SUDDEN - IN THE CAVE OF THUG (Completed)

[Ngaia]

SUDDEN - IN THE CAVE OF THUG
AUTHOR : C. THANGZUALA
CHAPTER - 13
(Rozami Pachuau)

Sudden-a te pahnihin midang hmuh theih lohna hmun an thlen chuan an in um zel lo chiang kher mai. Elizabeth-i chuan Sudden-a, pangpar kung lian tak nghenga ding chu a nghawngah a kuah chawt a, "Jim, ka ngai lutuk tawh che asin, engati nge ka bulah i awm duh loh? Ka tan chuan i bula kala, rawn pan fo che hi a mawi si lova, nang chu ka pa pawhin kan chhung zinga mi ang hialin a en che a, rawn kalin, zan rei tak thleng pawhin ka bulah awm mah la, ka pa chuan mi hauh phah dawn chuang lo tihte hi hre ve tawh rawh, nang pawh a hau bawk lovang che," a ti ta mial mial a.

Sudden-a pawh chuan engmah pawh sawi lovin Elizabeth-i rawn dak chho ha, a hmui no chek, fawh nawm hmel tak chu duhthawh em em chuan a lo fawp ta ngawih ngawih zawk a; an thisen pawh a lum rang dun kher mai. Sudden-a chuan Elizabeth-i taksa no nalh em em leh hrisel tih hriat tak, lum hiam hiam maiin a han kuah chial chuan ţim uai uai hian a inhria a. Rei tawk an infawh hnu chuan ui tak chungin an hmui chu an phawi ta hram a. Chutah, Sudden-a chuan, "Elizabeth, i bula awm chu ka thil chak ber alawm. Mahse i bula ka awm chuan tuiral mai dawnin ka inhre hial a, chuvang chuan kan awmdun tam loh hi a ţha rih zawk a ni. Zalen taka kan awm theih hunah chuan i nin hlui khawpin kan la inkawm em em ang, i bula ka awm hi chuan thildang ka ngaihtuah thei thlawt si lo," a ti ve ta raih a.

Elizabeth-i chuan, chu chu a dik tih hrereng mah se, han hnial leh vel chu a duh hrim hrim a, "Min ngai lo tawp tihna nih chu. Ka bula awm ai chuan i sakawr lianpui bula awm a, rampalailenga mahni chauha vah vah pawh i duh zawk daih alawm; chu lo rengah, zalen taka kan awm hunahte chuan mi kalsan daih i tum tawh awm si a," a han ti leh a. Sudden-a chuan, chu chu a tum dan leh atana ţul a nih miau avangin chhan ngaihna hre lo chuan a riat nawi vel ta mai mai a, thudang a sawipui ta daih a. "Ti teh, helaiah hian i ţhu zawk teh ang," tiin an hma lama ţhutna tur an dawhah chuan a kai phei ta a.

Elizabeth-i chu Sudden-a mal karah chuan a ţhu a, a hnungin a âwm chu a ngheng a. Sudden-a chuan nula chu kuahin a biangahte chuan a han fawh sak zauh zauh ţhin a, chutah, "Eli, nangmah chauh chuan khawiahmah kal tawh lovang che, an ru bo chiah che kha chu ka alh lo chauh a ni ber e," a han ti hmasa ta a. Elizabeth-i chuan, "Ni e, ka chhuak tawh ngai hauh lovang, chhuah ka châkna leh sakawr chungchuan ka châknate pawh a bo zo duakin ka hria. Mahse, i bula kal tur ka nih erawh chuan khawi hmunah pawh châk takin ka kal zel thung ang," a ti ta a.

Sudden-a chuan, "I châk tak tâk anih chuan a lawmawm a nih chu; mahse, ka kalnaah reng reng chuan i kal vena chi a awm loh avangin i pa bula i awm hi a ţha ber," a han ti ve a. Elizabeth-i chuan, "Stephan-an ka pa thah a tum thu a han sawi meuh kha chuan ka thidang lo chauh a ni, mahse, nang i awm chuan tumahin ka pa hi an thah theih ka ring ta lo. Hmana min rawn lam ţum pawh khan, nang chu awm lo la chuan ka pa kha an kaphlum ngei dawn asin," a han ti sap sap a. Sudden-a erawh chuan, "Chutiang a ni hlei nem. Awm lo mah ila, in naute ho rintlak tak tâk an awm bakah i pa chu a thi mai lovang tih ka ring tlat a ni. Mahni tawkah nang pawn pasal i la neiin, fa pawh i nei thuai anga, him takin i pa chuan a la awmpui zel dawn che a ni," a ti thung a.

Elizabeth-i chuan rang takin Sudden-a chu a thawh san phat a, lehhawi meuha Sudden-a chu enin, "Sudden, ka rin aiin i nunrawng daih mai. Heti khawp hian ka hmangaih che a, nang lo chu midang, pasala neih ka tum loh zia pawh ka hrilh tawh che a. Chuti chung pawhin pasal dang neia, hlim taka awm turin mi han ti amaw? A teuh loh mai! Chu ai chuan i pistol, i hman thiam em em kha zei deuhin han phawi leh la, ka thinhnunah hian mi han kap la, nang nei lova midang ka neih ai chuan i pistol mu khat paia, tu tan maha nupuia neih tlak lohva ţawihral pawh ka duh zawk," tiin a ţah aw ta ţiau mai a.

Chuti khera a han ko chu Sudden-a pawhin a ngaithei lo deuh a, tunhma outlaw a nih laia a hming chu paihin, nun tharin a nung tawh a, tuna a hmangaih ber maiin 'Sudden' tia a han lam ri chu a duh lo hle a ni. Engmah pawh sawi lo chuan lei lam bihin a ngawi ta run mai a. Elizabeth-i pawh chu mittui tla fap fapin lehlam a hawi ta a. Rei tawk chutia an awm hnu chuan Sudden-a chu a rawn ţawng chhuak hmasa ta a, "Tunhma chuan Sudden - outlaw chu ka ni ngei alawm, thilsual tam tak pawh ka lo ti tawh ţhin a. Tunah erawh chuan kawng dik lam zawhin ka thil lo tihsual tawhte hi rul zo vek thei lo mah ila, theih ang tawk chu rul turin ţangpui ngaite pawh ka lo ţanpui ve ta ţhin a.

"Ka ţhiante ho phei chu ka chungah an ţhain, Sudden - outlaw ka lo nih tawhna chu hre duh lovin, mi tam tak pawh ka chungah an ţha em em a, mahse, i chungah chuan Sudden - outlaw ka lo nihna chu a bo thei si lo a nih hi. Chuvang chuan i tan pawh neih tlak ka ni lo reng a, in leh lo pawh nei lova hetia vak mai mai hi ka ni leh zel bawk nen, mi hausa leh fel tak neia, hlim taka awm turin ka duh che a ni. Chu chu ka hmangaih vang che a ka duhpuina che a nih chu. I huatthu ka lo sawi avang erawh chuan min ngaidam la, mahse sawi lo thei ka ni lo tih erawh chu min hriatthiampui ve ang che aw," tih pah chuan a tho a, Ranch tualzawl lam a pan ta a.

Elizabeth-i chu a dinna ngaiah chuan a la ding ta reng tho a, a rilru chu a nain, ţah vak mai pawh a duh a, mahse, Sudden ti khera a lo ko kha erawh chu a inchhir hle bawk a, ngaihdam han dil leh tur lahin a awm tawh si lo. A rawn kir leh mai beiseiin a han hawi phei ţhin a, ani lah chu a reh hlen hmak mai si a. 'Sudden' ti a a koh laia a hmel hlim thei tak han ngui ta rawih pawh kha a hmu reng a, tisual a intiin, Sudden-a chan chu a chana a han dah chhin chuan a hriatthiampui hle a. 'Ka hmangaih vang zawk chein hlim taka i awm theih nan, midang nei turin ka duhpui che a ni, in leh lo nei pawh ka ni ve si lo,' a tih ţawngkamte chuan a rilru a khawih hle mai a. Sudden-a a rawn lan leh tak mai loh avang chuan Ranch tualzawl lam chu a pan ve ta hna hna a.

Tualzawl a va thlen chuan Brydon-a te pahnih chhek in siam chu Sudden-a chuan a lo pui mawlh mawlh mai a, ngaihdam dil a duh vanga a va pan phei chuan Sudden-a lah chuan hmu awm pawhin a lo lang duh si lo. Hreh tak chung chuan, "Jim, nichin khan ka lo tisual palh der a ni, min ngaidam ang che," zawi sap hian a ti ta nge nge a. Ani chuan, "Mai maia, engmah sawi sual i nei hlei nem, thil dik tak alawm i sawi," zawi dap bawk chuan a lo ti ve a. Sawi leh tur dang a van em avang chuan Elizabeth-i chuan Ranch lam chu a pan chho ta hnak hnak a.

Elizabeth-in a hriat phak loh awm velah chuan, "Nang pek hian kan pi kha i lo va vaw tak tak emaw ni pek le? A hmel kha i lo hmu ve em? A ţah teuh zia kha. He Ranch-a ka thawh hnuah khatiangin a hmel ka la hmu ngai lo. 'Ka sawi sual a ni' te kha a la ti ta lehnghal a, enge maw a lo hrilh che le, Jim?" mak ti takin Harry-a chuan a ti ta hau mai a. Sudden-a lah pek chuan intihhlim luih hram hram tumin, "Bawngin mit pathum a nei tih mai mai alawm a sawi le," a lo ti mai a. Brydon-a te pahnih pawh chuan an awih chiah lo a ni ang, an in en dun hrak hrak a.

Harry-a bawk chuan, "Bawngin mit pahnih emaw sawm lai emaw pawh nei ta ni se, chuvang maia ngaihdam dil ngai leh kan pi hmel, khati khawpa tidanglam theitu a nih ka ring lo reng reng," a ti nang nang a. Sudden-a chu za lo fe hian a nui huk chauh a. Sudden-a chuan a thil tawn dan chanchinte chu an pu hnenah report ve thuai thuai pawh a duh viau na a, Elizabeth-i nena an intawn dan khan, han sawi vel pawh a chak loh phah tir rawih a. Mahse, hrilh ngei chu ţula a hriat si avang chuan tho lo zet chuan a kal ta hram a.

A han thlen chuan, nidang ang lo takin an pu bulah chuan a fanu chu a lo awm lo teh mial a, choka lama a awm a han ring rilru ngawt a. Norton-a hnenah chuan Funy-a chanchinte chu a han hrilh ta zung zung a. A tawpna atan, "Hetianga min lo enthlak reng ţhin vang hi lo ni nekin, a inah pawh awm hman lek lovin a chhuak reng mai tih thute pawh ka dawng a. Tunah zet chuan Stephan-a pawhin thil tih zung zung chu harsa a tih phah viau maithei a ni. Mahse, chu mi chhung chu a rei loh viau ka ring," a han ti dap dap a.

Norton-a chuan, "Thil hi a mak teh e, Thirdeng pa te saw chu mi ţha puiah ka lo ngai mai a, chutiang te'n a han tih duh mai mai chu le! Sheriff hmasa lah kha a bo vang vang a, chutah Pilkington Bank rawknaah khan a rawn tel ta nawlh mai bawk a," tiin a mak tih thu chu a sawi chhuak ve ta hial a. Sudden-a chuan, "Rin loh ang tak hian thil hi a awm duh châwk reng a ni. Chuvangin, tumah hi rinawm tura pawngpaw ngaih ngawt chi an ni lo reng a nia. Hei vang hian kan chet chhuah vat hi a ţulin ka hre ta a, a rang lamin Pony Cross chu kan va bei tur a ni," tiin rawtna a siam ta nghal a.

Norton-a chuan, "Ţha i tih hun hun chu beih hun a ni mai alawm," a lo ti ve leh thluam a. Sudden-a chuan, "Kan naute ho hi ka hruai anga, nang i lo tel ve chu a ţha ka ti lo a ni. A tu a pawh kan vanduai thei ţheuh a, a vanduaia i ţan hlauh phei chuan tu in nge he Ranch hi enkawl ta anga, tu in nge i fanu hi enkawl ang? Chuvangin, i rawn kal loh chu a fuh zawk ngei ang," a ti ta a. King Norton-a chuan, ni viauin a hria a, mahse kal ve ţalh a duhna chu a lian hle a. "Kal ngei ka tum a ni, Stephan-a saw'n ka kut hi tuar ve ngei se ka duh a ni; kal pawh ni ila, a vanduaiah chuan ka ţang lo maithei asin," a ti ve tlat a.

Sudden-a chuan, "Maithei, vanduai maithei bawk. Lo thi palh ta la chuan i fanu hi rethei leh hrehawm takin i siam anga, Stephan-a kutthlak pawh chu tum hle mah la, chuti mai chuan duhtawka sawisak theih anih chu a rinawm loh a ni, chuti maia inpek ai chuan, thih ţhak thlenga ţan khawh pawh a duh zawk ang. Chuti a nih chuan, i phuba lak tum pawh chuan awmzia a nei dawn lo tihna a ni mai a, nang kherin i tâwng fuhin, i kap ngei ang tih lah hriat lawk a ni si lo. Puk chhungah chuan mi engzat nge awm a; an tam hle a, kan kal lai min lo hmuh hlauh phei chuan min lo that mâng parh maithei asin," tiin a hnial ta fan fan a.

Norton-a chuan Sudden-a thusawi chu a dik zia pawh a hria a, a borala a ţan hlauh chuan a do hram hramna chu engmah lo a ni leh dawn a, chuvang chuan hnial ngaihna hre lo chuan a ngawi zawkah a ţang ta a. Sudden-a bawk chuan, "K.N Ranch huam chhungah hian puk a awm reng em ni?" a ti ta daih a. Norton-a chuan, "Lian vak lo pakhat chu a awm a, puk rimchhe tak leh ţangkaina nei lo ni maiah ka ngai mai a," a lo ti awlsam ve mai a. Sudden-a chuan, "Big Trust ram dep, chhimlamah sawn em ni?" ti a a han zawh leh chuan, Norton-a chuan a nih thu chu a han hrilh a. "Kan naute ho zingah hian, chu puk awmna hria chu an awm ang em?" tiin Sudden-a chuan a han zawt leh a.

Norton-a chuan, "Awm tehreng e, Tito-a te hi chuan an la kher lo ang a, midangte chuan an hre vek ang. Va en chian i tum deuh em ni?" a han ti a. Sudden-a chuan, "Vawiin chu hna kan zo thawkhat tawh bakah, a la hma deuh bawk a, hun khawhral nan, chu puk chu va en mai mai ila ka duh khawp mai," a ti ta a. Norton-a chuan a han en vung vung a, "Thil engemaw hmuh i inbeisei deuh em ni pek?" a han tih chuan Sudden-a chuan, chu chu a kal tum chhan a nih thuin a chhang ve mai a. Norton-a vek chuan, "Va kal mah la, engmah i va hmuh chu ka ring chiah lo, Jim, mahse, i duh phawt chuan i va kal dawn nia," a ti ve ta a.

Sudden-a pawh chu rei awm tawh lovin a chhuak ve leh ta a, Brydon-a te pahnih lo insil thlandai mek chu a va pan a, "In han insil tak na a, kan kal chhuah leh a ngai tlat mai. Chhimlam ramah sawn puk rimchhe tak awmin kan pu chuan a sawi a, chu mi awmna chu in hriat chuan min va hruai teh u," a han ti a. Brydon-a chuan, "A hriat chu kan hre nameuh mai, mahse, saw puk saw boruak ţha hip tur a vang si a, kal ka chak lo teh mai ania aw," a han ti nang nang a.

Sudden-a chuan, "E, thil ţha deuh pawh kan va hmu maithei a ni, i va kal thuai teh ang u; chuti lo zawng, kan ţhiante rualin Ration kan dawng ve hman lo palh ange," a han tih chuan Harry-a chuan nuih var var pahin, "Ni e, Brydon, thatho takin insiam ta che, bawng mit pathum nei pawh kan hmu ve maithei asin," tiin, fiamthu duh ta na na na chuan a han ti chhuak leh ta pek a. Brydon-a pawh chuan nui chungin, "A ni dawn teh tak e, ka lo hre lo a ni," a han tih ve hak hak chuan Sudden-a pawh za lo fe chuan a han nui ve hak a. Tichuan, an insiam a, an ram chhimlam pan chuan an inzui chhuak ta dam dam a..

