THE WARRIOR'S PATH (Completed)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

THE WARRIOR'S PATH (Completed)

Unread post by Rozami pachuau » August 12th, 2019, 8:10 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 1
(Rozami Pachuau)

Ka beisei tak chu savawm thau tak a ni a; ka va tawn tâk erawh chu Indian putar cher tak mai a ni thung.

Chu lai tlang ram chu a reh hle mai a, ni zung chuan tlang chhip te chu a em rut a, kawr thûk tak takte chu ṭiauchhum chuan a bawh luih a. Blue Ridge tlang vêlah te chuan chhawkhlei an par vul chuk a; chûng chhawkhlei buk hnuaia ka birukna lamah te chuan ka lu leh koki vel te chu chhawkhlei par lo tlate chuan a bawh chiai tawh a.

Ngawi reng leh fimkhur êm êm hian ka thlang kawng chu ka thlir reng a. Chu kawng chu kawng hlui zet mai a ni a; Cherokee leh Shawnee-hote, he lai hmun an lo chuan chhuah hma daih, hmakhawsanga mi tluk zeta upa tawh a ni.

Nilengin chu lai hmunah chuan sava hram ri lo chu thawm dang hriat ka nei lo va; mahse, eng emaw chuan chu lai kawng chu a rawn zawh ngei a ni tih erawh ka hre chiang hle. A khat tâwka kawng sira savate, hlauh neia an thlâwk leh pharh ṭhin te chuan chu thil lo thlen chin chu min hrilh chiang hle thung.

Savawm thau ṭha tak ka mamawh a ni. Sa thau ka tlakchham avangin nâk ruh lang ṭhuakin ka tla kuam tawh a; hêng lai ramah hi chuan sa thau chu thil vang tak a ni. Sa kan hnianghnar a; mahse, an thau lo hlawm hle thung si.

Beisei loh deuha chu Indian-pa ka tawng tlat mai chu ka lungni lo kher mai! Indian-ho zingah hian ṭhian ṭha tak tak kan nei ngei mai a; mahse Indian, ṭhiana i siam chuan a hmelmate chu i hmelma-ah i siam ve a ṭul tihna a ni. Chu bâkah, tun ang huna Indian, buh duh ve tak mai lo mikhual chu fairel bel a phai chak ngawt ang, kan tlakchham lai tak a lo ni kher bawk vei nen.

Savawm thau tak tih lovah chuan tuna ka thlakhlelh ber mai chu Yance-a a ni. Ani, sa pela ramchhuak chu savun tam tâwk nen a lo haw êm ang chu maw!

Chu Indian-pa chu a tar tawh hle a, ka entlanga ka'n thlir chuan hliam tuar ni ngeiin ka hmu tlat mai! Chhawkhlei buk kar aṭang chuan ka lo thlir reng a, muangchang fahran hian ka lam chu a rawn pan phei a, min la hmu ve lo ni ngeiin a lang.

Chu putar chu chau tak, ṭanpui ngai hliah hliah hmel pu hi a ni a; mahse, têt tê aṭanga Indian-ho lo dawr ṭhang tawh ngang ka ni a, an fin kherekzia ka hre tlat. He putar pawh hi thala kah theih tura ka inpho lan nana an rawn tawktarh pawh a ni maithei a, ka phur zawng a ni hauh lo mai.

Fimkhur zet chungin ka'n ding chhuak a, he lai ramah hian Indian ṭhenkhatte chu ka lo inbakkaihpui tawh a; mahse, keimah ngeiin thi tura ka kahte tih loh chu hliam tuarin ka kalsan ngai lo.

Chu pa bul ka zuk thlen chuan tlu mai turin a lo petek nasa tawh mai a, a tlu tur chu ka va kuah ding hman ṭâwk a. A chau satliah ni mai lovin hliampui a lo tuar ngei a; silaia kahna hliam tuar a lo ni nghe nghe a. Fimkhur thu-hlaah a chemtê pai lai chu ka phawisak hmasa tê te a, tichuan kan bûk lam pan chuan ka kuah phei ta a.

Kan bûk, Yance-a nena kan sak hi Indian-ho laka invenna remchang tak tura sak a ni a, a hnung lamah chuan kham bung vut hi a awm zui a; Seneca-hovin ka pa leh Tom Watkins-a, Crab orchard tlang sang hmuna an thah hnu lawka kan sak a ni nghe nghe.

Indian putar chu khumah ka muttir fel chauh tih chuan a thidang zui a; tui lum ka chhuan chhung chuan a thawmhnaw hâk lai te chu ka hlihsak a, a hliam tawrh chu a na hle tih kan hmu ta a.

A dàr chung deuhah silaimu chu lûtin a tawn tlang a, a dàr hnung lamah chuan a vun tawn tlang si lo hian a lo pawng pur mai a. Ka chemtê chuan a vun chu zai pawpin silaimu tang chu ka sawr chhuak a, a hliam chu a hlui tawh nen, a pun lo chu mak tak zâwk a ni.

Sakim-a khan hetiang tlang sang hmunah hian khawpui lun lai hmun te ang lo takin hliam a pun ve ngai loh thu a lo sawi fo va; Sakim-a hi ka pa ruala America rama lut ve a ni. Tun hma chuan Asia khawmualpui laili-ah damdawi leh mi zai lam lo zir hrep tawhin, thlahtute aṭanga damdawi lam thiam an lo ni tawh a.

Chutiang chhungkua aṭanga lo seilian a nih avang chuan hetiang lam hi chu hre tak a ni. Ka pa nen lawng suam hmang, Nick Bardie-a lawngah an lo tang dun ren rawn tawh a; hei hi an lo inhmelhriat ṭanna chu a niin, chumi hmun aṭang chuan an tlan chhuak dun ta nghe nghe a ni.

Naupang tê kan la nih laiin Shooting Creek hmunah te chuan kan zirtirtu ber a ni ṭhin a. Amah hi mi thiam, hriatna zau tak nei niin, chûng hun lai chuan Europe-ah pawh ani anga mi ril an awm kher lo vang. Khawvel finna, thil hlui lam zirna te leh damdawi lam thiamna te hi a tuina ber a ni ṭhin. Tunah te hian ani kha han awm ve ni se chuan ka ziaawmpui tur.

Chutiang lam ngaihtuaha ka buai chhung chuan kan putar hliam thidang pawh chu a lo harh ve leh ta a, “Sackett-a i ni em? Pi Penney-i'n min rawn tir a,” la chauh hmel fe hian a rawn ti nghal a.

Penney tih hming pu ka hriat chhun chu Yance-a nupui a ni a; a hming pum Temperance Penney tih chauh chu — tunah Shooting Creek-ah kan sa pel haw min lo nghak mek a ni si a.

“Pi Penny'n lo kal vat turin a duh che u. Buaina nasa tak a awm — Carrie-ite an ru bo daih,” tiin a han sawi chhunzawm leh a.

Chu veleh kei chuan, “Carrie-i; Temp-i nau hmeichhe naupang tê kha maw? Engtin? Tu nge ru bo?” ka lo ti zung zung a.

Ani chuan, “Pequot Indian-ho phiangsen maw le!” a han ti leh nghat nghat a.

Tunah chuan he putar ka lo chhan hlauh chu ka lawm ta kher mai! Ani hi lo tawng fuh hlauh lo ila, Cherokee-ho ram vah kawng bumboh zet maiah khan Yance-a ka zawng buai hrep tawh ngei ang chu. Ani lah hi a lo tlai leh hle dawn a nih hmel lehnghal si a, Indian-ho a chhaih kawlh leh ta pek em maw ni dawn ni ka ti rum rum hial a ni.

Mahse, Yance-a zawng tawh khirh tak mai a ni a; an lo dang chêp te a nih teh zawngin an châk lo ngawt ang. Amah hi kan naupan laiin ka chhaih kawlh tawh alawm, pangti himdama ka chhuak leh thei hi chu vannei tak ka ni.

Yance-a hi zawng, bâwng chal anga chak, savawm anga chhel leh tlang ram sakei ang maia insual thiam a ni a. Pa ngaih sam àwm taka lang, thil duh tui êm êm si a ni.

Ka pa kha mi khermei tak a ni ṭhin a, thil ti tlang hrâk mi, mahni hna tlin taka ti mai zel mi a ni a. Keini unau pawh hi chutiang tur chuan min beisei ṭhin reng a; chu vang chuan keini pawh a ṭul hunah chuan kan inhâi kaw zo ve hle ṭhin.

“Pi Penney chu a hmanhmawh hle a ni,” Indian-pa chuan a han ti leh bauh a.

Ka silai; a dawt aṭanga a mu leh zen thun chawp chi chu ka'n la a, kawngkhara ding chung chuan kawng lam chu ka thlir a; Yance-a lo haw pawh Indian-hovin an rawn ûm te a nih chuan he lai aṭang hian pahnih/khat chu lo thal ve theih mai ka inring deuh a ni.

Vawi khat chu, Yance-a ram kal haw hi vawmpui kawlh zet mai hian a hnung lawk, pên hnih/khat lekah hian a rawn ûm haw ta pek a, kawngkhara Yance-a luhtir a, savawm khar hnan chu thil buaithlak tak a ni. Chu achhapah, chhuat ka lo nâwt fai hlim chauh bawk nen, kawngka chu khar a, pawnah chuan an inhriat thiam lohna te chin feltir law law ka duh rum rum a ni.

Chutah, eng emaw ti tiin savawm chu kan ti hlum thei ta hram a.Yance-a hnenah chuan, “A vun chauh alawm kan duh; a pum puma rawn hruai haw kher tur em maw ni le?” chhuahchhal titih hian ka'n ti a.

Ani lah chuan, “Savun lih hlim hlawl, ni sen sa hnuaiah, kawng chhengchhe pui pui kal tlangpui tur pathum ngawt a awm lehnghal a, i peih bik dawn em ni?” a ti ve khauh a. “Amah ka rawn inphurhtir a nih hi,” te chu a la ti zui a.

“Kah hlum mai tur alawm,” ka'n tih leh chuan a thutak leh ta deuh a, “Silaimu ka thun lai takin mi rawn bawh thut alawm maw le! Kâp hman tawh hek lo i, chak zetin ka rawn tlan ta mai a ni,” ti-a kan titi lai hun te kha ka'n ngaihtuah chhuah leh tâkah chuan ka nuih te chu a za hnuhnawh lek lek a.

Tun ṭuma a lo haw tur hi chu sakawrte a ken avangin a dan a dang ngei ang. Sakawr chung chuang chung chuan hmun fai lai zelah lo chuan kal thei dawn hek lo; Indian-hovin lo bei ta se, amah a luhlul ropui si a, a savun phurhte chu a tlansan dawn hauh si lo, puih chu a ngai ngei ang le....

“Temperance-i pasal em ni i nih?” Indian-pa chuan a han ti leh a.

Yance-a emaw min ti a ni ngei ang; hmeichhe pahnih bo thu te kha a sawi a, pakhat zâwk chu tu tak ni ang maw?

Ṭanpui ngaite'n kan ṭanpuina an rawn ngen a, chu kohna chu chhang lo thei kan ni lo. Hmun hla taka kal tur kan ni a, kan thlaite erawh chuan an tuar ngei dawn a ni. Kan mamawh turte chu ka siam fel sawk sawk a, rei lo têah chuan chhuak mai thei turin kan inpeih ta a.

Kan kawng zawh tur chu 'Warrior's Path' an tih mai, Indian-ho kawng hlui zet mai hi a ni a. Indian indo mite pawh kan tâwk zauh maithei a; mahse, he kawng hi zawh lo thei kan ni bawk si lo, hmanhmawh thil thu-ah chuan a remchang ber tlat a ni.

Kan mi bo zawn turte chu an ngaihtuahawm tak zet bawk. Indian-hovin an lo man tak tak te a nih phei chuan an mi mante an dim ngai si lo. Salah pawh an duh maithei a; an hralh duh maithei bawk a; an huai leh huai loh fiah nan an sawisa hlum ṭhak maithei bawk. Indian-ho chuan huaisen an ngai sang ber a; dâwihzep taka an lan erawh chuan an that hmiah ang.

Temperance Penney leh Yance-a chu Cape Ann hmuna inchhar an ni a. (Hetih hun lai 1630 bawr vêlah hi chuan tuna America kan tih mai USA-ah khuan mi ngo cheng an la tlem hle a, tuna Cape Ann kan tih te pawh hi khua han tih tur tak tak pawh a ni lo va; Europe aṭanga mi hrât khawkheng ṭhenkhat, ram thar (America) bawhtute zuk inkhuarna hmasa, bûk hmun ang vêl a ni ber mai e.)

Keini, Sackett thlahhote hi chu mi vâk zau leh hrât khawkheng tak mai kan ni a; ram pilril, la dai dar loh hmuna vah chhuah te hi nuam kan tih zawng tak a ni. Jamestown lam te pawh kan zuk thleng tawh a, kan zinga mi Kane O' Hara phei chuan chu lam chhuak chu nupuiah a zu nei nghe nghe a ni.

Kan awma aṭanga hmar lam hla taka Pilgrim-ho awm thu te pawh kan hria a; mahse, chumi hmun va thleng awm chhun chu Yance-a chauh hi a ni. Yance-a hi chu Indian ang maia mi teihawi taima, mi khawsa zia chik peih êm êm mai a ni a — chutianga a va teihawina lamah chuan a nia Temp-i pawh hi a va hmuh ni.

Chutih lai chuan Temp-i chu zawhtê no ang maia zei, nulât hre ṭan tawh hi a ni a, mahni thu duh leh hawi harh tak mai a ni. An chenna hmuna cheng ve dangte chu mi ṭha tak tak ni hlawm mah se, kalphung neia khawsa tlut chi, hlimhlawp ngaina lo leh puithu êm êm an ni a, an inmil meuh lo a ni.

Yance-a tan chuan Temp-i chu vawi khat hmuh a tâwk hle a ni! Khaw dai, tlang pang thing hmun aṭanga Temp-i chetla a va hmu chu tih danglamin a awm nghal a ni ringawt mai.

Khaw thim a nghak tê te a, a sazuk kah dàr chu phawk hlawkin Temp-ite kawngka bulah chuan a ruk têin a zu khai a; kawngka chu a'n kik dawt dawt a, thimtham lamah a insaseng ta daih a.

Hetih hun laia America hmar lam rama pem tharte chu sa pel mi an awm mang lo va. An lo chhuahna ber England ramah te chuan an ramsate chu lal ta a ni si a; thih huama an phil ru te a nih ngawt loh chuan sa pelh tur dang an nei lo a ni.

Ramhnuaia sa pelh vêl pawh an zei lovin sa an tem khat êm êm a; America ram an luh tâk hnu pawhin sa chu tam teh mah se, zei thlawt hek lo, an râwp rehna khawp sa an that thei lo a ni. Chutianga beisei loh tak maia mahni kawngka bul maia sazuk dàr phawh hlawk an han hmu ta mai chu, i-he lovin lawm takin an la nghal hmak mai a ni.

Sa chu tu rawn pêk nge tih chungchangah chuan Temp-i chu a ngawi hmiah a, a hna pangngai – ei rawng bawl leh sekrek dang chu a khawihsan daih a, eng mah ngaihtuah àwm pawhin a lang lo.

Mahse, Yance-a nen an inneih hnua a sawi leh dan chuan, tlang pang vela Yance-a chetla vel chu a lo hmu ru fo tawh a, chu vang chuan sazuk sa rawn petu pawh chu a lo hre ru kiau a ni. Chumi hnu rei vak lova sa dang khai chunga Yance-a a zuk inlan leh pawh chuan, an lo khual ṭha thlen nghal mai reng a.

Yance-a chu pa titi ngah tak a ni bawk a, a thu an ngaichangin bengvarthlak an ti hle a; mahse, khawi lam aṭanga lo kal nge a nih chu a sawi duh dèr lo. Welsh thisen kai, pa titi thiam leh dang nal a ni bawk a, a titi a ngaihnawm ṭhin reng a ni.

Mahse, chutianga a va khawsak lai chuan Temp-i chu vawi khat tê mah a ngaih melh chhin eih lo va; Temperance-i erawh chuan tu vanga chutiang taka khawsa nge a nih chu a lo hai miah lo thung.

Mahse, Temp-i te ang nula fel leh hmelṭha chuan mipa chu an lo hip nge nge a. Sumdawnga rawn tlawh zauh zauhtu bâkah, chu lai an awmna hmuna tlangval, 'kei ka ni' inti deuh pawhin an lo beisei mek laia chutia mikhual tlangval; savun kawr ha, lukhum hlaipui mai khum, tlangnel lutuk tak maia a'n titi sarh sarh reng mai chu an ngaithei lo ta thuai a.

Chu mai bâkah Yance-a, kan chhungkaw ze dik tak mai kengtu, mi rilru zalen leh ngaih dan sawi tlang pawp pawp mai mi chu an ter thei lo ta thuai a.

Ka pa khan, chhia leh ṭha hriatna hmang fimkhur tur leh ngaih dan leh duh dan, ṭhaa kan hriatte chu zalen taka hmang turin min zirtir ṭhin a; chu vang tak chuan Yance-a, pa titi ngah tak chuan Temp-i a rimnaah chuan chûng lai rama chengte dàn kherkhiap tak mai chu a bawh chhe ta kau mai reng a.

Yance-a chu an man ta a. Chutih hun Iaia an mi mante chu thing pal lian pui pui an hung kual pup chhungah kalh hnanin, bawlhhlawh leh thei rah ṭawihtein diriam takin an vawm hrep ṭhin a. Tlangvalho lah chuan chu Indian ang tak mai chu an deusawhin tih nawmnah an phur kher mai!

Yance-a erawh chuan dawh thei takin a tuar hram hram reng a, chu lai hmunah chuan a tang chatuan dawn lo tih leh eng emaw ti tala Temp-i chu inrawlh tura a beiseina chuan a awm a ti nuam tlat a ni.

Temperance-i chuan eng thil emaw chu a rawn ti ta ngei reng a, hungna kawngkhar kalhna chu rawn hawngin a rûk têin Yance-a chu a rawn chhuah ta hlauh a.

Yance-a chu a kum phu lohin a fing a; chuvangin, i-he lovin chu lai hmun chu a chhuansan ta hmiah a; chu mai pawh ni lova a tih fuh êm êm chu Temperance-i a hruai ve nghal zaih chu a ni.

Yance-a chuan Temp-i chhungte a zah avangin han rûk ngawt chu a hreh viau a; mahse, Temp-i chu a turtu-ah a ṭang ta hlauh a. Hla vak lovah puithiam an va hmu a; chhungte hriat loha lo inneihtir ngawt chu puithiam chuan a lo duh lo dawn a; mahse, Temp-i chuan zui a tum tho si a, a inneihtir ta a.

Kan zinga a khawsak hnuin Temp-i chuan zin veivak remchang an awm ṭumin a chhungte chu a khat tâwkin chanchin a hrilh ve ta a. Chutianga dàn ang thlapa pasal a neih avang chuan a chhungte pawh chu an lungawi ve ta deuh a. Chutiang chuan tun hun hi kan lo thleng ta a; tunah harsatna an tâwk a, ṭanpui turin an mâkpa Yance-a chu an rawn chah ta a ni.

Temp-i chhungte chenna Massachusett Bay tuipui kam vêlah chuan mi ngo cheng ve an awm nual tawh a; mahse, chûng mite chu Europe aṭanga lo pem thla thar, Indian chinchang la hre miah lote an ni deuh vek hlawm a ni.

Keini chuan Indian-ho chu kan hre hneh hle tawh a; Indian-ho zingah rau rau pawh Pequot-ho chu kawlhsen chungchuang, tawr ṭha pui pui leh mi ngo haw êm êmtute an ni tih pawh kan hre chiang hle a ni.

Ka rin dan chuan Yance-a rawn chahtu pawh hi Temp-i nu a nih ngei ka ring. Nu fing tak, thil chîk thei leh inkhâwm ṭhulh ngai lo; mi a'n melh thuak pawha an áwm hmul leh hmul loh hre thei khawp a ni a; Yance-a pawh hi a áwm hmul dan vêlah pa rin tlâk tâwkah a ngai chu a ni phawt ang a, a ti sual lem lo vang.

“Tute'n maw nulate chu ru bo?” ka'n ti leh ngat a.

Chu Indian-pa chuan, “Pequots,” a ti mawl tawp a, eng dang a sawi belh lo.

Ka ngaihruatna nge ni, chu Indian-pa chu enghelh nei riau hian ka hria a. Pequot-hote chuan an mi mante chu an that nghal mai lo a nih chuan va chhan chhuah ngei an ngai dawn chu a ni si a, a huphurhawm bep bep ṭhin teh e!

A thawm hriat hauh lohvin Yance-a chuan a sakawr chunga chuangin kan bul chu a lo thleng ta mai a; chutah, a thil rawn phurhte chu kan hlang thla ta sawk sawk a.

“Ka va kal ang e; nang chu i huan thlaite i kalsan thei lo, lo awm mai rawh,” Yance-a chuan a ti nghal zung zung a.

Ka phu deuh zawk hial mai! Engtin nge a hriat? Sawi tur pawh ka hre mai lo nghe nghe a ni.

Yance-a chu ngun deuh maia en chungin, “Sackett-hovin an chhungte an phatsan ngai lo tih hi miin lo hre ve se ka ti a; chu bâkah, Indian-ho i buaipui chhungin i hnung lam te ka lo veng ve thei ang a, kal ve ngei ka tum e,” ka ti ve hmak a.

Yance-a chuan, “Pequot-ho tawh khirhzia te kha i lo theihnghilh palh ang e, anni chhaih kawlh chu tih namai a ni lo vang,” a la ti ve ṭalh a.

