THE WARRIOR'S PATH (Completed)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: THE WARRIOR'S PATH chapter 1-12

Unread post by Rozami pachuau » August 27th, 2019, 8:08 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 13
(Rozami Pachuau)

Chu kawng, thim hnuaia ka zawh lai mek chu ngaw kar kawng a ni bawk a, kal a harsa viau a, ran tlatna tur phul hmun te pawh a awm leh zauh ṭhin. Thla chu a chhuak dawn tawh a, kawl chu a kâp eng ruih tawh a, hla taka huan hungna pal hmuh theih riai ruai te chu mihring ruh ro pawh a ang hle.

Zan thima thlawk chi eng emaw hi ka lu chung lawkah hian a rawn thlawk fua mai a; zan reia hram chi rannung hram a ri chuah chuah bawk a; chu bâka thawm chu ka sakawr ke pen ri chu a ni leh mai. Ka hma lam chu hlauhawm awm thei tur a awm em tiin fimkhur takin ka melh kual pah reng a.

Kawng sir tuakah chuan thing a ding tlar put a, zanah chuan bang ang maiin a lang a. Chutianga rei fe ka kal hnu chuan hmun fai lai zawl nuam tak hi ka va thleng a, thla pawh a eng ruih tawh a; mahse, ka ngaih a ngam thei tlat lo.

Hmun ualau leh ralmuang bera ngaih te hi hlauhawm theih tawp a ni fo tih ka hriatna a rei tawh. Ka sakawr pawh hriat nei tak hian a beng a tun hru mai a, a tlan lai chu tlemin a muang ta hrat bawk nen – hlauhawm a hnai tih ka hai ta lo.

Ka pistol chu a pahnihin ka hum a, inkah thut a awm pawhin ka sakawr chu a chi-ai loh hram ka beisei ve ngawt a. Ka sakawrin hlauhawm a hnaih thu min hrilh lawk hlauh chu ka vannei hle mai!

Kan hma lam kawi deuh reih, hnim buk tlem tê chauh awmna aṭang chuan rawn zuang chhuakin min rawn bawh ta thut a! Mahse, ka sakawrin a hun takah inring turin min lo hrilh lâwk tawh tlat, min changtu zinga a hmasa ber chu a rawn tho chhuak chiah tihin ka kap nghal ta ṭhuai a.

Chu pa lo din chhuahna chu ka tana kah remchanna lai tak a ni kher bawk a, a áwmah tak ka va kah chuan a leng lâwp a. Chu veleh ka sakawr chu ka phih her lawih a, a nâkah ka'n kheng zui leh chu sakawr ṭha tak a ni e, hma lamah chuan a zuang khawh ta nghal zawk a.

Ka hnung lamah chuan silai a puak ṭhuai ṭhuai a, silaimu a ving thar thar a. Ka sakawra chuang reng chung chuan ka'n inher deuh a, ka hnung lam thim zinga mi pakhat ka va hmuh chu ka va kap leh thawr a.

Silai a puah chuan a ring ṭha êm bawk a, ka sakawr chu a zuang zawk a; ka mi kahpa chu a pai nawk a, a tlu hnawk tih chu ka va hre thei a.

Tunah chuan ka lo thleng hla hman leh tawh viau e. Min lo changtute kha eng zat tak ni ang maw? Pali aia tlem lo chu an ni ngei ang. Ka inring lo lai min kah an tum chu a ni ngei a; mahse, hmun ralṭia khawsa ṭhang ka lo ni hlauh a, hlauhawm hnaihzia chu ka sakawr chezia aṭangin ka hai lo, ka him phah ta reng bawk a ni.

Ka sakawr chu a tlan chak bawk a, a lakam hrui chu thlah dulin duh tawka chakin ka tlantir ta a. Ka pistol pahnih chu a mu ruak tawh mah se, a mu thun sa pahnih dang ka la nei ta fo tho alawm le!

Rei tawk kan tlan hnu chuan ka tlan zawihtir ta deuh a, min ûm zuitu an awm loh avangin min lo changtute kha sakawr chung chuang an nio a ni ang. Khawchhak aṭanga kawl a lo eng ruih tâkah chuan Santiago De la Vega khaw tawntirh chu kan lut ṭan ta a.

Khaw chhung kan va lut chu in lian pui mai, King's house an tih mai chu kan pel phei a, a piah lawkah chuan tualzawl nuam takah hian kan chhuak leh a. Chumi sirah chuan hotel lian vak lo hi a awm a, chutah chuan ka chhuk ta a.

Sakawr ka dah dawn lai chuan mi hang naupang hi a lo kal a, chaw leh tui a lo pe a, ṭha taka lo enkawl turin ka hrilh a, shilling khat ka pe nghal bawk a.

Chu mi hang naupang chuan, “Hei hi Pu Legare-a sakawr kha a ni ngat mai; sakawr pawh hian ka hriat ang bawkin min hre ve asin!” a ti ta reuh a.

Hotel chhung chu rin ai takin a lo zau a, a vawt raih bawk a, dawhkan leh ṭhutthleng tam fe hi a inhung bawk a. Ṭhutna ruakah ka ṭhu fel hman chauh tih chuan pa pakhat hian rum um khat hi kengin min rawn chhawpsak nghal zat a.

Kei chuan, “A ṭha e; mahse, ka duh chu chaw a ni; thil mawm leh thau lampang tam lutuk lo ni bawk se,” ka ti a.

Hêng laia Spanish leh French-ho hi duh aiin an in-ei kiar mah mah a; ka pa khan Sakim-a zirtirna pakhat a hriat reng ṭhin chu, 'Chaw mawm lutuk ei chu ngaihtuahna fim leh mahni inthunun theihna kan tlachham,' tih hi a ni a, ka pawm zawng tak a ni.

Chaw chu min rawn pe ta a; sa chan nawi dah vawh, ar tui pum chhum leh dawnfawh zai lep te a ni hlawm a. Ka ril a ṭam tawh bawk a, tui ti takin ka ei ta a.

Zu erawh chu ka tem hlek chauh a. Zu chhia chu a ni hauh lo, a ru deuh mah mah a; kei anga harh fim mamawh reng tan chuan khawih chi a ni lo thung, he laiah chuan eng tik lai pawhin men kar reng a ngai tawh tlat.

Buaina ka lo tawh zeuh zeuh tawhahte khan Max Bauer-a leh Pittingel-ate an inrawlh tih hre turin finfiahna eng mah ka nei lo va; an mi phiar rukna te chu a buarchuarin an tum a tlawlh chiang kher mai; mahse, tunah chuan khatiang mai mai kha chuan an che tawh lo vang, an fing thiam hle tawh ngei ang.

Eng pawh ni se, tunah chuan ka hmanhmawh ve ta hle a ni; ka tih turte chu zawh vat a, Carolina lama ka hmun lo ram lam pana haw ve tuai thuai chu ka rilru-ah a awm tawh.

Boruak chu a uap churh mai a, thlipui a hnai a ni ngei ang. Ka hmai vela thlan lo luang chu hûih pahin tukverhah chuan ka dâk a. Engtin nge dam khawchhuaka ka awm theih ang tih leh engtin nge sumdawmna tenawm tak, naupang pawi sawi lote ru bova hralh ṭhinna hi ka tih tawp theih ang tih chu ka ngaihtuah theih awm chhun chu a ni rih mai.

Sal neih hi kan bansan a ngai a; mahse, he thil hian khawvel a dap chhuak hneh hle a, khawi hmunah pawh sal hmuh tur an awm zel si. Hetih lai ngei pawh hian Europe khawmualpui lam mi sang tam tak, sal angin North Africa leh hmun dang dangah an chhawr mek a, khawi hmun mah hi hetiang laka fihlim an awm lo.

Pindanah chuan ka chaw ei kham chu mahni chauhin ka awm a, ka sakawr zin sir tuaka ka pistol pai, a mu ka kah ruah tawhte chu ka thun khat leh ṭhap a.

Chutih lai chuan hotel neitupa chu a lo lut a, ka silaite chu melh reng pahin, “Pu Legare-a ṭhian i ni maw?” a rawn ti thei mai a.

Kei pawh chuan, “Aw, ni e,” ka ti ve mai a.

Chutia ka chhan chuan a hmel chu hmuh theihin a nelawm ta surh a. Pa sa nghet leh lawh, hmel sen tal mai, sam sen thang a ni a. “Pa ṭha elkhen a nih saw, a fing hle bawk. A zia saw a zawi a, mi pawhin an ring sual chawk ṭhin reng a ni,” a ti charh charh a.

“Hêng a pistol-te hi a ta tih i hriatsak elo?” tiin ka lo zawt ve thung a.

Ani chuan, “E, a sakawrte nen lam khan maw le! I lo thleng kha ka lo thlir reng che alawm,” tiin ka pistol-te chu a en reng a, “Buaina i tawk elo?” a ti leh bauh a.

Kei chuan, “A khawi lai mah hi a him tak tak lo a nih hi; buaina lian tham chu tawk lo ve,” ka ti ve mai a.

“Mi lo thleng thar an tam riau a, a ṭhente chu Port Royal lama mi sualte an ni hlawm a; fimkhur hle ang che,” tiin min chah zui a.

“Ka inring reng e,” tih pahin ka tho ve ta nghal a. Santiago de la Vega aṭang chuan Rio Cobre chu mel ruk vel chauh a ni a, chu lam pan chu ka rilruk ta a.

Ani chuan, “Khawpui luh hma, in te reuh tê te awmnaah khan Senor Sandoval-a a awm a, a hnenah khan i duh chuan i sakawr leh pistol hawhte kha hnutchhiah mai la, a neitupa ka lo pektir mai ang,” a ti ta zel a.

Silaite chu a paiah thawlh felin ka chhuak nghal a, sakawrah lawn kaiin Rio Cobre lam pan chuan ka chhuak ta a. Kawng lakah chuan mi hang tam fe, thil chhipchhuan bawr tak tak hi ka hmu thluah a; a ṭhen phei chuan chibai te min lo buk a, ka sakawr leh a neitu chu hriain an zah hle ni tur a ni.

Henry-a hi darkar tam fe chu kan inhmu ta lo va, khawiah tak awm ni maw?

Sakawr chung chuang pakhat hian mi rawn pel a, ka hmuh hnu chu niin ka hre si a; mahse, tu tih ka hre chiang thei si lo. A hnu lawkah chuan ka hnung lama sakawr tlan ri ka hre leh a; ka'n lehhawi a, sakawr chung chuang mi pahnih, yard sawmnga vel lek tura rawn tlan hi ka va hmu ta a.

Chutih lai chuan min tâwk zawnga sakawr tawlailir lo kal chu ka bul maiah chuan a ding ta a. A khalhtupa chu chhukin tawlailir hnuktu sakawrte chu panin eng emaw siam ṭha ni àwm tak hian a va kun vel a.

Ka hnung lama sakawr chung chuangte chu an lo hnai hle tawh a; nichina mi rawn tlan peltu pawh kha a ding a, tawlailir chhunga mi tu emaw chu a va be sa sa a.

Kan awmna lai chu Rio Cobre aṭanga mel thum vela hla a ni a, hmun reh lai tak a ni nghe nghe a. Ka'n hawi vel chuan thil dang pakhat ka hmuh belh leh a, tawlailir dinna hma lawkah chuan mi pahnin hi lo ṭhuin zu um an dawm mek a, an sirah chuan thil fun pakhat hi a awm ngat bawk a.

Engtizia emaw ni, ka awm hle hle thei ta hauh lo mai a, ka pistol paite chu a rukin ka'n sâwi thawl zauh a. Sakawr tawlailir dinna ka thlen chiah chuan a sira lo ding-pa chuan mi lo en a; chutiang bawkin sakawr chung chuangpa chuan mi lo ve chiah bawk a, chan ṭha chang inti hmel tak hian an nui bawk a.

Pakhat zawk chuan tawlailir hnung lam chu kâwkin, “I mit la tur deuh kan kawl a nia,” a ti ta mai a.

Ka phu deuh zawk a; mahse, tawlailir chhung chu ka va bih ta tho a. Chuta ka thil va hmuh chuan mi barakhaih chiang kher mai!

Diana! Diana Macklin-i chu hmai dang lêp hian a lo ṭhu a, a bulah chuan nui sawngin Pittingel-a chu a ṭhu bawk a, “I thih hmain vawi khat tal chu i hmu leh duh ang chu ka ti a...!” mi elsen zet hian a han ti ta lehnghal a.

Thu ṭha eng mah sawina hun a ni tawh lo.... Ka sakawr chu ka'n kheng zawt a, kan hma chiaha min dal zawnga lo ding sakawr ngei mai chu ka va su ta dawt a. Ka sakawr chu a lian ṭha bawk a, ka hmaa dingpa sakawr chu a let ta tawl mai a.

Ka sakawr chu a ke hma lama ding uaihin ka han phih her sawk a, tawlailir kawngkhar chu ka pawt hawng ta rawp a, “Lo chhuak vat rawh, Diana! Thuai vat!” ka ti ta tuar a.

Mi dangte chuan min rawn hual chu a ni chawpchilh nghal mai a. Kan hma kawng sira lo ṭhu pahnihte pawh chu an zuang tho a, min rawn pan tumin kan hmaa sakawr tlu chu an rawn hêl ve mek a. Tawlailir khalhtupa pawh chuan mi rawn en a; mahse, ka sakawr nen chuan ka va bawh zui thut a, a hnungtawlh dawrh a, a tlu rawk rawk a.

Diana chu tawlailir aṭang chuan a rawn zuang chhuak thuai a; amah dawmtu, Pittingel-a pawh chuan Diana thawmhnaw ṭhenkhat chu a la vuan tel nghe nghe a; amah tak erawh chu a dawk chhuak zawk a.

Diana rawn zuang chu ka lo chelh vat a, rang mangkengin ka sakawr chu ka kheng tlan ta a. Chutih pah chuan ka pistol chu phawiin ka hma lama mi chu ka kap nghal pawp a, a pai nawk a, a kat phei rawk rawk a.

Kan hma lam kawng thlang Iamah chuan mi pali hi an lo inzar pharh mek a; chu vang chuan kawng chhak lam hawiin sakawr chu ka tlantir ta chiam a.

Ko pang kan liam chiah chu ngaw pik zau tak hi a lo awm reng chu niin! Sakawr nena han tlan zelna chi rual ni ta hek lo, sakawr chu kaiin thing karah chuan kan tlan ta zar zar a. Kan tlu thul, kan tho leh, kan tlan leh thul; tlan chak lah a har êm êm!

Kan hnungah chuan au thawm a nasa hle a, Pittingel-a aw phei chu a ringin, “Man rawh u; in man loh chuan a nung chungin ka lip ang che u,” tiin a hote chu a vin tuar tuar a.

Hruizam a tamin a pik hle a, tlan chak a har a ni! Kalna remchang ber tur nia ka hriat lam chu panin, tlan chak har teh mah se ka pistol chu ka la hum reng a, theih ang anga inthiar fihlim chu a ṭul si!

Kan kalna ramhnuai pik tak chu a hnawng churh a, a nal hle bawk a. Tuipui kam kan hnaih ta tih hriat tak hian kan awmnaah chuan tuifinriat kam lungṭhil a lo tam tawh hle a. Thâwk leh khatah, tuipui lo dum kuk chu kan va hmu ta thut a, hla takah hian Port Royal chu a lang ut bawk a.

Tuipuiah chuan sangha mantute lawng eng emaw zat hi a awm tuar a, chûngho chu ka va vai khum ngial nâin ka ban vai chu min chhang tura min rawn hmu an awm àwm pawhin a lang lo.

Chutah, lawngleng ding fal deuh hi ka hmu ta a. Uar zet hian ka han vai leh vak a, min rawn hmu ta a ni ang, a rawn inher a, kan lam a rawn pan ta dalh dalh a. Kut vai reng chung chuan hmanhmawh turin ka han tur a.

Diana chuan ka kut a chelh chu thlahin, “Kin, min rawn nangching dawn ta e, kan tlai ta deuh a ni!” a ti zuai ta raih a, a âw aṭang chuan a beidawng hle tih pawh a hriat hle mai.

Mi pali zet hi ngaw kar aṭang chuan kan lam panin an lo chhuak a; kan piah lawk aṭang chuan ka lam panin mi dang pakhat a lo kal belh a; a dang pakhat leh pawh piah deuh aṭang chuan a rawn lan belh leh cheu bawk a — mi paruk!!

Chutah, ka pistol chu ka'n lek chhuak a, an tim ta deuh a; mahse, min rawn pan leh ta thuai a.

Diana hnenah chuan, “Tui hleuh i thiam em?” ka ti ta chawt a.

Ani chuan, “Thiam e,” a lo ti ve mai a.

Kei chuan, “Chuti chu, sawta lawngleng lo kal saw panin hleuh phei la; amah pawh Andrew-a a nih saw, ka hria e,” ka ti ta zung zung a.

Chu veleh Diana chu tawi khawtlai lovin tuiah chuan a lut ve nghal a, a kawrchung hak lai pawh chu a phelh ta a. Chutah, min ûmtute zinga pakhat chu a ṭe ta ṭhat a, tlan chung hian min rawn bawh ta ngawt a.

A hmasa ber chu ka lo kap pawp a, ka sir lungpuiah chuan a inbang ta hnawp a. Chu lo pawh pistol dang ka la nei ta cheu tih an hriat phei chuan an phawk ta ho hlawm a, ka awmna ang aṭang chuan ka hlah dawn lo tih lah an chiang hle bawk ni tur a ni.

An zinga pakhat chuan pistol a phawi ve ta a; thu pêk an dawnah a nung chunga man tura tih an ni ang a; mahse, an rin ang ka nih tak lovah chuan loh theih lohah a ngai ve ta a ni ngei ang.

Pistol chu Pu Legare-a ta ka hawh bakah pahnih dang ka la nei a, ngunhnam hriam tak ka la nei zui cheu si.

Ka hnung lawkah chuan lawng kar ri barh barh ka hre ta a. Tunah chuan ka kut lehlam lehlamin ralthuam hlauhawm tak ka hum ve ve a, fimkhur takin ka hnungtawlh pah ta zel a.

An zinga pakhat chuan min kah fuh ngei tum zetin min han tin kawh ta lah a.

Mahse, kei chu ramhnuaia Indian-hote nena intawh chilh thut thut leh hlauhawm tak tak laka rang taka che ṭhin ka ni miau a, tin pawh tin kawh hmasa si se lo chuan ka va kap ta thawr a.

Min kah tumtupa chu a eu zawk a, a silai chu a thlauh ta a. Mahse a silai thlauh chu chhar a la tum tâk fo avang chuan ka kap nawn leh siah a, a tlu hlen ta a.

Kei pawh chu tuiah ka tawlh lut ve ṭan ta a. Mi sualho zingah chuan amah bak silai keng an awm lo a ni ngei ang, min rawn kah zui tum an awm lo.

Ka tui dai chu a thuk ta viau tih chuan, “Khai le, Captain, he lamah...," tia Andrew-a min kohna aw chu ka hre ta a.

Lawnglengah chuan ka lawn kai ta vat a, Diana pawh chu huh zawr hniangin kil khatah chuan a lo ṭhu than a. Ka lawn fel ta tih veleh Andrew chuan lawng chu a kar sawn ta vat a.

Tunah chuan thil a danglam leh ta vek mai!

Tukṭhuan kan ei lai chuan Legare-a leh Henry-a chu an lo Iut ta a. Ka bula ṭhutna chu zaizirin ka lo kawh hmuh a; hmun tam takah chuan mi ngo leh mi hangte hian dawhkan an kil ho ngai lo va; he lai hmun, Pirate khawpui Port Royal angah te hi chuan chi inthliarna a awm hauh thung lo.

Legare-a chuan, “Adele khan chhechhamna thu ziak i mamawh niin a sawi a...,” a ti ta a.

“Ka hming hliau lohna tur ngawt a ngaihtuah a; mahse, chu êm chu ni theiin ka hre lo. He thil hi a namai lo êm a, Adele hi ka nupui tak ni turin ka nei tawh a, ka tan chu chu a tâwk. A hming hliau zawnga lo sawi tum emaw an awm chuan chu mi ngei chu mipate'n an tih dan tur ang ngeiin ka hmachhawn mai ang. Hei le...,” tih pahin lehkha inthlep hi a rawn phawrh ta mai a.