An sakawr te chu a kalin an kaltir bauh bauh a, puk awmna lai vel chu darkar chanve lai an kal hnu chuan an thleng ta a. Chu puk awmna chu a langsar lo hle a, Nevada luikam, fur laia tuihawk luan vena kawr khawkrawk zet mai bulah hian a lo awm a. Brydon-a chuan, "Eheu, he puk chu kan tlawh ngai hauh si lova, sakawr hnu a va chiar nasa dep dup ve," a han ti chhuak ve phawng mai a. A ni reng lah tak a, puk bul velah chuan sakawr rualkhat rahna hnu ni mai awm hian a chiar nuk a. Sudden-a chuan, "Keini'n tlawh ngai lo mah ila, tlawhtu chu a nei ngei tih a chiang mai alawm," a ti ve mai a. Brydon-a chuan hma a hruai a, an lut ta a.

An sawi lawk ang ngeiin a lo rimchhe kher mai tak a, Sudden-a pawh luak lo hram turin a insum ngat ngat a. Puk bang vel chu ngun fein a han bik kual chiang a, a khat tawka thir changin a khak zeuh zeuhna niawm taka a lo paw hrât tih mai bak chu thildang hmuh tur vang a ti em em a. A puk chhuat erawh chu mihring rahna tih hriat tak hian boot hnuhmate a awm nuk a, chu puk chuan hlet a nei lo tih hriat tak hian chung boot hniakte pawh chu a chhuak leh lam pawh a lang nuk a. Mahse, pheikhawk dangdai tak, rangkachak zawnga tlang sang tak tâk lawna bei chiam ţhin, Miner hote chauhin an bun ţhin, pheikhawk hnuai pawh thap hrup mai thla chu a lut lam hnu chu a awm ngei a, mahse, a chhuak leh lam hnu erawh a hmu tlat lo.

Chu veleh, "Brydon, lo ding teh, ka rawn kal hmasa teh ang. Ka hnungah fimkhur leh thawm dim takin lo kal teh u," a ti ta a. Brydon-a chu a ding ve mai a, Sudden-a chuan fimkhur leh inring takin hma a hruai ta zel a. Chu mi Harrya'n a han hmuh chuan nuihza insum hramin, "Enge maw, hetiang puk rimchhia leh ţawpah hian awma i rin reng reng le? a ti ta a. Sudden-a chu ding meuhin a han lehhawi a, "Mihring hmel kan hmu maithei, ka hriatna te a dik lo zo tawh te a nih ngawt loh chuan. Chuvangin fimkhur takin min rawn zui rawh u, kan hmelma a lo nih a, kan va pawh chawt mai zawngin kan nuih a za lo teh mai tur a nia," zawi sap hian a han ti ta a, a kal leh ta a.

Harry-a pawh chu Sudden-a ti tak hmel a han hmuh khân, ho mai maia fimkhur a nih chu a ring ta bik lova, a thupek ang chuan thâwm dim takin an zui ve ta a. Sudden-a chuan hma a hruai zel a, pawn lama en ang mai a lo ni hauh lova, a lo sei hle mai a. An lut thuk tial tial a, a thim tial tial bawk a. Rei vak lo hnuah phei chuan rahna lai tur pawh an hmu hlei thei ta lova. Harry-a chu a han chiar leh nang nang ţhin a, mahse Sudden-a chuan zaizir hian a khap vat zel a.

Thawklehkhatah Sudden-a chu a hriatna mak tak chuan a dintir ta chat a, a hmaah chuan enge awm tih chu hre chiah lo mah se, kal zelna chi a ni lo tih chu a hre ta tlat mai a; hetianga hriatna mak tak a neihna avang hian vawi tam tak a nunna pawh a chhanhim tawh reng a ni. Brydon-a chu Sudden-a bula din pah chuan, "Enge ni ta, luh thuk zel châk lohna i nei em ni?" a han ti sa sa a. Sudden-a chuan, "He puk hi a tawp thleng i lut tawh em?" tiin a lo zawt let ve thung a. Brydon-a chuan, "Teuh nang le, hmana Benjo-a te nena kan kal ţumin thui vak lo kan lut tih mai chauh a ni. Chu mi ţum chuan helai pawh hi kan thleng lo," a han ti leh a.

Sudden-a chuan a iptea nawalh chu phawrhin a han nawt alh ta zet chu, an hma lawk feet hnih emaw lekah chuan khuarkhurum thuk lutuk mai hi a lo awm reng mai a, Brydon-a te pahnih phei chu an hnungtawlh dawrh nghe nghe a. Sudden-a erawh chuan, chu khuarkhurum kotlang chu chik zetin a han bih a, a thuk em avangin a mawng pawh a hmu pha lo reng reng a; a rilru pawh chu a buai ve map a, chutah chuan mi tumah an lut thla lo tawp ang tih pawh a ring mai a. Chuti ni si, a nawalh chhit en hnuaia hniak a hmuhte chuan puk ril lam chu a la pan tlat bawk si! Chuvang chuan lehlamah an kai phei a nih chu a ring ta ber a.

Chutiang a ngaihtuah avang chuan a nawalh fung alh mek, a ken lai pawh chu a lo hre chang lo tawp mai a, a kut, meiin a han hliau chuan a harh leh zawk a. A dang a han nawt leh vat a, a lehlam kai theihna awm chu chik fe hian a han bih leh a, mahse, kai theihna tur awm chu a awm lo mai ni lovin, lung han rah theih tur, pawng eih pawh chu a awm lo reng reng a. Puk ril lama luh zel chu a la tum miau si a, chu khuarkhurum a han bih ngial lah chuan hnuhma reng reng a hmu thei bawk si lo. A nawalh ken pawh chu a lo ral leh a, a dang a han nawt leh a, a ding chhuak ta a, "Hetiangin a thim dawn tih chu hria ila, meichher emaw khawnvar emaw tal ken tur ania le," a ti ta sap a.

Brydon-a chuan, "Jim, kan kir leh mai dawn em ni? Kal ngaihna pawh a awm tawh si lo," a han ti ve sap a. Sudden-a lah chuan kir leh mai chu a tum lo hle a, "Hei chen kan kal tawh a, a tawp thleng chuan ka kal tho dawn a ni. Nangni erawh chuan hetah hian min lo nghak ula, silai vawi thum ka kah ţhuai ţhuai chuan 'engemaw a awm a, tlanchhuah a ngai a ni' ti a ka signal na che u ni sela, puk kawngka lamah in tlan anga, puk kawngkaah khan min lo nghak mai dawn nia," a ti ta a. Harry-a chuan, "A lehlam saw thlen phei theih i inring a ni maw? Thla nei la zawng, i thleng ngei tur hi a ni a, mahse hei chen hi kan inzui tawh a, thla i neih reng reng kan hre bawk si lo, tum duh ting lo mai rawh," a lo ti thung a.

Sudden-a chuan, "Thla chu ka nei lo chiang alawm, mahse, ka zuang phei dâwn a ni. Ka zuan kai phak loh leh he khuarkhurum, a mawng pawh hmuh phak lohvah hian ka tla anga a ni mai a, mahse ka kai thei hlauh a nih chuan, he puk hi a tawp thlengin ka en thei dawn tihna a ni bawk ang," a la ti ve fan mai si a, Harry-a chuan tihngaihna hre hek lo, a lo chek tlak tlak ringawt a. Sudden-a bawk chuan, "Tikhan, nawalh kha lo chhi eng ula, ka han tum chhin tehreng ange, ka pha ta ngang lo a nih pawhin in tan, thlan laih a ngai lovah ngai mai ula," a ti ta et zawk a.

Tichuan, a hnung lam pen sawm lai turah a han tawlh kir te te a, a insangmar a, chu khuarkhurum, feet 15 vel lai tura zau chu huphurh rilru tak chuan zuankai a tum ta miau mai si a. A theih tawka chak chuan a tlan a, a kotlang a thlen veleh chuan a tha neih zawng zawng sawmkhawmin a han zuang ta dawrh mai a. Khaw enga zuang chu ni se, zuan dan tur pawh a thiam theih deuh tur hi a ni a, mahse, kea va rah tur nge, kuta va man tur tih pawh a hisap thiam thei meuh lova.

Theih tawp tak meuha zuang a ni bawk a, a zuang thui hle a, mahse a kotlang chu a va rap pha ta tlat lo mai a, a dawk thla ta purh mai a. A vanneih asiamin a kut chuan a kotlangah a inham tang thei ta hram a. Rei lo deuh chu a han chawl rih dat a, a kotlanga inham kai tum chuan a bei ta a. A bang vel chu a lo nal hle mai lehnghal a, a rah tumna apiang chu a tleu zarh zarh zel ta mai a, a dawm pawh chu a tlah ţhelh hial a. A tlak thlak mai chuan thluak darh chuai khawpin a zuk insawh dawn tih lah a hre reng si a, a theih ang ang chuan a inham tang leh hram hram a.

Brydon-a te pahnih lah chuan an foreman, khuarkhurum kotlanga inham tang lang lang chu han puih an chak hle na a, puih theihna an nei der si lo; hlauthawng takin nawalh engah chuan an lo thlir dauh dauh ringawt a. An nawalh han thim laia, a dang an nawh hlante chuan a lo tla hman ang tihte chu an hlau em em a.

A ban tha pawh a kham ta hle mai a, chutia a uai reng chuan a ban tha chuan a tlin reng dawn lo tih lah a hre reng bawk si. A tawpna atan tiin a tha la neih ang ang hmang chuan a han bei leh fat fat a, a tawp a tawpah zawng a lawn chhuak ta nge nge a.. Engmah tih zai pawh rel lo lekin puk bang ngheng chuan a ţhu ta hle hle a, a thaw hlap hlap a, a lo thlir rengtute pahnih pawh chu an lo thaw ve huai a.

Chutia rei tawk a ţhut hnu chuan a lo hahdam leh ta deuh bawk a, muang raiha thawh pah chuan zawi tak, mahse, hriat theih tur si hian, "Ka sawi ang khan, silai vawi thum ka kah ri in hriat chuan in tlan chhuak dawn nia," a han ti nawn leh a. Anni pahnih lah chuan makti zet hian an thlir dun dauh dauh a. Sudden-a chuan a silaite chu an ţha tawk em tihte a han check leh te te a, puk chhungril lam pan chuan a kal ta a.

Thawm dim thei ang berin a kalna tur indap chawp rak rakin a kal ta hram hram a. Puk chhung chu a la rimchhiat bakah khuarkhurum kai nan khan a tha a lo hman nasat avangin a chau hle lehnghal a, a luak chu a chhuak hlui mai a. A kalna tur chu thim hle mah se, nawalh han nawh en zel lah a chiin a hre si lo. A kea a kalna tur dap hmasa zel chuan a kal ta a, aimitthlawn chu nep te zawkin a thim bawk a. Chutia hmu thei lo chunga a kal zel lai chuan puk chu veilamah a kawi ta nghat a ni tih chu a hre ta a, chu mi kawi a pelh chiah chuan, eng a hmu ta tlat mai le! Khati taka kalkawng pawh thim si, helaia eng lo awm ta ngawt mai chuan, awm an awm tih chu a tifiah ta hle a.

A va kal hnaih deuh hnu chuan, chu eng chu lalţin pakhat hi a lo ni a. A va hnaih zel chuan, chu engah chuan mi pakhat hi engemaw ker hian a lo buai hle tih a hre ta a. Tlema a va kal hnaih leh deuh chuan, chu pa chuan enge a kher tih chu a hrechiang ta hle mai le! Chu puk bang leh a chhuat tam zawk chu rangkachak hian a lo tle vur mai a, a chhuat ami ringawt pawh chu Sudden-a chuan engzat man nge ni ang tih pawh a chhut thiam phak lo.

Muangchangin Sudden-a chuan chu pa chu a veh phei ta ţham ţham a, a bul a va thlen dawn ţep chuan a han khuh ta kharh a. Chu pa chu a zuangkang lawp a, Sudden-a chu hlauh hmel zet hian a rawn melh a. Sudden-a chuan, aw thum chhek chhawk hian, "Engvangin nge he puk chhungah hian i luh ringawt a?" a han ti bung nghat a. Chu pa chuan, hlau tih hriat tak, mitmeng pawng hlawt hian, "Rangkachak zawn hi ka hna a ni a, helaiah hian Stephan-a leh a hote an lo kal fova, engemaw a awm ngei ringin ka lut ve ta a ni," a ti khur dut dut a.

Sudden-a chuan, "Rangkachak emaw, mihring zawng pawh ni la, mi ram chhung a nih hi i hre lo em ni? Tu hnenah nge he puka lut tur hian phalna i lak?" a han ti leh a. Chu pa chuan, "Tumah phei zawng ka dil lo, Stephan-a te pawh an lut a, ka lut ve mai a ni," a ti tham ţuak a. Chu veleh, Sudden-a chuan rang zetin a pistol chu a phawi ta thut a, chu pa chu tin pahin, "Stephan-a hote tih anga ti i nih ve chuan an hremna tuar tur chu nang pawhin i pumpelh bik dawn lo tihna a ni mai alawm," tiin a pistol cheng chu a kau ri ta rap mai a.

Chu pa chuan, hlau, thlabar, mangang takin, "Min that lo hram rawh, khawngaihtakin, tichuan ka lâk tawh sa hi kan insem dawn nia," a han ti ţial ta ruan ruan a. Sudden-a erawh chuan, "Thih i duh lo anih chuan i lak tawh sa pawh kha khawih tawh suh, chhuak nghal la, a khamphei zawnga hnuhchhuah kher che chu ka chak lo ania," tiin a han vau leh chheu chheu mai a. Chu pa bawk chuan, "Mahse, ka lak sa..," a sawi zawh hma chuan Sudden-a bawk chuan, "I lak sa a ni emaw ni lo emaw, he ram chhungah hian, ta i nei lo reng reng. He rangkachak hi i nunna aia i ngaihlu zawk a nih loh chuan ka thusawi chu zawm vat mai rawh," a han ti leh a.

Chu pa pawh chuan a nunna ai em chuan rangkachak a lo lak sa chu a ngaihlu ta bik lo a ni ang chu, tho lo fe hian a tho chhuak a, a lalţin leh a hmanrua, thir niawm tak, inthlep chhawng tup chu a pu a, a kal ta hnu hnu a. Sudden-a pawh chuan chu pa rangkachak lak sate chu a fun a, a zui ve ta a; lalţin eng aţang chuan chiang takin a kil lampang bang leh a chhuat zawngah chuan rangkachak hi a lo awm zai mai niin, mahse puk kawkel lam ang em chuan a tam lo. Tunhmaa an lo lak tawhna ni ngei turin a kawi piah lamahte pawh chuan an kerna hnuhma a lo kaw thluah mai a.

Khuarkhurum an va thlen chuan chu pa chuan a thil put chu a han nghat a, a inthlep chu awlai tak hian a pawt mar ta zur a, leihlawn sei tawk hi a lo ni reng mai. Chu leihlawn chu a khâmkai ta ut a, an zawh phei ta zai zai a. Chutia, Sudden-a te pahnih rawn inzui phei ta mai chu makti fe hian Brydon-a te pahnih pawh chuan an lo en reng a. Harry-a chuan, "Nang zawng, hetiang ang puk chhungah pawh ţhian tur i hmu thei zel mai a leh!" a han ti thut mai chu, chu pa pawh chu a phu chiang kher mai.

Sudden-a chuan, "E khai, he puk hi Stephan-a chuan a lo hmu fuh a, chuvang chuan alawm he ram leh a chhehvel a lo beih vak chhan pawh hi...," a tih lai chuan Brydon-a chuan, "Tak tak maw? Enge a chhan? Enge awm?" a ti ta hlut a. Chutih lai chuan Sudden-a chuan a ip khai chu a han hawng a, "Hetiang hi tam lutuk mai puk kil tawpah chuan a awm mawle, a chhuatah ringawt pawh a man chhut chhuah mai phak loh khawpa tam a awm a ni. Chu ai mah chuan a bangah a la tam ta leh nghal!" a han tih takah chuan mak tiin an ka dun ta hau mai a.

Brydon-a chuan lek kan pahin, "E heu, kan pu chu a va hausa dawn tehreng ngai ve aw!" a a ti ta vawng vawng a. Harry-a pawh chuan rangkachak chu melh pahin, "Tunah chuan Stephan-an kan pu ram a lo duh em em pawh hi a awm viau e. Jim, nang chu kan zingah rawn tel lo la chuan, heng zawng zawng leh K.N Ranch ram hi Stephan-a ta a ni vek mai dawn si a, he ram hi Stephan-a chuan nei thei ta lo pawh ni se, keini leh kan pu ringawt hi chuan he puka thil awm hi kan hmuchhuak awm tawp si lova," ngaisang tih hriat taka Sudden-a en ran chuan a han ti lang lang a.

