Bill Jack Chapter-7

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-7

Unread post by Ruata Ralte » March 7th, 2020, 5:41 pm

Bill Jack-7
Retyped : Ruata Ralte


Zanriah eikham hnu chuan Lawler-a chuan a foreman leh a naute ho chu ama chenna lamah chuan a kochho ta hlawm a. An rawn thlenkim thap hnu chuan muang dap hian thu a sawi ta a.


Hei le, naute u. Ka hlauh rilruk thin leh duhloh ber, kan ranch thenawmte nena inhmelmakna chu a lo intan ta a ni phawt mai a. Theihtawp chhuah ka inbengdaih hram hram hnuah pawh mi thah duhkhawpin ka chungah an la thinrim miau si a, hetiang mite thiltih dan titawp tur chuan anmahni chet ang bawka kan chet ve a tul dawn ta a ni. Mahse tumahin a tul tawpah lo chuan in thinrimna te tilangin silai pawh in hmetpuak mai tur a ni lo vang a, tin, Solten-a bawngte hi kan va ruksak ngailo tih chu kan vai hian a hretu pawh kan ni a. Ruk chu sawiloh, an ramchhung va dai pawh hi kan zingah hian kan awm bawk hek lo."


"An bawngte chu an hloh fo va, keini pawhin engemaw zat chu kan hloh ve fo thin. Chuti anih chuan kan inkarah hian siamtum an awm em ni ang tih pawh a rintheih a. Chuvang tak chuan a ni, Bill-a pawh hi min pui tura ka sawm nachhan chu ni. Amah pawh hi ka la hrilh hauhlo va, a hnathawh tur chu bawng enkawl nilovin he thil inthup min zawnchhuahsak tur hian a ni zawk. Atan pawh thil hlauhawm tak a niin thihpalh mai pawh a awl hle ang. Chuvang chuan a duh anih phawt chuan englaipawhin a inhnukdawk thei ang," a ti ta charh charh a.


Bill-a pawh chu a thutna hmun atanga rawn dingchhuak ve meuhvin, "Pu Jerry, min hlauhthawnpuina avangin a lawmawm hle mai. Mahse ka tihtur a lum tawh chu ka tlanchhiatsan mai ngai lo ve," a rawn tichhuak ve ta ngat a. An lawm tlang hle ni ngei tur a ni, kut an lo beng dar dar a.


An thianthar turin an pu nunna a rawn chhanchhuah dan leh Windham bank rawktute a chhuichhuahdan te chu an hre hlawm tawh bawk a, an ngaisangin an chhuang rilru hle hlawm a.


Foreman, Mart Bren chuan chumi nia an hnathawhdan te report a pek fel hnu chuan reilote an han tawi khawmuang leh phawt a, chutah bunkhouse lamah chuan an inzui thla ta ham ham a. Bill-a erawh chu puberin a ngen tlat avangin ranch chhunga room pakhatah chuan a riak ve ta thung a.


Muthmunah chuan Banasona chanchin bawk chu a ngaihtuah leh nauh nauh va. Windham Bank rawktu misual pawlah khan hotuber lo ni ta se, heng ranch pahnih, inthenawm dunte kara buaina siamchhuaktu pawh hi ama remruat leh duhdan veka tih ava nimai awm em! Chung ranch lian ve ve tak maite inhmelmakna chuan a vawrtawp ala thleng ngei anga, chumi hnuah chuan heng ranch pahnih te hi an ral der anga; anihloh leh tuemaw zawk tal chu an ral ngei ang le. Chumi hnuah chuan an ram, an rauhsan mai tur ram tha elkhen mai chu tunge rochung ta ang? Amah Banason-a chu henglaiah a nuamsa ber pawl a ni a, ani chuan a rochung thei mai angem? Mahse Banason-a lah chu tumahin rinhlehawma a awm an la hre hauh si lo. A hriattheih chhun lah chu Banasona ngilneihzia leh hausakzia lam a ni daih thung bawk si. Chungte chu a han ngaihtuah vel chuan Banasona thiltih ni theiin a ring bawk si lo.


Atuk khua a lo var chuan Bill-a chu midangte thawhhmain a tho thuai a, Choka ah chuan chhukin Pi Money-i coffee siam, sa tha ver vawr chu a han dawt hlak hlak phawt a. Chutah Bigger-a chu corral atanga lachhuakin a jeans chu a han bel leh nawk nawk a. Tukthuan ei hmaa JL ram chin chu a tam thei ang ber tlawhkual hman tum chuan a chhuak ta a.


