WAR ON THE CIMARRON ( Western ) (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: WAR ON THE CIMARRON ( Western ) 1- 13

Unread post by Ngaia » August 26th, 2018, 7:57 pm

WAR ON THE CIMARRON
Bung - 13

Darlington khua an thlen chuan khua a la tlai lutuk lo a.Barnes-a compound chhung, cottonwood lianpui buk thim laiah an sakawr chu an thlung a.Red-a hrilh angin Frank-an midang an awm leh awm loh a fiah hnuah chauh in lam chu an pan a, kawngkhar chu an kik ta a. Luvie-i chuan a lo chhang a.

Anmahni a hmuh veleh chuan Luvie-i chuan tum reng vang pawh ni chuangloin a ka a han hup a, mak a tih hmel khawp mai a. Chutiang hmel a hmuh chuan Frank-a chuan, "Au chhuah kher chu a tullo ang. Lo kal turin min rawn ngen a nilo em ni?" a lo ti a. "Ni e, ni e," tiin aw thâm deuh hian Luvie-i chuan, "Lo lut rawh u," a han ti a. Otey-a hmel a hmuh leh takah phei chuan a mak tih a zual leh ta. A silk kawr hak rawng chuan a hmelte chu a ti dâng zual niin Frank-a chuan a hria a. "Lo lutin, sitting room lam i pan nghal ang u," a han ti a.

Ngawi rengin Frank-a te chuan an zui lut a. Thut nan sofa thutthleng a kawhhmuh a, amah chu kal tlangin khawnvar dahna dawhkan bulah chuan a va ding a. Frank-a chuan, "Khawiah nge Barnes-a hi a awm?" tiin a'n zawt a. "Reiloteah a lo haw mai ang," seh chilh lek lek hian Luvie-i chuan a ti a. Chutah rang deuh hian, "Frank, Scott Corb-a naute pali lai zan hmasa lam khan in that an tih hi a dik em?" tiin a zawt ta phut a.

Frank-a chu a thensak a, "Chutiang thu chu a lo darh vel mek ani maw?" a tih chuan, "A dik em ni?" tiin a lo zawt leh vat a. Otey-a zawk chuan, "Dik chiah lo. Pali leh a chanve zawk a ni," a lo ti a. Luvie-i hmel a hmuh chuan Frank-a chuan, "Pakhat hliam tuar a awm a, chu chu kan enkawl mek," a lo ti a. Luvie-i hmel chu a danglam nghal sawt sawt a. Tûm hmân chung hian, "Enkawl dam tê tê a thah in tum tihna a ni ang chu maw?" a han ti a.

He nula hian danglamna reng a la neilo tih Frank-a chuan a hria a. Chuvang chuan, "Ni na'ng, chutiang chiah lo deuh chuan, kan enkawl damin kan chawm thau anga, lawmthu sawi nan a sa ei kan tum zawk a ni," a lo ti a. Luvie-i thinur chuan a ke a per tân tân a. "Engtin nge maw chutiangte fiamthu thawh nan in hman theih chu le?" a han ti a. Frank-a thung chuan, "Fiamthu i tia lo? Kan fiamthu awzawng lo. Chumi hunah chuan khuang vuakna fung te pawh i rawn tum ve ang chu," a la ti ta deuh deuh a.

Luvie-i mitmengah chuan Frank-a huatna hmel a lang tep mai. Khawnvar chu banin a chawikang a, tukverh zawn dawhkan chungah chuan a va dah ta a. "Khawngaihin thu teh u. Ka pa hian bawng khalhtute a va hmu a, reiloteah a lo thleng mai ang," a han ti a. Frank-a chu sofa-ah chuan a thu a, Otey-a chu thutthleng pangngaiah. Frank-a chuan, "Eng ang buaina nge in tawh tak a?" tiin a zawt ta a.

Luvie-i chuan, "Ka hre chiah lo," tih pah hian kawngka pui hnungchhawn zawngin a thu a. "Nangmahin i chawh chhuah a nih te pawh ka ring a," a han ti zui a. Frank-a chuan a melh kawk a, Frank-a chu en tha ngamloin a pawnfen tlâng a zût a, nui deuh tat tat chung hian, "Frank, min han hrilh teh, jail-ah hian i tâng tawh reng em?" tiin a zawt ta a. "Chûng thu hriat chu i mamawh amaw?" tia zawhna chu nui deuh chung hian Luvie-i chuan, "I tlânchhuah theihna jail ang kha ni lovin, pawn lama vengtu tha tak awmna, a thla a thla i tân tawhna ka tihna anih chu," a han ti a. "Chutiang sawi tur ka nei lo," Frank-a chuan a ti hmak a.

"Chutianga tân chu i duh em?"

Frank-a chuan a ke chheh chu siam remin hmalamah a kûn a, "I tawnghmang atang chuan min hralh tum i ang hle mai," tiin pâwr chhak hian, "Jail-a ka tân leh i duh tih hi chu min hrilh hauh suh," a ti ta a. Mahse Luvie-i chuan ngaihno bei ang reng tak hian, "Mahse ka duh alawm," a lo ti hmiah mai. Otey-a chu a lo rûm hak a. Frank-a paw'n a thut dan siam tha in, nghenchhan chu nghengin a ngaihtuah zui ta a. He nula hi chu nunphung pangngai leh mi tak anga biak chi a niin a hre ta lo. A pa hnena a leibat a rulh hnuah chuan hemi te pafa hi hmuh zui leh chi-ah pawh a ngai ta lo. Ran chaw lei tuma a kal ni leh he nula a tawn hmasak ber ni te kha a rilru in anchhia a lawh ta.

Luvie-i chuam thawm hria niawm takin a beng a chhi hra a. Frank-a erawh chuan a hre ve lo. Chuti chung chuan Luvie-i chuan thawh pah hian, "Ka pa a lo thleng ta a ni maithei, a lo thlen....." a tih lai tak chuan tukverh darthlalang chu a keh chuai a, a keh them chuan khawnvar te pawh a raan deng a. Silai a ri thuai a, Frank-a beng bulah silaimu a rawn ving fia mai a. Frank-a che chu a rangin a zei kher mai. Chhuata letthla pahin a pistol a phawi a, a hmeh puah rual chuan dawhkana khawnvar chu a thim hmak a. "Otey, hnunglam kawngkhar saw va kalh rawh," tiin thu a pe a. Thawh pahin Luvie-i chu chhuatah a nam tlu a. Chutihlai chuan pawnlam atangin namenloin in chhung lam hawiin silai an hmet puak tawh a ni.

Otey-a pên thawm a rik thlap thlap lai chuan Frank-a chuan hmalam kawngkhar chu a pan a. A kalhna chu pawhiin awmkhawmna pindanah chuan a lut nghal a. A han ban chuan Luvie-i dâr a va khawih fuh a, a lo khur dar dar a. "Hliam i tuar em ni?" a han ti a. In hnit hlap hlap chung hian, "Oh! Frank, eng thil nge maw ka tih tâk chu le? Eng thil nge ka tih tak hi?" a rawn ti a. Frank-a chuan, "Ka tih i tia lo? Engmah i ti lo a, anmahni tih vek zawk anih hi," a lo ti a.

Luvie-i thung chuan, "Mahse Frank, keima tih vek alawm," tiin, "Corb-a a ni. Sipai rawn tirin an rawn man dawn che angin a sawi a. Kha lehkha thawn khan helai hi a rawn hruai thleng che a ni. Tukverh bula khawnvar ka dah khan he inah hian i awm tih a entir anih kha," a ti ta zel a. Frank-a chuan a thu hriat chu rin harsa a ti. Chutihlai chuan pawnlam atangin rifle in an awmna pindan bang lu chin chung hretah hian an rawn kâp pawp zawt zawt a.

"Tunah chuan ka hrethiam ta," tiin Luvie-i chu a inhnit faih faih a. "Nangmah thahna tura thang a lo nih reng hi. Chu thangah chuan ka hruailut ta che a ni," a han ti zui a. Frank-a pawh chuan a tawpah chuan, "A lo nih hi," a ti ve ta ngawt a. Luvie-i chuan, "Frank, chutiangin i tuar ngawt tur a ni lo. A theih loh. Corb-a hian ka pa hi ti chhe vek dawn pawh nise pawi ka ti ta lo. Heta tanga i chhuah theihna tur anih phawt chuan eng pawh, eng pawh ka ti ngei ang," a ti ta bawrh bawrh a.

A theih anga dam hian Frank-a chuan, "Chuti anih pawhin tap tawh suh. Mi i hua tih hi ka hria. Mahse ka...." a tih lai chuan Luvie-i chuan, "Ka haw lo che. Tunah mai hian ka haw lo che tih ka hrechhuak a ni," tih pah hian Frank-a chu a han ban a. "Corb-a hian a hote zing ami i that niin a sawi a, Frank, zaninah ngei khan nang pawhin chu chu i pawm a. Chumi avanga hetiang thil ti hi ka ni. A sawi hmang chuan a kawng i dâl avanga dahbo i nih theih nana man tum che a ni a. Sipai hoin an man tur ni chein a sawi a. Mahse heng ho hi sipai anni hauh lo. Tualthah hmang an ni," a ti chûl a.

Frank-a chuan, "Ngawi teh," tiin tih dân tur ngaihtuah a hun hlein a hria a. Chutihlai chuan Otey-a khan corridor chung atang chuan, "Frank, he hmun hi an hual vek tawh. Min rawn luhkhung hunah chuan kan ral a ni mai," a rawn ti sek bawk a. Frank-a chuan a chhang mai lo. Tih dan tur a la ngaihtuah mek a ni. He hmun atang hian Luvie-i a chhuah tir tur a ni a, a rual hian Otey-a pawh a chhuak ve tur a ni. Thian rinawm tak anih avangin Otey-a hi tihsual engmah a nei lo chungin an kap hlum ngei dawn. Chutih rual chuan he in leh a chhung venghim tur hian Otey-a awm ve hian awmzia a nei tak tak si lo. Chutianga ngaihtuahna a hman mek lai chuan Luvie-i bânah a man a, "Ka thusawi i hre thei em?" tiin a zawt a.

"Hre thei e,"

"He hmun atang hian i chhuak tur a ni. Him taka i chhuah..." a tih lai chuan Luvie-i chuan, "Ka chhuak dawn chuang lo. Min rawn kâp se ka ti. Thi ila ka duh tak meuh," a lo ti mial mial a. Vîn zet hian Frank-a chuan, "Hmeichhia, chutiangin tawng suh. Hetah ai hian pawn lamah i tangkai zawk daih ang. Chuvangin ngaithla rawh. Otey-a pawh i rualin a chhuak ve nghal ang. Amah hi huatna engmah an nei lo. I hruaichhuah hunah chuan i pa bawngrual awmnnaah hruai la, venpui turin hrilh ang che. A chhan chu heta tanga ka chhuah hunah Corb-a hian i pa bawngte hi a rawn rawk dawn si a," a han ti a.

"Mahse engtin nge i tlan chhuah ang? Engtin...?"
Frank-a chuan rifle ri thawr thawr karah, Ka chhuak mai ang. I tih ve tur chu heta tanga chhuah a, Corb-an mi hâl khung tur dan hi a ni mai. I hrethiam em?" a han ti a. Ngui raih hian Luvie-i chuan, "Aw," a lo ti chuai raih a. Otey-a a bulah a rawn vâk hnai tih Frank-a chuan a hria a. Otey-a chuan, "Frank, do hneh theih i in beisei em?" tiin a rawn zawt a. Frank-a chuan, "Hneh e, he nula hi Corb-a ka lakchhuah tir ang a. Kan pahnihin kan bei let anga, min hneh dawn leh dawn loh chu an hre mai dawn alawm," a lo ti hmiah a. Otey-a pawh chuan, "Ka hnialloh zawng tak a ni," a lo ti a.

Rifle ri a khât deuh tihah Frank-a chuan, "Corb, Corb," tiin a au a. Rifle ri a reh takah chuan kawt zawl tawp lam atang chuan Corb-a chuan, "Kristian," tiin a rawn au let a. "Inchhungah hian hmeichhia a awm ve a. A rawn chhuah fel hma chuan silai kha rawn kap tawh suh u," Frank-a chuan a han ti a. "Rawn tir chhuak nghal rawh," tiin a hote pawh chu silai hmet puak tawh lo turin thu a pe a. Frank-a chu a tho a, Luvie-i pawh a kaitho nghal a. "Otey, kawngkhar kalhna kha hawng rawh," tia thu a pek a, Otey-an kawngkhar a pan lai chuan Luvie-i chu kawngka lam panin Frank-a chuan a kai phei a.

Otey-a chuan chhete in kawngkhar chu a hawng a, a han bih a. Piah deuh tak corral bulah chuan pakhat hian mei a lo chhem a, mahse a alh ral tep tawh a. Piah leh deuh khawchhungah chuan eng thil nge thleng tia inzawtin an bengchheng hle a. Hriat chian tumin an awmna lam pan chuan an rawn tlan mek a. Otey-a chuan, "Frank, heng mihring ho hian mipui pungkhawm hmaah min tihhlum an tum anih hi, hrep hlawm a!" a lo ti a.

A rawn hawikir leh chiah chu Frank-a chuan a pistol barrel chuan a lu-ah a lo chhu a, engmah hreloin, thawm nei miahloin a tlu ta a. Luvie-i makti chu a ang pho mai a. Mahse Frank-a chuan, "Luvie, ani hi heta tang hian ka chhuahtir tur a ni. Hetia ka tih ngawt loh chuan min kalsan duh dawn silo a, a zâng bawk a, i kuah chhuak thei mai angem?" tiin a zawt zui a. "Ka tum chhin ang," a lo ti sap a.

Frank-a chuan Otey-a pistol chu a phawi a, a kawnghrenah a zep a. A silaimu bawm leh kawnghren pawh chu phelhin amah a inbel nghal a. Otey-a chu pawm thoin Luvie-i chuan a bân lehlamah la in a kokiah a chhuang a. "A rih vak loh hi. Ka chhuahpui thei mai ang," a han ti a. Frank-a chuan ring tak hian, "Hei a lo kal nghal ania," tiin a'n au a. Pawnlam atang chuan, "A that chu," a lo ti ve mai a. Luvie-i chuan, "Frank, i chhuak ngei tur a ni. I chhuak lo anih chuan ka lo inti hlum ve tawp ang," a ti a. A chhanna pawh nghak loin Otey-a chu paw titih, hnuk titihin a chhuahpui ta nghal a.

Frank-a chuan awmkhawmna pindan chu a pan ta nghal a. Tukverh keh atang chuan Luvie-i hmasawn dan chu thlirin cottonwood hnuai a thlen thlengin a thlir a. Tumahin an lo kap lo. Mi pahnih hian an lo dawngsawng a. Ami rawn chhuah pui pawh chu an lo bel chiang a. Otey-a chu an hnena hnutchhiah tura an tih pawh remti loin an inkal pelh tir a. Chumi hnuah chuan silai an hmet puak tan leh ta a ni.

Frank-a chu hall lamah a tawlhkir a, engtia tih leh zel tur nge ni ang tih a ngaihtuah a. Inchhungah mi pakhat chauh a awm tawh tih an hriat chian chuan reiloteah an rawn luhchilh ngei a ring tlat. Chutiang a rinna bakah Corb-a mizia leh a dinhmun a ngaihtuahin a rawn luh chilh ngei a ring bawk. He in hi khua atanga hla lote a awm a ni a. Mi za tam takin he thil thleng hi an thlir tawh a. Tuemaw tal chuan Corb-a leh a hote thiltih chu tih tawp an tum ngei a ring tlat. Jail atanga tlanchhuak ringawt chu tumahin tihhlum an tum ngai lo. Mahse tun tumah hi chuan an tum hmel tlat. Chuvang chuan Luvie-i chungah a lawm ang reng hle a ni.

Corridor lamah a vak phei leh a, chutihlai chuan hnunglam kawngkhar chu tubohin na zet zetin an rawn chhu bur bur a. In pumpui hi engti kawng mahin a veng seng dawn lo tih a hria. Chuti anih chuan a then tal chu a venhim a ngai. Luvie-in Corb-an he in a hâl tur a dan theih hlauh chuan inthahna rapthlak tak a thlen hma leh sipaiho lo thlen hma chuan in chu a venhim theih a in beisei a ni. Hnunglam kawngkhar an chhut hawn rual rualin in chhawng kailawn a thleng ve chiah a.

Inchhawng hnihna a thleng chiah tih chuan mi pahnih hi hmalam kawngka atang chuan lo lutin kailawn lam panin an rawn tlan nghal a. Bawk thlap chungin a pistol pakhat chuan kailawn lam chu a kap nghal mawlh mawlh a. Mi pahnihte chu chhuatah an lum thla nghal a. Hmalam kawngka atang chuan mi pahnih hian Frank-a bawhna lai tum chuan rifle in an rawn kap nghal a. Frank-a chu a tawlhkir a ngai ta. A tawlhkir hma chiahin mi pathumin silaimu karah kailawna lawn an tum chu a hmu hman a.

A chhawng hnihna hall lamah tawlh pheiin tukverh pahnih, hma lama mi leh hnunglama mite chu a en vang vang a. Hma lama mi chu hnuailam sumhmun khuhna in chung awihtlan deuh chungah chuan a awm tih a hria a. Hma lam tukverh hnuai zawnah chuan tanhmun a khawh a. Kailawnah mi an rawn lawn loh phawt chuan tumahin an hmu in an khawih thei dawn lo tihna a ni. Kailawn pela mi pakhat a rawn dah chhuah rual rual chuan Frank-a chuan a'n kap a, kailawna a lum thla thawm leh âng bawrh bawrh thawm chu a hre reng mai. Corb-a hote chuan kailawn bulah an nghak a, mahse a silaimu tuar tur chuan an inpe ngam lo.

Hnuai lamah chuan thawm a ring sawt hle. Corb-an a hote hnenah thupe in, kailawna lawn chho turin a vin tuar tuar a. Mahse thihna tura han inbarh ngawt chu tumahin an duh si lo. Corb-a chuan leilawn la a, chhawng hnihna tukverh atanga luhchilh tura a tirh pawh chuan tumahin an zawm chuang lo. Thupek leh tawng ri nuai nuai karah Luvie-i chu rawn inrawlhin, "In hi in hal ngawt tur a ni lo, nun dan mawi leh tha bawhchhiaa mi in hal ngawt hi a dik lo," tiin aw a rawn chhuah a. Corb-a pawh a thusawi angin a khawsa lo tih te a rawn sawi chhuak a. Khawchhung atanga lo kal thawm chuan a thusawi dang chu a khuh bo zo ta.

Nasa taka an inhnial buai lai leh Corb-a thinrimna a sosan hle lai chuan Frank-a chuan tukverh atangin hnuai lam chu a zu bih a. Kailawn leh a bul vel chu a zu hmu fiah ang reng hle a. Chutihlai chuan kawt zawl hla deuha in lam pana sakawr rawn tlan thawm hi a hre ta. Sakawr tlan ri avang chuan inhnial thawm a reh deuh a. Sakawr chuangin an hnen a rawn thlen chuan a sakawr a ti ding chawt a, "Khawiah nge Corb-a hi?" tiin a rawn zawt a.

"Heta hi," Corb-an a tih leh chupa in sumhmun lam pana a kal thawm chu Frank-a chuan a lo hria a. "Captain Haggard-a ka ni e, Corb," tiin thinur zet hian, "Hetah hian eng thil nge thleng a?" tiin zawhna a rawn pe a. "Eng nge thlenga i rin?" tia Corb-an a lo zawh chuan, "Hetah hian Frank Kristiana dan chêp a, thah i tum a ni phawt mai," Captain chuan a ti a. Corb-a chuan, "A dik chiah," a lo ti hmiah a.

"Tu thuin nge chu chu i tih dawn? Kristiana hi whisky tawlhruk avang leh jail atanga a tlanchhuah avangin agency in a chungah thubuai a siam a. Agent hian a ruang hi an mamawh hleinem. I hote hi kokir la, sipaite nen kan lo kir leh hma erawh chu helaiah hian lo nawr bet ang che. Corb, engtihna mah i ni lo. Sipai i ni lo a, police pawh i ni hek lo,"

Corb-a chuan captain awmna lam panin, "Major-in a rawn tir che em ni?" tiin a va zawt a. "Tir nang, officer bar-a ka awm laiin he thu hi a rawn thleng a ni. A thuhrimin agency mi zawn lai chu ka kuta awm tur a ni tlat," a han ti a. Corb-a chuan, "I mi tâng chu a ni hauh lo. Murphy Hotel-ah khan zuk kir leh ta la, banga lehkha intâr kha ngun zawkin zuk en teh. Khatah khan agent remtihna ngeiin, 'Dead or Alive' tiin wanted a nihna tar chhuah anih kha. Kha kha vawiin chawhnu lama chhut a ni a, tlailamah tar chhuah a ni. Captain, agent remtihna thlap asin," a han ti a.

