☆RUATSANGA☆ By M Dingdi Pachuau (Completed)

[Ngaia]

TargetPreview.jpg (9.21 KiB) Viewed 53685 times

RUATSANGA - 1 By Dingdi Pachuau

( Story ka vawikhat post-na a ni a,min lo chhiarsak ve hram ru. Ka inbuatsaih nasa ve khawp mai, chhiar peih loh pawhin a sawisel theih tho ania, a leng vek aw)

A story tak hi khawiahmah copy phal a ni lo a, in group ah in post ve duh anih chuan a link hi share ula, a story erawh chu hetah chhiar tir rawh u whatsapp ah copy daih lo a, a link atanga an chhiar hian a story ziak tu ten hlawh an nei zel thin a, in copy chuan a ziaktute hlawh ru tihna in ni. A link share hi chu phal vek a ni e.
A link share dan: viewtopic.php?f=2&t=917
A share dan tur nen lam kan inkawhhmuh chung pawh a, a story full a whatsapp lama la copy/paste lui in awm anih chuan Police-ah FIR kan thehlut anih pawhin nangmahni chochhuah liau liau a ni ang...
Copyright ©
All rights reserved
www.storyfb.com


Vawiin chhun dar 12 hian ka hmu dawn a ni. Ințhenna tifel turin ka hmu dawn tih amah pawhin a hre tawh a, kum ruk lai kan inhmuh loh hnuah hian engtiangin nge min lo dawnsawn ang tih chu ka hre chák phian. A thinrim viau ang em? Nge a lo hlim viau zawk ang le? Nupui tel lo va nun hman chu nuam a lo ti phian maithei bawk a.

Maimichhîng vang vangin a hmêl awmdan tur ka ngaihtuah a. A hmel, chhe lo tak leh pâ zet kha.. Ni lo, chutiang ka ngaihtuah tur a ni lo. Ka chhuahsan chhan kha ka hrereng tur a ni. Ka hmuh hunah ka bêng pawp mai ang em? Nge ni a,ka hmanraw hmuh hmasak berin a hmâiah ka vawm chawrh mai zawk ang?

Ni lo, fîm taka rilru ka hman a ngai.

Hmm....ka thinrimna so but but chu ka thunun a ngai a ni. Hahdam tak leh zâidam thei ang berin ka hmachhawn zawk tur a ni ang. Chuti lo chu, a thin ka tihrim vaih zawng, ințhenna a tifel duh lo ang. Mamawha pantu zawk ka ni tlat, ka inbengdaih a ngai. Ințhenna a fel hma leh ka zalên hma a ni mai a, chuvangin rilru fîm tak pua ka tihfel thuai a ngai a ni.

******flashback*****

Banga frame mawi zeta thlalak intâr chu ka en reng a. A mitmu uk kharh, nalh zet leh fin hmêl zet chuan ka mit a la chiang a ni. A mithmul dum buk chhah zet chuan a tilang zahawmin a luhlul ve thawkhat ang tih ka ring thiam mai a. A hmui mawlh mai chu... A mawi tâwk chiaha chhah niin fawh nuam tâwk chiaha pan a ni thung lawi si. Fâwp ta ila, thawnthu ka chhiar țhina a changtupa ang maia fawh nuam a ni ang em?

Thlalak chu ka chûl kual dan dan a, a sam dum hlap, ngîl zet ațang chuan chûl kualin a hmuiah chuan ka tâwp chat a. He a hmui ngei mai hi...ka fâwp châk takzet, ka insûm thei lo,zãwimuanga hnaih zêlin a hmuiah chuan ka fâwp ta zoh a.

"Dî-te?"

Ka ding ngîl zawt mai. Ka phu nasa bawk nen, frame chu a che lawih a, sailungvar chhuatah chuan a tla keh darh ta chuaih a.

Ni lo, Lalpa leh!! Frame ka tikeh.

Ka hmâi chu ka kut pahnihin ka hup vang vang a, ka zak bawk si. Buaina ka hmachhawn chu a ni ta reng mai. Frame ka tihchhiat chu thil man to tak ni lo hrâm teh se.

"E khai!!" Nu Sangi chuan pawitih hmêl tak leh awka chhuak ațanga lâwm vak lo tih hriat hian a ti țhat a. Mahni lo maha inthiam loh nakalaia. Mahse Nu Sangi hi a sual vak miah lo.

Kan pahnih hian he inah hian hnathawka chhawr kan ni a, mahse Nu Sangi chu a thawhna a rei tawh, kum sãwm a chuang tawh daih. Ka hnathawh hi min enfelsak țhin a, a mittlun loh lai a awm chuan ka tinawn leh țhin. A strict viau nain a rilru a sual hran lo va,min duhsakna kawng kawngah hi chuan a fel em em.

"A pawi ka ti takzet a ni, Nu Sang. Ka châwi mai ang, ka lei phâk a ni ang tiraw?" ka ti sap a, hrehawm ti zet hian ka kut chu ka hûm nghet sauh sauh a. Ka hlawh tlêm tê hian a lei pha meuh ang em pawh hriat va ni suh. Mahse, ka tihchhiat a ni miau si a,ka tih ngei ngei tur a ni. Ka rilru a hah kher mai. A man zât lah hriat a ni si lo, Lalpa, thil man to tak nihtir lo hrãm rawh aw.

"He frame hi thil man tlâwm tak a ni lo asin, i lei pha lo ang tih ka hlauhpui hle mai che. Mahse, lo lungngai lutuk lo la, Pu hnenah ka sawi ang a, a hrethiam maiin ka ring. A fel lutuk ania"

Ka inthiam lo takzet. Vawiin hi he ina thla hnih ka thawhna chiah a la ni si. Chutah, frame man to tak ka tichhe leh ringawt chu a nia. Pu chu fel viau mahse a lungawi kherin ka ring lo, chubâkah ka la mi thar si. Ka pa erawhin a hriatchhuah loh hrâm ka beisei. A hrechhuak anih chuan a thin a rim ang a, kut min thlâk leh hrep mai ang. Chu thil thleng tur chu ka ngai ngam lo.

"Dãrthlalang keh them hi lo tifai la, inchung lamah frame dang hman loh ka han zawng chhin ang e"

"Ka lawm e, Nu Sang. Ni dangah chuan ka fîmkhur viau tawh ang tih ka tiam e"

"Um, fîmkhur hi a ngâi viau reng asin. A chhan chu he inah hi chuan thil man to tak takin min hual khup si a"

Nuam lo ti zetin ka bu nghat a, Nu Sangi kal hnu chuan dârthlalang keh them chu ka chharfai nghal a.

Hna ka thawh âwm tãwk zawng pahin he inah hian maid angin ka thawk a, mahse zan ka riak ngai lo thung. Hna hrehawm tak a awm lêm lo va, chuvang chuan hrehawm ka ti hran lo. Ka pa hi he in neitute huan enkawltu-ah a țang a, he hna pawh hi ka pa min hmuhsak a ni. Ka pa chuan huan enkawl bakah wiring, inchung siam, sink siamthat leh hna hrang hrang a thawk tel vek țhin.

Pawl sawmpahnih ka pass hnuah college kal zawm duh viau mah ila, ka pa hlawh ringawt ațang chuan ka chhunzawm thei lo tih ka hria a, chuvangin he ina maid anga thawh pawh hi ka hnial thei lo a ni. Ka hlawh hi tam lo mahse ka khâwl zel ang a, college kalna tur senso chu ka intum ve thei mai ang. College kal kher lo pawhin DIET-ah ka training thei ang a, primary teacher nih hi ka lo dream țhin a ni bawk a, ka dream chu ka puitlin thei dawn a ni. College kal zawm pawh ka châk tho, college life an tih fo pawh hi ka tem ve châk.

Rei lo te hnuah Nu Sangi chu frame kengin a lo chhuk a, dârthlalang keh them ka lo paihfâi vek tawh avangin thlalak chu frame-ah chuan a vuah a,bangah chuan a târ leh ta a.

"Saron room-ah ka han hmu a, hei a infit tâwk chiah lehnghal a, a lawmawm hle mai"

Saron room....Saron room chu room nuam tak a ni tih ka hria. Bathlar zâu tak neiin saron par chi hrang hrang, rawng inang lo tak tak leh par dan pawh inang lo tam tak a par vul chûk a. Room chhûng chei dan hrim hrim pawhin mit a la hle a, lal fanu room ni âwm a mawi a ni. Tu room nge ni ang aw tiin ka ngaihtuah fo,vawihnih chu ka tifai ve tawh.

Frame banga a târ fel hnu chuan inthlahrung tak chungin," Nu Sang, khawngaih takin thil eng emaw min tihsak leh thei ang em?" Ka ti sap a.

Mit ko sân âk pahin," Eng thil nge ni ta?" A lo ti vat a.

"Thil thleng hi ka pa lakah kan zêp tlat thei ang em? A hriat chuan a thinrim ka hlau si a, kan zêp thei ang tiraw?" A hriat chuan min vaw dawn chiang sa.

"Tehreng mai,a hre miah lo ang" nui sâng chungin a lo ti a, ka thaw huai mai.

"Ka lawm e,ka lawm takzet e"tiin ka kuah chawt a, ka nu ang hialah ka chan a ni.

Ka hnung chúl hauh hauh pah chuan,"Rsa thlalak i fâwp lai kha ka hmu reng che asin" a ti ta.

Mak ka ti lutuk chu ka meng phar nasa ngawtin ka ring. Ka zak lutuk chu ka sa pup pup a,ka kuahna chu thlahin ka biang chu ka hup ta ringawt a.

"Ni lo, i hmuh ang kha a ni lo. Bawlhhlawh kâi ka chhêmfai zawk alawm"

"Tak tak maw?" A mit ko a sân âk âk a. "Ka hmu reng che alawm. A ãwm lo hran hleinem. Rsa hi chu a hmelțha a, chutah chhûngkaw rochuntu tur a la ni zui. I lo star ru viau anih pawhin nangni ang kumah chuan a zahthlak hleinem. Mahse beisei sang lutuk lo la,chuti lo chu nangmah kha i intina mai ang. A chhan chu Rsa te ang tlangval class sâng chuan class lo tak hmeichhia chu a duh dawn miah lo ania, chuvang chuan nangmah i invêng lâwk dawn nia"

Um, dik chiah. Nu Sangi sawi chu a dik chiah a ni. Kei ang hmeichhe dinhmun hniam lutuk hi...hna lamah rilru pe zawk teh ang.

#######################

Engtin ngai ve ang che maw?
Hlân che ila hmangaih biahthu.....

Kut bêng ri avang chuan ka zâi tâwp chiang kher mai. Pu ber (in neitupa ber) ka hmu chu ka zak kher mai, thlalakah chuan ka hmu fo. Mahse hmaichhanah tak chuan ka hmu tam lo khawp, hmuh nuam pawh ka ti lêm lo. In ka tihfai lai hian ka hmu ngai lo tluk a ni, room-a a inkhung bo loh leh a chhuak daih zel.

Bûk nghat nghat pah hian,"I zâi thiam hle mai" a la ti zui.

Ka hmai chu a sa vat vat a, ka beng pawh a ling țha khawpin la ring. Library ka tihfai lai niin a reh bawk si nen, phûr taka hna ka thawh theih nan zâi ka ni reng a ni.

"Ka lawm e, ka pu. I awm tih ka lo hre miah lo va, min ngaidam rawh" tiin puanchhia leh funiture spray bur chu lain ka kalsawn nghal a. Nu Sangi hian in neitute awm lai chuan an awmna tifai lo turin min hrilh fo țhin.

Kawngka ka pêl țêp tihah chuan," Kal suh, i tihtur ti zo phawt rawh" tiin min ko ding a. Chair-ah chuan țhuin,"Nuna fanu i ni tiraw?" tiin min zawt zui nghal a.

"Aw, ni e, ka pu"

"Hetianga fanu hmelțha leh záithiam tak hi a nei tih ka lo hre miah hleinem. I aw a mawi ka ti hle a ni" chair chu nghêng ar arin min en reng a.

"Ka lawm e, ka pu"

"Mizo idol/ icon-ah te hian tel ve la?"

Min hmuhsit vânga sawi chu ni lul suh se. A hmelah lah chuan chutiang lang miah lovin a tih tak hmel viau bawk si.

"Ina ka zâi mai mai țhin bâk, hmun dangah ka zâi ngai lo, ka pu"

"Bathroom-ah i tihna a ni thei ang em?"nui chungin a ti leh a, kei pawh ka nui ve ringawt a.

"Chuan, Bawihi, i hming le?"

"Dingdi Pachuau"

"I hming chu a common lo hle mai, a mawi phian bawk si. A nih leh, i kum zat te?"

'Kum sawmpariat ka tling țêp, ka pu"

Eng engemaw min zawt ta nual a, kan titi ta hrep mai. Ka lehkha zirna te, zirzawm lam chungchang leh kan chhungkaw chanchin min zawt țeuh mai. Hna lâk tura interview hi ka inchan ber.

