Bill Jack Chapter-10

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-10

Unread post by Ruata Ralte » March 13th, 2020, 8:55 am

Bill Jack-10
Retyped : Ruata Ralte


Bureau khua, Banason-a inah ve thung chuan Banason-a chu thinrim hmaisen teuhvin a veitawn vut vut reng mai a. A bul lawkah chuan mi pahnih hi thlaphan hmel zet mai hian an dingkhur zaih zaih mai a. An pu Banason-a chuan eng ang takin hremna chuan eng ang takin hremna chu pe ang maw tih ringawt mai chu an lo ngaichang ran tawh mai a.


Banason-a veitawn sek chu a ding chawt a, "Bill Jack, Bill Jack... He mi pakhat avang chauh hian maw in thiante zawng zawng an thihphah a nangni pahnih pawh ui dawih zawk ang mai a in rawn khup haw zul zul tak mai ni? Silai in kawl ve reng a ni lawm ni, nge, in hmang ngamlo zawk?" tiin chu mite pahnih hlauhlawpa ding zai maite chu a vin ta khur khur mai a.


Pakhat chuan hlauh vanga aw khur dat dat chung hian, "Kan kahlet ve hmain kan bawngrualte chu silai ri hlauvin an tlandarh ta huk a, chu chuan min tibuai zota a ni. Chet kan lak ve eih hmain kan thiante ho chu an thi hman vek tawh a, keini pahnih erawh chu chanchin rawn hrilh tur chein kan rawn tlanhaw ta ringawt a nih hi. Kan tan chetve ngaihna a awm nganglo a ni, Boss," a han ti tham deuh tuak a, a hlauhzia pawh chu thup pawh a tum hran biklo.


Banason-a chu a han thaw leh hawk a, chumite pahnih beiseiloh dan deuh chuan, "A tha vek e. Bill-a hian vawihnih ngawt mai ka thil ruahman a tisukuk tawh a, chuvangin a thi tur a ni. Tun tumah chuan diklohna pawh in nei lo va; in hmunah va kal thuai ula, Preter-a hnenah khan hei hi va hrilh rawh u. Bill-a hi kan tan mi hnawksak anih avangin a thi ngei tur a ni. A thidan turah pawh kahhlum ngawt a tawk lo va, rei tak hrehawm tuarin a thi tur a ni. Ka naute mi sawm chuanglai chu amah avangin an thi tawh a, pawisa tam tam bakah bawngrual thlengin ka chan bawk. Chung zawng zawng ka ngaihtuah chuan a hrehawm thei ang bera thih hi a phu hliah hliah a ni. JL Ranch saw enthla reng se la, remchang hmasa berah in man dawn nia," a ti ta a.


Chu mite pahnih pawh chuan hremna an tawh dawn takloh avanga lawm tak chungin Banason-a in chu an chhuahsan ta thuai a. Chutia an chhuah tak hnu pawh chuan Banason-a chu a hma ang bawk khan a veitawn leh ta sek a, ama hriattawk lek hian, "Bill Jack, rei zawng i daih dawnlo tih lo inhre mai teh. Nangmah avang hian ka thiltum pakhat pawh a hlawhchham leh mek tih ka hria a, mahse tunah chuan i thihna tur a ni ka ruahman tawh dawn. Prater-a chuan a thatlo che anih pawhin nang aia tuanrang zawk ka chah mek hi alo thlen huanah chuan i thi tho thovang," a ti ta sup a.


********************************************************


Jerry-a pawh chuan an bawngrualte chu Banason-a hnena va hralh leh tur chuan an khalhkhawm leh tan ta a. An ram chu a zauh em avang leh an bawng tlattir dan chu a darhsarh em avang chuan a khalhkhawm nan ringawt pawh nithum lai hun an hmang a. A nili-na tukthuan eikhamah chuan Bureau khawlam an panpui thei tawk a ni. Bill-a pawh chuan alo tum lawk tawhsa ang ngeiin bawngrual hralhna turah chuan a kal tel ve ta a.