An ngawi vang vang a, nakin deuhah chuan Captain chuan, "Dawt min hrilh anih ngat chuan Corb, jail-ah ka khung ngei ngei ang che," a han ti a. Corb-a chuan pawisa lo tih hriat zet hian, "Kal la, zuk chhiar rawh. I sipaite nena i lo kir leh hunah chuan Kristiana hi chu a lo thi der tawh ang," a han ti a.

Tunah chuan khawchhung maia dan chêp Corb-an a duh chhan hi hriain Frank-a chuan a inhre ta. Sumhmun chung khuhna lamah chuan dimtein a phei a. A hnuai lamah ama zawn velah chuan Captain pawh chu lo kalin a hria a. Sakawr ke pen ri leh inher thawm hria chuan Frank-a chuan a pistol chu dimtea a paiah khungin, inchung hmawr lam chu a pan zel a. Chutihlai chuan captain chuan, "A thi anih ngat chuan Corb, i phu tawk hremna chu i tuar ngei ang," a lo ti a. Sakawra chuan Captain-in in chung hmawr zawn a rawn thlen chiah chuan Corb-a chuan, "Khai le, kailawnah khan chho nghal rawh u," tiin thu a pe a. Frank-a pawh sakawr tlan tan tir zawnah chuan a zuangthla chiah a. Sakawr saddle hnunglam hretah zuk thu in, sakawr chu a te tuar a, a tlu tep a. Mahse a rawn ding chhuak leh thuai a. A hmaa thu Captain zak hnuaiah chuan pawmin sakawr chung atang chuan a theh thla ta a.

Captain chuan, "Corb," tiin a ko tuar a. A rawn ding chhuak lai chu Frank-an a bekah a kuttumin a lo hêm a, bengchheng zui theiloin a tlu ta a. Frank-a chuan sakawr hrui chu vuanin a pawt dâk awrh a, sakawr pawh chu a hram nghur nghur a. Chutah Corb-a chuan ding zet zet hian, "Pawn lamah, mi â ho, pawn lamah hian," a ti tuar tuar a. Silai a hmet puak mawlh mawlh bawk a.

Frank-a chuan sakawra bawk phek thlar chungin na tawkin a spur chuan a'n kheng a. Thim lam pan chuan sakawr chu a lim ta puat puat a. Mipui pungkhawm chuan kawng sir lam chu chuhin an au nuai nuai a. Mi pakhat hian silai a'n hmet puak a, midangte pawh chuan an chhunzawm ve a. Frank-a chuan cottonwood hnuailam chu a chuh vat a. Sakawr chungchuang mi pakhat hi a rawn lang nawlh mai a, Frank-a lam hawi chuan silai a rawn kap a. Frank-a chuan tum em em pawh neiloin chu lam hawi chuan vawi hnih vawi thum lai a'n hmet puak ve ngawt bawk a.

Corral chu tlan hualin sakawr tui pekna zawnah chuan a sakawr chu a lim puat puat a, reiloteah thing hmun pik lam chu a thleng ta. A hnung lawkah amah umtu sakawr pakhat niawm tak tlan thawm pawh a hre zui nghal a. Mahse sipai ho hian an sakawrte an chawm thain an thau a, an chak hle thin tih hriain a nui sak a. Hemi zan kher hi chuan amah man tur hian hah thi kula an beih a ngai ngeiin a ring. Zan dangte a awm leh ngai anih chuan amah phiarru tur hmeichhe dang chu awm leh tawh ngailo turah a beisei a ni.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 2nd, 2018, 5:45 pm

WAR ON THE CIMARRON
Bung - 14

Frank-a chuan riltam leh chau tak chungin Red Indian hnuchhui thiam ber pawhin an chhui theih loh turin a kalna chu a thup a. A tuk chhunlaiah Barnes-a bawngrual tlatna hmun chu a hmu ta. Canadian lui phaizawl, sipai post atanga mel 18 vel laia hlaah chung bawngte chu an tla hlawm a. Bawng tlat darh teh nuaih dan atang chuan helai hmunah hian Otey-a kha thleng tawhin, a remruat angin bawngte pawh awlsam taka um darh theih loh turin an awmtir ni turah a ngai a. Mahse chu ngawt chu Otey-an a venpui tih fiahnan a tawk lo. A fiahna dang atan chuan wagon hrula puan inzar chu a ni ang. Sipai quarter master-in hetianga hlaah a bawng lei tur a dawn ngai loh avangin puan inzar chuan amah Frank-a an lo nghak tihna ni turah a ngai a ni.

Ngaw atanga Frank-a sakawra chuang chunga a inlantir rual deuh thaw chuan amah lo hmu hmasa ber tu chuan a sakawr chu tidingin a lo nghak a. Frank-a chuan tunge anih a inhriattir veleh an pahnih chuan puan in lam chu an pan ta nghal a. Chawhnu her khawlum hnuaia Barnes-a bawngrual tla te chu an thau tha hlawm kher mai. Chuti anih chuan ama bawngte pawh kha an thau ve tawh ngawt ang tih a ngaihtuah a. Mahse hun thawl a neih huna ngaihtuah zui atan tiin a suangtuahna chu a titawp nghal a.

Puanin an hnaih ta tihah a kalpui pa chu hlimin a'n au a, puanin atang chuan a rualin Red-a te, Otey-a leh Barnes-a te chu an rawn chhuak a. A hlim avanga ring tak maia Red-a han khêk vel chuan bawngrual tla lai te pawh a ti hlau tep a, eng nge ni ta ti ni awm takin an hawi hu hu hlawm a. Frank-a pawh a chuanna McClellan-a saddle atanga rawn zuangthlain chung ho chu hlim takin a hmachhawn a. Red-a chuan a hnungah a lo beng thawr thawr a. Otey-a erawh a lawm lutuk hnukulh tawngtheiloin a kut a nuai nawk nawk a. Barnes-a chuan a bul ami a lo bêng nawk nawk bawk a. Luvie-i pawh puanin kawngka atangin a rawn chhuak mek a. Frank-a chuan a hmel ngui tak leh hmui seh chat chat chunga a lam a rawn pan mek chu a lo thlir a. A hmaah chuan rawn dingin, "Frank, ka inchhir zia leh pawi ka tih zia sawiin tangkaina a nei tawh lo tih ka hria," a han ti a. Frank-a chuan, "Tangkaina hran chu a nei tawhlo ang, kan thatpui tawh chuang nang," a lo ti vat a. Luvie-i erawh chuan, "Inah kha chuan 'a pawi lo ve' i ti si a," a han ti a. Frank-a erawh chuan, "In ina ka sawi leh heta ka sawi hi chu a danglam daih tawh," tiin thinur miahlo ang maiin, "Ina i thu ka awihna chhan te chu in atanga i chhuah duh nan ka ti a nia, helaiah erawh hi chuan i thu ka awihna chhan tur engmah a awm tawh lo. I zalen a, kei pawh chutiang chu ka ni. Kan in rûl tawk vel anih chu," a ti ta hmiah a.

Luvie-i chuan, "Frank, ka inchhir lutuk," a han ti leh a. Frank-a chuan, "Ka hria e," a tih chuan Luvie-i chuan, "I chungah ka theih anga tha thiltih ka tum tawh ang," a han ti leh hram a. Frank-a erawh chuan, "Thil tha tih tur engmah i nei lo," tiin, "Corb-an min man theih nan in inah min hruai a. I duh ang thil a thlen veleh Corb-an min thah tum loin, jail-a min dah zawk tur angin i lo ring ta a. Heng thil hi i pa tanpui i duh vanga ti i ni. A tha e, i tih chhan pawh hi a that ka rinpui a che. I thlir zel phawt teh ang," a han ti a.

"Mahse Frank, khatiang reng chu ka ni bik nâng, tun hnuah chuan," a tih lai chuan Frank-a chuan, "Nangma tan i in chhir a, eng thil emaw thleng tura i suangtuah apiangin i hlau thin a. Chung hun chu i la pal tlang ve mai ang. Buaina engemawa min hruailuh theih nan fing kherek takin engemaw chu i la phuah chhuak leh mai ang. Min bail na tur i pa pawisa ngei i ru chhuak ang khan. Tuna ka danglamna tur pawh lehkha them avang ngawt chuan i thangah ka awk tawh lovang. I thluak bawm tereuhtea thluak hmang khan nang hi ka tanpui dawn lo che a, i pa erawh ka pui dawn tih hi ngaihtuah ve ang che. Min tanpui a duh a, harsatna karah pawh. I lo inthiar fihlim phawt chuan harsatna lak ata i pa hi ka hruaichhuak ngei ang," a ti ta zel a.

Rilru buai tak chungin Barnes-a chuan, "Tlangval, nêm deuh te pawhin mawle," tia lo inrawlhin, "A inchhir a, chu chu namnul ngawt bik tur a ni lo e," a lo ti a. Luvie-i dinnaah chuan pheiin a fanu chuan a pa kut chu a lo vuan chawt a. A hmelah chuan hnehsawh leh diriam taka Frank-an a tihna avang chuan a zak hle tih a lang. Frank-a hmel pawh a en ngam lo a ni. Frank-a chuan, "A dik alawm," tia meng kal ralh ralh chung hian, "A inchhir khawp a, a hmel pawh a tha bawk. A hmel duhawm tak pawh hmuh fo ka duh. Kan inhmelhriat naah hian ka vanduai deuh thin avang erawh chuan, ruang dai chunga kuanga min zawn sawn hma hian a hmel hmuh hi ka bansan mai dawn a ni e," a han ti a.

Luvie-i chuan a kuta lo zâpin, "Frank, i mi tihna zawng zawng kha ka phu tawk lek a ni. Khatiang thu min hrilh kha ka lawm e," a ti a. Inherin buk chhungah chuan a lut ta a. Gus-a, a hma zan lama loh theih lohna avanga a hliam an enkawl khan mu chungin Frank-a chu a lo hui a, a lo nuih a. Frank-a pawh chuan a nuih ve a. Barnes-a chuan a fanu chu a zui lut a, engemaw hi a rawn sawi mawlh mawlh a. Frank-a chu Red-a leh Otey-a te bul lamah chuan a kal ta a.

"Frank, deh chu i lo khirh kher zawng anih hi," Red-an a lo tih chuan Frank-a chuan meng sen deuh rum chung hian Red-a leh Otey-a te chu a en vang vang a. "Nang pawh hi.....khuaa mipui ho kah rawn tura a tawktarh hunah che chuan i rothap fe chu a ngai ngei ang," a ti ve a. Barnes-a chu lo chhuakin, rawmawla a hmai hru mawlh mawlh chung chuan Frank-a lam chu rawn panin, a rawn chibai a. "Frank, Luvie-i chunga khatiang ngaihdan i nei kha chu pawi ka ti khawp mai," a rawn ti a.

"Lo ngaithla teh," tiin Frank-a chuan nelawmlo deuh leh thinur tih hriat deuh hian, "Barnes, Luvie-i chungchang hi engtin mah ka ngaihtuah lo. A chungchang thu hi a sawi ri tawh lo teh ang. Tanpui che erawh hi chu ka duh. A chhan pawh he ram pumpuia min tanpui duh leh tum awmchhun chu nang chiah hi i ni. I laka ka bat kha ka pe kir ang che. I duh lo anih phei chuan he ram hi ka chhuahsan nghal ang," a han ti a. Dam thlap hian Barnes-a chuan, "Khang kha chu theihnghilh rawh," tih pahin a'n hawi kual a, "Wagon hnuai hlimah sawn thuin thu i sawi ho teh ang u," Barnes-a chuan a ti a.

Wagon hlim lam chu panin an thu tlar tham a. Frank-a chuan buhpawl kuang chu thliakin a thial a, engemaw chen chu ngawi rengin an thu a. Otey-a chu a rawn tawngchhuak ta hlawl a. "Barnes, Corb-a hian Frank-a chunga a tih theih zawng zawng chu a ti a ni ta ber a. Nang pawh hi he buainaah hian i intât lut a ni ber a. Luvie-i kha a lo sawi thaih tawh a, a tih thaih ang ngei khan chet a tum ngei ka ring a ni," a han ti a. Barnes-a chuan tumruh hmel tak hian, "Bawngrual hloh hi ka pawiti der lo. Ka duh ber chu hepa chhut chhiat hi a ni zawk," a lo ti a.

"Chuti ngawt chuan i hlawhtling lovang," Red-an a tih chuan Barnes-a chuan, "Eng vangin?" a lo ti a. Red-a chuan Frank-a hnenah chuan, "Kan rin dan a thuhmun tho a, nangmahin han hrilh la," a lo ti a. Frank-a chu lo bu nghatin, "Amah chuan a bei lo ang che. Indian hoin i bawng chu lak tumin an rawn bei mai dawn a ni," a lo ti a. Barnes-a pawh chuan ngaihtuah vang vang chung hian, "A ni dawn maw? Min rawn rawk leh dawn tihna anih chu," a lo ti a. Frank-a chuan, "Tun tumah hi chuan silai pawh an rawn chelek ngei ang. Inbeih dan ringawt an ngaihtuah anga, a tam thei ang ber mihring thah an tum bakah bawng pawh a nasa thei ang bera um darh an tum ngei ang," a ti ta zel a.

"Chutiang chu i rin dan ania maw? Engvangin?" tiin phawk zet hian Barnes-a chuan a lo zawt a. Frank-a chuan titak zet hian, "A chhan chu ka'n hrilh ang che. He thil inmun dan hi ka hmu reng a ni. Barnes, bawngvulhtu keini ang hi Corb-an a thuhnuaia a dah theih chhung chuan helai ramah hian Corb-a hi a him tawk. Chuvang chuan min hnuaichhiah tumin vawi engemaw zat chu min bei tawh. Tunah hian rancher tenau thahnem tak leh helai hmuna bawng rawn tawlh thin thahnem tak helai leh a chhehvelah hian an awm a. Chung ho chuan Corb-a ka do hneh beiseiin min thlir reng a. Ka hneh pawh hi an beisei tawh lo a ni. Corb-a hi lo hneh ta hlauh ila chuan a rang a rangin he ramah hian an rawn tawlhlut ang a, chumi hunah chuan Corb-a hian engmah a sawi thei tawh lo ang. Chuvang chuan min tih chhiat hi a duh a, nangpawh hi min puitu i nih avangin tihchhiat che hi a tum a ni. Chumi thleng chuan i hrethiam tiraw?" a han ti a.

Barnes-a chu a bu nghat nghat a. Frank-a chu a en ran a. Frank-a chuan, "Chuti anih chuan a thurualpui Indian ho chu a hman mai a ngai ta a ni," a han ti a. "Engvangin maw?" tia a lo zawh chuan Frank-a chuan, "Che theilo a siam che a duh vangin mawle. Chumi avang chiah chuan ani hi i beih duh a ringlo a ni. Nang hian lo bei ta la chuan Indian ho reservation-a awm mek, hel châk ngawih ngawih hi an rawn inthurual anga, nang leh kei hi min rawn beih dawn avangin Corb-a hian i beih ngam a ring lo a ni," a ti ta zel a. Barnes-a chu minute khat dawn a ngawi vang vang a, "Chuti lam chu a lo ni maw?" tia a zawh chuan Frank-a chu a bu nghat a.

Tumahin thu an sawi zui lo. Ngawi rengin an chunga thil thleng thei an suangtuah a ni. Cheyenne Indian ho,Corb-an duhtawka a hrai ruih ho kha lo thawkin an rawn bei dawn. Chung ho chuan mingo tawh phawt, hmeichhia leh naupang pawh thliar chuang hauh loin an bei ang a, sipai ho venna hnuaiah inhumhimna zawnga tlan luh a ngai ang. Fort Reno-a sipai tlemte pui tura hmunpui lam atanga sipai tirh belh a ngai ngei dawn a ni. Chumi awmzia chu chhun leh zana indo te, mingo hoin hnehna an chan hma chu hlauthawng leh nghakhlel taka lo nghah te a ni ang. Otey-a chuan, "Chutiang hun a thleng anih ngai chuan a bul atanga engkim siam thatna hun a awm dawn tihna a ni ang. He reservation chhungah ngei pawh hian," a rawn tih chuan Red-a pawh chuan, "Sihal anga fing kherek Corb-a te ang tello hian," a lo ti vat a.

Barnes-a chuan boruak lum lutuk tih daih nan tiin, "Chu, Corb-a khawi ngam Indian ho chuan ka mite an rawn kâp ang a, ka bawngte pawh chu an rawn ru dawn tihna a ni ber maw? Chung mite ka lo do chuan Indian ho nen indona ka chawk chhuak dawn tihna a ni maw?" a rawn ti a. "Chu chiah chu a ni mai," Frank-a chuan a lo ti hmak a.

Barnes-a chu a inseh ruh a, "American ka ni a, thianghlim takin sumdawnna ka kalpui niin ka inhria. Chutiang ka nih laia min beitu chu ka hmachhawn ngei ang. Corb-a leh whisky-a a lei, Indian ho he hmuna an rawn luh hi ka remti hauh lo. Indian ho hrêng riltam a, thinur taka tamchhawla siam mi ka ni lo a, mi dik zawk te, engmah sawi theilo leh che theiloa he ram siamtu pawh ka ni hek lo," tih pahin Frank-a chu a han en a. "Harsatna siamtu chu ka hmachhawn ngei ang," a ti ta a. Frank-a chuan, "A awmzia tur leh thil thlen dan tur chu i hre meuh amaw?" a lo tih chuan Barnes-a chuan, "Thil awm dan chu hria e. Ka hun chanve hi Commanche ho do nan ka lo hmang tawh a. Ka hun hnuhnung chanve pawh hi heng Commanche hnam laktlakloh tak do nan hian ka hmang ang," a ti ta zel a.

Frank-a chuan, "Buaina lian tham tak chawk chhuak thei pawh anih hmel a," a lo tih chuan Barnes-a chu a ding a, a hmel chu thinurna avangin a sen teuh mai a. "Chu pawh nise ka inpeih vek," a rawn ti hmak a. Red-a pawh chu rawn dingin, "Buaina kan hmachhawn dawn ani maithei, engpawhnise heng bawngrualte hi kan vawnhim dan tur hi i ngaihtuah teh ang u," a rawn ti a.

Frank-a chuan hmanlai Indian ho tih ang thoin tunah pawh Indian ho hian thim hnuah ral an do ngai lo tia rawn sawiin, Indian ho hian bawng hi rawn ruk an tum emaw anih chuan hemi ni chawhnu lamah an rawn beih maitheih thu te, sawrkarah pek luh tum pawh nise, a tuk zingah lo chuan zanah an dawnsawn theih loh dan te chu a sawi zel a. Barnes-a chu a bu nghat nghat a. Puan in atanga chhuakin a hnathawktu pakhat chu a'n au a, "Ed, midangte kha rawn hruai lut rawh," a han ti a.

A naute ho pariat lai an rawn punkhawm hnu chuan Barnes-a chuan an hmabaka thil thleng thei tur chu a han hrilh a. Indian ho hmachhawna beih an ngaih maitheih thu a sawi chuan a nauteho chu a tihlimin nui hmel an pu hlawm a. Bawng an tawlh nalamah Indian hoin helai an paltlang apiangin chhiah angreng deuh atan bawng engemaw zat an lo laksak thin a. Sawrkarin Indian ho an hel leh a hlauh luattuk avangin anni ho pawh tha taka pe mai turin an lo ti thin kha an ning tawh em em a ni. Tun hi phuba lak an lo chak thin em emna hun kha inher chhuakah an ngai hmiah a, chuvang chuan Barnes-an an hlawh pangngai la a, amah tinsan mai tura a ngenna pawh an hnar fithla thak a ni.

Barnes-a chuan, "Chuti anih chuan insem darh ula, bawng chu veng leh phawt rawh u. Nitlak ruala chhuak thei nghal turin bawngte chu khalh khawm ang che u," a ti ta a.