Amah vek chuan, “Kuta ziak ngei; ro reltute hma ngeia a dikzia chhechham meuhva nem ngheh, Adele-i kut ziak ngei chu a nih hi. A thu ziakah khan hming eng emaw zat chu a chuang a, Pittingel-a hming pawh a lang zing pawl a ni. Hei hi a tawk lo a nih chuan keimahni ngei pawh Cape Ann-ah emaw, Shawmut-ah emaw, khawi hmunah emaw pawh kan lo kal mai ang,” te chu a la ti ta zel a.

Kei chuan, “Ka lawm tak zet e, hei hi tawk ngei turah ka ngai...,” ka tih mek lai chuan kawngkhar chu rawn kikin Diana chu a lo lut ta a. Ani chu ka lo kawh hmuh vat a, “Hei Diana, Pittingel-a leh a hote'n vawi hnih ngawt an lo man tawh hnu pawh a awm remchang e, han inhmelhriat teh u,” ka ti ta a.

Diana lo lut chu a nalh kher mai, Augustus Jayne-a ṭhatna azarah thawmhnaw thar mawi tak mai hi a rawn ha zan a.

Legare-a chuan a lo buk khum nghat a, “Chibai, Adele hian i chanchin min hrilh fo asin. Buaina i tawh zozai pawh ka lo hria a, a pawi ka ti hle a; mahse hei, Kin Sackett-a hian mi sualte chungchang ziah lanna lehkha chu a nei tawh a, thil chu a fel thuai tawh ang,” a lo ti a.

Diana chuan mi rawn en a, “Khawngaih takin min hruai haw thuai thei ang em? Min man lai khan ka pa kha an hliam a, tunah a thih leh dam pawh ka hre si lo,” a ti ta a.

“Ni e, kan haw vat ang chu; kan ṭhian John Tilly-a chu naktuk chuan a lo thlen ngei ka ring a, chu chu a tum zawk a ni reng a, a rawn tlai lo vang,” tiin ka chhang a.

Legare-a chuan, “Chu, kan lo kal ve a ngai tawh lo vang maw?” a rawn ti leh a.

“A ngai lo thei tawh chuan ka ring a; mahse, Adele erawh chuan a mamawh dawn chauh chein a lang,” ka ti thung a,

Chutah Legare-a chu a nui suk a, “Kei pawhin Adele hi ka hlimna leh ka tana pawimawh hmasa ber a ni alawm,” a ti a.

Henry-a hnenah chuan, “Hei, i chipuite awmna hmun i thleng ta a ni a, i awm hlen tawh mai dawn em ni ang?” ka ti ta a.

Ani chuan a lu a thing a, “I bulah hian kal ve zel thei ila ka duh zawk. Hêng laia mite hi ka chipuite chu an ni ngei e; mahse, kei chu chipuite hnen khera chetla lo chi ka ni. I ngaihtuahna i hman dan leh hmelmate i hmachhawn dan ka hmuh hian ka rilru mil zawng tak i ni tlat a ni,” a ti ta a.

“I duh dan a nih phawt chuan — ni e le!” tiin ka chhang a. Chutia ka bula awm ve a tum chu ka lawm hle zawk a, mi chak leh rin tlâk tak a ni a, ka mamawh hle zel dawn a ni.

Legare-a chuan kut phar chhuak meuhvin chibai min buk a, “A tawk ta e; eng pawh mamawh in neih apiang chu ka hmingin lam mai ula, Port Royal-ah na nâ na chuan tu mahin an tihsak hreh lo vang che u. In lakah ka ba nasa hle si a,” a ti ta hial a.

Mi dangte an kal kian tâkah chuan Diana leh an awmpui-nu nen te chauh chuan kan awm ta a. Diana hnenah chuan, “Chaw i ei tawh em? Kei pawhin ei ka tum rilru mek a, i ei dun ang hmiang,” ka ti a.

Ani chuan, “Ka lo nghak rilru deuh che a, ka rin dan chuan mahni chauha chaw han ei chu nuam i tih loh ka ring deuh a,” tiin mi lo chhang a.

Ami chhanna chuan mi ti lawm kher mai! A ṭhutna tur chair chu ka hung hnai sauh sauh a, “Chaw ei tura mahni chauha dawnkan kil tawh loh hi ka beisei rûk tak a ni reng a ni,” awmze nei tak hian ka ti ta a.

Diana chu a nui sak a, “I thu sawi dan chuh! Ka tan chuan sawmna angah te pawh a ngaih theih alawm le,” a ti ve a.

Thutak deuh hian, “Chu chu a dik chiah mai. Nula hi ka la kawm ve ngai lo êm a, thiam pawh ka thiam hek lo, an zia pawh ka hre hek lo. Kan awmna hi a ram a nuamin hna thawh tur pawh kan ngah a, mi zeizia hre turin kawmna hun pawh ka nei ṭha lo bawk reng a ni,” ka ti ta zel a.

Chutah, kan titi dun zel a, thu nawi mai mai a ni nâin, kan inkar thil inzirsak tawnna ṭha tak a ni. Hetih lai ngei pawh hian ka rilru pakhatah chuan Max Bauer-a leh Pittingel-ate chu ka theihnghilh tak tak thei lo. Anni pahnih hi ka bulhnai maiah zalen takin an la awm tih ka hre tlat a, nuam ka ti thei lo a ni.

Port Royal-ah lah an laka min chhan thei tur thu neihna nei tu mah an awm si lo va, fimkhur êm êma awm a ngai a ni. Dam khawchhuaka an awm theih nan leh zalena an awm theihna tur chuan kei hi min thah a ngai a ni; Diana pawh chuti bawk.

He khawpui rura tak, dàn leh dùn awm lohna, sual zalenna hmun hi ka tan chuan ralṭi viau mah se, a khaw awmzia hre tura belh chian châkna ka nei tlat mai. He khuaah hian hmuh châk tak tak ka la nei nual a, hmu tura chhuah ngei ka tum bawk.

Mahse, min ti buaitu pakhat a awm tlat a — Max Bauer-a leh a hote an awm ve a, kei chu min hre vek tawh a; keiin amah, Max Bauer-a chauh ka hre thung a, a hote chu hriat ka nei ve si lo, fimkhur thiam a har dawn tlat a ni.

Diana pawh Jayne-a tirhkah-nu nen bazara chhuah an tum a; kei pawh John Tilly-a lawng a lo thlen leh thlen loh ngaihven tura chhuah ka tum bawk a.

Diana-te chhuak tura an insiam lai chuan kei chuan ka chhuahsan ta a. Pawnah chuan mi hang an lo tam hle a, sang deuh tak pakhat, a sir lama lo ding chu ka hriat hnu ang riau hian ka hria a, ka'n hûi ta ngawt a.

Ani chuan min rawn pan ve mai bawk a, a hnenah chuan, “Ṭhian pahnih/pathum hruaiin Pi Macklin-ite bazar kal veng ru turin in kal thei ang em?” ka ti ta ngawt a.

Ani chuan, “Anmahni veng turin Henry-a'n min tir alawm, an duhna hmun hmunah kal rawh se,” a lo ti ta then a.

“A lawmawm a nih chu. Kei erawh chu tuipui kam hrul velah tih tur ka nei a, ka va kal ang e,” ka ti ta a.

“Ka Pu, sâwng lai saw mi sual an tam a, kalna chi a ni lo teh asin.”

“Mahse, ka va kal ngei a ṭul tlat si a ni.”

“Lawng tam tak a lo thleng a, tam tak an kal chhuak reng bawk a; chutiang nuaih nuaihah chuan mi an bo a nih pawhin miin engah teh vak an ngai lo. Va fimkhur hle ang che.”

Ka mit ngeia Port Royal ka hmu ta chu a ropui ngei mai. Keini, ngaw kara chetla ṭhin hi chuan kan mita hmuh ngawt ni lovin thil engkim hriat chian hi kan tum a; tam tak hi chuan an en liam puat a, an hmu mumal lo ang hi kan ni ve lo. Tin, khawpui lian hmuh hi ka nei tlem a, he khua hi ka hmuh len ber a la ni a, hmuh chak ka ngah hle mai.

Thil tam tak ka ngaihtuah lai chuan Yance-a kha ka'n hre chhuak ve leh a. He khua, sorkar phal loh 'thil' tam tam tak zawrhna, zu no leh pawisa thir inkhak ri chhuai chhuai tamna, nawmsip bawlna chi tam tak te, rangkachak leh lunghlu tamna hi han hmu ve se a hlimpui teh ang chu — hmuhnawm a ti ngawt ang.

Zan tin deuhthaw khawlaiah ruang chhar tur a awm a; mahse, tu thah nge, engtia thi nge tih hriat tum pawh an awm hek lo.

Mi hangpa, Diana-te vengtu tur zinga pakhat chuan, “Chemtê i nei em?” mi rawn ti chawt a.

Kei chuan inti thei aw tak hian, “Ngunhnam hriam ṭha tak leh pistol pahnih ngawt ka pai maw le!” ka han ti a.

Ani erawh chuan, “Chûng thil chu i va kalna turah chuan hman a remchang hauh lo vang le,” mi tihsan ta then a. A kâwnghren kar aṭang chuan chemtê a rawn phawrh a, “Hei hi la rawh, i hmang ṭangkai zawk daih ang,” a ti ta mai a; chu lo pawh chu ani chuan a la pai tho a.

Chu chemtê chu a mawiin a zum ṭha vet vawt a, a hriam ṭha hle bawk a, a tawn tawna hriam a ni. A buk pawh a dik hmel hle mai a; ka'n vawrh vir a, a fawng lamah ka man leh chat a, “Ka lawm kher mai, a mawi hle lehnghal a!” ka'n ti a.

Ani chuan, “Ni e, a mawi viau a nia,” a ti ve mai a.

Chutah, chemtê leh a pai, ka kâwnga ka zeh bo hnu chuan ka chhuak ta a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 28th, 2019, 7:12 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 14
(Rozami Pachuau)

Tuipuia lawng ding khup chu ka va hmu thei ta a, 'Abigail' lawng chu tel ve tak maw?

Lawngte chu tuipui fâwn zawng chuan an su dulh dulh a, nunna nei ni àwm hialin. Mi chi hrang hrang an tamin, a ṭhen an hnaah an ṭul êm êm a; a ṭhen an hawi mai mai a. Tin, a ṭhen kut ke kim lo, mit khing del leh hmai ser deu do pawh an tam hle a; hêng hi tuipuia an nun dan darthlalang ber chu a ni mai a, intih buai rep rep pawh a tam hle reng a ni.

Chutianga mi piang sual pakhat ka va hmuh chuan tuipui lam chu hawiin lawng chu a lo thlir vang vang a. Ka va hnaih a, “Tlai lam hun nuam tak i hman ka beisei,” tiin ka va chibai ve tawp a.

Chu pa chu pa valai tak, sa ṭha tak hi a ni a, a sek ṭha hle mai. Mahse, a ke lehlam a bul tlat a; chu mai pawh a la ni lo, a kut lehlam pawh chu a la bul a; a mit chu a pawl ram a; chu chuan a ti nelawm loh tlat zawk mai. Kut pakhat chauh nei e ti lo chuan ka mi rin loh chi, mi hlauhawm tak nia rinna ka nei ta tlat a.

Ani chuan, “Tlai nuam tak chu a ni ngei mai a; mahse, a ti nuam zualtu atana han lem tur leina ka nei lo a nih hi,” a lo ti chheu mai a.

Kei chuan, “Abigail lawng chanchin min hrilh tur i neih phawt chuan i duh tâwk lem tur chu a awm thei ngei ang,” ka ti ve thung a.

“Abigail i tia law? Eng vanga min zâwt nge i nih chu ka hre lo nâin, saw lawng saw mi pangngai tan chuan pawngpaw chim ngawt chi a ni lo a nia. Lawnga hna thawkte saw an vai mai sawn mi tawh khirh tak tak vek an ni asin,” a ti ta a.

Kei chuan, “Chutiang chu an ni nâin ka ṭhiante an ni alawm; he laiah hian an rawn chawl thuai dawn a, an ruala chhuah ve ka duh avangin an lo thlen hun tur ka hre duh a ni,” ka lo ti thung a.

Ani chuan, “Zin chhuak tur maw? Lung te pawh i ti leng e a! Tuipuia zin chhuah hi ka châk leh hle tawh a; mahse, ka chhuak thei bawk si lo!” a ti a.

A ban bul lam chu a'n hlim a, “En teh, kum sawm zet tuipuiah ka khawsa tawh a, inbeihna pawh ka tâwk tam tawh a, hliam tih tham ka tuar ngai lo va; laipui ka tawn erawh chu ka pian sual phah ta a nih hi,” a ti ta a.

Kei chuan, “Dama i chhuak leh thei chu i vannei a nih chu,” ka lo ti a.

Ani chuan, “I thlir dan azir aniang chu,” tih pahin tuipui lamah chuan a chil a'n pik puat a, “Mi chapo tak, mahni hna tlin ṭhin tak; mahni inenkawl zo tak leh insual pawh thei ve tak ka ni ṭhin a; mahse, chûng hun te chuan mual an liam ta a, thih hun nghakin ka awm ta ngawt a nih hi,” a ti ngui ta ruai a.

Kei erawh chuan, “Mai mai a! Kut pakhat, ke pakhat leh mit pahnih i la nei alawm. Han en mai pawhin pa fing tak i nih hmel a, thawh theih leh nih theih eng emaw chu i nei ngei ang. I hmu zo lo a nih erawh chuan nangma thiam loh a ni ang a, tu mah i mawh thei lo vang,” ka ti ta hmiah hmiah a.

Rum zet hian mi'n melh a, “Piang sual ve lo tan chuan sawi mai chu a awl alawm,” mei nei fe hian a han ti a.

“Chu chu a dikna chen chu a awm ang; mahse, kei chu ni ta ila, ka beidawng duh mai hauh lo vang, hna eng emaw tal chu ka zawng ngei ang,” ka ti ve tlat a.

Ka iptê aṭang chuan rangkachak tangka ka phawrh a, ka'n entir a, “Hei, shilling khat ka pêk che chuan zu in nan i hmang ral mai mai si ang a; chuvangin, he rangkachak tangka hi ka pe ang che. I ren thiam chuan thla khat lai i hmang thei ang a; chumi chhung chuan eng hna emaw tal i dap tur a ni, i thluak kha hmang rawh,” ka ti ta a.

Ani chuan, “Tu nge i mi thah duha chu?” ka pawisa ken lai en ran chung chuan a ti ta nghal mai a.

Kei chuan, “Tihian lo awm la, Abigail lawng lo thlen leh thlen loh thu te, a chanchin hrim hrim pawh hriat thar i neih chuan Augustus Jayne-a hnenah i thlen vat ang a; chutah, min hrilh chhawng ve mai ang. Ka hming chu 'Sackett' a ni,” tiin ka chah ta a.

“Sackett maw? Chu hming chu ka hriat hnu a ni ngat mai. Chu hming putu mi pakhat, tawh khirh zet mai hriat ka nei tawh a; vawi khat pawh kan pu nen an inti thiam lo va, khawlaiah ka pu chu a sawp hrep tawh asin — E, Barnabas Sackett maw le!”

“Ka pa a nih chu!” ka lo ti thuai a.

Ani chuan, “A ni tak ang, an pawh in inang viau mai; i sang zawk mai pawh a! A kianga chettlat kha ka châk ṭhin a; aw le, Abigail maw kha? Ka lo ngaihven ang e,” phur tak chuan a ti ta soh soh a.

Ka pawisa pêk chu lain, “Shilling khat pawh ni se, ka lawm tâwk khawp mai,” a ti a, a nui sun sun a.

“Aw le, ṭan lo la sauh sauh la; chinchang hre tak tan chuan tuipui lamah lo pawh hna chu i hmu mai ang,” ka ti ta a.

Tunah chuan khua pawh a tlai ta hle a, a thim dawn hnai a ni tawh mai a. Ka thlenna lama kir leh pawh a hun tawh viau nâin, in pakhat, ri mawi lo chhuahna chuan mi hip riau pek a, chu lam chu ka pan leh ta nge nge a.

Ka thlen veleh kawngkharah chuan ka'n ding hlek a, lawng mi zi nuk nuk leh lehkha denghote ka en dan dan lai chuan pa lian tak hian ka banah a rawn vuan a.

Chu pa, hmui hmul buk chhur mai chuan, “Hawh teh khai, ṭhianpa, tun hma lam hun thlir kirin no i han dawm dun teh ang,” a ti ta mai a.

Kei chuan, “Tun hma nun maw? Kan la inhre ngai pawh chu a ni si lo va,” nui deuh chung hian ka han ti a.

“A pawi hlei nem; tun hma lam nun dawn kir tur te chu kan nei dun chek ang. Hawh teh, i lem dun ve reng reng teh ang,” a ti lui ta tlat a.

Mipui zingah chuan mi an tamin an bengchheng hle a, nelawm loh tak tak vek ni mai hian ka hria.

Kil khata dawhkan ruak chu panin, “Eng nge i in duh ang? German rim nam deuh aw ni ang? Moelle lam chhuak wine nem deuh i lem dun phawt teh ang,” a ti suam suam a.

“Chutiangte hêng laiah hmuh tur a awm a ni maw?”

“Awm e. Eng zu pawh i duh apiang a awm thei zel ang maw le; tin, kan zu man hi ka chawi tur a ni tih hre bawk la,” a ti ta duah a.

Zu dawr tirhkah chuan, “Nang kher chu ni lo la, chu zu kher chu kan pe chhuak hauh lo vang le, kan nei tlem tawh lutuk a...,” a lo ti a. Chu pa a kal liam tâkah chuan ka ṭhiana chu chîk zet hian ka en ta a.

Amah vek chuan, “Lawng pahnih, tuipui zaua intâwk, kalna lam tur te ve pana inthlah liam tur angah i inngai teh ang. I khawsa zia hi ka lawm zawng tak a ni a, mahni chauhva zu no dawm chu a nuam lo êm a; titipui tur ka duh bawk si a, a tihzia hle a ni,” a ti ta a.

Chutah, min han thlêk a, “E, tuipuia chetla ṭhang i ang viau nâ a, i ni lo tih ka hre mai; he laiah hian awm rei i tum em?” a ti ta zel a.

“Ni hnih khat dang ka la awm ang,” ka lo ti ve mai a.

“A nih leh, khawi lam pan tur nge i nih?” mi han ti leh a.

“Plymouth lam ka pan ang,” tiin ka chhang a.

Ani chuan, “E, ka hre ta! Fakna hla sak chingho, sakhaw mite awmna kha maw?” a lo ti hu hu a.

Kei chuan, “Anni hi chu pem thar mai chauh an ni a; an hmaa mite chu mi ṭha leh tih nuam tak tak hlir maw le,” ka ti a.

Ka no leh a no a thlit khah leh hnu chuan, “Kei chu Carolina lam mi ka ni,” ka ti ta zel a.

Ani chuan, “Hming apui hi a tam a, chutiang hming chu ka hre fo va, ka la tlawh hlei lo va; engtianga khawsa nge i nih?” a ti leh ta a.

“Ram nuam leh mawi lutuk mai a ni a, sa te pawh kan pel ṭhin a, thlai hmun te kan siam bawk ṭhin,” ka ti ve ta a.

Chutah, “A nih leh hnam mawl, kawlh tak tak an awm em?” a ti teh daih a.

“Chutianga i koh chuan a ni thei mai ang chu. An khawsa mawl hle a, an zia pawh a dangin kei pawh hi anmahni ang chuan ka khawsa ve thei tho ang,” tiin Indian-ho chanchin chu ka hrilh ta nual a.

Ani chuan, “Chu, keimah ang mai zuk ni che a! Ka ring reng a ni,” a ti ta daih a. A no lek kan pah chuan, “I âwih lo maithei a, kum sawmhnih velah khan Cambridge-ah ngat asin ka zir ṭhin; chutih lai chuan puithiam nih asin ka tum hial ni!” a ti ta zel a.

“Chuti chuan...,” ka lo ti a.

“A, nula vang maw le; nula tih lemah pasal nei lai chu a ni a; kan inkawm ve fo ṭhin a, a ruk hian; mahse, kan che sual miah lo. Kan che sual lo tih erawh chu tu ma'n an awih lo bur a; chutah, a pasal chuan min that turin mi sual a ruai ta alawm maw le,” a ti kai ta zel a.

“Mi sualho lo kal lai tak chuan mahni chauhvin ka awm a; mahse, min zuam sual hle thung! Ka la chak ṭhat vang lai a ni bawk a, an zinga pahnih phei chu ka chem zum hmangin ka that a, chuta ṭang chuan ka tlan bo a lo ṭul ta a; hetia kum sawmhnih a lo vei tâkah meuh chuan hetah hian nang pawhin min hmu thei ta a nih hi,” tiin a sawi ta zel a.

