WAR ON THE CIMARRON ( Western ) (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: WAR ON THE CIMARRON ( Western ) 1- 10

Unread post by Ngaia » August 21st, 2018, 8:51 pm

WAR ON THE CIMARRON
Bung - 7

Corridor bang sir hla deuh hleka pereka khawnvar inkhai ringawt chu a en ta vang vang mai a. A han mu leh a, a tho a, chu bawk chu a en leh vang vang a. Tih dan tur hre ta niawm takin khumah chuan a mu leh a, reiloteah chuan a muhil ta a.

Chumi ni chuan tum hnih chawei turin Frank-a chu kaihthawh a ni a. Thim hnu, jailer-in chaw a rawn pek a, a kal kian leh hnu chuan Frank-a chuan thirfian lian deuh chu hmangin a khum bul chhuatah chuan thusawpin, khum kilhna screw te chu herhin a bei ta ngat ngat a. A herh thawl zawh chuan khumah chuan thuin a chaw chu a ei ta a.

Halfbreed jailer, Arapaho Indian lam pawl zawk, mawm hmak mai chu Frank-a chawthleng lam tura a lo kir leh chuan Frank-a chuan nawhalh bawk engemaw zat a lo dil a, a pe ve mai a. Hlim takin an in mangtha a, an inthen leh mai a. Jailer-in laltin khaina a thlen chuan a tui awm leh awm loh chu enin a thing rak rak a, a tui a khat nia hriain lungawi takin a herh hniam hret a, a kalsan ta a ni.

Frank-a chuan rei ti takin chu zan reh hun chu a nghak vang vang mai a. Step leh inhnuai lama thawm ri leh jailer thawm chu a ngaithla reng a. Amah vengtu mut hun chu a nghakhlel hle a ni. Zanlai hnaih dawnah chuan thawm a reh fel ta tihah Frank-a chuan a hna chu a tan ta. Reilote chhungin khum kilhna screw te chu a herh phawi a, a thiah fel chuan Frank-a chuan khum za sei ber chu la in, tukverh bar karah chuan a hawlh chhuak ta a. Theihtawp chhuaha va ban chungin laltin chu a va hawlh thleng thei a. Laltin khaina, pereka inbat chu a hmawlh hmawrin a va nawr na na a, nakin deuhah chuan laltin khaina chu a khum za hmawrah chuan a rawn inbat ta a. Tlema han ti sang deuhin laltin chu a awmna lamah a rawn tawlh thla a. Frank-a chuan bar karah laltin chu a la lut ta a.

Thawm engmah hnuailamah leh step-ah a awm lo tih a fiah leh hnu chuan amah vengtu in tui ûm a hnutchhiah kha la in, chhuatlaiah chuan a leih huh kual ta a. A leih huh kual chhungah chuan khum bungrua kha Frank-a chuan a chhep khawm a, laltin chhin chu hawngin a thil chheh khawm chu khawnvartui chuan a leih ta a. Tui um chu kengin nawhalh chu a'n nawt a, a thil chheh khawm chu a hal ta a.

Khum hmanruate chu a ro tha in khawnvartuia leih a ni bawk a, a kâng tha in a alh duh hle mai. A mei chhemna lai thingphel te pawh a rawn kang kai tan ta a. Chhuat rawn kang zau zel tur chu vengin Frank-a chuan tui khan a lo leih zel a. A pindan a zim a, meikhu a nasa tawlh tawlh a. Nakinah phei chuan corridor-ah meikhu chu zam pheiin a rei deuh hnu chuan meikhuin a khat a ni ta deuh der a. Frank-a chuan chhuatah beng siin bengchheng leh thawm a ngaithla ran mai a.

A halna lai chhuat chu a kang viau tawh tihah vawilehkhatah step-a rawn tlan chho thawm chu Frank-a chuan a hre ta. Thawm chu a reh leh mai a. Mahse nakinah chuan pawnlam atang chuan kawngkhar an rawn beng dawt dawt a. "Hawng vat rawh u, chhunglamah kangmei a chhuak ania," an rawn ti ta tuar tuar a.

Phun nang nang chungin meikhu karah chuan Frank-a chuan chhuat lai mei a chhemna lai chu a'n per charh charh a. Chhete chu per kau theiin a them chu inhnuai lamah a tla thla a. Chu a per kuak atang chuan pawnlam thawm chu a rawn ri ring hle a. Jailer-in a awmna lam pana a rawn tlan thawm pawh chu a ring sawt hle a ni. A han per leh tak tak a, a kaw zau sawt a, mahse mihring lengin a la pawp thei lo. Reiloteah jailer chuan a room chu a rawn thleng dawn ngei si. Meialh leh khu karah a han per leh charh charh a, jailer leh midangin a awmna an rawn thleng tep tihah Frank-a chuan chhuat pawp bâng chu a tumin a tum ta a. Vanneihthlak takin jailer lo thlen hma chiah chuan a tum pawp a, inhnuai lamah chuan Frank-a chu a tla thla ta a.

A zuanthlak hma chiah khan jailer khan rawn hmu hmanin pistolin a han kâp a, mahse a silaimu chu tukverh bar khan a lo la kawi hman hlauh a. A hnunga mi hnenah chuan eng thu emaw hi a hrilh nghal a. Frank-a chu a awmna hnuai office dawhkan pakhat sirah a tum thla chawrh a. Dawhkan chu bûkin chhuatah tha takin a ding a. Chunglam step atang chuan mi pakhat hi hmanhmawh takin a rawn tlan thla a. Step tawp a rawn thlen hmain Frank-a chu step tawp bangah, thim zingah a lo bet a. Chupa in a bul a rawn thlen veleh na tawkin a banin a lo hem a, chupa chu a let tawp a, a bul lawka thutthleng chu delhin chhuatah chuan a tlu ta a. Chutihlai chuan jailer pawh chu hmanhmawh takin step-ah chuan a rawn tlan thla ve bawk a. A tih thluk pistol kha chhuatah a tla ngei tih a thawm atanga hriain Frank-a chuan silai chu lak tumin chhuat chu a dap a. A vai thluka kha a rawn tho leh chiah tihin Frank-a chuan na tawkin a'n hnek leh a, na tuara rum thawt chungin a tlu leh ta. Thim zingah chhuata silai tla kha a zawng a, vanneihthlak takin a dap fuh ta. A tho chhuak a'n inher chiah chuan kawngkapui atanga pawnlam mi rawn inhawr khawm chu a va hmu a. Chulam hawi chuan a silai chhar chu vawi hnih a hmet puak a. Kawtthler lam panin an tlan darh chiah tihah step lam atang chuan silai a rawn puak ta bawk a. Frank-a chuan jailer khan a hnuai pindan a rawn thleng thla tih a hre mai a.

Bawkvakin, thim zingah Frank-a chuan hnunglam kawngka a pan a. Thawm neilo thei ang berin a che vel a. Jailer chuan tum hnih silai a han hmet puak leh a. Chhanna a dawn loh avang chuan nawhalh a han nawt a, chu nawhalh engah chuan Frank-a chuan kawngkhar a hnaih hle tih a hmu a. Rang takin chu kawngkhar chu panin a su dawt a, a su hawng hlauh a. Chumi rual rual chuan jailer pawh chuan a rawn kap a, mahse a fuh lo hlauh.

Frank-a chu pawnlam kawmkarah chuan a tlan a, mi pakhat amah zawngtu ni ngei tur lo tawng lang lang hnenah thinur deuh ni awm tak hian "Bengchheng siam suh. Min rawn kap mai tur asin," a han ti a. Chupa chuan, "Khawiah nge amah chu a awm a?" a lo ti a. "In chhungah sawn a la awm. Tanpuitu tur midang ka'n zawng ange," Frank-a chuan a ti a.

Chupa chu tlan pelin kawtthler lamah chuan a tlan phei a. Kawnglai a thleng ta tihah mi pathum hian in chu rawn tlan hualin Frank-a bul an rawn thlen chiah chuan, "Helaiah hian lo changin tukverh saw lo veng rawh u. In chhungah sawn a la awm ania," a ti leh a. Chung mite chuan hetiang buaina kara thunei tih hriat tak aw an hriat chuan lawm taka pawmin bang nghengin tukverh chu an veng zui ta a. Frank-a erawh kawtthler lamah chuan a tlan zui zel a. Mipui pungkhawm buai nuai nuai, chhunglama lut ngam chiah lo ho bul a va thlen chuan chhunglam atang hian aw a lo chhuak a. Amah vek chuan, "Hnunglamah a tlanchhuak ta anih chiah chu," a han ti a. Amah chu thim lai deuhah a ding a. Mipuiin in hnunglam pana an tlan fihlim fel hnu chuan Frank-a chuan kawta sakawr inthlung zinga a tha ber chu a phelh a, a chungah chuangin Darlington khua chu a chhuahsan a, a tawlai awmna leh Red-a leh Otey-a te awmna lam pan chuan a tlantir ta a.

Nakin deuhah chuan lui a va pawh a. Lui dung chu thim zingah mel tam fe a zawh a. Zan a thim em avangin tawlai awmna chu hnaiteah hmuhlohin a kalpel maithei. Red-a te thian dun pawhin a thawm an hriat hmaa va barakhaih a tum mek lai chuan zan thim hnuaiah chuan têng fe hian, "Nang kha, tunge i nih?" a rawn ti ta a. Red-a ngei a lo ni a, Frank-an a chhan veleh hlim takin Red-a chu a au chhuak nghal a. Camp-a midang ho pawh an rawn harh nghal a.

Mei engah chuan Frank-a chuan a lo chhuah dan tlangpui a han hrilh zung zung a. Otey-a, thil kal dan zawng zawng tha tilo tu pawh tunah chuan a rawn nui chhuak ve ta hial mai. Frank-a chuan Samse-a chu tirin sakawr ama tan leh Red-a tan, a hahdam deuh va la turin a tir nghal a. An tawlai bulah chuan ral relin an thukhawm a. Frank-a chuan hmanhmawh takin eitur a la khawm a, kawmawlin a fun mawlh mawlh a. Frank-a chuan, "Otey, kha ka sakawr rawn ruk kha phelhin, helai atanga a hla thei ang berah va thlah rawh. Chutah chuan saddle-te leh a hruite kha i phelh vek dawn nia," tiin a hrilh a.

Thinrim zetin Otey-a chuan, "Rawn hmu mahse ka hnen atang hian engmah an hrelo ang," a lo ti a. "Chu chu ka hlauh ber a ni," Frank-a chuan, "Kan zinga pakhat tal hi he buaina laka inthiarfihlim an awm a tul. Chumi tur chuan nang hi Otey, i tha ber a, kan mamawh che a ni," a han ti zui a. "Anih nang hian enge tih i tum a?" tiin a lo zawt a.

Frank-a chuan Otey-a chhang ta lemloin, "Red, kha Cheyenne tlangval chanchin kha i lo hriat belh em?" tiin a zawt a. Red-a chu a bu nghat a. "Cimarron luikamah sakawr rukhmangho zingah a riak thin," a ti zui zat a.

Frank-a chuan kawmawla eiturte a tel fel hnu chuan a rawn ding chhuak a. A hmel en reng rengin tum fel tak a neih hmel a. "Jail-a ka awm chhung khan thil awmzia ngaihtuah chhuahna hun ka nei a ni. Thil ho tak anga lang ka ngaihtuah chhuah chu hei hi a ni: whisky tawlhru tua min puhtu hian outlaw-a min siam emaw, jail-a min khung emaw hi a duh a. A chhan chu kan ram hi an duh vang a ni mai. Chutiang rilru pu thei chu pahnih chiah, Milabel-a emaw Corb-a emaw hi an ni mai. Anni pahnih hian Morg-an ram a lo lei hi neih an duh a. A tu emaw zawk zawk hian Morg-a pawh an that tihna a ni. Tu zawk nge tih zawng ka hrelo. An pahniha um chhuak turin kan tam tawklo a, tu emaw zawk hi chu thil sual titu an nih laiin an pahnih hian che theilo a siam ka tum a ni. Keimahni zat leka kan siam hunah Morg-a thattu chu kan hre mai ang," a ti ta a.

Otey-a chuan, "Chutiang tur chuan engtia tih nge i tum a?" a lo ti a.

Frank-a chuan, "Ka hre mai lo. Mahse ka chhuak anga, he Indian pa atang hian tu zawk nge whisky tawlh lut anga sawitirtu hi zawtin, chuta tang chuan bul ka tan dawn a ni. Chuta tang chuan bul ka tan anga, ka che na hle bawk ang. Tute emaw chuan na tak an tuar dawn a, ka tawp hunah chuan ka lu man hi khawi khawiah emaw chuan an tar thluah dawn. Otey, i hrethiam maw?" tiin a zawt zui a. Otey-a chu a bu nghat nghat a.

Frank-a bawk chuan Otey-a hnenah chuan, "Hei vang hian alawm he buaina atanga inthiarfihlim a, kan buaina avanga man ve hauh loh tur mi ka mamawhna chhan chu, chutiang tur chu nangmah hi i ni, Otey. Nang nilo, Red-a ka hnena ka hruaina chhan pawh eng dang vang niloin, nang leh kei ai pawha helai ram chanchin hi a hriat zawk vang a ni," a ti ta zel a.

Otey-a chuan, "A ruksak leh vek tho ang che," tih pahin Red-a chu a'n melh a. Chhum hmakin Frank-a chuan, "A tu amah hian kha min bail-na tur pawisa kha in ru lo," tih pahin a naute ho zawng chu a thlir kual a. "Tumah hian zanin hian min hmu hauhlo a, kan thusawi pawh hi a engamah in hre lo. In tihtur ber chu Corb-a leh Circle R laka buaina neiloa inthiarfihlim hi a ni. Tichuan, engti kawng mahin kan bawngrualte nen an hual bet lovang che u. Ka awmna chin pawh nangmahni atanga hriat an tum dawn, mahse min hmulo a, ka awmna pawh inhre hauh lo. In hrethiam vek ti rawh u," a ti ta a. An bu nghat nghat a, Samse-a pawh sakawr pahnih hruaiin a lo thleng chiah a.

"Beach, ka chuanna tur Samse-a sakawr rawn kaih kha hruai rawh. Midang zawngin mei kha timit ula, in kawmawlah te khan inthawlh rawh u. Tupawh lo kal se Otey-a hian a lo chhawn zel ang. Engtik niah emaw chuan ka rawn hmu leh ang che u," tiin Frank-a chuan a hrilh ta a.

Darkar sawm pali dawn sakawra chuanga an kal hnu chuan Frank-a leh Red-a te chuan Cimarron luikam, thing hmun kara Red Indian camp awmna chu an thleng ta. Lui kam zawlah chuan buk pahnih hi Indian ho zâr dânin a lo inzâr a. Khawvar dawnah pawh chuan chu buk atang chuan thawm reng a awm lo. Ui takngial pawh a bauh lo. Frank-a chuan a hruizen chu la chhuakin a phelh then a, chutiang chiah chuan Red-a pawh chuan a rawn ti ve a. An buk zâr lam chu an pan ta a. An hnaih ta deuh tihah Frank-a chuan lui hnaih zawk buk chu Red-a a kawhhmuh a.Hruizen valh vaivir chungin an pahnih chuan buk chu sakawrin an pan ta a. Buk zarna ban filawr tak chu va phih awkin, vawilehkhatah sakawr chuan an hnuk ta a. A chung inzar chu a inhlip ta vek mai a. A chhunga mu Indian pahnihte chu rang taka rawn ding chhuakin Frank-a pistol kaw hmawr enin an ding ta ran a.

Chu buk atanga fit sawmngaa buk pakhat pawh Red-a khan Frank-a tih ang tho khan lo tiin a lo barakhaih ve bawk a. A chhunga awm Indian pathum chu Frank-a mi pahnih bulah khan a rawn khalh chho a.

Indian tlangval panga chu zing khawvawt takah luikam zawlah chuan an ding tlar a. An zinga pakhat chu Frank-a zu tawlhrua puhtu kha a ni. A hmelah zam hmel engmah a pu chuang lo. Sam a phiar kak a, midang ang bawkin Frank-a chu a en kal mai a. Frank-a chuan chupa hnenah chuan, "Hetah hian lo pen chhuak rawh " tiin thu a han pe a. Commanche tawng kherin a bia a. Grey Horse-a pawh chu a thiante hmalam pen khatah chuan a rawn ding a. Dam thlap hian Frank-a chuan, "Whisky chungchang sawi tur khan tu'n nge tangka pe che?" tiin a han zawt a.

Grey Horse-a chuan hmela danglamna reng neilo hian, "Nangmah ngeiin ka hnenah i hralh anih kha," a lo ti hmiah a. Frank-a chuan Red-a lam melh zauh chungin a pistol chu a ke bulah a theh phei a. A lukhum parh hlai tak pawh chu phawkin silai chungah chiah chuan a va theh phei a. Grey Horse-a chuan mit la leklo in Frank-a chet dan chu a lo thlir a. Amah pan hnai chung chuan Frank-a chuan, "Ka tawng kha i hrelo anih takin. Tuin nge zu chungchanga dawt sawi turin sum pe che?" tiin hnai set sawtah chuan a zawt leh a.

Indian pa chuan chhang lovin lei lam a bih tlat a. Frank-a chuan na zet hian a hmaiah a'n beng a, a beng na bawk a, Indian pa chu a zangthalin a tlu thlawrh mai a. Ngawi rengin a rawn tho a, piah deuh taka an buk sawp chhe ta lam pan chuan a tlan ta a. Frank-a chuan a um phei a, an mutbu kawmawl chu tum nei tak hian a han bawh a. Frank-a chuan bawh beh tumin a han zuan a, mahse Grey Horse chu lumsawnin a rawn tho chhuak a, chemte sei tha tak hi a rawn hum chhuak ta a. Kun deuh chal chung hian Frank-a chu a hmachhawn a, a mitmeng chu verveknain a khat a ni ber a.

Red-a chuan Grey Horse-a tihthaih nan a lu chungah pistol-in a lo kap thawi vuai a. Chu veleh Red-a hnunglamah chuan Grey Horse chu a tlan phei a. Frank-a nena an inkarah Red-a chu a awm ta a ni. Lehhawi chungin Frank-a chuan, "Red, lo khawih hauh suh. Keiman ka'n chingfel ange," a lo ti vat a. Red-a thung chuan, "A that mai ang che," a lo ti tuar a. Mahse Frank-a chuan, "Lo khawih reng reng suh," a ti tlat a.

Indian pa lam chu Frank-a chuan a pan hnai a, a va hnaih deuh chuan a kut dinglam hian a'n ban deuh zuau a, chu veleh Grey Horse chuan a chemte chuan a lo vai fua a. Rang fahran hian Frank-a chuan Indian pa chemte kenna ban rek chu a lo man vat a. Na tawkin a han hmer a. Grey Horse-a lahin a chemte chuan Frank-a chu vih ngei tumin theihtawpin tan a khawh a. Tha tawpin an pahnih chuan intih nat tumin, Grey Horse-an chemtea a vit tur chu Frank-a chuan a lo dang ngar ngar a.

Rei ngial an inchelh tawn hnu chuan vawilehkhatah Frank-a chuan Indian pa chemte vawnna ban chu hnuailamah hnuk thla in, a ban lehlam chuan a dul nemah a kuttumin a'n dâwm a. Tha tawpa tan a lak lai leh a inrin loh laia Frank-an chutia a theh tak thuaiah chuan chetna hman nei hek lo, Grey Horse-a chu hnunglam leiah chuan a thal ta thuai a. A chemte hum pawh chu leiah chuan a thlauh a. Frank-a chuan a lo chhir sawn thuai a. Grey Horse-a thawh tum rawn kun hniam lai chuan na tawkin a hmuiah ngei chuan Frank-a chuan a kut hnunglamin a'n hem leh a. Grey Horse-a chu a thal leh thuai a, luikama koah chuan a tla thla tep a. Thawh paha a sir lama zuan a tum lai chuan Frank-a chuan a bek hnunglam hretah a'n vai fuh leh a. Grey Horse-a chu tuiah a tla thla ta a.

