THE CALIFORNIOS (Western) (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

THE CALIFORNIOS (Western) (Completed)

Unread post by Ngaia » September 10th, 2018, 7:33 pm

TargetPreview.jpg
TargetPreview.jpg (11.97 KiB) Viewed 17882 times
THE CALIFORNIOS

CHAPTER - 1

(A hmasain he cowboy thawnthu hi cowboy thawnthu dang anga ri deuh rep rep lam a ni lo a. A story hi a lunglenthlak reuh em avangin kei chuan ngaihnawm ka ti a. Hetiang lam ngaihnawm ti ve in lo awm tak hlauhin hman lo chung chungin ka rawn post leh dawn a. Inrin a ang dawn hauh lo a, amaherawh chu ngaihnawm ti ve lemlo pawhin comment ngaihnawm lo tak tak a rawn comment lo hram turin ka ngen lawk che u a ni e - VM)

Malibu an tih hmuna ranch in chu hlum leh lung remkhawma sak a ni a, a kawt lamah chuan bathlar hi a nei a, kawngkapui pakhat leh tukverh pahnih hi a awm bawk a.

Bathlar liangah chuan tui dahvawhna pahnih, Ollas an tih hi a inkhai a. Sir khatah chuan tuithawl lian fe fe hi a inkhai bawk a.

In veilam sir, fit za leh sawmnga vela hlaah chuan sakawr/bawng huang (corral) thing tlawna hung hi a awm a. Corral sirah chuan tuikuang sei zet mai leh sakawr in hi a awm bawk a.

Kawtzawl hmalamah chuan Sycamore thing tar tawh tak, hrawl zet mai bakah cottonwood thing engemaw zat an ding thelh thuau mai a. In hnunglamah chuan sasaw thing a ding thluah thung a.

Ranch in chhehvel tlanga hnim bawrchhawr tak tak to karah chuan lungpui lian pui pui hi a awm thluah a. Ranch in bathlar atang chuan ran in panna kawng leh piah deuh a tuipui dumpawl ruih mai te chu an lang chiang hle a ni.

Eileen Mulkerin-i chu kawngkaah chuan a rawn chhuak a. Fapa puitling pahnih nei tawh mah se a hmelthat em avangin a fapate farnu niawm lek hian a lang naupang a. A hming ang chiahin Irish hnam diktak a nihna a miziaah a lang chiang hle. "An rawn kal em ni, Michael?" tiin a fapa pakhat zawk chu a han zawt a.

Michael-a chuan, "La rawn kal lo," tiin a chhang a.

Eileen Mulkerin-i chuan, "An rawn lang har lovang. Chu chu ring mai rawh. I pa in a sakawr a sawisak avanga kut a thlak atang khan tun ang hun hi Zeke Wooston-a nghahhleh ber a ni," a han ti a.

Michael-a chuan, "Pa fing vervek leh hlauhawm tak a ni," a han tih chuan a nu chuan, "Ni chiah e," a lo ti thuai a.

Fehrehsân a ni tawh a, Eileen Mulkerin-i leh a fapa, puithiam kawr fual ha chuan ranch in kawngka chu an thlir dun vang vang a. Eileen Mulkerin-i chuan, "Sean-a awm ve se ka ti ngawt mai," a han ti a. Michael-a chuan, "Keipawh," a lo ti ve thuai a.

Eileen Mulkerin-i chuan, "I pa kha a chhun ngawt mai. Nang pawhin i chhun ve tho a, mahse ani chuan kohhran rawngbawltu tih atana inhmehlo thil tam tak a ti thei tlat a ni," a han ti a.

Michael-a chuan a lu a thing a, "Senora, lo ngaithla teh. Tharum thawh lampang chu i ngaihtuah a ni em lo maw? Chu chuan thil tha min then hauh lo ang. Tin, chu lovah, dân a awm bawk," a ti charh charh a.

"Sean-a chuan remruat dan engemaw chu a nei thei ang mawle,"

"Remruat ngai eng nge awm? Win Standish-a nen pawh kan ngaihtuah dun tawh a, mahse sum i neih si loh chuan...."

"Pakhatmah ka nei lo,"

Michael-a chuan, "Chuti anih chuan kan nei dawn lo tihna a ni mai alawm. Kan tih theih chhun chu insawnna tur hmun ngaihtuah a ni mai," a ti ta a.

Eileen Mulkerin-i chuan, "He hmun hi ka ta a ni. Mexico President-in i pa Mexico Army-a a awmlaia hna a thawh that avanga lawmman atana a pek a ni a, tuma min chhuhsak hi ka phal dawn lo," a ti ta bur mai a.
Michael-a chuan, "Senora, i president sawi chu a thi tawh a, tuna an president hian keini hi kan awm ve tih pawh a hriain ka ring lo. Win-a nen pawh lehkha kan thawn tawh a, tun thlengin chhanna pawh kan la hmuh loh hi," a ti zawi raih a. (Senora = Mexican tawnga 'Ka pi' tihna ang vel a ni. Mitinin Eileen Mulkerin-i hi Senora tia an koh vek avangin a fate pawh hian chutianga ko ve mai chu an ni).

Eileen Mulkerin-in, "Governor Michetorena lah chu an thianpa a ni a, Alvarado-a chu la nise....." a tih mek lai chuan Michael-a chuan, "Ani chu pa tha leh dik a ni," a lo ti a.

A nu chuan, "Mahse a bâng tawh tlat si a," a ti a. Michael-a chuan, "Wooston-a hian kan ram neih chauh hi a duhtawk lo tawp ang. Pa duhâm lutuk mai a ni a, ram dang pawh neih zel a tum ang," a han ti a.

Eileen Mulkerin-i chuan, "Engvanga kan ram hi neih duh nge anih i hria em?" tiin Michael-a chu a han zawt a. Ani chuan, "Smuggler a ni a, Paradise Core hi zanthim hnuaia hman tangkai a duh vang mawle," a ti a. A nu chuan, "Chu mai a ni hleinem, rangkachak chungchang mi sawi a hria a ni," a lo ti a.

Michael-a chuan a nu chu a thlêk hâ a, "Rangkachak a awm anih chuan keini hian engah nge tunah kan lâk mai loh?" tiin a zawt ta a. Eileen Mulkerin-i chuan, "I pa chauh khan a awmna chu a hria a. Sakawr atanga a tlâkhlum tum khan tumah a hrilh hman ta silo a ni," tiin a chhang a.

Michael-a chuan, "Thil engemaw sawi a neih loh pawhin a chhuizuina tur engemaw tal hnutchhiah a nei lo maw?" a han ti a. A nu chuan, "Nei lo, chutiang engmah hnutchhiah a nei lo. Ka hriat theih chinah chuan ni engemaw zat......thlaler lamah niin ka ring.....a thangbo thin a. Kawng hran hranah a kal a, mahse ka hriat danin rangkachak chu hmar lam khawi hmun emaw atangin a la thin a ni. A thangbo thin ka han ti na a, rangkachak chu tum hnih chauh a ni a rawn hawn ni," a ti a.

Michael-a chuan, "Anih leh engvanga vâk chhuak fo nge anih?" a lo ti a. A nu chuan, "Ram chin a bêlchiang thin a ni. I pa kha Mexico Army-ah kum sawmhnih zet a tang a, tawng chi hrang hrang pawh thiam hnem tak a ni. Kan Indian hmuh zawng zawng deuh thaw anmahni tawngin a be thei a, hmuntin hmun tangah thian a siam bawk," a ti a. A han ngawi vang vang a. "Helaia kan khawsak dan hi hei, i hriat ang hi a ni a. California mi tam zawk chuan biakin emaw, zu hmun emaw zawk zawk an vahbosan ngai loh hi. I pa erawh kha chu a danglam bik tlat a ni. Jaime-a kha chuan tlangram, thlaler leh kawr thuk pui pui han fankual vel kha nuam a ti thei em em a. Kei pawhin a vahkualnaah chuan ka zui ve fo thin. Thil pakhat hriatchhuah ka nei, rangkachak la a a kal tum khan a kalna ram chu ram khawkrawk leh chhengchhe tak, sakawr chung chuanga kal harsa deuh mai niin a sawi. Mahse chu thu a sawi apiang chuan 'kan' tih tawngkam hi a hmang ziah a, tu emaw kalpui a nei ni tur a ni," a ti zui ta zel a.

"Montero hi a ni thei angem?" Michael-a chuan a lo ti a.

Eileen Mulkerin-i chuan, "Ani chu a ni lo, ani chu a hruai ve ngai lo. Sipai Colonel anih lai khan Jesus Montero-a hi ami te zing ami, sergeant anih avangin i pa khan a ring tawk em em a, in lam lo venghim turin a dah thin a ni. Ani hi niloin midang tu emaw a ni; tunge tih erawh chu ka hrelo," a ti a.

Michael-a chuan ranch in panna kawnga vaivut rawn khu phei laih laih chu a kawk a, "En teh, tuemaw a lo kal e," a han ti a. A nu chuan, "Win-a anih saw. I cousin saw a hmanhmawh tawh chuan sakawr a tlanchak tir thei teh ania," a lo ti a.

Eileen Mulkerin-i chuan a fapa dârah chuan a vuan a, "Michael, fapa tha leh chhuanawm tak i ni. Mahse a chang chuan puithiamah hian lo tang lo la ka ti rum rum thin. Hruizen leh silai hman i thiam nasa mai si a," nui var var chung hian a han ti a.

Win Standish-a chu a rawn thleng ta a. Sân lamah chuan pa vantlâng, tlangval sa tha nelh nawlh hi a ni a. A hmel chu a thutak râm reng a. Eileen Mulkerin-i hnenah chuan, "Senora, an rawn kal ania. Ka lo dang thei lo a ni. Ka thusawi an ngaihthlak duh loh bakah dân tanchhan an nei bawk si," a han ti a.

Eileen Mulkerin-i chuan, "Rawn kal rawh se," a ti mai a.

Kawngah chuan sakawr chungchuang pathum hi an rawn lang ta a. Eileen Mulkerin-i chuan, "Engmah an hlawh chhuak lovang," a ti bûl hmak a. Michael-a chuan, "Tharum thawhna a thleng tur a ni lo," a lo ti a. Win-a pawh chuan, "Keipawh," a lo ti ve thuai a.

Eileen Mulkerin-i chuan, "Ka ranch hi chân se min ti a ni maw?" a ti vîn ta hlar mai a.

"Senora, i hum thei chuang lovang. Mihring an ngah a, an lamah dân a tang bawk si. An pawisa i bat kha rulh a hun tawh tlat a ni,"

"Chu phei zawng thudik a ni. Mahse he ranch hi kan tâ a ni a, kan hloh tur a ni lo. Ireland-ah khan tum khat in leh lo kan chân tawh a, a dang chân leh zel chu ka tum hauh lo,"

Ranch in kawt zawl an rawn thlen chuan sakawr chungchuang pathum te chuan an sakawr chu an pawt ding ta a. An hmel atang chuan buaina tawh an inpeih hle tih a hriat mai a.

Zeke Wooston-a chu palian pui, inchei tawp thei zet mai hi a ni a. Kum tlemte kaltaah khan Panama lam atangin California a rawn lut a, sumdawnna rinhlelhawm tak tak engemaw zatah a inrawlh tawh a. Governor Michetoren-an tualchhung sipai hotu atana a ruat Captain Nick Bella thiantha tak a ni a. Michetoren-a chuan a sipaite chet dan chu a kip a kawiin a hriatpui loh bakah an chet dan apiang chu thaah a pawm hmiah zel a. Chuvangin sipai ho chuan venthawn tur nei miah lovin tualchhung mite an rawk a, zu rui chungin buaina an siam fo thin a ni. Californio chu Mexico atanga a hlat tham em avangin sipai zinga tam zawk chuan California a duty chu hreh tak te hian an hreh a, chuvangin lung in te pawh a hranga siam niin California-a sipai dah ho zinga tam tak chu lung in tâng chhuak, convict tawh te an ni nawk a ni.

Wooston-a rawn kalpui pa, Jorge Fernandez-a chu pa chêr ria dên dâwn, Indian ho leh hmeichhe laka a nunrawn avanga lâr zet mai hi a ni a. An zinga pakhat Tomas Alexander-a chu cantin (saloon leh restaurant inkawp) neitu a ni a, card khelha eizawng, sawrkar phalloh thil zuartu niin silai hman pawh thiam tak a ni. Santa Monic tlangram kawr ruama awmhmun khuar outlaw zinga thian tam tak nei nia sawi a ni bawk.

Wooston-a chuan sakawr atanga chhuk mai a han tum a, Eileen Mulkerin-i chuan, "Chhuk kher a ngai lo, thil i duh i neih chuan sawi mai rawh," chang fal hian a lo ti a. Wooston-an, "Senora, hla tak atangin kan lo kal a, chuvangin....." a tih lai mek chuan Eileen Mulkerin-i chuan, "Thiante leh mikhualte tan ka kawngkhar hi hawn reng a ni, nangni erawh chu a khawi zawk mah in ni lo," a lo ti a.

Wooston-a chuan, "Chuti tur maw? A tha e. Senora, ka han sawi tlang hrâwk mai ange. Ka pawisa in bat kha tuna min pek loh chuan he hmun hi naktuk ni tlâk hmain in chhuahsan tur a ni. In sakawrte leh in mimal bungrua te chu in la thei ang," a ti ta a.

"I lei kan bat chu kan rûl ngei ang che," Eileen Mulkerini chuan a ti a. Wooston-a chuan, "Engin maw min rulh ang, Senora? Thlai kâng bângin maw? Savun tlema zawngin em ni zawk? Engmah neih in nei lo. Engmahlo atang chuan engmah beisei tur a awm lo," a ti nghut nghut a.

Eileen Mulkerin-i chuan, "Kalbo vat ula a ni mai. Pawisa chu in hmu ngei ang," a ti ram hmak a. Zeke Wooston-a chuan, "Ka pi, naktukah ka hote dang nen kan lo kal leh ang. In lo kal bo lo anih chuan kan theh chhuak ang che u," tia za lo zeta nui then sûng chungin, "Ka pi, chumi hunah chuan ka hoten duh duhin nghaisa che mah se ka inrawlh hauh lo ang," a han ti leh a. An sakawr an pawt her a, an kalsawn ta a. Win Standish-a chuan mitmeng buai nak chung hian an kalsawn lai chu a thlir vang vang a. "Senora, engmah a fel chuang lo, an thin i tirim sauh zawk a ni," a ti niah niah a.

"Hun tlem min neih belhtir alawm,"

"Rangkachak chu a awmna han hriat chhuah dan i nei lo maw?"

"Jaime-a thuruk a ni a, a thih bopui daih alawm mawle,"

Engemaw chen an ngawih thap hnu chuan Win-a chuan, "Pio-a bia ila a tha ang. Mahse thuneihna a nei tawh lo a, buaina a ngah ve hle bawk si. Governor nen an thu a inhmu teh chiam lo a ni," a han ti a.

Eileen Mulkerin-i chuan, "Pio chu pa tha tak a ni ve ringawt mai. Kan thian tha phei chu a ni a, mahse tun tumah hi chuan kan hmelma ten min tam hneh tlat a ni," a ti a, tuipui lam chu a thlir vang vang a. Bathlar atanga tuipui lang thei chin chu sava thlawk kual vel pawh hmuh tur awmloin a reh ruih mai a. A ngawih vang vang hnu chuan, "Sean-a a rawn thleng anga, chêt lâk dan tur a hre mai ang," a rawn ti chhuak phawng a.

Win-a chuan, "Chêt lâk dan kawng a awm anih chuan keini pawhin kan ngaihtuah chhuak tawh ang. He hmun hi kan chân ngei dawnin a lang tlat," a lo ti a.

Engmah a ngaihtuah zui hleih theih tawh loh avangin Eileen Mulkerin-i chu inchhungah a tlan lut a, mittui tla lo turin a insum hram hram a. Tap chhuak lo tura insum tang tang chungin pindan chhung chu a han thlir kual a. Pindan chhung chu a va han ruak hiai huai em! Ireland-a an pindan te nen kha chuan a va inang lo tak em! An furniture mawi leh man to tak tak ho kha a phurh man a to lutuk avangin an chhawm thei ta lo a ni.

Inchhungah chuan Brother Michael-a a rawn lut ve a. Thuthmun a rem a, a puithiam kawrfual, rawng buang a hâk avang chuan a taksa sen phiar fat mai chu a lang theilo a. Tlangval kawlhsen leh hrohrang na tak thin kha sakhaw rawngbawlna lamah a inpe thut mai a. A chhan a sawi ngai lo a, tuma'n an zawt ngai bawk hek lo.

Michael-a chuan, "Senora, kan ngaihtuah ngun a ngai a ni. A tih dan tur enge maw tal a awm ngei ang. Pen leh lehkhapuan la la, i thil hriat tawh thin han ziak chhuak teh. I thil ziah chuan i theihnghilh tawh thil engemaw zat a hriat chhuahtir ang che nga, rangkachak awmna chu engemaw ti takin kan hrechhuak thei maithei asin," a ti charh charh a.

Win Standish-a pawh a rawn lut ve a, chair pakhatah chuan a thu a. "Senora, engkim ka ngaihtuah vek a. Bawng tam tak i nei a, midang pawhin an nei ve tho a, an vun mai lo chu hralhna tur hmun a awm tlat si lo. Sakawr pawh engemaw zat kan nei a, chu pawh midang pawhin an nei ve tho a. Ranch han hralh phawt lah chu....... a hralhtu hnuhnungber pawh khan acre khat cent sawm lek hisapin a hralh a, han hnemhnan pui na tham a ni si lo....... mitinin ram an nei tlat si," a han ti a.

Brother Michael-a chuan, "Wheat chîn kha tih chi viauin a lang asin mawle. Mahse meiin a kâng ral ta hlauh si a," a ti a. Eileen Mulkerin-i chuan, "Chu chu thil kal tawh a ni. Wheat chin kha chu a hlawk hmel khawp mai......mahse meipuiin a suasam chhe zo vek ta si a ni," a ti a. Ngawi turin Brother Michael-a chuan a kutin a nu chu a han zâp a. "Ka pa kha rangkachak la turin tlangramah tum hnih a kal a, hlawhtlingin a rawn haw ve ve a ni. A kalna kha khawilai hmun nge anih chiah a hre ngei ngei ang. A vawihnihnaah tal kha chuan," a han ti charh charh a.

Eileen Mulkerin-i chuan, "A rawn hawn tam ngai lo. A kal tum khatna chu i pian hlimin a ni nghe nghe. Michael, kan harsat a, sum kan mamawh em avangin i pa chu sakawr pahnih, pakhat zawk chu puak phur sakawr nen a thawk chhuak ta a ni," a ti a.

"Sakawr dang pakhat a hruai tel amaw? Tuemaw chuan nan em ni?"

"Tunge chu chu hria ang? Sakawr tha a ren duh avangin pahnih a keng pawh a ni maithei,"

Michael-a chuan, "Engtia rei tur nge eitur a ken? Nikhat nge ni thum? Kâr khat em ni zawk?" tiin a nu chu a zawt zui ta zel a.