Sudden-a chuan, "Awm lo mah ila, engtikah emaw chuan in la hmuchhuak tho ta ve ang," a lo ti mai a. Harry-a bawk chuan, "Engti kawng mahin kan hmuchhuak lovang, khatiang khuarkhurum mawng, hmuh phak pawh ni lo chu zuan khum han tum ngam tur kan zingah kan awm loh bakah, a ţulna hria kan awm lo reng reng," a han ti leh a. Sudden-a chuan, "Kei chauh lo pawh, midangte pawhin kha.. an lo hre tawh a ni a, an lut leh chhuak in hmuh fo chuan luh ve a, kha khuarkhurum kha chu thing emaw dawhkaia kal kai zawng in tum ve tho ang; tuna mi pawh khan leihlawn dawh tur a ken mai kha in hmu ve tho a ni lawm ni? Awlsam taka kan rawn kai mai kha," a han ti leh a.

Harry-a chuan tih vak ngaihna hre tawh hek lo, "Nang zawng, engti kawng mahin kan tluk lo chiang khawp mai che, kan pu lah chuan a atchilh che a ni hrim hrim mai a," a han tih chuan nui ţha duh vak lo hian, "Hetiang zawnga in atchilh hi vanneihna a nih dawn phawt chuan kei chu vanneih loh mai ka duh rum rum zawk," Sudden-an a han tih chuan Harry-a pawh chuan chuti lam sawipui reng chu a duh ta bik lova. Tichuan, an pu hrilh hlan nghakhlel tak chuan an kir leh ta a.

[Ngaia]

SUDDEN - IN THE CAVE OF THUG
AUTHOR : C. THANGZUALA
CHAPTER - 14
(Rozami Pachuau)

Sudden-a te hovin Ranch an va thlen chuan a thim deuh chhalh tawh a, an țhiante ho pawh an lo haw kim tawh a. Brydon-a te chuan an pu hrilh tur chuan an foreman a awm tih hriain an țhiante hnen lamah an puk hmuh chanchin chu hrilh turin an kal ta vat zawk a, Sudden-a pawhin a sakawr corral-a dah zetin, rangkachak ip chu a khai a, a pu hnen lamah chuan a chho ta a. Rangkachak a han hmuh chuan King Norton-a chuan, phâwk deuh hu a Sudden-a en leh pahin, "Ka ram chhungah hetiang rangkachak țha chi lehnghal hi a lo awm a maw?" lawm em em chuan a ti ta hu hu mai le !

Sudden-a erawh chuan muang charh hian, "Kha mai kha a ni awzawng hlei nem, puk kil tawpah chuan a chhuat leh bangah a awm zui mai a ni," a han tih zet chuan lawm takin Norton-a chuan, "E Jim, tunah chuan kan vannei ve dawn ta e. Aw, Jim, heti em ema ka tana i țangkai hi chu.. ! Ka damchhung pawhin ka rul zo tawh lo che, hei pawh hi, awm lo la chuan kumkhua chatuan pawhin ka hmuchhuak i-khaw lovang, Stephan-a erawh chuan min that a nih loh pawhin a thiar vak vak mai dawn a ni si a," Sudden-a chhuang em em chuan a han ti hluam hluam a.

Sudden-a ve thung chuan, "Ni lo, awm lo mah ila engtikah emaw chuan in....," a tih lai chuan, "Teuh lo, ka thi daih tawh zawk ang," Norton-a chuan a lo ti vat a. Sudden-a, mit la lo leka lo entu Elizabeth-i pawh chuan, "Ni e, kan thi lo anih pawhin Stephan-a lak bang nawi mai mai asin kan chan ang ni," a rawn tih ve takah chuan Sudden-a chuan țawng ve leh chu duh viau mah se, hrehna tlat a neih tawh avangin a ngawi ta daih zawk a.

Norton-a chuan a lawm avangin Sudden-a chu zana zu no dawmpuiah a sawm a. Sudden-a erawh chuan, "E, a ngai lo, ka hah bawk lo va, i mi sawmna erawh chu ka lawm tawk khawp mai," a ti mai a. Norton-a chuan, "Anih leh le. Amaherawhchu, chaw tal kan kil ho dawn lawm ni?" a han tih leh pawh chuan Sudden-a chuan, "A châkawm khawp mai, mahse ka nau te'n nuam an ti lo ang e, an zingah ka ei ve zawk ang," a tih leh tak zel siah chuan Norton-a pawh chuan puk chanchin chu a zawt ta zel zawk a.

Sudden-a chuan, "Kan luh tirh chuan a thim lem lo a, kan lut thuk tial tial a, a thim tial tial a, khawnvar eng tel lo phei chuan engmah hmuh theih a ni ta lova, a rim lah chu a tui lo em em bawk a. Ril feah khuarkhurum zau tak, thuk em em a awm a, chu mi piahah chuan puk chu a kawi nghat a, chumi piah lam zawng chu a chhuat leh bangah a lo de noh noh tawh mai a. Mi pakhat hi lalțin inchhawpin a lo awm a, a lo ker chhuak mek a, lungmuang taka a awm laia mi han hmu thut chu a phu chiang kher mai! Tichuan hengte hi a ker chhuah sa a ni a, min han dil na a, mahse kan ram chhung a ni a, chanvo a neih ve loh thuin ka chhang a. Chutah kan rawn chhuak ho ta a, helai ram chhunga rawn kal leh ngai tawh lo turin ka hrilh ta a ni," tiin an puk va tlawh chanchin chu a hrilh ta malh malh a.

Ngaihnawm ti takin an pafa chuan an ngaithla dauh dauh a, Sudden-a sawi zawh chuan Norton-a chuan, "Chu pa chuan ama tana la nge a nih a, Stephan-a tana la tih i zawt lo maw?" a tih chuan Sudden-a chuan, "A sawi dan chuan Stephan-a te lut lai a hmu a, chuvangin a lut ve ta a, a la ve ta a ni. Rangkachak zawng mi niin a insawi a, kei pawhin chu chu ka ring," a ti a.

Amah vek chuan, "Naktuk zingah chuan Pony Cross chu va beih a ngai dawn ta a ni. Kan naute ho zinga pahnihin puk saw veng se, pakhatin Ranch hi veng tlat bawk sela, midang zawng erawh chu ka mamawh dawn avangin hruai ka duh a ni. Tin, Old Joe-a leh Stoddard-a te pawhin rawn tel ve an tum a; an tel chu ka duh chiah lova, mahse 'Beih kan tum hunah chuan kan rawn hrilh ang che u' ka lo ti tawh si a, hrilh loh chuan an vui viau ang. Chuvangin kan hrilh ve anga, keini, pasarih kan nih bawk chuan a tawk viau ang. A theih phawt chuan pakhatmah chhuah lova thah fai vek ka duh a, mahse chu chu sawi theih a ni si lo," tiin a ruahman lawk leh a țha tihdan chu a hrilh a.

Norton-a chuan, "Ranch inah chuan awm pawh a ngai kher hlei nem, kei ka awm chuan a tawk mai e. Ka duh dan phei chuan kal ve ngei pawh ka duh a, mahse i sawi ang khan a țha ber lem lo thei tlat si a," a han ti chuar chuar a. Sudden-a chuan, "Pakhat tal chu inah hian awm rawh se, rangkachak puk pawh vengtu awm ngei bawk se, thil fel taka ruahman a theih hma chuan rangkachak va lak pawh awlai lo tak a ni," a han tih chuan Norton-a pawh chuan Sudden-a ruahmanna a țhat țhin zia pawh a hre fo tawh a, a hnial ta bik lo va, "Engkim i ruahman ang ngei chu ni rawh se," a ti ve ta a.

Sudden-a pawh chu a naute ho awmnaah a chhuk ve ta a, a thil ruahman dan a han sawi chuan an phur tlang hle hlawm a. Stephan-a te va beih chu an chak tawh zia pawh an sawi sap sap a. Stephan-a hian an Ranch a khawih sak țhin bakah an țhiante pawh a lo thah sak fo tawh avangin khawih ve chu an chak hle a. Zanriah eikham chuan thla a eng nuam bawk a, Sudden-a chu sakawr chunga chuangin an țhenawm ho hnena a thil tum dante hrilh tur chuan a chhuak ta a.

A kal chhuak lai chu bathlar ațangin Elizabeth-i chuan a thlir zui vawng vawng a. A hmuh thei tak loh hnu chuan, "Huaisen leh rorum pasalțha, hetiang zan khawthim pawh hian i tumna chu a dal chuang lo che a, kei ngei pawhin i thil tumah chuan ka dal thei lo che a, nangmah avanga ka muthilh theih loh leh ka hrehawm ziate hi min hriatthiampui der si lo, i thiltihna apiangah chuan vanneihna dawng mawlh ang che," a han ti zui sap a. A pain a rawn au ta bawk a, inchhungah chuan a lut ta vat a.

Norton-a chuan a fanu hlim lo ta riau chu mak a ti hle mai a, Stephan-a rukbo vang kha han ti dawn ila, a hnuah pawh a hlim em em leh tawh si a; Sudden-a khuaa a va kal hlan pawh khan an pafain pangpar huante hlim takin an tifai dun a, Sudden-a nen an infiam zo a rawn luh ațang chiah khan a hlim lo tih pawh a hre bawk a, chuvang chuan a zawt ta hlawl mai nghe nghe a. "Bawihi, vawiin hi i va hlim ta lo em em ve maw le, damlohna i nei nge, enge ni a chhan ni ta? Nang i hlim loh chuan kei, i pa ngei pawh hian nuam ka ti bik lo va, ka hlim thei hauh lo ania," a ti ta phawng mai a.

Elizabeth-i chu a pa bula țhu vein, "Engmah dam lohna leh hlim lohna ka neih ka hre hlei nem ka pa," a ti mai si a. A pa erawh chuan a awih der lo mai a, "Ka fanu i ni a, i pa ka ni bawk a, kan karah engmah zep lo la, sawi hreh tur a awm bawk lo. Ka hnena i rilru hahnate i sawi hreh chuan tu bulah nge i sawi chuan ang? Chuvangin vei i neih chu min hrilh ve ngei la, eng ang thil pawh nise ka haw lo tawp ang che," a ti duam duam a.

Elizabeth-i chuan a pa thusawi dik zia chu a hre ve reng a, a rilru hah zia chu hrilh ve țha chuan a hria a, a hreh angreng hle thung a. Thawk a la ta halh a, "Ka pa, min hau lo tak zet ang maw?" a han ti te te a. A pa pawh chuan rang takin, "Ka hau lo tawp ang che, ka fanu neih chhun hlim lo leh ngui taka i awm chuan kei pawhin hrehawm ka ti a, chuvangin mi hrilh vek la, ka theih ang tawk chu i tan hian ui reng ka nei hlei nem," a lo ti ta vut a.

"Hhsss......A, ka pa, Jim-a hi ka hmangaih em a, chu chu hmana Pilkington-a Denny-a nen min lo țanpui ațang daih tawh khan a ni a, amah pawhin min hmangaih ve thu mi hrilh tawh a, chuvang chuan nasa takin ka hlim zual hle țhin a. Mahse, vawiin kan infiam zawh khan i chanchin kan sawinaah keiin i thih mai ka hlauthawn thu leh Stephan-an thah che a tum thute sawiin, Jim-a a awm ve phawt chuan an thah theih che ka rin loh thute hial pawh ka sawi a. Ani chuan, 'I pa chu a thih mai ka ring lo, nakin lawkah zalen takin in la awm ang a, nang pawhin pasalte neiin, fate i la nei ang a, hlim takin in la awm ho dawn zawk alawm' mi ti ta daih mai a. Midang nei tur anga min sawi chu na ka ti em em a, a bulah pawh țhu duh lovin ka thawhsan ta daih a.....," tiin Elizabeth-i chuan a pa a hrilh lai chuan..

Norton-a chuan, "Chu ringawtte hlim lohna chhan tur a ni hlei nem, a duh ve che anih phawt chuan kei pawhin in inneih chu ka remti ve tho alawm. Tin, mihrang ang pawhin ka en bawk lo va, chungte zawng, rilru hah nan hmang duh mah ta che Bawihi, a duh loh thu che pawh a la sawi chuang lo a ni lawm ni? 'Pasal neiin hlim takin in la awm anga,' a tih pawh chu tunge i pasal tur pawh a sawi hran bawk lo va, amah a insawi pawh a ni ve thei tho asin," tiin Elizabeth-i thusawi lai chu a lo pawtchat ve thung a.

A fanu chuan a sawi zawm leh a, "Chu mai a ni lo asin ka pa, chutia ka thinrim leh nâ ka tih lutuk chu sawi tumin, a tan huat tur a nih lam pawh ngaituah chang lo lekin, 'Sudden,' ka rin aiin i lo nunrawng daih mai, ka hmangaih zia ka hrilh tawh hnu che pawhin pasal dang nei turin min la tir a maw? Midang neih ai chuan i pistol mu khat paia țawihral pawh ka duh zawk," tiin ka ankhum a. Chu veleh lungngaihna nasa tak nei ang maiin a ngawi ta hmak a, kei pawhin sawi leh tur ka hriat tawh loh avangin lehlam ka hawisan daih bawk a.

"A tawpah chuan Sudden outlaw a nih chu a zep loh thu leh a nun sual lo hman țhinte chu a theih ang anga rulh tuma a beih dante, mi tam tak pawn outlaw anga an hmuh tawh loh thu leh a țhiante phei chuan outlaw a lo nih tawhna an ngaih pawimawh lohva, an hriatpui duh loh thute sawiin, 'I tan erawh chuan Sudden outlaw ka nihna hi a bo thei lo anih hi. Chuvangin i tan chuan neih tlak ka ni lo reng a, mi hausa tak neia nuam taka awm turin ka hmangaih vang zawk chein ka duhpui che a ni. Kei chu, in leh lo pawh nei lo, hetia vak vak mai hi ka ni a,' tiin min kalsan ta a.

"Sudden' ti khera ka han lam kha chu tisual ka intiin, a mi ngaihdamna dil turin ka va kal a, 'Engmah tihsual i nei hlei nem,' min lo ti leh ringawt bawk si. Chuvangin ka rawn chhoh san ta ringawt a. Chuta țang chuan tun thlengin min be duh ta reng reng lo a, kei pawh ka hlim thei ta hauh lo a ni ka pa," tiin a hrilh ta vek a, a mittuite chu a tla kiang tawh mai a.

Norton-a meuh pawh chuan a fanu hlim lohna chu awm a tih puiin han hnem ngaihna pawh a hre bik lo hle a. Rei fe an ngawih dun vang vang hnu chuan, "Nang pawhin i tidik bik lem lo anih tak chu mawle Bawihi, 'Sudden' ti khera han koh chu, nâ a tih dan tur pawh a hriat mai alawm. Eng ang pawhin lo sual mah se, tunah chuan a sim hmak tawh a, Governor Bleke-a pawhin a ngaidamin kawng engkimah kut ke berah a chhawr tawh a ni a, a bik takin keini chhungkaw tan phei chuan a baka midang han ngaihsan tur hi an awm thei tawh lo.

"Hetia a nunna hial pawh chan huama kawng engkima min țanpui laia nangin misual bera an kohna leh an hmuhsitna hming khera i han ko mai chu nâ a ti ngei ang. Keini pawh ni ila hrehawm kan ti hle ang. Mahse nang pawhin i thinrim leh i rilru nat avanga sawi i ni tih chu a hre tho ang a, huat phah lovin nakin lawkah a la be țha leh mai tho ang che," tiin a thiam tawkin a fanu chu a han hnem a. Chutah zet chuan Elizabeth-i pawhin a rilru hrehawmna a pa a hrilh takah chuan a hahdam phah huai a.

Sudden-a chhuak ta khan Stoddard-a Ranch chu a tlawh hmasa a, engvang tehreng emaw ni, Stoddard-a chu Old Joe-a Ranch-ah a lo leng phei ve chiah a. A lo awmte hnenah chuan, "Kal ka tum tho a, chutah chuan ka va hmu zawk ang e," tih pah chuan a inpawt her ta nghal a. A va thlen chuan cowboy ho te, Old Joe-a leh Stoddard-a te chu Ranch in tualzâwlah meilum an lo kil țaih hlawm a. Old Joe-a chuan a cowboy chhawrte chu a en hrang lo hle tih a hriat mai a. Sudden-a chuan, "E khai, tunah pawh khati a nih chuan thlasik tak takah chuan in va nasa dawn ve le," a sakawr ațanga chhuk pah chuan a han ti barh barh a.