A no lek kang reng chung chuan nuihza hmel pu deuh hian mi han melh a, “Ka hming chu i hre fo tawh ang; Rafe Bogardus a ni,” tiin a insawi leh a.

“Hming ṭha tak a nih chu. Kei chu Kin Ring Sackett ka ni,” tiin ka hming chu ka hrilh zui ve a.

A nui deuh suk a, “Ka mi ngainat zawng tak i nih teh lul nen, a pawi ang reng mang e!” a ti ta daih a.

“Eng nge ni 'pawi' chu?” ka lo ti thuai a.

“Pawi tak a ni! Pawisa lo mamawh hle lo ila chu ka ti duh miah lo vang!” a la ti tak deuh deuh a.

Kei chuan a awmzia ka hre lo hIe mai a, “A enga chu nge i tih duh miah loh tur chu?” ka ti ve zel a.

Ani chuan, “Nang, Kin Ring Sackett-a hian i la hre lo tak zet a maw? Nangmah that tura rawih hi ka ni alawm!” a ti ta heu mai a!

Mak ti zet hian, “Keimah that turin maw?” ka ti leh ngat a.

“Ni teh reng e — he lai hmunah, zaninah ngei hian!” chiang fak hian a ti ta charh charh a.

Ka nuih a za ta deuh tlat a, “I in Iai kha tlâk thuai la maw le!” thawp sat hian ka ti ve ta a.

A mitmeng chu a fim ṭha kher mai! Fimkhur taka min en ran chung hian, “Rui deuh ila min duh a ni maw?” a ti ta a.

“Duh lo ve; tui i tih hmel êm a, i duh tâwkin in phawt la ka duh vang a nia — i thih hma ngei hian!” ka ti ve ta a.

Chutia ka'n tih tâkah chuan a nui hmel leh mitmeng chu a dang ta daih mai a. Ngun lehzual hian min han en a, muang ban charh hian, “Sackett, Port Royal-ah leh England-ah chuan ngunhnam vai thiam bera sawi ka ni asin,” a ti ta a.

“Chu chu ka ringhlel lo ve; mahse, tunah Europe-ah i awm tlat lo va, ngunhnam vai thiam ber berte hi Port Royal-ah leh Europe-ah chauh hian an awm a ni tih ka hre hrep lo ve! A reng rengah, hêng laiah hi chuan an ngunhnam vai duh dan te hi an ti nêp êm a ni,” ka han ti thla ve ngawt a.

“A nih leh Carolina lamah engtin nge?”

“Saw lamah chuan ngunhnam hmang thiam han sawi tur vak an awm lo, silai leh pistol hmang chi deuh hlir kan ni,” ka'n ti deuh ngat a.

“Chuti chuan...,” tiin mi lo zawt a.

Kei chuan, “Kan hre chawp zel ang chu! Pawi ka ti ve hle a ni; pa kawm nuam leh titipui nuam tak i nih vei nen, thil dang dangah pawh la titipui che ka la châk asin! Chhungte i nei maw kha?” ka han ti ve ngat a.

“Chhungte tia han sawi tlâk vak ka nei hlei nem; min theihnghilh zo tawh,” a ti awlsam mai a.

“Chu zawng, ka tan a ngaih ṭhatthlak deuh e!”

A chal a'n chuar nung a, “Eng vang chuan nge i ngaih a ṭhat phah ngawtna tur?” a ti churh churh a.

“E le, i thih thu i chhungte hrilh buai a ngaih dawn loh avangin; i bungraw neih chhun tih ral pawh a awlsam phah sawt bawk ang a,” ka tihsan ta hmiah a.

A thin a rim ta kher mai! “Naupangchhia ang maiin i ṭawng a nih hi,” a ti ta tun tun a.

Ka no dawm lai chu lek kangin wine tlem chu ka'n lem leh pap a, dawhkanah ka hung leh a; ka che vel reng reng chu a muang thei ang ber zelin ka che a.

He pa hi ngunhnam vai thiam tak chu a ni ngei ang, amah pawh a inring tawk bawk a. Hêng lai ramah chuan ngunhnam vai thiam han sawi tur an vang hle a; tuipui ral rawn kai chhun John Smith-a lah Europe lamah a kir leh ta daih si a, chu vanga insawi champ a ni ngei ang.

Ngunhnam hmanga insualnaah hian ka la tel khat hle a; mahse, ka tet tê aṭanga min zirtir ṭhintu ka pa leh a ṭhiante — Jublain, Jeremy Ring leh Sakim-ate an la awm tho a ni. Anniho min zirtirna kha a hlu berin ka hre tlat a; hei vang tak hian a ni ka hmelmapa laka ka chungnun hretna tur chu!

Ka ngunhnam vai thiam chu ka thup a, vai thiam lo anga ka lan a ṭul rih tlat a ni. Mahse, ka rin loh ang takin he pa hian Mosolman ram a lo thleng a, a lo thiam ve vek a nih vaih erawh chuan ka buai hle ang le....

“Hetianga mi that tur hian an ruai ṭhin tawh che em?” ka han ti leh rih a.

Ani chuan, “Eng vangin nge mi ka thah ngawt ang? Mi thah nuam tih avanga that fo tur khawpa mi â ka ni lo. Pawisa hlawha mi thah hi chu mi suam leh rawk aiin a hah damthlak zawkin ka hria.

“Mi ka thah avanga ka rilru nawm loh riau ṭhin i ring em ni? Chutiang chu ka ni miah lo. Khawvelah hian vawi khat thi tur vek kan ni a, an hmabak hlensak thuaitu ni-ah ka inngai mai,” a ti leh mai a.

“I chunga thil thleng tur thlen hmatirtu-ah pawh a la ṭang ngei ang le,” ka lo ti a.

“Tun thleng hian ka la nung ve zel chu a nia lawm...!”

“A nih leh ei tur i lam ang hmiang. I thi ta a nih pawhin, 'Rilṭamin a thi,' miin an tih loh nan maw le,” ka ti ta a.

Chaw chu kan han lam a; ka'n en ṭhin a, amahah chuan danglamna eng mah a lang chuang miah lo; mahse, chu chu ni theiin ka hre tlat lo.

Amah khan mi tih zam a, mi chhaih buai a tum a; mahse, a rin angin ka buai ta si lo va, a beisei loh ang takin ka awm ta si a, chu chuan a tih buai hle chu ka ring a ni. Tunah, chaw eipuiah ka'n sawm ta mai phei chu mak a ti hle ang.

“Min thah i tum thu min hrilh khan mak ka tih a, ka hlauh viau i ring em ni? Mak chu ka ti ngei alawm; mahse, thil danglam hu-ah ka ngai lem lo. A chhan pawh naupang ka nih lai ata tawh kei leh ka chhungte hi thihna kotlanga dâk reng renga khawsa ṭhin kan ni tlat.

“Ka pian lai ngei pawh hian ka pa leh Indian-ho chu an inbei nasa hle a ni. Tichuan, tun thleng hian ka nun hi ni khat mah ngaih ngam leh lungdam zanin a la awm ta lo reng reng a; 'Thah che ka tum e,' mi tih pawh khan ka tan thil a ti awlsam ta zawkah ka ngai a ni,” ka ti ta zel a.

Ani chuan mi melh tur hle a, min thah a tum thu a sawi pawha hlau àwm pawha ka awm lo chuan a thin a ti rim hle ang le.

“Hriat thiam loh tur a awm lo ve. He lai ka lo thlen hnu hian kil tin aṭanga beihna ka tawk a, fimkhur taka ka awm reng a ngai a; mahse, tunah chuan a reh ta — tunah hian ka hmelma chu ka hre ta a, khawi aṭangin nge buaina a lo thlen ang tih lah hriat sa, a hah damthlak ta hle a ni!” ka ti ta a.

Ani chuan, “Thihna chu i pumpelh phah lo vang chu,” a la rawn ti ve leh hram a.

Ka nui ta a, “Chu chu i hre chiang ngam ngat maw? I thil tih theih chin i hria a, i ṭangkaipui viau mahna! Ngunhnam pawh i hmang thiam fu a ni thei e; mahse, kei hi min hre chiang hauh lo, keia dam khawchhuahna khawvel hi chu nanga khawvel aia khirhkhan leh rothap zawk a ni asin!” ka ti ve a.

“Ngunhnam hmangin alawm kan inbeih dawn!” a lo ti hluk a.

“Chuti maw? Mi rawn chotu zawk i ni a, hriamhrei hman tur chu ka thlan tur ni zawk àwm tak!” ka lo ti ve a.

“Hriamhrei hman tur chu ka lo ruat fel tawh — ngunhnam hmang ngeiin a ni ka thah dawn che!” a ti ta khawl mai a.

Ei tur an rawn chhawp chu kan ei ta a. Bogardus-a chu a ngawichawi ta hle a; kei ve thung chu ka ṭawng duh a chhuak a, ka titi ta duah a; a nin hmel êm êm lehnghal a.

“Bogardus, Indian-ho beihnaah i tel tawh em? An tawh khirhzia chu, sa ṭha len lun chu an ni lo; mahse, an ṭuan a ṭhain an zuanzang riau a, intawh chilh thutah phei chuan anni anga chemtê leh tomahawk hmang ṭangkai thiam an awm lo vang.

“Indonaah keini anga dàn leh dùn hmanga rel ve si se an ni lo va; hetah erawh hi chuan mi ngo chu min khan lo hle a; mahse, a rûk a rala inṭhawn thut angah chuan anni tluk tur an awm lo,” ka ti ta duah a.

Nin hmel zet hian, “I ṭawng tam ta bawk a, thah che pawh a nuam sawt ta ve ang,” a rawn ti hluk a.

Chaw kan ei zawh chuan ka no chu ka tlâk pawp a, dah pah chuan, “A nih ahnu, kan tih tur chu i ṭan ang le!” ka ti ta thut a, a ti phu chiang kher mai!

“Hun khawh ral hman ka ni lo!” tih leh thawh ka rual ta a, chaw thleng leh no ruak vel chu ka hnawl kiang rawp a, kan thawmah chuan min rawn en ta ṭhup hlawm a.

Bogardus-a pawh chu thinrim ṭe tuar chungin a rawn zuang tho ve nghal a; mahse, kan dawhkan kil lai hmang chuan bangah ka nawr bet thut a, ka kut vei lam chuan a hrawkah ka rêk zui a, a lu lian pui chuan bang ka tauhtir ta bur bur a.

“Nang teh chai hian min thah i tum maw? Khaw'nge ka'n...,” tih paha dawhkan rit taka ka'n nawr chilh chu tal chhuah a awlsam tlat lo!

Chutah, ka kut lehlama rêk bet reng chungin lehlam chuan ka chemtê chu ka phawi zawk a, a sakhmela tin zawn siah chung chuan, “Ka chemtê hian a tlin tawkin a thil mai tur che asin! Mahse, ka chemtê han tih bawlhhlawhna tlâkah ka la ngai lo che chu i vannei a nih hi!” ka tih khum ta piap piap a.

Mi zawng zawng chuan min thlir ṭhup a, hawi kual pah chuan, “He pa hi min that tura an rawih a nih hi...,” aw pangngai tak hian ka'n ti phawt a.

“Chu chu a theih pawh ka ring hrep lo ve! Tunah hian ka chhuah dawn a ni; min that turin pawisa pawh a dawng lâwk diam tawh a, han tum chhin teh reng se...,” tiin ka'n au zui leh lang lang a.

Mipui zing aṭang chuan, “That nghal zawk rawh. Amah kha ka hre chiang teh a nia; i chan ṭhat laia i thah loh chuan khatiangin a hrawkah chem zum i chuktuah tawh hauh lo vang,” pakhat chuan a rawn ti lauh lauh a.

“Tlanchhe lo ve; a tum ngam a nih chuan tum chhin zawk rawh se,” tih pahin Bogardus-a hnar chu ka chemtê hriam hlar chuan ka'n tai thler zauh a, a thi nghal zaih zaih a.

Chutah, a hrawka ka rehna chu ka thlah thut a, ka chemtê pai ṭhat leh pahin ka tawlh hnung zauh a.

Rafe Bogardus-a chuan dawhkan chu a'n nawr sawn a, a che vel aṭang ngawt pawhin a chak dan tur chu a hriat mai a, amah lah chu a phili buai lo kher mai lehnghal a.

“I intih hlimna beitham tak chu i zo ta bawk a, tunah chuan ka that tawh dawn che!” a ti ta chheu chheu mai a.

“Ka tih reng kha! I chan ṭhat lai chuh turin ka hrilh che kha; hêngho hi vawi khat bâk hun remchang pek chi an ni lo asin,” nichina mi bawk khan a lo ti ngal ngal a.

Pindan chhunga awmte chu an tawlh hla sung sung a, hmun min kian ta a. pindan chhung chu a eng sen phut a; dawhkan leh chair hnuai te chu a thim rup thung a. Pindan chu a lian hle nâin mi an tam hneh êm a, a lumin a uap churh mai.

Bogardus-a chuan a ngunhnam chu a phawi ta a, a che reng reng chu a muang ta charh mai. A ralthuam hman thiamzia a sawi te pawh kha ka ringhlel bik lo. Tunah tak phei chuan a lang hlauhawm zual hle. A inring tawk tih a hriat bâkah a thil tih tum chu a tih theih ngei a hmel aṭang pawhin a hriat a ni.

A kawrchung hâk lai chu a phelh ta a, kei pawhin chutiang bawk chuan ka ti ve nghal a. Ka ngunhnam chu ka phawi ve nâ a, ka inring tawk ta vak lo kher mai!

Tun hnaia kan inbeihna neuh neuh tih mai bâk phei chu ngunhnam hi ka la hmang ngai miah lo va; ka pa bâkah min zirtirtu dangte kha ngunhnam hmang thiama sawi chu an ni ngei e, an ṭha tawk em tih chu rei lo tê hnuah kan hre dawn alawm!

A ngunhnam chu a lu chunga lek chhovin chibai nan min han bûk khum ta zauh a.

“Tunah Sackett, i thih a hun ta!” tih leh chem zum lek kawh chunga mi rawn bawh chu a rual ta thut a.

A che chu a rang kher mai; mahse, a ngunhnam chu ka lo khak per hman hlauh a. A vawi khatnaa mi vih hlum chu a tum deuh a ni ngei ang, chutia ka lo khak persak ta mai chu mak pawh a ti kher mai a.

Fimkhur lehzualin mi han veh leh a. Thâwk leh khatah, mi han bawh leh thut ṭhin a, hmun tin maiah chuan a ngunhnam chu a vai tle zawr zawr a, mi han chhin vel ni berin ka hria. A ngunhnam zum leh hriam fahran lak ata inven ngai leh zei lo tak anga lan a ngai chu a buaithlak hle zawk mai.

Chutah, mi han bei leh chu ka tawlh hnung dawrh a, a chem zum hmawr chuan ka kawr hma chu a pir thler ta hial a. Thawm reh ṭhuap kara mi pakhatin, “A che nalh kher mai!” tia Bogardus-a a han fak ri pawh chu ka hria a.

Ka invai lum ve ta deuh bawk a, ka hmaiah chuan thlan a rawn bawl ṭiam ṭiam a, ka inzir thiam vena pawh ka hnenah an lo kir ve ṭan ta a.

He pa hi Jeremy-ate ai pawhin a thiam ngei ang; mahse, ka pa ang êm chu a ni lo alawm le. Ka chêt dan chuan mi tih dan a ang lo va, a buai ve riau a; mahse, chu tak chuan zei lo nia min hriain a ti phur ve tlat a ni.

Bang kil lamah chuan mi nawr ta zel a, ka duh anga ranga ka chêt theih lohna turin a ti tih chu ka hai hauh lo. Chutah, mi han vit thut a; rang zetin ka lo khak per a, chumi rual chuan a chem zum hrut pheiin ka'n vit ve thut a, a zuang lêt hman lo teuh kher mai!

Thinrim zeta mi melh pahin ka hmaia sah tumin a rawn vai leh fua a, a chem chu ka lo dang hman hram a. Chutah, ṭhutthlengsei pakhat chu ka lamah a rawn pet leng lâwp a, ka zuang sawn chiah chu min vih hlum tumin min rawn zuan zui ta a.

Ka lo tawlh hnung hman hlauh chu ka vannei hle a ni. Ka kawr chu ka kâwng zâwn veleh a chem lu zum chuan a tai thler leh ta duai a.

Theih tawp tak meuhvin kan inbei ta a, han tih der vêlna hun a awm ta lo. Kan invit, kan indang; lu lam, ke lam, kan ngunhnam chu a tle dun zawk zawk a....

Thisen chhuah hmasatu a ni ta a. A rawn vit phei a, ka lo dang tleu a; ka hmaiah chuan a chem hriam zet chuan min rin hman zeuh a, a thi ta zaih zaih a. Chutah ka kawr hma, thin hnun zâwn tak chu a tai thler leh ta zeuh a, “Rei lo têah chuan mitthi i ni tawh mai dawn e,” a'n ti zui a.

Vawi leh khatah a chem chu a la thla thut a; mahse, mi a vehthlemna mai a ni tih ka hria a, ka bawh mai duh bik lo.

A han che leh zet chu a rang kher mai a, mite pawh chu an lo au dar dar a. Mi han vit a; ka lo dang tleu leh a, ka lu, ka ban, ka hmai leh áwm vel chu ka veng kawi zar zar a; engtin nge ka inven hman pawh ka hre bik lo.

Chutia min han bei ta chiam chu a chau ta deuh a ni ang, a hnungtawlh ta a. Chu chu remchangah hmangin ka bawh ve ta thut a, a hrawk vêla vih tum ka ni nâin ka lo tin sang hret a, a kawr nghawng ka tai pawp hawk a, a nghawng sir pawh a pem ve ta hlak a.

Ka lu lama mi vih tumin mi lo chhang lêt nghal zat a, mi hlauhawm tak chu a ni. Mi beih dan chu a thlak a, inbeihna chu tih tawp vat a duh tih a hriat mai bawk.

Ngunhnam hmang thiam reng reng chuan ama thiam zawng, mi dang tana remchang ve si lo chêt dan a nei ngei ngei ṭhin a; ngunhnam hmang ṭhang chuan chutianga an hmelmate'n an tih ṭhin chu an lo man thuai a, an hmelmate chêt dan tur an hre lawk thei ṭhin. Hemi ka hriat avang hian he pa mi beihna pawh hi ka lo chhang lêt ve thei zel a; mahse, hetia ka tih reng chuan ka thi mai ang.

Tunah chuan nui hmel a pu ta deuh a, a mitmeng erawh chu a de ṭhiang ral thung. Ka lu lama mi vih tum ang taka tin zâwnin ka dula mi vih a tum leh ta thut a. Mahse, rang lutukin ka lo dang per a, ka awm hla hret bawk a; a duh angin mi vit thei lo pawh a ni ang e.

Ka chem kenna kut bawr chu ka ti lek zeuh a, a chem kenna banpuam chhung lamah chuan ka tai thler ta duai mai a. Ka chem chuan a ât thuk bawk a, a ner sawk a, a tawlh hnung ta dawrh a. Ka bawh zui vat a, a lo indang pawh chu a che muang ta deuhin ka hria.

A kawr ban te chu thisenin a bual huh nghal zuih a, chhuatah te chuan a sen ta nguai a. A lu lam tinin ka bawh zui zel a, a dul zâwnah ka vit ta thut a.

Rang takin a tawlh hnung dawrh a, a banah hliam na tak a tuar chung pawh chuan a la che thei hle tho mai; mahse, a mitah chuan hlauhna leh thihna ka hmu tlat tawh. Ka'n tin a, ka'n chawl leh hlek a; chutah, rang zetin ka bawh ta a.

Lo indan chu a tum ngei mai; mahse, a chem chu a lek chhuak hma hret a, ka chem zum chu a ṭhelh ta hlauh a. A nâkah tak chuan ka thil ta pâwk a, ka chem chu ka phawi leh ta vat a.

Bogardus-a chu a têi nawk a, a kawr hâk lai chu thisen chuan a bual huh sen nghal hnuang a.

Chutah, ka ngunhnam ken lai chu lek hniamin, “Thah kher che chu ka duh lo a nia,” ka ti ta a.

Ani chuan, “Mitthi tluk ka ni tawh tho alawm, min that nghal rawh!” a ti ve ta chuar chuar a.

Kei chuan, “Ka duh tâwk ka ngah tawh e, thah che ka tum lo. I ei zawnna hi hna tih tlâk chu a ni lo a nih hi; i dam khawchhuak leh a nih pawhin bansan tawh teh,” ka ti ta salh a.

