THE WARRIOR'S PATH (Completed)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: THE WARRIOR'S PATH-I chapter 1-6

Unread post by Rozami pachuau » August 20th, 2019, 8:23 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 7
(Rozami Pachuau)

Diana hnenah chuan, “Thil a kal tluang zel êm ang a, rang takin Samuel Maverick-a chu va pan vat ula; mi ṭha leh rin tlâk tak a ni a, engkim hrilh vek la, tih tur chu a hre mai ang. I pa nen an inhria a nih phei chuan a va chah mai ang,” tiin tih dan tur te chu ka hrilh ta zung zung a.

Indian-ho kan tawhte kha hmar lam panin an liam ta kha a ni a, Indian-ho bawk an va run ni ngei tur a ni. Bauer-a pawh a hla tawh hauh lo vang.

Zing kar hun chu chak taka kal zelna hunah kan hmang ngar ngar a; ni a vanlaizawl meuh chuan lui lian ve tak hi kan va thleng ta hlawl a, chu lui chu hmar lam aṭanga kan sawi fo ṭhin kha a ni.

Chu lui chuan min ti buai hle mai. Henry-a chu kan nulate lo awmpui turin kan dah a; Yance-a nen chuan Iui kân theih dan tur ngaihtuahin lui hnar lam leh a mawng lamah kan inṭhen ta phawk a.

Lawngleng han beisei tur chu ka hmu ta hauh lo va, an thlunna hnu erawh chu ka hmu a. Mahse, Yance-a chuan thingluang, tuia lang hi a hmu hlauh a, a dangte pawh chu kan pawt khawm a, hruiin kan ṭawn khawm ta a.

Chutianga kan tih chhung chuan nulate chuan lui kama theihmute chu zawngin rilṭam inhnangfâk nan an lo hmang ve a; lui pawh a dam duai a, kân a harsa hauh lo vang le!

Nulate chu kan pûm siamah chuan an chuang fel tâ tih veleh Henry-a chuan ngaw aṭanga rawn tlanin, “An lo kal ta e,” a rawn ti ta thut a.

Chu veleh, “Yance, Henry-a nen hian nulate hi va hruai kai ula; kei chu ka lo tawi khawmuang ang e,” ka ti ta a.

Hman mai theih turin pistol chu a mu thun sa diamin ka dah a, ka thal chu a ngul nen ka ban nghal a; Yance-ate pawh chuan pûm chu hruia hnûkin tuiah chuan an hleuh zui ta bawk a. Henry-a pawh chu Yance-a ang bawka tui hleuh thiam a lo ni a.

Pûm chuan yard sawm vêl chauh a la thleng ang tihah mi sualho zinga pakhat chuan hmuin a ṭe ta chul a, hnim zinga a tlan buan buan thawm pawh chu ka hre reng a.

An zinga ka hmuh hmasak ber chu pa thaua kha a ni. A tlan lai chu dingin pûm lam tin chuan a silai chu a lek ta a. kan inhnaih bawk a, silai hmet puak lovin a hrawkah chuan ka thal fang chu ka va thawlh ta thawih mai a, a silai chu hmet puak thei chi a ni ta lo! Silai chu thlauhin a tlu nghal a, a hrawka thal fang bur ngur chu a pawt ta chawt chawt a.

Ka thal ngul chu ka koki-ah bâtin pistol chu ka hum ta thung a. Hnim karah chuan thawm a rawn awm leh a, chu pa chu a rawn au lung lung a; ka kah-pa kha chu a rum kûk kûk a.

Thâwk leh khatah, pa sang deuh hi ka bul lawkah chuan a rawn lang hlawl mai a, kah mai tumin ka pistol chuan ka lo tin zuau hman a; mahse, min hmuh avangin rang takin hnim karah chuan a pil bo ta a.

Kan pûm chu ka va melh zawk a, tunah chuan lui lai an thleng tawh a, silaia kah pawhin kah fuh harsa tham an ni ta. Nulate chu a chhuatah chuan an bawk phêk thlar a, a changa an lu a lo lang leh zauh ṭhin tih mai loh chu....

Yance-a leh Henry-a pawh hmuh harsa ve tak an ni tawh a, an tui hleuh paha an ban vai lang phe zauh zauh chu hmuh theih chhun a ni mai.

Hnim buk zingah chuan thil che zeuh hi ka va hmu a, ka'n rin kah ve pawp a, ka silai chu rang takin ka thun leh ta vat a. Lui dungah chuan tawi tê chu ka'n tlan hlek a; lui kawi chin ka thlen chuan ka silai chu hruiin ka awrh a, tuiah chuan ka zuang lut ve ta a.

Thui vak lo ka hleuh hnu chuan ka liluh ta a, a hnu deuhvah chuan thâwk la turin ka dâk chhuak ta a. Min ûmtute chu ka awmna aṭanga lui hnar lamah an awm a, silai ri te chu ka hre nâ a, thawm dang hriat erawh ka nei lo.

Thui fe ka hleuh hnuah chuan ka'n hawi kir leh a, lui kama mi ding hi ka va hmu ta a. Mi pahnih hian tuia rawn luh ve an lo tum mek a; pakhat erawh chu lui mawng lamah a rawn tlan thla a, min rawn zawng a; min hmuh veleh ka liluh leh ta nghal daih a.

Ka han dâk chhuak leh a, lui lai chu ka lo pel titih der tawh a. Pûm ni àwm tak ka va hmuh chuan vaukam a lo thleng ṭep tawh niin ka hria a, ka lawm hle mai.

Theih tawp chhuahin ka han hleuh leh fat fat a, rei vak lovah chuan ka hleuh kai ve ta a. Ka bul vêlah chuan thawm dang hriat tur a awm lo va, ka ṭhiante pawh an pûm Ieh an sulhnu tak ngial pawh ka hmu hek lo.

Ka hnung lama mi pahnih tui hleuhte pawh chu ka va hmu a, anni pawh an rawn hleuh kai thuai ta ve ang. Ka pistol chu a huh vek a, ka thal hrui lah chu hman tlâk lohin a huh vek bawk si. Ka tun din hmuna ka hmanraw neih chhun leh awm chhun chu ka tomahawk leh chemtê chu an ni mai.

Fimkhur tak chunga ka hawi kual leh hnu chuan ka ṭhiante awmna tur lam nia ka rin, ngaw chhungah chuan ka tlan ta ngar ngar a. Mihring hnuhma àwm reng reng hmuh ka nei lo va, ngaw chhung chu a thelh hun mai bawk a, ka tlan chak theih phah ta hlauh zâwk a.

Yance-ate hmuh thuai chu ka châk hle tawh mai! Chutih lai taka ka thil tawn chu ka fimkhur tâwk loh vang liau liau a ni ta!

Thingluang pakhat ka zuan kân a, pakhat dangah ka zuang kai leh a; feet sawmthum vêl zet ka zawh hnuah leiah ka zuang thla a, hnim buk karah chuan ka va lut ta ngawt a. Chuta ka lût chiah chu silai kaw hmawr hian mi lo thlir heu mai chu niin!

Chu silai kengtu chu sam sen ther thur, hmai ser do mai leh nuihzat hmel taka nui kuk kuk hi a ni roh a. Tunah erawh chuan a hmaiah ser nung thar a awm belh tawh ngei ang, a chhan chu ka chêt lâk a ran êm vang a ni.

A silai kua ka hmuh rual rual chuan ngaihtuahna awm miah lo hian ka kut phar chhuakin ka han man chawt a, a kengtupa hmai nawr nan chuan ka hmang ta a. Ka han nem zûi nghek a, amah pawh chu a rum hawk a, a pai awn awn a.

Chutih lai tak chuan pakhat dang hian hnung lam aṭanga mi rawn zuanin ka hnungah a rawn bei thlawp a, ka tlu chiang hle mai. Ka han inleng vak a, ka tho chhuak leh hlawl a, ka hnaih bera mi, hmai hlai phek phuk chu ka hnek ta bur a. Ka hnunga mi erawh chuan mi la kuah ve reng a; min beitute chu pathum aia tlem lo an nih ngei a rinawm.

Kan bul lawkah chuan thing bul, thliin a chhem tliah ni ngei tur ther fur mai hi a awm a; chu chu remchanga hmangin ka puak reng-pa chu ka sawh ta ngheng mai a. A ṭe ṭhawt a, mi thlah rang kher mai, a zum ther fur chuan a chhun fuh a ni ngei ang.

Hnim buk karah chuan ka tawlh lût nghal vat a, ka bul lawkah chuan mi pakhat hi a au tuar a, silai a ri nghal dawt bawk a. Silaimu chuan ka bul maia thing hawng chu a deng per sawk a; chu veleh kei chu thing hnuaiah chuan kah fuh har thei tur ang berin chak takin ka tlan kawi ta zawr zawr a.

Ngaw karah hian ka lo tlan fo tawh ṭhin a, thingluang han zuankahlen a, phen nei chung renga chak taka tlan hi chu ka thiam tawh viau reng a ni.

Vanneih vang liau liaua tlan chhuak thei hram ka ni. Ka han hmu thut kha keimah ang bawkin an inring lo ve tho a, a hnua thil thlengte kha an beisei loh ang tak a ni bawk nen. Lui dungah zel chuan tlanin ka ṭhiante chu ka ûm leh ta a.

Ka tlan muang ta deuh a, ka chemtê leh tomahawk-te chu an la awm em tih ka han indap a, an la bo lo hlauh chu ka lawm kher mai. Ka thal ngul pawh chu ka dàrah chuan a lo la inbât reng a, ka hnunga bei-pa khan ka hrawkhrui bâk chhah a lo tum lo hlauh kha ka vanneih phah lehzel a ni.

Yance-ate hnuhma chu ka va hmu fuh ta hlauh a, rang takin an hnu-ah chuan thing hnah tlate chu chharin ka vur hnan ta vat a. Thing ṭang rote chu lain chu lai hmunah chuan awm ve sa reng ni àwm takin ka dah hnan leh a; chutia ka tih fe hnu chuan ngaw ril lamah chuan ka insaseng zui thei ta a ni.

Choak thlawh dan aṭanga chhûtin Shawmut chu mel sawm panga lo liam a ni tawhin ka ring lo; mahse, kawng mumal lovah chuan rin aiin kan thang rei leh fu maithei bawk.

Tuna kan awmna hi chu ka hmelhriat lo hle nâin ka tlangnel fu lawi a, a chhan chu a pilril zawh poh leh ka tan chuan a thlamuanthlak ve tlat a ni.

Ka moccasin bun chuan ngaw hnuaiah chuan thawm a chhuah lo kher mai a, ka thawmhnaw pawh a hlui tawh bawk a, ramhnuaiah chuan hmuh ka awlai loh phah ve hle ngei ang.

Chaw ei tur ka nei lo va; mahse, chaw mumal ei lova ni tam fe lo teihawi ṭhang tawh ngang ka ni a, rilṭam chu ka tuar ve thei tawh khawp mai. Ṭam hnem tur ramtheihmu te ka melh pah zel bawk a, nakinah chuan phul hmun sirah hian kung tam fe lo awm buk laih mai hi ka va hmu fuh ta a.

Chutah chuan savawm hniakte pawh a lo chiar dup a, theihmu rahte chu muangchangin tui ti takin ka ei ta a. Darkar chanve vêl tur zet chu ka chawl ta a, ṭam hnem a lo tling teh meuh mai a; mahse, sa a ni ka ei châk leh mamawh chu ni!

Kal leh ka tum lai tak chuan a piah lawka sazuk pahnih tla ral ral hi ka hmu ta hlauh a, ka tomahawk chuan ka vawm ta a. Ka kut zungpui tiat lek pawh tum ren rawna ka'n vawm chuan ka hlah ngai loh nen; tun ṭum chu ka han thlah chiah chuan a dâk zauh a, a rual deuhthawin an zuang sawn a, an tlanchhe ta daih mai a.

Rilṭam ngai renga rilṭam chung chuan ka tomahawk chu ka va chhar leh a, chuta ka hlawhchham thinrim an-hla te chu sawi chhawn leh chi pawh a ni lo!

Tuna ka awmna chu âwihtlan deuh, lung hriam leh thingtuluang tamna a niin, muangchang leh fimkhur taka kalna chi a ni a; lo tlu sual palh ta ila ka chan chhiat turzia chu a lang reng si a.

Ka han ṭhut chawlh zawk zawk chang te chuan Yance-ate thlen chin tur te ka chhût ṭhin a; mahse, ka awmna aṭanga hmar lam hla vak lovah an awm ang tih bâk chhut chhuah theih ka nei si lo. Tunah chuan ka ṭhiante chu mi sualte chuan ûm tawh lovin keimah min ûm tawh ka beisei ngawt a, chutiang ngaihtuah chung chuan ka kal leh ta a.

Ka rilru-ah chuan Diana Macklin-i chu a lo lang leh ṭhin a; anmahni ûmtute'n an man loh nan theih tawp ka chhuahpui a ni mai a, tun hma pawhin ka la hre ngai pawh a ni si lo. Eng vanga he nula hi ngaihtuah reng nge maw ka nih le? Hmeichhe chungnung larh a ni a; a ṭhiante aia dàwi thiam a nih bikna tur erawh ka hre chuang lo.

Mi ngawichawi, hmeichhe ngaihsak lo tak ka nihna chuan hmeichhe chinchang ka hriat lohzia pawh mi thup hlauh zawk a. Eng vanga Cape Ann tlangvalte khan Diana hi ringhlel tlat nge an nih chu ka ring thiam mai.

Diana hi a hmel thatna bâkah ngaih sanawm rûkna riau nei a ni a, hlauhawm a hnaiha ṭe vak leh thidang nghal mai te, tap hliam hliam chi ang te hi a ni ve tlat lo. A chunga mawh phurhna tla reng reng tlin taka hlen tum mi a ni zâwkin, harsatna lo thleng pawh vui hmui pu hauh lova a thawm ṭhat dan ngaihtuah hram mi a ni. Ka nu pawh hetiang mi chiah hi a ni a, Lila pawh chuti tho.

Indian hmeichhiate pawh ka hmu ve fo tawh a, mipa it theih tur zawnga an taksa han siksawi leh han inpho lan te hi an zei hlawm a; mi ngo nulate pawh chutiang bawkin.

Diana erawh chu hmeichhe nalh berte zinga mi a ni ngei ang; mahse, mipa hmuh atana han intheh no vêl hi a tih chi a ni ve tlat lo, mi hip tumna a nei ve ngai lo.

Chutiang a nih avang chuan ka nel lovin ka hêl hram hram ṭhin a, kan inbelbul hnaivai vak lo a ni. Chuti chung chuan ka rilru-ah a cham reng mai si hi mak ka ti khawp mai; keini ang, ramhnuaia khawsa ṭhin, hawihhawmna pawh lantir thiam lo tan chuan beisei chi reng niin ka hre si lo.

Yance-a hi chu mi hlim thei leh nuih heh tak, zai leh lamna hmunah pawh thei ve tak a ni a; chutiang mi lah ka ni bawk hek lo. Chutiang hmuna tel ve ai chuan kil khata ngawi renga ṭhut veng veng thlang zâwk mi ka ni tlat a ni.

A tawpah zawng Shawmut chu ka va thleng ta nge nge a. He hmun hi khawmuala litengsawl lût awmna hmun a niin lawng chawlh nan a remchang hle a; Shawmut pawh chu litengsawl kamah mai chuan a awm a ni.

Indian mi kawm nuam tak pakhat hian lawnglengin mi va hruai a, pawisa pêk lah a duh der lo va; min kalsan leh dawn chuan chung lai mite chu fel tak tak vek an nih thu mi hrilh nghe nghe a.

Beacon Hill an tih hmuna in lian tak ding; pal, sang taka an hung pup chu ka thlir ta vang vang a. Hmun reh leh ralmuang tak a ni; chhim lamah chuan thing tlem azawng a awm a, Beacon Hill-ah chuan cedar thing leh elm thingte chu an ding ṭhuau bawk a.

Ka moccasin pheikhawk, la huh chuap bun chung chuan Rev. Blaxton-a in chu ka pan ve ta a. He lai hmun ka thlen thu hi an lo hre tawh a ni ngei ang, a awmte chu an lo inring êm mai. Blaxton-a chuan Peqout hmeichhia chhiahhlawh a nei a; pa sek pui mai pakhat, a ṭul apianga an tirh ṭhin hi a nei bawk a.

Blaxton-a chuan kawngkaa dingin min lo dawngsawng a. Pa nun zawi hmel pu tak a ni nâin ngainatawm hmel pu tak hi a ni a, kum sawmthum mi àwm vêl niin a lang.

“Rev. Blaxton-a i ni em?” ka han ti nghal chawt a.

Ani chuan, “Ni e, Blaxton-a ka ni e,” a lo ti ve mai a.

“Kin Ring Sackett; Carolina lam chhuak ka ni e. He lai hmunah hian mi bo zawngin ka unaupa Yance-a nen kan rawn kal a ni,” ka ti leh a.

“Indian-ho rûk bo angin an sawi a ni maw?” a lo ti a.

“Indian-ho hi an tih ni miah Iovah puhmawh an ni fo mai a, tun ṭuma mi kher phei hi chu an ni lo chiang hle a ni,” ka ti ta a.

A ngawih vang vang hnuah, “Lo leng lut ta che, inleng te hi ka nei khat teh a nia,” a ti ve ta a.

“In awmna chu a nuam hle mai. In leh a chhehvêlah pawh pangpar mawi tak tak a awm a; ka rawn chhohnaah pawh ramtheihmu leh grape tual ṭote an buk luai hlawm a, a nuam tak zet a ni,” ka han ti luam a. Ani pawh a hlim hmel hle a; tichuan, in chhungah min hruai lut ta a.

In chhung chu a dai nuam hle mai a; chhuat chu lung chher mam phah chhuah vek a ni a, a kil sirah chuan thuk a awm a, thukah chuan sa tui hang ni àwm tak hi an chhuang khu hlat hlat a.

“Carolina aṭanga lo kal ni khan i insawi a, in lo kal hla hle mai a,” a han ti a.

“Kan awmna chu a khawthlang hle a, kan thlang lamah chuan Indian bâk an awm tawh lo; Spanish leh French kan hmu zauh zauh bawk.”

Min han thlêk vung vung a, a lehkhabu dah khawmtu chu a'n melh leh zauh a; eng dang sawi ta lo chuan, “Eng vanga min rawn pan ta nge i nih le?” tiin min zâwt ta daih a.

“Rawn biak ràwn che hi ka duh bâkah ka ṭhianteho laka mi sualho hruai pen nan he lai hmun hi ka rawn pan a ni,” ka han ti a.

Sa tui hang an rawn chhawp chu phur taka ban pahin kan buaina zawng zawng chu kimchang takin — Penney'n ṭanpui tura min rawn ngena kan rawn thawh chhuah dan leh, nula pahnih, anmahni mantute hnen aṭanga mi hang pakhat nena an tlan chhuah hnua kan va chhar dan zawng zawng te chu ka hrilh ta vek a.

“In thil tawn hi a namai lo hle mai. Sala sumdawn hi ka duh zawng a ni lo va; mahse, sal tang tlan chhuak lo puih chu dàn hmanga hrem theih a ni ve tho asin,” a ti ta a.

“Nulate chuan he mi hangpa hi tlan chhuak turin an pui hlei nem,” ka lo ti vat a.

“Chutiangin an ngai lo vang; anni mi ngo an ni a, an ruala a kal ve ringawt pawh chuan mi rinhlelh an kai phah dawn asin!” a'n ti phawt a.

A han ngawi vang vang a, “Tunah Maverick-a in an thleng tawh ang em?” a han ti leh bauh a.

“An thlen tawh ka ring; anmahni ûmtute nen khan kan han innuai deuh hlek a; chutah, anni lak ata hruai pen phet tumin ṭan ka la leh ta kha a ni a, chumi chhung chuan thui fe an kal hman ngei ang. Ka unaupa Yance-a chu anmahni hruai turin ka hnutchhiah a ni,” ka ti ta a.

“Yance-a; Yance sackett maw?” a ti a, a nuih a zat hmel hle a, “A chanchin an sawi hi ka hre hnem hle a; ka hriat chhunte chu a ropui lo hlawm nâin ka lawm zawng tak an ni thung. Sakhaw mi, kohhran hruaitu chu ka ni ngei a; mahse, ka lawm zawng leh ngaih san zawng te hi chu dang ve tak a ni,” a han ti zui a.

Nakin deuhah chuan, “Nulate chu Indian-ho rûk bo an nih loh chuan tu tih nge ni ta ang?” a han ti leh a.

“Anmahni mantute chu mi ngo pathum, lawng hna thawk mi vek leh mi hang pahnih an ni. Mi hang pakhat zâwk phei chuan anni chu tlan chhuak thei turin a pui ta nghe nghe a, chu mi hangpa chu mi fel tak a ni,” ka ti ta a.

“Mi ngo maw an nih?” mak ti zet hian a ti hu a.

“Ni e; sala sumdawng ṭhin, lawng nghah lai mek nei an ni a, an lawng nghah mek chu an tum aiin a rawn thleng tlai niin a lang.”

“Lawng chu i hmu em?” mi han ti leh a.

“Tuifinriat kam hrulah chuan lawng pakhat chu kan hmu ngei a, khawmual rawn chuang kai si lovin anniho chu a lo nghak niin ka ngai — Merrimack lui chhuahah a ni nghe nghe,” ka ti ta zel a.

“A dik mahna le; mahse, lawng in va hmu a ni mai a, sumdawng lawng rawn chawl tur pawh a ni thei a; sal mantute lawng anga lo ngaih ngawt chu a dik ber lo vang,” a ti thung a.

