A Bullet's Amen - By, Gunn Halliday ( Completed )

Western cowboy Re-type, lehlin leh mizo phuahchawp dahna

Moderator: writers

Jakob L Hd.
Posts: 1
Joined: May 13th, 2020, 11:05 am

A Bullet's Amen - By, Gunn Halliday ( Completed )

Unread post by Jakob L Hd. » May 13th, 2020, 11:21 am

A BULLET’S AMEN - By Gunn Halliday
( Jakob L Hd )

Clay Rogan-a chuan ram chhete a nei ve a,tahchuan hna a thawk nasain a rim pawh a rim hle a ni.
Rel kawng sial/phahtu mi hausa tak mai Gun Fighter pawh tam tak ruai tawhtu Jobe -Doherty-a chuan, Rogan-a ramah chuan rel kawng phah tlang a tum a,Rogana’n duh loin a lo do let … A thenawmpa, Norwood-an a ram chu tih luihna a neihsak a lo tum ve bawk nen…Engtin zel nge ni ta ang le…?
Rogan-a, mite hmuhsit leh hnuaichhiah em em,silai hman thiam pawh a an rin loh chuan, Gun fighter Eli Paxton-a te, Elison-a te nen an in draw a ngai ta tlat mai..!!!! Rogan-a chuan silai a lo hmang ngai emaw chu le?
Nula hmeltha chung chuang, Norwood-a fanu mal leh nghal Gail-in, Rogan-a a rukin a lo hmangaih chu niin, a pa Norwood-a lahin, Rogana chu a hmelma lian berah a dah bawk si…Chulai kara hmangaihna chuan rah chhuah duhawm tak a chhuah thei ang em le ??!!

BUNG - 1

Chhum zing mup kar atang chuan Clay Rogan-a chuan van lam chu a han dak a, ni chu a lo lang riai riai a, a lo tlang sang viau tawh nghe nghe a. Chumi thlasik zing ni chhuak chuan lumna chhete pawh hi a nei lova,a kawr hakte lah chu a pan si a, thli a rawn thaw tel bawk nen, baltina tui khangte chu a han khawng thla a, a thlengte chu a han silfai a. Chumi hmun reh takah chuan chung rite mai lo chu ri dang hriat tur reng reng a awm lo.
Tlang bul thut velte chu a han thlir phei a, chumi ni ngei chuan a hnim neih chhun hlu tak tak thenkhatte chu an thih belh ngei dawn tih a hria a,tunah phei chuan hnim tlemte chauh an awm tawh nghe nghe a ni. A in, pindan pahnih chauh awmnaah chuan tlan kir phei leh ta a. Khua chu nuam lo hle mahse, vawiin niah ngei hian a ran zawng zawngte chu khalhkhawm a, a kawtzawl zau takah chuan dahkhawm a tum a ni. Khua pawhin lo zir lo zui ta zel mahse a buh in a a ran chaw dahkhawm khan chawm zui mai a tum ta zawk a ni.
Pindan chhhung lumah chuan a han vei kual a. Thuka a coffee chuan so rimte pawh chu a han hre nghal a, tunah chuan a lo lum tan ta deuh bawk a, nuam pawh a ti ta deuh va. Tunhma pawhin khaw chhe runpui hi a lo tuar fo tawh thin a, tunah pawh hian a lo thleng leh ngei ang tih a hria a ni.
A chang chuan kum khat chhunga ruahtui tlak miah loh kum pawh a lo tawng tawh thin a, kum khat dang leh chu vur a tla khat vek thung a. Chung lai chuan ran rual ruk ching lah an tamin an bang lova. A pa ran rual kha hmun li a thena hmun thum chu mi rukbo sak vek an ni a, tuna ng bawka rethei a khawsa tur hian an ran rualte kha an lo hnutchhiah a, thlasik chhung zawng chu an tuar chhuahpui thak tawh bawk a ni. A pa chu hlawhchhamnain a khata, an chhungkua pawh chu beidawnnain an khat bawk a ni.
Chuti chuan kum sawm chhung hah taka an thawhna chu engmah lovah a lo chang ta a ni. A pa rilru na lutuk chuan a tuar ta lova, a in hnem chhuak zo thei ngang lo va, nipui a lo thawtte chuan an ran rual cher tak takte chu a han thlir vel thin a, chumi hnu lawk chuan a rilru na tuar lo chuan a lo thi zui ta a ni.
A pa Brag Rogan-a hi kum sawm kal tawh atang khan hemi hmun ram that vak lohna hmunah hian a lo cheng tawh thin a. A tirah tak chuan rangkachak zawng mi a ni a, thil laihchhuah zawng tur hian a vak chhuak thin a, a hnuah chuan ran han vulh chhin ve a tum ta zawk a ni. Mahse thil laihchhuahna rilru a thinlungah hian a la khah tlat avangin ran rual tana tul lo leh nuihzat thlak zawk lung ti rekruk thil laihchhuahna hmun niawm zawk tak hmun chu a thlang a, a fapa nen chuan harsa takin an khawsa dun ta a. A thih hma pawh khan a fapa hian thil engkim hre tawha a hriat avangin a fapa kum sawmhnih mi lek Clay-a chu ro tha tak hnutchhiah tawh niin a in ngai a ni. A hmuia nui hmel pu reng chung chuan a fapa chu a thihsan ta a. Clay-a chuan a pa chu in hnung lampang awihah chuan a phum ta a. Kalna tur hmun dang a hriain a nei bawk lo va, a cheng zui ve ta zel a ni.
Chu chu tunah chuan kum sarih kal ta lai kha a ni tawh a, a coffee in pah chuan a pa chu a ngaihtuah chhuak a, hetiang hmun hrehawma harsa taka an khawsak laite kha a ngaihtuah zui ta zel a.
Thlasik lo thlen hmaa a bawngte a chhiar hnuhnun ber tum chuan bawng za lai a lo nei tling ve tawh a. Tin, a hnute sawr lai pahnih a nei bawk a, vawk paruk leh arpui tui lai thenkhatte nen a nei bawk a ni. In hnung lamah chuan huan hmin hnihah a siam a, a dang lehah chuan bepui a ching thung a. Hengte hi an tam tham lo hle na a, ama ta leh neihchhun an ni miau si a. Hmun tha zawkleh hlawk zawkahte pawh awlsam tein hmun a va khuar thei a, mikhual hriat chian mang lohte leh an mizia hriat mang lohte bula nitin buai reng tur ava awm chu a duh lo va, mi thupek hnuaia va kun reng mai leh inhnial buai reng maite pawh a duh bawk hek lo a ni. A dam chhung a thil neih loh a hlauh ber chu tuma tihbuai lohva mahni chauh va awm theihna leh a duh ang zawnga thil a tih theihna leh a duh ang anga a awm theihnate hi a ni.
Clay Rogan-a chu choka dawhkan bulah chuan a thu a, a thirbela vawksa lep bacon kan puah rite chu a ngaithla a, pawn lamah chuan inchhung lum hua ang hrimin thli vawt tak mai chuan in chu a chhem lawih lawih a, a piah lawk mel khata hlaa tlang pangahte chuan chum an lo zing chho va. Clay Rogan-a chuan henglai bialah hian thlipui leh ruahpui a lo thleng thuai dawn tih a hria a, Chuvangin hmun dang zawk a ramri hrula a rante chu khalhkhawm a tum ta zawk a. Engtik lai mah hian hmanhmawh a tulna a hre lo va, a hmanhmawh bawk hek lo.
A zing tukthuan vawksa leh biscuit leh coffee te chu a han ei a a in zawh hnu chuan a einate chu a han silfai a, beram vuna siam kawr a han ha chhuak a,kawngkhar a han hawn dawn lai tak chuan sakawr tlan ri a hre ta a. An tlan thawm atang chuan mi pathum an ni hian a hria a, tlang awih lampang atanga lo tlan chhuk an ni a, kawngkhar chu a han hawnga, a han dak chhuaka,thli chuan hnimhnah ro leh vaivutte chu a chhem leng chuai chuai a, thlipui lo thlen nan pawh darker khat vel chauh a awm tawh a ni.
A han inthuam tha sauh sauh va,a han pen chhuak ta a, kawngkhar chu a khar leh a, amah hi pa ria deuh lampang, sang tak a ni a. Thli chuan rei lote chhung chu a lo chhem ding a, kawtzawlah chuan a chhuk a, a sakawr in lampang a pan phei ta a. A sakawr chak zawk chungah chuan a zin chu a han phah zo va, a sakawr chungah chuan chuangin a kal chhuak ta a.
Sakawr tlan thawm ri chu chu a han hre leh ta a. Tute nge maw ni dawn chu aw a ti rilru a. Major Norwood-a mi chhawrte’n an ranrual vakbo an rawn zawng khawm a ni ang e tiin a ngaihsak duh lem lo va,Clay-a hian Norwood-a hi vawi tam tak a lo hmu tawh thin a, an inhmuh hmasak ber khan Norwood-a hian engahmah a ngai lo a ni tih a hria a, hnawksakah te pawh a ngai lek lek zawk niin a lang a. Khuaah pawh ni se, ramah pawh ni se, an pahniha inkarah a an in thlunna awm chhun chu hmun kha ve veah ram in ri tawnin an awm dun tih mai chauh a ni.
“ Rogan “ tiin tlangpang atang chuan tu emaw hi a rawn au tuar a. Clay-a chu a sakawrah chuan a han thu tha a, a han hawi chho va, mi pathum Range kawr haa amah rawn pan chu a hmu ta a.An hmaite chu an lukhumin an rawn hliah khuh a. A tu amah chu a hrechiang thei lo va, a sakawr chunga thu chung chuan a lo nghak ta a.
A tirah chuan chung sakawr chung chuang mi pathumte chuan muang chang hian an rawn pan a, mahse Clay-a a lo din chuan an rawn tlan phei ta a.Clay Rogan-a bul an rawn thlen chuan an din hual nghal a, a dinglamah pakhat; a veilamah pahnih, a ding lama mi chu a rawn tawlh hmasa ber a, a hriat mi pawh a ni lo. Clay-a chuan ngun takin a lo thlir reng a. Pa hmui pan hlei hlawi, mu ang mai a hmai hriam hi a ni a, a mitmengahte chuan sualna hi a khat tlat a ni.
Chupa chuan, “ Khua chu a chhe hle tak na a Rogan, hei hmun hla tak atanga rawn hmu tur che a lo kal kan ni a, chuvangin kan thil rawn sawi tur chu tawitein ka han sawi nghal mai ang e. Kan han endik hnu velin hemi hmun hi i ta a lo ni awm a. Hei, sumdawnna lam kawng sawiho turin khuaah i lo kal ngai lo tih kan hriatin kan lo kal zawk a ni “, a han ti a. A tawngka chhuak chu a chang hle a, hmui pawh a che mang lo va.
Clay Rogan-a chuan, “ Enge ni in duh Mr ? “, a han ti a. Chutia a tih pah chuan midang pahnihte chu a han enchiang a. Pakhat chu palian tak a ni a, a kut tum chu a lo hum ruh a, a hmel pawh a dur hle a, pakhat dang erawh chu anni zawng ai chuan a lang upa hret a, a mitkhur a thuk hle a, misual hmel hi a pu hliah hliah bawk a. Tin, a kawr hakte pawh chu a danglam bik a, khawpui incheina lam hi a kawk zawk mah a. Hetiang Ranch-ahte hian hna a la thawk ngai lovang tih leh a hrehawm leh harsat ziate pawh a la tuar ve ngai lo a ni tih a lang nghal mai a.
Thu rawn sawitu bawk khan a rawn sawi chhunzawm leh a. “ A hmasa berin kan han inhriattir ang che. Kei hi Art Curry-a ka ni a, hei hi Eli Paxton-a a ni , kan thian dang pakhat hi Burt Elison-a a nih hi “, a han ti a.Paxton-a chu palianpui a kha a ni a. Elison-a chu khawpui inchei a inchei kha a ni. A han sawi chhunzawm leh a, “ Kan vai hian Jobe- Doherty-a hnuaia hnathawk kan ni “, a ti a.
“ Doherty-a chu tunge ni ? “, Clay-a chuan a lo ti a.
Chutia a han zawt ta chu Curry-a hmelah chuan mak tihna deuh hi a lang a, a kutphahte chu sakawr zinah chuan a han tat fai te te a, a khel vei lampanga a puakruk pai chu a lo lang nghal a.
Art Curry-a chuan, “ Jobe Doherty-a te chu hetiang ang ram atante chuan P-thian rawn tirh a ni ringawt alawm Rogan. Ram tih hmasawn leh changkan a tum a, mipuite hmasawnna tur leh hausak zawkna tur kawngte rawn zirtir a tum a. Hetah hian nangmahni ang mipuite hi tanpui tur che u in a lo kal a ni “, a han ti a.
Clay-a chuan, “ Amah pawh chu a in tanpui ve nghal bawk ang maw ? “, a lo ti thuai a. Clay-a chuan chutianga a chhanna a rilru a lo lut phut mai chu mak pawh a inti rilru deuh va. Curry-a tawngkam chhuaka inrinna hluah hluah lo lang khan a rawn thun lut ni hian a hria a. Midang pahnih Paxton-a leh Elison-a te chu an sakawr chung atang chuan an lo ngawi reng a. Paxton-a chuan chunglai ramte chu a lo en chiang a. Elison-a chu dawhthei awm tak hian a lo thu reng a.
Curry-a chu a han nui chhuak hawk a. “ Aw, a ni khawp mai.Jobe-a chuan amah pawh chu a in tanpui ka ring khawp mai. Mahse, chungte chu mihring dan pangngai alawm. Ani lovem ni ? Shallow River khawchhak lampanga khuate nen rail kawnga inzawm tir a tum a, henglai rama ran tualte hi thau tak leh a hun taka hralh theih annih nan sum namen lo sen a huam a ni.Ram chhengchhe bumbohva ran rual khalh chhuah a ngai tawh lovang a,heta tang hian relin a phur liam tawh mai dawn a ni. Hei hi Jobe-a thil tum chu a ni a, a hlawhtlin pawh a hlawhtling ngei ang “, a han ti a.
Clay-a chuan ringhleh tak chung hian, “ I sawi dan chuan a tangkai fu awm chu maw “, a lo ti mai a. A rilru tak chuan kal chhuah hlan a nghakhlel hle a. Tumahin khawiahmah a ran rualte chu an phurh sak duh dawn lo tih hriain, a ran rualte chu khalhkhawm thuai thuai a duh tawh hle a ni.
Curry-a chuan, “ Mi tam tak chuan an tangkaipui hlawm ngawt ang Rogan. Amaherawh chu a chang chuan engemaw buaina hlek hlek zawng a awm lo thei lo va, mahse, chung zawng zawng chu sut kian zawh loh thil a awm lovang. Tunah hian ka han sawi rawt mai ang a, i ram hi leisak che kan duh a ni “, a ti ta a.
Clay-a chuan a mak tihna chu tih lan loh hram hram a tum a, mahse, a hmelah chuan a lo langchhuak palh a ni ang chu Curry-a chuan, “ Jobe-an a man awm tawk a tih chu a tam tawk viau ang. Nakin hnua mite’na hemi ramah hian a maha duhthuin a rawn in zep lui ti a an sawi rik leh loh kan duh a Rogan. A reng reng thuah engzah nge i chhiar reng ? Dollar sanghnih em ni ang ? “ a han ti a.
Clay-a pawh chuan a mak tihna chu han thup hni hne tul hian a hre ta lo va. Hemi zing ngei hian ama chenna in leh ramte chu a ngai ngaia chhuah san mai a lo rilruk tawhsa chu a ni ngei a. A nih loh vek pawhin a ran rualte chu Norwood-a rama khalh luh a hralh zawh vek a lo tum a, chumi hnua vah bo daih mai chu a lo tum rilruk deuh a ni a. Hetiang anga ram chhia ang atan chuan dollar sanghnih te chu ihe lohva pawm nghal mai tur chi a ni a, a hriatah phei chuan hetiang ang ram atante chuan a la man sang ber ang tih a ring a ni.
Clay-Rogan-a chuan a chhan tak lawk loh avang chuan Curry-a hmel pawh chu a lo danglam ta deuh va. “ Rogan, hei aia to chuan kan lei ngam lo va ni. I duh leh pawm la, i duh loh leh pawm lo mai rawh “, a han ti leh a.
Curry-an chutianga a rawn tih tak deuh hmak avang chuan Clay-a pawh chu a sakawr atang chuan a thu ngil zawk a. Zing khaw vawt pawh chu a pawi sa duh ta lo va. Curry-a chungah chuan engemaw duh lohna riau a nei ta nghal a. A thian dangte pahnih pawh chu a ngei tel ve ta zel a.
“ Curry, phal lo ta ang i la “ Clay-a chuan a han ti chhak a.
Curry-a chuan a mitko a han san ak a, mahse a chhan hmain Burt Elison-a chuan a sakawr chu a rawn pawt her a, Clay-a chu a rawn pan hnai a, a han en chiang te te a.
“ Rogan, i phal lo a nih chuan a pawi lo ve, kan nei reng reng ang engpawh nise, kan neihsak chein kan la dawn a ni ! “ a han ti nghal thuai mai a.
Curry-a chuan Clay-a mita thinrimna rawn lang chhuak chu a lo en reng a. Elison-a chuan tawngkam a hmang chang lutukin a nawr hma lutuk a ni tih pawh a hre reng a. Ani chuan dam deuh zawk hian, “ Chutiang thleng thlenga kal pawh a ngai lovang, a ni lawmni Rogan ? Mi thil hai ngai lo leh hrethiam tak i niin ka hria a.Hetah hian neih i neiin han awm chhan tur pawh i nei lo va, Jobe Doherty-a pawisa chuan hmun tha zawk leh nuamsa zawkah a awmtir thei ngei ang che. Chu engtin nge i ngaih ve dawn le ? “ tiin a lo zawt ve leh a.
Burt Elison-a chuan, “ A pawm em em ang “ lo tih pah chuan a malpuia a puakruk pai chu a han ti lang lui ngat a.
Chu veleh chuan Clay-a chuan Elison-a chu a en ta reng mai a. Curry-a chuan hmanhmawh deuh mai hian, “ Lo ngawi lawk teh Burt, awmzia a nei lo “ a lo ti hman chauh va. Burt Elison-a chuan, “ Curry, lo in rawlh ve tawh suh, nang chuan i sawi tur i sawi zo tawh a, i thil sawi dan pawh kha ka duh lo a ni. He mihringpa hian a pawnthuah tel sela, Shallow River-ah lo kalin, a pawisa tur rawn lam bawk rawh se.Rawn kir leh ngai tawh lo turin kal chhuak nghal bawk rawh se ! “ a ti ta tlut mai a.
Clay-a chu a thin a rim ta hle mai a, a kate chu a lo ro zo ta a. Elison-a chona chu a han chhang let a. “ Ka han inngaihtuahin, kei chu he tah hian ka la cheng reng dawn “, thum dap hian a han ti a.
Tunah zet zawng Elison-a chu a thinrimin a sa ta phat mai a, a han nur a, a han thenkhum a, anchhia a han lawh leh phawt a. Curry-a chuan thlaphang tak hian a lo thlir reng a, Elison-a lo hrilh tawh ang khan ngawi rengin a lo awm a. A pathumna Eli Paxton-a erawh chu a lo nui var var thung a, a inhnial buaina chu ngaihthlak nuam a ti a, an inbei tur pawh chu hmuh a chak hle a ni.
Eli Paxton-a chuan, “ Chungte chu tunah pawh kan ti thei reng alawm. A awlsam khawp ang chu, lo kal harsat leh a ngai tawh lo a ni mai alawm “,´a lo ti a.
Elison-a chuan chang bang hian, “ Kan kal leh a ngai tawh lovang. Rogan-a hian atana tha ber tur a hria a. Henglai velah hian thian pakhatmah a nei lo va, tumah han hrilh tur pawh a nei hek lo. Jobe-a hian a lo chian lawk sa vek tawh a ni, a tan pawh in dawrna hlawk tak a ni ngei a, a hralh em em ang. Tin, a dang leh chu a ke ler thleng maia a dawihzep em em mai avang hian a ni bawk, a ni lawmni, Rogan ? “ a han ti leh kher a.
Clay-a chuan chung mi pathumte chuan an rawn en reng tih a hria a. Silai a keng ve si lo va, an rik rapna pawh chu a tak tak a ni tih a hre bawk a. Heng mi pathumte hian chil chhak ang leka awlsamin an that mai dawn tih pawh a hria a ni. Clay-a chuan, “ Elison, mi hmaah hian ka la dawl ngai lo a sin. Tuma hmaah hian ka la tlawm ngai lo “ a han ti ve ngat a.
Elison-a chuan, “ A hmasa ber tih fo mai chu Mister “ tih pah chuan a sakawr chu a pawt her a, a kal ta a. Eli Paxton-a pawh chuan Clay-a chu nuihzat hmel tak hian a han nuih a khum a, Elison-a chu a zui ve nghal a. Art Curry-a chu engkim tifel turin an kalsan ta a.
Art Curry-a chuan, “ Rogan, a a duh teh suh, engmah thil chan tur leh a thlawn tur i nei hlei nem, hlawkna zawk ve alawm. Naktukah chuan Shallow River-ah chuan min rawn hmu ang che “ a han ti leh a.
Art Curry-a chu a inher a, a thiante pahnih chu a um phei ve ta a. Awihpang an han thlen chuan an ding khawm a. Burt Elison-a chuan Clay-a chu a rawn thlir let a, a hmel chu thinrimna hian a khat a.
Clay-a chuan zawl fai lai chu a kal tlang phei a, engatinge maw ni buaina hian a rawn zawn chhuah bik fo mai chu le ? tihte chu a rilru chuan a ngaihtuah neuh neuh va, miin a ranrual chungah rilru sual leh tumna sual an rawn nei lo a nih vek pawh hian khuate tal a lo ro char leh zel si a. Tui te a awm lo va, a hnim neih chhunte pawh a lo thi zo tep tawh a ni mai bawk si a.Mikhualte leh Norwood-a mi chhawrte lah chu ti bawk, mipuite chuan an chim buai a, an ringhlel a, tumahin an kawm tha duh lo va. Engtik ni khan nge thiantha biaka an rawn biak, engtik ni khan nge thian nuiha an rawn nuih pui tih pawh a hre phak tawh lo va ni. A rilru chuan, “ Duh leh kal bo vek rawh se “, ti tein anchhia a lawh khum a.
Doherty-a te chu an rel kawng chawpin bo phiar rawh se te a ti vel ta mai mai a. Ama duh vang ni lovin mite’n chhuak se antih vang ringawt a chhuah ai chuan awm ngheh a tum leh ta zawk a ni.
Awih tlanah chuan a kal chhuk zel a, ngaw a han thleng a, lungpui karahte chuan a put phei zel a,a pal hungna chu a va thleng ta a.Awlsa tein hmun rualremah a kal chhuak a, chuta tang chuan a bawng khalh khawmna hmun pangngai panin lui dung a zawh pui ta a. Chutihlai hun chu nau riltam hun a ni tawh a, ni chu sa vak lo mahse, sakawra a chuan hah em avang chuan lum a ti hle tho va. A hnathawh kawr chung chu a hlip a,a sakawr zinah chuan a bang a, a sakawr chu tui a han in tir a. Kawng lakah chuan bawng dang pahnih a hmuh belh leh a, a la hma bawk a, hmuh belh leh zel pawh a la in beisei a ni.
A sakawr chu a che hrut a,amah pawh chu thu ngil nghalin, a han hawi kual vel a, a ranrualte pawh chu engemaw tih thaihtu an awm ni awm tak hian a lam chu an rawn hawi a, a awmna piahlam chu an rawn thlir a ni.
Clay-a chuan mi pakhat, sakawr chung chuang,thing zinga ding hi a va hmu ta a, a awmna hnung lam atang a fit sawmnga leka hlaah a ni a. Thli rawn tlehna lampang atang a rawn kal a nih avangin a sakawr leh bawngte chuan a rim an lo hre hmasa a ni.
Rei lote chhung chu chupa thil tih leh dan tur chu a lo thlir ringawt a, tunge a nih tih a hrechiang lo na a, Norwood-a mi chhawrte zinga mi a nih a ring ringawt a. A bawng khalhte chu an chhinchhiahna rawn endik sak tumah a ngai mai a, engah tehchiam a lo ngai duh lo va. Bawng chhinchhiahnate chu a lo endik vek tawh a, ama ta vek an nih avangin a lo ngai pawimawh vak lo a ni.
Tichuan chupa chu a awmna atang chuan a lo chuang chhuak a, a puakruk rawn lek chhuahte pawh chu Clay-a chuan a lo hmu hman a. Vawilehkhatah chupa chuan a rawn kap ta thuai mai a, silaimu chuan Clay-a luchung fit 1 vela thing zar chu a rawn deng dawt mai a, chuveleh chuan Clay-a sakawr chu a ding uaih a,tuiah chuan a zuang thla ta bawrh mai a, a bawng khalhkhawmsate pawh chu luikam hrulah chuan an tlan darh ta nghal a, a sakawr chu thunun a han tum thin a, mahse, silai chu a rawn puak leh ta a, a thunun hlei thei lo a ni.
Hetia awm renga kah hlum nih chu thil atthlak tak a ni tih a hria a, mahse a rawn kaptu rawn kal phei chu tunge a ni tih hriat chian tumin a han hawi kir leh hram a. Eli Paxton-a a ni tih a han hriat takah chuan thinrimnain a khat nghal a.
Clay-a chuan a kawngbawra a pistol paina chu a han dap nghal a, mahse a lo pai awzawng lo tih a hrechhuak nghal a. An pathuma an kalsan hnu khan silai han ken pawh a lo ngaihsak zui ta lo a ni. Tunah chuan mahni pawh in veng thei lovin hmun ualau-ah a rawn nangching ta si a.
A sakawr chu a han kheng vak a,tui thuk lampang chu a pan phei pui ta a,lui lai chu a va thleng a, tui chu a lo khauh viau mai a, silai a rawn puak ri leh zawt zawt a. Chutih lai tak chuan a sakawr chu a tlu ta a, hma lampang fit tlemte te chu silaimu chuan a rawn deng per chhuai chhuai a, silaimu pakhat chuan a malpuiah chuan a rawn fuh ta a, silaimu pakhat dang leh chuan a sakawr chu a rawn kap fuh bawk a. A sakawr chu hlauvin tuiah chuan a tlan ta a. Clay-a chu a sakawr atang chuan a zuang thla a, tuiah chuan a liluh ta nghal a. A han dahchhuah leh chuan lui mawng lampang yards 10 vela hlaah hian a lo awm tawh a ni.
Chutia a han dahchhuah leh lai tak chuan silai chu a rawn ri leh a, a ke bul lawka tui chu a rawn deng per sawk a, Clay-a chu a han in her leh pah chuan Paxton-an ngun taka a rawn tin leh lai chu a hmu leh nghal a, tuiah chuan a liluh leh nghal a, mahse silaimu chuan a darah a rawn fuh ta hlauh va, a dar dawm chung chuan a liluh lui zel ta thova,a hliam pawh chu apawisa thei tawh lo ni.
Paxton-a rawn kah phak lohna tur vei lam hla deuh vah chuan a her phei ta a. A thaw lah chu a chham tawh em em mai bawk nen, a puak keh lo chauh hi a ni tawh a. Engtia hla nge tui chuan a len chhuk tawh pawh a hre lo va, vau kamah chuan Paxton-an a lo chan ngei a ring si a, chumi lai chuan tui chuan veilamah a len phei zel a,limawnga thingtluang rawn tlu chhuk chuan a lo hrut a, chu thing chu a vuan bet zui ta a.
Tui chuan thingluang lehlamah chuan a len liam a. Clay-a chuan thingluang chu a vuan chho a, limawnga han chhuah chuan a thaw huai a, chumi thingluang atang chuan a zar te tak te te hi a lo chawr chhuak a, chumi buk phenah chuan a biru ta a, a rawn chhukna lampang chu a han thlir chho va, limawng lam yard 50 laia hlaah chuana lo awm der tawh a, mak pawh a ti hle a ni.
A ral leh lamah chuan Paxton-a chuan a sakawr chunga thu chung hian, a luhna li vel lai kha a silai hian a lo tin kuala, a hmelah chuan lawmna leh rinhlelhna a lang kawp a,a tawpah zawng lawman hmel nge nge chu a hmelah chuan a lang nasa ta zawk a,ngaihtha takin a sakawr chu kai herin, a rawn kalna lamah chuan a tlan liam leh ta a.
Clay-a chu tui atang chuan a lo chhuak a,a dar velte chu a han endik a,Paxton-a silaimu khan a dar ruh chu a rawn su a, chu chuan silaimu chu a lo la kawi a ni. A hilum chu na a ti viau mai a, mahse ni rei loteah Paxton-a umzui thei tur chuan a dam that leh mai a ring a. Paxton-a a hmuh leh vaih chuan a dulah ngei suanmu thun a tum tlat a ni. Thingluangah chuan a han thu kai a,a kekawr chu pawt thlerin,a malpui hliam chu a han en ve leh thung a, a ruh a lo khawih lo hlauh va, a tihrawlah a lo tlang zawk a. A han thu fel te te a, a taksa zawng zawng chu na huai huai hian a hria a.
Tichuan a rawn mangang ta thut a, a mitte chu a lo vai tan ta bawk si nen. In tih harh hram a han tum thin a,mahse, thisen a hloh hnem em avangin a lu te chu a vir tan ni hian a hria a, a thle lawk lawk a, tuiah chuan tawlh thla leh ta riai riai hian a in hre ta a. Thingluang chu a hawngah a han man a, rei lote chu a han inham tang a, man ngheh tlat a tum bawk a, mahse a chauh tawh em avang chuan a man nghet zo ta lo va. Tui chuan a han hrut thla a, han che turin a chau lutuk ta, tui luang khauh tak chuan a len thla ta a, engmah hre lovin a awmzui ta nghal bawk a.
Engtia rei nge a nih zawng a hre lo va, a tawpah chuan a rawn harh chhuak leh a, vaukam tiau lung chu a khawih thei ta a. A thei tawpin, a tha neih zawng zawng nen a tang a, engtin tin emaw vaukam tiau ah chuan a in hai chhuak thei ta hram a, a hriat theih hnuhnun ber chu vaukam a laitel tlan ri chu a ni.

*******************

Clay Rogan-a in chhak awih pangah chuan Burt Elison-a chuan, “ I va that em ? “ a lo ti a. Eli Paxton-a chuan, “ A thi tawh “ a ti mai a. Art Curry-a chu a ang ta hlawih hlawiha, Elison-a chuan, “ Art, i pum at let der elaw “, a lo tih khum a.
Art Curry-a chuan anchhia a han lawh khum leh rih a, “ A tulna a awm lo em mai, thil a hriat chian ve tawh ka lo ring a, tun thleng pawh hian ka la ring a sin “, a ti ta a.
Elison-a chuan a thin buluk leh vin tak mai hian, “ Art, i ka atanga i lo rak chhuah mai mai kha rang takin ti tawp vat mai teh, Eli-a leh kei hian a thah lampang chu kan tum dawn alawm. Hretu an awm lo va, nang pawh hi hretu i ni pha hlei nem, mite chuan misual vak mai mai kut a tuar palh a nih hi an ti mai dawn a sin,a pawi tha ting mai a ni “, a han ti a.
Art Curry-a chuan, “ A ram kan la nei chuang hlei nem “, a han ti leh hram a.
Elison-a chuan dam deuh hlek zawk hian, “ Engvangin nge maw kan neih lo hang le, a ram neihna kan enfiah tawh a, a hmingte chu kan ziak chawp ve tawh mai ang chu. Vawiina ka hnathawhnaah hian Jobe-a chu a lawm kher ang chu. Tunah zawng rel kawng a siam thei dawn ta a nih hi. Tuna kan tihtur chu thut mai mai leh thil rawn chawk buaitu turte lo dan hi a ni ta mai “, a han ti a.
Art Curry-a chu chu chu a la ring thei chuang lo va, a lawm bawk hek lo a ni. Mahse, Elison-a hi hnial loh a tha zawkin a hria a, Paxton-a lam chu hawiin, “ Chu i that tak tak chiah maw Eli ? Tihsual a awm miah lo maw ? “ tiin a han zawt leh a. Paxton-a chuan, “ Thil ka tisual ve ngai lo, nang ziaktupa, nang zawk hian i tisual palh ang e “ tiin a lo vau let zawk a.
An pathum chuan an kal ta a. Rogan-an a ran rual a chanve lai a lo khalhkhawm tawhte chu an kal pel a, a hma aia chak zawkin Shallow River lam pan chuan an tlan liam ta a.

