Bill Jack Chapter-2

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-2

Unread post by Ruata Ralte » February 25th, 2020, 10:05 pm

Bill Jack-2
Retyped : Ruata Ralte


Bill-a te chuan an theih ang tawka chakin Bureau khawlam chu an pan ta char char a. Mahse a hlattham deuh em avangin zanlam pawh ramhnuai ngaw kara riah mai chu thain an hretlang ta a. Khuate a rawn thim ta bawk a, riahbuk tur chu an han sual ta nak nak a. Chutih chhung chuan Pi Roper-i chuan Bill-a leh a pasalte nena an eitur te chu alo buatsaih ve mek bawk a.
Image

Riahbuk an peihfel hnu chuan Pi Roper-i eitur siam chu tuiti takin an ei ta talh talh a. Zanriah an eikham hnu chuan coffee te in hovin reingial chu an han titi leh nak nak a, a tuk zinga kal leh mai tur an nih avangin mutzai an rel ta a.


Roper-a te nupa chu an bukzar chhungah chuan an mu a, Bill-a erawh chu an buk atanga hlatham deuh tak, yard 20 vel daih turah ama duhthlanna in a kalhrang ta thung a. Chutah chuan a komol chu a phah tawp a, a thawmhnaw pawh phelh chuanglo chuan a mu ve ta tawp mai a.


Bill-a chuan a muthnu chuan Bureau khawlam ringawt chu a ngaihtuah veng veng reng a, thlen thuai thuai chu a chak em em tawh a. Chutiang lam hlir a ngaihtuah lai chuan engtik laiin nge alo muthilh tih pawh hre lovin tui tak chuan a mu ve ta suk suk a.


Chutia tui tak a a muhil lai chu engemawti taka amah rawn kaiharhtu awm tlat hian a hria a. A rawn harh hlawl mai a, a rawn menchhuah erawh chuan engmah hmuh tur leh hriattur phei zawng a vang hle mai. A hmuhtheih awmchhun chu van boruak sang taka arsi de neuh neuh awm tuarh leh thlasik kawng inkham paw raihte chu an ni mai si. A mit chuan engmah dang hmuhtur hrelo mah se ngaihthatlohna tak erawh chu a nei tlat mai si.


Red Indian hnam chikhat, Muta ho zinga rei tak lo cheng ve tawh a ni bawk a, a hmalam hun chuan enge a rawn thlen dawn tih lo nghah ngar ngar pawh chu alo tih ve fo thin tawh anih avang chuan harsa leh hrehawm tihna em em pawh a nei tawh bik lo va, dawhthei takin thil lothleng tur awm tlata a hriatna chu fimkhur tak chung chuan alo nghak ta a ni. Chu zan khawhar leh reh takah chuan enge thil inmun mek tih chu hrelo mah se a nghak ta nget nget mai a. A mit chaktak pawh chuan kiltin kiltang chu a melhkual pah reng bawk a.


Smil Roper-a te nupa lah chuan Bill-a'n ngaihthatlohna tak a nei a ni tih pawh hriatpui hauhlo leh thildang reng reng hrechang lovin tui takin an muhil suk suk a, an hnar dun tluk tluk reng mai a. Chunglai ram vela misual turu leh tawrhhlelhawm tak thin RIKI CHOSHU-a leh a hote chetdan rapthlak theihzia te chu hre ngat sela chuan huthilh chu harsa an ti ve ngei ang le!!


Darkar chanve vel a han ral leh meuh chuan Bill-a meuh pawh chuan a ngaihthatlohna chu thil engemaw mai mai anih te pawh a ring ve lek lek ta mai. Mahse chuti maia mut leh erawh a tum bik hauhlo. A hma aia maha uluk leh fimkhur zawk hian buk leh a chhehvel ramte chu a han thlirkual leh zung zung a. Chutah zet chuan a ngaihthatlohna chhan chu chiang takin a rawn lang ta ngei mai le!!!


Chutia Bill-a'n uluk tak leh fimkhur taka buk leh a vel ram a thlirkual dan dan lai chuan buk chhak lampang a hnimbuk chhah zet mai chu a rawn che ta lawih mai a. Lei rahchim hlau niawm taka mi pakhat, puanduma hmaituam hi thawmdim em em mai hian a rawn penchhuak ta than than mai le..


Chupa chuan buk leh a velte chu ngun fahran leh fimkhur em em mai hian a han thglek kual dan dan a. Buk chhung lama muhil hnar bawrh bawrh thawm a han hriat takah chuan chet a hun ta tih a hria ni ngei tur a ni, zawite hian a han faifuk ta raih mai a. Chuveleh buk kiang lawk, thing leh hnimbuk velte chu a rawn che sat sat a, chutah amah ang bawka hmaituam, mi panga lai mai chu pistol hum far chung hian an tawmna theuh atang chuan thawmdim tak hian an rawn tawlhchhuak ta zal zal hlawm a.