Ani chuan, “Nangmah that tur hian pawisa te ka dawng tawh si a,” a la ti ve ta cheu a.

“I tum tawh ngei a, i hlawh chhuak tawh tho alawm,” ka tihsan ve mai a.

Ka kawrchung chu ka la a, ka chem la thi zui mai keng chungin mipui zingah chuan ka lut phei ta a. Kawng chu min lo kian duak duak a, pawnah ka chhuak ta a; fimkhur tluk a awm lo tih erawh chu ka theihnghilh bik lo.

Tunah chuan Jamaica thliarkarah chuan ka tih tur ka hlen ta niah ka ngai a; naktukah John Tilly-a ka hmu ang a, Diana hruaiin ka haw thei tawh ang chu....

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 29th, 2019, 7:07 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 15
(Rozami Pachuau)

Thli a thaw vûk vûk a, khua lah chu a dur thim khuih mai a. Lawng chhuatah chuan a ngul vuanin ka ding a, tuipui chu a lang dum kûk a; tui fawn han inhlap chho te chu darthlalang dum chi, keh ther hriam tak hi ang berin ka hre mai. Ka pa khan a hun ṭha zawng chu tuipuiah hian a hmang zo va; kei ve thung chuan tuipui hi ka ngaina hauh thung lo.

Thli tleh lai chuan thli hlaua tuipui sava an tawm-im hle hle ang maiin kil khatah chuan ka awm hle hle a. Chu thlipui na tak chu ka hlau hle nâ a, mi ti phur ru angreng hle lawi a; tui fawn si per ka hmai rawn pertu chu ka'n liak a, a al ṭha hle lehnghal.

Tilly-a chu ka bulah a rawn ding a, “Zanin khua chu a mak hle mai maw? Hmar lam panin tuipui kam kan hrut phei ang a; hei ai maha lawng ṭha pawh hetiang thlipui hnuaiah chuan a pil bo fo va, chuvangin fimkhur hle a ngai a nia,” a han ti a.

Ka hlau a ni tih pawh pha buai duh bik lovin, “Khawmual lei ruh ṭha ka rah leh theih chuan ka lawm hle ang,” tiin ka lo chhang a.

Ani chuan, “Chutiang rilru chu kan pu vek hlawm a; 'Thlipui a reh veleh vaukamah ka kai daih ang a, lawngah ka kal leh tawh ngai lo vang,' kan han ti tak nâin, a hun a lo thlen chuan ka kal leh nge nge ṭhin,” a ti ve mai a.

“Kei chu tlang ram ngaw kara khawsa tura piang ka ni ang!” ka han ti ngawt a.

“Chu chu a dik ka ring; mahse, thahrui i neiin i taima bawk a, i thluak i hmang thiam bawk nen, ṭul thutah chuan khawmualah lo pawh i che thei viau ta ve ang. Bogardus-a nena in inbei pawh kha ka lo thIir ve reng che u asin, ka lo manganpui hman hial che a; mahse, i tuk zal chiang ta kher mai,” a ti ta duah a.

“Min lo hmu maw? Ni e, ka hneh ta hlauh a, ka pa leh mi dangte min zirtirna vang liau liau a ni,” ka lo ti a.

“A ni mahna! I han che kha chu i pa hlauh i ni mai. Bogardus-a kha eng vanga that lova kalsan ta mai nge maw i nih le?” mi han ti a.

“Mi thah mai mai hi ka ti ve ngai lo. Nunna hi a hlu êm a, nunna hi rangkachak leh thil dang zawng aiin a hlu a, loh theih loh a nih loh chuan mi nunna laksak mai ka tum lo.”

“I nunna lak tumtu a ni miau alawm.”

“A mawl vang mai mai maw le. A hliamte kha a dam ṭha leh hlauh te a nih chuan inngaihtuah chhuah nan te pawh a hmang ve mahna!”

A nui hawk a, “Nang pawh chu...,” a han ti teh daih a.

“Eng nge maw i ngaihtuah le?” tiin ka lo zawt a.

“I pa i ang êm atin ni. I pa kha thil thliar thiam tak mi a ni a, mihringte hi kan dinna ngaia ding ngawt ngawt tura duan hi kan ni lo a nia...,” tiin thil dang a sawi kai duah a.

Tui fâwn zawnga lawng chhuat lei buk bukah chuan kan ding ngawi ta reng a. He lawng hi ka pa hun laia mi tawh kha a ni nâin tunah pawh a la ṭha viau tho mai.

“Dam takin kan la inhmu leh thei ang em le?” ka'n ti chhuak phawng a.

“Tu chu maw?” hriat thiam loh hmel fein Tilly-a chuan a rawn ti ha a.

“A..., ka nau a nia; Noelle hruaiin England lamah mn chhohsan a, ka pa phei chuan a ngai thei hle ṭhin,” ka ti a.

“Ni e, a ngai thei ṭhin khawp mai; mahse, i nu khan a tih tur dik tak a ti a ni. I farnu chu hmu ve chiah teh, i chhuan turzia mai chuh! A la naupang deuh mai pawh a; Brian-a pawh khi, a hmelṭha si, court-ah lah chuan a thu sawi thiamzia hahipin asin an sawi!” a han ti leh a.

“Welsh thisen kai a ni tlat a, chu lamah chuan a ngaihtuahawm loh ang chu,” ka lo ti a.

Ani chuan, “A nih, Jeremy-a leh Lila-te an ṭha maw?” a han ti bauh a.

“An ṭha ang chu ka ti mai. Thla khat lai ka inhmu tawh lo a ni a, Jeremy-a pawh ram zau tak neitu a ni tawhin Lila pawh mahni in leh lo enkawlin a buai ve hle tawh,” ka ti a.

“Khu lawng pindan chhunga nula hmelṭha tak khu engtin nge ni dawn? A melh no thei hle che tih te hi i hria em, ka nau?” a ti ta daih a.

Fimkhur tak hian, “Ka hre lo le; tlem azawng chu ka titipui ve tawh,” ti chauhvin ka chhang a.

“Nula ṭha lutuk, huaisen leh dawlhkai ṭha tak a nih khu, i tan chuan neih ngei chi a ni. In hnung lamah ûm zuitu che u an la awm cheu elo?” a han ti a.

Kei chuan, “Ani khu Cape Ann lam mi a ni a; chu lai hmun chu tunah chuan New England ti te pawhin an sawi bawk. An awmna lama mite chuan dàwi thiam angin zuk sawi teh tlat a!

“Sal mantute'n vawi hnih ngawt an man tawh a; a vawi hnihna phei chu phuba lâk nana ti ni àwm takin an inring lo lai an inah an lut thut a, a pa pawh an vaw thlu a, ani chu an hruai lui ta daih a.

“Chutia titu chu Pittingel-a a ni. He laia a rawn hruai kherna chhan pawh, that mai lovin min hmuhtir phawt a duh vang mai mai maw le! Ka taksa chauh ni lovin ka rilru thlenga mi hliam a duh vang mai a ni,” ka ti ta a.

“A nih, tunah hian khawi lam nge i panpui dawn?”

“A pa chu a la dam a nih chuan a hnenah ka hruai thleng phawt ang a, thil awm dan tur chu a la inhril ang chu. Kan chenna lam panpui tur chuan a hla bawk si; chu bakah, ngaw kar thui tak a awm a, Indian an tam si,” ka ti a.

Ani chuan, “Chûng te chu a tuar zo êm êm ang, a lu a zovin a mitmeng te khu a chiang kâk mai a, mi chhuanawm tak tur a ni tlat!” a ti leh zel a. Chutah, tuipui lam chanchin te sawi kaiin titi dang kan vawrh zui ta zel a.

Rel tak hnuah ka riah hmun lam ka pan a; mahse, ka muhil thei tlat lo. Diana hi ka nupui tur chi a ni ang em? Kei hi, in leh lo dinpui tlâk ka ni meuh ang maw ti tein ka inngaihtuah nasa mai a.

Hun lo kal zel turah mipa fa chak takte leh fanu ṭha tak takte chu tih tur ṭul ang ang thawka hma min lâksak turin kan la mamawh dawn a; chutiang fanu leh fapa ṭha tak tak hring tur chuan Diana bâka ṭha an awm thei dawn em ni?

Kan hma lamah chuan khawmual chu a awm ngei a ni; zan thim hnuaiah a la lang thei lo mai pawh a. Ṭiauvut var tak tlim hmurna, ka naupan laia ka infiamna hmun ngei kha!

Tuna kan awmna aṭanga hla vak lovah hian mi sawi lar êm êm leh an ṭih tak, khawvel danga luh leh chhuahna kawngka an tih mai, Bermuda hmun pawh a awm a ni.

Ka muhil ka han ṭhangharh hlawl chu ka meng nghal a, lawng han insâwi dulh dulh paha ka hmai, ni zungin a en te chu ka hria a; thlipui chu a lo reh duk tawh a, tuipui thli fim a tleh heuh heuh a, khua a thiang mawi kher mai.

Thli fim dawng tura lawng bathlara ka chhuah chuan Tilly-a chu ka hmu a, ngaihtuah mûk tak nei nia ka hriat avangin ka be buai duh lo va; lawng puanzar ngul lera mi pakhat awm chu a han en chho leh ṭhin a, beisei a nei tih a lang mai.

Chutih lai tak chuan lawng chokaa an tirhkah naupang chu a lo kal a, “Kan piin tûkin zing chaw min rawn eipui thei ang em a ti?” a rawn ti ta a.

Kei chuan, “Aw, ka lo kal a ni nghal mai,” tiin Tilly-a lam chu hawiin, “Captain, min rawn zawm ve hman ang em?” ka'n ti zui a.

“Lo zuk ei mai rawh; kei zawng, he laiah tih tur ka la nei tlat mai,” tiin mi chhang a.

Lawnga ka zuk luh chuan dawhkan kilin Diana chu a lo ṭhu a, tun ang reng hian ka la hmu nalh ngai lo! Captain John Tilly-a khan thawmhnaw thar nalh tak tak, suam hmangho lawng; anmahni beih rawn tumtute laka a chhuhsakte chu Diana a lo pe niin, Diana chuan a nalhpui kher mai.

Chaw ei pah chuan kan titi dun a, sawi tur pawh kan ngah dun hle mai a; tirhkah chuan ei tur leh in tur a rawn chhawp zel a.

Tilly-a khawsa zia kha ka'n ngaihtuah leh zawk a, pa kawm nuam tak si, khati taka enghelh nei ni àwm taka a awm khan ka ngaih a ti ṭha lo viau bawk.

Khua lah a thiang ta si a, eng emaw hriat a nei em ni? Lawng ngul lera khaw thlirtu khan hmuh a nei em ni? Hmelma lawng a hnai nge ni a, suam hmangho lawng em ni zawk? Pittingel-a khan lawng a nei nual a, a mi huatzia lah kan hria..., min zuitu an awm ta em ni le?

Chaw ei kham chuan ka ding a, “Diana, i thawmhnaw kha thlak vat ang che, buaina kan tawk dawn niin ka hria,” ka ti ta a.

Diana hi chu tih tur hrilhin, 'Engati nge?' tia min zawt buai he he chi a ni ve lo. Rikrum thilah tih tur hrilha a chhan zâwt si se ṭhin chu chhan hman an ni lo fo.

Ka pindanah chuan ka va kal a, ka pistol pahnihte chu ka la chhuak a, a mu ka thun nghal a; ka ngunhnam ka pai leh hnu chuan ka chemtê pawh ka kâwngah ka zep leh a. Thil lo thleng tur chu ka hre lo; mahse, inrin lâwk a ṭha ber a ni.

Kan awmna tlâk lamah chuan Virginia tuipui kam a awm a, engtia hla nge a la nih chu ka chiang lo. Kan lawng chu a rinawm tâwkin a chuangte pawh chak leh tawh khirh tak tak vek kan ni a; mahse, mi chak ber pawhin tum tawk chu a phang ngai chuang lo tlat a ni.

Bathlarah chuan ka va chhuak leh a, khaw thlirtu leh Tilly-a chu an lo inbe mek a. Ka'n hawi ve ngial nâin lawng chhuat aṭanga hmuh theih chu a zau lo kher mai. Tui chung feet sawm panga vêla sang aṭang zet chuan mel li hlaa hla pawh a hmuh theihin; a ngul sang ber aṭang phei chuan mel sawm laia hlaa mi pawh a hmuh theih a ni.

John Tilly chuan mi rawn pan a, “Ralthuam i pai chu a ṭha khawp mai, buaina a hnaiin ka ring tlat mai,” ti ta a.

“Thil fel hlel deuh hmuh in nei elo?” ka lo ti a.

“Nei chiah lo ve; mahse, nizan khan lawng pakhat min rawn hnaihtu chu a awm ngei a ni,” tiin mi chhang a.

“Chu chu in hre chiang maw? Tunah khaw'nge a awm tâk si?” ka lo ti a.

Ani chuan, “Chu tak chu a ni kan buaina chu! Khaw var hma darkar khat velah khan min rawn kai tho a; lawng chung zawl aṭangin Tom Carboy-a'n a thil hmuh mi kawh hmuh a, tuipui chung hla taka thil dum chhah deuh map awm kan va hmu a ni. Eng nge a nih chiah chu kan hre thei lo; mahse, eng emaw chu a awm ngei tih kan chiang,” a ti ta a.

“Carboy-a hi mahni hna tlin tak mai a ni a, thlipui tleh lai te khan khaw thlirin a awm a; heng lai hmun hi tuizangkhauh maksak tak tak tamna lai a ni a, chuvangin, fimkhur a ngai ta êm êm a. Chutianga khaw chin thlira a awm lai chuan zan thim hnuaia kan lawng rawn pana chak taka lawng lo kal, êng pakhat mah inchhi lo a hmu a ni.

“Min rawn koh chhung khan chu lawng chu a insaseng leh ta aniang, lawng chung ka han thlen chuan eng nge a nih hriat chian phakah a awm leh ta lo va,” Tilly-a chuan a ti ta zel a.

Kei chuan, “Lawng huai an sawi fo hi ka âwih zawng a ni lo va; mahse, hêng lai velah...,” ka tih lai mek chuan, “Kei pawhin ka awih lo; mahse, zan thim hnuaia lawng, êng chhi miah lovin min rawn zar fo mai chuan ngaih chu a ti ṭha lo alawm,” a lo ti ve a.

“Tunah chuan eng mah chu kan hmu lo; mahse, zing khaw en hnu khan khaw thlirtu chuan hla takah lawng puanzar ngul ni àwm tak chu a hmu a ni,” a ti leh a.

Kei chuan, “Chuti chu, lawng min zuitu an awm ang a, kan hmuh phak loh chinah biruin hun remchang a nghak a ni ang,” ka ti leh a.

Tilly-a pawh chuan, “Chu tak chu a nia ka hlauh, thim hnua min rawn beih thut an tum a ni maithei,” a ti ta a.

“Lawng suam hmang an ni thei ang em?” ka ti a.

“Ni thei ang; tin, i ṭhian Pittingel-a pawh a ni maithei. He lawng Abigail hi lawng kal chak tak a ni a; mahse, suam hmangho lawng, kal chak tur hrim hrima siamte chu kan ter pha lo hle ang. Chutiang lawng chak chi chu Pittingel-a pawhin a nei a, 'Vestal' tih hming a pu nghe nghe,” a ti ta zel a.

Ka'n hawi vel ngial a, chutianga min ûmtu an awm a nih ngat chuan thimthama min rawn nanchin tum chu a ni ngei ang.

“Kan bikbosan thei mai lo'm ni?” ka'n ti leh a.

Ani chuan, “Vaukam hnaih deuh zawngin kal ila, kan inhloh thei maithei a; mahse, vaukam lam tui pannaah hi chuan tawh sual tawh tur apui a tam thung a,” a ti ve mai a.

Kan ngawi dun vang vang a, chutiang khaw thiangah chuan tuipui chu hmun ralṭi a ni thei ang tih awih a har khawp mai.

Chutah, “Vaukam hnaih chu a ṭha ang; mahse, fimkhur hle chu a ngai a, lawng ṭha tak tak, tui panna laia insawh chhia leh tang ta hi an tam teh a nia,” a ti leh ta a.

“Tûkinah chuan eng vanga min rawn bei nghal mai lo nge nia i rin?” ka han ti a.

“A, khua a var ṭep tawh tlat a, min rawn ûm phak chuan khua a var tawh mai dawn tlat a ni,” a ti leh a.

Nilengin chak takin kan kal a, lawng laipuite chu hman mai theihin kan buatsaih a. Ka pa hun lai khan laipuite chu an lo bun tlem deuh a ni.

Khaw thim pawh a hnai ta; hnuai lamah Iut thlain Diana hnenah chuan, “Eng chhit loh tur, hmelma an hnai e,” ka zuk ti a.

“Kan hnung maiah sawn min rawn beih tum an awm a, zanin lam hian min rawn beih ngei ka ring a; chu vang chuan vaukam lam kan hnaih dawn a ni,” ka'n tih zawm leh a.

Diana chuan, “E, Khawi lai vaukamah nge kan awm tâk?” thlaphan hmel fu hian a ti ta ha a.

Kan awmna lai chiah Tilly-a ka lo zawt lo chu pawi ka ti hle mai; mahse, Chess peake Bay an tih aṭanga hmar lam deuhah kan awm mek ang. Chutiang te ka hrilh hnu chuan lawnglenga chhuak mai thei turin kawrlum te ha a, a bungrua pawimawh te pawh tel fel diam turin ka chah vek a, ka chhuahsan ta a.

Tilly-a chuan mi rawn hnaih a, “Kan hnung Iawkah sawn an awm a, an lawng puanzar ngulin arsi a hliah zauh zauh pawh ka va hmu a ni,” a rawn ti a.

“Sava te pawh a lo mahna,” ka lo tihsak a.

“Sava a ni lo,” a ti ta hmak a.

“Maryland vaukam hrul em ni kan awmna hi?” tiin ka'n zawt a.

Tilly-a chuan, “Ni e. Hêng lai tak hi chu ka hnaih khat viau a, tuipui thuk lai hi a him zawk avangin. Vaukam hnaihah chuan hlauhawm chi hrang hrang — lung hriam tak tak leh mi sual bâkah thlipui na tak te a tleh thut thei bawk a,” a lo ti a.

Hetiang taka zan thim hi ka hre ngai lo. Tuipui chu a dum put ringawt mai a, a thim êm avangin eng mah a hmuh theih loh. Thim hnuaiah chuan thli thaw vûk vûk leh tui fâwn inhlap ri bak hriat tur a awm lo.

Thâwk leh khatah, hmelma lawng chu kan sirah chuan a lo lang ta thut a! An lawng dum run chu tuipui dum kûk aṭang chuan phûng ang maiin a rawn inlar thut a, kan lawng hnung maiah chuan a rawn ding ta a.

Pa lian pui mai, hmui hmul buk tak hian hruizen sei tak, a hmawra thir kawm vuah hi rawn vawm kai a lo tum mek chu ka va hmu ta a.

Chu pa chuan a hruihrual ken chu a rawn theh kai chiah tihah chuan ka lo kap ta thawr a. Ka silai ka phawi lai pawh ka hre lo; ka kuta pistol puak thawr leh ka mi kah-pain ka kahna lai, a áwm a dawm vawng vawng leh silai kah ênga a meng phar uau lai chu ka hmu chiang hle thung.

Chu pa chu hma lamah a rawn tlu phei tawp a, a thil vawm pawh a ṭhelh phah ta a. An lawng chuan min rawn hnaih chilh ta a; chu veleh ralthuam keng mi tam fe mai chu kan lawngah chuan an rawn zuang kai ta sup sup mai a.

Khawi maw laia Tilly-a au ri ṭhawt hi ka hria a; laipui puak ri dur ka hre leh a; lawng bang thing keh darh chuai ri leh ṭe thawm ka hre zui zat a; chutah, mei alh thawm leh mihring insual buai vel thawm bâk hriat theih a awm ta lo.

Ka silai pakhat zawk chu ka'n hmet puak leh a; mahse, tu emaw hian ka kut aṭang chuan ka silai chu a rawn pawt thla tawp mai a. Rang taka inher pahin chu pa hmuiah chuan ka hnek ta bur a. Ka chemtê ka phawi zui leh zat a, rang zetin a nâkthawlah tak chuan ka vit nghal thawih a.

Ka kut lehlamin ka ngunhnam chu ka hum bawk a, ka chemtê chu Italian-ho tih danin ka la hum bawk a, min rawn luh chilhtute awm khawmnaah tak chuan ka va zuang lut ve ta chawm a.

