Bill Jack Chapter-4

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-4

Unread post by Ruata Ralte » February 29th, 2020, 10:35 pm

Bill Jack-4
Retyped : Ruata Ralte


Bill-a te pahnih chu hotel lam panin an inzuichhuak ta a, an thlenna pawh a lo thuhmun reng mai a. Hotel an va thlen chuan Ropera te nupa pawh chuan zanriah eipui turin an lo nghak reng tawh a. Bill-a te hmel an lo hmuh chuan anni nupa chu an lo ding vat a. Chutah Roper-a chuan, "Khawilam saloon-ah emaw iva ruibo ta ni turah ka lo ngai hman tawh asin," tiin a lo fiam hlut a.


Bill-a chuan, "Ruibo mai mai hman pawh niin ka inhre lo. Bakah hei, thian ka rawn chhar a, he hotel-a thleng ve bawk anih hi," tiin a han inhmelhriattir tawn a. Roper-a pawh chuan Bill-a thian rawn hruai chu chibai buk nan a lu buk zauh pah chuan, "Jerry, hei Bill-a te nen hian zanriah kilho kan lo tum a, midang lo intiamrual tawh i nei anih loh chuan min rawn zawm ve nghal thei mai lawm ni?" tiin a lo sawm ve ta nghal a.


Jerry pawh chuan, "Tumah han tiamrualpui pawh ka nei hran lo ve. Mahni chauhva zanriah han ei chu ka lo huphurh deuh va, Bill-a hi sawm ka lo rilruk ve mek bawk asin. Chutia in remtih chuan kan kiltlang hlauh dawn nia," a lo ti ve ta a.


An thilchah rawn thlen hma chuan tit an han vawrh nak nak hlawm a, an nui leh dar dar thin a. A tuk maia sakawr intlansiak tur chu an nghahhleh thu leh Bill-a pawhin tel ve a tum thu te chu an sawikai ta a.


Bill-a tel ve tur thu an han sawichhuah takah chuan Jerry-a meuh pawh chuan a lo phurpui ve hle ni ngei tur a ni, nuisang chung hian, "E heu, nang i tel ve dawn phei chuan en ava phurawm lehzual ta ve. Tunge ka tan ang aw ka lo ti rilru ve mai mai a, tan tur bik ka nei thei dawn ta anih chu. Chakber lawmman hui ngei turin duhsakna ka hlan a che," a ti ta soh soh a.


Bill-a pawh chuan, "Tel tumte chuan chakber nih kan tum theuh dawn a, mahse chakber chu kan ni vek dawn si lo. Intlansiak hunah theihtawp chhuah a ngai a ni," a lo ti ve vat a. Jerry-a chuan, "Anih leh Bill, intlansiakna chu a zawh hunah nge i tih leh zel ang? Bureau khua hi i chhuahsan lehnghal mai dawn em ni?" tiin a zawt ta daih a.


Bill-a chuan, "Ka hrelo le. Pumpui ruak reng thin hi ka chai thei hlawllo thin a, pumpui hnawhpuarna tur a hnathawh emaw chu ka mamawh ngeiin ka ring," tiin a lo chhang ve mai a. Chutah Jerry chuan phur hmel zet mai hian, "Chutia inhlawhna te zawn i rilruk anih chuan ka ranch-ah hnathawktu kan indaihloh lai tak a ni a, min rawn zawm ve duh mai lawm ni? Hlawh chu thlakhatah dollar 40 a ni mai a," a lo ti var a. Bill-a pawh chuan, "Zanin lamah te ka lo inngaihtuah ve phawt anga, naktuk lamah te chanchin kan inhrilh leh zawk dawn em ni ang?" a ti ve ta a.


Zanriah tur chu a rawn thleng ta bawk a, hlim tak chuan an ei ta dar dar a. An eizawh pawh chuan titi khawchang an han sawiho leh zet a, chumi hnu chuan mu turin mahni hmun lamah chuan an darh leh ta sang sang a.


Muthmunah chuan Bill-a chu a inngaihtuah nasa hle mai. Tun tum sakawr intlansiakna ah hian Mc Trone-a chu lokal ve hlauh se a ti rilru hle mai a. Mahse amah Mc Trone-a chuan zawngtu a neih tih kha a inhre tawh si a, chuti chung chuan mi chi hrang hrang fuankhawmna ah chuan a inlan ngam a ring chiah bawk si lo. Engpawhnise hmanhmawh a han zawn ngaihna tehchiam a hre lo bawk a, engemaw chen chu inhlawhna te pawh a zawn a ngai dawnin a hria a. Remchang tak maia Jerry Lawler-a'n a lo sawm hlauh pawh chu a lawmawm zawk hle ni hian a hre ta zawk a. Tichuan Jerry-a hnena thawk tur chuan a rilru a siamfel ta a. Hun engemaw chen chu ramhnuai hmun remlo leh khawvawt tak hnuaiah a lo mu mai mai tawh thin bawk nen; tunah erawh khum nuam takah puanthuah lum nuam tak kara han inthawlh kak mai chu mut a tui duh bawk a niang, ni chhuah hnu fe ah a rawn harhchhuak ve chauh va. A inphihfai a, insiam sawk sawkin chaweina hmun lamah chuan a chhuk thla ve ta nghal a.


A pumpui ruak tak chu coffee leh biscuit bawm khat chuan a han hnawhpuar te te a, Bigger-a awmna lamah chuan a kal leh ta thuai a.


Corral chhung a tang chuan Bigger chuan a pu chu a lo hmu thuai a, a lo chik nghur nghur a. Bill chuan a thlunna chu a phelh a, tualzawl nilum lamah chuan a hruaichhuak ta a.


Bigger pawh chuan a pu chu alo ngaihman tawh hle ni ngei tur a ni; a hmui chuan a pu chu a nawr nu nu a. Bill-a chuan a nghawnga han chulsak thuak thuak pah chuan, "Min lo ngai hle tawh a ni maw? Vawiinah chuan kan inzui nileng dawn khawp e. I pu hlui Brutus kha hrereng la, he intihsiakna ah hian chakber ni ngei ang che. Brutus pawh kha infiamna a hnehna ngaisangtu anih kha," tiin a sakawr chu a han fuih mawlh mawlh a.


Hmana Red Indian ho zinga a chettlat laia Haku Brutus-a'n Martel-a, Indian pasaltha hotu nen chemte hmanga an inbeih tuma chak zawk lawmman, pasaltha chawimawina thi alo pek a awrhlai chu a han khawih zauh va. Bigger pawh chuan a pu thusawi chu ngaithla ve niawm tak hian a beng chu a lo tun hru hru bawk a.


A hnung lama penthawm a han hriat chuan Bill-a chu a han lehhawi vat a, a lam pana rawn kal mek Jerry chuan a rawn nuih var var a. "Sapui thil hriattheihna pawh hi i bengah chuan a nep zawk hial ta ve ang. Engtin nge ka lokal tih i hriat theih mai zawk chu le?" a rawn ti phei bawrh bawrh a.


Bill a chuan, "Khawpui ri tluk zeta i rawn pen ri thlup thlup kha tunge maw hrelo vang le? nui hak hak chung chuan a lo ti ve a.


