WAR ON THE CIMARRON ( Western ) (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

WAR ON THE CIMARRON ( Western ) (Completed)

Unread post by Ngaia » August 13th, 2018, 9:41 pm

TargetPreview.jpg
TargetPreview.jpg (9.84 KiB) Viewed 16586 times

WAR ON THE CIMARRON ( Western )
Re-type : Valmawia Chhakchhuak Mcf

Bung 1


Ni a tla tawh na a khua a la eng fu tihah chuan a hnunglama bawngrual tuihal bu thawm chu Frank Kristian-a chuan chiang takin a hria. Helai hmun, Chisholm chheh vel, Fort Reno atanga hla vaklo, Red Indian hnam hnih Cheyenne leh Arapaho ho khawi ngamna tur ram velah, ni thum lai an thang tawh hnu, a ram a pilril a, bawng tana hnimhnah that em em na hmunah hian a hnunga bawngrual ang mai hian Frank-a chuan ram chin engmah a hrelo a, ram chin a hriat loh em avangin bo nia inngaiin a rilru a mangang hle a ni. Otey Fleer-a, ram chin en thlithlai a, Morg Wheelon-a hnena a tirh lah a lo la kir lo a. Hnung deuh taka rawlthar Beach Freeman-an ring leh vin zet zeta bawngrual thunun tuma aw a chhuah chuan bawng vengtu hoin an pan ram thlen an nghahhlelh tawh zia a lantir a. Frank-a pawh chu a sakawr saddle rahchhan rapa dingin phaizawl zau tak leh a hma lam chu thlirin Otey-a hmuh tumin a hawikual ruai tawh a ni.

Thlifim thawin a nghawngawrh a chhem phet hlap hlap a, a sakawr nghawng sam a rawn len din sung sung lai chuan a thununna piahlamah a hnung bawngrual hotupa ber chuan thuneihna a rawn chang ta tlat mai. An hma deuh taka lui tui rim chu hriain bawngrual zinga a hruaitu ber chuan a hnar chu a len ruai ruai a, thawklehkhatah lui lam pan chuan a lim ta zuai zuai a. Bawngrual dangte pawh chuan thunun ruallohin an hotupa tih dan chuan lui lam chu panin chak takin an pan ta hum hum a. Frank-a pawh chuan a hote zaizira hrilhin a ban pahnih a phar chhuak a, bawngrual chu thunun tumlo a kaltir turin a hrilh nghal a. Amah pawh chuan bawngrual chu kawng lo kianin kawng sirah a sakawr chu muangchang zawkin a kaltir ta a. A hnung deuha an eitur tinreng phurtu tawlai pawh chuan a rawn um phak a, hmalam panin a tlantir ta zel a. Khua a thim thet thet a, unau hmel hai bawr velah lui kam atang chuan Otey-a pawh chu sakawrah chuangin Frank Kristiana lam pan chuan a rawn tlan ve ta a.

Vaivut khu rum rum karah Otey-a chuan "Frank," a rawn ti a, "Saw lui kawina chhak hret rama in, a hnunglama oak thing thahnem tak dinna lai saw Morg-an a lo va sak chu a ni thei angem?" a rawn ti zui a. Frank-a pawh chuan "Chutiang chuan Morg-a chuan a rawn ziak chu anih kha. Khawiah nge amah chu a awm a?" tiin a lo zawt let vat a. "A hmun ka va thleng chiah lo," tiin Otey-a chuan "Thim hmaa nangmah rawn hmuh phawt che tha zawka ka hriat vangin ka lo kir leh rih a ni," a ti a.

"Engtia hla nge la ni ang?"

"Mel li mel nga vel a la ni ang. Helai phaizawlah hian bawngrual te nena riaha va thlen chuk chuk loh a that ka ring e," Otey-a chuan a ti zui nghal a.

Frank-a chuan phawk zetin a thachhangdawltu ber Otey-a chu a han en a, a hmelah leh a aw chhuak atang chuan a phur lo tih a hriat a, a fimkhur hrim hrim vang zawk nge ni ang tih a ngaihtuah a. Zawimuangin luikam tawlai dinna, cowboy ho meichhemna lam chu a pan ta a. Samse Benson-a, sakawr enkawltu chuan cowboy ho sakawr thlun khawmna tur hmun chu hruizenin a lo siamfel diam tawh a. Bawngrual vengtu pali te pawh chuan muangchangin chulai hmun chu panin zanriah kil an lo tum mek a.

Frank-a an zinga a lo thlen a, an sakawr saddle te hlip tura thu a rawn pek an nghah lai chuan Frank Kristian-a pawh a lo thleng ve nghal a. A chezia leh a hmel en reng rengin Texas tlangval a nih chu hai rual a ni lo. Tlangval sang thlerh thlawrh, dar pharh hlai tak leh kawng fek rat mai a ni. Sakawr atanga chhuk chuangloin a saddle vawn chhan chu vuanin a lukhum pharh hlai tak chu a'n hui chho hret a, a hmui hmul meh ngai tawh tak chu a'n chul thuak thuak a. A bawng rual luikam tawn tawna hahchawl mek chu thlirin, Otey-a ngaihdan pawmpui ni awm takin sakawr enkawltu hnenah chuan "Samse, sakawr te kha an hmun turah khan khalhkhawm rawh. A zan a zan chuan kal tawhloin helaiah hian kan riak ang," a ti ta a.

Cowboy ho hlim au thawm ring tak karah chuan Frank Kristiana pawh a then ve sak a. A hlim hmel atang chuan kum 27 a ni tawh na in a la naupan hmel zawk daih a ni. A nui hmelah chuan nelawm tak anih zia a lang a, a mit pawl ram atang chuan a ngilneih zia pawh a lang nghe nghe a ni. Mahse Otey Fleer-a, ngawi renga sakawra la chuang tlat chu a hmel a hmuh veleh Frank-a mitmeng pawh a danglam nghal a. An zinga naupang ber Beach Freeman-a chu a bulah va kalin "Kan hlimna min rawn tawmpui ve nange? Helai hmun hi riahhmun nuam tak tur a nih hi," a rawn ti a.

Frank-a chuan "Zaninah hian Morg-a awmna lam pan ka tum a, Beach. Naktuk zingah sakawr leh thawmhnaw phurtu tawlai kha lui kam inah i rawn thlen ang. Bawngrualte erawh a tuk leh lamah kan ngaihven chauh ang," a lo ti a.

A hnuah Otey-a lamah chuan kalin "Otey, ka hnenah kal ve ta che," a ti a, an pahnih chuan mei enna piah lamah chuan an inzui ta a. Otey-a hi pa te deuh, intuai fai lutuk lo, englai maha thiltih a phur lutuk ngailo mi a ni. Mahse kumtluanin bawngrual a enkawl thin. Helai hmun anga hnim thatna hi Texas ramah a la hmu ngailo chungin phur hmel reng a pu lo a, Frank-a pawh a ngawi chawi lutuk chuan a ti thinur deuh a. "Otey, enge i hmuh dan ni a?" tiin a zawt ta ngawt a.

"Ram chu a tha alawm," Otey-a chuan a ti mai a. Frank-a chuan thip deuh takin a'n melh na a, Otey-a hmel erawh a thim deuh avangin a hmu thei chuang lo. Frank-a chuan "Anih a hnu chuan eng nge a dang i duhlohna chu?" a han ti a. A ngawih vang vang hnu chuan Otey-a chuan "Eng teh vak mah," a ti a, an ngawi leh vang vang a. He lui hming hi Patmaster an ti a. Frank-a chuan a ram that zia a hmuh hian a mang lama a lo hmuh thin, a nun bul intanna tur ni ngeiah a ngai a. Morg Wheelon-a, a partner chuan hla deuh a inah amah chu nghakhlel takin a lo nghak reng tih ngaihtuahin an inhmuh hun tur thlirin a hlim ru hle a ni.

Kum khat liamtaah khan amah leh Morg-a hi thawk dun turin inremna an siam a. An sum neih ang ang te thawhkhawmin leh an puk theih ang te pawh pukin bawngrual an lei a. Chisholm Trail-ah khalhin Red Indian hnam kawlh tak tak Commanche-Kiowa, Cheyenne leh Arapaho hnam te leh Cherokee ho chenna, Indian Nations an tih mai, Kansas atanga Texas thlenga inpharh ramah an khalh thin a ni. Helai ram hi mingo ho tan chuan neih theihloh anga ngaih a ni. U.S Army hoin tharum nena Indian ho an awpbehna ram a ni a, khawthlang ram state hrang hrang atanga outlaw leh misual tinrengte chenna hmun a ni. Chutiang anih mek lai chuan bawng leh sakawr chaw tur hnim that em em na hmun a ni tlat. Bawngvulhtute intelkhawmin helai reservation ram chhungah hian an lut a, Indian ho hnen atangin ram zau tak tak man neia hawhin bawng an vulh ve mek a. An ram hawh chhungah an mite huaisenna leh tumruhna in Texas bawng rual an vulh thau a, man to tak takin Dodge City leh Caldwell-ah te an hralh thin a ni. Ranvulhtute chuan rancher tenau deuh tan helai hmun hi chen nan leh ran vulh nan a him loah an ngai a. Chutihlai chuan ranvulhtu intelkhawm, company anga khawsa lian deuh te chuan sheriff emaw, roreltu leh jail te an mamawh lo a, anmahni kha chutiang chu anni vel vek a, an duh danin dan chu an kengkawh mai a ni. Rancher tenau tan helaiah hmun a awmlo tih leh dinchhuahna chance a awmlo tih chu Morg Wheelon-a leh Frank Kristiana te ngaihdan erawh a ni lo.

Kum khat dawn chu helai ramah hian Morg-a hi lo awmin Frank-a hi Texas-ah bawngte leikhawm leh thawktute zawngin a kir leh a ni a. Thla hnih liam taah khan Morg Wheelon-a chuan Frank-a chu lehkha thawnin, Cheyenne-Arapaho reservation chhungah Cheyenne lal hnen atangin ram a lei a, in leh sakawr dahna in te pawh sa tawh in amah leh bawngrual chu a lo nghak reng tawh tih a hrilh a. Zanin ngei hi helai ramah rancher tenau tan pawh dam khawchhuahna a awm a ni tih an fiahna bul tan zan tur niin Frank-a chuan a ngai a ni.

An ngawih vang vang hnu chuan Frank-a chuan "Kum lo thara kan bawngrual thau hmel i hmuh hma chu bei ti dawng duh suh, Otey," a han tih chuan Otey-a chuan "Hmu phak dawn ila ka duh khawp mai," phur lo zetin a lo ti a.

"Engvangin nge i hmuh phak loh vang?"

" Chutih hunah chuan hetah hian ka awm hmel tawh lo tlat,"

Frank-a chu a ngawi vang vang a. Phur lo zet hian Otey-a bawk chuan "Frank, a pawi ka ti khawp mai. Morg-a nen hian tun aia tha deuhin ruahmanna lo siam ula tha tur a ni a," a han ti a. Frank-a chuan "Engvangin maw?" a lo ti vat a. Otey-a chuan Frank-a lam hawi chuan "Min rawih tirh khan helai hmun kan thlen hunah Foreman ni turin min ti a ni lawmni kha?" tiin a zawt a, "A dik chiah," a lo ti vat a.

"I rawih dang Cook te, Samse, Beach, Phil-a leh Mitch-a te hi rawih chunzawm zel turin i ti em kha?" a'n ti leh a. Frank-a chuan " A dik, chutiang tur chuan ka ruai a ni," a ti vat a. "Anih leh Morg-a thil lo tih dan saw engtizia nge ni ngai a?" tiin a zawt zui a. Frank-a chuan a sakawr chu tidingin Otey-a pawh a bulah chuan a va ding a. Frank-a chuan zawi sap hian "I thusawi awmzia chu enge maw ni ta le?" tiin a zawt a.

Otey-a chuan "Morg-a hian midang a lo ruai a ni. Cook te nen lam ruaiin mi pariat lai ka chhiar thei," a tih chuan Frank-a chuan "A hmun ka thleng lo i ti khan ka hria a," a lo ti vat a. "Thleng chiah lo e, mahse a hmun lan theihna ka thlen rual rualin mi panga leh sakawr tlatna hmuna sakawr engemaw zat ka hmu nghal a. Oak thing bul atangin ngun zawkin ka han thlir a , Frank, cook te nen chuan mi pariat ka chhiar thei chiah a ni," a ti ta a. Mahse Frank-a chuan "Morg-an chutiangin midang a chhawr lo ang. A lehkhaah pawh bawngrual leh a enkawltu zawng zawng hruai turin min ti chiah alawm," a ti tlat a.

Bung vatin Otey-a chuan "Sawlai mihring ho saw zin hahchawl satliah an ni lo. An khawsak dan atang sawn saw hmun saw an ta chei tlat a ni," a ti hmak a. Frank-a chuan engmah sawi loin a sakawr a kaltir nghal a. Amah zui pah chuan Otey-a chuan "Lui kam tuakah bawngrual engemaw zat ka hmu a, chung bawngte chuan nang emaw Morg-a farm chhinchhiahna reng reng an pu lo," a ti a. Mahse Frank-a chuan awki sang hret hian "Ngawi teh Otey, i hmun hmuh hi a diklo anih ka va ring em," a lo ti a.

"Ding teh, Frank, thusawi dun ka duh tlat," Otey-an thupe aw zeta a tih chuan Frank-a chuan zawm ngei chi niin a hria a. A din veleh Otey chuan "Nang leh kei hian Morg-a min hrilh ang chiahin Fort Reno atang khan bul kan tan tih i hria a. A ram leilung a sawi te, lui a sawi te pawh kan thlengin tuna kan lui sawi pawh hi Patmaster Creek a ni ngei a ni. A sawi ang zelin engkim ka hmuh bakah a in sakna lai a sawi pawh a sawina hmunah ngei ka hmu a. A tihchian lehzual nan tiin a hmar lamah ka va kal kual a, chutah pawh chuan chhinchhiahna a sawite ka va hmu ngei a ni. Ka hmun hmuh hi a dik ngei a ni. Tunah hian i ramah ngei Morg-a hian bawngrual a dahin a enkawltu a dah thu hi a awmzia min han hrilh teh," tiin a zawt ta a.

Frank-a chuan zawi sap hian "A hmuchhuak turin i kal nghal ang," a ti hmiah a. Otey chuan engmah sawiloin a zui nghal a. Ngawirengin Otey-a sawina lamah chuan kalin a hnu deuhah chuan hmun rem lai an thleng a. Sakawr tlatna bik tura an hungna lai te chu kal pelin sakawr dahna in, corral hrulah chuan an kal zel a. In lam chu an pan ding ta a. In atanga fit za vel an thlen chuan in a khawnvar inchhi chu a thi hmak a, sumhmun thim lai atang chuan aw hian "Tu te nge in nih? Insawi vat rawh u," tih thupek chu an hre ta. Sakawr pawh din pah chuan Frank-a chuan "Khawiah nge Morg-a hi a awm?" tiin a han zawt a.

A reh vang vang a, a hnu deuhah chuan "Morg-a chu tunge ni a?" tiin a rawn zawt a.

"Morg Wheelon-a, helai ram neitu hi,"

"Tunge maw chutiang thu rawn sawi ta chu le?"

Vin lam hret leh hriam deuh tak hian "Thiana, khatah khan ka lo kal dawn. Buaina siam tur ni loin. Inbiak ka duh vangin ka lo kal a ni," Frank-a chuan a han ti a. Sakawr atanga chhukin in lam pan chuan muangchangin a kal ta a. Ina lo awm chuan "Chet, khawnvar chhi rawh," tiin mikhual lam hawi chuan "Khawnvar chhit nghak phawt ula, muanchangin in pahnih khan lo kal rawh u," tiin thu a rawn pe ta a.

Khawnvar engah chuan muangchangin Frank-a chu kalin kawngka pui atang chuan chhunglam chu a han thlir a. Mi panga hian card lo khelin an lo inhnial lek lek a. Room sir awl zau laiah dawhkan lian deuh kilin an lo ding kual a. An zinga palian deuh ber chu hmachhawnin Frank-a chuan "Khawiah nge Morg Wheelon-a hi?" tiin a han zawt a.

Chupa chu Frank-a lam hawia dingin a kawnghren chu a khinghnihin a dawm a. Pa lian leh sa tha tak, sam kir lek lek, sam thawl deuh, mitmeng rum tak a ni. A hmelah nelawmna a lang tlem khawp mai. "Morg Wheel-a maw?" tia rawn tawng chhuakin "A hming chu ka va hre mai lo em. He hmun hi Reservation Cattle Company ho camp pakhat a ni a," a han ti a.

Frank-a chu inchhungah chuan a han vei kual a. A kawr hak te, a kekawr leh jacket inbel atang chuan bawng vengtu cowboy satliah ang mai a ni. Mite tih dan pangngai takin nghawngawrhin a nghawng a vet a, lukhum pharh hlai hlep hlawp, vaivut kai dan atanga a thar a ni lo tih hriat tak a khum a. Texas cowboy ho bun ang pheikhawk pangngai tak a bun a. Mahse a sa inphut tawk tak fit ruk zet leh zawi muang, bah miahloa a che vel chuan thuneihna a nei tlat tih a lantir a. Pindan chhung chu fimkhur takin a thlir kual a, khum sawm lai chunga thawmhnaw darh niaih nuaih te leh choka panna kawngte chu a hmaih lo.

Khum lu banga thil inbel a hmuh veleh a zawnah chuan a ding chat a. Chu thillem intar chu sakawr ke hma lam inkhai, mei kawh vah mai leh a sam ding chho hiang a lo ni a. Frank-a chuan mi panga lam chu hawiin, "He thil lem intar hi tu ta nge?" tiin a zawt ta a.

Pa lian ber chuan, " Keima ta anih kha," a lo ti a.

"Sakawr lem mawi tak anih hi. Eng sakawr nge ni a?"

"Ka hrelo. Lehkhabu atanga ka cheh thlak a ni,"

Frank-a chuan ngeiawm ang reng deuh hian "Dawt sawi hmang i nih chu. He sakawr hi San Francisco-a Lady St Claire sakawr, intlansiakna atana a hman a ni. Kum '74 khan Frisco-a mel ngaa thui intlansiaknaa lawmman a dawnpui sakawr kha a ni. Morg-an a ngaina em em a, a lehkhabua a dah hi keu chhuakin vawi tam tak a en thin a ni. Morg-a ta ngei a ni a, he khum mawngah hian a en fo theih tura a tar a ni," tiin thip zet hian chu paliana chu a melh a, "Khawiah nge Morg Wheelon-a chu a awm?" tiin a zawt leh ta a.

Kawngkhar bula Otey-a silaia tin rengtu chuan "Boss, engmah sawi suh," a rawn ti a. Paliana erawh chuan "Engmah zep tur ka nei lo," tia chang taka Frank-a hmachhawn chung chuan "Morg Wheelon-a chu a thi tawh," a ti ta hmiah a. An ngawi vang vang a, a hnuah chuan hul hakin Frank-a chuan, "A thi maw?" beidawng tih hriat takin a han ti a.

"Thi tawh e, Fort Reno-a Major Corning-a zawt mai teh. A hoten a thih dan pawh an enfiah vek tawh kha. Kar thum liamtaah khan ka hote zinga pakhat helaia chawlh hmang tura kal hian sakawr dahna in gate bula Morg Wheelon-a let reng hi a hmu a. Mi tuemaw nen an insual a, a tawpah chu a sualpui pa chuan ulhbunin a kap ta ni awm tak a ni," tiin a hrilh zui a.

An ngawih leh vang vang hnu chuan Frank-a chuan, "Anih nang hi tunge i nih a?" tiin a han zawt a. "Kei hi Chet Milabel-a, he Reservation Cattle Company enkawltu, foreman hi ka ni," a tih chuan Frank Kristiana chuan, "Anih leh Morg-a hmun lo ramah hian nang hian engnge i tih?" tiin a zawt leh ta a.

Milabel-a chuan lu thing pah hian muangchangin "Hei hi Morg-a ram a ni lo. Thah anih hnu khan Cheyenne lal hnen atangin lilam a ni a, sum tam tak senga Company in a chhan a ni. A chhannah he in pawh hi a tel avangin ti hian kan cheng zui ta a ni," a ti a.

Frank-a chuan Otey-a chu a en a, Otey-a hmelah mak tihna leh thinurna a lo lang chhuak a. Chutah Milabel-a lam hawiin "Milabel, he thil kal danah hian diklo pakhat a awm a ni. Wheelon-a hian thawhpui a nei a, a partner chu keimah hi ka ni," a han ti a. Chu foreman chuan chu thu chu a hma ai chuan a ngaihven tih a mitmengah a lang a. Muangchang hian Milabela chu a'n zi leh te te a, "I thusawi chu ka awih hmain a fiahna hmuh hmasak ka duh. I thusawi chu lo awih ta reng pawh ni ila awmzia a nei vak chuang lovang," a han ti a.