Ka ngunhnam chuan ka sat a, ka vit bawrh bawrh bawk a; hmelmate lah chuan min hual tuau tuau a, hrem hmun sa lai takah ka awm hi a ni hrim mai.

Mi pakhat tlu tawh chuan ka ke chu a la man ve ta fo va, han tlawh kian dawrh pahin mi tam zual lak aṭang chuan ka sawn leh thei ta deuh a; kil khatah chuan Tilly-a leh mi ṭhenkhat chu hual behin an lo awm mek a.

Kan laipuite chuan hna an thawk ṭha kher mai! Hmelmate lawng chu a alh hluah hluah tawh a; mei alh engah chuan chumi kang ṭhelh tumtute buai phili vel pawh chu ka va hmu thei a, lawng puan zar han kang te chu ṭhelh ngaihna a awm dèr si lo.

Lawng puan zar kang chuan mi pakhat kawr hâk lai chu a kang kai a, a mangang lutuk chu tuipui zau takah chuan a zuang thla bawrh a, a ṭe tuar tuar chu a reh zui ta hmak a.

Mi inbei luai luai karah chuan pindan hnuai lam pan tumin ṭan ka la ta chiam a; a tawpah zawng a kawngkhar chu ka hawng thei ta hram a, ka zuang lut ta vat a.

Mi pakhat hian mi lo hmachhawn a, a ngunhnam ken lai chuan ka lu-ah sah tumin a han vai fua a; kei chuan ka ngunhnamin ka lo dang tleu zauh a; chumi pah chuan ka bawh a, ka chemtê chuan a dulah ka vit lut ta thawih a. A tlu zui ta a; ani chu ka kân a, pindan dangah ka lut leh ta a.

Lawng hma lam leh hnung lam daidanna bang ngheng chuan zam êm êm hian Diana chu a lo ding a; meng phar âwn awn chung hian kei mi hmachhawn zawngin amah hmachhawntu chu a lo en a; chu pa chu a hnung lam aṭang pawhin Pittingel-a ngei a ni tih ka hai hauh lo!

“Tunah hian ka that dawn che a ni!” Pittingel-a chuan a lo ti mek a.

“I hnunga ding kha han hmachhawn phawt la, i bei ngam ngût ang emaw chu?” Diana chuan a ti ve ta sap a.

Pittingel-a erawh chuan, “Chutiang ’trick' ṭhing lutuk chuan mi bum mai mai lo vang,” nuihsawh fe hian a han ti phawt a, “Khaw'nge ka thah hma chein ka'n...,” a'n ti leh a, Diana zam ta lo lutuk hmel a hmuh tâkah chuan a tawp ta chawt a.

Pittingel-a chuan eng emaw ti tala mi vau paha min biak hmasak phawt ka ring chu ka â hle mai! A ngunhnam lek chung chuan min rawn bawh ta thut a.

Ka kâwnga ka pistol ruak ka lo zep hlauh chuan ka nunna a chhan ta hlauh zawk a; a ngunhnam hmawr zum chuan ka pistol tak chu a vit fuh ta zawk a; a lâk let leh hma chuan rang lutukin ka ngunhnam chuan a dàrah ka sât ve ta siah a.

Thinrim zeta meng pawng zawrh chung hian min en run mai a, a ngunhnam chu a lek kawh leh ta a. Kei pawh chuan inring takin ka lek kang ve ta bawk a.

Pittingel-a chu a inher thut a, Diana chu a sir zawnga sah a tum ta mai a. Diana lah chu tlan sawnna tur dang awm hek lo, bang ngheng hian a ding ngar mai a.

Pittingel-a'n a chem a vai dawn chiah tihin ka ngunhnam hriam lutuk chuan a koki-ah, a dàr leh ban bul inzawmna laiah tak chhuk zawngin ka sat ta siah mai a; a ban chuan a duh anga hna thawk ta lovin a uai thla hnawk a, a chem zum ken pawh chhuatah a tla ta bawl a. Diana chu a vai fuh hman teuh ngei mai.

Thinrim zet hian Pittingel-a chuan a ban zawi hnuang leh thisen chik tuam tuam chungin min rawn en ram ram a; chu chu en kânin kei chuan Diana chu ka ban a, “I kal tawh ang hmiang?” ka tihsan ta daih a.

Lawng chung zawlah chuan kan chhuak chho a, Tilly-a leh a hote pawh an lo awm a.

Inbeihna chu a tawp ta! Lawng chhuatah chuan ruang pathum lai hi an lo zalh a. Hmelmate lawng chu hmuh phak maiah a la awm a; tuiah chuan léi burin a awm a, lawng chhuat ṭhenkhat phei chu tuiin a chim tawh a ni tih pawh a hriat mai a.

“Kan lawng hi eng nge a an ve?” tiin Captain chu ka'n zawt a.

“Vawi hnih lai chu laipui muin a rawn deng ve a, lawng pawh hmun hnihah a pawp a, tui a lut chak viau bawk.”

Kan lawng che vel reng reng chu a dik tawh lo a ni. “Vaukam lam i pan vat ang u, lawng puan zarte pawt pharh ila!” ka ti ve ta a.

Captain chuan, “Chu chu kei pawh ka lo ngaihtuah mek a ni. Lawnglenga inthiar chhuah ai chuan a him zawk ang; hawh u, i che nghal vat ang u,” tiin thu a pe nghal a. Lawng hna thawktute pawh chu hmanhmawh takin an insingsa zui ta bawk a.

Vestal pil ruai ruai lai chu kan va en a, Captain Tilly-a chuan, “Keimahni ang bawkin an buai ve a nih saw; duh leh an buai buaiin buai ve sela, buaina chu anmahni cho chhuah a ni miau alawm le!” a ti ve mai a.

Lawng chhuat zawlah chuan ka chho Ieh a, mitthi ruangte chu tih ngaihna awm ta hek lo, tuiah ka nem thla ta vek a.

Chhuata pistol let reng chu ka la lawk a, ka kawngah ka zep ta a, kan lawng pawh muangchangin a kal ta ṭuah ṭuah a.

Lawngah chuan tui chu a lut chak hiau hiau hle mai; Abigail hi chu kan chhungkaw zinga mi tlukin kan ngai si a.

Diana chu ka han hnaih a, “Ka bulhnaiah awm reng la, lawng hi a pil palh hlauh a nih pawhin vaukam lam kan pan dun mai dawn nia,” tiin ka hrilh ta a.

“Tuiah kan tla hlum mai ang ah!” Diana chuan a ti a.

“Vaukam chu kan thleng ngei ang; kan tlang ram in chu min hmuhpui ve ngei pawh ka duh bawk. Tlang ram lei ṭha hmunah chuan in leh lote dinin, ram ropui tak din turin fate kan la mamawh dawn si a...,” hreh tak chung chuan ka'n ti ve phawng a.

Lawng chu a ṭul thuta chhuahsan mai thei turin lawngleng pawh peih sa vek a ni ta a; thawmhnaw, ei tur leh tui, mutbu, silai leh a mute nen lam kan dah lawk diam a.

Vestal pawh kan hmu pha ta lo va, a pil ta ngei a ni ang. Pittingel-a kha ka'n hre chhuak thut a, lawng hnuai lam pindanah khan hliam na tak tuarin kan kalsan ta kha a ni a....

A hnu lawka ka zuk luh thlak leh chuan hmuh tur a lo awm tawh lo va; a thisen luang zuih chu ka hmu a, amah chu tuiah a zuang thla ta nge tih pawh hriat a ni ta lo. A chin kan hriat loh avang chuan ngaih chu a ngam zan lo hle a, ngaih tih ṭhat ngawt a la chi rih tlat lo.

Khawmual chu kan hnaih ta hle a, CaroIina tuipui kam chu kan hnaih ta! Tui fâwnin vaukam a va hlap ri hlawp hlawp thawm te chu kan hre pha ta a.

Tilly-a chuan, “Thliin min nawr chak lutuk; heti chuan tui thuk tawh lohna hmunah kan lawng hi a insu tang ngei ang,” a han ti a.

Kei chuan, “A pawi ka ti hle mai, keimah vang vek a ni,” ka lo ti a

Ani chuan, “He lawng hi i pa ta ka ro chun a ni a; chu vangin chutiangin inthiam lo duh suh. Lawng ṭha tak a ni a, theih tawp chhuahin pil mai lova chhan kan tum dawn nia,” a ti ta zawk a.

Vaukam tui thuk lohna kan va thlen chuan khua a êng ṭan tawh a, tui fawn chuan vaukam lamah min len phei zel a; a tawpah chuan lawng mei lam chu ṭiauah a va innghat ta lawih a, a ding zui ta a.

Tichuan, lawnglengin vaukamah kan kai ta a; ngaw chin, hmun ualau lo lai zel chuhin mei kan nun a, ei turte kan buatsaih ta a.

Ei tur an buatsaih laiin kei chu ram chin hriat nan ka vak chhuak ta a. Vaukam kan kaina chu thliarkar te deuh, khawmualpui aṭanga rawn inkhawh chhuak, sei zet mai hi a lo ni a. Ka vah kual deuh hnu chuan sazuk hniakte pawh ka hmu a, savate pawh an awm a; mahse, ka kap lem lo.

Ka kir leh ta a. Ka va thlen chuan Tilly-a leh a hote chuan lawng chhiatna laite chu chianin an va en mek a, a pawp chu tui chim chin hnuai lamah a lo ni a.

Tilly-a chuan, “Khua a ṭhat chuan tui lo lut hi kan ti kang ang a, lawng pawh hi a tanna aṭang hian kan la chhuak leh thei mai ang,” a lo ti a.

Hma lak zel dan tur te sawiin chaw kan ei pah a. “Vestal lawng aṭang pawh khan lawnglengin an inthiar chhuak ve ni àwm tak a ni. Kan khaw thlirtu-pa hian an lawngleng pawh a hmu a, kan fimkhur viau a ngai ang,” Tilly-a chuan a ti a.

Kan awmna sir tawn tawn chu thui tak thlengin a hmuh theih a, hnung lam chu ngaw chhah tak a ni mai a, ngaw-ah chuan Indian bâk chu venthawn tur awmin ka hre bik lo.

“Lawng hi a tanna aṭang hian ti chhuak Ieh thei ta se, engtia awm zel nge i tum dawn?” tiin Diana chuan min zawt ta khauh a.

“Kan awmna Shooting Creek chu a la hla hle nâ a, ka pan nghal mai tho ang,” tiin ka chhang a.

Thil hriat chhuah ka nei thut a, Tilly-a chu enin, “John, he lai aṭanga hla lo têah hian mi pakhatin sumdawn nan awm hmun a khuar asin. Lawng pawh pahnih lai a nei a; chu pa hming chu 'Clairborne' a ni a, a hnenah chuan i bungrua tam tak pawh hi i hralh theiin ka ring. Pa thinram tak a ni nâ a, pa ṭha tak niin an sawi,” ka ti ta a.

Tilly-a chuan, “A hming chu ka lo hre tawh ṭhin asin,” a lo ti ve a.

Lawng hna thawk ṭhenkhat chuan lawng bang pawp thawm ṭhat hna chu an lo ṭan der tawh a; a ṭhenin pump hmangin tui chu an lo paih chhuak mek bawk a. Kei pawh chuan rang takin tui pump chhuahna khawl chu ka pan ve ta a.

Khaw thim dawnah meuh chuan kan pump chhuak tam hle tawh a, a bang pawp pakhat zawk phei chu an lo ti phui zo der tawh a.

Ni a lo chhuak ta a, khua pawh a thiang ṭha hlein hna pawh kan ṭan leh ta a. Hêng lai ram ruak zau takah hian Indian pasalṭhaho chu an vei deuh reng a, anni nen hian kan intawng lo a nih chuan kan vannei hle a ni ang.

Bûk mei lum ai pahin Tilly-a chuan kan awm zel dan tur te min zawt a. Kei chuan, “Tunah chuan leilung rapin ka awm leh ta a, in lam panin ka kal thuai tawh ang,” ka ti a.

“In kalna tur chu a hla hle si a, i tuar chhuak peih dawn em ni?” tiin Diana hnenah chuan a zawt thung a.

Diana chuan, “Kin-a kalna apiangah ka kal ang,” a lo ti hnâp mai thung a, a nui pah seih a. “Ke-a kal pawh thei ve tak ka ni; kan awmna Cape Ann lamah chuan sakawr leh tawlailir hman tur te awm ve hek lo,” a ti zui leh sap a.

Tilly-a chuan, “Kawng lakah chuan mi kawlh, sa kawlh tam tak an awm tih i hre meuh maw?” a han ti leh a.

“Chûngte pawh chu ka hria e,” Diana chuan a lo ti leh mai a.

Henry-a chuan mi rawn pan ve ta a; ani hi kan buai bawk nen kan inhmuh lohna a rei ve ta hle a ni. Diana nen kan awm dun a hmuh chang hi chuan mi ti buai lovin min kalsan leh mai ṭhin a, a hre thiam ve hle ṭhin.

Henry-a chuan, “In duh phawt chuan in kalna turah chuan ka kalpui thei ang che u,” a ti ta a.

“Duh teh reng e, kan chenna chu nuam pawh i ti ve ngawt ang,” ka ti a.

Dàr chhin uk pahin, “Hawna tur in leh lo ka nei chuang lo. In bula kal ve tura min duh phawt chuan ka lo tel ve ang,” Henry-a chuan a ti ta zel a.

Kei chuan Tilly-a chu enin, “Thil ṭul tak pakhat, tih makmawh ka la nei cheu mai. Chu chu ka pa pawh i tihsak tawh a, kei pawh min tihsak ve ka beisei a ni,” ka han ti a.

Tilly-a chu a meng phawk ta hu a, “E! Inneihtir turin min duh a maw? Teh reng mai, chutiang ti theia ka awm chuan ka lawm hle bawk ang,” a ti ve ta a.

Tom Carboy-a pawh lo ding chhuakin, “Kan nula-i hian a pa aia ding tura min duh chuan in inneihnaah chuan a pa ai ka awh thei ang,” a ti ve teh khauh bawk a.

Chutah thutak zet hian Diana chuan, “E, Tom, pa lo nei tawh lo ni ila chuan ka pa tak tak angah pawh ka ngai duh ang che. A nih, ka pa ai awh chuan mi dinsak hram duh ang maw?” a ti ve ta a.

Chu lawng pu, tar baih tawh chu a hawi kual a, a zah hmel ta riau a, “E khai! Nula, ka ding êm êm ang,” a ti bah ta nawk a.

TilIy-a chuan, “A nih chuan naktukah kan ti dawn nia; kan hnate han zo fel tê tê ila,” phur fe hian a ti ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 30th, 2019, 7:57 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 16
(Rozami Pachuau)

Tuipui kam chu a reh ruih a, tui fâwn ri hlep hlep te leh sava ṭhenkhat hram ri te bâk thawm hriat tur a awm lo.

Diana chu ka chhungte pawhin an lo lawm ngawt ang chu, Yance-a ṭhiannu Temperance-i nen lah têt tê aṭanga lo inkawp ṭhin an ni lehnghal bawk si. Naktukah pawh khua a ṭha êm ang chu, van lam a thiang ṭha êm mai; kan tan ni lawmawm leh hlimawm tak, Diana nen nupaa kan insiamna hun tur a ni si a.

Ka hnung lamah chuan thil ri hraih hi ka hria a, ka pistol vuan chat pah chuan ka inher ta a.

Zan thla êngah chuan Indian pathum dingte chu ka va hmu ta a. An vai chuan fei an keng vek a, thal leh thal a ngul nen! Chutah, min hnaihtu ber chu a han ṭawng ta a, a ṭawng chu ka hriat ṭhan leh hriat hnu a ni tlat mai!

Anmahni ṭawng chuan, “Cacba in ni maw?” ka ti a.

An ṭawng ngeia ka'n biak chuan an ri ta hlut a, rawn ṭawng hmasa bera bawk khan a khap ta a, “Nang, mi ngo hian engtin nge kan ṭawnga min biak theih mai?” a rawn ti ta a.

“Ka pa hian in zingah ṭhian a nei ṭhin a, a hming chu Wa-ga-su a ni. Catawba tam takte nen ral dovin kan chhuak ho va, kan ramchhuakho bawk ṭhin,” ka ti leh a.

Chu pa vek chuan, “Wa-ga-su chu ka hria, pasaltha huai leh chak tak a ni,” a han ti ve leh a.

“In lo kalna a hla hle mai; tihsak theih che u ka nei em?” ka han ti a.

“Ei tur kan duh, kan ril a ṭam nasa a nia,” a ti ta a.

“Min han zui ula, ka bulah lo kal rawh u; chuti lo chu ka ṭhiante'n hmelma emaw an lo ti ang che u,” ka ti ve ta a.

Ka vanneihna a la tluang zel a, tunah chuan Shooting Creek lam panna, kawng ralṭi tak zawhpui tur ṭhian rinawm tak tak ka chhar leh ta hlauh mai.

Keimahni ang bawkin Catawba-ho pawh hi hmelma nei an ni a, kan haw kawngah chuan kan fimkhur viau a ngai dawn a ni.

Senecas-ho chuan ka pa thih hnuah min la rawn run leh miah lo va. Mahse, Catawba zinga an hotu deuh ber chuan, “An la rawn thawk ngei ang. I pa tluka huaisen in nih leh nih loh fiah tur talin an la rawn bei leh ngei ang che u,” a ti a.

“An bûk mei lum te chu aiin lo khawsa ve mai mai se an tan a ṭha zâwk tur maw le; anni thah hi kan châk ber a ni lem lo asin,” ka lo ti thung a.

Amah bawk chuan, “An zinga upa lamte chuan hun inher danglamzia hriain inrem taka awm chu an duh; mahse, an ṭhalai tha zaho saw alawm buaithlak chu ni, an chakzia leh huaisenzia ti lang turin mi huaisen fate ngei han indopui che u hi an châk sakhai maw le!” a ti leh a.

Zing khaw var veleh ‘Abigail' chu kan la chhuak tawh ang, Catawba pasalṭha chak tak tak paruk ngawtin min pui thei dawn bawk a. Catawba-ho hi ka pa dam lai pawha min ṭanpuitu ṭha tak takte an ni ve tlat a, an rin tlâk êm êm bawk a ni. An zinga pakhat chuan Diana chu a'n en vang vang a, “I nupui em ni?” tiin min zâwt phawng mai a.

“Naktûkah kan innei ang; chumi hun chu nangni pawh hian min hmanpui thei hlauh dawn ta a nih hi,” ka ti a.

Diana chuan, “Eng nge maw an sawi le?” a ti ha a, Indian-ho nena kan inbiakna chu ka hrilh ve ta vek a.

Ani chuan, “Chutianga i hrilh ngawt ni! Ka rem tih leh tih loh pawh min zâwt si lo; naktuk chu a rem lo vang!” a ti ta hlar mai a.

“John Tilly-a hi lawng captain mai ni lovin, puithiam a ni bawk a; ka nu leh pa pawh a inneihtir tawh a, keini pawh a kutah kan innei thei a ni. Naktûkah lawng tang hi lâk chhuah kan tum dawn a; kan theih hlauh chuan tawi khawmuang tawh lovin khua a chhiat a, thlipui lo thlen leh hma ngeia dîng taka kal a ṭul a ni.

“Tunah lawng hma lam, a mawng hnuai saw ṭiauah a inphum a, a che chhuak thei lo va; thli na vak lo pawh tleh se, tuipui mawnga mi ṭiau a rawn hnâwl chhuah a, lawng tanna laia a chhêk belh leh vaih chuan saw lawng saw chu tui chungah a lang thei tawh ngai lo vang.

“Tur luih che chu ka hreh viau tak nâin a loh theih loh a ni. Mahni pasal pawh ni hlei lo ram pilril taka zui ai chuan inkut suih mai chu a ṭha ber ang,” ka ti ta a.

Diana chuan, “Remchang i ti a maw? Eng nge ka ngaihtuah pawh i hria em ni? Ka rilru te pawh ka thlak leh mai thei tih te i ngaihtuah ve ngai em?” a han ti vêi tan tan a.

“I rilru i thlak a nih chuan tun hi sawi chian hun a ni. Tilly-a hi i zui haw mai ang a, Shawmut tlawh a tum nghe nghe kha,” ka ti bul ve ta hmak a.

Indian pakhat chuan zawhna min zâwt leh a, ka'n chhan leh chuan an ri ta hlut a. Diana chuan, “Eng nge in sawi leh tâk pek?” a lo ti hlak a.

