Bill Jack Chapter-5

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-5

Unread post by Ruata Ralte » March 3rd, 2020, 9:13 pm

Bill Jack-5
Retyped : Ruata Ralte


Bill-a leh a mi man ten Bureau khua an rawn luh leh meuh chuan khawchhung mite pawh engemaw zat chu an lo mu tan der tawh a. Ponda Saloon leh dawr thenkhat erawh chu an lo la inhawng nual thung. Sakawr tlanthawm an han hriat chuan kawngka leh tukverh-ah te chuan an rawn dakchhuak hiang hiang hlawm a.


Bureau khaw mipuite chuan chumi nia an khaw bank rawk anih thute chu an lo hre vek tawh hlawm a. Sakawr intlansiakna a lawmman pakhatna dawngtu, Windham Bank rawktu nia an lo rin Bill-a hmel an han hmuh leh meuh chuan an hlau deuh nge ni, tukverk leh kawngka a rawn dakchhuak thenkhat te chu an pilu leh nghal vat hlawm bawk a.


Bill-a chu Sheriff Office panin a mi mante nen chuan an inzui diah diah a. Office zawnah chuan Bigger chu tidingin a chhuk thuai a, office lam chu a pan nghal zat a. Office chhung pawh chu a lola eng teng teng mai a.Hmanhmawh zet chuan Bill-a chuan kawngkhar chu a han kik ta dawt dawt a mai a. Chhunglam atang chuan Sheriff Simon-a aw ngei mai chuan, "Lo lut rawh," tiin a lo chhang vat a. Chutah Bill-a pawh chu ngaihtha takin a penlut ve ta nghal a.


Chutia a han luh takah chuan a beiseiloh deuh mai hian pistol kawhmawr a hmachhawn ta heu mai le! Sheriff chuan thinrim hmaisen tan tan chung hian, "Bill Jack, sang takah i ban kha phar nghal rawh. Thupek hi i zawmloh chuan inchhirna hun pawh awmlo lekin ka kaphlum nghal ang che," a ti ta chhur chhur mai a.


Chutianga vau a tawk ta mai chu Bill-a chuan a hrethiamlo kher mai; mahse thupek zawm hmasak phawt mai chu a finthlak zawkin a hria a, Sheriff sawi ang chuan a ban chu a phar ta a.


Sheriff bawk chuan, "Naupang, nausen mai emaw inih tih nak alaiin, hetiang thil i han ti ve ta mai chu a nia le(h)! Ka lo ngainat hman tehlul che nen. Tuna ka tihsak theih che awmchhun chu a na lo thei ang bera hrem inih theihna tur ngaihtuahsak chauh che hi a ni ta," a han tileh a. Bill-a lah chuan alal hrethiamlo ta tulh tulh mai si, a ngaihna hrelo zet mai hian, "Engthil nge tihsual ka lo neih tak mai le?" a han ti he haw a.


Nelawmloh zet a Bill-a melhkur chung chuan, "I tihsual pawh i hre lova maw? Lawmman i lakzawh veleh hmanhmawh takin khawchhung i pan a. I kal hnu rei vaklo va silai puak thawmte kha kan lo hre vek a sin. Kan rawn kal ve nghal thuai a, mahse kan rawn tlai ta a ni. Smither-a leh mikhual, tu tih hriatloh ruang bakah Bank pawisa dahna bawmruak chiah kan rawn hmu hman a. MAhse kan rawn unzui ngial che pawhin i mawngphe pawh kan rawn hmu talo mai che a ni e. Rem pawh i hriain huai pawh i lo huai hle mai. Engtin nge khuaah pawh hian ila rawn luhleh ngam zawk chu le? Mahse i huaisenna hi chu a atthlak deuh zawng anih hi. Chuti chung pawh chuan 'Enge ka tihsual?' tiin mi la han zawt thei a nia. Chuti maia awlsama bum theihah chuan min ring duh suh. Kal rawh le, engpawhnise, jail bang chu i zut ve phawt rih chu a ngai a nih hi," tih pahin a rawn thochhuak ta tuih tuih a.


