Bill Jack Chapter-3

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-3

Unread post by Ruata Ralte » February 27th, 2020, 9:47 am

Bill Jack-3
Retyped : Ruata Ralte


Bill-a ten Bureau khua an va luh chuan chawhnu her lawih hi a ni tawh a. Khawluh tantirh a in lo ding hmasa ber bulah chuan thingphel hlai deuh mai pahnih hi thingah an lo kilhbet a Chu thingphela rawng duma inziak chu Bill-a chuan chhiar tumin a sakawr chuan ava pan hnai a, chutah chuan heti hian a lo inziak a.


'Naktuk tahrik 22.11.139ah khian sakawr intlansiakna, Texas rampum huap a awm daw. A tel duh chuan a hnuaia hmiung ziak hnenah hing ziahtir tur. Lawmman ah Dollar 1000. Pahnihna in Dollar 500 a ni ang'


Sd/-
(BANASON)
Sheriff, Bureau
Texas State


Tin, thingphel pakhatah chuan hetiang hian a lo inziak bawk a.


'He khuaah hian thil engpawh thleng thei a ni a, mahni inveng zolo te tan chuan fimkhur taka awm tur' tiin.


Bill-a chu a han nuisak a, "Big, a nuam leh pek dawn mange tiraw? Buai rep rep na tur awmlohna khua hi zawng a khawharthlak mai bakah a ruk tak chuan a ralmuanglo zawk fo a nia," tiin a sakawr chu a han be sup a. Bigger pawh chuan a pu thusawi chu tawmpui ve niawm tak hian a lu chu a lo bu ve nghoh nghoh va.


Reilote ah Roper-a te nupa pawh chuan Bill-a chu an rawn pawh ve ta thuai a, khawchhung lam pan chuan an inzui tlang ta a.


Kalpahin Bill-a chuan, "Sawlai thil inziak lo inatr ngawt danah khan he khua hi khaw rura tak zawng a ni ngei ang maw?" a han tichhuak phawng mai a.


Roper-a pawh chuan, "I ring dik kher ang. He khua hi khawlian tak anih angin misual awmtha duhlo leh inthah mai pawh pawisa lo an tam khawp asin. Nangpawh i fimkhur hle loh chuan buaina engemaw tal chu i tawk mai thei a nia," a lo ti a.


Bill-a chuan, "Min ngaihtuah avangin ka lawm khawp mai. Mahse keima buaina chu keimah bawkin ka chinfel theih ka beisei. Engpawhnise, i sawi ang chuan fimkhur taka awm chu ka lo tum phawt ange," alo ti ve mai a. Titi mawlh mawlh chung chuan kawtthler lunlai chu an va thleng ta hlawl mai a.


Chulaiah chuan saloon leh dawr chi hrang hrangte chu kawtthler tawn tawnah chuan an lo intlar tuarh mai a. Saloon chu kalpelin Roper-a chuan tawlailir chu a kaltir ta zel a. Piah deuhva hotel pakhat zawn an thlen chuan tawlailir hnuktu sakawr te chu a pawtding ta a. Chu veleh hotel a thlengte ho sakawr lo enkawlsak thintu naupang chuan Roper-a te chu nel tih hriat deuh mai hian a rawn pan vat a. Chutah Roper-a te chu beisei nei tih hriat deuh mai hian, "Pu Roper, in rawn kal ve ngei hi ka lo ring reng a sin," a han ti lauh va.


Roper-a pawh chuan a kawr ipte a dollar khat tlang chu han phawrhin, ""Kid, sakawrte hi phelh la, tawlailir pawh hi hotel hnung lamah hian lo hungsawn mai ta che," tih pahin pawisa chu a han pe a.


Amah Roper-a vek chuan, "Bill, kan thlenna hotel hi he khuaah chuan a nuamber pawl a ni asin. I rawn innghat ve duh mai lawm ni? Nakin lawkah chuan room pawh hi a full thuaiin ka ring a ni," tiin Billk-a chu a han rawn a.


Bill-a chuan, "Ka pawiti hran lo ve. Mahse a hmasa berin Sheriff hnenah chuan hming va pek ve phawt mai tha in ka hria. A theih chuan room chu min lo hauhsak la, ka duhdan chuan kawtthler lam ep, kawtthler lam hawia tukverh awm ni nghe nghe se a tha ange," a ti ta a. Room lo hauhsak an tum thu chu Roper-a'n a lo hrilh tak hnu chuan Sheriff Office lam chu a pan ve ta nghal a.


