Bill Jack Chapter 11

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter 11

Unread post by Ruata Ralte » March 13th, 2020, 10:48 pm

Bill Jack-11
Retyped : Ruata Ralte


Jerry-a leh a naute chuan Bill-a bo ta daih mai chu a ngaihna hrelo tak chungin nihnih lai mai chu an zawng tawh a, mahse an hmthei ta mai si lo. An mangang tihngaihna hrelo chuan Solten-a hote pun tumin Jerry-a te chu an va kal ta ngawt mai a. Bill-a chu a thi emaw, a dam emaw, hmuh hrim hrim an tum ringawt mai a ni. An hmuchhuah hmaloh chuan ranch-a haw pawh an tum hek lo va, a thi ta ni ngeia an rin nachhan pawh amah chuahva a sakawr a lo haw tak vang kha a ni a.


Bill-a bo tak daih thu leh a thi tawh ngei anih an rinthu te chu Jerry-a chuan Solten-a chu a va hrilh ta ngei a. Solten-a'n chu thu a han hriat meuh chuan a phu deuh zawk mai nghe nghe a. Amah leh Jerry-a inkar rawn siamthatu, 'dikna lalpa a nih hi' alo tih rilruk thin hian a bo tak thu a han hriat chuan a awihlo hial a, awmngaihna tak pawh a hrelo va. Mangan tawp a ni bawk a, an naute ho zawng zawng chu hruaiin Jerry-a te ho nen chuan an chhuak ta a.


A pate kalchhuah veleh Jeny pawh chu mangang takin a room lamah a tlan thuai a, kawngka inkalh khum sauh sauhvin lungchhe tak mai chuan a tap ta chiam mai a. A hmangaih ber leh a nun tihlim theitu awmchhun, englai pawha a hmel hmuh alo beisei reng thin kara a chhan pawh hriat hleihlohva bo ta daih mai chu a tuarthiam thei thlawt lo va. Engtikah mah hmu leh tawhlo tura a han inchan vel phei chuan a lung chhe lutuk chu naupang chhe tah tak hian a tap hlap hlap mai a.


Chutiang taka Jerry-a leh Solten-a te an mangan lai chuan Bureau khua a Banason-a inah thung chuan hlimna ni ropui a thleng hi a ni hawt a. A hmelma lianber mai leh a thil ruahmanna zawng zawng lo tihkhawlohsak thintu awmchhun a han rekbet thei ta chu a hlim em em mai a. Gunfighter turu leh phawirang elkhen, amah Bill-a bei tura a chahchhuah pawh chu a lo thleng ve tawh bawk si nen. Bill-a chu beih ngai lovin lo thikhawng reng tawh pawh ni se la amah veng zui rengtu atan thlakhata dollar zanga hlawh turin an lo inbefel leh diam tawh bawk a. A hmabak a han thlirchhin vel thin a, a hlim lutuk ringawt mai a ni.


Nimahsela Banason-a chuan hriathmaih pakhat a nei tlat mai, chu chu hei hi a ni. Thi ngei tura a beisei leh a rin hial, rekbet hmiah tawha a inhriat Bill-a chu a lo la thi bik em lo tlat tih hi. Ani chuan a thilker chu thei leh theilo chunga nihnih lai a han beih fat fat takah chuan mihring chhuah hal hal theihna tur khawpa zau chu a kerkaw thei ta mai a! Mi thenkhatte anga chi-aina nei ve ni se zawng, a chauhlum der tawh hial ang chu.


Mahsela beidawng lo leh rilru chi-aina nei hauh lo va, tumruhna nena a beih fan fan na chuan rah duhawm tak a rawn chhuah ta mai reng a. Chumi a han ker zo meuh chu Bill-a pawh chu a chau chhe ve tawh hle mai. Mahsela a hmangaih ber Jeny hmu leh tawhlo tur ang leh, Pete-a'n a han sawisa kual vel tur a suangtuah velna chuan tumruhna leh chhelna a siamsak a, a damkhawchhuah ngei a ngai tih a hre reng a. A theih ang tawk chuan a taksa leh rilru a han tipaukhauh leh a, a thil kerkuak awng phuau tawhah chuan a vak chhuak ta hrat hrat a, a tawp atawpah chuan a vakchhuak hlawl ta mai a.


