Bill Jack Chapter-12

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-12

Unread post by Ruata Ralte » March 14th, 2020, 9:15 pm

Bill Jack-12
Retyped : Ruata Ralte


Bill-a te'n JL Ranch an va thlen lai chuan amah a thiante ho chu amah zawnga beidawngin, tihngaihna hre tawhlo chuan ranch tual zawlah chuan mahni ngaihdan te te sawikhawmin an lo thu bial tiau hlawm a. Solten-a leh a naute pawh chu an lo lakim thap mai bawk a.


An awmna lam pana Bill-a, chau hmel tak leh a hnunga sakawr pakhat chunga mihring phuarbeh nena rawn kal an han hmuh tal thutah chuan lawm em em, makti bawk si, a ngaihna hrelo zet hian an lo hawi thap mai a, Jerry-a phei chu a lawm lutuk a tahnuih hi a ni ber tawh a.


Ding meuhva an lo thlir taih lai chuan Ranch tualzawlah chuan an rawn thleng ve ta mai a. Chutah lawm leh hlim tlang taka an inchibai hnu chuan Bill-a chuan thil awmdan tlangpui chu a hrilh ta mawlh mawlh hlawm a. Jerry-a phei chuan Bill-a thusawi zawng zawng ai mah chuan dam taka a han hmu leh chu a lawm tak zet a, Bill-a chau lutuk pawh chu hre phallo lekin a kuah chuk chuk reng a.


A thil tawn zawng zawngte a han sawizawh hnu chuan Bill-a chuan, "Min rukbo tak ni atang khan biscuit tlem tih mailoh chu engmah pawh ka la ei lo va, ka ril pawh a tam ve lek lek ta. He pa hi tha takin lo veng ula, ka pumpui hi ka'n hnawhpuar ve phawt ange," tihpah chuan Pete-a chu a han kawk zeuh va, choka lam pan chuan a kal ta thuai a. Jerry-a pawh chuan a zuilut ve ta nghal a.


Midangte chuan lainatna tel map lovin Pete-a phuarna hrui chu phelhin an han hlangthla a, chhek in banah chuan che thei hauhlo tur chuan an phuarbet ta hmiah mai a. An duhdan takah phei chuan rukru lalpa chu khaihlum nghal hmiah an duh a, mahse Bill-a thu an la ngaihchan rih vanga khaihlum nghal ta lo mai an ni zawk a.


A riltam tawngkhawng bawk a, Pi Money-i eitur siam chu a lo tui kher bawk nen; Bill-a chuan chaw pawh chu a eihnem nangiang mai a. A eikham veleh chuan a thiante leh Solten-a naute ho nen chuan engemaw chen an han inkawm leh a. An inkara inhmelmakna siamsak tumtu ber chu Banason-a anih thu te, Windham Bank rawktute pawh ama hote tihvek anih thu te; Solten-a ram leh Jerry-a ram chu chhuhsak a, neihsak an lo tumdan leh an thuruk engkim mai, Pete-a'n belchhunga sa anga a lo ngaih tawh avanga a hrilh tak maite kha a hrilhchhawng leh ta vek a.


A thusawi tihtawp nan chuan, "Vawiin ah chuan eng han tithei kan ni rih lo va. Naktukah chuan Bureau khua ah chuan kan va kal anga, a thiltih ruk zawng zawngte mipui hmaa kan puantir vek hnuah he a fapa nen hian kan khaihlum tur a ni. Chu chu a nunrawnthlak deuh lo tite kan awm maithei a, mahse hetiang khawpa mi bawlhhlawh te hi khaihlum zel loh chuan mi tha thenkhatin an thilchin thalo te hi an la rawn chhunzawm ve mai ang tih a hlauhawm a. Hetiang misualte chantawk chu khaihlum a ni tih pawh mi tinrengin an hriat ve a tul a ni," a ti ta charh charh a.


Bill-a thusawi chu midangte pawh chuan an pawmpui thu an lo sawi ve sap sap hlawm a. Chuta chin chu an thiltih turah chuan an phur tlaangin an nghakhlel hlawm em em mai a. A tuk khaw lo var leh hun tur nghakhlel tak chungin Solten-a leh a naute chuan an hmun lam an pan ta a.


