UTAH BLAINE (Completed)

[HLalthazuala]

UTAH BLAINE CHAPTER - 7
*********************************************

Pindan chhungah chuan Blaine-a chu a vei sek mai. Inbeihnaah hual emaw, danchep emawa awm a duh lo. Bei hmasatu nih a duh tlat. Lo inven aiin nawrtu nih a duh. Chutih lai chuan inbeihna hmuna hmeichhe lo awm ve hi a duh hauh lo. Bung vat hian Mary hnenah chuan "Tunah chuan duhthusama inkhapthluk reng a hun ta lo. Thil a puak keh tawh a, i kalchhuah hi a tul ta a ni," a han ti a.
"Chung ho zawng zawng hmachhawn tur chuan ka kalsan ang che u maw? Ka kal bik hauh lo ang," Mary chuan a lo ti a. Blaine-a erawh chuan "I kal chhuah hi a tha zawk a ni. Keini pawhin helai chhuahsan hian hmun dang atanga kan beih tul hun pawh a awm ngei ang," a ti hmiah a. Coker-a chu a silai la in pawn lamah a chhuak a, in atang chuan a inthiarfihlim a. Timm-a pawh sumhmunah chhuakin a kuaite a ti nung a, a ding vang vang a. Kelsey-a telloa khawsak chu ho a ti. A thih theih pawh a lo ringlo a ni.
Blaine-a chuan zawi sap hian "Mary, i kal hi ka duh tak meuh a ni. I duh chuan Red Creek-ah i kal thei a. Anih loh pawhin khawchhak lam, Mormon ho khawsaknaah i kal thei a ni. Chutah chuan i him zawk ang. Tunah engkim a kehsawm rih a nih hi," a han ti a. Mary chuan chiang taka en in "Enge i tih dawn? Tunah enge tih theih i neih? Heng ho zawng zawng hi i hmachhawn dawn a ni si a. Joe Neal-a ber a thi tawh si a, eng nge tlawhchhan tur pawh i neih tawh?" a ti ta a.
Chunglai thil chu Blaine-a ngaihtuahlai mek a ni. Joe Neal-a thah a nih tawh avangin a ke hi an rawn phet ta dawrh a. Neal-a hian roluahtu tur a neih loh avangin a thih tawh ber chuan ranch chhungah thuneihna a nei tawh lo. Amah Blaine-a hian mihring nei nise, helai ram hi a chuh ve thei. Hnehna a chan chuan 46 ram hi a nei thei a ni. Chutiang tur chuan mi a nei tlem em em a, midang rawih nan sum a nei lo bawk. Helaia an tawm reng chuan an rawn beih leh hunah an lo dang zoin a ring lo. "Helai hi kan chhuahsan a ngai. Kan chet nghal a ngai a ni. Helai hmun humhalh kan tum rei poh leh kan che chhe thei. Humhalh chu kan tum ang. Kan hlawhchham ta anih erawh chuan kan tlanchhiat te pawh a tul ang," a ti ta zel a.
Coker-a kha lo kir lehin "Helam pan hian mi enge maw zat an lo kal. Engtia tih tur nge ni ang?" a rawn ti a. Utah chuan kawngka lam hawiin "Mary, i kal chhuah hi a tha a ni. Kan hmachhawn tur hi an nep lo teh a nia," a han tih chuan Mary chuan "I tawpsan dawn tihna a ni maw?" a lo ti a. Za hauh loa nui hak chung hian Blaine-a chuan "Darkar tlemte chhunga chu zawhna zawttu pahnihna i ni. Ka bansan lul lo. Mi pakhatin Joe Neal-a a that a, a tir tu an awm bawk. Hna thawh tur pawimawh tak ka nei a ni,"
Rip Coker-a chu in kil khat bang nghengin a lo ding a. Blaine-a hnenah chuan "An thahnem khawp mai. Sawlai lungpui phenah sawn Timm-a pawh ka awm tir e," a lo ti a.

"A that chu. Min rawn kap hmasa anih loh chuan lo kap suh ang che u. An rawn kap anih phawt chuan hlah hauh lo turin in kap dawn nia,"
"Hetiangah tunge thelh tawh ang!"
Muangchangin Utah Blaine chu an lo kalna lam kawngah chuan a chhukthla a. Thla pawh a chhuak sang tawh hle a, en pawh a eng viau mai. Sakawra chuang hoin an rawn hnaih deuh chuan an kal muang tial tial a, Blaine-a chu kawnglaia rawn dingin "Kha tah khan ding rawh u," tiin thu a rawn pe ta a. Sawmhnih rual lai chu an ding rual thawt a. "Nang kha Blaine-a maw i nih?" tiin an rawn zawt a.
"Teh reng mai. Tu dang nge hmuh in inbeisei? Joe Neal-a i that leh nghal a,"
Thawm reng a awm lo. Reh tak a ni. Thinrim insum deuh chung hian Nevers-a chuan "A dik alawm, Neal-a chu a thi tawh. A thihna hian hetah hmun i neih lohzia a entir nghal," a rawn ti a.
Blaine-a erawh chuan "Chutiang chuan kei chuan ka ngai ve lo. Neal-a kha la damin min ban thei a. A thi tawh a, ka hna atangin min ban lo bawk. Hna thawh tur min pe a, tumahin chu hna chu min laksak loh avangin helaiah hian ka awm zui zel dawn a ni," a ti hmiah a.
Thinrim tih hriat zetin Nevers-a chuan "Â duh suh. Hetah hian mi sawm hnih ka rawn hruai a, tunah ngei hian helai ram hi ka rawn la ta anih hi," a han ti a.
Blaine-a erawh chuan zawi sap, chiang tak si hian "Chutiang chu ka hmuh dan a ni ve lo. I thuneihna hnuaia dah i tum anih hrim chuan Nevers, i rawn hruai zat hi i hruai haw tawh hauhlo ang," tiin "Ka rawn umzui lehnghal bawk ang che," a han ti zui a.
"I thih miau chuan min rawn umzui hauh lo ang,"
Blaine-a chuan aw ring deuh zawk hian "Naute u, he mihring hnung hi in rawn zui chu a ni a. Eng ang mihring nge anih i han en teh ang u hmiang. Nevers, tunah hian ka that nghal thei che. I rin ber nen pawh rawn ding chhuak ula ka that nghal ang che u. Zan thla eng hnuaiah hian eng anga huaisen nge i nih i han fiah ang hmiang," tiin a cho ta a.
A duhthusam hun a thleng ta. He hun ngei hi Nevers-a beisei chu a ni. Amaherawh chu Blaine-a te ang hmachhawn tur hian huaisenna a nei tawk em? Amah puitu tur heti zat nei chung hian Blaine-an a sawi ang ngei hian a rawn kap thelh dawn lo tih a chiang si. Khawthlang ramah hi chuan hruaitu huaisenin amah zuitu te ah awmzia thui tak a nei tih a hre bawk si. Khawthlang lamah kher kher hi chuan hruaitu dawihzep an zui ngai lo. Chona aw a hria a, chhan tha tawk nen helai atanga tal chhuah dan ngaihtuah a ngai ta tlat.
"Engti zia nge ni ta, Nevers? Thi turin i la inpeih lo tihna em ni?" tiin Utah chuan "Min huphurh lutuk mah ta che. Tunah tak hian ka kut hian ngai a awh phak lo tlat. Min phawikhalh maithei asin,..nimin lama Ortman-a ka chin chauhna lamah ka kut hi a vung deuh chur ania," a han ti a. "Engtin leh engtikah maw?" lokal zinga hnung deuh ami, an inbiakna in eng nge a thlen dawn tia lo ngaichang rengtu chuan a rawn ti chhuak a.

Veilam sira awm Rip Coker-a chuan a awm ve tih hria se a duh avang chuan "Naute u, a sawi kha a dik. Blaine-a hian Ortman-a kha a sawisa hlum lo chauh a ni. Ama inah ngei va panin duhtawkin a va sawisa a ni ber mai. Ortman-a pawhin a ti na khat ve tho," a rawn ti chhuak a. An zinga pakhat chuan "A thusawi chu in hria maw? Utah Blaine-a hian Ortman-a kut lawngin a sawisa hrep anih chu," tiin a bula mi chu a hrilh a. Chutihlai chuan Coker-a chuan "Thiante u, thi tura in rilru in siam fel thuai ka beisei," tiin dam thlap hian "Shotgun-a ka tin na che u lamah ka ban a kham viau tawh ania," a han ti zui a. Rip Coker-a hian winchester rifle a keng a, mahse an hmuh theih chu a barrel chauh a ni. A rawn sawi lan Colt Revolver shotgunah chuan mu li lai a thun theih a. Mi pangngai chuan hetianga hnaiah he silai hmang hian tumah a thelh dawn lo tih hriat vek a ni. Zan thla eng hnuaiah chuan a rifle ken hi shotgun a ni lo tih hriat hran theih rual a ni lo.
Engtia tih tur nge tia an inngaihtuah lai chuan lungpui phen atang chuan Timm-a chuan "In awmna kha spencer rifle chuan han thelh rual chi a ni lo. Kah nghal mai atan pawh in tha kher mai," a rawn ti ve leh ta.
Rei tak chhung chu a reh tlawk tlawk mai. Nevers-a pawh a tawng chhuak lo. Tun atan boruak rit zual kiam hreta a hriat avangin a lawm hle. Tunah emaw, nakinah emaw Blaine-a silai a hmachhawn hi a chak mawlh lo. A tun dinhmun atanga talchhuah dan erawh hriatthiam harsa a ti. Chiang takin tih mualphoin a awm mek tih a hria a, a thinur tak zet. Hetiang anih tak avang hian a hote pawhin phur takin a hnung an zui tawh dawn lo tih a hria. Blaine-a ringawt pawh hmachhawn nuamlo tak anih laiin shotgun, mu li lai inthun hmachhawn zawng tih rual a ni lo. Chubakah spencer .56 an la hmachhawn tel ta lehnghal.
A ngaihna hrelo a an awm laiin Blaine-a chu hmalamah a rawn pen phei a, "Zanin atan chuan kan ennawm chhuah chu duhtawk ila, helai hmun hi neih in duh anih chuan harsatna hmachhawn tur in ngah viau ang. In duh anih chuan in rawn tum leh dawn nia," a rawn ti ta a.

Nevers-a pawh chuan "Tunah chuan kan kal phawt ang. Mahse naktukah kan lo kir leh ang," a ti ve ta a. Blaine-a pawh chuan "Teh reng mai. Kan lo lawm ngawt ang che u. Helaiah hian nangni ho phumna tur ram chu a awm e," a ti hmiah a. A hnunglam atangin muangchangin a inher a, hreh tak angin Nevers-a pawh chuan a sakawr kai herin a hote chu a zui ve ta.
Rip Coker-a chuan muangchanga rawn panin "Khatiang taka hnaiah kha chuan kan intawng leh tawh hauh lo ang. Thawkkhat lai phei kha chuan ka bing deuh chuk chuk a ni," phur takin a rawn ti a. Blaine-a pawh chuan "Shotgun i rawn sawi ri khan awmzia a nei ta em anih kha," a lo ti a. Coker-a chu a lawm hle a, "Inbumna liau liau a ni. Thim tham zinga shotgun hmachhawn a duh loh tur zia ka hre reng alawm," a ti a.
An lam rawn pan pah chuan Timm-a chuan "Eng nge kan tih leh dawn? Clell-a rawn tel ve ngei turah ka ngai a, mahse an zingah khan a tello a ni ang," a rawn ti a. Blaine-a chuan "Kan nghak hrih ang a, khaw en chian hma in helai hi kan chhuahsan ang," a lo ti a. Coker-a erawh chuan "Chutiang a ni thei dawn em ni? Engmah ti theiloin kan siam chauh a, engvangin nge kan tlanchhiatsan ang?" tiin a lo zawt a.
Blaine-a chuan "Indonain a tum pawimawh ber chu hmelma te tha tih chhiat a ni. Chu chu keini pawhin kan tum ang. He ranch leh 46 ram hi kan dam chhung chuan an nei hauhlo ang. Vawiinah an thuhnuaiah rawn dah ve mah se, kan duh hunah kan la let leh mai dawn a ni," a ti ta zel a.
Zing ni chhuah rualin khawchhak lam panin an kal ta a. Mary Blake leh a awmpui nu thau zet chuan Mormon ho chenna lam an pan a. Hun remchang hmasaah Red Creek lamah an ram hum turin an kir leh ang. Blaine-a, Coker-a leh Timm-a te erawh chuan chhim lam ram chhengchhe lam an pan thung.
Ni a sa hle a, tlang sang lamah zau taka helin sakawr pathum, eitur phur te nen an kal zel a. Timm-a chuan "Kan tana hmun tha ber tur chu Maverick Spring a ni. Tlang piah lam deuh hmun chhengchhe takah a awm," a han ti a. Blaine-a chuan a thlan te chu hru in khawthlang lam a thlir vang vang a. Tlang dung sang lai atang chuan lui leh a dung phaizawl zau tak chu a hmuh theih a. An awmna atang chuan Table Mountain chu hmar thlang hreta awm a ni. Lui dung zuia sakawr chung chuang kal ve te pawh chu a hmuh theih bawk a.

Coker-a chuan "Lee Fox-a hote an nih khu. Nevers-a hian a tum angin a pumhmawm bik hauh lo ang," a rawn ti chhuak a. Blaine-a chuan "Ka hriat dan hi a dik chuan Nevers-a ram chu Bloody Basin piah deuh saw niin ka hria," tiin a han ngawi deuh vang vang a, "Kan eitur phurh te kan thuhruk fel hnuah kan va tlawh nghal tha in ka hria," a ti zui a. Coker-a pawh chuan "I sawi ang chuan ti ila,"a lo ti a. Blaine-a chuan "Kan thil phurhte hi hmun khata dahlo in a hrang theuha dah pawh a tha ang," a ti a.
Ramhnuai thing sang pui pui hmunah zawi muangin an kal a, thlan pawh tla mang loin an sakawrte tulloa tihhah phalloin an ban tum ram chu an pan zel a. Remchang hmunah eitur an pai te chu an thukru zel bawk a.
Basin bul hnai tlang dung an chuan chhuah chuan piah lawka Big N ho chenna in lianpui chu an va hmu ta. Chulai hmuna mi awmchhun chu eirawngbawltu chauh a ni. Rifle kengin kawngka lam chu a rawn pan mek a, Utah a hmuh veleh chuan a ding chawt a. Blaine-a chuan "Khawiah nge Nevers-a?" tiin a lo zawt vat a.
Coker-a chuan cook hmel a hmuh veleh a sakawr chu kuaiherin veilamah kalin in chu a kal hual ta nghal a. Cook chuan Blaine-a zawhna chu chang banga chhangin "I hriattur pakhatmah a awm lo.Tunge maw i nih reng le?" tiin a lo zawt let a."Ka hming chu Blaine a ni," tiin chutih laia Coker-a sakawr atanga chhuka in hnung lam pana a phe zauh chu a mitsirin a hmu a. Cook hnenah chuan "Nevers-a hnenah chuan 46 leh B-Bar ram hi lo khawih buai hauhlo turin hrilh ang che. A rawn inrawlh hlauh anih chuan a tuar ngei dawn tih pawh hrilh rawh,"a han ti a.
"Chung thu chu nangman hrilh ta che," tih pah chuan thunun mai theih anih loh zia entir tuma a rifle chelek a tum lai tak chuan a hnungah silai hmawrin Coker-a chuan a rawn nawr a."Zawi muangin i shotgun kha leiah dah rawh.Hmet puak teh reng pawh ni la i thelh mai thei. Mahse kei chuan ka thelh hauhlo ang che,"a rawn ti ta hmiah a.

Thudik chiangsa chu zawmin cook chuan a shotgun chu leiah a dah a, Coker-a chuan a la ta nghal a.Cook chuan "Ka chungah hian eng nge tih in tum a?"tiin a zawt ta a. Nui chungin Blaine-a chuan "I chungah maw? I chungah eng tih mah tul ka ti lo. Amaherawh chu eitur te min han chhawp ta che. Kan lo kalna a thuiin zing chaw kan ei fumfe lo a nia. Nevers-a hnenah chuan hetah hian kan lo kal tih leh 46 ram khawihbuai a tum hlauh anih chuan he hmun hi kan hal darh vek dawn tih hrilh ngei ang che," a ti a.
Eitur buatsaih pah chuan cook chuan "Pathum chauh in ni a, chetna hun in nei hauhlo ang," a lo ti a. Coker-a chuan a thuthmun atang chuan phur zet hian "A ni khawp mai. Han tum chhin teh reng se. Chet kan lak hunah chuan Nevers-a thlana an zalh fel hnuah keini ho chu min phum ve chauh ang. Chu chu lo chhinchhiah kiau ang che," a rawn ti a.
********************
Nevers-a chu a hlim hauh lo. A hoten B-Bar an han thlen chuan a lo ruak der tawh. Mi â a ni lo. Thil awmzia a hrechiang. 46 ramah emaw B-Bar-ah emaw amah leh a hote tan himna a awm hauh lo, Blaine-a leh a hote an dam chhung chuan. Hei hi a hrechiang em a ni.
Clell Miller-a pawh pawr taka rawn lut ve in Nevers-a chuan a lo panhnai vat a. "Khawiah nge Blaine-a? Amah chu i hmu em?" a lo ti vat a. Miller-a chuan muangchanga sakawr atanga chhukin "Hmu nang. Hmuh pawh ka duh lo," a han ti a.
Hmusit takin Nevers-a chuan "I zam ta a ni maw?" a han ti a. Rang zetin Miller-a chuan a rawn hmachhawn a, chutah muang charh hian "Ka zam hauh lo. Mahse he thil hi ka duh lo a ni. A that hmel a, mahse ka duh theilo a ni," a ti a. Nevers-a chuan hepa hi a kila dan chep a ni tawh tih hriain nawr luih chi ah a ngai lo. "Engtizia nge ni ta ngai a?" tiin a zawt ta zawk a. "Mocking Bird-ah Tom Kelsey-a ka tawk a, ka that ta," Miller-an a tih chuan Nevers-a chuan pawiti awm tak hian "A ni maw?" a han ti a. Mahse ani hi B-Bar a neihna tura daltu a nih a hre reng. "Blaine-a chu Coker-a leh Timm-a nen an pilbo tawh," a han ti zui a.
"Kan hmabak chu a thim hle anih chu," tiin lungngai takin Miller-a chuan "Nevers, i tawpsan mai teh ang. Ka kham takzet a ni," a han ti a. "Kan bansan ang maw?" Nevers-a thin chu ur tak a ni. "I â ta em ni? Hetiang taka ram tha kan hmaa chhawp anih lai hian bansan i duh amaw?" tiin "Engpawh nise tumah in he thil hi an tawpsan lovang. Kei ni hian tawpsan pawh ni ila midangin an tawpsan chuanglo ang," a ti zui ta zel a.
"A dik khawp mai," tia Nevers-a rilru hriat tumin Clell Miller-a chuan "Neal-a thah thu ah chuan i chungah enge thleng ang tih ka ngaihtuah," a ti ta daih a. Thinurin Nevers-a chu a vir zawk mai a. "Ani kha ka that reng reng lo," a'n ti a.
"I thupekin Witter-an a that a ni. Neal-a hian thiantha a ngah teh asin, Nevers. Phoenix-ah te, Tucson-ah te pawh. Chung ho chuan 'engti zia nge' an ti ngei dawn. Neal-a hian Vigil Earp-a dinhmun khirh tak atangin a lo chhanchhuak tawh a. Earp-a leh a hote hi an thiante lakah chuan rinawm tak an ni. Doc Holliday-a an tanpui dan te kha ngaihtuah ta che," Miller-a chuan a ti a. Nevers-a thinur chu a in thing nawk nawk mai. A luhlul teh reng nen a dinhmun a thlirin a awm chu a nuam hauh lo. A lo kal thui lutuk ta em ni ang? La kal thui lo. Hlaua khura inthiarfihlim leh thei a ni tawh lo, a tlai lutuk tawh. Inngaihtuahin chhungrilah a rum a, in thing nawk nawk chung chuan "Blaine-a hi kan that ang. Reiloteah kan that ngei ang," a rawn ti chhuak a.

"I va um hun hi a lo nghah che i ring em?"
"I thusawi awmzia hi enge ni?" vin deuh hlur hian Nevers-a chuan a lo ti a. "Ka rindan chuan amah hian min rawn bei thut ang a, a thawh pawh a thawk na khawp ang. Alta a beih dan te kha i theihnghilh ta em ni? Ka theihnghilh hauhlo ania. Alta a beih tuma a mihring tawn te kha kan hote aia rothap vek an ni a, kan hote nen hian khaikhin chi pawh an ni lo," Miller chuan a ti ta zel a.
Kir leh ngaihna a awm tawhlo chungin thu lawmawm ngaihtuah chhuah nei chuangloin an ding thap mai. Tawp thei an ni tawh bawk si lo. Nevers-a chuan a hnunglama pen thawm hria in a lehhawi a, a hote zinga pakhat chu hla vakloah rifle kengin a lo ding a. "Boss, sakawr chung chuang engemaw zat an lo kal. Lee Fox-a leh a hote an nih hmel e," a lo ti vat a. Nevers-a chuan ring tak hian "Fox-a" a ti thawt a, hepa pawh hi buaipui tham a ni tlat. Pa sang thlerh thlawrh hian sakawr buang deuh chungah chuangin a rawn pan chho a. Sakawr pawt ding lawih chungin a'n hawikual a, "I lut fel chiah tihna maw, Nevers? A tha e. Vawnghim zui nghal ang che. 46 ram lam ka pan ang," a rawn ti tawng a.
"Neitu tumah an la awmlo," tiin Nevers-a chuan "46 ram ka duh ang bawkin B-Bar ram thenkhat hi ka duh ania. A bak zawng chu nangin i nei ang," a han ti a. Fox-a chu a nui ta a . A nui hmel chu hmuh nuamlo zet a ni. Nevers-a hian hepa hi pa duham leh tihhar tak anih a hria. "A vaia neih i tum em ni? Engtin nge Ortman-a hi i tih dawn?" tiin a han zawt a.
"A inrawlh ve dawn lo,"
"Chutiang tur chuan hrilh ang che. Lam tanga i siam loh chuan Neal-a thianpa lamah a tang ngei ang,"
An dinhmun a buai nuai ta. Awlsam lai reng a awm ta lo. Miller-a hian ngawih a chuh na a, remchang a zawng ni ngei tur a ni. Nevers-a chuan "46 lam pan chuan kal ta che. Remchangah kan la chingfel zui mai ang chu," a han ti a.
Fox-a chu che map loin a ding a, "I duh anih chuan tunah hian chingfel mai ila," tiin rawtna leh chona a rawn chhak chhuak ta. Nevers-a hi mi dawihzep a ni hauh lo. Muangchanga rawn dak chhuakin chiang takin Fox-a chu a en a, "Awmze neiloin tawng suh, Fox. Keini kan lo inthah hian awmzia a nei reng reng lo," tiin muangchangin a inher a, "Lud, whiskey bawm kha han hawng teh. Hnehna kan lawm tan te pawh ni teh se," a ti ta a.
Fuller-a chu a rawn tho tuah tuah a, Blaine-an namenloa Ortman-a a sawisakna khan a rilru a la hneh tlat. Tumah in an rin phak bakin kutlawng ngeiin Blaine-a hian pa lian elkhen leh chak fahran Ortman-a a sawisa hrep si. An pahnih inkarah Blaine-a che rang zawk a, chak pawh a chak zawk tlat. Ortman-a hnek hi a na khawp mai. Mahse Utah Blaine-a a hnek na tawk lo. Hnehna a chan hnu hi chuan hneh theih loh ni maiin Blaine-a hi ngaih a ni. Hnehna a chan hnu chiah khan Fuller-a hi helai
ram chhuahsan nghal turin thu a pe anih kha.
Kha inbeih thu kha Fuller-a hian a sawilo na a thu thang chak tak a ni. Awm khawm hoin whiskey bur chanve dawn an in tawh tih chuan titi leng vel karah Fuller-a chuan "Mit ngeiin hmulo ila chuan kei pawhin ka ring hauhlo ang," a han ti a.