"Eng ang hla nge sak nuam i tih ber?"

Leh ta daih chuan... mahse a lawmawm ve reng reng e.

"Hla hlui lam hi ngaihthlak nuam ka tih bâkah sak pawh a nuam ka ti"

"Ţha hle mai, nih leh hla pakhat min sak sak thei ang em?"

**********************

A tûk zîng ațang chuan Pu ber tûkțhuan ei laia newspaper lo chhiarsak chu ka hna pakhat a ni leh ta. A chhan chu a mit hi a chak tãwk tawh lo hle a, chhiarsak mai turin min ti a,a hrehawm lêm lo nen, phûr tak chuan ka chhiarsak a.

A phone a rawn ri dar dar a, a kekawr iptê ațanga phawrhin a chhâng nghal a.

"Hello, Bawiha?"

A tupa Rsa a be chiang. Ka lung phu a lo rang ve ringawt a, ka lo phúr ve viau bawk.

"Engtikah maw? Aw le, ka lo kal ang"

An inbia chu ka lo ngaithla ve reng a, newspaper lo chhiar rîk thu awm hek suh, an pûtû inbia hre theia ka lo awm ve ringawt pawh chu ka lawm tâwk ve em em a ni. A aw ri hriat ka châk hle mai. A thûm deuh ang nge, a sîn deuh ang le? Ni lo, a sîn lo ang ,a hmêl nên a inhmeh thei lo. A thâwp deuh sat ang a...a ni thei lo, cool reih rawih, zâwi lam,aw ki hniam reih rawih lam a ni ngei ang, chu chu a hmêl nen a inhmeh ber.

"Ka tupa Rsa a nih kha" phone dawhkan chunga dah pah chuan a ti a. "Kar leh thawhlehni khian graduation day an hmang dawn a,min rawn hrilh a nih kha. Delhi-ah sumdawnna lam a zir a, hetia a zo thei tawh mai tur hi ka lawm takzet a ni. Ka upa ve ta a, ka thachhang dâwltu hi ka mamawh ve tawh a ni," a ti barh barh a.

"I lawm hle dawn a nih chu"

"Tehreng mai. Naupang smart tak a ni a, mahse a châng chuan a tihmawhin a luhlul hle, dân ka siam pawh a bawhchhe ve țhin. Boxing leh karate a tui hle a, a thiam viau bawk. A thil tih țhin zînga ka duh theih miah loh chu bike-a chak taka a tlân țhin hi a ni, ka hâu fo a, a sim chuang hlei lo va, a chetsual ka lo hlauhpui țhin vang ania"

A tupa chanchin tui taka a sawi chu ngun takin leh ngaihnawm ti takin ka lo ngaithla reng a, a chanchin ka hriat tam poh leh ka duhna a zual zel ni maiin ka hria.

A chhe lo tih chu a thlalak ațangin a lang reng a. A taka hmuh ka chãk viau a ni. Ka hmuh hunah engtin nge ka awm ang? Ka nervous over ang em? Ka buai vek ang nge, ka khawng reng zawk ang? Fb leh IG lamah lamah stalk ka tum lahin ka hmu zo reng reng lo. Social media lam hian a lung a lên tehchiam lo pawh a ni mahna.

Nu Sangi leh ka pa hnên ațangin Rsa pu, a nu leh pa chanchin hi chu ka hre nual tawh. Rsa nu leh pa hi kum riat an inneih hnuah an ințhen a, Rsa pa hi Rsa pi leh pu fa neihchhun a ni. Tunah Champhaiah nupui dang neiin sikulah a thawk a,an harsa lo viau. A pa sumdawnna hi a tuipui thlâwt loh avangin a pa pawhin a tilui duh lo reng a ni. Rsa nu ve thung hi chu eng emaw laia Miss Mizoram lo ni pha ve ngat kha a ni a, mi zînga inlâr nuam ti chi leh chhe lo tak mai a ni. Fashion a buaipui hle a,IG lamah pawh a lâr phian. A bialpa Bank Manager,Aizawl ami nen an inkawp nghet viau. Rsa hi chu a pi leh pu bulah seilianin anni hian an enkawl ta a ni

[Ngaia]

RUATSANGA - 2 By Dingdi Pachuau


Zing ka tho hma țhin lutuk hi ka ning ve thlâwt. Zing dar 4:30 ah ka tho zat zat a, a chhan chu Pu berte in hi kan in nen a inhlat em avangin ka inbuatsaih hma a ngai țhin a ni.

Pu ber pawhin min lo chîk riau a ni ang, an ina riaka awm ve rih mai turin min râwn a. Ka pa erawh chu huan enkawltu nia zîng taka kal ve kher a ngaih loh avangin riah ve kher a ngai lo a ti pawh a ni mahna. Ni lênga thawh ni pawh a nei meuh si lo a. Pu ber min râwn ang chuan kei pawhin riahchilh mai ka duh, zîng lutuka thawh a ngâi tawh lo mahna. Nu Sangite bulah ka awm ve thei mai anga, a zia phian ang. Room ruak pawh a la awm tho sia.

Nu Sangite chenna hi Pu berte in atangin a hnâi ka tih tawh kha, Pu berte compound vek niin hnathawkte luah atana an sak a ni bawk. Chuvang chuan fin ve mai pawh ka inthlahrung duh bîk lo a ni. Mahse Nu Sangi hnena Saron room, ka room tura ruahman tura a hrilh chuan mak ka ti kher mai.

********************

"An inah i riak ve ang maw?"

"Chu chu a sawi dan chu a ni alawm"

"Engngati nge? Sangite chênnah i awm thei mai lo'm ni?"

"A thu hnial ka duh bîk lo alawm"

"A ina riak turin ka duh lo che. Sangi chu ka lo bia ang a, an ina riak ve mai turin"

"Ni lo, ka pa. Chutiang chu ti suh, a thu hnial ka ni dawn asin"

Ka pa thu ka hnial avang chuan vuak ka tuar leh ta. Kum ruk kal taa ka nu min chhuahsan hnu khan ka pa nun chu a buai lehzual a. Eng emaw hlekah hauh leh vuak ka tuar ziah, a chhan ka hre ngai lo. Ka nuin min chhuahsan atang khan hma lam pan tumna leh inthlak danglam tumna hi a nunah hmuh tur a awm lo reng reng.

***********************

Ka phone ri mai mai chuh!

Rûm nghat pahin banga sana intar chu ka en a, zing dar 5:30 chauh a la ni. Pu ber a awm lo chuang lo a, thawh hma viauna chhan tur ka hre lo. Tun ang hunah tu tehlulin nge min rawn phone ang?

A rik rei loh avang chuan khum dûp nuam takah chuan ka han inlet kual a. He khum nuam tak hi thawhsan ka huphurh lek lek țhin, ni rei lo tê chauh la mu mah ila. Room lah hi ka duhthusam. A chhunga furniture lah hi a mawiin a to dawn tih a hriat hliah hliah vek a. Parda fual hnalh, man to tih hriat zet inzâr hnalh lah hi a mawi bawk si. Kan ina ka room ka mitthla a, tehkhin phâk a ni hlawl lo. Thawnthua lal fanu ang maiin ka inchan hial reng a, a nuam ka ti takzet.

Phone bawk chu a lo ri leh a.

"Hello?"

"Dî-te, i tho tawh em?"

"Tho têp,Nu Sang. Eng nge ni ta?"

"Pu berte lo thlen ni kha ania, an lo zîng chhuah dawn sia, ka rawn kâitho che. Rsa room kha tihfai țhat leh vek a ngai dawn a,a rawn haw tel dawn tawh avangin. Inchhung chêt ngai nen,I buai lutuk ka hlauh avangin ka rawn hrilh lâwk che"

Ni dawn tak. Pu ber lo haw ni chu a ni ngei mai. Mahse Rsa a lo haw tel ve dawn tih ka hre miah lo. Rsa a lo haw dawn, he inah hian a lo haw dawn.

Ka tho rang kher mai. Phûrna mak tak sawifiah thiam rual lohin min tuam a, hmaichhanah ngêi ka hmu thei dawn ta. Ka phûr lutuk leh helhhawlh lutuk chu ka za chung maiin ka hria.

Inchhung chêt tur ka ti zo ta. Rsa room-ah ka lut nawn leh a, muangchãngin ka hrufai nawn leh vek. Sawisel tur a hmu ang tih ka hlau a, engkim chu duhthusama faiin hmu se ka duh.

Ka tifai zo chiangkuang ta bawk a, puanchhia leh furniture spray bur chu ka la a, room rawn pan chho thawm ka hriat avang chuan ka pên chu ka ding chat mai a.

Lalpa, Rsa a ni ngei ang.

Kawngkhar a rawn ri a,min hmuh ka duh loh chuan ka bihruk vat a ngai. Tukverh hnâi ber bulah tlân vatin parda fual hnelh hnawlh phênah chuan ka tawlhlût ta nghal a.

Min hmuh loh hrâm ka beisei.

Room-ah chuan a rawn lut ta ngei e,Nu Sangi chu a ni lo chiang. Ka thin a phu dawt dawt mai. Khum lam a pan thâwm ka hria a, parda pan deuh zawk chhan ațang chuan chiang lutuk loin ka hmu thei a, ka en reng a, khum bulah chuan a ding a, min hnungchhawn bawk.

A sâng thlerh thlawrh hle mai. Room chhung chu enkualin a jacket a hlîp a, khumah chuan a thehthla nghal a, a dârpharh hlâi darh chu a t-shirt vâr hãk , taksa phuar deuh hlek atang chuan chiang takin a lang thei a.

Ka dinna parda lam chu a rawn thlêk ta vang vang mai. Ka thâwk a tâwp dawnin ka hria, ka thâw ngam tawh lo, ka thinphu a rang bawk si. Rei rawn en lovin a hawisawn ta a, a hawisawn rual rualin boruak tam thei ang ber ka hîp lut nghal a.

A t-shirt chu a hlip leh ta. Ka mit chu ka khap sawk sawk mai, a pian chu a nalh teh e, chiang deuhin hmu lo mah ila, a nalh chiang tih ka hria.

Lu thing nâ nâin a nui suk a, thil nuihzatthlak a ngaihtuah chhuak pawh a ni mahna. Kei lahin mit tla lek lekin ka lo thlîr reng a,a hmél chhe lo lutuk tak mai saw, ka theihnghilh thei tawh lovang tih ka hre nghal a ni.

A jeans pawdal hâk chu phelhin a hlîp zui nghal. Ka en duh tawh lo, ka maimichhîng tawp. Mit ka chhîn loh chuan a boxer hlîp leh ta se ka au chhuak vak ang tih ka hlau.

Ka meng leh der der a,a boxer pawh a lo hlîp tak tak!!! Lalpa leh, ka kutin ka hmui ka hup vat,nget lutukin, ka auchhuah vak loh nan.

Ruak vekin a awm ta. Min hnungchhawn zawngin a ding hlauh. Chuti ni lo se...

A mawng sexy zet leh a mal sei thlarhte chu.. Milim kertuin milim, a duhtawka mawi leh duhthusama a ker ang hi ka tehkhin. Chiangkuang taka hmuh ka châk kher mai.

Bathroom lam a pan a, a intleuh zawk dawn a ni ang. Bathroom-a a awm chhungin room hi ka chhuahsan ngei a ngai.

Ka thlan a tla bawrh bawrh mai. Tui herh hâw ri ka hriat veleh thâwm dîm thei ang berin ka dingdihlîp a, kawngkhar dîm lutuka hawngin ka chhuak ta a.


Tukțhuan ei laiin Pu ber chu newspaper ka chhiarsak leh ta a. Ke pên thâwm a rawn awm a, Rsa chuan chair-a rawn țhut pahin ,"Good morning, ka pu " a ti nghal a.

Ka newspaper kenlai pawh chhiar chhunzawm lo chuan Rsa chu ka en reng a, a va chhe lo tehlul em!! A sam a la hnâwng deuh a, shower gel rim nam vang vang ațang chuan a intleuh zo chiah tih a hriat theih bawk a.

"Morning, nizan i mu țha maw? I tho nuam em?"

"Aw, mumang bo țhakin ka mu. Kapu, nang pawh i mu țha tiraw?"

Pu ber chuan nuih var var pahin," Tehreng mai. Hei hi Dîte-i a nih hi. Kan huan enkawltu ber Nuna fanu ania" tiin min hmelhriattir a.

Min en reng a,ka zak kher mai. A mitmeng uk kharh, vāwt raih mai chuan min x-ray ni berin ka hria. Khûk chem chema khûk ral daih ka va châk em!

"Chibai"

A aw chhuak vâwt reih rawih leh hniam chhak chu a inhmeh phian, Pu ber a biak dan leh min biak dan aw chu a dang daih. Ka kut a thlan dap dap a, ka lung a phu rang viau bawk.