Reilote ah Sheriff Office chu a va hmu ta thuai a, a chhungah chuan awm an awm a ni tih hriat tak hian a kawngka pawh chu a lo inhawng deuh hiau va. Chutah a sakawr atanga chhukin office ah chuan a lut thla ta a.


Office chhung ava luh chuan pa upa lam tawh, kum 50 mi vel tur, palian tawk tak leh huaisen hmel zet mai hi alo thu a, buai hmel tak hianb office lehkhabu te chu a lo bih nuap nuap a.


Mi lolut thawm a han hriat veleh chuan nelawm tak hmelpu hian a rawn hawichhuak vat a, a rawn nui deuh vur vur a. "Enge duh i neih le, tlangval? Sakawr intlansiakna ah hian tel ve i tum em ni?" a lo ti thuai a. Bill-a pawh chuan, "Chu chu ka kawn kalchhan ber chu a ni e. Ka hming chu Bill Jack a ni," tiin a lo chhang nghut a. Sheriff pawh chuan dawhkan chunga pencil chu la in a hmawr chu a han sep nuap nuap a, chutah Bill-a hming chu lehkhapuan chhah zet maiah chuan a han thai nuap nuap a. A lehkha ziahdan atang mai pawh chuan lehkhathiam sang tak chu a ni bik lovang tih a rin theih mai a.


Bill-a hming a ziah zawh chuan rawn dakchhuakinBill-a chu a han en vang vang a, la naupang riauvin a hria ni tur a ni. "Tlangval, eng i ang chuang vak dawn emaw ni le? Banalson-a fapa Pete-a sakawr chakzia leh thahrui feizia ka ngaihtuah hian tumah han khingzo tur an awmin ka ringlp. A reng thu ah nangni ang rual ka nih ve lai chuan sakawr chungchuan pawh ka thiam tawk chauh asin ni," a han ti leh nuah nuah a.


Bill-a chuan fiamthu pah deuh hlek hian, "Anih hmel khawp mai. I naupan lai chuan naupang tuallim lo tak, ti deuh chut chut i ni ngei ang. Tuna i hmel atang pawh khan a hriatreng alawm. Tin, chu lovah khaw hmawr a in thuziak tarah khan la naupang deuhte tan tel phalloh tih inziak awm reng reng ka lo hmulo alawm mawle," nui tat tat chung chuan a han ti a.

Bill-a han fiamna chu thinrim nana hmang bik mailo chuan sheriff pawh chuan, "I tidik e, tlangval. A duh apiang tana teltheih a ni alawm. Mahse nausen hnute hnelai em chu an rawn tel ve ang tih rinngaihna reng ka lo hrelo atin ni," nui sun sun chung chuan a lo tilet a. An vawikhat inhmuhna chauh pawh nise an innel dun nghal hle mai.


Bill-a chuan, "Anih leh ziaktu-ropui, kan rawn kalna te a hlatham bawk si a, keini ang nausen hnute hnelai tan chuan sakawr-in a min sawhna ah ringawt pawh kan chau zo a ni tawh mai a, bakah pumpui han hnawhpuar vete pawh ka mamawh ta riau bawk nen, ka chhuahsan leh rih phawt mai ang che aw," nui var var chung chuan a han ti a, kawngkhar lam chu a pan ta nghal a. Sheriff pa pawh chuan, "Ni e, va kal tawh. Riltama i thi mai zawngin intihsiakna ah i tel thei nang le," tihpaahin kawngka thleng chuan ava thlah ta a.


Pawnlama Bill-a sakawr, nghakhlel hmel fahrana a pu lo thlir doh dohtu a han hmuh ve meuh chuan, "Ekhai, i sakawr chuan a zawh nalh nalh hmel hle mai che ka ti. Pete-a sakawr var nen chuan an va intumtawk rua em!! Mahse i sakawr ang em chuan a thau ve lovin thahrui a ngah hmel vakloh va, a len lamah chuan an inter tawk viauvin ka ring," Bill-a hnenah chuan a han ti loh loh va.