A thu sawi chu a dik khawp mai. Kan mi sualte hi sala sumdawng ṭhin an ni tih finfiahna eng mah kan nei thei lo reng a; kan nulate pawhin anmahni mantute hi mi eng ang nge an nih an sawi fak thei bik lo vang — rin thu mai lo chuan....

“Min rawn ûmtute hi Max Bauer-a'n a rawn ho niin ka ring...,” ka'n ti ve leh zauh a.

Chutah meuh chuan a ngaih dan a pel ve ta a ni ang, a sa tui inna chu nghat dawtin, “I ring maw? Max Bauer-a te ang hming i lam rik tel dawn chuan rin thu mai mai a sawi chi loh ang; fiahna i nei ngei tur a ni,” a ti ta hmuk mai a.

“An zinga pakhat chuan Joseph Pittingel-a hnuaia thawk ṭhin a nih thu a sawi,” ka ti ve leh sap a.

Thinur rilru viau mah ila, a sawi chu a dik tlat si! Finfiahna eng mah kan nei thei lo va, kan nulate pawhin anmahni mantute chu tute nge an nih an hre bik miah si lo.

Ka thu sawi chuan a nuih a ti za zâwk mah niin a lang a, “Khawvel sual hi i la dai thûk lo ve hle a nih hmel e! Pittingel-a te hi chu mi hriat hlawh leh mi nei nung, kohhranah pawh thawhlawm thawh ṭha thei tak, he lai ram vêla thu neitute pawhin an biak ràwn ve pawl a ni asin. Chuvangin, in tana tih theih awm chhun chu ngawih hle hle a; nulate, anmahni in lum lam pana an haw leh thei chu lawm hle tur a ni mai,” a ti ta daih a.

Pittingel-ate chu thil sual ti-ah chuan a ring lo khawp mai! Ka sa tui hang no chu rawn thli khat leh tê tein, “Hemi chungchang hi chu Samuel-a nen pawh la sawi dun leh ila a ṭha ang,” a han ti leh a.

Amah bawk chuan, “Samuel-a saw pa thil hria leh ngaihtuahna seng peih tak a ni a, ràwn tlâk tak a ni; in nulate pawh chu din hmun ṭha lo takah an ding a ni si a,” a ti leh ta zel a.

“Diana-i, dàwi thiam nia an puhna te chu i âwihsak bik lo ve hle ang ti raw?” ka lo ti ve thung a.

“Teuh nâng! Maverick-a pawhin a awih lo vang; âwih tâwk chu an awm tho ang a...,” a han chawl deuh a, “A nih leh, he Macklin-a fanu an tih hi i be tawh em? Eng ang mi nge ni reng reng a?” a han ti thut a.

“Bia e; nula hmelṭha lutuk, nunnem tak leh thluak ṭha zet mai maw le! A kum phu lohin a fing lehnghal!” ka ti a.

Ani chu a lo nui huk a, a awmzia reng ka hre lo mai. A sir zawng deuha mi'n melh pah chuan, “Tlangvalin nula fin leh fin loh an sawi ka hre khat teh mai asin!” mi dâwp titih hian a'n ti vêl a.

“A hmel ṭhatzia chu chhuan tlâk a ni! Mahse, kan chenna lamah hi chuan finna hi a pawimawh êm a, sawtiang ram pilrilah te saw chuan nupa pawh a ruala ke an pên thiam a ṭul tlat. Dam khawchhuak tur chuan an inlungrual a ṭul êm a ni,” ka lo ti ve fan a.

“Tun hnuah chuan ṭawng fimkhur deuh la; Pittingel-a hi fing leh hlauhawm tak a ni a, a larna leh thil tih theihna chhawr ṭangkaiin i tih thinrim vaih chuan nang pawh Europe lamah a thawn haw daih mai ang che,” a la ti ta deuh deuh a.

“Thawn haw tih zawng sawi tel suh; he lai hi ka chenna leh ka ram a ni asin!” ka ti ve tlat a.

Chutia ka'n chhan chuan mak tih hmel tak hian mi han en a, “Hei hi ka ram a ni,” a han ti ve ngat a.

“Chu ṭawngkam chu he laiah hian ka hriat vawi khatna a ni. A hriat a nuamin a hahdamthlak kher mai! Mahse, hêng laia mi hi a tam zâwk chu English mi kan ni tlat mai,” a ti ta zel a.

“He ramah hian ka piang a, England ram chu ka la hmu hlei nem,” ka lo ti ve leh a.

“He lai pawh hi England lal thu neihna hnuaia mi vek a ni tih hi theihnghilh suh!”

“Kan chenna hmun chu ram hla tak a niin, chu laiah chuan Indian-ho leh keini bâk chu mi dang an awm lo va; chutah chuan lalin thu neihna a neiin ka hre lo. A mi chengte chuan kan duh danin hna kan thawk a, lal awm leh awm loh pawh kan ngaihtuah ve lo,” ka ti ta ngat a.

A han ngaihtuah vang vang a; chutah, nui hmel pu lek lek hian, “A dik tak chuan keini pawh hian lal chu kan mamawh lovin kan ngaihtuah ngai bik lo; mahse, a thu hnuaiah kan kun lo tihna a ni chuang lo va, lung inah min khungin kan nunna hial pawh min lâksak thei a ni tih hriat reng chu a ṭha,” tiin min hrilh ta chiam a.

Kan sa tui in te chu kan in zo ta a, kan ngawi dun ta vang vang a. Rei fe hnuah lehkhabu chu bûk khum nghutin, “I tuipui zawng te a ni ve em?” a ti leh ta daih a.

“Teh reng mai. Keini pawhin lehkhabu tam tak chu kan kawl a, chhiar min zirtirtu phei chu mi thiam tak a ni asin,” tiin phur fe hian ka chhang a.

“I ngaih dan a ni lo maithei a, chhiar min zirtirtupa chu ring lo mi, Mosolman a ni,” ka'n ti zui a.

A dàr chhin ukin, “I hnenah bâk ka la sawi miah lo vang; Maverick-a chuan a hre maithei. Kei pawhin lehkhabu, Mosolman ziah ka chhiar tawh alawm, a ṭha viau nghe nghe bawk. A nih, Mosolman i sawia chuan sakhaw lam thil sawi a nei em?” a han ti ve leh thung a.

“A thil sawi fo ṭhin pakhat chu, 'Kawng tam tak a awm a, chûng kawngte chuan tum thuhmun an nei a ni,' a ti ṭhin a. Tin, Indian-te pawh an sakhua zah dersak a, Christian-na pawh an hnenah pawngpaw zawrh mai loh turin min hrilh ṭhin. A ngaih dan chuan Indian-ho pawhin anmahni tana sakhaw ṭha tak, an mil zawng tak mai an nei a ni,” tiin Sakim-a'n sakhua-na a pawm dan te chu ka hrilh a.

Blaxton-a chuan, “I huaisen hle mai, ram pilril takah te i vâk chhuak a ni si a; tuipui leh ngawte hi ka ngaina viau nâ a, ka vâk chhuak ngai meuh lo...,” a ti ta a.

“Lehkhabu i ngah bawk a, i khua a har dawn loh hi le,” ka han ti a.

“A dik chiah reng a ni...,” tiin mi han melh a, a mi en dan aṭang chuan min haw lo hle hian a hriat theih a.

“He pindanah ngei hian Hebrai zawlnei te, Greek mi fing Plato-a leh Aristotle-a te pawh ka lehkhabu hmang hian ka titipui thei a, ka nun hi ka lungawipui thawkhat hle a ni,” a han tih zawm leh a.

Chutah, a ding ta hluai a, “Ti rawh le, Maverick-a chu i va pan ang hmiang; tih dan tur ṭha riau te pawh a lo hre mahna!” a ti ta a.

Kawnga kan kal lai chuan, “A nih leh, sala sumdawng ṭhinte chu engtia han tih turah nge i ngaih ber a?” ka ti a.

Ani chu mak ti hmel tak hian a meng phar uau a, “Eng sal mantute nge i sawi a? Tu nge sal mantu an ni tih fiah thei ang? Ngaihruatna mai mai a ni i sawi ni.

“Hre ta che, i thil sawi te hi a âwihawm lo ka ti phei chu a ni lo; mahse, Pittingel-a te ang hi chu hetiang maia mawlmang hi chuan sal mantu-ah i puh thlu thei lo vang — a fing lutuk. A chang phei chuan mi zawng zawng hi min hmusit êm êm vek ni te hian ka hria a; mahse chu zawng, ngaihruatna mai bawk a nia,” a ti ta zel a.

“Sal neih hi mi tam takin duh lovin haw hle mah se, dànin a khap lo miau a; chuvangin, sal neih leh kawl hi kum sang tam tak kan lo ching ta a ni. Sal nei lo ila, kan hna zozai hi tu nge thawk ang? He lai lo thleng thla apiang hian ram zau tâwk kan duh zel a; chumi tuai hnuma enkawl tur chuan tha tam tak sen a ngai si a, mahnia che thei bar lah kan awm si lo!

“Miin a mihringpui, sala a chhawr mai hi ka duh zawng a ni hauh lo; mahse, sal neih hi dànin a khap miau loh avangin Joseph Pittingel-a hian salte man khawmin a hralh leh ṭhin a nih pawhin tu pawi mah a sawi lo.

“Dàn hmang phei chuan hrem theihna tur bawh chhiat eng mah a nei lo. Tute emaw chuan lo demin inleng atan pawh an lo iai mahna; mi tam zâwkte chuan engah mah an ngai lo vang. Hêngte hi hre ta che, Ṭhianpa!” tiin thil kalhmang ka la hriat ngai lohte chu min hrilh ta teuh a.

A thu sawi chu a dik ang tih ka ring; mahse, kawng dang a awm tur a ni. Nula thlabar tak takte chu ka'n ngaihtuah leh a, tun hma pawhin an lo khuangcher bo hmiah hmiah tawh ṭhin tih te kha..!

Blaxton-a chuan, “Ka hmeichhe hriat pakhat pawh bo tâte zingah chuan a tel ve tak asin! Nula harhvang leh hmel ṭha tak a ni a; a nungchang erawh a sahawk deuh a, zilh pawh ka zilh fo ṭhin. Mi sual han tih tur chu a ni lo va; mahse, Lalpa duh zawnga khawsa ṭhin chu a ni lem lo...,” tih pahin mi han melh kâwk a.

Chutah, a han sawi zawm leh a, “Pathian thu te pawh ka hrilh fo ṭhin a; mahse, ṭawngka chuan min chhang lo nâ a, 'Mihring ve bawk i nih kha,' ti hmel a pu tlat a, thu sawi a ngaithla ṭha duh dèr lo. Chutah, a bo ta daih a; ṭhenkhat chuan tu emaw nen an tlan dun a nih an ring,” a ti ta zel a.

Kei chuan, “Chu pawh chu, 'Huai taka' an tih mai dawn chu le! Diana pawh hian uitu a nei tlem hle a, chu nu lah chu chuti bawk; bo tâte chu chutiang mi vek chu an ni ta ve ang.

“Tun ṭuma Carrie an ru bo erawh hi chu tum lâwk reng ni lovin, tih palh liau liau emaw, loh theih loh vang emawin an hruai tel ve a ni ngei ang. Mi sualte hian an mi rûk turte chu an thlang fimkhur ṭhin hle a; mi ui vak loh tur hlir, mi sawi sep kai hi an ni duh khawp mai,” ka han ti ve ṭalh a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 21st, 2019, 7:00 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 8
(Rozami Pachuau)

Maverick-a chenna in chu kulh hrawl tak hi a ni hrim mai. Kulh laiah chuan in lian zet hi a ding luah a, a hungna pal vêlah chuan laipui an hung thluah a, chu lai hmun venghim tur chuan mi tam tâwk a nei reng a ni. A hote lah chu rothap tak tak, inbeih rep rep inpeih at reng mi an ni lehnghal a.

Hêng laia chengte hi a tlangpuiin savuna sumdawng an ni ber a, ramhnuai hmun reh taka khawsa ṭhin an niin mi tawh khirh tak tak an ni hlawm. Chutiang chi mihring a ngah avang chuan Indian-ho lakah pawh hlauh tur a nei ngai lo. Mi zah a kai hle a; mahse, kohhran mite chuan sakhua-na a lâk urhsun loh êm avang leh a thil la zam lutuk chu an ngaithei lo hle a ni.

Mi sawi dan phei chuan vawi hnih/khat chu kohhran aṭang pawhin hnawh chhuah an lo tum tawh a ni àwm e; mahse, mi rilru ngil pangngai tak a nihna leh a pa ngei pawh kohhran rawng bawltu lar tak a lo nih ṭhinna chuan a chhan ta hlauh a ni.

Kan va thleng chu Maverick-a chuan min lo lawm thiam hle a, apple tui dah vawh hi min lo chhawpsak thuai a, a hmel pawh a hlim hle mai.

“I ṭhiante pawh hetah an awm e. An hriselna pawh a ṭhain, i unaupa phei chuan sazuk sa a rawn paipawn ṭeuh nghe nghe a, a chungah kan lawm hle a ni. Nizan khan an lo thleng a; an hah deuh aniang, kan nulate pawh an la chawl hahdam mek a, kan nuin lo buaipui teh se,” a ti suam suam a.

Blaxton-a chuan Maverick-a hnenah, “Hei, ka lo titipui nual tawh a, nangin han kawm ve la ka ti deuh,” tiin kei chu mi han kawh hmuh a. Ka thiam ang tâwk chuan thil awm dan nia ka hriatte chu ka sawi leh ta vek a.

Maverick-a pawh chuan ka thu sawi chu apple tui sawr in pah chuan a lo ngaithla ngun hle a. “Blaxton-a ṭanna chu a dik ang. Pittingel-a leh Max Bauer-ate, nula ru botu nia lo puh ngawt chu a tih chi lohin, awmzia a neih dawn loh bâkah buaina a koh chhuahsak zâwk ang che u.

“Lo ngai haw lo la, han sawi zel tâkah chuan nangni chu he laiah eng in ni hlei nem; mikhual vâk rawlai in ni ve mai a, tu ma'n in thu an ngaichang lo vang. Pittingel-a hi chu miin an zahin an hlau hle a ni; kei ngei pawh hian a lawng zinga pakhat chu lawng ngul tur thing, England lama tawlh chhoh nan ka lo hmang tawh a ni,” a han ti a.

Hetiang ngawta thil ti sualtute man chhuah loh leh hrem loha an chhuak zalen mai tur chu ka ngaih dan a ni lo kher mai. Rei lo têah sual rawng an bawl leh mai dawn si a...!

Ka rilru-ah chuan thil pakhat a lo lut thut a, Blaxton-a lam hawi chuan, “I hmelhriat, hmana nula bo i tih kha a chanchin eng mah in hre zui ta lo maw?” ka han ti hluai a.

Blaxton-a chuan, “Eng mah kan hre zui ta lo. Kha nu khan tuipui kam vêla vah khawthawn a ching reuh a, mi ṭhenkhat phei chuan lawng pu ṭhenkhatte chu melh no thei hlein an sawi lehnghal a ni. A han bo ta kha a nuin a rawn sawi a, kan han zawng ngial a; mahse, kan hmu zo ta chuang lo. Mite chuan lawng hna thawk, tu emaw nen an tlan tâah an ngai mah zâwk a ni,” a ti a.

“Chutiang khawpa nula...,” ka'n ti hman chauh a, Maverick-a chuan, “I sawi tum chu ka hre mai. Kha nu kha ka hre chiang hle a, kum sawm paruk pawh la tling si lovah chuan a kawlhrawng hle a ni; ani ang sâwi hmin zan tur kha chuan tih fe a ngai ang.

“Khatiang mi kha ka lo hmu fo tawh a; mi tuar chhel leh dawh thei tak an ni zel a, mi dang beidawnnaah pawh hlawhtlinna an chhar fo ṭhin. Kha nula-ah kha chuan kahpathir an phum tel a nih ka ring hial mai,” a ti ta a.

“Chuti chu khawiah emaw chuan damin a la awm ang,” ka lo ti vat a.

Maverick-a chuan a âwih loh hmel hle a, “Sâwi zawi a harsa fu ang ka tih tawh kha. Zêp lovah chuan kha nu kha ka mi ngainat zawng tak a ni asin! Mi tih mawh tak chu a ni ngei a — a nu a ti luhai a, kohhran pawhin an buaipui laih reng a; mahse, chu chuan a nungchang lepler chu a ti reh chuang lo.

“Amah han be lumlamtu apiang hi a melh no hle thei zelin a lang; amaherawhchu, chutianga a awm chu a ti der vêl mai mai niin ka hre thung a, a tum tâwk nia a hriat hi tawng ta ngat se chuan pasal atan pawh neih a hnial ka ring lo. A nu kha nu fing tak ni se chuan pasal a hmuhsak thei ngei ang,” a ti ta a.

Rev. Blaxton-a chuan, “Pasal neihtir chu an tum ngei alawm; mahse, he nula hian an khaw tlangval tu mah duh a nei tlat lo. Eng ang mi nge a duh tih chu ka hre lo nâin thil danglam leh mi danglam bik deuh a duh niin ka hria,” a lo ti ve ta a.

“Chuti chu, he nu zawng tur hian West Indies thliarkar ka va fang teh ang,” ka ti ta chiam a. Ka thu sawi chu an hriat tura sawi pawh ni lovin keimah leh keimah ka inhrilh a ni ber zâwk.

Min en ṭhap a, mak an tih hmel kher mai!

“Nula pakhat bo zawng turin chûng thliarkarte chu i va pan ang a maw? I â a ni lo maw? Va hmu teh reng pawh ni la, amah chu i biak pawh an phal lo maithei asin; engtin nge i hruai haw ang?” Maverick-a chuan a lo ti a.

Kei chuan, “Chu nu hnen aṭang chuan chhechhamna lehkha ziak, amah mantute chungchang a ziahna ngei chu ka va la mai ang; chumi a theih loh chuan amah pawh chu ka rawn hruai kir mai ang. Chutianga ka tih theih chuan hêng kan mi sualho hi an phu tâwk, khai hlumna dawhsan an pan theihna tur tâwk finfiahna ka nei tihna a ni mai,” ka ti ta a.

Thil han sawi mai hi chu a awl a; mahse, tuna ka thu sawi chuan ka rilru a luah hneh hle. Hetiang taka thil sual ti ṭhin si, man loha an awm reng thei hian ka ngeng a chhun tlat a ni.

Mi tam tak chuan, 'Chin fel hi ka hna a ni lo ve,' an ti pawh a ni ang; mahse tu emaw tal, mahni mawh phurhna anga ngaia thawktu an awm loh chuan pawi sawi lo tam takin an la tuar zel dawn tlat mai....

Maverick-a chuan dawh thei tak hian, “West Indies-ah i la kal si lo va, Virginia te, Carolina te nen chuan tehkhin chi rual a ni lo. Suam hmangte kulhpui, mi phil hmang leh sumdawng fing kherek tak takte tual chaina ram a ni asin! A reng reng thu-ah hmeichhe pakhat, hmun biru taka thuhruk tur tih hriat sâ chu engtin nge i va hmuh mai theih ang?” tiin thil harsat dan tur te chu a han sawi vêl a.

A zawhna chu ka chhang thei bik chuang lo. Indies chungchang ka hriat te chu mi titi aṭang maia ka hriat a ni a; mahse, ka'n ngaihtuah chiang a, kal ngei tur chuan ka rilru ka siam fel ta zâwk a.

Yance-a chu a lo ngawi reng a, a in-àwm lo zâwk mah mai! Yance-a hi ho angreng taka inchei ṭhin a ni nâin thil a dawn thui a, a ngaihtuahna te hi a dîng riau a, tuna ka thil tih tum khirh turzia pawh hi min hriatpui vek a ni.

A hmasa berah chuan West Indies hi thliarkar tam tak awm khawm a ni a, khawi berah chuan nge nula chu a awm ang tih va chian a ngai phawt mai. He nula hi a la dam meuh em? Mi tam tak chuan lawnga zin hi an zo lo va, chaw chhia eiin lawng pu tawr ṭha tak tak pawh an lo boral fo tawh ṭhin.

“I thil sawi tum hi thil ropui tak, tih theih pawha lang lo a ni. Sâwng lai thleng thlenga nula pakhat bo va zawn ai chuan hun awl khawh ralna ṭha zâwk leh hlawk zâwk i hre ngei ang.

“Nula kha Indian-ho man a nih leh nih loh pawh kan hre lo va; a thi tawh pawh a ni thei; ani va zawn chu thlasik laia vur tlang pakhat bo zawn ang mai a ni ang,” tiin Blaxton-a chu a rawn ṭawng ve leh bauh a.

Yance-a pawh chuan, “In lamah Temperance-i pawhin min lo ngaihtuah tawh ang; chu bâkah, i thlai chinte pawh i kalsan rei tawh si,” a lo ti ve a.

“Nang chu i lo kal ve dawn hlei nem; i lo va haw ang a, chanchin i lo va sawi ang chu ka ti asin,” ka han ti a.

Thil kan sawi nawi vak vak a, lâk tlâk a awm thei si lo; mahse, an thu sawite chu lâk tlâk deuh a awm em tiin ui bauh chang ran ang mai hian ngun takin ka lo ngaichang a.

Indies lama kal ka sawi hmasak ber kha chuan ka tum tak tak pawh a ni chiah lem lo; mahse, ka sawi chhuah aṭang khan ka rilru-ah a cham reng a, hêng lai ram ngaw dur leh hmun, tuipui kam te anga ka tlangnelna tur chi a ni hauh lo ang — ka va mikhual hle ang a, hmelhriat loh hlir an ni dawn a, a nuam lo hle ngei ang.