Chutah zet chuan Bill-a pawh chuan thil awmzia chu a hrethiam ve ta kuar kuar mai a. Amah rawn pantu Sheriff chu chiang zeta melh pah chuan, "Sheriff, Jail-a min khung hmain thil pakhat hrilh tur che ka nei a ni. Windham Bank hi ka rawk a ni lo va, chu chu i ringhlel anih chuan a rawktute ngei pawh sakawr chunga phuarbehin pawnah sawn ka hnutchhiah reng asin. Intihsiak lai khan ruk ru turin khua hi ka pan lo va, anmahni lo dang turin ka pan zawk a ni. Mahse ka tlai tak hret avangin mi pahnih chuan an lo thihphah hman ta tho anih kha. Pawisa pawh a zavaiin a rawktute nen hmuh maitheihin pawnah sawn an awm e," zawi thawpsat hian a ti ta a.


Chutianga Bill-a'n a han sawi pawh chuan Simon-a chuan ala awih phahlo reu reu kher mai. Thinrim zual sauh niawm tak hian, "Chutiang dawt muhlum mai mai ngaithla turin hun ka neilo. I in thar tur lam chu pan vat mai teh," a lo tibul hmuk a.


Chutah zawng BIll-a thin pawh in a tuar ta bik lo. "Ka thusawi ngaihthlakna tura hun i neihloh chuan tu thusawi mah ngaihthlakna hun i nei tawh bik lovang," tih pahin a veilam sirah chuan a zuangphei lawp a, Simon-a silai pawh chu a puak nghal thuai a. Mahse a thleh tih a inhriat rual chuan kah nawn leh tumin a han inher rem thuai a, mahse a tlai hman ta tlat mai.


Bill-a chuan SImon-a thinhnun zawn taka tin ran chung chuan, "Sheriff, i ngam anih chuan han hmetpuak leh ta che. Hremhmun thleng rawk khawpin kan inzui anga a ni mai alawm. Chu chu i ngamlo anih chuan i silai kha thlauhthla rawh. I paihthlak loh chuan he silai hian a ngaithiam lovang," a ti ta hmiah mai a.


Chutah meuh chuan Simon-a pawh chu a zam ve ta hle mai a. A hmaa tlangval ding chuan a sawi ang chu a hlen duh ngei ang tih pawh a hmel atang chuan a hrethiam ve nghal mai a. Khawvel hi rei tak lo chen ve tawh nimah se la chen chhunzawm zel chu a la thlang reng tho mai. Chutah silai ri hriat avanga midangte an lokal beisei ru deuh pah hian tihkhawtlaina a zawng ta a. "Bill, ka thusawi chu awih la, tha takin inpe mai rawh. Chu chu itan pawh a tha ber zawk ang," tia biak khawtlai chu a han tum thlarawk a.


Mahse chu sawmna awmzia leh a thiltum chu Bill-a chuan alo hrethiam nasa mai. "Min biak khawtlaia midangte lo nghah chu tum duh tinglo mai rawh. Vawikhat ka hrilh leh ang che. Chuta ka thusawi ila zawm duhloh fo chuan ka kap nghal tawh ang che. I silai kha paihthla rawh," tiin chang khel khawl hian a han hrilh leh ta a.


Chutah zet chuan Simon-a huaisenna pawh chuan tlin ta hek lo, a pistolte chu chhuatah chuan a thlauh ta nge nge a. Chu celeh Bill-a chuan, "Kal rawh le. I laltin ung zet kha han keng la, ka thusawi nge dik a i mi puhna chu i han fiah teh ang hmiang?" a ti ta a. Simon a pawh chuan Bill-a thupek ang chuan laltin chu khaiin a chhuak ve ta hnu hnu a.


Sheriff Simin-a'n mihring, sakawr pathuma phuarbeh tlatte ava hmuh chuan a mengphawk nasa ta mai a. Bill-a a lo puhna avanga inthiamlo rilru tak chung chuan, "Heng mite hi tute nge ni?" tiin Bill-a chu a zawtlet ta hu mai a. Bill-a chuan, "Tute nge an nih chu anmahni ngei kha ila zawt zawk dawn nia. Tuna ka hrilhtheih chhun che erawh chu Windham Bank rawktute an ni tih chauh hi a ni rih e," a lo tiliam puat a. Chutah a sakawr jean-a ip chu a han pawthawng a, a chhunga tangka ip liantham fe chu a rawn khaichhuak ta nawlh mai a.


Chu tangka ip chu Sheriff hma a thehthlak pah chuan, "Khang kha Bank pawisa, a rawktute kut atanga ka laksak takte chu an nih kha. Heti chung pawha min la man duh cheu anih chuan min han man tha leh dawn em ni?" fiamthu deuh si hian a han tihkhum salh a.


