DYNAMITE DICK (completed)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

DYNAMITE DICK (completed)

Unread post by Rozami pachuau » July 24th, 2019, 8:21 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 1
(Rozami Pachuau)

A lo kalna lam chu a thui tawh êm avangin chu cowboy-pa chu a chau tawh hle a, a thlan te chu a biangah chuan a dir zawih zawih a. A sakawr pawh chu a chau ve tawh a ni tih hriat tak hian a taksa pum mai chu thlan tui hian a bual huh hnup tawh a; mahse, a pu chu zo takin a la tlanpui reng tho a.

A chunga chuang cowboy chu chau tawh hle mah se a mitmeng chu a la fiah êm êm a; hei vang hian a ni tun thlenga khawvel eng hi a la chhim ni. Ani pawhin fimkhur ṭhatzia chu 'ka beng' tih tluk zeta chiangin a hria a, a hma lam thil chu eng mah hmuh hmaih a nei lo emaw ni chu aw tih tur hian a en chiang ṭhin a ni.

Pumrua-ah pawh pa lian tak, dar pharh hlai tak hi a ni a; mahse, a tai erawh a fek rat thung. Tin, lukhum parh bial pap mai hi a khum a, amah a la valaiin a hmel pawh a ṭha kher mai. Hmai sawl lam deuh, mitmeng dum fiah kâk leh ngainatawm tak hmel, hnar ngul sang veh vawh, hmui pan lam hret hi a ni a; a hmuihmul chu a met fai vek a, churut lian zet hi a pak khu talh talh bawk a.

Cowboy chuan kamis pawl a ha a, a chungah chakai khawrh kawr a ha bawk a, a thawmhnaw te chu paw hle mah se, mi inchei peih tak a ni ang tih chu hai rual a ni lo.

Gunman dangte chin ṭhin loh ang takin a gunbelt chu chhing takin a hreng a, puakruk pawh pakhat chauh a pai nachungin tun thlengin a nunna chu a la chhanhimsak ve tho a ni. He pa hi a ni Daniel Clifton; mite'na Dynamite Dick tia an lo hriat ṭhin chu!

A sakawr chu a pawt ding a, zuitu an awm nge awm lo a han hawi lêt a, tu mah amah rawn zuitu àwm a hmuh loh avang chuan a inher leh a; a hma lam chu a han thlir vang vang a, “Tun aṭanga darkar chanve-ah chuan khua kan thlen tawh dawn hi,” ti chungin a sakawr chu a kaltir leh ta zel a.

Ni chuan dimna nei hauh lovin chu cowboy chu a em ngawt ngawt mai a, van rang chhum pawh hmuh tur awm lovin khua chu a thiang kûk a.

Wallatin khuaah pawh chuan khua a lum êm avangin khaw chhung mite chuan boruak thawveng dawn tumin hmun remchang an zawng ṭheuh hlawm a. Khua a lum avang emaw ni teh reng ni, khua pawh chu a reh ruih mai a.

Chutih lai chuan khaw chhung lam panin sakawr lianpui hi a rawn tlan lut thoh thoh a; a sakawr chu lianin ṭha hle mah se sakawr ai mahin a chunga chuang chuan mi rilru a hnehin an mit a la zawk a.

A taksa leh thawmhnaw chu vaivut bawh a ni tih hriat reng hian a paw thuk mai a, a taksa thlantuiin a bawh avang chuan a thawmhnaw te chu a hnawm deuh chuap tawh a. Amah pawh a bal tawhin chauh pawh a chauh hmel tawh hle a; a sakawr chak tak pawh chuan hahin chau ve viau tawh mah se, a pu chu zo fahran hian a la kal pui thoh thoh zel a. An pu-tu chuan an inmil hmelin kawm pawh an inkawm ngeih hmel viau reng a ni.

Daniel Clifton; a ṭhiante'n a hming kaih tawi, ‘Dan' tia an koh mai ṭhin chu kawtthlerah chuan fimkhur takin a kal zel a. A sakawr chunga chuang chung chuan hmun tin chu a melh a, a thlan lah a tla nasa kher mai; mahse, hlauh lûat vanga thlan erawh a ni lo, khua chu a lum kher êm atin a ni!

Hotel Palace kawt a thlen chuan a sakawr chu a pawt ding a, duh tak hmu ta ang maiin a chhuk thuai a. A sakawr chu a thlung ṭha a, chumi zawhah a han hûi pap a; a dawt leh atan, ding meuhin kawtthler chu a han thlir nawn leh a; chutah, lungtlu hmel takin saloon lam chu a pan ta a.

Saloon kawngkhar a luh dawn chiah chuan cowboy pakhat lo chhuak nen an insu thawi thuak a; mahse, a tu-a mah mah in-um-e chuang lovin mahni hma lam chu an pan ding dun vang vang a.

Saloon chhung a rawn luh chuan mi an lo tam vak lo va; bar nghengin mi pathum hi inhnaih fe fe hian ding chungin an lo titi a, kawngkhar lam hnungchhawn ṭheuhin zu no an lo dawm mek a. Ṭhutna hmun dangah chuan dawhkan kilin mi tlem azawng an lo awm bawk a. Chutih laia mikhualpa lo lut chu tu mahin an lo ngaihsak hran lem lo.

Dan Clifton pawh chu bar lam pan chuan a pên phei nghal a‚ bar nghaktu hnenah chuan, “Khawngaihin whisky min han pe teh‚” a han ti a. Bar nghaktu chuan no-a thlitsak pahin, “Mister, mikhual i ni maw? He khuaah hian tun hmain ka la hmu ngai miah lo che,” a lo ti a.

Dan-a pawh chuan no chu a han tlâk tê te a, “Ni e, tun maiah khan ka rawn thleng ve chiah a ni. Khawngaihin ka la duh belh aw, ka lo kalna lam a hla deuh a, chhawl hal a na duh kher mai,” a han tih chuan a bula zu in pathumte chuan an rawn en ṭhap a.

Bar nghaktu pawh chuan a han thlit khahsak leh a, chu erawh chu muangchangin a dawm ve ta rih a. Dan-a chuan, “Mister, zanina riahna tur ka duh a ni,” a han ti a.

Bar nghaktu chuan, “He hmun hi Hotel Palace Saloon a ni a, riahna pawh a awm nghal e. I lo thleng duh a nih chuan room no 7-ah i thleng dawn nia, ka hotel hi chu he khuaah hian hotel changtlung bera an sawi a ni ve reng asin. A nih‚ ti ta daih ila, eng ti tur bera lo kal nge i nih, he khuaah hian rawn kal chhan i nei em? Nge, i pal tlang mai dawn? Min chhan theih chi te a ni emaw chu?” a han ti leh a.

Dan-a chuan a han melh kâwk a, “Mister, mi lu man khawma ei zawng chu ka ni lo tih lo hre phawt rawh; tin, ka hrawk hlawhna tur hian hna ka thawh a ngai a ni. Tunah neih ka nei tawh mang si lo va, hna thawh tur remchang a awm a nih chuan thawh ve nghal ka duh a ni,” tih pahin a han kiai deuh sak a.

Bar nghaktu chuan, “Chutiang a nih chuan hna thawh tur chu a awm maithei. He lai ramah hian ranch awm neuh neuh mah se Garby Straumer-a ranch tluka lian hi chu a awm lo. Tun hnai deuh khan bâwng ruk ching an awm tih hriat a ni a, ranch tênau ṭhenkhat bâwngte pawh a bo thu kan hre ta zauh zauh a.

“Chutiang laka venghim tur chuan puakruk hmang thiam tak tak Pu Straumer-a chuan a duh belh tih thu ka hria a, chutiang hna thawk tur chuan mi iaiawm tak i nih ka ring hauh lo. Puakruk hmangah pawh nangni ang bâk hi a hmuh ka ring lo,” tih pahin Dan-a puakruk kawm hnum hlarh chu a zuk melh zauh a.

“...Tin, chu lo pawh chu ka la hria,” bar nghaktuin a han tih leh chuan Dan-a chuan a no chu a tlak pap a, “Chu lo pawh chu...?” a lo ti ve a.

Bar nghaktu chuan, “I thawh mi a nih ka ring lo; mahse, i thawh chi tak pawh a lo ni reng mahna!” tih pahin a hrawk chu a han thian kâk kak a. Dan-a chu chiang deuh maiin a han en leh a, “Naktuk tûk leh khian Phoenix Mining Corporation-in hna thawktu tur a lak belh dawn a, chutah chuan puakruk hman thiam aiin thahrui hman thiam a ṭul zawkin ka ring,” a han ti leh a.

Dan-a pawh chuan, “A ṭul ngei ang; mahse, tun atan chuan chawlh hahdam ka duh zawk. Inbual fai zawhah chaw ei a, chawlh a ni ka duh ni,” a han tih chuan bar nghaktu chuan, “A ni tak e, kan titi ata langin i hming pawh ka la ziak lut hlei nem,” a ti ta a.

Dan-a chuan muang ban charh hian, “Daniel Clifton,” a lo ti a.

Bar nghaktu chuan, “A ṭha e, i room tur chu sawi tawh angin no 7 a nih kha; hei chabi,” tih pahin a pe a, inbualna tur hmun chu kawhhmuh pahin Dan-a'n whisky no khat dang a lam belh leh chu a han thlitsak a.

Dan-a chuan dollar tlang theh thlak pahin a kut ding lamin no a dawm nghal a, saloon chhunga mi dang awm vete chu a han melh zawk a; a no chu a lek kang a, a chhunga mi chu tui ti takin a lem fai ta vek a. Bar nghaktu hnenah chuan, “Thil pakhat lawk.... Saw..., pawnah sawn ka sakawr ka dah a, saw saw min enkawlsaktu tur i lo ngaihtuah thei ang em?” a ti a.

Bar nghaktu chuan, “Ngaihtuah duh suh. Hei, kan ṭhenawm maiah hian sakawr enkawltu, mipa naupang fel tak Guchillo a awm alawm,” a tih hnu chuan Dan-a pawh chu inbualna pindan lam pan chuan a kal ta a.

A inbual lohna a rei ta bawk a, a bal kher mai. 'Eng tik laia ka inbual kha nge ka chhunzawm leh tâk chu aw.... Ka inbual hmasak ṭum kha chuan hmanhmawh thila inbual ka ni a, tun ṭuma mi zet hi chu ka duh thu sam zan a ni. Sakawr chung chuan leh ni sen sa tawn hnua inbual hi zawng a nuam bik hle mai,' ti rilru nauh nauh chungin brush kuang sei tak chuan a hnungzang chu a khuih hauh hauh a.

Nuam a ti hle ni tur a ni, darkar khat dawn lai mai tuia a inchiah hnu chuan chaw chu tui ti takin a ei ta mial mial a.

Hotel kailawnah chuan Dan Clifton chu a pen chho chhat chhat a, hotel neitupa chuan a lo thlir reng a, “Pa ṭha tak chu a ni ngei ang; mahse, a thin ti rimtu nih chu ka thlang hauh lo,” a han ti sup a.

Dan-a chuan hotel room no 7 chu a han hmu a, kawngka kalhna chu a hawng a, a lut ta nghal a. Hotel pindanah chuan a inkalh khum a, khumah chuan a bawk thlawp a, vawi khat atan a pindan, a chenna tur chu chiang deuhin a han melh kual a.

Tukverh a awm a, chuta ṭang chuan kawtthler chu chiang takin a hmuh theih a; tukverh sir chhak, khum lu bulah chuan dawhkan a inhung bawk a, a bâk chu thil dang mit han la teh vak tur a awm chuang lo.

Dan-a chu a ngaih a ngam ta aniang, a thaw huai a, a gunbelt pawh phelh chuang lovin khumah chuan a bawk ta reng a, rei lo têah a muhil ta mai a.

A han ṭhangharh leh chuan khua a lo thim viau tawh a, rei phei zawng a mu hauh lo. Tichuan, a pheikhawk chu a bun a, a churut chu ṭan kai pahin kawngka-ah chuan fimkhur takin a pen chhuak ta a. Kawngka chu dim takin a khar a, a kalh leh nghal a; a chabi chu a vawrh a, a lo tla lehlam chu a kutin a lo dawng a, a iptê-ah chuan a ak nghal a; churut pak khu laih laih chungin kailawnah chuan a pen thla ta chhat chhat a.

*************************

Bar sir lehlam kailawnah chuan mikhualpa chu a rawn pen thla chhat chhat a, kal pahin a churut chu a pak khu laih laih bawk a. Bar lam chu a rawn thlir chhuk a, mi pahnih hian zu an lo in mek a; mahse, a melh rei peih lo kher mai. Chu ai chuan a piah dawhkana card khelho chuan a mit an la daih zâwk a ni.

Dan Clifton chuan a churut zûk lai chu a paih a, bar lam pan chuan a phei ve ta rih a. Dawhkan chu a han khawng karh karh a, “Whisky khawngaihin min han pe teh,” a ti a.

Bar dawhkan phen aṭangin a nghaktu chu a rawn dak chhuak a, Dan-a hmel a han hmuh chuan, “E..., I lo tho tawh a ni maw?” tih pahin zu chu a han thlitsak nghal a.

Dan-a ta pek chuan, tui tlem pawlhin a lem ta puat mai a. Chumi hnu chuan ei tur tlem azawng a ei a, bar lamah bawk chuan a phei leh a, whisky bawk chu a va lam leh a.

A mizia chu bar nghaktu chuan mak a ti angreng hle mai a. Zu a in laklawh laiin chaw a ei a; a in zui leh nghal thei mai bawk a. A rilru chuan, 'He pa hi eng ang mi tak ni ang maw? Whisky hi chawm bawkin hawp bawk mah se, chaw hi tui ti takin a ei thei tho ang,' tiin a ngaihtuah nauh nauh a.

Whisky a lem zawhin Dan-a chu card khelho kiangah chuan a va phei a, an inkhelhna bulah chuan rei lo tê a han ding a, inkhel chu a en ve ta rih a. Nakin deuhah chuan, “Ṭhiante u, hmun a la awm emaw chu? In infiamnaah hian ka lo tel ve ang e,” a ti ta a.

Pakhat chuan, “Kan duh zawng tak a ni ang chu; mahse thil pakhat, ṭhian ṭha inkhelha inkhel kan ni nachungin kan dahkham erawh chu a sang angreng viau a nia, chu chu pawi i tih loh chuan lo tel ve ta che,” a lo ti a.

Chutia lo titu chu pa sang deuh leh hmai dung sei deuh, inchei peih hmel tak mai hi a ni a. A sir ding lamah chuan pa cher tak, hnar zum tak, mitkhur thûk tak leh lungngaih hmel deuh mai hi a ṭhu a; vei lamah ve thung chuan, pa thau leh mum kung mai, kum sawmnga vel hmel pu, chal kawlh zet mai hi a ṭhu bawk a. Mahse, Dan-a be hmasatu ber tih loh a dang pahnihte chu an ṭawng ve miah lo va.

Dan-a chuan, “Poker khelh hi ka thil ngainat zawng tak a nia sin, Mr...?” a han ti a, ṭhutna chu a rem nghal a.

“Brent.... Max Brent.... Tun kan inkhelh chhung zawng hian fair taka kan khelh theih ka beisei e, Mr Dan Clifton,” tih pahin Brent-a chuan card chu a'n deal a, amah chuan a sem nghal a.

Dan-a chuan, “Engtin nge ka hming i hriat le? Tun hmain inhmuhna kan nei tawh em ni?” tiin a han zâwt a.

Max Brent-a chuan, “Alamitos-ah ka hmu tawh che a ni; mahse, eng nge i tih tih zawh kher che erawh chu ka tum lo,” a lo ti a.

Card chu an khel ṭan ta a. Brent-a chu a luck ta phian mai a, “Dan, gunman-te hian hming than châkin an la pel ve mai ang che tih ka hlauhpui ngawt mai che,” a han ti a.

Dan-a chuan, “Brent, ka hun remchang hi ka bawh pelh ngai lo. Chutiang ang mi i hria a nih leh heta ka awm thu hi han hrilh ta che,” a ti mai a.

Brent-a chu a dollar man sa, a lama hûi pah chuan a nui huau huau a, “Eng lai pawha inring reng i nih chu ka hai hauh lo a nia, Dan. Tunah dollar sawmnga-in kan san thei ang em?” a han tih chuan Dan-a chuan a sira ṭhu pahnihte chu a han melh zauh a, anni chuan an rem ti tih nan an lo bu nghauh a. Dan-a pawh chuan a hma zâwn taka ṭhu Max Brent-a lam hawi chuan a han kiai sak a, dollar sawmnga chu a dah belh ve ta nghal a.

Rei fe an inkhelh hnu chuan an pawisa thàp pawh chu a sang sâwt ta hle a, Dan-a leh Max Brent-a chu an in-luck chhawk a ni ber mai. An sira ṭhu pahnihte chu êk mai an ni, ṭawng pawh an ṭawng lo.

Max Brent-a chuan, “Thil dang a awm a nih ngawt loh chuan rinawm takin kan kal a ni ang chu,” a han ti leh a.

Dan Clifton-a ngaih dan a ni lo ṭan ta hle a. “Brent, i ṭawng chuan mei a ve nei deuh ve,” a han ti ve a. A aw-ki chu a ngainatawm lovin a rum ta riau a, a thinrim chu insum a tum hle a ni tih a hmelah chuan a hriat mai a.

Brent-a chuan, “Dan, chutiang zawngin ngai duh suh. Thil awm thei a thuphungin ka sawi mai mai a ni. Tu mah ringhlelin ka ti lo ve,” tih pahin a han nui hak a.

Chu nui ri chuan boruak sosang tur chu a ti dai leh ta a, an inkhel chho ta zel a. Dan-a chuan a sa chu a han siam rem a, dawhkanah chuan a han pharh a, a sira ṭhu pahnihte chuan lunghnur fein an card chu an theh thla a.

Max Brent-a chuan, “Zât sarih pathum leh zât li pahnih i nei a nih chuan i ei a nih kha,” a lo ti ve bawk a; ama card chu, “Card vanduai!” tih pahin a theh thla ṭhak a, Ace pair leh Queen pair a lo nei a; chutih lai chuan Dan-a chuan pawisa chu a lo hûi ve mek bawk a.

Dan-a chuan, “Ṭhiante u, min ei chat in tum a nih chuan zanin hian in tum a ṭha ang; chuti lo zawng, he hmun hi ka chhuahsan leh hlauh dah ang e,” a han ti a.

A sira ṭhu, putar Martin-a chu a lo nui huk a, a pawisa neih chu a theh thla leh ta a. Jose-a lungngai hmel chu a ṭawng lo kher mai.

An han khel ṭan leh chuan tu mah luck awm chuang lovin an khel chho zel a; a tawpah zawng, nei ṭha inti fahran hian Max Brent-a chuan pawisa chu a dah belh leh ta a.

Pu Martin-a thung chuan a card chu a off hmak a. Jose-a nei chhia inti pawh chuan a card chu a sam a sam ta mai a; mahse, kal dawih nih chu a hreh si a, dollar sawmnga chu a theh thla ve leh ta a. Dan-a pawh chuan dollar a theh thlak hnu chuan card chu a han tuai ri pak a.

Card an han theh thlak chuan Dan-a chuan chhe tê te hrang nuai mai hi a lo nei a; Pu Martin-a chu a lo nui huk a, chu chu Dan-a'n a han hriat chuan a va melh kâwk a.

Jose-a pawh chuan a han thal nghal a, eng ual chu a lo nei bik lem hlei lo va; mahse, Brent-a chuan Queen pathum leh Ace pair a lo nei teu mai a, Jose-a hmel pawh chu a ngui rawih mai a.

Pu Martin-a chuan a sona, rangkachaka siam chu a hlip a, a thàp ta mai a. Jose-a pawh chuan a pawisa neih chhun chu a thàp bawk a. An han khelh ṭan leh chuan Jose-a chuan a card chu a han en a, a nur nasa kher mai!

Dan-a chuan a han thàp belh leh a, Max Brent-a pawh chuan...; tichuan, an incho sang ta zel a. Jose-a chuan, “Pawisa ka nei tawh lo,” tih pahin a card chu a off ta daih a. Tichuan, Dollar zali lai chu a tling ta mai a.

Card an han pharh chuan Dan-a'n Ace pair leh four pair-in a ei ta a. Chu chu Martin-a'n a hmuh chuan, “Ka bang tawh ang e, Gentleman, eng mah neih ka nei tawh lo,” tih pahin a tho ta a.

Jose-a pawh chuan, “Ka neih zawng zawng ka hloh vek tawh,” a ti a, a tho ve ta a. Tichuan, Brent-a leh Dan-ate chu an pahnihin an inkhel dun ta a, an thàp pawh a sang chho tawh hle mai a.

Max Brent-a chuan, “Dan, kan in chak chhâwk a ni ta hrim mai a, min huat chu ka ring hauh lo a; mahse, sum zawng zawng hi man vek i duh ngei ang. Tichuan, kan la khel tluang zel thei a ni lawm ni?” tih pahin Dan-a chu a han melh a. Chutia tih pah chuan, “Whisky bottle hnih leh no pahnih min han pe rawh,” tiin a han order nghal a.

Dan-a pawh chuan, “Ni e, tu nge hnehtu ni dawn i han ti zel ang hmiang,” a lo ti ve mai a.

Dawhkana zu an rawn dah chu Brent-a chuan a han thli a, Dan-a hmaah chuan no khat chu a'n hung a, an card khelh chu an chhunzawm ta zel a.

An inkhelh fe hnu chuan cowboy dangte pawh chuan an rawn kil hnai ta hlawm a, tu nge hloh tu zâwk ni ang tiin an chungah mit chu a fu ṭhup tawh a.

Darkar chu a liam zel a, zan a rei tawlh tawlh bawk a. Dan-a chuan card chu a han sem a, a sem zawh chuan a card chu dim tê hian a'n en de de a.

Brent-a pawh chuan a card chu a en ve bawk a, a lungawi hle ni tur a ni, phur fe hian pawisa chu a thàp belh zel a. Dan-a pawh chuan Brent-a ngam chen chen chu ngamin pawisa chu a dah ve zel bawk a, dollar note leh a thir chu a tling khawm ta hnur mai a.

Dan-a chuan, “Zan a rei tawh a, tunah dawhkanah pawisa a tling hnem tawh bawk a ni lawm ni?” a han ti a.

Chutah, Brent-a chuan a card chu a han pharh a, Mal (Ace) pathum a lo nei a, “Ka ei a ni lawm ni, Dan?” a han ti a, pawisa chu hui khawm mai a han tum a.

Mahse Dan-a chuan, “Brent, zah ngai deuh teh, ka card pawh i la hmu ve êm hlei nem maw le,” tih pahin a card chu a rawn pharh chhuak ta a. “Eng nge i ngaih dan le, Brent?” a han ti a.

A card chu Brent-a'n a han hmuh chuan a hmelah thinrimna a lo lang nghal a, “Trick i thiam hle mai, Dan; i trick lai ka hre miah lo. Aw le, a ṭha e, i ei a nih kha,” tiin a seh chilh ta rap rap a, Dan-a card chu Queen, full house-in a nei a lo ni si a.

Mahse, Dan-a chuan Max Brent-a chu a lungkham vak hmel loh kher mai! Churut chu a pak khu luai a, “Kan la chhunzawm zel dawn nge kan tawp dawn?” a ti ta a.

Max Brent-a chuan, “Aw le, Dan, hnehtu chu i ni ta ngei mai. Mahse, tunah neih eng mah ka nei tawh lo, min ei cha vek a ni. Chuvangin pawisa min lo pûktir la; tichuan, kan chhunzawm leh dawn nia,” a han ti a.

