DYNAMITE DICK (completed)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: DYNAMITE DICK chapter 1 - 6

Unread post by Rozami pachuau » July 31st, 2019, 8:24 pm

DYNAMITE DICK
AUTHOR : LOUIS L'AMOUR
TRANSLATOR : THANPARA
PUBLISHER : C.THANGZUALA
CHAPTER - 7 (Last chapter)
(Rozami Pachuau)

Dynamite Dick-a chu rel rawk turin rel kawng lam panin a tlan dawk zur zur a, a sakawr lian tak chu a ṭhain a chak bawk a, kar lovah rel kawng chu an thleng ta thuai a. Rel kawng a thlen hma hret chuan hnuhma a awm leh awm loh a han chian leh tê te a; chutah, ngaih ṭha takin a awm ta chauh a.

Ni danga a lo tih fo ṭhin tawh angin awlsam zet hian a che zung zung a, a dynamite tel khawm lianpui pui chu rel kawngah chuan a ṭawn hlawm a; buaina dang a tawh loh nan hmun thum laiah a ṭawn a, a fuse erawh chu sei lem lo takin a siam thung a.

A duh ang thlapa a siam hnu chuan rel lo kal chuan lei chu a rawn nghawr ta der der a, “Duh thu sam ang zanin a chêt tluan theih dawn e. Chhiat a hmanhmawh tawh a nih dawn chu,” ti sap chungin rel lo kal mek chu a lo nghak leh ta ran mai a.

Columbus Express Company rel chu tluang deuh mai hian a rawn dawk phei zur zur a, chu chu Dick-a'n a han hmuh chuan, “Ka mit in ti tlai leh dawn mang e,” a lo ti sap a.

Rel a lo kal hnaih tâk hle hnu chuan a dynamite ṭawn khawm hmun thum laia a ṭawn ṭheuhte chu a churut zûk lai chuan a han dep kual ta zar zar a. A deh kai kim vek hnu chuan a rang thei ang berin hmun him lamah a insaseng ta nghal a.

Rel pawh chu a rawn tlan hnai zel a, a rawn tlan zawng chuan a ke vir thawm chu a ri thluk thluk mai a. Dick-a pawh chuan a awmna hmun him chin aṭang chuan a lo thlir ve reng bawk a. A churut zûk lai chu a'n hip vang vang a, rel tlan lai en reng pah chuan a han pak khu bial pap pap a. A kiai sak a, a mit lehlam chu a siai deuh sang a.

Chutih lai chuan rel chuan dynamite ṭawn behna hmasa ber chu a rawn tlan pel chiah a, a pathumna chu tlan pel lehin a lu aṭanga pindan khatnain a pal chiah tihin Dick-a chuan, “I tawp a hun ta!” a han ti a, chumi rual deuhthaw chuan dynamite ṭawn khawm chuan rel pindan chu a han vawrh dawrh mai a.

Chu thil chu lo lawmpui ve ni àwm fahran hian dynamite ṭawn khawm, hmun hniha ṭhena mite chu a han puak ve leh ta dur mai a. Dick-a chuan, “Ka thlir ning thei dawn lo...,” a lo ti el vêl a. Chutih lai chuan vaivut chu a khu rum rum a, rel chu a hliah ta nghal a.

Vaivut khu a han reh a, Dick-a'n rel a han thlir leh meuh chuan a dynamite chu a thawk ṭha hle a ni tih chu a hre nghal mai a. Rel pindante chu a lo darh deuh nuai a, an lo awm hrang fur mai a.

Dick-a chuan a churut zûk lai chu a han pak khu leh luai a; duh loh hmel zet hian leiah a paih leh a, a rap hrual nghal a; puakruk phawi chungin a inthuamna ngai tê bawka infam lehin rel lam chu a pan phei ta chhat chhat a.

Chu Columbus Express Company rel chu a lainatthlak kher mai a, chhantu hmel reng reng a tawng si lo! Rawn chhan tumtu apiang chu thah nghal mai inpeihin Dick-a lah chu a lo inpeih at mai bawk si a; mahse, a chhantu neih chhunte lah chuan mual an liam zo tawh a ni chek ang chu, tu mah reng an lang si lo!

Dick-a chu rel pindan chhungah chuan a han lut a‚ a lo lèi deuh bum avangin luh fimkhur pawh a ngai hle a. Pindan chhungah chuan company pawisa chu a han zawng chiam a, a hnu mai thei lo va.