Fuller-a lam an rawn hawi rual thup a. Miller-a phei chuan a va pan hnai a. "I hmu amaw?" tiin a han zawt a. Intithei taka dawhkan chunga inher rem pah chuan Fuller-a chuan "Hmu ngei e. Blaine-a hian a ching hrep a ni ber mai. Ortman-a khan han bei teh mahse a che hman lo," a tih chuan an ngawi thap mai. Chutihlai tak chuan dam thlap hian "Ka rawn tel ve thei ang chu maw," tih thawm an hre ta.
Thawm an hriatna lam an hawi chuan Utah Blaine-a, engkim hmachhawn huama lo ding kak tai mai leh a lukhum pharh hlai tak hnuaia a mitmeng pawl raih leh rum tak chu chiang takin an hmu ta. A hnunga muangchanga Coker-a leh Timm-a te, Big N atanga shotgun an lak keng chunga inring taka anmahni rawn pan chu an hmu ta bawk.
Nevers-a hmel chu a dang sawp sawp ni berin a lang. Makti tih hriattakin "Nang hi, hetah hian i rawn kal ringawt amaw?" pawr fe hian a lo ti a. "Dawn lawm ni!" tiin Utah Blaine-a chuan muangchangin pakhat te te in awmkhawm ho chu a han en kual a. A tawpah Lud Fuller-a ah a tawp chat a. Lud Fuller-a hmel chu a dang sawp sawp a ni ber e. "Lud, nangma hruailuhah chuan min ngai suh. Keima thuin ka rawn tel ve tawp mai anih hi. Helai ram chhuahsanna hun i la nei cheu e. Mahse ka hmuh turah chuan awm tawh hauh suh," a han ti a.
"Enge i duh a?" tiin Nevers-a chuan a lo zawt a.
"Ka duh min zawt maw? Nangni ho hian whisky bawm in thet darh tih kan hria a, rawn tem pui che u kan duh anih hi," tih pahin Nevers-a lam chu muangchangin a hawi a. "Nevers, winchester rifle a kah fuh nuam tak tur zawng i nih hi. Big N eitur neih ang chu kan rawn ei zo deuh vek a ni,"a han ti a.
Nevers-a chuan Blaine-a chu a en tlawk tlawk mai a. Huatna in a rilru a luah hneh tawlh tawlh. Mahse a rilru chhungril ah fimkhur tura hrilhtu a awm tlat. Tun dinhmun hi chu thihnaa hruailuttu tur a ni.
"Miller-a pawh, ka hmu che a, bari bo thak khawpa sawisak che ka duh viau laiin mi pakhat lakah ka lo intiam tawh si a," Blaine a chuan a ti leh a. Rang zet hian Miller-a chuan "Chuti maw? Tu lakah maw?" a rawn ti vat a.
"Keima hnenah hian," tiin ngeiawm zeta nui chung hian Coker-a chuan "Clell, i pistol hmanga rang leh ropuia i inngaih ang hian i rang lo a, i huaisen tawk lo bawk. Kan intawn hunah pawh Tom Kelsey-a nen in intawn ang kha a ni dawnlo bawk. Tom-a i thah dan kha tualthah dan dik tak a ni," a lo ti a.
Clell-a chuan Coker-a melh pah chuan Timm-a mitmeng rum leh thip zet chu a hmu a, a khûr lo chauh a ni. He tlangval hmai bial deuh, ngawi chawi leh dam thlap mai, Timm-a mitmeng hi huatna hlirin a khat a, tun hmain hetiang anih hi a la hre ngai lo. Timm-a chuan "Clell, Kelsey-a nen khan kum tam fe kan lo inkawp tawh asin," a han ti lehnghal a.
An ngawih thap lai chuan Blaine-a chu rawn pen chhuakin Nevers-a kut atang chuan zu no chu a laksak a. Thlit belh pahin hnunglamah a tawlh a. Nevers-a en chung chuan chang bang hian "Nevers, ka that dawn che. Vawiinah erawh chuan a nilo ang. Tunah hi chuan kan rawn leng lut satliah mai a ni. Coker-a hnenah Miller-a nen inbeihna in neih loh chuan kei pawhin Nevers-a ka that lo ang tiin ka lo tiam tawh," a ti ta a.
Hnungtawlh pahin no chu Timm-a a hlan a, Timm-an tlem a in zawh chuan Coker-a a pe chhawng leh a. Coker-a chuan nui chungin a lo tlak pap a. Utah Blaine chu a chet vel apiangin a spur chu a ri chhak chhak a. Tumah an tawng lo. Mi engemaw zat chu ngawi rengin an ding ringawt a. Blaine-a chevel chu an thlir ringawt a ni. Clell Miller chuan a chevel a hmuh in ngaihsan riauna a nei; "Hei zet chu mi huaisen a ni," tiin amah leh amah a inhrilh a ni.
Khawthlang mi, rilru pangngai pu chin chuan mi pathum, ralthuam keng, pahnih phei chu rifle hmang tura inpeih reng hmaah chuan silai han chuh chi a nilo tih an hria. An zinga pakhat Fox-a erawh chuan a chuh mai duh hmelin Blaine-a chuan a hria. Mahse Coker-a mitmeng atangin Fox hian silai a chuh a ring lo. Chiang fahranin Coker-a hian Fox-a hi a lo en ran mai a ni.

"Ni e," tia tanin Blaine-a chuan "Tualthata bul tanin mi pahnih; Neal-a leh Kelsey-a te in that a. Khang mi te kha mi tha tak an ni. Tunah hian 46 Connected ram leh helai ranch hi in khawih buai dawn loh chuan mi pahnih thihna kha tawkin he buaina hi tih tawp theih a ni," a han tih chuan Nevers-a chuan "Chutianga kan tawpsan mai i ring anih chuan i â let der ani ang," a lo ti a.
Fox-a pawh chuan "Kan tawpsan dawn lo," lo ti a.
Blaine-a chuan "Anih tak chu," tia hnungtawlh pah chuan "Naute u, hei hi in zavai atan a ni e. Ni tlak hmain he ranch pahnih hi in chhuahsan anih loh chuan indona hi a kal zel tihna a ni ang. Kan hmuhna apiangah kan that ang che u a, kan zinga pakhat pawh in ti na anih chuan a tina tu chu kan khaihlum bawk ang," a ti ta a.
"Mi tlemte i nei a, i tawng lian kher mai,"
"Tih chhin i duh deuh em ni, Nevers?" tiin Blaine-a chuan chiang zetin a en a. Nevers-a erawh chuan "Hun dang a la tam alawm," a ti hmak a.
Utah Blaine chu sakawrah zuangkaiin "Tunah khan thil awmzia ka hrilh tawh che u a, in thluak burah khan vawng ang che u," a han ti leh a. Vawilehkhatah a silai chu a kutah a rawn chawr nawlh a, "In kawnghren te kha phelh nghal rawh u," fiak ring tawkin a ti a, "Thlauh thla nghal rawh u," a'n ti zui a.
Inthurual ang hrimin kawnghren chu phelhin an thlauh thla ta a. Blaine-a chuan "Khai le, in her ula, tlan nghal rawh u. A tlan hnuhnung berin silaimu a tawng ngei ang," a han ti zui a.
Inthurual leh hmanhmawh taka an tlan mek lai chuan anni pathum pawh chu an inthiarfihlim ta a. Sakawr tlan thawm a hriat veleh Nevers-a chuan "Sakawr chuh ula, um zui nghal rawh u. Blaine-a that thei emaw, a nung chunga man thei emaw hnenah dollar zanga ka pe ang," a ti ta chul a.

*********ADVERTISEMENT CLICK **********

[HLalthazuala]

UTAH BLAINE CHAPTER : 8
*********************************************

Basin an chhuahsan atang chuan Timm-an hma a hruai a. Mocking Bird Pass lama kal lovin khawthlang lama Soda Springs Creek ruam a hrut pui a.
Timm-a chin hriatnaa innghatin Blaine-a chuan a zui a, Coker-an hnung a dawl a.
Blaine-a hnenah chuan Coker-a chuan "Fox-a khan awm a ti nuam tlat lo.

Min rawn um zui lovang tih hriat a har khawp mai," a rawn ti a.

Chu chiah chu Blaine-a ngaihtuah lai tak a ni. "A thil tawn khan namen loin a ti thinur ngei dawn a," a lo tih chuan Coker-a chuan "Ni e, a tlanchhe zawka kan tan a ngai ta anih hi," a lo ti a.

Timm-a chuan engmah a sawi lo.
Ngun takin an kalna tur thlirin ngaihtuahna a seng a ni.

Chutia an kal zel lai chuan
Blaine-a chuan "Engtia hla nge ni ang, Otten-a ram hi?" a rawn ti a.

"A hla lutuk lo ang. Chuta kal chu i duh em ni?" tiin Timm-a chuan a lo zawt let a.

Blaine-an Timm-a chu a han enchiang deuh a, a hma ai khan a hlim hmelin fiamthu te pawh a duh hmel riau hian a hria. A tunhma nun leh hun harsa a tawn thin lai hmel ni ngei turah a ngai a ni.
"Duh e, kal paha tlawh theih a nih phei chuan tlawh nghal a tha," Blaine-a chuan a ti a. Coker-a chuan "Ani hi chuan min lo lawm vakin ka ring lo," a lo ti a. Blaine-a chuan "Ka hria alawm. Tun hi amah hmuhna hun kan neih hnuhnung ber anih pawh ka ring," a lo ti a.

Vanneihthlak takin a ranch ah Otten-a chu a lo awm hlauh a. Ranch lam pana lo kal a hmuh veleh Otten-a chu pawnah a lo chhuak a, ngun takin tute nge an nih a lo thlir a. Tunge an nih a hriat veleh "Blaine, hetah enge in rawn tih? He ram in chhuahsan hi a tha ber ang," a lo ti a.
"I duh zawng tak pawh anih ngei ka ring," Blaine-an a tih lai chuan Timm-a chuan sakawr te chu in tur awmna lamah a hruai a. Blaine-a chuan "Ben, kal kan tum lo. Henglaiah hian awm kan tum tlat. Indona hneh tur hian kan bei dawn a ni," a han ti a.
"Â duh suh," tiin Otten-a chuan awm nuamlo zet leh thin ur teuh hian "En teh u, naute u, hneh theihna tur chance in nei reng reng lo. Helai ram pumpui hi in do dawn tihna a ni. In thah ni hmel hmuh hi ka peih tawh lo. Kal chhuak nghal rawh u. Sum lama harsatna in nei anih chuan ka pui ang che u," a han ti a.
Chiang tak hian Blaine-a chuan "Puih ka ngai lo," tih pahin Otten-a en ran chung chuan "Nawr luih nih hi ka duhlo a, tlanchhuah hi kan tum lo bawk. Helaiah hian thih a tul anih pawhin ka thi mai ang. Mahse hei hi lo chhinchhiah rawh Ben, kei hi min phum hun chuan engemaw zat phum ve ngei an ngai ang," a han ti a.
"Chutiang thu chu sawi tur a ni lo," tih pah chuan Otten-a chu a rawn chhuk a, "Khawiah nge Mary hi a awm? A chungah eng thil nge thleng?" tiin a han zawt a.

"Mormon ho chennaah a awm. Chuta a awm chhung chuan a him ang,"
"Khawiah nge Tom Kelsey-a hi?"
"I lo la hre lo a ni maw? Clell Miller-an a that tawh. Joe Neal-a pawh a thih tawh kha,"
Otten-a chuan a lu a bu nghat a. "Chu chu ka lo hre tawh. Tom-a a thi chu pawi ka ti hle mai. Neal-a pawh hun tha a neih lai khan a inthiarfihlim tur a ni asin," a han ti a. Utah Blaine chuan Ben Otten-a chu a en tlawk tlawk mai a. A mitmengah a nihna hmuin a inhria.
"Ben, mi tha tak angin i lang. Amaherawhchu heng chinghne rual i thurualpui erawh hi chu ka haw ngawt mai. I mi duh hi a chan a chhiat veleh pawh darh vek tumin i bei a," a han tih chuan Ben Otten-a chuan "Chutiang thu chu sawi tlak anih loh chu," tih pahin thinur tak ang maiin a pheikhawk chhip chuan lei chu a'n chhir vel a. "Tunah hian khawi atangin nge in lo kal?" tiin a zawt a.
"B-Bar atangin. Chutah chuan Fox-a, Nevers-a te nen kan han hmachhawn a, an thil tih tum chu ti hauh lo turin kan hrilh a ni. Chuvang chuan ania hetah pawh kan lo kal ni. Ben, thil awmzia chu i hria ani lawm ni?" tia zawh pahin a hrilh a.
Otten-a chuan rum tawka melhin "Utah, i thusawi awmzia chu enge ni a? Mi i bum hauhlo ang," tiin chang bang hian a chhang a.
Blaine-a chuan zawi sap, chiang tak si hian "Ben, mi tumah ka bum ngailo. Bum che ka tum lo a, thil awmzia ka hrilh mai che anih chu. I neih chhun nen hian helai hmun hi chhuahsan rawh. Hun i neih laia i chhuak lo anih chuan keimah ngei hian he ram atang hian ka um chhuak dawn che," a ti zui ta a.
Otten-a hmel chu a dur khuih khuih a, rawn pen hnai deuhin "Nang kha!" tiin "Nang hian min um chhuak ang maw? Nang, silai pai fual ve satliah hi! Outlaw, man hlaua tlanchhe kual vel mai mai i nih hi. Helaiah i la khawsa cheu anih chuan an khaihhlum lai che hmuhnawm ti takin ka lo thlir ngei ang. Khatiang thu awmze neilo min hrilh tur chuan lo kal tawh suh," a ti ta zel a.

Blaine-a erawh chuan "Ka hrilh tawh a che," tih pahin a hnungchhawn hmiah a. A sakawr hruihrual a lak lai chuan Timm-a chuan hmanhmawh hmel takin "Utah, i kal ang u. Min rawn um phak tep tawh ang," a lo ti a. Blaine-a chu sakawrah zuangkaiin Ben Otten-a chu a han en leh te te a, "I duh thlang fel rawh, mihring. Kawng dik erawh thlang ang che. Ka chungah tihsual engmah i la nei lo; ka kawng dala awm erawh tum chhin hauh suh," a'n ti leh hram a.
Inhnaih tea chuangin Ben Otten-a kawtzawl atang chuan an chhuak ta. Ben Otten chuan a thlir zui vawng vawng a, silai a chul hauh hauh a. He mihring hi a â ani ber. A tlanchhiat mek laiin khatiang khan a rawn tawng chu a ni si! A tunhma thil hriatin Ben-a thinur chu a rawn tidai leh ta. Khaw rura lutuk Alta ah pawh khan hepa hi thurualpui leh pui tu awm miah lovin a lo lut a, a tudai fel der anih kha. A bak pawh Ben-a hian a hriat belh zel. Gid Blake-an bawngrual thahnem tak hralh tuma a khalh tuma harsatna namen lo a tawh khan Blaine-an a chhanchhuah dan te a han hriat leh takah chuan a inthing nawr nawr a. Ring deuh hian "Engtizia chu ni dawn maw aw? He mihring hian puitu pawh a nei lo. Hnehna chance pawh a nei lo," a ti chhuak a. An kalna lam chu a thlir zui vawng vawng a. Hepa hian hnehna chang ta se? A sawi ang chiah hian thil a ti ang. Tumah a bum lo a, a thusawiah a ding mai dawn.
'Ta se' tih zawng innghahna tlak a ni lo. Hneh thei dinhmunah engti zawng mahin a dinglo tia ngaihtuah zui chungin zanah a mu ta. Mahse a mitthlaah Blaine-a hmel nelawm lo leh a mitmeng rum zet a hmuh chuan hlauin a khur lo chauh a ni.
Remchang zawnga tlanchhe mek te chan chu hrehawmin hautak tak a ni. Zan thim hnuaia Rice-a in an thlen chuan zawi deuhin an han kik karh karh a. Tukverh atanga rawn thlirin Rice-a chuan "Tunge ni a?" a rawn ti a. "Blaine-a ka ni e. Sakawr rawn lam tur leh mamawh dang lam turin kan lo kal a ni," a ti thuai a.
Kawngkhar hawngin a rawn kal chhuak a. Coker-a leh Timm-a te a han hmuh chuan "Nangni ho maw? Kham hrulah khian chho ula, chutah chuan corral, tuma hmuh loh tur a awm a, ka lo chho ve nghal ang," a rawn ti a.
An sakawr chau tawh tak atanga saddle-te chu la thlain sakawr dangah an bel mawlh mawlh a. Blaine-a chuan a sakawr chhuan tak chu chulin a sakawr chuan ngai tak hian a hnarin a lo nul vel a. Rice-a hnenah chuan Blaine-a chuan "Keini ho hi min hmu miahlo a ni lawm ni?" a han tih chuan Rice-a pawh chuan "Nimin maia piang chu ka nilo alawm. Fimkhur takin kal ang che u," a lo ti a.
Gate a hawnsak a, an kal pelh lai chuan Timm-a hnenah chuan " Sihal rual zingah i tel ve tih i hria ang chu maw?" a han ti a. Hlim tak hian Timm-a chuan "Teh reng mai. Kum sawm panga zetin ka naupang leh ta in ka inhria asin. Rice, chinghne rual zinga awm ai chuan sihal rual pawl chu ka duh zawk e," a lo ti a.

Ni li hnuah chuan Calfpen Canyon-ah chawlin chau leh meng pawr fap hian an coffee lum chu an in a. Timm-a chu leiah a bawk a, Coker-a lu tuamnaah chuan thisen a kai nual a. An pathum chuan sakawr chung chuan rei vang te, riltam avang te in an zawi hnap mai. Blaine-a chuan "Sihal rual zinga chen chu hahthlak i ti em?" tiin Timm-a chu a fiam a. Khabe hmul pawr chhap tawh leh a aia upa zawk Timm-a chuan "Utah, nuam ka ti khawp mai," tiin zawi sap hian "Duh pakhat ka nei, chu chu do let a ni," a han ti a.
Blaine-a pawh chuan "Chu chu," tiin "Ni e, naktuk tuk lehah kan tan ang. Hun khawhral pahin muangchangin Big N pan chungin khawchhak lamah kan kal kual ang," a ti a. Rip Coker-a pawh chuan hmel hriam hrat chungin phur takin a rawn en a. Blaine-a chuan "Kan bei let ang. Na tawkin kan che ang. Indona awmzia dik tak kan hriattir dawn," a han ti a. Rip-a pawh chuan "I sawi chu ka pawm zawng tak a ni. Tlanchhiat tih vel hi ka kham tlat," a lo ti a.
Utah chuan "Ni khat pumhlum min hmu ta lo a. Engemaw chen chu min la hmu lo ang. Kan chawlh hahdam chhungin anni pawhin thawk lo la ve rawh se," a ti a.
*******************
Nevers-a chu a chau takzet tawh. A thawmhnaw inbel chu hlipin kawmawlin a inzial a, chhuatah a let tawp a. A piah pindana midang muangchanga lut thawm chu a hria a. Zawite te in an phun sep sep a. A pheikhawk chhip chu a thlir vang vang a, phur taka an um hnuin tunah chuan an ngui ta riauin an dinhmun a raltitawm ta.
Ni hnih an um tawh tihin Blaine-a leh a thiante an um phak tumin an inbeihna lamah an thiante pahnihin hliam an tuar a. Pakhat phei chu a na hle. Blaine-a thiante zinga Coker-a chu hliam a ni a, mahse a thianten chhanin an hruai bo daih a. A hnu lamah tum hnih ngawt an hnu an hloh a, darkar tam tak an zawn hnuin beidawngin Big N lamah an kir leh ta a ni.
Nevers-a chu blanket in a inkhuh tha sauh sauh a. Blaine-a chauh ni lovin harsatna siam thei tu Fox-a an zingah a awm tlat. He rancher hian 46 ah thuthmun a siam a. B-Bar ramah mi engemaw zat a dah bawk a. Big N pawhin mi engemaw zat a neih bakah Ben Otten pawhin a chuh ve tih entir nan mi a rawn tirh luh ngei a ring.
Nevers-a chu a rawn harh hlawl mai a. Engtia rei nge a lo muthilh a hre lo. A awmna in pawnlam thawmin a ti harh chu a ni phawt mai. Kiua inbeng kangin ngun deuhin a ngaithla a. Sakawr hram thawm leh hruia sakawr vuak ri bakah sakawr tlan thawm a hre zui ta. Tu ten emaw sakawr an um ni ngeiah a ngai.
Rawn thu chhuakin a pheikhawk a lak lai chuan a piah pindanah mi pakhatin khawnvar a chhi a. A chhi eng chiah tihin khawnvar chu a ri chhuai a, eng a mit nghal a. Chhuatah a tla ri chuai a.
Thinura zuang thoin Nevers-a chuan a rifle a chuh a, mahse
tukverh darthlalang chu a keh chuai a. Silai mu chuan a rifle tunna bul thing chu a rawn verh siah a. Tukverh dang darthlalang te chu silaimu chuan a rawn tawn per chuai chuai a. Pindan piah zawka silai mu khawk chuan mi pakhat a deng fuh ni ngei tur a ni, na tuarin a te vawng vawng mai. Pawnlamah chuan au thawm lo awmin nasa zawkin an rawn kap lut a. Nevers-a chuan rifle a chuh laiin a bul kawngka biang chu silai mu in rawn dengin a thing them chu a mitah a lut a. Na a tih em avang chuan a rifle ken pawh chu thlauhin a indawm kun leh rih a.