Bill-a chuan fiamthu hian a han chhanglet a. "I rawn hmusual mnai mai a ni lo maw? A te si, Intlansiakna ah pawh mel khat bak a tlan ve thei ngut ange maw? Kei nausen mai hian ka han khalh lehnghal dawn vei nen!! Ka huphurh thar ta riau mai. Tel veloh mai pawh ka pawiti lo ta rum rum mai,"


Sheriff chuan Bill-a tlanliam ta chu a thlir zui vang vang a. A rilru te te chuan, "Tleirawl kawm nuam tak zawng anih kha maw le. A silai paite lah kha inchei nan maia pai zawng a ni hauh lovang le," a han ti nuah nuah a, office ah chuan a lut leh ta a.


Bill-a'n hotel ava thlen leh chuan nichina naupang bawk khan a rawn pan leh vat a, Bill-a chuan a sakawr atanga chhuk pah chuan, "Tha takin va thlung la, corral chhunga i dah dawn pawhin chuan tum lo la, a kaihin kai ang che. Chuan i tum vaih chuan a vawrhthla ang chia, a chilzui hrep mai ang che," tia vaulawkin dollar khat tlang hi a han vawrh a, ani chuan alo dawng nalh a.


Hotel chhung ava luh chuan Roper-a pawhin alo nghak reng tawh a, Bill-a hmel a hmuh chuan alo nuih vur vur a. Lawm hmel taka a lam rawn panin Bill-a tana room alo hauhsak lamah chuan an inzui chho ta nghal a. Roper-a'n room a lo hauhsak chu Bill-a duhthusam ang chiah, kawtthler ep, kawtthler lam hawia tukverh pawh awm ngat hi alo ni a. A chhunga an han luh pawh chuan uluk taka enkawl ani tih hriat tak hian a thianghlimin, bungraw awm ang ang pawh chu an lo hnum hlarh hlawm a.


Bill-a chuan lawm takin, "Pu Roper, i room min hauhsak chu ka duhthusam chiah a ni e. A lawmawm kher mai. I sawi ang chiah khan a chhung pawh a thianghlimin a nuam em em bawk," tiin lawmthu a han hrilh luam a.


Roper-a pawh chuan, "I duh ang chiah kan hmuthei hi keipawh ka lawm khawp mai. A luah man lah chu zan khatah dollar2 leh 50cent chauh a ni lehnghal," alo ti ve thuai a. Anni nupa awmna tur pawh Bill-a room dep chiah, room no 8 anih thute leh zanriah kilpui tura a duhthu te an inhrilh hnu chuan a chhuahsan ve leh ta a.


Bill-a chuan a room chu uluk takin a han enkual a. A intihfai lohna pawh a lo rei ve ta bawk a, a han inbual meuh chuan zanghawk hian a inhria a. Zanriah ei nan ala hma deuh bawk a, saloon hnai berah chuan no hnih khat lem tumin a chhuak ta a. A chhuah hma chuan a silai te chu uluk takin a han 'oil' leh phawt a, chutah a gunbelt chu hrengin hotel chu a chhuahsan ta a.


Hotel kawt a thlen chuan sir lehlama sakawr thlunna bula Bigger-a ding chu naupangte khan tui hian alo leih a, alo chul hauh haulai hi ava hmu a. Chu naupangte chuan Bigger chu a lawm ve hle niin a hria a. Ava pan phei thuai a, Bigger-a chuan a pu chu alo hmuh veleh a han hram nghur nghur a. Naupang hnenah chuan, "Kid, i titha e. Hei hi la rawh. A chaw eiturte pawh ilo pe anga, puar takin ilo eitir dawn nia. Naktuk intihsiakna ah a chau hma palh hlauh ange," tih pahin dollar khat chu a han pe leh a.


Lawm taka pawisa chu lo dawngin naupangte chuan, "Bill, ka lawm e. Naktukah chuan pakhatna inih ngei ka duhsak a che; chu chu ka ring chiah bawk," a lo tilet ve reuh va.


Bill-a pawh chuan chu naupang tereuhte chu makti tak hian a han en a. "Engtin nge ka hming te a min lo kohtheih mai le? Tuin nge hrilh che?" a han ti ha a.