Bill-a pawh chuan ngun zet mai hian chungho han chetla vel chu a lo thlir reng a, an thiltum niawm ang chu hrethiam ruak hian a inhria a. Tawlailir a zinvak vel lo suam chu chung mite ho hna ber anih a ring nghal a. Chutiang mite chuan hremna eng anga nasa pawh tawk mah se an sim thei tawh ngailo va, miten hah taka an lo thawhchhuah sa awlsam taka lo chhuhsak leh mai thin chu nuam an tiin an thisenah an thanhnan tlat tawh thin a ni.


Chutiang mite enkawl dan tha ber chu thah mai aia tha kawngdang a awmlo tih pawh Bill-a chuan a hrechiang hle. Vawikhat silai hmehpuaha an vaia an thih theihloh pawhin a tam zawk chu thah ngei tumin a rilru a siamfel ve ta. Chumi hun remchang chu nghakin a kutbawr, boruak vawtin a hmehkhawng thumte chu a han humtawlh ralh ralh a, chumi hnuin a jacket ipte ah chuan a rawlhlum leh ta than a. A duh anga a kutbawrte a chelek theilo anih vaih chuan Roper-a te nupa tan mai bakah, ama tan ngei pawh a pawi thei hle dawn a ni tih a hriatchian em avangin a inzen lum ta vang vang rih a.


Chutia Bill-a'n a en reng lai chuan an zinga rawn chhuak hmasa bera khan buk piah lawka Bill-a puanthuah, mihring mulai niawm taka pawng thur chu enfiah tumin ava phei a, midang pahnihte pawh chu buk chhunga lut tur chuan buk lamah chuan an phei ve ta nghal a.


Bill-a mutna hmun lam pan mektu chuan puanthuah awmna lai chu a thleng phei tep tawh a. A thlena a enfiah hlauh chuan mihring mu an awmlo tih hriain thil a tibuai zo vek ang tih Bill-a chuan a hrethiam nghal mai. Chutih lai chuan mi pahnihte khan buk kawngka bul chu an thleng a ni chawpchilh der mai bawk si. Buk chhunga an luh vaih chuan Roper-a te nupa tan pawh thil hlauhawm tak a ni tawh dawn a. Anni pahnih an thih hlauh si phei chuan Bureau khaw sakawr intlansiakna ah a tel thei dawn lo tih pawh a chiang. Chuvang chuan duhthusama hun remchang ni rihlo mah se chet loh theih a ni ta lo tih chu a hrechiang ta em em mai a.


Chutah le, a tawmna hmun atang chuan Indian ho ralbeih au hla rapthlak zeta khek rawih rawih pah chuan a rawn zuangchhuak ta phut mai a. A kutbawr pahniha pistol te chu zan thla eng ruai hnuaiah chuan an rawn dechhuak dun ta zawk zawk mai a. Chu veleh chuan buk kawngka bula mi pahnihte chu an eu nghal zawr zawr ta mai a.


Chutia zan thla eng hnuai reh vang vawng kara Red Indian ralbeih kheka rawn khek chhuak rawih an hriat tak avang chuan Bill-a mutna hmun va thleng tep tawh leh buk tuala mi pahnih la awmte pawh chu an phu zuk mai a. An awmdan atang chuan rapthlak zeta Bill a rawn khek chhuak rawih chuan a rap hle tih pawh a hriat theih mai a.


Pistol puak thuai thuai an han hriat ruala an thiante pahnih thal tawp tawp an hmuh meuh chuan anmahni rawn beitu chu Red Indian ni lovin anmahni Mingo pui a ni tih an hrechhuak ta thut ni ngei tur a ni; rang zet hian chu pistol rawn rikchhuahna lam hawi chuan an pistolte chu an hmetpuak ve ta thuai thuai mai a.


Bill-a pawh chuan a bul lawk hnimbuka zuanluh leh pah chuan a silai pahnih chu vawikhat ve ve a han hmetpuak leh hram a. Chu pistol mukhat chuan a mutbu va en tumtu pa hrawkah tak chuan ava verh leh ta siah mai a, mu khat erawh chu chu a thang nachin erawh hriat a ni ta lo thung. Chupa, a hrawka ava kahsak pa chu a pai chawn chawn a, tluk mai chu a hreh hmel hle na in han dingmar leh turin chakna a nei ta lo. Puanchhe duhloh paih ang hnawk hian leiah chuan a tlu ta hnawk mai a.