Frank-an a thlir thlak chuan Cimarron lui luang laiah chuan Grey Horse-a chu a lo lang nghal a. Frank-a pawh chu feet sawm laia sangah chuan a zuangthla ve ta nghal a. Frank-a chuan Grey Horse-a chu li thuk lam deuhah chuan hnuk pheiin, a lu chu li chhungah chuan a nem pil ta a. Tha tawpa tangin Grey Horse chu a rawn tal zangthal a. Chu chu Frank-a duhthusam a ni a. Amah chu kapkalakin a hrawkah a rek a. A zangthal zawng chuan tuiah a hmai chu a nem pil leh a. Number panga thleng a chhiar hnu chuan tui chungah a chawikang leh a. Thawk a'n lak a, a rawn harh fel deuh hnu chuan Frank-a chuan Commanche tawng bawk chuan, "Tu'n nge dawt sawi tura pawisa pe che?" tiin a lo zawt leh a.

Grey Horse chuan engtinmah a chhan loh avangin Frank-a chuan a hmai chu tuiah bawk nem pil lehin, second sawm chhung a chiah leh a. Grey Horse chu a khuh bawrh bawrh a, a hmel pawh a duk deuh a. A lak chhuah leh chuan Frank-a chuan, "Tu in nge pe che, sawi rawh," a han ti tuar a.

Frank-a thinur chuan tuiah bawk a nempil leh ta. Tang tur a awm tawh lo a, a zawi hnap thleng tuiah chuan a chiah a. A la chhuak leh a. Tun tumah zet chuan Indian pa mitmeng pawh a pual ta emaw tih tur a ni a. Grey Horse-a sam phiar kak chu a khingkhata vuanin Frank-a chuan a kut lehlamin a hmaiah chuan a beng chawrh chawrh a. A mitmeng a rawn fiah leh deuh hnu chuan a khinghnihin a hrawkah rekin Frank-a chuan a thing vak vak a. "Sawi rawh, hmela, i sawi loh chuan tuiah hian i tla hlum tawh ngei ang," a tih chuan thei leh theiloin hmui phun titih hian, "Milabel-a," a rawn ti a.

Frank-a chuan, "Khawi atangin nge whisky kha a neih theih?" tiin a zawt leh a. Grey Horse-a chuan sap tawng hmangin, "Corb-a zu dahkhawmna atangin a ru chhuak a ni," a ti ta a. Frank-a chuan luiah chuan chupa chu theh pheiin lui kamah a rawn chhuak a. Vaukamah chuan a rawn lawn chho a. Red-a chu a thaw huai a. A thinur hmel dur pawh Frank-a rawn chho a hmuh chuan a reh sawt a. Indian dangte pawh chu Red-a chuan rawn khalh thlain lui ko atang chuan a nam thla a. Grey Horse-a chu luikam lungpui chungah thuin a hrawk a nuai hauh hauh a.

Frank-a chuan hruizen chu kualin sakawr chu a man a. Red-a nen chuan sakawrah chuangin lui kama Indian panga, thinrim teuh chunga anmahni lo thlirtute chu enin phaizawl lamah chuan an sakawrte chu an kaltir ta a. Red-a chuan, "Tunge lo ni a?" tiin a han zawt a. "Milabel-a. Corb-a whisky tawlh luh a lo ru chhuak anih chu," Frank-a chuan a ti a. Red-a chu a ngawi vang vang a. A hnu deuhah chuan, "Ka hlauh ang ngei ngei anih chu," tia Frank-a chu en chung hian, "Hrep hlawm takin," tiin "Corb-a michhawr ho chauh chu beih dan dan a la awm a, mahse engtin nge mi sawm thum chuang hi nang hian i beih theih tak ang?" a ti ta a.

Frank-a chuan ngui raih chungin Red-a chu a en a, a then deuh sak a. "Kawng chu a awm mai ang," tia phun sap pah hian, "Kil thum atanga inbeih chuan tih dan a awm mai dawn asin," a han ti zui a. Red-a chuan chil lem khalh pahin, "A ngam sang ber hnenah i hralh anga, chumi hnenah chuan intulutin midang chu i bei dawn tihna em ni a?" tiin hnai taka en chung chuan Frank-a chu a zawt ta a. Frank-a thung chuan, "I ring dik lo. Anmahni pahnih inbeihtir tur a ni. An chauh deuh hnuah zuanluh ve chauh tur," a lo ti a.

Then sak chungin Red-a chuan, "Engtin nge kan inbeihtir theih ang?" a lo ti a. Frank-a chuan, "Kan la ngaihtuah ang chu," tiin, " Tuna kan tih tur chiangsa chu he inbeihna hi kil li atanga inbei lovin, kil thum atang ngeiin a ni tur a ni," a lo ti a. Red-a chuan mak a tih hmel riau a. Frank-a bawk chuan, "Barnes-a hian keimah vangin dollar sang nga a hloh tawh a, Red, tunah hian kei min tanpui avang hian mi â let derah a inngai tawh maithei. Chuti chung chuan kan lamtanga kan siam zel a ngai tlat," tiin a hrilh ta a.

Khaw thim hnu deuh takah chuan Frank-a leh Red-a te chuan Hopewell Barnes-a kawt, nawhalh thing lianpui pui hnuai chu an thleng ta a. Red-a chuan hma hruaiin sumhmun chu a lawnkai a, inleng an awm leh awm loh thlira a din vang vang hnu chuan ngaihtha takin kawngka lam chu a pan a, kawngkhar chu a kik ta karh karh a. Luvie Barnes-i chuan kawngka chu rawn panin a rawn hawnsak a. Anmahni chu lo lawm lem lo tih hriat tak hian, "Nangni in ni maw?" a lo ti a. "Keini kan ni," tih pah chuan Luvie-i chu a kal pel a, Frank-a chuan a zui a, a lukhum a la thla nghal bawk a. Luvie-in Frank-a a hmuh chuan maktiin a ang phawm mai a, Frank-a chuan dimtein kawngkhar chu a khar a.

Luvie-i a rawn tawngchhuah leh theih veleh, "Nangmah man theitu hnena pek turin luman i nei tawh tih i hrelo em ni a?" tiin a zawt a. "Ka rin dan reng a ni," Frank-a chuan a ti sam et a.

"I buaina zarzoa midang kan kaitir hi pawi i ti chailo a ni ti raw?" tia zawtin Luvie awki chu a sang hle mai. Red-a chuan, "I pa biak kan duh a ni," a lo ti a. Luvie-i thinur chuan thap zet hian Red-a chu a melh a. "Texas lamah ka pa sum pek che nen khan i kal daih tawh kan lo ring asin. Chutiangte i la sawi ngam chu le," a han ti leh a.

Red-a hmel pawh a sen tan tan a, mahse a insum hram hram a. Luvie-i chuan thu tur pawha sawm chuanglo chuan a pa chu a ko a, "Ka pa, hei i jail tang thian pahnihte chu heta hi an awm e. Nangmah rêp ro turin an lo kal a ni mahna," a han ti a. Barnes-a pawh chu a lo chhuak thuai a, chibai buk zai pawh a rawn rel chuang lo. Hmel hlim tak chu a pu a, mahse a hma ni hnih kal taa thil thleng avang khan hlim taka lo hmachhawn tur an ni em tih a chiang lo. Red-a chuan hul hak hian, "Barnes, i sum min pek kha ka room atangin ruk chhuah daih a ni," a han ti a.

(Laklawh in lo ti leh ange. Vai film pawh an han insual a, changtupa zuan laklawh lai takin fakna a awm thin kha🤣🤣🤣🤣🤣)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 21st, 2018, 8:51 pm

WAR ON THE CIMARRON
Bung - 8

"Khawiah nge i thuhruk reng reng a?" tiin Luvie-i chuan a lo zawt a. "Luvie," tiin Barnes-a chuan, " A sawi tur chu i ngaithla phawt ang," a lo ti hmak a. Red-a chuan, "Chu zawng chu a ni mai, a bo a ni mai. Khawiah nge a bo ka hrelo. Ka mutin kawngkhar a inkalh a, ka thawh pawhin a la inkalh reng a. Chuti chung chuan sum chu a awm tawh tlat lo a ni," a ti a. Luvie-i chuan no hnapin, "I kut veilam tih chu i dinglamin a hre duhlo te pawh a ni mahna," a lo ti a. Red-a chuan a ke a per tak a, mahse engmah sawiloin Barnes-a chu a en ran a.

Frank-a zawk chu lo inrawlhin, "Barnes, a mak khawp mai. Mahse chutiang chu a nih dan chu a ni tlat si. Ka theih huna rawn rul leh turin ka lo kal a ni. Min lo bail ta pawh ni la, sawrkarin ka thubuai an ngaihthlak thlengin an kawl tho dawn a. Chutih hunah chuan i pawisa i hmuhkir dawn chauh avangin chumi hun a thlen hunah chuan i pawisa bo chu ka rul leh ang che," a ti ta a. Luvie-i chuan ngeiawm zet hian, "I rul ngei dawn nia, sawrkar chu chutianga bum chuan i lu man dollar sang nga chu i dawng hmiah mai ang chu," a lo ti vel a. Barnes-a chuan, "Lo ngawi teh, heng mite hian an duh chu sawi teh se," tiin a lo vin a. Frank-a chuan pawr chhak hian, "Barnes, i fanu hian choka lamah ka hnena sawi tur enge maw a neiin ka hria," tih leh Luvie-i bâna kaih a rual a, chokaah chuan a kai lut ta nghal a. Kawngkhar a khar nghal bawk a.

Luvie-i chu a thin a ur kher mai. Frank-a chuan, "Miss Barnes, min ngaina hauhlo. Chhete pawhin min ngaina lo. A chhan min han hrilh teh," a ti ta a. Luvie chuan, "I luhlulin i ngaih a sam a, i sual hle bawk a. I tlu chhe mek a, i rualin ka pa hi chhiatnaah hnuhluh i tum a; chuvang chuan ka ngaina lo che a. Chutiang chuan i tih ka remti hauh dawn lo," a ti ta hmiah hmiah mai a. "Chu, tun atang chuan min do dawn i tihna a ni maw?" Frank-an a tih chuan Luvie-i chuan, "Ka theih angin ka bei ang che," a ti ta hmiah a.

Frank-a erawh chuan, "Ka ring chiah lo," tih pahin chiang tawkin a mit pawl ram chuan a en tlawk tlawk a. Luvie-i chu a hmu tlang vek emaw tih mai tur a ni. Luvie-i chuan, "Min hre chiang tawk lo anih chu," a han ti a. Frank-a chuan pawr chhak hian, "I chanchin thenkhat hriat ka nei. Chu chuan i pa beng a thlen hlauh chuan i chapo thei hauhlo ang le," a ti a. Aw dam deuh zawk hian Luvie-i chuan, "Eng thu maw?" a lo ti vat a. Frank-a chuan, "Mi pali chiah i pa in Red-a sum tam tawk a pe tih hria an awm. Chung mite chu nang, i pa, Red-a leh Otey-a te an ni," a han ti a.

"I thu sawi chuan enge a kawh tum ber ni a?" a lo tih chuan Frank-a chuan, "Red-a hian chu pawisa chu a la lo a, Otey-a hian engti kawng mahin pawisa a la dawn lo bawk a. I pa in Red-a hi a pek tawh avangin ani chuan a la kir hauh lo bawk ang. Tichuan, a bak chu ngaihtuah chhuak ve mai rawh. Jail-a ka tân lai khan thil nih dan chu ka ngaihtuah chhuak vek tawh," a ti zui ta a.

Luvie-i hmelhmang chu a danglam sawt sawt a. Khur deuh der dera nui chung hian, "Pawisa chu laah min puh tihna a ni maw?" a han ti a. "Chutiangin ngaihdan engmah ka siam lo," tiin Frank-a chuan, "Mahse Red-a emaw, kei emaw hi min bei leh anih hlauh chuan nula, khami zana hotela thawk clerk kha kawtthlerah ka khalh chhuak anga, tu hnenah nge chabi spare kha a pek tih hi ka puanchhuah tir ngei ang. Chu chu thil awmzia chu a ni. Ngaihtuah chhunzawm ve tawh mai rawh," a ti ta a.

Luvie-i chu a ngawi vang vang a, "I fiamthu mai mai a ni ang," a tih chuan Frank-a chuan, "Ni e, i pa hi ka thian tha anih angin min ring zual se ka duh. I tawngkam bawlhhlawh tak tak ka ngaithla hnem ta deuh. Ka thusawi kha theihnghilh hauh suh ang che," a ti hmak a. Naupang thuawi tak ang maiin Luvie-i chu choka atang chuan a chhuak ta a.

Amah bail na tura sum bo ta kha pek let leh a intiamna lehkha a siam a, Barnes-an Frank-a lama tan zel a tum thu a hriat chuan che chhuak leh turin a zalen tih Frank-a chuan a inhria a. Chumi zan chuan Frank-a leh Red-a te chu Darlington khaw chhim lam phul hmun zawl zau takah an riak a. Khawvar tantirh chuan an tawlai awmna lam panin an kal tan leh ta. Canadian river chu Reno khaw chhakah kânin thing hmun an pelh hret chuan Frank-a chuan a sakawr a tiding chawt a. Phul hmun phaizawl piah deuh chu a han kawk a. Mel chanve dawna hlaah chuan tawlailir pahnih inzui, thelret puana khuh rit tak phur ni ngei tura sakawr paruk ve ve in an hnuh kal mek chu a va hmu a. Chu chu tihdan phung pangngai tho a ni. Mahse Frank-a rilru la thartu erawh chu heng tawlailirte hian eng ang taka pawimawh nge an phurh ang? Mi paruk silai keng theuhin an escort tlat mai hi a ni. Rangkachak phur an ni maithei angem?

"Saw saw eng thil nge ni ta ang i hria em?" tiin Red-a chu a zawt a. Red-a chu a bu nghat a, "Circle R ho an nih saw. Anni hi hetianga tawlai hmanga bungraw phur thin an ni. Tawhsual an tawh khat deuh avangin vengtu pawh an thahnem lo anih saw," a ti mai a. Frank-a mitmengah chuan nuihzat riauna a lo lang a. "I chiang chiah maw?" tiin a zawt a. Red-a chuan, "Anni chauh hi helam kawng zawh a bungraw phur thin hi an ni," tih pah chuan, "Engvanga nuihzat hmel riau nge i nih a?" tiin a zawt zui a. Ngaihtuah nei ni awm tak hian Frank-a chuan, "Hei hi hriat tuma kan melh reng hi a ni maithei. Hriat chhuah pawh a harsat ka ring lo," a lo ti a.

Red-a chuan kawng hrul thui takah birukna tur thinghmun a awm tih a hrechhuak a. Chulai atang chuan duhtawkin kawnga kal tawlailirte chu an enthla thei dawn tih hriain an kal nghal a. Red-a erawh chu an sakawrte enin a kir leh a. Frank-a chuan an chet vel dan chu a thlithlai reng a. Red-a awmna a va thlen leh chuan a kawrte chu hling leh thingtangin a kai thler nual a. "Circle R ho ngei zawng an ni e. Chawhnu lamah kan chian leh dawn nia," a rawn ti a.

Tawlailir rit phur lehnghal chu an kal muan em avangin a ruka zuitu tan chuan a ninawm duh hle mai. Red-a chuan chumi zan chuan Canadian luiah riak turah a ngai a. Mahse an hnu enin lui kânna khân chhak zawk leh kawng chhe zawk, tlangram kawng an zawh chu mak a ti hle a. "Lui kânna kawng chhak zawk an zawh anih hi. A hniam zawk hi chu phai ram lei a ni a, a lei a dûp deuh avangin rit phur tawlai tan chuan tân mai an hlau ni ngei tur a ni," a ti a. "An phurrit hle anih dawn hi," tiin a chhunzawm a. Frank-a chuan, "Chinchang chiang zawk min han hrilh teh khai," a lo ti a.

Frank-a dilchhut dan chu mak tiin Red-a chuan phawk deuh hra chungin, "A eng chanchin ber maw?" a lo ti a. Frank-a chuan, "Kai chhak zawk chanchin chu. Khawilaiah nge ni a, engtin nge an kai theih ang?" tiin a lo zawt let vat a. Red-a chuan lu thing deuh mât mât chung hian, a thianpa zawhna awmzia chu manin a then sak a. "Kan puitlin thei chuanglo ang. Lui tui luan dan a pangngai reng anih laiin nidang zawng aiin tun tumah hian an lui kân tur an fimkhur zawk daih dawn. Tawlaiin lui a dai hmain leh tawlai ke, nghet taka an kamna an laksawn hmain luikam lehlamah Corb-a hoten lo ambush an tum ngei ringin lamkal leh vengtu an indah ngei ngei ang," a tih lai chuan Frank-a chuan, "Tawlai ke kamna i tia law?" a lo ti vat a.

"Ti e, lui an kânna tur lai hi a chhengchhe hle a. Tawlailir rit phur lehnghal ke te chu ngun taka kam a ngai alawm," a tih chuan Frank-a chuan, "Chung zawng zawng chu engtia hria nge i nih a?" tiin Red-a chu a lo zawt vat a. Red-a chuan, "Hetiang bungraw phur veng hian ka inhlawh reng reng alawm. Vawikhat kalah dollar nga te ka hlawh thin. Morg-a hnena ka thawh takah khan ka bansan chauh a ni," tiin a hrilh a. Frank-a chu a ngawi vang vang a, Red-a erawh chuan Frank-a ngaihtuahna belhchhah tur leh a rilru leh tum hriat beiseiin a hriat atana thaa a rin te a hrilh mawlh mawlh a. A ril a tam hle a, mahse Frank-a avangin riltam a ngaihtuah hman bik lo.

Khua a lo thim fel chuan hla deuh taka tawlai khalhtute riahbuk mei eng chu an awmna atang chuan a hmuh theih a. Phul zinga an mut hmun atang chuan thoin Frank-a chuan, "Ka va thlithlai chiang deuh ange," tiin a tho a, Red-a chuan, "Fimkhur takin che ang che," a lo ti a. "An awmna bulhnaiah thingbuk engmah a awm lo a, a ual au viau a nia," a han ti zui a.

Frank-a chu sakawra chuangin chungho riahbuk lam chu a pan ta a. Hla deuh takah sakawr chu thlungin chiang deuh zawka va thlithlai turin phul buk karah chuan a vak phei a. Chiang taka chungho khawsak dan hmuh theihna tur laiah chuan a biru ta a. An meichhem eng avang chuan ram dang chu chiangin an hmu thei dawn lo tih a hre naa Frank-a chu fimkhur takin a che vel a ni. Ramhnuaia an khawsak thin dan ang thoin hengho pawh hi an lo khawsa ve tih a hmu mai a. Cook chuan an meichhemah chuan chhang urna chu dahin chhang a lo ur mek a, pakhat chuan thingtuah tur pawm teuh chungin meichhemna lam chu a rawn pan mek bawk a. Tawlai khalhtu pakhat chuan an kal leh hun atan a tawlai a buatsaih mawlh mawlh a. Sakawr enkawltu chuan pahnih te tea hruaiin sakawr chu tui in turin a kai a.

Frank-a mit la bertu chu an tawlailir ke te tawlh thei leklo tura kamtu leh tawlai ke hmalama thing kheng mektu chu a ni. An awmna lai hi awihtlan anih avangin tawlaite hi awlsam taka a lirh theih mai dawn avangin chumi venna atan chuan a kete chu tha takin an kam a ni. Duhtawka a thlir kual hnu chuan lui an kânna tur lam chu enkual turin Frank-a chu a hnungtawlh a. Lui kân an tumna lam chu a pan ta a. Lui luang ri atang chuan an thlanglam chu suar a ni tih hriat takin lui luang ri a ring hle a. An kalna tur kawng pawh tawlailir ke pil mai theihlohna tura hmun chang a ni tih a hmu a. A duhtawka a hmunhma te a chian hnu chuan a sakawr thlunna lamah kalin Red-a awmna lam a pan leh ta a.

