SUDDEN: CLEAR THE NAME! BY Chhantea Pautu (Completed)

[Ngaia]

Chapter 7

Zing khawvar lam hnaih a ni tawh a. Sudden-a muhil chu a harh hlawl a, pawnah chuan zawitea thawm ri hraih hraih hi a han hre zui nghal a, a Puakruk a phawrh vat a, inring takin thawm chu a han ngaithla ta a.

A han reh vang vang a, a rik deuh hraih hraih hnuah Puakruk han ri ṭhuai leh han thum deuh dawp hi a hria a, a reh zui leh hmiah a; chutah a pindan kawngkhar chu zawite hian an rawn kik ta karh karh a.

Mipakhat hian, "Jim, Snap ka nia..." a rawn ti sap a.

Kawngka chu a han hawng a, pindan pawn chhuatah chuan mipakhat hi a lo tlu reng tawh a, Snap chuan ruang chu ten hmel zet hian a lo en reng a.

"Jim, ka kap ta mai a ni, kei pawhin beih ka tawk tho a; mahse Silai ka hmehpuah a ngaih hmain thim thamah an tlanchhia" a han ti a.

"Chuan, kei pawh..." Sudden-a chuan a lo ti bauh a. "Snap, ka lawm e" a ti leh sap a.

"I pindan an tlawh ve ngei ka ring a, ka rawn enfiah a, ka thawm hriain min rawn hmu a, Silai a phawrh zui tâk mai avangin ka kap ta mai a ni" Snap chuan a lo ti a.

Sudden-a chuan, "Hotu lu ber tuemaw tak an awm ngei ang" a han ti ngawt a.

"Khawvar ṭan veleh Sweet Valley chu ka lo va pan ang" Snap chuan a ti ta a, Sudden-a pindan aṭang chuan a kal sawn ta a ni.

Sudden-a chu a pindan bula mipakhat kahhlum a nih chungchangah Marshal chuan thu a zawtfiah a, Sudden chuan thil thlen dan chu tawi fel tak hian a hrilh a, tu kahhlum nge tih erawh chu a hriat loh thu a sawi tlat thung.

"Nangmah thah tum che a niin i ring em?"

"Ka pindan kawngkhar bula thi chu a nia lawm" Sudden-a chuan a ti mai a.

Chupa thih dan chu Marshal tan pawh han tih vak ngaihna awm hek lo le, an buaipui zui ta lo a ni.

Chawhnu lamah Sudden-a chuan Yorky nen San Jose chhuahsanin Sweet Valley an pan ta a; khua an chhuahsan lai chu Ben Harvey chuan a lo hmu a, an pahnih chuan a thlir zui vang vang a. Ngaihtuah thui àwm zet hian a lang a, a lu chu a thing nur nur a.

Yorky chu Sudden-a kianga a han awm leh thei ta chu nuam a tiin a hlim em em mai a, a la naupang deuh bawk a, ani bulah hi chuan naupangchhia ang mai hian a awm a, Sudden-a hi a ngaisang em em a, dan pangngaia inhmachhawn chuan tumahin Silai chelek ranah an khalh a ring ngai reng reng lo a ni.

Ni chu a sa rum rut mai a, hmanhmawh miah lo hian phaizawl, hmun ṭhenkhat hla deuh hleka tlang pawng lian lo tak tak awmna velah chuan an kal bauh bauh a, chulai ramah chuan thing lian pawh awm lo hian hnim bawrchhawr te te, a ṭhen chu thur bim bem, ṭáwi ve laih si te hi an ni hlawm a. Hmun ṭhrnkhat laiah chuan thlalera ṭo ṭhin hnim chikhat, Cuctus pawh hmuh tur a awm zeuh zeuh a, Laiking vak zeuh hmuh tur pawh a awm a.

"Jim, San Jose khaw boruak hian min ti phur khawp mai" Yorky chuan a han ti a.

"Yorky, helai vel boruak hi a lum telh telh dawn a ni" Sudden-a chuan a han ti ve thung a.

"Jim, chu ti ang chu a lawm ka duh"

Sudden chu a ruk hian a nui tat tat a, Yorky huaisenna hi a chhuang em em a ni.

"Yorky, mi i hmachhawn reng rengin fimkhur turin ka hrilh ṭhin che kha; he zirlai hi i thiam thei lo hle mai" a han ti leh a.

"Jim, pawi ka ti khawp mai...khapa kha ka la hmu leh khawp ang" a han ti nang nang a. "Min din hnaih lutuk a, khati ang khan min hnek ang tih ka ring lo a ni" a han ti zui a.

"Kan khingpuite chet dan tur chhut lawk hi a pawimawh em em a; chubakah, khati ang boruak ṭhelh dai tur chuan i Silai i phawrh tur a ni...Lawman ni chunga Puakruk phawi sa lo va kha'ng mite i hmachhawn kha tih dan tur a ni lo" tiin Sudden-a chuan a lo zilh a.

"Tharum ai chuan Silai ngeia hmachhawn a ni ka duh" Yorky chuan a lo la ti bal bal a.

Sudden-a chuan, "Puakruk phawirang nih hian nunna leh thihna a kengtel a sin"

"Jim, ka phawirang ve tawh i tihna em ni?"

Sudden-a chu a nui suk a, he a nau hian zir tur a la ngah hle tih a hria a, tunah pawh a ngaihtuahawm viau tawh lo tih erawh chu a hre tho thung. "Jim Silver-a khan he khuaa i luh tirhin mipakhat nen Puakruka in inhmachhawn thu a sawi a sin...rang a ti khawp mai che" a han ti a.

Chu thu chu Yorky chuan phur zet hian a lo sawizawm vat a, Bull Bulock-a'n a nu chungchang mawi lo taka a sawi vang a nih thu te, chumi hnuah Marshal Ben Harvey-a'n Deputy atana a rawih zui tak thu te leh, Deputy Marshal a nih hnuah San Jose khuaa Gunman ni awm tak tak an rawn luh fo thu leh, buaina a awm pawha Marshal-in tumah a man ngai loh thu te chu a sawi ta ṭeuh mai a.

Yorky chuan, "Kan Jail chu a ruak reng mai" a han ti a.

"San Jose khaw Marshal saw a mak ang reng ngawt mai" tiin Sudden-a chuan thil a ngaihtuah ta vang vang a.

An ngawih dun ren rawn hnuah Yorky bawk chu a rawn ṭawng leh a, "Jim, ka phawirang ve viau tawhin ka inhria a sin" a han ti phawng mai a.

"Phawiran hi a pawi lo; mahse lawm suh, a hlauhawm a ni" Sudden-a chuan a lo ti bauh a.

Mak tih hmel deuh tak hian Yorky chuan a han en a, "Jim, hlauhawm i tih nachhan ka hrethiam lo tawp; miin Silai a phawiran viau chuan mahni a inveng thei tawk tihna a ni mai lo em ni?" a han ti hâ a.

"America khawthlang lamah leh Mexico velah hi chuan phawirang nih leh kap thiam nih chu a pawimawh tehmeuh mai; mahse Yorky, lo chhinchhiah rawh, Puakruk i phawirana i kah thiam viau chuan Gunman leh Killer tam takin hming chher tumin an rawn zawng che ang a, anmahni aia i ran leh ran loh fiah turin an rawn hmachhawn ang che, chung ho chu i lo that a nih a, midang inphawi khalh zel a nih chuan Oilutlaw niin i tih loh pui thil sual ti niin an sawi mai ang che...chu chu khawthlang rama thil awmzia a ni...i fimkhur viau lo chuan i phawiranna chu i thihpui vat ang; hnunglam aṭangin a la inkah theih bawk a nia. Chuvangin in tih lar nan Silai chelek ran hi chîng ngai suh ang che; a ṭul a nih chuan kan khingpui te chu huaisen taka hmachhawnin kan phawikhalh thei ngei tur a ni thung. I phawiran thu hi a nazawngin sawi tawh ngai suh!" Sudden-a chuan a lo ti ta hmiah a; ama chunga thil thleng te kha a han ngaihtuah neuh neuh a.

Yorky chu a ngawi ta rauh rauh a, Sudden-a thusawi chu a ngaihtuah zui ta a, a dik dawn hle hian a hria a, a mi ngainat leh ngaihsan em em anga fing leh dawhthei tak, hnuchhui thiam bawk si leh Puakruk phawirang leh kah thiam em em nih chu a tum ta tlat a. Sudden-a hnenah chuan, "Ka hrethiam e, Jim" a han ti ta sap a.

Ngawi rengin Sweet Valley awmna San Jose khawchhak lam chu muang changin an pan zel a, hnim leh thing bawrchhawr te te awmna kha an kal pel tan tawh a, an kalna hmabak hla vak loah chuan thing pangngai lian ve deuh deuh hi a lo awm ṭan tawh a, thing hmun thlen hma deuh chuan lungpui lian pui pui hi a khat tawkin a awm thliah thluah a, a ram leilung pawh pharh duai ni tawh lo vin, ruam leh tlang pawng lian vak lo hi a awm thluah mai bawk a, hnim chhe te te chu a ṭo phauh phauh tho a.

Sudden-a chuan chulai ram awm dan chu ngun deuh mai hian a han thlir kual a, a ruam awm dan leh tlangpawng lian vak lo awm thliah thluah vel a han hmuh chuan, inlambun nana hmun duhthusam ni hian a hria a, a rilruah chuan a hun hmaa thil ṭha lo an chunga a thlen loh nan an fimkhur hle a ngai dawn tih pawh a rawn lang ve nghal chiah bawk a ni. "Yorky, i ding leh vei kha uluk takin en ang che. Nizan lama kan ṭhian kawmngeih lem loh tak te khan rilru hrisel vak lo an lo pu pawh a ni thei" a han ti a.

Chutih lai chuan an kalna hmabak sir dinglamah chuan Sakawr tlan thawm hi an han hria a, chulam an han hawi phei chuan an piah rala Sakawrin vaivut an pal khuk leh Sakawr chungchuang pali vel hmanhmawh hmel zeta rawn tlan hi an han hmu a. Ding meuhin an han thlir a, Sudden-a chuan, "Kan awmna lam hi an rawn pan a ang hle mai; Yorky, i lo nghak chhin teh ang" a han ti a, chumi te chu an lo nghak ta a.

An hmanhmawh hmel bawk a, chung Sakawr chungchuang ho chuan Sudden-a te awmna chu an rawn thleng ta thuai a. An awmna bul an rawn thlen chuan an Sakawr lakam chu an han pawt cháwih a, an tlan chak laia ding an nih a vangin vaivut khu chu a leng chum chum a.

Sakawr chungchuang te chu mipanga lai hi an lo ni a, an hmel leh thawmhnaw chu vaivutin a bawh paw uarh a, pakhat tih loh chu la naupan hmel tak tak hi an ni a. Sudden-a te ṭhian dun chu an rawn en ngun khawp mai a, pakhat phei chu thinchhiat hmel zet hi a ni nghe nghe.

Sudden-a chuan an Sakawr khela chhinchhiahna chu a han en a, chuta ṭang chuan chung mite chu Double D Ranch Cowboy an ni tih a hre thei nghal mai a; Double D Ranch chu San Jose khawthlang lama awm niin Jim Silver khan a hrilh si a, a rilru te te chuan, 'He lam lamah Double D Cowboy ho hian eng'e an tih chu le?' a ti a, mak a ti deuh riau mai a. An zingah erawh a hmelhriat emaw, a hmuh tawh hnu emaw an awm lo.

"Ṭhiante u, helam hi Sweet Valley, Mr. Mac Mathew-a Ranch panna kawng a ni ang chu maw?" tiin Sudden-a chuan an kal hmabak lam chu a han kawk a.

Chung mite chuan an chhang lawk lo va, a nakkinah chuan a thinchhiat hmel ber leh a upat hmel ber chuan a lu a bu nghut a, "Chutah chuan eng'e in tih dawn a?" a han ti a.

Sudden-a chuan, "Chaw nghei kan duh bik si lo va, Mr. Mac Mathew-a hnenah chuan hnathawh tur te pawh kan dil ang chu" tiin a chhang ṭha mai a.

Chupa chu a rum nghut a, "Mac Mathew chuan hnathawh tur a nei lo, nei pawh ni se hlawh pek tur che u a nei chuang lo vang" a lo ti hmuk a.

Sudden-a chuan, "Ṭhiana, i va hriatchian hmel ve, han rawk tlak pawh an awm nange?" Awmze nei deuha a tih hnuah, "Sweet Valley te pawh chu kan va thleng phawt ang chu maw le" nui chung hian a lo ti leh mai a.

Chupa bawk chuan, "In thu thu le; mahse ka thusawi hi awih ula, in Sakawr te kha an hahthlawn lo tihna a ni mai" a han ti leh hram a.

Sudden-a chuan, "Kan lawm e, Ṭhiante u, kan kal phawt mai ang'e" tiin han kal mai hi a tum a.

Mahse chupa bawk chuan, "I sakawr chu a ṭha hle mai" tih pahin awh hmel deuh hian Sudden-a Sakawr Blue Devil chu a en vung vung a. Chutah, "Nang hi, Mr. Ben Harvey michhawr te zinga pakhat, Mr. Bull Bulock kap tu leh a hnua Deputy Marshal-a ṭang zui ta kha i ni maw?" tiin Yorky chu a han en a.

Chupa ṭawng dan leh awm dan chu Yorky chuan a lo ngei riau mai a, "Ka bang tawh" a lo ti deuh hmak a.

Chupa chu a nui suk a, "Nang pawh hi nizana Big Ben Saloon-a midang inhmachhawnnaa rawn inrawlh ve ngawt kha i ni ngat mai" tiin Sudden-a lam chu a hawi ve leh a.

Sudden-a chu a nui mai a; mahse chupa hnenah chuan, "Ṭhianpa, buaina chhuahna hmunah i awm theiin thil i chhinchhiah thei awm hle mai...ka Sakawr chu i awt deuh elo?" a han ti ve ta a.

"Sakawr ṭha tak a ni; engzat nge i chhiar ang?"

"Mr. ka zuar lo; mahse i lei zo lo vang"

Sudden-a'n, 'I lei zo lo vang a han tih deuh kher avang chuan chupa chu a lawm lo hle tih a hriat a. "Khawi aṭanga i neih nge?" a han ti leh khanglang a.

Sudden-a chuan zawhna a zawt tam lutuk chu a ning ve deuh ta a, la nui reng chung leh a mitmeng erawh danglam tawh deuh tak hian, "Mr. zawhna i ngah hle ṭhin dawn hi le; Texas ah hi chuan zawhna inzawh vak hi a hrisel lo khawp a sin" a han ti nghat a, a'n ngawi leh te te a, "In Sakawr khela chhinchhiahna ka han en hian Double D Ranch mi chhawr in ni ngeiin ka ring a, in Ranch chu San Jose khawthlang lama awm a ni a, helam khawchhak lam lamah eng'e in rawn tih teh daih zawk chu le?" tiin a han zawt lui ve ta ngat a.

Chupa chuan, "Chu chu in lo hriat ve tur a awm lo" a ti hmuk a.

Sudden-a pawh chuan, "Kei pawh, ka Sakawr hi khawi aṭanga ka neih nge tih chu i lo hriat ve a ṭul lem hlei nem" a ti ve ta khauh a.

Chupa chu a thinrimin, a hmel chhe zet chu a dur khup a, a han rum nghut a, a rawn kalpui te pawh chu an awmdan leh hmel a danglam ve nghal bawk a; mahse eng thil mah ti zui ta lo chuan, "Mathew chuan hlawh a pe thei dawn chuang lo che u...hnathawh tur in duh chuan Double D Ranch rawn pan mai rawh u" a han ti bul leh hmuk a.

Sudden-a chu a nui leh mai a, "Kan lo hre reng dawn nia...chuan ka Sakawr hi awt duh suh Mr., i chuang rei thei chuang lo vang" a han ti ve leh hram a.

Chupa chu Sudden-a'n a chhan dan avang chuan a thinrim tawh takzet a, Yorky leh Sudden-a chu a melh tawn ta sek a; mahse Sudden-a hmel leh mitmeng a han en chuan, pawngpaw cho mai mai chi a ni lo tih a hria a, a khel zawna a kut a dah zawi hnak mai te a hmuh phei chuan, Silaia eizawng ṭhin Gunman a nih ngei a ring a; Yorky leh Bull Bulock an inhmachhawn ṭuma Yorky Silai phawi lai lah kha a lo hmuh tawh bawk si avangin a rilrua a thil tih tum chu an ti hlawhtling ngam ta lo a ni. A Sakawr chu a pawt her mawp a, San Jose lam panin a tlan tir ta a, midang ho pawh chuan an zui ve ta a ni.

"Kha pa chu a thinchhiat hmel kher mai...a hawihhawm lo em em mai lehnghal a..." Yorky chuan a han ti nang nang.

Sudden-a chuan, "He lamah eng'e an tih ang le?" a lo ti daih thung a.

"Ka hre lo tawp...mahse Jim, Silai an chuh tawh dawn emaw ka lo ti hman a, ka lo inring khawp a sin" Yorky chuan a lo ti leh a.

Sudden-a chuan, "A tum chu an tum a nih kha" a lo ti mai a.

An hmalama thing leh lung lian deuh deuh awmna hmun lamah chuan an kal leh ta zel a, anmahni lambun duh mai awm a hre lo na a, Sudden-a chu a fimkhur em em a; lambun duh an awm a nih chuan San Jose khua a rawn luh ni-a hruizena a rawn kaih luh Beneto leh a ṭhianpa kha an ni thei maithei a, nizana Jim Silver-a man tumtu te khan an hmangaih viau chuan a ring lem lo bawk.

Lungpui lian pui pui awm khupna chu pelin thing awmna ngaw chu an lut ṭan tawh a. Thing chu awm bawk mah se, a awm zing lutuk hran lo va, lungpui pawh a phena biruk theih maina khawpa lian chu a khat tawkin a bawk thliah thluah a, hmanhmawh chuang miah lo hian an kal zel a, Yard za emaw vel thing hmun an lut tawh tih emaw velah chuan Sudden-a Sakawr, Blue Devil chuan beng a tun hru hru a, a hnar chu a tum dut dut mai bawk a.

A sakawr awm dan Sudden-a'n a han hriat chuan an chheh vel chu a melh kual vat a, zawi sap hian, "Yorky, fimkhur rawh, thil dik lo a awm a ni; Blue hian a hre tlat" a han ti a.

Fimkhur lutuk mai hian an bul vela thing hmun rem tehchiam lo leh lungpui bul chu an melh kual ruai a, thil awmzia ngaichangin an awmna ngaiah chuan ngawi rengin an ding ta a; mahse, minute nga emaw vel an han ngaihchan hnu pawh chuan engmah, thawm emaw Silai puak ri emaw leh thil danglam emaw pawh a thleng ta si lo va.

"Blue, eng'e i hriat chu le? A lothlawn mai chuan khati khan i awm lo vang tiraw? Nigger-a ang bawka hmantlak turin ka beisei che a nia; chuti a nih loh vaih chuan ka piai hlak ang che" tiin a Sakawr chu a han hau fiam a, kal turin a han tur leh ta a.