“A..., i man atan puan lum eng zât nge ka pêk tih an hre duh alawm maw le,” ka ti mai a.

“Puan lum — ka man atan maw?” mak ti zet hian Diana chuan a han ti ha a.

Nuihza insum tak chung hian, “Silai panga, suan pound za, zen tam tâwk leh puan lum sawm ka pêk tlâk tawh thu ka hrilh a ni,” tiin ka han hrilh leh a.

Diana chuan, “Dâwt a nih chu! Ka manah eng zât mah i seng...,” a tih mek laiin kei chu ka lo inrawlh vat a.

“Ssh..., fimkhur teh! Ka thil hrilhte hi an tan chuan thiI ropui lutuk a ni. Lal fanu, mi ropui tak i nih thu te ka hrilh a; chu bâkah, thlai hnah aṭanga damdawi i siam thiam thu te thlengin ka hrilh maw le! Anni ngaihah chuan i ropui lutuk!” ka ti ta a.

Diana chuan, “A nih leh i tan ve thung? Min ngai ropui ve em?” ngenngawl pah ang reng tak hian a ti ta khauh a.

Kei chuan, “Ngai ropui teh reng e; chu vang chuan a nia an ngaih ropui theihna tur chea thil ka hrilh chiam ni,” tiin ka chhang a.

Zing khaw var hma aṭangin lawng tang tih chhuah hna chu kan ṭan ta a. A bungraw phurhte kan hlang thla ṭeuh a; kan beih ngial hnuah, ni chu a vanlaizawl ṭep tawh tihin engtin tin emaw kan ti chhuak thei ta hram a, a chhunga tui pawh kan paih kam vek bawk a.

Bungruate kan hlan luh fel leh meuh chuan ni a tla dawn ruai tawh a; chutah, ṭiau hmun remchang laiah chuan inneihna chu buatsaihin Diana nen chuan nupa-ah kan insiam ta a.

He hun hi ka mitthlaah a cham reng tawh dawn a ni. Tuipui kam ṭiauvut var sur mai, hmuh phak chin thlenga inpharh duai leh tuifinriat tui cham put te; ṭiauvut sira hnim hring tlim hmur awmna hmuna British lawng mi tlem tê leh Catawba pasalṭha paruk lekte chu....

Engkim peih fel a nih hnuah Tilly-a chuan Diana chu a va pawm a, a biangah a'n fawp zauh a. Rei vak lo inthlahna leh thu pawimawh inchah nan hun kan hmang leh a; Diana chuan a pa, Shawmut-a awm hnena sawi tur thu a chah leh a; chumi hnu chuan anni chuan lawng chu an pan ta a.

Lawng chu kan thlir zui reng a, tuipui zau lamah a tawlh ta ruau ruau a. Keini pawh chuan Catawba-hovin an lo kal lama lawngleng an thuhrukna lam chu kan pan ve ta a.

Diana chu a ngawichawi ta hle a, a mi hriat tharte kutah a intulut a ni ta si a; chu bâkah a kalpui turte chu a tam zâwk Indian an ni lehnghal a, a ngawichawi ta riau pawh chu a àwm viau e!

Indian-ho lawngleng chu a lian hle a; tuifinriat litengsawl 'Sinepxtent' an tih mai chu kan zawh zel a; Catawba-ho pawhin in thlen an nghakhlel ve tawh bawk a, chak takin kan kal zel a.

Lui chhuah hi kan va thleng a, chu lai far thing hmunah chuan riah bûk kan sual ta a. Sazuk, lui tui in tur lo chhuak hi Catawba pakhat chuan a kap hlauh mai lehnghal a.

Zing hma takah thovin lui chu kan zawh chho zel a; a hnar, chirhdum hmun thleng rawkin kan kal a; chu lai dum hmun chu khawthlang lamah kan hêl a, a hnuah chhim lam hawiin kan kal leh ta a.

Diana nen chuan kan inbe mang lo va, Indian-ho lah chu a ṭul feah lo chuan an ṭawng mang bik hauh lo. Lawngleng chu kan inkar chhawk a, fimkhur takin kan kal zel a. Kan pan ber chu Clairborn-a awmna hmun a ni hmasa phawt a; kan pelh tâk litengsawl chhak lama awm niin ka hria a, chu lam chu kan pan mek a ni.

Chak taka kal zelin Kent thliarkar chhim lam chu kan va thleng ta a. Chuta lo awmte chuan hmelma kan ni lo tih an hriat theih nan kan thlen dawnah chuan muangchanga kut vai lâp lâp chung hian kan va hnaih phei zel a. Chu lai chu kulh ang maia thing lian pui puia hung kual pup hi a ni a, a kawngkharpui sirah chuan kawngkhar te reuh tê, mihring pawh a mal mal chauhva luh theihna tur hi an siam a

Pa thaupui mai, hmai sen hlur hi a lo chhuak a, lawngleng dinna tura an dawhah chuan a lo chhuk a, kan zinga mi ngo nula a'n hmuh chuan mak a tih hmel kher mai.

Kei chuan, “Clairborn-a i ni em?” ka lo ti nghal a.

“Deal Webster-a ka ni; Clairborn-a chu a awm lo.”

“Thil hralh tur leh mamawh lam tura lo kal kan ni a. Kei hi 'Kin Ring Sackett' ka ni a, hei hi ka nupui 'Diana' a ni; ani hi Cape Ann lam chhuak a ni thung,” ka ti a.

Ani chuan, “E, lo thleng rawh u, tlawhtu kan nei khat teh a nia. Hêng i Indian rawn hruaite hi ka va hmu ngai lo ve?” a han ti zui zat a.

“Catawbas; Carolina lam chhuak tho an nih hi. Mi ngo tan chuan ṭhian ṭha tak an ni asin,” ka ti thuai a.

“E, ka hria e. Hnam kawlhsen leh sual huai tak an ni tia an sawi ṭhin tak kha maw le,” a ti ta a.

“Chu zawng a ṭul dan azir a ni mai. Tunah chuan hei, ralmuang takin kan lo kal a; anni hi chu kan haw kawnga min hruai tura ka hruai an nih hi,” ka ti ta zel a.

Lawngleng aṭanga kan han chhuk chuan Diana chu ka kai a; kan vêla Indian hnam dang min lo thlirtute chu ka Catawba hruaite chuan melh pawh an melh chhin duh eih lo.

Webster-a chuan kulh chhunga in pakhatah chuan min hruai lût ta a. Thukah chuan mei an lo chhem bawk a, a lum nuam hle mai. Dawhkan kîla kan ṭhut hnu chuan ei turte chu an rawn chhawp thuai a – sazuk sa, sangha leh chhangthawp la lum vat vatte chu min rawn chhawpsak a; bâwng hnute aṭanga siam butter-te nen.

Webster-a chu kan hmaah a ṭhu a, “Chu, thil hralh tur in nei a maw? In lawnglengah khan savun ni àwm tak pawh ka hmu a...,” a han ti a.

Kei chuan, “Indian-ho ta a nih saw; a manah chuan rangkachak tangka min pêk a ngai ang,” ka lo ti a.

Webster-a chuan, “A ṭhat nasat chu,” a ti a, a thaw huai a. Chutah, “Lord Baltimore-a hi i hre ngai em?” a ti zûi ta daih a.

“Hre ngai hauh lo mai,” tiin ka lo chhang a.

“Buaina kan tâwk dawn a ang hle mai! William Clairborn-a hian he lai Virginia rama mahnia ro an inrel vena; ro rel khawl ti mai ila, chauh hi a chunga thu neitu-ah a ngai a; Lord Baltimore-a ve thung hi chuan hêng lai ram zawng zawng hi British thu hnuaia awm vek turin a ngai thung si,” a ti ta a.

Kei chuan, “Keimahniin kan inrel bawl chawp a; kan chunga thu nei tur, hmun danga mi an awm dawn em ni?” ka lo ti a.

Chaw kan ei kham chuan silaimu leh zente chu kan mamawh tur tâwk kan leisak ta a.

Webster-a chuan, “In awmna lamah engtin nge silaimu leh zente in ngaihtuah?” tiin min han zâwt a.

“Kan insiam chawp mai ṭhin. Tlang ramah chuan suan laih chhuah tur a la awm a; tin, kut themthiam tak tak an awm a; chu bâkah, kan chheh vêlah sawn thir laih chhuah tur te pawh a awm bawk a,” tiin ka chhang a.

A tûk ni chhuah hmain kan chhuak leh ta a. Lawnglengah khan kan tâwt deuh avangin Webster-a ta kan lei belh leh a; tichuan, kan thil leite chu thiar lutin kan inzui chhuak ta a.

A ni khatnaah chuan Kent point kan kal pel thei hram chauh a; litengsawl zau tak, Webster-a'n sangha chi khat, 'Herring' a tam a tihna hmun kan va thlen chuan ni khat chamin sanghate chu kan man ta a; kan man sâte chu kan rep ro nghal a.

Kan awma aṭanga chhak lam hla takah chuan lawng kan hmu ta a; kan awmna a birûk deuh avangin min hmu lo a ni maithei. Chu lawng ka hmuh chuan ka awm a nuam chiah lo hle a; mi chi hrang hrang awmna a ni miau a, mi thah hreh hauh lote an nih nual avangin tu ma hmuh loha kan awm chu a him berin ka ring a ni.

Lui chhuah dang kan va thleng ta chu ka thaw huai a; sazuk sa leh sangha rep kan ngah bawk a, ei tur chu kan phang lo ve. Fimkhur erawh a ngai hle — kan zin kawng chu mi sualte, zalen taka an chêtna a ni miau a. Tunah chuan Rapidan lui chu pawhin kan zawh chho leh ta a.

Catawba pasalṭha paruk lai kan han zinpui tâkah chuan an ṭawng ka lo thiam sâ bâk pawh ka hriat belh ve zel a. Diana pawh ṭawng man chak tak a ni bawk a, a thiam ve nual ta mai. Kal pah chuan hnimhnah chi hrang hrang, damdawia hman chi chu Indian-hote nen chuan an inhrilh tawn zel a, an lawr pah zel a.

Diana hi mi eng ang pawh, an ze mil tâwka kawm thei zel mi a ni a. Catawba-te pawh chu unau ang maiin a be bawrh bawrh thei tawh a; anni hi chuan hmeichhe damdawi lam thiam hi chu an chung en deuh zel bawk si. Amah hian a zir bawk a, eng thil pawh tâwk ila buai map lo chi a ni a, a ni telin ka nupui ni tâ chu ka ngaih sanna a zual tial tial mai.

Catawba-ho chezia chu a dang ta thut a, thawm ngaichangin lawng an kar lai chu an chawl leh ṭhap ṭhin a. Kei pawh chuan inralring takin ka silaite chu ka en fiah nghal a.

Diana chuan, “Thil dik lo a awm deuh em ni?” a han ti sa sa a.

Kei chuan, “A ang khawp mai, ngawi renga kan awm a ṭul a ni e,” ka lo ti ve mai a.

Indian-ho Iawng kar chuan an thawm an dim sâwt hle mai. Kan sir vêl te chu ngun takin kan thlir pah reng a, lui tui te chu ngun takin kan bih zauh zauh reng a. Thil eng emaw lo lang hian hriatna ṭha tak min pe thei tlat fo reng a; mahse, eng mah hmuh leh hriat kan nei rih lo.

Lawngleng ka kar ve hun chu a lo thleng ta a; mahse, Catawba-te chuan ka kar ve chu an phal ta hauh lo mai a; a chhan pawh silai nena inring renga awm tura min duh vang a ni.

Tunah chuan kan hma lam hla taka tlang dumpawl ruih pawh kan lo hnaih ta viau a; lui kuang pawh a zim tawhin tui pawh a khauh ta hle a, lawng kar pawh a sak talh ta mai.

Hmun ṭhenkhatah phei chuan luia hnawmhnawk a tam avangin lawngleng chu a zawna zawn te a ngai ta fo mai a; chutianga lui laia thing tlu awmna kan thlen chuan Catawba-ho chuan lawngleng chu vaukam lam an panpui ta vat a, chumi rawn fintu lui pakhatah chuan kan kal ta daih a.

Dum hmun deuh kan va thlen chuan lui kam hnim buk hnuaiah lawng chu an khalh lut a; Indian pakhat chuan kan hma lam tlang chu kâwkin, “Tunah chuan kea kal a ngai ta...,” a han ti a.

Lawngleng aṭang chuan bungrua kan zawh ṭheuh kan phur a, Diana pawh chuan hnial hauh lovin a phur ve mai a. Catawba pakhat chu ngawah chuan a relh bo ta zauh a; keini erawh chu chhim lam panin tlang pangah kan inzûi ta thliai thliai a.

Catawba-te chuan an ṭhianpa chu ngaihtuah vak àwm pawhin an lang lo, inveng zo tâwkah an ngai a ni ngei ang. Rapidan lui lam panin a lêt leh dawn a ni ngei ang a; lui mawng lamah min zûitu an awm em tih a thlithlai dawn pawh a ni mahna!

Min ûmtu an awm ang em tih thu-ah chuan ngaih dan mumal tak ka nei mai a; Diana ngaih dan erawh ka zâwt lem lo. Ka rilru-ah chuan mi pakhat hming, beidawng duh hauh lova min chhui zui reng tur a awm a ni — chu chu Max Bauer-a!

Tlai thim dawnah chuan thing leh lung lianpui pui ngir khupna hmun hi kan va thleng a, chu laiah chuan kawrtê tui fim tak hi a luang her her bawk a, riah hmun kan sual zûi ta nghe nghe a.

Catawba-te chu an ṭhian pakhat, lui mawng lam pan tâ chanchin kha sawiin an phun sap sap hlawm a.

Diana chuan, “Eng nge an sawi leh tâk?” a han ti a. Kei chuan an ṭhian pakhat a la rawn kir loh thu an sawi tih ka lo hrilh a.

Chaw te kan ei kham hnu chuan mei chu kan ti mit leh vek a, thimthamah chuan kan mu ta a. Catawba pathum chu ral vengin an meng a, kei pawh eng emaw chen hnuah chuan ka muhil ve ta a.

Varṭianah thovin kan sa rep te chu kan ei a, kan kal leh ta a. Kan ṭhian pakhat kha erawh chu a la rawn kir leh lo va; chumi chungchang kan sawi aṭangin pakhat chuan, “A thi tawh tihna a ni mai!” a lo ti hlak a.

Kei chuan, “Va kir leh in duh a nih chuan kei pawh ka lo kal ve ang e,” ka ti ta a.

Chu pa bawk chuan, “Kir lo ve, chutiang tihna hun chu a la rawn inher chhuak ve leh mai ang,” a ti a.

Kan kal zel a; Diana chu a chau tawh hle a, ka lainat khawp mai; mahse, engtin mah a phun nawi bik hauh lo.

Hêng thleng thlenga ûm zui kan la ni reng chu ka thin a rim ta riau a. Catawba pasalṭha kha an lo that a nih ngat phei chuan chu thisena inhmelmâkna chu keimah vang liau liauah ka ngai a; Diana hi tel lo ngat se chuan va kir leh a, hmelma chu a tam thei ang ber va thah tâk a nia ka nâp ni.

Tunah zet chuan kan thleng dawn hnai ta e! Tun hmaa keimah ngeiin ka ramvahnaa ka lo chhinchhiah thing kung ngei mai chu ka hmu ta a. Ka ṭhiante hnenah chuan, “Kan thleng ṭêp tawh e,” ka han ti lar lar a.

Diana chuan ka kut chu a rawn vuan a, kei pawhin a kut nel thep chu ka hmer ve vawng vawng a.

Kan kawng zawh chu phulrai nuam zetah hian a chhuak ta hlawl a. Chu laiah chuan ran chaw atana an sah thar te chu an lo tiang vum thur a; a piah lawkah chuan vaimim leh thlai dangte chu an lo duah ṭha khawp hlawm a, 'Kumin chu kan thar hlâwk hle dawn a nih hi,' ka ti rilru neuh neuh a.

Kan awmna hmun, kulh ang maia hung chu kan va thleng ta a. Gate chu inhawng sâin a lo awm a, mi pahnih hian min lo thlir a, ka hmuh veleh ka kut chu ka'n phar chhuak a.

Min rawn pan hmasa bertu chu Yance-a a ni, “I va thang rei char char ve,” nui sang hian a lo ti a. Diana chu enin, “E, taka, nula pakhat i rawn hruai haw dawn tih Temperance-i ka lo hrilh lâwk pek a; mahse, tu nge tih chu min zâwt nasa hle nâin ka hrilh duh miah lo va,” a han tih zawm a.

Kei chuan, “Kan hnungah sawn min thah ngei tuma min ûmtu an la awm cheu a nia. Kan Catabaw ṭhian pakhat pawh an that ta ngei a nih ka ring,” ka ti a.

Yance-a chuan, “Pahnih ngawt khawsika damlo kan nei mek asin maw le. Rawn ûmtu che u chu an tam em?” a ti a.

“Tlem tê; mahse, tawh khirh tak tak tur,” ka ti a.

Yance-a chu za deuh hian a nui ta a, “Eng tik lai mahin kan hmelmate hi mi nêp tak tak an ni ngai hlei nem! Keini pawh hi kan lo pian chhuahna khawvel hi a hram khawp a, mi tawh khirh tak chu kan ni ve tho alawm ti raw?” tih pah chuan Catawba-ho chu a'n thlêk a, “Hêng hi khawi lam aṭanga i rawn hruai nge?” a'n ti zui zat a.

Kal pah chuan thil dang zel pawh ka hrilh ta vek a. Ani chu a bu nghauh nghauh a, “Jamaica thliarkar i va pan chu i thàp sang hle a nih chu, Kin!” mi han ti leh a.

“Mi ngo nula an tam lo va, rin aiin hna a hautak lo hlauh a; mahse, Henry-a hian min pui lo se chuan hetiangin eng mah kan ti thei tawp nâng,” ka ti ve ta a.

“A lawmawm a nih chu. Kan zingah kan lo lawm e...,” bûk lam hawi pah chuan, “I lo haw dawn tih kan lo hre lâwk a, fapa tlan bo lo lawm turin ruai kan lo buatsaih maw le,” ti ta a.

“Kei hi maw fapa tlan bo? Nangmah zâwk hi ni àwm i ni asin,” ka'n ti lêt a.

Inah chuan min lo nghak ṭhap a, Temperance-i chuan Diana a hmuh veleh a lo tlan phei a, “E, Diana a ni reng mai! Tunah zet chuan unau kan ni ta alawm le,” a ti ve sawt sawt a.

Lila pawh chuan, “Lo lut rawh u; ei turin a lo nghak reng tawh che u a nia, in ril pawh a ṭam tawh viau lo'm ni?” a lo ti ve chul a.

Lila chu ka'n en a; tun hmaa ka nau rawng lo bawlsak ṭhintu hian tunah ka pa ṭhian ṭha berte zinga pakhat pasalah a nei a; a hleitlinzia mawlh mai hi! Kei, sang leh lian ve tâwka inngai pawh hi mi chen thuak a ni.

Ka nu pawh mi hriat chhuahtir rum rum a. Ani kha England-ah mi chhohsan ta daih kha a ni a, damin kan inhmu leh ngut ang nge maw? Noelle leh Brian-te'n zirna sang zâwk an lo neih theih a duh vang a ni a, tunah te hian awm ve se a ṭha tur.

Jeremy pawh lo lam aṭangin a lo thleng ve chiah a, hna hram khawih tih takah a kut te pawh a thap hraih mai a, “I vâk bo rei tawh bawk a, tunah chuan tawmim ve deuh tawh la a ṭha ang,” hlim hmel tak hian a ti a.

In chhung chu a lo êng nuam hle a, tukverh aṭanga ni êng lo lut chuan a ti êng nuam ut ut hle mai. Pa sa ṭha tak, sam var va mai hi a rawn tho va, “Hung pawn lamah ka va chhuak teh ang,” a han ti a.

A chhuah tâk hnu chuan, “German mi, Schaumberg-a a nih kha. Kan chanchin leh kan awmna hmun hriain a nupui leh an fa sente nen min rawn pan a, tu mah dang tel lovin an lo kal nia!” Lila chuan a ti a.

“He lai hmuna kan mamawh mi tak tur a nih chu; pa ṭha tak a ni ngei ang maw?” ka ti a.

“Pa taima tak, kut themthiam zet mai; hlauh nei vak àwm pawhin a lang lo,” a ti zel a.

“Hlauh chu neih tur; mi a ti fimkhur a ni,” ka ti a.