Hla deuh zawkah insasengin thuthmun an khuar a. Meite chhemin Frank-an lui tui a rawn hawn chu thingpuiah lumin an in a. Hun engemaw chen an tlukzal hnu chuan Frank-a chuan a rilrua thil awm chu a hrilh ta a. Red-a chuan ngun takin a lo ngaithla a, a sawi zawh chuan Red-a chuan, "A vengtu ber chu engtia tih tur nge ni ang?" a lo ti a. Frank-a chuan, "A lo chhuah veleh ka lo vaw thlu mai ang. A lo kalloh erawh chuan tihngaihna a awmlo a ni mai,"a ti a. Red-a chuan engmah a sawilo nain Frank-a chuan a remtiah a ngai hmiah.

Darkar engemaw zat an nghah leh hnu chuan sakawra chuangin chung mite riahna lam chu an pan leh ta a. An fimkhur hle a, an sakawr rim an lo hriat loh nan tiin hla deuh leh thli beng lohna lamah an sakawrte chu an thlung a. Chungho riahna hmuna mei pawh chu a lo mit vek tawh a. An pahnih chuan chungho riahna lam leh tawlailir awmna lam chu panin kalna tur an insem lamah chuan an inthen ta nghal a. Red-a chuan camp-a meichhemna lehlam chu a pan a, Frank-a erawh chuan camp chu a pan ding nghal a.

Red-an bawkvaka a awmna tur lam a pan lai chuan camp vengtu ber chuan thingtang tereuh te te elh tliakin an meichhemah chuan a lo tuah a. A bul lawk lawkah chuan a thiante dang chu an muhil bawrh bawrh a. A hnu deuhah chuan guard chu thim lamah tawlhlutin tawlailir ke chu nghengin a va thu a, a mal chungah a rifle chu a nghat a. Mei a zu deuh reng a, a khat tawkin a kan kual a. Mahse englaimahin a rifle chu a thlah ngai lo. Mei eng chinah a kal kual duhlo a, engemaw changa mei rêm tur va chhawm nun bak chu mei bulah a kal lo.

Darkar chanve zet a ral hnu chuan Red-a chuan Frank-a hian a thil tum chu a thulh leh ta mai em ni aw tia a ngaihtuah laiin wagon awmna piah deuha sakawr thlunna laia sakawr thawm chu a hre ta. Chu thawm chu guard pawh chuan a ngaithla vang vang a. Mahse a reh leh mai avang chuan a thutna ngaiah a thu leh mai a. A thu fel chauh tihah sakawr thlunna lam atang chuan thawm a awm leh ta. A'n ngaihthlak chian chuan sakawr ke per thawmte a hriat zui tak avang chuan thil engemaw a thleng niah a ngai ta a. A tho a, tawlailirte a kal hual hnu chuan hruizena an hung sakawr thlunna corral lam chu a pan ta a. Chutihlai tak chuan chupa hnunglama mi pakhat kal leh bawkvaka tawlailir hnuaia vak lut ta chu Red-a chuan a va hmu ta a.

Guard chu a lo kir leh a, ngaihthalo tih hriat takin corral lam chu a en zak zak a. Mei a va tuah tha a, a thutna lam chu a pan leh ta a. Thaw dep dep chungin Red-a chuan chulam chu a thlir ran a. A beisei ang ngeiin thil phe vuai a hmu a, a ri leh chawrh a. Reiloteah guard chu a thutna bul zawlah zalh a ni ta. Nui var var chungin fimkhur taka mei chhemna lai kal hualin Red-a chuan tawlai dinna lam chu a pan a. Tawlai pakhat hnuaiah chuan a thu a, piah deuha Frank-a ding pawh a hmu thei a. An inkar lawkah chuan vengtu ho chu blanket-a inkhuhin tui takin an mu hlawm a.

Ruahman lawk angin Red-a chuan chemte chu a phawrh a, tawlai kal theihlohna tura an phuarna hruizente chu a zai chat mawlh mawlh a. Tawlai ke dâlna thing an khamte chu zawn sawnin, pakhat dâlna an laksawn zawh chuan tawlai pakhat zawk ke dâlna chu an la sawn leh a. An tihfel zawh chuan tawlai pakhat zawk hnuaiah chuan thu in,"Kan inpeih thawkhat e," tia phun sap chung chuan tawlai ke hmalamah chuan an kal a. A ke kamna chu an la sawn leh ta a. Mahse a che chuang hauh lo. An pahnih chuan a keah chuan kokia doin theihtawpin an nawr ta a. A che hrut a, a ding leh a. A che leh hrut a, engti kawng maha tih din ruallohin thlanglamah chuan a lir ta a.

An pahnih chuan thim lamah chuan an insaseng a, ring tawk hian Frank-a chuan, "Yee-ow-eeeeeee," a han ti ta a. Camp-a mu ho chu a rual hian an tho thawt a. An thil hmuh hmasak ber chu tawlai, thim zinga thlanglam panga a lir liam chu a ni ta. Pakhat chuan, "Bart," tia koin, "Tawlai a lir liam ania," a han ti a. Midang ho pawh rawn tho chhuakin rifle an rawn lek a. Pakhat chuan van lam hawiin silai a'n hmet puak ngawt a. Chutah tawlai liamthla thawm chu thaw dep dep chungin an ngaithla a.

Tawlai liam thla thawm chu a ring kher mai. A insawh ri bur bur a, vawikhat reilote chhung a reh duk a. A lo dâltu thing tlu thawm nen a ri leh ta bur bur a. A tawpah phei chuan luiah a zuk tla lut ta nge nge a. Luia a tla thawm an hriat veleh vengtuho chu hmanhmawh takin lui lam panin an tlan thla a. Frank-a leh Red-a te erawh an birukna atanga rawn chhuakin tawlai pakhat lam an pan nghal a. An tihdan pangngaiin tawlai ke kamna an la a, theihtawpin an nawr leh ta nghal a.

Chu veleh thlanglam atang chuan pakhat hian ring mangkheng hian, "Invengin tlanchhe r'u....pakhat dang a rawn lir thla leh ania," a ti vawn vawn a. A hmaa mi ai khan a thawm a ring a. Luia a zu tlak thlaknaah khan a hmasa ami a zuk delh avangin a ri a ring zual a. A ri ring zual a tawp fel, thawm dang awm leh hma chiah chuan Red-a chuan ring em em hian, "Whisky in leh te in duh anih ngai chuan in lei ve tawh dawn nia," tiin a'n au a. An pahnih chuan an pil bo ta nghal hmak a. Khatia an auh avang khan a tituah heng ho hian Scott Corb-a leh a hote tihah an puh hmiah an ring a ni.

Milabel-a office hma chiahah chuan kawt zawl leh corral a awm a. Circle R awmna kawt zawl a lo thlen a, Bart Hampstead-a sakawr atanga a chhuk rualin Milabel-a chuan amah chu a lo hmu nghal a. A thutna atanga thoin kawt zawl a pan a, Hampstead-a lam chu a pan nghal a. Cottonwood thing lianpui hnuai hlimah an ding a. He thingbuk hi a len em avangin Circle R headquarters building pawh a chanve lai chu a hlim hnuaiah hian a awm a. Milabel-a chuan, "Bart, eng thil nge ni ta a?" tiin a lo zawt a. A hmai vung leh duk te pawh tunah chuan a lo ziaawm deuh tawh a. A mit bui cher chur te pawh ziaawm tawhin a khaw hmuh pawh a fiah viau tawh a ni. A mit dinglam hnuaia kak pawh a lo hil hle tawh a.

Bart Hampstead-a chuan thaw hlap hlap, thinrim fe hian, "Kan bungraw phur tawlai pahnih hmarlam luiah an tla a, a thil phurh zawng zawng, vaimim te, chhangphut te leh thil dang zawng zawng chu a chhe vek," a rawn ti bawrh bawrh a. "Engvanga chutianga awm ngawt nge ni a?" tiin Milabel-a chuan a lo zawt a. Hampstead-a chuan, "Corb-a leh a hoten kan mut hlanin Barney-a an lo chhu thlu a. Tawlai phuarna leh dâlna zawng zawng la sawnin luiah an nam liam a ni. Cova chuan pakhat a umna lamah a ban a tihliam a, sakawr zawng zawng an um darh vek avangin hei chen hi kein kan lo kal a ni," a tih chuan Milabel-a chuan, "Hahchawlin thawkte han la phawt teh," a lo ti a. A han nghak vang vang a, "Engtin nge Corb-a tih a nih i hriat. Amah chu i hmu em ni?" tiin a han zawt a.

"Hmu nang, mahse min rawn au a, 'whisky te in la in duh anih ngai chuan tun atang chuan a leiin lei ve tawh rawh u' min rawn ti a ni," Bart-a chuan a ti a. Bung vatin Milabel-a pawh chuan, "Amah Corb-a ngei anih chu. Tunah Kristiana ram a luah ta a, a thaw lian tan ringawt tihna a ni," a lo ti hmak a. Bart-a chuan sawitur nei awm takin a ka a ang zuau a, a ke a'n chhep rem a. Mahse a pu mitmei vengin a ngawi leh a. A pu Milabel-a chuan, "Enge sawi tur i neih a?" tiin a zawt a.

Bart-a chuan, "Ran chaw kan phurh thenkhatte kha Shafer-a hoten bawng hralh tur ho khat an khalh mekte ei tur a ni a. Zaninah hian North fork an thleng anga, eitur an nei dawn lo tihna a ni," a han ti a. Milabel-a chu a rûm nghut a, "A nih tak chu. Tawlai tê chi kha Reilly-a tirin a hnuk tur sakawr buatsaihtir nghal la. Post-ah kalin an tla tawk tur ran chaw leiin Shafer-a hnenah chuan kal nghal rawh se," a ti a.

"Keimah kal se min ti em?" tia a zawh chuan Milabel-a chuan, "Ti lo. Nang chu midang ho lo thlen thlenga heta awmah ka duh che," a tih chuan Bart-a chu corral lam panin a kal nghal a. "Bart," tiin Milabel-a chuan a va pan hnai a, "Zaninah hian Corb-a chungah tih tur pawimawh zet ka nei a. Shafer-a leh a bawngrualte chu Corb-a hoten zanina an tihbuai phaka hnaiah an awm angem?" tiin a han zawt a. Bart-a thung chuan, "An chunga i tih tur a zir a niang chu. A sakawr zawng zawng i um darh vek chuan Shafer-a ten lui kanna hun an nei thei ang. North fork-a lui an kan hman phawt chuan Corb-a leh a hote chuan an beih zui ka ring lo," a lo ti a. Dam thlup hian Milabel-a chuan, "Chu chu ka hriat duh chu a ni e. I thiante ho lo thlen veleh mi hriattir ang che. Tin, Shafer-an rei nghaklo a ran chaw leh eitur a neih theih ngei nan a mamawh chuan a hnen a thleng ngei tih hre bawk ang che," a ti ta zel a.

Inherin in lam chu a pan a, a hmelah ngaihtuah a ngah tih a lang reng mai. Office a thlen chuan a thutthleng vir theiah chuan thuin dawhkanah a ke khinghnih a hlang a, corral lam chu a thlir vung vung a. Circle R remruatna tihhlawhtlin azara Kristiana ram, Corb-an a luah tak avanga Abe Puckett-an a ân khum bawrh bawrh lai kha mitthlain, a nui suk a. Tunah hi chuan a ngaihdanin Corb-a hi a kal thui hrat a ni. Kristiana ram a lo luah hmak pawh a dikloh tawh vei nen, hetianga a bungraw phurtu tawlai te khamah a tlanliamtir hi chu nuaibo theih loh sual anih tawh avangin Corb-a hian a tuar ngei ngei tur a ni tiin a ngaihtuah a. A inchhirna ngei tura tawrhtir tulin a hria a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 21st, 2018, 8:51 pm

WAR ON THE CIMARRON
Bung - 9

Chumi tlai lama tawhsual tawk ho an rawn thlen kim chuan a lukhum chu la in cowboy ho tawmna in bunkhouse lam chu Milabel-a chuan a pan nghal a. Chau tih hriat taka pakhat te tea an lo luh kimah chauh Milabel-a chu a tawng chhuak ta a. Chumi hnuah chuan an hna chhunzawm dan tur leh an kal dan tur te sawi zuiin zanriah eina tur dar ri chu an hre ta.

Ngawi rengin zanriah an ei a, an eikham chuan mi sawm pariat lai te chu sakawrah chuangin pahnih te tea inkawpin khawchhak lam an pan ta a. Milabel-a chu amahin a kal a. Khua a thim meuh chuan Circle R hmunah chuan cook chauh a awm ta.

Sakawr sawm chuang zet oak thingbuk hnuaia dingte chuan an ke an per sek a. An bula mihring hote pawh chu phunin an inbe sur sur hlawm a. Chutihlai chuan mi pahnih hi lo thlengin sakawr atangin an rawn chhuk nghal a. Milabel-a chuan aw thum pawr chhak hian, "In chingfel thei em?" tiin a lo zawt nghal a. Pakhat zawk chuan, "A hungna kan thiat darh a, sakawr awm zawng zawng kan um darh vek," tiin a hrilh a. "Inah eng a awm em?" tia a zawh chuan pakhat chuan, "Awm lo. Mahse sumhmunah vengtu pakhat a awm," a ti thuai a. Milabel-a chuan a sikret zuk lai chu leiah paihin a raphlum nghal a. "In awmna tur hmun theuh in pan nan minute sawm panga hun ka pe a che u. Chumi hnua chet dan tur chu in hriat tawh kha," a ti ta a.

Amah leh Bart-a chu midang paruk nen ngaw chhungah chuan an pil bo ta a. Pakhat te te in thim zingah an relhru a. Milabel-a chu thawm dim takin a kal a. Khawnvartui rim a hriat phei chuan a fimkhur leh zual a. A hnu lawkah chuan tawlai ke a va dek a, a ding chawt a. A thlang lawka thim chhah bik, in ni ngei tur chu thing dinna thlang deuhah chuan a hmu nghal a. A beisei ai daihin a tih tum chu awlsam dawnin a hria a ni. Mi parukin tawlai ke pali nei rit vaklo chu thawm nei miahloin an rawn zawn phei a, in lama mite ti harh loin thing karah chuan an rawn zawn phei a.

A hun thleng tawha a hriat chuan Milabel-a chuan nawhalh a nawt a, a kawr lianpui hnuaiah a sana chu a han en a. A hun tiam chu minute sawmhnih laiin a pel tawh tih a hmuh chuan a bul hnaia Bart-a lam chu hawiin, a nawhalh alh lai chu tawlai chhungah chuan a theh lut ta a. Khawnvartuia theh huh thing tang rawn kang chu a puak tek tek a. Bart-a chuan tawlai ke kamna chu a lasawn a, chutiang bawkin Milabel-a chuan a ti ve nghal a. An pahnih chuan tawlai chu an sawi nawk nawk a.

Tawlai chhunga khawnvartui bur insawi avang chuan a chhunga khawnvartui chu a baw chhuak a, chu chuan mei chu a ti alh zual sauh sauh a. Tawlai lir thla chuan in a hnaih tawh tihah sumhmun atanga vengtu silai kah rik chuan zan khawhar tak chu a tiharh ta. Tawlai chhunga khawnvartui bua in mei alh a ti zual zel a, a lir chak tial tial bawk a. Choka lam panin a lir zel a. An beisei tak zuk su fuh lo mah se in kil ban chu tawlailir chuan a zuk su dawt a. Chu veleh a chhunga khawnvartui barrel inhawng sa te chu a rawn bua a, namenloin mei chu a alh ta zuai zuai a.

Bart-a chuan hnunglam tukverh chu rifle-in a lo kap mek a. Chutih laiin Milabel-a chuan in chu hel kual deuhin sumhmun lan theihna lam chu a pan bawk a. In lam atangin silaia chhan letna chu a rawn ri thuai thuai a. In chu a kang nasa in a alh zau tial tial bawk a. A hnu reiloteah chuan mi pakhat hi choka tukverhah rawn zuang chhuakin ngaw lama insaseng turin a rawn bei a. Mahse silaimu leng vak chu pawn a chhuak fel tihah a tawng nawlh a, a let tawp a, che zui tur a awm ta lo.

In kang nasa avang chuan in leh a chheh vel chu a eng hle a. Milabel-a pawh chuan a hote tan khawhna hmun chu a hmu thei vek a ni. A awmna lai chu tuma hmuh theih loh nia a ngaih lai chuan Corb-a silaimu chuan a nghen lai thing chu a lu chung maiah hian a rawn deng ta dawt a. Rang fahranin thing hnunglamah chuan a bibo ta vat a. Chutihlai chuan in atangin pakhat chu a rawn dawk chhuak zawk a, corral lam pana tlanin ran chaw dahna in a thleng hman tep a, mahse a thlen hma in an kap thlu leh ta.

In kang a nasat em avangin chhun lai ang maiin a eng tawh a. Silai ri a reh deuh lai chuan thûm pawr ring tak hian Milabel-a chuan, "Corb," tiin a han au a. Corb-a pawh chuan in kang puak ri tuk tuk karah thinrim tih hriat tak hian, "Milabel, i thlarau chu anchhe dawngin awm rawh se," a rawn ti a. Milabel-a chuan, "Ka bungraw phur wagon sawisakte i rilruk leh ngai anih chuan chet i lak hmain tum hnih tal ngaihtuahna hmang hmasa ang che," a han ti zui a. A sawi zawh rual rual chuan in atang chuan ngaw lama in saseng turin an rawn tlanchhuak a, mi paruk tlan chhuak zingah chuan Corb-a pawh a tel nghe nghe a ni.

Circle R ho chuan han kap zui ngial mahse an rin loh lai taka an rawn tlan chhuah thut avang chuan a hnuhnung pakhat bak chu an kap fuh hman ta lo. Midang erawh chu an sahim nan ngaw chhung an lut hman a. Milabel-a chuan an muangchan vaih chuan tlanchhuak ta te khan an lo lehkhalh hman dawn tih hriain a sakawr lam chu hmanhmawh takin a pan ta a. Midang ho pawh pakhat te tein an tanhmun atang chuan thoin an sakawr thlunna lam an pan a. Milabel-a chuan a hote him takin an insaseng kim tih a hriat chuan in kang lam chu a thlir vung vung a, lungawithlak ti tak chungin a naute tlanna lam pan chuan a sakawr chu a kal tir ve ta a.
***************

Milabel-a wagon leh a thil phurh te kawng atanga luia an nam liam tuk, zing karah chuan Frank-a leh Red-a te chuan an ram kil chhak lam phul hla fea Otey-a enkawl, thawmhnaw leh eitur phur wagon chu an hmu a. Mahse an va hnaihchilh mai lo. An awmna thing hmun leh phul inthenna laiah chuan an sakawr atanga chhukin an mutbu te an la thla a, mutna siamin an mu ta zawk a. Chhun pachanga tawlai awmna pan chu atthlak leh hlauhawm a ni tlat.

Chawhnu her, tlai lam tawhah chuan Frank-a chu lo harhin Red-a pawh kaitho chuanglo chuan a puanthuah a tel a, sakawrah chuangin a hlang nghal a. Tawlai awmna lamah chuan a kal ta a. Tawlai atanga yard za vel a thlen chuan tawlai chu a'n thlir vang vang a. Joe Vandarmeer-a, cook chauh kha tawlaiah chuan awmin a chungah a lo muhil tih Frank-a chuan a va hmu a. Frank-a a va thlen a, a kaih harh hnu chuan a riltam thu leh eitur thahnem tak a mamawh thu a sawi chuan Joe-a chuan a lo khawngaih hle a. Frank-an meichhem a coffee a chhuan lai chuan sarêp lian leng lawng hi a rawn pe a.

