Bill Jack Chapter-6

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-6

Unread post by Ruata Ralte » March 6th, 2020, 6:25 pm

Bill Jack-6
Retyped : Ruata Ralte


Bill a muttui em em lai chu a room kawngkhar zawn insawi dawt dawt chuan a tiharh hlawl mai a. Rang taka tho chhuakin kawngkhar chu ava hawng a, kawngkhar rawn sawitu Sheriff Simon-a chu rang takin a rawn lut thuai a.


A hmela hlauhthawnna nei tih hriat ngawih ngawih hian Simon-a chuan, "Bill, nizana i rawn man mi pathumte kha tukin chuan an lo thi der mai, a awmzia pawh ka hrethiam ta lo. Hliam engmah an tuar bawk si lo," a rawn ti ta a.


Bill-a pawh chuan chu thu a han hriat chuan mak a ti ve hle mai. Minute khat dawn lai chu thil awmdan ngaihtuahin a han ngawi vang vang a, chutah, "Mr. Simon, he thil hi thil ho mai mai chu a ni lo tawp mai. Tute nge an nih chu hrechhuak rihlo mah ila, henglai velah hian misual pawl liantham tak an awm ngei ang tih a rinawm a ni," a ti ta hlawl mai a.


Sheriff chuan ang huau chung hian, "Chung thilte chu engtin nge i rin theih ngawt a?" tiin a han zawt leh a. Bill-a chuan thawmhnaw inbel sawk sawk pah chuan, "Chu zawng, ka rinthu mai a nih chu. Engmah ka la sawi thei mai bik lo," tih pahin a gunbelt chu a hreng leh sawk sawk a an pahnih chuan Sheriff Office lam pan chuan an inzuichhuak ta a.


Office chhungah pawh chuan lut rih lovin, Office hnung lama jail chu an pan nghal a. Jail chu thir khauh tak, bang pawh nei hran lova pin anih avangin a pinna thirtlawn leh thirtlawn inkar, kutphah bawk lek tura awng suar suar atang chuan kawngkhar hawn kher pawh ngailovin a chhung chu a hmuhtheih vek a. Jail bul an thlen veleh chuan Bill-a chuan rang takin a chhunglam chu a han bih vat a. Zan lama hah taka a va man mi pathumte chu nunna nei tawhlo tih hriat tak hian an lo thal huang mai a.


Chiang lehzualin chung mi pathumte chu a han en leh vang vang a. Chutia a han en vel takah chuan thil mak tak mai a hmu ta tlat mai a. An vaiin chung mite chuan an ka an lo ang huau hlawm a, an kamsir velah chuan thisen pawh ni lo, rawng hring lam lek lek hi a rawn luangchhuak ngiai ngiai mai a. Chungte chu engdang ni lovin, tur chak lutuk mai an nih a ring nghet nghal hmiah mai a.


A bula ngawireng a loding Sheriff hnenah chuan, "Ka rindan chu dik tawlh tawlh dawnin ka hre ta. Han en ve mah ta che. Hliam tuar miah lova an thitheih nachhan chu an ka atanga rawng dang rawn luangchhuak te saw an ni ngei ang. Sawngsaw engdang ni lovin, reilote chhunga awlsam taka mihring nunna titawp thei tur chak lutuk a ni ang tih a chiang hlein ka hria," a ti ta a.


Simon0a pawh chuan chik lehzuala a han bihhnaih ve takah chuan, "I sawi ang chu thil nithei tak anih chu maw le," a rawn tichhuak ve ta a. Bill-a ngaihtuahna chakzia a han hriat takah chuan mak a ti lek lek zawk a.


A rilru a a ngaihtuahna rawn sawichhuak tih hriat deuh mai hian, "He pawl hotu ber hi zawng, engpawhnise thluak thawl tak chu a nih hmelloh hle mai. An pawl thuruk chu puanchhuah a ni ang tih hlauvin tu emaw chuan tur chak lutuk a pawn pe a ni ngei ang. Anihloh vek pawhin anmahni hian tur chu an lo pai a ni tal ang," Bill-a chuan a han ti leh a.