Thui pawh an la kal hma chuan Blue Devil chu a ngai ang bawk chuan a han awm leh a, a beng tunin a hnar pawh chu a tum dut dut reng a, hawi hru hru pahin zawite hian a hram nghur nghur a.

"Yorky, i sakawr aṭang khan chhuk vat la, kein i kal lawk teh ang, Blue hian eng thil emaw tak chu a hria a ni ngat ang" Sudden-a chuan a han ti a, amah chu a chhuk nghal bawk a.

Yorky pawh chu a sakawr aṭanga chhuk ve nghalin fimkhur deuh hian an sakawr kai chungin kein an kal ta a.
Thui pawh an kal hma chuan, "Saw saw Jim Silver-a Sakawr kha a ni lo'm ni?" tiin an piah sir deuh hnim buk bula Sakawr dum lian leh pian ṭha zet mai hi Yorky chuan Sudden-a chu a han kawhhmuh a.

Sudden-a chuan, "A nih ngei dawn saw, Nigger-a unaupa te pawh a ni hial ang ka ti; a neitupa Sudden-a emaw an ti ṭhin pawh hi a mak vak lo ve...khaw'nge maw a neitupa hi a awm ang? Ka ngaih a ṭha lo tawp mai!" a han ti a.

Chu Sakawr bulah chuan tumah an awm lo va, a Saddle ah chuan hruizen, Winchester Rifle leh Tuithawl pakhat hi a la awm thlap a, chu Sakawr chu nungchang ṭha awm deuh hian a lo ding a, Sudden-a te rawn kal phei a hmuh chuan a lo chik nghur nghur a, anmahni a rawn en hnuah a awmna bula hnimbuk lam chu hawiin a hram leh nghur nghur a.


Chu sakawr awmna chu an pan phei zel a; chutah Yorky chu a phul ta hlut a, "Saw en teh, Jim, Sakawr dinna bula hnimbuk phen a saw mihring ke ka hmu tlat mai...Jim Silver-a hi...an lambun a ni ngat mai" tiin Sudden-a chu hnimbuk lam chu a kawhhmuh ta vat a.

Sudden-a'n a han hmuh ve chuan Blue Devil a kaih lai chu thlahin hnimbuk lam panin a tlan ta vat a, hnimbuk chu kal hualin a phena mihring chu a va hmu ta a. Chupa chu bawkkhup hian a lo tlu a, a tukkhumah tak chuan silaimu luhna kua hi a awm a, amah lambun tute chuan an kahhlum hmain an lambun a ni tih a hre hman a ni tih hriat deuh hian amah chuan a dinglamin Puakruk hi a lo la hum ve a. A landan chuan hnunglam aṭanga kahhlum ngei a ni tih a hriat bawk.

Sudden-a hmel chu thinrimna hlirin a khat a, ruang chu a han kuai zangthal a, a hlauhthawn ang ngeiin helai hmuna kal tura amah rawn ngentu, Hattchet Folly thleng thlenga amah rawn zawngtu leh, Puakruk a phawiran leh a kahthiam mai bakah, Sakawr dum lian tak a neih ve avanga miten amah Sudden-a emaw an lo tih fo, an ṭhianpa chhar thar Jim Silver a lo ni a.

Yorky nen chuan lukhum an phawk a, rei vak lo chu Jim Silver-a ruang en chuan an ngawi dun reng a.

"Yorky, ti khan lo awm rawh, saw ti lam aṭanga kah saw a ni ngei ang, ka va thithlai ang'e" tiin Sudden-a chuan silaimu lo kalna lam nia a rin chu a pan nghal a, thing hmun leh lungpui hrawl zet zet awmna lamah chuan a pil bo ta daih a.

Lung hmun leh thing hmun velah chuan a han vei thuak thuak a, minute sawmpanga hnu velah chuan tlangpawng deuh, mahse lungpui leh thingin a hual avanga biru zet si ah hian hmun pakhat, lo bel deuh tlan hi a han hmu a, chuta ṭanga a han hawichhuah chuan, Yorky nena an rawn kalna kawngṭum leh Jim Silver-a ruang lo awmna lai chu chiang tak hian a lang thei a, kawngṭum aṭang erawh chuan chulai hmuna mihring biru chu hmuh harsa deuh tur a ni ngei ang tih Sudden-a chuan a ring a. Chulai hmuna mihring hnuhma leh, an mezial zukna vap leh bung tam dan te leh an kalchuah lehna hniak pherh veng vung danah chuan, helai hmunah hian Jim Silver chu rei tawk tak an lo chang a ni tih leh, an kah hnu ah hmanhmawh takin an tlanchhe zui nghal tih chu a chiang hle hian a hre bawk a.

An lo channa leh a chhehvel chu ngun lehzual hian a han en kual a, Winchester Rifle Cartridge ruak pakhat leh Spur(Sakawr khen kalna) pakhat lo tla hi a han hmu a, chu chu a chhar a, Yorky va pawh leh tur chuan a kal leh ta a.

"Jim, eng'e chanchin?" Yorky chuan a lo ti var a.

"An hnuhma aṭanga a lan dan chuan, mipahnihin rei tawk tak an lo chang a ni, an hniakhnu pherh zet avangin kan la man chhuak vat turah ngai ang" Sudden chuan a han ti a.

Yorky chuan, "Jim Silver hian an lambun hi a ring lawk lo em maw ni le?" a lo ti bauh a.


"A Sakawr hi Sakawr fing tak niin a lang a, a pu hnenah warning a pe ngei ang a, chu chu Jim Silver hian a hrethiam ngei tih pawh a lang a, a Puakruk a phawrh ve hman tlat a ni...a lambun tute hian vawikhat chiah silai an hmet puak niin a lang a, a kaptu hi Silai kah thiam tak, dawihzep tak si a nih ka ring" tiin a thil chhar, Cartridge ruak leh Spur chu Yorky a han hmuh a.

"Jim, engtin nge ni dawn?" a lo ti a.

Sudden chuan a Sakawr Blue Devil chu a han chul thuak thuak a, "Blue, i ti ṭha e, Nigger-a nen hi chuan thuhmun in ni mai" a han ti a. "Blue hian Silver-a thisen rim kha a hria a ni ngei ang...Yorky, Jim Silver-a Sakawr chungah hian a pu ruang kha phuar bet ila, Sweet Vally lam pan pui phawt mai ang aw...khua lah a hla deuh tawh si a, Mr. Matthew leh Mrs. Nancy te pawhin ṭha taka phum an duh ngei ka ring" a han ti zung zung a.

Chu hmun khawkrawk leh ralṭi ru takah chuan kal zelin Sweet Valley lam pan chuan an kal leh ta zel a.

Eng ang buaina chiah nge an la hmachhawn zel ang tih Sudden-a chuan a ngaihtuah neuh neuh a, helai hmuna amah kal tir tu pakhat chu tenawm takin a hnunglam aṭanga kahhlum a ni ta a. Buaina engpawh lo thleng se Jim Silver chu a mi duh ber te zingah a tel a ni. Engtikah emaw chuan anni pawh hi dawihzep taka hnunglam aṭanga kahhlum an la ni ve maithei.

San Jose ah chuan Gunman leh Killer, an lut chhuak reng a, Bounty Hunter pawh an rawn kal ṭhin bawk. Gunfighter rura tak tak an rawn kal fo tih pawh a hria a, chung ho ruaia kilkawitu tuemaw tak chu awmin a ring tlat a; Governor Bleke sawi ang khan Ben Harvey hi a ni thei ang em tih a han chhut a; mahse thil a hmu tlemin a la hre tam rih lo em a, thil lo thlen dan azira ngaihdan siam chu a tum nghet ta zawk a ni.

A awmna hi Texas a nih miau avangin nakkinah chuan amah hretu, Sudden-a a ni tih hretu ngei Gunman emaw, Bounty Hunter a la tawn ngei a ring tlat a, buaina chu pehhel hram hram tum ṭhin mah se, phawirang ve tawk nia inngai Gunfighter tuemaw nen gunfight an neih ngei a la ngai bawk ang tih chu a ring sa a ni.

Sudden-a chu chuti ang thil ngaituah chuan a han nui sak a, tuna a awmna hi Texas a ni tawh miau a, engpawh thleng se hmachhawn turin a inpeih thlap a, a Puakruk pahnih, a enkawl ngun em em leh a kawm hnum hlarh mai te pawh chu hman mai theih turin a khel lehlam lehlamah fual hnalh hian an awm ve ve reng bawk a ni. Mi a hmachhawn reng rengin a sangmar ṭung ve ngai lo va, a taksa a inthlahdul hnak a, a kut pahnih chu a khel zawnah a thlakthla zawi hnak a, a hun takah a che mai ṭhin. Texas ah hian misual tam takin an hlau a, a ṭhen chuan thah emaw, man emaw an duh bawk.

Khua chu a tlai lam tawh a, mual pawng lian ve deuh pakhat hi an va chuangchhuak a, chu mual pawng thlangah chuan ruam rai ṭha zet hi a awm a, ruamah chuan In pathum vel hi a ding a, pakhat chu a lian deuh bik hle nghe nghe a.

"Yorky, khu khu Sweet Valley chu a ni ngei ang" Sudden-a chuan a han ti a.

[Ngaia]

Chapter 8

Sudden-a ten Jim Silver-a ruang an hmuh lai vel chuan BB Ranch ah ama chungchang sawiin mi ṭhenkhat an ṭhu khawm a. Heta awmkhawm ho te hian Sudden-a hi an lo enghelh tlang ṭheuh a ni.

Mipangain Jim Silver-a an nawrchep ṭuma a lo inrawlh dan te kha an zinga ṭhenkhat hian an hmu ve hlawm bawk a, amah leh a chezia reng reng hian an ngaih a ti ṭha thlawt lo a ni ber e. An zinga tumah hian San Jose khuaa a lo luh hnu hian a Silai chelek lai erawh an la hmu miah lo va. Engtin nge an hmuh reng ang, a la chelek lo miau a ni. Kawng laka midang lo suamtu Beneto te ṭhian dun hmaah khan Puakruk kha a phawi chu a phawi ngei a; mahse khami te khan a phawi lai an hmu hman hlek lo chu a nih kha. Awmkhawm zingah hian Beneto te ṭhian dun kha an awm ve lo na a, kha thu kha chu an hre tawh hlawm tho a.

An zinga pakhat Jason Curse an tih mai chuan an mi sawi lai mek chu eng ang hmel pu nge tih a han zawt a. Midang ho chuan Sudden-a hmel leh pian hmang vel te chu an han sawi a; chutah Jason Curse chuan, Puakruk pahnih fual taka pai a nih leh nih loh te, a Puakruk paina a then a then loh nana a malpuia a ṭawn beh leh beh loh te, a mi thah zat chhinchhiah nana a Puakruk kawm a zai rek leh rek loh te chu a zawt ta zel a.

Midang ho chuan Jason Curse a zawhna chu an han chhang a, an hmuh dan leh hriat dana an chhan hlawm hnu chuan Jason chu a han ngawi vang vang a, a ṭhian ten an sawi hmangah chuan hman deuha mipakhat a hmuh tawh, Puakruk phawirang lutuk leh kap thiam lutuk tak mai pakhat, a Sakawr dum lian tak chunga chuanga hmun hrang hranga kal kual ṭhin tlangval la naupang tak, sam dum hlap mai leh mitmeng pawl ram mai, fiamthu duh hmel deuh taka nui thei deuh reng mai, a hnua 'Sudden' tia an sawi zui tak kha ni thei dawn tlat hian a han hria a; Sakawr dum chunga chuang a ni lo tih thu an sawi erawh chuan a rilru a ti buai deuh a.

Lumbo leh a midang thenkhat te hian Big Ben Saloon-a an dan chép pa, Sakawr dum lian ṭha tak nei kha Sudden-a niin an sawi tlat bawk si a; chuvangin an mi sawi lai mek chungchanga a ngaihtuahna chu a ṭhian te hriatah chuan a sawichhuak duh ta rih lo va. Midang ho chuan Saloon chhunga an buaina chungchanga rawn inrawlh ve ngawt mai, Puakruk pahnih fual hnalha pai a, a kut bawr a khel zawna dah zawi hnak mai chu Gunman tuemaw tak a nih chu an ring ṭheuh a ni.

Jason a rilru ah chuan a reh mai thei ta lo va, a lo hriat ṭhin Sudden-a kha chuan a mi thah zat chhinchhiah nan Puakruk kawm a zai rek ve ngai miah lo va, loh theih loh a nih chauh loh chuan mi hmaah Silai a chelek ve mai mai ngai lo bawk a ni. A hmelma te tana zuam sual awl tak a nih tur zia a mitmenga a lan ṭhin zia te pawh a ngaihtuah kai ta zel a; chutih rualin an zinga mi ṭhenkhat leh Lumbo ten Sudden-a ni ngeia an hriat pawh khan a Silai kawm a zai rek bik chuang hauh lo tih an sawi tawh a, amah Jason hian a la hmu miah lo bawk a, Sakawr dum lian tak a neih thu an sawi avangin Sudden-a an tih chu a ni thei tho a ni tih erawh a hria.

Chung ho chuan Sweet Valley leh Mac Mathew te nupa chungchang pawh an sawi kai ta zel a. Chutia an lo ti ti lai chuan Johny Lumbo kha a rawn lut ta a, an lo ngawi ṭhap a, hepa hi engtik lai mahin nelawm takin a khawsa ngai lo. An zingah chuan Jason Curse hian a thunun thei ber a, mi thinchhia, Puakruk kah thiam leh phawirang tak a ni a, tumahin tih thinrim an duh ngai lo. A nun a rawng hle a, a mi thah ṭhenkhat te chu na tak tuarin rei tak a awm tir ṭhin a, nun chhe tak a nih avangin hmeichhia pawh a dim vak ngai lo bawk; mak tak maiin hmeichhe a khawih mai mai ngai lo thung.

Inchhungah chuan thinrim hmel deuh hian a rawn pen lut chhut chhut a, midang ho chuan ngawi rengin an lo thlir ṭhap a, chutah Jason Curse chuan a lo be hmasa ta a.

"Lumbo, eng'e chanchin?" tiin Jason chuan a han zawt a.

"Beneto leh Delreido an kal a, a thi tawh" a han ti nghut a.

"A ṭhat chu, Delreido kan tir chu a ṭha e, kan zingah a ni tluka Rifle kap thiam hi an awm ka ring lo" Jason chuan a lo ti leh a.

"Chuti chu inhmatawnin ka la chhin pui ang'e" Lumbo chuan a lo ti hluk a.

Jason Curse chuan Lumbo chu thip zet hian a han melh a, "Lumbo, kan zingah hian buaina a awm ka remti hauh lo a nia...Delreido i puhna kha duhtawk tawh teh...nge, keimah nen hian inhmatawnin Puakruk kap thiam leh rang zawk han chhin i duh zawk em ni?" a han ti ta hmak a.

Inchhunga awm zawng zawng te chu an ngawi ṭhap a, rei vak lo chu tumah ṭawng lo va an awm hnu chuan Lumbo chu a nui ve vei suk a, "Jason, ka tihpalh a ni...ka hah deuh a ni e" a han ti ta a. A dik tak chuan Jason hi a phawi khalh a ring lo a ni.

Johny Lumbo hi a thangna chinah chuan Gunman lar tak a ni a, mi a hmachhawn hnem ve tawh hlein amah phawikhalhtu chu a la tawng lo a; mahse tupawhin Jason Curse hi an hlauin an zah a, lar lo zawkin lang mah se tumahin phawikhalh theih an inring lo.

Jason Curse hian Puakruk pahnih a pai reng a, engtik lai mah hian chung a Silai pai te chu a kut bawr hian a hlat ngai lo, a taksa peng pakhat ni mai awm hian a enkawl uluk a, amah hi Killer diktak a nih avangin, a tana hnawksak deuh anga lang chu, Puakruka inhmachhawn a ni emaw, Rifle hmanga lambun emaw leh chemtea thah emaw pawh ni se, a remchan hun leh a remchannna hmuna tih hlum a tîm ngai map lo a ni.

Jason nena an inchhan deuh hnu chuan Lumbo chu a kal hrang a, zu um hi a hawng a, amah chauh chuan kilkhatah a in ta mial mial a; a ngaihtuahna chu zana thil thleng hlir khan a luah a. Mak a ti hle a; eng a ti nge ni le; a awm a nawm theih miah loh chu le?

Sudden-a ni ngeia an hriat amah leh a ṭhiante pali ten an hmachhawna an hual chep laia rawn inrawlh, mikhual Puakruk pahnih fual hnalha pai leh inring em em chung si-a ding zawi deuh hnak mai a enghelh rukna chu thuhran ni se, Snap Lunt-a hmel a hmuha mak a tih ruk zia kha a la hre reng a ni. Ani kha a that tawh ngei khan a hre si a, tinge hetah a lo lan leh chu le?

A ngaihtuah chian poh leh mak a ti a, khapa leh Snap Lunt hian hetah eng'e an rawn tih? Eng emaw chhan neia rawn kal an ang tlat hian a hria a, Snap Lunt tak pawh chuan a awm hi a ti nuam thei hauh lo a ni.

Mikhual pakhat Sudden-a nia an ngaih kha a chhui zui viau ṭhin a; hmun dangah pawh Sudden-a a ni tih sawi rik a hre ṭhin, an inhmachhawn ṭuma a chunga thil thleng kha tlawmthlak a la ti reng a, chuvangin lambuna thah pawh pawi ti tawh lo va Jason Curse hnena rawt a ni a. Chu chu Jason chuan a duh vak lo hle a, a chhan pawh ṭhenkhatin Sudden-a nia an ngaih chu hmuh ve phawt a duh a ni.

Mahse Lumbo erawh chuan, Ben Harvey-a'n theihtawpa a sawm hnuah pawh an zingah a tel duh tawh lo va, Jason-a hnenah thah a duh a ni tih sawiin a remti lo chung chuan lambun turin an ti ta ni.
* * * * * * *

Sweet Valley chu Ranch tenau anga chhiar theih chu ni ve bawk mah se, Ranch ang chuan an sawi ngai meuh lo. Ram zim te, tuihna ṭha tak awmna ruam lian vak lo hmuna phaitual hnim hring chamdup mai awmna a ni a, chu ruam phaitual hnim cham dup maiah chuan Mathew te nupa chuan chenna In leh Sakawr huang lian lo tak leh In dang te pawh an nei ve ngei a; mahse an ram a zim deuh avang leh an nupa bakah eisiamtu atana an hman, Putar Hodden-a chauh an khawsak avangin bawng tlemte chauh an vulh a ni; an ram hi a zim tiin kan sawi na a, tuna an bawngvulh lét pawh hi vulh se an chaw mamawh khawp chu an ramah hian a awm tho a ni.

Sweet Valley chu mi rothap pui pui leh hmaituam tlat ṭhenkhat hian a khat tawkin an tlawh fo mai a, Mathew te nupa hnenah chuan sum leh thildang an phut ṭhin a, Mathew hi Silai chelekmi a nih loh avangin lo do let thei dinhmunah a ding lo a ni. Ben Harvey hian a Ranch lei sakah a dil fo a; mahse chhan ṭha tak avangin an phal mai bik lo va.