Eileen Mulkerin-i chuan, "A kârkhat tla tur niin ka hria. Chu aia tam pawh chu a ni maithei. Sa pêl a duh fo thin a, a keng âm deuh pawh a ni maithei," a ti a.

Win-a chuan, "Enge maw han tih theih ka duh kher mai. Store-a hman atan sum ka pûk khanglang si a. Engtin emaw......." a lo tih lai mekin Eileen Mulkerin-i chuan, "I theihtawp ai bak i thawk tawh alawm," a lo ti a. Kawtzawl lam chu a thlir vang vang a. Kum 1844 vel chuan California ramah chuan sum a vâng tak zet a. Eitur lam chu an hnianghnar hle, mahse pawisa fai chung chang chu thu dang daih a ni. Mitin mai chu sum lamah an harsa theuh ni hian a lang a, chutihlaiin anni chuan hetiang thil hi an tawk leh zel bawk si.

Thlai hmun reh tak mai, Malibu tlangram an rawn thlen tirh kha a hrechhuak a. A ram hmangaih tak mai, Ireland rama tlângte ang lo takin helai hmuna tlângte chu a buang thâng hlawm a. Ireland an tlanchhiatsan hnu khan smuggler ho lawngin France an lut a, France-a thla tam vak lo an awm hnu chuan a pa chuan Spain a pan a. A nupui fanaute chu rawn zui ve turin a rawn chah a. A pa chu British sawrkar paihthlak tuma phiarrutute zinga mi a ni a. Hriatchhuah anih thu a English thianpa in a hrilh avangin a sahim nan Ireland an tlanchhiatsan ta a ni. Spain-a a pa thih hnu chuan Eileen-i chuan Mexico a pan a, a pami te hnenah a khawsa ta a. Chutah chuan a ni, Jaime-a nen an intawn tak ni.

Colonel Jaime Mulkerin-a chuan sa pêla ramchhuah hi nuam a ti thei em em mai a. Eileen-i pawhin a pasal chu a zui ve fo thin a ni. Tlangram an vah kualnaah te chuan Indian ho an hmu fo thin a. Engemaw chang chuan tuipui kamah te pawh an hmu bawk thin. Indian ho chu Chumash hnam, rilru zau leh lawng tuk thiam tak mai anni deuh ber a. A tira an hnam hming dik tak chu Chumash a ni lo a, San Miguel tliarkara mingo cheng ho, Chumash an tih te nena an inchiahpiah tak hnu chuan 'Chumash' tih chu an hnam hmingah an lo pu ve ta mai a ni.

Eileen Mulkerin-i chuan chair pakhat chu a pan phei a, thuthmun a rem hnu chuan muang ban charh hian, "Helai hmun kan rawn luh a, Indian ho nen kan inchûl nêl hnu chuan Indian ho chuan sangha min rawn pe fo thin a. Jaime-a chuan sa eitur a lo pe ve bawk a. Tumkhat sa pe tura an khuaa kan kal tumin ania Juan-a an tih chu kan hmuh tak ni," a han ti a.

"Juan-a maw? Ka hriat zawng mi a ni hauh lo mai," chal chuar nang nang hian a lo ti a.

A nu chuan, "Amah kan hmuh tum chuan i la pianglo a. Indian ho sa kan va pek chu an chhum nghal a, kan titi ho ta a. An zinga pakhat erawh chu tawng ve loin tuipui lam hawiin a thu ngawi reng a. Tunge anih ka han zawh chuan 'midang zing ami a ni' ti ngawtin min chhang a. Indian dangte ai chuan a hnar chu a sin deuh zawkin a ngo pawh a ngo zawk a. A mitmeng pawh Indian dangte ai chuan a zauin, a upat dan chu chuti maia han sawifiah theih pawh a ni lo, upa tak hi a ni ringawt mai," a han ti a.

"Hnam dang, chi dang tihna em ni?" Michael-a chuan a lo ti a.

A nu chuan, "Midang an ti ringawt mai a ni. Mahse an thian tha tak a ni. Kan kalsawn lai chuan ani pawh tuipui vaukam atang chuan a kalsawn ve nghal a. A bulah Jaime-a chuan sakawr a pawt ding a. 'Nangmah chauhin i khawsa niin a lang a, i duh hun hunah min rawn tlawh ve thin dawn nia' a ti a. Ani chuan English nalh zet hian 'Ni e le' tiin min chhang a. Jaime-a chuan tlangram vel chu a kawk kual a, 'Khinglai ram vel te khi a mihring chengte, khua te leh a bikin mi la tlawhpawh loh laite fankual ka duh a ni' a ti a, putar chu a ngawi reng a, min kalsan ta a. Kar hnih ral hnuah tuipui vaukamah kan hmu leh ta chauh a ni," a ti ta a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 11th, 2018, 5:27 pm

THE CALIFORNIOS
CHAPTER - 2

Lawng chi khat, 'Schooner' an tih hotu, Captain Sean Mulkerin-a chu a lawng bathlara dingin Acapulco khaw êng pe that chu a thlir vang vang a. Chu khua chu tlâng bulthut, ramngaw depa awm a ni a, mihring sangthum vel zet an chêng nghe nghe a ni.

A tûk chhûn ênah chuan in lam an pan dawn a, mahse Sean Mulkerin-a chu a hlim lutuk lem lo. Thil zawrh tur an thawhchhuahpui tlem bakah an hralh tha lo hle mai bawk si a. A savun ken, têl khat dollar hnih leh a chanve zela a hralh theih a inbeisei chu dollar khat chauh zelin an hralh ta si a ni. Sahmul erawh chu an hralh tha deuh thung a. Mahse an thil khârna man an rulh hnu chuan an ranch leiba han rulh tlâkna tham a ni chuang lovang. Lawng chawlhna hmun chu tui a thuk avangin vaukam chu an hnaih thei viau a, khawpui êng pawh an chhim pha a ni.

Lawng chawlhna hmunah chuan lawng dang pahnih a inthlung ve a. Pakhat zawk chu Malina atanga rawn thleng hlim hlawl hi a ni a. Pakhat dang leh chu puan zar ngul pathum nei chi, Sean-a te lawng, 'Lady Luck' tia an vuah aia hrawl zawk hi a ni. Chumi zan chuan boruak a lum hle a, Sean-a chuan lawng bathlar hungna bawhin khaw lam chu a thlir vang vang a. Engemaw chen a din ngaia a din hnu chuan a riahna cabin lam pan tumin a inher a. A kalsawn tan chiah tihah chuan thil hmuh a nei ta.

Mi pakhat hi tuipui lam pan chuan hmanhmawh zet hian a rawn tlân dawr dawr a, hmeichhia a lo ni lehnghal a. Tuipui chim chin a rawn thlen chuan chu nu chuan a thawmhnaw hak thuah chu a hlip lawk a, tuiah chuan a zuangthla ta a, a hleuh ta bawrh bawrh mai a. Sean-a chu a phu zawk a, lawng bathlar hungna lamah chuan a lêt phei vat a, mahse tuipui thim ruih maiah chuan engmah hmuh theih a neilo a. Mihring bân vâr hi vawikhat chu a hmu thânin a hria a, chutah vaukam lamah chuan kawngkhar inkhar ri thuai leh au ri hi a hre zui nghal a. Reiloteah in autawn thawm hi a ri ta nuaih nuaih mai a.

Vawilehkhatah Sean-a chuan a hnuailam tui han ri barh barh leh hmeichhe aw in, "Tlahlum se min ti anih si loh chuan hruizen min han thlak ta che," tih ri a hre ta a. Sean-a chuan lawng banga hruizena siam leihlawn inbâng chu a la a, tuia vawm thlak pahin, "Helamah hian," a ti a, hmeichhia chu leihlawn lam pan chuan a rawn hleuh phei nghal a. Leihlawn chu a vuan a, zei lo zet hian a rawn lawn chho a, Sean-a chuan a lo pawt kai ta a. Hmeichhia chuan a sam huh hnuang mai chu a thing nawk nawk a, chutah, "Min thlir reng lo khan kawrlum emaw min han lak la, i kalsawn nghal dawn nia," a han ti a.

Sean-a chuan, "Zing khawvar hma chuan kalsawn kan lo tum hleinem," a ti a. A thil hmuh chuan a ti hrilhhai letling hle a ni. Hmeichhia chuan, "Ka thurawn zawmin kalsawn mai teh. Chutilo chuan jail-ah i tâng a ni mai," a ti a, vaukam lam hawi chuan a han bu nghat a. "Sawng kan mi â ho sawn ka thawmhnaw kha an hmu ngei anga, helai hnaia lawng zawng zawng an dap vek ngei ang," a han ti leh a. Sean-a chu a bu nghat a, a inher a, "Ten, Pedro, Congo, rawn chhuak teh u," tiin a hote chu a au ta a. Lawng bathlarah chuan Ten Tennison-a chu a rawn chuang chhuak hmasa ber a. Sean-a chuan, "Thirchakai khai chhuak ula, lawng puanzar pawt pharh rawh u. Êng chhit loh tur. Thawm neilo thei ang bera kalsawn ka duh a ni," a ti zung zung a.

An inpeih fel hnu chuan lawng chu an kalsawn tir ta a. Tennison-a chuan lawng khalhna chu a vuan a. Thli a tlem hle na a, Schooner chu lawng kal duh tak mai anih avangin harsatna an nei hran lo. Arsi eng nen a lawng ngul chhip an thlir dawn te anih ngawt loh chuan vaukam atang chuan lawng che vel chu hmuh ngaihna a awm lo. Sean-a chuan lawng pindan kawngkhar tê zawk chu nula chu a kawhhmuh a. Nula chu a lut bo nghal thuai a. Sean-a chu a thaw huai a, a chhan chu a hote zawhna chhang hman a la ni tlat lo a ni. An lawng chu man anih loh dan tur chu tun atana an lungkham ber tur a ni tlat. An lawng Schooner chu Point Pillar leh Point Grifo inkar yard zathum vela zau kaltlangin tuipuiah a tawlhlut ta a.

Sean-a thupek anga lawng puanzar zawng zawng an zar pharh vel hnu chuan lawng chu thli chuan a chhem kal ta a. Ten-a chuan Sean-a chu a rawn pan hnai a, "Kha nu kha khawilam mi nge? Lungin tâng tlanchhuak em ni?" tiin a rawn zawt a. Sean-a chuan, "A tawngka chhuak leh a cheziaah chuan Lady dik tak ni chuan ka ring. Mahse anih leh nih loh phei chu ka hre bik lo. Amah kha hmu lo tawp ila, ani pawhin kan lawng hi hmu lo tawp se tih hi ka duhthusam ber chu a ni," tiin a chhang a. Chutah, "Ten, hmar thlanglam pan zel ila, ka zuk lut thla anga, thil awmdan zuk hriat ka zu tum teh ang," a ti a.

Lawng pindan chhunga a zuk luh leh chuan nula chu tui zet hian a lo muhil bawrh bawrh a. Amah, Sean-a khumah a lo mu a. A hmel a han enchian chuan Sean-a chu a thaw hawk a, chu nula chu a lo hmeltha chung chuang kher mai. An rawn um zui pawh kha thil mak a ni hran lo ve.

Êng chu a lo herh hniam a, lawng bathlar lamah chuan a chhuak chho leh ta a. Tennison-a chuan nui var var chung hian, "I va rawn lang leh rang ve," a lo ti a. Sean-a chuan, "A muhil alawm mawle. Ten, enge tih theih kan neih? Kan lawng lam panin a rawn hleuh a, leihlawnah a rawn lawn ta mai si a ni. Vaukam lama mite chuan an zawng nasa mai. Kan lo inrawlh ve tih pawh an hre maithei a ni," a han ti a.

"Thil dik tak i ti a ni. Duhthlan tur dang nei hek lo che,"

"A kut zungtangah inneih zungbun a bun lo a, chu zawng chu ka hmuh a ni,"

Sean-a chuan a chet dan kha a dik leh dik loh a hrechiang thei lo. Vaukam lama mite kha koin, nula kha a man tir thei a. Mahse chu chu huaisenthlak a niin thil dik a ni thei angem? Chiang takin rukru a ni lo tih a hriat a. A thawmhnaw inbel bak kha chu engmah rawn ken a nei tlat lo a ni.

An lawng chu tluang takin a tawlh zar zar a, California chu Acapulco atang chuan hla tak a ni a. An lawngah chuan nula chu a rawn lawnkai tih pawh hria se chutiang chen chena hla chu an rawn umzui a rinawm hran lo a ni.

Tennison-a chuan, "Zuk mu ve tawh la a tha ang. Ka khumah khan zuk mu mai rawh," Sean-a hnenah chuan a ti a. A chauh em avangin Tennison-a thu chu hnial hranloin Sean-a chu mu turin a kal ta nghal a. A han mu fel chu a muhil nghal bawrh bawrh a. Zing dar li a lawng bathlara a han chhuah chhoh chuan an lawng chu tluang takin a la kal zel a. A hma lawka ruah sur avangin lawng chhuat chu a hnawng deuh chap a. Congo-an lawng chu a lo khalh tawh a. Tennison-a chuan lawng bathlar hungna bula dingin hnunglam chu a lo thlir veng veng a.

Sean-a chuan, "Thil hmuh i nei em?" tiin Tennison-a chu a han zawt a. Ani chuan, "Lawng puanzar niawm tak ka hmu thanin ka inhria a, mahse ka hmuhsual a ni maithei bawk," a lo ti a.

Khua a la var chiah lo na in khawchhak kâwl chu a rawng a dal tan tawh a. Sean-a chu lawng khalhna lamah chuan a phei a, compass chu a han en a. Acapulco leh Paradise Cove inkar chu mel sangkhat leh zanga zeta hla a ni a. Tluang takin kal pawh ni se, kâr hnih kâr thum lai thang a ngai hrim hrim a ni. Khua a var fel tih chuan Sean-a chuan lawng chu a khalh ve ta a. Nula pawh chu lawng chungzawlah chuan a rawn chhuak chho ve ta a. Sean-a thawmhnaw a rawn inbel a, a vun chu a buang deuh thak a, a sam chu a dum hlap mai bawk a. Sean-a chu a rawn pan phei a, "Mariana de la Cruz ka ni a, lawmthu hrilh che ka duh a ni," a han ti a.

"Kei ka hming chu Sean Mulkerin ania,"

"Captain i ni ti raw? Irish mi i ni maw?"

"Ni e, ka nu hi Irish a ni a, ka pa kha Irish leh Mexican thlah pawlh a ni,"

"Ka pa kha i ti elo?"

"Kum khat vel kaltaah khan miin an that a ni,"

Sean-a chuan lawng khalhna vuan chung chuan compass chu a han en a, ama hriat tawk lekin a han phun sap a.

Nula chuan, "Thil hmuh i nei em? Min zuitu an awm em ka tihna ania," a han ti a. Sean-a chuan, "Chutiang tumah ka hmu lo. An umzui che i ring deuh em ni?" tiin a han zawt a. Nula chu a ngawi vang vang a, a inngaihtuah mûk hle a. Chutah a bu nghat a, "Min rawn um zui ngei ngei ang. Andres-a kha pa tum ruh deuh mai leh mi ngaidam mai mai lo chi a ni tlat a ni," a ti ta a.

Sean-a chuan, "Andres-a maw?" a lo ti ha a.

Nula chuan, "Ni e, Andres Michado-a. Vawiin hi kan inneih ni tura ruat a ni nghe nghe," a ti a.

Michado chu tunge anih a, eng ang mi nge anih a hrechiang hle. Tumkhat phei chu an lo in thiantha viau tawh nghe nghe a ni. Mahse sakawr intlansiaknaah Michado chu a khûm avangin an in thianthatna chu a tawp ta thut mai a ni. Andres-a chu chhungkaw pangngai tak atanga rawn seilian a ni a, mahse kawlhsen leh awm hle hle ngaitheilo mi a ni a, tlâwm zawk chan chang duh hauh lo mi a ni bawk. Engkim mai thei bera inngai tlat mi a ni. A rawn um zui ngei ang. Sean-a a inrawlh ve vang ngawt pawh chuan a rawn um zui ngei ang tih a chiang lehzual a ni.

Andres Michado, ani ber kher a han ni chu...... inchhuang leh mahni induhtawk zet mai, insual leh silai hmanga inbeih lam pawh thei chungchuang tak mai a ni a. Nula chu a rawn umzui ngei ang le. Neih atan a duh tak tak em. A duh tak tak lo emaw, a tlanbosan avangin a ngaidam dawn hauh lo, a rawn umzui zel ang tih chu hriat sa a ni.

Nula chuan, "Ka duhthlanna a ni lo a, amah neih chu ka tihna anih chu. Ka pa hian min thihsan tawh a, he thil hi ka pami leh Andres-a te rêl dun a ni. Ka han hnial ve teh naa engmah a sawt lo. Acapulco-a innei tur kan ni a, Andres-a nî leh a chhiahhlawhnu chu an rawn thleng tawh a, ka pami pawh chu a ranch atangin a rawn kal dawn a. Andres-a chu ka huat em vangin neih ka tum lo reng reng. Khuaah khan ka hmu che a, mi pakhatin tunge i nih leh California lama haw tur i nih thu min hrilh a. Ka khum a buatsaih fel hnuin chhiahhlawhnu chuan min kalsan a, ka tlânchhuak thut mai a. Mahse min enthla turin an ti a ni ang chu a rawn let leh ta thut si a ni," a ti malh malh a.

Nakin deuhah chuan Sean-a chuan an hnunglamah chuan thil hmuh a nei ta. A hote zinga pakhat chu, "Hilo, lawng hnunglam saw han en teh," tiin a han au a. Hilo-a, Hawaii mi chuan lawng hnunglam chu a pan phei thuai a, "Ka pu, Schooner a ni, heta tanga mel sawm vela hlaah a awm," tiin a rawn hrilh a.

Michado-a chuan hun a khawhral lo kher mai. Sean-a chu anchhelawhin a han phun sap a, chutah nula kha a bulah a lo ding ve reng tih a hrechhuak a, "Min lo hrethiam rawh," a han ti leh hnuhnawh a. Nula chuan, "Captain, thupha chawi a ngai hleinem, keimah vang a ni. Pawi ka ti takzet a ni," a lo ti thuai a. Sean-a chuan thildanga chhangloin, "Saw lawng saw Acapulco lawng chawlhnaa ka hmuh kha a ni chiang mai. A kal chak theih hmel viau lehnghal," a ti bal bal a.

Mariana-i chuan, "Buainaah ka hnuk lut ta che u anih hi," a ti ngui raih a.

Sean-a chuan, "Buaina tawh hi ka pawisa hleinem. Mahse tun tum chu ka buaina tawh hi kan chhungkaw pumpui tawh a ni tlat. He Schooner hi kan thil neih chhun a la ni thuai maithei a ni. Chhiatna tawk lo hram sela ka ti khawp mai," a ti a.