BUNG - 2

Clay Rogan-a ang bawk hian Lew Stubbin-a mi a ngaina teh chiam lo va, mahnia maltlat mi a ni. Tunhma chuan ramte pawh a lo nei ve tawh thin a, a chhun a zanin eichawp zawngin hna a lo thawk ve tawh thin a ni. A thawhchhuah rah ve thungte chu kut durh phungnate, taksa nat them thumnate, ei chhiatte leh pawisa neih lohte chu an lo ni thin a.Tho te, lum te leh vaivutte chu a pawisa ngai chuang lo va, ngaiah a nei mai a. Thatchheho nawmsakna kawng daltuah a puh hmiah mai zawk a ni.
Mahse, Major Norwood-an a ram dollar sangkhata a han dawn meuh chuan, ihe lovin tih luih pawh ngai lovin leh phurna pawh awm chuang lovin a lo pawm nghal hmiah mai a ni.
Norwood-a hian engtik niah emaw chuan henglai rawm zawng zawng hi a la nei vek ngei dawn niin a hria a. Chutiang a nih dawn chuan lo hnial vak chu mi aa chhiava ni dawnin a in hria a ni. Stubbin-an Norwood-a hnen a a thil ngen pakhat chu, Norwood-a ram chhunga ramvah vel theihna leh sangha man, thangkam, leh riahhmun khuar theih phalnate chu a ni mai a. An inremna lehkhaah leh an thil inhralhna lehkhaahte pawh chuan heng a thil ngente hi ziah luh tel vek an ni a, chutiang chuan an in dawrna chu an ti fel ta a ni.
Kum hnih a tling dawn ta a, a ram a hralh ni atang chuan Lew Stubbin-a chuan a nun duh dan ang chuan a khawsa tan ta a. Khuaah pawh a kal ngai lo va, buaina pawh a hel zel thin a,mite hian an hmuh chang nite pawh hian,hepa hian engnge maw a tih kual vel thin ni an ti mai zawk a ni. Thenkhat chuan khawiah nge maw a kal dawn nite anti mai mai chauh thin bawk a.
Tlangah emaw ran vulhna hmunah emaw an han hmuh change hian phar ang maiin a tawng duh lo va, miin thil an han zawhte hian a chhan nan a a melh mai hi zawhna zawttute hlawh thin chu a ni mai. Chuvang chuan mite chuan an rilru an siam a, biak enah pawh an en duh tawh lo va, mi aa ah an dah a,an kalsan mai thin a ni.
Lew Stubbin-a chuan tlang pang puk pakhatah hian awmhmun a khuar a,chumi pukah chuan hapta/kar sawm lai a cheng tawh a. Chumi ni, zing khaw vawt tak mai hnuaiah chuan a awmna puk atang chuan a rawn chhuak a, Rogan-a in awmna lam chu a rawn thlir chhuk a. Rogan-a kawtzawla sakawr chung chuang mi pathum tlan lai chu a hmu a,mak a ti rilru hle a.
Rogan-a hian in leng a ngaina ngai lo va,in leng leh tlawhtu pawh hi a nei ngai mang lo va ni. Norwood-a mi rawihte tak ngial pawh hi a ngai thei lo va, an rawn tlawh pawh a duh hek lo. Mikhual reng rengin a ram chhunga an rawn tlawh tawh phawt chuan Rogan-a hian en chiang tur leh hrechiang turin a chhuak ziah thin a ni.
Lew Stubbin-a chuan ran dahkhawmna vel chu a zuk thlir chiang a, Clay Rogan-a hmel awm reng reng a hmu ta lo mai a,a ran rualte khalh chhuak turin a liam ta a ni ang e a ti mai a ni.
Stubbin-a chuan sakawr chungchuang mi pathumte chu a han thlir zui a,mahse a rilruah ka hna a ni lo ve tih pah chuan a sakawr chu a kal chhuk tir ta zel tho a, a tawpah chuan Rogan-a kawt chu a zuk thleng ta a. A han ding a, Rogan-a kawt vel chu ngun fe hian a han enkuala. A rilru chhungrilah chuan engemaw dik lo awm ni hian a hre ta tlat mai a,khuaa eitur va lei nan a sazupui vunte hralh a lo tul bawk si. Rogan-a hian eitur a ngah viau mai a, inthleng mai pawh chu a hnial lo reng a ni.
Stubbin-a chuan a rilru a siam fel ta a. A sakawr chu a kai her a, in chu a pan phei ta nghal a, kawngkhar bul atang chuan Rogan-a chu a han au va, mahse chhanna a dawng ta reng reng lo mai a, mahse in chu a han kal hual a,mak a ti ta tulh tulh mai a, a sakawr atang chuan a han chhuk a. Kawngkhar chu hawngin, in chhung chu a han bih vel a, thil lo awm dan chu a kal hmasak ang chiah tho khan a lo awm vek bawk si a. Chu chu a keartui a sawh tliah tuma Rogan-a bula a va awm lawk lai kha a ni. Engemaw ti zawng tak chuan an inmil phian a, chumi hnuah chuan a tu ve ve mah an la intawng leh ta lo a ni.
Stubbin-a chuan a sakawr chu a be mawlh mawlh a, “ Sakawr, hei kan thiana hi kei atan leh tu a te tan pawh hian a inah a awm lo niin a lang a, kal zel zawk ila a tha ber mai ang “ a han ti a.
Stubbin-a chuan a sakawr chu a kal tir ta zel a,luikam a va thleng a, luikamah chuan a kal chhuk zel a, Rogan-a in atanga mel khat a hlaah chuan lui chu a kan ta a. Khawthlang lampang tlanga lawn chhoh chu a tum a ni. A sakawrin lui a kan lai chuan Stubbin-a sakawrin tui a hleuh awlsam zawk nan tuiah chuan a zuang thla a, a meiah vuanin tui khauh chuan sakawr chu a len thla dawr dawr a, rei lote hnuah chuan lei chu a rap pha ta a. A kam leh lam lei sanghet a va thlen chuan a sakawr chu a tiding a, a sakawr chungah chuan a han chuangkai leh a.
Tui chu a vawh em avang chuana sakawr pawh chuan kal hlan a nghakhleh hle ni hian a lang a, mahse, Stubbin-a chuan a pawt ding ta tlat a, thlang lam deuh va vaukama thil awm chu a thlir ta reng a. Rei lo deuh chhung chu zuk fiah mai pawh a tum lo va,a nghak ta reng a, minute khat hnu vel chuan mihring che chang lova mu a ni tih a hre ta a.
Stubbin-a chuan tui chak taka luang chu a han en a, hre ngai lo tan chuan a hlauhawm zia tur pawh a hria a,lui tui khauh tak mai, thuk tak, thingluang awm thliah thluahna hmun a ni tih a hria a. Hepa hi engemaw tiin a sakawr atangin a tla ang a, a hleuh kai theih hram a ni ang a ti rilru a. A sakawr chu a pan chhuk tir ta a, a zuk thlen thlak chuan Clay Rogan-a ani tih a hre nghal a.
Lew Stubbin-a chu a sakawr atang chuan a chhuk leh a, kum hnih chhunga a thian lo neih ve chhun a ni a. Rogan-a chu dimtein a han kuai zangthal a, Rogan-a dar atang leh a malpui atanga thisen rawn luang chhuakte chuan a kawr leh kekawr chu a lo luan sen hnu tawh a, chumi a’n hmuh chuan Stubbin-a chuan a bandana nghawngawrh chu tui ah va chiah huhin,chu chuan Rogan-a hmai chu a han hru fai ta a.
Fimkhur takin Stubbin-a chuan a thianpa chu a han mut that tir a. A kekawrtlawn chu a han pawhthler sak a, ngun deuhvin a han en chiang a,a sakawr chu a va pan phei a,a ip atang chuan chi hi a va phawrh chhuak a, Rogan-a malpui hliamah chuan a han tat a, nghet takin a tuam sak leh a. Thisen rawn chhuak pawh chu a tawp a, a dar lampang chu a han en veleh thung a,a kamis hak lai chu pawh thler sak lehin, silaimu a tang nge tang lo tih a han enfiah hnu chuan silaimu a lo tang lo va, chi bawk chu a tat lehin a han tuam tha leh a, chutia a tuam that lai chuan Clay Rogan-a chu rawn harhchhuak in, lo bawisawmtu Stubbin-a chu a han en a.
Stubbin-a chuan, “ Clay, tuar hram hram la, lo che suh ang che. Silaimu pahnihin a fuh che a nia “, a lo ti vat a.
Clay-a chuan ngun deuhvin a la en reng a, khawiah nge a awm a, engnge ni ta tih pawh a hre lo. A vawt deuh tih mai loh chu na pawh a vak lo va,vawikhat a lo tanpui tawh hnuin, a lo tanpui ve chu hlauhawm a ni pawhin a hre lo a ni.
Stubbin-a chuan, “ Clay, i ding thei ang em ? “ a han ti a. Chu aw chuan a ti harh leh zual a. Clay-a chuan, “ Engnge lo thleng ta ? “ a lo ti ve thung a. Stubbin-a chuan, “ Clay, chu tak chu ka hriat loh chu a ni. Heti lampangah hian ka lo kal a, heta i lo mu ka hmu ta che a, i hliamte ka tuam tha nghal a ni. Mahse, Mister, doctor leh damdawi chu i mamawh ngei dawn a ni “ a lo ti a.
Clay-a chuan a malpui tuam pawng ul chu a han hmu a, han thawh chhuah mai a tum a, mahse adar chu a rawn na chhuak ta uaih mai a, a han rum nghat a, a dar chu a han khawih vel a, chu pawh chu tuam that bawk a lo ni a. Rogan-a chuan a mitmei chuan Stubbin-a chu a han zawt a.
“ Clay, vawi hnih an kap fuh che a, a lan danin thisen pawh i hloh tam viau ani ang. Hetah hian i awm reng thei dawn lo va, i in kan thlen ngei a ngai a ni “ Stubbin-a chuan a lo ti a.
Chutia a sawi lai la la chuan Stubbin-a chuan Clay-a zakah chuan nghet tak leh dimte hian a kut chu a rawlh a, Clay-a pawh chu a lo tang tel ve bawk a, a tung ding thei ta a. Clay-a chu then chawk chawk chung chuan a ke tha lam chuan a ding chhuak ta hlawl a. Stubbin-a chuan, “Silaimute hi an tlang ve vein ka hria a,a vungte hi tui vawta kan silfai chuan a lo reh deuh ang a,kan tuam tha leh ang a, tichuan a ziaawm chhawm tawh mai ang“ a han ti leh a.
Clay-a chuan a thianpa tawng chu a chhang lo. A kat phei hlauh hlauh va. Stubbin-a chuan thing nghengin a din tir a, a sakawr la tur chuan a kalsan ta a.
Clay-a chu Stubbin-a tanpui nain harsa ti takin sakawr chungah chuan a lawn kai thei ta hram a. Stubbin-a chu a hnungah chuan a rawn chuang kai ve a, lui mawng lam chu an zawh chhuk ta a. Rogan-a in atanga mel chanve a hlaah lui chu an kan phei ta a. Ngaw karah chuan an kal zel a, minute 10 hnu ah chuan Rogan-a in chu an hmu thei ta a, khua pawh a hnim leh ta deuh va, Stubbin-a chuan, “ Ruah rawn sur hma chuan kan thleng hman ang chu “ a han ti a.
In hnung lamah chuan Stubbin-a chuan Clay-a chu sakawr atangin a hlang thla a, kawngkhar pawh a thlen zawh tak loh avangin Stubbin-a chuan kawngkhar chu a hawng a, Clay-a chu a pawm lut ta a.
Clay-a chu khumah chuan a han mut a, mei a chhem ta nghal a. Chaw ei turte chu a zawng khawm a, chutih lai chuan Clay-a thung erawh chu engmah pawh hre lo in a lo muhil nghal bawrh bawrh a. Stubbin-a chuan bawngsa chu tui neiin a kang ta a.
Clay-a tan chuan muthilh hrih a that zawka a hriat avangin amahin chaw chu a ei a, a eikham chuan a sakawr zin va hlang thlain a va thlung fel a. In a a lo kir leh hnu pawh chuan Clay-a chu a lo la muhil a.Amah pawh chuan chhuatah mutna a siam a, kawt lama kawngka leh hnunglam kawngka te chu kalh tha in, a rifle chu dawhkan nghengin ban mai theih hian a tung a, a muhil ve ta a.
Ruah lah chu a sur nasa hle mai leh nghal a, zing khaw eng pawh chuan tukverhte pawh chu a chhun tlang zo lova,Stubbin-a chu a dan pangngai angina zing dar 5 ah a tho va,tukthuan atan sa kan kha a ti lum leh a, dar 6 a rik thleng pawh chuan Clay-a chu a la harh loh avang chuan Stubbin-a chuan a va kai tho a.
Clay-a rawn tho chu a la harh chian loh viau avang chuan Stubbin-a chuan a thianpa chu a la tha lo viau tih a hre nghal a. Clay-a chu a han dawm thu a, sa leh sa tuihangte chu a han ei in tir a. A thleng hnihna a han ei zawh chuan a rawn harh ta deuh bawk a, Stubbin a chuan khum nghengin a hma ni a thil awmdan hre chiang tur chuan a thu ta a.
A han sawi tan a, “ Clay, ka hna leh ka tihtur zawng a ni lo na a,mahse a lo ni maithei bawk a, enge thil awmdan chanchin min hrilh duh ve reng em ? “, a han ti a.
Clay-a chuan muangchang hian Stubbin-a chu a han en a, a hma ni a thil lo thleng zawng zawng chu a han ngaihtuah chhuaka vek phawt a, Chutah, “ Nimin khan Lew, min rawn tlawhtute ka nei alawm maw le “, a han ti tan a.
“ Mi pathumte kha chu ka lo hmu ve a sin “ Stubbin-a chuan a lo ti a.
Clay-a chuan, “ Silai kap thiam rual Jobe Doherty an tihin a rawihte an nih kha “ a han ti leh a.
Stubbin-a chuan, “ Doherty-a a ! ? “ a lo ti a, a khabe ser chu a han tuai a.
“ Chu, i hria elaw ? “ Clay-a chuan a han ti a.
Stubbin-a chuan, “ Hre lo ve, ka la hmu ngai reng reng lo. Mahse, Clay, an sawi rik chu ka hre tam mai“, a lo ti a.
Clay-a chuan, “ Heti lai ramah hian rel kawng rawn kal luh tir an tum a ni awm e “, tiin Stubbin-a chu a han hrilh a.
Stubbin-a chuan, “ Anih tak chu, a va han bei rang kher ve le. Mi ka atanga ka lo hriat dan chuan Shallow River chhim lampang ram zawng zawng chu a lei zo tawh tih thawm ka lo hria a. Tin, i hmun thlang lampanga ram pawh hi a nei tawh an ti bawk a, mi thenkhat ram a leisakte phei chu an lawm lo viau niin an sawi bawk a. Thil awmzia chu Doherty-a hnena i ram i hralh loh vaih chuan a gun fighter rawihte an lo lang nghal mai dawn tihna a ni a. I tan chuan buaina zakhua a ni dawn a ni, chung chu i hriatthiam ka ring a ni “ a han ti a.
Clay-a chu a in pet ruh a, a khuma han thut san deuh hi a han tum a, a ke na chuan a ti then chawk chawk a. Stubbin-a chuan, “ Clay, ti khan thu mai mai rawh, kan la titi zel dawn alawm. I rilru ah chuan engpawh lo lut ta nise, khawiahmah i kal chhuak thei rih dawn chuang lo a, engle khawle, ni hnih khat tal chu i kal chhuak thei dawn lo a ni “, a lo ti leh a.
Clay-a chuan, “ Lew, ni hnih khat pawh ka nghak thei hlawl lo a ni “, a han ti talh a.
Stubbin-a chuan a han nuih khum ringawt a, “ Mahse Mister, a dang thlan tur i nei chuang lo a ni hi. I sakawrte chu i buatsaih thei mai thei a,mahse, thisen i hloh hnem lutuk a, khua i thlen hmain i sakawr atangin it la thla mai ang. Tin, eng vangin nge silaimu pahnih kah hliama i awm a,lui dungah khan i lo tluk reng le ? “, a han ti leh a.
Clay-a chuan a chhan hmain a malpui chu a han hmer a, a han in she ruh te te a. A chakna chu a lo kir leh tual tual hian a hre na a, Stubbin-a thusawi chu a dik ngei tih tih a hria a. Zawi te hian, “ Mi pathum min rawn tlawhtu leh Doherty-a duh dan min rawn hrilhtu ka neih hnu khan ka ram ri pal vela ka ran tla bot e zawng khawma khal hawng turin ka chhuak ta a “ a han ti a.
Stubbin-a chuan, “ Dawrzawn hnih dawn lai chu ka hmuh kha “, a lo ti vat a.
Clay-a chuan “ Dawrzawn hnih a ? “ a lo ti a. Stubbin-a chuan, “ A tlem e, a tam e Clay, dozen hnih vel chu an nih ngei kha “, a lo ti ve leh a.
Rogan-a chuan,“ Pasarih chuah ka hmu a, ka kir leh lamin ngawah pahnih ka chhar belh leh chauh va“, a han ti a.
Stubbin-a chuan Clay-a chu reilote a han melh a, “ Ka hmuhte chuan i chhinchhiahna an pu ngei mai a, ka en chiang a, an awmna chu i hria ang chu ka ti mai a sin “, a a lo ti leh mai a.
Clay-a chu a han ang hlawih hlawih a, rei fe a ngawi zui ta reng bawk a. Stubbin-a bawk chuan, “Engpawh nise i bawng hmuh zawng chu i khalh hawng ta bawk a, chuta tang chuan engtin nge ni ta zel ? “ a han ti leh a.
Rogan-a chuan a nghawng chu a han hiat a, “ Khamite pathumin min vauna kha ka la ngaihtuah reng a. Doherty-a duh ang a hralh a, kal chhuak vat turin min vau a, ka hralh dawn lo va, ka chhuak dawn bawk hek lo va, ka awm reng dawn a ni tih ka ti thlu ta a ni “, a han ti ta a.
“ Ni e, Clay- chuti chuan ti ngei rawh “, Stubbin-a chuan a lo ti ve a.
Clay-a bawk chuan, “ Tichuan, kan inthen hnu chuan an rawn let leh ni tur a ni, ka bawng khalh lai chu min rawn kap a, Eli Paxton-a hian min rawn kap a ni, silai pawh ka pai ve lo va, luiah chuan ka tlan thla ta a. Paxton-a chuan tuia ka sakawr chuanna chu a kap hlum a, tui chhung atanga ka han lan chhoh leh lai tak chuan hei silaimu pahnih hi ka dawng leh ta a, tui chuan min len thla ta a,Chutah chuan nang hian min rawn hmu ta a ni “, tiin a thil tawn chu a han sawi a.
Stubbin-a chuan, “ Paxton-a maw ? “ tih pah chuan a lu chu a han thing nu nu a. “ Ni lo, Paxton-a chu ka hre lo tawp mai. Mahse, Doherty-a hian a thu nem nghet turin silai hmang mi rual khat a ruai a, an hotu ber pawh Elison-a an ti nghe nghe in ka hria “, a lo ti ve leh a.
Clay-a chuan, “ Burt Elison-a a nih chu “ a lo ti a.
“ Ni, chu chu a ni. Khuaah chuan Elison-a chu silai kap thiam tak a ni tih an sawi bawk tak a sin “, a ti a.
“ A pathumna chu Art Curry-a a ni “ Clay a chuan a lo ti leh a.
Stubbin-a chuan, “ Ni e, Curry-a chu an zinga pakhat a ni ve alawm, thusawitu ber a ni a, an lehkhabu vawngtu, an thil engkim ching feltu a ni. A nih leh Paxton-a’n a kah lai che chuan Curry-a leh Elison-a te chu i hmu ve reng em ? “ a han ti a.
Clay-a chuan, “ Anni zawng ka hmu lo “, a lo ti a.
Stubbin-a chu a tho va, a vaihlo bawm a la chhuak a, mei a han zial a. Chhuatah chuan a han vei a. Atawpah chuan thuka sa chuan chu a han chawk a, a han in her leh a, “ Clay, kei chuan ka ram Norwood-a hnenah ka hralh a, chu chu tih awm viau ni hian ka hra a. A chhan chu, ka ram chu keimah chauh chuan ka ti hlawk thei dawnin ka hre lo va ni. Ka thatchhiat vang pawh a ni mai thei a, mahse, chu zawng ka inhre chiang lo, ka hriat zawng zawng erawh thung chu tuna ka nun dan hi a hrehawm lo a ni tih hi a ni.
“Ka duhna na ah, ka duh hun hunah ka kal thei a nuam ka ti ti a, mi han duh tur engmah ka nei lo va, Chuvangin buaina pawh ka nei ngai lo va ni. Hei aia chan chhe zawk pawh hian mihring a awm theih a ni “, a han ti a.
Clay-a chuan a lo en reng a, a thil sawi awmzia chu a hre reng a, a tawpah chuan, “ Hetah hian ka la cheng rih dawn “, a ti ta tlat a.
Stubbin-a chuan a dar a han chhin khum a, a rawn phei a, “ Ni e, awm ang che, mahse an rawn kap hlum ngei dawn che a sin Clay. Chu zawng ka hna a ni lo va, nangma hna a ni zawk a,i thu thu a ni e.Ruahsur ban veleh, naktuk pawh a ni mai thei a, ka chhuak ang a,chutih hunah chuan a chak pawh i lo chak chhuak tawh ang a, i duh duhin i che thei tawhin ka ring a ni. Tin, he thu hi ka sawi chhuak tawh ngai bawk lovang, mahse, khing tlangte khi mi ngaih aiin a nelawm zawk tih rawn hrereng ang che. Khing tlangahte khian mi tha pahnih tan ram a zau tawk tih rawn hre bawk ang che “, a ti ta a.
Clay-a chu a ngawi reng a, enge a tawh tur chu a hria a, hneh theihna chu a nei tlem hle tih pawh a hria a. Mahse, hemi hmuna a luh tirh phat atang khan he hmun a awm reng turah hian a in ngai tlat a. Atan chuan hmun ro mai mai,thlan tlakna leh hnathawh hahna mai mai, hlawkna tlem si a ni tawh lo va, a ram a ni a, ama chhinchhiahna a chuang a, hemi hmunah hian a cheng ngei tur a ni. A chung leiah a nih loh pawhin a hnuai leiah tal a cheng ngei tur a ni.
Lew Stubbin-a chuan a puanthuah chu a tel a, pawn hulhliap ah chuan a dah tha ta a, tukverh atang chuan ruahpui van awn sur chu a thlir reng a. Thlasik hmain hnimte chu an lo hring leh ang a, ram chhuah nan pawh a a nawm tur zia leh hlawk tur zia a hria a, khuaa a sazupui vun va hralh tur pawh chu a ngaihsak ta lo va. Rogan-a hnena eitur nena inthleng zai pawh a rel leh ta lo bawk a, tlang velah ringawt chuan a rilru chu a cham ta reng zawk a.
Rogan-a mahni a mal tlat mi ni ve bawk, amah ang bawkin buaina karah hian mi tanpui hi a ngaina lem lo va. Lew Stubbin-a chuan kar hnih khat chhungin Clay Rogan-a chu an kahhlum thu hre turin a in ring tlat a, mahse thil lo thleng tur chu hand an rual niin a hre si lova, Rogan-a a thih chuan pawi zawng a ti ngei ang le. Thian neih a duh si chuan Rogan-a ngei hi a ni thian atana a sawm duh chu ni.
Chumi nileng chuan Lew Stubbin-a chhuah chak tawh chu a vei sek a, chawhnu lam chuan Clay Rogan-a chu a thu chhuak a, inchhungah chuan a han kal chhin a, mahse, zan a rawn nih meuh chuan a hahin a chau tak zet hman a ni. A dar leh malpuite chu tlemin an lo ziaawm deuh a, khumah chuan nakin hun lo kal tur chu ngaihtuahin a mu leh ta a. Lew Stubbin-a pawh chu chhuatah chuan a muhil tawh a.
Ruah a sur chhung chuan Doherty-a leh a hote chuan khua an chhuahsan mai chu a ring lo va,mahse, khua a that veleh chuan an rawn kal ngei ang tih a hria a, rawn kal mahse ani chu hetah hian an hmu dawn lo a ni. A chhan chu Eli Paxton-a hmu turin khuaah a awm hman daih tawh dawn vang a ni. Eli- Paxton-a a va hmuh chuan a that nghal ngei bawk tur a ni, chutiang chuan thil a duang lawk a, tichuan a muthilh san ta a.
Khua a lo var chuan a la hnim deuh ruih a, rei loteah ruah a rawn sur leh ngei dawn tih pawh a hriat theih a. Boruak chu a la hnawng hle a, Clay-a chu a han ding chhuak a, a ken a leh rawl lutukte pawh a lo ziaawm deuh tawh a, a dar chu a han chet vel chhin a, a duh duhin a chet thei tawh na a, mahse a la na thum tho a,a lawm rilru hle a. A Gun-belt chu a han hreng a, a pistol chu a han endik a, a mu a kim leh kim loh nen, a han tuai vir a, nalh tak hian a bawmah chuan a thawlh lut leh ta a.
Lew Stubbin-a mutna lam chu a han thlir phei a, Stubbin-a chu a lo kal bo hman daih tawh a.
Clay Rogan-a chu pawnah a han chhuak a, a han enkual vel chuan Stubbin-a sakawr pawh chu a lo awm tawh lo va, han in chibaina hun pawh a awm lo va, tin, beisei pawh a lo beisei lo reng a ni. Lew-Stubbin-a tih dan a ni ve reng thin a ni. A thil tih theih zawng zawng a tihsak tawh a, ama nun dan pangngaite kha a chhunzawm leh tawh tihna a ni mai a.
Clay-a chuan tukthuan chu a han in siam a, a ei kham chuan a sakawr chu khuaa kal thei turin a han buatsaih a, a zin te phah a a peih fel diam hnu chuan a inchhungah chuan a lut leh a, mei chu a ti mit a, a bungrua chu dah felin, a hmu leh ngai ang em ? ti hian a han thlir kual a.
Chutia a han thlir kual lai chuan tlang atanga sakawr rawn chhuk thawm chu a hre ta a. Clay-a chuan a pistol chu a phawi nghal zawk a, chutia a silai a phawi pah chuan a dar chu a rawn na chhuak zawk nghe nghe a, kawngkapui lamah chuan a phei a, a han hawng a, mi pakhat, tualzawl fai laia sakawr atanga rawn chhuk hi a hmu ta a. Khaw la hnim deuh ruaiah pawh chuan Ty Conway-a chu a hre thei nghal mai a.
Ty Conway-a hi Major Norwood-a Foreman a ni a, Conway-a hi tunhma pawn a hmu tawh thin a, amah a hmusit zia pawh a hria a. Norwood-a tan hian a rinawm em em a, Norwood-a duh chu a duh a, Norwooda duh loh chu a duh lo ve mai a ni. Norwood-a huat zawng chu namen lovin a haw ve mai bawk thin a ni.
Clay-a chuan kawngkhar atanga a chhuah hma chuan a pistol chu a bawmah a thun leh a, Conway-a tawk tur chuan a kal ta a.Conway-a hi hlauhawmah pawh a lo ngai ngai lo va,tunah pawh hian a ngai hek lo. Tunhma pawh a engahmah lo ngai lo tupa hian engemaw rawn kal chhan a nei tih chu a hria a, hriat pawh a hre chak hle reng a ni.
Conway-a chu sakawr thlunna bulah chuan a ding a, sakawr chungah chuan a la chuang reng a, palian tak a ni a,a darpharhte chu a hlai hle a. A hmelah chuan Clay-a rawn hmuhsitna hlir hian a khat a, thenawmah pawh a rawn ngai lo a ni. Engmah dang sawi hmasa lo chuan, “ Inrinni zan hian Ranch-ah Major-a’n inkawm hlimna a siam dawn a, Chutah chuan rawn tel ve turin a duh che a ni Rogan ! “ a rawn ti chhuak nghal tawng a.
Clay-a chuan a mak tih zia pawh chu thup a tum duh lem lo va, “ Conway, chu min sawm a maw ?! “ a han ti ve a.
Conway-a chuan a dar chu a phut duh chauh va. Clay-a compound vel chu ten awm tak hian a han thlir kual vel a, pa sat ha tak, rinawm tluk mai,a hnuaia mite zah hlawh em em thin a ni a, an zah loh pawhin a hlauh talin an hlau thin a ni. Clay-a chuan Conway-a hi hna a thawk thain Norwood-a hian engkimah a ring em em a ni tih a hria a.
Conway-a chuan, “ Major-in ran vulhtute zawng zawng chu chuta awmah chuan a duh a, khuaah chuan mi thenkhat rawn thleng thar an awm a, chungho chuan hemi ram tantlang hian thil atthlak tak rel kawng siam an tuma, mi thar lo luhna tur leh ram rukna leh ran thahnate ti tam tur mai mai a nih avangin Major hian a duh lo va, a ngaite hian awm reng se a duh zawk a ni “, a han ti leh a.
Clay-a chuan, “ Conway, i thusawi hian chumi tura sawmna chu a la hrilhfiah chiang hlei nem “, a lo ti leh a.
Conway-a chuan, “ Rogan, i lo tel ve ngei ngei ringawt tur a ni. Tumah hemi rel kawng siam tumtute hnenah hian an ram an hralh tur a ni lo.Tu paw’n a ram a duh tawh lohva a hralh duh anih chuan Major-a hnenah an hralh zawk tur a ni. Chu chu thil awmdan chu a ni Rogan. Inrinni zanah chuan rawn kal ngei ang che “, a han ti leh a.
Clay-a hnial hman hma chuan a sakawr chu a pawt her lawp a, a kal nghal ta daih a. Clay-a chuan duh leh ka tel lo pawhin Norwood-a chuan inkawm hlimnate chu a nei thei tho alawm a ti rilru ta zawk a. Mahse, Conway-a thusawiah khan mak tihna a nei a,chuti a nih chuan hengho rel kawng siamtute pawh hian Major Norwood-a awm chu an lo ti nuam lo ve tih a hre ta a.
Chumi lai ruama ran vulhtute inkawm khawm chuan awmzia pakhat chiah a nei thei a, chumi awmzia chu Major-a hian a chakna hman a tum a ni tih a ti lang a ni.
‘ Rail road hnenah chuan i ram chu va hralh ta la, Norwood-a chuan a lo bauh ang che ‘ tihna ang a ni. Clay-a chu a inchhungah chuan a lut leh a, a han en fel leh te te a, lo kir leh ngai tawh lo pawh nise, engkim fel taka hnutchhiah a duh a ni.
A in chu a han kalh fel a, a sakawrah chuan a han chuang a, a hliamte a tih nat zual loh nan muangtea kal a tum a, chuti chuan Shallow River chu nitlak rual vela thlen a in beisei a ni.
Ngaw chhungah chuan a lut phei a, Norwood-a ram chu a han thlir chho va, ‘ duh leh lo ni mai mai teh se ‘ a ti ta a. Shallow River khaw pan chuan a kal leh ta a.

BUNG - 3

Major Norwood-a chuan mi lo pungkhawmte chu a kailawn atang chuan hmel hlim tak puin a lo thlir a. Amah hi pa te ria lam deuh a ni a, a hmelah chuan pa induh tawk tak nihna leh in rin ngamna chu a lang a.
Mipui chezia chu a lo thlir reng a, a chheh vel ram a hmuh theih leh hmuh phak zawng zawngte chu ama ram vek a ni a. Chutah chuan ranrual chhinchhiahna pu an khat tlat a. Thingte, hnim te, ran rualte leh tui te chu a zavaiin a ta vek an ni bawk a. Heng zawng zawng nei thei tur hian a lo thawk nasa bawkin a ngaihtuah nasa hle a,a lo humhalh hram hram thin a ni tih hi a lang chiang hle a ni.
A hnuaiah hian mi tha tak tak hnathawhtute a nei a, a mi chhawrte leh amaha an inkara palai tur hian foreman tha tak a nei bawk a, buaina reng reng sut kian zawh loh hi a la nei ngai lo a ni. Tuna rel kawng rawn sial a, ram rawn phin darh vek tumtute pawh hi lo hneh ngei a tum a ni. A tum dan chuan tumahin henglai ram hi an rawn ti hmelhem tur a ni lo tih hi a ni.
Zu inho zing atanga thawm rawn awm ta hlut chuan chapo taka a lo in ngaihtuahnate chu a rawn tih tawp sak ta thut a,mi awm nuk nuk hote chu an lo ding bial ta tiau tiau va, a laia mi phahnih inveh thauh thauh bul atang chuang a fanu an lo pawt hrang lai chu a va hmu a, a mitmeng chu a thip ta hle mai a. A fanu hmel atang chuan nuam lo tihna lo lang chhuak chu a han hmuh chuan a chhuk thla ve ta vat a, Conway-a rawn kal pawh chu a hmu nghal a. Conway-a thinrim zia a hmuh chuan chuan va kal ve kher pawh tulin a hre leh ta lo va.
A han ding a, a fanu hnenah chuan, “ Gail, hetah hian rawn kal teh “ tiin a han ko ta zawk a.
Gail Norwood-i hi Nula nungchang mawi tak leh hmeltha tak nu zam mai leh pian nalh inkhaithli thlar mai,nui mawi tak a ni a. Shallow River chheh vela a nula hmeltha ber leh piannalh bera an lo ngaih a ni reng a, tumah han tluk pha tur pawh an awm chuang lo a ni.
A hmelah chuan manganna a lo lang chhuak a, a pa hmela a thinrim zia rawn lang pawh chu a hmu a. Conway-a taksa lianpui chak deuh maiin a mipui lo bial khawm a va bauh darh lai pawh chu a hmu tel bawk a. Gail-i chuan a pawnfen chu hcawi chhingin, a pa lamah chuan a tlan phei ta dawr dawr a, a va thlen chuan Norwood-a chuan, “ Eng thil nge thleng ta le Nula ? “ tiin a lo vin khum a.
Gail-i chuan, “ Ka pa, Bud-a leh Rick Semple-a an insual alawm maw le,” a han ti a.Norwood-a chuan, “ Naupang mi aa ho chuh ! Enge an insualna chhan ? “ tiin a fanu chu a han zawt let nghal a. Norwood-a chuan Gail-i hmel lo danglam ta chu a han hmu chawp chilh a, “ Nangmah vang em ni ? “ tiin thinrim takin a han zawt zui nghal a.
Rei lote chhung chu Gail-i chuan a chhang lo va, mipui lo ding kual teuh awmna lam chu a han thlir phei a, tlangval pahnihte chu an insual a, Conway-a lo inrawlh ve hnialna ri chu a ri chhuak mum mum a. Conway-a chuan a pawisa duh chuang lo va, tlangval pahnihte chu lei atang chuan a phih tho va, chutihlai chuan Bud-a a sang zawk leh ria zawk chuan Conway-a chu a lu-ah a lo hnek vak mai a.
Major Norwood-a chuan Conway-a thinthawk hmel lo lang chhuak chu a hmu a, Conway-a chuan a kuttum chuan Bud-a dulah chuan a han hnek let ve nghek mai a, Bud-a chu a kun lawp a, na tiin leiah chuan a vial ta ngawl ngawl mai a. Conway-a chu Rick-a bulah chuan a per phei leh a, Rick-a khabe-ah tak mai chuan a han hnek leh nghek mai a, Rick-a chu ke vawr thawtin a thal nghal der a, Conway-a che vel chuan mipui chu a tawlh kian tir a, Conway-a chu huphurhawm tak mai hian a din ta lut a, buaina pawh chu a reh zui ta nghal a.
“ Tun atanga buaina siam leh chuan khatiang aia nasa zawk khan an tuar tawh ang ! Tunah chuan, ei leh inna hmunah kal u la, inti hlim rawh u ! “ tiin Conway-a chuan mipui ho chu a han hrilh a. Mipui ho pawh chu an kal darh ta nghal a.
Major Norwood-a chuan hei hi buaina tawpna chu a ni tih a hria a, mahse ama hriat duh tawpna chu a ni hauh lo. A fanu chu ngun tak hian a han en a, “ Nangma chungchangah em ni an insual Nula, a ni em ? “, a han ti leh a.
Gail-i chuan a sam chu hnung lamah a han huih a, a hmui chu a chip tlat a, a pa tih thinrim hi a hlauh em avangin a chhang ngam rih si lo va, a pa chuan dawh theih loh hmel takin alo en reng si a, atawp atawpah chuan thawp sat hian, “ Ni e, ka pa,an pahnih khan min lampui an duh ve ve a, ka theih ang tawkin ka hnial thla dun ve ve a, mahse chu chuan buaina a ti chhuak ta zawk a lo ni a, lam pui ka duh lohna chhanah an inpuh tawn ve ve a, naupang chhia anga awm lo tura ka hrilh pawhin, an thinrim em avang chuan min ngaithla duh ta lo a ni ! “ a ti ta a.
Gail-i chuan mipui awmkhawmna lam chu a han hawi phei leh a. Rick Sempe-a’n a hmui atanga thisen a lo tiai lai chu a va hmu a, a la tlawm mai lo tih a hriat a. A kuttum chu a hum ruh a, Ty Conway-a chu a han en a, Chutah a unaupa lei atanga an kaihthawh, a dul lo la chul vat vat chu a en zui leh tih chu a va hmu a.
Norwood-a chu a rum deuh ngul ngul a, “ Mitmei i hmuh a ni lo maw Gail ? “ a han ti leh a.
Gail-i chuan, chutia a pan a han zawt ta mai chu mak a ti hle a, “ Ka pa, naupang mai an la ni alawm, a hma pawhin hrilh ka tum tawh ……………….. “ a han ti hman chauh va.
“ A hma a…!? “ lo tih thawt pahin Norwood-a chuan Gail i chu a han kal pel a, Gail-i’n a pa a lo dawmdin hma chuan an nichina an insualna ah khan a kal phei ta, Conway-a bulah chuan a va ding a, “ Ty Conway, tuna tang chuan keiman ka buaipui ve tawh ang “ a han ti a.
Conway-a chuan ran vulhtute chu hnung tawlh turin a han hrilh a,tumah pawh chuaqn an lo ngaichang mang lo va. Major Norwood-a chu thinrim deuh mai hian Bud Semple-a te unau bulah chuan a va ding a, “ Nangni pahnih kha fingvar tawh rawh u, a nih loh chuan helai hmun atang hian chhuak vat mai rawh u. Kam it atang hian emaw ka fanu ngaihah hian emaw khawi atangin nge hlu tham nia inngaihna in lo chhar chhuah, hei hi in luruh chhah takah khan lo dah tha rawh u. A tu ve ve pawh ka hrilh nghal a che u, Gail-i hi intan a ni lo,a khawih phaka in awm pawh ka duh lo ani, Chuvangin thil ni thei lovah leh awm lo lutukah lo in hnek chhen tawh suh u. Hetah hian inzawmkhawmna tha zawk nei tur leh inti hlim tura kal khawm vek kan ni hi “, a han ti a piap piap a.
Semple-a te unau chu a han hnung chhawn lehin Ty Conway-a lam chu a han hawi a, “ Tun hun hi hengho lo kal khawmte hnena ka ngaih dan sawi chhuahna remchang tak a nia lawm, han ko khawm hlawm ta che “, tiin a han hrilh zui a.
Chutia Norwooda’n mipui a lo nghah khawm chhung chuan a fanu Gail-i pawh chu hmeichhe ho awmna zingah chuan a lo awm ve leh tawh a. Ty Conway-a chuan ran vulhtute chu a rawn hruai khawm a, an rawn inchei nalh hlawm hle a. Mahse, an hmai zur danah te chuan ran vulhtu an ni tih a hriat hliah hliah bawk a.
Norwood-a chu a inla thupui fun hle a, a hmaite chu a sen tawn tawn a, a kut hnung lamah a suih a, a han hawi deuh voh bawk a. Ran vulhtute chuan an rawn din hual a, an ni pawh chu an thu tak hlawm hle a ni. Major-a thil phal vanga thenawmte in hmu khawm leh hlimhlawp siam mai ni lovin, a aia thuk zawk thil a awm a ni tih an hre bawk a ni.
Major Norwood-a chuan a aw a han thian hmasa phawt a, “ Awle, in zavaiin min lo ngaithla teh u. Shallow River-ah hian ngaihdan dang nei, helai rama rel kawng rawn siam tumtute an lo kal a. Tunah hian rel kawng emaw hmasawnna emaw duh lo kan nil ova, a dik tak zawk chu hei hi a ni a. Ka phal ova,a chang chuan rel kawng hian ram chhungah hian thatna zawkte a rawn thlen theiin mi tha tak yakte a rawn thlen thei a, mitin tan thatna zawk tur leh hausak zawkna tur hun remchang te pawh a hawn sak thei a ni.
“ Mahse, rel kawng hi chu helai kan ram nen hian a inmil thei tlat lo a ni. Ran rual khalhtu tur mihring tha tak tak kan nei a. Chhim leh hmar, khawchhak lamahte kawng tha tak tak kan nei bawk a, tin, mifel leh tha tam tawk tak kan neih tawhte tan hian buaina a an va inrawlh ve loh nan hnathawh tur tam tawk kan nei a, An chhungte chawm theihna tur thil mamawh zawng zawngte pawh kan pe bawk a. Chu chu thil awmdan a ni a, chutiang chuan awm reng bawk se ka duh a ni “, a han ti phawt a.
Norwood-a chuan a chal chu a han hru a, a thenawmte ho ngun taka lo ngaithlatute chu a han thlir kual a, an lo ngaithla ngun hle tih a hriat chuan amah pawh chu a inring leh zual a, sawi chhumzawm lehin, “ Keinina heng Doherty-a ho, misual rual leh ran ruk chingho hian kan ram min rawn tan tlang sak kan phal chuanin, kutdawh chitin rengte, bawng ruk chingte, silai hmanga eizawng mite bungraw chhe hnawk zuar mite hian kan paltlang an rawn zut ang a, henglai ramah hian te lua awm lovin ran rual ruk ching mi an rawn khat vek ang a, buaina an rawn chawk chhuak ngei ngei dawn a ni.
“ Tunah hian nangni ka thenawm tam zawkte chu ka awmna hmar lampang tlang sang zawkah in awm a, a thente chu chhim lamah in awm thunga, nangmahni tan leh inchhungte tan pawh, chapo thamin hnate inthawk a, chapo tlak inni reng a, keipawh inthenawma awm ka nih hi ka chapo pui hle a ni,” a han ti leh dap dap a.
Ty Conway-a thung chuan ngun takin Gail-i chu a pa thusawi chhung zawng chuan a lo thlir ru reng a. A hmela a pa a ngaihsanna chu a sawi sei pauh leh a lo lang sang zual tial tial tih a hmu a, tin, heng mite pawh hian an zavaiin Major thusawi chu an pawm thlap a ni tih a hre chiang bawk a. A han chhut ru neuh neuh a, Major hian engtia tam nge sum a neih a, heng mite tan hian engtia tlem nge a hnutchhiah sak ve tih a han ngaihtuah chhuah chuan a nui ru ver ver a.
Major-a chuan sawi chhunzawm lehin, “ Thiante u, he ram a rel kawng rawn siam hi kan zavaia kan lo thawh sa tawh leh kan lo thawh chhante kha rawn tichhe vek tur annih chuan kei chuan ka phal lo reng reng a ni. Kei chu ka hmunah ka aw manga, ka ram inchi khat te pawh hi k ape dawn lo, ka do let ve zel dawn a ni. A tul phei chuan silai nen pawn ka do let ang, chumi ka tih chhung chuan in mi puihna ka duh a ni.
“ In ram chu in theih chhung chu vuan reng tur leh hum tlat turin ka duh che u a ni. In tan vawn reng leh chelh reng a harsat viau pawhin emaw inchhungte’n enkawlna tha zawk an mamawh a, in hralh ngei dawn anih chuan ka hnenah ngei hralh ang che u. Heng rel kawng siamtute ho hnenah hian hralh suh ang che u. Hengho hian kan ram atang hian min then fai leng an duh a,kan aiah hian midang mikhual rawn dahkhah vek an tum a ni tih hria u la, ka hnenah in hralh ang a, in zinga ka hnenah hralh duh lo palh in lo awm a nih chuan he ram hi ram zau tak leh muanawm, mitin tana awmna chu a ni tih ka theihnghilh a tul mai dawn a ni “, a han ti leh a.
Norwood-a chuan an rawn chhanlet ve nah un pawh nghak chuang lo chuan a han thlir kual leh a, a hmai chu a han hru leh a, a rilru chu a lawm hle bawk a, a han ding kak a, a tih tawp nan ring deuh mai hian, “ Thiante u, hei hi a ruala kan lo in tih hlimna chhan chu a ni a. Nakina kan la in chu kha leh theihna zel turin hun dang pawh kan la nei fo ang a. Chaw duh tawkin kan ei ang a, a tlen thlak nan zu duh tawk kan in bawk dawn a nia.
“ Chutah zainate leh lam ho nate pawh a la awm zel ang a, rimawi tumtute leh hlim hlawpna te pawh a la awm zel turah ngai bawk i la, tin, in zinga tu pawhin buaina in tawh pawhin, hei in awmna atangin ka in awmna a hla lo bawk a, heath hian nangmahni tanpui tur che u in ka lo nghak reng dawn che u a ni tih lo hrereng u la. Tin, kan insuih khawm nghet tlat ang a,ruam lampanga chengte tan phei chuan a tul zual bik a. Doherty-a hian rel kawng hi chhim lampanga nawr chhuk zel a tum a, mahse a lo dan dan turte pawh ka lo ruahman fel vek tawh a. Bramton-a ram leh Shore-a hmunte leh midang ramte pawh tan tlang a tum a ni mai thei a, chungte pawh chu kan tih tawp sak a ngai ang a, nangni pawh hian ka thil duh chu min duhpui ve a ni tih ka hria a ni. Awle, tunah chuan ei leh in lam ti ila, nuam i han chen tawh teh ang u “,a ti ta a.
Thu a sawi zawh meuh chuan Norwood-a chu a thlan a tla hluam mai a, mi ngaihdante chu a han ngai chang a, an inhrilh ru laite chu a thlir reng a, thenkhat chuan amah chu a tha lampanga an sawi thawm pawh a hria a. Ty Conway-a chu nui chunga a hnena a lo kal hnu chuan chuan thil a zawt fiah ta a.
“ Ty, nang engtin nge i ngaih ? “ a lo ti a.
“ I hneh chiang hlawm kher mai Major, an zavaiin i ta an ni ta mai e “, tiin Conway-a chuan hlim deuh mai hian a lo chhang a.
“ An zavaiin maw Ty ? “ a han ti tha leh a.
“ Major, an phatsan hauh lovang che, ka sawi chu awih mai rawh “, Conway-a chuan a han ti leh a.
“ Min phatsan lo se, a tha zawk reng ang,” Norwood-a chuan a lo ti veleh ngat a.
A hnung lama a fanu thawmhnaw innawt ri chu a han hria a, a han inher a. Gail-i chuan, “ Ka pa, ka chhuang chein, ka chapo pui hle mai che. Heng mite i thlahthlam mai lovang tih ka hria a,tunhma chuan heng mite hi an lo hlauthawng thin a, mahse, tunah chuan an hlauthawng tawh lo a ni “, tiin a pa chu a han hrilh a.
Norwood-a chuan, “ Kan dinna hmunah chuan kan ding tlat ang Nula, Ka hneh ngei bawk ang “, hlim tak hian a lo ti let ve a.
Gail-i bawk chuan, “ Pa, kan hneh ngei ang tih ka hria e “, a ti a.
Gail-i chu kal leh nghal mai tum chuan a han in her a, mahse, a pa chuan, “ Ty, enge kan mi luhlul pa Rogan-a chanchin hi ? Hetah a rawn thleng ve tawh em ? “ ti a a pa’n Rogan-a tih hming a han lam rik ve leh chuan a ding ta chawt a.
Conway-a chuan a lu a lo thinga, a mangan rilru hle mai bawk a, mahse tihlan loh hram hram a tum a.
“ A hmunah chuan keimah ngei ka zuk kal a, rawn kal turin ka zuk hrilh ngei a ni “, Conway-a chuan a ti a.
Norwood-a chuan, “ Ka lo kal ang a ti si a maw ? “ a han ti a.
“ Heta lo awm tur hian ka hrilh a ni “, Conway-a chuan a lo ti vat a.
Gail-i chuan a pa thinrimna a hmela rawn lang chu a lo en reng a. Mi pakhat, Rogan-a chanchin chu hriat chian a lo chak ve hle mai a. Nimin pawh khan a pa leh Conway-a, Rogan a chungchanga an inhnial thawm a lo hre tawh a ni.
Norwood-a chuan, “ Doherty-a a hmu a ni lo maw, a ni em ? “ a han ti leh a.
Conway-a chuan, “ Ka hre lo le “, a han tih chuan Norwood-a chu a ang ta hlawih hlawih mai.
“ Doherty-a a lo hmu a nih vaih chuan a va pawi dawn em !! Keimah ngeiin amah chu ka that ang. Doherty-a tana pawimawh tak ram a nei a. Tunah hian amah chu ka hmu nghal tur a ni “ in seh ruh teuh chung chuan a han ti a.
“ Rem i tih chuan tunah Rogan-a hruai tur chuan ka kal nghal ang e “ Conway--a chuan a lo ti vat a.
Norwood-a chuan a foreman chu ngun takin a han en a, “ Ni e, Ty, mahse eiin hmasa phawt la, nuamte pawh chen ve rihin, mirethei khawsa ve mai mai pakhat biak hun a ni rih lo. Tunah rih zawng Rogan-a chungchang chuan lo nghak rih rawh se “, a han ti a.
Norwwod-a chuan a fanu Gail-i chu a la awm ve reng tih a han hria a, a fanu chu hmel mangang hmel deuh hian a hmu a. Gail-i darah chuan a kut a han nghat a, a han kuai hnai a, chutia a pa a nelawm tak deuhah chuan Gail-i chuan, “ Pa, Rogan-a hi tunge a nih chiah a ? “, tiin a han zawt a.
“ Tudang mah ni lo ve, ril tama thi lek lek mi mai maw le, ka fanu, zaninah hian heta lo kal ve se la chu a ram lo lei sak ila ka duh a, mahse, heta rawn kal tur pawh hian a chak tawk lo niin alang “, tiin Norwood-a chuan a fanu chu a chhang a.
Gail-i chuan, “ Rogan-a chu khawthlang lampang ruam a awm kha a ni em Pa ? ‘’, a lo ti a.
Norwood-a chu a phu zawk a, “ Chu i hria elaw Gail ? “ a han ti a.
Gail-i chuan, “ Hre lo, mahse khuaa ka kalin vawi hnihkhat chu ama hmuna a hnathawk lai ka hmu tawh “, tiin a lo chhang a.
Norwood-a chuan, “ Tuma bulah hian thian ni tak tak turin a awmrei ngai lova, Chuvangin, amah hriat chian zawng tum lo mai rawh. Amah chauh va awm thin a ni a,thenawmte hi a mawi hnaia han tlawh kual ve na chang pawh a hre lo va, henglai rama mite hian an ngaina mang lo a ni “, a han ti a.
Gail-i chuan, “ Anih Pa, i tlawh ngai ve tawh reng reng em ? “ tiin a han zawt leh a. A pa hmelah chuan thinrimna a rawn lang leh nghal a, ani pawh chuan a zawhna zawh chu mak a ti hnuhnawh hle a.
A pa chuan, “ I tlawh tawh em a ? Nula, engatan teh lulin maw ? Henglai ramah hian bur chhe khawm ranvulhtu naran mai mai ka tlawh ngai lo a ni”, a han tih khum leh a.
Gail-i chuan a pai’n Rogan-a a huat em em dan chu mak a ti hle a,a pa chu a kalsan ta a. Rogan-a hmel chu a la hre reng mai, Rogan-a chu pa sang tak leh pa inkhaithli deuh a ni a, a mitthlain pal nghenga thlan tla phunga a ding laite kha a hmu a. A rawn en laia an mit leh mit a intawn khan, engemaw ti riau hian a awm a. A mit ah khan amah ngaihsakna thuk tak awmin a hmu a, chutih lai chuan Rogan-a hi buaina siamtu anih a ring nai lo va, tun thleng pawh hian a ring lo a ni. Tichuan khaw lampan chuan a kal ta a, Rogan-a pawh chu a hre zui ta lo kha a ni a.Mahse, tuna a pa’n Rogan-a hming a lam leh chiah atang khan amah Rogan-a chu a hre chhuak leh a ni.
A pa’n Ty Conway-a a koh ri chu a hre zui a, “ Ty, chaw ei leh zu in lam lo theihnghilh leh rih mai rawh, kal chhuak la, Rogan-a chu va zawng chhuakin heath rawn hraui rawh. Doherty-a hnenah a ram chu lo hralh ta pawh nise a pawi chuang lo va, an inlei tirna ni aia hmain a hralhna bill-ah chuan a hming kan sign tir anga a ni mai alawm. A sign ngei ang a, a sign hah manah pawisa tam tak a hmu dawn a lawm. Chumi hnu ah chuan a duh duhnaah kal rawh se, Doherty-a lakah biru bo se a ni mai, Dohertya’n buaina a rawn siam vaih leh rorelnaah kan khing ang a, kan hneh mai ang. Chuti chuan Doherty-a chu kan dang char a lo ni mai dawn a ni “ tih a pa sawi chu a han hria a.
Gail-i chuan a pa thusawi, Ty Conway-an a han hriat a a lawmzia a hmuh chuan mak a ti hle mai a, hmanhmawh tak hian a pa bulah chuan rawn let leh in a pa hnenah chuan, “ Ka pa, chu chu dan dik a ni hlei nem, chutiang thil chu i ti thei lo reng reng ang “, a rawn ti ta a.
Norwood-a chuan thinrim deuh mai hian a fau chu a han hmachhawn a, “ Ka thei lovang maw Nula ? A nih hlawm tak chu. He hmun hi ka ram a ni a, ka theih ang angina ka veng reng dawn a ni. Rogan-a hi tumah a nil ova, engmah pawh a ni bawk lo a ni. Tuna a ram, bawlhhlawh vaivut belthleng atang leh nun engmah nei lo va a tal ral mai maina hmun atanga tal chhuahna hun remchang a neih phawt chuan a zuang chhuak vat mai ang. Ka mi do tur chu Doherty-a hi a ni a, min rawn tihbuai a tum tlat chuan indo hi enge anih a a an a hrethuai mai ang “, a han tit awn tawn a.
“ Mahse, Pa “, Gail-i chuan han ti leh talh a.
“ Mahse, rawn ti fo suh. Nula puitling i ni tawh a, hmeichhe hnah chauh innghat zawk rawh. Heng hi chu mipa buaina thil a ni a, Chuvangin kal kiang la, kan mikhualte lo va chiau au zawk rawh. Ngaithuah buai ngai leh thil tul zawng zawng chu keimahah nghat mai la a tha ang. Ty, nang pawh kal tawh la, Rogan-a chu zaninah ngei, hetah ngei hian rawn hruai ang che “ , tiin Conway-a chu a han hrilh leh a.
Gail-i chuan Conway-a hnenah chuan, “ Anmahni ang chauh kan ni dawn anih chu Ty, kan bum chuan… “, a han ti leh hman chauh va.
“ Ngawi reng rawh Nula “, a pa chuan a lo ti leh thawt a. Conway-a hnenah chuan aw dam zawk hian, “ Kal chhuak rawh le Ty, ka lo nghak dawn che a nia “, a ti ta a. Conway-a pawh chu a kal chhuak ta nghal a.
Norwood-a chuan a fanu Gail-i chu a han hmachhawn te te a, Gail-i chungah hian a piana hnu lamah a la thinrim ber awm e.
In sum hram hram chung chuan, “ Gail, hei hi i hrechiang lo a ni e, i thil buaipui tur awm chhun chuTyConway-a chauh hi a ni. In inneih ni turte pawh ka zawt tam tawh hle che a,i mi chhan duh lohna hian min ti nghakhlel zo tawh zawk a nih hi. Zaninah te khan thil awmdan i hmu vek a, khang Semple-a te ang ho khan an insual phah tawh che a nia, Ty Conway-a nupui i nih hun chuan khatiang ang thil kha a thleng leh ngai tawh lovang.
“ Mi tupawhin an tih leh che chuan Ty-a nen an inkhing dawn tih an hria ang a, Ty-a hmaa ding tur hian tumah hi an huaisen tawk lo a ni. Tumah hian a ngaihtuah ngawt pawh an ngaihtuah ngam tawh lovang che. Tunah hian engtik ni ah nge ka mi rin em em mai leh huaisen leh chak bawk si chu i pasalah i neih dawn tak ? “ tiin a fanu chu a han zawt nghal a.
Gail-i hmai chu a rawn sen chhuak awp awp a.
Zanin ang tluk reng hian Norwood-a hian a fanu hi a la hmu hmeltha ngai lo, mipa fak leh chawimawia hlawh thin a, amah nei tur hian heng mipa ho zingah hian an neih zawng zawng hralh zo ngam lo pakhatmah an awm a ring lo a ni. Tin, nula ho zingah pawh amah itsik lo pakhatmah an awm a ring bawk lo a ni.
Norwood-a chuan, “ Gail, engtik hunah chuan nge in inneih ang ? Nang leh Ty-a lakah hian tu neih hlan ka nghakhlel teh a nia, Chuvangin i chhanna hi ka hre chak tawh em a ni. Ka la upat lutuk hma hian tute han chhawnchhaih vel a han pawm velte pawh ka chak tawh a nia “, a han ti leh a.
Gail-i chuan muangchang hian a lu chu a han thing a, a thinlung chhunga a rilru buaina chu a zep zo lo a ni. Ty Conway-a hi a hua pawh a ni hranpa lo va, a pa-in a lang a pauva Ty-a a han fuih deuh phawt hi chuan Ty Conway-a hi Gail-i bulah chuan a nih tur ang pangngai thlapin a che thin a, tihluihna ang reng a han ngam hneh mai pawh a tum lo. Amah hi pa duhawm tak, pa zaidam leh hnathawk tha, pa rinawm a ni tih pawh a hria a, mahse, pasal atana han neih emah chuan rinhlelhna leh timna a nei deuh tlat mai a ni. Chuvangin an inneih ni tur pawh chu a tiam ngam lo a ni. Tunhma chhung zawng khan ngaihzawng a la nei ngai lova, neih pawh a inring mai kher lo a ni. Amah ngei pawhin helai ram tha takah hian chhungkuaa awm a, pasal neih a, fate nen hlim tak leh hrisel taka awm ho chu a duh ve a ni.
Gail-i chuan mangan hmel deuh hian, “ Pa, ka hre lo, ka hre hlawl lo a ni “, a ti ta hlawl mai a.
Norwood-a chuan, “ Anih chuan keiman ka hria alwm Nula, thla khat chhungin in innei ang a, a ni chu nangman i ruat tur ang a, chumi anih loh chuan keimah thoin ka ruat leh mai ang. Heng mi aa ho duh hluah hluah tu che an insual phah fo tur hi ka duh lo a ni. Pasal i nei ang a, i pasal tur chu Ty Conwaya hi a ni tur a ni bawk a ni “, a ti ta a.
Norwood-a chu a in her a a kal lian zui ta nghal a. Zu in ho nui dar dar ho zingah chuan a va tel ve a, tunhmain hengho zingah hian hun a nei tlem hle thin a, mahse, tun tum chu an zu sem pawh in ve in, an zingah chuan a awm ve ta reng a, an mahni ang a hlimna lantir ve hram pawh a tum a ni.
Zan chu a lo rei zel a, mipuite chu an duhtawk an intih hlim hnu chuan an tin darh ta a. A tawp berah chuan Semple-a te unau chuan thupha an rawn chawi a. Norwood-a chu varanda-ah chuan Conway-a leh Rogan-a te rawn thlen hun chu a nghak reng a. A lo nghah lai chuan inchhung lama a fanu coffee siam thawm chu a hria a. Rogan-a chu a han ngaihtuah a, eng mihring hmelpu nge a nih pawh a hre reng tawh lo va, a la hriat reng theih chhun chu pa sang tak, ria deuh pa, pa luhlul awm tak hmel pu hi a ni.
Vawi hnihkhat chu pal chungchangah an lo inti buai tawh a, Rogan-a ram chhung a tuikhur an inchuh chungchanga Ragan-a’n a dinhmun a sawn duh hauh loh pawh kha chiang takin a la hre reng a. Norwood-a zawk chu a tlawm zawkah a tang ta nge nge a ni. A pal pawh chu a sawn loh phah ta a ni.
Chumi an inhnialna chuan rei fe chhung chu a ti thinrim hle a, Stubbin-a ram a lei hnuah chauh a ni a thinrim chu a reh tak chauh ni. Clay Rogan-a hi uksak loh reng reng a tum ta a. Rel kawng siamtute ho rawn thlen hma zawng kha chuan uksak pawh a uksak lo reng a ni.
Gail-i’n coffee a rawn pek lai chuan a lo la tum bur a, Conway-a te lo thlen chu a nghakhlel hle a, a fanu pawh chu chawl hahdam turin a hrilh chuang hlai lo va, ngui tak chuan zana an ruaithehna thil nawi an peih chu a thlir reng a, zing khawvar hmain ruah a sur ang a, a ram hnimte pawh chu a tha sawt dawn a ni tih a hria a, mahse, mahse chung pawh chuan a rilru hahnate pawh chu an chhawk chuang lo. Gail-i mut hnu thleng pawh chuan a la in ngaihtuah ta reng a.