Silai ri tuarh tuarh karah vawilehkhatah pawn lam chu a rawn eng ta phut mai. Mittui karah na ti tak chungin a dak chhuak a. A bawng chaw dahkhawm chu a lo alh sen zuai zuai mai. Thinur eng phiar a rifle nena a tlanchhuah lai chuan thim zing atang hian "Nevers, indo i duh a ni lawmni kha? Enge anga i hriat le?" rawn tih thawm chu a hria a. Chumi rual chuan a ke bul lawkah silai mu chuan a rawn verh siah siah a. A hnunglam darthlalang te chu a keh chuai chuai bawk a.
Thinur teuh chungin thim lam hawiin silai a hmet puak ve ngawt a. Bawng chaw kanna lam chu panin a hote nen theihtawp chhuahin an thelh a. Mahse a kang zo a ni deuh ber mai. Thinur leh beidawngin in lamah, coffee in tur awmna lamah ngawi rengin an phei a. "Ka that ngei ang," tiin Nevers-a chuan "Khaihlum a nih lai hmel chu ka hmu khawp ang," a han ti ngawt a.
Midang chu an ngawi thap mai. Chau leh ngui takin an thu a. A hma niah kal chhuaka an hah nak alaiin zana bawng chaw kang an thelh leh chuan a ti chau zual a, an sakawr tla darh man khawm ngai bawk nen.
Hemi tum hian pakhat chauhin hliam a tuar. Chu pawh darthlalang kehin a hmai a deng a, a kak thukin thisen a chhuak hnem hle a. An um laia Blaine-a ten an hliam, khuma mu chu rawn inbeng kangin "He mihring Blaine-a hi chu namen lo tak a nih hi," a rawn ti a.
"Ngawi chip cham rawh," Nevers-a chuan a rawn ti hlur a. An ngawih thap lai chuan Rocky White chu rawn ding chhuakin "Pawnah sawn ka va mu teh ang," tiin a chhuak chu a thiante pawhin an rawn zui chhuak ve a.
Nevers-a thin ur chuan Blaine-a thah theih dan tur a ngaihtuah ta. Rink Witter-a hnenah he gun fighter that thei ngei tur zawng khawm turin tirh a tum ta. Gunfighter bakah Man-hunter te rawih a tul. Heng ho rawih nan hian Fox-a leh Otten-a te pawhin enge maw zat tum ve an hnialin a ring lo.
Zingah muangchang leh beidawng chunga pawn rawn chhuakin a sakawrah a chuang a. A hote zinga lo hmu tu hnenah chuan "Naktukah ka lo kir leh ang. Red Creek khuaah ka kal dawn," a ti a.
Big N, zana beih a nih hma chiah khan Mary Blake chu Red Creek khuaah a lut ve chiah a. Ram inchuha inbeihna result hriat nghakhlelin Mormon ho awmna atangin a awmpui nu Maria nen an rawn kal tawp mai a. An mi tawn hmasak ber chu Ralston Forbes-a kha a ni.
"Hello," tih paha Mary en chung chuan "Helai ram hi i chhuahsan niin ka lo hria a," a lo ti a.
"Chhuahsan chiah lo a, kalbo tumna pawh ka nei lo.

Utah i lo hmu mial em?"

"Hmu chiah lo. Mahse a chanchin chu hriattur a tam khawp mai. Theihtawp chhuahin Nevers-a hian a um mek chu a ni phawt mai a. Engtia tih nge i tum ve a?"
Amah nuih chung chuan "Zing chaw ei phawt. Chutah chanchinbu mi hnena engmah sawi loh a ni mai," Mary chuan a ti a.
"A nih tak chu, tirawh, tukthuan chu i ei dun ang hmiang," tiin kawtthler lehlam chaw siamna chu an pan nghal a. Kawngkaah chuan Otten-a chhuak tur nen an intawk chiah a. Mary chu phur taka melhin Forbes-a hnenah chuan "Chanchin thar enge awm?" tiin a han zawt a.
"Thuthar engmah a awm lo,"
Dawr kawngkharah an lut chiah, mahse an ding chawih; Blaine, Timm-a leh Coker-a te pathum chuan dawhkan kilin chaw an lo ei a. Inziat fai lo, chau leh bal tak an ni. Utah chu rawn hawi chhuakin anni pahnih chu a melh tawn sek a. Mary erawh a hmu tha ngam chiah lo. Engmah reng a sawi lo. Forbes-a chuan "Remchang in insiam ani maw?" a tih chuan Utah chuan "A ni mai ang chu. Ortman-a helaiah a awm hnai em?" a lo ti a.
"I sawisak atang kha chuan helaiah a rawn inlan ta hauh lo. Hmuh duh riauna i nei em ni?"
"Kan bulah hmelma an awm reng laiin ka hrilh che i ring em ni?" Blaine-a chuan a han ti a. Otten-a hmel chu a danglam kher mai. Chhan a tum mek lai chuan Coker-a zawk chuan "Kar zau tum hi chetsualna a ni duh khawp asin, Ben," a lo ti zauh a.
Ben Otten-a chuan "Thin thiin chaw te hi in ei ve ngailo em ni a?" a rawn ti a.
Utah chuan Mary hnenah chuan "Engvanga lo kir ngawt nge i nih le?" a han ti a.
Mary chuan "Nangmahni maia inbei tur hi ka ngai ngam lova, tanpui tur che u in ka lo kir a ni," a ti vat a.
Minute enge maw chhung chu an ngawi thap mai. Mary chuan Utah chu pan hnaiin coffee te chu a va thlitsak a. Chu coffee chu Blaine-a chuan tui a ti tak zet a ni. Rip Coker-a lu tuamna pawh a thar a ni a, a var tha khawp mai. Tuam that a ngaih avangin Doctor an kaitho hma a, "Lu ruh chang bik neilo la chuan tuam tur a awm tawh lovang," tiin a lo tuamsak a ni.
Engemaw hnu chuan Forbes-a chuan "Chanchinbua chhuah tur enge maw te?" tiin Blaine-a chu a zawt a.

Mit sen rum chunga enin Blaine-a chuan "Awm dawn lawm ni!" tiin a nui hak a. "Hetiang hian lo chhuah ta che: Utah Blaine-a, 46 ram manager chuan reilote chhung chawlh a la a, mahse Headquarters lam panin lokir leh thuai tura rin a ni, han ti phawt la. Tin, hei hi i ziah belh dawn nia- helai vela cheng hruaitu enge maw zat vuinaah rawn tel a tum a, chungho zingah chuan Ben Otten-a a tel ve loh a beisei i ti dawn nia," a ti ta zel a.
Otten-a hmel chu a dâng sawp sawp mai. Thinura ân chhuah a tum lai takin sakawr tlan thawm leh hmanhmawh taka kailawn rawn kai a kawngkhar rawn chhir ri an hre ta.
Kawngkhar inhawngah chuan Angie Kinyon-i chu a rawn lang hlawl mai. Hmanhmawha thaw hlawp hlawp chung hian "Utah, i tlanchhuah nghal a ngai. Lee Fox-an i hnu a rawn chhui zel a, mi enge maw zat a rawn hruai ania. Nevers-an khaw pawn maiah sawn a rawn zawm ve bawk. Khawngaihtakin hmanhmawh deuh teh," a rawn ti nghal mawlh mawlh a.
Blaine-a pawh rawn ding chhuakin a puakruk a pai tha a. Piah deuha Angie chu a en a, a mitmeng erawh a rum viau lo. "Ka lawm e," tiin "Ka lawm takzet a ni," a ti ta a. Mary Blake erawh a buai tlat. Chumi te pahnih chu rang takin a entawn sek a. Chumi lai chu Ralston Forbes chuan lo hmuin lo nui ringawt a.
An liam hnu chuan Mary Blake-i chuan Angie chu a rawn en a, "Angie, helaia ka hmu thut che chu mak ka ti khawp mai!" tiin awki hriam deuh zawk hian "Khaw chhungah hian i lo lut zen zen lo a, a bikin tun ang hunah hian," a han ti zui a.
Angie chu hlim hmel takin a nui a, a rilru erawh helaiah hian a awm lo. Sakawra chuangte tlanna kawng lamah daih a awm a ni. Chu chu Forbes-a leh Mary te pawh chuan an hriatpui a ni. Angie chuan "Ni e, tun ang hunah chuan kal fo lo e. Mahse thiantha dinhmun hlauhthawnawma an din chuan chu chuan tihdan pangngai hi a thiat hmak mai a ni," a rawn ti a.

"Utah Blaine hi i hria tih pawh ka lo hrelo a,"
"Vawikhat chiah kan la inhmu,"
"Vawikhat chiah maw?" chang deuh bang hian Mary chuan a ti a. A insehruh lek lek a. Forbes-an a lo hmuh chuan a then sak a. Mary'n Angie-i a thik tih a hmuh vawikhatna a ni. Angie-i awm a nuam lo lek lek a, mawi taka nui chungin "Vawikhat chu a tawk mai lo em ni?" tiin a zawt ve a.
Mary chuan bung deuh vat hian "A tawk a ni maithei. Mahse Angie, nang hi ni ila chuan ka fimkhur viau ang. Hetiang Cowboy tei vel dan hi i hria a ni lawm ni?" a tih chuan Angie-i chuan aw mawi leh no tak hian "Ka hre hauh lo. Mary, eng ang nge ni ngai a?" a lo ti a.
Mary thinur hmel dang bai chu a rawn ding chhuak a. "Enge sawi i tum chu? Eng boruak nge siam i tum a?" a rawn ti chhuak ta a. Angie chuan a ngaihna hrelo zet hian "Mary, engmah a ni lo. A ni lo takzet. Mi i ngaihtuah hlein ka hria a. I thurawn te pawh kha ka tan chuan hriat reng tur a ni asin," a lo ti sawk sawk a.
Mary chu Forbes-a lamah a hawi hmak a. Mahse a tawng chhuah hmain sakawr tlan thawm chu a rawn ri ta khup khup a. An awmna hma kawngah chuan sakawr chung chuang sawm chuang zet chu an ding a. Kawngkhar chu rawn tlawh hawngin Lee Fox-a chuan rawn luh pahin "Khawiah nge an awm? Khawiah nge Blaine-a hi?" a rawn ti lut nghal a.
Muangchanga inherin Angie chuam dam thlapin Fox-a chu a en a. Engmah a sawi lo. Mary pawh chuan tukverh lam a pansan hmiah. Lee-a thinrim hmel chu a sen tawn tawn mai. Angie lam chu panin Angie hnenah chuan fiak thak hian "Nang hi!" hmel dur khuih chung hian "Tun maiah khan khuaah hian i lut a, pawnah i sakawr thlan tla hluam pawh ka hmu. I lo hrilh khang lang anih hi," a han ti a.
"Ka hrilh avang chuan enge pawi awm?" meng sen deuh khai hian "Engmah ti lova ka thut laiin mi tha pangngai hi duham avanga ram lak tum ruk ru rualin an that ringawt ang maw?" tiin a zawt let ve ta.
Lee Fox-a thinur lutuk chu a tawngchhuak mai theilo a. "Rukru rual i tia law? Keini ho hi rukruah min puh amaw? Kha mihring kha enge.....eng nge?" a tih tuarh tuarh lai chuan Angie chuan "Rukru chu ka ti chiang e," tiin dam thlap hian "Lee Fox, nang emaw, in zing ami tumah hian sawlai ram leh B-Bar ah hian thuneihna engmah in nei lo. Heng ranch pahnih te hi helai hmuna lokal hmasa pahnihte leh nangni aia thate khan an enkawl tha zawk daih. Chinghne koham rualin hun rei tak atang khan savawm kawlh tawngin in hnim kual in hnim kual a. Tunah chu savawm chu a thi ta a. Mulukawlh rualin sa hrang ei tam ber nih tuma an inchuh ang chiah hian harsa taka an tihpuitlin ram chu chan tumin in inchuh ta anih hi. In duhamna chiah tih loh chu helai ram chuh theihna pakhatmah in nei lo. 46 ram chuh thei tu hi an awm anih ngai chuan Utah Blaine-a chiah hi a ni ang," a ti ta a.

"Utah maw? Eng chuh theihna nge a neih a?"
"A kutah dah ani alawm. Chu chu chuh theih nan a tawk chiah. I rawn chuh ve ngawt ai hian awmzia a nei zawk," tia awki rawn thlakin "Lee, enga ti nge awmze nei hian in nun loh? In ranch ah chuan kir lehin in neihah khan lungawi rawh u. Hun in neih lai hian kir nghal rawh u. In thiltih hi in hrelo a ni," Angie chuan a ti ta zel a.
Lee Fox-a chuan a va
hnaih a, "Nang....nang tehlul...." tia ben tuma a kut a lek chiah chuan fiak thak hian "Fox!" tia a hming lam rik a hre ta. A kut lek chu a tawp chawt a, aw rawn chhuahna lam chu a hawi a. Ralston Forbes-a a hmuh chuan a phu zawk mai. Puakruka lo tin chung hian Forbes-a chuan "Kha nula lama pen khat i pen leh chuan ka that ngei ngei ang che," a lo ti a.
Fox-a chuan muangchangin a kut a la thla a, harsa ti tak chungin a inthunun a. "He thilah hian nang hi lo inthiarhlim rawh," a rawn ti hmak a.
Mahse Forbes- chuan "Helai ramah hian miten Angie Kinyon an ngaihdan leh hmuh dan i theihnghilh hlauh anih chuan a pawi khawp ang. Han beng chiah la chuan i hote ngei hian an khaihlum ang che. Darkar khat pawh i nung lo ang," a ti hmiah a.
"Ben ka tum hleinem," tia insum hmui phe hlawk hlawk chung hian "Khatianga thusawi theihna kha a neilo reng reng," Lee Fox chuan a ti a.
"I duhamna kha i chhia leh tha hriatna in a luahlan hunah a dikzia chu i hre mai ang," tiin zawisap, chiang si hian Forbes-a chuan "Khang a thusawi ngei kha naktuka chhuak tur chanchinbuah chhuah ka tum nghe nghe a ni," a han ti zui a.
Fox-a hmel leh a mitmeng chu tenawm tak a ni. "I chhuah vaih chuan i press ka vaw chhia ang a, ka hal darh vek ang. Helaiah hian duhtawkin i inleng vel a. Thuneitu, helai thunun thei mi thar an rawn lang dawn. Kan thu anga i ti lo anih vaih chuan i nundan kan thlak loh pawhin kan that ang che," a ti ta a.

Forbes-a hi sang thlerh thlawrh a ni. Tunah hian a lang sang sawt mai. "I duh phawt chuan i tum chhin thei e. Mahse nang hi chu ni ila ka ti chhin hauhlo ang. He ramin engti kawng maha a ngaihdam theihloh thil an awm. Chungte chu hmeichhe tih nawmnah leh chanchinbu mite chunga hlei len hi," a ti ta hmiah a. Fox-a chuan Mary chu a melh kawk a. A tawngchhuak dawn emaw tih lai chuan a inher thut a, pindan atang chuan a chhuak ta a. Sakawr tlan thawmin a zui nghal a, an kalbo ta a ni.
Angie-i chuan sakawr tlan thawm a reh chuan "Ka lawm e, Rals, min beng tep chu anih kha" a han ti a. Forbes-a chu a bu nghat a, "Beng chiah che se chuan ka that ngei ang. Mi tumah ka la thatlo na a," a ti a. Angie chuan "Blaine-a te hoin an tlan thui phah hlauh ang chu. Tunah mai chuan an man tawh hauh lo ang," a ti a.
"Man tawh lo ang,"
Mary Blake chu tukverh atangin a rawn hawi phei a, "Rals, engtin nge i awm dawn? Anni ho hmachhawn kha chu tum duh suh. Helaiah nangmah chauhin i awm si a," a rawn ti a.
"Mahniin maw?" tih paha lu thingin Forbes-a chuan "Nilo, mahniin ka awm lo. Khaw chhungah hian mi sawmpahnih zet ka lama tang an awm asin. Ryan-a te, thirdengpa te, Jordan-a te, pheikhawk siamtute leh midangte. Chung ho chu ka lamtang te an ni," a ti ta a.

*********ADVERTISEMENT CLICK **********

[HLalthazuala]

UTAH BLAINE CHAPTER 9
*********************************************

Darkar khat lek hnuah Red Creek khuaah Big N beih a nih thu chu a rawn thleng ta. Ben Otten leh Forbes-a te chu coffee ina an thut dun laiin Big N-a thawk pakhat chu a rawn lut hlawl mai. Thil thlen dan kimchang Rocky White-a sawi chu an ngaithla char char a; "Bawngchaw ringawt pawh ton sawm tehmeuh chu a kang ral a ni," a ti a.
Ranch-house pawh nasa taka kah a nih thu sawiin a ngawi vang vang a. Hetianga buaina a intan tawh chuan a lehpek chu nasa dawn hlein a ngai. Coffee chu inthlitin ngui hmel pu takin tukverh lam chu a thlir vang vang a. Rei tak a ngawih hnu chuan Rocky White chuan, "Putara kha chu a lo fing ngawt zawng a nih hi. Utah Blaine-a kher kher a rawih duhna chhan te hi enge ni ang aw? Vanneihthlak zetin a mi rawiha hi mi thah hmang a ni lo hlauh. Chutiang mi nise chuan Nevers-a hi a that daih tawh ang, "a ti ta zel a.
"A nih Nevers-a chuan engtia tih nge a tum?" Otten chuan a lo ti vat a. Tlangval chuan, "Gunman eng emaw zat chawkluh a tum. Chutiang mi chaw lut tur chuan Witter-a a tir tawh. Blaine-a luvun hik thei hnenah dollar sangkhat tawp a phal a, mi dang pahnih tan dollar zanga ve ve a thap bawk, "a ti ta zel a.
"Chutiang a nih chuan helai chu a pherh chhe vek dawn tihna a ni a, United States Marshal chah luh a ngai tihna a nih chu, "
Tlangval chuan thawh pah hian, "A tha khawp ang, " tih pah chuan, "Mangtha u, " tia hawi kual chungin, "Ka neih zawng hi chhuah puiin ka lo inthiar fihlim teh ang, "a ti zui a, a kal ta a.
Rocky White-a inthiarfihlimna chuan mi dangah a kang kai nghal a. Otten-a mi chhawr senior pahnih pawh an pu be miah lo leh an hlawh pawh la lovin an chhuak nghal a. Chutiang chiah chuan Fox-a chhawr lai pakhat pawh a bang hmak a. Chutih lai chuan thenkhat an rawn inpe thar a, chung zinga pangate phei gunfighter an ni.
An inbeihna a sosang ta hle mai. Heng mi pathumte hman tangkai theih tur tui awmna te chu zawngchhuakin ngun takin an veng vek a. Rice-a chenna lama corral, tuma hriat loh pawh an lo zawngchhuak tawh a, ngun taka enthlak reng a ni bawk. Big N a run hnu zan thum zan zanlaiah Blaine-a chuan Fox-a Table Mountain chu a thawng leh thut a. Vanneihthlak takin mi pahnih chauh an lo awm a. Chung mi pahnihte chu phuar hlawmin an sakawr te an umchhuahsak a; an tui dahkhawlna te nam letin corral pawh an hal nghe nghe a ni.

Clell Miller leh Timm-a te pawh lo intawngin an lo in-draw a, mahse an inthelh tawn. Rip Coker-a pawhin mi pakhat, Pete Scantlin-a, Indian hnuchhui thiam, Nevers-a hnena thawk a tawng. An in tawn tum hian he Indianpa hian leilam a bih reng a;an hawichhuah chiah chuan sakawr chunga thu Rip Coker chu a hmu ta thut a. Rang taka lekin a rifle chu an hmetpuak a, mahse a fuh lo. Chutih laiin Rip-a .44 chuan Indianpa hrawkah tak a fuh a. Chu pa ruang chu darkar khat hnua an hmuh chuan a ruang bul vaivutah chuan: "MAN-HUNTER TAN HMUN A AWM LO.I CHAN TUR TAK I HMU A NI" tih hi a lo inziak a ni.
Nevers-a mi chhawr ten rui chungin Red Creek-ah silai an hmetpuak a, darthlalang kehin mi pakhat a hliam a. Chumi tukah chiah chuan Forbes-a chuan a chanchinbu phek hmaah a hnuaia mi hi tarlangin a tichhuak :
PHAIZAWLAH DAN PALZUTIN A AWM.
NEVERS, OTTEN LEH FOX-A TEN
MI RAM CHHUHSAK TUMA AN PAWNGSUAL VANGIN THIHNA A THLENG!
Hemi zanah hian mi eng emaw zatin tuboh leh hriamhrei dang hmangin chanchinbu chhuahna Office chu an bei a; Press pakhat chu an tichhia a. Forbes-an silaiin a rawn umdarh ta. Forbes-a thinurna chu sang tak a ni. A tukah chuan a chanchinbu awm ang ang chu Governor hnenah te, United States Marshal hnenah te El Paso leh Santa Fe chanchinbu mite hnenah te a thawn darh ta a.
Nevers-a hoten press an beih thu ah Blaine-an engmah sawi a nei lo. Titi ah chuan hliam a tuar niin an sawi. Scantlin-a thih thuah Rip Coker-a khuaa a lo luh hma zawng chuan Blaine-a thah angin a thang a ni.
Verde Saloon khar hma chiah zanah Rip Coker chu a rawn lut ve a, bar lam a pan nghal a. A pawr deuh naa a mitmeng erawh a zuamawm lo. Zu no khat a tlak pap a, midang paruk lai dingkhawm lam chu hmachhawnin, "Miten Pete Scantlin-a kha Utah thah angin an sawi a, Utah thah ni lovin, keima thah a ni. Utah chuan a hmaa mi a that a, kei pawhin ka duh chu ka that ang. Min thah ngei tumin min zawng a, tichuan ka zawngchhuak a. Chetna hun pawh ka pe. Mahse a chesualah a tang ta a ni," a ti a.
"Rip, chhuak leh nghal rawh, Clell-an a zawng che,"
"Min zawng maw? Khawiah nge a awm?"
"Hotel piaha room-ah," tiin mi pakhat hian "Mahse i fimkhur..." a tih lai chuan kawngkaah chuan Clell Miller chu a rawn lang hlawl a.
Miller-a hmel chu a durin a rum kher mai. A mitmeng atang chuan zu pawh a in hle tawh tih a hriat. A chet tibuai leh zawi khawp erawh chuan a la in lo. "Min rawn zawng ani maw, Rip?" tih paha lo lutin kawngkhar pawh a inkhar nghal a. "Khuaa i lo lut kha ka lo hmu che a, hmachhawn tur chein ka lo kal ani," a rawn ti hmiah a.
"Tehreng mai. Ka rawn zawng che alawm," tih pahin bar atang chuan a kalsawn a. Mutmu hmuh that loh vang te, sakawra chuanga an teihawi tam em avang te leh eitur tuihnai tak a ei tlem avang te in a hmel chu pan deuh mahse a rothap zia leh a rum zia chu a bo chuang lo. Nui deuh leh phur hmel takin Rip-a chuan "Tunah hian a ni mai dawn lawm ni?" tiin a zawt a.
"Anih loh rengin," tih pah chuan Miller-a chuan a pistol a chuh nghal a. A rang kher mai. Rip Coker-a ai pawhin a rang zawk. A hmehpuah hmasak chuan Rip-a kawnghren chungah va dengin Rip Coker pawh a hnungtawlh dawrh a. Clell-a chuan a kap leh a, mahse a thelh ta. Coker-a chuan fimkhur takin a kap ve ta. A silai mu chuan Miller-a chu a thuai vir mawp a. Thingthi chungin Miller chuan a rawn kap leh a, a vawihnih rawn kah leh na chuan Rip-a chu a va fuh leh ta. Mahse Rip-a chuan chiang zawka tinin vawihnih a'n hmet puak leh a, a lu ah ve ve fuhin Clell-a chu a thal tawp a.