Mi dang zawng zawng, Luvie-i pawh tela ran venga an vahchhuah lai chuan chawhnu lam zawng chu Frank-a chu wagon hnuai hlimah chuan kawmawla inkhuhin a mu a. Khawthim hma darkar khat vel a la awm tih ah chuan cook chuan zanriah ei turin a ko hlawm a. Frank-a pawh chu kaithoin a ei hmasaah a tang nghe nghe a. Barnes-a leh Luvie-i te chu hêl hram hram a duh avangin an hliam enkawl lamah rilru a pe lui tlat a. Eitur thlenga chawiin puan in chhunga Gus-a hnen lam chu a pan ta a. A va luh chuan Gus-a chu dingin, a bawp te chu lo khai chhin velin a hmu a. Frank-a thawm a hriat veleh Gus-a chu a inher vat a, thim thet thetah chuan inhmachhawnin an ding dun ran a.

Frank-a chuan, "I ei tur ka rawn la e," a tih chuan Gus-a chu lawm takin a bu nghat nghat a. Frank-an chhuahsan a tum lai chuan, "Frank," tiin Gus-a chuan a lo ko a. Frank-an a ngaihthlak lai chuan, "Hun remchang hmasa bera he ram chhuahsan tura i thu min pek kha a la ding reng em ni?" tiin a zawt a. "A la pangngai reng," ti chauhin a chhang a. Gus-a chuan, "Zaninah hian ka chhuak ve thei tawh mai ang," a lo ti a. "Eng nge i nâk hliam kha a an tawh a?" tia a zawh chuan Gus-a chuan, "A ziaawm tawh a, sakawr chungah pawh ka chuanpui thei tawh ang. Chhuah te pawh ka duh tawh a ni," a ti zui a.

Frank-a chu a bu nghat a, meichhemna lam chu a pan nghal a. An thiante thlãk turin midang zawng an chhuah lai chuan Barnes-a leh Luvie-i te, Red-a leh Otey-a te chu zanriah ei tur chuan an rawn thleng ve chiah a. Luvie-i chuan Frank-a chu a en ngam lo. Engmah pawh sawi lovin, lungngai hmel pu chungin, Red-an a tanpuina te chu hmel ngui tak chungin a pawm ve mai a. Barnes-a chuan thlenga a eitur dawhin Luvie-i chu a rawn pan a, chaw chu an ei dun ta a. Frank-a chu a bulah chuan lokalin a rawn kûn deuh a, "Sakawr min lei tir thei angem?" tiin a rawn zawt a.

Eitur hmuam tun chung chuan Barnes-a chuan, "Theilo ang. Pakhat chu a pekin ka lo pe ang che," a lo ti a. "Gus-a tâ tûr ania. Texas lamah hawn a tum a ni," Frank-a chuan a ti mai a. Sakawr enkawltu chu piah deuhah chaweiin a lo thu ve a. Barnes-a chuan, "Sakawr pakhat kha saddle te han bel rawh," tiin thu a pe nghal a. Frank-a pawh kalsawn maithei anih laiin Gus-a hi a chhuak ngei em tih hriat a duh vangin a la awm a. Chutihlai chuan Gus-a chu a thleng ruak nen lo chhuakin a thim lai deuha ding chungin coffee te a in a. Frank-a chu a thlir vang vang a.

Sakawr enkawltu chu sakawr pakhat rawn kaiin, saddle hlui deuh tawh tak a rawn bel a. Eitur te pawh saddle hnunglamah chuan a rawn khai nghal a. Frank-a chuan Gus-a chu sakawrah chuan a hlangkai a, a nâk nâ lo chhuak avanga tê chhuah mai hlauin Gus-a chu a in pet ruh hle a. Mahse saddle-a a thut fel hnu chuan a nâk hliam nâ pawh chu a reh ve leh ta mai a. "Kal chhuak thei dawna i la inhre lo anih chuan kan zingah hian i la awm thei ania," Frank-a chuan a han ti a. "Ka ti thei mai ang," Gus-a chuan a lo ti a.

Frank-a pawh hnungtawlhin, "A that chu. Ka thutiam kha a la ding reng e. He ramah hian i hmel ka hmu leh anih chuan khawngaihna nei miahlo in ka nawp tawh ang che," a han ti a. Gus-a pawh a bu nghat nghat a. Frank-a chu ngun takin a en a, a hmui a liak lap lap a. Chutah Frank-a en leh pah chuan, "Kei leh he Samsena hi kan muhil theilo a," tiin Gus-a chuan, "Kan titi a, zawhna thenkhat min zawt nghe nghe," a han ti a.

Frank-a chuan hmel nûr deuh chung chuan Red-a chu a en vat a. Red-a chuan Gus-a chu a lo en reng a. Gus-a bawk chuan, "Nang hi Morg Wheelon-a partner chu i lo ni maw?" tiin a zawt a. Muang charh hian Frank-a chuan, "Ni e," a ti a. "Mi pakhat talin Morg-a an hmuh tum khan nasa taka inbei leh a bân pawh a tliak a ni tih hi an hrilh tawh che em?" a han ti a. Frank-a chu a bu nghat a. Gus-a chuan, "An insual alawm. Corral pawn, an hmuhna hmunah khan," a ti a.

Chiang takin Frank-a chuan, "Engtin nge i hriat a?" a lo ti thuai a. Gus-a chu a nui deuh sak a. "He thu hi i hre duh nge duh lem lo?" tia a zawh chuan Frank-a chuan, "Han sawi nghal teh," a lo ti vat a. "Morg-a khan hepa hi a hnek thlu a, corral hungna thingah khan. Chupa spur chu gate ban, cedar thingah khan a tlukna lamah a ti bûr a. Thawh a tumna lamah a spur chu a bung ta a ni. Morg-a khan a thawh dawn lamah na tawk a a lo hnek avangin a lum tawp tawp a. Sakawr dinna hnuaiah a lum lut a. Chu sakawra chuanga chuan shotgun lo kengin a malah chuan a khai mai a. A sualpuipa chuan chu shot gun chu a la lawk a, Morg-a kha a kap hlum ta a ni," a ti ta zel a.

"Chupa chu tunge ni?"

Gus-a chuan a lu a thing mai a. "Frank, awmzia a awm lovang. Ka sawi chhuah chuan ka lu-ah hian silaimu lutin ka thi mai ang," tiin a ngawi vang vang a. Frank-a chu en chung hian, "Ka chungah i tha hle mai. Min châwmin min enkawl a, kal chhuah ka duh hunah sakawrte min la pe ta zel a. Duh la chuan buaipui ngai loin min kap hlum thei reng a ni. Ka hrilh theih chin chu ka hrilh tawh che a, a bâk hi chu lo chhunzawm ve tawh mai rawh," tih pah chuan a then sak a. A pheikhawk lehlam chu Frank-a hmaah chuan a rawn lek a. "Ka spur kha han endik hmasa phawt teh. Hnunglama min rawn kah mai chu ka duh hauh lo ania," a han ti a. Frank-an a spur a en hnu chuan Gus-a chuan sakawr a inher tir a, a ke lehlama spur chu a entir leh a. Chumi hnu chuan Luvie lam hawiin chibai buk nan a lukhum hmawr a khawih zauh a, chhimlam pan chuan a sakawr chu a kaltir ta nghal a.

Umzui tuma a pên lai tak chuan Red-a chuan Frank-a bânah a lo vuan chat a. "Frank, engmah a sawi lo ang. Nun chân ai chuan ngawih a chuh a tul alawm," a lo ti a. "Mahse engtin nge chutiang hmu theia a lo awm ve ngawt?" tiin Frank-a chuan, "Chutah chuan a awm ve a. Tu hnena thawk nge anih? Corb-a hnenah ani lawm ni?" a tih chuan Red-a chuan, "Heng mite hnenah hian a thawk ve ve tawh. Corb-a leh Milabel-a hnenah," tiin a lu a lo thing a. Frank-a chuan Red-a chu a en ran mai a. Hriatloh ai chuan a bul tanna tur a hre taah ngaiin a lungawi rih ta a. Red-a kut chu thing thlain a sakawr lam chu a pan a, a chungah chuangin Gus-a kal lohna lamah Frank-a chu a kal ta a. Bawngrual, khalh mai theih tura an buatsaihna lamah chuan a kal ta zawk a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 2nd, 2018, 5:45 pm

WAR ON THE CIMARRON
Bung - 15

Chumi zana bawngrual khalh chu hna fe a tling a. Bawngrual tuihal, an hma lama tui awm vanga chak taka kalte chu khalh a harsa lo. Mahse heng bawng te hi Texas atanga lo kal, an chawlh rei tawh avanga thau tha tak, mahni tlat tlata duh duha an tlatna a rei tawh avangin an luhlulin thunun leh khalh khawm an har hle mai. Chuvang chuan, Chisholm lam pan tura khalh khawm tur chuan tha fê an sêng a ni.

A hnu lamah chuan thunun an awl ta deuh bawk a, a vengtu cowboy ho te pawh hlim takin an awmna tur theuhah chuan zai chungin bawng chu an khalh ta a. Frank-a pawh a chângin Red-a bulah a kal a, a chângin Otey-a bulah. Wagon-ah chuan ei tur an phur bawk a, Luvie-i pawh a chuang ve nghe nghe a ni.

Khaw ên hmaa hlauhawm thleng thei chu Corb-a hote zinga mingo hoin an beih a ni. Mahse chu pawh chu a rinawm lutuk lo, Corb-an atthlak takin chutianga a beih duh a rinawm loh. Chutiang anih chuan tiin thil dang, Gus-an ngaihtuah zui tura a hnutchhiah lamah khan a rilru a pe ta a. Naktukah, Barnes-a bawngrual him taka an thlenpui hnuah Gus-a in sawi, kang ral ta lamah khan a kir leh anga, spur bung, thinga tâng chu a va zawng leh ang. Red-a leh Otey-a te chu pawisawi lo leh zalen taka khawsa thei an nih avangin sipai hmunah leh agency lamah kalin a tul dan ang zelin engkim an ti thei.

Zing khawvar hma darkar khat velah chuan Frank-a chuan thim laiin an beisei an thleng hman dawn lo tih a hre ta. Hnim a duah tha a, bawng lahin peh tumin luhlul an chhuah a, pên an tum sek bawk nen, thunun an harsa leh ta deuh. Khua a lo var tan tihah Frank-a chuan agency atanga an awmna chu a la hla viau tih hriain, anmahni bei thei hlauhawm a la thleng thei tih a hre tlat. A sakawr rahchhanah chuan ding sangin bawng khalhtu ho hnenah chuan chak zawka an bawngte chu khalh turin a au hlawm a. A hnu lawkah chuan mual pawng an pan chhoh lai chuan tlang dunga sakawra chuang mi enge maw zat a hmu ta. A rilru a ngui nghal ruih mai. Zing khaw eng tirah chungho chu ngun takin a en a, Indian ho ngei nia a hriat hnu chuan Red-a hmu turin a tawlhkir ta a.

Red-a pawh chuan chung ho chu a lo hmu ve a. Phûr teh ual loin Frank-a chu a lo dawngsawng a. Rang takin Frank-a chuan, "Sawng ho lamah sawn kalin tih dan tur ka va ngaihtuah dawn a. Ka chungah engpawh thleng se bawngrual hi inthen darh loa a huhoa khalh hram hram in tum dawn nia. Ding loa a chak thei ang bera khalh zel tur. Chu thu chu lo hriattir nghal ang che," tiin thu a pe a. A sakawr chu chak vakloa tlan tirin bawngrual hma tawngah chuan a kal ta a.

Cheyenne Indian ho chu sawmhnih vel lai an ni. Chem sei leh phaw te, sairawkherh leh thal te an keng fur a. Thenkhat chuan puak rang silai an keng a. Hetih hun lai hian silai ken mai mai hi sipaiin an khap nghe nghe a. Bawng kalna tur kawng sirah chuan lo intlarin, ding turin zaizirin an lo phar a.

Frank-a chuan bawngrual hruaitu, a chal ber lam chu a pan hnai a. Indian ho awmlohna lama kal turin bawng chu a sakawr chuan a nawr ta a. Indian hoin bawngrual chu tih din a tum lo tih an hriat chuan an au ta chul a. Bawng chal leh a hruaitu atang chuan Frank-a chu inla hrangin, Indian zinga an hotu ni awm tak lam pan chuan a sakawr chu a tlantir ta a. A bula awm bawng hote pawh chuan an pu thu hmu ni awm tak hian Indian intlar lam pan chuan engemaw zat chu an tlan ta a. Indian ho chu an mangang tan a, an rawn chil buai hlauin kawng an lo kian titih a.

Frank-a chuan an hotu ber lam panin a sakawr a tlantir lai chuan Red-a leh Otey-a te che vel chu a mitsir a. Bawngrual pen darh tum chu hneh takin an lo buaipui tih a hmu a. Chutihlai chuan bawng sawmhnih chuang zet hian Indian ho chu an lo kal hual titih reng mai a. Frank-a chuan Indian pa hnenah chuan Commanche tawng hian, "Kal kiang nghal rawh," tiin thu a'n pe a. Chu Indian pa chuan vin zet hian, "Bawng kha ti ding rawh. Sa kan mamawh alawm," a lo ti tuar tuar a.

Frank-a chuan, "Hengho sa hi chu ka pe lo ang che," a ti hmak a. Chu Indian, an hruaitupa chuan bawng hruaitu leh an hotu ber a inkal pelhtir tawh avangin a thunun thei tawhlo tih hriain hla deuha Indian pakhat chu a va au a. Chu Indian chuan a sakawr chu pawt herin, bawngrual hruaitu lam pana a tlantir chu Frank-a chuan a lo hmu a. Tun hi chet hun a ni tih a hre ta.

Frank-a chuan a kut hnunglamin na tawkin a bula Indian pa chu a hmaia ben pah hian, "Kal kiang nghal rawh," a'n ti tuar a. Engkim a puak darh ta a ni ringawt. Indian ho chu an khêk chêl chûl a, pakhat phei chuan silai a hmet puak a. Amah hnaih bertu Indian chu panin Frank-a chuan a pistol a phawi a, a lu ah chuan chhut a tum a. Mahse chu Indian chu lo kunin silai kawm chu a dârin a dawng ta zawk a. A hnung hla deuha Red-an bawng rual tihthaiha tlantir tumin silai a hmeh puah thawm chu a hria a. Frank-a chuan a pistol kawm chu tiang ang deuha hmangin Indian awmkhawmna lamah chuan tlan lutin a va khâwng ta zawt zawt a. An inkar chu a zim em avangin Indian ho chuan an thal leh silaite chu an hmang tangkai thei der lo.

Tunah chuan bawngrualte chu hmalam panin an tlan tan ta. Chuti anih chuan engti kawng mahin bawngrual chu khalh hran theih an ni tawh lo ang. Chutihlai chuan Indian pakhat hian a hnunglam atangin Frank-a chu a rawn bawh a. Mahse Frank-a chuan a pistol-in chupa beng zawnah chuan a kâp a, chu Indian bân, Frank-a a kuahna chu a zawi hnawp a. Chutihlai chuan a hma lawka Indian pakhat thinrim lutuk chuan a thal a'n kuai a, Frank-a chuan a sakawr chu chupa lamah chuan tlantirin hmun leh hmunah a'n kap leh a, chupa chu a sakawr atang chuan a leng thla lawp mai a.

Bawngrual tlan chu a chak tial tial a, Indian ho pawh an talbuai tawlh tawlh a. Hla deuh hleka Indian pakhat chuan a thal ngul kuaiin Frank-a lam hawiin thal a rawn thlah a, Frank-a beng bulah chuan a rawn ving fia mai a. Rang tawkin chupa chu Frank-a chuan a'n kap a, a sakawr chu bawng pathum hian lo bawh buaiin a sakawr chawp chuan an chil ta nawk nawk a.

Frank-a chu tunah chuan bawngrual sirah inthiarfihlimin, a sakawr chungah bawk phek thlar
chungin bawngrual tlan rual chuan a tlan ve ta a. A khat tawkin silaimu in a rawn umzui a, a bul lawka bawng chu a rawn fuh a, a pai tawng tawng a, a tlu ta nge nge a. Frank-a chuan a'n thlir kir a, Indian ho chu bawngrual tlan dur dur laka him tumin an lo buai hle tih a hmu a. An zinga a zatve emaw lek sakawrah chuan an chuang tawh a. A bak zawng sakawr chu chuangtu awmloin bawng zingah chuan an tlan lawp lawp a. Chak zawka tlantir tumin hnunglam atang chuan Otey-a leh Red-a chuan a vanvawr zawngin silai an hmet puak chhen bawk a.

Frank-a chuan bawngrual hmalam chu panin a hruaitu deuh ber lam chu a pan a. Chutihlai chuan sir lehlam atanga rawn tlan Otey-a chu a va hmu a. Otey-a chuan a rawn au a, mahse chhangloin Frank-a chuan Otey-a chu a hui ringawt a. Bawngrual pawh an tlan zawih tak deuh hnuah chuan anni pahnih pawh chu bawng hmalamah chuan an tlan dun thei ta a ni. Frank-a chuan Otey-a hnenah chuan, "Bawng hralhna gate lam panin tlan la, gate lo va hawng rawh. Chulam pan tur chuan bawngrual hi kaltir ka han tum ange," tiin thu a pe a.

Otey-a chuan bu nghat chungin a sakawr chu a tlantir nghal a. Frank-a pawh chuan bawng hmahruai lam chu panin a tlan rualin a sakawr chu a tlantir ta a. Otey-a tlan lohna lamah, bawngrual tlanna dinglamah Frank-a chu a tlan ve ta thung a. A hnunga bawngrual chuti zata tam, engmahin a dan rualloh a rawn tlan te chu a lu chunga khandaih vir zawk zawk ang maia hlauhawm an ni. A sakawr han tlu palh ta se chung bawng ke sang tam tak chuan an rawn chil pherh vek dawn. Bawngrual tlanin vaivut khu a siam nasat lutuk avangin a hnunglam thui tak a hmu theilo chungin chung bawngho chuan an hmahruaitu kalna lam kha an rawn zui mai turah a ngai hmak a. Barnes-a bawngrualte chu tlan darh loin a huhoin an tlan zel niin a hria a, a lawm hle a ni. Hmarlam lui kaina thlen hma phaizawlah an tlan ta a. Lui kam veilam pangah chuan Darlington khua a hmuh theih a. Hla deuh taka bawng an pek chhuahna kawngkharte pawh chu a hmuh theih ruau ruau tawh. Frank-a chuan an hruaitu ber bawng chu a pan lam sawh sawn a tul vangin a pan hnai a. Phâwk hrû leh hlauhthawn nei ni awm taka a tlan chu lui thlengin a khalh thla a. Luikam vaivut dur hmun an thlen chuan bawng chu an tlan chak thei ta vak lo. Lui an kânna kam lehlam chu a lo awih deuh hlek a. A hruaitu chu a tlân lâwn zo dawn lo emaw tih turin a kotlangah chuan a'n ding deuh a. Chutihlai tak chuan Frank-a chuan a lu bul deuhthawah a pistol chuan a va kap ta a. A mangang hlau chu namenloa insang phekin a lim tlang ta puat puat a. A hnunga rawn zuitute pawh chutiang chuan an tlân lawn ta sung sung mai a ni.

An hruaitu ber chu zuiin ram dang pan ta loin corral lam pan chuan an tlan ta hum hum a. Frank-a chuan Otey-an corral gate paruk lai a hawn chu a han hmu a. A la hlat deuh avang leh ram dang pana an tlan a hlauhawm avangin Frank-a chuan a pistol chu a hmet puak leh thawt thawt a. An tlan dana lungawi tawkin a pistol chu a paiah a khung a. Bawng rual nawlpuiin an rawn nanchin hmaa inthiarfihlim tumin a inbuatsaih ta a. Bawngrual nanchin ai maha a inthiarfihlimna chhan chu sipai ho hmuh hmaa a insaseng a tul vang a ni. Mahse vanduaithlak takin a sakawrin khuar a dai a, a thawh mai theihloh avangin bawngrual chuan an rawn nangching ta. A sakawr a thawh a, kawng dang pana kal a tum chu a tih hleih theih ta vak lo.

A sakawr chu theihtawpin nawr chak han tum thin mah se bawngrual kara tlan chhuak turin tha a neih tawh loh avangin bawng rual chuan corral lam pan chuan a kal ve ta nawk nawk a. Corral-a an luh hnu pawh chuan Frank-a chuan a hungna lehlam panga lawn liama inthiarfihlim a la rilruk a. Mahse bawng tlim hmur karah a sakawr chu nawr kal theih pawh anih tak loh avangin a lukhum chu a hmalamah kuai kunin, bawng khalhtu pakhat anga inlantir tumin leh bawng te chu thunun tum niawm takin a che vel a. Chutihlai chuan corral hungna tlang pheiah chuan sipai ho khat hi an rawn ding ta fur a, chung zinga an hotupa ber chuan, "Khai
le, Kristian, tunah chuan kan dang chêp ta tlat mai che, tihtur dang i nei ta silo a, i silai kha phawi la, leiah khan paihthla rawh," tiin thu a rawn pe ta. Sipai dangte chuan rifle-in an lo tin thap tawh bawk a. Frank-a chuan duhthlan tur dang a nei ta lo.