Mipaho chu an chhuak phauh phauh a, an lo chhuak zo duak tawh a, silai intung hle hle pawh a lo awm tawh mang hauh lo va. Thawh chhuah ve mai ka tum laiin Lila chuan, “Ṭhu teh, ṭhu teh; inbeihna a lo thleng a nih tâk pawhin i chan pual tur zawng a awm êm êm ang,” a lo ti chul a. Ka no chu thlit khah leh pahin, “In nu chu ka mi ngainat zawng tak a ni mai,” a ti ta zel a.

Rei tak kan titi hnuah Yance-a chu a lo lut a, min rawn ûmtute an hnaih leh hnaih loh ka'n zawh chuan, “Anmahni chu kan hmu lo va; mahse, kan thlai chinna sir ngaw karah sawn an awm ngei a ni — sazuk la pakhat, kan lova lo kal tur chuan eng emaw hlauh a neih avangin a lo kalnaah chuan a kir leh ta daih mai,” a han ti a.

Kei chuan, “Max Bauer-ate an ni ngei ang; min rawn ṭhawn thut an tum a nih chu. Ngaw karah sawn biruin remchang a nghak reng tih a chiang mai alawm,” ka lo ti a. Chutah, Yance-a chu enin, “Max Bauer-a saw chu keima chan pual liau liau tur a nia,” ka'n ti leh a.

Yance-a chuan, “Ka kawng min dal loh phawt chuan i pual ngei dawn nia,” a lo ti ve mai a.

Ka hmelmapa hi ramhuai nun rawng lutuk ang a ni a, a fingin a kawlhsen êm êm bawk a. Kei chuan Indian-ho ka indopuite ngei pawh ka haw zui ngawih ngawih ngai lo va; ani ka huatna erawh hi chu huatna piah lam a ni mah àwm e!

Indian hi chuan ral beih hi an hna pakhat ve a ni a, an beih tawhte reng reng hi chu mi rin tlâk tak vek an ni deuh zel mai. Hmelma an ni na vang vangin mipa zawng an tling chiang a ni. A ṭul hunah an inbei a; mahse, an inzah tawnin inhriat thiamna thui tak an nei tel tlat a ni.

Kei leh Max Bauer-a inkar chu chutiang a ni ve lo — intih chhiat ṭhak a, intih hlum ngei a ngai dawn a ni; chu chu kan hre dun ve ve bawk.

Kulh hungna lama ka chhuak tur chu Lila pawhin min dang zui ta bik lo va. Max Bauer-a chuan ngaw kar aṭangin min rawn bihthla reng ang a, remchang a hmuh veleh a che thut ang a, kei phei chu mi tih nat hrim hrim a duh ang. Thihna hian tawrhna a ti tawp thei tih a hria a; chuvangin, min thah hmain a na thei ang bera min sawisak a duh ngei ang.

Chu mai pawh duh tâwk lovin ka unau leh ka hmangaihte pawh ka rilru tih nat duh hrim hrim vangin a khawih tel duh ngei ang. Hei hi kan inan lohna chu a ni — ani chuan min thah hrehna a nei eih lo va; kei chuan ka tih chhiat phawt chuan thah kher ngai ka ti lo!

Jeremy chu ka bulah a lo kal a, “I pa thih aṭang khan kan hotu i ni ta ber a; i awm loh hlan khan buaina kan tawng a, chu buaina chu i la ngaihtuah loh zawng tak pawh a ni maithei,” a han ti a.

Chutah, “Virginia tuipui kamah te hian mi cheng an lo tam ta hle a, Carolina lam te pawh an lo thleng chho ta mek zel chu a nia; he ram kan luah lai mek pawh hi neitu ṭha tak kan nih theih nana beih hi hun i ti ve lo maw?” a ti ta zel a.

A thu sawi chu ngun takin ka lo ngaithla a; chutah, amah bawk chuan, “Kin, han ngaihtuah ve mah teh, tih theih i nei ngei ang. Brian emaw Peter Tallis-a hnenah emaw lehkha thawn la, anni'n an lo ching fel thei mai ang,” a han ti leh a.

A dik viau mai. Plymouth leh Cape Ann vêl aṭang pawhin ram luah tur zawnga chhuak an tam tawh a ni. Keimahni ang bawkin Clairborne-a chuan Kent thliarkar chu a luah a; mahse, Lord Baltimore-a chuan dàn hmangin ram neitu nihna a chuh ta si a, a in leh lo pawh a chan maithei a ni — chu chu kan dinhmun tur tho a ni tlat mai!

Kei leh Yance-a chu ngaihtuah kan ngai lo; he laiah hlawhchham mah ila, hmun dang kan hmu leh tho ang. Mahse, mi dangte hi ka pa ruala he laia lut ve hi an ni a, in leh lo an din nghet laklawh ve tawh si!

“Ni e, Brian-a leh Peter Tallis-ate chu ka lo rawn dawn nia,” ka ti ve ta a.

Ka awm loh chhunga lehkha lo thleng pawh a tam tham hle a; a ṭhen chu pawisa dawn chhinchhiahna te, ba chhinchhiahna te a ni a. Pawisa kan hâi lut hnem ve ta tihna a ni a, chhiah khawntute pawh an lo lang vat ta ve ang.

Ka awm loh chhung khan kan mite chuan luiah lawng ngul tur, lawng pathum phur lai hi an lo tawlh a; thil dang thawn chhuah pawh a nêp lo hle — savun tel sawmthum pahnih leh silai zen ton sawmsarih, lawi vun sawm pali, maple thing tum, thingzai leh bungraw siam nana hman tur sawmhnih panga zet thawn chhuah a lo ni a.

Lehkha ziak chu ka harsat hle a; Peter Tallis-a lehkha tur chu ka ziak hmasa a. Ani hi mi thil hria leh ṭhian thil ti thei tak tak nei, hna sang tak tak chelhtute be tura mi rawih ber pawh a ni. Kan dinhmun dik tak, kan in leh lote dàn ang thlapa neitu nihna kan mamawhzia te ka hrilh a; Brian-a nen pawh an inhmu thei ang chu, Brian-a pual tur pawh a hranin ka ziak ve ta tho a.

Kan lo leh ramte chu an lo ṭhang duangin an lo hming ṭha ta hle a, Indian-ho nena kan insumdawn tawnna pawh a hlâwkna kan tel ve ṭan ta a. Lehkha ka ziak ṭhang lo bawk a, ka kut te chu a kham hman hle mai.

Yance-a chu kawngkharah a rawn ding hlawl mai a, “Kin, kulh lamah lo kal vat teh, tu emaw puan var kengin a lo kal e,” a rawn ti ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 31st, 2019, 6:39 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 17 (Last chapter)
(Rozami Pachuau)

Pawn lamah chuan ni a lum nuam hle a; ral lakah pawh kan inring tâwk ve hle mai. Indian-ho hi mi ṭhawn thut thut ching an ni a, eng lai pawha inring renga khawsa ṭhin hi kan ni hrim hrim a ni ber e.

Hungna palah chuan ka lawnin ka han hawi vêl a. Ka'n thlir kir vang vang a, Jeremy-a chu ka va hmu ta a. Ani hi chu a inring lo lai hi hmuh a har zâwk a, chu laiah pawh chuan kan inbiak hlana hnung lam lo vengtu tur a ni.

Chutah, kei chuan, “Inbiak in duh a nih chuan hmun fai laiah pakhat lo chhuak ula; pakhat aia tam in lo chhuak a nih erawh chuan kan lo kâp nghal che u a ni mai,” tiin mi lo kalte chu ka va au ta a.

Bauer-a rilru chu ka hre lo va; mahse, tunahte hian kan awm hmun leh kan inkhuarna te chu ngun takin a lo thlir mek maithei. Kulh chu a rinawm tâwk a; mahse, hung chhunga inte chu a darhsarh deuh pawh a, nunaute awmna an ni hlawm si a, inven erawh a hautak deuh.

Min be tura lo chhuak chu Lashan-a a lo ni a, hmun fai laiah chuan kâwng dawmin a rawn ding a. Ngunhnam a pai a, pistol pahnih a pai tel bâkah silai lian a la keng tel zûi a, a zam loh hmel hle lehnghal.

“Nangniho kha...! Sackett-a leh Macklin-a fanu kha min rawn pe ula, eng mah kan tih lo vang che u; chuti a nih loh erawh chuan in zavaiin kan that vek ang che u,” a rawn ti ta.

“Tunah chuan Diana chu ka nupui a ni tawh a, in laka inpêk chu kan tum lo. Ei turte in neih lai khan tuipui lamah chuan kir leh ta ula, in vannei zâwk ang,” ka lo ti lêt ve a.

Natahala tlang chhak lamah chuan chhum dum pui pui a tam hle a, Chuky Gal tlang pang phei chu chhumin a bawh nasat avangin a lang tawh meuh lo.

Yance-a hnenah chuan, “Thlipui a rawn thawk dawn a ni ngei ang,” ka han ti satliah a, ani pawh chuan, “A ang khawp mai,” a lo ti ve a.

Lashan-a chu a la ding ding reng a, thing buk phen aṭang chuan betu an awm ngei niin a lang. Chutah, “Inngaihtuah nan darkar khat hun kan pe ang che u,” a rawn ti ta bauh a.

Yance-a hnenah bawk chuan, “Hun khawh ralna tur an ngaihtuah a ang hle mai, eng emaw tum an nei aniang,” ka ti a.

Thâwk leh khatah, Natahala tlang lamah chuan khawpui a ri ta dur dur a. Hêng laiah hi chuan ruah sur thut thut a awm chawk reng a; kan hmelmate pawh chuan hmun hul an pan ve a ṭul ngei ang le!

Bauer-a chuan Jamaica aṭanga ka lehkha hawnte chu Shawmut emaw, Plymouth lamah emaw ka la kalpui lo tih a hre si a; chu chu ka tih vaih chuan mi ngo hmeichhia hralha a sumdawn ṭhinna chu a tawp mai bâkah khawi lawng chawlhna mah a tlawh ngam tawh lo vang — dàn pawn lam mi a ni tawh dawn tlat a.

Hetiang a nih avang hian ka lehkha neihte kal zel lo tura dan chu Max Bauer-a tan chuan tih mâkmawh a ni. A sumdawnna hlâwk tak kaltir zel tur chuan min thah a ṭul tlat.

Khawpui a la ri dur dur a, kawl a phe zawr zawr a, ruah fang pawh a tla ṭan ta fuap fuap a. Chutah Yance-a chuan, “Tunah chuan eng han ti thei tur an ni dawn em ni? An zen te an ti huh mai ang asin,” a ti ta a.

Cherokee-hovin an sawi fo ṭhin, phai ruam ram ṭha tak takte chu kan sawi dun a. Ruah chu a sur nasa tawh hle a, “Chaw va ei rawh, ral vengin ka lo awm ang e,” ka ti ta a.

Jeremy-a chu ka bulah lo kalin, ruah sur buan buan chu kan en dun reng a, “I pa kha ka ngai ngawt mai!” a han ti chhuak teh daih a. “Hei, kum tam fe chu min awm lohsan ta chu a ni a; mahse, ka tan chuan theihnghilh a har a nih hi,” a han tih zawm leh a.

“Hma a la zau a, hriat nawn fo hi a ṭul leh ṭhin a nih hi,” ka lo ti ve a.

“Nang pawh i pa ang bawk i ni ngei ang, Kin,” a'n ti leh a.

Eng eng emaw sawiin kan titi a, kan sir vêl chu kan melh pah reng bawk a. A hnuah chuan keima in ngei chu ka zuk pan a, Diana pawh a lo awm a. Dawhkanah chuan ei tur a lo chhawp diam a, ani chu thuk hmaah thir fian sei kengin a lo ding a, a koki-a vawn pah chuan, “Nupui ka nei vannei ngawt mai,” ka han ti a.

Ani chuan, “Dàwi thiam-nu i nei ta si a...,” fiamthuin, nui sang chung hian a lo ti ve thung a.

“Dàwi thiam te chu kan mamawh khawp alawm; Max Bauer-a pawh hi dàwi bo daih law law la a ṭha ang chu,” ka'n ti lêt ve a.

Diana chuan sa tui hang min han chhawp a, "Chaw te hi ei thuai rawh. Kan hmelma-pa chuan ruah sur ban hun pawh a nghâk lo maithei asin,” a ti ta a.

“An silai zen te a zawp vek dawn asin,” ka lo ti a.

Diana chuan, “An chem zum a bil phah dawn chuang lo asin, Kin! Ngaih nêp mai chi chu an ni lo vang,” a lo ti khauh a. Min hmachhawn zawngin a'n ṭhu sauh sauh a, “Ka pa ka ngaihtuah hle mai,” a ti ta sap a.

“He buaina hi kan chin fel veleh kan hnena awm turin kan va hruai dawn nia,” tiin ka lo hnem a.

Chutianga eng emaw chen kan titi dun hnu chuan Diana chu kalsanin kulh hungna lamah ka kal leh ta a — Yance-a chu va thlâk turin.

Chhum chu a la zing mup a, ruah chu a la sur deuh reng a, ngaw kar aṭang chuan thawm hriat tur a la awm lo. Kane 0'Hara chuan min rawn hnaih a, “Hna kan la ngah si a, hna kan ṭhulh nasa ta ngei mai,” a han ti a.

“Tih ngaihna a vang êm a ni; kan dinhmun an hre si a, kan chêt sual hun an chang ve reng si alawm,” ka lo ti a.

Bauer-a mizia leh nihphung te min zâwt a, kei chuan, “Pa lian leh chak tak, ramvachal tak, fing leh hlauhawm tak maw le! Diana nen hian min duh bera chu kan ni a; chu bâkah, kan bungraw ṭha chi leh lâk sawn theih chi hi chu an it hle ang. Kan din hmun te an hriat chian ang bawk hian kan thil neih pawh an hre vek tawh ang a; hmeichhia kan kawl nual a ni tih te nen,” ka ti a.

Kane-a chuan ngui ruai hmel pu hian, “Kan thlai ṭhat ve ṭum tak a ni asin maw le; heti mai chuan kan thlai te saw awm lohsan chi a ni lo a nia,” a ti ta a. A ngawih vang vang hnuah, "Yance-a nena in ram va en chu eng nge a an?” a han ti leh a.

“A ram chu a mawi ngang mai a, a ram ṭhat dan pawh hêng lai ang hi a ni. A ram hnim te chu koki thleng hmur hmur hi an ni mai,” ka ti a. Kane chuan a hmuh châk thu a lo sawi ve a.

Tunah chuan ruah sur pawh a reh ta deuh a, khawpui ri pawh a nêp tawh hle a, boruak pawh a dai nuam ta khawp mai. Kan mite mut tui laia min rawn beih thut pawh a rinawm ta tlat a; chuvangin, inven ngawt ngawt ai chuan va luh chilh chu ka thupui a ni mah tawh zâwk.

Ka pa pawhin, 'Hmelmate lakah chuan a che hmasaah ṭang la, inrinna hun pe suh,' a tih ṭhin kha maw! Chûng hre reng chung chuan, “Zanin hian ngaw karah ka va vâk chhuak teh ang,” ka ti ta hluai a.

O'Hara pawh chuan, “Chu chu ka lo rilrûk dan chiah a ni; mahse, i va che sual palh hlauh ang e,” a lo ti ve a.

Kane O'Hara chu hungna pal vêl en dikin a kal sawn ta a; chutih lai chuan Diana chu coffee kengin a lo kal a, thing buk hnuaiah chuan kan ṭhu dun a, coffee chu kan in a.

“Hêng buainate hi keimah vang liau liau a ni tak si a....”

Chutia Diana-i'n a sawi lai mek chuan, “Chutiang thu sawi a hun lo; i lo inthiam lohna ngawt tur pawh a awm lo bawk. Kan tih turte hi ṭha takin ti ila, a fel a ni mai,” ka lo tihsan thuai a.

Pal hrulah chuan kan inzui dun ta a, titi chungin ngaw te chu kan thlir pah a. Hêng ngaw te hi kan naupan laia kan unauhova hlim taka kan lo chêttlatna, kan inbihrûksiakna leh thei rahte kan lawh ṭhinna a ni a, kan bel hle a, kan hre kilh kelh a ni. Mi sual inhrosakna hmun atan chuan a uiawm deuhvin ka hria.

He lai hmuna cheng mi tlem tête hi hûi khawmtu ka nih a ṭul tâin, ven himna pawh ka kutah a awm a; chu vang chuan hmelmate chêt lâk hun nghak ngawt lova chêt khalh vat a ṭul a ni. Bauer-a hi a fing si a, engtin emaw tak min bum a tum ngei ang.

Ka tum dan te chu Diana pawh hrilh tlang nghal ṭhain ka hria a. Mi ṭhenkhat chuan hmeichhiate laka thu dik zêp hi an duh ṭhin a; kei chuan an ngaihtuahna fim ṭhatzia hi ka hre tawh tlat a, “Zanin hian ka vâk chhuak dawn a nia,” ka ti ta a.

“Tih theih i va nei chuang dawn em ni?”

“Kan intawn dan azir zelin ka che mai ang.”

“Yance-a chhuak zâwk se a ṭha i ti lo em ni?”

“Yance-a chuan thawm a dim thiamin rem a hre zâwk pawh a ni thei; mahse, he buaina hi ka mawh phurhna a ni tlat a, he lai thlenga min rawn zûina chhan pawh hi keimah min zûi vang a ni. Kan vaia hmelma chu a ni nameuh mai; mahse, Bauer-a duh ber chu keimah hi ka ni tlat,” ka ti ta a.

“Mi pakhat chauh tan chuan tih theih a va tlem duh àwm ve maw le,” Diana chuan a han ti leh a.

“Ka va chhuak ang a, tih theih chu ka zawng mai ang,” ka ti ve ngat a. Chhuah tuma rilru ka siam fel ta chu ka zan phah ta hawk a.

Diana chuan, “Eng pawh ni se, chawl hahdam phawt la; Yance-a ka'n ko ang a, a rawn thlak ang che,” a ti ve ta a.

Ruah chu a han tawh nâin dai a la far tluah tluah a, hungna pal kawngkhar zim têah chuan hlimthla ang mai hian ka put chhuak ta zauh a.

Zan thimah chuan pal nghengin thawm ngaithlain ka'n ding vang vang a; dai far ri tluar tluar karah chuan hmun fai lai chu ka pel a, ngaw-ah chuan ka lût ta a.

An awmna chu hre lo mah ila, tun ang zan khaw vâwtah chuan mei lum ai tur an chhem ngei ka ring a ni. Thli fim rawn thawah chuan mei khu rim hriat tumin ka hnar ka'n len ruai a; mahse, eng rim mah ka hre lo.

Thing hnah huh chu ka'n khawih a, ka kut huh chuan ka hnar ka'n khawih huh leh a. Hnar a huh hian thil rim hriatna a chak bik a; mahse, hnahthel ṭawih rim bâk eng mah hriat theih ka nei chuang lo.

Ngaw ril lam chu ka pan zel a, kual kikawi tâkin ka kal a; rei fe ka kal hnu chuan ngaw pawh a lo pan ta hle a. Mei khu rim hriat ka la nei hauh lo va, ka bengin ri hriat tur a nei bawk hek lo.

Nakinah chuan magnolia thing hnah nuai sawm rim ka hre ta le. Hêng laiah hian magnolia thing chu a tam viau a, a hnah pawh a tla duh viau bawk. Thil dang vak a ni lo vang tiin ka ngaichang leh ta deuh a.

Thawm ri zawi tak hi ka hre ta a. Thawm dim zetin hma lam chu ka pan a, ka thawm hriat pawh a reh zui leh ta a. Ka hma lawka hnim buk tak awm chu fimkhur takin ka hêl ta a.

Ruah surah khan sa leh savate chu an bibo diak a, an rawn che chhuak a nih ngat chuan ti hlautu a awm a ni mai. Ka naupan laia Catawba-hovin min zirtirna avangin ramsa tluk thawthangin ka hriatna a ṭha a ni.

Ka pa pawh khan ramhnuaia min hruai changin min dinpui thut ṭhin a, tah chuan kan thil hmuh te min zâwt leh ṭhin a — ramsa hniak kan hmuh ang ang te hi.... Chutiang taka enkawl ka nih avang chuan thil ka hmuh hmaih ta lo ṭhin khawp mai reng a, rampalailengah chuan thil chhinchhiah theih hi nungdama awmna a ni chawk a ni.