“Ani hi engtin nge ni dawn?” tiin Indian putara chu ka'n en a, “A tar tawh bâkah a hliam a na hle si a...,” ka han tih zawm a.

“Ka kal dawn! In kal emaw, kal lo emaw ka kal tho tho dawn,” Indian-pa chuan a lo ti vêi hmak a.

“I kal muang a nih pawhin ka kalsan tho ang che,” Yance-a'n a han tih chuan Indian putar chu a sa kher mai a, “Huh! Nangmah zâwk kha ka kalsan tura chu i ni,” ner nang chung hian a lo ti lêt salh a.

Chhuak thei mai tura kan sakawrte kan peih fel vek hnu chuan chaw kan ei ta a. Warrior's Path kawng kan zawh chuan kan kal sâwt viau ang chu, chaw leh sa rep pai tur lah kan ngah tâwk a, kawng lakah ei tur dapa chawlh lailawk ngai dawn hek lo.

“Penney-i ṭhiannu bo ve chu tu nge?” tia ka'n zawh chuan chu Indian-pa chuan min chhang lawk lo va; a hnu deuhah chuan sawi châk lo hmel fe hian, “Macklin-i; hlo nula maw le,” a rawn ti ve ta a.

Hlo nula! Eng tihna nge ni ngai? Ngaw kar hnim eng ilote lawr khawm ṭhin a tihna em ni le? Chutiang mi chu a nih ngat zawngin, ngaw karah pawh a che thei viau ang le!

“Kan hmanhmawh a ngai ang, Kin; tu ma puihna pawh kan beisei phâk hek lo vang. Macklin-i phei chu tu mahin zawn enah an en lo vang,” Yance-a chuan hmanhmawh aw fe hian a han ti a.

A aw-ki chu a danglam êm avang chuan ka thil phuar Iai chawlhsan meuhin, “Eng vangin nge an zawn loh ang?” ka'n ti leh ṭalh a.

Yance-a chuan, “A chhan chu mite huat êm êm, dàwi thiamah an ngai tlat a ni; a bo hlauh pawh chu, 'Huai taka,' an ti lek zawk ang,” a ti chuai raih a.

“A nih leh, Carrie Penney-i ve thung chu?” ka'n ti leh a.

“Ani pawh, 'A ṭhian kawmin a zir lo a ni,' an ti ve mai ang,” Yance-a chuan a ti leh ta zel a.

************************

Khua a en meuh chuan thui fe kan lo thleng hman tawh a. Kan bûk kan chhuahsan kha kan fimkhur hle a, hnung lam aṭangin lungpui phena kal zelin, kham pang kawng biru zet maiah kan chhuak chho kha a ni a; tu'n kan chhuak tih an hre hauh lo vang. Chutiang taka fimkhur chuan lungpui leh chhawkhlei buk phen pah reng chungin kan kal zel a.

Tun ṭum hi Indian, sakawra chuang ka hmuhna hmasa ber a la ni. Kan Indian putara chu Tenaco a ni a, a ṭawng tlem hle.

Hêng lai hmuna cheng hmasate hian sakawr an chelek lo hle a; keini pawh hian Spanish sumdawng pakhat‚ Spain rama kir leh mai tur kan hmu fuh a, kan Ieisak ta a.

Hetih hun lai hian Florida hmuna cheng, Spanish-hote chu English-te nen sumdawnna kawngah inkungkaih phal a ni lo va. Mahse mihringte hi zawng, famkim lohna khawvela cheng kan ni miau si a, ka pa min hnutchhiah rangkachak tangka ṭhahnem tham tak kan la kawl ve aṭang chuan kan sakawr man chu kan pe ta a.

Tuna kan awmna lai hi Indian-ho ram a ni a, mikhual tawh phawt chu anni tan chuan hmelma an ni vek mai a; mahse, an zinga ṭhenkhat chuan hâwkdak vang hrim hrim emaw, thil inthleng duh vangin emaw mi ngoho chu an dawr ve chawk bawk.

Hmun hla tak pan tur kan ni a, ram pilril leh ṭihbaiawm, ngaw dur pui pui karah kawng reh leh khawharthlak tak te zawh a ngai a, eng lai pawha thihna tâwk thut thei dinhmunah kan ding a ni tih inhriatna chuan min ti ṭi dak reng mai a ni.

Tenaco-a pawh Indian a nih avang ngawtin a him thei mai bik lo, Indian hi chu anmahniho pawh inphil leh inrun reng reng ṭhin an ni miau a. Chutiang chuan alawm Warrior's Path hmun chu kan zawh ni — mi pathum; sakawr chung chuang leh thuam phur sakawr pakhatte chuan....

‘Dàwi thiam-nu' an ti maw ni kha? A ṭha e. Kei chuan dàwi tih ang reng vêl hi chu ka rin zawng a ni lo. English-ho pawhin hetiang thawnthu hi chu an ngah ve hle mai — Dàwi thiam, Phûng, Thlahrang leh Lasi tih ang rengte....

Dàwi thiam tia an sawi chuan kan nula-i chu tu ma'n an uksak lo vang‚ a naupang hruai pawh chu, 'A vanduai a ni,’ an ti liam mai ang. Indian-hovin an man pawh chu, 'An phu tâwk an hmu,' an tihsak duh lek chauh ang.

Mihring leh thil dang hnuhma reng kan hmu lo. Far thing ngaw ding khup maite chu pal tlangin phulrai nuam zet mai te chu, 'Tute tak lo khawsa tawh ṭhin ang maw?' ti rilru chungin kan kal pel zel a.

Sakim-a khan thil tam tak min zirtir a, chûng zinga pawimawh tak pakhat chu, a hun leh a hmun mila chêt lâk thiam hi a ni. Tun ṭuma kan thawk chhuak pawh English-hovin indonaa an hman ṭhin, thal ngul sei chite pawh kan keng a.

Keini chhungkua leh kan laichin hnai deuhte chuan thal hi chu kan chulnel viau reng a; silai te angin suan leh zen a ti hek ve lo va, thawm a nei zawi ṭhain, ri thangkhawk a chhuah ve ngai si lo; chuvangin, hmelmate pawhin lo inrinna hun an nei ṭha hman ngai lo a ni.

Kan chheh vêl tlang leh phairuam te chu a reh hian a reh tlawk tlawk a, a luah lumtu tur mihring a mamawh ngawih ngawih ni hian ka hria. Ram hausa leh ṭha elkhen pawhin luah lumtu leh enkawltu a neih loh chuan rah ṭha a chhuah thei lo tih hi ka ngaih dan a ni tlat a ni.

Tlai ni tla tur chuan kan chheh vêl tlangte chu a kâp eng sen sur mai a; thâwk leh khatah, sava rual khat hi tlang sang lam panin an thlawk chho ta ham ham a. Ni tla turin chûng sava thlawk lai a'n em chu thil puak darh nasa tak, thawm nei hauh si lova a sem darh chuai hi a ang ber mai; chutah, a reh hian a reh leh ta tlawk tlawk a.

“An chhia a ni ngei mai, thisen a chhuak dawn a nih hi!” Tenaco chuan sava thlawk lai en reng chung chuan a ti ta a.

“Kan thisen chu a ni lo vang; Temp-i unaunu thisen pawh,” Yance-a chuan a lo ti hmak a.

“Chu, amah chu eng rual nge?” ka lo ti ve a.

Yance-a chuan, “Nula ve ek ek tawh, thli fim ang maia nun nem leh ngainatawm maw le. Amah tê kha alawm — Temp-i tih lovah chuan tlangnel taka min lo chhawn vetu chu,” a han ti a.

“A ṭhiannu thung chu?” ka'n ti leh a.

“E, kha nu kha maw, nula ve ar ar tawh maw le. Ṭawng thlahdah lo leh ngawi thei tak, ṭhian kawm aia mahnia awm melh melh nuam ti mi, nula hmelṭha chungchuang tak niin, amahah hian 'riau' a awm tlat lehnghal,” tih pahin min han melh a, “Kin, i duh zawng tur chi tak maw le. Hmu la chuan a dàwi thiam leh thiam loh lam i thlu miah lo vang‚ i mawih nghal siah siah mai ang chu le,” a han tih zawm Ieh a.

“Dàwi thiam leh ai en thiam tih ang rengin ka ngeng a chhun ve ngai lo ve!” ka lo tihsan mai a.

Ani thung chuan, “I hmuh ve hunah kan la hria ang chu. A mi han melh te kha a na vêi ngaih ngaih a nia, kan nihna zawng zawng hi a hmu tlang vek emaw tih mai tur hian min melh thei nia maw le!” uar fe hian Yance-a chuan a han ti leh a.

Nuih za insum hmel tak hian Yance-a chu a han nui vêi suih a; chutah, “Tlangvalho pawh khan an ṭihin cho enah an en ta lo deuh a nih kha. Puan ṭhui, la phiar leh sekrek dang khawih pawh a zei vêl vek mai.

“Mahse, a thil tihahte chuan tuina êm êm a nei lo tih a langin amahah khan khawharna a lang tel tlat an — a khawsa zia aṭangin ka man mai. Tlangval, amah hnim hnaih han tum deuh pawh a bulah chuan sawi tur hre lovin an hawi â lo chauh zel,” tih pahin a nui kur kur lehnghal a.

Ngaw kar fianrial leh dài zetah chuan kan riak ta a; mutnaah pawh chuan fimkhur thu-hlaah a hrang deuh thliahin kan riak bawk a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 13th, 2019, 8:58 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 2
(Rozami Pachuau)

Ni tam fe kan thang ta.... Zanah chuan kan riahna mei khu te chu van boruak thiang takah zam chho ngiai ngiaiin, zingah varṭian aṭanga ni tlâk thleng rawkin kan kal ṭhin a; kan zin kawng tawp huna kan va tawh ngei turte lah chu Red Indian zingah pawh a kawlhsen ber leh ṭihbaiawm ber mai, Pequot-ho an ni si.

Indian-ah pawh Pequot-ho kher hi chu a tawh khirh bera ngaih an ni a; mahse, kan monu nau, kan thisen zawm ngei zawng tur chuan an zinga vah luh chu a ngai miau mai si.

Carrie-i ṭhiannu, nula hmelṭha leh ṭawng tam lo tak an tih chu ka rilru-ah a lo lang thut a, 'He nu chungchang thu a sawi laia Yance-a min han melh dan kha a dik lo deuh tlat, engtizia chu ni maw?' tiin ka ngaihtuah neuh neuh a.

Kan inthuamnate chu a mawlmang hle; lukhum parh hlai tak leh savuna siam kawr, a darfem nei bâkah Indian-ho pheikhawk moccasin kan bun a; mawlmang hle mah se, ngaw kara inthuam nan chuan duh thu sam a ni thung.

Moccasin mawlh hi, thawm dim taka kal vêl nan a ṭha tak meuh a, ngaw kar hnahthel hmunah pawh thawm nei lovin a kalpui zung zung theih a; mahse, a chhe hma deuh êm a ni.

Zan mut hmunah te chuan Plymouth chanchin te Tenaco-a chu kan zâwt ṭhin nâin sawi theih a nei vak lo va; Cape Ann vela mi ngoho zinga chetla ṭhin a ni a, a va tlawh ve tawh tih bâk a hre lem lo pawh chu a àwm lo lem lo ve.

Tenaco-a hi Massachusset hnam niin, mi ngo nena an inkar chu a chhe ve lo va. Tun hma mi ngote'n awm hmun an khuar hma tawhin pul hri a leng a, an thi chiam mai a; an lo chaurau ta hlein, ral hlau reng rengin an khawsak a ngai ta a.

Chutiang an lo nih tâkah chuan an hmelma hlun Narrangansett-ho chuan kut thak hnawih nan tak an hmang ta a. An ram neih chhun pawh chhuhsak dawna an hriat lehzel tâkah chuan Tenaco-ate lal chuan mi ngoho chah chhuakin ram ṭha lai ber, Narrangansett-ho ram chu a luahtir ta hmiah a ni.

Cape hmun kan va thIen chuan zan a ni a, khua a thiangin boruak a vâwt hle a. Khuaa han sawi tham êm a la ni lo bawk a, in tlem tê leh lian lo tak tak an ni.

“Khawi saw nge kan thlen in tur ni ang le?” tiin Tenaco chu ka'n zâwt a.

Ani chuan zaizir hian piah deuh lawka lunga sak in pakhat chu min kawh hmuh a, “An pa ber saw England-a an awm lai chuan lung mistiri a ni ṭhin,” a'n ti zui a.

“Min lo ngaichang rih ula, rawn inlan ve rih suh u. Mahni chauhvin va kal rih ila a ṭhain ka hria; Tenaco, he laia kan kal tur hi hria an awm ve em?” ka ti ve nghal zat a.

Ani chuan a dàr a chhin uk chauh a, eng mah phei chu a sawi ta lo.

Ngawi rengin chu khaw hmun chu ka thlir a, engtia chêt lâk tur nge ni ang tih ka ngaihtuah vang vang a. Kan sakawrte chu ngaw chhung ril tak, hmun biru takah chuan kan thukru fel vek tawh a, khuaa lut mai thei turin kan inpeih ta a ni.

Zan chu a reh hle a, thawm riva hriat tur a tlem kher mai! Tun ang zanlaia kan thawmhnaw hâk lai ang ha chunga khuaa va luh chu a tih chi vak loh. Savun kawr te hi Indian-ho incheina a ni a, mi ngo zingah a la lar ve lo va; mahse, tih ngaihna awm ta hek lo, hmanhmawh takin lunga sak in chu ka pan phei ta a.

Penney-ite in chu a hmunah chuan a lo lian ṭhain ral laka invenna tling tura duan a ni tih a sak dan aṭang chuan a lang mai a; Indian-hovin khua an rawn beih pawhin he inah hian an tlan khawm mai ṭhin a lo ni. In dangte pawh chu chiang lo ruaiin an kalh fimkhur hlawm hle tih chu khawnvar de va va aṭangte chuan a hriat theih a.

Kawngka chu zawi tê hian ka'n kik ta karh karh a.

In chhungah chuan phun sep sep hi ka hria a; ka hnung lam ngaw chhungah chuan chhimbuk a hram karh karh bawk a, thil che leh thawm dang hriat tur eng mah a awm lo.

Rei vak lovah in chhung lamah chuan puan han innâwt ri sat sat hi ka hre ta a; kawngkhar chu a hma aia ring deuhvin ka'n kik leh a.

“Tu nge ni?”

Chu âw chu a zawi hle nâin a aw aṭang ringawt pawh chuan a zam hle tih a hriat theih a.

“Sackett ka ni e,” ka han tih chuan kawngka chu tlemin a rawn inhawng a, chu veleh rang takin ka lut ta vat a.

“Yance-a a ni hlek lo mai!” phâwk fe hian a han ti a.

Chu thu sawitupa chu sa ṭha leh lawh, pa lian ni hauh si lo hi a ni a, a hmel chu en mai pawhin rin ngam hliah hliah tur hmel pu hi a ni a.

“Saw laiah sawn Tenaco-a nen an awm,” ka han tih tâkah chuan a thaw huai a, a hmel pawh chu hmuh theihin a hlim ta surh a. “Chu, Tenaco chu a lo thleng thei maw? Pequot-ho khan an lo that ta mai emaw kan ti hial asin,” phur hmel fe hian a han tih zawm leh a.

“Thah zawng an lo tum ngei alawm. Silaia kah pawh a tawng ngei a, silaimu chu keimah ngeiin ka phawrh a ni. He lai vêla cheng Indian-ho phiangsen hian silai an nei ve elo?” ka ti ve nghal a.

“Silai tih tham vak phei chu an nei lo,” tih pahin ṭhutna min kawh hmuh a, “Ṭhu teh khai; khaw'nge, ei tur te pawh i duh tak ang chu maw le,” a ti leh ta zung zung a.

Chutia a han tih chuan, “Ka lawm khawp ang chu,” ka lo ti thuai a. Ka lawm rilru reng bawk a, ka rilṭamzia chu ka'n hre chhuak leh a, ka pum te chu a ri rawih rawih hian ka hre mai a.

“Yance-a asin kan lo beisei,” nu pakhat, hmel ngainatawm tak; mahse, rilru hah hmel pu tak si hian a rawn ti ve ta a.

“Ani pawh a rawn tel ve e; mahse, he lai hmunah hian lawm a hlawh vak dawna kan hriat loh avangin keimahin ka rawn pawh hmasa che u a ni,” ka ti a.

“Nang pawhin lawm chu i hlawh vak chuang nâng,” tiin a ngaih dan chu tlang takin min hrilh ve nghal mai a.

“Thil awm dan kimchang deuhvin min han hrilh ula, rei rial pawl ka tum lo,” ka han ti leh a.

Chutah chu nu bawk chuan, “Ngaw-ah an lut dun a; Carrie-i lah hi Diana-i mei ang hlauh a ni a, Diana-i hi a zui chawt reng mai alawm maw le. Ani hian a lo hruai ṭhin a, ram hnimhnah leh eng ilo hnah nem aṭanga damdawi siam te hi ka zirtir e te a ti a; chutiang tura an chhuak chu a nia an lo rûk bo daih ni,” a ti ta zung zung a.

“Kal pawh an kal hla lo asin. Saw lai lawka ngaw kar phul hmunah sawn a nia, Diana-i phei chu mahni pawhin a kal mai ṭhin,” a han ti zui leh a.

“Vâk vak suh u ka ti ṭhin reng alawm; ka thu hi tu'n ngaithla duh hek lo che u!” thinur àwm fe hian Penny-a chuan a ti ta khur khur a.

“Ṭhiana kawm tlâk a ni lo tih pawh ka hrilh fo che u a ni lawm ni? Tunah hei hi kan tawng ta reng a nih hi,” a han ti leh tun tun a.

Penney-i chuan, “ 'An ti' tih mai maiah ka buai ve lo. Diana-i hi naupang fel tak a nih bâkah ka ngainat zawng tak a ni. Mahni ngaih dan leh duh dan anga awm ngam, huai tak a ni tlat; mahni thu a duh deuh a lo nih pawhin sawisel chi a ni lo ve,” a lo ti ve hlaih hlaih thung a.

“Chutiang ngawt a ni lo...! A hmel leh nungchang te reng reng hi; hnimhnah leh thlai chinchang a hriat dan êm êm te hi, eng emaw tak zawng a awm a ni. Lehkhabu a chhiar ṭhin te hi in hmu ve ngai na nge?” uar fe hian Penney-a chuan a'n ti leh a.

“A pa pawhin lehkhabu te chu a chhiar ve tho alawm, eng mah i sawi ngai loh hi,” Penney-i chuan a ti ve ta zel a.

Chutah zawngin pa thin a thawk ta aniang, hmai sen tun hian, “Sawi sawi tawh suh; ani te zawng, mipa - PA a ni. A reng rengah, an chhiar ṭhin pawh hi eng dang a ni lo ang e — Pathian sawi chhiatna thu vek a ni ta ve ang,” a ti ta buan buan a.

Nu ber pawh chu a ṭhu ngawi ta ran a.

Kan titi kalphung chu ka ning ta deuh riau a, “Han sawi chiang deuh hlek teh u a.... Hnim leh eng ilo rahte an zawng chu an rawn kir ta lo a maw?” ka han ti leh daih a.

Penney-i chuan, “Ni e maw le. Pequot-ho; thisena tuihalho chuan an man ta a, an thih leh an dam pawh kan hriat tawh loh hi,” beidawng aw deuh hian a rawn ti chuai ta raih a.

“An la thi lo maithei asin. He nula, Diana in tih hi chu nula fing tak zawng a ni phawt mai, hetiang mi hi chuan tlan chhuah dan kawng pawh an hre thei mai zel a nia. A nih, Carrie hi in fanu maw?” ka han ti a.

“Ni e, ka fanu ngei a ni alawm.”

“A nih leh, Pequot-ho rûk bo ni-ah in ngai a ni phawt mai a, anmahni emaw, an hnuhma emaw hmuh in nei em?” ka han ti leh a.

Chu zawhna chuan a ti phâwk hle a, an ne ne ta mai mai a.

“Eng vanga Pequot-ho nia ngai nge in nih ngawt? Indian dangte pawh an tam si a; mi ngoho thil tih pawh a ni maithei asin,” ka ti ta zel a.

Chu zet zawngin Penney-a ngaih dan a pel deuh a ni ngei ang, mak ti àwm fea mi melh pah chuan, “Chu, mi ngoho tih ni veah te i ngai a...,” a rawn ti chhuak ta bauh a.

Kei chuan, “Ni thei teh meuh mai. He lai vêla chengte hi ka mi hriat ngai pawh in ni lo va; mahse, zin veivak mi tam tak — sumdawng te, tuipuia chetla ṭhin lawng mi te pawh an lo chuang kai ve fo tih ka hria.

“Hetiang lawng mite ngat phei hi chu rin tlâk loh tak tak an ni asin. Pequot an ni lo vang chu ka ti lo, tu pawh an ni thei ka tihna a nih chu; a ru botu dik tak kan chian hmasak a ngai ta,” ka ti leh ta zel a.

“Pittingel-a pawhin Pequot-ho bâk ni theiin a ring bik lo, ani hi thil chinchang hre tak a ni,” Penny-a chuan a han ti leh a.

Kei chuan, “A ṭhat nasat chu. Chu pa chuan Indian-ho pawh a hre chiang viau ang chu maw?” ka'n ti lêt ve hram a.

Penney-a awm chu a nuam chiah lo tih a lang ta mai a. Nakin deuhah chuan, “Amah chu sumdawng hausa tak, ama pual ngata sumdawnna lawng nei khawpa hausa leh hawi zau, chinchang hria, he lai velah pawh hruaitu zinga thlan pakhat a ni,” ngai sang àwm tak hian a ti ta a.

“Chuti chu, a hnenah a ṭanpuina te in va dil lawm ni?”