A chhungten an lo nghah loh chuan khawthlang lam Hawaii lamah anmahni umtute chu an bibosan a tul dawn a ni. Inbum dan chi hrang hrang engemaw zat a lo zir thiam tawh a, a hman tangkai pawh a ngai maithei...

Mariana-i chuan, "Pawi ka ti tak zet a ni," a han ti leh a. Sean-a chuan, "Thil kal tawh chu thil kal tawh a ni a, tuna kan ngaihtuah tur chu he thil tawn tlang dan hi a ni," a ti charh charh a. Mariana-i chuan, "Michado-a chu California Governor Micheltorena thian tha tak a ni lehnghal," a han ti a.

Sean-a chuan awka nelawm teh chiam lo hian, "Nih pawh a ni ang. Chutiang lampang chu sawi tur i la nei em?" a lo ti a. Mariana-i chuan, "Pio Pico-a leh Alvarado nen chuan inthian an ni lo tih ka hria," a ti a. Sean-a chuan, "Anni pahnih chu ka nu thian tha te an ni a, ka pa nen pawh khan inthian tha tak an ni thin. Mahse chu chuan tun hun atan chuan tangkaina a nei lem lo a ni. Michetoreno leh Michado te angin thuneihna an nei ve tawh tlat lo," a lo ti a.

Nilengin hmar lam panin an kal zel a, anmahni zuitu lawng chu thlir turin a hote chu a khat tawkin a tir a. Chu lawng chu hmar lam panin a rawn kal ve zel a, anmahni tak chu a la rawn hmu lo pawh a ni maithei. Zanriah chu a cabin-ah Mariana-i nen an kil dun a. Sean-a chuan Mariana-i chu a chhungte chanchin te hrilhin, "Ka nu chu kan chunga thuneitu ber a ni a, thil a tisual ngai hauh lo bawk. I ngaina hlein ka ring. In kan neih chhung chu kan hnenah i awm thei ang," a ti a, za lo zet hian a han then sak a. "Kan nei rei kher lo maithei a ni," a han ti zui a. Mariana-i chuan, "Chumi chungchang chu uluk taka i ngaihtuah a tul lo maw? Vaukam kan kai hnu ai chuan tunah hian inngaihtuahna hun i nei tam zawk hle awm si a," a ti a.

Lawng bathlar dinglam sira dingin Captain Sean Mulkerin-a chuan kawlkil, California vaukam lam chu a thlir vang vang a. Anmahni rawn zawngtu Schooner lian tak kha chulai hmun khawimaw laiah chuan a awm ngeiin a ring a ni. Michado chu pa fing tak mai anih avangin San Pedro a kalin Los Angeles lama sawrkar thuneitute thil awm dan a hriattir ngeiin Sean-a chuan a ring a ni.

Zing thlifim vawt var mai chuan tui chu a chhem fawn hlap hlap a. Kum sawmhnih pahnih mi niin Sean-a chuan tuipuiah hun engemaw chen a lo hmang ve tawh a. An ranch Malibu hmuna lo piangin, a lo seilen hnu chuan bawng enkawl, sapêl, sakawr sawizawi leh lawngkarin a hun tam zawk a hmang a. Tuipuia a zin chhuah hmasak ber chu a pa nen Mazattan, Acapulco leh Tehuantysee tlawha an zinkual tumin a ni. A vawihnih zin chhuah tum chuan Panama, Callao leh Valpaiso a tlawh a. Chuta tang chuan hmun hrang hrang tlawhin a zin chhuak ta fo a. Sahnghai leh Macao thlengin a tlawh chhuak vek tawh a ni. Kum sawm leh paruk a tlin chuan Sean-a chu pound za leh sawmriat zeta rit a ni tawh a. Ranch-ah leh tuipui lama hna a thawh rim em avangin thahrui a ngahin a tuarchhel em em a ni. Kuttuma inbeihnaah leh silaia inkahnaah a tel fo thin a, silai hman lamah pawh mi naran chunga leng a ni.

Sean-a chu Tennison-an a rawn pan hnai a, "Engtin nge vaukam kan kai ang?" tiin a rawn zawt a. Sean-a chu a han inngaihtuah hlek a, "San Nicolas thliarkarah kan lut anga, Santa Barbara thliarkar helkualin vaukam kan kai dawn a ni. Thirchakai kan thlak zawh veleh lawng hi thelret puana khuh ka duh nghal bawk ang," a ti a.

"Zanah maw?"
"Ni e, tum anga kan kal theih chuan,"

Lawng bathlara Mariana-i a rawn chhuah chuan vân chu a thim deuh ruih tawh a. "I nu chuan engtin nge min ngaih ang?" tiin Sean-a chu a rawn zawt nghal chawt a.

"A ngaina ngawt ang che," Sean-a chuan a ti mai a. Mariana-i chuan, "Engtin nge min ngainat theih ang? Buainaah ka hnuklut che u a ni si a," a lo ti hâ a. Sean-a chuan a dâr chu a chhin âk a, "Buaina chu a thleng fo alawm. A hmachhawn dan kan thiam a tul a ni mai," a ti a, a hmalam chu a thlir vang vang a. San Nicolas thliarkar chu hmalam khawthlang lam deuhah a awm a. Heng thliarkar ho hian zeizia riau an nei ve a. A chîk peih leh a hrethiam tan chuan kal kai a awlsam deuh sawt thin a ni. Khawmual lam chu a thlir ngun hle na in a rilruah chuan Mariana-i chu a lian ber thung a. Kâr hnih chhung zet chawhlui an lo kil dûn thinin lawng bathlarah te chuan an teikual dun thin a. Hmangaihna khurpuiah an tlu lut ta mai em ni ang? A han ngaihtuahin awm ang lo hle hian a hria a.

Lady Luck chu lawng tha tak mai leh rinawm tak a ni a, khalh kawi vel pawh a nuamin lawng puanzar han thunun vel pawh a awlsam hle a ni. Hmanraw tha tak a awm phawt chuan mihringin thingzai tlawn mai mai lawng tha leh rinawm tak maia an han chhuah thei te chu mak angreng tak ni hian Sean-a chuan a hria a. Lawng an han tuk zo a, khawmual kalsanin tuipuiah an han chetla a, thingzai phawk phawhraw tak tak tuipuia a han lêng ta delh delh mai chu hla châng chi khat tluk zeta mawi niin a hria.

Sean-a chuan Mariana-i chu a titi pui fo a, Mariana-i chuan a thusawite chu ngunthluk takin a lo ngaithla a. A thusawi niloin a sawitu chu a ngaihven zawk ni hian a lang bawk a. Tuipuia kum engemaw zat a lo khawsakna chuan Sean-a chu mi ti kher kherah a siam lo a, a rilru a tisak chuang hek lo. Lawnga khawmual hmel hmu lova ni engemaw zat han khawsak chuan mihring rilru put hmang a danglam theih zia leh khawmual kai hnua a reh leh mai dan te a hre vek a ni.

Sean-a chuan, "Khua a thim veleh khawmual kan kai ang," a han ti a.

"A hlauhawm lovang maw?" Mariana-i chuan a lo ti a.

"Kan tan chuan hlauhawm love. Helai vaukam hrul hi chu vawi tam kan kal tawh alawm. Ka chhungte ka hmuh hma chuan anni ho khan min hmulo sela ka duh a ni," Sean-a chuan a ti a. Chutah, "Helai velah hian thian emaw chhungkhat emaw i nei em?" tiin a han zawt a.
"Nei lo," tiin Mariana-i chuan a chhang a. Sean-a chuan a kawrchung bah chu a ha a, Santa Barbara thliarkar khawkrawk deuh mai chu a thlir vang vang a. "I pami hnenah engvangin nge ka hruai haw leh mai loh ang che," a han ti a.

Mariana-i chuan, "Chu, kir leh turin min duh tihna em ni?" a lo ti ha a. Sean-a chuan, "Chulam phei chu ni love. I tan a that zawk ka rin vang mai ania," a ti a. Mariana-i chuan, "Ka haw leh vaih chuan Andres-a min neih luih tir ngei ang. Ruahmanna an siam lawk vek tawh a ni," a ti a.

Sean-a chuan Michado-a chêtlâk dan tur te a chhut neuh neuh a, vaukam a rawn kai angem? Ranch-ah a rawn kal ngeiin a rinawm a, chuti anih chuan an inkhuainuai a ngai ngei ang le. Anih leh Senora ve thung hi? Engtin nge ani hi a buaipui ang?

Monterey lama kalin Alvarado-a an hmu thei a. Thuneihna chelh tawhlo mah se huhâng a la ngah em em a. Governor meuh pawhin ani nena buaina neih chu a duh kher lo ang.

Thliarkar chu a hnunglam atangin a pan a, ni a tla tawh a, khawthlang kawl chu a sen ruih a, tuipui pawh a thim deuh ruih tawh a.

Amah thlâk tura Tennison-a a rawn kal chuan Sean-a chuan, "Thil danglam engmah hmuh tur a awm rihlo na a, i mit lên ngun hle ang che. Vaukamah sawn Indian ho an rawn kal maithei a nia," a lo ti a. Tennison-a chuan, "Captain, sum tlem azawng khawl ka nei ve a, Senora-in a mamawh......." a tihlai mek chuan Sean-a chuan, "Ka lawm e, Ten. Tihdan a awm mai ang. Pawisa lam erawh chu a ngai hnem viau dawn a, helai chhehvelah hian sum a harsa viau mai si a," a lo ti a.

Ten-a chuan, "Michado hi ngaihthah chi a ni lo ang. Mi paruk zet a that tawh a, thenkhat te phei chu a thah chhan ho tak a ni," a han ti leh a. Sean-a chuan, "Ten, ngil takin khalh ang che. Thli tleh danin a zir chuan zanlai velah vaukam kan thleng hman ang," a ti ta daih a.

Kawlkilah chuan thliarkar chu a lang thim khap a. Cabin chhung chu a lum nuam hle a. An khawnvar khai chu lawng chet zawng chuan a inthên leh delh delh thin a. "Naktukah chuan in kan thleng tawh ang. Engkim a kal tluan ka beisei," tiin Sean-a chu a phun sep sep a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 15th, 2018, 7:45 pm

THE CALIFORNIOS
CHAPTER - 3

Lawng chungzawla Sean-a a han chhuah chhoh chuan a thim mup a. Êng a rawn inkah chhuah loh nan cabin kawngkharte chu an khar phui vek a. Lawnga êng an chhit thin pawh an tithim vek a ni. Muangchangin vaukam lam chu an pan zel a. Thlifim a thaw heuh heuh a, chhum karah chuan arsi a lang zauh zauh a. An hmalamah chuan thliarkar chu a lang thim mup mai a.

Tennison-a chuan, "Kelp ( tuipui hnim chikhat tona hmun) kan thleng tep, sawlai mai saw a ni tawh," a rawn ti a. Tlâng pangah chuan eng a rawn lang a, Tennison-a chuan, "I mi rawih pa chuan a hna a tlin hle mai," a han ti a.

Êng rawn lanna lai chu tuipui atang chauh lo chuan hmuh theih a ni lo a. Tuipui atang pawhin hmun khat atang chauhin a hmuh theih a ni. Sean-a chuan lawng khalhna chu a vuan a, lawng chu Kelp hrûlah chuan a kaltir a. Litengsawl chu hmar chhak hawia inkhawh a niin mel hnih vela sei a ni a. A thuk zawng chu fathom sarih vel a ni. (Fathom khat leh feet ruk a intluk)

A chhim lam depah chuan lung hriam tak tak a awm a. Sean-an lawng din tir a tumna hmun chu kelp piah chiah li mawnga tiauvut awmna hmun chu a ni. Reivaklo an kal leh hnu chuan Sean-a chuan, "A tha e, Ten, thirchakai kha thlak rawh le," a ti ta a. Thirchakai chu an thlak a, lawng puan zar chu an la thla nghal bawk a.

Vaukam kaina tur lawngleng an thlak hnu chuan Tennison-a chuan, "Captain, râl vêngin kan ding rih dawn em ni ang?" tiin Sean-a chu a râwn a. Sean-a chuan, "Chu chu a tha ang. Ka thang hlana buaina in tawk anih chuan tha in tih ang angin lo che mai ang che u. Lawnglenga an rawn um che u anih chuan kelp-ah lut ula, an umzui theilo ang che u," a ti a.

Congo-a chuan lawngsirah chuan hruizen leihlawn a thlak thla a. "Ka pu, hei i rifle, i mamawh ka ring," Sean-a hnenah chuan a ti a. Congo-a hi West Indies mi a ni a, a palen aiin a awm chu a tê a.

"Ka lawm e, Congo," Sean-a chuan a ti a.

Mariana-i pawh chu lawng chung zawlah chuan a rawn chuang chhuak ve ta a. Congo-a a rawn chhuk ve a, lawng chu vaukam lam panin a kar ta a. Tui chu a thim duk ruih a, khua chu a thim chhahin a reh vung vung mai a. Vaukam an thlen chuan lawngleng atang chuan an chhuak a. Anmahni a kalsan hmain Congo-a chuan, "Captain, a tul i tih chuan englai pawhin rawn kal turin ka inpeih reng ang. Inbeihte a ngai anih chuan......." a tih lai mekin Sean-a chuan, "Ka rawn pun hmasak ber i ni ang. Lady Luck kha uluk takin lo enkawl phawt mai teh u," a lo ti thuai a.

Thli vawt ver vawr hi a tleh hauh hauh a. Congo-an a kalsan hnu chuan Sean-a leh Mariana-i chu an kalsawn ta a. Thawm ngaithlain an ding leh zeuh zeuh thin a. Sean-a chu a fimkhur em em a, lawng pawh kha ranch hnaih zawk, Dume Cove-ah a thlun theih a. Mahse Michado-an a rawn zawng anih chuan chulai hmun chu a rawn zawn hmasak tur a ni tlat a ni.

Minute khat vel ral hnu chuan Mariana-i chuan, "A la hla em?" tiin Sean-a chu a zawt a. Ani chuan, "Kan thleng thuai tawh ang. Zanin chu tui takin i mu thei ang. Senora-in thawmhnaw inbel tur a ngaihtuahsak bawk ang che," a ti a. "Buainaah ka hnuklut ta si che a, min haw ngawtin ka ring," Mariana-in a han tih chuan, Sean-a chuan, "A hmangaih ngawt ang che," a lo ti thuai a. A han ngawi hlek a, "Mariana, i hriattur, i la hmuh thuai tur chu....... Ka nu chu hmeltha deuh mai ania," a han ti leh a.

"Mahse........."

"Ka nu anih vanga hmeltha ti ka ni lo, a hmeltha ve hrim hrim a ni. Tin, Irish kulmuk dik tak a ni a, a ngaina ngawt ang che. Rilru chak leh mi tih ang chu ti thei zel mai mi a ni,"

Tawlailir, sakawr pakhat hnuh chi an hmu ta a. A bul tiauvut chungah chuan rifle kengin Jesus Montero-a a lo thu a. Montero-an Sean-a te a hmuh chuan spanish tawngin a lo lawm a. Montero-a chu pa upa lam tawh a ni tih loh chu Mariana-i chuan thim zingah chuan a hmel leh pianhmang a hmu chiang theilo a.

Montero-a chuan, "Senor, buaina kan tawk nasa khawp mai. Ranch lâk tumin an rawn thawk a, naktukah an rawn thawk nawn leh dawn a ni," Sean-a hnenah chuan a lo ti nghal chawt a.

"Tute nge lo kal?" tiin Sean-a chuan a zawt a. Montero-a chuan, "Palian deuh mai, Senor Wooston Fernandez-a leh Tomas Alexander-a te an ni," a han tih chuan, "Rukru rual ho," Sean-a chuan a lo ti hmak a.

Montero-a chuan, "Midang pakhat pawh a la awm. Chupa chu Russel-a a ni," a han ti leh a. Kingpin Russel-a chu mahni chipuite phatsan hreh lo, suamhmang, kawng engkima sual chung chuang larh mai a ni a. Tih hreh a neilo a, engmahin a kawng an dâl theilo bawk.

"He thilah hian engti kawngin nge Wooston-a a inrawlh ve?" tiin Sean-a chuan Montero-a chu a han zawt a. Montero-a chuan, "Mi sawi ka hriat chin bak chu hriat ka neilo. Midang hnen atangin leiba a lei chhawng a ni awm e. Anmahni vaubetin an lei miin an bat sak chu a kutah a dahtir a, an rulh hun chuan pawisa chu a kutah a lut mai dawn a ni," a ti a.

"Chutiang chu Wooston-a leh Russel-a te chêt duh dan awm tak a ni reng a ni,"

"Senora-in a lo nghakhlel hle tawh che asin. I chungah rinna a nghat a ni,"

Sean-a chuan a taksa pum mai chu na deuh zawk hian a hria a. A nu chuan a lak atangin tanpuina a beisei laiin ani lahin buaina chauh a hawnsak si. Mahse tih dan engkawng emaw a la awm mai ang chu.

********************

Phairuam panna kawngpui lan theihna tlang bâwk, hnim bukin a hual vel karah chuan Tomas Alexander-a leh Russel-a an tawm dun a. Russel-a chuan, "Tomas, engtizia nge ni ta? A la rawn lang ta hauh lo mai," a ti bul bul a.

Alexander-a chuan, "Lawng chawlhna atangin mi pakhat a rawn kal a. Mulkerin-a chuan helam hi a pan tih a sawi alawm. A lo thleng ngei ang," a ti a. Russel-a chuan, "Litengsawl pawh kan en vek alawm. Engmah hmuh tur a awm lo," a ti a.

Alexander-a chuan, "He Sean Mulkerin-a hi pa fing ve tak a ni a. Helai tuipui vaukam hi a hre bel em em a, khawilaiah emaw a lawng a thlung a ni ang," a ti a, a dâr a chhin ak a, "Chulo rengah khawthim hma chuan a rawn kal kherlo ang," a han ti zui a.

Russel-a chuan a zu um ken chu a han khiat khawlh a, a sirah chuan a dah a. An awmdan teh hrep chu a nin zawng tak a ni a, muthilh a tum ta a. A muhil hman tep tihah chuan Tomas-a chuan, "An lo kal e, tawlailir thawm ka hria," a ti ta a.

Russel-a chu a thu chhuak thuai a, silai hmet puak maithei turin a insiamrem nghal a. A rifle chu a lekkawh a, mahse hmet puak mai loin a han thlir khawmuang leh rih a. "Pathum anni tlat mai. A tu ber khu nge anih engtin nge kan hriat theih ang," a ti bul bul a.

Tomas-a chuan, "Tawlailir a khalh lo ang. Amah chu dar pharh hlai tak a ni," a lo ti a. Russel-a chuan mi pathumte pianhmang chu a hmu fiah thei ta deuh a. Vawilehkhatah a rawn nui chhuak hawk a. "E khai, pakhat chu hmeichhia a ni reng mai," a ti ta hlut a. Tomas-a chuan, "Thianpa, fimkhur rawh. Hmeichhia a tel anih chuan hmeichhe zahawm chin tihna a ni mai. Hmeichhe zahawm chin ngat lo chu a nu hnenah a hruai hauh lovang," a lo ti a.