Ka kal lai chu ka ding chawt a, savun kawr rim leh mei khu rim ka hre ta tlat mai! Che miah lovin ka ding a, ka hnar ka len a, ka mit chuan ka melh kual nasa hle mai. Hnimhnah hrut che lo thei ang ber chuan ka tawlh hma leh hriau hriau a, phun ri mam mam thawm ka hre leh ta! Mei khu rim pawh chu a nasa ta sawt a, rei lo têah an mei chhem ngei pawh chu ka hmu thei ta a.

Che miah lovin ka awm a, an thu sawi hriat ka duh a, eng zât nge an nih ka hmu duh bawk a; mahse, ka awm hnai tih an hre tur a ni lo. Ka hnaih leh hret a, an bûk pawh a lang chiang ta hle a. Max Bauer-a ngei pawh chu ka va hmu ta a; mahse, a mitah tak chuan ka en duh lo — a chhan pawh ramvachalte hian anmahni thlirtu an awm tih hi an hre thei tlat!

“Zing ni chhuah rual chuan ni lo ve. Indian-hovin chutia tih chu an ching a; chu ai chuan ni chhuah fel hnuah ngaih ṭha taka an awm lai va nanchin a ṭha zâwk ang. Ṭhenkhat chuan chaw te an lo eiin, a ṭhenin an hna an lo ṭan tawh ang a, chutih hunah chuan kawngkhar vengtu pawh pakhat bâk an awm lo vang. Lashan, kawngkhar vengtu saw rang takin i that thei ang em?” Max Bauer-a chuan a lo ti dap dap a.

“Thei teh reng e; feet sawmthum vêla va hnaih erawh chu a ngai ang —ka fei ka hmang dawn si a,” a lo ti ve a.

Bauer-a bawk chuan, “Rang takin that ngei ang che. Kawngkhar a lo inhawng lo a nih pawhin a hungnaah kan lawn liam mai ang a, a ruala bawh huk tur. Tu mahin ral kan thah fel hma chuan hmeichhia leh ral lâk thil buaipui loh tur; chutiang ti in lo awm vaih chuan ka hmaah in ding ang,” a ti leh khur khur a.

Lashan-a chu a ding thut a, “Max, tu emaw min enthla rengtu an awm chiang a ni,” a ti ta mai a!

Rang takin ka inher a, hnim pik karah chuan ka tlan ta vak a. Thawm chu ka nei hauh lo nâin, ka hnung lamah erawh chuan thawm a rura nasa kher mai.

“Va ûm zui vek rawh u! A theih chuan a nung chunga man tum ula; a theih loh pawhin that ngei rawh u,” tiin Max Bauer-a chuan thu a pe ta ṭhawt ṭhawt a.

Compass Creek lam pan chuan chak zetin ka tlan zel a; ka hmun hriat chian a ni bawk a, ka bahlah lo kher mai. Ka hma lamah chuan thawm ka hria a, ka inher a, ka tlan zawi ta deuh a. Ding lamah ka inher thut a, kawrtê pangah ka lawn chho ta a. Chhum a tam leh tâk deuh avangin a hmuh fiah theih ta loh.

Lungpui chhawrdawh âwih zetah hian ka lawn a, kulh lama ka lêt vat a, inring tura ka hrilh a ngai a ni. Lungpui karah chuan kua a awm a, ka tlan lut vat a. Ka lei rah chu a rem lo hle a, a bal hlawk a, ka tlu ta a. Ka lu chu lungah ka tauh a, eng mah ka hre zui ta lo va.

Rum ri ka hriat chu keima rum ri a ni! Khaw vâwt tak hnuaiah ka huh zawr hnêp tih ka hriat rual chuan ka lu na ut ut chu ka hre nghal a. Ka hawi chhuak a, chhum chu a lo la pik chuk a; ka tlûkna chu ka lu tauh fuh lo ila chuan nat viauna tur pawh a ni lem lo.

Ka ṭhu chhuak a, khua pawh a lo eng fel tawh a. Ka hmelmate chuan min hmu zo ta lo a ni ngei ang. Fimkhur zetin ka'n hawi kual a, thawm hriat eng mah ka nei lo. Ka han kal dawn a, ka khûp a na zawk a; ka khûp chu ka lo sawh tel palh a lo ni a, tiang hawl tur ka zawng ta a.

Ka tlai lutuk ta mai àwm mang e, Bauer-a chuan kulh chu a bei tawh em? A panna hnai ber tur, tlangah chuan harsa ti chung leh hmanhmawh ru tak chung chuan ka chho a, tlang zawl chu ka thleng ta hlawl a.

Kulh pawh chu a ngaiin a la awm a; in pakhat aṭang chuan mei khu a chhuak lat lat a, ralmuang àwm takin a lang mai.

Hmelmate chuan kulh chu an la ta mai em ni zâwk? Mahse, han inbeihna àwm hnuhma reng a lang hauh si lo.

Tlang aṭang chuan ka chhuk a, ka khûp chu a vung nasa sâwt hle a, kal a ti har ta hle mai. Ka chhuak chu ka ti fuh lo mang e —ka ṭhiante tan thil ṭangkai eng mah ti si lovin ka inti na a ni lek si a. Yance, Jeremy leh O'Hara-te chuan kulh chu an lo veng zo êm ang chu.

Sava pakhat hi ka chung lawk thing zarah chuan a rawn fu a, thawm dang hriat tur a awm lo. Khua pawh a lo tlai ta hle a, kulh hungna pawh a lo lang thei ta uar a. Ngaw thing chinah chuan Max Bauer-a leh a hote chu kulh an la bei lo a nih chuan an awm ngei ang chu.

Ka lu na pawh a ziaawm huai tawh a, ka khûp na pawh a ziaawm hret hret a. Kulh lam chu beisei nei takin ka thlir a; khua a tlai tawh avangin in chhung chu a thim chhulh tawh àwm si a, êng chhit tawh àwm tak, kawtlaia veivak pawh an awm dèr si lo.

Kulh chu chhuahsanin ngaw karah ka ṭhiante chu an biru em ni zâwk? Chu chu a ni thei lo, kulh chhungah khuan rim taka kan lo thawh rah kan rosumte chu kan dah vek a, tlanchhiatsan thei ziazang kan ni lo. Yance-a hi pa fing tak a ni a, Bauer-a chu thlem chhuah a tum pawh a ni maithei.

Thil han ri hraih thawm hi ka hre ta a! Ka chemtê chu ka phawi nghal zawk a, ngun lutukin ka vêl chu ka en a. Ka bul lawkah chuan eng emaw hi leia bawkvak a awm tlat mai. Ka chemtê chu ka hum nghet leh sauh a, ka lo chang ta a.

Maple thing ngheng chuan kan ding a, ka kut lehlam chuan ka tiang chu ka chelh a, lehlamin ka ram vah chemtê chu ka hum bawk a. Ka bul maiah chuan eng emaw hi a che laih a, va bawh thut ila chuan ka vit thawih thei mai àwm e; mahse, hre chiang hmasa lova bawh mai chi ka ni lo.

Chu thil chu a tho chhuak ta..., ka awm hnai tih a hria a ni ngei ang. Ka chemtê hum chung chuan pên khatin hma lam ka pan a, ka chemtê chu vai thuak thei turin ka inring ran a.

Kut pakhat a lo lang a; chutah, a lu lam ka'n en chiang leh deuh a, ka mi hriat chian tak a ni!

Zawi têa, “Yance!?” ka han tih chuan ani chu hnim kar aṭang chuan a rawn tleng chhuak ta a. “I thang rei ta êm a, kan ngaihtuah che alawm; khawiah nge i awm bo daih a?” tiin mi zâwt vat a.

“E le, ka lo nghak che maw le; eng nge thil awmzia?” ka lo ti lêt ve thung a.

Ani chuan, “Jeremy-a'n kulh lam chu a lo ho mai ang. Hmelmaho thlem chhuah kan tum a, kulh chhuahsan tâ ni àwm takin mei êng kan ti mit vek a, min rawn beih mai tâkin tiin kan inring hle a ni,” a ti a.

Amah bawk chuan, “Catawba-te nen tawm reng kan ning ve tawh a, kulh pawnah kan rawn chhuak ve a ni. Kulh chu an va bei tâ a nih pawhin hnung lam aṭangin kan chhu zûi mai ang,” a ti ta then a. Chutah, “I ṭha maw?” tih panin min rawn hnaih ta a.

Kei chuan ka chêt sual dan zawng zawng chu ka hrilh a, Bauer-ate ka va hmuh dan chanchin te nen. Yance-a hi ka bula a awm chuan ka thla a muang hle ṭhin a. “Diana a ṭha maw?” ka han ti a.

Yance-a chuan, “A ngaihtuah khawp mai che a, pistol pahnih lai a inchhawp ve ran mai. Kin, nupui tur i thlang fuh hle mai,” a ti ta hluai a.

Tunah chuan khua a thim ta a, thawm dang kan han ngaichang deuh a; mahse hriat tur a awm lo. Catawba-ho, ngaw karah an awm tih ka han hriat chuan ka awm a nuam ta sawt a.

Thawm a reh duk lai chuan Yance-a chuan ka ban rawn vuanin, “Kin, thil dik lo a awm niin ka hre tlat mai,” a ti ta mai a.

Kulh hungna ka thlir lai tak a ni a, kulh hungna piaha thing zarte chu thliin a chhem che ta a. Thâwk leh khatah, thil awmzia ka hre chhuak ta thut a, thing zar chu thliin a chhem chêt a ni lo, thli a thaw lo...!

“Yance, tunah sawn hungna palah lawn liam an tum a nih saw,” tih leh thawh ka rual a, ka theih ang ang chuan kulh lam panin ka tlan ta a; Yance-a chuan min rawn ûm ve nghal a.

Kulh kawngkhar kan va thlen chuan kil khat bang bula mi lo awmte chu ka va hmu thei a, kawngkhar aṭang chuan, “He lamah,” tih ri hi kan han hria a.

Pa lian tak, khabe hmul buk tak hian kawngka bula ding hian luh ve mai a lo tum mek a; chutih lai tak chuan hung chhung lam aṭanga pistol kah tlawlhna a lo de zuai a, chumi êngah chuan chu pa chuan min rawn hmu ta a.

Chu veleh ka chemtê chuan a dulah ka thil pâwk a, a thaw nghal hrawp hrawp a. Ka kut lehlam chuan a pistol hum lai chu ka lâksak nghal a, chu pa chu kalsanin gate chhungah chuan kan lût ta vat a.

Yance-a chu ka bulah a lo awm ve zel a, kulh chhung lama mite'n min lo sai palh loh nan, “Sackett kan ni e,” ka ti a; Jeremy-a mi lo chhanna pawh kan hre zui zat a.

Kulh beitute chu eng zât chiah nge an nih kan hre lo. Ngunhnam chuan kan invit a, kan insat a; ka pistol ka hmet pûak a, a ruak chuan ka bula awm hnai ber lu ruh takah ka vawm zui a, a lu ruh tak a fuh tih ka hmuh chuan ka lawm hle a ni.

Yance-a tlu lai ka va hmu a, mahse, rang takin a tho leh a; tu emaw hian ka lu-ah a rawn hlap ṭhuai a, ka lu chu a thi ta zawih zawiih a. Kan in kawngkhar lo inhawng ka hmuh chuan inbeihna chu kalsanin ka lût phei ta vat a.

“Ka that lai che hmu tura a lo awm lo hlauh chu a pawi ngei mai!” tih pahin Bauer-a chuan Diana chu pistol-in a lo tin mek a, Diana pawh chu a zam hmel kher mai.

“Heta hi ka awm alawm, Max!” ka ti thawp ta sat a.

Max Bauer-a chu a rawn hawi nghal zawk a, han ṭawng duahna chi a ni lo; ka aw a hriat rual rual chuan a rawn inher a, a pistol chuan min rawn kâp ta ṭhuai a.

A hmanhmawh lu hret a ni! Chutiang taka a chêt chu ka lo rin sa avangin a ding lamah ka zuang phei nghal dawrh a; chuti chung pawhin a silaimu chuan ka biang a thawi thip zak hman tho mai.

Ka va bawh phei chawpchilh ve nghal a, min hlap tumin a pistol chu a lo vai fua a; ka lo thle sawn hman hlauh mai a, a silai chuan ka lu chu ṭhelhin ka koki a fuh ta a. Pa dar chhah ve tak ka ni zâwk pawh a, ka chemtê humna ka ban chu a hik chuai a, ka thlauh zûi ta nghe nghe a.

Bauer-a chuan chan ṭha zâwk chang inti tak mai hian mi han din chilh a, a chemtê chu hniam takah kengin a pistol kah ruah pawh chu a kut ding lam chuan a la keng tho va.

Fimkhur takin kei chu ka hnungtawlh ta a. Kan awmna pindan chu a zau bawk a, hmanraw chuh tur awm chhun thuk thaina, thirtiang hmawr zum lah chu ka ban phak dèr si lo!

Bauer-a chuan min thah ngei tum tih hriat zet hian min rawn pan zel a; kei lah chuan ka kuttum bâk amah hmachhawnna tur hmanrua ka nei tawh si lo.

Diana lak aṭang chuan ka la sawn nâin ka tan chêt dan tur a vang ta kher mai! Amah thah ngei chu ka tan thil ṭul ber a si — kei mi thah vaih chuan a dawtah Diana a ni leh ang.

Pawn lamah chuan insual thawm, na tuar au thawm, ngunhnam inkhak thawm leh na tuar au ri bâkah silai ri ṭhuai ṭhuaite chu ka hria a, pawn lamah chuan min mamawh ve hle tih lah ka hai lo.

Ka dul thai thler tumin Bauer-a chuan a chemtê chu a rawn vai ta fua a; ka hnungtawlh dawrh a, bang ka ngheng chu a ni ta mai a. Min vih ngei tumin min han zuan leh a; mahse, rang takin ka lo pên sawn hman a, amah bawh tum ni àwm takin ka'n awm a; ani chu a nui mai a.

Thâwk leh khatah min rawn bawh a, a chemtê chu ding lam leh vei lamah a vai tawn a, ka kawr ban chu a vâi thler ta hawk a, ka pangti pawh a thi ser ser thei a.

Mi rawn hnaih viau tâkah chuan a chemtê kenna kut chu ka lo vai per lâwp a, ka kut ding lamin a kut chu ka man nghal chat a, ka ke vei lam chuan chhuatah ka kalh thlu ta a. A chemtê ken chu chhuhsak ka'n tum ngial a, chhuatah chuan kan let dun ta tawp tawp a. Mahse, a chak êm a ni! Ani bei tur chuan ka ke pahniha ka din ngei a ngai tih hriain ka tho ta vat a.

A chemtê chuan mi han vai leh fua a; lo bum pahin a hmuiah tak ka hnek ta bur a, a khûpah ka han tlawh zawt bawk a. Engah mah ngai tham lo ni àwm takin mi rawn bawh leh ta a.

Ka tlu palh ta hlauh mai le! Min bawh bet zûi a; a kut lehlamin ka hrawkah mi rêk a, a chemtê ken chuan min vih a tum ta a. Pistol pawh a lo hum tawh bik lo va; mahse, ka lo thle sawn leh thei hram a, chemtê chu chhuatah chuan a bur ta ngur mai a.

A hmaiah chuan ka'n chhoh hnek ve awrh a, a lu lian pui chu a thle ve buk a; chu chu remchangah hmangin ka zuang tho ta vat a. Ani pawh chemtê la hum reng chungin a rawn tho ve nghal a.

Diana chuan ka hnung lam aṭang chuan mi rawn au a, “Kin,” tih pahin thuk thaina hmawr zum chu a rawn theh phei a, rang takin ka la vat a. Feet hnih vêla sei, kibar nei vun mai, zum ṭha tak hi a ni.

Chutah, mi rawn zuan leh tâkah chuan ka thil ken chuan ka lo vit ta hrawih a. A tawlh lêt leh vat nâ a, ka thil ken kibar chuan a kawr chu a man a; ka pawt lêt leh dawrh a, a kawr chu a thler ta huai a.

Pawn lam insual thawm pawh a reh ta. Bauer-a chu a nui huk a, “A tlai lutuk ta, ka hote an chak ta a nih chu. He nu hi min pe la, lehkha ziak kha mi pe bawk la, engtin mah ti lovin kan chhuah leh mai ang che,” a ti ta roh a.

Ka thuk thaina ken chuan ka hmachhawn a, eng mah ka sawi ve lo; ka hmelmapa lah chu na tuar àwm pawhin a lang si lo!

Thâwk leh khatah, Diana chu a ṭe tuar a, ka'n hawi chhuah nâk chuan kawngkhara pistol keng chunga Lashan-a lo ding reng chu ka va hmu ta a. Min kah fuh ngei tumin uluk tak hian a silai chuan min lo tin niin!

Chawp leh chilhin ka thukthai ken chu ka vawr a; a lai takah ka man leh a, fei anga hmangin ka khawh phei ta a. A silai a hmet puak chiah tiin thukthai chuan a hmaiah a va chhun ve siah a, min kah ṭhelh phah ta a.

Lashan-a tlûk lai chiah chuan Bauer-a chuan min rawn bawh phei leh a, a chemtê chuan min vit fuh em tih pawh ka hre hman ta lo. A beng ve veah chuan manin ka kuai kun vak a, chutih pah chuan ka khûpin ka do chho ta nghek a. A hnar ruh tliak ri rawp pawh ka hria!

Ka nawr lêt thut a, chumi pah chuan a hmaiah ka hnek bur a, a hnung zawngin a thal ta hual a. A chem ken pawh a thlauh ve ta a; a rawn tho leh chu a hnarah bawk ka lo hnek leh siah a, kan thi dun hnuang tawh mai.

Ka mitmu ham chhuah tuma a phar chhuah lai chuan a khabe hnuaiah ka kun a, ka do chho ngheng mai a, a pai phei ta tuang tuang a.

Lashan-a chu a rawn tho chhuak ve leh tawh a; mahse, Bauer-a chu a rawn puih hman hmain Yance-a a rawn lang ve ta a. Lashan-a inher chiah chu a rawn kâp pawp a, a leng ta lâwp a.

Chutah, Bauer-a chu a inher thut a, Yance-a'n a lo man hman hmain pawnah a tlan chhuak ta a. A hote chu pawnah an lo thal phung tawh a, a la dam chhunte chu ngaw lamah an lo tlan chhe mek a.

Bauer-a pawh gate lamah a tlan phei mek tih Diana-i'n a han hmuh chuan ka chemtê thlauh chu a chhar a, a rawn theh phei a; ka lo man chawt a, Bauer-a chu ka va vawm ta a.

Bauer-a tlan lai chu a eu zawk a, a hnungzangah chuan chemtê chu a bur ngur a; a han pên zui leh tho nâin, gate pawnah chuan a tlu ta tawp a.

Rei tâwk chu ka ding reng a, Bauer-a ruang chu ka en reng a. A hote la dam awm chhun chu ngaw lam pan tâwk awm bawk mah se, Catawba-ho chu ngaw-ah an inzar pharh ve miau si a, kan hmelmate chu dama kir leh tur an awm tawh hauh lo vang le!

Chuti taka buaina nasa min rawn thlentupa ruang chu ka'n en a, a thi chiang hle mai. Ka chemtê pawh kha ka vawm na hle hi a lo ni a, a hnungzang ruh a chhun tliak a ni ngei ang. Mi sual chu a ni na meuh mai, insual pawh a lo va thei êm ve le!

Diana chuan min rawn panin min rawn kuah a, “Kin, i hliamte chu a na em?” a'n ti nghal sawt sawt a. Chutah, in chhung lamah chuan kan inzui lut ta a.

Yance-a pawh a lo lut a, “I ṭha maw, Indian Putar?” a rawn ti a. A aw aṭang chuan min ngaihtuah hle tih a hriat a.

“Ka ṭha alawm; mi dangte eng nge an an?” ka lo ti a.

Ani chuan, “Kan ṭha e; hliam chhe tê te bâk hliam na vak kan nei lo,” a ti leh a.

Diana chuan ka hliamte chu ti faiin damdawi eng emaw hi a hnawih a, a dam huai huaiin ka hre mai. Bauer-a khan min lo hliam nual mai a; mahse, a thûk lovin a sa huat an pawh lo hlauh a ni.

“I pa pawh kan hruai vat thei tawh ang,” Diana hnenah chuan ka han ti a.

“Chutiang sawi a hun rih lo, mu hahdam phawt rih rawh,” tih pahin duat tak hian Diana chuan min muttir a.

Ka hahin ka chau hle a; mahse, ka muhil phal lo a ni ber e. Nungdama ka khawchhuak leh thei chu ka lawm a, ka nunna chu chen rih ka duh a ni ber.

A TAWP TA.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)