NUNPUII BY Mahruaitei Pachuau (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

NUNPUII BY Mahruaitei Pachuau (Completed)

Unread post by Ngaia » May 14th, 2018, 8:59 pm

index.jpg
index.jpg (31.56 KiB) Viewed 14768 times

NUNPUII

Chapter-1
By
(Mahruaitei Pachuau)


"Khawnge I awm?"
Lehlam a țangin ring lutuk mai chuan min rawn bia, țawng hriat a har lutuk, thawm awm loh na lam chu ka pan ta vat a..

Friday a ni a, kan țhianpa nupui neih ni a ni a,zanah kan party nghal bawk a,mi kan tam in an lam hut hut reng mai,lam chi hrang hrang in an bei a,ka lam vak ngai loh vangin kei chuan whisky in pah chuan ka lo thlir vel mai mai a, chutia ka thlir reng lai chuan ka phone a rawn ri ta ral ral a, ka pick chuan ka bialnu a lo ni a,party na hmun kan thlen khan a țhiante nena an awm hran a vangin kan in hmu leh ta reng reng lo a mai a,ka awmna min lo zawh a tum nasa khawp mai, thawm awm lohna lam ka pan lai tak chuan tu emaw nen hian kan in su ta chawrh mai,kei lah rui tawh tih takah awlsam zet hian ka tlu chiang lutuk,ka lo rui tawh deuh tawh nen"kawng en ve ta che"kan ti vin tuarh a,lungawi lo zet chuan ka hawi chhuak a, mahse ka mi sut hmel ka hmuh khan ka lungawi lohna chu tu nge la bo tih tur khawpin ka hmel ah a lang ta tlat lo...

"I na em? ka tihpalh lutuk"

chu tleirawl hmelțha zet mai chuan inthlahrun hmel zet a min en in a zak lutuk chu a sen țawn țawn mai,mi zakzum tak a ni ngei ang..

"Na lo ve, keima thiam loh a nih kha"ka ti ve mai a, sawi tur leh chuang a awm tak loh a vangin a in thiar fihlim ta vat a..

Ka bialnu nen chuan in hmu in party na ah te chuan kan awm ho ta reng a, zan rei tak thleng kan party a, mahse ka mitthla ah kha tleirawl kha a cham ta tlat mai, party na lamah pawh chuan ka bet ta vak lo, mahse a tawp thleng chu kan awm ta tho a, haw kawngah pawh chuan ka ngaihtuah ru reng tho, ka bialnu chu ka thlah a, keipawh ka haw leh ta vat a...

Mut hmunah chuan ka ngaihtuah reng mai, tleirawl tih ah kum 20 vel bak a nilo ang, kan kum erawh a in thlauh hmel phian,kum nga dawn a ni ve ang, a silhfen inbel in hmeh zia te kha, kawrfual paw tak nalh deuh mai hi khup thleng in a ha a, a sam lah a nung țha in a ti lang nu hnap turin a thlah siau a,makeup a uar em em lo bawk..ka thinlungah a riak reng ta mai,mahse ngaihzawng ka nei reng a,ka ngaihtuah tawh tur a ni lo tiin ka in hnem a,eng tin tin emaw ka lo muhil ve ta a...

Kar a liam leh ta a, tuk khat chu ka phone a rik tak ah chuan ka harh ve leh ta chauh a, ka room chu ni chuan a lo chhun ut mai, ka alarm ka tih mai ka bialnu Kimkimi chuan min lo phone leh tawh,zingtin min lo phone țhin..

Hey,tho tawh rawh"

Min va kai tho hma ve, nidang aiin min kaitho hma nia aw"

Hma lo, hma lo, vawiin kha I rawn tlai a nge, class țan hma a nih kha, tlai lo ang aw"

Awle, nang berin I tih te chuan kan zawm tlat a niang chu"

A rawn nui leh har har ta mai,Kimkimi nen hian private school ah kan thawk dun a,kan inbiak zawh chuan in hnuai lamah ka chhuk vat a, chaw ka ei sawk sawk a,ka in siam leh vat vat a, kimkimi te in lam pan in bike chuan ka in khalh chhuak leh ta a, kimkimi pawh a lo hman der tawh a,school lam pan chuan kan in phur liam ve ta..

School kan thlen hma deuh chuan Kimkimi pawh chhuk in a țhiante a zawm a, keipawh ka țhianpa Muana nghakin thingbuk hnuai ah chuan ka chawl a, chu tih lai tak chuan ka awmna lampana țhiandun lo kal pakhat zawk chuan ka mit a la ta hle mai, ka hmuh hnaih takah chuan ka țhianpa te inneih zan a ka mi sut kha a ni tih ka hre ta a,biak chu ka duh viau mai,mahse ka hnaih ngam tlat lo, hmeichhe bulah hi chuan ka zam khat viau a sin le, mahse engtin emaw tal biak ngei chu ka la tum ruh ngang mai..

Biak ngei ka duh avang in zanlam ah chuan ka țhianpa nupui nei tawh chu ka zawt ta tawp a, a nupui Mawitei cousin a nih thu leh tleirawl fel tak a nih thu min lo hrilh a, number te min pe a, ka lawm rilru ang reng hle..
A tawi zawng in sawi ta mai ila, number te ka neih takah chuan kan inbe ngun ve ta viau mai, mahse ţhianțha ang in, a fel in a nun a nem em em a, a cool reuh phian leh nghal,mahse an khawsak dinhmun avang hian kei min kawm hi a in thlahrung ve țhin, ka pa doctor a ni a,mi te ngaih ah chhungkaw pangai ve tak kan ni,Nunpuii te erawh khawsak pangai ve mai an ni,apa a boral tawh a,a nu leh au mipa nen an khawsa a, a u chu office pakhat ah a thawk a,,chu chu an eizawnna a ni..Mi zakzum mi tak ni a nimahse Pathian a bêl tlat a, hmeichhe dang nena tehkhin rual a nilo, a bula ka awm tawh chuan ka thla a muangin ka hlim veng veng a,mizia dang khawp in a bulah ka nunphung a dang a, ka zah ru hle ţhin.

