Bill Jack Chapter 1

Western cowboy Re-type, lehlin leh mizo phuahchawp dahna

Moderator: writers

Bill Jack I hmuhdan rawn sawi ve ta che.

Poll ended at January 29th, 2020, 5:09 am

1. Hmanah ka chhiar tawh. Chhuah chhunzawm tlak a ni lo.
0
No votes
2. Ka chhiar tawh. Chhuah chhunzawm zel tlak a ni.
1
100%
3. Ngaihdan ka neilo.
0
No votes
 
Total votes: 1

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter 1

Unread post by Ruata Ralte » December 28th, 2019, 7:06 am

Bill Jack

Retyped by Ruata Ralte


"Bigger, hma i sawn chak viau ve. Hetiang ang zela thil i hriatchak chuan i chhawrtlak viau dawn hi. Hetiang hi i pu hian ka mamawh reng a ni," tia sakawr chungchuang pakhat, Mexico leh Texas ram inri na lam pana kalmekin a sakawr buang lianzet mai a biak mawlh mawlh lai chuan an thlang kawr, ruamrai lama rifle han puak thuai thuai ri chu an hre ta a.

Sakawr chungchuang pa pawh chuan a sakawr chu ding meuhvin a han ngaithla vang vang a. Winchester rifle hi chatlak miahlo hian a puak zawt zawt reng a. Chung rifle te chu a rikdan atang chuan a tlem berah pawh pathum chu ni ngeiin a hriattheih a.

Chung Winchester rifle puakri thuai thuai karah chuan Sharp rifle ni ngei tur hi a rawn puak veleh dur bawk thin a. Chutiang sharp rifle chu vawikhat kah zawhah a mu dang thunchawp zel a ngaih avangin hmanhmawh thilah chuan a hmantlak teh vaklo a ni.
Chibai le. Story ka phochhuahte min lo chhiarsak ve thin avangin ka lawm e. Khawngaihin advertisement hi min lo clicksak ve thin dawn nia
Chu sakawr chungchuang pa chuan rei vaklo silai puak thuai thuai thawm a han ngaihthlak zawh hnu chuan a hmel chu lungawilo tih hriat fahran hian a nrawn nur chhuak ta nang nang a. Ama hriattawk lek tura zawi hian, "Chhe heu, mi engemaw zatin mi pakhat chauh, silai tha pawh nei velo lehnghal an beihrawn ava nih hmel ve le," a han tisap a.

A sakawr jean a rifle inthiat zan chu a han pawtdawk zawk mai a, "Bigger, kal teh le. Chumi tye infiamna ah chuan tel ve ka chak tlat mai. Mahse thawm nei vak lovang che," a han ti leh sup a.

A sakawr, 'Bigger' tia a koh mai pawh chuan a pu duhdan chu hriatthiampui ni awm tak hian thawmdim tak leh chak tak si hian a kalpui ta zut zut a. A pu pawh chuan chutia a sakawrin thawm a dim ve zia a han hriat chuan a lawm ve hle ni tur a ni, a han kiai suk a.

Reilote ah chuan ruam lanchian theihna lai hmun chu an va thleng ve ta thuai a. Rang zet hian chupa chu a sakawr atang chuan a han zuangthla thoh va. "Lo biru rawh, Big," tiin na vaklo hian a sakawr khelah chuan a han beng taih a. A sakawr pawh chu an piah lawk hnimbuk phenah chuan ava ding ta thun a. Chupa chuan an thlang ruam vel chu ngun zet hian a han thlir thla ta vang vang a.

Ruam lai taka sakawr tawlailir, bungraw phur chi leh khualzinte pawhin an lo hman ve ber thin kawng, chhim lam leh hmar lam hawi zawnga lo inkham riah mai te chu a zu hmuthei a. Reilo te ah chumi kawnga sakawr tawlailir pakhat, chhimlam hawia lo ding bam pawh chu a zu hmu leh ta a. Chu tawlailir chu sakawr pahnih hnuh chi, bungrua leh mihring phurkawp tgei ang chi hi a lo ni a.

Chupa chuan chu tawlailir ngei mai chu an kahrawn a ni ang tih a ringthiam nghal mai a. Mahse chu tawlailir chhung atang chuan sharp rifle rawn puak leh dur thin pawh kha a reh daih tawh a. A mu an kapruak tawh nge, a kaptu chuan hliam a tuar tawh zawk ni ang tih chu a ngaihtuah nauh nauh va.