Russel-a chuan a rifle chu kah mai inpeihin a lekkawh reng mai a, a hmet puak ta mai lo a. Pakhat chu a that thei ngei ang, a vanneih phei chuan pahnih pawh. Mahse a pathumna chu? A tlanchhuah hman vaih zawngin a tawng chhuak ngei awm si a. Zawimuangin a inthlahdul a, "Khawilam hmeichhia nge maw ni dawn le?" a ti nuah nuah a.

Tomas-a chuan, "Ka hre bik hauh lo mai. Mahse kan fimkhur a tul a ni. Mi pawimawh chin hmelhriat tam tak an nei a, Senora-in thian tha engemaw zat a nei bawk a. Chung mi pawimawh ho zinga pakhat nupui emaw, fanu emaw a ni maithei. Silai kan hmeh puah chuan a inhliam palh thei a ni," a ti a. Russel-a chuan rifle chu a lek hniam ta a. Pawi khawih palh a hlau ve tho a ni. Hmeichhia chu lo that palh ta sela khaihlum a hmabak mai dawn a, mi pawimawh tak a lo nih phei chuan Wooston-a pawhin a chhan thei dawn hauh lo a ni.

Chubakah Sean Mulkerin-an a han veh kual vel tur chu a ngaingam hauh lo. Rinhlelh ruallohin helai chhehvel ram hi Sean Mulkerin-a tluka hrechiang an awm lo. Chulai ram hnimbuk, chapareal an tih chu chuti maia awlsama han paltlang theih a ni lo. A pik em avangin thawm a thup theih loh a, hmun thenkhatah phei chuan han tawn tlang rual a ni lo. Kawng tum lah chu Sean Mulkerin-a chuan a hre kim vek bawk si a.

"I kalsawn teh ang," Russel-a chuan a ti a.

Wooston-a hlawhchhama han hmuh chu a hreh em avangin kalsawn chu Tomas-a chuan a phur hle a. Engemaw chen a ngawih hnu chuan, "Saloon i pan teh ang. Zu in pahin he thil hi kan sawi dun dawn nia. Kawng dang a awm maithei asin," a ti ta a. Kawngtum zawh thlain an sakawr thlunna hmun an pan ta a.

A tukverh bul atanga thawm avang chuan Eileen Mulkerin-i muhil lai chu a harh hlawl mai a. Montero-a aw a ni a, a lo beisei rilru reng a ni. Montero-a chuan, "Senora, an lo thleng ta. Tuipui atangin an rawn kal a ni," a rawn ti a. "Ka lawm e, Jesus," Eileen-i chuan a ti a. A fapa chungchang ngaihtuahin reilote a han mu leh hlek a. Thil zawrh tur tlema zawng nen a zin chhuak kha a ni a, savun man lah a chianglo hle mai bawk si, an ba rulhna khawp sum a rawn hawn a ring chiah lo a ni.

Mahse amah tanpui tura a lo thleng chu a lawm em em tho a ni. "Jaime, Jaime, ka va mamawh tak che em!" tiin a pasal thi tawh hnu hming chu a lam chhuak hial a. Sean-a chuan a pa a chhun fuh hle a, mahse a pa ai kha chuan a fing var zawk a. Mahni inrintawkna a ngah in tuipuia a khawsakna hautak zet avang chuan a kum aiin a lang upa nghe nghe a ni. Sean-an tuipui chanchin leh Polynesian hoin tuipuia khaw awmdan leh tuipui sukthlek dan an hriat zia a hrilhte chu a hrechhuak a.

Thawmhnaw a inbel sawk sawk a, chokaah a lut phei ta a. Chutiang hunah chuan zin lo haw te tan eitur lo buatsaih hi a tih hmasak ber thin a ni reng a ni. An neih tlemte atang chuan coffee a siam a, Sean-a hian coffee a ngaina em em a, mahse a leina an nei hleithei thin lo a. Thingpui hi mitin in tam zawk a ni. Indian ho chuan 'ephedas' atanga siam thingpui an in uar hle thin a, ani pawhin a ngaina ve hle tawh a ni. Eitur dangte chu a siam a, zana Sean-a rawn thleng chu mak a ti rilru hle a. California tuipui vaukam chu a hriat chian tehlul nen chuti taka a han fimkhur ta mai chu eng nge a chhan ni ang?

Inngaihtuah buai tak chungin pawnah a chhuak a. Pawn boruak chu a vawt var mai a. California chu semi desert (thlaler thawthang) ram a ni a, chuvangin zan lamah chuan boruak a vawt hma hle thin. Khawilaiah emaw chuan chhimbuk a hram dat dat a, luiteah chuan chungû an hram sup sup bawk a. Thim tham hnuai atang chuan tawlailir chu a rawn lang ta a, a seat-ah chuan mi pathum an chuang a. Jesus-a, Sean-a leh nula an ni a, chu nula chu a hmeltha kher mai.

Sean-a chu tawlailir atang chuan a chhuk a, nula chu a hlangthla nghal a. Bathlar lam pan chuan an phei a, Sean-a chuan a nu chu a kuah a. A tawng chhuah hma chuan nula kha a rawn kal hnai a, Eileen-i hnenah chuan, "Senora, Mariana de la Cruz-i ka ni a, buaina ka rawn thlen che u ka hlau khawp mai," a rawn ti a.

Eileen Mulkerin-i chuan, "Buaina a? Buaina chu kan tawk sa reng alawm. In lo lut dawn lawm ni?" a lo ti a, kawngkhar lam hawi chuan a inher a. Montero-a chu lawmthu a hrilh a, inchhungah chuan an inzui lut ta a.

Eileen-i chuan, "Coffe in tur a awm a, han thu phawt teh u," a ti a. Sean-an tawng chhuah a tum lai chuan Mariana-i chuan, "Senora, thil awm dan ka han sawi anga, min lo ngaihthlak sak hram ka beisei. Buaina ka tawk a, mi pakhat nei tura nawr luih ka ni a, chupa chu ka hmangaih lova, neih ka duh bawk hek lo. Chutihlai chuan i fapa leh a lawng ka hmu ta a, tanpui ka ngai a, ani hi pa ngilnei leh chak tawk tak niin ka hmu a. Khua a thim veleh ka pût chhuak a, a lawngah ka hleuh kai ta a ni," a han ti a.

Eileen-i chuan, "Thawnthu te pawh a an chu mawle. Anih leh i pasal tur chuan engtin nge a ngaih ang?" tiin a han zawt a. Sean-a zawk chuan, "Min rawn umzui ta a ni. A hming chu Andres Michado a ni a, Senora, buaina i tawh mek laiin buaina dang ka rawn thlen belh che a ni ang tih ka hlau khawp mai," a lo ti a.

"Andres Michado," Senora chu za lo zet hian a han then sak a. "Sean, hmelma i siam dawn reng rengin awlsam takin thlang mai suh ang che," a han ti a. "Keima thiamloh vek a ni," Mariana-i chuan a lo ti thuai a. Eileen-i chuan nula chu a han en a, buaina an neih thar chu a duhlo hle na a, chu nula inchhuang hmel tak leh tumruh hmel deuh mai chu a ngainat zawng tak a ni thung a. "I thiamloh a ni hleinem, ka fapa hian a tih tur awm reng a ti a ni. Mahse buaina kan lo nei sa tawh a, kan neih belh dawn anih chu. He hmunah hian kan lo lawm a che," a ti ta a.

Mariana-i chuan, "I duh dan anih chuan ka kalbo mai ang. Thian ka zawng hmu thei mai ang. Ka pa khan California-ah hian thian a nei ve nual a," a han ti a. Eileen-i chuan, "Kan hnenah hian i awm thei ang. Kan lo lawm lut a che. I thiante erawh chu i la mamawhin ka ring. He Michado-a chanchin hi ka hre hnem viau ania," a lo ti thuai a.

Coffee in pah chuan an hmalam hun tur te an sawi a. Engemaw chen an ti ti hnu chuan Sean-a chuan, "Hetah hian Michael-a a awm ve em?" tiin a nu chu a zawt a. "Awm ve e," Eileen-in a han tih chuan Sean-a chuan, "Awm ve reng sela a tha ang. Pathian rawngbawltu chu tharum thawha an reh chhuah ngam ka ring lo," a ti a.

Eileen-i chuan, "Enge ti tura min duh?" tiin Sean-a chu a han zawt a. Sean-a chuan, "Senora, chu chu nangma ngaihtuah tur a ni. Hei hi i ranch anih avangin thuneitu ber i ni a. Engpawhnise, keini ho hi chu heta awm reng thei kan ni lo. Michael-a hi chu chesawn thei a ni lo. Ka awm dawn a tih chuan a awm mai ang. Keini ho hi chu awmbo ila, chuti chuan lehkha an pe thei dawnlo che a ni," tiin a chhang a.

Eileen-i chuan, "Chu chuan a tikhawtlai deuh ang tih mai loh chu engmah min thlen lovang," a lo ti a.

Kawngkapuiah chuan Win Standish-a a rawn lang a, Michael-an a rawn zui a. Win-a chuan, "Tawng ri kan hria a, kha Sean, i dam maw? I zinna lamah i tluang em?" a rawn ti lut a. Sean-a chuan, "Khaw awm dan chauh a tha a ni ber mai. Savun man a lo tlawm em em mai a," a ti a.

"I senso chu a khuh thei maw?"

"Chu zawng chu a ni mai,"

Sean-a chuan Mariana-i chanchin leh an inchhar dan tawikim takin a han sawi a. Win-a hmel chu a danglam sawt a. "Andres Michado-a nena buaina neih chu ka thil châkloh ber a ni. Pa hausa leh thil tithei, phuba reng reng lakloha chhuah ngailo a ni a, Wooston-a nen buaina neih chu Michado-a nena buaina neih nena khaikhin râlah chuan engmah lo a ni," a ti ta bawrh bawrh a. Amah vek chuan, "Kan pe kîr leh tur a ni. Michado-a nupui tur a ni a, chu chu a pa duh dan pawh a ni," a han ti leh a.

Mariana-i chuan, "Amah neih ai chuan thih ka thlang zawk," a lo ti bak hlar a. Michael-a chuan, "I pa duh dan a ni a, i nu leh pa i zahlo em ni?" a rawn ti ve ta a. Mariana-i chuan,"He thilah hian ka pa a tel ve lo. Ka pa chu a thi daih tawh. He thil hi hnawksak min titu ka pami leh nupui mamawh, Andres Michado-a ruahmanna a ni," a ti ta a.

Sean-a chuan, "A pasal tur chungchangah chuan duh a thlang thei alawm," a lo ti ve a. Win Standish-a chuan, "He buaina hi kan sutlang zo lo tawp ang. Ranch hi chân ta ila, ani hi khawnge a kal ang?" a han ti a.

Eileen-i chuan, "Ranch chungchang hi in mangnghilh niin ka hria. Ranch hi ngaih pawimawh hmasak ber tur a ni," a rawn ti a. Win Standish-a chuan, "Kumin hi khaw awmdanin a zir lo em em a, chuvangin keipawhin ka theih phak bak ka chhuah a ni," a han ti ve leh a.

Kil khata lo thu ngawi ve reng Montero-a chu a rawn tawngchhuak ve ta a. "Putar Juan-a kha kan la hria ang a, Don Jaime-a kha tlâng ramah a hruai tawh thin asin," a han ti a. Win-a chuan, "Colonel-in rangkachak a han hmuh chhuah tum khan maw?" a lo ti a.

Montero-a chuan, "Tam phei chu a ni lo, tlemte chauh a ni. Mahse kan mamawh chu a phuhru zo tho," a ti a. Standish-a chuan, "Rangkachak chu innghahna tlakah kei chuan ka ngai lo. Tumahin California-ah rangkachak an la hmuchhuak ngai lo," a han ti a.

Sean-a chuan, "Chu chu a dik lo. Vaguero (mexican cowboy) pakhat pawhin tlem azawng chu kawr ruamah a chhar a ni. Ram purun zunga kai a ni nghe nghe. Rangkachak chu a awm a ni," a lo ti ve thung a.

"Thawnthu mai a ni, thawnthu mai," Win-a chuan a ti bawrh bawrh a. Eileen-i chuan, "Montero, tlangram lam khi a chanchin i hrechiang em?" tiin a han zawt a.

Montero-a chuan, "Tunge hrechiang awm? Tuman an hrechiang lo. Indian ho pawhin an hrechiang bik lo. Han kal la, i hrechiang emaw i inti anga, i kal leh hun chuan i bo leh tho ang. Ka chipuite hi tlangramah khian an kal ngailo reng reng, Senora," a ti a.

Eileen-i chuan, "Putar awmna erawh chu i hria a ni lawm ni?" a lo ti a.

Montero-a chuan a dâr a chhin ak a, "Hre maithei. Chu chu tunge sawi thei? A rawn lang a, a bo leh a. Hmuh che a duh loh chuan engtikawng mahin i hmu theilo ang. Don Jaime-a thih hma kum khat kalta atang khan ka la hmu leh ta reng reng lo. Tunah chuan a thi tawh emaw a bo tawh pawh ani maithei," a ti charh charh a.

"A bo tawh pawh a ni maithei i tih chu eng nge a awmzia?" Eileen-i chuan a lo ti a.

Montero-a chuan, "A châng chuan a bopil daih a, a sulhnu tuman an hmu ngai lo. Khawiah nge a kal tuman an hre lo. A changin a rawn lang a, a bopil leh daih thin a ni. Old one pawh hi chutiang chiah chu a ni," a ti a. (Putar Juan-a hi Old one tiin an sawi bawk thin)

Sean-a chuan, "Putar chu Montero, a hnenah min hruai thei angem?" tiin a han zawt a. Montero-a chuan, "Kan tum chhin ang chu. A la dam anih a, kan hmuh a duh anih chuan kan hmu thei ang. Kan hmuh a duhloh chuan kan hmu thei hauhlo ang," a ti mai a.

Michael-a chuan, "Eng ang Indian nge anih?" a lo ti a. Montero-a chuan, "Tuman an hrelo. Mi thenkhat chuan Chumash ho awm ve hmaa helai ram luahtu leh a hming satute zinga pakhat niin an sawi. Malibu tih hi a awmzia tunge hria? Mi thenkhat chuan tlangramin tuipui a pawhna tihna niin an sawi a, mahse chu chu a dik lo. Tunge Mogu tih leh Hueneme tih pawh hi tunge a awmzia hria? Hmanlaia phuah a niin a phuahtute ho, an hnam chu an thi mang vek tawh. A la dam chhun chu he putar hi a ni," a ti ta duah a.

"Sean, amah chu i hmu tawh em?"tiin Michael-a chuan a han zawt a. Sean-a chuan, "Vawihnih chu Sandstone Peak bulah naupangtê ka nih laiin ka hmu tawh.Min be nghe nghe asin," a ti a. Eileen-i chuan, "Chu chu min la hrilh ngai hauh lo. Engnge a sawi a?" a lo ti thuai a.

Sean-a chuan, "Thil engemaw zirtirna lam hawi min hrilh a ni. Eng engemaw a sawi teuh mai. A kalsawn dawna a thusawi, 'Finna hi insem tlân tur a ni a, chutilo chu lungpui velah a thamral mai mai thin a ni. Vala, ka finna hi ka la pe ang che' a tih chu ka la hre reng mai," a ti a.

"A pe ta che em?"

"Tlemte chu min pe niin ka hria. Tuipuia ka vahchhuah hmain vawikhat chu ka hmu leh a, chumi tum chuan reife min be nghe nghe,"

Michael-a chuan, "Pa mak danglam tak a ni. Indian ho phei chuan a chanchin an sawi duh hauh lo. Vawi tam sawi pui ka tum tawh a, thudang an sawi chhilh zel mai a ni," a ti a. Standish-a chuan hul zet hian, "An hrelo ani maithei asin. Amahah thilmak hranpa a awm hleinem. Putar, amaha khawsa a ni ve mai alawm," a lo ti a.

Eileen-i chuan, "Win, hmeichhe tana vahpa tha ber i ni. Mahse Irish i ni tlat lo," a han ti deuh ngat a. Standish-a chuan lawmlo hmel tak hian, "Chu chuan enge awmzia a neih?" a lo ti a.

Nui var var chung hian Eileen-i chuan, "Awmzia engmah a neilo maithei. Mahse Irish ho chu hnam upa an ni a, khawvel dang a awm hi an ringhlel lo a ni," a ti a.

Win-a chuan, "Vanram, lei piah lam ram maw? Kei pawhin ka ringhlel hleinem. Inkhawm peih tak ka ni a, vanram leh hremhmun chu a awm ka ring a ni," a ti a. Eileen-i chuan, "Chutiang lam ka sawi tum a ni lo. Keini Celt ho chuan thil mak danglam hi a awm tak tak a ni tih kan ringhlel lo tih sawi ka tum mai zawk a ni. Ireland chu thlarau lam inlâr tamna hmun a ni a, mahse thlarau inlâr thin te chu a rapthlak zawngin an che ngai lo," a ti a.

Sean-a chuan, "Jesus, Juan-a hnenah chuan min hruai thei angem?" tiin Montero-a chu a han zawt a.

"Ka hrelo le. Kan han tum chhin ang chu,"

"Anih leh naktukah aw, hma tawk takah,"

Michael-a chuan, "Anih leh Wooston-a kha?" a han tih chuan Sean-a chuan a dâr a chhin ak a, "Ani chu i mawhphurhna a ni, Michael. Pa chak leh fing var i ni a, Pathian rawngbawltu i ni bawk a, kei hi ka lo awm chuan ka dawhtheihna in a tlin lo mai dawn a, mahse nang chuan zaidam takin i lo dawr thei ang," a ti a. A han ngawi vang vang a, "A tum tlat anih chuan i awmtir mai tur a ni. Mahse nang chu i kalbo tur a ni lo. Ranch hi an kutah hlan mai suh ang che. Chu chu thil pawimawh ber a ni," a ti ta a. Eileen-i chuan, "In rualin ka kal ve ang. Hei hi ka ranch a ni a, Juan-an min hre bawk a," a lo ti a. "Kei pawh ka kal ve ang," Mariana-i chuan a lo ti ve thuai a.

Sean-a chuan, "Nang chu kal ve love. Hla taka kal a ngai dawn a, khua a lumin a hahthlak nasa dawn ania. Chu loah enge kan tawh dawn leh khawnge kan thlen dawn pawh hriat a ni silo," tiin a hnial a. Mariana-i chuan, "Captain, thil theihnghilh i nei a ni. Andres-a kha a lo kal chuan tharumin min hruai lui ngei dawn asin. Michael-a hian lo dan a tum chuan a that ngei ang. Chu chu Andres-a chuan a hreh hauhlo ang," a ti a.

Eileen-i chuan, "Kal ve rawh se. Keiin kawm tur ka lo neih phah dawn bawk si. Sakawr atang chuan a tla bik em lo ang chu," a lo ti a. Mariana-i chuan, "Ranch-a seilian ka ni alawm. Ka kal theih tirh atangin sakawr chung chuan ka thiam a ni," a ti ta hmak a.