Jim Siver khan he Sweet Valley hi panin tukṭhuan eikhamin San Jose kha hmanhmawh hauh lovin a chhuah san a, chutia a chhuahsan lai vel chuan Mexican pakhat hi hmanhmawh leh chak zet hian khua aṭangin a tlan chhuak ve nghal a, khua aṭanga mel khat vela mi pahnih lo awmte chu va finin chanchin a va hrilh a, amah chu BB Ranch lamah a let leh ta nghal a. Mipahnih te kha chuan hmanhmawh em emin Sweet Valley panna kawng awlsam ber lam chu an pan a, thing leh lung lian pui pui awmna an thlen chuan an Sakawr an thukru a, hmun pakhatah an thil duh chu an lo chang ta a ni.

Rei tawk tak chulai hmuna an awm hnu chuan, Jim Silver chu a Sakawr dum lian taka chuangin muangchang hian a rawn kal ta bak bak a, thing hmun an han luh aṭanga thui tehchiam lo a kal hnu chuan a Sakawr fing tak chuan a beng a tun a, kal reng chung chuan a hram chîk nghur nghur a, a ke te chu a per leh deuh ut ut ṭhin a. A pu Jim Silver pawh chuan thil dik lo a awm a ni tih a hrethiam ve nghal mai a, a Puakruk pakhat chu a phawi a, fimkhur deuh hian a han hawi kual a, a Sakawr chul thuak thuak paha fimkhur thu hlaa chhuk a tum lai tak chuan Rifle a ri ṭhuai a, a Sakawr aṭangin Jim Silver chu a tla hlawm tawp a, che leh tur a awm tawh lo reng reng a ni.

Amah lo changa lo lambun tute chu dawihzep tak an nih avangin, chulai vela lo awm hnai mi tuemaw chuan an Silai kah ri chu an hre ngei dawn a, midang hmuh leh hriat an hlauh avangin hniak pherh vungin an tlanchhe ta a ni. Winchester Rifle kengtu chu a inbilh nawk a, a pheikhawk chu lung leh lung inkarah a tlazep a, a hmanhmawh bawk si chu a han pen lui a, a ri hlawk a, a ke tâng chu a chhuah tak avangin hmanhmawh zetin a ṭhianpa chu a um zui a, San Jose khua helin an Sakawr chu chak zetin an tlan tir ta nghal a.

Silai a han rik ṭhuai khan Jim Silver-a Sakawr chu a tlan phut a, thui vak lo a tlan hnuah a ding a, thawm ngaichang niawm tak hian a beng pahnih chu tunin hnunglam, hmalam leh ding leh veiah a ti che tawn vel a, chutah a han hram nghur nghur a, chulai hmuna rei fé a din reng hnu chuan a pu ngaihvenin a kir leh ta a, hnimbuk ṭawih laih bula bawkkhup zawnga a pu let reng bulah chuan a ding a, a pu chu a hmui chuan a han nawr ṭhin a; mahse a pu chu che leh tur a awm tawh si lo!

Heti ang huna Sakawrin mihring thisen thang rim an hriat tawh chuan zawi zawiin mihring ruang chu an kal hlatsan hret hret zel a, thlun an nih loh chuan mihring ruang bulah an ding reng ngai meuh lo. Mahse Jim Silver-a leh a Sakawr, 'Big Wolf' tia a koh hi chu an inhrawn nasa em em a, chubakah Sakawr fing fal tak a nih avangin a pu chu a kalsan mai duh hauh lo va, thisen thang rim pawh pawisa lovin a pu ruang bulah chuan a ding ve ta reng mai a ni.

Big Wolf chu a khat tawk hian ṭanpuitu au niawm tak hian a han hram a; mahse a beisei angin tumah an rawn lang ta lo tih hrethiam niawm takin a din rei tak deuhah chuan a hram duh ta lo va, hnim peh pawh tum chuang lovin a ngawi ta reng a. Lambun an nih aṭangin darkar hnih zet a liam tawh a, a pu chu kalsan tum lovin a la ding ta reng a; chutih lai vel tak chu a ni Sudden-a ten an awmna lai an va pawh tâk.
Cowboy tan chuan an Sakawr te hi an hlu em em a, an Sakawrah hian an nunna thui tak a innghat tlat a, Cowboy emaw, Gunman fing leh thil chik takin emaw Sakawr fing leh ṭuan ṭha, chak bawk si an neih ngat phei chuan, an hmelma mihring leh an tana hlauhawm thildang lakah an him phah fo a; mahse Sakawr fingtakin thil hlauhawm laka warning an pek hrethiama chhawr tur chuan pa fimkhur leh fing tak nih a ngai ve thung. Cowboy fing lo leh thil chhuta chik nachang hre lo tan Sakawr fing neih chu awmzia a awm tak tak lo va, an rula-raw-neih mai mai lek a ni ṭhin.

Big Wolf chuan a pu ruang chu a phur hnawp hnawp a, Sudden-a te chu zui zelin a pu Jim Silver-a'n a lo tlawh tawh ṭhin Sweet Valley lan theihna tlangpawng chu a thlenpui ta kha a ni a.

Yorky chuan, "Jim, hmun nuam tak a ni ngei ang; kan hun tawnin zir deuh se ṭha tur" a han ti a.

Sudden-a chuan, "An ṭhianpa ruang phur lûttu mikhual chu an lo beisei hauh lo vang le?" a han ti ve a.

"Inléng an nei a nih dawn khu" Yorky chuan a lo ti leh sap a.

Chulai ruam kuam nuam zet maia In awm chu panin hmanhmawh chuang vak lo hian an chhukthla ta a. In lian ber kawtah chuan Sakawr, a Saddle belsa hi a awm a, Sudden-a ten awihtlan tawpa phaitualhnim awmna zawl inṭanna an thlen chiah chuan Inchhung aṭang chuan mipakhat hi a rawn chhuak a, a Sakawrah lawnin Sudden-a te awmna lamah chuan a rawn tlan phei auh auh a.

Sudden-a chuan, "Marshal a ni reng mai ka ti; teh hlauh a" a han ti sup a.

Jim Silver-a ruang an hmuh khan, San Jose lama kirpuia Marshal hnen han thlen kha a duh hle a; mahse chulai hmun aṭanga khua kha a hlat tawh zawk avangin Sweet Valley hi an pan pui ta mai kha a ni a. Chutia Marshal an han hmu remchang hlauh chu tih chi hle hian Sudden-a chuan a hria a ni.

Marshal-in an bul a rawn thlen a, an mihring ruang rawn phurh a han hmuh chuan mak a tih hmel hle mai a. A Sakawr chu a pawt ding a, Sakawr dum lian ṭha takin a phurh mihring ruang chu a han en a, chumi hnuah Yorky leh Sudden-a chu a en tawn ta sek a.

"Hei...enge ni ta mai? Tunge ni?" a han ti a.

Sudden-a chuan, "Marshal, Sweet Valley panna kawng, thing hmun inṭanna hmunah khan thiin kan chhar a ni, tu ten emaw an lambun a nih hmel" a lo ti a.

Chutia an inbiak lai chuan Mathew-a chu pawnah a rawn chhuak ve mek a, Sudden-a te chu a rawn pan phei ve ta a, mihring ruang phurtu Sakawr a han hmuh chuan ngaih ṭhat loh hmel deuh hian Sudden-a te chu a han en a.

"Hei eng'e thil awm zia? Hei chu Jim-a Sakawr Big Wolf a nih hi..." a han ti a, mihring ruang chu a han hmu chiang a, "Khai awww...hei chu Jim a ni reng mai ka ti...engtizia nge mikhualpa?" a han ti a, a hmelah chuan tuarna hmel a lo lang nghal a.

Sudden-a chuan, "Mr. Matthew, in Ranch a rawn panna kawngah an lo lambun a nih hmel...hei Marshal a awm hlauh bawk a, inchhungah lut ila, thil awmzia kan inhrilh dawn nia" a han ti a.

Chutih lai chuan Mrs. Nancy chu a pasal ṭawng ri avangin inchhung aṭangin a lo chhuak ve a, bathlar aṭang chuan Sudden-a te chu mak tih hmel deuh hian a lo en a, engmah phei chu a sawi lem lo.

In chhungah chuan an lut a, Sudden-a chuan thil awmzia leh Jim Silver-a ruang an hmuh dan chu kimchang tak hian a hrilh a. Marshal hnenah chuan Winchester Rifle Cartridge ruak pakhat a chhar thu chu hrilhin Cartridge ruak chu a pe nghal bawk a.

Mrs. Nancy chuan a hmai a hup a, a pasal chuan duat deuh mai hian a lo kuah a.

"Engtin nge nangmahni kah a ni lo tih ka hriat theih ang?" Marshal chuan a lo ti nghut a.

Chu chu Sudden-a beisei loh lutuk dan a ni; Marshal chu rum leh thip zet hian a han en a, "Chu tualthattuah min puh i tum tihna em ni?" a han ti ram hmak a.

Marshal chuan, "Man in ṭul chuan ka man ngei ang che u" a lo ti bung ve nghut a.

Sudden-a chu za lo zet hian a han ṭhen sak a, "Marshal, i sawi awlsam mah mah lo maw?" a lo ti duh lek a.

Marshal Ben Harvey hi, Sudden-a te rawn thlen hma hian Matthew nen hian an lo indawr fuh vak lo va, lungawi lo deuha chhuaka haw tum kha a ni a; Yorky chuan a lo ngei khawp mai a.

Sudden-a bawk chuan, "Marshal, kha Cartridge ruak i nei a, ka Rifle aṭanga kahchhuah a nih leh nih loh chu fiah ta che" a han ti leh a. "Chubakah, nizana Johny Lumbo leh a ṭhian ten hepa an dan chep lai khan ka pui a...nangmah kha a ni lo'm ni kan inkap ngei dawn tih hriaa rawn inrawlh ta kha? Min rawn ṭhelh avangin kha'ng mi tenawm ho kha an thaw huai mai a nih kha...ani Jim Silver-a ka thah duhna chhan tur ni ngeia i hriat chu han sawi ta che" a ti ta sak sak a.

Marshal chu a ngawi run run a, "Kan la hria ang chu" a la ti ta hram a, a han ding a, Yorky lam chu hawiin, "Nang hi mikhual satliah ṭhian i nih ka lo hre miah lo" a ti leh hmuk a, pawnah chhuakin Sakawrah a lawn a, chak deuh hian Sudden-a te lo kalna lamah chuan a lim chho ta puat puat a.

Yorky chuan a enzui vang vang a, "Jim-a thattu ah a la puh maithei che a nia" a han ti a.

"Min puh zui ngam lo vang" a lo ti mai a.

Marshal a kal liam hnu chuan Mathew te nupa chuan mak tih hmel deuh tak leh ngaih ṭhat loh hmel tak hian Sudden-a te pahnih chu an en tawn deuh sek a. A chenpui Putar Hodden-a pawh Inah chuan a rawn lut ve tawh a.

"Min lo hrethiam ula, tute nge in nih min hrilh hram rawh u...kan ṭhianpa Jim Silver-a chu thah niin a ruang in rawn phur lut a...kan tan chuan a hrilhhaithlakin a lungchhiatthlak takzet a ni...tute nge in nih?" Matthew chuan a han ti ta khawl mai a.

Sudden-a chuan, Jim Silver-a'n Hattchet Folly hmuna an Ranch-ah rawn kala a rawn zawn chhuah dan te leh helai hmuna kal tura Jim Silver-a'n a sawm thu te, Hattchet Folly aṭang chuan anmahni pui tura mipathum an rawn kal thu leh, ama'n San Jose a rawn luh hnua thil thlen dan leh helai hmuna Jim Silver-a ruang an rawn thlen dan thleng chuan tawifel deuh hian a han sawi a; amah hi Sudden-a chu a ni tih leh, Jim Silver-a'n Nancy nena an inlaichinna a sawichhuah chungchang erawh chu a sawi tel duh lo va. A thusawi tlangkawm nan, "Jim Silver-a ruang hi ṭha tak leh zahawm taka in phum duh kan rin avangin khua pan lovin helam hi kan rawn pan nghal ta mai a ni" a han ti a.

Mathew te nupa chu an thaw huai a, an hmelah hlim hmel tlem a lang tel nghal bawk a.

"Engpawh ni se, harsatna kan tawk reng a, mite angin hlawh kan pe mumal ve thei dawn lo che u a, in nunna atan pawh a hlauhawm thei dawn a ni" Mathew chuan a han ti a.

Sudden chuan, "Chulam chu engto duh suh u, ei tur min pek chuan a tawk mai" a han ti a.

Nancy chu a lo ṭawng ve ta a, "I nau tlangval hian 'Jim' ti khan a ko che a...Silvera hi 'Jim' ti hlirin kan ko a...in hming min hrilh thei lo'm ni?" a han ti a.

Nancy hi hmeichhe hmelṭha leh ngaihnobei deuh mai a ni a, a sam chu a dum hlap a, a mitmeng chu Sudden-a ang maiin a pawl râm a, a mengmawi hle bawk, thil thlengin a ṭhawn a vangin a dâng lep hian a hriat a. A hmelṭhat avangin helai vela misual, anmahni ti buai ṭhintu te lakah harsatna a tawk zeuh zeuh a, a pasal Mathew atan tak hian nun a derthawn phah bawk a ni.

Sudden-a chuan, "Kan insawi nghal lo va, kan thiam loh a ni...James Green ka ni a, ka ṭhiante chuan 'Jim' tiin min ko ve mai bawk...ka nau hi chu 'Yorky' tiin kan ko mai" a lo ti thuai a.

Mathew chuan, "Kan ṭhianpa Jim Silver hian chawlh hahdam a mamawh a ni, khaw thim hma ngeiin phum fel phawt teh ang u" a lo ti a. An vai chuan Jim Silver-a ruang phum tur chuan an chhuak ta a.

Putar khan, "Khaw'nge in ṭhianpa pakhat chu a awm?" a lo ti ve bauh a.

Chutih lai chuan an piah lamah chuan Sakawr chungchuang pakhat hi a rawn lang a.

"Jim, Snap a nih dawn saw?" Yorky chuan a lo ti sap a. A lu chu a rawn tuam bar mai a.

[Ngaia]

Chapter 9

Sudden-a hnena a sawi angin khawvar rualin Snap Lunt chuan San Jose(Heta San Jose kan tih hi, California State chhunga San Jose khua nen khuan ngaihpawlh loh tur; Wild West hunlai khan Texas chhungah Mexico nena an inrina depah San Jose khua a awm ve angah ngaih mai tur a ni e - Cht) a chhuahsan kha a ni a, kawng a hre sa lem lo va, Sweet Vallley chu khawchhak lamah a awm tih a hriat tawh avangin chu lam chu a pan ve chawm mai a, harsa lo taka a pawh ve mai pawh a inring a ni.

Hmanhmawh lem lo tak hian a kal a, a kal hnua Sudden-a leh Yorky-a'n an rawn zawh kawngṭum, Jim Silver-a ruang an rawn chharna kha chu a zawh ve lem lo va, a kual zawngin a kal tih inhre miah lo hian Sweet Valley chu a hel chiam hi a lo ni; chumi avanga a ṭhiante ai pawha thleng hnuhnung a nih bakah harsatna pakhat a tawk ve reng reng bawk a.

A kal bauh bauh zel a, hmun pakhata lui tereuhte lo luang ker ker hi a han hmu a, Saddle-ah tuithawl a lo pai miah loh avangin a tui a hal tawh hle bakah a Sakawr chuan tui in tumin a pan nghal ruak ruak avangin chu kawrtea tui thianghlim zet chu in tumin a Sakawr aṭang chuan a chhuk a, tui chu a in ta khalh khalh a.

Chutia tui ina a kun kât kât lai chuan thawklehkhatah Silai hi a rawn puak ṭhuai a, a bula tui chu silaimu chuan a deng per chuai a, a han hawichhuah chuan Rifle kaw hmawr hian a lam a lo hawi reng tawh mai a; lungawi lo zet hian chung mipahnih te chu a han en a.

"Che tawh suh!"

Chutia rawn ti ngawttu te chu a han en a, pahnih an ni a, pakhat chu Mexican a ni nghe nghe a, Mexican lukhum parh hlai zet hi a khum a, a hmuihmul a awm chhur a, a hmel chu a bal hle mai bawk; hepa hi zanah khan Salloon chhungah a hmu ngei tih a la hre thei a. Pakhat zawk erawh chu Western tlangval dik tak ni hian a lang thung a.

"I ban kha chunglamah phar chho rawh"

"Miguel, i kal zawk teh ang, hepa hian kan pawi a sawi hleinem" pakhat zawk chuan a lo ti vat a.

'Miguel' tia a koh chuan, "Ho mai mai, a hmel hi ka haw hrim hrim..." a lo ti hluk a.

Pakhat zawk chuan Snap chu ngun deuh hian a han en a, a Puakruk pahnih a pai dan chu chîk zeta a en hnuin, "Miguel, i tih tlat chuan le...mahse kei chu ka tel ve lo...in pahnih inkar thu ni teh se" tiin Mexican pa piah lamah chuan a sakawr chu a kal phei tir ta daih a, ngawi reng hian chuta ṭang chuan a lo thlir a.

"Belly, i dawihzep hle mai" Mexican pa chuan a lo ti nghut a.

"Ka dawihzep maw, Miguel? A nih chuan mikhualpa hi kal tir la, kan han en dawn em ni?" Belly chuan a lo ti ve ta ngat a.

Mexican pa chu a ngawi ngul a, chutah a ṭhianpa chu a ti thinrim tih a inhria a ni chék ang, nui huah huah pah hian, "Ka fiamthu a nih kha Belly, hepa hi ka'n buaipui lawk a nge, Puakruk pahnih pai fual ve ngawt satliah..." tih pahin Snap Lunt chu a han melh rum leh zual a.

Snap Lunt chuan thuawih tak hian a ban chu a phar chho ve mai a. He Grasier lakah hian thil ṭha tak a beisei lem loh avangin hun remchang hmasa bera risk lak a tum tlat a, thah a tum emaw tum lo emaw a dinhmun tur àwmang a han chhutin a ṭul ang leh remchan angin Silai chelek ve mai a tum nghet ta a ni.

Mexican pa chuan, "Gringo, i Gunbelt kha phelh vat rawh" a han ti vin leh tuar a.

Chu hun remchang, a khel bawr lama a kut dahthlak theihna hun chu a ni Snap Lunt-a'n a lo nghah reng chu. Muangchang hian a kut chu a thlakthla zel a, a Gunbelt phelh tum niawm tak hian a kut chu a han dah hniam hret hret a, thawklehkhatah a Puakruk chu a chuh ta thut mai a, Silai chu a puak rual hi a ni mai a, Mexican pa chu a Sakawr aṭangin a hlawmthla tawp a, Snap Lunt-a silaimu chuan a khabeah tak dengin a chhip lamah a lût chho a. Snap pawh chu Mexican pa silaimu chuan a lu-ah a thâwi a, a tlu ve tawp tho a, a lu-a silaimu thawina avang chuan nikhawhrelo hian a awm zui ve nghal bawk a.

