THE CALIFORNIOS (Western) (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: THE CALIFORNIOS (Western) 1 - 12

Unread post by Ngaia » September 27th, 2018, 7:55 pm

THE CALIFORNIOS
CHAPTER - 13 (last chapter)

Sean Mulkerin chu tluang takin a kal zel a, tuna a kalna hi chu an kal hmasaka an zawh tak loh zawk kha a ni a. Ram pilrila hmelma nei chunga vah vel chuan kawngtum pangngai zawh chu a him tlat lo a ni. Ten Syclomore flat a thlen chuan a sakawr chu tui a intir a, reilote hnim a peh tir hnu chuan a kal leh ta a. A hnunglam chu amah umzuitu an awm nge awm lo tiin a en deuh reng a.

A hma pawh khan an zui tawh a, tun tumah pawh hian an zui leh ngeiin a ring tlat a ni. Khua a thim tan tih chuan luite kamah hian a riak ta a. A tukah chuan a riahna bul vel chu a han fangkual thuak thuak a, sakawrah a lawn a, a kal leh ta a.

Kawng pangngai zawh loin hnimbuk karah a kal a. Ram chu a chhengchhe hle mai lehnghal a. Van chu chhum han pawlhtu pawh awm lovin a thiang kuk mai a. Beartrap Creek chhak, tlang chhip zawl a lawn chhuah zawh chuan ni pawh a chhuak sang tawh hle a. Chuta tang chuan a nu sawi, sakawr pheikhawk pianhmang ang deuh ram awmna tlang pawh kha a va hmu thei ta a.

Engemaw chen a kal leh hnu chuan riahna tur hmun remchang tak, lungbang khuar, hnimbukin a hual vel hi a hmu ta a. Thingbukin a meikhu a ti tai darh a, a lansar loh nan thingbuk tawi tha tak hnuaiah chuan mei a chhem a, coffee a lum a, sarep a hem lum bawk a.

A in eipuar hnu chuan mei chu a timit a, lungbang khuar laiah chuan kawmawl a phah a, mut hmun a rem ta a.

*******************

Beltran-a chuan lungawilo zetin, "Kan hloh ta der mai. Kan hloh chiang lutuk!" a han ti a.

Velasco chuan, "Engpawhnise, Francisco-an hmun pakhat a sawi kha a pan dawn tho alawm. Kawng dang zawh pawh nise chulai hmun chu a pan tho ang. Kan thlen khalh anga, kan lo chang mai dawn alawm," a lo ti a.

Beltran-a chuan, "Chu phei zawng a dik. Mahse min pilbo san daih thei kha a mak ka ti a ni," a ti bal bal a. Velasco chuan, "Tawh a khirh hmel riau mai. Fimkhur taka kan chet a tul a ni," a ti charh charh a.

Beltran-a chuan chu chu a lo ngaihtuah ve lai mek a ni. A kalna lam an hriat avangin Mulkerin-a sakawr hnu chu an lo en ngun duh lem lo a. Mahse vawilehkhatah sakawr hniak hnu chu an hloh hmin derin Sean-a kalna chu an hre ta lo a ni.

Senora-in Old one sakawr an hnutchhiahna kha an hmuchhuak ta a. Mahse sakawr hniakhnu thar reng a awm lo a, kopang khuar deuh leh a bul vel chu Velasco chuan chik zetin a han thlek kual a.

Beltran-a chuan, "Enge hmuhchhuah i neih?" tiin a thianpa chu a zawt a. Velasco chuan, "Thil hriat chhuah ka nei. Cantina-a zu kan in lai khan hmeichhia khan Russel-a chungchang a sawi ka hria a, a vahchhuah lai chuan tlangval thalai a ni a, an hmuh leh meuh chuan a lo tar thi tep tawh niin a sawi," a han ti a.

"Hmeichhe thu, thu puarpawleng mai mai anih chu,"

"Ngaihthah mai chi chu a ni lovang,"

"Tui a neilo anga, chuvang chu a ni ang. Tui hal luatna hian chutiang thil chu a thlen thei a ni,"

"Mahse hetiang em em hi chuan a thleng thei lo ang. Kar khat vel lek chhungin tar thi lo chauh hmel a pu hman a ni,"

Beltran-a chuan, "Theihnghilh hmiah rawh," a ti ta hmak a. Chutiang thil atthlak chu a ngaihtuah zui peih zawng a ni lo. Rifle hum chungin inring takin an thu ta ran mai a. Khua a la thim lo deuh a, mahse Sean-a chuan muthilh a tintuah mek thung a. A riahna chu Beltran-a te awmna chhak, an hnunglam deuh, yard zaruk vela hlaah a ni.