Frank-a chuan hâm bai bai chung hian, "Khawiah nge mi dang hi?" tiin a'n zawt a. "Otey-a leh midang zawng chu kan ram chhak lam kil fangin an chhuak a. Beach-a erawh chu ei tur lamin Reno-ah a kal a. A ching dawklak titih ta. A thuhrimin a hawklak deuh a, a buaipuiawm lek lek ang tih ka hlauthawng khawp mai," a lo ti a.

Coffe a so dawn mek lai chuan Red Shibe-a pawh a rawn thleng hlawl mai a. Eitur hmel a hmuh chuan a hlim hle a. An chaw eikham dawn lamah chuan Beach Freeman-a pawh chu a rawn thleng ve a. Eitur a rawn hawn chu a bag chawpin wagon chhungah chuan dahin Frank-a leh Red-a te ep chiahah chuan a thu a. Tlangval hmel pan deuh, mahse luhlul hmel tak pu a ni. Naupan tet atanga mahnia khawsak ching ho chu dan naranin an luhlul tlangpui thin angin he tlangval pawh hi in leh lo chhuahsana a khawsakna a rei tawh a. A la naupang deuh nain hnathawh kawngah a fel hle a. Frank-a hian puitling zawk bulah khawsa se, saloon leh khawlai a ngainatna a tihrehsak theih beiseia chhawr a ni. Chutiang anih lai chuan Joe Vandarmeer-a thuhrilh khan Frank-a rilru a tibuai tlat. Hna mumal tak pek anih loh laiin khuaah kalin saloon-ah a tâl tam deuh tihna a ni. Ama nun thlak danglam turin a ram an chuh hi a chinfel phawt loh chuan han chhawr ngaihna a awm rih si lo.

A tih dan thin aia nelawm deuh hian Frank-a chuan, "Beach, i hnathawh hi i ning deuh tawh tihna em ni a?" tiin a'n zawt a. Beach-a chu a nui sak a, mei a chhawm tha a. "A ang khawp mai," tih pah hian hlim hmel pu tak chungin a iptea bag a phawrh a, mei a zial a. "Sipai hmuna dawrah khan thil hriat engemaw tak ka nei asin," a han ti a.

"Eng lam maw?"
"Milabel-a leh Corb-a te inbeih thu a ni," tiin Beach-a chuan, "Nizanah khan Milabel-a bungraw phur an ven reng laiin a tih chhiat sak a ni," a'n ti zui a. Frank-a chuan Red-a chu enin an nui sak a. Chu chu Beach-a chuan a lo hmu reng a. "A eng chu nge nuihzat tur awm a?" tiin a lo zawt vat a. Frank-a chuan, "I hriat dan min hrilh phawt la, ka hrilh ve ang che," a lo ti a.

Fimkhur takin Beach-a chuan, "Chawhnu lam khan Circle R mi chhawr pakhat khuaah tawlai nen lo lutin eitur thahnem tak a rawn lei a. Hmanhmawh phelengin tawlai hnuk tur sakawr pawh thlak hman lovin hmar thlanglam panin a chhuak leh nghal a ni," a han tih chuan Frank-a rilru a la ta hle a. "Hmar thlanglam panin maw?" tiin a lo zawt vat a. "Ni e, clerk hnenah tawlaite tihchhiatsak an nih thu a hrilh ka hriat veleh sakawr in lam panin ka chhuak vat a. An tlan liam lai pawh ka hmu ngei alawm," Beach-a chuan a ti a.

"Thudang hriat i nei em?"

"Nei hran lo. Walkin Elk-a naute an lam rik chu ka hria a, mahse a ziktluakin engmah ka hre lo," a tih chuan Frank-a chuan, "A awmzia i hria em?" tiin a zawt a. "Chulamah chuan Walkin-a te hian camp an nei alawm," a lo ti a. "Bawng khalh mek te tan chaw an mamawh hle tihna te pawh a va ni thei mai awm ve," a lo tih chuan Red-a chu a bu nghat nghat a. An in en a, an nui leh ta ngawt a.

Beach-an a hmuh chuan ring thak hian, "Eng nge in nuih leh tak ngawt a?" a lo ti a. Frank-a chuan, "Eng dang nilo e. Keimahni hian Circle R bungraw phur tawlai chu kan tichhia a ni," tiin kimchang takin an tihchhiat dan chu a hrilh zui a. Meng phawk hraa makti takin Beach-a chuan a ngaithla a. A sawi tawp hnu chuan a nui ta chiam a, a hmelah engemaw duhkhawp loh awm tlat hian a lang. Thudang sawia Frank-a leh Red-a te an inbiak pawhin engmah reng a sawi duh lo a, anmahni enin a ngawi ran mai a.

Khaw thim hlim chuan Frank-a chuan, "Joe, kan chet chhuah a ngai dawn a, kan eitur engemaw zat han buatsaih ta che," tiin thu a han pe a. Red-a pawh a tho a, an sakawr tlatna lamah kalin a va man a, Beach-a chuan kut khur der der chungin mei a tuah a, Joe-a leh Frank-a te eitur lakhawm vel chu a en ran a. Meizial a fawp chhen bawk a. A tawpah chuan rawn ding chhuakin Frank-a bul chu a rawn pan ta a. "Frank, thu engemaw ka sawi thei angem?" a va ti ta a. "Sawi rawh, sawi rawh," a lo ti vat a, mahse Beach-a chuan, "Hetah lo hian," a ti leh ta kher a.

An kal fal deuh hnu chuan Frank-a chuan Beach-a hmel chu a'n en a, a thutak hmelin a sen deuh teuh mai a. "Red-a nen bawngrual chanchin in sawi lai khan in hmel ka lo thlir reng a. Frank, bawng khalhtu ho va tihbuai in tum a ni tiraw?" tiin a zawt ta a. "Ka hrelo le," tiin Frank-a chuan, "Kan la sawi fel tlat lo," a ti a. "Ka kal ve dawn," Beach-a chuan a ti tawl mai a. A thu hnial tuma a ân chhuah dawn lai tak chuan Beach-a chuan, "Frank, tunah chuan puitling ka ni ve tawh. I hnena thawk tura min lakluh tirh pawhin hetiang thil ti turin min tiam nghe nghe kha. Ka hnathawk i hmu a, ka thawk tha tawk bawk. A ni lawm ni?" a ti zui a.

"Tha teh reng mai,"

"Hna thawh ka duh ve tawh. Tih tak takah chuan zantin maia Otey-a phun ri ngaihthlak te hi ninawm deuh asin. In pahnih hian engkim in ti a, eng nge in tih pawh kan hrelo a. Tih tur awm apiang ti turin Otey-an sipai hmunah min tir a, ka haw a, Otey-a vekin eng ang harsatna nge kan la tawh dawn tia a hlauhthawn thu sawiin zankhua khuain a phun a. Ka ngaithla kham ve tawh ania," a han ti leh a.

"He thil hi chu a risky khawp asin, Beach. Tin...."

"Chutiang hna hlauhawm chu a ni ka duh. Tar pawh ka ni lo,"

Beach-a hmelah tumruhna a lo lang a. Naupang seilian enkawl hi a harsa a, engtikah chiah nge puitling hna an thawh theih hriat anih loh avangin hna khirh tak hi a thawk ve thei tawh mai tak ang a....tiin Frank-a chuan a ngaihtuah zui a. Aw dam thlap hian, "Beach, silai chelek hauh loh tur a ni. Chubakah chak taka chet a tul ang a, a hun hmaa kan thiltih bansan hauh loh tur a ni bawk," a ti ta a.

Phur zetin, "Min han chhin teh reng la," Beach-an a tih chuan Frank-a chuan, "Chuti anih chuan kal la, eitur leh i sakawr buatsaih nghal rawh," a ti ta a. Hlim fea au chhuak chungin Beach-a chuan tawlai lam a pan a. Chutihlai chuan Red-a chu a rawn kal a, Frank-a chuan Beach-a kal ve tur thu a lo hrilh nghal a. "Ani telin chung bawng rual chu zanin hian kan va khawihbuai dawn tihna maw?" tiin Red-a chuan a zawt vat a. Frank-a chuan, "Eng nge a pawina tur awm ang?" tia a zawh let chuan Red-a chuan dam deuh hian, "Engmah," a ti mai a.

Red-a chuan tha a ti lo niin a hria. Mahse Frank-a chuan luhlul chhuahin a tum chu thlak danglam a tum chuang lo. Red-an remti lo mahse hetah hian boss a ni a, midang a pawisa vak tur a ni lo. Tunah outlaw ni tawhin, a remchan hun ang anga chetlak a ngaih tawh lai hian hnial kalhna te chu a tawn tur reng a ni a. Pawisak vek sen chi a ni loin a hria a ni.

A theih hram chuan nikhata tlai pawh a duh tawh loh avangin zankhuain chak takin an kal ta a. Red-a, a kawng chin leh ram chin hre berin hma a hruai a, khawvar dawn hnaihah chuan Red-a chuan a sakawr chu tidingin, "Ngaithla r'u," a lo ti a. An dina an han ngaihthlak chuan hla taka ui bauh thawm chu an hre ta. "Chulai hmun chu Walkin Elk-a camp a ni ang," tiin Red-a chuan, "Ka rindanin chu camp hnuai lui kânna, sipaiho pawhin an hman thin lai chu Circle R hote chuan an bawngrual, kum thum bawr vel khalh kai nan chuan an hmang ang. A hmun a dam tha a, kalna tur chi tak a ni," a ti a. Frank-a chuan, "Chulam pan chuan kal ila, kan hre mai ang chu," a lo ti thuai a.

Darkar khat dang an kal leh chuan khawchhak lam arsi te chu nichhuak turin a rawn chhun dal tan ta. A hmanhmawhna rilru nen bawngrual awmna an thlen meuh chuan khua a eng tawhin chetna hun an nei tawhlo mai awm mange aw tiin Frank-a chuan a ngaihtuah a. Ruam atanga tlang dung an pawh chhoh chuan an hma lawka camp-a mei chhem alh tha tak chu an hmu ta phut a. Rang takin Frank-a chuan Beach-a sakawr hrui chu a man chawt a. Red-a pawh chuan a hmu ve nghal a. Fimkhur leh rang takin chu camp chu khawchhak lamah an hel ta a.

Hla deuh tak, phaizawla wagon bula meichhem chu chiang takin an hmu a. A bulah chuan mi pahnih an lo vei theuh theuh a. Pakhat chu sakawr vengtu a ni a, pakhat chu cook a ni. Chumite piah deuh phaizawlah chuan thim deuh hmuk tham hian an bawngrual chu an bawk khup mai a, an hahchawl ve a ni. Chung zinga a hruaitu deuh ber chu rawn thoin a hnu reiloteah bawngrualte chuan an rawn zui ngei dawn. An zing tho tuihal chuan lui lam chu an pan nghal dawn a ni.

Frank-a chuan zawi sap hian Beach-a hnenah chuan, "Red-a nen khan hmarlam atangin sawng ho saw va thawng tho ula, lui lamah va um thla rawh u. Tumah be lo la, silai chelek hauh suh. Khua a var fel veleh lui pakhat kan kân hnuhnun ber kan kânna lai kha pan la, chutah chuan kan innghak ang," tiin a hrilh a. An inthen a, Frank-a chuan a han nghak deuh a. Silai vawikhat a han rik chuan Red-a chuan ring tawka au chung hian a spur-in a sakawr chu a'n kheng a. Chak tawka a sakawr chu tlantirin wagon sir lehlamah bawngrual awmna lam chu a pan ta. Van vawr zawngin silai vawihnih a hmet puak bawk a.

An muttui lai taka thawm rawn awm ta thut chuan bawngrual mutui lai chu rawn thawng harhin hmanhmawh takin an tho a, an kite chu a inkhak ri sung sung a. Kalna tur lam pawh hreloin an innawr tawn a. Anmahni vengtute pawh an mutna atanga rawn thoin silai an chuh a, an sakawr lamah an tlan nghal a. Chutihlai chuan Red-a leh Beach-a te bengchheng siam avang chuan bawngrual innek buai nuai nuai chuan bu chel chul chungin kal an siam tan ta. Frank-a pawh chuan ring tawka au chungin bawngrual hnunglamah chuan a um ve ta a. Van vawr zawngin silai a hmet puak bawk a. Wagon bul vel chu tunah chuan a ruak ta huai mai. Cook pawh wagon-ah chuan lawn kaiin an bungraw phurh chungah chuan dingin bawngrual tlanna lam chu a thlir vawng vawng a.

Bawngrual tlemte peng darh umin Beach-a chuan van lamah silai hmet puakin a rawn um a. A pistol mu thun chhungin ring takin a au bawk a. A dinglamah chuan mi pakhat rawn tlan a hmuh chuan Beach-a chuan a pan nghal a. Bawng tlan thawm bengchheng tak karah chuan ring tak hian"Red-a i ni em?" a ti ta pek a. A au zo chiah tihah Frank-a thupek a bawhchhia tih a inhre ta. Chumi rual chiah chuan a lam pana rawn tlan chuan a rawn kap a, a nakah a rawn thawi fua a. Bawng vengtu zinga pakhat niin Red-a emaw a lo tipalh a ni.

Beach-a chu a buai ta tlat. Amah inven nan silaia a kah ve a ngai dawn ta. Chupa kâ chu a hup ngei a ngai tlat. Chupa lam hawi chuan a silai a lek a, a chhaklam tlang dunga a thla lo lang chu ngun taka khur dar dar chunga tinin a pistol chu a hmet puak ta. Chupa chu mi chak takin a sakawr chung atanga laksawn ang maiin silaimu chuan a sakawr chung atang chuan a lenthla lawp a. Hlauthawng leh mangang tak chung chuan bawngrual lak atang chuan tal chhuah tumin a sakawr chu Beach-a chuan a tlantir ta. Vaivut khu tak karah wagon sir lawkah mi pakhat lo kal a hmu a, Frank-a a ni tih a hria a.

Tlema bawng tlan thawm a reh deuh hnu chuan Frank-an, "Cook," tia a au thawm chu Beach-a chuan a hria a. A sakawr tidingin a lo ngaithla a. Cook pawh chuan aw lo chhuahna lam chu hawiin, "Tunge i nih?" tiin a zawt a. Frank-a chuan, "Kir leh ta la, Milabel-a hnenah chuan 'whisky i in duh anih chuan a ruka ru chhuak loin aleiin lei ve tawh rawh' tiin hrilh ang che," a han ti a. Cook chuan aw lo chhuahna thim lam chu ngun takin a thlir a, Frank-a lah chu a kalbo lehnghal daih a.

Beach-a chu a dinna piahlamah a insaseng a, a hnunglamah amah pana lo tlan an awm tih a hriat veleh a lehhawi a, a silai kauin tunge anih tih fiaha a en lai chuan, "Dah bo nghal rawh," tih thupek a dawng ta. Thupetu chu Red-a a lo ni a, a bulah chuan rawn dingin ngeiawm ang reng tak hian, "I kap tha khawp mai, a thi tawh," a rawn ti a.

Beach-a chuan pawiti tak hian, "Red, ka....ka kap lo theilo a ni. Bawngrual zingah ka talbuai a, kha pa lam hawi khan bawngrual khan min khalh kal tlat a.Chubakah amah khan min rawn kap a ni," a han ti a.

"Engvangin nge a kah che?"

"Engvangin i tia lo?"

"Engvangin nge a rawn kah ringawt che,"

"Bawngrual ka um lai min hmu alawm"

Beach-an a tih chuan Red-a chuan, "Dawt i sawi a ni," a ti hmiah a. "Ka hming lama i au kha ka hre reng alawm," a'n ti zui a. An tawng leh ta hauh lo. Khawvar engah chhim lam panin an tlan a. A khat tawkin bawng vengtu hoin an bawngte thunun tuma silai an hmet puak thawm chu an hre leh phauh thin a.

Bawngrual awmna atanga hla tak, lui pakhat an kânna laiah chuan sakawr atangin an chhuk a. Red-an mei a zial zawh hma chuan Frank-a pawh a rawn tlan thleng ve ta nghal a. Frank-a chuan, "Kha baka bawngrual hlauhlawpa tlanchhiattir dan kha kawng dang a awm chuanglo e," a rawn ti a. Red-a thung chuan, "Beach-a hian a vengtu pakhat chu a kap a, a kap hlum der mai," a lo ti a. Frank-a chu sakawr atangin a chhuk a, che maploa ding chung hian, "Eng a?" tiin a'n zawt a. Red-a chuan, "Thil awmzia fiahin ka talbuai tep lehnghal," a tih chuan Frank-a chu a lungawi lo kher mai.

Lui laia ding Beach-a chu chiang taka enin, "Anmahni beia kap tur niloin, chak taka tlan zawk turin ka hrilh che khan ka hria a," tiin nelawmlo zetin a'n ti a. Beach-a chuan ring tak hian, "Ka pumpelh thei nganglo a ni. Amah khan min rawn kap a ni, Frank. Che theilo tawp tura min kah ngawt chu ka nghak thei biklo a ni e," a lo ti vat a. Frank-a chu a ngawi vang vang a, a tawpah chuan pawr chhak hian, "Nang, beram vengtu der hian min khaihlum i tum tihna anih hi," a ti ta a. "Hêl ngaihna a awmlo ka tih kha," Beach-a chuan a lo ti vat a. Frank-a chuan, "Keimah ngeiin ka sawisak hlum hma che hian heta tang hian kalbo nghal rawh," tiin thu a pe ta a.

Beach-an sakawr a pan lai chuan Frank-a chu a sakawrah chuangin, lui chu kânin chhimlamah amahin a tlan liam ta a. Beach-a chuan Frank-a kalna lam chu thlir chung hian thinur fe hian, "Tumahin 'beram vengtu der' tiin min la ko ngai lo. Kha tawngkam kher kha chu lakir leh rawh se," a han ti a. Red-a thung chuan, "A thinur reh hma chuan inthiarfihlim ngei la a tha ang," a lo ti chhum hmak a. Beach-a chuan thinrim zeta en chung hian, "Chutiang thu chu engvangin nge min hrilh?" a han ti a.

Red-a chuan hul hak hian, "Nauva, thu tha zirtir che ka tum anih hi. Mahni thil tihsualah a damdawi ei dan thiam turin i upa ve tawk tawh. I tihsual atang hian khawiahmah i tlanbo dawn reng reng lo. I tihsualna hmunah ngei hian i hmaa thil awm hmachhawn dan i zir tur a ni. He hmunah ngei hian," a ti ta a. Beach-a chuan, "Hrilh kherlo la chuan a hre chhuak dawn hauh lo a ni," thinur takin a la ti hram a.

"Ka thu hrilh pawm thiam tur hian ka lo beisei che a, ka beisei sang hret che anih hi," tiin vin deuh zawk hian, "I sakawrah chuang la, min zui nghal rawh. Frank-a lakah inthiarfihlim ngei bawk ang che," tiin Red-a chuan thu a pe zui ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 21st, 2018, 8:52 pm

WAR ON THE CIMARRON
Bung - 10

Corb-a chu Fort Reno-a mi titi ngaichangin a tei mai mai a, chu chu thil harsa vak a ni lo. Tumahin nizan lama kangmei chhuah thu kha an la hrelo nain mi sawm chuang zet hi bar-ah chuan thuin, hnunglamah Corb-a chu an nuih tet tet a. Bar nghaktu hnenah zu a lam a, a rawn pek pah chuan bar nghaktu chuan, "Milabel-a bungraw phurtu ten harsatna engemaw an tawk niawmin ka lo hria a," a han ti a. "Tunge chu thu chu hrilh che?" tia a lo zawh chuan ani chuan, "Circle R a thawk pakhat hi nimin chawhnu lam khan helaiah lokalin i hote anchhia a rawn lawh bawrh bawrh a," a han ti a.

"Chuti elo? Khawii hmunah nge?"