Jerry chuan Bill-a awmna chu a rawn thleng chawpchilh ve nghal mai a. Titak hmel pu tak hian, Enge ni i thutlukna chu ni ta le? Nizan zankhua khan ka lo ngaihtuah reng che a, nangang mihring hi ka mamawh zawng tak mai in ni. Chuvangin ka ranch ah chuan rawn thawk thei la ka ti hle mai," tiin zawt titih, sawm titih hian a han phun suap suap a. Bill-a chuan, "Ka rawn thawk ange. Amaherawhchu vawiin atan chuan infiamna ah tel ka lo tum tawh si a, ka pu thar chuan rem min tihsak thei ange maw? Tin, eiin lam hi ka tithei ve khawp mai bawk a, min chawm peih ngut ange maw chu le? Nakin lawkah hian eitur in tlachham mai tur a nia," nui hak hak chung hian a lo ti a.


Chu thu a han hriat chuan Jerry chu a lawm hle mai. Thinlung taka lawm tih hriat fahran mai hian, "Ka sawmna che i lo pawm thei chu ka lawm takzet mai. Bill, tunah zet chuan ka duhthusam mihring ka hmu ta," tiin a lawmzia thu chu a sawi ta mawlh mawlh mai a. Chuta tang chuan an inruai fel a ni ta der mai.


A hlimzual sauh ni hian a hriat a, a hlim ngiang reng a. A thenawmte nena an intihthiamloh tak atang hian amah bakah an ranch venghim theitu tur silai chelek hnehsawh tak hi a lo zawng ru ve reng thin a, tunah zet chuan alo duhthusam piahlam a hmu ta chu a lawm takzet a ni.


Tukthuan eikham ah chuan Bureau kawtthler chu a lun tawh hle. Ke-a kal leh sakawr chungchuang bakah tawlailir a kal te pawh chuan khawdai lama sakawr intlansiakna tur hmun zau tha em em chu an pan zung zung hlawm a. Hun rei tak atang tawha lo nghak tawh an nih avangin an phur em em hlawm a, duhthusama sakawr intlansiak la thlir theihna hmun chu chanfuh ngei tumin an hmanhmawh ru hle hlawm a.


Bill-a leh a pu thar Jerry Lawler-a bakah Smil Roper-a te nupa pawh chu chu sawkawr intlansiakna tur hmun lamah chuan an kal ve thuai a. Anni nupa chu tawlailirah bawk khan kalin, inhnaih tak chuan an kal hlawm a.


Roper-a chuan, "Kan tlangvala hi pakhatna anih vaih chuan kan vaia intur bakah zanriah pawh a tui tha tha ka chawi ngei ang," a han ti lar lar a. Jerry-a pawh chuan, "Keipawh Bill-a hian pakhatna a lak vaih chuan kan inrawihna ah dollar 50 in kan inruai ngei ang, chu chu ka lawmpuina ni rawh se," alo ti ve sauh sauh va.


Chutia an titi bawrh bawrh lai chuan a hmun chu an thleng ta der mai a. Hmun pakhat ah hian rawng var hian an lo rin zui mai a, chumi bulah chuan sakawr lian tha tak tak leh a chungchuangte chu an lo inhawrkhawm luih luih bawk a.


Chung sakawr dinkhawmna hnung lawkah chuan thutthleng hi a lo inrem dul mai a, chung thutna te chu sawmbikte thutna tura an zuat hi a lo ni a. Chu hmun chu he intihsiakna buatsaihtu Banason-a leh a thuihruaite thutna tur a ni.


Bill-a pawh chuan intihsiak turte kalkhawmna tur niawm tak, rawngvar a inrin ruih mai chu enin, "Khulai khu intihsiak ture awmkhawmna anih hmel hle mai, ka zu chhuk ve ange," tih pahin a chhuk ta nghal a. Roper-a chuan, "I sakawr aia thahrui ngah tur reng reng ka hmu lo. Nang han terpha awm deuh ber chu Banason-a fapa Ptete-a chauh khu a ni awm e. Ani pawh chuti tehual chu a ni hauh lovang, tang nasa rawh aw," tiin a han fuih zui a.


Bill-a pawh chuan intihsiak turte awmkhawmna a zu thlen chuan rin ai daihin an lo thahnem a. Bigger chuan sakawr dangte chu a ngaitheilo deuh nge ni, a hnar a tum dut dut reng a. A puin awm hle hle tura thu a han pek takah chuan thuawih tak chuan a ngawi veleh ta mai a..


Darkar khat lai a liam hnu chuan entu mipui pawh chuan an duhna lai hmun theuh pawh thutna chang tawhlo khawpin an awm ta, mipui lam chu an kim thawkhat ta anih hmel hle. Chu phaikuam rai zau tak sir hualchhuak mai bakah awihpang thleng mai chuan mihring lu hlir hi a dum khup tawh mai a. An thil thlir tur chu an nghakhlel tawh takzet a ni.


Chutih lai chuan nakin lawka thil thlengtur hrelawktu te chu mi tlemte chauh an ni a. Midang zawngte chuan Bureau khawchhung, luahlumtu pawh awmlo ang hrima reh duk maiah chuan eng thil nge lo thleng dawn tih reng an hre hlawmlo a ni.


Reivak lovah chuan Banason-a leh a thuihruaite pawh chu an lo thleng ve ta a. Banason-a sirah chuan a tel ve turte leh chak ber nih pawh inring tak, Banason-a fapa Pete-a pawh chu a sakawr var lianzet mai chunga chuangin a rawn tel ve nghal bawk a. A hawiher vel atang reng reng chuan a chapovin a induh hmel nghlah mai a. A sakawr chu a chhuang hle a ni tih a hmel atang chuan a hriat hle.


Banason-a ten an thutna tur an luahfel hnu chuan Pete-apawh chu intihsiakna beitute awmkhawmna lamah chuan induh tawk taka hawi nghawlh nghalh chung chuan a sakawr nen chuan a rawn phei ve ta a. Chung sakawr lo ding khup te chu a sakawr lakah chuan an cher hmel hlawm hle mai tih a han hmuh chuan nuihzat hmel tak hian a han melhkual dan dan a.


Sir deuh hleka sakawr buang, ram sakawr ni ngei tur, chak hmel taka thahrui phiar fut mai, a sakawr ai maha lian tur a han hmuh meuh erawh chuan a lawm ta vaklo hle mai a. Chutih rual chuan a chunga chuang tleirawl te mai niawm tak a han hmuh leh takah erawh chuan a hmel nur viau tawh pawh chu chapo hmel bawkin a rawn thlak leh ta thuai a.


Banason-a chu a rawn dingchhuak ta. Thlirtu mipui te hriat vek theih tura ring leng lawnga thu sawiin, welcome address chu tlawr fahran hian a han sawi hmasa a, chutah intihsiakna kalphung tur chu a han sawi leh a.


"He intihsiakna lawmmawn chu inhriat theuh tawh angin, a chakber chuan dollar 1000 a dawng anga, a dawttu in dollar 500 a dawng bawk ang. Tin, an tlan dan tur chu hetiang hi a ni ang. Hemi rin bul atang hian an tlan tan anga, he phaizawl, melthum ai maha sei tur hi hmarlam zwngin an zawh par par anga, sawlai Broke Hill tlang saw tlanhualin an rawn kir leh anga, helai hmun rawn thleng leh hmasa ber chu pakhatna dawngtu tur a ni ang."


An tlanna tur kawngtluanin endiktu an lo awm zel anga. Saw Broke Hill lehlamah sawn tlanpaha lak maitheih turin endiktu ten puanvar an lo dah teuh dawn a, chu chu intihsiakna beituten pakhat theuhvin an rawn la ang. Chumi la velo chu tel velo anga ngaih an ni ang a, thleng hmasa ber pawh ni se engmah a ni lovang. Tin, intihsiakna beitu ten dik taka bei theuh turin ka duh em em bawk che u a ni," tiin thu a han chah nghal a, a thutna lamah chuan a kir leh ta a.