Standish-a khan, "Thil atthlak tak a ni, Senora. Eng rilru nge maw i put chu le? Tlangram hmun pilrila i pasal hretu Indian putar, a hming dik tak pawh hriat loh han zawn te chu. Engmah hriat pawh a lo neilo a ni maithei asin. Chulo rengah i pasal khan rangkachak tlemte chauh a rawn hawn a ni si a. A dang awm sela chuan tam tham deuh a rawn hawn i ringlo em ni? Tin, kan putara pawh chu a lo thi daih tawh a ni thei asin," a rawn ti ve ta a.

Sean-a chuan, "Duhthlan tur dang i hria em ni, Win?" a lo ti a. Chutah, "Win, i rilru puthmang chu ka hria e. Mahse thil dang tih theih kan nei tlat lo a ni. Tun hma khan rangkachakin vawi hnih min chhanhim tawh a, tun tum pawh hian min chhanhim leh maithei asin. He thil hi kan tih loh chuan eng nge kan tih chuan ang? Kan ranch hi kan chân mai dawn em ni ang? Anih leh henglai tlang ram hi indona hmunah kan chantir dawn em ni? Win Standish, acre khat pawh ram chân ai chuan thih ka thlang zawk," a ti ta hmiah a.

Win Standish-a chuan, "Anih tak chu han kal rawh u," a ti ve ta a. Michael-a lam chu a hawi a, "Michael, i ngaihtuahawmloh ang ti raw? Pio-a va hmuh ka duh a ni. Engemaw tih theih a neih takin. Ani saw mi fing a ni a, thurawn min pek tur pawh a nei maithei a ni," a han ti a.

Michael-a chuan, "Eng chen pawh thangbo ula, kei chu ngaihtuah ka ngai lovang. Hetah hian ka lo awm reng ang," a ti mai a. Sean-a chuan, "Lady Luck-ah Tennison-a te an awm a, Point Dume-a lawng an thlun ka ring. Tanpui i ngaih chuan i pun mai dawn nia," Michael-a hnenah chuan a ti a.

"Ka ngaihtuahawm lovang," Michael-a chuan a lo ti a.

Sean-a chuan, "Lo tawngtai ang che. I tawngtai puina kan mamawh nasa dawn ania," a han tih chuan, "Sean, i tawngtai ngai nange?" Michael-a chuan a lo ti a.

Sean-a chu a nui sak a, "Ka tawngtai ang. Chulam chu ngaihtuah buai duh suh. Mahse ka tawngtaina ai chuan i tawngtaina chu chhânin a awm ka han ring zawk deuh mai mawle," a ti a. A pindanah a lut a, chawhtawlhah tui a bun a, a kawr a phelh a, a insilfai ta a.

Mut tuma a inbuatsaih lai tak chuan a pindan kawngkhar chu a rawn inhawng a. Jesus Montero-a a rawn dak a. "Min enthlaa min zuitu an awm ka ring," a han ti a.
"Russel-an maw?" Sean-a chuan a lo ti a.

Montero-a chuan a dâr a chhin ak a, "Russel, Tomas emaw midangin emaw, ka hruai thlen hunah che u Michael-a hnen lamah ka let leh ang," a ti a. Sean-a chuan, "Ka lawm e. Chu chu ka duh dan chiah a ni," a ti ve mai a.

Montero-a chu a rawn lut a, kawng chu a khar a, bang nghengin a ding a. "Old one-an a bia che tih ka lo hrelo a. A biak che chuan a mi thlan i ni tihna a ni," a han ti a.

"I thusawi chu eng nge a awmzia?"

Montero-a chuan a chhang lawk lo a. Nakinah chuan, "An sawi danin ani hi an hnamah chuan a dam chhun a ni tawh a, hnam ropui tak an niin ram hla tak atanga rawn kal an ni awm e. Titi ah chuan hmanlai hian hlum leh lunga sak khaw ropui tak thlalerah a ding a. Chu khawpui chu hun rei tak chhung a ding a. Chutah zan khat chu lir a nghing vak mai a, lirnghing chuan ni tam fe a awh a. Khawpuia in te chu a sawi chhe vek a, mihring pawh tlemte chauh an dam khawchhuak a, an zinga pakhat chu Juan-a, Old one an tih tak mai hi a ni," a ti a.

Sean-a chuan, "Thawnthu ngaihnawm tak anih chu. Montero, mahse kei chuan ka awih thei tlat lo. Hun rei tak kal tawhah khan Pedro Fages-an helai ram hi a lo fangkual vak tawh a, khawpui chungchang reng reng a sawi ri lo. Tuipui kam hrulah te chuan kum za liam ta te khan khua chu a awm thin ngei ang. Chuvangin he thil hi thawnthu mai niin kei chuan ka ngai. Juan-a hi kum engzat nge anih tawh ang? Kum sawmsarih em ni ang? Kum sawmriat em ni zawk ang?" a lo ti a.

Montero-a chuan, "Upa tak a ni, Senor, upa lutuk ani tawh i ti mai teh ang. Tuman engtia upa nge anih an sawi thei lo. Khuaa upa ber ber te pawhin a kum zat an sawi thei lo. San Maguel-ah Chumash putar upa tawh zet mai a awm a, chupa pawh chuan a naupan tet lai pawhin Juan-a hi chu tun ang reng hi niin a sawi. Kei hi ka chipuite chuan mitdawivaih thiamah min ngai a, Juan-a lakah chuan kei chu naupang chumchiap mai ka ni. Senor, hun hi i teh thin a, i lawngah pawh dâra siam sana ka hmu a, hun teh leh hman chungchangah hian i fimkhur hle a. Hei hi mingo ho chin chhuah a niin teh theih loh hi teh an tum a ni. Thirkhaidiata thlun theih loh thlun talh an tum a ni. Hun hi enge ni, Senor? Ram zau zawng i tehin i pên zat i chhiar a, Ni, thla leh khaw awmdan inher vel i chhut a. Mahse chu chuan enge a hrilh che? Senor, hetiang thil i chhut leh i teh vel hi i ti dik lo niin ka hria. Kei chuan hun hi a kalbo theiin ka hre lo. Kan zingah a awm reng zawk a, a intanna a awmlo a, teh theih a ni hek lo. I vahvelna hi khawvel awm danah i ngai a, mi thenkhat te chu an vak kual mai niloin an kaltlang hial thin asin," a ti ta duah a.

"An kal tlang amaw? Engmaw an kal tlang?" tiin Sean-a chuan a han zawt a.

Montero-a chuan a sombrero lukhum chu uluk zetin a han hrufai te te a, "Naktuk hi a awm fo a ni. Ka va mu tawh teh ang," a ti ta daih a.

"Jesus?"

"Senor, enge ni?"

"Old one nen hian in inbe tawh tiraw?"

"Tlemte chauhin, reilote chauh. Mangtha muttui le,"

Montero-an a chhuahsan hnu chuan Sean-a chuan khawnvar chu a chhem hlum a, muthilh tumin a maimitchhing ta a.

(Vawiin chu nilengin kan training a, tlaiah kan khaw lam panin ka haw leh nghal bawk si a, ka rawn che tlai deuh a ni. Zan dang aiin ka rawn dah sei hret e).

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 15th, 2018, 7:46 pm

THE CALIFORNIOS
CHAPTER - 4

A la hma hle naa kawr ruam zim tak maiah chuan khawlum chu a tawrhhlelhawm hle a. Montero-an hma a hruai a, Eileen-in a zui a. A dawtah Mariana-i. Puakphur sakawr nen Sean-an hnung a dawl a.

An kawng tum zawh chu a chhiat em avangin muangchangin an kal a. Kawr ruam chhung chu thli han thaw eih pawh awmloin a ngawi hmuk mai a. Bawng tla bo an hmu deuh reng a. An ti em em mai hlawm a. Sakawr pên thawm leh engemaw changa khuai han vi ri leh zauh thin tih loh chu thawm dang hriat tur a awmlo a. Kawng zim leh khawkrawk zet maiah chuan kal sâwt a har hle mai a. Ni a han tlângsân deuh hlek pawh chuan ranch atanga mêl sawm lo liam an kal lovang. An hnuhma tireh turin Montero-a chu a ding zauh zauh thin a. Nakin deuhah chuan kawr ruam peng hi an thleng ta a.

Sean-a chuan rifle a lek chhuak sa reng a. Chulai hmunah chuan buaina an tawh phei chu a ring chiah lo. Mahse inring renga awm tluk chu awmin a hrelo a ni. Tlângram, thlaler leh tuipuia a lo khawsak thinna te chuan fimkhur thiamna a neihtir a. Chu chuan vawi tam tak a nunna a lo chhanhim tawh a ni.

Khawvela ran vulhna hmunpui ber pakhat, Southern California-a bawng enkawla seilian a ni bawk a, chulai ram chhehvel chu a hre bel hle a ni. Kawng zau deuhna hmun an thlen chuan Montero-a chuan chawlh a rawt ta a. Sean-a chuan Montero-a chu a va pan nghal a, "A la hla em?" tiin a han zawt a.

Montero-a chuan, "Ni tlâk rual velin kan thleng ang. Kawng pêng veilam zawh ila kan thleng hma deuh ang," a ti a. Sean-a chuan a dinglama tlâng khawkrawk deuh chu kâwkin, "Saw saw Saddle Rock kha a ni em? Helamah hian rei fe chhung ka kal ta lo a," a han ti a. Montero-a chuan, "Ni e, tunah hian hmalam khawchhak lam hawi hretin kan kal a ni," tiin a chhang a.

Sean-a chu sakawr atang chuan a chhuk a, a sakawr chu daihlimah a kai phei a. Chuta lo chawl sa hmeichhe pahnihte bulah chuan thuthmun a han rem ve a. Mariana-i chuan, "Tukthuan ei turin Montero hian min chawlhpui em ni?" a han ti a.

Sean-a chuan a nuih sak a. "I ril a tâm tawh em ni? Ei leh in lam chu a la rawtin ka ring lo. Tunah hian tui awmna lam min panpui mek a ni. Helai chhehvel tlangram hi a khawro viau na a, tui hmuh tur a awm ve leh zauh thin. Montero-a hian henglai velah hian bawng a khalhkhawm ngun bawk a, tui awmna chu a hrekim deuh vek a ni," a ti a.

"A hre kim vek lo a ni maw?"

"A hre kimtu chu Indian ho chauh an ni,"

Sean-a chuan an piah lam chu a kawk a, "Sawlaiah sawn Lobo Canyon a awm a, ka sakeibaknei thah hmasak ber pawh sawlai hmuna ka thah saw a ni nghe nghe a. Feet kua zeta sei niin lungpui chung atanga min lo châng lai ka kap a ni. Chutihlai chuan kum sawm leh pahnih mi lek ka ni nghe nghe," a han ti a.

Khawthlang lam panin kawng zim leh mumallo zet chu an zawh tan leh ta a.

Nakin deuhah chuan Montero-a chu hmâr lam panin a inher thut a, an kalna kawng chu a bumbohin a zim leh zual a. An kawngtum zawh lai chuan hnim to lohna tlâng kawlhsen vul mai chu a chhun niin a lang. Sean-a chuan vawi engemaw zat sandal pheikhawk hniak a hmu a, Old One-a hniak ngei tih a hre thei mai a.

A la dam ngei a ni. Putar chu a la thilo e. A phûrin a ngaih a ngam ta hle a. Eng chen nge chu putar chu a hmuh tawh loh? Hun rei lutuk zawng a la ni lo e. Hnimbuk to chu a khât tial tial a, reivakloah phei chuan lung mê hmun an thleng ta a. Engtin nge Juan putara chu a khawsak tak? Khawia mi nge tui a hmuh? Enge a ei thin? Englai pawha lawm a hlawhna hmun ranch-ah engvanga lo kal ngai lo nge anih? Chung thil te chu Sean-a chuan a ngaihtuah nauh nauh a.

Tlâng bulthut hi an va thleng ta a. Chulai hmunah chuan thing leh hnimbuk te pawh hmuh tur a awm a. Lung bang nghenchhanin thing tang remkhawma sak bûkte hi a lo ding a. A ban thenkhat te phei chu thing dinglai te an ni hlawm a. Kawngkhar bula thutthlengseiah chuan Juan-a, Old one an tih chu a lo thu a.

A upa tawh em em a, a hmai chuar dân te chu namen lo tak a ni. Hnângtah lukhum a khum a, kawr tial buai mai a ha a, sandal pheikhawk a bun bawk a. Juan-a chuan awki hniam tak hian, "Thiante u, in dam maw? In rawn lang har hle mai," a han ti a. Eileen-i chuan, "Min lo nghak em ni?" tiin a han zawt a.

Ani chuan, "Aw, ni e. I pasal khan a chunga thil tha lo a thlen chuan nang leh i fapa chauh hi thil hrilh turin min ti a," a ti a. Sean-a chu a en a, "Ani pawh a lo puitling ta maw? A tha e," a han ti a. Chutah a kut a vai a, "Thu rawh u khai," a ti a.

Sakawr atang chuan an chhuk a, Montero-a chuan an sakawrte chu daihlimah a kai phei a, a rawn kir leh a, meizial a han tan a. Sean-a chuan Mariana-i kutah chuan a vuan a, "Old one, he nula hi Mariana de la Cruz-i Mexico atanga rawn kal anih hi," tiin a han hmelhriattir a. Juan-a chuan a mitmu dum tak chuan Mariana chu a han en a, "A ni tak maw? Chutah chuan ka naupan laiin ka rawn kal tawh asin. Khaw ropui tak a awm a, mahse ka lo beisei ang chu a ni lo. Dila thliarkar awm niin an sawi thin a, mahse thliarkar ka hmulo a, dil pawh hmuh tham a awm lo," a ti charh charh a.

Thuthmun an rem fel hnu chuan Juan-a chu inchhungah a lut a. Hlum bêlin thil tui vawt deuh mai hi a rawn la a, hlum noah chuan a thli diat diat a. "Hmanlaia an chin thin, chi al leh khawizu chawhpawlha siam a nih hi. A vawt a, chakna min pe thei a ni," tiin a hrilh a.

Senora chuan, "Juan, buaina kan tawk a ni. Kan leiba kan rulh loh chuan kan ranch min chhuhsak an tum a. Ka pasalin rangkachak a lâkna kha i hriat kan ring deuh a ni," dam thlap hian a han ti a. Old one chuan, "Ka hria alawm, rangkachak chungchanga lo kal in ni tih pawh ka hria e. Ka hrilh che u anga, chutichuan in kal dawn nia. Thah tumtu che u mi pariatin tunah hian an zui che u a ni," a ti ta a.

Eileen-i chuan, "Kan rualin i kal ve angem?" tiin putar chu a han zawt a. Ani chuan, "Kal ve ang. Nangmahni mai chuan in kal theilo ang," a ti a, Sean-a chu a han en a, "Kan kal bo hnu chuan nang chauh hi rangkachak la tur chuan i lo let leh dawn nia. Hre reng ang che...... nangmah chauh," a ti ta a.

Montero-a chu a tho a, "Old one, i sakawr ka va lâk ang che," a ti a. "Ka lawm e," putar chuan a ti a, Eileen-i lam chu a hawi a, "Senora, i la danglam miahlo anih hi. Kan zinga mi i ni rêng a," a han ti zui a.

"Kan zing ami a?" tiin Eileen-i chuan a lo zawt a.

Old one chu a nui sak a, "Ka chipuite chu an liam zo ta, Senora. A hma chuan thahnem tak kan ni thin asin. Nangni ho leh chi dang hote anga tam lutuk chu kan ni ngai lo. Mahse thahnem tawk tak kan ni thin," a ti a.

"Nangni ho hi in thang upa ve ngai nange?"

"Mi zawng zawng an thang upa in an thi thin alawm. Kan damrei thin tih mai a niin finna hi kan zir nasa em em a ni. Damrei ringawt hian awmzia a neilo a, finna neia rei tak dam chu thil dang daih a ni,"

Eileen-i chuan, "I thuchhuak a fing hle mai. Pa mak danglam tak i ni, Old one," a ti a.

Bûk piah lunghmun atanga Montero-an sakawr a rawn kai phei lai chu Juan-a chuan a thlir vang vang a. "I pasal a rawn lan hma chuan pa khawhar thei tak ka ni thin a. Ngaihthlak nan beng ka mamawh ang bawkin chhân nan aw ka mamawh a. Chumash ho hi mi tha tak leh rilru tha tak an ni a, mahse helai ram vel chanchin bak hi hriat an nei lo. Mahse i pasal erawh kha chu a rilru a zauin tuipui leh khawmual hmun hrang hrang chanchin a hre em em a. Ngaihthlak a peih ang bawkin a thuchhuak pawh a fing a. Thil engkim a hrethiam a ni. Mi tam takin an awih hauh loh pawh hrethiam khawpin a rilru a zau a ni," a ti a.

Eileen-i chuan, "Old one, lehkhathiam i niin ka hria," a ti ta hlawl a. Putar Juan-a chuan, "Lehkhathiamna chu khawtlâng inawp dan leh mihring nunkawng chhui thiamna hi a ni mai lawm ni? Lehkhathiamna, zirna hi chi hrang hrang a awm a ni," a ti a, a ngawi ta daih a.

Sean-a chuan putar thusawi chu ngun takin a lo ngaithla a. Putarin a naupan laia a thil hrilh te kha a ngaihtuah chhuak a, a thil sawi erawh chu a famkimin a hre tawh lo. "Finna chungchang i sawi kha ka la hre reng asin, Old one. Insem tur anih thu leh min sem ve tur nia i sawite kha ka la hre reng asin. Sawi tur i neih chuan ka lo ngaithla ange," a ti ve ta a.

Old one chuan, "Ka sawi tur neih chu ka hrilh ang che. Mahse i rilru leh ngaihtuahna zawng zawng nen i ngaihthlak a ngai ang," a ti a, a tho thut a, a sakawr awmna lam a pan a. A sakawr lakam chu a la a, sakawr zin chu a vuan a, sakawrah chuan awlsam fe hian a lawn ta a. Midang ho pawh chu sakawra lawna amah zui turin zai zirin a han hrilh zui nghal a. Tawng leh tawh loin tlângdung chu an zawh a, chutah hmar lam panin an inher ta a.

Chulamah chuan kawngtum awm âwm pawhin a lang lo. Mahse Old one chuan a sakawr chu a kaltir zel a. A hnunga kal Sean-a lam chu a hawi a, "Kan kawng zawh hi theihnghilh hauh suh ang che. Ka thi thuai tawh dawn ania," a han ti a.

"Ni lo ve,"

"A rei tawh lovang,"

Sean-a chuan a nu chu a han en a, a hmel chu a tla dêk a, a chauh hmel hle a. Mariana-i pawh chuti bawk. "In kal thei zel maw?" a han ti a.