Stoddard-a pawh chuan, "Ni e, hei, vawt tuarah chuan kan tluk lo che a nih awm hi," nui vur vur chunga a han tih chuan, "Mai mai a, kei pawh ka khur hlum lo chauh alawm le," tih pah chuan Sudden-a chu tlangnel takin an karah chuan a inzep ve a. Old Joe-a chuan, "A zan a zana enge ni țul ta, a va pawimawh ta awm ve, nge in pu fanu nen in han intawksir deuh em ni zawk?" a han tih chuan an foreman Preson-a chuan, "Ni e, kei pawh an sawi ka hre thawi tlat a ni. Nang zawng, Jim, mi vannei tak i ni ngei dawn e," nui var var chung chuan a lo ti ve a.

Sudden-a chu a zah deuh avang leh Elizabeth-i chu sawi rik fo a duh chiah loh avang chuan, "Ka rawn kal chhan zawk chu kan pu fanu vang ni lovin, naktuk zing khawvar hmaa Pony Cross va beih kan tum thu rawn hrilh che u ka tum a ni, 'ka hrilh ang che u' ka lo ti tawh si a, ka rawn hrilh loh che u chuan in nur viau ang tih ka hlau si a, a zana zanin ka rawn kal ta mai a ni," tiin a han hrilh ta a. Chutia Sudden-an a han sawi takah chuan fiamthu thawh pawh chu an tum zui ta bik lova.

Han thinrim thar leh thut ni mai awm hian, "Va beiha, va thah chimih vek chu ka chak hliah hliah tawh mai a ni. Simon-a phuba pawh laksak ka chak tawh hrim hrim," Old Joe-a chuan a rawn ti chhuak ta a. Stoddard-a erawh chuan, "Engtin nge Jim, han ruahman dante i nei em?" tiin Sudden-a chu a han zawt ve a. Sudden-a chuan, "Tuna han sawi theih awm chhun chu, naktuk zing khawvar hma fein Big Trust hmunah awm kim vek tur tih a ni mai a, a dang chu a hmunah kan la relchawp ang chu," tiin a lo chhang a. Old Joe-a chuan, "Keiniah chuan harsatna a awm lovang, i sawi ang hunah chuan Big Trust chu kan rawn thleng ngei ang," a han ti ve a.

"Keini pawh Old Joe-a sawi ang chu kan tih tur a ni ve mai," tiin Stoddard-a chuan a han ti ve a. Sudden-a chuan, "A țha anih chu, amaherawhchu, Big Trust bak chu kan rawn thlen har deuh pawn, lo phei lo hram ula, chutah pawh chuan a biru thei ang berin awm ang che u. Chuti a nih loh chuan an lo hria ang a, an lo tlanbo vek emaw, min lo leh chan mai emaw a ni thei ania," a han ti a. A sawi ang apiang chu an zawm tlang hle a, ani chauh lo chu Stephan-a fin han tlankhalh thei tur an awm bawk lo a ni tih pawh tunhmaa an thil tawn ațangin an hre hneh em em tawh a ni.

Sudden-a vek chuan, "Eng chen chiah nge kan beih dawn hriat a ni lova, chuvangin, in eipuar sa diam ula, chuti lo chu nilenga inbeih a ngaih mai chuan in chau palh ang e; tun hi helai ram zalenna atana țankhawhna hun pawimawh lutuk a ni dawn a ni," a han ti leh dap dap a. Old Joe-a chuan, "Jim, pumpui hnawhpuar lamah chuan min ngaihtuah duh suh, kan hriatreng theih chi tak a ni," nui chunga han tiin, "A bik takin kei phei hi chu pumpui hrisel tak, pai nei lova awm thei lo, ei leh in lam chu theihnghilh mai mai lo tak tur ka ni," a han tih zawm leh a.

Rei tawk an ti ti ho hnu chuan, "Khawi nge ka va phei tawh ange, kan khawnvar pui roh khian mi liamsan mai zawngin ka inhaibuai viau mai thei a ni," tiin thla chu a han melh zauh a. Preson-a chuan, "Anih leh Jim, mangțha mai le, nang zawng lo nghak rengtu che pawh an awm maithei asin," nui var var pah hian a han ti zauh a. Ani lah chuan, "Ni e, kan pu chuan min lo nghak ngei ang," a ti daih thung a, a sakawr awmna lam chu a pan ta a.

A sakawr lam a pan lai chuan Preson-a chuan, "Pu lo deuh hlek," a han ti zui leh hram a. Old Joe-a leh Stoddard a pawh chuan, Sudden-a chu a sakawr awmna thlengin an va thlah a. Sudden-a a sakawra a lawnkai takah chuan an inmangțha ta a. A lan theih chhung chu an thlir dun vung vung a, Old Joe-a chuan, "Mi ngaihsanawm tak chu a ni mawle," a han ti sup a. Chu mi hnu lawk chuan Stoddard-a pawh a haw ve ta a; a haw tak hnu chuan Old Joe-a te ho pawh chu a tuk lama an hmabak hre ranin mut zai an rel ta a.

Sudden-an K.N.Ranch in a va thlen chuan an lo la meng vek a, Old Joe-a te ang bawk khan tualah mei an lo bawr laih a. Sudden-a pawh chuan a sakawr zinte hlip a, corral-a a han dah fel hnu chuan meilum lam chu a pan ve ta a, mahse țhu ve ta lem lo chuan, "Naute u, kan mut hma a țha ang, naktuk khan khawvar hmaa chhuah a ngai si a, in mut kham lo hmel han hmuh chu ka chak lo viau a nia," a han tih chuan a naute ho pawh chu thuawih takin Bunkhouse lamah an kal ta sang sang a. Ani pawh eisiamtu Monti hnena a tuk zing khawvar hmaa ei siam peih hram tura a hrilh hnu chuan Bunkhouse lamah a kal ve ta a.

Bunkhouse tuala a la awm lai chuan pangpar kung kar, Ranch in sirah chuan thil che zeuh hi a han hmu a, enge tih hriat tum chuan a pan phei ta a. A va hnaih deuh chuan hmeichhe aw lo phun sep sep ri chu a hre ta a; a han en nak chuan Elizabeth-i chu amah chauha lo phun sep sepin, a hmel pawh a lo dang bai mai niin. A rawn hmuh ve hlaua kir leh mai a tum lai takin nula chuan a rawn au ta tlat mai a. Ani pawh chu autu awm takah na na na chuan kalsan luih hram chu a tih theih loh lam tak a ni bawk a, phur lo fe chuan a pan ta a.

Sudden-a bulah chuan rawn kal vatin, "Jim, vawiina i pawi ka lo sawi avang khan pawi ka ti lutuk, i theih chuan mi ngaidam hram rawh aw!" a han ti hmasa ber phawt a. Sudden-a chuan, "Ka pawi i sawi hlei nem, mahse outlaw ka lo nih tawhna ka inhriat chhuah hian ka zak deuh țhin a ni mai a, engmah ngaihdam ngaia i awm ka hre lo, ka nihna dik tak i sawi zawk alawm," a lo ti a.

"Min huat phah lo amaw?"

"Huat phah lo ve, huat phahna tur engmah i sawi lo ka tih tawh kha. Ti rawh, helaia awm reng chu a țha lo ve. Kei pawh tlem tal ka mut loh chuan naktuk zing takah kan chhuah a ngai dawn si," tih pah chuan Sudden-a chuan hma a hruai a, pangpar huan ațang chuan an inzui chhuak ta a, an kal pah chuan, "Jim, fimkhur takin rawn che ang che aw, i vanduai hlauh chuan hrehawm ka tih tur zia te hi rawn dawn ve ang che," Elizabeth-i chuan a ti a.

Sudden-a chuan, "Kei chu min ngaihtuah duh suh, ka va thi ta anih pawhin i cowboy chhawr zinga pakhat ka thi a ni ve mai dawn a, i tan a pawina a awm lem hlei nem. Chu bakah, miin an hriat lar em em outlaw chu ka bo hlen hmiah tawh dawn bawk a, tam takte chu an thaw huai maithei asin, chung zingah chuan nang pawh i tel ve ka ring. Amaherawhchu, ka thih hma tal chuan in tan ka theih tawk ka chhuah ve țang țang a ni tih hi i rawn hre ve dawn nia. Mangțha le," tih pah chuan a riahna tur lam chu a pan ta daih a. (Va han sual thiam ţalh ţalh, ka kuk fâwk chak )

Elizabeth-i chuan a beisei ang lo taka a chhan avang chuan rilru na ngawih ngawihin Ranch tualzâwlah chuan a ding ta reng a. "Aw Jim, vawiina i huatthu ka lo sawi chu min ngaidam thei thlawt lo a ni maw?" a han ti zui sap a. Han țah hawm hawm mai chu a chak viau na a, a insum hram thung a, a riahna chu rilru na tak chungin a pan chho ta hna hna a.

A tuk zing khawvar hma, darkar hnih vel la awm turah chuan Sudden-a chu a harh zawk a, an hmabak chu a vei hle a ni. A insiam sawk sawk a, corral ațanga Nigger chu la chhuakin a zin a phah a, Monti chu a la thawh loh takin tiin a va en a, mahse a tih tur chu tlin takin a lo tho der tawh a, a lo buai malh malh tawh a. Sudden-a chuan fel a ti em em a, nui chung hian, "Pi Monti, i fel hle mai a, nupuiah ka nei duh che a nia," a han ti ve har har a. Monti pawh chuan nui ar ar pahin, "Ka tih ve theih tawk a ni a, mahni chanvo hlen zawh loh hi alawm ka hlauh le," a lo ti ve a.

Sudden-a chu a naute ho kaitho tur chuan a kal leh a, a naute ho mutui lai han kaihthawh ngawt chu nuam a ti chiah lo deuh a. Bunkhouse pawnah chuan a han khuh ta kharh kharh a. A thawm chu zawi hle mah se, vei nei țhâma mu an ni bawk a, rang takin an rawn tho ta sang sang a, an hmaite phihin an sakawr an buatsaih nghal sap sap bawk a. Zan lama an lo buatsaih lawk diam, Rifle leh a mu tam tawk bakah pistol mu țhahnem fe nen an sakawrah chuan an dah țheuh hlawm a.

A naute ho felzia leh taimâk zia a hmuh chuan Sudden-a chuan a chhuang ve hle a. An insiam peih vek hnu chuan, "Ti ru le naute u, i va inhrai tlai phawt teh ang u, nilenga kan awm pawh a ngai maithei a nia," a han tih chuan choka lam chu an pan ta sap sap a, Pi Monti lo siam peihsa diam, chhangper leh bawngsa rep hem hmin chu duhtawkin an ei ta bawrh bawrh a; tui ti taka a thilsiam an han ei ringawt pawh chu Pi Monti lawm tawk a lo tling ve a. Chutah coffee sa țha ver vawr chuan an han thual leh ngei bawk a.

Tui an titlang hle a, Tito-a phei chuan, "Pi M.T, ei tur siam i lo thiam kher mai, lei kan lem tel dawn alawm le," a han tih chuan Harry-a chuan a lo tuihnih ve zat bawk a, an han nui ho leh ang dar dar a. An pute an la mutui hle a ni tih lam pawh ngaihtuah nachang reng an lo hre lova. An nui thawmah chuan Pu Norton-a chu rawn harhin Ranch in bathlarah chuan a chhuak thuai a, an naute ho chu sakawrah an lo chuang far tawh a, "Dam taka lo kir leh vek thei turin va fimkhur hle rawh u," tiin a zuk au a. Sudden-a chuan an pu chu thlir chhoh pahin, "Dam takin kan rawn kir leh em em ang, rei pawh kan va thang lo maithei a ni," tiin a han chhawn let ve a.

www.storyfb.com mizo story thar englai pawhin chhiar tur a awm reng

[Ngaia]

SUDDEN - IN THE CAVE OF THUG
AUTHOR : C. THANGZUALA
CHAPTER - 15
(Rozami Pachuau)

Pony Cross-a misual turu tak, Stephan-a leh a hote zawng zawng va chimih tur chuan K.N.Ranch cowboy pathumte bak chu an chhuak ta țham țham a; kal ve lo pathumte chu Ranch in vengtu tur leh rangkachak awmna puk veng turin foreman chuan a awmtir a ni. Hmanhmawh tak chuan Big Trust chu an pan ta a, darkar chanve chhung lekin an thleng ta a.

An va thlen chuan Old Joe leh Stoddard-a te ho chu an la thleng ve lo emaw Sudden-a chuan a ti hman hial a, mahse an han innghat fel ve chiah tih chuan an bihrukna ațang chuan an rawn chhuak ta phak phak a. Sudden-a chuan, "E heu, Red Indian ho ang maiin bihruk pawh in lo thiam anih hi, in la thleng ve lo emaw ka ti zawk asin," a han tih chuan Old Joe-a chuan, "Khati mai dawn asin, harsatna kan nei lovang ka tih reng kha," nui vur vur chung chuan a han ti a.

Sudden-a chuan, "Anih leh thawm dim em emin mi han zui rawh u le," tiin Pony Cross tlang lam chu a pan ta nghal a. An vai chuan 19 lai an ni a, an tam tawk hle pawhin a hria a; an kalna chu fimkhur a ngaih zia Sudden-an a hrilh ngun hlawm bawk a, an thawm pawh a ring lo kher mai. Tlang bul an va thlen chuan Sudden-a chuan ding turin a han zaizir ta a, an ding ta țhap hlawm a.

Ring lo tak, hriat tlan theih tur si hian Sudden-a chuan, "Pawl thumah kan ințhen ang a, pawl khat chuan helam tlang panga rawn tlan chhuak apiang hmuh hmaih miah lova thah nghal hmiah zel tur a ni ang a, pawl khat ve thung chuan tlang lehlamah in lo chang ang a, ka sawi tawh ang khan hmuh apiang chu chhuah loh tur a ni ringawt mai. He puk hian hlet a nei maithei a, chung ațanga an rawn chhuak anih pawhin hmuh leh hriat ngei tumin beng chhi ang che u. Tin, puk kawngka bulah hian pakhat a ding ang a, ani'n rifle vawi thum a kah puah veleh in vaiin puk chhungah in tlan lut dawn nia," tiin rem a han ruat ta zung zung a.

Chutah pawl ințhen dan tur chu a han sawi leh zung zung a, Dick, Old Joe, Stoddard, Brydon, Tito, Preson, Harry, Set, Dale Sorty leh amah chu puk lama kal tur chuan a han ruat a; midangte pawh chu an han ințhen a, tichuan an chan lam lamah chuan an kal ta dial a. Sudden-a ten puk kawngka bul an han thlen chhoh chuan khua pawh a var țan tawh a, an han ding khawm laih a. Sudden-a chuan zawi sap hian, "Preson, Harry-a nen hetah hian lo awm ula, mahse tu pawh rawn tlan chhuak se, an kah nghal mai theih loh turah biru ula, Red Indian ral beih kheka ka rawn khek chuan tu emaw zawk zawkin a zawnin vawi thum rifle in hmet puak dawn nia," tiin a han chah leh a.

A ipte ațang chuan thil dum phek thlir thler chu a han phawrh a, lungpui pakhat bulah chuan a phei ta nghal a. A ngaihna hre lo zet hian Old Joe-a chuan, "Jim, puk kawngka pawh a awm si lova, khawi ațangin nge kan luh ang a?" a han ti su su a. Midangte pawh chuan Sudden-a chu zawh an lo tum ve mek hlawm a. Sudden-a chhanna chu nghakhlel takin an lo thlir ta țhap hlawm a.

Sudden-a chuan, "Kawngka chu a rawn insiam mai dawn alawm, lo nghakhlel lutuk suh u, lang thei lo turah khan lo awm ringawt mai ula, he puk kawngka vengtu hi bengchheng thei lova ka siam hunah in lo lut ve dawn nia," tih pah chuan a kawr nghawnga chemte a pai chu a phawi nghal a. Lungpui leh tlangpang lei insikna bulah chuan a han ding hnai a, a kut veilama a thil ken dum phek chu a kutzungpui chuan a han hmet ta zauh a, chu thil hmawr chu eng zet hian a deng chhuak ta zawk a.

Sudden-a chuan a han nghak vang vang a, a rawn inhawn tak mai si lovah chuan 'a la muhil tui hle anih dawn hi,' tiin a han hmet nawn leh a, a han nghak leh a, a inhawng dawn ta lo emaw a tih hnu chuan lungpui chu a rawn che ta țual țual a. Nghakhlel fe chuan Sudden-a chu a bet thei ang berin a awm a; Old Joe-a te ho lah chuan lungpui phen lam ațang chuan makti fe hian an lo thlir hau hlawm a.