Chutia a han fan vel takah chuan a neitupa Jerry-a'n alo fak viau pawh kha awm hlein a hre ta a. Hmuntin maiah chuan hnimhring a awm dup mai a, chungah te chuan bawngrual thau tha tak tak hi an lo tla sup sup mai bawk a. Chung hunlai chuan tumahin mahni ram chin hungte hi an duh hran lo va; mahni ramchin hung chu sawiloh, a hungtute chu an ngainep hle zawk thin a ni. Chutiang anih avang chuan Bill-a pawh chu Jerry-a ram chin nia a hriat thleng chuan ava kal ve ta tawp mai a. Tukpuma a han faankual vel chuan JL ram chhimlam chu fangchhuak thawkhat hle hian a inhria a. Tuktghuan eite a lo hun ta bawk a, ranch lam pan tumin a inher ta a.


Ranch lam pan tura a inher lai chiah chuan hmeichhe thlabar te thawt thawt thawm a hre ta thut mai le! Khawilai atanga aw chu lochhuak nge tiin a han ngaichang leh hlek a, chutah kalsan a lo tum mek lam, chhimlam bawk mai chu a ni tih a hre ta thuai a.


Hmanhmawh tak chuan a sakawr chu a han kuaiher leh lawp a, hmeichhe te tuar tuar thawm a hriatna lamah chuan a lim pheitir ta puat puat mai a. Reilote ah chu hmeichhe thlabar pawh chu a va hmu ta thuai reng a. Chu hmeichhia chu kawrkam, hmunzawl lai deuh va chirhdiak hmun, fit sawmhnih leh panga bial vel turah hian a lo tang a lo ni a. Chu chirhdiak chu han en mai chuan vaivut satliah ni mai awm hian a lang a, mahse vaivut awzawng a ni hauhlo.


Chu chirhdiak chu 'Quick Sand' an tih ang chi hi a lo ni a. Chu hmeichhia pawh chu a ban bul thlengin alo hip pil hmuk tawh mai a. Minit chanve lek pawhin han tlai hret sela chuan a lo pilhman ngei ang le.


Hmanhmawh tak hian a sakawr atang chuan a chhuk ta thuai a. A hruizen chu phelh sawk sawkin a hmawr lehlam chu saddle ah chuan a han thlungbet thuai a, a hmawr lehlamah erawh chuan a awmah inthleng bet ve nghalin chu hmeichhe ban vai lap lapna hmunah chuan a zuk zuangthla ve ta bawrh mai a. A ni pawh chu chu chirhdum chuan alo hip ve nghal vung vung mai a. Chu hmeichhia chu harsa tak chung chuan a lamah a han pawthnai a, a zakhnuaiah chuan akut chu zenlutin a kut chu a suih ta tlat a. Ala reilo hle na a, Bill-a pawh chu a zakhnuai thleng chuan a pil ve nghal chu a ni ta mai a.


Chutah Bill-a chuan, "Big, min han hnukchhuak teh le," tiin a sakawr chu a han au that a. Bigger-a pawh chuan a pute pahnih hnukchhuak tur chuan a chechhuak ve ta nghal a.


Quick Sand hipna chaktak maiin mi pahnih ngawt a hipna chu sakawr naran tan chuan han hnuhchhuah zawh chi rual a ni lo va. A tirah chuan ani ngiang pawh chuan a hnuk che zo ta mang lo va, chumi a han hriat chuan Bill-a pawh a mangang rilru ve ta hle mai a.


Chutihlai chuan Bill-a pawh a koki thlengin a pil ve tawh a. Hmeichhia phei chu a nghawng thlengin a pil zo tawh a ni. Mahse chutia tanpuitu a han hmuh tak avang chuan thawm a chhuah tawh bik lo va, mahse chu chirhdiak chu an him takin an chhuahsan thei ngei angem tih chu hriattheih a ni ta tlat lo. Anmahni hnuktu skawr lah chuan a hnuk che det det thei chauh a ni mai si a!!!


A zakhnuaia hruaizen hlinna pawh chu Bill-a chuan na a titawh hle mai a. Bigger-a chu a han en chho va, ani lah chuan hnuhsawn chu sawiloh, Quick Sand hipna chuan a pawtlet ve lek lek zawk ni te hian a han hmu a. Chutah Bill-a chuan ring zet mai hian, "Big, i chakna zawng zawngte kha khawnge an awm zawh tak? I thapui kha han chhuah leh ta che," a han ti tuarh mai a.