Nula chu damin va hmu thei pawh ni teh reng ila, an sawi hmangin mi tuar chhel leh beidawng mai mai lo chi niin a lang a, dam pawh a la dam mahna le!

He nu chungchang an sawi tam poh leh amah ka ngaih sanna a zual a, a nungchang tur àwm pawh ka hre mai. Mi tum ruh leh tum sang mi tak a ni ngei ang; hetiang mi tan chuan kohhran dàn kherkhiap tak hnuaia kun chu a har viau maithei e.

He nu hi sal mantute chuan lo man pawh ni se, Indies vêlah chuan an lo hralh a nih pawhin engtin nge a awm zel ang? Hetiang dinhmun khirh a lo hmachhawn tâkah chuan beidawnna khurah tlu lutin natna ṭha lo tak vei pawhin a lo awm maithei bawk. Mahse, ka ring chiah lo; hetiang mi paukhauh hi chu an ngêt chhe mai mai ngai lo, thir inphum amahah a awm tel tlat!

Pindan ril lam aṭangin Diana chu a rawn chhuak hlawl mai a, kan awmna pindan thuka mei lingte chu a rawn thai vam sauh sauh a. He nu zet hi chu a hmelṭha ngawt mai.

“Carrie chu a ṭha zel maw?” ka lo ti a.

“A muhil mek; a chau bawk a, mut tam a mamawh reng a ni,” tiin min chhang a.

“Nang ve thung, i chau ve viau tho lo maw?”

“Ka mawng pawh ka la hung hman lo. Ngaihtuah tur a tam si a, min ûmtute pawh an lo thleng ṭep tawh ang. He laia kan awm thu pawh hi an hre tawh ngei ang a, Cape Ann leh hmun dangah pawh kan chanchin chu an sawi darh tawh ang chu,” a ti ve zel a.

“Chu chu eng i tihna nge?” Maverick-a chuan a lo ti deuh hu a.

Blaxton-a chuan, “Diana hi dàwi thiam tia an sawi avangin chu thu chu an theh darh ang a tihna a nih chu,” a han ti a. Maverick-a in tur thli mek chu enin, “Joseph Pittingel-a hi in rin anga a lo inrawlh ve tak tak a nih chuan chutiang chuan a ti ngei ang. Pa fing a ni a, thu tlem azawng a belhchhah hlak ang a, an âwih zel mai ang.

“Hêng nulate hi engtin nge a mantute kut aṭanga an tlan chhuah theih? Man emaw rûk bo emaw an ni ngei maw? An bo tâk daih dan kha a makin ramhuai thil tih theihna te a tel a ni lo maw? An bo kan tih pawh hi amahin remchangah hmangin thil tih rûkna hun atan an vâk bo lui te hi a ni lo maw?

“Hniak leh hnuhma hnutchhiah awm mang si lovin engtin nge an bo daih theih? Chuvangin, 'He thilah hian dawi thiam kut hnu a lang a ni,' tiin he pa fing tak hian thu chu a vawrh darh ngei ang,” tiin a sawi belh ta zel a.

Diana chu en ran chungin, “In duh phawt chuan Shooting Creek lamah, kan zingah in rawn khawsa thei ang, hmun rûak remchang lah a awm bawk a,” tiin ka sawm ta a.

A han inngaihtuah vang vang a; chutah, “A va hIain tu mah hmelhriat lah kan nei àwm si lo,” a ti ta niah niah a.

Thu dang kan sawi leh hmain Maverick-a chu a rawn inrawlh ta hlauh a, “Chuti chu Shawmut-ah hian lo pem daih ula a ṭha mai alawm. Kan thirdeng Thomas Walford-a pawhin a pui hreh hauh lo vang che u; pa ṭha zet mai a nia,” a lo ti a.

Maverick-a chu ka ngei hle mai! Dik tak chuan Diana-te chu an bulah awm se, hmun danga an awm ai chuan an him zâwk ngei ngei ang a; lo ṭawng ve lo se Diana khan ka sawmna kha a pawm mai lo'ng maw? Ka â thei ṭhin mang e aw!

Yance-a chuan mi lo melh reng niin! Eng dang sawi lova ka ngawi thei chu ka vannei hle a ni.

Diana chuan ka sawi leh tur ngaichang ni àwm tak hian mi rawn melh zauh a; mahse, sawi belh tur ka hre vak lo. Shooting Creek lah a sawi tawh ang khan a hla hle a; lo kal duh ta pawh ni se, an lawm zawng leh mamawh thil ṭha hlui tur kan nei dèr si lo.

Ka sawi tur hre lo lutuk chuan, “Indies-ah chuan ka va kal ang a, nula pawh chu ka va zawng chhuak ang a; engtin emaw chuan hêng kan mi sualho man chhuah theihna tur finfiahna chu ka rawn hawn mai ang,” ka ti ta ngawt a.

Chumi ka sawi lai tak chuan Henry-a chu kawngkaah chuan a rawn lut ve chiah a, “I rem tih chuan ka lo kal ve ang e,” a rawn ti a.

“Sal ni lo, mi hang tan chuan chu lai hmun chu kalna chi a ni ve lo,” ka ti a. Ka rilru tak chuan a inpêkna chu lawmawm ka ti hle a ni.

“Sal ni lo, mi hang chu an tam alawm, Jamaica-ah phei chuan sang tam tak an awm asin. Ani pawh hi i bula a awm chuan a ngaihtuahawm hauh lo vang,” Blaxton-a chuan a lo ti ve vat a.

“A nih leh, nangmah mantute khan lo hmu che sela...?”

Henry-a chuan, “Min hlau tawh zâwk ang. Ashanti chu tu ma'n min zuam hlei nem,” a lo ti ve hmiah a.

“Chuti a nih chuan kan kal dun ngei ang,” ka ti ta a.

Diana chuan, “Chu lam pan tur lawng chu Pittingel-a ta lo chu a awm hlei nem,” a lo ti ve khauh a.

Maverick-a chuan, “Damariscove in pan chuan, chuanna tur lawng chu in va hmu mai ang, sumdawng tur leh tui chawi tur chu laiah chuan an kal ve fo alawm,” a lo ti ve a.

“Eng vanga i hmeichhe la hmuh ngai hleih loh va zawn chu chuti taka i phur viau le? Hmel ṭha viauin i ring em ni?” Diana chuan a lo ti ve leh a, a aw chu a vin lam lek lek a ni.

“Nang leh nangmah ang bawka ṭanpui ngaite tan a nia ka tih ni. He thil ṭha lo hi a bul aṭanga tih rem vat a ṭul a ni,” ka lo ti thung a.

“Pa tlawm ngai thei tak i nih chu!” ti el aw deuh tak hian a’n ti leh kher a.

Thinrim deuh taka chhan tum chuan ka'n ang zuau a; mahse, ka ngawihsan ta a; chu chuan a ti thinrim zual mahin ka hria.

“Hêng thil hi ti turin ka la ngen lo che a, ka ngen ngai bawk lo vang che. I thil tum hi a âtthlak hle a ni; i la hriat ngai hauh loh mi sual bâk hmelhriat tur awm lohnaah i kal dawn a nia...,” a ti ta zel a.

Chutah, inherin ka mit taka en ran chungin Diana bawk chuan, “I tum ang taka kal tur hian Joseph Pittingel-a leh Max Bauer-a chuan an rem ti ang em? He thu an hriat rual hian thah ngei che tumin an veh nghal ang che. Hetiang tih ai chuan in khaw lamah haw la, i thlai chinte pawh chu va enkawl zâwk la i tan a ṭha zâwk ang,” a han ti hmak hmak a.

A aw aṭang chuan ka ngaih dan te chu min ṭawmpui lovin, a ten hian a ten a ni tih a lang mai a. Ka thin a ti rimin, tum ruhna min siamsak sauh zâwk a, “I awm awmin lo awm mai la, ka kal dawn ka tih chuan ka thu a ni,” ka ti ve ta ngat a.

Eng mah sawi tawh lovin ka ding ta uaih a; Maverick-a chuan nui hmel deuh hian a kuaitê chu a bih vung vung a, Rev. Blaxton-a pawh nuihza insum tak hian a awm a, Yance-a phei chu nuihza tak a ni. Hetiang mi lâk tlâk lohho bulah hian ka awm reng peih hrep lo ve – Yance-a pawh tiamin!

Kawngkhar lam pan pah chuan, “Henry, naktukah ngei Damariscove pan chuan aw, lawng pawh kan hmu thei mai ang,” ka ti a.

Diana chu eng mah sawi lo chuan a chhuak ta daih a.

Pawn boruak chu a vâwtin, tuipui aṭanga thli lo tleh chuan chhum a rawn chhem chho a, khua pawh a thim khuih a. Tuipui lam ka thlir chuan tun hmaa ka pa'n tuipui lam chanchin min hrilh te chu ka hre chhuak a; lawnga inbeihna râpthlak tak leh tuipuia pil bo tâte ka hre chhuak uai uai a.

Hla takah ka kal dawn a, engtia rei nge ka thang ang? Dam takin ka kir leh ang em tih te chu ka ngaihtuah nauh nauh a. Tuipui ral ram hla tak tak leh hmun mak leh ropui — Shanghai, Gorontalo, Rangoon, Chittagong leh Zanzibar tih ang rengte chu ka suangtuahna mitin ka hmu fo ṭhin a.

Chûng ram hla takte chu ka lo mangphan fo ṭhin a; mahse ka chenna hmun, tlang dumpawl ruih tluk chuan khawi hmun mah hi ka thlahlel lo. Mahse, he thil duhawm lo tak, sala sumdawnna hi ka tih tawp phawt a ṭul a ni.

Ka rilru chuan Noelle ka hre reng a, ṭanpuitu nei lovin mi sualte kutah tang ve ta se, engtiang takin awm ang i maw? Ka laina hnaivaite chungah chhe tê pawhin kut lo thlak teh vaih se, thi tawh hnu tho leh an sawi ang maiin sual rawng bawltute lakah hian chemsen ka lek ve ngei ang.

Chhum chu a rawn zing chhah ta mup a, ka hmai te chu a vâwt thlur a. Ka hma lawkah chuan kulh hungna pal chu a lo lang ta a, gate chu ka pan dîng nghal a.

Thim zingah chuan mi pakhat hi a lo ding a, “Tom-a ka ni. Zanin hi ka gate ven zan a ni a; ṭanpui theihna che ka nei em?” a lo ti vat a.

“Pawna chhuah Iawk ka duh a,” ka ti ve nghal a.

Ani chuan, “Kei chu tun ang hunah ka chhuak hauh lo vang. Zanah hian thil duhawm lo tak tak a inlar fo a nia, moccasin bun chunga kal thawm ni àwm tak te pawh ka hre fo asin. He hung chhungah hian awm hle hle la, palte hi a rinawm tâwk bawk a, lawm hle ta che,” a han ti a.

“I ti dik e. Tuipui ral hla tak pan tur ka ni a, chawlh hahdam pawh ka mamawh viau a, ka rei lo vang,” ka ti a.

Tom-a chuan, “Mut an duh thuai ang. Tunlai chu kan pu hi a meng rei ngai lo va; Reverend (Pastor) awm tâk hnu hi chuan zu ina rei tak tak men chu an bansan tawh bâkah thawh tur kan ngah a, mut hahdam kan mamawh tlang a ni,” a ti leh a.

“Indian-te nen in inti buai ngai em?” ka'n ti leh a.

“Kan intih buai lohna hi a rei tawh khawp mai. Thil te tham tê te min rûksak ṭhin bâk chu min ti buai ngai lo. An thil neih ngai loh tam tak kan nei a, chumi hmuh duh vang hrim hrim leh en chian châk vang tein an lo kal a, an ru ṭhin. Keini angin thil roh hlur chi an ni ve lem lo va; chu vang chuan thil lâk mai an ching pawh hi a àwm viau mai,” a ti ta a.

“A dik chiah,” ka lo ti a.

A hnu deuha ina ka va luh leh chuan ka mutna tur chu thuk bul chhuatah hian an lo siam a; mahse, kei chuan ka hnûk sawn ta a. Hmun lum nuam lutuka mut chu ka duh lo; vâwt deuh se, ka mu te pawh ka harhvang zâwk a, thawm ri hlek pawh ka hre hma bik a ni.

Mi dangte chu an muhil vek tawh niin a lang; ka pheikhawk rawngsang bun lai chu ka phelh a, ka pistol te chu a mu thun a fuh em tih ka en leh tê te a, ka mu ve ta chauh a.

Mu chung chuan in chung liang hrawl fe mai chu ka thlir a, lndies lama kal chu ka tum nghet tawh a; mahse, ka rilru chu a nuam thei tlat lo mai. A chhan pawh, ka va kalna tur hi ka tan mikhualna ram, hmelhriat ka neih miah lohna a nih bâkah an nun dan phung ka hriat hauh lohna hmun a ni tlat a ni.

Zanah chuan ruah a sur a; ka rilru-ah chuan Max Bauer-a a lo lang zawk a, a hote nen chuan tunah hian khawiah tak awm ang maw? Tunah chuan ka him viau a; mahse, Diana thu sawi kha a dik thei viau tlat bawk. Ka thil tum hi an hriat vaih chuan min zawng ngei ang.

Chutiang chu ni mah sela, he sumdawnna bawlhhlawh tak hi tih tawp a ngai miau si a; a nih loh chuan, tu hmeichhia mah hi lungmuangin an pawnchhuak ngam tawh lo vang.

He ka thil tum hi tuipuia vah chhuah ka châkna, keimaha inphum ru tlat leh min thlahtute aṭanga ka rochunin min tur vang a ni thei ang em? Nula bo zawn chu ka chhuanlam mai a ni zâwk lo maw? Mahni inhriat chian pawh a har mang e!

Ka pain, “Khawiah pawh mihring chennaah tawh phawt chuan dàn leh dùn a awm zel tur a ni. Dàn leh dùn a awm loh chuan mihringin a hlutna a hloh tial tial ṭhin a, a tawpah sakawlh ang chauhvin an khawsa mai ṭhin. Keini, ram thar bawhtute chenna, ram reh leh pilrilah hi chuan dàn leh hrai kan la nei lo nâin thu pêk eng emaw tal chu kan zawm ve a ṭul tho mai. Sualna chu kan dan a, thil sual titu chu kan hrem zel a ngai a ni...,” tia a sawi ka hriat reng ṭhin chu ka ngaihtuah zui a.

Tu mahin ka unaupa vengtu-ah min ruat lo; mahse, sual chu dangtu tur an awm loh chuan ka dang mai tur a ni. Hêng mi sualte hian ka mi ngainat takte an sawisa a ni; chutiang ngaihtuah chung chuan ka lo muhil ve ta a.

Zingah pawh tuipui lam aṭanga thli a la tleh avangin boruak chu a la vâwt hle a. Yance-a nen chuan pawn khaw vawtah chuan kan va chhuak a.

Kei chuan, “Yance, ka thlaite hi chu lungkham duh suh; savate leh thehleite’n min sengsak mai dawn alawm. Ka ṭhiante hnenah khan ka kalna tur hmun hrilh la, nipui a lo thlen leh hunah chuan an zingah ka khawsa leh mai dawn a ni,” ka ti a.

“Kin, fimkhur hle ang che. An rorum hlawm teh mai a nia.”

“Ka hria alawm, ka va fimkhur hle ngei ang.”

“Khawi lam nge i pan hmasak ang?”

“Jamaica-ah, lawng mite lo kalna lam ka zawt fiah hmasa phawt ang. Ṭhenkhat chuan tuipuiah hian thuruk tam tak hmuh chhuah tur awmin an ring ṭhin a, kei chuan ka ring ve lem lo. Damariscove-ah lawng ka zawng ang a, hman ka dil nghal mai ang.”

“Kin, John Tilly-a kha i la hre reng em? Pike-a pawh kha? Tunah hian Indies ram bialah kan nu hming chawia sumdawnna, ‘Ihc Abigail’ tih an din mek a; England rama kan nu rawn phurtu lawng, ‘The Eagle’ tih hming puin Indies ram bialah tho hian sumdawnna an din bawk a lawm.”

“Aw, ka la hre reng e.”

Henry-a chu kawngkaah a lo dak a, “Tunah kan kal mai dawn em ni ang? Ka inpeih reng tawh a nia,” a rawn ti a.

“Kei pawh ka inpeih e. Yance, dam takin le. Ka lo kir leh hma chu engkim hi i lo enkawl vek dawn nia. Sa pel turin kal chhuak rih lo la, hun eng emaw chen chu Temperance hi lo hlat hauh suh ang che.”

Chutih lai chuan aw hian, “Thu rawn i pe a ni maw? Nangma tana thu rawn inpek nachang i hre ve êm ang chu maw?” a rawn ti a.

Chu thu rawn sawitu chu Diana-i a ni a, gate pawn lamah a lo ding reng tawh a. Ka va melh zawk a, a chhan pawh hre thiam chuang lovin ka ban ka phar chhuak a, “Ka lo kir leh ngei ang,” ka ti ta a.

Chiang taka min melh deuh kâwk pah chuan, “Chiah maw, I lo kir leh chiah ang maw? A nih tunah hian eng nge i tih tur tak ni ta le? Mawh, eng nge?” a ti a.

Kei chuan, “He thil ṭha lo tak hi ka ti tawp dawn a ni,” ka ti a.

Hlauthawng takin a kut hmawr chuan mi rawn dek a, rang takin a inher a.

He nula hi engin nge lo mawlh fahran ni ang le?

A lo hawi let a, “Kal rawh, tunah kal nghal rawh,” a ti ta a.

**************************

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 22nd, 2019, 7:32 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 9
(Rozami Pachuau)

Tuipui cham dup chungah chuan kan che chhuak a, lawng kar fung invai thawm leh lawngin tui a sut fawn phe neuh neuh bak chu thawm hriat tur a awm lo. Chhum lei vak chhah zet chuan min bawh chuk mai a.

Kan hma lam khawi laiah emaw chuan thliarkar a awm a; thliarkar zau lo tak, sei tak si, thing tam tak awmna a ni a. Chutah chuan lawng chawlhna, Damariscove an tih chu a awm a, Captain Dammerill-a chu chu hmuna inbengbel hmasa ber niin an sawi ṭhin a ni.

Chu thu ka'n sawi chhuah chuan kan lawng hman neitu, sangha mantu chuan a dar a chhin uk a, “Nia, an sawi ang pawh chu a ni mahna; mahse, tun hma lam daih, he thliarkar hlimthla tak ngial pawh a hmuh hma khan mi ṭhenkhatte'n he tuipui kam hi rawn hrutin, an sanghate an rawn pho ro tawh ṭhin a ni,” a lo ti a.

Ka pa ngei pawh khan chumi chungchang chu min hrilh tawh tak e. Grand banks aṭanga lo kal, sangha mantu ṭhenkhatte'n Europe lama an haw leh hmain he hmun hi an tlawh fo va, mei te chhemin an sangha man sate an rep ro ṭhin a ni.

Chumi thu ka'n sawi leh lai chuan mak tih hmel tak hian mi han en leh a, “I pa chuan hming a nei em?” a lo ti leh a.

“Nei e, Barnabas Sackett a nia....”

A tep hluk a, “Amah chu ka hria alawm. Amah ang kha an vang teh asin! An vang tak zet! Fing thiam zet, mize hriam hreih hrawih leh thahrui nei deuh a nih kha! Keini New Foundland aṭanga lo kalte zingah a hming hi a lar pherh erh a, amah kha tute pawhin kan ngaina vek alawm — chutiang mi chu a ni e,” a ti ta a.

Ka kalna tur lam chu a han thlek zawk a, chumi pah chuan, “Amah aiin ropui zawk daih tawh mah la, i la ngaina viau ṭhin ngei ang. A nih leh chutih lai chuan Tilly leh Pike i hre ngai em? A ṭhiante an ni a; tuna i kalna tur tuipui hi an awm mekna niin a lang a, i vannei dawn a nih chu. Chu thliarkarah chuan tunah an lawng a awm mek emaw, a lo awm daih tawh emaw pawh a ni maithei,” a ti ta a.

“John Tilly-a lawng maw i sawi chu?”

“Aw ni e, a hming chu Tiled Abigail a ni. Lawng lian tak a ni lem lo nang a, tuipuia kal vel nan chuan duh thu sam a ni. Tui chunga sahmul phurh kual vel nan leh sumdawn nan an hmang ṭhin alawm.”

Ka pa lawng hlui chu tunah lawng chawlhnaah chuan a awm mek a nih chiah chu! Vawi leh khatah ka hmanhmawh thar ta thut a, lawng kar fungte chu an invai muang ta riau hian ka hria a, ka dawh theihnain a tlin lo ṭep a ni.

Ka inthlah dul a, ka chawl a, Damariscove kan thlen hun tur nghah pah chuan ka ngaihtuahna a vak vel a. Ka vanneih chuan ka tawng ngei ang - tawng ngei turin zawi têin chhia ka chham mawlh mawlh a. Kan thlen hmain lawng chu a lo kal bo leh hman daih pawh a ni thei si a. Eng vangin nge chu chu a hma khan ka lo hriat reng reng loh le?

Kan hmanhmawhzia hre ve ang hrimin tuipui thli fim a lo tleh a, chhum te chu chhem kiangin kan lawng puanzar a'n chhem chuan a kal chak ta sauh a; chu aia chak chu la ni se...!

Henry-a lah chuan ka hmanhmawh lutuk chu mi lo nuih ruh ruh a, “Lawng dang pawh an awm tho ang chu,” a lo ti a.

“An awm ngei ang; mahse, tuna kan lawng sawi kher hi chu ka tan lawng danglam bik a tling a ni. He lawnga chuang tur hi chuan insen fe pawh ka huam ang; tu pawh lawng captain chu lo ni tawh mah se a pawi ka ti lo,” ka ti a.

