SUDDEN TROUBLE SHOOTER - Cowboy - (Completed)

[Ngaia]

trouble shooter.jpg (21.11 KiB) Viewed 30780 times

SUDDEN TROUBLE SHOOTER - Cowboy -

SUDDEN
TROUBLE SHOOTER 1
www.storyfb.com mizo story thar englai pawhin chhiar tur a awm reng


"I puakruk pai kha i kap thiam tak tak ngut emaw ni le? Nge, hmeichhia in an ngûn, inchei nana an bun ang lek hian mawi duhin i pai ve mai?" palian pui mai hian tleirawl kum sawm leh pariat pawh la tling manglo hnenah chuan a han ti a. Hmundang leh ni dang chu nise, fiamthu emaw tih mai tur hi a ni a. Mahse, tun țum hi chu a sawitu hmel han en reng rengin a rilru tak takin a sawi a ni tih chu hairual a ni si lo a.
Hemi hmun hi saloon chhung a ni a. Saloon dang ang bawk, dawhkan sei tak leh a hrana dawhkan, mi pathum emaw, pali emaw kil theihna tur paruk lai awmna a ni bawk a. Saloon naran ai chuan a lian deuh bawk a. Thusawitupa chu, kum sawmthum chuang awm vel hi a ni a. A landan hrim hrim ah pawh chuan pa tawhkhirh hmel tak chu a ni hrim hrim mai a.
A hmaa ding erawh chu tleirawl, sa pan te, cowboy kawr la thar tak mai ha hi a ni a. A puakruk pai te lah chu la thar țha diai mai hi a ni bawk si a. Saloon chhunga mite han hmuh dan ngawtah pawh chuan, he tleirawl hi chuan cowboy nungchang ala hre lo tih chu a hmuh theih nghal mai bawk a.
"Dancy a hi a rui leh ta pek a ni maw? Sual tur leh sawisak tur a zawng leh ta pek a nih hi?" Saloon chhunga awm ve pakhat chuan a han ti a.
Dancy a chuan, chu tleirawl chu rum deuh mai hian a han melh a. Ani tleirawl chuan, mite rin loh anga engmah hrelo nih kha chu lan chhuahtir loh a tum ve tlat mai a, "Min bia em ni?" inti tlangnel awm tak hian a han ti ve ta a. Saloon chhunga awm te reng reng chuan a tilui ah an ngai vek tho a. Dancy a chuan, "Nang chu be love, i hnung a mi camel chunga țhu kha a ni ka biak ni," a han ti a. A nui nghal huau huau mai a.
Saloon neitupa chuan, intih buai a duh loh avangin Dancy a hnenah chuan, "Dancy, kha naupang kha ngawihsan mai mai rawh... Hei, zu hi han in rawh!" tiin a han thlem ti tih a. Chutah, thinrim hmel zet hian Dancy a chuan saloon neitupa chu a rawn en a, "Tyler, intur ka duh a nih chuan ka lam mai ang. Tin, he...kawlphe hian țanpui tura a sawm duh che a nih chuan a sawm mai ang che... A dik em? Kawlphe!" tleirawl chu enchungin a han ti a.
Tleirawl chuan, thlaphang hmel takin pindan chhunga mite chu, amah țanpui peih an awm mial mahna ti niawm takin a han enkual a. Mahse, tumah han țanpui peih leh țanpui duh awm hmel a hmu lo. A mangang rilru ta hle mai a. Dancy a chu, mi awm mai mai sawisak vak te leh velh mai mai a chin țhin avangin a hming chu a thang zek a. Yavapai khuaah phei hi chuan tumahin an khawih ngamin an hnial ngam lova.
Zu a han ruih ngat tawh hi chuan a bulah pawh an ding ngam tawh țhin lo. Tin, a harhfim ngat phei chuan phawirang ve tak hi a ni hranpa reng reng a. A harhfim lai aiin a ruih laiin a hlauhawm zual leh zawk an ti a ni, "Buaina engmah ka zawng lo," tleirawl chuan zawi te in a rawn tichhuak ta a. Chutah, deusawh deuh mai hian Dancy a chuan , "A va mak ve! Buaina chu i zawng lo pawh a ni maithei a, mahse, buaina in a rawn zawng zawk mai thei che asin. Rang takin min chhang rawh. I puakruk pai kha i hmang thiam tak tak nge inchei nan chauhva i pai?" țhen sung chung hian a ti leh ta a.
Chutah tleirawl dinna chu zawi zawiin a han hnaih phei ta hret hret a. Tleirawl chuan thil awmzia chu a hrethiam ta a. Engtiang pawhin zaidawh mahse, hepa hian sawisak chu a tum tho tho a ni tih a hre ta a. A mang chu a ang takzet tawh a ni. " Ka..th..ei..ka.. hmang..thei...a..țul... chuan ..mahse..," harsa deuh tak hian a han tichhuak ve hram a.
Dancy a chuan tleirawl chu a han țhen khum a. "E heu, chaihte ha nei tur ang vel ila ni maw?" a han tih pah chuan pen hnih in a han hnaih chilh a. Ngun tak mai chuan chu tleirawl chu a han thlek ta a, "Henglai velah hian engtia rei nge i awm tawh?" tiin a han zawt leh ta a.
"Karhnih chauh..... Philadelphia khuaa mi ka ni a, cowboy nih ka tum a ni," tleirawl chuan ți deuh dek hian a lo ti a. Dancy a chuan, "Enga ni? Bawng khalh.... Thil mak tak a nih chu!" hmusit hmel fahran hian a han ti leh ta a. Tleirawl chuan theihtawp a intih pachan tumin a insehruh a, kal chhuah mai hi a tum a.
"Kawlphe, la chesawn suh! Thusawi tur ka la nei a nia," nui sung chungin Dancy a chuan a rawn ti leh ta a.
Tleirawl chuan, a kham ta ngang ni tur a ni. "Ka ngaithla peih bik tawh lo che. Min kal san la a ni mai," a ti ta khauh mai a. Chu chu, Dancy a ngaih theih loh zawng tak mai a ni a, "Kal san lovang....," vin zet hian a han ti tuarh a. Chutih rual chuan a puakruk colts 43 chu a kawmah a han vuan nghal a.
Tleirawl chuan hlau leh makti em em chuan Dancy a chu a en ta a. Dawihzep anga tlan mai nge, chakai a kaw tawp a ațang anga beih ve mai tur tih chu a han ngaihtuah a, bei ta sela chu a thi ngei dawnin a inring bawk si a.
Dancy a lah chu a zurui hmaisen bakah a thinrim in a hmai chu a tih sen belh sauh a. A taih hian a tai tuk a ni mai. A mit lah chu a sen rum mai si a, "Naupang â..... tlanchhiat nachang pawh hre lo..... Dancy an a that ang," mi pakhat hian ring deuh hian a rawn ti leh nghal a. Tleirawl chuan a beih ve mai an rin avangin silaimu leng laka inven nan, saloon chhunga mite chu an insaseng ta a. Tumahin an țhelh ngam bik si lo a, tleirawl hi chu a thi ngei dawn a nih hi an ti rilru tlang vek a.
Saloon chhung chu a reh țhap tawh a. A tawpah chuan, Dancy a chuan, "Kawlphe, che rawh le, phawi vat rawh.... I phawi ngam lo a nih chuan tlanchhe rawh!" a ti ta a. Chutih lai tak chuan, puakruk hi a lo ri ta țhak mai a.
Dancy a beng kawm chu a thi ta zar zar a. Chuveleh, Dancy a chuan tleirawl chu a hre chang ta bik lova. Rang deuh mai hian puakruk rikna lam chu a han hawi a, a puakruk pawh chu phawi ve nghal a han tum a, "Phawi lo la i tan a hrisel zawk ang!" rawn kaptu chuan, awki hniam deuh si, thunei em em hian a rawn ti ta a.
Dancy a kut chuan a puakruk chu a khai uai zuah mai a. A che leh ngam tawh si lo. Mitmeng dumpawl ram mai, sang thlerh thlawrh, kum sawmthum pawh la tling lo, en reng reng a thiltih tawh chu hlen ngei tum chi hi a rawn kaptu pa chu a lo ni a, "I rilru hi a chhe hrim hrim nge, i pianpui zawk?" a kaptu chuan, Dancy a hnenah chuan a rawn ti ta a.
Dancy a chuan, chu mikhual, amah rawn kaptu chu rum zetin a han melh a, "Silai i hum bawk a, i huaisen hle mai maw. Tunge i hming nita chu?" a lo ti ve hmuk a. Mikhual, Dancy a kaptu chuan chhang mai loin Dancy a chu a rawn pan hnai deuh a, feet thum awrh velah hian a rawn ding a. Rang zetin a puakruk chu a khung leh ta mai a. Chupa chuan Dancy a chu a cho hle a ni tih a hriat hliah hliah mai a.
Mikhual pa chuan, "Nichin khan i țawng huai thur thur hle a, hei, tunah chuan... ka puakruk pawh a paiah ka khung leh tawh a, han che teh le!" cho deuh mai hian a ti ta tawng mai a. A hma lawka Dancy a han uang vel leh chapo taka a awmdan zawng zawng kha chu hmuh tur reng reng a awm tawh lo a. A ding kun nguih tawh mai a ni.
A hmaa ding mikhual pa chu Dancy a chuan a han enchiang tawlh tawlh a. A mitmeng te leh a chetdan ațang te chuan engpawh a huamin, mi hlauhawm tak a ni tih chu a hmuchhuak chiang hle tawh a. Chutah, "Nangnen in tihbuaina kan nei hleinem," a ti nem ta duai a. Mikhualpa chuan, "Nichin khan, ka hming min zawt a, ka hrilh ang che..... Green a ka ni a, nang ang hi chu hlauh enah ka en ngailo reng reng.... Nang ang hi chu....., naupang ho leh nang aia hnufum deuh tur ti ngam chauh mi in ni a, chuvang chuan, i tiat pui hi i ti ngam tak tak emaw i han fiah teh ang," ti pahin Green a chuan Dancy a zu no chu a la lawk a, Dancy a hmaiah chuan a theh ta țhawt mai a.
Dancy a chuan mit chu thip ti tak hian a han nuai nawk nawk a. Chutia a awm lai tak chuan, Green a chuan, a kut khinghnih chuan a hmaiah tak mai chuan a rawn beng tawn ta sek mai a. Chutia a tih pah chuan, "Khawnge, nichin a pa huaisen tak mai kha ka va hmu si lo ve?" a han ti lehnghal a.
Mipui hmaa chuti tak mai a sawisak a han ni ta mai chu Dancy a chuan zahthlak hi a ti em em mai a. A țap lo chauh hi a ni tawh a. A puakruk chu han phawi mai a rilruk leh a, mahse, a phawi mai chuan, a hmaa mi chuan a kaphlum hman em em in a ring bawk si a. Chuvang chuan a puakruk hnaih pawhin a kut chu a dah ngam lo a.
"Ka rin ang ngei i ni. I dawihzep tluanchhuak zak!" Green a chuan a ti leh ta a. Ten niawm tak hian Green a chuan a hawisan a, pen hnih vel chu a pen hman ang tih chuan .... Dancy a khan, hun remchang tiin a puakruk chu a han phawi mai dawn a, a aia rangin Green a chu a lo lehhawi ta a. Dancy a khabe ah tak mai chuan a theih tawpin a rawn hnek ta nghal a. A ri chu inchhunga awmte chuan a hre thei vek a ni.
Dancy a chu theh ang dawrh mai hian a leng lawp mai a. Bangkilah chuan a tla sawp ta nawk a, a lu chu bangah khan a tauh leh ta nghal a. Nikhaw hrelo in a let ta reng mai a. Green a chuan Dancy a chu a han pan hnai a, a puakruk chu a phawi sak ta a. Saloon neitu hnenah chuan a hlan ta nghal a.
Hetih lai hian, saloon chhunga awmte chuan an thil hmuh phak ngai loh hmu in an inhria a, an ngaihdan sawi inchuhin an in hnial ta laih laih hlawm a.
Saloon neitu chuan, "Mister Green, Dancy a i sawisak avang hian ka chhungril tak ațanga ka lawmzia ka hrilh a che. Lo inrawlh lo la chu, kha tleirawl kha Dancy a khan a that duh ngei dawn a, i ti țha takzet a ni. Khawnge, chibai i han inbuk teh ang, ka hming chu, Tom Tyler a ni," a rawn ti a, chibai te chu an han inbuk ta a.
Green a chuan, ngun zetin tleirawl chu a han en a, "Tunge i hming, naupang?" a han ti a, "Henry, Ka pu, Henry Sloane a ka ni," tleirawl te chuan a lo ti thuai thuai a, "Cowboy nih i tum em ni? I va han tum sang lo ve le.... Tuna i landan mai mai chuan, a tu a pawh hian an sawisa thei țheuh che in ka ring. Cowboy an tih ang chu i ni har viau dawn rih a nih hi," Green a chuan a han ti a, saloon chhung a mite chu an nui ta dar dar mai a. Henry a pawh chu a lo nui ve mai bawk a.
"Philadelphia khua ațanga lokal ka ni a, cowboy nih ngei chu ka rawn kal chhan a ni a. Ka pa hi Prescott khuaah chuan, ranch nei a khawsa a ni tawh a... Hei tuna ka inthuamna zawng zawng hi , ka pawisa neih chhuna ka lei a nih hi... (Green a chu a han en a ) ka thawmhnaw hi a dik nange?" a han ti ha mai a.
"Dik lo ve. Karhnih vel sakawr chunga i chuan chuan, cowboy pang ngai kawr ang an ni ve mai ang. Tin, Mister Green tih te hi chin chi a ni lo a. Jim min ti mai la a țha zawk. Mister tih te hi chu a hmanlai tlat tawh a, tih loh tur a ni bawk, " Green a chuan a han ti a. Henry Sloane a chuan Green a chu, ngaisang em em leh zah em em hian a han en a, nui chung hian, "Ka chanchin chu ka sawi ang chu a ni a, khawi ațanga lokal nge i nih zawk?" Green a hnenah chuan a han ti a.
Tom Tyler a chuan Green a țawng hma chuan a lu a lo thing nar nar a, a nui ri hawk hawk mai a. Green a chuan, "Sawng tlang piah lam ațanga lo kal saw ka nia..," tiin a lo chhang mai a, Henry a darah chuan ava vuan a, "Lo ngaithla leh rawh aw.. ka pu, mister tih te leh khawiahnge i kal dawn, khawnge i awmna... enge i tih dawn? Tih te hi tih loh tawp tur, a hrisel lo," a han ti leh a.
Saloon a awm pakhat chuan Henry Sloane a chu a han en a, "Eng emaw avang a tlanchhia pawh a ni maithei a, a sawi duh lo pawh a ni...," a han ti a, mahse, Green a chetdan te kha a hrechhuak a, a sawi zawm leh ngam ta lo a. Nimahse, a rin loh ang takin Green a chu a lo nui mai a, "Hlauthawng suh. Misual tlanchhia ka ni lo e," a rawn ti ta a.
Chutihlai chuan Green a hnunglam ațang chuan aw nelawm vak lo, thunei niawm fahran hian, "Misual i nih loh chuan a tihzia a nih chu," a rawn ti ta a. Green a chu a han lehhawi thuai a.
Tlangval hmel fel tak leh inchei nalh thlarh mai hi a hmu ta a. A awmah chuan marshal badge hi a intar vah mai a, "Appleby, he khaw marshal hi ka ni a, in lo intibuai deuh a ni maw..? Mithar i ni phawt awm a, he khua hi i rawn tlawh satliah mai em ni?" tiin marshal Appleby chuan Green a chu a zawt ta a.
Green a chuan marshal chu ngun zetin a han en a, "Ram ka fang kual vel mai mai a, mahse, eitur ka tlachham țep tawh a, hnathawhna te ka hmuh theih chuan awm pawh ka la awm rih maithei e," a ti ve ta a. Marshal Appleby pawhin Green a te ang chi hi chu henglai vela awmah hian a duh vak lo a ni tih a hriat mai a.
"Hna zawng turah si chuan i han zawn dan vel chu a danglam hle mai. Nichina i sawisak pa kha, Jim Damcy a, helai vela ranch lian bera an foremen a ni a, an hotupa hnenah chuan a ha hmai hnek thlak sak tu chu a sawimawi a rinawm vak loh," a han ti leh a.
Chutihlai chuan Dancy a kha a lo harhchhuak a, han din chhuah mai hi a tum a, mahse a ding hlei thei lo a. Inchhunga awm mi pahnih hian dim vak lo hian an va kai ding a. A han din chhuah theih hnu chuan vin deuhin, "In mi vawn ka ngai lo. Rang takin in kut kha lasawn thuai rawh u," a han ti tuarh mai a.
Marshal Appleby a chuan, "I vannei ngawt zawk a ni. I chalah khan silaimu in a verh lo zawk che a, rang takin i thawmhnaw la la, he khua hi chhuahsan vat rawh," tiin Dancy a chu thu a han pe a. Dancy a chuan, ngaihnobei lo zetin marshal chu a han melh a. Mahse, a aia rum zawkin marshal chuan a lo melh si a, a mengkhup leh ta zul zul a, "Marshal, ka kal nghal dawn e," tih pah chuan pai uan uan chungin saloon chu a chhuahsan ta nghal a.
Chumi hnu chuan Green a chuan Tyler a hnenah chuan, Dancy a thawhna ni lo, ranch dang hmingte chu a han zawt a, saloon neitu Tyler a chuan, "Dancy a thawhna kha a lian deuh ber a. Heta țanga kawtthler lamah hian ranch pakhat lian ve tak mai a awm a, Jack Harris a ta a ni a, chu lo chu ranch te tak te te engtikah emaw chuan kan la ding chhuak ang ti chi ang chu an tam ve mai," tiin a sawi a.
Green a chuan Tyler a sawi dan chu a hrethiam mai a. Ani taka, hetiang ranch te tak te te neitute hian, an ranch a lo kal te reng reng hnenah engemaw hunah chuan helai vela ranch lian ber ka la nei dawn tih țawngkam hi an hmang lar hle reng a ni, "Chung ranch te chuan min lo chhawr duh ang emaw chu?" Green chuan a ti ta a.
Tyler a bawk chuan, "I chezia ka han hmuh ațang ngawt che pawh khan vawiina Dancy a i sawisak dan an hriat ngat chuan chhawr duhlo an awm che ka ring lo," a ti a.
"Chuti chu, Dancy a thawhna Sabre Ranch chu beisei lo ila a țha ang. Khatiang mi nunrawng tak, aia tenau zawk sawisak ching mi ruai duhtu hnenah chuan thawh pawh ka chak lo e," Green a chuan a ti ta a.
Tyler a chuan, Green a thusawi chu a lo chhunzawm a. "Sabre ranch hote hi chu an lar lo hle asin. Mahsela...," a han ti dek dek a, marshal Appleby a khan, "Chutiangin anti tih ang mai mai sawi suh! Mi ngaihdan turte hi ngaihtuah ve ta che," inti thunei deuh hian a rawn ti ta a.
Henry Sloane a kha a lo țawng ve ta a, "Marshal, i thusawi awmzia chu ka va hrethiam lo ve," a rawn ti ve miau mai a. Naupang chhiaah ngai mahse, chhan loh ringawt chu dikin a hre si lo a, marshal chuan, "Henglai velah hian, buaina lian tak a thleng ngei dawnin ka hria a. A chhan chu, ranch te tak te te, mi karah an rawn siam a, tin, Sabre ranch neitu Gunnisona hian bawng a hlauh reng a. Tin, a rutute chu heng mi lo lut thar, ranch te tak te te ho hi an ni a. Chuvangin, Dancy a te ang, mi rorum deuh hi a chhawr ta mai a ni. Heng ranch tenau hotu hi, Jack Harris a a ni a, Dancy a phei chuan chîlah a vau fo tawh a ni," a ti a.
"Harris a te ho chuan engtinnge an sawi ve a?" tiin Green a chuan a rawn zawt ve a. Marshal chuan, "An sawi dan chuan, Gunnisona hi a duham lutuk a, helai ram hi, amahin pumhmawm a tum a ni. Bawngruk chungchangah phei chuan, Gunnisona hian dawt a phuahchawp mai mai a ni. Tumahin a bawng kan ruk sak lo tiin an țang țhap si a, kei ngei pawh hian ka en ve fo tawh a, an ruk ni theiin a lang lo, mahse, bawng chu a bo tak tak ngei bawk si, a tihngaihna tak pawh a awm lo," a han ti leh charh charh a.
Chutah, "Ka hna tak chu, he khua, Yavapi hi țha taka vawn a ni a, ranch te hi chu remchangah ka tlawh ve mai chauh a ni. Kalna tur dang awm hek lo," tiin marshal chuan a thusawi chu a han chhunzawm leh a.
"Thil awmzia min hrilh avangin ka lawm e. Sabre ranch chuan min lawm si lo a, Harris a ranch lam chu pan mai ila a țha berin ka ring a. A kawng min han hrilh leh ula ka va ti ve," Green chuan a ti a.
"Jack Harris a, JH ranch neitu a ni a, ka tirh che u a ni, han ti nghe nghe ula a țha ang," Tyler a chuan a han ti a. Jh ranch pan dan tur chu a hrilh ta a. Green an lawmthu a hrilh leh hnuah chuan, "Philadelphia, ilo kal ve dawn em?" tiin Henry Sloane a chu a han zawt a, "Jim, mi sawm ve lovang tih ka lo hlau teh asin, ka lawm e," hlim hmel tak hian, Henry chuan a lo ti a. Chumi hnu chuan, an pahnih in Jh ranch lam pan chuan an chhuak dun ta a.
Tyler a chuan, marshal chu a han en a, "Tom, kha pa khan, helai buaina hi tireh theiin rinna ka nei tlat. Ka awm a nuam deuh sawt mai. Khaile, a duh apiang tan zu, man awm lovin ka phal e," a han tih chuan saloon a awm zawng zawng, marshal Appleby a tih loh chuan Tyler a chu an pan ta sung sung a, marshal Appleby erawh chu amah maiin a ding a, Green a kha a rilruah a cham reng mai a. Engmah sawilo chuan saloon chu a chhuahsan ta nghal a.

in tih ve tur chu in hriat kha ooo

[Ngaia]