Mahse tawlailir chhunga mi chuan hliam ala tuar biklo ni ngei tur a ni. A sharp rifle chu anmahni kaptu te awmna lam hawizawng chuan a han kappuak leh ta dur mai a. Chu veleh chu sakawr chungchuangpa chuan tawlailir beitute awmna la, pang tur chu a han melhkual nghal zung zung a.

A landanah chuan chung ho chuan hmunli atangin tawlailir chu an kahrawn a, tawlailir chhunga an tawm tlat avangin an va kapfuh thei mai bik lo a lo ni. Tawlailir chhunga awm, an kahrawna pawh chuan a rawn rinkah ve mai mai a ni tih a hriattheih a. Chutia a rawn kah ve apiang chuan tawlailir hnuktu sakawr pahnih leh, an chauh hun atana hman atana an hruai, tawlailir hnunglama sakawr dang pahnih an thlunte chu hlauvin an lo phili buai hle thin a ni.

Chung sakawr phili te chu tawlailir chhung atang mai chuan thunun an harsa hle ang tih chu sakawr chungchuangpa pawh chuan a hrethei mai a. Mahse tawlailir chhung atang chuan engemaw ti tiin a thunun veleh mai thin tih a han hmuh chuan mak pawh a ti rilru hle nghe nghe a ni.

Sakawr chungchuangpa pawh chuan chet ve a hun hle tawh in a hria a. A chetve thuailoh chuan tawlailir chhunga mite chuan silaimu tawnfuh hun an la nei ngei ang a, chutih hunah chuan chung mi palite chu dan an harsa hle tawh ang tih leh a tanpui tumte pawh chu tanpui tlak an ni tawhlo mai ang tih a hrethiam sa vek bawk a ni.

Chupa chuan engvanga chu mite chu tanpui duhnge anih pawh a inhre bik chuang lo va. Mahse chutianga mi pakhat chauh, che ve hleitheilo lehnghal, mi pathum ngawtin an han beihrawn ta mai chu a thilduhloh leh huatzawng tak a ni miau a ni. Chuvang chuan a nunna thap hial pawha puih ve chu a duh ta tlat mai a ni.

Chung mi pali te awmhmun theuh chu a han chhinchhiah ta nghauh nghauh phawt a. Chutah a awmna hmun atanga hnaiber, mi pali zinga pakhat awmna lam pan chuan a tawlhthla ta hrauh hrauh va. Chupa awmna leh a awmna inkar chu feet 15 vel chauh a ni tawh ang tihah chuan a ding ta chat a. Silaia kah chu thatlohna tak a awm zawk dawn tih a hriat avangin a chakaikhawrhkawr chhunglam chu a zen ta zal zal a.

Chutah chemte vawm chi, inchi 5 vel lai tura sei chu a han phawrh ta zal zal mai a. Chutah tin pawh tinchhin hauhlo chuan a han vawm ta fua mai a. Ani lah chuan tawlailir lam ngawt alo ngaihtuah avangin a hnung lawk a mi pakhat han chevel pawh chu a hrelo chiang kher mai si a.

Chutah leh! A tukkhum thlung taka chemte sei zel zawl tak mai rawn lut ta thut chuan a titho awk a, a thiante auh tum niawm tak hian a ka chu a han ang leh zuau va, auchhuak ta lem lo chuan leiah a hlawm ta tawl zawk a. Chutah a ke a han leng aih aih a, reiloteah che leh tawh ngailo turin a zal ta raih raih a.

Rang takin sakawr chungchuangpa chuan a mithahpa chu a zuk panhnai thuai a, chupa tukkhum thlunga a chemte bur vu chu a han phawi a, a thahpa kawrawm velah chuan a tatfai leh nawk nawk a, a jacket kawr nghawngah chuan a thawlhlut leh ta zan a.

Chutihlai tak chuan piah deuhva awm chuan a thianpa han tlu vel thawm chu hria niawm tak hian, "Pat, thil danglam deuh a awm em ni?" tiin a rawn au ta tlat mai.

Chuveleh sakawrchungchuangpa khan a aw chu han tidanglam deuhvin, Awm hran lo ve. Ka tanhmun ka han siamrem mai a nia," tiin alo chhang ve zaih a, a rawn autupa pawh chu a ngawi ve leh ta mai a.

Sakawrchungchuangpa chuan a rawn autu awmna lam chu a vehphei leh ta hrauh hrauh va. A rilru te te chuan, 'Ani hi ngawirenga ka dahthat theih chuan pahnih chauh an awm tawh dawn a, awlsam takin an dahthat theih ngei ang,' a ti rilru nauh nauh va. Mahse a vanduai a siam nge ni, a lungrah pakhat chu thlang lamah chuan a lumthla ta nawk nawk mai a.