Tlai ni tlak dawn ruai chuan Jerry-a leh a naute chuan Bureau khua chu an va inkhalh thleng leh ta hlawl mai a, Banason-a chuan a lo lawm der thiam hle mai nghe nghe a. Bawng pakhat dollar sawmhnihpanga zelin bawng sangkhat leh zanga lai chu a lo leizawhsak ta vek mai a.


Chutah midang ho zawng chu an dangro te va tihnawng turin saloon lamah chuan an kal ta vek a, Jerry-a leh Bill-a erawh chu Banason-a sawm angin coffee chu an inpui ve ta rih a., coffee in pah chuan an ti ti bawrh bawrh mai a.


Banason-a chuan, "Tunlai in tluang zel em? In thenawmpa Solten-a te nena in intihthiamlohna kha ka lo hre tlaikhawhnu ve chauh va, a zialo ka tiin thil awmzia ka hrethiam ve lo kher mai," a han ti chuar chuar a.


Chik taka a hmel lo enrengtu tan lo chuan dawt a sawi a ni tih reng a hriatloh reng reng a. Mahse Bill-a chuan a mitsira a lo en reng avang chuan chu chu alo hmuhhmaih hauh si lo.


Jerry-a ve thung erawh chuan engmah hrethiam ve heklo, titi kaltluang pangngai, tui taka han sawi miah miah ang mai hian, "A ni thin asin. Mahse tunah chuan kan inrem ve thei tawh e. Solten-a bawng ruksak a, kan ruk niawm taka langthei tura kan rama rawn luhpui thintu te kha keini chuan kan lo hrechhuak ve thei hauhlo mai a. Mahse hei Bill-a hi kan zinga a rawn tel ve tak azarah kan lo hrethawi ta deuh va, a chan te pawh kan lo chang a. Tichuan hmanzan lawk khan chumi te chuan an hna ngai bawk chu rawn tilehin keinin kan lo manchhuak ta a ni," tiin thil awmdan chu kimchang takin a sawi ta a.


Banason-a pawh chuan ngaihnawm tih hmel fe hian alo ngaithla ve vung vung a, Jerry-a'n a sawizawh hnu chuan, "Chu! in lo that vek mai lawm ni?" a rawn tichhuak ve ta ngawt a.


"Pasarih lai chu Bill-a te hian an lo that a, mahse pahnihte erawh chu an tlanchhuak hman ta hlauh a ni," tiin chu zawhna chu a lo chhanglet ve leh a.


"In lo that veklo chu a pawi hle mai. Hetiang mi hi chu damtir reng chi pawh an ni lo asin," a hmel han en mai chuan chutia tiduh mai hmel chu a pu thung si lo.


Chutianga Banason-a a rawn tawngchhuah takah chuan Bill-a chuan chu hun remchang chu chuhin, "Reilote hnuah kan la thatfai vek dawn nia. Anni mai ni lovin a bul tumtu, an hotu lu ber thlengin kan la chimih thak dawn a ni," a han tive leh zat a. CHutia a tihpah chuan Banson-a hmel chu ava melh pah reng bawk a. Alo rin ang ngeiin Banason-a hmelah chuan thinrim lutuk hmel chu a rawnlang zawk a, mahse thiam takin a inthup bo leh vat a.


Engemaw chen chu an han titi leh laih laih hnu chuan Banason-a pawh chu an chhuahsan ve ta a. Banason-a in leh a velte chu thil danglam deuh hmuh inbeisei takin Bill-a chuan a han thlekkual vel ngial a, mahse engmah phei chu a hmuta lem hlei lo va.


Bill-a te inzui chhuak ta chu Banason-a chuan han thlirzui vung vung pah chuan, "Engmah la hi in hre der tak mai si lova leh! In hriat hunah zet zawngin in thlarau pawh auhdin phak rual lohvin a thlawk bo hman tawh awm si aleh!!" zawite hian a han tisup a.