Pindan pathum lai a zawn hnu chuan dollar box chu a hmu thei ta a. Pindan kil sir deuhah hian a lo awm a; chu chu a awmna hmun reng a ni chuang lo va, rel pindan let chuan a lo hnawl a ni.

Pindan chhung aṭanga dollar box han put chhuah tum chu a khirh ngang mai a, a chhan pawh pindan chu a lèh tlat vang a ni. Mahse, a hlauhthawnawm ber mihring chu an thi vek tawh tlat a.

Company relah reng reng chuan mi an chuang tam ngai lo va, pali panga vel lek pawisa venga kal te an awm ṭhin a. Chu bâkah, rel pindan pawh tlem tê a ni a, a sei ve ngai lo va; chu tak chu Dick-a tan remchang a lo ni leh zel si a ni.

Dollar box a put chhuah hnu chuan tlem a han chawl rih hlek a, a mit a han len kual leh deuh hret a; chutah, a sakawr thuhrukna lam pan chuan a inpu phei ta a.

A sakawr thuhrukna hmun a thleng ṭep tih chuan lungtê mum hi a rap hrual palh a, a petek nawlh mai a, a thil put pawh chu a thlauh ri nghal pawp a. A thinrim chuan a ke chu a'n han per ṭhuai ṭhuai a, “Ka pu tawh tawp lo vang che!” a han ti a; a puakruk chu a han lek kun deuh hlek a, a hmet puak ta ṭhuai a.

Chu pawisa bawm kalhna tala chu a tla nghal tawp a. Dick-a chuan dim lo zet hian a han chhir hawng a, a zuk en chuan dollar tlang hlir mai, thir chi hi a lo ni a, a inrem tle sut mai a. Thingrem khat chu ni mah suh se, tam tâwk tak a ni reng reng a ni. Dick-a chuan, “Hei vang phiangsen hi a nih hi a rih êm êm,” a'n ti ngawt a.

A ruk sum reng reng a dahna ṭhin, a savun pawh zih ip, a kawnghrena a zeh chu a la chhuak a‚ chu dollar thir chu a khung lut ta ruih ruih a. A khung zawh hnu chuan a han chawi a, a lo rit pherh erh reng a, “A rit hle reng a ni,” a'n ti leh sap a, a sakawr awmna lam pan chuan a inpu phei leh ta hnak hnak a.

A sakawr chuan ani chu a lo en hru hru a, Dick-a'n a bul a va thlen chuan a ke a per dut a. Dick-a chuan a pawisa put chu dah thlain, “Min hlau elo?” tiin a hmuiah chuan a va chul hluau hluau a, “Ṭhiana, kan che fuh leh ta,” a han ti a, a nui sak a.

Chutih lai chuan a sakawr chuan a kut chu a lo pet thawi vuai a, Dick-a chuan, “Min seh te chu i tum vêi a ni maw?” tih pahin a kut chu a la sawn vat a, savun pawh zih, dollar tlang hlir awmna chu a sakawr saddle sirah chuan a phuar bet ta zâwk a.

Dick-a chu zei zet maiin a sakawrah chuan a han lawn kai a, a dan pangngai tê bawkin a hma lam, a kalna tur lam chu chik fe hian a han thlir a. Chutah, “Ṭhiana, he hmun hi kan chhuahsan thei ta e,” a han ti sap a, a sakawr chu a kaltir ṭan ta a.

Thla chu a de tir chauh a la nih vangin a êng a chau hle a. Dick-a kalna ram chu a chhengchhiain lung khawkrawk a tam êm êm mai a, chu vang chuan amah pawh a fimkhur viau a, a kalna kawng te chu a en chiangin a fiah hmasa zel a. Hetiang hunah hi chuan Dick-a hian mihring hmuh hi a duh ngai hauh lo va; amah rawn hmutu lek phei chu thah a duh ngei ang.

Dick-a chuan a kalna kawng chu chiang takin a han en a; chutah, hma lam hla tak chu a han thlir vang vang a, mei eng set set hi a hmu ta a. A rilru chu a kal ding hman hle mai a; mahse eng nge, chu mei eng chu a enghelh teh chiam ang? A kal hêl mai tur alawm. Chutiang thil ngaihtuah rauh rauh chung chuan hma lam chu a pan ta zel a.