A sakawr awm hle hle theilo per sek thawm chuan Sean-a chu a tiharh a. A meng chhuak a, thawm ngaithlain a beng a han chhi a. A sakawr chuan a beng a tun hru a, a hnar a phit dut dut a. Chhim lam chu a en a. Sean-a chu a ding chhuak a, "Boy, enge ni ta? Buaina rim i hria em ni?" tiin a sakawr chu a be mawlh mawlh a.

Sakawr chuan a hnarin Sean-a chu a nawr thuak thuak a, Sean-a chuan, "Thlanglamah khuan nangmah tibuaitu che an awm a ni maw? Sakei em ni ang?" tiin a phun sap a.

Sakawr zin chu a bel a, a chungah chuan a lawn a, a kual zawnga kalin tlang pangah chuan a chhukthla ta a. Sakawr chuan tui chu a dawt a, vawilehkhatah a rawn dak chhuak thut a, Sean-a chuan zawite in a lo khap thuai a.

Thing karah chuan thil che hi a va hmu a. Sakawr pahnih an lo ni a. Lui mawng chu tiau dup a lo nih hlauh avangin sakawr pen thawm chu a hriat theih loh a, a vanneihthlak hle a ni.

Sean-a chuan sakawr chu luite a dai kai tir a, vaukam a thlen chuan sakawr atang chuan a chhuk a. Sakawr pahnih zinga pakhat zawk khan a hnar a han tum dut a. A lo chhawn ve hlauin Sean-a chuan a sakawr hnar chu a hup chawt a.

Sean-a chuan phun bal bal thawm hi a hre ta a. Thim tham hnuaih chuan mihring ruangam hi a rawn lang a. A han ding vang vang a, a pilbo leh ta a. Engemaw chen a nghah leh hnu chuan Sean-a chu sakawrah a lawn a, lui dung chu a zawh chho ta a.

Nakin deuhah chuan luikawr chu a lo zim tak em avangin a sakawr chu a thlung a, ke in ruamah chuan a lut chho ta a. Reiloteah chuan a veilamah chuan a nuin hmunzawl a sawi kha a hmu ta a. Lungpherah chuan a chuang kai a, a han ding vang vang a. A reh vung vung a, thla pawh a rawn chhuak tan mek a.

Vawilehkhatah aw hian, "Rangkachak i rawn zawng dawn em ni?" a rawn ti ta thut mai a. Sean-a chuan, "Dawn lo e. Old one ruang kha phum loha kalsan a ni a, a ruang phum tur fapa a nei silo a. Ka rawn kal ta mai a ni," a ti a.

Aw chuan, "A tul tawh love. Engkim tihfel a ni tawh," a ti a. Aw chu a ri a thawrawngin tuichhunchhuaha tawng hi a ang hle a.

"Chu pawh nise hmuh ve reng reng ka duh a ni,"

"Ruam luhnaa mi pahnih awmte kha tute nge an nih?"

Sean-a chuan, "Hmelma an nih ka ring. Mahse an hmel ka hmu bik lo," a ti a, a chawl dat a. "Ka chhuak lam min lo chang ngeiin ka ring," a han ti leh a.

"I hlau lo em ni?"

"Anni saw maw? Hlau lo,"

"Ni love, he hmun hi mawle,"

"Hlau lo,"

"Rawn kal tlang chu i duhlo ang tiraw?"

"Kaltlang maw? Duh love. Heta awm hi ka duh tawk e,"

"Chu chu ni rawh se,"

Thawm dang awmloin a reh ta vang vang a. Sean-a chuan reilote a han nghak rih a, chutah lungpui bulah a thu a. Arsi de that chu a han en a, a hlau em? Teuhlo mai. Old one khan a lo zirtir tawh a ni.

A lo muhil a ni ang chu, a han harh chuan khua a lo var tan der tawh a. A tho thuai a, pukah khan a va lut ta a.