“Min ṭanpui nasa reng a ni; mahse, eng ruai kan ang ta chuang rih lo a nih hi.”

Chutianga a nawlpuia mi bote an zawng a nih ngat chuan sulhnu te pawh chhui theih lek lohvin an chil pherh vek tawh ngei ang le.

“In mi bo zawng chu a nawlpuiin in zawng em ni? Mumal leh awmze nei deuhin in zawng em?” ka ti ta a.

Penney-a chu sawi tur nei ni àwm tak hian a han ang zuau a; eng mah sawi lovin a ngawi leh ta mai a.

A nupui chuan, “Thu dik tak chu hrilh vek ta che. Mipa inti ve si, i sawi ngam lo em ni? Khawi'nge, keima'n ka'n sawi ang e. Hêng laia mi hnaisai loho hian kan fate hi tih tak takin an zawng hlei nem; Diana phei chu, 'Chawh tak rawh se,' an ti mai a ni,” Penney-i chuan a ti ta phiar phiar a.

Chutah kei chuan, “Pi leh pute u, i inhmelhriat rih phawt teh ang u hmiang. Kei hi KIN RING SACKETT; Yance-a unaupa ka ni,” ka ti a.

Penney-a pawh chuan, “Kei hi Tom Penney ka ni a; ani hi ka nupui Anna Penney a ni. Mi dang lo kal an awm em?” hawi vat vat chung hian a han ti a.

“Tu nge tun ang hunah lo kal ang?” ka lo ti a.

Tom Penney chuan, “Joseph Pittingel-a leh Robert Macklin,” a'n ti zui a.

Anna Penney chuan, “Tunah Carrie-ite chu chin hriat lohvin an awm ta chu a ni a, engtia tih zel tur nge ni ta ang le?” mangang hmel zet hian a ti ha mai a.

“An la dam te a nih zawngin kan va hmu ngei ang a, kan rawn hruai haw ngei bawk ang. An thi tawh a nih pawhin an thlan tal kan zawng chhuak tho vang,” tiin ka'n hnem ve a.

“In theih ngei ka beisei. An bo tirh pawh khan ka rilru-a lo lang hmasa ber chu Yance-a hi a ni asin,” tiin Anna Penney hmel nguai raih tawh chu a lo êng leh ta deuh a.

Kan thu sawi ngaih san hmel vak lo hian Tom Penney-a chuan, “Ramvachal tak zawng i ni ngei ang; mahse, nangmah mai chuan keiniho tih theih loh chu i tih theih ka ring tlat lo,” a ti hmiah thung a. A nupuiin keini min rawn chah hi a lawm vak lo pawh a ni mahna le!

“Indian-ho nen in inti buai zing em?” tiin an thu sawi chu hre lo ni àwm tak hian ka zâwt ta daih a.

A nupui chuan, “Tun hnai maiah chuan buaina dang chu kan tâwk lo. Joseph Pittingel-a hi pa thil ti thei ngang a ni a, kan hnam kawlhsenho pawh hian min ti buai ngam lo,” ngaih san hmel tak hian a lo ti a.

“Chuti chu, amah chuan kan mi bote chu a chhan chhuak thei ang chu maw le; sum talin a tlan chhuak thei ang,” ka ti ta a.

“Aw khai! Kan va hnaisai lo tak, ei tur pawh kan lo lo chhawpsak hlei nem che le,” hre chhuak phut ni àwm tak hian Penney-i chuan a ti ta hlut a. Ka ril a ṭam tawh bawk a, chu thu chu ngaihthlak nuam ka ti ngei mai.

“Ka ril a ṭam tawh khawp mai, pawn lama ka ṭhiante pawh chuti bawk; ei tur han theh chhuah theih in neih chuan ka ṭhiante pawh ka va pe ve ang e,” ka ti ta thuai thuai a.

Ei tur tuihnai tak tak — chhang ur thar la lum vang vang te, sa tui sa ver vawr te, apple tui te a rawn chhawp meuh chuan dam man awm ka ti ngei mai. Tui ti zeta rei tâwk ka ei hnu chuan an thu sawi chu ka ngaihven leh thei ta chauh a.

Penney-a chu a phun deuh nuah nuah reng a, hlauhthawnna nasa tak leh enghelh a nei tih hi a hriat hliah hliah mai.

Kawngkhar kik ri dawt dawt leh mi inbe thawm chu kan hre ta thut a; kawngka inhawn zawnga pawn boruak vawt vur mai a rawn luh hukah pawh chuan dâk chhuak chuang lovin ka thil ei lai chu ka la bur chilh ngar reng a.

Lo lut thar pahnih zinga pakhat zâwk chu a aw aṭang pawhin thu pe ṭhang leh mahni aia tête hmusit thei tak a ni tih a lang thei mai — Joseph Pittingel-a a nih ka'n ring ngawt a.

Pakhat zâwk erawh chu aw zawi sat, a awphawi aṭang mai pawhin mi inzir sang leh lehkha thiam a nih hmel hliah hliah thung.

“Sackett i ni ang maw?” tia mi rawn biak tâkah zawngin anmahni hmachhawn tur chuan muangchangin ka inher rem ve ta chauh a.

“Anni hi Pu Pittingel-a leh Pu Robert Macklin-ate an nih hi,” tiin Penney-a chuan mi han hmelhriattir nghal a.

“Kin Sackett, Carolina lam aṭangin,” ka lo ti ve sap a.

“Yance Sackett-a unaupa i ni maw? Ani kha pa tih mawh leh khirhkhan tak a nih àwm kha maw le,” Pittingel-a chuan a han ti leh a.

“Pa fing, rem hria leh thei chungchuang tak maw le; mahse nangni chuan, 'dangdai' in ti maithei,” ka lo ti ve thung a.

Pittingel-a bawk chuan‚ “Hmun hla tak aṭangin in lo kal tih ka hria a, in hahna te a thlawn mai a lo nih tâkah chuan pawi ka tihpui hle mai che u. Thil chu a nih tur ang a ni zo tawh a, keini pawhin theih tawp kan chhuah a; mahse, hmuh phâkah an awm ta lo. A ru botu Pequot-ho lah mi tawh khirh tak an ni lehzel bawk nen,” a ti ta roh a.

Kei ta pek chuan, “Pequot-ho an ni in ti zel mai a, anmahni in hmu pawh a ni si lo va,” amah melh ran chung chuan ka'n ti ve ngat a.

Pittingel-a chuan, “An ni chiang alawm, hêng laiah hian an tam reng a ni. Tin, hmuh leh hmuh loh tihah kher chuan, Indian-ho hi an inlan ve reng a nih ngawt loh chuan hmuh fuh mai mai har tak an ni,” a ti leh ta zaih zaih a.

“Chu kher chu a dik khawp mai. Pequot-ho pawh an lo ni ngei mahna le...,” ka lo tihpui ve hmak a.

Pittingel-a chu a phur thar ta riau a, “Ninawm leh hnawksak; tual thah ching kan Indian-ho hrep hi!” a ti zûi ta chiam chiam a.

“Eng kan ang dawn lo niin a lang. Tun hmaa mite ang bawk khan kan fanute hi an bo hlen dawn ta a nih hi...,” beidawn hmel zet hian Robert Macklin-a chuan a rawn ti ve ta phawng a.

“Chu, mi dangte pawh an lo bo fo tawh a ni maw?” ka lo ti vat a.

Pittingel-a chuan, “Tun hma lama thil thleng nen chuan inzawmna neiin ka hre lo. Hêng lai ram te hi chu a chhengchhiain chirhdum hmun te a tam a, ramchhuak mite ngei pawh an bo chang a tam reng a ni. Tun hma lam thil kha zawng a rei tawh a, kum a tling a ni tawh alawm,” tiin min chhang mai a.

“Mi eng zât nge bo tawh?” ka'n ti lui leh hram a.

Macklin-a zâwk chuan‚ “Mi pathum lai maw le,” a lo ti ve vut roh a.

“Nula hlir em ni bo?” ka'n ti leh a.

“Ni chiah e; naupang chhia ang maia kan la en chu an ni hlawm nâin nula ve uaih tawh vek an ni. Chutiang lam chu chhût nachang kan lo la hre hauh hlei nem,” mak tih hmel takin Penney-i chuan a rawn ti ve ta vat a.

“Naktukah anmahni in hmuh tàwpna hmun chu min va kawh hmuh theih chuan ka lawm khawp ang,” ka ti ta a.

Macklin-a chuan, “Hnimhnah lawr tura kal kha an ni mai a; Diana khan hnimhnahte hi damdawiah hman ṭangkai dan a hriain, chaw atana ṭha chite pawh a hre êm êm a, Carrie pawh kha a zirtir...,” a la tih mek laiin Pittingel-a chuan a lo sawi khalh hmawk hmawk a, “Tih loh loh a nia a tih reng ni; a bul chu nangmah roh hi i nia, he nu tê hi kawm tlâk a ni lo ka ti reng a ni,” a rawn ti ta bawrh bawrh a.

Chutah, Macklin-a chu a sa ta phat a, Pittingel-a lama inher pah chuan, “Joseph, ka fanu chungchang a ni!” a rawn ti ban ta charh mai a.

Pittingel-a chu a sen awp awp a, “Macklin, he nu hi i faa vuah chu a ni ngei mai; mahse, ramhuai lalpain i nupui chhulah a kêutir lo tih tu nge sawi thei — a danglam êm êmzia te hi!” a ti ta mai a.

Macklin-a thinrim lutuk chu ṭawng pawh a ṭawng ṭha thei ta lo hial a, “E! Pittingel, chutiang chuan maw ni dawn...?”

Sawi zawm tumin a han ang leh zuau hman tihin Penney-i chu a rawn inrawlh vat a, “Khaih, khaih! In inhnial avang khan kan fate min pe kir lo vang. A thu hrimah, Pittingel-a pawhin theih tawp chu a chhuah ve alawm, a laka kan bat hi a namen lo hle a ni; chûng chu theihnghilh ma ta che, Macklin,” a lo ti thuai a.

Macklin-a pawh chu a inbengdai ta deuh a, “A ni khawp mai, min hre thiam hram teh u,” tiin a ngen ve ta a.

Pittingel-a pawh chuan, “A, kei tak pawh hi ka bang bik lo ve; khawi'nge, tih tur ka nei a nia,” tia chhuanlam siamin a kal sawn ta a.

A kal liam hma chuan, “Sackett, min mamawhna te in neih chuan inthlahrung lovin min han hriattir ula‚ ka lawng pawh lo thleng mai tur a ni tawhin mihring pawh mamawh tâwk na nâ na chu chhawr mai tur ka nei thei mai ang,” tiin mi rawn au zûi ve leh a.

Chutah Penney-a chuan, “Robert, ani kha tih thinur chi a ni lo vang. Pa thil ti thei leh sakhuanaah pawh lam ṭang ngah a ni bawk si. Tih êmah chuan Diana pawh, hmana dàwi thiama an puh ṭuma an hal hlum lohna chhan pawh kha, Pittingel-a rawn inrawlh vang chauh a nih kha,” a ti ta a.

“Dàwi thiam â!!? Eng finfiahna nge an neih? Diana te zawng naupang fel tak, Lalpa ṭih mi tak a ni asin!” tiin a fanu thlavang chu Macklin-a chuan a lo hauh nasa mai a.

Penney-a chuan, “Zan rehah mahni chauha ram palailenga vah chhuah a ching a, ram hnim therhlo leh eng ilo hnahte lâk khawm a ching a; hetiang lo liam finfiahna an mamawh i la ring em ni? Gardner-a bawngpui hnutê sawr lai pawh Diana nen an inhauh thinrim hnu lawkah a hnutê tui a kang vek e an tih kha. Chu bâkah...,”

“Dâwt vek, dâwt vek; thu taka lâk chi a nih loh chu,” Penny-i chuan a lo ti zung zung a.

“Dâwt pawh ni ang hmiang, an ngai pawimawh tlat chu a nih si hi! Hei vang hian alawm an bo pawh hi an zawn ṭhat duh loh; a ni lo'm ni? A bul chu Diana vang hi a ni, amah avangin ka Carrie pawh a bo hlen ve dawn ta a nih hi! Ka lo va â rei êm ve aw...!” Penney-a chuan a ti ta vung vung mai a.

“Sawi sawi a sâwt tawh lo, an lo kir phah chuang lo vang,” Anna Penney chuan a lo ti leh hlak a.

Chûng thil an sawi lai chuan ka thil ei lai chu ka chhunzawm reng a, ka beng erawh ka chhi ngun hle.

Apple tui ka'n in leh pawp hnu chuan ka tho chhuak ve ta a, “Ka pi, in fate chu dama an la awm ngat chuan Yance-a nen kan rawn hruai kir leh ngei ang. Tin, ka kal hmain hriat belh duh ka la nei — Pequot-ho hian silai an nei ve reng em tih hi?” tiin ka han zâwt a.

Penney-a chuan, “Silai â? Ka ring lo; mahse, Indian hnena silai lo hralh duh tâwk hi chu an awm alawm. A nei pawh lo awm ta se thil mak lutuk a ni lo thei ang; chutiang te eng vanga min zâwt teh daih nge i nih?” a lo ti lêt ve thung a.

“Tenaco-a in rawn tirh khan; he lai hmun a chhuahsan dawn khan, tu emaw ṭanpuitu zawng tura a kal rem ti lotu, thah ngei tuma silaia kâptu an awm a ni,” ka ti ta a.

Kawngkhara chhuah pah chuan, “Chutiang han ti duh tur àwm chu in hre mial lo maw?” ka'n ti leh a.

Ka chhuak chiah tih chuan rang takin in chu ka hêl nghal a, thawm riva ngaichangin ka'n ding hlek a, thil ka hmuh fiah theih nan tiin ka mit chu ka han khap sak sak a.

Thawm ngaichanga ka din chhung mai pawh chuan eng emaw chu a awm tih ka hre nghal kau mai le! Chu thil chuan min lo bihthla reng a nih loh vek pawhin min lo chang a ni ngei ang.

Zan thim hian thurûk tam tak a vawng a, chumi chahbi chu mihring hriatna thazam hi a ni. Bang nghengin che miah lovin ka ding a, ka beng leh mit chu ngun takin ka chhi kar reng a.

Ka piah lawkah chuan thing ṭang tel khawm hi an dah a; thawm nei hlek lovin chu lai chu ka va pan a, eng mah ka va hmu lo nâin, eng thil emaw chu a hnai tih ka hre tlat!

Ngaw tawntirh chu ka va thleng leh a, riva ngaithlain ka'n ding leh hlek a; min lo enthlatu chuan ngaw hrulah chuan min lo nghak reng maithei si a. Zan te a rei tawhin ka kal vêlna lamah ka chau tawh bawk a, tawi khawtlai lovin fimkhur leh thawm dim takin ngaw chhungril lam chu ka pan leh ta vat a.

Ramhnuaia seilian leh Indian-ho zinga sa pela ramchhuak ve fo ka ni bawk a, fimkhur leh thawm dimah na nâ na chuan member satliah ni lovin O.B tling pha ve ngat ka ni ta ve ang. A ṭul hunah chuan ngaw leh ṭul pikah pawh thlarau ngawichawi ang maiin ka pût ve zung zung thei tlat a ni.

Yance-ate ka kalsan aṭang khan darkar khat vêl zet a ni ta, kan bûk bul ka va thlen chuan khawi lam aṭangin nge tih pawh hriat hman lohvin Yance-a chu ka bulah a lo awm ve thei mai nia! “Tenaco-a a kal bo daih mai,” a lo ti nghal a.

“Khawi lam nge a pan?” ka lo ti vat a.

Yance-a chuan, “Thing ro tuah tur ka fawm hlanin a lo kal bo daih mai a ni,” tiin min chhang a.

“A ṭhat chu. A tih tur a ti zo tawh a, a tan awm ve reng chu a ṭul tawh lo reng a ni,” ka ti awlsam ve mai a.

Kan sakawr dahna hmun chu ka va pan a; Tenaco-a a kal bo tih a hriat veleh Yance-a chuan kan riah bûk chu hmun dangah a lo sawn daih hi a lo ni a, hêng laiah ngat hi chuan fimkhur lûat a awm lo reng a ni.

Mut zai kan rel ta a, rikrum thila tho mai thei turin kan sakawrte thawm ngaichang ran chung chuan kan mu ta a.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 14th, 2019, 8:41 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 3
(Rozami Pachuau)

Zingkhua a lo var chuan Penney-ate'n ei tur min pai khan kan han inhnawh puar sawk sawk a; chumi hnuah kan sakawrte chu ngaw kar phul hmun biru leh chengker takah kan va thukru a, Penney-ate hmu turin kan kal leh ta a.

Rei lo têah Penney-ate chu an lo lang ve ta mai a, Macklin-a nen chuan hma an rawn hruai nghe nghe a, mi pali lai an ni.

ka silaimu thun te ka en dik tê te a; chutah, anmahni tâwk tur chuan ka inlan ve ta a. An zinga pakhat chu a lian hle mai; ani rawn tel ve chu ka lawm hauh lo bawk, mahni maia min rawn pan ka beisei teh reng nen....

Nizan khan an titi tam tak ka ngaithla a, hnu chhuitu chuan a mi chhui laite rilru sûkthlek dan leh suangtuah tur àwm ang te a chhui zawn thiam tur a ni tih ka hriat tlat vangin an thu sawi te chu ka lo chik ve êm êm zel a, an titi aṭang mai pawh chuan he mite hi mahni thu duh leh induh tâwk tak, an chhia leh ṭha hriatna kalh zawnga hruai kawi harsa tak tur an ni tih pawh ka man thiam mai a ni.

Chêt lâk dan tur ka hriat vat a ngai ta. Pequot-ho chanchin ka hre tlem lutuk chu ka buaina a ni. Indian ka hriat dangte chu an inang lo hlawm khawp mai tih chu ka hria a; ka hriat tlemzia ka hre hlauh chu vanneihthlak tak a ni bawk.

Tom Penney-ate in sak dan chu ka'n en mai pawhin a satu mizia phawk zo hlein ka hria. Rinawm tlut leh nawm hmel fanran hi niin hmanhmawh miah lova sak a ni tih a hriat bawk a. Pindan hrang hrang an siam dan te chu a nawm hmel hle hlawm a, a satu pawh a hnaah a inpe zo hle a ni.

Diana Macklin-i chu kum sawm pasarih mai niin, mahni inenkawl zo tak, ramhnuaia vâk fo ṭhin a ni a, 'Naupang hruaia a ramkal ṭum ber khera a bo ta hi a mak mang e,' tih vêl te ka ngaihtuah chhung chuan Penney-ate chuan ka bul chu an lo thleng ta a.

“Khawi lai hmun nge an bo tâkna hmun chu?” ka han ti ve nghal tawng a!

“Saw lai lawk, minite sawm vêl lek kalah sawn,” Penney-a chuan a lo ti ve a.

Macklin-a chuan, “Diana hi hetianga a bo daih thei hi a mak a ni, a naupan têt aṭanga ram vah ching tawh a nia sin!” tiin mak ti hmel tak hian a han sawi lang tawp bawk a.

“Ramhnuai hnim leh thil ṭo chanchin te a hre hle in ti maw kha? Indian-ho hnen aṭanga a thiam em ni?” ka ti a.

Tim deuh tak chung hian Macklin-a chuan, “England-a kan awm lai aṭanga a thiam tawh a ni; he lai kan thlen hian nu pakhatin a tuipui leh hle a; a ṭhente chu Indian-ho hnen aṭanga a hriat te pawh an ni,” a ti ve leh a.

“Indian-ho ṭawng a thiam em ni?”

“Teh reng mai, ṭawng thiam chak tak mi a ni alawm.”

Diana chu leh! A huaisen a, a zam chhe mai lo a nih ngat zawngin Indian kut aṭang pawhin Carrie chu a chhan chhuak leh thei mai ang— a fing êm mai.

Penney-ate rawn kalpui, pa liana chu Max Bauer-a a ni a, a hawiher vêl chu mak tihna riau ka nei tlat mai. Pa thu nei tak a nih pawh ka ring a, Pittingel-a te ang thu hnuaia kun chi niin ka hre lo; Joseph Pittingel-a chu ka lo dah nêp lutuk pawh a ni maithei e.

“E heu! Hei hi maw kan pasalṭha chu?” tih pahin Max Bauer-a chuan a kut lianpui chu a rawn phar chhuak a; kan han inchibai chiah chu a chakzia uanpuiin ka kut chu a hmer na pah salh a, thahrui pawh a nei hle tih chu hai rual a ni lo.

Mahse, chu chu ka lo rin lâwk sa reng a ni bawk a, ṭan ka la ve nghal a; ka hmer nat vezia a hriat chuan a hmel chu a dur deuh khup hial a, chu chuan min ti lawm hle mai!

“In lo kalna chu a hla hle maw? Virginia aṭangin in ti maw kha?” Bauer-a chuan a han ti a.

“Hla tak aṭangin,” ka lo ti duh lekfang a. He pa chezia reng reng hi ka ngaihtheih zawng a ni tlat lo.

“Eng mah in va hmu chhuak chuang lo'ng e, mipuiin hnuhmate pawh an chil reh vek tawh,” a ti leh ta zuah zuah a.

“A nih leh, an bo tih in hriat ni khan hnuhma eng mah hmuh in nei hauh lo em ni?” ka ti ta khauh a.

“Khami ni khan ka awm ve lo. Lawngin ka rawn thleng ve hlawl a, a hmun chu ka va tlawh ve a; mahse, hmuh chu ka va nei ta chuang lo,” a ti a, ka zawhna chuan a ti phawklek deuh chu a ni.