Thli pawh tlemin a chak ta deuh a, chhunlai chu a la ni chiah lo va, Darmariscove pawh a la hla phian a ni. Tuipui sava hi kan chung lawkah chuan a rawn thlawk hniam a, chu chuan phurna namen lo hi min siam teh tlat a.

Tuipui — tuifinriatah ngei ka awm ve ta! Vawi eng zat nge tuipuia inbeihna chanchin te ka lo ngaihthlak ve tawh? Lawng suam hmang rawva tak tak an sawi te pawh ka lo hre fo tawh bawk.

Ka pain lawng suam hmang a lo sawi tawh zinga pakhat chu Nick Bardie-a a ni. Vawi khat chu Yance-a nen a lawngah a rûk têa lawn kaiin a laipui kan tih chhiatsak tawh nghe nghe a, chutianga kan va che chu ka pa pawh a lawm hle a ni. He pa hi mi sual tak, ka pa haw êm êmtu a ni bawk.

Lawnglengah chuan ka lo muthlu a, ka han ṭhanharh leh meuh chuan khua a lo thim tawh a. Kan hma lam hla feah chuan êng de ve ve hi ka va hmu thei a, thliarkar chu a ni ngei ang, “Kan thleng dawn tawh em?” tiin lawng pu chu ka han zawt hluai a.

Ani chuan, “Khawmualah sawn ka va dah ang che u,” a ti teh daih a.

“Khawmual va rap kher lo pawhin, Abigail a awm hnai a nih chuan chutah chuan min va dah mai rawh,” ka ti a.

Ani chuan, “Zan thimah hian maw? Saw lawnga mite saw inring renga awm an ni a, cho thinrim harsa lo tak an ni. Va pawngpaw nel mai chi an ni hauh lo asin, an hmelhriat sa i nih loh phei chuan.... Mahse, an awm hnai bawk a, ka va hruai thleng hrim hrim ang che u,” a ti ta a.

Lawng aṭanga êng lo chhuak chuan lawng bul vel te chu a chhun eng pup a, thirchakai thlunna thir khaidiat te pawh a lang chiang tawh hle a.

Lawng kan va hnaih ta hle tih chuan lawng atangin mi pakhat hian, “Rawn hnai tawh suh u; kal sawn vat rawh u!” a rawn ti ṭeng ta chhak mai a.

“John Tilly-a a awm em? A awm chuan ka be duh khawp a,” ka'n ti dêk dêk a.

Ani chuan rang deuhvin, “Lawng captain maw i biak duh? Tu nge i hming? Tikhan lo awm rawh, lo hnai tawh suh!” a rawn ti zui nghal zat a.

“Ka hming chu Sackett a ni a, in hming hriat fo tawh a nih pawh ka beisei,” tluangtlam tak hian ka'n ti lo ve mai a.

Lawng vengtupa chuan, “Sackett â ni? Uai!” mak ti hmel tak hian a han ti a, a aw pawh chu a nem ta deuh a, “Joel, captain kha han ko teh, hetah Sackett-a a awm tih han hrilh tel nghal bawk la,” a ti ta lung lung a.

Lawng kawngkhar chu a ri ṭuah ṭuah a, mi pakhat hi khawnvar khaiin a lo chhuak ta a. Aw ring fe, ka lo hriat fo tawh ngei hian, “Sackett; nang i nia law, Barnabas,” a rawn ti ta a.

Kei chuan, “Kin; Kin Sackett, a fapa upa ber zawk ka nia; Indies lam i pan tâkah tiin i lawnga chuan ve ka han dil che a nih hi,” ka lo ti ve vat a.

“E, lo chuang kai ve ngei teh, Tlangval!” tiin chu pa chuan nelawm tak hian min sawm zui ta hlauh a.

Leihlawn an rawn thlak thla a, Henry-a nen chuan kan inzui chho ta nghal a. Kan bungraw neih chhunte chu kengin, kan Iawngleng pu chu kan kalsan ta a.

Tilly-a chu pa tawrawt deuh mai hi a ni a; a sam pawh a ṭuak var vo tawh a, a hmui hmul chu a chep rual nalh kher mai! “E khai! Tlangval, ka hmu che chu ka lawm hle mai. Ka ṭhian hlui, i pa chu eng nge a an zel, a dam em?” a ti ta zung zung a.

Kei chuan, “Ani zawng mual a liam ta! Indian-hovin an that ta a ni; Tom Watkin-a nen an ni a, pasalṭha takin an thi ta a ni,” tiin thil awmzia ka hrilh ta a.

“Chutiang tak chuan a kal ngei ang...,” a han ngawi deuh vung vung a, “Chu, a lo thi ta chu a ni a; a awihawm lo lek lek alawm le,” a han ti leh a.

“Ka nu chu England-ah a awm; NoelIe leh Brian-ate lehkha zirna tur ngaihtuah turin a chho ta a ni,” ka'n ti ve leh a.

Tilly-a chuan, “Chu chu ka hria; hmanni lawk khan London-ah ka hmu nghe nghe,” a lo ti a.

“I hmu maw? An dam em?” ka lo ti thuai a.

“Hmu e. Thames luiah lawng dah meuhin anni chu ka han zawng chhuak alawm. I unaupa Brian-a chu a pa lianin a hmel lah a ṭha, lehkha a thiam si. In farnu Noelle-i phei chu; Kin, i nu ang maia duhawm leh hmelṭha a ni; han puitling deuh phei se chu tun ai hian a la ṭha lehzual dawn a ni,” a ti ta luam a.

Chutah, “Brian-a chu dàn lam zir a ni a; chu lo pawh chu thil buaipui a nei — khi lama in ram neih chungchangah buaina a awm mek a ni. I pain England a chhuahsan dawna a ram enkawl tura a tih Wiliam-a, mi rinawm zet kha a thi tawh a; tichuan, a tupa sual zet mai chuan a ro a khawm ta si a, in ramte chu a chuh ta zel ni àwm tak a ni. Mahse, Brian-a a awm hlauh chu in tan vanneihna a ni alawm,” a ti ta zel a.

“Brian-a chuan thil tih dan kawng a dap chhuak mai ang; ṭanpui a ngaih leh kan che ve mai ang a,” ka lo ti ve a.

“Ṭanpuina chu a mamawh teh meuh ang; mahse, ṭanpui tur chuan sorkar-a thil ti thei tak ṭhian ṭha a ni a mamawh,” Tilly-a chuan a ti ta zel a.

Lawng chhuatah chuan kan inzui phei a, ama pindan bikah chuan min hruai lut ta a. Coffee no dawmin zen rei tak thleng kan titi a; a tawpah chuan chu laia ka kal chhan te chu ka hrilh ta a.

Ka thil tih tum ka'n hrilh chuan mak ti àwm pawhin a lang lem lo va, “Hmeichhe pakhat va zawng chhuak turin maw!? Thil tih theih a ni dawn em ni? Mahse, Sackett i nih chuan a tih dan a awm mahna! I pa pawh kha thil tih lai hlen hmaa tawpsan mai mai mi a ni ve lo tlat a; kei pawh hian puih theihna che ka neih chuan ka pui ngei ang che,” a ti ve ta a.

“Tuipui hrul lawng chawlhna hmun velah te hian thu a thang nasain Pittingel-a leh Max Bauer-ate chanchin pawh hriat theih mai ka inbeisei a ni. Hmeichhia pawh chu an hralh a nih vek chuan hmun fianrial leh fal deuh, huan zau pui pui neiho hnenah ngei an hralh ang a, zawn chhuah harsa lutuk a ni lo vang,” Tilly-a chuan a han ti leh a.

“Hetiang thu thang dangdai deuh hi hriat i tum a nih chuan Port Royal pan mai la a ṭha ber ang; mi chi tin chi tang awmna a ni a, an lo hre viau che pawhin ka ring,” a'n tih zawm zat a.

“Min lo hriat theih i ring a maw?” ka lo ti ha a.

“Hre teh reng ang. Sackett hming hi chu i pa khan a ti lar hneh êm a, hre lo aram an awm lo vang. New Foundland bula mite hlauh êm êm, lawng suam hmang Duval-a a sawisak dan te kha i hre ve em? Khatiang rap rapa che mi kha an ngaih san a ni a; I pa mizia chiah a lo ni bawk si a, hmingthang tak a ni,” a ti ta zel a.

Chutah Henry-a chu a han thlek a, “Ani hi sal elo?” a han ti deuh hlut a.

“Ni lo ve, ka ṭhian tha a nih hi. Min ṭanpui turin amah a inpe a ni; Ashanti hnam a nih hi,” ka lo ti a.

“Ashanti-ho chu ka hria asin, in va kalna turah pawh an awm nual ang. Tlang ram hmun, Cockpit Country an tih velah an khawsa deuh ber a, a fing deuhte chuan an va ti buai ngai lo. Jamaica leh a chheh velah chuan, 'Maroons' tiin an sawi ṭhin,” Tilly-a chuan a han ti leh a.

Henry-a chuan, “Min lo lawm viau ang. Ka chipuite zingah chuan lal ka lo ni tawh ṭhin a ni,” a lo ti a.

John Tilly-a chuan, “He lai hmun hi Africa ram aṭang chuan a hla hle si a; Africa aṭanga an lo kalna a rei tawh hlawm si nen, an hre dawn che em ni?” a han ti ve thung a.

Henry-a chuan, “Min la hria ang; min lo hre lo a nih pawhih ka inhriattir mai ang,” a lo ti awlsam mai a.

Tuifinriat thli fim chuan chak takin Jamaica panin min beng zel a; kan chuanna lawng, ka nu hming chawia an sak, 'Abigail' chu lawng chak tak a la ni reng a.

Lawnga rei tak kan khawsak hma chuan lawnga hna thawh dan leh zeizia te chu ka man ve mai a, hruizen deh dan leh lawng khalh thlengin ka ti thei ve ta mai a.

Zan tin mai chuan lawng hna thawk, tu emaw tal chu ka titipui a, Pittingel-a leh Max Bauer-ate chanchin chu hriat tumin ka kawm ta ziah a.

Chutianga zan tam ka tih tâkah chuan he mite mizia tur àwm ang te chu ka hre ta hle a. Ka mi hmachhawn tur hi fing leh hlauhawm tak, hmun tin maia ṭhian nei zul mai, tun hmaa ka lo ngaih ang ngawt aia hlauhawm zawk mah a nih thu te chu ka hriat belh ta zel a.

Ka fimkhur hle a ngai dawn a, mana hrem zui vak emaw khai hlum emaw ka hmabak tur a ni mai ang. Amah hre tur àwma ka ngaihte pawh chuan sal mana sumdawng ṭhin a nih chu an hre miah lo va, a fin dan êm êm chu mak ka ti ta hle a. Hei hian a chêt fimkhur ṭhinzia chu a ti lang chiang a ni.

Mahse, a sumdawnna chu lo hre tâwk zawng an awm ve zauh tho a; hei hian a mizia chu a ti lang chiang hleah ka ngai. Pittingel-a hi fing vervek tak, inthup thiam tak, mi zahawm tak anga awm thiam, mi thil ti thei leh sumdawng hausa takte laka a lan dan leh hmuhsitawm takte laka a lan dan chu dang tak a ni.

John Tilly-a pawh chuan kan titi chu a lo ngaithla ngun thei hle a, zawhna te pawh zawt vein kan bulah chuan a ṭhu ve reng ṭhin a.

“I thil tih tum hi thil awlai lo tak a niin, i hmelmate'n an lo hriat vaih chuan thah ngei ngei che tumin an veh dawn che a ni tih ringhlel hauh suh ang che,” zawi deuh raih hian a lo ti a.

Kei chuan, “Tuna nula bote din hmuna ding tura ka farnu Noelle ka han dah chhin mai pawh hian, hei hi chu ti lo thei niin ka inhre lo tlat a ni,” ka han ti a.

“A dik khawp mai, hêng kan nula bo khawngaihthlak takte hian chhantu an ngai hle tak mai. He i thil tih tum hi chu tih ngei chi a nih hi. A hmasa berin nula chu va zawng chhuak phawt mai teh.

“Henry-a pawh hian a pui thei ngei tak ang che chu! Mi hang sal an tam a, chûngho zingah chuan kalin thil tam tak a va hriatsak thei ngei ang che. A chipui, Maroon-ho pawhin thil lo tihsak chu an phur viau ngei ang; nang chu va kal pawh ni la, an lo uksak vak lo vang che,” a ti ta a.

Tuipuiah chuan lawng tam tak kan hmuin kan kal pel hlawm a; mahse, hla takah an ni vek a; hnai takah, chiang taka hmuh theih tur chuan an awm duh der lo. Lawng suam tih te a tam avangin an fimkhur ve pawh a ni ang e.

Tuifinriat thliin min han chhem tak tak zet chuan hmui te hi han liak ila, a al lup mai! Lawng chhungah tawm mai lovin chung lam chhuatah chuan ka khawsa deuh ber a, lawng han lei bur bur ṭhin leh thliin a han nam her leh lawih lawih ṭhin te chu ngaiah ka neih ve tawh a. A chang leh ruah a sur leh vak ṭhin a, tunah chuan tuipuia chetla ṭhangte'n nuam an tih viauna chhan te chu hre ve tain ka inhria a ni.

Tuipui hian thil tih theihna leh chakna a nei a; tui han fawn so bulh bulh te chuan chakna thahrui namen lo a nei tlat a, hêngte hi sanghate tuallai, an khawvel chu a ni.

Captain Tilly-a chuan tuipui nihphung chu a hre hnehin thli thawt dan te chu a hre chipchiar hle mai a; chûng a hriatnate chu chhawrin lawng chu chhim lam panin chak takin a khalh kal a, keimahni awmna, Carolina tuipui kan kal pelh lai reng ka hre hman lo.

Khua pawh a lum sâwt ta hle a, kawr phelhin lawngah chuan hna kan thawk ta fo a, kan vun te pawh a sen uk kharh tawh mai.

Jamaica chu thliarkar sei tak, kan awmna thliarkar ai maha hring nalh zawk a ni. Tuipui kam hrulah zel kalin khawmual kan hlat lo hle a, Pallisadoes an tih mai, thliarkar te reuh tê inzawm sei tak; thing kung, ṭâwi Iuiha dinna hmun ni si, ralkhat aṭanga han thlira pal bang ni àwm taka lang te chu kan hmu a.

Little Plumb Point lam tin zawnin chumi leh Gun Key thliarkarah chuan kan lut tlang a, tuipui litengsawl, thlipui laka him ṭha fahran mai kan thleng ta a. Chu litengsawl kamah chuan khaw lian ve tak mai hi ka va hmu ta a, Captain Tilly-a chu ka bulah rawn dingin kan hmaa khua chu kan thlir dun a.

Hetiang taka khaw lian leh in tamna hi ka la hmu ngai lo va, tuipui kam maiah te chuan in tam tak awmin dawr leh zu zawrhna hmunte pawh a tam mai a. Lawng chawlhnaah lah chuan a tlem berah lawng sawmhnih vel chu tunah pawh awm ngeiin ka hmu a, a aiin an tam mah pawh a ni mahna! Jamestown aia khaw lian ka la hmu ngai lo va; Jamestown te lek lek chu he lai veng pakhat tiat lek a ni ta ve ang.

“Tu mah hi ring lutuk lo la, mi bum hmang an tam teh a nia! I thil neih hlu zawng zawng an laksak che ang a, an huat zawng sawi zeuh la, thah hial che an duh mai ang.

“He khua, Port Royal hi khawvela suahsualna khurpui bera ngaih a ni a, khawthlang lam Babulon ni àwm hial a ni. Pirates, lawng suam hmangho leh an phung bawm deuh hlir an nih saw. He khuaah zet hi chuan lunghlu leh rangkachak chu a tam teh a nia, London-a i hmuh lêt zet a awm ang,” Tilly-a chuan a ti a.

Kan chuanna lawng thirchakai te chu thlakin, lawnglengin khua chu kan pan ta a. Kan chhuk tur chu Tilly-a chuan min han au zui a, “Puan ṭhui dawr pan hmasa ber rawh, Kin Sackett; chuti lo zawng, i savun kawr hak te khan mi mit a la lutuk ang a, a ṭha hauh lo vang,” a ti leh a.

Kei chuan, “Chutiangin thawmhnaw leina tur sum ka keng hlei nem. Shooting Creek-ah chuan rangkachak dah ṭhat tlem azawng chu ka nei ngei a; mahse, chûngte chu rawn ken nachang ka hre hauh bawk si lo,” tiin ka chhang a.

Tilly-a chuan, “Chutiang lamah chuan buai hlek suh, i sum vawngtu-ah ka ṭang ang e. He lawng hi i pa duhsaknaa ka dawn liau liau a ni a, nangin sum i mamawh chuan ka pui thei ngei ang che. He laiah chuan pawisa lovin eng mah a tih theih loh. An ngaih san ber chu — pawisa, mi fing, mi huaisen leh chak chauh a ni. Inphiar ru reng renga khawsa tih takah mi chak an zah hle a ni,” a ti ta a.

Chutah, mi han thlek leh zawk a, “Ngunhnam i hmang thiam em? I kâwngah khan pistol chauh ni lovin hêngte hi pai tel ta che,” tih pahin ngunhnam hriam ṭha zet leh chemtê lu zum nalh deuh mai hi min pe ta a.

A thil min pêk chu lak pahin, “Hetiang hi ka naupan lai chuan ka hmang chhin tawh a; ka pa kha ngunhnam vai thiam a ni a, chutiang bawkin Jeremy-a leh Sakim-a kha hriamhrei hman dan te a zirtir fo va; mahse, a taka insualnaah chuan ngunhnam hi ka la lek ngai miah lo,” ka ti a.

Chutah, “Chemtê erawh hi chu Indian lakah ka lo lek ve fo tawh a; kum tin mai hian Indian-ho nena buai laih hi kan nei ziah ṭhin a,” ka han tih zawm leh a.

“Indian-hovin an rawn beih thu chu ka lo hre ve a,” Tilly-a chuan a ti a. Min han en a, lu thing meuh hian, “I pa lo thi ta mai chu awih a har hle mai! Mi chak, fing leh insual thiam êm êm mai a ni a, kumkhuaa dam tur ni hial àwm asin maw le,” a ti ta hlut a.

Kei pawh Tilly-a ngaih dan ang chiah hi ka lo ngaih dan ṭhin a ni. Sek phiar fut mai, ral rel thiam si, hriamhrei chi tin hmang thei vek a ni a; ka pu hi sipai a niin a themthiam hle bawk a, ka pa pawh hian a chhun a ni ngei ang.

Tilly-a chuan, “He khua hi ramhnuai ngaw dur khup ang mai a ni a, a mi chengte saw a hmei a pain ram sakawlh ang mai an ni. Port Royal hi mi ṭha pangngai leh mi derdep tan chuan awmna chi pawh a ni lo. Chhun zan zawmin inthahna a awm deuh reng a; an thil buaipui ber chu khi lam, Zoram lamah pawh an buaipui em em zu bawk a ni; fimkhur hle ang che,” tiin mi zilh zui hlak a.

Captain Tilly-a hi lawng hotu ni satliah mai lovin kohhran upa nem ngheh ngat tawh a ni tih hi an sawi ka hre tawh a; ani hi ka nu leh pate inneihtirtu a ni nghe nghe. Tuna Port Royal chungchang a sawi zawng zawng pawh hi a dik ngei ang tih pawh ka ringhlel hauh lo, tun hmain he khaw mite rawva-zia an sawi hi ka hre tawh tlat a ni.

Lawnglengah chuan pali kan chuang a, khaw lam panin chak takin kan inkar zel a, rei lo têah vaukam kaina tura an thing dawhah chuan kan va chuang kai ta a. A bul lawkah chuan lawng mite chawlhna tur, in lian fe fe hi a awm a; lawng hna thawktu pakhat, rui zet mai, a lu-a rawmawl hreng, rangkachak bengbeh beh tle chuai mai hian pai tuang tuang chung hian min rawn kal pel a.

Tilly-a chuan a kut zungpuia kâwkin, “Kan chhak deuhah khian zu dawr, fai ṭha tak a awm a, dawr hming chu 'Bristol' a ni. Han kal ula; chuta kal tura ka tirh in nih thu te sawi ula, ei tur leh in tur han lam rawh u. Tin, lo nghak hlek ula, nangmah teh vel turin puan ṭhuitu ka rawn tir ang e,” tiin min hrilh ta a.

Henry-a chuan mi han en a, “Nangmaha awm i hreh lem loh chuan ka chipuite zawngin ka'n vak chhuak ang chu...?” a ti ta bawk a.

Khawpui kawng zim tê maiah chuan lawng mi hi a khah hian an khat hmur a; a ṭhen chu sumdawng satliah an ni a, a ṭhen chu suam hmang, ruk ru leh mi chi tin, mi chi tang an ni ber e.

Rilru nei deuh tan chuan sumdawnna ṭha tak tur niin ka hria a; hêng lai hmuna bungruate hi a tam zawk chu sumdawng lawng aṭanga rûk chhuah an niin a man pawh hmun dang zawng aia tlawm veka zawrh chhuah leh an ni. Hêng bungruate hi han lei khawm ila, hêng laia ti riral hauh lovin India hmarchhak kil vel lamahte han hralh vek mai ila chuan...!

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 23rd, 2019, 6:11 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 10
(Rozami Pachuau)

Bristol hotel chu ka va hmu thuai a; Tilly-a min chah ang ngei chuan ka han insawi a, pindan luah tur te chu ka la fel ta thuai a. Tui lum min rawn chhawpsak chuan ka inbual a, a nuam kher mai.