Bill-a mutui lai chu engemaw hian a hmuiah hian rawn deka a hriat avangin a harh ta hlawl mai a. Dektu chu a lo awm chiang kher mai reng a. Jeny, lungngaihna leh beidawnna in-a alo khuhpil tawh, chaw pawh ei hleithei lova tap zawih zawih reng mai thin chu tunah zet chuan lawm avanga bianga mittui luang ngiai ngia chungin Bill-a mutui lai hmuiah chuan alo fawhsak zauh zauh hi a lo ni a. Sakawr chungchuan kekawrtlawn hi a ha zaih a, a piannalh zia chu a lang chiang kher mai a.


Bill-a pawh chuan Jeny a han hmu ta thut mai chu a lawm ve kher mai bawk a. Thophang hlawt e tilo chuan Jeny chu a kuai mu ve ta thut a, duhthawh em em chuan a fawp ta vawng vawng mai a. An inthlah dawn tawhlo emaw tih tur khawpa rei an infawh hnu chuan thate chuan an inthlah veleh thei mai a. Bill-a chuan a thawmhnawte han inbel zung zung pah chuan, "Jeny, engtizia a zing zingah te i rawn kal teh tlat a?" tiin a han zawt a.


Jeny chuan, "Bill, i bo tirh atang tawh khan zan khatmah ka la mu hauh hleinem. Nizana ka pa'n i rawn haw thu a rawn sawi khan ka lawm lutuk a, ka tap lek lek zawk asin. Nizan la la khan rawn kal nghal ka tum deuh va, mahse ka pain i chauhzia tur leh chawlh hahdam i mamawh turzia te min hrilh a, tihbuai che a remti ta lo a ni. Tichuan tukin khan zing hma takah ka rawn kal a, chutah pawh chuan kaitho lo chein i bulah hian ka thu reng a, i hmuia ka han fawh che khan i harh ta chauh anih kha," a han ti siam siam a.


Tunah chuan Jeny pawhin lusun ang hiala a lo inngaih tawh hnuah a hmangaih chu a hmu leh ta a. Chumi zing, tukthuan eikham veleh chuan Solten-a hote zawng zawng leh Jerry-a naute zawng zawng chu an mi khaihlum tur Pete-a chu hruaiin Bureau khaw lam pan chuan an kal ta diah diah a.


Bureau khua an va thlen chuan Banason-a in chu an tlawh hmasa ber a, mahse alo awm loh avangin saloon lam chu an pan leh ta rih a. Saloon chhunga mi te chuan an lo hmuduh hlawm hle a. Ranch thenawm, inngeihlo ve tak nia an hriat nisi, lungrual awm taka rawn kaltlang ta chu mak an ti deuh ni te pawh hian a ngaihtheih a. Jerry-a, Solten-a leh Bill-a te tihloh an naute ho chuan tualah Pete-a chu an lo awmpui vek a, an mi manpa chu chhuah an tumloh hmel kher mai.


Saloon chhunga an va luh chuan an rin ang ngei chuan Banason-a chu an va hmu ta ngei mai le! Banason-a'n Bill-a hmel a han hmuh ve meuh chuan a phuchiang kher mai! Chutia a makti hmel a han hmuh chuan Bill-a chuan, "Ka hmel i han hmu leh zet chu i phu nasa mai maw, Banason? In mikhungna pindan kha alo phui tawklo deuh va, ka rawn chhuak leh thei ta mai anih hi. I thuihruai ho, hmai pawh tilang ngam lova tuamreng ho te pawh khan i thupek chu hawisanin Setana rawngbawlsak ve tawh turin an kal ta hlawm anih kha. I fapa duhtak, suamhmangte hotu erawh kha chu pawnah sawn hlinsa in a awm reng e,"


"I chanchin leh thiltih dan zawng zawng, Windham Bank rawk anih theihnana sakawr intlansiak i huaihawt thu te, Solten-a leh Jerry-a ram neihsak i tum avanga an inkara buaina i chawhchhuah thin dan zawng zawngte kha i fapa duhtak chuan a sawi vek asin. Tin, nangmah ngeiin, 'hetiang mi bawlhhlawh te hi chu thah vek tur an ni' ilo tih tawh ang ngeiin hei vawiinah hian chumi tihhlawhtling tur chuan kan rawn kal ta anih hi," tiin Banason-a chu ava au ta lauh lauh va. Banasona lah chu sawi tur reng hre lovin a ka ho ringawt a.