Diana-te va kalna hmun nia an sawi chu hmun kil deuh leh dil lian lo tak kam, phul rai ṭha deuh mai awmna a ni a; chu dil kamah chuan hnim chi hrang hrang a awmin hnimhnah lâk vêl nan pawh duh thu sam ni ngei tur hi a lo ni ngei reng a. Chûng laiah chuan hnuhma chu a lo chiar phut dup mai lah tak a, nulate ru botu hnuhma àwm ang pawh hmuh theih a ni tawh lo.

“Eng mah hmuh tur a awm tawh hlei nem—hei...,” tiin beidawn hmel tak hian ka'n hawi kual ruai a.

Bauer-a chuan phur tih hriat tak hian, “Dik chiah, hun kan khawh ral mai mai a ni. Hetia kan têi khawtlai chhung hian Pequot-ho chuan hla te khua an thlenpui tawh ngei ngei bawk ang,” a lo ti lung lung a.

“Pequot-ho i tia law!? An hnuhma pawh i hmu em ni?” ka lo ti leh zauh pek a.

“Hmuh chu hmu lo e; mahse, anni bâk tu va ni suh. Pequots ngei an ni tih kan hre mai,” Bauer-a chuan a ti leh ta zut zut a; chu thu chuan min hmin ve lo kher mai!

Yance-a chu hmuh turin a rawn inlar lo reng reng a; mahse‚ hnaivai tak aṭangin min lo thlirin min lo ngaithla ru ve reng ang tih chu ka hria a; ani nen hian kan inkawp rei tawhin kan ngaih dan pawh a inzul êm êm ṭhin.

Tuna kan tih tur pawimawh tak pakhat chu, kan nula bo tate anga inzeldin a, an ngaihtuahna ang leh an chêt lâk dan tur ang te ngaihruat a ni. Mi bo zawngtute hian hmun hla an thlen ka ring lo sâ a; a chhan chu, ralthuam nei an tlem a, hnu chhui thiam an awm mang bawk si lo.

Hêng hmuna chengte hi tun hma chuan khawpui lian tak taka cheng an ni a; England an chhuahsan hma chuan a ṭhen inhlawhfa chawpa ei zawng, a ṭhen chu khawsa thei tak tak an ni.

Ngaw rau rau pawh England ram ngaw leh hêng lai ngawte chu inkhan lo tak tak an ni a, hêng lai hi chu ram ṭha an niin ka pa leh Jeremy pawhin an titi tui ber a ni ṭhin.

Khuaah chuan kan kir leh a, kal pah chuan Max Bauer-a rawn kalpuipa chu ka'n en chiang a, pa tê leh pa ti thawt thawt, a che vêl reng reng chu ram sazu ang mai hi niin ka hria a; a hming an lam rik loh danah mi pawimawh vakah an ngai lo a ni ngei ang.

Kei chuan hetiang mi hi mi hlauhawm berte zingah ka chhiar a, an lakah fimkhur êm êm a ṭul a ni. Anmahni aia lian leh thil ti thei zâwkte hlimthlaah khawsain; anmahni inhre lo mah se, hetiang mi hi pawisak nei lo tak an ni duh chawk a ni.

Penney-ate inah chuan kan va chawl a, mi dangte kal liam hnu chuan Macklin-a nen chuan kan titi khawmuang ta a.

Anna Penney-i chu zawhna zâwt hlirin a khawsa a ni ber a, Temperance-i chanchin leh Shooting Creek lam chanchin te chu ka'n hrilh luam a.

“Kan awmna chu tlang sang tak bulṭhutah hian a ni a; kan tui tlan te chu luitê tui, fim, thiang leh vâwt ṭha êm êm mai hi a ni. In sawm pahnih; pal sang pui puia hung vek, thlai hmun pawh zau ṭha tak a ni a, thlai pawh kan thar tam ve thei hle. Chu bâkah, ramhnuai thei ei tur a tam a, sa pel mite lahin an kâp thei nghat nghat khawp mai bawk,” ka ti a.

“In chhungkuain em ni chutah chuan in khawsak?” a han ti a.

“Ka pa chu chumi hmunah chuan Senecas Indian-hovin an that a, ka nu chu England-ah a awm ta a ni. Kan farnu neih chhun leh kan tê ber Brian-a chu kan awmna hmun, dàn leh hrai pawh awm lohna ram, pilril lutukah chuan seilen ve phal lovin ka nu chuan England-ah a awmpui ta a; Brian-a chu zirna sang zâwk zuanin dàn (Law) zirin a awm mek,” ka ti ta a.

“Temperance-i pawh ngaihtuah suh u. Kan chhungkuaa mi a ni tawh a, ngainat leh duat pawh a hlawh hle a ni. Kohhran kan din hranpa lo nâ a, Pathian biakna lamah chuan chhung inkhawm kan uar hle. Temp-i pawh ṭhian ṭha tak tak neiin a awm a, a khua a har lo hle e,” ka han tih zawm leh a.

“A nih leh, Jamestown lam te? Ka lo hriat ve dan chuan pem thla hmasate chu Virginia pan tur an nih laiin, an tum ram thleng ta lovin Jamestown-ah an tawp ta mai niin ka lo hria a?” Penney-i chuan a han ti leh a.

“Jamestown chu a hla khawp mai, kan awmna lam chu Carolina lam daih a ni a,” ka ti a. Chumi hnu chuan a chhuak ve ta a.

Macklin-a nen chuan eng mah pawh sawi lovin kan ṭhu ngawi dun reng a, a awm a nawm loh hmel hle lehnghal a. Sawi tur nei ni àwm tak hian aw te a'n thian leh kharh ṭhin nâin a sawi ta bik lem lo. Amah hi pa ruakhau leh ngawichawi‚ lehkha thiam tak hmel pu a ni.

Ka no dawm lai tlâk pah chuan, “I fanu chu eng ang mi nge ni?” tiin Macklin-a chu ka'n zâwt a.

Mak ti hmel tak hian rei fe chu min han melh reng a; chutah‚ “Engati nge, a enga chu nge hriat i duh?” a ti ta a.

“Anni zawng chhuak tur chuan an chanchin chiang taka ka hriat a ngai hmasa tlat; 'hnuhma' han tih hian an hniak ringawtin a sawi fiah si lo a ni.

“Mi kuta an tan chhung chuan anmahni mantute thu thua an awm a ngai a; amaherawhchu, lo tang lo ta se emaw, lo tlan chhuak thei ta hlauh se emaw, eng angin nge an ngaihtuahna te an hman ang a, khawi lam nge an pan ang tih te ka hre duh a ni,” tin ka hrilh fiah ta a.

Chutah, “Tu nge ru botu chu tih pawh kan la hre lo chu a ni a,” ka'n ti leh charh charh a.

“Indian-ho rûk bo a nih i ring lo em ni?” Macklin-a chuan a ti ta a.

“Rin thu mai maiin kan la kal zel rih chu a nih hi. Indian-ho tiha han pawngpaw puh ngawt chu a dik ber lo vang; anmahni chu tu mahin an hmu pawh a ni dèr si lo,” ka ti a.

Muang ban fe hian, “Nula fel leh rinawm lutuk a ni asin,” a ti ta a.

“A rualpuite chuan pasal an nei fur tawh ang chu maw?” tiin ka'n cho leh a.

Ka mit takah chiang zetin mi han melh a, “Rimtu chu a ngah ve khawp mai; Joseph Pittingel-a ngei pawh hi...,” a tih mek lai chuan ka lo inrawlh a, “Nupuia neihah a thlem pek elo?” ka lo ti vat a.

“Niang chu maw le. Jaseph Pittingel-a hi pa hausa tak mai, duh duh nei thei turah a inngai pawh a ni ang,” a ti ve mai a.

“Chuti si, engah nge an inneih mai loh? A hmeichhiain a duh lo em ni?” ka han ti leh hram a.

“A ni teh reng aniang chu. Ngawi rengin a en vang vang a; chutah, a kalsan ta daih mai maw le!” a ti ta a. Chu thu a han sawi chuan a nuih te pawh a za lek lekin a lang.

He nula hi chu ka mi ngainat zawng a ni dawn tlat mai le, a chanchin tlem tê chauh ka la hre mah mah!

“A nih leh, chuti taka duhtu pawh ngah si chu, a bo tirh khan in zawng ṭha duh vak lo ni khan an sawi a, eng vang nge? Thil dik lo a awm deuh tihna em ni?” ka ti leh ta zel a.

Hmui pet fan chung chuan a ngawi ta reng mai a. Kan titi chu sawi zûi a châk loh zawng tak a ni tih a hriat mai a; mahse, thil tam tak ka hriat a ṭul a ni tih chu a hai si lo....

A tawpah chuan, “Eng kim i la hre tho ang,” tih pah chuan a han hawi ruai a, “Hetiang mi tlem tê chauh chennaah te hi chuan mi danglam deuh, mi aia chungchuang deuhte hi chuan sawi an kai duh ve bawk a ni.

“He lai tlangvalho-ah hian a lung han ti leng phâk an awm lo pawh a ni ang e, kawm ngeih deuh pawh a nei lo. Tar chak lo deuh te hi chu a ngainain a nungchang han sawisel pawh an awm lo; mahse; dàwi thiam anga sawi duh te zuk awm a maw le!” a ti ta a.

“Dàwi thiam leh ramhuai tih ang reng te hi chu chaw tak khûka khûkpui chi-ah ka ngai lo,” ka lo ti ve a.

“Nang pawh i lei kha i ven ṭhat viau a ngai ang! Ramhuai awm rin loh te chu Pathian awm rin loh tluk hialah an ngai a ni,” tiin mi han vaukhan a.

“A nih leh, ama duh thu renga tlan bo a ni lo'ng maw? A nungchang leh a finzia en hian ama duh thua kalpui pawh a ang thei alawm le; he lai hmun chengker tak hi a tàwng khawp lo deuh pawh a ni mahna,” ka'n ti leh a.

A'n ngawi vang vang a, a lu a thing a, “A ni thei lo! Amah maia kal chu ni se thu dang, tlan bo duh tak tak ni se Carrie kha a hruai hauh lo vang. Carrie khan unau pianpui ang chiahin a en a, zui lah an inzui ngun nangiang a; mahse‚ Diana hian a hruai bo duh hauh lo vang.

“Tlan bo tum reng ni se chuan Diana hian khaw thengthawt hun a nghâk ngei ang, fur chhe lai ber kherah hi chuan a tlan bo lo tawp ang. Ani, mi fimkhur, thil engkim chhût hmasa thlip thlep ṭhin mi khan khatiang rum rum khan thil a ti lo vang,” tiin a fanu chhuang aw Iek lek hian Macklin-a chuan a ti ta a

“Diana-i nu ve thung hi eng nge a an ve le?”

“A boral tawh; England-a kan awm laiin a ni nghe nghe a, Diana pawh hi naupang tê mai a la ni.”

Kawngkhar a rawn inhawng a, Anna Penney-i chu a rawn lut a.

Ka tho chhuak a, Macklin-a hnenah chuan, “In in lamah i phei ang hmiang‚ titi khawchang sawi belh zel teh ang,” ka ti a. Macklin-a pawh chu phur loh hmel fe hian a rawn tho chhuak ve ta ṭuih ṭuih a.

Penney-i chuan, “Ka fanu Carrie chu Yance-a nen hian min zawn chhuahsak lul teh u aw.... An bo tirh khan tu ma'n an zawng ṭha duh si lo va; an rilru chu ka hre vek, Diana hi dàwi thiam angah an ngai a ni. Kei chuan ka ngaina hle a, an relnate hi pakhat mah ka awih ve lo; mahse...,” sawi zo lo chuan a ngawi ta daih a.

“Eng nge 'mahse' chu?” ka lo ti vat a.

“A..., eng dang ni lo ve, zan lama mahnia vah vêl a ngaina hi a ni ber mai. Kan thu hriltupa phei chuan dàwi thiamhovin zan thim an ngainatzia a sawi ṭhin a; zanah ngaw karah te, pûkah te inhmu khawmin sual rawng an bawl ṭhin niin a sawi asin,” a ti ta a.

Kan chhuak a, kawngpui kânin Macklin-ate in chu kan va thleng ta a. Dawhkan kan kil a, ani chuan kawngkhar inhawng aṭang chuan pawn lam chu beisei nei hmel tak hian a thlir a.

“Diana tel lo chuan in hi a rûak huaiin ka hria. Ka hna hi ka tuipui hle nâ a; chu ai mah chuan ka lehkhabute hian min ti hlim mah zâwk a. Diana pawh kha lehkhabu chhiar peih tak a ni ve a, zan rei tak thleng hian kan titi dun ṭhin a ni,” a ti ngui ruai a.

Eng eng emaw sawiin kan titi a; mahse, a ngaiah bawk lût lehin, “Engtin chuan nge kan nulate chu zawng chhuak turin beisei dan te i nei em? Bauer-a meuh pawh a beidawng chu a ni ta a; ani hi kan zinga ramvachal ber, hnu chhui leh ramhnuaia chêt vêl zei bera kan neih a ni a,” a han ti leh ta a.

Ka ding ta a, ka hriat duh tam tak chu ka hre taah ka inngai a. Pequot-ho rûk bo an nih tak tak chuan kan nulate chu an ti hlum tawh pawh a ni thei a; mahse, chu chu ka ring chiah si lo.

“Tun hmaa bo in sawite kha nula vek em ni?” tiin ka zâwt ta thut a.

Macklin-a chuan, “Ni e; mahse, hei hi thil danglam vakah ngaih chi a ni lo. Mipa te chu han bo ve bawk mah se, hmeichhia te ang lovin an inhâi kaw chawp thei a, an rawn vâk thleng ve leh mai ṭhin a; mahse, hmeichhe tan chuan chu chu thil awlai lo tak a ni si,” tih chuar chuar pahin a dàr a san uk a.

“Diana pawh kha ramhnuaiah pawh ngaihtuahawm lo tak ni khan in sawi si a?” ka lo ti ve thung a.

Chhan ngaihna hre lovin a ngawi ta reng a. A hnuah chuan, “Mi danglam tak chu a ni,” a ti ta ngawt a.

Kawngkhar pan pah chuan, “I fate chu ka va hmu ngei ang, Macklin. Nang ve thung hi engtia awm zel nge i tum? Hetah hian i awm reng dawn em ni? An sawi hmangin he laiah hi chuan in tuitla tawh vak lo niin an sawi si a; Diana pawh chu rawn kir leh ta teh reng pawh ni se, tlang rel leh sawi sep mai loh chu hmabâk a nei dawn em ni?” ka han ti a.

Macklin-a chuan min han melh kâwk a; chutah, lu thing nar nar chung hian, “Mihring zin kawng hi engtiang taka hla nge lo ni teh reng le? Khawi lai hmunah nge chawlin thâwk ka lâk tak ang? Khawi hmunah nge ka inbenbel ve leh tâk ang?” beidawng aw zet hian a ti ta a.

“Hetiang harsatna hi tun hmain i lo tâwk ṭhin reng em ni?” ka ti leh a.

Ani chuan lungngai aw tak hian, “Hetiang reng hi maw le; a bul chu keimah vek hi ka ni! Diana hi a tet tê aṭanga ka enkawl seilen a ni a, a nungchang pawh hi tun ang lo deuha chhuah thei tur hi ka ni maw le...,” a han chawl dat a.

Chutah, hmel dur lek lek hian, “Mi dang tih dan ringawt la lova mahni nunna chu mahni duh dan taka chèn a, nung turin ka duhsak tlat a; aw..., ka lo va â tak em!” a ti ta vawng vawng a.

“A nu hi chhun viau turin i duh a ni maw?” ka ti a.

A phu deuh zawk hian ka hria a; chuta a hmelhmang leh mi melh dan chu mihring, hremhmun pal tlang tawh, hrehawm tinreng tuar tawh ni àwm hmel a ni. Lungngaihna leh beidawnna, hlauhna, thinrimna leh beidawnna te chu a lang kim thei vek a ni.

“I lo hre ru reng a ni maw? Tu emaw chuan an la hriain ka ring reng a...,” a ti chuai ta raih a. Beidawn hmel zet hian min en tlawk tlawk a, “Aw Pathian! Engtin nge ka tih tâk ang!?” a ti tham ta ṭuak a.

Kawngkhar kik ri dawt dawt chuan kan thu sawi lai chu a pawt chat ta a. Macklin-a chuan kawngkhar chu a va hawng a; kei erawh chu inring takin ka ding ve nghal hah a— a ṭul thut pawha che mai thei turin.

Chutah, mi pali lo lûtte chuan Macklin-a chu kal pelin kei chu min rawn pan dîng ta ngat a, “Sackett i ni em?” no lo zet hian an rawn ti ta a.

Ka nih thu ka'n sawi chuan, “He lai hmun hi chhuahsan nghal tura tih i ni e. Nangni ang, Pathian ngaihsak lo chu he laiah hian kan mamawh lo che u! Kal la; lo kir leh tawh suh!” min han ti nghal bawl mai a.

“Nangmahni ṭanpui tur chauha lo kal ka ni asin,” zawi sap hian ka lo ti ta a.

“Nanga ṭanpui kan ngai phiangsen lo. Chhuak nghal rawh; i chhuah loh chuan a pawi ang,” an ti khur khur mai a.

“In âwih emaw, âwih lo emaw ka ṭanpuina chu in mamawh chiang a ni. Nula pahnih an bo a, Indian-ho rûk bo pawh a ni maithei a, a ni lo maithei bawk a; nangniho lahin zawng chhuak turin eng mah in ti si lo!” ka ti ve ta ngat a.

“Chûng te chu nanga sawi phâk a ni lo. I unaupa pawh hmanah kan man tawh kha, man ve i duh loh chuan kal bo nghal thuai la a ni mai,” tiin min han vau leh a.

Nui hmel pu deuh hian anni chu ka hmachhawn a; ka silai chu ka keng a, pistol pahnih ka kawnghren karah ka zep bawk a.

Zawi sap hian, “Pute u, in mi ngaih thiamna ka ngen e; min man erawh chu tum buai ting lo mai rawh u. In khaw ropui lo tak mai chhunga ka lo luh avang ngawta man ka nih chuan, in chawi tur a turu viau ang tih ka hriattir a che u,” ka ti ve ta sak sak a.

“Nangmahni tih tur dik tak ni si; in tih si loh ti turin ka lo kal a, ka tih tur hi ka zawh fel hma chuan ka bansan dawn lo. Mi ṭha tak tak in ni ngei ang; mahse, nangni leh keini nun dan phung a inang lo...,” tiin ka'n chawl dat a.

Chutah, “Hmeichhe pahnih an bo a; tun hma pawhin an lo bo fo tawh tih ka hriain, tih theih eng mah in nei ngai lo tih pawh ka hre bawk,” ka ti ta zel a.

“Mi dangte kha maw? Khâng te chu a rei tawh alawm!” phâwk hru hian an zinga pakhat chuan a rawn ti ta a.

“Nikum lam thil chu rei tawh in ti a maw? In fimkhur lo hle mai! Eng vanga hmeichhe fa chauh bo ṭhin nge tih te hi in chhût phâk miah lo vang maw, dàwn tawiho! Ngaw te hi a chhahin a zau ṭha hle a ni thei e; mahse, duh zawng an thlang theiin a hmei a pa an thliar thei em ni?” tiin an rilru ka kawih hersak ta a.

“I thu sawi awmzia pawh ka hre phâk nek lo ve a...,” an zinga pakhat chuan a lo ti sup a.

Chu pa hmel chu a buai ru tlat a, he thil hi a ngaihtuah ve fo tawh a ni mahna...! Chutah, “Hmeichhia hlir chu an bo ṭhin ngei mai tak a...!” a ti ta a.

“Kal bo turin min duh a. A ṭha e, ka kal ngei ang; mahse, he thil hi ka chin fel hma chuan he lai ram hi chu ka chhuahsan dawn lo. Ringtu; Christian ka ni e in ti maw? Lalpa ṭihtute chuan nula bo chu zawng ṭha duh lovin, rampalailenga artê thih mai mai turin in hnutchhiah chu a nih si hi!” ka ti ta phiar phiar a.

An zinga ṭawng thei leh dang nal ber chuan, “Ṭawng fimkhur rawh! He laiah chuan a hmuha hmutute kan nih hi— ringtu dik tak! Heng thil hi zawng, ramhuai hnathawh a nih hi!” a ti leh ta zat zat a.

A thu sawi lai chu ngai sang lo tih hriat fe hian, “Ka kal tawh ang e. Ka tih theih zawng zawng chu ka va ti ang e; nangni lahin in ti duh si lo,” ka ti ve ta ngat a.

“Kan ti duh lo pawh a ni lo, 'kan thei lo' ti ila a dik zâwk ang. Sulhnu eng mah hmuh tur a awm lo miau a,” an zinga pakhat, la ṭawng ve miah lo chuan a rawn ti a.

“Hnuhma tlem azawng chu an hnutchhiah ngei kha le! lndian-ho phei chuan awlsam lutukin an chhui zui thei ngei ang. Hnu chhui thiam, sa pel mi tawh phawt chuan an sulhnu kha an chhui zui thei vek hial ang chu,” ka tihsan mai thung a.

“Hnu chhui thiam lutuk chu keini zingah pawh a awm a; mahse, ani pawh a beidawng tlat a ni,” a ti leh a.

“Hnu chhui chu a thei lo nge; a thei nâ a, a ti ṭha duh lo tih in hre chiang chiah em ni?” tiin ka chhuahsan pah nghal ta daih a.

Ka chhuak fel chiah tih chuan kawngkhar chu ka nem khar nghal a. Thinrim ṭeuh chunga chhuak ka ni a, a âtthlakzia pawh ka hre chawpchilh leh lawi a; thinrimna hian mi a ti fimkhur lovin mit a lo va ti del tak êm!

Ka han pên leh chiah chu thil hi a rawn thlawk ri fua a, thil ri dawt thawm hian a zui nghal zat bawk a; chemtê hi ka hnung chiah thing bangah chuan a rawn bur ta ngar mai a!