"I awih ngei tur a ni ang. Chief Stone Bull-a hnen atanga he thu awmzia i hriat a, helai atanga ka um chhuah hunah che chuan ka thusawi hi a dik tih i awih ngei ang," Frank-a chuan a ti ta hmiah a. Milabel-a chu a nui deuh suk a, lu thing deuh chung chuan "Indian lal pakhat hmaah i tlawm anih chu, ka hrethiam mai," tih pah chuan khum pakhat chu kawkin, "Tah khan thu teh," a han ti a.

"Ka thu lo ang,"

Milabel-a chuan a ke chheh an siam rem hret a, deusawh tih hriat zet hian "Tanpuitu tur che tumah helaiah hian an awm lo. Helai ram hawha nei thei tur hian Indian ho engemaw zat zawn khawm a, an hnena sum engemaw zat pek tur a ni a. Morg Wheelon-a khan Red Indian lal putar, lal tha tak Stone Bull-a hmu fuhin sum a pe a, helai ram hi a thlang chu a ni phawt mai a. Mahse kei hian Indian lal pali chu 'Morg Wheelon-a sum ka hmu' ti duh reng reng lo tur ka nei sa reng a. Chutih rual chuan mingo sawm rual zet, Indian ho hnena zu hralh ru thin, henglai ram hralhna a agent nia inchhal, 'Morg Wheelon-a ram leina pawisa sen pawh kan dawng lo' ti tur hi ka nei bawk a ni," tih paha lu thing nur nur chung hian muangchangin, "Ka thian, helai ram hauh theihna hi engmah i nei lo, mihring, silai hmang thiam thahnem tawk i nei a, helai hi i veng thei anih ngawt loh chuan. Chutiang mihring chu i nei reng reng em ni?" tiin a zawt ta a.

Chik taka chung ho chu en thlithlai chung chuan Frank-a chuan "Ka hrelo le," tia ngawi deuh chung hian, "Chutiang zat chu ka mamawh ka ring lo," a ti zui a. Milabel-a erawh chuan, "Chutiang zat ang i neih loh chuan tum duh suh. Kei chuan chutiang zat ka neih loh chuan ka tum hauh lo ang," a lo ti a. Frank-a erawh chuan a kekawr sawi chhing deuh pah chuan, "Ka tum dawn. He hmun chhuahsan tur hian kar khat hun ka pe a che. I bawngrual leh i thawmhnaw zawng zawng hi thiar chhuak vek rawh. Ni lo, kar khat niloin ni hnih, darkar sawmli pariat ka pe zawk a che. I hmel hmuh hi ka duh tawh lo," a ti ta a.

Milabel-a nui hmel a reh a, ngeiawm zetin Frank-a chuan, "Milabel, i hnen atang hian thil pakhat chiah hriat ka duh. Tunge Morg Wheelon-a hi that?" a han ti leh a. Milabel-a erawh chuan, "Reservation Cattle Company ho chuan an that lo tih ka hria. Chubak chu ka ngaihtuah lo bawk," a ti hmiah a.

Frank-a chuan "He hmun atanga ka um chhuah hunah che Morg-a thattu chu ka zawng chhuak ngei ang," a han ti leh a. Kawngka bula mi kha a lo phun nang nang a. Chutah Milabel-a chuan Frank-a chu a pan hnai a, hmaichhanah dam thlap hian, "I tawng hmangah chuan i dehkhirh hmel hle mai maw?" tih pah hian Frank-a hmaiah chuan na tawka ben a han tum a. Mahse Frank-a chuan bum tumin a kun zauh a. A khabea Milabel-a kuttum dawng tawk vel chauh anih avangin Frank-a chu a dak awrh a. A hnunglam bang chu a tukkhumin a va tauh dawt a. Zawi hnawk chungin chhuatah chuan a thu ta hnawk a. Rang tawkin Otey-a chuan a pistol kawm a vuan a, mahse a hnungah silai hmawrin a hnung ami chuan a rawn nawr sawk a.

Thinur zetin Otey-a chuan, "Milabel, i thil tih vang khan i la inchhir hle ang," a lo ti a. Milabel-a chuan "He hmun atang hian la chhuak la, ka hmuh phaklohah kalpui vat rawh," a lo ti a. Otey-a chuan Frank-a chu kaihkuahin thim zingah ngaw hnuaiah chuan a hruaichhuak ta a. An sakawr thlunna hmun a thlenpui chuan Otey-a chuan Frank-a chu a sakawr chungah chuantir tumin saddle dawmchhan chu a han vawn tir a. Chutihlai chuan Frank-a chuan a lu a rawn thing nar nar a. A han in thin harh chuan in lam, eng lo chhuahna lam chu a han hawi a, a inher a, chulam pan chuan kal a tum ta a. Mahse Otey-a chuan a banah a lo vuan chat a. "Frank, kal hauh suh," a'n ti tuar a. Mahse Otey-a kut chu thing thla in in lam pan chuan kal a tum tlat a. Tihngaihna dang awm ta hek lo, Otey chuan a pistol a la chhuak a, a kawm chuan Frank-a bek chungah a chhu ta a. A tlu tur chu Otey-a chuan a dawm zui a, a zawi lai tak chuan rit ti tak chungin a sakawrah chuan a hlang a. Lui lamah kalpuiin an camp lam chu a pan pui ta nghal a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2018, 9:42 pm

WAR ON THE CIMMARON
Bung - 2

A hun tiam ni hnih chhung ral hmaa tih tur, rang taka tih tur Frank-a hian a ngah hle mai.

Chutiang ti tura a tuk chawhnu lama Fort Reno pana a kal chuan a mitmengah lungawi hmel reng a lang lo. A tih tur zinga pakhat chu Morg-a thih dan kawng engemaw tal hriat a ni. Zing karah khan Morg-an a lehkhaa a thuziak pakhat hriatchhuah thar a nei. Chu chu an tum anga an tluan zel chuan kum tawp lamah helai Agency a thawk, nula duhawm tak Edith Fairing nupuia neih a tum thu a ni. Chutiang anih chuan Frank-an tih tur hmasaa a ngaih chu he nula hmuh hi a ni.

Tih tur dang neuh neuh a ngah deuh avangin sipai ho awmna lam pan hmasak a tum ta a. Fort Reno hi Canadian River phaizawl atanga invawrh chho tlang pawnga awm a ni. He phairuamah hian Cheyenne-Arapaho reservation a chengte sumdawnna hmunpui Darlington pawh a awm nghe nghe a. Sipai ho awmna leh Agency pawh mel khat leka in hnaih a niin awlsam takin an in kalpawh zung zung thin. Frank-a tan helai sipai hmun hi thil thar a ni lo. Chisholm Trail-a bawngrual nena an kal fo thin avangin helai hi a hmelhriat hle a ni. Sipaiho tawmna bik tak chu lunga sak in a ni a. A bulah kawng a kalin thing an phun thluah thluah bawk a. A khat tawkin khawnvar an dah bawk a ni.

Frank-a chu a sakawrah chuangin sipai ho dawr lun ber lam pan chuan a kal ta a. Parade ground hmarchhak kil lamah chuan thinga sak in lian deuh mai, chhawng hnih lai chu a ding ut a. Chu inah chuan saloon te, store te, restaurant te leh lu mehna te a awm a. A chhawng khatna a awm an ni a. A chhawng hnihna chu hotel anga hman a ni. Chu in hual deuh thaw chuan tawlailir dahna bik hmun a awm a, tha taka hung a ni a. Ran chaw pekna in te, thirdeng in te a awmin helai hmuna an hmun pui ber, engkim awmna leh lamna hmun a ni.

Chu hmun pana a kal chu chulaia pungkhawm sipai uniform ha engemaw zat te, Red Indian ho leh cowboy sawmhnih chuang dawn awmkhawm ho chuan chik takin Frank-a chu an lo thlir a. Hotel kawngka piah tawlai dahnaah chuan tawlai parukin Kansas rama Caldwell khuaa phurh tur bungrua an load mek a. Chu khua chu helai atanga hmar lam mel 150 laia hla a ni.

Heng wagon ding khup zinga pakhat chu mawi danglam taka chei a ni a. A ke te chu rawng var leh senin an tial a. Chu tawlai chu in pakhat, kawngka lu chunga 'HAY AND FEED, LIVERY RIGS FOR HIRE' tih intar kuau bulah chiah chuan a ding a.

Frank-a chu sakawr atangin a chhuk a, chawhnu lam nisa tak hnuaiah chuan office chhung thim lam chu a pan ta a. A luh rual rual chuan hmeichhe aw in, "........leh vaimin bag ruk. Ka pa hian tunah mai in rawn thlen theih tur thu hriat a duh nghe nghe. A chhan pawh naktukah quartermaster hnenah a thlen ngei a ngaih vang a ni. In tih thlen theih dawn loh chuan anmahniin sakawrin an rawn la dawn a ni," a lo ti a.

"Thu rawh, thu rawh, Miss Barnes," pa pakhat hian a lo ti sawk sawk a. "Jake Humphries-a hi a awm mai lo a, a phurh theih dawn leh dawn loh ka han ngaihven ange," a ti zui mawlh mawlh a. Frank-a mitmeng pawh daihlim hnuaiah a fiah ta deuh tihah chuan a piah lawka thutthleng lam pana nula lo kal, thawmhnaw dum pawl ha chu a hmu ta nghal a. Sumdawng, nula lo dawngsawngtu chu pa san tha deuh, inthlahdah tak hmel pu a ni. Kawngka lam pana a rawn kal chuan Frank-a chu a tawk ta thut a. A ding chawt a, "Pu a, enge i duh tak le?" tiin a zawt a.

"Tawlai phur khat vel vaimim, ran chaw tur ka awmna hmuna phurh ka duh,"

Clerk chu a dawhkan lamah kir lehin pencil a la a, "I awmna hmun hming chu?" tia a zawh chuan Frank-a chuan a sawi mai a. "Khawilaia awm nge ni a?" tia a zawh chuan Frank-a chuan "Paymaster luikam hrul, chhaklam zawnga a inher kualna chung chho ram kha a ni mai," a lo ti thuai a. Clerk chu a rawn dak chhuak vat a, "Chulai chu Circle R ho camp awmna kha niin ka va hre ve?" tiin a zawt a.

"Ni thin e,"

"I lei em ni a?"

"Ka ram alawm," Frank chuan a ti hmiah a. A aw chhuak chu a ram hle a. "An chhuahsan tawh," a han ti zui a. Clerk chuan, "Ran chaw chulaia phur thleng tur chuan an tanpui dawn che em?" tiin a zawt leh a. Frank-a chuan makti deuh tak hian a en hau a, "Tanpui a? Engvangin nge min tanpui ang? I vaimim ka lei anga, nangin ka ram thlengin i phur mai dawn alawm," a lo ti a.

Clerk erawh chuan a lu a thing nawk nawk a, "Kristian, Circle R hoin min veng dawn anih loh chuan engti kawng mahin chu lamah chuan ran chaw ka phur thei lo. Phurh tum teh reng pawh ni ila a hmun ka thlen chuanglo ang," a ti ta hmiah a. Frank-a chuan chu thu chu hrethiam lo tih hriat takin clerk chu a en a, "Tha deuhin sawi ve mai la," a han ti a.

Clerk chuan, "Anih leh aw. Tu hnen atangin nge chu ram chu i neih a?"

"Indian ho hnen atangin,"

"A ni ngei ang. Tu ber hnen atangin nge?"

"Stone Bull-an ram leina sum chu a dawng," tiin Frank-a chuan mak a ti rilru hle mai.

Clerk chuan lu thing nar nar chungin a pencil pawh dawhkanah a dah a. "Min hrethiam la, ka ngaihdan ka han hrilh teh ang che. Indian ho ram hi Scott Corb-a hnenah an hawhna man an pek hi chuan dan naranin buaina an neilo in bungrua engpawh awlsam takin an phur vel thin. Corb-a hnen atanga an lei loh erawh chuan harsatna an tawk chawk. Circle R ho pawhin Corb-a hnen atanga an lei loh avangin bungrua engpawh helai atanga an lak dawn hi chuan vengtu tha tak an nei ziah," tiin a'n ngawi vang vang a. Dar chhin ak ak pahin, "Wagon tir chhuak ta ang ila an ti chhe vek anga, a khalhtu an vaw hrep bawk ang. Tin, vaimim pawh an hal darh vek ang," a ti ta a.

"Chutiang chu a lo nih tak chu," a tih chuan clerk chuan, "Ni e, pawi ka ti khawp mai. Tawlai leh a khalhtu i rawn thawh a, vengtu i rawn neih theih a, a man i pe tla nghal anih loh chuan ran chaw chu i nei theilo tihna a ni e," tiin Frank-a chu kal pelin pawnah a chhuak a, "Jake," tiin a va au ta a.

A bula nula, clerk dawhkan bula thu chuan a rawn en reng a ni tih Frank-a chuan a hre ta a. Chu nula chu pian nalh ang reng tak, sam buang lek lek a niin a tukkhum lamah a sam chu a tawn a. Hmel pawh ngaihno bei thawkhat a niin a nui deuh hmel phei chuan mipa a hip theih hmel khawp mai. Mit meng mawi leh mit mu lian tak a ni a, Frank-a'n a en veleh a mit chu a la sawn thuai a. Frank-a chuan a lukhum chu a la thla vat a. A sam buk, khuih loh tih hriat tak chu a hui pawk pawk a, nula thutna lam chu a pan ta a.

"In tawng thawm kha ka lo hre nual a, ran chaw tur vaimim kha i order em ni a?" Frank-a chuan a han ti a. "Aw, eng atan nge ni ta a?" tiin nula chuan a lo zawt let a.

"Ram chu Corb-a hnen atangin in lei tihna em ni?"

Zawi sap hian, "Ka pa hi sipai leh Indian ho hnena bawng supply tu contractor a ni a," tiin "Tu hnenah mah ram leina chu kan pe ve lo," a han ti zui a. Frank-a chuan mak ti deuh tak chungin kawngka lam hawiin, "Saw pa thil min hrilh kha a dik tihna a ni dawn maw?" tiin a zawt a. "A dik tihna anih mai ka ring," nula chuan a ti a.

Frank-a chuan engmah sawiloin nula chu a en vawng vawng a. A hma zana Chet Milabel-a thusawi kha a hrechhuak a, phur ang reng tak hian, "He Corb-a in tih hi Indian ho hnena Whisky hralh ru thin tu hi a ni mai thei angem le?" a han ti a. A thutna atanga thawh pah chuan, "A fiahna engmah a awm thei lo. Eng pawh nise Cheyenne ram zau tak hralhnaah hian Corb-a hi agent chu a ni ngei alawm. Bungraw phurh velah harsatna a awm thin avangin bawngvulhtu tam ber hian a hnenah ngei hian ram leina man an pe a, hei hi Corb-a tum pawh a ni reng a," a ti ta zel a.

Frank-a chuan zawi sap hian, "A chin than chu thlak a hun tawh tihna anih dawn chu," a han ti a. Nula chu a nui sak a, a nui hmel atang chuan amah chu a khawngaih deuh niin a lang a. "Chutiang ngaih dan nei zinga a hmasa ber chu i ni lo e," a lo ti a. "Chutiang ngaih dan neitu chu khawiah nge an awm tak a?" tia a zawh chuan nula chuan "Henglai velah bawng an vulh leh ngai tawh lo," a ti hmiah a. Frank-a chu a then sak a, "Hnuhma an nei lian tawk lo tihna anih chu," a lo ti ve hmiah a. Nula hmel hlim chu a reh hmak a, "Chutiang thu chu kei chuan ka sawi hauh lo ang," tiin, "Thu atthlak tak a ni," a han ti zui a.

"Ka thil tih tum pawh chu a atthlak dawn tihna a ni maw?" tia Frank-an a zawh chuan nula chuan bu nghat nghat chung hian, "Nang chu ni ila ka thil tum chu ka thulh hmak ang," a ti ta a.

Clerk pawh chu a lo lut a, "Jake Humphrey-an i bungrua chu a rawn phur thei dawn e," a rawn ti a, nula pawh chu a chhuak nghal a, a sakawrah chuan chuangin lehhawi miah lovin a kal ta nghal a. Frank-a chuan a thlir zui vang vang a. Cheyenne-Arapaho ho chenna ram lei chung chang chuan tualthahna a thlenin politics tak pawhin a buaithlak hle dawn niin a ngai ta.

Hotel kal pelin bar lam chu a pan ta a. A lu na deuh fek fek te leh a rilru hah chu zu tlem ina reh maithei turah ngaiin bar chhungah chuan a lut a. Bar dawhkan bul thutna awl chu panin a thu a. A dawhkana bar nghaktu in zu um a rawn dah fel chiah chuan mi pakhatin "Frank Kristian," tia chiang banga a rawn koh hi a hre ta a.

A hnung lama mi pakhat, amah hnaih lutuk lo a ding hmachhawn chuan a han inher a. Chupa chuan bar dawhkan chu a khing hnihin a vuan a, pa vantlang tak, cher lam deuh, suit hlui lam tawh inbel, hmai tlang pan, phiar fat mai a ni a. A hmuihmul chhah tak chuan a heh leh a hmel lan dan a ti danglam lek lek a. A mitmeng nelawm lo zet avang chuan nel a hlawh lo hle a ni. Frank-a chuan "Enge ni ta a?" a han ti a. "Kei hi Scott Corb-a ka ni a," a ti a, chibai buk erawh a tum hran lo.

"Anih tak chu,"

"Morgan Wheelon-a kha i partner a lo ni reng amaw?" tia a zawh chuan Frank-a chu a bu nghat a. Corb-a bawk chuan, "A thih hma khan tih hman loh pakhat a nei a, i chhunzawm dawn tihna em ni ang?" a han ti zui a. "Chu chu enge ni a?" tia Frank-an a zawh chuan Corb-a chuan "I ram man hi a pe lo a ni," a ti ta a. Then sak chung hian Frank-a chuan, "I hnenah a pe lo i tihna a ni maw?" tiin a'n zawt a. "A dik chiah. Cheyenne leh Arapaho ram hmun thuma thena hmun hnih hralhtu agent chu keimah hi ka ni. Indian lal tereuh te hnenah Wheelon-a khan ram man a pe a. Indian lal ho thukhawm chuan Wheelon-a partner i nih chuan dan loin an ram i rawn luah dawn niin an ngai a ni," a han ti a.

Corb-a hnunglam a han en chuan Frank-a chuan mi pahnih inring taka ding chu a hmu nghal mai a. Ama thutna hnunga thutna, a hma lawka awl pawh chu mi pakhat hian a rawn luah tawh a. Heng ho hi buaina chhuak palh veng tur leh bei tura Corb-a ruahman tih chu Frank-a chuan a hre mai a ni. Thil awmdan leh buaina inmung hre reng chungin Frank-a chuan, "Hei, ran chaw vaimim phurh tumin ka inbuatsaih mek a, chungah pawh chuan i inrawlh zel tihna em ni?" tiin a han zawt a. Corb-a chuan, "I ram man i pek chuan inrawlh hran nang," a lo ti vat a.

Chu pindan chhunga awm te chu an ngawi thap mai. Eng thil tak nge thleng dawn tih ngaichangin Frank-a thutlukna leh ngaihdan chu ngaichangin theh hmeh ang maiin an ngawi thiap mai a ni. Muangchangin Frank-a chuan whisky bur chu a la a, a chhin hawn a, Corb-a bul hnai deuha dah tum niawm takin zu um chu a'n nuai vel a. Vawilehkhatah zu bur chhin chu rawn pawk chhuakin zu chu a rawn inphuh chhuak ta vak a. Corb-a chu ban pharin bar dawhkan atang chuan a hnungtawlh dawrh a. A lo che muang hret nge ni whisky chuan a kawr chu a lo phuh huh fe mai a. Zu chu a kawr femah chuan a dir ta tliah tliah mai a. Hmel sen deuh tan tan chung hian Frank-a chu a han en a. Frank-a zawk chuan "Ka han tuai pelh khanglang chu ka zeilo takzet a ni. Engvanga hetiang te ti nge maw ka nih chu le?" tih pah chuan Corb-a chu nelawm lo zet hian a en a. Corb-a pawh chuan a mitmeng chu a ngei hle. Mahse chance han pek leh tumin, "Tihpalh thil tih a ni ang chu maw?" a han ti a.

Frank-a chu ngeiawm zetin a'n nui a, "Corb, tihpalh ni teh nang. Ram man dawn i beisei a nih ngat chuan i kawr fema zu far kha sawr belhin no kha dawh la, chuta tling zat zu man chu bar nghaktu pa hi ka pe ang. Chu chiah chu ka hnen atanga i sum hmuh tur chu a ni ang," a ti ta hmiah a. Zu man tur chu dawhkanah chuan a dah a, a inher vat a, engmah sawiloin pawnah chuan a chhuak ta a. In chhung lam chu a reh tlawk tlawk mai a ni.