Rip-a pawh chu a pai tang tang mai. A hmel pawh chu a dâng deuh ta. Kawngka lam panin a pai phei a, pawna a kat chhuah nawk nawk lai chuan a piah lam kawng atang chuan "Rip , i luman dollar zanga chu kan nei dawn ta," an tih thawm a hria a. Silai chu a puak ta thuai thuai a. Silai mu denna avang chuan a bul bangah a ding a, a silai chuan harsa ti tak chungin a han tin a. Silaimu a tawrh zozai chu thihna khawp a ni tawh. Mahse inti pachangin a insehruh a, a silai chu a hmet puak ve leh a. Pakhat chu na tuarin a te thawt a, a tlu ta nghal a. Silaimu in a rawn deng fuh leh. Chuti chung chuan a pistol chu a la load hram hram a.
An kah fuh hnem tawh teh reng nen a tlu mai bik lo. A silai chu a hmet puak ve deuh reng a. Thler lehlam atanga thupek avang chuan nasa zawkin an rawn kap leh ta. Tluk pahin Rip-a chuan a'n kap ve leh hram a, piah deuha amah thah tumtu zinga pakhat chu a zi awrh a, engmah hreloin leiah a tlu ta thlawrh a.
Hotel atang chuan Forbes-a a rawn tlan phei a, Mary leh Angie-i ten an rawn zui bawk a. Ben Otten-a leh midang ho chu an rawn inhawr khawm bawk a. Rink Witter-a chuan rawn nam kiangin "Kiang teh u, he zawngsen hi a la thih loh pawhin a thi thuai tho ang," a rawn ti a.
Forbes-a chuan rum tawka enin "Tualthah hmang, khawih hauh suh. In ti na tawk tawh," a lo ti a. Rink Witter-a chu a meng kal rawlh rawlh a. Chutih lai chuan Doctor chu lo kalin Rip-a bulah a thingthi a. Coker-a chu lo meng chhuakin Witter-a chu a rawn hmu a. Thi mai tura ngaih chu rawn rum chhuakin "Ngawi lawk teh u," tiin tham tuak hian "Rink, i thi dawn. Blaine-an he thil hi a hriat hun hunah a khaihlum ang che," a rawn ti hram hram a.
"Ngawi chip cham rawh," Witter-an a lo tih chuan Rip-a chu thei leh theiloin a then sak a. "Ka che chhe hran lo e. Clell-a ka thah hram kha. Ka thah theih pawh ka lo ring lo..." a ti hram a. An zinga mi huaisen leh tuarchhel ngaisangtu pakhat chuan Rip-a lu bulah kunin "Ka fapa, hlim takin kal rawh. Kalpui tur pahnih chu i neih kha," a rawn ti a.
Rip-a chuan doctor kut chu vuanin zawite in "Doc, min ngaihtuah duh suh," tiin a then sak a. "Clell-a bakah midang pahnih. Hetiang bak chu Utah pawhin a kalpui ka ring bik lo," a rawn ti hram a. Doctor pawh chu rawn ding chhuakin Forbes-a hnenah chuan "Ka hrethiam ta lo. An kap chik hrup ani ber a, thi ngei tawh tur a ni," a han ti a. Angie-i chu rawn kal hnaiin "Doc, ka room-ah zawn lut rawh u. Mi huaisen bik a ni a, a damchhuak leh maithei asin," a rawn ti a.
Chawhma chanve ah chuan an inbeihna chu hmun tinah a thang hman. Rip Coker-a leh Clell Miller an in draw a, Rip-an Clell Miller-a a that a. Kawngkaah hliam tuara a pai chhuak chu mi parukin an lo lambun a, an lo kah rawn a. Silaia vawi sawm pakhat kah fuh a ni chungin amah beitu zinga pahnih chu a that hram. Hetiang taka hliam a tuar chung hian a la dam a ni!
Forbes-a chuan Angie hnenah "A dam chhuak maithei. Northfield rûn tum pawh khan Cole Younger-a pawh vawi sawmpakhat kah fuh a ni a, mahse a dam chhuak hlauh!" tiin a hrilh a. An zinga pakhat pawh chuan "Coffeyville khuaa bar ka enkawl lai pawh khan Emmet-a chu amah beitu ten vawi sawm paruk an kap fuh a, mahse tun thleng hian a la dam," a lo ti ve bawk a.
Utah Blaine-a chuan 46 ram chu ngun takin a thlithlai a. White Rock bula an tawm ruknaa a lokir leh chuan Timm-a chu a bulah a lo kal a. Beidawng hmel leh ngui tak chungin "Rip-a i hmu miallo maw?" tia zawtin "Nizan ka muthilh hlanin ngawi rengin a kal daih a, engmah pawh min hrilh lo," a lo ti a.

Blaine-a chu sakawr atangin a chhuk a, ni li lai inmet tawhlo leh mutmu hmu tha lo a ni bawk a, a khabe kual te chu a hmul deuh chhar tawh a, a meng sen deuh ram bawk a. "Kan mi â pa hi chu! Sualpui tur ringawt a zawng a ni. Insiam la, i kal nghal ang," a ti a.
Timm-a erawh chuan "Nilo e, Rip Coker-a hi a la dam anih chuan tunah pawh a la dam ang. I dinhmun anga i zuk kal anih chuan i tawn hmasak apiangin duhtawkin an sawisa thei ang che. Tui takin mu phawt rawh," a lo ti a.
Thurawn fing tak a ni tih Blaine-a pawhin a hria. Reiloteah tui takin a muhil ta nghal a. Timm-a chuan a hmel a'n en a, a lu a thing ringawt a. Pawnah nisa hnuaiah chhuakin lungpui pakhat a pan ta a. Helai rawn pantu te awlsam taka a hmuh theihna tur lungpui phenah chuan a thu ta a ni. An rawn hmuh mai chu a ringlo na in anmahni beitute hi an khirh em a, an rawn hmulo ang tih a sawi theih loh. Blaine-a chauh a chau lo, amah ngei pawh hi chau tawh tak a ni.
Lui mawng thlang deuhah chuan luikam atangin Indian pakhat hian Rink Witter-a hnenah zaizirin "Sakawr pakhat, chau tak hetah a awm. Helaiah lui kân rawh," tiin signal a lo pe a. "Sakawr chu a lian em?" phur zetin Rink-a chuan a zawt a. "Sakawr chu lian tak a ni," a lo ti vat a.
Blaine-a sakawr hi sakawr dang aia lian anih bakah henglai vel sakawr ai hian a lian bik a. Rink-a chuan a khabe a chul hauh hauh a, beiseina thar nen luikawr vel chu a thlir a. A chhak lam ram chhengchhe zet chu a zauin he sakawr chau tawh taka chuang chu tupawh ni se hla tak a kal a ringlo a. Khawimaw laiah tui taka mu in a awmna lam pana kal pawh venthawn ngaiin a rin a ringlo a ni.
"Veilam atang hian helai ram chhengchhe lai hi i hel kual ang. Rin dan fel tak ka nei e," a ti a.
Mel ruk vel leka hla nisa hnuaiah chuan Timm-a chu a thu a, a mut a chhuak em em a, a chau hle bawk. Nilum nuam tak chuan a taksa a rawn em a, a dam sawng sawng a. A hnuai lawk daihlimah rul pakhat a tleng zal zal a. Thlang deuhah chuan sazuk hian tui a a dawt khalh khalh bawk a. Chhete in Timm-a chu a insiamrem a, mahse a meng hauh lo. Han chawlh vang vang mai chu nuam a ti kher mai. Nilum leh boruak thiang tak kara hah hnep hnawpa han inpho chu a nuam a ni ang, Timm-a chu a han meng kawk kawk a, a maimitchhing leh thin. Men hram hram tumin a han bei ngial a, mahse a muhil ta.
Rink Witter-an midang pali a hruaina tlang chu a chhengchhiain ngaw a tha em em a. Chuan hnuai lam panin hmun thawl lamah lui lam hawiin an kal a. Fimkhur takin mi pahnih chau tak te bihruk theihna awm lai chu an zawng a ni. Ram tha a niin sa chi hrang hrang leh sava tam tak an awm a; eitur hran kenglo pawhin henglai sa te hi chaw a ring hian rei tak a khawsak theih ngei ang. Hmun rem tak tak, midang lo ambush na atana tha fahran te an kal pelh mek lai chuan Witter-a hruai zinga pakhat, Wardlaw-a chuan "Blaine-a hi mi satliah a ni lo. Ambush na hmun remchang hi a hmang tangkailo ang a tih theih hauh lo," a han ti a.
Ni tlak dawn hnaih chuan an hnu chhui thiam pakhat chuan a kut a phar chhuak a, midangte chuan awlsam takin an hmu mai a. Piah lawka lui chu kawkin "Khinglai khawimaw laiah khian an awm ngei ang. Chhak deuhah khian White Rock Mesa hmun a awm a. A biru in awlsam taka ban maitheihin tui a awm bawk a. Thing tuah tur pawh a tam a ni. Fimkhur leh ngawi renga kan thlen theih chuan kan man ngei ngei ang," a ti a.
Timm-a han thangharh hlawl chuan hun lo taka a lo muhil chu mak a tiin pawi a ti hle. A mu rei bawk a ni ang, ni pawh a lo tla tawh hial mai. Fimkhur taka chet a'n la chiah tihah chuan a ding leh chawt a, a piah yard sawm ruk emaw lekah Rink Witter-a leh tualthat tura a mi rawih te a hmu ta.

A hmuh rual chiahin anni pawhin rawn hmu in Wardlaw silai chu a puak nghal thawr a. Mahse Timm-a chu fuhlo in a awmna lungpui a va fuh a. Timm-a chuan rifle chu lekkawhin a hmet puak thawr mai a. Rink-a sakawr chu chelo se chuan a mi phurh Rink Witter-a chu fuh ngei tur anih laiin a sakawr chal darah a fuh ta zawk a. Chutih lai chuan Wardlaw chuan rawn kap lehin Timm-a chu a fuh a ni ngei ang, lungpui atang chuan a leng lawp a, insaseng turin a vak sawn ta.
Chiang zeta rawn harhin Utah Blaine pawh lungpui karah himna zawngin a biru a. A awmna atanga yard sawmruk vela hlaah inkahna a awm tih a hre mai bik lo. Hmanhmawh takin sakawr pahnihah saddle te a bel a, ei tur an neih te a hlang a, minute reilote chhungin engkim a siam fel vek a.
A hnunglama silai ri a hriat leh chuan Timm-a chuan a tih theih ang a ti tih a hria a. Mahse hun rei tak helaiah hian an him dawn lo. An vanneih chuan thimin a rawn nang ang. Utah Blaine chuan a thianpa awmna lam chu a pan thla a, a hmuh hmasak ber chu a thianpa Timm-a, silaimu tuara kun chunga lo insaseng lai chu a ni. A hnunglamah thisen hmuh tur a awm bawk a. A hliam tawrh chu a na tih hriain "Thiana, khalai kilah khan lo tawm phawt mai teh," a zuk ti a.
Timm-a hmel chu a khawngaihthlak khawp mai. "Ka lo muhil khanglang alawm," tiin a zak hle a. Mahse Blaine-a chuan "A pawilo, an rawn bawh buai hma che chuan i hmu thei chuanglo ang," a lo ti a. Apache pakhat rawn inlan zawr chu Blaine-a chuan rem vakloin a lo kap a, a tawmrukna lai nia a hriat chu a kap thuai thuai a.
Timm-a hnenah chuan "I hliam chu a na hle naa vah han tum teh. Sakawrte kha ka siam peih vek tawh a, an awmna i va thlen theih a i rawn chuankai theih hlauh chuan.." a tih lai chuan anmahni beitu awmna tur nia a rin ding leh vei lam chu a kap tawn sek a. A hmaa awm te hi namai lo tak, tualthaha eizawng, dehkhirh tak annih a hre chiang. Helai atanga tlanchhuah theih anih chuan a lawmawm ngawt ang. Tlanchhuak pawh ni se an rawn um zui dawn tih chu a chiang bawk.

A bula lungpui chu silaimu in a rawn deng thuai mai a. Silaimu lo kalna chu a en vat a, a hnunglam lungpui phen atanga kah ni ngeiin a hria. Chu lungpui chu awih panga ding, lungtein a kamki avanga ding mai a niin chhaklamah leiminin leivung a chhek teuh hian a hmu a. Ngun deuhin chu lungpui kamtu lung te deuh chu a tin vang vang a, a kap ta. A vawihnihna atan a tin leh vang vang a, a hmet puak chiah tihah chuan vawilehkhatah chu lungpui leh a chhaka leivung chu thlanglamah a tawlhthla ta hum hum a.
Thlanglama lo awm pahnih te chu hlauhlawpin an rawn zuang chhuak a. Blaine-a chuan pakhat chu a awmah tak kapin pakhat erawh chu a khup bawrah a lo kap a. Lung leh lei tawlh chu a ri thla rum rum a. A thlang luiah an lum lut ta a.
Manganga an phi buai lai chuan rang takin Blaine-a chuan sakawr awmna lam chu a pan a. Timm-a pawh sakawr chungah lo inhlangkaiin a pommel chu a lo vuan a. A rifle erawh chu leiah a lo awm a. Blaine-a chuan rifle chu chharin a bawmah a khungsak a. Timm-a sakawr chu kaiin lungpui lian pui pui inkar kawng chep takah chuan a kai chhuak ta a. Hnim buk leh khaw thim zarzoin an tlanchhuak ta hram a ni.
A han hawikir a, Timm-a chu sakawrah a la bei tih a hriat chuan hma lam panin a kalpui zel a. Hmanlai atanga mi sawi a lo hriat tawh puk tha tak chu a melh reng a ni. Khawkrawk leh ngaw hnuaia rei tak an kal hnu chuan a zawn puk chu a hmu ta.
Puk chhung an luh fel a sakawr a din chiah chuan Timm-a pawh rawn harh ve in tawngvai titih hian "Ka bei tang thei hram maw?" a rawn ti a. Nikhaw hreloin a awm leh ta mai a. Puk hmun khat lai chu vaivut ro hian a lo bawhkhat tlat a. Chulaiah chuan sakawrte chu a kai phei a, puk kotlang atang pawhin a thuk a, tumahin an rawn pawh theih a ring lo.
Tui a chhuan so hnu chuan Timm-an hliam a tawrhna lai chu enin tui lum chuan a han silfai a. A thianpa hliam tawrh hi a na in engtin nge khatianga rei kha sakawrah chuangin a dam theih le? Thil mak a ni ringawt mai. Fimkhur takin a hliam lai chu a tuam a, a mutna bulah chuan Blaine-a chu a thu a, eitur a buatsaih a.
Pawn lam boruak chu a hnawngin ruah pawh sur maithei dinhmunah a ding. Khawpui a lo ri a, Blaine-a chu a lawm hle a ni. Ruah tam tawk a sur phawt chuan an hnuhma zawng zawng kha ruahin a len fai vek anga, anmahni chhuitu tan chhui ngaihna a awmlo ang. An tawmna puk lah a sangin puk chhungah tui a lo lut thei bawk silo.
An awmna atang chuan eitur an thuhrukna hmun chu a hla deuh. Timm-a hi engti kawng mahin khawih chet theih a ni tawh lo. Chutih lai chuan khawi hmunah pawh awm se Rip Coker-a khan anni hi a mamawh ngei ngei ang. Timm-a chu a rawn che a, a sawi hriatlohin a rawn phun a. Zawite te in a rum a. En reng reng pawhin Timm-a hi a na a ni. Mahse damdawi engmah an nei si lo.
Hun rei tawh taka a lo hriat tawh hriat chhuah leh a neih chu vaimim atanga Indian hoin damdawi an siam thin chu a hrechhuak leh a. A thiam dan danin an chaw atana an pai vaimim atang chuan damdawi a siam a, a hliamah te chuan a hnawih a.
Timm-a chu kalsanin a sakawr thlunnah a va kal a, sakawrte chu va chulin a va kawm a. Timm-a awmnaa a lo kir leh chuan Timm-a pawh lo harhin eitur an neih ang ang chu tlem azawng a han ei ve a. A rawn tha chho hret hret a, ei tur pawh tlem tlem chu a ei ve ta. Then deuh sang chung hian Timm-a chuan "A chhelo e, ka nupui pawh khan hetiang bakin a siam ngai lo," a rawn ti a.
"Timm, nupui i nei tih reng ka lo hre lo,"
"Ka nei tawh hleinem, tuihriin a thi tawh,"
"A va zialo ve le,"
Timm-a a ngawih lai chuan Blaine-a chu lo dingin "I tha zel ang ti rawh? I hliam damdawi tur hnim hnah zawn ka duh tlat mai," a han ti a.
"Va zawng ta che,"
Blaine-a chuan puk kawngka lam a pan a, a rawn hawi let lai chuan Timm-a chuan "Utah, kan kir leh tak takin i ring em?" tiin zawite hian a lo zawt a.
Blaine-a chuan "Timm, kan kir leh anga, i hna ngai ngei kha i thawk chhunzawm ang," tiin a lo tiam a.
Timm-a chuan "I bulah, i bulah ngei thawk thei ila ka duh," a ti bawk a.
Darkar khat pawh a thang bo hmain Utah chu hliam damdawi atana an hman thin hnim hnah pawm bawrin a lo kir leh a. Mahse Timm-a hmel a hmuh chuan a ding chawt a, "Timm," tiin a ko a.
Chhanna reng a dawng lo. A thil ken paihin Timm-a lamah a tlan phei a,beisei tur reng a lo awm tawh lo. Timm-a chu a lo thi reng tawh. Hmel hlim tak puin a ni a thih ni. Chiangtaka amah chu enin Utah chuan "Ka bula thawkah ka duh tehlul che nen, mi tha tak i ni asin, Timm. Mi tha chungchuang tak," a ti ta mawlh mawlh a.
Phur lo takin silai leh a mu te a khawm a, tunah chuan amah chauh a ni ta.....amah chauh! Pawn lamah thah tumin an la veh reng .

********ADVERTISEMENT CLICK **********

[HLalthazuala]

UTAH BLAINE
%%%%%%%%%

CHAPTER 10
*********************************************


Utah Blaine chu a ngaihtuah hle naa Angie chu a chenna in tereuhte ah chuan a la kir leh lo. Rink Witter-a leh a hote pahnih khuaa an rawn luh lai chuan Ralston Forbes-a nen hotel chhungah an ding dun reng a.
Mi pahnih a ruala an lo kal laiin sakawr chungah mi pahnih hi thiin an rawn phur lut bawk a. Pahnih zinga pakhat pawh chuan hliam a tuar a ni. Inseh ruh teuh chungin Angie-i chuan a lo thlir reng a.

Hmanhmawh takin Forbes-a chuan "Ka zu chhuk teh ang.
Eng thil nge thleng hriat ka'n tum ange," a ti a.
Angie-i pawh chuan a zui thla ve nghal a. Reiloteah kawtthler chu mihringin an khat a ni mai. Hemi ni hian Nevers-a pawh Lee Fox-a ang bawkin khuaah a awm a. Lud Fuller-a pawh awmin tun hnaiah Lud-a hi a tawng duh hauh lo a ni.
Ben Otten-a pawh lo tel ve in Nevers-a bulah a rawn ding a. Rink-a, en reng reng pawha nelawmna nei hauhlo chu a thlir a. "Blaine-a chu kan that lo. A tal chhuak leh ta. Timm-a pawh a chhuah pui a, mahse Timm-a kha chu a na hle a ni. White Rock Messa thleng kan chhui thei a, Rock Creek atangin a hnu kan chhui thei ta lo. Chhim lam, Mazatzal lam an pan a, thui tak erawh an kal theih a rinawm loh. An sakawr a chauh tawh bakah Timm-a hliam kha a na hle si a," a han ti a.
"I hote pawh i chan nual anih hi,"
Forbes-a lam chu hawiin Rink-a chuan "Blaine-a thah tuma chhui chu picnic ang chu a ni hauh lo," tiin za lo takin a nui hak a. "Ka hote pahnih leh kan sakawr pakhat min thah sak a, Wardlaw-a an hliam bawk," a han ti zui a. Sakawr atanga chhuk pahin "Utah chu Indian ang chiah. Chinghnia ang maiin hnuhma hmuh tur a hnutchhiah reng reng lo," a ti bawrh bawrh a.

"Timm-a chu a thih i ring amaw?" tiin Fox-a chuan a lo zawt a. Bu nghat nghat chungin Witter-a chuan "Ka ring," a lo ti a.
"Chuti chu Blaine-a, amah mai a ni ta a, a thiltih lai pawh a tawpsan tawh dawn chu," Nevers-a chuan a'n ti ngawt a. Mahse Lud Fuller-a chuan "A bansan hauh lo ang. Ortman-a nen an insuallai ka hmu a, bansan tih awmzia hi a hre lo," a lo ti a. Nevers-a chuan Fuller-a chu a melh kawk a, mahse hotel lam pan pah chuan Witter-a hnenah "Lo kal teh, Rink. Inbiak a tul tlat," a ti ta zawk a.
Forbes-a pawh chu inherin Angie lam a va melh a, "Tih theih enge kan neih aw? Tih tur a tam vei nen kan kut phuarin a awm si. Ka press chu a tha leh tawh a. Mahse paper pakhat kan tih chhuah rualin min tihchhiatsak dawn tih a chiang si," a han ti a.
"Governor khan eng thu emaw chu ziak se ka ti hle mai," a tih chuan "Lehkha te chu a pe chhuak tawh maithei asin," Forbes-a chuan a ti a.
Mary Blake pawh kawtthlerah chuan a rawn chhuk a, an hmaah chuan dingin a melh tawn sek a. "Khinglai hmunah khian a awm a ni. Amah zawngin ka kal dawn," a rawn ti a.
Angie erawh chuan "Tihbuai loh a that zawk fe ka ring. Kal ta ang la, Rink Witter-a tan amah hmuhna remchang i siam tihna chiah a ni ang," a lo ti a. Mary erawh chuan "Ka zawng hmu dawn. Rink Witter-an min zui lovang. Min zui pawh nise a chhui theih lohin ka awm dawn a ni," a han ti a. Angie chuan "Coker-a hetiang anih lai hian Timm-a pawh chutiang chu a ni ta si a," a tih vang vang lai chuan Mary chuan "I lo enghelh ve na chhan tur engmah a awm lo," a lo ti hmak a.

Angie chuan chhang ve ta lemlo chuan thlanglam chu a thlir a. Station atanga tlangval sang thlerh thlawrh, thawmhnaw dum inbel lo kal chu a hmu ta a. A kut dinglamin bag a khai a, a han ding chat a, mahse an awmna lam pan chuan a rawn kal leh ta. Sam buang deuh, meng bial leh fiah tak a ni. "Chibai ule, George Padjen-a, ukil ka ni e. Tunge ka biak te hi in nih aw?" a rawn ti ta a.
"Ralston Forbes-a ka ni. Ka press an chhut chhiat thleng kha chuan helai chanchinbu editor hi ka ni," tiin phur deuh zawk hian "Governor tirh chu i ni lovang maw?" tiin a han zawt a.
Nui chung hian chupa chuan "Nilo e, ka ni lo. Ka biak tur mi ah fimkhur hle tura chah ka ni a. Mahse i hming hi chu ka biak tur zingah a tel a ni,"
"Ka bul ami hi Miss Kinyon leh Miss Blake te an ni,"
Padjen-a chuan lukhum phawkin chibai a buk a. "Utah Blaine hi khawiah nge? 46 ah chuan a awm em ni?" tiin a zawt ta a.
Forbes-a chuan a tawi thei angin thil thleng tawh chanchin chu a hrilh a. Ortman-a nen an insual thu te, Ranch-a Blaine-a an beih thu leh an inthiarfihlim dan, Kelsey-a thah a nih thu leh Coker-a chanchin tlem leh Timm-a pawh thah anih a hlauhthawn thu te a hrilh zung zung a.
"Coker-a chu a la damin i sawi si a?" Padjen-an a tih chuan Forbes-a chu a then sak a. "A la dam chu a ni ber ang chu. Mahse dam khawchhuahna chance a nei lo. A la dam tawk tawk a ni mai. Utah tan chuan Coker-a chu thi a ngaih tur a ni. Utah hian tlanchhiat bak tih tur neiin a lang lo," tiin a chhang a.
Padjen-a chuan zawi deuh sap hian "Ka thu rawn ken hi a pawimawh dawn ta tihna a nih chu. Helaia Joe Neal-a a rawn kir leh hma khan min rawn hmu a, thurochhiah a rawn siam a ni. Chutah chuan a chungah engpawh thleng se, ranch chu Blaine-a chan turin a ti hmiah a ni," a han ti a.