Che miah lovin leiah chuan ka bawk a, ka bawk hman lo teuh kher mai; mahse, min vawm nawn tur chuan hun ka pe bik lo. Ka'n che sawn hret a; chutah, piah deuhah chuan ka insawn leh a, thil che zeuh pawh hmuh tur a awm miah si lo.

Zan chu a thim mup a; vanah erawh chuan arsi an de sap sap a. Thimthamah chuan ka hawi vêl a, ka mit vai te pawh chu a ziaawm ta a. He lai hmuna ka kal vang em ni min man an tum? Ka thu sawi te kha an lo ngaithla ru reng em ni? Tlema tlemah ka thi lo chauh alawm le....

Thlarau ang maia thawm nei lovin ngaw thim chhah tak chu ka thleng phei thei ta hram a; mahse, tu mah an lo awm lo!

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 15th, 2019, 7:16 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 4
(Rozami Pachuau)

Thawm eng mah ka hriat hmain Yance-a chu a rawn lang ve ta hlawl a, ka unaupa thawm dim thiamzia hi chu aw...!

“Buaina i tâwk elo?” a'n ti nghal a.

Lu ka lo bûk khum nghat a.

“Ka ring a ni. Thimthamah khan veivak an awm nual reng a; chu vang chuan kan bûk pawh ka sawn daih,” a ti ta a.

“Mi sualho hnuhma tlem azawng chu ka va hmu a; ka va hmuhna a hla deuh a, chu vang chuan aniang mi dangin an hmuh ve loh,” a han ti leh a.

“Indians em ni an nih?” ka lo ti vat a.

“Nang leh kei anga mi ngo, moccasin bun an ni,” a ti ta a.

Thimthamah chuan kan insaseng ta thuai a. Chak fea hun rei fe kan kal hnu chuan kan ding thut a, thawm riva ngaithlain rei tak kan ding vang vang a.

“Pittingel-a i lo hmu em?” ka han ti a.

Yance-a chuan Pittingel-a tak chu a hmuh loh thu leh mi dang, mikhual ni àwm tak tak a hmuh thuin min chhang a.

A han ngawi leh vang vang a, “An kharkhip chhunga min tantir lai khan lawng pu pakhat an dah ve a, a zu rui chu a ṭawng duh kher mai a.

“Zan lama a han harh fim deuh chu ka titipui a, chuta a sawi ka hriat reng chu hei hi a ni — He pa, Pittingel-a hi lawng 2/3 nei a ni a, America ram thingte chu England lamah tawlh chhovin West Indies lamah vaimim a tawlh thung ṭhin a.

“A thil va dahna lam atangin chithlum, zu, coffee leh nepnawi dang, ni tin mamawh chite a hawn ṭhin a; mahse, hetiang chauhva sumdawng ṭhin hi ni lovin thil dang tih a nei tel ṭhin a ni,” tiin lawng pu thu sawi chu a han sawi chhawng a.

Yance-a chuan a thil sawi lai chu sawi zawmin, “Mi dang mut hnuah pawh rei fe ka titipui a; chu hmun hrehawm lutukah chuan titi a tui duh lo viau nâ a, a thu sawi chuan beng a verh tlat a ni. A sawi zel dan phei chuan, he Pittingel-a hi bum hmang, sal leh bâwiha sumdawng ṭhin niin a sawi tlat mai,” a ti ta a.

“Sal i ti elo?” ka lo ti vat a.

“Mi hang; Africa lam mi, Arab-ho hnen aṭanga an lei chhawnte an ni. Arab-ho te, Portuguese-ho te leh mi dang te pawhin salte chu Indies velah an hralh nasa hlein he lawng pu hian a sawi tlat a ni,” tiin Yance-a chuan min chhang a.

Yance-a bawk chuan, “Hêng lai vela mite hian sala sumdawng an haw hle a; Pittingel-a pawh hi a rûk thei ang berin a che vêl a ni ngei ang, sala sumdawng zawng a ni ngei alawm,” uar fe hian a han ti leh a.

Ngawi reng leh ngaihtuah muk àwm fahran hian kan ṭhu dun ta vang vang a.

Yance-a chuan ngaihtuah chhuak thut ni àwm tak hian, “Macklin-a chu a khua a har ngawt ang. Temp-i min hrilh danin leh ka hmuh ve danin Diana hi a pa bula chetla reng ṭhin, pafa inngaina tawn tak an ni a, a pa lehkhabu te pawh chu chhiar dunin an tuipui pafa hle ṭhin a ni,” a han ti chhuak phawng a.

Anna Penney-i chaw min funsak chu Yance-a chuan muangchangin a ei a, a chaw bar kar lakah apple tui um chu a intulh ri leh barh ṭhin a. Zawi tê tein kan chheh vel ram chungchang chu kan sawi sep sep reng a.

Chaw a ei kham chuan chu lai hmun chu chhuahsanin bûk atana a va hual thar, hmun remchang zet mai chu kan va thleng ta a. Mut hmun kan han rem fel chauh tihin Yance-a chu tui fe hian a hnar nghal sak sak a.

Kei erawh chu ka harh tulh tulh mai a. Ngaw kar aṭang chuan arsi chu an lang iar a, kan piah lawka sakawr hnim pet thawm te chu ka hre pha reng a.

Ngaw chu a reh ṭhuap a, khua chu kan awmna aṭang chuan a hla bawk a, thawm eng mah hriat phak a ni lo. Chu bâkah, khaw chhung mite chu zanah chuan an tawm-im a, tu pawh zana pawn chhuak chu rinhlelh an kai a ni nghal mai si a. Chutiang ngaihtuah neuh neuh chung chuan ka lo muthlu ve ta nge nge a.

Zing hma takah thovin nulate bona hmun chu kan va pan ta a. A lo hla lo hle mai lehnghal a, kan riahna hmun aṭang chuan minute sawm kal vel lek a lo ni a; chu lai hmun chu mipuiin an chil nasa tawhin hnu tharlam deuh beisei tur a awm lo hle mai.

Hmun nuam tak, phulrai nuam tak, a vêla ngawin a hual vel a ni a. Kil khatah chuan dil, acre khat hmun vêl tur laia zau hi a awm a; dil kam vêlah chuan ram pangpar chi hrang hrang an vul chek a, dil tuiah pawh chuan tui lily an par bawk a. A nawlpuiin an va chil phulh hma chuan hmun nuam leh mawi tak zawng a ni ngei ang le!

Chu lai phul hmun chhuah lam chu ramtheihmu hmun a ni a; chu lai hmun chu mi pangngai tu mahin pal tlang an tum duh lo vang, a chhan pawh ramtheihmu hian hling zum ṭha tak tak an ngah êm a ni. He lam aṭang lahin tu mahin he lai hi an rawn pan thei lo ang tih chu chiang sa a ni bawk si.

Ka thlir kual vêl a, chu laiah chuan eng thil chiah nge thleng tih hriat chhuah tum takin kil tin mai chu ka'n melh kual a. Rei pawh kan la awm lo tih chuan khua aṭanga kan awmna lam pana lo kal thawm kan hre ta thut a, Yance-a chu rang lutukin a bibo nghal zauh a.

Ka va hmuh hmasak ber chu Max Bauer-a a ni! “Tunah chuan mel za tam an liam tawh ang chu, va zawng chhuak tur chuan sipai rual rawih a ngai tawh ta ve ang. A pawi teh e, an la naupan nen! Mahse, Pequot-hote chu va dawr phawt ila, Pittingel-a pawhin...,” a rawn ti phei lung lung a.

A thu sawi laklawh lai chuan ngaw kar aṭangin chhimbuk a lo hram dut dut a, a thu sawi lai pawh chu sawi zo lovin a tawp ta daih a.

Chu sava hram ni àwm tak chu a ngaithla ve ngei niin ka hria a; chhimbuk hram a nih lohzia ka hriat angin ani pawh chuan a hre ve ni tlat hian ka hre bawk. Mahse, chu chhimbuk hram chu Yance-a kha a ni tlat a, thil hmuh thar a nei tih mi rawn hrilhna a ni nghe nghe.

Penney-a chuan Max Bauer-a chu kal pelin min rawn pan a, “Chu, nulate va zawn chu in tum chiang ta maw?” mi rawn ti a.

“Kan zawng ngei ang. Va haw ta ula, Yance-a nena kan khawih turin kan kutah dah mai rawh u. Ngaihtuah ta che — Yance-a lah Temp-i pasal a ni tawh a, kan zawng ngei ang tih hria la,
inchhung khatna tih vel hi keini chuan kan la na teh a nia,” ka ti ta a.

Chutia ka'n tih chuan, “Sackett, Anna-i nen hian in chungah kan lawm tak zet a ni, kan...,” sawi zawm thei lovin a hnuk a ulh a, khaw dang ka hawisan ve ta vat a.

Penney-a koki-ah chuan ka kut ka'n nghat a, “Kal tawh r'u le, an la dam a nih chuan kan rawn hruai haw ngei ang,” tiin ka'n ṭawng thlamuan leh a, anni pawh chuan kir zai an rel ve ta a.

Macklin-a chu sawi tur nei ni àwm takin a han ang zuau a; mahse, eng mah sawi lovin Penney-ate chu a zui ve ta a.

Bauer-a erawh chuan, “Ṭanpui theihna che u ka neih chuan eng mah sawi hreh suh u; mahse, hun in khawh ral thlawn mai mai ang tih erawh chu ka hlauhpui deuh che u a ni,” a han ti a.

“Nia, hnuhma tlem tê chauh a nia kan la hmuh,” tiin a mitah tak chuan ka melh ran a.

“Tun hma pawhin hetianga hnu chhui hi kan lo ti fo tawh a, uisathiam leh Indian-hovin an chhui theih chu kan thei ve zel,” ka tih khum ve ngat a.

Bauer-a hmel chu a dur hle mai! He pa hi ka ngaina tlat lo a ni. A chanchin ka hre tam lo hle a; mahse, Pittingel-a hnuaia thawk niin a lang tlat a ni. Amahah hian thil tih theihna leh sual a lang kawp a, amah ka en mai pawh hian ṭih deuhna ka nei tlat a; chu chuan min ti thinur ru riau mai. Mahse, 'Ka hlau tur a ni lo; tu ma'n min la tlawm ngai lo bawk,' tiin ka pau ka ti khauh lui ve a.

Mi chak chuan eng tikah emaw a aia chak a tawng a, hriamhrei chelek thiam takte pawhin an aia chak leh thiam an tawng leh ṭhin. Chutiang chu a nih avangin kan fimkhur a ngai reng a; eng vanga hetiang te hi ngaihtuah nge ka nih erawh chu ka inhre hauh lo.

Ngaw dur pui chhungah chuan thawm dim takin ka lût phei ta a. Yance-a khan hmuh a nei ngei a ni, va hmuh vat pawh ṭhain ka hria. A thil hmuh chu beitham deuh pawh ni se, kan ṭangkaipui phian maithei bawk.

Mi sual hnuhma chu hmuh har viau tawh mah se hnu chhuitu chuan hmun khatah chauh a zawng ngai lo a ni lawm ni? Chumi hmu fuh tur chuan phul vêl chu uluk taka bihin kan zauh hret hret ang a, mi sualho hniak emaw tal chu kan hmu ngei ngei ang.

Yance-a chu thingkung lianpui nghengin a lo ṭhu a, a bulah chuan ṭhut hmun ka rem ve nghal a, “Mihring hniak hlui fe fe chu ka va hmu a, mi 5/6 emaw chu an nih hmel e. Pahnih phei chu ke lawnga kal an ni nghe nghe,” a lo ti a.

“Mi pahnihte chuan pheikhawk an bun lo maw?”

“Bun lo. Thui fe ka va chhui a, an pên zau danah pa sang takte pawh an awmin, thil rit tak an zawn ni àwmin an hniak thûk dan aṭang chuan a rin theih,” a ti ta a.

Rei fe kan ngawih hnuah Yance-a bawk chuan, “Thil mak tak chu a ni, he lai hmuna cheng hmasate pawh ke lawnga khawsa chi an awm lo. Indian-hovin an ching lo va, mi ngoho lah pheikhawk rawngsang bun chi bawk an ni a,” a'n ti leh a.

Rei fe kan titi dun hnuah chuan kan tho a, thawm dim tak leh thawm ngaichang ranin kan kal leh ta a.

Yance-a hnuhma va hmuhna chu kan thleng ta a, a sawi ang chiah chu a lo ni mai. Kan hnu chhui lai chu namai lo tak a ni, a ṭhen chu ruahin a lo tleng tawh a; mahse, tu mahin an dai phâk loh ram pilril a ni miau a, kan vanneihna chin a la awm tho mai.

A tûk zingah chuan luitê an kânna hi kan va hmu leh ta hlauh a; ke lawnga kal pakhat phei chu a tawlhthlu ni ngei tur a ni, lui kam nal laiah chuan hnuhma a lo pe san a.

Darkar eng emaw zât kan kal hnuah chuan beisei rûk ang deuh takin an riah bûk hlui chu kan va hmu ta a. Chu lai hmun chu pawh mai lovin kan han thlithlai hmasa tê te a; chutah, keimah chauhvin fimkhur takin ka phei a, Yance-a chuan bûk aṭanga an chhuak leh hnuhma chu a lo chhui zui ve thung a.

Rei vak lovah Yance-a chuan min rawn fin ve leh a, “Hmar lam an la pan cheu mai. Hmuh i nei em, nang?” a rawn ti a.

Kei chuan, “An zinga pathum chu silai keng an ni a; ke lawnga kal pahnihte kha chuan ralthuam an keng ve lo,” tiin ka thil hmuh dan te chu ka han hrilh ve a.

“Pahnihte chu sal an nih dawn chu,” mûk fe hian Yance-a chuan a lo ti a.

Kei pawh chuan a nih hmela ka hriat thuin ka lo ṭawmpui ve a.

Yance-a bawk chuan, “Hmana ka tanpuipa khan Pittingel-a hi sala sumdawng ṭhin a nih a ring reng a ni, a ring dik viau a ni ngei ang,” a ti ta a.

“An ring a? Rin dan ringawt zawng fiahna tel lo chuan ngaih dan siam ngheh chi a ni lo. Pittingel-a pawh Christian tlangval fel tak pawh a lo ni maithei asin,” ka han ti leh hram a.

Chu zet zawng Yance-a chuan a ei lo kher mai, a ner nang mai a.

“Hmuh dangte i nei em?” ka'n ti leh a.

Ani chuan, “Kan nulate hnuhma pawh ka va chhar e, hniak an hnutchhiah tlem kher asin! A zàwnin an zawn a ni maithei; an phuar hlawm ang a, an chawlh duh hunah lei charah an nghat leh mai ṭhin ni ngei tur a ni. Tin, an mei chhemna hnu pawh ka hmu bawk,” a ti ta a.

“Salte chuan em ni rawng bawl ṭhin?” ka lo ti vat a.

“Ni lo; an zinga pakhat, mi ngo ni maiin ka hria.”

Thing hnuai daihlimah chuan ngawi rengin kan ṭhu a, chu lai chu mi sualho riah bûk hlui chu a ni a, an mei chhemna hlui kâwk chung chuan, "He lai hi vawi hnih vawi thum lai riah nan an hmang tawh a nih hi, an mei chhemna te hi han en teh,” ka han ti a.

Ram lawi sa rep chu kan ei a, “Tuna kan chhui lai hi Indian-ho tih a ni lo tih a chiang a, nulate kha hlangin an zawn a; hetiangin Indian-in an ti ve ngai lo,” ka'n ti leh a.

Yance-a chuan min han en a, “Eng nge i ngaih dan ni zel le?” a han ti a.

Kei chuan, “E le, i ngaih dan ang tho maw le. Tute emaw chuan nulate hi ru bovin, Indian-ho tih ni àwm takin an sawngbawl vêl a ni,” ka lo ti ve a.

“Sal atan em ni an tih ni ang?” Yance-a chuan a'n ti leh a.

“Engah nge a nih loh ang? Bible keu ta che! Mi hang sal an awm hma daih, kum sang tam tak liam tawhah khan mi ngo sal an lo chhawr fo tawh tih i hre mai ang. Aigupta mite'n Hebrai sal an chhawr a; Rom mite'n Greek, English leh French-hote an chhawr a, an vai chuan mi ngo, vun ngo vek an ni,” ka ti ta a.

Yance chuan ngaihnawm ti takin ka thu sawi chu a lo dawgsawng a.

“Vawi khat chu Jeremy khan England leh Ireland tuipui hrul khuate, Africa ram lam mi, sal mantute'n an suam thut thu min hrilh a ni. Ireland ram khaw pakhat, tuifinriat kama mi Baltimore an tih phei chu ṭum khat runah a hmei a pain an rût fai vek a ti nghe nghe asin,” tiin ka'n hrilh zui a.

Chutah, “Nula tuai ṭha tak, hmel ṭha bawk si chu Africa, West Indies emaw khawi hmunah emaw pawh hralh an tla ngawt ang. Thil chingtute phei chuan an ngam huai ngawt ang chu,” ka ti ta zel a.

“Hetiang lama sumdawng tur chuan a hranpaa lawng an neih pawh a ngai ang; chu mai a la ni lo, lawng pawh hmang ṭangkai tak tak tur chuan lawng chawlhna pawh tuipui kam biru laiah a awm remchan a ngai bawk ang,” tiin ka ngaihtuahna chu ka sawi chhuak ta a.

Yance-a chuan thawh pahin, “He lai hmun hi i chhuahsan vat teh ang,” awm hle hle harsa tih hmel tak hian a ti ta a.

Mi sualte chu sal mantu leh chutianga sumdawng ṭhin an lo nih ngat chuan man chhuah theih loh turin an fimkhur hle ngei ang a; tin keini, anmahni zawngtute hi min hmu fuh hlauh a nih chuan thah ngei ngei min tum bawk ang. Chutiang a nih avang chuan ngaw karah chuan chak tak leh fimkhur tak si, hnuhma langsar lo thei ang ber chuan kan kal zel a.

Kan sakawrte kan hnutchhiahna, phul hmun kha kan va thleng leh ta a. Kan sakawrte Penney-a hnena kan lo hnutchhiah daih lo chu ka inchhir ta hle zâwk a, hêng lai tuipui kam vêlah hi chuan chhawr hleih theih vak an ni lo a ni.

Sakawrah chuang kaiin chu lai hmun chu rang takin kan chhuahsan ta a. Tuipui kama kal lovin ngaw kar chhah ṭha lai deuh zelah chuan kan kal a.

Hemi zan zet hi chuan ka muhil har kher mai a, Yance-a hnar ri suk suk chu ka ngaithla reng a. Eng eng emaw ngaihtuahin ka muhil thei thlawt lo va, “Yance,” tiin a mu tui lai chu ka'n ko ta ngawt a.

Ani chu a rawn inlet thawk a, “Kan va hmu ngei ang. Kin, i ngaihtuah ve em? Pittingel-a khan lawng lo thleng mai tur nghah a nei niin a lang a, a lawng nghah pawh hi an beisei aiin a lo tlai a nih ka ring bawk,” tiin kei pawhina ka lo ngaihtuah rûk chiah chu Yance-a chuan a rawn sawi ve ta mai a.

************************

Diana Macklin han ṭhangharh hlawl chu a'n meng a, chung lama ngaw thing hnah buk luih te chu a han melh chho a. Khua a la var chiah lo va, sal zinga pakhat zâwk chu a harh ve tawh ni ngeiin a hria a.

Chûng salte chu Africa lam mi, mi hang a hmuh hmasak berte an ni. A tirah chuan engtianga biak leh dawnsawn tur nge tih a hre lo va; Indian-ho chu a lo hmu fo tawh a, he mite nen hi chuan inang lo hlein a hria a ni.

Tun thlengin mi hang hote han biak lumlamna hun pawh a la nei lo va, anmahni mantute chu an fimkhurin tu mah an ring zo lo a ni ber mai.

Mahse, Diana chuan mi hang pakhat zâwk chuan anni chu rawn ngaihven riauvin a hre tlat a, chu pa chu a ṭhian, mi hang ve tho nen chuan engkim maiah an inang lo vêl vek mai.

Beisei a nei thui tawh lo kher mai! An khaw lam mite lahin tih tak zetin an bo chu an zawng buai lo vang tih a hre tlat a ni.

Anmahni mantute pawh chu a ni telin an ṭi ve tial tial niin a lang a, chûng lai tuipui kama chutiang huna mi ngo nula lo rûk bo chu man chhuah an nih vaih chuan an chung a ripin namai lo tak a ni dawn tih an hai lo miau a ni.

Cape Ann chheh vêla chengte zinga tlem tê chauh chu ramhnuaia chetla ṭhang leh chhuahvah ching an ni a; mahse, chutih karah sumdawnna atana inkulhna tur hmun remchang melha tuifinriat kam hrul vêla vâk vâk an awm ve reng bawk a, an hmu palh ang tih a hlauhawm hle reng a ni. Lawng lo thleng mai tura an beisei lah thlen tih a awm thei bawk si lo.

Ngawi renga mu chungin Diana chuan an dinhmun chu a chhût neuh neuh a, an beiseina neih chhun chu mi hang sal, Henry an tih bera chu niin a hre ta lek a.

Henry-a chu mi hang, pa sang leh sek tal mai a ni a; pasalṭha, ral do mi a nihzia chu a hawiher leh a taksaa ser nung awm zozai aṭang chuan a ngaihruat theih mai.

Mi hang pakhat zâwk chu pa tawi, thau leh dul kiar, thu âwih tak hmel pu a ni a, sangha man leh lawng kar chu hneh tak a ni tih an sawi thawm Diana chuan a hre tawh nghe nghe bawk.