Ka inbual zo chauh tih chuan kawngkhar an rawn kik ta dawt dawt a, ka kekawr ha mawlh mawlh chung chuan ka chemtê ka hum a, ka va hawng ta a.

Pa hang, sa ṭha leh lawh, lu kawlh tal mai hi a lo ding a; a hnungah chuan mi hang, sal pakhat hi a ding bawk a. “Mister, ka lo lut thei ang em?” a rawn ti nghal a.

Ka chhanna pawh nghak chuang lo chuan a rawn pên lut nghal mai a, a sal pawh chuan a rawn zui ve zel a. A sal hnenah chuan, “Fimkhur tak khan han teh rawh khai,” thupui fun hmel fe hian a ti ta a.

Mi han en ha a; chutah, ka thawmhnaw inbel mek chu enin, “I hâk tur chu kan ṭhui zo thuai ang, kan rang teh a nia. Min pui tur hian mi chhawr lai sawmli zet ka nei a; chûng zingah chuan hmeichhia pawh an tel nual a, ka bâwihte vek an ni,” a han ti leh lar lar a.

A ṭawng dan aṭang reng chuan a bâwih neih chu a chapopui hle hian a hriat a. “Hmanhmawh taka lawng aṭanga khawmual rawn kai ka ni a, thawmhnaw pawh ka ngaihtuah hman lo a ni,” tiin ka thawmhnaw dangdai tak chu ka pha mar ve zung zung a.

Ani chuan ngaih sam hmel tak hian, “Chu zawng, Port Royal ziarang dik tak a nih chu.... Lawng mi lo thleng hlim, ṭawp zet zet pawh hi minute rei lo tê hnuah chuan mi hausa tawntaw an ni thut fo asin! Mi chi tin awmna tih takah mak tih êm êm pawh hi kan nei lo ve,” a ti ta daih a.

“A nih leh hmeichhiate ve thung hi, mi mal bâwih atan chuan an hralh ve ngai em?” ka han ti ve daih thung a.

Ani chuan, “Teh reng mai. Ṭhenkhat chu hmelṭha tak tak takte an ni a, an zinga ṭhenkhatte phei chu a tawpah din hmun ṭha tak takah an inhlang kai thei maw le. Amaherawhchu, a tam zawk chu an vanduai deuh a, hna hrehawm tak tak thawkin mi hnuaihnung ber berte angin an khawsa ṭhin,” a ti ta a.

Chutianga titi zat zat pah chuan a bawih-pâin min han teh vel zawnga ka len zawng (size) a sawi ang ang chu a lo ziak zel a. Min melh leh zauh ṭhin a, chutih lai chuan kawr ha lovin ka awm a. A tawpah chuan, “Kuttuma insual te hi i tuina zawng a ni em? Mi chak chungchuang i nih hmel hle si a?” a ti ta nge nge a.

Ka chhan lawk loh avang chuan thupha chawi aw fe hian, “I lawm loh zawng sawi ka tum hauh lo a nia. kuttum hmanga inbeihna hi he laiah chuan a lar viau a, pawisa inchawi nana remchang tak a lo ni vei nen.

“Kuttum hmang thiam tak kan hriat pakhat chu pa zahawm tak a ni a; a vanneihna lam a tluang chho ta reng lo va, a pawisa nei lovin inhnek lam a luh chilh ta a. Chu erawh chu a vanneihpui ta hle a, tunah chuan huan leh ram zau tak a nei duai tawh asin!” a ti ta a.

“Kuttuma inbeih hi chu ka tih ṭhan zawng a ni lem lo va; mahse, insualah hi chuan, 'Mi hrât khawkheng' tiin min sawi ve ṭhin,” ka han ti zet a.

Chutah, “He lai hmun ka rawn kalna chhan tak zawk chu Port Royal-ah hi chuan thil a to lo ber ang a, bungrua heti zozai zingah chuan lenkhabu, chanchin hlui lam chhuina bu leh tunlai finna lam ziah lanna bute pawh a awm ka beisei deuh asin,” ka han ti ve luam a.

“Kan awmna Virginia-ah naupangte tan zirna sikul din kan tum a, hêng lai hmuna bungraw thlen tamzia ka hriatin lehkhabu pawh hmuh ve theih ngei ka inbeisei ta a ni,” tiin ka phuah chawp belh ta duah a.

Mak tih hmel tak chuan mi han en a, “Port Royal-ah hian lehkabu zawng turin maw i lo kal a?” a ti ta ha a. A hmelah chuan min ringhlel a ni tih hai rual a ni lo.

Han din chhuah hluai pah chuan, “Port Royal-ah ber kher lehkhabu rawn zawn dawn tâk chu! Mi chi hrang hrang ka lo tawng tawh ṭhin a, hetiang lam hi ngaihven an la awm ngai lo va; a pawi ka ti hle mai Pu Sackett, ka hriat thiam zawng a ni hauh lo mai,” a ti ta a.

“Lo ngaihtuah buai vak duh suh; ka thil duh chi chu mi kawh hmuh theih tâkin ka ti mai a nia,” ka lo ti mai a.

Chîk taka min en chung chuan, “Captain Tilly-a khan tlangval fel leh hawihhawm tak niin a sawi si che a...,” a han ti leh hram a.

Kei chuan, “Ni teh reng e. Virginia lamah pawh hmun lo ram zawnga inbenbel tuma lut chho ka ni reng a; mahse, mahnia ramhnuai reh tak taka khawsak reng ai chuan huan leh ramte chu a thawktu nih aiin a neitu nih a hlawk zawk tih ka hriat tawh tlat avangin ram ṭha tak neiha mi dang enkawltir mai ka duh ta a ni. Chu bâkah, he nula...,” tiin sawi zo lo chuan ka ngawi ta daih a.

Ani chuan, “Nula i tia law? Ah! Ka hre thiam leh ta deuh e,” a ti ve leh ta a, a hmel pawh a nelawm leh ta deuh a.

Chutah kei chuan, “Ka'n hrilh fiah vek law law ang che. He nula 'Duhawmi' hian unaupa, thik thu chhe tak leh sek zet mai a nei a; kei aia tlangval ngo leh pawisa ngah hmel zawk, rimtu a nei ve reng bawk si nen; sikul te han din ila, han inti zahawm ve deuh ila, an inah pawh inthlahrung hauh lovin ka lutchhuak ve thei mahna ka ti deuh,” tiin dimdawina nei miah lo chuan ka han daw leh zung zung a.

Ani chuan, “Mawi lutuk! Chutiang taka i tih chuan i la hmin êm êm ang,” a ti ve ta hlut a, min phurpui hmel hle lehnghal a.

Chutah a han ding a, “Ngawi teh, i hâk tawk tur thawmhnaw ṭhui sa pawh ka nei maithei a nia,” a ti ta zel a.

“Engtin nge chutiang te i neih theih mai a?” ka lo ti a.

“Keini, puan ṭhuitute hi chuan hetiang thawmhnaw chuang hi kan kawl fo reng a ni. Thawmhnaw min rawn ṭhuitir zet a, thil ṭul thut avanga he lai hmun chhuahsan leh vat ngai, an thawmhnaw ṭhuitir pawh rawn ngaihven zui leh hman ta si lo hi an awm chawk a ni, chutiang chu ka ngah mai.

“I darpharh hi a hlaiin i kâwng a fek ṭha a; mahse, tlem han tih danglam hreta i hâk theih mai tur pawh a awm ang. I ta pual tur ka zawh hma chuan chu chu i lo ha mai dawn nia,” a ti a.

Chutah zawngin, “A remchan chuan kawr leh kekawr pathum ve ve ka duh ang. A rawng chu ka inhmeha i rin ang ang a ni leh mai; ka thlang ve hman si se lo,” ka ti ve ta a.

“I duh zawng tur chu thlang thiamin min ring a maw?” a han ti a.

“Teh reng mai. Han en mai pawhin mi duh uluk tak tur chi i ni tih ka hre mai, i thlan apiang chu ka duh ang. Chu bâkah, mi tlemna leh hmun reh tak aṭanga lo kal ka ni a, hêng laia mite thawmhnaw duh zawng leh uar chi lah ka hre ve phak hek lo,” tiin amah ngai sang àwm tak chuan ka han ti a.

“Thil pakhat leh chiah — thawmhnaw lar vet vut leh rang chiai chuai lam chu ka ngaina lo a nia,” ka'n ti leh a.

“Teh reng mai,” a lo ti vat a. Ka faknaah chuan a lawm hmel ve hle a, ka tan chuan a thlang uluk pawhin ka ring.

Ka rilru-a thil lo lut thut chu bawh zui vatin, “Hetiang hmun lun leh ri nuaih nuaih karah hi chuan sumdawnna lam leh lawng insuamsakna te, sal inman leh inbeihna lam tih loh chu titi dang a leng vak lo ang maw?

“Khawpui pawn lam; a bikin hmun kilkhawr deuha awm, huan neitute chanchin te in hre ve ngai em? Khawpui lam nun nen chuan an inchiahpiah lo hle ni àwmin ka lo hria a?” tiin pehhel takin ka zawt ta a.

Ka ṭawng fimkhur hle a; ka seilenna khawvelah chuan sâp ṭawng, Queen Elizabeth-i hun laia an hman ang chi lar hun lai a ni a, mite chuan ṭawng kau chheh an duh tuiin an ṭawng fimkhur êm êm ṭhin a ni.

Mahse, kan han ṭhang lian deuh a, kan pem kual nasain rem reh tak takah kan khawsa ṭhang ta deuh deuh a, kan ṭawng kau chheh te kan lo duh tui lo sawt hle mai a lo ni a; Yance-a nen lek phei chuan kan duh tui lo lehzual. Tunah mi zahawm tak tak — Captain John Tilly-ate ang zingah ka lo khawsa ta si a, ṭawngkam hman fimkhur a ngai ta hle mai.

Puan ṭhuitupa chuan, “Teh suh ei! I hre letling hlauh a nih chu. Indies chhunga thil thleng reng reng hi chu Port Royal-ah hian an hre zel. I hriat angin he lai hmun hi chu lawng lama hna thawkte chenna hmunpui a ni a, lawng mite; lawng suam chingte tiamin, chanchin thar hriat zung zung hi an thil tum pakhat a ni.

“Lawng suam hmangte hi ka ngaina lo va; mahse, lawng suam hmang lian tham leh a hlawhtlingho deuhte hi chu ngaih sanawm tak an ni lawi si. Vanneihna leh tih palh thil thu-ah an innghat lo va, khawi lawng ber nge suam tlâk khawpa hausa tih hi an hre chat chat zel a ni. Tuipui zauah pawh hetiang lawng, thil hlu tak tak phur hi chu an thur fuh nalh nalh thei zel zu nia!” a ti ta zel a.

“Chûng lawng suam hmang i sawiho chu sal leh bâwiha sumdawng an ni hlawm em?” ka lo ti zauh a.

Ani chuan, “Hetiang lama sumdawng ṭhin hi chu mi tlem tê chauh an ni. Sal phur lawngte hi chu mite'n an ṭih viau a, a hriat pawh an hre theiin a rim aṭangin an hria em maw ni tih tur a ni.

“Lawng suam hmang pawhin an zar buai chuk ngai hek lo. A chhan chu, salte hi enkawl hautak, chaw pêk ngai; kawl hlauhawm leh ualau taka zawrh leh theih si loh an ni a; sal mantu nih ai chuan tuipui zau taka lawng suamtu nih kha ka duh zawk ṭhin a ni,” a ti ta a.

“Mi ngo sal chu a hralh a tla deuh lo maw?” ka ti a.

Ka ngaihbel nge ni, chu pa chezia chu dang ta deuh riau hian ka hria a. Ani erawh chuan, “Chutiangin mi ngo sal an awm ka hre lo,” invengthawng tak hian a ti zui ta zat a.

Chu pa ngaih chu a ngam ta zan lo tih ka hriat chuan, “Mihringte man a, sumdawn nana hmang duh tawh chuan vun rawng an thliar dawn em ni ka tihna mai a nia,” ka ti ta than a.

Chu lam chu sawi zui zel duh tawh lo tih hriat tak hian, “Thawmhnaw i sawi ang chu a tawk thei ang maw? A nih leh Charles, i kal tawh ang le,” tiin a chhiahhlawh chu a hrilh ta a.

Han tawi leh hratin, “I thawmhnawte chu naktukah ka rawn pek theih che ka beisei,” a han ti phawt a.

Charles-a a chhuak fel ta tih chuan, “Sal chungchang reng reng; mi ngo an ni emaw, mi hang an ni emaw he laiah miin an sawi ri ngai lo; nang pawh chu chu huat thu-ah la lovin hre reng la ka duh a ni,” a ti ta a.

“Chu chu mikhual tih takah ka lo hre lo a ni. A pawi khawp mai; mahse, ka duh angte ka hmuh chuan he laiah ka cham rei dawn lo va, a zia tak a awm a nih chu,” ka ti ta a.

“Ka hming chu Jayne; Augustus Jayne a ni; min mamawh tâk pawhin,” a ti leh a, min chhuahsan ve ta a.

A chhuah hnu chuan tukverh bulah ṭhuin ka inngaihtuah nasa hle a. Jayne khan thil hriat eng emaw chu a neih ka ring a; a nih loh vek leh hriat thawi tal, rinhlelh deuh chu a neih ka ring deuh tlat a ni.

Lehkhabu zawnga vâi kual vel anga lan chu mi pawi sawi lo nihna chu a ni ngei ang; mahse, mite chuan mi danglam deuh hmuhin min hmu tlat a ni. Dik tak chuan he lai hmun hi lehkhabu zawn nan pawh a inàwm ve riau a, ram hrang hrang tIawh kual ṭhin lawngte chuan an rawn lak luh ṭeuh a rinawm a ni.

Lehkhabu zawng anga ka lan miau chuan khawiah pawh mikhual kal vak lohnaah pawh kal ila a àwm viau zel dawn a, miin makah an ruat lo vang – hei hi lehkhabu zawn ṭhatna a ni.

Mahse, ni hnih hun ka hman ral pawh chuan thil thar eng mah hriat belh ka nei ta miah lo va. Henry-a pawh a lo haw a, a chhuak leh ṭhin a. Mi hang, inchei tak takte nena an kalho erawh ka hmu fo a; a mi hang ṭhiante erawh hi chu induh tawk tak, ngeng ngalh mai an ni a, 'Maroons' an inti ṭhin.

Ka thawmhnaw thar pawh a lo thleng tawh a, ka han ha chhin vêl a. Ka savun kawr, fem nei suau mai ha ṭhin ka ni a, hetiang thawmhnaw ka'n ha ve ta chu nalh ka intiin ka lawm hle a; mahse, mi zingah langsar dawn riauin ka inhre thung.

Thawmhnaw thar inbela ka inthlek vel lai tak chuan Captain Tilly-a chu lo kalin kawngka kikin a lo lut ta a. Mi han thlek ngial hnu chuan, “I nalh hle mai a, Kin! I lo hmelṭha hle mai. Pianhmang ṭhatnate hi a chang chuan min puitu ṭha tak an ni tih te hi hriat tel a ṭha a nia,” tiin min fak luam a.

“Ka lawm e, Captain. Mahse, kei chuan hetiang ai chuan savuna siam hak kha nuam ka ti zawk; mahse, he laiah hetiang hi an ching a nih chuan ka ha ve mai ang a; min nuihzat an awm vaih chuan an insawi fiah ka phut ngei ang,” ka ti ta a.

“I pa fa i nih zawngin chutiang chu i ti duh ngeiin ka ring reng a; chuvangin, hei hi ka rawn kensak che a nih hi,” tiin a thil rawn ken chu mi hmuhtir a. A ngunhnam hriam ṭha tak chu a pai aṭanga phawiin, “Chem zum ṭha lutuk a nih hi. I pain lawnga a hnutchhiah, thingrema ka hai chhuah a ni. Pai la, inven nan hmang ang che,” a ti ta a.

Chu chem zum chu a pai aṭanga phawi chhuah a nem zaih mai a, a hriam ṭhain a buk pawh a dik zaih bawk. Han lek vel pah chuan, “A ṭha kher mai; mahse, ka hman lohna a rei tawh êm mai pawh a!” ka ti a.

“Chem zum i lo vilik ve tawh ṭhin elo?” a ti leh a.

“Ka pa khan ngunhnam vai chu min zirtir fo ṭhin a, mi dang zirtirtu ṭha tak tak pawh ka nei nual tawh; chûngte chu thiam hmingthang an ni bawk a, zirtirna dawng ṭha tawkah ka inngai ve a ni.”

Tilly-a chuan, “Chuti chu fimkhur hle ang che. He laiah hian ngunhnam vai thiam, mi that tura rawih theih maite pawh an tam a nia. An ngunhnam vai dan te lah chu a saha insah bawrh bawrh an ching a, invih leh indan vel hi an ti ve lo; chuvangin, an chem zum hman duh pawh a tawi, chhah chi a ni ber,” a ti ta a.

Ka rilru-ah mi pakhat a lo lang zawk a, “Ka pa khan hêng laiah hian ṭhian ṭha tak neiin a insawi ṭhin a,” ka'n ti a.

Ani chuan, “Jublain-a a nih chu; mi ṭha tak, chem zum hmang thiam tak maw le! A chhan ka hre ta lo va, England-ah a chho leh a; chutah, Europe khawmualpuiah. Awm hle hle thei lo, mi vâk kual reng mai a ni. Ka hriat zel dan chuan khawchhak lam, Mosolman ram lam panin an sawi,” a ti a.

Lawng lama min kirsan hnu chuan mut zai ka rel ve ta a. Mahse, ka muhil thei tlat lo va, min mawlhtu awm ang maiin ka tho leh a, tukverhah chuan ka va dak ta a.

Ka pindan chu a thim vek a; pawn lam chu a eng deuh ruih a, piah deuh hotel bula mi pakhat ding chu ka va hmu thei a. Chutia ka en reng lai chuan kawngpui chu kânin a kal sawn ta a.

Ṭhâwk leh khatah, tu nge a nih ka hre chhuak ta thut a! Chutiang taka pa lian si, zangkhai leh inthazo taka che vel thei chu mi pakhat chauh — Max Bauer-a a ni.

He laiah eng nge a tih ve? Min lo zui ru reng em ni? Nge, kan intawng palh mai mai zawk? Kan awmna thlang lam kawngpui chu a zawh thla ngei a; mahse, ka awmna hi chu a hre ngei tho ni chuan a lang.

He lai hmunah hi chuan mihring nunna hi an ngai hlu teh vak lo hle a, duh se chuan pawisa tlem têin emaw zu tlem tê seng emaw pawhin mi rawih tur a hmu mai ang, amah inrawlh ngai lovin.

Eng lai pawhin ka inrin reng a ṭul dawn ta; buaina tawk thut thei tur ang maiin ka inpeih ve ta at bawk a.

Zing varṭianah thovin ka awmna pindanah chuan chaw ka ei a, ngaihtuah tur ka ngah hle mai. Henry-a chu chanchin thar ngaichangin a chhuakvak mek tih ka hria a, thu thar rin tlak tak tak pawh a rawn hawn ngei ang tih ka ring bawk. A mi va kawm ṭhin sal leh mi hangte chuan thil hriat loh ahleih an nei lo vang; mahse, amahah chauh ka innghat tur a ni lo vang.

Puan ṭhuitu Jayne-a pawh kha thil hre thei tak tur a ni ngei mai, mi inah an lut chhuak hnem alawm. Ani khan kan hriat duh tur a hria ang em? Mi ngo hmeichhiate meuh ru bo a, hralh ṭhintute chuan a rûk thei ang berin an ti ngei ang tih lah hriat sa.

Pawn lam chu min enthlatu an awm em tih hriat tumin ka'n thlir kual ngial a; mahse, eng mah hmuh ka nei lo. Thil pakhat ka hriat chhuah chu Maroon-ho kha an ni. Anni hi an tam lo nâin, mi hang dangte chuan an ṭih riau a, eng vanga ṭih nge an nih chu ka hre lo.

Kawngpui ka va chhuak chu mi an lo tam tawh hle a; lawng mi, mize inang lo leh pianzia inang lo tak tak hlir hi an kat nuk mai a. Lawng mi ṭhenkhat chu lo thleng hlim, thawmhnaw tak ngial pawh la inthlak hman lo an ni a; a ṭhente chu lunghlu leh rangkachak bengbeh nen an inchei parh hle thung a, maimaw puan nen an inchei nalh hle hlawm mai.

Lawng mi inzuah buk tak takte chu zu hmunah an kal a, zu manah chuan rangkachak tangka ngat...! A..., he lai Port Royal hi chu thil a ṭha ber chi hlir awmna a ni ber e.

Heng mite hi rothap tak tak, pawisak nei lo zet mai an niin, chemtê leh kuttum pawha inbeih an awlsam hlawm hle a ni. Lamna hmunah mi lo inthat awm ta se, lam te chu an chawlh phah chuang lo va, an lam hual nghal mai ṭhin!

Hêng mite pawh hi thihna kotlanga ding; silaia kah hlum emaw, chemtêa vih hlum emaw, dawhsana dintira hruihruala khai hlum emaw hmabak thei maia khawsa an ni hlawm reng a ni.

An zingah chuan ka va tei lut ve tawp a, ka tlangnel ve nghal deuh mai a, an zeizia pawh man ve tawh hlein ka inhria. Hmeichhia pawh chi tin chi tang inpawlh an ni a, a tam ber chu mi hang leh mi ngo kara piang an ni ber.

Chutih lai chuan Henry-a chu ka va hmu ta thut a! Ani chu kawng sira dawr, ip khai chi zawrhna bulah hian a ding a; a kamis var leh kawrchung dum hak chu a inhmeh hle mai.