Enge maw chen kan inkawm takah chuan țhianțha tak kan lo ni a,nunpuii nen chuan kan nungchang erawh a inthlau hle,a ni zawng theih ang tawkin kohhran ah a in hmang a, kei chu zu in ve thei mai ka ni a,inkhawm lam ah pawh ka chhungte hmai ka zah vang in a mawi tawkin ka inkhawm ve chauh țhin, mahse chung ang chu ni mahila min en dan a dang chuang lo, ka tan min țawngțai sak reng zawk țhin...

U ang hian min en tlat in ka hria a, min koh pawhin min u kher țhin, mahse keiman min u suh ka tih tlat a vangin min u ta lo a,țhianțha anga en reng tur chuan harsa ka ti tlat lawi si,a dik a dik chuan ka duh in ka hmangaih a ni,mahse ka hrilh ngam lo, ka lakah in ngaitlawm hle mahse a mah ka zah ru tlat si a,mahse nunpuii chuan ka rilru a luah hneh hle si..A țul a nih chuan Kimkimi pawh thlah mai ka hnial ta lo..

Vawi khat chu an in a ka len țum in ka rilru hrilh tawp mai ka duh a,

"Nunpui, ngaihzawng I nei em?"

"Nei nang, tu nge nei se min tih"

"Hmm, ka awih lo, hmanni pawn tuemaw kha chu I kalpui reng kha..""

"Naaa, kha te chu ka bialpa pawh nilo, aman min ngaizawng a, mahse kei chuan ka ngaihzawng ve lo, țhian angin in en ang ka ti lawm, kha min hrilh duh kha kan chhuak dun ringawt lawm"

Lungawi loh hmel zet hian a sawi niah niah a, ka en țhin, a hmel ah hian sawiselna tur a awm mawlh lo...

"A nih chuan kan pahnihin in ngaizawng daih mai ang, ka duh che"

A rin lo lutukin ka zawt chu a hamhaih nge,a ngawi hle hle a, hnuai lam a bih ta kar a,a haw ta emaw ka ti hial a, ka inthiam lo in ka zak rilru hle mai, mahse a hnu ah chuan rawn dak chhuak a,

"Hey min tih der suh aw, dawt ka ngaina lo nia"

"Ka tih der che i ring a mi"

"Ring tho e"

zah hmel deuh chuan a nui saih a,..

"Ka ti tak tak"

Nui miah lo chuan ka sawi a, amah ka en kar bawk a,

"Ka awi lo"

"Tinge min rin theih loh, ka ti tak tak a lawm"

"Denis, khuanu remruat dan hi a mak ngawt mai tiraw, dinhmun inthlau tak kan ni a, chutah ngaihzawng hmelțha leh hausa I nei a,engtinnge kei hi I bialnu ka nih theih ang,nilo țhian kan nih hi a țha zawk, engti kawng zawng mah in a theih loh"

nuih pah chuan a ti a..
mahse a hmel kha en chian chuan lungngaih hmel a pu tlat thung si..

Tun bak hi hun remchang a nih ka rin tawh loh a vangin a rilru hneh ngei ka duh a ni, ka hmangaih tih hi hria se ka duh..

"Nunpui, hausakna leh ropuina te chuan kumkhua a daih dawn hleinem, kan din hmun leh Kimkimi avang hian min duh ngam lo tiraw,mahse khawvel thil ai chuan hmangaihna hi a pawimawh zawk a sin,nia, Kimkimi chu ka tan chuan mi țha tak a ni,phu loh hial chang te pawh ka nei ngei ang, mahse nang ka tawng che a, ka tawn ni a țang che khan ka thinlungah hian I cham reng a,ka hriatchian hma daih che khan i nihna leh dinhmun ka hre vek tawh a,eng dinhmunah pawh ding la,hmangaih tlat tur che in ka intiam tawh a sin, hmangaihna leh duhna hi a in ang thei ngai lo, ka hmangaih che vangin Kimkimi pawh thlah turin thutlukna ka siam tawh"

ka tih chuan a lo hawi vat a,

"Tak tak maw, I ti tak tak em, keipawh hian ka duh in ka ngaina che a, mahse ka phu lo lutuk zawk che"

a lo ti vat a, a hlim ngang mai,a hmelțhat a zual emaw tih mai tur a ni, kan rilru kan in hriat tawn takah chuan kan hlim dun em em a, tudang kan ngai bik lo,kan in kuah hle hle a, tlai lamah ka haw ve ta chauh a..

Chumi ni a țang chuan ka hlimna chu a famkim sawt emaw tih mai tur a ni, nunpuii vang chuan ka nun țha lo ka sim a,zu pawh ka in ta lo,Kimkimi nen chuan kan inthlah ta bawk a,nunpuii nen chuan kan in zui chawt ngai lo,kan hnathawh te a in an loh vangin,in lamah erawh ka hman chuan ka leng ziah țhin,a theihna apiangah kan in pui tawn a,thianghlim taka kan inkawp vang erawh chuan eng thil țha lo mah kan ti ngai lo..Thil țha lo tih a hnekin bible te min chhiar sak a, Pathian thu te min hrilh țhin..

Enge maw chang hi chuan thu mak deuh te hi min zawt leh khut țhin..

"Min hmangaih tak tak em?"

"Ka hmangaih tak tak che"

"Eng din hmunah pawh ding ila, mi vuan tlat duh a ngem?"

