Bill Jack Chapter-8

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-8

Unread post by Ruata Ralte » March 8th, 2020, 4:52 pm

Bill Jack-8
Retyped : Ruata Ralte


Bill-a'n JL Ranch ava thlen leh meuh chuan tukthuan pawh an lo eikham der tawh mai a. A thiante'n a thawmhnaw berhluai mai an han hmuh chuan an lo nuih dar dar a, an pu fapa Monte-a phei chuan nilum ai vauh chung hian alo nuih tlawrh tlawrh a.


An zinga fiamthu duh ber mai Batt-a pek chuan hmui hup tut tut chung hian, "Ekhai, chirhdiak hleuh pawh ilo thiam tel vek a ni maw? Min la zirtir ve dawn nia," a han ti pek a, a nuihza lutuk insum hleitheilo chu a nuichhuak ta hawk hawk a.


Bill-a pawh chuan a sakawr atanga han chhukpah chuan, "E, tehreng mai. I chakzawng anih phawt chuan ka la zirtir ve em em ang che. Mahse Quick Sand zinga han hleuh meuh chu thiam a har teh a nia," tihpah chuan a thil va tawn zawng zawngte chu an zavaia hriattheih tura ringin a han sawi ta a. Mahse Solten-a ranch-a a vakal thu leh an inbiakna hlimawm loh tak kha chu a sawi tel ta lo.



Chutah Batt-a bawk chuan, "Cheheu! kan Kan Solten-a fanu hmeltha-i chu ilo va tawng ta anih ngei chu. Theihnghilh har iti viau lawng maw?" a han tileh ta zung zung a, Bill-a pawh chu a lo nuiliam ve mai a. Mahse Batt-a sawi erawh chu a dik ngei tih amah leh amah chuan a inhre ran thung.


A thawmhnawa chirh kai liai luaite chu tihfai pahin a inbual nghal a, pu ber hmu tur chuan a chhuak ta nghal a. A thil va tawn zawng zawngte chu a ava hrilh ta vek a. Solten-a nena an inbiakna zawng zawngte a hrilh kelh hnu chuan ama ngaihdan te pawh a hrilh tlang ta vek a.


Ngun tak hian Jerry-a pawh chuan alo ngaithla a, Bill-a'n a sawi zawh hnu chuan, "Kei hi lo ni zawk hlauh ila chuan a fanu chirhin a hip pil ruai ruailai chu hmuhnawm ti takin ka thlir ngei ang le! Mahse a tha e. A taka a hriat hma chuan sawtiang ang mi ngawltawt te chuan engmah an awih duh tawp nang," tiin a ngaihdan a rawn sawi chhuak ve ta a.


Chutah Bill-a chuan, "Ngawi teh, Pu Jerry. Banason-a chanchin i hriattheih ang ang mi lo hrilh zawk teh khai," tiin thudang daih chu a zawt ta zawk a.


Jerry-a pawh chuan, "Banason-a chanchin hi ka hretlem teh asin. Ani saw Bureau khaw dintu hi a ni a, pa hausa leh thiltithei tak a ni bawk. Bawngrual hralh leh rangkachak saw a sumdawnna bul ber a ni maithei. Keini pawhin ram hla tak pan ngai lovin ani hnenah sawn kan hralh mai thin a, a awlsam khawp asin. Tin, ka sawi tawh ang khan rangkachak zawngmite pawh hian an hmuhchhuah apiang chu a hnenah sawn an hralh mai thin a, ani chuan man man tawkin a lo leisak zel mai thin a ni. Tichuan a duh ang tawk a leihnu chuan hmarlam mel 60 vela hlaah sawn Crossvan khua a awm a, chu khua chu relkawngin a tantlang a, chawlh pawh a chawl thin a. Chumi hmunah chuan a bawngrual leisa leh rangkachak te chu ava hralh ta thin a ni. A lo leitu te chuan relah chuan an kalpui mai thin," a han ti a.


Bill-a chuan a lo ngaithla tui hle a ni ang, Jerry-a sawizawh lai pawh chu a lo hrechang mang lo va. A han hriatchhuah veleh chuan, "Anih leh a bawng leikhawmsa zozaite chu Crossvan thlenga va khalh tur chuan hlawhfa a ruai mai thin nge, amahin mileh sa a nei hrim hrim zawk em ni?" a ti ta a.