Ka en reng lai chuan nula pakhat hian a va pan a, eng emaw hi a sawi sa sa a. Henry-a erawh chuan uksak hmel vak loh hian a hawisan ta daih a, nula chu lungawi loh hmel fe hian a kal tau ta nghawng nghawng a.

Mi hang cher fe mai hian Henry-a chu a va pan ve leh a; mahse, Henry-a chu be miah lovin a kal pel ta mai a, ip zawrhna dawr sirah chuan a pil bo ta daih a. Rei lo tê hnuah Henry-a chuan chu pa liamna lam chu a pan ve ta a.

Chutih lai tak chuan ka kawr bana min pawt zauhtu hi awmin ka hria a, ka'n en chuan Charles-a kha a lo ni reng a; Henry-ate chu ka lo en ngun êm avangin min rawn pan lai pawh ka lo hre miah lo va.

“Augustus Jayne-a rawn tirh ka ni a, i thawmhnaw ṭhui turah khan han teh kual leh deuh che a ngai a, i lo kal hman lawk ang em?” chu sal mi hang chuan a ti ta a.

Tun ang huna han inteh leh vel ngai chu mak ka tiin ka awih lo viau a; mahse, hnial buai lovin ka zui ve ta a.

Dawr kan va thlen chuan a kawngkhar te chu a rinawm ṭhain oak thing, thir pheka char khawng tlat a nih bakah a kalhna te chu a lian ṭha hle tih pawh ka hmuh hmaih hauh lo.

Kawngkhar chu Charles-a chuan a'n kik a, kan lut ta a. In chhunga kawngkhar vengtu mi hangpa chu a hrawl ngei mai.

In chhungah chuan Jayne-a chu teh fung kengin a lo ding a. Chumi ka hmuh chuan mak ka ti hle a, a teh vel chu Charles-a hna a ni ṭhin si a.

Mi han teh vel pah chuan, “I hming hi ka hriat hnu niin ka hre tlat mai...,” a han ti phawt a.

Chutah, “Sackett tih hming hi hman lar Iem loh tak a ni a; mahse, hun rei tawh taka England aṭanga ka lehkhathawn hmuh min ti hre chhuak zawk mai a. Chu lehkha chu thil pawimawh tak min rawn hrilhna a nih avangin vawi tam ka chhiar nawn fo va...,” a han tih zawm leh a.

Min teh zawh chuan a tawlh sawn deuh a, “Thu thar leh thu beng lut deuh te hi bungrua angin a hralh pawh tla tak a ni,” a ti leh ta a.

“Thu beng lut min hrilh tur i neih chuan bengvar man chu pêk che ka inhuam e,” phur fe hian ka lo ti vat a.

“Ngawi teh, i hre sual a nih chu! Thu thar hrilh tur che ka nei ka tihna a ni lo. Puan ṭhuitu ka ni nâin ṭhian ṭha tak tak, thu thar min hrilh thei tur hi ka nei nual a; London lamah pawh khian chutiang chu ka nei a, a thu min hrilh lah a chhawr ṭhin bawk a. He pa hnen aṭanga ka lehkhathawn hmuhah chuan a nia hming pakhat 'Barnaba Sackett' tih chu ka hmuh,” a ti ta a.

Kei chuan, “Ka pa a nih chu,” ka lo ti vat a.

Jayne-a chuan, “Ka rin dan reng a ni! Ka ṭhianpa hming chu Peter Tallis a ni,” a ti ve ta a.

“A hming chu ka pa pawhin a sawi fo mai,” ka ti ve a.

Ani chuan, “A sawi fo ang. Peter Tallis-a hi chu pa dangdai ve tak, hriatna danglam bik nei a ni a, khawvel hmun hrang hrangah keimah ang ṭhian hi chu a nei tamin ka ring. Lehkhate thawnin sumdawnna Iamah pawh a thu ràwn ka la fo ṭhin.

“I hming ka hriat ṭan tirh khan ka hriat hnu angin ka hre si a; ka'n hriat chhuah hnuah chuan hetiang hian ngaih dan ka siam ta a, 'Peter Tallis-a ṭhian a nih chuan ka ṭhian pawh a ni' tih hi,” a ti ta zel a.

“Chuti chuan...?” tiin ka lo zawt bauh a.

“A tir kha chuan enthlatu i nih ka ring a, a chhan pawh Port Royal-ah hian hmun tinah enthlatu an awm ṭhin avangin. Mahse, mi ngo sal i sawi zauhah khan ka ngaih dan chu ka sawh sawn leh a, mi ngo salte chu nangma tan i duh dawn lo tih ka hre tlat a; i pa ka hriat chhuah tâk avangin,” a ti leh ta a.

Chutah kei pawh chuan, “I ring dik e; hmeichhe pakhat, sal anga an hralh ka zawng a ni. Chu nula chu New England an tih mai hmun aṭanga ruk bo a ni a, mi dang pawh an awm nual ang. Mahse he nu, Cape Ann vel aṭanga bo hi ka zawng a, a bona chin pawh kum khat vel kha a ni tawh; amah hralhtu pawh ka rin dan chuan...,” ka ti ta a.

Jayne-a chuan ka ṭawng chu lo pawt chatin, “Khawngaihin chutiang lampang chu sawi rih lo teh ang!” a lo ti thuai a.

Chutah, “Nula hmelṭha tak, rilru khauh leh mahni inrin tawkna nei, awmzia a neih dawn loh chuan a zahawmna a hloh avanga ṭe chiam duh lo mi a ni.

“An sawi zel dan phei chuan rilru huaisen tak, mahni duh dan taka khawsa ṭhin, an khaw lama nunphung pangngai pel hreta khawsak ching ni hialin an sawi a; rûk bo a ni pawh chu hrehawm a tih vak an ring lo,” ka ti ta duah a.

“Chu zawngin thil a ti awlsam ta deuh e, Pu Sackett! Chutiang mi chu tlem tê chauh an awm ang; mi tam zawk chuan rûk bo an nihin an beiseina an hloh mai ṭhin a,” a ti ve ta a.

“He nu kher hi chu chutiang mi a ni ve lo,” ka lo ti leh a.

“A nih leh amah chu hruai kir leh i tum dawn em ni?”

“Hruai kir kher chu ka tum pawh a ni lo. Ka hmu thei a nih chuan a duh leh hruai kir pawh ka inhuam tho va; ama thu thu ni rawh se. Ka tum ber chu he thil duhawm lo tak, mihringa sumdawnna tih tawp vat hi a ni zawk,” ka ti ta a.

“I hlawkna tur ûm vang pawh ni miah lovin i va chhan ang maw?” a ti ta zel a

“Hlawkna tel tur ka nei lo; mahse, hmeichhe pakhat ruk bo tum a ni a; he nu hi ka... ka hmelhriat a ni a,” ka'n ti bah deuh nawk a.

Chutah, Jayne-a chuan, “A nih leh heta i lo kal chhan hi Tilly-a chuan a hria em?” a han ti leh a.

“Hria e. Samuel Maverick-a; Shawmut-a cheng leh Rev. Blaxton-ate pawhin an hria maw le!” ka ti ve ta zel a.

Ani chuan, “Maverick-a chu ka hria asin. Sumdawnna lam aṭanga inhria kan ni a, mi rin tlak leh fing, thil dawn thui mi a ni. A ṭha e, mi rin tlak i ni tih i ṭhian kawmte aṭangin ka hre ta alawm. I mi duha pawh chu ka hriain ka inring – nu hmeltha lutuk, fing tak, thil chhût peih tak...! Dam leh hrisel takin a awm e; mahse, sal chu a ni lo,” a ti ta a.

“Sal a ni lo maw!!?” ka ti ta ha a, mak ka ti hle a.

Jayne-a chu a nui hak a, “Teuh nâng le! Sal nih ahnêkin heng lai vela huan zau ber neitu a ni tawh zawk alawm. Nu tum ruh tih takah a duh chu a tawpah chuan a hmu ta nge nge a nih hi ka ti mai a, tumna a awm chuan kawng a awm an tih kha maw,” a ti ta zel a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 24th, 2019, 8:23 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 11
(Rozami Pachuau)

Jayne chuan a thil tih lai chu dahin wine dawmpuia'n min sawm ta a. Ṭhutna dup nuam takah chuan inti pawimawh tak leh awm pho at hian a ṭhu a, chu nu lo din chhuah chhoh dan zawng zawng chu min hrilh ta vek a.

“Taimakna leh tih tak zeta thil tih hi ka ngaih san zawng a ni a, khawvel tlu sawp tung ding leh tur chuan taimakna chauh lo chu eng dang a awm lo. He nu pawh hi a lo thlen tirh chuan Pi (lady) han tih tlak bar pawh a ni lo maithei a; tunah erawh chuan Lady dik tak a ni ta,” Jayne-a chuan a ti ta a.

“Nu danglam tak chu a ni. Kan zinga huan neitu pakhat hnenah an hralh a. Chu pa chu a la upa lo a, huan zau takah in lian tak a sa a; a nupui chu a thi ta a, a khua pawh a har thei hle a ni. A nupui hmasa chu mi duham leh pamham zet a ni a, a han thih pawh chuan, 'An pa tan chuan a thawventhlak huai ang chu,' an ti hlawm reng a ni,” a ti ta duah a.

A thu sawi chu ngun takin ka lo ngaithla tih a hriat tâkah chuan a phur thar leh sauh a. Amah vek chuan sawi zawm lehin, “A khawhar êm avang chuan a ni, 'Adele' pawh hi a va chhar mai tâk ni,” a han tih chuan ka lo inrawlh vat a.

“Adele i tia law?” lunghnur deuh hian ka lo ti vat a, “He nu i sawi hi chu ka mi zawn a ni thei lo vang,” ka ti ta a.

Ani chuan, “E, ngawi teh, a ni thei tho asin. A nih theih dan tur chu — hetiang hmeichhia hi pakhat aia tam an awm thei lo vang. A hmingah mai chuan enghelh duh lem suh, Port Royal-ah hian mahni pianpui hming pu an vang teh asin; an duh duh an inphuah chawp mai a ni. He nu pawh hian a hming a la chher ropui dawn khawp, lo ngai reng mah rawh,” a ti ta a.

A chawlh deuh pah chuan meizial seipui mai, ka la hmuh ngai loh hi a ṭan kai a, ka no chu a thli khat zui leh nghal zat a. Kan wine chu a var sar a; kei, zu in ngai lo pawhin thlum tui ka ti hle a ni.

Chutah, a han sawi zawm leh a, “Sal an hralh dawn hian a leitu turin a duh ang a sawi hmasa phawt a; sum te an inhlan fel vek hnuah a leitu duh ang a nih leh nih loh an entir leh te te ṭhin. Adele-i leitu hmasa hi chu inbeihnaah a vanduaiah a ṭang ta hlauh a; neitu awm ta lo chu he pa kutah hian an dah ta a ni àwm e,” a tih zawm leh a.

“Tu nge, 'he pa' i tih chu?” ka lo ti a.

Ani chuan, “Hming sawi lan ka tum lo. He pa hian anni chu hmun fianrialah lilam turin a hruai a, chuta amah dawrtute chu mi rin tlak tak tak vek an ni bawk a.

“Kan nula-i hi a huaisen hle a, amah lei tumtute chu a'n en kual a, amah lei tura a duh ber hnenah chuan, ‘Nangmah khan min lei mai la...?' a va ti ta a.

“Chutah, an han lilam ta ngei a; mahse, a hmaa a thu sawi kha mi dangte chuan an phur loh phah ta a, amah lei tura a duh ber chuan a lei ta nge nge a ni.

“He pa hi ka thawmhnaw lei ṭhin a ni bawk a, a nula lei dan pawh hi ama ka ngei aṭanga hria ka ni. He nu a lei zan pawh hian pindanah dah hrana kalh hnan an tum rawk a; ani erawh chuan amah leitu chu a fala hmuh a duh thu a sawi ta a.

“An han inhmuh fal chuan, 'Hei, min lei ta a; sal anga min chhawr nge i duh i nupui angin?’ a ti ve ta ngat mai a ni! A pu chuan mak a ti hle mai a, 'Nupui i ti elo?' a ti he haw a.

“Ani thung chuan, 'Nupui emaw, sal emaw i duh danin min ko la, a lem chuang lo. Mahse, zahawm takin min enkawl la, zahawm takin ka awm mai ang; sal anga min enkawl erawh chuan i in hi 'hrem hmun patê-ah' ka siam mai ang,' tih pah chuan a'n hawi kual vel a.

“ 'He in hian uluk leh duat taka enkawl a mamawh a, a ropuiin a mawi bawk. Duat tak leh hmangaih taka enkawl i mamawh ang bawkin a mamawh ve a; hetiang in lian leh ropui hi ka la enkawl ngai lo va; mahse, ka enkawl thei tho ang — i tan chuan ka huam e.

“ 'Ka pa dam lai khan sumdawnna chhe tê chu a nei ve a; Indies leh England a kar tawn ṭhin a, ka pui ve reng a, sum enkawl pawh ka zei ve hle a ni. I duh phawt chuan i tan chûng chu ka ti thei ang a, i hna thawk haw i chau viau ṭhin a nih pawhin hahdam takin ka siam thei ang che.

“ 'I duh thlang la — i bawihnu; i duh huna i khuma i mutpui mai tur nge ka nih ang a, i tha chhang dawl; i ṭhian emaw, i nupui ni turin?' tiin duh a thlantir a,” a ti a, a nui pah suk a.

Jayne-a chu a han nui leh huk a, “I hisap thiam tawh mai em? He kan pu hi mi ṭawng tam lo leh zawiawi tak mi a lo ni kher si a, nupui neih chu sawi loh, sal hmeichhia lei pawh hi a tum reng a ni lo. A khawhar tih tur hre lovin sal an lilamna hmun a va pan ve satliah mai lek a ni a, a rin loh tak maia bâwihnu hmelṭha leh viak ṭha hmel tak a chhar ta chu a lawm ru ve hle a ni.

“Chutah, 'Tlan bo te i tum lo'ng maw?' a han tih chuan, 'Eng vangin nge min lei tura ka duh berin min lei tawh pawha ka tlan bo leh si ang? Chutiangin ka â lo! Ka awmna tur in ka mamawh a, chu chu nangin min pe thei a; tu dang mah rawng bawlsak tur ka nei lovin nangmah ka nei ta bawk che a,' tiin a la chhang ta zel a.

“Pindan hran an pe ta a, tlan bo lampang chu a ngaihtuah chhin ta lo reng a. A pu hna thawk haw chu a lo duat thiam êm êm a, a thawmhnaw inthlakna tur chenin a lo chhawpsak zung zung zel a; inbualna tur tui lum thlengin. Chutiang mi chu a ni a, a nupui hmasa nen chuan inang lo tak an ni,” tiin Jayne-a chuan a thu sawi thui tâwk hmawr chu a bawk ta hram a.

“A nih, Adele-i chu a rinawm ve ta zel a maw? Pute laka tlaktlum tumna lekfang a ni mai lo maw?” ka lo ti a.

Jayne-a chuan, “Chu lai tak chu alawm mak! A pu lakah chuan a rinawm mai ni lovin a pu chu a hmuh tirh phat aṭangin a ngaina êm êm mai maw le! A khawharnaah te chuan a hnem thiam ṭhin hle bawk. Thla te a lo vei meuh chuan a pu chu a khawsak a lo nuam hman ta hle a, tun hma zawng aiin a nun pawh a hlim zawk maw le!” a ti ta zel a.

“Engtin nge ni ta zeI?” ka lo ti leh thuai thuai a.

Jayne-a chuan, “A hnuah chuan a nupuiah a nei ta hial maw le! Nupuia a neih dawn chuan a hmeichhia zawk chuan zuk tur lui duh tawh miah lo va! A pu zawk chuan nupuia neih chu a tum ta bur zawk a ni,” a ti a.

“A nih leh, a pasal chu a thi tawh em ni?” ka'n ti leh a.

Ani chuan, “Teuh nâng, tun hma aiin a dam ṭha tawh zawk maw le! An nu lah chu nu fel tih takah an huan chanchin pawh a pasal ai chuan a hre chiang daih zawk a; mahse, hre àwm chuan a lang lem lo. A rem ruatna te hi a fingin an pa pawhin a zawm ve zel mai a, tunah chuan an hausa tawh hle asin,” a ti ta zel a.

A thu sawi chu tlip mawi tum fe hian, “Tunah chuan hlim êm êmin an khawsa ve ta a ni,” nui hak chung hian a tih zawm leh a.

“A nih, eng vangin nge he nu hi ka mi zawn nu a ni tih i hriat theih maina chhan?” tiin ka zawt ta ngat a.

Chek tlak tlak chung chuan mûk fe hian, “I mi zawn lai bo hun leh he nu lo lan hun hi a inmil chiah a; chu bâkah, thawmhnaw ṭhui tur thu-ah ka va kal ṭumin an pa huan kal a lo la haw lo bawk a, chu chu remchangah hmangin min titipui ta chiam a ni.

“An pa hriat ve loh ka chungchang thu thlenga thil hriat a neihte min hrilh vek a, ka ringhlel hauh lo. Thil pakhat, ka hnen aṭanga a hriat duh chu — mi pakhat, Joseph Pittingel-a chanchin hi a ni tlat zu nia!” a ti ta a.

Kei chu ka lo phu deuh zawk a, “Eng vanga Pittingel-a chanchin chu hre duh nge a nih? Ka rin dan...,”

“I rin dan chu ka rin dan nen a inang ang. He nu hi mi tum ruh a ni kan tih tawh kha, amahah hian kahpathir an phum a ni hial ang. Pittingel-a hian hmuhsit theih tawpin a hmusit tawh ang a; chumi vuak lêt nan chuan a chanchin chhe lam hriat tum ranin a chang a ni ang,” a ti ta a.

“Chuti chu, ka thil tumah chuan min pui duh ngei ang a,” ka lo ti thuai a.

“Chu chauh chu maw a lakah i phut?” tiin mi zawt a.

“E le, chhechhama thu ziak, amah an ruk bo dan leh sal anga an hralh dan zawng zawng, ama kut ziak ngei ka duh a ni. Chumi ka neih chuan thil ti sualtute'n hrem an pumpelh lo ang a, hetianga mihringa sumdawnna tenawm tak pawh hi a lo tawp tawh dawn a ni,” tiin ka hrilh tlang ta rawt a.

Jayne-a chuan a lu a thing ta nâ na a, “Chu zawng i phut sang lua a ni, Adele chuan a tihsak duh hauh lo vang che. A tih duh phawt chuan a tun hma nun, buichhe laih lohvin a inpuang vek a ni mai dawn asin! Chutiang ti tur chuan ro reltute hmaa kal a ngai ang a, amah mantu chanchin chauh ni lovin ama chung thu ngei pawh vantlang hriat a lo ni vek dawn a ni.

“Tin, a tih duh lohna chhan tur pakhat chu — ama tan ni lovin a pasal tih hminghliau a duh loh vang a ni bawk ang. Tin, a tun hma nun hi tu ma'n an hre lo va, heng lai mite'n an hmuh hmasak ber chuan an pa nen hian an innei fel daih tawh a; mi zahawm leh challang tak nupui, nu zahawm tak kha a ni mai a, tu ma'n sal a nih tawh thu an hre lo.

“Nang ṭanpui che chu duhin phuba lâk chu duh teh mah se, chhechhamna lehkha chu a ziak duhin ka ring lo. Chu ai chuan amah ru bo va, sal anga hralhtu chu a rûka beih lêt dan a ngaihtuah ran zawk ang,” a ti ta tlat a.

“Eng lam kawngin maw?” ka lo ti a.

“E le, Pittingel-a hi chawr chhuak leh thei tawh miah lo tura tih chhiat vek a duh ang; a thungrul thei a nih ngat chuan he pa hi a thih leh dam a pawi ti hauh lo vang,” a ti ta zel a.

“Chuti a nih lehnghal chuan, amah chu ka va hmuh ngei a ngai a nih chu!” ka ti ve tlat thung a.

Chutih lai chuan Augustus Jayne-a chu a nui ta suk a, “A hnena i va kal chu a ngaiin ka ring lo; hei, amah chu a lo kal alawm!” a ti ta a.

Jayne-a chuan pindan puanzar chu hlimin a ril lamah chuan min hruai lut ta a. Ka va luhna sirah chuan kawngkhar rûk a awm tih chu ka hmu hman a; chu kawngkhar chu parda phena mi ni mah se, a inhawng sa a ni tih ka hai lo.

“Tih tur ka ngah êm mai. Kin Ring Sackett, Madam Adele Legare nen hian lo inhmelhriat ula, sawi tur in nei ṭeuh ta ve ang,” tih pahin pawn lam aṭang chuan kawngkhar chu nem kharin a kal ta daih a.

Chu nu chu a mitmeng a mawi hle tih lohah chuan nu hmelṭha han tih vak tur a ni lo. Nu la upa vak lo, mit la tak tur chi, pian fuh zet mai a ni a; a sam chu a buang thang a; a mitmeng erawh chu a pawl ram thung.

“Kin Ring Sackett maw i nih? Hming lar lo tak chu a ni ngei mai! Carolina aṭangin maw?” a ti hmasa zung zung a.

“Ni e, tlang rama khawsa ṭhin ka ni. Aw le, ka Pi, hmun kilkhawra cheng tih takah khawpui mite nun dan mawi tak te hi ka hre ve lo teh a nia, min ngaidam aniang chu?” ka lo ti vat a.

“Tu nge ka nih chu i hre ta a, sawi nawn kher ngai lovah dah ila; tin, hun kan nei tlem hle bawk. Tunah hian Max Bauer-a, khaw chhungah a awm mek a, i thihna tur hian a phiar ru mek ang che,” a ti ta a.

“Amah chu i hre chiang viau ang maw?” ka ti ve leh a.