"Ka hmangaih I ni a, engtiklai pawh in ka vuan tlat ang che,ka kalsan lo ang che"

"A nih leh kalsan ta che ila engtinnge I tih ang?"

Chu zawhna chu ka beisei lo, mahse min zawt miau si,

"Ka sawisa ang che anga, bawm ah ka khung bet tlat ang che"

nuih chung chuan ka ti a,mahse a hmel chu a thu tak reuh phian si,

"Uang suh uang lo in, enge thleng ang pawh a hriat miah loh hi"

Min melh rum ang reng, ka ngaih a ti țha lo lek lek mai a a,ti hian ka chhang ta zawk a,

"Nang kalsan che hi ka duh lo, ka tum lo bawk, eng harsatna pawh paltlang ngai dawn mahse min kalsan a nih ngawt loh chuan ka thlah lo ang che"

A nui ta var var mai, a nuih zawnga a biang sum lang kalh chuan mi a hneh reuh hle mai, ka awm ah chuan a bei hle hle a, a thla a muang tak zet a ni...

Mahse hringnun chu hringnun a ni miau a, harsatna kan tawh a țul chang a awm țhin si,ka beisei loh dan deuh in ka chungah thil a thleng ta a, nunpuii nen kum khat vel chu kan in ngaizawng ve tawh ang..

Nunpuii nen chuan kar khat liam ta a țang khan kan inkar a buai țan a, nitina min be țhin khan min biak loh zauh te a nei țhin,a ngaihna ka hre lo hle a,message ka thawn lah in min reply a tum bawk silo,kan in hmu khat si..an in ah len ka tum țum lah in hmundang ah a zin daih bawk si..

Kan in hmuh loh chhung chuan thla a liam ve ta reng, ngaihțhalo deuh chuan ka awm ta reng a,vawi khat chu ka hmu, mahse kha thil kha hmuh ngai lo se ka ti ngawt mai,hmun thengthaw nuam zet mai ah chuan mipa pakhat nen an chawl dun ka hmu a; an in huat loh hmel hle leh nghal, ka thin a rim ta thut a, an bulah chuan kal in

"Nunpui he pa hi tunge?"

Min chhang mai lo..

"Tunge ka tih chu"

Ka vin tuarh a, thinrim aw ki a ni bawk a, a ring țha ngei mai..

NUNPUII bialpa ka ni e, tunge i nih a?"

Chu thu chuan ka thinrim a va belh chhah em,

"Nilo, a ni lo tih min hrilh rawh"

Nunpuii enreng chung chuan ka zawt a,a bu nghut ringawt, a bak engmah a sawi ta lo,ka thin hi a tawt up up mai, kha mihring kha sawisak va chak em, ka kut ka hum ruh a, hnek mai ka tum lai chu nunpuii chuan a lo hmu vat a min chelh bet tlat bawk,

"Ni lo ti suh, khawngaihin,Hriata kal ang",

Chu aw ri ka hriat chuan ka thinlung a khawih ta tlat mai, insual tumna rilru pawh ka pu hleithei lo,

Zonunpui,kei aiin kha pa kha i thlang maw,thu ka lo tiam che kha ka sut leh e, nang aia țha kan zawng ve nge, nang ang ka hmangaih che hi ka zak tak zet"

Ka rilru a awm awm chu ka sawi ta phawng phawng mai,ka thin a rim em a ni..An ni pawh an chhuak nghal a,chu bak chu kan inbe leh ta lo, mahse hrehawm ka tih em a vangin zankhat chu keimah bawk hian ka va be leh a..

"Ka tihpalh, I laka ka awmdan a vang khan,min ngaidam dawn nia,mahse enge I hriat a, tianga I awm tak mai?"

Min reply chuang lo, a online reng si..

"Mawh, tinge,a hma in thinrimna I nei ami?, min chhang ta che"

Min reply leh ta chuang lo, ka tawt up up mai, ka thawn na chu ka en reng a, minutes 5 hnu ah chuan a seen ve ta a,

"A ho lutuk, engahmah ngai suh"

A lo thawn rual rual chuan ka seen leh nghal..

"Nunpui, tiang a i tih hi ka ring ngai lo sin,ka hrethiam lo hle mai"

"Denis, min hrethiam la, min kalsan tawh mai rawh,ințhen hi ka duh a ni, tihpalh"

Chu thu zet chuh, ka lung a va ti awi lo em!
Ka call a, a pick duh lo, ka call tlut tlut pawn a pick duh ta hauh lo,ka thin a va han rim em! A hnu ah chuan status a update a, ti hian a lo ziak a

"He thu hi I chhiar a nih chuan min kalsan vang vang ang che, ka hmangaih che emaw ka ti a, mahse ka thinlung hian hlat che hi a duh tawh zawk,reiloteah hmangaih chu I nei ve leh mai ang kei ang hian, lo kir tum lo la, ințhen hlen zawk ang, Kumkhua atan mangțha.."

Aw chu status chuan min va ti na em!, ka ring thei lo,mipa mah ni ila tuar har ka ti,ka nun hi a ruak ngawih ngawih, ka mumang mai nise ka va ti em!Mawitei a chhan ka zawh lah in a hre silo,tiang em em hian a nimaw ka lo hmangaih leee...

Nunpuii chu hmangaih hle mah ila ka hua a ni, hriat loh hram ka tum țhin,min duh lo in min kalsan a, ka umzui a țulna ka hre tawh lo,Kum a vei leh meuh chuan ka pa te chuan nupui nei turin min nawr sek a, keipawn ka hnial lem lo, hmangaihte ber a neih theih tak loh ah chuan chhungte thu kan zawm mai loh nakahh...