Sakawrah chuangin Garrison chhuahsanin agency lam chu a pan ta a. A thinurin kian zai reng a rel lo. Corb-an a tih vel dan te a ngaihtuah a, a ram luah mek lai chungchang chu a buai dawn chauh a, kil thum atanga buaina chawk chhuak thei anih a hai lo. A hma zana Milabel-a thusawi te leh nula thusawi atang te khan Morg-a thah chungchangah Corb-a a rinhlelhna te pawh a zual chho zel a.

Corral kal pela chhuk zawnga Canadian lui kuam zawl a hnaih tawh tihah a hnunglama tawlai kal thawm a hre ta. Tawlai hnuktu sakawr te kawng kianin anmahni pawh en chuangloin kawng sirah a sakawr a din tir a. Tawlai ke a hmuh chuan a hmaa tawlai ke chei nasat bik kha a ni tih a hre mai a. A hnu lawkah a bulah chuan tawlai chu din tirin a khalhtupa chu a rawn thaw huai a. Tawlaiah chuan a hmaa a hmuh nu leh a seat pakhata thu chu palian lam, kut bawr hrawl tak niin tawlai hnuk tu hrui chu chu pa chuan a lo vuan a. A hmel tai tuk karah chuan thlan a luang zung zung bawk a. Hlim hmel pu tak hian chu paliana chuan, "Kristian, bar-a mak taka i khawsak lai khan a chhungah khan ka awm asin.Ti teh, i han in chibai teh ang," tiin a ban a rawn phar chhuak a.

An in chibai zawh chuan chupa chuan a hming chu Hopewell Barnes a nih thu a hrilh a. "Hei hi ka fanu Luvie-i a ni e," a han ti a. Luvie chuan, "Kan inhmu tawh," a lo ti vat a, a hmel pawh a hlim fahran lo. Barnes-a chuan "Kha thil kha ka hmuh zen zen loh a ni. Corb-a hmaa khatianga i ding kha," a'n ti zui a. "A nih tak chu," tih pahin Frank-a chuan Luvie chu a en a. Luvie-i biang chu a tai hlar mai. A kutbawr lian tak chuan a nghawngawrh hlai tak chu hmangin a thlan chu Barnes-a chuan hru pahin, "Luvie-i hian in inhmuh thu leh vaimim i mamawh thu min hrilh a," a han ti a.

Bu nghat chung hian Frank-a chuan, "Nimin maiah khan ka bawngrual leh sakawr te nen helai hmun hi kan lo thleng a. An cher hman tawh avangin hnim hnah mai lo deuh a chawm ka duh a," a ti a. "A nih tak chu. Hnim hnah bakah i duh ang chuan vaimim pawh i pe tur alawm. Ka vaimim phurh dawr atanga ka order hi kawng a bo a, i ranch-ah lo thlengin ka hmuhchhuah hmain i lo pe a ni mai alawm," Barnes-a chuan a ti ta daih a.

Frank-a chuan chupa chu a'n en vang vang a, a nui sak a. "Chutiang chu a ni thei ngawt dawn em ni? Chutiang anih dawn pawhin a man chu ka pe ngei tur che alawm," a lo ti a. Rang zet hian Luvie-i chuan, "Ka pa, fimkhur rawh. Corb-a hian a hrechhuak vek ang," a lo ti a. Barnes-a chuan a fanu lam hawiin "Nilo, a thiang zan alawm," a tih chuan Luvie-i chuan, "Ni lo, hepa leh Corb-a hi an inhmu thiamlo tawh lehnghal a, a hre em em ang," tiin a lo hnial a.

Frank-a chuan saddle vawnchhan dawm chung hian, "Miss Barnes, Corb-a chanchin kha min la hrilh zo lo niin a lang a. Tumah hretu tur dang an awm lo bawk a, a chanchin chu min han hrilh chhunzawm la," a lo ti a. Luvie-i chu a meng tâl tap mai. Mahse a chhan hmain a pa zawk chuan, "Kristian, a chanchin chu i la hriat zawm ngei tur a ni. He thil pakhat hi ka han hrilh ang che. Circle-R ho hi Corb-a khing ngam awm chhun an ni. Reservation chhunga awm dang zawng hian an khing ngam lo. A khing ngam lo zingah kei pawh ka tel ve. A chet dan hi i hriat angin Texas misual, outlaw te a khawm a, Kansas atangin whisky an tawlh ru a; helaiah hian sum siam nan an hmang a. Nangmah ang bawk hian mi dang te pawh an rawn lut a. A hnenah ram man an pe a, a niin whisky leiin Indian ho hnenah a pe a. Amah kal tlanga ram an lei loh lahin harsatna tawrh rualloh an chungah a thlen tir si thin a ni," a ti ta a.

"I chungah pawh chutiang chiah chuan a ti dawn," Luvie-i chuan a lo ti thuai a. Frank-a pawh chuan, "Chutiang anih dawn chuan Barnes, min tanpui loh a fuh zawk ang, vaimim tello pawhin kan khawsa thei mai ang," a ti ta a. Mahse Barnes-a chuan pawr fe hian, "Nilo, mi leh sa ka nei lova, Corb-a do thei pawh ka ni lo. Mahse amah do ngamtu hi puih ka chak em em a ni," tiin sakawr vuakna hruihrual chu lek chhuakin "Thil pek ka tum chu a la ngai reng e. Vaimim chu i mamawh dawn a ni lawm ni?" a rawn ti ta mauh a.

"Ka lawm khawp mai, ka mamawh e," tiin a lukhum a'n tawk zauh a. Engmah sawi zui lovin Barnes-a chuan a tawlai hnuktu sakawr te chu a vaw kal nghal a. Luvie-i mit meng pawh hmu lovin Barnes-a chuan a tlanpui nghal a. Luvie-i chuan a pa hnenah sawitur a nei a ni ngei ang, a pa lam chu hawiin a sawi ta bawrh bawrh a.

Tlai thim dawnah chuan Frank-a chu Darlington khaw te reuh teah lutin, kawtthler leh hotel hma leh kawt vela Indian lo awmte leh midang te chuan Frank-a chu thip fe fe in an lo thlir a. Restaurant kawtah chuan sakawr ti dingin, restaurant-ah chuan a lut a. Amah chauha dawhkan kilin chaw a ei nghal a. Restaurant nghaktu hnen atang chuan helai agency a hnathawktu pakhat, a hma kuma thi tawh fanu, Edith Fairing-i chanchin leh awmna te chu Frank-a chuan a hre thei ta. Chu nula chu restaurant awmna chhak lam kawtthler tawp lama in te reuh te ah a cheng a ni.

A hnu deuhah chuan chumi lam pan chuan Frank-a chu kalin chu in kawtah chuan sakawr atangin a chhuk ta a. A thim tawh em avangin khua a hmuh theih meuh tawh lo a, mahse chu in pan chuan Frank-a chu a kal zel a. Thutthleng atanga thoin tu'n emaw a rawn pan tih Frank-an a hriat chuan chu amah pantu chu hmeichhia a ni tih a hre nghal mai a. Nula sam dum hlap mai, ngaihno bei tak, mahse a mitmenga lungngai hmel pu hi a lo ni a. Frank-an tunge anih a han inhriattir hnu chuan nula chu a nui sak a, a thutna bula thu tur chuan a sawm ta nghal a.

Frank-a chuan "Nizanah mai khan Morg-a chanchin hi ka lo hria a," ban deuh chatin a han ti a. Nula chuan, "Lehkhain ka rawn hrilh tur che a ni a, mahse i awmna chin ka hre tlat lo a ni. Kar thum kaltaa thil thleng kha ani asin," a lo ti vat a.

"Min rawn hrilh pawh ni la Morg-a nunna kan la kir thei tawh chuang nang. Engpawhnise tu emaw chuan a tawrh ve chu a ngai a ni," Frank-a chuan a han ti a. Bung leh rang vat hian Edith-i chuan, "A tuar tur tumah an awm lo. Chu chu a makna lai tak pawh a ni," a lo ti vat a. Êng fahran lo karah Frank-a chuan Edith-i hmel ngui tak chu a'n en hram a. "I mi tanpuina beiseiin i hnenah ka lo kal a ni. He thil hi ngawih bo pui mai mai tur a ni lo. I hriat ang ang min hrilh ka beisei," a han ti a.

"Hrilh tur che engmah ka nei lo,"

"Tu emaw chuan a that chu a ni phawt a," tiin Frank-a chuan a nawr lui a.

Rang takin Edith-i chuan Frank-a lam hawiin tih tak hmel pu zet hian, "Chu chu ka ngaihdan chu a ni reng. Chhan hrang hrang hmangin tute emaw chuan an that thei ngei ang," a ti ta a. "Chung zinga a then tal chu han sawi la," tiin Frank-a chuan a nawr zui a.

"Reservation Cattle Company mi leh sa te pawh an ni thei. An ram pahnih inkarah i ram hi a tlazep tlat a. An ram venhimnan hung lo duh ta se i ram hi an neih ngei a ngai tlat," Edith-i chuan a ti ta a. Frank-a chu a bu nghat a, "Chu chu pakhat ni ta se, a dang leh chu eng te nge ni zel?" a lo ti thuai a.

Edith-i chuan, "Scott Corb-a hian amah kal tlanga Indian ho ram lei lo te hi chu hrehawm tinreng tawrh tir dan leh inchhir ram ram khawpa siam dan hi a thiam em em a ni," a ti a. Zawi sapin Frank-a chuan, "Anih tak chu," a lo tih chuan Edith-i bawk chuan, "He reservation chhungah hian Indian thalai, mingo ho thah chak ngawih ngawih za rual an awm bawk. Chungho chuan midangte pawh indo turin an fuihpawrh reng a. Mahse Indian ho lal putar pakhat hian a bengdai hram hram zawk a," a tizui zel a.

"Indian za rual bakah tute nge la ni thei ang?" Frank-a chuan a lo ti vat a. Edith-i chuan, "Frank, he ram chhungah hian khawthlang rama wanted chanve dawn hi an biru a, nawhalh bawm khat hlawh tur lek pawhin mi an that duhin ka ring," a tih chuan Edith-i chu a in hnit hlap hlap a. A rawmawlin a inhru a, a sai der der bawk a. Frank-a chuan nula, chuti taka lungngai leh khawngaihthlak a hmuh chuan hnem a duh a, mahse a hnem thei si lo.

Rang takin Edith-i chu a tho a, Frank-a pawh a ding ve thuai a. Edith-i chuan, "Frank, chulai chanchin sawi chu harsa ka ti kher mai. Khawngaihin min kalsan mai teh," a rawn ti a. Frank-a pawh chuan, "Naktuk lamah ka lo kal leh zawk ange," a ti ve ta a. Mahse Edith-i chuan, "Chulam pawh a nilo Frank, he ram hi chhuahsan la a tha zawkin ka hria. He ram atang hian chhuak rawh. I thil tum hi bansan rawh. Nang pawh hi an that ngei ngei ang che," a ti ta zel a.

A chhan hmain Edith-i chu a inher hmak a, thim zingah inchhung chu a pan ta a.Frank-a chu a ding vang vang a, a thinurna chu a sosangin a insehruh teuh a. A hnu deuhah chuan a sakawr dahna chu panin a chuang a, garrison lam panin a kal leh ta a. A hawina lam apiangah hlauhna leh inrikrapna leh beidawnna a hmu. Khawchhung a luh atanga tun thlengin beiseina engmah a hmuh loh bakah a tana hlauhawm thleng thei lam hlir thu a la dawng char char a ni. Morg-a thih thuah pawh engmah hriat belh a la nei chuang lo. Lui chu kanin a hriat duh hre thei tur chuan kawng khat chiah a awm niin a hria. Chu chu sipai lam biak pawh a ni. Garrison hotel-ah riakin a tuk zinga sipai hotupa panin Morg-a thih dan hriat belh tumin engkim zawh a tum ta a ni.

Garrison-ah chuan lutin building pakhat chu kal pelin tawlai dahkhawmna hmun chu a va thleng a. Ran chaw pekna hmuna khawnvar chhit engah chuan chulai hmun chu a ruak huai tih a va hmu a. Tawlai dahkhawmna building pahnih pawh chu a ruakin, chu hmun ruak chu khawnvar engin a thlen phak loh avangin a thim hle a ni. Thim zingah chuan sakawr dahna in panin a kal zel a. Kalkawng sir, sakawr thlunna sirah chuan zan reia helaia kalte tan khawnvar a hranin an chhit chu a hmu a. Corral-ah sakawr a dah hnu chuan a lo kir leh a. Sakawr in atanga a rawn chhuah a tawlai dahna lai a thlen chuan engemaw danglam awmin a hre ta tlat. Helai hmuna khawnvar in chhi kha a lo awm ta tlat lo a ni.

Frank-a chu a ding chawt a, a insehruh a. A sir tawn tawna tawlai dahna hmun ruak chu a thim hle a. Kawtthlera eng awmna thleng tur chuan heng wagon dahna hmun thim lai pal tlang hi a ngai a ni. A buai rilru hle a, engtia tih tur nge tih a ngaihtuah a. Helai sakawr in enkawltu hian a thawm hrelo in khawnvar hi a lo timit a ni thei angem?

Chutihlai vel tak chuan pawnlam gate bulah mi pakhat hi a rawn kal ve chiah a. Thiam lemlo takin a rawn faifuk rât rât a.

Frank-a chu thim zingah chuan kalin pen sawmpahnih vel a pen chiah chuan wagon dahna thim zing atang leh a hnunglam atang chuan "Kristian," tia koh thawm a hre ta. A ding chawt a, a kotu lam a hawi hma chiah chuan gate lama mi lo kal pawh chu a ding chawt a. A kotu kohna pawh chu a chhan hmain kil lehlam atang chuan mi pakhat hian, "Khai le," a rawn ti thawt a.

A kotu hmalam atang khan silai a rawn puak ta thawr a. Silaimu chuan ran in pinna bang chu a rawn fuh a. Silai phawi chhuakin thinur in seh bap bap chung chuan Frank-a chuan aw lo chhuah hnu hnunna lam chu a pan ta a. Wagon dahna in chhung thim zing atang chuan Frank-a lam hawia kap tu silai chu a de zawk zawk a. Frank-a chuan chu lam hawi chuan a silai chu a hmet puak ve nghal a. A hnu hretah chuan amah rawn kaptu, sakawr chunga chuang chu thinrimin a ang chhuak nawk nawk a. Compound chhunga biru ve pakhat chuan Frank-a lam hawiin a rawn kap bawk a. Chutihlai chuan gate ami khan, "Kristian, khalai thim zingah khan inthiarfihlim rawh," a rawn ti ta a.

Compound sir lehlama awm chuan gate lam hawi chuan silai a hmet puak mawlh mawlh a. Chutihlai chuan a thim zual lai, bang bul chuhin Frank-a pawh a insawn phei a, piah deuh taka sakawra chuangin a sakawr thunun tuma a bei lai thawm chu ngaithla in chulam hawi chuan Frank-a chuan a kap a. Mahse chupa chuan a rawn chhang let ta lo. Chu veleh lehlam thim zinga awm pawh insasengin sakawr chungah a chuang a, a thianpa tlanna lam hawi chuan a sakawr chu a tlan tir ve ta a.

Frank-an thawm awmna lam kah a tum lai tak chuan gate ami chuan rang zetin chumi te lam hawi chuan silai vawi hnih a hmet puak a, sakawr chu a hram thawt a, a tlu ta a. A chunga chuang pawh chu leiah a invawrh let tawp tawp a. A sakawr tlu hnunglamah chuan tawlhpheiin, a thianpa chuan "Mi â pa, hnunglam kawngah khan tawlh bo ta che," a rawn ti a. Thei leh theilo in a thim lam leh a thianpa awmna lam nia a hriatah chuan chupa chu ke in a tlan a. Frank-a chuan chumi te thawm a reh thleng chuan a han kap zui a.

A hnu lawkah chu lam pan chuan kawtthler atangin mi an rawn tlankhawm a. Chutihlai chuan gate lam atang chuan mi pakhat hi a rawn lang hlawl a, "Kristiana i ni em?" a rawn ti a.

" Ni e,"

"Engmah lo sawi ve suh. Keiman ka lo chhang ang," a rawn tih chuan Frank-a chuan chupa awmna lam chu a pan nghal a. Mipui pungkhawm hmachhawn tur chuan an inbuatsaih ta. Khawnvar an rawn chhit en ve leh sipai uniform dumpawl inbel, Captain hian hma a rawn hruai a. Frank-a leh gate bula mikhual, sakawr thi bula ding ve lam chu an rawn pan a. Thupe aw zet hian, "Hetah hian eng thil nge thleng a?" tiin a rawn zawt a.

Frank-a chuan ngawi rengin a bula ding lam chu a en mai a. Chupa chu tlangval la naupan hmel tak, hmuihmai pawh met fai lem lo, sam sen ther thawr, thawmhnaw tha fahran lo inbel a ni a. A hmelah chuan zam hmel reng a pu lo a, hlim hmel lam a pu zawk a. Luhlul hmel leh inti thunei tak hmaah pawh chuan hlauhna reng nei hian a lang lo. Sa tha lam, Frank-a aia hniam hret, a thawmhnaw inbel leh a vun rawng atang chuan nisen sa hnuaia khawsa thang tih hriat tak a ni. Captain chu pa te lam deuh, chapo leh hawi sang vah mai a ni a. Frank-a bul ami a hmuh veleh chuan a ding chawt a, "Oh, nangmah i ni leh pek maw?" a han ti a. Samsena pawh chuan, "Ni e," a lo ti mai a.

"Helai inkahna kha engtiziaa lo awm nge ni ngai a?"

Chu zawhna chu chhang mai lovin Samsena chuan mipui pungkhawm te chu a lo nghak hret a. Sakawr thal reng lam chu kawkin, "Ka sakawr lam turin helaiah hian ka lo kal a, helai gate ka thleng fel tih veleh silai a rawn puak ta dawt dawt mai a ni. Mi pahnihin min thah tumin min rawn kap a, hepa hian min lo tanpui a ni," tih pah chuan Frank-a lam hawiin a han bu nghat a, "Hepa hi sakawr dahna in atangin a lo chhuak a, ka lamah rawn tangin kan um bo thei ta a ni," a ti zui a.

Meng sen rama Frank-a lam hawi pah chuan Captain chuan, "Tunge i nih a?" a han ti a. Frank-a chuan a hming a hrilh mai a. Samsena thurawn hre rengin engmah dang a sawi lo. Captain chu a rum hak a, sakawr let reng lam chu a pan nghal a. Sakawr thi chu a'n en chiang a, saddle hlui tawh tak a lo inbel a, a han bihchian deuh chuan Circle R tih chhinchhiahna inziak chu a hmu ta a. "Circle R," tiin a han tawng chhuak hak a, Frank-a chuan Samsena chu a melh kawk a, mahse ani chuan a lu a lo thing a.

Captain pawh chuan Samsena lam chu a rawn pan a, "Kar hmasa khan warning ka pe tawh che a ni tiraw?" a han ti a. Samsena chu a bu nghat a, "Ka la hre reng asin, harsatna i tawh te kha ka siamchhuah chu anih hauh loh kha," a lo ti thuai a. Rum fe in a han melh a, Captain chuan, "Shibe, nangmah hi buaina i ni ringawt. I kalna apiangah buaina a awm zel. Reno khua atang hian inthiarfihlim ve rih teh. Chutih chhung chuan thâwk te pawh kan lo la ve ang!" a ti zui a.

"Chu, thupek em ni leh ta?" pawr chhap hian a lo ti a. Captain chuan, "Headquarter thuchhuak anih chu. He hmunah hian kan kham khat che a ni ber. I hmel hetah kan hmu leh anih ngai chuan kan man che anga, hrengah kan tan tir ang che. Chutah Kansas-ah i chungchang thurel turin kan thawn ngei ang che," a ti zui hmiah a. A inher hmak a, pungkhawm ho karah chuan kalin midang ho pawh chuan Shibe-a leh Frank-a chu an en hrek hrek a. Khawnvar pawh chu kawnglaiah dahin an tin darh ta a.

Frank-a chuan Shibe-a lam chu muangchangin a hawi a. "Ka lawm hle mai, khang mite khan nangmah niloin keimah ngei min rawn kah an tum anih kha," a han ti a. Shibe-a pawh chu a bu nghat a. A then sak a, "Nangmah beih tum an ni tih ka hriat avangin ka rawn zui reng che alawm," a lo ti a. "Tuten emaw min beih dan an ruahman tihna a ni maw?" tia a zawh chuan Shibe-a chuan, "Circle R hote nena in inhmachhawn dan leh Corb-a i tih dan zawng zawng kha miten an hre vek tawh. Morg Wheelon-a khan i tih ang chiahin a ti a, a thi ta mai reng a," a lo ti thuai a.