Dan-a chu a kiai sak a, a pûktir hmel loh kher mai! “Pûk tir ââ ni? Ni lo ve Brent, chutiang tur a ni lo, chu thu chuan ka thinlung dàn bu a kalh tlat a ni. I pawisa zawng zawng i paih zo tawh a nih chuan kan infiamna pawh hi a tawp nghal a ni mai,” a ti ta hmak a.

Max Brent-a chu ramsa kawlh ang mai a ni tawh a. A thinrim chu a kun ngal mai a, a rum nghut a, “Dan, min va ringhlel ve! Ka neih zawng zawng min mansak vek tawh a, chuti chung chuan kal sawn i tum a maw? Ka pawisa kha ka neih let leh hma chu i kal sawn thei bik hauh lo vang; chu thu chu i hria em?” a han ti a.

Dan-a chuan, “Eng nge i ngaihtuah leh tâk a? Hlohtu chan chhia i nih hi min hrilh nawn lo la, min hrilh tawh hek suh,” tih leh thawh a han rual a.

Brent-a chuan, “Ka daw ngai lo, Dan; hlohtu lah ka ni ngai hek lo. Kan inkhelhna kha dik tak a ni tih leh fair takin i ei a ni tih ka hriat hma chuan i kal thei lo vang,” a la ti ta fan fan a.

Dan-a chuan, “Max Brent, kan inkhelhnaa i sum paih aia hlu thil dang i paih hlauh dah ang e!” tiin kal leh mai a han tum a, “Ka thu sawi chu i hria em? I kal sawn lo vang!” tih ri a hriat rual rual chuan a puakruk chu a phawi de zawk a, Brent-a lung zâwn tak chu a tin kawh ta teu mai a.

Brent-a chuan a puakruk kawm a dawm nghal chat a; mahse‚ Dan-a puakruk kaw hmawr chuan a lam a lo hawi veh tawh mai!.

Dan-a chuan, “Khatianga min ti leh a nih chuan ka kap hlum nghal ang che. Ka kal dawn ka tih chuan min dan luih tum duh tawh bawk suh. Tin, sum tam tâwk i neih hunah i pawisa hi chu i la la let leh maithei. Tun atan chuan a tawk rih e, a rang thei ang berin he saloon hi chhuahsan rawh!” tiin thu a pe ta chhak mai a.

“Zaninah zawng i chan a ṭha a ni e, hnehtu pawh i ni tluan zak e; mahse, he game hi a la tawp dawn hauh lo a nia, Dan,” tih pahin Brent-a chu a inher a, hnung lam pawh hawi let tawh miah lovin saloon chu a chhuahsan ta nghal a.

Dan-a chuan a puakruk chu a paiah a khung lut leh a; a churut lian tak chu a pak khu luai a, a inher a, kailawn lam chu a pan chho ta a. Mi dang chuan a kal chho chu an thlir zui reng a.

Dan-a hi zawng, sum chu a nei thei alawm; mahse, khâwl hi thiam mawlh hek lo! A room pindan chhungah chuan mu chungin a inngaihtuah nasa mai a. Tuna a sum neih chu chemènin a zin kual leh mai dawn nge ni ang, mi ranch-ah a inhlawh zâwk dawn? Nge ni, Phoenix Mining Corporation-ah chuan a thawk zawk ang?

Ranch-a a thawh chuan silai hmeh puah a ngai ngei ang a; amah pawh chu an kap hlum ve thei tho bawk si. Han teihawi mai mai lah chu mi chanhai leh ngelnghet lo mihringah a ngai tlat bawk si.

A cowboy nun chu a ning tak zet tawh a, hetiang hrim hi chuan cho rual loh val a tawn hun a la thleng ve ngei dawn si. Chutiang hun a lo thlen chuan vaivutah a kir ve leh mai àwm si a, “Dan, i phawi muang hret a ni,” tia puakruk khu vat vat chhem len paha a ruang chunga diriamna âw lo la chhuah hun tur chu a ngai ngam bik si lo.

Chutiang hlir ngaihtuah chuan muthilh zai a rel ta a. 'A tu-ate pawh hian tawpna ni chu an la nei vek dawn alawm,' a ti ta ngawt a. A mu a han ṭhangharh meuh chuan khawchhak kawlkil aṭangin ni chuan chhuah a lo tum mek a....

*******************************

Ni chu a tlang sang hle tawh tihah Matt Katlin-a chuan Wallatin khua chu a rawn lut ve a. Khawthlang lam khaw dang ang bawkin chu khaw kawtthlerah chuan vaivut a tam a, khaw lian tia sawi tur ni mah suh se, khaw invawng fel angreng tak an ni ang tih chu an khaw kawtthler in sak inrem dan aṭang chuan a hriat theih mai a.

Thawm riva awm lovin khua chu a reh tlak tlak hle a, kawtthlerah chuan a khat tâwkin mi pahnih pathum vêl chu an vêi ve zeuh zeuh chauh a.

Matt-a chuan, 'A la hma deuh a nih hi le,’ a ti rilru nauh nauh a. Plaza saloon kawtah chuan a sakawr chu a ti ding a, sakawr enkawltu hnenah chuan, “Ka sakawr hi ṭha takin min lo enkawlsak dawn nia,” tih pahin dollar tlang hi a han theh phei a.

Sakawr enkawltu chuan a lo dawng vat a, lawm hmel pu taka nui var var chung hian, “Ka pu, ka theih tawpin ka lo dûat ang e,” a ti a. Matt-a pawh chuan, “Ka lawm e,” tih pahin saloon chhung lam chu a pansan ta a.

Saloon chhung a luh hnu chuan whisky a lam nghal a, an rawn pek chuan tui ti takin an rawn pêk um chanve zet chu a in fai nghal ta vek a. A dawt lehah inbual...; inhrai puar...; chutah, chawlh hahdam.... Chu chu alawm, Matt Katlin-a'n a zinna kawng tluana a lo nghahhlelh êm êm chu....

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E* 💝💝

🌸 Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 25th, 2019, 8:44 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 2
(Rozami Pachuau)

Kum 1860 May thla a ni a, Phoenix Mining Corporation-a thawh tumte chu an intlar ṭham mai a; mahni tâwk ṭheuha tlin inbeisei ṭhah an ni bawk a, tu mah han in-iai hmel pu an awm hlawm lo kher mai. A indawtin room chhungah chuan an inluh chhâwk zel a; an hming chu chhung lama mite'n an lo ziak zel a; chûng zingah chuan a tling leh tling lo an la awm leh dawn a ni.

Room chhunga hming lo latute chu pahnih an ni a; pakhat zawk chu fir hmel êm êm mai, mihring aiin zawng a ang zâwk emaw ni chu aw tih tur hi a ni a. Meizial a pet kawh a, a lukhum chu he zet hian a khum bawk a; a beng lah chu a parh êm êm mai lehnghal a, chu pa zawk chuan hming a lo la zel a.

A hma chiaha ṭhu ve thung chu, thau mum deuh keng kung, thluak aia tihrawl ngah tih hriat reng mai, zu heh tih hriat taka hmai sen tul hi a ni thung a, a lu chu a chik rut mai bawk a.

Chu pa thaua chuan, “Next,” a han tih chuan room chhungah chuan cowboy pakhat, sazu hmel ang tak Ieh cher deuh mai hi a lo lut a, “Eng nge i hming?” a han tih chuan tliang ral hian, “Bill Ramirez,” tiin a chhang a. A hming a ziah zawh chuan pa thaua bawk chuan, “Next,” a han ti leh a.

Cowboy pakhat lian thelh thawlh, hmel ṭha tak, ro rel thei hmel pu tak hi a rawn lût a, “Eng nge i hming?” tiin a han zawt a. Chu pa chuan chang fak hian, “Daniel Clifton,” a ti a, muangchangin a chhuak leh ta a.

A dawt leha rawn kal chu Dan-a ang vela pa lian, hmel fel veh vawh leh ruakhau deuh tak mai hi a ni a. A hming an han zawh chuan muang ban charh hian, “Mat Katlin,” a han ti a.

Chûng cowboy hming ziah luhho zawng chuan an hming an sign vek a. Pa thaua chuan, “Kar khatah mi pakhatin dollar sawm zel in hlawh ang a; ei leh in tur bâkah chenna tur ngaihtuahsak in ni bawk ang,” tiin a han hrilh a.

Matt Katlin-a chuan a Mexican cigarette chu a'n ṭan kai a, a ṭanna nawhalh fung chu leiah a paih a, a'n rap zui a, saloon lam chu a pan ta nghal a.

Saloon chhung a va luh chuan Dan-a chuan whisky a lo lam mek a, bar dawhkan chu awn deuh tak hian a lo bawh a. Matt-a pawh chuan bar nghaktu hnenah chuan, “In tur min han pe teh, ka chhawl a hal riau mai,” a han ti a.

Bar nghaktu chuan a han thlit dawn lai chuan, “A ngai lo ve, keima'n ka ti ve thei,” tih pahin no leh saidawium chu a la a, dawnkan lam chu a panpui ta a. Dan-a chuan a thlir zui deuh vang vang a.

Matt-a ve thung chu amah chauha dawhkan kilin ngawi rengin zu no chu a dawm a, chutih lai chuan Mining Corporation-a thawh tuma interview ve dangte pawh chu saloon chhungah chuan an rawn lut ve ta bawk a.

Dan-a chuan a zu no dawm lai keng chungin card khelho awmna lam chu a pan phei a, mi an tamin thawm pawh a ṭha hle a.

Saloon chhung chu meizial zûk khu chuan a ti hrehawmin in chhung kil tin mai chu a fan chhuak a. Saloon pawh chu a ṭhing tawhin, an ṭhutthleng leh bungrua te chen chuan a hlui khung tawh mai a. Saloon bangah chuan milem nalh lo pui pui pathum ngawt a intar a; han en ngawt pawhin lunglen a hnawt ṭiau a, lung a ti chhe lek lek zawk a; ṭawpin hlui viau tawh mah se, a lùnin mi lawi luhna ber a ni tlat pek a.

Dan-a pawh chu card khelho zingah chuan a tel ve leh a. An han khelh ṭan aṭanga rei lo têah chuan vawi khat a man a; mahse, a paih chhunzawm ta char char a.

Matt-a chuan Dan-a card khel ve va en zawk pahin zu chu a lem zo ta vek a, a duh tâwk a in hnu chuan saloon chu a chhuahsan ta a.

A tûk zing boruak chu a nuam hle a, a thengthawin thlifim a tleh hauh hauh reng a. Phoenix Mining Corporation-a thawh tuma interview-te pawh chu an interview-na result hriattir an ni a; a ṭhen an tling a, a ṭhen an tling lo va. A tling lo zingah chuan pawi ti tak awm mah se, a ṭhente chuan‚ “A pawi chai hlei nem!” tia lo ṭawng ta bawrh bawrh te, “Grape te chu a thur thur nen,” lo ti tâwk te an awm bawk a.

Dan CIifton leh Matt Katlin-ate chu a tling zingah an tel ve hlauh mai a. An hlim dun viau nâin Dan-a chuan tling lo mah se pawi a inti vak lo va.

Matt-a ve thung chuan tlin ngei chu ṭha a tiin a duh thu sam a ni. Tichuan, a duh thu sam ang ngei chu a lo thleng dikin a duh ang ngeiin sum lâk luhna ngelnghet a nei thei dawn ta a ni.

A tûk May ni 23, 1860 chu an hna ṭan ni tur chu a ni a, chumi ni aṭang chuan Dan-a pawh chuan nun thar a lo hmang ve ṭan dawn ta a ni. Puakruka ei zawng ṭhin khan ama tha leh zungzam ngeiin thlantui nen ei zawn a lo ngai ta a; mahse, dàn a nih chuan engkim mai hi a lo thawh theih mai zel a ni.

Silai hmanga thinlung ral ṭi êm êm leh mutmu pawh tuah hlei thei lova hmelmate pelh rûk
rengna kara ei zawn ai chuan, tha leh zung chu lo seng deuh mah se ngaihngam taka sum lak luh chu a ralmuanthlak a, nawm pawh a nuam zawk a ni — chu rilru chu a ni, Dan-a rilru-a lo lian ve ta chu!

Matt-a pawh chuan hotel pindana mu chungin a hun kal tawh te a ngaihtuah neuh neuh a. An in a chhuahsan dawn ṭuma tleirawl thinlung sak tak pu chunga chhuak a nih te, beisei nei tak leh hming than châkna rilru a put zawng zawng te kha thil ho mai mai a nihzia a hre ṭan dawn chauh a la ni si a. Khatiang ang, a rilru put dan te kha a lo va mak êm!!!

Mi hming thang leh puakruk kah thiam zawng a ni meuh mai; mahse, amah ang bawka hming than tum mihring a tawng ve ta a. Chutah chuan duh thlan tur a nei tawh lo va; ama nun humhim nana thah a lo ngai ve ta zel si a ni. Eng tikah nge ani pawh chuan a ngam loh val a la tawn ang a hre si lo va, chutiang ram chu a ning tawhin tuna a thawhnaah hian a thawk dawn a ni. Hmun hla tak aṭanga lo kal a ni a, heta a thawh tawh chuan tu ma'n ṭul lovah an rawn tih buai leh a ring tawh lo a ni.

Gunman hming thang tam takte, an bo pilna, chin pawh hriat loha an bo pil ta mai te hi eng dang vang mah a ni lo, nun dan thara nungin a ṭul phei chuan an hming nen lam an thlak ṭhin a ni.

Tlai lam boruak vâwt a rawn thleng dawn tawh a, saloon lam panin cowboy dangte pawh chu an kal ṭan tawh a. Matt-a pawh chuan ṭhutthleng buk theia ṭhu chungin kawtthlera mi kalte chu ngun takin a lo en zel a.

Matt Katlin-a chu tlangval lian thelh thawlh, ruakhau ṭha tak, sam buang thang mai, mitmeng fim kâk mai leh hlim thei tak a ni a. A pianzia leh chezia reng reng chuan nula hi a hip hranpa ve rêng rêng a, amah hmu tawh nula chuan an thlir nawn leh ngei ngei ṭhin a ni.

Kawtthler lam a thlir reng lai chuan cowboy chi hrang hrangte chu an vei zut zut hlawm a; a ṭhen kea an kal laiin a ṭhen sakawr chungah an chuang a, sakawr thlunna thing kham pheiah chuan sakawr a inthlung ṭhap bawk a.

Chutih lai chuan Dan Clifton-a chuan kawtthler chu a rawn tan tlang ve mek bawk a, Matt-a chuan mitmeng hnim deuh raih leh uluk zet hian a lo en a. Matt-a, mi thil chîk mi leh mi mizia hre thei tak mai pawh chu, chu tlangval mizia-ah chuan a buaiin hriat thiam loh eng emaw lai nei tlatin a inhria a, chu a hriat loh lai chuan a rilru a la tlat a; mahse, chu ringawt chu a ni thei si lo.

Dan-a chuan a kâwng bawr zâwnah tak chhing takin puakruk pakhat a pai a; a sakawr chung chuan zin tawh vang emaw ni teh reng dawn ni, a kal kun phei deuh taih taih a, a rui deuh tawh bawk a, a inchhuih leh khat khat ṭhin a.

Matt-a, pistol phawi rang ve tak mai pawh chuan chu tlangval, Dan-a chu mi deh khirh tak a ni ang tih a ring nghal mai a. Chuti ni si, engati nge a la hriat loh? Mi hming thang tam tak te leh phawi rang tam tak te a hre fo tawh ṭhin si a; nge ni, outlaw a niin a hming chu a thlak ta mai zâwk, chu chu mi tam tak chin dan a ni si a....

Matt Katlin-a chu a tho va, a han zi mar deuh hlek a, a thlenna hotel kailawn aṭang chuan a pen thla chhat chhat a, Dan-a luhna saloon, Hotel Palace lam chu a pan ve ta a.

Kawtthlera a kal lai chuan pa lian tak, sa ṭha tak leh hmul phurh chhe deuh mai hian Matt-a chu a lo melh vung vung a. Matt-a pawh chuan thip fe hian a han melh ve a; mahse, chu pa lian leh sual hmel tak chuan zamna chhe tê mah a neiin a lang lo. Engtin mah intibuai lovin an inpel ṭha ve mai a.

Matt-a chuan a rilruin, 'Nang nen he khuaa kan awm dun reng zawngin eng tikah emaw chuan kan kar chu a la buai ngei ang maw le,’ a ti rilru nauh nauh a; mahse, chu chu enghelh zui teh chiam lovin a kal ngaiin a kal miah miah a. Matt-a chuan buaina a zawng ngai lo va; buaina chuan a zawng zâwk ṭhin.

Saloon chhunga Matt-a a va luh ve lai chuan Dan-a chuan card a lo khel mek a; ruih lûat avangin cowboy pakhat chu dawhkan bawhin a lo muhil bawrh bawrh a. Mi an lo tam tawh avangin thawm pawh a ṭha tawh hle a, tu ṭawng ber nge tih pawh hriat loh chu a lo ri nuai nuai a. Matt-a pawh chuan card khelho leh mi dangte chu kal pel zelin bar dawhkan lam chu a pan ta a.

Bar dawhkanah chuan no pahnih a lo inhung a, chu no dawm ve vetu cowboy pahnihte chu tui ti takin an lo titi bawrh bawrh a. Matt-a chuan bar nghaktu hnenah chuan whisky a han lam a, ani chuan a darthlalang hruk fai lai chu chawlhsanin Matt-a chu whisky a han pe a, ani chuan muangchangin a in ta a.

No hnihna tur a in ṭan leh dawn tihah thawm chu a bengchheng ta hluai a. A va hawi phei chuan Dan-ate card khel an lo ni a, 'Eng nge ni ang?' ti rilru chungin a thlir reng a.

Dan-a chuan, “I card la lai pawh ka hmu a ni,” a ti a.

Chutia Dan-a a ṭawng lai chuan a hma zawna ṭhu, pa lian deuh mai leh thau tak Pederson-a an tih chu a ding ta hluai a, a bula ṭhutthleng leh amah daltu dangte chu a vâi kiang a, “Eng lai mahin card ka trick ngai lo; dâwta min puhtu chu rei dam tlâk a ni lo, ka pawt sawm vek dawn!” tih pahin a gunbelt chu a phelh ta nghal a.

Dan-a pawh chu a rawn ding chhuak a, “Tu mah dâwtin ka puh ngai lo, chutiang bawkin tunah pawh khan i trick a ni,” tih pahin a kawnghren chu a phelh ve nghal a, bar dawhkan lam hawiin a gunbelt chu a theh phei ve ta a.

Matt-a chuan zu no dawm chungin a lo thlir ve reng a; saloon chhunga cowboy dang awm vete chu an kiang sang sang a, a laia an insualna tur chu an zuah awl a, an kil bial laih mai a.

Pederson-a chu a sen tul mai a. Dan-a nen chuan an inchen vel a; mahse, a taksa a lianin a sa a muk zâwk a. Tin, amah rau rauah puakruk phawi aiin insual a ti thei zâwk mah a, chin pawh a ching nangiang reng a ni.

Chutih chhung zawng chuan Dan-a chu inring àwm pawhin a lang lo. Pederson-a thinrim chu lawi kawlh ang mai a ni a, a mit te chu a sen rum mai a, a chhia leh ṭha hriatna pawh a hloh phah a rinawm hial a ni.

Thâwk leh khatah, Pederson-a chu Dan-a lam hawiin a dawk phei zawk a, a lu-a Dan-a dul va sut ngei tumin a dawk phei a ni a, mahni inven lam a ngaihtuah tel lo a ni. Va su fuh na se zawng, Dan-a chu beihpui tur a awm tawh lo vang; mahse, a sir lama tlem tawlh pahin Pederson-a bekah tak chuan a lo hnek ta bur a.

Pederson-a chu ama tha chakna nena lo thawk a ni bawk a, chutia Dan-a'n a han hnek ve leh tâk bawk si-ah chuan a leng dawrh mai a; mahse, chu chuan a ti zam chuang lo va, a ti thinur zaw-mah a. Rang zeta thovin Dan-a chu a bawh phei leh ta a, thau viau e ti lo chuan a che rang roh viau mai a.

Dan-a chu inring renga awm ni mah se, Pederson-a chuan a rawn bawh hman ta tho va, an pahnih chuan chhuatlaiah an let dun ta hawl hawl a. Dan-a tlu han tho leh tur chuan Pederson-a kuttum rawn thlawk phei fua mai chu a tawng ta a. A bek chu a ri no chak a, sir zawngin a let nghal hawl mai a, a khaw hmuh chu a fiah lo ruai bawk a.

A tlûk lai den chhen chuan Pederson-a chuan rawn pet leh nghal a tum a, Dan-a chuan a lam hawia pheikhawk rawn thlâwk phei fua a hmuh chuan lo man a tum a; mahse, a man hneh chuang lo.

A nâk thawl chu a rawn chhir ta zawt a; mahse, a ke a lo dawmsak avangin a nâk ruh tliak ngei tur chu a tliah loh phah ta a ni. Dan-a chuan Pederson-a ke chu a han herhsak ta mai a, Pederson-a chu chhuatlaiah a let ve ta hawl a.

Chutih lai tak chuan Dan-a chu a zuang tho vat a, ding chungin a lu a'n thing a; a inthin harh hnu chuan ṭan hmun a han insiam a. Pederson-a pawh chu a rawn tho ve mek a; chu veleh Dan-a chuan a bawh phei rawk a, a kut ding lam leh vei lam chuan a hmaiah a hnek ta zawt zawt a.

Duh tâwka a hnek hnu chuan a hmaiah a tauh bur a, Pederson-a chu chhuatah chuan hmai tauh chawrhin a tlu ta a. Dan-a pawh chu a zawi zo vek tawh a, a hmaiah chuan thisen a luang zawih zawih a, Pederson-a'n a beka a hnek kha a lo fuh hle a ni.

Pederson-a chu a che thei tawh lo emaw tih lai chuan a rawn tho chhuak a; Dan-a lah a lo inthlahdah tawhin Pederson-a chu a lo ngaihsak tawh lo reng reng a. A va hmuh meuh chuan beih a lo tum mek hi a lo ni a, mak a ti hle mai a. Ani ang mihring chu a lo sualpui fo tawh a, Pederson-a anga tuar chhel leh daih rei hi a la hre ngai lo reng reng a ni.

A thil hmuh hmasak ber chu Pederson-a rawn thlâwk phei chu a ni. Dan-a kâwng bawrah tak chuan a rawn tauh nghek mai a, Dan-a chu a zawi nghal hnawk a. Pederson-a chuan Dan-a chu a bawh bet a, a rem laiah chuan a hnek ta pawp pawp mai a.

Dan-a chuan inven a'n tum ngial ṭhin a; mahse, Pederson-a kuttum lo thlâwk chu a dang zo mawlh lo. A hmai chu thisenin a bual huh zûih tawh a, a ngaihtuahna te pawh a tawi zo vek tawh hian a hria a, a mit lah chu a phe ruai mai si.

Dan-a chuan a chakna zawng zawng chu a han sawm khawm a, a theih tawpin a khûp chuan Pederson-a kap bawrah chuan a han chho tauh ta ngheng mai a. Pederson-a chu a rum hawk a, a kap chu dawmin chhuatlaiah chuan a let ta tawp a.

Dan-a chu a zuang tho vat a, a han inthing harh a, chakna petu boruak chu a theih tawka tam a'n hip a, a khaw hmuh te pawh chu a lo chiang leh ta a. Chutah, Pederson-a na tuar, chhuata tal tal chu a pan hnai a, a theih tawpa nain a chhir ta zawt zawt a.

Pederson-a hmai chu hmuh châkawm loh khawp hian thisenin a bual tawh a, Dan-a lah chuan a la chhir zawt zawt mai si a. A nâka vawi thum zet a chhir hnu phei chuan Pederson-a nâk ruh chu pahnih ngawt a tliak tawh a.

Dan-a chuan kil khat aṭanga, “That nghal rawh!” rawn tih ri hi a han hria a, Pederson-a hmaia vawi li ngawt a'n chhuih leh hnu chuan a duh tâwk ta a.