Intihsiakna beitute chu a mal malin line ah chuan an intlar ta thap mai le. Chutah Sheriff chuan intihsiakna a tel turte hming chu a han lam ta loh loh va. An lo kim vek a, tan tur chuan an inbuatsaih ta nghal a. Ani chuan tlan tan dan turte chu a han puang leh te te a, intihsiakna beitute pawh chu an sakawr chungah chuan an chuang ta thap a. Tunah zet chuan thlirtu mipui te thlengin an inpeih ta thap mai.


Bill-a pawh chu veilam pang sir ber atanga parukna ah chuan a ding ve vang a, Bigger-a chu a be mawlh mawlh bawk a. Banason-a te ho thutna lam chu a han hawiphei a, chutihlai chuan Sheriff Simon-a pawh chuan Bill-a chu a rawn hmu ve a, hmelhriat tawhhnu tih hriat tak hian a han nuihsak a. Chutah a pistol phawichhuakin vanlam hawiin a lekchhuak ta vauh mai a.


Simon-a'n pitol a lekchhuah takah chuan intihsiakna beitute pawh chuan an tan dawn ta takzet tih an hre ta. Silai chu a puak ta dawt a, an tlanchhuak tan ta sung sung mai a. Sakawr thenkhat erawh chu silai puakthawm avang chuan hlauvin an limchhuak zawk a, a chung chuangte lah chu an lo tlathelh nghe nghe a. Mahse tla em awm ta lo chuan an sakawrte chu an thunun leh thuai hlawm a. Thlirtu mipui pawhin thawm an chhuah nghal huk mai.


Bigger erawh chuan sakawr dangte ruala tlan chu duh velo niawm tak hian ala ding vung vung reng a. Mahse a pu thupek a nghah vang mai chauh alo ni zawk a.


Bill-a la tlanchhuak ve lo chu Roper-a ten an han hmuh chuan an lo ipru chawih chawih hman tawh a, tlan ve thuai tur chuan Bill-a chu an lo au tuar tuar a. Bill-a pawh chuan a thiante awmna lam hawia han thensak pah chuan, "Anih leh Big, tlan ve tawh rawh le. Sawng i hmaa tlan hote zawng zawng saw lehpelh vek tur an nih saw," tiin thupek a chhuah ve ta a.


Chuveleh Bigger-a chuan a pu thupek a han hriat takah chuan laklawh awm hauhlo chuan a dukchhuak ve ta phut mai a, chak mangkheng chuan a lim ve ta puat puat mai a. Sakawr naran thalet engemawzat nei, ram sakawr pa, hmun rualremlo leh tlangpangah pawh duhtawka thlawk theiu emaw tih mai tur khawpa thahrui nei chu a chakzia a rawn langchhuak tan ta mai reng a.


Midang zawngte tlanhnu daiha tlan tan ve chauh nimah seminit khat vel an han tlan meuh chuan engemawzat chu an tlanpel hman ta reng mai. Bill-a chuan an hmalam chu a han thlirphei vang vang a. Mel chanve dawn lai a Pete-a sakawr var, fal taka hmahruai nalhtu chu a va hmuthei a. Bigger-a lah chuan a hmaa sakawr dang awm ve te chu a ngaithei baulo ni ngei tur a ni, a duk zur zur a, a tlanpel phei duak duak zel mai a.


Mel hnih zet chu an tlan ta. An hmaa la awmte chu Pete-a tiam lovin sawm vel bak an ni tawh loavang tihtur hi a ni tawh a. Pete-a erawh kha chuan Broke Hill Stone chu a thleng phei lek lek tawh a. Chutah Bill-a chuan, Big, tan han la leh tak tak tawh le," tiin a sakawr chu a han tur leh sauh sauh va.


Bigger pawh chuan a pu tawng chu hriain a hma pawha a chak tawh tehreng nen, a aia chak lehzual chuan a lim kawh leh ta puat puat a. An hmaa la awm chhunte pawh chu a lehpel leh ta zut zut mai a. Broke Hill Stone an thlenphei dawn meuh chuan an hmaah pahnih chiah an awm ta.


Pete-a erawh chu tlang bulthut lehlamah chuan a hmuia puanvar sehbet va hian a lo tlankir der tawh a. Bill-a chuan tlang letliam an thlen dawn chuan a hnunglam chu a han hawikir zauh va. Hnung lamah chuan indawt zut hian midangte pawh chu an rawn tlan ve tak tak bawk a, an awrawl tawp tawp hian an sakawrte chu turin an rawn kheng zawt zawt reng bawk a. An thawm chu a ri tuk tuk a, an vaivut palkhukte lah chuan par a chhuang luih luih bawk a.


Tlang phen an han thlen meuh chuan an hmaa pakhat tlan mek pawh chu an lehpel leh ta mai a. An hmalawkah chuan puanvar chu thil indawh kangah hian alo intiang teuh va. Chumi zawn a va thlen chiah chuan pakhat chu a zu ban ve zauh va, a hmuia sehbet tura a han lakkian chiah chuan an piahlam, tlangchhip inphah phei zui maia sakawr chung chuang, mi panga vel tur inzui hi ava hmu ta hlauh mai a. an hmai te chu puanduma tuam vek ni mai hian a hria a.


Bureau khaw pana Roper-a te nena an kalho laia kawnglaka an riah tum khan puanduma hmaituamte bawk khan an rawn tibuai ta kha a ni a,chumi a han ngaihtuah chuan ngaihthatlohna tak a nei ta a. Chung sakawr chung chuang, hmaituam ni ngeia a hriatte chuan Bureau khawlam pan hi an ang hle bawk si a. Mahse an hlattham deuh avangin hmaituam an nih ngei leh ngei loh chu a hrechiang lutuk vak biklo a ni. Engpawh chu lo ni se khua luh leh thuai chu a tul ni hian a hre ta a.


Chung sakawr chuangte lam hlir a ngaihtuah avang chuan Broke Hill Stone tlankual pawpin, midang ho chuan an lo tlansan thui hle tawh a. An hma mel chanve pawh tling lovah chuan Pete-a sakawr var pawh chu a lo tlankhu ve rum rum bawk a.


Bill-a chuan an hmaa sakawr var tlan mek chu a han melh zawk a, chu sakawr var chu a chau tan tawh a ni tih pawh a ke hnunglam chhehdan pai deuh hlek tawhdan atang chuan ava hrethei mai a. Bigger-a erawh chu chau hmel pawh a la pu thung hauhlo mai. A tlandan pangngaiin ala duk pur pur zel a.


A hnuhnung ber atan ti rilru nauh nauh chung hian Bill-a chuan, "Big, i thatawp han chhuah teh le. Kan hmaa tlanmek saw lehpel ngei turin i thapui han chhuah teh le," tiin a sakawr chu a han fuih leh sauh sauh a. Chumi hnua Bigger-a han tlan zet chu a lo hmutu te pawh chuan mak an tiin, chutiang reng renga sakawr chak chu an la hmu ngailo a ni. Bill-a chuan an tlanpelh thingkung te chu phe zawt zawt hian a hria a, thliin a beng a han chhemte pawh chu ri vuk vuk hian a hria a. An hmaa Pete-a sakawr pawh chu an va hnaih hle tawh a. Mahse hmalam a hawiphei reng chuan an boruak sut chuan a thaw a tidanglam thei dawna a hriat avangin kun chal chung chuan a tlan ta zel a. Ani ngei pawh chu chutianga sakawr tlanchak chungah chuan ala chuang ngai lo ni mai lovin a hmuh pawh ala hmu ngai bik reng reng lo a ni.