BUNG - 4

Clay Rogan-a chuan Shallow River chu a tum ang hunah chiah chuan a thleng ta a. Khawnvarte chu an lo chhi eng thluah tawh a, khaw chhiat avangin mipuite chu ni hnih ngawt anmahni inah an la tawm tawh avangin, khawlaiah te chuan an lo vak harh a, kawtthlerah te chuan an lo zi mur mur a.Boruatte chu a thiang hle mai a. Clay-a pawh a hliamte chuan an tibuai rih lova,a dar hliam a ngaihtuah chuan puakruk phawi a ti bahlah ang tih a hlau hle a ni.
Sakawr inah chuan a sakawr chu dahin a han thlung tha a, kawtthler sirah chuan a kal ta a. Garter Saloon bulah chuan in sak thar hi a lo awm a, a hma lamah chuan hawrawp lian pui hian a neitu hming a lo intar a, chu hming in tar chu ‘ DOHERTY ‘ tih hi a ni.
A han hawi chho zel a, jail te, chaw eina te, sakawr zin siamnate ho chu a indawtin a lo awm chho thluah a. Mi pathum hian an rawn kal pel a, a hma a thil tawn tur chu hre rengin thim hnuaiah chuan a ding ta a, atan chuan dama chhuah leh theihna chance a nei tlem hle tih pawh a hria a.
Paxtona’n emaw Elisona’n emaw Currya’n emaw anih loh leh an zavaiin emaw a mah chu an lo thah chuan, Doherty-a chuan a ram neih sak tur chuan buaina reng reng a tawng tawh dawn lo a ni. Clay-a chuan duh lo hle mahse engmah tih theih a nei si lo va, a puakruk chu a han phawi a, bathlarah chuan a a han kai chho va, a rilru ah thil pakhat chauh a thuna, chu chu Eli Paxton-a zawn hmuh a; thah nghal a ni.
Pen sawmpahnih vel chauh a pen hman ang tih chuan a hnung lam atang hian kohna aw ri a hre ta a, Clay-a chu a ding chawt a, a han hawi kir a, Sheriff Mace Thurlow-an a rawn pan phei chu a hmu nghal a.
“ Kha, Rogan-a i ni maw, lo ding teh “, a rawn ti a. Clay-a chuan a lo nghak a, a lo thlen chuan Sheriff chuan Clay-a puakruk pai chu a han en a.
Clay-a chuan, “ Enge ni ta ? “, tiin a lo zawt a.
Sheriff chuan, “ Rogan, khuaa i lo lut tur kha ka hmu che a, ka lo nghak che a ni. Khi lamah eng thil nge lo thleng ta a, silai te i pai tak ka ti deuh va, khuaah hian silai pai a i lo kal hi ka hmu ngai zen zen lo che a ni “, tiin a han zawt a.
Clay-a chuan,” Sheriff Thurlow, tunhma pawhin silaite chu ka pai fo a lawm “, a lo ti let ve mai a.
Thurlow-a chuan a lu a lo bu mai a, “ Ni e, ka pha lo ve, i pai chu ka hmu tawh a, mahse, tun ang reng renga i la sa hal lai hi ka la hmu ngai lo che a ni. I rilruah engemaw vei i nei a ni Mister, chu chu enge a nih ka hre duh a ni “, a ti ta tlat mai a.
Clay-a thinlung kang alh chu chu zan thlithaw chuan a chhem dai mai lo va, Sheriff Thurlow-a a hmu ta thut mai hi a ma thiam loh pawh a ni lo va, hmu tur emaw biru tur emaw pawhin Thurlow-a hi a lo ngaihtuah ngai reng reng lo va ni. Clay-a ngaihdan chuan Thurlow-a hi mi dik tak leh rinawm tak, dan vawngtu, buaina siamtute tana tawh khirh tak ni hian a hria a, mahse, midawh thei tak mai anih avang bawk hian mi zah a hlawh em em a ni.
Clay-a chuan a tawpah chuan a han chhang leh ta a, “ Ka buaina chu nang nen a ni lo Sheriff “, a han ti a.
Sheriff chuan, “ Keimah anih loh chuan tu nen nge ? “, a lo ti leh zel a.
Clay-a chuan a chhang lawk lova, Shallow River-ah hian Paxton-a hi a ruka thah tumin a lo kal lo va, mitin hmuh theih turin a ni zawk tur a ni. Chumi hnua damtea a la awm anih chuan Sheriff Thurlow-a chu a hmu leh zawk tur a ni. Mahse a thah tum chhan chu a dik tih a hrechiang hle bawk a ni.
Clay-a chuan, “ Eli Paxton-a an tih hi a lawm maw le “, a ti ta a.
Sheriff chuan mak pawh ti chuang lo chuan, “ Paxton-a maw ? Chupa chu Doherty-a mite zinga mi kha a ni lawm ni ? “, a lo ti a.
“ Mi min hrilh dan chuan Doherty-a tan a thawk a ni Sheriff “, Clay a chuan a ti leh mai a.
“ Chuti anih chuan hrechiang la a tha ang Mister. Doherty-a leh Paxton-a i beih phawt chuan midang pahnih Elison-a leh Curry-a pawh an la awm tel ve nghal a ni “ Sheriff chuan a han ti leh a.
Clay-a chuan, “ Tuna ka buaina hi chu Paxton-a nen a ni a, midang an lo tel ve a nih chuan a pawi tui viau ang “, a ti mai a.
Sheriff Thurlow-a chuan Clay-a chu a han en a, anghawh hiah pah chuan, “ Nangmah i inring lutuk mah mah niin alang Rogan, min ring rawh, anniho hi tawhkhirh tak an ni a sin, “ a han ti leh a.
“ Paxton-a hian a ruk a rala thah min tum tawh a ni “, Clay-a chuan a ti leh ta tlat a.
Sheriff chuan ban a han ngheng a, a bul atanga hriat chhuah vek a tum lai chuan a ding mar leh ta thut a, a meng nur a, a chalet chu a han chuar a, kum sawmli a lo hnaih ta a,atan chuan khawthlang ramte hi a hrethiam zawk zawk lo va,a vanglai tak nin a inhre nghe nghe a. Dan ken kawhna hun kum sawm emaw kum nga lai emaw la nei chuan a in hria a, a chawlhsan hun pawn a awm hle hle theih a inring lova, chumi chuan a rilru a tibuai thin a ni.
“ Chu chu a fiahna i nei reng em Rogan ? “ a han ti leh a.
Clay-a chuan, “ Han pawimawh tham tura fiahna chiah chu ka nei lo va, a tawng leh ka tawng a ani mai “ , a ti veleh mai a.
Sheriff chuan, “ Chuti chuan khuaah cho turin i rawn kal ta a ni maw ? “ a lo ti leh a.
Clay-a chuan, “Chu chu keima thu liau liau a ni lawm ni Thurlow “ a ti a. Paxton-a chu hmuh thuai thuai a, thah thuai a nghakhlel hle a ni.
Sheriff Thurlow-a chuan a nghang chu a han hiat leh a, a lu a thing nu nu a, “ Awle, tuna hi thu a ni thei a, a ni lo thei bawk a, mahse, i rualin ka kal ve ang a, miin thah an lo tum tawhte chu, thah tumtute hnen atangin an thah tum chhan chu hriat a thiang ve reng a ni, mahse, a tihdan riau kawng a awm a nia Rogan “, a ti ta a.
Clay-a chuan, “ Ka hmu ngei ang a, ka cho ngei bawk ang Sheriff, dik tak leh fair tak a ni ang a, hretu leh hmutu pawh an awm ngei tur a ni “, a ti ve ta a.
Sheriff chu a han nui a, “ Paxton-a, Curry-a, Elison-a, tin, Doherty-a hial pawh. Chungho chu anni a i tum tur chu, i hria em Rogan ? “, a han ti leh a.
Clay-a chuan a lo chhang thuai a, a aw chu a chang hle a, “ Ka hre lo le Sheriff, eng hunah emaw zaninah a nih loh vek pawhin hun dang a lo la thleng ngei dawn a,Chuvangin tunah hian min dang thei dawn chuang lo a ni “, a ti a.
Thurlow-a chu ngawi rengin a in ngaihtuah a, bathlar chu a thlir chho va, “ Chu, Paxton-a chuan a kap thelh che a maw ? Chuti chung pawh chuan thah i la tum ta fo a maw ? “ a ti leh a.
Clay-a chuan a malpui leh a dar chu a han kawk a, “ Silaimu pahnih ka dawng a Sheriff, ka thianpa’n thi chhawngin in min thlen thei hram a ni “, a ti ta a.
Thurlow-a chuan, “ Chu, engtik hun laiin nge Rogan ? “ tiin a han zawt leh a.
“ Nimin zing khan “.
Sheriff Thurlow-a chuan mak ti deuh hian a mitko a han san a, “ Silaimu pahnih i dawng a, khuaah i lo kal a, i duh duhin i che thei a !! “, a ti ta ringawt a. Clay-a pawh chu a lo bu ve mai bawk a . “ Chuti anih chuan mi tuar fei tak i nih pawh in, i daw tal a ni ang “, a la ti ta talh a.
Clay-a chuan Sheriff thil beisei chu a hre reng a, a kawr hma chu a han hawng a,bandage lianpui chu a rawn lang a, “ Bandage pawh hi ka phelh thei a ka hliam i hmuh duh chuan ka phelh vek thei, mahse, a thi leh ang tih ka hlau a ni, ka malpui pawh hi bandage tho in ka tuam a ni “, a ti a.
Sheriff Thurlow-a chuan a kut a lo vai a, “ A ngai lo ve, i kawr kha kilh leh rawh “,a lo ti a.
Sheriff chuan bathlar sir a pan phei a, khua chu a han thlir chho va, Clay Rogan-a chu a han en leh a. Thurlow-a chuan a rilru a siam fel ta tih Clay-a chuan a hria a, Thurlow-a rilru chu a hre zui ta ngei bawk a.
“ Paxton-a ka hmuh hnuhnun ber chu, Garter Saloon-a a zu in lai a ni a,a thiante an awm bawk a, mahse, Elison-a chu a tel ve lo. Elison-a hi pa ngawichawi tak, thian kawm vaklo a ni “ a ti a.
Clay-a chuan Garter Shaloon atanga eng rawn chhuak chu a han thlir chho va, mi pahnih kawngkhar lam pan chu a hmu bawk a,an nui bawrh bawrh a.
“ Ka beih tum chu Paxton-a a ni “ a han ti leh a.
Thurlow-a chuan, “ Anih leh le, nangma ke a din i duh a ni a, han dan che pawh hi awmzia awmin ka hre lo va, mahse, ka tih angina ti ang che mister. Tikhan ding takin va lut la, Paxton-a hnenah chuan eng vanga thah tum che nge anih va zawt la, keiin a chhan dan che atang chuan tunge dik a dik lo zawk tih ka hre mai ang. Tin, Rogan, a lo chhan reng reng che chuan phawi zui nghal mai ang che “ tiin a han hrilh a.
Clay-a chuan a hmui a han liak huh a, inkahna a mi a hmachhawnna hi a rei hle tawh a, a dik chiah phei chuan tum hnih chauh a la ni a, chung chauh chu mi thah duhna leh mi a thahna hun neihte chu an ni a. A hmui leh dangte chu a lo ro zo tawh a, mahse..
“ Ka lawm e, Sheriff “ a han ti hram a.
“ Ka lawm e ti kher suh mister, tha bera ka hriat angina ka ti mai a ni. Ka khuaah hian inhuatna chambang awm reng tur hi ka duh lo a ni. Thil dang pakhat leh chu, nangmah lo that tur chein ka chhuah che a ni mai thei a ni tih hi ka ringhlel lo ve “.
Bathlara Sheriff Thurlow-a chhuk hnu chuan Clay-a chu a ngawi reng a, Sheriff hnungah atang chuan, hma lam kawtthler en reng chung chuan a kal ve ta a. Mi pathum hi Garter Saloon atang chuan an rawn chhuak a, pakhat chu a rui hle mai a, midang chuan an rawn kuah a.
Thurlowa’n mi pakhat hming a han lam chu Clay-a chuan a hria a, chu chauh chu ri awm chhun a ni. Khua chu a reh vawng vawng hian a hriat a.Garter Saloon pawnah chiah chuan Sheriff chu a ding a, Clay-a lut tur chu kawng a lo kian a, Thurlow-a chuan zawite hian, “ Fiah takin sawi chhuak lawng mai la; a dang chu amahin a la inhril chho zel mai ang “ a han ti leh a.
Clay-a chu a bu nghat a, a kut dinglam chu a kekawrah chuan a han hru a, Clay-a hmela zauthauna awm zawng zawng kha a bo ta hmiah a, a aiah tum ruhna a lo lang ta zawk a. Chu chu Thurlow-an a han hmuh chuan mak a ti hle a, a kut bawr leh mitmengte chu a che ta hlek lo va.
Sheriff Thurlow-a chuan Clay-a mizia tak chu a vawikhat hmuhna a ni. Paxton-a hian a damchhung zawng a a thil tih loh tur a lo ti sual palh a ni tih pawh a hre zui nghal ta a.
Clay-a chuan a dar hliam lo lam chuan Saloon kawngkhar chu a han su hawng a, chu tah a pen lut nghal a. Saloon chhung chu a lo ri mur mur a, Sheriff Thurlow-a pawh chu rawn lut ve nghal in, kawngkhar bulah bang nghengin a ding ta a.
Clay-a chu Saloon chhungah chuan a lut phei zel a, a kal pah chuan mite chu a en chiang zel a, a mi kal pelh a piangte pawh chuan an lo thlir zui zel a, an tawng laite pawh chu an tawp chawt hlawm a. Clay-a mitah chuan thinrimna hlir an hmu a ni.
Clay-a chu muangchangin a phei zel a,thawm pawh chu a reh ta tial tial a, a tawpah phei chuan a reh ta thup a, thawm ri hriat tur reng reng a awm ta lo va, thawm ri awm chhun chu Clay-a boot ri mai chauh a ni. Clay-a hma a lo awmte pawh chu an tawlh sawn nghal ur ur bawk a.
Sheriff Thurlow-a chuan, Clay-a piah lama Eli Paxton-a ding chu a va hmu thei a, a mit atang chuan manganna rawn lang zawk hi a hmu hman a, Clay-a chu Paxton-a hma zawn chiah fit sawm vela hlaah chuan a ding ta chat a.
‘’ Paxton, nimin khan min kah hlum i tum tawh a, nimin a i thil tih kha rawn ti zo tur in heta hi ka awm e “, aw zawi dap hian Clay-a chuan a han ti a.
Saloon chhung chu a reh tlawk tlawk mai a. Paxton-a hnaia mi lo awm ve te chuan Paxton-a chhanna chu nghakin an lo thlir thap a. Paxton-a chuan a zu no chu dawhkanah a han hung a, a tawlh hlat san a. Midangho te chuan Clay-a chu an lo then khum a, mi aa ah an lo ruat a.
“ Rogan, thil engemaw sign tur i nei e “, Paxton-a chuan a han ti phawt a.
“ Engmah ka sign lovang, nangni mi bawlhhlawh awmkhawm hote kha lo hnung tawlh rawh u, hei hi kei leh Paxton-a nena kan inkar thil a ni. “ aw nelawm loh tak hian a han ti a.
Sheriff Thurlow-a pawh chuan Paxton-a thiante hmela mak tihna lo lang chu a lo hmu reng a, hma lamah chuan lo pen chhuak vein, bar lam chu a rawn pan phei a, a rawn kal phei pah chuan, “ Hei hi lo hria u la Gents, midang tumah lo inrawlh ve suh u. Hei hi mipa chen na ram a ni a, mi pakhatin midang chungah thil dik lo tak lo ti ta se, chupa chuan buaina ching fel turin ama duh dan ang angina thil a ti thiang a ni. Chumi tih theihna chu Rogan-a hian a nei a ni “, a rawn ti ta a.
Art Curry-a chu a dang sawp sawp a, rang takin Paxton-a hnungah chuan a rawn zuang chhuak a, a chalahte chuan thlan tui hi a luang thla zawih zawih a.
Sheriff bawk chuan, “ In zavaiin ka ti a ni lawm ni Curry, Rogan-a hian thil a rawn zawt a, Paxton-a hian chhang rawh se “, tiin a han vin thawt a.
Clay Rogan-a chu che hlek lovin a ding a, a hmaa thil lo thleng tur nghak chuan a in ring hle a, tunah chuan a hun a lo thleng ta, zaman leh hlauhna chhete pawh a nei hek lo. Bawng rual zinga chhinchhiahna siam tur ang lek ah a ngai tawh a ni.
Clay-a chuan vin thak hian, “ Paxton, min chhang vat rawh, nimin ah min thah i tum tawh thu kha sawi vat rawh ! “, a han ti leh a.
Paxton-a chu a thaw lum pawp pawp a, a kekawr chu a han pawt chhing a, a puakruk bulah chuan a kut chu a thlak thla ta a.
“ Rogan, silaimu lo chuan mi ka chhang ngai lo “, Paxton-a chuan a han ti ve ngat a.
“ Anih a hnu, phawi ta che ! “ Clay-a chuan a han ti leh a.
Paxton-a tan chuan Clay-a rawn chona chu a na hle a ni, mahse, a rawn cho tlat si !! A vei lama awm a thiante chu a han en kual a,anni chuan an lo thlir reng a, han tlawm mai chu a hrehin, a theih tawh loh tih a hria a. Rogan-a chu a that ngei tur a ni tih a rilru chuan a siam nghet ta nghal bawk a. Chumi chuan amah ah in rin tawkna a rawn neih tir leh ta a.
Paxton-a chuan, “ Sheriff, hemi zawhah hian enge ni zel ang, a tawp a ni mai ang chu maw ? “ tiin a han zawt hmasa leh te te phawt a.
Sheriff Thurlow-a chuan, “ Paxton, a tawp a ni mai ang chu, mithi tawh hnu an tawng leh thei tawh si lova. Tuna a lan dan chuan nang leh Rogan-a chung thu a ni mai a, in pahniha inkara thil awm a ni. In tihtur chu ti thuai ula, tichuan khaw thianghlim ka nei leh thei dawn chauh a ni “, tiin a lo chhang a.
Paxton-a chu nur nung chung hian a han bu nghat a. a han in her leh hret a, saloon eng khawnvar eng chuan a dar tak a rawn chhun a, a kut zungtangte chu a han hum a, a pharh leh a. Chutah Rogan-a chu ding takin a en ta a.
Clay-a chuan a lo nghak reng a. midangho chuan Clay-a chu an rawn en thup a. Norwood Valley rama ran vulhtu pakhat a ni tih an hriat nial nual chauh kha a ni a, mahse, a mit atanga huatna lian tak lo lang chuan mite chu a ti hlau va,mak an tiin an ngawi thuap bawk a. Clay-a pawh chu che miah lovin a la ding ngawi reng a.
Paxton-a chuan a kut chu a han chet ta aa, a puakruk chu a phawi ta nghal a, puakruk phawi pawh a rang ngei mai. Clay Rogan-a kut pawh chu a phe zawk a, a kutah chuan puakruk hi a rawn chawr chhuak nawlh a, a ri nghal thuai a. Clay-a silai rik hnu deuh hlek chuan Paxton-a silai pawh chu a rawn puak ri ve a.
Clay-a silaimu chuan Paxton-a awmah tak chuan a va verh sawr a, Paxton-a silaimu thung erawh chuan ceiling chu a verh pawp hawk thung. Paxton-a chu a pai chawn chawn a, bang chu na deuh mai hian a va su dawt a, second hnihkhat ve a han ding leh a, a kut atang chuang a pistol hum chu a ke bulah chuan a thlauh ta bawl a, Paxton-a chuan a silai thluh chu enzuiin, a kun ta riai riai a, a mit atang chuan mak tihna leh rinhlelhna a rawn lang a, chhuatah chuan ke vawrin a bingbilet thla ta tawp a, a keartui chuan chhuat chu a vaw ri dawt a, a che zui ta lo va.
Thawm ri hriat tur reng a la awm lo va, Sheriff Thurlow-a chuan, “ Anih tur ang chu a ni zo ta a, hretu tha tak tak tam tak in awm a, Chuvangin hemi thu ah hian kal thui zel pawh a ngai tawh lovang. Nangni rel kawng siam tum ho khan Paxton-a ruang hi heta tang hian hnuk chhuak ula, phum nghal ang che u. Rogan, nang min rawn zui rawh “, tiin a rawn tawng chhuak a.
Midang tumah chechang an la awm lova, Clay- Rogan-a chuan a puakruk chu a bawmah a han thun a, a taksa chhung zawng zawng chu vawt chhuak vek hian a hria a, a ke te chu a zawi deuh huau va, mahse, rang takin tunah hian a chhuak nghal tur a ni tih pawh a in hai lo.
Clay-a chuan, “ Sheriff, ka rawn kal e “, a han ti a. Chutia a han sawi zawh chuan Clay-a chu a in her a, Saloon atang chuan a chhuak ta nghal a. Bathlarah chuan Thurlow-a thusawi chu a lo nghak a.
Thurlow-a chuan, “ Minute nga chhung chu heta tang hian tumah pawhah rawn chhuak suh ang che u“ tiin saloona awm ho chu a han hrilh a. A sawi zawh chuan pawnah chhuakin Clay-a bulah chuan a va ding a, ngun tak hian Clay-a chu a han thlek kual a. Clay-a lah chuan engtin nge a rawn tih dawn tiin a lo en ve reng bawk a.
“ Tlanchhuak nghal vat rawh Rogan, hapta tlemte chhung chu i mit kha meng kar ang che “, tiin Sheriff chu a rawn tawng chhuak ta a.
Clay-a chuan a hrethiam tih entir nan a lo bu nghat a, engmah pawh sawi leh tawh chuang lovin sakawr in lampangah chuan a phei ta a. A sakawr thlunna chu phelh in a chuang kaiin a sakawr chu a kal tir ta nghal a.
Kawtthlerpui ber lam pan chuan a sakawr chu a kal tir a, Thurlowa’n saloon kawngkhar pawn atanga saloon a lo la venglai chu a va hmu a, a sakawr chu kheng tlanin Shallow River chu a chhuahsan ta a. A dar chu a rawn na tan leh ta a, an inkah hnu atanga a hriat chhuah leh na a ni a, thisen chu a rawn lum chhuak ta nghal a.mahse, a ngaihtuah duh lo lui a, a taksa ahte chuan rilru hahna leh vawhnate chu a lo cham bang reng a ni.
******
Ty Conway-a chuan zan thim tham hnuaiah chuan Clay Rogan-a kawtzawl fai lai chu a pan chhuk zel a, a zuk thle chuan a lo thim vek a, kawngkhar bulah chuan a va phei a, thenawm mel hnih vela awm te pawn a hre thei hial ang tih tur khawpa na hian kawngkhar chu a han chhir ri a, mahse, chhanna reng reng a awm si lo. Chuvang chuan theihpatawpin a han au leh a,a thin chu a rim zual ta tulh tulh mai a, mahse Clay rogan-a thawm awm reng reng a la hre ta chuang lova. Kawngkhar chu hawn tumin a han bei a, mahsela a hawng thei ta chuang lo va, a vawnna hnuai chu a han en a, kawngkhar kalhna chu a hmu ta a.
Thinrim deuha kir lehin a sakawr chungah chuan a chuang a,a ngaihna pawh a hre lo hle a. Rogan-a chu Norwood-a inah khan a rawn kal ve lo tih chu a hria a, chumi hmun lam hawi chuan a kal in a kir leh lo tih tih pawh a hra ta bawk a. Clay Rogan-a awmna tur ngaihtuah chuan a sakawr chungah chuan a thu ta reng a, a tawpah chuan khaw lam panin a kala ng a, Doherty-a hnenah a ram va hralh a tum a ni a ring nghet ta a.
Conway-a chuan in ngaihtuah mai mai nan hun a khawh ral duh ta lo va, a sakawr chu tlang awihlam hawi chuan a pawt her a, ram palailengah chuan a tlan tir ta vak a. Zanlai a pel tawh a, mahse, zing khawvar veleh Shallow River a thlen hman a in ring a ni. Rogan-a a va hmuh chuan hruai hawn a, Norwood-a hmun chu hnathawh hma a tlen leh hman a in ring a ni.
Darkar rei lote hnuah chuan Shallow River chu a va thleng ta a. Doherty-a in sak thar chhunga eng lo la awm chu Conway-a chu a han hmu a.Doherty-a mirawihte leh a thil tumte chu hriat a chakin, hetiang tlai tawh takah pawh an lo la eng fo mai chuan hriat a chak zual tir phah a, tichuan Doherty-a in chu pan pheiin kawrkharpui hma yard tlemteah chuan a sakawr chu a tiding ta a.Thawm dim takin a sakawr atang chuan a chhuk a, ri hlek lovin bathlarah chuan a va lawnkai ta a, kawngkhar chu penkhatin a la thleng lo va, chutih lai tak chuan kawngkhar chu a rawn inhawng ta thut mai a, eng chuan a rawn chhun a, a hnung tawlh vat a, mahse Elison-a lo hmu hmanin a pistol a phawi nghal bawk a.
“ Ding rawh “ tih ri a hriat chuan Conway-a chu a ding nghal chawt a. Han intih mi tak deuh hi a tum a, Elison-a chu ngun takin a en a. Elison-a nen hian an inhmuh hmasak ber tumin buaina an lo nei dun tawh a ni. Elison-a tiam chin a pelh leh chuan Elison-a hian a kap ngei tawh ang tih vauna pawh a lo dawng tawh a, tunah pawh hian Conway-a chuan a rawn kah nghal mai a inring tawh a ni.
He vauna thu hi Conway-a hian a lo ngai pawimawh ngai vak lo va, Elison-a leh mi tupawh Doherty-a hnuaia thawk reng reng chuan inkah ah hian a tluk thei a ring ngai lo va, mahse, tunah hi chuan thil a danglam ta. Elison-a hian silaiin a tin sa tlat mai si. Amah that mai tur hi chuan chhuanlam awlsam takin a siam thei mai a ring a ni.
“ Conway, hetah hian enge i rawn tih ? Ka hmaah hian rawn in pal lut tawh lo turin ka hrilh tawh bawk che a, i rawn inrawlh leh chuan ka that ang che pawh ka ti tawh a ni lawm ni ? “, Elison-a chuan a han ti a.
Conway-a chuan, “’ Helai eng hi ka rawn hmu a, a hma aia inremna tha zawk kan nei thei dah mial lo maw ka han ti a ni “, a ti a.
Elison-a chuan ringhlel deuh hian a han en a. Jobe Doherty-a chu Elison-a hnunhah chuan a rawn phei a. Conway-a a han hmuh chuan, “, Burt hei enge ni ta mai !?” a han ti a.
Elison-a chuan, “ Conway-a hi hetah hian a rawn lut ru a lawm maw le, amah chuan min rawn be tura a rawn kal thu a sawi a “ ,a lo ti a.
Doherty-a hmelah chuan huatna a rawn lang a, “ Conway, enge kan hriat chak awm zawng sawi tur i neih ? “, a han ti leh a.
Conway-a chuan hun tlemte chuan a nei tih a in hria a, mahse. chu hun tlemte pawh chu a tan chuan a tangkai ta reng reng a ni. “ Majora’n hmuh che a duh a Doherty, a lang a pauva indo hi a duh lo a ni“, a han ti thla ringawt a.
Doherty-a chuan, “ Conway, a ram kaltlanga rel kawng siam pawh a duh bik chuang hlei nem. Nooo-a cu a duh ang ang a khawsa turin ka hrilh tawh kha, tin, rel kawng pawh ka siam ngei dawn a ni tih ka hrilh tawh nghe nghe kha, “ a han ti leh a.
Conway-a chu a awm a nuam ta deuh tulh tulh a, a dar a han chhin ak a. Burt Elison-a chu ngaihno bei lo fahran hian a han melh a. Doherty-a hnenah chuan, “ Thu ka rawn thlen che a, chu chu ka hna a ni bawk a, Major-a hnuai a hnathawk ka nih hi “, a han ti leh ngat a.
Elison-a chuan, “ Mister, i hna chu Norwood-a boot liah fai sak a nih zawk kha, heta i rawn luh rukna chhan i sawi kha kei chuan ka ring hlawl lo a ni. “ a lo tih khum a.
Conway-a chuan Elison-a chu a han melh tur khai a, “ Elison, chu chu a nih si loh chuan eng dang vang chuanin nge ka rawn kal ttak ang ? “, a han ti a. Elison-a chu a thin a rim em em mai a, amah rawn thah a chak zia chu Conway-a chuan a lo hmu reng a.
Doherty-a chuan, “ Min rawn enthla turin maw le, ka chil chhak ang tluk lek fang i ni Conwa. I taksa ah khan Burt-a hi ka verh kuak tir phawr mai tur che a nia “, tiin a lo vau ve a.
“ Han verh kuak tir phawr ta che, mahse, a chhan ka hnenah i sawi siah ngei a ngai ang Doherty ! “ an hnung lam thim zing atanga aw lo chhuak chuan a rawn ti thum ta dap a.
Sheriff Mace Thurlow-a chu thim zing atang chuan a rawn pen chhuak ta chhak chhak a. Doherty-a leh Elison-a chu hnung lamah chuan an her rual thawt a, chutia Elison-a a han in her pah chuan rang lutuk tak mai hian a pistol chu a phawi nghal zawk a, Sheriff rawn pen chhuak chu a puakruk chuan a han tin nghal a.
Sheriff chuan Elison-a pistol chu a han nem kianga, Doherty-a leh Conway-a inkarah chuan a va ding ta ngat a. Conway-a chu ngun tak a en hnu chuan Elison-a lam chu hawi lehin chang bel bawl tak mai hian, “ Kha kha zaninah chuan i mamawh lovang Elison ! “, a han ti a.
Doherty-a chuan Sheriff mitmeng leh hmeh rum zia a han hmuh chuan Elison-a chu a puakruk dah kiang turin a han hrilh a. Elison-a chu rum deuh ngul ngul chung hian a pistol chu a bawmah a khung ta a.
Doherty-a chuan, “ Sheriff, hei hi keima tan chauh a ni hlei nem, kei chu mi tha tak ka ni tih i hria a lawm “, a han ti a.
Sheriff chuan, “ Doherty, ka hriat ve dan thung che chuan Paxton-a hnenah ran vulhtu invenna leh ralthuam pawh pai ve lo that tur a thupetu i ni zawk in ka hria, chu lo pawh i chanchin hriat loh tam tak ka nei a, chungahte pawh chuan ka rilru tih hah tawk na ka hmu a ni,” a han ti lawng mai a.
Doherty-a chuan anchhe lawh pah chuan, “ Tuna i thusawi kha la kir leh nghal rawh Thurlow ! He khuaah hian buaina ka siam lo va,ka ram lei hote kha dan ang thlap a ka lei a ni. Tumahin an sawisel lo. Helai hmunah hian rel kawng siam turin ka rawn kal a, he khua pawh hi a nih tur ang chiaha a phuisui phah ka ring a, a than len chhoh zel pawh ka duh a ni. Nang pawh hian min tibuai mai mai lo la, min tan zawk tur i ni a sin ! “, a ti ta hrep a.
Thurlow-a chuan,” Doherty, ka tih tur chu ka hria alawm “, a lo ti mai a. Conway-a lamah chuan a inher leh a, “ In ranch atangin i tla hla hle mai ti raw Conway “, a han ti a.
Conway-a chuan, “ Kan nauteho thenkhat chu an rawn kal tawh a, Doherty-a leh a hote hnen atang hian buaina an tawh kan ring deuh a, Major-a chuan kan nauteho chu Ranch lamah awm se tha a ti zawk a. A ram chhungah pawn lam mite’n buaina an rawn siam a duh lo a ni, “ tiin a han chhang a.
“ In Major-a chu chutiang ti duh lo mi niawm tak chuan a lan ve si hi maw le, “ Sheriff chuan a lo ti leh a. Elison-a chu a han thli thlai leh te te a.
“ Engpawh nise, kal bo vat la a tha zawk ang Conway, zaninah hian inthahna a awm tawh a, ka diary -a a dang han ziah luh belh leh chu ka duh dawn lo teh mai a nia, “ a han ti zui leh a.
Conway-a chu a phu zawk a, hre chak tih hriat fahran mai hian, “ In thahna a ? “ a han ti a. Thurlow-a chuan, “ Conway, zanin hian inthenawmpa a rawn kal a, Doherty-a te zinga mi pakhat, Eli Paxton-a a rawn that a ni,a rawn cho dan leh thah tak dan pawh dik leh fair tak in a ni bawk. Mi tam tak pawhin Rogan-an a kap hlum thei ta mai chu mak pawh an ti hle a sin, “ tiin a han sawi leh a.
Thurlow-a chuan Conway-a mak ti chu a hmu reng a. Doherty-a chuan anchhe bawlhhlawh tak tak a lo chhak chhuak ve leh chiam bawk a, Sheriff bawk chuan, “ Chu, an lo hrilh ve na che nge ? An lo theihnghilh palh che anih ka ring. Eng pawh nise khua atang hian chhuak nghal la a tha ber ang Conway, tichuan khuaa mite hi thlamuang takin an mu thei dawn a nia,” a han ti leh a.
Conway-a chuan a thu hriat chu ring lo tak leh awih lo tak hian a lu a han thing nan a a, “ Rogan-a’n maw !? “ a han ti leh ngat a.
Doherty-a chuan, “ Khapa kha zawng thi ang tluk a ni tawh e “, a lo ti a.
Sheriff Thurlow-a chuan thinrim zet hian a inher a, “ Doherty, a hma khan chiang deuhvin ka hrilh tawh che a ni lawm ni ? An in beih dan kha inbeih dan thianghlim leh fair tak a ni , mi tam takin an hmu a, Rogan-a chu ngaihdam a niin, Rogan-a leh Paxton-a inkar buaina a ni a, hetiang dan hi he ramah hian kan pawm a, Paxton-a’n tawktarh a va keih them a, a bang zawng chu Rogan-a hian a lo ei zawh tir ta mai a ni “, a han ti leh ta hmak mai a.
Conway-a chuan, “ Rogan “ ti a han phun sap pah chuan Doherty-a chu a han melh a, “ Doherty, chu, kan thiana chuan a ram a hralh dawn lo a ni maw ? A tirah Rogan-a leh Paxton-a, tunah Rogan-a leh nangni in ni tawh ang maw ? “ a han ti a.
Jobe Doherty-a thinrim lutuk chu a puakkeh lo chauh hi a ni tawh a, Conway-a chu a han melh nghek a, tawng chhuah a han tum a, a hmui chu a che ngei mai, mahse, ri reng reng a chhuak zo lo va.
Sheriff Thurlow-a chuan ti hian Conway a chu a han hrlhfiah a, “ Saloon chhungah khan thil hralh chungchang chu sawi a awm ngei a. Ka rin danin Major-a pawh hian a ngaihven ve viauin ka hria. In thil chungchangah hian ka inrawlh ve pawh a ni lova, mahse, ka dinmun hi chiang taka in lo hriat a hun ta in ka hria. Doherty-a hian ram a duh a, nangni ran vulhtuho hian hnawhchhuah tumin in do va, in duh leh in thisente chu leiah luang ngeih nguai ang hmiang, mahse, tun a chin, tun minute la la atang hian ka khuaah hi chuan in hrawk leh in hrawk ah lo in rek tawn tawh suh ang che u. Hei hi tu ve ve tan pawh a ka tih a ni “ a ti ta khawl mai a.
Ty Conway-a chuan thirban chu a han ngheng a, hmusit deuh mai hian Doherty-a leh Elison-a te chu a han nuih a, Thurlow-a chuan Elison-a hmela thinrimna rawn so sang zel chu a hmu a, thinrim tak hian a han te chhuak a, “ Conway, zanin hian khatiang kha buaina tan chhuah leh dan a ni awm e, I sakawrah chuang la, in michhawrte ho nen chuan khua hi chhuahsan nghal vat rawh u. “ a ti ta tuar mai a.
Ty Conway-a chu a phu zawk mai a,a han ding ngil nghal a, Thurlow-a thinrim chuan a han tibuai deuh va, mahse, a chhuak nghal mai chuang lo va, han khawtlai deuh hret pah chuan, “ Doherty, i lo chhinchhiah reng atan hei hi ka’n hrilh teh ang che. Rogan-an a ram a hralh dawn chuan kan hnenah a hralh ang, chutiang bawkin kan awmna lama ran vulhtu dangte pawh chuan an ti ve ang. I ram duh chu i nei chuang lovang. Chuvangin inti hah duh suh, i hun i khawhral thlawn mai mai a ni “, a han ti zui leh hram a.
Doherty-a chuan, “ Rel kawng zawng ka phah ngei ang. Min lo ring mai rawh Conway, i pu Norwood-a kha hrilh nghal ang che. Tun hnuah chuan kawtthlera i kal pawhin i silai phawi i peih reng a nih si loh chuan, ka awm lohna thler lehlam pangah kal zel tawh ang che, “ tiin a lo vau let ve nghal a.
Sheriff Thurlow-a chu a rawn au tuarh a, “ Ngawi tawh rawh ! “, tih pah chuan Doherty-a chu a ma office bang deng dawt chuan a nam phei a, Elison-a chu a lo rum ngal ngal a, mahse, Thurlow-a chua vau melh hian a han melh kawk a, engmah a ti zui ngam ta lo a ni.
Ty Conway-a chuan la then khum reng chung hian bathlar atang chuan a in her a, a sakawrah chuan a chuang kai a,kawtthlera kal chhuk pawh chuan hmusit tak hian a han nuihsawh leh a, muangchang hian an pathuma hnung chhawn chuan a kal san ta a.”
“ Kha ngai rawh Thurlow, a thusawi kha i hria a, min nawr lui a nih kha “, Doherty-a chuan a han ti a.
Sheriff Thurlow-a chuan, “ Ngawi reng rawh Doherty, khua a tlai tawh, “ a lo tihsan a. Tichuan Doherty-a leh Elison-a chu a kalsan ta a.
Conway-a chuan a sakawr chu a kheng tlan ta tih a han hmuh chuan Sheriff Thurlow-a chu kawtthlera a office-ah chuan chuan a lut a, Doherty-a kawngkhar khar ri pawh a hre zui nghal a. Zanin a hnathawhna kawngah chuan a lawm hle a. Mutchhuak tak chung chuan Rogan-a chu mut pahin a ngaituah zui ta zawk a.