Chutihlai tak chuan a fapa Pete-a chu Solten-a naute ho chuan an rawn nawrlut ta nawk nawk mai a. Bill-a chuan a pistoil chu phawichhuakin Pete-a kaihza ah tak chuan a hemsak ta zauh va, Pete-a na ti lutuk chu a te thawt mai a. Chutah Bill-a chuan, "I kaihza lehlam kha kahsak i duhlo anih chuan ka thusawite kha a dik ngei a ni tih mipui hmaah hian han puang rawh le," a ti ta chheu chheu mai a.


Chutia thu a han pek rual chuan Bill-a chuan a silai chu a han kau nghal rap a, Banason-a ber lah chuan engmah reng a sawingam tawh lo. A hlau lutuk chu hmai dang bawih bawihin a dingkhur deuh hlak hlak reng tawh a. A bula a gunman hnenah chuan, "Khi pa khi anih khi that tura ka tih che chu," a han titham tuak a.


Chuveleh chu gunfighter chuan ring leng lawng tak mai hian, "In khaihlum hmain kei hi min dahsawn phawt a ngai ang," a rawn ti ve ta chheu cheu bawk a. A hlawh hmuhna chu tlansan a tumlo chiang kher mai.


Bill-a chuan, "Nang pawh kha Banason-a thau sawktu bawk maw lo ni che a? Dahsawn i ngai anih chuan ka han dahsawn mai teh ang che," a tilet ve ta siah mai a, boruak chu a tang ta at at kher mai le!!


Bill-a chu a pistol chu phawi mai thei tur hian a han insiamrem ta nghal a. Chutah a thiante pahnih chu silaimu lenglak atanga inveng turin kalkiang tur chuan a hrilh ta nghal a. Gunfighter bawk chuan a hma aia ring leng lawng hian, "Nausen nen kan la inhmachhawn ang tih hi ka lo ringpha ngai reng reng hleinem. I thilhriat lutuk man chu i tel dawn a ang ta hle mai," a rawn ti leh loh loh va.


Chutianga tawngkam a intawng reng mai chu Bill-a chuan a ning tan tlat mai a, changfal hian, "Nausen silaimu pawh a chang ve viau tho asin. I ngam anih chuan tawng tawng lo khan i silai tawih tak te kha chuh thuai ta che," a ti ta khawl mai a.


Chutah zawng chu gunfighter pa pawh chu a sa ve phat ni tur a ni. Chutiang taka hmusittu chu an damrei ngai lo va, thinrim engphiar hian, "Ka ngamzia chu i hmu dawn alawm," tih leh a pistol chuh chu a rual ta mai a!


Bill-a pawh chuan a kut chu rang mangkheng hian a vaithla nghal fua mai a. Engtik laiin nge a lo phawihman tih pawh hmuh hmanloh khawpa rang chuan a kutah chuan a silai pahnihte chu an rawn chawrchhuak nghal nawlh mai a, a kawngzawn atang chuan an rawn dechhuak ta zawk mai a.


Gunfighter pa pawh chuan a pistol chu phawichhuak in a han hmetpuak ve hman hram a. Mahse a chaldar taka .45 muin a rawn den hman tak avangin a tum tak pawh fuh ta lo chuan saloon chhung ceiling chung chu a han verh ta pawp thung a.


Silaimu in a den rual rual chuan chu hired killer chu a eu awrh a, a hnung lawka amah ruaitu Banason-a chu delh thawithuakin chhuatah chuan a tlu thum ta dup mai a. Awmze nei hauhlo hian a ke chu a leng awrh awrh a, chumi hnu chuan a hnuk feina pawh chuan a tlin ta biklo a niang chu, a zal ta raih raih a.


Bill-a chuan a pistol kawhmawr la khu ngiai ngiai han chhemkian dalh dalh pah chuan, "Mr. Banason, i hun a thleng ve ta," hriam hraih chuan a han ti a, chutah va kaichhuak tur chuan Solten-a leh Jerry-a te chu an va phei ta a.