Green a te țhiandun kal chu an inbe mang lo a. Henry a khan Green a chu a han en țhin a, a inthuamna leh thil neih te chu hlui tawh hle mahse, țha tak tak vek hi an ni hlawm tih a hria a. A puakruk pai te lah chu a hnum tliang hliau mai si a. Hman ngun an ni tih a hriat em em mai a.
Henry a chuan engemaw han zawh hi a duh hle a, mahse, nichina Green an a lo sawi avang khan , thil hriat chak tak anga han lan chu a duh bik lo a. Mahsela, a tawpah chuan a insum zo ta chuang lo a, "Jim, khawi ațanga silai kah hi zir nge i nih?" tiin a zawt ta phawng mai a.
"Philadelphia, thawnthu sei tak a ni ang. Thil pakhat erawh chu ka hrilh ang che. Nithum chhung leka thiam mai chi a ni lo," nui deuh chung chuan Green a chuan a lo ti mai a.
"Jim, ka hrethiam e. Nichin a mi rawn chhan thuah khan lawmthu pawh ka duh angin ka la hrilh țha hman lo che a," Henry a chuan inthlahrung tak hian a han ti leh a, "Chutiang sawi a ngai lo. Chhan engemaw ka neih vanga rawn inrawlh ka ni," Green a chuan a ti ve mai a. Henry a vek chuan, "A chhan chu min hrilh thei ang em?" a ti leh ta a.
Green a chuan, engdanga chhang lo chuan, "Dancy a khan kaphlum ta che sela, Arizona hi i thlir dan chu a dang hle lo'ng maw?" fiamthu hian a ti ta a. Henry a pawh chuan fiamthu bawk hian, "Ni e, lei chhung feet ruk vel ațanga en ngat chuan a hmuhnawm tak tak lo ang," a lo ti ve ta a. Chutah, a han nui hawk hawk a. Green a chuan, Henry chu a han en a, "Reiloteah cowboy tak tak zawng a la nih thuai dawn hi," a ti rilru a.
"Jim, puakruk phawi dan min zirtir thei ang em?" Henry chuan a ti ta phawng mai a. Green a chuan Henry a chu a han en leh a, "Philadelphia, ka chhan na che chu, phawiran lam hi i hriat tlem poh leh i tan a țha zawk ang," a ti ta a. Henry chuan, "Aw... Jim, mi pangngai ka nih ve dawn chuan puakruk phawi ran leh kah fuh thiam te hi ka duh ve asin," ngen titih hian a ti ta zel a.
Muang cherh chawrhin Green a chuan, "Puakruk han kah chu thukhat nise, phawiran hi chu thudang, tunah, entir nan, darthlalang lian tak hmaah han ding la, darthlalanga i thla en chuan phawi țhin la, a rei hnuah chuan i thla ai mah mahin i phawi rang zawk pawhin i hre maithei e, mahse, a tak takah chuan rawn kap let ve thei nena han phawi dawn tak tak chuan, phawi rang ngawt mah la, i kah fuh leh theih chuan si loh chuan a sawtna a awm reng reng lo. Phawiran bakah, i kap fuh thiam tur a ni," a ti ta a.
Green a chu a sakawr ațangin a han chhuk a, Henry a pawh chu chhuk turin a han hrilh a. Green a chuan, lungtum, lungdenna tiat awm hi a la a, pen sawmhnih vel a han pen a, ko deuh hlek ah hian a han hung a, a lo kir leh a, "Philadelphia, khai le, saw lungtum ka dah saw han kap chhin teh le, eng anga kap thiam nge i nih, ilo en teh ang," a ti ta a.
Henry a chuan, a puakruk pai te chu a han siam țha vel a. A ding ren rawn a, a theih anga rang chuan a puakruk chu a phawi a, a han kap ta a. Green a lungtum dah piah fe a lungpui chu ava kap khu ta laih mai a. Green a chuan kap leh turin a han ti a, a han kap leh țhin tak naa, a tum chu a kap hnai thei mang chuang lo a. A tawpah zawng Green a chuan, "Philadelphia, i tihdan kha a diklo ziktluak vek. A hmsa berin, i puakruk pai kha a fual lutuk. Tin, i țang lutuk bawk, a tawp berah chuan i tin lo. Lo en rawh, hetiang hian tih tum ang che," a han ti a.
Green a chuan a ban chu a char thla a, rang deuhin a puakruk pahnih chu a han phawi a, lungtum chu a kap lir ta a, a lir a, chumi lir lai tak chu a veilam chuan a rawn kap leh a, chumi hnu chuan vawili ve ve a han kap leh a, lungtum chu feet thum lai a lum sawn ta a. Henry a makti lutuk buai vel chhung chuan Green a chuan a puakruk chu a paiah alo khung fel leh hman diam tawh a ni.
"Aw... Pathian, Jim, khatiang thilmak kha ka la hmu ngai lo," a ti ta ngawt a. Green a chu thildang daih ngaihtuah niawm tak hian makti hmel pawh a pu ve chuang lo a, "Philadelphia, heng thilah hian, engmah hriatthiam loh tur a awm lo. Ngaihtuah taka i zir reng chuan puakruk kahthiam ringawt chu a har lo. A hman hun tur leh kah fuh hi a pawimawh ber a ni," a ti a.
Henry a chuan, "Ka hrethiam e," a lo ti ve a. Green a chuan, "Thil pakhat ka hrilh ang che. Engtikawng mahin, a țul loh chuan i puakruk hi phawi reng reng suh. A țul tak taka i phawi a nih chuan, tin la, kap ang che, i hre reng ang em?" a han ti leh a.
"Jim, ka hre reng ang," Henry a chuan a lo ti sap a.
"A țha. Khawnge, i kawnghren te kha i han pawt chhing deuh teh ang," tih pahin Henry a puakruk paite chu a han sawichhin sak a. Henry a sirah chuan a ding a, phawi dan te a zirtir ta a, "Phawi la, kau la, tin la, chutah hmetper ang che," a han ti a.
Phawi, kau, tin, hmehper... chu chu an pahnih chuan an zir dun ta tlat tlat mai a. Reife an zir hnu chuan Henry a ban chu a rawl em em mai a, "Jim, ka ban a kham lutuk tawh, ton khat laia rit niin ka hria," a ti ta thlawt mai a.
"I tha ila hman ngai loh i hmang țan a, nakinah chuan ngaiah i la bei mai ang," Green a chuan a lo ti mai a. Henry a chu a han en leh a, "Tunah chuan i hunawl apiangah zir reng la, ila thiam tak tak mai ang. Chubak chu hrilh theih che ka nei tawh bik lo," a ti zui ta a. Tichuan, phawiran chu Henry a chuan ama thuin a han zir leh rih a. Reife hnuah chuan Green a mittlung zanin a phawiin a tin thei ta a. Chumi a han hmuh chuan Green a chuan, "Atawp ber atan in hmatawn in ding ila, ka au veleh i phawi dun ang," a ti ta a.
Henry atan chuan a chakawm reng bawk a, "Jim, tluk chu ka tluk hlek lovang che. Mahse, ka theih ang chuan ka ti ve ang," a lo ti a. Inkah palh a awm loh nan an puakruk mu chu an la chhuak vek a. Chutah, pen nga vela hlaah chuan, inhmatawn in an ding dun ta ran mai a.
Green a chuan, "Khai le!" a han ti a. Henry an a puakruk kawm a vuan hman tih chuan Green a chuan a lo tin reng tawh mai a. "Philadelphia, uanthuan nana phawi rang mai ka ni lo a, i hriat atana ka duh chu... tak tak chu nise, thlanmual lam i pan daih ang. Tun ang hian i aia phawi rang i la tawng thei a, chuvangin, phawirangah inngai reng reng suh," Green a chuan a ti ta a.
Thiam a lo intih țan tawh vei nen, Green an chutianga a han sawi chuan a rilru a tihniam hle a. A tihngaihna hrelo chuan, "Jim, nang aia phawirang i tawng tawh em?" tiin a zawt ta zawk a.
"Mi țhenkhat ka hmuh tawh te lakah chuan a phawi pawh hi ka phawi duh lo. A pawimawh ber chu phawi hun hriat hi a ni ka tih tawh kha. Chu chu a tawk ta. Khai.. kan pan tur lam chu i pan teh ang, thil pakhat i zir lai reng rengin i puakruk mu kha phawrh chhuak ziah rawh. Chuti lo chu i ke te kha i kap palh hlauh ang e," Green a chuan a ti ta a. JH Ranch lam pan chuan an kal dun ta a.
JH Ranch an va thlen chuan, a neitupa ngei mai chu a rifle nen a lo chhuak ta nghal a. "In ban kha phar rawh u," a rawn ti ta a. A hote zing a mi hnenah chuan an puakruk paite chu laksak turin a ti a, rang zet hian an rawn laksak nghal a.
Green a chuan, "Jack Harris a hmuh tumin kan lokal a, nang hi i ni mial em?" tiin a han zawt a, "A zawttu a thu in nih pawh chu a ni maithei," Cowboy pakhat hian a lo ti a. Green a chuan, "Ka hming chu Jim Green a ni a, he tlangval hi Philadelphia ka ti mai a, a hming tak tak chu, Henry Sloane a a ni a, hnathawh tur zawngin kan lokal a ni," a han ti a.
"In hmel en ngawt pawhin Sabre ranch a kal awm in nih zawk hi le.. Chuta țanga lokal chu in ni nghe nghe lo maw?" Ranch neitu chuan a lo ti a. Green a chuan, "Nih pawh kan ni maithei e.. Mahse, kan ni lo e. Kan silai min laksak tawh bawk a, kan thu hi chu ngaithla ve hram la ka duh e," a han ti ve a. Green a chuan, an rawn kalna ram te leh pawisa an neih tawh loh avanga hnathawh tur an duh zia te chu thiam tak hian a han sawi ta a.
A hmaa an puakruk rawn laksak tu kha, Johstone a ni a. Ani chuan a pu chu ava bekbawr a, chumi hnu chuan Harris a chuan, "In puakruk hi in kap ngun hle a ni tih a hriat mai a, engahnge Sabre ranch a kal lo a heta in lokal teh tlat ni?" tiin a zawt ta a. Rang zet hian Henry a chuan, "A chhan leh vang chu maw, Dancy a kha Jim a hian a sawisak nek vang a ni," a rawn ti ta a. Harris a chuan Green a chu makti hmel tak hian a han en a, "Dancy a i sawisa a maw? Green, chutiang i tih ngat chuan ka mikhual lawm ber te zing ami i nih dawn chu!" a ti ta a.
Green a chuan, "Dancy a pui khan, Philadelphia a hi vanram pan tir a lo tum mai a, chu chu ka awih loh zawng tak a ni a, a rilru ka thlak tir mai a ni," a lo ti mai a. Mahse, Philadelphia a chuan a lo sawi ve leh a, "Han hmu ve mah ula chu mak inti ve hle ang. Jim a hian...," a han ti a. Mahse, a sawi zawh hmain Green a chuan a lo sawi khalh ta a,"Philadelphia, sawi tam vak tur a ni hleinem mawle, min hre ta bawk a, kapu, kan ban hi kan dahthla thei tawh ang em? Heti ringawt chuan a khawng zo vek dawn alawm," a ti ta a.
"Green, min ngaidam rawh u. Hawh u, inchhungah lo lut rawh u. Rab, Susie kha coffee han siam tir rawh," a ti ta zung zung a. Reb Johnstone a chu a kal nghal vat a.
"Ka hming hi, Jacob Harris a ni a. Ka țhiante chuan, Jake tiin min ko țhin a. Susie chu ka fanu a ni a, anu thi tawhin min koh dan khera Jacob ti a koh tur hian a ngiat țhin a, nakinah in la hmu ang. Green, hnathawhna chu in zawng tak tak maw? a nih, ranvulh lam te hi i hre phawt ang a... " Harris a chuan a han ti a.
"Hre ve bawk tawh e. Texas ram ațanga lo kal ka ni a, mahse, Green han intih ai chuan, Jim, min ti la ka duh a," Green a chuan a han ti ve a.
Harris a chuan, "Anih, he tlangval hi, nangmah ang bawk em ni?" tiin a han zawt a. Green a chuan , "Ni lo e. Ani hi zawng, engkim zirtir a ni a. A chaw hlawh, a changa khuaa pawisa hman tur i pek zeuh zeuh chuan a tawk ang, a ni lawmni, Philadelphia?" a han ti a. Henry a chuan a duh ang chiah chu a ni lo na a, Green a thu han hnial chu thiltih chi niin a hrelo a, ngawih a chuh ta zawk a.
Chutih lai chuan, Susie i chu a lo lut ta a. A hmel chu a țha em em mai a. Chubakah, a hmeichhia hnep mai tih ang chi hi a ni a. Kum sawm leh pariat mi vel tur hi a ni a. A lo luh tirh phat ațang khan, Henry a chuan mit pawng zawrh in a lo en hman a. Amah lah chu a ka ho mai bawk a. Chu chu Jim a leh Jake a chuan an lo hmu ve reng bawk a.
Harris a chuan, Jim a te țhiandun chu a fanu hnenah chuan an hmingte a han hrilh a. Chibai te an inbuk hnu chuan, Harris a chuan, Henry a hnenah, "I en anga en kha an tam tawh asin. Amah lah hi a hmelțha tawlh tawlh mai a," a fanu chu chhuang em em hian a han ti hram a. Jim a chuan, "Mit a ti hahdam ngei mai," a lo ti ve sak bawk a.
Henry a khan, a hmelah khan, Jim a leh Harris a khan an lo hre vek a ni tih a hriat chuan a zak leh hnuhnawh em em mai a. Mahse, Green a chuan a lo nuih san san a, a thlavang hauh nan Harris a hnenah chuan an ranch chanchin te chu a zawt vel ta daih a.
"Jh ranch hi, te takte a ni a. Mahse, ka aia te zawk hi an la tam a, bawng zasarih vel ka nei a, keimahni ngawt chuan chung vel pawh chu kan enkawl țha thei lo a. Mi han țanpui tur kan zawn leh, hmuh tur an vang hle si a, kan theih ang angin kan la khawsa vel mai mai a ni," Harris a chuan a ti a. Henry a chuan, "Saloon neitu Tyler a sawi ang deuh i ni maw? Engtikah emaw chuan, tih hun nghak pawl," a rawn ti ve zaih a.
"Tlangval i ti dik ngawt a ni. Ka fanu Susie hnenah pawh hian, "Engtik hunah emaw chuan ranch lian tak ka nei ang," hi ka ti reng țhin a. Mahse, chung zawng, mumang ang deuh a ni a, a thleng thei tak tak chuang lo. Mi țanpuitute chu nei ila nih pawh kan la ni ve mahna. Ka ngaihdan chuan Sabre ranch ah chuan kal ta zawk ula chu, an hlawh pek pawh a țha a, kei chuan chung ang chuan ka ti ve thei lova....," in ngaitlawm tak hian Harris a chuan a ti ta a.
Green a chuan, "Tunge Gunnisona, Sabre ranch neitu hi. Yavapai khuaa ka hriat dan chuan, "Gunnison an a ti, Gunnison an a duh, Gunnison an a sawi... Henglai hi ata vek em ni tih tur hi a ni a, a ropui viau em ni?" tiin Harris a chu a zawt leh a. Harris a chuan a sikret chu a han țan te te a, muang changin Gunnison a chanchin chu a sawi ta a.
*******---*****--*******--****
"A ram ringawt hi chu ka thlahlel em em a. Mahse, helaia tu cowboy emaw nupui nih mai mai chu ka tum lo. Khawvel fan te, kawrmawi tak tak hak te hi ka duh leh chak zawng a ni a, fa tamzet nena pasalte enkawl leh cowboy ho chawchhum ngawta hun hman a tar mai chu ka tum lo," Susan Harris i chuan a lo ti ve a.
Chumi thu Susie in a han sawi hnu chuan, Henry a rilru chu a na ta hle a. Țawng miah loin ranch lam pan chuan an hawng leh ta a. Susie chu pen nga velin a hmasa a. Chutihlai tak chuan, rifle hi a lo ri ta a. Susie chu a țe tuar mai a, a sakawr chuan na pawh chu a tlu sawp nghal a, Susie chu sakawr bulah chuan a tlu a, a hnang a, engmah a sawi thei lo a.
Henry chuan, Susie rawn kaptu awmna tlang pawng hnimbuk ațanga silai lo khu chhuak ngiai ngiai lam chu a han pan nghal a. A puakruk chu a phawi a, silai khu lo chhuahna lai chu an pawng kah a. A puakruk mu a hmanral zawh rual chiah chuan rifle chu a han ri leh țhang a, Henry chu a sakawr ațang chuan a her lawih a, leiah chuan a tla thla ta riai riai mai a.
Hetih lai vel hian Jim a leh Harris a te chuan bawng rual an lo endik mek a. Rifle ri an hriat veleh, "Phil leh Susie te kalna lam a ni... tirawh, i va endik teh ang," tih pahin silai rikna lam panin chak zetin sakawr chu an tlan tir ta nghal a. Reiloteah Philly a leh Susie te an lo lambunna an thleng ta nghal a.
Green a chuan, Philly a a hmuh veleh chuan, sakawr ațangin a zuang thla thuai a, mahse, vanneih thlak takin a chhipa silaimu thawi hliam mai lo chu engmah hliam dang a lo nei lo a. Green a chuan, a tuithawl pai chu phawrhin Henry chu a han tulh a. Henry chu a lo meng chhuak ta a. Hetihlai hian, Harris a khan Susie i luhai pawh la reh lo chu a rawn kai ve bawk a.
"Tuten emaw Susie sakawr an kap thlu a, chutah, Philly a hi kahhlum an tum niawm tak a ni... tute kher nge ni ang aw?" Harris a chuan a han ti a. Philadelphia.. Henry a chu a lo meng chhuak a, a țhu thei nghal mai a. Susie chu a hmuh veleh chuan, "Susie," ring zet hian a han ti a, harsa tak chung chuan a han ding chhuak a, mahse, Harris a chuan, "Engmah a ti lo ve, a țha e," a lo ti thuai a.
Green a chuan, Henry a hliam chu a han enkawl sak a, hetia a lo enkawl lai hian Harris a chuan, "Hmeichhia leh naupang te em han kah tak chuh! An sual dan hi a buru hle mai," a han ti a. Susie chuan, "Kapa, Philly hi naupang a ni awzawng lo. Ani hi awm lo phei se chu...," a lo ti ta hmawk hmawk a. Jim a leh Harris a chu an in en dun a, an nui ta a.
Green a chuan, "Khawnge, a lo lambun tu hian hnuhma a kalsan em ka han en teh reng ang," a ti a. A lo lambuntu awmna te chu ngun deuhin a han en vel a. Mahse, silaimu ruak tak ngial pawh engmah han hmuh tur a awm lo a, "Kan mihring pa hi a fimkhur hrep a nih hi, engmah hnuhma pawh a nei lo. Sikret bung tak ngial pawh a awm lo, pa fimkhur tak chu a nih dawn hi," Green a chuan a ti chhuak ta hial a.
Midang te pawh chu an lokal hnai hlawm a. Harris a chuan, "Midang, Gunnisona tih loh chuan hetiang thleng thleng a an tih ka ring lo. Marshal Appleby a thusawi kha a lo thleng ta a nih dawn hi. Ka fanu han kaptu tur a han puh tur dang ka hre lo ," a lo ti a.
"I fanu hi an tum chiah a ni kher lo maithei a, tihțhaih an tum nan che i fanu hi an hmang a ni lek zawk long maw?" Green a chuan a lo ti a. Harris a pawh chuan, "Chu i sawi dan chu a dik zawk maithei e, an duh chuan, ka fanu hmang hian min vau thei tih chu a lang chiang ta tak tak a nih chu," a ti ve mai a. Green a chuan, "A ni ang chu ka ti thei chiah lo na a, thil awmthei chu a ni alawm," a ti leh ta a.
Green a chuan, ngun zetin hnuhma chu a han zawng leh a, "Jake, he misualpa hnu hi chhui ka tum dawn a, Philly leh Susie hi Jh ranch ah hruai hawng ang che," a han ti a. Harris a pawh chuan Green a thusawi chu a pawm zawng tak mai a ni a, "Susie, ka hnungah hian lo chuang la, Phill, nang pawh, i sakawrah khan chuang la, i kal ang u," a han ti a.
Mahse, Philly a chu a lo țeu ta hlar mai a, "Tumahin min hnial suh u. Keimah hi a nia kahhliam chu. Chuvangin, Jim an min kaptu hnu a chhui dawn phawt chuan ka tel ve lo theilo," Hnial rual loh hian a tita bur mai a. Jim a pawh chuan awm a tihpui ve tho mai a. Tichuan, Harris a te pafa chu an kalsan ta a.
Thui vaklo an kal hnu chuan Green a chuan sikret hi a han zial a. Philly a hnenah chuan, "Harris a hian a tuarna hle maw?" a han ti a. Philly chuan, "A tuar nat loh rengah... a fanu pawh an kap duh a nia, thil engmah tih hreh a nei dawn lo tih chu kei mimawl pawh hian ka hrethei a..," a tih hnu chuan Jim a chu eng engemaw a han zawt a. Mahse, Green a chuan a chhang lo a.
Atawp atawpah, Philly a thinrim chuan, "Thu i sawi duhloh chinah chuan keu an chawp ngawt che loh chuan i țawng duh dawn lo a, i khirh hle mai. Anih loh leh, i țawng duhna tur chuan ka lu te hi silaimu khan lo kap tlang ta se chu i țawng duh hle dawn a nih hi," a han ti khar khar a. Chuti chung pawh chuan Green a chu ala ngawi ta reng a. A sikret bung chu a paih a, misualpa sulhnu chu an chhui țan tak tak ta a ni.


SUDDEN
TROUBLE SHOOTER 3
Mel tam fe chu an kal tawh a. Philly a te lo lambuntu hian a hnu reng reng thui tak chu a thup bik lo a. Mahse, Green a te hma lawkah chuan lui hi a awm a, lui leh an awmna inkar chu leițhil hmun a lo ni a. Hnuchhui pawh chu a harsa ta viau mai a. Chuvangin, Green a chuan lui chu thlen zet a, an mihring chhui a chuan lui a kan leh kan loh en țhain a hria a. Lui lam panin an sakawr chu an tlan tir ta nghal a.
Lui an va thlen chuan, bawng hnu leh sakawr hnu te chu luikamah chuan a lo chik nuk mai a. Green a chuan, ngun deuhin chung hnu te chu a han en vel a. Philly a chuan, "Jim, khatiang zingah te engtinnge min kaptu sakawr hnu kher kha i hriat theih ang?" tiin a han zawt a.
"Hriat dan awlsam tak a awm ve a, lo ngaihtuah ve teh," Green a chuan a lo ti a. Vaukam chu ngun lehzualin an han en leh a, "Helaiah hian he lui hi a lan," a ti ta a. Philly a chuan a la awih lo khawp mai a, "Chu, a sakawr rawng pawh i sawi thei nghal dawn e lo?" ring lo leh awih loh hmel zet hian a han ti a.
Green a chuan a lu a lo thing a, "Hrilh pawh ka hrilh thei maithei che asin. Mahse, ka hrilh lo ang che. Chhuk la, han en ve teh," tiin Philly a chu a sawm ta a. Philly a chuan a han en thuak thuak a, "Sakawr hniak pangngai ve mai a ni," a ti a. Mahse, Green a erawh chuan, 'Anilo, en chu i en ngei a, hmuh tumin i en lo.. han ennawn leh teh," a han ti leh ta a.
Philly a chuan ngun lehzual in a han en leh ta a, sakawr hniak veilamah chuan engemaw dum hi a awm a. A kutin a zuk dap a, hling khauh tak tak a rawn phawrh chhuak ta a. Amah pawh chu a nui ta hawk hawk a, "Jim, min ngaidam rawh. Chuti chung pawh chuan engtin nge ka hnuchhui pa hi a ni tih i hriat theih?!" tiin Green a chu a han zawt leh a.
"Han ngaihtuah mah la, he hnu hi nimina mi chu nise dai tla leh khawvawtin a ti zawp tawh anga, mahse i hling han phawi te kha a la hul hak a, chuvang chuan ka ring diklo pawh chu a ni thei a, a teuh ber a ni tlat si. Kan chhui zel tur a ni," Green a chuan a ti ta a.
Hlauthawng tak hian Philly a chuan, "Ral lehlam saw chu Sabre ram a ni tawh," a lo ti sap a. Philly a thusawi chu chhang lem lo chuan Green a chuan lui chu a sakawr a dai tir ta nghal a. Philly a pawh chuan ngawi rengin a zui ve mai a. Ral lehlam chu reiloteah an kai ta mai a. An han kai fel chuan an piah lawk tlang pawnga thil intar hi an hmu thei ta a. Rang zetin Green a chuan ava pan thuai a, chu thil intar chu a han chhiar a.
HEI HI SABRE RAM A NI.
HETA LENG TURA SAWM
I NIH LOH CHUAN
KIR LEH RAWH.
Tih chu a han chhiar a, "An nelawm hle mai," Green a chuan a han ti zui a. Ranch awmna lam chu an pan ta a. Mel hnih vel an kal hnu chuan ranch in chu an va hmu ta a. Green a chuan, "Philly, i kut kha i puakruk bulah khan dah reng reng suh. I hmu ve lo maithei a, kawtlai khu en la, awm pangngai ang chuan an awmna a, inchhung tukverh a mi khuan rifle a keng a, kan lam hawi zawngin a keng lehnghal a nia," a han ti a.
Chu chang pawh chu a ni lova, lui an rawn kai phat ațang khan an piah lawkah outlaw pakhatin Winchester rifle nen a zui ru reng tawh a ni. Ranch an hnaih ta tih veleh a zuitu chuan a sakawr chu a han tlan tir a, Green a te hma lawk, feet sawmhnih vel, hnimbuk phenah chuan a ding a, Green a te țhiandun an lo hnaih veleh chuan , "Che tawh suh u, in puakruk leh in silai te kha leiah thlahthla rawh u," țeng zet hian a rawn ti ta a.
Thu petu an han en chuan, patawi lam, sanghet tak, karkhat vel hmuihmul pawh ziat tawh lo ni mai awm hi a ni a. A thupek awihin an puakruk te chu an hlip ve mai bawk a, leiah chuan an thlauh ta a. An silai an paihthlak zawh chuan, "Enge induh?" tiin Green a te țhiandun chu a han zawt a.
"Gunnisona biak kan duh a ni," Green a chuan a ti a. Chupa chuan, "Eng thuah nge?" a han ti leh a, "I hriatte chuan in pu chu ka biak kher pawh a ngai lo ang chu," Green chuan a lo ti ve ta siah mai a. Chupa chu a thinur em em mai a, a rawn hnaih phei a, Green a nakah chuan a rifle chuan a han nawr a, Green a lah chuan pawisak awmlo hmel tak hian lehlam a hawi san daih a, a nui nghe nghe a.
Green a a hawi lai khan rifle kha a tawlhsawn a, chu chu a man tupa chuan han hawlh nawn leh a tum a, mahse rang em em hian Green a chuan rifle ngul chu a phihsak ta thut mai a. A mantu tihngaihna hrelo chu a sakawr chung ațang chuan a zuangthla ta a, a puakruk phawi a han tum a, mahse a hma lawka a mi tang ngei mai chuan ama rifle ngeiin a lo tin reng tawh mai si a, a mangang chu a meng nasa ta mai a.
Green a chuan hmusit hmel deuh tak hian, "I van tla hniam ta ve; Phil, kan silai te kha han chhar khawm rawh. Hei, nang pawh, i puakruk paina kawnghren kha phelh la, rang deuhin thlauh nghal rawh," tiin thu a han pe ta a. Chutia a thupek anga a han tih hnu chuan an mi man let a chu hma an hruaitir ta a. Sabre ranch chu an pan pui ta a. "Fimkhur takin kal rawh. Nichina min man hmasak zawk avang khan ka tha a khur nasa a nia," tiin a,han sawițhaih vel a.
An mi man pa chuan Green a chu a en leh zuk zuk țhin a. Sabre ranch kawt an thlen chuan ranch a lo awmte chuan thil a fel lo a ni tih an hria a. Pakhat phei chu rang deuha inchhunga silai lak tum ni awm takin a tlan thut mai a. Mahse, Green a chuan a ke sir ve veah rifle khan ava kap hman a, chupa hlau chu a ding chawih mai a.
Chutah, an mi manpa hnenah chuan, "Che suh," a han ti zui a. Ranch hung chhung an han thlen chuan ranch varanda ah hian mipahnih hi an lo ding a. Pakhat chu Dancy a a lo ni a, pakhat dang leh chu putar lam deuh tawh, pa sang tak hi a ni a, Green a chuan, "Gunnisona i ni em?" tiin a han zawt ta a.
"Minute nga chhunga i silai kha i thlauhthlak loh chuan i thi ang tih hre rawh. Tunah sana hi ka endawn a, minute nga chhunga i silai kha i thlauh loh chuan heta țangin a zawnin an zawn chhuak ang che," ranch neitu niawm tak zawk chuan a rawn ti ta a.
"Minute hnih a thlen hmain nang leh Dancy a hi chu ka kaphlum hman ang che u. Chuvangin â â duh lo mai la, ka thusawi hi ngaithla țha mai la engmah buaina a awm lo ang. Mahse, ka tih ang a i tih duh loh erawh chuan....," tih pahin Green a chuan a rifle in a han tin a, Gunnisona chu thusawi tum niawm tak hian a han ang zuau a, mahse sawitur a hre lo a ni ang, a ngawi leh ta daih a.
Reife an in en kelkawl hnu chuan, Gunnisona chu a dawl zawkah a țang ta nge nge a. "Anih leh, i thusawi duh chu sawi la, mahse sawi rei lutuk suh," a ti ta zawk a. Green a chuan Philly a leh Susan Harris i, lo lambun an nih thu leh a hnu an chhui dan zawng zawng te chu a han sawi ta phiar phiar a. Chutih lai chuan inchhung ațangin tlangval ria lam deuh, inthuam uluk fe mai hi a lo pen chhuak zan zan a. "Chung i thusawi te chuan, Sabre ranch nen inzawmna a nei em ni?" a rawn ti ta a.
Gunnisona chuan a fapa chu a han en a, Green a hnenah chuan, "Ka fapa Randolph a nih hi. Ni e, a rawn sawi dik ngawt mai. Enge Sabre ranch nena a inzawmna chu?" a lo ti ve nghal a. Green a thin chu a rim țan ta a, "Mihring, heng naupang pahnih kaptu hian Yavapai khaw lam a pan loh avangin Sbre ranch lo chu pan tur a nei lo," a ti ta hmiah mai a.
Randolph a pawh chu a thinrim ve nghal mai a. "Chu, chung naupang pahnih kaptu chuan a kah hnu chuan Sabre ranch ah hian a lokal i tihna a ni maw?" a lo ti lui ve ngat a. Randolph a thusawi chuan Green a chu engtin mah a khawih lo a, chu chu Randolph a rilru te tak te nei chuan a thinrim zual phah tawlh tawlh a. A pa hnenah chuan, "Ka pa, Sabre ranch hian hmeichhia te leh zel pawh kap tu an hmang hepa hian a tihna a ni a, i van ngai thei zawk ve," a ti ta a.
Randolph a thu han sawi chuan a pa chu a ti thinrim ve ta a, "Heng ranch tenau ho hian hmelma an ngah em em a, chungho zinga mite chu an ni ngei ang. Sabre ranch hian hmeichhia kan do ngai lo tih hi hria ang che," a rawn ti ve ta a.
"Ka pa thusawi chu i hria maw? A rilruah hian hmanlai tlawmngaihna an tih ang reng te kha a la nei a, mahse, a them te pawh ka nei ve lo tih hre rawh. Heng thleng thlenga kahhlum loh a in lo kal thei chu in vannei hle mai. Pawisa sen pahnihin..., " Randolph a chuan a ti hman chauh a, rang takin Green a chuan a ipte chu a lo zen vat a, pawisa sen pahnih chu a rawn phawrh a, "Hei le, pawisa sen pahnih chu. Engtin nge ni ta ang?" tih pahin Randolph Gunnisona hmaah chuan ava theh ta a.
Gunnisona chu a dang ta sawp sawp mai a. A pa hnenah chuan, "Ka pa, hetiang thil hi i ngaithei dawn em ni?" a ti ta ngawt mai a. Apa chuan a fapa chu a han en a, "Randy, lum i tih chuan hmun dangah kalsawn rawh. Thu tak tak kan sawi laiin lo inrawlh tei vet suh. Tin, mi cho ngai suh," a lo ti ta sak sak mai a.
A fapa chuan, "Ka pa, silai kah ka thiam ve hleinem," zak deuh chung hian a han ti ngawt a. "Chuvangin, kap thiam niawm takin țawng pawh țawng suh," tiin a pa chuan a zilh leh ta zel mai a. Chumi hnu chuan Green a te nen chibai an inbuk a, an hmingte an han inhrilh tawn a.
Chibai te an inbuk zawh hnu chuan Gunnisona chuan Philadelphia chu ngun deuh hian a han en a. Phung hmu emaw tih mai tur hian a phu deuh zawk mai a. Din pawh chu a ding țha thei mang lo a, vawn tur a zawng ta ruai mai a. "Naupang i hming dik tak chu han sawi teh," a ti ta ngawt mai a.
"Ka pu, ka hming chu Sloane.... Henry Sloane a a ni e," Philly a chuan a lo ti a. Gunnisona chuan lu thing chungin, "I hmel ka han hmuh phat ațang khan hmanlaia ka hmuh tawh hmel ka hrechhuak a. Hm... ka mit a fiah tawh loh vang te pawh a ni ang... tlai lam a ni ta a, tunhma ang kha ka ni ta lo a ni ang. Green, ka fapa ang teh huam kha chuan Sabre ranch hian țawng kan thlahdah lo a, tin, a thusawi țhenkhat te kha chu a dik ngei a ni tih chu keipawhin ka ring..,"
"Tunah hian ngangni hian thu thar engmah min hrilh hranpa lo. Chuvangin kan ranch hi rang takin chhuahsan thuai ula ka duh. Tin, i țhian, Harris a hnenah chuan a fanu a venghim zo dawn lo a nih chuan ranch pawnah vahchhuah tir suh se tih hrilh la, nangni Green, i nausen rawn kalpui nen hian hria ula. Heti mai chuan tun hnuah chuan ka chhuah tawh lo ang che u. Ka hote hian an hmuh hmuh naa kap tur che u in thu ka pe tawh dawn," a ti ta a.
Green a chuan, "A pawi hle mai. Ka thusawi kha i ngaihtuah chiang lo a ni ang. Mi pangngai turah ka ruat che a, mahse i lo nih loh hi le! Ka thusawi tur hi ngun deuhin lo ngaithla ve teh. Susan Harris leh Philly lo lambuntu hian Sabre ranch rawn pan lohvin khawilam nge a pan ang?" a tih zawh veleh chuan an sakawr chu a tlan tir ta a, Philly a pawhin a zui ve nghal a.
Gunnisona chuan han chhan leh hman a duh tehlul nen, Green a te țhiandun kal ta mai chu pawi a tiin a thin a rim em em mai a. Dancy a chuan, "Mi pali ka hruai anga, kan va um zui ang e. Thuhnuairawlha chetmawi zawk zirtir an ngai a nih kha. Ka va zirtir anga, nakina an lokal leh hunah awmdan mawi zawkin an awm tawh ang," a lo ti vat a.
Dancy a rin loh ang takin a pu Gunnisona chuan thinrim zetin, "Ka sawi tawh angin hmeichhe lakah buaina kan siam ngai lo. Chutiang bawkin mi pahnih lek lakah mi panga a ruk a ralin ka tir dawn bawk hek lo. Ka tih hun vek vekah chuan inthupna awm hauh loin ka bei ang. Chumi hma chuan engmah i ti tur a ni lo," tiin Dancy a chu a hau ta hrep zawk a.
Dancy a pawh a thinrim ve kher mai. Mahse, inhlawhfa a ni miau si a. A tih ngaihna hre lo chuan, "Ka pu, i thu thu le," tui lo zet hian a han ti hram a. "I theinghilh palh hlauh ang e," Gunnisona chuan a han ti zui a. Chumi hnu chuan Gunnisona chuan, ranch inchhungah chuan a lut nghal a. Dancy a chuan huat namen loin a hua tih hriat reng hian a pu chu a en zui vang vang a, chil a chhak a, a kalsawn ve ta a.
Ranch ațanga an lan theih lohna hmun an thlen veleh chuan Green a chuan a sakawr chu a ti ding thut mai a. Philly a pawh chuan a ti ding ve nghal a, "Jim, enge mi?" tiin a han zawt a.
"Nichin khan kan kal chhan ber, lo lambun tu che u kha Sabre ranch ah khan a luh leh luh loh kan hre miah lo a, chuvangin ka kir leh dawn... an sakawr ke ka va endik vek teh ang," tiin a chhang ta daih a. Philly a chuan mak a ti em em mai a. Green a hian arsi lak a tum dawn em ni aw a ti rilru hial a, "Jim, i â ta em ni? An lo man vaih che chuan i vun an lip anga, i sa chu mulukawlh an tlan tir ang che," a lo ti a.
"Man turin ka awm dawn hleinem," Green a chuan a ti mai a. Philly a chuan, "Chuti chu keipawh ka lo kal dawn," a ti ta a. Green a erawh chuan a awih lo khawp mai a, Philly a chu a hnial ta zawk a.
"Phil, puakruk kah chu i thiam viau tawh pawh chu a ni maithei a, mahse a ruka thawm dim taka kal dan ka la zirtir lo che a, chuvang chuan lo kal ve lo in sakawr hi lo veng la, ka lo kir leh chuan rang deuh a tlan te pawh ka duh mai thei ania. Lo inring reng ang che," tih pah chuan bihrukna tur hmun thlengin Philly a chu a kawh hmuh vek a. Chutah, Sabre ranch lam pan bawk chuan thawm dim em em in a kal leh ta a ni.
Chutia Green a a kir leh lai chuan khua chu a thim tawh a. Thawm a siam loh phawt chuan han hmuh mai theih a ni dawn lo tih a inhre bawk a. A theih anga rangin sakawr dahna lam chu a pan ta a. Kawngkhar bulah chuan a ding a, sakawr inchhunga țawng ri chu a hre ta nghal a. Dancy a aw ngei mai chuan, "Chaw pe la, ngun takin zut ang che," a tih chu a hrethei a.
"I duh ang chuan ka ti ang. Anih, Jack Maldo a sakawr hi engtin nge ka tih dawn? ti a a zawhna chu Green a chuan a hre leh a, "Maldo a sakawr kha chu chaw pe la a tawk," Dancy a chuan a ti a. Chumi hnu chuan sakawr inchhung ațang chuan a lo chhuak ta a. Ranch in lam panin a kal ta a. Inchhungah chuan a lut nghal a.
Green a chuan thawm dim thei ang berin sakawr inchhung lam chu a han pan a, a lut ta a. Pa pakhat sakawr lo zut mawlh mawlh hi a hmu a, chupa hnung lawkah chuan ava ding ve ta a. Chupa chu a lo leh hawi ta thut mai a, Green a a han hmuh chuan, "Eng...," a ti hman chauh va, Green a chuan a bekah tak mai chuan puakruk kawmin a chhu ta chawrh mai a. A tlu tur chu a ban leh lamin a lo dawm ding nghal a. Chupa, engmah hre lo chu a hnuk sawn nghal vat a, a hmaa sakawr chu ngun zetin a han dap vel țan ta a.
Chu sakawr chu a tlan nasa hle a ni tih hriat takin a thlanin, a vun chu a huh deuh vek a ni. Chutah, a ke chu a han dap leh a, mahse a hmuh beisei ber hling kha chu a lo awm tawh lo. Ngun lehzualin sakawr ke hnuai chu a han dap vela, hling chhunna awm chu la hretheiin a inring a. Mahse, tihsual a hlauh em avangin Maldo a sakawr chu ava en leh ta a.
A han chul ațangin Maldo a sakawr chu nitheiin a hre lo a, a kalsan leh ta mai a. A sakawr en hmasak bawk chu a han bel leh ta a. Reife hnuah chuan chu sakawr chu lambuntu sakawr ni ngeiin a ring ta tlat mai a. Mahse, tu sakawr ber nge tih a hriat miau loh avangin a chemte a phawrh a, chu sakawr ke sirah chuan JG tih te tak tein a kher a, a țul huna la en leh atan a ti rilru a ni.
Chumi hnu chuan Green a chu Sabre ranch ațang chuan a in saseng fel leh ta a. Philly a awmna chu reiloteah ava thleng a, JH Ranch lam pan chuan an hawng ta a.