Ka nupui tur Ruatpuii chu kan veng mi tho a ni a,chhungkua ah pawh mi zah kai leh kohhrana lam ah pawh mi țangkai tak an ni,nunpuii ang mai a fel leh zaidam a ni a, kan in ngaihzawn hma a țang daih in min lo duh ru ve tawh a..

Nikhat chu inneih na tur thil țul buaipui pah in Ruatpuii nen chuan kan bazar a, restaurant ah te chawl in kan khawmuang ta deuh a, pawn lam ka thlir reng lai chuan tuemaw hi hmanhmawh deuh a a kal liam tur hi ka hmu ta thut mai, inring lo lutuk in pawnlam ah chuan ka tlan chhuak vat a, mahse ka hmu ta reng reng lo,hriatchian ka chak leh ru hle mai,tuemaw kal liam tur ka hmuh kha nunpuii ka hre chhuak zawk mai, mahse ka hrechiang in ka hmu zui ta silo...mahse a ang lutuk ka hriat loh in phirpui a nei a ni ngawt loh chuan...



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 9:00 pm

NUNPUII

Chapter-2
By
(Mahruaitei Pachuau)

Mahse phirpui chu a nei hauh lo, amah ngei a ni NUNPUII chu..mahse ngaihven ka duh lo bur mai, ka thinlung erawh chuan hriatchian a chak ru tho si, ka țhianpa nupui min hrilh dan chuan anute nen mi in luah in veng dang ah an khawsa ve mai tih chu min hrilh a,tlai khat chu ka rilru chapona a lo chhuak a,nunpuii chu tihnat ve duhna rilru ka pu tlat mai,bakah nupui ka nei tawh dawn a, a tawp na a tan tal tiin hmuh leh ka duh rilru hle a,kan ințhen hnu hian zu in leh zeuh zeuh ka ching leh a,chu mi ni pawh chuan ka in leh phawt a,harh fim a ka awm vak tawh loh hnu chuan nunpuii te in lam chu ka pan ta a..

An in ka thlen chuan pawn lam ah anu chuan an varenda te chu a lo phiat mawlh mawlh a, rin aiin a lo upa ve ta hle mai, a lu ah kelsam pawh a lo țo ve nual tawh a, min hmu chu mak a ti ngei mai, a fanu awmna ka zawh chuan room ah a awm thu a sawi a, I he lo chuan inchhung lamah ka lut ta nghal a..

"Nunpui"

Min hmu thut chu mak a tiin a ham haih kher mai,mahse a hmel erawh a hlim ru hle thung..

"Enge I lo tih dawn a? Ve teh mial che chuan"

"Nunpui"

"Umm"

"Nupui ka nei dawn!"

"Maw, engtikah?"

"Thla thar 24 ah khian"

Mak a tih hmel kher mai, engmah a sawi zawm ta lo, hnuai lam a bih ta char char a,a rilru erawh a na ve hle tih a hriat, mahse hnem ka tum lo, ka duhthusam a thleng dik miau a, min tina tu ni miau hek..

"I theih leh I lo kal ve ang chu tiraw"

Kan tih khum leh sak a.

"Ka lo tum ang"

Zawi sap hian a ti a,a sawi zawh rual rual chuan wedding card chu dah in ka chhuak leh nghal,a u pawh a lo la haw hman lo a,a nu pawh be tawh lo chuan ka kal nghal vang vang..

Hun leh ni te chu danrual loh in a kal liam ve zung zung a, kan inneihni pawh a lo thleng ve ta reng mai, kan chhungte ve ve chu an phur tlang ngei mai, mahse keimah ah chuan kim lo riau awm in ka hre reng mai, dar a rik val val chuan biak inchhungah kan țhu țhap tawh a, a hnu ah chuan Ruatpuii te chu an rawn lut ve ta zan zan mai, nula hleitling leh ngo lam a ni a, a hmel in a lo zir bawk a, mothuam chu a in hmeh kher mai..

Kei,DENIS REMRUATFELA leh ka nupui tur LALRUATPUII chuan chu darkar rei lo te ah chuan Pastorin thu a sawi chhawn chu sawi chhawng ve zelin Pathian hma ah leh mi zawng zawng hma ah kumkhua a nupa ni tur in thu kan tiam dun chu a ni ta reng mai..

Kum 1 chuang kan inneih hnu chuan fapa duhawm tak mai kan nei ve ta a, kan lawm tlang kher mai, nun hi a ti hlim ve thlawt a, ka nupui hian min ngaihsak em a vangin sawiselna tur te hi a vang ngawt mai, min hrethiam em em a,nupui fel tak chu a ni ve a ni..Nunpuii pawh theihnghilh hlen lo mahila, ka hre chhuak em em ta lo,mahse a chang erawh chuan ka nupui nen ka tehkhin ru leh tlat țhin...

Zankhat chu room ah ka mu zal mai mai a,dar 10 bawr vel a ni ang,chhungte ho chu in hnuai lamah an la ri nak nak a,hla te ka ngaithla vel mai mai a, chutih lai tak chuan ka nupui hi hmanhmawh angreng deuh hian kan room lam a rawn pan chho hlawk hlawk a, kawngkhar a rawn hawn rual rual chuan,

"Denis,Nunpuii kha ila hria em?"

"Tu nunpuii maw"

Ngaihsak lem lo chuan ka chhang ve mai a,

"Denis, i hria tih ka hria lawm,I țhianpa khan a be thei lo che a, min lo be tawp a,tun mai khan a boral a rawn ti a nih chu!"

Chu thu thințhawng tak mai chuan min va kai tho rang em!,ka awi lo rum rum mai..ka țhianpa ka zawh chian lah chuan thudik a nih thu min hrilh zel bawk si,, awih harsa a va ni em..