BUNG - 5

Ty Conway-a chu khuaa thil thleng zawng zawng chuan a ti va uar a, chumi avang chuan chu van chu tlaivar mai a tum ta a. An Ranch awmna lam pan ta mai lo chuan tlangah chuan a kal tlang zel a. Rogan-a ram chhung chu a rawn thleng leh ta a, darker tam tak sakawr chungah chuan a chuang na a, a hah em em hran chuang lo va, mutmu a hmuh loh avangin a mit chu a thip deuh va. A sakawr atang chuan a chhuka, chutih lai chuan kawngkhar chu a rawn in hawng a, Rogan-a chu a ulhbun nen chuan a rawn chhuak a, Conway-a chu a rawn hmachhawn ta a.
Conway-a chu a han then sak a, a sakawr chu a han thlung tha te te a, Rogan-a lamah chuan a phei ta a. Zawi te hian, “ Rogan, kha kha i mamawh lovang, buaina rawn zawng ka ni lo ve “, a han ti a.
Rogan-a chuan, “ Anih leh Conway, enge i zawn tak ? “, tiin a han zawt let ve nghal a.
Garter Saloon-a an inkah atang kha chuan in ring lovin a la awm ta reng reng lo va ni.
Conway-a chuan, “ Khua atangin ka lo kir chauh a ni a, Paxton-a nen a inbuaina pawh ka lo hria a“, a ti a.
Clay Rogan-a chu in thlah dul chuang hauh lo chuan Conway-a chu a la en ta reng a, Conway-a chu cabin bang ngheng chuan a ding a, a vaihlo ip chu a han phawrh a, a mei zial pah chuan Rogan-a chu a han nuih a, “ Sheriff Thurlow-a chuan silai kah i thiam kher mai, i thiam tak zet a ni a ti che a, a awm pawh a awm viau reng a. Paxton-a hi silai kah thiam hmingthang tak mai a ni a, chuvang chuan a thiam pawh i thiam na ngiang a ni ang “, a han ti leh a.
Conway-a bawk chuan, “ Ka tan chuan eng mah a ni lo ve Rogan, i lute kha i lo hawisan tir lutuk ang e tih thu hla mai a ni e, “, a han ti zui leh kher a.
Clay-a chuan a thinrimnate chu a han beng da ihram hram a, awki fiak thak hian, “ He ram hi ka ta a ni a, heath hian ka cheng zel dawn bawk a, Conway, chu chu thil awmdan a ni e, tin, a ni reng fo bawk ang. Chuvangin, nangin emaw Norwood-an emaw he lai ka ram hi zawrh lai a ni tih rinna rilrute in lo neih hlauh a nih chuan theihnghilh nghal ang che u. Norwood-a pawh hrilh nghal la, tin, chumi rual chuan tun hnuah chuan sawmna pawh rawn thawn buai ting duh tawh suh se, tih rawn hrilh bawk ang che, min mamawh lova kei pawn ka mamawh bik lo va che u “, a han ti leh a.
Ty Conway-a chu a rilru a nuam lo ta thut a, hei hi vawikhat rilru nawm lohna a neih hmasak ber a la ni. Hma lamah chuan a zuang ta thut a, Rogan-a ulhbun chu a nem per sak a, a puakruk chu a phawi nghal thuai bawk a, Clay-a awmah chuan a chuktuah ta ran mai a, Clay-a chuan anchhia
a han phuh chhuah thawt a,a silai chu lek chhoh va Conway-a lo hem nan a hman chu a han tum a, mahse, Conway-a chuan a lo nem chhuk a vang chuan a lek chhuak zo ta lo va.
A chan a that zawk tak avang chuan Conway-a chu a han then sak a, “ Awle, Paxton-a ka nih loh hi Rogan, Ty-Conway-a ka nih hi. Tunah tak phei chuan thu petu ka nih hi, i boot bun la, i silaite hnutchhiahin Major-a i hmu dawn a ni “, thu pe aw tak chuan a han ti a.
“ Norwood-a nen a remna siam hi ka phurna zawng a ni lo ka tih tawh kha “, Clay-a chuan a lo ti a.
Conway-a chuan, “ phur la phur suh la mister kal mai teh, mi pawimawh em em ni ta thut awm tak a i thusawi lo ngaihthlak reng hi ka ning tawh teh mai a nia, ka ha pawh i ti tim zo ve, “ a lo tih san ve leh a. Clay-a silai chu a han chhuhsak a, a mute chu phawrh chhuakin, Clay-a awm chuan a han theh phei a, Clay-a chuan a silaimu rawn theh phei chu lo manin, a la che chang duh miah chuang lo va.
“ Conway, i hun i khawhral mai mai a ni, “ Clay-a chuan a han ti leh a.
Conway-a chuan a puakruk chuan a han tin sang hret a, hmusit awm tak mai hian, “ Hunte chu ka ngah mai mister, mahse nangmah zawk hi hmanhmawh vat zawk rawh, “, a han ti leh a.
Clay-a chu in chhungah chuan a lut a, khum hnuaia a boot lak a tum lai tak chuan Conway-a lo lut thawm chu a hre nghal a, Conway-a chu la nui thu chung chuan khum tlang a puakruk in bang chu a la chhuak nghal a, Clay-a chuan a ban phak rengah a puakruk chu a awm tih a hre na, mahse, a chuh duh ta lo a ni. Conway-a hian kah hlumna tur thu hmu se chuan a lawm zawng tak a ni ngei ang tih pawh a hrechiang hle a. Tichuan a hmun leh ram hi tuma enkawl lohvin a awm ang a, Norwood-a tan chuan a duh hun hun nei turin a rawn kal mai dawn a ni. A boot chu a han bun a,
“ Conway, engtik lai pawhin silai ka chungah i lek fo dawn lo tih hria ang che “ ,tiin a han vau va.
Conway-a chu kawngkhar ngheng chuan a ding a, “ Ka mamawh fo bik lovang “ ngainep tih hriat tak hian a lo ti mai a.
Conway-a chu a chhuak a, a sakawr bulah chuan Clay-a chu a lo nghak a, Clay-a pawh chuan a sakawr chu a va la chhuak a, a chungah chuan a chuang nghal a. Conway-a chuan silai chuan a lo tin reng a, tualzawl fai lai an pelh hnu chuan Conway-a chuan, “ Hetiang a chak chiah hian kal reng ang che Rogan, Major-a te nen chuan tukthuan kan la ei ho hman ang, “ tiin a han sawi a.
Clay-a chuan chhan pawh a tum chuang lo. Awihpangah chuan a sakawr chu ama duhthuin a kal tir mai a. Norwood-a ram chhung ruam dup chu an va thleng a, zing boruak thlifim te chuan a rawn chhem a, a zan mut lai a a in leh tih vel loah chuan a malpui hliamte pawh chuan a tibuai hranpa tawh chuang lova. A dar na pawh chu khua atanga a let leh hnu a a tuam that hnu kha chuan a tur ut ut tawh lo a ni.
Darkar hnih hnuah chuan Norwood-a Ranch chu an va thleng ta a. Conway-a chu rawn kal hnaiin Clay-a bulah chuan, “ Major-a bula thil i sawi dawn reng rengin hei hi hre reng ang che, henglai ram chhungah hian ran rual nei tam ber leh lian ber leh zahawm tak a ni a, Rogan, nang pawhin chutiang ang chiah chuan ngaiin zah takin bia ang che “, a han ti a.
Clay-a chuan, “ K a hmuh dan ang angin ka bia ang Conway “, a lo tih san duh chauh a.
Conway-a mit atang chuan thinrimna a rawn lang a, “ Chutianga i tih chuan a pawi ngawt ang, ka hnenah chhanna i pek a tul dawn a ni, Major-a hi milian tak a ni a, nangni ang mi chhiate hi chu a hmaah thingthi hial awm inni zawk a sin “, a han ti leh a.
Clay-a chuan in chu a pan phei zel a, Conway-a thinrim hmel a hmuh chuan a lawm zawk hle a, eng ang pawhin thil rawn in her chhuak mahse, Conway-a hi tih thinrim zel a, a induhna leh chapona zawng zawngte hi nuai chimih sak vek a tum ta zawk a ni. Conway-a in sual lai pawh hi a lo hmu tawh a, han hneh mai tur chuan thil awlai tak a ni dawn lo tih pawh a hre sa a ni. Mahse, Paxton-a pawh kha hetiang bawk a sawi kai kha a ni a, mahse, Paxton-a chu ama kutah ngei a thi ta si a.
Sakawr thlunna chu an thleng a, Conway-a chuan Clay-a chu chhuk hmasa turin thu a han pe nghal a, Clay-a pawh chuan a hnial buai duh lem lo va, kawtlai fai laiah chuan a’n ding a, an michhawrte chu chaw eina in lam pan a an kal chu a hmu a, chutih lai tak chuan chaw ei dar chu a rawn ri bal bal a.
Conway-a chuan, “ Rogan, kal rawh le, a hun takah kan thleng a nih hi “, a han ti a. Ranch in pui lam varanda chu a han kawk a, Clay-a chuan a la hnial ta lo chau va. Varanda kailawnah chuan a han chuang chho va, thingphel chhuatah chuan ban nghengin a han ding a, a kut pakhat chuan a malpui chu a han dawm a, a lo nghak ta a. Conway-a chuan kawngkhar chu a han hawng a, Norwood-a chu a han ko va.
Chutih veleh chuan Clay-a chuan In lianpui chhung a thawm chu a han hre ta a, a hnu lawkah Major Norwood-a chu a kawr rawn kilh pah chuan a rawn chhuak a, kawngkhara a rawn chhuah lai chuan a hmel chu a dur hle a, mahse, Clay Rogan-a a rawn hmuh chuan a hmel chu hawp leh chilhin a hlim ta nghal a.
“ E khai, Ty, a tawpa tawpah chuan i rawn zawng hmu ta hlawl maw ? “, a han ti chhuak a.
Conway-a chuan, “ Hmuhchhuah a har khawp mai, hun a duh rei deuh va ni. Amah zawng chhuak tur hian khuaah ka kal a ngai a. Mahse, ka va hmu ta chuang lo va, ka rawn kir leh a ni. Tun thleng pawh hian a la thenawm chet loh viau a nia “, a lo ti a.
Norwood-a chuan, “ Chu zawng kan la thlak tir mai ang chu “, a han insiam fel zawh chuan Clay-a chu ngun tak hian a han thlir a, “ I hmun lampang chanchin chu engtin nge i tih tak Rogan ? Doherty-a hnenah chuan i la hralh lovang chu maw ? “, a han ti a.
“ Ka ta chu vawn reng ka tum tlat a ni “, Clay-a chuan a lo ti hmiah a.
“ A tha, a tha, ka lo lungkham lian ber chu a lo kiang ta a nih chu “, hmel hlim deuh mai hian Norwood-a chuan a lo ti a. In chhung lam chu a han hawi a, “ Gail, hei mikhual pakhat chaw kil pui tur kan nei a, a hmun tur kha lo ruat sak la, chaw ei kha lo siam kep rawh “, a han ti zui a.
Clay-a chuan a rawn chhan letna chu a hre na a, Gail-i hming a han lamrik chuan a hriat rengna chu a rawn chawk tho va. Tum khat ama hmuna pal bante a lo phun laia nula hmeltha deuh mai rawn kal a hmuh kha a hre chhuak uaih uaih a, nula pawh chuan a rawn hmu ve a. Khami ni, ni sa tak mai hnuaia a hnungzanga thlan tuiin a a luan thlak zawih zawih laia a hmuh kha, a nula hmuh tawh zawng zawngah chuan a la hmeltha berin a hria a, amah chu rawn ti vawt sawng sawngin hian a in hria ani. A sam sei tak mai chu silk ang mai an ni a, a hnung lamah chuan sakawr luang ang mai hian a uai thlak tir a, a lo chu a zo vah mai bawk a, a vun chu ni in a em uk deuh hlek a, mahse, a mam than a, engmah ti hmelhemtu an awm reng reng lo a ni.
Chumi tum chuan a biak pawh an inbe miah lo va, a dik tak phei chuan chumi hnuah pawh chuan in biakna hun an nei ta reng reng lo va ni. Tin, an inbiak ngai pawh a ring lova, chutiang ang a nula hmeltha leh pian nalh chu a la hmu ngai lo va, engemaw kawng zawng tak chuan a lo be ta lo pawh kha thil tha zawk tak a lo niin alawm zawk mah a ni. Mahse, a mitthlaah te khan a cham reng a, zana a mutnaah chuan a nula hmuh ngaihtuahin a buai a, mahni a a khawhar thlak zia leh a chantawka a lungawi loh ziate pawh a rawn hre chhuak a, mutmu pawh a tuah that theih loh phah hial reng a ni. Mahse, hunte a lo liam zel a, a hriat rengna pawh chu a lo chuai telh telh a, a mitthlaah te pawh a lo phe ta a. Mahse, tunah chuan a hming a han hriat ve leh khan hmuh a chak thar leh ta thut a, mahse, a incheinate chu a mawl mang em em mai si a. Gail-i hre lo ang tak mai a lang tur chuan a rilru a ti mangang ta hle mai a ni.
In chhung a tang chuan a mit a han la sawn a, Norwood-a chuan ngun tak mai hian a lo en reng chu a hmu ta a. He pa mitkhur thuk tak mai thau tak leh a ranch-a nula tawllailira rawn tlan peltu nen khan an in anna awm reng reng a hmuchhuak zo lo a ni., mahse, hun kal zelte hian thil an rawn belh mawi zual zel a ni ang te a ti mai mai a.
Hetiang a a ngaihtuah kual vel lai tak hian a ni; Major Norwood-a chuan a rawn thawn phut ni, “ Rogan, thiantha angin kan la awm dun ngai reng reng lo va, tin, ka ngaihdan pawhin kan nin nih ngai pawh ka ring bawk lo va. A lan dan chuan ram hla tak kar dana awm ve ve angah ka in hria a, mahse, chutiang pawh chu lo ni ta reng reng se, kan pahniha inkarah hian kan hawihhawm dun ve ve thei lo tihna chu a ni em dawn em ni ? “ a han ti a,
Clay-a chuan “ Norwood, ka rawn tibuai ngai reng reng hlei nem che “, a lo ti a.
Major-a mitah chuan thinrimna a rawn lang a, mahse, Major Norwood-a hi pa ti thak mai leh pa fimkhur tak mai a ni a, a thil duh tawh chu neih ngei a tum thin, a neih theih dawn phawt chuan mi bawlhhlawh ber pawhin a engahmah an ngainat ngai loh Rogan-a te ang hmaah pawh hian a chapona paih bo pawh a huam thin a ni. Tunah chuan a han nui leh tan a,inchhung atangin Gail-i chuan a rawn ko ta a, rawn ko kher lo phei se la chuan engemaw chu a la sawi zawm ngei ang.
“ Chaw ei chu peih fel a ni ta e, Ka pa “, a rawn ti ta a.
Norwood-a chuan, “ Awle, a tha e, a tha e “, a han ti a. A kut chuan Clay-a leh Conway-a chu kal hmasa turin a han hui a.
Clay-a chu inchhung lianpui chhungah chuan a han luh chuan inchhung awmdan leh chei dante chu ropui a tiin a hneh hle a. Chu pindan chhung chu, ama in ang pahnih dah len theihna hial khawpa zau hi a ni a. Chu bakah duh tawka vah vel theihna pawh a la awm ang. Tukverhah chuan a dak chhuak a,tawp chin nei lo ang mai hian hnim hring dup mai chu a lo cham phei duai mai a, ama ram thlaler lung hmun leh thing hmun mai maite nena a han khaikhin chuan a maha ngaihthat lohna a neih ve chhunte pawh chu a a bo zo rum rum a.
Ty Conway-a chu a rawn kal phei zel a, a lukhum chu pindan pakhat lukhum dahnaah chuan a han khai a, Chutah kawmchar lampang bathlarah chuan a phei ta a.
Clay-a bulah chuan Norwood-a chu a rawn kal a, thian tha tawngkam tak hian, “ Kawmchar lampang pawnah sawn chaw kan ei thin a Rogan, chuta tang chuan ka ram hi chiang takin a lang thei deuh vek a, chaw ei pawh a ti tui thei viau thin a sin “, a han ti a.
Clay-a chuan a chhang lo va, Norwood-a hnung chu a zui ta zawk a, Conway-a lukhum tarna ah chuan a lukhum chu a han tar ve a, a lu thur chu a han huih mama a, a tawp zia pawh chu a hre chhuak a. Insil lo va hnathawk tura chhuak ang mai hian a in chan a. Lew Stubbin-a nena in sum dawn tawn tur ang mai hian a in hre bawk a ni.
Norwood-a chuan, “ Khatah khan thu rawh khai Rogan “, a han ti a. Ani dawhkan luah chuan a han thu a, dawhkan puanphah fai takte leh thirfian, thirkut, thleng tle hlarh mai te chuan a ti khawbaw zo vek a, a ti deuh huai mai a. Boruak rimte pawh a thiang hle a, savun leh vaivut rimte pawh a nam hauh lo a ni.
Choka atnga pen thawm ri a han hriat chuan Clay-a chu a han hawi chhuak a, mawi tak mai a nui hmel chu a hmuh hmasak ber a ni. Amah chu nula sang tawk tak, in khaithli thlarh mai hi a ni a, a chete chu a mawiin, a lu a zo vah mai a, a han pen velte pawh chu a z*ng haih mai a ni.
“ Hei hi Clay Rogan-a a nih hi Gail “, Norwood-a chuan a han hmelhriat tir a, Chutah, “ Chaw ei pahin i ti ti ang u “, a han tih zawm nghal a.
Gail-i chuan Clay-a chu a rawn en a, Clay-a mit leh a mit an han intawn takah chuan a hmaa awm ang khan engemaw ti riau hian a awm a, hmana an inhmuh hmasak ber kha a hrechhuak nghal zawk bawk a. Clay-a pawh chu a han ding chhuak nghal a, a lukhum phawh a han tum a, mahse, a lo khum tawh lo tih a han hrechhuak leh a, a samte chu a han huih mam ta thuak thuak zawk a. Gail-i chu a la ding reng a. Clay-a chuan enge a nih pawh a hriat chuang loh hi a han phuh chhuak nawk nawk a, Gail-i pawh chu mawi takin a lo nui ve mai a.
“ Nang ka hmu che hi ka lawm ngawt mai Mr,Rogan. Ka ei siamte pawh kha i duh zawng a nih ka beisei e“, aw thawp sat hian Gail-i chuan a han ti a.
Gail-in chawhmeh la khu hlat hlat chaw ei dawhkana a rawn dah lai chuan Clay-a chuan, “ A tui hmel khawp alawm “, tiin a lo chhang a.
Norwood-a chuan belthleng chu a han la phei a, a hna hnim vel a, “ Lalber tan pawn a ei tlak ang “, a han ti a. Amah leh amah chu a han insuah nghal a. Conway-a chuan a dawt leh a.
Gail-i chuan Clay-a awm nuam mang lo chu a lo hmuhin amah chuan Clay-a chu a va suah sak ta a. Gail-i pawh chu Clay-a sirah chuan thu ve nghalin chaw chu a ei ve ta nghal a. Mipa pathumte chu a chang changing a en leh zawk zawk thin a.
Norwood-a chuan a thusawi chhuah duh chu a khek rei thei lo hle mai. Chaw han lem pah chuan, “Rogan, i ram saw ka lei sak dawn che a ni ! “, a han ti chhuak hlawl mai a.
Clay-a chu a han dak chhuak a, a thirkut chu a ka zawn taka a lo dah lai hi a ni a, a mitah chuan mak tihna leh thinrimna a rawn lang nghal a, Gail-i chu Clay-a bula thu a nih avangin Clay-a mitmeng chu a lo hmu hman a, Gail-i chuan hepa hi hmaichhanah a lo la hmu chiang ngai lo va, dan mawi tak leh nem taka che thin mi a ni tih pawh a hai lo va, mahse, miin an duh duha an tihkawi thei mi chu a ni dawn hauh lo tih pawh rinhlelhna awm miah lovin a hre nghal mai a ni. A pa han dawr hlawl danah pawh chuan a ti thinrim ve deuh a, mahse, a lo inrawlh ve duh chuang ta lo va. A pa leh Clay-a hi an inkhin tawk chiah a lo rin leh beisei vang chauh a ni.
“ Tumahin ka ram hi min leisak lovang Norwood ! “, Clay-a chuan a han ti chhuak ve tawl mai a. A thleng chu a nawr tawlh a, a thirkut leh chemte chu a han hrufai a, chaw chu tui a tiin, ei belh leh pawh a la duh hle a, mahse, tun hun hi thil tihfel hun niin a hre ta zawk a. An lo lawm a, an inhriattir a, an lo hrai bawk a. Tunah chuan ran talh tur ang maia talh an tumna chu lo bei let ve turin a in peih ve a tul ta a ni.
“ Chu enge ni ta Rogan, i ram chu ka hnenah i hralh dawn lo a maw !? “Norwood-a chuan a han ti a.
“ Tuma hnenah ka hralh dawn lo a ni “, Clay-a chuan a lo tih leh tawl a.
Norwood-a chu a rum ngul ngul a, a thleng pawh chu a nawr kiang ve ta a. A hmui chu dawhkana hrukna puanah chuan a han hru fai a, “ Ka dawhkan kil chungin i ram chhete, engmah pawh ni hlei lo, bawng tan pawha sawi loh, vawk tan pawha eng atan maha hman tlak hleih loh vah chuan ka awm reng dawn i la ti ta fo a ni maw ? “ a han ti tan ta a.
Clay-a chuan a chal chu a han chuar a, Gail-i chu a han en a, Gail-i pawh chuan a chal a lo chuan ve nang a. Chumi lai chu a awmzia pawh a hre thiam lo va, mahse, engemaw zawng tak chuan Gail-i chuan a pa thusawi chu a zawmpui chiah lo a ni tih chu a hre thei nghal a ni. Norwood-a chu a han en leh a, Conway-a lah chuan a kiu nghah chhanin dawhkan chu a lo bawh a, a mitmeng leh hmelah chuan amah a rawn hmusit zia chu a ti lang bawk a.
“ Ka hrilh tawh che alawm Norwood, ka ram chu a lo tha vak lo pawh a ni thei e, ka ram aia tha pawh ka hmu fo tawh. Mahse, ka ramah hian theih tawpa hah aka lo thawh tawhna a ni a, chuvang chuan ka la awm reng dawn a ni “, a lo tih san leh hlauh a.
Norwood-a chuan thinrim hmai sen teuh chung hian, “ I riltam thi lo chauh a nih tawh hi, ka lo endik tir vek tawh a, Bank-ah pawh pawisa i nei lo va, i bawngte lah chu ruhkawl man an ni si a. Kum khat kum that loh kum rawn thleng se langin i ram i khar nghal a tul ang a, chuvang chuan i ram chu i chhuahsan a ngai tho tho vang. Tunah a man zah ka bithliah sak ang che ang a, helai ka dawhkan ngei, ka zar i rawn zo vena hmun ngeiah hian min hnial tur a ni lovang “, a han ti nghal thuai mai a.
Clay-a chuan a kutte chu a’n nuai vel a, a ding chhuak ta a.Gail-i chuan Clay-a chu insum hram hram mahse, thinrimnain a khat tih a han hriat chuan hlauhthawnnain a lo khat ve ta a.
Conway-a thung erawh chuan kut zungtang insuih hian ngawi rengin a lo thlir thung a.
Clay Rogan-a chuan, “ Ka han sawi nawn leh ang e Norwood, Ka ramah chuan ka la awm reng dawn a ni. I thil phalna chungchangah erawh chuan silai tin khum chunga heta rawn hruai luih hi ka nih avangin, i chungah hian engmah bat neiin ka inhre lo va ni “, a ti ta a.
Gail-i chu chutia Clay-a’n a han sawi chuan a lo phu zawk, Conway-a chu makti tak hian a va melh a.
Norwood-a pawh chu Conway-a lamah chuan a hawi nghal a, Conway-a chu a lo nui then thu a, a bu nghat a, “ Khuaa a va hlawhtlin em avang khan, a kekawr hak laite kha a tan a te lutuk ta ni hian a hria a nih ka ring a ni “ a lo tih khum a.
Gail-i, a zah vang chauh leh a la awm ve a vang chauh chuan Clay-a la ngawi hram hram a. Gail-i chuan ama tan engmah thil tha chu a rawn thlen dawn chuang lo na in amah han insawi chian ve chu pawimawh a ti hle a. Tin, Gail-i hian amah hi a lo hriatthiam ve palh hlauh takin, zan khawhar tak maite chu tuar a ziaawm deuh phah mahna tiin insawi ve chu tul a ti ve ta ni.
“ Doherty-a mi rawihte zinga pakhatin Rogan-a hi a ram hralh turin a lo ti a ni awm a, kan thenawmpa Rogan-a hian chu chu lo hnial a ni, engtin nge zawng anih ka hre hauh lo a, mahse engtih tihin emawni Rogan-a hian Eli Paxton-a chu mal beihah va chovin a that ta tlat mai zawk a ni “, a han ti leh a.
“ Paxton-a chu tunge maw a nih chiah le ? “ Norwood-a chuan thinrim zet hian a han zawt nawn leh a. Hetiang thu hi lo hre hmasa niselang chuan Rogan-a hi kawng dang daih pawhin tihdan a awm tur a ni a, mahse, Conway-a chuan a lo hrilh hmasa si lova, chuvang chuan a thinrim chu a zual a ni.
Conway-a chuan, “ Paxton-a hi an zinga silai chelek thiam pawl ber a ni a. Hela ramah hian Doherty-a rawn hruai luh a ni nghe nghe. Hmanni khan Paxton-a hian Rogan-a hi thah a lo tum a ni awm a, chu chu Rogan-a hian khuaah va umzuiin a va that ta mai a ni. A ngaihdan chuan a chapo pui hle niin ka hria a, chuvang chuan niin ka hria, tunah pawh a la hnial kalh ngam fo che ni “, tiin Norwood-a chu a han fuihpawrh pah a.
Norwood-a chuan Clay-a hmachhawn leh tur chuan a chair atang chuan a inher a. Gail-i’n a pa chu a thinrimna tih hniam hram hram a tum tih chu a lo hmu a, tunah tak chuan ama din hmun chiah pawh a hrechiang zo ta lo tih a hmu a, mahse, a pa mizia chu a hriat chian em avangin hemi thu hlaa a chetsualnaah hi chuan a tawlh kir dawn lo tawp tih a hmu pha reng a, engti kawng pawh nise a pa hi a thil tum tawh bansan mai mai mi a ni lo tih a hria a ni.
A tawp a tawpah chuan Major Norwood-a chuan a thinrimna chu a bengdai thei ta hram a. A chair-ah chuan hahdam hmel tak chuan a han thu leh a, zingni chhuakin a a chhun a ram zau tak leh cham put mai chu a han thlir leh rih a.
“ Awle, Rogan, min an nawr luih chung che pawha lo tang ngam ve mihring i ni tih ka hriat avangin ka lawm ngawt mai. Hei hian i ke ruh lam thleng pawhin ran vulhtu dik tak i ni tih a tilang chiang hle che a. I lakah hian thian nih zawk ka thlang ta mah mah a ni. Tlang takin ka han hrilh mai ang che, a hma chuan mi aa angah ka lo ngai mai thin che a, tunhma pawhin thil ka lo ti dik tawh lo thin a, chumi chu pha miah lo turin ka huaisen tawk a ni. Tunah pawh hian ka thil lo tihsual tawh chu ka pha miah lo va, nangmah ka lo ngaihdan che chu ka thlak nghal e. Mahse, i ram hi a tha vak lo ka tih erawh kha chu a la ngai reng a ni, a dik a ni lawm ni ? “ Norwood-a chuan a han ti leh dap dap a.
“ Kei a tan chuan a tha tawk e “ -tiin Clay-a chuan a lo chhang ve leh a.
Norwood-a chuan, “ A ni khawp mai, awle, a tha tawk pawh a ni thei e, mahse thil pakhat a awm a Rogan, Nizana khuaa i lo entir tawh ang khan, Doherty-a do tur chuan i huaisen em em a ni thei e, mahse, mithat tur a rawih chi mi tam tak a ruai tel a, i ram hi an duh mamawh em em bawk a, tunah phei chuan a che bawlhhlawh tulh tulh tawh a. Nangmah that tur che hian an lo kal thuai tawh ang Mister, tihluihna in i ram chu a hnenah an hralh luih tir che ang a, chutih huna lo awm mai mai tur leh thil lo thleng lo en mai mai turah chuan min lo ruatin mi lo beisei suh ang che “, a han ti zui leh ta a.
Clay-a chuan a dan hank an ak pah chuan, “ An rawn kal chuan inring sain min rawn hmu ang “, a lo ti ve leh hmiah mai a.
Norwood-a chu a awm hle hle thei ta mang lo va, chaw ei dawhkan chu a han chum dum mai a. Gail-i chu a lo phu zawk a, chaw ei thleng velte chu, chhuatah chuan a tla keh ang tih hlau in a lo hui khawm vat a, mahse, Norwood-a chuan a fanu chu a pawisa chuang lo. Clay-a bawk chu a han hmachhawn leh a.
“ Ka hrilh tawh che a ni lawmni mihring, i ram saw ka duh a ni. Hemi ram chhungah hian Doherty-a hian rel kawng a siam dawn lo reng reng a ni “, Norwood-a chuan a han ti leh khur khur a.