Pederson-a chu han tho leh thei hmel pawh a pu tawh lo va, chhuatah chuan che lovin a let ta reng a.

Dan-a chuan a hmaia thisen kai chu a kawr banin a han hru fai a; chutih lai chuan cowboy pakhat hian, “A chan tâwk chiah a chang a ni,” tih pahin Dan-a lam chu a rawn hawi a, “Mister, ti rawh, ka khilai ang che,” a'n ti zui a, mi dangte pawh chuan Dan-a chu an rawn chibai ta sap sap a.

A duh tâwk a in hnuin bar hnung lam pindan te tak têah chuan a lut phei a, bar nghaktuin tui a lo lum sa diam chuan a insil ṭan ta a.

*****************************

Kum 1860, May ni 23 chu Daniel Clifton-a tana hun ṭha a rawn inher chhuah ṭanna a ni a, hemi kum hian hming ṭhatna tam tak a phur ta a ni.

Dan-a pawh chu an hna thawhna tur lam pan chuan a sakawr chungah a chuang a, a kalna kawng chu a bumbohin a khawkrawk angreng hle a, a sakawr chu duh angin a kal chaktir thei hek lo.

Muangchang leh fimkhur takin an kal a, an kalna kawng sira lungpui chunga lo bawk laiking chu Dan-a sakawr chung chuang lo kal a hmuh chuan a inthiar fihlim thuai a. Ni pawh a sa ṭan viau tawh a, Dan-a pawhin muangchanga kal zelin a hma lam hla fea Phoenix Mining Corporation-a thawkte'n chen nana an hman bûk in chu a hmu thei tawh a.

Dan-a'n a hna thawhna hmun tur a va thlen chuan a thawhpui turte chu an lo thleng kim tawh hlawm a. Chuta an hna thawhna khai khawmtu ber Randall-a chuan, “E, I lo thleng ta maw Mr Daniel Clifton; i lo kal dawn ta lo emaw ka lo ti hman tawh asin. In chhungah hian lo lut phawt rawh,” hawihhawm deuh mai hian a lo ti a.

Dan-a chuan zahzelah, “Nia, ka rawn tlai deuh alawm maw le, kawng ka rawn bo deuh nual atin ni. Keimah chauh a ni maw min lo nghah tawh?” a han ti a, a sakawr aṭang chuan a chhuk ta nghal a.

Randall-a chu putar, kum sawmnga paruk vel hmel pu, inchei uluk zet mai leh hmuihmul zuah ki van mai, hmai sawl deuh leh cher lampang hi a ni a. Mi hawihhawm leh fel tak a ni ang tih chu a chezia leh khawsazia aṭang pawhin a hriat theih mai a.

“A nia sin, kan kal kawng hi a bumbohin kawng a bo riau mai a, Smith-a nen pawh kan ngaimawh thu kan sawi zing viau tawh nâin, he rangkachak laih chhuahna khur neitupa hian a uksak lo êm mai a, 'A ṭha zâwk alawm,' te chu a la ti mai mai lehnghal a. A enga pawh chu ni se, hlawh a awm chhung hi chuan a ṭhaah ngai phawt ang,” Randall-a chuan a han ti a.

Camp chhunga Dan-a leh Randall-a an luh dawn lai chuan Dan-a chuan kawngka sir chhak lama Matt Katlin-a lo ding chu a han hmu a, Mexican cigarette hi tui ti àwm fahran hian a lo pak khu hlat hlat a. Dan-a chuan a han nuih sak a, Matt-a pawh chuan a lo kiai khum sak a, in chhungah chuan an lut ta a.

In chhungah chuan awm rei hman a ni lo va, Randall-a chuan Dan-a mutna tur hmun a kawhhmuh zawh chuan an chhuak dun leh nghal a. Dan-a hnenah chuan, “C Group-ah i tel ve ang,” a han ti a, Dan-a chuan a lu a lo bûk khum zauh a.

Randall-a chuan hmanraw dah khawmna in chu a kawhhmuh hlawm a, chumi chhunga an va luh chuan an hmanrua tur ṭheuh chu an la hlawm a; lungral te, suahdur te leh hmanraw chi hrang hrang a lo tam mai a.

Dan-a pawh chuan suahdur a la a, a chhuak ta nghal a. An awmna piah lung chher chhuan hnuaia pûk awm phei ruah chu a thlir vang vang a, “A lum àwm si a, kawr hâkna chi pawh a ni lo vang ka ti,” a han ti a.

Tu ma'n an hre pha lo emaw a tih laiin a hnung lam aṭang chuan aw thum leh pawr chhup mai hian, “A dik ngei ang. Kawr hâkna chi pawh a ni lo vang, Mr Dan,” a rawn ti a.

Dan-a chuan hnung lam chu a han melh a, pa lian tak, sa ṭha tak leh hmul phurh chhe deuh mai hi a lo nui sung mai a, “Ketchum-a ka ni, Mr Dan, ka ngainat zawng mi leh ka ṭhian duh zawng tak i ni. Nimina Pederson-a i sawisak lai te khan ka hmu ve reng che a, ka ngai sang ngawt mai che,” a han ti a. Mahse, Dan-a chuan lehlam a lo hawi daih tih a hriatin sawi zawm zel chu a hrisel lo a ni tih chu chawp leh chilhin a hre nghal mai a.

Dan-a chuan, “Ketchum, khawi group-ah nge i awm?” tiin a han zâwt a. Ketchum-a chuan, “C group-ah ka awm; nang zâwk?” tiin a han zâwt let ve a. Dan-a chuan, “Kan awmna a inang a nih chu,” a ti sam et a.

Ketchum-a chuan, “A ṭha a nih chu - kan thawk dun thei dawn a. A nih, ti rawh i kal ang hmiang,” tiin a han sawm zui nghal a. Dan-a pawh chuan engtia chhang lem lo chuan a zui ve mai a.

Pûk deuh ruih hian rangkachak khur chu a awm a. Dan-a leh Ketchum-a pawh chu an hmanrua pu chungin rangkachak khur kawngka-ah chuan an ding a, chutah chuan Randall-a chuan a pawl tê tein a luhtir ta a. Dan-a-te group pawh chu a chhung ril bera thawk tura tih an ni a; tin, an zingah chuan Matt Katlin-a pawh a lo tel ve a.

Khur chhungah chuan an lut ta a. Pawn boruak ênga awm an ni bawk a, han luh thut ralah chuan a lo thim hle mai a. A lut apiang mai chu an inchhuih khat khat mai a; mahse, rei lo têah an hmu leh thei ta thuai a.

Chu khur chu a thûk lem lovin a zauin a zau zawk a, chung lam nghet lo deuh do nan thing ṭhenkhat a lo kawkalh deuh nuk bawk a. A khur chhung zau laiah chuan a chung te chu a sangin a pang te chu a khuar kek kuk hlawm a.

A thawk hmasate'n hma an hruai a, an hnungah thawk tharho chuan an zui bawk a. Chu khur pang ṭhenkhat leh lung thuahthip ṭhenkhatte chu dynamite-a halna hnu tih hriat tak mai hian a khi reh ruah bawk a.

Hna an han thawk ṭan ta a. Dan-a leh Matt-a chu thawk dun mah se an inbe khat angreng hle a; Ketchum-a lah chuan Dan-a tih loh mi dangte chu a be êm em lo va.

Dan-a leh Matt-a chuan kut hna an thawk khat bawk aniang, an hah dunin an thlan te chu a chhuak tam bik emaw ni chu tih tur hi a ni a.

Khur chhungah chuan bengchhen an awih lo va; mahse, suahdura lei laih thawm leh lungrala laih thawm te chu a thum tlut tlut a.

Ketchum-a lei laihnaah chuan lungral lian deuh mai hi a lo awm a, amah mai chuan han tih vak ngaihna a hre lo aniang, Dan-a chu a va melh zawk a.

Dan-a chuan a lo hriat thiampui vat a, chu lung chu an pahnih chuan an kar chhuak thei ta hram a. An han kar chhuah chuan Matt-a'n a rawn pui ve leh vat a; Ketchum-a chuan lei a lo laihsan leh a, Dan-a leh Matt-a chuan sir deuhah an kar sawn ta a.

Dan-a hah hmelhmang chu a chhe kher mai, “Kha kha, kawla ni chhuak chhiara kan hna tur chu a ni si a maw?” a han ti a. Mi dang tu ma’n an chhang lo va, mahni hna ṭheuh an thawk zui mawlh mawlh a.

Dan-a chuan, “A hahthlak dawn kher mai,” a han ti leh ngawt a. Matt Katlin-a lah chu ngawi rengin a thawk mawlh mawlh a.

Nilenga thlantui chhuak zawih zawiha an han thawh meuh chuan Dan-a chu a chau tak zet a, a hna chu bansan mai a duh ut ut a; mahse, a rilru chu a siam a, 'I'n thawk rih phawt teh ang, kar khat êm pawh a la liam hlei nem maw le,' a ti rilru nauh nauh a.

Ni tlâk hma deuh chuan ban a lo hun ta a. Dan-a leh Matt-a pawh chuan inbe lem hlei lo hian an suahdur ken chu an pu ve ve a, khur chhung aṭang chuan an chhuak ta a.

Ketchum-a chuan, “Khur chhungah thawpik zetin kan thawk a; chu bâkah a thimin a lum bawk si a, pawn khaw eng chu kan tan chuan vanram tla fual a ni ringawt alawm maw le,” a han ti a, ha bal deuh chung chuan a ṭhen ṭhu mai a.

Tuizem lianpuia tui chuan an han inbual leh tê te a, “Kan inbual ni tin peih dawn emaw ni le? Boruak a lo vâwt ang a, thlasik rim a lo nam chinah chuan insil satliah ringawt pawh hi ninawm tham a tling a nia,” a'n ti leh a.

Matt-a chuan, “Kan peih loh tâk leh kan inbual lo mai aniang chu,” a lo ti a, mi dangte chu an lo nui dar dar a.

Zanriah an ei kham chuan rei pawh ṭhu lovin mut hahdam an duh deuh vek a. Dan-a ep chiah chhak lamah chuan Matt Katlin-a a mu a; Ketchum-a chu Dan-a sir chiahah a mu bawk a.

Dan-a leh Ketchum-a chu mu chungin an titi mawlh mawlh a. Ketchum-a chu phawi rang tam takte chanchin sawiin a phul hlut mai a; Dan-a chuan a lo ngaithla reng emaw a ti a, a lo muhil daih tawh a ni tih a han hriat chuan phun bul bul chungin mut zai a rel ve ta a.

An thawh hmasak ber zan chuan an hahin an chau tlang bawk a, an muhil thuai hlawm a.

Mahse, Matt Katlin-a erawh chu rei fe mai khuma mu chungin a inngaihtuah a. Tuna a hlawh chu khawl zel a tum a, bank-ah dahin a sum chu a vawng zel ang a, tun aṭanga kum thum leh a chanve velah chuan mahni in leh lo a din ve thei tawh dawn a ni.

Mahse, chumi ni tur pawh chuan sum lak luhna kawnga a tluan viau a la ngai cheu a ni. Chûng hunah chuan Matt-a chuan nupui neiin mahni kut leh kea din a zir ve tawh ang a, chutianga rilru nei taka a chêt phawt chuan rei lo têah ranch puitling a nei thei mai dawn a ni.

Chutih huna a nupui fanau duh takte nena an in kawta an infiam ho lai leh ralkhata an bawng tla dam dam tur chu a mitthlain a hmu a; mahse tunah zawng, duh thu sam mai a la ni rih si!

Ni tina thlan tla zawih zawiha an thawh hnu chuan kar khat chhung rei lo tê chu rei ti takin an hmang tlingtla ta mai a. Kar tawp Inrinni tlaiah chuan an hlawh tur ṭheuh chu Clerk chuan a sem ta a.

Chu Clerk chu pa sang tak, khabe sei deuh leh ring sang deuh, hmul ngah tak, inchei peih angreng deuh mai hi a ni a; pen atana an hman ṭhin, ar pa chang hi a hum ran a.

A group tê têa an inṭhen hnuah chuan anmahni mi mal hming ṭheuh chu a lam leh a. Clerk chuan pawisa a pêk dawn chuan ama'n a ziah zawh hnuah anmahni ṭheuh chu an hming a sign-tir leh vek a; tichuan, hlawh chu a pe ta chauh a.

Dan-a'n hlawh a han lak chuan, “Dollar sawm,” tih pahin a'n tuai ri pharh a, a hnunga, “Matt Katlin,” tih thawm chu hre pha mah se a um-e tawh chuang lo. Phur fe maiin Lumas-a nen‚ Silas Ketchum-a nen chuan khaw chhung lama kal turin an insiam nghal thuai thuai a.

Ṭhiante aia thleng hmasa bik nih an tum hrim hrim nge an sum chu chen an châk tawh, rei lo têah an insiam peih ta mai a. An sakawr chungah chuang kaiin khaw chhung lam panin hmanhmawh deuhin an tlan ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 26th, 2019, 7:53 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 3
(Rozami Pachuau)

Dan-a te'n khaw chhung an va thlen chuan a thim viau tawh a, saloon kawtah chuan an sakawrte chu an thlung thuai thuai a, Hotel Palace Saloon chhung lam chu an pan ta a.

Rin ai takin mi an lo tam a, Ketchum-a chuan a enga mah hmain bar lam chu a pan nghal nal nal a, bar dawhkan chum dum pahin, “Whisky um hnih rang takin.... Dang rovin ka thi ṭep tawh a nia,” a han tih chuan mi dangte chuan an lo en ṭhap a.

Dawhkan kil tuma ṭhutthleng pawt sawn ve mek Dan-a pawh chu a hma zana thil thleng avangin mi hriat a hlawh angreng hle a; a bula ṭhu mek Lumas-a pawh chu khaw chhung mi a nih avangin mi tin hriat a ni a.

Bar nghaktu chuan, “A àwm reng a ni. Hna in thawk rim bawk a," a lo tih lai chuan Ketchum-a chuan, “Chiar kual chiar kual lo khan han ti thuai rawh,” a'n ti a, bar nghaktu pawh chuan a rawn pe ta thuai a.

Ketchum-a chuan a kut lehlama um pahnih keng kawpin lehlamin no ruak pathum a keng bawk a, Dan-ateho ṭhutna lam pan chuan a keng phei ta a. Dawhkan bul a va thlen chuan Lumas-a chuan a zu ken chu a lo lâk thlakpui thuai a, dawhkanah chuan an dah ta a.

Lumas-a chuan um chhin chu herh hawngin no ruakah chuan a han thli chhuak a, a thlit chhuah zawh veleh ama no chu a dawm nghal a, “Cheers!" tih pahin a zu chu a lem ta vek a. Dan-a leh Ketchum-a'n an lem ṭan ve chauh tih chuan Lumas-a chuan a no-a mi chu a lem zo vek tawh a.

An hna thawhpui dangte an lo thlen lai chuan an lo ṭha hle tawh a, Ketchum-a aw phei chu a ring lehzual a. Chutih lai chuan Matt Katlin-a pawh a lo lut ve tawh a, whisky lam pahin saloon sir kil lama mi tlemna lai deuh chu a chuh a, zu an rawn thlitsak hnu chuan eng mah sawi lovin amah chuan a in ta a.

Dan-ate zu inna lam panin James Harris-a pawh bottle hum chungin a rawn phei ve a, “Zanin chu a nuam hle mai a, kan hna thawh hahthlakzia kha ka theihnghilh vek," tih pahin chair pakhat la ruakah chuan ṭhuthmun a han rem a.

Harris-a chuan Ketchum-ate ṭhianho zu no in phaiah chuan zu chu a'n thlitsak diat diat a; amah lah chu rin aiin a rui hma zêk lehnghal a. Chutih laia harh fim deuh ber chu Matt Katlin-a chu a ni mai a, ani lah chu inngaihtuah dîng tih hriat fahran hian no a dawm a, a en ngai a en reng mai bawk si a.

Saloon chhunga cheng leh saloon hna thawk ve nula, hmelṭha leh pian nalh fahran mai, a hming Debbie Gadner chuan Dan-ate zu inna chu a rawn thleng phei dawn ṭep tawh a; chutih lai chuan Dan-a chuan a ṭhiante no lâk kan rual chiaha no lek kangin, “Arizona ram nula hmelṭha ber hmingin,” tih pahin a zu chu a khiat ta khawlh khawlh a.

Ketchum-a chuan a zu no ruak chu dawhkana nghah rik chawrh pahin, “Arizona nula hmelṭha-i chu heta hi,” tih pahin Debbie chu a lo en ha a, a lu chu a bu lak lak tawh a.

Debbie-i'n an awmna zawn a pelh dawn lai chuan James Harris-a chu a lo siai suk a; Dan-a erawh rui ve tho mah se a ṭawng tawh lo va, Lumas-a lah a ruih lûat avangin a muhil bawrh bawrh a.

Debbie Gadner-i'n Matt-a a va hmuh lai chuan lehkhathawn tur ni àwm tak hi a lo ziak mawlh mawlh a.

Debbie chuan, 'Matt-a hi zawng, cowboy dang nena tehkhin ralah chuan a va danglam bik tak êm! Ani hi zawng, a nungchang a mawiin a zahawm a ni. Eng nge maw a ziah le? Tu lehkhathawn tur emaw chu a ni phawt ang. Nupui nei tawh a ni ang a, a nupui lehkha tur a ziak aniang. Nupui a nei tawh tak tak ang em aw...?' tiin a rilruin a lo ngaihtuah neuh neuh a.

Matt-a chuan a lehkha ziahna pen chu dah pahin in tur dang a han lam belh leh a; a lam panin Debbie chu a rawn kal a, Matt-a no chu a rawn thlit khahsak a. Matt-a'n he khua a rawn luh ni aṭangin Debbie leh Matt-a hi lo inhmelhriat tawh an ni a; mahse‚ inhmelhriat satliah mai an la nih avangin inkawm dun erawh chu an la nei lo a ni.

Nuih deuh saih pahin Debbie chuan, “Tu lehkha nge i ziah a? I nupui lehkhathawn tur em ni?” tiin a han zâwt a; chutih lai chuan Matt-a sawmna pawh nghak lem lovin a bul ṭhutthlengah chuan a ṭhu ve nghal a.

Matt-a chuan, “Ni lo ve, Miss Gadner.... California rama Estate Agent lehkhathawn tur a nia ka ziah ni. Ka chenna tur ram ṭhenkhat lei ve ka tum deuh alawm,” tih pahin zu thlit sa chu a han lem a, “Eng tik ni-ah emaw chuan keima mi mal ta ngei tur ranch la neih ve ngei ka tum a ni,” tiin a lo chhang a.

Debbie chuan, “Matt, i fingin thil ṭha i hre hle mai. Hetiang a nih chuan nakinah mahni in leh lo dinin rancher hming thang leh hlawhtling i nih ngei ka ringin ka duhsak che a ni,” a ti ta a.

Matt-a chuan, “I mi duhsakna chu ka lawm e,” a lo ti ve bawk a.

Debbie chuan, “Matt, a nih, he rangkachak laih chhuahnaah hian thawh rei i tum ang em? Nge ni, i bansan leh thuai zâwk dawn?” a'n ti leh a.

Matt-a chuan, “Ka sawi thei mai bik lo. Tluang taka kan thawk thei a nih chuan kum hnih kum thum bâk ka awm lo vang; chutah pawh chuan sum ka la inkhawl ngah thei lo a nih chuan a aia rei pawh a ni maithei,” a lo ti a.

Matt-a chuan, “Miss Gadner, kum eng zât nge i nih tawh?” a ti ta daih a.

Debbie chuan mak ti deuha Matt-a chu en pahin, “Kum sawmhnih pakhat ka ni; eng atan nge i tih a, Matt?” a han tih chuan Matt-a chuan, "Ka han zâwt mai mai che a nia," a lo ti sam et a.

Dan-ate zu in pawh an rui tlang tawh bawk a, an ṭawng te pawh a phelh phung tawh a.

Ketchum-a zu rui thle deuh buk buk chuan Matt-a lam chu a va hawi a, Matt-a leh Debbie lo inbe mawlh mawlh lai chu a va hmu ta a. Mani lo maha lo ngaihzawn rilruk ve nâk alaia chutia Matt Katlin-a bula hlim àwm deuh maia a han ṭawng vel lai a'n hmuh chuan a thin a ur thut a, a zu no chu dawhkanah chuan a nghat ri ta chawrh a.

Silas Ketchum-a chuan, “Hey, Dan! Han hawi phei ve teh‚ Debbie saw i hmu em? Saw inchei atchilh mi â pa bula saw a awm saw!” a ti ṭeng chhuai mai a.

Dan-a leh James Harris-a pawh chu an hawi phei ve nghal a. Ketchum-a chuan, “Saw mi â pa sawn tu nge ka nih a hre nghal ang!” a tih lai chuan Harris-a zu rui pawh chu a lo phur ve êm êm mai a.

Dan-a chuan, “Mr Ketchum‚ ngawihsan mai mai rawh, mahni kuang lo nawr nawr hi a ṭul lo a nia,” a lo ti a.

Ketchum-a chuan, “Eng nge ka kuang lo a nihna?” tih leh thawh a rual ta a.

Dan-a lo rui ve deuh tawh si, thin thawk chuan dawhkan chu a chum ri ta dum a; a chum rik thawmah chuan ruih lûat avanga mumang rama lo cheng mek Lumas-a chu a harh zawk mai a.

“Mr Ketchum, ani sawn kan pawi eng nge a sawi? Eng mah sawi a nei lo. Duh leh inchei te chu peih hlum dawn ang hmiang, a ṭha tih zawng a ni ve mai a. Debbie chu i duh ve a nih leh dik takin rim ve mai la, chhai ve ta che. I hmakhua chu su kua la; mahse, mi pawi sawi lo lakah buaina siam tumin inrawlh chu tum suh,” a ti ta a.

Ketchum-a chuan Matt-a lam pan pahin, “I pawi chu a sawi lo maithei; ka pawi erawh chu a sawi alawm. Dan, kei zawngin i ngaih dan kha ka ṭawmpui thei lo che a ni,” a ti a. Matt-a lam panin a pên phei chhut chhut a, a ruih vangin a pai leh khut khut ṭhin a.

Dan-a chuan thawh pahin, “Kal suh! Lo lêt rawh, Ketchum, mi â pa!” a han ti a; Ketchum-a lah chuan a ngai pawimawh lo nasa mai si!

James Harris-a chuan Dan-a hnenah, “Dan, va ti buai lo mai rawh. Engtin nge an intih teh reng ka hmu châk a nia,” a han ti zet a; amah leh amah chu a inthiam lo leh aniang, a ne ne ral ta mai mai a.

Dan-a chuan‚ “Nang pa hian Ketchum-a hi i ṭan a ni maw? A lam ṭang i ni ti raw?” a han ti a.

Harris-a chuan Dan-a chu a'n melh zawk a; mahse, Dan-a mitmeng thip khai mai, keitê thinrim mitmeng ang maia meng chu a en rei ngam lo va, a mit a la sawn leh ta thuai a.

Ketchum-a chuan Matt-a leh Debbie kil lai dawhkan chu a va chum dum mai a. Matt-a zu in lai um leh no chu a tlu nghal a, whisky chu a baw nghal hawk hawk a.

Ketchum-a zu rui chuan chher chhuai hian, “Hei, Katlin, eng nge hetah i tih ve reng reng? A rang a rangin saloon hi chhuahsan rawh. Chu chu i hria em? Thu pêk a nih chu! Nangni ang mihring hi Debbie hian a mamawh lo che u, mipa dik tak kawm nan chauh hun a nei,” a han ti a.

Debbie chu a ṭhutna aṭanga thovin thin phu hlawp hlawp hian Ketchum-a chu a lo en a.