A han harhchhuah leh chuan a lu chu a lo intuam thlap tawh a, mak ti deuh tak hian a han meng a, a hawi kual vel a, a bul maiah, nichina Mexican a kah pa rawn kalpui kha a hmu ta a. Ani chuan meizial hi a lo zu hlat hlat a, a pak khu talh talh a.

"Kha i rawn harh ta maw; a teuh ther ther hle mai che" nui chung hian a lo ti a.

Snap Lunt chuan thil thlen dan chu a han ngaihtuah let a, a thih teuh zia leh a laka hepa awm dan te pawh chu a ngaihtuah a, a lawm hle rualin mak a ti deuh hlek bawk a.

"I ṭhianpa ka kaphlum a; engvanga min lo buaipui leh si nge i nih min hrilh thei em?" a han ti a.

"Ka ṭhianpa pawh a ni chiah lo; tin, Miguel kha ka ngaina lem lo bawk a ni?" tiin chupa chuan a lo chhang a.

Snap chuan amah leh Mexican pa an inhmachhawn laia chupain a chhan dan te a han ngaihtuah leh hnu chuan, "I chungah ka lawm hle mai" a ti ta sap a.

"Belly ka ni; khawia kal tur nge i nih chu le?"

"Sweet Valley Ranch lamah kal ka tum a ni; a panna kawng awlsam deuh min hrilh thei lo maw?"

"I kal kual hle mai a..." tiin Belly chuan Sweet Valley pawhna hnai ber nia a hriat chu a kawhhmuh ta a.

Snap chu a tho a, a Sakawrah lawnin, "Belly, ka lawm e...ka kal mai ang'e" a han ti leh a, kawng a kawhhmuhna lam pan chuan a kal leh ta a. Sweet Valley a thlen dawn chuan hmanhmawh zeta Marshal-in a Sakawr a rawn tlan tir puat puat chu a tawk a, a enzui vang vang a.

Marshal ngaihtuahnaah pawh chuan heng mi ṭhenkhatten Sweet Valley an ngaihven ta viau mai chu a riak reng a, a hrethiam lo kher mai. San Jose khuaa lo thleng thar te hian engvanga Sweet Valley pan kher nge an nih hlawm tih chuan a rilru a kap ru tlat a.

Snap-a'n Ranch a va thlen chuan Jim Silver-a ruang phum tura an lo inbuatsaih mek lai chu a va nang ta a ni. Sudden-a te ho chuan an lo en ṭhap a, a lu a tuam bar mai te leh a hmel pawr phang mai te chu mak an tih hmel deuh a. Amah pawh chuan ruang a han hmuh chuan mak a ti ve hle tho bawk.

"Snap, engti zia nge? Buaina i tawk elo?" Sudden-a chuan a lo ti a.

"Mexican pakhatin min ngaina vak lo a ni" tiin a thil tawn chu a han hrilh hlawm a. "Nangni zawk hi...Silver a ni maw?" a ti zawi ta sap a.

Sudden-a chuan Jim Silver-a ruang an hmuh dan leh thil awmzia chu a han sawi nawn leh a.

Snap bawk chuan, "Jim, helai boruak hi kan beisei aiin a ṭha lo a nih dawn hi!" a han ti leh sap a.

"Puakruk hmang ngeia mimala inhmachhawnna a la tam khawp ang" Sudden-a chuan a lo ti nghat a.

Jim Silver-a ruang chu miparuk te chuan urhsun deuh hian an phum a, an vai chuan an ngawi nghiai hlawm a.
* * * * * * *

San Jose khuaah chuan Sheriff pakhat hi a lo lut a; chu chu San Angelo khaw Sheriff a ni. Tunhmaa Gunman sawi lar tak ni ṭhin, mak tak maia a thil tih sual an ngaihdam sak tak Cole Griffin leh Deputy pahnih hi a rawn hruai a.

Sudden-a ten Sweet Valley an thlen aṭanga karhnih deuh thaw chhung chu eng thil danglam teh vak mah a thleng lem lo va, San Jose-ah chuan Sudden-a leh a ṭhian te pawh chu an la lut leh ta lo reng reng bawk a ni.

Chumi karhnih chung deuhthaw chu Sudden-a chuan Sweet Valley ram fan kuan a hmang a, a chhehvela Ranch te lak chuan Matthew-a ram chu a zim hle na a, ram leilung ṭha lo leh chhawrtlak loh lai a awm miah lo thung a ni. Chipchiar deuhin a fang kual a, a Sakawr Blue Devil nen chuan nitin deuhthaw mai hian an chhuak a, thil hriat belh emaw, ruahhmanna thar siam theihna tur khawp ngaihdan nei thei turin thil awmzia leh kalphung hriat chian a duh a ni.

Matthew chu Bawng vulh tur lei belh turin thurawn a pe a, tunah chuan Sudden-a pawhin Marshal Ben Harvey hian Sweet Valley hi lei a dil fo tih pawh a hre tawh a, a ram ṭhatna piah lamah lei ngei a tumna chhan thildang a awmin a ring tlat a; mahse Mathew te nupa hian eng teh vak an la sawi duh chiah lo si lo va, amah ngei hian thil awmzia hriat tumin a ngaihven reng rih ta zawk a ni.

Snap leh Yorky chu an chhuak ve ngai lem lo va, Sudden hian Matthew te nupa ti buaia rawn lenchilh ṭhin tu hmaituam ho kha an la rawn kal leh ngei a ring tlat a; chumi huna lo awm turin Snap leh Yorky hi a duh tlat a ni. Sweet Valley hnaiha awm Ranch pahnih hi an lakah chuan Ranch lian tak an ni tih pawh a hre tawh a, an michhawrte chungchang pawh a hrechiang ṭan viau tawh a, indona chu a thleng mai chuan a ring lo; mahse midang ṭha tak chu mamawh belh hle hian a inhria a. Puakruk kah lama ngaihtuahawm loh tak, mimal inhmachhawn a ṭul pawha rang ve tawk tak pakhat chu a duh khawp mai a. Helaia khaw lian lo, khaw te tak pawh ni chuang lo, Texas leh Mexico inrina aṭanga Mel 100 vel leka hla San Jose hian Outlaw, Gunman, Killer leh Bounty Hunter te fuankhawmna a nihna hi an tana fimkhur a ngaihna a ni a; heti ang khaw langsar tehchiam ni si loah hi chuan an chungah engpawh a thleng thei.

Snap leh Yorky chuan Matthew te nupa chu an pui ṭhin a, Ran In, Chhek In leh thil ṭul dang an khawih a, engmah ti buaitu awm lovin hun an la hmang zel rih a, Yorky ṭawngkam takin, han rik deuh rap rapna tur thil an la tawng leh lo a ni.

Nikhat chu Sweet Valley ah chuan Cowboy pangngai inthuama inthuam tlangval pakhat hi a rawn lut hlawl mai a, chumi ni tak chuan Sudden-a pawh a a kal chhuak lo va, rawn kal thar chuan Matthew te nupa hnenah chuan hnathawh tur hi a rawn dil a; mahse Matthew chuan hnathawktu tur an mamawh loh thu sawiin ṭawngkam ṭha tak si hian a lo hnar a. Chupa chu Snap leh Mexican pa an inkah ṭuma lo awm ve Belly kha a ni.

Sudden chuan Matthew chu kaihrangin thil a han sawipui a, a thil rawt chu Matthew-a'n a remtih hnuah Belly bulah chuan a rawn kal a; amah a han en vang vang hnuin mi rintlak tak a nih a ring a, nakkinah thil eng emaw thleng ta se midang an la mamawh belh dawn a ni tih a hria a.

"Midang hnena thawh angin hetah chuan hlawh kan dawng mumal dawn lo va..." Sudden-a chuan a han ti a.

"Chu chu ka beisei ber pawh a ni lo, mi dik lo lama awm ka hlau a; helai ram vel boruak hi la lum hle dawna hriat rukna ka nei a. Chu chu hunawl hmanṭhat nan ka duh deuh maw le" Belly chuan a lo ti a.

"A ṭhat chu...mi rintlak chu kan la mamawh viau mahna" Sudden-a chuan a lo ti leh mai a.

Chupa chuan Snap chu a han en a, a nui sak a. Snap pawh chuan pangngai tak hiam a lo be ve a.

"Khua aṭangin em ni i lo kal?"

"Aw ni e"

"Thuthar te a awm em?"

Belly chuan, "Nimin piah khan San Jose ah chuan San Angelo Sheriff a rawn thleng a ni, tunhmaa Gunfighter turu pawla an sawi ṭhin Cole Griffin pawh a rawn hruai..." a han ti a.

Cole Griffin hming a han sawi rik chuan Sudden-a chu a lo nui sak a, "E heu! Griffin chu dan chhungah an lo la lut tawh elo?" a lo ti a.

Belly chuan, "A landan chuan Deputy niin a lang" a lo ti leh a.

"San Angelo Sheriff chuan heng lam lamah eng'e a rawn tih chu le?" tiin Sudden chuan a zawt ta zel a.

"An sawi hmangin Outlaw pakhat, 'Sudden' an tih ṭhin a rawn zawng a ni awm e" tiin Belly chuan a sawi zel a, "Hman deuhah Johny Lumbo leh a ṭhian ten Big Ben Saloon ah Sudden-a beihrawn an tum a ni awm a, chu thuthang chu San Angelo Sheriff hian lo hriain Silai chelek rang tak hruaiin a rawn thlithlai niin an sawi" a ti ta zel a.

"Sheriff chu khuaah a la awm em?"

"Khua ka rawn chhuahsan thleng kha chuan a la awm"

Sudden-a chuan nui chung hian, "Sheriff chu ka hmu ve teh ang" a han ti a. A insiam a, kal nghal mai hi a tum a.

"Jim, ka kal ve ang" Yorky chuan a lo ti vat a.

"Yorky, hetah lo awm rawh, keimahin ka kal dawn" Sudden-a chuan a lo ti mai a.

Snap chuan Sudden-a chu ngun zet hian a han melh ren rawn a, "Jim, a âtthlak kher mai" a han ti a.

"Snap, hmuh ngei a ṭulna riau a awm a ni" Sudden-a chuan a han ti leh a.

"Ka hrethiam e" Snap chuan a ti sap a, a thiltih lai chu a chhunzawm ta daih a.

Sudden chu a nui mai a, Belly hnenah chuan, "Mr. Matthew chuan i awm a rem tih kha, lo inti tlangnel rawh" a ti a, SanJose khaw lam pan chuan Blue Devil chu a kal tir ta nghal a.

An khawsa zia chu Belly chuan mak a tih hmel hle mai a, Sudden-a kal ta chu eng emaw chen a enzui reng a.
* * * * * * *

Lehlamah BB Ranch ah chuan Jason Curse leh a hote chuan chet dan tur an la ruahman reng a, tun maia bawhzui tut tut erawh Ben Harvey chuan a rem tih loh avangin San Jose leh a chheh vel chu a la reh rih mai zawk ni hian a lang a ni. Sweet Valley lamah mipathum an lut a, hna an thawk mek a ni tih te pawh chu an hre ve vek tawh a. A lut zinga pakhat phei chuan Sweet Valley ram chhung chu a fang chipchiar hle tih thlengin an thlithlai a; an la ngawi rih mai mai a ni.

Ben Harvey chuan Jason Curse hnenah chuan an ruahman lawkna a hlawhchham avanga San Jose khaw Marshal a ni zui ta zel chu an tan leh amah Ben Harvey tan ngei pawh a ṭhat tawk loh thu a sawi tawh a.

Ni e, an michhawr te zingah Owtlaw an awm nual a, a ṭhen te phei chu San Jose khaw chhunga mi zahawm chin leh mi pangngai chinin misual tak an nih thu an hriatchian em em te pawh an ni a, chung ho chu an awm hle hle theih loh chang a awm lo thei lo va, buaina an siamin Ben Harvey chuan Marshal ni chunga a hum a ngai deuh fo ta si a, chu chu khaw mipui zinga a zahawm leh mi pangngaite chuan hriatthiam loh chin an nei thuai mai dawn a, Ben Harvey-a'n mite zah a kaina hi a pawthniam thei dawn tih a hria a ni.

A dik tak chuan Marshal thlan ṭuma a inrawlh chhan pawh, inthlantlin tir a, mawihnai leh hmingthatna hlawh chunga Jim Silver-a hnenah Marshal hna kha hlan a, an lamṭanga siam tum a ni a; mahse Jim Silver kha a lo â bik si lo va, an ruahmanna a tlawlh ta a nih kha. Marshal a nih reng chuan Sweet Valley ruam neih an tumna kawnga an ruahmanna a ti sukuk thei dawn tlat hian a hre tawh a.

Jason Curse leh Ben Harvey hian midangin an hriatpui ve miah lovin Sweet Valley neih an tum tlat nachhan ṭha tak hi a awm a, Matthew-a hnena kalin Ben Harvey hian vawi tam a ram hi lei a dil tawh a; mahse a man a tana Dollar tam tham tak a tiam pawhin a la hlawhtling thei lo a ni.
Jason Curse hian mihring ruaiin inthup chungin Sweet Valley hi a rawk thung a, hrek chera hralh tir mai theih an beisei a ni; mahse ani pawh a la hlawhtling thei chuang lo. Tunah phei chuan mithar pakhat leh a ṭhiante pahnih an awm ve tawh lehnghal, he mithar lah hian Sweet Valley chu a vil hneh hrep lehnghal a, awlsam lam aiin a harsa tawlh tawlh dawn nia a lan avangin a lung a awi lo ṭan hle tawh a.

Jason-a rilruah chuan mithar(Sudden-a) chu a lo awm leh ṭhin a. 'Tunge maw a nih le?' tiin a inzawt a.

Chutih lai chuan Johny Lumbo a rawn lut a. "Curse, San Jose ah San Angelo Sheriff a awm a ni"

"Khati khan min ko tawh suh ka tih kha Lumbo" Jason chuan a han ti hmak a.

Lumbo chu a nui suk a, "Jason, Sheriff chuan a hmu duh ngei ang che" a han ti leh a.

Jason chuan, "Min rawn hmu se la" a lo ti ve mai a.

"Nangma'n i hmu dawn lo em ni? San Jose i kal lohna pawh a rei tawh viauin ka hria" Lumbo chuan a lo ti leh ṭalh a.

"Sheriff chu cham rei lo se a ṭha ang" Jason chuan a ti hmak a.

Tumahin an ruahmanna leh an thil tih tum hi an tih sukuk a rem ti dawn hauh lo, Lawman pawh ni se, Gunman dang emaw, Bounty Hunter pawh an dang chuang lo, a ṭul chuan a dahṭha mai ang, amah dotu leh kalhtu hi a mamawh hauh lo a ni. A han inngaihtuah vang vang a, chutah Lumbo lam chu a hawi a, ṭhen suk pahin a Winchester Rifle a la chhuak a. "Lumbo, Sheriff chu ka hmu chak ta riau mai; San Jose khaw boruak pawh ka hip khat teh tak e" a han ti a. Pawnah chhuakin a Sakawr chu Saddle a bel a, inthazo deuh hian a lawn kai a, a ṭhianpa chu a han thlek a, "I lo kal ve dawn em Lumbo?" a han ti a.

"Ka rawn kal ve ang'e"

Chu'ng Gunfighter pahnih te chu Sudden-a'n San Jose lam pana a Sakawr a kal tir tlai lam chuan khaw lam pan chuan an kal ve ta a ni.

Buaina awm lovin San Jose chu karhnih dawn a awm ve tawh chu a ni a; mahse rei chu a reh kher lo maithei bawk. Mak deuh maiin khawi khua emawa Gunman lar tak emaw, Killer, mite ṭihkhai an luh reng reng hian buaina a awm duh khawp mai a, ruang hi a chhuak duh khawp mai bawk. San Jose khuaa kuang siamtu hi heti ang hunah hian mi tam takin an lo dawr tawh ṭhin a ni

[Ngaia]

Chapter 10

Sudden-a'n San Jose a thlen chuan San Angelo Sheriff awmna leh a thlenna Hotel a ngaihven nghal a. Sheriff chu nuthlawi hmelṭha leh duhawm Mina Chrisandy-i Saloon-ah a awm tih a hria a, a thlenna Hotel lam zawk chu a han pan a. Hmanhmawh tak chuan Sheriff chu midang tamna zinga hmuh nghal mai a la tum lo va, mimal taka hmuh phawt a duh a ni; chuvanga Lucky Chance Saloon pawh pan rih lo a ni.

Hotel a pan a, khualchhawn hnenah pehhel deuh tak hian Sheriff pindan a zawt a, a han hriat chuan lawm takin a nui sak a, John Denver-a Saloon, Stranger Come Back ah a lut leh a, Bar-ah zu a in a, reitawk fang a awm hnuah Sheriff thlenna Hotel lam chu a pan leh ta a ni.

San Angelo Sheriff, Jack Murdock hi pa rothap leh ngap, huaisen zet mai a ni a, Silai chelek lamah ai mahin a rorum ṭhin em avanga lar leh, Outlaw ṭhenkhatin an hlauh a ni. A bial chhungah Sudden-a chetna ni-a an sawi hian a hnen a thleng fo mai a, inrawkna leh insuamna, Bank rawk leh mi lambun bakah Sudden-a tih ni-a chhal tualthahna pawh a thleng fo tawh a ni. Amah Sudden-a hi hmaichhanah ngei a lo hmu ve tawh a; chutih lai chuan naupang tak a la ni. Miten a Puakruk phawiran zia leh kahthiam dan an sawi hi khual thuthang leh ar pan chuk satliah mai a ni lo tih pawh a hria a; heti khawpa miin khawthlang rama an sawi lar hat tawh hi chu mi namailo tak an ni ṭhin tih hi a hre ve tlat.

San Jose Town Marshal Ben Harvey pawh a hmu tawh a, Johny Lumbo leh a ṭhian ten beihrawn an tum mipakhat chungchang pawh chu a zawt tawh nghe nghe a ni. A ruk tak chuan Ben Harvey hian San Angelo bial Sheriff rawn kal hi a ngaimawh hle a, Law Officer ve ve an nih si avangin a tan tihngaihna a awm der si lo, a awm chhunga buaina a thlen loh a duh hle a ni.

Lucky Chance Saloon-a zu ina rei mawi tawk a han awm hnu chuan Sheriff Jack Murdock chuan Cole Griffin chu a han bekbawr zauh a, Saloon chu chhuahsanin a thlenna Hotel chu a pan ding ta nghal a.

Chutih lai chuan Hotel khualchawn dawhkan nghengin Sudden-a chu kawisawi fe hian a ding a, a lukhum chu hmalamah a hmai chanve hliah hian a kuai kun a, lo lut thar chu ngun zet hian a lo chik a. A thlenna pindan lam pana a chhoh hnu chuan rei vak lo a han nghak leh hlek a; chutah, Hotel chhawng chung pindan lam chu a pan chho ve ta a ni.