“ Keima ram a ni a Norwood, i lo mangan pui mai mai a ni. Chhan tha tak awm lovin ka tan i lo inthial rum satliah ve mai mai a ni “, Clay-a chuan a han ti ve sak a.
Ty Conway-a chu muangchang hian a rawn tho chhuak a, a kutte chu a kekawrah chuan a han tatfai te te a. Gail-i chuan Conway-a hmel atang chuan ani pawh a awm hle hle thei tawh bik lo a ni tih a hmu nghal a, Gail-i chuan Clay-a lam chu hawi leh in Clay-a chu a han en leh a, ralthuam pakhatmah a pai ve lo tih a hmuchhuakin a hre ta thut a.
Gail-i chuan hlauthawng aw tak mai hian, “ Ty, thil atthlak tak leh buru tak ngaihtuah lawk lovin tih tum miah suh. Mr Rogan-a hian dikna pawh a nei thei a sin. Tin….”, a la tihlai mek chuan, “ Hmeichhia, lo ngawi mai mai teh !! “ a pa Norwood-a chuan a rawn ti thawt a.
Norwood-a chu thinrim teuh hian a rawn ding chhuak leh a, Clay-a chu han en pah chuan, “ Mr, khutah khuan nangmah chauhvin i awm a, Doherty-a te chu nangmah chauhvin i hneh thei lo reng reng tih ka hrilh a che. An kaphlum mai dawn che a ni, a nih lohvek leh i tlanbo a nih loh pawhin, an hnenah i ram khu an hralh luihtir ang che. Kei erawh chuan i ram khu dollar sangthumin ka leisak ang che. I Ram saw ka ram chhungah ka hungtel nghal ang a, tichuan, keima chaknain Doherty-a leh a hote chu ka rek bet dawn a ni. Tichuan, pawisa chu la mai la, chuti anih siloh chuan damchhung atan i hmelma atan min siam a ni nghal mai “, a han ti fiak leh thak mai a.
Clay-a chuan ngun tak mai hian Norwood-a leh Conway-a chu a han en a, dawhkan bul atang chuan a han tawlh sawn a, a samte chu a han huih pawk pawk a, Gail-i lamah chuan a han hawi phei leh a, mitmeng dam thlap hian “ Chaw min eitir avangin ka lawm khawp mai ka pi, tui pawh a tuiin i siam thiam khawp mai “, a han ti a.
Gail-i chu nuih pawh a nui chhuak thei tawh lo va, tha taka han chhan let ve pawh chu a duh a, mahse,a pa thinrimna leh Conway-a, a pa laka a inpek hneh ziate chuan a ti mangangin a ti tawngchhuak zo lo zawk a ni.
Clay-a chuan han kal chhuah mai a tum lai chuan, Gail-i hlauhthawn ruk ang ngei mai chuan Conway-a chuan, “ Lo la ding lawk teh Rogan ! “ a han ti ta tuar mai a.
Clay-a chuan a lukhum dahna a thleng tep tawh a, a lukhum chu a han la thla a, Norwood-a kaihza vengtu, Norwood-a mi rin ber pa chu hmachhawn turin muangchangin a han inher a.
“ Enge ni Conway ? I hnenah pawh thil ka sawi chiang tawh a ni lawm ni. Ka ram ka hralh dawn lo va, ka awm reng dawn bawk a, tumahin min umchhuak mai mai lovang “ a han tin awn leh sak sak a.
Conway-a chuan rum deuh ngul ngul pah chuan, “ Keiman ka umchhuak dawn che a ni Mister !! Tun atang hian i bungraw lakkhawm nan nihnih chiah hun ka pe ang che. Chumi hnuah chuan i pawisa chu khuah kan rawn thawn ang che. I pawisa dawn zawha khuaa i la awm renge anih chuan, i la awm rengna chhan chu keima hnenah ngei hian i sawi fiah ngei ngei a tul bawk ang, “ tiin a han vau a.
Gail-i chu a lo thaw chhuak hawlh a, a pa chuan thinrim fe hian a lo melh a, “ Nula, he buaina ah hian lo inrawlh ve suh. Hei hi mipa hna leh buaina a ni a, i pindanah lo va kal la a tha zawk ang. A hmasa berah chuan hetah hian lo awm ve lo la tha zawk tur hi a nia “ a han ti ram hmak a.
Gail-i chu a pa thinrimna chuan a ti chi-ai hle mai a, chaw ei thleng vel pawh seng fel ta lo chuan a kal pah chuan Clay-a chu a han melh zawk a, tichuan a pindan lamah a kalsan ta nghal a.
Chutih lai chuan Rogan-a chuan lukhum chu a lo khum mek a,Gail-i pawh chu lo en vein pawnah chuan a chhuak ta nghal a.
Gail-i chuan a pindan atang chuan a pa ang thawm chu a la hre zui reng a, “ I hria em Rogan ? Nihnih kan ti a nih chu. I sakawrah chuang la, ka ram leh henglai ram leh chheh vel hi chhuahsan nghal vat ang che “ tiin a la vau zui khar khar a.
Gail-i chu a khumah chuan a han bawk a, thil kal tawh hnu chu a la hrereng a. Nizanah mai khan a pa chuan anmahni hnenah Rogan-a kha a vau va, midang hnen a ram hralhna lehkha pawh anni aia hmaa sign luih tir turin thu a lo pawtchat diam tawh a. Tichuan dan lo ang takin Rogan-a ram chu neih sak a lo tum ta a ni. Rogan-a hian tuma tihbuai lohva mahni a awm ve mai mai hi a duh a ni tih pawh a hria a. An inhnialnaah hian engti kawng zawng mahin Rogan-a hian tharum thawhin a nek ve lo reng reng a ni.
‘ Ty Conway-a, mi ngilnei lo leh tawrawt ber, gun fighter silai kah hrat khawkhengpa lah hian Rogan-a chu umbo a tum ta si a, chu pawh chu a pa hian a lo la rem tih puiin a lo la pawm tha bawk si. Gail-i mit atang chuan mittui a lo far zawih zawih a, hruk pawh a hru duh lo va. A pa chunga a rinna lo nghah tawh zawng zawng han kehh chhe ta vek mai turte chu tuar ahr a tiin hrehawm a ti ta em em mai a ni, hetianga hrehawm leh rilru keh chhiaa a awm hi a pian a hnu lama a vawi khat tawnna a ni.
‘ A lungchhia chu a insut a insut a, Clay-Rogan-a liam ta pawh chu a lo hmu reng a, khuma a bawk lai chu a han thu chhuak leh a, Rogan-a kal liam chu a thlir zui vawng vawng a, tanpui a chak teh lul nen engtin mahin a tanpui thei si lo va. Rogan-a nen chauh han awm a, tanpui a duh zia leh han hnem a duh zia te han hrlh a chak ngawih ngawih a ni. Lehlamah apa leh an mirawihte an tang a a lehlamah lah Doherty-a leh a hote, Chutah amah Rogan-a chuah chu a mal tan ta si, Rogan-a chu amah chauhvin atang bik lo, amah Gail-i chu alamah a tang a ni tih han hrilh thei tak se la aw a ti ngawih ngawih bawk a ni. A han inngaihtuah zel a, a tawpah chuan a insum thei ta hram a, a pa ang thawm pawh chu a la reh ta chuang lova, Conway-a pawh a pa fuih thinrim turin a la awm zel ngei a ring bawk a.
A pa-i’n a inneih ni ruat thuai tura a lo nawr fo hnu atang khan tunah hian thilpawimawh tak a lo hrechhuak ta a ni. Chiang tak mai leh dik takin a hria a ni. Chu chu, Ty Conway-a hi a pasal tur a ni awzawng lo mai tih hi a ni. Conway-a maw, Rogan-a chungchanga a rilru put dante leh chhan awm miahlo a a lo thinrim ve ringawtna te leh thil dang dang vang khan a lo ngainat ve na zawng zawngte kha a bo zo nghal hmiah a ni. A pa a biak leh hmasak ber hunah hemi chungchang thu hi fel taka hrilh ngei a tum a, a pasal neih tur chungchangah pawh a lo inrawlh ve na hi tih tawp sak nghal a duh ta zel bawk a ni. Ama duhdana nun a thlang ta ta zawk a, a tul hunah chuan a hmangaih tak chu pasalah pawh a la nei ang chu , chutianga a hmu ta lo anih leh pasal nei lova kumtluan ve mai pawh pawi a ti ta lo zawk ni.

BUNG – 6

Clay Rogan-a chuan a Ranch in lam pang chu muangchang hian a pan a, boruakte chu a thiang hlein khua erawh a la lum vak lo va. A rilruah chuan mahni induhna thar hi lo lutin a inhria a, a hmaah chuan buaina pawh a inmung mek a ni tih a hra bawk a, chu buaina pawh chu a do zo ngei dawn ni hian a inhriatna a nei tlat bawk a ni. Engtik hunah nge Doherty-a hian a rawn beih zui leh dawn tih chu a hre lo na a, mahse, rei a rawn rial vak chu a ring lo a ni. Chutiang a lo nih dawn chuan amah pawhin inven dante a lo ngaihtuah lawk a. A hmasain a in chu thuam that a lo tih ngheh vek a tul a, tukverhte khar vek a, kulh ang mai a siam a ngai dawn ta a ni. Tunah hian a rante zawn khawm duh viau mahse a ngaihsak lo rih a tul ta tlat a ni.
Lew Stubbin-a a han ngaihtuah chhuak a, tunhmaa bawng a ngeih velaia a lo chet dante kha a la hre reng a, Lew Stubbin-a tihdan ang khan ani pawh hian Major Norwood-a hnenah man to takin a ram hi lo hralh ve ta sela, buaina tawk lovin Stubbin-a ang maia engthawl tak leh duh duhna ah a vei thei mai dawn a ni. A duh leh nghakuai a chiah anga, a duh leh a ram vak ang a, a pawisa te chu a dah tha hliau thei dawn a ni.
Thlasik ral hnuah chuan ram tha zawk pawh a lei thei mai dawn a, tun aia nuamsa zawk hian a khawsa thei bawk dawn a ni. Mahse, chutianga a han ngaihtuah chung pawh chuan a rilru chhungril takah chuan a pa hnen atanga a lo rochun tawh mahni induh tawkna chu a la awm tlat a, mite’n an duh duh a an palest mai mai theih nih chu a tum tlat lo a ni. Mite’n an duh an ganga awmtir an rawn tum mai chu lo do let ve tumna nghet tak mai chu a rilruah a vawng tlat a. Apa kha hemi hmunah ngei hian a lo boral tawh a, apa-i’na a thlah chhawng zelte tana rochun zel tura a lo ruahman sa kha a ni a, tunah hian chu ngei chu Clay Rogan-a hian vawn ngheh tlat chu a tum ta zawk a ni.
A in atanga mel vel a hna ngaw kar atang chuan a lo chhuak a, a sakar chu a han ti ding a, a mit fim tak chuan a ding lampang ngaw kara phe zauh chu a han hmu a. Ngaw chhungah chuan a sakawr chu a pawt let leh ta vat a, silai a keng lo tih a han inhriat chuan a thinrim chu a han sa phat mai a, a rilru chuan Conway-a chu mawh chhiatin anchhia a han hlawh hlak a.
Tichuan a thlir chhuk ta reng ringawt a, nakinah chuan mi pakhat a awm chunga rifle lek, thing kara zawi te a kal chu a hmu leh ta a, enge maw a veh teh reng ti a chupa awmna thlang lampang a zuk en chhuk nak chuan, sakawr chungchuang rualkhat lehlampang atanga a ranch lam pan chhuk chu a hmu ta a, chutia a han hmuh tak thutah chuan a sakawr chungah chuan a thu mar ta awt a.
Clay-a chuan a sakawr chu ngaw atang chuan a tlan chhuah tir ta thuai a. A in atanga hmuh theih lohna hmun fai lai hi a va thleng a. Thli chu ama lam hawi zawng chuan a rawn thaw a, a thil hmuh pawh a tih harsat phah hle a, mi pakhat ngaw a hmuhna lampang pan chuan a kal leh ta a. A sakawr chu a han lawn san tir deuh hlek a, chupa chu a rawn lang ta a.
A han hmuh chian veleh Clay-a chuan a sakawr chu dinglam pangah a pawt kawi a, mahse chutia a tihlai chuan chupa chu fai laiah a rawn pen chhuak a, a kut a rawn vai a, Clay-a pawh chu a ding ta a, chupa chu a Lew Stubbin-a a nih a ring a, mahse tun thleng thlenga henglaia a la awm chu a ring chiah bawk si lo va, buaina a rawn thlen thut pawha tlan nghal mai thei turin a inring reng a.
Nakin deuhvah chuan chupa chu a rawn tlan chho va, Lew Stubbin-a ngei chu a lo ni a, a ban a rawn vai chho a, ngaw lampang chu a rawn kawk a. Clay-a hian Stubbin-a hi a rin em avangin lo nghak hranpa tawh lovin ngaw lamah chuan a tlan nghal a. Ngaw chhungah chuan Stubbin-a chu kein a rawn tlan thleng ve nghal deuh mai a, a rawn thaw huam huam a, Clay-a pawh chu a sakawr atangin a chhuk nghal a.
Stubbin-a chu a thawchham a han reh hnu chuan, “ Mi rual khat i hmunah an awm a, pasarih vel an ni awm e. An aa ta emaw tih mai turin an khek vak vak mai a, i in chu an hal kang zo vek tawh mister, engmah tih theih i nei tawh lo “, a han ti chhuak phawng mai a.
Clay-a chu a han kal chhuak deuh a, hmun fai lampang chu a han thlir chhuk a, chutia a en reng lai chuan mi pahnih siali kap chunga a in lampang bawh phei mek chu a zuk hmu a. A sakawr lampang chu a han pawn thut a, mahse, Stubbin-a chuan sakawr hnung lam a tang chuan a lo ti ding a, a lu chu a lo thing a, “ Ni lo Clay, mahni inthat tir mai mai zawng a tul lo ve, ka sakawr ke a bai si a, ka kahhlum a tul ta nghe nghe a, ka dam chhung zawnga ka thil tihah chuan n aka la tih ber a ni. Sakawr pakhat chauh kan nei tawh tihna a lo ni ta anih hi. Anni vethung chuan sakawr an la nei kim bik a, a hnu takah zuk kal pawh ni ila engmah kan zuk ti thei chuang lovang “ a han ti a.
Stubbin-a chuan Clay-a silai bawm ruak chu a han hmu thut a, “ Clay, kha i aa ta em ni, silai reng reng i pai loh !? “ a han ti a.
Clay-a chu a han phun hlak a, “ Norwood-a kaihza vengtupa Conway-a’n min rawn tlawh alawm maw le. Silaia tin chungin Major-a nen titi dun turin min hruai chhuak a, amah ang a hun remchang neih ve ka tan a phal lo a lawm mawle “, a han ti duh chauh va.
Stubbin-a chuan a hmaia thlantui luang zawih zawih chu a han hru fai a, lungchhiat hmel tak hian a lu chu a han thing nawk nawk a, “ A lo nih tak chu. Khung mi pasarih bei tur khu chuan rifle pakhat leh puakruk pakhat chauh kan nei a, hetiang hun angah hi chuan ka thiantha ber tan pawn ka beih sak dawn lo a ni “, a ti ta hmiah a.
Ruam atanga meikhu an han hmuh chuan Clay-a chu tlem a han kal sawn deuh a, Stubbin-a chuan ka sawi ang ngei kha a nih tak khu le. Engpawh nise tunah chuan a nih tur chu a ni zo tawh a, keini pawh kan inring tawn tur a ni “, a ti ta a.
Chutih lai tak chuan Clay-a pawh hian Stubbin-a chu a hua a, khawvela mi zawng zawng hi a haw vek mai niin ainhria a, Doherty-a chuan rawn hneh tain, a rawn hnawtchhuak ta ni ber hian a in hre bawk a. In ah chuan han kal tum ringawt mahse, in a nei tawh lo va, meivap mai chauh a lo ni tawh dawn a ni.
“ Inring tawn a “, Clay-a chuan a han ti chhuak hlawl a.
“ Ni ang chu maw le. Khilai kawng atang khian an lo chhuk a, sabengtung thluak pu tak ngial pawn an rawn kalna lamah bawk chuan an let leh ka ring a ni. Nikum thlasik lai khan, khiti lai puk pakhatah khian bu ka khuar tawh a, chu puk chu ke nuam zawka thluan theih nan ka ti lian a, Chutah chuan mi pahnih bawk dun ta se la, helai kawng chiang takin an hmu thei dawn a ni. Vawi sawmphnih vel lai pawh an kap hmanin a rinawm a. Chu chu tih i duh dawn lawm ni Clay, kei hi i bulah ka awm dawn bawk si a, an mahni hi zuk bei tur a zuk nawr chhuk ruak ruak tur chuan ka la naupang deuhvin ka la fimkhur deuh a ni “,a ti ta then a.
Clay-a chuan thinrim tak hian anchhia chu a han phuhchhuak leh thawt a, Stubbin-a rilru fim that zia chu a hmu a, “ Engtia hla nge ni ang i puk chu Lew ? “ tiin a han zawt a.
“ Thing hmun hi ke a kan kal tlang chhoh chuan minute sawm vel chu a duh ang. Khu lai hmunah khuan khung misualho khu chutiang hun vel tur chu an la huaibak ngeiin ka ring a ni, i in peih em? “ Stubbin-a chuan a han ti zui zat a.
Clay-a chuan hnialna a nei lo va, a sakawr chu a kai a, Stubbin-a rual chuan a kal ve ta a. Thing hmunah chuan an lawn sang chho zel a, khawthlang lama kawng peng te reuhte chu an zawh chho zel a, minute sawmpanga hnuah chuan puk chu an thleng ta a.
Stubbin-a chuan, “ I sakawr hi kan chhak deuhah khian han thlung la, i rawn kir hunah chuan i rawn bawkvak lut mai dawn a nia, puk chhung hi ka tilum ang e “,a ti a.
Clay-a pawh chuan a sakawr chu kai chhivin thing pahnih inkarah hian a thlung ta a. Puk chhungah chan a rawn vak lut ve a, puk chhung chu a chepin a rimtui vak lo hle a, mahse, Doherty-a hote an rawn thleng thuai dawn tih a hria a, thil dang a ngaihtuah zui duh ta lo va.
Stubbin-a chuan mak ti awm tak hian engemaw chen Clay-a chu a han en a, atawpah chuan “ Khuaah i kal tawh em ? “a han ti thut a.
Clay-a chuan, “ Kal tawh e “, a lo ti sam et a.
Stubbin-a chu a nui mai a, a chul chu kawng lampangah chuan a zuk chhak tlawrh a. An awmna puk atang chuan kawng chu alang chiang hle a, tupawh rawn chho se hmuh hmaih chi rual a ni lo.
Stubbin-a chuan, “ Tin, i lo kir leh maw, a tha e. I zuk kalna chhan chu i tih ngei ka ring ringawt a ?! “ a han ti a.
“ A thi tawh “, ti ringawtin Clay-a chuan a lo chhang leh a.
A lo beisei reng niawm tak hian Stubbin-a chu a bu nghat a, rei fe chu an han ngawi dun a, Chutah, Stubbin-a chuan, “ Clay, a reng rengah khulai ram chhete khu eng atan nge maw i tiha i duh reng reng na chhan le ? Rel kawng siam tum ho dan nan man man tawk takin Norwood-a hnenah i hralh theih ngei ka ring a ni “, a han ti chhuak phawng a.
“ Tukin zing khan Norwood-a chuan dollar sangthumin min dawn a sin “, Clay-a chuan a han ti a.
Stubbin-a chu a han faifuk raih a, “ Chutianga tam chuan maw !? Chutiang zah pawh chuan i phal ta chuang lo va maw ? “ a lo ti a.
Clay-a chuan tih tak hmel pu deuh hian, “ Keima ram a ni miau si alawm “, a han ti ta daih a.
Stubbin-a chuan a chil a han chhak that a, “ A ni khawp mai le, chutiang mi chu i nih ka ring reng a ni. I ta chu i ta a ni a, engpawh lo thleng se i ta a la ni zel dawn tihna a ni maw? “ a han ti leh zel a. Clay-a chuan chhang let loin a mit leh beng chuan mi rawn chho thawm a awm leh awm loh a ngaihven ta zawk a.
Stubbin-a chuan amah leh amah inhrilh ni awm tak hian a han phun chhuak sup a,“ Clay, i hria ang chu maw, Norwood-a hnena ka ram ka hralh lai khan, thil tha ber ka ti a ni ti a mahni thiam inchantir hram hram ka lo tum thin a, a man te a tha tawk bawk a, hun engemaw ti chhung chu nuam pawh ka ti hle. Hun awl tam tak leh duh duha mahni a chet theihna hun pawh ka nei a, mahse, tunah chuan engmah ka nei ta lo a ni. Tunah chiah hi chuan sakawr a mahni in lampang han pan a, kawngkhar han hawn a, ka in chhung han pen luh leh hi ka chak em em thin a ni. Engmah vak pawh ni lo mahse, Ka in, Keima in a ni tlat dawn si a ni. A ngai hian ka aa lo chauh a ni ta e, “ a han ti chhuak hlawl mai a.
Chutiang lam hawi zawnga a thianpa han tawng chhuak chu Clay-a chuan mak a ti hle a, engmah pawh sawi lo chuan a thianpa chu a en ta reng a, engmah sawi tur pawh a hre lo a ni. Nimahsela, Stubbin-a rilru ngaihdan leh lunglen thu a han hriat chuan engemaw ti zawng tak chuan a lawm hle a, he ngaihdan avang hian anni pahnih hi an inzawm nghet leh zual reng a ni.
Stubbin-a chuan a han sawi zawm zel a, “ Clay, chutiang chu a lo ni ta si a, tunah pawh hian ka tan chuan ramvah pawh hi a chakawm vak tawh lo va, nghakuai chiah lah hi thatchhe hna a ni bawk siin, thatchhia angina ka lo awm tawh a,thatchhia angina nuam pawh ka lo ti tawh thin a. Mahse, ka rilru chhungril takah hian engemaw thil kang a awm a, chu chu nitin hian ka hre thin, kumtin ka lo upa telh telh a, hmun nghet leh hmun tha, ka ta a ni tih theih ngei tur chu ka neih a tul a ni tih min hriattir thin a ni. Chuvang chuan tun hun hi heta thlasik ka hman hnuhnun berna tur pawh a ni mai thei a ni “, tiin lunglen hmel tak chuan a han ti leh a.

Clay-a chuan a kut chu Stubbin-a silau ngulah chuan a han tat nawk nawk a, a han hawi thla a, ngawi rengin a han in ngaihtuah vang vang a, chumi hnu chuan rawtna ang reng a han siam ta a, “ Norwood-a leh Doherty-a te nena kan buaina hi dam aka tihfel theih phawt chuan, ka in leh hmun hi din that leh ka tum a, Chutah chuan mi pakhat ka mamawh ngwi dawn bawk a, nang hi ka hmun leh ram veng thei tura min dopuitu i nih avangin i damchhung atan hmun a awm dawn a ni, “ a ti ta a.
Stubbin-a chuan hnial tumin a han ang zuau a, mahse, Clay-a chuan Stubbin-a mit atanga chakna chu a hmu reng a, a han sawi zawm leh nghal a, “ Chutiang chu thil awmdan tur a ni a, mi pahnih tan chuan hmun a zau tawk a, hnathawh tur kan thawh zawh hunah chuan duh leh kan vak chhuak ang a, kan va thatchhe tal vel mai mai anga a ni mai alawm “, a han ti zui leh a.
Stubbin-a chuan Clay-a dar chu a han beng thak thak a, Chutah hmun tha zawk lamah chuan a bawkvak phei ta a. Kawng zawnah chuan siali chu a han tin a, “ Khung mulukawlhho khuan Kan hmun an halral zo va, tunah chuan ka awm mai mai dawn bik lo reng reng “, a han ti chhuak ta a.
Clay-a chu a lo nui a, a hahdam ta huai a, chutihlai tak chuan sakawr rawn tlan chho ri a hre ta phut a, a inseh ruh leh tan ta a.
“ Thianpa, he lamah hian an rawn chho tawh a nia “, Stubbin-a chuan a han ti a. A rifle chuan a han tinzawn nghal a, Clay-a pawh chuan an rawn chhohna lam chu a tin ran a. Sakawr rawn tlan chho ri pawh a hnai tial tial a, an bul hnai chu a rawn thleng ta a.
Art Curry-a chu Clay-a silai hmawr zawnah chuan a rawn lang ta a, a sakawr darah chuan a rawn beng zawt zawt a, chak tak hian a rawn tlan chho a.
“ Nang, khu khu i chan “ Stubbin-a chuan a han ti sap a, chu veleh Clay-a chuan a han kap nghal thuai a, a silaimu chuan Art Curry-a chu a zuk fuh siahin, a sakawr atang chuan a let thla nghal tawp a, a lu chuan thingzar hniam deuh a awm chu a han vaw dawt a, a ke chu a van vawr suau va, kawngah chuan a zangthal zawng hian a tla thla thlawr mai a, a hnungzang ruh a sawhtliak a ni.
“ Kei ve tawh “ tih pah chuan Stubbin-a chuan a silai chu vawi hnih a han hmet puak nghal a, silaimu hmasa zawk chuan sakawr chungchuang pakhat, inmet fai lo zel mai, Art Curry-a ruang hel tum lai mek chu a deng dawt mai a, chupa awm chu a kaw duai mai a, a na tuar thawm chu a sakawr hram ri aim ah pawn a ring zawk a ni. Stubbin-a silaimu pahnihna pawh chuan sakawr chunga chuang a pathumna nghawng chu a zuk verh kaw hawk bawk a.
Tin, sakawr chungchuang pahnihte pawh chu silai phawi chhuak sain an rawn tlan chho ve a,an bul hnai vel chu an rawn enkual ruai a, Clay-a chuan Clay-a chuan a silai chuan a han tin leh a han hmet puak a, a han nawn leh sak bawk a, mahse, a mu hnih chuan a thelh ta ve ve a, Stubbin-a chuan a silaimu chu a lo thun veleh mek a, mahse, chutihlai tak chuan Clay-a kah thelh khan midang sakawr chu a su ta chawrh mai a. Chupa sakawr chu a ding uaih a, a chunga chuang pa chu a vawrh thla ta thuai mai a. Chupa chu patawi deuh, thau tak hi a ni a, a rawn tho leh thuai a, hnungtawlh chungin silai chu a rawn hmet puak ve ta a.
Clay-a hnungzang chu silaimu chuan a rawn thawi sa zawk mai a, amah rawn kaptu chu a kah thelh pa kha a ni a, a thinrim hle a, a vawi thum kahna ah chuan amah rawn kap tupa lu-ah tak chuan a fuh ta siah a. Lew Stubbin-a pawh chuan a panga na chu a han kap thal leh thuai a.
Clay-a chuan, “ Lew, mi pasarih an ni i ti a ni lawm ni kha ? “ a han ti a.
Stubbin-a chuan, “ Pasarih an nih kha Clay, sava thlawk lai pawh chhiar thei ka ni a, heng misualho hi chu ka chhiar sual tawp lovang, midang pahnihte kha chu an tlan kir leh ta a ni ang “, a lo ti ve nghal a.
Clay-a chuan, “ Doherty-a leh Elison-a “ a han ti sap a.
Thawklehkhatah aw chher chhuai hian, “ Rogan, hemi avang hian thi ang tluk i ni e, i hria em mister ? “ a rawn ti a.
Clay-a chuan tu aw nge anih a hre thei mai lo va, Elison-a aw chu a hria a, chuti a anih chuan Doherty-a aw a ni ngei ang.
Stubbin-a chuan, “ Clay, ngaihsak lo mai teh, duh leh lo in hampuar thlantla vel mai mai ang hmiang “, a lo ti hlak a. Puk pawn lamah chuan han tawlh chhuah a tum a, mahse, Clay-a chuan a lo dawm bet thuai a, a lu a han thin khum a, “ Anmahni chu rawn kal zawk rawh se “, tiin Stubbin-a chu a han hrilh a.
“ Clay, tuna min rawn betu kha chu a rawn kal lo reng reng ang, a aw a hlauhna nasa tak tel kha i hre na nge ? Tunah hian umzui ila, pahnih leh pahnih kan ni mai alawm “, Stubbin-a chuan a lo ti then a.
Clay-a’n rilru han siam fel a tum lai tak chuan Doherty-a bawk chuan, “ Tih leh hunah chuan Rogan, i ril kha i ram chhe zetah hian ka zam darh nuai tawh ang, tumah hian min do zo chuang lovang. Nang ang mihring bawlhhlawh leu uih kha chuan min sukiang zo chuang lovang “, a rawn ti leh tun tun a.
Stubbin-a chuan nui sak chung hian, “ Chu a aw chu a hlauh aw em chu, a lo kal tawh teuh lo mai Clay “, a lo ti leh a.
Rogan-a chu puk kawngka lamah chuan a han tawlh phei a, thing bul pakhat hnungah chuan a va thu a, mahse, chuta tang pawh chuan kawngkawi chauh lo chu a zuk hmu chuang lo va, a lo ruak huai a.
Aw dang pakhat a rawn ri chhuak leh a, chu aw chu a thum zawk a, a vin zawk bawk a, anchhia a han phuh chhuak mawlh mawlh a, Clay-a chuan chu aw chu Elison-a aw a ni tih a hre mai a.
“ Rogan, ka that ngei dawn che a ni, engtik niah emaw chuan ka la that ngei ngei dawn che a ni “, a rawn ti khur khur mai a.
Thawk leh khatah sakawr tlan thawm chu a ri ta thut a, Doherty-a leh Elison-a chu an tlan ta a ni tih Clay-a chuan a hre mai a. Tichuan a han ding chhuak a, ama in haltute pahnih la dam chhunte chu chak taka khaw lam pana an tlan chu a han hmu a. A hnungah chuan Lew Stubbin-a chu nui deuh thu chung hian a rawn ding a, an mithahte chu phum turin an puahchah tah a.
Stubbin-a chuan, “ Clay, hetiang ang huna ka tel ve lai thin te kha a rei hle tawh a. Norwood-a’n ka ram min rawn dawn lai khan ka hlau tih chu i tawh ang a, mi um chhuah a tum zia pawh a tilang chiang em em a, mi’n um chhuak turin mi pawh a ngah tawk a, an inring reng a, an ti thei ngei bawk ang. Chuta tang chuan pumpui na tuar thinrim reng ang mai hian ka awm ta mai a ni “, a han ti charh charh a.
Clay-a chuan a thianpa chu a han en a, a han nuih a, hlawhtling inti awm fahran hian an pahnih chuan an han ding dun a, tum khatna zawng an hneh ta ngei mai le. An mi thahte silai chu an han khawm a, thingbuk hnuaiah chuan an dahkhawm a. Clay-a chuan Curry-a silai chu a la thar vang leh a ngul a sei avangin amah man atan chuan a la a
An mi thahte phumna tur an han laih zawh chuan an han phum fel a, mulukhawlh leh sa ruang ei chi te’na an hai chhuah mai loh nan lung chuan an han chilh hnan leh a. Stubbin-a chuan an mi thahte sakawr pahnih chu a va man a, pakhat zawk chungah chuan a han chuang nghal a.
“ Clay, i in kang chu zuk hmuh i duh em ? “ Stubbin-a chuan a han ti ta a.
Clay-a chuan a lu a han bu nghat a, hma a hruai ta nghal a. Doherty-a leh Elison-a khan khaw lam an la pan zel ang em tih chu an hre chiang ngam lo na a, fimkhur takin in kang awmna chu an pan chhuk ta tho va. An han thlen chuan in chu a lo la alh zuai zuai a, bang pakhat chu a lo tlu sawp tawh a, buh in pawh a lo kang ral zo lek lek tawhin, a lo la khu luih luih a, ding takin van lam pangah chuan a khu chho luih luih a, a vela thingpal hungnate chu an lo phawi sak vek a, lei ah chuan a lo tlusawp neih nuaih bawk a.
Stubbin-a chuan, “ A rim chauh anih hi maw an lo hnutchhiah che le, helai hmunah hian kang kawi nget ngut leh kang mut hem huam bak awm a awm tawh lo. Ka riahbukah chaw kan ei mai a ni ang chu “, a han ti chhuak hlawl a.
Clay-a mitmeng chu a sen rum mai a, huatna leh thinrimnain a khat a. Hela a ram hi a chhuahsan tur a ni lo, a cheng reng tur a ni tiin a rilru a han siam nawn leh a, a tul phawt chuan Doherty-a leh Elison-a chu a bei zui ngei tur a ni tih pawh a hre nghal bawk a. An pahniha a thah zawh hunah in chu din that leh a, tumah hal tir chu a tum tawh hauh lo a ni.
A sakawr chu a han pawt her a, a in kang zo tep tawh chu lungchhe takin a han thlir leh a, chumi hnu chuan Stubbin-a hmun chu an pan chho dun ta a.