"Commanche Fort-ah," tiin bar nghaktu chuan nui sak chung hian a ti a. Corb-a te ang, mahni hna ringawt ngaihtuah chi, mi thusawi engahmaha ngailo ang chi hi hepa hian a ngaisang ru riau a ni. Corb-a chuan a thil in lai a in zawh chuan pawnah, a sakawr thlunna lam chu a pan ta a. Hei ngei hi nizana Milabel-an in a rawn halsak laia a rawn sawi chhuah kha anih hi tiin a ngaihtuah chhunzawm ta a.

Corb-a chu amah chauha kalin Commanche Fort lam chu a pan ta a. Chhunlai velah chu hmun chu thlengin, ngun takin a han thlithlai a. Engmah a hmuh mai loh avangin lui hnar lam a pan chho a. A hnu lawkah chuan lui kawina laiah tawlailir chhia te chu hmuin lui kânna pawh a lo dang ping vek a. A sakawr atang chuan a chhuk a, fimkhur lehzualin tawlai lirh tanna hmunte chu a enfiah zui ta a. Tawlai kal theihlohna tura hrui phuarna zai chah te leh a ke dâlna tura thing an kham thin dahna hmunte chu a en ngun hle a. A thil hmuhte chu a'n phuah khawm a, he thil hi zan lama tih a niin inkahna pawh a awm fumfe lo tih a kartut ruak chhar atang chuan a hre mai a. He thil thlen hma hian camp-a awm ho pawh an harh lo anih hmel. Anih loh pawhin inbeihna chu chhete a awm ve a ni maithei. He thil titu hian Corb-a leh a pawlte tih ni thei turin engemaw tih an nei anih loh chuan nizana in an rawn hâlnaah khan khatiang khan a rawn ti hauhlo ang. A in pawh an rawn hal hauh lo ang.

Corb-a chuan inngaihtuah vang vang chungin a hmuihmulte chu a khawih nauh nauh a. He ramah hian hmelma a nei a ni. Amah tihchhiat tumin fimkhur takin tu'n emaw a ruahman a ni. Chutah Frank Kristiana a ngaihtuah chhuak ta a. Amah bei thei tur reng reng chu a khawi ngamin a thuhnuaiah a dah mai thin. Frank-a erawh a khawi ngam loh mihring awm chhun a ni. A rawn ding chhuak a, Red Shibe-a a ngaihtuah thleng ta zel mai. Heng mi pahnihte hi luhlul leh tum ruh, savun ang maia beih har an ni. Kristiana jail atangin a tlanchhuak a, a phuarna chu phelh a ni ta. Chutihlaiin Corb-a hian a hmun a lo luah hmak bawk si a, he thil hi tu dang mahin an ti lovang, Kristiana lo chuan, tiin ngaihtuahna a nei ta.

Thil ni thei tur a han phuahkhawm zawh chuan a sakawrah chuangin, ama in lamah, nizan lama an hal chhiatsak lamah a kal leh ta. Tawlai bungraw phur luia nam liam leh inkang vel a han ngaihtuah chuan Frank Kristiana ruahmanna ni thei dawnin a hre ta tlat. Amah leh a hote an tlem si a, a hmelma pahnih lian pui pui bei turin a chakna in a tlin dawn loh avangin anni pahnih hi indotir a tum ni ngeiin a ring ta. Phaizawl hla deuh thlir vang vang chungin a sakawr chu a kaltir zet a, mahse a thil hriat leh hmuh a phuahkhawm hnu chuan a pan lam chu thlakin, Circle R lam panin a sakawr chu a kaltir ta zawk a. Silaiin an lo kap mai thei. Mahse Milabel-a hmuh a, biak ngei a duh avangin risk a lak a ngai tlat.

Milabel-a hmun chu chawhnu herah a thleng a. Thirdeng dawr lam a pan ding a. Chutah chuan mi pakhat hian a sakawr ke thir bun a lo thlak mek a. "Khawiah nge Milabel-a hi?" tia Corb-a zawhna chuan a barakhaih hle a. Chu tlangval chu rang takin a inher a, Corb-a, a sakawr chunga thu a, saddle horn vuana zawi awm taka a thu chu a hmu ta a. Chupa chuan ngun zawkin, chiang fein a'n en a, "Corb-a an tih hi i ni lo em ni?" tiin a zawt ta a.

"A dik alawm," Corb-a chuan a ti mai a. Chu tlangval chuan a pistol a chuh ta a. Mahse Corb-a chuan engah teh chiam a ngai lo. Chupa silai hmawr kua chu chiang takin a en ringawt a, "Milabel-a chu i hmu thuai ang," tiin, "I sakawr atang khan chhuk la, in lam panin kal nghal rawh," a ti zui ta a.

Thupek anga Corb-an in lam a pan lai chuan Milabel-a chu office kawngka atanga lo chhuakin, makti takin hmai bui deuh chur chung chuan Corb-a chu a lo thlir a. Bung vat hian Corb-a chuan, "Nangmah be turin ka lo kal a. Mi fing pangngai inih chuan ka thusawi hi i ngaithla ngei ang. Saw i mihring pa saw tirbo nghal rawh," a han ti a. Hmelma pahnih, pakhat palian leh sa tha tak, pakhat lah sa pan leh mi naran ang lek, thawmhnaw inbel pawh uluk lem lo te chu inhmachhawna dingin, ngun zetin an han in en a. Enge an tih theih tih fiah tum niawm takin an inzir a ni. Hun rei tak atanga hnai taka an inbihchianna hmasa ber a la ni nghe nghe.

Milabel-a chuan a mit a lasawn a. Hepa hi a ngaisang ang reng phian mai. A thil rawn tih dan hi a âtthlak viau nain a huaisen thlâk tlat. A ngaihdan tih lan kher chu tul ti lovin, bung vat hian, "Sawi la," a ti ta a. Amah hruaitu a kal kian hnu chuan Corb-a chuan, "Khawiah nge kan inbiak dawn?" tiin a zawt a. Milabel-a chuan office lam a kawk a, Corb-a chu a lut hmasa a. Sofa chair hmaa thutthleng hlui deuh chu panin Milabel-a chuan a thutthleng vir thei chu a pan a. Ngaisang fahran lo niawm taka melh chung hian, "Eng thu nge i rawn kalpui chu?" tiin Milabel-a chuan, "Inbeih hi i kham ta deuh tihna em ni a?" a han ti a.

"Nang leh i hote hian ka khamkhawp indona hi min pe dawn hauh lo," tia tawng chhuakin Corb-a chuan, "Inbeihna lama ka mite chân fo erawh ka duh tawh lo a ni mai," a han ti zui a. Milabel-a chuan hmel sen deuh tun chung hian, "Suma min thlem lungawi i tum tihna ani maw?" a lo tih chuan Corb-a chuan, "Thudik ka rawn hrilh dawn che anih hi, Milabel. Engvangin nge nizanah khan mi i rawn hal darh rikngawt a?" tiin a zawt ta a. Thip zeta meng chung hian Milabel-a chuan, "I in ka hal chhan chu i hrechiang khawp. Ka bungraw phur wagon i khawih leh anih ngai chuan ram danga i in leh lo pawh ka hal darh vek tawh ang," a ti ta a. "I wagon ka khawih reng reng lo. I thusawi chu a nuihzatthlak tlat," Corb-a chuan a lo ti hmak a.

Tur fea en chungin Milabel-a chuan, "I tlanchhe leh si dawn amaw?" a han tih chuan Corb-a chuan, "Nang hi ka hlau chhete lo che. Hei chen hi kan lo inhmachhawn tawh thin a. Milabel, i hmaah ka la tlanchhe chhin ngai lo. Nang leh i hote tih chimihna hun nei ila tunah pawh tîm miahloin ka ti chimit ang che u. Chu chiah chu i rilru pawh a ni. Mahse hun engemaw atang khan thutlukna kan nei ve ve niin ka hria. Indona hian mihring leh tha, sum a heh em em tih kan pahnih hian kan hria a ni," a tih chuan Milabel-a pawh bu nghat nghatin, "Chu chu ka ngaihdan a ni reng a. Mahse ka bungraw phur wagon pahnih ngawt min tihchhiatsak takah hian......." a tih lai chuan Corb-a chuan, "I wagon te ka khawih reng reng lo. Chumi thu chu hrilh ka tum reng che a ni. Whisky tawlhrua i puhna a hlawhtlin takah khan a hmunhma ka en a, a lo ruak huai a. Chutah chuan ka insuan lut ta a. Nang aiin ka tuan rang hret tihna a ni," tiin a'n ngawi vang vang a. "Chulai hmun chu i lakah hian ka venghim zo dawn em tih pawh ka ngaihtuah nasa. Chutiang anih laia buaina belhchhah turin i wagon pahnih ngawt ka tihchhiatsak duh che i ring em ni?" tiin a zawt ta a.

"I duh hauh lovang, mahse i tichhe miau si alawm," a tih chuan Corb-a chuan, "I ring dik lo. Ka ti reng reng lo. Midang tuin emaw an ti zawk a ni. Milabel, a awmzia ka hrilh tawh che a ni lawmni? Indo tura i thawh chhuah duh an ring a, an rin ang ngeiin i khawsa a. Ka in i rawn hal darh vek a. Kei pawhin ka chhanlet ngei an beisei. Thinura chhang let chein i ramte halin emaw, Indian ho puna i bawngrualte rawn ru turin anni hian min ngai a ni," a han ti a. "Anni i ti a, anni i tih hi tute nge ni a?" Milabel-a chuan a lo ti a.

"Ngaihtuah chhuak ve tawh rawh," tiin Corb-a chuan, "Nang leh kei hi indo ta ang ila, i mite chanve i chân hnuah a dangte chuan an chhuahsan ang che. I bawngrualte chu chutih hunah chuan mulukawlh ang maiin an cher tawh ang. I ramte hal darh a ni anga, i camp te pawh tihchhiat a ni ang. Chutih hunah chuan company in i lakah hlawkna an hmuh dawnloh avangin in indawrna an ti tawp bawk ang. A ni lawm ni?" tiin a zawt zui a.

A ngawih tlat avangin Corb-a bawk chuan, "Min ngaithla teh. Mi i do tan rual rualin Indian hoin an do ve nghal ang che. A hnu reiloteah sipai hoin he ramah hian buaina chawk chhuakah min puhin he ram atang hian min hnawtchhuak ta se, tunge a hlawkna têl bera i rin?" tiin a zawt a.

Milabel-a chuan, "Rancher tam takin an têl ang chu," a lo ti a. Mahse Corb-a chuan, "Tunge hlawk bera i rin? Kan inkara rawn tlazep a, hlawkna tel thei turte pawh ngaihtuah la," tiin tifuh inti takin Corb-a chuan a thutna hnunglam nghengin a kut a kuangkuah a. Milabel-a chuan muangchang hian, "Frank Kristiana anih theih a rinawm," a lo ti a. Engmah sawi zui loin Corb-a chuan Milabel-a chu a en ringawt a. Chutihlai chuan kawngkhar chu a rawn ri dawt dawt a, Milabel-a chuan pawr zetin, "Enge ni a?" tiin a zawt a. Mi pakhat hian, "Chet, i la nghak thei hram lawmni?" tiin a lo ngen a.

Milabel-a chuan kawngkhar chu hawngin a chhuak a, a khar lehnghal bawk a. Corb-a chuan an sawi hriat tumin a ngaithla a, mahse mumalin engmah a hre thei chuang lo. A hnu deuhah chuan a hmaa a hmuh sakawr ke vuahtu leh midang pakhatin saddle pu a corral lam an pan chu tukverh atangin a hmu thei a. Milabel-a chu thinur hmel dur khupin a rawn lut a, sikret bung a pet kawh a. Corb-a pawh en chuangloin a thutna a rawn pan a. Corb-a chu chiang zeta en reng chungin a thutna chu a luah a. Rei ngial chu Corb-a leh a hmaa chhuat chu a entawn sek mai a.

A rilru a siam fel ta tihah Corb-a chu chiang taka en chungin, "Nizanah Caldwell-a hoa ka bawngrual thahnem tak hmar lama an khalh mek chu namenlovin um darh an ni. Zathum vel chu chirhdumah an pil a, zahnih zet chu a la bo anih chu. A dang pawh harsa taka zawn khawm ngaiin an awm a ni," a ti ta a. Corb-a chu a ngawi reng a, a nuih te pawh a za lek lekin a lang. Milabel-a bawk chuan Corb-a en reng chung hian, "Mi pathum thiltih a ni. Cook hnenah whisky te ka duh leh anih ngai chuan a leia lei tawh turin an hrilh nghe nghe a ni," tiin a'n ngawi vang vang a. "Chu thu bawk chu ka tawlai an tihchhiat zana an thusawi kha a ni," tiin Corb-a makti meng phawk taka en ran chung chuan, "Kristiana kan thanga a awh theih nan i whisky engemaw zat kha kan ru anih kha," a han ti a.

"Ka hria alawm," Corb-a chuan a ti mai a. Milabel-a chuan, "Tupawh chuan ka bungraw phur tawlai ti chhiain ka bawngrual um darh lo ni ta se, chumi chuan i laka thiamloh ka chan theih nan i whisky rutu angin min chhal tihna anih chu," a han ti a. Corb-a erawh chuan, "Chupawh nise nizana ka in i rawn hal lai khan ka naute chu inah an awm si alawm," a lo ti a. "Ka hria, ka hria," tiin Milabel-a chuan a sikret peh chu chhuatah a chhak a, a rap hlum nghal a. "I sawi dik hmel ta khawp mai," a han ti a.

"Ka sawi dik alawm. Fiahna dang i la mamawh em ni?"

"Eng nge kan tih tak ang?"

"A hmasa berin," tiin Corb-a chuan, "Kan inkara indona tih tawp. Keimahni pahnih kan inti chhe tawn ringawt. Chutah tak chuan Kristiana hi a rawn tlazep dawn," a ti a. "Eng nge kan tih leh zel tur chu ni ta ang?" tia a zawh chuan Corb-a chuan, "Chu chu nangma thu a ni tawh. Min rawn zawm a, Kristiana hi nuai bo i duh anih chuan ka ti mai ang. He ram atanga kan umbo thleng chuan remna lailawk kan inkarah kan siam a ngai a ni," a ti a.

Milabel-a chuan, "Thil pakhat ka hrilh loh che a la awm. Nizanah khan ka bawng khalhtu pakhat chu an that a ni," a han ti a. An in en leh ta ran mai a. Milabel-a chuan, "Kan tih leh tur hmasa chu Frank Kristiana luman kha dollar sanghniha kan tih pun a ngai. Nang leh kei hian dollar sangkhat zanga bak kha kan thawh belh a ngai a ni. Tun tumah hi chuan 'a nungin emaw, a damin emaw' tia a luman hi kan tar chhuah a ngai tawh," a han ti a. Lu bu nghat nghat chungin Corb-a chuan, "Tunah chuan thu awmze nei i sawi ve ta," a lo ti a.

Thawh pahin Milabel-a chuan, "A bak chu ka lo ngaihtuah tawh ang. Ni engemaw zat hnuah Puckett-a phalna ka lak hunah ka hrilh ang che. Reno khuaah thirhrui hmanga thu thawn pawh a tul dawn a ni," a ti ta a.

"A hmanhmawhthlak lo. I thluak hmang hmasa phawt rawh," Corb-an a lo tih chuan Milabel-a chu a bu nghut a, "Ka hrethiam," lo ti vatin, "Corb, ka ngaina thlawt lo che. Engtik niah emaw chuan thluak baw hakin ka la sawp ang che. Tuna kan inremna hi reilote atan chauh anih hi. I hria maw?" tiin a han zawt a. Corb-a pawh chuan hul hak hian, "Hre tehreng mai. I sawi ang chiah chuan i chungah ka la ti dawn," tiin chu hmun chu a chhuahsan ta nghal a.

*******************

Darlington khua, Murphy Hotel sumhmun hmalama thuin Red Shibe-a chuan khun takin thil a ngaihtuah a. Mite thusawi a ngaihthlak atang chuan Frank-a nena nizan lama Milabel-a bawngrual an um darh chu an tihsual ani tih a hrechhuak ta. Khami zan tak kha Milabel-an Corb-a leh a hote in pakhata khalhkhawm a, hal darh vek a tum zan a lo ni a. Chuti anih chuan Milabel-a hian Corb-a leh a hoten a bawngrual an um darh lo tih a hre dawn tlat. Chutianga a hriatchhuah hunah chuan thawmhnaw phur tawlai tihchhiat anih dan te a ngaihtuah ang a, Frank-a suangtuahna chu meikhu angin a zam ral ngei dawna hriain Red-a chu a ngui hle a ni.

Hun engemaw chen la thuta, titi khawchang atanga tu nge chutianga bawngrual um darhtu nia miten an sawi leh mite rinhlelh hre tura thut rih a tum lai chuan kawtthler lehlama hmeichhe pakhat a lam hawia ding vang vang hi a va hmu a. Chu hmeichhia chuan a awmna lam a rawn thlir vang vang a. Red-a chuan ngun taka enin, tunge anih ang tia a ngaihtuah lai chuan Edith Fairing-i a ni tih a hrechhuak a. Amah a rawn zawng ni ngeiin a hre ta. Frank-a jail-a dah a nih laia Edith-i ina a hruai haw tum khan, khatianga lehkhathem a hmu leh anih chuan amah hriattir hmasa turin thurawn Red-a hian he nula hi a lo pe tawh a ni.

A thutna atanga thoin Red-a chuan Edith -i chu a pan phei a. "Buaina i nei em ni?" tia zawh pahin chibai buk nan tiin a lukhum hmawr chu Red-a chuan a khawih zauh a. Chhetea nuih seih pah hian Edith-i chuan, "Nei lo e. Ka hrilh chian hma che in ka in hlat deuhah i kalsawn teh ang," a lo ti thuai a. Red-a chu a bulah chuan pheiin, a mitsir chuan Edith-i hmel chu a'n en zauh a. Khami zan khan Morg-a kha lo thlah fal lo se chuan tunah hian Edith-i hi Morg-a nupui a ni tawh tur tiin a ngaihtuah a. Lungngai reng renga awm atan chuan a la naupang lutuk a, a lungngai hmel hi umbo sak theih nise Red-a hian a duh hle a ni.

Kil khat an thlen chuan Red-a chuan, "Lehkha i dawng leh tawh em ni?" tiin a zawt a.

"Dawng lo. Scott Corb-a ka inah sawn a awm a ni, Red,"

Red-a chu a ding chawt a. Maktia amah en chung chuan, "Corb-a maw? Engtin maw....," a tih lai chuan Edith-i chuan, "Engtinmah min ti lo. A hawihhawm lutuk. Frank-a biak a duh a ni," a lo ti thuai a. "Eng thuah maw?" tia a zawh chuan, "A sawi lo. Frank-a a hmuh theihloh thu a sawi a. A awmna chin pawh a hriat loh avangin kei hian amah chu hmu thei turah min ngai a ni," Edith-i chuan a lo ti a.

"Amahnin em ni a awm?"

"Amah chauhin inah sawn a awm. Pawn lamah a hote an awm maithei. Chuvang chu ania ka in atanga kalsawn ka duhna chu," Edith-in a tih chuan Red-a chuan, "Naupang fel tak i ni e," a lo ti thuai a. "Frank-a hnena hruai i duh em?" tiin Red-a chu a zawt a. Red-a chuan, "Ka hrelo le. Chumi hma chuan amah ka be phawt ang. Kir leh ta la, lo va haw phawt teh. I kawngkhar ka kik hmain i in vel hi ka'n thlithlai hmasa phawt ange," a ti a.

Edith-i kir hnu chuan uluk takin a in leh a chheh vel chu Red-a chuan a en kual a. Engvanga Corb-a hian Frank-a hmu duh ta nge anih? Rem siampui a tum ta em ni ang? Mahse chu chu Corb-a mizia a ni hauh lo. Milabel-a bawngrual an um darh atang khan Frank-a hi thinurna in a khat a. Beach-a a hnawtchhuak tawh a. Milabel-a bawng khalhtu a thi bawk a. A thih chhanah Frank-a chuan mawhphurin a inhria. Red-an a hnem a, khami kha misual anih thute a sawi pawhin Frank-a hian a ngaithla duh vak lo.