Bigger-a pawh chuan chutia fiah thaka a pu au ri a hriat takah chuan manganna tawpkhawk a ni tih a hrethiam ve ta ni ngei tur a ni, ring em em mai hian a han hram ta nghur nghur mai a, thapui a han chhuah tan ta tak tak mai a. Chu meuh erawh zawng Quick Sand hipna chaktak pawh chuan a dawl zo ta lo. Bill-a leh hmeichhia pawh chu tlem tlem chuan an chhuak ve ta hret hret zel a.


Bigger-a chuan a thapui tak meuh a chhuah a ni bawk a, a tn lakna lai leite chu a haikhawk hlawk hlawk mai a. Hruizen lah chu a chat mai ang tih hlauhawm khawpin a fan awk awk mai bawk a. Chutia minute khat dawnlai tan a han lak hnu chuan a pute pahnih chu a hnukchhuak ve ta hlawl mai a.


Bill-a chuan a awmbawr a hruizen hrenna chu na a ti hle mai a, thawk pawh a harsa lek lekin a hre ta hial a. Hmun him chinah chuan hruizen chu harsa titak chungchuan a han phelh a, a awmruh leh dar ruh thleng mai chuan a bal vek mai dawn emaw tih tur hian a na thum tawh mai a, chauh pawh a chau hman viau reng a ni. Hmeichhia pawh kha a chau hman ve hle a ni ngei ang, a mit takngial pawh a meng peih lova, a mu zawi nghiai mai a.


Hruizen chu a han kual leh malh malh a, a sakawr jeans filawra han ban leh pah chuan, "Big, i titha lutuk tlat. Sakawr chak tak zawng lo ni hlauh lo la chuan ipu hi i hmu leh tawh hauh lovang," tiin a sakawr chu a han fak mawlh mawlh a. Bigger-a pawh chuan a lu alo bu ve nghoh nghoh va, a pu chirk kai, rimchhe tak chu ngaithei lo niawm tak hian a ner ve nung mai a.


Bill-a chuan chu hmeichhe sakawr chu a han melhkual vel a, a hmu zo hauh lo mai a. A pi thlabar te tuarh tuarh thawm khan hla takah a umbo ta daih a nih ngei a ring ta a. A hmeichhe chhanchhuah, mu zawi hnep reng mai chu a panphei a, ani chu a hma ang bawk khan alo la maimichhing ta reng a. A han sawi deuh nawk nawk a, reilote ah a rawn mengchhuak ve ta lap lap a.


A rawn menchhuah takah chuan a mitmengte pawh chu a lomawi hle mai a; a hmel, hlauhna avanga dang lap tawh pawh chu thisen lum chuan a rawn fanchhuak leh ta thuai a. CHutia hmel pangngai a han put leh takah chuan a hmelthatzia chu Bill-a chuan a zuk hmu ta a, mit lalo lek chuan a thlir ta vawng vawng mai a.


Engemawti tak hian awm deuh riauvin a inhre ta tlat mai a. Chutiang reng renga hmeichhe nalh chu a lo la hmu ngai hauhlo mai a, a tituai atang chuan nula ala nih ngei pawh a ring ta hial a.


Nula pawh chuan a mitmeng paw ram mai chuan mit khap bik hauhlovin Bill-a mitmeng dum kak mai chu a lo thlirchho ve reng mai a. Chutah nalh fahran maia nuihsak pah chuan, "Min lo hruaichhuak thei ta maw? Ka him tawh tiraw?" lawm hmel tak chuan a rawn tichhuak ta a.


"Aw, i him tawh e, ka pi. Tun hnuah chuan helai vel hi tlawh tawh hauh suh ang che,"


"Kapi ti lova Jenny tia min kohtheih chuan ka lawm hle ang. I sawi angin helai hmun hi tlawh ka tum tawh hauh lovang a, ngaih zuina chhete ka neih pawh ka inring hek lo,"


"Ka pi, aw... Jeny, keipawh Bill JAck ka ni a, ka thiante chuan Bill tiin min ko mai thin. Nang pawhin chutianga min koh ve theih ka beisei,"


Bill-a han tawngbah deuh nak chuan nula nuih chu a tiza deuh ni ngei tur a ni, a rawn nuichhuak ta hak hak a. Mahse a chauh deuh vang nge ni, a nui reilo hle thung. Harsa tihmel zet hian han thawhchhuah a tum a, Bill-a chuan a lo tanpui ta thuai a. Nula chu a rawn dinchhuah meuh chuan a rinai daih chuan a lo sang lehnghal a, amah Bill-a nen pawh chuan an lo inchen a lo ni.


Bill-a chuan, "Jenny, i sakawr a tlanbo daih anih hmel a, in awmna lamah ka rawn thlah mai dawn che em ni ang?" tiin a han zawt a.


