Bill Jack Chapter-9

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-9

Unread post by Ruata Ralte » March 9th, 2020, 8:26 pm

Bill Jack-9
Retyped : Ruata Ralte


Bill-a remruatna ang ngei chuan JL Cowboy-te chuan chhimlam ramri hrulah chuan langsar lo tak hian ralven buk chu an sa ta ngei reng a, pahnih zel chuan zanlamah chuan an inriahchhawk ta a. Zankhat chu Bill-a leh BAtt-a riahdun hun alo thleng ve ta a. Ni a tlak a khua a rawn thim dawn hnaih chuan an duty-na tur hmun lam chu panin anni pahnih chu an inzui chhuak ta a.


Chu bukte-ah chuan beng chhi ran leh thawmdang chhuah hauhlo chuan an thudun ta ran mai a, zan reitak thleng an meng dun a. Mahse thawm engmah an hriat tak mailoh avang chuan Bill-a chuan, "Batt, kan inmenchhawk mai a tha ang. NAng lo va mu hmasa la, ka rawn kaitho leh dawn che nia. Kan invenchhawk a tul dawnin a lang tlat mai," a han ti a. Batt-a pawh chuan Bill-a remruatna pawh chu hnial hauh lovin ava mu ta thuai a.


Zanlai pelh rawk thleng pawh chuan thawm engmah ala awm ta chuang hauh lo mai a. Atuk mai chu Banason-a hnena an bawng hralh tum ni a lo ni kher bawk nen, mut ve mai chu a duh rum rum tawh a. Chumi zan chuan rukru hote chu rawn che ngei se a ti hle mai a.


Mut ve mai rilruk deuhvin, muthmuna zuk tura a tih sikret chu a han tankai dawn chiah tih chuan a beng fing tak mai chuan thawm ri deuh khap khap a hre ta tlat mai le. A sikret pehkawh vauh tawh chu khung lehin buk kawngka atang chuan ava ngaithla ta ran mai a, mahse a ri hriat kha a hre leh thei ta tlat lo. A bengchhe ri mai mai anih te pawh a ring ta rum rum mai a, tichuan buk chhungah chuan a lut leh ta a.


Chutah a thufel hman chauh tihah chuan a thawm hriat kha a hre leh ta. A bengte chu a han nuai leh nawk nawk a, mahse a bengchhe ri mai a ni ta lo hian a hre ta a. Buk pawnlamah chhuak in a han ngaithla leh a, chu zet zawng a ngaihruatna mai a ni ta lo tih a hrechiang thei ta.


Pawnah chuan benga lei si meuh hian a han ngaithla leh ta a. Chutiang chu Indian ho hnen atang khan alo zir vek tawh reng a ni. Chutianga han ngaihthlak chuan hla taka sakawr tlanthawm te pawh a hriattheih a. Indian pasaltha ten mi chan an neih reng rengin chutianga ngaihthlak chu an lo ching thin reng a ni. Chutia ngun taka a han ngaihthlak takah chuan bawngrual tam tham tak ten lei an rah nghawr dat dat pawh chu a hre thei ta reng a.


Buk chhungah chuan lut leh thuaiin, tui taka lo mu bawrh bawrh Batt-a chu a han sawitho thuai a. Ani pawh chu mutui hle mah se thawhphan nei hauhlovin a rawn thuchhuak ve nghal thuai a.


"An rawn che ta ngei e. Helai hmunah ngei hian an rawn kalpui a rinawm a, chu chu kan lo karcheh dawn nia. Lohtheihloh anih loh chuan silai hmehpuah loh hram tur a ni ang. Bukah hian ilo awm anga, keiin sawlai thingbuk liantak atang sawn ka lo chang ve bawk dawn nia," tiin ren chu a ruat ta a.


Chutah a rifle chu la in buk atang chuan a tlanchhuak ta vat a. Batt-a pawh chuan a rifle chu rang takin a han puah ve zung zung bawk a. An rawn kalna lam tur niawma Bill-a'n a sawi lam chu thlirin inring tak chuan a thu ta ran mai a.


Bawngrual thawm chu a rawn hnai tawlh tawlh a, reilote hnuah chuan bawngrual hmasa pawl leh hmaituam mi pahnih hi an rawn lang ta hlawl mai a. Bawngrual zawng zawng an rawn lankim chuan sangkhat chuanglai chu an tling ngei ang tihtur hi a ni a. Hetiang zat zat a tam khalhkhawmte chu engtin nge Solten-a hote hian an hriatloh theih le tihtur hi a ni a.


Batt-a chuan chung hmaituam ho a han hmuh chuan insum harsa a ti kher mai a. Kah mai tum niawm tak hian a silai chuan a han tin vel thin a, mahse Bill-a chet hun nghah a ngai bawk si. A rilru te te chuan Bill-a chu chechhuak har a titawh hle mai a.