BUNG - 7

Chumi thlasik ni chu a lo lum ta deuh a, boruak pawh a thiang nuam hle a. Stubbin-a hmunachuan an han awm hahdam a, nuam pawh an ti ngei mai. An awmna puk an han thlen chuan Clay-a chuan Stubbin-a hmel lo danglam ta em em chu a hmu ta thut a, enge a chhan a han zawh pawh chuan Stubbin-a chuan a chhang tha duh hauh lova, a tih ngaihna hre lo chuan Stubbin-a kawr chu chu a hlih luih sak ta a, Stubbin-a nak a hliam thuk ang reng tak mai chu a han hmu ta a, a han silfai saka, tha takin a tuam sak leh bawk a. Chu chu nihnih lai kal tawhah khan a ni.
Clay-a in an halsak atanga ni thum ni zingah chuan Stubbin-a pawh chu a lo ziaawm ta viau a, ngai a awh leh thelh tawh a ni.
“ Ka tih hmasak ber tur chu ka rante zawn khawm a ni. Lui kam zawla min rawn hmuhna ah khan hmun tha deuh mai a awm a, kar khat vel chhung chu chutah chuan him takin an awm theiin ka ring a ni “, tiin Clay-a chuan Stubbin-a chu a han hrilh a.
Stubbin-a chuan, “ Ni e, Clay, ran zawn khawm tur ila nei a, ti nghal vat i la a thain ka hria, kan mulukawlhte hmel pawh an rawn la lang ta rih lo va, an duh tawk leh kham tawk an hmu ta rih a ni ang e “, a lo ti ve bawk a.
“ Mahse, an rawn kir leh ngei ang “ Clay-a chuan a lo ti sap a.
“ Ni e, an rawn kal leh ngei ang, mahse, Doherty-a hian mi thar a rawih leh a ngai dawn a, lo ngai reng mah rawh, a hmaa mite ai kha chuan an rawn rothap zawk ngei ngei dawn a ni. Nihnih dang han chawl hahdam leh phawt i langin, chutah rawn kal leh tawh mahse engti kawng mahin pawi pawh ka ti lovang. Heng tlang ramte hi ka hre bel hle a, min rawn umzuite pawh han tum ta teh reng mahse, heng mulukawlh hote hi chu an vaiin an bo hlen phiar thei ang. Ti rawh le, ranrual ho chu i han zawng khawm teh ang hmiang “, a ti ta a.
Hemi ni hnih chhung hian Clay-a chuan Stubbin-a chu hnial chi a ni lo tih a hmuchhuak a. Amah chauhin ama hmunah kum tam tak a lo khawsa thin a nih avangin mite duh ang leh khawsak dan hi a lo la hre ve ngai lo va. Thil a tih dawn reng rengin a han ngaihtuah hmasa vang vang phawt a, Chutah a han buk tawn leh, thaa a hriat danin thu a ti thlu mai thin a ni.Heei hi tunhma atanga a thil tih dan phung chu a lo ni ve reng reng thin a ni.
Clay-a chuan a sakawr zin leh Stubbin-a sakawr zin chu a han phah zo va, Stubbin-a chu a bulah a rawn kal hnai a, Clay-a chuan, “ Inthen hrang ila a thain ka hria Lew. Nangin khawchhak lampang chang la, keiin lui ruam lampang ka hrut thung ang e, ka bawng chhinchhiahna kha i hria a ni lawmni kha ? “ a han ti a.
Stubbin-a chuan, “ Hria ang chu Clay, ka hrechiang khawp mai. Hmanni deuh la rei vak lovah khan, thla khat chhung chu eitur ka tlachham deuh a, talhtumin bawng pakhat chu ka han kuk thlu a, mahse, vanduaithlak takin i bawng a lo ni hlauh mai. Chumi ni kher kher chuan ka haw ngawt che a sin “, tiin a lo chhang zauh a.
Clay-a chuan a thianpa chu a han nuih suk ringawt a, awihpangah chuan hma a hruai chhuk ta a, ruam an zuk thlen hnu pawh chuan Stubbin-a chu kal ta mai lo chuan a bulah chuan a la awm ta reng a, Clay-a chuan zawt niawm tak hian a han melh zauh va.
Stubbin-a chuan, “ Silai pahnih hi silai pakhat ai chuan a tha zawk a, hmanhmawh tak taka thil tih tut tut hi a tul chuang lo bawk a, ranrual khalhkhawmna hunte chu kan la ngah alawm, tikhan kal hma han hruai zel phawt rawh mister “, a lo tihsan then a.
Ruamah chuan an lut zel a, lui chu an kan phei a, thing hmun lam chu pan phei zelin, bawng chu an han zawng kual a. Darkar khat chhung chuan bawng pakua an man hman a, heng an bawng hmuhte hi Paxton-a’n a rawn kah tuma a khalhkhawmte kha an niin Clay-a chuan ahria a. Lui kama phaizawlruam kil khatah chuan a khalh lut a, an chhuah theih loh nan thingtuaite chuan engtin tin emaw an hung. Ruah pawh chu sur leh mai tur ni hian a lang bawk a, mahse, a tu ve ve mahi an ngaihsak hman chuang lo va,
Awihpang zawng zawng chu an zawng chhuak vek a, nakinah chuan Norwood-a nen a an inrinna pal chu an thleng ta hlawl mai a. Bawng pakhat mah an hmuh belh si lova, Clay-a chuan mak ti leh mangang ru deuh tak chuan a ding ta chawt a.
“ Ka in bulah khan bawng sawmnga chu ka dah tawh a, phairuam kilah khan pakua kan hnutchhiah bawk a, chuti chung pawh chuan bawng sawmli an la kim lo a ni “, Clay-a chuan a han ti a.
Stubbin-a chuan, “ Bawng rualte chu an thlawk thei hlei nem “, a lo ti ve vat a.
Clay-a chuan Norwood-a ram chu a han thlir phei a, “ Hemi pal pela an kal dawn chuan khulai thlaler khuan a lo dang awm si a, mahse, khawiah emaw chuan an awm ngei tur a ni, “ a han ti leh ringawt a.
Stubbin-a chuan, “ Khawiah nge maw, i han thlir kual teh ang “, a ti ta a.
Clay-a chu a la ngawih reng avang chuan Stubbin-a chuan a han chhunzawm leh a, “ Mister, ran rual i nei a, mahse, i hmu zo lova, an thi a nih chuan an ruangte tal chu kan hmu ang chu, chuti a nih si loh chuan i thenawmte ramah tal hian an awm mial mai thei a sin. An ran rualte nen pawh an lo inpawlh a ni thei a, han en chian mai loh chu tih theih dang kan nei lo a ni. Khilai mel khat vela hlaah khian luhna tur gate a awm a, kan pan chhoh nghal a ngai a ni, “ bul hmuk hian a han ti a.
Stubbin-a kal hnu pawh chuan Clay-a chu a rilru a la siam fel lawk thei lova, a tawpah chuan Norwood-a leh Conway-a vauna te kha a han hrechhuak chungin Stubbin-a kalna lamah chuan a kal ve ta a.
Ni hnih chhung kha an lo chawl hahdam tawh bawk a, lo hrehawmin lo hlauhawm deuh mahse a pawiti chuang lo va. Stubbin-a sakawr darin a a lo nek hawn reng Gate-ah chuan Clay-a chu a kal tlang nghal a. Thinghmun awihpangah chuan kal tlang zelin an bawng hmuh hmasak ber bawng sawmnga te chu an han endik vel a, mahse, chung bawngte chu an zavai chuan Norwood-a chhinchhiahna pu vek an lo ni hlawm a.
Chhun chawfak hun dawnah thlan tla phungin ruam hi an va thleng leh a, Stubbin-a hmel pawh chu a lo dangin a chau hle tawh mai a, Chutah bawng rual dang sawmthum vel hi an va hmu leh ta a. Clay-a chuan chung bawngrualte chu va en chiang tur chuan a sakawr atangin a han chhuk a, chutah thinrim deuh mai hian “ Sawng bawng zinga pakhat sawn ka chhinchhiahna a pu a ni “, a han ti nghal hrawk a.
Stubbin-a hmelah chuan, “ Ran rualte hi palah an lawn liamin a thlawk ngai hlei nem Clay, “ a lo ti leh mai a.
“ An thlawk thei lo va, an lawn ngai bawk hek lo ! “, Clay-a chua rum tak a lo tih thum dat pah chuan a sakawrah chuan a lawnkai leh nghal a, chutah a han ngawi leh vang vang a, “ Lew, hemi chungchang thuah hi chuan nang nen hian inhnial ka duh lova, kei maha kutah a in nghat a ni, heng ka bawngte hi ruk chhuah an ni a, Chuvangin keima hna liau liauvah ka dah a ni “, a han ti chhuak hlawl a.
“ Kei pawn ka hna liau liauvah ka dah a ni “ Stubbin-a chuan a lo ti ve ngat a. Mahse, Clay-a chu a tumna chuan a nghet a, tih danglam thei reng reng a ni lo.
“ I taksa te hi a la chak tawk lovin, i hliam pawh duh angina a la dam chiang bawk si lova, heta tang hian kan awmna kha hla tak a ni tawh a. Chuvangin tunah hian nang chu lo va hawng ta mai zawk la, nakinah ka rawn um phak leh mai ang che “, tiin Stubbin-a chu a han hrillh a.
Stubbin-a chuan, “ Chu, nangmah chauhvin i kal dawn tihna em ni ? “, ngaihtuah tih hriat tak hian a han ti a. Amah tak pawh chuan a chauh zia chu a in hre reng a, sakawr atanga chhuk a han thut hahdam vang vangte pawh chu a rilruk rum rum a. Mahse a han hnial chhun zawm leh a, “ Ka han zawt nawn leh teh ang che mister, nangmah mai a kal chu i tum tak take m ni ? “, a han ti leh hram a.
“ Keimaha ka kal a ngai tlat a ni Lew, nang pawhin chu chu i hria alawm “, Clay-a chuan a han ti leh mauh mai a.
Clay-a aw rawn chhuak chu a hlauhawm kher mai, Stubbin-a hian Clay-a hi a la hrechiang chiah lo nge, a hlauhthawnpui a ni. Clay-a mitmenga thinrimna thuk tak a han hmuh chuan amah chu a tangkai tawk dawn lo a ni tih a inhre ta a.
A tawpah chuan Stubbin-a chuan a sakawr chu pawt herin, “ A nih leh chaw ei tur ka lo buatsaih zawk ang e “, tiin a tlan liam san ta a.
Clay-a chu Stubbin-a kal liam hnu pawh chuan che lovin a la ding ta reng a. Chutah a sakawr chu kheng kalin Norwood-a Ranch hnaihah chuan a kal ta a. Ngun taka Norwood-a tual zawl vel en pah reng chuan a sakawr chu a kal tir zel a, chutah Ranch piah lam zawlah chuan Norwood-a hote’n bawng chhinchhiahna lo siamin an lo buai ruai a.
Clay-a chuan a sakawr chu a kheng tlan a, Norwood-a Ranch atanga pal hungna hla ber lam chu a pan chhuk ta a. A sakawr atanga chhukin palah chuan a lut ta a, pal hung chhunga bawng lo awmte chu an tlan darh hak a, hemi hung chhung ah hian a aia te zawk in a lo inhung leh a, chutah chuan mi pali an lo awm a. Chung hung chhung hrang hrangah chuan a pawl pawl hian an lo inthen a, bawng rualte chu an lo chhinchhiah zel a, an chhinchhiah zawhte chu ram lamah an chhuah nghal zel bawk a.
Clay-a chu chung bawng lo chhinchhiahtute ho chuan an hmu ve lo va, chutih chhung chuan bawng rualte chu a han bel chiangin a han kal kual vel a, minit nga chhung chuan a bawng ngei mai sawm leh pakhat zet mai chu a hmu ta mai a.
Clay-a chu a thinrim ta tak zet mai, a mit ngeiin a bawng an rukte chu a hmu ta si a. Tichuan a ranrualte chu an ru ngei a ni tih fiahna tha tak a hmuh hnu chuan a sakawr lam chu a pan leh ta a. A sakawr chungah chuan a han lawn a, a han hawi kual leh te te a, chutah Conway-a’n a lam a rawn pan lai chu a hmu ta a. Tin,Conway-a puakruk rawn phawi chhuak pawh chu a hmu nghal a.
Conway-a chu a rawn kal zel a, Clay-a hmaah chuan a rawn ding ta a. Tichuan midang hnathawk ve ho pawh chuan Clay-a chu an rawn hmu ve nghal bawk a, an hnathawh lai chu chawlhsanin an han ding khawm a,Clay-a lam chu an rawn hawi ta thap a.
“ Rogan, hetah enge i rawn tih ? He lai hmun leh henglai ram hi chhuahsan rawh ka ti che a ni lawm ni? “, Conway-a chuan thinrim hmaisen puakkeh tep hian a han ti chhuak thawt a.
Tunhmaa hun kal tawh zawng zawng ai khan tun tum ang reng reng hian Clay-a rilru hi ala fimin a la thlamuang ngai lo. A rawn kalna lam chu muangchang hian a han kawk a, chutah dam thlap bawk hian, “ Ka bawng rualte hi rawn la turin ka rawn kal a ni Conway, helai hmunah hian ka rawn hmu a ni“, a han ti a.
Ty Conway-a chuan hung chhung lam chu a han thlir phei a, Clay-a a han en leh chuan a thinrim a la paih lo, a hmai chu a la dur khup bawk a, a hmui chu a han pet ruh a, “Ranrual khalkhawm changte chuan rante chu an inpawlh ve chawk alawm Rogan “, a han ti hmak a.
“ Ni love, bawng rual sawmli pui pui chu ni love Mister, henglai ramah hian tumahin mi bawng an kawl rei ngai lova, tin, an awmna an hriat phei chuan a neitute hrilh lovin an awm ngai lo a ni. Nihnih kalta khan henglai ramah hian ka awm a, chumi aia rei daih chu ka bawng rualte hi hetah hian an awm tawh a ni “, a ti ve ta nghat a.
“ Nimina rawn kal chauh an ni “ Conway-a chuan a la ti lui talh a.
Clay-a chuan a lu a han thing a, “ Sawta hnung lampanga vur zingah sawn an hnu hmaa; a rei lo berah pawh ni li lai a kal tawh ngei ang tih hriat ngawih ngawih mai loh chu hnuhma thar dang reng reng a awm lo a ni. Chuvang chuan ka bawng rualte hi inru a ni nang leh Norwood-a te hian “, a han ti ta sak sak mai a.Chuveleh Conway-a chuan a pistol cheng chu a han kau rap a. Clay-a pawh chuan silaimu dawng thut thei mai tur chuan a in puahchah ve nghal ta a.
Chutihlai tak chuan hung chhung atang hian aw a lo chhuak a, “ Conway, Rogan-a kha a dik a ni. I silai kha han hmetpuak vaih teh. Dan lo anga tualthat hulhual i ni mai “ tih chu a rawn ri chhuak ta a.
Conway-a chu a sakawr chung atang chuan a inher zawk a, amah rawn en thuptute chu a han en kual a, tumah amah tantu hmel awm reng reng a hmu lo va, ring tak leh teng fe hian, “ Tunge kha thu rawn sawi chhuak tu kha ? In zinga tu ber nge rawn sawitu kha ? “ a han ti teng chhuai a.
Hung chhunga ding khawm ho zinga a hmasa bera ding sam sent her thawr sat ha lampang hi a rawn pen chhuaka, “ Keima rawn sawi chhuah a nih kha Conway. Helai hmuna kan ran kawl dan chungchangah hian keimah chauh ni lo, kan zavai hian kan hrethiam loin mak kan ti a ni. Midangte ram buaina chungchang chu engahmah kan ngai hran lo, mahse, ranrual rutute zingah chuan kan tel dawn lo a ni. Sawng bawngte saw Rogan-a bawngte an ni a, nang ngei pawhin i hria a, chuvang chuan tunah hian chhuah nghal vat la kan duh a ni ! “, a rawn ti chang khal mai a.
Conway-a hmai chu a rawn sen chhuak leh awp awp a, a pistol chu chupa rawn tawng chhuaktu lamah chuan a han tih phei a, thinrim zet hian anchhia a han phuh chhuak zui thawt thawt a, chutihlai chuan midang pakhat hi a rawn tawng chhuak veleh a.
“ Cassidy-a tanpui tur hi kan thahnem teh mai a nia Conway, hmun dangah lo va insawifel ta u la, tin, va hmanhmawh bawk rawh u, chuuti anih loh chuan keini ho chu kan vaiin kan kal chhuak dawn a ni “ a rawn ti ve ta hmiah mai a.
Clay-a chuan, “ Anih leh, Norwood-a hmu turin ka kal zawk ang e “, a han ti a.
Conway-a chuan a sakawr chu Clay Rogan-a bulah chuan a kheng kal nghal a, a han thaw huam huam a, Rogan-a hmusitna aw leh a hnuaia thawkte ngei thusawi chuan a ti thinrim zual a, mahse, Clay-a chu duh aiin a va hnaih mah mah a ni, “ Hemi Ranch ka enkawl chhung hi chuan khawiah mah i kal lovang Rogan, sawng mi aa rual ho pawh saw an chhuak hek lovang “, a ti ta ngut mai a.
Conway-a’n a silaia a tin kual vel chhung chuan Clay-a chuan remmchang a hmu fuh ta hlauh mai a, a khup chu a han san thut a, Conway-a pistol ken lai chu a per ta lawng lawng mai a. A kut veilam chuan rang lutuk mai leh theihpatawp hian a han hnek ta bur mai a, Conway-a chu a sakawr a tang chuan a tla thum ta dawp mai a, a tlakthlak pah chuan Rogan-a chu anchhia a la lawh hram pek a.
Rogan-a chuan a puakruk chu a phawi a, a sakawr atang chuan muangchang hian a chhuk ve ta a. Conway-a chu a khup dinglam hian a lo thingthi a, a silai chu hmanhmawh tak hian a han zawng vel ruai a, fit tlemte ah hian a va hmu a, lak tum chuan a va bawh phei nghal ruak a, Rogan-a silai chu vawikhat a han puak dawt a, Conway-a banrek bul chiaha vaivut chu a va verh khu sawt mai a, Conway-a chuan a kut chu a la kir rang leh kher mai, Clay-a en chhoh pah chuan a han rum ngul ngul a.
Clay-a chuan muang ban chat hian, “ I ke khan ding chhuak rawh le Mister “, a han ti a.
Midang hnathawkho te chu an rawn tlan phei nghal hum hum mai a, pal dung zui zawng chuan an ding ta hlawm a, chungho chu Conway-a chuan a han en kual a, chutah Rogan-a lam hawi lehin, then sung chung leh zawi sap hian, “ He mi i thiltih avang hian ka that ngei ngei dawn che a ni Rogan ! “ a han ti a.
Clay-a chu a sakawr lamah chuan a han tawlh hnung a, a sakawr chu a nam kiang a, muangchangin a puakruk chu a bawmah chuan a han khung a, Rogan-a che vel chu Conway-a chuan a lo hrethiam lo hle mai a, a ngiahna hre lovin a lo ding reng a. Clay-a, a silai a bawma a khung fel zawh chuan a gun- belt chu a han phelh a, palah chuan a bang ta a.
A han inher a, Conway-a chu a hmachhawn ta chheu mai a. Conway-a chu a lo buai rilru hle mai a, Clay-a bawk chuan aw dam thlap hian, “ Conway, i nghawng hi pawh sei sak zawk che a thain ka hria, a pawh pawh engtikah emaw chuan ka la pawh sei sak ngei ang che, mahse, tunah rih chuan mimal thu hlaah ba han rulh ve hlek che ka duh a ni “, a han ti dam leh riai a.
Conway-a chuan chutianga Rogan-a han ti chu rin ngaihna pawh a lo hre lo zawk a, a mak ti chu a meng bial kaw kaw a, ringhlel deuh chung hian, “ Chu, kuttuma min sawisak i tum a maw ! Teh chai che chuan “, lawm hmel tak hian a han ti then thu a.
“ Ni teh reng e Conway, ka sawisa dawn chiang che a ni, ka ba ka rul dawn che “, mahni inring tawk tih hriat reng hian Clay-a chuan a lo chhang a.
Conway-a chu rei lote chhung chu rilru mumal lo deuh hian a han tawi hret a, chutah a kut veilam chu vai pahin a zuan ta thut mai a. A hnek chu a na khawp mai, Clay-a chuan lo dan pah zel chuan hnung lamah a tawlh phei phah ta a. Conway-a chuan Clay-a chu sawisak a chin phar hrep chak tih hriat fahran hian a nui ta vur vur a. Nuam ti tak hian, “ Mister, vaivut hian a hnawh hlum thleng che hian ka eitir dawn che a ni, “ a han ti a.Clay-a chuan a chhang ve le, kutum lianpui maiina a rawn bei leh tur chu a lo inralring a ni. Conway-a chu a rawn thawk phei leh ta ngei mai a, mahse tun tum chu Clay-a chu a sir lam a lo pen phei zauh va,Conway-a chuan a rawn hnek thelh ta a.
Chutia Conway-a a rawn hnaih veleh chuan Clay-a kut dinglam chuan a hmaiah tak mai chuan a lo hnek sak ta bur mai a, thisen chu a rawn chhuak nghal puat puat a. Conway-a chuan thisen a khabe a luangthla zawih zawih chu a hre thei a, Conway-a chuan thinrim zet hian a han bawk zui leh a, hei tak hi Clay-a lo tum reng chu a ni. Amah aiin Conway-a chu a lian zawk si a, tih thinrim hmasak a, a fimkhurnate hloh tir a a tum a ni. Conway-a chu a hnaih chilh vaih chuan a lo sawisa hrep dawn tih a hria a, chuvang chuan hnaihchilh a duh lo va, a kal sawn zel a, a remchan veleh a hmaiah chuan a lo hnek leh pawp thin a.
Conway-a hmai chu thi chuan a bual nasa tawh kher mai, Clay-a chuan a kut veilam bawk chuan Conway-a rawn hawi let leh lai tak chu a nghawngah tak a lo hnek sak leh a, Conway-a chu thaw hrawih hrawih pahinin hnung lamah chuan a leng phei dawrh a. Tun tum hi chuan Conway-a chuan a rawn bawh zui ta lo va, thi hlir hian a khat vek tawh mai a, a hmelah chuan hneh ngei tura a lo inrinna chu a bo ta a. Conway-a chuan a hmai a thisente chu a han hui puat puat a, chil chu a han chhak thawt thawt a. A sira lo thlir tute chu a han melh kual a, an hmelah chuan amah an tan loh zia leh an lawm loh zia chu a hmu nghal bawk a.
Clay-a chuan, “ I duh hun hunah i bang thei ang Conway, tichuan kan Norwood-a hmu turin kan kal dawn a nia “ a han ti a.
Conway-a chuan tur deuh mai hian Clay-a chu a han melh a, a hmai chu a han nuai leh a, Clay-a lam chu a pan phei leh ta chhut chhut a. A kut chu vai tawh lovin sang deuh vah chuan a han lek chho va,a thaw huam huam bawk a, Clay-a chuan hei hi an inbeih tawpna ber a ni tih a hre nghal mai a, a ni pawh chu a chau hle tawh mai a, a dar dinglama Conway-a rawn hnekna khan a dar a silaimu hliam na kha a rawn tawk fuh a, thi a lo chhuak tuam tuam a.
Clay-an a va pan phei lai chuan Conway-a rawn kal phei ve mek chu a ding chawt a, Clay-a taksa chu ngun tak hian a han en a, a mitah chuan lawman a rawn lang chhuak a, Conway-a chuan rum ngul ngul chung hian, “ Tunah chuan ka sawp dawn che a ni Mister, ka sawisa hlum dawn che a ni, “, a lo ti chhur chhur a. Clay-a dar na lam takah chuan a lo hnek bur mai a. Clay-a na ti lutuk chu a petek dawrh mai a, Conway-a chuan tunah chuan hneh ngei dawnin a inhre ta a, a ban chu han vai kual lehin Clay-a darna lamah bawk chuan hnek leh nghek a han tum a, a han vai fua a, mahse Clay-a chu rang takin a lo insiam rem vat a.
Clay-a pawh chuan fimkhur duh tawh bik lovin Conway-a chu a bawh zui ta thut mai a, chutia a va bawh tak thutah chuan Conway-a lo inring lo lai chu a va nangching ta a. Clay-a chuan a hnek ta siah siah mai a, hnek lah chu a hnek fuh kher em bawk a, dim baksak lo chuan a hnek zui ta awrh awrh mai a. Conway-a rawn hnek let ve pawh chu a pawisa duh tawh bik lo. Conway-a chu pal hungna thleng chuan a tawlh kir ta a. Chuta mi lo dingte chuan Clay-a hnek dal lo tawk tur chiah chuan an lo tawlh sawn a. Sam sent her thawr Cassidy-a chuan Clay-a chu lo fuihin, “ Sawisa hrep rawh Rogan, a tih hrehawm em che avang khan hremhmunah nawr lut nghal law law rawh “, a lo ti a.
Conway-a chuan chu aw chu a lo hria a, chu thu rawn sawitu Cassidy-a chu hmuh tumin a lu chu a han her a, chutia a lu a her lai tak chuan Clay-a chuan a khabe-ah tak mai chuan a rawn dawm leh siah mai a, mahse, Conway-a chu a la tlu mai bik lova.
Chutih lai tak chuan ring taka au thawm rawn ri hi an hre ta a, “ Tawp rawh u, nangni pahnih kha tawp nghal rawh u “, a rawn ti chul mai a. Clay-a chuan chu aw chu a hre nghal mai a. Anmahni lam panin Major Norwood-a chu a rawn tlan a, Gail-i pawh chu a hnungah pawnfen chawi chhing meuhvin a rawn tlan ve hlawk hlawk a.
Clay-a chuan Norwood-a rawn kal lai chu engahmah a lo ngai duh lo va,a beih ngai chuan Conway-a chu a bei zui ngat ngat zel a. Conway-a chu pal dung zawng chuan a tawlh zel a, Clay-a kut changte chu a pilh pheng phung tawh mai a, an thi tuam tuam a, an vung tan tawh ti tih leh nghal a, mahse a pawisa duh chuang lo. Norwood-a ang thawm chu a hria a, mahse atawp rak thleng beih a tum ruh tlat a, a tawp san duh chuang lo a ni.
Norwood-a chu fit sawmhnih emaw lek a hlaah a awm tawh a, tawp turin a rawn au leh chul a. Chutih lai chuan Clay-a chuan beihpui a thlak leh ta a, Conway-a kawr awm thi hniang hnuangah chuan manin, a kut ding lampang chuan a han hnek leh nghek mai a, a ri no chawk a, Conway-a chu a ka a ang hlui a, thi a chhuak ta puat puat a. Clay-a chuan a kuttum chu a han hum ruh leh a, Conway-a hmai pherh vek tawh chu a han en a, Conway-a mitmeng chu a kal rulh rulh a, a pual tan ta mai a, a lu chu a thle buk a, mahse, Clay-a chuan a la dawm bet lui zel a, atawpah chuan leiah chuan a paih thla ta thlawrh a. Conway-a chu Norwood-a ke bulah chuan nikhaw hre lovin a thal ta hual a.
Norwood-a pawh chu a ding chawt a, Conway-a lei a thal reng chu a en ta reng mai a. Mak tiin a tih ngaihna hre lo chu a thinrim em em mai a, amah Norwood-a pawh chu hetih hun lai tak hian nikhua a hre ve lo tep a ni.
Gail-i pawh chu rawn kal hnai vein, Conway-a hmai thiin a a bawh khah tlat chu a thlir a,a nih tak tak a ring thei lo va, a lu chu a han thing ringawt a, tichuan leh lam a hawi a, a hmai chu a hup ta a.Chutah rawn hawi let lehin Clay-a chu a han en ve leh thung a, Claya lo ding che luk luk leh a kawr awm atanga thisen rawn val chhuak chu a hmu nghal a, Clay-a chu mit tla lo lekin a en ta reng a.
Norwood-a chu a rawn tawng chhuak ta a, “ Awle, Rogan, hnunglamah khan lo tawlh kiang rawh. He i thil tih man hi ka pe ngei dawn che a ni tih inring ringawt mai rawh Mister, ka thiltih theihna zawng zawng ka hmang ang a, a theih ang a na ka tuar tir ve dawn che a ni, “ thinrim aw khur deuh dar dar hian a rawn ti ta a.
Clay-a chuan a chhang lo va, thawk a han la vak a, a thaw khan lak zawng chuan a dar dinglam chu a rawn chhuak zawk a, a malpui na pawh chuan a rawn tur tan ut ut bawk a, mahse, a sakawr chungah chuan a lawnkai theih hram a inring a, tuna a duhdan tak chuan thlawh bosan vek mai chu a duh ber a ni. Che hlek lovin Conway-a chu a en reng a, engtia rei nge a en pawh a hre lo va, mahse a tawpah chuan mi kal thawm leh Norwood-a tawng lung lung chuan a ti harh ta zawk a.
“ Kha, nangniho kha, inzinga mi thenkhat khan Ty Conway-a hi rawn tanpui ula, tin, midangin Rogan-a hi min lo ven sak rawh u “ tiin Norwood-a chuan a hote chu thu a han pe a.
Chung a hnuaia thawkhote chu rawn kal hnaiin Cassidy-a chuan hma a rawn hruai a, chutak Cassidy-a chuan, “ Min lo ngaithla hmasa phawt la tha in ka hria “, Norwood-a hnenah chuan huaisen tak hian a rawn ti a.
Norwood-a chuan a mi chhawrteho chu a han en zawk a, chutah thinrim zet hian, “ Enge ka ngaihthlak tur chu Mister ? “ a lo ti chang al a.
Ty Conway-a tanpui a bawihsawm tur chuan tumah an kal lo tih a hmuh chuan a thinrimna chu a belhchhahin Rogan-a chu an hlau ta a nihte a ring ta rum rum a, Gail-i pawh chuan chutia Cassidy-an a rawn ti mai chu mak ti tak hian Clay-a a en na atang chuan a mit chu la sawnin Cassidy-a chu a en ve ta a.
Cassidy-a chuan, “ Major, i tana thil tha ber tur chu pal hung chhunga bawng rualte saw va endik hmasa phawt la. Sawtah sawn Rogan-a bawng thenkhatte i va hmu ang a, chung bawngte chu tuna buaina rawn chawk chhuaktute chu an ni “, tiin fiah fel tak hian a han ti a.
Norwood-a hmai chu a sen awp awp a, vin deuh hian, “ Heng bawng zingah hian pakhatmah Rogan-a bawng an awm ve lo, Rogan-a bawng pakhatmah a tel ve lo, i aa ta zawk em ni ? Ka ramah hian Rogan-a bawng ka kawl lo va, heta awm zawng zawng hi ka ta liau liau an ni a, an zavai hian ka ta an ni, “ a ti ta tlat mai a.
Cassidy-a chuan nur fe chung hian a lu a lo thing a, “ Conway-a hian Rogan-a bawngte hi Rogan-a ram atangin a khalh chhuak a, kan bawng rulate zingah khalh lut ve turin min ti a, kan zinga mi thenkhat chuan kan duh lo va, kan hnial a,mahse, thupek nei niin a insawi a, ngawi mai mai turin min khap bet zawk a ni “, a han ti leh a.
Cassidy-a chuan Norwood-a chu chang khal mai hian a en reng a. Norwood-a chuan amah pawh chu an ringhlel tih a hre ta nghal a. Norwood-a chuan ngaihtha lo tak chung hian, “ Keima thupek maw ? Eng thupek nge ni ngai ? “ a han ti tuarh a.
Cassidy-a bawk chuan, “ Conway-a hian i hnen atangin thu pek a la a, keini’n a hnen atang hian thupek chu kan lo dawng chhawng leh a. Conway-a sawi dan chuan nang hian Rogan-a ram leh a chhunga awm zawng zawng, a zavaiin Rogan-a hnen atangin i lei fai sak vek a ni tiin min hrilh a, tin, a thiltih pawh hi amah ngeiin a awmzia a hrechiang a ni tih a sawi zel bawk a. Mahse, kan zinga thenkhat chuan kan awih chiah lo va, Rogan-a, i in atanga a kal chhuak lai kan hmuh khan ram hralh zo hlim hmel a pu lo reng reng a. Chumi hnua nang leh Conway-a inhnial vak thawm kan han hre zui leh ta zel bawk si nen, chutah chuan thil awmdan chu i duh angina a kal ta lo a ni ang tih kan ring ta a. Chumi hnu rei lo teah Rogan-a hi a rawn lang leh ta bawk si a, sawti laiah sawn a bawngte a va hmuin Conway-a chu thil awmzia sawifiah turin a ti a, a bak chu hei nangma mit ngeiin i hmu zui ta vek a, chu chu thil awmdan chu a ni e “, a ti ta a.
Norwood-a hmel pawh chu a rawn danglam leh ta deuh a, Cassidy-a thusawi chu rin harsa a tiin, awih lo chungin a lu chu a han thing nawr nawr a. “ Chu, Rogan-a bawngte chu ka bawng zingah an awm ve a maw ? “ a han ti nawn leh a.
“ Sawmli vel chu an awm ang Major “ Cassidy-a chuan a lo ti a.
Norwood-a chu thinrim tak leh lunghnur tak chung chuan a han ang leh bawrh bawrh a, “ Conway-a hian pal leh lampang atangin Rogan-a bawngte hi a va khalh chhuak anih chu. Ka bawng leh Rogan-a bawngte hi anmahni mai chuan an in chawhpawlh hauh lovang, lak hran leh mai theihin a dah a ni ngei ang “, a han ti leh talh a.
Cassidy-a chuan, “ Conway-a chuan a thiltihte chu a hrechiang alawm “, a lo ti leh a.Chutih lai chuan Major-a chuan Conway-a nikhaw hre lo; lo la thal reng chu a lo en reng a.
“ Major, kan zinga a tam zawk hian, i tan hun engemaw ti chhung chu i hna kan lo thawk tawh a, i rinawm em avang hian kan zah em em bawk che a, tin, nuam kan tiin kan hlim hle bawk a ni. Mahse, tunah tak hi chuan engmah hriat i nei ve lo niin alang a, Conway-a hian ama duhthua thil a ti a ni tih min hrilh thei la a thain ka hre ngawt mai “, inphah hnuai chuang lo hian a han ti leh sak a.
Norwood-a chuan Cassidy-a awka a chona rawn ri chhuak chu a hai bik miah lo va, chungho chu han um darh phiar maite hi a duh rum rum mai a, tuma hnenah insawifiah pawh a tum hek lo. Mahse, a fanu Gail-in a rawn en reng ve tih chu a hmu a, Gail-i pawh chuan ama chhanna chu a hre ve duh tih a hmelah chuan a va hmu thei bawk a. Awki zawite hian, “ Conway-a hian, amaha ka rinna nghah zawng zawng chu min bum nan a lo hmang let ta zawk a nih hi. Amah ka rinna chu a phatsan a, chuvang chuan ka hmun atang hian paih chhuak nghal rawh u. Tin, helai hmunah hian amah hi kan duhin kan mamawh leh ngai tawh lovang tih hi chiang deuhvin hrilh nghal bawk ang che u ! “ a ti ta hmiah a.
“ Major, chu zawng chu kan hriat duh a ni e “, Cassidy-a chuan a lo ti vat a.
Conway-a chu lei atanga tung chhuak tur chuan a han hrilh a, a sakawr a an hlan kai hnu chuan lehlam lehlam mi pakhat ve vein an dawm thu ta a.
Cassidy-a chuan Rogan-a lam chu a han hawi a, a lu a bu nghat a, “ Rogan, i bawng rualte chu Conway-a ruk vek an ni a, midang tumah kan inrawlh ve lo a ni. Mahse, vawiin ni atang hi chuan nang chu ni ila chuan ka fimkhur leh zual ngei ang. Ty Conway-a hi mi ngaidam mai mai ngai lo a ni “, tiin a han hrilh zui a.
Clay-a chuan a chhang lo a, a sakawr lam chu a pan a, pala a thlunna chu a han phelh a, harsa ti tak chung leh a hliamte chu na ti tak bawk chung chuan a sakawrah chuan a han lawn kai a, a sakawr lakamte chu a vuah tha mawlh mawlh a.
Chutih lai chuan Major Norwood-a chu dawih zawk hmel pu tak hian a hmai chu a dang zo vek mai a, a thinrimna pawh a khuahkhirh zo tawh lo a ni. Hung chhunga bawng chhinchhiahte chu endik tur chuan a kal ta a, Rogan-a bawngte pawh an awm ngei a ring nghet ta a ni.
“ Rogan-a bawng rualte kha a hmunah va khalh luh sak nghal rawh u. A duhna hmun takah dahsak bawk ang che u “, a han ti tuarh tuarh a.
Chutia Clay-a a sakawr chunga harsa ti taka a lawnkai tur chu Gail-in a han hmuh chuan a lo ip chawih a, va tanpui a, a hliamte chu va ensak a va biak a chak hle mai a, mahse, chu chu thil tihchi a ni si lo.Mahse, a pa thil sawi a han hriat takah chuan a thaw ta huai a.
Norwood-a chuan pal chu a rawn lawn liam a, Gail-i bulah chuan rawn kalin Gail-i hmel chu a han en a, a hmuh duh fo thin ang ngeiin Gail-i mitmengte pawh chu a lo nivin a lo de sar sar a, a lang zaidam em em bawk a. A pa a han nuih zawng chuan a pa tan hmangaihna tak tak tel hian a pa chuan a hmu a, a thinlung chhunga thinrimna te pawh chu reh hial hian a hria a ni.
Norwood-a chu Rogan-a hnenah chuan a va kal a, “ Rogan, keimah ang mihring tan hi chuan tun ang hunah kher a thusawi tur hi chu a vang hle a ni. Conway-a hian amaha ka rinna nghah zawng zawng chu a lo phatsan ta si a, mahse, a zavai chuan a chungah hian thiam lohna zawng zawng chu ka burbun bik hauh lo, hei hi ka ram a ni a, keima tan Conway-a hi thawk ve mai a ni bawk a, chuvang chuan Conway-a thiam lohna ah hian mawh ka phur tel ve a ni. I chunga buaina leh manganna ka rawn thlen zawng zawngte kha eng ti kawng zawng emaw chuan keima’n ka rul leh vek ang che, “, a han ti chhuak ta hlawl a.
“ Chutiang thilte chu lo ngaihtuah duh reng reng suh Norwood “, Clay-a chuan la thinrim teuh chung chuan a lo chhang let a.
A sakawr chu a pawt her a, kal mai chu a han tum a, chu chuan Norwood-a thinrimna chu a rawn chawk tho leh a, aw vin fe hian, “ Rogan, tun maiah khan i hmaah ka inphah hniam a, rawn lang tawh suh ang che ka tih hnu pawhin tunah hian ka hmunah i rawn thawk lut leh a. Hemi thu ah hi chuan dikna leh theihna pawh i nei tih ka hria, tin, kan inkara inhriatthiam lohna awm thenkhatte pawh theihnghilh vek mai ka lo rilruk tawh a, mahse, a vai chuan a ni vek lo tawp mai Mister. Conway-a i sawisak vang ringawt hi chuan tunhmaa ka lo ngaihdan bak che aia tha zawk chuan ka ngai chuang tawp lo che tih i hriat a tul ang “, a ti leh ta sawk sawk a.
Clay-a chuan ngawi rengin Norwood-a chu a han en vang vang a, chutah, “ Kan inkarah hian thil a la danglam chuang hlei nem Norwood, ka hmunah rawn kal lo la, kei pawh i hmunah ka rawn kal lovang, chu chu tawk rawh se “ a ti ta hmiah a.
Clay-a chuan a sakawr chu a kaltir hma chuan Gail-i lam chu a han hawi a, a mit leh Gail-i mit chu an intawng ta siah a, Gail-i mitmengah chuan amah a rawn ngaihtuah nasat zia chu a hmu a, a pa ai mahin amah chu a ngaihsakin leh a lamah chuan a tang zawk mah hian a hria a ni, mahse, Gail-i chu atan chuan han neih phak a ni si lo, a rilru ah chuan hmun chang sang ber mahse,thil theih lohah a ngai a ni. Gail-i lamah chuan chibai bukin a han kun a, Gail-in a a lo la en ngawih ngawih chu inher sanin a sakawr chu a kal tir ta a.