Kha pindan, Bill-a an dahna kha tunhma chuan anmahni zawngtu te bihruksan nan an hmang thin a, a vahchhuahna an pinphui tak pawh kha boruak thianghlim luhna tura an siam a ni nghe nghe a. Mahse chu chu tunah chuan thingphel chhah tawkin chhunglam atang chuan an ping phui ta hmiah a, an mi mante riltama hrenhlum nan an hmang ta zawk thin a ni.


Bill-a chu a theih ang ang chuan a vak ta zel a, tan thar lak a ngai zing hle mai a. A vakthui tawlh tawlh a, eng pawh chu a rawn fiahin a lian ve tual tual bawk a, a chang phei chuan thlithaw te pawh a rawnlut ve ta zauh zauh va. Chutia thlifim tlem tlemin a rawn chhema boruak thianghlim a han hip kawk kawk theih takah chuan harhphah sawt hian a inhre thin a. Tunah chuan a rilru ah tlanchhuah theih mai inbeiseina pawh a lian hle tawh a. Beiseina thar neiin a phur thar ta bawk a, a theih ang tawka chak chuan a vak leh ta hrauh hrauh va.


Rei vaklo a han vah leh hnu chuan chu awng, kaw thui tak chu a vakchhuak ta hlawl mai a, pawn boruak leh khaw eng te chu a hmu thei ve ta a. Pukchhung thim takah khan thi ngei tura a lo inrin hnuah pawh boruak eng te hmu leh a, ngaw hring dup mai te a han hmuh leh takah chuan a hlimzual hle nghe nghe a. Chu puk kaw tawp, a vahchhuahna atang chuan amah mantute awmna niawma a rinte chu a han thlithlai vel phawt a.


A hmuhtheih chin chu ramhnuai pik tak mai vek hi a ni a, mihring hmel chu sawiloh, thawm riva reng reng pawh a awm hauh lo. A tana thil pawimawh hmasa ber chu tui a ni tih a hria a. A tui inlohna rei lutuk tawh chu a leite pawh chu a tawt ul tawh hian a hria a. Danghnawnna chu a mamawh hmasak ber a ni tih hriain ko hniamte ah hian a tum thla ta a. CHu ko chu fit thum vel leka sang ni mah se a chauh hneh tawh em avang chuan a tlusawp deuh nuaih nghe nghe a. Mahse a insawh na hran lemlo bawk a, a rawn thochhuak ve leh thuai a. Hnimpik hnuai, fai thelh hunah chuan tui zawng turin a penlut ta vat a. Thui lo te a kal hnu chuan kawrte tui fim tha zet mai hi ava hmufuh ta a. A lawm lutuk chu a aw neih zawng zawnga ring tawka han au vak mai chu a nap a. Mahse hlauhawm a awm thei tih hriain a insum leh ta zawk a. Dimte hian tui chu a dawt ta khawlh khawlh mai a.


Chutiang reng renga tuisik tui chu a in ngai pawh a hre lo. Chu kawrte a tui chu dawtkang vek theih pawh a inring hial a, nimahsela a in teuh chuan a chauhphah zawk ngei ang tih a hriat kar avang chuan a duhtawk ta rih a. La khamlo hle mah se a taksa mamawh tawk a in tawh a a inrin a vang chuan a thochhuak ve ta zawk a. A lu leh taksa a han tihuh leh te chu nuam a ti kher mai.


Inchiah nilen thak pawh chu chak rilru hle mah se tihtur hmabak ala neih tam zia te chu a hrereng a, reilote ah chuan luitui tui lutuk tak mai chu a kalsan thei ta hram a. Kha a tui in khan a reilo berah darkar nga vel chu a taksa pawh a rawn tihpangngai leh theih mai a ring deuh va. Chumi chhung chuan sakawr leh silai tal a neih a ngai a ni. Tichuan amah thah tuma khungbo tute awmna lam nia a hriat lam chu a pan leh ta chhat chhat a.