Simon-a chuan a ngaihna ala hre vaklo ni ngei tur a ni, a lo hawi ka ho ringawt a. Tihtheih eng vak an neilo tih a chiang bawk a, hotel lam pan chuan Bill-a chu a kir leh ta a. Simon-a pawh chu a mitangte ruang buaipui tur chuan a inpuahchah ve ta bawk a.


Tukthuan eikham veleh chuan Jerry Lawler-a leh Bill-a chu khawchhak lam mel sawmhnih vel tura hl, JL Ranch lam pan chuan an inzui chhuak dun ta nge nge a. Kalkawngah chuan sakawr intlansiakna leh bank rawk vel chungchangte sawiin an titi luam a Ni alo tlangsan tak hle hnu chuan kawng chanve dawnlai an thleng ta a, an sakawrte pawh chu tur hmanhmawh duh tawh biklo chuan anmahni kal kalin an kal ta hnak hnak a.


Chutia an titi dun bawrh bawrh lai chuan mit naran tana hmuh ve theih mai siloh, nizungin an chhak tlangbawk a thil engemaw a han em tlet zar chu Bill-a chuan a hmu ta zauh mai a. "Kun rawh," tih tuarh pahin a sakawr atang chuan a letthla nghal tawp a.


A taksa in lei a thlenthlak hma hma chuan thil tlezeuh a hmuhna hmun atang ngei chuan rifle hi a rawn puak nghal thuai mai a. Chu rifle mu han puakthuai mu chuan Bigger-a chung lawk chu a rawn thawi ta fua mai a, a bula lei chu a dengphut nghal chuaih mai bawk a. Lo letthla hmanlo ta sela chuan a thlarau chu a chhuak nghal vawn vawn ta ve ang.


Rang takin kawngsir hnimbuk lamah chuan a lirphei nghal tawp tawp a, hnimbuk kar a thlen veleh chuan bawkvakin fit engemawzat chu a tawlhsawn nghal thuai bawk a. Chutah kawng lam chu ava hawiphei leh a, kawngsir hnimbuk kara Jerry-a lo zuanglut ve mek chu a va hmuhhman chiah bawk a. Chutia Jerry-a lo insaseng ve thei a han hmuh chuan Bill-a chu a thaw huai a.


A pistol phawichhuakin hnim tihchet hlau tak chung chuan anmahni lo lambuntu te awmna lamah chuan Bill-a chu a tawlhchho ta hrauh hrauh mai a. Chupa pawh chuan Bill-a tawlhluhna vel hnimbuk chu ala rawn kap thuai thuai reng a. Mahse a chanchhe zawkah a tang ngei dawn tih a ring nge ni, reilote ah chuan rifle puak ri thuai thuai chu a reh a, sakawr tlan ri tak tak chuan a zui leh ta a.


Inbumna thil mai anih takin tih thu ah Bill-a chu ala inlan duh mai chuang lo va. A bula hnimbuk te chu a han sawi cheleh det det a, chutih rual chuan a awmna chu a sawn nghal zel bawk a. Mahse hriattur engmah a awm tak lovah chuan anmahni lo lambuntu chu a tlanchhe ngei a ni ang tih a ring ta a. A chhak lawk, lambuntu pa in a lo channa lamah chuan hmanhmawh tain a chho ta a.


Chulai hmun a han thlenchhoh chuan che zeuh pawh hmuh tur a han nei ta lo. Chupa chuan a lo changrei tawh hle a ni tih pawh alo thutna bul vela sikret bung let ram mai atang chuan a hriat theih a. A lo nghahna pawh chu lambun nan chuan duhthusam hi a ni ringawt mai a ni. Anmahni changtupa awmdan tak nia a rin danin a han thu chhin vel a, chutia a han thu chuan a thlang lam kawng chu a lo langchiang kher mai. Kawng atanga rawn hawichhoh erawh chuan a hresa tan lo chuan hmuh a harsa hle ang tih a hriat a. A remhriat dante a han hmuh takah chuan fing a ti rilru hle nghe nghe a.