Diana chu a ṭhu chhuak hlawl a, a sam te chu a'n chul mam a; chutih lai tak chuan Henry-a pawh chu a rawn hawi nghe nghe a, chu chu remchanga hmangin a hriat tur tâwk leka zawi hian, “Hmanhmawh a ngai tak zet ta!” a han ti sap a.

Henry chuan a thu sawi chu a hre lo em maw ni, engtin mah a chhang lo. Lo hre thiam pawh ni se, anni chu a ṭanpui duh ang em? Duh ta hlauh pawh ni se, he pa hi rin tlâk a ni ang em? 'Mi dangte ai thlawt chuan a belh tlâk ang chu,' tiin a inhnem chawp a.

Anmahni rutute chu an fimkhur tial tial a, an mi mante chu zunram thiar tur tak ngial pawhin an thlahthlam ngai lo; chutiang a nih tâkah chuan Diana tan pawh tlan chhuah chu thil khirh tak a ni tawh ngei ang.

Henry-a chuan tlan chhuah rûk dan chu a melh ve reng niin a lang a; he pa hian sâp ṭawng a hmang Io va, a ṭawng chhun lahin Portuguese ṭawng a hmang daih a, anmahni mantu zinga pa ria sang tak chu Portuguese ṭawngin a be ve zauh ṭhin.

Mei lum aia an ṭhut laiin Henry-a chuan a rawn hnaih deuh hrut a, rang takin Diana chuan, “Min ṭanpui duh chuan kan lawm ngawt ang,” a lo ti ru hman zauh a.

Anmahni mantute zinga mi ngo pakhat, thau tak chuan hriat leh rinhlelhna nei ni àwm fe hian Diana chu melhin, “I bia elo?” vin zet hian a rawn ti ṭhawt a.

Diana chuan, “Teuh nâng, he lai lei chara mut reng mai hi kan nin tawh thu ka sawi mai a nia,” naupang pawi sawi lo hmel pu tak hian a lo ti zaih a.

Nuihsawh zet hian chu pa chuan, “Ngawi tak rawh u, in mut hmun zawng in la sawn dawn khawp e,” a lo tihsan a.

Mi dang mu pawh chu an rawn tho sang sang a.

Diana chuan a rilruin, 'Eng pawh ni se, vawiin emaw naktuk emaw ral hmain tlan chhuah ngei ngei tur,' tiin a rilru a siam ru sauh sauh a.

Luitê tui vâwt tak chuan a han inphih harh a; anmahni an man aṭang khan khawthlang lam hawiin an kalpui ta char char kha a ni a, mel sawmhnih vêl zet kal tawhin a inhria a. Chumi hnuah ni hnih dang hmar lam panin an kal leh a; chutah, inher kualin khawchhak hawiin an kal leh a ni.

Tunah chuan tuifinriat an hnaih tawh hle tih an boruak hip dan aṭang chuan a hriat theih a, chi al rim pawh a nam deuh nghur tawh a. Tuna a hmai phihna luitê pawh hi tui fâwn sàn changa tuifinriatin a rawn chim zauh zauh ṭhin niin a lang — a tui pawl dan atangin.

Anmahni mantute chuan nghah an nei tih a chiang mai, sal phurtu lawng lo thleng mai tur nghah an nei a ni. Lawng chhunga hruai luh an nih hman vaih chuan tlan chhuah lehna hun a awm tawh lo vang; lawng pawh chu a lo thleng ṭep tawh ang a, a lo thlen hma ngeia chêt lâk vat a ngai dawn ta a ni.

Diana-i'n Henry-a a bekbawr ru zauh pawh kha loh theih lohna vang chauh a ni. Anmahni mantute thu âwih takin eng mah sawi lo leh phun hauh lovin a hma zawngin an lo awm tawh a; chu vang tak chuan anni pawhin zam chhe hle turah an ngai tawh a. Hei hi thil pawimawh lutuk a ni, zam chhe lutuk chuan tlan chhuah an tum ngam lo vang.

Tunah hian Cape Ann hmar lam tuipui kam, tuipui aṭanga hla vak lovah an awm tih bâk Diana chuan hriat a nei lo. An lo tlan chhuak ru thei hlauh te a nih ngai chuan chhim lam hawi zawnga kir leh ngat ngat a ngai dawn a ni.

Mahse chu zawng, tih chi a ni lo vang. An rawn ûm zûi ngei ang a, chhim lam an pan an ring ngei bawk ang a; chu vang tak chuan an rin lohna lam tur ber khawthlang lam pan a chi ber zawk ang —an khua Cape Ann hlat zawngin.

Diana Macklin-i hi kum sawm pasarih mi a ni tawh a, a rualpuite chuan pasal a chhia a ṭha an nei fir fer tawh a. Ani hi chu a kum phu lova mi inhmuam ûp thiam a ni a, inhmuam ûp taka a awm hian mipa lepler deuhte lakah a chhanhim tih a lo hre ṭhin tawh tlat a ni.

An man dan lah kha a ho angreng hle Iehnghal a. Hnimhnah mala a kun a han hawi chhuak leh chiah chu mi pakhat hian Carrie-i chu a lo pawm bet a, a hrawka chemtê a lo chuktuah lai chu a va hmu ta mai a! Khatih laia a lo ṭe vak lo kha aw...; lo ṭe vak ta se, a au thawm hre pha pawh an awm mial maithei asin....

An man aṭanga ni thum chhung zet chu hmanhmawha tlan titih chung zelin varṭian aṭanga ni tlâk ṭhak thleng an kalpui dawr dawr reng a; zan a lo nih chuan lei charah mitthi ang maiin tui takin an muhil bawrh bawrh zel a.

A rilru chuan tlan chhuah dan tur ngawt chu Diana chuan a ngaihtuah ngial a. A hmasa bera an mamawh leh tih hmasak ber tur nia a hriat chu hun eng emawti chhung birûk bo hmiah a ni. Kal pah chuan chutiang tihna hmun remchang chu a melh ru pah reng a; mahse, hmun remchang hman tlâk tur êm chu a la hmu thei lo.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 16th, 2019, 7:13 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 5
(Rozami Pachuau)

Carrie chu a'n zi ṭalh ṭalh a; a tho va, a kut te silin a hmai te a phih a, a thawmhnaw chuar te chul mamin a sam te chu a'n huih mam a. Chu chu Diana-i'n a hmuh chuan lainat leh dûat tak hian a khuihsak a, a phiarsak ta diam a.

Chutia tih pah chuan Diana chuan, “Beidawng reng reng suh. I theih anga fel leh faiin awm tum tlat reng la, nangmah i intih zahawm chuan mi dangte pawhin an zah mai ang che,” tia phun sep sepin Carrie chu a fuih malh malh a.

“Chutianga awm te zawng a sâwt chuang hlei lo'ng e; nangmahni leituin a duh duhin a chawk vêl dawn tho che u tih hi hre mai rawh u,” tiin lainatna nei hauh lo hian mi pakhat chuan a lo tih khum a.

Chu thu rawn sawitu, Lashan-a chu Diana chuan engtin mah a chhang lo, a sâwt dawn lo tih a hre bawk a ni. Chu pa mei lum ai chu a'n melh vang vang a; cher sang ṭhai mai mah ni se, en aiin thahrui a ngah tih pawh a hai hauh lo.

Lashan-a chuan rawn enin, “Dàwi thiam i ni em?” a rawn ti ta a.

Chu thu a han hriat chuan Carrie chu a lo ip chawih a, Diana chu a'n melh vang vang a.

“Mite chuan ni ngeiin min ring alawm,” Diana chuan a ti ve mai a.

Mi dangte chuan an thlir reng tih pawh a hai hauh lo. Mi hang pahnihte chu an phâwk hra a; Henry-a chuan chîk zet hian a lo en a, Feebro-a pawhin a thil tih lai chawlhsan meuhin râp lek lek hmel pu hian a lo en bawk a.

“Dàwi thiam lâk tlâk loh tak i nih dawn chu!” Pomey-a chuan a lo ti bauh a. A kut bal tak chuan a kekawr hâk lai chu a pawt chhing a, “Chuti ni lo se chuan, khatianga awlsam khan kan man hauh lo vang che u,” tiin fing inti fe hian a'n tuihnih leh a.

Muangchanga inherin Diana chuan Pomey-a chu a han hmachhawn siah a, a mit taka melh kar chungin, “Eng mah insawiselna i nei rih lo maw? Ka rin aiin hun a duh rei daih mai!” mak tih hmel tak hian a ti ta a.

Pomey-a chu a phu zawk hian a hriat a, zam leh hlauthawng tih hriat zet hian, “Eng thilin nge hun duh rei ta chu ni? Eng thil ṭha lo nge kan chungah i tih tâk a!?” tiin Diana chu a zâwt ta sek a.

“Ngawi chip cham mai rawh, mi â, lu lian-pa! Nuihza siam nan a hmang che tih i hre na ker kur nge?” tia vin zet hian Lashan-a chuan a lo hrâwk a.

“Na eng mah i la nei lo maw? Ngawi tak rawh, a hun a la thleng dawn alawm,” nui deuh, ti tak hmel pu si hian Diana chuan a han ti leh a.

“A tâwk tawh ka tih kha! Nang nu tê reuh pawh hi, khatiang ṭawngkam kha han phuh chhuak leh vaih teh!” tih pahin willow thing ṭang vilik chung hian Lashan-a chu a ṭeu ta hlur a.

Diana chuan Lashan-a chu a en ran a, “Nang pawh Lashan, nang pawh hi!” a ti ve ta ngat a.

Chu veleh Lashan-a tiang ken lai chu a ri fua a, Diana-i koki leh dar vêl chu a sen nghal tawn tawn a.

Che miah lova ding ngar chungin, “Lashan, fimkhur hle rawh! Hmelhema min awmtir vaih zawngin nakinah i insawi fiah hle a la ngai ang. Min leitu chuan him pial leh hmelhem lo a duh ngei dawn a nia,” Diana chuan a ti ta a.

Lashan-a thinrim mitmeng chu a sen ta rum a, insum tak chung hian, “Nauvi, lawng pawh kan la thlen êm loh hi! He lai ngaw karah pawh hian thil tam tak a thleng thei tih hre rawh; mi han tih thinrim leh vaih zawngin Indian-ho hnenah ui hur hralhin ka hralh mai ang che,” a ti ta khu khu a.

An ngawi ta ṭhap a; mahse, Diana chuan a thil tum pakhatah chuan hlawhtling a inti hle tho mai, chûng thil avang chuan amah chu an ṭih phah deuhvin a lang tlat a ni. Carrie chu a han kuah a; mahse, ani chu a lo tim deuh tlat a, mi dangte tih ṭhaih a tumna lamah a ti hlauhlawp tel ve chu lo niin!

Chumi ni chawhnu rei tak chu thing buk hnuaiah chuan an awm ta a. Lashan-a pawh chu a awm hle hle thei tawh lo va, a phe sek tawh mai a. Eng tik hunah pawh buaina tâwk thut thei an ni tlat a; Indian-ho emaw, anmahni zawngtute emaw, sangha mantu, hêng Iaia tap chawt-hote emaw pawh tawng thut thei an ni tlat a ni. An lawng nghah ber lah chu a la reh vung vung a, kar hnih dawn laiin a rawn tlai ta....

“Min mantute hi hlau lo la, kei phei chu min hlau reng reng suh. Dàwi thiam pawh ka ni hek lo va; mahse, mi dangte hi chuan dàwi thiamah pawh chuan min lo ngai a nih pawhin min hlauh phah ang a, a pawi hauh lo,” tiin Diana chuan Carrie chu a hnem melh melh a.

Vem-a chu ngaw karah chuan khawi lam nge a pan dawn tih pawh hriat loh hian a liam ta daih a. He pa hi pa tê deuh, sa nghet tak, hmai tlang hriam tak si a ni a, a khabe a zum ṭha hle bawk. Lukhum phiar ṭial a khum a, savun kawnghren hlaipui mai a hreng a.

Anmahni mantute zingah ani chauh hi tun hma lama a lo hmuh tawh a ni a, a hmuhna chu SHAWMUT a ni nghe nghe. A tira an mannaah kha chuan a tel ve lo va, he lai hmunah hian a lo nghak a ni. Lashan-a hnena eng emaw a hrilh ṭuma Lashan-a thinrimzia kha a lo hmu ve reng a, lawng a rawn tlai tur thu a hrilh a ni ngei ang.

Diana-i'n a hmuh tirh khan hre àwm pawhin a lang duh lo va; Vem-a erawh chuan a hmuh tawh hnu ang a ti deuh ni ngei tur a ni, a melh leh ralh ṭhin a.

Lashan-a tih loh chuan tu mahin ani chu an be ngai lo. Pa thauva erawh chuan vawi khat chu a rawn bia a; mahse, Lashan-a chuan a lo ṭim hrep a; chuvangin, anni hi be lumlam lo tura thu pêk khauh tak nei an ni ngei ang.

An muthlu an lo harh leh meuh chuan Vem-a pawh a lo kir leh reng tawh a; apple tui sawr chu a in sawk sawk a, a kal bo leh ta daih a.

Boruak chu a reh duk a, Diana chu ramhnuai vêla chetla ṭhang a ni bawk a, thawm a dim thiam hle a; a tuar a chhel bawk a, mipa tam tak pawhin ngaw kara chêt vêlah chuan an tluk lo vang. Tuna a mantute kut aṭang hian a tlan chhuak thei ang em le? Lo tlan bo thei teh reng pawh ni se, engtin nge Carrie-i hi ni ta ang?

Tunah chuan duh thlang thei dinhmunah an ding lo va; tlan bo erawh chu an tum ngei tur a ni. Henry-a chuan a pui duh emaw, duh lo emaw tlan chhuah chu an tum hrim hrim tur a ni.

Henry-a lah chu a ngawi reng mai a, a hawiher aṭang chuan a inring tâwk tih a hriat hle a; tin, ngaw kara a han che vêl aṭang chuan ramhnuaia chetla ṭhang a ni tih hai rual a ni lo bawk.

Khua pawh a lo tlai Ieh ta hle a, Vem-a pawh a lo kir leh tawh a, Feebro-a ei tur siam sa chu an lo hlui mek a. Satel sa, sazupui sa leh sangha chhum pawlh chu an zanriah a ni a, tui an ti tlang kher mai. Chaw an ei kham chuan mu turin an inpuahchah zûi leh mai ang a, anni pawh chu an phuar hlawm leh mai dawn a ni.

Diana chuan an piah lawka thing bul, thlipuiin a chhem kar, zum ther fur chu a va melh ru zauh a; a rilru chuan chu thing tlu kar, zum ther fur hmang chuan an phuarna hrui chu a tih chhum theih mai a ring deuh a, hun erawh a duh rei duh deuh ngei ang.

Tlan chhuahna tur kawng pawh a riruat fel vek tawh a, an riah bûk bul, thing lian pui pui pahnih inkar aṭang ngei chuan tlan chhuah a chi dawnin a hre ta a. Chu laiah chuan hnim a tlem deuh a, thing hnah ro leh thing ṭang ro rah rik tur a tlem hle a, chu chu remchanga hman a rel thlu ta a....

Vem-a chu a mu ta daih a, pa thauva lah chu tuipui kam lam thlithlai turin a chhuak ta daih bawk a. Thli leh tui fawnte hi innghahna tlâk an ni lo fo va; chu vang tak chuan lawng pawhin an tum ram an duh hunah an thleng zo lo fo reng a, a chang phei chuan an pil bo hmiah ṭhin a ni.

Lashan-a pawh chuan mut zai relin a kuaitê chu a pak khu hlat hlat a. Chutih lai chuan sa tui hang kengin Henry-a chuan Diana-te chu a rawn pan a, Carrie chu a han pe hmasa phawt a.

Diana hnenah chuan, “Lawng a lo thleng, puan zar ngul ka hmu,” a ti ta sap a. “Zanin hi hun remchang hnuhnung ber a ni ta,” a han ti leh sup a, a kal sawn leh nghal daih a.

Lashan-a chuan thil hriat nei ni àwm tak leh ngaih ṭhat loh hmel tak hian a rawn en ngun hle a....

**************************

Thla eng no ruih mai chuan thing hnah te chu tangkaraw tle tak ang maiin a rawn kâp tle siau a, thing buk kar aṭang chuan chhum te chu an paw var phang mai bawk a. Chutiang zan reh tak hnuaiah chuan an hun chu an hmang mek a ni.

“Tunah chuan tuipui a hnai ta, chi al rim a nam ta huam mai,” Yance-a chuan a han ti sap a.

“Dik chiah, an lawng pawhin vaukam hrul a pan mek reng a ni; kan tlai loh hram ka beisei,” ka lo tihpui vat a. “Thirchakai pawh an la thlâk lo a ni maw?” ka'n ti leh a.

Yance-a chuan, “A ni ang e; a nih leh lawng chu kan luh chilh hmiah mai dawn em ni?” a han ti ve a.

“I laina hnaite an ni a, a ṭul a nih phawt chuan kan luh chilh mai tur alawm. Amaherawhchu, lawngah sawn silai nei ṭhiau sawm pahnih aia tlem lo an awm a nia; keini — pahnih,” ka han ti ve bauh thung a.

Yance-a chuan beidawn hmel tak hian a hnar a'n han tum dat a, thiI sawi tuma a han ang ṭan ziau lai tak chuan piah deuhva thawm eng emaw chu kan hre dun ta a.

“An bo ta.... Mi â-ho! Tu nge vengtu tura in dah? Lâk tlâk loh lutuk!” tiin mi pakhat chu a au ta teng tung a, phun ri mar mar thawm hian a zui nghal a.

Thinrim aw fiak ṭhak hian pakhat chuan, “Chuti a nih a hnu, ûm zûi vat ta che u! An la thleng hla hauh lo vang; han man leh lo vaih teh u!” vau titih hian a han vin lêt ṭhat a.

“An tlan chhuak ta a ni ngei mai!” phur hmel tak hian Yance-a chuan a han ti hlat a.

“Kha nu tê reuh kha mi dangdai tak a ni reuh a, mipa nazawngin duh duha an kawih her theih chi niin ka hre lo reng a ni,” a'n ti zui leh a.

Kei chuan, “Engtianga hla nge tlan theia i rin hrep ni? Nula leh hmeichhe naupang, pawnfen feng ve ve chi lehnghal! Hetiang ngaw karah zawng, thui an tlan thei hauh lo vang le,” ka lo ti thung a.

“Hla tâwk tak, a ṭul ang tâwka hla an thleng ngei dawn alawm, keini'n kan lo va pui thei dawn bawk a,” Yance-a chuan a ti ve sauh sauh a.

“Lo ṭanpui dawn teh reng pawh ni ila, ṭanpui dan tur hriat thiam a va har êm! Ngaw kar pik zingah tlanin an biru ve ngei ang a, an hnuhma an thup hle dawn bâkah a ûmtute lahin an hnuhma an chil bo vek àwm si a.

“A..., zing khaw en hun te pawh nghah àwm takah ka'n ngai deuh ngawt a, zan thimah chuan hla tak an kal thei àwm si lo. A reng rengah, pui dawn pawh ni ila hetiang zan thimah te chuan engtin nge maw kan hmuh mai theih bik ang le?” ka han ti deuh chiam a.

Ding chung chuan thawm chu kan ngaithla vang vang a, kan thlang lawkah chuan kan rûk ru rual mi â-ho chu thawm dim nachang pawh hre lovin an ri teng tung a.

Thli fim chuan thing hnah te chu a chhem che siau siau a; ka rilru chuan Diana-i dinhmuna dingah ka'n inchan vêl a; tunah hian eng rilru nge a put ang a, eng angin nge hma lâk zel a tum ang tih te chu ka ngaihtuah nauh nauh a.

Nula fel tak tia sawi chu a ni ngei a; mahse, hmeichhe naupang hruai a nei si a, khawi lam nge an pan tâk ang? Tuipui hlat zawnga an kal ngei chu ka ring a; mahse, an kal hlat poh leh Indian-ho an tam bawk si!

Tichuan, tuipui kam aṭang chuan ngaw ril lam panin kan tawlh kir ve leh ta a. Rei tak chhung chu kan mi â-ho thawm pawh kan la hre thei a, hman a ṭul palh tâkin tia inring renga kan ken kan ralthuam pawh chu hman a ngai ta lo hlauh a.

Mahse, zing khua a lo var chuan harsatna kan nei ta kau mai a, khawi lam nge kan nulate chuan an pan zel ang tih chu zawhna pawimawh tak a ni ta. Kawl a lo eng ṭan ta tihah kan bûk chu chhuahsanin, inkar hlat vak lova kalin kan hnu chhui chu kan ṭan ta a.

Rei fe hnuah Yance-a chuan thing buk hnuaia ṭhu chung hian, “Kan hnu chhui lai en hian an thluak ṭhatzia a lang reng mai, ngaw kara hlauhlawpa pawngpaw tlanchhe mai zawng an ni miah lo. Macklin-i hi a fing hle a nih hi, khawmual lam hi an pan ril zel dawn niin a lang,” a ti ta a.

“Chhim lam pan se chuan ṭanpuitu an hnai ngei ang maw le,” ka'n ti nâin Yance-a sawi chu dik ka ti hle tho mai.

“Chhim lamah chuan ṭanpuitu chu an hnai ngei ang, chu vang tak chuan anmahni ûmtute pawhin chu lam an pan chu an ring ngei ang a, chu chu Diana hian a hre phâk a ni ngei ang. Chuti a nih chuan, hmar lam panin rei fe an kal ang a; Indian-ho tâwk lova tuipui an hlat fe hnuah chhim lam chu an la pan leh chauh ka ring,” Yance-a chuan a ti a.

“A nih leh engtin nge ni zel ang?” ka lo ti a.