In tih ve tur kha ooo thian te uuu

[Ngaia]

Chumi zan, Green an Sabre ranch a tlawh vawihnih hnu chuan a neitupa leh a fapa chu țhutna pindanah an inhnial a. A hnialtu zawk tak phei chu a fapa Randolph a kha a ni a, a hnial tak tak pawh a ni lo a, a pa kha a fuihpawrh zawngin a hau a ni ber zawk a.
"Ka pa, sawng ranch tesep ho sawn kan bawng an ru tih chu i pha bik miah lo... Susan i thah tum thu te kha dawt mai mai a ni ang. Chutiang thil te chu awm tak tak chu nise, engah nge marshal hnenah an sawi mai loh? Tak tak nise, khatiang khan anmahni thuin Sabre ranch ah hian an lokal miah lo ang. An thusawi zawng zawng te kha dawt vek a ni," Randolph a chuan a ti phiar phiar mai a.
A pa, Gunnisona chuan a chhan pawh a chhang lo. Green a a hmuh dan, a ngaihdan te chu a han ngaihtuah kir leh a, Green a hmel a han en khan, dawt sawi ching mi chu a ni lo tawp tih a hrethei nghal mai a. Mahse, țhenkhat chu hmela țha awm taka lang te pawh hi dawt sawi hmang em em mai te an lo ni ve thei tho tih a hre tho bawk a. Mahse, he Green a kher hi chu, mi satliahah a dah thei tlat lo a, a rilru chhungril tak chu a tibuai em em mai a.
Mahsela, chung zawng zawng chu thuin a sawi chhuak thei mai si lo. Chutichung chuan a rilruah eng emaw chu a awm tlat si a. Hetia a ngaihtuah lai pawh hian, a fapa chuan, "I hmanlai nun, țha takin awm tlang dial dial ila, tih ang kha chu tunlai hunah chuan a hman theih tawh loh. Tumahin an ngaisang tawh chuang lo. Kan ranch leh ramte hi min chhuhsak an tum a, chutiangte chu kan lo dang ve tur a ni," a rawn ti leh kak kak a.
Gunnisona chuan, a fapa chu en pawh a en țha peih mang lo. A hmel takah hian a han melh a, "Randy, engti zia teh thut nge ranch chung chang hlir i sawi ve tak? Tunhma in engtin nge kan enkawl te pawh i ngaihtuah ngai lo a, i thiltih chhun chu, Tyler a saloon a zu man bat vak vak leh nula nikhualo deuh deuh laka pawisa sen țeuh țeuh bak chu i hre ngai lo a nilawm ni?" a han ti let ve ngat mai a.
Hun dang chu nise, Randy a hian tunhma ang bawkin a pa hi zu man chungchang thuah te chuan a hnial leh tawh ngei ang. Mahse, thil tum thuk zawk a neih avangin a pa chu chhang lovin a hauh zawm leh ta zawk a.
"Ka pa, ka thusawi hi hrereng rawh. Inchikhat pawh he Sabre ram hi, heng mite hi i pek vaih chuan melkhat lai an la anga, nakin dwuhah phei chuan i mithmuh lai ngeiin an la chhuhsak vek ang che. Engahnge tuna i theih lai hian i mi chhawr zawng zawngte hruaiin heng ranch chek hnawk ho hi i nuai bo nghal vek mai loh?" a ti leh ta zel mai a.
Chutah zet chuan Gunnisona thin chuan a tuar ta ngang lo a, "Chu, i sikul kalnaah chuan dikna hi a lalber tih hi i zir chhuak ta chu a nia maw?" a ti ve ta a.
Reife mai an inhnial hnu chuan, a fapa zawk chua, "Ka duh angin Sabre ranch hi enkawl ta ila chu engkim a danglam in a fel vek tur," duhthusam ang reng chung chuan a ti ta a. A pa chuan, "I thu hnuaiah a la awm em lo a, lawmawm ka ti a ni. I enkawl ve tak tak hunah chuan i duh angin ila ti ve dawn nia. Tunah rih chuan thu tak tak sawi laiin rawn inrawlh ve tawh ngai suh ang che," a ti ta hmiah mai a.
Randy a chuan a pa chu a enta reng a. A tih ngaihna hre lo chuan, "I rilru hi ka hre ve thiam lo," hmusit hmel tak hian a han ti hlak a, a chhuahsan ta daih a.
Gunnisona chuan, thil awmda zawng zawng chu a han chhuikir leh țhin a. Susan Harris i te țhiandun an kah thu te leh Philadelphia, a hmel hmuh tawh hnu a an zia te a ngaihtuah a. Tin, a bawng bo fo thu te pawh a ngaihtuah chhuak vek a. Jake Harris a mi rinawm ni a a mgaih ber hi chuan a ruksak chu ala ring thei chuang lo a ni.
Engpawhnise, Harris a kher chuan ru lo mahse, rutu chu an awm ngei a ni tih a chiang a. A theih anga manchhuah chu a tum ruh ta hle mai a. Tin, Sabre ranch haw hrim hrim zawnga miin thil an tih chuan, a theih ang tawka țan lo khawh chu a inhuam bawk a. Chutiang thil chu a han ngaihtuah vek hnu chuan, "Tihtak emah chuan henglai ramah hian ka lut hmasaber alawm.. Susan Harris an kah mai avanga keiin ngaihdam ka va dilna tur a awm ka hre lo," tiin inthiam lo deuh chung chuan a vaibel chu a han țan a. Țhutthlengah chuan a han țhu a, a mut chhuah thlengin a zu a.
**-----**--------**---+-+***-----**-
Yavapai khua chu, chhun nisat lai tak hian a thleng a, palian tak chu a ni lo a, feet ruk leh inches riat vela sang hi a ni a. Mahse, pian a thiam em em a. A rit lam chu Mound hnih țhelh a ni bawk a. Puakruk pahnih hi fual zet hian a pai bawk a, pa naran pawhin silai kahthiam leh phawirang a ni tih chu an hrethei mai a ni.
Tyler a saloon kawt a thlen veleh chuan, a sakawr chu a ti ding a, a chhuk ta a. A sakawr chu pawna banah chuan a thlung a, saloon chhungah chuan a lut ta nghal a. Zu a han lam phawt a, Tyler a chuan no lian hem hawm khat hian zu chu a han thli a. Zu bur chu chhin a dah leh mai hi a han tum a.
Mahse, zu rawn lam tupa chian, "Tikhan dah rawh, zu ka in dawn," a lo ti hlak a. Tyler a chuan, chupa chu a melh relh relh ngam chauh a. A hlauh ruk nak a lai chuan, "Hei, lo hawi teh. Hei aia țha hi he hmunah hian a awm nang e? Sheriff emaw, Marshal emaw in nei em? In nei a nih chuan rang deuhin va ko teh," tiin bung deuh maiin Tyler a chu thu a han pe zui nghal a.
Tyler a chuan, "Marshal hming chu Appleby a ni e," tih pah chuan rang zetin marshal ko tur chuan a chhuak ta nghal a. Tyler a kal veleh chuan, chu mikhualpa chuan saloon chhunga mite chu a han enkual a. Vin fe hian, "Pawnah chhuak vek rawh u!" a han ti tuar mai a.
Țhenkhat te chuan, a ngaihna an hre lo a, ala țhute chu, chu mikhualpa chuan ava hnaihchilh a, rum deuh hian a han melh a. Hreh chung chung chuan an kal leh ta hlawm a, a țhente erawh chu rang zet zetin an chhuak dawr dawr mai a. Chutah, amah chauh chuan saloon chhungah chuan a awm tawh a, a zu no chu a han tlak a, a han thli zo leh chiah tih chuan, marshal Appleby a leh saloon neitu Tyler a chu a lo thleng ta a.
Tyler a chu a lokal hmasa a. Appleby a chuan muangchangin saloon kawngkhar chu a rawn pan ta a. Kawngkhar chhung si, chu mikhualpa veilam zawn siah chuan a ding ta a, "Marshal, i fimkhur hle mai maw?" mikhualpa chuan a lo tihkhum nghe nghe a, Marshal Appleby a chuan, "Fimkhur tluk a awm lo," a ti ve mai a. Mikhualpa chu ngun zetin a han en a.
"Ekhai, Yavapai marshal hi i ni maw?" Mikhual chuan a han ti a. Marshal Appleby a chuan, marshal a nih thu leh a hming te chu a hrilh nghal a.
"Marshal, ka rawn koh tir nachhan che chu, rawn zawn chhuah kher ai che chuan, khatia han koh tir mai che kha awlsam zawkin ka hria a, chuvang chuan ka rawn koh tir mai che a ni. Tin, ka hming i hriat duh takin, Wesley Cameron a ka ni," a han tih meuh chuan pawn ațanga lo ngaithlatu ho zawng zawng chu mak tiin an in enkual ta hlawm a.
An lo hriat țheuh tawh angin, cameron a chu, mi thah hmang a ni a. Mahse, dan chhungah ziah hian mi a that țhin a. Mi tam tak chuan miin an ruai țhin niin an ring bawk a. Mi a han thah dan reng reng chu, a chova te khan puakruk an han phawi chiah tihin a kap ta țhin a. Chuvang chuan, mahni invenna avanga kap ve chauh hi a nih țhin avangin dan a bawhchhe ngai lo a ni.
Marshal Appleby a chuan, "I hming hi ka hre tawh țhin a, enge i duh tak?" tiin a zawt ta a.
"Engdang duh lem lo e. Helai vela han cham rih hi ka tum a, chuvang chuan ka hriattir duh che a ni. Marshal, mi zaidam tak ka ni a, buaina chu a hranpa in ka zawng lo. Mahse, i hria anga, ka phawirang tak tak nge tak tak lo tih fiah rawn tum hi an awm leh mai țhin alawm," Cameron a chuan a ti zaih mai a.
"Chutiang mi chu helaiah chuan i hmu lo tawp ang," Marshal chuan a lo ti a, "Chutiang mi, ka phawiran leh ran loh fiah tum tur an awm loh chuan a țha a nih chu, an awm palh ka hlauh avanga rawn hrilh che ka ni reng asin," Cameron a chuan a ti leh ta hleuh a.
"Cameron, dan bawhchhe lo a i awm theih chuan a țha. Mahse, i bawhchhiat vaih chuan, midang ang bawkin Jail ah ka khung ang che," marshal chuan a ti ta hmiah mai a. "Marshal, chutianga i tih chuan ka duh lo ang. Marshal hi ka la that lo asin," deusawh deuh tak hian a ti ta a.
Pawna lo ngaithlatu mipui te chuan, tunah zet chuan engemaw chu a awm dawn ta le? an lo ti rilru țheuh hlawm a. Mahse, an rin loh ang takin marshal chuan, "Engtia rei nge i cham dawn?" tiin a zawt ta daih a. Cameron a lah chuan marshal chu en pawh a en țha duh tawh lo a. "Ka sawi thei lo," lehlam hawi chung hian a ti vel hmuk a.
Marshal chuan, "Ka sawi tawh ang khan, buaina i siam vaih chuan, rang zetin Jail ah ka khung ang che. Ka fiamthu a ni law," a lo ti ve nghal a. Cameron a chu a nui ta a, "Marshal, a fala han inbiak hi ka duh vang mai a nia, eh khaih, pawna mite u, lo lut ru, zu kan leisak ang che u," a ti a. A tirah chuan an lo lut țha ngam mai lo a, mahse, hmahruaitu pakhat a han awmchinah chuan a hmaa a hnawhchhuah aia tam mah mah chu an lo lut ta thung a.
Heta lut tam tak hi chuan an zu chak tak tak vang pawh ni chuang lem loin, "Cameron a mi hmingthang nen zu kan inho," tih duh vang hrim hrim in an in a ni zawk a. Hengho awmdan hi marshal khan a hrechiang em em a. Karkhat chhung chu Cameron a chanchin an sawi ngeiin a ring bawk a.
A kal liam ta chu Cameron a chuan a lo en zui reng a, "Lemchan a thiam kher mai," a ti a. Thil tak tak hi a ti angem aw, a han ti rilru leh a. A ngam lo aniang. Chuti nise, engahnge kei hi min rawn chah ang, nuam ti rilru tak chuan a han ti leh a. Zu in tura a koh te chu hmusit ru hle mahse, an hnena lan țhat a duh vang ringawt chuan hlim hmel tak pu in a be vel sarh sarh hlawm a.