Chuveleh nichina rawn autu kha a rawn zuangtho ta thut mai a. A rinloh taka a hmelhriat ngailoh a han hmachhawn ta thut mai chu mak a ti kher mai. Mahse chu chuan a tihamhaih rei lutuk bik lo. Rang takin a rifle ken chu a han lekkawh nghal a. Mahse a hmaa dingpa rifle ken hmawr atang chuan a rawn dechhuak ta zawk mai a. A bu ngawih a, a dula silaimu lut avang chuan hreh zet hian a tlu ta hnawk mai a. A taksain lei a thlen meuh chuan a thlarau pawh a thlawkchhuak hman daih ngei ang le.

Tawelailir hualtu ten trifle ri dangdai tak mai han puak thawr ri an han hriat takah chuan an phawk hra mai a. Rei pawh riallo leh chi ai buai vak chuanglo chuan rifle ri lo chhuahna lam hawi chuan an rifle chu an hmetpuak ve nghal zawt zawt a, tawlailir lam pawh an ngaihtuah hman ta lo. Chutia an rawn rin kah chiam chiam avang chuan sakawr chung chuang pa pawh chu an rawn kapfuh teuh ther ther hle ta mai a.

Sakawr chung chuang pa pawh chu rang takin a insawn zung zunga,anmahni chu chiang taka a hmuh phawt loh chuan kah mai pawh a tum hauh lo.A chhan pawh awmze chunga silova a va kah ve ngawt chuan a

awmna a hrih a ni lek dawn tih a hriatchian em vang a ni.

Chutah a han tawp ta chat a,chutia insawn kual zel ringawt chuan awmzia vak a nei dawn in a hre ta lova,a tu emaw zawk zawk chu veh hnaih tumin han che chuak vaih sela chuan a leh lam a mi zawk khan chiang takin a rawn hmuthei mai dawn a,alo thal tawp mai dawn a ni tuh pawh a hre vek a.Engtia tih tur nge ni ang.?tia a in ngaihtuah nauh nauh lai chuan tawlailir lam atang khan Sharp Rifle kha a rawn puak leh ta dur mai a.

Chuveleh chumite pahnih pawh chuan tawlailir lam chu an kap let ve nghal vat a. Sakawr chung chuangpa pawh chu hun chu remchanga hman hun a ni tih pawh a hai lo chiang kher mai. A bul lawka lungtum lian tha lelh lawlh tak chu a la lawk a, a piah fit sawmruk zet tura hla a mi pakhat, tawlailir lam kap vaktu awmna lai vel ni awma a rinna lai chu a va deng ta thawr mai a.

Chupa lah chu a bul lawka lungtum rawn tla thum dawp chuan a han ti phu nasa em em khawp a, a thutna hnim buk kar atang chuan li nei ang auh hian a rawn in perh chhuak ta nawlh mai a. Chu tak chu sakawr chung chuang pa tumdan leh a duhthusam chu a lo ni ta a ni.

Chupa awmah tak chuan a va verhsak ta siah mai a, a ni chu a te tuar a, a rawn zuan chhuahna hnimbuk ah bawk khan a zuang lut leh ta zawk a. Thawm pawh nei leh tawh lo chuan a reh zui ta vang vang a.

Pakhat pawh chu a thianpa rak thawm avang chuanrang takin a rawn zuang phei zawk zawk a. A thianpa awmna hmun chu a rawn thleng tep tihah chuan sakawr chung chuangpa Rifle bawk chu a han puak leh ta thawr a. Chutah zet chuan a ni pawh a thianpa bul lawkah chuan a zal ve ta raih raih a.

Sakawr chung chuangpa chuan midang sn lo la awm takin tih thuah a lukhum chauh chu hnim kar atang a rawn hlawh chhuah da da a. Mahse silai puak thawm a awm tak hauh loh avang chuan a lukhum chu khum tha lehin a rawn tho chhuak ve ta thut a. Chutah pawh chuan thawm a awm tak hauh loh avang chuan a rilru pawh a muang ta huai a. Fimkhur tak reng chung chuan tawlailir awmna lam chu a pan thla ve ta chhat chhat mai a, a tul tak thutin tih thuah a Henry Rifle erawh chu a la lek kawh ve reng tho a.

Chu veleh tawlailir lam atang chuan Sharp Rifle thawm na zet mai chu a rawn puak leh ta dur mai a, sakawr chung chuangpa bek chu silaimu chuan a rawn thawi vung thuak mai nghe nghe a.