“Chiang teh reng e; ngaihthah mai chi a ni lo tawp a nia! Hmana min ṭanpui tumtu pa pakhat a sawisak anga i chunga a tih hma chuan Port Royal hi a chhuahsan phal lo vang tih ka hrilh nghal a che!” a ti hmiah mai a.

“Engtin nge chu pa chu a sawisak a?”

“Ka lakah chuan pa ṭha deuh mai a ni a, min ṭanpui a tum bawk...,” tiin a'n chawl dat a, “Max Bauer-a chuan a mitmu a kher chhuahsak bâkah a lei a tansak bawk,” a ti ta a.

A thu sawiin min barakhaihzia chu a hai bik lo, a dar a chhin ak a, “Chutiang ai maha rapthlak chu he laiah hian i chungah pawh a thleng thei tih theihnghilh suh; England thleng rawk pawhin an ûm zui mai ang che,” a ti tak deuh deuh a.

“An sawisak-pa chu khaw nge a awm tâk a?” ka lo ti a.

“He lai hmun tlang pakhatah hian a awm a, chhuatphah leh eng ilo a phiarin a hralh ṭhin. Ka theih ang angin ka ṭanpui ṭhin a; mahse, mi ṭanpuina dawn ai chuan intodelh hram hram chu a la thlang ve fan mai.”

Min han thlek leh thut a, “I chak hmel kher mai, Max Bauer-a hi i that thei ang em?” mi han ti ta thut a.

Kei chuan, “Ka pi, min hre sual a nih chu. Mi thah tuma lo kal ka ni lo va; he laia ka lo kal chhan zawk chu finfiahna a ni — Pittingel-a leh a chekawite tenawmzia lailang theitu finfiahna,” ka ti ve tlat thung a.

“Finfiahna chuan an thil tih ṭhinte bansantir theiin i ring a maw? An sual rawng bawlna hmun an sawn lekfang ang a; Pittingel-a erawh chu a thinur ngawt ta ve ang. Mi pawimawh tak anga tei kual vel hi nuam a ti asin!

“A hming pawh hi a hming tak a ni lo va; a hming tak hi ka la hre fuh thei lo. 'Pittingel' a nih hmaa mi chu ka hria a; chu pawh chu a invuah chawp mai mai lek a nih ka ring. Chu chu ka sawi tum tak a ni lo — he pa hi sual hlawm a ni ringawt a, Max Bauer-a lah hi chuti bawk! Tih chhiat hmiah hi ka duh tawh,” a ti ta hmiah hmiah mai a.

Kei chuan, “Anmahni hekna — chhechham meuha ziaka hekna; an sualzia ti lang theitu neiin Cape Ann va thlenpui thei ila...,” ka'n ti dek dek a.

Adele chuan, “Chu zawng a teuh lo! Keimah tak chuan a pawi pawh ka ti lo; mahse, ka pasal tan hmingchhiatna nasa tak a ni dawn tlat. Tu mahin ka chanchin hi an hre lo va; hre tur pawhin ka duh bawk hek lo,” a ti ta a.

“Kum khat chhung mai pawhin i din hmun a inthlak nasa hman ngei mai,” ka lo ti zauh a.

Ani chuan, “Kum khat maw? Chu chu eng nge awmzia? Hun hi chu a hmangtuin kan hman dan azirin a reiin a rei lo mai a ni ber e. Ka tleirawl lai chuan ka zalenin ka engthawl êm êm a, tu hnuaiah mah ka kun ngai hek lo. Chutiang ka nih avang chuan ka lo ti lutuk pawh a ni ang e, mi thu ràwn ka pawm lo fo ṭhin a!

“Chutah le, man ka ni ta thut a! Tun hmaa a tla chawpa ka ni tin hun ka hman ṭhin ang ngawt kha a ni ta si lo va, sal ka lo ni ta reng mai a! Chumi hriat chhuah chu thil namai lo tak a ni, nungdama khawchhuah ka tum a nih si chuan rilru hman a ngaiin huaisen a ngai ta hle reng a ni.

“Ka ṭhianpa, min puih a tum avanga mitmu kher chhuah tâwk-pa khan sal anga ka din hmun tur te min hrilh ṭhin a; khawi maw lai hmun kilkhawr deuha huan neitu rawng zet hnena hralh ka nih vaih chuan ka din hmun chhiat turzia te min hrilh a; ka puin min hne deuh hnu chuan nawhchizawrhna hmuna min hralh leh mai theih tur thlengin min hrilh a ni. Chu chu ka din hmun a nih avangin rilru hman thiam a ngai ta hle a ni,” a ti ta a.

“Hmeichhe ropui tak chu i ni ngawt mai e!” ka ti a.

“Pasal hmangaih êm êmtu ka ni bawk,” tiin a lo belh a.

Sen ap ap chungin, “I pawi sawi ka tum lo a nia,” ka lo ti vat a.

Ani chuan, “I tum lo tih chu ka hria e; mahse, ka din hmun leh nihna tak ka sawi lang duh mai a ni. Mi tam tak hi chuan insiam len nana ka pasal hi thlem thlu-ah min ngai pawh a ni thei ang; mahse, ka pasal hi ka hmangaih hle a, a tana harsatna thlentu nih pawh ka tum lo hle reng a ni,” a ti ta a.

“Max Bauer-a hian tuna i awmna leh i pasal neih tâk thu hi a hria em?” ka ti ve ta zel a.

“A hriat ka ring lo. A tan chuan bungraw pakhat, man man taka hralh mai tur ang chauh ka ni a, min lilam dawn lai pawh khan a awm ve lo; a awmte chu thliarkar danga mi deuh hlir an ni. Chu bâkah ka hmel te pawh a lo danglam ve leh tawh a; mahse, he mite hi chu ngaih nêp chi an ni miah lo tih ka hre chiang tlat,” a ti ta a.

Chutah, “Chhechhamna thu; anmahni chungchang i kuta i ziak ngei ka lo beisei asin le,” ka'n ti leh a.

“Chu zawng thil theih a ni lo; mahni inpuan kher lova ka tih theih chi erawh chu ka ti vek ang.”

“Chuti a nih chuan ka lawm e!” tiin ka inher ta a.

Chutih lai chuan, “Nula an man pahnih, an kut aṭanga tlan bo leh tate kha tute nge an nih i hria em?” a ti ta khauh a.

“Diana Macklin leh Carrie Penny-ite maw le. Ka unaupa Yance-a chuan Carrie laizawn; Temperance Penny hi nupuiah a nei a...,” ka han tih chuan Adele chu a nui ta rah rah a.

“Diana nen chuan kan inkawm ngeih ṭhin hle asin...,” a han nui leh hak a, “A chhungte chuan inkawm lo ila an duh hle a, mi tih mawh leh sehhel deuhah min ngai ṭhin a...,”

“Diana kha ka ngainat zawng tak a ni. Kan inmil hle a, mi ṭawng tam kan ni lo ve ve bawk. A thluak kha a ṭha a; mi vantlang chung lam deuh a nih vang nge, mite'n an en dan kha a dik lo riau mai a, ka ngaihtuah thei hle a ni,” a ti leh ta zel a.

Kei chuan an awm loh hnua Cape Ann lam chanchin chu a tawi thei ang berin ka'n hrilh ve leh luam a, thil awm dan tur chu a man thiam khawp mai.

Chutia kan han titi dun tâkah chuan amah ka ngaih sanna pawh a zual sawt a. He nu hi nu namai a ni lo, dinhmun hnuaihnung tak aṭangin a finna leh thluak hmangin a inla chhuak a; hemi kawngah hian vanneihna tak pawh a nei reng a, amah an lilam nia Legare-a a lo tel lehzel te kha a vanneihna a ni.

Chutah Adele chuan, “Hetah hian hretu che an awm ve nual a, fimkhur hle rawh. Kan mi sualho hi Port Royal-ah hian an lo lang fo a; kei chu khawpuiah ka luh khat avangin ka ngaihtuahawm loh a nia,” tiin mi hrilh ta a.

“I ngaihtuahawm loh ang maw?” ka'n ti ve ngat a.

Ani chuan, “Min ngaihtuah duh suh,” a'n ti te te a.

Kawngkhar hawnna vuan chung chuan, “Hmelma kan inṭâwm a ni a, inṭhen tawh rih ila a ṭha ang; fimkhur tak leh tu ma hmuh lohvin he in hi ka chhuahsan vat a ngai a ni.

“Kei chu ka him ang; mahse, i duh dan ang taka ka ṭanpui thei lo che chu pawi ka ti ngawt mai. Anni saw tih chhiat vek an nih hma chuan ṭan erawh chu ka la zui ve zel dawn,” tum ruh tih hriat tak hian a ti ta a.

Kan awmna dawr hma lamah chuan mi pahnih an lo awm tawh a, puan an lo ṭhui mawlh mawlh a; Augustus Jayne-a erawh hmuh tur a awm lo. Kawngkhar aṭang chuan pawn lam chu ka thlir ta a.

Kawngpuiah chuan mi an lo khat hmur tawh a; lawng hna thawk, suam hmangho leh lo neitu tlem leh sipai ni àwm tak uniform ha leh mi hangte chu an lo inpawlh nuk a.

Lawng pu pakhat rui zet hi a rawn pai phei ṭak ṭak a. Ka han ding hlek a; a bengah chuan lunghlu tle ṭha fahran mai hi a beh a, a kut zung ṭangah chuan zungbun pathum aia tlem lo; rangkachak, lunghlu leh lung mawi hlira siam hi a bun tle ṭhat bawk a.

Ka lo en a ni tih a hriat chuan a rawn ṭhen ṭha a, “Hetiang tlereuh te hi chu a dang pawh ka la ngah hle a nia!” te chu a ti nuah nuah lehnghal a.

Ka'n hawi sawn leh chuan mi pakhat, nelawm loh hmel zet nen hian kan mit chu a intawng ta siah mai a! Chu pa chu hmai ser do mai leh beng lehlam pawh bul a ni. Ka va en ve chiah chuan a mit chu a la sawn vat a, eng vanga hawi sawn vat nge maw a nih dawn chu ni?

Tawlailir hrawl zet hi bawng pa pahnih hian an rawn hnûk a, zu dahna ni àwm tak barrel hi a phur ṭeuh a; rang takin chumi phenah chuan ka tlan phei vat a, a zâwna dawr pakhat lo inhawngah chuan ka tlan lut zui ta zauh a.

Hnung lam ka va hawi lêt chuan mi zuitu chu pakhat ni lovin pahnih an ni tih ka va hmu ta a. Hmai sera chu kawng chhak lamah a tlan a, pakhat chu chhuk zawngin a tlan bawk a; min hmu zo lo a nih pawhin an rawn thawk ṭha leh ang a, min hmuh ngei chu an tum dawn a ni.

Ka chhuahsan dawrah chuan ka va kir leh a, kawngka bula ding chuan, “Duh i nei em ni?” a lo ti pawr kuk mai a.

“Rang takin dawr neitupa hi ka hmu duh,” ka ti a.

Chu pa chuan ngaina lo tih hriat tak hian min han thlêk vang vang a, mi namai lo deuh ni turah min ngai a ni ngei ang, “Nghah deuh a ngai ang,” phur lo fe hian a ti ta a.

Rei vak lo hnuah chuan a rawn kir leh a, “He lamah hian lo lut ta che,” a rawn ti ta a.

Mi zawngtute pawh an lo lang ṭep tawh ang a, bikbo rih chu ka mamawh a ni. Puanzar chu ka'n keu a, mi pakhat, tarmit darthlalang kil li nei vuah hian ngun zetin mi lo en a; pa tawi, thau leh dul kiar, chal ngalh tak a ni. Ka mi rin zawng chu a ni hauh lo nâin tun atan chuan ka mamawh ve deuh tlat si a ni.

“Eng nge ni? Hun hi ka nei lo teh a nia,” hmanhmawh leh ning tih hriat zet hian a lo ti nghal tawng a.

“Miin thil hralh tur i neiin an sawi a,” tiin ka han ṭan phawt a. Ka han ngaichang hlek a; chutah, “Dawr hma lama i thil pho lan ang saw ni lovin,” ka ti leh ta a.

A ṭhu ngil awt a, chiang lehzual hian mi han en nawn a. Ka ngainat hmel pu chi chu a ni mawlh lo, “Tu chuan nge chutiang thil chu lo hrilh che a?” a ti nghut a.

Mi'n melh leh kâwk a, “Ka hriat zawng pawh i ni si lo, mi dawr duh a nih chuan a hma lama saw lei tur a awm ṭeuh alawm. Ka hmelhriat tu emaw ni turah ka lo ngai che a, lo luhtir hauh loh tur che ka nih nen a le; thlawk bo rang mai rawh!” a ti ta khu khu a.

A la rel lo lulai êm a, min zawngtute pawh kawtah an la awm ngei àwm si a, nghah ve hret rih a ngai a ni. Chutah, “Lunghlu tak, Iian tham leh dangdai deuh ka zawng a, a man pawh ka pe tla nghal thei,” ka ti ve ta ngawt a.

Ani chuan, “Chutiang ka nei hauh lo; chutiang nei chu he khawpuiah hian an tam alawm. Tu nge he lai rawn kawh hmuh reng reng che a; chu chu min hrilh loh chuan kan indawr chhunzawm thei lo vang,” a ti ve ta mauh mai a.

Ka rilru-a hming lo lang hmasa chu ka sawi ve ta ngawt a, “Pittingel-a maw le; mahse, ama hming sawi lan chu a duh lo teh asin!” ka ti ve ta a.

A archang pen ken chu a dah a, “Pittingel-a maw? Ka chanchin eng zat fakau nge a hrilh che? Nang pawh tu nge maw i nih reng reng le?” mak ti fe hian a ti ta hu hu a.

“Carolina lam aṭanga rawn thleng thar ka ni a; a hma chuan Mexico lamah ka khawsa,” tiin ka daw kual ve ta a.

Chutah, “A eng ber chu maw i duh?” a han ti ṭha leh a.

Kei chuan, “Lunghlu lian deuh leh rangkachak ker mawi pawh a awm chuan ka duh bawk,” ka ti leh a.

He laia ka luh chhan chu pawn lam boruak tlansan ka duh vang mai a ni a; min zawngtute an liam hun hun chu ka chhuah hun a ni ve mai.

Chu pa chuan a lu a thing a, “Lunghlu! A tam ang chu, va zawng zel la a ni mai,” a ti ta a.

“A lian deuh tlem azawng ka duh a; mahse, i neih loh chuan ka chhuak leh mai ang e,” tih pahin ka inher nghal a.

Ani chuan, “Aw le, hriat chian duh ka nei ta nual mai! Pittingel-a'n maw rawn tir che? He pa hi ka mi hriat zawng pawh a ni hlei nem! Tu nge rawn tirtu che dik tak chu?” a ti ta sek sek a.

Kei chuan, “Ka kal mai ang e, sumdawnna thila lo kal ka nia...,” ka ti ringawt a.

“Sumdawnna lam chu a ni mawlh ang! Enthlatu i ni maw? Enthlatu tenawm lutuk!” thinrim zet hian a ti ta tawn tawn a.

A hnar a tum dat a, “Pittingel! He pa hi chu ka hria alawm; mahse, ani min hriat vena chhan tur hi a awm lo! Eng duhin maw i lo kal? Lunghlu maw? Kei, lawng pu thawmhnaw mai zuartu hnenah hian lunghlu maw i rawn zawn?” mi rinhlelh hmel fe hian a ti ta a.

Rin loh takin ka tawn loh tur tur ka tawng ta a ang hle mai ka ti, hre miah lovin khuai bu ka tawn darh em ni zawk le?

“Kan thu a inhmu dawn lo, ka kal mai ang e; ni dangah...,” ka ti hman chauh a.

Ani chuan, “Ngawi lawk teh...,” tih pahih a dawhkan hnuai aṭang chuan pistol hrawl zet mai a rawn phawrh ta mai a, a kau ri pawh a ring hlein a hriat!

“Ṭhu hle hle rawh! Ka naute ka'n ko khawm mah ang a, nang mi â pa chanchin hi chu kan hriat belh mawlh ang,” a ti ta chheu chheu mai a

Dawr neitu chuan, “Harry, Tom-a nen khan lo phei teh u!” a ti ta tuar tuar a.

Chutih lai chuan a pistol chu a keng nâ a, mi a tin zawn hauh lo, silai a keng ringawt pawh chu hlau hle turah mi ngai a ni ngei ang. Chu chu remchangah hmangin ka ṭhutna chair chu a lamah ka thlawh phei lâwp a; chumi laka a inveng, a pistol lek sawn lai chu chuhin puanzar phenah chuan ka put chhuak ta zauh a.

Mahse, ka hmaa lo ding chu a pa lian kher mai a, duh aiin a inring tâwk lutuk mah mah bawk! “Ding rawh nang kha — ding rawh!” a ti khu khu a.

Kei chuan, “Tun ṭum chu ni lo ve,” tih pahin a khûp kawiah tak chuan ka chhuih ta chawrh a. Chu veleh a na ti lutuk chu a khup dawm chuan a kun tlawk tlawk a, a rum ta kâwk kâwk a; chutih lai chuan ka khûpin a hmaiah ka'n dawm zui leh siah a, a dâk leh awrh a; ka hnek zui ṭhuai a, hnung zawngin a pai phei ta awt awt a.

Kawngkhar chu ka hawng a, tleirawl la naupan hmel tak, sual hmel zet hi a lo ding a; min hmuh veleh a kiang vat a, nui deuh ṭha chung hian, “Ka thawh ni a la thleng ve ngei ang, lo ngai reng rawh!” a han ti zui ngal ngal a.

Eng danga chhang tawh lovin kawtthlerah chuan ka chhuak a, kawng kawi laiah chuan ka liam ta vat a.

He khua zet chu mi sual bupui a lo ni maw le? Khawi laiah pawh mi sual tawn tur an awm dawn a ni maw? Tuna ka chhuahsan tak te ngei pawh kha; enthlatu an hlauh dan êm êm te kha, dawrah thil lei tur ka va zawt satliah a ni ve mai a, min dawngsawng ṭha lo hle tur chu an ni bik lo.

Ka thlenna pindana ka lut chu ṭhutthlengah ka ṭhu nghal a, ka lukhum chu khumah ka theh phei a; khum bul dawhkanah chuan tuithawlin lehkha them hi a lo indelh bet va a, chu lehkhaah chuan tihian a lo inziak a:

'Pi Legare-i an man ta. Rio Cobre lui chhuah, Santiago De La Vega bulah zanlai pelh hma ngeiin min rawn hmu ang che.'

Ngawi rengin ka ding vang vang a, Pi Legare (Adele) chu an man leh ta maw!? Hmanah an lak ata a tlan chhuak tawh a; tun ṭum zawng a thei tawh lo vang, a pasal lah mi ṭha tih takah Max Bauer-a te ang han dawr chi a ni dèr si lo.

Hei zet chu ka mawh phurhna liau liau a ni, Pi Legare (Adele) chu keimah vanga man an ni ngei ang.

Ka thawmhnaw tel chu ka phelh a, ka pistol pahnih dah ṭhatte chu ka phawrh a; a mu ka thun khah hnu chuan ka kawnghren karah ka thawlh ta ve ve a.

Rio Cobre lui chu engtia hla nge ni, mel hnih vel em ni ang? Tunah ka kal nghal ang...!

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 26th, 2019, 7:16 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 12
(Rozami Pachuau)

Lawng chawlhna bul tuipui kam ka va thlen chuan tleirawl pakhat hi a lawngleng nen chuan a lo ding a, a hangin a sang ṭha hle bawk. “Pu-a, shilling (pawisa) khat min pe la, i duhna hmun takah ka thlen ang che,” a lo ti nghal a.

Kei chuan, “Aw le; hmanhmawh takin kal la, buaina a hnai em tih thlithlai reng la, shilling khat dang ka pek belh ang che,” ka ti ta zung zung a.

Ani chuan, “Teh reng mai, i hriat duh zawng zawng pawh ka hrilh zel bawk ang che,” a ti ve a. Ka ṭhut fel veleh ani chuan a kar kal ta nghal a.

Tuipui chu a dum kûk a, khua a thim hle a, thli a thaw eih lo bawk. Kan velah chuan lawng a tlim hmur a, a tam zawk chu suam hmangho lawng a nih ngei pawh ka ring.

Zan a ni nâin chu lai chu a reh chuang miah lo va; a ṭhen lo thleng hlim, a ṭhen chhuak leh mekte chu an insul zut a. A ṭhente chu inbeihna lam sulhnu, laipui muin a denna ni àwm tak te, meiin a kanna hnuhma hmuh tur te a awm nual mai.

Lawng khawnvar chhit êng aṭang chuan lawng pu pakhat rui zet hian zu um kengin min lo au va, zu in puiah min lo sawm a; vaukam hla takah chuan zai ri hriat tur a awm bawk a, he khawpuiah zet hi chuan zan reh tak tak a awm lo ni tur a ni.

“He laiah hian i cheng rei tawh em?” tiin lawng kartu chu ka'n zawt a.

Ani chuan, “Hmun dangah ka la kal ngai lo, he lai hi nuam ka ti ber mai. Lawnglengin mi ka hruai kual a, shilling tlem azawng ka hlawh ve a; chawlh hahdamna tur in te tak tê Healthshire tlangah khian ka nei ve a, ka lawm tawk hle a ni,” a han ti a.

Chutah, a ngawi ta vang vang a, eng mah a sawi zui ta lo; a lawng kar zawnga tui ri barh barh tih mai loh chu thawm dang a awm ta lo.