Chulai vel chu ngun tak hian a han fangkual leh thuak thuak a. Tlangchhip letliam lawkah chuan anmahni lochangtupa sakawr hniakte chu alo awm dup mai a. Mahse chu sakawr hniak chu danglam riau hian a hria a, sakawr atanga chhuk neuh chuan a zu bihhnai ta a.


Chu sakawr hniak chu an phir deuh thaih vek a. Chumi awmzia chu anmahni lochangtupa chu Red Indian anih loh vek leh Red Indian ho tihdan a sakawr thir pheikhawk hmang ve lo a ni tih chu a hre ta a. Chumi hnu chuan engemaw tal hmuh leh tumin a han fangkual chiam aengdang vak a hmu ta hlei lo va. A hmuhtheih chhun chu mocasin pheikhawk, savun nemchi a siam hnuhma, fiahlo tak te chu an ni a. Lambuntu pa chuan a hnuhmate chu Indian ho hnuhma ang taka lantir a tum nge, amah chu Indian a nitak tak em tih chu ala chiang chiahlo nain, a sikret zuk atang chuan Indian anih lohna a langchiang hle hian a hre thung a.


Thil dangah chuan Indian pasalthate hnuhma nena danglamna pawh a awm vak lo va. A rifle kartut ruakte pawh hmaih nei hauhlo va a chhar leh vek danah chuan Indian pasalthate tihdan a ang hle a, mahse a sikret zuk bung atang chuan a ni lo tih a chiang hle si. Indian ho hian mei an zu ngai hlek lova, a zu chhun mi tlemte pawh hian ramvahnaah reng reng an zu ngai miahlo tih te chu ani hian a hre hnehsawh hle mai si a. Mihring luvun an lak an lawmna ah te, intihhlim tum leh an chawlh hahdam laite chauhvin an zu ve thin a ni. A reng thu-ah, a lo changtupa chu Indian pasaltha lo ni ta sela chuan chuti mai chuan a tawpsan lo tawp ang a, a silai ngul pawh kha ni em tlet theih lohvin a tidum vek ngei bawk ang. Chutiang vel ngaihtuah nauh nauh chung chuan kawngpui chu a zu pawh leh ta a.


A han hawi vel a, Bigger-a chu a hmuh mailoh avangin chang a han tum raih a. Chu veleh a piah lawk kawngsir atang chuan Bigger-a chu a rawn penchhuak ta thoh thoh mai a. A pu zirtir dan chu hriain kawngsirah a lo inthiarfihlim ve zawng a ni ngei mai. Jerry-a sakawr erawh chu a puin a zuanthlaksanna ngai ngaiah khan a lo la ding vung vung thung a.

Bigger-a chunga invawrhkai nawlh pahin Jerry-a awmna lai niawma a rinte chu a han melhkual zung zung a. Mahse a hmuh tak mailoh avangin Jerry-a sakawr lamah chuan a phei leh ta a. An va thlen phei chuan Jerry-a pawh chu hnimbuk tawn che laih laih hian a lo chhuak ve ta hlawl mai a. A sakawr chunga lawnkai ve taih taih pah chuan Jerry-a chuan, "Engmah i han hmu biklo a ni maw? tiin a han zawt a.


Bill-a pawh chuan, "A fing khawp mai. Min kap fuhlo tih a han hriat khan a tlanchhe ta mai alawm maw le," tiin a thil hmu leh a ngaihdan te chu a han hrilh thuak thuak a.