A pindan duh chu a pan phei zel a, inthlahdah miah lovin a inring ru em em a. He Sheriff hian a hmel hi a la hriat ngei a ring tlat a, khatih lai khan la naupang hle mah se, an intawn dan kha Jack Murdock-a tan chuan chhinchhiah a awl dawn tlat a ni. Tunah hian amah man tumin a rawn kal ni ngeiin a lang a, Sudden-a chu a fimkhur hle a, in man tir ngawt chu a tum lo hle a ni; mahse, amah zawngtu Law Officer te hi rang taka a hmachhawn vat loh chuan a tan thil a buaithlak zo vek thei zawk dawn tih a hria a, engpawh huama a nihna ang anga hmachhawn turin hmuh nghal mai hi ṭha a ti a ni.

Kawngka chu a han kik kauh kauh a, a reh vang vang hnuah, "Tunge ni?" inchhung lam aṭang chuan a rawn ti a.

Sheriff Jack Murdock-a aw hi a thum pawr deuh chhar a, amah hi a landan maiah pawh Western pa dik tak nih a tling a, hmuihmul a zuah chhap a, Suit dum hain Lukhumparh tlangchhah parh hlai lutuk lo, parh tawi chi ni si lo hi a khum a, a kawrâwm dinglamah Sheriff Badge arsi lem a tar va a. A kawng hmalam veilam sir deuhah a Puakruk Navy Cold .44 hi dinglam hawia a kâwm dahin, kut dinglama phawi theih turin a pai a, a hawiher leh chezia reng rengah Wild West hun laia Sheriff niawm hliah hliah hmel hi a pu sa reng reng a ni.

Sudden chuan Pindan pawn aṭang chuan, "Sheriff, i mi zawn chungchangah biak che ka duh a ni?" a han ti a.

Sheriff chu tukverh bulah hian a lo ding a, a pindana lo lenglut chu ngun deuh mai hian a lo en reng a. Sudden-a chu kawngka bul maiah chuan a la awm a, muangchang hian kawngka chu a khar a, kawngka bula bang nghengin zawi deuh hnak hian a han ding kawisawi deuh a; Sheriff chuan a chezia chu a lo en ngun kher mai.

"Tlangval, eng'e ni min biak i duh nachhan chu?"

"Sheriff, kei hi min rawn zawng tih ka lo hria a?" Sudden-a chuan a han ti nghal tawp a.

"Ka va hrethiam lo ve...kei hian ka zawng che maw? Tu nge i nih a?" Sheriff chuan a lo ti hû a.

Sudden-a chuan a lukhum chu tlemin a kuaidak hret a, ngun deuh maia Sheriff khawsa zia en pahin, "Ka hming chu James Green a ni; mahse Texas ah hi chuan 'Sudden' tia koh ka ni!" a han ti leh a.

San Angelo Sheriff Jack Murdock chu thawklehkhatah a hmel a rawn danglam nghal vek a, a chezia leh mitmengah chuan a inring em em nghal a ni tih a lang thei bawk, ṭawng miah lo hian Sudden-a chu a en reng tawh mai a; hmana rawlthar hlimhlawt a lo hmuh tawh kha tunah a hmaah a ding leh ta a ni. A tir khan a lo hre nghal mai lo chu mak a ti hle a; mahse a lukhum a khum kun bakah tlema a lo upat ve deuh tawh avangin a âwm tho mai. Amah hmachhawntu chu a han en chiang lehzual a, a hmel pangngai thlap leh inring ru em em tih hriat si, thinrim hmel pu miah lo chunga a mitmeng enchiana zuamawm der si lo leh, a dar pharh leh kawng fek tak, sang ṭha zaih mai leh, a kut pahnih a khel zawna a thlakthla hnak mai te chu a hmuhhmaih hauh lo. Eng'e lo thleng dawn tih ngaichangin inring em em hian a awm a, hepa hi man tumin a zawng rei tawh a, a veh kual fo tawh, a hlau miah lo va; a Deputy te leh Cole Griffin-a tel lo va hmachhawn a ngai ta mai erawh pawi a ti hle a. A rilru chuan Silai phawi mai tumin a inbuatsaih ta a.

Sudden-a chuan Sheriff mitmeng aṭang chuan a thil tum chu a lo hrethiam nghal mai a, "Sheriff tum duh suh, min khalh hman chuang lo vang" a ti ta sap a.

Sudden-a chu a ṭawng ring lo hle na a, a chiangin a fiah hle thung; a mitmeng aṭang chuan a ti mai mai lo tih leh awmze nei lo va sawi a ni lo tih chu Sheriff chuan a hrechiang hle a, a thil tum a rawn hrethiam nghal mai pawh chu mak a ti hle a, Silai phawi mai tuma a rilru a siam chu a inthlahdul hret a, mahse a la inring ve em em tho a ni, 'Hepa hian thu awmze nei lo a sawi lo vang' a ti rilru a. Ni e, Sudden-a hian thu awmze nei lo a chhakchhuak mai mai ngai tlat lo.

Sudden-a bawk chuan, "Sheriff thah che tuma rawn kal ka ni lo, thil hriatthiam loh a awm avangin nangmah hmu tur leh be tur chea lo kal mai ka ni zawk" a han ti a.

An ngawih vang vang hnu ah Sheriff chuan, "Outlaw i ni a, thlahnih kal ta mai pawh khan San Angelo aṭanga mel 50 vela hlaah mi i rawk a nih kha, i rawk pa chu i that zui nghal bawk a ni" a han ti a, Sudden-a chu rum zet hian a han melh a; chutah pawn lamah chuan ke pen thawm a lo awm a; Sheriff chuan Cole Griffin-a nih ngei ringin chulai hun remchang chu chuh vat tumin a rilru a siam ta nghal a.

Sudden-a chu za lo zet hian a ṭhen sak a, chutah a kut chu a phe vuai a, mitkhap kar pawh tling mang loah chuan a kutbawr dinglamah a Puakruk hman ṭhan zet chu a rawn chawr chhuak nawlh a. Sheriff-in a rilru a siam fel meuh chuan Puakruka tin a lo ni reng tawh a.

"Sheriff, Killer ka ni lo, ni ila chuan tunah hian ka that tawh ang che" Sudden-a chuan a han ti te te a, "Ka mi hmachhawn tawhte khan min nawrlui ṭhin, Silai an chuh hmasa ziah bawk; chubakah thlahnih kalta khan Arizona State-a Hattchet Foly khuaa ka Ranch-ah ka awm daih a ni...in thil hriat fuh loh chingfel turin leh ka hming thangmawi lo zet hi siam ṭha turin Texas hi ka rawn lut leh a ni" a han ti a.

Ke pen thawm chu a reh ta daih a, Cole Griffin-a chu a ni lo tawp a ni ang. Sheriff chuan Sudden-a Puakruk kaw hmawr thim raih chu a melh ran mai a; he Puakruk hian amah thah tumtu te nunna a lo la fo tawh a ni.

Sudden-a chuan a sawizawm leh a, "Sheriff, hmanah kan inhmachhawn tawh kha...ka la hre reng a sin, khami tuma min man i tum nachhan ka mi thah pa kha Killer dik tak a ni a, ani khan a Silai a phawi hmasa a, keiin Silai ka chuh ve chuan a phawichhuak kim tawh a ni; ka sahim nan ka kahhlum mai a ngai ta a nih kha. Chubakah, ka tih anga an sawi tam tak hi ka tih a ni ngai hauh lo, mi ka rawk ngai lo va, ka suam ngai hek lo, loh theih loh thilah lo chuan Silaiin mi ka hmachhawn mai mai ngai lo bawk" a han ti a.

Sheriff chuan, "Bounty Hunter leh Gunman ṭhenkhatin hming chher tumin an veh reng che a, ka lak aṭangin talchhuak mah la i him tak tak chuang dawn lo...Mr. Sudden" a lo ti leh chhar chhar a, a hmelah chuan a la hmin lo hle tih a hriat a.

Sudden-a chu a lo nui mai a, "Hei hi en la chhiar rawh" tih pahin a Ipte aṭangin lehkha pahnih hi a phawrh chhuak a, Sheriff Jack Murdock chu a pe ta a; chung lehkha chu Arizona Governor hnuaia Deputy Sheriff a nih thu lanna leh, Governor Bleke-a'n Texas Governor Edmund Jackson Davis hnena Sudden-a chungchang dik tak a sawina lekha a a thawn hnua, San Jose khuaa a kal a remtihna leh mawhphurhna a pekna lehkha Texas Governor hming chhut hnan ngei a ni a.

"Wanted nihna tur khawpin thil ka la tisual lo" Sudden-a chuan a ti leh nghat a.

Jack Murdock chuan chung lehkha pahnih te chu a thlek vung vung a, a tawpah chuan a thaw huai a, hahdam hmel deuh zawk hian, "He khua leh a chhehvelah hian mi tuihnai lo tak tak an fuankhawm a, i tan an hlauhawm thei hle ang" tiin Sudden-a hnenah lehkha chu a pe let leh ta a.

"Sheriff, helai hmun hi chu ka kutah dah rawh, ka tih ṭhin danin ka chingfel dawn a; buaina hi hmuh theihin a alh chhuak thuai tawh ang" a ti bung nghat a.

Chu Law Officer chuan amah lenchilha zep miah lo va Sudden-a a nih thu rawn sawitu, Puakruk pahnih fual hnelh hnawlha pai chu chik lehzualin a han ennawn leh ngat a, a thusawi hi a hlen ngei dawn tih pawh a ring nghet ta tlat a, ṭul lo tawpah he khuaah hian a kal ni te hian a han inhre lek lek a, nui huah huah pah hian Sudden-a chu a han en a, "Mr. Green, i silai kha dah tawh rawh, Governor Bleke chanchin chu ka hre ve tawh ṭhin, ani leh Governor Edmund-a'n an rin phawt che chuan ka inrawlhna tur a awm lo vang; naktukah San Jose kan chhuahsan ang" a ti ve ta a.

"Ka lawm e. Sheriff...helai buaina hi a landan ang hi a ni lo vang tih ka hlau ngawt mai" Sudden-a chuan a lo ti leh a.

"Chu...eng i sawi tumna nge?"

"Mi hi an thi zeuh zeuh ang..." a lo ti sam mai a, a Silai chu a bawmah zei zet hian a han thawlh lut ve ta a

"Ni e, Gunfighter hnawksak leh Killer ho te...Outlaw ṭhenkhat te hi chu thi ṭhen nual rawh se" Sheriff chuan a lo ti ve mai a.

"Ṭhenkhat chu thu-a sawifel pui theih an ni dawn lo va, ka Silaia ka hmachhawn ngei pawh chu an ngai hlawm ang" Sudden-a chuan a han ti leh a.

"Mr. Green, fimkhur ang che; helai hi i chinfel ngei erawh ka ring"

Sudden-a chhuah hnu chuan Sheriff chuan an inbiakna chu a ngaihtuah zui vung vung a, a tawpah chuan a nui vur vur a, chu tlangval chezia leh huaisenna chu ngaisang ru tak hian Hotel chhawng hnuai lamah chaw ei turin a chhuk ta chhut chhut a.

Zan lamah chuan Big Ben Saloon chu a bengchheng hle mai a, a ṭhenin Poker khelin, a ṭhenin zu no an dawm a, rui phur hawklakin hmeichhe awm ve ṭhenkhat an lo chhaih kuah nawk nawk hlawm bawk a; he tih lai hian Town Marshal Ben Harvey erawh chu a Office lamah a awm a ni.

Jason Curse leh Johny Lumbo chu Saloon chhungah an rawn lut ve ta a, Lumbo zawk chu a rui tawh hle ni hian a lang a, Jason erawh chu a meng fim kar mai thung a. Hetah hian an ṭhian te tam tak an awm tih an hria a, he hmun hi chu an nghawng lenna hmun a ni.

Lumbo chu a ṭhian ṭhenkhat te dawhkan lo kil mek lam pana kalin a ṭawng lung lung a; hepa rui fuh tawh laklawh hi chu a harhfim laia a ṭawngduh loh leh nelawm loh ang aia phunglung leh nikhualo zet mai hi a ni thung a. Jason erawh chuan Bar lam a pan nghal a, Danny hnenah chuan San Angelo Sheriff a rawn kal leh kal loh zawi sap hian a han zawt a, Bar nghaktu chuan a lu a lo thing nar nar ringawt a. Chutah Jason chu a chhuak zui nghal vat a.

Jason Curse a chhuah hnu lawkah Snap Lunt chu Big Ben Saloon ah chuan a rawn lut ve nawlh mai a. Ani hian Sudden-a'n Sweet Valley a chhuahsan hnu lawk khan a rukin Yorky leh midang ho pawh hrilh hran chuang lovin a zui ve ta vat a, hepa hian ngawi reng chungin YZ Ranch lama an Pu ber hi a ngaihtuah fo a, chu chu an Pi ber Norry(Noreen) i duhdan leh Snap Lunt hnena a ruka a chah dan a ni reng a, an Pi hian Sudden-a hi hmeichhiaa thuchang takin a ngaihtuah em em si a, a ruka veng ṭha tur leh vil tlat turin Snap Lunt hi a duh a ni. Sudden-a hi amah chauh pawhin ngaihtuahawm a ni miah lo tih a hrechiang a; mahse Puakruk phawirang leh kah thiam tak pawh hi hnunglam aṭanga kahhlum theih an nih ve tho avangin leh an Pi ber hnena a intiam tawh angin Sudden-a bula awm turin a kal hnu lawkah San Jose a pan ve ta nghal a ni.

Khawthlang rama Puakruk phawirang leh kahthiam Gunfighter turu zinga chhal ṭhenkhat te pawh an hnunglam aṭanga kahhlum an lo ni tawh ṭhin a, Will Bill Hickock chu Deadwood-ah a hnunglam aṭanga kahhlum a ni a; chuti ang bawkin Doc Holiday leh midang chungah pawh a lo thleng tawh a. Mi dawihzep tak tuin emaw hnunglam aṭanga Sudden-a an kah ve mai hi Snap hian a hlauhpui ṭhin a ni.

Sudden-a thung chuan khuaah riah mai chu a la tum deuh deuh a; chu chuan thil pawi tak a thlen ang a, San Jose-ah leh Sweet Valley lamah thil thleng a awm ve ve phah dawn ta a ni. Hemi zan aṭang chiah hian Sheriff hnena a lo sawi lawk tawh ang leh a rinaia rangin helai chhehvel boruak chu a alh chhuak ta ngei reng a. Snap Lunt-a'n khua a rawn luh ve thu chu a la hre hauh lo va.

Marshal chuan zan dang ang lo takin ama Saloon pan lovin Mina Chrisandy Saloon chu a pan, chutah chuan Sheriff Jack Murdock leh a Deputy ṭhenkhat te pawh an awm nghe nghe a, Cole Griffin erawh chu Denver-a Saloon-ah a awm thung. Stranger Come Back Saloon-ah hian Sudden-a pawh Bar dawhkan bawhin zu no a dawm a, Cole Griffin chuan amah chu a hre ve lo tih a hria a, ani Sudden-a erawh hi chuan midang nena an inhmachhawn lai a hmu tawh thung a ni.

Denver-a Saloon, Stranger Come Back leh Mina-i Saloon, Lucky Chance hi inhnaih te an ni a, Harvey-a Saloon, Big Ben erawh chu heng Saloon pahnihte nen hi chuan a inhlat deuh hlek a, thawm bengchheng karah chuan Silai pawh ri se a hriat lutuk lo vang.

Sudden-a chuan tlem te te hian a no dawm laia zu chu a in a; chutih lai chuan Silai hi indawt zatin vawithum a rawn ri ṭhuai ṭhuai a, Denver-a Saloon chhunga lawi lut te chu an phawk hra hlawm a. He Saloon-a lawi lut ṭhin te hi chu mi pangngai tak tak vek an ni tlangpui ṭhin.

Sudden-a chuan Silai rikna chu Lucky Chance Saloon ni ngei hian a hria a, Sheriff kha, chu Saloon-ah chuan a kal tih a hre bawk a, Denver-a Saloon ang lo takin Ben Harvey Saloon leh Mina Chrisandy Saloon-ah hi chuan mi ṭawp tak tak an kal fo tih pawh a hre bawk a, eng'e thleng tih hriat tumin Lucky chance Saloon chu a pan ve ta nghal a ni, Denver-a leh midang ṭhenkhat pawh chuan an zui ve bawk a.

A va thlen chuan Saloon chhung lai takah chuan Sheriff Jack Murdock chu a lo ding a, a dar veilam chu a lo dawm a, a bul mai chhuatah chuan Sheriff Deputy pahnih te chu an lo let reng a, pakhat chu a la thi lo tih hriat deuh hian rum hawk chungin a lo la che ṭial ṭial a, pakhat erawh chu a thi tawh a ni ngat ang, che miah lo hian a mu hlawm reng mai a. Sheriff hmachhawn chuan mipakhat, Cowboy inthuam pangngaia inthuam ria sang lam leh sa pan hlenghlawng, kut zungtang zum sei sal mai, a kut veilama Puakruk hum hi a ding kak ṭah mai a; hemi hi Jason Curse a ni. Sherriff chu nui ṭha hian a lo en a, ani chuan rum em em hian a lo melh let ve thung a.

Chu mipakhat a han hmuh chuan Sudden-a chu, "Black Curse Jason" tiin a phun sap a.

Jason Curse chuan nuihzat awm deuh hian San Angelo Sheriff chu a han melh a, "Sheriff i rawn tla hla mah mah lo maw? Kei aiin i phawirang si lo..." a han ti a. "Tunah hian chance ka pe dawn che a ni; i Silai phawina kut lam a la ṭha a, i Silai kha i chuh ngei tur a ni" a han ti chhak chhak a, a Puakruk chu a pai ṭha ta nghal a.

Marshal Ben Harvey chuan an chezia chu a lo en reng a, chutah a rawn inrawlh ve ta a. "Duhtawk tawh rawh u...ka khuaah buaina ka duh hauh lo" tih pahin Jason chu a han melh hrâk a.

A sawi zawh rual deuh thaw chuan Jason Curse chuan a Puakruk a phawi dawk leh zawk a, a puak zui nghal thawr a, Marshal khel dinglama a Puakruk pai chu a va deng siah a, "Marshal i khua maw? Lo inrawlh suh, Mr. Murdock nen hian mimal taka chinfel tur kan nei...nang chu i Ranch lamah va haw rawh" awmze nei zeta tih pah hian rum lutuk maiin a han melh zui a.

Marshal chu a ding ngawi run a, kal sawn tum hmel hian a lang hauh lo.

"Marshal kal rawh...thah che hi ka hreh hauh lo a nia" Jason chuan a han ti chhum leh hmak a.

Marshal Ben Harvey chuan a mitmeng chu a han en a, namnul mai chi nia a hriat loh avang a ni chêk ang, muangchangin pawnah a chhuak ta a. Saloon aṭanga a chhuah hnu chuan a nui suk a, 'Jason, Sheriff kha han that ngei ang che' a ti rilru a. San Jose khuaah Sweet Valley mi chhawr ho an rawn lut kim vek tih a hriat avangin Jason-a sawi ang ngeia a Ranch BB lama kal chu a tum ta a ni. Chumi hmaa tih tur a neih pahnih chu a han hrechhuak zawk a, Denver-a Saloon-ah a lut a, Denver-a chu Lucky Chance Saloon-ah khan a rawn kal ve avangin mipakhat hnenah chuan a Marshal Badge chu a dah a, Denver-a lo pe turin a ti a, chumi zawhah hmanhmawh deuhin a Ranch lam pan chuan a Sakawr chu a tlan tir ta pur pur a. A suangtuah danah chuan, Marshal hna a bansan chuan San Jose khua, Outlaw leh Gunman tam tak luhkhawmna chu a chiri leh nuaih ang a, chutah Low Officer awmchhun Sheriff Jack Murdock a thih phei chuan...a ngaihtuahna chu hlimpuiin verther zet hian zan thimah hnuaiah chuan a nui sun sun a...'Chutih chhung chuan a duh tawkin a lo che thei tawh thung ang' tiin a duhthu a sam zui nuah nuah.