Mahse a chunga thil lo thleng mai tur chu enge ni tih a hrechiang ve hle a ni ang, tha taka lo inpek chu a tum ikhaw lo mai. A kawrawm chhunglam chu a han zen thut a, deringer hi a rawn phawrhchhuak ta thut mai a. Mahse Bill-a tuanranna chu ala chelh ta chuanglo.


Silai a puak leh thuai a, chuveleh Banason-a kuta deringer chu a per lawp a, ani chu a ka ta ho mai a. Chumi rual deuhthaw chuan Jerry-a leh Solten-a te chuan an va phih ta nawk nawk mai a.


Chumi hnuah chuan le, bawlhhlawh taka thil lo tithintu te pafa chu an thiltihsual man tel tir tur chuan mipui chuan an chhawm dul dul ta mai a. Thenkhatte chuan an thil lo tih te chu an awihlo rum rum hial a, mahse Pete-a chuan engkim a sawi miau si! An hremna tawrh tur chu hmuchakin mipui tam tawk chuan an zui hum hum mai a, saloon chhunga awm te bakah a hria apiang chuan an rawn zui ve zel bawk a.


Banason-a hova mi engemawzat an lo khaihlum tawhna hmunah ngei chuan amah Banason-a leh a fapa ngei mai chu khaihlum an ni ve dawn ta. An khaihlum tumna thingkung bul an va thlen chuan Jerry-a leh Solten-a hote chuan phur zet mai hian khaihlumna tur chu an han buatsaih zung zung ta mai a! Banason-a te pafa tan chuan a hmuhnawmlo kher mai!


Hruizen pahnih chu thingzarah chuan an han vawrhkai nawlh a, a hmawr ve ve chu thingzar sang takah chuan an pawtzip leh chaih bawk a. A hmawr lehlam ve ve erawh chu Banason-a te pafa nghawngah chuan hlingin, anni chu sakawr chungah kutphuar chungin an chuantir ta a.


Engkim peihfel vek a ni ta! Solten-a chuan heti hian thu a han sawi ve ta a.


"Thian duhtak te u, he thil hi chak avanga ti kan ni hlek lo va. Nakin zelah midangte pawhin hetiang khawpa thilsual leh bawlhhlawh hi an rawn tihngam tawhloh kan duh vanga ti mai kan ni e. Henglai ram hi a lo thianghlim zawk theihnan ti lo thei kan ni lo a nih hi,"


Banason-a te pafa hlau lutuk hmel chu hmuhnawm tham a ni a, fiamthu a la duh tan phei chuan nakin hnua sawi pawhin ala nuihpui dur dur theih hial awm e. A dan hian an dang sawp sawp a, an thil lo tih tawh zozai chuan chung hremna chu a phu hliah hliah bawk si. A tawp berna atan ti niawm tak hian Banason-a chuan, "Khawngaih takin kan nunna min zuah ula, tichuan he ram hi kan chhuahsan vang vang ange," a han ti veleh hram a.


Midangte rawn tawngchhuah ve hmain Bill-a chuan, "He ram hi zawng i kalbosan dawn chiang khawp mai. Hremhmun Lalpa pawhin a rama seng tur chein a ban a lo phar du ta ve ang. I nunna erawh zawngin a dawlh zawhloh tur khawp sual a phur tawh tlat si a ni," nuihmel pu lek lek hian a han ti thuai a, a beisei ang chu a ngenchhuak dawnlo a ang ta hle mai.


Amah Bill-a vek chuan thlirtu mipui zawng zawngte hriat vek theih tur khawpa ring hian, "Tunah chuan bawng rukhmang te laalpa leh a fapa te chu tumah tibuai leh tawh lo turin leh, midangte kara inhmelmakna siamsak tawhlo tur te, mipuite tithlabara pawisawilo te nunna pawh laksak leh ngai tawhlo turin an chanpual chu pek an ni dawn ta,"tiin a pistol a han phawi a, vanlam hawiin a hmetpuak ta thawr mai a.


Chuveleh silai ri hlau chuan sakawr pahnihte chu an tlan ta thut mai a; chumi rual chiah bawk chuan anni pafa chuan boruakah chuan an ke te chu an leng nghal awrh awrh mai a. An taksa pum mai chu a insawi dawrh dawrh mai a, chumi hnu reilo te ah chuan lei chhuah hluiin an inkhai tlawn ta zar mai a.


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)