A duh anga a kal chak theih loh avang erawh chuan a kal hêl chhung chu a rei kher mai a, a han pelh meuh chuan Dick-a chu a thaw huai a. Mahse, chuti chung pawh chuan chawI thei a la ni mawlh lo mai. Zan thla de tir, eng mang lo hnuaia rei fe a kal leh hnu chuan riahna tur hmun remchang a melh ta a.

A duh ang thlap riahna tur hmun chu a vang kher mai. Amah ûmtute chuan rawn barakhaih ta thut se, a tan beih lêt a remchang ang em? A tan tlan chhiat lo ṭul ta thut se, tlan chhiatsanna tur kawng dang remchang a awm ang em tih thlenga a chian vek hnuah zan rei fe hnu chuan a duh thu sam ang chu a hmu thei ta hram a.

A sakawr chu a ti ding a, a chhuk thla a, a sakawr chu a be mawlh mawlh a, “Ṭhiana, min ven a ngai leh dawn ta a nih hi,” a han ti a. A sakawr chu a lo kal sawn mai loh nan a han thlung ṭha a; mahse, rikrum thila tlan sawn mai theih tur chuan a thlung a. A puanthuah tel chu a la thla a, rang takin mutna a han siam zung zung a, kar lovah a siam zo ta thuai a.

A mut hmain dynamite leh a puakrukte chu a en fel leh vek a, chumi hnu chuan ngaih ngam takin a mu ve ta a. Mahse, chuti chung pawh chuan cowboy dangte ang lo takin pheikhawk phelh lovin a mu mai a. A lukham sirah chuan a dynamite dahna savun iptê chu a dah a‚ chumi kiangah chuan a pawisa ruk chu a dah a, a ṭul thuta hman theih nghal turin a puakruk chu kawmawl hnuaiah a hum reng a, a muthilhpui ta a.

Khawchhak lam tlang kara ni lo chhuak tur chu a eng sur mai a, tlang sang tak tak te leh ruam te pawh chu a rawn kâp eng uai a.

Chutih lai chuan Dick-a chuan a sakawr chu chak lem lo tak hian a tlantir a; tlang ram vaivut mah ni se hmun ṭhenkhat lai chu a dur dup tho va, lei char ṭhenkhat te chu a khi ruah bawk a, a ṭhen laiah chuan ram chhengchhia leh khawkrawk tak tak kal tlang a ngaih hun lai te a awm bawk a.

A sakawr chu hma lam panin a kal zel a, ni pawh chu a tlangsang tawh hle a, Dick-a chuan ruam pakhat khawro zet mai hi a va thleng ta a. A han hawi kual vel ngial a, kalkhan remchang a hmu ta lawk lo va, a beidawng chuan kawrtê pakhat chu a zawh ta chawt a.

Rei fe a kal hnu chuan kawngṭum zim zet hi a va pawh ta hlawl a; chu kawng chu a zawh zel a, hmun zawl deuh mai hi a chhuak leh ta hlawl a, Dick-a chu phaizawlah chuan a tlan ta zel a. Chhun nisen sa-ah meuh chuan a chau ve ta hle mai a, a sakawr pawh chu a thlan chhuak vek tawh a. A sakawr hnenah chuan, “Chawlh hahdam kan mamawh a ni,” a han ti a.

Daihlim awmna lam pan zawngin an tlan leh ta a. An han chawlh hnu chuan Dick-a chuan tuithawl chu lain tui chu a han in khawlh khawlh a; a sakawr pawh chu tlem a intir a, a sakawr chuan kham lo takin tui tlem tê chu a lem ve ta a.

Dick-a chu a sakawr chungah zuang kaiin a tlan leh ta a. Ni danga a lo chin fo tawh ang ngeiin a hma lam chu chik takin a en a; chutah, a hnung lam chu chhuitu an awm leh awm loh a han en leh a. Chutah meuh zawng, a ṭangkaizia a lo lang ta....

A hnung lam hla feah chuan sakawr chung chuang rual hi an rawn tlan phei khu luai luai mai a. Han en mai pawhin paruk ai chuan an tlem lo tih chu a hre nghal a. Chutiang hmun thleng thleng a rawn zui peih ta chu Posse an ni ngei ang tih Dick-a chuan a hai hauh lo. A sakawr chu a kheng ṭhuai a, a sakawr na ti chu a lim nghal zawk bawk a.