Tumah an lo awm lo a, Russel-a sawi ang khan Old one ruang pawh a awm lo. Chhuarah chuan darthlalang bur pali a intlar a, a nu khan panga niin a sawi si kha mawle. Bur te chu pakhat te te in a han en a, an lo ruak vek a. Pakhatin a kim lo a ni......khawnge a awm ang?

A han hawikual thuak thuak a, mahse bur kimlo chu hmuh tur reng a awm lo a. Kal leh huna la zawn thatah a khek ta ngawt a. Pukah chuan thirkhen leh lungral sulhnu hlui, hlui tawh tak mai, hmakhawsanga mi niawm tak hmuh tur a awm nual a.

Sean-a chu puk atang chuan a chhuak ta a. Reilote a han hawi kual a, mahse tumah hmuh a nei lo a. A dik tak chuan tumah hmuh a inring lo reng a ni. A aw hriat kha mak a ti lem lo. Old one-an a lo zirtir tawh vang em ni?

Lungpherah chuan Sean-a chu a ding a, "Dam takin," a ti a, a kalsawn ta a. Fimkhur pawh a tum hran lo. Ruam pawn lam ami te chuan an lo chang angem?

Hmelma niloa khualpang zin satliah an nih phei chuan an kalbo daih tawhin a ring a. Kawngsir hnimbuk karah chuan a lut a, thawm ngaithla in a han ding vang vang a. Mahse thawm engmah hriat a neilo a, mihring thawm chu sawi loh, sava leh rannung hram thawm takngial pawh hriattur a awm lo a ni. Chhan engvangin emaw sava leh rannungte pawhin helai hmun hi an hnaih ngailo ni tur a ni. Hmun fai zimte tawntirh hi a va thleng a, thing kar atang chuan kawng pathum hian lung chhipzawl, lung dang pahnih inthuah chunga intiang hi a va pawh a. Chu chu maicham, Russel-a sawi kha a ni tih a hre thei mai a.

A pan hnai a, a bul vel chu a han en a. Russel-a boot hniak bakah sandal pheikhawk hniakte a hmu ta a. Maicham lung chu a mam par mai a, han titoh deuh lai pawh a awm lo. Nawh mam fo anih loh pawhin an hmang ngun hle ni tur a ni. Mahse enga tan tak chuan hmang ang maw?

A inher a, maicham chu a kalsan ta a. A sakawr dahna a thlen hma chuan a ding chat a, hnimbuk kar atangin a han bih a. Sakawr chu ngawi rengin a ding hle hle a, mahse va pawh mai loin Sean-a chuan a chhehvel chu a han thlir kual leh rih a.

Leia tla chi, sava pakhat hian vaivut a lo thai sarh sarh a. A piah deuh thingkungah chuan Hleimualrang hi a zuang kual zak zak a. Ngaih han tih thatlohna tur a awm lo. Inring taka rifle hum ran chungin a sakawr awmnaah chuan a chhuak phei ta a. Sakawrah chuan chuangloin a lakam chu a hum khawm a, kawrte dung chu a zawhpui ta a.

Thawm ngaithlain a han ding leh dat thin a. Mahse ngaih han tihthatlohna tur thawm engmah hriat a neilo a. Nakin deuhah chuan kawngtum pangngai chu tan tlangin sazuk kawngtum hi a zawh ta a.

Yard zahnih vel a kal hnu chuan tui kangchahsan kawrte hi a va thleng a. A veilamah chuan mi pahnihte kha a va hmu ta thut mai a.

A hmuh rual chiah chuan Velasco-a chu a rawn inher a, zawhte ang maia che rang a ni. Sean-a a hmuh chuan a silai chu a han hmet puak nghal thawr a. Sean-a ke bula lungtum chu Velasco-a silai mu chuan a rawn deng khem hlawk a.

Sean-a rifle pawh chu a puak ve nghal dawt a. Silaimu chuan Velasco-a lu chu a va thawi thuak a. A han hmet puak zui leh zat a. Velasco chu a vir nawk a, a thal ta tawp mai a. A tluk dan atang chuan a thih chu a la thi chiah lo ni hian a lang a.