Chawhnu herah chuan Cheyenne Indian pasarih ngawt bawng tawlhtuten an that tih chu a than chak em avangin helai chhehvela mite hi chuan an hre deuh vek tawh a. Chuvang chuan Darlington khaw kawtthler leh sipai awmnaa Indian hote chu dawithiam thil tih ang maiin an reh duak mai a. Darlington khawchhunga mite pawhin thil awmzia thlirin an in te an kalh a, sipai kulh chhungah sahimna zawngin an kal deuh vek bawk. Lui mawng lama Indian ho camp-ah eng thil nge thleng, engtin nge an awm tih hre châk hle mah se mingo tan ngaihven ngam chi a ni tawh lo.

Luvie-i leh Red-a te chu Fort Reno-a an luh ve a rem vak loh avangin Barnes-a mi chhawrte nen Barnes-a in lamah chuan an kir leh a. Otey-a leh Barnes-a te erawh commandant hmu turin an kal thung a. Chutianga an thang hlan chuan Red-a chu Barnes-a kawtah a vei tawn sek a. Meizial a pet khu deuh reng bawk a. Chawhnu her, Barnes-a leh Otey-a te an rawn thlen chuan an hmel atangin Red-a chuan a thiante pahnih thil tawn chu a lawmawm lo ni ngei turah a lo ngai a. Luvie-in an zavaia eitur a buatsaih eiin chokaah chuan an awm khawm a. Barnes-an a ei mek lai chuan thil awmdan Otey-a chuan a han hrilh hlawm a.

"Lung in chhungah, vengtu panga ngawt din hual chhungah Frank-a chu an dah a. Zanin zan laiah chuta tang chuan a rukin an la chhuak ang a, Kansas khawpuiah an hruai dawn anih chu," a han ti a. Luvie-i chuan, "Kansas-ah maw? Engvangin nge an hruai ang?" a lo ti vat a. "Thubuai sawi turin anih ka ring. Chubakah Indian ho laka dah bo an tum vang pawh a ni thei," tiin Otey-a chuan, "Thubuai dang tam tak an awrhtir ngei tawhin ka ring," a han ti zel a.

Luvie-i chu khawsak rêlna lamah a phei vat a. A phei hmaa a hmel dâng sawp sawp te, a heh sai der der te chu Red-a chuan a lo hmu reng mai. Thawmhnaw var lam inbelin pawnlamah chuan enghelh neilo ang takin lang mah se Red-a chuan Luvie-i chu chutiang ani lo tih chu a hrechiang hle a ni.

Barnes-a tihngaihna hrelo thinur chuan vawilehkhatah a chawei thleng chu a paih ri bawl a. Lungawilo tih hriat tak hian, "Ka bawngrualte chân ka hlauh luattuk vanga hetianga Frank-a a awm ta anga ka ngaihtuah hi chuan ka nghawng tan tak hi ania ka duh ni. Ti tak hian mahni hma siallo ila chuan hetiangin ani hi a awm hauh lo ang," a han ti a.

Chawei dawhkan lehlama thu Red-a chu a ngawi tlat a. Otey-a chuan Red-a chu a'n en a, tun tumah hi chuan huatna mitin Otey-a hian a en ta bik lo. Frank-a an manna hian an inkarah inhriatthiam tawnna a rawn thlen ta a ni phawt ang.

Mei chhemna bula awm Luvie-i chu rang taka rawn inherin, "Enga ti nge engmah tilo a hetia kan thut reng ni? Helaiah kan thu bial a, engmah kan ti bawk si lo," a rawn ti chhuak phawng a. Ngui deuh tak hian a pa chuan, "Eng chu nge kan tih ang?" tiin a lo zawt a. Aw rawl ring deuh hian Luvie-i chuan, "Ka hre nang! Mahse ka pa, min han en hlawm teh. Frank-a hian heti tak hian ti lo se i bawngrual zawng zawng i chân vek dawn a. Red, nang pawh hi hetiangin Frank-a hian chhawr lo che se chuan cowboy laktlakloh tak i la ni zel ang. Otey, nang pawh inbeihnaah khan Frank-a khan i lu ah chhu thlu loin, in atang khan hruaichhuah ni ta lo la, i thi chiang ngawt ang. Kei pawh chutiang tho chu ka ni," tiin a meng kual ralh ralh a. "Chuti chung chuan, buaina a tawh mek lai hian engmah kan ti theilo chu a ni a," a ti ta a.

A pa chuan, "Sipai kut atangin i la chhuak thei miau silo a!" a lo ti a. Vîn that hian Luvie-i chuan, "Enga ti nge nang tal hian i lakchhuah theih loh?" a lo ti that a. Reilote chhung chu tumah an tawng lo. Beiseina nei ni awm takin Red-a chu a rawn meng a, mahse a reh leh mai a. Dam thlup hian Barnes-a chuan, "Mami, awmze neiin thu sawi teh khai," a rawn ti a.

Red-a mitmeng kha Luvie-i chuan a lo hmu a. Red-a chu thoin, pindan hnunglam kawngkaah chuan a chhuak ta a. Step chung berah chuan thu in khaw lam chu a thlir vang vang a. Luvie-i pawh chu lo chhuakin a bulah chuan a rawn thu a. Ngawi renga an thut hnu chuan Luvie-i chuan, "Red," a han ti a. Red-a chuan amah chu a lo en vat a. "Khatiang thu ka sawi lai khan i hmela engemaw lo lang kha ka lo hmu a," a han ti a. "Eng i sawi laiin maw?" a tih chuan Luvie-i chuan, "Red, thup bo tum duh suh. Remruat dan engemaw i hria ni ngeiin ka hria. A ni lo maw?" a lo ti a. Red-a chuan muangchang hian, "Âtthlak angreng tak a ni," a lo ti a.

"Min han hrilh teh," Luvie-i chuan a ti a. Red-a a ngawih leh tak tlat avang chuan a bânah chuan va chûlin, "Aw Red, tanpui theih che ka va duh em! A chhuah theihna tur hian engemaw tal ka ti ve tur tih hi min hriatpui lo em ni?" a ti ta a. Red-a chuan, "Ka hria e, hetah hian min lo nghak rawh," a ti ta a.

Red-a chu chokaah a lut a, Otey-a a va bia tih chu Luvie-i chuan a hre thei a. Chumi hnu chuan Otey-a chu lo chhuakin sakawrah a chuang a. Khaw lam pan chuan a kal ta nghal a. Red-a pawh chu a lo chhuak a, Luvie-i hnenah chuan, "Lo kal ve nghal rawh," a rawn ti a.

An sakawrah chuangin Darlington khaw lam panin an chhuak ta a. Khawchhungah kal tlang zelin, Edith Fairing-i in bul an thlen thlengin an kal zel a. A in an va thlen dawn chuan Edith-i pawh corral bula a sakawra saddle a bel lai chu an va hmu ta a. Anni pahnih a hmuh veleh a sakawr hrui thlah pah chuan Edith-i chuan, "Red, Frank-a an man tih hi a dik em?" tiin a lo zawt vat a. Red-a chu a bu nghat a, engmah sawi zuiloin Edith-i chuan Red-a chu a en vawng vawng a. Chumi hnuah chauh chuan Luvie-i lam hawiin a han chibai a. Red-a chuan a saddle dawmchhan dawma bawk deuh hian, "Kal chhuah i tum em ni?" tiin a zawt a.

"Barnes-a in lamah Frank-a an man tih hi a dik em tia zawt tura kal ka lo tum mek a ni," tih pah chuan, "Red, tih theih te hi ka nei ve reng em le?" tiin a zawt zui a. A zawhna tak chhang mai loin Red-a chuan, "Indian ho hel tumin an inbuatsaih tih bawr vel hi eng nge i rin dan?" tiin a han zawt a. Edith-i chuan, "Ka hrelo Red. Engvangin nge min zawh?" a ti a.

Red-a chuan a lungngai hmel chu chik takin a lo en a. Pawnfen dumpawl dal lam deuh a feng a, kawr sen a ha bawk a. Red-a chuan Indian ngainat zawng tak thawmhnaw a inbel tih a hriat vawikhatna a ni. Chu chuan a rilrua thil awm sawi chhuah chu a ti phûr zual a. "Cheyenne ho camp lamah hian mingo kal ta se engtin nge an lo tih i rin le?" tiin a han zawt a. Edith-i chuan Luvie-i melh pah chuan, "A mihring azir a ni ngei ang," a lo ti a.

"Entirnan, nangmah hi," a lo tih chuan Edith-i chu a nui ta a. A nui ri a hriat vawikhatna a la ni. Red-a chuan a lawm hle a. Edith-i chuan, "Red, ka chungah engpawh a thleng thei. Amaherawhchu, heng ho zingah hian ka seilian a. Cheyenne leh Arapaho pasalthate kârah ka lâmin an tualzawlah te ka infiam thin. Ka hah deuh hnuah an bûkah lûtin an pasaltha leh upa deuhte bulah ka hahchawl a. He rama an luh hma chanchinte ka zawtin min hrilh thin a ni. Ka pa thiante vek an ni a. Ka chungah engmah a thlenglo ang. Engvanga min zawt nge i nih le, Red?" tiin a zawt a.

Red-a chuan a suangtuahna zulzui deuh vek Edith-i hnen atanga a hre chungin pehhêl deuh tak hian, "Anih leh Stone Bull-a hi lal tha a ni em?" tiin a zawt leh a. Edith-i chuan, "A tha ber," a lo ti vat a. Red-a chu a ngawi leh ta vang vang a. Edith-i ngaih a tha lo hman tep a. "Red, engtizia nge a? Eng nge ni ta ngai a?" tiin a lo zawt chûl a. Red-a chuan, "Anih leh a awmnaah chuan zanin hian va kalin i rualin Barnes-a inah hian a lo kal duh angem le?" tiin a zawt ta a. "A lo kalna chhan tur chiang taka ka hrilh phawt chuan a lo kal duh ngei ang," Edith-i chuan a ti ta a.

"Frank-a chung thu a ni," tiin Red-a chu a then sak a. "Ka luvun a lo hih mai hi hlau lo ila chuan keimah ngei kal ka duh a ni," a han ti a. Edith-i chuan, "Red, buaina nasa zawk a chawh chhuah mai te hi thil hlauhawm a ni thei angem?" a lo tih chuan Red-a chuan, "Stone Bull-a thusawi in a hril mai dawn alawm," a lo ti hmiah a.

Hnuailamah chuan kunin sakawr hrui chu a man a, Edith-i leh Luvie-i te inbiak mawlh mawlh lai chuan Edith-i sakawr saddle chu a lo bel mawlh mawlh a. Edith-i kalsana Luvie-i nen Barnes-a in lam an pan lai chuan Red-a chu a ngawi tlat a. Red-a rilrua awm hriat tuma a beih pawhin Red-a chuan lu a thin san mai a. "Zaninah Stone Bull-a ina a rawn kal huna a in tur thingpui gallon hnih vel a tam bucket-ah i lo peih diam tur a ni a, engmah sawiloin i lo ngaithla ringawt ang," tia hrilhin Red-a chuan chu in chu chhuahsanin Darlington khaw lam a pansan leh ta a.

Otey-a leh Red-a te chuan tlai tawh takah zanriah an ei a. Hetih lai hian Barnes-a chu a awm ve lo. A bawngrual hralhin sipai quartermaster nen an buai chawhnu thak a ni. Red-a che vel avangin Luvie-i rilru a buai hle a. Ngaihtuah loh a tum pawhin a paih bo thei mai lo a. A rei deuh hnuah a reh ve mai a beisei a ni.

Thim hnu deuh tak, Otey-a leh Red-a ten nghakhlel taka chawei dawhkan kila an thut lai chuan hnunglam kawngkhar kik ri an hre ta. Luvie-i chu a dawngsawng turin a kal vat a. Zau taka kawng a va hawn rual chuan Indian pa hi a rawn lut a, Edith-in a rawn zui lut nghal a.

Tar lam tawh, thau deuh, mahse mahni inzo tak, a hmel landan atanga dehkhirh leh nelawm lemlo tak a ni. A thawmhnaw inbel, kawr nghawng neilo bâl tak leh a kekawr hlui tawh tak te chuan a zahawmna a paih chuang lo. Edith-in a inhmelhriattir hnu chuan Otey-a leh Red-a te chu chibai a bûk lawp lawp a. Indian ho tih danin Luvie-i erawh chibai a buk ve lo.

Chung mi pathum te leh Edith-i te chu an inkawm tan ta. Red-a hian Indian ho kalhmang a hre hneh hle a. An inbiak hun chanve zet chu inhmelhriat tawnna leh intih tlangnel nan hun hman a ni thin a. Titi phungleng sawia an inkawm lai chuan Luvie-i chuan thingpui a rawn thlit sak reng a. An in in tlai thawkhat tihah chuan Red-a leh Otey-a te, Stone Bull-a te chuan thupui an vai tan ta. Edith-in an tawng chu a lehsak zel a. Edith-i hian Cheyenne tawng a thiam em avangin a chang phei chuan Stone Bull-a hian Edith-i chu enin a nui hial thin a ni.

He lal putar tawh tak, sam pawh tuak nual tawh hian Edith-i hi a ngaisang hle tih a che vel atang chuan Red-a chuan a lo hmu kiau mai a. Muangchangin, Indian ho ngaihtuah zawng tak, ram vah chungchang te, ram sakawr man thu te, bawngrual chung chang leh whisky tawlhruk thu te an sawi hnu chuan Stone Bull-a chuan whisky-in a mite a tihchhiat thu te a sawi ta hial a.

Red-a chuan an thupui bera luh a hun ta tih hriain Edith-i hnenah chuan, "Chutianga harsatna an chunga thleng chu an thiam loh ni loin keimahni thiam loh a ni a. A mawhphurtu pawh mi pakhat a ni tih han hrilh teh," a ti ta a. Edith-in a hrilh chuan Stone Bull-a chu a bu nghut nghut a. Red-a chuan Corb-a sualna dangte pawh chu a hrilh zui zel a. Chung zinga pakhat chu a thianpa ngei, Morg Wheelon-a partner, Frank-a chunga diriam taka kut a thlakna hi a ni. Tunah hian Corb-a hian Indian ho phatsanin, Indian thenkhat zu a hrai ruiin mingo bawng vengtu te a tibuai a. Tunah tak phei hi chuan chu suahsual rawngbawlna avang chuan Indian zawng zawng leh helaia mingo zawng zawng hian indo an tin tuah ta hial a ni, tia a sawi chuan Stone Bull-a chuan, "Kum lama upate hi chuan indo an duh lo a, mahse naupang seilian ho hian indo hi an châk zek zek a ni," a lo ti ve bawk a. "Zaninah pawh hian chung ho chu indo châkin an lâm mup mup a. Zan hnih zan thum hnuah chuan an thisen a lum hle tawh anga, an khuang vuak pawh a ring hle tawh ang. Chutih hunah chuan indo an tintuah tak tak tawh ang. Chu chu a thleng thei a, a thleng lo thei bawk," tiin a chhunzawm zel a.

Red-a chuan Edith-i hnenah chuan, "Chu chu thleng se a duh reng em tih han zawt teh," a lo ti a. Stone Bull-a chuan a duhloh thuin a chhang nghal a. "Anih leh chu thil thleng thei chu tih tawp a duh em tih han zawt teh," a tih chuan Stone Bull-a chuan, "Duh e," tiin a lo chhang vat a. Red-a chuan phur takin Stone Bull-an Edith-i a biak lai chuan a lo en reng a. "Edith, fimkhur takin che rawh se tiin hrilh rawh," a ti a. Thupui ber chu khûn khán takin an sawi zui ta zel a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 2nd, 2018, 5:45 pm

WAR ON THE CIMARRON
Bung - 16

Zanlaiah chuan a tânna kawngkhar kalhna tala lian tak rawn inhawng thawmah Frank-a chu a harh ta a. Kawngkhar a rawn inhawng a, khawnvar eng lo lut chuan Frank-a khawhmuh a tibuai a. Zawi fiah tak si hian, "Kristian, lo chhuak nghal rawh. Kan kal tawh dawn," a rawn ti a. "Khawiah nge kan kal dawn?" tia a lo zawh chuan, "Kansas khaw lamah," ti chiahin chhân a ni.

Frank-a chu khum atanga thoin a pheikhawk te a bun nghal a. Tunah chuan Kansas lam an pan pui dawn ta a ni. Vawiin tlai lamah khan Indian ho hel tum anga an sawi te a hre nual a. Chuti anih chuan eng ang thubuai dangte nge an awrhtir ang tih Frank-a chuan a ngaihtuah a. A enga pawh chu ni ta se sawrkar hi a chungah an ngilneih viau a ring lo. A tirah whisky tawlh ruk avanga thubuai siam sak a ni a. A hnuah tualthah thubuai awrhtir a ni leh a. Tunah hian sipai officer tihbuai thu te, sawrkar sakawr ruksak thu te, Indian ho hel tura fuih thu ah te leh Cheyenne Indian, sawrkar thuhnuaia awm mi pasarih ngawt thah thu ah te thubuai dang tam tak awrtir theih a ni ta tlat. Officer pakhatin a awmna pindan atang chuan a rawn hruai chhuak a. Pawnah chuan uniform inbel mi sawm chuang lai lo ding khawm hi a hmu nghal a.

Chu officer chuan Frank-a vengtu hnenah chuan, "He kawngkhar hi tha taka kalh lehin amah la awm ang chiahin ngun takin i veng tur ani tih hi theihnghilh hauh suh. Indian hoin pen sawmnga aia hnaiah helai hi an rawn thleng tur a ni lo. Amah tlawh tum pakhatmah remtih hauh loh tur. I hrethiam maw?" a han ti a. A vengtu chuan khawng takin, "Ka pu, ka hrethiam e," a ti thak a.

Khawnvar tih mih a ni a. Kawngkaa eng lo lut chuan Frank-a khaw hmuh a tibuai vek a. Thim zingah chuan Frank-a chu a chuanna tur sakawr bulah hruai a ni a. A chunga a chuan hnu chuan post chu chhuahsan turin sakawr dahna in thim rup te chu kal pelin phaizawl an thleng ta a. Hrelawk an awm anih loh chuan helai an chhuahsan thu hi thurûk tawp khawk a ni. Sipai hmun an pelh fel chiah chuan an ding det a. Frank-a chuanna sakawr hruiah chuan hruizen dang thlunzawm a ni a. A tlanchhiat thulha pawh dinna tur a ni.

Amah hruaitu zinga hotu ber, Captain chu a bulah rawn kalin, "Tlanchhuah te i tum hlauh anih chuan Kristian, i thi a ni mai. Court-in nangmah khaihlum tura rorel buai kha kan pumpelh dawn tihna a ni mai," a han ti a. Frank-a chuan engmahin a chhanglo a, chupa chuan kal turin thu a pe ta hlawm a. A chak thei angin, thawm dim em emin an tlan ta a. Kawng pangngai zawhloin hmar lam an pan a. Tum hnih tum thum lai anmahni hruaitu Cheyenne halfbreed chuan chu officer chu a rawn bekbawr a. An inbiak apiangin an pan lam an thlak ziah a. An inbiakna tawngkam erawh a tlem thei hle a ni.

Frank-a chuan khua a var dawn tawha a rin lai tak chuan officer chuan ding turin thu a pe a. Nawhalh nawtin a sana chu a'n en a. Scout hnenah chuan, "Darkar chanve chhungin buk khuarna tur zawng hmu rawh. Hmun him tawk, zau tak ka mamawh a, chutah chuan kan hahchawlin chhun engah hian kan bibo rih dawn a ni," a han ti a. Scout pa chuan thupek chu a chiangin, reilote hnuah chutiang hmun chu hmu in ding turin a rawn hriattir a. A chuanna sakawr tui in thawm pawh Frank-a chuan a hria a ni.