Au chhuah tum niawm tak hian a ka chu a han ang ve zuau na a, mahse awrawl han chhuah thei chi a ni ta lo. A ka atang chuan thisen hi a rawn bawchhuak burh burh ta zawk a, chung thisen per chhuai khawp chuan a han khuh hnawk leh nuaih bawk nen. Chumi hnu chuan a zal ta raih raih a. Chumi atang chuan a pu Riki Choshu-a duhthusam ang chu hlen zo ta lovin a sual rawngbawl man chu hmuin a lo tawpsan ve ta a ni.


Bill-a zuanluh takna hnimbuk zawn chu midang pathumte chuan an kahrawn ta zawt zawt mai a; ani tan chuan han chet zeuh pawh ngam awmloh tak a ni ta. Chumi te chu han kaplet ve ngawt dawn pawh ni se anmahni a hmu thei tlat si lo. Chubakah a silai ah chuan mu li ve ve chauh a awm tawh a, rin thilthu-a han kahruah vek lah chu a tan a pawi thei hle ang tih a hre ve kar mai bawk si.


Bill-a chuan chumite pathum silai rikna danglam hret hret dan atang chuan an rawn hual hnai zel a ni tih pawh a hrethei mai a. A rilru te te chuan engti tihtur nge ni ang tiin a ngaihtuah rauh rauh va.


Bill-a ngaihtuahna thluak tha danglam tak mai chuan a chet zel dan tur a han ngaihtuah ta zung zung mai a, rei vak lovah chuan thiltih dan tur a ngaihtuah chhuak ta thuai a. Chu thil chu a hlawhtlin chuan chu mi te pathum chu an che a buai hle ngei ang le. A chet fuh theih hlauh chuan amah bakah Pu Roger-a te nupa tan pawh him taka chhuah theihna a ni anga, a chetsual vaih erawh chuan an pathum chuan an mang pak ngei ang. Mahse chu mi lo chu thildang ngaihtuah chhuah a nei thei tlat lo.


A awmdan chu tlemin a han her rem hret hret a, duh ang taka inher rem pawh chu thil harsa tak niin a hria a. Lehlam ho silai mu lah chuan chatlak lek lo hian a lu bul lawk lawk ah an rawn ving thiak thiak reng mai si.


Harsa titak chunga engemaw chen a han beih leh fat fat hnu chuan a duh ang ngei leh an rawn vehhnaih hun pawh a harsa lo taka a lo beihlet theih nan a awmdan chu a siamrem thei ta nge nge a. Chutah le, amah rawn kaptute hriattheih ngei turin a han te thawt a, a reh zui ta hmiah mai a.


Chutia an mi beih pa han te thawt ri an hriat chuan chung mi pathumte pawh chuan an silai hmehpuah pawh chu han chawl datin a hnu deuh vah chuan an han kap leh zawt zawt a, chutah pawh an mi vehpa chu awmlo ang vang vangin a reh ta hmiah mai si a.


An mihual mek chu an kapfuh ta ni ngeia ngaiin chung hote pawh chuan hual zel talo chuan an dingkhawm ta laih laih a. An zinga pakhat chuan, "Kan kapfuh a ang hle mai. Nichin lawka a rawn te that hnu ah kha chuan a chezui leh tawhlo reng reng. I han enchhin teh reng ang u hmiang. Mahse fimkhur hle ang che u. Pistol a kahthiamzia kha hrereng ula, a hliam chauhte a lo nih zawngin kan che chhe hle dawn a nia," a han ti bul bul a.


Chupa thusawi pawh chu Bill-a chuan a hre thei reng a, a thil ruahman chu hlawhtling ngei dawn a a hriat tak avang chuan lawm pawh a lawm rilru hle a. Ama hriattawk lek chuan, "Lokal vat ta che u, tunge chefuh zawk chu kan la hre dawn alawm," a han ti sup a, a pistol pahnihte chu hmang nghal thei turin a hum tha sauh sauh va.


Muangchang tak leh fimkhur tak chung chuan chung mi pathumte chuan Bill-a tawmna hnimbuk lam chu an pan phei ta dan dan hlawm a. An hnaih ta viau maw tih ah pakhat chuan Bill-a awmna hnimbuk vel chu vawihnih ngawt mai a han rinkah leh thuai thuai mai a. Bill-a chu lo la insawn lovin a awmna ngaiah khan lo la awm ni se la chuan a rawn kapfuh chiang hle ngei ang le.


Chu chu Bill-a pawhin alo rinsa reng anih avangin harsa ti chung chungin a insawn ve kha a ni reng a, a himphah ta a ni. Tunah chuan chupa silai mu in a denna atanga fit sawm vel lai turiah a lo awmhman tawh a ni.