Bawngrual leh a khalhtu hmaituam hote pawh chuan changtu an nei tih inhre hauhlo chuan hmalam an rawn pan ve zel a. A hmasa pawlin Batt-a awmna buk zawn an thleng ta maw tih veleh chuan Bill-a chu a tawmna atang chuan a rawn zuangchhuak ta thut mai a, chung hmaituamhote chu a silai a han tin pah chuan," Che tawh hauh suh u.In ban kha sang takah pharchhuak ula, thupek zawmlo apiang tan thihna a ni e," tiin a han vau ta chhek mai a.


Chuveleh Batt-a pawh chu bukchhung atanga rawn zuanchhuah thuai pahin chung hmaituamho chu a silai kawhmawr thim mak mai chuan a va tin ve leh ta a. Chutah zet zawngin hmaituam hote chu an hawiphawk nasa hlawm ta hle mai a. an beisei loh deuh va thil lothleng ta thut chuan a tihrilhhaiin a ti chiai nasa ta mai a. Mahse chu chuan hun rei a awh lo.


An hamhaih chhung chu a reilo hle. Bill-a thupek zawm chu hremna pumpelhna a ni lo tih an hrechiang hle a. Bawng rukhmangte hremna chu enge a nih an hrechiang lutuk tlat a ni.


Vawilehkhatah chung hmaituam hote chuan intiamrual ang hrim hian an silai an chuh ta thut mai a. Bill-a pawh chuan duhthusam in thil a awm thei talo tih a hriat veleh a rifle kenlai chu a hmetpuak ta zawt zawt mai a., Batt-a silai pawh a lo muang bik awkawng lo mai, a rikin an ri ta zeih zeih mai a.


Rifle puak zawt zawt avang chuan hmaituam panga lai chu an thal nghal hawl hawl mai a, midang laite erawh chu him takin hnimbuk karah chuan an zuanglut hman ta hlauh mai a. Bill-a te pahnih pawh chuan kah lehna hun an nei ta biklo.


Bawngrualte chu silai ri hlau chuan an tlanbuai ta chuk chuk mai a, chung bawngrualten an suttluk mai loh nana inven chu tihmakmawh a ni ta zawk a.


Silai hmantheih a ni ta chuanglo bawk a, chung bawngrual tlandarh tena an sut mailoh nan Bill-a chu thingkung liantak phenah chuan a han tawmfel te te a, chutah a rina ring mangkheng hian Red Indian ralbelh au dan diktak mai chuan a han khek chhuak ta rawih rawih mai a. Enge anih hresa lo tan phei chuan hmulthi din sung sungna tur khawpoa rapthlak a ni tlat.


Bawngrual la tlandarh velo te pawh chuan chu au thawm rapthlak zet an han hriat takah chuan hlauvin, awmze neilo lekin an phili ve ta ruai ruai mai a. Chutianga bawngrual, hlauh neih vanga tlandarh chum chum te chuan pawisak hi an nei tawhlo reng reng a, an hmaa awm apiang chu enge tih pawh hre lovin an su buan buan tawh mai thin a, an hlauh a reh hma chuan chutiang chuan an tlan ta vak mai thin a ni.


Chutianga Bill-a'n bawngrual a han tihthaih vak mai chuan awmzia a rawn nei ta thuai reng a. Reilote ah a beisei ang ngei chuan mihring natuar, han te rawih rawih chu a hrethei ta mai reng a. A thiltum pakhat a hlawhtling tih a hriat chuan lawmin a han kiaisak a.


Chutihlai chuan mi pakhat hi bawngrual karah chuan chilhlum maipalh hlauvin a rawn tlankawi ta zawr zawr mai a. Bill-a chuan a rifle lek kangin a han kap thuai a, mahse zigzag a tlankawi kual vel anih vang nge ni, a va fuh mai bik lo va.


Batt-a pawh chuan chupa chu a rawn hmu ve ta ni tur a ni, a rifle chu a han puak thawr ta mai a, mahse ani pawhin a tum loh zawk, bawngrual zinga pakhat chu a va fuh ta hlauh mai a, chu bawng chu chiang em em mai hian a tlu ta dup mai a. Bawng dangte pawh chuan chu bawng chu an rawn palzui nghal bawrh bawrh mai a. Han zuankhum mai na hun awm bik hek lo, a bulah chuan bawng dang pali nga lai tur hi an rawn inpal thlu ta nawk nawk hlawm a.