An ranch mamawh tul chi hrang hrangte an inleifel hnu chuan JL Ranch lam pan chuan an kir tlang leh ta dial a. Khua a tlai tawh bawk a, hmanhmawh takin an sakawrte chu an tlanlim tir puat puat hlawm a. AN tlanpah chuan BAnason-a chanchin leh a thiltih ni ngeia a lo rindan te chu Bill-a chuan a han khaikhin neuh neuh va, awm anglo riauva hriatna te chu a han nei leh lawi a. Mahse a rinhlelhna erawh a bo mai chuanglo. Banason-a chu va chamchilha a in leh a velte chu va thlithlai tur em ni tihte chu a ngaihtuah neuh neuh zawk a. Engpawhnise, hunin ala rawn herchhuahpui mai tur ah a ngai ve ta a.


Tunah chuan Jerry-a leh Solten-a te chu an inrem tha ta bawk a, duh duhin an intlawhpawh tawn thei leh tawh a. Nikhat chu Bill-a chuan chhimlam panga an bawng tladarh zualte chu khalhkhawm turin a chhuak ve ta a. Mahse rinai taka a lo awlsam avangin chawhma lekah a zo thei ta mai a. An ranch lama haw leh turin ala hma deuh bawk a, Jeny hmutura va kal chu a tum leh ta zawk a.


Ranch a va thlen chuan Jeny leh an eisiam nu chu tualzawlah nilum aiin an lo thudun hrauh hrauh va. An lam pana sakawr tlanthawm chu hriain Jeny chu a han hawichhuak a, hla tak atang pawhin a hmangaih Bill-a chu a hailo chiang kher mai.


Bill-a tawk tur chuan a tlanphei ve ta vat a, an intawh veleh chuan Bill-a chuan Jeny chu a sakawrah chuan a han pawtkai lawp a, Jeny hlim lutuk chu a nui ar ar reng a.


Tualzawl an va thlen leh chuan Bill-a chuan Jeny chu a han hlangthla nawlh a, "Big, ipi tur anih hi hrereng rawh," tiin a sakawr chu a han bia a, ani lah chuan hrethiam ve niawm tak hian a lo bu nghut nghut a.


Jeny chuan, "I sakawr pawh hi nangmah ang maia remhria leh fingvar, duhawm tak si anih hi le. Engtizia nge, Bill, min va rawn tlawh duhlo ve? Kapa pawhin hmuh che a chak thu a sawifo thin asin. Tunah lah hnathawkin a chhuak bo leh daih tawh bawk si," vui aw lek lek hian a han ti a. Bill-a lah chuan, "Hei, kan awmdun reng chu a ni mai lawm ni?" fiamthu hian a lo tiawlsam mai a. Jeny bawk chuan, "Englai kha nge kan awmdun reng a? I mumanga min hmuhte i rawn sawichhuak ve mai mai ani lek lo maw?" vin aw lek lek hian a han ti khar khar a.


Bill-a lah chuan, "Ele, ka thinlungah hian i awm reng a, keipawh i thinlungah ka awm reng lovem ni? Thinlung leh taksa chu lakhran theih a ni hleinem. Kan awmdun reng emaw ka lo ti mai asin," tiin a sawi awmzia chu fiamthu titak deuh hian a han sawifiah leh a.


Chutah Jeny pawh chu mawi taka han nuihsaih pah chuan, "Chutiang ringawt te chu ka duhtawk ve hleinem," a ti no ta nghelh mai a, Bill-a hmuiah chuan a han chuk nghal zauh va. Chutah anmahni lo thlir rengtu an eisiam nu hnenah chuan, "Chachi, coffee no hnih leh biscuit kha ka room ah min rawn pe mai dawn em ni? tih pah chuan Bill-a banah chuan a kai a, inchung lamah chuan an inzui chho ta a.