"Pu Roper-a.n min hrilh alawm. Kawnglak a i rawn tanpui dan zawng zawngte pawh min hrilh vek a, ani pawh a lawm khawp asin. Ka tih ve theih tawk, i sakawr hi duat taka enkawlsak tur che in min hrilh bawk a ni,"


Bill-a chuan nuih var var pah chuan, "I fel hle mai, Kid. I lo tlangval hunah pawh tlangval fel tak ila nih ngei dawn hi," tiin naupang chu a han fakzui a. Chu naupang pawh chuan fakna ri a hriat chuan a lawm ve hle tih hi alang thei a. Bill-a chuan Bigger-a nghawng chu chulsak hauh hauh pah hian, "Big, i tel lovin ka va chhuak lawk anga, thuawih deuh khan ilo awm dawn nia. Naktuk maiah khian i chakzia ila lantir dawn a ni," tiin a sakawr chu a han be leh mawlh mawlh a, saloon lam pan chuan a chhuahsan leh ta a.


Bill-a'n saloon ava thlen chuan mi pawh an lo tam tawhin saloon kawt leh kawtthlerah te chuan vei nak nak tawk pawh an awm nual a. Saloon chhung atanga rawn paichhuak tak tak tawk pawh an awm reng bawk. A tuk mai sawkawr intlansiakna awm turah chuan hmun hran hran atanga tel ve tum bakah en tur ringawt a kal pawh engemawzat an awm bawk a. Chungte avang chuan Bureau khaw kawtthler chu a lun tawk ve viau a ni.


Bill-a pawh chu saloon chhungah chuan a penlut ve ta thuai a. Chu saloon chhungah chuan mi an lo tam tehreng nen, an lo ngawi deuh thuap mai a. Bill-a chuan thildang ngaihtuah hauhlo chuan bar dawhkan lam chu a panphei nghal a. Zu nokhat chu a han lam a, bar dawhkan chu nghengin tui ti tak chuan a lem ta khalh khalh a. Mahse a mitsir chuan saloon chhung chu a melhkual pah reng thung.


Reilo teah chuan chu saloon a rehduk nachhan chu ava hmu ve ta thuai a. Saloon kawngka, rawn luhna atanga veilam pang dawhkan tlar li-na kiltu mi pathumte leh an piah fit sawmpanga vel tura mi, mahni chauhva dawhkan kil, zuno lo dawm mektu te chu an inhnial deuh hi a lo niawm a. a va luh lai chiah kha atu lam lam mah tawng lova an ngawihlai tak a lo ni a.


Saloon kawngkhar bulhnaia mi pathumte chu Ranch-a rim taka hnathawk thin, cowboy an ni tih an hmel pawr chap atang chuan a rin theih a. An khela an pistol, fual hnalh maia an pai atang erawh chuan cho mai mai chi an ni lovang tih pawh a hriattheih bawk. An hmel leh mitmeng han en pawh chuan an lem ve nual tawh a ni tih chu hairual a ni lo.


Mahni chauhva zu lo dawmtu erawh chu a ruilo tih a chiang hle thung a. A hmel atang chuan thinrim insum hram hram a ni ang tih a hriattheih bawk a. A inchei dan atang chuan rancher anih loh vek pawhin khawilai farm neitu emaw tal chu ni ngei tur a ni. Pa zaidam tak, a thinrim tawh vek vek chuan tawrhhlelhawm tak a ni ang tih Bill-a chuan a ring nghal mai a.


Chutah cowboy pathum zinga pakhat chu a rawn dingchhuak ta hluai mai a. Thinrim tih hriat fe hian a bula dawhkan chu a han tlawhthlu thuai mai bawk a. Dawhkan han tlu tur chuan a thiante pahnih chu a hrut fu thelh nghe nghe a.


A thiante pahnih pawh chu an rawn dingchhuak ve nghal a, chutah dawhkan tlawhthlutu pa chuan mahni chauhva no dawmlai, an hnialpuipa chu rum zeta melh pah chaun, "Mr. Jerry, kan sawi ang ngei chuan i naute ho reng reng kan ramchhungah rawn luhtir tawh suh ang che. Bawng bozawn hi kan ning tawh teh a nia. Vawikhat pawh kan ram chhunga i naute ho hmel kan hmuh leh vaih chuan kan lo kaphlum hmiah hmiah tawh ang tih hi hre rawh," ring zet mai hian a han ti tuarh mai a.