Dik tak chuan khatia min tina tu a nih a vang khan tlawm ah ka la tlat pek a, keipawh in ka ngaihven zui duh ta lo reng a, mahse ka thinlung erawh chuan a theihnghilh tak tak thei ngai lo,chungte chu ka nupuiin a hre ve vek a, mahse min hmangaih avangin leh nunpuii ang mai a rilru tluangtlam leh mi rilru țha a nih avangin engmah ka hnenah a vui thu hi a sawi ngai lo,ka nupui bulah erawh pangai taka lan ka tum a, rilru na lo anga awm ka tum tlat thung..

An lumen dawn tho vangin a thlah nan tiin kal ve ngei ka duh a,ka țhianpa te in ah chuan ka kal phawt a,ka țhianpa chu thil pawimawh avangin a lo chhuak leh zawk a, ka nghak ta a,a nupui mawitei pawh a lo awm a, a chhangchhiat lai tak a nih vangin leh aiawh tur anpa a awm vangin a tuka kal zawk a lo tum a, pangai taka a awm kha min hmuh chuan a lungchhe angreng khawp mai, an room ah kal tura min duh avangin ka zui lut ve ta a..

"Denis mak I ti em?"

"Ti ve tho e"

"Nunpuii khan a hmangaih tak zet che sin"

"Mawite min hrethiam la, I unaunu pawh nise sawi tawh suh,khatiang lam kha ka ngaithla duh lo"

"Hrilh ngei tur che in min ti a lawm"

"Ka ngaithla duh lo"

Kan tih leh nghut takah chuan pawi tih hmel takin a chek tlak tlak a,

"Awle ka hrethiam e, engmah ka sawi lo ang,nunpuii khan a thih hma in I lehkha tur min kawl tir a, ka thihnu ah chauh I lo pe dawn nia a tih vangin ka kawl țha ta reng a,kha lehkha chu la rawh, chuan heipawh hi chhiar tel ngei ang che,I țhianpa chu tah hian lo nghak la,chuan lehkha hi lo chhiar ngei ang che"

Tihpah chuan rilru nat hmel zet chuan a chhuak ta nghal a, eng lehkha tak chu nimaw ka ti rilru nauh nauh a,ka lehkha tur zawk chu ka chhiar hmasa a..

"Hringnun par hun chhung hi a van reilo tak, chhum reilote lo langa, ral leh mai ang hian ka hria, a ni reng a ni, hnahlui te pawh an vanglai a pelh chuan an lo țil a, hnah thar in a lo thlak ve țhin a lo nia..

Hmangaihna te pawh a ni tho, inthlahlel leh ngai em em in an awm a maw tih lai hian an in țhen a, mahse hnahthar ang mai in hlim hun an nei leh țhin..

Tiang chiah chuan ka nunah I lo lut a,hlimna te hi ka ta a maw tihtur khawpin I lakah ka hlim a,kan hlim viau emaw tih lai chuan hnah hlui ang mai in ințhen a lo țul a, mahse hnahthar ang erawh chuan hlimna kan hmu ve thei tawh silo, hnah hlui angin kan țil a ngai vang vang ta mai si....

Kan pahnih a kan awm dun tawh chuan kan hlim dun țhin in lungrual takin kan awm dun țhin a nih kha tiraw,"ka hmangaih che a, ka kalsan ngai lo ang che" ti a min hrilh khan ka thinlung chhungril ber thleng in ka lawm a ni,min hmangaih ve tak zet tih ka hriat vangin.........Mahse engmah sawi lo in ka kalsan che a,I rilru ka tihnat sak che vangin hrehawm ka ti em em asin,ka țhen chhan che kha hrilh che ka duh țhin, mahse ka sawi chhuak ngam thlawt lo a ni e,engkim mai hi ka unaunu mawitei hnenah ka sawi vek a, ka țhen chhan che pawh a hrilh ngei ang che, I bula ka sawi tak loh avang erawh chuan min ngaidam dawn nia..

Nupui hial i nei tawh a,a tirah khan ka hrethiam lo țep mai, mahse keima thiam loh vang liau liau a ni a,dem theih i nilo tih ka hria,i lak ah ka vui lo, vui thei din hmun ah pawh ka ding chuang lo,hlim taka i awm hi ka duh ber chu a ni, hmangaih dang ka nei ka tih kha engmah lo mai a ni,ka laka i fihlim theih nan a hmanrua mai a ni,kan hlim chhung rei lo in nupui hial pawh i nei tawh tih hre mah ila, ka hmangaihna che chu a la pangai reng mai,mahse min dem lo hram ang che,ka hmangaih hmasa ber I ni a,ka hmangaih hnuhnung ber I ni bawk,englaipawh in ka hmangaih reng ang che...

Ka chungah engpawh lo thleng in ka chanchin i hriat hunah chuan biak tur ka awm tawh lo pawh a nithei,mahse I thiam loh engmah a awm lo tih hi I lo hrereng dawn nia, I hlimna hi ka duh ber fo vang...


Mal leh khawhar taka ka awm lai in ka duhthusam nang ka tawng che a...Ka hlimna te chu pangpar ang mai in a lo vul a, engkim mai hi ka tan a hlu em em bawk..Theih chu nise engtiklai mai pawh a I kianga awm kha ka duh in ka thlahlel tak zet mai...Mahse chung khuanu remruat chu dan rual a ni silo,ka hmangaih vang che hian țhenna biahthu hlan i țul ta si...Ka hmangaih che sin le, mahse a rem ta lo, a rem mawlh lo a ni e, tawrh thiam a har ngei mai, ti mai a in țhen hi zawng nghilh ni reng I awm thei dawn lo a nih hi..