SUDDEN
TROUBLE SHOOTER 5
Green a chuan Susan Harris i leh Philly a an lo lambun ațang kha chuan ranch tenau ho chu țanrual a ngai tawh tih leh fimkhur a ngaihzia te chu a sawi a. Jake Harris a chuan, "Jim, Gunnisona chuan a miten Susan i leh Philly a te kahhlum an tum thu hi a hre miah lo i ti a, i ring tak tak em ni?" tiin a han zawt a.
"Ka sawi thei tak tak bik lo, Philly a nena kan va kal pawh khan a hmel landan ngawtah chuan engmah hrelo hmel a pu in ka hria. Midik tak niin ka hmu tlat. Le, ka ring dik lo maithei a, thil pakhat, ka rilrua lo lut a awm a, helai ramah hian tunge lut hmasa ber?" Green a chuan a han ti a.
"Helaia cheng hmasa ber chu, R. Johnstone a hi a ni a. Chumi hnu chuan Stan Neuly ah Johnstone a hian suamhmang buk hluiah awmhmun a khuar a, tuna a insakna hmun khu a ni a," Harris a chuan a ti a. Green a chuan, "A nih leh engtik ațang chiah nge bawng bo hi in hriat țan tak a?" a han ti leh a.
"Kan hre chiah lo na a, ala rei lo. Kumhnih pawh ala tling lo ang. Gunnisona hian bawng bo thu chu a sawi hmasa ber," Harris a chuan a ti leh a. Chutah, Green a chu reife a han en a, a tawpah chuan, "I thusawi awmzia chu ka hre ve dawn țan ta e. Bawng ruk hmang leh henglaia buaina siam țhinte hi thuhmun an nih i ring a ni maw?" Harris a chuan a ti ta a.
"A ni thei mai ang. Mahse, Gunnisona khan, 'Ka ni lo a ti a, nangni pawhin "kan ni lo" inti ve bawk si a. Tunge nita ang? Hriatchhuah ava harsa ta awm ve le," Green a chuan a ti ve ta a. Harris a chuanin kei zawngin ka hre thei lo ang. Taka, Jim, thutak tak min hrilh dawn em? a han ti a. Mahse, Green a chuan, "Jake, hre rih lo la a țha ang," a ti duh chauh a.
"Jim, khawiah pawh thawk la, hlawh țha ber hlawh thei dinhmunah i ding a, thil thiam loh pawh hi i nei lo a... Engvanga helaia hlawh pawh nei mang lo a khawsa duh mai nge maw i nih le?" tiin Harris a chuan a zawt ta hial a.
"Tucson khuaa ka hriat dan chuan, henglai velah hian misual an pungkhawm a, ka mi zawnte pahnih an lo tel ve mahna tih beiseiin ka lokal a ni. An hming chu, Webb a leh Pettersona an ni. I hre ve tawh ngai em?" Green a chuan a han ti a. Harris a chuan, "La hre ngai lo. Engvangin nge i zawn a?" tiin a han zawt let ve thung a, "An dam rei lutuk tawh," ti chauhin Green a chuan a lo chhang mai a.
"Chu, dan laka tlanchhia i ni elo?" Harris a chuan a ti ta ha mai a. Green a chuan a lu a thing a, "Thil zawng zawng ka hrilh vek mai ang che. Jim Green a chu ka ni ngei mai a, mahse khung ram lamah chuan Sudden a an tih hi ka ni asin," a ti ta a. Jake Harris a chuan Jim Green a, Sudden a chu a en ta reng mai a.
Chutah, "Dan pawna awm ka ni lo, i ti si a, Sudden a misual hmingthang an ti si che a?" Harris a chuan muang charh hian a han ti a, "Khawiah mah danin min zawng lo a, tin, mi thata min puh te pawh kha, ka piana hnu lama ka la hmuh ngai reng reng loh te an ni hlawm asin. Engkim kha, Governor Bleke a ruahman vek a ni," tiin Green a chuan a lo chhang a.
"Sudden, tunah chuan engmah ka hlau ta lo. Ka lawm lutuk. Khawvela lamțang atana ka duhber i ni leh nghal si a, ngawirawh, ka naute hian han hre ve teh se," Harris a chuan a ti ta a.
"Harris, ka chanchin hi, tunah rih chuan tumah la hrilh rih suh. Chutilo chu, fel lohna lai a awm thei maithei ania. Mite lo hriat dan kha a diklo zawngin a ni ngei anga, chutiang misual lo rawih chu i tan pawh a țha lo ang. Chuvangin, engmah sawi lo la a țha rih ang. Tin, nithum vel vah bo ka duh a, chu pawh chu, tuma hnenah sawi lo ang che. Philly a hnenah phei chuan sawi miah suh ang che," Green a chuan a ti ta a. Chumi zan la la chuan a kal chhuak ta a.
A kal chhuah hnu chuan, Jake Harris a chuan, "A tihzia mange, Sudden a te ang ka lama ațang dawn a ni a, engpawhnise, misual angin a thang a, Sheriff â deuhin a duhlo chung man an tum ang tih ka hlau mang e," a ti rilru a.
****---***----*****----****-****
Sudden a thung chu, Silverton khuaah a kal a. He khua hi, Yavapai khuaa aia lian zawk a ni a. Tucson khua pawh a hnaih viau tawh a. Hemi khuaa a thiltih tum ber chu Sabre ranch bawng bo fo si, a rutu leh a leitu awm a hriat theih loh hriatchhuah dan awmin a ring tlat a ni. Tin, Riverton khua hi mihausa leh ram danga rela bawng an thawn theihna hmun hnai ber a ni bawk a, chuvang chuan he khuaah hian Sudden a chuan kal a duh a ni.
A hmasa berin JH ranch a kalsan dawn a Harris a kawr leh kekawr hlui a dil chhuah kha Sudden a chuan hmun fianrialah chuan a ha ta a. A hmai te chu eng rawng rawng in emaw a han chulh vel a, chumi hnuah chuan Riverton khuaa saloon pakhatah chuan a lut ta a.
A thawmhnaw chu a țawp em avangin tumahin an lo ngaihsak vak lo a. Inthlahrung awm tak hian Sudden a chuan saloon neitu hnenah chuan, "Chaw ka lo ei ang e," a han ti a. Saloon neitu hming hi, Casey a a ni. Mi naran lakah chuan pawisa hi an neih leh neih loh hi a zawt ziah țhin a. An neih loh chuan engmah a pe duh țhin lo a ni.
Chumi țum pawh chuan, Sudden a chu a han en țhin a, pawisa han nei hmel hi puin a hre ngang lo a, "I pawisa min hmuh tir zet loh chuan, nau hnuchham chawmna in enkawl ka ni lo ania," Casey a chuan a ti deuh kher a. Saloon chhunga mi țhenkhat chuan Sudden a chu pawisa neia an rin loh avang chuan an lo nuih zat ru hle bawk a. Mahse, Sudden a chuan, dollar zawr fahran a rawn phawrh chhuak ve ta mai a. Chu dollar a han hmuh veleh chuan Casey a chuan chaw eitur chu a rawn buatsaih ta nghal a.
Sudden a chuan chaw chu muang changin a ei a, a eikham chuan pawisa chu Casey ahan pe a. Casey a beng bulah chuan, "Pawisa te chu a awmna khur ka hria asin," a han ti a, za hlek lo hian a han nui a. Chutah, "Thu pakhat zawh che ka duh a?" a han ti a.
Casey a chuan, "Pawisa khur zawng i nei lo ang, nei ni la zawng khatianga pawisa hlui kha i kawl lo tawp ang. Tunah pawh hian pawisa bawk min dil i tum em ni? I hmuh loh hmel a ni," a lo ti hmak a. Sudden a chuan, "Pawisa te chu ka ngah mai. Ka thu zawh duh che chu... bawng lei duh i hria em?" a han ti ta a.
A zat te leh a ruk a nih leh nih loh te chu a han sawi vek hnu chuan Casey a chuan, "Engah nge kei kher min zawh a?" a han ti țha leh a. Sudden a chuan, "I hria ang ka tihna phei zawng a ni bik lo a, midang tumah hriat ka nei lo a, pawi ka sawi hranpa lo tiraw? A nih... saloon dangah ka va kalsawn leh rih tange," tih pah chuan Sudden a chuan a chhuahsan ta nghal a.
Sudden a kal liam veleh Casey a chuan banga a lukhum in tar chu ala lawk a, in panga lai a tlanpelh hnu chuan kawmkar te takteah hian ava lut a, chumi piah lawka in lianpuiah chuan a lut ta a.
Sudden a thung chu saloon dangah a lut leh a, zu no khat hi a dawm ve a. Chutih lai chuan mi pahnih thau tak leh palian sang deuh hi an lo lut ta a. Pathau zawk chuan Sudden a țhutna bula țhutthleng chu a rawn pan a, an sira țhutna awl chu a palian zawka pawh chuan a rawn pan phei nghal bawk a. A thau zawk chuan Sudden a hnenah chuan, "Kan zu hi in ve ang che aw...i hming han sawi mai ka tum a..," a rawn ti a.
"Ka hming chu, John Smith a ni," Sudden a chuan a lo ti ve mai a.
A thau zawk chuan a hming a han hrilh ve hnu chuan a țhian pa hming pawh chu a han sawi ve nghal a. "Rance Fontaine a, helai vela mihausa ber a nih hi. Nang enge i tih țhin?" a ti ta a. Chumi te chu Casey a tirh te an nih ngei Sudden a chuan a ring a. A thil hmuhchhuah tum pawh chu hlawhtling ngei dawnin a inhre ta a. A lawm rilru ta hle a ni.
Rance Fontaine a chuan Sudden a chu a en reng a, a tawpah chuan, "Smith, tu'n nge Riverton khuaa lo kal tura hrilh che?" Engmah peh hel awm miah lo chusn a han ti tawng mai a. Sudden a chuan hlauthawng niawm tak hian, "Sh..ih...in hrilh..," a han ti a. Rance Fontaine a bawk chuan, "Sawi thuai rawh," a han ti leh a.
"Ngawi teh u, min hresual a ni ang. Yavapai khuaa tute sawi emaw ka hria a, saloon neitupa kha a ni ang, a hming pawh Tyler a ni nghe nghe," Sudden a chuan a han ti ve ta a. Pa thau zawk chuan, "A nih leh khawnge i bawng te chu? Khawi ațanga i hmuh te nge?" tiin a zawt a.
"Yavapai khaw piah tlang pang kham kar hmun zawlah hian an lo awm a, tumah a neitu awm leh vengtu awm an awm si lo a, chinchhiahna hrang hrang an pu fur bawk si a, ka khalh ta a. Tunah chuan hmun biru deuh maiah ka dah tawh," Sudden a chuan a han ti a. Rance Fontaine a chuan, "Chuti chu i bawng thuhrukna chu min hrilh la, zan in hian kan lo kal ang e, pawisa pawh kan rawn pe nghal ang che," a ti ta thuai a.
Sudden a pawh chuan a bawng thuhrukna te chu a hrilh a, chumi zawh chuan Rance Fontaine a te țhiandun chu an chhuak ta a. Sudden a chuan an kalna lam chu a ruk tein a han thlir zui a, rang deuhin a chhuak ve ta nghal a. Hetihlai hian khua a thim tawh a, tuichhunchhuah hnai berah chuan a hmai te a phih fai a, a thawmhnaw pangngaiin a inthlak fel leh ta a.
Rance Fontaine a leh a țhianpa kalna lam chu a chhui ta zel a. Kawmkar chep tak piah lawka in lianpui ah chuan an lut ngeiin a hre bawk a. Chu in chu fimkhur zetin a pan ta a. Tukverh bul ava thlen a a han ngaihthlak chuan Rance Fontaine a aw ngei mai chuan, "Kha mi â pa khan a bawng dahna te a sawi vek a, nakina kan kal hunah kan zuk laksak anga, pawisa kan pek dawn chuan silaimu kan pe dawn a ni lawm ni? Ha...ha..ha..," nui sung chungin a lo ti a.
"Kha putar kha nimin a piang chu a ni em si lo a, Jim Dancy a phei chuan hmu sela a kawr kha a hlih sak vek ang chu. A letlingin a khaihlum ang," pathaua zawk chuan a lo ti ve bawk a. Chumi an sawi tak Jim Dancy a hming chu Sudden a kalchhan ropui ber chu a ni ta a ni.
Jim Dancy a hian Sabre bawng hi a hralh ru țhin tih chu a chiang ta a. Mahse, amah mai chu a nih a ring lo a, a aia fing zawk leh thiltithei zawk an awm a ring tlat a. Gunnisona chu nih theih ngaihna a awm silo a. 'Tu tak chu niang maw?' a ti rilru a. "Jim Dancy nen hian inbiak a țul a nih hi" tih pah chuan a awmna ațang chuan dim tak bawkin a kalsawn leh ta a. A sakawr dahna lam chu a pan ta a.
A sakawr chunga a chuan hnu chuan Rance Fontaine a ten, John Smith a bawng man silaimu pek tuma an lo kal chu chan ve zawk a chak rilru viau mai a. Mahse, a țul tehchiamin a hre lo a, "An tenau em mai a, a lu ber zawn chhuah a țhain a țul hmasa a nih hi. Khawinge, Jake Harris an min lo ngaihtuah hman ang e, haw thuai thuai ila a țha ang," a ti a. JH Ranch lam pan chuan a kal ta a, hlawhtling a inti hle a.
***----******------******-----***
A rin ang ngeiin Jake Harris a chuan Sudden a chu a lo lam zing tawh khawp mai a, "Khawiah nge a kal ang aw?" a ti leh țhin a. Chu chu a fanu Susan i chuan a ning tawh hle a, "Ka pa, engah nge i sawi i sawi duh? A ni pawh awm mahse, engmah a tithei bik lo ang," a rawn ti a.
Harris a chuan, a fanu chu a han en a, pawnah a chhuahsan ta nghal a. Pawn avah chhuah veleh chuan hla tak ațanga sakawr lo tlan thawm ri hi a hre ta a. Susan i pawh chuan a lo hre ve bawk a. A pa in, "Fimkhur luat a awm lo ve," a lo tih țhin kha a hrereng a, a pa laiphir chu a rawn lachhuak a, a pa chu a rawn pe thuai a, "Ka pa, khawiah nge Philly hi?" tiin a han zawt a.
"Taylor a te hreipui hawh turin a kal a nih kha. A lo hawng dawn tawh ang," tiin a lo chhang a. Susan i chu inchhungah chuan a lut leh ta a, a pa in silai chu a mu a inthun leh thun loh a han endik vel chu a lehlam lehlamin a lo inthun a. Chutih lai chuan a hma lawkah mi pakhat, lian vak lo, mahse silai pahnih fual deuh a pai hi ava hmu ta a.
Harris a rilruah chuan, " Hepa hi chu mi naran a ni lo," a ti nghal thei a. Tin, a hawiher reng rengah zahpah pawh neilo leh chapo deuh ni hian a hmu bawk a. Chupa chuan, "Harris a i ni em?" tiin bung deuh hian a rawn zawt a. "Ni e, enge i duh a? Tunge i hming?" Harris a chuan a lo ti ve a.
"Ka rawn hmu duh mai chauh che a ni. I hming miin an sawi zing hle a, eng ang mi nge i nih ka mit ngeia rawn hmuh che ka duh vanga lo kal mai ka ni. Ka hming kha min zawt a, i hriat duh chuan Wesley Cameron a ka ni a, i hriat tawh pawh ka ring," chapo zet hian Camerona chuan a han ti a.
"I hming chu hretawh teh reng mai; mahse, a țha lama sawina erawh ka la hre miah lo," Harris a chuan a lo ti ve leh mai a. Camerona chuan, "Putar, țawng thlahdah suh... i in vel hi a mawi em a, ka thlir a nih hi. Țawng i thlahdah vaih chuan ka ti danglam vek mai tur che a nia," tiin Harris a chu a han vau zui nghal a.
Harris a chuan, "Hepa hian buaina rawn siam hrim hrim hi a tum a nih hi," a ti rilru a. A laiphir chu tin mai theihin a keng a, chu chu Camerona chuan a mitsirin a lo hmu a. Mahse, engahmah a ngai lo a ni tih hriat rengin lehlam a hawisan daih a.
"Ka rin danin helai chhuahsan hi i rilruk a, i fing hle mai. Nang ang tar tawh lam tan chuan a boruak hi a hrisel lo hle a nih hi." Cameron a chuan a han ti a. Harris a chuan thinur zetin, "I va han nikhua lo em! Mihring pawh i nih loh hi. Rang deuhin haw leh rawh, chuti lo zawng ka laiphir hian ka phuh palh hlauh dah ang che," a ti ve ta a.
Camerona chu a nui a, a nuih danah chuan a tilui tih leh a runluih a nih zia chu Harris a chuan a hrethei mai a. Harris a chu a rawn pan hnai a, a ni chuan a laiphir ken chuan a lo tin a, "Hma rawn sawn tawh suh," Camerona hnenah chuan a han ti a. Camerona chuan thupek pawh chu a ngaisang lo tih hriat tak hian Harris a chu a rawn pan zel tho a.
"Kha laiphir khan min han kap teh, hetianga hmun leh hmuna in kah ngat chu a hmuhnawm teh mai a nia. Hei i fanu a awm ve lehnghal a, chutiang ang thil rapthlak chu i fanu hmuhah i duh em ni?" fing tak hian a han ti a. Jake Harris a chuan a tihngaihna tak pawh a hre lo hle mai a. A fanu awmna kha ava en a, chutih lai tak chuan Camerona khan rang zet maiin Harris a laiphur ken chu a han vai kiang a, a puakruk chuan Harris a bekah chuan a chhu ta nghek mai a. Harris a chu nikhaw hre loin a tlu ta nghal a.
Chutia Harris a lei a tlu reng tawh pawh chu Camerona chuan han chhuih leh hi a tum a. Chutihlai tak chuan Susan i kha a lo tlanchhuak ta a. Camerona chu ava bawh ta a. A hmaiah chuan vawikhat chu a ham hman a, mahse engmah a tih leh hmain Camerona chuan Susan i kut chu a vuan bet ta tlat a, a che thei ta lo a. Camerona chuan hmusit mitmenga meng chungin, "I van han huaisen deuh ve le! I hmel te chu a țha hrep lehnghal a... khawinge, ka han fawp teh ang che," tiin han fawh mai hi a han tum a.
Chutih lai tak chuan Camerona hnunglam ațang chuan Philly a chuan a rawn țham ta a. Rang zetin Camerona luah chuan na fe in vawihnih a han hnek a. Camerona na tuar chu a țhu hnawk mai a. Chu chu Philly a chuan a rawn bawhzui a, a kawr awmah chuan a rawn țham a. Na zetin a khabeah chuan a rawn hnek leh ta siah mai a.
Camerona chu a leng dawrh mai a, zang thal zawngin leiah chuan a let ta der mai a. Philly a chu rang takin a let a, Susan i kaihthawh tum chuan a han pan a. Mahse, Susan i chu amah in a lo țhu chhuak a, a pa chu an va pan dun ta a. Harris a na tuar chu a lo rum țuah țuah a, Philly a chuan Susan i chu tuilum la turin a tir nghal vat a. Tuiluma a han deh hnu chuan Harris a pawh chu a lo meng chhuak ta a. Philly a chuan Susan i chuan engmah a tih loh thu leh a țhat thu chu a lo hrilh vat a. Susan i nen chuan an han țhut rem tir te te a.
Hetihlai vel hian Camerona pawh chu a lo harhchhuak ve leh tawh a. Philly a te chuan an lo ngaihthah tawh a, lehlam hawiin an lo țhu bawk si a, Camerona chuan a lu a han thing a, Philly a te ho chu a en reng a, a tho țuah țuah a. A puakruk chu a phawi ta a. Chutih lai tak chuan Susan i chuan ava hmu ta phut mai a, a hlau lutuk chu a țe tuar a, rang deuhin Philly a chu a han inher a, mahse Camerona khan a puakruk pahnihin a rawn tin tawh si a, a tan chuan din mai loh chu tih theih dang a awm tawh si lo a, Camerona chu a en ta ringawt mai a.
Camerona chuan hnuai chhiah deuh tak hian, "Naupang, fimkhur nachang i hrelo a nih hi. I misual te reng reng engmah tithei tawh lo tur an ni tih i hriatchian hma chuan lehlam hawisan ngai suh," a han ti a. Chuti chung pawh chuan Philly a chuan Camerona chu va hnaih leh hi a tum a, mahse Harris a chuan a banah a lo chelh sak tlat a.
"Philly, va hnaih suh, Wes Camerona a nih saw. Mi huat zawng that tura an rawih țhin...phawirang a ni. A ne pawh i ek lo ang." Harris a chuan a lo ti ta a. Chuveleh Camerona chuan a puakruk te chu a paiah a han khung leh ta a. Chapo zet hian, "Naupang, phawirang tawkin i inring em ni? Inring duh suh. I rang lo tih ka hrechiang. Tin, mi kahhlum mai chu vawiin hian tumna ka nei lo a, engpawh nise thil pakhat i hriatreng nan... Camerona hi tuman a thlawnin an sawisa ngai lo," a han ti a.
Chutah Camerona chuan a puakruk chu a han phawi leh a, Philly a malpui lehlam lehlamah chuan a rawn kap ta mai a. Susan i chu a lo țe tuarh tuarh mai a. Philly a bulah chuan rang deuhin a rawn tlan phei a, Harris a pawh chu Philly a bulah chuan a rawn kal ve bawk a, Camerona chu han en pahin, "Misual, tualthah hmang," a han ti ngawt a.
Diriam taka nui chungin Cameron a chuan, "Harris.. hlauthawng duh suh... a thi lo ang. A malpui ve ve ah chauh a nih kha ka kah ni. Ka hnunglam ațang reife zawng min rawn sawisa tawh rih lo ang," a lo ti hmuk a. Harris a te pafa chuan Philly a chu an han en a, a sawi ang chiah chuan a lo ni a.
Thisen a chhuah tam em avangin Philly a chu a chau dawn ta mai a. A hliam chu rang thei ang berin an han tuam sawk sawk a. Thisen chhuak pawh chu a reh ve ta mai a. Chutia an tuam zawh chuan thinrim em em in Harris a chuan Camerona chu a han en a, chu chu Camerona pawh chuan a lo hmu reng a.
"Harris, i inngaihtuah țan ta maw? A țha e, thawm nei miahlo in lokal ta ila... tin, i awm loh hlanin lokal ta ni ila...i fanu hi a hmelțha hle a... helai boruak hrisel lohzia ka sawi kha hre reng la, i țhenawm hote pawh hrilh rawh.. kei chu ka la awm rih dawn...," Cameron a chuan a ti ta a.
Camerona kal hnu chuan Harris a chuan, Susan i puihna in Philly a chu inchhungah an zawn lut ta nghal a. Susan i chu a enkawl tir a, chu chu Philly a chuan tlawmngaiin a hnial ta tlat a. Mahse, darkar khat vel hnuah chuan a khua chu a sik țan ta si a. Susan i khumah chuan an mut tir ta a. Harris a rilruah chuan, "Khawnge Sudden a hi," tih chu a cham reng mai a.
Harris a chuan Sudden a chu a ring em em mai a, awm se chu tihdan te pawh a hre tur a ti rilru a. Khati ema Cameronan an ranch chhuahsan tura thu a pe ti tih mai kha a hrethiam thei lo a, mipa chungah chuan buaina siamin kut lo thlak pawh nise ka hrethiam. Mahse, hmeichhe chungah lehzel pawh kut an thlak duh hi mihring pangngai tih chiah pawh ka ruat lo e, a ti chhuak ta hial a. Chung a sawi lai te chuan Sudden a chu a hre reng mai a.
Tin, Sudden a khan Gunnisona kha misual niin a hre tlat lo a. Mahse, a ni, Gunnisona a hian Sudden a hi a rin loh ang tak hian a tithei bawk tih chu a hre reng a. Chuvang chuan, "Sudden a hian Gunnisona hi a ring neu lutuk a ni ang, a rin ai daih hian a thuk zawk maithei a ni," tiin amah leh amah inhnem nan chuan a han ngaihtuah leh rih țhin a. Chutihlaia a mitthlaa a lo lang leh rih țhin pakhat chu Cameronan 'helai hi chu putar tan chuan a hrisel lo' deusawh deuha a ti lai hmel kha a theihnghilh thei lo a ni.
Tupawhin Camerona chanchin lah chu an hria in an sawi uar em em hlawm mai si a. Sudden a nen hian han intawk ta sela Sudden a hi a chak zawk bik dawn em ni aw? ti te in a suangtuah a. "Sudden a chauh lo chu beisei ka nei lo," a ti ta thlawt mai a.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

CHHUT CHAWP VEK A NGAIH THIN A VANGIN LO NGHAK HRAM HRAM ULA>>>TIHIAN A HLAWMIN KAN TI THIN DAWN NIA......

Chuan mn lo click sak ve hram hram dawn nia

[Ngaia]

TROUBLE SHOOTER 6-7
Sudden a chumi tuk ngei chuan a lo thleng ta hlawl mai a. Harris a chuan Cameron a thiltih dan zawng zawng chu a hrilh ta vek a. Sudden a chuan, "He thil hi a fel hma chu Susani hi hmun dangah dah rih ila a țha ang," a han ti a.
Chu chu Susani chuan a lo hre hlauh mai a, "Min dahsawn dawn teh u, Jim..., Ka pa, min ngaihtuah avangin ka lawm e, mahse, han kalsan thei che u ka ni hleinem.... Philly a hi tuin nge enkawl ang?" a lo ti a. Philly a enkawl tur midang an awm theiin an ring bawk si lo a. An han in enlual a, thil chinchang hrethiam em em hian an han nui deuh tat tat a.
Chumi hnu chuan Sudden a chuan, Philly a chu a awmnaah ava en a, "Nuam i tawl a ni ngawt alawm... enkawltu hmelțha tak, chaw tui tak... hnathawh hah ngai lo, i vannei hle mai," tiin Philly a chu ava fiam a.
Philly a chu tui lo zetin a lo nui ve a, "Han inthlak theih nise ka va ti em! Theih chu nise, Camerona kha ka thah hma chu ka umzui tur!" a han ti a. Sudden a chuan, "Philly, i damdawi chu țha takin ei phawt mai la, Camerona aia lian zawk hi helaiah hian a awm a, chumi ka beih hunah chuan imi țanpui ka ngai dawn a, chuvangin, țha chhuak thuai thuai rawh," a han ti a.
Chutia Sudden a meuh pawhin a țha chhuak thuai thuai tura a duhna chhan te thlenga a han hriat ve tak hnu chuan Philly a rilru chu a phur ta em em mai a. "Jim, rang deuhin ka țha chhuak ang," a ti ta a. Chumi hnu pawh chuan Sudden a chu Harris a kiangah bawk chuan ava țhu leh ta a.
Harris a chuan, "Thil a khirh zo ta vek mai. Susan i hmun dangah ka vah tir ngam si lo a, kei hian ranch hi ka chhuahsan rei ngam si lo a, nang...Jim, thil awmdan hi kan țhenawmte hrilh ve thei la a țha ang. Chuti lo zawng Cameron a nihna tak tak hrelo te hian an cho palh hlauh anga, phum tur hian tawpin tai a neilo mai tur a nia," a han ti a.
Sudden a pawh chuan dik a lo tihpui bawk a, chawte an eikham hnu chuan Cameron a chu hlauh tur a nih zia thu chu a hlauhawm thei ang berin Sudden a chuan an țhenawm ranch neitute chu a han hrilh vel a.
Sudden a chhuah hnu lawk khan Rob Johnstone leh Neuly a kha sakawr tawlailir in Yavapai khaw lam panin an lo chhuak a. Harris a ranch ah an lo chawl lawk a, chutih chhung chuan Camerona chanchin chu Harris a chuan a lo hrilh a. An ni pahnih chuan makti zetin ka ang phuau in an lo ngaithla a.
Rob Johnstone a chuan, "Ka ranch ah chuan lokal ve lo sela a țha ang. Chutiang misual chu ka hmu hreh si a," a lo ti a. Harris a chuan, "Amah chu hmu mahla, inthiarfihlim zel rawh. Tûr țhalo tak a ni a, tin, a phawirang em em bawk a, keini pathum hi han țang tlang ila, min kahhlum țheuh hmain kan ban hi kan vai ve hman kher lo ang. Rang tak a ni," a han ti leh a.
Camerona chanchin chu reife an sawiho a. A tawpah chuan Rob Johnstone a chuan, "Jake, hei Neuly a nen hian, Yavapai khuaah kan kal dawn a, enge chah tur i nei em?" tiin Harris a chu a han zawt a.
"Ava tihzia ve le. Zu um khat mi han lei teh u. Ka ngheina chu a rei hle tawh na a, Cameron a, Tûr a kha ka hmuh ațangin ka tui a hal ve ta tlat mai," Harris a chuan a ti a. Pawisa chu Johnstone a a han pe a. Harris a chuan a țhenawmte pahnih chu fimkhur hle tur chuan a han hrilh nawn leh a, tichuan, an pahnih chuan an chhuahsan ta a.
Sudden a mi va hrilh te reng reng chuan, țanho a ngaihzia thu hlir chu an lo sawi ve bawk a. Chuvangin, a tam zawk chuan, Harris a ranch chu a lian ber bawk a, chutah chuan awmkhawm mai ila tia ngaihdan nei an ni fur mai a. Chu rawtna chu Sudden a pawm zawng tak a lo ni ve a, a rang thei ang bera JH Ranch a awmkhawm tura chet vat tur tih thu chu an inpe kual ta hlawm a.
****** ********* ******
Rob Johnstone leh Neuly a chuan Yavapai khua chu an thleng ta thuai a. An thil lak turte chu an sakawr tawlailirah chuan an hlang a. Rob Johnstone a chuan zuin a rawt ta a. Mahse, Neuly a chuan engmah buaina a awm hmain haw leh thuai chu țha zawkin a hria a, a hnial țang țang a. Mahse, Johnstone a chuan, "Heti hian i ti ang. Tyler a kawt vela Sabre ranch sakawr awm kan hmuh chuan kan haw tlang nghal anga, an awm loh chuan tlem azawng tal chu i in teh ang," a ti a.
Neuly a pawh chuan a han hnial ngial chungin a hnial zo ta bik lo a. Tyler a saloon ah chuan an lut dun ta nge nge a. Ding chungin zu an in a, an dinna piah lawk pawnah chuan, sakawr enkawl ngun loh tih hriat fahran hi a awm a. Reb Johnstone a chuan, "Tu sakawr nge ni aw? Chaw te pein han zut mam velah chuan a duhawmin ava țha em!" ring vak lo hian a han ti a, midang hriat ve atan pawh a ti lem lo a.
Mahse, a hrelo ber tur, an hlauh ber mai Camerona chuan a lo hre hlauh mai si a, "Ka sakawr a ni a, engah nge ka sakawr chungchang in sawi?" Camerona chuan a rawn ti nghal pang mai a. Chutia a rawn tih veleh chuan saloon chhung chu a reh nghal ta duak mai a. Reb Johnstone a pawh chuan engemaw tak a awm dawnin a hria a ni ang, "Ka sakawr a ni" rawn titu chu a han en a, mahse, a thinrim bikin a hre lo a, "I sakawr ka sawisel satliah mai lo a, han enkawl ngun deuhah ka it thu ka sawi mai a ni," a han ti ve ngawt a.
Camerona chuan a ipte zenin dollar tlang a han phawrh chhuak a, Reb Johnstone a hnenah chuan a han theh phei a, "Kha kha la la, ka sakawr chu lo va zut rawh," a ti ta mai a. Reb Johnstone a hi pa dawihzep a ni lo a, a thinrim tawh ah chuan thih thlenga insual peih mi a ni.
Chuti kher khera mikhualin thu a han pe a, ama sakawr zut tura a han tih ngat takah chuan a thin a rim ta thut mai a. Han phawi mai hi a han tum a. Mahse, Tyler a khan a banah a rawn vawn sak ta chawt a, "Reb, insum a țha. I hma a mi saw Camerona a nih saw," a han ti a. Reb Johnstone a pawh chu a thinrimna ațangin a rawn țhangharh leh ta thuai a, a kutbawr chu mitin hmuh theih turin dawhkanah chuan a dah lang ta a.
Neuly a chuan, "Reb, tirawh i chhuak teh ang, i haw ang.., "Hman hmawh zet hian a ti ta sawk sawk mai a. Johnstone a chuan a han enkual a, khati ema in hnuaichhiahna chu a hrethiam thei lo a. Dawihzep nih pawh a hreh hle a, mahse, a hma lawk a mi chu, Camerona, mite hlauh em em a ni miau mai si a, at bik tum loh chu a țhain a hre ve a, inhnuhhniam chu țha a ti ve ta a.
"I mi ngaihdam ka han dil e. Engmah buaina siam ka duh lo e," Reb a chuan a ti ta thlap a, Camerona a chuan, ngaihdam dilna chu hrelo ang mai hian, "Tunge i hming?" tiin Reb a chu a han zawt leh kher a, "Johnstone a ka ni, ranch nei ve bawk, Neuly a a nih hi," Reb a chuan a ti ta a.
Camerona chuan, "Nangni ang sakawr ngaisang chi hnuaia hnathawh pawh ka chak ve tehlul nen, ranch in nei tenau deuh a ni. Engpawhnise, ka sakawr chu i va en tlang teh ang u," a ti ta tlat mai a. Neuly a te pahnih chu annhan inmelh dun a, hnial ngaihna annhre si lo. Hreh tak chungin Camerona chu an zui chhuak dun ta a.
Pawn an va thlen chuan Camerona chuan, a sakawr chu ngun zet hian a han en a. Chutihlai chuan, Neuly a khan Reb a chu an sakawr tawlailir awmna lamah chuan a kai phei a. Rang deuh hian tawlailir chhungah chan lawn kai a, sakawr an kal tir dawn lai tak chuan Camerona chu a lo dak chhuak a, "Hei, nangni pahnih kha...," a rawn ti tuarh a.
Reb a thin chuan a tuar ta ngang lo a, a silai kawm a vuan run tawh tih chuan, Neuly a bawk chuan, "Reb, khawngaih takin i kut kha la sawn rawh," tiin a han thlem leh rih a. Hetih lai hian Camerona chu, saloon bathlarah a ding a, saloon chhung a mi zawng zawng pawh kha an lo tlanchhuak ve bawk a, "Tawlailir chhungah khan enge in dah?" tiin Camerona chuan a rawn zawt leh ta a.
"Thirhlingnei" tiin Johnstone a chuan a lo chhang a. Camerona chuan, "Bawng vulhna ramah in hung bik in tum a ni maw? Chutiang tih ching chu ka awmna tawhah chuan kan khaihlum mai țhin asin," a rawn ti leh ta zel a. Reb a chuan, "I lokal na ram ațanga lo kal kan ni ve lo, enge hriat duh ila neih?" tiin a zawt lui ve ta ngat mai a.
Chumi hnu chuan Reb a chuan, "Cameron, i chanchin ka hrechiang a, i phawirang tih pawh ka hria. Mahse, i lakah chuan engtiang pawhin thinrim ila, ka puakruk ka phawi dawn lo. Kan kal mai dawn," a han ti zui leh a. Camerona chuan, "A dawihzep em avang hian a nia, chhim indona pawh kha an ngam loh reng ni," a rawn tichhuak ta a.
Chu thu zet zawng Reb a chuan a tuar thei ta ngang lo a, a puakruk chu a han phawi a, a tin zawn hma chuan Camerona khan a awmah tak mai a rawn kap ta a. Neuly a chuan, a țhianpa thi tur a han hmuh chuan a thisen chu a lum ve ta pap mai a. A puakruk chu han phawi mai hi a tum a, harsa ti tak hian a han phawi ve hman hram a, mahse, a tin hma in Cameron a chuan vawithum a rawn kap hman a. An țhian din chuan an thi ta a ni.
Chumi hnu lawk chuan, silai ri hriain marshal Appleby a kha a lo kal ta a. Camerona chuan lehlam a hawi lai tak hi a ni a. Mahse, marshal lo tlan thawm ah chuan rang zetin a rawn inher a, a puakruk chuan Appleby a chu a tin ta reng mai a. Marshal a ni tih a hriat hnu chuan a puakruk chu a paiah a khung ta nghal a.
"Marshal, ka invenna lam a ka kah liau liau an ni. Heng entu zawng zawng te pawh hi zawt vek la, dawt ka sawi lo ang," Camerona chuan a lo ti thuai thuai a. Marshal chuan, "I sawi ang chiah a nih chuan han man ngaihna che ka hre lo ang. Helaia awm zawng zawng hi chu ka zawt vek dawn. Chuvangin, hmun dangah kalsawn suh ang che," a han ti a.
Camerona chu a nui deuh sawng a, "Engah nge i thupekte ka bawhchhiat ang ni," a han ti lui ngat a. Appleby a chuan Camerona chu reife a han en a, Camerona sawi ang chuan, Reb a hian a phawi hmasa ngei chuan a ring a, tin, chung chu mipui hmuh dan tur a ni a, mahse, Camerona hian a phawirang zawk tih a inhriat avangin an phawi hnu siah chuan a phawi ve anga, a kaphlum ve ve a ni tih chu Appleby a pawhin a hai bik lo.
Dan ang chuan, mipui chu a han zawt kual vel a. Camerona sawi ang chiah chuan a lo hmutute chuan an sawi vek a. Chuvang chuan Camerona chu a man thei ta lo a.
***************
Sudden a chuan, Jim Dancy a te bawng thuhruk na lai awm chu a zawng ta a. Yavapai lui hnar lamah chuan kawng țum țha tak tak hi a awm bawk a. Chuvang chuan hmundang aia a remchan zawk bawk avangin chu ram pharh țha tak tak leh tlangram chu a fang vel chiam a.
A tawpah chuan a vannei ta hlauh a. Tlangkar ralkhat ațanga han hmuh mai theih lohah chuan, kawng țum țha deuh mai hi a hmuchhuak ta a, chu chu a zawh ta a. Mel chanve vel awm a han zawh hnu chuan, phaizawl, melthum bial vel tur, hnim tamna deuh mai hi ava hmu ta a. Chumi hmunah chuan bawng rukkhawm ti hriat reng mai hi an lo tla noh noh mai a. Chung bawng rual chu ngun fe mai hian Sudden a chuan a han en a.
Chung bawng tam tak te chu Sabre ranch chhinchhiahna pu an ni hlawm tih Sudden a chuan a hmuchhuak thuai a, mak a ti ta hle mai a. Jim Dancy a kha a telve tih a hriatin Dancy a hian a pu bawng a ru tih chu a ring ta nghal mai a. Bawng dang te chu a han enkual vel a, engmah chhinchhiahna pawh an lo nei lo a, mi ta an ruk lawr a nih hi a ti rilru a.
Tlai lam a lo ni ta a. Helai hmun hi JH Ranch ațang kha chuan hla tham tak a ni. Thlipui in tleh a rawn tum lehnghal si a, chuvang chuan Sudden a chuan tawmhulna tur a zawng nghal vat vat a. A phaizawl hmuh kil sir khatah chuan buk chhe zet hi ava hmu ta a. Chu buk ațang chuan, meikhu hi a rawn zam chhuak ngiai ngiai bawk a.
Buk lam pan chuan a kal ta a. Buk kawngkhar chu a han kik a, buk chhung ațang chuan, "Tunge ni?" tih pah hian kawngkhar chu a rawn inhawng a, putar tawh tak mai leh zangkul tawh tak mai hi a lo ding chhuak a, "Green a ka ni a, khawiah nge ka sakawr hi ka thlun ang?" Sudden a chuan a han ti zaih a. Putar chuan, "Buk hnunglamah khan va thlung rawh. Chuti lo zawng, kawngkhar hi ka khar hnan mai ang che," a lo ti a.
Sudden a chuan a sakawr a thlun fel veleh rang deuhin a rawn lut lehnghal a. Putar chuan coffee a rawn siam a, an titi dun ta a. Putar hian Sudden a chu Dancy a mi leh saah a lo ngai reng a. Engkim a hrilh ta vek mai a. Tin, putar hian Sabre ranch bawng hi ruk a ni tih reng reng a hrelo tih chu Sudden a chuan a hmuchhuak bawk a. Chutah thlipui chu alo tleh țan ta a. A sakawr thlung țha turin Sudden a chu a chhuak ta a. A lo luh leh chuan, putar chuan silai ung zet hian a lo tin reng mai a.
Sudden a chuan, phawk deuh tak hian, "Engtizia nge ni ta?" a han ti a, putar chuan, "Sabre ranch a mi i ni lo, i ban kha phar la, han in sawifiah teh ang che," a ti ta a. Sudden a chuan, "Ka pu, i silai kha chu kau teh suh. Ka chhan hma chein i hmetper palh ang e, a pawi hle tur ania, a lo ti ve a. Putar chuan vin zet hian, "Phar thuai la a ni mai," a lo ti leh a.
Chutih lai chuan, mei chu a khu ta em em mai a. Putar chu a mit a thip ta em em mai a, a han nuai a. Chutilai tak chuan Sudden a chuan putar silai ken chu rang zet hian a han beng a, a vuan zui nghal bawk a.
Mahse, putar chuan a lo hmetper hman tawh si a, a buk chhung kilkhat chu a pawp ta huau mai a. Silai a han chhuhsak hnu chuan, "Tunah hian che miah lo la, thu tlem ka han fah teh ang che," Sudden a chuan a ti ta a. Putar chuan, "Jim Dancy a chang a ni lo ang, Randy a zawk chuan a nia pawisa chu mamawh ni. Pawisa khlehnaah a paih țeuh țeuh țhin tih thawm ka hria," a lo ti ve leh a.
Sudden a chuan, "Dancy a leh Randy a hian henglai ranch tenau te nuaibo an tum in kawng an zawng dun a nih deuh ber mai hi. Ram țha tehchiam pawh a ni si lo a, Sabre ranch tluk a awm loh bakah, ram zau lutuk a ni si a, thildang a chhan a awm a nih ka ring," a ti a.
Chumi hnu chuan, rei tak an ti ti dun a. Hetia thil engkim a han hriat takah chuan, awm zelna chi ni bikin a hre ta lo a. Putar leh Sudden a chuan JH ranch panin a zan a zanin an kal chhuak ta nghal a.
Chumi tlai vek chuan, marshal Appleby a khan Johnstone a te țhiandun, Cameron an a thah thu chu JH ranch a rawn thlen ve mek a.
Harris a chu a thin a ur em em mai a, "Gunnisona tih vek a ni ang maw... Hepa, Camerona pawh hi a chah chhuak a ni ngei ang," a lo ti siah siah mai a. Marshal Appleby a chuan, "Tumah dang han tirh tur an awm si lo a, keimah hi rawn hrilh tur che u in ka lo kal nghal a ni. An ni hi i țhiante an ni a, phum dan te pawh i ngaihtuah vek a rinawm a, chuvang chuan, midang pan hran loin ka rawn kal nghal mai a nih hi," a han ti a.
"I ti dik e. I chungah ka lawm ngawt mai. Mahse, mi pahnih, ka țhianțha tak tak te chu, Cameron an a that ta chu a ni a, tunah a ni lah chu man lohin a awm mai mai a, ka thawk lawk anga, ka hote zawng zawng nen....," a han ti a.
"Jake, i sawi tum chu ka hria. Mahse, Yavapai khuaah chuan han kal la, buaina lian zawk i chawk chhuak maithei, tin, i țhiante pahnih hi an lo dam chhuak leh tawh chuang si lo ang a, i tan hlawkna aiin chhiatna leh țahna a ni zawk tur asin! Fim takin han in ngaihtuah la ka duh a ni. In ngaihtuah chiang lo chuan engmah ti lo turin ka ngen a che," marshal chuan a lo ti ve ta a.
Harris a thinrim tawh lutuk chuan, dawhkan chu a han chum ri bur mai a, "Engmah ti loin hetah hian ka țhu reng mai dawn em ni?" a han ti chhuak leh a. Marshal Appleby a chuan, "Chu chu i tan a țha zawk," a lo ti a.
Chutihlai chuan, Harris a țhenawm hnai pakhat, Alex Taylor a chuan, "Jake, Reb Johnstone a te ruang la tur chuan mi i tir ang u," a rawn ti a, chu chu an remti tlang a. Chumi hnu chuan, marshal Appleby a chuan, "Jake, tunge Johnstone a hmun saw neita ang le? I hauh dawn em ni?" tiin Harris a chu a han zawt a.
Harris a chuan, "Ekhai! Keima ranch pawh ka enkawl zo lo a ni a, engtin nge midang tel lo a ka enkawl theih ang?" tiin a lo chhang a. Appleby a chuan, "A ni tak maw? Khawiah nge Green a? Ka va hmu ngailo em?" a han ti leh a.
Rang deuhin Harris a chuan, "Bawng tla hrang te a zawng a ni ang?" a ti thuai a, Taylor a chu a han en a. Chumi hnu chuan, "A lo haw dawn tawh ang," a han ti zui a. Marshal chuan, Harris a thusawi dan ațang chuan Green a hian engemaw tak a ti a ni tih a hre nghal mai a. "Jake, pawi tih ngawt loh chu han tihtheih ka nei bik silo a," marshal chuan a han ti leh a.
"An thih thu i rawn sawi a, kan lawm ngawt mai. Mahse, heti ngawta thil kan kal tir dawn chuan a fel lo viau ang. Tunah mahni hmalam hre rengin inkap, insual ta ang ila, ka hrethiam em em a ni...,"
"...Mahse, hetiang ringawt te chuan inlambun nen a danglam chuang hleinem.. Kan phawi chhuah hmain min kaphlum hman zel mai dawn si a, rilru a na teh zawng anih hi," Harris a chuan a ti ta a.
Marshal chu a lawm rilru khawp mai a, "Ka lawm e. Khawnge Susie hi, chokaah rawng a bawl a ni maw? Ka va bawlpui ve ang chu," tih pah chuan choka lam chu a pan ta nghal a. Choka ava luh chuan Susan Harris i chuan, thuka chawhmeh a chhum lai chu a lo chawk mawlh mawlh a. A rim te chu a nam ram ram a. Appleby a thawmah chuan a lo lehhawi a, "Oh! Tom, coffee i duh em? Lo țhu rawh, kan siam ang che," a lo ti bawrh bawrh mai a.
Appleby a chuan Susan i chu a lo en reng mai a, "Susie, marshal chu nilo ila, i lawm nan ngawt pawh Cameron a chu keimah ngeiin ka hnawtchhuak tawh ngei ang. Mahse, dan kenkawh hi ka hna ber a ni a, țhenkhat duh ang ngawt chuan a tihtheih bik loh a ni. Min hrethiam tirin ka ngen a che," tih pah chuan it em em hian Susan i chu a han melh a. Susan i chuan, Appleby a mitmeng vel a hmuh chuan a hlau rilru hle a, "Tom, min endan chu...," a ti ta a.
Appleby a chuan a chhang lo bawk a. "Khatin min en tawh teh suh... A nuam ka ti lo viau a nia," Susani chuan mangang awm tak hian a han ti zui leh a, "Susie, ka en lo theilo che a ni..., Susie, ka hmuh tirh phat ațang chein nula dang hi ka en thei ngang lo a.... Ka nupui nih i duh ang em?" Appleby a chuan a ti ta chawt mai a. A thusawi chu Susie chuan mak a ti khawp mai a. A tih ngaihna hrelo chu a ang phiau mai a, "Tom, engatinge aw... min chhaih a ni maw?" a ti ta a.
Appleby a chu a tho a, Susan Harris i hmaah chuan ava ding a, "Susie, ka piana hnulamah hetiangin tuma hnenah ka rilru ka la sawi ngai lo...ka thusawi kha pakhatmah dawt a ni lo...tunah rih chuan, mi awmthei tak chu ka ni rih lo na a, nakinah chuan, engpawh nise, tlakchham engmah i nei ngai lo ang... thawmhnaw, in lian tawk tak...i duh anga zau, i duh apiang... engtin nge i ngaih?" tiin a zawt leh ta chawt mai a.
Susan Harris i chian, engmah in hmangaihna thu tak tak pawh sawi hmaa hetia Appleby an a han ti ta mai hi mak a ti rilru hle mai a. Tin, Appleby a chu a hmel a țha bawk a, nula tam tak chuan an ngaihzawn pawh a ring a ni. Mahse, a ni pawhin țha chu a ti ve em em tho a, pasal atan em erawh chuan..., "Ngainat chu ka ngaina ve em em che a, mahse, Tom...," a han ti a..
Tom Appleby a chuan rang takin, "Mi ngaina a, min hmangaih lo... kan inneih theih phawt chuan, hun reiloteah min hmangaih thei mai ang," rilru chhungril bera sawi tih hriatreng hian a rawn tichhuak a.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/