"Chibai le, ka pu" Ka aw chhuak chu ka va duh lo tak, a khûr deuh ti tih lehnghal. Chubakah ka aw chu a mawi lo thar riauin ka hre pek.

Chaw ei pah chuan sumdawnna chungchang an sawi a, bungraw lo thleng tharte pawh enfel a ngaih thu Pu ber chuan a hrilh malh malh a. An thusawi lo ngaihthlak ve reng chu mawi lova ka hriat avangin newspaper chu ka bihsan ta daih a, mahse a rûkin Rsa chu ka melh ru reng tho.

Melh loh ka tum pawhin ka melh lo thei lo. Dining chair-a a țhu chu a inhmeh bik hliah hliahin ka hria. Chaw ei paha a țawng leh zauh thin chu a aw hniam chhek chhawk nen chuan a inhmeh ngawih ngawih.

A zûnah ka uai zo ta chu a nih ber hi.

####################


Rsa awm achin chu zîng thawh pawh ka phûr ta riau mai. Tûkthuan ei laiin ka hmu thei a, ka lawm tâwk em em a ni.

Min be ngai lo, min en ngai lo bawk. Chaw a ei mawlh mawlh a, a puin a biakin a chhâng a ni leh mai. Mahse keiin duhtâwkin ka en thei a, ka lung a âwi ve em em mai a ni. A engkim mai hian ka lung a dum ni maiin ka hria, ka duh hi a ni tawp mai.

Ina a awm tawh hi chuan ka zui rû reng hi a ni tawp mai.Gym-ah emaw, pool-ah emaw khawi room-ah pawh ni se ka bihthla reng a,ka zui kual char char a ni mai.

"Nang hi, uitein a pu a zui kual reng ang maiin Rsa hi ngatinge i zui reng a? Thil thleng a awm em ni?" Nu Sangi'n min biakna chu chhân ngaihna ka hre lo kher mai.

"Engmah a awm lo. Ka hna ka thawk mai ania" ka ti ringawt a.

"Dâwt sawi lo mai teh. Rsa i zui kual reng mai leh i biru kual reng hi ka hmu lo che emaw i ti a ni ang e. Ka hmu reng țhin che asin, i ti mah mah lo maw? Rsa'n nula high class lo chu a melh lovang tih ka hrilh tawh che kha. Nangmah intina suh ang che"

"Ka hria alawm, keini ang mi hnuaihnung chu melh pawh min melh peih lo tih chu. Ka star ve mai mai ania, chu chu a pawi viau em ni?"

"Star te chu pawi lo ve. Mahse invêng fîmkhur turin ka duh mai che ania. I bihthla ru țhinte hi hmu fuh ta che se la, engtin nge ni ang?"

"Ka fîmkhur alawm"

Lu thing nar nar pahin," Ni lo, Bawihi. I fîmkhur sêng lovang tih ka hlauhpui che a ni" a ti ve thung a.

[Ngaia]

RUATSANGA - 3 By Dingdi Pachuau


Zan khat chu ka muthilh theih loh avangin pâwnah ka chhuak a, pangpar chi hrang hrang, saron, rose leh derhken rawng chi hrang chu an pâr vul chûk a. Thli a thâwt heuh heuh avangin chûng pangpar rim inpawlh chiai chu a rawn nam leh chem chem țhin a.

"I muhîl thei nange?"

Ka phu zawk, ka zuang dâwrh lo chauh tak tak. A aw atang chuan Rsa a ni tih ka hria. Ka lung a phu dawt dawt a. Ka phut nasat vang chu thuhran ni se, ka bula a awm vang chu a ni bawk.

Inherin ka inkuangkuah thân a. Kan inhlat loh em avang chuan ka lungphu ri chu a rawn hre pha ang tih ka hlâu ru hial mai.

"Aw, ka pu"

A chhiat lohzia mai chuh!! Pawn light chuan min ên chiah lo nain zân thla êngah chuan a lang chiang kher mai. Mipa hmeltha hi chu Tv -ah te ka lo hmu ve fo tawh thin, mahse ka duhthisam tur hi ka hmu ngai lo. Ka duhthusam tur mipa hi ka mitthla thiam thin lo va, mahse Rsa ka hmuh chiah hian ka duhthusam thin , ka suangtuah thin ang ngei kha amah hi a ni tih ka hria.

"I sam chu a mawi hle mai"

Ka mut tawh avangin ka sam, ka vial tawm vek țhin chu ka thlah a,a sei angreng a, a hmâwr lam hi a kir pah bawk a. Mu tawh, tho leh ka nih avangin a hnawk nuaihin ka ring a, ka sam chu ka han chûl ringawt a.

"Ka lawm e, ka pu"

"Pu chu ka la ni bîk lo asin"

Chhân dân tur ka hre lo. Ka hnathawhna pu ber tupa niin min chhawrtu ve tho a ni si a, pu mai loh chuan koh dan ka hre lo a ni.

"I pa hi a thawkrim khawpin ka hria, pangpar a chîng tam bawk si"

"Nia". Chhân thui dân tur ka hrw hlawl lo.

"Ka pi khân pangpar hi a ngaina thin hle asin. A chîng țantu pawh amah kha ania"

Kum nga kalta khan a pi hi a boral tawh tih ka hria, Rsa enkawltu ber a ni bawk a, a ngâi viauin ka ring. Pangpar pawh hi a pi lo chîn chhuah a nih avangin an chîng zui ta reng a ni.

"Oh , a ni maw?"

"Pangpar i ngaina ve em?"

"Aw"

"Thil dang duh deuh bîk, ngainat bîk i nei em?"

"Pasta"

Kan ngâwi deuh vang vang a, kalsan mai ka duh a ni, mahse han kalsan vut lah chu dikin ka hre si lo. Lâi deuhin ka awm reng sia, a hahthlak.

"Ka puin i zaithiam hle tih a sawi a"

Ka zak kher mai. Ka zaithiam hle si lo va, nuam lo ka ti a ni, zaithiam tak chu ni ila, a nuam deuh tur.

"Ka pu chuan a ti ve mai mai a nih chu. Ka zaithiam lo tak tak"

"A ni maw?" A sana bun chu a bih zoh a. "A tlâi tawh riau mai. Mut tum tawh rawh, thil ngaihtuah vak vak lo la" a ti a. "Nge tu emaw ngaihtuah deuh bik i nei a ni lo maw?"a ti leh a.

"Nei chiang e, nangmah. Nangmah kha ka ngaihtuah che"tia âu vak mai ka duh, mahse ka ti ta êm lo.

"Ka kal ang e, mangțha le. Tui deuhin i mu dawn nia"

Tui deuha muthilh chu khawi lam, ka muhil thei lo chiang kher mai.Amah ngaihtuahin ka tlâivâr deuhthaw a ni.

###################

Pu ber chu a fel viau mai, min ngaina der ve hle bawk. An in hi a zâu hle a, Nu Sangi nen enkawltu kan nih bâkah cook hi a awm hran leh a. Pu ber hian driver chhawr a nei bawk a, pu ber a kalchhuah loh ni chuan ka pa a puih ve mai bakah a țul țul a thawk ve lâwp lâwp țhin. Ani pawh Nu Sangite in bulah a awm ve a, a hranin in a luah ve a ni.

Nu Sangi hian fanu, kei aia la nâu ve deuh, pawl sawmpahnih zirlai a nei a. Tin, thingtlang atanga an chhûng,Lungleia sikul rawn kal an awmpui bawk. Anni pawh hian an hman châng chuan min rawn thawhpui ve zawk zawk tho, an fel dun phian. An țawng duh a, an rawn kal hi chuan kan nui nasa țhin khawp.

Aizawl lamah Pu ber chu sumdawnna thilah inhmuhkhâwm a ngaih avangin a kal a, Rsa'n a zui ve ka ring ania, mahse a zui miah lo.

Chhûnah Rsa țhianteho an lo lêng a, eisiamtuin an eitur a siamsak vek a, kei erawh chuan ka buaipui lo hrim hrim. Hmeichhe pahnih leh mipa pahnih an ni a. Hmeichhe pakhat sambuang, chhe lo zet chu a ngaihzawng a ni ngei ang.

A engamah hmain ka ngaina lo nghal ringawt. A bialnu ni ngeia ka hriat vang pawh a ni mahna. A hmel a țha,a changkang, a ngo viau bawk. Ka rilruin ka lo thîk ve em em mai a ni.

"Thawmhnaw i su zo tawh em?"

"Aw, ka zo deuh chiah"

"Rsa room ami, a thawmhnaw bâl ka lak theihnghilh daih a, i han la lawk mai dawn em ni? Room-ah an awm chuangin ka hre lo"

Ka châk rualin ka huphurh tho, a room hi tifâi țhin mah ila, luh luh hi ka huphurh țhin tho nia.

Zâwi muangin ka chho a, kawngka chu a inhawn deuh avangin ka bih dêk dêk phawt a. Chuta ka thil hmuh avang chuan ka ding khawng chiang kher mai!

Rsa khumah chuan sambuangi leh Rsa chu ruak deuhthawin an lo awmdun a, an lo infâwp mawlh mawlh mai. Hmeichhia chu Rsa mal chungah țhuin a kâwng achin chunglam chuan khuhtu a nei lo. Rsa pawh boxer nen chauh a awm a nih hmel.

Ka inngaihtuah harh hnu chuan ka tawlhsawn vat a,ka â húih mai. Ka thil hmuh chuan min tihrehawm hle, hrehawm ti tur ka nih phei chu ka hre lo.mahse, ka thinlung hi a na em em si. Bialnu a neih chu ka ring khawp , mahse hetah inah, a room-ah, kawngka pawh kalh lo ém chuan an awmdun ka ring pha miah lo.

Hemi ni atang hian Rsa hmuh loh dan tur mawlh ka zawng ta ngar ngar a. Pu ber tukthuan ei laia newspaper ka chhiar pawhin ani a lo lan chuan ka kalsawn daih zel,a chhan chu an titi țhin tho sia,chhiar chhunzawmna hun a awm chuang lo. A theih chinah chuan hmuh loh hrâm ka tum, mahse zánah erawh ka mu țha lo țhin khawp mai.

He pa hi ka duh phãk a ni lo a, a duh tur chi ka ni hek lo. Hei hi ka hriatchian hle a ngai. Ani tân chuan engmah ka ni lo a, an ina chhawr pakhat ve mai ka ni. Nu Sangi pawhin min hrilh lâwk tawh kha, ka buaina lo turah ka lo buai ve chiam a nih hi, zahthlak zawk hian a.

"Rsa a dam țha lo a, a room-ah chaw han pe mai ta che"

"Midang tir zawk rawh,kei chu hei ka hman lo sia" Washing machine-ah thawmhnaw bâl ka vawm lut mawlh mawlh a.

Nu Sangi chuan chuan makti hmel deuh tak hian," Midang an awm lo, eisiamtu ber a lo kal loh hi. Han dah la, i lo chhuk lehnghal dawn alawm. Ngati nge a? I châk viau ka ring asin" a ti a.

"Nu Sang, nangmahin han pe mai la, ka laklawh bawk sia"

"Hmuh i hlâu em ni?"

"Teuh lo, hei ka buai em hi"

"Tak tak maw?! Nangma pek ngei a duh sia" Ka hresual a nih loh pawhin a sawi sual tal a ni ang, awihawm loh lutuk.

"A nuihzatthlak loh ania"

"Tinge a? I duh ni khân ka hre si a"

"Ka duh tawh lo"

"A va mak dawn ve!! I zui kual dat dat reng sia"

************************

Sitting room ka tifâi a, frames leh leather sofa ka hrufâi a, centre table ka tihfâi laiin Rsa chu a lo kal a, ka lo en duh miah. Ka tih lai chu ka tichhunzawm malh malh a. A rúk tak chuan nuam ka ti lo, ka thil tih lâia min en ve reng chuan ka confi thei lo.Safa-ah chuan rawn țhuin , centre table-ah chuan a ke chu a rawn hlâng duai a.

Eng nge inah a tih reng reng ni? A pu hnung zuia a chhuah ve ka rin tehlul nen, thatchhe lutuk mai.

Ka thil tih lai chu châwlin ka kalsawn a.

"Dîte"

Amah en chuang lovin ka ding a.

"I dawhkân hrûk hi a fâi lo ania, hru nawn leh rawh"

A hmâia ben ka châkzia mai chuh..ka thinrim chu ka insûm țang țang a ni. Lêt lehin dawhkan chung chu ka spray a, ka hru leh nghal a. A ke pawh chu ka hru tel sawk sawk a, lâksawn tum miau lo hek.

"Ka tui a va hâl tak!"

Ka en duh chuang lo, ka thiltih lai chu ka ti mawlh mawlh a.