An hotupa chuan sakawr atanga chhuk turin thu a pe nghal a. "Mei chhem hauh loh tur tih kha hre reng ang che u. Eitur in ken te kha ei ula. Reilly, nang leh Morehouse-a te santiri a ding hmasa tur in ni e," tih pahin Frank-a bulah chuan a rawn kal a. Frank-a pawh sakawr atanga chhuk turin thu a pe a. A chhuk hnu chuan a kut leh keah kawl buntir a ni a. A sakawr pawh chu hruai sawn nghal a ni. A bulah chuan blanket te phahin a thu ta a. A hnuah chuan mi pakhat hi a bulah lo kalin, chhang khawro leh tui in tur a rawn pe a. Tui awmna piah lawkah chuan sakawrte thlungin eitur an pe nghal a. Camp mak tak a niin heti em em a an fimkhur dan chu Frank-a chuan mak a ti hle a ni. A eia a in zawh chuan sipaihote pawhin mutna te an kai pharh a. A tul tawpah lo chuan vengtute hian Frank-a hi an be lo a ni. A sir tawn tawnah vengtu an mu a, a lu lamah pakhat a ding bawk a. Camp chu a reh fel tihah Frank-a chuan he an hruai dan hi dangdai tak a niin, zan lamah kalin chhunah an chawl thin dawn ni turah a ngai a. Kansas an thlen hma chuan hetiang hian an ti dawn niin a ngai.

Thawm a reh tawlh tawlh a, a bula mu te pawh tui taka mu in an thaw ham ham hlawm a. Khua a la var chiah lo a, Frank-a chu a mut a chhuak hauh lo. A hnunglama santiri ding chuan thawm a'n nei hlek a, nawhalh a nawt zawk a, mahse a reh leh vat a. Tuibur rim ni awm tak rimchhe zet hi Frank-a chuan a hre zui a. Santiri chuan a bula rawn kun hnaiin, "Ka meizuk thu hi i sawi chhuak anih vaih chuan i châk lo viau ang," a rawn ti a. Frank-a chuan a chhang lo. A rilru zawng zawngin tlanchhuah dan ringawt a ngaihtuah a. Mahse a tlanchhuah theih dan tur chu kawng a bo takzet a ni.

A chêt hlek pawhin a awngphah ri chuan a bula mu chu a ti harh zel a, "Ngawi chip cham rawh," a rawn ti hman zel a. A reh leh ta thap mai. Mahse camp epah chuan thawm chhete hi a hria a. A reh leh vat a. Frank-a chuan santiri dang che vel ni turah a ngai a. A hnu hretah chuan a hnunglamah thawm awmin a hria a, a mutna bul lei chu nghing deuh datin hnahthel pawh a ri deuh sat a. Chumi rual deuh thaw chuan santiri kuaite chu ama lu bul maiah chuan a rawn tla tap a. Frank-a chuan a'n en ngial a, mahse engmah a hmu thei lo. Thawm engmah a awm loh avangin amah vengtu chu a muhil ta ni turah a ngai a ni.

An awmna piah sakawr thlunna lamah chuan thawm enge maw a awm a. Sakawrte pawh an che deuh a. Mahse a zawi em a, sakawr ke chhep ri satliah a ni ang. Mahse minute sawm panga dawn lai awm hle hle thei loin sakawrte chu an che vel a. Mahse a hnu lawkah chuan a reh leh ta tlawk tlawk mai. Frank-a chuan a ngaithla vang vang a, a hnu lawkah chuan namenloa sakawr tlan ri chu a rawn inthum rawn ta. Che theiloin ani chu a mut ngaiin a mu reng a, a thin erawh a phu dup dup a. Helaiah eng thil tak chu thleng ta ni ang maw tiin a ngaihtuah a. Chutihlai tak chuan rim mak tak mai, savun kâng rim niawm tak a hre ta. Thawm chu a rawn ri leh hlek a, a reh leh a. A hnuah a rawn ri leh der der a, mahse engmah a hmu theilo a. A thawm hriat dang chu a sir tawna amah vengtu muhil thaw ri chu a ni mai si.

Meng rengin, thawm ngaithlaa a mut reng lai chuan a kâ chu an rawn hup ta thawk a. Han au chhuah vak a tum lai chuan na zawkin a nghawngah an rawn kuah ta bawk a. Tang buai loa a inthlahdul hnu chuan a ka hup tu pawhin a thlah ve ta a. Amah huptu chu tawlhkir hlekin, dimtein a kut leh kea kawl an buntir chu a rawn phelh a. A awngphah beng chheng tak sirah a ke chu nghatin a rawn thu chhuak a. A bânah manin thing hmunah a hruai nghal a. A thawm hriat chhun chu ama pen thawm chauh chu a ni. Thawm nei reng rengloa hruaitu hi thlarau emaw ni ngei turah a ngai.

Amah hruaitu hi tunah chuan Red-a emaw, Otey-a emaw niloin, Indian a ni tih a hre ta. Ngaw chhung ril zawka a luhpui hnu chuan amah hruaitu chu a ding a. A hma lawkah thinga phuarbeh a, tawng theilo tura a hmui tuam sak Captain chu Frank-a chuan a hmu ta. A ke bulah chuan santiri pahnih, hmui leh ke che theilo tura phuar hlawm hi an lo let reng bawk a. A sirah chuan anmahni hruaitu scout kha a kâ pawh hnawhloin phuar beh ve a ni a. Amah hruaitu chuan chupa hnunglamah chuan Cheyenne tawngin engemaw hi a sawi nawk nawk a. Chu scout chu hlau tih hriat takin a thlan a tla zawih zawih mai a. Captain hnenah chuan, "Mingo tâng an lakchhuah chhan chu thah atan a ni. An unau pasarih thah phuba lak nan an ti anih chu," tiin a han hrilh a.

Frank-a chu a îp chawih chawih mai. Chu Indian pa lu chu a hmu vuai vuai a. Chutihlai chuan a lu a lo thing deuh a. Scout thusawi kha a dik lo ti niawm taka lu thing chung chuan Frank-a kutbawrah manin chibai a han buk a. Thua sawi rik kher ngailoin scout thusawi kha a diklo tih nemngheh nan leh a thian a ni tih hriat nan chibai a rawn buk a ni. Frank-a chu a thaw dêp dêp a. Indian pa chuan thu rawn sawi lehin scout khan captain hriat turin a han let a. "Engtikah emaw keini ho hi min that dawn. Tunah erawh a nilo," tiin thinur takin, "Heng mite hi Corb-an zu a a hrai ruih thin te annih hi," a han ti zui a. Corb-a hming lamrik anih rual khan scout awmah thal a rawn bur chawt a. Thim zingah Frank-a chu a bânah kaiin chu hmun atang chuan a hruai ta a.

Ngaw hnuai atanga an chhuah chuan khua a lo eng tan tawh a. Frank-a chuan a hma lama kal Indian pasarih lai chu a hmu thei a. Commanche tawngin, "Ka thiante chu tute nge annih le?" tiin a'n zawt a. An zinga pakhat chuan, "Stone Bull-a thiante kan ni e," a lo ti a. Sakawr hrui chu vawn tirin anni ho chu an kal bo leh ta mai a. Tunah chuan amah mai a lo ni ta. A sakawr chu a tlan chak theih tawka tlan tirin chulai hmun chu Frank-a chuan a chhuahsan ta a.

*******************

Henglai ram cheng midangte ang bawkin Corb-a hian Indian ho zei zia chu a zir thiam a. A hnenah Frank Kristiana ten Cheyenne Indian pasarih an thah hnuah Kristiana chu man a ni tih an han hriattir chuan a hmelah danglamna engmah Corb-a hian a nei chuang lo. Chanchin tha chu a chhe zawkin a rawn luahlan leh ta. Ngaihtuah fuh loh tam tak Corb-a hian a nei a. Kristiana leh Barnes-a te an tangrual tih a hrelo a. Barnes-an Indian ho a bei tih phei chu a lo hre reng reng lo. Red Shibe-a leh Frank-a te fuihpawrhin hepa hian thil a ti a. Indian ho hel hi Corb-a hlauh ber a ni.

Lehkha den puia an sawm pawhin Corb-a hian a hnial tlat a. Fort Reno atanga a hote lo kir report dawn nghakhlel takin a lo ngaichang reng a ni. Reno atanga lokir reng reng chuan boruak rih zia hlir an rawn report a. Indian ho chuan Reno khua leh agency te chu an rauhsan a, an camp-ah buaina lo thleng tur chu an ur mup mup a. A hote an rawn kir atanga rei tawkah a hnuhnung ber Beach Freeman-a chu a lo lang ve a. Zanlai pelh tawhah Beach-a chu rui tawkin a lo kir a. Rui tih hriat takin hla a rawn sa a. Tui lo zeta solitaire khel chungin Beach-a thawm chu Corb-a chuan a lo ngaithla a ni.

Hnunglam kawngka atang chuan Beach-a chu a rawn tei lut a. Corb-a chu sikret zu a inthlahdah angreng taka thu a rawn hmuh chuan, "Boss, enge i an?" rui zet hian a rawn ti a. Corb-a chuan, "Lo lut teh," a lo ti mai a. Beach-a chu a rawn pai lut tuang tuang a. A lukhum chu Corb-a hma dawhkanah chuan paih thlain thutthlengah chuan a rawn thu hnawk a. Nelawm lo takin Corb-a chuan a lo melh a. Beach-a chuan, "Tunah chuan Frank-a luvun chu an hîk ngei dawn tain a lang e," a rawn ti a. Corb-a chu a ngawi tlat a.

Then sâng chung hian Beach-a chuan, "Naktuk zingah Kansas lam an pan pui dawn anih chu," a han ti leh a. Corb-a chuan, "Indian ho chu enge an an?" a lo tih chuan Beach-a chuan nui sak chung hian, "An lâm mup mup mai. Sipai post atang phei chuan an khuang ri pawh i hre thei ang. Sipai kulh chhungah mi an tlanlût hum hum a, an hlauin an thlabâr nasa," a han ti a. "Nang hian i hlau ve lo amaw?" a tih chuan Beach-a chuan, "Eng maw? Heng vun sen ho hian thal leh a ngul bak engmah an nei lo," a lo ti a. Corb-a chuan chhân buai tlakah pawh a ngai lo. Amaherawhchu amah ngeiin sum tlemte siam nan silaite Indian ho hnenah a lo hralh tawh a. Chu chu mingo dangten an tawrh rualin amah ngei pawh hian a thihpui mai ang tih chu a hlau hle a ni.

Corb-a chu thoin, dawhkan hlai pui chu kal hualin Beach-a hmaah chuan a va ding a. "Kid, i in tam lua a ni. Inthiarfihlim vat rawh," a ti a. A rui emaw, rui lo emaw, Beach-a thukhawchang atang hian Corb-a chuan engemaw tak a hriat belh a, chumi zan chuan rilru nuamin a mu hauh lo. A tuk chawhnu herah phei chuan Corb-a chu a awm hle hle thei tawhlo a, suit dum inbelin, a hote hnenah chuan Indian ho an ralkhel chhung chu Reno khuaah kal a tum thu leh a duh chuan an zui ve theih tur thu a hrilh a. Sakawrte thlung loin, an hmunhma chhuahsan mai turin a hrilh a. Whisky, Indian ho hnena lo hralh an awm anih chuan a hriat chhuah hma ngeia an sum neih ang ang nena helai ram chhuahsan nghal turin a vau nghe nghe a ni. A buckboard khalhtu hnenah thu pe in, engmah dang sawi leh loin Reno khaw lam chu a pan ta a. Beach Freeman-a chu sakawrah chuangin amah va fin hmasa ber tu ah a tang leh ta. Mi pathumin an rawn fin belh a, midang erawh chuan an rawn muangchan deuh tur thu an hrilh a.

Sipai kulh chhung chu a hma zana Beach-a sawi ang mai khan mi an lo tamin an tawt tawh khawp mai. Darlington khuaa agency-a thawk hote pawh zing lamah khan an lo lut tawh a. Hmun a tawt tawh em avangin Corb-a pawh chuan hmun a chang lo tep a ni. Saloon chhungah chauh lo pawh pawn lam remchang apiangah puanin an kaih a. Zing atangin sipai hmun chu santiri dingin uluk takin an veng a. Holiday a ni na vang vangin boruak a rit hle a ni.

Corb-a chuan hmelhriat thenkhatte chibai a buk hnu chuan lu mehna hmun lam a pan a. A bula khawsa Beach-a chuan Corb-a kal a hmuh veleh bar lamah a lut ve vat a. Lu met tur an intlar thui deuh avang chuan Corb-a chuan a chang lawk lo a. Rei deuh hnu chuan a hun a thleng ve ta a. A sam thawl tak an meh zawh a a khabe hmul an meh mek lai chuan midang titi a ngaithla ran a. Sipai ardali hi lo lutin "Hetah hian Corb-a a awm em?" tiin a rawn zawt a. "Heta hi," tiin Corb-a chuan a lo chhang a. "Major-in chibai a buk a che. Hmuh che a duh a ni," a tih chuan, "Tunah maw?" Corb-a chuan a ti vat a. "Tunah hian a hmu duh che anih ka ring," tiin ardali chuan a chhang a.

Corb-a chu a in nuai fai nawk nawk a, necktie thawl taka suihin ardali rual chuan a chhuak ta a. Parade ground kal pelin administration room lamah chuan a hruai ta a. Major Corning-a chu office chhungah chuan a lo vei a lo vei a. Thutthleng pakhatah chuan captain pawr tak, thawmhnaw bâl tak inbel hi a lo thu bawk a. Corb-a a lo luh chuan chu captain pawh chu a thutna atang chuan a lo ding ve a. Major Corning-a chuan ardali chu chhuak tura a hriattir hnu chuan, "Hei hi captain McEachen a ni e, Corb," a lo ti a. Chibai pawh inbuk chuang loin an inen ringawt a. Bung vatin Major chuan, "Thu rawh," a ti a.

Corb-a chu chair-ah a thu a, major erawh chu dawhkanah a thu mai a. Pa thil chîk hmel, sam sen deuh a niin tunah hian a in pet ruhin a nelawmlo kher mai. "Corb, tun tum chu i kal thui lu hret a ni. Nizan thil thleng khan chu chu a nemnghet tlat," a han ti a. Corb-a chuan fimkhur takin a han en vel a. Captain lah chuan ngei tih hriat takin a lo melh a. Mi â nilo tan chuan major chu a thinur tih hai rual a ni lo. Corb-a chuan, "Ngawiteh, major Corning, i sawi awmzia chu ka man hauh lo mai," a lo ti a. Major Corning-a chuan hmel sen teuh chung hian, "Ka rindan chiah a ni e. Captain, nizan chanchin kha han hrilh teh. A hnu lamah thu tak tak kan sawi ang," tiin thu a pe ta a.

Captain McEachern chuan zan lama an camp-a thil thleng, Indian hoin an rawk dan chanchin chu hrilhin, amah leh a vengtute leh anmahni hruaitu scout chu hruia phuar betin, Frank Kristiana an chhuhsak thu te chu a han sawi a. An kal sawn dawn chuan bawngrual khalhtuten Indian mi pasarih ngawt an thah phuba lak nan Kristiana chu an thah tur thu an hrilh a. "Khua a lo var fel chuan Kristiana chu a lo awm tawh hauh lo," tiin a thusawi chu a titawp ta a.

Corb-a chu a ngawi vang vang a, "Chutiang ti tur chuan ka tirh i ring tihna a ni maw?" tiin a zawt ta a. Major Corning-a chuan, "Nang leh Milabel-a hi Kristiana luman siam tura agent ho nawrtu kha in ni a. Barnes-a ina tihhlum tuma beitu kha nangmah hi i ni bawk a. Bawng vulhtu ho kâr thu hi ka inrawlhna tur a ni lo tih ka hria. Chutih rual chuan Kristiana helaia a lo lan ve atang hi chuan in inkar hi a chhe hle tih hi ka hre bawk. Chutihlai chuan chung Indian ho chuan i hming an lam ri kher bawk a ni," a han ti a. Corb-a chuan fimkhur tak leh nem deuh zawk hian, "Chutiang chu a ni thei lo. Kei hian chutiang ka ti thei lo," a lo ti a.

Major Corning-a chu zuk kun hnai deuhin, inseh ruh teuh chung chuan, "Corb, tlang takin thu i sawi teh ang. Dik tak chuan nang hian he hmunah hian whisky i tawlh lut thin. Dânin a khap chungin dân bawhchhiain Indian ho i pe thin. Vawi hnih vawi thum i laka thubuai ka siam theih nan a fiahna ka zawng tawh a, ka hmu thei tlat lo. Chuti chung chuan hetah hi chuan thiamloh chu i chang a ni. Tin, Cheyenne ho khat hi thununin an ram lei thu ah pawh agent angin i awm tih hi ka hre bawk," tiin rum takin Corb-a chu a melh a. "Nizana thil thleng ang ti turin Indian ho chungah tih theih ka neilo i ti dawn anih chuan dawt sawi hmangah ka ngai fel hmiah bawk ang che," a ti ta a.

Corb-a mitmeng atang chuan a thinur tih hriat mah se a hmelah a lang lo. Sikret a phawrh a, nawhalh nawtin a tankai a, nawhalh chu chhuatah a paih zui a. "Min puhna chu pakhatmah ka pawm lo chungin, i mi puhna hi lo dik ta pawh nise engtia min tih nge i tum a?" tiin a zawt ta a.

"Ka man ang che,"

"Eng tlawhchhanin maw?"

"United State sipai lak atanga an mi man la chhuaka thatah ka puh ngei ang che,"

Corb-a chu a nui deuh a, "Major, dân hremi chu ka ni lo. Mahse tualthata min puh thluk dawn chuan ka thah mihring chu court hmaah i rawn thlen ngei a ngai ang. Chutiang tur chuan i nei reng em ni?" a han ti a. Major chuan bul hmak hian, "Nei lo," a lo ti a.

"Hretu tal i nei thei dawn em?"

"Ka tawng lettu kha," tiin captain khan a lo chhang a.

"Ani chuan kei hi min hmu em?"

"Hmu na'ng. Mahse i tirh Indianin i hming a sawi a hria alawm,"

Corb-a thung chuan, "Tu pawhin ka hmingte chu an sawi thei alawm. Hmingchhiatna ka chunga thlen tum tu chuan ka hmingte chu an sawi ngei ang," tih pahin a kut a'n ti pharh a. "Ruang hmuh tur i neilo a, hretu i nei thei lo bawk. Chubakah Indian pakhat pawh he thu ah hian i la be lo bawk," a tih chuan Major chuan vîn that hian, "Kan zawt ngawt thei hleinem, mihring. Zawt turin tute nge annih pawh kan hrelo," a lo ti a.

Nui sang chung hian Corb-a chuan, "Major, i thu phuh chhuah hian awmzia a nei hauh lo," a han ti a. Major chuan, "Chuti anih pawhin Hopewell Barnes-a bawngrual ruk tum tu Indian ho kha i tirh anih avangin chutah chuan thubuai ka siam ngei ang," a lo ti a. Mahse Corb-a chuan, "Chutah pawh chuan thubuai i siam ka ring hauh lo," tiin,
"Nang leh kei hian agent hoin Indian ho tana an bawngsa pek hi an khawp kham thlawt lo tih kan hria a. Kha chen kha an bawng ruk i lo haider tawh laiin tunah hian riltama siama, hel tuma an inbuatsaih chu i duh ka ring hauh lo," a han ti a.

Major Corning-a chu thoin chhuatah chuan a vei tawn sek a. Corb-a chu a melh rân reng a. Corb-a lah chan tha changah inngaiin a nui vel a. A sikret zuk lai chu a hrual vel a. "Major, min man i tum a, hriatpuitu takngial pawh neilo a court hmaa i rawn inlan anih vaih chuan i chan tur chu nêp tak a ni ang," tih pahin Major chu nuihsawh deuh hian a'n melh a. Ani lah chuan rum tawkin a lo en thung a. Corb-a bawk chuan, "Major zawng zawng hian colonel-a kaisan an duhin ka hria, a ni lawm ni?" a'n ti vel a. Chan tha zawk a chang tih inhriain Corb-a bawk chuan, "Chutiang chung chuan min man chu i la tum zel em?" tiin a zawt a.

Major leh captain chu an in en tawn ta sek a. Chutihlaia an rilru chu Corb-a hian hriain a inhria. Vawi tam tak whisky tawlh rukah leh bawng ruk chungchangah a fiahna zawngin thubuai siamsak an tum tawh thin a, mahse an la hlawhtling thei lo. A bâk tih tur an neih chu Frank Kristiana man a ni. Captain McEachern-a hian court-ah thil nihphung dik tak sawi ta se sawrkar tan mualphona namen lo tak anih rualin major phei chu na taka zilhhau a ni ngei dawn. Chutiang anih chuan thubuai put luh a ani man hi an tan a tha dawn hauh lo. Corb-a chu a tho tharh a, "Min man dawn loah ka ngai e," tiin kal a tum ta a.