Frank-a chu a meng kâwk a, "Morg-a chu i hria tihna a ni maw?" a ti vat a. "A damlai hmu hnuhnung ber ka ni ngei ang," tia then sak chung chuan Shibe-a chuan, "Tute emaw chuan khang kha an theihnghilh hauh lo ang. Mahse ka hriat ang hriat hi an ngam lo. Chuvang chu a ni Captain Arthur-a pawh khan buaina siamtu anga min ngaih nachhan kha. Anni ho hian tum thum ngawt min hmeh mih tumin min bei tawh," a ti ta a.

"Engmah sawilo tura min tih chhan kha enge ni?"

Nui sak chungin Shibe-a chuan, "Helai ramah hian sipai ho chiah hi dan leh thupek keng kawh tur awmchhun an nih avang hian kei hi min ngai theilo hle a. Engmah tak tak ka chungah an ti thei hrih lo. Nang erawh chu heng ho laka i inthiarfihlim rei poh leh hetah hian i cheng rei dawn tih i hriat a ngai a ni," a ti a. Frank-a chuan chiang zetin Shibe-a chu a melh a, sakawr lam melh leh zauh pahin "Sakawr saw Circle R ho ta a ni," a tih rualin Shibe-a chuan, "Awmzia a awm lo. Ruk te pawh a ni thei," a lo ti mai a.

"Khang mite kha tute nge annih i hria em?" tia zawh pahin amah zir niawm taka chiang zeta en chung chuan Frank-a chuan, "Shibe, thawhna fumfe tak te hi i nei em?" tiin a zawt a. Shibe-a chuan, "Rin ngam tur thawhna a awm chuan ka hniallo," a lo ti a. Frank-a chuan beidawn hmel tak hian, "A nuihzatthlak ang reng khawp mai. He hmun ka rawn thlen atangin zawhna ka zawh reng reng chhan a ni lo. Chutihlaiin tute emaw chuan min thah an lo tum mek bawk. Tunah erawh chuan ka tih tur chu ka hre ta. Theihtawp chhuahin ka bei ang. Zawhna erawh ka nei tawhlo anga, tu emaw chu seh tumin ka bitum tawh dawn. Eng nge i ngaih ve dan le? Puih tlakah min ngai em?" tiin a zawt ta a.

Shibe-a chuan,"Morg Wheelon-a ang chiahin maw. Thawhpui tlakah min ngaih a thu a ni mai," a lo tih chuan Frank-a chuan chibai bûk turin a kut a pe a, "Kan thawk dûn dawn tihna a nih chu. Red, tun a tang chuan ka hnena thawk i ni ta," a ti a. Red Shibe-a chuan a kuttang hraw tak chu hmer chungin, "Hming tha lo tak ka pu tih i hria alawm, "a lo ti a.Frank-a erawh chuan, "Ka lakah i hming a chhe hauh lo," tih pah hian, "Ka tih tur ka tih zawh meuh hi chuan ka hming pawh hi a chhe ngawt ang," a ti a. Na taka inhmerin innel tak leh hlim takin an inchibai ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2018, 9:43 pm

WAR ON THE CIMMARON
Bung - 3

An buka an bungraw phurtu tawlai lam pan chuan zankhuain Shibe-a nen chuan an kal ta a. Kawngtluanin Red Shibe-a thuhrilh chu Frank-a chuan a ngaithla a. Midang sawi nen a danglam chuang vaklo a, thu ngai a ngaithla nawn a ni deuh berin a hria. A bul intanna lam erawh a hriat belh deuh. Morg-a nen khan lo inhmelhriatin a lo tanpui a. Helaia in a saknaah pawh a lo pui tawh a. Morg-a khan hna pawh a lo pe fel tawh a. Mahse Red-a hian bawngrual leh enkawltute nen Texas atangin helai hmun an rawn pan dawn tih a hriat avangin a hna pek chu a lo pawm duhlo a, an lo thlen hunah Frank-a nen la inbe chhunzawm tura thu an dah laiin Morg-a hi thah a lo ni ta tih te a hrilh zel a. Morg-a an thah rual rualin helai ramah hian Circle R ho an lut ta nghal a ni.

Red-a thusawi chu ngun takin a ngaithla a; engmah a sawilo na in Frank-a tum tiruhtu a ni chho zel a. Engmah sawilo a Red-a thusawi ngaithla chunga zanlai pelh thleng an kal hnu chuan tawlai awmna lam pan chuan an sakawr chu an kaltir zel a. Zan a rei tawh avangin an meichhem pawh a lo rem vek tawh. Frank-an camp lam a pan dawn, thui pawh a kal hma chuan camp atang chuan, "In awmnaah khan ding nghal rawh u," tih thupek an dawng ta.

"Frank-a ka ni e," a tih veleh chuan camp ami chuan "Anih tak chu, Frank," tiin Beach Freeman-a chuan mei te chu a tinung ta nghal a. Mei a chhem en hnu chuan Frank-a leh Red-a te chuan camp chu an pan ta nghal a. Camp-a awm ho pawh chu rawn harhin Otey Fleer-a chu a rawn tho a. Mei engah chuan Otey-a bul tawlai vel te chu Frank-a chuan a'n thlir kual a, chhangphut te, ei tur an neih ang ang te leh thleng te, bungbel te chu a lo darh pheng phung mai a. Puan kang rim nam rum rum karah a naute ho chu a kang bang kawmawl inzawnin phaitual hnim chungah an lo mu tih a hmu ta a.

Otey-a hnenah chuan, "Engtizia nge ni ngai a?" tiin a zawt ta a. Dam thlap hian Otey-a chuan, "I thenawm ten min rawn tlawh a ni," tih pahin Red Shibe-a chu ringhlel tih hriat takin a han en a. "He mi hi tunge ni a?" tiin a zawt a. Mahse Frank-a chuan, "Sawi zel teh. Circe R ho chuan ti hian an suasam ta a maw?" a lo ti vat a. Otey-a chuan Frank-a lam hawi vat chung chuan, "Chu chu a ni deuh mai. Khawthim hnu khan sawm atanga sawm panga vel helaiah hian an lo kal a. Engkim rawn chingfel tura insawi an ni. Silaiin min tin a, an tihchhiat theih apiang an tichhia in kan kawmawl te an hal hnuah an lo kir leh hma ngeia he an ram atanga inthiarchhuak ngei turin min hrilh a ni," a ti ta a.

Frank-a nauteho chuan an pu chu an en thap mai a. Lo duty mek Beach Freeman-a chu a naupang ber a ni a. Joe Vanderman-a, an cook pawh chuan Frank-a chu beidawng tak hian a lo thlir a. Mitch-a te, Henry te leh Samse-a te chuan an pu chu lainat tih hriat takin an thlir a. Zahthlak takin an aia chak zawkin helaiah an lo sawisa a, chhuak nghal turin an lo ti bawk a. Frank-a chuan thutlukna a siam ta thuai a. Heti tak hian reilote chhungin miin an bawr buai a, ani pawhin Milabel-a chungah tih vat tur neiin a inhre ta. "Samse, sakawrte kha han kai la," tiin Otey-a hnenah chuan, "Silaimu bawm an khawih em?" tiin a zawt vat a.

"Khawih lo,"

"Chuti anih chuan," tiin a hote chu a enkual dan dan a. Frank-a chuan, "Ka sawi tawh ang khan sawlai inah sawn ka insuan lut dawn a, buaina pawh a chhuak ngei dawn ani. In zingah buaina hmachhawn duhlo in awm anih chuan tun hi inthiarfihlimna hun a ni e," a han ti a. A'n ngawi hlek a, chutah Beach Freeman-a chuan, "Frank, paruk lek kan ni si a, sawmhnih lai annih thu an sawi ka hria asin," a lo ti a. Frank-a chuan, "Paruk niloin pasarih kan ni," tih pah chuan Red-a kha an lamah a tang tih a la hrilh lo tih a hrechhuak a, a sawi nghal a. Tumahin chibai an buk lo a, an ngaihsak zui miah lo bawk.

An ngawih tak thiap avang chuan Frank-a chuan, "Tawng chhuak ta che u," tiin, "Nang Beach, inthiarfihlim i duh em?" a han ti a. Beach-a chuan, "Midangin an duh loh chuan duh bik nâ'ng. Midangin an tawrh theih chu ka tuar ve thei," a lo ti hmak a. "Chuti anih chuan silaimu bawm kha hawng nghal rawh u. Kan che nghal dawn ani," tiin thu a pe ta a.

Khawvar hma darkar hnih vel a la awm tihah chua lui hnar lam panin an chhuak ta a. An hâl bâng bungrua leh mutbu te phurin kal thei tawk tawk an tawlai pawh chu an hnuk ve ta zel a. Khua a eng tan tihah chuan Red Shibe-a chuan Morg-a in hnung oak thing ngaw karah chuan tanhmun midangte chu a siam sak a. Chung oak thing thenkhat chu Morg-a in hnung lawk thlengin an ding a. Cook chu tawlai awmnaah hnung deuhah rifle nen an hnutchhiah a. Khawvar tur chu an nghak ta a ni.

Corral leh in inkar hung deuh thingbuk bula biru Frank-a chuan khawvar tirh chuan ngun takin corral leh inchhung a khawsak dan chu a thlithlai reng a. Choka-a meikhuchhuahnaah meikhu a rawn chhuak tan a, in chhungah khawnvar a rawn inchhi ta bawk a. Khua a var fel chuan inchhung lamah thawm a rawn awm tan a, khawnvar pawh an timit ta. A hnu lawkah an zinga pakhat chu thingpui te a in zawh chuan meizial pet khu vang vang chungin in atanga chhuakin corral lamah a kal a. Saddle te a bel hnu in sakawr te kai chhuakin an tlatna hmun bikah chuan a kalpui nghal a. A hnung rawn zuiin pahnih te, pathum tea inkawpin in atang chuan an rawn chhuak a, hnathawk turin an inbuatsaih a, corral-ah chuan kalin an sakawrte an lam hlawm a.

A pakuana in in atanga chhuak a a thiante a zawm dawn lai chuan Frank-a chuan Red-a, thingbuk hnuaia bawk chu a han thlek a. Red-a pawh chu a lo bu nghat a. Frank-a chuan a rifle chu lek chhuakin ke a kala a thiante pan mek ke artui bul chu a han kap a. Zing khaw thiang reh zet kara rifle han puak chu a ring kher mai. Ngawah chuan a khawk rum rum mai a.

Chupa chu a vir zawk a, silai rikna ngaw lam enin a kâ hau mai a. Beach Freeman-a, piah deuha awm pawh chuan corral lam hawi chuan silai a hmet puak ve ta bawk a. Corral bul hnaia awm chu va fuh chiah lo mah se a teuh viau ni tur a ni, a tlanchhe rang kher mai. Red-a leh Samse-a ten an lo kap ve bawk a. Mi pakhat chu a han au that that a, chutah mi pali lai chu corral kawngkaah chuan an rawn dak a. Mahse an bul lawk lawkah silaimu a vung ther ther avangin an tlum leh ta vat a.

A hnu reiloteah chuan an rawn chhanglet ve ta. Frank-a beisei ang takin riflle a rawn chhang let loin pistol an rawn hmang hlauh mai. Frank-a chu hnunglamah a tawlh let a, tlema hel kual hlekin thingbuk chhahna laiah kalin in chhak lawka thingbul chu a pan ta a. Cook chu hmuh theihin a awmlo a. Midang silai ri atang chuan anmahni chhanglettu te chu corral-ah leh sakawr chawpekna lamah an tawm ngei a ring bawk. Frank-a chuan a'n ngaithla vang vang a, choka lam atang chuan silai hmeh puah thawm a awm lo. Hmun ruak laiah tlan pheiin bawkkhup chungin thawm a ngaithla a. Pistol a lek chhuak bawk a. Choka chhungah chuan thawm a rawn awm a, cook ni ngei turah Frank-a chuan a ngai a. Vawilehkhatah chokaah chuan a zuanglut a, tumah an lo awm lo. Dimtea dingdihlip pheiin kawngkhar atang chuan cowboy ho mutna pindan a va thlir a, cook chu hnunglam bang bulah dingin hnunglam tukverh inhawng bulah amah lang thei silo in a lo ding a.

Feet sawm vela hla, pawnlam atanga Frank-a nau ten an hmuh phak loh turah Milabel-a chu rifle pu in a lo ding a. Pawnlam ngaw hnuaia Red Shibe-a bawkvak, ngaw hnuailam pan mek chu Frank-a chuan a hmu thei a. Frank-a chuan rang takin pistol a hmet puak a, chu veleh cook in tukverh a hawn chu a inkhar nghal a. Milabel-a rifle pawh chu a puak nghal thuai a. Milabel-a leh cook chu rang takin an inher a, Frank-a puakruk barrel-in chiang taka a tin kaw hmawr chu an hmu ta nghal a. Dam thlapin Milabel-a hnenah chuan, "I silai kha dahthla nghal rawh," tiin thu a pe a.

A makti hmel leh insehruh dan atang chuan Milabel-a hian a rifle thlauh pahin a hmeh puah duh mai a ring hial a. Mahse engmah ti lovin a rifle chu chhuatah a thlauh thla ta a. Muangchangin a lu chungah a kut pahnih chu a phar chho ta bawk a. "Kristian, he hmun atang hian i tlanbo thei chuanglo ang. Naktukah hian he in hi tun hnuah pawh tumahin a awmna chin an hriatloh tur khawpin ka ti boral dawn," a han ti a. Frank-a erawh chuan, "I nuai bo hauh lo ang. I hnar bak kha eng dang mah i nuaibo dawn lo," tih pahin cook lam chu hawiin, "Nang kha, kawngkaah khan meikhupin chhuak la, corral lamah sakawr zawngin tlanchhuak rawh," a han ti a. Cook chuan hlau em emin a heh a pet a, "Min lo kap anga sin," a han ti a.

"Pawnlam atang emaw, helai atang emaw hi chuan kah i ni tho tho ang," Frank-a chuan a lo ti hmiah a. Bang hrulah kut lukhum chungin cook chuan Milabel-a mitmei beisei chungin kawngka lam chu a pan a. Ngaw atanga an rawn kah mai erawh a beisei vak lo. Frank-a chuan a ke artui bulah chuan a han kap a. Hlau phelengin au chul chungin pawnah chuan a tlanchhuak ta a. A hoten amah an lo kah Frank-a hian a ringlo a, tih thaih nan, corral thlenga a tlanchhiat theih nan erawh an lo kah zui chu a ring.

Frank-a chuan Milabel-a silai chu laksakin pawnah a theh chhuak a. Engmah sawi lovin, bang hrulah dingin Milabel-a chu a en ran a. Pawnlama inkahna ri bengchheng tak hnuaiah Milabel-a chuan thinrim zet hian, "Enge i la nghah a? Min kap la, i tih tur chu ti vat rawh," a lo ti a. Frank-a chu a thensak a, "Rei nghah chu a ngai lovang," a ti mai a.

Choka lama pen thawm chu a ngaithla a, Red Shibe-a chu kawngkaah chuan a rawn lang hlawl a. Amah pawh en chuanglo chuan Frank-a chuan a pistol chu Red-a lamah chuan a vawrh phei a, a lo dawng chat a. Frank-a chuan a lukhum a phawk a, dawhkanah chuan a dah a; dam thlap hian, "Milabel, hman zanah khan chhanletna hun ka neih hmain kut min thlak mai kha a ni a," a han tih chuan Milabel-a chuan a kut chu muangchangin a la thla a, "A lo ni maw? Mahse sawisa ta che ila ka hnunglamah hian min kap ngei ang le," a lo ti a.

"Min hneh anih ngat chuan keimah leh keimah ka inkap hlum hmiah ang," Frank-a chuan a lo ti thuai a. An inkara dawhkan lianpui chu sir zawngin a nam sawn nghal a. An inkar feet sawm panga dawn chu a ruak ta huai mai. Frank-a chuan, "I pute bula i zualko dan tur te ka ngaihtuah a, i pute ho chunga ka tih tur ang takin i chungah tunah hian ka che dawn. I lu lian taka beng te kha la thla in i hnarah khan ka hnawh dawn! Milabel, i chungah hian chutiang chuan tunah ka ti nghal dawn a ni," a ti ta a.

Milabel-a pawh chuan a lukhum chu phawkin pindan kila theh phei pahin Frank-a chu a pan a, a zuan phei ta a. A tum dan chuan tuboha chhut ang zeta na in Frank-a dul nema zuan pah a va hnek a tum a ni. Va fuh chiah se chu bawng lâ pawh nise a tlu tawp ang tih tura na anih laiin a fuh lo hlauh. Frank-a chuan lo bum zauhin, a dul nemah chuan na tawkin a lo dawm a. A nghawngah kuahin a rem lai laiah a hnek zawt zawt a. Milabel-a tal chhuak rawn inher chu a darin na tawkin a khabeah a dawm chho a, Milabel-a ha chu a inseh ri bup a. Chutia a dah lai tak chuan na tawkin Frank-a chuan a hmaiah a beng zui a, Milabel-a chu a thu hnawk mai a, Frank-a chuan a la duhtawk lo kher mai.

"Milabel, tho rawh. Ka duh tawk ka la ngah hauh lo," a tih lai chuan Milabel-a chu rum tuah tuah chungin a rawn tho a. Frank-a chu ngeiawm zeta nui chungin a lo hnungtawlh a. Milabel-a hi Frank-a aiin inchi chanve in a sang a, pound 40 zetin a rit zawk bawk a. A tawpah chuan hnehtu chan a chan ngei Milabel-a hian a inring tlat. Milabel-a chuan phar huang chungin a va bawh a, Frank-a chuan a kutbawr chu lo dang tleuin a hmaiah chuan tum hnih ngawt a lo tlir a. An thiam thil theihnghilha inpawmchilhin a rem lai apiangah an inhnek ta mial mial a. Hah thaw huam huam kara na tawka inhnek ri chawrh chawrh bak hriattur a awm lo.

Frank-a chuan Milabel-a hmai bawr chu a tum ber a ni. Milabel-a lahin a veng ngun viau bawk silo. Na tawkin, a khat tawkin a biangah a ri chawrh chawrh a. A hmai a vung a, a hmui a kak a. Nakin deuhah phei chuan a mit vun chunglam kak atang chuan thisen nasa tak a lo chhuak a, a khaw hmuh pawh a chiang ta lo. Khaw hmu fiahlo chunga a hnungtawlh lai chuan a thin a rim em em a. Mahse engmah a hmuhchian miau loh avang chuan chet atan a harsa a. Chutihlai chuan sakeiin a sa seh a zuan ang mai hian Frank-a chuan a rawn zuan a. Chiang zet zet leh na zet zetin a hmaiah a hnek ta siah siah a. A khabeah na tawkin a'n dawm chhoh leh takah chuan Milabel-a chu zangthalin a tlu a, a lum tawp tawp a. Thei leh theiloa a rawn thawh leh chuan a bula thutthleng chu a khinghnihin a rawn lek chhuak a.

Frank-a chuan en pawh en tha chuang loin, "Red, han tum chhin rawh se," a lo ti a. Hmui kak thi hnuang chung chuan Milabel-a chuan a thil ken chuan a rawn vawm a. A rih deuh avang leh a vawm nat em avang chuan Frank-a chuan lo man mah se hnunglamah a tlukpui ta a. Rang takin a tlu lai nanchin tumin Milabel-a chuan a va tum a, in chu a nghing der der mai. Mahse Frank-a chu a lo lumsawn vat a, a tum fuh lo. Frank-a chu a tho vat a, na tawk hian a han hnek leh ta a. A tlu leh ta. Harsa tak chunga rawn thoin a inven hman hma chuan Frank-a chuan a'n hnek leh a, a tlu leh ta.

Milabel-a chu a inthing harh a, a rawn ding chhuak leh a. Frank-a chuan a hmai bawrah a hnek mial mial a, a tawpah phei chuan a lu chuan engmah a hre mang lo a, a mitmeng pawhin khua a hmu mumal ta lo. Chu veleh a tlu tur chu Frank-a chuan dawm dingin, "Red, min han pui teh," a ti a, an pahnih chuan a zakah an la a. Meng sen rum chung chuan Frank-a chuan, "Red, pawnah sawn theh chhuak rawh," a han ti a. Red-a chuan, "A tawk viau tawh a ni lawm ni?" tia a zawh chuan Frank-a chuan, "Red, a tawp ka thleng dawn. I tel ve peih lo anih chuan kalsawn nghal rawh," a lo ti hmiah a.

Red-a chuan Milabel-a kawnghrenah chuan dawmin an pahnih chuan kawngka atang chuan lei charah an thehchhuak a. A rum thawt a, vawi hnih a let a, che leh tur a awm ta lo. A kawnga a kut hniha dawm chungin Frank-a chuan, "Ka naute ho kha ko chhuak rawh," tiin Red-a chu thu a pe a. Tukverh atang chuan midangho chu au in, kap tawh lo turin a hrilh a, silai ri pawh a reh nghal a. Frank-a chu sumhmuna pen chhuakin corral lam hawi chuan, "Nangniho kha, lo chhuak ula,in pu hi va senghawi rawh u," tiin thu a han pe leh a.

