Bill Jack Chapter-13

Western cowboy Re-type, lehlin leh mizo phuahchawp dahna

Moderator: writers

Ruata Ralte
Posts: 78
Joined: September 20th, 2017, 12:20 am
Location: Thenzawl
Contact:

Bill Jack Chapter-13

Unread post by Ruata Ralte » March 15th, 2020, 7:56 am

Bill Jack-13
Retyped : Ruata Ralte

Banason-a te pafa an khaihlum atanga chawlhkat thum lai a lo liamlehtak hnu chuan Bill-a pawhin a mi zawnte umzui zel tur chuan JL Ranch chu a chhuahsan a tum veleh ta a. Chumi hma zanah chuan Solten-a sawmna angin Bill-a pawh chuan zanriah a va ei phei ve a.


Hlim taka zanriahten eikham hnu chuan Solten-a pawhin a fanu rilru tur chu hriatthiampui takin ama room lam a pansan ta thuai nghe nghe a. Bill-a te pahnih pawh chu Jeny room lamah chuan an inzui lut ve ta thung a. Mahse nidang anglo takin chumi tum chuan atua mah chu an hlim lovin tawngchhuah zai pawh an rel hleithei lo va, khumah chuan an thu ngawi reng mai a. Atuk maia inthen tur an nih avangin an hlumdun thinna zawng zawngte chuan a thlawhbosan ta ni ber hian a lang a.


A tawpah chuan Jeny chu a rawn tawngchhuak hmasa ta nge nge a. "Bill, i kal mai tur hi chu ka va han huphurh tak em! Engtin nge he khawvel hi ka lo hmanral ve tak ang le?Inneih pawh ka pa chuan a phal awm tho si a, tichuan he ranch ah hian kan awmdun thei mai lawm ni?" a tizuai raih mai a.


CHutah zawng Bill-a chuan, "Chu chu ka thil chakber pawh a ni alawm. Mahse kal lo theilo ka ni rih tlat si a ni. Hnathawh zawhloh ka la nei miau mai a, chu mi ka zawh hma chuan nuamin ka awm thei dawn tlat lo. Chhel takin lo awm la, chu hna chu ka thawhzawh veleh damchhunga inthen tawh lo turin ka rawn lam leh dawn che a ni," a ti ta a.


Heti hian a han chhunzawm leh ta a. "He thi hi ka Indian thian, Chief Haku Brutus-a'n intihsiakna a chak zawk ka nih vanga ngaihhrui nana min pek a ni a, ka duhin ka ngaina em em mai. Nang hi ka thinlungah i awm a, kei i thinlungah ka awm bawk a. Kan awmdun reng avang leh ka hmel tak erawh chu engemaw chen i hmuh dawn rihloh avangin ka hmel anga ngaiin duat taka lo awrh rih turin ka hlanchhawng rih che anga; Tin, he thi hi i khawih apiangin ka rawn lam leh ngei ang che tih i hrechhuak thin dawn nia," tih pah chuan a han phelh a, Jeny chu a awrhtir ta a.


Jeny chuan Bill-a thi pek chu han fawh zauh pah hian, "Bill, ka nunna chahbi tluka ngaiin ka lo vawngtha reng ang," a han tihnep a. Zan reitak thleng titi paha an inkuah vawng vawng hnu chuan lohtheihlohva haw a hun ta. Inkhamlo leh harsa titak chung chuan an inthen ve ta hram a, Jeny chuan Bill-a chu a sakawr awmna thleng ava thlah a.


"Bill, naktukah chuan thlah tur chein in ranch-ah ka rawn kal dawn nia. Ka rawn kal hmaloh chu min lo nghak turin intiam rawh," a han ti leh hram a. Bill-a pawh chuan, "Lutuk tlat. Mahse hlim hmel putak chunga min thlahliam tur erawh chuan ka phut ve thung che a nia. MAngtha phawt aw," tiin Bigger-a chu a kaltir ve ta nghal a.


A tuk zing, tukthuan eikhamah chuan Bill-a chuan a thawmhnaw neih ang angte chu khawmin a sakawr jean hnunglamah chuan a phuarbet mawlh mawlh a. Ngawirenga amah lo thlir thaptu Jeny, Jerry leh Solten-a leh a hote hnenah chuan, "Kan inthen rih dawn chu a ni a, mahse ka la rawn lan leh thuai ka beisei a ni. Chumi chhunga buaina dang engemaw a rawn thleng leh anih pawhin lo tangrual tlat tawh ang che u. In tanrual phawt chuan tumahin an hneh ngai lovang che u," tiin a han fuih ve a.


Amah lo ngai ve em em thintu, an pu Jerry-a fapa Monte-a chu a dara han bensak thak thak pah chuan, "Monte, hei midang zawng zawngte pawh hi keimah ang thova i hmangai tute vek niin, i thiante vek an ni tih lo hria ang che. Kan pahniha kan inkawm ang bawk khan ilo kawm thin dawn nia. Ka lo kir leh huna ilo kawm duhlo a ni tih ka hriat vaih chuan i mawngtamah ka rawn vaw taih taih ang che," tiin Bigger-a chungah chuan a lawn ta nghal a.


A kal hma chiah chuan Jeny chu a han melh leh zauh va, a hmela lungngaihna langchhuak chu hmuh hrehawm a ti kher mai. Jeny pawh chuan Bill-a chu hmuleh tawhlo tur anga a han inchan phei chuan a tahte chu a chhuak rum rum a. MAhse Bill-a'n hlimhmel tak pu chunga thlah tura a phutna kha a hre ve reng a, tapchhuak lo tur chuan a insum hram hram a. A theih ang tawka aw pangngai han chhuah tum chung chuan, "Bill, mahni thutiam chu hlen ngeiah aw. Keipawhin ka hun tawp ber thlengin ka lo nghak dawn che a nia," tiin midangte hriat lai pawh nise a han tichhuak ta phawng mai a.


Bill-a pawh chuan, "Jeny, hlim takin ipa bulah khan lo awm la, ka sawi tawh ang khan ka rawn kir leh ngei ang," a han tilet ve leh a. Amah ngai em em tu a thiante zawng zawng leh a hmangaih ber Jeny te chu hawisanin a sakawr chu zawimuang chuan a kaltir ta bauh bauh a.


Thui tak a thlen hnu chuan a han hawikir a, a thiante ho ban rawn vai nak nak leh Jeny'n a rawmawl a rawn vai phe lap lap chu a va hmu thei a; mahse Jeny mittui luang ngiai ngiai erawh a hmupha ta lo. A lukhum chu phawkin a han vailet ve lap lap a.


Lainatna reng reng nei lova a nu leh pate thattu Mc Trone-a zawng zui zel tur chuan a hmalam a kawng lo kawi ngiai chu a zawh chhunzawm ta zel a.


..........A tawp ta............


Hei hi lo tlawh ve ta che. https://myshopprime.com/ruata.ralte/shop

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)