Chutah sakawr chung chuangpa chuan thil awmzia chu hrethiam nghal vatin ring zet mai hian, "Keichu hmelma lam ni lovin nangmahni rawn chhantu hi ka ni. Anni ho chu an thi fai vek tawh," tiin tawlailir chhunga awm te chu a han au ta lauh lauh va.

Tawlailir kawngkhar chu a rawn in hawng ta dak dak a, chuta sakawr chung chuangpain a han hmuh theih hmasa ber chu Sharp Rifle kaw hmawr lian zet hi a ni. Chutah putar lam tawh, kum sawmnga mi vel ni tawh ngei tur leh lukhum parh hlai zet mai khum chu a rawn pen chhuak ta a.

Sakawr chung chuangpa chu chik zeta rawn en chung hian, "I thusawi chu dawt nge thutak tih ka hre hauh lo mai," a rawn ti ta bul bul roh va.

Chutah zet zawng sakawr chung chuangpa pawh chu a sa ve ta phat mai a, chang beng bawng taka chupa chu melh chungin, "Tar a tak i nih dawn hi mawle. Rawn inrawlh lo khan lo en mai mai ta che u ila tha zawk tur leh! Mahse ka rawn inrawlh ta sa sa bawk a, ka han hrilhfiah law law teh ang che. Kha i Rifle thawm na zet, kah pawh kap dik thei tawh lo khan an ni ho chu pakhatmah i kap fuh lova, la inkap reng ta pawh ni ula, i kap fuh ve dawn hauh lo. Anni ho erawh kha chuan duhtawkin an kah rawn che a, kah pawh an rawn kap fuh teuh hle che a ni lawmni? Nakin lawkah phei chuan an rawn kap fu ngei ngei ang che tih pawh a chiang a ni," a ti ta a.

"Anni zawk hi ni ta ila chuan i Rifle mu thun lai, i insawh buai hle lai khan tawlailir hi ka rawn pan thut ang a, hmun leh hmunah ka rawn verh sat mai dawn che asin. Chungte chu i ngaihtuah phak em? Anni hian chutianga tih nachang chu an hre lo hlauh zawk a ni. In sakawrte hi rawn kahhlum sak ta che u se la riltana tawlailir chhunga thih emaw, tui zawng tura rawn chhuaha thih nghal emaw in chan tawk a ni nghal mai dawn a ni. Tawlailir atanga in rawn chhuah hun hun kha in tawp hun tur a ni mai tih te chu i ngaihtuah phak em? Chutah 'I thusawite chu dawt nge thutak ka hre hauh lo mai' te chu i la han ti a maw? Tun angah tawh te chuan mi a ber tan pawh hriatloh a hun tawh em ni?"

"In tawlailir rawn kaptute Rifle kha Winchester Rifle vek a ni a, a ri atang pawh khan a hriat hran theih vek a. Nanga Rifle ve lah atom bomb tluk zeta ring a ni bawk si. Chung kara Rifle ri danaglam bik ri zawi sat mai, Henry Rifle rawn ri ve kha he ka Rifle lo hi heng laiah tuin nge rawn hmet puak mai a i rin reng reng? Hmelma lam ni ila, tunah te pawh hian that thei reng che ka ni asin. Ka Rifle ah hian mu sawmhnih leh pariat a la awm a, i Rifle ah ve kha chuan mu khatmah a awm tawh lo tih chu nangmah i inhriat ang bawkin ka hria asin. Chuti vhung pawhin dawtsawiah mi la han ring duh a maw? I at manah thih pawh i la thi nge nge maithei a ni," a ti ta charh charh a.

Chutah zet zawng chu putar pawh chuan tawlailir hmaa tlangval ding thusawi chu huat a hnehin a dik hle tih a hre ve ta a. Zaidam hmel taka nui vur vur chungin leiah chuan a rawn chhukthla ve ta a. Tlangval awmna lama rawn kalpah chuan, "Ka tidiklo a ni e, Tlangval. I sawi zawng zawng kha a dik vek a ni. Henglai ramah hi chuan tumah rinawm an awmloh thin avangin ka rawn fimkhur ve a ni mai a, a reng thuah thil i chhut chak hle mai. Nang anga rilru chak hi hriatpawh ka la hre ngailo," a rawn ti ve ta bawrh bawrh a.

Tlangval pawh chuan, "Hei hi chu ka piansual vena pakhat reng a ni. Bakah hengte chu tu pawhin an chhut ve thiam vek ang chu! Pakhat leh pakhat belh chu pahnih a ni tih tlukin a chiang alawm," tih pah chuan a han nui ve ta rah rah a.