Red-an Edith-i in a thlen dawn chuan kawmkar leh ran chaw dahna inte chu ngun takin a enkual a. A in panna kawngkam tuakah mi lo biru reng an awm em tia a thlithlai zawh hnu chuan Edith-i kawngkhar chu a kik ta chauh a.

Edith-in kawngkhar chu lo hawnin sitting room-ah a hruailut nghal a. Chulaiah chuan Corb-a pawh a lukhum kengin a lo ding a, a lo nghak a ni. Red-a hmel a hmuh chuan a hmelah danglamna reng a awm lo. Mahse a mit zim san chuan ngun takin a lo en ran mai a. Red-a chuan Edith-i hnenah chuan, "Kawngka hawn kha a that zawk hmel e," tiin, "Helai rim hi ka tui tih zawng a ni hauh lo," a han ti zui a. Corb-a chuan Red-a tih el velna chu engahmah ngai lovin, "Shibe, Kristiana hmuh ka duh a ni," a lo ti a.

Red-a chuan, "Corb, chutiang chu inbum tumna thing lutuk, Indian ho pawhin an hman duh tawh loh anih chu," a lo ti a. Corb-a chuan, "Helaiah mi leh sa tumah ka hruai hleinem," tiin, "I duh anih chuan han en vel la, i mi rin theih nan ka silai pawh hi ka pe che anga, tumahin min zui lo bawk ang," a ti ta zel a. Red-a thung chuan, "A hmuh rual chein Frank-a chuan a kâp ngei ang che," a tih pawh chuan Corb-a chuan, "Nilo, min lo kâp lo ang. Min kâp lo se a tha zawk nghe nghe ang. A hriat duh tak hrilh tur pawh ka nei a ni," a ti zel a.

"Eng thil maw?"

"Amah ka hmuh hunah ka hrilh ang,"

Red-a chuan dawhkan bawh chungin Corb-a chu a en vang vang a. Hepa hi an hmelma chu a ni ngei mai. Mahse ngaihsan awm riaua hriatna a nei. "Corb, misual tenawm tak i nih lai hian huaisenna tak te chu i nei ve a ni phawt mai. Frank-a hriat duh nang hian engmah i nei lo a, a tan thil tha tih tur engmah i neilo bawk. I chan tur awm chhun chu a hmaa thi tura va inlan a ni mai," a han ti a.

Edith-i chuan, "Red," hlauthawng tih hriattakin a lo ti vat a. Helai hmunah hian Corb-a hi thiltithei ber leh thuneitu ber anih laia mi satliah, engmahlo ang hrima Red-an a ti bawrh bawrh kha a lo hlauthawng hle a ni. Red-a chuan Edith-i chu a'n en a, a nui sak a. "Edith, i lo hlauthawng deuh a ni maw? Amah hi en teh. Tar, mit zim sin sen, thinlung khà leh rûl thluak pu, verther tak anih hi," tih pah chuan Corb-a chu a en a. Mahse Corb-a chuan thinur hmel pawh a pu duh lo a, tih thinrim theih pawh a ni tlat lo.

"Thu awmze nei i sawi teh ang," tiin Corb-a chuan, "A hnenah chuan min hruai dawn em?" tiin a lo zawt a. Red-a chuan, "Frank-a nena kan inhmuh rual rualin i hoten min kaphlum nghal dawn lo tih engtin nge kan chian hmasak theih ang?" tiin a han zawt a. Corb-a chuan hul hak hian, "Zan thim hnuaiah engtin nge min zui theih ang? Nangpawhin tumah i zui ngai hleinem," tiin, "Amah biak ka duh tih hi i thluak tlemte hmang khan hrethiam ve bawk ta che. Wagon pakhat neiin thawhpuite pawh kha in nei ve a ni lawm ni kha?" a lo ti a. Red-a chuan a chhang lo.

Mahse Corb-a bawk chuan, "In nei tih ka hria. A chhan chu ka hmuh tawh avangin," tiin Corb-a bawk chuan, "I hote bulah min hruai la, Frank-a chu min biaktir teh. Chutiang karah chuan i him tawklo em ni a?" hmusit tih hriat tak hian a han ti a. Red-a chuan thinur hmel sen deuh tan tan chung hian, "Corb, i huaisen hmel kher mai. Nang leh i hote hi kan hlau chhete lo tih hriat nan Frank-a hnenah chuan ka hruai khawp ang che," a ti ve ta a.

"Anih a hnu, min hruai nghal la," a tih chuan Red-a chuan a pan phei a, a pistol, dar baka a ah chu a laksak nghal a. Hmanraw dangte pawh a han dap ngial a. Mahse engmah a hmuh loh avangin kawngka lamah chuan Corb-a chu a nam phei a, a zui ta nghal a. Edith-i chuan, "Red, fimkhur viau rawh," a lo ti a. A aw atangin a hlauthawng tih a lang reng a. Red-a chuan hnem tumin hlim hmel pu tak hian, "Min ngaihtuah suh. He sihal pa hi ka tih thinur theih hlauh chuan nakin lawkah a luvun hi ka hih sak dawn khawp," a ti mai a. Mahse Edith-i chuan, "Nilo, Red, chutiangin i tilo ang. Fimkhur viau ang che," a lo tih avang chuan Edith-i chu mak tih hmel takin a en a. Red-a chuan, "Awle, fimkhur takin ka che ang. Mangtha le," tiin nui sak chungin an inthen ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 23rd, 2018, 6:14 pm

WAR ON THE CIMARRON
Bung - 11

Hotel kawt atanga an chhuah dawn chuan Red-a chuan,"Corb, tha ka tih danin khua kan chhuahsan ang. Tha takin min zui ringawt rawh," a han ti a. Lui lam panin an tlan a. Khuaa engin a thlen phak chin an thlen veleh khua chu helin chhim lamah an kal a. Khawthlang lamah thui tak an kal hnuin hmar lam panin an kal leh a. A khat tawkin zuitu an awm em tiin an ding vang vang thin a. Ngawi renga darkar hnih zet an kal a, a changa hnungtawlh zawnga a kal te pawh chuan Corb-a chuan engmah a sawi lo. Ngawi rengin an inzui tawp mai a ni.

Paymaster lui kam zawl zau tak, lui khawkrawk leh tuikhawhthla bul lawkah Otey-a tawlai chu a lo ding a. A chheh velte chu ngaw tha tak a ni a. Chunglam a tang lo chuan helai hmun hi hmuh mai theih pawh a ni lo.

Chu lai hmun an thlen chuan Joe Vandermeer-an a lo challenged a. Red-an an nihna a hrilh hnu chuan mei mit tawh lam chu an pan nghal mai a. Red-an mei an chhem en rual chuan Otey-a leh a thianteho pawh chu an rawn thu chhuak ve a. Otey-a chuan ngei tih hriat zeta melh chungin Corb-a chu en ran chung hian, "Kha mihring khan hetah eng nge a rawn tih?" tiin a zawt a. Red-a chuan, "I silai khan lo tin reng teh. Frank-a biak a duh a nih hi," a lo ti a.

Red-a chu sakawra chuangin thim zingah chuan a chhuak leh ta a. Mei eng piahlam a thlen chuan a hmaa a tih ang bawkin khaw thim tak hnuaiah a kal dan a sawn a sawn kual a. A tawpah chuan lui hnar lamah chhovin, mel chanve dawn a kal chuan thawm pawh a dim duh ta lo a. Vawihnih lai a'n faifuk raih raih a. A hnu lawkah chuan a hnung maiah faifuk bawkin Frank-a chuan a rawn chhang a. Chu lam pana a kal chuan reilote-ah Red-a chuan phaitual hnim zinga Frank-a blanket chu a hmu ta. He mite pahnih kher hi chu an inring lo lai camp-a nanchin chu a harsat hmel khawp mai.

"Camp-ah sawn Corb-a a awm. Hmuh che a duh a nih chu," a han tih chuan Frank-a mutchhuak pawh a reh nghal hmak a ni ang, ring ang reng tak hian, "Corb-a maw?"a lo ti thuai a. "Ni e, thianpa," tiin Red-a chuan, "Ngaithla teh. Milabel-a leh a hoten nizan mai khan Corb-a leh a hote a inah an nangching a,a in te halsakin a hote eng emawzat pawh a thahsak asin," a han ti a. Frank-a chu a ngawi vang vang a. A hnu deuhah chuan, "Chu, kan bawng um darh pawhin awmzia a nei lo tihna a ni maw?" a lo ti a. Red-a chuan, "A nih hmel khawp mai. Zan khat thil thu-ah Corb-a leh a hote hi hmun hnihah an awm theih hmel si lo a," a lo ti a.

Frank-a chu a ngawi hmak mai a. A thil ruahman leh tih chuan awmzia a nei ta lo phawt. A pheikhawk a bun a, a puanthuah a tel hnu chuan sakawrah lawnin camp lam chu a pan ta a. Fimkhur taka kalkualin chhimlam atangin camp chu an lut a.

Sakawr atanga chhukin mei engah an lut a, Corb-a'n Frank-a hmel a hmuh chuan a phu zawk a. Texas tlangval pian nalh leh hmel tha tak, meng pawl rem rawm, nelawm tak ni thin kha rei tak tak chaw nghei te, sakawra chuan a thui tak tak kal leh mutmu tuah that loh vangin a hmel a pawrin a sa pawh a pan tawh. A hmel leh mitmenga nelawmna a bo a; a rothap hmelin buaina siam chak hmel te pawh a pu dawn dawn a.

Frank-a chuan mei bul lam a pan a, amah ep chiah chuan Corb-a chu lo dingin mei chu a lo ai a. Frank-a nauteho chu hla deuhah dingin, beiseina nen an inbia chu an lo thlir a. Dam thlap hian Frank-a chuan, "Eitur emaw, in tur emaw engmah kan pe lo ang che. Uichoho hi chu camp pawnlam ah eitur kan pe thin," a han ti a. Hmel pawh danglam chuang hauh lo hian Corb-a chuan, "Kristian, biak che ka duh ani. I chaw ei hi ka duh lo," a lo ti a. "Anih chuan i sawi tur chu sawi la," Frank-a chuan a ti nghal a. Corb-a chuan a'n enkual deuh a, zawi sap hian, "Midang hriat lohvin," a han ti a. Frank-a thung chuan, "Hetah hian i sawi tur chu sawi nghal rawh," a ti that a. "A ni maw! A tha e. Thin te hi tihchhiat lutuk tur a ni ngai lo," Corb-a chuan a ti hmiah a. Frank-a thung chuan, "Chuti a nih chuan heta tang hian chhuak nghal rawh," a lo ti thung a.

Corb-a chuan ngawi rengin lei lam a bih a, a bul tan dan tur a ngaihtuah a ni. A rawn dak chhuak a, "Milabel-a bawng rual i um darh kha i tihsual a ni. Ka hote tiha puh i tum kha khami zan tak mai khan Milabel-a leh a hoten kei leh ka nauteho inah min luhkhung zan alo ni hlauh mai," a han ti a. Frank-a chuan, "Engtin nge nangmah leh i hote tiha puh ka tum tih i hriat a?" tia a zawh chuan Corb-a chuan nui deuh leh hmuihmul kiai sak sak chung chuan, "Milabela nen kan sawi dun a ni. Ruahmanna tha tak a ni. Mahse Kristian, i hmanhmawh lu hret a ni. Nangmah ah hian engkim kan bel fel der tawh," a han ti a. Frank Kristiana chuan, "Chu in lo inkawp fel der a ni maw?" tiin a zawt a. "Engtin nge in thawh dun theih zawk?" tiin an zawt zui a.

Corb-a chuan chhum hmakin, "Milabel-a hian ka in a hal hnu hretah thu awmze nei lo a rawn chhak chhuak a. Chu chu a wagon-te tichhiaah min rawn puh a ni. Ngun takin ka ngaihtuah zui ta a. Heng zawng zawng hi i tih ni ngei in ka hre ta; chuvang chuan a hnen ah ka kal ta a ni," a tih chuan Frank-a chuan, "Tichuan, min rawn uankhum turin i lo kal ta a maw?" a lo ti vat a. Corb-a chuan, "Thil nihphung ka rawn hrilh che a nih chu. Tun atang hi chuan Milabel-a nen kan in do tawh lo a. Nangmah hi kan do rawn dawn ta che a ni," a han ti a. "Ka va han hlau dawn em!" a lo tih el a.

A thusawi rul tawk vel chiah chuan Corb-a chuan, "I hlau chhete lo . I â a ni zawk. Nimahsela thil awmze hre lo tur khawp erawh chuan i â hauh lo," a lo ti a.

"Thil awmzia chu min hrilh ta a," a lo tih chuan Corb-a bawk chuan, "Milabel-a bawngrual chungah emaw, a mi leh sa, a ramah eng pawh thleng se kei chu min rawn tibuai tawh dawn lo. A titu-ah kei min ring lovin, nangma tihah a ring hmiah tawh dawn a ni," a han ti a. "A awmzia chu i hria maw?" a han ti zui a.

"Chumi thleng chuan hria e."

"Kei leh Milabel-a te chu nangmah tichhe turin kan thawkho tihna a nih chu. Chanchin awm ang ang kan inhrilh zel anga, che thei lova khenbeh che kan tum a ni. I hria maw?"

"Teh reng mai."

"I che vel kan hmuh ang ang Milabel-a ka
hrilh zel ang a. Kansas thlenga kan um chhuah theih nan che kan mite ve ve thawk dunin ka nawr chêp dawn che," tiin Corb-a chu a'n ngawi vang vang a. Meng tle ralh ralh leh thufun tak hian, "I naute hruaiin Circle R va hal darh vek la. An bungrua zawng zawng hal ral vekin an sakawrte helai ram atang hian um darh vek la. A bawng rualte pawh he reservation ram then thum chhungah hian um darh vek rawh. Bawng rual hralha inpek hun tur nen lam thurualpui a nei tawh a. Mahse chutia i um darh a i um tiau vek chuan hralhna hun a nei tawh lo ang. A pu Puckett-an a rawn hmuh chuan bawng sa a pek theih loh avanga sum nuai tam tak a chân tur chu a hmu nghal mai ang," tiin a sawi zui zel a.

Red-a chuan Frank-a han nui sak hmel chu a lo hmu kiau a. Frank-an a chhan hun a lo ngaichang a. Frank-a chuan ngaih tha fahran lo leh chiang lo deuh ruai chung hian, "Chung zawng zawng chu ka nauten lo ti ta se,eng nge kan chan ve tak ang?" tiin a zawt ta a. "Morg Wheelon-a ram hi ka remtihna ngeiin i chang hmiah ang a, ka tibuai hauhlo bawk ang che," Corb-an a tih chuan Frank-a chuan, "Nangin Circle R ram hi i nei anga maw?" a lo ti vat a. Corb-a chuan, " A ni mai ang chu," tih pah in Frank-a hmel chu ngun zetin a thlir a. Frank-a chuan hmawlhte pakhat chu lain, fimkhur takin, "Corb, ruahmanna tha tak a nih hmel e. Mahse kei hian engtin nge ka tih tur chu ka tih theih tak ang?" tiin a zawt a.

Corb-a chuan, "I tih theih loh hi ka ring miah lo," tiin, "Ka in a i rawn luh zan khan silai pawh hmang lovin i lo lut mai a. Duh ni la chuan mi pawh i rawn kap thei a, mahse i hmang tlat lo. Dan emaw,silai emaw i hlauh vanga silai chelek lo i niin ka hria. Nimahsela zan dang leha milabel-a chhawr pakhat, i bawngrual umdarh zana i thur danah khan i deh khirh dan chu ka hre chiang. Kan thawk dun a nih ngat chuan Milabel-a leh a hote tan tihngaihna a awm lo anga, harsa lo takin anmahniho chu i thian fai mai dawn a ni," a ti ta a.

A thuk thai lai chu ti tawpin, chiang takin Corb-a chu a hmachhawn a. A hmel chu thinur avangin a dâng deuh a, a hmui pawh chu a var ta vek emaw tih tur a ni. Thinrim vanga khur lek lek chung hian Frank-a chuan, "Phatsan hmang Juda Iskariot, chhuak nghal rawh," tiin thu a pe ta a.

Corb-a chuan rum ang reng deuh hian, "Ka remruat ang chuan tih i tum..." a tih lai mek chuan Frank-a chuan, "Ka tih dan tur chu nangmah hi ka that dawn che tihna a nih chu," tiin awki sang zawk hian, "Khami zan khan ka that daih tur che a nih laiin zanin ang hian i sualzia ka lo man lo a ni. Mi i hmuh leh hunah chuan i pistol puak sa in min hmachhawn tawh ang che," a ti ta hmiah a. Corb-a chuan a hmuihmul chu a tikiai leh sak a, nui deuh chung hian. "I va la inchhir dawn tehlul em," tih pah hian a inher a, Otey-a chuan, "I sakawr chu i thlun lohna lamah khan a awm e," a lo ti a.

Corb-a chuan a rawmawl ken chuan a hmai a hru a, Otey-a thusawi pawh kha hre lo ang maiin lui hnar lam pan chuan mei eng chu a chhuahsan a. Mei chhemna atanga hla deuh hleka ding Red-a chuan Corb-a che vel chu hmu hmasa berin, mei chhemna lamah chuan rang takin a tlan thla a, Frank-a chu kuah thluk pahin meichhem chu a tlawh darh vek a, mei eng pawh chu a reh nghal duak a. Chumi rual chiah chuan lui kam tuak tlang pawng atang leh lui mawng lam atang chuan rifle-in an rawn kap nghal dawt dawt a.

Frank-a chuan an rawn beih dan ngaihtuah chung chuan, a nauteho hnenah chuan, "Tu mahin kap let suh u. in kah rual in in awmna lai in hrilh tihna a ni mai," tiin thu a han pe a. A theih anga rangin a vak sawn a. A tlukna laiah te khan silaimuin a rawn deng dawt dawt tawh a ni. A vah pah chuan mipakhat lo bawk hi a va chul fuh a, "Red?" tiin a'n ko sap a. Red-a chuan pawiti tihhriat tak hian, "Pawi ka tiin ka inchhir tak zet a ni, Frank," lo tiin, "Tawlailir awmnaah khan min hruai rawh tia a rawt laite khan ka hrethiam tur a ni a. Nilengin helai hmun hi lo fang kualin, a tih tur a hlawhchham thulha bei turin a hote a lo dah ru vek tihna a ni phawt mai," a lo ti a.

Frank-a ve thung chuan, "Ka lawm khawp mai. Tunah chuan he pa laka ka dinna ka hre chiang ta a. Red, hnim zingah khan insaseng teh. Min luhkhung tura an rawn luh hma chuan silai kha hmet puak lo ang che," a ti zui nghal a.

Frank-a chu tawlai awmna thlengin a va phei a. Tawlai bulah chuan dingin a rifle a la a, lui lamah chuan a vak thla ta a. Hmun hran hran hmun sarih atangin rifle chuan an rawn kap a, mahse tum nei lem lova kap an niin a lang. Khaw thim dan chu thim tak a ni. Red-an khati khan rang takin mei kha rawn tlawh darh ta lo se chuan awlsam takin an rawn kap hlum phiar dawn tihna a ni. Corb-an a rawmawl a vai rual rual khan an rawn kap a lo ni. Corb-a thuhruk mihringho khan han kap chiam thin mahse an meichhem ber a thih tawh chuan mihring kah fuh tur an hre thei tawh chuang lo.

Rilru fimin Frank-a chuan thil awm dan an ngaihtuah a. Corb-a hian a hmawr bawk a duh tak tak anih chuan a tum a hlawhchham ruala mei a thim takah hian a hote luhchilhtir a tum ngei a ring. Corb-a hian a hote hloh then pawh a hnial loh laiin Frank-a erawh chuan pakhat mah hloh loh a duh. A mi chhawr te hi mi tha an ni. Mahse a harsatna tawh hian dinhmun khirhkhan takah a hruai lut mai a ni. Heng pawisak nei lo mi sual rual kut tuar atan chuan Frank-a hian a phal lo.