An reh vang vang hnu chuan cook leh mi pakhat hi an rawn inlan ta a. Corral atang chuan a hnu deuhah pakhat hi a rawn chhuak ve leh a. Ngaw hnuai lam en chuan an han ding vang vang a, mahse silai a rik tak loh avang chuan cook leh mi pakhat chuan an pu mutna lam chu an rawn pan a. Frank-a chu an rawn melh a. Frank-a chuan, "He hmun atang hian kalbo pui rawh u. In sakawrte pawh hruai bo vek rawh u. Circle R mi leh sa he laia hmel rawn inlan leh in awm chuan kan sawisak dan tur che u chu in hriat tawh hi," tiin a hrilh ta a. An zinga Texas tlangval bâl zet chuan, "Kan lo kir leh ngei ang," a han ti ve talh a.

Rit ti takin, a hnuhin Milabel-a chu an pahnih chuan an hnuk a. Corral lamah tual zawla pheikhawk hnu lang ruakin thei leh theiloin an hnuk phei a. Muangchangin Frank-a naute ho chu inah chuan an rawn lut a. Milabel-a naute ho kal tura inbuatsaih chu an thlir a. Thawktuho hnungah chuan cook khan tawlaiin Milabel-a chu a rawn phur a. Khawthlang lam panin Milabel-a nauteho chu lunghnur zetin, Frank-a nauteho silai tin reng karah chuan an chhuak ta a ni.

An liam fel ta tihah chuan Red Shibe-a chuan Frank-a chu enin, a hnuah Otey-a chu a en leh a. Otey-a chuan lu a lo thing mai a. Frank-a erawh chuan, "Khai le, Joe, tawlai kha rawn khalh lut la, bungrua te kha rawn dah rawh ule. In kan thleng ta alawm," a ti ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 13th, 2018, 9:43 pm

WAR ON THE CIMMARON
Bung - 4

A tukah chuan Circle R ho chuan phuba chu an rawn la mai lo. Frank-a chuan Samse-a hruaiin an sakawr tla darhho chu an khawm a. Red-a leh Otey-a hnenah in chhuahsan loa lo awm tlat tura hrilhin midangho chu ngaw chhung leh lui kamah te mit lena hmelmate lo thlithlai turin an hrilh bawk a. Otey-a chuan Red Shibe-a chu ringhlelin, a bulah pawh awm duhlo in tawlai lamah chuan a chhuk a, siam that ngai laite a siamtha a. A chhelai a siam that lai chuan nimin lam thil thleng hlir kha a ngaihtuah a. Nimin lamah khan mi sawm, thinrim tak tak ten helai hmun hi an chhuahsan a. Tunah heng thil thleng an hriat huna sawmhnih rual thinrim chet dan tur chu a suangtuah a.

Lui mawng lam chu enin a ngaihtuahna tihbo tumin a lu a thing nawk nawk a. Mi rothap te chet dan a hmuh in Frank-a hi a ngaisang a ni. Mahse mite chetdanah hi chuan a lungngai thin. A ngaihtuahna tihbo nan tia tawlai hnuailam zâ te a la rinawmin a la hmantlak em tia a bih lai chuan kawngka bula pheikhawk rawn lang chu a va hmu ta a. A rawn din chhuah chuan amah ena lo ding reng Red Shibe-a chu a hmu ta nghal a.

Ngawi renga rei tawk an in en hnu chuan Otey-a mitmeng atang chuan a thinurin a ringhlel tih a lang reng mai. Red-a chuan, "Thianpa, nang leh keia inkarah damdawi kan zawn a hun ta e," a han ti a. Otey-a chuan, "Eng damdawi maw?" a tih chuan Red-a chuan, "Heta khawsa turin ka lo kal a, kan pu hi ka ngaisang hle a ni. Ka ringsual anih loh chuan nang pawh hian i ngaisang niin ka hria," a han ti a. Otey-a chuan, "Ani hi ka ngaisang a; kawppui tur a rawn thlan erawh ka ngaina hran lo," a ti hmak mai a. Red-a chuan kawngka biang ngheng chung hian, "Kei pawh," a lo ti ve hmak a. Chiang bangin an in en ran a. Otey-a chuan hul hak hian, "Mister, helai hi ka chhuahsan dawn hauh lo," a han ti a. Red-a pawh chuan, "Kei pawh," a ti ve hmak mai a.

Otey-a thinur chuan chil a chhak pharh pharh a, Red-a hmachhawn tur chuan tawlai chu a hel kual a. Nelawm lo tak hian, "Ka upa ta deuh a, mahse bawng chanchin hi ka hriain ka enkawl thiam a ni. Mihring zia pawh ka hriain Pathian zarah ka enkawl thei bawk. Frank-a hmalam hun ka thlir hian tumahin an duh theih ka ring lo. A hmalam kalkawnga a tawn turah hian nang hian mawh nasa tak i phurin ka hria," a ti ta a. "Phur bik nang," Red-a chuan a lo ti leh hmak a.

"A ze pakhat hi chu a ni ngei a, mahse khua atanga a lo haw khan mize mak tak a rawn hawn tlat a ni," Otey-an a tih chuan Red-a chuan, "Tlanchhia se i duh tihna a ni maw?" a lo ti a.

"Midang pawh thlamuanga an awm theih chuan kei ni pawhin kan thei ve tur a ni,"

"Ram leina man Scott Corb-a hnena pek chuan awm thei e. Chu chu tha i ti em ni?"

"Ti teh reng mai,"

"Anih khawi atangin nge ram leina pawisa chu kan hmuh anga, Corb-a kan pek ang?"

"Kan bawng thenkhat hi kan hralh mai ang. Kum hnih hnuah chuan ngai kan awh leh mai dawn," tiin ring deuh zawk hian, "Tluangtea bawng kan vulh theih ahnu chuan ram leina pawisa chu tu pawhin dawng se eng nge a pawina?" a ti zui a. "Chu bakah i tan eng nge a pawina chuang?" a han ti zui a.

"Frank-a tan hian hna ka thawk a,"

"Tiang chiah chuan midang pawh an thawk a, mahse chung ho hnenah chuan anin thu a pe a, annin tih tur an hrilhin thu an pe ve ngai lo," a tih chuan Red-a hmel chu thinurin a dur khap khap a. A thlan a rawn bawl tiam tiam a. Ding kak chungin pawr zet hian, "A buaithlak lai zawk chu in tawng anga in nung ngam lo hi a ni ber mai, nangni ang vel hi chu," a ti ta a.

Otey-a pawh chuan, "A buaithlak lai zawka chu nangni sam sen satliah ho hian intihbuai bak kawng dang awma in hre tlat lo hi a ni. Hei pawh in sam rawng ang lek rilru in neih vang hi a ni," a ti ve ta hmiah a. Ngawi rengin rei tawk an in en kal a. A tawpah chuan Red-a chuan, "Han nuai zawk mai tur nge i nih, engmahloa ngaih che a, palzut mai mai tur che tih pawh ka hre hrep lo a che," a han ti a. "A eng zawk zawk pawh chu tih han tum chhin teh reng la," a tih chuan buaina thelh tawk chiahin sakawr ke pen thawm an hre ta. Beach Freeman-a a lo ni a, an hmaah chuan rawn dingin, "Min tlawhtu tur an awm ania," a rawn ti ta hlauh a.

Red-a biaa rawn sawi anih laiin Red-a chu a ngawi mai a. Otey-a hi foreman anih vang a ni. Otey-a chuan, "Pakhat mai maw?" a lo ti a. "Ni e, Circle R tawlaiah a rawn chuang. Mipa a niin suit nalh tak a rawn inbel a. Khawthlanglam atanga lo kal a ni," Beach-a chuan a ti a. "Anih tak chu," tiin Otey-a chuan "I hmunah kal lehnghal rawh," a ti zui a.

Red Shibe-a chu in lamah a kal a, Frank-a thurawn zawmin Otey-a pawhin Red-a chu a zui nghal a. Inbe miahloin feet sawm dawna inhlatin an thu a. Chutihlai chuan tawlaia chuang chuan in chu rawn thlengin an hmaah chuan tawlai chu a dintir ta a. Beach-an suit nalh tak ha a tih chu a dik ngei mai. Mahse a hmel lan dan leh a hmuihmul zuah dan leh a mitmeng nelawmloh danah cowboy satliah anih loh zia a lang nghal mai a. Step zawna sakawr tih din pah chuan Otey-a leh Red-a te chu chiang zetin a'n en a, "Khawiah nge Kristiana hi?" tiin a zawt a.

Otey-a chuan, "A kal chhuak," a lo ti hmak a.

"Engtikah nge a lo kir ang?"

"A rei lo vang,"

"Ka lo nghak ang," tih pah chuan tawlai atang chuan a chhuk a. Sumhmun lam pan ta lo chuan lui lam thlir pah hian a ipte a zen a, sikret a phawrh a. Otey-a leh Red-a ten an en zui reng tih hrelo ang maiin a ngaihsak reng reng lo. Red-a chu a then sak a. Abe Puckett-a, Reservation Cattle Company General Manager a ni tih a lo hre sa a. Hnunglam bang nghengin sikret a tan a, hmuhnawm lo thleng tur chu a lo nghak ta a.

Minute sawmhnih dawnah chuan Frank-a leh Samse-a te chuan lui kanin sakawr engemaw zat an rawn khalh haw a. Red-a chuan corral gate te lo hawngin an sakawr rawn khalh haw chu a lo dawng sawng a. Sakawr tlatna hmun bikah chuan a khalh lut a. Frank-an tawlai a thlir vang vang lai chuan Red-a chuan, "Mi pakhatin a be duh che a," a rawn ti a. Frank-a chu sakawr atanga chhukin sakawr chu corral lamah a nam phei a. Red-a hnenah chuan, "Lo kal ve la," tiin a sawm a.

Frank-a hmel lan danah ni dang zawng aiin a nelawm loh a. A mitmeng te, a hmui hmai vung deuh leh duk deuh te leh a kutbawr sil them thum te avang chuan a hlim vak lo. Lui lam atanga a rawn chho chu an lo thlir thap a. A tawlai bula a rawn thlen chuan an inleng pa chuan, "Kristian, kei hi Puckett-a, Reservation Cattle Company General Manager ka ni," a han ti tawp a.

Frank-a chu a bu nghat a, a sawi leh tur chu a la ngaichang a. "Nimin lamah hetah hian ka naute ho nen buaina in nei tih ka lo hria a," a tih leh chuan Frank-a chuan, "Buaina a ni hran lo, sipai ho chuan khatiang kha retreat an ti zawk," a lo ti a. Puckett-a chuan, "Tunah helai hmun hi i luah chu a ni a, ka mite lakah hian hum theih i inring em ni?" tiin a zawt a.

"Engah nge ka hum theih loh ang?"

"I phu tawk chiaha kut an rawn thlakna hi engin nge dala i hriat?"

"Puckett, ka mi leh sa te hi he inah hian an riaklo a, ngaw hnuaiah hian kan khawsa mai a. Min rawn barakhaih tur chuan in beih fet chu a ngai ang,"

"I bawngrualte pawh him tawkah i ngai tihna a ni maw?"

Frank-a chuan, "Him tawk e, an tla darh nasa a, chungho man khawm tur chuan in beih fe a ngai bawk ang. Chu chu ka dang thei zan ang," a ti leh hmiah a. Puckett-a chuan a sikret zuk lai chu a'n en vang vang a, chutah Frank-a chu rum tawka melh chung hian, "A dik maithei, mahse bawng vulh chung hian min la do theih i inring amaw?" tia a zawh chuan Frank-a chuan, "Ka do theihlohna chhan tur min han hrilh teh," a lo ti hmiah a.

Puckett-a hmel chu a dur deuh kaih kaih a, "Kristian, thusawipui i har hrep mai. Awmze neiin thu i chhak chhuak duh hauh lo," tia then sak chung hian, "Thurawn pakhat ka han pe ang che. Suma lei che ka duh. Lo la ngawi la, ka'n sawi zel ange. Kan dinhmun hi i hria. Helai ram hi kan ram chhaklam nena suihzawm kan tum hma hretin Morg Wheelon kha a rawn lang hlawl mai a. Mahse helai ram hi kan mamawh a ni. Hung kan tum pawhin ani khan min dal tlat a. Mahse kan hmelma te laka kan humhim theih nan kan ram hi hung a ngai si. Chuvang chuan, duhthlan tur tha tak ka rawn ken che a ni," a han ti a.

"Han sawi la,"

"I duh anih chuan he ram atan hian sum ka pe ang che. Chutianga sum ngainat vanga helaia awm hi i nih chu ka ring hauh lo. Chuvangin, hetiang hian duhthlan tur ka siam a ni. He i ram tiat chiah, a that lam pawh thuhmun hi Indian ho ram atang hian kan lei sak che anga, i in ang chiah hi kan sa bawk ang. Chu chu Cheyenne-Arapaho reservation chhungah tho hian a ni ang," a han ti a.

Otey-a chuan a ke a rawn per tak a, rang takin, "Frank, pawm vat teh. Pawm nghal mai teh," a rawn ti chhuak a. Otey-a chu en pawh en lo hian Frank-a chuan, "Ka pawm lo," a ti fel hmiah a. Puckett-a chuan, "Engvangin maw? A fair viau a ni lawm ni?" a lo ti a. Frank-a chuan bu nghat nghat chung hian, "A fair khawp mai. Morg-a hi i that lo tih hrechiangin, helai hmun ka rawn thlen tirh khan hetiang duhthlan tur hi min siamsak ni la chuan ka pawm thlap ang," a ti ta a.

"Engvangin nge tunah hian i pawm mai loh ang?"

Frank-a chu meng kal ralh ralh chung hian, "Puckett, a chhan ka han hrilh ang che. I thil tih dan leh kalpui dan hi ka duh lo. I hnathawktute pawh hi ka duh lo. I foreman hi ka duhlo in i sukthlek hrim hrim hi ka duh lo. Morg-a thih dan pawh hi ka duh lo. Thiltithei takin i inlantir a ni maithei, mahse chu chuan min ti hlau eih lo. Reservation ram zawng zawng hi min pe in sum dollar sang tam tak pawh min pe la, helai hmun hi ka chhuahsan dawn lo. Ka sawp hrep thei kherlo ang che. Mahse i mi tih dan avang hian hrehawm takin ka siam dawn che a, inchhir taka ka siam che bakah Morg-a thattu hi ka zawng chhuak dawn bawk," a ti ta hmiah a.

Thinur zetin Puckett-a chuan a sikret zuk lai chu leiah a paih a, "Anih a hnu, indo i duh anih chuan i duh ang chu i hmu mawlh ang," a ti a, a tawlaiah chuan a chuang nghal a. Sakawr vuakna hruihrual lek chung chuan Puckett-a chuan, "Kristian, sir khatah Corb-a i bei a, lehlamah kei mi beih i tum mek bawk a. Buhher khawl chet dan hi i hria alawm, mangtha le," a ti a, a

kal ta nghal a.

Otey-a chuan a thlir liam vang vang a, chutah ngei deuh niawm taka Frank-a en chungin, "I tawn tur chu tunah i tawng ta ngei ang le," a han ti a. Frank-a pawh a insum zo ta bik lo a, "Otey, i duh hun hunah i chhuak thei a, i hlawh pawh ka pe nghal ang che," a ti ta hmak a. Otey-a chuan, "Frank, kal se min duh em ni a?" tiin a zawt a. Frank-a chuan, "Chulam a ni lo. I duhthlanna zawk a ni," a tih chuan Otey-a chuan rum nghat chung hian, "Ka kal lo ang. A chhan erawh ka hre lo. Kan zingah tuemaw tal awmze neia remruattu awm se ka duh a. Kei hi chuan chutiang chu ka thiam lo a ni," tiin Red-a lam chu ngei tih hriattak hian a'n melh a. Inchhungah a lut ta a. Red-a chu corral lamah a kal a, Frank-a chuan a zui nghal a. Kawng chanve vel atang chuan lui mawng lam chu a'n thlir a, luidung atanga anmahni lam rawn pan sakawr chungchuang a hmu ta a. A ding chat a, engtiziaa Joe-a hian khutianga mi rawn inkal pelhtir chu ni ang maw tiin a ngaihtuah a. A rawn kal hnaih chuan chu mi chu mipa ni loin hmeichhia a ni tih a hre ta a. Luvie Barnes-i lo niin, mipa thawmhnaw a inbel a lo ni a. Lukhum parh hlai tak hi a rawn khum bawk a.

Corral bula a din veleh Frank-a chuan, "Chibai le," tiin, "I thu hahchawl hman ang chu maw?" a lo ti thuai a. Hlim hmel pu takin Luvie-i chuan, "Hman e, in tur te pawh ka mamawh ang," a ti a, in lam panin an kal dun a. Eng teh vak mah sawiloin khawlum thu te an sawi mai mai a. Luvie-i thut hnu chuan Frank-a chuan in tur te a rawn laksak a.

A in zawh chuan Luvie chuan lawmthu te a sawi a. "A hunloah ka lo kal niin ka hria a, a dik em?" tiin bul a tan a. Frank-a chuan, "Engvangin maw?" a lo ti thuai a. "Engemaw tak hi i âtchilh a, i mitmengah a lang reng a ni. Nimin atang tawh khan engemaw âtchilh nei tlatin i lang. Hetiang reng hi emni i nih a?" tiin a zawt a. Frank-a chuan thensak pah hian, "Helai hmun ka rawn thlen atang hian ka boruak tawn hi a rit em a ni. Ka hmun hmaa khawsa misualho chhir chhuah a ngai a. Tukin zingah pawh khan an hotupa lo kalin min rawn vau vak a," a han ti a.

"Puckett-a maw?"

"Ni e,"

Luvie chuan chiang zawkin Frank-a chu a en ran a. "Anih tak chu, ka lo kal chhan hi ka sawi vat a tha ang. I thinur belhchhahtu atan pawh a that viau ka ring," a han ti a. Frank-a chuan engmah sawiloin a en ran a. Luvie-i chuan, "Ka pa hi Indian ho lakah a duai ngai loa, mahse nimin khan Indian ho lakah a tlawm ta tlat mai. Chuvang chuan i hnenah vaimim pawh a rawn ti thleng thei ta lo a ni," a han ti a.

"Anih tak chu mawle," tiin pawi a tihna chu thup tum lemloin Frank-a chu a tawngchhuak a. Luvie-i chuan a pa chhan tum tak hian, "Chutia tih liam ngawt chi a ni lo. A chhan ka han sawifiah ange," a ti a. "Sawi kher a tul hleinem," Frank-an a tih chuan "Ka sawi duh alawm," Luvie-i chuan, "Nimin piaha lui kama kan tih din che kha i la hre reng ang chu maw?" a tih chuan Frank-a chuan a lu a bu nghat a. "Kha kha a lo atthlak ta viau a ni. Tuten emaw min lo hmu a ni ngei ang," a'n ti zui a.

Frank-a chuan la thutak lutuk lo hian, "Eng nge a pawina tur chu?" a lo ti a. Luvie-i erawh chuan, "Chu chu lo ngaihtuah chhuak ve mai rawh. Niminah khan ka pa bawngrual khalhtute chu Reno atanga chhim lam mel sawmhnih velah Cheyenne thahnem takin an lo ti ding a, bawng chhiahah tiin bawng sawmthum ngawt an lo thing a ni," a han ti a.

Frank-a chuan meng phawk deuh chung hian, "Ka bawng khalh thin lai pawh khan min thing thin a, ka pe mai a, tha takin ka kal leh mai thin. An ram paltlang laia an hnim, ranin a ei manah ka ngai mai thin," a ti ét a. Mahse Luvie-i chuan, "Bawng sawmthum ngawt chu i pe anga maw?" tiin a lo hnial a. Frank-a chuan lu thing pahin, "Ni em em lo ve, mahse i sawi tum chu ka hrethiam hauh lo," a han tih chuan Luvie-i chuan, "Lui kamah khan ka pa in i hnenah thu a sawi a. Khami tlaiah khan kan camp-a dah turin nidang aia tamin vaimim a order a. Zanah chuan kan naute zinga pakhatin heta rawn dah tur hian a phur ta ngei a. Hmel hriatloh mi thenkhatin an lo dang a, an rawn hnar kir ta ngawt a. A tukah Cheyenne Indian hoin kan bawng vengtu hnenah bawngsa thahnem tak pe turin an lo ti bawk a. Hei hi kan chunga a thlen vawikhatna a ni. Ka pa hi sipai leh Indian ho bawngsa supply tu anih avangin hetiang ti lo hian khawiah pawh awlsam takin a tlang mai thin," tih pah hian thutthleng hnunglam chu a han ngheng a. "I hrethiam tawh mai em? Invauna leh hriattirna chiang tak anih chu," a han ti zui a.

"Chutianga ti tu chu Corb-a a ni ang chu maw?"