Jenny pawh chuan a sakawr chu a hrechhuak ta thut a ni ngei ang. Phawk hra hian a han hawikual ngial a, a sakawr awzwng a hmu ta lo va. Chutah inthlahrun hmel tak hian, "I mi chhanchhuah tawhna pawh kha ka tan chuan thil lawmawm tawp a ni tawh a, thlah lehzel zawng ka ngai tawh bikin ka ring lo. Sawlai mai saw kan ranch a ni a, ke pawhin ka thleng thei maiin ka inring," a lo ti a.


Chutah Bill-a chuan thil hriatchhuah a nei ta zawk mai a, ka heuh ho chung hian, "Chu(?)! Solten a fanu, Lalhmelthai an tih chu ilo ni maw? An sawi ang nei chu ilo nih chiah hi le!" a tichhuak ve ta hlaui a.


Zah avanga hmai sen tan tan chung hian Jenny chuan, "Keini angte hmeltha titu an lo awm anih chuan lawmthu hrilhtlkak hianl an nih chu le. An mit a chianglo deuh a ni hial lawng maw?" a lo tilet a. Bill-a pawh chuan zak tawh biklo hian, "Ka mit hi han en la, chianglo deuhva i hriat chuan anni mit pawh a chianglo ve deuh a ni mahna! An hmuhdan che leh ka hmuhdan che hi a inang chiah a nih si hi," a han ti leh a.


Amah Bill-a vek chuan sawizawm lehin, "Nang ang nula hmelthate chu tuin nge ke a kaltir phal tehlul ang che le," Bigger-a lama kaih phei chu a rual ta nghal a.


Jeny chuan nuih ar ar pah hian, "Khawnge, min thlah teh. Keimah pawhin ka kal ve thei tho alawm," tiin Bill-a hnungzang chu a han chum taih taih a, a ruk tak erawh chuan a hawlo a ni tih a hriat a. Amah hi 'a chum na lo rual' an tih ang chi kha a ni ve tawh reng a ni.


An pahnih a Bigger-a chunga chuang chung chuan, Jenny kawhna lam zel ah chuan an kal ta a. A rilru a tlawh alo chak rilruk leh tum rilruk sa ran chu chhuanlam remchang tak nei sa a a tlawh thei dawn ta chu a lawm rilru hle mai nghe nghe a. Chu mai bakah nula hmeltha tawpthang nena an lo inchhar phahna alo ni zel bawk nen, a hlim rilru hle nghe nghe a. Jeny chu kha Quick Sand-ah khan a tlapalh lovang tih te chu a hlau rum rum ta hial a.


Sakawr pakhat chunga chuangte chu an vawikhat inhmuna chauh mah nise an rilru chhungrilah chuan inzawm rukna tak chu an lo nei reng tawh a lo ni a, mahse atua mah mah chuan an inzawm ru tih pawh an la hrethiam hauhlo. Bill-a, inhmachhawn pawha mi engemawzat lo tirirliam tawhtu leh misual tawrawt tak takte pawh lo tukzal tawhtu ngei pawh chuan chu hmeichhe hmeltha zet mai hmaah chuan a rilru a awm chu a sawichhuak ngam bik hauh lo.


Engemawchen ngawi renga an kal hnu chuan Jeny chuan, "Bill, henglai velah hian i hmel hi ka la hmu ngai hauh lo va, engtin nge khalai hmunah khan i rawn lan hlawl theih mai chu le?" tiin a rawn tawngchhuak ta a.


"Tunhma chuan ka la rawn kal ngailo reng a ni. Nimin mai atang khan Pu Jerry-a ranch ah ka rawn thawk tan ve chauh va. Tukin hian ramchin hriat nan tiin chhimlam hi ka rawn fang vel mai mai chauh a ni,"


Jeny chuan engtuin nge a ngaih ang tih chu a han ngaichang hlek a, mahse engmah a rawn sawi tak lovah chuan, "I pate leh Jerry-a te inngeihlohna thute hi pakhatmah hriat i nei ve lo nge, i pa rilru ang hi i pu ve lo zawk?" tiin Bill-a chuan a han zawt ta a.


Jeny chuan, "Ka hria asin. Mahse kei chuan Pu Jerry-a hian kan bawngte hi a ru duh pawhin ka ring ve hauhlo. Chuvang chuan huatna chhete pawh ka nei ve lo a ni," tiin Bill-a rinloh ang deuh chuan a ngaihdan chu a rawn sawi ta a.