Matt-a erawh chu a ṭhut ngaiin a la thu reng a. Debbie chuan Matt-a chu a lo hlauhthawnpui hle a.

Ketchum-a'n, “Ka thu pêk a nih chu i hria em, Bengtululh-pa?” a tih zawh rual chiah chuan rang lutukin Matt-a chuan a ṭhutna sira a winchester rifle tun chu a la a, Ketchum-a áwm zâwnah chuan a tin ta teu mai a.

Ketchum-a chuan puakruk chuh ve-na hun a nei mawlh lo. A tih ngaihna hre lo chuan, “Hey, mi â pa!” a'n ti thla ngawt a.

Matt-a chuan, “Mr Ketchum, i chêt dan a âtthlak kher mai! I thu pêk chu kei chuan ka zawm thei lo a ni; mahse, keiin ka zawm theih si loh chuan nang talin i zawm theih a ngai dawn a ni. Tunah ngei hian i thu pêk zahawm tak chu zawm la, he hmun hi chhuahsan rawh le,” a ti ta chhak mai a.

Ketchum-a zu rui chu a harh nghal sawng sawng mai a; chutih nâk alai chuan Matt-a chuan, “Thuai vat!” a lo ti leh a.

Ketchum-a chuan, “Katlin, tunah kha chuan rifle i hum a, kei ai chuan i chan a ṭha zâwk ngei e; mahse, a leh pek kan la ngaichang dawn nia,” tih leh kal sawn chu a rual ta nghal a.

Matt-a chuan, “Mr Ketchum, silai i nei ve tho alawm. Tu nge a rang zâwk chu kan han fiah nghal dawn em ni?” a han tih chuan Ketchum-a kal lai mek chuan kam khat mahin a chhang lo. A kal chhuah pah chuan James Harris-a leh Lumas-a chu lu a han bûk khum zauh a, an zavai chuan an chhuak ta a.

Chutih chhung zawng zawng chuan Debbie chu pindan sir kil khatah hlau êm êm hian a lo ding khur zawih zawih a.

Ketchum-a chhuah dawna Lumas-a leh Harris-a a'n melh dan leh an pathuma an chhuah tâk daih dan leh boruak awm dan chuan thil dik lo a her chhuahpui dawn tlatin Dan-a chuan a hria a. Dan-a hi mi dik a ni a, dik taka chet hi a ngainat zawng a nih avangin Matt-a chu a ṭan tlat a ni.

Ketchum-a chu a ṭhian kawm lai ni mah se, tun ṭuma a chet dan chu dikin a hre tlat lo va, a ṭan lo a ni. Tu pawi mah sawi lova Matt-a leh nula ṭhu lai a va pawngpaw tih buai ngawt kha thiamin a hre tlat lo.

Matt Katlin-a pawhin a duh tâwk a in hnu chuan chhuah a tum ve ta a. A chhuak tur chu Debbie chuan kawngka thleng a va thlah a; an inṭhen dawnin Debbie chuan, “Mangṭha le Matt, kan la inhmuh nawn leh ngei ka beisei,” a han ti thawp sat a.

Matt-a chuan, “Inhmuh nawn leh ngei chu ka tiam a che. Mangṭha le, Miss Gadner,” a tih hnu chuan Debbie chuan a luhsan leh ta a.

Chutih lai vel chuan Dan-a pawh chuan a zu no chu a tlak ve chiah a, boruak awm dan ṭhaa a hriat loh avangin Matt-a chhuah hnu lawkah chuan a chhuak ve ta a.

In kil sir thimthamah chuan Ketchum-ate ṭhian thum chu an ding a, a thatho tâwk chauhin zu an in bawk a, an phur hle a; an zinga rui ber Lumas-a pawh a harh tawh viau a.

Matt-a lo chhuak chu Ketchum-a'n a va hmuh chuan, “Saw le, kan zawngsen-pa chu a lo chhuak e; a va han rethei dawn e aw...!” a ṭhiante hriatah chuan a han ti a.

Matt-a chu kawtthlerah chuan a rawn phei chhat chhat a. Eng mah a beisei loh avang leh a lo in ve deuh tawh avangin fimkhurna pawh a tlachham hle a. Ketchum-ate pawh chu Matt-a'n an awmna zâwn a rawn thlen veleha bawh nghal huk tumin an lo inring ran a.

Chutih lai chuan Matt-a pawh chuan an awmna zâwn a rawn thleng phei ve chiah a. Ketchum-a chuan, “Khai le!” a tih rual chiahin thim zing aṭang chuan Matt-a chu an bawh nghal huk a; Matt-a chuan chutiang thil a lo thleng ang tih a beisei loh êm avang chuan inrin pawh a lo inring lo va.

Harris-a chuan Matt-a chu a bawh thlu ṭhuai a, Matt-a rifle hum lai chu a leng nghal lâwp bawk a; chu rifle tla chu rang mangkhengin Lumas-a chuan a lo chhar vat a. Chutih lai tak chuan Matt-a chu a rawn tho chhuak mek a, Lumas-a chuan Matt-a kawr nghawng hnung lamah a lo ṭham a; chu chu remchanga hmangin Ketchum-a chuan arsi lang chum chum khawpin Matt-a chu a lo hnek ta a, Matt-a chu a leng dawrh mai a.

Harris-a leh Lumas-a chuan Matt-a chu an ṭham tho va, a kut lehlam lehlamah an vuan bet a, chu tak chu Ketchum-a chuan remchangah bawk la lehin a dulah chuan a hnek ta pawp pawp mai a.

Chutih lai chuan saloon kawngkhar chu a rawn innam hawng a, Daniel Clifton-a chu a rawn pên chhuak a; kailawna a chhuk thlak hmain kawtthlera Matt-a an lo sual rawn mek lai chu a va hmu nghal a, 'Ka lo rin ang ngei a ni, Matt-a chuan ṭanpui a ngai hle mai a,' ti rilru chungin kailawn aṭanga zuang thlain an insualna lam pan chuan a tlan ta vak a.

Lumas-a'n rifle kawma Matt-a lo chhut a tum lai mekin Dan-a chuan a kawr hnungah a va man hman a, a kuai her nghal dawrh a, a hnek ta pawp a. Lumas-a chu hmai lei si chawrhin a tlu ta a, a rifle ken chu a theh leng nghal lâwp bawk a.

Matt-a chuan Harris-a kaiza-ah chuan a theih tâwpa nain a han pet nghek a, Harris-a pawh chu a thlep nghal hnawk a.

Chutih lai chuan Ketchum-a chuan Matt-a chu rawn hnek a lo tum mek a; mahse, ani chu a lo inveng hman a, a lu a lo thle zoh hman a. Ketchum-a kuttum chu Matt-a bek sirah chuan a thlawk phei vuai a; Matt-a chuan chu chu remchangah hmangin Ketchum-a bekah tak chuan a lo hnek pawp mai a, Ketchum-a chu a pai nghal chawn chawn a.

Harris-a rawn tho leh mek lai chu Dan-a chuan a pheikhawk chhip zum fahran chuan a lo chhir nghek mai a, a hnu leh awm lovin a tlu ta nghal tawp a.

Dan-a hnung lama rawn veh phei mektu Lumas-a chu dimna nei hauh lovin Matt-a chuan a kuttum chum beng buang chuan a lawk ta bur a. Lumas-a chu a dâk nghal awrh a, a kat nghal nawk bawk a, Matt-a chuan bawh zuiin a hnek nghal pawp pawp a.

Dan-a chuan a theih tawpa nain Ketchum-a chu a han hnek a, Ketchum-a chu ke vawr ṭhawtin leiah a tla thum ta ṭawk a. A rawn ṭhut chhuah leh chuan ama hriat tâwk lek hian, “Dan Clifton-a a ni maw? Katlin-a lamah a ni maw a lo ṭan?” tih leh thawh a rual a, a tlan ta chiam mai a. A hnungah Lumas-a chuan chak fe hian a zui a; an chau tawh viau emaw tih laiin tlan chhiat lamah chuan an la chak kher mai!

Harris-a erawh chu Dan-a khan a lo chhir fuh êm kher mai a, a hmai zawng zawng chu thisenin a bual khat vek a, han tho chhuaka tlan chhe leh chi pawh a ni tawh lo a ni. Han sawisak zui zel chi lah ni hek lo, amahin a insaseng ve thei hram hram chauh a, Dan-ate pahnih pawh chuan an um-e tawh lem lo a ni.

Matt-a chuan, “Ka lawm e, Dan,” a han ti a.

Dan-a chuan, “Saloon aṭanga ka rawn chhuak chiah kha in buai lai ka rawn hmu che u a, ṭanpui i ngaiin ka hria a, ka rawn tel ve ta mai a ni. Kan Zawng-ate chu insual aiin tlanchhiat lam an thei zâwk a nih hlawm kha,” a lo ti a.

Matt Katlin-a chuan kut rawn phar chhuah pahin, “Tun aṭang chuan i ṭhianah min chhiar tel thei tawh ang chu maw?” a han ti a.

Dan-a chuan, “Ka lawm zawng tak a ni ang chu,” a lo ti a, a kut chu a pe ve ta nghal a.

Chumi darkar aṭang chuan Dan Clifton-a, tlangval hmelṭha leh huaisen, sang zeih zawih chu tlangval hmelṭha tak, lian tak leh ruakhau ṭha tak, khabe ruh tlo tlet tlawt‚ Matt Katlin-a nen chuan kut thinga inchibai dun meuhin ṭhianah an lo insiam ta a.

Matt-a'n a rifle, leia lo tla ngat chu chhar paha, “Mr Dan, ti teh, tlem azawng i'n lem dun leh hlek ang hmiang," a han tih chuan Dan-a chuan, “I lem dun ang hmiang,” tih leh kal chu a rual ve nghal mai a. Phur fein saloon chhung lam chu an pan dun ta nghal a.

Chuta ṭang chuan Dan-a leh Matt-a chu ṭhian inṭhen thei lo an lo ni tain, an thawk dun ta zel a. An mizia chu hrang hle mah se inngainatna thûk tak an lo nei dun ta a. Harsatna thûk tak tawk dun mah se, su kiang turin an pahnih bawk chuan lungrual takin an thawk dun ṭhin a ni.

******************************

Kum 1861, February ni 5 a ni a, Phoenix Mining Corporation Company chu mi sual, outlaw ni bawk, Stan Smithson-a leh a hote'n an rawn bei thut mai a.

Dan Clifton-a leh Matt Katlin-a chu pindan pakhata an awm dun lai a ni a; an ṭhian dangte erawh chu chu lai hmuna an awm remchan loh lai tak a ni bawk nen, “Outlaw... Outlaw...!” tia au thawm an han hriat chuan rang deuh maiin Dan-a chuan a puakruk a phawi nghal a, Matt-a pawh chuan a winchester rifle chu a chuh nghal bawk a.

Smithson-a leh a hote chu chak deuh maiin sakawrin an rawn tlan a; an hmaah chuan hlau leh hmanhmawh êm êmin Ketchum-a chu tlan chungin a rawn au phei hi a lo ni a; mahse, rei a tlan lo kher mai! Puakruk hi a ri ṭhuai a, Ketchum-a chu ar thla khirh thlak ang tawp hi a ni nghal a.

Dan-a chuan a puakruk hmeh puah ṭhuai ṭhuai pahin, “E heu! Ketchum-a an that der mai!” a han ti a.

Matt-a chuan, “Ani ai chuan kan chan a la ṭha hret; mahse, rei kan daih bik hauh lo vang‚” a lo ti a.

Smithson-a chuan, “That fai nghal vek rawh u,” a han ti tuar tuar a.

A sawi zo chiah tih chuan Matt-a winchester chu a puak nghal ṭhuai a, outlaw pakhat chu a sakawr aṭang chuan a tla nghal tawp a; chumi rual deuhthaw chuan Dan-a puakruk pawh a ri ve nghal thawr bawk a, Smithson-a sir chiaha awm, pa zang kul khen khawn leh tih mawh hmel fahran, a ṭhiante'na 'Hook' tia an koh mai chu a kun nghal ngawih a, sakawra rei inban tang lo chuan leiah a tla ta nghal a.

Silai rawn puak ṭhuai chuan Dan-a awmna sir tukverh thing chu a rawn kâp per sawk a; a them per chuan Dan-a hmai tak chu a va deng siah mai a, a hmai pawh chu a thi nghal sar sar a. Chu veleh Dan-a chu rang deuh maiin a tlum lut leh ta nghal a.

Matt-a chuan uluk deuh zâwkin a winchester chu a han lek kawh leh a, a lam hawia silai hmeh puah lo tum mektu outlaw pakhat chu a va kap leh pawp a; ani chu a puakruk, van lama vawr meuhin a sakawr aṭang chuan a eu liam ta tawp a.

Smithson-a puakruk puak ṭhuai chuan amah rawn kah tum leh mektu, Matt-a beksam chu ṭil ṭhawt khawpin a va kap a, Matt-a pawh chu a dahna tukverh aṭang chuan a tawlh kir leh ta vut a.

Matt-a chuan, “Dan, kan ṭanhmun a ṭha lo tlat mai, silaimu kan ngah tâwk bawk si lo. Heti chuan rei kan ṭang lo vang; nge ni, min kah hlum hma hian kan inpe zâwk mai dawn em ni?” a han ti a.

Dan-a chu a ner sawk a, “Inpêk â! Chutiang thil ho chu ngaihtuah duh suh, Matt,” a lo tihsan ta daih a.

Matt-a chuan, “A nih a hnu, eng nge i ngaihtuah chu sawi la; chuti a nih loh vek chuan Ketchum-a chan kha kan chan a ni mai,” a ti vin ta hlar a. Chutih chhung chuan an lam hawiin silai a puak reng bawk a.

Dan-a chuan, “Matt, remchang ka hria e. Kawngka hi ka bawh hawng ang a, chutih chhung chuan nangin i lo kap buai ang a; kei chu bomb dahna in (Explosive shed) lam pan in ka tlan ang a, chuta ṭang chuan kawng dangin kan bei thei tawh ang,” a han ti a.

Matt-a chuan a lu a lo bu nghat a, “Thlan tur dang kan nei chuang lo!” tih pahin Dan-a chu a va melh zawk a, mi sual lam hawiin a winchester chu a hmet puak leh a, pakhat chu a sakawr bawh chhanin a kun nghal ngâwih a.

Chutih lai chuan Dan-a chuan kawngka bawh hawn rawk pahin a puakruk chu a hmet puak ta ṭhuai ṭhuai a, Matt-a pawh chuan a winchester chu a lo hmet puak ve reng bawk a.

Dan-a chu a theih tawpa chakin explosive shed awmna lam pan chuan a dawk phei zung zung a, silaimu chuan a rawn thawi phei fua fua a, mu khat phei chuan a kawr ban a rawn thawi thler duai mai a.

Stan Smithson-a chuan, “Finish him off! That nghal rawh u!” a lo ti tuarh a; mahse anni, sakawr chung chuang lai chuan cowboy tlan lai mek chu an kap fuh thei bik lo.

Dan-a chuan, 'Ka thleng hman ngei tur a ni,' ti rilru ran leh tum ruh takin explosive awmna in chu a pan phei mek a. Chutih chhung chuan Matt-a pawh chu a lo awm mai mai bik lo. A winchester rifle puak ṭhuai ṭhuai chuan a lo tudai a, mi sual rualte chu a chhaih buai viau mai.

Smithson-a chuan, “Kha mihring kha a rifle chawpin dah ṭha thuai rawh u!” a lo ti leh tuar tuar a; mahse, chu êm zawng an ti thei bik lo.

Matt-a'n a lo kah buai lai chu remchangah lain Dan-a chu explosive shed-ah chuan a zuang lut dawrh a, a theih anga rangin a che nghal zung zung a. Rei lo têah a duh ang chu a ti zo nghal thuai a, a savun iptê-ah chuan a khat ṭanin dynamite chu a ak ta a.

Phur rilru tak chung hian, 'Kan zawngho chu Chinese-ho intih hlimna ang maiin mei hna thawh ka han hrilh teh ang, an hnam chin dan hi ka ngainat zawng tak a ni bawk a...,' ti rilru nauh nauh chungin hmanhmawh takin kawngka lam chu a pan nghal a.

Matt-a chuan a lo la kap char char a; mahse, rei han dang thei chi a ni tawh lo a ni. Chu chu amah pawhin a hai hauh lo va, Dan-a a rawn lan har vaih chuan a chan chu Ketchum-a chan ang bawk kha a ni ang tih a hai hek lo.

A awmna in chu an rawn hual tawh a, a rilru chuan Dan-a chu che muang a ti tawh kher mai. 'Dan-a chu engti zia nge maw ni le? A va muangchang ngai êm! Rei ka dang thei tawh dawn si lo...,' ti rilru chungin amah hnaih bertu chu a han kap thla tawp a.

Dan-a, kawngka aṭanga rawn dâk chuan Matt-a dinhmun derthawnzia chu a rawn hmu nghal a, “Poor old Matt, i dinhmun a va derthawng êm! Ka tan chêt vat a hun a ni,” tih pahin a dynamite hum chu a dep kai nghal a.

Chutih lai chuan Matt-a chuan thih mai loh chu hmabak a nei tawh lo va, an lo hual bet vek tawh a ni. A vanneih chuan pahnih khat chu a la kap hlum maithei; chu bâk erawh chu....

Chutah, outlaw pahnihte chuan Dan-a chu an rawn hmu ta a; mahse an tlai hret a ni. An lam hawiin Dan-a chuan dynamite chu a vawm phei a; outlaw pakhat chuan Dan-a chu kah pawh tum lovin a thil vawm phei chu, “Eng nge ni?” a lo ti tuarh a.

Dan-a chuan, “Ka chibai bûkna che u a nih kha!” a lo ti nghek a; chumi rual deuhthaw chuan dynamite chu a puak ta a. A khu rum rum mai a, eng mah a hmuh theih ta loh a. A khu a han reh meuh chuan outlaw pali lai chu an lo let phung mai a.

Smithson-a leh a hote pali la dam chuan Dan-a awmna lam hawiin an sakawr an rawn kheng a, an silai an rawn hmet puak bawk a.

Matt-a pawh chu a tawmna pindan aṭangin a rawn chhuak a. Smithson-a chuan Dan-a chu, “That nghal rawh u!” tih leh hma lama rawn tlan chu a rual a.

Dan-a chuan, “Chutiang zawngin ka ngai lo,” tih leh a dynamite deh kai sa chu an lam hawia vawm a rual a. Chu dynamite puak khu chuan par a chhuang nghal luih a, chutiang thil hlauhawm leh thih theihna bomb puak zingah chuan silai chuan hlutna a nei tlem hle mai.

Stan Smithson-a leh a hote pahnih chuan Boot Hill lam an pan leh ta a. Smithson-a sakawr phei chu a pherh vek a, amah pawh chuan hmel hmuh tlâk alawi a nei lo. A la dam chhun outlaw pahnihte chuan silai an chuh ngam ta lo va; a chhan chu, Matt-a winchester leh Dan-a puakruk chuan an lam a hawi tlat avangin!

Dan-a chuan nui ṭha chungin, “Ṭhiante u, in chan tur chu in hria ang chu maw? In hma lawkah hian hruizen sei takin nghakhlel takin a lo nghak reng che u a nia,” a han tih khum sak a.

Matt-a leh Dan-a chu an ṭhian dang Mine-a thawk vete chuan lawm thu an hrilh sap sap a, “Dan, i lo huaisen hle mai,” tih thawm ri hriat tur a tam hle mai a.

Dan-a lah chuan, “Eng mah ka ni bik ngawt hlei nem, Matt-a nen ṭang dun lo phei ila chuan ka chan tur chu a chau viau ang,” a lo ti tlat a.

Chumi ṭum na nâ na chuan Matt-a leh Dan-a chuan in tur an hmu hnemin, “Ka tawk che,” tih leh, “Ka leh a che,” tih pawh an awm viau a ni.

Kar tawp a lo ni a, hlawh lâk a lo hun a, hlawh an lâk rual chuan chu Phoenix Mining-a an manager chuan Dan-a chu lawmman a hlan nghal a, “Dan, nangin he Mine leh kan nunna hi chhiatna lakah min hum avangin kan lawm tak zet a, kan lawmzia entir nan he Phoenix Mining Corporation Company hmingin hei hi ka hlan a che,” tih pahin lehkha thleh ṭhat sa diam hi a hlan a.

Dan-a chuan lawm takin a dawng a, a ṭhian dangte chuan kut an lo beng dar dar a.

Cowboy-te'n an lo chin ṭhin ang ngeiin an hlawh lâk chu saloon lama chen turin Mine-a thawk cowboy-te pawh chu an tleh phei leh ta sang sang a. Matt-a pawh dang chuang hek lo, saloon chhungah amah chauha no dawmin a ṭhu a, a sirah chuan a winchester rifle chu a tung ran mai a.

Chutih lai chuan Dan-a pawh chu saloon chhungah chuan a lo lut a, a hmel chu a dur kher mai a. Matt-a chuan a kianga ṭhu turin a lo sawm vat a; Matt-a vek chuan Debbie chu in tur han lak belh turin a ti nghal a, Debbie-i'n in tur a rawn lak hnu chuan an pahnih chuan no chu an dawm dun ta a.

Dan Clifton-a chuan a lungawi lohna chu Matt-a a han hrilh a. Chu veleh Matt-a chuan, “Dan, eng thil nge i ngaihtuah? I lawmman dawnah chuan i lungawi lo a maw?” a ti a. Chik zâwkin Dan-a chu a'n en a.

Dan-a chuan lu thin deuh nghat pahin, “Matt, hetiang thil tê thama lungawi tur hian min ring a ni maw? Nang leh kei hian he rangkachak khur hi kan chhanhim a, chumi atan chuan dollar sangkhat hi min pe a maw?” a han tih chuan a hmel chu a dur kher mai.

Matt-a chuan, “Dan, engati nge naupang chhia ang maia i awm a? He rangkachak khurah hian kar khatah dollar sawm hlawhin kan thawk a ni lawm ni? Dollar sangkhat chu kan kum khat hlawh aiin a tam daih tih i hre na nge?” a han ti leh a.

Dan-a chuan, “Chu chu thil inang lo leh dang daih a ni. Kawng hrang daih a ni bawk,” a lo ti ta daih a.

Matt-a chuan, “Ngawi teh Dan, hetiang zawng hian ngaihtuah zâwk rawh. Kha inkahnaah khan hnehtu i ni a, chutiang ang ropuina chu i khum a ni. Hnehna kha i ta a ni,” a ti a.

Dan-a chu a ṭhen sawk a, “Thil ṭhing lutuk leh nuihzatthlak a nih chu, Matt, i thu sawi chu...,” a tih zawh chuan a no chu a'n tlak pap a. “Eng pawh ni se Matt, kha inkahnah khan keimah chauh ka ni lo va, nang pawh i tel a, nangmah avangin hnehtu pawh kan ni thei a nih kha. Chuvangin, lawmman hi ka chan vek tur a ni lo, dollar zanga (500) hi chu i chan tur a ni,” a han tih chuan a hmelah hlim hmel a lo lang leh tawh a.

Matt-a erawh chuan, “Ni lo ve Dan, nangma chan vek tur zâwk a ni e; kei chu nangmah avanga dam khawchhuak chauh ka ni zâwk e,” a lo ti a.

Dan-a chuan a ngai thiam lo lek lek mai a, “Matt, chutiang a ni ngawt thei lo. Kan pahniha theih tawp kan chhuahna azarah he Mine hi a him ta chauh a ni a, keiin he lawmman hi ka chang vek thei lo,” a ti tlat a, Matt-a hmaah chuan dollar zanga (500) chu a theh thla a.

Matt-a chuan lâk loh ngial a'n tum a; mahse, Dan-a chuan a nawr luih tlat avangin a la ve ta a.