A rawn chhuahna kaw ko bul ava thlen chuan chet lakdan tur a han ngaihtuah leh phawt a. Lungbang chu a veilam sirah chuan zawh chhovin, fit sawmhnih vel lai a zawh hnu chuan lungbang chu chhung lamah a kawi phei ta a. Chu kawng chu zawh zelin, a hma ang bawk khan veilamah bawk a lo kawi leh ta a. Chu lungbang chu killi nei a siam hi a lo ni a. Vawikhat dang a han zawhleh chuan chu lungbanga kawngkhar lo awm leh, a piah lawk a sakawr dahna, corral chu a va hmu ta a. Corral-ah chuan sakawrtamfe mai hi an lo awm nghe nghe a.


Uluk zet mai chuan a mit te chu a lenkual ta zung zung a. Chu kawngkhar chu tumahin an veng hauhlo mai. Mahse corral chhunga sakawrte chu mi pakhat hian a lo veng tlat mai thung a. Chupa chuan Bill-a lam a rawn hawi lo hlauh mai chu Bill-a tan vanneihna tawpkhawk a ni ta.


Chu hun remchang, hlu lutuk mai chu Bill-a chuan hloh a tum lo kher mai. Lehlam hawia zial lo pak bial pap pap pa chu a vehphei ta tham tham a, a kut dinglam chuan a chemte vawm chi chu a humran mai bawk a.


An inkar chu fit sawm pawh a tling tawh kher lovang. Sakawr vengtu pa chu a rawn inher ta thut mai le. A thiante, amah rawn chhawk tur a lokal emaw a tih rilruk nak alai chuan an mitang, Bill Jack-a hmel diktak a han hmu thut mai chu a hawiphawk hman hle mai a, engmah tih nachang a hre lawklo chu a vanduai phah ta.


Bill-a chuan rang em em mai hian chupa chu a va bawh ta rawp mai a. A kut veilama chupa ka chu hup nghalin, a dinglama a chemte hum erawh chu chupa hrawkah tak chuan a han vaitlum thawih a, a han pirlet nghal zauh bawk a. Chu chuan a hrawkhrui a tichat ngei a ni tih hriat tak hian thisen lum hi a rawn chikchhuak nghal puat bawk a.


Chuoa hrawk chu vawikhat a rawn ri-uk a, thawm dang chhuah ta chuanglo chuan a zalhlen ta raih raih a. Chutah Bill-a chuan a chemte chu chupa kawr awma a han tahfai hnu chuan a kawrban chhungah bawk chuan a thawlhlut lehta daih a. Chutah chupa pistol chu a gunbelt chawp chuan aphelhsak a, a hrengzui ta mawlh mawlh a.


Chupa chu minung la ni mawi awm hian lehlam hawiin a thuttir a, hma lama a bawhkhup mai lohnan kawngkhar atanga lang theilo tur hian a do ding bawk a. A lukhum chu kun fe a kawihkunsakin a hmaa a sikret peh lai bawk kha a hmuiah chuan a pehkawhtir leh ta vauh bawk a. Chutia a duh ang tawka a buatsaih zawh hnu chuan chupa rifle, leia letreng chu a la leh a, sakawr huang lamah chuan a phei ta a. Sakawrte chu a han enkual dan dan a, chak thawkhat tura a ngaih ber chu corral atang chuan kaichhuakin ramhnuai lamah chuan a kaiphei ta daih a.


Chu a sakawr kaih chu a chak hmel ve hle mai a, mahse Bigger-a han tluk tur chi erawh a ni lo. Sakawrah chuan a jean pawh a invuah lo nachungin han chuan chu a tan huphurhawm a ni hauh lo va. Indian ho hnena a chenlai khan chung mai mai te chu an lo chin thin ve reng a ni bawk a, a huphurh hauh lo mai a.


Chutah lungbang lantheihna laiah chuan a han thu sauh sauh va, sakawr vengtu inthlak hun tur chu a chang ta ran mai a. A tumdan chuan chumi chu lo dahthat leh a, duty hmasa zwk niawm taka gate chhunga va luh ve chu a tum a ni. A tawp rak thlenga chung rukru ho beih chu a tum nghet bur mai a ni.