I țawng ri te chu ka bengah engtiklai pawh in a cham reng a,I che zia te lah mitthla ah a cham reng mai si, engpawh chu nise ka hringnun hian mual a liam hunah chuan ka hmangaihna che pawh hi a liampui ve ngei ang,chu tiang a lo thlen hun ah chuan engmah hrilh lo a kalsantu che hi min dawn lo in hlim tak in awm tum ang che aw, kan hlimlaini te pawh reilote ah chuan hmanlai an chang thuai mai ang........

Mangțha vawng vawng lee...Denis.."

Dawt thu a ni lo vem ni,nilo,nunpuii kut ziak ngei chu ni si,min lo hmangaih reng tih na nimaw tiin ka ngaihtuah nasa hle mai,enge ka laka a zep tlat chu ni ang tih hriat ka chak kher mai, pakhat zawk chu ka en leh vat a...

"Au,
nang nen chuan kan tet lai ațang tawh in unau ang tak tak in kan in en țhin a nih kha,ka harsatna te pawh min chhawk țhin a nih kha,he thu hi sawi chhuah zen zen pawh ka duh ngai lo,mahse nang chu ka engkim a engkim i nih vangin min țanpui dan pawh i hriat leh ngei ka ring..,
Denisa ka hmangaih tak zet tih chu nangpawn I hriat kha,a ni pawn min hmangaih ve in ka hria, ka hlim tak zet a sin ka nun tihlima ka kianga a awm kha...
Mahse harsatna te chu mihring te tawrh tur a ruat a nih vangin ka chungah a thleng lo thei bik silo, kan inngaihzawn hnu reilote ah khan ka hrisel lo riau a, damdawite ka ei ngial pawn ka țha thei silo, a tawpah chuan ka inentir tawp a, thisen te kan test a, mahse mitin mai in kan duh loh leh a thleng ang tih kan hlauh țhin kha vanduaithlak takin ka chungah a lo thleng ta si! HIV positive ka lo ni reng tihna nih chu!!
Ka awi thei lo, mahse doctor te meuh in an sawi chu thudik ngei a ni si, ka kai chhan pawh thisen thianghlimlo ka dawn ațangin a ni..Ka hnual ta rawih mai,Denisa chu ka rilru ah a awm nghal, mahse engtinnge ni ta ang le,ka nu nen chuan kan mangang takzet a ni, zep ruk reng chu a harsa viau a niang, A nu pawh engtin tin emaw in a lo hria a, kan hnenah lo kal in a ni nena ințhen turin min duh thu a rawn sawi a, na ka ti takzet,mahse a ngaihdan kha thil dik lo a ni hauh lo, tunge mahni fapa te positive nupui ah neih tir duh ang, mahse țhen kha ka duh lo tak zet a sin,ințhen ngai pawh nise aman min țhen hmasa sela ka duh a, mahse duh reng vang nilo in ka dinhmun avangin engmah nisi lo hian ka țhen hmasak a lo ngai ta si...
Min hmangaih ve tak tak ni a ka hriat avangin ho te chuan min țhen ka ring bik lo, chuvangin thikthu hmangin ka țhen ta mai a nih kha..engtiklaipawh khan ka ngai reng țhin...
Ka natna te hi hrilh ta ila eng ang in nge min ngaih ang le, min hmangaih tak tak a nih chuan min ťhen phah ka ring lo,ințhen lo in in zui ta reng ila, anu in engkim a hriat avangin a phal lo reng mai dawn a, bakah mi nun tichhe tu nih hi ka thil duh lo tak a ni bawk si,
A nih loh vek pawh in ka natna chu hria se,a laka ka insawifiah nghak lo in a thinrim viau ngei ang, ka nun tihlim țhin tu leh ka hmangaih in min thinhrik leh min phatsan lai hmuh chu ka tan thil nuam a ni dawn silo..

Au, ka rilru a buai țhin hle a sin..

Dik tak sawi chuan ințhen mahila ka thinlung chuan beiseina chhe te tal a lo la nei ve a ni chek a niang, min hmu tura a lo kal kha e ka hmuh rual rual khan ka lawm tak zet a sin, ka dinhmun hrechang lek lo a a kianga awm kha ka duhthusam ber a la ni fan a, mahse ka rin loh leh ka beisei loh in nupui a neih tur thu min hrilh a nih kha,chuan engmah sawi lo in a chhuak leh nghal a nih kha,,aw kha mi țuma ka rilru nat zia kha,kha minute reilo te kha chatuan tluk hial in hrehawm ka ti, mahni hmasial vangte pawh chu a ni mahna,nupui nei lo a a awm tih ka hriat khan ka thla a lo muang ve a,mahse nupui a neih tur min hrilh erawh kha chuan engkim mai hi mumang ang lek in ka ngai,ka hmangaih ka chan dawn tak tak tih ka ngaihtuah phei chuan hrehawm hi ka ti ngawih ngawih,ka țap hawm hawm mai,mahse a sawt tawh lo..


Ka beidawng tih ka nu pawh chuan a hai lo, ka nu chuan councelling class neihna hmunah min hruai tawp a, mahse ka hlawkpui ve sin,min councelor tu in a sawi kha ka hrechhuak,"hmangaih ten malsawmna an chan theih nan hmangaihtu'n a tuar a țul si țhin"tiin min fuih ta...ka thlarau a dam theih nan tiin min țawng thlamuana, țawngțaina te min neih sak a, ka thawl hawk mai..
Pathian hnenah chuan rilru na lo tur in vawi tam ka țawngțai a,engkim mai ka hriatthiam theih nan ka dil țhin, amah belh tlat mai loh chu tihtheih dang ka nei lo...
Ka țawngțai na te chu chhan in a awm a, ka ngaihtuahna te pawh a lo dang a,ka nuna thil thleng zawng zawng te hi ka pawm thiam vek mai...