An va kahpa, hmaituama tlankawi zar zar pawh khan chutia bawng han tlu ta phawk phawk chu remchanga hman tumin bawngrual thenkhat ten bawng dang lotlan lehzel tur an lo dankhawmna hmun zimte chu a rawn pan leh ta chan chan a. Chu tak chu Bill-a chuan lo hmuin, a rifle chuan a han tin ta vang vang a, a hmetpuak ta thawr mai a.


Chupa tlankawi zar zar lai chuan a tumna hmun a rawn thlenphei hma hma chuan pawnchhe duhloh paih ang thlawrh hian a tlu hlawm ta nawk mai a. Chutah bawngrual chuan an rawn chilzui ta nghal nen, a thihchian duh hmel kher mai.


Bawngrualte pawh chu an tlandarh fai ta duak tihah chuan sakawr pahnih khat han tlan tak tak thawm chu an hre zui ta nghal a.


Chutah an mi thahte ho ruang chu Bill-a chuan enfiah turin a tawmna atang chuan a rawnchhuak ta a. Batt-a pawh chu rawn chhuak ve nghalin an pahnih chuan chung ho ruang chu an hnukkhawm ta a. An vai chuan pasarih lai an lo ni reng mai a. AN zinga pakhat erawh chu kahhlum ni lovin bawngrual tlanchhia ten an chilhlum tak kha a lo ni nghe nghe a. A hmaite chu amah lo hrechiang hletu tan pawh hriattheih rualloh hian alo thker chhe hneh kher mai.


Chutia an hnuhkhawm zawh chuan tute nge an nih hriat tumin, an hmai tuamna chu an han phihthla na a, nimahsela anni pahnih mai chuan tute nge an nih an hre thei ta chuang lo va, an la hmuh ngailoh mi vek an lo ni a.


Za fahran lo taka nuichung hian Batt-a chuan, "Ekhai, Bill. Indian ralbeih auhla te thlengin ilo thiam lehzel a ni maw? Pa maksak tak zawng ilo nih hi. Mahse tlema tlemah kan thihphah ve thelh anih kha. Lamthiam tak chu lo milo hlauh ila zawng bawngrual stampede khan min chilpherh ve chiang teh ang chu," a han ti bal bal a.


Bill-a bawk chuan fiamthu hian, "I lamthiam zia han show-tir ve reng reng che kha thil chakawm tak a nia lawm. Mihring emaw i kah dawn ka ti a, bawng i han kapthlu tawp te kha lamchunga i kah emaw ka lo tia sin," a han ti ve a, an nuidun the thaw a.


Bill-a vek chuan thutak deuh zawk hian, "Pahnih emaw an han tlanchhuak ta mai kha chu a pawi ta anih hi. Tunah rih chuan a pawng atakin an rawn inlan leh mai a rinawm tawh awm si lo va, manchhuah pawh an harsat phah sawt dawn ta anih hi. Mahse thawh zawng kan thawktha thawkhat teh alawm mawle, tiraw? Tunah chuan kan pu leh Solten-a te inkar thu pawh a hlimawm thei deuh vang chu," a han ti a.


Chutia an awmna ngaia din tak reng chu Batt-a chuan a ning ta deuh ningei tur a ni, "Heti hian heng ruangte hi kan dinchilh tlaivar mai dawn em ni ang? Nge, kan chandarh anga, sakawr jean-ah hian kan khung vek zawk dawn em ni?" a han tifiamthu a.


Bill-a pawh chuan Batt-a ngaihtuahna chu hriatthiampui tak hian, "Ni em em bik lo ve. Bukah sawn kan riak anga, khawvar veleh kan thiante punin Solten-a bawngte hi kan khalhkhawm leh anga, a inah ngei kan va pe dawn nia," tiin alo chhang ve thuai a.


Atuk zingah chuan Bill-a te chuan an thiante chu va punin bawng tlandarhte chu an va khawm leh ta chuk chuk a. Zanthim kara tlandarh an ni bawk a, thui pawh an lo tlan hlawm lo va, harsa lo takin an khalhkhawm kim leh thei ta mai a. Tichuan an pu Jerry-a ho chuan chung bawngrualte chu Solten-a ranch lam pan chuan an khalh ho ta dam dam a. Bawngrukhmang, Bill-a te thiandunin an kahhlum takte ruang pawh chu sakawr chunga phuarbetin an hruaitel ve ta nghal a.


Solten-a hoten an ranch lam pana bawngrual lo kal ri khup khip thawm an hriat chuan rang takin an rawn chhuakkhawm thuai a. Zingkar mai ala nih avangin tumah hnathawk pawhin an la chhuak hlawm lo va. An naute ho ang bawkin Jeny leh a pa pawh chu ranch tualzawlah chuan an rawn chhuk ve ta bawk a.