"Ka tui a hâl ka tih chu"

Hmm...a va han chimawmin min va tibuai em!! Ka thinrim chu ka insûm hrâm hrâm takmeuh. Tui laksak tur chuan choka lam ka pan a.

Ka lét leh chuan a lo awm tawh miah lo. A va han ngeiawm thiam tak! Dawhkan ka nawhfai a sawisel a, a tui hâl thu sawiin min tîr leh a, a hâl tak tak hauh si lo. Keimah leh keimah chu ka insawh thinrim hlur mai.

Pu ber awm loh chhung chu min tithinur reng hi a ni ringawt. Kei lahin ka hniah ngam bawk si lo, a hnuaia thawk ni miau hek i. A chimawm khat tlat hi a ni mai, ka thinurna tur tâwk chiaha ngeiawm a thiam lutuk hi a châng chuan ka nuih a za zawk.


*************

Ka zîng tho chu ka lu a na búr mai. Nizan ka mut țhat loh vang a ni. Ka mumangah Rsa leh sambuangi kha ka lo hmu a, sambuangi hmuh lai chuan min lo vîn phar nasa mai a, thinrim țúnin zîng ka thawh phah.

Ka insúk laiin Nu Sangi'n min rawn ko a." Rsa'n newspaper chhiarsak turin a duh che a?" a rawn ti a.

"Pu ber chauh ka chhiarsak țhin. Ani chu chhiarsak a ngai lo, a mit a la țha alawm. Ka hman loh bakah ka lu a na"

"Ngati nge hmuh i hreh tak viau le?"

"Ka lu a nat vang ania,ka insuk zawhah ka mu lawk ang"

Min tilui bik lo. Ka insûk zawh chuan ka room-ah ka chho a, damdawi pawh ei chuang lovin ka mu vang vang a. Ka mut hnu rei vak lovah chuan ka muhil ta mai reng a.

Ka room kawngka kik thawm avangin ka harh a, Nu Sangi a nih ka ring. Ka lu na a la reh chiah loh avang chuan peih lo deuhin ka tho a, kawngka chu ka va hawng a, mahse tumah ka hmu lo. Kawngka bulah chuan tray-ah hian damdawi mum, tui bottle leh bowl lian vak lo, inchhín tlat hi a lo awm a. Makti deuh chuan ka'n hawng a, pasta a lo ni a. Nu Sangi siam a ni ngei ang, Nu Sangi kha pasta ka ngaina tih ka hrilh tawh emaw ni dawn le?

*******************

Zan khat chu ka țhiannu birthday lawmnaah kal ve ka tum a, zîng lamah Pu bet ka díl tawh avangin leh zan lama hna thawh tur a awm chuan loh avangin rilru zângkhâi deuhin ka insiam a.

Ka thawmhnaw zinga ka inhmeh ve bera ka hriat , kawr dum fual,khup chen, bãn tâwi té chu hain pheikhawk pum sen, hnniam té ka bun tawp a, ka sam chu ka uluk ve kher mai. Make up etawh ka inhnawih vak ngai loh avangin tlêm té, a hming chauhin ka inhnawih ve a, Mama'n min rawn hruai dawn avangin inhnuaiah chhukin ka lo nghãk a.

Tsa,Tv room atang lo chhuak chuan min hmuh chuan a mit ko sân âk chung hian,"Wow, khawilam nula nge i nih chu le?"a ti a, ka chhân loh avangi"Khaw'nge i kal dawn?" a ti leh a.

"Ka chhuak lawk dawn"

Ka incheina chu a thlêk kual vel a,ka lâi bawk si, ka phone chu ka ensan daih a.

"Kekawr ha ta che"

Rum taka melhin," Ka duh duh ka ha thei alawm, kekawr chauh hi hãk tur a ni kher lo. Kawrfual pawh thawmhnaw a ni tho" ka ti hlar a. A nui suk duh chauh nia. Mama lo thleng thuai thuai se ka ti kher mai.


"Kawrfual pawh a nih loh kha"

Ka chhâng peih tawh lo. Ka phone chu ka thlêk ka thlêk tawh mai, a rawn thleng har ka ti tawh hle a ni.

"Rawn haw har lo la. Hmeichhia, zân rei tak tak pâwn lama hun hmang țhin hi ka tei thei țhak lo ania"

A va han thú lo tak em!! Zan tina chhuak țhin pawh ka ni lo va, a mi tihdan hi chu pāidam hi a har ve ngawt mai.

Rei vak lo hnuah chuan Mama chu a rawn thleng a, horn a rawn pe a. Hmanhmawh takin ka chhuak a, ka țhutna tur passenger seat kawng min lo hawnsakah chuan nuihsakin ka țhu lút nghal a.

Mama hi ka star țhin. Ka țhiannu Lily u nen an inkãwm țhin a, Lily te ina kan awm lai hian anni thiandun pawh an lo awm ve ziah. Hmelțha, sport thei tak, ria lam deuh leh ngo lam aia hãng lam pâwl mah hi a ni a. Star-tu a ngah țhin viau niin Lily'n a sawi, ka ringhlel chhin lo, a luck hle tih ka hre tlat a ni.

Kan thlen meuh chuan an lo awm kim deuh vek tawh a,sâwm chin chu. Lily chuan min lo welcome vat a,a bula min țhuttirin ," I lo kal thei hi ka lawm takzet a ni" a ti sap sap a.

"Kei pawh. I birthday ka lãwmpui che"


"Ka lawm e"

Ka rin âi daihin nuam ka ti. High school ka kal laia țhian țhenkhatte nen kan titi a, kan lãm a, ei tur lah kan hnianghnâr si.


Dar 9:30 velah chuan haw tawh mai ka duh a, Lily chu ka ko a.

"A tlâi tawh sia, ka haw tawh mai ang"

"A la hma lutuk"

"I hriat kha, ka tân chuan haw tlâi a chi miah loh ania"

"Zanin chauhte chu, titi pawh kan la titi hman hleinem. Titipui che ka châk ania"

"Eng lam nge sawi i duh a?"

Meng sawr sawr pah hian, "Rsa chanchin min han hrilh teh, Chénpui a nuam em? A bula awm ve chhin ka chãk ania" a ti sar sar a.

"Châk duh suh, a chimawm khat tlat"

Ani lah chuan min rawn hnaih sauh pahin," Awii, ka hrechiang châk deuh deuh. A chhe lo ropui si" a ti leh sap sap a.

"Chhe lo viau mah se a ngeiawm tho"

Lily chuan mak tih hmêl deuh hian," Wow!!Nang pawhin chhe lo i ti ve tho elo?! Mipa i ngaihsak vak ngai pawhin ka hre ngai si lova" a ti chúl a.

"Mipa ngaihsak loh pawhin chhe lote chu ka hre ve thei tho lo em ni?" Kan inen a, kan nui dun hak hak a.

[Ngaia]

RUATSANGA - 4 By Dingdi Pachuau

"Rsa chu min lo tihpui teh a"

"Zia awm teh"

"Eng nge? Nge i tân i hauh hlur tawh zawk?"

"Ka ning, nei vek rawh. Mahse, ka tihpui che chu beisei suh. A reng rengin țha deuh i neih tawh reng kha"

Ani lah chuan ner sak chung hian,"Hmm,kan awmdan hi ka hrethiam lo alawm. A chângin min ngaihsak viau a, a châng leh min kawp niin ka hre bawk. Distance chu a buaithlak, ţhen maite hi ka duh ţhin. Ngaihzawng nei pawh angin ka inhre tawh lo" a ti a.

"A la rawn be tho che a ni lo'm ni?"

"Be tho e. Mahse ani nen hi chuan kan inneih pawh ka ring lo, zu a in ţhin lehnghal"

"A la sim na nge?"

Lu thing nar nar pah hian" Teuh lo. Inneih hma atanga zu in chu an ţha lo tawp ang, pâ nih hnua sim chu an awm tehmeuh tho ang a, mahse a risky ka ti lutuk" a ti leh barh barh a.

"A nih tak chu. In inbiak leh hunah kawp a neih leh neih loh chu zawhchian a ngai a nih chu"


Zan dar 10:30 ah Mama'n min thlah haw a, a titi barh barh a, kei erawhin ka ngaihtuahna ka lo kâwm veng veng thung a.

" I va ngâwichawi ve!"

Ka phu zawk lehnghal, chi loh lutuk.

"Chuti mi?" Nui chungin ka thlêk zoh a.

"Zanin kha nuam i ti em?"

"Umm, ti khawp mai"

Kan ngâwi leh vang vang a. Car tape a play ta hlauh a, boruak a nuam deuh sawtin ka hria. Ed Sheeran 'Perfect' a zâi vang vang a.

"He hla hi chu a mawi ve chiang a ni"

"Nia, a satupa hian a sa thiamin a sa lungrun ve bawk em a ni"

Zan boruak thiang raih nen chuan Ed Sheeran aw chu inhmeh ka ti takzet. Titi lo chuan ngaithlain a changin kan lo zâwm ve a.

Mama chu ka mitsírin ka en ru pah reng a, a rimtui hman chu a rim a pâ viau nain a rim a tui a, hnar pawh a verh khawp mai,amah nen a inhmeh ka ti lutuk.

In kan thlena la chhuk dawn chuan," Ka lawm lutuk aw" tiin ka nuihsak a, ani pawh chuan,"Kei pawh le, ka hruai thei che a,ka lawm hle zawk a ni"nui chungin a ti ve a, a ha vâr țhat chu a lang chiang kher mai.

Pu berte pawh an mu tawh a ni ang, light a thim nual tawh tlat. Kawngkhar ka kalh nghal a, room pan chhoh mai ka tum lai chuan Tv room atang chuan,"I lo va haw hmâ ve, a nuam vak na nge?"Rsa chuan a rawn ti a.

Chimawmliana...

"Nuam e"

"I rawn haw himdam maw?"

A sawi awmzia chu ka hrechiang khawp mai. Ka thinurna chu a rawn inthuah leh tup tupin ka hria. Âwm dawmin ka ding vang vang phawt a, thâwk muangchangin ka la bawk a.

"Aw, ka lawm e"

Ka chhang lêt ve thiam tho. Thinura ka chhân lét hian a chimawm sual sauh zel a, dam taka ka chhân erawh hi chuan a chimawm rei lovin ka hria a ni.

"I luck vak lo a ni maw?"

Chhãn enah pawh ka en tawh lo. Room lamah thinur teuhin la chho ta a. Haw tlai lo turin min ti a, ka haw ta chéng a, haw hma min ti leh bawk si. He pa tak hi chu a. A, khawvel a tifamkim ve reng reng e.

Lily birthday kan lawm zan atang chuan Mama chuan min rawn text țan a, pawi ka ti tehchiam lo. Ka lo star ve ngar ngar țhin kha anih avangin ka be chhe lo hrim hrim, tunah pawh ka la star tho.

Sambuangi pawh a rawn inlâr peih riau. A hming pawh ka hre tawh, Eli a ni. A chhe lo ka ti reng, mahse a phakar hmel ka ti lutuk. Chuan, a inla no viau a, a hawi sâng ka ti bawk.

A rawn kal lahin Rsa room-ah ngat ania an awm țhin ni. Zak lo hi ka ti ve thlâwt. Keini min zah lo pawh ni se,Pu ber hi chu zah ve âwm tak. Ka hriat hma fé aťanga lo inhre tawh ni mahse zak lo ka ti tho tho. A inla no kual vel lah hi ka hné.

Chimawmliana lah ka chungah a la che chimawm chho zel a, țawngkam țha reng reng a leng lo. Pu ber hmuh lai erawh chuan țawngkam pangngai thei ang ber ka hmang thung.

Ka birthday pawh a lo hnâi ta. Lawm ve ngei ka duh avangin Pu ber ka díl a, kan ina lét leh loh chuan hetah chuan lawm a chi si lohva. Pu bet erawh chuan a ina lâwm mai turin min duh nain ka hnial ve tlat a, min tilui bik lo.

Lily leh Mama an phúr kher mai
Mama phei hi chuan lo lên a duh țhin a, mahse keiman ka remti lo. Miina awma tlangval inlêng lo neih chu ka duh teuh lo, Chimawmliana'n min nuihzat âwm em mai.

Pu berin a phal avangin ka birthday lo thlen hma ni chiahin ka haw a, ka birthday ni phei chuan an ina ka kal pawh a ngaih loh thu min hrilh nghe nghe. Inbuatsaihna hun min pe a, fel ka ti em em.

Țhian ka ngah lova, chuvang chuan thil ei tur lei pawh a harsa lo. Lily leh Mama'n sum min tum nual a, ka hnial viau nain ka hnial hmain an lo lei lâwk nual.

Lily hi tét té atanga ka kawmchhoh awmchhun a ni a,sikul kal tlângin kan inkâwm chho ve ngar ngar. Midang te hi chu Higher-a kan kawm an nia, mahse an fel lutuk,kan inkâwmngeih tlâng tawp.