Senora chu a nui sak a, "Tehreng mai, nang zawk le," a lo ti a. Sean-a chu a nui hak a, Mariana-i chuan a lo nuih ve sak a, "Kal zel rawh u, min kalsan hauh lovang," a han ti a.

Tuipui atang chuan thlifim a rawn tleh heuh heuh a, ni chu a sa hle na a, thlifim thaw chuan boruak chu a vawngdai tha hle a. A châng chuan lungtohlawt hlimah an kal a, a changin hnimbuk hlim hnuaiah te an kal bawk a. Sean-a chuan grizzly savawm, savawm chi dang, tlangram sakeibaknei leh ramsial hniakte a hmu leh zauh thin a.

Putar chuan kawng tum zim zet hi a zawhpui zel a, kawngruh hlui zet hi an thleng ta a. Nakin deuhah chuan kawrruam, lungpui insir khupna hmun hi an thleng a. Tui a dir kar kar a, sava an hram nak nak bawk a.

Reilote an chawlh hnu chuan an kal tan leh ta a. Sean-a chuan, "A la hla em?" tiin putar chu a han zawt a. Putar chuan, "A tâwpah a ni mai. Kan kalna tur chu i hmu tawh thin anga, mahse khawpui i la hriat ngai hauh siloh a ni ang," a ti mai a.

Sean-a chuan an hmalam chu a han thlir a, kawrruam chu a lo thûk lehzual ta a. Han chhinchhiahna tur sulhnu hlui pawh a awm miah lo a, bo a awl hle dawn a ni.

Kawng a lo var zau deuh tih chuan Mariana-i chuan sakawr chu Senora sakawr hrûlah chuan a rawn kaltir a, "Indian chu a ang lo riauin ka hria," a han ti a. Eileen-i chuan, "Indian ho chu eng nge an nih? Aztec-ho an awm a, Eskimo-ho an awm bawk a. Chutihlaiin Toltec-ho leh Roguois-ho an awm ve bawk a,"a lo ti a.
"Ka ngainat zawng tak a ni,"

"Keipawh,"

Kawng a zim tak avangin an kal hrang leh ta a. A han zau leh deuh hnu chuan an kal dun leh a, Mariana-i chuan, "Kan zui ve tih a hmuh pawh khan engmah a sawi loh kha. I hria em? Min hnutchhiah pawh a tum miah lo," a han ti a.

"Thil a hre zawk alawm," a lo ti hul hak a, chutah, "Anni ho hian hmeichhia leh mipa intluktlânna lam hi an ngaihtuah ve ngai lo a ni ang..........a ni ngei ngei ang," a han ti leh a.

Tlâng pâwng an lâwn chhuah chuan Sean-a chuan a hnunglam chu a han thlir a, a chala thlan rawn bawl chu a han hui pawk pawk a. An hnunglamah chuan lung mê to lerh lurh leh laiking bêl rawh khu chem chem bak chu hmuh a nei lo. Michado-a leh a hote khan an rawn zui angem?

Old one khan an rawn zui tih a sawi a. Chu chu a awih mai tur a ni. Chumi fiah tur chuan hmuh leh an thawm hriat kher a ngai lo a ni maithei. A hmu thei a ni mahna. Chu chu Indian rual û hoin anmahni zuitu an awm leh awm loh an hriat theih dan pawh a ni mahna.

Sean-a chuan a dâr a chhin ak a, a puakruk chu a han dap a. A puakruk chu a chhuak thar, repeating pistol, Peterson, New Jersey-a siam a ni a. Colt tiin an vuah nghe nghe. An puakruk siam tawhah chuan a la tha ber a ni. Sean-a chuan rifle, eight shot colt revolving rifle a keng tel tho a. A rifle pawh chu tha chung chuang tak a ni. A tin zawnna 'sight' leh a part thenkhatte chu amahin a siam danglam an ni nghe nghe a.

A hnunglam chu a han hawi leh a, thîr, ni êngin a chhun tlet zauh hi hmu thânin a inhria a. A ngaihruatna mai mai pawh a ni thei e.

Ni a tla tan mek tihah chuan tui awmna, Petero Spring an tih chu an thleng ta a. Putar chuan a sakawr a pawt ding a, "I chawl rih lawk ang u," a han ti a.

Sean-a chuan a nu leh Mariana-i chu a ngaihtuah deuh avangin, "Kan kal zel dawn em ni?" a lo ti thuai a.

Old one chuan, "Mêl hnih khat chauh. Tomas-a khan helai, tui awmna hi a hre ve maithei a ni," a ti a. Sakawrte chu tui an in tir a, reilote an chawlh zawk hnu chuan an kal tan leh ta a. Khua pawh a thim tan tawh a.

Tlâng bulthut hmun biru laiah hian riahbuk an khuar ta a. Sean-a chuan lungtum te chu a thianfai a, a nu leh Mariana-i mut nan kawmawl a phah a. "Muhil ula a tha ang, khawvar veleh kan chhuak leh dawn si a," a ti a. Montero-an phaitual hnim hmun lama sakawr a kai phei lai chu a han en a. Chutah lung chunga thu in van lama arsi pe that chu a han en a. Montero pawh a rawn lêt leh thuai a.

Montero chuan, "Râl vengin ka ding hmasa anga, muthilh tum rawh," a ti a. Sean-a chuan, "Zanlaiah min kaitho dawn nia," a ti a, hmeichhe pahnih mutna piah deuhah chuan kawmawl phahin mut hmun a rem ve ta a. Muthilh a han tum a, mahse a muhil thei der lo mai a. Arsi te chu an êngin an lang hnai kuar hian a hriat a. Zân boruak chu a thiangin a dai raih a.

Nakin deuhah chuan a muhil ve ta hram a. A han harh chuan a bulah chuan Montero-a a lo awm a. A thu chhuak thuai a, "Enge ni ta?" tiin a han zawt a.

Montero chuan, "I ral ven hun a ni ve ta. Ka mut a chhuak ve tawh khawp mai," a lo ti a.

Sean-a chu a tho a, a kawmawl chu a thing fai a, a thlep a, sakawr zinah a phuar bet a, a rifle a la nghal a.

Montero chuan, "A reh khawp mai. An rawn hnaih chu ka ring lem lo. Mahse fimkhur ang che," a ti a.

"Indian ho te hi?" Sean-an a han tih chuan Montero chuan a dãr a chhin ak a. "Kan zingah Old one a awm ve chhung chuan California Indian ho chuan min rawn hnaih lovang. Kan zingah a awm ve tih an hre bawk a. Colorado lam Indian ho Mahave leh Piuo te ho chungchang erawh chu ka sawi thei lo," a ti a.

Darkar chu a liam zel a, Sean-a chuan an riahhmun chu vawi engemaw zat a hel kual tawh a. Sakawrte a endik hnu chuan an riahhmun sira lung pakhat chungah chuan a thu a. A nu a lokal a, "Sean, mut i duh chuan ka harh reng asin," a rawn ti a.

Sean-a chuan, "Ka mu teuh tawh alawm," a lo ti a.

"Sean, kan ranch hi kan humhim ngei tur a ni. Engemaw kawng tal chuan kan humhim tur a ni,"

"Tehreng mai,"

"Mariana-i hi nula duhawm tak a ni,"

"Ni e,"

"I hmangaih em?"

Sean-a chu a chek tlak a. "Inhmangaih leh nulat tlangval inlêmna lampang ngaihtuah nan hun a awm loh hi. A duhawmin a hmeltha a, mahse kan ranch hi kan humhim a, kan buaina a fel hma chuan........" a la tih lai mek chuan a nu chuan, "Hun a la awm alawm, Sean. Kan zingah a awm ve rengin ka ring a, ka beisei bawk," a lo ti thuai a.

Sean-a chu a ngawi reng a, thawm a ngaithla vang vang a. A hma zawng ai khan zan chu a reh zual ta riau hian a hriat a. A nu chu a han en a, a nu chu a thu ngil at a. Phaizawl, tui awmna lam kha a hawi a, "Tu emaw lo kal an awm e," a ti ta thut a.

Juan-a a rawn lang vat a, "Ti rawh u, tunah i kal nghal ang u," a rawn ti a.

Sakawra an lawn fel hnu chuan Juan-a chuan hma a hruai a, ngil taka kal loin a péng kawi a, hnimbuk, 'Chepparal' an tih mai, pik zet mai, sang pui lui lam chu a pan pui ta a.

Kawngruk a lo awm a, hnim chu a pik nasa mai a. An khûp, sakawr zin leh an koki te chu a tai nawk nawk mai a, Juan-a chuan hun a khawhral lo hle. Vaguero rawltharin sazuk a um ang maia tuan rang hian a che vel a.

A indawtin an zui a, an kalna chu a pik em avang leh khua a la thim avangin an sakawr beng aia hla chu an hmu pha lo a. An hnim tawn rik leh an sakawr pen ri tih mai loh chu thawm dang hriattur a awm hek lo. Hmun fai lai deuh an thlen chuan Old one chuan sakawr a pawt ding a, Montero-a chu hnung a dawl tir a, an kal tan leh ta a. Thla pawh a lo chhuak ve tawh a.

Hnim pik atanga chhuakin kawrruam thim mup maiah hian an lut ta a. An chhak lamah chuan tlang dung chu a lang thim hmuk mai a. An hmalamah thung chuan kawrruam chu engmah hmuh theih lohin a thim chhah mup thung a.

Darkar khat zet an kal hnuin phaizawl zau tak, thlain a chhun ên ruih hi an va pawh ta hlawl a. Chulai hmun chu phaitual hnim leh vaivut inchawhpawlh anih avangin sakawr pen ri pawhin thawm a nei nep ta deuh a. Darkar hnih vel an kal hnu chuan kawrruam chêp zetah an inzui lut leh ta a.

Reivakloah chuan kawrruam atang chuan an chhuak leh a, ram pharh tha tak, cottonwood thing dinna hmun an chuang chhuak ta hlawl a. Lung leh chirha sak in chhe tawh leh corral chhe tawh hi a lo awm a.

Juan-a chuan, "Darkar khat vel chu i chawl ang u," a ti ta a.

"Phaizawl lam kha enthla turin ka va let leh ange," tih pahin Montero chuan an rawn kalna lama let leh chu a rual nghal a.

Sakawr atang chuan an chhuk sap sap a, Mariana-i chuan putar chu, "A la hla em?" tiin a han zawt a. Putar chu a kiai sak a, "Engkim a kal tluan chuan ni thum ni li vel kal a la ni ang. In lo kal ve zel dawn em ni?" a han ti a.

Eileen-i zawk chuan, "Kal ve zel dawn e. Tâwpsan mai tur che u in min duh deuh em ni?" a lo ti a.

"Coffee kan lum thei angem, Old one? Nge meichhem a hlauhawm i ti deuh?"

Putar chuan, "A tih chi khawp ang. Khawvar hma chuan kan kawngtum zawh kha an hriatchhuah ka ring lo. Hnim pik kar kawng kha a zim em mai," a ti charh charh a.

Sean-a chuan, "Old one, Tomas-a kaihhruai zingah outlaw Vasquez-a hote zinga tel thin pakhat a tel a, kawng chin a hre vekin ka ring," a han ti a.

Putar chu a rawn dak chhuak a, "Kawngtum, thenkhat zawh theih si, thenkhat tana zawh theih hauh loh a awm a ni. An ngam phawt chuan min rawn zui rawh se," a lo ti hmiah a.

Sean-a chuan mei a nun a, coffee a lum ta a. A lum so chuan Eileen-i chuan no ah a thli chhuak a. A reh ta ngawih ngawih a.

Old one chuan a thiltih chu a hrechiang hle. Mahse Sean-a awm erawh chu a nuam lo hle thung. Chulai ram paltlangtu, an zinga tam zawk outlaw ni nghe nghe te chuan Tomas Alexander-a saloon an tlawh ngei ngei thin a. Outlaw hote chu Vasquez-a leh Joquin-a pawlte zing ami anni deuh ber. Tomas-a khan helai ram chanchin hi a hria a, a hote zingah amah ang an awm bawk.

Helai tlangram reh tak maiah hian anmahni umzuitute nena an intawnchilh vaih chuan a buaithlak hle ang le. Juan-an silai a kawl lo a, Montero-an Hawken rifle hlui tawh tak a keng a, a nu chuan amah Sean-a ken ang bawk colt revolving rifle a kawl a, Mariana-i chuan ralthuam ken a nei lo bawk. Inkahna a thlen vaih chuan Montero-a, a nu leh amah chu che tur chu an ni mai.
Michado-a ve thung chuan Russel-a te, Tomas-a leh midang ho a kawl ang.

Inkahna pumpelh tur chuan fing taka thil ruahman a ngai a, chu chu Juan-a tum ber pawh niin a lang.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 15th, 2018, 7:46 pm

THE CALIFORNIOS
CHAPTER - 5

Eileen-i chuan meilum bula dingin a fapa chu a en vang vang a. A dâr pharh hlai hlep hlawp te chu a han enin mak tak maiin a lang mikhual ta riau hian a hria a. Michael-a kha a hnena khawsa hnem zawk a ni a, a tha nei zawk leh rorum zawk chu Sean-a hi niin, mahni inrintawkna pawh a nei zawk a. A tleirawl têt atangin a pa Jaime-a pawh kha tuipuiah a zui fo thin a ni.

Eileen-i chuan van lam a han thlir a, khawchhak lam kâwla vân rawng chu a lang dal tan tawh a. Arsi hmuh tur a la awm zauh zauh a. Kawrruam thûk tak tak te erawh chu an la thim chhah mup hlawm a. Putar thutna lamah khan a phei a, ani chuan rawn din chhuah a tum a. Eileen-i chuan, "Thu rawh khai, kei pawh ka rawn thu ve dawn e," a han ti a.

Juan-a chu a ngawichawi ta riau a, a hmel pawh a danglam ta riau hian a hriat a. Eileen-i chuan, "Juan, enge ni ta?" tiin a han zawt ta chawt a.

Juan-a chuan zawi raih hian, "Thisen a luang dawn a ni.....thisen leh thihna....lo kal ve lo tawp tur i ni," a lo ti a.

"Thisen hi ka hlau hleinem," Eileen-i chuan a han ti phawt a. "Kan buaina hi Sean-a tawh chauh a nilo a, ka tawh pawh a ni ve tho asin. Thisen inchhuahna a thleng anih chuan a chhuahtu emaw a hlohtu emaw ka ni ngei ang," a ti ta hmiah a.

Putar chuan a lu a thing nar nar a, "Mihring hi thawkrim tura piang kan ni a, rim taka thawkin hun kan hmang chho zel reng a ni," a han ti a.

"Kan kalna tur chungchang hi? Hlimna a awm angem? Inhumhimna hmun te?" Eileen-i chuan a han tih chuan putar Juan-a chuan, "He leiah hian hlimna a awm hleinem, hun engemaw chen tih loh kha chu inhumhimna pawh a awm ta lo. Hun engemaw chen kaltaah khan ka chipuite chuan himna an nei a; mahse zankhat thil thuah chu chu a bo ta hmiah a ni. Chumi hnu, ni leh chawlhkar engemaw zat a han ral meuh phei chuan lunh intiang khawm pawh sawi darh loh a awm lo. Kan khawvel siamchawpah kan cheng a, mi naran aiin finna kan zir sang a, him tawkin kan inhria a, mahse kan lo him tawk hauh lo mai.

"Finna engemaw tak kan nei a, nangni ho hriat ve loh thil hriat kan nei a. Mahse chu pawh chu a chhawr tlak loh a ni. Lei a insawi a, a khi chat a, vaivut a khu luih luih a, kangmei a chhuak zui a. Mipui chu pan lam tur hre siloin an tlân darh chum chum a. Tuipui lama inhumna zawngte chu tuifawnin a vawrh hlum a. Thlaler lama tlanchhiate chu tuihal dang charin an thi a, mi tam tak chu kan in chimte chuan a delh hlum a.

"Kan zinga tlemte in tlangram kan pan a, a then kan dam khawchhuak a. Kan zinga tamtak chuan min boral san a. Kei hi an zingah chuan puithiam ka ni a, ramhnuaia vah vel nuamti mi ka ni a. Hnimhnah damdawite zawng khawmin ka dam khawchhuak ta a ni," a ti a.

Phâwk hrâ a Juan-a en chung chuan Eileen-i chuan, "He thil hi ka lo la hre ngai reng reng hleinem. Jaime-a kha i hrilh tawh em?" tiin a han zawt a.

Juan-a chuan, "Tlemte chauh ka hrilh. Thlalerah bang a hmu a, bang bulah chuan hlum bel keh them a awm a, bel kehthem chu pan tak, mawi deuh mai a ni. Chinese ho bel keh them chulai hmuna a han awm ta mai chu mak a tih thu a sawi chhuak a. Kei chuan, chinese ho siam nilo in keimahni ho kutchhuak ani tih ka han hrilh chuan mak a ti teh asin," a ti a.

"Anih leh Sean-a hi? He thil hi a hre ve tawh em?"

Putar chu engemaw chen a han ngawi vang vang a, chutah, "Ani hi chuan ama thil hmuh leh hriat atangin thil tam tak hriat a mei a ni. Thil thleng tawh leh thil awm dan tam tak hriat a nei a, engemaw tak amahah hian a awm a ni," a lo ti a.

"A naupan lai khan thil engemaw zirtir i mei lo maw?"

"Zirtir maw? Nei maithei,"

"Thisen chhuaj chunhchang kha i sawi a, thisen inchhuahna atang chuan ka fapa hi nungdamin a chhuak angem?"

"Chu zawng ka hrelo le, Senora. Ka la naupan deuh lai chuan thil tam tak ka hria a. Mahse tunah chuan êng a alh hniam tawh a, ka thil hriat leh hmuh te hi puanzar phena hmih ang maiin a chianglo ruai tawh a ni,"

"Anih leh in khawpui, i rawn chawr chhuahna chu enge a chanchin ni ta? Midang hote chu tu te nge an nih?"

"Midang an ni.....tunah chuan chulam chuan engmah awmzia a nei tawh lo. Kei hi a damrei ber leh a hnuhnung ber ka ni. Ka rindan in. Tin, ka upa tawh, upa tawh tak mai ka ni,"
"Khawi atanga rawn kal nge i nih a?"

"Hmanlaiin khawi hmun atangin aw a ni. Chu chu tumah ka la hrilh lo,"

"Sean-a pawh maw?"

"La hrilh rih lo. Mahse ka la hrilh thuai maithei. Mahse hrilh pawh ni ila, tlemte chauuh a ni ang. Tun hma hun chu an liam zo tawh a, ka chipui, mi chak leh huaisen, induhtawk tak te chu meiin hnim ro a kâng ral ang mai hian an boral zo tawh,"

Eileen-i chuan, "I thil hriat hi tite emaw chu i hrilh tur a ni. History-a ziak niin, miin am zir thei dawn asin," a ti ta zel a.

Putar chu a nui sak a. "Mihringte hian history atangin thil kan zir hleinem. Thangthar inthlah chhawng lo chhuak thar apiangin an hmaa mite aia fing leh changkang zawkah in inngai a, chu chu mi hmasa te tihsual lian ber pawh a ni," a ti charh charh a.