Hei hi chu ka chiang biklo tawp mai. Mahse hlawhfa a lak awm thu reng reng chu ka hre ngai hauhlo. A bulah hian mi pali panga vel chu an awm reng thin a. Henglai velah hi chuan chu chu thilmak pawh a ni hran lo. Mahse chungho tan ringawt chuan bawngrual khalh hnehsawhin ramchin te hre bel viau mah sela, a harsa ve fe ang. Mahse chuti chung pawhin bawngruaal engzata tam pawh ni se Banason-a chuan a kalpui hmiah hmiah thei zel tlat a ni," tiin a thilhriat ang chu a han hrilh belh leh a.


Anih leh bawngrual in va hralhna hnuhnung ber hi engtia rei vel nge ni tawh ang le?" tiin zawhna dang a han siam leh a.


Jerry-a chuan, "Thlathum chu a ral tawh ngei mai a, harsatna te a awmlo anih chuan karleh maiah khian sangkhat vel chu kan va pek leh theih mai ka inbeisei," tiin a lo chhang a. Bill-a pawh chuan, "Inva pek leh dawn hunah chuan rawn tel ve tur anih chu," a ti ve ta a, zanriah eitur chuan a chhuk ve ta a.


Chumi ni tanga nihnih a han ral leh meuh chuan Bill-a pawh chuan JL Ranch ramchhung chu a hrebel hle tawh a. Jerry-a fapa Monte-a pawh chuan a ngainat ve em avang chuan an pahnih chuan an inzui deuh chawt thin a ni.


Nikhat chu amah chauhvin JL ram leh Solten-a ram inrina lai vel chu enfiah turin a chhuak leh ta a. Rustler hote hnuhma pawh chu uluk zet hian a enfiah zel bawk a. Chunglai hmun vel atang chuan chet an la thin a ni ang tih pawh a ring ta tlat a.


Chung bawngrual hnute chu Soltena ram atanga rawnchhuakin JL ramchhungah an rawn lut a, JL ram chhungah engemaw chen chu kalin khawthlang lampang hawizawngin an chhuahsan leh ta a ni tihte a han hmuh phei chuan a ngaihdan chu a dik dawn hle ni hian a hre ta nghe nghe a. Chutianga bawngrual hnuhmain JL ram a lut thin ngei a ni tih chu Solten-a hote chuan an han hmuh a, an pu hnena an han thlen chuan a rutu chu tudang nilovin JL cowboy ho an ni ngei ang tih chu rinhlelhna nei hauh lovin ani chuan a lo ringnghet nghal hmiah ni ngei tur a ni.


A rilru ah chuan thil pakhat a rawnlut thut mai. Chulai vel, ranch pahnihte inrina lai, an ramchhungah si chuan buk sak ruk a duty pahnih vel indah reng chu tha dawn hle hian a hre ta a. Chumi hmun atang bawk chuan rustler ho chu an rawn che leh ngei anga, chiang zetin an lo rek tawh mai dawn a ni.


Chutiang lam hlir ngaihtuaha hnuhma vel a bih dan dan lai chuan hmeichhe aw hian, "Zawn nei iva ang dak dak ve, Bill?" han tih ri chu a hnunglam atang chuan a hre ta a. Chuveleh rang mangkhen hian a han vir zawk a, a pistol chu a phawidawk nghal ta zawk mai a.


Mahse a rawn autu chu tudang nilovin alo ngaihtuah ruk reuh reuh thin Solten-a fanu Jeny ngei kha a lo ni a. A pistol phawichhuahsa han thawlhluh leh zal zal pah chuan, "Enge heng hengah te ila rawn tih fo chu le? Jerry-a ramchhung a ni a, kei ni lovin midang zawkin hmu che sela chuan a pawi thui thei hle ang tih pawh i hre ve awm tho si a," a han ti a.


Jeny erawh chuan a hma a tlangval, la naupang tak leh mitmeng dum fiahkak mai chu nui hmel pu lek lek hian a han melh vang vang phawt a, a hnu deuhvah chuan, "Midang ni lovin tlangval hmeltha tawp, Bill Jack-a ngei ini tih i hnunglam atang pawh hian ka rawn hrethei tlat che alawm. A reng thu-ah khati taka ilo chetran vang anih kha, kan naute ho pawhin i hming hi an lamrik fo ni," nui ver ver chung hian a han ti a.