Hmun leh hmun deuhthaw atanga kah pawha an mi hualpa chu a reh veng veng si avang chuan an kaphlum tawh ngeia an rinna pawh a zual ta sauh va, an fimkhurna pawh a hma ai ngawt chuan a dul ta hle tih an chetdan atang chuan a hriattheih tawh a ni. Chutia BIll-a tawmna hnimbuk an thleng tep tihah chuan thawklehkhatah Sharp rifle ring em em mai chu a rawn puak ta dur mai a, an phu chiang hlawm kher mai le. Thla chu nei phei se chuan an thlawk dawrh ngei ang.


Bill-a awmna hmun atang chuan hnim velin a hliah deuh avang chuan chumite chu an la langchiang thei vak chuang lo va. Mahse Smil Roper-a rifle chuan a rawn tidarh leh hlawm ta si a, chet ve lohtheih ni ta heklo; a pistol pahnihte chu pakhat ri ang mai hian an puak ta thuai thuai mai a. Pakhat chu chiang zet mai hian a bekah ava fuh a, pahnih la damte chuan kah ve zai pawh rel ta chuanglo chuan an sakawr thlunna lam panin baklengin an tlan ta dawr dawr mai a.


An beisei loh deuh maia rifle rawn puak dur khan a ti chi-ai hneh hle hlawm a; chu mai bakah kaphlum tawh ngei nia an inhriat lah khan an zinga pakhat chu chiang em em mai hian a rawn kaplet tawp bawk si nen, an tan chuan himna zawnga tlanchhiat mai loh chu tihtheih dang awm ta hek lo. Chutia an nunna humhim nana an tlanchiam mai laite chu Bill-a chuan chiang tak hian a hmuthei a. Mahse mi tlanchhe tawh an hnunglam atanga han kahzui te chu a duh der bawk si lo.


Roper-a chuan a rifle hmawr la khu vat vat chu rawn lekchhuakin, "Kan mi tenawm ho chu ka rifle mu thun leh chhunga an han tlanchhiat vek mai chu le. Lo la awm chu ni sela chuan ka han hnawl let tawp tawp mai tur ale(h)," ti bal bal chung chuan buk tualzawlah chuan a rawn penchhuak ve chhat chhat a. A nupui pawh chuan hlauh vanga hmel dang bam chung hian a pasal chu a rawn zuichhuak ve a.


Bill-a pawh chuan a thawmhnaw a bawlhhlawh kaite chu benfai thak thak pah chuan Pu Roper-a te nupa awmna lam chu a rawn pan phei ve nghal a.


Roper-a'n Bill-a alo hmuh veleh chuan, "Bill, I tha maw? Nang chu lo awm hlauh lo la chuan kan va thichiang dawn tak em!! Chhun lamah lah chuti bawk. I pistol puakri ah khan ka harh ve chauh va; a thim lutuk a, ka rifle pawh ka dahfuh mai theilo lehnghal nen, ka rawn inrawlh thuai thei ta lo anih kha. Hei, tumhnih ngawt kan nunna i chhanhim ta a, i chungah lawmthu sawi ba hle mah ila sawi dan tur lah kan thiam si lo. Kan lawm tak tak a ni tih leh, englai pawhin kan hrereng ang che tih hi lo hre phawt mai teh," a han ti a. A hmelah chuan a rilru chhungril taka sawi ni ngei hian a hriattheih a.


Bill-a chuan, "Mai mai a! Lawmthu han sawina turin eng thil mah ka ti hleinem. Ka zan muttheihloh aleiah an rawn kaltur kha ka lo hrelawk hlauh va, ka nunna chhanhim turin ka bei ve mai alawm. Dam hi ka la thlahlel teh a nia. Bureau khua ka han ngaihtuah phei chuan ka thi mai ang tih hi ka hlau teh a nia," nui hak hak chung hian a lo tilet ve thung a.


Roper-a chuan Bill-a rilru thatzia leh chapo lohzia a han hriat phei chuan alo ngaihsan rukna pawh chu a zual telh telh hian a hria a. Puih theihna a awm phawt chuan a nunna chanphahna tur hial pawh ni se a tanpui duh tawh hial awm e.


Tichuan mahni mutna hmun theuh chu an pan leh ta hlawm a. Mahse an hma lawka thilthleng avang nge ni, chuti maia muthilh chu a awlsam lem lo. An han muhil ve pawh chu thinthi-a mut chu a har ta hle zawk a.


ZIngah chuan hma takah thovin Pi Roper-i coffee siamsa leh biscuit tuihnai takte chu an ei a an in zawh hnu chuan Bureau khaw lam pan chuan an chhuak leh ta a. Bill-a chuan hmalam hla vak lovah kalin hma a hruai zel a, mahse kawngchin a hriat loh miau avangin a khat tawk hian alo nghak leh zauh thin a.Image


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)