"Lemchan a thiam vaklo anih dawn chu. Mahse engtin nge hemi kawng kan zawh dawn tihte alo hriat theih mai le aw! Mak ka ti hle mai,"


"Keipawhin chu tak chu a ni ka hriatthiam loh chu ni. Sikret hehtak te anih ngawt loh chuan a sikret zuk bung tam dan han ngaihtuahin tukin zing atangin min lo chang tawh niawm tak a ni lehnghal vei nen. Engpawhnise, nimin lama thilthlengte nen khan ala inkaihhnawih chhoh vek chu ka ring. Engtik hunah emaw chuan kan la manchhuak maiin ka ring a ni,"


A hnu lawkah chuan thil hriatchhuah thar thut nei niawm tak hian Jerry-a chuan, "Ekhai, taka. Niminah khan ilo hmuh ve ngei ka ring. Pete Banason-a sakawr var ke kha khuhtu awm a awm hauhlo tak asin. Ani chiah kha a ni sakawr ve vuah lova hmang ka la hriat ni," a tichhuak ta phut mai a.


Bill-a erawh chuan alo hmu ve hauhlo ni tur a ni. "Chutiangin a sakawr kha alo hmang a ni maw? Chuvang chu anih dawn chu a sakawr tlanthawm pawh kha a zawi mange ka lo tih. Chuti takin ka lo enchiang ve lem hleinem," a ti han deuh ha a. Chutah thil nithei awm angte a han ngaihtuah zung zung a, Pete-a chu a ni thei mai awm mange a ti rilru ve ta a. Pete-a kha Bank rawkna hun awmtheihna chhan, sakawr intlansiakna buatsaihtu Banason-a fapa a lo ni chiah mai bawk si. Chubakah Pete-a'n awmze nei deuh taka amah Bill-a a rawn melhdan te kha a han ngaihtuah chhuak a, thil awmdan chu hrefiah uarh uarh hian a inhre ta a. Pete-a khan eng sikret nge a zuk thin tihte chauh chu finfiah la ngai chu a ni tihte a ngaihtuah nauh nauh va.


Chutia titi bawrh bawrh chunga an kalzel lai chuan JL Ranch ramchhung chu an thleng ta der mai a. Jerry-a chuan, "Ka ramchhung kan thleng ta e, Bill. Han enkual ve mah teh. Harsatna tawk lova hna kan thawhtluan zel theih chuan reilote chhungin bawngrual chu sang tam tak kan vulh thei ngeiin i ring ve lo maw?" hlim takin a han ti a.


Bill-a pawh chuan Jerry-a ram vel chu a han enkual vel a bawngvulh nan nana na chuan ram tha tawp, duhthusam ni hliah hliah hian a hria a. Chu ram chu mit tlin tawk mai hian a hringdup mai a, a ram lai takah chuan englai mah a kangchat lo tur tih hriatreng hian luitui thianghlim tak mai hi a luangkawi ngiai mai bawk a.


Reilote ah chuan ranch pawh chu an thleng ta a Tualzawl an han thlen chuan mipa naupang pakhat, kum sawmpahnih mi vel tur hi an lam pan chuan a rawn tlanphei chan chan a. "Papa, iva rawn haw har ve? Sakawr intlansiak chu a hmuhnawm em? Tunge i rawn hruai hi?" tiin apa chu a han vir that that a.


Jerry-a chu a sakawr atanga chhukin a fapa chu a lo kuah ve chawt a. "Monte, ka rawn hawhar lem em ni? Nimin khan intlansiakna chu kan en a, vawiin ah ka rawn haw lehnghal vat anih hi. Hei, ka rawn hruai hi Bill JAck a nih hi. Kan hnenah hian a awm ve dawn a, min pui dawn a ni. Nimina sakawr intlansiakna ah pawh lawmman pakhatna dawngtu anih hi. In pahnih hian in inkawp anga, sakawr chungchuan dan leh silai kahte pawh ala zirtir dawn che nia. I awm angem?" tiin a fapa chu hlim hmel tak hian an chanchin te chu a han hrilh suah suah a.


Monte-a pawh chuan, "Papa, i titha lutuk, ka lawm khawp mai. A hmel pawh a tha a, a zaidam hmel bawk si. Papa, kan hnenah a awm reng ang tiraw?" nui var var chung hian a han ti ve nghal mai a.


Mahse chu zawhna chu Jerry-a chuan chhan mai harsa a ti deuh ni ngei tur a ni, a ngawi ta reng a. Chu chu Bill-a chuan a han hmuh chuan a sakawr atang chuan a han chhuk zet a, "Tlangval, i bulah chuan i tlangval hun thlengin ka awm ve reng dawn alawm," tiin a rawn chhang ta thuai a.