Țhian hmeichhe 3 leh Mama leh Lily u, U Sam-a ka sâwm a. Ka birthday hi ka la lâwm ngai lova, ka lawm ve chhunah chuan ei tur hnianghnâr tak eiin puar se ka duh. Nu Sangite pawh ka sâwm tho taknain an hman lova, Pu ber pawh a rawn kal ka ring chuang lo.

Kan tam lo nângin kan ri ve laih laih a. U Sam-a'n fiamthu a thawh a, Lily lah a phawk berah a țang a,an unau avangin kan nui nasa hle, kan bengchheng viau bawk.

Ka pa a inthiarfihlim avangin mitmei vên tur awm ta lo chu, a țhen an zâi a, a țhen an lâm nghang nghang a, a châng leh fashion show an ti, camera lah a rim.

Thlang lam bathlâr zâu lo téah chuan Mama nen kan țhu a, light-in min chhun phak loh avangin a éng lo hle a.

"Naktuk zân atangin em ni i riah phei leh ang?"

"Ka hre lo le, tinge a?"

"Ka lo lêng châk"

"Hei i lo lên reng hi"

"Nia, tun anga lo lên theih hi ka châk, sawtah chuan lo lên i phal si lo va"

"Ni bawk si"

Ka kut rawn vuan pahin," Awm phei tawh lo la"a ti sap a,"Mahse ka hma ka sial tiraw?"a ti leh a.

Chhân ngaihna pawh ka hre lo, ka zak bawk si. Ka kut chu a chelh ta reng a, kei pawhin lãk lêt ka tum bîk lo. Zahloh chhuah ka duh ve, chuti lo chu bialpa ka nei thei nãng.

"Mahni hma sial dan țha zawk pawh a ni maithei asin"

Ka kut pahniha vuan chungin,"Zanin hi ka tân a hlu takzet a ni" a ti leh sap sap a.

"Engngati maw?"

"Hetia i kut ka vuan thei ringawt pawh hi a hlu em asin"

Ka kut vawn ringawt pawh hlu a ti!! Hetianga min ngaihlutu hi ka la tawng ngai miah lo. Mak ka ti a, ka awih lo lek lek a ni.

"Ka awih chiah lo"

"Ka ti tak tak"

An haw hnuah chuan ka mu nghal tak nain ka muhil thei lo. Mama nen kan infáwp miau a!!! A vawikhatna atan mipa ka fâwp ve, ka fâwp ti ila min fâwp a ni mah, kei chuan ka lo dawh tawp, zei lo min ti ngawtin ka ring, mahse chutiang lam engmah a sawi lang miah lo.

A túkah chuan Pu ber hnenah chuan kan in aťanga kal leh mai ka duh thu ka hrilh a, a lo hrethiam mai a. A room-ah min ko lut sauh sauh a, ka birthday present min pe ve ngéi. Ka rin loh lutuk anih avangin lawmthu sawi ngaihna pawh ka hre lo hial.

"I duhzawng tur ka hre si lova, ka lei risk tawp"

"Ka pu, ka lawm takzet a ni. Lawmthu sawi ngaihna pawh ka hre lo, ka duhzawng a ni hrim hrim ang"

Pu ber room atanga kan chhuak chu Rsa kan tâwk a, a chhuak daih emaw ka ti nghe nghe. En pawh min en lo nia, ka birthday kha a hre ve awm sia, min wish ve tal ãwm. Huh..ka phút sâng em mai a, he pa hian chutiang chu a ti lul lovang.

In ka thlen veleh present ka dawn chu ka hawng a, cotton shirt vâr nalh zet mai leh envelope a lo awm a. Ka thawmhnaw hãk lai chu hlípin ka inthawlh chhin nghal a, darthlalangah ka inthlêk ve ngial. Ka inhmeh reuh lutuk.

Envelope chu ka la leh a, a inchilh loh avangin ka hawng nghal bawk a, a chhunga ka thil hmuh avang chuan ka meng phar âwk âwk mai!!

Cheque chu kut khúr dar dara chelhin ka en chiang a, ka rei leh!!! Çhéng nuaikhat lâkchhuah theihna cheque!!! Pu ber hming sign lah a awm thlap si.

Envelope chhungah chuan lehkha dang a la awm cheu! Ka en leh a, Pu ber ziak a ni chiang, a hawrawp tung súl leh hrâw zet atang chuan ka hrechiang ve hle.

*I birthday ka lawmpui che a,he pawisa hi i college kal chhunzawm nan ka pe a che, pawm ngei turin ka duh bawk che*

Mak ka ti lutuk, lâwm bawk si chu ka zuang zawng zawk a, ka țé chiam bawk. Miin min lo hmu ta se chuan ka â emaw an ti ngei ang. Hetiang zah zah pawisa a thláwna han inpêk ringawt mai chuh. Ka awih thei lo hial zawk a ni. Ka chanchin min zawh chiam laia zirna chhunzawm leh ka châk thu ka sawi kha a lo la hrereng a nih hi.

Zânah Mama a lo léng lo. A chhan chu lo lêng rih lo turin ka ti a, ka pain min hâu ang tih ka hlâu a ni. A inla strict ve sia, mi hâu a zak ve tawh si lo nen, zahna ka tuar peih rih lo.

Mut hmunah min rawn text ngei a, a hnuah phei chuan min rawn call. Mahse ka pa a awm ve avangin leh kan room a inhnaih chilh em avangin ka țawng ring ngam lo. Ka chhân dan atangin Mama pawhin a hrethiam thuai a, min rawn text leh ta zâwk a.

"Tlangval inlêng i nei a ni maw?"

Whatsapp message a ni. Number ringawt atangin ania, a dp lah ka hmu thei lo zui.

Chhân pawh ka chhâng lo. Mama text chu ka chhâng a. Rei lo te hnuah number ngai bawk atang chuan message dang a lo thleng leh a.

"Nei leh si lo ang, luck lo em mai"

A thuhman dan atang chuan Chimawmliana bâk a ni thei lo. Engtin nge ka number chu a lo neih pek ni? Ka chhâng ve ta a.

"Mu rawh"

A hmu rang kher mai,a rawn chhâng lét rang bawk.

"Ka mu reng"

"Muhíl rawh"

"Ka hlim lutuk ka muhíl thei lo"

"A va lawmawm ve!"

"Ka hlim chhan chu maw , i awm lova, boruak hi a nuam ngawih ngawih a ni mai"

"A LO NIH TAK CHU"

Nui hmêl intlar țhút a rawn thawn leh a, ka ngei tâwk a tling leh em em mai. Ka chhâng lét peih tawh lo. Mama text ka chhânlét san leh daih a.

Message tone a rawn ri leh dat a.

"Naktuk chu chaw ei kham dar 10-ah lo kal la, thil țúl min tihpui turin. Rawn inchei nalh hle la, kawrfual chhíng rawn ha suh ang che"

Awiiiii....he pa hi chuhhhh....Ka incheina lehzelah thu a nei lo chiang em mai.A hnuaia thawk ni mah ila, ka taksa a ni a, ka duh duh danin ka chei ang a, ka duh duh thawmhnaw ka ha bawk ang, a sawi tur a awm lo chiang.

"Puan ka rawn veng ang"

"I duh a thu le"

*********************

Pu berte in ka thlen chuan dar 10 a ni thuak mai. Pu ber kawr min pék ngei mai kha ka ha a, ka hâk zin ber ber zingah a tel chho dawn tih ka hria. Kekawr dum , hâk nuam zet leh rubber pheikhawk flat dum ka bun bawk. Thawmhnaw dum hi ka ngaina a, kekawr dum leh pheikhawk dum ka bun hian ka confi bík riau bawk.

Pu berin min lo hmuh veleh," I kawr chu i inhmeh hle mai, i inhmeh ka ring reng a, i tân liau liau a țhui ni âwm a ni" tiin min lo fak chiar chiar a, a inhmeh lo ka ti hial zawk.

"Ka lawm e, ka pu. Hâk a nuam lutuk, ka duhzawng tak a ni bawk"

"A țhat hlauh chu. Taka, vawiin chu Bawiha i zuikual a ngai a ni. A hrilh tawh tho chein ka ring a, office leh bank lamah in kal a ngai a ni. I huphurh em?"

"Huphurh lo ve, ka pu. Ka lo țangkâi ve phawt chuan ka hreh hleinem"

Inchung lam ațangin Rsa chu a lo chhukthla ta zân zân a, ngun deuhin ka lo en a, he pa hi chu a chhe mawlh lo a ni. Thudik tak a ni bawk. A thawmhnaw hâk apiang a inhmeh zel bawk si, a tân liau liau țhui niawm renga inhmeh a ni zel mai.

Min rawn hmuh veleh ka kelér atangin ka chhíp thlengin min enchhuak dap a.

"I puan rawn ven chu, kha, a va mawi ve!"

Ka chhâng lo, ka peih vél lo. Pu ber a awm ve bawk nen, ka chhân lét loh hian ka him hma.

Ka inthuamna chu a fuh ka ti phian mai. Office leh bank dâwr dawn chuan zahawm tâwk a awm ve a, ka inthuamna chu a zahpuiawm loh ka ti viau.

A pu hnen atanga leather bag dum, lian angreng tak a lâk chu khâiin," Min zui rawh. Vawiin chu ka'n hruai kual tak tak teh ang che" a ti a, a nui deuh suk bawk a.

A nuiha a hmelthat tehlul nen, a nui khât mah mah a ni. Mahse mipa nui vur vur reng chu ka duh miah si lo. A nuih loh pawhin a hmeltha tho a, mahse a nuih paha a ha vâr țhat mai leh a hmui chunglam chhíng deuh hlek chu a inhmeh bík ka ti.

Car-ah ka lút a, a pu nen eng engemaw an inhrilh leh chhúngin car chhung chu ka lo en kual a.

Motor lam hi chinchâng ka hriat loh em avangin eng car nge tih pawh ka lo hre pek lo. A chhung chu a var hle a, a nuam hle bawk. A faiin a rimtui viau bawk a ni, tlangval car niawm renga rimtui niin ka hria. Enkawl uluk ani tih a hriat hle a, bâl hmuh tur a vâng hle a ni. Inchhung lam chauh ka tihfai țhin avangin car hi tunge tifai țhin ka hre miah lo. E, pu ber driver kha a ni tak ang.

Rsa chuan motor chu a khalh thiam kher mai. A car dum tle hlarh leh a sam dum,ngil zet , a chhipa a tihpir deuh hlek chu inhmeh bík riauin ka hre pek. Sunglass a'n vuah phei chu chhe lo tak hi a ni ringawt.

"I mit kha a tla ang e"

Zak lutukin ka hawisawn nghal. A sawi dik, ka en nasa lutuk,mit tlãk hlauhawm khawpin.

"Zak duh suh, mi tih loh dan a ni hleinem"

He pa han inngaihhlut dan em em hi chu..

"I inngaihlu mai a nih chu a"

"Hlu ve bawk ang chu, ka hlu ve miau bawk sia"

"A lo nih tak chu"

Țawng thlâwn hi chu ka ba duh bík lo. Kan inbiakna țawngkam hi chu a naupang chhia hle țhin chuan ka hria, mahse he pa bulah hi chuan a nuam hranpa ve tlat ka ti.

SBI, bazar veng kawtah kan ding a, car a park fel hnuah chhuak mai lo chuan," Lo hnâi teh" a ti sup a.

A ngaihna hre lo zet hian ka en hâ a, ani chu lo âwn pheiin,"Tihian i mawi zawk" tiin ka sam kilhna chu a rawn phelh a,bakilh chu a ak zui daih a.

Makti deuh hian ka en reng ringawt a. Ka sam țhen chu hmalama húiin, " I sam hi țawn tawm ziah tawh suh" a ti leh sup a. Seat hnunga bag chu lain a chhuak ta nghal a, kei pawh inthing harhin hmanhmawh fahranin ka chhuak ve ta nghal a.

Chawhma hun zawng chu office leh bank dâwr nan hun kan hmang a, Rsa bulah chuan chhiahhlawh rinawm ber angin ka lo awm ve reng a, a chângin bag ka lo kensak thúl.

Ka thil hriatchhuah tâk chu Rsa hi ka lo rin ang ngawta thatchhia leh nép a lo ni miah lo tih hi. A rintlâk hle zawk a lo ni. A mawng a zâng si, thil a hre ropui bawk si. A puin a lo chhuang viau leh a lo mamawh viau pawh kha a lo âwm ngawih ngawih a lo ni, a bu ang thlap a ni tlat.

"I ril a țâm tawh em?"

Car-a kan țhut laiin min zawt a. Zíng lamah chaw ka ei tlêm avangin leh kan kal kual nasat avangin ka châu viau lo nain ka ril erawh a țam viau.

"Aw"

"Pehhél lo ve thei bawk sia"

Melh hrâwkin,"Eng nge pehhél a ngaihna? Min zawt a nih kha, dâwt ka sawi dawn em ni?" Ka lo ti hlar a.