"Ngawi lawk teh, Corb," tiin major chuan thinrim vanga khur deuh hlak hlak chung chuan, "He post-a commandant hi ka ni a, emergency thilah chuan thupek chhuah theihna ka nei a. Finfiahna fel tak ka neih hma chuan helaia mingo zawng zawng hi he hmun chhuahsan lo turin thupek ka siam a. Nang pawh chu thupek hnuai ami chu i ni e," a han ti a. Corb-a chu a nui hak a, "Major, min um chhuak ngawt theilo ang, ka kal phawt ange," tiin a chhuak a, lumehna lam bawk kha a pan ta a. Kristiana chunga thil thleng erawh hriat a duh kher mai.

******************

Stone Bull-an Barnes-a in a chhuahsan hnu chuan an za in Edith-i ama ina a awm chuan a him dawnin an hrelo a. Chuvangin Luvie-in riahpui mai se tha an ti tlang a. A tuk zinga Luvie-i a'n harh chuan Edith-i chu a lo awm tawh hauh lo. Red-a pawh a awm lo bawk. Engvanga kal bo nge tih leh khawilam nge an pan tih hriatna turin lehkha pawh an hnutchhiah lo. Luvie-i chuan Otey-a leh a pa chu kai thoin, sakawr inah Otey-a chu a va kal a. An sakawr pawh a lo awmlo ve ve tih a rawn sawi chuan Luvie-i chuan, "Khawiah nge an kal tak ang?" a lo ti vat a. "Hetia Indian ho an hrân viau lai hian khawiahmah kal tur an ni lo asin," a han ti zui a.

Kar khat liamta lekah khan an ram atanga nawr chhuah an nih thu ah Otey-a hian Red-a kha namenloin a mawhchhiat kha a ni a. Mahse tunah chuan engmah reng a chhe zawnga sawi ta lo chuan, "Red-a bulah Edith-i a awm phawt chuan a ngaihtuahawm lo vang," tiin, "Ngaihtuah zui a ngai lo. Tuna kan tih tur zawk erawh chu sipai hmuna kal a, eng thil nge thleng tih va hriat hi a ni mai," a ti ta a.

Barnes-a pawh chuan, "Kan vaiin kan kal ang," lo tiin, "Indian ho hi an camp atanga an chhuak anih vaih chuan hetah hian an lo kal hmasa ber ang. Chuvang chuan helaia Luvie-i lo tawmpui reng hi ka tum reng reng lo. Nizanah Major Corning-a min nawr luihna avangin hotel-ah kan zavaia leng tur room pawh ka hauh lawk vek tawh. Luvie, che nghal la, breakfast tur han buatsaih nghal teh. Kan inpeih fel veleh he hmun hi kan chhuahsan nghal ang," a ti ta a.

Hmanhmawh taka breakfast an ei hnu chuan Otey-a chu chair-ah thu in he hmun chhuahsan a tum loh thu a sawi ta tlat a. Stone Bull-a ruahmanna a hlawhtlin a, Frank-a a chhuah theih hlauh chuan he hmun hi a rawn pan ngei a ring tlat. Hetah tumah rawn hmu ta lo se khawilai nge a pan tak ang? Chutianga ngaihtuahna a neih tlat avang chuan Luvie-i te pafain han thlem ngial mah se a tang tlat a. An pafa chuan Darlington mipui rualin sipai venhimna beiseiin an kal ve ta a ni.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 2nd, 2018, 5:46 pm

WAR ON THE CIMARRON
Bung - 17

Sipai hmunah chuan mi an thahnemin an tawt hle a. Mahse Otey-a thurawn angin Luvie-i chuan dawr kawt zau tak hmawr lama thutna chu a chuh tlat a. Chutah chuan mite thu ngaichang leh thu thar nghakin a thu reng a. Chawhnu her hretah chuan Captain McEachern-a chu pawr takin a hoten an rawn zui lut a. Mi man an nei lo ni ngeia a lan avangin hun engemaw chen tawt taka a lo awm tawh chu hlim deuh takin a thaw huai a. A pa hmu tura a kal chu pen sawm emaw lek a kal hman tihah a pa chu pal hungna tlâng bawha midangte nen an inbia chu a va hmu ta a. A pa pawhin a kut a vai danah amah chu a rawn hmu ni ngeiin a hria. Thil a eilo tih pawh a lo theihnghilh thak a. Tunah Red-a ruahmanna pakhat chu a hlawhtling ta a, a dang hi engtin tak ni leh ang maw tiin a ngaihtuah neuh neuh a.

Zanriah chaw chhum hun dawnah Scott Corb-a, suit dum nalh tak leh pheikhawk dum tle zet buna kailawna a rawn chho chu Luvie-i chuan a hmu ta. A hnung maiah chuan tlangval pakhat, mi thar deuh ni ngei tura lang, boot thar tle sar bun leh lukhum parh hlai tak khum hian a rawn zui a. A pheikhawk chu a thar deuh avang chuan a tawt deuh ni tur a ni, a kal danah a ke a nawt ni ngeiin a lang. A lungawina ber nia lang chu Corb-a bula hetia a kal thei hi niin a lang. Midang ho pawhin Corb-a chu an zui ve a. Chungho chu bâl tak tak, mitmeng thîp leh hmel nelawm lo zet zet an ni a. Chu tlangval, an zinga kal ve chu chinghne rual zinga beram ang maiin a langsar a.

Barnes-a pawh chuan Corb-a lo kal chu a lo hmu a. A fanu bul chair-ah a rawn thu a. En tur leh bih chian bik tur hriain parade ground piah, administration building lam chu an thlir vang vang a. An thlir reng lai chuan office kawngka atang chuan ardali pakhat hi lo chhuakin, mipui karah hotel lam chu a pan sawk sawk a. Lu mehna in lam chu a pan ding ta nghal a. Reiloteah chu in atang chuan a lo chhuak a, Corb-an a rawn zui chhuak nghal a, administration building lam chu an pan ta a.

Barnes-a chuan a fanu chu enin a nui deuh sak a. "Thil tak tak a thleng dawn ta a ang e," a han ti a. "Kal la, eitur va ngaihtuah nghal rawh," a'n ti zui a. Mahse Luvie-i chuan, "Ka pa, eng thil nge saw pa chungah sawn thleng hmuh ve ka duh alawm," a lo ti a. Mahse a pa chuan, "Restaurant-ah sawn eitur zawngin tlan nghal rawh. Keiman ka lo thlir mai ang. Kal rawh," tiin thu a pe leh ta a. Restaurant tawt tak karah minute sawm thum chhungin Luvie-i chuan ei tur chu a va chang ve a. Ei tur a nei nâ a, a thil hmuh châkna chuan a thil ei châkna a tibo vek a. Mahse châk lo chungin a hnawh lût tawn tawn a.

A ei zawh veleh a pa bulah chuan a phei a, a pa beidawng hmel ngui tak chu a va hmu a. "Ka pa, engtizia nge ni ta?" a va ti a. Ngui tak chungin, "Corb-a chu zalenin a chhuak tlat mai. Diklo engemaw a awm a ni phawt ang. Sawlai atang sawn amaha lo chhuakin saloon lam panin a kal tawh," a lo ti a. Luvie-i chu a bula chair-ah chuan a thu hnawk a, "Anih Frank-a chu?" tiin a han zawt a.

Barnes-a chuan, "Man a ni lo chu a ni phawt ang. Amah hruaitute kut ruakin an lo hawng a, engvanga Corb-a pawh saw office-ah sawn koh nge a nih le?" tih pahin lu thing nawk nawk chung hian, "Mami, saw mihring saw han nuai liam mai atan chuan a lian lu hret ni ngei tur a ni. Chu zawng chu a ni mai," a han ti a. Ngun deuh zawkin a fanu chu a en vang vang a, "Hmeichhia ni lovin mipa chu ni la chuan ka bula lo kal ve turin ka sawm ang che," a han ti a.

"Khawiah maw?"

"Bar-ah sawn. Ka châkna te tih reh dan ka va dap ve dawn ange," tiin Barnes-a chu a tho a, a kal ta nghal a.

Luvie-i chu a thutna ngaiah thuin khaw lo thim tur leh Otey-a thu nghakin a thu ran mai a. A hlim lohna zawng zawng te chu paih bo tumin a bei ve mek a ni. Corb-a hi manin sipaiin hrêng sela chuan Frank-a tan chet ve dan a awm tur. Helai hmunah lo kirin, an puh chhiatna zawng zawng hi a awmze dik tak a rawn hriattir ve thei ang. Mahse chu chu tun atan chuan beisei bo a ni. Eng berin nge Otey-a leh Frank-a te inbiakna dâl? Heti taka helai boruak hi Frank-a tan a lum si chuan Texas-ah a kir ta mai em ni ang? Chuta kal tur chuan engin nge maw dâl le?

A bula thu hmeichhe pakhat nen thu dang dang an sawi a, a ngaihtuahna bîng lutuk tireh turin chu nu chu a kawm a ni. A hnu lawkah chuan mi tumahin he sipai hmunpui hi an chhuahsan tur a ni lo tih thupek a lo thang ta. Chu thu nemnghehna atan chuan vengtu pawh an rawn tirh belh nghal a. Heti anih chuan Indian hoin an rawn bei ngei dawn tihnaah miten an ngai a. Tunah pawh hian he sipai hmun pui hi an hual reng tawh a ni thei bawk. Sipai ho chaweina in pakhat pawh civil mi tan tih ruah anih thu te an chhuah nghal a. Parade ground-ah tumah hmuh tur an awm loh avang leh bengchheng thawm a daih ruih avang chuan Indian Camp atanga indo tura an inpuahchahna khuang ri te chu chiang takin a hriat theih a. Mite ngaihtuahnaah chuan Cheyenne ho hian indo duh lo, Arapaho ho pawh hmin tumin an bei nasa niin an hria. Khaw thim hma deuh hlekin sipai ho khat chu Darlington lam atangin an rawn thleng a. Mingo tlemte, Indian ho lo do ve tuma sipai hmun pan duhlo te chu an rawn hruai thleng a.

Chung ho thu ken chu Darlington leh a chhehvela mingo awm reng reng chu sipai hmunah awm khawm vek tur tih anih avangin an hmuh apiang an rawn hruai a ni. Chung zingah chuan Otey-a pawh a rawn tel ve a. En reng reng pawhin a thinrim tih a hriatin a insehruh teuh a. Lo hmuakin Luvie-i chuan a va pan a. "Eng nge Frank-a chanchin?" tiin a lo zawt vat a.

Pawr chhak hian, "A lo kal lo. Thim hun hi a nghak a ni maithei. Heng sipai ho hian ina ka awm an phallo khanglang anih hi," tih pahin Luvie-i chu a melh a, "Tu tan nge maw ka ring hi ka rawlh tak chu aw?" a han ti zui a. Luvie-i chuan, "Helaiah pawh tuma chhuah an phal tawh lo," a lo ti a. Otey-a chuan, "Helaia min chelh reng hi an tum anih chuan an buai khawp ang. Khua han thim se Frank-a hmu turin ka chhuak dawn. Helai sipai zawng zawng pawh hian min dang lo'ng e," a ti tân tân a.

Barnes-a chuan zanriah ei turin an vai chuan a rawn ko ta a. Otey-an a ei lai chuan vawiin lama thil thleng chanchin te Luvie-i chuan a hrilh a. A lan danah chuan Frank-a chu a zalen niin a lang. Mahse Corb-a chu sipaiin an hrêng tlat a. He sipai hmunah hian sipai thu angin ani pawh a awm ve niin a lang.

A eikham chuan chhuanlam siamin Otey-a chu a kalsawn leh ta a. Luvie-i pawh a hlauhthawnna nasa tak nen a thutna atanga thoin, a room-ah chuan a lut nghal a. Chunglam ceiling thlirin a zangthal a. Hun hi pawhkir leh theih nise Corb-an Frank-a phatsan tura a tih ni kha chu a nuaibo chiang ngawt ang. Khang zawng zawng kha ama tihsual vek a ni. A rilru tina ber leh a theihnghilh hauhloh tur chu Frank-an chiang fiah taka, 'hmuh leh che hi ka duh tawh lo' a tih kha a ni. Inchhira thiamloh inchantirin awmzia a nei tawh lo. Amah nena inhmuhna hun remchang an neih lai khan amah hmachhawn turin a huaisenna in a tlin tlat loh avangin tunah chuan a chân dawn ta niin a lang.

Ding taka a ngaihtuahna a kal mek lai chuan kawngkhar kik ri a hria a. Otey-a chu rawn lutin khum piah thutnaah chuan ngawi rengin a thu a. Luvie-i chuan, "Otey, i vannei thei chuang nange?" a lo ti a. Otey-a chuan, "Corral zawng zawng an veng tlat a, ka sakawr tal min pe rawh u ka tih pawhin an phal chuang lo. Santiri ho kal pelh ka tum lahin vawi hnih ngawt min theh kir si," a han ti a. Luvie-i chuan engmah a sawi lo. Frank-an in a thleng anih ngat chuan an phatsan ta vekah a ngai ngei ang. Engah nge Texas lamah a kal mai loh aw? Luvie-i chuan Otey-a beidawng hmel, hmel nur tak a hmuh chuan a nui ta hawk a. Otey-a pawh a rawn then ve sak a.

Barnes-a pawh a rawn lut ve a, thinrim vangin a hmel chu a rawn dâng sawp sawp a. A lukhum chu khum chungah a paih thla thuai a, Otey-a a hmuh veleh chuan, "Otey, i pistol kha min han pe teh," tiin a dil ta a. "Enga tan nge ni ta?" tia a lo zawh chuan Barnes-a chuan, "Corb-a mi rawih pakhat, thlang deuha awm lu ah khuan ngen mu a khat tlata thun ka duh," a ti ta a. Luvie-i chuan a pan hnai vat a, "Ka pa, engtizia nge ni ta? Hetianga i awm hi ka hmu ngai reng reng lo. Eng nge ni ta a?" a lo ti vat a.

"Tih-elna leh chona tawngkam hi ka kham ta a ni. Mi thar a niin a rui hle a. Indian ho kha ka thupeka thah niin a sawi a. Kei leh Frank-a hi awm ta lo se hetiangin Indian ho hlauin mi an pungkhawm lo ang te a ti vel a. Corb-an ngawi tura a tih pawhin Frank-a chanchin mawilo tak tak in a tlangau pui vel a ni," Barnes-a chuan a han ti a. Luvie-i chu a lo bu nghat nghat a, "Kei pawhin ka hmu alawm. Naupang mai a la ni a, i bei theilo ang," a lo tih chuan Otey-a chu a lo phawk hra mai a. "Eng hmel pu nge a nih?" a lo ti vat a. "Kah thlêk lawl atana itawm tak hmel pu, naupan hmel tak,cher deuh, sam buang deuh, meng pawl rem rawm leh tawng tla hawlh tak a ni ringawt mai," a tih chuan Otey-a chuan, "Tuemaw talin a hming an lamrik i hria em?" tiin a thutna atang chuan a rawn tho a. "Corb-a chuan 'Beach' tiin a ko," a tih chuan, "Anih tak chu," tiin Otey-a chuan kawngka lam a pan ta a. Barnes-a chuan, "Khawnge i kal dawn?" tiin a lo zawt a. "Kohna ka chhang dawn. Hetah hian lo awm rawh," tiin thu a pe ta hmak a.

Kailawnah chuan chhukin sumhmun lam a pan a. Bar tukverh zau tak zawn a zuk thleng a. A chhungah chuan mi an lo thahnem hle a. Mahse a laia dawhkan sir khata Corb-a leh a hote paliin poker an khel chu a va hmu thei a. Bar dawhkan nghenga khabe dawm chunga an inkhel thlir a ding, Beach Freeman-a pawh chu a hmu nghal mai a. Zu no a lo dawm bawk a. Beach-a chuan Texas a lo pan hauh lo tih a hrechiang ta. Hun kal tawha thil thleng a'n ngaihtuah let a, he nau chungah hian tih tur a nei tih a hre thar leh ta. Engtin nge lehkha them pakhat hmang khan Frank-a kha Barnes-a inah koh kal mai anih tih leh hrilhtu awmloin engmah a thleng theilo tih a hre chhuak thar leh a. Chu thu hrilh tu chu Beach-a hi a ni phawt mai. Thil thleng tawh dangte belh khawmin Beach-a chungah chuan namenloin a thinur ta a. Chhia leh tha hriatna bo khawp erawh chu a ni lo.

Thim zingah chuan kir lehin, wagon hûnna gate-ah a lut a. Khawnvar inkhai chu a la sawn a, ran chaw dahna inah a lut ta a. Khaw hrang hrangah ran chaw dahna velah hian zu rui mut harh tum leh vannei lo deuh ho hi an tawm khawmin ruih tih reh nan an mu chawk thin a. Otey-a chuan a'n enkual dan dan a, mi pakhat pawr deuh a hmuh chuan a ke chhipin a'n chhir harh a. A lo thawh chuan Otey-a chuan, "Dollar nga hlawh lawk i duh em?" tiin a lo zawt a.

"Teh reng mai,"

"Chuti anih chuan mi zui rawh,"

Sakawr in kawngkhar pawn chiahah Otey-a chuan a mi hruai chu zu thing rim a nam nasa tih hriain a thlang fuh dawn hlein a inhria. Otey-a chuan dollar nga tlang chu a han pe a, chupa chuan, "Enge ka tih tur?" tiin a lo zawt vat a. Otey-a chuan, "Bar ah sawn va lut la, zu va in rawh," tiin, "Chumi hma chuan Beach Freeman-a hi i hria em?" tiin a han zawt a.

"Hre lo,"

"Bar nghaktu saw i zawt anga, a kawhhmuh mai ang che. Chupa hnenah chuan 'a sakawr chaw man hi tunah a pek loh chuan a enkawltu in tunah i sakawr a chhuah dawn' tih va hrilh rawh. I hria maw?" a han ti a. Chupa chuan a tihdan tur vawi hnih lai a sawi nawn hnu chuan bar lam panin hmanhmawh takin a kal ta a. Otey-a chuan Beach-an bill a pek chu a ring tho a. Mahse chu ai chuan a sakawr chhuah tur anga a hrilh khan a koh chhuah ngei a ring tlat. A mi tirh lah zu châk tawh ngawih ngawih anih vangin bar thleng loin a tawi ral mai mai dawn lo tih a hria.

Otey-a chu wagon shed hnung thim laiah chuan a tawlh lut a, a lo nghak ta a. Minute nga hnu lekah chuan mi pakhat hi chulai gate bulah chuan a rawn pai tang tang a. Khawnvar engah rawn pai lutin office kawngka lam chu a thlir a. Khawnvar eng avang chuan a thim lai chu a hmu thei hauh lo. Kil khat atang chuan Otey-a chuan, "Hello, Beach," tiin a ko a. Beach-a chuan thim lam chu a en vat a, a inring hle. Mahse enga a rawn inlan chuan Otey-a chuan pistol-in a lo tin reng tawh a. Ngawi renga in enin Beach-a chuan a hmui a liak lap lap a. Muangchangin a lu chungah a ban a phar chho ta a.

Otey-a chuan, "Beach, thim zingah khan tawlhlut rawh. I hmel hi ka ten a, ka ten zia lantir hi a hun ta niin ka hria," a han ti a. Beach-a chuan dangro tuihal tak chung chuan thim tham lam chu a pan ta a.

*******************

Milabel-a leh a hote hi sipai hmunah khawm an ni ve lo. A tih dan pangngaiin khum inthên theiah mu in chanchinbu a chhiar a. A chhiar peih tawh loh hnu chuan nisa in a em loh nan chanchinbu chuan a inkhuh a. A hote nen Indian ho chuan an rawn bei anih pawhin an lo dang thei turah a in ngai. Indian hoin hel an tum hi pawi a ti ve vak lo a. Amaherawhchu an lam tang anga lan erawh tha a ti chiah lo. A duh ber erawh chu an agency vawnhim hi a ni. A muhil dawn chiah tihah a mutna hrui chu a chat hmawk a, a lu bul lawka mi pakhat lo thu reng chu a inkhuhna lehkha a laksawn chuan a hmu nghal a. A mutchhuak tireh chiang bertu chu colt .45 barrel kaw hmawrin a lo tin reng chu a ni.