Pakhat zawk chu a pilbo nghal daih a. Sean-a pawh chu hnimbuk karah a pilbo ve nghal a. Luite, tui kangchahsan kamah chuan lungpui insir khupna hmun, sakawr dah nana hmun remchang fahran hi a hmu ta hlauh a. A sakawr chu hnimbukah chuan nghetlo takin a thlungbet a, a lo thi palh ta hlauh anih chuan a sakawr chu chulai hmun a a thlunna hmun atanga tal chhuak theiloa thi mai tur chuan a duh lo a ni.

Hnimbuk karah chuan a vak lut a, thing hmunah hian a va chhuak phei a. Vawilehkhatah engemaw ni hi a rawn ri vung thuak a, hruizen a lo ni a. Sean-a kokiah chuan a rawn vawm awk chawt a. A rawn phihawktu chu Valesco kha a lo ni a. Mexican pa chuan hruizen chu phih a han tum lai tak chuan Sean-a silai chu a puak dawt a, silaimu chuan amah a rawn verh siah avangin Velasco chu a petek nawk nawk a, a let hlawm ta tawp a. Sean-a chuan hruizen chu a phih thla nghal a, lungpui chungah chuan a bawk a. Midang pakhat khan silai ri kha a hre ngei anga, a rawn veh hnai ngei ang.

Sean-a chu muangchangin a tawlhsawn ta hrauh hrauh a, khua lah chu a lum sawt hle mai a. Sean-a chuan a kut thlan huh dap mai chu a kawr hmalamah chuan a tat fai a, a chhaklam tlangpang awih vut mai chu a han en a. A mitah chuan thlan tui a rawn lut a, a han nuai fai lai tak chuan silai a rawn ri thuai a, a beng bulah chuan silai mu a rawn ving thuak mai a.

Sean-a chuan a piaha mi pakhat bawkin rifle a lo load leh mek chu a va hmu ta a. A colt rifle chu rang deuh maiin a lekkawh a, a han hmet puak zui nghal a.

Beltran-a chu a vir nawk a, Sean-a chuan a han kap nawn leh a. Beltran-a taksa chu a che nawk a, che lo changloin a thal ta reng a.

Sean-a chuan mitthi pa chu a pan phei a, a ipte chu a han dap kual zung zung a. Rangkachak tangka engemaw zat leh lehkhathem, Wooston-a tih inziahna hi a lo ak a.

Sean Mulkerin-a chuan a sakawr awmna lam kha a pan a, sakawrah chuan a lawn a, in lam panin a kal tan ta a. Kawng chu thui hle mahse a sakawr chu a chak em avangin an thleng har lovang.

Tuipui vaukam lam pana a chhuk lai chuan thla a eng ruih a. Boruak chu a reh ruih a. Piah deuhah chuan Lady Luck pawh kha a va hmu thei a. Khawnvar an chhi eng va va a.

Tuipui kama thuilote a han kal leh hnu chuan ranch in panna kawng chu a thleng ta a. A chau tawh hle a. Ni hnih chhung zet chawlloa sakawr chunga chuang ngar ngar a ni bawk a, a awm ve reng a ni. A khum leh Mariana leh a nu a han ngaihtuah chhuah chuan sakawr chu a kal chak tir sauh a.

Ranch in kawt a thlen chuan a rifle chu a scabbard atang chuan a phawi chhuak a, zanlai a pel tawh a, a thim ruih a. A reh ngawih ngawih mai bawk a. A tuk lamah a nu te ho chu thil awmdan a hrilh ve ang chu. Tunah chuan.....

Sakawr atanga chhuk tuma a inher lai chuan silaimu in a rawn deng dawt mai a. A taksa veilam chu a hit mup hian a hria a, a lu chu a rawn hit leh mup a. Sakawr atang chuan a letthla ta tawp mai a.

A hliam chu a namai lo hle na a, nikhaw hrelo chuan a awm mai bik lo. Pen ri a hria a, mi pakhat hian a nakah a rawn chhir dawt a. A han thai let zui a.

"A thi em ni?" Chu chu Fernandez-a aw a ni.

"I â ta em ni? Kan pasarihin kan kap a ni a, han en ta che. A lu a kak a, a taksa pawh thisenin a bawh sen hnuang hi,"

"A nu rawn chhuah hmain i dahsawn teh ang u," chu chu Tomas-a aw a ni.