Dan-a chuan, “Matt, kha khan eng emaw chenah i thil tum, ranch neih ve i tumna chu a puih ve ngei che ka beisei. Eng pawh ni se, Matt, ka thawhsan leh mai ang che, tih tur dang ka la nei si a,” tih pahin a tho ta nghal a.

Matt-a chuan, 'Eng nge tih tur ṭul i neih a, tlem azawng chu i lem leh hlek ang hmiang,' han tih chu duh viau mah se, a awmna ram chu cowboy chenna ram a nih miau avangin chutiang thu chu an inzâwt ve ngai si lo!

Matt-a chuan, “A nih leh Dan, ka lawm e,” tih pahin a dawhkan kil lai chu a han kuk karh karh a, Dan-a pawh chu nui sak chungin saloon kawngka lam panin a kal ta a.

Dan-a lungawi lohna pawh chuan ni rei lo têah ngai a rawn awh leh tawh a, ni dang ang bawkin a hlim hle a, a ṭhiante zingah pawh a phawk berah a ṭang leh ta a.

Mahse, a hming 'Daniel Clifton' tih chu a hming thar, 'Dynamite Dick' tih chuan a rawn thlak ṭan ta a. Chuta ṭang chuan a ni, miin a hming dik aia 'Dynamite Dick' tia an lo hriat tâkna chu.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 27th, 2019, 7:33 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 4
(Rozami Pachuau)

Mihring nun hi zawng a mak teh a ni! “He khawvelah hian mi ṭha famkim an awm lo, pakhat tê mah an awm lo,” Bible-in a ti ni maw kha...? Aw, ni teh reng mai. Khawvel mihring zingah hian thinlung, sualnain a lo zem a, thlemna tawng lo tu nge awm? Chutiang hun a lo thlen a, thlemna do hneh a, sualna lam kawng zawh duh miah lo mite chu, 'mi fel' tia sawi an lo ni ṭhin; chutiang do hneh lotute chu Pathianin khawngaih mawlh rawh se!

Dan-a zan mu chu a inngaihtuah nasa hle a. Sum leh paia dinhmun ṭha a neih theih nan hna a thawk a, a dinhmun atana hnu leh awm lo tura a duh avangin dikna nen taima takin a thawk ṭhin a; mahse amah ang mihring, sum leh pai ren thiam lo tan chuan han inkhawlna chi a ni mawlh si lo.

Chuvangin engtin nge ni ang, a hna hi bansanin puakrukin ei a zawng leh zâwk dawn em ni ang? Nge ni, mi tinin an huat êm êm ṭhin, mi lu mana ei zawngin a khawsa zâwk dawn em ni? Chutiang ngaihtuah chuan rei tak a meng a.

A tawpah zawng, dynamite chanchin kha a ngaihtuah chhuak ta zawk a. Kha thil kha eng emaw zawng taka hman ṭangkai dan ngaihtuah a ngai a ni; chutah pawh, tu mahin an rinhlelh lohna turin....

Rei fe a ngaihtuah hnu chuan a nun chhung zawng zawng atana thil pawi ber, sualna thinlung chuan a rilru chu a chiah zawp zo ta!

A ṭhiante chu an mu reh vek tawh a, Dan-a chu a mutna aṭangin a tho ṭhem ṭhem a, Matt-a chu a va en a, a lo mu tui kher mai a. “Tui takin mu hlawm rawh u, nangni pawi zawng sawi ka tum lo ve,” ama hriat tham lek chuan a ti sap a, pawnah a chhuak ta a.

Thla mang lai a nih avangin khua a thim kher mai a; tin, chumi zan chu Inrinni zan tak a nih avangin Dan-a tan chuan chhinchhiah reng tlâk a ni hial ang. A sakawr chu tlan mai thei turin a buatsaih a; chumi a tih fel zawh chuan a thim lai hlir chu chuhin dynamite an dahna in lam chu a pan phei ta hriau hriau a.

Thawm nei miah lovin chu explosive shed chu a va thleng thei ta a. A chhungah chuan a han lut a, a lo thim kher mai a. Tih dan tur chu a han ngaihtuah vang vang a; chutah, kawngka chu a khar a, parcel bawm hun ṭeuhna hmun lam chu a pan ta a. Nawhalh a han nawt eng pharh a, bawm panga 'dynamite' tih inziah kulhna chu a hmu ta a.

Chu bawm chhungah chuan dynamite eng emaw zât a awm a, a kar hawnna chuan bawm chu a kar hawng a, dynamite tlawn chu duh tâwk a lak hnuin bawm chu a ngai ang chiahin kilh beh a tum ta a. Chu erawh chu a harsa kher mai, a ṭhiante'n a thawm chu an hriat a rem si lo!

Rei fe hnuah chuan a kilh bet thei ta a, dynamite pawh chu a savun iptê ah chhungah chuan a dah lut a, chumi zawh chuan a fuse sei deuh mai chu a ipte-ah a hnawh lut leh ta a.

'Kei zawng, Matt-a angin dawh theihna ka nei si lo. Dollar khat tê tea pawisa khawl hi ka tih theih zawng a ni ve si lo va, kawng dang ka dap a ngai ta a nih hi,' ti rilru chungin chu hmun chu a chhuahsan ta a.

'Tu mah min hmu an awm lo chu a tihzia hle mai,' ti rilru chungin a hmabak chu phur takin a ngaihtuah a. A sakawr chu dim têin a kai a, 'Rel kawng chu kawl a en hma ngeia ka thlen a ngai a ni,' ti rilru chungin a sakawr chu a kheng tlan ta chiam a.

Northern Mining Corporation Company-te chuan an hna thawh hlawh chu thla tawp apiangin relin an thawn ṭhin a; chu chu Dan-a chuan hai hek lo, chu hlawkna zar zo tum chuan a lu thàp turin a sakawr chu a kheng tlan ta chiam a ni.

Kum 1861, March ni 21 zing lam kawl eng tur chuan khawchhak lam chu a chhun sen phut a. Dan Clifton; 'Dynamite Dick' tia koh bawk chuan lung khawkrawk leh ram ro te chu tlan pel zelin a hmabaka sum leh pai ṭha tâwk tak beisei chung leh mitthlaa hmu chung zelin rel kawng chu a thleng ta a.

Dynamite han phuar behna tur remchang zawngin rel kawng chu chhim lam hawi zawngin tawi tê a zawh a; chutah, a duhna hmun a hmuh hnu chuan a sakawr chu dah ṭhain a savun iptê nen chuan a pên ta chhat chhat a.

Rel kawng thir phah hnuaia a vang tan zawnga thingphel inkham pheiah chuan a dynamite tumtel pariat lai mai ṭawn khawm chu a phuar bet ta a.

A phuar beh lai chuan amah tak pawh chu a nuih a za ru angreng hle a, puitling tih atan chuan naupanchhiatthlak riaua hriatna a nei a; tu mahin hmu mah suh se, a rilru-ah chuan inthiam lohna rûk tak a nei lian hle a ni.

Mahse, dollar eng emaw zât nei tura a han inngaihtuah meuh chuan a inthiam lohna zawng zawng chu lâk bo ang hmak a ni ta a. A duhamna chuan inchhirna thinlung chu ruahthimpui lo haw tur, chhum dum chhah takin khawvel enna a rawn ti thim a, a hliahkhuh ta ang mai hian a rawn hliahkhuh ta a.

A dynamite fuse chu sei taka a vuah hnu chuan rel lo kal chu a nghak ta ran a. Rei nghah a ngai lo kher mai, Dynamite Dick-a awmna lai chu a rawn nghawr ta nghing der der a, Dick-a chuan a lo thleng dawn ta tih a hre mai a.

A hnu lawkah chuan Arizona Express chu ralkhata hmuh theihin a rawn lang ta a. A mei khu chhuahna aṭang chuan mei khu dum ngek nguk chu van lam hawiin a khu chho luih luih bawk a.

Chu rel khawngaihthlak tak mai chuan a tawrh tur hre hauh lovin leh chhiatna tur lam pana tlan tluk tluk a ni tih inhre hauh lovin hma lam a rawn pan zel a. Second tinin a tan chhiatna tur leh buaina tur a awm chu beisei ni hek suh; chu bâkah Arizona Express kher kher hi chu a ralmuanawm a ni tih ngam a ni si a; mahse. a lo ralmuanawm lo a ni zâwk àwm mang e....

Rel chu a lo kal hnai zel a, Dick-a chuan, “A lo thleng dawn ta e," tih sap pahin a dynamite ṭawn beh hre reng chungin a fuse chu a han dep kai ta a. A deh kai pah chuan, “I tawrhna tur leh ka hlawkna tur pawh a lo thleng dawn ta e,” a han ti sap a.

Dynamite fuse chu a zit ta phar phar a; chu veleh Dick-a chu a theih tawpa chakin a tlan phei a, a piah hla fe, lungpui phen aṭang chuan a thlir ta a.

Eng nge pawi ang? Dynamite chu a ṭangkaina tur leh hlawkpui nan a hmang ve dawn a ni mai alawm. Dynamite hman ṭangkai dan a hriat vang a ni lawm ni, a hming 'Dan Clifton' tih pawh a ṭhiante'n, ‘Dick..., Dynamite Dick' tia an koh phah tâk ni....

Rel chu a rawn thleng dawn ta.... Second chu a ral zel a, Dynamite Dick-a mit tle riang mai chuan duhawmna mitin a lo thlir reng bawk a, “Second khat a la bâk...,” a ti zo chiah chu a beng a hup nghal a.

Chutah, chu Arizona Express chu lainatna a hmu ta lo aniang e tih turin dynamite tel khawm puak chuan a han vawrh ta a. Pindan pathumte chu a leng nghal lâwp a, han siam ṭhat chi hmel hi a pu tawh lo reng reng a ni.

Chu dynamite puak ri chu a ring kher mai! A thangkhawk chuan mual lehlam tlang te chu a deng chhuak a, rel pindan ṭhenkhat let ri ruih ruih thawm nen; a tirah phei chuan a khuk êm avangin eng mah a hmuh theih loh a.

A khu rum rum tawh lo va, a khu te chuan van lam an pan chho tawh a. Dick-a chuan a puakruk chu a phawi a, rel chhe tawh lam pan chuan a tlan phei ta a. 'Dam an la awm a nih pawhin an chuai zo vek ang a, chutih chhung chuan an kalna tur dik tak lamah ka thawn hman vek ang‚' ti rilru chungin rel awmna chu a va thleng dawn ta a.

Va pawh nghal mai lovin a'n ding deuh a, fimkhur zâwkin a puakruk chu a lek kang a, pindan lam pan chuan a kal phei ta dan dan a. Thâwk leh khatah, pindan chhungah chuan a zuang lut thut a, kah tur an lo awm pawha kap nghal mai thei turin Dick-a chuan a puakruk chu a lek kual nghal a, a ṭul thuta hman atan dynamite eng emaw zat chu a la ak bawk a.

Mahse, Dick-a lo dodal thei tur mihring an awm lo. Chhuatah chuan pindan chhunga awmte chu an lo let phung mai a; mahse, an thi lo a ni tih chu Dick-a chuan a hai hauh lo. 'Ka thil hal puak ri khan a nghawr tlu che u a ni maw?' ti rilru chungin pawisa awmna chu a zawng ta nghal a.

'Kan mihringate lo harh hma ngeiin ka hna hi ka zawh a ngai a ni,' ti rilru ranin pawisa an dahna box chu a han zawng a, a vanneih asiamin zawn rei ngai lovin pindanah chuan a hmu ta mai a. Pawisa ngei a ni tih a chian hnu chuan a chawi kang a, a pu a, muangchangin pindan chhung chu a chhuahsan ta a.

A chhuahsan dawn chuan, “A nih, ṭhiante u, dam takin u le,” ti chungin a pên chhat chhat a. 'Kan zawngate lo harh hmain ka sakawr thuhrukna ka thlen hman a ngai a ni,' ti reng chung si chuan a hmanhmawh duh dèr lo va.

Chutih lai chuan a chhunga chuang, dynamite puak avanga thidangte chu an rawn harh hlawm a, an harh rual rualin an silai an chuh nghal a. Pakhat chuan Dynamite Dick-a chu a rawn hmu a, a ṭhiante hnenah chuan, “Sawta saw!” tih pahin a puakruk chu a kap ta nghal a.

Dick-a, muangchang leh fimkhur taka kal chuan silai puak ri thawr chu a hriat rualin a ke bul lei chu a phut nghal surh a. An rawn hmu ta a ni tih a hre mai a; chutah, a lam hawiin silaimu chu a rawn sur phei ta nghal a.

Dick-a chu a sahimna zawngin a theih tawpa chakin a piah lung pahnih inkarah chuan a tawm ta a. A pawisa bawm rûk chu a han melh a, a nui sak a, “Kan zawngate chuan an thil tih sual rah chu an seng ngei ang,” tih pahin dynamite tlawn khat chu a han phawrh a, “Hei hian hna chu eng angin nge a thawh theih teh reng,” ti chungin a nawhalh chu a han nawt ri pharh a, a theih tawpin a'n vawm vak a, amah rawn kaptute awmna pindan chhungah chuan a vawm lut ta a.

Pakhat chuan ring fein, “Eng nge ni?” a han ti tuarh a; mahse, a chhanna chu chawp leh chilha hriat nghal a ni. Dynamite puak chuan Dick-a rawn kaptute chu fam khua a lawitir ta!

Rel chu a khu vut vut a, Dick-a pawh a tawmna hmun aṭanga lo chhuakin pawisa dahna thingrem chu a pu leh ta a. A sakawrah chuan pawisa thingrem chu ṭawn beh pahin, ‘Mi dang an la awm a nih pawhin an hlauh aleiah thlabarin an pil bo zo vek tawh ang,' a ti rilru a.

A sakawr chuan a ke a per dut dut a, a lu chu a thing nur nur mai a. Dick-a chuan, “Ṭhiana, kan hausa ṭep tawh a nia, kan hna kan thawk zo ṭep tawh. Tunah zawng, lo la ngawi mai mai rawh,” tiin a sakawr chu a be mawlh mawlh a.

A ṭawn beh zawh hnu chuan a sakawr chungah chuan a chuang a, a lukhum chu a'n khum ṭha tê te a; rel awmna lam chu a va hawi leh a, a nui sak a; chutah a kalna lam tur chu a'n en leh a, a meng hnim ralh a, a sakawr chu a kheng tlan ta a.

Kawng rem lo deuh leh lung hmun te chu awm bawk mah se a sakawr chu a chak thei ang berin a tlantir zel a, a sakawr pawh chu thlanin a bual huh zuih tawh a.

Dick-a chuan a sakawr chu a fuih sauh sauh a, rei fe an tlan hnu chuan Gila tlang chu an thleng dawn ta a. Ni pawh a tlangsang tawh hle a; Dick-a pawh chu a chau ve tawh nangiang mai a, hna a thawk nasa tawh êm bawk atin a ni.

A rem lo rûat sa tawh angin a sakawr chu muangchangin tlang lam panin a kaltir ta a. Kawng mumal loh bâkah chho zawnga kal nen, sakawr chau lam tawh tan chuan kal chak a har angreng hle a. Amah mai chu ni se thu dang, a chunga mihring an chuan bâkah bawm rit tak chu a la phur bawk si a, Dick-a pawhin a sakawr chu hre thiamin a tur lui duh ta bik lo va.

Kawng chanve vel an thleng tawh tih chuan kawng chhak lamah chuan thawm a rawn awm a; chu veleh hmuh hman loh khawpa rangin Dick-a chuan a puakruk a phawi a, thawm lo chhuahna lam chu a tin ta a.

Thawm chu a reh leh ta vang vang a, 'Eng mah a nih dawn loh saw,' a tih rilruk lai mekin sazupui nupa lo chhuak hlawl chu a hmu ta a. Ngaih ngam takin a thaw huai a, “Hmm...,” tih pahin a puakruk chu a bawmah a thun leh ta a. A sakawr hnenah chuan, “I kal leh tawh ang hmiang,” a han ti sap a.

A sakawr chu tlang sang lamah chuan a chohtir zel a, tlang chung zawl a chhuah chhoh hnu chuan a thil phurh lai thuhrukna tur hmun remchang chu a han melh a, a hmu lawk lo va.

Nakin deuhah chuan hmun zawl deuh leh remchang ṭha zet mai hi a hmu ta a, “Duh thu sam ang zan a nih hi ti raw, ṭhiana,” a han ti a, a sakawr chu a be mawlh mawlh a, a sakawr pawh chuan hre thiam ang ziazangin a lo chik ve nghur nghur bawk a.

A sakawr chu a thlung ṭha tê te a; a pawisa bawm phurh chu a la thla a, chu pawisa thingrem thuhrukna tur chuan lei chu laih a tum ta a. Hmanrua a neih ṭhat loh avangin laih a sâwt lo hle mai a; a tum a ruh hrim hrim a, chau fea a laih hnu chuan a phum thei ta ṭâwk a. Chutih lai chuan ni chu a vanlaizawl tawh a, Dick-a pawhin hmanhmawh a ṭul tih a hria a.

Pawisa bawm thingrem chu a lei laih khuar chhungah chuan a dah a‚ lei vung chuan a chhilh ta a. A sulhnu zawng zawng chu tu ma hriat theih loh turin a thup vek a; chutah, a phumna hmun chu a chian a, a ram awm dan nen lam a chhinchhiah vek hnu chuan a sakawr chungah a chuang a; a phumna lai chu a han en nawn leh a, lungawi deuh hian a han bu nghat a.

Tlang pangah chuan a sakawr chu a chhuk zawngin a kaltir ta a, “A hmanhmawh thei ang berin aw, ṭhiana. Khaw thim hmaa kan thlen ngei a ngai ang; tu rinhlelh mah kan duh si lo va,” a han ti a.

Chawlhni tlai lam a ni tawh a, Dynamite Dick chu a sakawr chunga chuangin an camp tualah chuan a rawn kal phei thoh thoh a. Eng mah hre lo ang maiin a ṭhiante a hmuh chuan hlim hmel pu tak hian a nuih thei zel a. Cowboy ṭhenkhat lo inhmu khawm laih laih a hmuh chuan thil awmzia tur chu a hre nghal mai a.

Camp kailawn a rah dawn lai chuan veranda-a Matt-a lo ding chu a hmu nghal a, “Matt, i ṭha maw?” tih pahin a'n nui sak a. “Matt, eng thil nge lo thleng a, hmuh apiang in phun sep sep hlawm mai le, thil ṭha lo a awm em ni?” a han ti zui a.

Matt Katlin-a chuan, “Dick, i thiam anga thiam leh dynamite i hman anga hmang ṭangkai thiam an awm alawm,” a han tih chuan ṭhian ṭha innuihin an han innuih dun te te a.

Dick-a chuan, “I sawi tur chu sawi thuai thuai teh, i sawi awmzia chu ka man thiam hauh lo mai,” a ti a.

Matt-a chuan tlema hmel thu tak zâwk hian, “Tu tih hriat lohin Arizona Express, dynamite hmangin a suam chiam alawm, Dick. A che rapthlak khawp mai,” a han tih chuan Dynamite Dick-a chuan thil thar hre ta phut ni àwm tak hian mak ti takin Matt-a chu a han en a, “An thi vek em ni, chu?” a han ti a.

Matt-a chuan, “Ṭhenkhat chu an thi lo, hliam na deuh pahnih an awm a; a hliam lote tan pawh beih zui ngam mi pawh a ni lo, dynamite lakah chuan silai nêpzia pawh Dick, i hai loh kha,” tiin a lo chhang a.

Dynamite Dick-a chuan, “Eng pawh ni se, Matt, chawlh hahdam ka duh tlat. Vawiin nilengin Gila luiah ka cheng a, ka va inti hlim ve e ka ti a, ka chau riau mai; kei zawng, rinhlelh zingah ka tel loh kha maw,” tih pahin a han nui sak a, “Matt, naktuk lamah kan inhmu leh dawn nia; tunah chuan mut ka duh tlat,” tih pahin camp chhung lam chu a pan a.

Matt-a pawh chuan, “A nih leh le Dick, naktuk lamah kan inkawm leh dawn nia,” a lo ti a.

***************************

Dynamite Dick-a chuan, tu rinhlelh mah kai lovin a hun chu a hmang thei ta a; mahse, chu Phoenix Mining Corporation-ah chuan thil mak tak a thleng ṭan ta a. Explosive shed-ah chuan dynamite-te chu kim taka dah ṭhat ni ṭhin mah se, an han en nawn apiang chuan a lo kim lo hman ta ziah a ni.

Dynamite dahna pindan chhungah chuan Randall-a chu a han lut a, dynamite awm zawng zawng chu a'n chhiar leh vek a; chutah, a awm zât an chhinchhiahna lehkhabu chu a'n en leh a, a inmil leh ta tlat lo. A tih ngaihna hre lo chuan a lu thak miah lo chu a hiat ta ngawt a, “Engati nge aw..., hetia a bo a bo tâk mai chu le?” a ti ta nuah nuah a.

A rilru chu a hah kher mai a, a mawh phurtu tur ber lah chu amah a ni bawk si. Pindan chhungah chuan a vei tawn sek mai a, han rinhlelh tur lah a hre si lo va, a hmel te pawh chu a rilru hah vang emaw ni, a lang upa sawt sawt mai a. “Eng pawh ni se, Foreman hrilh ila a ṭha ber ang,” tih pahin explosive shed chu a chhuahsan ta a.

“A kim lo tak tak a ni tih chu i chiang chiah maw?” rawn titu chu pa lian tak a ni a, a aw chu a thum chhur mai a. Hmul a ngahin hmelṭhaa han sawi tur lah a ni hek lo va.

Randall-a chuan, “Chiang teh reng mai, Mr Smith. Ka chhiar zawh vek hnuah pawh ka chhiar nawn leh vek a, a kim lo chiang a ni,” a ti a.

Foreman Smith-a chuan, “Eng pawh ni se, tu nge a rutu hi kan hriat chian a ngai a ni. Zanin aṭangin a vengtu tur ṭha tak dah tawh tur a nih chu,” a ti ve ta a.

Randall-a chuan, “Chu chu rem ruatna ṭha tak a ni ngei ang; mahse, kan mihring-pa hi a chêt danah hian a fin hmel hrep mai si a, fimkhur chu a ngai ve viau ang,” tiin Smith-a chu a han hrilh a.

Ani chuan, “Tuna mi hi a tlawlh chuan rem ruatna dang ṭha zâwk a awm leh mai ang,” a lo ti a.

Randall-a chuan, “Mahse, chumi chhung pawh chuan eng zât nge kan hloh leh ang?” a han ti leh dek dek a.

Smith-a chuan vin zet hian, “Mahse, mahse tih tih mai, engtin nge kawng dangin i tih theih chuan ang? Kan man chhuah hma chuan kan hloh fo reng dawn alawm,” a lo ti hlar mai a. Randall-a pawh chu a ngawi ve leh ta mai a.

Dynamite Dick-a chuan saloon chhungah chuan zu um inchhawp meuhin zu a in karh karh a. Amah chauhin dawhkan pakhat a kil a, a chêt zel dan turah ruahmanna eng eng emaw a han duang vel a. Engtin nge tu ma rinhlelh kai lova a hna thawh lai hi a bansan theih ang?

A bansan hun chuan Gila tlanga a sum thuhruk chu hmangin nuamsa takin a nun a chen thei tawh dawn a; a duh hun hunah leh remchang a hmuh apiang suam mai thei turin dynamite lah a ngah tâwk tawh bawk a, a thuhrukna lah han hmuh mai mai chi lah a ni si lo.

Randall-a lah chuan dynamite bo tate chu hmuh chhuah leh a duh a; mahse, a hmu chhuak tawh dawn si lo. Dick-a vanneihna ber chu tu rinhlelh mah a kai lo chu a ni; chutih ahnêkin an ringin an ngaina êm êm vek a; ani lahin chu chu remchangah hmangin dynamite chu ruin tlang sang lamah a thukru hmiah hmiah zel mai si a....