Yance-a chuan, “An hnu zela kan kal chuan anmahni zawngtute tan chhui a nawm phah ting mai dawn a; chuvangin, khawmual lût thûk zawng hian kan kal ngar ngar ang a, ni khat chutianga kan kal hnu chuan hmar lam panin kal leh zel ila a ṭha ang,” a ti ta a.

Chu chu ka pawm zawng tak a nih thuin ka lo chhang a, nula ru botute lahin he laia kan awm hi an la hre bawk si lo. Tichuan, hmanhmawh takin, tlan titih hian kawng hlui chu kan zawh ta ngat ngat a. Rampalailengah pawh nileng lenga sa pel ṭhin kan ni ve miau a, Indian-ho ang maiin kan chhel ve a ni.

Tlan pah chuan thil ka ngaihtuah nauh nauh a, kan nulate chu zanlai pelh hnuah an tlan chhuak niin a lang a, an tlan chhuah aṭanga an chhuak tih an hriat inkar chu hun rei lo tê chhung pawh a ni thei a, an biru ve ngei ang.

An zawn buai chhung chu thawm nei miah lovin an biru ang a, an kal kian hunah an kal ve leh chauh ang. Zanah chuan kal chak har teh mah se a ṭul miau si a; chutianga han chhût tâkah chuan mel thum, mel li vêl te chu an thleng ve tawh mahna!

Yance-a chuan, “Hmana Jamestone-a he lui chanchin min hrilhtu, lawng pu khan leiah a lem nen ziak meuhvin he lui luan kawi vêl dan te kha min hrilh tak a. He lui hi chhak lama Indian-ho nena insumdawn tawnna leh inkal pawh nana remchang tak a nih thu te pawh min hrilh nghe nghe,” a han ti a.

Tlan tawh lovin a kalin kan kal ta a. Kan awmna chu oak thing leh maple thing hmun a ni a, tlang pangah chuan birch thing var pur mai, lian tak tak an ding khup a.

Khawi laiah emaw sava hian thing a tuk ri kauh kauh tih mai loh chu thawm dang hriat tur reng a awm lo. Kan sir deuhvah chuan sava rual khat hi hniam takah an rawn thlawk vuai a, piah deuh hnim buk karah chuan an thlawk lût ta dial a.

Moccasin kan bun bawk a, thawm kan nei lo viau mai. A khat tâwka thawm ngaithlaa kan han ding leh hlek ṭhin tih mai loh chu chawl lovin kan kal leh ta zel a.

Thil ri reng reng hi boruakah chuan hla tak thlengin a hriat theih a, ramhnuai leh ngaw chhung thawm chu kan beng chuan a hre hneh tawh hlein, thawm danglam deuh pawh kan thliar zung zung thei tawh a ni.

Tlang pawng deuh hi kan va chuang chhuak a, chu lai hmuna oak thing lian pui mai pahnih bulah chuan dingin ram chin kan thlir ta a.

Kan awmna chu a sang deuh bawk a, han thlir kual vêl pawh a remchang hle reng a; chutah, hla taka thil che zauh chu Yance-a nen chuan kan han hmu rual ṭhawt a.

Thing phena biru chung chuan kan kalna lam aṭanga mi paruk, kan lam pana lo kal mekte chu kan thlir a; a hmasa bera lo kal chu tu nge tih hai rual a ni lo, chutiang taka pa lian si, ani anga inthazo leh zei hi an awm thei tawh lo vang — Max Bauer-a ngei a ni!

“Eng nge i ngaih dan, min ṭanpui tur an ni thei ang em le?” tiin Yance-a chu a'n phun chhuak sap a.

Kei chuan ka ring lo êm a, ka rin loh thu pawh Yance-a chu ka hrilh a.

“Chuti chu min rawn chhui a ni maw? Lo beih nghal tur em dawn?” tih pahin Yance-a chu a ter at a.

Kei chuan, “Ni lo ve; chutiang lo deuh chuan le. An hnu chhui lai saw keini kan ni tih an la hre lo bawk a, kan hnu hi chhui theih hauh lovin i'n ti chingpen vêl teh ang,” tiin ka rawt ta zâwk a.

Tichuan, kan hma lam tlang sang tak pakhat awm chu Yance-a kawh hmuh pahin, “Saw lai tlangah sawn kan intâwk dawn nia,” ka ti ta a.

Yance-a chu hlimthla ang maia thawm nei lo hian hnim buk karah chuan a pil bo zûi ta nghal a. Chutah, kei pawh tawi khawmuang lovin tlang pang Iehlamah chuan ka liam thla ve nghal a, hnuhma chu hmuh awlsam thei tur ang berin ka hnutchhiah ta vak a.

Chutianga hnu thup tum lova thui fe ka kal hnu chuan thing kung, ṭêkin a den thluk tlu sawp nuaih hi ka va hmu a, an lo indelh kalh nuk mai a. Thingluangah chuan lawnin ka zawh a, a dangah ka kal kai zel a; chutah, luitê ka va thleng a; luitê chu ka zawh ta thung a. Lui hnar lama ruah a sur avangin lui tui pawh chu a nu hle a, mel chanve vêl lai ka zawh hnuah ka per kai ta a.

Lungpui chungah ka han ding a, ka thawmhnaw te chu sawrin lungpui dangah ka pakai zel a, lung chungah hlir kalin lui dung zelah chuan ka kal zel a.

Hmun pakhatah hian sazuk an lo tla dam dam a, min han hmuh chuan hlauvin an tlan darh zo ta a. Kil tin panin an darh a, an hnuhma chu a buai ta nuaih a; chutiang a nih avang chuan an hnu chhuitute tan pawh a buaithlak hle ngei ang le.

Darkar chanve zet a liam ta ang tihah chuan kan hmun tiam chu ka va thleng ta a. Thing bul nghenga ṭhu chungin a chheh vêl ram chu ngun takin ka thlir a. Hmar thlang lam hla takah chuan ngaw karah hian hmun awl ni àwm tak, paw deuh raih hi ka va hmu a; chu chu Cape Ann aṭanga rawn luang thla, luipui an tih kha a nih ka han ring deuh ngawt a....

Tunah chuan kan ring sual hle a nih loh chuan kan nula bote pawh chu kan awmna aṭanga hmar lam emaw, tlâk lam hla vak lovah emaw an awm ngei ang a; anmahni ûmtute lah chuan an hnu chu chhui lovin kan hnu zâwk an chhui ta daih chu a ni tak si a!

Rei lo tê hnuah chuan Yance-a pawh a rawn lang ve ta a. Diana-te chuan luipui a hnaih thu hi an hre ve ang em tih ka lo zâwt a, Yance-a chuan an hriat a rin lem loh thuin min chhang a.

Mahse, “Diana hi titi ngaithla peih tak a ni a; Temperance-i hnena kan awmna lai chanchin ka hrilh pawhin a awm ve a, zawhna fing tak tak hlir zuk zâwta maw le! Chuvangin, he lui chanchin hi a hriat ve viau pawh thil àwm tak a ni thei ang," Yance-a chuan a han ti hnuhnawh a.

Kan hna chu a buaithlak ngawt mai! Hetiang ngaw karah hi zawng, kan mi zawnte nen pawh hnai takah kan inpel daih thei a, thawm dim tak rengin an awm dawn si a. Kan thawm hria pawh ni se, hmelma emaw min ti ang a, hlau leh fimkhur takin min relh rûksan daih maithei bawk a ni.

Tunah chuan tuifinriat aṭanga mel sawm panga vêlah kan awm kan ring a; nula bote lah chuan khawthlang lam la pan zelin chhim lam pana an rawn inher chhuah thuai erawh kan ring a ni chauh a, kan rin dana an kal tak tak a nih chuan kan inhlat tawh hauh lo vang.

Kan awmna leh a chheh vêl ram rûak zau tak tak rai dup mai chu kan thlir kual a. Yance-a chuan, “Tunah hêng lai hi ram rûak angin awm mah se mi tam tak an lo la kal ang a, ram rûak a ni rei tawh hauh lo vang,” tiin hrilh lâwkna ang reng chu min han hrilh a.

Chutah, kal turin kan insiam ta a. Yance-a hnenah chuan, “Tlâk lam hawiin hnuhma zawngin rawn tuam phei la; keiin chu lam hawi tho chuan ngil takin luipui kam te ka rawn thlithlai ve ang e,” ka han ti a.

Hei hi sa pela kan ramchhuah ṭuma kan tih dan a ni a; sava hramin kan duh hunah kan inko mai a, kan tla hrang a, kan inpui thei reng thung ṭhin.

Thui pawh ka la kal hman lo, thawm eng emaw hriat ka neih avangin thawm ngaithla chuan ka han ding hlek a; ka’n hawi chhuak chiah chu le, nula hmel ṭha lutuk mai hian mi lo en kiau mai chu niin!

A tu-a mah chuan ṭawng zai kan rel lo. Ani chu birch thing ang maia ngilin a ding zaih a; chutah, a han nui ta seih mai lehnghal a, ka bing mup mup hian ka inhria...!

Chutih lai chuan mi dangte pawh a bulah chuan an rawn inlan ve ta sap sap a. Chûngte chu hmeichhe naupang leh Negro (mi hang) la upa vak lo, sang tak mai hi an ni a; chu pa chuan fei zum ṭha tak hi a keng a, a kâwngah chuan chemtê hriam hmel tak hi a pai bawk a.

“A ṭha e, Henry; Sackett a nih saw,” tiin nula chuan mi hang-pa hnenah chuan a'n hrilh sap a.

“Eng nge ni Sackett chu?” mi hang-pa chuan a lo ti hu a.

Chutia a han tih zawh chuan nula hmel chu a hlim zual sawt hian a hriat a, “Tu nge hria ang, Henry? Sakawlh chi khat, chhim lam aṭanga lo kal, sa tam tak min rawn hleh a, kan nulate min rûk bosak leh si te pawh an ni maithei!” fiamthu tin hriat tak, nui chung hian a ti a; Yance-a chanchin a sawina a ni tih erawh chu hai rual a ni lo.

“Nula rûk bo tih ang reng hi chu ka lo ngaihtuah ve ngai lem lo va; mahse, miin eng vanga nula ru ṭhin nge an nih chu tunah chuan ka hre ta...,” amah en reng chung chuan ka ti ve ta a.

“Nulate hi awlsam taka rûk theih vek chu an ni hauh lo a nia; mahse keini zawng, hei i hriat angin rûk bo kan ni ta mai pawh a. Min mantute hnen aṭanga tlan bovin in lam pan zai kan rel mek a ni — chumi atan chuan min pui thei ang em, ka Pu?” tia ngenna aw, nula hmel ṭha tak maiin a han phuh chhuah meuh chuan ka mawih zuah zuah a ni ber e!

“In nute'n ka unaupa an rawn chah a, nangmahni zawng tur hian kan pahnihin kan rawn thawk chhuak ta a ni. Aw le, he lai aṭang hian i kal sawn vat tawh ang u, min ûmtute khan min hlat vak tawh lo vang,” harsa ti takin ka ti thei hram a.

Ani chuan, “Keini pawh min ûm alawm; mahni chauhvin em ni hetah hian i lo awm a?” tiin min han zâwt leh rih a.

“Yance-a nen kan nia, min rawn fin ve thuai ang,” tih pahin mi hang-pa lam chu ka hawi ta thung a.

“Kei pawh sal tang, tlan chhuak ve tho ka ni,” a lo ti ve nghal thuai a.

Diana chuan, “Min ṭanpui nasa teh a nia; ani hi tel lo se chuan tlan chhuak thei kan ni hauh lo vang,” a lo ti ve thuai thuai a.

Chutah, chhim lam hawiin ngaw ril lam pan chuan hma ka hruai ta a. Rei vak lovah chuan chinghne maltlat, sa pel lai ûû dan dik tak hian ka han ûû ta raih a; chhanna phei zawng kan hmu lo vang; mahse, Yance-a chuan a lo hre ngei ang a, min rawn pan thuai bawk ang.

Mi hang-pa leh Diana chu hah vak àwm pawhin an lang lo va; mahse, Carrie Penney-i erawh chu a chauh hmelin a dawldang riau a, han inngaihsakna hun erawh a awm si lo.

Chak takin hnim karah chuan ka kalpui ta zel a, ka hnunga kal Diana chuan hnuhma langsar lo thei tur ang bera kalna ka hmu zung zung chu mak a tih hmel hle nghe nghe a.

Kan chawl zing ta hle a, kan chawlh lai te chuan kei, Kin Sackett-a chu min chîk ngun thei hle a; he Sackett kutah hian an zalenna leh an nunna te chu thui tak a innghat miau a ni.

Diana chuan ring ngam tâwk viau mah se a fimkhur êm êm tho a. Yance-a a hmuh tirh khan a ngaina nghal thei mai a, Temperance-i nen an tlan dun tâkah pawh khan an lam ṭang a ni reng a ni.

Tuna an bula awm Sackett ve thung hi chu Yance-a aiin a sang zâwk a, a ṭawng tlem zâwk bâkah a inhmuam ûp deuh zâwkin a rilru pawh a puitling zâwk niin a hria a, chu vang chuan a ring ngam nghal hmiah reng a. Mahse, fimkhur lûat a awm lo tih thu-ah Diana chuan a tâwk a fang a hre khawp tho mai.

An dinhmun derthawnzia chu Diana chuan a hai lo, anmahni ûmtute'n an rawn nanchin vaih chuan Sackett-ate unau chu an that hmasa ang a; anni chu sal atan an man leh ang a, thui tak an lo kal tawhna chu a thlawn leh dawn a ni.

Kan han kal leh ṭan chiah tih chuan Carrie chu a inchhuih palh hlauh mai a, hlauh hmel zet hian a rawn tho leh vat a, “Min kalsan lul suh, Diana,” tia Diana chu enin a ṭap ta fap fap a.

“Kan kalsan miah lo vang che; khawi'nge, ka'n paw nghe nghe teh ang che,” tiin keima'n ka paw ta a. “Nghet tak khan min kuah la, i kein ka kâwngah min kherh tlat rawh,” ka'n ti zui a, phur rit nei lo ang maiin chak zet chuan hma ka hruai leh ta a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » August 19th, 2019, 6:58 pm

THE WARRIOR'S PATH
AUTHOR : LOUIS L'AMOUR
TRANSLATOR : THANVULA
PUBLISHER : HV. LALMAWIA
CHAPTER - 6
(Rozami Pachuau)

Tunah chuan Yance-ate nen kan kalho leh tawh a, hnung dawlah awmin a mit leh beng chhi rana inpeih at rengin a awm a ni tih chu ka hria; amah chu lang theiin a awm lo nâ a, thil awmzia aṭangin ka hai lo thung.

Ngaw chu kan lût ril tulh tulh a, maple leh far thing, Chhura rual pui pui hi an thelh thulh a, a hnuai chu a thelh hun a, kal pawh kan kal chak thei viau a ni.

Diana chuan min chîk thei hle a, a àwm tho ve; la inhmu ngai hlei lo heti taka anmahni puitu ka ni ta mai hi chu a tan chuan mak tih àwm pawh kan ni reng a ni.

Tlang pawng pakhata kan va chuan chhuah chuan hla deuh taka thil dumpawl, ngaw kara lang nal nal chu kan hmu ta thut a. Luipui kha a ni thei ang em? Han en mai chuan rin chu a harsa deuh si; dil em ni zâwk ang?

Rei fe kan kal leh hnu chuan kan va thleng ta a, dil lian tak hi a lo ni a, a kamah chuan kan innghat ta a. Carrie pawh chu a chhuk nghal a, a la tê deuh nâin han inpûak ngar ngar tâkah chuan a hahthlak tham ve viau mai.

Yance-a chuan min rawn fin tawh a, “Min ûmtute pawh saw lai maiah sawn an rawn lang thei tawh a, hmanhmawh a ngai tawh viau a nia,” a rawn ti ta hlut a.

Carrie chuan hlau hmel tak hian, “Kan inah kan haw thei tawh ang em? A la hla em?” tiin min zâwt ve sek sek a.

Kei chuan ka thiam ang tâwka hnemin dam tê hian a koki-ah chuan ka kut ka'n nghat a, “Hlau suh, a hla tawh lo ve. Mahse, in in leh tuna kan awmna inkarah hian mi sual an awm avangin kan pan thei rih lo, mi sualte chuan min chang tlat rih a,” tiin ka hrilh ta a.

Yance-a chu thing karah chuan a pil bo leh ta a, kalna tur khàn ṭha deuh a zawng a ni ngei ang.

Ka taksa sil ṭhem ṭhum leh chau tak avang chuan ka'n tluzal a; chawl hahdam chu kan ni nâin ka ngaihtuahna erawh chu a chawl hman lo hle thung. He dil hi a zau tham a, hêl tur chuan khawchhak lam hawia kal leh deuh ngial a ngai dawn a; chutah, chhim lam pan leh a ngai ang.

Diana chu ka bulah lo ṭhuin, “Cape Ann chhak lam deuhah kan la awm niin i hre ve em?” tiin min han zâwt a.

Kei chuan, “Ni e, kan la awm mek a ni,” tiin ka lo chhang ve mai a.

“Khawchhak lam hawiin kan kal zel dawn em?” Diana chuan a han ti leh a.

“Kal sawn chu a ngai ngei ang, kan awmna lam panin mi sual an lo kal miau si a; a nih leh min ûmtute zingah hian Max Bauer-a hi a tel ve em?” tiin ka zâwt ve thung a.

A ngawih vang vang hnuah Diana chuan, “Joseph Pittingel-a hnuaia thawk a ni,” a ti ve ta a.

“Pittingel-a chu a ni lawm ni, lawng an nghah lai mek neitu chu?” ka lo ti a.

“Min pui tura lo kal te pawh an ni mahna! Carrie-ite inah pawh a leng fo va, Carrie nen pawh hian an inhmelhriat hle asin,” Diana chuan a ti a.

Ka lu ka lo thinsan a, “ln veng mite kha chuan Indian-ho rûk bo in nih thu an sawi uar hle a, Pittingel-a leh Bauer-a pawhin chu thu bawk chu an sawi ve chamchi asin,” ka ti ta daih a.

“Kan ṭhenawmte chuan min zawn hmuh chu an châk vak lo a nih hmel; mahse pawi ka tih ber zâwk chu Carrie lo tel ve hi a ni,” Diana chuan muang raih hian a ti ta a.

Hetiang hunah pawh mahni inngaihtuah chang lova Carrie zâwk a ngaihtuah tlat mai chu ka ngai sang kher mai.

Chutih lai tak chuan Yance-a chu thawm nei miah lo hian kan awmna bul hnim kar aṭang chuan a rawn chhuak leh ta hlawl a.

Hmanhmawh tih hriat zet hian, “Indian-ho an lo kal a nia, an tam viau a nih hmel!” a rawn ti ta thut a.

Yance-a bulah chuan ka va kal a, a kawhna lam chu ka'n thlir a; hla fe maia Indian, ral bei mi rawn inzui thliai thliai chu ka va hmu ve ta a. Chhim thlang lam aṭanga lo kal an ni a, mi sawmli aia tlem lo an ni ngei ang.

“Bengchheng hauh lovin biru ula, an kal liam veleh an lo kalna lamah sawn kan kal ve hlauh dawn nia,” ka han ti zung zung a.

Yance-a chu Indian-ho lo thlithlai reng turin ka hnutchhiah a, mi dangte pawh ka rem ruat dan chu ka hrilh ve a, “Bengchheng miah suh u; kal tur ka tih hunah erawh chuan chak takin thawm nei miah lovin kan kal dawn nia,” ka ti a.

Ngawi rengin kan biru ran a. Indian-ho chu an lo kal zel a, an incheina leh an hmai hnawih ran danah te chuan ka la hmuh ngai lohte an ni tlat mai. Ka silai chu ka hum nghet sauh sauh a, silaimu pakhatin hmelma nunna pakhat a la thei tih chu ka hre ran a; pistol ka la nei cheu bawk.

Keini; mipa pathum leh mi sawmli chu kan intam hleih deuh êm a, ka zam ve deuh nge ni, ka dang te chu a ro huam huam a. Min han bawh ta huk se chuan beisei tur a tlem khawp ang — rifle pahnih leh pistol leh chemtê bâkah Henry-a fei kibar ken chu kan ralthuam neih a ni mai a; Henry-a lah eng ang mi nge tih kan la hre bîk si lo.

Indian-ho lo kalna lam chu kan va thlen loh avangin hnuhma hmuh tur an la nei lo hlauh a; mahse, thil pakhat an hmuh hmaih hauh loh tur a awm, an kawng zawh lai chuan Bauer-a leh a hote tâwk zawngin a hruai tlat a ni. An intawh chilh vaih chuan le! Ka nuih te chu a za ta deuh hial a.

Thawm nei miah lovin Indian-ho chu kan lo thlir a, anni pawh thawm nei miah lovin hnim karah chuan an pût zung zung a. Min rawn pel fel ta a.

Ka lo rin ang deuhin mi sawmthum pali lai chu an tling a, sa ṭha nelh nulh chu an ni lo nâin thahrui nei tak tur phiar fat maite an ni hlawm. An taksaah chuan pem leh hliam eng mah hmuh tur a awm lo va, mi run tura kal, an mi run turte la tawng lo ni ngei tur an ni.

A hnuhnung berin min pel fel ve ta tihah chuan ka ding chhuak a, zaizirin mi dangte chu ka ko a, tlang pang far thing hmun, an lo kalna lamah ngei chuan ka kalpui ve ta a. Dil chu kan ding lamah a awm ta a, kan kal pel ta thuai a.

Mel ruk vêl lai tur kan kal hnu chuan oak thing hmun ngawah hian riah bûk kan sual ta a. Thing ṭang ro ṭha tak tak kan fawm a, a khu lo thei ang ber turin kan chhem a; ngaw thingte chu an sang ṭha hlawm bawk a, mei khu pawh boruakah hmuh thamin a zam vak lo ang.