Bill-a'n chutianga a rawn chhan tak mai avang chuan Jerry-a pawh chu a lawm rilru hle a. Engchen nge an ranch-ah chuan a thawh duh ang tih alo ngaihtuah ve reuh reuh thin a ni.


"Monte, Bill tiin ko mai la, chu chu ama duhdan tak pawh a ni. Tin, Bill, hei hi ka fapa neihchhun Monte Lawler anih hi. In innel dun viau pawh ka ring a ni. Tin, hei, anni pahnih hi hun reitak atang tawh a min lo buaipui thintu Money-a te nupa an nih hi. Monte-a nu erawh hi chuan hrisellohna avangin kum hnih kalta khan min peihlohsan tawh a," tiin an awmpui te nupa leh an chhungkaw chanchin te chu a han hrilh a. A nupui a han sawirik vel lai chuan sawi har pawh a ti ang reng hle mai a, a hmelah chuan tawrhna leh lungngaihna a rawn langchhuak hial a.


Bill-a pawh chuan chu chu lo hrethiamin, "In naute ho chu hnathawkin an chhuak bo zo a ni maw?" tiin thudangah a lo pakaipui ta daih a.


Jerry-a chuan, "Anih dawn hi. Kan naute ho hi zawngin kei aimah hian thahnem hi an ngai a, hahdam deuh zawk a hna thawk tura ka hrilh ngial pawhin an zawm duh tlatlo thin zawk a ni," tiin a naute ho felzia chu sawiin a hmel pawh a rawn hlimhmel leh ta deuh va.


Tichuan an sakawr jean te chu phelhin ranch tualzawl vel a hnimhring pet tur chuan an thlah ta a. anni pawh chu inchung lam pan chuan an inzui chho ta diah diah a.


Chu ranch chu a chhawnga sak, te fel ren rawn hi a ni a. Cowboy ho riahna bunkhouse erawh chu a dung leh vang intiat reng, lian tha zeta sak hi a ni thung a. Ranch leh bunkhouse inkarah chuan corral a inhung kual raih bawk a. Chumi ep chiah kawtzawl lehlam sirah chuan thal alo nih huna sakawrte eitur chhekkhawlna in liantha tawk tak hi a awm bawk a.


Bill-a'n chung zawng zawng a han hmuh chuan a nu leh pate damlaia an ranch nen khan inang riauvin a hre ta a, a lungte chu a leng thar ta hle nghe nghe a. An ranch nena a inan lohna chu thil pakhat chiah a awm. An ranch tualzawl sirah kha chuan pangpar huan mawi tak kha a awmkual pat kha a ni a, hetah erawh hi chuan pangpar hmel pakhatmah hmuh tur a awmlo thung. Mahse chungte chu nuber a awm tak lohvah chuan tuin nge rawn enkawl ta reng ang ni?


Tlaini alo tlak dawn ruaiah chuan sakawr rualkhat tlanthawm hi a rawn ri tak tak a, chuveleh Jerry-a chuan, "Kan naute thenkhat an rawn haw ta anih chu," tihleh pawna chhuah a rual ta nghal a.


Bill-a pawh chuan a zuichhuak ve nghal vut a. Tualzawl an thlenthlak chuan JL Ranch cowboy pali pawh chuan an rawn thleng ve chiah bawk a. Hnathawkzo rawn hawhlim hlawl nimah se hahhmel pawh pu lovin an sakawr jean te chu an han hlip lehnghal sang sang a.