Dick-a tlan an rawn hmuh chuan an rawn tlan chak ve sauh sauh mai a; mahse, Dick-a sakawr chu a lianin a chak bawk a, sakawr dang nena khaikhin ralah chuan sakawr ṭha a ni a, a tlan pawh a tlan chak kher mai. Posse rual khatte chu Dick-a chuan lehhawi meuhin a han en leh a, an inhlat tawh kher mai. Dick-a chuan a theihpa tawpa chaka tlan a, anniho chu tlan bosan daih a tum a ni.

Rei tâwk a tlan hnu chuan lung khawkrawk hmun bawk chu a va thleng leh ta a. Dick-a chuan ngaihtuahna thar a nei leh ta thut a; tuna a hnung rawn zûitute chu a hmeh mih vat loh chuan an rawn chhui zui zel dawn si a; amah rawn hmutute reng reng chu kutthlak kha a duh dan a ni si a, anni pawh chuan an pumpelh dawn bik em ni?

Lungmuang lova tlan reng ai chuan chûng mi pathumte chu that vek mai sela, a tan a fihlimthlakin lungmuang takin a tlan leh zel thei zâwk dawn a ni.

A thil ngaihtuah chuan a ti phurin chûng Posse-ho lo chànna tur hmun remchang chu a melh ta ran a. Lungpui phenah chuan a sakawr chu a thukru a; ani chu thlang deuh hretah chuan a kal thla a, lung lian vak lo phenah chuan a tawm ta a. A thlanga an rawn kal hunah chuan kawngpui lian deuh mai pahnih inkarah chuan an rawn kal khawm deuh ang a, chu tak chu dynamite chuan a lo vawm dawn a ni.

A rin ai daiha Posse-ho chu an rawn thlen har tâk avangin Dick-a chuan an lo tlansan hla hle tawh a ni tih chu a hre mai a. Nakin deuhah chuan sakawr ke rawn per ṭak ṭak thawm chu a hre ta a; chutah, a dynamite ah lai tlawn thum chu a phawrh chhuak vat a, nawhalh pawh chu a phawrh nghal bawk a.

Rei lo têah, Posse rual chu an rawn lang ta a. Dick-a chuan an ṭawng te pawh chu a hre thei tawh a, an vaiin pariat lai mai an lo ni a. Posse-ho zinga an hotu ber ni àwm chuan, “Tunah chuan kan kuta man hun tur chauhin min dal tawh a ni,” a han ti deuh lung lung a, lung khawkrawk tak hmun a nih avangin an rawn chho chak thei lo va.

Lungpui lian deuh mai pahnih inkar zawl laia an din khawm lai tak chu Dick-a chuan remchanga hmangin nawhalh chu a han nawt pharh a, dynamite chu a dep kai ta a. Rang zet hian an awm khawmna lai deuhah chuan a vawm thla ta a, “Ka hnung rawn zuitute chan ang chiah in chang ve ang!” a han ti tuar a.

Mahse, Dick-a aiin a thil rawn vawm thlak chuan an rilru a la ta zâwk a! An mi chhui chu an hria a, hmanrua eng nge a hman ṭhin tih pawh an hria a ni. Posse-ho chuan insaseng chu duh teh mah se insasengna hun an nei mawlh lo a ni.

Dynamite han puak dur chuan mi pahnih chu a vawrh leng nghal lâwp a. Dynamite chu an awmna aṭanga fit riat vel laia hlaah a tla a, an zal hlen ta a ni.

Pathum dang leh chu a hmunah ka pawh chhawn lovin an thi nghal a; sakawr pawh pathum an thi a, pahnih an inhliam bawk a. Chu mai chu duh tâwk lovin Nick-a chuan dynamite chu a han vawm leh a; chutah meuh zawng, a thlanga thil nung la awm chhunte chu an thi chiang hlawm hle mai!

Tu mah dam awm tawh lo mah se, a tawp ber atan pakhat chu a zuk vawm thla leh a, a han puak ri dur chuan ram chu a nghawr khawk rawih rawih mai a.

Dick-a chuan, “Kha kha ka sunna che u a nih kha. Tin, in chan kha pawi ti reng reng suh u. Min zuitute reng reng chan chu kha kha a ni a; lungawi takin awm tawh rawh u, ka kuta thih chu mi tin dan a nia lawm,” tiin mitthite chu a zuk be vêl luam a.