Broke Hill Stone atanga melhnih lai an tlan leh hnu chuan Pete-a sakawr chu a va umpha lek lek tawh a, yard 30 pawh a tling tawh awm kher lo ve. Tlem tlemin Pete-a chu an hnaihphei hret hret zel a. A hnung lawka sakawr rawn tlan lim puat puat thawm chu Pete-a chuan a rawn hrethei ni ngei tur a ni, a rawn lehhawi zawk mai a.


An tlan tan hma pawha a lo huphurh rilruk ber sakawr buang lianzet mai, an hnung lawka rawn pelh tuma rawn duk pur pur mai a han hmuh takah chuan a phawk nasa ta mai a, a sakawr chu chak lehzuala tlan tur chuan a han tur sauh sauh va. Chu mai pawh duhtawk lo chuan a spurs pir vauh mai chuan a sakawr chu a han kheng ta sawk sawk mai a.


Chutia a han khen tak nghek nghekah chuan a sakawr pawh chu tlem chuan a han duk leh hlek a, mahse a chauh deuh tawh avangin reilo teah a hma ami ang bawkin a tlan chu a zuai leh ta hrat hrat a.


An hnunga sakawr buang lah chuan a rawn tlanruapui der tawh a. A sakawr chu a han kheng leh ngial a, mahse engmah a ang tak tak thei ta tlatlo. Lunghnur tih hriat ngawih ngawih hian chu sakawr buang theng thung chu a han melh zawk a, chu sakawr buang lah chuan hah hmel pawh ala pu velo tih a han hmuh phei chuan a thinur teuh tawh mai a. Chu sakawr buang leh a chunga chuang te chu melh tluk theih nise a melhtlu chiang zet ang.


Bill-a'n Pete-a lungawilo hmel a han hmuh chuan a han nuihkhum deuh sak mai a. "Kan hmanhmawh deuh va, kan lo vakal hmasa mai ange," a han ti zauh va, Pete-a te chu an tlanpel ta hrat hrat a, reilo teah chuan an fal leh ta nalh mai.


Hla tak atang pawhin Bill-a sakawr rawn tlanfal nalh mai chu Jerry-a te pawh chuan an lo hmu thei ta ni ngei tur a ni, an lo au tuarh tuarh mai a. Bill-a hnung lawka Pete-a lah chuan Bill-a rawn auh dan khan a thinrim a tizual sawt lehnghal a. Hnunglam atanga kahthlak tawp tum niawm tak hian a pistol chu a han dap that that a. Han kap ta chiah se la, amah leh apa chu chunglai ram vela cheng zawng zawngte chuan an dem dan tur leh an hmingchhiat turziate lah chu a hrechiang ve hle mai bawk si. Lokap ta tehreng pawh ni se, lawmman chu a hmuh pawh a rinawm chiah siloh avangin a thinur chu a puakkeh lo chauh a ni ta mai a.


Lawmman pakhatna dawngin, hmun hran hranah a sakawr chungchuan thiamzia leh a sakawr var chakzia an sawi ngei alo beisei ruk tehreng nen, a aia chak zawk an han awm ta mai chu a tap lo chauh hi a ni ta mai a. A sakawr chu chak lehzual tura a han tur ngial pawhin tur loh nen thuhmun reng a ni ta mai si a. Hmalam a han hawiphei leh meuh chuan sakawr buang lah chuan an tlantirhna hmun kha a thleng phei tep a ni ta mai bawk si.


Dimna nei leklo hian a sakawr khelah chuan a han kheng leh nghek nghek a, mahse a sakawr lo chhuan ve em em pawh chuan a pu chu a zo lo lek lek hi a ni hrim tawh mai a. A sakawr a han khen apiang mai chuan a pai leh nawk mai thin a, a sakawr pawh chu lainatna reng reng a nei tawh lo. Atir atanga theihtawp chhuah tura a tur avang chuan a chau hle tawh tih pawh a ngaihtuah lo reng reng a ni. A sakawr dul leh nghawng vela thlantui loluang chhuak tiam tiamte leh a kamsir vela rawn phuan chhuak bawrh bawrh te pawh chu a pawisa phal tawhlo a ni ber e.


Reilote hnuah chuan Bigger-a chuan an tlan tantirhna hmun, rawngvara rin awmte chu a thleng ta der mai. Bill-a chuan, "A tawk e, Big. I titha lutuk tlat," a han ti sap a. Bigger-a pawh chu tlanzawi tial tialin a vaivut palkhuk rum rum zingah chuan a ding ta chat a. A hah chu a hah ve hle a ni tih chu a taksa thlan hluam mai atang chuan a hriattheih a. Bill-a pawh chu a chhuk vat a, Bigger-a nghawng vel chu kuahin a han chul vel thuak thuak a.


Jerry-a leh Roper-a te nupa chuan Bill-a pakhatna han ni ta chu lawmin awrawl tawp tawpin an lo au tuarh tuarh mai a. Roper-a phei chu a lawmbik chuang emaw tih mai turin an awmna hmunah chuan a zuanin a lo zuang tawr tawr mai a. Bill-a pawh chuan chuti taka a thianten lawma an rawn au tuarh tuarh chu chhangletin a puanvar ken chu han vai lap lap a.


Sheriff Simon-a pawh chu a thutna hmun atanga rawn thochhuakin, "Nausen pawh sakawr chungchuan in lo thiam viau hi mawle," tia nui vur vur chung chuan Bill-a chu lawmpuina chibai a han buk ve lawp lawp bawk a. Bill-a pawh chuan nui chung hian, Ka tihfuh ve mai mai a ni e," tiin a lo chhang tha ve mai a.


Banason-a pawh chuan nuihmel putluih hram hram tum chung hian, "Tlangval, sakawr ilo nei thain a chungchuan pawh ilo thiam hle mai. Nang ang rual chauh si, hetiang tithei hi chu an vang teh ang chu," tiin Bill-a chu a rawn chibai ve ta nghal a. A rilru tak erawh chuan pakhatna ni ngei tura a lo rinlawk a fapa khumtu an han awm ta mai chu a lawmlo thung hle a ni.


Bill-a pawh chuan, "Ka thiamvang pawh a ni bik lovang, ka vannei ve hrim hrim ni zawkin ka inhria," nuisang chung hian a lo ti ve a. Lawmman sem hun aimah chuan Bureau khawchhung lam ringawt chuan a rilru a luah tawh zawk a.


Reilote hnuah Pete-a pawh chu a sakawr chau, tlu lek lek tawh nen chuan an rawn thleng ve ta a. Dinna hmun tur an rawn thlen ve chuan dimlo baksak fe mai hian a sakawr chu a han pawtding awrh mai a. Leiah chuan rawn chhuk vatin Bill-a leh a sakawr chu nelawmna tel maplo chuan a rawn melh ta ram ram a, thutthleng indawh ah chuan chau hmel zet hian ava thu ta hnawk mai a.


Pete-a rawn melh dan chu Bill-a pawh chuan alo hmuhhmaih bik hauh lo va. Pete-a hmelah chuan thil tam tak inphum hmu telin a inhre nghe nghe a. Chu intihsiakna ah chuan pakhatna anih tak avangin thildang tam tak pawh a kengtel nghal ang tih pawh a hmel atang chuan a manthiam nghal mai a, pawi tihna em em erawh a nei hran hauh lo.