Marshal a vau chhuah hnu chuan Jason Curse chuan a thusawi ngai bawk sawiin Sheriff chu a han cho leh a, a Puakruk pawh a pai ṭha leh thlap tawh a. A phawi khalh dawn a ni tih inhrechiang hle lo se la chuan Jason hi heti ang hian a awm kher lo vang, a chan a ṭhat dawn loh chuan tumah fair takin a hmachhawn ngai tlat lo a ni.

Lucky Chance Saloon-ah chuan mi an ṭhahnem tehchiam lo va, Denver-a Saloon aṭang pawh khan tlema huaisen deuh chin lo chu an kal ngam lo. Mak tak maiin Cole Griffin pawh kha a rawn kal ve miah lo va!

Sheriff leh Jason chu an inmelh ran mai a, a tu ve ve mai pawh chuan Silai an chuh ngei chu a ngai dawn ta a ni. Pakhat hian engti kawng zawng pawhin Sheriff hi thah a tum tlat niin a lang a, chu chu Sudden-a remtih zawng a ni miah lo.

Jason chu a dawhthei lo ṭan tawh hle a, Sherriff erawh Silai chuh tum awm pawh hian a la lang lo va, ṭawng erawh a ṭawng miah lo va, a hmaa a mah cho em em tu chu nelawm loh zet hian a melh a, hlau emaw huphurh hmel emaw a pu miah lo va.

Ning âwm zet hmel a put zawhah Jason chuan a tum hlenchhuah ngei tumin a Silai chu a chuh ta nge nge a, midang ngawi ṭhup karah Puakruk chu a ri ring hlein a hriat; mahse Jason-a Silai chu a puak lo va, Sheriff pawh kah a ni ta hek lo.

Sudden-a chuan Jason-a chezia leh mitmeng chu ngun deuh hian a lo en reng a, a mitmeng a danglama Silai a chuh dawn tih a hriat veleh a tih tur a tih theih nan a inher rem ve nghal a, Jason-a'n Silai a chuh rual chiah chuan a kut chu hmuh hman loh hian a phe vuai a, Jason-a'n Sheriff kah tuma a Puakruk a lekkawh hma hretin a Puakruk chu a kah per sak lawp hi a lo ni a.

"Kei chu ni ila ka tum hauh lo vang"

Jason chuan a dinglam, veilam tluk zeta a hman thiam chuan Silai chuh a han tum leh a; mahse, àwka nelawm loh leh vawt raih, zawi leh fiah tak si hi a han hre ta a ni; chu thu phuhchhuaktu mit chuan amah chu a rawn en ran mai bawk a, a Puakruk kaw hmawr thim raih mai chuan a rawn tinzawn nasa mai.

"I han ti chhin dawn em ni?" tih pahin Sudden-a chu Jason-a hmachhawn zawng chuan a kal chhat chhat a. Sheriff hnenah chuan lo inthiarfihlim turin a han hrilh a, chutih lai chuan Saloon neitu Mina Chrisandy chuan hlau leh ṭi deuh dai chung hian Sheriff hliam chu a rawn bawihsawm ta a. Deputy pahnih te erawh an thi fel ve ve tawh a ni ang, nichina tal tal pawh kha a che tawh miah lo.

"Kah hliam tawh hnenah i kahhlum ngei theih nan Silai chuh turin i nawrlui a, a dik ka ti chiah lo a ni...kha Marshal ṭawng zet kha i tirbo ta bawk a, Sheriff hian min rem tih sak loh ka ring hran lo va; chuvangin ka duh danin kan inremsiam dawn a ni" Sudden-a chuan a han ti ta a.

Jason chuan, "Eng ang inremsiamna nge ni a?" a lo ti nghat a.

"Kei chuan ka kap hliam ve lo che a, i khel dinglama kha Puakruk i la pai a, Black, ka hrechiang hle che a sin, veilam hmang ṭhin i ni a, dinglam pawh veilam tlukin i hmang thiam tho bawk. Keiin dinglam ka hmang ṭhang a, veilam pawh ka dinglam tlukin ka hmang thiam ve tho bawk. Tunah hian ka Puakruk hum lai, ka dinglam ami hi ka dah ang a, veilam ka hmang ang a, nangin dinglam i hmang ang..." a ti ta hmiah a.

Jason-a'n a hmaa dingin a hming ngeia a rawn koh takah chuan chupa chu tunge a ni tih a hrechhuak ta nghal a. Texas rama Outlaw hmingthang ber mai chu tunah hian a hmachhawn mek a ni; a ṭhian ten Sudden-a nia an sawi, an lambuna an kahhlum tak kha Sudden-a a ni lo tih chu a rilru-ah a rawn awm nghal a. Chutah, "Kan en ang chu" a ti ve ta nghat a.

Sudden-a chuan a hmaa ding chu uluk zeta en reng chung hian muangchangin a Puakruk hum lai chu Bar dawhkanah chuan a dah a, muangchang tak leh fimkhur tak zela chein a kut chu a khel zawnah a pahnihin a thlak zawi ta hnak a; mipahnih te chu Silaia inhmachhawn turin an inpeih ta.

Chutah hmeichhe aw fiah tliangral mai hi a rawn au ṭhat a, "Ka Saloon-ah tumah in inkap tawh lo vang" tiin Sudden-a leh Jason Curse chu Puakruk pahnih hum chung hian a rawn en a, an pahnih chuan a tin ta ve ve a. Chu nu chu Mina Chrisandy a lo ni a, a hlauhtawng hmel te chu a lo reh vek tawh a, a hmel chu a tumruh hmelin a thusawi chu tih tlang ngei a tum tih a hriat hle. "Mipahnih an thi tawh, a tawk a ni...nang kha, Mr. Jason ka Saloon aṭang hian chhuak rawh..." a han ti leh ṭhat a.

Sheriff Murdock pawh chuan, "Green, Jason kha kal tir rawh...mipahnih an thi tawh a...zanin atan chuan tawk rawh se" a lo ti ve ta bawk a.

Khawthlang mipa te hi an rothapin an rorum a, zawhna emaw chhanna emaw, thil hoteah pawh Silai chuh mai awlsam em em mah se, hmeichhia an zahthiamin hmeichhe hmelṭha tak an en dan phei chu a zahawmin an thlavang an hauh na ṭhin hle a ni; chu chu Western mipa dik takte rilru put hmang a ni. Jason Curse pawh hi Gunman leh Killer diktak niin, engkawng leh hawi zawng pawha mi thah mai hreh lo leh tim miah lo mah ni se, Western tlangval dik tak dang te ang bawkin chhungrilah Lady dik takte zahna rilru a nei ve tlat a, Silai chuh tumna rilru pawh pu lovin a inthlahdul zui ve ta mai a ni.

Sudden-a chuan, "Black, kan inṭhen mai a ngai chu a pawi hle mai" a han ti a, a nui zui sak a.

Jason erawh chuan engmah a sawi lo, muangchanga a Puakruk pakhat chu chharin a han dingchhuak a, chutih lai te chuan Sudden-a chuan inthlahdah hauh lo leh ngun em em hian a lo en a; mahse Jason chuan Mina-i avang chuan engtinmah chet a tum tawh bik lo. Muangchang leh fimkhur deuh mai hian Saloon chu a chhuahsan ve ta a ni.

Hetih lai vel hian Big Ben Saloon-ah chuan inkahna a lo thleng ve mek bawk a.
* * * * * * *

Sudden-a'n Sweet Valley a chhuahsan hnu chuan Yorky chu ngaih ṭha zan lo hian a awm a, Snap chu a hmuh loh zui tâk mai bawk si avangin a zui ve ngei a nih a ring nghal a, tlai thim dawn a ruaiah chuan a za sek tawh a, chumi ni maia rawn kal thar Belly hnenah chuan San Jose lama kal ve mai a duh thu a sawi sek tawh mai a ni.

A tawp a tawpah chuan Matthew te hnenah a kal a, San Jose pan a tum thu sawiin a Sakawr a buatsaih ta nghal a, a kal chhuak tur chu, "Ka rawn kal ve dawn" tiin Belly chuan a zui ve nghal bawk a.

Hmanhmawh deuhin khua chu an pan a, khawchhung an luh chuan khua a thim tawh nghe nghe. An luh ṭhanna Big Ben Saloon chu an pan nghal chat a, an va luh chuan Snap-a chhuak tum chiah chu an va nang hman vel chiah a ni.
* * * * * * *

Yorky leh Belly-a'n Big Ben Saloon an thlen hmaa thil awm dan chu heti hi a ni.

A tih dan ngai tein Snap chu Saloon dawhkan pakhat kilin a ṭhu ngawi reng a, Johny Lumbo leh mipakhat, a la hriat ngai hauh lo rawn lut pawh chu a lo hmu reng a, chupa chu a chhuak leh vat nghe nghe a.

Saloon chhungah chuan mi an ṭhahnem phian a, Cowboy pangngai nia lang ṭhenkhat pawh an awm a, Snap-a'n a chhut danin Johny Lumbo leh a ṭhiante chu mi pakua vel lai niin a hria a, an bengchheng hle nghe nghe mai bawk.

Chutah an zinga pakhat, Razo chu Bar lam panin a rawn kal a, Danny chu tham lo zet hian a rawn bawlzan vel a, Zu chu thlit sak turin a han ti a, Danny-a'n a han thlit sak chuan ti lui tih hriat zet hian amah Bar dawhkanah chuan a han ti bua a, chuveleh, "Engvanga min tihbuak sak ngawt nge i nih?" tih tuarh pah hian Danny-a kawrâwmah chuan a ṭham a, a phih lawp lawp mai a, "Thli lehnghal rawh" a han ti vin zui leh tuarh a.

Anmahni lo en reng tu Snap-a ngaihdan a ni ta hauh lo, "Thlit sak tawh suh" a lo ti ta hmak a.

Chupa chuan Snap-a lam chu a rawn hawi a.

"Ani kha thlah rawh" Snap chuan a lo ti chhum leh hmak a.

Chupa chuan Danny chu a thlah ruai ruai a, Snap-a hmachhawn zawnga inherin Silai phawi mai tum hian a lang a. "Mr. Engvanga lo inrawlh ve ngawt nge i nih?" a ti bul nghut a.

"Chu chu i hriat reng kha" Snap chuan a lo ti leh nghat a.

"Hria ila ka zawh che ring suh...i tenawm hle mai...tunah i rawn inrawlh ve ngawtna chhan ka sawi tir ngei ang che" chupa chuan a lo ti ve leh a.

Snap chuan aw pangngai thlap hian, "A ni maw? Chu, engtin nge min tih ang? I Silai kha i phawi mai dawn em ni? Han phawi dawn chhin ta che" a lo ti ve leh hmiah a.

Chutih lai chuan Johny Lumbo chuan, "Razo, lo kal rawh, ani kha chu i khan lo deuh ang" nui huah huah chung hian a lo ti a.

Razo chuan a tawp nan ti niâwm tak hian Snap chu a rum thei ang ber hian a han melh leh a, a ṭhiante lamah chuan a phei ta chhut chhut a.

"Ka lawm e" Danny chuan Snap-a hnenah a lo ti sap a.

Chuti ang thil a thlen hnu lawkah chuan mipakhat hi Saloon-ah a rawn lut a, Johny Lumbo chu a rawn hrilh ru sur sur a, ani chuan midang ho chu enkualin enge maw hi a han sawi leh sup a, Snap chuan an thusawi chu a hre phak lo va. Chumi hnuah an zinga paruk chuan Saloon chu hmanhmawh deuh hian an chhuahsan a. Danny-a âwma ṭhamtupa kha chu a la awm a.

Snap-a ngaih chu a ṭha chiah lo va, chung miparuk te an chhuah hnu chuan Sudden-a zawn tum rilru chungin Saloon chu chhuahsan a tum zui ve ta a, chutia a chhuak tur chu a ni Johny Lumbo chuan Puakruk ruai meuha a lo tih din tak.
* * * * * * *

"Snap, khawng'e Jim...?"

Yorky chuan a sawi zo hman ṭawk a, Silai a puak ṭhuai a, Silai mu chuan Snap-a ke bul chhuat chu a rawn verh sat a.

"Snap Lunt, la chhuak mai bik suh...nang nen hian chinfel tur kan la nei" mipakhat hian a han ti pawr chhuk a.

Snap chu a han hawi let a, rui mengsen rum chunga Johny Lumbo lo dingin amah hmachhawna Puakruka a lo tin reng tawh chu a han hmu ta a. A ngawih ren rawn hnuah, "Lumbo, i ngam a nih chuan mipa takin inhmachhawn ang hmiang" a ti ve ta chhak a.

Lumbo chu a nui huah huah a, "Ni lul e Snap..." tiin a ṭhiante lam chu a hawi a, "Naute u, lo en ngun rawh u" a ti nghut a, a Puakruk chu a pai ṭha leh a, ruih tawh avangin a fimkhurna chu ngaihthahin a awm tih a hriat a, chuti ni lo se Snap Lunt-a hmaah a Puakruk a pai ṭha leh kher hauh lo vang le; chubakah a Puakruk a pai ṭhat leh mai danah, rang a inti ve tawkin Snap hmachhawn turin a inringtawk hle a ni tihna a ni thei bawk. "Snap, hmanah khan thi daih tawh tur i ni" a han ti leh hmuk a.

Hemi te pahnih hi an lo inhmachhawn tawh a, chumi ṭum chuan Snap Lunt hi a muang zawk hret a ni maithei Johny Lumbo hian a kap fuh ta zawk a, thi tawh kalsanin a kalsan a ni, chumi ṭuma an inhmachhawn chhan chu Snap-a ṭhianpa vang a ni a, chu thil a thlen hnu-a a khawsak zui dan aṭang chiah chuan a ni Snap Lunt hi Gunman anga mi ṭhenkhatin an hriat ṭan tak.

An mitah tak inenin thawm chu a reh duk a, Saloon chhunga la awm ho chu hrilhchawp ngai miah lo hian Silai mu leng tawn palh hlauin an insaseng nghal a, a lo thlirtu ṭhenkhat tan chuan tunge rang zawk tih lo en chu thil phurawm tak a ni leh dawn a ni.

"Tha ba ka rul dawn a ni, Lumbo"

Snap chuan Lumbo ṭhiante chu a han en a, nichina Bar nghaktu Danny-a ṭhamtu Razo khawsa zia phei chu a duh lo hle mai a; mahse chutih lai tak chuan Belly kha a rawn inrawlh ve ta khauh a.

"Midang kha, in lo inrawlh ve vaih chuan ka tel ve ngei ang" phur hmel zeta nui ṭha chung hian Belly chuan a lo ti a.

Yorky pawh chuan, "Kei pawh" a lo ti ve nghal vat a.

Lumbo ṭhiante pahnih pawh chu Belly leh Yorky avang chuan an tîm tih a hriat a, tel ve mai tum âwma an awm pawh chu an inthlahdul ta niin a lang a. Tunah chuan Snap leh Lumbo chauh an ni ta.

Chulai boruak chu a reh cool ruih a, mipahnih te chu Silai phawi mai turin an inring dun em em tawh bawk a ni. A lo thlirtu ṭhenkhat te chuan thaw dep dep hian an lo thlir hlawm a, tu nge rang zawk ang tih chu an rilruah a awm deuh ṭhup vek mai a.

Lumbo chu a'n meng deuh kawk a; chutah rang lutuk fahran hian a khel dinglama a Puakruk chu a phawi nghal a, Silai chu pakhat ri ang mai hian a ri rual ṭhawt a.

A khingpuipain a Silai a chuh rual chuan Snap pawhin a Puakruk chu a phawi dawk zawk a, a phawi leh a hmehper chu a rual nghal a ni mai, a Silai mu chuan Lumbo lung zawnah a va verh sat mai a, ani chu chhuatah chuan a tlu hlawm nghal tawl mai a ni. Lumbo Silai mu erawh chuan a fuh ve ta lo.

Muangchangin a mi kah hlum ruang chu a pan chhat chhat a, a kawrâwm chu a keu a, dim lo taka a thil awrhna hrui phih chah sawk pahin, "Hei hi i ta a ni lo" a ti sap a. Mipahnih lam chu hawiin, "In ṭhianpa hi chhuahpui tawh rawh u" a ti bul leh hmak a.

Chumi te pahnih chuan Lumbo ruang pawh ngaihven chuang loin Saloon chu an chhuahsan ta nghal a.

Nui ṭha chung hian, "Rang kher mai a" Belly chuan a lo ti lang lang a.

"Ranch rawn chhuahsan lo tur in ni a sin...ka ngaih a ṭha lo tlat, Jim zawng vat ila, a hma thei ang bera Ranch lama kir a ṭhain ka hria" Snap chuan a han ti a. Saloon aṭanga Johny Lumbo ṭhiante paruk vel an chhuah huk thu te chu a han hrilh ve a.

Yorky leh Belly chu Sweet Valley lam panin an kir leh ta nghal a. Sudden-a zawng tur chuan Snap chu a chhuak nghal bawk a, darkar chanve hnu velah Lucky Chance Saloon aṭanga a chhuak tur chiah hi a va hmu a, a lam panin a kal nghal a; chutah a mak tih zawng deuh hian Sudden-a chu a che ta phut mai a. Sudden-a chuan a Puakruk a phawi dawk zawk a, a lam hawi chuan a Silai chu a rawn lekkawh mek a.

Chutia Snap-a'n a rawn pan phei lai chuan Sudden-a chuan Snap-a hnunglama thil phe zeuh hi hmuin mak ti deuh tak hian a lo en tawh a; chu hlimthla chu mihring hlimthla ngei a ni tih a hriat rual chuan hlimthla chuan Silai a keng a, Snap chu tinzawnin kah a tum ngei a ni tih a hrethiam ta nghal a, rang taka chein chupa chu a kap ta thawr mai a ni. Mihring ṭe ṭhawm a ri ṭhat a, Snap pawh chu a inher ve nghal vat a. Sudden-a'n a kah hlum pa an han en chian nak chuan Big Ben Saloon-a Danny ṭhamtu, Razo kha a lo ni a, Sudden-a chuan a Hnarkawnah tak a lo verh siah a.

Snap chu a ner nang nang a, "Dawihzep" tiin a phun sap a.