A sakawr dahna hmunah chuan a han chho a, zei zet hian a sakawr chungah chuan a'n chuang kai leh tharh a, “Ṭhiana, kan hna chu kan zo leh ta e, i kal leh tawh ang hmiang,” tih pahin a sakawr chu a kaltir leh ta zel a.

****************************

Arizona ram chu outlaw pakhat chanchin chuan a deng chhuak chiang kher mai. Matt Katlin-a pawh chuan chanchinbu chi hrang hrang enin a lo chhui kual ve nasa hle mai a; a tawp a tawpah chuan a lo ngaihtuah ngai reng rang loh thil pakhat ngaihtuah chhuah chu a nei ta a - chu chu Dynamite Dick-a hi a ni.

'Tun kum tir lam leh nikum lamah te chuan kan store house-a dynamite-te hi a bo ngai hauh lo va; mahse, Dick-a'n nipui laia min rawn tlawha a bo tâk daih hnu kha chuan dynamite a bo ṭeuh thu Smith-a khan min hrilh kha a ni a; chumi hnuah inrawk leh insuam thu kan hre leh a ni si a...,' tiin thluak fim takin a ngaihtuah ta rauh rauh mai a.

'Dynamite Dick-a a chêt sual a, a ke a bai hma khan dynamite eng emaw zat a bo a; chutah Dick-a a awm tâk loh aṭang bawkin thil rapthlak tak tak kan hre leh si....

'Chu lo, thil pakhat dang a la awm cheu mai. Dick-a a rawn zin khan a ke a bai nasa hle kha a ni a; mahse, Kingsmann-ah Slim-a ngeiin a hmu bawk si. Slim-a lahin dâwt min hrilh ngai dèr si lo. Tun ṭuma a rawn zina dynamite bo ta vak mai leh a hnua thil rapthlak tak tak thleng leh si ṭhin hi Dick-a nen inkungkaihna an nei ngei ang‚' tiin a ngaihtuah chhunzawm nauh nauh a.

Amah ngeiin mi sual chu man a tum nghet ta tlat a. A thil tum chu Phoenix Company Director hnenah chuan a hrilh ta a, ani chuan a lo hriat thiampuiin ṭha a lo tihpui khawp mai a.

Matt-a chuan, “Ka pu, i hriat angin ka mi zawn tur hi dynamite hmang a ni a, silai maia han beih lêt chi a ni si lo va; khawngaihin lo hre thiam la, dynamite tlem azawng min hmantir a ngai dawn a ni,” a han ti a.

Director chu a han inngaihtuah vang vang a, “Aw le, Matt, a ṭha e. Randall-a'n a sem thei ang che; mahse, i va kalnaah chuan va fimkhur hle ang che,” a ti ta a. Matt-a chuan, “Min ngaihtuah duh suh,” a lo ti mai a.

Matt Katlin-a chu Kingsmann lam pan tur rel-ah chuan a lawn kai ve ta a. A ipte khat ṭanin dynamite a ak a, winchester rifle chu a hum bawk a, puakruk a pai reng bawk a.

Rel chhung a luh hnua Matt-a rilru-a cham reng mai chu, 'Debbie kha eng mah ka hrilh si lo va, a lo lungngaiin a lo mangang hle mai ang a.... A nih loh leh han hrilh ta ila, min hlauhthawnpui aleiah a lungngai leh si ang a,' tih chu a ni a; chuti chung chuan Kingsmann lam panin rel chuan a tlan liampui ta zel a.

Matt-a chuan hmana Dick-a lehkha rawn thawna a awmna leh chenna hmun a rawn sawi kha a la hre reng a, hman ṭangkai ngei pawh a tum hle a ni.

*****************************

Dynamite Dick-a chuan kawngka a han hawng a, a nula kalpui hnenah chuan hawihhawm zet hian, “Come in, Baby,” a han ti a. Nula pawh chuan chu tlangval sang thlerh thlawrh leh hmelṭha tak mai melh paha han nuih sak chung hian in chhung lamah chuan a ke a pên lut ta a.

Dick-a chu a nalhin a hmel a ṭha kher mai. Kawrchung dum a ha zaih a, a hnuaiah chuan kawr var thianghlim sar mai hain bow-tie dum a suih zaih bawk a; lukhum parh dum, a tlang parh bial pap mai hi a khum bawk a.