Puk kawngka vengtu, cher khen khawn chu puk kawngka bulah chuan tui deuh maiin a muhil barh barh a, chutih lai chuan puk kawngka hawng tura signal han de zawr chuan a lo tiharh chauh chu niin, peih lo fe chuan a rawn tho ta țuih țuih a, phun nuah nuah chung chuan puk kawngka hawnna chu a han pawt tau nghek a. A han inhawn fel chuan, "A khawiah kher nge maw chhunah te khan i lo awm bik a, tun ang hunah te i lo haw kher kher chu le?" rawn dak chhuak duk duk chung chuan a ti nuah nuah a.

Mahse chu chu khawvela a phun tawpna ber a ni ta ! Rang zet hian Sudden-a chuan puk kawngka vengtu chu a sir lam ațangin a han kuah bet thut a, a chemte ken chuan chu pa dulah chuan tlum hmawkin a vit ta thawih mai a, chutah na fe hian a han pir chho leh kawk a, a thler chho ta duai mai a, thisen tam tawk a rawn baw chhuak nghal puat puat a, Sudden-a chuan chu pa a kuahna chu a han thlah a, a tlu zawi nghal ta hnawk a, a thi chu a ni zui ta der mai.

A chemte leh a kuta thisen kaite chu chu pa thawmhnawah chuan a tat fai nawk nawk a. Old Joe-a te ho han hui zauh pah chuan zawhte ang maia thawm nei lovin a pen lut țan ta a. Anni ho pawh chuan an rawn zai vat a. Sudden-a chuan hma hruaiin puk ril lam chu a pan ta zel a. Chu puk chu Sudden-a chuan a puk hmuh tawhah a la zau berin a hre hial a. Han en mai chuan a zau lam feet sawm vel, a san lam feet sawm aia sang tur mah a ni bawk a. Duhtawka chei tih hriat tak hian a mam hun vek mai a.

An han luh thuk zel chuan puk chu pindan ang deuh hian a hrang thliah thliahin a lo inping khap zel a, kawngkate chu kalh loh anih avangin an luhna leh a dawttu chu an lut tlang thei ta mai a. Mahse pindan pathumna chu chhunglam ațangin a lo inkalh tlat mai a, 'engtia tih chi nge ni ang aw? tiin a han inngaihtuah vang vang a. A pistol chu a phawi chhuak ta ngawt a, puk kawngka vengtu phun nuah nuah ang thei tur ber khan, "Rawn hawng vat teh, ka pu ka hmuh a țul tlat pek mai, ka mutui lai min han kaihthawh khanglan chu ni, phiangsen hlawm chuan," a han ti ve ta nang nang a.

Chhunglama awm pakhat chu mutui lai harh hlawl tih hriat tak hian a han rum ta țuah țuah a, "Tunah te zawng kan pu chu hmuh inbeisei lo mai rawh," ti chuar chuar chung chuan a rawn hawng ta a. Sudden-a hmel a han hmu zet chu rang zetin a mutna lamah a zuang phei ta dawrh a, a rak tuar bawk a, a khum sira a pistol chu a chuh ta nghal a. Sudden-a chuan zuan phak a ni tawh lova, silai hmehpuah loh theih a ni ta lo tih hriain chu pa âwmah tak chuan a va verh ta phawr mai a, a leng lawp a, awmze nei lo fe hian a ke chu a leng ta awrh awrh a, a chatthla zui ta a.

Chutia silai a han rik takah chuan thawm dim pawh a țul tawh lo tih hriain, pindan chhungah chuan a zuanglut ta vat a, midangte pawh chu an rawn zuang lut ve ta phawk phawk a. Sudden-a chuan, "Joe, veilam pindanah khan mi pathum luh tum ula, nangni Stoddard, kha mi pindan kawngkharah khan luh lo tum ve bawk rawh u; Brydon, nangin mi han zui rawh," a ti ta zung zung a. A hmaa pindan kawngkhar chu hawn mai a han tum a, chhunglam ațangin a lo inkalh bur si a. A theihtawpa nain a dar chuan a han su ta nghek a, mahse a che lawih chauh a.

Sut leh tuma țan a lak leh lai chiah chuan chhunglam ațangin silai a puak ta țhuai a, chu kawngkhar chu silaimuin a rawn verh kaw ta phat mai a. Sudden-a beng a thawi fua mai nghe nghe a. Sudden-a chu chhuatah chuan a bawk phek nghal thlawp a, pindan dang chhunglam ațangte pawh chuan silai a puak ta zawt zawt a. Stoddard-a chu silaimu, kawngkhar rawn deng tlang zawktu pakhat chuan a darah a rawn fuh ta siah mai le! A rak țhawt a, Sudden-a pawh chuan a melh phei vat a. Ani chu a lo pai chawn chawn a, puk bang ngheng chuan a ding thei hram a, din reng pawh harsa a tih avang chuan a țhu thla ta a.

Buaipui hman ni bik hek lo, Sudden-a chu a zuang tho thut a, Stoddard-a chu pindan pawn zawkah chuan a va dah a, a rawn zuang lut leh vat a, țhingțhiin pindan kawngkhar chu a kap ta țhuai țhuai a. Sudden-a tihdan ang chuan midangte pawhin puk kawngkhar chu an kap ve ta țuk țuk a, chhunglam ațang pawh chuan an rawn kap ve țuk țuk bawk a, a mute chu kawngkharah a tlang tawn ta nuk nuk a, an lu chung lawk lawkah te chuan a ving ther ther a. Ding chunga kap chu nise silaimu tuar pawh an awm ngei ang. Mahse Stoddard-a lo chu hliam an la awm lo.

Sudden-a chuan pindan chhung ațanga rawn kaptute chu an rawn kah dan ațangin silai kap thiam tak tak an ni tih chu a man thiam nghal vek a, silaimu rawn chhuak reng reng chu chhuat ațanga feet li vela sangah a ni tlangpui a, ding chu awm se an awm velah a fuh tawk chiah dawn a ni. Sudden-a chuan chutia pawng kah chiam mai chu țha dawnin a hre ta lo va, a țhiante hnenah chuan kawngkhar in vuahna lai zela kap turin a hrilh ta a, chuti lo chuan hawn ngaihna a awm dawn si lo. A hrilh ang chu zawmin a kawpza-ah tak zel chuan an kap leh ta zawt zawt a.

A pistol mu ruak țhak khawpa a han kah chuan kawpza chu a chhe țep tawh a, a kekawr iptea a silaimu ah chu a han ţham chhuak țeuh a, a thun leh ta zung zung a, a thun bang chu a ak leh vek a; rifle an lo keng lut ta lo kha a inchhir rum rum a. Rifle-a kap chu nise kawngkhar kawpza chu an kap chhe vat thei tur hi a ni a, tihngaihna a awm tak lovah chuan pistol bawk chu a hmet puak leh ta zawt zawt a. Puk chhungah hetiangin kawngkhar a awm thluah ang tih a ring bik lo miau a.

Sudden-a hmazawn pindan kawngkhar kawpza chuan a tuar ta bik lo va, a hrang ta nawlh mai le ! Chu veleh Sudden-a chu a tlan phei vat a, kawngkhar sirah chuan a bet thlawp a, a sir lehlamah Brydon-a pawh chuti bawk. Silaimuin inchhung lam ațanga an rawn den pawp pawp reng avang chuan luh mai chu a huphurhawm hle na a, mahse luh loh chuan pawnlam ațang ringawtin awmzia a awm thei tak tak si lo.

Sudden-a chuan a pistol mu chu a pahnihin a han thun khat leh te te a, zuang lut tur chuan a insangmar țan ta a. Brydon-a chu a han melh zauh a, "Kawngkhar hi ka su hawng anga ka lut nghal dawn a, ka luh veleh a sir lehlamah zuang lut ve nghal la, chhuatah bawk nghal vat ang che," a han ti a. Pen hnih vel a han tawlh hnung leh a, chutah a darin a han su ta nghek a, kawpza chhe tawh sa a ni bawk a, a inhawng ta dawrh a, rang zetin pindan chhung dinglamah chuan a bawk lut nghal thlawp a, chu mi rual deuh thaw chuan Brydon-a pawh vei lamah chuan a bawk lut ve thlawp a.

Chu pindan chu a dang ang bawka chei a ni a, mahse a dang lakah chuan zau tak a ni ringawt mai, chuvang chuan Sudden-a pawhin an inhmuhkhawmna deuh bikah a ngai ve mai a, kil khatah chuan khum pahnih a awm tih mai loh chu țhutthleng chi hrang hrang leh dawhkan nalh ve tak, feet 6 laia sei tur hi a awm a. An han luh chiah chuan khum awmna bul ațang chuan pistol hmawr hi a rawn de zawk zawk a; dawhkan phen ațangin pakhat chuan kawngkhar uai duai lam chu a rawn kap zawt zawt bawk a.

Sudden-a chuan a pistol chu a kap puak ve nghal thuai a, khum bul ațanga rawn kaptu hrawkah tak chuan a fuh a, hnung lamah a hnawl dawrh a. Buaipui zui a ngai tawh lo tih a hriat chuan Sudden-a chuan dawhkan phen ațanga rawn kaptu kha a han ngaihsak leh vat a, mahse kah ngai tawh lovin Brydon-a chuan a lo thal ve der tawh a. Sudden-a chuan a mit a han len kual zung zung a, mahse midang hmuh tur an awm lova; a ding chhuak a, an țhian dangte pawh chuan pindan kawngkhar chu kap chhiain an lo lut ve tawh tih hriat tak hian an thawm a țha laih laih hle a. Thi leh hliam an awm leh awm loh erawh chu rin thu mai bakin hriatna a awm thei lo.

Khua pawh a eng chiang tawhin, ni pawh a lo chhuak dut dut tawh a. Pony Cross puk chhung chu khawi ațanga êng nge tih pawh hriat loh hian a eng ve uau mai a, puk chhung a ni tih pawh hriat loh khawpin boruak te pawh a thiang țha ve hle a. Sudden-a chuan a han thlir kual zel a; dawhkan sei tak ațanga veilamah chuan kawngkhar dang a awm tih chu a han hmu ta a. Rang takin a pan vat a, chu kawngkhar pawh chu a dangte ang bawkin a lo inkalh bar mai a. Mahse a han chian vel pawh chuan chhunglam ațang chuan thawm pawh a awm bawk loh avangin a ruak anih a ring a; an țhiante ho thawm chu a reh ta duk a, a khat tawkin pistol puak leh phauh țhin tih mai loh chu a reh ta hle mai.

Sudden-a chuan ngaihțha lo fe chuan a han ngaithla leh vang vang a, chhunglam ațang chuan ri rek pawh a awm lo reng reng mai a, chunglam chu a han thlir chho a, pindan bang leh puk chung chu a lo insi chiah lo va, feet khat leh a chanve tur vel lai hi a awl a. Chu veleh Sudden-a chuan Brydon-a chu a han hui zauh a, ani chuan a pan phei ta vat a. Zawi sap hian, "He kawngkhar hi hawn tum ang takin lo su vel la, bangah hian ka'n lawn ang e," a ti ta a. Brydon-a pawh chuan sut hawn tum ang takin a dar chuan a han tauh ve ta bar bar a, a sut thawm chu a ring bawk a. Sudden-a banga thawm dim taka lawn thawm chu a hliah hneh kher mai.

Engemaw ti ti chuan Sudden-a chu a han dak chhuak thei ta a, fimkhur taka invuanin chhunglam chu a hmu thei ta a ni. A rin ruk ang ngeiin chu pindan chhungah chuan awm an lo awm ve reng mai a, chu pindan chu a zau hle a, a dang ang bawkin țhutthleng tam tak leh dawhkan sei zet hi a awm a, a hmasa zawk ai chuan a zim a; bangah te chuan milem mak pui pui hi a awm thluah a. Kil khatah chuan sakawr zin leh bungraw dang dang, lung halna leh silaimu bawm niawm tak tak pawh a awm țeuh a, pindan dangte angin khum erawh chu a awm ve lo.

Chu pindan chhunga awmte chu pali lai an niin, silai an lo hum ve țheuh a, pindan kawngkhar ri bur bur lam hlir chu thlirin an lo inring țhap a. An awm lo emaw tiin kawngkhar kha su chhiain va lut vaih se zawng an lo thal chiang hle dawn a lo ni. An țanhmun han siam dan ațang mai pawhin silaia inbeihnaah an tel tlem lo hle tih a lang mai bawk a; inkar hlat tak takin an awm a, kawngkhara lut chuan pakhat chu kap hman pawh nise, midangte chuan an thal chiang viau ang.

A kut veilam chuan a theih tawka nghetin bang tlangah chuan a inkuai tang a, a dinglam chuan pistol a phawi a. Amah en reng chunga kawngkhar tauh bur burin Brydon-a chu kawngkhar kawpza taka kap ve turin a han zaizir leh a, chu veleh Brydon-a chuan a tauh reng chu bansanin a țhingțhi ta rap a, khinghnih meuha a pistol chu vuanin kawngkhar kawpza chu a kap ta țek țek mai a, silaimu pakhat chuan kawpza sir khat chu a deng pawp ta hawk a, chu silaimu tlang phei chuan inchhunga awm pakhat lu chung chu a thawi phei fia mai a, ani chu hlauvin a lo phu zawk nghe nghe a.

Sudden-a chuan chu pa, silaimuin a den thawi phu zuk a hmuh chuan a nuih pawh a za ru hle a. Brydon-an a kah reng avang chuan a kawpza chu a chhe lek lek tawh a, chhunglama mite pawhin an hmu ni ngei tur a ni, an silai chu an hmet puak țan ve ta a. Kawngkhar chu an silaimu chuan a deng ri pawp pawp mai a, chutihlai chuan Sudden-a chuan chet a hun ta tih a hre chiang khawp mai. A kut dinglama pistol a hum chu pindan tlangah chuan a han nghat a, a awmna ațanga kah chu a hlauhawm hle dawn tih chu a hre reng a, chuvangin an rawn hmuh fuh hmaa pahnih tal kahhlum a tum a, midang pahnihte erawh chu an insawn loh phawt chuan bang chhan ațang pawha kah fuh theih a inring a.

Chutah a pistol chu a zawn zatin vawihnih a hmet puak ta a, mi pahnih chu an let nghal tawl tawl a. Sudden-a silai ri a hriat chuan pakhat chu a rawn hawi chho vat a, amah pawh a rawn hmu a, kah tuma a silai a rawn lek chhoh chiah chuan Sudden-a chu chhuatah a țum thla ta auh a, chu mi rual chuan pindan tlanga a han dahna bang chu silaimu chuan a rawn deng tlang nghal pawp a, a țum thla lo palh ang tih hlauhawm tak a ni, chu chu a hriat sa avanga zuangthla a ni reng a. A țum thlak rual chuan ding lamah feet 3 vel a tawlh sawn nghal vat a. Chutah uluk taka bang lam tinin vawihnih a han hmet puak zawn leh zat a.

Chu veleh silaimu leh sakawr Saddle awmkhawmna bula mi pakhat awm chu kah fuh tih hriat takin a rak țhat a, a tlu thawm a hriat theih a. Pindan chhungah chuan pakhat chauh a awm ta a, Sudden-a chuan hmun hnih ațanga kah chu țha bera a hriat avangin Brydon-a kawngkhar kawpza kah chhiat tawh lam chu pan pheiin, "Kawpza kha chu kah a ngai tawh lo ang, i awmna ațanga feet 4 velah tawlhsawn la, i hmai zawnah ngil takin kap phei rawh le," a han ti a, a tawlhsawn leh a; nichina a awmna aia chhak deuhah chuan lawn lehin a zuk bih leh ta a.

Brydon-a chuan Sudden-a hrilh anga a kah avang khan a fuh teuh ther ther hle a, mahse a lo insawn ve thuai a. Sudden-a chuan a pistol phawiin vawikhat chiah a han kap ta a, chu pa dulah tak chuan a va kah sak ta a. Chu veleh hreh hmel takin a tlu awn ta ruai ruai a, tukkhuma lei vaw dawt chuan a tlu ta a. "A tawk e Brydon," tih pah chuan a zuangthla leh ta a. An pistol mu chu an thun khat leh ta ve ve a, tichuan kawngkhar chu nam hawngin an pen lut ta a.

