla ve chiah anih chu....

Ka lungchhe lutuk chu ka mit a sen rum a. Ka lu a na vek bawk. Anpa hrilhhai lutuk chuan min vel nasa hle. Kanu leh Pa pawh an awm chawt a. Kan thianho pawh kan buai hle. Zothana nu leh pa anlo chho nghal a, Kanute venga Zothana rawngbawlna pawh a chawl nghal bawk. Anpa ber lah a thu laktlak ani lova, anmahni Khawlamah chhungkhat anneilo bawk nen, Zothana kutah engkim a tla ta vek ani.

Ka naute nu leh a u pawh kan vui liamna ninga lai a ni ta, tunah chuan Kei leh Rotein an unauin kan enkawl a, Zohmingin lak ve a tum nasa viau nangin a naupai indim tura an tih vangin kan phallo va. Ma-in a rawn tlawh nitin bawk a, Anni chu an hriselna pawh a tha viau e.

Zothana nu leh pa pawh kan pahnih chanchin an hre tawh a, a tir atangin engkim an hria pawh ani maithei, chhungkaw inpawh leh inkawmngei tak anni a, kei nuthlawi ringawt lehnghal, fa neilo chu min iai ringin ka inthlahrung em em a, ka hlauthawng bawk. Mahse min pawm thlap tih ka hriat chuan ka lawm takzet ani.

Tunah chuan Shillong lamah an chhuk leh tawh a. Pathian tih mi chhungkua niin, an bula chen a nuam em em vek mai. Pasal sun ka nihna leh ka dinhmun chu vawikhatmah hria angin an awm miahlo thei nia. Nu leh Pa ropuiin fapa fel anlo nei tih ka hrechiang hle.

Ka naute te pa chu ka khawngaih takmeuh, A dinhmun chu ka lo tawn hnu ani bawk a. A tan tihtheih ka nei tlem si, ka tawngtai sak tluk tluk thin. Tunah chuan Zothana bulah a awm a, a changin a huan lamah Kapi leh Kapu bulah khan a hruai harh zauh zauh bawk.

Zanah Zothana alo leng a, A inlamah Johna te nupa anla awm bawk a, a inla free ve hle. Naute zawk a pawm a, a chhaih nui iarh iarh reng a. "Rinpui, Pathianin nang leh fa min pek dan hi a mak ngawt mai tiraw?" zaidam na-a khatin min en a...

"Hey.. Nangni chhung chu inlo dam maw?" Tei leh Ruati anlo lut a. Naute u zawk thil anlo hawn chu pein an pawm nghal a. Ka naute te hi Tei leh Ruatin an rawn supply nasa bawk a, thawmhnaw an ngah chak hle. Mama leh Ma-i an rawn inzui lut bawk a, kan hlim nak nak viau.

"Tunge Innei hmasa dawn che u" Ruatin a rawn ti teh thut a. Ka lo nui hak ..

"Ute min neih khalh nawn thei nang"Maman a tih chuan kan nui dar dar a. Ma-i hi ka hrechiang tulh tulh a, ka ngaisang tawlh tawlh bawk.

Zothana leh Mama hi ka ngaihtuah fo thin. Pathian thu an awihin naupangte an nihin an piangthar ve ve a. A thuawihtu chu Pathian hian a lo duat khawp mai, an eizawnna ah an tluangin an nunah eng pawh tawk se, Pathianah an lawm thei zel a. Pathian hian malsawm tur, malsawm tlak mihring hi alo duh em em a, A mihring lam hian kan lo tlin nganglo thin alo ni.

Christmas hmandan tur kan sawikhawm nak nak a, keimahni hlim hlawp lam tuman kan sawi talo. Midangte tan kan rel a, kan ngaihtuahna kan seng a, Kumdang zawng aiin kan phur tlang bawk. An haw hnu chuan Zothana ala thu a, Maman Ma-i a thlah bawk. Naute ka mut fel a, Zothana bulah thuin ka ngheng ar ar a...

"I chau thin viau lo maw?" min rawn kuah a.

"Chauh chang awm mahse, a hlimawm viau a sin, tunlai engnge damdawiin lam i kal em?"

"Kal a ngai khawp mai, nau awmtu tur hi kan la mai dawn emni? Lang a kal tur nise"

" A ngai kher emni? Ka fit viau a sin" ka nui a..

"Damdawiin kal a ngaih chang hian ka bulah lokal ve la ka duh a.."a tih chuan ka lawm viau bawk si..

"Chutiang hunah chuan kan kawmchhak naute khi min pui thei an awm ang, an felin inhlawhna an zawng fo alawm, school an chawl vek tawh a..."