A nula kalpui pawh chu a hmelṭha kher mai! Meng hring nghalh mai, hnar ngul sang veh vawh leh hmui mawi zet mai hi a ni a, amah a ngoin a pian lah a nalh zek lehnghal a. A sam chu a dàr chung lam vaw tâwk chauha sei hi a ni a, a chalsam chu a kir deuh hlek a. Ṭhi nalh fahran mai hi a awrh a, kawr ban nei lo hain; pawnfen, khûp khuh tâwk chiah hi a feng bawk a. Dick-a nen chuan hlim dun deuh maia kut invawnsak chungin pindan chhung chu an lut dun ta a.

Chu pindan chhunga Dick-a a han lut chuan a dam chhunga a thil tawn mak leh rin loh deuh mai chu a tawng ta!

In chhunga chair pakhatah chuan Matt Katlin-a chu winchester rifle kengin a lo ṭhu a, a rifle ken chuan Dick-a lo lut chiah chu a lo tin nghal chat a.

Dick-a mak ti lutuk chuan, “Matt...!” a han ti ṭhawt a.

Matt-a chuan, “Lo lut rawh, Dick. Kha, ka han hmuh leh che chuan i ke lah a lo ṭha reng tawh mai,” ti el deuh tak hian a lo ti a.

Dick-a chuan, “Matt...,” a han ti leh dêk dek a.

Chutih lai chuan zawi fiah kâk hian Matt-a chuan, “Dick, i thil tih sual ka hmu chhuak ta! Eng dang sawi a hun ta lo. Tuna ka duh chu khawiah nge dynamite-te kha i dah ṭhat tih leh nangmah ngei kha i inpêk ka duh a ni,” a ti ta daih a.

Dick-a chuan, “Aw.. Matt‚ i hre thiam lo a ni. Nang hian maw min man chu tum a? Matt‚ nang nen hian ṭhian ṭha tawp kan ni si a; engati nge min man i tum tâk mai?” a han ti a.

Matt-a chuan, “Dick, finrawl thawh te hi i lo tum ang e aw...,” a lo ti ta hmiah a. A sawi dik a ni, Dick-a chuan remchang a melh reng a ni.

Thâwk leh khatah, Dick-a chu a che ta phut mai a, a nula rawn kalpui chu Matt-a awmna lamah chuan a nem phei rawk a, nula chuan Matt-a chu a va bawh ta rawk a.

Chutih lai chuan Matt-a chuan a rifle chu a hmet puak ta ṭhuai a; mahse, chung lam hawi a nih avangin a pawi khawih ber chu in chung ceiling a verh kuak phawt chu a ni mai a.

Nula hlau lutuk chuan, “Min chhan ru...,” a ti nghal tuarh a. Chumi rual deuhthaw chuan Dick-a chuan, “Matt, hremhmunah liam nghal rawh!" a lo ti ve tuarh a.

Dick-a chu a zuang dawrh a, tukverh darthlalang chu a su keh chuai a, in hnuai lam kawtthlerah chuan a zuang thla ta daih a. Tukverha zuan thlak pah chuan, “Nang hian min man kumkhua lo vang,” a la ti fan a.

Matt-a chuan rang zet hian dynamite chu a chuh nghal a, kawtthler lamah chuan a zuang chhuak ve ta vat a. A dynamite hum chu a han ṭan kai a, a vawm phei ta vak a. Dynamite chu a puak ri dum a; mahse, Dick-a chu a fuh chuang lo.

Dick-a chu a sakawr thlunna lamah chuan chak deuh maiin a tlan a, 'I thil tih hi i la tuar ang,' tia rilru siam nghet tlat chungin a sakawr awmna lamah chuan a tlan zel a.

Dick-a'n a lo hman fo ṭhin tawh angin Matt-a chuan dynamite chuan a va vawm leh ta a. Dick-a chu a hnungtawlh dawrh a, a sakawr awmna leh a awmna inkarah chuan dynamite chu a puak ta dur a.

A sakawr hlau lutuk chu a tal vak a, a thlunna chu tal chatin a tlan chhe ta a; chu chu Dick-a'n a han hmuh chuan a sakawr chu a ûm ve ta zel a. Matt-a han bei lêt ve tur pawhin a sakawr chuan dynamite chu a phur tel daih bawk si a, 'Dynamite ka hman ve nghal a ngai a ni,' ti rilru chungin a sakawr chu theih tawpin a ûm zel a.