Bill-a chuan Jeny hmelhmai, duhawm lutuk leh tha lutuk chu han melh vang vang pah chuan, "Ipa te hi rawn haw ta thut se i tan leh ka tan a nuam lovin a zahthlak lutuk lovang maw?" venthawn nei tih hriat tak hian a han ti a. Jeny ve thung chuan, "Hlauhthawn tur engmah a awm lo. Ka hmangaihber ka room-a ka awmpui chu tunge sawisel ang le?" a lo tiawlsam mai a. Chutah zawng Bill-a pawh chu ngaihngam takin Jeny bulah chuan a thuthla ve ta a. Reilote ah an eisiam nu pawh chuan coffee lum vat vat leh eitur dangte chu a rawn dah a, a chhuak lehnghal ta vut roh va. Rinai takin a bengvar mai.


Ei in lam an zawhhnu chuan an tihdan ngaite bawk chuan hmangih biahthu di chu an inhlan leh ta mawlh mawlh a. Chutia rem leh rem lova han inkuah vel chu a khawpkham ta lo deuh ni ngei tur a ni, Jeny chu khum lamah chuan a chho ta tharh a, chutah Bill-a pawh chu inngaihtuah set set lo chuan a lawnchho ve ta nghal a.


Tumah venthawn nei hauhlo chuan Jeny khum chungah ngei mai chuan an inkhal dun ta heuh heuh mai a. Jenu hnute kawhtha lehlawh tak maiin a awm vel a han nek kual velte chuan Bill-a chuan insum har a ti tawh hle mai a. Dimlo leh duhthawh tak chuan a han thamsak leh ngial thin a, a chang leh Jeny mal var tak te chu a han tuaisak a, a mawngtam ah te chuan a han tham leh ngawt ngawt bawk thin a.


Ani Jeny lah chuan 'khami thleng bak chu' tih tum bik hauhlo chuan numati takin a lo chik ngher ngher zel mai si a, a bialpa khawihna lai apiang mai chu a lo dawh heuh heuh ringawt tawh mai a. A hmangaih Bill-a tan chuan engmah ui a nei ta lo.


Mahse Bill-a chuan insum har ti hle mah se a tawp han thlenpui fo chu atan leh Jeny tan pawh a thalo thei ang tih a ring tlat a. "Jeny, hei bak chu hma ka sawnpui zel tawh rih lovang che. Nupa kan nih hma chuan kan duhdanin han awm ringawtin ila a tha ber lo tlat. Duhtawk phawt ila, ranch vel i zu fangkual mai mai zawk teh ang," a ti ta a.


Jeny pawh chuan lo ngaithla karin, a bialpaa in a sawi zawh veleh chuan keite koham ang mai hian a thianpa kawngah chuan a thut lawk a, alu kuai hnaiin a hmuiah tak chuan a zu fawp leh ta tawn tawn a. Chutah mawi lutuk a han nuihsaih pah chuan, "I rilru a tha kher mai. Nang nilovin midang zawk chu ni sela chuan hemi piahlam ram hi kan thleng ngei ang le," tihpah chuan a thochhuak ve ta nghal a. Chutah a kawrhma kilhna phelh niaih te chu siamtha mawlh mawlhin an chhuak dun ta ral ral a.


Nitlak thlenga an lenkual hnu chuan an naute hnathawk thenkhat pawh an rawn haw ve ta hlawm a. Bill-a pawh chuan inthlahnan tiin a han fawp leh vawng vawng a, "Jeny, ka haw a hun ta. Hun remchang hmasa berah ipa chu ka la rawn hmu dawn nia," tih pahin Bigger-a chungah chuan a han invawrhkai leh nawlh a.


An naute hovin an lo hmuhpalh hlauthawng tak chung chuan Jeny chuan Bill-a kut chu a han hmersak vang vang a. "Nih leh mangtha aw, Bill. Min theihnghilh lo la, ka rawn ngai hle thin che a ni tih hriain min rawn tlawh fo dawn nia," aw nem no tak chuan a han tisap a. Bill-a pawh chuan, "Lutuk, darling," tih pah chuan a sakawr chu a kaltir ta nghal a. Jeny chuan a kalliam thleng chuan a thlirzui vawng vawng a.