Chutah Bill-a pawh chu engthawl ta deuh huai niawm taka thawk han lak hap hap pah chuan, "I ngaihdan chiah chu keipawh ka ngaihdan a ni. Mahse ipa pawhin thiamna chen chu a nei thovin ka ring. Heng in bawng rawn ru thintu te hian Pu Jerry-a ramchhung atanga an khalhchhuah a, an tih niawm taka an hnuhma an hnutchhiah zel anih chuan i pa tan pawh Jerry-a thiltih anga ngaihlohtheihloh a ni dawn tlat a ni," a ti ta a.


"Chutianga vawi tam tak in bawngrualte rukbo an lo nih tak fovah chuan i pa thinrim chuan ama kutzalin man chiahlo mah sela a titu ni ngeia a hriat Jerry-a hote chu ava khak ta a, anni bawng rulo nangiang chu an lo thinrim ve ta viau mai si a, chu chu i pa leh Jerry-a te intihthiamlohna bul tak chu niin ka hria. Ka rindan chuan heng thil hi ipa leh Jerry-a te inhmelmaktir duhtu thiltih vek a ni ngei ang. A duh nachhan pawh ipa ram emaw, Jerry-a ram emaw hi chhuhsak a duh vang anih ngei pawh ka ring. A khawi emaw zawk zawk pawh hi rawn luah ta se la, a chhuhsak loh zawk zawk chu gunmen rothap tak tak te nen engtik niah emaw chuan a la nekchhuak leh thovin ka ring bawk. Chumi hnuah chuan ram zautak neitu alo ni tawh ang a, Texas chhimlam bialah hian thiltihthei berte zinga mi a lo ni tawh mai dawn a ni,"


"Chu chu ipa leh Pu Jerry-a te inkara nuaina chawhchhuah tumtuthiltum ber chu anih hial ka ring. Kan hmuhchhuah thuai loh phei chuan a duhthusam ang pawh chu thlen ni ala awm ngei ang tih pawh a rinawm a ni. Heng ka sawi zawng zawngte hi ipa chu hrilh in hmin ngei pawh lo tum la ka duh khawp mai," tiin thil kalphung leh anin a lo thlirdan te chu a hrilh ta vek a.


Jenny pawh chuan, "I sawi ang chu a dik hmel dawn riauvin ka hre mai. Mahse ka hlauhthawn ber zawk chu anni pahnih hi an inbei thut mai ang tih hi a ni," a ti ta a. Bill-a chuan, "Chu tak chu thil hlawuhawm tak a ni reng a ni. He ngaihtuaha bawlhhlawh tak hi tithuanawp tur chuan nangin ipa hi ilo bitum anga, keipawhin Jerry-a chu lo beng daih hram hram ka lo tum ange. Chumi chhung chuan heng michimawm ho pawh hi kan manchhuak thei ngei bawk tur a ni ang," a ti ta a.


Chutia an tawng bawrh bawrh lai chuan ranch chu an thleng ta der mai a. Sakawr tlanthawm chu hriain Solten-a hote chu bunkhouse atang chuan an rawn chhuak ta phak phak hlawm a. Chutah an pu fanu, a taksa zawng zawnga chirhdiak hlira bet luai mai an han hmuh chuan nuihza si, nui tha ngam chiah silo hian an lo then tha hlawm a. Amah rawn hruaitu cowboy an han hmuh leh meuh chuan an zinga pathumte chu an nuih a za ve hauhlo mai.


Chung mi pathum ziunga pakhat chu bunkhouse a tlanlut lehin rifle hi a rawn lekchhuak ta mai a! Mahse an pu ber, Ranch in verandah atanga lo thlir ve rengtu Solten-a chuan, "I rifle kha dah bo thuai rawh," a rawn ti ta thawt mai a.


Thinrim viau mah sela pu ber thu na na na chu hnialngam bik hek lo, "Hepa hi alawm Jerry Lawler kan kahhlum dawn tuma rawn tanpuitu chu," tiin ner nang nang chunga phun chung chuan a silai chu a dah leh ta zul zul a. Bill-a pawh chuan chupa chu a pheikhawk keartui a kahthlawnsaka ngei kha a ni tih a lo hre ve nghal mai a, a nuihte chu a za lek lek zawk a.


Sakawr chu tidingin Bill-a chu a han chhukthla hmasa auh va, Jeny rawn chhukthla ve tur chu han tanpui pah hian, "I paitawih thei meuh nange?" tiin rifle rawn lekchhuaktupa chu a va au zui ve ta ngat a.