Jeny bulah chuan kalpheiin an pahnih chuan inngheng rialin an thudun ta a. "Jeny, ipa chu ilo hrilh tawh em?" a han ti a. Jeny pawh chuan, "Sawi tam vanga hmintheih chu ni sela chuan i mi hrilh zawng zawngte kha chu ka hrilh ngun tawh khawp mai. Mahse a ngaihdan chu a sawhsawn thei lo bur a ni ringawt mai," a han ti ve sep a.


"Anih leh engtia chet zel nge a tum le?"


"Hrilh chu min hrilh duhlo na a, mahse kan bawng vawikhat a bo leh anih chuan a tawp rat thlen a tum deuh niin ka hria. Chu chu alawm hrilh che tumin nitin maia helai hmun hi ka rawn tlawhziah nachhan chu le. Midang hlir an rawn thawkchhuak thin si a, ka lo mangang ru hman hle tawh asin," tiin a han hrilh leh malh malh a.


Chutah Bill-a chuan, "Bawng hi in hralh ve thin ngei anga, tu hnenah nge in hralh aengtikah nge in hralh leh dawn i hre mial em?" tiin a han zawt leh a. Jenu chuan, "Bureau khuaa Banason-a hnenah an hralh thin tih chu ka pa chuan a sawi ngei mai a, mahse an hralh leh hun tur chu ka hre hauhlo mai. Ka hriat hun chuan ka rawm hrilh leh dawn che em ni?" tiin a han zawtlet a.


Bill-a chuan, "Ni e. Ka ngaihdan chuan i pa leh Jerry-a te hi an la inrem thei ngeiin ka ring. Han ngaihtuah ve mah teh, nichin lawka ka thil zawn kha in bawngrualte hnuhma hlui tawh tak a ni a. Khang bawngrual rutute khan Jerry-a naute tih niawm takin Jerry-a ramchhungah hian thui tham ve tak chu an khalhlut a, Sawti lam, khawthlang lamah sawn an chhuahpui leh ta thin a ni. Heng hnuhmate hi in nauten an rawn hmu a, Jerry-a rama a luh tak avangin chhuizui zel lovin Jerry-a naute ho rukah an puh ta ngawt mai a ni. Chuvangin helaiah hian riahbuk kan siam anga, kan in-duty chhawk mai dawn a ni. Tichuan rukru ho rawn chet leh hun hun chu kan manchhuah hun a ni mai dawn a ni. Pu Jerry-a bawngte pawh hi an bove fo va, in thinrim ang bawk hian bawngrual rutute chungah pawh hian an thinrim thin a. Chung chu kan hriatchhuah theih hlauh chuan inremna a awm ngei ka beisei a ni," a ti ta a.


Jeny pawh chuan Bill-a thusawi chu ngaihnawm a tiin a lo ngaithla tui hle mai a, a sawi zawh veleh chuan, "I sawi ang ngei chu thil awmdan tur lo ni tak tak ta sela a lawmawm awm..." a han tichhuak ve hliai a. Amah vek chuan, "Sawitur nia ka hriatte kan sawi zo ta bawk a, ka haw ve tawh ange. Ka awmrei lutuk chuan kan nauten min lo zawngin, nang nena min rawn hmuhdun hlauh chuan a pawi dawn em mai,"tih pah chuan a thu ta iaih a.


Mahse BIll-a chuan rangzet hian a han pawh thu leh vat a, a hnenah chuan, "Ka sawitur ka la sawi zo ve hleinem. Min ngaihthlaksak duh dawn chuan thu leh lawk teh," a han ti a.


Jeny pawh chuan nuih saih pah chuan, "Nang hmuipuipu berin sawitur ila neih te chuan nitlak thleng pawhin kan ngaithla mai tur alawm," tichung chuan a thu tha leh ta a.


Mahse Bill-a chuan a thil sawiduh chu sawimai harsa a ti deuh nge ni, a han ngawi deuh vang vang phawt a. Chutah Jeny chuan fiamthu deuh hian, "Ka beng hi a chiang tawklo deuh nge ni, i thusawi reng reng ka hre thei hauhlo mai," a han ti a, a nui zui ar ar a.