Ranch pahnihte inri-na lai vel a thlen chuan engthawl fahran mai hian a faifuk ta hlarh hlarh mai a. Chutiang ang ema engthawla a awm chu a la hrelo hial a. A ngaihtuahna ah chuan Jeny mitmeng paw ram maite, a mawi tawk chauh va a hnar zum rat mai leh a hmui nemno chek mai te chu a ngaihtuah zui vang vang reng a.


Bawngrutu te an lo channa hmun, an buksakna hmun a thlengphei chiah tih chuan thil han ri fua hian a faifuk lai chu a rawn titawp ta chawt mai le!! Enge anih chu hrenghal lo mah se a pistol chu rang zet hian a han ban ve nghal a, mahse a tlai ta hrat a ni. Hruizen pathum ngawt mai hian a taksa chu a rawn vet hman ta tlat mai a, a bante chu a vehtel tlat avangin chettheih a ni ta lo.


Bigger-a chu ding tura hrilh a han tum a, chu pawh chu a tlai hman ta tho mai. Engah nge engtiklai pawh a fimkhur tur a ni tih a theihnghilh tak tlat mai le?!


Chung amah rawn vettu hruizen te chu vawilehkhatah an mar thut a, chutah Bill-a chu pawnchhe tumtel paih ang thlawrh hian a sakawr mawng lam atang chuan a hlawmthla tawl mai a. Leicharah chuan a thal nghal hawl hawl mai a. Chutah a sir hnimbuk kar atang chuan hmaituam pali hi an rawn chhuak ta tha tha mai a. An zinga oakhat chuan rifle hian Bill-a chu a tinran mai a, midang pathum chuan an phihawhna hruizen chu an chelhfar hlawm bawk a.


Pakhat chuan Bill-a chu a rawn panphei ta. Zei tak mai hian a gunbelt chu a han phelhsak a, silaia lo tintu lamah chuan a thehphei nghal a. Ani chuan lo dawn nawlh pah chuan, "Bill Jack, thuawih tak khan awm hle hle rawh. Chutilo zawng kahhlum ini mai ang a, i uihawm dawn em mai. I thihdan tur chu ruahman fel sa diam a ni tawh," tiin a han nuizui hak hak a.


Chutah a gunbelt hlihsaktu bawk khan a mit chu a han tuamsak leh ta hmiah mai a. A che hleithei bawk si lo, 'engtin nge min tih an tum ang aw?' tih chu a lo suangtuah ve nauh nauh ringawt a. Chutia a mit an rawn tuamsak takah chuan rindan a nei nghal mai; an tawmna hmun lamah hruai an tum a ni phawt ang.


A rin ang ngeiin Bill-a chu sakawr pakhat chungah chuan an hlang ta nawlh mai a. A ke lam an phuar telloh avangin amah pawhin a la chuang ve thi tho va. Mahse a mit an tuamsak tlat avangin tlanbo han tum chu tihsaloh a ni tih pawh a hrechiang hle mai. Chumai bakah silai nena ven reng a ni ang tih a ring hmiah bawk.


A chuanna chu Bigger-a a ni lo tih pawh a hrethuai a, tihzia a tirilru hle nghe nghe a. Bigger-a chu chungchuang nei lovin JL lamah a haw leh ngei anga, Bill-a awm tak lohvah chuan an rawn zawng thuai ang tih pawh a ring a ni.


Tichuan Bill-a chu an kalpui ta zel a. Tlangpang niawm tak te, kawrruam leh hmun ruallo tak tak ni ngei turah te chuan an kal zel a. Hmu ve theilo mah sela sakawr kaldan atang chuan a ram awmdan awm ang chu a lo rinhriat ve thei zel a. Dam taka chhuah lehtheih chu inringh chiahlo mah sela a rilru te te chuan an kalna chin chu hriat a tum ru ran reng a.


An kalthui tawlh tawlh a, amah mantute pawh chu an tawng duhlo tawlh tawlh a. A tawpah phei chuan phun ri sep sep pawh awm lovin an ngawi ta thap hlawm a. Thil ri hriattur awmchhun chu an sakawr ke pen ri leh sakawr jean ri tawt tawt chiah chu a ni ta.