Tlang pawng leh lui hnar lam leh lui mawng lam atang chuan nasa zawkin an rawn kap a. A hnu rei vak loah chuan Corb-a hian luhchilh turin thu a pek ngei Frank-a chuan a ring. Corb-a hoten an hualna pawnlam atanga beih chu Frank-a rilruk chu a ni. Mahse an hualna pawnlama kal tum chu a thawm atangin amah chu an rawn kap ngei ang. Chuvangin hnim kara anni ho kara chhuah tum chu thihna mai tur anih hriain a zawn thlanglamah chuan a vak thla ta a. Reiloteah hmun hnawng tak chu thlengin, vaukam tui bul lawkah a awm tih a inhre ta.

Rang takin a kawnghren phelhin a rifle nen a lek sang a, tuiah chuan a inchiah thla ta a. A silaimu te chu a huh hauh lo tur ani tiin amah chu inchiah pil deuhthaw mah se a silaimu leh a rifle chu tui chungah chuan kengin tui chakna hmang chuan a inlen thlaktir ta a. Camp-a awm hote awmze nei taka lo hrawk mektu awmna chu a pel thla a, chupa chuan engmah rinhlelh tur a hre reng reng lo.

Thlang deuh takah chuan Frank-a chuan tui chu vaukamah chhuahsanin, a khur deuh bap bap a. Chutihlai tak chuan Corb-a chuan a hote hnenah, "Luh chilh tawh rawh u," tiin thu a lo pe a. Chuti anih chuan Frank-a chuan rang taka chet a ngai tih a hre ta. Chungho sakawrte um darh a, anmahni hualtute um darh tur chuan hun a nei ta lo. Tih tur pakhat chiah a nei ta. Amah hnaih ber, a theih anga ranga rifle-a camp lam hawia lo kaptu lam chu a pan a. Silai ri avangin Frank-a tan thawm dim a ngai lo. A va hnaih a, a pistol kawmin chupa lu ah chuan na tawkin a chhu a, thawm nei lêkloin a tlu tawp mai a. Chupa rifle leh a mu te chu la in Corb-a hote tan khawhna lai hre turin chhaklamah chuan a chho ta a.

A chhak mual pawnga mi pakhat, rifle kap mektu lam hawi chuan Frank-a chuan vawi nga ngawt a rifle chu a hmet puak a. A tawp rual chiahin midang ho chuan namenloin an rifle te chu an hmet puak bawk a. A va kahna thlang hreta silai kap mektu lam hawi chuan Frank-a chuan a'n kap leh a. A vawihnih kahnaah chuan chulaia awm chu na tuarin a au chhuak ta. Chu veleh midang ho pawhin an silai hmeh puah chu an ti tawp nghal a. Chu na tuar au thawm chu Corb-a naute pawhin an hria a, an zing ami au thawm ni ngeiin an hre bawk. Ngaihthatlohna lian tak karah tui lo zetin an kap chhunzawm leh ta a.

Thinur rawl ring takin Corb-a chuan a naute ho hnenah chuan, "Hnaihchilh rawh u. Kal hnai rawh u ka ti a ni lawm ni?" tiin thu a pe tuar tuar a. Mahse tumahin an hnaihchilh duh chuang lo. Chu tlang dungah chuan mi pakhat a la awm. Chupa chuan a thiante pahnih reh tak daih atang chuan kah chhunzawm tur nge chhunzawm loh tur tiin a rilru a inkhâp mek a. A han hmet puak ve leh na in a hmeh puah rualin a insawn vat zel a. A thiante pahnih chanchin a ngaihtuahin fimkhur a tul tih a hria a ni.

Frank-a pawh a fimkhurin chupa chu che theiloa siam vat tula a hriat avangin a awmna lai tura a rin lam hawi chuan a'n phêk kah ngawt a. Rifle ri chu a tawp a, a reh ta vang vang mai. Chumi tlang dunga an thiante pathum an reh tak duakah chuan Corb-a naute dang pawhin thil awmzia an hrethiam ta. Frank-a naute lam atangin silai a puak ve lo. Chuti anih chuan an hualna pawnlam atangin tu'n emaw a rawn bei anih loh vek chuan an zinga tu emaw in anni ho chu phatsanin rifle rik runpui lai khan an thiante a that a ni ngei ang tiin an ngaihtuah a. Corb-a bawk chuan thinur vin zet hian, "Luhkhung tawh rawh u. Mi panga emaw lek annih kha," a rawn ti leh tuar tuar a.

Tumah an chesawn duhlo a, silai pawh an hmet puak duh chuang lo. Lui hnar lamah chuan Corb-an thinur taka a hote zinga pakhat a ânkhum thawm chu a hriat theih a. Chutihlai chuan camp zawl zau laiah mi pakhat hian nawhalh a'n nawt pharh a, rang takin hnimbuk ro chu kang kaiin chulai vel chu a eng ta pup mai. Frank-a chuan Corb-a hote zinga tu emaw ber tlan lutin, mei eng atanga thah tur zawng an awm ta mai em ni ang tiin a ngaihtuah a. Mahse mihring hmuh tur awmloin tawlai bak hmuhchian tur engmah a awm lo. Mahse namenloin chulam hawi chuan silai chu an kap thung a ni.

Vawilehkhatah a hnung lui mawng lam atang leh a chhak mual pawng hnung hret atang chuan silai a ri leh ta dawt dawt mai. Frank-a chuan a hrethiam mai a. Red-a leh midang pakhat khawthlang mualpawng lamah tawlhthla in, an zinga pakhat hnim ro hal turin an hnutchhiah tihna a ni. Tunah chuan a hote leh mei eng tak inkarah Corb-a mi rawih, tualthah hmang ho chu an awm ta tihna a ni. Chutiang dinhmunah chuan Corb-a hote chu an talbuai nasa ta. A thenin hnimbuk kar atangin luihnar lam chu a theih anga chakin an pan a. Mual pawnga awm pakhat chuan a thlanglam hnimbuk a zuk zuan a, thei leh theiloin lei a zuk rah rualin lui hnar lam a pan nghal a. An zinga pakhat chu tawlai awmna lamah khan a tlan phei a. Mual pawng atangin an rawn kap a, tawlai ke deng dawtin a tlu phei a, che leh tur awmloin tawlai ke bulah chuan a thal ta reng a.

Tunah chuan an dinhmun a inlehthal ta. Frank-a chuan, "Red, lui hnar lamah khan khalh chho rawh," tiin a rawn au a. An tlanna tur chhak lamah chuan silaimu a leng chho nasa ta. Chutihlai mek chuan an hnung phaizawl atang chuan sakawr chak taka tlan thawm an hre ta a. Corb-a leh a hote thi bâng an insaseng ta tihna a ni.

A mal te tein camp lamah Frank-a naute ho chu an lutthla a. Joe Vandermeer-a chiahin a bânah hliam a lo tuar a, a kawrte chu thisenin a khat a ni ber. Thisen chhuah tam vang leh khawvawt vangin a lo khur bap bap a. Frank-a chuan tha takin a tuam sak a, Joe-a chu a nui sak a. Frank-a pawh chuan a nuih let ve nain Joe-a thil tawrh chuan a rilru a kap na hle mai.

Red-a pawh a rawn kir ve a. Corb-a mite pali lai thi a a hmuh thu rawn sawiin, Samse-a hnenah chuan Corb-a leh a hote mi thahnem zawk nen an lokir leh hmaa tawlai chu hmun danga saseng turin a rawn hrilh nghal a. Samse-a pawh chuan thupek anga ti tur chuan a tho a, kal mai a han tum a. Mahse Frank-a chuan, "Samse, lo nghak lawk teh," a rawn ti a. Samse-a pawh chu kal ta chuangloin mei bulah chuan a ding a. Mi dang, Mitch-a te, Otey, Red-a leh Joe-a te chuan Frank-a awki avang chuan Frank-a chu phawk hra chungin an lo thlir a.

Frank-a chuan zawi chiang tak si hian, "Hun rei tak, atthlak takin ka khawsa ta. Naute u, he ka ram chuh mek hi rei tak chhung chu luah theihin ka nei let dawn lo. Lo nei let ta reng pawh ni ila, indo mite paltlanga neih let a ngai ang. Nangniho hi gunman in ni lo a, gunman hlawh ang pawh ka pe lo che u a ni. Chuvang chuan nangniho chelh reng hi ka tum ta love," tiin anni ho chu a enkual dan dan a. "Heta tang hian chhuak ula, eitur te, sakawrte leh in theih phei chuan bawngte nen kal chhuak rawh u. In hlawh tur pawh Fort Worth khuaa Stockman's Bank atangin in la mai dawn nia. Ka thurawn che u hi phuartu leh engemaw awm lo anih angin lawm taka min dawnsawn sak ka duh," a ti ta a.

Samse-a chuan dâr chhin ak ak chung hian Frank-a chu a en ran a, "Ka theih tawk a tlem a, mahse i tan theihtawp ka chhuah ve. Kalsan che hi ka hreh hle nain i thurawn min pek ang hian ka kal mai ang," a lo ti a.

Otey-a erawh chuan, "I bulah ka awm ang," a lo ti sap a. Red-a pawhin, "Kei pawh le," a lo ti bawk a. Joe-a leh Mitch-a te erawh an ngawi reng a, Samse-a enin an bu nghat nghat a. Joe-a leh Mitch-a ten eitur bag-a an thun lai chuan Samse-a chuan sakawr saddle bel sa thlapin a rawn hruai a. Chibai te an inbuk hnuin Samse-a, Mitch-a leh Joe-a te chuan Texas rama thlamuang taka khawsa turin an thiante chu an kalsan ta a ni.

An liam fel chuan Frank-a chu a inthing deuh sawk a, Otey-a hnenah chuan, "Otey, wagon-a eitur thenkhat leh kan thawmhnawte kha la chhuak teh. Tawlai hi ka hal darh dawn e," a ti ta a.

Hnim ro leh thildang lakhawma tawlai hnuaia a dah hnu chuan han hal mai chu Frank-a tana thil hrehawm tawp anih avangin a hal lai pawhin a en duh lo. Frank-a tan chuan bawngvulhtu leh a hotu berin mahni tawlai ngei hal tak chu tlawmna lantirtu chiang tak a ni. An in tun nunna ber sakawr leh a saddle hralh ang a ni a. Inhlawhna zawnga vak vel mai mai, cowboy satliah chauh a ni taah a inngai.

Ngawi rengin tawlai halna atang chuan an insaseng a. An thlang deuh thingbuk hnuai atang chuan thei leh thei lovin mi pakhat hian, "Min kalsan teh suh u," a rawn ti a. Frank-a chuan mitmeia Red-a rawn chung chuan a sakawr chu a pawt her a, hnimbuk lamah chuan a kaltir a. Chulaiah chuan mi pakhat hi na tuarin a lo let reng a, engemaw hi a lo phun pui mawlh mawlh a. Frank-a chu a bulah zuk thingthiin nawhalh a han nawt a. Corb-a mi chhawr pakhat a lo ni reng a. Chupa chuan a nâkah silaia kahna hliam a lo tuar a. A thawmhnaw inbel chu thiin a khat a ni ber e.

Harsa tak chungin chupa chuan Frank-a kut chu lo vuanin, "Kristian, helaiah hian min hnutchhiah lul suh. Ka che thei der lo ania," tiin a lo ngen a. "Corb-a a lo kir leh mai dawn alawm," Frank-a chuan a ti hmiah a. Na zawk a hmer chungin chupa chuan, "Ama min kah ka ni. A lokir anih pawhin min that ngei ang. Ka hnunglam atangin min rawn kap a ni," a ti ta daih a.

Otey-a chuan, "Chu chuan mi zawng zawng lawmna a siam ngeiin ka ring," a lo ti a. Mahse chupa chuan nasa lehzualin, "Mi in kalsan thei dawn em ni? Corb-a chu a lo kir ngei ang. Ka lu ah ngei hian min rawn kap ngei dawn. Camp-a in awm ka luhchilh duhloh che u avangin min kap a ni," a han ti a. Chupa chuan beiseina nen na takin Frank-a kut chu a hmer a. Frank-a chuan Red-a hnenah chuan, "A thusawi chu a dik duh hmel lo maw?" a han ti a. Red-a pawh chuan, "A dik ang. Corb-a chuan a ti duh ngei ang," a lo ti a.

Otey-a thung chuan, "Frank, kalsan vat rawh. Enga tan nge khatiang mihring kha i tih? Darkar chanve pawh a ral hma khan nangmah thah che a tum anih kha," a lo ti bawrh bawrh a. Mahse chupa chuan, "Sakawrah tal min chuantir ta che u," tiin a la ngen ta zel a. "He hmun atang hian ka inthiar fihlim a tul tlat a ni," a'n ti zui a. Frank-a chuan Red-a hnenah, "Sakawr dang i hmuhsak thei em? Kalsan ngawt chu a theih loh anih hi," a han ti a.

A hnu reiloteah an pali chuan tawlai halna hmun chu an chhuahsan ta a. Frank-a chu a ngawi hmak a. He ramah hian thawktu te, tawlailir te, bawngrual te, thawhpui leh kawppui tur te, in leh ram zau zawk nei tura tum ropui tak neiin a lo lut a. Tuna a neih chu bawngrual nasa taka darhsarh, a tâ anga a sawi hleuh theih loh te, hliam tuar, thi tura kalsan theih loh te, beiseina reng a awm tawhloh hnu pawha phatsan ve duh lo a thiante pahnih chiah an ni ta. Chubakah luman neiin 'wanted' a ni mek bawk.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 24th, 2018, 7:20 pm

WAR ON THE CIMARRON
Bung - 12

Indian ho hnenah hian kartin vawikhat bawngsa an sem thin. Hemi nia ennawm en tur hian Agency-a awm leh sipai kulh chhunga awm mingo zawng zawngin bawngsa semna hmun hi an pan thin a. Zing khawvar hma daih atangin Indian sang tam tak an awmna mel khat laia hla atangin an rawn thawk chhuak thin a. He an bawngsa semna hmun hi bawngrual dahkhawmna atanga lui kânin, sipai ho kulh leh lui inkar chu mel khat emaw, a aia zau emaw lai a ni. Tunah hian sipai ho pawh garisson atanga rawn thawk chhuakin, bawng rual khalh khawmna gate chungah chuan fel takin duty an awm tawh a. Bawngsa pawh an sem tan dawn tawh.

Hetih hun lai hian buffalo hmuh tur a awm tawh loh avangin Indian tlangval ho hian sa pela intihhlimna tur an nei tawhlo a, chuvangin bawngte hi buffalo anga ngaiin thah tumin an um chiam thin. He an sa semna hmunah pawh hian bawng tuai chak tak gate atangin an rawn chhuah anga, chu chu Indian tlangval pahnihin buffalo anga ngaiin thah tumin an um dawn a ni. Cheyenne tlangval pahnih, saruak deuh thawa inthuamin, fei nen emaw, thal hmangin emaw chu bawng chu an bei anga, engemaw chang chuan an bawng um chu man maithei loin, sipai kulha parade ground-ah te um lutin an tihlum chauh thin a. Chu chu a umtu chhungte khan rawn panin bawngsa kha an va chan ho thin a ni. Hetiang niah hian boruak a tang duh hle a. Indian hoin an sa chan hi an kham khawp lo em em a, mahse sipai hoin pek belh an tum hauh silo.

Milabel-a pawh Puckett-a hnen atanga Kristiana luman tih pun rawtna hemi tuk hian la felin, Indian ho sa semnaa ennawm en turin a rawn thawk chhuak ve a. Tun tumah hi chuan Frank Kristiana hi a nungin emaw, thiin emaw tia a luman hi tih san a ni tawh. Sipai ho awmkhawmna chhakah chuan sakawr saddle inbel sa thahnem tak te, tawlailir mihring chuanna chi leh lirthei dangte a inhung thluah a. Chulam pan chuan Milabel-a pawh kal pheiin zawn nei niawm tak hian a hawi kual a. Buckboard-a, a hote zinga pakhat nena thuin Corb-a chu a va hmu ta a. A bul lam pan chuan a sakawr chu a kaltir ta nghal a. Corb-a chuan inthian tha tak ang hian hawihhawm takin chibai a lo buk a. Milabel-a chuan, "Biak lawk che ka duh ania," a han ti a.

Corb-a chuan a bula thu chu, "Rob, kal kiang lawk teh," tiin a thutna hmunah chuan Corb-a sirah Milabel-a chu a thu ve nghal a. Mite hriat khawpa inhmelmak pahnih, chutianga tawlai seat-a thu dun a an titi ta mawlh mawlh an hmuh chuan a hmutute chuan mak an ti a, an en duh hle a ni. Mahse chumite pahnih chuan hrelo ang maiin an thil thlir lai chu an en tlat a.

Milabel-a chuan a ipte atangin ip a phawrh a, vaihlo a zial mawlh mawlh a. A zial zawha a tan hnu chuan, "Ka remruatna pawh Puckett-a chuan a pawm e," a han ti a. Corb-a chuan, "A that chu," tiin, "Bawngsa sem zawh hian agent kan hmu nghal ang. Dollar zanga chu keiman ka thawh mai ang. Partner kan ni tawh ani lawm ni kha?" a han ti a. Milabel-a chu a bu nghut nghut a, an ngawi leh ta vang vang a.

Corb-a chuan a hma hret atanga cowboy pakhat chezia a lo thlithlai renga chu a en vang vang a. Chu tlangval chu amah maiin leiah a lo thu sawp a. A sakawr pawh a hnungah a hrui thlaha leia inhnukin a tla mawlh mawlh a. Thawmhnaw hlui leh tawp tak a inbel a. A hmel lan dan atang chuan chapo tak niin, bawngsa sem a en te chu thinrim leh ngaihtha fahran lo hmel a pu a. Amah chu kawkin Milabel-a hnenah chuan, "Saw nau saw i hmuh tawh hmel em?" tiin a zawt ta a.

Milabel-a chuan fimkhur takin a'n en vang vang a, nakin deuhah chuan, "Kristiana naute zinga pakhat anih saw," a ti ta a. Corb-a pawh chuan, "Niin ka hre deuh reng a ni," lo tiin a hma zana thil thlengte kha a ngaihtuah chhuak a. Mahse Frank-a nena an inbiak zan khan wagon bul velah he tlangval hi a hmu ve miah lo. Chuti anih chuan he nau hi a zalenin a tâl hrang tawh a ni phawt ang. Rang takin Corb-a chuan suangtuahna thar neiin Milabel-a hnenah chuan, "Saw nau saw a biak chi khawp ang," a ti ta a. Milabel-a chu a phawk deuh hru a.

Corb-a chu a thutna atanga thoin Beach-a thutna lamah chuan phei pahin, "Ka lo kir leh thuai ang," tiin a kal ta a. A bulah chuan va dingin Beach-a chuan a lo en hra a. Corb-a chuan lu bu nghat nghat chung hian, "Kid, hlawh i la hnailo ani maw?" tiin a zawt a. Beach-a chuan, "Chu pawh nise i tan hlawkna enge awm?" tia zawh pah chuan khaw dang a hawisan hmak a. Corb-a chuan, "Hlawkna engmah awm nang. Mahse i kekawr ipte kha a ruah hmel a. Kristiana hian hlawh pek che u a harsat ta deuh a ni maw?" tiin a'n zawt leh hram a.

"Kal mai teh," tiin Beach-a chuan a chhang hmak a. Chil lem ri khalh chungin Corb-a chuan, "Teh reng mai. Tu hrawkah mah hian tangka hi ka la thun ngai lo e," tiin a thutna ngaiah chuan a va thu leh a. An hnuailamah chuan Cheyenne Indian tlangval pahnih hian bawng chal tha tak hi rawn um chhoin, sipai duty na lamah chuan an rawn khalh lim a. Duty na hmun a rawn tlan thlen tep lai chuan lieutenant chuan a hote a rawn chil hmain silai a phawrh a, bawng chalah tak chuan a lo kap a, a let tawp mai a. Indian pahnih chu an thinrim em em a, an kuttum te an hmuh a. Mahse chu lieutenant chuan a nuih mai mai a.