"Jeny, lo ngaihaw lo la, hmanni kha ka vawikhat hmuhna chauh che ala ni a, nangpawhin min hmuh vawikhatna tho anih ka ring. Ala rei lovin nang pawhin tunge ka nih pawh ila hriat hma hauhva hetiang thu han hrilh tawpmai che chu ka hreh tak zet a ni. Mahse ipa te inremloh azarah duh ang pawhin kan inhmu theilo a ni a, kan inhmuh chhuna ka sawi mailoh chuan engtikah nge kan inhmuh leh ang tih pawh hriat a ni si lo. Chuvangin ka hrilh tawp mai ang che. Ka hmangaih che niin ka hria," a ti ta a.


Chhan mai ngaihna pawh hre lovin Jeny chu a ngawi ta vang vang mai a, chutah Bill-a vek chuan, "I lawmzawng anih pawh ka ring chiahlo reng a ni; mahse ka sawi lo thei si lo. Min huatphah nan em chuan hmanglo la, i naute i en ang thova min en theih chuan ka lawm hle tho vang," tih paha thochhuakin, amah lo nghak rengtu Bigger-a lam chu a pan ta nghal a.


Chutia Bill-a'n a kalsan ta mai chu Jeny chuan ruak ta huai hian a inhria a. A sakawr nena Bill-a liam mai tur chu ngaingam bik ta lo chuan, "Bill, keipawhin sawitur chu ka nei ve tho asin. Min ngaihthlaksak peih chuan rawn let leh la, ka bulah hian rawn thu leh teh," tiin a sawmlet ve ta thung a.


Jeny aw no tak mai a han hriat chuan Bill-a pawh chu a rawn chhuk leh a, Jeny bulah ngei chuan a rawn thu tha ve leh ta a.


Jeny chuan Bill-a kutzungtangte chu khalhsak pah nep nep chung hian, "Bill, ka tibeidawng hman che a, min ngaidam hram teh. Keipawhin ka hmangaih che a, mahse ka chhang thuai ngamlo che anih kha. Kha ni atang khan ka rilru chhungril berah hian i cham tlat reng a, zanmut pawh harsa khawpin ka ngaihtuah thin che a sin. I mitmeng mawi tak maite hi hmuh leh chakin in ram chhungah hian ka rawnlut fo thin asin," zah hmai sen tan tan chung chuan a ti ve ta a.


Zah avanga hnuailam a melh reng lai chuan Bill-a chuan a han kuai dak a, Jeny heh senno chek maiah chuan a han fawp ta zeuh va. Chuveleh Jeny pawh insum zo ta biklo chuan Bill-a nghawngah chuan a kuah ta vat a, fawh leh chak hmel tak chuan a hmuisen vam hiam mai chu fawh remchang fahran chuan a rawn dawh hnai ta heu mai a.


Chutah Bill-a chuan Jeny hnute kawhlah mai chu perthlawp khawp chuan a awmah a pawmbet ta chiah mai a. Jeny hmui, fawh chaka ang deuh phiau maiah tak chuan kunhniamin a fawp ta vawng vawng mai a.


A tuamah mah chuan tawng zai reng an rel lo. Induh tawn tak leh inngaina tawn tak chuan an infawp ta nawk nawk mai a, an lei leh lei chu a insual ta nak nak mai a. An hmui ve ve chauh pawh a ni ta lo. Jeny nuamti chu a ngik deuh faih faih tawh a, A hnute lah chu Bill-a chuan a khalhsak nawk nawk a, a hnute hmur ruh tang mai chu Bill-a chuan a khalh ta nep nep mai a, atuamah chu meng phal pawh an awm ta lo.


Tunah zet chuan he khawvelah hian midang an awm ve ta lo emaw an ti ni ngeitur hian indimdawihna awm map lo chuan an inkuah ta nawk nawk mai a, an inpawm vawng vawng ta mai a. A ruka an lo inveitawnna leh hmangaihna an lo inhrilh ngamlohna te chu thiltihin an lantir ta a, venthawn awm lek lovin an inhmangaihna par chu a taka chenin Bill-a chuan a sawhin a sawh ta thawih thawih a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)