Chutih lai chuan Matt Katlin-a chu winchester rifle kengin saloon chhungah chuan a rawn lut a; a incheina pakhat a ni ve ang e tih mai tur hian a rifle chu a kalna apiangah a keng tel ṭhin a ni. Dock Holliday-a nen inanna tak an nei a, chu chu puakruk aiin rifle chelek an zei zâwkna hi a ni; mahse, chuti chung chuan puakrukah pawh mi chunga leng an la ni tho mai.

Dynamite Dick-a'n Matt Katlin-a a hmuh ve chuan a bulah a lo ding reng tawh a, “Dick, i va han inngaihtuah nasa àwm ve?” a han tih chuan Dick-a chu a phu zawk mai a, “E heu! Matt, i in dun hlek teh ang, lo ṭhu ve rawh,” a lo ti thuai a, a hmel chu a hlim sang a.

Matt-a chuan, “Ka in lo zâwk ang e, Dick; ka lawm e. Ka rawn hmuhna chhan zâwk tak che chu thil hrilh tur che ka nei a ni. Naktukah hian kan hna thawhna khurah hna hlauhawm deuh mai thawh tur kan nei a, zanin chu hma deuhah lo mu la tih ka rawn hrilh duh che a nia,” a ti a.

Dick-a chuan, “Engtianga hlauhawm nge ni a?” a lo ti thuai a, chutih pah chuan Matt-a in tur chu a thli lui ṭalh a, a dawm luihtir ve ta a.

Matt-a chuan chair-a ṭhut pahin, “Debbie chu eng mah hrilh suh ang che, a lo thlabar hlauh ang e,” tih pahin a no dawm lai chhunga zu chu a han lem hlak a. Chutah, muangchangin, “Dick, kan hna thawhna rangkachak khur saw tunah tak saw chuan a dinhmun a derthawng êm êm a, chung lam kan dona te saw a nghet tawh lo va, chhe thei mai dinhmunah a ding tawh a ni.

“Chuvangin, siam ṭhat a nih hma loh chu thawh ngam a ni lo va; naktuk hi siam ṭhat nan hman tur a ni a, chuta siam ṭha turte zingah chuan nang leh kei hi kan Foreman-in min thlang tel ve a ni,” a ti chat chat a. A zu no chu a han lem zo va, Dick-a pawh chuan a no dawm lai chu a lem zo thuai a.

Matt-a chuan, “A nih Dick, ka kalsan mai ang che, ka in tawh lo mai ang e,” a ti ta a.

Dick-a chuan, “A khai! Mahni chauha in chu ka peih tawh lo, ka zui haw ve mai ang che. Chutia naktuka hna hlauhawm leh thih theihna hmuna kan va thawh dawn chuan zanin chu hma deuh takah mu ila, lungmuang taka mut pawh a ṭha alawm,” a ti a, saloon chu an chhuahsan dun ta a.

Dynamite Dick-a zan mu chu a inngaihtuah a inngaihtuah mai a, a rilru-ah chuan ngaih dan ṭha tak mai a lo piang chhuak leh ta a.

A tûkah chuan rangkachak khur chu an repair ṭhat a ngai ngei ang a, chu chu ani chuan remchangah a lo hmang hlauh dawn a ni. Tichuan, tu ma rinhlelh lohvin he Mine-a a hna tlawh hi a bansan thei tawh dawn a ni. Mahse, chumi ti tur chuan a nun a thàp a ngai dawn a, a vanduai hlauh phei chuan thihna a ni ngei ang.

Mahse, rel a rawk lai te pawh khan a nun a thap lo chuang em ni? Eng nge tuna taka a hlauh ang? Dick-a te ang tan hi zawng, nun hi a derdepin thihna kotlanga ding reng ang mai a ni a; mahse, chumi avang chuan thihna chu a pawngpaw hlauh ngawt lo. Hlawkna a awm dawn phawt chuan, a ṭul ang ang tih hi a ngai fo ṭhin reng a ni.

Tun hma hunah zawng, an silaite pawh a zena sawh chawp ngai a ni a, cowboy tam tak tan hmelma lakah dinhmun a derthawng êm êm a; duhamnain an thinlung a lo chiah a, nei tam nih duhin rangkachak an zawng a, Red Indian ram chhung an lo lut ṭhin.

Chutah, Red Indian-hote'n, “Engati nge kan ram chhung in rawn rah?” tia tha rum an thawh a, fei leh thal nena an han beih meuh chuan silai zen sawh chawpa hmelma an va do ve ṭhin chuan awmzia a nei rei ngai lo va, an duhamna rah chu rei lo têah tawrhna emaw, thihna emawin an seng a lo ngai ṭhin a ni.

Mahse, hun hlui te chu an ral zo tawh a, tunlai mite tan chuan hmanlai an chang zo tawh a, thawnthu-a kan lo sawi leh kan pi leh pute min hrilh chhawn chauh an chang zo ta. Tunah zawng chutiang dinhmun chu a ral tawh a, mahni khingpui leh hmelmate an tawn pawhin, “Tu rang rang?” tih a ni tawh mai a.

Hmelma hmuh pawha rang taka chêt ve theih nan puakruk a awm tawh a, chu chuan Dick-a nunah pawh hun sei tak a siam phah a; chu mai pawh a la ni lo, puakruk aia a hman uar zâwk leh hna pawh thawk ropui thei zâwk dynamite a nei tel tlat a ni. Dick-a te ang tan zawng, nun hi puak thei thilah a innghat a nih hi a tih theih hial ta ve ang.

A ngaihtuahna a kal dîng êm avangin Dynamite Dick-a chu a muhil lawk lo va, zan rei tak thleng a meng a; a han muthilh ve meuh chuan zanlai a lo pel daih tawh a.

A han ṭhangharh leh chuan khua a lo var fel der tawh a, a la mu rei lo hle emaw a ti a, chutih lai chuan a ṭhiante thawm pawh a hre ta a.

Dick-a chu lungral puin khur chhungah chuan a lut ta a. Hma hruaitu niin a hnungah chuan mi dangin an rawn zui lut bawk a. Pûk chung lam chu a lang thim deuh ruih a, a ṭhen laiah phei chuan a lo hlauhawm hle reng a, han siam ṭhat a, han do ṭha tur pawhin a hlauhawm hle reng a ni. Rilru danglam bik pu ran chungin pûk chhungah chuan lutin hma a hruai zel a.

An siam ṭhatna tur hmun chu an thleng ta a. Dick-a chuan, “He lai aṭang hian a ni lawm ni thawm ṭha tura Foreman-in min tih kha?” a han ti a. A hnung deuha awm Matt-a chuan, “A nih kha maw le,” a lo ti a.

Chutah, siam ṭha tur chuan an inbuatsaih ṭan ta a. Dick-a chuan a thil tum chu a hlawhtlin ngei theih nan, chûng lei lo chim palh mai theihna lai chu a chuh a, 'Ka hun a thleng ta,' ti rilru chungin a ṭhiante chu a va en a, a ṭul àwm lai deuh chu siam an lo tum mek a.

Dick-a chuan chung lam dona ban pakhat chu a dona tur hmun lài ṭha tur ni àwm takin lungral chuan a theih tawpin hnuai lam chu a chhun ta vak a, a tum tak zâwk ban chu a chhun phet ta dawrh mai a.

Chutah le, chung lama lei te chu a rawn chim thla a, lung te pawh chu a rawn tla ta phuk phuk a. Dick-a chuan a lo ruahman lâwk sa vek a nih avangin pawn lamah chuan tlan chhuah zai reng a rel lo va; a ṭhian dangte erawh chu pûk pawn lam panin an tlan chhuak vek hman a.

Chutih lai chuan pûk chhung chu a khu rum rum mai a, a khu zam vel chu khur pawn lamah chuan a lo chhuak a, khur chhung aṭanga tlan chhuakte chuan engtia tih ngaihna hre lovin an lo thlir ringawt mai a.

Pakhat chuan, “Dynamite Dick-a hi khawiah nge? A rawn tlan chhuak ve miah lo!” a rawn ti ta a.

Chu veleh Matt-a chu a hawi kual ruai a, Dick-a chu a hmu ve ta hauh lo mai a, khur chhung aṭang khan a rawn tlan chhuak ve hman ta lo a ni ngei mai! Engtin nge a awm tâk ang? A thi nge a dam?

Eng dang ngaihtuah lovin Matt-a chuan khur chhunga tlan luh ve mai chu a han tum a; mahse, mi dangte chuan an lo dawm bet vat a, “Matt, tunah chuan la tum duh suh, i la lut thei chuang lo vang‚ rei lo tê nghak rih rawh,” an lo ti a. Chutih lai chuan pûk kotlang velah chuan a chhung khu chu a zam darh chum chum a.

Matt-a chuan rei a nghak thei lo, a tlan lut ta vat a. Chung lam pawh a lo chim tawh lo va, a ṭhen laiah bawkvak lutin, a ṭhenah chuan kal harsa tak tak tein a lo awm bawk a. Dick-a chu a hmuh veleh, “Dick, engtin nge i awm?” a han ti thuai a.

Dick-a chuan, “Matt..., min delh bet tlat,” a lo ti a. Matt-a'n a va hmuh chuan a kawnga chin hnuai lam chu a lo delh a, chumi chungah chuan lungtum ṭhenkhatin a lo la delh bawk a.

Matt-a chuan a rang thei ang berin a delhtute chu a han ti kiang a. Dick-a chu a pawm tho a; mahse, Dick-a chu a kal thei ta hauh lo mai a, a ke chu na ti êm êmin a khai ta reng mai a. Matt-a chuan Dick-a chu a koki-ah puin pawn lam chu a panpui ta a.

Matt-a'n Mine khur aṭanga Dick-a a rawn put chhuah chuan an ṭhiante chuan, “Eng nge a an?” an lo ti thuai a. Matt-a chuan, “A la dam e, a rang thei ang berin Doctor ko nghal rawh u,” a han ti a.

Camp chhungah chuan Dick-a chu an mut a; Doctor chuan a han en vel a; a ke chu a han khawih dawn chauh tihin Dick-a chuan na tia ṭhen sawk sawk chung hian, “A tâwk tawh e, min khawih tawh suh,” a lo ti a.

Doctor chuan mi dang awm vete hriatah chuan, “A ṭha lo hle mai a, a ruh hi a sâwp a ang khawp mai,” a ti ta a.

Matt-a chuan Dick-a chu a lo en ve reng bawk a; Doctor chuan a theih ang angin a han enkawl a, a ṭul ang angin a buaipui nghal bawk a.

Dick-a chu Doctor Finley-a enkawlna hnuaiah chuan a awm ta a. A ni tin hna chu ṭha taka mut hi a ni ringawt mai a; chutianga awm reng mai chu a ning rilru êm êm a; mahse, a thil ruahman nena inzawm a nih miau avangin ning thei pawh chu a ni bawk si lo. Tu ma rinhlelh kai lova chu Mine chu chhuahsan a duh bawk si a ni.

Tlai khat chu Matt Katlin-a leh Debbie Gadner-i chuan a damlo chu an rawn kan a. Debbie-i chuan, “Dick, i ṭha chak hle mai, ka lawmpui tak zet che a ni. Saloon-ah i rawn lang thei ta si lo va, i hmel hmuh a khat hle mai; a kal thei zâwk lah hi ka rawn lang hlei thei mang si lo va...,” a han ti a.

Dick-a chuan, “Ngaihtuah ka ngai lo ve, Debbie. Hei, ka ṭha ve leh ṭep tawh a nia,” a ti a.

Matt-a chuan, “Ni e, Dick. Ngai i awh leh ṭep tawh ang, kan zingah pawh hna i rawn thawk thei leh ṭep tawh ang chu. I tel lo chuan kan hna thawhpuite pawhin nuam an ti lo, i chanchin hi an sawi an sawi mai ṭhin a,” a lo ti a.

Dick-a chuan hmel ngui deuh tak hian, “A pawi ngawt mai Matt, thawh leh hi ka hreh tawh a ni,” a han ti a.

Matt-a chuan, “Eng nge i sawi awmzia chu?” a lo ti vat a.

Dick-a chu a han ngawi deuh vang vang a, muangchang hian, “Mine-a thawh leh hi ka duh tawh lo a ni; a nung chunga inphum hi ka hlau tak zet a ni, Matt,” a ti ta a, a han ngawi leh ta vang vang a.

Debbie leh Matt-a hmelah chuan pawi tihna hmel a lo lang a, Dick-a an ngainatna thûk tak chu an hmelah a lo lang nghal bawk a. Debbie chuan, “Dick, kei zawngin hriat thiam har ka tih zawng tak a ni,” a lo ti a.

Kar li chhung zet khuma a mut hnu chuan Dick-a pawh chu a dam ve leh ta a. Mahse, a ke chu a ṭha thei chuang lo va, tiang hawla a kal a ngai ta a. A lo sawi fo tawh angin Phoenix Mining Corporation-a thawh zawm zel chu a duh ta lo va, Kingsmann lama kal a tum ta zâwk a.

Tichuan, a lo ruahman rûk ang ngeiin chu company chu tu ma rinhlelhna awm lovin, ama mi mal vanduaina avang emaw tiin a chhuahsan thei dawn ta a ni. 'Rûk chu ru rawh; mahse, manin awm suh' tih hi Dick-a rilru-ah chuan a cham ve ta reng pek ang chu!

Tichuan, Wallatin khuaah chuan cowboy vâk vai angin a lo lut a; mahse, rûk suma hausain a chhuahsan leh dawn ta a ni. Khawvela mi tam zâwk hian chu hamṭhatna chu an duh vek si a. Hlâwkna tur a nih phawt chuan thil sual han tih mai pawh pawi tih lohna hi mi tam ber rilru put hmang chu a ni si a, a hlâwkna tam leh tam loha thu thlengin a ni thei a ni.

Rel chawlhna thleng chuan Matt-a leh Debbie chuan Dynamite Dick-a chu an va thlah a, a hun taka va thleng an ni bawk a, kalkawnga an inkawm bâk chu han inkawm lehna hun dang pawh a awm meuh lo.

Dick-a chu a ke a bai avanga tiang hawl bauh bauh chungin rel chhungah chuan a lut chho va, kawngka bulah chuan a rawn lehhawi leh a. Chutih lai chuan Matt-a chuan, “Dam takin le Dick, lehkha thawn kha theihnghilh miah suh,” a lo ti a.

Dick-a chuan, “Teh reng mai, ka theihnghilh hauh lo vang,” a tih zawh chuan a kut chu Matt-ate lama vai pahin rel chhungah chuan a lut ta a.

Rel a kal liam thlengin Matt-a leh Debbie chuan an thlir reng a; tichuan, Matt-a leh Dick-a inṭhen nan chu rel chuan a kal liamsan ta a.

Matt-a chuan, “Ṭhian ṭha tak a ni asin,” a ti thawp sat a. Debbie chuan, “A ni ngawt mai, Matt,” tiin a lo zawm vat a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 29th, 2019, 9:00 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 5
(Rozami Pachuau)

Kum 1862 a lo her chhuah meuh chuan boruak a danglam ta kher mai a; chu kum chu Arizona ram tan chuan kum vanduaithlak a tling reng a ni. Bomb hmanga inrawk a tam êm êm a, khualzin veivak tan pawh a ralṭitawmin lungmuang taka zin a khat hle a.

Chumi kum chuan rel rawk, stage rawk leh bank rawk a tam êm êm a, chumi laka lo inven nana an hman puakruk leh rifle-te chuan awmzia a nei thei vak si lo! A chhan pawh chutianga inrawkna a awm reng rengin a rawktu chuan silai hmang lovin dynamite a hman tlat ṭhin vang a ni.

Dick-a hian rawk tur a neih reng rengin a hmai a tuam ve ngai tlat lo va, a chhan ni ber àwma lang chu a dynamite hman hian a ti thlamuang viau a ni ta ve ang. Tin, mi a rawk dawn reng rengin an inrin hmain dynamite chu a vawm puak mai ṭhin a, a mi rawk zingah amah hretu tur leh hmu chiangtu tur apiangte chu fam khua lawi tur an nih loh vek leh an lawi tawh zâwk a ni fo ṭhin. Tin, mi a rawk reng rengin a ṭul atana hman nghal mai turin dynamite tam tak a pai tel ziah bawk ṭhin a ni.

Dynamite Dick-a chu a sakawr chunga chuangin chhim lam kawng chu a zawh zel a. Mi fimkhur tak a nih avangin a kalna tur lam chu chiang takin a en hmasa zel a, mel hnih vel a tlan hnu chuan khawchhak lam hawiin a tlan kual leh ta a.

Thui pawh a tlan hmain lung khawkrawk hmun hi a thleng ta a. A sakawr chu a tlan chaktir theih loh avangin muangchangin a kaltir a; chutianga thui fe a kal hnu chuan kawngṭum hi ral aṭang chuan a hmu ta a.

Chu hmun chu inlambunna atana ṭha fahran mai hi a ni a, muangchanga kal zelin kawngṭum chu a va thleng ta a; inlambunna tur hmun remchang tak tak a tam avangin han buai vak a ngai lo a ni.

Dick-a chuan a sakawr chu hmun biru deuh laiah a han thukru tê te a, amah pawh chu lungpui phenah chuan a biru ta a. A savun iptê chhunga dynamite a ah chu a zu khawih a, a nui sak a, a thil tih tur chu a hre chiang hle mai. Tual a that ang a, sum leh pai a lâksak dawn a ni.

A thil tih turah chuan zamna chhe tê mah a nei lo va, pawi tihna pawh a nei hek lo; a duh thu sam ang chu a lo thleng dawn tawh a ni tih a hre tlat a. Mi dang tan tawrhna hun a lo thlen chuan ani tan lawmna hun a lo thleng dawn a ni tih lah a hai hek lo.

Darkar chanve vel Iai chu a ṭhu tawh a, Dick-a chuan a churut chu a pet kawh a, nawhalh a nawt ri pharh a, churut chu a ṭan kai ta a. Fawh hnih fawh thum vel bâk a la zu hman lo tihah chuan thawm a hre ta a; a churut zûk lai chu leiah a nawr hlum a, hla deuhah a paih ta daih a.

Lungpui phen aṭang chuan a han bih dek dek a, ralkhata Wells Fargo stage lo kal chu a hmu ta a. “A hun a thleng dawn ta,” a han ti sap a, a dynamite chu phawrh chhuakin pathum ngawt chu a ṭawn belhbawm ta a.

Chu wagon stage chu hmanhmawh vak lo hian a rawn tlan phei ṭak ṭak a. A khalhtupa chu pa te tak tê leh lukhum parh hlai tak, Mexican Sombrero khum hi a ni a; a sirah chuan winchester rifle chu a tung reng mai a, a fimkhur loh danah ralmuang thawkhatah a ngai ni ngei tur a ni.

A ni reng lah tak a, hun rei tak chhung he hna hi a lo thawk tawh a, suam emaw, rawk emaw tâwk miah lovin tun hi a thleng a ni a. Hotu lam pawhin a ralmuanthlak an tihpui deuh emaw ni, vengtu teh chiam hi an awm ngai lo va; a vengtu pakhat lah chu tladah deuh takin a muthlu bawk bawk mai bawk si.

Chu stage khalhtu chu ring fe fe mai hian a ṭawng loh loh mai a. Dick-a chuan a chhungah chuang an awm ang a, a bia a ni ang tih chu a ring mai a; mahse, eng nge a sawi chu a hre thei chuang lo va.

Stage a rawn kal hnaih deuh hnu chuan a khaltupa thu sawi pawh chu Dick-a chuan a hre pha ta a, “A nia sin, ka pi. Hei, kum hnih pumhlum tawp mai he stage hi ka lo khalh ve tawh a, ama chhiatna emaw, keimahnia thawktu lam rokhawlhna avang emaw tih loh chuan buaina dang kan tâwk ngai lo.

“Suam hmang leh rûk rûk ching chu awm bawk mah se, keini lam kawng hi chu an rawn ti buai ngai lovin a ralmuang hle a ni. Sam-a nen hian hei leh chen hi inkawpin kan lo awm tawh a, mi sual kah nan silaimu kan la seng lo va, a vanneihthlak ngawtin ka hria,” a han ti vei lung lung a.

Dick-a chuan ama hriat tham lek hian, “Tunah suam hmang chu in tâwk dawn alawm,” a'n ti sap a, chutih lai chuan stage chuan a awmna zâwn chu a rawn thleng dawn ṭep tawh a. Dick-a chuan a dynamite ken lai chu a han ṭan kai a, stage-in a awmna zâwn a rawn thlen chiah chuan a vawm phei ta a, a beng a hup nghal vat bawk a.

Chutah, vanpui a chim ta emaw ni tih mai tur hian dynamite chu a puak ta a le! Dick-a tawmna lung leh lei vel chu a rawn nghawr nghing dawt mai a. A ri a reh fel dawn ṭep, a thangkhawkin tlang dung a zui lai chuan puakruk hum chungin a chhuak ta a.

Fimkhur takin chu wagon awmna lam chu a pan phei a, an lo thi chiang hlawm hle mai. Thil nung awm chhun chu sakawr pakhat thi tur tal tal chu a ni mai a; Dick-a puakruk chu a ri ṭhuai a, chu sakawr pawh chu kumtluang atan a zal hlen ta a.

Wagon ke chu a darh hneh hle a. Stage khalhtupa chu mihring a ni àwm mang e a tih theih chang chang a; a bula ṭhu Sam-a chu a ban lehlam a bung a, a hmel hmuh tlâk a awm lo.

A chhung chu a han en a, nupa an ni ngei ang tih theih tur hi an lo let dun reng a. An lo ût thual mai a, an hmel te chu a dum êm avangin Dick-a chuan kum eng zât nge an nih ang tih chu a hre thei mai lo. Mahse, chu lam chu a kal chhan pawh a ni chiah lo; a kal chhan zâwk tak chu an piaha thingrem tê, a chhunga dollar sangthum lai awm chu a ni.

Eng mah hlauh tur a awm tawh lo a ni tih a hriat chian hnuin Dick-a chuan a puakruk chu a paiah a khung leh ta a. Wagon tlu bum mai chhunga pawisa dahna thingrem chu lâk tumin a chhungah chuan a han lut a, awlsam têin thingrem chu a la chhuak thei ta mai a.

Thingrem chu leiah nghatin a'n en chiang a, tala-a kalh a lo ni a. A puakruk chu phawiin a hmet puak nghal ṭhuai a, tala chu a tla ta tawp a. Chutah, a'n ṭhu hniam a, dim têin thingrem chu a han hawng a, a chhungah chuan dollar note hlir mai hi a lo awm a.

Dick-a chuan kiai sak pahin a kâwng bawra savun ip khai a zeh chu a la chhuak a, dollar note intel urh mai chu, chu savun ip-ah chuan a thun ta vek a. A'n ding chhuak a, mitthi ruang chu a han en leh hlawm a, “A pawi ngawt mai,” tih pahin a sakawr a thuhrukna lam chu a pan ta a.

A sakawr saddle sirah chuan chu savun ip, a chhunga dollar sangthum lai awmna chu a ṭawn bet a; chumi zawh chuan sakawr chungah a chuang a, muangchangin chu hmun chu sum tam fe nen a kalsan ta a. Kalkawngah chuan vannei inti takin a faifuk phei hlarh hlarh a.

***************************

Hun lo ral zel ṭhin hian mihring nun hi a rawn her danglampui ṭhin a ni. Dynamite Dick-a pawh hmanah kha chuan Dan Clifton niin, mi fel êm êm leh ṭhiante chhan nan chuan a nun pawh lo dahkham ngam ṭhintu kha a ni si a; mahse tunah zawng, thil sual tih chu a hna tui ber niin, a ni tin nuna hmun luah tam bertu a ni ta si!