Jeny pawh chuan thinrim aw khur dar dar pah chuan, "Benrope, khatiang khan vawikhat lek pawh Bill-a hi i tih leh chuan i chaklo hle ang tih inhre mai rawh," tiin a lo vau zui ve khar khar bawk a.


Solten-a pawh chu a fanu bulah chuan a rawn chhukthla ve thuai a, rang tak hian Jeny chuan, "Ka pa, hei hi Bill Jack anih hi. Nichin lawk mai khan ka nunna min chhanchhuahsak a ni," tiin thil awmdan zawng zawng chu a han hrilh zung zung a. Solten-a pawh chuan, "Ka rawn hmu ve reng che u alawm. Bill Jack, i huaisen hle mai. Nang anga huaisen hi chu ka hmukhat teh asin. I sakawr khan lo pawtchhuak zo lo ta cheu sela chuan nangpawh kha i thi ve ngei ang tih chu i hre ve reng awm si a," a ti ta mai a.


Bill-a pawh chu za vak lova thentha chung hian, "Ni e, ka hrechiang khawp mai. Mahse kawngdang a awm tawh ngangloh bakah Bigger-a hian min hnuk zo ngei ang tih ka ring tlat a ni," tiin alo chhang a.


Jeny ngaihdan chu a nilo nasa ta mai. A pa pistol chu a phawisak lawk a, apa kuta pekleh pah chuan, "Min rawn hmu reng chung siin min tanpui duh hauh lova maw? Ka thih hi pawi i ti miahlo anih chu. I duh chuan min kaphlum nghal law law mai teh. Minit chanve lek pawhin Bill-a kha rawn tlai sela chuan ka thi ngei dawn tih pawh i hre ve reng si a," a ti ta siah siah mai a. A thinrim lutuk chu a tap lek lek ta mai a.


Chuveleh rang tak hian Solten-a chuan, "Ka fanu, aa viau teh suh. Ka fanu neihchhun ini a, ka rohlu ber ini tih pawh ka hria alawm. Itan hian hun reitak chhung chu hrehawm tak tuarin hna ka lo thawk tawh thin a, ka la thawk zel bawk ang. Chuti chung chuan i thih hi pawi ka tihloh i ring amaw? Nang i thih ai chuan kei ipa leh he ranch zawng zawng pawh hi an ral hmasa ngei ang," aw dul raih hian a ti ta chuar chuar mai a. A rilru pawh a na hle a ni tih a hmel atang ngawt pawh chuan a langthei mai a.


Bill-a pawh chuan, "Jeny, i pa sawi chu a dik chiah a ni. A tan rawn puih theih dan tur che kawng pakhat mah a awm lovang tih ring rawh. Remchang takin kei ka lo awm tho bawk si nen," tiin Solten-a chu a rawn thlawp ve thuai a.


Solten-a chuan, "I authawm kha sawlai tlang pang a sakah tur ka zawnlai sawn ka hria a, i awmna ka rawn hmuh ve meuh chuan Bill-a hi i bulah lo thleng tawhin chhanchhuak tur che a a rawn zuangthla lai kha ka rawn hmuhman tawk chauh a ni. Rawn tlanthlak ve nghal pawh ka rawn tum a, mahse ramvak satliah ve mai ka nih avangin ka rawn thlenthlak ve meuh chuan anih tur ang ang a ni hman vek tawh ang. Tin, rawn tlanthla ve pawh ni ila, sakawr tang fat fat lai khan ka thawm hriain a phili buaiphah vel ang tih kha thil hlauhawm tawp a ni bawk asin,"


"Sakawr kha lo phili buai sela, reilote ah kha Quick Sand khan a hippil mai dawn bawk si cheu a; kan naute va pun dawn ila, a tlai zawk dawn bawk si. Sakawr pawhin a hnuhchhuah zawhloh cheu chuan kei ipa tar lam tawh hian ka pawtchhuak zo dawn chuanglo cheu tih lah hriatsa a ni bawk si. Tihngaihna hrelo leh mangang tawpkhawkin ka lo thlir ta reng mai cheu a nih kha. Him takin in chhuak thei tih ka han hmuh veleh ka sakawr lak tumin ranch lam ka pan ta vat a, in chunga ka chhoh hlanin in rawn thleng chawpchilh ve ta mai anih kha. I thi pawi tilo anga min han puh chu a tisual zawk a ni e, ka fanu," tiin thil awmdan chu a sawichhuak ta dap dap a.