Ngawi thap chunga minute 10 vel an kal leh hnu chuan an sakawrte chu tidingin Bill-a chu an hlangthla ta a, chutah kein engemawchen chu an kalpui leh ta a. Inchhung ni ngei tur a ni, a rawn lum deuh ta huk nghe nghe a. Chutah hmunpakhatah hian dintirin a mittuamna pawh chu an phelhsak ta a.


A mitvai chu a nasa map map kher mai. A hmaa nui ri kur kur pawh chu tunge ni tih ala hre thei mai lo va. A lu chu thing nawk nawkin a mit te chu a han chhing vang vang a, a han khap fak fak a. Chutah zet chuan a hmaa mi chu tunge a nih a hmuthei ta!


A hmaa chair pakhatah chuan tudang ni lovin Banason-a fapa Pete Banason-a chu a lo thu reng mai a. A hmelah chuan phuba laak chakna hlir a hmuhtheihin a hre nghe nghe a. A pa thil ruahman zawng zawng tichhe zel tu chu dama chhuah a tum loh hmel kher mai.


Bill-a chuan chang bel bawl tak mai hian, "Nang hi ilo ni maw hmaituamte lalpa chu? Mahse i fing nep deuh zawng anih hi, tiraw. I hote tam tak i chan a, ramzau tak i chan tur pawh chu a thlawk bo ta anih hi," ngaisanglo tih hriat tak hian a ti ta siah siah mai a. A hmel erawh chu tlemin a nui deuh va.


Chu thu zet chu Pete-a huatzawng tak mai a ni tlat mai. A thutna atanga rawn dinchhuah zawk pah hian, "Ka pa thil ruahman tihlawhchham theitu chu nang chiah hi ila ni. Mahse i finna chuan a hun hmain thihna ruamah a hruai dawn ta che a nih hi," a ti tuarh tuarh mai a, a mitte chu a meng zim sun tawh mai a.


A hma ang bawka ngainep leh nuihzat hmel pu tak chung hian Bill-a chuan, "I pa Banason-a pawh chu a fing vak chuanglo anih chu. A reng thu-ah Bureau khaw bank rawk turte khan engati nge hmuhtheih tura inrawn inlan reng reng ni? In lo ngaihtuah kur dup hnu chu a ni ve ngei anga(h)," a han ti ve leh ngat a.


Chutah Pete-a chu sawi tur haihchham niawm tak hian a han ngawi hlek a. Chutah hmel dur khup chung hian, "Mitthi tur hnena thusawi zawng a pawi lovang chu. I thi dawn tho bawk a, ka han hrilh ang che. Ka pa ngaihtuahna fin leh finloh chu i hre ve hman dawn chuanglo tur chu a pawi zawk ngawt mai. Ka han hrilh law law teh ang che. A hnawksak ber ka kawl ta bawk che a, Solten-a ram leh a fanu saw ka chanpual a ni tawh mai. Nang hrep hi rawn lang phiangsen lo la chuan tunah te pawh hian nula hmeltha chungchuang tak mai nen chuan kan inkuah heuh heuh ngei ang. Mahsela nangber kan kawl tawh si che a, sawng mi tlawktlaw tak tak te saw kan la chingdarh thuai dawn; kan thil ruahman pawh a hlawhtling ngei bawk ang. Chumi ni thleng thleng ilo daih ta anih hlauh chuan ka la entir dawn khawp che," a han tih khum deuh salh salh a, a nuizui ta kur kur mai a.


A hmangaih ber Jeny chungchang thu a han sawitel tak zauhah chuan Bill-a thin pawh a khei zak mai. A kut chu che theilo mah se thinrim tih hriat tak, aw khur deuh dat dat chung chuan, "Nang ang bawk rukhmang neih tur atan chuan Solten-a fanu saw a hnuaihnung lo. Mi dawihzep, mi inringlo lai chauh kap ngam khan sawng ranch te saw va hnehtheih beisei duh suh. Jerry-aa nen kan kaldun tuma min lo lambuntu, tlanchhe leh ta si-a kha nang ngei hi ini tih pawh ka hria asin," a tichang ta fal mai a.