Putar chuan, "Pakhat leh pakhat belh thiamlo pawh hi kan tam hle awm asin. I chungah ka lawm takzet a ni. Nang chu lokal hlauh lo la chuan i sawi ang zawng zawng kha a thleng dik vek ang tih keipawhin ka hrechiang a ni," tiin a nupui, tawlailir chhunga la awm pawh chu a kochhuak ve ta a, an bulah chuan a rawn ding ve ta nghal a.

Putar bawk chuan, "Kei hi Roper-a, Slim Zroper-a ka ni a, kan nupui hi Tety Roper-i a ni," tiin chu tlangval hnenah chuan a han inhmelhriattir a.

Tlangval pawh chuan, "Ka hming chu Bill Jack a ni a, ka thiante chuan 'Bill' tiin min ko thin," a han ti ve a.

Chutah chang a han tum raih a, chumi hria chuan an chhak tlang atang chuan sakawr buang liantha zet mai hi a rawn dawk thla ta pur pur mai a, Roger-a te nupa pawh chuan makti takin an lo thlir reng a. Reiloteah rawn thlengthla in, Bill-a bulah chuan a rawn dinhg ve ta thun mai a.

Bill chuan, "Hei hi Bigger a nih hi," tiin tiin a sakawr hnenah chuan, "Big, hei hi Pu Roper-a te, i thiante annih ve hi," tiin a sakawr leh putara te nupa pawh chu a han hmelhriattir ve ta a.

Roper-a chuan, "Ekhai, ka sakawr hmuh tawh a zawngah a la lianber mai awm e. He sakawr hi nei ngat ila chuan BUREAU sakawr intlansiakna awm turah pawh hian ka tel ve ngei ngei ang, a han tichhuak phawng mai a.

Bill-a chuan alo hrethiam ve meuh lo va, a ngaihna hrelo zet hian, "Eng BUREAU intlansiakna maw?" a han ti he hawh a.

Phur fahran hian Roper-a chuan, "I lo la hre velo a ni maw? Heta tanga mel 40 vela hla, Bureau khuaah sawn Pu Banasona'n sakawr intlansiakna, Texas ram pum huapin a buatsaih a, chakber lawmman chu dollar 1000 laki a ni a sin. Tin, pahnihna pawhin dollar 500 an dawng ang. Intihsiakna hun chu nihnih chiah in a dang tawh asin," a han ti a.

Billp-a chuan a hmui chu a han kum phut phut a, hmuhtheih bak piahlam a ngaihtuah a ni tih hriattak hian, "Tel ve a chakawm chu maw le. Mahse khaw awmna chu ka hreve si lo va, ka hmuh hunah meuh chuan khua a tlsai tawh emaw a ni si ang a. Thil chakawm leh uihawm tak i rawn sawichhuak lek anih zawk chu a!" a han ti a.

Roper-a chuan tifuh intih hmel taka nui var var chung hian, "Bill, ngaihtuahbuai duh mah ta che. Keini pawh hi chu intihsiakna en tur a kal kan ni alawm. Tluang taka kan kal chuan naktuk chawhnu herah kan thlenghman ang chu. I duh phawt chuan min rawn zui la, ila tel hman em em ang," a ti ta a.

Bill-a pawh chu a phur rilru ta hle a, sum lama a khawro lai tak a lo ni hlauh nen; a han ngaihtuahchian phei chuan a chak et et tawh mai a ni. Chutah nuisang chung hian, "Chutia kal tum ve tho innih chuan thil remchang tak pawh a nih dawn chu. Mahse thil pakhat, heng hote nen hian engeti nge in inkah chiam mai le?" tiin a zawt ta a.

Putara chuan, "I rawn hmuh leh hriat ang kha a ni mai. He kawng kan zawhlai hian min rawn kap thut mai a. An themtlaw vang nge kan vanneih vang zawk? Min rawn kapfuh ta mai lo va. Min rawn kah veleh sakawr tidingin, a chhungah hian ka lut ta vat a, tichuan kan inralsai ta reng mai a ni. Anni pawhin min rawn bawhchilh ngam em bik lo va, eng thleng nge ka dan theih ang tia ka lo ngaihtuah rauh rauh laiinn nang kha ilo lang ta a ni," tiin thil awmdan chu a sawi ta zung zung a.

Bill-a kahhlum takte chu tute nge an nih a hriattheih tak mialin tih thu ah Bill leh putara chuan an va chian leh te te a, mahse engmah hriattheih an va nei ta chuang lo va. Chumi hnu chuan Bureau khaw lampan tur chuan an kal za ta a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)