Ring that hian Forbes-a chuan "Engtin a? Thudik i sawi maw?" a rawn ti a.
"Thu dik ka sawi,"
Forbes-a chuan a kutah kaiin "Lokal rawh," tiin a office lamah a kai phei a. "Hei hi kuta her theihin ka siam anga, a theih ang angin chanchinbuah ka chhuah dawn," a ti a. Nula pahnih puihna in Forbes-a chuan a tawi thei angin Padjen-a thusawi chu hetiang hian a ziak ta:
"JOE NEAL-A'N 46 RAM CHU BLAINE-A KUTAH A HLAN!"
El Paso-a thurochhiah siam chuan Joe Neal-an 46 Connected leh a chhunga sakawr, bawng rual zawng zawng leh tih tur awm apiang te chu Utah Blaine-a hnenah a hlan a. He thurochhiah hi a thih huna hman nghal tur a ni. Hei hian helaia rancher inhlawm khawmin helai ram an chuhna leh neih tuma an beihnaa 46 ranch leh B-Bar-a thawk an thah te a titawp nghal a ni.
He thu in a tarlan dan chuan helai phaizawla khawsa rancher hnenah reng reng Blaine-a hian 46 ram hi a hralhin a neih hawh tir tur a ni lo. Rancher intel khawmin helai ram chuh thei nia an hriatna chu hei hian a ti tawp a. He thu pawisa loa nawr lui an awm anih chuan chungho chu Outlaw an ni tihna a nih dawn avangin an chungah Danin ro a rel ang!
Padjen-a chu a nui var var a. Forbes-a chu enin, "Hetiang thu hi i chhuah anih ngat chuan thirlena i inhung anih loh pawhin he khua hi i chhuahsan a ngai ang," a han ti a.
Forbes-a pawh chuan bu nghat nghat chung hian "Ka lo ngaihtuah reng asin. Ka rilrua awm reng a ni," tiin an chanchinbu siam peih sa intiang khawm zinga thenkhat chu la in "Tha tura ka ngaih ang hian hengte hi a zau thei ang bera sem darh ni rawh se," a han ti a. Padjen-a pawh chuan phur takin chanchinbu tlem chu la in pawnah a chhuahpui ta a.
In chhung atang chuan muangchangin Angie chu pawnah a chhuak ve a. Thil kal zel dan tur chu a hria. Thil dang eng vak nge thleng ang? Kir leh turin tunah chuan Nevers-a a kal thui lutuk tawh. Chutiang chiah chuan Fox-a pawh. Mi an that a, diklo takin an that a ni. Tunah erawh chuan ram chuh thei nia an inhriatna lakboin a awm tawh. Tunah chuan 46 chu Blaine-a kuta awm anih a chiang tawh. Anih leh B-Bar hi chuh theiah an la in ngai angem?

Tunah hian Utah Blaine chu chhak lam tlang khawimaw laiah khian a vak vel ang. Hliam a tuar thei a, a ril pawh a tam tawh ngawt ang. Mary Blake hian Witter-a hriat loh turin a awmna hi a thleng thei angem? Thei lo. A awmna hi hria pawh ni se he misualpa hriatloh turin a hnu a thup thiam lo a, a fimkhurna in a tlin lo. Mahse Angie-i hi chu chutiang a ni ve lo. A inher thut a, kawtthler lamah chak takin a kal ta a.
An chhak tlang hla taka puk an tawmnaah chuan Utah Blaine chuan Timm-a chu a phum zo chiah a. A thlan chung vaivutah chuan thu tlemte a ziak ve a. Thinga kross a siam chu phun ve in a bulah chuan ram pangpar tlem te a phun bawk.
Thlan atang chuan tawlh hnungin "Timm, mangtha," a ti a, a sakawrah chuan a chuang ta nghal a. Timm-a sakawr chu kai chungin Pine Canyon lam panin chhim thlang lamah a kal ta a. A dam chhunga a tawn hmasak berna ni turin mi zawn hna a tan dawn ta a ni. Mi pathum zawn chhuah a thah hna a tan dawn ta anih chu.
Chak takin Blaine-a chuan sakawr a tlantir a, darkar khata mel nga laia hla a tlan hnu chuan Timm-a sakawrah zawk chuan a chuang leh a. A chang phei chuan darkar khata mel riat lai te tlan chang a nei. Zing khua a var chuan Timm-a sakawr chu chhuahin ama sakawrah chuan a chuang leh a. Timm-a silai erawh a la chhawm zel. Amah mai a ni tain silai erawh rifle pahnih, shotgun pakhat leh pistol pathum, a mu thun sa thah a nei thung.
A ril erawh a tam hle. Chaw pangngai a eilohna a rei tawh a ni. Chaw tui tak awmna tur Angie-i chenna in kha a awmna atanga mel tam a ni lo. Lui panna kawng lamah, hmar lamah a sakawr a kaltir ta a. Khawvar atanga darkar khat lekah Angie-i chenna chu a thleng ta. A thil hmuh hmasak ber chu Angie-i in meikhuchhuahnaa meikhu chhuak chiai chiai chu a ni a. A pahnihna atan corral gate bula sakawr saddle inbel sa thlap ding reng chu a ni!
A sakawra kal zelin chu in hnung lam ngaw karah chuan a kal a, sakawr chu thlungin a shotgun keng chuan thingbuk hnuaiah a pan hnai ta a. Sycamore buk lian tak, Angie nena an inbiakna hmun a thlen chuan a ding dat a, a lang thei chin zawng chu chiang takin a en kual a. Sakawr dang hnuhma a hmuloin Angie-i leh a sakawr chauh chu a hmu. Fimkhur takin lui piah ram te pawh chu a thlir vang vang a. Chumi hnuah chauh chuan in lam chu panin, kawngkhar chu hawngin a lut ta a.
Angie-i chu sakawra chuang turin hmanhmawh takin a lo inchei a. Dawhkanah chuan eitur thleng khat chauh a lo inchhawp a. "Angie, eitur thleng dangin i rawn chhawp thei em?" tih thawm a hriat veleh rang fahranin a inher a, maktia meng zau kawk kawk chung chuan "Utah, aw, ka lawm e Lalpa! Hetah i lo awm reng mai. Eng nge i an? I dam amaw?" a ti bawrh bawrh a.

"I mi ngaihtuah thu chu sawi duh suh," tih paha thlahlel taka melh chung chuan "Kal chhuah i tum em ni?" Blaine-a chuan a lo ti a. "Nangmah zawng tura chhuah ka lo tum a. El Paso-a Neal-a thurochhiah siamah chuan ranch leh thil dang zawng zawng i hnenah a dah thlap mai," a tih chuan Utah chuan chiang takin Angie chu a en a, "Ka hnenah maw? I hrechiang maw?" a lo ti vat a.
"Dawn lawm ni!" tih pah chuan rang takin artui kan tam zawk thlengah chuan a dah a. Thil awmzia chu a hrilh zung zung a. Padjen-a thusawi tlangpui leh Ralston Forbes-a chet dan te a hrilh zung zung a. "Utah, khawiah nge Timm-a hi?" tiin a zawt ta a.
"White Rock-a kan inbeihnaah hliam a tuar a, a thihpui ta a ni. Nimin tlaiah khan ka phum tawh. Coker-a hi i hmu hnai em?"
Khuaa Clell Miller-a nen an intawn dan leh huaisen taka midang a hmachhawn a, pahnih lai a thah thu te a hrilh zung zung a. "Vawi tam tak kah fuh a ni a, mahse a la dam cheu a ni. Doctor phei chuan awmze neia dam ni pawhin ka hrelo a, mahse a la dam tlat," tiin a chhunzawm a.
"Neal-a thurochhiah chungchang min hrilh turin lo kal i tum a maw? A bak sawi tur dang te...?" coffe no sa tawk khu kar atang chuan Angie-i chezia en chung chuan a han ti a.
"Awm hran em em lo e..ih.....ih....Mary hian a ngaihtuah khawp mai che a, zawng tur che a rawn chhuah a tum nghe nghe a," tiin hreh deuh tak chung hian "Utah, in lo in hmangaih reng em ni a?" a ti ta hlawl a.
"Mary nen maw?" tia a zawh chuan Angie-in a hnungchhawn tlat avangin a hmel a hmu thei lo. Makti zet chungin Blaine-a chuan "Chutiang ngaihdan chu eng tia nei ta nge i nih le?" a ti ve a.
Artui leh chhang leh sarep te thlengah chuan a rawn dah belh a. A thil ei tui ti lutuk chuan engdang a ngaihtuah lo. Ngawi rengin a mawlh mawlh mai a. Rei tawk a ngawih hnu chuan inthiamlo tak hian "Ka ril a tam em a, tawng nachang pawh ka lo hrelo a ni. Ka puar ta bawk a, inah hian inmeh faina chi awm a awm em le?" a ti ta daih a.

"Ka pa razor bakah thil dang tlem ka kawl asin. A silai pawh," tih pahin razor chu la in Blaine-a chu a pe a. A inmeh fai lai chuan thu dang a hrilh mawlh mawlh a. Hmanhmawh takin kawngkhar lamah chuan kalin a in chhehvel leh lui lam te chu fimkhur takin a thlir kual a. "Utah, enge an tih tak ang? Nang hi an la rawn um zel dawn che em ni?" tiin a zawt ta a.
Razor keng reng chung chuan Angie lam chu a hawi a, an mit leh mit a intawng ta siah mai. Angie chu zaka amah hmachhawn ngamloin khaw dang a hawi a. A awmbawr te chu a in sep deuh dawrh dawrh a. A zawhna kha chu theihnghilhin muang changin Blaine-a chuan a pan hnai a, "Angie," tih pahin a vei lam chuan Blaine-a chuan Angie darah a vuan a, ""Angie, ka hma..." a tih lai chuan Angie-i chu rawn inherin a mitmeng mawi tak chuan hlauthawng tak chungin a rawn en a. Blaine-a chuan dimtein a kawng bawrah vuanin a pawt hnai a, inthlahlel tawn takin an in fawp ta vawng vawng a. Angie chu a thaw halh a, a kuah nghet zual sauh a. A tu amah in hmanhmawh taka sakawr rawn tlan thawm chu an hrelo a. Kailawn rah ri atang chauhin an inthen phawk a, pakhat ang maiin a rualin kawngka lam chu an hawi ta a.
Kawngkaah chuan Mary Blake-i a lo ding vang mai. A lukhum a keng a, thli chhemna avangin a hmai chu a samin a khuh then bawk a. Utah leh Angie-i te chu a entawn sek a.bHnar var deuh hak leh hriam hrak hian "Angie, kei aiin i thleng hmasa anih hi," a'n ti ngawt a.
"Enge? Enge pawi? Kei chu ka inah ka haw a ni mai alawm!" tia a chhan chuan Mary Blake chuan "I hmel pawh a tha sawt ang; I hmui vela hmul awm kha i hrukfai hnu chuan! Nge razor khan i ziat fai ve zawk dawn?" a han tih chuan Angie chuan "Awi!" tih pahin darthlalang awmna lam chu a pan ta nghal a.
Utah pawh chuan chil lem khawlh chungin, "Mary chibai, helaia ka hmu thut che hian min barakhaih tlat," a lo ti a. Mary erawh chuan "Ka ring reng a ni," tia hul haka chhangin "Hmanhmawh taka helai atanga i tlan chhuak nghal anih loh chuan thil dangin a rawn barakhaih leh ngei ang che. Ka hnung hla vaklo ah Rink Witter-a a lo kal ania," a ti ta a.

"Rink Witter a lo kal amaw?"
"Aw, mahse Nevers-a a lo thleng hmasa zawk ang. Rink-a kha engemaw thlithlaiin a peng zawk a, Wardlaw leh Fuller pawh an rawn hruai tel ve a ni,"
"Nevers-a chuan hruai a nei em?"
"A hote paruk a hruai,"
Utah Blaine chu inherin a lukhum a la a, "In pahnih khan lo awm ula, ka'n inthiarfihlim rih phawt ange," a ti a. Pawnah chhuakin in a kal hual a. A sakawr thlun chu phelhin in lamah bawk a rawn kai a. Tui te in tirin chaw tlem a pe bawk a.
Vaivut rawn khu ram ram a hmuh veleh sakawrah zuangkaiin lui lam chu a pan thla ta a. A thlen thlakna lai lui chu yard sawmhnih vela zau, thuk lutuk lo a ni a. Harsa vakloin a daikai mai a. Hnim buk tha lai, midangin an hmuh theihloh turah sakawr chu a thlung tha ta a.
Mi engemaw zatin lui lam pana a awmna lam rawn pan chu a hmu ta a. Lungpui chungah sikret zu a thu in chungho chu a lo nghak a. Chung ho chuan yard zathum vel an rawn thlen chuan lungpui chungah thingthiin ngun takin rifle chuan a tin ta vang vang a. Nevers-a chu a tin ngun bik a. Thah tumin a tin lo; mahse rifle a hmeh puah lai tak chuan a chuanna sakawr chu a zuang deuh a. Nevers-a beng hleh thlak hlak a tum laiin a hmai a hup ta chawt a, a tê tûng bawk a. A kut zungtang karah chuan thisen a rawn luang chhuak ta. Chumi rual chuan midangin rawn kah let pahin an vâk darh ta hlawm a. Chungho lam hawi chuan Utah pawhin silai hmetpuakin pakhat chu insaseng tum a sakawr atanga a zuanthlak laiin a ke ah a kahsak a. A silai mu hnihna chuan Nevers-a sakawr chu kap fuhin Nevers-a delhin a tlu ta bawk a. Blaine-a chuan Nevers-a mit bul vaivutte chu a kap per chuai chuai a.
"Nevers, thih i duh a maw? I hna tenawm tak thawk a min do turin i hote i rawn hruai amaw? Enge ang i tih le?" tih pah chuan a bul vel chu a kap siah siah a. "Nevers, i mit a mim elo?" tih pahin a hmai bul vaivut chu a kap per leh chuai a. A mit chu a mim chiang khawp mai!
A han nghak leh hret a, Blaine-a chuan "Midang ho kha in inthiarfihlim phawt chuan ka tina lo ang che u. Tu emaw kha lo zuang chhuakin in thianpa ke kha tuamsak rawh u. Ti nghal rawh u, ka kap lo ang che u," a han ti a.
Pakhat chu lo zuang chhuakin an thianpa chu a va kuah a, an awmna lamah a phei pui a. Blaine-a chuan a kap hauh lo. Nevers-a chuan thinrim zet hian "Mi â ho, kalin va kap ta che u. Man nghal rawh u," a rawn ti tuarh tuarh a.
Utah erawh chuan nui chung hian "Nevers,nangmah tak hi min bei tura i lo thawh chhuah pawh ka la hrelo e. Midang tello chuan min hmu ngam lo anih hi," tih pah chuan Nevers-a bul setah a va kap leh a. "Lui kama rawn inlan hmasa apiang ka lo that ngei dawn ania," a han ti zui a.

Silaimu kara rawn kal kai ngam an awm a ring lo. Mahse a mit erawh a len ngun hle. Chuti chung chuan Nevers-a hian amah that tur rawih a nei tih leh chung ho chu a bulhnaiah an awm tih erawh a hria.
Nevers-a chu a chuanna sakawr thiin a delh bet reng a. Midang puihna lo chuan a tal chhuak thei lo. A duh chuan Blaine-a hian a that thei reng a ni. "I mi tirh te hmangin Timm-a i that tawh a, Coker-a pawh i kap chik nuk bawk a. Tunah hian tualthah hmang,kei min that turin i ruai leh bawk a. Joe Neal-a khaihlum tumtu zinga pakhat kha i ni bawk. Chungte avang chuan ka kap chik nuk dawn che!" a han ti a.
Nevers-a chu a ngawi hmiah. Tunah hian Blaine-a hian thah a tum lo niin a hria. A tir lamah hlauhthawnna in khat mah se a hnung lawkah Rink Witter-a leh tualthah hmang a hruaite kha lo kalin silai thawm te kha hre ngei turah a ngai a. Hma rawn lak dan tur pawh an hriain tunah hian an veh mek ang tih a ring a ni.
Blaine-a chuan a'n kap leh a, hnim buk zinga tlan lutin a sakawr thlunna a thleng a. Thawm bengchheng awmlohna tiau vut lam panin tlema hel kual deuhin chak tawkin lui lamah a sakawr chu a tlantir a. Lui kanin Witter-a te awmna lam nia a rin lamah chuan a tlan a. Thingbuk hnuaiah chhaklam atanga a rawn tlan thlak lai chuan au thawm a hre ta a. Yard zahnih vel leka hlaa sakawr chung chuang sawmpahnih dawn tlang dunga lo in zarpharh chu a va hmu ta. A hmuh vuai danin hengho hi Fox-a leh a hote ni ngei turah a ngai.
Chung ho lam hawia rang taka silai hmet puak chung chuan tlang dung lamah chak takin a sakawr a tlan tir a. Witter-a a zu nangching tawk chiah a ni. Amaherawh chu Witter-a tawn a tum dan chu a ni lo. An in
barakhaih chiang hle. Chak taka a sakawr chu tlan tirin heng mite kawng kal lai chu Blaine-a chuan a rawn su darh ta thut a. Blaine-a sakawr chu a len zawk avang leh dinhmun tha zawka a din avangin Witter-a leh a pawlte hian inrinna hun an nei miah lo.
Blaine-a chuan a puakruk la chhuakin mi pakhat lo tê chul banah a vuak sak a. Rink Witter-a mit meng leh a pistol chuh tum a hmuh vuai chuan Blaine-a chuan pistol kawma a hmaia chhut tumin a va bei a. Mahse pistol kawma vuak thelhin a kutbawr zawk chuan Witter-a hmaiah tak a va hem a. Sakawr atanga a tlak hlawm tawp lai chuan lui lamah chak tawkin a sakawr chu a tlantirr ta a.
Silai a ri thuai a, a beng bul lawkah a rawn vung thuak a. A rawn ri leh dawt a, a nâk hnuai hretah silaimu chuan a rawn deng dawt a. Khuh deuh barh barh chungin lui hnar lam panin a sakawr a tlantir zel a. Tlan zawihtir hretin hnunglam a'n hawi a, a hliam tawrh chu nâ a ti ta hle mai. Mahse a sakawr chu tluang tak leh chak takin a tlan zel a. Amah zuitu mai a hmuh loh avangin tlangdung tan tlangin hmar thlanglamah 46 ram lam hawiin a kal ta zel a. Mel sawm vel zeta hla a ni a, a thiam tawka hnu thup chungin chu lam pan chuan a kal ta zel a.

Tum hnih a hliam tuar in a tur vang leh tui in in a ding a, silaimu tawn chu a nat em avangin thisen pawh a chhuak hnem hle mai. A chuanna saddle te chu huh tlangin a sakawr pangah te chuan thisen chu a luang zuih a. Thlang lama inherin phaizawl bul thut a thlen chuan ranch chhunga in lam pan chuan a kal ta a.
In lam pana a kal lai chuan a ngaihtuah thui khawp mai. Hliam a tuar tih an hre ngei ang. A thlan tui chuan a leih bawrh bawrh a. Chinghne kohamin sakhi hliam inchuha hmanhmawh phelenga an inchuh ang maiin an rawn bawr tawh dawn tih a hria. Midang che theiloa siam a a hnua Witter-a hmachhawn a tum laiin Lee Fox-a leh a hote lo lang ve khan a tum dan a ti sukuk ta a. Tunah hian amah zawk hi dan chepin a awm phah ta mai angem?
A sakawr thahrui a ren duh bawk a, zawimuangin a kaltir a. Kal pahin a silaite a check a, pistol leh rifle mu te a thun belh a. A tuihal dang char chuan a hmalam phaizawl chu vir deuh te hian a hmu a. Ni a sa in a lum kher mai. Ranch chhunga in chu a hla lutuk tawhlo ang chu maw.
Tunah chuan an za in inthurualin an um tawh ngei ang. Rink Witter-a pawhin mimal takin a haw hle tawh ang. Nevers-a lah khati tak khan a tihthaih kha a ni a. An zain amah thah tumin an rawn inhawr tuau tuau dawn. Chil lem a han tum a, mahse a hrawk a ro tlat. Tawrh ruallohin ni chu a sa a ni ber. A thawmhnaw in bel te lah thlan rim leh thisen rim inpawlh avangin a rimchhe em em a.
A'n thlir thla vang vang a, phaizawla in ding chu a zuk hmu ta. A ruak a ang khawp mai. Thingbuk hnuaiah a sakawr chungah chuan a chauh em avangin a bawk thlawrh a. A tih theih hnuhnung a ni ta mai em? Ni lo, a hmabak hlen turin ei tur a mamawh. Mamawh lam turin Angie-i hnenah a kal a, mahse amah zawngtute a duh aiin an lo thleng hma si....
Angie-i mawlh mai kha..... A mitmeng te reng kha a va mawi em! A heh te kha fawh a va han nuam teh reng em! Khatiang renga fawh nuam kha a la tawng ngai lo. A kawngbawr a kuah laite a ngaihtuah lai chuan mengin a lu a han tun a, a sakawr chu ranch kawt zawlah muangchangin a lo kal reng tawh. Sakawr atang chuan muangchangin a chhuk a, hetianga thil hre mang lo hian eng chen a rei nge a lo awm tawh ang? Darkar chanve nge darkar khat zawk aw?
Hetianga a lo kal hi miin an beisei lo ang. Tumahin an ring miah lo ang. Mahse chutihlai chuan kawngkhar chu rawn inhawngin mi pakhat hi kailawnah chuan a rawn chhuk ta. Utah Blaine-a chu a ding chawt a, nisa rum tak leh a thlan karah Lud Fuller-a chu a hmu ta. Phur zet hian Lud-a chuan "Ka ring dik chiah, helai hmunah i lo kal dawn tih ringin ka pen bosan a, kao nghak che a ni. Hliam na tak i tuar tih ka hre bawk. Tu ah khan enge i an a? Kei, Lud Fuller-a hian Utah Blaine-a ka that dawn ta anih hi," a lo ti a.