Bill-a chuan tui awmna hmuna Bigger-a chu kai pheiin duhtawkin a han dawttir ta kuang kuang mai a, amah pawh chuan tlem chu a han in ve bawk a. A lukhumparh, hlai hlep hlawp chuan tui chu thalin a sakawr chu a han theh thawt thawt a, chutianga an chawlh vang vang hnu chuan an awmna ngaiah bawk chuan an inkai phei leh ta a.



Bill-a'n sakawr intlansiakna hmun an va thlen leh chuan midang hote pawh kha an rawn thlengkim ve lek lek tawh a, an sakawrte chu an chau hlumlo chauh hi a ni mai hlawm a. Pete-a tihloh midang, intihsiakna beitute chuan Bill-a chu itsik hmel pawh an pu hlawm hran lo va, Pete-a erawh chu a lungawi thei hlawllo tih a hmelah pawh a lang reng mai a.


Chutia an rawn thlenkim takah chuan lawmman semna pawh chu an neizui ta nghal a. Bill-a chuan pawisa mamawh lai taka dollar 1000 a han nei mai tur chu a lawm em em mai a, tunah chuan a mi zawnte umzui zel dan turte pawh a han ngaihtuah leh deuh thut thut a. Mahse Jerry-a hnena thawk tura alo intiam diam tawh chu hrechhuak leh thutin, a intiam tawh ang chuan a thawk phawt anga, chumi hnuah Mc Trone-a zawn zeldan kawng chu ala awm neiin a ring leh ta zawk a.


Lawmman sem zawh veleh chuan Bill-a chu a thiante hnenah chuan kalin, "Min lo hrethiam ula, rang taka khaw hanluh hmasak phawt ka duh a ni. Hotel lamah kan inhumkhawm leh mai dawn nia," tiin Bigger-a chungah chuan a han zuangkai thauh va, khawchhung lam pan chuan a tlantir ta nghal a. Han hahchawlhtir deuh pawh duh viau mah se Bureau khaw thlen thuai chu tul a ti miau si a, an lim leh ta puat puat a.


khua a thlen hma deuh chuan pistol ri niawm tak han ri dap hi a hre ta a. 'Eng tak chu ni ang maw?" ti rilru reng chung chuan Bigger chu a ahn tur leh sauh va. Rei vak lovah chuan khawhmawr chu an thleng ta thuai a. In lo awm hmasa ber ava thlen chuan kawtthler lehlam a sakawr rualkhat tlanri tak tak ri chu a han hria a, duh aiin a tlai ta hrat ni pawhin a inhre nghal a.


Kawtthlerah chuan Bigger chu a tlantir ta puat puat a. An chenna hotel piah lawk a Windham Bank ava thlen chuan Bigger chu a han pawtding chawt a, kawtkaia mi pakhat ruang lo let reng chu a hmu nghal a. Bank lam a han hawiphei leh chuan Bank vengtu ningei tur hi bank veranda-ah chuan thisen nen hian alo bawkphek thlur bawk a. Tunah zet chuan thil awmdan a hrefiah ta kuar mai le.


Chung ruang lolet rengte chu tute nge an nih tih han enkual vel chuan sawtna a nei dawnlo tih hriain a sakawrah chuan lawnkai lehnghalin misual hote tlanliamna lam nia a hriatah chuan Bigger chu a tlantir ve ta nghal a.


Chungho chu hmanhmawh taka tlan an ni bawk a, an hnu pawh a hriat kher mai. Chumi an tlanna lam zelah chuan an tlan ve ta zel a. Hnai taka va hmuh thut aiin an hnu chhuitheih zel chuan awmzia a nei thui zawk fe ang tih a rin tlat avangin Bigger a chu chak lutuk chuan a tlantir duh lem lo va.


Chungho chuan rei tak chhung chu kawng pangngai zawhin khawthlang lam an pan zel a. Melhnih zet an inzui takah chuan chung sakawr hniakte chuan kawng pangngai pensanin kawngsira bawng kawngtum hlui, bawngrualte pawhin reitak an zawh tawhloh ni ngei turah hian an peng ta a. Bill-a pawh chuan sakawr penna lamah chuan a sakawr chu a kaltir ve ta zel a.


Chu bawng kawngtum chu a tira a landan ngawt ai chuan alo zau ve tial tial a. Bank rawktute chuan umzuitu neih an inringlo ni ngei tur a ni, an hniakte chu alang chiangin thup bo an tum lo hle ni hian a hriat a.


Thui vak lovah chuan chu kawng chuan ngaw chhung hi ava pawh ta a. Bill-a pawh chuan fimkhur a tulzia chu a hrechiang ve em em a. A sakawr leh amah pawh chu langsar lo thei ang berin, phen tur remchang apiang chuhin hmun biru deuh lai zelah Bigger-a chu a kaltir a. A mit chuan sakawr hniak chauh en lovin hmundangte chu a mitsir pah zel a.


Awlsam tak zela hnu ala chhuitheih zel chu a tan vanneihna a ni. Rei tak chhung Indian pasaltha ho zinga alo chen ve hrep tawh avangin hnuchhui dan leh thawm dimdan te chu a hrehneh ve tawh hle a ni.


Ngaw chhung thim deuh mup lai a han luh hnu erawh chuan Bill-a tan pawh sakawr chunga chuanpah chuan hnuchhui chu a har ta deuh va, chuvang chuan sakawr atanga chhukin a kaihin a kai ta zawk a. Chutia kea a han kal takah chuan a hnuchhui lai pawh chu harsa lo takin a hmu thei leh ta a.


Ke hlira rei ngial a kal leh hnu chuan ngawchhung pawh chu a kalchhuak tep a ni ta. Ngaw karah chuan sikret te zuin reilo te a han chawl leh a, a zuk zawh hnu chuan a hna ngai bawk chu a chhunzawm leh ta a.


Ngaw a han kalchhuah lewh meuh chuan khua pawh alo tlailam tawhin ni tla tur chuan ramhnuai ngawpui hring dup pawh chu a chhunsen phut tawh a, mahse kir leh ringawt chu a tum hauhlo. A tul anih chuan hotel chhunga khum nuam tak mai kalsana ramhnuaia riah leh mai pawh chu a hreh hauh lo va. Bank rawktute chu tawh chilhin man vek theilo mah se tute nge an nih hriat a, an pawisa lak zawng zawngte pawh chu a zavaia lakkir leh vek a tum fan a, kutruaka kir leh ringawt chu a tum hauhlo.


Ngaw piahlam mel chanve dawn lai a han kal leh hnu chuan kawng han tih ve mai theih tur, mahse tawlailir te thei ang ber chi tan pawh a harsa taka zawh hram hram theih tur lek hi a va pawh ta a. Chu kawng chuan an hma lawk kawr ruam chhengchhe zet mai chu a chhun phei raih mai bawk a. Chu kawrruam lunghmun chu khawkrawk tak niin lung lian fe fe hi a awm teuh mai a, a bul velah chuan tlang lian vaklo hian a hual khap mai bawk a. Chu hmun chu han bihruknan pawh a remchan hmel tak hi a ni a.


Zankhua lo thim turah chuan Bill-a chuan a hnuchhui mekte pawh chu khawi hmunah mah an kaltheih bik a ring lo va, an hma lawk lung khawkrawk tak hmunah chuan an chawlh ve mai a ring tlat a. An hnu pawh chhui chet chet duh tawk lovin a sakawrah chuan a zuangkai leh nawlh a, kawr ruam lam pan chuan an chhukthla ta buk buk a.