Old Joe-a te pathum va luhna ve thung chu sakawr hlir hian a lo khat hmur mai a, sakawr awmna piah chiah chu puk bang a ni leh tawh mai a, kal zel ngaihna awm ta hek lo, phun nang nang chung chuan an chhuak leh ta a, Stoddard-a te chan lamah chuan an lut phei ve leh ta a, Stoddard-a chu a inhliam tawh avang khan Dick-a leh Preson-a chauh an ni tawh a. Dick-a te luhna chu Stephan-a chhuantawlawl outfit te tih loh, midang ho zawng zawngte riah khawmna bik hi a lo ni a. Dick-a te chu an lo inkap buai nasa hle a. Preson-a chu an lo kap hlum der tawh bawk si.

Old Joe-a te pathum pawh chuan an pistol chu muangchang lovin an hmet puak ve nghal ta zawt zawt a, silai kah thiam tak an nih hlawm avangin an tum chu an hlah lo chiang kher mai, kar lovah Stephan-a hote panga chu an thal ta der a. A la thi bang pali te chuan an rawn kap ve nasa mai a, an lu bul lawk lawkah silaimu chuan an rawn kap fer fer țhin a, dinna ngaia din reng chi ni hek lo, Old Joe-a te pathum chuan rang tak leh insawn kual zung zung chungin an hmet puak zawt zawt reng a; che reng chunga kap an nih bakah, an va kaha te chu silai chelek thiam tak tak niin, inbeih dan hre ve tak tak an nih bawk avangin kah fuh harsa ang berin an che sawn ve reng bawk a.

Chutah an vanduai asiamin nge ni dawn Old Joe-a te pathum chuan a rual deuhthawin an pistol mu chu an kap ruak ta țhup mai a. Tito-a chuan an piah deuha anmahni rawn tin mektu chu han kah thluk tawp tumin a pistol chu a han hmet a, mahse a mu a lo ruak tawh tih hriat takin a cheng chu a ri ta kauh ringawt a, chu veleh rang zetin a bawk phei thlawp a, chu pa lah chuan rang tak takin a rawn kap ve reng mai bawk si, Tito-a chuan puk chhuata lum tawp tawp pah chuan a kekawr iptea pistol mu a ah chu a han țham chhuak a, en theih ni hek lo, lum tawp tawp chung chuan a thun mawlh mawlh a. Chutih laite chuan a bul lawk lawk chu silaimu chuan a rawn deng sawk sawk reng a.

Chutih lai bawk chuan Old Joe-a leh Dale Sorty-a te pahnih pawh chuan an pistol mu chu an lo kap ruak ve ta chiah a, an buai ta map map kher mai. Stephan-a hote lah chuan an rawn kap dawt dawt reng si a, Old Joe-a te pahnih pawh chuan Tito-a tih ang chiah chuan an ti ve nghal vat a. Chutia an let tawp tawp kah tuma Stephan-a hote pathumin an rawn tin leh chiah chu Dick-a khan a rawn thal ta tawp mai a, pahnih a kap let nghal tawp a. Tito-a chu rang zeta zuang thovin, amah kap mektu chu a kap let ve hlawl bawk a.

Midang tumah chu pindanah chuan an awm ta lo bawk a, Old Joe-a foreman ruang chu Stoddard-a, Sudden-an a va dahna bulah khan an zawn chhuak ve ta a. Stoddard-a kha erawh chu nikhaw hre lovin a lo awm mek a, ruang an nghah fel hnu chuan Sudden-a te awmna lamah chuan hmanhmawh takin an phei ve ta a.

Sudden-a te pahnih, mi pali awmna pindana an luh fel chiah chuan an rawn thleng ve a. Sudden-a chuan, "In chan lam enge in an?" ti a a lo zawh chuan Old Joe-a chuan, "Kan that vek, mahse Preson-an vanduaithlak takin a zui ve ta hlauh thung," thinrim zet chuan a han ti țhat a. Sudden-a chuan, "Stoddard-a kha na a ti viau em?" a han ti leh a. Dick-a ve thung chuan, "Tunah chuan engmah hre lovin a awm mek," a lo ti thuai a.

Kawngkhar pakhat chiah, chu pindan ațanga a chhungril lam pan lehna tur chu a la awm a. Sudden-a chuan a hmuh veleh a va pan hnai vat a, a dang ang bawk chuan a lo inkalh leh bur mai pek a; a dara a han tauh bur bur pawhin inhawng mai chi a ni lo hle. Pindan kil lamah chuan a phei ta a, silaimu bawm kg. 20 lai tura rit chu a va chawi tawrh tawrh a, pindan kawngkhar chu a va deng ta bur mai a, kawngkhar pawh a ri tuar nghe nghe a.

Chutiang chuan vawi engemaw zat a han deng leh chawrh chawrh a, tuar zo ta reng bik hek lo; Sudden-a chu a sir lamah a per nghal dawrh a, mahse silai reng a rawn puak ve ta lo. Fimkhur takin pindan chhungah chuan a tawlh lut ta zal zal a, mihring hmuh tur reng a awm tak lohvah chuan a țhiante chu a hui zauh a, rang takin an lut ve ta a.

Sudden-a ten mi pali awmna an beih buai lai khan Stephan-a chu thinrim zetin, a kaw tawpa sakei hliam țankhawh ang maiin ama pindan bikah chuan a vei ngoh ngoh reng a. A tum dan chuan vawiin ni ngeia K.N. ram chu va beih a, a chhunga chengte leh rangkachak puk chu neih theih a inbeisei tawh a, chutiang tur chuan Plan a duang fel diam ve tawh hi a lo ni a. Khawvar veleha che chhuak turin outfit pangngai leh a chhuantawlawl panga te chu a lo hrilh fel vek tawh a, amah ngei pawhin King Norton-a foreman Sudden-a chu vawiin ni bawka thah a lo tum fel diam bawk a ni.

Mahse a thil tum zawng zawng chu Sudden-a bawk chuan a rawn tibuai zo leh vek tih a han hriat chuan awm ngaihna reng a hre tawh lova, tunah tak phei chuan rangkachak puk ai mah pawhin Sudden-a thah chu a duh ber a ni tawh a, a that dawn a nih rau rau chuan fair taka thah pawh a duh a ni. Chutia Stephan-a thinrim engphiara a vei thoh thoh lai chuan kawngkhar chu a rawn sawi ta dawt dawt a, "Boss, Boss," tiin a rawn au chul mai bawk a. A pu mitmei a hmuh veleh Big John-a chuan kawngkhar chu a va hawng vat a. Kawngkhar vengtu chuan hlauthawng hmel zet hian, "Boss, kan pukah hian min rawn luhkhung ania, ka hriat dan phei chuan puk kawngka hnai lama riak ho panga te kha chu an thi zo vek tawh," a ti hlawp hlawp mai a.

Stephan-a chuan nidang ang lo taka aw zawi leh dam duam hian, "Ka lo hria asin, eng hunah emaw chuan hetia min rawn beih mai hi ka lo ring sa reng a ni; mahsela rin ai chuan an rawn che hma ta anih hi. Rang takin Bat-a te ho kha hetah lo kal rawh se," a ti dam duai a. Kawngkhar vengtu pawh chuan an pu mizia danglam ta thut chu mak a ti hial a, han zawt ngam tur erawh chu a ni chuang lova, chuvang chuan an pu tirhna lamah chuan a tlan ta vat a. Reiloteah Stephan-a outfit chhuantawlawl panga te chu a pindanah chuan an rawn lang ta țham țham a.

Stephan-a chuan, "Khai le Ben, tunah chuan a vawrtawp kan thleng dawn ta a, hemi a hnehtu kan nih chuan damchhunga nawmsak chhoh kan hmabak tawh ang a, kan hneh loh erawh chuan Stephan-a leh a outfit panga te tawpna ni tur a ni thung dawng a ni. Chuvangin nangni chu puk kawngka ruk ațangin chhuak ula, pahnihin Norton-a leh a fanu va that ula, pathumte chuan K.N. ram leh a vela mihring in hmuh apiang va that ang che u. Chumi hnuah rangkachak pukah khan min lo nghak ula, chawhma lama ka rawn lan loh chuan rangkachak kha in theih ang ang la ula, he ram hi in chhuahsan nghal dawn nia," dam thlap bawk chuan a ti ta a.

Anni pawh chuan an pu țawngkam vin tak țhin a han dam ta duam chu mak an ti ve hle a, a chhan erawh chu zawh tum an awm chuang lo. A outfit chhuantawlawl zinga pakhat erawh chuan, "Boss, nangmah chauhin hetah hian i lo chang hlawm anga maw? Engzata tam nge an nih pawh kan hre si lova, i tan a hlauhawm viau lawng maw?" a han ti sap a. Stephan-a chuan, "Sudden-a ka lo thah phawt chuan midang chu ngaih pawimawh tham an awm lovang, Sudden-a hi an hotu ber a ni tih chu a chiang mai a, ani'n thu a pek hma chuan min rawn kap ngawt lovang," tiin a chhang ta a.

An pu thupek ang chuan an chhuak ta vat a, an puk chhuahna ruk chu tlang chhipa lungpui lian tak pali lai insir khupna kha a lo ni a. Chu lungpui insir khupna kar chu pathum pawh a ruala len hal halna khawpa awng zau hi a ni a, tah chuan Stephan-a outfit pangate chu an chho ta țham țham a. Tlang chhip an han chhuah chuan thihnain a hual vel a ni tih hre hauh lovin an sakawr lo awmsa diamah chuan an chuangkai a, muangchangin tlang pangah chuan an chhuk thla ta țham țham a. Tlangpang chanve vel an thleng tawh tihah chuan an beisei hauh loh thil an chungah a lo thleng ta !!!

Vawilehkhatah lungpui lo inhung thluah leh hmun hrang hrang ațang chuan silai a rawn puak ta țhuai țhuai mai a, an zinga pahnih chu an sakawr ațang chuan an let thla nghal tawl mai a, thui tak an lum nghe nghe a, an thi chiang kher mai. Pathumte erawh chu an sakawr ațanga zuangthla vatin, lungpui remchang apiangte chu phen zelin, an kap let ve ta zawt zawt a; mahse an intam hleih em a, rei an țang thei ta chuang lo.

Tlangpang lehlama awmte chuan an țhiante silai ri chu hriain an rawn phei ve vat hlawm a, Stephan-a hote chuan anmahni kaptute lam hlir an ngaihsak lai chuan an hnunglam ațangin an beisei loh tak, thihna kut vawt chuan a rawn man ve ta a. Chung rawn vehtute chuan chiang zet zet hian an rawn kap eu ta awrh awrh mai a, an țanchhan lungpui bulah țheuh chuan an puin ti tura thu a pek chu hlensak ngei tum mah se, an chatuan kawngkhar hawnna hmunah an hmang ta tlat thung a ni.

[Ngaia]

SUDDEN - IN THE CAVE OF THUG
AUTHOR : C. THANGZUALA
CHAPTER - 16 (Last chapter)
(Rozami Pachuau)

Sudden-a chuan a va luhna pindan chu chik zet hian a han en a, pindan zau tak a ni e, tih mai bak chu kil khatah khum pakhat a awm a, a bulah chuan dawhkan chhe zet hi a awm leh tlawng a; tu thawmhnaw emaw chu bangah a inkhai ve nalh nalh a, a bal kher lehnghal a, chungte bak chu thildang a awm lo tih theih a ni. Chutah, "Dick, khalai pindan chhung kha fimkhur takin en ula, keiin hei hi hawn ka lo tum ang e," tih pah chuan a bul lawka kawngkhar awm chu a pan nghal a. Sudden-a chuan a han pawt chhin a, a che hrut hian a hriat a, a han pawt nawn leh a.

Chutihlai chuan Dick-a te pawh khan chu pindan chu an lo enfel ve mek a. Dick-a chuan, "Tumah an awm tawh lo, an tlan chhuak vek tawh a ni ang," a han ti lang lang a. Chuti anih chuan Sudden-an hawn a tum mek bak chu an awmna tur awm a vang hle tawh a. Sudden-a pawh chuan Stephan-a chu tlan chhuak hman ngei tawhah a ngai hman a, 'an chhuak hman anih pawhin pawn lama lo awmte khan an lo hmu tho chek ang' ti rilru chung chuan a han pawt nawn leh nghek a, a inhawn rual chiah chuan a sirah a bet nghal thlawp a. Silai ri hriat mai a inbeisei na a, mahse silai ri hriat tur reng a awm leh ta lo.

Chutihlai chiah chuan chhunglam ațang chuan, "Sudden, lo lut rawh, ka lo nghak reng che a nia, ka duh chuan kawngkhar chhanah pawh khan kaphlum thei che ka ni a, mahse mipa ka nih ang ngeiin ka lo nghak zawk che a ni; chu chu i ngam anih chuan rawn pen lut rawh le, i inring lo lai chu kan lo kap hauh lovang che," aw chuan a rawn ti ta chheu chheu mai le!! Mak tak maiin Sudden-a chuan chu pa aw chu dawt tel lo anih ngei pawh a ring a, chuvangin midang ho hnenah chuan, "Tah hian lo awm ula, kei erawh chu ka chanvo anih tlat avangin ka hlen a ngai a ni," tiin hlauhthawnna nei eih lo chuan chu pindan chhungah chuan a pen lut ta zan zan a. Inchhunga mi pawh chuan a sawi lawk ang ngei chuan a lo kap ta mai bik lo.

Sudden-a pawhin, chu inchhunga lo țhu kawkalh ram mai a han hmu zet chu a phu ve deuh zawk a, hlauh vang phei chu ni lovin, tumahin an la phawikhalh ngai loh, silai chelek zei ve tak, Donphil (Stephan-a), outlaw, luman pawh itawm tham tak neia chu a lo ni reng mai a, Sudden-a chuan rum ret rawta han melh ram ram pah chuan, "Donphil, nang hi a ni maw 'Stephan' ti a hming invuah chawp, Norton-a ram chhunga rangkachak duh vanga helai Pine cut ruam zawng zawng chawk buai vektu chu? Mexico velah chuan awm nuam i ti ta chiah lo em ni? A awm ve viau tho e, mahni luman san viauna hmunah hi chuan tawm sen reng hi a hrehawm reng a ni," deusawh tak chuan a han tih khum ta sak a.

Stephan-a chu thinrim la insum tih hriat fe hian a sen urh tawh a. "Sudden, nang pawh chutih zawngah chuan outlaw ve mai tho i nih kha, chubakah kei ai chuan i luman pawh a la tam lehnghal; a reng reng thuah helai ramah hian engti tura lo lut nge maw i nih reng reng le? Kum tam tak ka lo zawng tawh țhin che a, tunah chuan min rawn pan ve ta thung anih hi," tih lung lung pah chuan a rawn ding chhuak ve ta a. Sudden-a chuan țhen deuh sak pahin, "I sawi dik kher mai, Governor Bleke-an chibai buk tur chein min tir a, mahse nang i nih kher phei chu a hre bik lo a ni ang, a hriat hunah erawh chuan a lawm teh ang chu!" a han ti leh sak a. A kut chu englai pawha puakruk phawi inpeih atin a dah reng tho a.

Stephan-a chuan, "Awle, i lo piangthar tawh a ni maw? A pawi love. Ka tan chuan Texas Ranger i ni emaw Sudden outlaw i ni emaw danglamna a nei chuang lo, kei nge rang zawk nang hi? tih chu ka hriat duh a ni mai, ka ran zawk ngei chu ka ring. Chuvangin tunah pawh, Bleke-a chuan a uicho pakhat a chan belh leh dawn tihna a ni mai alawm," a han ti ve leh hmak a. Sudden-a chuan, "I beisei sang lua hret a ni maithei, vawiin ni ațang chuan Texas Ranger tumah i that leh tawh ngai dawn lo," tiin a han vau let leh salh a.

Stephan-a chu za fe hian a han nui ta khuah khuah a, a nui chu vawilehkhatah a rawn tawp leh thut a, a thinrimna hmel chuan a rawn thlak leh vat a. Rum tawka Sudden-a chu melh pahin, "Ka la that dawn chauh, nangni ang Law-man rimchhe lutuk hi ka hmuh ringawt pawhin ka luak a chhuak a, thah zel loh phei chuan ka chaw ei pawh a tui thei țhin lo a ni. Nang phei chu damin i chhuak dawn lo reng reng, vawi tam tak ka kawng i lo dal tawh bakah ka hote tamtak nangmah vang hian an thi tawh a, chuvangin i thlarau, vana lak chhoha a awm theih nan țawngțai hla chham turte i neih ve chuan tunah khan chham nghal rawh," a ti ve leh khur khur a.