Milabel-a chu a'n meng deuh awn awn a. "Nangmah bawk maw? Jail-ah i tâng emaw ka ti a," a han ti a. A tawngka chhuakah chuan a hlauh hmel vak lo. Mahse a hmuh thut avang erawh chuan mak a tih hmel hle mai. Frank-a chu a hmel a dur khap mai a. Nui leh thei hmel pawh a pu lo. A khabe kual leh a hmai vel chu a chêr hle a, a mit khurte pawh a thûk zo tawh. A hmelah nelawmna a awm lo a, a che vel reng rengah a zangkhaiin a inring tawk hliah hliahin a hriat a. Milabel-a pawhin buaina hmachhawn turin a inpeih niin a hria.

Frank-a chuan engthil emaw hi Milabel-a awmah chuan a'n bel thlawp a. "Kha kha i ta a ni em?" tia zawtin a hmel chu ngun takin a lo thlir a. Milabel-a chuan chu thil chu chharin ngun takin a han en a. Silver spur, dollar khat tiat vel, ngun taka chher a ni tih leh tih bun tawh a niin a bung lehlam a ni tih chu a hre mai a. Ngun taka a en hnu chuan Milabel-a chuan Frank-a en chung hian, "Ni lo, ka ta a ni lo," a ti ta a. Frank-a chu a ding a, "Tho teh," tiin thu a han pe a, a tawngkam chu a hriam em avangin Milabel-a pawh thuawi takin a ding nghal a. "I hnunglam hawi rawh," tiin thu a pe nghal bawk a. Frank-a chuan a spur chu a han endik sak a, a spur bung ken nen a inmillo tih hria in, "A dang i nei em?" tiin a zawt a.

"Nei lo,"

"Khawiah nge i khum a awm?" tia a zawh chuan Milabel-a chuan piah deuh pindan lam chu kawkin, "Engvangin nge min zawh?" a lo ti a. Frank-a chuan, "Tah chuan lut la, i thawmhnaw zawng zawng chhuatah hian rawn theh chhuak vek rawh. Kal nghal teh," a han ti a. Frank-a chuan pindan lamah a nawr lut a. Milabel-a chuan thinur hmel sen tun chung chuan a thawmhnaw te chu chhuatlaiah a rawn theh chhuak a. A theh chhuah zawh hnu chuan Frank-a chuan, "Kha zawng kha maw?" a lo ti a.

"Kristian, ngaithla rawh. Spur hi pair khat bak ka nei lo. Eng thil hmuh tumin nge i lo kal leh tak a?" Milabel-a chuan a han ti a. "I hrelo amaw?" tia Frank-a zawhna chu thinrim deuh hian Milabel-a chuan, "Engmah ka hre lo, vengtu ka dah te pawh engtin nge i rawn kal pelh ka hrelo a. Tunah hetah i rawn awm ringawt a. Eng nge i rawn zawn pawh ka hre hleinem," a lo ti a. Frank-a chuan ngun taka en chungin, "Morg Wheelon-a thattu ka zawng anih hi. Morg-a kahhlum a nih zan khan spur them kha tih bo a ni a, hemi tibotu hian Morg-a hi a that a ni. Chumi chuan chu spur bung lehlam chu a la vuah reng a ni," a ti ta a.

Milabel-a chu a lungngaih hmel riauin a lang a. Chiang deuha Frank-a en chung hian, "Chu chu i chiang amaw?" tiin a han zawt a. "An inbeih lai hmutu in min hrilh a ni," a tih chuan Milabel-a chu a bu nghut a. "Tichuan hetah hian chumi khing bun an awm ringin i lo kal a, kei leh ka hote hi rawn endik i tum amaw?" a ti ta a. "Ni chiah e," a lo ti vat a.

Zangkhai tak hian Milabel-a chuan, "Kristian, vawi tam tak nang nen hian kan lo intawng tawh a, kan la inbei leh ngei bawk ang. Mahse hriatloh pakhat i nei tlat. Chu chu kei leh ka hote hian diktakin thil kan ti tih hi. Wheelon-a rama khawsa in min rawn hmu a, he ram hi kan duh em avangin a thih hnu khan kan luah a ni mai a. Chu chu mihring pawisawilo thah nen chuan a danglam daih a ni. Khatiang khan mi ka that lo tih leh ka hote zingah khatianga mi that an awm lo tih hi ka entir ngei ang che," a ti ta a.

"I ngam chiah maw?" tia Frank-an a zawh chuan, "I duh chuan silai kha keng la, i duh leh a paiah khungbo rawh. Kha khan kawngro engmah a su lo. Helaia ka naute ho thil neih zawng zawng hi ka entir vek ang che," Milabel-a chuan a ti ta a. Frank-a chu kal pelin office-ah chuan a lut ta a. A puakruk kawnghrena inkhai chungah chuan a lukhum a awm a. Lukhum chu a la a, silai reng a ngaihsak lo. Kawngkaa a chhuak chu Frank-a chuan a zui a, bunkhouse cowboy ho chen khawmna in lianpui lam chu an pan ta a. A hote chuan kawngka atang chuan an lo thlir thap a.

Frank-a chuan a pistol chu Milabel-a hnungah chuan a theih anga biru in a keng a. Mahse a hote zinga pakhat chu rang takin a hnungtawlh zauh a. Chupa chuan thil awmzia a hmu thiam tihnaah a ngai nghal a. Milabel-a chuan ring tak hian, "Barney, i silai kha dah rawh. Chu chu in zaa chunga thupek a ni. Jess, i naute ho zawng kha han nawrchhuak rawh. Silai chelek hmasa chu amah a inthat tihna a ni mai, chu chu ka thutiam a ni. Helaiah hian lo chhuak ula, rawn intlar rawh u," a ti ta a.

Muangchangin an lo chhuak a, Milabel-a hmaah chuan an rawn intlar a. A thupek avanga Frank-an a pistol a paia a khung laite chu a hmu reng a. A hote, sawmhnih paruk ngawt a bul hnaia an intlar fel chuan Milabel-a chuan, "Hei, Kristiana hian in spur te a en duh anih hi. In awmnaah khan dingin ngawi rengin awm rawh u," tiin thu a pe a. Frank-a chuan an hnunglamah kalin an spur te chu a en a. A thil ken nen chuan a han en mil ngial thin a, a en zawh chuan Milabel-a chuan, "Kristian, bunkhouse lamah khan lut rawh. Naute u, lut ula, in khum zawn theuhah in thil neih zawng zawng chhuatah khan rawn phawrh rawh u," tiin thu a pe leh a.

In chhungah chuan lutin an thawmhnaw bawma an neih ang ang an rawn phawrh a. An spur te pawh chu rawn phawrhin Frank-a chuan a en dan dan a. Pakhat chu ngun deuh zawkin a en a, mahse a ken nen chuan a inmil chuang lo. A en zawh hnu chuan Milabel-a chuan, "Hmun dang, thir denna hmun te, wagon shed te leh inchhungte hi i en duh em?" tiin a lo zawt a. "En duh e," a tih chuan dawhthei takin, ngawi rengin Milabel-a chuan a hruai zel a. Gus-a khan a thattu chuan vawiin ni thlengin a la bun reng a ti a. Helai ami tumah in chutiang mil chu an bun si lo. A beidawn hnu chuan Milabel-a hnenah, "Helai vengtu spur ka en hnuah lungawi takin ka kal ang. Ka lawm khawp mai," a han ti a. Milabel-a chuan sakawr latu a ko a, in hnung lam, vengtu awmna lamah Frank-a nen an chuang phei a. A vengtu spur chu a en a, a inmillo tih a hmuh hnu chuan kal nghal mai a tum a. Mahse Milabel-a chuan, "Kristian, i thiltih dan hi ka ngai thutak khawp mai. Ka inrawlhna tur a ni lo chungin helai ram puma spur zawng zawng hi i thil ken nen a inmil em tih zawn chhuah hi i tum em ni?" tiin a zawt a.

"A tul dan azir ani ang chu,"
Milabel-a chuan, "Chutiangin i zawng tih an hriat rualin a neitu chuan a lo paih bo daih ang. Chutihlai chuan nang hi sipaiin an zawng reng bawk si che a," a lo tih chuan Frank-a chuan, "Hetiang nei thei chu ho hnih chiah an awm a, nang leh i hote hi pakhat zawk chu in ni," a lo ti a. "A dang chu?" tia zawhna chu a chhang hauh lo.

Milabel-a chuan sakawra zuangkai pah hian, "I mi rinhlelhna thang atanga ka fihlim theih dan kawng khat a awm. Chu chu Corb-a hnena hruai che a, anni ho spur va endik pui che a ni," a lo tih chuan Frank-a chuan, "Tichuan Corb-a hnen kan thlen veleh nang hi a lamah i tang thut anga," a lo tih el a. "Ka lawm khawp mai," tiin a hnar zui bawk a. Mahse Milabel-a chuan, "Pistol pahnih i neih laiin keiin pakhat pawh ka pai lo. Corb-a hnen i thlen ruala buaina thleng tur laka ka chhanhim theih nan che ka ti anih chu," a han ti a.

Frank-a chuan thil ni thei tur te a ngaihtuah vang vang a, a chhang lawk lo. Corb-a naute ho hi Circle R a thawktute ang niloin amah an lo bei ngei ang. Tunah hian anni pahnih hi partner anga awmin an thawh dun lai a ni a. Chuti anih chuan Milabel-a hian Corb-a leh a hote hnenah Frank-a hi a duh ang en thei turin a thlem thei hlauh maithei a ni. Chu chu beiseina neiin Frank-a chuan, "A that dawn chu," a ti ta a.

(Next chapter hi a tawpna tur a ni tawh dawn a, amaherawh chu ni khat kan chawlh a ngai maithei a. Damtea awm chuan kâr tawpah kan chhiar zo hman turah ngai ang aw)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 2nd, 2018, 5:46 pm

WAR ON THE CIMARRON
Bung - 18

Corb-a chênna an thlen chuan Frank-a chuan fimkhur takin a pan a. Sakawr atanga chhukin, in leh ama inkarah chuan Milabel-a chu kal tirin hmalama kawngka inhawng chu an pan nghal a. An han luh chuan muhil hnâr thawm an hria a. Piah deuha thutthleng bana kut uaithla zar chunga mi pakhat muhil hi an hmu a. A hmaah chuan zu um hi a let rân a. Frank-a chuan chupa ke chu a'n en a, mahse spur a lo bun hauh lo. Inchhungah chuan thawm dang reng reng a awm lo a.

Frank-a chu lungawi vakloin a han phun deuh a. Gus-a thusawi, he spur bung lehlam neitu chuan tun thlengin a la bun a tih kha a han ngaihtuah a. Mahse Corb-a leh a hote chu an lo awm hauh si lo. Milabel-a chuan, "A vanduaithlak hle mai. An lo haw hun i nghak dawn tihna em ni ang?" tiin a han zawt a. Frank-a chuan, "Ni mai e. Tunah hian an thawmhnawte ka'n en teh ang," tih pah chuan chunglam panna kailawnah chuan a lawn nghal a. Pindan hmasa ber, in kil lamah chuan a lut ta nghal a. Chuta khum lo awm chu thira siam a ni a. Thawmhnaw thenkhatte chu chhuatah a darh nuaih a. A mutbu te chu a bâl hle bawk a.

Thawmhnaw dahna bawm hnuaiah chuan boot pair khat a awm a. Chumi sirah chuan spur pair khat hi a lo awm bawk a. Frank-a chuan thingthiin pakhat chu a la a, a han en a. A'n enchian deuh chuan a thin a phu ta ut ut mai. Spur bal leh a them, a iptea a ah chu a han chuktuah chhin a, a lo inmil ta thlap mai le. Spur pakhat chu a la leh a, a iptea mi nen chuan a inmil hauh lo. A inmil zawka chu kengin step pahnih chu pen khata hmanga tlanin, inchhunga mi pakhat mutthlukna lam chu chak takin a pan a, a thutna thutthleng chu phet tluin chupa chu a kawr awmah a tham a, na takin a han beng siah siah a.

Chupa chuan a kuta indan a tum ngial a, mahse Frank-a chuan a beng zui zel a. Khur deuh hlak hlaka a din lai chuan chu spur chu Frank-a chuan entirin, "Hengte hi tu ta nge?" tiin a zawt a. Muangchanga rawn meng fiah deuhin chupa chuan, "Khang spur te kha maw?" a rawn ti a.

"Ni e,"

"Khawia i hmuh nge?"

"He pindan chhungah hian,"
"Corb-a ta a ni ang, he pindan chhungah hian a mu alawm,"

"Tunah khawiah nge a awm?"

"Reno khuaah,"

Frank-a chuan chupa chu khumah a nam thlu chawrh a. Hmanhmawh takin enge lo thleng ta tih hriat tuma lo kal, Milabel-a chu a tlan pel a. Milabel-a chuan makti takin a en zui vawng vawng a.

********************
Luvie-i chuan a pa thinrim chu Otey-an a chhuahsan hnu khan a bengdai hlei thei lo. Chutihlai chuan an pindan kawngkhar chu a rawn ri dawt dawt a, a han hawn chuan Edith-i chu kawngka bulah a lo ding reng a. Ani chuan, "Luvie, khawnge i pa hi?" tiin a lo zawt vat a. Luvie-i chuan, "Hetah hian. Khawiah nge i. ..," a tih mek lai chuan rawn kal pelin Edith-i chuan, "Mr. Barnes, ka bulah hian lo kal teh," a va ti a. "Colonel hmu tur kan ni a, mahse santiri hoin min kaltir duh hauh lo. Red-a hi hruaibo talh an tum lehnghal a," a rawn ti a. Barnes-a chuan, "Eng thil nge ni ta a?" tiin a lo zawt a.

"Major Corning-a hmuh a, Darlington kawnga hruai a ngai a ni. Nangin i tih chuan a lo kal mai ang. Khawngaihin hmanhmawh deuh teh," Edith-i chuan a ti mawlh mawlh a.

Barnes-a chuan phâwk deuh hrâ chungin Edith-i thu chu zawmin, an pathum chuan parade ground kalpelin administration building lam chu an pan ta a. Santiri chuan lo tih din a tum nâin, Barnes-a chuan a nam sawn lawk a, Major Corning-a office kawmgkhar chu a nam hawng nghal a. Major Corning-a bulah chuan officer pakhat hi lo awmin an in be mek a. Mahse Barnes-a a hmuh veleh a tawlhsawn nghal a. Edith-i chuan Barnes-a chu kal pelin Major Corning-a dawhkan lam chu a pan nghal vat a. "Major Corning, khawngaih takin lo kal nghal teh," a va ti a.

"Engvangin maw? Khawiah maw?"

"Indian ho buaina siam mek tih tawp i duh chuan ka rual hian lo kal nghal rawh,"

Major Corning-a chu thoin Edith-i chu a zui chhuak ta nghal a. Luvie-i leh a pa in an rawn zui bawk a. Edith-i chuan chu in kal hual chuan a hruai a, Darlington panna kawng chu an thleng ta a. Building piah hret kawnglaiah santiri pahnih hi dingin, an inkarah laltin hi an chhi nghe nghe a. Red-a, sakawr pahnih, ama ta leh Edith-i sakawr hrui vuana lo ding chu santiri pahnihte chuan rifle-in an lo tin ran mai a.

Thil awmdan a hmuh a, Red-a hmel a hmuh chuan Major Corning-a chuan makti taka Red-a en chung chuan, "Eng thil nge ni ta ngai a?" tiin a'n zawt a. Red-a chuan zawi muang charh, thinur tih hriat tak hian, "Ngun takin lo ngaithla teh, ka sawi nawn dawn hauhlo ania. Stone Bull-a, Cheyenne lal putar khan chawhnu lam atang khan tuna nawrh tuma hel ho hruaitute hi a bukah a khawi mek a. Scott Corb-a whisky ka ruk chhuah chu a in pui mek a ni. Chawhnu lam zawng khan Edith-i leh kei hian Stone Bull-a kaihhruainain an rilru thlak turin kan ngen ngar ngar a, an zu ruih tantir lam chuan an pâwng nasa mai a. Mahse tunah chuan an inbeng hniam ta viau mai," tiin a han ngawi leh vang vang a.

Amah bawk chuan, "Tunah chuan an rui let dêr tawh a, an muhil vek. Stone Bull-a bûkah tunah hian sipai ho khat tirin chung kawhmawh bawla hotu zawng chu i rût thei vek a. Sipai hmunah hian tân tir la, helna chawh chhuah an tum chu a tawp tihna a ni ang," a han ti chhunzawm a. Corning-a chuan, "A tawp a? Chung mi tlemte te chuan he harsatna kan sut kian tumnaah hian awmzia an nei dawn em ni?" a lo ti hâ mai a.

Red-a thung chuan, "Ka han sawi zo phawt ang. Stone Bull-a chuan i officer zinga fing ber leh sipai engemaw zat amah pui tura i tirh a, midangte hnenah Cheyenne leh Arapaho ho te hnenah naktuk maiah hian bawngsa tam zawk kan sem ang tih i tiamtir phawt chuan helna hi a awmlo ang. Indian ho hi an tam nasa a, a hotu pawl i man a, sa i pek phawt chuan an hel lo ang, Major," a ti ta zel a.

Major Corning-a chuan khawnvar engah Red-melh reng chung chuan rei tawk a ngawi a, a tawpah chuan, "I chungah hian rinna nghat tur ni ila chuan ka....." a tih lai mek chuan vin fe hian Red-a chuan, "Ka chungah rinna nghat hauh suh. Ani hi ring zawk rawh," tiin Edith-i chu a'n kawk a, "Ani hi Stone Bull-a bûkah nilengin a thu a, chutih hun chhung zawng chuan Cheyenne tlangval hoin an chhaih nawmnahin, a lu vun hih-ah te an vau a. A thu hi ngaihthlak tur a ni. Amah kha han zawt teh," a lo ti a.

Major Corning-a chu Edith-i lamah a inher vat a, "Major Corning, a sawi ang khan ti rawh," lo tiin, "Ka thusawi hi ring rawh. An zinga seilian ka ni a, Stone Bull-a leh midangte hian remna leh muanna hi an duh tih ka hria. An hruaitu thenkhat, Corb-a thurualpui Indian te man annih phawt chuan buaina hi a tawp a ni mai. An hruaitute chu man la, i thutiamah ding bawk la, hetia buaina inmung hi chu a tawp ani mai," a lo ti ve a.

Major Corning-an Edith-i tumruh hmel te leh hetiang hun pawha zâmna reng neilo a thutak a rawn phuh chhuak hmel mawi tak a hmuh chuan a nihna chungnung tak pawh chu chhuang thei nia inngailoin a inher vut a, administration building tukverh atanga officer, anmahni lo thlirtute hnenah chuan, "Brett, awmkhawm turin tawtawrawt hamtir rawh. Ngawi rawh, a ni leh lo, lo nghak leh hret teh," tiin a inher a, Major a nihna lam theinghilhin a tlân ta dawr dawr a.

*******************

Santiri te pawh an hmuh theih tawh tihin, anni ho paw'n an rawn hmu hnai tawh tihah Milabel-a chuan Frank-a hnenah chuan, "Kristian, i ti duh chiah amaw? Luman nei i ni a, sipai lak atangin i tlanboin thubuai i nei bawk a. I kal thui....." a tih mek lai chuan Frank-a chuan zawi fiah tak hian, "Santiri hi min paltlang pui vat rawh. A bâk chu keimahin ka chingfel vek ang," a lo ti hmiah a. Milabel-a chu a rûm nghut a, santiri ten, "Tunge khalaia kal te kha?" tia an rawn zawh chuan Milabel-a chuan, "Chet Milabel-a, Circle R atangin. Ka bula kal hi ka hote zinga pakhat a ni," a lo ti a.

Santiri chuan, "Anih tak chu Milabel, in sakawrte kha corral-a sipai hnenah khan hnutchhiah ang che u," a ti ve mai a. An kal tlang a, sakawr in hungna corral an thleng a. A thim deuh laiah chuan sipai pakhat hnenah an sakawrte chu an hnutchhiah a. Chu sipai chuan, "Nangni pahnih chu in va rawn tlai tehlul em!" a lo ti nghe nghe a. Stable bul kawng thui takah chuan kalin wagon dahna hmun an rawn thleng a. Helai chu Frank-a pawhin a hre ve a. He hmun hi Fort Reno an thlen a an lo dawnsawnna hmun kha a ni. Hetah tho hian Corb-a pawh an dawnsawn ve a ring.