"A that nasat chu... Rinpui, ka lawm e.. Engkimah min thlawp a.." Dimtein min rawn fawp a, keipawh chuan ka lo chhanglet rang hle. Zothana hi tlangval hrisel tak nimahse, a tawk a hriain a insum thei em em thung.

Kei hi lawmtur zawk ka ni tih ka hria, Ani hi awmlo se engang Khawvelah nge ka chen ang ka hrelo. Ka hmangaih takzet bawk.

A haw hnu chuan muturin ka chho va. Kan naute 2 chu ka en vang vang a, an pahnihin ka mutpui a. Kan khum a zau bawk nen, Rotei pawh kan bulah a rawn insawn a, zanah an harh ngailo te hi a hahdamin vanduai hle mahse, Lalpan a veng ani ngei ang. Min tihlim em em tute anni bawk.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 6:35 pm

Crush last Episode

(Story ngaihlu a, min chhiarsak tute hnenah lawmthu ka sawi e, ka lawm takzet ani.)

Fate nen chuan zing thawh har hi thil theih alo nilo. A u zawk chu Rotei rualin a tho thin a. A nau erawh chu ka thawhpui hma chu ka hmai hi infiamnan a hmang char char thin ani ber e. Min tihbuai chang awm mahse anmahni vanga ka hlimna hian a buk rit zawk fe ani.

Kan inpawm thlak chuan Zothana leh Mama lo thu chu ka en ha a..

"Naute neih chin chu thawh kan hre sawt ania" Maman a tih chuan ka nui var var a. Zothana chuan naute chu min lo lakchhawk a..

"Engnge zing zingah inlo sawi dun? Min rel ani lo maw?" an bulah chuan ka thu ve nghal a.

"Mami, nangni pahnih hi Innei vat ula tha ka ti, engnge i ngaihdan?"

Mama chu ka en reng a "Neih khalh nawn leh i hlauh viau khaa..." ka nui hawk hawk a.

"Ka uang mai mai alawm, Bawihi te unau hi apa hian engtikahmah amahin a enkawl thei dawnlo tih a hriat reng a, an len hma hian Inneih vat hi a tul ani, inneih bak hmabak innei tawh chuanglo" Zothana ka en a. Engmah a hmelah ka hre theilo.

"In tih dan dan ani mai alawm, ka hrethiam lo" ka tih chuan Zothana chu a rawn nui hak a.

"I hnial ang tih hlauin rilruin ka lo tawngtai char char" atih chuan kan nui dar dar a.. Kei chuan a hmasa berah Ka pasal boralta chhungte hmuh ka duhthu ka sawi a. Min hrethiam khawp mai.

Inpui lama ka kal tur chu ka hreh ve deuh kher mai, chutihlaiin Zothanan hei chen hi min lo nghak tawh a.. Hnial chi niin ka ngai bawk silo. Chhunah ka inkhalh phei a. Christ a tihloh chu anlo awm vek a. Kanu leh Kapa pawh anlo dam that lai tak aniin ka lawm hle.

"Bawihi... Pasal hi nei vat teh, i awmdan hi tha ka ti miahlo ania" Kapa in a tih chuan ka sawi hreh tak mai sawina hun lo inhawng chu ka lawm hle.

"Nia, Kapa.. Chumi chungchang sawipui tur cheu chuan ka lokal a.." tiin Zothana nena kan chungchang chu ka hrilh chho malh malh a. Ngawirengin anlo ngaithla a, zawhna pawh min zawtlo. A tawi thei ang berin sawi mah ila, a rei duh viau. Ka sawi zawh meuh chuan ka thawveng hawk mai.

"Bawihi, ka va lawm em.. Pathianin kan tawngtaina a chhang ani. I tan hian ipa nen, Bawiha te nupa nen kan tawngtai fo va, Pathian hi a tha takzet ani. Mama pawh a lawm ve khawp ang" Kanu lawm avanga lungchhia chu ka kuah a...

"Mam, A lawmawm emai. Zothana chanchin chu ka hre fo va. Ani ang makpa tha kan nei tur chu Christ-a pawh a lawm ngawt ang" Emmy'n alo ti ve siam siam bawk a.

"Kan fanu i ni a, thil pakhat chiah ka phut ang, Bawihi... Tun tum chu kan In atang ngei hian i lawi tur ani, hmaanah pawh ipa bulah ka sawi tawh a, engmah hnialna a nei hauhlo ania, palai pawh kan In lamah an lokal tur niin ka hria.."