Kawrruam luhthlakna turah chuan Bigger chu tidingin a zuangthla leh ta a. "Big, tah hian min lo nghak reng ang che," a han tisup a, kein kawrruam ah chuan a chhukthla ta a.


Fimkhur takin kawrruam lam chu a pan thla ta zel a, a chang chuan thawm ngaithlain a han ding leh lawk thin bawk a. Mahse eng thawm mah a la hrethei ta chuang lo va. Bihruk theihna tur hmun nia a hriatte chu a enfiah pah zel a, engmah hriat ala nei ta chuang lo va.


Chutah ngaihdan thar a nei ta! Khaw thimchian hle hun nghah rih phawt a, chumi hnuah thlaeng rawn lamn hma ngeia kawrruam chu dapchhuah vek a rilruk ta zawk a. Thla a rawn en hma chuan a mi umte pawhin khawihmun mah an pan theih a ring biklo a ni. Chutah lungpui lian pui pui intawksir khupna hmunah chuan a thu sauh sauh va, eng chhuah lo thei ang berin meizial chu a zu leh ta hlat hlat a. A hmel ah chuan hmabak enghelh nei hauh lova chawl hahdam mai mai hi a ang ber zawk a.


Sikret tlawnhnih zet a han zuk ralleh meuh chuan khua pawh alo thimchiang ta hle a. A lukhum parh hlai hlep hlawp kaihna hrui chu a hmalama uaithlak tirin a lukhum tak chu hnunglam ah a huih liam thung a. Chutia tih chuan tangkaina tak a nei ve tlat a ni. Zanthim hnuaiah chuan lo hmutu pawh awmse lu ringawt chu hmuh mai a harsa deuh va, chu bakah lukhum khumloh chuan a thawveng zawkin thil ri hriat zung zung pawh a awlsam phah dawn a ni.


Keite in a saseh tur a veh ang maia thawmdim em em chung hian a thutna hmun chu a thawhsan a, kawr ruam lam chu a pan ta zal zal a. A rahchhan apiang mai chu buk palh thei a ni tih hrereng chungin fimkhur tak chuan a tawlhthla ta zel a. Khawthim chian hmaa a lo rinhlelh ruk ber lungpui lian tak tak pahnih leh piah lawka awihpang inkar a puk niawm tak, thim bik ran mai chu a pan thla ta zel a.


Chutia a vehthlak hrauh hrauh lai chuan zan sava hi a thlang lawka puk ni ngeia alo rinruk awmna piah, fit sawmkua vela hla thingbuk tawi laih atang chuan a rawn thlawkchhuak ta pharh mai a. Chuveleh enge anih pawh hre lemlo chuan a pistol chu a han phawidawk nghal zawt mai a, mahse sava thlazap ri a han hriat takah erawh chuan thensak chungin a silai chu a khunglut leh ta zawk a.


Mahse engvangin nge kha sava kha a rawn thlawhchhuah thut ni ang le? Hlauh a nei anih loh chuan a thlawkchhuak hauh lovang tih ngaihdan Bill-a chuan a nei ta tlat mai. A thlawng lawka puk awmna niawm tak pawh chu pan ta lo chuan sava rawn thlawhchhuahna thingbuk lian vaklo chu a pan ta zawk a. Chutah chuan engemaw tal hmuh a inring tlat a ni.


Zan sava te hian eitur rannung emaw, an aia te zawk sava ve bawkte an chan reng rengin thlawhchhuah chu sawiloh, an fukna ngaiah che lek lovin an awm thin a ni ngai a. Chutianga an thut tlat chuan an aia te zawk te pawhin an ral, anmahni lo chang rantu an ni tih hre lovin an panhnai zel a, awlsam takin chung zan savate chuan an lo man tawh mai thin a ni tihte chu a hrechiang ve tlat. Chutia a rawn thlawhchhuah mai danah chuan a hlauh zawng engemaw tak a awm ni ngeiin a ring ta a ni.


Chu thingbuk awmna a va thlen dawn tepah chuan a lam hawi zawnga thlifim rawn tleh heuh heuh chuan atang chuan thil rim, alo hriat fo tawh rim chu a hnar fing tak chuan a hre ta tlat mai le. Chung a hnar rawn verh vartu sakawr thlanrim, thanghuam mai chu a lo thleng tep tawh a ni tih hriain, a thil zawn chu a hmu thuai dawna a inhriat avang chuan a lawm hle ta mai a.N He kawr ruamah hian amah ni lo midang an awm ve ngei a ni tih chu a chiang ta hle hian a hria a. A mi umte kha an ni mai thei angem tih erawh chu ala chiang thei mai bik tlat lo. A lawm rilruk viauna chhan pawh chu engemaw mai mai ala ni thei tlat.


Thlaler rultur nei hlauhawm ber mai, Rattle Snake tleng vel ang maia thawm neilo chuan hmalam chu a panphei hrat hrat zel a, reilote chhungin thingbuk awmna chu a thleng phei ta thuai a. Thawm ngaithlain thingbuk bulah chuan a han ding leh hlek a, inhmuhtir hlau tak chungin lungpui chungah chuan a lawnchho ta tham tham a.


Lungpui chung zawlah chuan a bawkphek ta zan mai a, thawm danglam engmah a hriat takloh avang chuan tumahin an la rawn hmulo a ni tih chu a hrethiam mai a. Thingbuk piahlam chu a han thlir phei a, fit 20 vel leka hlaah hian sakawr niawm tak lo ding thim khap mai chu ava hmu ta a.


A han enchian deuh ngial hnu chuan sakawr a ni ngei tih a ringnghet ta a, mahse zanthim karah chuan engzat nge annih tih erawh chu a hrethei mai bik lo va. Sakawr an ni ngei tih ah chauh ala chiang thei a ni.


Chutah a awmna lungpui atang chuan thawm ngaithla ran chung hian a chhuk leh ta a. Sakawr lo ding thim mak te lam pan chuan a phei leh ta dan dan a. Chung sakawrte chu a veha vehphei chi an ni lo tih a hria a, an pute niawm tak leh ngampat hmel tak hian ava pan phei ta zawk a. Thawmdim taka veh phei chu ni ta sela chuan chung sakawrte chuan hlauvin thawm an nei ngei ngei dawn tlat a ni.


Chung sakawrte chuan an lam pana mihring lokal mek chu an lo en satliah ve mai a. Ani Bill-a pawh chuan ngampa takin chung sakawr te chu a va chuk thuak thuak a, a hlauh rilruk anga thawm chhete mah an chhuahlo chu a lawm hle nghe nghe a ni.


Chung sakawrte chu hah taka tlan hrep, thleng hlim deuhhlawh an ni tih hriat tak hian an lo thlan hluam hlawm a. An jeans te lah chu a ngai ngaiin phelh pawh phelh thlak lohvin a lo la invuah vek bawk a. A landanah chuan reilote hnua chhuah lehnghal mai tum an ni ang tih a rintheih mai bawk.


Chung sakawr jeana ip awmte chu Bill-a chuan a han dap zung zung a, a tawp berah chuan a thil zawn chu a hmu ta ngei mai le. A rilru te te chuan hlawhtling pawh a inti hle nghe nghe a. A han umzui hram hram chu ama mawhphurhna leh a sum pakhatmah telna ni kherlomah se tifuh a inti rilru hle. Tunah chuan anmahni man leh chu a tihtur hmabak a ni ta!