Luvie-i chu a bu nghat nghat a, enge maw han phuhchhuah a tum zet a, mahse a insum leh ta zawk a. Ding chung hian, "Anih hlawm tak chu. Thu muang ve deuh la, ei tur te pawh ka'n siam ang che chu," Frank-an a tih chuan Luvie-i chuan zawi sap hian, "Frank, ka pa hi dawihzep i ti ani maw?" tiin a rawn zawt ta a. "Chu thu chu ka sawi hauh lo a," a lo ti thuai a. Thinur tih hriat sen teuh chung hian Luvie-i chuan, "Dawihzep ti hmel i pu tlat. Mikhual, engmah hrelo tan chuan min dem mai thei rêng a. Mahse kan damkhawchhuahna tur kawng kan zawn a ngai tlat," a ti ta zel a. Frank-a chuan hnial buai duh loin, "A dik chiah alawm," a lo ti a.

"Chuti anih chuan khatiang khan min en suh," Luvie chuan a ti ta hmak a. Makti taka en chung chuan Frank-a chuan, "Engti angin maw?" a han ti a. Luvie chuan, "Nimina ran chaw leina hmuna ka biak lai chea min en ang te, ka pa nena in inbiak laia min en ang te leh tuna min en ang khan. Nuihsawh nih hi ka duh reng reng lo," a ti ta bawrh bawrh a.

Frank-a chuan, "Ka nuihsawh awzawng lo che," tiin, "Mahse nuihsawh tur nia inngaihna rilru i neih zawk avangin chutiang tur chuan min hmu mai mai zawk a ni ang," a han tih chuan Luvie chu a ding phat mai a. Meng sen ram chung leh ke per tan tan chung hian, "Engvang berin maw?" a han ti a. Frank-a chuan, "Ka hre nang. Nangmah zawk hian ka nuihsawh chein i hre tlat zawk a," a lo ti a. "Nang hian min nuihsawh chiang. Ka pa pawh hi dawihzep i ti. I ti ani lawm ni?" tiin a zawt a.
Tunlai hun tawitea thinurna tur hlirin a bawh mek laia chuti taka rawn ankhum anih takah chuan Frank-a pawh a insum zo ta meuh lo a. "Ka hrilh dawt mai ang che. Min ti nasa bawrh bawrh khawp mai. I pa hi dawihzep ti chuan ka ko hauh lo. Amaherawhchu ka pawm zam mai mai loh hi i pa erawh chuan a pawmzam thei," a ti ve ta a. Luvie-i chuan, "Mi rinawm tak zawng i lo nih hi," a ti leh hram a. Frank-a chuan, "Eng kawngin maw? Thutiamah maw? Ka lawm e. Ka lawm khawp a, i duh ang takin lawmthu ka hrilh a che. Ran chaw vaimim min pek in tiam kha ka tan thil hlu tak a ni a, tak tak emaw ka lo ti hman hial tawh a," a ti ve ta hmiah a.

Luvie-i chu thinur zetin a ding khawng at a, a thaw ham ham mai a. "Frank Kristian, helai hmun atang hian i tlanbo thuai ka beisei. I chhuak ngei tur pawh a ni. Ka pa hi sumdawng mi tha tak a niin mi zawng zawng a rem thei vek. Mahse tun mai atang khan atthlak takin, a ngaihtuahna fim leh tha ang lo takin a....." a tihlai mekin Frank-a chuan, "Nangma ngaihdan zawk tihna em ni a?" tiin a lo zawt a. Luvie chuan ke per at chungin, "Ka sawi zo phawt ang. Thil atthlak tak a ti a, tunah hian a tanpui theih loh che avangin mi dawihzep ni ah i ngai leh nghal a. Tumahin mi â an tanpui duhlo tih chu kan hmu mai dawn alawm. He reservation chhung ami zawng zawng hian atthlak taka huaisen awm taka tawng hi kan duh lo. A chhan pawh kan tawng anga kan khawchhuah theih loh vang a ni. Nang pawh hi i tawng i umphak dawn hauh lo," a ti ta bawrh bawrh a.

Frank-a chu kalpelin ding leh khawng zetin Luvie chu a sakawr dinna lam panin a kal ta a. Frank-a chuan a thlir zui vang vang a.A thlir liam hnu chuan Frank-a chuan in lam chu a'n hawi a, kawngkaa Otey-a ding, amah thiamloh chantir tih hriat taka lo entu chu a han hmu a. Luvie-i khan tawngka chauha huaisen, mahni tawng pawh umpha lo, 'Texas' kareh zau, amah pawhin a huat em em ni khan a hmu tihna a ni a. Luvie-i hian at huai leh mi huaisen, rilru nei hi a thliar hrang thiamlo a ni phawt ang.

Frank-a chuan tawlai dahna hmuna Red-a ding chu a va hmu a. Chu wagon ke pahnih chu a lo thlawn a. Luvie-i hmuh dan chu hre rengin Red-a awmna lam chu a pan ta a. Frank-a chuan, "Red, Scott Corb-a tlatna ram hi i hria ang chu maw?" tiin a han zawt a. Phawk deuh tak hian Red-a chuan amah rawn en chung hian, "Hria e, engvanga min zawt ta nge i nih?" a lo ti a.

"Zanin hian amah hmuh ka duh a. Lo kal ve te i duh mial em?"

"Engah nge ka duh loh lem ang,"

Frank-a chuan lui mawng lam chu a thlir thla a, Luvie-i pawh a kal liam tep a.

Luvie-i thusawi ngei kha chham chhuakin Frank-a chuan, "Tumahin mi â tanpui an duh lo' tih hi ngaihtuah tham tak a ni," a tih chuan Red-a ve thung chuan, "Min han chhin teh phawt la," a lo ti hmiah a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 14th, 2018, 7:14 pm

WAR ON THE CIMMARON
Bung - 5

Zanriah eikham chuan Frank-a leh Red-a te chu thim hnuaiah corral-ah chuan kalin sakawr saddle an bel mawlh mawlh a. An peih tep tihah Otey-a pawh chu an bulah chuan a lo kal a. Otey-a chuan Red-a hnenah chuan, "Nang hi, kalsawn teh, Frank-a biak ka duh," a rawn ti a. Frank-a chu a lo bu nghat a, Red-a pawh chu a kalsawn a. Frank-a bulah chuan kal hnaiin Otey-a chuan, "Frank, buaina siam turin i chhuak dawn tihna a ni ang chu maw?" a rawn ti a.

Frank-a chuan a sakawr hmui tuai pah hian, "Ka sawi maithei lo a," a lo ti a. "Kha hmeichhe thusawi kha a dik chiah a ni, Frank. Thudik a hrilh che anih kha. Mahse i thu hriatte hian a ti â tlat che a. He samsena thu hi i ngaithla a, intihbuaina lam lo chu sawi tur a nei lo. Chân tur engmah a neihloh laiin nang chuan i nei. Chutiang chung chuan i kal talh dawn em ni?" a ti ta a.

"Otey, he hna chawlhsan hi i duh em ni?"

"Kei chuan duh nang. I thachhang dawltu ka nih avangin min um chhuak theilo ang. Kuang nena in lam pana an zawn haw che thlengin i bulah hian ka awm dawn. Chu chuan thil awmzia a hriattir ang che," tiin a rum hak a. Inherin inchhung lam a pansan ta nghal a. Kal pah chuan, "Kha samsena khan a that maithei bawk che," a ti zui a.

Frank-a chuan engmah sawiloin sakawrah chuangin Red-a lo nghahna lam chu a pan a. Otey-a thusawi kha a ngaihtuah zui vang vang a. Otey-an Red-a a thikna chu thukhat ni se, a thusawi chuan awmzia chu a nei a ni. Luvie Barnes-i thu rawn sawi khan tun dinhmun hi a rawn thai lang a. Red Shibe-a lah eng dang teh vak ngaihtuah lo, "Ti ang," a tih apiang hnialloa zawm ngawt mai a ni tlat. Red-a pawh chuan Otey-a sawi tur awm ngaihtuahin, "Frank, kan kir leh mai zawk dawn em ni ang?" a lo ti a.

Frank-a erawh chuan, "Teuh lo mai," a ti chhum hmak a, "I duh chuan kir leh rawh. Nge min zui dawn? Kawng tinrenga nawr nih hi ka kham ta khawp mai," a ti zui a.

Red-a chuan Scott Corb-a awmna lam chu a kawhhmuh a, kawngtluanin Corb-a khawsak velna ram hmelhmang chu a hrilh a. Corb-a hi helaiah hian bawng vulh tura lo kal a ni. Chumi hma pawh chuan Indian ho nena insumdawn tawn tawh thin a ni. Helaiah a chen rei tawh em avangin in tha tak, mahnia khawsakna tawk pawh a din tawh. A hming pawh a thang angreng hle. Mahse hun rei tawh tak atang khan bawng vulh leh hralha sum siam bansanin, whisky tawlhluha sum siam chu a hlawk zawk tih a hria a. A ruka tawlh luh a, hmun biru leh hmuh mai lohna a thuhruk a, tute emaw thurualpui chu tha hle dawnah a ngai a ni. Amah takin zu hi tu hnenah mah a hralh lo a, a agent ten an tiral thin. Sipaiho leh agency a thawkte pawhin Corb-a thil tih dan hi an ringhlel a, mahse a fiahna engmah an hmu thei lo. Indian tu pawh, rui leh harhfim, zu hmuh theihna hria anga lang chu nasa taka sawisak leh an chenna hal darh sak te bakah an neih zawng zawng chhuhsak te an ni thin. Corb-a hian Indian ho nen inzawmna an neih that em avangin a pawnga takin Corb-a hi an khawih ngam lo. Indian ho a thuhnuaia awm an tam avangin sipai ho lakah an hel mai ang tih an hlau tlat. Corb-a thiltihtheihna a san em avangin a sumdawnna pawh mite ngaihsan a ni lo thei lo. Chutihlaia amah han khing thei deuh bera lang chu Reservation Cattle Company a ni a. He company hian mi chhawr sawmthum zet an neih avangin Corb-a tan chuan hnawksak tak an ni. Hemite lo hi chuan Corb-a hnenah chhiah te pawh an pe vek a ni ber.

A thu ngaihthlak chuan Frank-a pawh a ti harh sawt mai. Tunah chuan a thil tih tum Red-a hrilh pawh a duh ta lo. A hriat chuan zanina a tih tur ti lo turin Red-a hian a dan a hlau ta tlat. A thiltum thulhtir hi tunah zawng Frank-a hian a duh hauh lo.

"Zawhna pakhat chiah," tiin Frank-a chuan Red-a hnenah "Corb-a hian sakawr thahnem tak a nei ngei ang chu maw?" a han ti a. "A vulh teuh mai," tih pahin Frank-a chu a en a. Mahse engmah dang a sawi duh chuang lo. An kal zel a, hmar lam pangah kalin luite pakhat an pelh chuan hmun rem deuh an va thleng a. Chuta tang chuan in atanga eng lo chhuak an hmu ta a. Red-a chuan, "Fimkhur deuha kal a ngai tawh ang," a han ti a.

Chu in atanga yard sawm sarih vela hla, nawhalh thing pahnih buk hnuaiah chuan dingin ngawi rengin in leh a chheh vel chu an zir a. Chu in chu chhawng hnih a lo ni a. A hnuai zawk pindan kil khat atang chuan eng a lo chhuak a. In piah lamah chuan ran chaw dahna in leh in dang a ding thluah a. Chu chuan khawchhak lama khawvar eng lo kal tur chu a hliah deuh lurh a ni. Mi pakhat hi kawngka bul lamah chuan lo kalin, lehhawi deuh chungin chupa chuan, "Scott, khatiang daw heh lutuk kha ring mah ta che," a han ti a. Nui hawk hawk chungin hmuh theih loh lamah chuan a kalbo ta a. A reh leh ta tlawk tlawk a.

"Red, hruizen keng khan lo kal teh," tiin Frank-a chuan in lam chu a pan ta a. Red-a pawh chuan a rawn zui a. In atanga yard sawm velah chuan dingin Frank-a chuan thawm a'n ngaithla leh vang vang a. In hnuai tukverhah chuan puanzar a awm loh avangin a chhung chu a hmuh theih a. Dawhkan te leh dawhkan pakhat kila lehkha lo deng te chu a va hmu thei a. Pakhat chu Corb-a a ni nghe nghe a. Thawm dim taka kalin Frank-a chu kawngkapuiah chuan a lut a. Tunah chuan lehkha den paha tawng ri pawh chiang zawkin a hre thei ta.

Frank-a chuan a colt .45 chu phawi chhuakin mi pahnih awmna lam chu tin chungin a pan ta a. Engmah sawiloin bang sir lama kawngkapui leh tukverh pahnih lam chu a thlir kual a. Lehkha denga an tawng mawlh mawlh lai chuan Corb-a chuan a ipte a zen a, nawhalh la chhuakin a sikret bung tawi tawh tak chu lakai turin nawhalh chu a nawt a. Sikret tan kai tura a mei a lek kan lai chuan piah lawka Frank-a ding chu a va hmu ta a. Makti takin a thlir reng a, a nawhalh alh pawh chu a keng reng a. A kut a kan tak hial avangin dawhkanah chuan a thlauh thla ta a. Card deng zinga pakhat chuan ben hlum pahin Corb-a chu a'n en a, chutah Corb-a enna lam a hawi chuan Frank-a chu a hmu ve ta chiah. A mal te te in Frank-a dinna lam chu an en a, lehkhadeng mi panga te thawm chu a reh ta thiap mai a ni.

Dam thlap hian Frank-a chuan "Dawhkanah khan in kutte kha nghat teh u," tiin an nghah hnu chuan, "Red, an silaite kha laksak teh," tiin thu a pe a. Red-an Frank-a a kal pelh lai chuan thip fe hian Corb-a chuan a lo melh a. Red-an an silai a laksak a, pawna a theh chhuah vek thleng chuan Corb-a chuan Frank-a chu a melh khai mai a. Corb-a chuan dawhtheihna tlachham tih hriat zet hian, "I thiltih awmzia hi ka hre hauh lo," a lo ti a.

"Corb, ka vaimim ka rawn lam a ni,"

"Vaimim a?"

"Reno khua atangin phurh tumin ka bei a. Mahse ka ram hi mi diklo hnen atangin ka lo lei a ni chek ang chu, ka ti thleng thei ta tlat lo a," dam thlap hian Frank-a chuan a ti a. "Barnes-an min pek a han tum zet a, mahse a rilru a thlak leh ta si a. Thenawmte hnen atangin ka puk mai ang tih rilru ka pu ta a ni. Sakawr i ngah bawk a, min tihsak theih mai ka ring a," a han ti zui a. Corb-a mi rawihte ho chuan Frank-a en ta lo chuan an pu, Corb-a chu an thlir ta thap a. Frank-a hnenah chuan, "La ta che," a ti mai a. Mahse Frank-a chuan, "Lak chu ka tum alawm. Mahse kei leh Shibe-a hian tawlai khalh kan thiam tlat lo," a lo tih chuan insehruh teuh chung hian Corb-a chuan, "Rob, kal la, tawlaiah a hnuktu tur sakawr va buatsaih nghal rawh," tiin a hote zinga pakhat chu thu a pe ta a.

A hote zinga pakhat chu a thutna atang chuan a tho tan chiah a, mahse vin zet hian Frank-a chuan, "Thu rawh," a lo ti tuar a. Chupa chu a thu leh ta a. Frank-a bawk chuan Corb-a en chung chuan, "He ramah hian vaimim i pe chhuak thin a, nangmah ngeiin tawlaiah chuan vaimim te chu mi hlansak a, ka chenna min thlensak ka beisei, Corb," a ti ta mauh mai a.

A sawi zo hman chiah tih ah khawimaw lai hnunglam kawngka chu a ri thuai a. Red-a hnenah chuan Frank-a chuan, "Va en fiah teh," a ti vat a. Ani chu kawngka sir bang bulah a phei vat a. Red-a pawh chu kawngka atanga dawhkan hliah theih tur laiah chuan a kal phei a. In chhunga mitin mai chuan Frank-a chezia chu an mitmei ran a. Tun hi chet hun a ni em? Chetna remchang melh leh ngaihtuahin rum fe in an vai chuan Frank-a chu an en ran mai a.

Pen ri chu an awmna lamah a rawn phei zel a, an zinga mi pakhat, Rob-a an tih chuan a ke chheh siam remin a thutna atanga thawh chu a tum a. Nuihzat tih hriat takin Frank-a chu a then sak a, chupa lam hawi ngei mai chuan pistol chuan a tin ta a. Rang takin, hmui sai dar dar chung chuan chupa chu a thu leh ta a. Lo kala chuan kawngka a rawn hnaih tawh hle tihah chuan vawilehkhatah Corb-a chuan, "Steve, fimkhur rawh," a ti ta tuar a.

Chutih rual rual chuan chupa chuan in chhunga thil awm dan ni awm chu a suangtuah thiam mai a. Hall kawngkaah chuan pawn lamah a zuang ta nghal a. Red-a pawh chuan tukverh darthlalang chu chhu pawpin pawnlamah a zuang chhuak ve nghal bawk a. Silai a puak nghal thawr a, chuveleh inchhunga mi ho pawh chu chet tumin an ding theuh a. Mahse kil khata Frank-a silai chuan a tin tlat avangin an che ngam chuang lo. Frank-a chuan thawm chu ngun takin a lo ngaithla reng a.

Silai rik rual rual chuan pawn lama zuang chhuak pa kha Hall-ah a rawn zuang lut leh a. Chupa kawr chu Hall-a a rawn zuanluh rual chuan a thler hrawk a. Frank-a pawh midang ho tin reng chungin bang hrulah kalin kawngka lam chu a pan hnai a. Chupa chu kawngkaah chuan rawn zuanglutin Frank-a awmna lam hawiin silai a hmet puak nghal a. A fuh teuh hle mai. Frank-a chuan a pistol kawmin chupa lu ah chuan a lo chhu a, chutihlai tak chu midang tan chetna hun remchang a ni ta. Frank-a hnaih bertu chuan a han zuan a, mahse Frank-a chu hnunglamah chuan a tawlh phei a. A kawr hma chu chupa chuan a rawn man thuak a. Corb-a pawh chu kawngka lamah chuan a zuang phei a, Frank-a chuan a kap zui a. Mahse a lu bulah a thawi thuak a. Inher vatin Frank-a chuan mi pakhat dul nemah chuan a pistolin a hawlh ta nawk nawk a. Vin that hian chhunglama mi ho hnenah chuan, "Thu rawh u," a han ti tuar a, amah rawn pantu chu a hmaiah Frank-a chuan na tawkin a lo beng a, hnunglam dawhkan delhin a tlu phei a, chhuatah a let thla tawp a.

A van vawr zawngin Frank-an silai a hmehpuah leh chuan tumah che chang ngam an awm ta lo. Chutah Corb-a zuanluhna pindan lam atang chuan thawm a rawn awm a. A hnu lawkah Corb-a chu hmui thi hnuang chung hian Red-a chuan a rawn nawr lut nawk nawk a. Bang hrul thutthlengah chuan a thuttir ta chawrh a. Red Shibe-a pawh kawngkaah chuan rawn dingin pistol khingkhatin a rawn keng a, a kut lehlam kut châng chu a thi sang bawk a. Red-an hnunglam kawngkhar a pan leh chiah tihah chuan chhuata tlu renga kha rawn tho chhuakin, thawh pah chuan chhuata pistol let reng chu a han chuh a. Mahse Frank-a chuan a kut leh silai chu a lo rap bet a. Frank-a chuan pistol chu chharin Corb-a hnenah chuan, "Corb, ding rawh," tiin thu a pe ta a.

Muangchangin Corb-a chu a rawn ding chhuak a. A mitmengah chuan huatna tinreng hi a rawn lang a. "Kristian, he ram atang hian ka um chhuak dawn che. I chenna in ka hal anga, ka um chhuak ang che. Chumi hnuah ka that ngei bawk ang che," a rawn ti a. Frank-a thung chuan, "Helaiah hian rawn pen chhuak teh," tiin thu a lo pe a. Frank-a lamah chuan a rawn ding a, Frank-a chuan, "Red, mi pakhat telloin midang ho hi phuar hlawm rawh," tiin a hrilh a. Red-a chuan pakhat chu Corb-a bulah chuan a nawr phei a, a dang zawng chu thutthlengah thuttirin, pahnih te te a hnunglam inhawi tawnin a phuar hlawm ta hlawm a.

Chutah Frank-a chuan Corb-a chu choka lamah a nawr phei a. Khawnvar a la a, ran chaw dahna in lamah chuan a khalh phei ta a. Red-a pawh chuan laltin la in, pakhat chu corral lamah chuan a zui phei bawk a. Laltin engah chuan Corb-a chuan vaimim chu bag-ah a thun mawlh mawlh a, Frank-a chuan silaiin a tin ran bawk a. A vaimim thun sa chu tawlaiah a hlang mawlh mawlh a.