Sudden-a hnenah chuan Saloon-a thil thleng te kha hrilhin khami vang kha a nih a rinthu a sawi a. Johny Lumbo nena an inhmachhawn thu leh a thah tak thu kha erawh a sawi tel lo thung. Thil awmzia a han sawi ta zel a, Ben Harvey mi leh sa ṭhenkhatin hmanhmawh taka Saloon an chhuahsan thu leh, chung mite chu khuaah hmuh tur an awm tawh loh thu te Yorky leh Belly pawh khuaa an rawn kal thu te, hmanhmawh taka Sweet Valley lama a lêt tir thu te chu a sawi kai ta zel a.

Sudden-a chuan, "Marshal pawh kha khuaah hian a awm hauh lo vang" a lo ti bauh a.

Chutih lai chuan, John Denver-a chu an bulah a lo awm ve tawh a, Sudden-a te hnenah chuan Ben Harvey an Marshal Badge a dah tak thu a han sawi a. Chu thu a han hriat phei chuan Sudden-a ngaih chu a ṭha zat tawh lo.

"Snap, Sweet Valley lamah kan let vat a ṭhain ka hria" a han ti a. Denver-a hnenah chuan, "Marshal hna chungchangah ka rawn hmu leh maithei che a ni" a han ti a. A Sakawr Blue Devil a dahna lam a pan zui nghal a.

Sudden-a leh Snap Lunt chuan a zan a zanin Sweet Valley chu an pan ve leh ta nghal a ni.
* * * * * * *

Ben Harvey-a'n Lucky Chance Saloon a chhuahsan hnu khan a Marshal Badge daha Marshal hna a bansan hnu-ah ama Saloon lamah a hote zinga pakhat a tir nghal a, Johny Lumbo, Razo leh Dirty Wizard an tih te tih loh Saloon chhunga ami te kha an chhuak ta huk reng a, tichuan hmanhmawh zetin Sweet Valley lam an pan ta a ni.

An va thlen chuan a lo reh ṭhiap tawh a, khawnvar erawh a lo la eng teng teng a, an Sakawr aṭanga an chhuk hnuah kawngka chu Ben Harvey chuan dim lo baksak hian a chum ta bur bur mai a ni.

Matthew chuan kawngka chu a rawn hawng thuai a, chutih laiin Mrs. Nancy erawh chu hrilhhai zetin a awm a, misual ṭhenkhat rawn tlawh zeuh zeuh mah se tun ang zanah heti taka thawm na hian vawikhatmah an la rawn ṭhawng ngai miah lo a ni. A pasalin kawngka a han hawn ve leh chuan mipathum hi kawngkaah chuan an rawn lang ṭhawt a, Matthew chu inchhung lamah an nawr lut rawk rawk a. Ṭhuthlenga dim lo zeta an nawr ṭhut hnuah, pakhat chuan a han beng zui nghek bawk a; Nancy chu a lo ṭe tuar a.

Ben Harvey chu chuan ṭhutchilhin hnai set sawtah Mathew chu a han en run run a, rei deuh tak a melh hnuah, "Mathew, i Ranch tereuh te hi min lei tir mai rawh" a han ti nghut a.

"Harvey, ka phal lo tih ka hrilh tawh che kha"

Ben Harvey chu ngeiawm zet hian a nui vur vur a, "I hausakpui theih tur khawpin ka leisak ang che" a han ti leh hram a.

"Engvangin nge he ka ram zimte hi i duh em em nachhan?"

Ben Harvey chu a rûm nghut a, "Mathew, chu chu i hriat a ṭul lo, ka duh a ni mai" tih pahin a ding hluai a, a hote chu a melh kual a, "Tuna an awmna tih loh In dang zawng hi hal vek rawh u; hei hi a bulṭanna chauh a ni ang" a han ti leh a.

Chu'ng mirawkrailo ho chu an nui khek uar uar a, phur zeta chhuakin Chhek In, Sakawr Huang leh Bawng chaw dahkhawmna te chu an hal alh ta hluah hluah mai a. Matthew-a te tan chuan tih theih a vang hle mai. Inchhungah a lut a, a Silai kawl ve chhun, .303 Winchester hlui tawh tak chu a va la chhuak a, hmanhmawh deuhin a rawn chhuak leh a; mahse Ben Harvey chuan ngun zetin a lo en chu niin, amah tin tuma Matthew-a'n Rifle a han lek kan veleh chuan rang zet hian a Puakruk a phawi a, Matthew-a Rifle vawnna kut chu a han kah sak a.

Matthew-a Rifle chu a per lawp a, a kut chu a dawm chawt a; Nancy chu hlauthawng zet hian a ṭe tuarh a, zan thim hnuaiah chuan a dang sawp sawp a, a khur dar dar mai a.

"Matthew, tunah chuan ka that rih lo vang che; mahse, hei hi warning hnuhnung ber a ni tawh ang...Sweet Valley hi chhuahsan rawh u, i mi chhawr te tan pawh" tih pahin Ben Harvey chuan a Sakawr a pawt her mawp a, a ho te nen chuan an tlan liam ta nghal a.

Mei chu a alh hluah hluah a, mei eng hnuaiah Matthew leh Nancy te nupa, leh Putar Hodden-a chu beidawng deuh hian an ding a.

[Ngaia]

Chapter Eleven

Yorky leh Belly an Sweet Valley an va thlen ve chuan a lo kang hluah hluah mai a, Ben Harvey leh a hote pawh chu an va nang hman lo chiah chiah hi a lo ni a. A hnu lawkah Sudden-a leh Snap pawh an lo thleng zui ve nghal a. Kawtah chuan Yorky chu a lo ṭhu kun chal a, thil thlen dan vel chu kimchang deuh hian a lo hrilh a.

Sudden-a'n In kang vel a han hmuh chuan a hmel chu a nelawm loh kher mai a, ṭawng miah lo hian thil kang bang vel chu a thlir vang vang a.

Inthiam loh hmel zet hian Yorky chuan, "Jim, ka thiam loh a ni...heta lo awm tur hi kan nia..." a han ti a.

"Yorky inthiam lo lutuk suh...khawiah nge Matthew hi a awm" Sudden-a chuan a han ti a.

"Inchhungah a awm"

Inchhungah an lut a, Sudden-a chuan Matthew-a hnenah, "Matthew, Ben Harvey-a'n helai ram a duh tlat nachhan hi min han hrilh teh...chhan ṭha tak a awm ngei tur a ni" a han ti nghal a

Matthew chu engmah sawi lo hian a la ngawi tlat a, a hmel chu sawi tur nei, sawi hreh deuh si ni hian a la lang a. Mahse a nupui chuan, "Matthew hrilh mai rawh, kan buaina hi ka ning tawh em mai, anni hian min pui thei maithei a sin" tiin a banah a han vuan a.

Matthew chu a la ngawi reng a.

Sudden-a chuan Matthew chu a mitah tak a han en a, "Matthew, Sudden-a an tih ṭhin hi i hre tawh ngai ang tiraw?" a han ti a.

Mathew chu a rawn hawichhuak a, chu hming chu hre lo an awm lo tih theih a ni a, misual rual a chimih dan leh hmun hrang hraga buaina a chinfel dan te chu miten an sawi nasa ṭhin hle a, Hell City a chinfel dan te phei chu a hre tawh phawt ten huaisenthlaka an sawi a ni.

"Hria e; mahse kan buaina nen han sawi pawlh chhan tur eng'e awm a?" Matthew chuan a han ti hâ a.

"Kha Sudden-a kha ka ni; chu chu tuna i buaina nen ka sawi pawlh chhan tur chu a ni ang"

Chu thu Sudden-a'n a han sawi chuan Matthew-a chu a kâ ta hau mai a, Belly thung chu phur hmel zet hian a lo chek tlak tlak a, an awmpui Putar Hodden-a kha erawh a lo nui var var a; ani hi chuan Sudden-a a hmuh tirh aṭang reng khan mi eng'e maw tak a nih a lo ring sa tawh a.

Matthew-a mak ti hmel chu pawisa lovin Sudden-a chuan a han sawizawm a, "Texas-ah hian tih tur pathum neia rawn kal ka ni. Pakhatna chu Texas State huam chhunga ka hming thangmawi lo ṭhin hi Law Officer leh Gunman dang ho laka thaibo ka duh vang a ni a. Pahnihna chu Arizona Governor Mr. Bleke thurawn anga Texas Governor Mr. Edmund Jackson hriatpuinaa San Jose khua thenfai a ni. Matthew min ringngam chiah lo tih ka hria, mahse helai buaina hi a alhchhuak tawh a nih hi, engkim min hrilh a ngai a ni. Tichuan, ka tih tur pathumna, ka ngaipawimawh ber tur chu in ṭhianpa Jim Silver-a, mi ṭhenkhatin hrechiang lo va keimah emaw an lo tih ve ṭhinin min ngen anga helaia inbuainaa ṭanpui tur che uin a ni; chu chu ka tih ngeina tur chhan ṭha tak a awm bawk" a han ti a.

Matthew chuan, "Eng'e a chhan chu?" a lo ti khauh a.

Sudden-a chuan, "Silver-a sawi kha a dik chuan, i nupui Nancy Petterson hi ka unaunu a ni" a ti ta a.

Chu thu a han sawi veleh Nancy chuan mak ti zet hian a rawn en ta kal mai a, chu thu chuan a ṭhawng pawh a ni mahna. Sudden-a Texas rama Outlaw hmingthang tak, Puakruk phawirang leh kahthiam ber mai nia an sawi chuan a unaupa a nih thu a sawi zo chiah tlat a ni.

Sudden-a chuan Nancy nena an inlaichin dan Jim Silver-a'n a sawi kha muangchang hian a han sawifiah ta zel a, a sawi zawh chuan, "Chu chu a dik em Nancy?" a han ti a. Nancy chu a lo bu nghat a, mak ti deuhin Sudden-a chu a la en reng mai bawk.

Tumah chu an ṭawng lo va, chumi hnuah Sudden-a bawk chuan, "Matthew, min rin a ngai a ni, ka tih tur pathum chu helai chhehvelah hian ka ti thei dawn a ni" a han ti leh a.

Matthew chu a han thaw halh a, muangchang hian Ben Harvey-a'n Sweet Valley neih a tum ruh em em nachhan nia a rin chu a sawi ta a, a sawi zawh chuan, "Kei pawhin a awm ngei tih ka hria a; mahse lehkha pawimawh tak pakhat a bo daih mai a, lehkha a bo aṭanga karkhat hnu lawk aṭangin Ben Harvey hian helai ram hi lei mi rawn dil ṭan ta a ni. Lehkha bo kha a nei a ni ngei ang" a han ti ta a.

"A awmna hmun chu i hre lo em ni?"

"Hria e, mahse tumah min ṭanpuitu tur an awm dawn loh avangin ka khawih ngam rih lo a ni; tin Ben Harvey hian a awmna chu ka hria tih a la hre lo va, ka hre ve tih a hriat hi ka hlau hle bawk a, a hriat chuan min that nghal duh mai dawn bawk tih ka hrechiang a ni"

"A ṭhat chu, engmah kan sawichhuak rih tur a ni lo; keima'n hun ka tih hunah BB Ranch ah chuan ka kal ang" Sudden-a chuan a han ti ta a.
* * * * * * *

Sweet Valley-a hal a nih aṭanga nithum a liam chuan Sudden-a chu San Jose ah kalin John Denver a va hmu a, Marshal hna chu thawh a duh thu a va hrilh a ni. Ani chu a lo phur ngang mai a, khuaa mi pangngai deuh deuh kokhawm nghalin ama Saloon ah khaw mipui te nen an ti fel nghal ta bawk a. Marshal hna chelh tuma khua a pan leh hma hian Sweet Valley ah buaina tenau an tawk leh a, mahse, hliam emaw, thihna emaw an tawk lem lo a, anmahni rawn tibuaitu mipahnih chu an kaphliam thung.

San Angelo Sheriff pawh Jason-a'n a kahna hliam kha a damfel tawh avangin San Jose chu chhuahsan a tum ta a. Marshal thar chu dusakna a hlan a, "Jim, he khua hi han thianfai teh khai" a han ti a. Cole Griffin nen chuan San Angelo lam panin an Sakawr chu an kheng kal ta a ni.

Sudden-a'n Marshal hna a thawh ni-a a thiltih hmasak ber chu BB Ranch tlawh a ni. Deputy atan Yorky leh Belly a hmang a, Sweet Valley ah pawh ama thu rawn angin mi rinawm tak tak nia a ngaih hnathawktu pathum lak belhin Bawng vulh tur an lei belh nghal a, chulam chu Snap Lunt-a'n a enkawl thung a; Sudden-a hian Sweet Valley rawn chuh buaitu te hnenah insawhngheh deuh deuh an tum a ni tih chu hriat tir ngei a ṭul a ti tlat a.

BB Ranch chu amah chauhin a pan a, Yorky leh Belly chu khuaah an awm thung a, Yorky chuan zui ve tum viau mah se, a rem ti lo va. Ben Harvey Ranch a va thlen chuan a neitupa pawh chu a lo awm a, nelawm loh tak hian a lo melh khui khui a, Cowboy ho chu hnathawkin an chhuak a ni ngei ang, BB chu a lo reh hle mai a.

"Hetah eng'e i rawn tih?" Ben Harvey chuan a lo ti nghal hmuk a.

Sudden-a chuan, "Mr. Harvey, Law Officer ten boruak ralmuanna tura an hmalak ṭhin dan hi zah turin ka rawn hrilh dawn che a ni" a lo ti ve nghal hmiah a.

Ben Harvey chuan Sudden-a kawrâwma Marshal Badge, Arsi lem intar chu a han melh rulh a.m; ngeiawm zeta nui chung hian, "Marshal, eng thu chu nge i sawi ang a?" a han ti leh buk a.

"Mr. Harvey, hei hi a ni..." tiin Sudden-a chu a han ngawi dat a, "Sweet Valley saw ti buai tawh miah lo turin ka hrilh che a ni?" khal zet hian a han tih zawm a, a aw chu a changin a ti mai mai lo tih a hriat hle.

Ben Harvey hmel chu a dur khup khup a, "Marshal, awn lam nei sa tûnin dan kenkawh i tum a ni maw? I lo inrawlhna tur chhan a awm lo vang" a ti bung nghut a.

"Awm e...ka la inrawlh dawn chauh...Mr. Harvey, awn lam ka nei miah lo bawk, kawng dik lam ka zawh mai zawk a ni, Sweet Valley-a awm te sawn i pawi an sawi lo. Hei bak hi ka sawi nawn tawh lo vang" Sudden-a chuan a lo ti ve leh hmiah a.

BB Ranch neitupa chu a thinrim takzet tawh a, tunhmaa pa dawhthei tak ni ṭhin kha a thil duh neih ngei a tum luatah a so sa bulh tawh ni berin a lang. A rilru chuan Silai chuh a, a hma ami chu kah leh tawp mai hi a duh tawh a ni; mahse Sudden-a chu a han en a, a mitmeng leh chezia a en leh chuan Silai chuh ngawt mai chu a ngam lo a m. San Jose khaw Marshal chu hahdam hmel taka awmin a inring em em lah tak a, Ben Harvey mitah tak chauh chuan a melh ngar mai a, a chezia leh rilru engkim chu hmutlang veka hretlang vek ni mai hian BB Ranch neitupa chuan a hria a ni.

"Mr. Harvey, Gunman, dan pawna hnawl tawh i chhawr ang tih chu ka ring thiam mai a; mahse, Black Curse Jason saw i chhawr tih ka lo hre miah lo va" Sudden-a chuan tih leh pahin a mit chu a han la sawn zawk a, Ben Harvey mit chu a en leh vat a.

Chutih lai chuan, Jason Curse chu Ranch tualzawlah a rawn chhuak phei mek a. Sudden-a chu a han ding a, "Ka sawi nawn tawh dawn lo ka tih kha" tih leh nghat pahin a Sakawr lam chu a pan ta a. A Sakawra a lawn kai fel chuan Jason pawh chuan a bul a rawn thleng ve tawh a.

Jason Curse chuan Sudden chu ngun deuh hian a lo en a, a kawrâwma Marshal Badge chu a en leh hnuah, "Marshal i lo ni ta a ni maw?" a han ti sap a.

Sudden-a chuan nui chung hian, "A nih hi Mr. Curse; tichuan ka thuneihna huamchhungah buaina ka duh hauh lo vang" a han ti chhak a, a chhan lehna pawh ngaihsak lo hian a Sakawr Blue Devil chu a kal tir ta nghal a.

Jason chuan a enzui vang vang a; a rilru tak chuan Sudden-a'n a hnungchhawn nghal mai chu huaisen a ti hle a; Marshal chu a phawi khalh dawn leh dawn loah engmah rindan a nei lo va, hepa hmingthang tak hi chu inhmatawn ngei leh fair taka hmachhawn a duh ve tlat a ni. Hnunglam aṭanga kap mai lo va, inhmatawn ngeia a hmachawn a, Sudden-a hi a phawikhalha a that thei a nih ngat chuan a hming a chher hle dawn si a; chu chu Gunfighter lar ṭhenkhatte duhthusam chu a ni.

Zanah chuan Sudden-a chuan khua a fang kual a, Saloon pathumte chu a lut lawr a, a hnuhnung berah Lucky Chance Saloon chu a lut a, Saloon ah chuan Double D Cowboy panga vel hi an lo awm a, an hlawh lak an chèn a ni ngei ang, Card dengin Dawhkan an kil a, zuin tur an inchhawp bawk a, an lo beng chheng hle nghe nghe a. Heng Cowboy te hian San Jose khuain Marshal thar an neih thu hi an lo hre tawh a. He khua hian Marshal an nei rei ngai lo va, Marshal lo ni tawh te pawh khan Cowboy pawr deuh leh Gunman te kut an tuar fo tawh reng a. Ben Harvey khan a hma aṭanga khua hi a thunun deuh ṭhin tawh avangin Marshal a han nih pawh khan mipangngai leh Cowboy te chuan harsatna an siam lo khawp mai a; mahse ama chhawrte bawk hi khuaa mipangngaite tana hnawk chu an ni si.

Marshal thar chu an hmuh hma hauhin Double D Cowboy ho chuan han chhaih deuh an tum tlat a; Sudden-a Silai phawi lai tak hi helai vel ami te hian an la hmu hauh lo va, an tan chuan mikhual a la ni ve mai rih a ni. Double D Cowboy ho zingah chuan hrang deuh tak hian Sudden-a ten Sweet Valley an pan dawna an hmuh thinchhiat hmel deuh pawh kha a awm ve bawk a, a ṭhut hran hma chuan thil eng emaw hrilhin a ṭhiante chu a bekbawr sur sur a.

Saloon chhunga Sudden-a a han luh chuan chung Cowboy ho chu an lo ngawi ṭhap a, an lo en ṭhap bawk a, pahnih khat chu an phun sap sap a. Boruak inmung dan àwm ang chu hrethiamin a inhria a, a han nui sak a, Bar lam panin a kal nghal a, Mina-i hnenah chuan hawihhawm deuh hian, "Ka Pi, min han thlit ve dawn lo'm ni?" a han ti a.

Lucky Chance Saloon neitunu chu a nui sèih a, "Jim...ahh...Marshal, min pi duh lo teh" tih pahin a han thlit sak a; chutah thutak zawk hian, "Sawlaia Double D Cowboy ho sawn fiam che an chak riau a nia...Marshal, ka Saloon-a inthahna a awm ka duh lo a ni" a han ti leh.