Chutah zet zawng Jeny pawh a inchhir ve ta deuh ni ngei tur a ni, a pa chu han kuah chuk chuk mai a han tum deuh va, mahse chirhdiak hlirin a khat tih a inhrechhuak leh thutin a thiltum chu a tawp leh ta chawt a. Chutih pah chuan, "Ka pa, ka lo tilungngai hman che a, pawi ka ti takzet a ni. I chunga ka lo tihsualah min ngaidam ang che," tiin thupha a chawizui leh ta zawk a.


Solten-a hmel durkhup tawh chu chutia a fanuin tisual palh inti taka thupha a han chawi veleh takah si chuan a rawn hlim hmel veleh ta deuh va. Chutah lawm tih hriat tak mai hian, "Bill Jack, Ka fanu chhanchhuaktu ini hi ka theihnghilh ngai lovang. Ka nunna min rawn pekir leh anih hi. Tanpui ve theihna che ka nei anih phawt chuan min rawn hrilh dawn nia," tiin Bill-a hnenah chuan a intiam titih ta hial a.


Bill-a erawh chuan, "Mi lawmthu sawi lo ngaithlatu nih hi nuam ka tihloh zawng tak a ni a, tupawh ni se, tanpui ngaite tanpui hi ka hrivei ve pakhat a ni reng a ni," alo ti daih thung a.


Solten-a chuan, "Ka naute lo tihdan ngawt che kha zialo ka ti hle mai. Tunhma a in inkar thu chu engpawh lo ni se, theihnghilh hram turin ka duh che a ni. Chubakah hnathawhlai neite i nihloh phei chuan nang ang mi huaisen, midangte tanpui nana mahni nunna hial pawh thap ngam hi ka mamawh khawp asin," a ti ta a.


Chutah Bill-a chuan a thil sawihreh em em mai chu sawi a ngai ta tih a han hriat chuan a han ngawi deuh vang vang phawt a. Mahse sawitlang law law chu nakin hnu atana tha zel zawk turah ngaiin, "A pawi ka ti ngawt mai, Pu Jerry-a hnenah nimin mai atang khan ka lo thawkfel hman tawh a ni," a ti ta nge nge a.


Chu thu Solten-a'n a han hriat chuan a phu deuh zuk nghe nghe a, hmuhtheih khawp chuan a hmel pawh a rawn danglam chawpchilh ta nghal a. Lei lam bih reng chung chuan, "Sawtiang bawng rukhmangte lalpa hnena i han thawk ta mai chu pawi ka ti hle mai. Mahse nangma duhthu ngeia thawk inih chuan an duhdan chu i tawmpui ve tihna pawh chu a ni mai bawk si a," a ti chuai ta raih mai a.


Chutia Jerry-a hming, 'bawngruk hmangte lalpa' ti hiala Solten-a'n a han sawi ri ta mai chu Bill-a chuan a longaithei ta mang tlat lo va. Nelawmna tel hauh lova Solten-a chu han melhkhai chung chuan, "Mr. Solten, i sawi ang chu a dik ngei em tih fiahna i hmuh hma chuan chutiang thu bawlhhlawh tak chu chhakchhuak tawh ngailo turin ka rawn a che. Tin, a tawp thak thlengin Jerry-a chu ka thlawp reng bawk ang. Rinhlelh thilthu mai mai a in rawn tibuai leh anih chuan in hmachhawn tur zawk chu kei ka ni ang tih hre bawk rawh u," a ti ve ta hmiah mai a. A mitmeng zimsan mai atang chuan a thinrimna tawk chu a hmu ngei a ni tih a lang reng mai.


Solten-a chuan han inher nghut pah chuan, "Chuti anih chuan bawng rukhmangte hremna chu nang pawhin i pumpelh thei bik dawnlo anih chu. Tun tumah hi chuan ka fanu tanpuitu, lo chhanchhuaktu i nihna avang chauhvin ka zuah rih ang che. Mahse hei hi lo hre rawh. Tun hnuah ka ramchhung hi vawikhat chauh pawh i rawn rap leh anih chuan ka fanu ilo chhanchhuahna mai hi chuan a humhim tawh hauh lovang che," tiin Bill-a chu a han vau zui leh ta a.