Office an kal pelh lai chuan Milabel-a chuan thawm a hria a. Mahse Frank-a chuan hrelo ang maiin a kal zel a. Vawilehkhatah, "Frank," tia koh ri a hre ta. Otey-a aw ngei a ni. Frank-a pawh aw lo chhuahna lamah chuan a hawi vat a, Otey-a chuan, "Min lo nghak lawk teh," tiin, inkhawih ri chawrh chawrh te, a hnuah phei chuan leia mihring tlu thawm niawm tak te chu an hre zui nghal a. A hnu lawkah chuan thim zing atang chuan Otey-a chu a lo chhuak ta a. A hnar chu a thi hnû a, a mit chung hi a kak deuh bawk a. A kutbawrte pawh chu a thi deuh nual a. Mahse hmel hlim tak hi a pu a, Frank-a bulah chuan lo kalin a han en vel a. A silai pai a hmuh veleh, "Khai aw! Hmuh phaklohah tlanchhuak lehnghal rawh," a han ti a.

Frank-a thung chuan, "Corb-a hi hetah hian a awm em?" a lo ti a. Otey-a chuan, "Mi â pa, hetah hian mi zathum atanga zali bawr vel, an hmuh veleh che a that tura thupek nei sa diam an awm asin," a tih chuan Frank-a chu a inher that a, gate lam pana kal mai a han tum a. Mahse Otey-a chuan a bâna man pah hian, "Frank, eng nge ni ta a?" tiin dam thlap hian a han zawt a. Frank-a chuan, "Otey, Corb-a hian Morg-a kha a that a ni. Gus-a sawi ang khan spur kha ka zawngchhuak a, chumi mil pui ngei chu Corb-a khum bulah ka hmuchhuak a ni," a tih chuan Otey-a chuan a thlah vat a. "Saloon-ah a awm e. Fimkhur viau ang che. I hnung ka rawn zui nghal e," a ti ta a.

Gate atang chuan Milabel-a chuan, "Helai hi ka thlen chin ni tawh rawh se," a rawn ti a. Otey-a chuan, "I inthiarfihlim pawh a that zawk hmel," a lo ti hmak a. Frank-a erawh chuan engmah a sawi lo. Saloon lam pan chuan hmanhmawh vakloin a kal a. Tukverh zawn a thlen chuan dingin chhunglam chu a han thlir a. Tunah chuan bar-ah mi an thawl deuh tawh a, mahse bar dawhkan inthlehna lai, tukverh piah deuh takah chuan Corb-a chu lehkhaden khalin a lo la thu a. Tukverh chu a lo hmachhawn a. Frank-a chuan a'n teh vel a, kawngka bul fit sawm vela a thlen hmain an lo kâp ngei dawn tih a hriat avangin, "Otey, kawngka atang khan a chhunga awmho saw lo thunun ang che," tiin thu a pe ta a.

Tukverh bul hnaiah chuan kalin thutthleng a la lawk a, na tawkin tukverh darthlalang chu a vaw keh ta a. Chumi rual chuan Otey-a chu kawngkaah chuan zuanglutin, ring tawk hian, "Mi tumah kha che reng reng suh u," tiin thu a pe nghal a. Frank-a pawh tukverh atang chuan lutin, pistol hi a rawn lek chhuak vah mai a. Corb-an Frank-a hmel a hmuh chuan makti zeta meng phawk chungin a thutna atang chuan a tho deuh uaih a. Mahse zawimuangin a thu leh ta a. Frank-a chuan vin that, ring tawk hian, "Corb, ding rawh," a han ti a.

Corb-a chu muangchangin, bar inthleh kawina bulah chuan a rawn ding ta a. Frank-a chuan, "Khalai i tawmna kil atang khan lo chhuakin pawnah hian chhuak rawh. Kawngka pawn i dai rual chiahin i uicho ho hi che hauh lo turin thu pe ang che. Nang hian Morg-a kha i that tih ka hria a ni," a ti ta a.

Corb-a chuan thupek chu a zawm mai lo. Muangchanga thoin, dawhkan hêla rawn kal chhuah tum anga a lan lai chuan vawilehkhatah bar hnung hmun him laiah chuan a zuang phei ta hlauh a. Frank-a chuan kah a'n tum naa, bar-a ding zu in lai engemaw zat an awm avangin a kâp mai thei ta lo. Mipui karah zuangin, mite keu chungin a tlân phei a, bar hnunglam a va thlen chuan bar hmawr lehlam tawpa store thim tak luhna kawngkhara Corb-a lut tur chu a va hmu zuai a.

Corb-a chuan rawn lehhawiin a rawn kâp a. Frank-a lu bul lawk kawngka kiang chu a rawn fuh dawt a. Chutihlai chuan Otey-a pawhin ceiling lam hawia pistol hmet puakin, "Tumah che suh u," tiin ring takin thu a rawn pe a. Corb-a chuan corridor piah deuha inchhawng kailawn lam a pan a. Hmanhmawh zetin, step pahnih te, pathum te kânin a tlan lawn chho a. A chung ber step a tlan pelh dawn laiin Frank-a chuan a'n kâp zui a. Mahse hmanhmawh thiltih a ni a, a kâp fuh lo. A chak thei anga tlanin Corb-a rawn kah let dan tur pawh ngaihtuahloin step-ah chuan a tlan lawn nghal a. A hnungah Red-a leh Luvie-i te khan an rawn zui ve ta bawk a. Red-a chuan, "Frank, fimkhur takin bei rawh. Corb-a hi verther tak mai ania," tiin thurawn a rawn pe a.

Hnuailama mite Otey-a tan thunun sên annih tak loh avangin kailawn lam pan chuan engemaw zat an rawn tlan a. Thenkhat phei chuan kailawn lam chu an rawn kâp ta a. Kailawn tawp zawl, hnuailam atanga lang lo laiah Red-a leh Luvie-i te chuan tanhmun an siam a. Kailawna rawn chho tur an veng a ni ber a. Red-an Frank-a lam pan a tum lai chuan Luvie-i chuan, "Red, i pistol pakhat kha khawngaihin min han pe teh, rang takin," a lo ti a. Red-a erawh chuan, "Hmeichhia i ni si a, a hman dan pawh....." a tih lai chuan Luvie-i chuan, "A tân chuan ka tang ve thei dawn lawm ni? Vawikhat tihhluma a awm theih nan ka bei tawh a. Red, khawngaihin ka thil tih tawha ka inchhir zia lantir nan theihtawp chhuahna hun min siamsak lul teh," a lo ti a.

Red-a chuan a pistol pakhat chu a pe a, hmanhmawh zeta a tlansan lai chuan Luvie-i hi lo thi ta se tiin a ngaihtuah a, a dâwn thui ngam loh bakah a hman lo bawk. Frank-a chuan Corb-a awmna lam nia a ngaih a pan zel a, in chung veranda zau takah a chhuak hlawl a. Veranda tawp thim deuh atang chuan Corb-a chuan a rawn kâp ta a. Frank-a pawh chuan rang zet zetin vawihnih a chhang let a. Thim zing atang chuan Corb-a chu rawn tlan chhuakin, a tlan dan atang chuan hliam a tuar tih a hriat theih a. Tlanchhe chungin Frank-a lam hawiin a rawn kap let a. Frank-a pawh chuan kâp ve lehin veranda hmawr a thlen hmain Frank-a chuan a kâp fuh leh ta. A awmna a hmawr tawh bawk a, veranda hungna chu va bawhin a bu liam ta a. A hnuai kawngpuiah chuan a tla thum dawt a. Chutih rual chuan a hnunglam atang hian thupe aw takin, "Sâng tawkin i kut phar chhuak rawh. A nih loh chuan i thi ngei ang," tih thupek Frank-a chuan a dawng ta a ni.

Frank-a chu kailawnah sipai kârchehin kawtzawl lamah an rawn kalpui a. Mi tuten emaw Corb-a ruang kawngpui ami chu puani an lo khuh tawh a. Major Corning-a pawh a officer ten khawnvar engah an lo din hual taih a. Red-a chu a pawrin, silai pawh a lo keng tawhlo a. Luvie-i, Edith-i leh Otey-a te chuan Major Corning-a ang bawkin Frank-a chu an lo nghak a. Otey-a erawh chuan Corb--a mi leh sa pahnih hi a pistolin a lo tin rân a.

Frank-a chuan pawr chhap chungin anni ho chu a rawn pan a, Major Corning-a chuan thunei takin, "Tun tumah hi chuan i tlanbo tawh hauh lo ang, Kristian," a lo ti a. Chu thu chuan sipaiho hnunga ding khawm ho nuih a ti za deuh a, an nui hak a. Luvie-i chuan thinur tak hian, "Tlanbo i tia lo?" tiin, "Engvangin nge a tlanbo ang? Engmah tihsual a nei hleinem," a lo ti a.

Major Corning-a chu inherin, "Nula, ka sipai ho mimute sawm chhung ngawt silaia lo dang thei hian he thuah hian sawi ve tur i nei hauh lo," a han ti a. "Chuti anih chuan kei hian sawi tur ka nei ang," tiin pungkhawm ho zing atang chuan Chet Milabel-a chuan sipai ho chu rawn tawn kiangin, "Engvanga Frank-a hi man tur nge a nih le?" tiin a rawn zawt ta a.

"A tualthat lai i hmu reng alawm," Major Corning-a chuan a han ti a. Pâwr zet hian Milabel-a chuan, "Ka hmuh hi tualthat a ni hauh lo. Thudik tan thil ti ani ka hmuh. Corb-a hian hepa thianpa hi a that a, a fiahna i hre duh anih pawhin a thusawi hi ngaithla mai teh," a rawn ti ta zel a.

Major chuan, "Ka ngaithla khawp ang," tih pahin Frank-a lam chu a hawi a. "Corb-a hian Wheelon-a a that tih fiahna chu eng nge i neih le?" tiin a han zawt a. Frank-a chuan spur pair khat phawrhin, thil awmdan chu a hrilhfiah ta a. Milabel-a chuan a dik tih a lo nemnghet bawk a. Luvie-i te, Barnes-a te, Red-a leh Otey-a ten bûka Gus-a thusawi nen a inmil thuin an lo tanpui bawk a. Chutia an rawn tawng tak sup supah chuan Major chuan a beng a hup ta hial a.

"A tawk e, a tawk e," tiin thinur tak hian Major chuan, "Chu pawh chu lo ni ta reng se, Kristiana hian luman tam tak a nei tlat. Milabel-a hnathawktu a thah vang a ni. Corb-a nen inthuruala thubuai awrhtir in nih nghe nghe kha, Milabel," a han ti a.

Otey-a chuan rang vatin, "Red, silai hi kengin heng mi pahnih hi lo thunun teh. Major, ka lo kir leh hma chu engmah lo ti suh," a ti a, Major chuan Otey-a lam chu a hawi vat a, mahse Otey-a chuan thim zingah a pilbo san a. A hnu minute hnih lekah chuan thim zing atang chuan khawnvar engah Beach Freeman-a chu a rawn nam kal ta dawt dawt a. A hmai te chu a thi hnuang mai a. Otey-a chuan a dawm ding a.

Major Corning-a hmaah chuan hruai pheiin Otey-a chuan, "Beach, Milabel-a naute zinga pakhat kha tu in nge that? Chiang taka i sawi loh chuan i tawrh mek ang hi i tuar chhunzawm dawn khawp," a han ti a. Hmui kak chhah bâr chung chuan Beach-a chuan, "Keima thah a ni," tiin chau tak chung chuan, "Ka tih palh anih bakah a loh theih loh a ni," a han ti zui a. Frank-a pawh chuan lungawilo tak hian Major hnenah chuan, "Chumi avang chuan a hna atangin ka bân ta nghal a ni," a lo ti a. Milabel-a chuan Frank-a chu enin dam thlup hian, "Chu thu ka hria chu ka va lawm em! I thah ni ngat sela chu i châk lo hle ang," tiin Major hnenah chuan amah bawk chuan, "Major, a chungah eng thubuai nge i la rawn phuh chhuah dawn?" tiin a'n zawt a.

Major Corning-a chuan thinrim aw fiak thak hian, "Eng dang nge ni ang? Ka lo hriat danin Frank Kristiana hian Corb-a hote pali lai anmahni zan lama beiin a that anih kha," a han ti a. Chu veleh Red-a chuan a hmaa Corb-a mi chhawrte chu an hnungzangah tlawhin Major Corning-a hmaah chuan a khalh phei a. "Nangni vâla te u, Major hmaah hian thudik in sawi mai dawn nge whisky in tawlh ruk thin avang zawkin Major hnenah thubuai ka siam sak dawn che u," a han ti a. Red-a bawk chuan, "In thianpa Gus-a khan engkim chiang takin min hrilh tawh a, tute nge a phusa zual thlengin ka hre vek tawh," a han ti zui a.

Pakhat zawk chuan Red-a chu a'n melh zawk a. Major hnenah chuan, "Corb-an Kristiana a va rûn zân khan ka kal ve a, Kristiana hian min rawn bei lo. Kan chan kha kan chan tur reng zawk a ni," a han ti a. Major Corning-a makti chu a âng phuau mai a. A officer te a en kual a, a tih theih chu makti taka a sawitu en kha a ni mai. Frank-a chuan dam thlap hian, "Major, sawitur dang a la awm em?" a han ti a. Major chuan , "Ka sipai ho hnen atanga tlanbo kha?" tia a lo zawh chuan Edith-i chuan, "Stone Bull-an a chhanchhuak anih kha," lo tiin, "Frank-a hian thubuai engmah a nei lo tih hi pawm mai teh," a lo ti ve bawk a.

Captain chu lo inrawlhin, "Major, thubuai lo irh chhuahna bul ber hi whisky-a inhrai ruih kha a ni," a lo ti a. Milabel-a chuan, "Kristiana kha ka thang kamah a awk anih kha. Corb-a hnen atangin whisky kha ka ru chhuak a, a ramah ka thukru anih kha," a lo ti leh a. Major chu a thinur kher mai. "Kristianan helai ram a rawn rah tirh atanga li hmelmak leh hal em em tu, Milabel, heti tak hian Kristiana chhuah zalen i duh ta a?" a tih chuan Milabel-a chuan, "Duh e," tia nui sung hian, "A chunga tih ka tum ang apiangin min vawm lêt siah siah zel a. Chutiang mihring chu thenawm atan ka duh tlat a ni," a han ti a. Captain chuan, "Chu pawh ni se jail atangin a tlanchhuak a," a lo ti hram a. Frank-a thung chuan, "In mi charge na kha a dik chuang hleinem," a lo ti thung a.

Luvie-i chu Major bulah chuan a va kal hnai a, "Major, zaninah hian helaia buaina siamtu lian ber nuai bo a ni a. Chupa chu whisky tawlhrua Indian ho hnenag hralhru thin a ni a. Indian ho fuihpawrh a bawng ru thin a ni bawk. Chutiang mi nuaibo a hna pawimawh titu chu nang hian jail-ah tântir i duh tlat a. Chutiang chu United States sipai rorel dan tur a ni thei angem?" tiin a zawt ta a. "I duh dan tak tak a ni thei em?" a'n ti leh sak a. Major chuan Luvie-i chu enin, "Ni lul love, mami, mahse inhnialna leh thu hian mittui tam tak bakah finna te pawh a tichhuak thin. Zaninah hian heng zawng zawng hian thudik a rawn hai lang ta a nih hi," tih pah chuan Frank-alamah a kal a, chibai buk nan a kut a phar chhuak ta nghal a. Chibai buk pah chuan, "Ka fapa, helaia ka awm chhung hi chuan boruak ang maia zalen i ni e. I phurrit belhchhah ka duhna pawh thinlung taka i chunga ka lawmna hi a ni," a ti ta a.

Frank-a chuan chibai a lo buk a, lawmthu hrilh a tum lai tak chuan cavalry officer pakhatin sakawra chuangin a lam a rawn pan a. Chu officer chuan chibai rawn buk pahin, "Major, kawhmawh bawl zinga an hotu zawng zawng chu taninah an awm tawh a, captain Brett-a pawh Indian camp atangin him takin a lo kir leh tawh e," a rawn ti a. Major chuan, "A tawp ta tihna maw?" a lo ti hu a. Chu officer chuan nui sang chung hian, "Ka hrelo le, ka pu. Mahse an inchawh phurna khuang ri chu a tawp ta ngei chu ania," a han ti a.

Major chuan Red-a lam a pan phei a, chibai buk pah chuan, "Shibe, sipaia i tang lo hi chuba pawi mange. Discipline hnuaiah awm phei la chu i thawhhlawk lehzual tur. Tuna i thiltihah hian lawmthu ka hrilh mawlh mawlh a che. Helaia ka awm ve chhung hi chuan eng hunah pawh, i duh hun hunah Officer's Mess-ah a thlawnin chaw i rawn lam thei e. Harsatna i neih chuan min hriattir zel ang che," tiin Luvie-i leh Edith-i te chu salute a pe a, parade ground lam panin a kal a, a officer te pawh chuan an zui ta a. Reiloteah mipui pawh an tin darh ta.

A bula ding Edith-i hnenah chuan Red-a chuan, "Morg-a phuba lâkna ang a ni ber e," a han ti a. Edith-i pawh a bu nghat a, lungngai hmel amahah a lo lang zawk a. Mahse a hnu lawkah chuan hlim hmel pu takin Red-a hnenah, "Morg-an hetiang thian a lo nei che u hi a van hlu em!" a han ti a. Red-a chuan, "Heng zawng zawng hi Frank-a thawh chhuah vek a ni," a tih chuan Edith-i chuan, "A dik e. Mahse Frank-a ang bawka thian rinawm a lo nei che hi a ropui ka ti," a lo ti a. Red-a kutbawr chu vuanin a chulsak ta heuh heuh a.

Luvie-i chuan Frank-an spur a iptea a ak tha lai chu a lo en reng a. A thaw a sa phat phat a, a pa lam chu hawiin, "Ka pa, lo kal rawh le," ngui deuh hian a han ti a. A pa
kut vuanin hotel lam an pan ta a. An hnunglama ke pen thawm leh anmahni rawn kal rual puitu Frank-a chuan, "Mr Barnes, parade ground vela han kualpui atan Luvie-i hi sawm ta ila i remtih zawng ani angem le?" a rawn ti a. Barnes-a chu a nui hak a, "Amah hian chhang mai teh se," a lo ti a.

Zawi sap hian Luvie-i chuan, "Ka pa, mangtha phawt," a han ti a. Frank-a nen chuan parade ground tan tlang zawngin, kawtthler khawnvar engin a thlen phak loh ram dai lam chu an
pan ta nghal a. Frank-a chu a ngawi vang vang a, sipai nupui nei tawhho chenna quarters an va hnaih tihah chuan Frank-a chuan, "Zanina Major thusawiah khan ka hriatthiam loh a awm tlat," a han ti a. "A eng ber kha nge?" a lo tih chuan Frank-a chuan, "Silaiin sipai engemaw zat i dang bet anga a sawi kha," a ti a. "Chutiang chuan i lo ti reng em ni? Engvanga ti nge i nih a?" a ti ta zel a.

No hnâp hian Luvie-i chuan, "Ka bâ ka rûl anih kha. I hnenah 'ka inchhir' ka tih khan min ringlo a. Frank, rin ka hlawh theih nan ka tih theih tawk ka ti ve anih kha," a han ti a, inhmachhawnin an ding dun ta a. Frank-a chuan, "Luvie, chhan hrang hrang vanga kan inhnial kan inhnial atang daih tawh khan ka tâ i nih zia hi ka hre daih tawh. Min kalsanin inthen daih mah ila ka tâ i ni reng dawn," a han ti a. Rilru hlim leh inthlahlel tak chungin an kir leh ta a.

Kut insuih chunga hlim taka an lo kir leh chuan kailawn bula lo thu Otey-a leh Milabel-a te chuan fiamthu an lo thawh a. An bul an rawn thlen chuan Otey-a chuan, "Frank, he kan lu liana hi fing vâr deuha siam dan i hria em? Kan bawngrual khalh hrangtur mi panga pawh kan tir chhuak theilo anih hi," a lo ti a. Milabel-a thung chuan, "Tlaktlailo pa, ngaithla rawh. Chung hnathawk tur chuan mi panga ka rawn tir mai dawn alawm," a lo ti a, an nui tlang ta dar dar a.

A tawp ta..

(Ka han chawl leh deuh hlek anga, Pathian zarah damtea kan awm chuan 'The Californions' nen ka rawn let leh ang - VM)

LIKE TU LEH COMMENT TU TE IN ZAVAIA CHUNGAH LAWMTHU KA SAWI TAK MEUH MEUH E.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)