A hnu deuhah chuan corral lam atang chuan Red-a chuan pakhat zawk chu rawn zui pheiin tawlai hnuk tur sakawr chu a rawn khalh phei tir a. Tawlai hnuk theia sakawrte an tih fel hnu chuan vaimim bag chungah Red-a leh Frank-a chu an lawn a. Corb-a leh a nau chu a seat-ah an thu ta a.

Red-an an sakawrte a um darh em tia a zawhna chhang a Red-a a buk nghat nghat hnu chuan Frank-a chuan tawlai chu khalh kal turin Corb-a te chu thu a pe ta a. In an kal pelh a, in atanga rifle a kah phak loh an thlen veleh Red-a chuan tawlai khalhtu chu tawlai atangin a nam thla a. Frank-a chuan a thutna chu a luah nghal a. Red-a pawh chu an sakawrte ngaihvenin chulaiah chuan a chhuk ve ta nghal a.

Corb-a thinrim lutuk chu a thaw ham ham a, engmah reng a sawi lo. Frank-a chuan, "I chet vel dan kha ka ngaisang khawp mai. Khatiang kha patling hnathawh dan tur chu a ni reng a ni," a han ti a. Corb-a chuan engtinmah a chhang lo. Red-a pawhin an sakawrte rawn hruaiin a rawn um pha a. Frank-a pawh ama sakawrah chuangin Corb-a tawlai khalh chu an chhawm a. An chenna in thlengin an zui lut ta a.

In an thlen chuan khua a var tawh a. Corb-a hnenah chuan Frank-a chuan, "Vaimimte kha tawlai atangin la thla vek rawh," tiin thu a pe a. A hote pawh an rawn tho tawh a. Ngawi rengin Corb-an vaimim bag a hlangthla lai chu an thlir reng a. Tumahin puih reng an tum lo. Corb-a chu a chakin a hah hle a. A thlante chu a luang zung zung a. Otey-an a hmuh chuan Frank-a chet dan chu ngaisanglo tih hriat takin Frank-a chu a en a. Beach Freeman-a chuan, "A chet zei dan atang hian hetiang hna hi a thawk fo tawh tihna a ni ngei ang," a lo ti lawng lawng a. Corb-a chuan ngei tih hriattakin Beach-a chu a en a, chhinchhiah pawh a tum tih a lang reng a. Red-a chuan Beach-a hnenah chuan, "I la thihpui ngei ang le," a lo ti sap a.

Corb-a chuan hrehawm pawh tih hmel lemloin a chhunzawm zel a. A lakthlak zawh hnu chuan Frank-a chuan, "Corb, eng zat man nge ni ang?" tiin a zawt a. Huatna tinrenga en chung chuan Corb-a chuan, "Duhsak thil hlan anih hi. Engtikah emaw chuan min la tihsak ve ngei ka ring," a ti hmiah a. Frank-a chuan pawisa a chhiar a, Corb-a chu a pe a. Mahse la lovin a en ringawt a. Frank-a chuan tawlai chhungah chuan a thehlut ta a. Rei tawk engmah sawiloin an in en ran a.

"Kristian, tumahin an la hrilh lo che a ni maithei, i thiltih rah hi chu i têl ngei ang. I pumpelh hauh lo ang," a han ti a. Mahse Frank-a chuan, "Nizanah khan min hrilh tawh kha. A ni lawm ni?" a lo ti a. Corb-a chuan sakawr thununna hruihrual chu la in tawlai chungah chuan a ding a. Chil chhak pharh pharh pahin Frank-a chu a'n melh a, "Kristian, thil pakhat tihsual i nei a ni," a han ti a.

"Enge ni ta a?"

"Silaiin min kap hlum ngei tur a ni. Min kap hlum lo hi engtik niah emaw chuan i la inchhir ngei ang," tih pahin na tawkin a sakawrte chu a han vua a. Sakawrte chu an zuang zawk zawk a. Beach Freeman-a pawh kawng kianin a phun nang nang a. Mahse Corb-a chuan melh pawh a melh duh lo. Sakawr chu tlantirin hmar lam a pan ta a. A thinur dan chu sawi mai theih pawh a ni lo.

A hnu lawkah chuan Otey-a chuan Frank-a chu enin vaimim bag chu a han chhiar a, "Heng hi enga tan nge i tih?" a han ti a. Frank-a chuan, "Khatia hnutchhiahah khan. Ran kan pek hmain khangho kha min bei turin an rawn kir ngei ang," a lo ti a. Otey-a chuan, "Chutiang anih tur hre reng siin engvanga hetiang thil hi ti nge maw i nih le?" tiin a thiltih dan chu tha ti lo tih hriat takin a zawt a. "Inbeng dai teh, Otey," Frank-a chuan a ti hmiah a.

An kal kian hnu chuan Red-a pawh corral hnungnaa a bân hlângin ngawi rengin a ding a. Frank-a chuan a va pan a. An ngawih deuh vang vang hnu chuan Frank-a chuan, "Red, i sawi duh chu han sawi la," a ti ta ngawt a. Red-a chuan, "I tih tur kha hre lawk ila chuan ka zui hauh lo ang che," a ti ta a. Frank-a mit chu a sen ram a, chiang tawkin an in en ran a. Red-a chuan, "Min thiamlo lutuk suh. I tih ang ti tur khan ka huaisen tawk lo tihna a ni," a han ti a. "Ni tlak rualin min rawn hal darh vekin ka ring," Frank-an a tih chuan, "I tih chhan ka ngaihtuahin ka hrethiam che. I hnung ka zui zel ang. I tum chu ti tlang ngei rawh," Red-a chuan a ti a. A thiltih hi Frank-a chuan Luvie-i demna chhannaah a ngai nghal a ni. Tunah chuan Frank-a hi a chet sawk sawk a ngai ta. An sakawrte chu zingkarah chaw an pe a. Red-a leh Otey-a te pawh chuan inbe hauhloin tawlai an siam tha mawlh mawlh a. Ei tur leh thil dangte tawlaiah chuan an hlangkai a. Engti kawngmahin mi pasarih lek hian helai in leh hmun hi an hum zo dawn lo. Darkar sawmhnih pali ral hmain Milabel-a pawl emaw, Corb-a hoten emaw an rawn bei ngei ngei dawn. Helai hmunah lo inveng theilo mah se mi pasarih ve lem chuan hmun hrang hrangah inzar pharhin hun enge maw chen chu an lo bei let thei ngei ang tih an inring.

Frank-a chuan Circle R ho kalsan rifle pathum pawm chhuakin in chu a chhuahsan a. Lui ral lehlam a'n en chuan luikuam thlanglam deuha sakawra chuang mi engemaw zatin an awmna lam rawn pan chu a hmu ta a. A'n thlir vang vang a, an uniform in an dan leh an chet vel dan atang chuan sipaiho an ni tih a hre thei ta a. Kir lehin a rifle ken te pawh chu tawlai bungraw karah chuan a thukru a. Chutihlai chuan Red-a chuan, "Inleng kan nei dawn ania," a rawn ti ta a.

Kawt zawla Lieutenant hoa lo kal sipaite chu an hotupa thupeka an din thlengin an lo nghak a. An zingah chuan Cheyenne Indian pakhat hi a rawn tel ve a. Indian Police ni ngei tur pawh a lo tel ve a ni. Halfbreed police chu sakawr atanga chhuk hmasa berin lieutenant chuan a rawn zawm ve a. Chu lieutenant chu la naupang tak, hmel hmuh nuam leh hlim hmel pu tak a ni. An zing atang chuan Frank-a chu rawn kal chhuakin an awmna lam chu a pan a. Otey-a leh Red-a te pawh chuan an rawn zui a.

"Ei tur zawng em ni in nih a?" tia a lo zawh chuan lieutenant chuan, "Frank Kristiana i ni em?" tiin a lo zawt let a. Feet ruk vela hlaa din pah chuan Frank-a chu a bu nghat a. Lieutenant chuan, "Chuti anih chuan ka man dawn tlat mai che," a ti ta a.

"Min man dawn maw? Engvang berin maw?"

"Whisky tawlh ruk vangin," halfbreed police chuan a lo ti vat a. Lieutenant chuan khawlum vang nge a lukhum chu a phawk a, a thlan a hru mawlh mawlh a. Frank-a mitmeng chu a en duh hauh lo. Frank-a chuan, "Zu ka nei hauh lo a, engtin nge ka tawlhruk theih ang?" a lo ti a.

Lieutenant chuan Cheyenne Indian, ngawi renga lo ding lam chu hawiin, Frank-a kawk chung chuan, "Hepa hi a ni em?" tiin a zawt ta a. Chu Indian pa chu a bu nghat a, thu a sawi zui nghal a. Lieutenant chuan halfbreed police chu tawng let turin a ti nghal a. Police chuan, "Hepa ngei hi a hnena zu hralhtu chu a ni' a ti anih hi, 'nimin chhunah khan whisky um nga ka hnenah a hralh a, Reno khuaah kan in a, kan rui hle a ni' a ti anih chu," a lo ti a. Rang zetin Frank-a chuan, "Dawt a sawi anih kha," a lo ti hmak a.

Lieutenant chu a rilru a buai tih a hmelah a lang reng a. "Khawiah nge whisky chu a lei?" tiin a zawt leh a. Indian pa chuan, "Ngaw chhungah. Chutah chuan a bawmin a la awm nghe nghe," a ti ta zel a. Lieutenant chuan, "A thusawi chu i hria maw?" tiin Frank-a chu a zawt a. Frank-a chuan, "A hnenah zu ka hralh lo a, a bawm pawh a awm na hek lo," thinur taka a tih chuan Lieutenant chuan, "Hepa hi nizanah namenloin a rui a. Thiante pawh a nei nghe nghe a. Darlington khuaa dawrte pawh an suasam a ni. Anmahni thunun kan tumna lamah kan that thelh nghe nghe a. Tichuan, he Indian pa hian a zu neihna min hrilh ta a ni. He thil hi sual lian tak anih i hria ang chu maw?" tiin a zawt ta a. Frank-a chuan, "Dawt a sawi a ni," a ti mauh a.

Lieutenant chuan, "Pawi i tih lem loh chuan zu awmna nia a sawiah chuan kal ta ila. A thusawi fiahna engemaw tal kan siamsak loh chuan," a han ti a. Police chuan Indian pa hnenah engemaw hi a han sawi a. Chu Indian pa chu a bu nghat a. A sakawr lam pan chuan a kal nghal a. Lieutenant chuan, "Kristian, sakawrah rawn chuang ve nghal la," a ti ta a.

An kallai chuan Frank-a chuan thil awmdan a ngaihtuah nasa mai a. Heti taka Indian pa in a sawi theih chuan Milabel-a mi chhawr tu'n emaw a ram chhungah hian zu a rawn thukru tihna a ni thei angem. Dawt ringawt behchhanin hetiang hian enfiah a ngam dawn si lo. Ngaw chhung ril deuh an kawng kawi dawn laiah chuan kawngthlang hnimbuk hnuai chu kawkin chu Indian pa chuan, "Khutah khuan a awm ang," a ti ta a.

Lieutenant chuan sakawr atanga chhuk pahin a hote chu thu a pe a, en nghal turin a hrilh a. Hnahthel ro hai kianga leivung thar deuh deuh an hai hnu chuan pakhat chuan zu dahna buara, bag khat chu a rawn phawrh ta hlawl mai a. Midangte pawhin pahnih dang an rawn phawrh leh a. Lieutenant chuan, "Zu chu a ni ngei maw?" a han ti a. Frank-a erawh chuan, "Ka ta a ni lo. Helai hmunah hian ni hnih lek kalta thleng khan Circle R ho an awm a ni," a han ti a.

Lieutenant chuan Cheyenne Indian pa chu tawnglettu kaltlangin a'n be leh phawt a. Chutah Frank-a hnenah chuan, "Kristian, i phatna hi thu tling niin a lang tlat lo. Nangmah ngei hi zu hralhtu chu niin a lang a, ka man dawn ta che a ni," a ti ta a. Frank-a chuan a sakawr pawt herin chiangtaka lo en rengtu Indian lamah a kaltir a. Commanche ho tawng, henglai vela sumdawn nana an hman ber chu hmangin, "Dawt sawi turin tu in nge sum pe che?" tiin a zawt ta a. Chu Indian chuan rang zetin Commanche tawng vek chuan, "Nangmah ngei hian ka hnenah i hralh anih kha," a lo ti hmiah a.

A kut hnunglam chu Indian pa kareh hup thakin na tawkin Frank-a chuan a beng a. A che rangin a na si a, Indian pa tan inrin hman ngaihna reng a awm lo. A sakawr sir lamah a uai thla hnawp a, in uai tang theiloin leiah chuan a tla thum tawk a. Lieutenant chuan a silai rawn kauin Frank-a bulah chuan a rawn ding vat a, thupe aw tak hian, "A tawk e. Harsatna siam lovin min zui mai rawh," a rawn ti a. Frank-a pawh chuan thinur tak chung chuan, "Aw le," a ti mai a. An hotupa chuan a hote hnenah chuan um hnih chu thubuai sawi huna an thu nemnghehnan laa, a dang zawng chu tikeh sawm vek turin thu a pe ta a. Chumi hnu chuan Frank-a in lam pan chuan an kal leh ta a.

An thlen veleh Red-a chu Frank-a bulah a lo kal a, Otey-a chuan a rawn zui bawk a. Red-a chuan, "Chanchin a tha vak nange?" a tih chuan Frank-a chuan, "Mi tu'n emaw ka ram chhung ngaw hnuaiah zu an dah a, ka chungah a tla ta a ni. Otey, eitur leh thil tul dangte kengin he in hi lo chhuahsan ang che u. Tawlai pawh hi eitur phurh nan hmangin kalpui ula. Helai hmun hi in chhuahsan anga, ni khatah vawi hnih emaw helaiah enge thleng tih hriat tumin in en thin dawn nia. Red, kha Cheyenne Indian pa kha ngun takin en teh," a tih chuan Red-a chuan, "Ka chiang e. Helai a rawn thlen atang khan a hnar atangin thi a rawn chhuak deuh reng lehnghal," a lo ti a.

"Reno thlengin min rawn zui la, mahse an hmuh phak lohah awm ang che. Kha Indian hming leh a chenna te, amah atanga hriattur tul awm te leh adangte pawh lo hrechhuak vek turin ka duh che a ni. I hrethiam maw?" a tih chuan Red-a chuan, "A luvun ka lo hik dawn em ni?" tiin a lo zawt a. Mahse Frank-a chuan, "Ka lo chhuah leh hunah keiman chu chu ka ti ang," a lo ti hmiah a. Red-a erawh chuan thinur hmel sen teuh chung hian, "I rawn chhuak leh hauh lo ang. Nangmah bail chhuah nan i neih phak loh sum an phût anga, nakum kumtir lama Kansas-a thubuai ngaihthlak anih theih nan chutah chuan an hruai daih ang che tih ka hrechiang a ni," a lo ti bawrh bawrh a.

Frank-a erawh chuan, "Ka lo chhuak leh ang. Ka duh ber chu in hnen ka rawn thlen leh hmaa buaina laka ka naute ho lo venhim hi a ni e. Red, chu chu i hria maw?" a han ti a. Red-an a chhan hma chuan a sakawr chu a kuai her a, lieutenant leh midang, amah lo nghaktu lam chu a pan ta a. "Lieutenant, ka inpeih e," a va ti a. Lieutenant pawh chuan a hote chu sakawra chuanga kal turin thu a pe ta a. Lieutenant leh Frank-a te chuan hma an hruai a, an liam tur chu beidawng takin Red-a leh Otey-a te chuan an thlir vawng vawng a.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » August 21st, 2018, 8:50 pm

WAR ON THE CIMARRON
Bung - 6

Ngawi renga Reno khaw lam pana an kal lai chuan thil ni thei tur Frank-a chuan a suangtuah neuh neuh a. Indian ho hnena whisky hralh anga sawi tur hian he Cheyenne tlangval hi tu'n emaw sum an pe tihna a ni. Chutianga thlem thei tur chu pahnih chiah an awm. Pawl hnih zinga tu emaw zawk zawk hian Frank-a an kawng atanga an thenfai nan engemaw chu an ti ngei a ni. Reservation company hian sipai chakna hmangin an kawng thenfai awlsam bera ringin hetiang hian an ti thei a. Anih loh vek leh Corb-a pawhin a ti thei tho mai.

Puckett-a thurawn Frank-an a hnial fithlak atang khan an tum chuan Circle R ho hian hetiang tih theihna hun hi chu an nei ngei mai a. Corb-a erawh chuan a hma zan mai khan a chungah khatiang thil kha thleng anih vangin hetiang tihna hun neiin a hrelo. Chutihlai chuan whisky tawlh rua hetiang zat tawktarh tur nei chu Corb-a hi a ni tlat si. Zu a thlem lungawi theitu tur pawh Corb-a tho niin a hria.

A rin ang ngeiin sipai hmun an thlen chuan sipai pawl khat chuan an chamban san a. A tlem zawkin lui kanin Darlington khua an thlenpui a. A ngaihtuahnaah chuan amah an man chhan hi Reservation hotute thiltih niin a mantu atan sipai ho an hmang niin a hre ta a. A rinna tihngheh nan amah chu Darlington hmuna kawtthler lun laia building lianpui, police ho hmun puiah an dah tak vang a ni. Agent Mr.Coe-a chu judge anga thu in hmanhmawh takin Frank-a thu chu a han ngaithla a. Sipai hmunpuia ukil thurawn angin chupa chuan amah bail nan dollar sang nga a tuk a. Chutiang suma a in bail theih loh chuan hun hmasa bera Kansas-a thutkhawm huna a chungthu rel anih theih nan hren rih tur a ti ta a ni.

Inchhawng chung pindan te reuh te, thianghlim tak, thira hung tlat chhungah chuan an dah ta a. Amah khungtu chuan kawngkhar chu a kalh nghal a, corridor tukverh sira perek khenah chuan laltin a khai a, ngaihsam leh zâng deuhin nakin deuha chaw an rawn pek tur thu a hrilh a, a kalsan ta mai a. Frank-a chu khum tereuh teah zangthalin, kut lukham in a mu a. Red-a thusawi kha a dik chiah dawn ta. Amah bail nana dollar sang nga chu engti kawng mahin a nei theilo a. Chutah thubuai sawi hun pawh kum tawpah daih a ni. An duh anga an chet theih nan Morg Wheelon-a thata an dah tha ang deuh khan amah pawh che thei miah lovin ti hian an khungbo hmiah dawn tihna a ni.

Red Shibe-a, helai ram leh an rilru put hmang chiang taka hretu chuan police office ep chiah, Frank-a thubuai an ngaihtuah zawkna ep tak kawtthler remchang laiah che lo changloa lo thu in, kha Cheyenne tlangval lo chhuak khan a sakawrah chuangin, thim thut thutah khawchhak lama an camp pana a kal chu a hmu ta. Darlington khuaah amah hretu an tamin, Indian tlangval kawhmawh bawl chakin tun ang hunah hepa hi a zui an hmuh vaih chuan a lu an tan sak loh vek leh hnunglam atangin an kap duh ngei dawn tih Red-a chuan a hria.

Tih dan dang ngaihtuahin kawtthler chu a tan tlang a, Murphy Hotel kawt zawl thim ber lai chu chuhin thuthmun a rem a. An zanriah eikham meizuk paha kawt zawla lo chhuakte ti ti chu a lo ngaichang ta zawk a. Reno bar lama kal chu chak zawk mahse helaia a awm rih hi a ngai tlat. Reiloteah nilenga hnathawk hah zanriah eikham ho chu lo chhuakin, thutna chu an luahkhat titih ta mai a. An hna te leh an tui zawngte an sawi tan a. Mi chi hrang hrang kal khawm an niin an ngaituah zawngte an sawi piahlamah thil thar nia an hriatte an sawi sap sap a. Engtikah emaw chuan Frank-a whisky hralh ruk avanga an man thu an sawi ngei ringin a ngaichang reng a. A hnu reiloteah chuan mi pakhat hi kawtthler pal tlangin chulaiah chuan a rawn kal a, lo thukhawm ho chu chibaite rawn bukin, Frank Kristiana chu an hreng a, dollar sang ngaa bail theih anih thu a rawn sawi ta ngei a.

Lo thu zinga pakhat chuan, "A va tam tham deuh ve. Whisky a lo tawlhru thin em ni dawn le? Ka hre hauh lo mai. Ka hriat ve dan chuan whisky tawlhrutu lian ber Big Agur-a man lo hian, tlem tham te te a lo zuartu te hi an man thin anih ber hi," a han ti a. Nui rah rah chungin pakhat chuan, "Chupa chu an hlau tlat alawm," a lo ti a. An sawi kual an sawi kual hnu chuan an zinga pakhat chuan, "Kristiana chu tunge man tir ta a?" tiin zawhna a rawn zawt a.