Sudden-a chuan, "Donphil, ui hur ang maia chiau chiau lo khan i silaite kha i chuh ngam dawn anih chuan chuh rawh," a han ti leh ta chheu chheu mai a. Chumi hnuah chuan a tu mah mahin țawng an tum tawh lo. Sudden-a chuan a țhiante'n kawngkhar ațangin an thlir țhap tih chu a mitsirin a hmuh avang chuan a dinglam sirah chuan pen thum a han pen sawn hret a, chuti anih loh chuan a țhiante chuan silaimu leng vak an tawn palh a hlauhthawnpui a ni.

Stephan-a chu puakruk phawi mai thei tur chuan a ding kak țuih a, a mit chuan chiang kek kawkin Sudden-a chu a melh khui bawk a. A bula lo ding pa lianpui mai Big John-a pawh chuan a pu chu a ran zawk ngei a rin avangin a hlim hmel fu roh a. A tu zawk nge che hmasa dawn tih chu a lo thlirtute chuan hriat harsa an ti em em a, mahse Old Joe-a te ho chuan Sudden-a mizia an hriatchian em avang chuan a che hmasa lo ang tih chu an ring sa mai a.

Thawklehkhatah Stephan-a chuan rang em emin a puakruk chu a chuh ta thut mai a. Chu veleh Sudden-a pawh chuan a kut phe zâwk a hmuh chiah chuan a tih tur chu a hre ve chiang kher mai. A pistol pahnihte chu pakhat ri ang mai hian a puak dun ta țhawt a, second khat hmun ngaa țhena hmun khat ang vela a pistol puak hman avang chuan Stephan-a mit leh mit inkarah tak chuan a verh ta sar mai a ni. Stephan-a pawh chuan a hmet puak ve hman tho a, a tum tak erawh chu fuh ta lovin Sudden-a nakah a fuh ta chauh a.

Stephan-a chu ama chair ngheng rawp khawpin hnunglamah a leng phei dawrh a, hreh hmel zet chuan a tlu ta ruai ruai a. Chhuatah chuan a zangthalin a tlu thlawp a, vawikhat a han insepkang lawp a, chubak chu chimawm taka awm leh thei tawh lo turin a tawp hlen ve ta nge nge a. A mit chu khaw hmu tawh lo tih hriat fe hian chunglam melhin a meng ru a, a bula ding pa lian zet mai Big John-a chuan lainat hmel taka enin, a mit chu a siamsak ta a. Chutah Sudden-a chu rum zeta han melh pah hian, "Nang chuan Silai i nei a, kei erawh chuan kuttum chauh ka nei a; kan pu pawhin silai chuan a hneh ta lo che a ni a, kuttuma inbeih i cho anih chuan i silai kha paih rawh," a ti ta khur khur a.

Sudden-a pawh chuan a hliam tawrh chu a sarhu lai anih vang nge na pawh a la hre vak lova, chuvang chuan a pistol hum laite chu a paih ve ta ngat a. Chutah Old Joe-a chuan, "Jim, â â teh suh, silaimu pakhat chauh senna turah engvangin nge i nunna chu i chan kher ang? In inbeih vaih chuan kha pa khan a that ngei ngei ang che," tiin a lo khap ta a. Brydon-a pawh chuan, "Ni e, Jim," tih leh pindan chhunga zuanluh chu a rual ve ta a. A pistol chuan John-a chu a tin ta teu mai a, a hmet per țep tih chuan Sudden-a chuan Brydon-a chu a va zuan ta zauh a, a silai tinna kut chu a nem sawn sak ta a.

Sudden-a chuan, "Engatinge mi dawihzep ber anga hmanraw pai ve lote chu kah i tum mai Brydon? I duh anih chuan kei hi min kap zawk rawh, min kap duh lo a nih chuan lo awm hle hle mai la, tumah invenna nei ve lote ka kap ve mai mai ngai lo, a duh ang ngei chuan ka bei dawn a ni," a ti ta tlat mai a. Brydon-a pawh chuan engmah sawi ngam tawh lovin a kalsan ve ta zawk a, chuti taka Sudden-a thinrim hmel a han hmu zet chu a khur lo chauh a ni.

Sudden-a chuan amah chotu chu a pan phei ta a, ani lah chuan Sudden-a chu ngaihsanna tak a nei a, mahse a pu, leia tlu hut mai a han hmuh leh chuan thinrimna chuan a tuam hneh leh hle bawk a, a pu thattu chu that let ve thei turah a inngai ve bawk si nen. Kuttum anih ngat chuan a pu phuba chu laksak thei ngei dawn pawhin a inhria a. Sudden-a lamah chuan kal ve pahin, "I silai chu i paih ve ngam chu a nia maw? Ka sawisa hlum dawn che tihna a ni mai alawm," a ti ta khu khu a. Sudden-a chuan, "I pu pawh silaia eng ual a ni bik lo ang bawkin nang pawh kha eng ual va ni bik suh che," zam lo fe chuan a han ti let ve a. A rilru tak chuan a huphurh ru ve hle a, a chan chhe zawka țan pawh a hlau hlel lo viau bawk a.

Big John-a chuan amah ngainep hmel tak leh a pu thi tawh sawichhe zuitu Sudden-a chu a huat a tawngkhawng ta a ni ang, a zuan ta thut mai a. Sudden-a chuan a lo rin lawk sa reng anih avang chuan a sir lamah a per sawn hman zauh a, chumi rual deuh thaw chuan a kuttum pahnih chuan Big-a dulah tak a lo tlir sak pawp pawp mai a. Big-a chu Sudden-a lo per sawn hman avang chuan a duh ai maha hlaah a va inthen ta lawp a. Chutah a bawhin a rawn bawh leh ta puat a, Sudden-a chuan a hma ang bawk khan a lo bum leh zauh a, a dulah bawk chuan a lo tlir leh pawp pawp a. Mahse Big John-a chuan Sudden-a hnek chu a ngai pawimawh tham lo viau mai a, a rawn inher leh vut a, mahse Sudden-a chu a lo insawn hla leh hman daih tawh a.

Veilama Sudden-a a per sawn ziah chu Big-a chuan a hrethiam ve ta a. Chutah a zuang phei leh ta dawrh mai a, chumi rual chuan a ban dinglam chu na em em mai hian a vai phei ta fua mai a; Sudden-a pawh chuan Big-a chu lo bum leh tumin a han zuang per leh bawk na a, Big-a ban vai chu a bum seng ta bik lo. Big John-a kuttumin a beka a han vai chawrh takah chuan Sudden-a chuan a lu chu a thlawh sak ta emaw a inti hial reng a, a na ti lutuk chu a tlu ta hnawk mai a. Chutia a han țhu chiah chu a khabe ah tak han pet sak tumin Big-a chuan a ke chu a han lek phei fua ta mai a, chu chu lo hmuin Sudden-a chuan a țhutna chu a sawn hman ve chiah a, chu mi rual chuan Big-a keah chuan a man sak ta a, rang zet hian a thawhpui ta hlawt mai le !

Big John-a pawh chuan a balance hlohin a tlu thum ta dup mai a. Sudden-a chu pen hnih vel a han hnungtawlh a, a nak nâ pawh chu nâ a ti ta deuh riau mai a, mahse han chet theih loh phah nana hman erawh a tum bik hauh lo. Big John-a chu thinrim rum ngul chung chuan a rawn tho leh ta a. Sudden-a chu pawhdarh vek tum hian a rawn zuan leh ta mai a. Mahse ani chuan lo per sawn chu awmze nei lovin a hre ta zawk a, a kun hniam thung a, Big-a khupah tak chuan a kokiin a lo do ta nghek a, a rihna zawng zawng nena rawn bawh a ni bawk a, hmaia lei vaw dawt chuan Big-a chu a tlu leh ta țhuai a, Sudden-a erawh chu a tho vat a, Big-a rawn thawh leh chu a lo nghak ta a.

Big-a chu hmai thi sung chuan a rawn tho ve leh ta a, a hliam pawh ngai pawimawh zo tawh bik lo chuan rum țuah țuah chung chuan Sudden-a chu a rawn bawh leh ta a, a ban pahnih chu a phar kak huang bawk a; chuvang chuan Sudden-a pawh chu a per sawn hlei thei ta bik lova. Big-a chuan a pawmbet ta tlat mai a, a pawm ngheh em avang chuan thawk harsa a ti hial a. Sudden-a chuan chutia tawrh reng chu țhaa a hriat tak loh avangin tih dan tur a ngaihtuah leh ta a, a tha la neihte sawm khawm tur chuan a hnung lamah a eu ta vak a.

Chutia a bana a tha a han sawmkhawm hnu chuan vawilehkhatah a han ding ngil ta thut a, chumi rual chuan a kut pahnih chuan Big-a bek tawn tawnah chuan a ben chilh ta bur mai a. Big-a na ti chu a tawlh hnung ta dawrh a, a luhai ni ngei tur hian a nger kawi ta chhu chhu mai a. Chutia a harh chhuah leh hmaa khawih zui vak tur chuan Old Joe-a te ho chuan, "Nang pawh i țhut hnawk laiin a khawih zui che kha, che zui ve vat rawh," tiin an lo au tuar tuar a. Mahse chu chu Sudden-a chuan a duh dan a ni ve tlat thung lo, an chet theih loh lai denchhena khawih chu a tum lo.

Big-a luhai a reh leh hnu chuan rawn ei mai tum niawm hian Sudden-a chu a rawn bawh leh ta duai a, Sudden-a chuan lo bum leh zuan pah chuan a kaizaah a han pet zui nghek a, tlu em lo chuan a duh aia thui mah a tlan ta uan uan a. A rawn inher leh a, fimkhur tak zawkin Sudden-a chu a rawn veh ta a. Chutia fimkhur nachang a hriat chuan Sudden-a chuan a hlauhawm hle dawn tih pawh a hria a. Chutia rawn hnai hruau hruau chuan rawn rehhlum mai tum hian han kuah leh tlat chu a tum ta a.

Chutih lai chuan ani chuan kun chelchawl hian a pan let ve ta thut a, Big John-a dulah bawk chuan a luin a lo do sak ta awk a, Big-a pawh chuan na a ti ve hle a, a rum nghut hial a. Mahse Sudden-a pawh chuan bum hman ta bik hek lo le, a khabe takah chuan Big-a chuan a vai fuh ta bur mai a. Sudden-a chu a hnung lamah a leng dawrh a, chumi a insiamrem leh hma chuan Big-a chuan a bawhchilh ta a. Sudden-a hrawkah chuan a kut hrawlpui mai chuan a rek ta chut mai a, a rek hneh bawk a, Sudden-a pawh a kang zawk a.

Big John-a chuan a reh nat em avang chuan Sudden-a chu a chau ta deuh tlat mai a, boruak pawh a hip hlei thei ta lova, a hmaite chu a duk ta hial a, a khaw hmuhte chu a fiah lo ta ruai mai le ! A mah rektu kut ațang lah chuan han tal chhuah mai rual ni hek lo, thir chaicheh liana chehbeh ang tlat a ni mai si a. Second thum vel hnuah chuan Sudden-a mitmeng chu a buai ta a. Old Joe-a te ho chuan Big John-a chu rawn kahhlum tawp mai hi an chak et et tawh mai a, mahse Sudden-a duh dan a nih loh bakah, Sudden-a chu anmahni lam chhawntu a ni tlat bawk si avangin han kah mai chi ni hek lo, lainat takin an lo thlir ngawih ngawih ringawt mai a ni.

Sudden-a chuan thi dawn thova a inhriat tak avangin vawikhat tal na tawka han khawih nat ve leh chu a tum ta a. Big-a kut, a hrawk rek lotu lamah chuan tlemin a han saisir deuh a, tichuan a kutin Big-a hmaiah na tawkin a khawih thei dawn tih a hre ran a. Chutia a han insiamrem deuh takah chuan a theih angin boruak a han hip a, a tha la neih zawng zawng sawmkhawmin a theih anga na chuan Big-a mitah tak a kutzungțang chuan a chhun ta nghek mai a.

Chu veleh Big-a mitmu pakhat chu a keh tih hriat tak hian tuifim a rawn luang chhuak ta ngiah ngiah mai a; a na tawk hle bawk a ni ang. Big-a chuan a kutin a mit chu a hup ta nguih mai a. Chuveleh Sudden-a chuan duhthawh takin boruak a han hip leh vat vat a,a thisen kal buai nuaih tawhte chu a rawn inpe țha leh ta deuh bawk a. Chutah a theihtawp tak meuhin Big-a tilah tak chuan a pet sak ta siah mai a, a na ti lutuk chu a rak hian a rak țe ţeng ţung a; a nat em avang chuan a țhu ta hnawk a, chhuatah chuan a bawk leh thlawp a, nikhaw hre lovin a awm zui ta a.

Sudden-a chuan muangchangin a pistol, leia let balte chu chharin, a mu a han thun khat leh a, "Tunah chuan kan hna kan thawk zo ta, i chhuak tawh ang u le," a ti ta a. Old Joe-a chu Sudden-a bulah chuan a rawn tlan phei thuai a, "Jim, a rekhlum dawn ta che emaw ka lo ti hman asin," thaw halh chunga a rawn tih chuan Sudden-a pawh chuan, "Min rekhlum țhelh zawng a ni reng a ni," a lo ti mai a.

Tichuan puk chu an kalsan dawn ta a, Jelatin leh saddle an dahkhawm țeuhna an thlen chuan Sudden-a chu a ding ta chat a, "He puk hi tuman tawmkuk atana an hman leh tawh lohna turin bomb darh vek tur a ni. Kei leh Dick-an kan rawn buaipui vel ang a, midang zawng chuan Stoddard-a leh Preson-a kha lo va zawn chhuak rawh u, sakawrah in hlang ang a, kan naute dang zawng nen khan tlang bulțhutah min lo nghak dawn nia," a ti ta zung zung a.

Sudden-a rawtna chu zawmin an chhuak ta hlawm a, anni pahnih pawh chuan Jelatin pawh chu an buaipui nghal a. Stephan-a room ațanga fit țanin pindan tinah chuan Jeletin tlawn nga zel dahin a ruala puak vek thei tur chuan a fuse chu an zawm ta zar zar a. Puk kawngka pawn ber pawh kha khartu tur awm ta hek lo, a lo la inhawng huau reng a. Sudden-a chuan a ipte chu a han dap rak rak a, nawhalh a han phawrh a, fuse hmawr chu a han dehkai ațanga minute sawm vela puak chauh turin sei takah a fuse chu an tan a. Sudden-a chuan a han dep kai ta a, chu veleh hmanhmawh takin an tlan thla ve ta a.

An țhiante chu an lo kim țhap tawh a, Sudden-a chuan, "I kal ang u le, kan kal vat loh chuan puk chim chhe vek turin bomb kan kam a, a nghawr velah tlang panga lungpuite pawh a rawn lum chiam dawn a ni," tiin kal a rawt ta a. Midangte chu an sakawrah chuan an chuang kai țhap tawh a, Preson-a ruang pawh ama sakawrah an phuar bet a. Stoddard-a erawh chuan amaha a chuan theih a inrin avangin kun ngaihin a sakawrah chuan a țhu ve a.

Nigger erawh chu a awm ve loh avangin Sudden-a chuan chang a han tum raih a. Chutihlai chuan Stephan-a kahna kha a rawn thip zawr a, a rawn thi nghal ta zaih zaih a. Nigger pawh chu a pu chang tum ri chu hriain tlang pang ațang chuan a rawn tlan thla ve ta pur pur a, a pu chu a rawn nul ta thuak thuak a. Thisen rim a han hriat takah chuan lungnih loh ve hmel awm tak hian a nur ta nung a, Sudden-an chu chu a hriat chuan, "Nigger, tlemin min hliam ve hlek chauh alawm," tiin a sakawr chu a hnem ve a.

Midangte chuan Sudden-a sakawr chu it hmel fe hian an lo thlir dauh dauh hlawm a. Harry-a phei chuan, "Amah pawh hi a fing hle tawh a, chu ai chuan a sakawr chu fing tak a la ni ringawt," a lo ti a. Sudden-a pawh chuan nui chungin, "I sakawr kha alawm fing chu le, a khela han khen zauh chuan kal tur a ni tih a hriat ve tho kha," a han tih chuan an nui ta dar dar a. Chumi hnu chuan King Norton-a Ranch lam pan chuan an kal ta a.