Mahse ka natna in min hneh tak em avangin leh natna hrang hrangin min tlakbuak chhoh avangin reilote chiah hun ka nei tawh tih doctorin ka nu bula an sawi ka hria,U, kei chuan ka chanchin hi ka hrilh ngam lo law law a ni e,I hnena ka sawi hi I lo hrilh mai dawn nia,,,Denisa hi ka dem lo,a lakah pawh hian ka vui lo,thu dik hre lo in a thinrim a ni mai a, chu pawh keima thiam loh vek a ni,I lo hrilh a nih pawh in ama inthiam lohna tur chuan engmah I lo sawi dawn lo a nia..

A tira engmah ka hrilh loh che vangin min ngaidam dawn nia, ka rilru kha a buai ve em a tin a ni..

Nang chuan pasal țha deuh leh fate I nei a, hlim tak in siam zel ang che aw"...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » May 14th, 2018, 9:01 pm

NUNPUII

Chapter-3 (Last)
By
(Mahruaitei Pachuau)

Ka thu chhiar zet chuan min va tina em! Ka mittui te chu dan rual loh in a lo sur a, nunpuii chunga ka chet dan chuan min tina hle mai, mahse ngatinge min dem miah lo le, engkim kha ama thiam loh vekah ngai in min demna thu pakhatmah a sawi silo, a natna te chu ka lakah a sawi ngam lo maw, ni e ka mizia a hrechiang em a,ka thinhrik mai a hlau a ni ber mai,mahse ka hmangaih tih a hai bik lo, min hrilh chu nise ka hmangaih vangin ka țhen phal dawn lo tih a hria a ni, mahse min hmangaih vangin ka lak a țangin a inthiarfihlim ta mai si, nunpui,keimah vangin I va tuar nasa em!...

"Denis, tuar dan I thiam a ngai"

Ka țhianpa chuan min lo en reng mai, a bulah mawitei pawh a awm..an lo luh lai pawh ka hre chang lo a lo nih kha..

"Mawite, ka tihpalh tak zet a ni"

"Nilo, ka hrethiam che, midang pawh nise an ti ve tho ang"

"Mahse ngatinge a ni kher khan kha natna kha a tuar le"

"Denis, nichin khan kha thu kha hrilh che ka tum chu a ni,in in hriat hma lawk khan nunpuii te chu zin tum in sumo ah an chuang a, mahse chu sumo chuan accident a tawk a,nunpuii chu in hliam nasa ah a țang ve hlauh mai a, a biak theih loh a, damdawiin hnai berah kalpui nghal a ni a, thisen pek vat vat a lo ngai bawk si,damdawiin changtlung tak a lo ni lem lo nen thisen a mamawh bawk em avangin thisen pe theitu an hmuh khan thisen pawh test lem lo in an pe ta nghal mai a,mahse.....mahse... kha..kha thisen a dawn chiah khan he natna hi a dawng tel nghal a ni"

A țap hawm hawm ta mai, mawitei lungchhe lutuk chuan ka thinlung a fan a, ka zawi nguai mai, mumang ang ruai in ka hria,ka țhianpa'n sana a en chuan dar 1 a lo pel tawh a,nunpuii te in lam ah chuan kan chhuk thla ta nghal a.

An in kan thlen chuan mi an lo tam khawp mai,in chhung ah pawh an leng lo hial a,khawhar hla an lo sa dup dup mai a,a hmel chu hmu duh viau mah ila thil mawi a nih hrih loh avangin pawnah chuan kan țhu ve ta a,ka ngaihtuahna te chu a vak thui ngei mai,nunpuii te in khawhar hla sak nan an hmang ta mai te chu ka hrethiam thei hlawl lo,khawhar hla an sak an sak chhung chuan khawvar in a rawn zui ve nghal a, nula leh tlangval te chu an țin sap sap a, kei leh ka țhianpa chu inchhung lam ah kan lut ve a,...

Mahse engkim mai chu a dang zo ta vek mai,kil khat ah chuan anu te leh midang te chu an lo awm nual a,an awm na lam ah kan kal hnai a,nunpuii khum a a mu ka hmu chu ka thinlung chu chemte a vih ang mai in a na zawk zawk thei, ka awi thei lo,a hmel chu dang bem mai a, a cher bawk, mahse a hmelțhatna chu a ngai reng mai,
"Bawihte tho ta che, i hmangaih em em kha i kiangah a lo kal a sin,i ngai țhin a ni lawmni"
tiin a nu chuan min lo țah khum a,mipa mah ni ila thihna meuh in ro a rel tawh chuan ka in sum thei bik ta lo
,"Nunpui, nunpui ka lo kal hi, min chhang ta che"
,tiin ka au mawlh mawlh a,nidang ang chu nise rang takin ka kohna chu a chhang ngei ang, mahse tun țum ah chuan ka biak a hre lo a, min chhang hek lo,engtikah mah min chhang tawh ngai dawn lo...ka hmangaih thu hrilh dawn mahila,ngaithla thei dinhmunah a ding tawh silo,tui takin kumkhua atan a muhil hlen tawh tlat si...hlim hmel taka min chhawn țhin tu, ka lungngaiha min hnem a hmangaih leh zaidawh taka min dawm țhin tu chu ka hmangaihna thlahlel in tiang hian nimaw min lo hmuah tak le,ka inthiam thei lo, tun a țanga reilote ah chuan ka hlimpui țhin leh ka hmangaih nunpuii chu piallei dai ah phum in a awm tawh dawn a ni...