Chuti em a mipa meuhin thu a han sawi takah chuan, Susan Harris i rilru pawh a khawih ve hle a, a thinphu te chu rang deuh sawtin a hria a. Mahse, Appleby a mit a han enchian leh chuan, engemaw han hriatthiam mai theih loh thil hi a awm tlatin a hria a. A hlau rilru deuh bawk a. Chutih lai chuan, Susan i darah chuan Appleby a chuan a han vuan a, Susan i chuan tlanchhuah mai a han tum a, mahse, a ni chuan a kuahin a kuah ta tlat mai a.
Chutah zet chuan, Susan i chuan a hlauhin a hlau takzet tawh a ni. Mahse, Appleby a chuan a kuah nghet tawlh tawlh a, han fawh luih hi a tum a. Susan i chuan a hlau em avangin han fawh luih țalh chu a dikin a hre bik lo aniang... Susan i chu a thlah ta thut a. Chutih lai tak chuan, Green a chu a lo lut ta a. Appleby an Susan i a han hnaih leh tur tak chu, "Marshal, i din ngai khan ding rawh," a ti a. Puakrukin Appleby a chu a rawn tin ta nghal a.
Appleby a leh Susan i chu Green a chuan a han en a, Green a chuan, "A hun takah ka lo thleng a ni maw, Susie engtin mah a ti lo che maw?" tiin a rawn zawt ta nghal a. Susan i chuan, "Engmah ti lo e. In hriatthiam lohna kan nei mai chauh a ni," a lo ti a.
Appleby a mitmengah chuan a thinrim zia chu a hmuh theih a. Mahse, hlauhna erawh chu a lang tel lo. "Green, i inrawlh lohna turah i rawn inrawlh a nih hi. Susan i hi nupui atan ka thlem mai a ni. Lo inrawlh na tur engmah i nei lo e," ti tak zet hian a lo ti ve a.
"A duh lo che a ni maw?" Green a chuan a ti a. Appleby a thinrim chuan, "I sawi thui vak tur a awm lo," a lo ti ve leh hmak a. Green a pawh chu a thinrim ve hle tawh a, "Thui i tih chin chu han sawi teh," a ti ve leh ta a. Chutia a tih zawh chuan marshal chhanna pawh nghak loin Susie hnenah chuan, "Paih chhuak rawh i tih chuan ka paih chhuak mai ang," a han ti zui a.
Mahse, Susan i chuan Green a darah chuan a rawn vuan a, "Chutiang tih a ngai lo e, Appleby a hian, thil awmzia a hrethiam lo a ni e, engdang mah a ni lo," thlem ang reng hian a rawn ti a. Green a erawh chuan, "Hrethiam tawh se a țha ang," a ti a. Marshal chuan, Susan i hnenah chuan, "Susan, ka thusawiah khan dawt pakhatmah a tel lo. Heti mai chuan ka beidawng lo ang," a rawn ti a.
Green a chuan, "Kei pawh ka thusawi kha dawt a ni law... Chuvangin, i hmel kha helaiah hian rawn tar lang lo la i tan a țha zawk ang," a ti ta bur mai a. Thinrim leh rum zet hian Green a chu en in Marshal chuan, "Ka theihnghilh ngai lo ang," a ti a, a inher a, a chhuak ta nghal a. Green a pawh chuan, "I theihnghilh loh chu a țha reng ang," a han ti zui ve a.
Hetihlai hian midang te pawh an lo lut ve ta a. Green a chuan chung ho hnenah chuan, "Susan i hian Appleby a nupui nih chu ala duh rih lo a ni awm e," nui chung hian a han ti a. Susan i chuan Green a chu a lo chum deuh arh arh a, "Engahnge heng ho zingah i sawi kher?" a han ti tak nain, a rilru tak chuan a lawm ru zawk hle a.
Chumi hnu chuan Green a chuan Philly a dam lo chu ava kan leh a, Philly a chu a lokal thei lek lek tawh a, tiang hawl chuan a tawlh thei ve tawh a ni.

SUDDEN
TROUBLE SHOOTER 7
Lafe Gunnisona rilru chu a la hah em em mai a. A bawng lah chu a khat tawkin a bo deuh reng mai si a. Bawng bo thu rawn hrilhtu chu, ama fapa ngei leh a enkawltu, Jim Dancy a an ni a. An rawn hrilh apiangin ranch tenau ho rukboah an rawn puh ziah mai a. Mahse, han puh ringawt chu an ru tak tak a ni tih fiahna a awm chuang si lo a. Chu lo rengah, Jake Harris a te ang chuan ruk ruk lam kher chu an tih duh a rinawm vak bawk si loh a.
Jake Harris a michhawr, Jim Green a te ang hi, mi dawrawm leh ruk hmang an nih theih a rinawm bawk lo a, Gunnisona chuan a tihngaihna tak a hre lo hle mai a. Green a naupang rawn kalpui hmel chu a ngaihtuah chhuak leh a, "A.. a ni thei dawn emni?" tiin amah leh amah chu a han inzawt a. Chung thil chuan a rilru chu a kap em em bawk si a. Chubakah, a fapa berin JH ranch te hi suam mai a rawt reng bawk si a, rilru buai deuh tak chung chuan a han țhu a, chutih lai chuan a fapa chu a lo lut ve ta a.
"Enge i duh tak pek? Nang ang rual ka nih lai chuan, tun ang hunah hi chuan bawng umin ka tlan ka tlan țhin tawh asin... Hei, i tho chauh pek a ni maw?" Gunnisona chuan a lo ti a. A fapa chuan, "Ka pa, a ninawm tei vet e a.. ka lu ana riau lehnghal a nia," a ti mai a.
Mahse, a pa chuan chuti mai a thlah chu a tum lo a, "Zu i in hnem lutuk a ni ang, i pai țawih zo lo a nih chuan in lo la a ni mai," a han tih hnu chuan, Randy a thiltih dan dik lo tak tak te chu a dan pangngai in a han sawi leh zar zar a. Randy a chuan ngawi rengin a pa ang chu a lo ngaithla a, a rilru chu a chhe bawk a, a pa chu thi thuai thuai sela a țha ang, a lo ti rilru mek a ni, "Ranch hi ka thuhnuaiah chuan awm sela, engkim a fel vek mai tur," tite in a lo suangtuah vel a.

Mahse, Gunnisona chu a la hrisel țha a, han thi mai chi zawng ala ni lo tih a hreve tho a. Chutah, Randy a chuan, "Ka pa, lo ngawi la, thu lawmawm deuh pakhat ka han hrilh ang che. Yavapai khuaah ka va kal a...," a han ti dek dek a.
Gunnisona chuan, "Eng thil țha tehlul nge nang mi le lo hian min han hrilh theih ang.. I thluak te kha i thlak vek a nih si loh chuan...," a lo ti a. Randy a chuan, "Ngaithla teh, Yavapai khuaah nimin khan mi pahnih an kaphlum asin! I hre chak em? An hming chu Reb Johnstone a leh Neuly a an ni. I lawm em?" a pa lawm ring em em chuan a han ti a.
Gunnisona makti lutuk chu, che miah lo hian a awm ta a. A fapa chu a han en a, vin em em mai hian, "Tunge thi? Tu thah nge? I tel ve a nih vaih chuan....I..," a han ti a. Randy a chuan, "Ka pa, chutia i aw tawp tawpa i au chu a țul kher lo. Lo ngaithla la, ka sawi mai dawn alawm," a lo ti a. A pa pawh chuan, "A ni tak alawm," a ti ve ta a, a fapa hnenah chuan, "A nih han sawi ta che," a han ti leh a.
Randy a chuan, Cameron an Johnstone a te țhiandun a cho dan leh, a kahhlum dan te chu a pa chu a hrilh ta vek a. Thil pakhat erawh chu a hrilh lo a. Hetia Cameron an Johnstone a te țhiandun a kah vel lai hian, saloon inchhawng nula pindana a awmthu chu a pa a hrilh ngam lo a. A han sawi zawh chuan, a pa chuan, "Tunah Camerona hi Yavapai khuaah ala awm em?" tiin a han zawt a. Randy a chuan, "Awm e, a lo thlenna pawh ni hnihkhat lek ala ni nghe nghe asin," a lo ti vat a.
A pa chuan, "Chutiang misual te chu engati nge marshal hian a hnawh chhuah loh a... ala awm tir reng theih chu le.. marshal tlak pawh a ni lo tawp mai," a ti ta a. Randy a chuan, "Ka pa, marshal Appleby a tan chuan, han tih ngaihna vak a awm lo a ni. Johnstone a te khan an puakruk an phawi hmasa tlat a ni. Chu chu, mi tam tak in an lo hmu bawk si a, amah leh amah inven nan chauha kap a ni," a han ti leh a.
"Tichuan.. Camerona chu an țha en ta mai mai a maw? Ava han mak ngai em!" Gunnisona chuan a ti ta a. Randy a chuan, "Tumahin Camerona hi an um chhuak ngam lo ang. Ama duh hunah erawh chuan a kal leh mai anga, tualthah te hi chu enghuah mai a ngai pawn a lang lo.. misual sa a lo piang chhuak a ni ta ve ang," a han ti ve a.
Gunnisona chuan, "Chutiangin piantirh ațanga sual sa ngawt chu an awm ngai lo... Ila hre mai ang," muang charh hian a lo ti a. Randy a chuan, a pa chu a han en vang vang a, "Camerona hi, Jake Harris a chah chhuah a ni e, te a han ti a...," inthlahrung deuh chung si hian a han ti a.
Gunnisona erawh chuan a fapa chu rum deuh hian a han melh a; Randy a hi a dawihzep bawk a, chutia a pa in a han en takah chuan lehlam a hawi thuai zel a.

"I â ta em ni? Engvangin nge Harris an a țhenawmte thah a duh vang ngawtin misual a rawih kher ang?" Gunnisona chuan a han ti a. "Ka pa, ka hre bik lo.. An ram neihsak te a tum a nih nghal loh chuan," fing zet hian Randy a chuan a han ti a. Gunnisona erawh chuan, "Chutiang a nih pawh ka ring lo," a pa chuan a ti mai a.
Randy a pawh chuan fing tak bawk hian, "A nih an ram khu tunge nei ta ang? Han ring chhin mah teh?" a han ti leh a, "Thil dik a ni thei lo. A kalhmang pawh a ni bawk lo," Gunnisona chuan a lo ti leh mai a. A pa chuan a duhdan leh ngaihdan in a chhang ta si lo a, Randy a chuan eng emaw ti zawng taka a ngaihdan lama thlek pui dan a zawng ta zawk a, "Nang chuan, i hre lo pawh a ni thei e... hetia i nghah reng chuan i tlai lutuk mai ang, mi reng reng hi i hmu țha lutuk..."
"..Harris a hian, heng ram te hi neita sela engtikahmah i hnawtchhuak tawh ngai lo ang. Tunah pawh hian, bawng kan hloh reng a. Nakina ranch lian zawk a neih chuan, misual rura tak tak ala ruai anga, nang chu, chung hunah chuan khawnge i awm ang? Camerona hi chu a ral mai dawn a ni," thiam inti tak hian a ti ta siah siah mai a.
Gunnisona chuan, a fapa chu endan danglam deuh tak hian a en ta a, "Ka fapa, min ngaisang vaklo tiraw?" a ti ta daih mai a. Randy a pawh chuan, a pa thu zawh dan chu a tum loh dan ang daih mai a ni ta si a, tihngaihna tak leh chhan ngaihna tak pawh a hre ta lo a, "Ka pa duhtak, ka thusawi lai leh ka ngaihsan leh ngaihsan loh che hi inzawmna a awn hleinem," a han ti thla ngawt a.
Gunnisona chu a țhutna ațang chuan a lo tho ta a. Randy a hmaah a ding ta to mai a, "Thil pakhat kan zawt ang che. Engvangin nge Harris a nen hian in hmuthiam loin in tibuai ila i tih em em?" a ti ta mai a. Randy a pawh chu a ding ve ta a. Inhmatawnin an han in en ren rawn a, Randy a chuan, "Ka pa, tuna țan i lak loh chuan nakinah Sabre ranch hi chu tuna ranch tenau ang lek hi a ni ve tawh ang, i boral a ni nghal ang...Dinchhuahna hun i nei leh tawh ngai lo ang," a han ti ve hmak a.
Gunnisona chuan a lu a thing a, "Chu zawng i rilru tak tak a ni lo, i ngaihdan anga thil ka kal tir hi i tum a, i rin ang hi chuan mi kawihthlek duhna lamah chuan min kuaithle thei lo ang," a ti ta tlat mai a, Randy a chuan a pa thil sawi kalhmang chu a hrethiam naa, mahse, a nihna tak tak a hre phak emni? tih chu a rilru a lian ber chu a ni ta a. A mangang rilru ta hle mai a.
A pa chuan, "Thu pakhat ka zawt leh ang che. Camerona hi ka chah chhuah pawh a ni mai thei a, ka chah chhuah leh chah chhuah loh i hria em ni?" a han tih takah chuan Randy a chu a mangang zual ta sauh a. Rilru mumal pawh a nei thei ta mang lo a. A hlauthawng lutuk chuan, "I chah chhuah a ni lo a ni tih ka hria. Chutiangin i tih duh ka ring lo..," tih pahin a chil chu a han lem leh te te a.

Chutah, "I â ta em ni? Engahnge chutiang te min zawh? I mi zawh tur pawh ka ni lo. Ka...," Randy a chuan a han tihzawm leh ngawt a, sawi zawm zel tur a hre leh si lo. A hlauthawng rilru ta em em a, a tawm ta chawih chawih mai a. Chutia a hlau tawm lai chu Gunnisona chuan ava hnaih chilh a, a in sehruh a, "Ka thu zawh che chu min hrilh rang rawh. Ka chah leh chah loh engtin nge i hriat?" vin zet hian a ti ta tuar tuar mai a.
Randy a rilruah chuan thudik han sawi chhuah a, ' mi that ang' han tih chhuah mai te pawh a duh rum rum tawh a. Mahse, a sawi ngam si lo. A pa lah chuan a hrawm na tawlh tawlh tawh mai si a. Randy a chuan, "Min thlah rawh," a han ti tuarh a, mahse, Gunnisona thinur chu a sosang tawlh tawlh mai si a. A kut chu a hum ruh a, na deuh a han chum hi a tum a. Chutih lai tak chuan Randy a hlau mangang chuan a jaket chhunga a pistol te pai chu a han phawrh a, a pa awmah chuan a chuk tuah a, a kap ta mai a.
Gunnisona chu hnung zawngin a let ta nghal a, a thih leh thih loh pawh en loin a pa tlu reng a han hmuh ngawt pawh chuan Randy a chu a zam chhe nasa mai a. Tukverh te chu a han hawng a, a dakchhuak a, tumah an awm lo. A vanneih a siamin cowboy, an chaw chhumtu tih loh chu an thangbo vek a, chawchhumtu lah chu choka lamah a awm daih bawk si a.
Randy a chuan a pa chu a han ennawn leh a, "Tunah chuan Sabre ranch hi ka duh duh in ka enkawl tawh ang," hmangaihna tel hauh lo hian a han ti a. A sawi zo hman chiah tih chuan sakawr lo tlan thawm hi a hre ta a. Kawtlai a han en chuan marshal Appleby a a lo ni reng mai a.
**********
JH ranch ah thung chuan Johnstone a leh Neuly a thih thu chu an sawi laih laih a.
Harrisona chuan, "Ka țhiante an ni a, an ruang chu keimah ngeiin va khawm ila, mawihnai taka phum ka duh a ni," a han ti charh charh a. A țhian te ho chuan an awih zawng a ni lo a, thuin sawi lo mahse an awih lohzia tih lan nan an lu an thing deuh vek a ni.
Harrisona vek chuan, "Keimah ngeiin an ruang ka khawm loh chuan mite sawi dan tur han chhut ve mah teh u, mahni țhiante ngei ruang pawh la ngam lo ah min puh dawn asin. Chu chu ka duhzawng a ni lo. Mi dawihzep ka ni bik lo a," a han ti leh a.
Sudden a chuan, "I han kal ngat chuan an thlan kianga i thlan laih mai a țul ve ang," a rawn ti ta a. Harrisona chuan Sudden a chu a han en a, "Jim, chuti kher chuan ka lakah i țawng tur a ni lo," hmel dur fe hian a han ti a. Mahse, Green a chu a nui mai si a, "Jake, i thil tih tum chu ka ngaihsan zawng tak a ni. Mahse, ngaihtuah chiang hmasa phawt teh, engvanga Johnstone a te țhiandun pahnih hi that mai nge an nih? A dawt leh tur leh a lu ber chu nangmah hi i ni a. Tin, tunah tak hian Philly a nen hian han in phawisiak teh u, Philly a ai chuan i rang lo tawp tih ka sawi thei sa.....," a ti a.
"... tin, Camerona lakah phei chuan engmah i ang lo ang. Chuvangin keimah hi han kal ila a țha zawk ang. Ka kal hlanin ka putar rawn hruai, Shorty a kha thil lo zawt rawh u. Randy a leh Dancy a hian khaihlum theihna khawpin thil an tih thu a hrilh vek thei ang che u. Tin, ka kal tak vek vek chuan thil pakhat va fiah ka tum a...," a han ti a.
"Gunnisona maw?" an ti rual țhawt hlawm a.
"Ka hre bik lo. Mahse, ka rindan chuan Gunnisona hian i hriat ai hian a hre tam mah zawkin ka ring," Green a chuan a ti ta a. Harris a chuan, "Ava mak dawn ve le! Gunnison an ka hriat aia thil a hriat tlem zawk chuan,... engmah ka hre si lo a, a beng a ngawng a ni ngei ang," a ti ta ngawt a.
Jim Green a chuan a sakawr zin chu a han phah mawlh mawlh a, "Zanlai velah chuan ka lo hawng leh mai ang," a ti ta a. JH Ranch chu a chhuahsan ta a, Philly a chuan, "Jim an zanlaiah ka lo hawng leh ang a tih chuan a lo haw leh mai ang," a lo ti a.
*************
Marshal Appleby a lo thlen chuan Randy a chuan thil awmdan zawng zawng chu a lo hrilh vek a. Marshal chuan, "Mi tenawm.... thluak hi i nei reng reng nange? Ka beng nek zawk dawn che emaw ni le!" a han ti khur khur a. Yavapai khuaa mite chuan tunah tak hian an marshal dan keng kawh tura an thlan hmel chu han hmu na se... Appleby a hi a thinrim em em a, a chhan chu Sabre ranch neitu ber, a fapa dawihzep lutuk hian a kaphlum tlat mai a...
Randy a thiltih chu marshal thil ruat ang a ni lo a, chuvangin a thin a rim em em mai a ni. Marshal Appleby an Randy a hauh lai chuan Jim Dancy a chu a lo thleng ve ta a. Randy a tihngaihna hrelo chuan, "Min zawt ngun si a, a tihngaihna ka hre lo a ni," hlau hmel tak hian a lo ti ngawt mai a.
Appleby a chuan vin zet leh thinrim hmel zet hian, "Eng thu nge a zawh che a, enge a sawi?" a han ti tuar tuar a. Randy a chuan hlauthawng tak hian, "Ka hrilh tawh che kha," a ti khur dar dar a. Marshal chuan, "A bul ațangin engkim han sawi leh vek teh. Sawi hmaih i neih vaih chuan....," a han ti leh a. Chutah ranch lian ber neitu fapa chuan a pa a thah dan leh a pa thil sawi zawng zawng te chu a bul ațangin a han sawi leh ta vek mai a. A pa thlah chu ni ngei mahse a sual avangin a aia tenau zawk thu hnuaiah a awm miau mai si a.
"Randy, i pa hian engmah a hre hman lo ang. I dawihzep vang vek a nih hi. A pawi kher mai. Engtin nge ka tih tak ang?" Appleby a chuan a ti ta a. Dancy a chu a lo țawng chhuak ve ta a, "Tihdan dang awmin ka hre lo. A tir ațanga kan lo ruahman angin Harris a bawk hi puh leh ila a ni mai," a lo ti a.
Appleby a chuan, "Keipawh chu chu ka ngaihtuah dan a ni. Mahse, engtin nge kan tih ang tih kha a ni ta!" a lo ti thuai a. Dancy a chuan hmanhmawh hmel tak hian, "Ka tih thuai thuai loh chuan kan naute an lo hawng dawn a, a rang lama chu thil chu sawi fel a ngai a ni." a rawn ti ve a. Appleby a pawh chuan bengsik meuhin tihdan tur chu a han ngaihtuah țan vel a.
Reilo deuh hnuah chuan, "Ka hre ta... kan sawi mah anga, a țhat leh țhat loh lo en ve teh...Dancy, sakawr tawlailir lachhuak la, tin, Gunnisona sakawr pawh a zin phah la, eng emaw... ui... kel...beram emaw kaphlum la, a sakawr zinah chuan chung thisen chu tat la, tin, a ruang hi tlangram thing hmun, Harris a ranch hnaih theihna berah khamah, zawn harsa vak lo turah lum ta la, i lum țan tirh naah chuan thisen bawk chu leiah te tat ang che. Tin,...."