A ni reng lah tak a, mi fel tak takte pawh mi nun rawng ber an la ni thei a; mi nun chhia leh sual ber berte pawh mi rin ngam leh fel an la ni thei ve zel bawk a ni.

Hun hlui te chu an ral tawh a, mi huaisen leh pasalṭha Colonel John Hays-a hming ṭhatna chuan mual a liam zo tawh a; chumi hnua lo hming thang leh êm êm Ranger Nick Preace, a thil tih ṭhat avanga United State-in tun thlenga an la hriat reng ṭhin pawh khan a vang lai ni a pel tawh a.

Tin, Oklahoma ram bâwng vulhtuho ti ral ṭi ṭhintu, bâwng rûk hmang êm êm mai Handerson sakei-a an tih mai pawh chuan mual a lo liam tawh a. Hun thar a lo inher chhuak ang bawk hian mi thar an lo chhuak ve leh zel ṭhin a ni.

Arizona ram bank lar ve tak mai pakhat, Agricultural Association Bank chu an hawnna a la rei lovin a la zing deuh bawk a. Bank rinawm leh him tâwk hlea ngaih niin, a chhung pindan tinte chu thir tlawnin an daidang ṭheuh a.

Chu bâkah, an pawisa dahna thir thingrem chu kil sir deuhah hian an hung a, chu pawh chu a rinawm hmelin a deh a khirh hmel hle mai a. Ton 2 laia rit hi a ni reng a, chumi chhungah chuan bank inven nan dollar nuai khat chu eng lai pawhin a awm reng bawk a. Chutiang tak a nih avang chuan mi â nileng lo tan chuan rawk han tum chhin chu thil âtthlak tak leh ṭul lova nun va thàpna a ni ringawt mai a ni.

Bank Director chuan bank chhunga lo lut, pa thau mem mawm leh chal kawlh deuh tak mai a hmuh chuan a lawm rilru hle a. Chu pa chuan an bank chu a ti hlawkin sum leh pai a dah hnem a, an bank pawh chuan a lun phah hle reng a.

Director chuan, “Lo Leng rawh khai, Pu Johnson. Tunlai chu i vang hle mai; i dam maw, kha? Heti lamah hian lo ṭhu rawh,” tih pahin a ṭhutna bula chair chu a han kawhhmuh a.

Pu Johnson-a chuan, “Ka dam ṭhat lai tak a ni e. Hei, tun lai chu i hlawk bawk emaw chu?” a han ti ve a.

Director chuan chhan a tum lai takin bank chhungah chuan eng emaw hi a rawn intheh lut rawk a; Johnson-a chu chhang ta lo chuan, “Eng nge ni, hei?” a han ti a. Eng nge ni zawng a hre meuh ang; mahse, a tlai ta deuh a ni.

Bank chhung zawng zawng chu a thlawk darh vek dawn emaw tih mai tura ring chuan dynamite chu a puak ta dur a. James T.Wood chu a leng nghal lâwp a, a lu chu a keh a ni tih a hriat nghal mai a. Bank Director leh Johnson-a pawh chuan an chatuan hmun tur an pan ta nghal a.

Director chu a kâwng a chhum lo chauh a ni a; Johnson-a pawh a taksa pum mai chu a ung thual mai a, a thawmhnaw te chu a ṭet hnuang bawk a. Tommy-a pawh chu Boot Hill lam panin a liam ta nghal a; mi dang pahnih la damte pawh chu dynamite puak ring tak mai chuan a nghawr tlu tawp a, an thidang ta nghal a.

Vawi khat dang leh dynamite chu a rawn leng leh lâwp a, safe awmna pindan thir awmna a va den rual chuan pindan thir te chu a darh nghal chuai mai a; chutih lai chuan Dynamite Dick-a chu puakruk hum chungin a rawn zuang lut ta a.

Safe kalhna chu a lo rinawm ngiang mai a, a chahbi lah chu hmuh mai tur a awm der si lo. Dick-a chuan a savun iptê ah chhunga dynamite tlawn khat dang chu a phawrh chhuak a, rang deuh hian a han siam zung zung a; safe-ah chuan a phuar bet a, a fuse chu nawhalhin a han ṭan kai a, amah pawh chu a insaseng nghal vat a.

Dynamite han puak leh durah chuan dollar note chu a leng chum chum mai a, a ṭhente chu a kang bawk a. Dick-a chu rang takin a tlan phei a, a pawh zih ip chu phawrh nghalin a theih ang ang chu a ip chhungah chuan a hnawh lut thuai thuai a; a duh tâwk a ngah hnu chuan a pawh zih ip lianpui chu puin a kut dinglamin puakruk a hum a, chu pindan chu a chhuahsan ta a.

Dollar zatve deuhthaw chu lâk hman loh leh kang chhia a nih avangin Dick-a chuan a zahve vel chauh chu a chang a, dollar tam tak phei chu a len darh chum chum avangin han khawm hman ziazang a ni lo reng a ni.

Mipuiin bank rawk a ni tih an han hriat meuh chuan Dick-a chu a lo bo hman daih tawh a. Thil puak ri dur an hriat khan a ti chi-ai hle a, eng thil nge ni ta ang tiin an inzawt hlawm a. Mahse, bank chhung an va luh ve meuh chuan a lo rapthlak kher mai!

Dick-a chêt hun chhung chu a rei lo êm kher bawk a; a thil tih tur chu ruahman fel sa thlap a nih avangin hun pawh a paih lo kher mai.

******************************

Dynamite hmanga mi rawk ṭhin an awm tih chu Arizona ram mipuite chuan hre bawk mah se, tu nge a nih reng an hre thei lo va, a hmel hmutu lah an awm ngai hek lo. Tin, chu inrawk ching-pa chuan chhui zui theih turin hnu a nei thui ngai bawk si lo va, Posse rualte pawh an buaiin han tih vak ngaihna an hre thlawt lo a ni ber mai.

Arizona ram, ram mawi leh nuam‚ a mihringte pawh hlim leh lawm taka an chenna ṭhin chu Dynamite Dick-a avangin a lo ral ṭi zo ta a. Zin veivak tan a ralmuanthlak lovin sum leh pai keng tam tan phei chuan nun a ral ṭitawm ta hle mai a.

Mahse, Dick-a makna êm êm mai chu, mi mal a suam ngai miah lo chu a ni. Chu chu mi pawhin an hai hauh lo va; mahse, chu vang ngawt chuan lung dama awm erawh chu a har tlat! A chhan chu, tu nge suam hmangpa chu an hre thei tlat lo.

Ṭhenkhat chuan hote neiin an ring a; mahse, chutiang tur pawhin rinhlelh tu mah an nei thei bawk si lo. An hriat chhun chu, chu suam hmang chu a fingin a che fel hle a, hnu chhui tur a nei ngai miah lo tih chu a ni tawp mai.

Dynamite Dick-a lo lan lehna hmun chu Arizona ram chhim lam hret, White Rock hmunah a ni a. Chutah pawh chuan eng dang vanga lo lang a ni chuang lo, a hna ngai tê bawk, pawi khawih turin maw le!

A dynamite ṭawn khawm chu rel kawng phaha a ṭawn beh hnu chuan a fuse chu sei deuhin a zawm ta a. Lungtlu deuha a en hnu chuan fel lo lai te a la awm em tiin inventhawn thil thu-ah a han en nawn leh a, a ṭha tâwka a hriat hnu chuan a lu a bu ta nghat nghat a.

Chutah, rel kawng piah deuhah chuan a chawl a, “Hemi hmun rawn thleng tur chuan minute nga tal a la duh a ni,” tih sap pahin churut a pet kawh leh ta vah mai a.

Mu zal titih deuha awm chungin a churut ṭan tur chuan a lu a han kan deuh a, a ṭan kai hnu chuan a mu zal leh deuh hlek a; a hun kal tawh chu a han ngaihtuah kir a, a ṭhen sak a, churut chu a pak khu laih laih a.

A churut peh kawh lai chu a zu zo dawn ṭep tih chuan a awmna lei leh a nghenchhan lung chu a rawn nghawr nghing ta der der a. Eng nge lo thleng dawn tih chu a hre chiang kher mai!

A churut zûk lai chu a nawr hlum tê te a, a han tho chhuak a, muangchangin a'n zi mar phawt a; chumi zawh chuan a gunbelt chu a han sâwi rem deuh hret a, muangchangin a sakawr awmna lam chu a pan ta a.

A sakawr saddle sira a savun iptê khai chu a la thla a, a chhung chu a han en a, dynamite chu a awm ngei a ni tih a hriat hnu chuan a ak ta a. A sakawr chu a kai sawn nghal a, “Ṭhiana, hetah hian thu awih takin lo awm ang che aw...,” tih pahin a han thlung ṭha a.

Chutih lai chuan a sakawr chu a lo phin dut a, Dick-a chuan a hmuiah a chulsak a, “Khatiang chin kha hmun ral ṭi-ah chuan a tih chi lo vang,” a han tih chuan a sakawr pawh chuan hre thiam ni àwm takin a ngawi ve ta mai a, Dick-a pawh chuan a kal sawnsan ta a.

Dick-a chuan ralkhat hla fea rel thawm chu a hre ta a. Rel kawng hnaih lamah chuan a kal phei a, rel pawh chu a kum tluan kawng zawh chuan a rawn tlan phei ve zel a, a rawn tlan pah chuan a khu chu a rawn dum phei ngûk ngûk a.

Chu Arizona Express chu a lo tlanna a hla tawhin a tum ram pawh a thleng ṭep tawh a; mahse, rel a nih ang ngeiin a hma lama thil lo thleng tur chu a hre hauh lo, a chhunga chuang dangte nen chuan....

A khalhtupa chuan duhthawh fahran hian lungalhthei chu a vur belh sauh sauh a. Mei sa tàwng reng a ni bawk a, a lum a ti kher mai a, a thlan pawh a dir zawih zawih a. A ning lutuk chuan a suahdur ken lai chu tung ṭhain a sam chu a han chul thuak thuak a, a bula puan bal zet chuan a hmai chu a han hru fai leh puat puat a; a hmaia thlantui luang te chu hru fai ve bawk mah se, a rawn luang leh thuai ngei ang.

Dynamite Dick-a chu kâk fe hian a ding a, a lam panin Arizona Express chu a rawn tlan phei zel a. Tang lian leh tê, mual sei leh tawi, lung khawkrawk leh a kal kawng sira laiking bel rawh khu nen lam chuan a rawn pel phei zel a; chutih lai chuan a hma lam hla feah chuan a hmelma-pa chu a ding reng bawk a.

Khawthlang ramah hian rel rawk hi a hluar hle a; mahse‚ Dick-a hi chuan mipui chuanna rel, an mimal sum leh rangkachak, an incheina hlute ûmin rel a rawk ngai lo. Chutiang tih ching chu a hnu daihah James Brothers-te'n an rawn uar chhuak chauh a ni.

Tin, Dick-a hi chuan rifle leh puakruk hmangin rel a rawk ngai lo va, dynamite hi inrawkna hmanruaa a hman ber chu a ni mai a; chu bâkah, silai ai chuan a thawk chak tih pawh a hre chiang hle a ni.

Mahse, Jesse James-a leh Frank James-ate kha chuan bomb aiin an hote nen silai hmanga mi rawk an ching a; chu chu dynamite hmanga rawk ai chuan a khirhin hlawhtlin pawh a har reng a; mahse, Dick-a zawngin hlawhchham hi a tum ngai lo reng reng a ni.

Rel chu a rawn tlan hnai ta bawk a, a ke te chu a ri thluk thluk a, lei a rawn nghawr nghing dar dar a. Dick-a chuan, “A hun ta e,” tia phun sap pahin fuse chu a dep kai ta a. Rang takin a inthiar fihlim nghal a, a piah hla fea thingtuluang phenah chuan rel hnungchhawn zawngin a awm ta a.

Rel chu a rawn tlan hnai zel a, a thil tawn tur chu zamna nei miah lo hmel puin a rawn hnaih zel a. A chhunga chuangte pawh chuan chutih lai hun chuan Arizona ram chhungah boruak danglam tak a thleng ṭhin tih chu hre mah se, tun hunah hian an tawng ang tih erawh chu an ring pha hauh lo a ni.

Dick-a chuan a tawmna hmun aṭangin dynamite hna thawh hun tur chu a lo nghak ran a, chutih lai chuan rel chuan a awmna zâwn chu a rawn thleng ve chiah a. Dick-a chuan a puak tawh dawn lo emaw tia a va hawi phei lai tak chuan dynamite puak dur chu a va hmu hman chiah a, zawi tê hian, “Dynamite puak ri te pawh hi kei ka bengah chuan ri mawi a tling a ni,” a ti sap a.

Dick-a chu a awmna aṭangin a rawn chhuak ve nghal a, rel awmna lam pan chuan muangchangin a phei a, lungmuanthlak hlein a hria a ni chek ang chu, a faifuk vêl hlarh hlarh a. Chutih lai chuan puakruk chu rel aṭangin a rawn puak ṭhuai a, Dick-a beng bulah chuan puakruk mu chu a rawn ving phei ta fua mai a, a lo lungmuang lutuk chuan a puakruk hum pawh a lo tum lem lo a ni.

Chu veleh Dick-a chu zuan dawrh pahin a pian hla deuh hleka lung phen lam chu chuh tumin a ding nghal a, leia a lèh tawp tawp hnu chuan a puakruk chu a lo hum reng tawh a. A lam hawiin silaimu chu a surin a sur a ni ber a, ani chu lungpui pahnih inkarah chuan a lir lut ta hlawl a; chutih lai pawh chuan a bula lungpui chu an rawn kap khem sawk sawk a, a mu sawhkhawk vel chu a leng fua fua mai a ni.

Dick-a chuan, “Tu huai huai?” tih pahin a savun iptê ah lai chhunga dynamite chu a phawrh chhuak ta zal zal mai a. Chutih lai tak chuan silai ri pawh a han deuh hret a, Dick-a'n dynamite a ṭan kai a, vawm tuma a han din chhuah lai chuan mi paruk ngawt mai amah rawn veh tuma rel saisir bum mai aṭanga lo chhuak mekte chu a va hmu ta a.

A dynamite ken chuan a han vawm ta a; chumi rual deuhthaw chuan mi pahnihin a lam hawiin puakruk an la rawn hmet puak ṭalh a. Mu khat chuan Dick-a lukhum parh tlang chu a rawn thawi pawr sawk a; mu khat ve thung erawh chuan Dick-a chu a ṭhelh nasa kher mai. Nge ni, hmanhmawh thila rawn kap a niin a kaptupa chu rikrum thilah a zei lo ve reng reng ni.

Mahse, Dick-a hna thawh ve thung erawh chu a thawh dan a dang daih mai. Dynamite han puak dur chuan Dick-a rawn beih tumtute chu a fuh chiang kher mai. Ka chhawn tur tu mah awm lovin fam khuaah lungrual takin an liam ta dial a.

Dick-a chu fimkhur deuhin a rawn tho chhuak a, puakruk chu a la hum reng a, rel lam pan bawk chuan muangchangin a phei leh ta a. Pindan pakhat aṭang chuan mi pakhat hi a rawn dâk zawk a, a tlum lut leh nghal vat bawk a.

Dick-a chuan rang zetin a dynamite tlawn khat chu a han ṭan kai a, pa pakhat rawn dah chhuahna rel pindan tak mai chhungah chuan a vawm lut ta a. Dynamite han puak leh dur chuan Dick-a ngaih chu a ti ṭha ta deuh a, rel pindan chhungah chuan a zuang lut ta thuai a.

Dollar eng emaw zât an dahna thingrem lian teh chiam lo chu a han hmuh chuan a thil duh tak chu a hmu ta tih hriain a pan dîng nghal ta chat a. A han en chiang vel a, a duh thu sam ang ngei a ni tih a hriat hnu chuan fimkhur thu-hlaah rel pindan kawngka-ah chuan a va dâk leh a, rel pindan ṭhenkhat, he deuh buma rel kawng rah thelha awm tih mai loh chu eng mah dang hmuh tur a nei lem lo.

Chutah, dollar box chu a pu nawlh a, rel chhung aṭang chuan a chhuak ta a. Tu mah rawn ti buai zûitu tur an awm ta lo aniang, silaia rawn kaptu pawh an awm ta lo. Nge ni, mi ṭhenkhatin dynamite hman ching mihring chu an do lêt ve ngam lo zâwk?

Dick-a chuan a sakawr dahna hmun chu a va thleng a, a phur chu a han nghat a; dollar box chu a sakawr phurh turin a ṭawn bet leh nghal zung zung a. A sakawr hnenah chuan, “Ṭhianpa, ka rei em? Thu awih takin lo awm phawt ṭhin ang che aw,” a han ti sap a.

A sakawr chu tawi tê a han kai sawn a, rel chhe tawh lan theihna aṭang chuan a va hawi phei a, thil hlauhthawnawma a hriat loh avangin a ngaih a ṭha ta hle a.

A sakawr chungah chuan a chuang a, hmanhmawh vak lovin a tlantir ta a. Eng chen nge tlan ngai dawn tih a hre lo va, amah rawn ûmtu an awm thut a nih phei chuan a duh aia thui tlan a ngai maithei a, chûng hun atan chuan a sakawr tha chu a rensak a ngai a ni.

A hma lam panin a kal zel a. Ni chu a tlang sang viau tawh reng a, khua chu a lum hle mai a. Thawm a rehin a sakawr pên thawm tih mai loh chu hriat tur dang a awm meuh lo.

Van sangah chuan mulukawlh hi a thlâwk delh delh a. Dick-a chuan a kalna lam tur a chîk ang tluk zetin hnung lamah rawn zûitu an awm leh awm loh chu a en chiang hle tho mai.

Matt-a chanchin te chu a ngaihtuah neuh neuh a, 'Debbie nen khan engtin tak awm zel ang maw? Anni pawhin min ngaihtuah ve fo ṭhin ang chu...,' a ti rilru nauh nauh a, remchang hmasa bera hmuh leh chu a tum rilru ta a.

A kal zel a, Cold Creek a kal pel a, chumi hnu deuh lawk chuan khawchhak lam hawiin a inher ta daih a. Rawn chhuitu an awm a nih pawhin chu lam chu an rin loh lam daih a ni dawn si a, remchang hlein a hre ta a.

Chutia a kal zel lai chuan a chhak deuh tlang panga sakawr tlan thawm chu a hre ta a; chu veleh rang deuhin hmun biru lam a pan a, a dynamite chu a phawrh chhuak nghal vat a. A han ngaithla deuh vang vang a, sakawr pahnih tlan thawm niin a hria a; mahse, a lam chu an rawn pan tlat lo.

A hnu lawkah chuan an thawm a reh tial tial a, an tlan pel ta a ni tih a hriat chuan Dick-a chu a thaw ta huai a. Thil tih tur eng emaw tak an nei ni ngeiin a ring a; anih loh vek pawhin outlaw an ni ngeiin a ring a, amah rawn ûmtute chu an ni lo vang tih chu an tlan dan aṭangin a hre ta a.

Ngaih ngam taka a sakawr chunga a chuan hnu chuan a hma lam hla tak chu chik zetin a han en a, hmuh hmaih a neih loh hmel kher mai. A hma lamah chuan tlang dung sei tak takte chu a inkham riah ruah a, tlang sang tak takte pawn an awm a; mahse, chu chu ram ti mawitu a ni miau mai si a.

Kalna tur thui tak a la nei tih hriain Dick-a chuan a sakawr chu a kaltir zel a, hun leh darkar te chu dan rual loh hian an lo liam ve zel mai bawk si...

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » July 30th, 2019, 7:38 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 6
(Rozami Pachuau)

Matt Katlin-a chu a duh ang tâwk sum a la neih loh avang leh a la khawl ngah tâwk loh avangin Phoenix Mining Corporation-ah chuan a la thawk ta reng a; chu bâkah, Wallatin-ah chuan cham chhan tur ṭha tâwk a la nei reng reng a; chu chu Debbie Gadner-i a ni.

Matt-a leh Dick-a chu chanchin an inhre khat hle a, a chhan pawh Dick-a hian lehkhathawn hi a ziak peih thlawt lo a ni ber.

Matt-a leh Debbie chuan Dynamite Dick-a chanchin chu an sawi dun fo ṭhin a, an ngai dun hle a. Matt-a phei chuan a thian ṭha neih chhun tak meuh meuh a nih avangin vawi tam a mumangah a hmu ṭhin a; “A ke a bai ta si a, engtin nge maw a khawsak zel tâk ang le?” tih chu Debbie-i'n Matt-a a zawh tam ber a ni fo ṭhin.

Matt-a leh Debbie pawh chuan an karah hmangaihna thu tiamin Wallatin-ah chuan len lai an chen ve mek a. Matt-a chu mahni kutke-a a din theih veleh inneih an tum a, chumi ni chu nghakhlel takin hun an hmang ṭhin a. Chûng hun a lo thlen hun chuan fa duhawm tak nen anmahni ranch ngeiah an inlawm hlim tawh dawn a ni.

Kum 1863 kum bul lam a ni a, ni khat chu Matt Katlin-a chuan Dynamite Dick-a hnen aṭangin lehkhathawn a dawng ta hlawl a. Chhiar nghakhlel takin Debbie hnen lam chu a panpui a, a hnen a va thlen chuan Dick-a'n lehkha a rawn thawn thu chu a han hrilh a.

Debbie chuan phur fahran hian, “Eng nge a rawn ziah?” a lo ti vat a. Matt-a chuan, “Ka la chhiar bik hlei nem. Hei, a lehkha rawn thawn chu...,” tih pahin lehkhathawn chuar zet mai hi Debbie chu a han hmuh a.

Matt-a chu chair-ah a han ṭhu a, lehkhathawn chu a'n hawng a, a chhiar ta a. A sirah Debbie chuan ṭhu chungin a lo ngaithla kiau a; ṭhuro no, pawi sawi lo tak hi a ang deuh ber a.

Dick-a lehkhathawnah chuan eng teh chiam sawi lo mah se, Matt-a leh Debbie tan chuan thil lawmawm tak a tling reng reng a. An ṭhianpa, kha leh chen an lo hmuh tawh ngai loh leh a chanchin an hriat loh khan lehkha a rawn thawn ta hlawl chu a ni a. Matt-a leh Debbie chu a ngaihzia te, remchang hun hmasa berah tlawh a tum thu te, Kingsmann-a a la awm reng thu leh a chenna in nen lam a rawn ziak vek a.

Matt-a'n a han chhiar zawh chuan, “A ke kha a ṭha ta si lo va, engtiangin nge a khawsak a, ei a zawn tâk dan a rawn ziak lo a nih hi,” a han ti a.

Debbie chuan, “Chuti lamah chuan ngaihtuahawma a awm loh ka beisei,” a lo ti vat a.

Debbie chuan an pahniha an in tur beer um pahnih leh no pahnih a rawn la a, tu ma dipdal hauh lohvin an in dun ta a.

An ṭhianpa lo kal hun tur chu nghakhlel takin an thlir reng a.

*******************************

Matt Katlin-a chu kawla ni chhuak chhiarin rangkachak khurah chuan hna a thawk ṭhin a; a ni tin hna chu hahthlak a tiin a ning tak zet a ni. Hlawh a tlemin khawl a har si a; eng emaw changa a han inngaihtuah phei chuan a cowboy nun hluia kir leh mai te pawh a duh thut thut ṭhin a; mahse, chutah chuan dikna tel lova chêt a ngaih hun a awm ṭhin si.

Hna dang zawnga zin kual daih mai te a duh rum rum ṭhin nâin Debbie Gadner-i chu a ngaihtuah chhuak ṭhin a, chutah meuh zawng, phur tak leh lawm takin Wallatin-ah chuan hna chu thlan dir zawih zawih khawpin a thawk leh si ṭhin a ni.