"Hetah hian awm rawh se. A rawn hmuh hunah sakawr atanga zuangthlain a rawn pan ang a, chu chu ka duh dan chiah a ni. Khua a lo var tawh dawn bawk si a, bel chhunga sa a ni mai," chupa chu Wooston-a a ni. A aw atang chuan a phur takzet tih a hriat a.

Tomas-a chuan, "Thian a nei asin," a lo ti a. Wooston-a chuan, "Kei pawhin ka nei alawm. Nick Bell-an Beltran-a leh Velasco-a tih veka a puh tur thu a sawi kha," a ti zut zut a.

"Anni kha enge an chanchin ni ta ang le?"

Wooston-a chuan, "Mulkerin-a nungdama a lo kir leh theih danah anni chu an thi tawh tihna a ni mai. I bibo teh ang u. Kan pi-i kha a rawn let leh thut maithei ania," a ti a, in lam pan chuan an phei ta a.

Warning a lo pek a ngai a ni. Engemaw avangin a nu leh Mariana-i chuan ranch chu an chhuahsan a ni phawt mai. Mimsa pawh a awmlo bawk. Anih leh Montero-a hi? Wooston-a chuan a man em ni ang? Chu chu thil ni thei a ni lo. In mantir ai chuan Montero-a chuan thih a thlang zawk ang. Anih leh Polanco-a leh Del Campo te kha khawnge an awm? Enge an chanchin ni ve le?

Engtin emaw tak trick haiin Wooston-a chuan ranch atangin a bum chhuak hlawm a, ranch chu a luah ta ni mai tur a ni.

A sarhu lai khan na a hrelo na a, tunah chuan a na chu a rawn inlar tan ta. Tuarchhel tak tan pawh tuar har tak a ni. A taksa pum mai chu a tur ut ut mai a. Then sawk sawk chungin vaivut chu a ham tawk tawk a.

A nu lo thlen thleng chu a la dam em ang chu maw. A puakruk chu a holster-ah a la awm a. A rifle erawh chu sakawr atanga a tlak lai khan a thlauh per daih ni tur a ni. A dinglam feet ruk velah chuan tuihawk luan kawr hi a awm a, chutah chuan a awm theih hlauh chuan.....

Mahse an hmuh loh chuan an rawn zawng ngei dawn si a. Che loin a mu a, a lu chu a na ngut ngut a, a ke veilam chu a na hit mup mup bawk a. A dinglam tuihawk luankawr bulah chuan lungtum, lu tiat tiat hi sawm chuang zet a awm a. A nu in pangpar a chin laia tuihawkin a rawn len tur dal nana tui luankawr kama a dah tlar a ni a.

A kut veilam chu a phar chhuak a, lung lo hnai ber chu a han pawt hnai a.In atang chuan a taksa chu chiangtakin an hmu thei dawnlo a, a ruangam thim chhah bik deuh chauh chu thimtham hnuaiah chuan an hmu thei dawn a ni. Lung chu a theih ang angin a hnukhnai zel a, a han chet zawngin a taksa pumpui mai chu a na tak chuai chuai a. Thlanin a bawh huh zuih mai bawk a.

A ruangam anga langthei tur lungtum a hnuhkhawm hnu chuan a han mu chawl vang vang a. Na tuar then sawk sawk chungin tuihawk luankawr lamah chuan a tawlh hnai ta a. Nakinah chuan kawrah chuan a vak lut thei ta hram a. A hah lutuk chu a thaw huam huam a, a han maimitchhing a..

A rawn meng chhuak hlawl a, a lo muhil chu niin. In lamah chuan tawng thawm a hria a, enge an sawi erawh chu a hre thei lo.

A mit chu a han khap sak sak a, sakawr chunga a nu thu chu a va hmu ta a. A bulah chuan mi pakhat hi a awm a, Mariana a lo ni a. Wooston-a aw hian, "A thi tawh. Keimahni thah a ni," a ti a, thingbuk hnuai atang chuan a rawn pen chhuak a, "Va en rawh. Sawlaiah sawn a awm kha," a han ti lung lung a. A rawn kal hnai a, Sean-a lung dahkhawm chu a rawn kawk a. Khua pawh a var dawn tawh a, khaw thim dan pawh a chhah lutuk tawhlo a.