Chu ip puar lah mai chu hawngin a chhungah chuan ip var pakhatah hian dollar note tih hriat fahran mai hi a lo infun teuh mai a. A phawrhchhuak thuai a, pawnah chuan ip var zawk chu a hawng leh ta a. Alo rin ang ngei chuan ip chhunga mi chu dollar note chhah fe fe a intel am hi an lo ni hlawm a. Chung pawisa note hnuaiah chuan pawisa nawi engemawzat hi a lo la awm nghe nghe a, a vai phei chuan dollar sing tel fe a ni ang tih chu chhiar kherlo mah se a ring thei nghal mai a.


Ngun zawkin a han inngaihtuah leh phawt a. Engpawhnise, amah zawk chu lo chesual palhin lo thi ta zawk pawh ni se, sum chuti zozai chu misualho kut atanga lakchhuah hrim hrim chu tha zawka a hriat tak avangin pawisa ip chu a sakawr dahna lam a panpui ta rih a. Thir nawite nena inpawlh a ni bawk a, rih pawh a rittham ve hle a ni.


Zanthim hnuaiah chuan thawm dim ngai bawk si, han kalpui zung zung chu harsa a ti ve hle mai a. Bigger-a chu han ko ngawt dawn se la, a duh aia hmain chung bank rawktute ho nen chuan an inbawh buai ngei dawn bawk si. Mahse kawng dang awm chuang heklo le, harsa titak chung chuan a sakawr dahna lam chu a pan ta zel a.


Harsa ti tak chunga reingialk a beih hnu chuan Bigger-a bul chu a thleng thei ta hram a. Reivaklo a han chawl a, chutah a sakawr jean ah chuan chung pawisa te chu a khung ta zung zung a. Chutia a khungzawh hnu chuan, "Big, min lo nghah leh a ngai anih hi. Thawm nei lovin min lo nghak leh lawk la, ka rawn koh hlauh che chuan ilo kal vat dawn nia," tiin a sakawr chu a be leh ta mawlh mawlh a. Chutah a hmabak ko tak mai hmachhawn tur chuan kawrruam lamah bawk chuan a chhukthla leh ta a.


A pumpui ruak tawh tak chu a han hrechhuak ta thut a. Mahse riltam leh chauh pawh ngaihtuahna hun ni tawh heklo le! ngun taka beng chhi ran chung chuan kawrruam lam chu a panthla ta zel a.


Puk ni ngeia a rinah chuan chung sakawr neitute chu an awm ngeia a rin avangin chumi lam chu a panding nghal nalh a. Chulai bak chu zan boruak vawt tak hnuaia han tawm reng na tur chu lai ruamah chuan a awm a ring lo tlat a ni.


Chu hmun chu a thleng tep tawh tihah chuan phun bal bal ri hi a hre ta thut mai a. Chiang lehzuala a han ngaihthlak chuan phun bal bal ni a a hriat chu zai ri a lo ni zawk a, hetiangin -

Englai pawhin ka ngai em em reng che a,
Nang zangin min ngai ve hian ka ring si lo;
Engtiklai pawh hian hmuh che hi ka chak ngawih ngawih a,
Hmu tur che hian ka tling tawh si lo.

tih hla hi thiamlo fahran mai hian mi pakhat hian alo sa vang vang mai a.


A thim em avang chuan chu hla satu pa chu khawi hmunah nge a awm a hre thei mai lo lehnghal a. Ngun zawka a han ngaihthlak leh vang vang hnu chuan chu aw fiahlo tak lo chhuahna hmun chu puk ni ngeia a hmuh, thim mak mai hmaa lungpui lian tak ding thiang bul vel atanga rawn chhuak ni hian a hre ta zawk a, chu mi lam pan chuan zawi muang hian a che chhuak leh ta a.


A hnaih telh telh a, chupa hlasak pawh chu a hrechiang thei tial tial a. A rilru te te chuan, 'In thlamuang hle mai maw? In pawisa ruk zawng zawngte kha a awm tawh lo tih leh thihna in a hmuak mek che u tih te hi han hre na ula zawng, in phuchiang ngawt ang chu. Sualkawng zawh tur pawh hian fimkhurna hi vawn reng tur a ni asin mawle,' tiin a ngaihtuah nauh nauh va.


Engemaw ti ti chuan lungpui lian tak tak pahnih inkarah chuan thawm chhuah hauhlo chuan a tawlhlut thei ta a. Silai hmanna chi a ni lo tih pawh a hrechiang hle. Chuvangin a jacket nghawng chhunglam kara a chemte pai chu a phawichhuak ta zal zal a. Zawite te hian lungpui karah chuan a tawlhlut leh ta zel a..


Lungpui phena lo zai rut rut chu an ralveng (santiri) dah ni ngei tur a ni. Lungpui nghengin awn fe hian a lo thu a, a malchungah hian a rifle chu a lo khang zar bawk a. Ralveng e tilo chuan a lukhum parh chuan a hmai alo chhin daih mai bawk a, a thla a muang hle tih a hriat a. Mahse chu chu Bill-a tan chuan malsawmna a lo ni ve tlat.


Bill-a thawm hriaa a rawn hawichhuah meuh chuan a tlai lutuk hrat a ni. Chemte vawt raih mai chuan a hrawkah tak mai chuan a thil tlang ta hraih mai a. Auchhuah tum pawh a ang viau na a, a hrawkhrui chu a chah tak si avangin a ri ta bawrh bawrh zawk a. A han leng uih uih a, a hmaa a lo thutdan ang chiah bawk khan a zal hlen ta ruai ruai a.


Bill-a chuan a chemte a thisen kai nguai te chu chupa kawrawm ah chuan a tatfai ta nawk nawk aa jacket nghawng lama dahluh pah chuan a pistol chu a phawichhuak leh ta thung a. A kut lehlama a kalna tur dap rak rak pah chuan pukchhung lamah chuan a penlut ve ta a.


Thawmdim taka a kal chuan a tiralkhel maimai dawn a a hriat avangin thawm pawh chu a dimlo lui ve ngat tawh zawk a. Pukchhung eng riau ruai a han hmuhtheih veleh chuan, "Ava han thim kher em! Min rawn en ta che u mawle," a han ti lang lang a. A aw chu duty pa aw emaw an tihtheih dan tur ber nia a hriat angin a han tithum deuh satliah ngawt a.


Puk chhunglam atang chuan, "Ka tih reng kha. Engah nge zan khawvawt hnuaiah te iva chhuah khanglan reng ni? Tumahin min rawn umzui lovang tihte chu pahnih leh pahnih belh pali a ni tih tluka chiang a ni alawm. Intihsiakna atang khan tu tehlulin nge Bank kan rawk a ni tihte hria ang le? Kan kahhlum tak pahnihte kha an rawn nung leh te anih ngawt loh chuan?" ti lung lung chung chuan mi pakhat hi puk pawnlam pan chuan a rawn kal ri ta khoh khoh va. Khawnvar eng a rawn keng a ni tih pawh pukbang vel eng phe hluau hluau atang chuan a hriat theih a.


Chutah Bill-a chu hnglamah a han tawlh leh hrat a, tlema puk bang, pawng deuh phenah chuan a phek thei ang berin a bet ta zan mai a. A taksa lang thei awmchhun chu a ke vel chu a ni mai a, rawn hmulo hlauh se a ti rilru hle mai a.


Pen ri pawh chu a la rawn ri koh koh zel a. Thawkkhat chu a han ding deuh hrut a, "Khawilaiah nge maw i awm teh hrep roh le? Chhuah lamah pawh harsa lo taka chhuak thei si, i han luh leh theihloh tak mai le," a rawn ti leh ta lung lung a.