BUNG - 8

Norwood-a hmun atanga an hnawhchhuah zawh hnu khan Conway-a chu Rogan-a in hmun chhak lawka thing hmun zingah chuan a hrh chhuak hlawl a, a han in enchian chuan a sakawr chungah a lo la thu reng hi a lo ni a. A han inngaihtuah chiang a, thil lo thlen dan zawng zawng chu a hrechhuak uar uar a, a taksa khawi lai mai pawh chu a na thum vek mai a. A sakawr atang chuan a han hawi kual a Rogan-a in leh buh dahna in kang chhiate lleh pal tlu sawp neih nuaihte chu a hmu ta a.
Rei fe chhung chu che lovin a sakawr chungah chuan a thu a, nihnih chhunga thil lo thleng zawng zawngte kha a han ngaihtuah a, atan chuan henglai ramah hian hmun a awm ta lo tih a han hre chhuak phut mai a, mi zawng zawngin tun atang chuan rukru ah an ngai tawh dawn a ni, atan chuan henglai hmunah hian a tuitla tawh dawn lo reng reng tih a hrechiang hle bawk.
A hmai chu a han chul a, a lo vung bawk lek luk a, a lo kak pem nasa hle mai tih a han hriat chuan a thinrim chu a han ang hlawih hlawih a. Clay Rogan-a chu va zawn chhuah leh a a dula suanmu va kah luh nghek mai chu a chak hle a. Rogan-a hmun atanga lui kal pawhna chu a la hre reng a, tichuan chumi kawng chu zawh chhukin lui chu a va thleng a, a han insilfaia, a hmaite chu a thip vin tuk mai a, mahse, amah chu a harh phah sawt ta thung a.
Tunah chuan a rilru a siam fel ta a, Doherty-a hnena va kal a, a hnuaia va thawh chuan Rogan-a chu dan ang thlapin a bei leh thei dawn a ni. Norwood-a chungah pawh phuba a la thei nghal bawk ang a, Sheriff Thurlow-a meuh pawhin chutih hunah chuan a khap thei tawh dawn lo a ni.
Conway-a chuan zan dar kuaah khua chu a va thleng a, Saloon-a han luh hmasaka whisky no hnihkhat han lem phawt chu a chak hle na a, mahse, a hmel a hem nasat avang chuan Saloon-a lut ngam ta lo chuan a hel ta zawk a. Doherty-a in chu a pan ding zel a, a kawt zawl a tlen chuan in atanga khawn var eng rawn chhuak chu a hmu a, a sakawr atanga chhukin a han thlung that e te a, tichuan kawngkhar lam chu a pan ta a. Kawngkhar chu kik a han tum zet a, mahse a kut vung leh lo pem nasat avang chuan kik ta lovin a benin a beng ta zawk a.
Kawngkhar chu a rawn inhawng a, Elison-a rawn dakchhuak chuan Conway-a chu a hmu ta a. Conway-a chuan, “ Tun tum chu min lo lawm khawp ang Elison “, a han ti nghal tawng a.
Elison-a chu a la ngawi ngul a, kawng pawh chu a kiang chuang lo va, Doherty-a nena khua an thlen hnu kha chuan Elison-a hian awm nawm hun a nei thei tawh lo va,a phu deuh zawk zawk reng mai a ni. Rogan-a va zawn chhuah a va kah pawp pawp mai chu a duh ber a ni. Mahse, Doherty-a chuan mi rawih belh lohva a va beih leh mai chuan tlawm zawk va nih leh a hlau tlat a, chuvang chuan va beih leh chu a duh rih lo a ni. Chutiang a Doherty-an a tih avang chuan Elison-a pawh chuan khuaa awm mai mai rih chu a remti ve ta rih a ni.
“ Engvangin nge kan lo lawm kher ang che Mister ? Nang i lo danglam ta te anih ngawt si loh chuan hetah hian engmah a la danglam chuang lo “, Elison-a chuan a lo ti a.
“ Ka danglam tawh alawm “.
“ Rawn hruai lut thuai rawh Burt “, inchhung atang chuan Doherty-a chuan aw vin zet hian a rawn ti ta a.
Elison-a chu hriat tham mang loh hian a han phun nung nung a, Conway-a chu kawng a han kian ta a. Conway-a chuan khawnvar enga Elison-a a rawn kal pelh lai tak chuan Elison-a chu a han faifuk raih a, Conway-a darah chuan a han man a, a lamah chuan a’n pawt her lawih a, Conway-a hmai vung lek luk chu makti tak leh ngun tak hian a han en sak a.
“ E khai, Mister, engin nge su ta che le ! ? “ Elison-a chuan a ti ta a.
Conway-a chuan a dar atang chuang Elison-a kut chu a han thing thla a, Doherty-a lo thutna lamah chuan a phei ta a. Doherty-a chuan ngun thluk tak hian a lo en vang vang a, Conway-a chuan Doherty-a dawhkan a whisky bur lo chhawp chu a la lawk a, a han khiat hmasa ta khawlh khawlh a, a ka chu sa hiar thak mai a, a hrawkah leh pumah chuan a lum thla ta raih raih a, chu chuan a hrawk chu a ti veng deuh huai a, mahni inrin tawkna pawh a nei leh tan ta deuh va.
Elison-a chuan, “ A nih leh han sawi tawh teh le Conway. Enge ni ta a, thil lo thleng a awm em ni ? “ a han ti ta a.
Conway-a chuan a hmain sawidan tur a lo riruat vek tawh avangin aw danglam map lo hian, “Norwood-a hote’n min beih rawn alawm maw le, Norwood-a mi chhawrte ho hnenah Rogan-a hian a bawng ru a khalh chhuakah min puh a, heng cowboy-ho hian Rogan-a hi an ring si a, thawklehkhatah min beihrawn ta thut mai a, chutah Norwood-a lahin chhuak nghal turin min ti ta bawk si alawm mawle “, tiin thiam takin a han sawi ta a.
Elison-a chuan tur deuhva lo melh chung hian, “ Rogan-a chuan a bawng i ru tih finfiahna tha tak a nei reng em ni Conway ? “, a lo ti leh khauh a.
Ty Conway-a chu rawn dak chhuakin Elison-a chu rum tawk hian a rawn en a, “ Ni e, Rogan-a chuan a fiahna chu a nei teh reng mai Elison ! A bawng sawmli lai ka ruk sak a ni”, a ti ta a.
Elison-a bawk chuan, “ Chu, nang pa indah sang, chapo leh inti chak a,in la milian bawng rutu ni bawk si tan chuan thil pakhat a tling pha ve lo maw Conway ? a han tih khum leh sak a.
Conway-a chu a sa ta phat mai a, mahse, chutih lai tak chuan Doherty-a chu a lo ding chhuak thuai a, “ Tunah zawng chung thilte chu engmah a ni a ni tawh lo va, sawi sawi pawh a tul tawh lo. Tun a thil tul zawk chu, engtin nge heng thil hi i tih tak zel ang tih hi a pawimawh tawh zawk a ni Conway “, a rawn ti ta a.
“ Rogan-a hi ka that dawn a ni “ , Conway-a chuan a lo ti hmiah a.
“ A nih leh Norwood-a pawh hi ? “ Doherty-a chuan a han ti leh a.
“ Norwood-a pawn ka kawng a lo dal ve phawt chuan ka that ve nghal ang Doherty. Henglai ramah hian ka awm tawh dawn lo va, mahse, engemaw chu ka hnutchhiah ve dawn a ni “, Conway-a chuan a han ti leh a.
Doherty-a chu a han nui a, Conway-a darah chuan a han beng thak thak a.“ Chutiang reng tur chu a ni Conway. I thusawi chu a dik khawp mai, ngun deuhva ka han ngaihtuah hian ka rilru pawh i hneh khawp mai. Mister, Rogan-a hi i bei ngam lo pawh a ni mai theia, mahse, chutiang mai maite chu eng hu-ah mah ngai suh ang che, zahthlak tham a tling lo. Tun thlenga a thiltih tawh chu Paxton-a a that tawh a, nang a sawisa…. “ a ti lai chuan Conway-a chuan thinrim tak hian, “ Tanpuitu a ngah em alawm “ a lo ti vin hlur a.
Doherty-a chuan Conway-a thusawi chu a awih miah lo nangin a sawi chhunzawm leh a, “ A sawisa hrep che a, keini pawh khaw lam pan a kan rawn hawng lai chu tuemaw ni nen min lo chang a,ka hote pali leh kan zinga lehkhabu enkawltu Curry-a an lo that a ani. Ka buaina chhan ber chu Rogan-a hi kan lo ring tenau in kan lo ngainep lutuk a ni tih hi a ni “, tiin a han sawi leh a.
Burt Elison-a chuan a mit chu Conway-a lak atangin vawikhatmah a la sawn lo va, Zu um chu Conwaya lamah chuan a han nawr phei a, a mit chuan in leh turin a han mitmei a. Chutih lai chuan Doherty-a chu inngaihtuah muk tak chung hian chhuatlaiah chuan a vei ngauh ngauh a, atawpah chuan a mitmengah lawman a rawn lang chhuak ta a.
“ Chu, Conway, tunah chuan Norwood-a nen chuan in inthen fel ta chiah a ni maw ? “, tiin Doherty-a chuan a han zawt leh a.
Conway-a chuan a hmuia whisky tuai fai pah chuan, “ Chutiang chu thil awmdan chu a ni alawm “, a lo ti a.
“ Anih leh tanpuina beiseiin ka hnenah i rawn kal em ni ? “.
“ Rawn tanpui ve thung zawk tur che u in ka rawn kal a ni “, then vur chuang hian Conway-a chuan a ti ta hlauh va.
Doherty-a chuan, “ A lo nih chu, a ni khawp mai “, a lo ti mai a.
Doherty-a chu a han vei khual leh ngauh ngauh a, an hmaa a rawn din leh chuan a thutak ta hle mai a, “ Hetiang hi a ni ka thil ngaihtuah chu Conway, Rogan-a hi a inla lian hle a ni, a inla lian mah mah a ni. Rogan-a hi hmun ualau-ah a rawn chhuakin a rawn inlar dawn miah lova, chuvang chuan he kan buaina hian hun rei tak a awh dawn a ni. Hei hi ka duhthusam a ni hauh lova, rel kawng siamlai ka nei a, chu rel kawng chu Rogan-a ramah kal tlang tir ngei ka duh bawk a ni. Tichuan, Rogan-a hi hmu ualau-ah kan thlem chhuak ang a, tichuan kan dahtha mai dawn a ni, chu hmun ualau a thlem chhuah dan chu kawng khat chiah a awm a ni. “ a han ti charh charh a.
Conway-a chuan ngun deuh hian a lo ngaithla a, Doherty-a chuan han sawi chhunzawm leh in, “Chumi kawngkhat chiah awm chhun chu i chanpual tur a ni Conway. Rogan-a hmunah chuan i va kal anga, Rogan-a chu i va cho chhuak tur a ni. Ka lo hriat dan chuan Rogan-a hi eng emawti kawng zawng chuan at huaina hi a nei a. A ni pawh chuan a ram chu a lo vengin tunge rawn kal tih chu a ngai chang reng dawn bawk a, hmun fai laia a rawn lan veleh kan lo kap thlu nghal mai dawn a ni. Chutianga kan tih zawh hnu chuan Norwood-a lak a buaina ah pawh chuan kan pui chhunzawm thei dawn che a ni. Chu chu i remti em Mister ? “, a han ti a.
Ty Conway-a chuan a ngaihna hre mang lo hian a hmui chu a han liak a, “ Rogan-a chu ramhnuaiah a biru daih alawm “, tiin a lo chhang a.
Doherty-a chuan, “ Nih pawh a ni ang, mahse, kan zawng chhuak dawn alawm. Ani ang mihring hi chu a in kang vel ching fel turin a lo kir leh ngei ang a,kan that nghal mai dawn a ni. Chumi zawhah chuan i duh leh ka hnenah i thawk chhunzawm ang a, anih loh vek leh i tlanbo nghal daih ang a, tha i tihdan dan a ni mai, anih loh pawhin i duh zawk zawk i thlang thei tho a ni “ tiin a han sawi leh a.
Conway-a chu a han ding chhuak a, a kut chu a kekawr bal takah chuan a han tat nawk nawk a, a zu in pawh khan a thawk ta a ni ang, “ Rogan-a kan man a, kan thah theih dawn phawt chuan ka remti e “, a ti ve ta a.
“ A tha, a tha lutuk Conway, chuti chu zanin chu heath hian riak ve nghal ang che. I chawl hahdam ang a, khuaah hian tumah inhmuh tirsuh ang che. I inhnuhtir vaih chuan Sheriff Thurlow-a hian eng boruak nge lo thleng ta tih a ngaihvenin hriat chakin a hnar a len ruai mai ang. Tin, doctor pawh i mamawh teh chiamin alang lova, han chawl hahdam rih phawt la, ngai i awh leh vat mai ang. Mahse, zing ni chhuah veleh a chhuak nghal mai thei turin lo inpeih sa diam ang che, “, tiin thu a han chah leh a.
Burt Elison-a chuan dawkan atang chuan a lukhum chu a han la a, a han khum a. Kawngkhar lamah chuan a kal ta a, a rawn hawi let leh a, Conway-a awmdan chu ngun tak hian a han thlir leh te te a, rei fe chhung chu ngawi rengin a han en a, a tawpah chuan, “ Rogan-a’n a sawisak lai che khan mi engzah nge tanpuitu a neih Conway ? “, a han ti leh hram a.
Conway-a hmai chu thinrimnain a rawn sen tun tun a. Chumi a hmuh chuan Elison-a chu a nui suk a, Conway-a rawn chhan let hma chuan a chhuahsan ta a.
Pawnah chuan Doherty-a chu a rawn chhuak ve vat a. Elison-a chuan zawite hian, “ Thil pakhat atan chiah kan chhawr thei ang Jobe “, a han ti a. Doherty-a chuan a mitko a lo san ak a.
“ Hmun fai lei leh hmun ualau lai deuvah Rogan-a ko chhuak tur chiahin a hmantlak ang. Hmun fai laia Rogan-a kan hmuh veleh mathei lovin kan that nghal ngei ngei tur a ni. A chhan chu ka rilru chhungril takah hian Conway-a hian Rogan-a beih hi a ngam hlawl lo a ni tih hriatna hi ka nei tlat a ni “, Elison-a chuan a han ti leh a.
Doherty-a chuan, “ I ngaihdan chu a dik ang. Ka lo ngaih ve dan chuan Rogan-a hi Norwood-a hnenah a va kal anga, a bawngte chu a va dilin, Norwood-a chuan chutianga bawng rukna a a tel ve loh thu leh a inrawlh ve loh avang chuan Conway-a hi a hnawtchhuak ta a ni phawt ang. Tin, a reng reng thuin Norwood-a hian bawng ruk lam chu a duhin ka ring hauh lo. Tichuan Rogan-a chuan Conway-a chu mal beihin a sawisa ta hrep a ni tih hi ka ring a ni “, a lo ti ve a.
Kawtthlerah chuan an kal phei dun ta zel a, Garter Saloon-a an luh dawn lai chuan Doherty-a chuan, “Conway-a hi kan duh anga kan chhawr hnu chuan engtin nge ti ila tha a i hriat Burt ? “, a han ti leh a.
Elison-a chuan “ A taksa rimchhe tak hi kan hnar hnuai atanga la bo vat turin kan hrilh mai ang chu “, a lo ti sam et a. Saloon kawngkhar chu su hawngin Elison-a chu a lut a, Doherty-a pawh chuan a gun- fighter rawihpa chu nui vur vur chung hian a zui lut ve ta a.
**************
Gail-i chuan chumi tlai lam zawng chuan a pa chu bathlar hnung lamah thuin a inngaihtuah nasa hle tih a hria a. Ruah a lo sur tan seng seng a. Norwood-a piah lawk bathlar thingphelte chu a rawn theh huh a.
“ Ka pa “, ti a Gail-i rawn kohna chu Norwood-a chuan hriain phur vak lo hian a rawn hawi chhuak a.
“ Pa,, enge lo thleng dawn ta ang le ?“, tiin Gail-i chuan a pa chu a han zawt ta chawt mai a, chair chu pawt hnaiin a pa bulah chuan a thu ve ta nghal bawk a.
Norwood-a chuan a lu chu a han thing a, “ Ka hre bik lo le Nula. Conway-a kha ka lo ring em em thin a, a hnenah khan ka rinna tam zawk ka nghat a, ka Rach hi ka enkawl tir a, chumi hna chu keimah ngeiin ka tih a lo tul ta si. Anih loh vek pawhin tu emaw tak ka rin ngam tak rawih ka mamawh ta a ni. Heti anih chuan tute nge maw ka rin ngam leh tak ang le ? “, a han ti chhuak ta phawng mai a.
Gail-i chu a lo ngawi reng a, mi an lo upat chuan an tan hnathawh hah hi a tha tawh lovin a lo harsa tawh tih a hria a. A pa tan chuan hun a lo thleng hnai ta tih pawh a hmuchiang ta hle a ni.
Gail-i chuan, “ Pa, awm hle hle mai ang, tunhma pawhin harsatnate chu kan lo tawk fo tawh alawm “, tiin a pa chu a han hnem a.
Norwood-a chuan a lu chu a lo bu leh nghat nghat a. “ Kan awm thei lovang ka tihna a ni hlei nem Nula. A bul atanga tan leh anga ka inhriat tlat avangin ka han sawi chhuak mai zawk a ni. A bul atanga han tan leh tur chuan tlin pawh ka tlin tawh kher lo pawh a ni mai thei reng a ni, “ a han ti chhuak nak a. Gail-i chu engmah sawi zawm lo chuan a han inngaihtuah a. Ruahsur hnuaia hnim hring dupte chu a han thlir kual a, hetia bathlara a pa nen tlailam hun an hmang dun thinte hi nuam a ti thei em em thin a ni.
“ Kha kan mihring Rogan-a kha, tu mihring in nge khati nek khan Ty-a hi a lo sawisa thei ang tih beisei phak bik reng reng ang le ? Amah Rogan-a ka han ngaihtuah ngawt pawh hian ka thau ah mi man tlat mai zu nia ! “, a han ti chhuak leh hlawl a.
Gail-i chuan engmah pawh sawi chuang lo chuan a pa chu a lo thlir reng a, khun taka darkar tlem te a inngaihtuah hnu phei kha chuan Rogan-a chunga a pa thinrimna chu nep deuh hian a hmu a. A pa-i’na a lo tih thin fo dan angin, mi reng reng mahni ke pahnih ngata lo ding thinte chu a pa hian a zah em em thin a ni tih a hria a. Mi ti mai mai leh mahni thiltih pawh ti zo lo va bansan a kal san mai mai ching mite chu a pa hian a ngai thei hlawl lo tih chu a hre reng bawk a. Chuvangin, a pa-ina Rogan-a chunga rin lohna a la neih em em zel hi tih kian sak tum a beih a hunin a hre ta a. Amah ngaihdan tak chuan Rogan-a hian tuma pawi a sawi lo va, mi tam tak erawh chuan Rogan-a pawi an sawi zawk thin niin a hria a ni.
“ Pa, engvangin nge maw Rogan-a chu i lungkham em em le ? “.
Norwood-a chuan a fanu chu a han hmachhawn te te a, “ Ka lungkham a maw Nula ? Mai mai a, Rogan-a hian min ti chi-aiin min ti buai awkawng lo a sin ! Chhan tha tak nei phei ila chuan a awmna atang khuan ka hnawtchhuak daih tawh ang chu, mahse, a fin em avangin engmah chhan hmuh turin a ti lang lo mai mai a ni zawk khu “, tiin a lo chhang a.
Gail-i pawh chuan a pa hmai rawn sen chhuak tawn tawn pawh chu pawisa lovin, “Engmah thil sual a ti hlei nem ka pa, han inngaihtuah nawn leh teh. Clay-a thil tih zawng zawngte kha ama dikna leh ama dikna venhim a ni mai a. Paxton-a khan thah a lo tum tawh a, tichuan khuaah a va kal a, a va cho va,a that ta mai a ni.
“ Dan ang tak leh dik takin a ti a ni ngei ang a, chuti ni lose lang chuan Sheriff Thurlow-a hi a rawn langin a rawn inrawlh daih tawh in a rinawm a ni. Cassidy-a chuan Clay-a ram thlanglam, awih pangah khuan thlan panga a awm tih a sawi a, mahse, tun thlengin Clay-a chu a la dam reng a, tin a la bei zui zel bawk a. Clay-a chuan a bawngte chu miin an ruk sak tih a han hriat chuan, kan hnen lamah rawn zawngin a hmu ta a, tichuan Ty Conwaya arawn chhuahchhalin sawi fiah turin a rawn phut ta a ni. A thiltih zawng zawng chu a dikin amah diknaah a ding a, a dikna a venghim bawk ani tih hi tumahin an hnial thei lovang “,a han ti ve ta siah siah mai a.
Chutia Gail-i thusawi lai chuan a pa Norwood-a chu a lo meng nur nasa mai a, “ Chu, Clay-a tiin i ko elaw Nula ? Vawikhat chiah a hnathawk lai i hmu tih loh kha chu amah hi i hre ngai lo emaw ka ti a sin“, a lo tih sak a.
Gail-i zak lutuk chu a sen chhuak awm awm a, lehlam a hawi ta ringawt a, chuti chung pawh chuan a thusawi lai chu a pa chuan a lo la enzui ta reng fo va.
“ Kan sabengtung pa chuan khan i thinlung a khawihin hmun a luah deuh a ni maw ? I rilru ah khan i lo vei deuhte a nih chuan theihnghilh hmanhmawh la a tha zawk ang. Mi vannei a ni a,mi ngaih ai daihin amah pawh a lo inveng thei a, mahse, mi aa luhlul a ni tlat a, heng bak hi chu amahin engti kawng mahin a dam khaw chhuak zo chuang lovang “, a ti ta hrep mai a.
Gail-i chuan a hmui a pet fan fan a, a lo kal thui lutuk em ni aw tiin engmah a sawi chhunzawm duh ta lo va.
Norwood-a chu a ding chhuak a, bathlar hungna chu a va vuan a, mahse ruah rawn sur chuan a rawn theh huh avangin a kir leh a, a fanu chu han hmachhawn lehin, “ A man ka pe emaw pe lo emaw a ram zawng ka neih sak tho tho dawn a ni. Atawp atawpah Doherty-a hian engtin emaw Rogan-a hi a la that dawn tho tho vang, tichuan, hetah ngei pawh hian buaina a rawn siam chhunzawm thei dawn a ni. Chuvangin nang chuang i thiltih theih ve zawng leh tihturte chu he in chhungkhur hi ngun taka lo enkawl leh ka nitin eiturte tui taka i lo buatsaih mai chauh hi a ni. Mi tu pawh henglai ram a mi duk dak lo ho hi chu lo ngaihven in i lo ngaihsak tur pawh a ni lo. Ngaihzawnna leh hmangaihna mawl mang takte kha i rilru-ah lo paih bo la, i suangtuahna atthlak takte kha lo paih bo vat zawk ang che “, Gail-i rilru hria ni awm tak chuan a ti ta a.
Gail-i chu a sa ve phat mai a, thinrim taka a pa hmachhawn pah chuan, “ Ka pa, Clay Rogan-a hi ka hmangaihin ka ngaina e tiin ka la sawi chhuak ngai reng reng lo va, thil awmdan kawhhmuh che a duh zawk vang che in ……….. “ a han ti hman chauh va.
A pa Norwood-a chuan, “ He inchhungah ngei hian Rogan-a i lo melh dante leh i lo nuih dante kha ka hmu vek a ni. Chumi hnu ah pawh bawng dahkhawmna huang chhungah khan Rogan-a i ngaihsak hmel leh mitmeng kha ka hmu tawh bawk a ni. Tun hnai lawka tang khan ka lo hriat danin kan inhnial dun a piang hian Rogan-a vang a ni deuh ta zel mai a, ahmel hmuh tih loh a hming ringawt pawh hian min ti luakchhuakin min ti khawsik rum rum a ni. Chuvangin bansan la, heta i nun nuam tak hi ngaihtuah zawk rawh “, a lo ti leh hmiah mai a. Norwood-a chu bathlar atang chuan a kal chhuak a, a chenna pindan chu kawngkhar chu pawt hawngin, a chhugah chuan a lut ta a.
“ Tunah khan khawiah nge kal i tum a, enge i tih dawn ka pa ? “, Gail-i chuan ngaihtha lo tak hian a pa chu a han au zui a.
“ Zu ka va in rui hnep dawn a ni. Nang kha chu i pindanah kalin lo va muhil daih rawh “, tiin a pa chuan a rawn chhang a.
Chutia a fanu a han hrilh hnu chuan pawhdawha whisky bur chu a han phawr chhuak a, dawhkanah chuan no pakhat a han hung tel a, thutthleng dup nuam deuhvah chuan a han thu hnawk a, a pheikhawk phelhin a nghawng suih a han phelh dul a, Rogan-a bawk chu a ankhum leh ta nghek nghek a.
Norwood-a chuan Rogan-a chu a nunkhaw ti nuam lotuah a puh vek a, Conway-a pawh a bang bik lo va, amah a lo phatsan avang chuan a anhla ah chuan a telh chho ve zel a, a zu no chu a han thli khat parh a.
Thutthleng atanga Major Norwood-a rawn thawh chhuah meuh chuan zanlai hi a lo ni thelh tawh a. Inchhungah chuan a pai phei uan uan a, engmah lo va hun a khawhral ta mai mai chuan a thin a rawn ti rim leh hle a. A rilru fim put thin leh fimkhurna zawng zawng pawh a paih bo ta vek a, tunah chuan a rilru a siam fel ta a. A lo nem lutuk thin niin a hria a, khua chu eng ang pawhin lo tlai tawh mahse, tuh darkar ah ngei hian Rogan-a nena an chungchang tih fel a hun niin a hre ta tlat a ni.
Rogan-a, mahni mai a inveng him zo lo tura a awm tur chu a ngai ngam ta bik lo va, Rogan-a chuan a ram a va dawn sakna chu lo hnial ta teh reng pawh ni se, ama ram thatna turin leh henglai ram thatna tur hian ama mi chhawr thenkhatte ngei chu Rogana bulah hnutchhiah a, Doherty-a lo beih pui tura hnutchhiah luih hram a tum ta zawk a ni.
A bathlarah chuan a pai chhuak ta hlawl mai a, intih harh tumin a lu chu a han thing vak vak a, bathlar hungna chu a han vuan a, ring takin zanlaiah chuan a han au chhuak ta a.
“ Cassidy, hetah hian lo kal teh ! “.
A au ri chu rangva inchung ruah sur rik seng sengna hnuaiah chuan a khawk chhuak rum rum a. Gail-i chuan a khum atang chuan a pa au thawm chu a han hria a, a khum atang chuan tho chhuak nghalin a thawmhnaw chu a han inbel sawk sawk a, a pindan kawngkhar chu a han hawng a, chutih lai chuan Cassity-a pawh chuan a pa kohna chu a lo chhang mek a.
“ Cassidy, kan nauteho kha sakawr zin phah nghal vat turin hrilh hlawm rawh, Rogan-a va tlawh turin kan kal chhuak nghal dawn a ni “ Norwood-a chuan a han ti a.
“ Tun ang hun zanlaiah hian maw !? A va tih awm loh ve, ruah a sur leh nghal si a, naktuk zing kan nghak thei mai lawm ni ? “ tiin Cassidy-a chuan a lo chhang a.
“ Thei lo, naktuk zing han nghahte chu sawi loh, tunah hian kan mihring bawlhhlawh pa kha hmu turin ka rui lung puam tawk chiah a ni. Khata tang khan min rawn hnial mai mai teh suh, mi paruk rawn hruai la, hetah hian rawn kal ang che u “, rui aw deuh hian a han ti leh a.
Gail-i chuan chutiang thu a lo hriat chuan a chal a chuar nang nang a, a pa’n hetiang rilru pu chunga Rogan-a hmu tura a kal chhuah vaih chuan tunhma aia nasa zawkin buaina a chhuak ngei dawn tih pawh a hria a, chuvang chuan a inrawlh ve a hun tawh niin a hre ta a. A pa chu amah leh amah mi aa anga a va insiam lohna turin lo dan beh a tlat a tum ta a ni.
Gail-i chu bathlar hnung lamah chuan a put phei ta a, sakawr in lampang pan chuan kawtzawt fai lai chu a kal tlang phei a, chutia a kal phei lai chuan an mi chhawrteho insiam thawm pawh chu a hre thei a. Rogan-a in va thleng hmasa tur chuan minute tlemte chauh a nei tih a inhre bawk a ni.
Sakawrin a a va thlen chuan a sakawr chu a zin a han phah sawk sawk a, sakawr in atang chuan hruai chhuakin Ranch in hnung lamah chuan a phei ta a. A sakawrah chuan zei tak leh in thazo tak hian a han per kai a, tichuan chak takin a tlan nghal a, ngaw chhung a thlen hnu chuan mi hmuh theih lohna tur hmunah chuan dingin, engtinnge a tih zel dawn tih pawh chu a inhrechiang thei rih lova, mahse, Rogan-a chu va hmuh a, biru tur ava hrilh lawk chu a tih tur ber niin a hre ta a.
Hetih lai hian Cassidy-a chuan phun nung nung chung hian mi panga a hruaiin Ranch in lam chu an pan mek a. Hetiang hun zanlai laia atthlak tak mai a kal chhuah hram a tumna va thulh tir theih hram a inrin avangin sakawr pawh an keng duh lo va ni.
Cassidy-a chuan Mojor-a chu pawn atang chuan a hank o va, mahse chhanna reng a hre ta lo va. Chutah bathlarah chuan a han lawn chho va, bathlar chhuatah chuan engemaw ni hi a han pal a, a petek phei dawrh mai a, a han enchiang vat a, a thil pal chu Major Norwood-a a lo ni a, engmah hre lovin chhuatah chuan a lo thal der mai a ni.
Cassidy-a chu a han kun a, ngun deuh maiin a han dap vel a, chutah tanpui turin midangho chu a han ko ta nghal a. Norwood-a chu pheikhawk pawh bun lovin leh nghawngawrh pawh awrh lovin a lo mu a, inchhungah chuan an han zawn lut ta a. Cassidy-a chuan muang chang hian a lu a thing nar nar a, “Zaninah chuan khawiah mah a kal chhuak hlek lovang tih ka chiang ta hle mai. Bobo, nang kawmawl va la vat rawh “, a han ti a.
Pawhdawh atang chuan kawmawl pakhat chu a rawn la chhuak a, chu chuan Norwood-a chu an khuh ta a. Chutia an hotupa ber engmah hre ta lo va mu chu Cassidy-a chuan a zuk nuih suk a, midangho chu pawna chhuak turin a kutin a han vai a. Kawng a han khar zawh chuan, “ Riahnaah kir leh ula, va mu leh tawh rawh u, kal chhuah kan tum kha thulh leh a ni ta e, kan kal chhuak leh lovang “, a han ti leh a.
Midangho chu lawmin an thaw huai a, rang takin an riahbuk lamah chuan an phei leh ta a. Chutiah lai chuan Cassidy-a rilru chu a buai deuh hle a. Gaili chu kaihthawh tur nge kaihthawh loh tur. A pa awm dan chu chu hrilh kher a ngai ang em ? A tawpah chuan Gail-i chu kaihthawh loh a ti thlu ta a. A fanui’n hetianga a awmlai hi rawn hmu se Major-a chu a lawm hauh a ring lo a ni, tichuan a ni pawh chu muangchangin a riahna lam chuan a phei ve ta a.
Chutih lai chuan Gail-i pawh chuan a sakawr chu chak taka tlan tirin tlang awihpangah chuan a tlan tir zel a. An Ranch a chhuahsan atanga darkar khat hnuah chuan Rogan-a hmun chu a zuk thleng ta a, zan khawthim hnuaiah chuan Rogan-a in riruang chu a zuk hmu a, mahse, a lo landan teh rum chuan a thin a ti thawng phut a, a sakawr chu rang takin a pawt ding chawt a. thing kang rim la cham bangte chu a hre thei ta a, hlauhnain a khat nghal a. A awmna bulhnai leh chhehvelte chu ngun takin a han en kual a. Rogan-a in chu halsak a niin amah pawh chu a thi ve nghal em ni tih chu a ngaihtuah chhuak ta nghal a.
Engemaw hlauhthawnna tak mai chu a thinlungah chuan a rawn lut leh a, a sakawr chu ama duh thuin fai laiah chuan a chhuk thlak tir a. Rogan-a inking bangte chu han enkual pah chuan a sir velah chuan a han vei kual a. Rogan-a hnathawh hah ziate leh ama ta liau liau venghim tura a lo do let ve mai a nih ziate chu a hre reng a. A lung chu a chhe em em mai a, a mit atang chuan a mittuite chu a rawn luang liam ta zawih zawih a. A thinlungah chuan Rogan-a a lainatin hrehawm a tihpui em em a ni.
Tunah chuan tuten nge do tih leh tumahin chhete pawha tanpui a hnekin amah Rogan-a chu kawng tin rengin a dodal zawk a ni thite a han hriat chhuah chuan a rilru chu a na em em a, thinrimna in a khat bawk a ni. Ruah tla seng sengte pawh chu hre chang lovin, a thinlung chhungril takah chuan Rogan-a chu a hmangaih a ni tih a in hre ta a. Clay Rogan-a hmelma te zawng zawng chu a hmelma te niin, a pa thleng pawha huatna leh thinrimna chauh lo chu thil dang engmah a hre chang tawh lo a ni.
Clay-a chu a thi nge hmun dangah a sahimna zawngin a inthiar fihlim tih lah chu a hre der bawk si lo va. Thi tura a han ngaihtuah chuan a tim uaih uaih a, thi tur chuan a phal mawlh lo va ni.
Thinlung beidawng tak chung leh hrilhhai tak chung chuan an in lam chu a pan leh ta a. In a han thlen chuan a pa chu nikhaw hre lova thutkhawmna pindana a lo mu hlawm reng chu a han hmu ta a. A pa kawmawla an lo khuhna chu a han tih that sak sawk sawk a, Cassidy-a ang bawkin a pa chu zanin ah chuan khawiah mah a kal chhuak dawn lo a ni tih a hria a, a pindan lam chu a pan san ta a.

BUNG - 9

An sakawr awmna an pan lai chuan Doherty-a chuan Conway-a chu ringhlel tak hian a la en reng a. Zinga Conway-a a han hmuh veleh khan nizana a zuin leh hahdamna te khan Conway-a chu inrin tawkna a neihtir leh chuang lo tawp tih chu a hre chiang hle a. Tuna an kal chhuah thleng pawh hian Doherty-a mitah chuan Conway-a hi a la ringhlel tlat reng a ni.
Conway-a sakawr chunga a han chuan kai veleh chuan Doherty-a chuan thinrim teuh hian, “ Conway, sawta kan va thlen hun chuan kawtzawl fai laiah i chuang chhuak ang a, chutah chuan nangmahin i va inlan ang. Rogan-a hian a rawn pan ngei dawn che tih hi hre reng ang che “, a han ti hrawk a.
Burt Elison-a pawh chuan ngun takin Conway-a chu a lo en ve reng bawk a, “ Conway, Rogan-a chu rawn ko chhuak ringawt mai rawh, a dang chu keimahni’n kan ti vek tawh mai ang. Nangmah leh amah inkar thu a ni tih hrilh la, nimin thil avang khan i thinrim thu leh rulh let ve che i tum thu i hrilh dawn a nia “, a lo ti ve a.
Conway-a chuan rum ngul ngul chung hian, “ Nangni ho kha lo phun phun teh suh u, k ava ti fel vek mai ang. Mahse, hei enge maw a awmzia le,in han tawng dan chu ? “ tiin a han zawt let ve thung a.
“ Kawng engkimah kan ring zo lo che tihna a ni. Nizan khan kei leh Jobe-a hian kan lo ngaihtuah tawh a, i va chet khawloh vaih chuan kan that ngei ang che tih hi lo hre rawh. Chuvang chuan Rogan-a chu i va ko chhuakin a thi ngei tur a ni “ a lo ti khur khur a.
Conway-a chu ang bawrh bawrh chung chuan hma a hruai ta a. An pathum chuan Shalow River chu chhuahsanin tlang lam chu an pan ta a. Ruah sur pawh a la bang lo va, chumi ni zing chu khua a vawt hle mai nghe nghe a, chhum dum lian pui pui chuan ni chu a hliah a, ni zung rawn chhun lum tur pawh a awm lova.
Shallow River an chhuahsan hnu darkar hnihah chuan lui te tak te awmna hmun hi an va thleng a, a kamah chuan an han ding a, chutah Doherty-a chu a han inphih fai a. Tichuan an kal leh ta zel a. Engemaw chen an kal leh hnu chuan Rogan-a in piah lam awih pang chu an thleng ta a. Ngaw pik tak hnuaiah chuan Doherty-a leh Elison-a chu an ding ta a.Doherty-a chuan bung zet hian, “ Conway, ti khan va kal chhuak la, va inlan rawh. Rogan-a chuan kar lovah a rawn hmu vat mai ang che “, a han i a
Conway-a chuan anni pahnih chu ngun takin a han en hmasa te te a, “ Nangni pahnih hi khawiah nge in lo awm ang a ?, tiin a han zawt a.
Doherty-a chuan Elison-a sakawr zina Rifle rawn lawr chhuak chu a han kawk a, “ Conway, Burt Elison-a hi henglai ram vela silai kap thiam berte zinga mi pakhat a ni a. Rogan-a a rawn lan veleh a rifle hian a lo tin zawn nghal ang a, Burt-a hian kan misualpa Rogan-a chu a kah fuh ngei ngei na turin a hnai thei ang berah i rawn hruai dawn a nia.” a han ti leh a.
Conway-a chuan nuam lo ti hmel tak hian, “ Aw ka hria e Elison, kei ni lovin Rogan-a chu i rawn kap fuh ngei tur a ni “ a han ti ve ngat a.
Elison-a chuan, “ Ka tan engtihna mah a ni lo, mi naran mai mai ah te chuan ka silaimu hi tih hek ka tum hlei nem Conway, Rogan-a chu va cho chhuak phawt mai la, in inbeihna tur chu keiman ka lo do sak ang che. Chhuak vat mai rawh “ a lo ti khur khur a.
Ty Conway-a chuan sawi tur dang a awm tawh lo tih a hria a, a sakawr chu awihpang chhukah chuan a kal tir ta a. Hmun langsar lai takah chuan a kal zel a, a awmna atanga Rogan-a inking bang awmna chu yard tlemte chuah a ni tawh a. Elison-a chu Doherty-a sawi ang a silai kap thiam anih chuan yard za bial chhungah chuan a thelh a ring lo va ni. Chuvang chuan yard sawmkua vel a kal tawh ang tih chuan hmun ualau ah chuan a sakawr chu a din tir ta a.

*****************

Major Norwood-a chu maihun tui vawt chuan a hmai a han phih a, a lu a kun lai chuan a rum rum a, a ka chu a tui lo hle a, a hmaite chu vung deuh luk hian a hria a, a che velte pawh chu a chau hle mai bawk a, a thinrimna ti zuual tu chu zana an lo mut tirna tuttheng avang khan a taksa zawng zawng maite chu a sil them thum vang a ni.
A hnung lama pen thawm a han hriat chuan Norwood-a chu a ding mar awrh a, engkim mai hian a thau-ah a man zo tawh a, thil ri hlekah pawh hian a phu zawk zel tawh mai a ni. A lu na a vang chuan a han then chawk chawk a, chutah a lam pana a fanu rawn kal chu a hmu ta a.
“ Pa, chaw tlem ka rawn lak ang che “, Gail-i chuan a rawn ti a.
“ Rawn la lovang Nula, hetah hian ka la thu rih dawn “, a lo ti hlur a.
Gail-i chuan, “ A nih leh, i duh ang angina awm rawh. Engle khawle, biak che ka duh reng reng, tun tum chu min ngaithla ve tawh tur a ni “, a han ti let a.
A pa chuan lo nur khum pah chuan, “ Tawng zawt zawt mai hi ka ngai thei lo a nia, han thut deuh rih a, hetia han intih harh rih hi ka duh a ni “, a lo ti a.
Gail-i chuan “ Engpawh ni se Pa, engemaw thil thenkhat kan inkara awm hi sawi fel a ngai a ni “, a han ti leh a. Gail-i chu chair-ah chuan a han thu a, a pa rawn zawm ve tur chu a lo nghak a. Zing ni enga hnim paw buang cham put maite chu a han thlir a. Norwood-a pawh chu chair-ah chuan a rawn thu hnawk a, pawn lampang chu muk zet hian a thlir ve ta a.
Gail-i chuan, “ Ka pa, tunah chuan hun rei tak a lo ni ta. Khang hun laia i thinrim thin pawh khan i hriatna leh ngaihtuahna fim zawk i hmang thinin r oi lo rel fo tawh thin a, mahse, nizan meuh kha chuan tunhma hun a mi zawng aia nasa in i thin a rim a, chu chuan i ngaihtuahna fim pawh a khuh zo vek a ni. Kan mi chhawr thenkhatte an sakawr nen a rawn kal turin Cassidy-a i hrilh lai pawh kha ka lo hria a. Chuvang chuan nang leh Clay Rogan-a nen a in inkar buaina leh indona la awm zel hi ka duh tawh lo a ni. Clay-a tan chang ka duh a ni lo va, nangma tan pawh ka duh tawh lo a ni.
‘ Rogan-a hi miin an rawn nek chep laiin a lo awm mai mai chu ka ring thei hauh lo va, a lo tuar nasa tawhin a lo tuar tawk tawh bawk a. Chuvangin i thinrimna leh thinchhiatna hianin Rogan-a hi a va chawhthawh hluah chuan engmah ti lovin ka awm theiin ka inring tawh lo va, Rogan-a hian thah a duh ngai lovang che tih hi ka ring a, mahse, hetiang anga i zuk nawr luih fo chuan a thah pawh a la that hial mai thei che a sin Pa “, a han ti chhuak ta phawng a.
Chutiang thu a fanuin a han sawi meuh chuan Norwood-a chu a thin a rim tak zet a, Gail-i chu a han melh dur khui a, “ Rogan-a chuan ho tam tawk pawh nei mahsela, min hneh thei chuang lovang Gail. Chuvangin i thil sawi awmzia chu enge ni ta ngai ? “, a han ti khur khur a.
Gail-i chuan, “ Kei ka rindan chuan a thei ngei ngei ang ka pa, mahse, chu chu thil kal dan tur pawh a ni lo va, thil pawimawh zawk leh hlauhawm zawk tak mai chu nizana ka thil zuk hmuhchhuah kha a ni. Chutih lai chuan nang chuan zu i rui a, rilru sual i pu a ni. Chutianga i rilru sual put leh tum dan zawng zawng chu Rogan zuk hrilh turin ruahsur hnuaiah khan ka chhuak ta a ni “, a han ti ve sak sak a.
“ Enge chu i tih a !? “, Norwood-a chuan makti tak leh ringhlel tak chung hian a han ti a.
“ Clay Rogan-a chu i thil tum lo zuk hrilhru hmasa turin ka kal chhuak ka tihna a nih chu ka pa. Engpawh nise Rogan-a hi nangma tan a a that zawkna turin i lak atanga lo inthiar fihlim tur leh lo biru rih tur a ka zuk hmin theih ngei ka inring a ni “, a han ti leh a.
Norwood-a chu a han ang hlawih hlawih a, mahse, a fanu chuan pawisa duh chuang lovin a han sawi chhunzawm leh a, “ Rogan-a in ka zuk thlen chuan a inte chu an lo hal ral sak vek mai a,a buh inte chu meivap hlir maiin a khat niaih a, a pal bante pawh an lo phawi sak vek a, thiltha pakhatmah hmuh tur a awm lo, a kangral vek mai a ni. Makti em em hian ka thlir ta reng a, Rogan-a hmun chu a lo ram ta vek mai a ni “, sawi harsa ti tak chung chuan a han ti leh charh charh a.
Norwood-a chu maktiin a lo ang hlui mai a, chutah, “ Chu, a in an hal sak i ti elaw ? “, ring zo lo tak hian a han ti a.
“ Aw ni e ka pa, a zavaiin an halral sak vek a ni.Tunah hian Rogan-a hi a thi nge a dam tih pawh ka hre lo. Rogan-a hi i ngaina lo viau na a, i huatna leh i taina chhan tur ka hre lo a ni. Amah chu henglaiah hian ran vulhtu pakhat a ni ve mai a, tin, ama ram chhan tur leh venghim turin amah rawn beitute chu a theih tawpin a lo bei let ve mai a ni. Hmanzan party-naa ka thenawmte hnenahah khan mi tupawh tanpui an ngaih chuan leh buaina an tawh phawt chuan i tanpui ngei ngei ang tih kha chiang takin i tlangau pui si a, kha kha i tum tak tak em ?”, tiin a han zawt let a.
Norwood-a chuan, “ Tum tak tak e ka fanu, thil ka tum ngai loh ka sawi ngai lo “, tum ruh fe hian a han ti a.
Gail-i chuan, “ Chuti anih si chuan Clay Rogan-a hi i tanpui tur a ni. Duh la duh suh la, kan zinga mi pakhat a ni ve maiu a ni Pa. I duh lo hem em leh huat em em he rama awm lo se i tih rel kawng siam tum hote chuan kan thenawmte zinga pakhat chu nasa takin an bei ta a ni a, mahse, tun thleng hian inzinga pakhatmah hian in kut zungtang te pawh in phut lo va, thenawm ngilnei chu in inti ve chu a ni si a. Ka ngaihdan chuan, kan mi chhawrteho hi hruai la, Clay-a chu zuk hmuin, i tanpui tum thute hi zuk hrilh la a thain ka hria. I tanpuina nen chuan Doherty-a hian Clay-a hi a hnawtchhuak thei lovang a, tin, tih theih engmah pawh a nei tawh lovang, Tichuan hemi buaina rapthlak tak hi zawi zawin a lo kiang ang a, atawpah chuan theihnghilh hlenin a awm mai ang “, tiin khun tak hian a rawn ti leh a.
“ Chu Rogan-a in chu a kang zo vek i ti elaw ? “ tiin Norwood-a chuan a han zawt nawn leh ngat a.
“ Lei seh chin thlengin a kang ral vek a ni ka pa. I chunga lo thleng ni ve ta selang chuan i thiante chu i lama tang turuin i beisei dawn lovem ni ? “ Gail-i chuan a han ti leh a.
Nowood-a chuan, “ Beisei a nula ? A ngaitin ka ngiat zawk ang chu “, a han ti thur thur a. A han ding chhuak a, fanu chu ngun fe hian enge maw chhung chu a han en a, aw dam deuh zawk hian, “ Hemi chungchangah hian i ngaihtuahna nasa takin i lo seng a ni maw ? “ a han ti a.
Gail-i chuan, “ Ni e, pa. Ka ngaihtuah nasa ngawt asin. Ka hmangaih em em che a, eng ang mi nge i nih pawh ka hria a, i chakna leh thil tih theihna mamawh reng rengte’n buaina an tawh a pianga tanpui i lo inpeih reng thin avangin mitin mai pawh hian an zah em em che a ni. A tir atang khan ngun takin ngaihtuah ni la, tuna Clay Rogan-a chunga i ngaihdan hi a dik lo tih i hmuchhuak thuaiin ka ring. Rogan-a chungah hian naupang chhia ang maiin lungawi lohna i nei a, a chhan chu tuna ama dinhmunah hian nang hi ding ta ang ni la, ama tih ang hian i ti ve ngei ang tih i hriatchian vang chauh a ni. Pa, tu hnenah mah i hralh lovang a, tumahin tharumin an nawr chhuak bawk lo vang che, “ a ti ta a.
“ Tumahin rawn tum lo se a tha zawk ang “, a pa chuan a lo ti nghut a.
Gail-i chu a tho va, a pa chu a va hnaih a, ngun deuh hian a han en a, “ Chu chu i tih tur reng a ni pa, i tih ngei ngei tur a ni “, a ti ta mawlh mawlh a.
Norwood-a chuan a hmui a han chip a, a han pet ruh a, hetiang ang thil mihring thluak pangngai pu tawh phawt chuan a hriat ve mai tur, a fanui’n a a thinlung chhunga a han thun luh sak a ngai ta kher kher chu a lungawi loh phah deuh va,mahse, a ram lo enkawl dan chungchang kawngah hian a fanu chuan thu leh hla a lo nei ve fo tawh reng thin a ni. A chang phei chuan a fanu hian amah ai mah mah hian ram enkawl dan a hre ta zawk emaw ni chu aw an ti hial thin a ni.
Norwood-a chuan, “ Tunah chuan i sawi tur i sawi zo tawh chuan keiman ka han sawi ve ang thung ang e. Nizan khan ka rilruah thil pahnih a awm a. Rogan-a hi a ram hralh tura nawr leh ka tum a, a luhlul avanga ka hlawhchham chuan Doherty-a laka tanpuitu tur mi ka hnutchhiah lui thovang tih ka rilruk deuh a ni a, chuvang chuan engmah lovah i lo tawng vak zawk a nih kha Gail “, a han ti a.
Gail-i chu a mit atangin mittui a rawn luangchhuak ta a, zah tak hian a pa chu a han nuih a, “ Chu chu ka lo hre lo a ni Pa. Ka lo hriat ve zawng chu mi tam tak hian Clay-a hi nawr chhuah an tum a, chutiang ang a nawrchhuah an tumna chu Clay-a hian a lo duh bik si lo va ni. Anih chuan Clay-a chu engtikah nge i hmuh taka ng Pa ? “ tiin a han zawt let a.
Norwood-a chuan a lu a han dawm a, Gail-i chu kal pelin inchhungah chuan a han kal tlang a. Kawngkhar a han hawn chuan Cassidy-a chuan in lam rawn pan phei chu a hmu ta a.
“ Cassidy, i nauteho han ko khawm la, minute sawm chhungin hetah hian rawn hruaikhawm ang che, tunah hian kan kal chhuak dawn a ni “, tiin thu a han pe a.