Min kalsan a țang chuan ka nun chu a ruak hle mai.ka nu lakah chuan ka thinrim viau dawn a,a ni pawh a inthiam lo hnuhnawh ang reng khawp mai,a thiam loh a ni pawh a ni hran bik lo, nunpuii pawh khan a dem bik lo a nih kha,mahse a chang chuan nunpuii khan engatinge min hrilh mai lo le tiin ka ngaihtuah țhin, mahse mi nuntluang leh mi rilru tihnat duh lo mi a nih vangin min hrilh duh lo chu a âwm ve tho si, min demna thu tak ngial pawh a chhakchhuak lo a nih kha le..engtiklai mai pawh hian nunpuii chuan ka thinlung ah hmun a chang reng mai...Ka nupui chuan ka awmdan chu a hai lo,nunpuii ka hmangaih dan zawng zawng pawh a hria,kan inneih hma ațangin ka hrilh hrim hrim bawk a, ka lakah vui hmel a pu lo, thinrim hmel a pu ngai lo bawk, min hrethiam zawk em em țhin..

Vawikhat chu chawhnu lam ah hian thlan ah chuan ka kal a, thlan pawh an ti nalh kher mai,a chang hi chuan nunpuii chunga thleng hi awih loh chan ka la nei țhin, ka țhu ta reng a..


Kan nunhlui ka dawn kir vang vang a,nunpuii hi ka tawng lo ang tih ka va hlau leh hnuhnawh em!
Ka hun liam tawh thlir let chuan mi fel leh țha ka ni ngai lo,hmangaihna hlutna pawh ka hrethiam ngai lo, ka nun chu ka hmang liam ve tawp tawp mai țhin a, mahse ka thinlung, chhunglam leh pawn lam ti dang lam vek thei tu NUNPUII chu ka tawng ta ani..

A ni chuan hmangaihna awmzia te hringnun hlutna te min hriattir a,Pathian ka belh theih nan ka tan a țawngțai fo țhin,a kianga awm kha a thlakhlelh awm țhin a, ka hlinna min thlentu leh ka hmangaih hmasa ber a ni..

Mahse hrinnun chu hringnun a ni miau a, famkim lohna khawvel tih takah ka nun thlak danglam tu chu laksak in ka awm a, chu mai pawh ni lo in kumkhua a hmu leh tawh ngai lo turin min laksak hlen ta si!

Ka chunga thil thleng hi ka hrethiam lo fo țhin,nun ngui leh chau a ka awm laiin a ni chu min thlamuan turin ka kiang ah a awm a, mahse kei erawh chuan dinhmun chhe bera a awm lai pawhin a kiangah ka awm ve thei silo..chu tih a hnekin a tana ngaihthlak nuam lo tak tak turin thu ka chhak chhuak zawk si, eng ka hria nge ni....

Mite pawh an ințhen a,hmangaihna vangin an in kal tir mai a,nunpuii min țhen chhan chu hre lo mah ila,țha tak khan lo kal tir ve mai ila tiin ka ngaihtuah leh țhin..mahse țawngkam mawi lo a ka țawngkhumna te chuan min ti na leh si...
Nupui neiin fa hial te pawh ka nei tawh a, mite ngaih ah pawh nunpuii ka sun dan chu a mawi tawh lo hial ngei ang, mahse mite chuan eng ang chiah in nge ka thinlungah hmun a chan țhin a, engtiang chiah in nge ka nun a tih danglam tih hi min hriatthiam pui ngai dawn loh avangin ka hmangaih tan a nih chuan tiin mawi leh mawi lo pawh ka thliar hrang thei lo chu ni..
Nunpuii awm na chu e, engtiklai mai pawh a kan duh loh leh kan suangtuah ngam loh ah an zalh ta si..Kan hlim chhung te chu a reilo viau na a,mahse ka thinlung ah thu tam tak a sawi hman a, thil țha lo tih duhna rilru ka put chang in a țawngțai lai te chu ka mitthla ah alang kuar a,ka țhulh phah leh țhin..

Ka bulah awm tawh lo mahse a hlim thla erawh chu ka kiang ah awm tlat in ka hre țhin,tlai lam ah chuan ni tla tur êng no sêt mai chuan chuan râl leh lam tlâng te chu a chhun ta raih mai a.....

"Denis ,enge hre reng tur leh chhinchhiah tura ka duh tlat che kha?"

"I awm dan tur chu LALPA chungah nghat la, amah chu ring la, aman a ti vek ang"


Kan in hriat țan tirh ațanga min fuihna thu hi ka thinlung in a theihnghilh ngai lo..engtiklai mai pawh in ka vawng a, ka hre reng țhin..

"Nunpui,fam dai rial min chan san mai hi tawrh thiam a har ka ti ngei mai,mahse engkim vangin I chungah ka lawm e, thiam lohna ka neih chung pawh in min dem lo a, dem a hnek in min fuih zawk si,min hmangaih vanga ka tana I tawrh na zawng zawng te hi engtikah mah ka theihnghilh lo ang, nang ka tawng che hi ka inchhir lo, hringnun hlutna min zirtir avangin ka lawm e,keipawh hian ka hmangaih tak zet che, mahse he lei ah chuan Khuanu'n kan pahnih tan rem a lo ruat mawlh silo,i duh ang chuan ka nun pawh țha takin ka hmang ang, nang ka hriatrengna tur che a nih dawn a vangin...I țhatna te,I hmangaihna te chu piallei dai ah liam pui tawh mah la,ka damchhung zawngin hriat I hlawh tawh ang,thlamuang takin chawl ang che...Ka hmangaih che,ka hmangaih reng che..."

Ti chungin nunpuii an zalh na hmun chu ka kalsan ta a ni...


"I hlimthla thlirin kan nun ka dawnkir a..

Kan duhaisam zawngten mual min liam san mahsela..

A aia nuam van in ah kan in tawk leh dawn nia...."


"Vanin nuamah lungngaih a awm lo an ti...

Vanram nuam ah ințhen a awm tawh lo an ti....

Chu hmun ah chuan min lo nghak tih ka hria...

Vanin nuamah kan in tawk leh dawn nia...."


A tawp ta.....

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)