Reilote ah chu gate kawngkhar chu a rawn inhawng ta ngei a, mi pakhat, cher den dawn hi rifle keng zan zan chung chuan a rawn chhuak ta a. Duty hmasa, meizial petkawh vauh chunga lo thukun lap lam chu a rawn panphei zel a, Bill-a chuan a chemte chu vawm nghal thei tur chuan a lo inring ran mai a.


Duty lokal thar zawkin a thianpa dar a sawi a han tum chiah chuan Bill-a ban dinglam chu a che vuai a, chemte chu chupa hrawkbawk hnuai chiah, a aw chhuahna dawt khalh chiah maiah chuan a va bur phei chawt a. Chutah chupa chu a tlu hnawk a, a taksa chu zo ta lo niawm tak hian a pai ta at at a. A hrawka chemte bur vu mai chu phawi tum niawm tak hian a han dap that that a, phawi hman ta emlo chuan a tlu ta riai ria zawk a.


Rang takin Bill-a chuan ava pan phei vat a, chupa hrawka chemte bur va mai chu phawiin a han tatfai leh nawk nawk a, a kawrban chhungah bawk chuan a thawlhlut leh ta a. A sakawr chu a thlungnghet tawka in ngaiin, a dahna lam pan talo chuan corral lam chu a pan ta zawk a. Corral kawngkhar chu hawnsa in ava dah te te a, a kalsan ta a. Silai te a puah palh hlauh pawh a an sakawr te ho an tlanbo zawh vek a beisei a ni.


Chutah kawngkhar lam chu a panphei ve ta. Kawngkhar chu kalhloh anih avang chuan awlsam takin a lut ve ta mai a. Anmahni ho zinga tel ve niawm tak hian ngampa tak chuan a penlut ve ta ngawt a. Kawngkhar vengtu niawm tak hian chhunglam atang chuan, "I va rawn lut har ve. Khawvawh tehreng nen chuan! Gate kalh leh tura lo nghah che pawh kha ka ning hman teh asin," a lo ti bul bul a.


Bill-a pawh chuan, "A ni tak maw.." tih pah chuan chupa bekah tak mai chuan a rifle kawm chuan a han hlap nghek mai a. Ani chu chiangzet mai hian a hlawm nghal tawl mai a, a hnawksak zui zel lohnan tiin chupa hrawkhrui chu a chemte bawk chuan a han zaisak leh nghal hmiah mai a. A pistol pai mek pawh chu laksak lehin, a gunbelt hrenna karah chuan a han zep leh zauh va, pakhat zawk erawh chu a hum ta thung a. A rifle ken erawh kha chu inchhungah chuan hnawksak zawk dawna a hriat avang chuan a hnutchhiah ta thung a.


Chung misual rual hote lo awmna in chuan pindan pahnih chiah a nei a. Pakhat zawk chu Pete Prater tia a hoten an lo koh thin awmna a ni a, a dang leh chu Pete-a hote, hmaituama vak vel thin hote awmkhawmna a ni thung. Chungho chuan a tuldan ang zelin tual an that a, ruk an ru a, bank te rawkin rel an suam a, bawng thlengin an ru thin a. An pu ber Banason-a'n bawngrual khalh tur a neih veleh an va khalhsak leh mai thin bawk a. An vai chuan tawrhhlelhawm tak tak leh silai chelek thang thiau an ni vek hlawm a.


Bill-a chuan rang takin a piah lawka kawngka chu thawm nei hauh lo chuan a va pan ta a. Chu kawngkhar bul atang chuan thawm a han ngaithla vang vang a. A reh deuh thap a, chutih laiin hla taka mi pakhat tawng lauh lauh erawh a hre thei a. Hnaivai takah an awmlo anih a ring nghal mai a. Zawite chuan kawngkhar pawhna chu a han pawtchhin a, a inhawng ta mai a. Silaimu a rawn len nghal ring tak chung hian a bawk nghal thlawp mai a.


Mahse a rin ang thawm chuan a rawn deng ta mai lo. A thochhuak leh ta thuai a, fimkhur tak chuan a penlut ta a. Chu pindan chu fit sawmthum bial vel tur hi a ni a.Chutah chuan mi engemawzat an riak thin a ni tih hriat tak hian puanthuah tel hi engemaw zat a lo awm a. Kilkhatah chuan eisiamna hmun niawm tak hian thuk leh thing tuahtur te, eisiamna bungbel chi hrang hrang leh cowboy ho chaw dawh thinna thleng kum tawk engemaw zat bakah khawnvartui tinhnih ngawt mai a lo awm bawk a.