A hnu deuhah amah bawk chuan, “Lawng liana zin chhuahpui tur pawhin min sawm fo a; mahse, kei chu hausakna leh rangkachak pawh hi thisena lei a nih chuan ka awt miah Io; chu ai chuan hetia lawngleng kara ei chawp hlawh theih hi ka duh tawk mai.

“Tuipuia lawngleng han kar te hi nuam ka ti a, lawnga mi ka kar te hi thlenpui thuai hi ka nghakhlel a; kan piah deuh Galeon Bay an tih mai te saw nuam ka ti ṭhin hle bawk,” a'n ti leh a.

A ngawih vang vang tâkah chuan, “Hmar lam ram hla tak, America tlang ram aṭanga lo kal ka ni a, chutah chuan kei pawhin in te reuh tê ka nei ve a. Ka in bul mai tlang pangah te chuan pangpar an vul chiai a, chu lai chu ka ngaina a; tuna i thu sawi kha ka hriat thiampui khawp mai che,” ka ti ve ta a.

Eng emaw chen kan kal hnu chuan vaukam lungṭhil hmunah chuan min nghat ta a, pawisa te chu ka pe ve nghal a.

“Chhungte i nei em?” ka han ti leh a.

Zan thimah pawh chuan a mitmeng ngui tak leh a lu hrenna chu a lang thei a. “Hmanah chuan nei ve tawh e. Ka nu chu a kâwng chen ka la nih lai hian a boral a, ka pa nen kan phum dun nghe nghe. Ka pa nen chuan kan khawsa dun chho ta a, min duat thei hle a ni.

“Mahse, ka pa chu lawng mi a ni a, chutia min awmpui lai reng pawh chuan lunglen hmel taka tuipui lam a thlir hi ka hmu fo a, tuifinriat zau lam pana lawng chhuak tur a hmuh te hian a rilru leh ngaihtuahna te hi a chhuahpui ni hialin ka hre ṭhin.

“Ni khat chu, kum sawm pali ka tlin hnu hian ka pa chuan min ko va, 'Hei, kum tling i ni ve ta a..,' min ti a. Kei chuan ka pa chu a rilru pawttu tuipui lam chu a duh phawt chuan a pan thei tawh ang tih ka hrilh a. Ka pa chu a kal ta reng bawk a; kei erawh chu ka lawngleng hmangin ka la khawsa ve ta zel a ni,” tiin min hrilh ta a.

Kei chuan a hming chu ka zawt ta a. Ani chuan 'Andrew' tia an kohna chu min hrilh a.

“Chu chauh chu em ni, a dang a awm lo em ni?” ka'n ti leh hram a.

A ha var rual ṭhah langa nui sak hian, “A..., hming dang hi kan mamawh vak lo aniang, 'Andrew' tih hi a tawk mai e. 'Naupang pakhat Andrew-a, lawngleng nei kha' tia miin min ti hriat hi ka duh tawk hle a ni. Dam takin le, ka Pu,” a ti ta a.

Thimthamah chuan ngawi rengin ka ding a, chu tleirawl Iawng kar ri chu a reh ṭhak thlengin ka ngaithla a. Ka dinna chhak deuh, tuiin a chim phak loh var deuh vu lamah chuan ka chho ta a.

Mûk fe hian ka inngaihtuah a, chutih lai tak chuan ka bul maiah thawm zawi tak ri hi ka hre ta thut a, “Captain, Henry ka nia,” tih hi a lo ni a.

Henry-a chu a rawn inlan ta a, a bulah chuan mi dang pawh an awm tlat mai! Ka pistol kawmte chu ka dawm chat a.

“Hlauhthawn tur a awm lo ve, Captain. Hêng mite hi ka ṭhian Maroon-ho an ni e,” Henry chuan a ti zui zat a.

“Adele chu khawi lam nge an panpui?” ka ti nghal a.

“An kal hlatpui lo ve,” tiin a han nui hak a, “Kan enthla reng tih hi an hre miah lo a nia. Ka chipuite hi in ram lama 'Indian' in tih mai ang khi an ni a, ramhnuaiah chuan thawm an dim thiam teh a nia,” a'n ti leh a.

“Tunah hian riah bûkah em ni an awm?” ka ti a.

Ani chuan, “Zawi muangin an kalpui a, tu emaw nghah an nei pah deuh niin a lang; tunah Salt Ponds hmun an thleng tawh ang. Galleon Bay an pan a nih hmel a, sawtah sawn lawng lut leh chhuak a langsar lo va,” a ti leh zung zung a.

Chutah, hma a hruai a, chak zetin min kalpui ta a. He lai hmun kan thlen hma deuh khan ruah tlem a sur a; tunah chuan bang tawh mah se thing hnah vel chu a la huh nasa hle a, a la far tluah tluah a, chu chuan kan kal thawm pawh hliah hneh hlein ka ring.

Rei pawh kan la kal hmain ngaw kar aṭang chuan mi pakhat hian min rawn fin a; Henry-a nen an inbiak sar sar hnu chuan thim zingah chuan a kal bo leh ta mai a.

Henry-a chuan, “Kan hma lawkah sawn an awm a nih chu, han inkhuainuai deuh rap rap a ṭul maithei e,” a han ti a.

“Eng zat vel nge an nih ang?” tiin ka lo zawt a.

“Tunah chuan pasarih an ni. Galleon aṭangin mei dêtin tun lawk khan an rawn bia a ni,” a ti leh a.

Chak takin âwih pangah chuan min chhukpui a, lei chu a nemin a nal ang reng a, ka tlu teuh ṭhin hle mai.

Tuipui thim kûk mai, kan hma lawka mi chu kan hmu ta thut a, hla fea vaukam pawh chu kan va hmu thei ruai ruai a. Henry-a chuan ka banah chelhin, “He lai hi fimkhur hle a ngai a nia, dûm thûk tak tak pawh a tam a nia,” tiin min hrilh a.

Ka pheikhawk rawngsang bun chu a tih chi ta lo hle a, ka moccasin te kha ka hre chhuak rum rum a. Tunah chuan lei sakhat deuh lai, tuipui kam ṭiauvut hmun kan thleng ta a.

Thâwk leh khatah, âw hian, “Lo hnai suh u, he laiah hian tu mah tlawhtu kan mamawh lo!” a rawn ti ta chheu chheu mai a.

Ring vak lo leh fiah tak si hian, “Tlawhtu chu in neih ngei kha le! Nangmahni tlawhtu zinga mi, nu zahawm tak kha kan duh e; tunah hian in rawn chhuah dawn nge, in thisen chhuahsak kher tur che uin min phût em ni zawk?” ka ti let ve hmak a.

“Thlawk bo rawh u!” aw chuan a rawn ti leh a; mahse, a âw-ah chuan zamna leh mahni inrinhlelhna a lang tel tlat!

Chutah ring deuh zawk hian, “An zingah khan i awm ve em, ka Pi?” ka'n ti thut a.

Ani chuan, “Aw, ka awm e!” a rawn ti ve mai bawk a.

Chutia min chhan veleh chuan an beng ri ṭhuai thawm chu ka hre zui zat a, ka sa ta phat mai a, “Khatianga kut i thlak avang khan i nunna i chan phah ngei ang,” tia vau pahin kan bawh ta huk a.

Mi pakhat hian mi rawn pan a, a ngunhnam ken chuan mi rawn vai fua a; ka pa-in min lo zirtir ang takin a chem zum chu ka lo dang tleu zawr a, pen khatin ka hnungtawlh pah a.

Ani chuan chu chu a hmuhin min thah ngei tum chuan a ngunhnam chu a han vai leh pawp a; min vai ṭhelh ta hlauh pawh a. Kei erawh chuan ka ṭhelh lo thung ta hlauh a, a dàr invuahna, a nghawng bulah tak ka ngunhnam chu ka vit tlum ta hmawk a.

Ka mi vih pa chu a tawlh lêt dawrh a, a khuh nghal bawrh bawrh a. Ka han hawi sawn leh chuan mi pakhatin Adele vih tuma a pan lai chiah chu ka va hmu hlauh a; ka pistol pai chu phawiin ka kap nghal pawp a, chu pa chu a thal nghal hawl hawl a.

Chutih lai tak chuan tuipuiah lawng a lo thleng a, âw hian, “Lashan,” a rawn ti ta a.

Ka ṭhian mi hangte chuan ngunhnam hlai chi an keng deuh vek a; a ṭhen chuan silai, a kaw hmawra a mu thun chi hi an keng bawk a. Chutia thawm dang a lo awm tâkah chuan an inher a, lawng thleng thar lamah chuan an silaite chu an hmet puak ta a. Lawng aṭang chuan an chhe lawh ri hi a hriat theih a; mahse, tui thuk lam panin a inher leh ta a.

Vaivutah chuan mi pathum hi chechang lovin an lo thal reng a, hliam tuar pakhat chu tlan bo tumin a lo vâk ṭâwk ṭâwk a. Maroon pakhat chuan chu chu a va pan a; kei erawh chuan, “Kaltir rawh, a dam chhuak leh ta hlauh a nih pawhin an âtzia te hi an la sawi duh zawk ang,” ka lo ti a.

Adele chuan min rawn pan thuai a, “A hun takah i lo thleng a nih hi; i lo thleng ngei ang tih hi ka hria a ni,” a rawn ti sa sa a.

“Henry-a zarah a nia; ani hi a bul tumtu chu a ni. Aw le, tunah ka hruai haw thei tawh che ang em?” ka ti ta a.

Amaherawhchu, a mantu zinga mi kha tlan chhuak an awm ngeia ka hriat avangin Pi Legare (Adele) chu him taka an in hruai thlen phawt ṭul ka ti ve tho mai.

Henry-a chuan, “Haw-na tur pawh kan peih fel diam tawh. Lo neitu hnen aṭangin tawlailir kan hawh a,” a ti ta a.

Kei chuan, “Henry, hemi chungchang hi tu ma'n an hre tur a ni lo asin,” venthawn nei tih hriat tak hian ka'n ti a.

Ka venthawn chu a hre sa ve a ni ang, “Hemi chungchang hi tu mah ka hrilh lo. He tawlailir pawh hi a neitute'n kan hawh tih an hre hlei nem; an hriat hmain a awmna ngaiah sil fai sa thlapin a awm leh mai ang,” a ti ta then a.

Eng emaw chen chu ngawi rengin kan tlan a; chutah, palm thing mawi taka ding tlar ṭhat hi kan va hmu ta a; a piah maiah chuan in lian zet hi a lo ding luah a.

In kan hnaih deuh tâkah chuan pa pakhat hi bathlarah a rawn chhuak a, ka ṭhiante chu kal pelin ka va kal hmasa ta a.

“Pu Legare-a i ni ang maw?” ka va ti nghal tawng a.

Chu pa chu pa hmelchhe lo tak, zaidam hmel tak; mahse, eng emaw enghelh nei hmel pu hi a ni a, “Ka ni alawm,” tiin mi lo chhang vat a.

“Pi Legare-i, tute nge tih hriat loh mi sualin an man chu him takin kan rawn hruai haw thei e,” tiin ka hrilh ta a.

Ani chuan, “Nang ve thung hi, ka la hre ngai lo che a?” tiin min zawt ve thung a.

“Kin Ring Sackett, Virginia chhuak ka ni a; ka ṭhiante hi Maroon an ni thung,” tiin ka hrilh ve nghal a.

Ani chuan phawk hra hian, “Maroon i ti elo? Mahse...,” a tih mek laiin ka lo inrawlh a, “Ka ṭhiante vek an ni; anni hi awm lo se chuan kan Pi pawh hi damin kan rawn hruai haw kher lo vang,” ka ti ta a.

Sakawr tawlailir chu a lo thleng zui ve ta nghal a. Pu Legare-a chu tlan chhuak vatin tawlailir kawngkhar chu an nu tan a lo hawng vat a, “Damin i lo thleng thei maw?” hlim tak hian a ti nghal chul a.

Adele chuan, “Ka ṭha e, tunah chuan in ka rawn thleng leh ta e,” nui sak chung leh an pa kut vuan ran chung chuan a han ti let ve a.

Nupa hlim dun takte'n in an thlen a, kawngkhar bul an thlen chuan Pu Legare-a chu, “Lo leng lut rawh u,” tia min sawm pahin a rawn hawi let a, “Uai...!” a'n ti leh hlut a.

Ka'n hawi let chuan a mak ti hmel awmzia chu ka man thiam zui ve mai a, kan mi hang hruaite chu ramhnuai lamah an lo bibo leh diak hman vek tawh niin!

Henry-a chu khaw nge a awm tih ka hre sa mai a, tih tur kan ngah êm a; chûngte chu Port Royal-ah emaw, Santiago De la vega-ah emaw chin fel chi chauh an ni si.

Min hruai luhna pindan chu a lian hle a, pangpar huan mawi tak, par vul chuk awmna ep chiah a ni lehnghal a.

Legare-a chuan, “Mu hahdam la a ṭha ang, Captain; mahse, han inei puar hmasa phawt la...,” tiin mi hrilh ta duam duam a.

“Hun ka nei tlem a...,” ka'n ti hman chauh a, amah bawk chuan, “Ngawi teh, sawi tur kan ngah dun hlein ka ring. Kan nu i hriatna hi a rei tawh em?” a ti ta a.

Chutah zawng Jamaica thliarkara ka kalna chhan leh an nu nena kan intawn dan zawng zawng te chu ka hrilh fai ta vek a.

“Cape Ann-a a khawsak laia Pi Lagare-i ṭhiannu ber chu ka nula...,” ka thu sawi chu ka harh chhuak leh thut a, ka tawp leh ta chawt a.

Eng vanga kha nula kha ‘ka nula' ka tih ngawt chu aw.... Kan inhmelhriat viau pawh a ni lo va, ani phei chuan ka chanchin a hre tlem lehzual ang a; a ngaihsak bawk lo vang....

Chutih lai chuan chhiahhlawh pakhat hian thleng hlai takin coffee te, ar tui te, sa hem hmin leh dawnfawh tuihnai zet mai te chu a rawn chawi lut ta a.

“Adele hian min tih buai hi a hreh hle a, mahnia awm nuam ti mi ka nihzia a hre bawk a. Lehkhabute ka chhiar ṭhin a, huan leh sumdawnna pawh ka khawih ve a, tih tur reng reng hi ka duh dan leh ṭhaa ka hriat angin ka ti mai ṭhin. Adele pawh hian ka hna thawh dan hmang a la hriat fuh chiah loh avangin chim buai loha awm hi ka duh zawk tih a hre bawk a; ṭhian ka nei ve nual bawk nen...,” a ti ta luam a.

A no ruak chu dahin, “I thil tih tum te ka lo hriatin a àwm ka tihpui hle che a, he thil tenawm tak hi ti tawp turin tu emaw chuan hma a lak ngei a ngai reng a ni. Hemi chungchang hi kei pawhin vawi tam ka lo ngaihtuah tawh a, tunah chuan ka mal chungah ngei min rawn chhawpsak ta a nih hi,” a ti ta zel a.

“Ka lo hriat dan chuan Pittingel-a hi pa thil ti thei, ṭhian thil ti thei ngah tak mai leh chumi avanga a duh anga khawsa thei, dàn pawhin a ban phak loh thawthang niin an sawi a ni,” ka ti ve a.

Ani chuan, “Eng emaw chen chu a dik ang; mahse, a thil tih theihna leh chakna innghah chhan derdepzia hi a hre lo a nih hi! A duham lutuk pawh hi a insum zo lo fo a, a la chhiatpui ngei ang. A hlawhtlinna leh vanneihna a la kal tluang a, beidawnna la tawng ngai hek lo, hlawhchhamna te hi a chungah thleng theiin a ngai lo alawm,” a ti ta zel a.

Ka coffee no han thlit khah leh pahin, “Chutiang chu amah ka ngaih dan tlangpui chu a ni e,” a han tih zawm leh a.

Eng eng emaw sawiin kan phul luam a, ‘Captain‘ tia min ko ṭhin hi Captain nihna eng mah ka neih loh thu te ka sawi ve a; ani lah chuan a remchang alawm, a pawi lo a ti mai zel si a.

Kan thu sawi chu thlakin, “Tun hma kha chuan ka theih ang anga thlai thar enkawl hi ka duh tawk mai a; tunah chuan hmun dangte tlawha sumdawnna tih len ve te chakna ka lo nei ta a. He lai thliarkar leh Carolina, England thlenga kar tawn vel te ka chak ta a; mahse, sumdawnpui tur, mi rinawm deuh England-ah zawn a ngai dawn a, vah chhuah hi ka harsa bawk si a,” te a ti ta zel a.

Chutia a han sawi chuan ka rilru-ah Brian-a a lo Iang zawk a, “England-ah khian ka unaupa Brian-a chu dàn zirin a awm mek tak asin, nang nena thil tih dun vel pawh a chak khawpin a rinawm. Ka lo hriat dan phei chuan London-ah pawh mi pawimawh tak tak ṭhian a ngah hle a, dàn lam pawh a hre viau tawh ang,” ka ti ve a.

Ani chuan, “A ṭhat nasat chu, ka han zawng ang e,” phur hmel tak chuan a ti ta sauh sauh a. Chutah, Legare-a chu a ding ta hluai a, “Nang ve hi, eng nge i tum ve a?” tiin mi zawt ta a.

“Kei chu ram reh leh fianrial, ram thar kai chi ka ni. Hetiang hausakna te hi ropui ka ti a; mahse, ka tlei vena chu rampalaileng, ngaw chhung reh tak tak a ni tlat. Hausakna te hi ka tan a hlu ve vak lo va, ka khawsak duhna hmunah ve hi chuan mi tih tham an awm lovin, ka hausa a ni tih hre tur an tam ve ngai lo alawm....

“In te reuh tê chu ka nei ve a, a bula huanah chuan vaimim ka ching ve a; mahse, kalsan a ngai ta a. Ka thil tih hi ka zawh hunah ka la tuai hnum ang a, sa kah tur lah silai leh a mu a awm a thu a ni mai. Khawpui nun leh thawmhnaw te hi ka la awt chhin ngai lovin ka awh ve chu lehkhabu a ni mai; lehkhabu chhiar hi nuam ka ti a...,” tiin ka sawi ta duah a.

Chutiang ka sawi lai mek pawh chuan ka rilru chu hmun dang daihah a awm a; khaw'nge Max Bauer-a hi? Pittingel-a chuan eng nge tih a tum zel ang?

Vawi khat dang chu an thil tum ka ti tlawlh leh ta chu a ni a; mahse, a ṭhulhtir hlen phah dawn hauh lo. Min thah ngei an tum a; tunah erawh ka la nung ve tlat si! Zan thimah chuan min beih tuma min chan chu ka ring chiah lo va, a chhan chu Maroon-ho awm hi an hre tlat a, thimthamah chuan anni aiin an zei zawk bawk si.

Chutah Legare-a chuan, “Port Royal emaw, khawi hmun emaw pawh i pan dawn chuan sakawr tawlailir ka ngaihtuahsak thei ang che,” a rawn ti ta a.

Kei chuan, “Darkar 2/1 ka chawl phawt ang a; chumi hnu chuan sakawr ṭha tak ka mamawh zawk ang,” ka lo ti a.

“Sakawr maw?” hre thiam lo fe hian a ti ta a.

“Chhun engah chuan ka kir leh hi min lo chang dawn tih chiang sa a ni a; tawlailirah chuan mahni tal chhuah zawh lohna tur thang kan inkam chawp a ni hlauh zawk ang,” ka ti ta a.

Zanlai pelh hretah chuan an tirhkah, mi hangpa chu ka khum bulah lo kalin min rawn sâwi harh a, “Captain, thawh a hun ta e, coffee ka rawn la ang e,” a han ti a.

Pindan te tak tê, nuam zet maiah hian ei tur tuihnai tak tak min lo chhawpsak ṭeuh mai a, rei lo têah chuan ka inthun puar ta liah a.

Chutah, mi hang tirhkah chuan step chhe zetah hian min hruai thla a, “Hei hi salho awmna lam a nih hi, he lam aṭanga chhuah hi i tan a him ber ang,” tiin ka himna duhin min hruai chhuak hi a lo ni a. “Kan pi i lo ṭanpui chu kan lawm tak zet mai,” a han ti zui leh a.

Sakawr dahha in phen thim lai takah chuan sakawr dum peih sa diam hi a lo awm a, chhuah vat vat nghakhlel ni àwm hrim hian a lo per ṭak ṭak a. Sakawr zin pawh phah sa diam a niin, a zinah chuan pistol pahnih, a paia inthawlh sa thlep hian a awm bawk a.

Mi hangpa chuan ka kalna lam tur kawh pahin, “Khawi kawng mah i tan hmun him a awm lo vang; mahse, hmun ralṭia khawsa ṭhang i ni tih ka hre tlat a ni. Tluang taka i kal theih nan ka duhsak a che,” tiin min thlah ta a. Mi hangpa chu hnung lam rawn hawi leh tawh lovin in lam panin a kal ta a.

Rei fe chu chechang lovin sakawr dahna in phen thim laiah chuan ka awm a; zan chu a reh hle mai. Sakawr pakhat chu awm hle hle thei lovin a per sek mai a, in hungna pal chu hêlin kawngpui chu ka hnaih phei ta a.

Kawng sirah chuan dingin thawm ka ngaithla ta a. Hla vak lovah chuan dil a awm a ni ngei ang, uṭawkte chu an hram karh karh hlawm a, zan lama thawm chhuah chi rannung dang thawmte nen; chûng bâk thawm dang hriat tur chu a vang hle mai.

Santiago De la Vega lam pan tur chuan thawm dim takin ka sakawr chu ka pawt her ta a. Ka kut ding lam chuan ka pistol pai pakhat chu ka'n sâwi thawl a; khua ka thlen hmain ka ralthuam hi hman a ṭul ngei dawn — ka hre tlat!

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)