[Ngaia]

RUATSANGA - 5 By Dingdi Pachuau

"I inhmeh ngawt mai" min melh vang vang pahin a ti sup a.

Leh ringawt a. Amahin thil min zâwt a, țha té téin ka chhâng a. Chimawm deuh deuhin min bia a, bak deuh hleka chhân lét avânga hetianga intih ringawt mai.

"Nangmah vâng vek"

"Eng chu maw?" Hriatthiam loh hmel deuh hian a ti a.

"Ka sawi peih lo"

"I sam kha alawm i inhmeh ka tih"

Ka rin loh lam daih a rawn sawichhuah avang chuan sawi tur ka bo vek nia. Min fak ve ngei, a ka ațanga fakna ri lo chhuak chu a inhmeh ka ti hlawl lo. Mahse a lâwmawm thlâwt thung.

"Ka lawm e"

Chanmari lamah kan tlân chho a, restaurant pakhat changkâng deuh, ka la kal ngâi miah lohnaah min luhpui a, a nuam reuh tawp. Hetianga restaurant nuam leh changkang riau si hi Lungleiah a awm tih ka lo hre lo reng reng.

Mi châwl pawh an lo awm ve nual a, a nuam ka tihzawng tak a ni mai. A neitute pawh an inséng ve nasa ngawtin ka ring.

Kan lút chu a neitunu ber a ni ang chu ka ti mai, min lo chiau âu vat a.

"In lo thleng thei maw? Lo țhu r'u. Kan peih fel vek tawh ania" a lo ti vat a.

"Um, a țhat hlauh chu"

Țhuthmun kan rem hnu rei lo téah chuan kan dawhkânah chuan ei tur an rawn dah nghal a. Kan order lai ka hre miah lo, mak ka ti ru viau. E, tak a,kan thlen veleh khan a neitunu khan 'Kan peihfel vek tawh ania' a tih tak kha. Rsa hian a lo order lâwk a ni chiang mai.

"Ei rawh le, i duhzawng tak a nih ka ring"

Bowl lian angreng deuha inchhín tlat chu ka hawng a, Pasta tui hmêl lutuk tak mai ka hmuh chuan ka au chiam lo chauh.

"Aaaa....tui dawn lutuk" ka ti chhuak hliai a. Ka ei țeuh mai. Ka ril a țam tawh bawk nen, an pasta siam lah chu a 'cial' tawp a ni mai.

Ka ei zo chu ka puar ta khawp mai. Tui ka in a, ka in zo chu Rsa'n min lo en reng tih ka hmuh chuan ka lâi lehpek. Mahse , zak âwm lo deuh hian," Ka puar hle mai, a tui lutuk tlat" ka ti a.

"Lo kún hnâi teh"

Ka kún phei ve mai. Ka hmui hnuai lam, ka khabe ni chiah si lo hi a napkin ken chuan a rawn hru a. "Naupang chhe thil ei ang mai" a la ti sup zui.

Ka zak si, ka ngei bawk si chuan rum deuha melh pahin ,"Min hrilh ve mai la, keimahin ka hru mai dawn alawm" ka ti lét zék a. Mahse, ka inthiam lo leh deuh a, "Ka lawm e" ka ti leh ta zâwk a.

"My pleasure"

Ei man a pék lai chuan a neitunu chuan," I ei tui meuh maw? Kan menu-a tel miah lo ania, mahse Rsa hian a rawn ngénngawl sia. Kan theihtawp chu kan chhuah ve a, sawiselna a awm em?" Tiin min lo zãwt a.

Mak ka ti viau a ni. An menu-a tel miah lo, Rsa'n a ngen avanga han siam tâk chuh. An lo tihsak ngei bawk si. An inhre țha hle a nih loh chuan an inchhúng emaw tal a ni ngei ang.

"A tui ka ti lutuk tlat. Kha tianga tui kha ka la ei ngai miah lo"

Kan chhuah hnua car-a kan chuan luh hnu chuan ," A tui ka ti takzet a ni. An siam dan ka hre châk ngawt mai" ka ti zui a.

A ngawih reng avang chuan " Kha restaurant neitute nen khan in inchhúng em ni? An menu-a tel miah lo pasta tui lutuk kan ei thei sia"tiin ka zâwt ta nge nge a.

"Chhúng lo"

Min chhâng tâwi viau. A lung ka tiâwi lo chu a ni em lo ang chu. Min chhân thui ve deuh ka ring ania.

"Ka lawm e, pasta tui tak min treat avangin"

"Thil ka chah lam lawk ang"

Leh daih mai a. Ka thusawi ve hi chu a engahmah hian a thawk hlawl lo.

"Aw le, Boss"

A rawn nui hawk mai. Makti zet hian ka melh phei a. "I va lawmawm reuh tak!" min ti a nih chu!

Faknaah ka pawmsak leh mai ang. Pasta ka ei kha a tui em avangin a a mi fanna chu sawisel lo phawt ang.

Snapdeal-ah thil a lo chah niin. Car chhúangah ka lo nghâk a. Parcel ang deuh, pahnih lai a rawn pawmchhuak a, lo pui vatin car kawngkhar ka lo hawnsak a.

Car hnung seat-a dah pahin ,"Vawiin chu ride ang aw"a ti leh daih a.

A duh duh a sawi țhin vang leh min ngaihchân ve lem loh țhin avangin ka lo aw liam ve mai mai.

Inah kan haw leh vang vang a. An awmna hi Serkâwn hmun nuam lai leh remchâng lai tak niin, a fâl deuh hlek a, fâl lutuk phei chu a ni lo. Compound an nei zau hle a, huan zâu tak pawh an nei. Nu Sangi sawi danin Lunglei khaw mi hlun chhúng an ni a, sumdawng hlun an ni bawk. Chuvang chu a ni ang an hausak em em.

Pu ber hmu turin a kal nghal daih a. Kei chuan Nu Sangi ka pui lehnghal a, ka inthuamna nen ani puih chu inrem fahran lo mahse lo țhut ringawt chu ka duh bík lo.

Rsa ka hmuh leh meuh chuan vawiin lama a inthuamna a lo thlãk fel vek tawh a, a inthuamna leh ka inthuamna chu a inang hle mai.

"Room-ah chho la, han intifai rawh"

Min bia tih ka hre lawk lo, mahse ka bula a din reng tâkah chuan min bia tih ka hre chauh.

"Eng nge kan tih leh dawn a?"

"Kan ride dawn ka tih kha"

He pa hi, a ti tak tak a ni ngei ang.

"Chutiang mai mai ka hman lo, hnathawk ka nih hi"

"Vawiin atân chuan a tâwk" Ka bãnah rawn chelhin inchung lamah min nam kal chho ta a.

Ka room hlui ka luh chuan ka kum bula rose pâr mawi zet inkhâwi ka hmuh chuan ka mit a la zar mai. Ka pan hnâi a, rose pâr vâr 10 leh a pink 8 niin a tharlâm hle a, a rim ka hním vang vang a.

Khumah chuan vawiin-a thil chah kan lam, parcel pahnih zinga a té zawk kha awmin marker-in ka hming a inziak kalh a, card a lo awm bawk a.

"Eng nge ni le?" Tiin makti deuhin card chu ka la a, ka chhiar nghal a.

*Tlâi deuh tawh mah se, HAPPY BIRTHDAY*

Parcel chu ka hawng nghal zat a. Wow!!!! Adidas sneakers pink, nalh zet mai ka hmu chu, ka lawm lutuk ka au chhuak lo thei lo. Ka mumang a nih ka hlau, ka zu khawih. Ka insik a, a tak ngei chu a ni.

Ka pheikhawk bun lai phelhin ka inthawlh chhin a, ka tâwk chiah lehnghal. Engtin nge ka bun tâwk chiah a hriat theih ni? Ka'n kal kual a,ka inhmeh phian bawk si a, ka rilru a hlim takzet.

Inhnuai lamah tlân thlain ,"Birthday present min pêk avangin ka lawm e" ka zu ti lauh lauh a, Nu Sangi leh eisiamtunu chuan min lo en hau a. Rsa a a lo awm lo niin.

"En teh u, ka present dawn hi"tiin ka bun lai sneakers chu ka'n lek kâng kual vel a,ka hlim lutuk chu ka awm hle hle thei lo.

Rsa, pâwn lam atanga lo lút chiah chu ,"Present avangin ka lawm lutuk" tih pahin ka kuah chawt a. "Ka lawm lutuk" ka ti mawlh mawlh a.

"Naupang chhia" a tih sup chu ka hre reng. Mahse, engahmah ka ngai peih lo. A thil min pek hian min tilâwm lutuk a, ka kuah hi a phú tlat a ni.

"Min tibâl vek dawn ania"

Ka thlah rualin a thaw huai a. Ka ngei țep, ka kut a bãl pawh a ni tawp si lo, ka thawmhnaw lah a bâl lo chiang si.

"Han insiam rawh, hmanhmawh deuh la"

Lungawi vak lo chuan ka chho hnâ hnâ a, mahse ka pheikhawk nun lai ka en chuan lungawi lohna tlêm chu a bo hneh kher mai. Insiam a ngai vak lo ca, ka hmai ka phih a, ka pheikhawk thar pawh khung țha lehin a hmaa ka bun ngai chu ka bun leh ta zawk a.

Inhnuaia ka chhuk chuan a backpack chu ak turin min ti a,eng tak awm ang maw? A rit nalh lehnghal a, amahin ah ce mai âwm tak. Car-in kan chhuak âwm tho sia, in leh car inkar ringawt pawh a ak peih lo aniah.

"Khawnge maw kan kal dawn le?"

"I hre mai ang"

Kawta bike ding chu ka melh a, engatan a la chhuak ni ang maw? Bike-a min ride-pui a tum a ni thei mai ang em?

Helmet a keng tih la hmuh tâkah chuan ,"Bike hi i khalh lo ang chu tiraw?" Tiin ka zawt hlawl a.

"I khalh duh deuh em ni?"

"Bike-ah kan chuang dawn lo tiraw?"

A helmet khum pah chuan ,"Dawn chiang e. Kan ride dawn ka tih kha" a lo ti thung a.

A pu thusawi ka hrechhuak zawk mai. Bike-in chak tak takin a tlân țhin. Bike-in chak takin min tlânpui dawn chiang mai.

"Ni lo, bike-ah ka chuang ngai lo"

Ka ti tak tak. Bike-ah ka la chuang ngai miah lo. A hnung seat sáng euh te hi ka ngei.

"I chuang țan dawn tihna a ni mai"

Bike-ah chuan a țhu ta nghal a. Kei erawh chu ka din ngaiin ka la ding reng thung.

Min rawn enin ," Lo chuang rawh" a ti leh nghut a, bike chu a tinung pah bawk a.

"Aih, ka tla ang"

"Min ring em?"

A bawp sei thlurh mai chuan a intlawhkhalh hneh lutuk. Backpack chu ak-in a hnungah chuan ka lâwn a, ka tha khûr dar dar chu a hrechiang khawp ang, la hlãu miau sia.

"Min kuah thei ang"

Amah sî chéta thut ka duh loh tehlul nen,a bike a tihrúm rin tâkah chuan ka hnaih lo thei lo, ka hlau tlat si a, a kawrah ka țham tlat a.

"Ka thaw țha thei lo, min țham nasa lutuk a"

A tlânchhuah hnu chuan tlân chak lovin a tlân pangngai hle a. Ka țhutna a sân euh avangin ka hnaih lo thei lo, ka tawlhthla zel a ni.

"Ka kâwngah vuan rawh"

A thu ka awih loh chuan ka tla mai ang tih ka hlau. A la tlân chak lo nain a tlân chak hun tur ka hre thei si lova, a pu thusawi ka hrechhuak thar leh a," Tlân chak suh aw" ka ti ringawt a.

"Min ring tlat mai rawh"

Motor a tlêm deuh naah chuan a tlân chak ta hle mai. Ka khap dái thei dawn chuang lo, a kâwngah ka vuan nghet sauh sauh a.

Kawng zâu leh motor awm lohnaah chuan a tlãn chak far far hle,a hnung ah ka bei thlar ti ila a dik ber ang.

Bike khalh chu a lo hnehsawh takzet e. Ka hlauhna pawh tlêm tlêmin a kiang ve zel a, mahse a hnung pharh darh mai nghen chial chu nuam ka ti tlat a, a kawnga ka kuahna pawh ka phelh phal rih lo.

Theiriat kawng chung lamah kan tlân chho zel a, khawiah nge kan kal dawn tih rin ngaihna ka hre lo, a chhungte kan tlawh dawn pawh.a ni maithei a ni.

Kawnga mi kan tawhte reng rengin min enzui zel ni maiin ka hria. Bike khalhtupa hi a chhe lo em bawk a ni, a hmei a pain min enzui zel mai pawh chu ka dem lo ve.