"I hredik kher mai. Mahse i sawitur aia tam i sawi ta. Hepa hi a awmna hmun turah dah nghal rawh u," tiin Pete-a chuan thu a pe ta nghal a.


Chuveleh midang chuan Bill-a chu rang takin an kaiher mawp a, chu an awmna pindan atanga hlatham deuh takah chuan hruaiin, hmun khatah chuan an han dinpui leh lawk a. A thawmhnaw chu an han dapsak zung zung a, a boot kara chemte leh a chakaikhawrhkawr nghawng chhung lama a chemte nen lam chuan an laksak ta hmiah mai a.


Chu an dinna bul chu leihnuai lam pindan luhna kawngka hi a lo ni a. A hruaitute chuan kawngkhar chu hawngin, tha tak pawha luhtir lo hian a namin an han namlut rawk mai a. Step indawh thla zui maiah chuan a lumthla ta nawk nawk mai a. Mahse lei a zu thlenthlak chuan a rinai takin a insawh nalo hlauhva.


Dimlo baksak hian kawngkhar pawh chu an han khar leh thuai mai a, chu room chhung chu a khawkin a khawk rum rum thei hial a. Tala lian zeta kalh pahin an zinga pakhat chuan, "Tikhan karkhat tal chu i awmtheih ka beisei. Mahse eiin lam chu a vang viau mahna," tiin a zu au zui a.


A ban leh taksa an phuarbehna chu engtia han tihchah tur nge ni ang tih chu a ngaihtuahna hmasa ber a ni. Chu pindan lah chu a thim hian a thimkhup mai a, aimitthlawn an sawi chu nepte hi a ni ringawt mai. Boruak a lut tha meuhlo a niang tih theih turin a lum uap churh mai a, a uih thang deuh nghur bawk si nen. A lumthlakna step lam nia a hriat chu a va pan leh ta phawt a.


Chu leihlawn hmawr kilzum chu a ke chuan a han dapfuh ta a. Chumi zum lai takah chuan a ban leh taksa phuarkhawmna, a dar a hruizen invet sangber chu a han bahtir ta a. Chutah a theih ang tawka na chuan a han tawlhhniam thut mai a, mahse chuti mai chuan a thiltum chu a hlawhtling ta lo. Mahse beidawng duh mai lo chuan a han tileh thin a, a tawpah phei chuan a nghawng lamah chuan a putliam chho ta mai a. Chutah hruizen invet dangte pawh chu an lo thawl ta deuh va, harsa lo tak chuan a inphelh thei ta mai a.


Amah an phuarna hruizen zawng zawng a han thinthlak tak vek hnu chuan thawl huai hian a inhria a. CHutah a vanneiha siamin chemte vawm chi, a kawrban chhunglam ve ve-a a thuhrukte chu an lo hmuhhmaih hlauh mai le. A taksa a a ban an phuarbeh tlat avang khan daptel nachang an lo hrelo a lo ni. Mahse a thawventhlak loh na chhan ber chu chu pindan rimchhe lutuk chu ala ni fo mai.


Chu pindan chhung chu a ke a hawl hmasa zel chung chuan a fangkual ta a, bangte chu a dap pah zel bawk a. A tam zawkte chu lungbang hlir an ni a, hmunkhat lai erawh chu thingphela pin niin, a dapfuh ta hlauh mai a. Chu thingphel lai takah chuan tereuh te pencil tiat emaw lek tur hian a lo kaw re re mai a, chumi awng bul chu sazu sehna niawm tak hian a lo pawr deuh fuap mai bawk a.