Chutah meuh chuan alo tihdik lohzia chu Simon-a pawh chuan a hrechiang ve ta kher mai. Bill-a lam chu hawiin, "Bill, diklo taka ka lo puhna ah che hian min ngaidam hram teh khai. Thil awmdan hrechiang hauh si lova khungbo che ka lo tum hi a tisual let der a nih hi," a ti ta a.


Bill-a pawh chuan, "Ka hnuk em ila chhat lo bawk a, chutianga ngaihdam i dil takah chuan ka ngaidam hram ang che. Ka hnuk hi lo chhat ta la chuan ka ngaidam hauh lovang," a han ti fiamthu a, chutah, "I mi puhna kalhmang chu a awm ve reng mai. Amaherawhchu tunhnuah zawng thudik tak i hriat hma chuan ngaihdan lo siamfel mai mai ngai tawh suh ang che. I Badge kha bullet proof a ni hauh lo a nia. Chu chu nausen hnute hnelai ka atanga zilhna awka a nih chu," a han ti leh a.


Chutia an inbiak mawlh mawlh lai chuan Bureau khaw mipuite pawh chu silai ri an hriat avang khan Sheriff Office kawtah chuan an rawn pungkhawm ve teuh tawh mai a. Bill-a leh an Sheriff inbiakna zawng zawngte pawh chu an rawn hre ve teuh hman tawh a ni. Bureau khaw bank rawktu emaw tia an lo huatruk em em tawh tlangval chu Bank rawktute uma an pawisa ruksa zawng zawng rawn lalet theitu a ni tih an han hriat meuh chuan huatna ni lovin ngaihsanna mitmeng nen an rawn thlir ta thup zawk a.


Chung mipui thawm vel avang chuan hmanhmawh takin an khaw Bank neitupa Windham Batcher-a pawh chu a rawn lang ve thuai a. Mipui lo ding hmurte chu rawn keu tawlh tawlhin a Bank pawisa ip var mgei mai khai chunga Sheriff lo ding tau hnenah chuan, "Sheriff, engeni thil awmzia hi? \" a rawn ti ve ta a.


Simon-a chuan a ipkhai chu Bank neitupa hnena lo hlan pah chuan, "Sakawr intlansiakna hmun atanga Bill-a chho ta khan i Bank awzawng a lo rawk hleinem mawle. Bank rawktute ho kha umin ava nangching ta a, i pawisa te chu a rawn lakir leh ta vek zawk anih hi. Tin, heng sakawr chunga a phuarbeh reng te hi chungho zinga mi chu an nih hi," tiin thil awmdan chu a han hrilh thuak thuak a.


Lawm tih hriat tak hian Batcher-a chuan pawisa te chu ip atang chuan a han phawrh zung zung a, a vai chuan a lola kim thlap mai tih a zu hmu a. Chutah dollar sawm note clip pahnih chu rawn phawrhchhuak in, "Bill, i chunga ka lawmzia hi tawngka ngawt chuan ka sawichhuak thiam lo. Ka lawmzia entirnan he thil hi min dawnsak hram teh khai," tiin pawisa chu hlan a han tum a. Mahse Bill-a chuan, "I lawmdan tur chu ka hrethiam tho alawm. I pawisa i hmuhkir leh vek theih avanga i dinhmun ngaia i han awm leh thei tur hi chu keipawhin ka lawmpui lutuk che asin. Pawisa hlawh beisei a heng rukrute hi um ka ni lo va, tul nia ka hriat avanga um chauh zawk ka ni e. Tunah chuan ka hmankhawp tawk chu ka la nei rih e. Ka mamawh hunah chuan ka la rawn dil fo dawn che alawm," tiin pawisa chu a la duh ta awzawng lo mai a.


Windham Batcher-a pawh chuan, "Anih leh mamawh i neih hun ah chuan min la rawn dil ngei ngei dawn nia. Pawisa chauh lo pawh ka neih zawng leh ka theih zawng anih phawt chuan min lo hrilh zel dawn nia," a ti ve ta a.


Sheriff-in chung misual hote phuarna hrui a han phelhsak pah chuan, "Nangni ho zawngin in nghawnga hruivalh pumpelh thei tur khawpa tawngkam te inthiam anih ngawt loh chuan boruak ah in la lam dawn khawp e," tiin a han tiel vel a. Chitih lai chuan Roper-a leh Jerry-a te pawh chu thaw ham ham chung hian an rawn thleng phei ve ta a. Thil awmzia chu Sheriff hnenah chuan an han zawt tha leh a. Ani chuan thil awmzia chu tawikim takin a lo hrilh leh zung zung a, Bill-a chunga a lawmzia te nen chuan.