Van lamah chuan arsi hmih tur pawh a awm tawh lo a. Putar chu a tho a, "Kal a tul ta, engtin nge an hmuh chhuah phei chu ka hre lo, majse kan kalna kha an hmuchhuak ta tlat mai. Tin, min hnaih viau bawk....min hnaih tak an ni," a ti ta a.

Eileen-i chu Sean-a awmna lamah chuan a phei a, "Min rawn pan mek a, thisen pawh a luang ang tih Juan-an a sawi," tiin a va hrilh a.

Sean-a chuan, "Ka lo rin ang chiah a ni," a ti mai a.

Khua a var tan tawh a, tlangpangah chuan an kal tan leh ta a. Sean-a chuam hnunglam chu a ham hawi a, engmah hmuh a la nei rih lo a. Mahse a inthlahdul chuang lo. Che thut thei turin a inring reng a, a tan chuan silai kâp tura sakawr chung atanga zuanthlak kher a tullo. Sakawr tlân chak lai atang pawhin a tum tak chu a kap fuj chat thei tho a ni.

Tum khat chu Sean-a chuan an hnunglam hla takah chuan vaivut khu hmubthamin a inhria a. Juan-a chu a han hrilh ve a. Ani chuan, "Anni ho chu an ni lo, mahse engvanga vaivut saw khu nge anih erawh chu ka hrelo. Anni ho chu vaivut khukna ai sawn am rawn hnai zawk. Min hmu lo mai pawh a ni," a ti a.

Mêl khat vel an kal hnu chuan ram hmelhmang chu a inthlak ta a. Kawrruam khawkrawk deuh maiah hian an lut ta a. Lung hriam to lerh lurh hi a tam mai a. Montero-a chuan, "Helai, leikhi chatin kawrruam a siam hi thui tak a ni. Mexico atanga hmar lam, Montery thlengbrawk a ni. Tumkhat chu ka zawh tawh alawm," a ti a.

Sean-a chuan, "Lirnghing vanga awm anih dawn chu. Hmun dangah pawh hetiang hmun hi a awm fo a ni," a ti a.

Khua a thim tan tih ah chuan Juan-a chuan a sakawr a tiding a, sakawr atang chuan muangchangin a chhuk a. "In sakawr zin kha hlip suh u. Coffee ka'n siam ange. Kan ei puar veleh kan kal lehnghal ang," a ti a.

"Zaninah hian maw?" Mariana-i chuan a lo ti hâ a.

"Ni e," Juan-a chuan a ti mai a.

Chaw an ei a, coffe an in zawh hnu chuan Juan-a chu muangchangin harsa tih hmel fe hian a han ding chhuak taih taih a. Sean-an a han hmuh chuan a ngaih a tha lo hle a. "Old one, la chawl rih deuh ila a tha lo maw? I chau anih kha," a han ti a.

Juan-a chuan, "Chauh deuh chang chu ka nei fo alawm. I ngaih ti tha lo duh suh," a lo ti a.

"Mahse reilote chawlh te chu....."

"Hun a awm lo. An rawn kal chak riau ania,:

Sean-an mei a timit tur chu putar chuan a lo dang a. "Tihlum suh. Thing tuah belh zawk rawh. Hetah hian kan la awm reng niin ngai rawh se. Chuti chuan sakawr atanga chhukinan rawn veh hnai anga, engmah an hmu dawn si lo a ni," a lo ti a.

"Chuti chuan?" Sean-a chuan a lo ti a.

Juan-a chuan, "Chumi chhung chuan engemaw chen kan lo kal hman dawn a ni," a ti a. Chau tak chungin sakawrah an lawn a, Juan-a chuan hma ahruai a, thim tjam hnuaiah chuan an inzui chhuak leh ta a.

An han din leh chuan khua a var tawh a. Chulai hmun chu kawrruam,lungbang awih deuh maiin a hual vel hi a ni a. Lungbang tawp, awihtlan chinah chuan Juniper leh Far thing an ding zen thulh a.

Juan-a chuan, "Hetah hian i chawl ang u, "a ti a, sakawr atangin a chhuk a, lungpui ngheng in a thu a, "Kal zel thei kan ni rih lo. An rawn hnai lutuk, "a rawn ti chhuak ta a.

"An rawn hnai i ti elo? Engtinnge i hriat ? Engmah hmuh kan nei silova."

"Ka hria alawm. "

"Juan-a chuan," Rangkachak chu kan la ngei tur a ni. Kan ranch kan chan tur a ni lo. "

Juan-a chuan, "Chu chu a pawimawh viau em ni? Ram a ni ve mai a, a dang a awm tho alawm. In hloh ta a nih leh hmun dang ah kalin ramdang in nei leh mai ang chu. Ramdang tha zawk ka kawhhmuh thei reng che u alawm, " a han ti a.

Sean-a chuan, " Ka awmna a ni a. Tlang leh tuipuite a awm a. Kan lawng, Schooner a awm a. Ka pa thlan awmna a ni bawk, " a lo ti thuai a.

Juan-a chuan, "E, a ni tak e ! Chu chu ka lo theihnghilh a ni, " a han ti a, a han ngawi vang vang a, chutah, " Min rawn hnaih tawh tak zet a ni. Min rawn nangching anga, engkim an la vek ang," a han ti leh a.

Eileen-i chuan, "Engmah min laksak lovang, Juan. Buaina chauhlo chu kan lakah engmah an hmu lovang. Kan ranch hi hloh ka tum lo. Ka hloh lovang. Chu chu i hria maw?" a ti ta nghat nghat a.

"Min rawn zuitute hi eng ang mi nge an nih? Misual tak em ni an nih?"

"A sual ber ber te an ni. An zinga thenkhatte chu Wooston-a, King Pin Russel-a, Tomas Alexander leh Jorge Fernandez-a te an ni,"

"Fernandez-a, pa chêr deuh, rorum tak kha maw?" Juan-a chuan a lo ti a.

Eileen-i chuan, "Aw ni e, tin, an zingah chuan Andres Michado-a pawh a tel ve bawk," a ti a.

Juan-a chuan hmawlhtea a vaivut thai nauh nauh chungin, "He Fernandez-a hi ka hria. Indian nula a that tawh nghe nghe. Chu nula chu fel tak mai a ni a, Frijoles (Indian ho ei thin) te pawh min rawn pe thin," a ti charh charh a. A han ngawi vang vang a, chutah a lu a thing nar nar a. "Ka thei lo ang, ka thiante inni a, chu chu ka hria e. Mahse he thil hi in rin ang a ni lo ang. Rosum tam tham a ni lo. Rangkachak uihum lek chauh a ni. Lâk a harsa hle lehnghal. In tân chuan a tawk maithei, mahse risk ka la thei lo a ni," a han ti a.

Sean-a chuan, "Old one, anni ho hi hruai la, keiin min zuitute hi chu ka lo dang ang e," a rawn ti chhuak ta hlawl a.

"An that ngei ang che," Juan-an a han tih chuan Sean-a chuan, "An thi ve vek tho ang. Senora leh Mariana-i hi hruai la, kal rawh u. Kei chu hetah hian ka lo awm ang," a lo ti a.

Montero-a chuan, "I awm chuan keipawh i bulah ka awm ve ang," a lo ti thuai a. Old one chuan chumi te pahnih chu a han thlek tawn a, muangchangin a lu a han thing a, "Mi huaisen leh mi tha tak in ni," a ti a, a han chawl dat a. Chutah, "Reilote chawl leh rih ila, sakawrte hi tui in tir ila, kan kal leh dawn nia," a ti ta a. Anni ho chu kalsanin lungpui phenah chuan a va muhil ta a.

Eileen-i chuan a fapa chu a han en a, "Sean, he thil hi kan ti tur niin ka hrelo. Min hruai a tumna hi hmun danglam tak anih ka ring. Hmun serh pawh a ni maithei," a han ti a.

Sean-a chuan, "I tidik maithei, ani pawh hi ka ngaihtuah khawp mai. Mahse ka sawi tawh kha ka ti tlang tur a ni. Ani hi zui ula, kei chu ka lo hnufual ange," a lo ti a.

"Kan zavaiin kan kal tur a ni,"

"Senora, ka........."

Eileen-i chuan, "Ni love, ka sawi tawh kha. Khatiang chiah kha a ni tur a ni. Ranch chu ka ngaina a, mahse ka fapa thisen chu a phû hauh lo. Kan zavaia kan kal loh chuan tumah kan kal tur a ni lo," a ti ta tlat a.

Sean-a chuan a nu chu hnial a sawt lo tih hriain, "Anih leh rangkachak chungchang kha? Thlitfim tawh em ni anih?" tiin a zawt ta zawk a.

A nu chuan, "Ka la hmu bik lo," tiin a chhang a.

Montero-a chuan an sakawrte chu a kaisawn a. Sean-a chu lungpui nghengin a thu a. A chau takzet a ni. Tuipuia thui tak a zin hnu in chawlh hahdamna pawh nei hmanloin tun hi an thleng ta si a. A maimitchhing a, a kut chu a hûm ruh a, a ti pharh leh thin a. Engti kawng emaw talin an zavaia nunna chu a chhanhim tur a ni. Juan, a nu leh Mariana chu.

Montero-a hi pa tha tak a ni a, tih tûr tûl, a chan a lum chu a ti hlawhtling ngei ang. Patling anih angin a hmaa chhuak chu a lo bitum tûr a ni.

A dâra rawn khawihtu an awm avangin Sean-a chu a han meng chhuak a. Ni pawh a lo tlangsang tawh hle a. A dâra rawn khawihtu chu Juan-a a lo ni a, "I mu tui hle mai, ka fapa. Kal a hun tawh e," a rawn ti a.

Sean-a chuan, "Kan kalna tur hi a kawng min hrilh thei mai lawm ni? Nang chu khawaiah emaw lo biru in lo chawl hahdam mai la," a han ti a. Juan-a chuan, "Kan kalna kawng hi hriat rengna a ka chhinchhiah a ni a, ka tel ve zel a tul tlat a ni," a ti mai a.

Eileen-i chuan, "Ka pasal khan a zahin a ngaisang takzet che asin," a lo ti a.

Juan-a chuan, "Pa tha tak a ni, Senora. Chîn dân hluite a zah der thiam a, hmasâng pathian ten an biak pawhin ngun leh uluk takin a ngaithla a ni," a ti charh charh a.

Eileen-i chuan, "Hmasang pathiante a?" a lo ti ha a.

Juan-a chuan, "Helai hmun ang hmun reh tak takah an awm vek a ni. Hmun fianriala ngawi renga i awm chuan an rawn pan hnai ang che. An thuchhuak i zah thiam chuan an hmangaih ang che. Min zuitute ho hian an thiltih lai awmzia hi an hre miah lo," a ti a, chutah chik zetin Eileen-i chu a han en a. "Old one mi hriat i ni a, an ta i ni tih an hria a, hmeichhe ngawichawi tak......" a tih lai chuan Eileen-i chu a nuichhuak hak a, "Juan, min hrechiang lo anih chu. Nu rorum, kawlhsen leh phût sâng zet mai ka ni tih hria la chuam chutiang chuan i rawn sawi chhuak hauh lo ang," a han ti a.

Juan-a chuan, "Hmun fianriala ngawihchawih nachang i hre tlat alawm. Chu chu thil pawimawh ber a ni. Ngawi renga thil zir leh thil hriat tum hi a tul a ni," a ti a, a sakawr awmna lamah a phei a, "A hun ta, i kal ang u le," a ti ta a.

********************

Meichhemna hmun an va thlen lai chuan Andres Michado-an hma a hruai a. A hnunga kal Russel-a chuan, "Meikhu kan hmuh kha hei hi a lo nih hi. Enga tana mei han chhem nge maw an nih le?" a ti bul bul a.

Michado-a chuan, "Coffee an lum mawle," tih pahin a sakawr atangin a chhuk a, pa zuanzang tak a ni bawk a, a che vel chu a zei thlarh mai a. "Coffee i lum ve ang u," a ti a, a inher a, "Silva, inthun puar a hun e," a han ti a.

"Signal a ni," tiin Silva chu a phun sap a, an zavai chuan Silva chu an en thap a.

"Signal maw? Tu an signal na maw?" an ti rual thawt a.

Wooston-a chuan, "Kha Indian putar kha enge a chanchin? Vawikhat chu ka hmu tawh a, Mulkerin chhungkua nen hian inkungkaihna engemaw tak an nei a ni," a han ti a.

Tomas-a chuan, "Tunge anih ka hrelo tawp mai," a lo ti a.

Fernandez-a chuan, "Vawikhat chu ka hmu tawh. Pa mak danglam tak, tar tawh deuh mai a ni," ban fe hian a lo ti a.

"Pa mak danglam tak a? Engti kawngin maw?" an zinga pakhat chuan a han ti a.

Fernandez-a chuan, "A danglam tih bãk chu ka sawi thiam bik lo. Amahin a tla hrang a, khuaah a rawn kal ngai hauh lo a, Indian ho pawhin a bula awm nuam an ti lo; an hlau ni berin a lang," a ti a.

Russel-a chuan, "Enge han hlauhna chhan tur awm? Vawikhat chu ka hmu ve tawh a, putar a ni ve mai a, kum zâ vêl laia upa tur. Meizial pak khûk han chhêm len nat deuhin a lên bo thei mai ang tih tur hi mawle," a lo ti a.

Tomas-a chuan a mitmu dum tak chuan Russel-a chu a han en a. Hepa hi a ngaina tehchiam lo a ni. Silva chuan vawksa rêp chan pahin, "Thlarau pawh a ko chhuak thei a, suangtuahna ang chiahin thil a thlentir thei niin an sawi," a han ti a.

Russel-a chu a nui huk a, "Âtthlâk lutuk, puithuna âtthlâk anih chu," a han ti a. An han thukhawm chu a then an muhil a, a then an tawng mawlh mawlh a. Wooston, Russel, Alexander, Fernandez leh Andres Michado te bâkah California mi sawm chuang lai an ni. An zinga pakhat chu Silva kha a ni.

Silva chu pa tawi, sa nghet tlet tlut, Indian leh Spanish thlahpawlh a ni a. Eirawngbawl thiam tak, vaquero tha tak leh hnu chhui thiam deuh mai hi a ni a. Pedro Fages-a leh Father Garees-a te tluk zet a ni.

Russel-a chuan, "Kan nanchin hun chuan engtia tih nge i rilruk?" Michado-a hnenah chuan a han ti a. Michado-a chuan, "In thil tum chu in thil tum nise, kei chuan ka tum ber chu nula kha chhuhsak a, vuak hrep a ni," a lo ti a.

"Anih leh Sean Mulkerin-a kha? I nula a rukbo sak che a ni lawm ni?"

Michado-a chuan, "A ru bo tih finfiahna ka nei lo. Kan nula-i kha a tlanchhia a, tuia zuangthlain a lawngah a hleuh kai ta a ni," a han ti a. Chutah, "Engpawh nise, Sean Mulkerin-a chu ka hmachhawn anga, ka that ngei ngei bawk ang," a ti ta a. Russel-a chuan, "Thah hmiah mai a tha ber," tiin a lo tuihnih a.

Michado-a chuan hnâr a han tum dat a, "Englai mahin ka ngaina ngailo reng reng. Ka hmachhawn anga, ka that ang. Chu chu ka thil tih châk ber pakhat a ni," a ti tûn tûn a.

Tomas-a chuan Michado chu a han en a, "Senor, fimkhur hle ang che. Pa chak tak mai leh indo mi dik tak a ni a. Nang chu ni ila ka hnaihchilh hmain ka kâp nghal pawp ang. A tlûk tawh hnuah pawh a thih chianna turin vawi nga zet ka kâp zui leh ang," a lo ti a.

Michado-a chuan thlênga vawksa kan chu a han ban a. Tomas bawk chuan, "Zan khat chu kan cantina-ah.......nikum mai kha a la ni, lawng danga thawk mi panga in rawk an tum rawk mai a. Vaukamah Sean Mulkerin-a chu a bungraw hralhna pawisa nen a rawn chuangkai a. Anni ho chuan an lo beihrawn ta a," a han ti leh a.

Wooston-a chuan, "Kha thil kha an sawi ka hre tak asin. An zinga pahnih chu a that a ni lawm ni?" a ti a. Tomas-a chuan, "Kan cantina-a inthah ka remti lo a, kawngah mi ruang pakhat chu an chhar ta anih kha. Midang pahnihte chu ramtuleilovin an awm bawk," a ti a.

"Anih leh midang pakhat chu enge a chanchin?"

Tomas-a chuan, "A tlânchhiat avangin a him ta hram a ni. A huaisenin a fing zawk phian a ni. Captain Mulkerin ve thung chu a pilh nin nian chauh a ni," a ti a.

Michado-a chuan, "Chemte an hmang lo anih chu," a lo ti a. Tomas-a chuan, "An zinga pahnih chuan an tum alawm, pakhat zawk chu ama chemte a nakruh kara a luh avangin a thi a. Pakhat chu a ban ruh leh a khingkhang ruh a tliak thung," a ti charh charh a.

Boruak chu a hnim deuh ruih a, tlang chhip te chu chhûmin a bawh deuh chuai a. Phairuam te chu a reh ruih mai a, boruak a reh dan em em chuan ngaih a ti thalo thei rum rum hial a.

An han kal leh tan chu Fernandez-an hma a hruai ve thung a. Mahse tawite chauh a kal hman tih in a sakawr chu a pawt ding ta chawt mai a. Michado-a chuan, "Engtizia nge?" a lo ti thuai a. Fernandez-a chuan lei lam chu a han kawk a, kawngah chuan hmawlh hi a kawkalhin a lo in dah a.

Wooston-a chuan, "Enge a awmzia?" a han ti a. Midangte pawh chuan an thil hmuh chu an rawn bâwr hnai a. Fernandez-a chuan, "Ka duh zawng a ni lo tawp mai. Engemaw sign a ni chiang mai," a han ti a.

Moichado-a chuan, "Ho lutuk! Hun kan khawhral mai mai a ni," a lo ti a. A sakawr chu a khêng kal a, midang ho pawh chuan an zui ve ta a. An chhak lam, hmun sâng tak, lungpui insir khup mai kâr atang chuan sihal û ang deuha au thawm hi a rawn ri chhuak ruah ruah a. Michado-a te hmulthi chu a ding ur ur mai a. An sakawr an pawt ding a, puakruk an lek chhuak a. Au thawm chu a ri chuai rawih rawih a, a rawn sâng leh thin a. An chhaklam lungpui hmun chu ngun zetin an thlir kual a, mahse engmah hmuh an nei lo.

Russel-a chuan, "Sihal te an ni ta ve ang," a han ti ngawt a. Tomas-a chuan, " Sihal te an ni awzawng lo,mitthi thlarau vakvai awrawl chiah a ni," a lo ti a.

Wooston-a chu a nui huk a, "Kei chuan thlarau leh thlahrang hi ka hlau ve awzawng lo mai. I kal ang u," a han ti a.