*****************

Clay Rogan-a chuan sakawr chungchuang mi pakhat ngaw kar atanga lo chhuak chu a hmu a, a han inbeng kanga. Lew Stubbin-a chuan Rogan-a hmela ngaihtuahna ding tak lo lang chu a han en a, Rogan-a in ralrin zia pawh a hmu nghal a. Stubbin-a pawh chuan Rogan-a enna lam chu a han en ve a, sakawr chungchuang ngaw kar atanga rawn chhuak chu a hmu ve ta nghal a.
“ Conway-a a ang kher mai “, Stubbin-a chuan a han ti chhuak nghal a.
“ Conway-a ngei a ni “, Clay-a pawh chuan a lo ti ve a.
Stubbin-a chu a han ding chhuak a, a pawnthuahte chu a zial ta tawp tawp a, a sakawr hnungah a phuar bet ta a. Zana ruah a tlak deuh fep fep avang chuan ama hmun thengthaw tak ni lovah leh thli upna deuh hmun zawk Rogan-a in bul awih pang, ngaw hnuaiah chuan riah hmun an khuar ta zawk a ni. An hnawm deuh chuap ve ve a, mahse tunhma pawhin an lo huh deuh fo tawh thin avangin engahmah an ngai duh chuang lo va ni.
Stubbin-a chuan, “ Enge maw a duh tak le ? “, a han ti chhuak a. Clay-a chuan a chhang lawk lo va, Conway-a hmela huatna lo lang kha a la hre reng a. Tin, Cassidy-a’n fimkhur tur leh inring renga awm tura a lo hrilh lawkna pawh kha a vawng reng a.Tunah pawh hian a fimkhur vangin an hnuai hmun zawla Conway-a ding lai chu a hmu reng a ni.
“ Keimah min zawng anih khu, “ Clay-a chuan a han ti a.
Stubbin-a chuan ringhlel hmel tak hian a lu chu a han thing a, “ A ni emaw ni lo emaw tunah hian kan hriat chian nghal a tha ang. Ka ngaihdan chuan Conway-a hi Doherty-a hnenah a va kal anga, Dohertya chu a va zawm ve ta a nih ka ring. I chungah leh Norwood-a chungah hian a thinrim em em a, chubaka inchunga phuba lakna tha zawk ama tan chuan a awm thei tawh dawn chuang em ni ? “ a han ti a.
Chutiang thu Stubbin-a sawi chu a ni pawn a lo ngaihtuah ve tho va, mahse, ni thei awma a rin loh a vangin a ngai thu tak lo a lo ni zawk a.
Clay-a chuan a sakawr zin chu a han phah a, “ Hriatchian theina kawng awm chhun chu ama bula zuk kal mai hi a ni Lew, “ a han ti chhuak a.
“ Chuti anih chuan kan pahnihin kan zuk kal chhuk a ni ang chu “, Stubbin-a chuan a lo ti a.
Clay-a chuan a lu a lo thing a, “ Ni lo ve, amah chauh a ni a, fimkhur takin ka en thlithlai reng ang a, ka inring lo lai chu min tawk miah lovang “, a lo ti a.
“ I aa ta anih hi Mister. Nangmah chauhva hlauhawma i lu zuk rawh chu enge a tul na ? “
“ A tulna leh awmzia a awm asin. He thil hi kei leh Conway-a inkar thil awm a ni a, Chuvangin midang reng reng a khawih tel ve lo a ni. Conway-a hian ka bawng a ru a, chuvang chuan amah pawh ka khawih tawh a, helai hmunah hian tuma duh tawh niin leh phuba rawn la turin a lo kir leh a ni a, chu a phuba lak duhna hun chu k ape ngei dawn a ni “ Clay-a chuan a lo ti bur a.
Stubbin-a chu a han ang hlawih hlawi a, mahse, Clay-a thil tum chu sawhsawn tir theih a ni lo tih pawh a hria a ni. An pahnih chuan an sakawr chungah chuan a han chuang a.
Clay-a chuan tumruh tak hian, “ Lew, khawngaih takin ka ngen a che, hemi thilah hi chuan lo inrawlhin lo tel ve lo hram ang che “ a han ti leh a.
Stubbin-a chu a han ang leh ringawt a. Clay-a kal chhuak lai leh amah lo nghaktu Conway-a lam pana a chhuk lai chu a lo thlir reng a. Stubbin-a hian Clay-a hi Conway-a hneh turin a tha tawk nge tha tawk lo tih pawh a ngaihtuah lo va, mahse Conway-a hian sawisak a tuar hrep hnu leh helai ram atanga hnawhchhuah a nih hnu a Clay-a rawn hneh ngei tura a lo kir leh anih si loh chuan Conway-a hian a lu a rawn lan leh ngam mai mai a ring lo va, chuvang chuan engemaw rinhlehna a nei ta tlat a ni.
Engpawh nise Conway-a hian inbumna thil emaw suahsual thawh a dik lo taka inthah ruknate a lo ruahman tak hlauhin tih thuah Stubbin-a chuan an bul hnai leh hmuh theiha awm reng chu a tum ta tlat a. Stubbin-a chuan ngaw chu hel kualin a chhuk ta zel a, thui fe a kal kual hnu chuan Conway-a dinna atanga yard sawnthum leh a hla ngaw tohlawt deuh lo awm chu a zuk thleng ta a. Chu ngaw tohlawt a va thlen chiah chuan sakawr pahnih mi lo thlun ruk hi a hmu ta mai a.
A tawlh kir leh thuai a, a sakawr atang chuan a han chhuk a, a sakawr chu hmun biru deuhvah chuan a han thlung te te a, ram vak mi a ni bawk a thawm bengchheng miah lo chuan a kal ta zel a. Tichuan, lung phena mi pahnih lo biru hi a va hmu ta reng a, mi pakhat zawk chu khuaah pawh a lo hmuh tawh hnu Elison-a a ni tih a hre nghal mai a, a pakhat zawk erawh chu a hre lo va, mahse, Doherty-a a ni ang tih a ring nghal mai bawk a ni.
A puakruk chu a han phawi a, a han panhnai leh hret hret a, hengmite pahnih hian Conway-a hi Rogan-a hmun ualau-a cho chhuak turin antir a ni ang tih chu a hre thein gal mai a, enge an tih zui tur pawh a hre nghal a. Thinrim tak hian a sa ta zak mai a, hemite pahnih hi a lo dan loh vaih chuan Clay-a hi a thi ngei dawn tih a hre bawk a ni.

BUNG - 10

Elison-a leh Doherty-a awmna chu Lew Stubbin-a chuan bawkvak a a pan phei leh lai chuan a hnungzangah te chuan ruah mal hian a rawn tlak a, an bulhnai yard sawm vel a thleng tawh ang tih chuan a han chawl rih a, tunah chuan chiang leh zualin tute nge annih chu a hrechiang ta hle a ni.
Stubbin-a chu a han insiam rem leh te te a, heng mi pahnihte hian a thawm an hriata an rawn leh hawi thut pawh a kap nghal mai thei tura a inrin a ngai a ni. A han ding chhuak a, aw thawp sat zawite hian, “ Nangni pahnih kha muangchangin rawn inher rawh u, tihsual palh a awm tur a ni lo “, a han ti ta a.
A aw chu zawi hle mahse, chung mi pahnihte chuan an hrechiang hle thung a ni. Elison-a chu a han insang mar a, Doherty-a erawh thung chu mwnga hawlh ang mai hian a zuang tho zawk mai a,an pahnih chuan an rawn hawi phei raul thawt a.
Elison-a chuan han insan mar pah chuan a silai chu a chuh ta thut a, hmehpuah nghal mai tum chuan a pistol chu han lek a tum a, mahse, Lew Stubbin-a chuan fiah tak leh dam thluam hian, “ Elison, han tum chhin vaih teh, in pahnih hian ka that nghal che u a ni mai “, a lo ti a.
Elison- chuan hmel dur deuh mai hian a han melh khui khui a, chutih lai chuan Doherty-a chu a rawn tawng chhuak ta a. “ Awm hle hle rawh Burt, min dang bet chiang hle a nih hi, kan tan chet ngaihna kawng a kaw lo ve “, a han ti a.
“ Elison, i silai kha i thluah thlak vat loh chuan i lu bur kha ka thlawh darh nghal ang, chumi zawhah Doherty-a hi ka that leh nghal ang a. Clay Rogan-an silai ri a rawn hriat chuan hlauhawm a awm a ni tih a hre thei nghal mai dawn a ni. Tichuan Conway-a hi a rawn that ang a, he in thil tum hi a thlawn vek mai dawn a ni “, Stubbin-a chuan vau ti tih pah hian a han ti leh a.
Doherty-a chuan a silai chu a thlauh a, a hmaiah te chuan thlanfim a rawn luang zawih zawih a, hlauthawng tak chung hian Elison-a chu a han en a, “ Burt, engmah thil tihsual kan nei hlei nem, tumahin thil tisualah min puh thei hek lovang. Hun dang tha zawk leh remchang zawk a la inher chhuak leh mai ang “, a han ti thla rawh a.
“ Elison ! “ Stubbin-a chuan a han ti leh thawt a. Stubbin-a aw ah chuan dawh theih lohna leh thinrimna hi a tel tlat tawh a, Elison-a chuan Doherty-a hlau hmel tak chu a han en te te, chutah a silai chu a thlauh thla ta a.
Stubbin-a chuan, “Awle, tunah chuan inpahnih khan ka lamah rawn kal rawh u, bawkkhup ula, tichuan dar insi rialin in kut kha in lu chungah suih ula, heta tang hian sawta thil rawn thleng tur saw chiang takin kan hmu thei ang. Khai le, ka rin ang ngeiin uichu dawihzeppa chu Rogan-a hian awlsam takin han that teh se “, a ti chhum ta hmuk a.


***********

Gail-i chuan a pate an chhuah veleh chuan a rukin a zui ve nghal a. Hemi ni hi chuan a pa thil tum danah lo inrawlh ve a tum lo va, mahse, amah chu engemaw turtu an awm tlat hian a inhria a ni. A pa leh Cassidy-a leh midang zuitu pali te’na Rogan-a kawtzawl fai lai chung, tlang pawng an thlen hma chuan an hmuh phak loh tawk tur chiah zel chuan a zui ru zel a. Chutah a pate chu an han inhawr khawm ta thut mai chu a hmu ta a, an vai mai chuan makti hmel leh ti tak hmai pu zet hian ngai renga dingin hma lam chu an en ta reng hlawm a, chutiang anih chuan an hmalamah chuan buaina engemaw awm tih Gail-i chuan a hrechiang ta hle a ni.
Gail-i chuan a sakawr chu chak takin a lim phei tir a, chutia an lam pana sakawr rawn tlan thawm chu hriain Norwood-a te ho chu an hawi let thap a. Gail-i chuan a apa lo insehruh chu a hmu a, a pa chuan a hauh hmain an hma thlanglam panga thil awmdan chu a zuk hmu hman a. Clay Rogan-a chuan a in kang tawh hnu kal pel a Conway-a a pan phei lai mek chu a zuk hmuh chuan, “ Pa, ti tawp rawh, ti tawp hram rawh “, a rawn ti chhuak chul a.
Major Norwood-a chuan ngawi reng hian a fanu chu a han en a, a ngaihtuahna pawh a vak thui hman hle a ni. An thlang lampang yard zathum vel a hla lam chu a thlir san leh ta zawk a. Ruah chu tla seng seng mahse boruak chu a thiang hle a, hmuh pawh a hmuh thui theih hle a ni.
“ Cassidy, nang engtin nge i ngaih ve le ? “ Mojor-a chuan a han ti a.
Cassidy-a chuan a hmui chu a han pet ruh a, a khabe a han nuai leh te te a.Chutihlai chuan Gail-i chuan Cassidy-a chu ngaihdan sawi mai mai mi a ni lo tih a hre nghal mai a, tuna Cassidy-a chhanna a han hriat chuan mak a ti em em a.
“ Ka ngaihdan chuan Conway-a hian dik tak leh fel taka Rogan-a hi rawn beih tuma rawn kal niin ka ring “, Cassidy-a chuan a ti ta a.
Gail-i chuan, “ Ni lo Pa, Ty-a hian silai chelek a hnehsawhin a kap thiam em em bawk si a, nangmah ngei pawhin henglai ram vela silai kah thiam ber a ni tih i sawi kha, chuvang chuan thelh vat mai rawh“, tiin a pa chu a han ngen a.
Major Norwood-a chuan a fanu Gail-i hian Rogan-a hi ngaihtuah nasa in a vei hle tih chu a hre chiang ta tak zet a,chu chuan a thin a ti rim ta hle a ni. Mahse, Rogan-a lam pana an kal chhung zawng pawh khan thil tam tak ngaihtuahin hriat belh pawh a ngah hle a, chu chuan tlemin a thil thlir dan pawh a ti ziaawm deuh a ni.
“ Conway-a hian Rogan-a hi a hneh kher lo mai thei a, anih loh vek pawhin tunhma atang khan kan zinga mi tam zawk hian Rogan-a nihna tak hi kan la hre lo nge ni zawk nge ni ang ? Tunah hian kan hre anihna tak chu kan hre thuai dawn alawm “, a han ti a.
Gail-i hlauhthawnna chu a la kiam aw zawng lo, a thin chu a la phu rang hle a, a pa chu a bulah rawn kal hnaiin, a bulah chuan a rawn ding a, zawite hian, “ Engpawh nise Gail, tih tawp pawh tum mah ila, ka ti tawp thei chuang lovang. Conway-a hian henglai ramah hian engmah innghahna tur leh beisei tur a nei tawh lo va, mi dang lakah a tlawm tawh a, a zahawmna zawng zawng pawh lak bo sak vek a ni tawh a. Chuvang chuan Conway-a hian a ngai zam thei tawh lo va ni.Vawiin hian he thil hi lo thleng ta lo reng mahse, engtik hunah emaw chuan a la thleng tho vang. Chuvang chuan tunah hian anih tur ang ang anih mai a ngai a ni “, tiin a fanu chu a han hnem a.
A pa tawngkam chuan Gail-i thinlung chhungril takah awmzia a nei hle a, mahse, chuti chung pawh chuan an hmaa thil lo thleng tur chu a han ngaihtuahin a la khur deuh zawih zawih tho va ni.
“ Rogan-a hian a hneh loh vaih chuan ka thla kha hlawh ka thap e “ Cassidy-a chuan a han ti chhuak ta thut a.
Chu veleh Norwood-a chuan, “ Keiin ka do nghal a che “ tiin a lo thap ve nghal thuai a.

***********

Clay Rogan-a chuan fai laia Conway-a lo ding a pan lai chuan a mit chu Conway-a lak atang chuan a la sawn lo reng reng a. Tichuan Conway-a chu a pan phei ta zel a.Conway-a hmelah chuan eng emaw lo thleng tur hmel hi a lang tlat a, chuvang chuan Clay-a chuan thil dik zan lo awmin a hre tlat a ni.
Rogan-a chuan Conway-a hnung lampangah chuan a mit a han len a, a hnung lam ngaw mai lo chu hmuh a nei chuang lo. A kawr awmah chuan a kutte chu a han tat te te a, a kut chu han humin a han tipharh leh a, a puakruk paina bawm chu a han hup a, chutiang chiah chuan Conway-a pawh chuan a lo ti ve a.
Hun chu a kal muang hle a, an fimkhur dun bawk a, mungchang chuan an han inpan hnai duh leh a. Clay-a chu Conway-a veilam pang hret ah chuan a han her a, Conway-a pawh chu sakawr chung atang chuan a han insiam rem a, tichuan ding takin an inmelh dun ta a, an pahnih a taksa chu che pakhat mah a awm lo, an taksa ti hrawtte chu a mar tang a, in ring takin an awm dun ta a.
“ A hun a lo thleng ta Conway, min rawn cho turin emni i rawn kal ? “ Clay-a chuan a ti ta a.
Conway-a chuan a hmui rote chu a han liak huh a, hnung lama inher a, han en vel chu a chak hle mai, a rilru te te chuan, tunah hian Rogan-a chu hmun ualau laiah a awm tawh si a, minaran tan pawh awlsam taka kah thluk theih na hmun langsar a ni bawk a,mahse, tinge Elison-a leh Doherty-a chu an va rawn che har em em ve le, enge maw an tih chen chen le a ti rilru nap nap a, a rilru chuan amah leh amahte chu anchhia a han inlawh bawrh bawrh a.
“ Conway, i phawi ngamlo a nih rau rau chuan tawlh kir leh mai rawh. Tichuan he ram atang hian thlak bo vat ang che. Henglai rama ka hmuh leh che chuan mi hnung lam atang pawha kah ching mi i ni tih ka hre reng ang “, tiin a han vau leh a.
Chu hmunsitna awka chhuak chuan Conway-a thinlung chhungah chuan huatna leh thinrimna chu a rawn tlen nghal a, a thinrim lutuk chu a hmaite chu a rawn sen chhuak awp awp a.
“ Rogan, tunah hian ka that dawn che, i thi ngei ngei ang “, Conway-a chuan a rawn ti ram hmak mai a. Mahse, chuti chung pawh chuan Conway-a chuan a silai chu phawi mai lovin a la tawi khawmuang mai mai a.
Clay-a chuan Conway-a hmela eng emaw rinhlelhna rawn lang chhuak chu a hmu leh ta a, chuvang chuan Conway-a hian tum bawlhhlawh tak mai a nei tih chu a hre chiang ta hle a ni.
Clay-a chuan vin zet hian, “ I phawi loh pawn keiman ka phawi ang Mister. Kan pahnih a inkarah hian han tal chhuah lehna tur kawng reng reng nei tawh lo. Hei hi kan tifel nghal tur a ni “, a han ti leh a.
Chumi a han hriat leh chuan Conway-a chu a ang hlui a, che hlek lo hian a la thu ta reng a. A hmela thinrimna leh huatna rawn lan leh pah chuan a hmui chu a han ner a, a han then sawk sawk a, a rum ngul ngul a. Doherty-a leh Elison-a te pahnihin an phatsan avangin anni chu a that ve ngei ngei ang tih rilru chu a pu ta a.
Conway-a chuan a pistol chu a phawi awlsam nan leh ran zawk nan a malpui chu a han san a, tlemin a dar pawh a han her hret a, a kut chu a silai phawi tur chuan a vai thla ta fua a, a pistol a han phawi chhuah rual chiah chuan rifle mu in Rogan-a awm taka a den a la beisei cheu a ni.
Conway-a ban vai thlak veleh chuan Clay-a pawh chuan a silai chu a chuh ve nghal a, Clay-a chu a inrin tawk em avangin a pistol phawi pawh chu a rang ngei mai. A kut atang chuan a pistol chu a rawn de chhuak zawk a, a ri nghal thuai a. A silaimu chuan Conway-a awmah tak chuan a va verh ta siah mai a. Conway-a chu a sakawr zin atang chuan a eu awrh a, chutia a eu awrh pah chuan a silai pawh chu a hmet puak ve nghal a, mahse a silaimu chuan pawi a khawih ta lo a ni.
Clay-a chuan Conway-a silaimu kalna lam chu a hre lo va, amah a rawn deng lo ngei mai tih chu a hria a. Chutah Conway-a sakawr chu a zuang vak a, a chunga thu Conway-a pawh chu a phe dawrh mai a, chutia sakawr a han zuan dawrh ah chuan sakawr hnung lamah chuan a tla thla ta a. Sakawr atanga a thlakthlak a lei a thlen chuan Conway-a chu a la thi mai lo va,a lu chu han kanin ngaw lam chu a han hawi phei a,mahse engmah a hmu ta chuang si lo chu a hmelah chuan beidawnna a rawn lang ta a.
Clay-a chuan a kap fuh tawh a, Conway-a chu la thi lo mahse nung damin a chhuah thei tawh lo tih a hriat avangin a han kap nawn leh a, silaimu chuan Conway-a nghawngah chuan a verh leh ta siah mai a. Conway-a anchhe lawh ri chu a hrawk atang chuan a rawn ri chho bawrh bawrh a, zangthalin leiah chuan a thal ta a, a hmai ah te chuan ruah sur seng sengte chuan a rawn tlak a, a kuta silai la hum reng chung chuan a thi a.
“ A va mak em !, a phawi rangin a va kap thiam teh lul em ! “ Cassidy-a chuan a han ti chhuak ta thut a.
“ A che rangin a kap thiam mah mah a ni “, Norwood-a chuan a lo ti ve bawk a.
Chutia Norwood-a tawng zawh veleh chuan Gail-i chuan a sakawr chu a kheng tlan ta zawk mai a, chu chu Norwood-a chuan a hmuh veleh man beh tumin a han ban a, mahse, Gail-i chuan a lo bum zauh a, tlang pang awih nalah chuan a tlan chhuk ta chiam a. Gail-i chu sakawr chung chuan thiam hle lo se chuan sakawr atang chuan a tla tawh ngei ang, engmah chet sualna awm miah lovin Rogan-a lam pan chuan a tlan ta zel a.
Rogan-a chuan chutia sakawr rawn tlan ri ta thut a han hriat chuan rang taka inherin a pistol chu a han tin kawh nghal a, mahse, chu sakawr chung chuang chu hmeichhia a ni tih leh Gail-i a ni tih a han hriat chuan a pistol chu a paiah chuan a thun leh ta zawk a. A bulah chuan Gail-i chuan a sakawr chu a pawt ding chawt a, thaw huam huam chung leh ngaihtha lo tak chung hian Clay-a chu a han en a.
“ Clay, i tha em ? “, hlauthawng aw tak hian a han ti chhuak ta chawt a.
Clay-a chuan chhang mai lovin Gail-i chu a mitah tak mai chuan a han en vang vang a, Gail-i mit atanga amah ngaihsakna leh hlauhthawnna chu a hmu a, chutiang thil chu a lo beisei hauh lo, mahse, Gail-i ngei chu a ni si. A chal a han chuar a,a mitko a han san a, enge lo thleng ta teh reng le tih pawh a la hrethiam lo va, a ngaihna reng reng a hre lo chuan a la ngawi ta reng a. Chutah awih panga sakawr chungchuang rual chak tak a rawn tlan chhuk chu a han hmu leh a, chutah a han hawi kual a, ngaw atang chuan ke a mi rawn kal leh,an hnunga Lew Stubbin-a rawn chhawm phei chu a hmu leh ta zel a.
Gail-i bawk chuan hmanhmawh leh la hlauthawng aw tak hian, “ Clay, i tha tak tak em ? Ka va hlauthawng tak em ! Conway-a khan a that mai dawn che emaw ka lo ti a “ a han ti chhuak leh a.
Clay-a chu a harh chhuak zawk a, Gail-i lam chu han hawiin, “ Aw ka tha e, ni lo va, Conway-a hian min that thei lovang, kan inkah dawn tep khan zamna engemaw tak a nei tlat a ni. A tir kha chuan min hneh zawk mai pawh ka lo ring rilru deuhva “, inthiam lo aw deuh hian a han ti a.
Gail-i chu rilru hahdam tak hian a han thaw huai a, Clay-a chu a han en leh ngawih ngawih a, chutah a han inher a, ngaw lam chu hawiin Lew Stubbin-a rawn nui phei the thaw chu a hmu ta a.
Lew Stubbin-a te an rawn thlen phei chuan, “ En teh u, ngaw karah sawn enge ka rawn chhar chhuah tak le, kan rul hlauhawm pahnihte hi ! “, Stubbin-a chuan a han ti chhuak lawng lawng a.
Chutih lai chuan Norwood-a te ho pawh chu an rawn thleng chawpchilh ve ta nghal a. Major Norwood-a chuan chutia mihran hran lo awmkhawm chu a han hmuh chuan a han meng kawk a. Clay Rogan-a ang bawk chuan a rilru chu a buai ve tho a ni. A ngaihna tak pawh hre lo hian a tawng chhuak thei mai lo va, a han tawng chhuah theih hnu chuan, “ Rogan, in inbeih dan kha kan hmu vek a, a fel faiin a dik thlap mai, sawisel bo a ni “, a han ti chhuak phawng a. Clay-a chuan Norwood-a chu a en reng ringawt a.
Chutah Norwood-a chu Stubbin-a lam chu a han hawi a, “ Enge khangho khan tih an tum reng reng Stubbin ? “, a han ti a.
Stubbin-a chuan, “ Ka lo hmuh dan chuan Conway-a kha puih an tum a ni awm asin. Sawmi ngaw karah sawn nuam ti deuh hian an lo awm dun a. Hepa Elison-a hian a Rifle-in Clay-a hi a lo tin mek a, pawi pawh ka ti khawp mai, an hmuhnawm en lai ka lo tihbuai sak a “, a han ti a.
Norwood-a chuan Stubbin-a thusawi chu a lo hrethiam thuai a, tichuan thinrim tak hian, “ Doherty, ka ram chhungah hian thil i ti sual a, ka thenawmte zinga pakhat in i hal sak avang khan dan i bawhchhia a ni. Henglai ramah hi chuan chung thil ti sual ho chu khaihlum theih an ni “,a han ti tlang ta thuai mai a.
Gail-i chu a lo phu zawk mai a, mahse, lo inrawlh ve lohva lo tihbuai loh chu tha zawkin a hria a ni. Doherty-a hmel lo dang sawp sawp pawh chu a hmu nghal a.
Doherty-a chu a hnung tawlh dawrh a, a lu a thing a, khur chung hian a han tawng chhuak a, “ Ni lo, Norwood, a ni thei lovang. Ka bansan nghal e, duh leh rel kawngte chu ram vek rawh se “, a ti tham ta tuau mai a.
Mahse, Norwood-a chuan a la duh tawk mai lo va, “ Chumi belhchhah leh tur chuan ran vulhtu mal tak that turin mi i tir chhuak a, chumi hnu chuan a in i hal sak vek a. Tunah hian inthahna rapthlak leh bawlhhlawh ber i duang chhuak leh a ni Mister. I tan chuan hrui hnuala khai hlum che hi a tha lutuk mah mah zawk a ni “, a han ti leh a.
Chutih lai chuan Cassidy-a chuan a sakawr zin sira hruihrual tel chu a lo phelh mek a. Doherty-a chuan chumi a han hmuh chuan a hnung tawlh phei leh dawrh a. Burt Elison-a chu beisei hmel tak hian a han en a, mahse Elison-a hmelah chuan hai rual lohvin hmuhsitna hi chiang takin a lo lang a. Tichuan Doherty-a chu a inher vut a, hnim huh leh nal per pur chungah chuan ngaw lam panin a tlan phei ta vak mai a, a tawlh thlu phei zawt zawta.
Major Norwood-a chuan, “ Rogan,i duh chuan i ta a ni e “, a han ti a.
Clay-a chuan chu rel kawng siam tum tupa hlau em em chung a ngaw lam pan a tlan chu a han en zui a, atawpah chuan a lu a thing a, “ A tlawm tawh alawm “, a ti duh ta chauh va.
“ A tlawm tihte mai mai chu, i hre lo anih hi. Hengtiangho hi chuan buaina hi chu an thau pui alawm, a lo kal leh ngei ngei ang. Chutih hunah chuan tun ai hian a sual zawkin a bawraw zawk bawk ang “, Norwood-a chuan han tih pah chuan a puakruk chu a phawi zui a, a kap ta nghal thuai a. Silaimu chuan Doherty-a hnungzangah chuan a va deng a, Doherty-a chu hnim nalah chuan a tlu ta hawl hawl mai a.
Gail-i chuan chupa na tuar authawm a han hriat chuan a hmai a hup a,leh lam a han hawi a, a te tuar tuar chu a la hre zui fova, atawpah chuan aw sin tak hian a han te chhuak vaka, tichuan Doherty-a chu a thi ta a. Gail-i chuan chu mithi tur pa hlau mangang au ri chu a dam chhungin a hre reng ang tih a hria a, chutiang bawkin a pa’n Rogan-a vanga mi a thah sak chu a hre reng bawk ang tih a hai lo a ni.
Tichuan a pa thusawi chu a han hre zawm leh a, “ Tumahin ka ramah emaw ka thenawmte ramah emaw buaina an siam ngai lovang “, a han ti zui leh hmiah a.
Chutah Norwood-a bawk chuan Elison-a lampangah vethung chuan a han hawi phei a, thinrim seh chilh nawk nawk chung hian, “ Mister, Doherty-a hian a ruai che a, mahse, tun thlenga kan la hriat theih chu henglai ramah tumah i la that lo tih hi a ni a. Thupek hnuai a hnathawk a, tuna kan hriat ai mah hian i lo inrawlh thuk pawh a ni thei a, engtia tihtur che nge ni tih hi ka hre chiang thei lo a ni “, a han ti leh a.
Elison-a chuan Norwood-a chu ngaihsak lovin Clay Rogan-a chu dam thlap hian a han en a, “ Tun thlenga indo ti a kan la vuah dawn a nih chuan ka do chu Clay Rogan-a hi a ni a. Ani hi nuai chimih leh nuai ral ka lo tum tawh a, chutianga mi’n min rawih leh phei chuan ka tum leh bawk ang. Rogan, min thah i duh anih chuan ka hun a lo thleng ve ta anih chuan ka ding ve mai ang a, ka chance chu ka la ve mai a ni ang chu. Amaherawh chu thah min duh lo anih chuan ka intel fel vek ang a, ka chhuak nghal ang. Ka lo kir leh ngai tawh lovang “, a ti ta a.
Gail-i chuan a pa rilru fim leh tawh zia chu a lo hmu a, Cassidy-an thil engemaw a sawi rik chu a hria a. Lew Stubbin-a pawh chu a lo ang hlak a. A pa erawh chu a lo ngawi reng a. Gail-i chuan Clay-a lamah chuan hawi pheiin a han en vang vang a, a hmelah chuan engmah a lang lo va.
Clay-a chuan a dam chhunga thil tih thluk harsa a tih ber chu a tawng ta a ni.
“ Elison, inthahna a tam tawkin a tam lutuk ta a, chhuak nghal vat la, mahse, lo kir leh tawh suh ang che. i rawn kir leh vaih chuan ka that tawh ang che “ Clay-a chuan rawn ti ta a.Elison-a chuan chu vauna aw a han hriat chuan a then sak a, mahse, a bul vela mi ho thu tak hmel tak tak a lo din hual veltute chu a hmu a, a han en kual hlawm a, tih tak hmel deuh hian a han bu nghauh va, zawite hian, “ Rogan, kei chu ka thu hlen mi ka ni a, chuvangin he buaina hi chin fel a ni ta e “, a ti ta nghal a.
Tichuan Elison-a chu a in her ta nghal a, Stubbin-a chuan kawng a lo kian duh lova, tur fe hian a lo en a, mahse, Elison-a chuan a hel a, Doherty-a ruang awmna lamah chuan a kal ta a. Chirdiaka Doherty-a lukhum tla chu a chhar a, Doherty-a lu-ah chuan nghet takin a khum tir a. Hnung lam pawh hawi kir miah lovin a kal ta zel a.Midang zawngte chu tlang panga Elison-a lo lan leh hma loh chuan che hlek lovin an ding a.
Tunah chuan Mojor Norwood-a hian thil tam takah a rilru chu a siam fel ta a. Awmkhawm ho chu a han thlir a, chutah Rogan-a inkang ral tawh hnu chu a han thlir leh te te phawt a.
Thunei aw, fiak thak hian thu a han sawi a, “ Rogan, nangmah chauhvin kan thlahfalin kan thlahthlam rei lutuk palh che a ni.Chuvangin ngaihdam kan dilna leh kan thupha chawina hi kei leh ka mite zawng zawng lak atangin lo dawng ang che. Kan zavaiin i mi ngaihdam kan duh a, thupha kan rawn chawi a ni. Keini ho chu nghet taka inzawm khawm leh lungrual tham kan lo ni ta a, chutiang ang chiah chuan tuna tang hian thil a kal tawh ang.
“ Buaina chu i tan leh ka tan a lo kiang zo ta a, mahse, hetah hian nangmah maia misualho tihbuai theih tur hian kan hnutchhiah tawh dawn lo che a ni. Chuvang chuan tiang hian i ti tur a ni ang, i neih chhun la awm zawng zawng kha la khawm langin ka Ranch-ah rawn chhohpui nghal ang che.
“Stubbin, nang pawh kha i rawn chho tel ve nghal tur a ni. Nangmahni maia in awm hi kan phal tawh dawn lo va, henglai ramah hian in lo buai rei tawh a, ka rilru inti hah hle thin a ni. Han sawi ta mai ila ka hote pawh hian min remtihpui ngei ang a, ka ram hi ka zauh dawn a ni. Lui thleng sawn ka hote ka hung tir dawn a, chu chuan Rogan-a ram zawng zawng hi a huam tel vek ang. Rogan, nang hi chu ka hote zinga thuneitu, kei min dawttu i ni ang.
“ Tin, chumai bakah ka ram chhungah hian ka kawppui i ni tawh zawk dawn a ni. He ram hi kan pahnih a ta a lo ni tawh zawk ang a, ka remruat dan hi a tha tawk hle in ka ring a, tin, hemi thu ah hian hnialna pawh a awm thei lovang.
“ Gail, nang hi ka fanu neih chhun i ni a, nang hi Rogan-a bulah i awm tlat tur a ni, tichuan a insiam peih veleh ka hnenah a lo kal ngei a ni tih ka hriat theih nan rawn chhoh pui nghal ang che. Nang chiah hian Rogan-a hi i hneh thei tih ka hriain, ka ring tlat bawk a ni “, tiin a fanu chu zaidam tak hian a en a.
Major Norwood-a chuan a thusawi zawh veleh chuan a sakawr chu a pawt her mawp a, Cassidy-a hnenah chuan, “ Kan mi aa pa kha phum nghal ang che u “, tih pah chuan a sakawr chu a kheng tlan ta nghal a.
Lew Stubbin-a chuan Clay-a chu ngun fe hian a han en a, la hrethiam chiang chiah lo hian thinrim hmel a la pu deuh va, Rogan-a hian thil a tih dawn reng rengin mahni a rilru siam hi a duhdan a ni thin tih pawh a hria a, tunah pawh hian a thianpa chuan a ram a hralh mai chu a la ringhlel deuh va ni.
Cassidy-a chuan mi pahnih chu a han ko hrang a, Doherty-a ruang chu buaipui a, thlante lai turin leh phum nghal turin a han hrilh leh chhawng a.
Gail-i chu Clay Rogan-a bula a va kal phei chu Stubbin-a chuan alo hmu a, tichuan a tawlh kian san ta a, mahse, a kal kian pah chuan he mite pahnih Clay-a leh Gail-i hi a leh hawi leh lo thei lo va ni. Gail-i lah chuan Clay-a chu a lo thlir ngawih ngawih tih a hmu bawk si a. An tawng hriat phak lovah chuan a kal kian san ta a. Mahse, hemite pahnih hian an inkarah eng thu nge an sawi dun tih a a hriat veleh loh si chuan a dam chhung zawnga a an hla tur a ni dawn tih a inhria a, amaherawh chu tuna an thusawi dun hi chu a hre ta hauh lo mai si a le.
Gail-i chuan, “ Clay, khami ni hmasa ber kha i la hria em ? Khatih lai kha chuan ka la hre ngai lo che a ni. Mahse, tunah chuan khami ni hmasa ber, ka hmuh hmasak ber atang che a in tan ta niin ka hre ta ber mai, tiang em em a ka rilru i luah khah hi. Tin, a hnua kan in a i rawn kal leh atang khan ka hrechiang tawh che a ni.
“ Chu lo rengah ka pa khingpui tawk el tawk i ni tih ka hre chhuak a, a chhan chu i dinna ngaia i din reng vang leh rilru dang i sawhsawn loh vangin. Paxton-a te, Conway-a te, Doherty-a te leh Elison-a te i han chin vel danah khan i hneh zia leh I tham loh zia i ti lang chiang hle bawk a, tichuan, ka pa ber mai i han khing tawk ta kha chu thil pawimawh ber mai a ni. Hun rei tak chhung chu mi tu emaw hian ka pa mawhphurhna rit tak mai hi a koki atanga lak sak turin leh chhawk z*ng turin, chumi bakah chuan ka pa’n kei min enkawlna te hi lak sak bawk a, chumi ngei chuan ama kuta min vawng ve zawk tura an lo kal hun hi ka lo nghak thin a, Chuvangin khawngaih takin ka pa thurawn che kha i pawm thei mai dawn lawm ni ?” tih tak hmel pu leh beisei nei tak hian a han ti ta seuh seuh a.
Gail-i thusawi leh amah a rawn sawmna chu a tirah chuan Clay-a chu mak tihna hian a rawn thawng thut a, hetiang nula hmeltha pian nalh leh ngaihawm, henglai ram vela nula duhawm ber mai chuan pasal atan a sawm ang tih rin ngaihna pawh a hre lo a ni. Gail-i chu chiang tak hian a han en leh pawhin sawisel tur pakhatmah a hre hlawl lo a ni. Amah Gail-i a hmuh hmasak ber tuma a rilru leh ngaihtuahna a tih buai ziate kha a han hre chhuak a, tin Conway-a nen an insual hnu a, amah a rawn a rawn ngaihsak zia a hmuhte kha a han hre chhuak uar uar a, a lawm zia leh chhan dan mai tur pawh chu a hre lo hial zawk a ni.
Gail-i rawn tawng chhuak leh chuan Clay-a chu thu a rawn tih thluk sak ta a. “ Tun ang reng reng hian ka thinlung chhungril taka tang hian lawman ka la nei ngai lo Clay, ka hmangaih che a ni. Khawngaih takin ka thinlung chhungril taka ka lo vei hi a rinawmin a dik a ni tih fiah theih nan hun min pe hram rawh aw. Chu chu kan pahniha kan nun chhung zawnga thil ropui ber a ni ang “, a han ti leh thlawt mai a.
Clay-a chuan a kut chu a han nuai a, ngun taka Gail-i en chung chuan hmel hlim tak hian a rawn nui chhuak ta a, “ Aw le Gail, kei tak hian alawm duh che, ka phu loh em che avangin leh ka lo beisei phak loh, mang lamah pawh ka man phak lohin min vur ta si a, chhan nghal mai ngaihna che ka hre lo alawm le. I pa rawtna leh inangma rawtna chu ka pawm thlap e “, a han ti ve ta a.
Gail-i chu lawmin a han nui saih a, Clay-a lamah chuan lo zuang pheiin Clay-a hmui ah chuan a fawp ta ngawih ngawih a. Clay-a pawh chuan a taksa rem zaih a lo pawm in a lo fawp ve vawng vawng a. Rei tawk fang an infawh hnu chuan an han inthlah a, Clay-a chuan a han enchhuk leh a, hetiang ang a nula hmeltha leh duhawm a nupui a han ni mai tur chu mumang pawh a ang zawk hlein a hria a ni. Gail-i lah chuan hmel hlim tak hian a lo nuih ver ver mai bawk si a.
Gail-i chuan, “ Ti khan nangmahin lo haw ve mai rawh, ka pa ka lo han hrilh hmasa ang e, rawn hmanhmawh la ka lo thlir reng dawn che a nia “, tih pah chuan a han fawp leh zawk a. Tichuan Clay-a chuan Gail-i chu sakawrah chuan a han hlang a, Gail-i chu in lam panin a tlan chho ta nghal a.
Lew Stubbin-a chu Clay Rogan-a bulah chuan a rawn kir leh a, “ Chu kan awm nghet dawn ta em ni ? Norwood-a tan chuan kan thawk dawn ta maw ? Eng thu chiah nge insawi dun a, thu tlukna i siam tak? “tiin hriat chak tak hian a rawn zawt a.
Clay-a chuan hmel hlim tak hian, “ Lew, keima tan i thawk dawn “, a lo ti a, Gail-i nena an thusawi dun chu a hrilh duh ta em rih lo va. An pahnih chuan an thawmhnaw leh buangruate an han ti fel zung zung a, tichuan Norwood-a Ranch leh a hmangaih leh duh ber, nula hmeltha chung chuang nakin lawka a nupui ni mai tur Gail-i te awmna lam chu an pan chho dun ta a.
Gail-i pawh chuan a hmangaih ber leh a pasal tur Clay Rogan-a chu in ah chuan a lo nghak reng tawh a ni.

A tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)

Post Reply
  • Similar Topics
    Replies
    Views
    Last post

Who is online

Users browsing this forum: Bing [Bot] and 2 guests