"Mahse Kapa, a hautak..." ka sawi zo hmanlo. Ngawi turin a kutin mi rawn zap a.

"Bawihi, Mama tana kan tihtheih hnuhnung ber ani a, chuvangin min hnial lo hram rawh. A hautak tih thu ah chuan In nupa ta ho min pek let tam tak kha hrereng ta che, khatiang ngaihtuah chuan tuna kan tihtur hi eng tham mah anilo, tuna in chenna In pawh saw i ta ala ni reng ang tih i hre dawn nia"

"Pa, ka lawm e.. Ka phuloh in min chawimawi ani, sawi tur pawh ka hrelo" ka lung te pawh a chhe hial zawk. Heti em em a min hmangaihtu ka nei hi ka lawm bawk si. Bawihtea lo inti tlangval ve tawh lutuk chu ka nuihpui ka nuihpui mai.

Ka leng rei ta phian a. Ka haw chuan Kanu te Inah kal in Kapa nen anlo awm a. Inpui a ka len chanchin te hrilhin an ngaihdan te ka sawi a. Kapa chuan "Mambawih, Pathian hi kan chungah a tha lutuk a, Atan kan thathnem loh zia ngaihtuah phei chuan a malsawmna kan dawn zozai hi engnge maw ka nih a, Lalpa mi hriatreng thin le..ka ti fo mai anih hi.. An rilru damna tur anih chuan ka pawm thlap e, keini chu fanu leh fapa kan la nei a, nang hi chu kan chanah hian ka lo dah tawh lo hrim hrim che a, engnge i ngaihdan Mama nu"

"Kei pawh i ngaihdan kha ka ngaihdan chiah ani. Keini chu i nu leh pa te kan ni reng dawn a, engmah a dang chuang lo" Kanu in a tihlai chuan Tetei alo lut a.

"I lo len khat zia hi... Pa, ka u hi lo len nachang pawh a hrelo" min rawn kuah thuak thuak a. Hmangaihte bula awm hi chu rilru a hlim thin teh e...

In ka thlen meuh chuan alo tlai dawrh tawh. Kan kawtah Zothana alo tei nulh nulh a. A bulah Mama alo awm bawk...

"I lo va haw har ve, kan thu hle hle thei tawhlo, engnge chanchin?" Mama'n a tih chuan ka nuih a za kher mai.

"Lut phawt teh ang u, khawnge ka naute te hi?" a lo reh teh thap si a, ka hmuh chak tawh tehreng nen..

"Rote-in dawrah a hruai lawk a, chanchin chu?" Mama tehsek pawh chu...

Inpui lama Kapa min lo tihdan ka sawi chuan an thaw dun huai mai. Zothana chu enin ka nuih rah rah a..

"A lawmawm hle mai, Pathianin engkim min thawhsak ani" tih zawng a sawi...

Kan Inneih tum ve lah chu Mipa lam an hmanhmawh nasa mai si a, Palai kalna Inpui lama Kapa te lah kei aia hmanhmawh anni bawk. Ka thulh leh an hlau emawni hlawm tih mai tur anni.Thu an pawtchat fel hma ngei mai. Kei ve hi tuman min rawn miahlo anih chu...

Te-i lokalin kan thawmhnaw tur kan sawi dun a. Puanchei bih mai kan rel a, ka vawikhatna ani tawhlo bawk nen, Zothana pawhin min pawmpui thlap bawk.

"Mam, nangin a pahnihna i nei dawn tawh a, Ruati nen lah pakhat pawh kan la hmuve silo" a nui kawr kawr reng a.

"In hmu teuhva, in duh tui dun em anih hi..Naktuk atangin Inpuiah ka riak phei tawh dawn si, Ruati pawh hi a van lo thleng har tak" ka tih mek lai chuan alo lut ve chiah a.

"Kan mopa tur phur lutuk hi kan thulh leh mai dawn emawni?" Ruati chu a rawn nui lut hawk hawk a.

"Engnge alo tih leh tak? Naktuk atang chuan i riak thei ang maw??" Te-in a tih chuan Ruati chu kan melh dun ran a.

"Thei e, tunlai chu mikhual kan ngah deuh nen, ka lo phei hma thei nganglo alawm, indaihloh ana lutuk"

"Ka thiante 2 hi pasal nei hman lo khawpa buai kha in ni ve a, " ka tih chuan an ner dun nasa mai..

Ka thawmhnaw kan pack fel mawlh mawlh a. Ka thiante pahnih anga thiantha ka lo nei hi vannei ka inti thin. Thian tam tak neih hi a harsa lo. Mahse, thiantha neih erawh awlsam lo tak ani thung.