".... A puakruk kha, vawihnih kap la, chumi thisen i tahna lai velah chuan dah ang che. Mahse, heng i tih lai hi tumahin an hmu tur a ni lo. An hmuh vaih che chuan thingzarah kan uai far mai ang," a han ti a. Randy a chuan a pawm zawng tak a ni a, mahse, ala hlauthawng a, Dancy a chuan, "Khing tlangramah te enge a han tih ang?" a rawn ti lehnghal si a. Mahse, Randy a chuan a lo suangtuah thui hman tawh a.
"Chu zawng, ngaihtuah vak duh suh. Ka pa khan Harris a a be dawn a, tumah midang ka hruai dawn lo. Cowboy nena ka kal chuan, Harris a te hian min rawn bei dawn emaw an lo ti anga, kan inkap buai palh hlauh dah ange," a tih thu ka sawi ang, a țha dawn lawm ni? Randy a chuan chu chu țha tawkin a hre bawk a. Randy a thu han rawt chhuah ang țheuh a sawi chu rem an ti tlang ta a.
Randy a vek chuan, "Chumi hnuah chuan enge kan tih tak ang?" tiin a țhiante chu a han zawt a. Appleby a chuan, "Sakawr kha a lokir leh hunah Yavapai khuaa mite kan pun anga, engkim ka hrilh anga," Dancy a chuan, "Harris a chu belchhunga sa an tih ang a ni tawh ang," nuam ti fe hian a lo ti a. Dancy a chu ala fimkhur em em mai a, "Harris a pawl te kan puh dawn chuan nimina an awmna an sawi thei vek mai tur asin," a rawn ti ve leh ta a.
Mahse, Appleby a chuan, "An zavai chuan an sawi thei bik lo ang. Tin, chu loah, midang tuin nge Gunnisona that duh ang?" a lo ti ve leh a. Dancy a pawh chu a nui ta vur vur a, "Tom, i rilru hi chu a chak țha mange, duhna min la nei em?" Appleby a hnenah chuan a ti ta a. Appleby a chuan, "Duhna awm tawh hran lo e. Rang takin i tih tur chu ti la a țha ang. Țha taka i tih loh vaih chuan...." tiin Dancy a chu a han vau zui a. Dancy a chu a chhuak ta a, Appleby a sawi ang chuan sakawr tawlailir chu a khalh chhuak ta a.
Dancy a kal liam hnu chuan Appleby a chu rum zet hian a rawn melh ta a, "Kan thiltih hi a hlawhtlin ngeina turin țawngțai rawh. A tlawlh palh vaih chuan... i chak dawn lo ania.. Aw... avan pawi tak em! I á lutuk hi chu aw... I pa khan, Camerona hi tunge rawn chah chhuaktu ngaihtuahna chang a hriat chuan, Green a hian a hre lo bikin ring suh. A ni tan phei chuan, Harris an a chah chhuak lo tih a hre si a. Tin, i pa pawh hian a chah chhuah a ring dawn bawk si lo. Pahnih leh pahnih a han belh khawm anga, a hrechhuak thuai mai ang," a ti ta a.
Randy a chuan â zet hian Appleby a hnenah chuan, "Camerona hi a țawng maiin i ring emni?" tiin a han zawt a. Appleby a chuan, "Țawng pawh a țawng duh mai ang. Chuvang chuan, dah țha thuai thuai ila, kan tan a țha zawk ang," a ti ta mai a.
"Tom, Camerona chu i thu thu a awm tur a ni emaw ka lo ti a, lo țang palh ta sela..," Randy an a han tih chuan Appleby a chuan, hmusit em em hian Randy a chu a han nuih a, "I hlauthawng hle a nih chuan, Yavapai khuaah zuk kal la, Camerona chu zuk that ta che," a ti ta daih mai a, "Tom, ka thei lo tih i hria...a lawm...," harsa tak hian a ti chhuak ta a.
Appleby a chuan dim miah lo hian Randy a chu a vau zui zel a, "I thei reng nang. I dawihzep ropui si a... lungngai lo la, Camerona chu ka dah țha ang. Tin, i lo tih vaih chuan.. I pa a thi ta bawk a, mamawhna ka nei tawh hleinem che, Sabre ranch hi ka ta a ni mai a. I pa i thah ni ațang hian mamawhna ka nei ta miah lo che," a ti ta siah siah mai a.
Randy a tihngaihna hre lo chuan, Appleby a chu ât hmel zet hian a en leh ta ho mai a. A thusawi te chu a dik si a, a tan chuan engmah hi han beisei tur hi awmin a hre lo a, a chauh thubarawh chuan, "Tom, i thil beisei chu ila chang bik lo a, nichin khan mamawhna i neih tawh loh thu kha i sawi tak na a, ranch tesep ho hi i um chhuah dawn chuan, nangmah mai chuan i ti thei lo tawp ang, Sabre cowboy hi ila mamawh ngei anga, chuvang chuan min la mamawh dawn tlat a ni," inthlahrung tak hian a han ti ve a.
Appleby a pawh chuan Randy a thusawi chu dik in a hre ta a. Randy a hmuh a țha taka awm chu a țul rih niin a hre ta a. Nui sang chung hian, "Randy, tunlai hian ka rilru a hah lutuk a, kan ang chhuak mai mai a nih kha. Sawi loh tur tur ka thinrim hian ka sawichhuak mai mai ania. Engahnge ka mamawh loh tehlul ang che. Kei, nang leh Dancy a hi chu pumkhat ang kan ni alawm," thiam deuh hian a han ti leh a.
Appleby a chuan a sawi thiam bawk a, Randy a rilruah chuan Appleby a hian dawt mai mai a sawi hi a ring thei lo a. A lawm em em tawh mai a, "Tom, pawisa kan hmuh hun tur hi ka nghakhlel em em tawh mai a, vawiin te hian hmu thei ila chu, helai ram hi kan chhuahsan nghal ang," a ti a.
"Phunnawi lo la, pawisa ka hmuh hunah chuan, i chan tur chu a hmasa berin ka pe ang che," chhungril a nui chung hian Appleby a chuan a ti ta a. Randy a chuan, Appleby a thusawi awmzia tak tak hi hria sela chuan, a ngaih a tițha miah lo tur. Mahse, pawisa hmuh tur thu ringawt chuan a ngaihtuahna thuk zawk chu a hliah khuh a, a hlim fu lehnghal a.

CLICK THEINGHILH AWI LOH AWWW

[Ngaia]

SUDDEN
TROUBLE SHOOTER 8
Sudden a chhuak ta khan Yavapai pan mai loin Johnstone a in lam chu a pan zawk a. Johnstone a in ava thlen chuan inchhunga lutin chhuat chu a han phawng a, suahdur a lo ken lawk tawh nen chuan lei chu a cho ta tlat tlat mai a.
Reife hnuah chuan a thil hai chhuah tum chu a zuk hai thleng ta mai a. Dimte hian thingrem tuiek lian vak lo hi a phawrh chhuak ta hlawl a. A chhunga awm chu a han phawrh nghal a.
Thingrem tuiek chhunga awm chu a han phawrh chhuak a. A puan lo in rin lawk chuan a tuam ta a. A leilaih vung chu, a laih khuarah chuan a vur leh vek bawk a. A chhuat thingphel a phawh pawh chu a bel leh bawk a. Tichuan, Yavapai lam pan chuan a kal leh ta a.
Yavapai khua a thlen veleh, Bank Manager Granger a hnenah chuan a kal nghal a. Thil awmzia zawng zawng a hrilh vek hnuah Johnstone a chhuata a thil phawrh te chu a hlan ta a. Granger a chuan, "Green, i thuawih in ka ti dawn a, engmah tihsual ka nei em lo ang chu maw?" a han ti a.
Green a chuan, "Hlau thawng suh. Khang hming ka pek che kha, i duh phawt chuan lehkha thawn la, ka thusawi chu an lo pawm țheuh ang. Ka thusawi leh ka thil hlan tur che kha tuma hnenah la sawi rih suh," tih pahin bank chu a chhuahsan ta a.
Chumi hnu chuan saloon ah ava lut a. Tyler a chuan a lo hmuh veleh, "Green, i lo va lang khat ve? Dancy a i sawisak hnua kan in hmuh vawikhatna chauh lah ni a, JH Ranch ah hian ila thawk reng em ni?" tiin a lo zawt thuai a. Green a chuan, "La thawk reng e," a ti a. Tyler a vek chuan, "Green, rang deuhin chhuak leh rih rawh. Johnstone a te thattu kha a awm ve a, an lam țang ini tih a hriat chuan... a rawn tibuai ngei ang che," a lo ti thuai thuai a.
Green a, Sudden a an tih bawk chuan, "Buaina siam tuma lokal ka ni lo. Johnstone a te ruang lak tum mai ka ni e," a sawi tawp lam chu ring fe hian a han ti kher a. Chu veleh, saloon chhung chu a reh ta deuh duak mai a. Sudden a chu a han hawi kual a, a mitsir in Camerona ni awm tak chu ava hmu nain, hmu anga lan chu a duh lo a, a zu no, a hmaa awm chu en reng niawm tak hian a han en a.
Camerona chuan Sudden a thusawi chu a lo hre ngei mai a, "E heu! Khualzin a ni maw? Ti rawh, mikhualpa, zu ka leisak ang che," mei nei fahran hian a rawn ti a.
Sudden a erawh chuan a lu a lo thing mai a, "Dawm lai ka nei," a ti duh chauh a. Chu chuan, Camerona chu a ti thinur nghal mai a, "Wes Camerona an zu in tura a sawm che chuan i in ngei tur a ni," thupe niawm tak hian a ti ta a.
Sudden a pawh chuan muang changin Camerona lam chu a rawn hawi ve nghal a. Mahse, rang takin a hawi kir lehnghal a, a zu no bawk chu a en leh mai a. Chutah zet zawng, Camerona thin chu a rim takzet tawh mai a. Chuti em em a pawisa lo tu chu ala hmu ngai lo a, mak pawh a ti hial zawk a ni.
Hetia a thinrim lungpuam vel lai hian a entu zinga pakhat chuan, "A â a ni ang. Hetianga Camerona laka a han țawng chhuak ngam mai hi!" a rawn ti a. Pakhat ve thung chuan, Sudden a chevel a han hmuh ațang khan mi rura tak a nih a lo ring nghal a, "Ât zawng a â lo ang," a lo ti ve bauh a. Chung an han țawng te chu Camerona chuan a haw țan mai dawn a. A țhutna ațang lo tho chhuakin Sudden a hma siahah chuan a rawn ding a. Feet hnih pawh a tla lo ang tihah chuan a rawn ding ta to mai a. Camerona chuan, "Mi ka biak reng reng in min en țhin asin," a ti ta a.
Sudden a lah chuan, engahmah a ngai lo a ni tih hriat tak hian Camerona chu a lo en vel a, "I hmel a țha em a, an hmu duh che pawh aniang chu," a lo ti mai si a. Hetia a han chhan ve tak chinah phei hi chuan engdang awm theiin an ring ta lo a, an in saseng ta sang sang a, an inkap ngeiin an ring țheuh a ni.
Camerona chuan mak a ti kher mai. Hetianga amah pawisa lo tu hi ala tawng ngai lo bawk a, a rilru chhungril tak ațang chuan hlauhna a lo lut țan ta a. A bula mi chu a hmuh tawh hnu ang hlein a hre bawk a, "Hmuhna che ka nei tawh lo maw?" a han ti leh rih a. Sudden a chuan muang charh hian, "Hmuhna ka nei hmasa tawh che a nih loh chuan min la hmu kher lo ang," a lo ti leh ta khauh mai a. Chutah zet zawng, Camerona pawh a insum zo ta lo a. A thusawi leh tur chu saloon chhunga awm te chuan an ngaichang țhuap mai si a.
"Mikhualpa, i thusawi kha fimkhur rawh. Tunge ka nih i hria em?!" chapo zet hian Camerona chuan a ti ta a. Muang chang bawkin Sudden a chuan, "Wes Camerona i ni lawm ni?" Mihring a zawng a hniam ber, hriamhrei nei lo te, lonei mite, naupang leh hmeichhia te pawh kap duh zel mai mi... ka hriat dan pakhat phei chu a țha lo. Mahni nu leh pate awngphah pawh a ruka hralh duh zel mai a ni, tih a ni asin," a ti ta a.
Sudden a chu a han ding ngil a, Camerona chu ngun zetin a han en a, "Chung ka sawi chu i ni ti raw?" a han ti zui ve ngat a. Sudden an chutia a tih lai vel chuan saloon chhung chu a reh hian a reh duk mai a. Hriau pawh chhuatah tla se silai ri angin a ring ang a tih theih hial a ni.
Camerona chuan, a thu han sawi leh vel chu anihin a ni tawh lo tih a hria a, a hmaa a aia sa pan zawk tak chu a han en a, vawi lehkhatah rang zet in a puakruk phawi tumin a ban chu a vai thla thuak a, mahse a puakruk hmawr chu Camerona hnarah chuan a lo chuktuah hman reng tawh mai a. A veilam in Camerona kut chu a dawm a, Camerona tan chuan eng han tih zia zang awm tawh hek lo, chet pawh che ngam loin a ding khawng ta reng mai a. Han che vaih se chuan a hma ami chuan i he loin a kap nghal mai duh dawn si a.
Chutia an in en reng hnu chuan, Sudden a chuan, "I puakruk kha thlah rawh. A paiah khan khung leh nghal ang che," tiin thu a pe ta a. Camerona chuan, a puakruk chu a paiah chuana thun leh nghal a.
Pa pakhat hian, "In hmu ve em," mak ti em em hian a rawn ti a. Midang chuan, "Hmuh chu ka hmu. Aw, a kut che lai chu ka hmu lo," a rawn ti bawk a. Sudden a chu a han hnungtawlh deuh a, a puakruk chuan Camerona chu ala tin reng a, "Thah mai che chu i tan a țha lutuk a, chuvangin, i puakruk paina kawnghren kha phelh la, thlauh rawh," a ti leh ta a.
Camerona rilruah chuan, Sudden a thiltum chu chiang takin a lang nghal a ni. A lo lawm rilru em em mai a. A aia sa pan leh sa inphut lo zawk in kuttum a sawisak a han tum chu mak a ti hle a. Amah, Camerona hi, saloon chhunga insual lamah chuan thei ve tak mai a ni a. Mi tam tak mit te a lo tihdel sak tawh a, țhenkhat te phei chu, ramtui leilo khawpin a lo sawisa tawh țhin a.
Sudden a pawh chu a zuam em em mai a. Châk awm fahran hian a kawnghren chu a phelh a, chhuatah chuan a han thlauh nghal a. Sudden a thupek angin a kal kiang a, Sudden a pawhin a kawnghren chu a lo phelh ve a, saloon neitu hnenah chuan a han pe a. Camerona pistol chu a chhuih leng dawrh a, "Duh ila chu ka that thei che a, a awlsam em em a. Mahse, ka duh rih lo a ni. Thil pakhat hria la ka duh a... loneitu leh cowboy te hi i duh ang anga i sawisak theih an ni vek lo tih hi ka hriattir dawn che a ni. Cameron, tunah chuan kan in ang reng ta e. Nge, nang, hmeichhiate leh zel pawh an inring lo lai lehnghal hnek te hi i theih zawng a nia," a han ti a.
Camerona chuan Sudden a chu a zuam rilru hle a, phawiranah chuan a tluk lo ngei mai, mahse, khata a hmingchhiatna kha Sudden a a duhtawka a chin hunah chuan a bo leh mai dawn tih hre rengin Sudden a chu ava bawh ta thut mai a.
Sudden a chu inring awm lo takin a lang na a, a inring rilru em em si a, Camerona lo zuang lai tak hmuiah chuan a lo hnek sak ta chawrh mai a. Camerona chu a tlu thlawrh mai a, a lo thawh leh chuan a hmui chu a kak raih mai a, thisen leh vaivut in pawlh hian chil a rawn chhak chhuak phawrh mai a. A rawn zuang tho leh a, Sudden a chuan a lo tih hmasak ang bawkin a lo per leh nalh a, a hnek na ngaiah chiah chuan a lo hnek leh chawrh mai a. A hma ang bawkin Camerona chu chhuatah chuan a let leh ta a.
A entute chuan chumi te pahnih chu an lo hual hnai tuau tuau mai a, Camerona chu muang changin a lo tho țual țual a.
Sudden a chu a han en a. Cameron an a bawhzui leh thuai a. Hemi țum hi chuan a lo inher zauh țhin kha hre rengin thiam tak leh fimkhur deuhin a han bawh a. Mahse, inher leh per sawn tum ta lo chuan Sudden a chuan, Camerona chu a lo hnek ta chawrh mai a. Camerona chu a hlawm leh ta hlawl mai a. "Khai...hnungtawlh țheuh rawh u. Kan hual zim lutuk, Camerona hian tlukna tur pawh a nei dawn lo e," pakhat hian a rawn ti a, an han hnungtawlh hlawm a.
Camerona chu a rawn tho leh țual țual a, a hmai chu thi hlir hi a ni tawh a. Fimkhur taka a rawn veh lai chu Sudden a chuan ava zuan ve ta thut mai a. Camerona hmaia na zeta hnek pahin a tawlh kir san leh thuai a. Camerona chuan, a kut hnunglamin a hmaia thisen lo luang zawih zawih chu a han hru a. "Chesawn loin awm ta che" a han ti a. Sudden a lah chuan, pem pakhat te pawh ala nei silo a. Nuisang chung hian a lo en a, ava zuan leh ta thut mai a.
Sudden a chuan a dinglam leh veilamin a han hnek sak sak mai a. Cameron an a lo hnek ve hman hma chuan, a tawlhkir leh ta a. A lo entute zinga pakhat chuan, "E khai! Insual an ni hleinem! Insawisa a nih zawk hi," a rawn ti a. Chupa thusawi chu Camerona chuan a lo hre phak a, a sawitu chu rum tawk in a han melh a, "Beih ve i chak a ni maw? Nang ai chuan ka tichhe vak bik lo ang," hmusit deuh chung chuan a rawn ti ve leh a.
Camerona chuan a lu a han thing a, a hmai te chu thi hlir a ni a, mahse, na tak tak erawh chu a hre lo a, vawikhat tal han hnek fuh ve ila, ti rilru ran chungin rang em em hian Sudden a chu ava zuan ta a. A bekah chuan na zet hian ava hnek fuh ve ta a. Sudden a chuan na a tiin, a beng te chu kiu chuah chuah in a hria a ni. Chutihlai tak chuan, Camerona chuan a dulah a chhut sak ta nghek mai a. Sudden a chu chhuatah a hlawm tawp mai a, mahse, a rilru chu a la hlauh bik lo.
Chutah, Cameron an a rawn țum leh a, a rawn țum fuh hmain a lo inher sawn hman a, inher hman hlauh lo se zawng a rawn țum fuh anga, a lu chu a țum keh ngei ang. A tawpna tur chu Sudden a chuan a pumpelh niin a inhria a. A thinrim lutuk chuan inven lampang pawh ngaihsak loin ding chungin an inhnek ta mial mial mai a.
Chutiang ngawta inbeih chu Sudden a chuan dikin a hre lo na a, a hma ami hi kuttum ngata tihchhiat a duhna chuan engmah pawi tih lohna a thlen ta tlat a. Camerona chuan Sudden a bek bawrah tak chuan a hnek fuh leh ta a, Sudden a chuan bang chu ava tauh leh nghal a.
Chutih lai tak chuan, Camerona chuan a nghawngah a rawn vawn sak ta tlat mai a. Sudden a chuan Cameron an rawn rehhlum ngei a tum a ni tih a hriat chuan talchhuah vat a tum ta a. A kut khinghnih in Camerona hrawkah tak chuan a han chho dawm nghek mai a. Camerona pawh chu a dak awrh mai a. Reilote chhung chu engmah pawh hre lo in a han awm a, a entute zinga pakhat chuan, "Khai le, kha, bel chhunga sa a ni tawh bawk a, hnek hlum law law rawh," a rawn ti a. Mahse, chutiang chu Sudden a duhzawng a ni chuang lo a, Camerona thung chu nise a tihreh hauh lo ang tih chu a hre tho a.
Camerona lo harh chhuah leh hun chu a nghak ta zawk a. Camerona chuan, "Tunah hian ka that dawn che, tih pahin Sudden a chu a rawn zuan leh nghal a. Sudden a chu a lo inring ve reng bawk a, a banrekah tak a lo man sak a, inher thut pahin a tha tawpin Camerona chu a han pawt zui a, a paih leng ta dawrh mai a, bang ava deng chawrh a. Nikhaw hre loin chhuatah chuan a tlu leh ta reng mai a.
Reife chhuata a leh reng hnu chuan Camerona chu a lo harh chhuak ve leh mai a. A rilru a lian ber chu, a aia sa pan zawkin a sawisa hi mak a ti a ni. A han en țhin a, hepa aia lian zawk tak tak te pawh a lo sawisa hrep tawh țhin a.... A han ngaihtuah chiang a, a sawisa tu chu hrechhuak ta thut ang hian, "Aw...ka hre ta che. Texas misual hmingthang, Sudden a kha i ni," a rawn ti chhuak ta a.
Cameron an Sudden a hming a rawn lam chhuah takah chuan a lo entute zawng zawng pawh chuan an hrethiam ve ta nghal a. Wes Camerona hneh thei tur chuan midang an tam lo a. Sudden a te ngei lo chuan.... an ti rilru ta hlawm a.
Camerona chu a kiu in a rawn in beng kang a. A piah lawka silai kha ava hmu a. A theih anga rangin a silai chu ava pan ta a, "Sudden i thih ni a thleng ta," a ti a. A puakruk chu a hum hman chiah a ni. Puakruk a lo ri țhak a. Sudden a ding reng chuan puakruk lo rikna lam chu a han en a, marshal Appleby a kha, puakruk la khu ngiai ngiai keng chungin kawngkhar bulah chuan a lo ding reng mai a.
Camerona chu a țhu hnawk a, harsa ti takin a puakruk chu han kenkawh hram a tum a, "Nang, mi han bum.." a ti a, chutihlai tak chuan Appleby a chuan vawihnih a rawn kap leh a, Camerona chu hnung zawngin a tlu ta a. A chatthla ta a ni. Chutih lai chuan Tyler a chuan Camerona chu ava bel chiang a, "A thi chiang hle mai. Hetiang ang mi hnawksak lutuk hi chu thi thuai se a țha reng a ni," a ti hmak a, marshal chu a lo pen lut a, Tyler a bawk chuan, "Tom, lokal hun i hre hle mai," nui chung hian a lo ti a. Marshal chuan, "Ka hre lo zawk a nih hi, thil awmzia a bul ațangin min han hrilh ve teh u," a rawn ti a.
Engkim an hrilh hnu chuan marshal chuan Sudden a chu a han en a, "Sudden a an tih hi i lo ni reng a maw? A pawi hle mai... Camerona khan kaphlum ta che sela, amah kha khaihlum leh si ila, tichuan misual pahnih ka dah țha a ni mai tur," a ti hmak a. Sudden a chuan marshal chu ngun deuh hian a han en a, "Marshal, ka nunna i chhanhim a i thusawi chu ka theihnghilh rih mai ang," a lo ti ve a.
"Theihnghilh suh. Nangni ang misual hi chu Yavapai khua hian an thlahlel lo che u," tih pahin marshal chuan mipui lam chu a han en a. A kut a han kuangkuah te te a, "Ngaithla țheuh rawh u, Camerona ka kahhlum avang khan ka â emaw in ti ange, an ni sazu pahnih in thah tum thu mai mai aiin ka thusawi tur hi nasa takin a pawimawh zawk a ni," tih pahin Sudden a chu a han kawk leh a. "Ka thusawi tur chu hepa hian a hriat pawh ka ring a, Sabre ranch ațangin ka lo kal a, Randy a pa, Gunnisona chu Harris a be turin amahin a kal a...,"
".... mahse a sakawr chauh a lo hawng a ni. A sakawr zinah chuan thisen hlir mai chauh hi hmuh tur a awm a, Randy a ka zawt chiang a, a pa sawi dan chuan Harris a nen hian pa leh pa inbiak a duh a, cowboy ho nena ka kal chuan Harris a hian amah bei tur emaw min lo ti anga, in kah palh pawh a hlauhawm a, chuvangin keimahin kal ila ka him zawk ang, a ti a, chutianga kal ta chu a ni," a han ti a.
Tyler a chuan, "Chu, kalkawngah an lo lambun tihna a ni maw?" a lo ti thuai a. Marshal chuan, "Ka hre chiah bik lo. Engpawh nise hepa, Sudden a leh a țhiante hian thu sawifiah tur an nei a ni," a han ti ram hmak a. Mitin mai chuan Sudden a chu rum zetin an en ta a. Midang ang bawk khan Gunnisona chung chang marshal in a han sawi kha Sudden a chuan mak a lo ti em em mai a, "Marshal, chu min man nghal dawn em?" a ti ta a.
Marshal Appleby a chuan, "Ni rih lo ve, mahse, naktukah mipui ka pun khawm anga, Gunnisona chu kan zawng dawn a, a thi a kan hmuh vaih chuan nang leh i țhiante sawn in sawifiah a ngai ang," a ti ta tlut mai a. Sudden atan chuan han awm reng na chi a ni ta lo a, a rang lama chhuah thuai atan a țha zawkin a hre ta a. A chhuah dawn chuan, "Johnstone a leh Neuly a ruang ka phur haw dawn a, an ranch ve veah phum ka tum a, min duh a nih chuan ka awm daw, marshal," mei nei tak hian a ti ve ta sak a, muang changin a kal chhuak ta nghal a.
Sudden a chhuah veleh chuan saloon chhunga mite chu an țawng ri ta mar mar mai a. Pakhat chuan, "Sudden a, misual tawp thang, tualthah hmang....," a han ti chhuak ta a.
Tyler a chuan, "A ni maw, Camerona engmah ti thei tawh lo sawisa zui duhlo tu khan tualthah a hmang lo ang e," a lo ti ve ta sak mai a. "A nih leh, zu min khilai hlawm la a ni mai," an tih tak tliar tliar avangin a hming chauhin zu chu a sem ta diat diat a.
Sudden an JH Ranch ava thlen hnu chuan Yavapai khuaa thil awmdan zawng zawng chu a sawi ta vek a. Gunnisona bo thu pawh chu a hrilh bawk a. Harris a chuan, "Jim, ava han pawi tak em! Tu kher kher in nge Gunnison a chu a han that duh ta ang le?" a ti ta vang vang a. Sudden a chuan marshal Appleby a rinhlelh a nih zia thu te chu a han sawi a, "Hming hmerh meuh chuan a sawi lo na a, mahse, mi â lo tan chuan han hai rual a ni lo. In marshal hian buaina tihreh aiin buaina chawh chhuah a duh zawk em ni aw ka ti hial a ni," a han ti zui a.
"Jim, Appleby an chutiang a tih ka va ring lo em! A thusawi i hresual a ni ang," Harris a chuan a ti vat a. Sudden a chuan, "Nih pawh a ni ta ve ang, mahse, Camerona kha chu kaphlum kher lo se ka duh asin mawle.... engemaw thu zawh tur ka nei a, a pawi ngawt mai," a ti ta a. Harris a chuan, "I thu zawh chu a chhan duh che i ring a maw?" a lo ti leh a. Sudden a chuan, "E ka hre thei tawh lo ang," pawiti deuh hian a lo ti a.
Chumi zan chuan an mu hma deuh vek a. Zingah chuan a țhiante pahnih Johnstone leh Neuly chu an phum ta bawk a. In an thlen leh hnu chuan an han chawl hahdam a. Rei pawh an la chawl hman lo tihah chuan sakawr rual lo tlan thawm chu an hre ta mai a, an han enchian nak chuan, marshal Appleby a leh mi sawmhnih rual dawn lai hi ranch lam panin an lo tlan a lo ni a.
Ranch kawt an lo thlen chuan Harris a chu laiphir kengin pawnah ava chhuak ta a. Marshal mi rawn hruaite zingah chuan Randy Gunnisona pawh a tel ve a. Chu chu Sudden an a hmuh veleh, Shorty a an kawl thu kha tumahin an sawi tur a ni lo tiin a han hrilh kual hlawm a. Kitson a leh Taylor a chuan Sudden a thusawi chu an man nghal mai a. Taylor a phei chuan, "Shorty an Randy a chanchin kha a sawi dik a nih ngai chuan inhmu lo se a țha zawk ang. A hun loah a thi mai ang," a lo ti a.
Harris a chuan Appleby a hnenah chuan, "Marshal, enge ni ta?" tiin a lo zawt a. Hetih lai hian, Sudden a chu kawngkhar phen ti tih hian a ding a, enchiangtu chu lo awm sela chuan a puakruk chu a hlat tawh miah lo tih an hmu ngei ang. Marshal chuan, "Dan kengkawh a lo kal kan ni vek a, i mite zawng zawng hnenah sawn an silai rawn dah vek turin hrilh phawt rawh! Ka thusawi awih lo a buaina an siam luih chuan i tan a pawi hle ang," a ti ta a.
Harris a chuan, chhan pawh chhang loin, marshal chu a en reng a. Marshal vek chuan, "I mi rawih Green a khan Gunnisona chanchin a hrilh lo che em ni?" inti thunei deuh hian a ti leh a. Harris a chuan, "Hrilh tehreng mai. Mak kan ti hlawm khawp asin! Mahse, ka hriatthiam loh chu, mi sawmhnih rual lai mai nen engahnge hetah in lokal kher?" a han ti ve thung a.
"Ka tih tur ka ti a ni mai. Tukin zing ațang khan, Gunnisona chu kan zawng nasa tawh a ni. A puakruk leh thisen hmun țhenkhatah kan hmu a, mahse, hnuhma han chhui awm kan hmu lo. JH Ranch hi a hla lo hle mai a," marshal chuan meinei fahran hian a han ti deuh kher a. Harris a chuan, "Chu, a ruang pawh chu in hmu lo maw?" a lo ti leh a.
"Hmuh ngaihna pawh a awm lo. A lo kaphlum tu hian a thukru a ni ngei ang. Kan hmuh theih mai a rinawm ta lo," marshal chuan a ti leh ta a. Harris a chuan, "Jim a hian a sawi dan chuan, Gunnisona chu min hmuh tuma lokal ni awm takin a sawi a..." a han ti a. Randy a chuan rang zet hian, "Chu chu ka pa min hrilh dan a ni," a rawn ti a. Harris a chu a han kawk a, mahse, engmah a sawi zawm leh ta lem hlei lo a.
"JH Ranch chu a lo thleng miah lo mai le. Dawt chu ka sawi ring lo ula, hretu ka ngah em mai," Harris a chuan a ti ta a. Appleby a pawh chuan, "JH ranch chu a thlen ka ring lo. Thi kan hmuhna velah khan, tu emaw nen an inhmu anga, inhnialna an nei anga, an in kap a ni ang. Chumi hnuah a kaphlumtu chuan Gunnisona ruang chu a thukru ta a ni ang," a ti leh a. Harris a chuan, "Tu tehreng in nge Gunnisona chu thah han duh ang le?" a lo ti a.
Randy a chu a lo țawng chhuak ve leh a, "Pathian lehkhabu chhal meuh pawhin ka that lo i ti duh ang chu. Ka pa thi ta chu i lawm ngawt lawm ni? I țhiante pawh hi," a rawn ti vei kak kak a. Rang deuhin mi hriattham mang si loh hian marshal Appleby a chuan, "I hmui kha chip hmak rawh," tiin thu a han pe a. Randy a chuan tihngaihna hre hek lo. Zak tak chungin lei lam a bih ta ngawt mai a.
Appleby an Harris a chu a han en leh a, "Jake, thil landanah hian i tan a hlauhawm thei viau mai. Mahse, min hrethiam la ka duh a, ka hna ka ti a ni mai a..." a han ti a. Harris a chuan a ngaihna a hre ta mang lo a. "Enge i sawi? Ka tan engmaw hlauh tur awm? Gunnisona nen hian kan inhmuh lohna a rei tawh teh asin," a ti ve ta a.
"A nih, nimin zing darkua leh dar sawm pakhat inkar khan heng i țhiante zawng zawng hian enge an tih a, khawiahnge an awm? Jake, thinrimin lo la lo la, ka hna ka thawk a, zawh țul ang ang chu dan angin ka zawt mai che a ni," marshal chuan a han ti a.
Harris a chuan, "Tom, i diklo ka ti lo ve... Anih, khawnge, i han chhut let teh ang u, " a ti ta a. A hma nia an awmna te chu an han sawi nghauh nghauh a, tuman Gunnisona kalna a kal an awm lo a. Hetih lai vel hian Sudden a chu a ngawi reng a. Marshal pawhin mak a ti deuh a, "Nang khawiah nge i awm?" tiin a zawt a. Sudden a chuan, "Yavapai khaw panin ka kal," tiin a lo chhang a. "Chuti chu, kawng lakah Gunnisona chu i tawk ngei ang," marshal chuan a ti a.
"Ka kalna kawngah chuan lo kal se chu hmuh pawh kan inhmu mial mahna, mahse, kan intawk lo a, hmuh pawh kan inhmu hek lo," Sudden a chuan a han ti a. Marshal Appleby a mi rawn hruaite zinga pakhat chuan, "Engah nge i hmuh loh tehlul ang... in in tawk a, i kaphlum a, a ruang chu i thukru a ni mai alawm. Tin, chu loah chuan, hemi ni kher kher hian engatinge Camerona kha i sual?" a rawn ti a.
Appleby a chuan, a sawi duh em em si, a ni tan han sawi mawi chiah si lo an rawn sawi chhuak ta chu tihzia a ti hle mai a. Sudden a chu a han en leh a, "Engtik hunah nge JH ranch hi i chhuahsan?" a ti ta a. Sudden a chuan, "Zing dar riatah," tiin a lo chhang a. "A nih engtik hunah nge Yavapai chu i thlen?" Marshal chuan a han ti leh a. Sudden a chuan, "Dar hnihah" a ti leh a. Marshal chu a phur ta hle mai a. JH ranch ațanga Yavapai kal nan hian, darkar hnih aia tam kal a ngai lo a, chu chu hre rengin, "I van thleng har em em ve?" awmze neife hian a ti ta a.
"Ka kual nasa bawk a ni. Johnstone leh Neuly a te hmun ka endik hmasa te te a, chutah, Yavapai khua chu ka pan ta chauh a ni, " Sudden a chuan a han ti leh a. Marshal chuan, "Hmutu che an awm em ?" a lo ti vat a, Sudden a chuan a lu a thing mai a.
"Tumahin an hmu lo che a, i thu mai chu hretu i neih si loh chuan rintlak a ni ta lo. Zing dar riat ațangin chawhnu dar hnih, hun a tam lutuk.. Yavapai thlen nan darkar li pawh lo hmang ta la, darkar hnih ala bo ta cheu mai! Gunnisona pawh i tawkin i thah theih mai a rinawm ta a ni. Chutah, a ruang pawh i thukru thei tho bawk a," marshal chuan inti thei fe hian a han ti a.
Harris a chu a lo țawng chhuak leh thung a. "Tom, engah nge, Green a hian Gunnisona chu a thah ngawt ang? Chhan engmah a awm si lo," a lo ti a. Appleby a chuan, "A chhan chu keiman ka han hrilh ang che. Randy a hian a pa, Gunnisona kha, Camerona chah chhuaktu, nangni ho umbo tura a chahchhuah ni ngeiin a ring a. Keipawhin ka ring a ni. A dik ngei ang," Inti thunei tak leh tifuh inti zet hian a han ti leh ta a. Sudden a erawh chuan, "In ring chauh a maw? Tak tak ti law law mai la!" awmze nei tak hian a lo ti ve ta a.
Appleby a chuan rang zetin Sudden a chu a han en a, "Thil tak tak a hria em ni chu le? " a ti rilru hial a. Han zawh chian chu chak viau mahse, ala hun rih lo niin a hria a niang chu, an thu ngaihtuah lai chu a han chhunzawm leh a.
"Thil awmzia chu kan sawi chiang ang e. Green a hian Gunnisona hi kawngah a tawk a, inhnialna an nei ta a. Green a chuan, 'Engahnge Camerona chu i chhuah' tiin Gunnisona chu a zawt a. Gunnisona chu a thinrim thut mai a, a puakruk a phawi a, mahse, hepa hian a that ta a ni. Chutah, Camerona pawh hi 'That law law teh ang' a ti a. Yavapai khua a thlen veleh Camerona chu a cho ta a nih kha," thiam takin a han ti leh a.
A rawn hruai te zinga palian deuh ber, Sudden a leh Camerona insual hmu ve tu khan, "Marshal i sawi ang chiah chu a ni," a rawn ti ve a.
Marshal chuan, "Tichuan.... Camerona chu a sawisa ta nek a. Mahse a tawpah kha chuan Cameron an a kaphlum țhelh zawk a, engmah a bul leh bal hre loin ka va lut a, Camerona kha ka kaphlum ta hlauh a, ka kahhlum hnuah chauh a ni thil awmzia ka hriat. Camerona tualthah tum kha ka kaphlum a ni mai a, Jake, hepa hi i hrechiang a maw?" a han ti a. Jake Harris a chuan, "Hrechiang teh reng mai. Jim Green a nih hi," a lo ti a.
Marshal chuan a lu a lo thing na na a. "Jim Green... ha... ha... ha.. Jim Green... eh, ka han hrilh ang che, he mihring hi, Texas ramah chuan tual a thah avangin Sheriff hoten an zawng nasa asin. Chung ramah chuan a hming pawh hi Jim Green a ni hleinem... ti raw.. Green ka sawi dawn em ni...Sudden?" a han tih meuh chuan, Harris a tih loh, lo hre ve zawng zawng te chuan mak an ti nasa mai a. Anmahni hriattham lek lekin an phun sap sap hlawm a.
Harris a chuan, "Ka hre daih tawh asin. Ka hnena a lo thawh tirh ni phat khan min hrilh nghal a," a ti ve thung a. Marshal chuan mak ti deuhin Harris a chu a en a. "Jake, Sudden a a ni tih hre reng in i lo chhawr lui ngat a ni maw?" ring deuh hian a han ti kher a.
Harris a chuan a thusawi chu an ngaisual ngei dawn tih a hria a. Appleby a chauh chu nisela, pawi pawh a ti lo a, a rawn hruai mi tamtak te khan an ngaithiam lo țan tih a hriat bakah, Appleby a chuan, "Jake, a nihna hre renga i hnena i thawh tir nachhan hi Gunnisona te ang thianfai turin a nih ngei mi tam takin an ring ang. Chutianga i tih chuan, helai vel ranch zawng zawng hi chu i thuhnuaiah i dah vek thei dawn a, " a sawi tum hriat tak hian a han ti a.
Harris a chu a țeu hlar mai a. "Chuti kher kher chuan sawi suh," a ti ve ta a. Appleby chuan, "Jake, mi ngaihdan tur ka sawi mai a ni. Nangin Gunnisona hi i that ka tihna a ni awzawng lo mai," a lo ti ve leh a. Harris a chuan, "I sawi dan kha ka duh lo. Jim Green a hi Sudden a a ni tih ka hriatna chu a rei tawh a, mahse, an lo sawi ang em em țhin hi chuan a sual ka ring mawlh lo e," a ti a.
"I rindan pawh a ni mai thei a. Mahse, Green a hi, Texas rama tualthat a puh a nih avangin ka man tho tho dawn. Gunnisona hi a thah avanga man chu ka ni rih lo. Engpawh nise, thil kalhmang zawng zawng ka en chhuah vek hma chuan rinhlelh thuah pawh ka hreng thei tho ang," marshal chuan a ti ta a.
Chutihlai chuan Randy a chu a lo țe chhuak a. "Texas rama tualthah vang... Yavapai khuaah ngei hian ka pa a thah chungah dan angin hrem tur a ni zawk," a rawn ti a. Appleby a mi rawn hruaite ho chuan dik an tih zawng tak mai a lo ni a, a țawng chu an lo zawm ta mur mur mai a, Appleby a chuan ban a phar a, "Green, țha takin inpe la a ni mai," a han ti a. Sudden a chuan pawisa lo zet hian marshal Appleby a chu a en a, a kut khinghnih chuan a puakruk chu a hnaih hle a.
"Marshal, nang leh i mi hruai paruk dang chu rang deuhin ka that hman ang che u," a han tih meuh chuan marshal mi hruai tam tak, Sudden a phawiran zia lo hmu tawh tute chuan an hlau ta hle a. An hnungtawlh ta a, Randy a phei chu a hnung berah a tawlh hman a ni. Mahse, Appleby a vethung chuan, engmah hlauhna leh timna nei chuang miah lo hian, "Min kaphlum țeuh mai thei a, mahse, i hnunga Susan Harris i leh midang kha chu an him bik lo tawp ang. Nang phei chu, chuti hlauh chu i ni ve tho ang," a ti ve ta a.
Sudden a chuan a han ngaihtuah a. Marshal thusawi chu a dik a ni tih a hre ta a. "Marshal a nih nih chu han ni phawt teh se, hun dang ala awm em ang chu," a ti ve ta a. Harris a chuan, "Tom, hetiang rinthu mai mai te chuan engtin nge Sudden a hi i khin hneh theih ang le?" a lo ti a.
"Jake, han chhut ve teh. Sudden a lo chu midang Gunnisona lokal hunlaia remchang nei an awm lo. Nangpawh hi fimkhur ang che. Hemi thuah hian i tel ve ngei pawh ka ring a, mahse, chu chu tunah hi chuan haider rih phawt teh ang," intithei fe hian a han ti a. Randy a chuan, "Rin thu aia tenau zawk pawhin mi an khaihlum tawh," a rawn ti ve leh ngat a.
"Ka dik leh dik loh chu kan la en dawn nia. Roreltu in ala endik dawn alawm. Khaile... Green, i puakruk paina kawnghren kha phelh la, leiah khan thlauhthla rawh," tiin thu a han pe a. Tihngaihna dang awm hek lo, thupek ang chuan Sudden a chuan a ti ve mai bawk a. Chuveleh, mi pahnih hian an rawn hnungkhirh nghal a, a sakawr chu pakhat zawk chuan a kai bawk a. A kut hnungkhirh chungin Yavapai khaw lam chu an pan pui ta a.
Harris a chuan Sudden a te kal chu rei lote a han thlir a, vawilehkhatah a tlan ta thut mai a. A sakawr chu ava kai chhuak a, a hnungah chuan a hote chuan an rawn zui nghal bawk a. Marshal te chu an umzui ta a. Reiloteah va umphakin, Sudden a bulah chuan an kal ve ta ngat a. Marshal chu a lawm lo hle a, "In lo kal ve a țul hleinem," mengnur tak chungin a lo ti a.
"Țul kan ti chiah bik lo a, mahse, fimkhur tluk a awm lo a, han ngaihtuah ve mah la, Sudden a hian tlan chhuah thut te a tum chuan ama tan a pawi dawn em a, Harris a chuan awmze nei deuh hian a han ti a.
Tunhma reng reng pawhin, tang, luman nei te phei chu a mantu hian, a nung chunga hruai aiin a thih hnua han hruai chu a awlsam a, tin, a lo thih takah chuan a luman pawh kha awlsam takin an la țhin a, chutiang ang chhuan lam angreng si a Sudden a hi marshal hian a thah mai an hlauh ruk vanga rawn zui an ni. An lo kal chhan leh an ring lo a ni tih a hriatin marshal chu a thinur hle a.
Tichuan, hmanhmawh takin Yavapai chu an pan a, Sudden a jaila an dah luh thleng chuan an țawiawm a. Sudden atan rorel hun ni thleng nghak tur chuan, Yavapai khua hotelah chuan Harris a leh a naute ho pawh chu an cham ve zui ta a.