"Indian tlangval pakhat, a hming pawh Grey Horse an tih kha a ni. Stone Bull-a hote zing ami a ni a, mahse tunah chuan Stone Bull-a chuan a pet chhuak tawh. Tunah chuan chupa chu Indian ho sakawr ruk hmangte kawpin Salt Fork-ah a riak thin,"

Chu chu Red-a hriat duh tawk chiah a ni. Tuma mit la lo tur chuan a tho a, muangchangin kawtthler chu a paltlang ta a. Kawng atanga hla deuh takah dingin Caldwell atanga tawlai, thil rit tak phurin hotel lam a pan chu ngawi rengin a lo thlir a. Tawlai hnuktu sakawr pathumte chuan phur takin hotel lam an pan a. A khaltupa chuan kawtlai leh sumhmun vela a hmelhriatte chu a au chul a. Thawmhnaw an phurhte chu hotel-ah chuan an vawm lut mawlh mawlh a.

Red-a chu inherin, kawtthlerah thlanglam panin a kal tan chauh tihah chuan dawr pahnih inkar kawng atang chuan, "Red Shibe," tia kohna a hre ta. A kotu chu hmeichhia a ni a, tunge ni ta ang tia a ngaihtuah lai chuan, "Helam rawn hawi suh. I hre thei em?" a rawn ti leh ta a. Red-a chu a bu nghat a, kawtthler lam chu a hawi ta a. Chu nu bawk chuan, "Helai kawtthler hi rawn kal hual la, ka awmna kawngin lehlam kawtthler a pawhna laiah khian ka lo nghak ang che," a ti leh a.

Red-a chuan tlanglam panin sakawr a kaltir a. Chu nu chu ringhlel hranloin tunge ni ang tih leh enga tan nge ni ang tiin makti deuhin a ngaihtuah zui a. Rin erawh chu a nei mai a. Mahse Corb-a mi tirh a ni thei angem? Mahse chutianga aw mawi hmeichhe tirh tur Corb-a hian hriat a neih chu a ring hran lo. Rei vakloah lo nghahna tur hmun a sawi kha a thleng ta a. A lo nghak ngei a, inbe hauhloin kawng an zawh a, sumdawnna leh dawr hmun pelh thlengin ngawi rengin an kal a.

Red-a chuan amah kotu chu hmu chianglo takin, "Miss, thil hriat belh tur awm chu hriat ka va duh tawh ve," a han ti a. "Niminah in hmun kha ka va tlawh a, Luvie Barnes-i ka ni e," a han ti a. He nula hi Frank-a ti thinurtu kha a ni tih a hrechhuak leh ta. Khua an pelh thleng chuan engmah a sawi zui lo. Mel chanve dawn an kal hnu chuan in lianpui mai, chhawng hnih nei hi kawngsirah chuan a lo ding luah a. Chu in hnuaiah chuan sakawr dahna in leh ran chaw dahna in leh corral te a lo intlar thluah a. Kawtlaia thing dingah chuan sakawrte chu thlungin Luvie-i chuan hma hruaiin in panna step-ah chuan an kal ta a. Kawngkhar hawnga sitting room pan pah chuan, "Ka pa, kan lo thleng e," a han ti a.

A pa chu a kawrfual hak nen a thutna atanga lo thoin Luvie-i chuan phur fahran lo hian, "Heta hi amah chu a awm e," a ti zui leh a. Barnes-a chuan Red-a chu a kut hrawl tak chuan chibai a buk a, "Red Shibe-a, Frank-a mi chhawr chu i ni ang maw?" tiin a zawt a. A hmelah harsatna a tawk ni ngeiin a buai hmel hle a. Red-a chuan, "Ni e," tiin a lo chhang a. "Thu teh," tiin thutna a kawhhmuh a, Red-a a thut hnu chuan Luvie-i pawh a pa thutna thutthleng banah chuan a rawn thu ve a. "Frank-a chanchin min han hrilh teh," tiin a hma lamah chuan Barnes-a chuan a beng a han dawh deuh a. Red-a chuan, "Hrilh tur che eng teh vak mah ka nei lo. Whisky tawlhruk thubuai an awrhtir a, an man a, jail-ah an khung a, bail chhuah anih loh chuan thlasik huna thubuai ngaihthlak turin an hreng dawn tih zawng a ni mai," a han ti a.

Barnes-a chuan, "Frank-a chuan bail chhuahna tur sum chu a nei reng em?" a han ti a. "Sum a? Amah bail na tur sum maw? Ka hriatah chuan a nei hauh lo," Red-a chuan a ti a. Barnes-a chuan, "Ka nei alawm," a ti ta a. Chu veleh Luvie-i chuan ke per tak chunga dingin, "Ka pa, Frank Kristiana hi i bail chhuak ang maw?" tiin a hmai chu a sen tan tan a. A pa chuan, "Aw, jail-a tang reng atan chuan a uiawm lutuk," a lo ti hmiah a. Thinur zet hian Luvie-i chuan, "Ka pa, i â a ni. Hetiang thiltih i tum tih lo hria ila chuan Red Shibe-a hi ka rawn hruai hauh lovang," a lo ti tân tân a.

"Engvangin nge ka bail chhuah loh ang?"

"Corb-an a hria anga, chu chuan buaina ah a hruailut ngei ngei ang che,"

Barnes-a chuan Red-a chu en chung hian, "Engmah sawiloin i inveng thei ang ti raw?" a han ti a. Red-a chu a bu nghat a. Luvie-i bawk chuan, "Engvangin maw? A thuhrimah Frank-a hian amah bail na tur sum hi a la duh hauhlo ang. Khatiang thu vawiina ka hnena a sawi hnu phei kha chuan....Ka pa, induhna te pawh hi i nei ve thlawt lo em ni? I chanchin a sawi dan te pawh kha i hre ve reng ani lawm ni?" a ti tân tân a. A pa thung chuan, "A sawi dik chiah alawm. Mi dawihzep ka nih hi ka pawm thlap. Kâwnga pistol paia, Corb-a mi leh sa te hmachhawn tur hian ka upain ka thau ta lutuk deuh a. Mahse chumi avang chuan chutiang ti ngamtu chu ka tanpui ngamlo tihna a ni lo," a ti ta a.

Ke per tân tân chung hian Luvie-i chuan, "Chutiangte chuan i tawng chhuak a! Frank Kristiana tanpui i tumna lamah kan neih zawng zawng i dahkham tihna a nih hi. A phu lo, a phu hlawl lo," a ti barh barh a. Mahse vin that hian a pa chuan, "Luvie," a han ti a, a ke hrawl tak lam chu a bih a. A thinrim tih a hmelah leh a mitmengah a lang reng mai. "Ka thau tak deuh avang hian ka rilruah hlauhna a awm chuang lo. Misual leh verther lutuk mi hi ka ngaisang lo. Mi bum hmangte hi ka hua. Ka fanu, he khawvel hi hengho hian an ti tawp lulai ta. Chuvangin mi huaisen, hetiang mihring do ngam i hmuh hi chuan lo tanpui hi i tihtur a ni. Chuvangin, Frank Kristiana hi ka tanpui dawn a ni," tih pah chuan pindanah a lut ta nghal a. Almira kawngkhar hawngin thil fun rit tak hi a va la a, Red-a malchungah chuan dah pahin, "Frank-a hian a ring che anih chuan keipawhin ka ring tawk a che. Kha kha Frank Kristiana bail chhuah nan a tawk chiah ang. Frank Kristiana chu va la chhuak rawh," a ti ta a.

Sum chu zât a hmuh chuan Red-a chuan a ring hlei thei lo. Mahse a dik miau si. "Hemi avang hian tih tur enge bat ka neih le?" tiin a han zawt a. Barnes-a chuan bung vat hian, "Engmah. Jail atang chuan la chhuak thuai rawh. Ka ring sual anih loh chuan tunah hian tuemaw chungah phuba lak chakin a phu zek zek tawh ang," a ti a. "Chu chu ka duhthusam a ni bawk," a han ti zui a. A fanu chuan, "A lehpekah chuan tualthah avangin jail atang bawkin i bail chhuah a ngai ngei ang," a lo tih pawh chu Barnes-a chuan a ngaithla hauh lo. Red-a chuan pawisa bag chu khaiin thawh pah chuan, "Ka lawm e," tiin Luvie chu a melh a, "Frank-a chunga i rilru put hmang hi a diklo. Amah ngeiin engkim hi a chingfel vek ang," a ti ta a.

Luvie-i thinur chuan a heh a pet fan a. A pa erawh chuan Red-a chu a thlahliam ta a. Red-a pawhin sakawrah chuangin khaw lam a pan ta a. Hlimnain a khat a ni ringawt mai. Zanin atan chuan Frank-a chu a tan naah chuan tha taka muin hahchawl se a duh. A chhuah leh hunah chuan hahchawlhna leh mutna hun tha nei miah lovin a chet nghal char char a ngai dawn si a. An thlah liam laia Frank-a mitmeng, huatnaa khat kha a mitthlain a hmu reng a, a chet duh dan tur pawh a suangtuah thiam nghal mai a.

A sakawr chu sakawr inah chuan thlungin, a sum neih pawh chu a bag tha berah a ak a. Hotel lam pana kalin sumhmun vela lo thu ho chu kal pelin a lut tlang nghal a. Room-ah chuan inthlahdah deuh hian Otey-a a lo thu a. Red-an a rawn pan hnaih lai chuan a rilru puthmang pangngai tak, huatna leh ngainatna tel hauhloin a lo en a, a lo ding nghe nghe a. Red-a chuan, "Thil awmzia eng nge ni a?" tiin a han zawt nghal a. Otey-a chuan, "Corb-a chuan a hote a rawn tir lut nghal a, engkim mai khawih chet theih lohin a siam a ni ber mai. Frank-an a chhuahsan atanga darkar khat velah khan an lo thleng nghal," a lo ti a.

"A hâl chu an hâl em lo maw?" tia a zawh chuan Otey-a chuan, "A chhungah an cheng tih ka hrilh che kha. An khawsa nghal alawm," a lo ti a. Red-a chuan dar chhin ak pahin clerk thutna lam chu a pan phei a, clerk hnenah chuan, "Chhawng chung zawka a kila pindan, khum pahnih awm theihna ka mamawh e," a va ti a. A hnunglam atang chuan Otey-a chuan, "Hetah hian kei chu ka riak dawn lo," a lo ti a. Chhum hmakin Red-a chuan, "I riak dawn khawp," a lo ti a, Otey-a chuan hmel sen tan tan chung hian, "Ka riak dawn lo ka tih kha. Riak dawn pawh ni ila i riahna pindanah chuan ka mu hauh lo ang," a han ti a. (Hemi te pahnih han in ngeihloh em em zia hi chu aw😃😃😃😃)

Red-a chuan a bânah elh deuh titih hian Otey-a chu midangin an tawng an hriatlohna tur hmunah a hruai phei a. "Ka bag khai hi en rawh. A chhungah hian Frank-a bail chhuahna tur sum a awm asin. Bansan i duh anih pawhin naktuk thleng tal hi chuan min venhim pui rawh," a ti ta a.

Otey-a chu a meng zau kawk kawk a, a bu nghat nghat a. Red-a room hauh takah chuan an pahniha lutin, chhunglamah kawngkhar an kalh hnu chuan sum awmna bag chu khumah chuan an theh thal tap a. Pheikhawk an phelh nghal a. Otey-a chuan, "Sum chu zozai chu ka lo en teh ang," a tih chuan Red-a chuan, "En ta che," a ti mai a. Mak tia meng kawk kawk chung chuan Otey-a chuan, "I rûk a ni ngei ang chu maw?" a han ti a. (Hram hram zel hian😃😃😃) Red-a chuan a melh kawk a, "Hrep tak che chuan," a ti hmak a. An pahnih chuan inhnungchhawnin, inbe leh miah lovin an mu ta nghal a.

Zinglam hma taka Frank-an zing thingpui leh a hmeh a ei zawh chiah chuan amah vengtu chu a kal kiang leh mai a. Red-a leh Otey-a te pawh corridor-ah chuan an rawn lang ve ta a. Jailer a kal kiang chiah tihah Red-a chuan rum fe hian, "Frank, he i foreman lak tlak loh lutuk hi rukhmang diktak a lo nih lek hi," a han ti a. Rang fahran hian Otey-a chuan, "Dawheh pa, chutiang chuan vawikhat han sawi leh teh, ka silai kawm hian i bekah a ri chawrh a ni mai," a lo ti hmak a.

Red-a thinur chu a hmai a sen tawn tawn a. Otey-a lah chuti bawk; a ke chu a sai hlak hlak a. An thinur chu an thaw hlawp hlawp a, an insual lo chauh hi a ni ber. Rang takin Frank-a chu a thutna atanga lo tho in, "Nangni pahnih kha, ngawi ringawt rawh u," a rawn ti tuar a. Red-a thinur a reh rualin Otey-a pawhin a awm dan pangngai a rawn luah leh ta. An pahniha a entawn hnu chuan Frank-a chuan thil awmzia chu a man ta. Amah bail na tur sum Barnes-a pek chu a bo a ni.

Red-a chuan sum hi Otey-an a muthilh hlanin a ru a, tukverhah sipaiho kutah a theh chhuakah a puh a. Otey-a ve thung chuan amah ngeiin sum chu a ru bo a, chhuanlam a neih theih nan room te pawh a hauh vek anih thu leh Red-a rukbo ngei niin a sawi thung a. Frank-an bail chhuah anih teuh dan a hriat a, a chhuah leh theih loh tur a hriat leh chuan a rilru a na kher mai. A khumah chuan a thu hnawk a, tihngaihna tak hreloa a awm an hmuh chuan beidawng takin Red-a leh Otey-a chuan an lo thlir reng a. Red-a chuan hrilh loh khan awmzia a neilo tih hriain Frank-a chu khawi atanga sum chu nei nge anih a hrilh ta a. Thil awmzia a hriata a lungngaih rual rualin Otey-an an in leh lo chu Corb-a leh a hoten an rawn luah nghal hmak tia a hrilh chu hrehawm ti takin a ngaithla a.

Otey-a chuan beidawng tak chung hian, "Frank, engtia kan tih nge i duh le?" tiin a zawt ta a. Rang zetin Red-a chuan, "Engtia tih nge i tia law? Mi â, he hmun hi tichhiaa lakchhuah anih lohvin!" a lo ti a. Rang takin Frank-a chuan, "Nilo, bawngrual kan kutah a la awm a, tlatna tur hmun an nei bawk a, in enkawl thei bawk. He hmun hi tichhiain min lakchhuah in tum rual rualin in pahnihin hetah hian in hun in khawhral ve mai mai dawn tihna a ni," tiin a lo inrawlh thuai a. A rawn ding chhuak a, ngaihtuah nei tih hriat takin a tanna pindan chhungah chuan a vei tawn sek a. Chutihlai chuan Red-a chuan, "Kum tawp thlengin hetah hian i awm dawn a ni, ka nau. Chutiang ngawt chu a ni thei si lo," a han ti ngawt a.

Frank-a chuan ngawi rengin a en a, chu chiah chu a lo ngaihtuah mek chu a ni. Engtinmah a chhang lo. Khawvar tirh atanga a lo ngaihtuah a ni. Chutihlaia bail theih mai dinhmuna a din tawh laia mak tak maia sum an bo pil ta chu na a ti tak zet zet mai. Lungngai tak chung hian, "A nih nih lo ni phawt teh se. Tawlai awmna lamah khan kir leh phawt teh u. Inngaihtuahna hun min pe leh rih rawh u," a ti ta a.

Jailer bawk chuan thawm a rawn nei leh a. Edith Fairing-i khan chumite pahnih chu chik deuhin a rawn en a. An pahniha an kal kian hnu chuan Frank-a tanna kawngka zawnah chuan a ding ta a. Thawmhnaw dum, a sam aia dum lo deuh a inbel a. Zing lama thawmhnaw dum a rawn inbel leh a hmela lungngai hmel a hmuh chuan Red-a chuan ngun deuhin a lo en a. "Frank, i chanchin ka lo hria a, pawi ka ti takzet a ni. Ka thurawn che kha i zawm tur anih vei nen," Edith-i chuan a rawn ti a.

Hul hak hian, "Ani khawp mai," tiin Frank-a chuan a thiante pahnih chu a han inhmelhriattir a. Edith-i chuan a kawr ipte atang chuan lehkha them hi a rawn phawrh a, bar karah chuan Frank-a chu a pe a. "Tukin zingah ka kawngkhar hawn rualin kha kha ka hmu a ni," a han ti a. Frank-a chuan a han en chuan, "Frank Kristiana kha lo hrilh rawh. Bail-a a chhuah vaih chuan Morg Wheelon-a damdawi ei ang kha a ei ve ngei ang," tih hi a lo inziak a. Hming sign erawh a awm hauh lo.

Frank-a chuan lehkha chu Red-a leh Otey-a te a pe a, an chhiar nghal a. Red-an Edith-i a'n en chuan a hmela thinur avanga thlan bawl ni awm takte chu a hmu a. Edith-i chuan zawi sap leh fiah ang reng tak hian, "Frank, heta i awm hi atthlak ka ti a. Mahse hetiang lehkha i hmuh takah hian ka tanpui dawn che a ni. Morg-a an tih dan nen a thuhmun chiah a, a titute pawh hi mi thuhmun tho an ni ang," tiin a'n ngawi vang vang a. A thinur zualpui a reh hnu chuan, "Ka pa in sum enge maw zat min hnutchhiah a, a tam viau lo na in, nangmah bail chhuahna tur atan chuan a tawk ang," a han ti a.

Frank-a chuan rang zetin, "Ka lawm e. Mahse i pawisa chu ka dawng chuanglo ang, Edith," a lo ti vat a. Mahse Edith-i chuan, "Frank, i la ngei tur a ni. Jail chhungah ai chuan i chhuah hunah thil i ti tam thei daih dawn a ni. I la hrâm dawn lawm ni?" a tih pawh chuan Frank-a chuan a lu a thing tlat a. Edith-i pawh chuan beidawngin a dar a chhin ak a, a nui sak a. "Frank, ka tanpui theihna che awmchhun a ni asin. Anih leh engtia chhuah nge i tum a?" tiin a zawt a.

Frank-a chuan, "Ka hre mai lo," tiin, "Mahse, Edith, hei hi ka hria. Otey-a leh Red-a te jail-ah an tang ve lo a. Kei hi Morg Wheelon-a thian tha ka ni ang chiah hian anni pahnih hi Morg-a thian tha te an ni," tih pahin Red-a chu a'n en a. "Red, Edith-i bulah khan kal la, nizan lamah tute emaw he thil titute hi an fimkhur tawk loin sulhnu engemaw hnutchhiah an nei mial maithei. Uluk takin chulai hmun chu en rawh. He hmun ka chhuahsan hma loh chuan lo chhui zel ang che," a han ti a.

Red-a chuan, "Anih leh aw," tih pah chuan engemaw hmuh beiseiin Frank-a mit chu a han en a. Mahse lungngai hmel bak hmuh tur a nei lo. An pathum chuan an kalsan a, Frank-a chu a khumah chuan zangthala kut pahnih tukkhuma suiha delh chung chuan a mu leh ta a. Chu lehkha dahtu chu tupawh nise Morg Wheelon-a thattu chu a ni ngei mai. He lehkhaa inziakin a tum ber chu Frank-a tih thaih lam aiin Edith Fairing-in Frank-a a bail chhuah loh nana tihthaihna niin a hria. A beisei loh lamin Edith-i hian bail a duh ta hlauh a. Mahse Frank-a hian pawisa chu a lo la duh lo a ni. Thil awmzia ngaihtuah chuan a inher a, bang lam chu ngun takin a thlir a.

A han ngaihtuah vang vangin he hmun atanga a chhuah theih dan tur kawng khat chiah a awm. Chu chu a bawngrualte hralh a ni. A zangthal leh tap a, chunglam en pah chuan chu chu a tha angem tiin a ngaihtuah leh a. Tha dawnin a hre leh ta lo. Helai ramah a awm ngei tih fiahna a neih chhun chu a bawngrualte hi an ni tlat. A bawngte hi harsatna siamtu leh a vanneihna thlen theitu anih tlat avangin hralh loin hetah hian a tang phawt ang. Otey-a leh Red-a ten amah bail na tur sum chu engtin emaw an hmuchhuak thei mai ang tih a ring ta.

Chutah pawisa bo thu ah Otey-a leh Red-a te thiam dun chu a ngaihtuah chhunzawm leh a. Anni pahnih kha pawisa ru ah an inpuh tawn a. Frank-a chuan a han ngaihtuah vang vang a, vawilehkhatah a inbeng kang a, tukverh lamah a va hawi phei a. A nui hawk a, a mu leh mai a. Sum awmna chu hre ta ngeiin a inhria. Sum awmna nia a hriat chu a thinlunga vawng tha in, a hman theih huna hman dan tur ringawt chu a ngaihtuah chhunzawm ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)