Chutihlai chuan Beach-a pawh chu thoin, a sakawr kaiin Corb-a te thutna lam chu a pan mek a. Ngun deuhin Corb-a leh Milabel-a te chu a en a, mahse anni pahnih chuan an ngaihsak hauh lo. Zawimuangin a hnaih hret hret a, nakin deuhah chuan Corb-a bulah chuan a va ding ta a. "Sawng Indian pahnih sawn buaina an tawk thelh anih kha," a han ti a. Corb-a pawh chu a lo bu nghat a. Hetiang hunah hian mihringin chapo leh thiltithei anga lan an duh thin tih hriain, Corb-a chuan Beach-a chu a nihna anga lantir thain a hria a. Beach-a chuan aw thian kak kak chung hian, "Nichinah khan ka hrawkah tangka hnawhluh i tum loh thu i sawi kha eng nge a awmzia ni a?" tiin a rawn zawt ta a. "Eng sum nge ni reng reng a?" tiin a zawt zui a.

Bûl hmak hian Corb-a chuan, "Ka rilru ka thlak leh ta. Milabel-a hian Kristiana hnena thawk i niin min hrilh a," a lo ti a. Beach-a chuan, "Ka thawk tawh thin a, mahse tunah chuan ka thawk tawh lo," a ti thuai a. "Inhriatthiamlohna in nei em ni a?" tia a zawh chuan, "Biruk ngai reng mai kha ka ning a, ka bansan a ni," tiin then deuh nang chung hian a chhang a. "Chu, thawh tur dang i dap ta amaw?" tia a zawh chuan, "A hlawh azir a ni ang chu," a ti thuai a.

"Bawng ven lam te?"

"A hlawh hi a tlem deuh a," tih pahin Beach-a chuan hnai set sawtah a va en a. "Duh ila chu hetiang hna hi chu ka hmu daih tawh ang," a ti a. Mahse Corb-a chuan ti tak hmel tak hian, "Kan sawi mek a, ka chhunzawm dawn nge ka......" a tihlai chuan Beach-a chuan, "Han chhunzawm teh," a lo ti vat a. Corb-a chuan, "Kristiana hi he ram atanga ka um chhuah loh pawhin ka that dawn a. Chumi kawngah chuan min puih theih te ka'n ring deuh mawle," a han ti a.

Rang takin Beach-a chuan, "Ka puih theih che ka ring," a lo ti vat a. Bawng an um darh tuka Frank-an tawngkam duhawmlo taka a tih thu kha a hrechhuak zawk a. Mi tupawh, beram vengtu suak tia puhtu chu himin a lak atangin an chhuak tur a ni lo tiin ngaihtuahna a siam a. Corb-a chuan, "Kristiana lumanah hian 'dead or alive' tia tarchhuah thuai a ni dawn a. Chu sum chu i chan theih nan ka tanpui ang che anga, nangmah tanpuitu tur pawh mihring ka pe ang che. Tha i tih zawng a ni em?" tiin a zawt ta a.

Beach-a chu a ngawi ran mai a. Tunah hian zep awm miahloin amah an thlemna chu tih lan a ni ta. Tawlai seat-a mi pahnih thu chu a'n en a, Milabel-a chuan a tham lohna hmel chu thup a tum hauh lo a. Corb-a lah chuan ring ngam chiah lo niawm tak hian chiang bangin a lo en kal mai bawk a. Chutiang karah chuan pawisak neilo niawm tak hian Beach-a chuan, "Ka sum hmuhna tur ni ngei dawnin a lang e," a han ti a. Corb-a bawk chuan, "Amah chu i hmu thei angem? Tlanchhiat tintuah rengin, zukchal ang maia chak leh inring rengin a awm si a," tiin a'n zawt a.

Beach-a chuan a ngaihtuah vang vang a. A pheikhawk chhipin phaitual hnim chu a'n pir a. Corb-a chu enin, "Inkahna thlenna tur duh bik leh thlan i neilo tiraw?" tia a zawh chuan Corb-a chuan, "Nei nang, dân ang thlapin a ni mai alawm," a lo ti a. Beach-a chu a nui var var a, "I tân ngei ka zawng hmu ang," tiin a tiam ta a.

Luvie Barnes -i chu sipai hmuna dawr pakhat atangin chawhnu herah a rawn chhuak a. Sipai leh midang awm ve te chuan amah chibai buk nan tiin an lukhum hmawr an khawih sap sap a. Luvie-i pawh chuan nui sangin a chhang let hlawm a. A sakawr thlunna lam pana kalin, eitur tlem azawng pawm chungin sakawrah a chuang a, an in lam a pan ta a. Lui panna kawng chanve vel a kal tawh tihah a hnunglama sakawr tlan thawm a hre ta a. Sakawra chuangin a bul a rawn thlen chuan, "Miss Barnes, chibai le," a rawn ti a. Luvie-i chuan a bula rawn kal ve Scott Corb-a chu a hmu mai a. Luvie-i hian Scott Corb-a hi ngaihsan riau na a nei a, a hmêl vang erawh chu a ni lo. Mahse a pa in sum chungchanga a chanchin a hrilh hnem em vang a ni. Amah zah tak chung chuan, "Chibai," tiin a lo chhang a. Khaw lum thu te leh sipai hmuna thil thleng chanchinte chu tawi tea sawiin Corb-a chuan rei tak a sawi tum chu hêl a tum lo. "Miss Barnes, thu ka hrilh dawn che a, i ngaihdan pawh ka mamawh nghal dawn a ni," a han ti tâwng a.

"Mr Corb, eng thuah maw?"

"Nizanah Paymaster luiah mi pahnihin min tibuai a. Inbeihna in a zui ta a. Tukin zingah chuan ka mite pali ngawt ka chân a ni. Ni engemaw kal taah khan Circle R bawngrual an umdarh chiam tawh a. Chutah pawh chuan bawngkhalhtu pakhat thah a ni bawk a. He mite pahnih thiltih bawk hi a ni. He mite pahnih chhuah zalen annih hi chuan henglai vel khawimah hi a him ta lo tihna a ni," tih pahin Luvie-i chu a'n thlir vang vang a, "Heng mi pahnihte hi i hria em?" tiin a zawt ta a.

Zawi sap hian Luvie-i chuan, "Hre lo," a lo ti a. "Frank Kristiana leh Red Shibe-a te an ni," Corb-a chuan a ti hmiah a. "Nilo ang, ka ring lo tlat," Luvie-in a tih chuan Corb-a chuan, "Anni hi an nih i ring tur a ni. A chhan pawh thutak i hmachhawn ngam nan," a lo ti a. "A englaiah chuan nge ka ngaihdan i mamawh na?" tia a zawh chuan Corb-a chuan, "Engtin nge man theih an nih ang tih laiah hian," a ti ta a.

Luvie-i chuan a lu a thing mât mât a. A mitmeng pawh a buai hle. "Ngaihdan reng reng ka nei lo. Engtin nge tualthah hmang an man thin? Tualthah hmang nia i puh si chuan a man dan chu i hre tur alawm," a lo ti let a. "I ringhlel ani maw?" a lo tih chuan Luvie-i chuan, "Buaina tenau a niin buaina enge maw chu an siam ani mahna. Frank Kristiana phei hi chu tualthat tur chi a ni lo," a lo ti tlat a.

"Amah hi i hria tihna a ni maw?"

"Ka hmu tawh thin,"

"In inah maw?"

Luvie-i chuan thip fea en chung hian, "Ni e, engvanga chuti taka ngaihven nge i nih a?" a ti ta a. Corb-a chuan, "A chhan chu amah man thei tura min tanpui dawn avangin," a lo ti hmiah a. Luvie-i chuan a sakawr a pawt dak awrh a, thinrim fe hian, "Ka tanpui ang che maw? Mr Corb, tanpui thei che pawh ni ila ka pui hauh lo ang che. Engvangberin nge ka tanpui theih che i rin reng reng chu le?" tiin a zawt a. Corb-a chuan, "Rin dan ka neih chu maw..... I pa'n bawngsa a supply naah hian a hna a thawh reng hi i duhsak turah ka ngai a ni," a han ti a. Muang charh hian Luvie-i chuan, "Ka duhsak alawm," a han ti a. Hlauthawng tih hriat taka a meng lai chu Corb-a chuan a lo hmu reng a.

"Miss Barnes, he thil tih hi ka hreh khawp a ni," tih pahin, "Mahse thudik i hriat a ngai tlat. Kristiana hian min thah a, min tihchhiat vek hi a tum a. Ka chungah kherlo pawh midang chungah amah man theihna tur thilsual tam tak a ti tawh bawk. Heng Indian ho nen hian kan inkawp rem hle a. Thu hi pe ta ila chuan heng Indian ho hi chuan i pa hi an tibuai thei hle ang. I pa tihbuai hi i duhlo anih phawt chuan Frank Kristiana man dan turah hian min puih ngei a ngai ang," tiin ngeiawm deuhin a'n nui a. "Thilsual ti turin ka beisei lo che a, dân erawh tanpui turin ka sawm mai che a ni," a han ti zui a.

"Mahse Frank-a awmna ka hre hlei nem,"

"Edith-in a hria. I tan chuan a hmuhsak thei ngei ang che,"

"Chuti anih chuan engah nge a hnenah chuan i kal mai loh?"

"A chhan chu maw....." tiin Corb-a chuan chaltlai tak hian, "Min hrilh duh dawn lo. Nang hian min pui ngei tur a ni, i pa chhiatna i duh anih loh chuan," a han ti a. Rei tawk ngawi rengin Luvie-i chuan Corb-a chu a en tlawk tlawk a. Hei hi a tir phat atanga a hlauhthawn kha anih avangin Frank Kristiana chungah a thinur thar leh ta. A pa pawh kha Frank-a tanpui hlauhawm dan pawh a lo hrilh tawh thin. Chuti takin Frank-a chungah thinur mah se dân hmaa tualthah thubuaia han pek erawh chu a duh lo.

A lo ngaihtuah hmasak vek tawh avangin Corb-a tan Luvie-i rilru leh a ngaihtuahna hriat a harsa lo a, a bawhzui hun tak nia hria in dam thlap hian, "Miss Barnes, mi tumahin midang mantirtu nih chu an duh loh laiin nangni ang tan phei chuan a harsa tih ka hria. Mahse zawhna thenkhat ka han zawt ang che. Helai chhehvelah hian outlaw mi sâng chuang an awm tih hi i hria em? Chung zinga a tam zawk chu tualthah hmang anni tih te pawh hi?" a han ti a.

"Hria e,"

"Anih leh sipaihoin emaw, Indian hoin emaw, agency ngei pawh hian chutiang mi chu dân hmaa thubuai siamsak an tum tawh ngai em?" tiin, "Engvangin nge kei emaw, Indianho emaw, sipai hoin emaw Frank Kristiana hi tualthattu anga roreltu hmaah kan hruai bik ang?" a han ti zui a. Luvie-i chuan, "Nangmah ngeiin tunah khan min hrilh anih kha," a lo ti a. "Tualthah thubuai nei thei a ni ka ti mai a ni," tiin Corb-a chuan, "Man anih pawhin whisky tawlhruah puh a ni ang a, bail-in a chhuak leh mai ang. Kansas-ah a thubuai ngaihthlak a ni ang a, amah bail na ang vel chawiin a chhuak leh mai ang. Roreltu hmaah tualthah thu kan sawilo ang. Min tihbuai loh nan umbo kan duh a, sum tlem azawng chawiin a chhuak leh mai dawn a ni," tiin a'n nui a. "Tanpui tura ka sawmna che chuan tunah chuan awmzia a nei viau tawh lo maw?" a han ti a.

"Mr Corb, thudik min hrilh em?"

"Chumi fiahna chu kawng khat a awm," tih pah chuan Corb-a chuan, "Han hawi kual teh. Murphy-a Hotel-a dak inah khan Kristiana man thei hnenah lawmman thahnem tak a awm tih hriattirna an tar tawh bakah hmun tina thawn darh tur a la awm lehnghal. Chutah chuan tualthah vang ni lovin, jail atanga a tlanchhuah vang tih a ni tlat. 'A nungin emaw, thiin emaw' tih a la tel tlat lo," a han ti a.

"Tanpui ta lo che ila tualthah thubuai chu a awrh dawn tihna em ni?" a tih chuan Corb-a chu a bu nghat nghat a. "Anih leh tanpui ta lo che ila ka pa chuan Indian ho lakah buaina a tawk dawn em?" tiin a zawt leh a. Corb-a chu a bu nghat nghat a. Luvie-i chu a ngawi hmak a. Corb-a bawk chuan, "In inah ka kal fo a, hmalam tukverh zawnah khawnvar in dah ngai lo. Edith Fairing-i kaltlanga in lehkhathawn chhang a, Frank Kristiana a lo kal hunah chuan kha tukverh zawnah tak khan khawnvar i hung dawn nia. Enthla tur mihring ka dah ang. Sipaihoin amah chu an rawn man mai ang. Zanin atang hian kar khat chhung i in enthla tur mi ka dah nghal ang," tiin chibai buk nan tiin a lukhum a'n khawih zauh a, a sakawr a pawt her a, a kalsan ta nghal a.

A tuk tlailam dar ruk velah chuan Corb-a mi rawih, hliam tuara kha khawsik sang tak avangin a rawn harh hlawl a. A bulah chuan Red-a leh Frank-a te chu an lo ding a, amah chu an lo thlir reng a. Frank-a chuan, "Tui in te i duh em?" tia a zawh chuan chupa chu a bu nghat a. Frank-a chuan tui no lain tui a va suak a, a pe a. An tawlailir hâlna atanga mel hnih emaw lekah an hliam phurha kha a thihdan tak mai avangin riahhmun an sual a ni.

Nilengin Frank-a leh Red-a te hian an lo awmpui a. Chutih hlanin Otey-a kha sipai hmunah kalin sipai doctor hnenah a damdawi tur lamin a kal a. Anni pahnih chu an in mut chhawk a. A hma thil thleng avang khan Corb-a mi leh sa te leh Milabel-a hote inthurualin anmahni chu zawng turin an chhuah ngei an ring. Frank-an tui a pek lai tak chuan an tawmna hmun biru takah chuan Otey-a chu a rawn thleng hlawl a. Otey-a chuan damdawi bur chu leia theh thlak pah chuan damlo hnenah chuan, "Enge i an a?" tiin a zawt a.

"Ka tha lo khawp mai," a lo ti a. Otey-a chuan rang zet hian, "A tha anih chu," tiin damdawi bur chu a'n kawk a. "I thihpui loh ka hlauh deuh avangin damdawiah khan rul tûr hlauhawm ber ka pawlh ania," a han ti a. Red-a chuan a lo nuih a, mahse Otey-a chuan a nuihlet hauh lo. Henglai ram an thlen atang khan Otey-a hi thawh tur neiloin a la awm ngai lo. Frank-a leh Red-a te an chhuak a, buaina thuk zawkah an hruai lut zel a. Chutih chhung zawng chuan Frank-a naute leh an bawngrual te, an tawlailir te kha Otey-a kutah vek an awm a. Tunah buaina thuk zawkah an lut mek a. Chutihlaiin an hmelma chhawr, hliam tuar, thi se an tana tha zawk daih chu an buaipui leh ta si. Otey-a ngaihdan a ni theilo a ni.

Otey-a chuan thu chungin ni tlakna lam chu a thlir vang vang a. Mei a zial a, a tan kai a. A meizial tur a phawrh pah chuan lehkha them hi a la chhuak tel a. Chu lehkha chu Frank-a pek pah chuan, "Ka theihnghilh tep a ni. Edith Fairing-in agency hmunah khan min pe a," a ti a. Frank-an a hawn a, a'n chhiar chuan Red-a hnenah chuan, "Luvie Barnes-i hnen atangin anih hi. A sawi dan chuan a pa in buaina a tawk anih hi," a han ti a.

Otey-a chuan, "Buaina tawk lo tunge awm?" a lo ti hluk a. Red-a erawh chuan, "Eng buaina nge ni ta a?" a lo ti thung a. Frank-a chuan dar chhin ak chungin, ngun takin lehkha chu a'n thlir vang vang a. Eng buaina nge tih hriat chu amah pawhin a duh ber a ni. Buaina khirh tak a ni phawt ang. Barnes-a hian Frank-a tih theih tlem zia hre reng chunga hetia a rawn hriattir hi chuan a khirh hle turah a ngai. A lehkha chu thlepin a ipte ah a khung a, hliam tuara chu a thlir vang vang a. Otey-a khan Edith-i emaw, Luvie-i hming emaw kha lamri lo se a duh. Chiang bang, zawi tak si hian Frank-a chuan, "Mister, i pu in hriat atana a duh em em thil tam tak i hre ta tlat mai. Sakawra chuang thei i nih veleh he ram atang hian kan nawr chhuak ngei ngei ang che," a han ti a.

"Chu thu chu ka thu hriatah chuan a la duhawm ber ang," a lo ti a. Hepa hi Texas mi, pa tawi lam, hmuihmul tlemte nei, inmeh fai ngai tak a ni.

Frank-a chuan thawh pahin Red-a hnenah chuan, "Le, kal ila, eng nge thil awmzia chu va chian a tha mai lawm ni?" a han ti a. Hliam tuara kha lo inrawlh ve in, "Hei hi Barnes-a kut ziak a ni ngei tih in chiang amaw?" tiin a lo zawt ve a. Rum zeta melh pahin Frank-a chuan, "I lo inrawlhna tur eng nge awm a?" tiin a zawt a. "Ka tan lo inrawlh ve chu a tul love. I tan a that takin ka ti a ni. Corb-a hian he lehkha hmang hian a bum chhuak thei che a ni," a lo ti a. Thinrim deuh tak hian Red-a chuan, "He lehkha hi Edith-i zawkin Otey-a a pe a ni," a lo ti a.

Hliam tuara chuan, "A tha e, a tha e. Tanpui che u ka tum vang mai a ni e," a lo ti mawlh mawlh a. Dam thlap hian Frank-a chuan, "Mister, i hming hi eng nge ni reng reng a?" tiin a zawt a. "Gus tiin min ko mai rawh," a lo tih chuan Frank-a chuan, "I tawngkan khat avangin ka lawm e. I thusawi kha hriat reng tlak a ni," tiin a'n ngawi hret a. "Mahse ka hrethiam vak lo. Engvanga min tanpui chu duh ta nge i nih a?" a han ti a. Gus-a hmel chu a sen deuh tan tan a, "Corb-a hi ka huat tawh em vang a ni ber e," tih pah chuan khaw dang a hawi ta daih a.

Zanriah chaw atan chhang khawro leh sarep an hmeh a. An eikham chuan Otey-a chuan Frank-a hnenah a kal ve tur thu a sawi chhuak a. Sawi pah chuan Red-a chu a en kher a. Red-an engmah a sawi tak lohah chuan a hniallo tihnaah a ngai mai a. Khawthim hnu chuan an awmna atanga chhuakin an sakawr thlunna an pan a. Sakawra chuangin Darlington khaw lam pan chuan an kal ta a. Khaw lam pana an kal mek lai pawh chuan eng vanga kal ta mai nge an nih Frank-a hian a chiang thei chuang lo. A tir phatah khan Luvie-i hian a ti thinur tawh a, mi â te a tiin amah bail na tur sum a ruk chhuah sak a. A pa in thurualpui a tumna zawng zawng a hnial fai vek a. Amah tanpui na tur chhan hi a awm reng reng lo. Ama buaina nise chuan he nula hi a hnenah a lo kal a ring lo. Mahse tunah hian a pa chunga harsatna thleng niin a rawn sawi tlat si. Thil awmdan chu ngun takin a ngaihtuah a ni.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)