Thui tak an kal hnu chuan ring em em leh rapthlak zawk khawp hian Pony Cross puk chu a puak ta ul ul mai a. Tlang vela lungpui awmte pawh chu an lum ri ta rum rum a, a thawm chu rapthlak hle mah se, Sudden-a te ho tan chuan ngaihthlak nuam tak a ni thung. Old Joe-a phei chuan, "Jim, nangmah avangin zalenin kan awm ta," a rawn ti chhuak ta hluai a. Sudden-a pawh chuan "In mi puihna avang liau liau a ni zawk, tunah chuan Pine Cut ruam chu zalenin in awm ta a. Bleke-a min tirhna chu kei pawhin ka thawk zo ta a ni," a ti ve a, an vai chuan an rilru chhungril takin an lawm em em vek a ni.

K.N. Ranch an va thlen chuan King Norton-a te pafa chu Ranch tualzawlah chuan an rawn tlan thla vat a, a naute ho leh an Ranch țhenawm hote chu dam taka an rawn hawn leh diah diah theih avanga a lawm lutuk chu a lam lo chauh a ni ber a, Old Joe-a hnenah chuan a foreman Preson-a thi ta chu pawi a tihzia leh a tuarpuina thute a hlan mawlh mawlh thung a. Old Joe-a pawh chuan, "Helai ruam zalenna tur hian Preson-a chuan a nunna a lo hlan ta anih hi," a ti ve dap dap a, a chhungril takah erawh chuan rukhmang ho kuta a thi chu a tuar thiam thei lo hle a ni.

Norton-a chuan, "Chu in va chimih thei ta maw?" a han ti leh bauh a. Old Joe-a chuan, "Kan va chimih thei ta chu a ni a, engkim mai Jim-a remruatna anga kan tih zel vang zawka chimih thei chauh kan ni. Stephan-a phei chu Jim-a thah ngei hi a ni nghe nghe a, fair takin an inbei nghe nghe a ni," a han ti a, Big John-a nena an inbeih dan zawng zawngte nen a hrilh vek a. Norton-a chuan a foreman chu ngaisang leh lainat tak si hian a melh phei ta vawng vawng a, ani chu a sakawr ațang chuan a chhuk ve mek chauh a.

Elizabeth-i chuan a pa leh midangte pawh chu zah zo lovin Sudden-a chu a va kuah ta chawt mai a, "Jim, dam taka i lo haw leh ta chu ka va han lawm tak em!" a ti ta ngawih ngawih a. Sudden-a chuan, "Kei pawh dam taka kan inhmuh leh theih avangin ka lawm khawp mai," a han ti ve sap a. Elizabeth-i lawm lutukin Sudden-a a kuah velnaah chuan a hliam lai chu a han tawk fuh palh ta a, Sudden-a na ti chu a eu zawk a. Chu veleh Eli-i chuan, "I inhliam elo Jim ?" tih hau pah chuan a kawr chu a phelh sak ta mawlh mawlh nghal a. Chutih lai chuan ani pawh chuan, "Tlemin min rawn hliam ve hlek alawm mawle, mahse engmah tham a ni lo," a lo ti a.

An țawng ri hria chuan Nortona-a chuan, "I inhliam ve elo Jim?" a rawn ti ve ta hu a, pawi a tih hmel hle a, a pan phei ve ta vut a. "I englaiah nge an hliam che? I sawi bawk si lova, keini lahin kan hre mai bawk silo," ti a pawi ti tak chuan a nur ta nung a, a inthiam loh hmel hle leh nghal a. Sudden-a chuan, "Stephan-an min kap thawi ve hlak a, a tumna takah min kap thei ta lo a ni. A na vak lo bawk a, ka sawi ta kher lem lo anih kha," tiin a lo chhang ve a. Old Joe-a pawh chuan hre bik hek lo, makti deuh hian, "E khai, hliam tuar chungin a ni maw kha paliana kha i lo beih a?" a rawn ti chhuak ve ta ho a. Sudden-a chuan, "A nat vak loh avangin min tibuai chuang hlei nem," a lo ti awlsam leh mai a.

Elizabeth-in Sudden-a hliam a han hmuh chuan a țe ta țhat a, a hliam chu a lo pawrh tuam mai niin, "Eng mihring nge maw i nih le? Hetiang khawpa hliam nasa tuar si hian Stephan-a bula ding țhin, palian pui kha i la hneh thei a maw? 'A na lo ve' te chu i la ti leh ta nghal a! Kal rawh, inah i chho vat ang, i hliamte hi kan silfaia kan tuam vat loh phei chuan i dam loh phah ang e," tih leh Sudden-a kaih chhoh chu a rual ta a. An kal chhoh pah chuan hmana Elizabeth-i thusawi kha la runluih pah chu a la duh cheu a, "Sudden outlaw, mihring ve mai alawm ka nih le," a la ti ta nang nang a.

Elizabeth-i chuan, "Jim, ka thinlung zawng zawnga ka hmangaih lai che hian Sudden outlaw anga ka la hmuh theih che chu i la ring fo dawn em ni? Hmanni kha chuan ka thinrim leh ka rilru nat em avangin ka duh miah loh leh ka tum hauh loh angin ka țawng chhuak ta mai kha a ni a, i mi ngaihdam pawh ka ngai tak meuh a, ka ngen chiam bawk che a. Eng ang pawhin ngai mahla kei chuan ka hmangaihna che hi chu a pangngai reng a ni tho ang," a ti ta sap sap a. Elizabeth-i chuan a rilru ang tak tak a sawi niin Sudden-a pawh chuan a hre ve ta a, "Chuti takin min lo hmangaih ang tih reng ka lo ring pha hlei nem," a ti ve ta a.

Ranch in bathlar chu an thleng chho ta a. Elizabeth-i chuan ding meuhin, "Jim, dawt ka hrilh theih che chuan kei hi Elizabeth Norton-i ka ni lo tihna a ni ang," a ti ta hmak a. Tichuan, inchhungah chuan a hruai lut ta a, ama room-ah ngei chuan a luhpui ta a, a khumah chuan Sudden-a chu a țhuttir ta a. Inthlahrung deuh tak hian Sudden-a chuan, "I khumah em hi chuan kei, thisen kai hnuang lehnghal hian ka ti țawp zo vek anga sin le!" a han ti a. Elizabeth-i thung chuan, "A ti țawptu, nang i nih phawt chuan ka taksa leh ka thinlung thleng pawh hian ka ui hlei nem," tih pah chuan a hliam chu a buaipui ta vat vat a.

Elizabeth-i kut mam no leh dam thliamin a khawih velte chu Sudden-a chuan hreawm a ti lo chiang khawp mai. Chutiang taka Elizabeth-in a lo hmangaih tih a han hriat chuan a rilru a lo tihnatnate kha a inchhir ru ve ta hle mai a, midang nei tur anga a lo hnar kherte kha a inhuat phah ta em em a; a kalsan hun a thlen pawha Elizabeth-i chu rilru hlim taka a awm theih nana tihhlim duhna lian tak a nei ve ta a, "Eli, i rilru ka lo tihnat sak che avangin min ngaidam hram ang che aw, kei pawhin ka hmangaih tak meuh che a ni tih pawh min hriat sak bawk la. He Ranch hi lo chhuahsan mah ila, eng hunah emaw chuan ka la rawn kir leh ang a, min lo la nghak anih ngat chuan ka nupui atan ka rawn nei ngei ang che," a ti chhuak ve ta phawng mai a.

Elizabeth-i erawh chuan a chhang mai lova, ngawi reng chuan a hliam chu a tuam sak mawlh mawlh a, a tuam sak zawh fel chuan, "Jim, i ti tak tak a maw?" ti a nuih saih pah chuan a kuah ta hnap mai a. Sudden-a hmui pa hrat mai chu duh takin a fawh sak ta vawng vawng a, ani pawh chuan ngawihsan mai phal bik lovin a lo fawp let ve ta ngawih ngawih a.

Rei tawk duhthawh taka an inkuah hnu chuan, "Eli, kan awm rei lutuk chuan i pa te pawhin nuam an lo ti lo ang e, i chhuk ve tawh ang hmiang," tih pah chuan a kawr chu hak leh mai a han tum a. "I kawr kha chu ka lo sufai ang e, suk loh chuan a chhunglam kha thisen hlir a ni mai si a, i pindana i kawr dang ka zuk laksak ang che. A reng thuah ka pa chuan kan awmdan engkim hi a hre vek tawh tho alawm, venthawn tur a awm lo, kan inneih pawh a remti vek tawh," a ti a, a kal chhuak ta nghal mai a.

Sudden-a chuan chu țawngkam chu mak a ti hle mai a, engtinnge an pu chuan a hriat? A fanu chuan a lo hrilh em ni ang? A hrilh mai duh chu a ring pha bawk si lo! Elizabeth-i chu Sudden-a kawr keng chuan a lo lut leh nghal a, han haktir pah chuan, "Ka pa chuan zanin tlai chu kan Ranch-ah, țhenawmte ho nen chaw eikhawm a rawt a, Pu Joe-a te ho pawhin an remti bawk, kan naute ho pawh an phawk lek nasa tawh mai, kei pawh Pi Monti ka va puih ve a ngai dawn a ni," a ti ta zung zung a.

Sudden-a pawh chuan, "A va nuam awm ve le, mahse thil pakhat min han hrilh teh, i pa chuan engtin nge kan chanchin chu a lo hriat theih?" a han tih chuan ani chuan nui san san chung hian, a awm loh hlana an chanchin engkim a pain hriat a duh chhante, a bul ațangin a hrilh fai vek thute nen chuan Sudden-a hnenah chuan a hrilh ve ta a. Sudden-a chuan mak a ti deuh viau na a, mahse Elizabeth-i chuan a pa in hrilh a phut ziate, hrilh loh theih a nih loh thute chu a sawi ta zel a.

Tlaiah chuan Ranch țhenawmte chu an kim țha hle a, a hliam tawrh avangin Stoddard-a chu a tel ve thei lova. Zanriah ei a lo hun chuan hlim takin an ei ho ta a. Zan rei tak thlengin an meng a, Ranch ţhenawm te'n haw an tum hnaihah chuan Norton-a chuan, "Awle, zanin hi helai Pine cut ruama awmte chuan englai mahin kan theihnghilh tawh awm love. Hetiang hun lawmawm min rawn thlensaktu Jim-a leh a rawn tirtu Governor Bleke-a chungah kan lawm zia hi ka ţawngka mai chuan ka sawi chhuak thiam lova,.." a han tih chuan kut an lo beng dar dar a.

"Heti khawpa kan mangan laia zalenna neitu, Pine Cut ruama awm zawng zawngte kan inthurual deuh deuhna tur ni bawk rawh se. He ram chhuahsan tawhtute leh Stephan-a sual avanga an Ranch lo thihchilhtute ka lainat zia lah ka sawi chhuak thiam hek lo," a han ti dap dap a. Midangte pawh an rilru a khawih ve hle a ni ang, an mittui an lo hru fap fap hlawm a. Chu mi hnu chuan hlim tak leh kham lo takin an inţhendarh ta hlawm a.

Chu mi kar aţanga kar hnihna a liam leh chuan Sudden-a pawhin K.N Ranch chu chhuahsan a lo tum ta a. Norton-a te pafa chuan kal lo mai tura an thlem chiam pawhin kal lo thei a nih loh thute sawiin, eng hunah emaw chuan a la rawn kir leh ngei tur thute Sudden-a chuan a hrilh ve a, an naute ho pawh chuan an ui em em ţheuh a, a kaihhruaina chu nuam an tiin an ngaisang ţheuh bawk a. Sudden-a ngei pawh chuan a hreh ve hle a, mahse, a kal ngei chu a ngai miau si. Bleke-a'n, "I hna i thawh zawh hunah chuan rawn kir leh la, chuti lo chuan ka che buai mai dawn si," a tihte chu a la theihnghilh mai si lo.

Sudden-a kal tum ni chu a lo thleng ta a, Nigger-a pawh chuan an chhuak ve dawn ta a ni tih hrethiam ve niawm takin a pu chu a thlir vung vung a. Sudden-a chuan a sakawr zin-ah Elizabeth-in a sukfai sak leh a thawmhnaw dangte bakah kawmawlte chu a ţawnbet lah tawh a, tualzâwlah chuan inpeih atin a ding tawh a. A naute ho chuan hnukulh ţeuh leh kun lap hian chibai an buk diah diah a.

Norton-a te pafa pawh an bulah an rawn chhuk thla ve ta a. Norton-a chuan hnukulh ve ţeuh chung hian, "Anih, Jim, kal i tum ţalh a nih chuan, 'dam takin' kan inti mai a ni ang chu, i thiltihna apiangah vanneihnain umzui zel che rawh se. Englai pawhin he Ranch hi i Ranch a ni ve tho a ni tih pawh theihnghilh hauh bawk lo la, lo kir leh ngei ang che," a han ti a, a mittui chu a hru mual mual a, midangte pawh an kun nghiai a.

Sudden-a pawh chuan, "Ni e, eng hunah emaw chuan ka la rawn kir leh ngei ang, nangni pawh dam takin lo awm ula, tin, ka naute pawh hi fel tak tak vek an ni a, kawng tinrengah malsawmna leh vanneihna dawng ang che u," a han ti ve a. A sakawr chu a pan phei a, a thlen chuan ţah aw ţeuha "Jim" tih ri chu a han hria a, lawnkai mai lo chuan a han ding leh chat a. Elizabeth-i chuan a pa kut a vawnna chu thlahin, tlanin a rawn pan ta a; Sudden-a pawh chuan a rilru chu lo hriatthiampui tak chungin a lo kuah chat a. Elizabeth-i chu engmah pawh sawi thei lo chuan a inhnit ta hlawp hlawp mai le!

Chutah zet chuan Sudden-a meuh pawhin kalsan mai har a ti hle mai! Elizabeth-i chuan, "Jim, i awm loh chuan engtik lai mahin nuam ka ti thei lovang, i kalnaah chuan min hruai ve mai rawh," a ti ta hliam hliam a.. Sudden-a chuan, "Eli, kei pawhin kalsan che chu ka hreh ve em em tho a, mahse tunah erawh chuan kan inţhen rih phawt chu a ţul miau si a ni. Tin, ka kalna tur chu i kal ve na chi a nih loh bakah i kal chuan i pa hi engtinnge a awm ang? Lunglengin a thi mai ang asin. Chuvangin ka tan pawh a hrehawm loh nan hlim taka min thlah hi tum ve hram zawk teh. Dam takin kan awm anga, eng hunah emaw chuan ka nupui i la ni ngei bawk dawn alawm," a han ti dap dap a.

A thusawi dik zia chu Elizabeth-i pawh chuan a hre em em a, chuvang chuan a ngawi ta vang vang a, "A nih leh Jim, kan inhmuh leh hma zawng atan," tih pah chuan a kuai kun a, duhthawh em em chuan a fawp ta ngawih ngawih a. Rei tawk an infawh hnu chuan Sudden-a chuan, "A nih leh, Eli, ka kal tawh phawt ange, ka kal tlai lutuk chuan ka tan a ţha lo ange," tiin a sakawrah chuan a lawnkai ta a..

Sudden-a chuan a naute ho chu an hming lam ţheuhin, "In vaiin mangţha vek ule, harsatna a awm pawhin kan pu hi lo phatsan hauh suh ang che u. Eli, nang pawh dam tak leh rilru hlim takin lo awm ang che," a tih zawh chuan King Norton-a lam chu a hawi a, "Pu Norton, I Ranch hi tluang taka i enkawl zel theih nan ka duhsakna sang ber ka hlan a che," a ti leh a. Tichuan, rei tak a lo chen vena, K.N Ranch ram, a duh ber leh a hmangaih ber awmna chu kalsanin, rampalailengah thlaler ramro hmuna hrehawm taka kal leh tur chuan a chhuak ta bauh bauh a.

Thui tak a kal hnu chuan a han hawi kir a, a naute ho leh an pute chuan an kut an rawn vai lap lap hlawm a. A hmangaih em em, Elizabeth-i pawh chuan a rawmawl var a rawn vai lap lap chu a han hmu thei a, mahse Elizabeth-i bianga hmangaihna mittui luang ngiai ngiai erawh chu a hmu pha tawh lo. A lukhum chu phawkin a han vai let ve lauh lauh a. Chutah, englai maha a ţhen ve ngai loh, a sakawr Nigger chu hmalam panin a kaltir leh ta a..

A TAWP TA..

Chhiartu zawng zawngte, in chungah lawmthu ka sawi e.. He mi zawhah hian Sudden-a leh Governor Bleke-a intawnna 'Sudden' tih ka chhunzawm leh dawn a, in lo chang leh ţheuh dawn nia...

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/