La hmuh ngailoh tih takah Bill-a chu an enduh hle mai. Jerry-a chuan, "Kan zinga rawn tel thar tur a ni a, a hming chu Bill a ni. Ani hi lo awm hlauhlo phei sela chuan in pu hi min hmu leh tawh ngai kher lovang. Bureau khaw saloon chhungah chuan Solten-a hote nen kan inhnial a, engemaw chen hnuah chuan silai an chuh ta mai a. Chuveleh ani hian min lo pui thuai a, ui dawih zawk ang maiin meikhupin an chhuak ta dal dal mai anih kha," tiin a naute hnenah chuan Bill-a chu a han hmelhriattir a. Intlansiakna lawmman latu anih bakah Windham Bank rawktute a man vek thute thleng chuan a hrilh ta a.


Anni ho chuan an pu thusawi chu ngaihnawm ti tak hian an lo ngaithla dak hlawm a. A han sawi zawh veleh chuan an zinga pakhat chuan, "Ka lokal ve talo chu aw!! Solten-a hote nena han inkah pawp pawp mai chu ka chak asin maw le," ner nang nang chung chuan a han ti lar lar a. Chu veleh an zinga pakhat, thau lam lek lek, hmaibial deuh chim chem chuan nui tat tat chung hian, "Khaih khaih, Noisy. Insum deuh hlek teh. I sawisual palh anih kha. Kan Solten-a fanu hmeltha in alo chhan anga, i tlawm der mai tur a nia," a lo tih tak zauhvah chuan midangte chu an lo nui hak a.


Ani Noisy lah chuan han nuihliam ve mai chu alo tum bik awzawng lo mai. "Tak che hian, kan pi Money-i chawmthau satliah thin hi a! Khawvela nula awmchhun pawh ni sela Solten-a fanu anih chhung chuan ka..."


A la sawi lai mek chuan ava auh-a bawk khan, "Solten-a fanu anih chhung chuan i hlau bik dawn reng reng lo a nilawm ni?" nuichung bawk hian a han tileh a, an nui leh ta ham hamj a.


Ani Noisy-a pawh chuan han thinrim der ngial chu tum mah se tihzel ngaihna hre ta hek lo, "Chutiangin sawi ka tum mai mai lo ve," a han tileh ngawt a, an nui uar zual sauh va.


Chutia an nuih ham ham lai chuan JL Ranch Foreman leh a kawppuipa chu an rawn lang ve leh ta hlawl mai a. A naute lo nui dar dar ho bula a sakawr han pawhdin pah chuan, "Ekhai, in va han hlim dar dar ve. Noisy-a leh Batt-a te pahnih an lo inhnial leh em ni? Nangni pahnih hi zawng, Vanramah pawh kal ula, in la inhnial fovin ania ka rin ni," tih pah chuan a sawkawr atang chuan a rawn chhuk ve ta nghal a. A naute ho zinga BIll-a lo ding ve reng chu tunge anih hriat tum niawm tak hian a han thlek vang vang a. Chutah Jerry-a bawk chuan, "Bill Jack anih hi. Vawiin atang hian in zingah a rawn tel ve dawn a ni. Tin, Bill. Ani hi kan foreman, Mart Bren anih hi," tih pah chuan midang hote nen chuan a han hmelhriattir ta a.


Mart-a pawh chuan nelawm hmel pu tak chung hian, "Tunah chuan mifel pakhatin kan pung leh dawn ta anih hi. Kan indaih deuh sawt anga, Veldon-a phun reng mai thin pawh hi a ziaawm deuh tawh ngei ang," tihpahin a naute zinga pakhat chu a han fiam pah a.


'Veldon' ti-a a lam pa chuan an foreman chu melh zauh pahin, "A ti leh ta rawk e. A hna ngamlo ber leh chiarkawi tam ber hi a ni si a, 'Thawk ve tawh rawh' tih ngawtloh phei chuan kan hnathawk laite hi nileng thak pawhin min en peihin ania ka rin ni," a han ti ve bai bai a, an nui zui leh ta ham ham a.


An fiamthu duhdan leh hlimtlan theihzia Bill-a'n a han hriat chuan an zinga awm ve chu nuam dawn hle hian a hre ta tulh tulh a. Chung a thianthar turte mizia a han hmuh chuan hunrei tak kal tawha a kalsan tak Billy-a nena an khawsak thin dante kha a hriattir zawk mai nghe nghe a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)