Chu awng te tak te atang chuan eng tihthamloh hi a rawn lut ve re re chauh alo ni a. Chu zawng chu ni mah se Bill-a chuan beiseiawm hle hian a hre ta a. Enchian deuh tuma a han insiamrem vel lai chuan engemaw hi a pal ta nawk mai a. 'Eng tak chu ni ang maw?' tia a han dap chuan a rinloh deuhvin mihring ruhro a ni tlat mai le! Mak a ti rilru hle mai a, thil awmzia a han ngaihtuah vang vang erawh chuan hrethiam ta uarh uarh hian a inhre ta a.


A ngaihdanah chuan - chu pindanah chuan amah chauhlo pawh an lo dah tawh a, riltamin an hrenghlum thak a ni ang tih a ringthiam ta a. Silaia kahhlum te, chemte-a invih hlum te leh inkhaihlum te chu alo hmu ve fo tawh thin a, mahse rapthlak tih em em a nei hran lo. MAhse tuna thihtir an tum dan, riltam leh tuihala thih mai chu rapthlak dawn hle hian a hre ta nghe nghe a.


Amah mantu ten, 'Heti maia thi tur chuan i uihawm lutuk, i thihdan tur ruahman fel vek a ni tawh,' an tihte kha a hrechhuak zawk mai a. 'Hei ngei hi anih hi Banason-a hremna tur chu' a ti rilru ta nauh nauh va.


Chumi kaw tereuhte bul vel pawr fap te pawh chu tuna ruhro maia chang ta pawh chuan a thih hma in chu thingphel chu beisei nei takin a lo belbul ve anih te a ring ta hial a. Chupa chan ang chang tura a han indah chhin vel chuan Jeny a hrechhuak zawk mai nghe nghe a. Enge a sawi tih pawh inhre hauhlo hian, "Helai hmuna thi thei ka ni lo," a tichhuak ta hlawl mai a.


Hmundang pawh fang zel tawh lovin a chemte pakhat zawk chu a han thingthla nawlh a, chupa lo ker tawhna hmunah chuan a bur ve nghal ta chat a. A hnuhma atanga a landanah chuan chupa chuan hriamhrei a nei velo ngei ang tih pawh a rintheih mai a. Chu thing lah chu a lo chang em kher a, taksa pum leng tura han kerkuak chu thil huphurhawm tak mai a ni. Mahse damkhawchhuah theihna awmchhun anih miau avangin a chauhchhiat lutuk hmaa beih fat fat chu a tul tih a hria a, theihtawp chuan a bei tan ta fat fat a.


Zankhua deuhthawa a han beih takah chuan a malpui lengvel tura zau chuan a kerkaw thei ta mai a. Amaherawhchu a ril a tamin a tuite pawh a hal tan ta huam huam mai. Chungte avang leh a hnathawh hahthlak tak avang chuan a chauvin a mutte a lo chhuak ta a, a muhil ta bawrh bawrh mai a.


Engchen nge a mut a, chhun nge aniha zan tih pawh hre hauhlo chuan a rawn harhchhuak leh ta hlawl mai a. A lute chu a na bur tawh a, aluakte pawh a chhuak deuh hlui tawh bawk a. A riltam lutuk chu a pum te a na tan ta hial hian a inhria a. A chil neih ang chhun chhun chu a lei chuan a han hawlvel a, a dangro tak tihnawng tur chuan a han lem leh hram thin a.


A kut veilam a a pum dawm vang vang pah chuan lehlam chuan a hna ngai chu thawkin a ker leh ta hrauh hrauh va. A taksa chauh tawhzia leh a tha neih tawhloh zia a han ngaihtuah chuan chu pindan atanga dama chhuah leh chu beiseibo ni hian a hre rum rum tawh a. Mahse a thih thak hma chuan chu a thilker chu chhunzawm zel a tum ta tho va.


Chumi hmunah chuan midangte pawh an la rawn khung leh ngei ang a, chung hote tlanchhuah nan pawh chuan thil tangkai tak a la ni thei ngei ang tih chu a ring tlat a. Chu a rinna chuan thathona leh chakna tlem a rawn pe leh ta deuh nge ni, a thihthak thlenga Banason-a ruahmanna tibuai theutu nih ngei tumin a bei leh ta fat fat a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)