Fiah mang lo chung chuan Utah chuan Fuller-a chu a han en a. He Lud Fuller-a hi a that ngei tur a ni. Intithei leh chapo taka a foreman a tei vel lai chuan a chakna a khawn khawm a. Nghet tak pawha ding hlei theilo chung chuan a han thlir a, Fuller-a chuan pistol a lo keng reng tawh. Mi â taka ngaih ni mah se Fuller-a hian Blaine-a phawi khalh theihna chance a neih tlemzia a hria a ni phawt ang.
A chakna sawm khawmin Utah chu a ding kak ta tai mai. A lukhum parh hlai tak hnuai atanga rum tawka rawn melhin "Lud, i â anih hi! Kalbo tura ka tirh lai che khan i kal daih tur hi a ni a," a rawn ti ta a.
A aw chhhuak chuan Fuller-a a ti phu zawk a. Meng zau kawk kawk chungin a pistol ken lai chuan rawn tinin hmet puak turin a sang mar a. Blaine-an silai a chuh lai reng a hmu hman lo. Blaine-a ngei pawhin engtik lai khan nge a kutin silai a chuh a hre bik lo. Hetiang hun hi a tawng tam tawh in kum tam a lo ti chhin tawh thin. Hliam a tuarin a chau hle a ni thei. Mahse a lo tih chhin tamna chuan tun hi a hruai thleng ta a ni. A chaklohna te, a thlan rimchhia leh a hliam tawrhte piah lamah a thluak bawrah thil nih dan tur chu a rawn lang hlawl mai a ni.
Kawlphe anga ranga silai rawn invawrh chhuak karah silai a ri dawt a, Lud Fuller-a silai mu chuan lei a deng per chuai a. Utah Blaine-a silai, vawihnih hmehpuah mu erawh chuan Fuller-a kawr hma ipte a sahdah bawm sir tawnah fuhin a pai chawn chawn a, leiah na takin a tlu ta a. Utah Blaine chuan a silaimu ruak te chu paihin a dang a thun nghal mawlh mawlh a.
Fuller-a chuba en zui lo. A rilruah Joe Neal-a khaihlum an tum zana Lud Fuller-a tawngkam hriam tak tak leh rei tak na tuara thihtir tuma a tawngkam chhak chhuah te a hre chhuak a. Amah lah chu a na tawrh pawh hre hmanlo in a thi ta si.
In chhungah lutin ei tur leh a tana pawimawh thei tur te chu a la khawm zung zung a, almirah pakhat a hawng a, silaimu enge maw zat chu thamin a ak tha bawk a. Lo chhuak lehin Fuller-a ruang chu helin corral lam a pan ta a.
A sakawr dum lianpui chuan rawn panin a hmuiin a rawn nul thuak thuak a. Blaine-a pawh chuan a lo hling a, Saddle a bel hnu chuan kawmawl them chu tui ti huh in sakawr chu a hru thuak thuak a. Sakawr chu corral lamah a hnawt phei ta a.
Sakawrah ei tur leh mamawh dang a hlan fel hnu chuan a hliam kha enkawlin, a tuamna thi hlira khat tawh chu thlakin tui thianghlima silin a tuam tha a. A hliam tawrh hi a na khawp mai. Tumruhna nen tuarin harsa tak chunga inthiarfihlim paha tum neia a kal talh talh avang chauh a hetia khawchhuak hi a nih hmel. Tumruhna nen chuan silaimu thihpui tur zat hi tumahin an hrelo a ni.
Sakawr chungah chuangin hmar lam panin a kal zel a. A beisei ang ngeiin harsa lo takin lui a kan a. Amah a chauh em avangin saddle vawnchhanah a kut chu hruiin a thlung nghe nghe a. Hmarchhak lam tlang ram, chhengchhe deuhah inthiarfihlim a tum a ni.
Chutia a sakawr a kal zel lai chuan a mut a chhuak sulh sulh a, nikhaw hreloin a awm ta. Engtia rei nge chutia a awm a hrelo. A han harh chhuah leh chuan sakawr chungah saddle-ah chuan a lo bawk reng a. A sakawr erawh chak vakloin hma lam panin a lo la kal zel a. Sakawr nghawngah chulin "Thian rinawm tak zawng i nih hi," a han ti a.
Ni a tla a, khaw lum a reh chho a. Tlai lam khawvawt chuan a rawn chhem harh sawng sawng a. Khaw thim leh zan arsi eng hnuaiah hma lamah kal zelin Joe Neal-an helai ram chanchin a sawi te a hre chhuak a. Joe Neal-an henglai ram chhengchhe deuh kara hmun nuam tak pakhat Deadman Mesa a sawi te chu a hre chhuak ta.
Mihring thihna lam ngaihtuah takah chuan amah ngei pawh hi a thi hnai tawh angem? A hnunglamah mitthi ruang pakhat chu a hnutchhiah ta phawt chu a ni a. Rink Witter-a te, Nevers, Lee Fox te leh amah ngei pawh hetia thi mai tur hi an ni. Râwng taka nung a, silai hmang thin te chuan thih mai chu an hmabak a ni. Zu rui ang maia thle bawk bawkin sakawr chungah a chuang a. Hengho hming hi a bengah a rawn ri nawn reng bawk. Mi zawng zawng hi thi tur an ni. Mahse Blaine-a rilruah chuan thi hmasa tur
awmin a hria: Chungte chu - Rink Witter, Nevers-a leh Fox-a te an ni.
Fim taka ngaihtuahna pawh hmang hlei theilo chuan zan boruak dai leh fim tak hnuaiah hmanhmawhna leh enghelh pawh nei em em loin hma lam panin zawi muangin a sakawr chu a kal ta zel a.
(Ka rawn let leh ta e. Rokhawlhna avanga tawkfang ka reh chhunga dawhthei taka min lo nghak hram hram tu te in zahawm hle mai. Min nghah rei manah tun tum chu ka rawn ti sei deuh hlek anih hi - VM)

[HLalthazuala]

UTAH BLAINE CHAPTER - 11
*********************************************


Ben Otten-a chu a office chair ah ngui burin office khar hnu darkar khat hnuah pawh a la thu reng. Sil thumin a inhria a, a pumah chaw fum fe a awm lo. A thu thar hriatah lawmna tur a nei lo. Ukil Padjen-a khuaah a la awm a, Neal-an sum pe lawk veka Blaine atana ding tura a rawih a ni.
Ralston Forbes-a chanchinbu hmun sawmhnih laia tar chhuah pawh Nevers-a thupeka pawh sawm vek an ni. Pawt sawm mah se miten a chhunga thu awm an hre tawh tho. Forbes-a lah a mi rawih pakhat nen a office-ah an inkhung a, ei tur chaw an neiin shot gun leh a mu tam tawk an kawl bawk. Tun tumah hi chuan vau beh emaw, a press tihchhiattir emaw a tum hauh lo.
Mary Blake-i pawh khaw chhungah awmin Crossing a inbeihna chanchin ngaihnawm takin a puang a. Rink Witter-a pawh Blaine-an a hnar ngul a ben tliah tuam bar chungin khuaah a awm bawk. Blaine-a pawh um chhuah hmabakin a la dam a ni. Mahse amah umtu te hi an vannei lutuk lo. An chhuina lamah 46 ah an chhui lut a, mahse chuta an zuk hmuh chu darkar engemaw zat kal taa Lud Fuller-a thi ruang let reng chiah chu a ni.
Clell Miller, ..Lud Fuller....Tom Kelsey te leh Timm-a te an thi tawh. Eng zat tak la thi leh ang maw? Tunah mai chuan a tawp dan tur reng a la lang lo.
Chumi tuk chuan Nevers-a leh Fox-a te chu bank-ah kalin Ben Otten-a hnenah ultimatum an pe a ni. Helai ram inchuhnaah hian inthurual an nih avang hian tun ataka ka tel ve lo ti thei a ni lo. A tir atangin engkim a hre vek a, an tum dan zawng zawng hriain a tuipui em em a ni. A langin tel ve thin lo mah se tunah chuan chet ve a hun ta. A rawn luhchilh ve lo anih chuan hmelma anga an en a ngai tawh dawn.
Lawmman an dawn tur a tha alawm! Ram tha eltiang acre nuai thum zet leh tlema ram ro hmun zau tak, mahse tui thatna hmun leh hnim hring duah thatna hmun te leh bawng rual tam tak. Heng ranch pahnihah hian bawng hralh rual leh thau tha tak tak sing nga teh meuh chu hralh maitheih an ni. Heti ang taka bawng thatna hi Tonto Basin-ah a awm reng reng lo tih Otten hian a hre chiang.

Heng ranch pahnih te hi an neih theih hlauh chuan anni ho hi mi hausa tak vek an ni ang. Helai ram chuhtu zinga pahnih chu tunah nuaibo an ni tawh. An mamawh ang ngeia a rawn luh ve hian pathum chiah an ni dawn. A ram neihsa let li zeta zau, acre singkhat chuang neih belh thei dawnin a inhria a ni.
Heng hausakna leh ama inkarah hian mi pakhat chiah a ding. Chu chu Utah Blaine-a a ni. Ani hi thah anih phawt chuan a ukil hi chu a chan tur tawk pe in sum tam thamlo takin a thawn haw theih mai ang. Mary Blake-i lah a lakah thutiam rinawm tak tak siamin, chumi chhung chuan a nek chhuah theih mai a rinawm bawk. Sum leh pai a mamawh zia leh a neih zat lama hretu chu Ben Otten-a, bank enkawltu hi a ni. Tunah hian bank ah Mary hian dollar zathum bak a neih pawhin a chuang tam lo ang.
Ralston Forbes-a a la awm. Ani pawh nuai bo a harsa lo ang. Blaine-a ber a awm tawh loh chuan Witter atan beih harsa tur a awm lo. Chutih hunah chuan dawnfawh rah lian tak chu a laiah phel a ni tawh dawn. Dawnfawh laimu chu a thlum teh ang chu!
Sai deuh dar dar chungin Ben Otten chuan a khabe a han chul a. Thutlukna siam harsa tak chu a ni e. Vawikhat a inbarh luh tawh chuan inhnuhdawh leh chu a theih tawh lo ang. A ruk tak phei chuan Lee Fox-a hi a hlau rilru tlat. He pa hi a che rapthlak theiin a rura em em a. Amah pawh a in thah duh maitheih laiin Nevers-a pawhin a that maithei bawk. Ben Otten chu a thu ngil awt a, he mite pahnih an thih hlauh chuan ram chu a vaiin a pumhmawm dawn tihna a ni.
Engtin nge an ni pahnih hi an thih ngei theih ang? Blaine-a a la dam chhung hi chuan an chungah engpawh a thleng thei alawm. Hemi te pahnih hi a lawm fahran lo. A lawm loh zia hi engtin tak emawa hriattir vat a tum a ni. Blaine-an Fuller-a a that tawh a, amah pawhin hliam na tak a tuar tih tlang hriat a ni. A hliam vanga a la thi lo anih pawhin dahthat dan tur chu a hria. Rink Witter-a a awm alawm. Ani hi sum tam dan azira chhawr maitheih a ni. Sum a tam tawk phawt chuan hetiang mi hi tuma chungah mah an rinawm tak tak lo.
Thil awmdan zawng zawng ngaihtuah chungin in chhungah a vei tawn sek a. A...Rip Coker-a a la dam tak! Mahse hei hi chu thi tluka ngaih tur. A thi lo anih pawhin tih dan tur a hria. Tun hi he buai naa zuan luh hun lai tak a ni e tiin amah leh amah chu fimkhur taka che turin a inchah mawlh mawlh a.

Kawngkhar lam a pan lai chuan thil hriat chhuah thar a nei ta. A theihnghilh tawh emaw a tih, rum lutuka amah entu mit, hmuh rual ruala amah ti zamtu Blaine-a mitmeng chu a hmu ta. Chu pa huaisen zia chu a chetzia mai niloin a mitmengah a chiang hian a hre hliah hliah a. Amah bakah Rip Coker-a a la dam bawk si. Rip Coker-an Clell Miller-a a thah hnua midang paruk a hmachhawn dan leh thi a miten an ngaih hnu pawha tun thleng a a la dam te chu a han ngaihtuah a.
Hetiang mi huaisen te hi engin nge khalh kal ang? An tumruhna leh huaisenna hian an nun a tisei ni ngei tur a ni. Coker-a huaisen zia leh tawrhchhel zia hi Utah Blaine-a hlimthla a ni thei angem tia a ngaihtuah lai chuan kawngka biang chu a han dek a, a phu zawk a. Ama thlan chung ngeiah heng mite hi lo kal ta anga ngaiin a khur deuh hlawk hlawk a.
Pawn khaw thimah chhuakin Forbes-a leh a thuihruai inkulhna lam chu a en vang vang a. Forbes-a hi dehkhirh tak zawng a ni e. Nevers-a leh Fox-a te pawhin tunah chuan tihngaihna tak an hre rih lo. Engtin nge Forbes-a hian a chanchinbu hmangin chet a rawn lak leh tak ang?
Lu thing nar nar chung chuan saloon kawngkhar chu nam hawngin a lut a, general store neitupa Hinkelman-a lamah chuan a kal phei a. Hink-a chuan "Ben, heng thil velah hian eng nge ngaihdan i neih? Eng thil nge rawn inher chhuaka i rin? Tunge dik a, tunge dik lo pawh kei chu ka hre lo a!" tiin a lo zawt a.
"A ni khawp mai," tiin Ben Otten chuan "Kei ngei pawh hian chu chu ka ngaihtuah nasa a sin," tih pahin in tur a order a. "Nevers-a ka hriatna hi a rei tawh a, ka chungah a tha em em a," a han tih chuan Hink-a pawh chuan "Chu chu a dik ang," a lo ti vat a. "A khawsak theih dan atang leh a chet vel dan atang hian helai hmun tha leh hlu ber rawn enkawltua in sawi Blaine-a han khing thei tur ber pawh Nevers-a hi a nih ka ring," tiin Ben-a chuan "Blaine-a hi a dik maithei; Fing taka a ukil nen inthuruala thil ti an nih loh chuan. Engpawhnise Rink-a hian Neal-a a that chu a ni phawt mai a. Tu thua that nge anih ang aw?" a han tih chuan Hink-a chuan "Nevers-a hnuaia thawk a ni alawm," a lo ti sam et a.
"Hetiang mi hi engtia ngaih tur nge annih hriatthiam harsa tak a ni. Sum an hmuh tam dana khawsa mai mai hi an ni tlangpui. Blaine-a beih an tum dan pawh hriatthiam a harsa. Hei chen chen hetiang kara a dam thei hi a mak deuh a ni," Otten-a chuan a ti ta zel a. Rei tak an ti ti hnu chuan Ben Otten-a chu a chhuak leh a. Kal pah chuan a ngaihtuah zui a. Luh a tum tan ve ta. In hnuhdawh lehna hun pawh a awm. Mahse a lut ril tawhin chhuah leh mai chu a tum lo.

*********************************************

Lui kamah khawhar takin, muhil thei loin Angie chu a let a let mai a. Pawn khawthim hnuaiah khawilaiah emaw a hmangaih chu hliam tuar leh thisen chhuak zung zung chungin amah maiin a awm dawn si a.
Zan khawthim hnuaiah pawh a hmangaih a ni tih hi a pawm thlap. Khawi hmunah emaw bawihsawmtu awmlo in a lo thi a ni maithei. Kawtthler vaivut leh nisa karah an that pawh a ni mai thei. Hmun dangah kalin hmeichhe dang a chhar anih pawhin a 'hmangaiha' kha a ni tho tho. Sycamore thingbuk hnuaia an inbiak atang khan a thinlung chhungrilah a ta ni hliah hliahin a hria a, midang tumah an awm thei tawh lo.
Muhil lovin a khumah a let thawk thawk a, pawnlamah thlifimin hnahthel ro a lo chhem let ve reng bawk. Khum atanga thoin choka lamah kalin mei a chhem a, coffee te lumin a in a. Khawiah nge a hmangaiha chu a awm ang? Thim hnuai khawimaw laiah chuan a awm ngei ang le.
Thu leng vel reng reng hmaih nei lovin Angie chuan a hre ve zel a. Lud Fuller-a thah anih thu te, Rink Witter-a leh a hote zinga Blaine-a a zuan luh dan leh Rink-a hnar ngul a chum tliah thu te leh Rink Witter-a thinrim inhrosa in Blaine-a a thah tur thu leh a thah hunah chuan engkim hriaa zawimuanga a thah tur thu a chhakchhuahte pawh a hre vek a ni.
Utah Blaine-a an hliam thu leh an umna lamah pawh thisen a far hnem tih te, mahse a bibo thei tih te chu a hre ve zel a. A awmna hi hria se chuan a kal ve ngei ang. Khawiah tak nge a awm ang tia a ngaihtuah lai chuan kal chhuaha va zawn ai chuan a ina lo nghah hi tha berin a hre ta a. He inah hian a awm tih Utah hian a hre tawh a, amah hi a la rawn zawng hmu ngei ang. A lo kir laia lo awmbosan chu felin a hre lo.
Zinglamah 46 ranch a kalin Blaine-a sakawr inthlung chu a in lamah lakchhoha lo chawm thau tha in a hria a. He ina a lo kir hun huna Blaine-an a hman atan. Chutianga ngaihtuahna a hman mek lai chuan ruah a rawn sur ta a. Khumah kalin a mu a, a muhil zui ve ta a.
A tuklamah chuan in chhung leh a vel tifaiin a hmanhlel a. A awm mai mai chuan Blaine-a bawk a ngaihtuah leh dawn avangin tul manglo thlengin a khawih kual vel a. Puan thui a duh, mahse ngaihtuah loh tur tur a ngaihtuah a hlau si. Chaw te ei theih maia siamin coffee te a lum a, a kalbo hlana Blaine-a a lo haw hlauh takin peihsa diamin dawhkanah chuan a dah a. Raincoat ha in sakawr chungah a chuang a, 46 ranch lam pan chuan a chhuak ta a ni.
46 ah chuan harsatna a tawk em lo ang chu maw. A thawk ho pawh an chhuak vek an tih kha. Blaine-a sakawr chu zuk hruai chhuakin lehkha themah tlem ziakin a rawn hmuh mai theih turah a dah anga, sakawr chu a hawn pui leh mai ang. A chenna Blaine-an a rawn pan leh hunah a sakawr hi a mamawh dawn si a.
Ruah tam tak sur hnuaiah 46 chu a zuk hnaih ta khawp mai. Mahse in a hmuh theih hmasa bera a thil hmuh chuan a ti phu zawk a. Kawt zawla sakawr lo ding reng leh a neitu, slicker ha a stable lama sakawr rawn kai lut chu a hmu ta.
Tu nge ni ta ang? A chet vel dan atangin hliam tuar hmelin a lang lo. Chuti anih chuan Blaine-a chu a ni lo phawt mai. Fimkhur takin Angie chuan in chu thingbuk kara hel kualin in thlang lam chu a pan ta a. Thingbuk pakhat bulah a sakawr chu thlungin thlanglam atang chuan stable chu a pan chho ta a. Utah Blaine-a sakawr lian zet chuan a lo pan a, a hungna kar atang chuan Angie chuan chhangthawp, a pu in a pek thin ang chu a lo pe vat a.
Corral kawngkaa lut tur chuan in bul lawka kal a ngaih avangin a hungna thirzaia phuar chu phelha sakawr hruai chhuah mai chu thaa ringin a bag-a chemte chu la chhuakin zai chah a tum ta a. Chutihlai tak chuan dam thlap hian "Kei chuan khati kha chuan ka ti lovang," rawn tih thawm chu a hre ta. Hlauthawng leh meng bial kawk kawk chung chuan a inher a. A hnung maiah chuan Lee Fox-a chu silai kengin a lo ding reng a. Rum zet leh thip takin a hmaa nula chu a lo en reng a.

*********************************************

Utah Blaine chu a rawn meng ta a. A taksa khawilai mai pawh chu a hliam tawrh avang te, sakawra a chuan rei tawh avang leh ruah tam takin a nan hrep avangin a sil in a na thum a. Zan thim hnuai kawlphe karah chuan engvanga a sakawr chu ding nge a nih a hmu ta. An dinna bul mai kawrte chu tuihawk tam zet avangin a kuang a lo khat a ni.
Ram awih leh ngaw kara kawngtumah a sakawr hian a lo hruai hi a ni ber a. Mahse helai kawng hi he sakawr hian lo zawh tawhin haw na tur hmun nei ni ngei hian a lang. Chutia an din lai chuan Blaine-a chuan hruihruala a kut a hlinna chu phelhin kawngtum danga a sakawr hruai a tum lai tak chuan an chhak lei chu a rawn min ta thut a. Sakawr chu a zuang zawk a, Blaine-a pawh saddle atangin a tla thla a. Sakawr a per fel tih ah leimin chuan Blaine-a chu a rawn delh ta a. Lungtum lian lemlo hian a lu ah a rawn deng bawk a.
Piah deuhah chuan ruahsur hnuaiah sakawr chuan a pu chu a lo nghak ran a. Mahse a pu chu chirh leh lungin a delh avangin a tho thei mai si lo. Harsa tak chungin a thingthi chhuak a, a taksa khawilai pawh chu a na vekin a hria. Pai tawng tawng chungin a ding chhuak a, a taksa leh thawmhnawa chirh kai te chu thing thlain piah deuh thingbuk hnuaiah chuan a phei ta a. A
sakawr hmel hmuh tur a awm tawh lo. Thingbuk hnuaiah chuan a mu a, thi leh dam kar ami hi a ni ber mai.
Harsa tak chungin a rawn thu chhuak a, a awmna atanga hla vaklo a kawrte tui luanna chu pai tawng tawng chungin a thleng phei a. Kawrte bula thingluang lian tak inkhang hnuai hul laiah chuan a lut a. A bul vela thingtang ro leh hnahthelte chu la khawmin mei a chhem ta a. A bul lawka raw bul chu tanin tui a thal a, a meichhemah chuan a tung ta a. Rei vakloah a tui chhuan chu a rawn so ta a.
A hliam tuamna te phelhin ngun takin a silfai a. A lu a lung denna avanga thisen chhuak, a sam kar ami te pawh chu a silfai a. Red Indian ho hnen atanga a lo hriat tawh hnim damdawite chu zawng khawmin a hliamah te chuan a hnawih mawlh mawlh a. A nak hnuai lam deuha an kahna pawh a khel chung chiahah, a nak hnunglamah tlangin pawi lutuk khawihlo in a lo tlang hlauh a ni.
A theih ang tawka a insilfaia a hliamte a tuam that leh hnu chuan insaseng tulin a hre ta a. A sakawr kha in lamah hawin amah zawngtu ten an hmuh hlauh chuan a hnu an rawn chhui ang a, an rawn hmu chhuak ngei ang. A silai a la hum thei a, a pistol te pawh a paiah lo la awmin chirh kai leh bawlhhlawh te tifaiin a mu te pawh a enfiah vek a. Chhak lam tlangah Deadman hmun awmin a ring a, chu lamah chuan kawngtumah pawh kal ngam lovin ram palailengah a pan chho ta a. A chauh em avangin yard sawmnga te a kal chuan chawlh a ngai deuh zel a ni.
Hnim chhah lai a paltlang chiah tih chuan a hmaa zawl fai taka sak, in te reuh te leh a bula corral chu a hmu ta thut a, a ding chawt mai. In chhak piah deuh lungpui atang chuan tui fim tak hi a rawn luang thla bawk a. Corral chhungah chuan a chuanna sakawr dum ngei kha lo awmin hnim a lo pet mawlh mawlh a. Ngaw chhung atang chuan lo chhuakin fimkhur taka mit len chungin in chu a rawn pan ta a. Engmah a hmuh loh hnu chuan in chu a rawn hnaih deuh deuh a. A sakawr tih loh chu thil nung hmel hmuh tur a awmloh bakah hnuhma hmuh tur pawh a awm lo.
A sakawr in a rawn hmuh veleh a chik nghur nghur a. Va pan hnaiin saddle te chu a la thla a. In lamah chuan a kal a, kawngkhar hawngin a chhungah a lut ta a. Engkim mai chu chhah tawkin vaivutin a bawh a. In chhungah chuan khum pahnih, thutthlengsei leh dawhkan pakhat leh chair pakhat a lo awm a. Bungbel tlem a awm bawk. Meichhemna thuk bulah chuan thing ro tha fahran, tuah mawlh mawlh atana itawm tak thahnem tak a awm bawk.