Chutah Bill-a bawk chuan a aw han tidanglam lehin, "Rawn kal thuai thuai la anih chu. Mitdel ang hlauh ka ni tawh alawm. Lungtum ka pal lehnghal," tiin a lo chhawn ve leh a.


Puk chhung lama mi pawh chu a rawn pen leh ta koh koh va. A rawn hnai telh telh a, a khawnvar eng pawh chu a langchiang telh telh a. Bill-a pawhin a silai chu a kawm lamah hum ve ta zawkin, che thut thei tur chuan a lo inring ta khiau mai a. A kekawr, a pheikhawk te chu a rawn hmu hmasa mai angem tih ringawt chu a ngaihtuah rauh rauh va. A lungphute chu nidang zawng aiin a ring ta sawt ni te hian a hre ta a. A chetsual hlauh chuan thihna a ni mai tihte chu a hrechiang hle.


Eng rawn kengtupa pawh chu a hmuhtheih ta. Palain tawk tak, hmuihmul leh khabe hmul zuah buk chhup mai hi a ni a. Amah a sang bawk a, pukchhung hnaim laiah phei chuan a rawn kun phei zoh zoh thin a. Alo channa lai tak pawh chu pukchhung hniamna lai tak a ni bawk a, Bill-a pawh chuan remchang hle hian a hre nghe nghe a. Chupa chu a rawn phei zel a, khawdang hawisawnlek lova a ke nghahna lai tur chauh zel a en avang chuan Bill-a kekawr tlang lang pawh chu a rawn hmu mai bik lo va. A zawn tak a thlen chuan a rin ang ngeiin a kun leh ta zuk a.


Chutia a kun pah chuan Bill-a kekawr chu a hmu ve ta chiah a, mahse a tlai lutuk hman ta tlat mai. Bill-a chuan a silai humna lam chu a vaithla ta fua mai a, chupa tukkhumah tak chuan a zu chhu ta siah mai a. Chupa nikhaw hrelo, tlu mai tur chu lo dawm thuaiin zaite hian a tluktir ta raih raih zawk a. A sathau khawnvar rawn ken pawh chu a thi zui ve hmiah bawk a.


Chutia khawnvar eng a han thim takah chuannpindan chhung chu a hma zawng ai khan Bill-a chuan thim zual ta hian a hria a. Aimitthlawn chu nepte a ni mai. Engemaw chen chu a han maimitchhing vang vang a, a han menchhuah leh chuan tlemin pukchhung pawh chu a hmu veleh thei ta ruai ruai a. A pistol pawh chu kap mai thei turin a chang kausa in a hum ta bawk a, chutah puk chhungril lamah chuan thawmdim tak chuan chuan a tawlh lut leh ta a.


Puk chhungah chuan khawnvar dang inchhi ala awm a ni tih hriat tak hian a engchhuak raih mai a. Fit 10 vel lai a kal leh hnu chuan puk chu dinglamah hian a kawi nghat a, chumi kawiah chuan dingin a chhunglam chu a han bih dak dak a. Puktawp kila mi pathum card lo khellai te pawh chu chiang takin a hmuthei ta a. "Tumah che tawh suh u. A che hmasa apiang thi tur in ni mai" tiin a va au ta thut mai a.


Chu veleh chung mi pathum te chu an hawiphawk nasa hlawm hle mai. An lo beisei lawk hauhloh leh rinphakloh tawp a hmelthar an han hmu thut leh vauna aw an han hre thut mai chuan chet nachang pawh a hriatloh tir hial a. Mahse an zinga pakhat chuan inpek nghal mai chu alo tum hauh lo mai.


A rawn dingchhuak talh talh a, vawilehkhatah chuan, "Thlawk bo rawh," tih tuarh pah chuan a silai a chuh ta thut mai a. Chutia chet a han thawh takah chuan Bill-a, mahni lo maha lo ransa bakah lo humsa diam tawh anih avang chuan a hmetpuak hmanlo chiang kher mai. Bill-a silai chu a de zawk a, chupa awmah tak chuan a va verhsak ta phawr mai a.


Chupa chu hnunglam bang deng dawt in a tlu ta a, puk chhuatah chuan a hlawm zui ta nawk mai a. Mahse a silai chu phawi ala tum ta fan a. Bill-a silai chu a de leh zawk a, chutah zet chuan a zal ta raih raih mai a. A hnarruh bung hmuar khawp a silai mu luhna atang chuan thisen a rawn baw nghal zawih zawih bawk a.


Midang pahnihte erawh chuan an ban sang taka an phar avang chuan chet ve an tumlo ngei hi hian a hriat a. "In Pistol te kha a hrenna chawp khan phelh ula, ka lamah hian han thaiphei rawh u," tiin thupek khauh tak mai an dawng leh ta. Anni pahnih chuan thuawih takin an vi zui ta vat a.


A ke bul lawk a an pistol rawn thaiphei te chu anmahni en reng chung chuan a han phawichhuak a, en hauhlo chung chuan a mu zawng zawng chu a phawrhchhuak ta vek a, chumi hnu chuan ama ke bulah bawk chuan a thehthla leh ta a. A mute erawh chu pawn kawngka lamah chuan a thehchhuak vek thung a. Chutah anni pahnih chu nghet tawka an kut hnungkhirh sakin puk kawngka lamah chuan a nawrchhuak dun ta a.


Chutih lai chuan puk chhunga a chhutthlukpa pawh kha harhchhuah mai tuin a lo rum tuah tuah tawh a. Bill-a chuan chupa pistol chu phawisakin, a thiante silai a tih ang bawk khan a mu chu a phawrhchhuak leh ta vek a. Chupa rum tuah tuah chu a samah thamin a han sawi nawk nawk a, reilo teah chuan ani pawh chu a rawn harhchhuak ve leh ta mai a.


Bill-a chuan kaitho vin a kut chu a han hnungkhirhsak ve leh a, chutah, "I thiante saw zui ve nghal rawh. Rinhlelhawm leh tlanbo tum in awm vaih chuan in a lettawp tihna a ni ang. Pathum lai in ni bawk a, ka ren tehchiam dawnlo che u a nia. Rorelna hmaah chuan pakhat bak din a tul kherlo an tia lawm, tiin a han vau veleh a, a thiante ang bawk chuan a nawrchhuak ve ta a.


Chu mite pathum chu an sakawrah theuh chuan a bawkkhup zawngin a phuarbet vek a, phuarbeh chung chuan an sakawr pawh an khalh theih dawn loh avanghin an lakam chu a suihzawm ta vek a.


Chutah Bill-a chu chang tumin a han ko ta a, thla pawh a lo en tak avangin harsa lo takin Bigger-a pawh chuan an awmna bul chu a rawn thleng ve ta thuai a.


Bigger-a chungah chuan inthazo tak mai hian a han invawrh nawlh a. Chung ho sakawr lakam, a suihzawm te chu ama saddle filawrah chuan a han thlung leh phawt a. "Thuawih taka in awm chuan in tan khawvel nawmna chen leh pawh ala beiseiawm thei mai thei. Tlanchhuah tumte kha in awm khanglang anih chuan ka tan a zangkhai ting a ni mai. In luburah khan suantlang ka phum thei reng a nia," tiin a han vau leh te te a, chumi hnu chuan Bureau khawlam pan chuan a kaltir tan ta a.


Chung sakawr pathumte pawh chuan an chunga phuarbeh reng te chu ngaihtuahloh hmel zet mai hian Bigger-a hnung zui chuan an kal ve ta rawk rawk a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)