SUDDEN
TROUBLE SHOOTER 9
A tuk zingah chuan, jail tifaitu pakhat hian, Sudden a chu a rawn kai tho a, "Sudden, tho rawh le. Vawiin chu i thiam thu i sawi dawn a ni lawm ni?" a rawn ti a.
Sudden a chuan, "Thiam thute ka sawi ve theih ngai chuan a țha ngawt ang chu. Sawi ta pawh ni ila, i pu hian ka thusawi reng reng hi a pawm duh dawn lotih la hre sa vek a ni. Chuvangin, sawi miah loin ngawi ta reng ila, a dang lam chuang lo'nge," a lo ti a. Jail hmunphiat chuan, coffee a duh leh duh loh te a han zawt a.Sudden a chuan, "Coffee thleng tui silna bawlhhlawh tak ang mai ka in țhin hi maw? Ka duh lo e. Tuisik thianghlim pang ngai min han pe zawk la, ka lawm ngawt ang," a lo ti a. Tui in tur a rawn pek hnu chuan, "In mehna min han pe leh thei la ka lawm ngawt ang," Sudden a chuan a lo ti leh a.
Jake Harris a khan Sudden a chu a khat tawkin a kan reng țhin a, an sawi dan chuan, engkim dan ang thlapa tih an tum a ni awm e. Marshal chuan Tucson khuaa mi judge pakhat a chah nghe nghe an ti, tih thu chu Sudden a a rawn hrilh a.
"A lan dan chuan, marshal hian engkim tihfel thuai thuai a tum a nih hi. Gunnisona fapa lah sawn, nang emaw, kei emaw hi khaihlum țalh a tum bawk si a, "Jim, thiamloh an chantir che chuan ava pawi dawn em!" Harris a chuan a ti ta a.
Chutia a han țawng zawh chuan Harris a chuan chhuah mai a tum a. Sudden a chuan nui chungin, "Chutiang em chu a ni thei dawn em ni? Gunnisona ruang pawh an hmu si lo a," a lo ti a. Tichuan, Harris a chu a kal chhuak ta a. Harris a chhuah hnu chuan Sudden a chuan thil awmdan chiang zawkin a han ngaihtuah leh a, "Eng em a ni lo'ng chu," Harris a hnenah chuan a ti tak naa, Yavapai khuaa mite chu Sabre hian an thu hnuaia an dah leh dah loh a thuin thil a kal ngei dawn tih a hria a. A diklo zawnga thil a kal vaih chuan, a țhiante, Harris a te pawhin an tuar ve pha ngei dawnin a ring tlat a. A lungngai ru hle a ni.
Chaw an rawn pek hnu chuan a meizial chu a han țan phawt a. Chaw rawn petu chuan, "Vawiin tlaia khaihlum mai tur si, i hmelah lungngaihna reng reng a lang lo mai a, mi mak tak zawng i nih hi le!" a rawn ti a. Sudden a chuan, "Ka pu, chutiang i rin ang chuan engmah a thleng lo ang," a ti mai a. Mahse, a rilru tak chuan a ring bik chuang lo. "Eh! Chutiang a ni thei dawn em ni? An thiam lo nasa che asin." Putar chuan a ti ta a.
"Gunnisona ruang an hmuh hma chuan, ka thah a nih leh nih loh hriat theihna tak, keimahin, 'ka thah a ni' ka tih ngawt loh chuan min khaihlum ngawt thei nang," Sudden a chuan a ti ve leh a. Putar chuan, "Vawiin leh nimin te khan, Appleby a hote chuan Gunnisona ruang chu an zawng reng a, mahse, an hmu zo lo a, a ngaihna pawh an hre phak lo," a ti leh a. Sudden a chuan, "Gunnisona hi i hrechiang hle em?" tiin putar chu a zawt a.
"Hriatloh a hleih ka nei lo" Appleby a hmaa thawktu hnenah pawh khan, rei tak ka thawk asin, tiin putar chuan a lo chhang a. Sudden a chuan, "Chuan engtik lai khan nge, engtia marshal Appleby a hi Yavapai khaw marshal lo ni thei mai nge maw a nih le?" tiin a han zawt leh a.
Putar chuan, "Kum thum dawn lai a ni tawh. Lung lumin a delh hlum a, a hming pawh George Roger a ni a. Pa țha tak leh nelawm tak a ni nghe nghe a. Tin, Appleby a marshal a lo nih dan hi ka hrechiang chiah lo na a, mi sawi dan chuan, Rogers a thih hnu lawk hian, Yavapai khuaah hian a lo lut a, marshal hna hi a rawn dil a, Gunnisona hian a sawipui nghe nghe a ni awm e," Santa Fe khaw lamah an lo inhre tawh a, chu khuaah chuan Appkeby a hi marshal a ni tawh a, a thawk zo hle tih pawh a sawi nual an ti. Midang han tih awm an awm si lo a, marshal hna chu an pe ta a ni. Engtizia a thil min zawt țeuh nge i nih? " putar chuan a ti let ve a.
"Thu zawh tam poh leh a chhanna a tam zel a... tih a ni lawm ni?" Sudden a chuan a lo ti hlauh a. Putar chuan, "I chung thu an ngaihtuah hunah chuan, chhanna chu i mamawh ngei dawn a, i inrin lawk a ngai ang. Tin, thu an zawt bawk dawn che a nia," a han ti leh a. "Ka pu, min hlauhthawn pui duh suh. Ka insawi fihlim thei em em ang," Sudden a chuan a ti ta a.
Sudden a chungchang ngaihtuah hun tur a ruat chu zing dar sawm a ni a, chumi hma daih chuan Yavapai khuaa mite chuan țhutna chan loh hlauin saloon lian ber Tyler a saloon ah chuan an khat țhap tawh a. An rorelna in a tet em vanga Tyler a saloon hi hmang an ni. Chubakah, ngaithlatu lam an duh thawh em vang a ni pakhat a, kil khatah chuan mi 12 țhutna tur hi an dawh kang a, tin, bangkil laitakah chuan chair hun theihna chauh tur hian thingphel an dawh kang bawk a, hei hi Judge țhutna tur a ni. Tin, mi 12 țhuttheihna an siam pawh hi, thu vawthlutu te țhutna tur a ni a.
Hemi ni hian Yavapai khaw chhehvel a ranch hrang hrang mite leh Yavapai khuaa puitling tawh phawt chu, thu ngaithla tur hian an kal deuh vek a. An kim hle a ni. Philadelphia leh Susan i an tel ve lo a, Sudden a țhiante hmel an han en ngawt pawhin engmah hi an beisei lo tih hi a hriat hliah hliah mai a. An thu hriat pakhat, Dancy a leh Randy a hian, Sabre ranch bawng an ruk thu an hre ru tih loh hi chu engmah Sudden a han pui thei awm an hre si lo. An rilru chu a hnual em em mai a ni. An beisei neih san ber chu, amaha Sudden a hi a insawi fel theih hlauh leh tih chu a ni mai.
Darkua leh a chanve a lo rik chuan, sakawr tawlailir hi a lo thleng a. Saloon kawtah chuan a rawn ding a, a chhung ațang chuan patawi lam deuh kawr dum suit a inchei, lukhum zuih deuh pet khum hi a lo chhuak ta a. "Judge a lo thleng ta," an ti sup sup a. Marshal chuan a hmuh veleh chibai buk tumin ava pan hnai a.
"Judge Mattingley a i ni phawt ang a. Marshal Appleby ka ni e," tih pahin chibai buk mai tumin a kut a han lek chhuak a. "Judge Mattingley kha eng emaw rokhawlhna avangin a lo lang thei lo a, a aiah keimah ka lo kal zawk a ni. Ka hming chu Bleke a ni," tiin chu pa chuan marshal chu melh țha duh lem lo chuan a lo chhang daih mai a. Appleby a chu mak ti hmel zetin a ang phuau mai a, a hmaa ding chu Arizona ram velah chuan hrelo an awm lo tih hial khawpa lar leh hmingthang a ni a.
Chutia Arizona Governor meuh thubuai rem tura lokal ta chu, mipuite pawh chuan mak an ti em em mai a. Appleby a lah chuan sawi tur pawh a hre mang tawh lo a ni. Makti zet hian Governor Bleke a chu a en ta reng mai a. Han tih ngaihna a hriat loh bakah, Bleke a chuan, "Kha tin ang phuau in ding reng suh. Thubuai sawina hmun chu rang deuhin min kawh hmuh ta che!" thunei deuh hian a ti ta a.
Appleby a chuan a han ngaihtuah chiang a, Governor meuhin thubuai a rem dawn chuan, theih tawp chhuah a, Sudden a chu khaihlum a nih loh vek pawhin kumkhaw lungin tan tir a, a lo chhawrtu Harris a pawh hi hemi ram ațanga hnawh chhuah dan zawn chu a tum rilru ta a, a rilru chuan nuam a ti țan hle mai a.
"Governor, min zui rawh. In lian dang a awm si lo a, saloon kan thianfai chawp ngawt mai a. Thu i pek veleh Sudden a chu an rawn hruai mai ang," Appleby a chuan a ti a. Governor Bleke a chuan Appleby a chu a zui ta a. Saloon chhung an va luh veleh chuan thawm chu a reh nghal a. Appleby a pawh chuan Sudden a chu rawn hruai turin a han hrilh a. Governor pawh chu a țhutna turah chian a han țhu a, a hmaa mipui țhute chu ngun takin a han enkual hmasa te te a.
Mipui chu an țhu ngawi țhuap tawh a. Governor chuan mimal tin chu a en kim vek a. Chumi hnu chuan, "Bleke a ka ni a, he thubuai hi dan angin engkim fel takin kenkawh ka tum dawn a, engmah mipui hian in siam ka duhin ka awih dawn lo. Ka hming pawh inhre vek bawk a, ka thiltih dan in hriat ang hian engkim ka ti dawn tih ka hrilh a che u," a han ti a.
Chumi a sawi zawh chuan Appleby a chu a zu en a, "Khawnge kan thubuai neitu chu? A van rawn lang lo ve?" a han ti a.
Sudden a chaw pe țhintu chuan, "Hei ka rawn hruai e," a rawn ti lauh a. Sudden a chu hnungkhirh bum chungin a rawn hruailut nghal a. Tang dahna tura an siamah chuan a han țhut tir nghal a. Bleke a chuan Sudden a chu a rawn en a, a inseh ruh a, lehlam a hawisan leh nghal mai a.
Governor chuan, "Engatinge a kut te in hnungkhirh vak mai?" tiin marshal chu a han zawt a. Appleby a chuan, chhan ngaihna a hre mang lo a, "Vang... a chhan maw... tualthata puh a ni alawm, ka pu," tiin a chhang ta ngawt mai a. Bleke a chuan, "Tualthata puh chu a ni ngei mai tih chu ka hria a, a thah a nih leh nih loh i fiah tawh em ni?" tiin marshal chu a han zawt leh a.
Marshal Appleby a chuan chhan ngaihna hre hek lo le, a lu a thing ta ngawt mai a. Chutah, Bleke a chuan Sudden a chu phelh turin a han ti a, putar pakhat hian rang takin a phuarna hrui chu a rawn zai chat a, "A hming a pu zo kher mai. Tar te e ti lo chuan a thin a chhe hrep a nih hi," tiin pa pakhat hian Bleke a hriat phak loh tur tawk hian a rawn ti a. A bula țhu chuan, "Ka hre bik lo le. Engpawh nise, pa nelawm zawk zawk chu a nih loh saw," a lo ti ve a. Tichuan, Bleke a chu an en leh ta a.
Governor Bleke a chuan, "Misual hming thang Sudden a an tih hi i ni em?" tiin Sudden a chu a zawt a, "Ka pu, chu hming chuan mi tam takin min ko țhin a," Sudden a chuan a lo ti ve mai a. Bleke a chuan, "I hming tak chu James Green a ni tiraw?" tiin a han zawt leh a. Sudden a chuan, "Ni e, ka pu," tiin a lo chhang leh a.
Bleke a chuan, "Green, Texas rama i tualthah thu hi chu kan sawi dawn lo a. Tunhmaa i thiltih sual dang reng reng pawh tunah hian kan sawi dawn lo tih hria la ka duh," a han ti te te a. Sudden a chuan en pawh en lem lo chuan a lu a lo bu ve mai a, Governor chuan, "A nih, tuin nge thu sawipui ang che?" tiin Sudden a chu a han zawt leh a. Sudden a chuan, "Midang rawih buai ka tum lo," tiin a lo chhang a. Chumi hnu chuan, Bleke a chuan marshal hnenah chuan, "Marshal, i in peih tawh chuan țan tawh rawh le," tiin thu a pe ta nghal a.
Appleby a chu a lo ding chhuak vat a. Sudden a hmaah chuan a lo ding a, "Tunah hian, ka thusawi fiah tum chu, Sudden a, Green a an tih bawk hian mi a thah ...," a han ti dek dek a, rang zetin Governor chuan, "I sawifiah tum ni loin thu tak sawi rawh," a rawn ti khauh mai a. Marshal chuan Governor chu a han en a, "Chutiang lo a ka tih chuan dan bawhchhia ka ni anga sin," a han ti ve a. "A chang chuan dan pawnah pawh thudik hriat theihna tur a nih phawt chuan tih zeuh zeuh a țha," Bleke a chuan a lo ti mai a. Chhun zawm turin thu a han pe zui nghal a.
Marshal Appleby a chuan Randy a chu a han ko a. Hretu dinna hmun a ding turin thu a han pe a. "Randy, i pa kalbo ni leh a kal dawna a thusawi te kha han sawi teh le,"a han ti a.
"Ka pa hi, Sabre bawng a bo fo țhin avangin a mang a ang viau tawh a. A rindan chuan, heng ranch tenau ho hi an nih ngei a ring a. Mahse, han fiahna tak a hrethei si lo a, a pawng a puia heng ranch te ho hi han vai hma ngawt chu, thisen a chhuah hnem a ring a, a duh bawk si lo a. Chuvangin, a bo tuk hian, Jake Harris a nen hian patling leh patling inbiakna neih a tum thu min hrilh a. Chutianga an inbiak theih a ring bawk a," Randy a chuan a han ti a.
"Midang hnenah a thusawi chu a sawi chhawng leh em?" tiin Appleby a chuan a han zawt a. Randy a chuan, "Ka hriatah chuan tuma hnenah a sawi ka hre lo," tiin a chhang a, "Ranch chhuahsan lai hmu an awm em?" Marshal chuan a han ti leh a, "Kan foremen in a kalchhuak chu a hmu ngei a," tiin Randy a chuan a chhang a. Marshal chuan, Bleke a chu a han en leh a, "Ka pu, a țul i tih chuan Dancy a hian sawi ve teh se " a ti ta a.
Governor chuan, "Sawi tir rawh," a ti a. Mahse, Dancy a chu la ko loin marshal chuan, "Engtik hunah nge i pa chuan Sabre ranch a chhuahsan?" tiin Randy a chu a han zawt leh phawt a. Randy a chuan, "Zing chaw eikham hnu dar sarih leh dar riat inkar vel a ni ang," tiin a chhang a. Marshal chuan, "Kal lo turin i ngen em?" a ti leh a.
Randy a chuan, "Ngen tehreng e. A hnena ka sawi dan chiah phei chuan, 'Sawtiang hmunah te chuan kal suh. I â ta a nih loh chuan kal reng reng suh. Kalna chi a ni lo," ka tih lahin engahmah a ngai chuang si lo a. A kal dawn hian midang ka hruai chuan Harris a hian an ranch bei tura kal emaw min lo ti anga, inkah palh a hlauhawm dawn em a, mahni a kal a țha zawk a ti tlat mai a, "Randy a chuan a han ti leh a.
Marshal chuan, "Chumi hnu chuan engtin nge ni leh ta zel?" tiin a zawt leh a. Randy a thin chuan a tuar leh ta pek lo a, "I hre vek tawh alawm," a ti ta hmak mai a. Mahse, marshal chuan, "Kei chuan hre vek e. Mahse, Governor hian ala hre ve lo a, chuvang chuan i hriat ang ang chu han sawi leh rawh," tiin thu a pe leh ta a.
Randy a chuan hrehawm ti em emin a han sawizawm leh a, "Ka pa kalchhuah hnu darkar hnih vel emaw ah chuan, marshal hi a lo lang a, coffee kan in dun a, chutihlai tak chuan Dancy a hi a lo lut a, "Randy, i pa sakawr, a zina thisen kai hnuangin a lo hawng," a rawn ti a. Chumi en tur chuan kan chhuak tlang ta a...," a han ti a.
Marshal chuan thu vawthlu tute lam chu a han hawi leh te te a, "Gunnisona sakawr chu thi hlirin a khat a. Sakawr tinah chuan hling khawng chi, tlang rama awm țhin hi a bur fur bawk a. Gunnisona chungah hian, thil engemaw rapthlak tak a thleng a ni tih chu hai rual a ni lo a, mahse, han tih vak ngaihna an hre si lo a. Dancy a hi kan pu, Gunnisona hnu han chhui turin kan tir a. Mahse, engmah a sawt chuang si lo. Ka tihngaihna hre lo chuan, Yavapai khuaa mite pun turin ka tlan hawng leh ta a," a han ti a.
Governor Bleke a chuan, "Engatinge Sabre ranch cowboy thlen i nghah mai loh?" tiin a lo chhuah chhal vat a. Marshal chuan, "Kan ngaihdanin JH ranch hnaih a a huho a kan kal chuan, Gunnisona hlauh ang khan, JH ranch ho hian anmahni bei tura kal emaw min ti anga, kan inbei chiam ang tih ka hlau a, chubakah, khua a thim mai dawn tawh si a, han zawn na tur lah kan hriatchian a ni bawk si lo a. A tihngaihna tak kan hre lo a ni," a ti a.