Birch thing kawr ro hmangin sazuk sa rep chu kan chhum a, rei lo têah ei mai theihin kan peih ta a. Chutianga ka che vêl chu Diana chuan min lo thlir reng a, eng mah phei chu a sawi lem lo.

Yance-a chuan birch thing kawr chu hîkin sa tui thlit theih turin a khawr a, a sem nghal a. Carrie chuan a la hreh deuh nâin a la ta tho a, a in ve ta khalh khalh a. Rilṭam a tawngkhawng hlawm tawh bawk a, ani pawh chuan tui ti takin sa pawh chu a ei zûi ve ta a.

Henry-a chu melhin, “Hetiang hian ngaw karah i lo khawsa ve tawh ṭhin em?” ka han ti a.

Ani chuan, “Kan ram ngaw chu hetiang nen chuan a inang lo deuh,” tiin min chhang thung a.

“Ramhnuaia chêt vêl pawh i lo hnehsawh khawp mai,” ka han ti zûi leh a.

“Kan ram lamah chuan pasalṭha, ral do mi ka niin hma hruaitu ka ni ṭhin asin,” chapo aw ve deuh tak hian a ti a.

“Kan din hmun en hian ral beih tur chu i nei thuai tawh dawnin a lang. A nih leh Africa lam chhuak maw i nih?”

Henry chuan, “Ashanti thlah dik tak ka ni,” a lo ti daih thung a.

“Chu, sal nei mi in ni maw?” ka'n ti leh hram a.

Ani chuan, “Indona te a lo awm a, indonaah chuan hnehtu an awm ṭhin a, hnehtu chuan a hmelma a mante chu salah a chhawr mai ṭhin; a nih loh vek pawhin a that chimit vek bawk ṭhin. Sal ṭhenkhatte chu silai leh puan emaw tein kan thleng chang a awm bawk,” a ti ta daih a.

“A nih leh, eng vanga sal ni ta thung nge i nih?”

“Sal, duh khawp pawh kan la nei lo tih laiin lawngah sal kan dah lût a; lawng hnuai lam, sal dahna pindan ka bih lai takin tu emaw hian ka hnung lam aṭangin mi rawn nem thut a, sal zingah chuan ka tla lût ve ta a, min kalh hnan ta hmiah a ni,” Henry-a chuan a ti ta a.

“Chuti chu sal nih hrehawmzia pawh i hriat dawn chu!” ka han ti leh kher a.

Henry-a chuan, “A ṭhen an chak a, a ṭhen an chak lo a ni mai. Kei pawh khatih lai khan ka chak lo va; tunah chuan ka zalen ve ta a, ka zalen kumkhua tawh bawk ang,” áwm pho deuh at hian a han ti a.

Ka lo nui mai a, “Engah nge i zalen loh ang? Sal mantu pawh kan ni hek lo va, sal chhawr lovin kan hna ṭulte chu keimahni'n kan thawk mai a ni,” ka ti ve ta a.

“Pasalṭhain kut hna a thawk ngai lo,” mi tihsan a.

“Kan zingah i khawsa dawn a nih chuan i chan puala tla chu i thawk ang a, ral beih a ṭul leh i bei ang,” tih pahin ngaw zau tak lam chu ka'n kâwk kual a, “Tichuan, i zalenna tur chu nangmahin va ûm la, i duh tâwkin i chen nghal thei ang,” ka tihsan ta hmak a.

Che miah lova kâwng dawma ding chungin min han en a, “Ka thu tiam chu ka nunnaah hian a bet tlat; hêng nulate pui tur hian chhechhamin ka lo intiam tawh a, him taka an in ka hruai thlen hma chu ka kalsan hauh lo vang,” a ti ta a.

Chutah, “A ṭhat nasat chu! Kan tan pawh i ṭangkai viau ta ve ang, kan mamawh hle dawn si che a,” ka ti ve ta a.

A hnuah Yance-a chu lo kal pheiin, “Nichina, 'Hnung lam aṭangin min nem,' a tih kha eng a tihna nge?” a rawn ti a.

Kei chuan, “Lawng pindan kawngkaa a ding lai, a inrin loh hlanin a hnung lam aṭangin an nem a ni ang; hetiang hi a awm ṭhin chawk reng a nia,” ka lo ti a.

Bûk mei tuah tur thing ṭang ro kan fawm a, Henry pawh chuan min pui ve a. A khat tâwkin ngaw ril lamah chuan thawm ngaithla tur kan intir reng bawk a.

Chumi zan chuan Yance-a leh Henry-a nen ral vengin kan inmen chhawk a, zing varṭianah kan chhuak leh ta a. Diana-ite theih ang tâwka chak chuan kan kal a, tunah chuan Cape Ann chu kan awmna aṭanga hmar lam hretah a awm tawh a.

Carrie chu a chau viau tawh a; Diana erawh chu chau àwm pawhin a lang teh vak lo. Ngawi rengin a kal ve auh auh reng a, Carrie chu a ngaihtuah thei hle bawk a.

Luitê pakhat hi kan va thleng ta a. Chu lui chu hmar lam atangin tuipuiah a luang lût a, luitê kamah chuan kan chawl ta a.

Henry-a chu Iui mawng lamah a liam thla a, keiniho chu kan bul hnai maia ramtheihmu chu lovin kan buai ve nak nak bawk a.

Nakinah chuan Yance-a chu ka bulah lo kalin, “Cape Ann emaw khaw hnaivai dang emaw pawh kan pan tawh mai dawn em ni? Mel sawm emaw vêl lo liam a ni tawh lo vang,” a rawn ti a.

Chu thil chu ka lo ngaihtuah ve mek a ni a; mahse, Max Bauer-ate chanchin kan hre si lo va, min ṭinsan ta mai zâwk em ni ang? Mahse, a rinawm chiah si lo....

Diana te ang nula hmelṭha leh Henry te ang hi chu an tan chuan màn man tham tak tur an ni. Chu mai a ni lo, keini hi min chhuah a nih ngat chuan mi ngo nulate, sala an man thu hi tlang hriat a ni mai dawn si a, khawi hmunah mah ral muangin an awm thei tawh lo ang a, man mai loh chu hmabâk an nei tawh dawn lo a ni. Eng pawh ni se, tunah chuan kan theih anga khua luh vat a ṭul ta ber mai.

Theihmu rah lova vêi vêl mek Diana chu ka va pan a, “Cape Ann chhim lamah mi chenna hriat i nei em?” ka va ti ta tawp a.

“Ka pa chuan hmun pakhat, 'SHAWMUT' awm thu hi min hrilh fo va; chutah chuan ṭhian pawh a nei a, a hming chu Reverend Blaxton a ni. Chu laiah chuan a chhiahhlawh pakhat nen chauh an khawsa a ni àwm e,” a lo ti a.

“Chu chauh chu maw i hriat?” ka lo ti thuai a.

“Hmun dang pakhat, 'Winesimet' an tih mai a la awm; chutah chuan Samuel Maverick-a a awm a, a in chu kulh ang maia hung phui tlat a ni. Laipuite pawh a hungnaah cnuan a awm thluah a ni àwm asin,” a ti ta zel a.

“Chu pa chu pa fel leh ṭha tak chu a ni ang maw?”

“Ni e; zaidam tak leh nelawm tak, pa chak zet mai hi a niin, hlauh ngah lo tak a ni bawk,” Diana chuan a ti a.

“Mi mal taka inhriatna in nei em ni?” ka'n ti leh a.

“Min la hre maithei. A in sak lai khan ka pa hian a pui ṭhin a; vawi khat chu min hruai ve a; mahse, naupang tê ka la ni,” Diana chuan a ti leh mai a.

“Chuti chu a ṭha e; chu pa ngei chu i va pan phawt mai teh ang u,” ka ti ta a.

Diana chuan, “Min lo mikhual duh a nih chuan a bulah chuan kan him ngei ang. Mi hming ṭha leh zahawm, England ram thleng pawha an hriat a ni a, Max Bauer-a ngei pawh hian ani hi chu a nuthuri zuam hauh lo a nia,” a ti ta zel a.

“Nupui te a nei em?” ka han ti teh thut a.

“Aw, nei e. David Thomson-a nupui thihsan, nu ṭha pui mai a rochung a nih kha,” Diana chuan a ti ve zel a.

Henry-a chu lui mawng lam aṭang chuan a rawn chho a, sangha a lo zuk man chu niin! Lian ṭha fe fe mai hi a zo tâwk ni mai àwm hian a rawn khai lawih mai a, “Ka'n siam vêl ang a, pumpui hmangin keng ṭheuh mai zâwk ila a ziaawm zâwk ngei ang,” hlim hmel pu tak hian a ti soh soh a.

Sangha kan ei mek lai chuan Yance-a pawh chu a lo lêt ve leh ta a. Ka bulah lo ṭhu ve nghalin sangha pakhat chu a han lek kang ve nghal a, “Saw laiah sawn kawngṭum hlui tawh tak ka hmu fuh hlauh mai, chhimchhak lam hawia kal a ni,” a han ti a.

“Zawh tlâk a ni meuh ang maw?” ka lo ti a.

“Ni teh reng ang; a khawkrawk deuh nâin khaw thim hmain thui fe chu kan kal hman ngei ta ve ang,” a ti a.

Ni tlâk rual vêlin kan bûk chu kan chhuahsan a, chu kawngṭum chu kan zawh ta a. Kan bûk kan chhuahsan fel chauh tihah ka hnuhnung fal deuh a, bûkah chuan ka lût leh a, kan hnuhmate chu ka chawk reh leh a; duh tâwk ka ngah hnu chuan mi pathum hnuhma àwm lek chauh a ni thei ta a.

Hnu chhui thiam tak chu ka thil tih chuan a bum hlen hauh lo ang; mahse, chhar chhuak kim leh tur chuan eng emaw chen a chawlh khawmuan a ngai ve ngei ang.

Rei tak kan hnu an hloh hnua an rawn hmuh leh pawh mi pathum hnu chauh a lo nih chuan mi pahnih dangte chu khawiah nge ni ta ang tiin an inzâwt buai ve hle ngei ang. Hetianga an ngaihtuahna ti buai thei ka han hnutchhiah mai pawh hi a hlu tham ve reng reng a ni.

Ka ṭhiante chu ka va ûm pha leh thuai a; kawngṭuma luh ṭannaa hnuhma lang thei chu ka ti reh leh vek a, thing ṭang ro leh thing hawngte ka theh darh hnan leh a, ka ûm pha ta a.

Zan thim hnuaiah chuan kan kal zel a, hmeichhiate chu an chauh mai loh nan kan chawl leh ṭhin a. Kan chawlh lai chuan Diana chu ka va hnaih a, “I pa kha ka mi ngainat zawng tak a ni asin,” ka ta ti ngawt a.

Diana chu ka lamah rawn inherin a lang dáng bam a, “Pa ṭha tak chu a ni ve asin; mahse, he lai ram nun dan leh amah hrim hrim hi an inmil lo niin ka hre thung a,” a lo ti ve a.

“Engah nge a mil loh lem ang? Ram siam tur chuan mi chi hrang hrang kan mamawh alawm. Mi thil chîk mi tak a ni lehnghal a; hetiang hi alawm pawimawh, a hre zauin a rilru a seng peih bawk si. Mi tam zâwk hi chu ei chawp dapin kan phili buai a, ram tana ngaihtuahna seng hman pawh kan awm hlawm loh hi,” ka ti ve zel a.

“Chu chu a dik khawp mai; ka pa pawh khan in chhung khawsak a ngaihtuah a ṭul ve si a, lehkha han chhiar zauna hun pawh hi a nei ṭha thei lo fo ṭhin. Kan mamawhte bazara lei theihna mai a awm loh avangin a ṭhen chu mahni kut ngeia siam te pawh a ngai a ni,” tiin mi rawn thlawp ve hle a.

Thil dang dangte sawiin kan titi zel a, “In haw hunah engtin nge in awm zel dawn?” ka ti ta phawng a.

Diana chu a ngawi vang vang a, chutah, “A..., a pangngai bawkin a ni mai ang chu. Tun hma ai chuan a hrehawm deuh pawh a ni maithei; ka pa hi ngaihtuah lo ila chuan saw lai hmunah saw chuan ka kir leh tawh ngai hauh lo vang,” a ti ta a.

“Chuti a nih a hnu, i pa nen chuan chhim lamah lo awm vein Shooting Creek lamah rawn inbenbel te in duh ve mai lo'm ni?” tiin ka sawi tum tak erawh chu ka la pehhel a.

“A nuam in tih viau pawh ka beisei. Kan zinga lo neitu pakhat chu Indian-hovin an that a, a in pawh a la ṭha hle a, luahtu an awm tawh si lo,” ka ti ta duah a.

“Ka lawm khawp mai...,” a ti ta sap chauh a. Ka sawmna chu a pawm leh pawm loh pawh a hriat theih rih loh avang chuan ka ngawi ta daih a.

Rei vak lo hnuah chuan kan kal leh ta a; tun ṭum chu Carrie pawh Yance-a chuan a paw ve ta thung a. Mel khat vêl kan kal hnuah chuan kan ding leh ta a.

Henry-a chu awm hle hle thei lovin a phi sek tawh mai a, “Ka thil tih hi a âtthlak hlein ka hre tlat! Kan tlan chhuak hlen thei tak takin ka ring lo, min rawn nangching ngei dawnin ka ring a ni,” a ti ta ruai mai a.

“Chuti chu min tlansan duh mai dawn a va ang ve?” ka lo ti a.

Ani chu a lungnih lo hmel hle a, “Chu zawng thil theih a ni lo; mahse, min man leh tho ang ka ti mai a nia. Anni saw i hre chiang lo a nih saw, lainatna pawh nei miah lo mi sual lutuk an nih saw!” a ti a.

“Tu salah nge i awm?” ka han ti leh daih a.

“Ka pu chu lawng captain a ni a, hêng lai tuipui kam vêlah hian a chetla ber a; Indian-ho khuate hi a bei ta ṭhin a, Indian chu salah kan man fo ṭhin,” a ti ta a.

Henry-a chu ka lamah chuan a rawn inher rem sauh sauh a, “Lawng hnuai lam pindana han tan zet chu a nuam lo kher mai a, tlan chhuah lah beisei chi rual a ni si lo; chu vang chuan tih dan ka ngaihtuah ta a.

“Min mantute hriat theih ngei tura ring hian ka tanpuite chu sâp tawng ngat hian ka be ta fo a. Vawi khat phei chu sal dang pakhat hnenah mi dangte hriat phâk tur si hian tun hma chuan English mi chhiahhlawha awm tawh ṭhin angin dâwt phuah chawp ngatin ka han hrilh a....

“Ka beisei ang ngeiin thil a awm ta a! Chutianga sâp ṭawng thiam chu lawng Captain chuan min ngaihven ta riau a, ama mi mal chhiahhlawh turin min dah ta a, chuta chin chu lawng hnuai lam pindanah chuan ka lût leh tawh ngai lo. A chhiahhlawh ka nih chhung hian rinawm takin ka awm bawk a, ka pu pawh chuan min ring êm êm reng a...,” a ti ta duah a.

“A nih leh, engtin nge lawng chhuahsana vaukam lam i rawn pan theih zâwk?” ka'n ti leh a.

“Tun ṭuma vaukam an kai turah hian Lashan-a hian ṭanpuitu a mamawh a, mi dang remchang an tam loh avangin min sawm ta hlauh a — hei hi ka lo beisei rûk thin a ni reng a, ka lawm hle reng a ni,” a ti a.

“Tunah hian lo tlan chhuak hlen thei ta la, Africa lamah i kir leh dawn em ni ang?” ka han ti ve leh a.

A han inngaihtuah vang vang a, “Ka hre chiah lo. Africa ka chhuahsan hnu khan thil tam tak ka hmuh belhin ka khaw hawi pawh a zau ta hle a, nuam pawh ka ti a; chuvangin, hêng lai velah hian inbenbel mai pawh a ṭhain ka ring,” a ti ta a.

“Hêng laiah pawh sal chu an awm tho asin,” ka lo ti a.

“Sal te chu khawiah pawh an awm alawm; a ṭhente erawh sal nih inhre miah lo pawh an awm a; tute pawh hi engti zawng emaw chuan sal kan ni thei vek a ni. Kei erawh hi chu sal tura piang ka ni lo va; chuvangin, hêng lai mi ngoho zingah hian awm ta ila, din chhuah pawh a awlsam zâwkin ka ring a ni,” a ti leh mai a.

“A nih leh i vun rawng hian harsatna a siamsak lo vang che maw?” ka'n ti leh ṭalh a.

Henry chuan, “Chu chuan mi ti buai lem lo. Ṭhenkhatah chuan harsatna min siam a ni thei e; mahse, min puitu a nihna chen a awm ve bawk. Sâp tawng ka thiam dan hi i hre duh em?

“English mi pakhatin min zirtir a; ani pawh chu kan ramah chuan sal a ni nghe nghe a. Africa mi, sal mantute'n an man a; a tirah chuan sal rethei ber zinga mi a ni a; mahse, damlo enkawl thiam a nih an hriat tâkah chuan an dûat ta hle a, a din hmun pawh a sang chak hle.

“Kei pawh thil tam tak min zirtir a; ka pa hi lal a ni a; a thih hnu chuan sum, lunghlu leh rangkachak ṭhahnem tham tak a hnutchhiah a; tichuan hausa takin England-ah a kir leh thei ta a ni.

“Kan ram a chhuahsan dawn chuan tuipui kamah kan ding dun a, chuta a thu sawi te chu ka tan theihnghilh chi rual a ni lo. Tute pawh hi sal kan ni thei a, chûng zinga tlem tê chauh chuan an tum tak zet chuan lal din hmun an chang thei tih te min hrilh a.

“Ka koki-a a kut te nghat meuhvin he khawvelah hian mi chi hnih kan awm thu min hrilh bawk a; chûng mite chu duh thu sam ching mi leh mi tum ruh, thil a tiha ti chi an nih thu te; he khawvel leh a hausakna chu mi tum ruhte ta a nih thu te thlengin min hrilh a ni,” tiin a sawi ta ṭeuh a.

“Chutiang tho chuan in ram ka lo thlen hian sal ka ni ngei mai; mahse, mawh phurhna ka kova tla reng reng chu ka hlen vek ṭhin a; chu mai bâkah mawh phurhna dang pawh ka zawn belh hial zawk a, miin a peih phawt chuan thawh tur a haihchham ngai lo tih hi ka hre chiang a ni,” tiin thil tam tak a sawi belh bawk a.

Kan chawl rei ta bawk a, kal leh tura han din chhuah pah chuan, “Henry, zirtirtu ṭha tak i nei a, i vannei hle a ni,” ka ti ta a.

“Ni e. Ka vanneihzia hi ka hre lawk lo va, rei tak hnuah an thil min hrilh hlutzia te hi ka hre ta chauh a; an nuna min zirtirna te chu ka chhawr a, ka en tawn hle bawk a ni,” a ti ve ta zel a.

Far thing hmun kan thlen chuan khua a la var chiah lo va. Kan awmna chu âwihtlan deuhva zawl zim tê awmna lai a ni a, a zawl hnuai chu kham bung vut hi a ni bawk a, chu lai hmun zawlah ngei chuan mut zai kan rel ta a. Kan hah hlawm bawk a, kan mut veleh kan muhil nghal a ni ṭheuh mai a, tun ṭumah hi chuan lungmuang takin kan mu thei ta a.

Ka ṭhangharh hlawl chu thawm ngaichangin ka beng ka chhi nghal hra a, ni pawh a la chhuak lo. Fimkhur takin ka tho ṭham ṭham a, kan mutna zawl sirah chuan ka va ding a, ka thlir kual zung zung bawk a.

Kal sawn tuma ka han inher chiah chuan thir inkhak thawm hi ka hre ta mai a. Ngun zet hian thawm lo rîkna lam chu ka melh vang vang a; kan riahna piah lawk, yard sawmthum emaw lekah chuan riah bûk dang hi a lo awm ve reng chu niin!

Chu bûkah chuan Vem-a chu ka va hmu hmasa ber a, mei chhem tumin a chemtê thir leh lung chang tak chu a lo innawh ṭêktir chhak chhak chu niin!

Thawm dim lutukin ka hnungtawlh a, min hmu phâk ta lo tih veleh chak takin ka kir phei a, Yance-a chu ka va kai tho ta a.

Buaina kara seilian a ni bawk a, Yance-a a rawn harh chuan thil dik lo a awm tih chu a rawn man nghal mai a, thawm dim takin Henry-a chu a kai tho zui ve nghal a. Kei erawh chu kan nulate kai tho turin an mutna lam ka pan ve thung a.

Diana koki-ah chuan dim têin ka zuk khawih a, a rawn harh ve thuai a. Ka kut zung chala ka hmui chuktuah nghalin hlauhawm hnaih thu hrilh tumin ka zuk en a, ani chu hlauvin a lo meng kâwk a; thil awmzia erawh a man thuai a, Carrie kai tho tur chuan a inbuatsaih ve ta vat a.

Rang takin, thawm nei hauh lovin hmelmate hlat zawng chuan kan insaseng thei ta hram a, kan intawng teuh thar thar ngei mai!

Hnahthel rote chu dàiin a lo chiah zawp hlauh hlawm a, thawm dim pawh a awl deuh a; kan riahna chu an thing fawm vêl pahin an hmu ngei ngei dawn a ni.

Tuna kan mamawh ber chu anmahni hlat thei tur ang bera tlan a ni ta; a dawtah chuan kan hnu chu chhui theih loh tura thup a ni leh a; mahse, ka rilru-a awm ber chu anmahni hlat thei ang bera awm phawt chu a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)