Matt-a pawhin dynamite chuan a vawm pha ta lo va, a winchester rifle chu a lek kang ta a. Chutih lai chuan Dick-a chuan a sakawr awmna chu a thleng a, a sakawr pawh chu a man fel vel chiah tawh a, Matt-a beih lêt nan a iptê chhunga dynamite chu lâk a lo tum mek a.

Matt-a chuan winchester chu uluk deuha a tin hnu chuan a hmet puak ta a, a mu thlawk phei fua chuan a tum tak Dick-a chu fuh lovin a beng bulah chuan a thawi fua a.

Mahse, a piah zawka thil pawi lutuk chu a va khawih ta! Chu chu Dick-a'n hawn a lo tum lai mek, dynamite dahna savun ip chu a ni. Chu savun ip chu silaimuin a han den chuan Arizona ram deng chhuak khawpa ringin dynamite chu a puak ta a.

Dick-a chu a leng lâwp a, a piah leiah chuan a tla ta thlawrh a. Chuti chung chuan han dah chhuah leh hram hram hi a han tum a; mahse, a mit chuan eng mah a hmu tawh lo. A hmai chu thisen leh zen phuh dum chuan a ti rang ruan a; chutah, leiah chuan a bawk leh thlawp a, a chatthla ta nghal a.

Tichuan, Dan Clifton; Dynamite Dick lo ni ta chu a ṭhianpa Matt Katlin-a kut tuarin kum 1863 August ni 3 khan a lo thi ta a ni.

Matt-a chu Dick-a ruang awmna lam panin a kal phei chhat chhat a; mahse, a ṭhianpa chu a lo thi fel der tawh a. Matt-a chuan, “Dick, hahdam takin chawl tawh rawh aw.... Kei chuan ka rawn hre reng ang che,” a ti sap a.

Tun hma chuan an pahnihin hmelmate an lo do dun tawh ṭhinin, thian chhan thih ngamin an nun chu an lo thàp dun tawh ṭhin a; zem khat zenin a theih phei chuan hlawkna nen lam an lo insem tawh ṭhin. Matt Katlin-a'n amah ngeia ranch a neih hun nghakhleltu ber pakhat pawh Dick-a chu a ni si a; mahse, chûng zawng zawng te chu an liam zo ta...!

Hmanlai an chang zo dawn! Dick-a pawh, Matt-a leh Debbie tawng leh turin he khawvelah hian a rawn lêt leh tawh ngai dawn lo va, an inneih ni hmuh châkin a rawn kir leh tawh hek lo vang. A chhan chu; ṭhen tawh lohna hmun, mitthi khua ngeiah chuan a lawi tawhin, chumi hmunah chuan khua leh tui thar a va ni tawh tlat si!

Matt-a chuan muangchangin a sakawr chu Wallatin lam hawi chuan a kaltir ta a. A mitthlaah chuan amah leh Dick-a leh Debbie inkawm khawm lai te chu a cham reng a; mahse, khuarei an chang mai dawn si.

Dick-a chu thi tawh mah se, ani chuan dam chhan ṭha tâwk a la nei alawm; chu vang chuan a ni, Wallatin chu a pan ni - Debbie Gadner-i ngei mai chu....

A TAWP TA.

(Ka chhiarna a rei ta deuh a, ka lo hre chiang vak tawh lo va; mahse, ka han chhiar nawn leh chiah chu ka hnuk a ulh deuh tlat mai.

Mihring nun tluang pangngai tak, rilru ṭha tak ni ṭhin kha duhamna sual avangin mi dang daihah a lo chhuak ta.... Hetiang khawpa rah chhuak duhawm lo siamtu, he duhamna hi a hûatawmin a hna thawh hi a va rapthlak teh lul em!!!

Mahse, Pathianin mihringte hi duh thlan theihna min pe a, duh thlang thei turin min siam a, a chhia leh a ṭha thliar thiam turin min buatsaih bawk a; chu chauh ni lovin a ṭha lam thlang turin min la kawhhmuh cheu a ni.

Thil siam chuan Siamtu'n a duan chhan ni si lo, a duan dan ti hlawhtling siin a duh thlanna chu a lo siam ta a; dynamite hmanga mi dangte nun sûattu chu dynamite hmang vekin a nun sûatin a awm ve ta.... Rz Pachuau)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)