Ni khat chu, Matt-a chuan thlantuiin a bual huh zuih khawpin Mine chhungah chuan hna a thawk a. A hah deuh hnu chuan a han ding mar deuh a; chutih lai chuan a piah hla fea thawk ve Slim-a chuan a rawn hmu a, Matt-a lam panin a rawn phei ta vat a.

Slim-a hi thla hnih lai chawlh laa zin bo a ni a, tun hi a zin lo haw hnua a hna thawh leh hmasak ber ṭum a ni nghe nghe a. Matt-a bul a rawn thlen chuan lawm takin, “Matt, i dam maw, kha?” tih pahin Matt-a chu chibai bûk turin a kut a han pe a.

Matt-a pawh chuan, “Dam e, Slim; eng tikah nge i lo hawn? I zinna chu a nuam em?” tih pahin a lo chibai ve a.

Slim-a chuan Matt-a chu hlim hmel sung hian a han en a, a áwm chu sih tui ṭha ang maiin thlanin a bual huh hnûp mai si a, “Nimin piah mai khan a ni ka lo haw, Matt. Tun christmas khan Kingsmann-ah ka awm a; chutah chuan tu nge ka hmuh i rin le?” a han tih chuan Matt-a chuan rin dan a lo nei nghal mai a, a hlim rilru viau mai a.

Slim-a bawk chuan, “Dynamite Dick-a maw le! Inchei nalh zetin hmanhmawh deuha kawtthlera a kal ka hmu a; a hmanhmawh êm vang nge min hre tawh lo zawk? Nge ni, min hmu lo reng reng? Biak pawh kan inbe hman ta lo va, a pawi ka ti khawp mai. A ṭhat lai tak a nih ka beisei. Tiang a hawl tawh lo va; chu bâkah, kea hmanhmawh deuha a kal ka hmuh bawk si avangin a ke pawh a dam tawh a ni ngei ang,” a han ti leh a.

Matt-a chuan, “Slim, ka lawm hle mai. Amah ngei pawh rawn zin a tum a ni àwm e,” a lo ti ve bawk a.

******************************

Hun a lo liam ve zel a, kum 1863 nipui a lo thaw leh ṭan ta a. Thlasik boruakin a rawn chiah phak tawh lo va; khua erawh a la lum lutuk lem lo va, boruak pawh chu a nuam angreng viau a.

Ni khat chu Wallatin khaw lam panin cowboy pakhat hi sakawr chung chuangin a rawn tlan thauh thauh mai a. Hmel ṭha tak leh pian thiam tak, dar pharh hlai hlep hlawp hi a ni a, scarf a awrh bawk a. Cowboy nun nem tak leh zaidam tak; a thin ti rimtu nih pawh châkawm loh tak, ṭawngkam chhuak reng reng hniam raih mai; ṭawngkam, mi hipna riau nei hi a ni a.

Tun hmaa a lo chen fo tawhna a nih avangin Wallatin khuaah chuan buaina êm êm tawk lovin a rawn tlan phei zel a, Hotel Palace saloon kawtah chuan a ding ta a.

A sakawr aṭang chuan a chhuk a, saloon kawta sakawr thlunna tura an siam thing kham pheiah chuan a sakawr chu a han thlung a; a sakawr saddle sira a tiang hawl ṭhin chu la thlain, saloon chhung lam pan tuma tiang hawla pên hnih vêl a kal chauh tih chuan Debbie-i'n a rawn hmu ta a.

Debbie chu saloon kawtah chuan a tlan chhuak thuai a, Dick-a lam hawiin lawm hmel deuh mai hian, “Dick, i lo kal ta a ni maw? Matt-a nen in inhmu tawh em ni? Nge, I lo thleng chiah zawk em ni? Kan inhmu chu ka lawm ngei mai,” a lo ti zung zung a, Dick-a bul chu a lo thleng hman reng tawh a.

Dick-a chuan, “Debbie‚ sava duhawm! Tûk tin hian i mawi zual zel a nih hi maw le! Debbie, tun maiah khan ka rawn thleng ve chiah a ni. Khatah khan Matt-a a awm em? Ka hmu châk tawh ngei mai, kan inhmuh lohna a rei tawh si a,” a lo ti a.

Debbie chuan Dick-a kut lehlamah a vuan a, saloon chhung lam pan chuan an kal dun ta a. Dick-a chu tiang hawl pah chuan a bai saih saih a.

Chutih lai chuan kawtthler lehlamah Matt-a chu a lo lang ve chiah a, dîng takin Hotel Palace saloon chu a rawn pan a, a kut lehlamin winchester rifle a hum riang mai a; saloon lam a han hawi phei chiah chu a ding ta chawt a....

Saloon kailawna Debbie leh Dick-a chho dun lai mek chu a va hmu a; hmui phun sepa, “Amah ngei a ni mai!” a tih lai chuan tiang hawl bai saih saih chungin Dick-a chu Debbie rualin in chhungah a lut ta a.

Matt-a chu saloon lam panin a pên phei ve ta chhat chhat a. A rilru-ah Dick-a chu mak tihna riau a nei ta a, thil inphum a hriat si loh awm tlatin a hria a ni.

Tun hma ai khan a bai nasa tawh zawkin a hria a, chu tak chu mak a tihna chu a ni. Slim-a khan christmas laiin Kingsmann-ah khan hmanhmawh deuha kea a kal kha a hmu a ni si a....

Engati nge a hma ai zawngin a bai nasa si a; Slim-a lah chuan dâwt a hrilh lah a ring bawk si lo. Tin, kha chen lo thawk ho tawh leh zem khat lo zen za tawh chu Slim-a hian a haiin a ring bawk si lo. Saloon kawngka thên thei chi chu a su hawng a, muangchangin saloon chhungah chuan a lut ve ta a.

Matt-a chu a va hawi phei a, piah deuh taka Dick-a leh Debbie, dawhkan kila lo inbe mawlh mawlh chu a va hmu a. Dick-a'n beer um khat leh whisky um khat a ban lai chu a en reng a, an lam pan chuan a phei ve ta a.

Debbie leh Dick-a chu an inkawm tui êm avangin Matt-a pawh chu an lo hmu lo reng reng a, an han hmuh meuh chuan an awmna sirah a lo ding reng tawh a.

Matt-a ding chu Dick-a chuan a han hmu phut a, lawm hmel tak hian, “E... Matt, i dam maw? Kan inhmu khat ngei mai. Kha, ṭhutna kha han la la, min han zawm ve nghal mai rawh,” tih pahin a ding a, a kut chu Matt-a chu a han pe a. Matt-a pawh chuan lo pe ve bawkin an inchibai ta a.

Matt-a pawh chu dawhkan kilin ṭhuthmun a rem ve nghal a. Dick-a chuan Matt-a in turin no-ah whisky chu a thli mek a; Matt-a chuan, “Dick, tunah Kingsmann-ah maw i awm a? Eng nge i tih ṭhin, i va rawn lang khat êm êm ve?” tih pahin a nui sang a.

Dick-a pawhin nui sangin Matt-a chu a han en a, “Matt, ka hman ngang lo a ni,” ti ngawtin a chhang a, a no chhunga zu chu a'n lem sak a.

Debbie chuan, “Vanduaina i tâwk ta si a, engtiangin nge i khawsak tâk zel?” a lo ti ve bawk a.

Dick-a chuan, “Chu vang chuan alawm ka rawn zin hleih theih loh. Ei zawnna ber ka nei thei si lo va, ka thawh ve theih tur a vang bawk si. Tin, chhung leh khat hnaivai lah ka nei si lo va,” a han tih chuan a kun deuh ngaih a. Debbie leh Matt-a chuan lainat hmel tak hian an lo thlir a.

Matt-a chuan, “Chutiang ngawt chu a ni thei nâng. Hei, kei ka dam a, Wallatin-ah hian awm ve leh mai la; kan pahnihin kan theih ang ang kan thawk dun ang a, a ṭul apiangah Debbie-i pawhin min pui thei dawn tho alawm. Chu chu nang pawhin tlàwmah la lo la, hetah cheng ve rih mai rawh,” a han ti a.

Debbie pawh chuan, “Ni e, hetah hian cheng rih zâwk mai rawh. A theih ang angin kan ṭang tlang ang a, a lungngaihthlak bik nâng,” a lo ti ve a, a hmelah chuan sàwm tak têin a sawm tih a hriat a.

Matt-a chuan Dick-a chu a han en a; Dick-a chuan, “Chutiang reng chu a ni thei nâng; mahse, in mi sawmna chu ka lawm khawp mai,” a ti ta a.

Matt-a chuan chutianga a ṭhian duh tak, anmahni a ngainat avanga ram hla tak aṭanga lo kal a, an han inkawm khawm meuh chuan lainatnain a khat a; chu chuan hmangaihna leh khawngaihna a rawn siam chhuak ta a. Chutah meuh chuan a rinhlelhna te pawh chu reh nghal vekin Dick-a chu a ke a bai tak tak a nih a ring ta a.

'Slim-a khan Kingsmann-ah Dick-a ka hmu a tih kha amah a ni lo zâwk a ni ngei ang. Mihring hi inang tak tak an tam si a; chu bâkah, biak pawh an inbe si lo. Keiin ka ṭhianpa ka lo ralkhat rinhlelh ngawt hian awmzia a nei lo. Slim-a chu mihring ve bawk a ni a, thil te chu a hai ve thei tho alawm, a hre sual zâwk a ni ngei ang,' tiin Matt-a chuan a ngaihtuah a.

Hotel Palace saloon chhunga ṭhian pathum han inhmu khawm tâ chu an hlim dar dar hle a, hun rei tak inhmu tawh lo an nih avangin a ngaih pawh an inngai tlang tak zet a ni. An chanchin te inzâwtin zan rei tak thleng an inkawm khawm a; mahse, zan chu a lo rei tâk êm avangin ṭin zai an rel ta a. Khaw var thleng pawhin inkawm mah se, an sawi tur ṭheuh chu an la sawi zo chuang lo vang tih tura mawi a ni.

Chumi zan chuan Dick-a chu Matt-a kianga khum pakhatah chuan a mu ve ta a. An han mut meuh chuan zan a rei tawhin thawm pawh a reh tawh hle a; thawm hriat tur awm chhun chu ralkhata ui bauh ri leh sihal ûû thawm te chu a ni mai a.

Debbie pawhin a mut hmunah Dick-a chu a ngaihtuah zui neuh neuh a. Matt-a leh Dick-a pawh chu zan rei tak thlengin an titi dun a, a tawpah zawng, mut zai an rel ve ta a.

Matt-a chu chhun lama hna thawk hah ngang a ni a, a muhil zui deuh titih deuh mai a; mahse, ani ai chuan Dick-a chu a muhil rang zâwk a ni teh chek ang chu, a hnar nghal bawrh bawrh mai a. Matt-a muhil tur chuan, 'Tun hma kha chuan a hnar ngai miah lo,' ti rilru chungin a chhing ve ta nghal a.

Zinga a lo harh chuan Matt-a chu a mutna aṭangin a'n let thawk a, Dick-a mutna lam chu a han en a; a mutbu chu a lo inthlep fel than a, amah chu a lo mu tawh lo va, “Ka tho hma ve hlein ka hre si a, Dick-a chu ka lo khalh hman lo a nih hi,” a ti sap a, a khum aṭang chuan a chhuk ta nghal a.

A hmai te a'n phih zawh chuan Dick-a chu a han melh deuh a; mahse, a hmu ta mai si lo va, “Ani hi saloon lamah te hian a lo va kal ang a, a lo va zing ṭhawn te hi a ni roh ang ka ti,” a ti ta nuah nuah a.

A ṭul dang dang a tih zawh hnuin Matt-a chuan a winchester rifle chu kengin kawtthler lam a pan ta a; mahse, Dick-a hmel reng reng a hmu lo.

Rei fe a zawn hnu chuan a beidawng ta deuh a, Debbie awmna lam a pan ta a. Debbie hnenah chuan, “Tûkinah Dick-a i lo hmu lo maw?” tiin a han zâwt a.

Debbie chuan, “Hmu nâng; nizanah in riak dun emaw ka ti a...?” a lo ti a.

Matt-a chuan, “Riah chu riak dun e; mahse, ka thawh ve chuan a lo tho daih tawh. Hmuh mai ka inbeisei a; mahse, ka hmuh tâk mai si lohvah chuan ka zawng kual ta vak mai a ni. Debbie, mak ka ti khawp mai, khua hi a chhuahsan a nih ka ring,” a ti ta a.

Debbie chuan, “A va mak ve! Kan hnenah eng mah a sawi si lo. A chhuah dawn leh dawn loh te chu sawi àwm tak a ni si a,” a lo ti ve a. An pahnih chuan pawn kawtthlerah an chhuak dun ta a.

Debbie leh Matt-a, kawtthlera an din dun lai chuan an lam panin Foreman Smith-a chu hmanhmawh fahran hian a lo kal a. A rawn hmanhmawh danah Matt-a chuan thil eng emaw tak awmin a ring nghal a, rilru-a ngaih ṭha zan lo chungin Foreman chu a lo nghak a.

Foreman-in an bul a lo thlen lai te chuan a rilru-a Dick-a cham reng chungin Matt-a chuan, “Mr Smith, eng thil nge lo thleng ta? I va hmanhmawh hmel em!?” a lo ti vat a.

Smith-a'n, “Nizanah Store house rawk a ni a, dynamite tlawn za aia tam rûk bo a ni,” a han tih meuh chuan a rilru-a a thil lo ngaihtuah nen a intu lo lutuk a‚ Matt-a chuan Dick-a pawh chu a theihnghilh nghal hmiah a, âtthlak takin rinhlelh nachang pawh a hre lo a ni.

Mak ti leh pawi ti hmel taka Smith-a en chungin Matt-a chuan, “Chu, rinhlelh deuh emaw in nei em?” a han ti a.

Smith-a chuan a lu a lo thing a, “Chutiang eng mah a awm lo, a hnu a thup thiam kher mai! Matt, nakinah chiang lehzualin kan la en ṭhat a ngai dawn a ni,” a ti a, Matt-a pawh chuan a lu a lo bu nghat a.

***************************

Kum 1863, May ni 25 a ni a, Dynamite Dick-a chu Tabare khuaah chuan a rawn tlan lut thauh thauh a. Kawtthlerah chuan muangchang hauh lovin a tlan tlang phei zel a, a koki-ah chuan savun iptê hi a inbat hnak a. Ni chu a tlangsan tawh avangin a lum hle a, Dick-a pawh chu a thlan nasa tawh hle a.

A thil tih turah chuan zamna chhe tê mah a nei lo va; chutih ahnêkin a châk zek zek zâwk a ni. Kawtthlerah chuan kal phei zelin drug store bulah chuan a lut bo ta daih a. Dick-a a rawn lan chhuah leh meuh chuan a duh thu sam ang ngeiin a infam tawh a, a kâwng bawrah chuan puakruk, a ṭul huna hmeh puah mai tur chu a inkhai a.

A churut lianpui peh kawh chuan ṭangkaina tak a nei a, savun pawh zih iptê chu kawnghrenah chuan a zep bawk a. Cattle Dealer's Bank chu kal hualin bank kawmchar lam hla deuh hretah chuan a sakawr chu a thukru a; chumi hnuah bank kawt lamah kal lehin bank kailawn chu a rap chho ṭan ta a. Chutih lai chuan a churut chu a pak khu luai luai a.

Bank chhung a lut chho ṭan tih chuan a dynamite chu mi hmuh lohin a phawrh a, a churut zûk laiah chuan ṭan kaiin bank manager ṭhutna lamah chuan a vawm phei ta nghal a; a dang a phawrh leh nghal zat a.

A vawm hmasak zâwk chu a puak dur a, Manager leh amah lo dawrtu mi pakhat chu an per nghal lâwp a.

Mi dang chi-ai chu an buai nghal nuai nuai a, an silai chuh nachang pawh an hre tawh lo. Dynamite puak ri dur leh khu luai luai chuan a ti mangang zo vek tawh a ni.

Dick-a chuan, “A awlsam leh dawn hle mai,” ti sap chungin bank hna thawkho leh a dawr tumtu mi pakhatte tal buaina lamah chuan a dynamite ṭan kai chu a'n vawm leh a, a han puah zawh meuh chuan chhuatah an lo let phung hman tawh a.

A la thi bang pahnihte chuan an silai chuh nachang an hre ta a. Pakhatin rifle a chuh laiin pakhat chuan derringer a chuh a, Dick-a lamah chuan an han lek kawh dun a. Chutih lai chuan Dick-a kut chu kawl phe ang maia rangin a phe zawk a, a kawng zâwn aṭang chuan mu khat puak ri ang maia inzawm hian vawi hnih a hmet puak ta a.

Vawi khat puak ri ang chauhin lang mah se, chûng mi pahnihte chuan an thihna tur ngen mu chu an dawng ve ve lawi si! Chutih lai chuan hnung lamah thawm a han hria a, rang zet hian a vir zawk a.

A hnung lama lo kal, bank vengtute pahnih chuan kawngka an rawn pel dawn chiah a. Dick-a puakruk chu vawi hnih a han puak leh ṭhuai ṭhuai a, winchester rifle keng pahnihte chu an let dun nghal hawl mai a.

Dick-a chuan a puakrukah chuan a mu thar a thun belh leh sawk sawk a; chutah a paiah khungin dynamite tlawn chu a phawrh chhuak Ieh ta thung a. Safe kiangah chuan hmanhmawh takin a kal a, safe-ah chuan dynamite tlawn khat chu ṭawnin a churut zûk lai chuan a han dep kai leh a, a puakruk phawi chungin a insaseng leh ta thuai a.

Dynamite puak ri an hriat chuan khaw chhung mipuite chuan khawi lam nge tih chu an ngaihven nghal vat a. Cattle Dealer's Bank ni ngeiin an hria a; mahse, an chi-ai hle a, chu vang chu a ni ngei ang, ral thuam nei pawh, chu lam pana tlan mai nachang an hre lo ni ngeiin a lang.

Dynamite puak vawi hnihna chu mipui hriat hmasak ber a ni mai a; a chhan chu, inzawm deuh zata a puah vang a ni. Dynamite vawi thumna a han puah meuh chuan an silai chuhin bank lam panin an tlan phei ta sang sang a, “Bank an rawk e...,” tih thawm chuan khaw chhung chu a khat nghal a ni ta ber a.

Dick-a dynamite hàlin safe a tih chhiat hnu chuan a kawnghren kara a savun pawh zih lianpui chu la chhuakin, a chhungah chuan dollar note la chhe lo, hlawm khat deuha awm chu a thun mawlh mawlh a.

Dollar note dang tam tak chu a kang chhia a, a la ṭha tam tak chu dynamite puak chuan a vawrh darh bawk a; mahse, chûng zawng zawng rût khawm tur chuan Dynamite Dick-a chu a â tlat lo. A lâk theih ang ang lâka inthiar fihlim thuai chu Dynamite Dick-a duh dan a ni.

A savun pawh zih chu a puar viau tawh reng a. Dick-a chuan a pu nawlh a, kal sawn a tum lai takin kawngka lam aṭang chuan silaimu a rawn sur ta zut zut mai a. Rang zet hian a kil lehlamah chuan a bet phei nghal rawk rawk a, a pawh zih iptê chu rang takin a dah thla a, a iptê aṭang chuan dynamite tlawn thum chu a phawrh ta a.

Amah rawn beitute pawh chuan an rawn pawh mai ngam bik lo va. Dynamite chu a churut peh kawh lai chuan han deh kai mai hi a tum a; mahse, a lo thi tawh a, thinrim deuh hian a paih ta a. Rang fahran hian a nawhalh chu a'n phawrh a, a han nawt alh phat a, dynamite fuse chu a dep kai a, rawn beih tumtute awmna kawngka lamah chuan a theh phei ta a.

Mi ṭhenkhatte'n, “Eng nge ni...?” an tih nak nak thawm chu dynamite puak ri dur chuan a zui nghal a. Dick-a chuan dynamite tlawn khat chu a han dep kai leh nghal a, kawmchar lam bang bulah chuan a theh phei leh nghal zat a.

Dynamite chu in chhung lamah chuan a puak leh ta dur a. Chutih lai chu pawn lama awmte buai lai tak a ni a, hliam chu an awm pheng phung mai a. In chhung lama dynamite puak ri an han hriat leh chuan engtia beih tur nge tih chu an haihchham hle a.

In chhung char lam bang bula Dick-a dynamite hal chuan in bang chu a ti pawp nghal huau a. Chumi zawh chiah chuan Dick-a chuan a dynamite tlawn khat la hum chu nawhalh nâwt lehin a han dep kai leh a, kawngka lamah bawk chuan a vawm phei leh ta a.

Pawn lamah chuan dynamite chu a puak leh ta dur a; mahse, chu chuan pawi êm em a va khawih ta lo va, a chhan chu mipuite chu tlema an lo hnungtawIh hman deuh tawh vang a ni

Mahse, Dick-a tan chuan hna ṭangkai tak a ni tho mai. Dynamite khan a va ṭhawn leh avangin an chi-ai leh ngei ang a, Dick-a chuan chu chu remchangah a lo hmang dawn a ni. A lo ngaihtuah ang ngeiin mipui chu an hnungtawlh leh deuh a, chutia dynamite puah hlim hlawtah chuan an va bei ngam mai bik lo a ni.

Pawn lama dynamite puak ri dur mai a han hriat rualin Dick-a chuan pawisa dahna ip chu a pu nawlh a, a puakruk phawiin char lam bang âwngah chuan a chhuak ta a. Thui pawh a la kal hmain an rawn hmu nghal thuai a; chu veleh Dick-a chu a tlan ta vak a.

A sakawr awmna a thlen chuan dynamite tlawn khat dang chu phawrh lehin nawhalhin a han dep kai leh ta a. Amah rawn ûmtute chu la hla deuh mah se, tlan chhiatna hun remchang atan a vawm phei ta vak a; chu veleh, a sakawrah chuan pawisa dahna pawh zih ip chu a ṭawn ta sawk sawk a.

Dynamite chu a han puak leh dur a, amah rawn ûmtute pawh chu an tawlh hnung leh sang sang a. Dick-a chu a sakawr chungah a zuang kai nawlh a, a tlan ta nal nal a.

Jabare mipui zing aṭang chuan kei ka ni inti deuhte chuan an sakawr chu an han buatsaih ve nghal zung zung a, rei lo têah Dick-a tlanna lam pan chuan an liam ve ta sang sang a.

Mahse, rei an va ûm lo kher mai! Tlai khaw thim dawn chuan an rawn haw leh hlawm a; pahnih an inhloh a, pathum lai an va inhliam bawk a.

Jackie-a an tih, pa te tak tê chuan, “Keini beih chi a ni lo. Dynamite hmangin min bei a; keini lah silai mai a ni si a, a lakah chuan eng mah kan ni lo. Dynamite hmang bawka beih chi a ni. Nakinah Posse-ho ûm atan kan khek ta mai a ni,” a ti fel et a.

Dick-a chu a reh ta vang vang kha a ni a, a awmna reng reng hria an awm lo va. Ṭhenkhat, “Sierras tlang bul hnaiah a ruang an hmu,” lo ti tâwk an awm a; a ṭhenin, “An that tawh a ni ang,” an lo ti bawk a; mahse, tu nge dynamite hmanga rel rawk ṭhintu chu tu mahin an chiang chuang lo.

Dick-a hming hria erawh zawng an awm teh meuh mai a; mahse, dynamite hmanga rawk ṭhintu chu Dick-a a ni tih hria tu mah an awm lo thung. Suam hmang chu tu nge a nih an la hre hek lo va; chu vang chuan chûng thu thang awm zawng zawng te chu dâwt leh belh chian dawl lo a nihzia Tabare khuaa Cattle Dealer's Bank rawk a nih leh tâk si hian a ti chiang hle a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)