Kan pathum chuan kan infiam a, kan inkap bawrh bawrh bawk, tuman huatah kan la ngai lemlo.

Kan Inneih Ni chuan kan phili buai mup mup ani ber mai, Christa leh Kapa tih loh chu inchei reng rengin kan buai a, mikhual ho nen.. Kan ri nuaih nuaih mai.

Kapa in Biak Ina min kaihluh chuan ka vawihnihna nimahse a vawikhatna angreng tho kha alo la ni. Ka zam in Mipui lah chu Biak In tual zawng zawng nen an lo khat vek bawk a, ka khur dar dar mai.

Zothana erawh chu a pangngai reng bik ni maiin ka hria, mipui hmaah a ding thang a, a ziaawm bik ani mahna, a mit erawh ka lak atangin ala sawn miahlo.

Inneih hunserh zawh chuan pawnlamah thla kan la a, chhungkhat laina kan rual bawk nen, a hmanhmawh theih ngang loh ani.

Kan Inneih hi mi tlemte nen hote a tih mai ka duh rualin Zothana nu leh pa ten an fapa neihchhun nupui neih chu chutiang mai mai a tih anlo duh silo va, Inpui lama Kapa lahin alo thlawp nasa mai si, chhungkhat laina thenrual tha anlo thahnem bawk nen, kan ri ta mup mup lawi a, sum lamah an buailo dun bawk a, ka thu an awih dawnlo bawk nen, ka enliam vel ta mai mai ani.

Mama leh Ma-i pawh kan fate an buaipui a, kan fate pawh an nalhin nuam anti ngei mai. Mama te bawr lutuk chuan mi fiam leh chhaih an hlawh nasa in min tihlim khawp mai.

Zanah Zothana huan lama riaktura min tih vangin thiantha tlem nen kan phei a, a Insak hi a chung di, a bang dap nimahse a chhungah a thuah leh vek a, bungraw tunlai ber ber awmin a nuam reuh hle ani.

Kan thiante ho lah chu inla zei fahranin hma deuhah min haw san duak a, an ngeiawm hlawm zawk, an haw hma leh lutuk a. Zothana nen varandaah thu in guitar a perh a, a zai a.. Keiin ka lo ngaithla thung.

"God made u, just for me,
Baby, ill love u always
By your side i will stand
Walk with u, hand in hand
From this day on,our love will stand strong
As i declare.....

Lord,as we take a stand
We're asking for your hand
To move in our lives as we become husband and wife
We will build our house on You as a rock....

A aw analhin a sa nalh bawk a, a serious bawk nen, Zothana zai tawh zawng zawngah ala mawi berin ka hria...

A sak zawh chuan "Rinpui, ka hmangaih che" a rawn ti sap a.

"Ka hmangaih lutuk che" lo ti letin Kan infawp vang vang a.

Kan mut dawn chuan kan khum bulah thingthi-in Pathian hmaah kan tawngtai dun a. A nuam danglam takzet ani.

Ka pasal hnen atangin Pathian rindan ka zir a, Pathian a hmangaih zia ka hriatbelh zel bawk. A hmangaih em em Pathianin malsawmna tamtak in a vur a, fa nei theilo ni a lo inngai tawhin fapa phir duhawm tak ka neih chuan lawm vangin ka mittui a luanglo theilo.

Kei pasal sun tawh ve maiin hetiang taka malsawmna ka dawng hi mak ka la ti fo mai. Engtikahmah Zothana hian min phatsan ve ngai dawnlo tih ka hria, A rin Pathian a rintlak em vangin A rin ngei Pathian chuan Ka pasal pawh rintlak ah a siam alo ni.... the end/-

( Tunlai Office kan buai deuh a, nihnih chhung chu story chhunah ka ziak hmanlo. A tlachawp zelin ka ziak bawk si a, min lo hrethiam dawn nia. Tuna mi pawh hi a tawp dan hi duh aiin ka pawt tawi ta deuh ringawt mai a, chhiartu ten keia thuziak tehlul inlo hlut hi ka lawmin in lakah ka inthlahrung ve si a, tih chhuah hram hman ka duh si, min lo hrethiam hram hram ru....



www.storyfb.com mizo story thar englai pawhin chhiar tur a awm reng

Story thar, Crush nena hrang hlak hi alo chhuak leh nghal dawn a. Chu chu ka lo post leh nghal ang. Min lo chhiarsak leh hram dawn nia.. Ka lawm e 😘😘)

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)