Kawngkhar lamah chuan kalin rifle nen pawnlam enin a va thu vang vang a. A sakawr hi in lamah hawng nise chu a dinhmun hi a derthawng ngawt ang. Mahse hawlo a helaia a lo awm hlauh avang hian nizan lama ruah baw hawk khan an hnu chu a tlengfai vek dawn a, a zawngtu te pawhin chhui tur an hmu lo ang. Hun rei tak chhung, kum tam deuh pawh a ni thei, he hmunah hian mi an awm tawhlo a ni. Mi tam takin helai hmun hi an hriat pawh a rinawm loh. Neal-a khan a hria a, mahse a ni kha kam tam lo zet a ni bawk si.
A chawlh hahdam hnu chuan hmunphiahin a chhung chu a phiat fai a. Mei te chhemin coffee te a buatsaih a. Ei tur tam tawk, a sakawr phurh te chu la chhuakin tui ti takin a ei ta a. Darkar tam fe hnua ei leh a ni bawk a, tui a ti hle a ni. A hahdam deuh hnu chuan pawn lamah chhuak lehin a vel te chu a fang kual a. A awmna in atanga piah deuh hlekah chuan corral zau zawk leh in nuam zawk, tuiluang bengchheng pawh hriat mang loh leh fianrial tha zawk chu a va hmuchhuak ta a.
In fianrial zawkah chuan a kal phei a, a hnuhma te chu chhui theih loh turin a ti reh vek a. Chung ang a tih fel hnu chuan inchhungah lutin khum pakhatah chuan a mu ta a. A chau bawk a, a muhil zui nghal mai a.
A rawn harh leh chuan zing a lo ni tawh. Ruah erawh a sur tam khawp a, a awmna in pawh a far nasa. Thuk awmna lai chu a far nep deuh a, chutah chuan pheiin thing ro tha tak tak chu meiah chuan a tuah a. Coffee te a chhuang a, a la tha chhuakloin a la chaklo khawp mai. Chuvang chuan kal chhuah ngawt pawh hunin a hrelo a. Chair-ah chuan thuin a dinhmun chu chik takin a ngaihtuah ta. Hliam a tuar a, thisen a hloh hnem em avangin a chak lo hle bawk. Mahse silai leh a mu tam tawk leh ei tur a nei. Tun atan chuan Rink Witter-a lakah pawh himin a inhria. A awmna hi rawn hual ta thut pawh nise engemaw chen chu a do let thei ngeiin a ring. An rawn hâl hlauh erawh chuan tal chhuah a har khawp ang le.
Ni hnih chhung hahdama a awm hnu, a ni thum ni chuan engemaw thulh a tlanchhuahna tur a zawng kual a. Kal chhuah tul riaua hriatna a neih avangin a chenna lam panin a kir thuai a. In chhunga a mutbu a tel mek lai chuan sakawr kal thawm a hre ta. Chutah "In â mai mai ka tih kha," tiin Nevers-a chuan "Hengah zawng a awm teuh lo em mai," a rawn ti ta a.
"Chuti anih chuan a awmna chu min hrilh la," tiin Wardlaw chuan a lo chhang a. Midang ve thung chuan "Boss, hnu ka hmu! Tu emaw chu hetah hian a awm ngei a ni," a rawn ti ta. "Amah ngei anih chu. Zawng ngun nasa rawh u," Nevers-a chuan a rawn ti tuarh a.
Utah Blaine chuan tlanchhiat a ning tlat tawh. A puanthuah leh a rifle chu chhuatah dah in pawnah a rawn tlanchhuak a, "Heta hi ka awm alawm," tih pahin pistol pahnih chuan a rawn kap ta a. Sakawr buanga chuang pakhat chuan silai a chuh vat a, mahse Blaine-a silai mu chuan a awmah fuhin a tê thawt a, a pistol tlak rual chuan leiah a tla thla ve nghal a. Nevers-a erawh chuan ngaw lam pana sakawr tlan tir pah chuan awmze neiloin silai a rawn hmet puak ve a. Silai mu in a hnunga thing chu a rawn deng dawt a, Utah Blaine chuan "Wardlaw, heta hi ka awm a, lo kal ta che. Heta hi tangka sangkhat chu a awm a, la turin lo kal ta che," a han ti a.
Gunman paliana chuan sakawr chu na taka a spur-a khengin Blaine-a lam hawi chuan chak zetin a rawn tlan phei a. Mahse Blaine-a chuan Wardlaw-a lu burah silaimu pathum a lo thun a, a chuanna sakawr atang chuan a leng thla lawp a, midang pakhat lam hawia silai hmetpuak pahin a rifle leh a puan thuah chu a la a, a sakawrah zuangkaiin chhak lam tlang sang lam chu panin a kaltir ta a.

Tunah chuan a sakawr chu tlan tir loin a chhak tlang chhip panin a pangah a kal chho a. An inbeihnaah chuan mi pathum leia mu chu mi pahnih in ding chungin an bih a. Rifle-a a tin reng lai chuan thingbuk hnuai atangin Nevers-a leh midang pakhat hi an rawn chhuak ve leh a. Wardlaw-a leh midang pakhat chu an thi leh ta phawt chu a nia. Lungpui chunga bawkkhup in Blaine-a chuan ngun deuhin a tin vang vang a, Nevers-a lam hawi chuan vawi thum a hmet puak a. Mahse Nevers-a thah tumin a kap lo. Nevers-a hi nung dama man a, hnehin a awm ani tih hriattir a tum tlat a ni.
Silai mu chuan vun pui pilhin Nevers-a hnungah a deng a, na ti leh hlauin leiah chuan a let tawp tawp a. A bul hnai lawk lawkah chuan silaimu in a la rawn deng reng bawk si. An zinga pakhat chuan a dul a hup thak a, leiah a tlu ta a. Pakhat chu ngaw chhung lama khalh luh tumin Blaine-a chuan a ke artui bul lawk lawkah a zuk kap a. A silaimu pakhat chuan an zinga mi pakhat rifle kawm chu a zu kap darh bawk a. A rifle mu a thun belh lai chuan Nevers-a chuan han vah sawn a tum a, mahse Blaine-a chuan "Tenawmpa, khatah khan awm reng rawh. Che lo khan awm ringawt rawh, dawihzep pa," tiin a zuk au a.
Hnim buk atang chuan silai a rawn ri thawr a, rang takin Blaine-a chuan chhangletin thingbuk ding leh vei lam chu a kap zui mawlh mawlh a. Chu hnimbuk bula te thawt thawm leh mihring tlu ri dawt chu Blaine-a chuan a hria. Muangchanga chhuk pahin a rifle mu a thun mawlh mawlh a, a sakawrah chuan chuangin ranch lam panin a kaltir ta a.
A la dam tha lo hle tih a in hria. Mahse tunah chuan tlanchhiat hun chu tawp ta in a hria a. Bawng kawngtum zawhin a theih anga chakin tlang dung chu a zawh thla a. Deadman Mesa thlengin chuta tang chuan a thlir vang vang a. A thlang tlang bawk pahnih inkara kalin chuta tang chuan Angie-i chenna in chu a hlat vak a ring lo. Chulai tlang bawk pahnih a thlen chuan Angie-i chenna pawh a lo lang ri riai tawh a.
Chutah chuan Angie-i chu a awm angem le? Chutiang ngaihtuah chuan a then sak a, ni tam tak chhunga a nuih leh hmasak ber a ni. A sakawr nghawng chul hauh hauh chung chuan "Amah han hmuh leh chu a chakawm kher e," a han ti a.

Muangchangin a pan hnai zel a, a kal kual a, sycamore thingbuk hnuai chu a thleng ta. Cabin chhungah che eih a awmlo a. Meikhuchhuahnaah meikhu a chhuak lo bawk. Sakawr atanga chhukin a pistol tih nghehna chu a ti thawl a, fimkhur taka pan hnai zelin step-ah a lawn kai a, kawngkhar chu a hawng ta a.
A lo ruak hiai a, a vawt hle bawk. Thuk pawh chu a lo dai vek a, Angie-i chu a kal bo a ni. Dawhkanah chuan thlengah eitur khuh thatin a awm a, chu chu a hma ni hnih emaw a hmanhmawh taka kalsan niin a lang. Ngaihthatlohna in a zem ta. A han hawi kual a, a rifle a awmlo a, a pistol pawh a awm lo bawk.
Calendar a'n thlir a, ni 5 ah chhinchhiahna a lo awm a. Vawiin hi ni ruk ni anih chuan darkar sawmhnih pali vel kal taah khan he in hi a chhuahsan anih a ring.

*********ADVERTISEMENT CLICK **********

[HLalthazuala]

UTAH BLAINE CHAPTER 12
***********,********************,*************


Angie Kinyon-i chuan Lee Fox-a chu a en ran mai a. A chhungrilah a hlauthawng nasa. Lee Fox-a hi mi dangdai leh uchuak, a tih lam ti vak chi a ni. Chutiang anih avang chuan hepa hi a hlauhawm tih pawh a hria.
Chutiang anih lai chuan Fox-a te chhungkaw chanchin a hriatna chuan a ti thlamuang deuh. A pa hi Pathian tih mi, mi taima rum rut mai a ni a. A nu hi inchhung khur hneh taka vawng chunga pasal tawiawm tlat mi a ni. A nu leh pa zia tlem tal chu Fox-a hian a keng ngei turah a ngai.
Zawi sap hian "Sakawr hi ka la duh a ni, Utah Blaine-a sakawr a ni a," a han ti a.
"Chuvang chuan alawm kei pawh hetah ka awm," tiin Fox-a chuan thip deuh tak hian a melh a. "Sakawr lam tur hian a lo kir leh ngei dawn si a," a han ti zui a.
"Ka ring lo. A rawn lam ring ila chuan khatah ka kal lo ang. In lamah hruai hawna lo enkawl ka tum a ni. Hetiang anga sakawr tha enkawl loha awmtir mai mai hi tha ka ti lo a ni," Angie chuan a ti a.
Fox-a pawhin a lu a bu nghut nghut a. Mahse eng rilru nge a put erawh a hrelo. Chutah "I tan a ni chu enge a nih? Utah Blaine-a chu i tan enge a nih a?" tiin a zawt ta phawng mai a.
Fiah fai taka inlan tir tumin Lee Fox-a chu chiang taka en chung hian "Amah chu ka hmangaih a ni. A nin min hmangaih leh hmangaih loh ka hre hauh lo. Chutiang sawi turin hun ka nei lo bawk. Mahse i nu in i pa a hmangaih tlat ang khan ka hmangaih ve tawp mai a ni. Ka thinlung zawng zawngin ka hmangaih a ni," a ti a.

Chutiang thawm a hriat chuan Fox-a pawh chuan a ngaisang sawt mai. A nui chhuak hawk a, a nuih rual chuan a mita huatna lang pawh chu a bo nghal a. "Chuti anih chuan mi vannei tak a nih chu, Angie, mi vannei chung chuang. Anih chuan sakawr chu la chhuak ila, helaia khung reng pawh a tul lo e," a rawn ti a.
A thusawi leh a takna chuan Fox-a chu a hmin ni ngei tur a ni. Corral chhungah chuan lutin chu sakawr chu a va man sak a. Angie pawh chu a chungah a chuang nghal a. Fox-a pawh a sakawr lam panin "Ka tan heta awm tulna a awm tawh chuang lo tih amah pawh chu i hrilh dawn nia. I rualin ka'n kal ve ange. Nevers-a leh a hote hi nang ang hmeichhe pangngai tak bula an awm hi a tha lo ang," a han ti a.
Ngawi renga an kal dun hnu chuan Fox-a chuan "Ka nu chanchin pawh i lo hre reng a ni maw? Ka nu anga pasal te tana rinawm hmeichhe dang hi ka hre lo. Blaine-an chutiang hmeichhia a lo hmu ve chu vannei ka ti a. Chutiang hmeichhia chu kei pawhin hmuh ve ka duh ngawt mai. A thih hnuah te chuan i hre reng bik lem dawn em ni?" tiin a zawt ta a.
"A thi lo ang. Tun maiah chuan a thi lo ang. Hetiang zat mihring hi hmachhawn mahse a thi lo ang," Angie chuan a ti hmiah a. Dar chhin ûk pah chuan Fox-a chuan "A ni mai thei. Mahse mi zawng zawng hian an bei a ni ber a. Tunah chuan Nevers-a hi a hnungtawlh dawn lo a, Otten-a a rawn zuang lut ve tawh bawk a. Blaine-a tan han tlanchhuahna emaw, birukna tur hmun a awm reng reng lo. A tih theih awmchhun chu tlanchhiatna kawng dapa tlanchhuah a ni mai," a ti ta a.
"Chutiang chuan a ti hauh si lo ang,"
"Ni e, a ti hauh lo ang,"
Peng thuam an thlen chuan Red Creek khaw lam panna kawngah chuan a pen san ta a. Angie chuan a sakawr ti ding meuhin a thlir zui a. Hla deuhah kal kualin a rawn zui ru mai angem? Chu pawh chu thil awm thei a ni. Lee Fox-a, western tlangval pangngai chuan mi pangngai te tih danin hmeichhe duhawm tak chu zah takin a en thei. A pasal te, a nuta te a thah sak a ni maithei. Chuti chung chuan hmeichhe pangngai chungah that a chhuah tur a ni.

Angie chuan lui kanin a in lam sycamore thing hmun chu a pan ta a. A kalsan lai ang chiah khan khawhar takin a in chu a lo awm a. A sakawr a thlun hnu chuan inchhungah a lut a, engmah thil danglam a awmloh laiin a dressing table a thlen a a samkhuih a'n lak chiah chuan a hnuaia lehkha them chu a hmu ta a. A hmuh veleh a nui ver ver a. A khawih hmasak tur nia ngaiin samkhuih hian lehkhathem hi a lo delh a ni. Chu lehkha themah chuan:
"Hetah lo awm rawh. 46 ah ka kal. Ka lo kir leh ang,"
"Ka lo thlir ve ang chu,"
Thawm engmah a lo hre lo. Mahse a han lehhawi chuan thlabar tak chungin a hnunga Rink Witter-a ding chu a hmu ta. Lehkha them dil chuan a lo ban reng tawh a.
Kum sawm chuang a hming leh a hnathawh a lo hre tawh. Mahse hetiang renga hnaiah hepa hi a la hmu ngai lo. A kut zungtang te chu hmeichhe kut ang maiin a sei sel a, hna hram thawk ngailo tih takah a no hle bawk. A pistol fual taka a pai te chu a hmuh hmaih miah lo. Heng silai te hi vawi tam a lo puak tawh thin tih a hre bawk.
Kum 16 anihin Rink Witter hi mi lu lak chinga sawi a ni a. Kum 18 ah rancher ho indona kara tualthat tura rawih thin a niin kum 20 ah phei chuan saloon nghaka gambler ho that tura rawih thin a ni. Inhmachhawna a hlauhawm ang bawkin hmun birua midangte changin a that hmiah hmiah zel. Mi thah hmang, khawngaihna nei miah lo mihring a ni. Insaseng tura mi te hrilh aia thah mai duh chi a ni.
Tlanchhuahna kawng a awm ta lo. Lehkha hi a pek loh pawhin a laksak tho tho dawn. A pek mai a, tal chhuah theih dan tur zawia ngaihtuah a ngai ta. Lehkha them chu a pe ta a. Rink Witter-a chuan ngawi rengin a lo la a, engemaw chen amah chu a en vang vang hnu chuan ngawi rengin lehkha chu a chhiar a.
Hnunglam hawi zauh chungin "Hoerner, hetah hian lo awm rawh. Midangte kha 46 pan nghal turin hrilh rawh. Hetah hian Utah Blaine-a a lo kal a, 46 lam panin a chhuak leh tawh. Chulaia amah an nangching lo emaw, a hnu an hloh emaw a nih pawhin Red Creek pan nghal rawh se. Helaia lo kir lo turin hrilh rawh," tiin thu a pe ta a.
Rink-a chuan lehkha chu nuai hlawmin chhuatlaiah a paih a. "Coffee te kha min han siam rawh," tih paha inherin Angie rifle leh a pistol te chu a la nghal a, pawn lamah a chhuak ta a.
Chhuar lamah chuan coffee herna khawl chu la in chhuatah a nghat a. A thawh pah chuan a dinhmun chu a ngaihtuah chho zel a. A dinhmun a chepin tanpuitu a neilo a, awmze neiloa khawsakin awmzia a nei dawn lo tih a hria. Utah a tanpui theihna awm chhun chu amah dawhthei taka lo nghah te, fimkhur taka thil awmdan thlir leh remchang zawn ruk te a ni. Mei a chhem a, belah tui leihin a chhuang a. Utah pawh a fimkhur ngawt ang. Hun khirh paltlang hnem tawh a ni a, fimkhur dan chin chu a hre ngawt ang tia ngaihtuah chungin 46 pawh a thleng anga, a hniak te hmuin thil nihphung chu chhui chhuak thiam turah a ngai a ni.
Peng thuam lam pana Fox-a nen an kal lai khan Blaine-a pawh an awmna atanga yard zahnih leka hlaah a awm a. 46 lamah kalin fimkhur takin thingbuk hnuai atangin in chu a thlir a, tumah an awmlo nia a lan avangin a pan hnai a. Angie-in a tih dan ang deuh chiah khan thlanglam atangin sakawr dahna kha a pan a. Angie-in corral phuarna thir a zaina te a hmuhin a hnu lawkah mipa hnu ni ngei tur a hmu bawk a. A ngaihtuahnaah Lee Fox-a ni ngei turah a ngai nghal. An hnu hma chhuiin corral pawna sakawr pahnih a an chhuah dan te hmu in an hnuhma atangin a in lam pan turah Blaine-a chuan a ngai a ni.
Blaine-a chuan thil awmzia a ngaihtuah vang vang a, hmaichhana inchapchar a hun ta em ni ang tiin a ngaihtuah a. Mahse Lee Fox-a nena inhmachhawna fiahna neih chu hun a la ti lo. Chumi hma chuan Nevers-a leh Rink Witter-a chinfel phawt a duh. Lee Fox-a hi chu thua biak rem theih pawh a ni mial maithei. Nevers-a erawh chutiang mi a ni hauh lo.
Ben Otten-a erawh a ngaihtuah tel ngai lo. Tel ve turah pawh Blaine-a hian a ring lo a, a lo lut ve reng tawh tih pawh a hrelo. Lo tel ve reng pawh ni se hlauhawm turah a ngai lo.
Tlanchhe turah a inngai tawh lo a, tlanchhiatna hun pawh a nei ta lo. Dikna a lamah a tang a, thawh tura a koa a lo nghah tawh chu tih puitlin ngei a tum. Red Creek khuaah ngei tlan lutin va inpho chhuah a duh. Hmai hmaa inchapchar an duh anih chuan a hmachhawn mai ang.
Muangchanga sakawr kal tirin nisa leh khawlum tak hnuaiah a thlan rimchhe tawh tak leh hmel hmai hmul pawr tawh tak chungin beng chhi ran leh mit len reng chung chuan a kal zel a. Mahse a fimkhur seng reng lo a, a mit a len reng thei lo. A hriatloh karah a lo muthluin sakawr chungah a intauh harh leh thin.
Kawng atanga pengin hmun nuam leh thing hlim bul chu belin a sakawr erawh hnim bul karah a thlung a, thingbuk hnuai hlimah chuan a mu ta a. A mut rual rualin a muhil ta nghal a.
Witter-a mi tirh pathum te chuan Blaine-an 46 a chhuahsan hnu lawkah an thleng thla ve a. Vanneihthlak takin heng mi pathum te hi an ril a tam in, an hnu chhui turah an phur fahran lo nen ei tur leh in tur te lakhawmin an muangchang hle mai a. An inhrai puar hnuah chauh 46 chhuahsan zai an rel ta a.

An zinga pakhat Todd-a an tih chuan "Turley, nang chu hetah hian lo awm rawh. Helama a lo kir tak hlauhin lo chang ang che," tiin thu a han pe a. Sakawr chung chuan te a ning tawh bawk nen, thupek chu hrehlo takin Turley chuan a zawm a. A sakawr hmun biru laia thlungin amah pawh inchhung hmun biru lai, pawn lam awlsam taka hmuh theih turah chuan a thu ta nghal a.
Todd-a chuan a han ngaihtuah vang vang a, Rink Witter-a leh Hoerner te Angie inah an awm a. Turley-a 46 ah a awm bawk a. Big N ah mi thahnem tak an awm bawk chuan hmun pawimawh zawng zawng chu enthlak vek a ni ta. An thiltihin awmzia nei dawn hnaiin a hria. Mahse 46 atanga mel hnih lekah Blaine-a hnu an hloh leh ta tlat. Red Creek khuaa kalin Blaine-a an hmuh mai loh avangin Ben Otten-a hnenah a va in report ta zawk a.
A thu hriat atang chuan Ben Otten pawh a lungawi. A hun takah a rawn zuanglut ve ah a inngai a. A tawp pawh hnai tawhin a hria. Fuller-a leh Clell Miller-a te nuai bo anni tawh. Sum tlem thapin indo zawh hma chiah velah Nevers-a leh Fox-a te chu lak bo dan awmin a hre bawk. Chuti anih chuan amah bakah mi pakhat emaw chauh an ram lak sem tur a awm tawh ang.
"I remhriat chu a tha," tiin Ben Otten-a chuan "46 ah Turley-a i hnutchhiah bawk a. Blaine-a a kir leh anih chuan a thi ngei dawn a," tih pah chuan dollar nawi a iptea mi chu a khawih ri rak rak a. Dollar sawmhnih tlang chu Todd-a a pe ta a. "Hei hian zu zuk in rawh. Mahse a tawp thlen hma chuan rui suh," a han ti a.
Lungawi taka Todd-an iptea dah paha a inher lai chuan Ben Otten chuan zawi fiah kalh hian "Todd, khawi atanga sum hi lo kal nge anih hriat reng hi a dik ang. A dangte i la mamawh dawn te a nih ngai chuan," a han ti a.
Todd-a chuan "Mr. Otten, haihawt tak chu ka ni lo e, a bikin sum telnaah hi chuan. Ka theihnghilh hauh lo ang. Khilaiah khian Peebles-a pawh a awm a, mi tha tak a ni asin," a han ti leh zauh a.

Otten-a chuan dollar tlang chu phawrh lehin "Hei hi ani chu pe rawh. In pahnih hnen atang hian thil awmdan chu ka hre zel tur a ni ang," a ti a. Hreh deuh tak chung hian "Mi in tlawhpawh reng tur a ni ang. Hetiang indona hi a tawp meuh chuan mi tlemte chauhin sum pe thei hi tunge anih an hre tur a ni," a han ti zui a.
Bank-ah chuan kir lehin a thutna ngai a va luah leh a. A thusawi leh thiltih khan engtianga thui tak thleng thei maw tih chu a hre lo.
Blaine-a chu a rawn harh hlawl mai. A thil hmuh hmasak ber chu kethiah lian pui pui pahnih a ni. Chutah khup lian pui pui pahnih chunga rifle inkhang chu. Ortman-a hmel la bui deuh chur chu a han en a, nui vur vur chung hian paliana chuan "Thiana, i mu hlum lo chauh chu a ni," a lo ti a.
Khawi atangin nge i lo kal?" tia zawh pah chuan fimkhur takin a rawn thu a. An insual hrep atang khan Ortman-a hi a ngaihtuah chhunzawm hauh lo. Hetia a hmu thut chu mak a ti hle a ni.
Ortman-a chuan "Hmuh tumin ka hêl deuh reng che a," tih pahin a sikret chu hnimah a nawr hlum a, "I muhil lai ka hmu che a, ven zui deuh i ngaiin ka hria a ni. Nevers-a hote helai maiah hian darkar hnih kal ta khan an vei sek a," a han ti a.
"Darkar hnih hetah i thu tawh amaw?"
"Darkar thum dawn ani tawh ang. Mutchhuak reh thak khawpa muttir che ka tum a,"
Meizial ziala a tan kai dawn chuan Ortman-a chu enin Blaine-a chuan "Ort, engtia inremsiam tur nge ni ang? Khawilamah nge i tan a?" tiin a zawt ta a.