Tlâng lamah kan tlân chho zel. Bike tlân theih chin thleng bike chu khalhin tlâng kan thleng chho a, Theiriat Tlâng an tih țhin chu hei ngei hi a lo nih hi.

Ka backpack ah chu amahin a ak ve thung a. Camera a lo keng reng niin, tlâi ni tla tur, êng sur mai chu a mawi em a, thla lak nan a mawi dawn em a ni. Kei pawhin ka phone ka la chhuak a, ka selfie nghal.

Ka kal hla deuh a, a mawi lehzual dan tur style hrang hrangin ka hmet mawlh mawlh a, midang lo awm ve pawh ka ngaihven lo.

A tlâng a sâng tha bawk a, tlâng hrang hrang a lang thei țeuh mai. A mawi ka ti a, Pathian thilsiam mawizia ka hriatthar phah. Mihringin kan cheimawi țhin tehmeuh mai, mahse a duangchhuaktu chu Amah a ni.

"I bo ang e"

"Bona tur awm lo chuan mawle"

A camera chuan min tin vang vang a, hre äwm lo deuh chuan ka en duh lo lui a, ka zak ve alawm. Ka ngaihsak lo der a, mahse kei pawhin a rukin ka phone camera chu ka on ve leh a, ka hmehsak ve khawp ang.

Thla kan la țeuh mai. Kan châwl a, eitur intur a lo keng tel nual bawk niin, a ngaihtuah kim ka ti roh lutuk.

Chimawm viau țhin mahse vawiin a a chétdan hian ka thinlung a dek tlat. Ka birthday kha ka hrilh ve lêm lo nain a hriat chu ka ring tho a, a chhan chu Pu ber ka hrilh lai khan a awm ve tlat. An ina ka room hluia rose pâr 18 khâwi pawh kha ama dah ngei hi a nih ka ring. Sneakers min pe a, restaurant-ah menu-a tek miah lo Pasta tui lutuk ka ei bawk.

"Ka lâwm takzet zet e aw. I thiltih zawng zawng vangin. Chuan , hei tlâng nuam takah min hruai bawk a, nuam ka ti hle a ni"

Min chhâng lovin min melh deuh reng a, ka lo lâi leh hman tawh.

"Lawmthu ka sawi chu i hria tiraw?

"Engtikah nge i lo lét leh dawn?"

Ka lawmthu sawi ve chu leh, a bengrawngah a thun duh lehpek lo.

A zawhna chu ka hre lo der ve thei tho.

"Engtikah nge i lo lét leh dawn?"

"Khawiah maw?" Ka hre lo der tlat.

"I hriat reng kha"min melh rún pah chuan a ti sup a.

"Hria ila, ka zâwt dawn che em ni?"

Mit a la sawn duh map lo.

"Engtikah nge kan inah i lo lét leh dawn?"fiah fek fawk, záwi muang si hian a sawi kalh kalh a.

"Ka hre lo"

"I bialpa khân 'Lét tawh suh' a ti che em ni?"

Kan inen ta reng mai.

"Lét lo turin a thlém che tiraw?"

Ka mit ka la sawn daih. Ka en reng chuan ka rilru a hre vek ang tih ka hlau.

"Thlém lo"

"Lo lét leh tawh la"

Hetiang ngenna awka hi he pa lak atang hian ka dawn ka ring lo. Lét leh turin min sâwm ania, min ngâi tihna a ni thei ang em? 'Ni lo, chutiang ngaihtuah suh,i beisei sâng lutuk em mai' tiin ka inhau ru mawlh mawlh a.

"I awm loh chuan inhnialpui tur ka nei lova"

Hmmm...chuvang a lo nih chiah chu. Ngâi tihte chu khawi lamah. Chimawm a chhuahna ber ka awm loh vang a nih chiah chu.

"Ka lo lét tawh lo ang" ka ti ve ngat a.

"Nitin i lo kal tho a"

"Chhún lama i chimawm pawh hi a hnéawm thawkhat viau reng a ni"

A huat ve deuh ka ring ania, a nui hak ri ka hriat chuan ka thusawi chuan a engahmah a thawk lo tih ka hre leh nghal a.

"Min lo hné țhin elo?"

Ka chhâng duh tawh lo. Min han hnialin chimawm viau mahse a chhe lo tho a, a zúnah ka uai tho si.

"Ka zúna i uai ka duh lo a ni"

Lei sei tâwkin ka chhuah khum. Mahse ka rilru chhungrilah chuan 'i tlâi tawh, i tlâi tawh, i zúnah ka uai daih tawh' ka ti mawlh mawlh a. Ni e, a zúnah hian a taka ka hmuh hma khan ka uai daih tawh. Ani duh leh duh loh khân awmzia a nei lo, ka uai lutuk tawh zawk a ni.

"I inngaihlu si a awwww"

A nui leh hak a. "I bulah hi chuan nuih tur hi a tam teh e, hei vang hian alawm ka lawm reuh em em che. Han hnial deuh che ila, i lo țang kawh ve nasa țhin sia, ka lâwm reuh tlat che alawm" a ti leh a.

'Lâwm reuh'. He țawngkam hi chuan min tilâwm tehchiam lo. Hmeichhe naupang hmuhin min hmu tihna a ni thei ang em? Chu chu ka duh miah lo. Ka lian lém lo, mahse hmeichhe naupang ka ni bík lo.

"Hmeichhe naupang ka ni lo"

"I ni ka ti lo che"

"Hmeichhe naupang enin min en reng kha aw"

Chiang deuha min en hnuah thaw hawk chungin a hawisawn ta a. Kha maw, a dik chiah. Nula enin min en lo hrim hrim. Kum 18 lai ka ni ve tawh, vote nei thei chin, puitlinga chhiar theih ka ni ve tawh tlat.

A phone a rawn ri a,'tu tak ni ang maw?' Ka tih rilruk lai chuan," Hi, Eli?" Tia a chhân avang chuan ka hnual rawih mai. Sambuangi, chhe lo deuh, mahse ka thík deuh kha.

[Ngaia]

RUATSANGA - 6 By Dingdi Pachuau

A kalsawn daih avang chuan an thusawi ka hre thei lo. Kan ei tur eina bawlhhlawh chu ka khâwm a, polythene-ah thunin backpack-ah chuan ka thunfel leh vek a, paih mai mai ka duh lo. Thil țawihral thei a ni si lova, hei hi ka rilruah ka vawng reng țhin.

A rawn lét chuan kan haw a ni nghal mai. Tlâng ațanga kan chhuk thla chu hrehawm ka ti ngang mai. Kawng a chhuk si, min pua hi a ni ringawt.


"Ka lo tawlhthla lo thei lo ania"

"Min ring vek rawh"

Kawng nuam chinah chuan a tlân chak leh ta far far khawp. Ka hlâu tawh bik lo, a khalh thiam em mai a, chubâkah mak tak maiin ka ring thlap tawh mai bawk.

In kan thlen chuan a bike dahțhat laiin keiin ka luhsan a. Nu Sangi'n min lo hmuh chuan," In lo thleng tawh maw? A nuam em?" a lo ti vat a.

"Kan kalna tur i hre lâwk em ni?"

"Hre chuang nâng. Rsa'n a lênpui che a ni lo'm ni?"

Chair-a țhut pah chuan,"Aw, Theiriat Tlangah kan kal a,a nuam lutuk"ka ti ve a.

"Zanriah kha hetah ei vek tur a nih kha aw"

"Engtin maw?!!"

"I birthday pual zanriah mawle"

Mak ka ti lutuk. Ka birthday pualin hetah zanriah a buatsaih a maw?! Nu Sangi thusawi chu a dik dawn em ni? Thudik a nih chuan a lâwmawm ngawt ang.

"Ţhu châwl la, i insil harh dawn nia, zanin tlâi atan chuan kan âwl ang che" nui chungin a ti leh a.

"Tak tak em ni, Nu Sang?" Ka awih thei lo.

"Tak tak ni e, kan zavaiin kan ei vek dawn"

Hlim takin room-ah chuan ka chho a, ka zâi pah rât rât a. Ka rilru a hlim takzet a ni. Rose, pasta, sneakers leh zanriah. Chutah pu ber hnen atangin kawr leh pawisa tam tâwk pawh. Min duhsakna hi ka tân chuan a hlú takzet a. Engtik laimaha ka la dawn ngai loh leh neih ngai loh ka han dawnga ka nei hi ka mumang a ang ka ti hial zawk a ni.

Ka insil harh hnu chuan Rose chu ka hním leh vang vang phawt a, inhnuai lamah zâi rât rât pah chuan ka chhukthla leh ta a. Nu Sangi chuan ka chét ve chu phal lo viau mahse ka pui leh tho, âwl ka duh bík teuh lo.

Nu Sangi fanu leh an ina lehkha zira awm nula ve tho chuan min rawn pui ve leh a. Fiamthu thawhin kan nui vak vak a, Lily bula ka awm ang thoin Nu Sangi fate bulah hian ka awm a, fiamthu an duh ve tho bawk sia, an bula awm a nuam ka ti viau a ni.

Kan zanriah ei chu a tui kher mai. Ni danga kan ei thin nen chuan a inang lo khawp. Ni dangah pawh kan ei tui viau nain zanin chu a dang hlakin ka hria. Nu Sangite chhung,eisiamtu ber U Chhani, Pu ber driver U Fela leh ka pa leh kei, pu ber leh Rsa kan ni a, kan hlimtlãng dar dar khawpin ka hria.

Ei khamah kan che sang sang a, Nu Sangi kan âwl thung. Kan che zo hmá rèng a, țanrual hi chu chakna a lo ni takmeuh e. Rei țhu khawtlãi lovin U Fela'n min thlah a, U Chhani a thlah hmasa phawt a, a dawtah keini.

In thlen hnu rei vak lovah chuan ka phone ka phawrh a, vawiina ka thlalakho kha ka check leh miah lo mai a, 'check mai mai teh ang' ti rilruin ka han en dawn a, a êng thei ta reng reng lo mai a. A battery low lutuk a lo thi niin.

Ka on theih hnu chuan Mama miss call 3 lai a lo awm niin. Ka call back a, a vawikhat riknaah a lo chhang nghal.

"Díte?"

"Aw, miss call kha hei ka hmu chiah a, ka phone a lo thi daih alawm. Zia lo tak tak a ni, pawi ka ti lutuk"

"Lo lén ka tum a, in ina ka rawn kalin a lo inkalh sia, khawnge in kal a?"

"Pu berte inah zanriah kan ei alawm. Ka birthday pual zanriah min buatsaihsak a, kan thlenna pawh a la rei lo"

"Um, a nih tak chu. An va ti lawmawm ve a tiraw? I ei puar bawk em?"

"Aw, ka puar lutuk tlat"

"Lo lén nân a tlâi tawh sia,mahse hmuh che ka chãk si. Ka rawn video call dawn che aw?"

"Haha, a zahthlâk, hmêl a chhe duh si"

"Ho lutuk, ka rawn call dawn che"

Min rawn call hmain ka text vat a.

"Ka pa a awm ve reng ania"

A hmu nghal vat a, min rawn chhang vat bawk a.

"Tinge a lén loh a?"

"Kan chaw ei haw kan thlenna a la rei loh bâkah lén nân a tlâi tawh alawm. Nang pawhin i tih ve tho kha"

"I tidik leh bawk si. Nih leh i pic min lo send teh"

Vawiina Theiriat Tlânga ka selfie, ka lan țhat ve na ber nia ka hriat chu ka thawn a.

"Khawi lai hmun nge? A va nawm hmel ve!"

"Theiriat Tlâng a nih kha"

"Vawiinah i kal em ni?"

"Aw"

"Tu nén?"

"Rsa nén"

Min rawn chhâng har ta deuh.

"Thikthu chhia nih ka duh lo nain Rsa hi hnaih lo thei hrâm la ka ti"

Mama hian a thík tihna a ni thei ang em? A ni chiang mai, ve ngei a. Ka nuih a za.

"Vawiinah office leh bank ka dáwrpui a, lawmthu sawi nan min kalpui alawm"

A reh leh deuh vang vang a, a hmu reng tawh sia, a thinrim deuh em ni le?

"I thinrim lo tiraw?"

"Thinrimna chhan tur a awm ang em?"

"Awm miah lo. Engmah Rsa nén kan inkârah a awm lo. Pu ber tupa niin min chhawrtu a ni a, a thu ka awih mai a ni"

"Um. In inkârah engmah a awm loh chuan a țha a ni mai alawm"

Kan intext rei phian. A lungawi lo hran lo a ni ang. Ka khawngaih roh, lo lén a tum ve sia, kan lo awm lo nen, min rawn call , ka chhang bawk si lo va, lungawi lo deuh mahse a awm ka ti tho ang.