Chu pindan kawngkhar hnung lamah chuan va phei leh den denin thawm a han ngaichang leh rih a. A piahlawk pindan a mi pakhat thu han sawi lauh lauh chu a hre thei ta a. Chiang lehzuala a han ngaihthlak chuan Pete-a aw ni ngei hian a hre ta a. A thil ruahman vel chung chang a sawi vel anih a ring hmiah a.


Pete-a chuan ala sawi duhtawk mai dawn lo nia a hriat chuan thukbul dawhkan chunga biscuit bawm chu a han ban zauh va tui ti tak leh hmanhmawh ru deuh si hian a ei ta mawlh mawlh mai a. Chutah coffe thing lo awm chu a han khiat leh khawlh khawlh a, chak thar ta sawng sawng hian a inhria a.


Chutia a pumruak lutuk a hnawhkhah hnu chuan a sir lawk a khawnvartui tin hnih lo awm chu a va pan ta thuai a. A han enchian chuan pakhat chu a lo la khat a, pakhat zawkah erawh chuan tlem a lo la awm a. Chutah a chhin chu hawngin a han khaikang a, mutbu ho bakah inchhung kiltin maiah chuan ren baksaklo chuan a leih ta hmiah hmiah mai a. Bangah te thleng chuan a leihhuh ta dul mai a.


Chhunglam duhtawka a leih hnu chuan kawngkharah leh pawnlam bangah te pawh chuan ava leih leh ta tlawrh tlawrh a, chung bur hnih a khaichhuah te chu a leih zo ta vek mai a. Chutah thuk bula nawalh lo awm kha a aksa than tawh bawk a, kawngka atang chuan a depkai tan ta a. Rang takin kawngkahr vengtu awmna lamah khan ava tlanlet vat a, nichina a kalsan tak rifle kha la lehin, a rawn dikdak hmasa apiang lo thal tawp tawp mai tum chuan chu rifle nen chuan a lo inring ta raqn a.


Khawnvartui kha a leihhneh bawk a, inkang chu a nasa sawt hle mai. An la rawn hre mailo lo nge ni, thawm an la rawn chhuahlo tlat. Chutah misual ho him taka an lo chen tawh thinna bang chu a alhkai tan ta. Tukverh ah te chuan a rawn alhsen ta zuai zuai mai le. Chutah meuh chuan rukru ho chuan an rawn hre ta ngei mai. An au ta chel chul mai a.


An vai chuan mi pawmpathum vel zet hi an lo ni a. Engvanga kang nge ni tih lam chu inzawhna hman pawh a awm lo; an zavai chuan kang thelh tumin an buai phili nasa ta mai a. An pu Pete-a pawh banglo, an vai mai chuan an ri chel chul mai a.


An kangthelh tum chuan awmzia a neilo tih an man ta thuai a. Tihtheih an nei tamlo hle tih an hrechiang tan ningei tur a ni; tlanchhuah tumin an in au ta zawk a.


Thawklehkhatah rifle a rawn puak ta tuarh tuarh mai le! Chung misual ho chu an tlu ta phawk phawk mai a. Hmalamah han tlan dawn se, meisa a inbarhluh ngai a ni si. Hnunglam atang lahin rifle a rawn puak zawt zawt lawi bawk si. An theih ang anga insaseng chu an han tum ngial a, thenkhat lahin an silai chuhin rifle rikna lam chu an rawn rinkah ve thawr thawr ta mai a. Mahse rinthu maia kap an ni bawk a, an teuhlo hlawm kher mai. Bill-a erawh chu duhtawka tanhmun lo siamrem sa diam a ni bawk a, a rifle mute chu a thlawn hian a chhuak mai mai lo emaw tihtur hian chung hote chu an tlu phawk phawk mai si a.