Ortman-a chuan chil a lem khawlh a, chiang taka Blaine-a en chung chuan "Chutianga inremsiam chu a ngai lo ang. Khatiang taka min sawisa thei mihring kha thi mai atan chuan a uiawm lutuk in ka hria a, theih tawp chhuah in a bulah din ka tum a ni," a rawn ti a.
Utah Blaine chuan a en vang vang a, "Chu, ka lamah i tang tihna maw?" makti takin a han ti a. Paliana chuan "Tehreng mai," tiin a bula hnim tang ro chu sehin "Khatiang tak khan mi ka la sual ngai lo. Ram tha lai zim te te chu ka duh ve anga, chutiang lek chu 46 ah hian a tam tih ka hria. Midang ho pawh in chutiang beiseina chu an nei. Mahse pali panga emaw lek an ni ang. Gunman leh killer i niin min hrilh a, chutiang mi chu engah mah ka ngailo a. Mahse kan inbeih dawna i kawnghren chawpa i phelh a, ka duh dan ang ngei a kutlawnga min bei leh min sawp takah kha chuan 'ka anpui ka chhar ta' ka ti a ni," a ti zui zel a.
Utah Blaine chu dingin a sam a chul nauh nauh a. A lukhum khumin a kut a rawn phar chhuak a, "Ka mi hmuh tawhah chuan i palian ber a, lamtang atan pawh i tha ber," a ti ve ta a.
Ortman-a chu a ngawih reng laiin Blaine-a bawk chuan "Hei hi i chian viau a ngai. I tanpuina ka mamawh rualin midang tumah ka duh lo. Midangin an tawrhloh tur tuara an thih ka duh loh rualin engemaw chang hi chuan tam aia tlem that zawk na pawh a awm fo bawk. Nang leh kei hian tam tak ai kan awh zo hrim hrim," tiin "Anih leh midang rintlaka i ngaihte chu eng zat nge an nih chiah?" tiin a zawt leh a.
Ortman-a chuan "Ka sawi ang khan pali nga vel an ni mai. Irish thlah, lonei mi, khawchhak atanga lo kal te an ni," a lo ti a.
Blaine-a chuan sikret hip vang vang chung chuan "Anih tak chu. Indona a tawp hunah ram tha lai acre za leh sawmruka zauah hna in thawk ang. Ram neitu chu a pangngai niin thlai chi kan tum sak ang che u. A zat ve ve a insemin kum nga in awm ang. Kum nga hnua in la awm peih zel dawn anih chuan in ram luah chu in kutah a awm vek tawh ang," a han tih chuan Ortman-a chuan hlim tak hian "A tawk alawm. A tha lutuk! Chutiang tur chuan phur takin an thawk vek ang," tih pah chuan a rifle chu a la a, "Anih chuan Utah, khawilam nge kan pan dawn?" a rawn ti ta a.
"Red Creek lamah kal phawt ila,"
******************
Ralston Forbes-a leh a press chu beih a ni leh ta rih lo. Red Creek khaw mipuite chu khawlum leh nisa karah eng thil nge thleng ang tiin an mit an len thuap mai a. A reh vung vung a, engemaw tak puak keh mai tur awma ngaiin an nghak thuap a ni ber. A tam ber chu Texas leh Mexico atanga lo kal an ni a, inbeih dan kalhmang hrelo an awm lo.
Todd-a leh Peebles-a te lo thleng pawh miin an hria a. Hemi te pahnih hi mi hriat hlawh tak an ni. Todd-a hi tum hnih ngawt jail atanga tlanchhuak tawh a ni a. Peebles-a lah Indian fighter niin zawhna zawt buailo a mi that mai thin a ni. Mi dehkhirh tak pahnih, dikna aia zu ngaina zawk, anmahni hire tu te ngaih dan chu an ngaih dana pawm hmiah thin an ni.

Red Creek Hotel lian tak tukverh atang chuan Padjen-a chuan Red Creek kawtthler chu a thlir vang vang a. Pa dilchhut ngang a ni bawk a, khawchhung pianhmang leh nihphung pawh a hre hle tawh a ni. Dan ang thlapa Utah Blaine-a hnena helai ram hi pek anih theihna tura beitu tura rawih anih ang ngeiin Red Creek a chhuahsan hmaa a tih tur tihhlawhtlin chu a tum ber a ni. Todd-a leh Peebles-a te lo lut pawh a hmutu zing ami a ni a. Todd-a leh Ben-a te inbia pawh ngun taka lo thlithlaitu a niin sum an inhlan lai pawh a hmu ngei mai. Todd-an a chhuahsan a, saloon a Peebles-a nen an inzui lut pawh a hmu bawk.
He ukil naupang tak hi khuaah vak velin thil awmdan ngun takin a thlithlai a. Mite ngaihdan lakhawmin he inbeihna hi tawp ta se tunge hlawkna têl ang tih te a zawt kual a. Tunge silaimu tuara thi leh ang tih sawi a harsa ang bawkin hlawkna tel tur sawi chu harsa an ti. A lan danin Vigilante ten mi khaihluma bul an tan a diklo ang bawkin Blake-a leh Neal-a te nunna lak tuma an bei phei kha chu diklo an ti hlein a hmu.
Todd-a, palian leh sa tha tak chuan rui lam tawh deuh chungin bar dawhkan a dawm a, in tur a lam belh a. Peebles-a, pa tawi leh tawp lam deuh pawh a bulah dingin zu no a dawm bawk a. A tu amah hian kawtthlera sakawr kal thawm chu an hre hauh lo.
Mahse Padjen-a erawh chuan lo hmuin, a hmuh veleh a ding chawt a. Blaine-a hi chu Neal-a nena an kal dun a lo hmu tawh. A bula palian elkhen kal erawh a la hmu ngai lo. Mahse mi sawi a hriat atangin Ortman-a ni ngei turah a ngai. Hotel hnunglama put chhuakin sakawr thlunna hmunah building hnunglam atanga kalin a chho a. Blaine-a te thian dunin chu hmun an thlen chuan a lo han thleng hman tawh a. Utah Blaine-an Padjen-a hmuh chuan a ding chawt a. Mahse Padjen-an a rawn pan hnaih zel avang chuan tunge anih a hre chhuak a. "Neal-an ranch ka kutah a dah an tih hi a dik em ni?" tiin a zawt dawt a.

"Dik teh meuh mai. Mahse i fimkhur hle loh chuan i rochun lo ang. Saloon-ah khian Witter-a mi rawih pahnih an awm. Todd-a leh Peebles-a te," a ti nghal zaih a.

"Misuala tang thin te an nih chu," tih pahin khabe chul thuak thuak chung chuan Ortman-a chuan "Khawilai kawngkharah nge lut se min tih?" tiin a zawt a.
"A nung chunga man i tum teh phawt ang," tiin Blaine-a chu a han ngawi vang vang a, "Inthahna a tam ta deuh," a ti zui a. Mahse Padjen-a chuan chiang tak hian "Khawiah nge dah i tum a? Enteh, thiana, helaiah hian remna siam tumin ka lo kal a, mahse i rul man khan a chuk hma che a a lua i chhut hlum mai lohin tih tur dang enge i neih?" a lo ti hmiah a.
"I thusawi chuan awmzia a nei e," Ortman-a chuan a lo ti a.
Utah Blaine chuan "Angie Kinyon-i hi khuaah a awm em?" tiin Padjen chu a zawt ta a.
"Awm lo aniang. Awm ni se chu la hmu lo mah ila ka hre tho ang. Mary Blake-in a hre ngei ang," tiin Padjen chuan a chhang a.
Angie-i hi a inah kir leh ni ta se khawiah nge Rink Witter-a hi a awm ang le? Thil thleng thei a ngaihtuahin Utah chuan a duhlo hle mai. Duhlo mahse helaiah chinfel hmasak tur a awm si. Padjen-a hnenah chuan "Hotel lamah kir rih rawh," tiin thurawn a pe a, "Helaia i inrawlh ve hi a tullo," a ti zui a. "Mahse ka....." a tih lai mekin Blaine-a chuan "Sir dang atangin hna i thawk tha thei zawk ang," a lo ti hmiah a. Padjen-a chu chhak lamah chuan kalin hotel lam pan tuma kawtthler a kan dawn lai chuan Todd-a chu saloon saloon kawngkharah chuan lo kalin kawngka biang chu a rawn dawm a. Padjen-a chu a thlir vang vang a. He pa nunrawng tak hian khin tur a melh lai takin he ukil naupang tak, Utah Blaine-a hnena chanchin tha rawn thlentu chu hmuin a châkna hrikthlak zai a rel ta. Sumhmun atanga lo chhukin Todd-a chuan "Nang kha, helaiah hian lo kal teh," tiin Padjen-a chu thu a rawn pe ta.

Padjen-a chu a tim deuh chawih a. Silai a pai lo a, a hmang thiam lemlo bawk. Ding mai loin hma lam a pan ve zel a. "Enge ni ta a? Ukil mamawhna i nei em ni?" tiin a zawt a. Todd-a erawh chuan nui chungin "Ukil te engah nge ka mamawh tehlul ang? Ukil ka mamawh ve ngai lo. Ka harsatna chu silaiin ka chingfel mai thin," a tihsan hmiah a.
Mahse Padjen-a chuan "Chuti maw? Chu pawh nise ka thian, chhan ngaih hun chu i la nei ngei ang," tia nui chungin "Mipuiin an khaihlum hlauh che anih chuan thu dang," a han ti a. Todd-a chuan a rawn panhnai a, a hnunga kawngka inkhar thawm a hriat chuan Peebles-a pawh a rawn chhuak ve tih a hre mai a. Peebles-a chuan "Todd, lo kiang teh. Keiman a hmelah khan chhinchhiahna ka'n siam teh ang," a rawn ti a.
Padjen-a chu hlauin a hmel a dang deuh sawp sawp a. Mahse inti huaiin "Buaina bul tan chu tum ngawt suh. Ben Otten-an a duh hauh lo ang," a han ti a. Chu chuan Todd-a chu a ti ding chawih mai. Hepa hian Blaine-a kutah ram pek anih tur thu a rawn thlen ngei mai. Chutih rual chuan ukil a ni a, ukil nge nge chu ruk hmangte ai chuan mi ngaihsan an hlawh zawk bawk niin a hria. Chuti chung chuan a iptea dollar inkhak ri avang chuan hmalam pan chakna a nei lian tlat. Mahse "Ben Otten-a nen enge inthurualna in neih a?" tiin a zawt hram a.
Hepa hian zamna engemaw a nei tih hria in Padjen-a chuan hriam hrak hian "Chu zawng i hriattur pakhatmah a awm lo. Ben-a hian hrilh hriat tur che a nei anih pawhin ama thu a ni. Keia lo sawi tur engmah a awm lo. Kal sawn nghal rawh," a han ti ve ta a.
Thaw dep dep chung chuan a kal pel a. Pen sawm vel a kal hnu chuan chak leh zuala kalin hotelah chuan a lut a. Clerk sam var deuh tawh hnenah chuan "Teuh ther ther ngei mai," a han ti ringawt a.
Kawtthler lam ennawm erawh a la intan dawn chauh. A kutthlak tumna ber a kalbo takah chuan thinur hrikthlakna tur dang zawngin a han hawi kual a. Hmachhawn tur chu a hmu ta ngei mai le! A awmna atanga yard sawmnga leka hla kawtthlerah chuan mi pakhat hi a lo ding reng mai. Hepa hi pa sang deuh niin a lukhum parh hlai tak chuan a hmai chanve chunglam chu a hliah deuh a. Kawr dumpawl hlui tawh tak hi a ha a, a fai hmel lutuk lo. Kawnghren lianpui pui pahnih a pistol pakhat ve ve fual hnalha paiin a lo ding kak ta mai. A pheikhawk siai hnawihna pawh a rei tawh tih a hriat hle. Hemi hi Todd-a hian a mi hriat mi niin a hre lo.

A'n en chian chuan chupa chu a che tan ta lehnghal. Chupa sang tak chuan amah panin kawtthlerah chuan muang changin a rawn chho a. Rui phur lam ni tawh mahse Todd-a hian hepa hi danglam riaua hriain a hmel enin a ngaina lo. Uluk taka thlira a lo en lai chuan hnunglam atanga "Fimkhur rawh. Kha pa kha Utah Blaine-a anih kha," Peebles-an zawi sapa a rawn hrilh chu a hre ta.
Todd-a chu a tim deuh. Englai mahin Utah Blaine-a tluk hian a la inhre ngai lo. Mi that tura rawih anih angin a that mai thin. An rawihna ti puitling turin hlauhna leh timna a nei ngai lo. Chuti chung chuan mi a nileng chu a ni lo bawk.
Blaine-a chu engmah sawi lovin amah ngei pan chuan a lo kal zel si. Todd-a chuan "Enge i duh? Tunge maw i nih le?" tiin a lo zawt a. "Witter-a mi rawih i niin min zawng mek a ni lawm ni? Blaine-a, in mi zawn hi ka ni e," Blaine-a chuan a han ti a. Todd-a chuan chil a lem khawlh a, chu chu a tan signal a niin silai a chuh tur a ni. Mahse silai chuh ta lo chuan ni chu sa zual ta em em leh lum huk hukin a hre ta. Enge he kawtthlerah hian a tih a, engati nge saloon ah khan a lo thut mai mai loh? "Ka zawng awzawng lo che," a han ti ngawt a.
Blaine-a erawh chuan "Mud Tank-ah kha chuan i phur teh kha le. Chu pawh nise duhthlan tur i nei e. I silai te kha thlauh thla in rel chhuak hmasa ber turah khua hi chhuahsan rawh. Chuti anih loh chuan hetah ngei hian i thi ang," a ti ta a.
Todd-a chuan hetiang hun hi a la thleng anga, inchapchar hun a la hmachhawn dawn tih a hria. Hei ai hian hruizen hmanga khaihlum a hlau zawk daih. Chutih rual chuan a phawi khalh ve thei bawk tih a hria.
Blaine-a chuan ring that hian "Chu chiah chu nang pawh, Peebles, i duhthlan tur chu a ni e. I silai kha a paina kawnghren chawp khan i awmnaah khan thlauh thla la, rel chhuak hmasa berah khua hi chhuahsan nghal rawh," a han ti a. Saloon kawngkharah Peebles-a chu a ding a. Chance nei tha hlein a inhria. Hepa hian mite tih dan zawm a tum ve kher lo. Blaine-a hian silai a chuh pawhin Todd-a hi a kap ngei dawn. Chulai hun chhete chu chuhin Blaine-a thahna hun remchang neiin Nevers-an a thâp, dollar sangkhat nei thei ngei dawnin a inhre ta.
Ring tawk hian Peebles-a chuan "Min ti hlau awzawng lo e, Blaine. Silai thlauh thlain khua hi ka chhuahsan dawn lo bawk," tih pah chuan silai chu a chuh ta nghal a. Todd-a pawh chuan chulai hun remchangah chuan silai a chuh ve nghal a. A khing hnihin pistol kawm vawt ngal chu a vuan a, nuam a ti. A silai cheng hmet tura a insansek lai chuan a dulah na takin a rawn deng dawt a, Blaine-an na tawkin a rawn hnek ta emaw a ti a. Mahse a awmna atanga yard sawmhnih laia hlaah Blaine-a chu a la ding si. Chutihlai chuan thil sa takin a taksa a rawn tawn tlang leh ta bawk. Kawtthler lam a thlit thlak chuan a hmaa ding zawk chu phe hlawk hlawk hian a hmu a. Chutihlai chuan silai ri a hre leh ta. A ding sai ngawr ngawr a, tluk pah chuan ring takin "Nilo, khawngaihin min kap suh," a ti a, hmai lei siin a tlu thlawrh a, a thi nghal a.
Peebles-a chuan rang takin silai a hmet puak a, a thelh hlauh. A thelh rualin a zam ta. Todd-a a dula kah fuh a ni lai a hmuh rualin a inher thut a, inchhung lam panin a tlan lut a. Hmun him atangin kah leh tumin a inbuatsaih a ni. Mahse kawngkhar a luh rualin a ding chawt. Ortman-a kha saloon hnunglam kawngkhar atangin a lo lut a. Pindan chhuat zau laiah shotgun kengin a lo ding a. "Peep, enge i an a? Ka thianpa lam hawiin silai i hmetpuak tlat mai," a lo ti hmiah.

Peebles-a chuan thâm deuh tuak hian "I pawi engmah ka sawi hleinem," a'n ti ngawt a. Hnunglamah Blaine-a a awm a, a rawn um ngei dawn. A tihngaihna hrelo chuan Ortman-a chu a'n kap ngawt a. Mahse feet khat dawnin a thelh. Ortman-a shotgun erawh chuan a dul bawrah kapin Peebles-a chu kawngkharah a leng thla a, vaivut zingah thiin a let thla hnawk mai a ni.
Padjen-a chuan a thlan a hru mawlh mawlh a. Minute thum lek kaltaah khan Todd-a khan a rikrap a, mahse tunah chuan an pahnihin an thi ta. Blaine-an a pistol mu a thun chu enin chhaklam a pan chu a hmu a.
Ben Otten-a chu a dawhkan kilin a lo thu a. Inkah thawm te chu a hria. Mahse a che eih lo. Engthil nge thleng tih hi tun hunah hriat a nghakhlel tehchiam lo. Pakhat te te a an thih then hian a tha zawk tia ngaiin chanchinthar chu tuin emaw an hrilh mai dawnah a ngai.
Blaine-an chanchinthar a hrilh ta hlauh!
Kawngkhar a inkhar chiah chuan Ben-a chu a'n dak chhuak a, a hmaa Utah Blaine ding chu a hmu ta si. Chil a lem khawlh a, "Eng nge....eng vang nge? Enge i an a, Utah? I tan enge tih theih ka neih?" a ti ta chul a.
"Ni e, i thawmhnaw tel la, khua hi chhuahsan nghal rawh,"
"Khua chhuahsan rawh a?" tih pah hian Otten-a chu a tho a. "Blaine, chutiangin ka hnenah thu i sawi thei lo. He bank hi ka ta a ni a, ranch ka nei bawk a. Ka...ka..." a tih lai chuan a tawp chawt a.
Blaine-a chuan dam thlap hian "Ben, engkim i hmuin i hre vek. Kum upat lamah hetiang mi i pui hi chu i â nileng a ni ber mai. Insiam la, chhuak nghal rawh," a ti ta a. Ben Otten chu a ngawi tlawk tlawk a, a tawpah chuan "Kawtthlerah khan eng thil nge thleng?" tiin a zawt a.
"Todd-a leh Peebles-a te inkahnaah an thi,"
"Nang......nang hian i that amaw?"
"Todd-a chauh. Ortman-an Peebles-a chu a that,"
"Ortman-an maw?" tiin a makti ka âng chu a kutin a hup a. Ben Otten chuan "Enge rawn tih ve tur a neih reng reng a?" tiin a han zawt a.
"Ortman-a chu ka lamah a tang," tia a chhanna Ben Otten-an a dawnsawn dan a hmuh chuan Blaine-a chu a lawm hle mai. Blaine-a chuan vin deuh that hian "Hei hi hrechiang viau rawh. Khua chhuahsan tura ka tih che chuan ka ti derlo tih hria ang che. Rink Witter-a te, Nevers-a leh Fox-a te ka chinfel hunah helamah ka lo kir leh ang. Chutih hunah chuan Otten, i lo awmloh ngei ka beisei," a ti ta a.
Ben Otten-a chuan hlauthawng si, thinur bawk si hian "Utah, i tawng lian lutuk hrat. Chung mi pathumte bakah ka lamah i lo kir ang maw? Ka hnen rawn thleng tur hi i awm lo ang," a han ti a.
"Chutah chuan innghat duh suh," tih pahin Blaine-a chuan "Ben, thil pakhat ngaihtheihloh deuh ka nei. Midang ho inthah zawh hun changa remchang hmasa bera chan tha ber chan tuma rawn zuanglut thin mihring hi. Ben, i lo fing vaklo tih reiloteah ka hre vek mai. Sum tlem i nei a, mite dahkham tlem azawng nen. Milian emaw i inti a, chu chuan a tihlum ngei dawn che a ni. Hei hi hre rawh. Mi rethei te hian an neihchhun hi lungawi taka eiin an damrei zawk zuk nia!" a ti hmiah a.
A inher hmak a, bank pawnah chuan a chhuak ta a. A chau hle tih inhriain kawtthlerah muangchanga kalin mei a zial a. A duh duha tei mai mai hun chu a tawp ta tih a hria. A chunga mawhphurhna innghat phur tur chuan a inpeih ta.
Ortman-a chu kawtthlerah dingin Utah Blaine chu a lo nghak a. Blaine-a a lo kal chuan nui vur vur chung hian "Mahnu ngawt ai chuan kan pahnih chuan kan ti fuh deuh zawk e," a lo ti a.
Blaine-a pawh chuan "I hnek nat ang chiah khan i shotgun hnawl pawh a na anih kha," a ti a. Ortman-a chuan "Peebles-a te ang sual zia hi ka hria alawm. Mi thah hmang, sawm chuang that tawh a ni. Chung zinga pahnih chauh chuan chance an nei a ni," tih pah hian Blaine-a chu a rawn zui a. "Engtin nge ni leh dawn?" tiin a zawt a.
Blaine-a chu Newspaper office kawtah chuan a ding a, Ralston Forbes-a chu a lo chhuak a. Padjen-a pawh a lo kal thla ve a. "Rals, chanchinbu chhuah leh la ka duh e," tiin Utah chuan "A theih phei chuan phek hmaah chhuah ang che. A tul dan azirin pawisa ka pe ang che," a han ti a. "Pek a tullo. I sawi hi phek hmaa chhuah tur a ni ringawt," Forbes-a chuan a lo ti vat a.

Utah chuan "Anih leh hetiang hian chhuah ang che: Naktuk chawfak hunah 46 Connected ram hi ka la let dawn. Thawhtanni atangin mi sawmhnih vel hire in ran rual pawh ka khawm nghal ang. Nevers-an inthiarchhuah nan ni sawm a nei tihna anih chu. Chutih chhunga ka hmuh hlauh chuan ka kap nghal dawn a ni," a han ti a.
Padjen-a chuan "Chutiang thu chhuah chu i tum maw?" a lo ti a.
"Chutiang chiah chuan," tiin Utah Blaine chuan "Hei hi telh bawk teh: Fox-a pawhin 46 ran rual a khawi reng reng a rawn khalh kir tur a ni. Chutiang atan chuan ni sawm chiah hun a nei. Chutianga ran rual a rawn kir chuan tunah a ni hi ham luh talh ka tum love," a ti leh a.
"Ani chuan a bansan hauh lo ang," Ortman chuan a lo ti a.
"A ni maithei. Tunah hian tih mai tur kan nei. Zanin hian 46 ah kan lut ang," Blaine-a chuan a ti ta a.

*********ADVERTISEMENT CLICK **********