Sudden-a chu a nui mai a, "An duh ang chu kan tih tir mai a ngai a nih chu; mahse lungngai suh, tumah an inthat lo vang" tiin a han ṭawng thlamuan a.

Mina-i hlauhthawn ang thil chu a thleng ta mai lo va, Saloon chhung boruak pawh chu a pangngai hle mai a, Sudden-a pawh chuan muangchanga zu chu in pahin eng emaw a thlen takin tih thu ah chik takin Saloon chhunga awmte chu a thlir kual reng tho a.

Saloon ah chuan Cowboy pathum hi an rawn luh belh leh a, rawn lut thar pathumte chu Double D Cowboy awmkhawm zinga pakhat chuan a han melh zawk a, a hawi let leh vat a. Chutah, "Tunlai hian Ranch pangngai tak hrulah ram zimte neiin mi ṭhenkhat hi biak an har viau a sin, Rinkie" tiin a ṭhian pa chu ring lenglawng, lo lut thar te hriat ngei tur chuan a han be lang lang a.

Rawn lut thar zinga pakhat, a upa ber àwma lang chuan, "Ṭawng fimkhur deuh rawh Kyle" lo tih khauh pahin a han melh ngar mai a, chumi zawhah Bar lam panin a hnungchhawn leh ta mai a.

Dawhkan beng ri dawp leh, ṭeng deuh chhaka, "Stravius, ka fimkhur a ngaihna ka hre lo...in pu Zuck Ork kha mi nikhualo tak a ni" tih ri chuan a hawi let tir leh ta a ni.

'Kyle' an tih chuan Puakruk hi a lo hum sa reng tawh a, Puakruka tin a ni tih a han inhriat chuan 'Stravius' a tih, Big Folly Cowboy chu a thinrim hle tih a hriat a, che lo leh ngawi ngal hian amah Silaia tintu chu a melh ran mai a.

Sudden-a chuan chumi te chezia chu a lo thlir ruk reng avangin a hun taka inrawlh turin a inbuatsaih ve a nghal a, inhmachhawn te inkar lam panin a pen phei nghal a, chumi te pahnih entawn chuan a nui deuh hlek a. Double D leh BB Ranch hnathawk ṭhenkhat hian inzawm rukna an neih a ring tlat a, chu chu hmuhchhuah a la tum thuai dawn a ni.

"Naute u, zaninah tumah he Saloon chhungah hian in inkap dawn lo...nang kha, i Silai kha a bawmah khung ṭha rawh" tih pahin Sudden chuan Double D Cowboy chu a han melh a. Saloon chhung ami te chuan Marshal thar lam chu an hawi ṭhup a.

Thinrim zet hian chu Cowboy chuan, "Lo inrawlh suh Marshal...ka kut i tuar tel palh ang'e" a lo ti ve hmak a.

Sudden-a chu a lo nui mai a, "Ṭhiana i rui tawh a nih kha, huatthu zawn chawp ngawt chu a hrisel lo a nia, ka thusawi chu zawm zawk mai la a ṭhat ka ring" a han ti a.

Chu Double D Cowboy chu a rui tawh tak tak reng a, thinrim zet hian Sudden-a chu a han en a, "Marshal thar satliah...nang..." tih pahin Stravius-a a tin lai chu Sudden-a lamah a han leksawn a.

"Han hmet per chhin ta che, Naua"

Chu aw vawt reih rawih chuan Kyle-a ngaihtuahna chu a ti chawl ṭhup a ni ber mai, a aw chu ring lo hle mah se a sawituin a sawichhuah dan kawngah chuan awmze thûk tak a nei tih a hria a; thihna rim a nam tlat! Silai hmeh per reng reng chu a tum lo, an chhaih châk San Jose Marshal thar chuan Puakrukin a lo tin reng tawh a, ani chuan tin pawh a la tinzawn hman si lo. Sudden-a chu en ṭhup mah se tuma'n a Puakruk phawi lai reng reng an hmu hman lo.

Kyle chuan Marshal mit chu a han en chiang a, tunah chuan la nui deuh mah se, a hmelah nelawmna reng reng a lang tawh hauh lo. A tirilah hlauhnain a rawn tuam a, chu a chhapah, "Han hmet per ta che" a lo ti nawn leh ta nghal a; mahse a Silai chu hmehper reng a la tum lo.

Sudden-a nui hmel chu a reh a, àwkâ nelawmna tel miah lo hian, "I silai kha thlauh rawh Naua" a han ti leh ta a.


Kyle chuan rang deuh hian a Puakruk chu a thlauh ri bawl a, Sudden-a chuan a va pan a, a kut veilam chu a phe vuai a, Kyle-a biangah chuan a han beng chawrh a, a Puakruk thlauh chu a chhar sak a, "Zaninah Silai tel lovin i haw ang" a han ti zui leh zat a, Double D Cowboy ho chu a han melh kual a, "Zanin atan chuan in awm rei tawk tawh...khua hi chhuahsan rawh u, nidangah chuan buaina siam inpeih sain khuaah in rawn kal tawh tur a ni lo" a han ti ram leh hmak a.

Double D Cowboy ho chu an chhuak ta zal zal a, hmana Sweet Valley an panna kawnga Yorky nena an hmuh tawh, pa thinchhiat hmel zet kha a la awm a, Sudden-a chuan, "Nang pawh, i ṭhiante kha zui ve ta mai che...tel vena i nei tih ka hria a ni" a han ti a. Chupa chu luhlul awm zet hian muangchangin a tho a, chhuak tura titu chuan a ti mai mai lo tih a hriat avangin zawm loh erawh a ngam lo.

An chhuah hnu chuan boruak chu a pangngai leh thuai a, phun sap sap chungin Saloon chhung ami te chuan Sudden-a chu a en hrak hrak a, an Marshal that chetdan chuan a hneh hlawm hle a ni; a ṭhen hi chu Jason nena an inhmachhawn lo hmu tawh tu te kha an ni nghe nghe.

Big Folly Ranch Cowboy fiamthu duh zet mai Collin chuan, "Rang kher mai, khati ang taka Puakruk chelek rang kha ka la hmu hman miah lo" Stravius hnenah chuan a han ti sa sa a, a nui vur vur a.

Sudden-a pawh chuan Big Foly Cowboy ho chu a rawn fin ve nghal a, an Ranch chungchang leh Kyle-a thusawi te chu a han zawt thuphung a, anni pawh chuan an hriat ang ang chu an lo hrilh ve bawk a; a remchan huna thil thlithlaia la kal ngei a tum ta a ni.

[Ngaia]

Chapter Twelve

Sudden-a Marshal a nih hnu nithum tukin Puck Parson chu Marshal Office-ah a rawn kal a, a hmel chu a lungngaih hmelin, a lungngai hmel phenah erawh thinrimna hi a hmuh theih bawk. Hmun dangah a mimal thil avangin a kal bo va, Sudden-a Marshal-a a ṭan hma ni mai khan San Jose hi a rawn lut leh ta chauh a ni.

"Marshal, Jim Silver-a ruang Sweet Valley thlenpui tu niin ka lo hria che a?" Puck Parson chuan a han ti nghal tawp a.

Sudden-a chuan a lo melh vang vang phawt a.

Puck Parson bawk chu a han ṭawng leh a, "Marshal, ka ṭhian ṭha tak a ni a sin...dawihzep taka amah thattu hi tupawh nise Puakruka hmachhawn ngei ka duh a ni" a han ti leh a.

Sudden-a chuan a rilru tur awm ang chu a hrethiam hle mai a, inṭhian ṭhatnain thil a tih theih zia leh a nghawng a nat dan te pawh a lo hre ve tawh a, chupa chu a ṭhianpa thattu zawnchhuah kawngah a theihtawpa puih a tum nghet ta tlat a ni.

"Mr.."

Parson chuan, "Puck Parson ka ni..." a lo ti vat a.

Sudden chuan, "A nih leh Mr. Parson, i rilru tur âwmang chu ka hrethiam khawp mai, theihtawp kan chhuah ang chu" a ti ve ta a.

Puck Parson chuan, San Jose a lo luh lehin Jim Silver hmuh ngei a ngaih avanga khawchhunga a zawn thu te, a hmuh mai loh avangin Sweet Valley lamah a kal a nih a rin thu leh, a tuka chutah chuan a va zawn thu te; mahse Nancy Petterson chuan a thih tawh thu leh a thih dan a hrilh tak avanga lungngai leh thinrim taka a awm thu te chu a sawi a, Sweet Valley hmuna amah phur lut tu hnen aṭanga thil eng emaw hriat a beisei avanga Marshal Office rawn pan a nih thu te chu a sawi kai ta zel a.

Sudden-a pawh chuan Jim Silver-a an lambunna hmuna Rifle Cartridge a chhar thu te, an hnuhma hnutchhiah aṭanga mipahnih an nih a rin thu te leh a kaphlumtu zinga tu emaw chuan Spur a ti tla ngei a, chupa chuan tun thlenga Spur pangkhing tel lo va pheikhawk a la bun reng a rin thu te chu a sawi ve bawk a.

Puck Parson chu a lo bu nghat nghat a, a hmelah chuan tumruhna leh thinrimna hi a lang kawp a, Sudden-a lam chu a han hawi a, "Marshal, ka lawm e, kan hmuchhuak ngei tur a ni" a han ti nghut a

Sudsen-a pawh chuan hrethiam tak hian, "Ka kutah dah mai rawh...ka hmuhchhuah chuan a phu tawk chu a hmu ngei ang" a han tih hnuah, "Kan thudang alai chuan, Mrs. Nancy te sawn puih an ngai ngawtin ka hria, Sweet Valley sawn ti buaitu an nei deuh reng a, nang ang mi rintlak hi chu Snap Lunt sawn thawhpui a chak ngawt ang" a han ti leh a.

Puck Parson chuan, "Ka lo inngaihtuah ang'e Marshal" a han ti ve a, Sudden-a chu a chhuahsan ta a ni.

Nikhat chu Sudden leh Yorky chuan Big Folly Ranch an tlawh a, chu Ranch chu a lian lo hle a, hnathawk pawh Cowboy pali chauh an ni a, a nei tu pa Zuck Ork chu palian pui mai, kum 50 mi vel, zaidam hmel deuh leh mitmeng rinawm zet mai hi a ni a. Sudden-a te lo kal chu hlim hmel zet hian a lo chibai a.

"E khai, Marshal in rawn kal chu ka va lawm em...ka nauten Lucky Chance Saloon-a i chet dan an sawi a, Clumsy Collin-a phei chuan i Silai phawi lai a hmuh hman loh thu a sawi uar khawp a nia..." a lo ti huah huah a.

Inchhungah an lut a, titi khawchang an sawi dun viau hnu chuan Sudden-a chuan an titi a thlak thut a. "Mr. Ork, helai i ṭhenawm te hnen aṭang hian harsatna i tawk deuh ṭhin niin ka lo hria a sin" a han ti thut a.

Zuck Ork chu a ngawi vung vung a, a tawpah chuan, "Ni e Marshal, a chang hi chuan kan duh rum law deuh fo mai; Double D lam hian an ram zau tak hi zau an la ti tawk lo deuh ṭhin a ni" a han ti dam duai a.

"I Bawng a bo ṭhin em?"

"Bawng hi chu a bo meuh lo; Maxican ṭhenkhat erawh chuan min ruk sak zeuh zeuh...kan harsatna ber zawk chu ṭhenawmte nena ram inchuh zawk hi a ni"

"A nih tak chu, engpawh nise Mr. Ork, in ṭhenawm Ranch pawh chu ka tlawh ve nghal teh ang...San Jose hnaiha awm Rancher te hi tlawh kim vek che u ka duh a, helai velah hian Outlaw leh misual an tam hle a, buaina hi ka thuneihna huam chinah ka duh dawn lo a ni, min thlawp ngei ka beisei khawp mai" tiin a han ding hluai a.

Zuck Ork chuan, "Tehreng mai Marshal, dikna lama ṭan hi chu khawthlang mi dik tak te rilru put dan tur a ni e" a han ti ve a.

"A nih leh le Mr. Ork..." tiin Sudden-a chuan a lukhumparh tlang chu chibai buk nan a han khawih zauh a.

Big Folly Ranch neitupa chuan Sudden-a te kal liam ta chu a thlir zui vung vung a, "Collin-a sawi kha a dik a nih ngat zawngin, San Jose chu a danglam chak kher ang" ama hriat tham lekin a ti sup a.

Sudden-a te chuan Double D Ranch chu an pan leh ta a, hnim buk ṭawi lii laih awmna hmun hi an kal pel mek a, Big Folly nena an inrina an pel fel tawh tihah chuan an hmalam la hla deuh hlekah chuan mei khu hi a zam chiai chiai a.

"Tirawh Yorky, i va pawh chhin tehreng ang" Sudden chuan a han ti a, an Sakawr chu chulam pan chuan an tlan tir ta nghal a.

An va thlen chuan mipathum hian Bawng no, ramtla ṭan tir rual vel khelah hian thir lingin Double D chhinchiahna an lo chhu mek a. Chulaiah chuan bawng 20 vel hi a lo awm a. Mipathum te chuan Sudden-a te lam chu an rawn hawi ṭhap a.

Pakhat chuan, "Hetah...kan ramah hian enge in lo tih" a lo ti hmuk a.

Chupa ṭawng dan leh a hmel a han hmuh chuan, Sudden-a chu a nuih a za deuh hlek a; mahse nui chhuak ta lo chuan, "Ranch kan han tlawh kual mai a nih hi" a han ti thung a.

Chulaia lo awm te chuan an lo lawm hmel viau loh; mahse Marshal Badge an han hmuh chuan engtin emaw riau hian an danglam hian a hriat a.

Sudden-a bawk chuan, "Bawng chhinchhiah vel chu in hnehsawh hmel hle mai" a han ti satliah a, "In pu hmuh ka duh a, In Ranch lam min kawhhmuh theih chuan a lawmawm lam a ni ang" a han ti zui a.

Pakhat chuan, "In hmalamah khan kal zel tur" a lo ti nghat a.

Chutah, "Delreido, nichina Bawng note tlan daih kha va khalh kir leh teh" tiin pakhat chuan an zinga Mexican pakhat chu a han tir a.

Mexican pa chu phun deuh nung nung chungin a Sakawrah a lawn kai a, chutia a phun nung nung chu amah tirtu pa chuan a han zilh zui a, "Phun khanglang ziah lo teh...i Sakawr dul te kha i kheng ri leh dup dup ang'e, mahni Spur tihtlakna hmun pawh hre hlei lo, nep thei ve si" a han ti leh hrep a.

Chu thu a han sawi rikah chuan Sudden-a chuan Mexican pa lam chu a hawi vat a, "Mr. Delreido Meizial mi lo ṭheh teh, ka lo keng hauh lo mai" tiin a han pan hnai a.

Mexican pa pawh chuan Meizial chu a lo ṭheh ve mai a; mahse Sudden-a hian Meizial a pai reng a, pakhatin Spur chungchang a sawi avang khan, Mexican pa Boot bun leh a Sakawra a Rifle dah chu enchian tumin chhuanlam a siam zawk a ni. Ngun deuh hian a thil hmuh duh chu a enchiang hman ta reng a, chumi zawhah Yorky nen chuan Double D Ranch House lam chu an pan leh ta a.

Double D neitupa chu tlangval la naupang tak leh hmel fai vengvawng tak hi a ni a, bathlarah hian Cowboy upa lam, phakar hmel deuh leh, thinchhiat hmel deuh hi a lo awm bawk a, chupa chu Sudden-a chuan a vawithum hmuhna a ni. Sweet Valley an pan ṭum leh, Lucky Chance Saloon leh tunah hian.

"Mr. Brad Cart i ni ang chu maw? Kei hi San Jose Marshal ka ni a, ani hi Deputy" tiin Sudden-a chuan a han inhmelhriat tir a.

Double D neitupa chu a khi suk a, "Marshal, hetah enge i rawn tih ve chu le? Mikhual tharlam hi kan lawm mai mai ngai lo khawp a nia" a lo ti khauh a.

A chhan dan chu a hawihawm loh em avangin Yorky chu a lo thinrim hle a; mahse Sudden-a chuan eng vaka ngai awm lo tak hian a lo nui mai a, "Mr. Brad, San Jose leh a chhehvelah hian buaina ka duh lo tih hrilh tur chein kan lo kal mai a nia, midang, i Rancher pui te pawh ka hrilh vek dawn" a lo ti ve ta hmiah a.

Brad Cart chu a lungawi loh hmel kher mai; mi hawihawm lo tak te hian hawihhawm lo taka dawr hi an ngaina lo hle ṭhin reng a.

"Marshal, i hawihhawm lo hle mai"

"I inleng te i dawr dan kha han chhut chiang deuh la a tih chi ngawt zawk ang"

Sudden-a ṭawng dan avang chuan Brad Cart chu a meng nur nang a, a bula mi chu a han melh ralh a, "Draco, kan inleng te hian min kalsan se a ṭha zawk ang tiraw?" a han ti nghat a.

Chupa chu a rum nghut a.

Chutah, Puakruk a rawn ri thawr a, Brad Cart kut chuan a Puakruk paina chu a ten ta riau emaw tih mai tur hian a per lawp a, hlau em em hian a dang ta sawp sawp a.

"Mr. fimkhur deuh tawh la a ṭha ang" Yorky chuan a lo ti chhak a, a Puakruk chuan a tin ta ran mai a.

Sudden-a pawh chuan Droco lam hawi chuan Puakruk chu a lo lek reng tawh a, nui suk pahin, "Yorky, i ti ṭha e" a han ti zet a, Draco lam chu hawiin, "Foreman i ni ngei ang chu maw?" a han ti a.

Chupa chu a rum nghut duh chauh leh pek a.

Yorky-a'n Brad Cart ṭawng dan leh chezia a hmuh khan rang lutuk hian a Puakruk a phawi a, a Silai dap a tum mek chu a Puakruk pailai chu a va kah sak a ni.

Silai ri avanga Cowboy lo pungkhawm ho chu rum deuh hian Sudden-a chuan a han melh a, "In vaiin hre rawh u, helai chhehvelah dan bawhchhiaa buaina ka duh dawn hauh lo a nia...khuaah phei chuan buaina in siam tawh tur a ni lo vang" a han ti fiak ṭhak a, khaw lam panin an tlan liam leh ta a ni.

San Jose chhehvela Ranch ho chu an tlawh kim ta vek a, Sudden-a chuan Ranch lian pahnih te chu buaina bul ber niin a hre ta bawk. Ben Harvey Ranch-a thawk misual rual leh Double D Ranch-a thawk ṭhenkhat te hi chuan inzawmna eng emaw tak an neih ngei a ni tih a hrechiang ta a.

"Yorky, Brad Cart kha eng'e i hmuh dan?"

"Jim, Kei ang bawka naupang, fing lo deuh a ang"

"Chu midang fuihpawr leh khalh kual mai theih a ni i tihna em ni?"

"Aw, a ni ngei ang, a Foreman khan a duh duhin a ti kawi mai mai theiin ka ring"

Suddena chu a nui ta hak a.