Anmahni lam pana bawngrual lokal ta khup khup an hmuh chuan a ngaihna an hrelo hlawm kher mai. Mahse a rawn khalhtu Jerry-a leh a naute hmel an hmuh takah chuan an silai te chu hman mai inpeih atin an lekchhuak ta far hlawm a.


Bawngrual leh a khalhtute chu an rawn hnai telh telh a, reilote ah chuan tualzawl chu an rawn thleng ta a. A rawn khalhtu JL Cowboy-te chuan an bawngrual khal te chu zei tak hian an han dintir ta khup mai a. Bill-a leh Jerry-a te chuan bawngrualte chu kalpelin Solten-a te pafa lo dinna ah chuan an va phei ta a.


Vin zet hian Solten-a chuan, "Enge ni in thiltih awmzia hi ni ta? In bawng rawn khalhte lah chu ka bawng hlir an ni lehnghal," a lo ti khur khur a.


Jerry-a pawh chu sakawr atang chuan a chhuk ve ta nghal a, Solten-a chu chhangletin, "Solten, i ngaihdan diklo tak hi rawn sawithiat turin ka lokal a nih hi," tiin a chhang ve ta hmak a.


A hma aia awka vin zawk hian Solten-a chuan, "Ka bawng in ruksa in rawn dahkir leh avang ringawt hian ka ngaihdan cheu chu a danglam in ring a ni maw," a han ti leh tuarh tuarh a.


Chutah zawng Jerry-a zaidamna pawhin a tlin ta biklo a niang, vin deuh zawk hian, "I bawngte hi vawikhatmah ka la ru ngai lo ve. I bawngrutu te hian kan ramchhungah an rawn khalhlut akan ramchhung chu tawite zawhin chhimlamah an kalpui ta zel thin a ni zawk. Chutiang thil chu keini pawhin kan lo hre ngai bik lo va, mahse Bill-a hian an hnu atangin a chhuichhuak ta hlauh zawk a ni e. Tichuan bukte te sa meuhvin kan lo chang ta thin a ni. Tichuan nizan zanlai pelh hlekah khan heng i bawng zozaite hi rawn ru lehin an tihdan ngaite bawkin an rawn tileh a, mahse an vanneihna in a tlinseng ta biklo a nih hi. Tha taka an inpek duh mailoh avangin kan naute nen pawh chuan an inkap ta nghe nghe a. An zinga a tamzawkte chu an kaphlum a, pahnihte erawh chu an tlanchhuak thei ta hlauh a ni,"


"Tin, silai ri hlauva i bawngrual tlandarh ta zawng zawngte chu tukin hian kan khawm leh vek a, helai kan rawn panpui ta anih hi. Amaherawhchu chung misualte kahhlum an tumna lamah i bawng pakhat chu kan nauten an kaphlum palh a, chumi man tur chu i nambar hriat zat zat han sawi teh, ka pe mai ang che. Tin, i bawng ru thintu te ruang pawh ilo hmuh duh ve ngei kan rin avangin kan rawn la tel nghe nghe asin," tih pah chuan sakawr chunga an miruang phurhte chu rawn la hnai turin a naute chu a han vai a.


Chutah Jerry-a naute chuan ruangphurtu sakawrte chu Solten-a leh a naute awmna ah chuan an rawn kaiphei ta thuai a. Uluk zet mai hian Solten-a pawh chuan chung mi pasarih lai mai ruangte chu a han en vung vung a, amah ai mah chuan a hote chuan mak an ti zawk mah emaw tih tur hian an lo ka ho hlawm a.


Chutia reingial a han bih vung vung hnu chuan aw damdup hian dawih aw a rawnchhuah ta a. "Pu Jerry, ka lo ngaihdan che chu a lo diklo chiang hle mai. Hmanni lawka Bill-a'n a ngaihdan min hrilh zawng zawngte kha alo dik chiah anih hi. Ka ngaihdan diklo tak avanga i pawi ka lo sawi tawhna ah pawh i ngaihdamna ka ngen nghal e," a rawn tichhuak ve ta zawk a, a hmelah pawh a inchhir hle tih a lang reng mai.


Chutah zet zawng, misual hote thiltum bawlhhlawh tak mai avanga ranch inthenawm, hun rei tak lo inhmelmak tawhte chu chumi tuk atang zet chuan inhriatthiamna thui tak an nei ta a. Bill-a remhriatna azarah inrem takin an awm leh theih phah ta. Solten-a pawh chu inchhir em emin, chutia a bawng an lo kahhlumsak taka pawh chu a man lam zawng ngai a ti ta biklo kher mai. Rulhtir ahnekin thil tisual anga a lo puhna zawng zawngah chuan ba tam hle zawkin a inhre hial a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)