A hmaa an lo thutkhawmna pindanah bawk khan tlanluh leh tumin Pete-a leh midang pakhat chu an tlankir leh chiah tihah chuan Bill-a chuan a rifle chu a han tlir lehta zawih zawih mai a. Mu khat chuan Pete-a kaihza ah tak a va fuh a, mikhat erawh chuan a tlanpuipa tukkhumah tak ava verh siah bawk a.


Pete-a pawh chu duh sela chuan a kaphlum der thei tih a inhria a.Mahse chuti maia nuamsa a thihtir mai erawh a tum bik tlat lo. An tan chetve ngaihna a awmlo bawk a, an zinga pahnihte tih chauhlo chu an thifai vek tawh mai a. Anni pahnihte pawh chuan Bill-a awmna chu an rawn hrechiang ta bawk a, an pistol hmetpuak thuai thuai chung chuan Bill-a lamah chuan an rawn tlan ta thut mai a.


Bill-a tan pawh silaimu leng karah chuan han hawichhuah chu a ngamawm ta hauhlo mai le. Chutiang zela an rawn panphei anih chuan atan pawh hlauhawm an tling dawn tih chu a hrechiang kher mai. An rawn hnai tawk hle tihah chuan a rifle kenlai chu paihin a pistol pai chu a han phawidawk zawk a, a lam pana rawn tlan mekte hma chiahah chuan a zuangchhuak ta thut mai a, a bawk nghal thlawp bawk a.


Chu mite chu chutia Bill-a rawn che ta thut chuan a tihamhaih kher mai. Chutia a rawn zuanchhuah tak thutah chuan an ding chawt a, kah tuma an silai an lekhniam lai chiah chuan Bill-a pistol te chu an de rual thawt a, anni pahnih chu chiang em em hian an thal nghal tawl ta mai a.


A sir lawka rawn phezeuh chu Bill-a chuan hmuin a vir nawk a, kah tuma mu chunga lo tin mektu Pete-a kutbawr ah tak chuan ava verh leh siah a. Pete-a na ti lutuk chu a chiau thawt a, a vial nghal ngawlh ngawlh a. Bill-a chuan midang an la awm leh awm loh chu a han enkual thuak thuak a, an awm tawhlo tih a hriatchian hnu chuan Pete-a kut chu hnungkhirhin ava phuar ta phawt a, in kanglo zawk chhungah chuan ava lut leh ta a.


Inchhungah chuan a rin ang ngeiin ama gunbelt leh pistol chu ava hmu ta mai reng a, a chemte te pawh chu a bulah chuan an lo let ngat bawk a. A gunbelt hrenlai chu chhuatah chuan a paihthla ta bawl a, ama gunbelt ngei chu a hrengtha ta malh malh a. A hriamhrei dangte pawh chuan an hmun ngai an luah leh ta. Chutah a pistol te chu an tha em, mu an la pai em tihte chu a han endik leh zawr zawr a, chutah a chhuak leh ta a.


Thei leh theilo hian Pete-a chu a lo thuchhuak dawn mek a. Bill-a chuan a ke a phuarsakna chu phelhin a han kaitho lawp a, a kaihza hliam pawh chu ngaihsak duh hauh lovin gate lam chu a panpui ta dawr dawr a.


Pawn an va thlen chuan sakawr zawng zawng tihtheih deuhthaw chu silai ri leh meialh hlau khan an lo tlanbo duak tawh mai a. Sakawr nu pahnih erawh an lo la awm hlauh mai. Pakhat zawk chungah chuan dimlo baksak hian Pete-a chu a phuarbet leh ta a. Ama chuanna tur alo thlunhran sa lamah chuan a kalpui ta a. Pete-a na tuar chu a rum kawk kawk a.


""Tunah zet chuan in sual man chu enge ni tih i hrethiam tawh ang chu. Nangni ang sual rawngbawltute vanneihna hi chuan tawpchin a nei tlat thin a nih hi. Tunah zet chuan Solten-a fanu 'hmeltha-i' pawh kha i chanloh hmel ta hle mai,"


A kut lehlama Pete-a chuanna sakawr lakam hrui chu chelhin ama chuanna zawk chu a han kheng zeuh va, JL Ranch panna lam nia a rin lam ah chuan dimlo tak hian a sakawr chu a tlantir ta a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)