Ka muhil țép tihah message tone a rawn ri leh dat a, ka lu bul maia ka dah avangin a nghawr dat bawk a. Ka thin a rim kher mai, ka muthilh teuh tawh nen. Rsa a la ni zui.

"Mu tawh em?"

"Aw"

"I châu viau lo maw?"

"Châu lo ve, tinge a?"

"Ka ngaihtuahnaah hian i awm reng sia, i châu tawh ngawt ang ka lo ti a"

He pa hian min fiam leh tawh tihna em ni? Nge min lémna thar zawk?

"I ngaihtuahna chu a țha lo a nih chu"

"Ţha tiu teu viau ka ti asin"

"Ngaihtuahna tuiék. Paih bo vat rawh"

"Lawmawm reuh lehpek"

A ti leh ta. A lakah hi chuan naupang, lawmawm bâk hi ka ni mawlh lo.

"Naupang enin min en ziah suh, naupang ka ni lo. Nula ka nih hi. India danah pawh puitling, vote nei thei chin ngat"

Nui hmél a rawn tlar tuar mai. Mai mai a,naupang chhia min ti ziah a, naupang chhia ka ni bík lo. Nula, ngaihzawng nei ka nih hi.

********************

A ngâi téin ka nitin hna chu ka thawk chhunzawm leh ta a. Zán lamah Mama a rawn lêng ve ta. A lo lén zankhatna, a țantírah chuan hrehawm ka ti khawp mai. Ka pa a awm ve si a, chubakah lo biak a tum si lo. Mahse Mama felzia ka hmuchhuak, ka pa chu a be siam siam a, chhân lét loh theih lohin a be thiam tlat nia. Zan danga a rawn lén leha ka pa a awm chuan ka pa zawkin a lo be vat ta a, an titi dun thei phian. Kei an sírah lo țhuin an titi ka lo zawm ve mai thin.

"Mama hi a fel roh hi le"

Zanriah kan ei laiin ka pain Mama chanchin a sawi a,mak ka ti kheer asin. Ka pa nen hian kan titi khât a,thil pawimawh a sawi bâk hi kan inbe tam lo, nél pawh ka nél lutuk lo. Ruih cháng a nei a,a ruih chânga a duh loh zawng ka sawi palh hlauh chuan kut min thlâk țhin. Hei vâng hian ka nél tak tak thei lo va , a ruih chuan ka be ngâi lo lehzual, ka tithinrim palh ang tih ka hlâu lehzual țhin. Lily hian min hrechiang khawp ang. Ka nu min chhiahsan hma, kan chhungkaw nundan zawng zawng hretu a ni a, min khawngaih thei tawp. Ka nu min chhuahsan hnuah pawh Lily hian min riahpui țhin, Lily a awm chuan ka pa pawh hian min vaw ngai bík lo. Tun hnu pawh hian hna ka thawh theih áwm tâwk min ngaihtuahpui ve reng a, mahse college rap lo tân chuan a vâng ve a ni. Dâwr nghah tur chu kan hmu mai, mahse ka pain a phal lo. Lily hi chu an rethei lém lo va, zirna pawh a zawm thei bík a ni.

"Tlangval fel tak a ni"

Mama chu a lâwm ngawt ang. Ka pa hian mi hi a fak ve mai mai ngai lo. Kei phei chu min sawisél reng thin zawk. Mahse nunțha leh chêtdan phung dik zawk ka neih a duh țhinah ka ngâi mai. Ani bâk hi neih ka nei si lo va, ka chhungkaw neih chhun a ni. A khawhar hnem nâna zu a in țhin leh nuthlâwi a rím țhin pawh hi sawisél ka tum lém lo, a hlimna tur a zawng a ni ve mai. Mahse kut min thlâk țhin hi chu a zahthlâk ka ti, a na ve țhin tho bawk si.

Mama hi Rsa nen an inrual vel ka ring. Chhungkaw vântlâng tak niin an unau hi pathum an ni a, a upa ber a ni. A nau hmeichhia nen kan inrual chiah. Venglaiah an awm a, tunah hian M.A chhuak tawhin sikulah a inhlawh mék a, B.Ed lam tih leh a tum bawk.

Zãnah Mama chu a lo léng ngei a. Ka pa a léng tawh a, free takin thlang lam bathlârah kan țhu leh a. Vawiin lama kan hun hman dan min zawt a, keiin a hun hman dan ka zawt ve thung a.

"I hah em? I hna hi a hahthlâk lutuk lo tiraw?"

"Hahthlâk lo ve. Ina kan thawh țhin ang tho alawm kan thawh"

"Hna dang han kawhhmuh tur che hria ila ka ti ngawt mai"

Min ngaihtuah tih ka hria,nuam pawh ka ti. Miin min ngaihtuah tih hriatte chu nuam miau hek.

"Hna dang thawh ka pa'n a remti lo. Dâwra inhlawhna tur pawh ka hmu ve mai țhin, mahse ani berin rem a tih loh miau chuan. Tuna ka thawhnaah hian Pu ber hian hlawh min pe țha a, duat pawh min duat. Ka vannei viau asin"

"I puin a duat che chu a lawmawm e. Rsa hi eng nge a an ve?"

"A hrehawm hran love. A fel ve reng mai" ' A chimawm deuh mai pawh a'ka ti rilru a, mahse ka sawichhuak lo.

"A țhat hlauh chu. Hrehawm ti deuh hian hun i hmang ang tih ka hlâu ania. B.Ed hi ka chhunzawm leh ang a, ka zawh hnu lamah chuan hna nghet lam pawh a beisei theih ve tawh ang a, chumi hunah chuan ka duat tak tak thei tawh ang che"

"Tunah pawh hei min duat reng alawm. E taka, ka pain fel a ti teh che ania aw"

"A ni maw? Ka mark score a sâng sawt tihna"

Kan inen a, kan nui ve ve a, ka kut a chelh chu a hum nghet sauh sauh a, ka hmuiah a fawp zohva.

"Ka ngâi veng veng chein ka hria , i bula ka awm reng chung pawh hian"

"Awihawm loh e"

"Ngahnge i awih loh ringawt? Ka rilru i hre hleinem"

"Hm, kei pawh i hre lo. Ka star hmasa zawk che tih pawh i hre lo"

Min kuah hnaih lehzualin," I hre lo zawk a nih chu. Min hriat hma khan ka star daih tawh che, chumi lai chuan min la hre miah lo" nui pahin a ti a.

"Engtikah?" Ka en pah hâ a.

"Chutih lai chuan high school pawh i la rap lo"

"Ka va awih lo tak! Chung hunlaiin min la hre lo aw"

"Ka hria che ka tih chu. Lily nen in inkawm țhin a, an inah i lêng ka hmu fo che. Sam-a nen kan inkâwm țhin a, i la naupang lutuk a, chuvang chuan ka sawichhuak ngai lo. Sam-a pawhin a hre miah lovang. Kei chu ka inti tlangval chho tawh a, naupang té star kha ka inthiam lo țhin hle asin"

"Zanin chu inpuanna ropui ka ngâithla a ni maw?"

Ka hmuia fawh leh zoh pahin," Nia, tuma hnena ka sawi ngam ngai loh a nih kha. A hre hmasa ber i ni" a ti sap a, min kuah chial a, kei pawhin ka kuah lét ve a.

A hnu deuhah chuan a nupui duhzawng sawiin a duhthusam țhin chu keimah ka nih thute chu a sawi a, ka lo nuih a.

"Chutiang sawi chu a la hmâ e"

"Mihringin kan hma chin kan hre miah lo, lo ngaihtuah lâwk hi a țha asin"

"A dik tho mai. Kei chu pasal neih lam hi ngaihtuah pawh ka la duh lo, zir zawm lehte ka la duh si a, a la hlâ em mai"

"Sawi chu a pawi vak chuang hleinem, kei pawhin ka la zir zawm leh dawn tho chu"

Nui chung chuan,"Chuvang chuan alawm nupui pasal lam hi chu ka sawi duh loh. A la hmâ em a, ka ngaihtuah pawh hian ka nuih a za zawk" ka lo ti a.

"Kum 2/3 bâk a ngai tawh hleinem" a lo ti thung a.

Nui chung bawk hian," A kārah thil tam tak a thleng thei a ni...kei chu engmah ka sawi lâwk duh lo" ka ti leh tlat a.

"Kum chu a ral chak e"

Chutiang mai mai chu kan sawi a, ka pa lo haw hma lawkin a haw a, a haw tur chu ka thlah a, step-ah chuan min fawp leh vang vang a.


"Hawsan che hi ka hreh tial tial mai"

"Riak ve mai la" ka fiam châk tlat.

"Min thlém lul suh"

"I duh lo a ni maw?" Ka chimawm ve tlat.

"Ka riak ve tak tak ang a, i pa laka ka mark score hi a chhe duai mai ang a"

Kan nui leh rih a.

**********************

Inrinni zan a ni a, ka pa pawh a hna ngâi, nuthlãwi rímin a chhuak leh tawh a. Ka inkhâwm hman thlâwt lo, ka tlâi tlat. Inkhawm a ngaih avang leh a hnu lama YMA lam committee a ngaih avangin Mama chu a lo leng dawn lo, min hrilh leh thlap tawh. Tih tur a awm loh dawn em avangin 'mut hmâ zânah' ka puang mai a. Mu thei mai turin ka inbuatsaih a, ka ha nâwtin ka hmai ka phih a.

Ka hmâi ka hrúk laiin kawngka a rawn ri a, tu tak chu ni ang maw? Inchungte nau chu ni se, min rawn ko hmasa leh phawt awm si a.

"Lo lút rawh u"

Rsa, helmet keng chunga rawn lút ka hmuh chuan mak ka ti lutuk ringawt. Eng nge a rawn tih dawn? Engtin nge min rawn zawn hmuh chat theih? Kan inah a la rawn kal ngai lo va, kan lâr lém lo bawk nen, engtin nge kan in a rawn hmuh theih zawk ni?

"'Lo leng rawh' te ti ve la?"

Towel dah țhat pah chuan, " Lo leng rawh. Eng nge i lo tih dawn? Engtin nge kan in awmna i rawn hriat theih a?" Ka ti thuai a, ka zawt lo thei lo, mak ka ti em a ni.

"In in ka rawn zawnna lamah hei, ka rawn tlâi vek réng hi. Mi ka rawn zawt kual nasa alawm"

"Eng nge i lo tih dawn?"

"Ka lo leng dawn mawle"

Awih lo deuh hian ka melh reng a.

"'Ţhu rawh'te min ti ve la?"

"E, țhu rawh. Thil ţul tihtur a awm lo tiraw?"
"Eng nge i sawi awmzia?"hriatthiam loh hmel deuh hian min zawt a.

"In inlamah tih tur țul a awm avangin i rawn kal tiraw?"

Ţhutthlénga țhut pah chuan,"A va mak!! Ka rawn léng ka tih chu. I phal lo mi?" A ti nghut a.

"A epa țhut ve pahin," Ni lo, a mak em alawm, ka pa hmuh i duh vang a ni lo maw? Mahse, a chhuak tawh a" ka ti leh țâlh a.

"Ni mai mai lo, ka rawn rím dawn che" min melh rún pah chuan a ti leh sup a.

Sawi tur ka hre ta mai lo.

A helmet chu dawhkanah a dah a. Min rawn en lehin," Zanin chu a lo léng dawn nange ?" A ti a.

""Tu chu maw?" Ka hre lo der leh tlat a.

"I bialpa kha mawle"

"Léng ang, a la rawn thleng lo mai mai anih ka ring" Dâwt ka hrilh a ni ve mai.

"Tinge ka message min rawn reply duh tak miah loh a?"

Rsa message reng reng ka chhâng ngai lo. Naupang chhe ena min en vang hian ka thin ka tirim lui ve a, ka chhâng duh lo.

"Ka peih lo a ni mai"

"Naupang chhia reuh lutuk. Mahse hetiang hi chu tihdan țha deuh ka hria asin"

"Naupang chhia min ti ziah suh"

"Thingpui min lum la"

"Naupang chhe thingpui lum i in duh em ni?"

A nui hak a, a nui ri chuan ka thinlung a dek lehpek tlat. A nui hak ri hi a mawi ka ti a, hriat reng ka duh.

"Lo kal teh"

Ka melh hrá a, eng nge tih a tum ang?

"Ka duh lo"

"Min hlau mi?"

"I hlauhawm em ni?"

"Maithei"

"Ka hlau lo nâng chein thingpui chu ka'n lum ang e"

Thingpui tur ka chhuang zo chiah chu ka hnungah a lo awm reng tawh niin, ka sam ka kilh chhoh chu a rawn phelh a.

"Tawm chho tawh suh ka tih kha. Ti khan i inhmeh," tih pah chuan a rawn kún hniam a, ka samah chuan a hmâi a rawn phúm a, thâwk a la vang vang a. A chét dan avang chuan ka khawng vekin ka hria, ka che ngam tawh lo hrim hrim.