Sean Mulkerin-a ruang emaw a tih chu lungtum awmkhawm mai a ni tih a hmuh chuan Wooston-a makti chu a ding chawt a.

Sean-a chu thingtang tianga hmangin a rawn inhawlh ding a,a kut dinglamin puakruk a hum a."Wooston, ka la thi lo deuh e," a han ti a, a aw chu a tham hle a.

Wooston-a chu ramsa mangang ang maiin a khek thawt a.A puakruk chu a lekkawh a, in atang chuan Fernandez-a kha a rawn tlanchhuak ve bawk a.

Sean-a chuan puakruk chu a han hmetpuak dawt a, Wooston-a chu a thal tawp a. Fernandez-a chuan tlan chungin a rawn kap a, silaimu chuan Sean-a ke bul lei chu a rawn verh khu sawt sawt mai a. Vawilehkhatah tuten emaw silai an rawn hmet puak ta zawt zawt a. Sean-a chuan Fernandez-a chu a han kap a, Fernandez-a chu a tlu tawp a.Sean-a chu nghetlo zet hian a ding bu lawp lawp a, hmeichhe pahnihte chuan tap chungin an rawn dawm a. Jonny Mimsa, Honeycutt-a leh Campbell-a te chuan ranch in kawtah an sakawrte chu an rawn tlan luh tir a.

*********************

Amah hmuh tuma Andres Michado-a a rawn kal chuan Sean-a chu kar thum zet khumah a mu tawh a. Mariana-i chuan kawng chu a lo hawn sak a, Michado-a chu a rawn lut a. "Michado-a put bosanin uicho ho i inkah hliamtir a ni maw? Ka la nghah rih che a ngai dawn ta anih hi," a han ti a.

Sean-a chuan nui deuh chung hian, "Thianpa, min nghah rih a tul miau si anih hi," a lo ti a.

Michado-a chuan a rawn panhnai a, "Thianpa, mi huaisen tak i ni. Huaisen tawpkhawk. Ka thinrimna in ka khaw hmuh leh ngaihtuahna a titawi a, pawi ka ti ngawt mai. I lo tidik chiah a ni. Hmeichhia min duhtu tam tak an awm laiin engvangin nge min duhlotu laka lo inham buai a tulna? Helai hmunah hian nireilote ka cham leh rih anga, chumi hnu chuan Mexixo ka pan ang. Ka thian, ka ngai dawn khawp mai che," a ti ta a.

Sean-a chuan a kut a rawn phar chhuak a, "Hmelma dehkhirh tak i ni, Amigo. Mahse thian tha tak i nih. erawh chu ka beisei," a ti a. An in chibai hnu chuan Michado-a chuan a chhuahsan ta a.

Sean-a chu a maimitchhinga, a pindanah chuan mi han vei vel thawm hi a hria a. Mi pakhat hi a khum bula rawn kalin a rawn kun hniam hian a hria a. Chutah thil engemaw, lungte awmkhawm niawm tak han tih rik raih raih thawm hi a hria a.

Meng chhuak chuangloin Sean-a chuan a kawmawl hnuaiah chuan a puakruk chu a han vuan a, a han nghak deuha, mahse thawm dang reng reng a hre zui leh ta lo a. Cedar thing rim hi a rawn nam chem chem a.

Pawn lamah chuan zai ri rat rat hi a hria a, Mariana-i a rawn lut ta a. A nu in a rawn zui lut a, Mariana leh a nu chu an ding chawt a, an mitmeng chu mak tihna hlirin a khat a. An enna lam chu Sean-a chuan a han en a, thuk chung khawnvar in hunnaah chuan tlangram puka bur bo ta daih kha a lo awm reng maia.

Senora chuan a pan phei thuai a, bur chu a la a, a kut khinghnihin chhuatah a hlangthla a. A han chawi danah chuan a rih hmel hle mai a.

Senora chuan, "Rangkachak a ni, Sean, rangkachak a ni reng mai," aw khur lek lek hian a rawn ti chhuak ta a.

Sean-a chu a nui a, a maimitchhinga. "Khawiah pawh awm ula, a tu a te pawh ni ula, in chungah ka lawm em em a ni," tiin a phun sap sap a.

A TAWP TA.....

(Kan in tawng leh har dawn tawh si a, lung a va lêng lâwk em!!!)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)