Mahni chauhva thu, 'Jerry' tia ava auh pa pawh chuan thinrim hmaisen tawn tawn chung hian, "Nangni Solten a uicho khawi, chawheh ho khan in ram chhunga ka naute rawn luhtir-ah min puh a ni maw? In pu Solten-a tihtir che u a ni pek ang maw?" tiin a rawn dingchhuak ve ta a.


A hma a Jerry a rawn autu bawk chuan, "Chu, Mr. Jerry Lawler, dawtsawiah min puh tihna a ni maw? Kan thilhmuh ngei kan sawi anih chu. Tuman he thu sawi tur hian min tir lo va, uicho kan nih leh nihloh chu i han fiah ang hmiang," tiin Jerry-a chu ava cho ta khawl mai a.


A kutbawr chu a puakruk zawnah a pharhthla ta tha mai a, a thiante pahnih pawh chuan a tihdan ang chiah chuan an tanhmun chu siamremin pistol phawi mai thei tur chuan an dingkak ve ta hah mai a.


Amah chauhva ding Jerry lah chuan zamna chhete mah nei bik lovin chung mi pathumte chu a hmachhawn ve ran mai a, pistol chuh mai thei turin a kut pawh chu a thlakthla ve zan mai bawk a. Fair takin, pakhat leh pakhata inbei tur pawh nise, Jerry-a chuan a khan lo hle ang tih chu Bill-a chuan a hretlang sa vek mai.


A tunge dik zawk tih chu hrelo mah se pathumin pakhat chauh an beihrawn tur chu dikin a hrethei ta ngang lo va, chu bakah Jerry chu mi diktak ni a a rin avang chuan amah puia inrawlh ve chu a tum ta a.


Saloon chhunga awmte pawh chuan inkahna a awm ngei dawna an hriat tak avang chuan silaimu leng vak tawnpalhhlauvin an insaseng ta sap sap hlawm a. Jerry-a chu thi ngei tura an ruatsa avang chuan an lo khawngaih hlawm hle a, mahse lo tanpui tum awm hmel reng reng hmuh tur a awmlo thung.


Solten-a cowboy chhawrte tuanranzia chu an lo hre tawh hlawm bawk a, an kawng dal zawnga awm hlauhawmzia pawh an lo hre tawh. Chuvang chuan tumahin mahni lu han zuar ngawt mngam an awmlo a ni, an ngaihdanah chuan chu chu thil atthlak ber a ni si.


Chutihlai tak chuan saloon chhunga awmte leh tuna intibuai mekte pawhin an beiseiloh tak thawm an hre ta thut mai.


"Pathum leh pakhat chu a intam hleih deuh lo maw? Chuvangin a mala awm lamah hian ka tel ve anga, pawi in ti hranlo ang chu maw?"


Jerry-a chuan amah rawn puih tuma tlangval la naupang tak rawn penchhuak ve mek lam chu a han melh zawk a, mahse a hma lawk a mi pathum dingte chu khawdang han hawisan chi abn ni tlat lo. A mit chu ala leh vat a, Solten-a hote chu a melh leh ta ran mai a.


Soltena hote zinga pakhat, dawhkan tlawhtlu tu bawk khan, "I telloh tawp natur ah i lu i rawlhlut anih hi. Dam ila duh anih chuan lo inthiarfihlim rang mai rawh," a lo ti chher chher mai a.


Bill-a erawh chuan chu vauna chu ngaipawimawh lo tih hriat tak hian a han thensak a. "Chu phei zawng a dik mai thei. Mahse fairlo taka inbeihna awm tur ka han hmuh hian tel ve chakin ka kutphahte hi a thakin an thak sup sup ta thin a, ka inthunun zolo hi ka tel veleh mai thin a ni," a han tilet ve sak a.


"Thi mai tur atan chaun ila naupangin vanglai hun ila hmang dawn chauh a ni si a, i uihawm dawn teh e. Mahse i inthunun theihlohna chu i thihpui dawn ta tihna a ni mai alawm,"


"Naupang silai mu leh putar silai mu hi a thawhnat zawng a inang reng e an tih chu,"


A hmelah chuan zamna chhete mah hi alang chuang hauhlo mai si a, inring ang pawhin a lang lo. Mahse a ruk tak chuan che thut thei turin a inpeih reng tawh zawk a ni.