Mit pawh lasawn chuang hauhlo hian Bill-a chuan, "I laka him ka duh vanga i fanu hi chhanchhuak ka ni hauhlo tih hi lo vawngtha reng teh. Mahse i kal thui lutuk palh ang tih erawh chu ka hlauhpui ngawt mai che. I bawng a bo apianga Jerry-a i puh zel ringawt mai hi dik ka tithei thlawt lo va, i bawng bo thinte hi Jerry-a hote ruk ni lovin, nang leh ani inhmelmak duhtu in a ruahmanna tenawm tak anih ka ring tlat a ni. Chu chu nang ang mi paukhauh chuan i ring hauh lovang a, mahse a ni ngei em tih chu ka fiah dawn a ni. Ka rindan hi alo dik anih ngat chuan tun atanga reilote ah Jerry-a nena in lo inhmelmakna chu a tawp anga. I rindan hi alo dik zawk anih chuan kei hian Jerry-a'n i bawng hi a lo ru thin reng a ni tih ka fiah bawk ang. Mahse chumi hunchhung tal chu lo dawh hram hram turin ka ngen che a ni. Chuti ni lova i thinrimna hi a tawp i thlenpui nghal mai chuan nang leh i fanu tan pawh hian thil pawi tawp a thleng ngei bawk ang," a ti ta charh charh a.


Mahse Solten-a chuan a lo awihlo nasa mai reng a. "I pu himna tur chu i duhpui hle mai maw. MAhse chutiang thu ho mai mai chu a awihtheitu tur midangte hrilh atan khek zawk teh. Ka dawhtheihna a tawp hma hian ka ram hi chhuahsan vat mai teh," a ti ta cheu cheu mai a.


Chutah zawng, Bill-a pawh chu inthazo tak mai hian a sakawr chungah chuan a invawrhkai ta lawp a, thu tam tak sawi a sawt chuanglo tih hriain, "I lalram hi zawng ka chhuahsan dawn khawp e. Mahse atawp ber atan i beng hlaipui khan hei hi lo ngaithla leh teh. Ka thusawite kha awih lova kan pu himna tur dilsak ang hrima min ngai anih chuan i duh hun hunah, i duh dan dan in Jerry-a chu rawn bei ang che. Mahse ropui viauva i inngai hi i ngaisual deuh a ni tih pawh hria ang che. Heng i hote zawng zawng zingah hian silaimu lo danglet thei khawpa vun chhah pu an awmlo tih lo hre bawk ang che," tihpah chuan a pistol kawm chu a han beng thak thak a. Chutah Solten-a cowboy te ho chu diriam hmel taka melhkual dan dan pah chuan Bigger-a chu a han pawther lawih a. Mitkhap lek lova amah lo en rengtu Jeny leh apa pawh chu melhnawn leh tawh lovin Bigger-a chu a kaltir ta nghal a. Bill-a kalliam tur chu han kahzui zawt mai duh hmel pu tak chunga melhzui vung vung chung chuan, "Nangpawh khan silaimu tawntlang zawhloh khawpa vunchhah zawng i nei biklo teh ang chu," Solten-a chuan a han ti ve sup a.


Chutah Jeny chuan ranch chhawng chunglama a pa zuichhoh dat dat pah chuan, "Engati nge Bill-a kir tur kha tlemte tal pawha tawngkam tha i hmuhloh? Mahni nunna meuh pawh chan huam khawpa min chhanchhuaktu anih thute chu nangpawhin i hrechiang hle a ni lawm ni?" tiin a han chhuahchhal a.


Solten-a thinrimna chu ala rehlo bawk a, thinrim aw vin zet hian, "Ka hria, ka hria. Chuvang tak chuan alawm that lova ka chhuahtir reng ni. Chuti nilo sela chuan Jerry-a cowboy chhawrte zinga mi anih hrim hrim pawhin a thichiang teh ang chu," tiin a fanu zawhna chu a han chhang bung nghut nghut a. A aw atang chuan ala thinrim a ni tih pawh ala hriat khur khur hle mai.


Jeny pawh chu a lo diau bik awzawng ta lo mai. Apa aw ang thawthanga vin thah hian, "A duh avanga i hmel pawh kha rawn hmu a ni hleinem. Keimah min rawn hruai avang chauhva rawn kal a nih chauh zawk kha. Khati khawpa thiunrim khumin ilo vau leh ta nghal chu a ni a. 'Thinrimna tihlan hun leh hunlo a awm' ti a min hrilh kurdup thintu kha nangmah hi ini lawm ni? Tuna i thinrimna i tihlan kha a hunlohzia chu i hre ve reng tho si a, amah avang chauhva i fanu hi la tawng ka ni tih lah i hai hauh si lo. A reng thuah Bill-a thusawite kha thil diktak zawk anih kei chuan ka ring tlat," tiin a pa awvin tak pawh chu pawisa duh ta biklo chuan a lo haulet ve tan tan a.


Chutianga a han tih takah chuan zialo a ti ve hnuhnawh ta hle mai a, tawng ngaihna vak pawh hrelo chuan a ngawi ta run run a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)