Chutah Jerry-a chuan, "Ka tih reng kha, Sheriff. Bill-a hi chuan Bank a rawk duh chu ka ringlo reng a ni. Nichina silai han puak dawt pawh kha Bill-a thihna tura i hmehpuah a lo ni maw? Lo kaphlum na la chuan i chaklo viau ang. Ka naute ho zawng zawng ka rawn hruai anga, a chaihin kan chaihhlum thak mai tur che hi a nia," a han ti nuah nuah a.


Sheriff Simon-a ngei pawh chuan, "Kei deuh hian ka lo kaphlum hmang tih ka hlau a nia. Mahse ka kaphlum ta em lo va, hei tunah pawh ala tawng ve zat zat alawm," nui vur vur chung hian a han ti ve a. Chutah an misual mante chu jail bang zut tur chuan a chhawmlut ta diah diah a.


Roper-a chuan, "Engtin nge maw iva umphak a, a man pawh i rawn man vek theih ni le?" ngaisang tih hriaat tak lehg mak ti fe hian a han ti he haw a. Bill-a chuan, Hriatlawkna ka neih vang a ni e. Intlansiak laia Broke Hill Stone kan va tlanhel lai tak khan henghote hi hla taka an kal tham tham hi ka hmu a; hmai antuam nia ka hriat takah phei chuan ngaihthatlohna lian tak ka nei nghal a. Chuvang chuan nangni pawh hmanhmawh phelengin ka tlansan ta che u anih kha. Mahse ka duh aiin ka tlai ta hrat a, an thawm erawh chu hriain ka umzui ta vut a nih kha. Ruang pawh kha ka hmu tho na a, a pawimawh hmasa zawka ka hriat avangin ka um nghal ta mai a ni," tiin a han hrilhfiah a.


Chutah Bill-a chuan a riltam zia chu han hrechhuak thutin, "E khai, ka pumpuiah hian bean mu fanghnih lek an inumkual ta zar zar mai. Ka pumpui hnawhpuar hi ka hnathawh chhan ber pakhat a ni asin le. Titeh u, kan chenna hotel lamah khan i phei thuai thuai teh ang u hmiang," a han tichhuak phawng mai a, tichuan hotel lamah chuan an inzui phei ta hlawm a.


Hotel an thlen chuan an lo la mu bik hauhlo mai a. Bill-a chuan a sakawr jean-te chu a hlihfel hnu chuan coral chhungah chuan a sakawr pawh chu a va dah fel nghal vat a. Duhtawka chaw a han ei meuh chuan a riltam tawngkhawng tawh bawk a, a eihnem nangiang reng a. A chawei kham chuan cigrattee a han zu leh te te a, a room lamah chuan a kal ve ta nghal a.


Mu chung chuan chumi nia a thil tawnte chu a han chhuikir neuh neuh va, maktihna tak pawh a nei tlat mai. Engtin nge khang misual ho khan a hun tak, mi rehlai taka Bank kha an rawk theih mai le? Engvangin nge sakawr intlansiakna hmun kha khua atanga mel chanve zeta hlaa buatsaih anih le? Bureau khawhmawr kawtthler kawng pawh kha mel tamtak daih tura kawng pawh ngil tak leh zau tha tak a ni tho si. A remchang lo zawk leh rualrem lo zawk engati nge an zuk pan kher le tih te chu a ngaihtuah neuh neuh va.


Tin, Banason-a khan engati nge lawmman ah dollar sangkhat leh zanga lai mai a phal theih le tih te a han ngaihtuah a, mak a ti hle mai a. Chu Windham Bank rawkna ah chuan inhnamhnawihna nei ve tlata rinna te chu a neihphah rum rum a. Mahse a hmel han en kha chuan chutiang thila inhnamhnawih duh awm hmel puin a hre bawk si lo. Engpawhnise, atuk khawvar hunah Simon-a mi mane, jail-a a khung takte kha thu va zawhchian duhna te a nei rilru ta a. Anni khan tha taka an lo sawiduh hlauh chuan Banason-a inhnamhnawih leh hnawihloh chu a chiang mai zawk dawnin a hre ta a.


Banason-a chu inhnamhnawih satliah mai pawh ni lovin a khaipa ber pawh alo ni zawk mai thei tihte a ngaihtuah kual ta zel a. Chumi hnu chuan a taksa alo chau ve bawk nen, a muthilh lai pawh hrelo chuan a muhil ve ta bawrh bawrh mai a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)