Chutah Bill-a rawn vautu bawk chuan, :Hremhmunah thlawklut nghal rawh u," tih pahin a silai chu chu a rual ta mai a, a thiante pahnih pawh chu an che ve ta phat a. Ran pawh an rang hlawm hle mai. Mahse an hmaa tlangval ding Bill-a chuan engtik laiin nge a pistol chu a phawi tih pawh hriathman lohvin a pistol pahnih chu a lo hum hman reng tawh mai.


Solten-a hote meuh pawh chuan pistol kawhmawrin alo thlir reng tawhna an chuan huaisen chhuah chu harsa an ti ve hle ni ngei tur a ni. Anmahni thlir rengtu .45 kawhmawr dum ran mai chu hmuhnawm tilo fahran a enreng chung hian an pistol kawm vawn mekte pawh chu an thlah leh ta zal zal a.


A phawichhuak hman teuh ber, pistol chuh hmasa ber pawh khan a chanve pawh alo phawi hman meuh silo. A ngamloh val a tawng a ni tih hriat takin a pistol chu a thlah leh ta zul zul a.


Bill-a chuan a silai pahnihte chu che map lova la tinkawh va chung hian, "Duh chuan that thei che u ka ni. Mahse misual ka nilo ang bawkin misual innih ka ring biklo. Chuvangin tun tumah hi chuan ka ngaidam ang che u. Mahse tun hnuah hetiang anga thil tenawm in ti leh anih vaih chuan emaw, hemi phuba hi rawn lak in la tum cheu anih chuan in chaldar takah in mit pathumna tur ka rawn verhsak ang che u. He saloon hi chhuahsan nghal rawh u," tiin thu a pe ta hmiah mai a.


Anni ho pawh chuan Bill-a chu nelawmloh taka melh chung chuan saloon chu an chhuahsan ta nghal a. Pakhat chu saloon kawngka atanga rawn hawiletin, "Tun hi a tawpna a ni mai lovang tih lo hre rawh, tlangval," tiin a rawn aulet hram a.


Bill-a chuan, "A dik ngei pawh ka ring, in chalah a inziak kulh alawm," tih pahin a pistol chu a han hmetpuak dawt a, chupa pheikhawk keartui chu ava kahthlaksak ta hlawk a. Chutah zet chuan chupa pawh chuan a hlau hle a ni ngei ang, hmanhmawh zet hian kawngkhar atang chuan a tawlhliam ta nghal a, a pheikhawk keartui bung erawh chhuatah chuan ala let ngat thung a. Bill-a silai chu vawikhat a han puak leh dawt a, chu pheikhawk keartui bung tawh pawh chu pawnlamah a lengchhuak ve nghal lawp bawk a.


Jerry-a chuan lawm tih hriat deuh mai hian, "Tlangval, min lo tanpui avangin ka lawm takzet a ni. Lo tel velo la chuan thih pawh ka thi ngei dawn anih kha le. Mahse ka thih ruala pakhat tal hnuhliam kha ka lo tum ve teh asin," tiin lawmthu a hrilh mawlh mawlh a.


Bill-a chuan a silai kahruahna chu thun khah leh mawlh mawlh pah chuan, "Ka hming chu Bill Jake a ni a, Bill tiin min ko thei ang. Lawmthu erawh inhrilh angai lo ve. A hun taka inrawlh thei tura ka lo awm kha keipawh ka lawm hle a ni," a lo ti ve a. Chutah a pistol chu a han vaivir char char a, a holster-ah chuan a thawlh lut ta zauh va.


Jerry chuan, "Keipawh ka hming chu Jerry Lawler a ni. Heta tanga mel 20 lek, khawchhak lamah khian Ranch ka nei ve a. Tuna min rawn tibuaitu kha kan thenawm lawka mi, Rancher ve bawk Solten-a naute ho an nih kha. Sakawr intlansiak en tura lokal ka ni a, anni ho pawh kha an ni ve ka ring," tia inhmelhriattir pah chuan an chanchin tlem chu a han hrilh ve nghal a.


Bill-a chuan muk taka ngaihtuah chung hian, "An zuruih vang ngawta intibuai chu innih hmel loh khawp mai," a lo ti bauh va.


Jerry pawh chuan an thenawm ranch te nena an inhmuhthiamlohna chu a hrilh ta malh malh a, chutah, "Kan inhmelmak hlen dawn ta anih hi," pawi tih hmel tak hian a ti ta a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)