MIN LO CLICK SAK LEH THEUH DAWN NIA OO...IN FEL KHA

[Ngaia]

Chutah, marshal chuan Randy a chu a han en leh a. Chumi hnu chuan Sudden a hnenah, "I duh duh chu zawt rawh le," a ti a. Sudden a chu a lo ding chhuak ta a. Randy a hma chiahah chuan ava ding a, "I pa a thi ta a, tunge Sabre ranch chu nei ta ang?" tiin a han zawt ta phut mai a. Randy a chuan a ngaihna a hre mang lo a, marshal chu a en ringawt a. Mahse ani chuan engtinmah a lo ti si lo a, "I mi han zawh dan chu...ka pa a thih tawh si chuan, Sabre ranch chu ka ta tur a ni mai dawn lawmni?" a ti ta a.
"Sabre ranch hi engzat man nge ni ang?" Sudden a chuan a ti leh ta daih a. Randy a chuan chhan ngaihna hre mang lo zet hian țanpui beisei takin Governor chu a han en a, mahse, Governor chuan, hmel danglam chuang miah lo hian a lo en a, a tawpah chuan Randy a chuan, "Chutiang thleng thleng chuan ka chhang lo ang," thinrim țeuh hian a ti ta a.
A rin loh ang deuh maiin Bleke a chuan, "I chhang tur a ni," a ti tlat si a. A awm a chum a, "Hmu... in tih țalh chuan..dollar nuaihkhat emaw, a nih loh vek pawhin nuaikhat leh singnga vel man a ni ang. Thil chhut thiam mi ka ni lo a, a thiam ten engzat man nge an chhutchhuah ang tih zawng ka sawi thei lo," a ti ta a.
Sudden a chuan khawngaihna nei miah lo hian, "Chu, i hausa hle dawn a nih chu," a ti leh ngat a. Randy a chuan, "I thusawi awmzia chu ka van hrethiam lo ve," a lo ti ve thung a. Sudden a chuan, "Ka sawi awmzia chu.. Sabre ranch man tam zia i sawi tawh a, i pa hi a thih chuan i ta a ni nghal mai dawn a, chuvangin, nangmah ngeiin i pa hi thah duhna tur chhan țha tak i nei tih thu ka sawi mai a ni," a han ti leh ngat a.
Randy a chu a zuang tho zawk mai a. Sudden a chu hnaih chilh pahin, "I va han sawi huai em em ve. Chutiang thleng thleng te a i sawi ngam chu le," hmaisen țeuh hian a han ti a. Marshal pawh chu a lo ding chhuak ve hman a. Governor hnenah chuan Sudden a thil tih dan chu a dik loh thu leh hetiang hian ti tawh lo tura thupe turin a ngen a. Marshal chu chhang chuang loin Bleke a chuan dawhkan chu thing tuboh chuan a han chhu ri a, chumi hnu chuan inchhung chu a reh ta țhap a.
Governor chuan, "Green, i thusawi hian Gunnisona thih chungchangah hian sawifiahna leh zawmna tak tak a nei em?" tiin a han zawt ve thung a. Sudden a chuan, sawitlang ala duh loh avangin a lu a lo thing mai a, a țhu nghal a. Engpawh nise, Randy a rilru a tihbuai bakah mipui rilrua rinhlelhna a khung tak avang chuan a lawm ru hle a.
Chumi hnu chuan marshal chuan Dancy a chu ding turin a han ti ve ta a. Mipui ho chu an lo phun mur mur a, Governor in dawhkan a han chhut leh chuan an reh leh ta duak a. Marshal chuan, "Dancy, Gunnisona kal chhuak tur chu i hmu ngei maw? Anih leh Randy a hian a pa kal chhuah hnuin Sabre ranch hi a chhuahsan reng reng em?" a han ti a.
Dancy a chuan lu thing chungin, "Chhuak lo," a ti leh hmuk a. "I hmuh lohin a chhuak thei lo em ni?" Marshal chuan a han ti a. "A theih loh," Dancy a chuan a ti hul hak a. Marshal chu a țhu ta a. Sudden a chu a lo ding chhuak veleh a. Dancy a chu ngun deuhin a han en a, "Lafe Gunnisona khan Camerona hming hi a sawi i hre ngai em?" tiin a zawt a.
"A sawi ka la hre ngai lo," Dancy a chuan a ti a. "Anih, Camerona hian Yavapai khuaah hian mi pahnih a that tih i hria em?" Sudden a chuan a ti leh a, Dancy a chuan, "Hria e. Chumi hnua Camerona chunga thil thleng pawh ka hre zui," a ti ta a.
Dancy an a sawi zawh chuan mipui te chu an phun leh țan nghal a. Mahse, a sosan hmain Governor chuan a thing tuboh in dawhkan chu a han chhu ri leh dup a, a reh leh ta mai a. Sudden a chuan, "Chuti, Gunnisona hian Camerona hi a rukin a ruailo a ni ang maw?" tiin a han zawt leh a. Dancy a chuan a han inngaihtiah fe hnu chuan, "Ka hre bik lo. Rawih pawh a lo ruai mahna le," a ti a.
Chutia Dancy an a han sawi takah chuan, Sudden a chuan Randy a chu ava en a, "I pa,khan Johnstone a te țhiandun that turin Camerona hi a ruai em?" a ti ta sak mai a. Randy a chuan vin takin, 'A teuh nan,' a rawn ti thuai a.
Chumi hnu chuan Sudden a chuan harris a

chu a han ko ve ta a, "Pu Harris, thu pakhat ka zawt ang che. I țhiante pahnih that tur khan, Camerona hi i ruai em?" tiin Harris a,rin loh ang deuhin a zawt ta a. Harris a chu a hmel en reng rengin a thin a ur hle a ni tih a hriat mai a, "Jim, nang kher chu ni lo la, court e.. court lo e ka sawi lo ang. Ka that nghal ang che. Hmmm... i thu min zawh chu ka țhiante that turin tumah ka ruai lo," a ti ta a.
Marshal chu a lo ding chhuak veleh a, "Jake, la țhu rih teh suh. Thu pakhat ka han zawt teh ang che. Sudden a hi, a nihna leh a sualna hre rengin i ruai em ni?" a han ti a. Harris a chuan huai takin, "Ruai e. Misual a an sawina zawng zawng hi dawt vek a nih ka ring," a ti ngat mai a, "Tualthah ching leh misual tawpkhawk a ni tih hre reng chungin ilo ruai a, thil pakhat Sudden an a zawh loh che kha kan zawt ve teh ang che. Gunnisona that tir hian Sudden a hi i ruai em?" tifuh inti awm fahran hian a han ti a.
Hemi țum hi chuan, Harris a chu a thinrim hle mahse, a insum hram hram a. A hmelah erawh chuan a thinrim zia chu hai rual a ni lo. A theih anga damin, "Ruai tawp nang," a han ti dap a. Randy a chuan hmusit deuh hian, "Ruai mahse, a sawi duh tawp nang," a rawn ti a. A tifuh lo kher lehnghal a.
Bleke a chuan, "Naupang, khatianga i tih leh vaih chuan ni sawmthum jailah ka khung ang che. Midangte pawhin lo hria ula, court in a zawh loh che u chuan țawng pawh in țawng tur a ni lo," a ti ta hmiah mai a. Randy a chu a ngawi ta hmak a. Ama hriat tawk te in a phun a phun a. Sudden a rilruah chuan Jake Harris an a rawih loh thu a han sawi khan, Randy a hian pawm har a lo tih vang ngawta rawn ang chhuakah a ngai a. Sudden a chu a lo ding leh ta a.
Appleby a hnenah chuan Sudden a chuan, "Khaile, marshal, han ding ve rawh le," a ti ta mai a. Marshal chuan mak a lo ti khawp a, a mumang emaw a ti zawk hial a ni. Mahse, Sudden a hian, engmah, a tal chhuah theihna tak tak tur ala sawi theih loh avangin a rilru chu a ngaihngam em em a. A rilru tak tak phei chuan, "Sudden, i tan tih theih a awm lo," a ti a. Muang changin, a rawn ding a, Sudden a chu a han en a.
Sudden a chuan, "Gunnisona leh Harris an Camerona hi an ruai lo tih thu an sawi kha i hria anga, anih, an ni pahnihin an rawih siloh chuan tuin nge ruai ta ang? Ama thuin Johnstone a te țhiandun kha a that ringawt dawn emni?" a ti ta siah a.
"Camerona kha, min an rawih leh rawih loh thu mi sawi ka hre lo," nui deuh sawng chung hian marshal chuan a ti a, Sudden a chuan, "Anih, Yavapai khuaah hian Cameron a kha a lo kal palh a, Johnstone a te țhiandun kher kha a cho a, chhan awm miah loin a kaphlum ringawt a ni i tihna emni?!" Sudden a chuan a ti leh ngat a.Johnstone a te țhiandun khan an phawi hmasa a, ama inven nan, Camerona hian a phawi ve a, a lo rang phian a, a kaphlum ve ve ta a ni mai lawmni? Chhuanlam dang ila nei em?" phur surh hian marshal chuan a ti ve leh ta a. Sudden a chuan, "Nei hranpa lo e. Nang i nei bik em ni?" a han ti a. Marshal chuan tihngaihna a hre ta vak lo a, a man"Enge sawi i tum chu? I thusawi awmzia ka hrethiam lo," rang zetin a han ti a. Sudden a chuan, "Marshal, midang zawng zawng te i zawhna kha, nangmah ngeiin han chhang teh le. Gunnisona a thih lai khan khawiah nge i awm ?" a ti ta a. A rin loh taka khatia Sudden an a han zawt ta thut mai chu, a hlauthawng ta em em a. A ang phuau lehnghal a. A hmaa a lo ngaihțhatna zawng zawng chu a kiang ta veka, a inngaihtuah.nasa ta mai a.
Chutia marshal a inngaihtuah buai lai chuan, Sudden a chuan a rawn zawt zui lehnghal a, "Zingah JH Ranch dar riat velah i chhuahsan a, Sabre ranch lam panin i kal a, i chhuah rual vel awm chiah hian Gunnisona hian Sabre ranch a chhuqhsan a, a pan tumna chu JH ranch a ni. In kalna chu kawngkhat a ni a, kawng dang a awm lo a, mahse, ka hmu lo i tithei tlat mai a, marshal, a mak viau lo maw?" a han ti leh sak a.
Appleby a tihngaihna hre lo chuan a awm a han chum a, a chhungril taka a hlauhthawn zia chu lan tir loh hram tumin harsa ti takin nui hmel han put luih hram hi a tum a, a hlawhtling meuh lo nghe nghe a. Mahse, mi tam tak chuan, an lo en chik lem lo, mahse, Sudden a, Governor leh Harris a te chuan an lo en chik ru hle a, hlauh a nei tih chu an lo hre nghal mai a ni.
Appleby a chuam, "Ka hre bik lo. Ka kalna kawng a rawn zawh ve pawh a ni ang. Chutiang a nih loh pawhin, heng ranch tenau neitu emaw hi min ti ang a, min hmu hmasa anga a biru a ni ang," a han ti leh a.
Sudden a lah chuan, dim hlek loin, a chhu zui zel si a, "Marshal, mak i ti ve lo maw? Gunnisona thatah min puh a, kei, Harris a hnuaia thawk, a huat em em tur leh a hlauh em em tur chu min bihruk san loin nang, a hriatchian em em che chu a bihruksan ang che maw?!" a han ti leh a. Marshal chuan, chhan ngaihna pawh a hre tawh mang lo a.A han chhan apiang mai chuan, amah leh amah a inawk thuk tulh tulh hian a hria a. Mipui lo ngaithlatute lah chuan, thil awmzia chu hrefiah hle in an inhria a. Rum deuh deuh hian Appleby a chu an en a, "A insawi fel thei tawh lo ang," an ti rilru țheuh mai a. A hma kha chuan Sudden an thubuai a nei a, tuna a landanah erawh chuan Appleby a hian thubuai chu a nei zawmah zawkin an hmu ta a ni....
Sudden a bawk chuan, "Ka chunga i thusawi ngei kha ka sawi nawn leh dawn," tihpah chuan Marshal Appleby a hma siahah chuan ava ding a, "Marshal, nang hian a ni Gunnisona chu that thei a, hun pawh nei remchang ber, chhan țhatak pawh i nei ang," a ti leh a.
Appleby a chu court chhungah chuan a han hawi kual a, mahse, țanpui tu awm hmel reng reng a hmu lo a, an hmel ava hmuh reng reng te chuan rum zet zetin an lo en țheuh mai si a. Tunah zet zawng, "Aw... ka tan in sawina tur thil ka hre ta lo," a ti rilru a. Mipui lah chuan, Sudden a thusawi leh tur an lo nghak țhuap a, mahse, marshal mangang kha a lo ding chhuak leh a, Sudden i â ta em ni? Engvang in nge Lafe Gunnisona hi thah ka duhna chhan tur? aw khur titih chung hian a ti ta a.
Sudden a chuan court chhung chu a han en a. "Kapu, thuhretu mak deuh ka nei," a ti ta a. Chumi hnu chuan Shorty a, putar, JH Ranch a an thuhruk kha rawn hruaichhuak turin Kitsona chu a chah ta a. Kitsona chuan rang deuh maiin Shorty a chu a rawn hruai a, Randy a chu a țe chhuak țhawt mai a, marshal pawh chu a mak ti lutuk a lo ding char ve reng mai bawk a. Tumahin he putar hi an hre hlawm lo a, "Tunge a nih?" an ti mur mur hlawm a, Sudden a rawn țawng veleh chuan a reh ta duak a.
Governor hnenah chuan, "Hei hi, Shorty Willis a a ni a, Shorty, i thu hriat ang chu han sawi teh le," Sudden a chuan a lo ti a. Shorty a chu tar tawh tak mai hi ani a. Sudden a ngen ang chuan, Dancy a leh Randy a bawng ruk thu chi a sawi ta zar zar mai a. Mipui lo ngaithlatute chu an ngawi țhup mai bawk a. Shorty a chuan, an ni pahnihin bawngruk an ven tir dan te, a nin an ruk anih a hriat lohzia te chu chiang takin a sawi ta vek mai a.
Chutia Shorty an a sawi lai la la chuan, alo ngaithlatute ngaihdan chu a hriattheih nghal a ni. An phun deuh sup sup mai a. Hetiang ema mahni hnathawhna te bawng ngei han ruk sak chu an hriatthiam loh zawng tak a ni mai a. Shorty an a sawi zawh chuan, Sudden a khan, Randy a kha ava en a, "Randy, sawi tur i nei ve em?" ava ti ngat mai a. Randy a chuan chhan tumin a ka a han ang zuau a. Mahse, aw reng reng a chhuak thei ta lo a.
A sawi chhuah theih hma chuan aw vin zet hian a rawn chhan khalh ta a. Dancy a kha, thinrim em emin a lo ding chhuak ta a, "Kha putar thusawi kha tumahin pawm duh suh u. Hmanah, bawng lo enkawl turin ka chhawr tawh a, mahse, a lo hralhru fo mai a, ka umchhuak a, ka hnawt chhuak daih a nih kha.. ka khaihlum lo a, a vannei zawk ngawt a ni. Tar ani tawh a, ka khaihlum lo mai zawk a ni. A thusawi lo pawm hi chu amah ai mahin an â zawk a ni ang," a rawn ti a.Dancy a thusawi chu Shorty a chuan ngun takin a lo ngaithla a. Hetianga dawt a han sawi thei mai hi mak a ti em em a. A ngaithlatute lah chuan thuthar an hre leh ta si a, rilru put lam tur pawh an hre hlawm tawh lo a. An ngawita țhuap mai a, Sudden a chuan, chutianga dawt muhlum ringawt mai Dancy an a rawn phuh chhuak.mai chu mak a ti viau na a, a hrethiam tho a ni. Dancy a hi lo țawngchhuak lo sela chuan, Randy a chu a in țawng awk ngeiin a ring a. Dancy a hmel a han en leh pawh chuan, a hmaa a awmdan ai ngawt chuan nuam a tih hmel tawh zawk a. Randy a hmel pawh chu a danglam leh hle tawh mai a.
Bleke a chuan, "Shorty, i thusawi te chu a dik ngei a ni tih i sawifiah thei ang em?" tiin a han zawt a.Shorty a chuan a lu a thing a, "Chuti mai chuan ka sawifiah thei lo. Mahse, bawng rual ho Dancy an a rawn khalh te chuan awmna ka hria," a ti a. Tumah chu țawng loin an ngawi țhup a, Shorty a chuan, "Dancy a thu leh ka thu a ni tawh mai a... a harsa em ni?" a han ti a.
Court chhunga awm zawng zawngte chuan Dancy a chu an en țhup a, a ni chuan in tithei em em in, "Chung bawngrual a sawi te an awmna ka hriava tih chu an awm miah lo," a rawn ti ta a. Sudden a chuan a hrethiam vek a, Dancy a hian, chung bawng rual chu a khalh sawn leh tawh a nih hi, a pawi mange," a ti rilru a.
Dancy a chuan, han țhut leh mai hi a tum a, mahse, ring takin Sudden a chuan, "Dancy, ding rih rawh," a rawn ti ta a. Dancy a chu a lo hawi a, "Enge ni ta? Eng thil te nge ka ruk tak pek?" nuam ti takin a lo ti let ve a. Sudden a chuan, "Lo nghak lawk rawh," a ti mai a. Thu vawthlutute chu a han en a, "Hman deuh kawk khan Susani leh Philadelphia te hi an lo lambun a, Susan i sakawr hi an kah sak bawk a, amah tak erawh chu an fuh lo a, an vannei hle nghe nghe a ni, Philadelphia a erawh chu a luah an kah saka, a ni pawh hi a vannei a, a thawi chauh in an thawi a ni," a han ti a.
A ngaithlatute ho chuan mak an ti hle a, hmeichhiate leh zel pawh kap duh an lo awm chu an hrethiam lo hle a, an phun leh ta mur mur mai a. Mi țhenkhat te chuan, Sudden a thusawi chu an lo hre nual tawh a, mahse, a tam zawk erawh chuan an lo la hrelo hlawm a ni.
Sudden a chuan a sawizawm leh ta a, "Philadelphia chu a nat vak loh avangin kan pahnihin a lo lambun tute chu kan chhui ta a. Sabre ranch thlengin kan chhui a, Gunnisona pawh kan be nghe nghe a ni," a ti a. Chutah Dancy a chuan, "Lafe Gunnisona chuan a lo umchhuak leh che u a ni lawm ni?" diriam hmel fe hian a lo ti a. Țhenkhat chu an lo nui țhu hlawm a, "Lafe Gunnison an hmeichhia that tura a lo rawih chu!" an ti rilru hlawm a.Sudden a bawk chuan, "Khami hnua thil thleng ka hmuh i hre tawh lo anga, Sabre ranch kan chhuahsan hnu kha a ruk tein ka lo kir leh a, in sakawr dahna hmun te ka en vek a. Sakawr pakhat chu a tlan nasa hle a ni tih hriat takin a thlan te pawh ala hul lo a ni. A ke ka han en leh a, ka rin ang ngeiin a ke tin sir te chu hling khawng tak takin a chhun chik nuk mai a. Chu sakawr keah chuan chhinchhiahna ka siam nghe nghe a ni. Hmu leh ila chu ka hre em em ang," a ti ta a.
Dancy a chu a hlauthawng leh ta hle mai a. Tihngaihna hrelo tak chung chuan, "Chuti chuan...," a lo tingawt a. Sudden a chuan țhenkhat awmho hnenah chuan, "Pawnah sawn va chhuak ta ula, Dancy a,sakawr hi va ensak teh u. A ke hnunglam veilamah JG tih ka ker ngei in hmu ang," a ti a. Chutah zet chuan Dancy a chuan awm ngaihna a hre ta mang lo a, midang mit pawh a en ngam ta lo a. A kun ta reng mai a, reilote chhungin Sudden a tirh te pawh chu an lo lut leh thuai a, "A sawi ang chiahin JG tih a chuang kalh mai, " an rawn ti nghal si a.
Mipui te chu an phun leh ta mur mur mai a. Mahse, Governor chuan a tuboh lianpui chuan dawhkan chu a chhu leh ta bur mai a. A reh leh ta țhiap mai a, Governor chuan Dancy a hnenah chuan, "Sawi tur i nei em?" tiin a han zawt a. Dancy a chu a han in ngaihtuah vang vang a, "Governor, ka sakawr hian hling te chu a pai ve pawh a ni thei, ka pha lo. Chumi chung thuah chuan... tin, a hming JG tih pawh chu a lo ziak.kher a ni thei a, a tum chuan hun a tam em a. Ka kher a tih chuan a kher a ni mai a, ama thu ngawt chu pawm tur a ni bik dawn em ni?" a han ti zo chu amah pawh chu a inchhuang hle a ni.
"Thil dang enge ka tih i sawi thei leh mai lo maw?" Sudden a chuan a lo ti a. Dancy a eilru nuam tawh sa chu a danglam leh ta vek mai a.Sudden a hian engthil nge a hriat ruk pek tiin a hlauthawng ru hle a. Chuvang chuan a thiamthu rang taka sawi chu țulin a hre ta a.
"I thil tih thu chu thudang, mahse, Susan i te țhiandun chu ka lambun lo tih hi hre rawh." Dancy a chuan a han ti sak sak a. Mahse, a rilru erawh chu a nuam thei tak tak lo. Sudden a hian thil hriat ruk engemaw tak a nei a nih a ring tlat si! Sudden a thu zawh leh nghak chuan a țhu ta a.
Sudden a chuan a rawn sawi ve leh ta a, "A lo lamvun tu hi Sabre ranch ațanga lo kal ngei a nih ka rin avangin Sabre ranch thleng rawkin ka kal a, sakawr hah deuh mai ka hmu bawk a, a kalna pawh hriat theih khawpin hling a rap hrep a. He hling awmna hi hmunkhatah chiah a ni nghe nghe a. Chuti chung pawh chuan engmah ka hre lo, i ti thei a maw?" Dancy a hnenah chuan a ti leh ta nghal a.
Dancy a rilru chu a phur ta a. Hun remchang Sudden an a siamsak taah ngaiin, "Ka thil hriat zawng zawng ka hrilh vek law law ang che. Nia, sawi vek mah ila i tan sawngsawhlawtna a awm chuang lo ang. Gunnisona i thah avangin chhuanlamah thildang dang i sawi mai mai a ni zawk lo maw? A pawi hleinem, Sudden, zan rei tawh hnua i sakawr enkawl tura ka tih kha a lo kir leh thei ta lo a, enfiah turin ka va kal a, chhuatah a lo tlu der mai a....,""...engmah bo a awm lo a, ka mihring pa lah chuan tumah ka hmu lo a ti bawk si! Engah mah ka ngai lo a, mahsu tunah nangmah i inpuang ta bawk a, ka sakawr keah i hming te ilo ker mai mai avang hian i țhiante chu ka lambun tihna em ni?" a han ti veleh ta siah mai a. Mipui hmel a han en leh hnu chuan a lamțang peih mi hlir niawm takin a zuk hmu lehngjal a, a lawm rilru hle mai.

In lo click leh hram+ dawn nia ooo