Michado-a te zinga pakhat chuan hma a hruai ve ta thung a. Vawilehkhatah a sakawr chu a ke hnunglamin a ding ta ur ur mai a. Ani chuan puakruk a phawi a, a han hmet puak thuai a. Midang ho chuan an hnaih phei thuai a, mahse engmah hmuh an nei lo a.

Wooston-a chuan, "Engtizia nge? I â ta em ni?" vin zet hian a han ti a.

"Kawngah hian rattler lian deuh mai ka hmu a ni,"

"Chuti maw? Anih leh tunah khawnge a awm tak?"

Rûl a awm hauh lo; vaivutah chuan a tlengna hnuhma a lang hek lo. Mahse chupa chuan, "Rûl chu a awm ngei a ni. Ka hmu a, ka sakawr pawhin a hmu alawm," a ti ve tlat a.

Rilru nuamlo deuh maiin Tomas-a chuan Silva chu a han en a, ani chuan a dâr a lo chhin ak ringawt a. Russel-a chuan, "Anih tak chu, rûl i la hmu ngailo em ni? I kal ang u," a lo ti nghut a. Inti paukhauh takin Michado chuan a sakawr chu a khêng kal a, hma a hruai leh ta a.

An kawng zawh chuan kawrruam hi a pawh a, vaivut a chhahin a ro hle a, a khawkrawk hle bawk a. Thlaler hnim hling nei chi hmuh tur a awm zauh zauh bawk a. Vawilehkhatah Michado-a chuan a sakawr chu a pawt ding chawt a, Silva lam chu a hawi a. "Kawng a tawp tlat mai. Ham zawng hmu teh," tiin thu a han pe a.

Silva chuan Michado chu a rawn kal pel a, an hnunglam leh hma lam chu ngun zetin a han thlir tawn a. "Khua a thim thuai tawh ang," Russel-a chuan a han ti sup a.

An kawng zawh chu a bumboh lehzual ta. Fâr thing a ding thluah thluah a, luikamah chuan sycamore thing hrawl pui pui, upa tawh tak tak an ding thluah bawk a.

Wooston-a chuan, "Kan hma lawkah sawn hmun fai lai awmin a lang. Riahhmun khuar ila a tha ang," a han ti a. Silva chuan kawng tum chu a hmu fuh ta a, mahse reiloteah a hloh leh thuai a. Silva chu rilru nuam lo tih hriat zet hian a hawikual ruai a.

Michado-a chuan, "Hei, khawilai nge ni ta?" a han ti a. Silva chuan a dâr a chhin ak a, "Lui tê hi Sespe niin ka hria. Helai hmun hi an sawi la hre tawh a ni. Hmun thalo tak a ni," tiin a chhang a.

"Ka tân chuan a that hmel khawp mai," tih leh sakawr atanga chhuk Wooston-a chuan a rual a. Silva chuan, "Hetah hian thihna a thleng tawh a ni. Helai hmun chanchin an sawi hi ka hre tawh tlat," a ti nuah nuah a.

Wooston-a chuan, "Chulam chu theihnghilh hmiah rawh. Helai hmun tluka riahna tur hmun remchang hi a vâng viau ang," a han ti a. Silva lam chu a hawi a, "Kan la hlat em?" tiin a han zawt a.

Silva chu a han inngaihtuah a, "Darkar hnih velin kan inthlauin ka ring," a ti a. Wooston-a chuan Silva hmel chu chik zetin a en a, "Thil diklo a awm em ni?" tiin a han zawt a. Silva chuan, "He hmun hi ka duh lo a ni, tin, thil diklo a awm bawk," tiin a chhang a.

"Thil diklo maw? Engti kawngin maw?"

"Old one-an a kaihruai a ni,"

"Chutichuan?"

"Senor, thil diklo a awm a ni. Min bikbosan a tum ta hauh lo mai,"

Wooston-a chuan chal chuar nung chung hian, "Chu chu enge a awmzia?" tiin Silva chu a zawt a. A sakawr

zin phelh lai chu chawlin King Pin Russel-a pawh chuan an thusawi chu a lo ngaithla a.

Silva chuan, "Min bikbo san a tum loh chhan chu anmahni nangching ila a duh vang a ni. Kan awhnan thang a kam tihna a ni mai dawn lawm ni?" a ti ta a.

Wooston-a chuan, "Thang maw? Teh hrep chuan! Thangah chuan keini nilovin anmahni zawk a awk ang," a ti lung lung a.

Russel-a chuan Silva lam chu a hawi a, "Thang chu..khawi laiah nge kan awh nan thang an lo kam i rin?" tiin a han zawt a.

Silva chu tawng chhuak lawk loin a han ngawi vang vang a. Midang ho chu muangchangin a han enkual a. "Helai hmunah hian. Helai hi kan awhna tura thang a kamna hmun chu niin ka ring," a ti ta a. (Ka edit hman lo, ngaihruatna nen lo chhiar mai teh u'n☺☺)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 20th, 2018, 6:21 pm

THE CALIFORNIOS
CHAPTER - 6

Ni vanlaizawl hma hretin luite hi an thleng a. Old one-a chuan, "Reilote chawl ila, kan sakawrte tui i intir ang u," a ti a.

Sean-a chuan an hmalama tlangdung inkham ruah mai chu a thlir vang vang a. Thing to dan vel atanga han chhutin an awmna chu tuipui zawl atanga feet thum vela sang niin a ring a. An hmalam tlangdung chu an awmna hmun ai chuan feet sangthum vel laia sang zawkin a ring bawk a ni.

A nu awmna lamah chuan a phei a. A nu chuan thingthiin luiteah chuan hmai a lo phih mek a. Sean-a chuan, "Kan hnaih tawh hlein ka ring," a han ti a. A nu chuan rawn thawh pahin, "Keipawh chu chu ka rin dan a ni. Engvangin nge maw min din pui le?" a han ti a.

Sean-a chuan, "Chawlh hahdam a rawt anih kha," a lo ti a.

Eileen-i chu a han hawikual a, "A awm lo tawp mai, Montero-a pawh," phawk hra hian a han ti a. Sean-a chu a inher thuai a, an sakawrte chu a awm a, mahse putar pahnihte hmel chu hmuh tur a lo awm tawh hauh lo mai a.

Mariana-in a rawn pan hnai a, "Helai hi em ni?" tiin anni pahnih chu a han zawt a. Sean-a chuan, "Ni love," a han ti phawt a. Chutah, "Kan awmna lai hi chhutchhuah kan tum ange. Sawlai tlang saw Pine Mountain anih chuan.....helai hmun hi....Piedra Blanca a nih dawn hi," a han ti charh charh a.

Mariana-i chuan, "I hrechiang chiah lo em ni?" tiin a han zawt a.

Sean-a chuan, "Helai ram map hi awm hek lo le. Hmun leh lui hmingte an han phuah ve thin tak na a, a tumahin khawilam ber nge anih an chhinchhiah thei tak tak lo. A kal hmasa te, hmun hming phuahtute pawh midang rawn kal thar hoten an thlak leh thin a ni," a ti a.

Luikamah chuan an thu a, tui mang lo zet hian an titi a.

Sean-a chu a phawklekin a rilru a buai ru hle a. An rawn kalna lamah khan a va let leh thin a. Mahse kalkawng chu yard za vel bak a thui a hmuh theih siloh a. A silaite chu a endik sek mai a.

Vawilehkhatah an rawn lang hlawl a, Montero-a chu lungpui insir khup karah a rawn inzep chhuak a, "Kal a hun ta," a han ti a. Juan-a pawh a rawn lang ve thuai a. Luite luanna hlui zawhin tlangpang awih deuh maiah chuan an inzui chho ta a. An kalna lai vel chu ngaw a chhah hle a. Vawi engemaw zat lung banga hmanlai Indian ho thil ziah hlui an hmu a. Tum hnih sazuk ram tla an thâwng tlân a. Kawrruam chu a zim sawt em avangin nakin deuhah phei chuan a mal te te a inzui a ngai ta a.

Tlang chung zawl, hnim eng deuh set sut tona hmun hi an chuang chhuak ta hlawl a, thing a to ve pheuh pheuh bawk a. Hmar thlanglam panin an kal zel a, ngaw chhung lutin luite an pawh ta a. An epah chuan tlang sang deuh mai, a panga lung bang awm zui hi a ding luah a. Juan-a chuan, "Hetah hian kan tawp ang," tih leh sakawr atanga chhuk a rual a.

Chulai hmun chu a reh ruih mai a. A khawhar thlak hle a, mahse a mawi phian thung a. Cottonwood thing hnah te chu thlifimin a chhem ri seng seng a. Lungpui kara tui rawn put chhuak te chu luite ah chuan a luang lut a. Piah deuhah chuan lunga sak, in chhe tawh hnu hi hmuh tur a awm thluah a.

Juan-a chuan, "Hetah hian awmhmun kan khuar ang," a ti a. Sean-a leh Mariana-i te chu a kawk a, "Nangni pahnih hi hetah hian in awm ang," a han ti a.

"Anih leh kei hi?" Eileen Mulkerini chuan a lo ti thuai a.

Juan-a chuan, "Ka rualin i kal ang," a ti a.

Sean-a chuan, "A tha ka tih zawng a ni lo tawp mai. A huhovin kan awm reng tur a ni," a lo ti a.

"A him em em ang" Juan-a chuan a tih chuan Sean-a chuan, "Eng chen nge in thang ang?" tiin a lo zawt a.

Juan-a chuan, "Naktuk khawvar thleng emaw, chu aia rei pawh chu a ni maithei a. Tuipuiah te zinin, khawmual hmun hrang hrang i fang thin a, inkahna leh kut tuma insualnaah te i tel fo thin a. Chuvangin engtikah nge i thih dawn hriat a ni lo. Naktuk lawkah pawh a ni maithei. Chuvangin i nu hi ka hrilh dawn a ni," a ti charh charh a.

A nu chuan a rifle a la a, nui sang chungin, "Ka ngaihtuahawm lovang," a ti a. Sakawrah an lawn a, Juan-a chuan hma a hruai a, an kalsawn ta a.

Mariana-i chuan, "I duh chuan i zui thei ang, kei chu min ngaihtuah duh suh," Sean-a hnenah chuan a han ti a.

Sean-a chuan, "Old One khan engkim a hre vek a, lo awm rawh min tih chuan lo awm mai tur ka ni," a ti mai a.

Mariana-i chuan, "Coffee ka insiam ang e," a ti ta daih a.

Sean-an thing a fawm lai chuan Montero-a chuan an sakawr zinte chu a hlip a.

Vawi engemaw zat Sean-a chuan thawm a ngaithla leh a, hnuhma thlithlaiin a thil tih lai chu a chawl thin a. Mahse ramsa hnuhma reng hmuh a nei lo. Thal lu vawihnih a hmu a. A thal lu lo hmuh thin ai chuan an sei a, an zen zawk a. Nalh danglam tak an ni bawk a. A thingro han la tur chuan hlumbel keh them, artui hêng ang maia pan hi a hmu ta a. A han khawih chu a sawm ta vek mai a.

Montero-a chu, "Hei, helai hmun hi eng ang hmun nge ni ta ngai?" tiin a zawt ta chawt a.

Montero-a chuan a dar a chhin ak a, "Awm hle hlena tur hmun a nih hi," ti ngawtin a chhang a. Mahse Sean-a chu a tette atanga a lo hriat a nih avangin, "Old One ho khaw hlui a nih hi," tiin thudik a hrilh leh ta zawk a.

Sean-a chuan Montero-a chu a en vang vang a. Chutah Mariana-i awmna lamah chuan a phei ve ta a. Mariana-i chuan coffee a lo chhuang kai fel chiah a. Sean-a chuan, "Vâk sawn suh ang che. Mei chhemna leh sakawr hnaiah awm ang che," a han ti a.

"Buaina kan tawh i ring deuh em ni ?"

"Ring rih love. Mahse helai hmun hi a nelawm lo riau a ni. Danglam riauin i hre ve lo maw ?"

"A reh ngawt mai."

"Khawi lamah tak kal ang maw ?" Sean-a chuan a ti vang vang a.

Mariana-i chuan, "Rangkachak awmna lamah anih ka ring," a ti a. Sean-a chuan, "Thingbuk hnuaiah, hmun biru deuhah lo awm la a tha ang," a han tih chuan, "Anih leh nang hi?" nula chuan a lo ti thuai a.

Sean-a chuan, "Sawlai in ram vel saw va fan vel ka rilruk deuh a ni," a han ti a. "Ka kal ve ang," Mariana-i chuan a lo ti thuai a.

Montero-a chuan, "Senor, saw lamah sawn kal chi a ni lo. Hmun tha leh hmun him a ni tlat lo. Mei bulah emaw, thingkarah emaw awm a tha ber ang," a rawn ti ve ta a.

"A tha e," Sean-a chuan a lo ti ve mai bawk a. Khaw ram lam chu makti deuh hian a thlir vang vang a. Hmun him a ni lo maw? Puithuna âtthlak tak a ni maithei e. Indian ho zinga tam tak leh Californios thenkhatte chu an la puithu hle reng a ni.

Sean-a chu rilru nuamlo zet hian a vei tawn chhen a. Heta tanga hla lo takah hian Michado leh midang ho khan an zawng kual ruai ang tih hriatsa a ni. Ram pilril leh kawng tum tlemte chauh awmna ni mah se an rawn hmuchhuak lovang tih sawi har tak a ni. Mariana-i leh a nu awm lai chuan inkah tullo hram sela a ti kher mai.

Jesus Montero chu pa upa tawh tak ni mah se fimkhur thiam em em mai leh silai kah thiam tak a ni a. Hun leh boruak khirhkhan tawp khawk pawh thleng sela tlawm zawk emaw, tlanchhe zawk emaw a tan tum bau lo mi a ni. A nu pawh a dang chuang lo. Nu luhlul leh huaisen tawp khawk a ni.

Nakinah chuan, "Ei tur buatsaih fel ila, mei hi i timit teh ang u. Min rawn hmu rih lo sela a tha ang," Sean-a chuan a ti ta a.

Montero-a ngaihdan chiah pawh a lo ni a. Amah chuan eitur chu a buatsaih ta nghal nghe nghe a. Sean-a chuan an awmna lai vel chu hmelma ho lo kal thut pawh a tanhmun lo khawhna tur hmun remchang zawngin a han melh kual a. Khaw ram lam chu Montero-a lung tihawiloh a duh loh vangin tanhmun lâk nan chuan a tintuah chhin duh lova. Chu putar chu a zahin a ngaina a, a rilru tih nat a duh lo a ni.

A awm chu a nuamlo telh telh a, an chhaklamah chuan vawihnih a lawn chho a, an chhehvel ram vel chu a han thlir kual a. Anmahni rawn vehtute tan chuan birukna tur hmun leh inphenna tur hmun a tam kher mai.

Sean-a rawn kir leh hnu chuan chaw an ei ta a. Chawei pah chuan Sean-a leh Mariana-i chu an titi mawlh mawlh a. Sean-a chuan Mariana-i chu a hmeltha mai ni lovin a fing hle tih a hrechiang tawh a ni.

Mariana-i chuan, "Old one kha Indian a ni i ti tiraw?" a han ti a. Sean-a chuan, "Chu chu a dik leh dik loh tuman an hre bik lo. Juan tiin kan ko a, ka pa pawh khan chu hming chuan a ko a. Chu chu a hming diktak anih leh nih loh phei chu kan hrelo. Mexican Indian emaw Anglo emaw anih leh nih loh pawh kan hrelo. Indian niin ka hria a, mahse a hnam bil erawh ka hrelo. Hnam mang tawh zing ami a ni maithei e," a ti a.

Mariana-i chuan, "A ngaihtuahawm lo ang chu maw," a ti ta daih a. Sean-a chuan, "Senora maw? A inenkawl thei em em ang. Mahse putar khan a thihsan ka hlau riau a ni,"

Mariana-i chuan, "I nu a ni si a, engvangin nge Senora tia i koh?" a lo ti a. Sean-a chuan, "Kan zingah han awm rei deuh la i hre chhawm ve mai ang. Senora tih hi a phu tlat a ni. A awki a sân khat hle a, mahse mitinin hotu ber a ni tih an hre tho. Ka pa damlai atang tawh khan mi tinin Senora ti vekin an ko a ni," a ti a.

A silai chu a han endik leh te te a. "Mike-a kha kan zingah hian awm ve sela ka ti ngawt mai," a han ti a.

Mariana-i chuan, "Mike-a maw? I unaupa Michael-a kha em ni i sawi?" a lo ti a.

Sean-a chuan, "Ni e, silai phawi rang leh kap thiam chung chuang a niin hruihrual hmang thiam zet mai a ni a. Tin, hmul nei tawh phawt chungah chuan theih lohna a neilo ang tihtur khawpa sakawr chungchuan thiam a ni. Tunah chuan Pathian rawngbawlna lamah a inpumpek ta a, a bula awm a thlamuan thlak riau a ni," a ti a. An chhaklam lungpui karah chuan chhimbuk a hram dat dat a.

Sean-a chuan, "Mu tawh la a tha ang. Ka nute kha an rawn thlen chuan naktuk zing hma taka kan chhuah a ngai dawn si a," a han ti a.

"Ka chau hleinem,"

"Khatiang chen sakawra chuan hnu khan maw? I chawl hahdam tur a ni,"

"Liverro tlangrama ka pa in bawng a khalh khawmnaah ka kal ve thin a. Hei aia thui daih hi sakawr chungah ka chuang thin alawm,"

Sean-a chuan, "Silai kah i thiam em?" tiin a zawt ta a. Mariana-i chuan, "Thiam ve bawk e," a ti a. A han ngawi vang vang a, "Andres-a khan ka mizia leh nihna dik tak hi hria sela chuan min duh hauh lovang. Hmeichhe thuam famkima ka inthuam a hmuh khan Vaquero ang chiaha silai chelek thang leh sakawr chung chuan thiam ka ni tih a hrelo a ni. Min nei chiah chu ni sela enkawl awlsam min ti hauh lo ang le," a ti malh malh a.

Sean-a chuan, "Mu tawh rawh khai, khawvar hnuah kan rawn let leh ang an tih kha," a ti a.

Thimtham hnuaiah chuan thinghnah thliin a chhem ri leh tui luang ri kar kar tih loh chu thawm dang hriat tur a awm lo.

Mariana-i chu lungpui bulah chuan a phei a, a kawmawl a phah a, a sakawr zin lukhamin a mu ta a. Sean-a chuan a pan phei a, poncho in a va khuh a.

"I fel kher mai,"

Sean-a chuan Mariana-i chu a han en vang vang a, "Ka lawm e," a ti sap a, a kalsan ta a. Mariana-i chu a maimit chhing a, Sean-a spur in lung a khak ri rak chu a hre thei a. Sean-a chuan meiah chuan thingtang a vur belh a, a kalsawn leh ta a. Mariana-i chuan a pen thawm chu a lo ngaithla kar a. Engemaw ti takin a pen thawm chu ngaihthlak nawm a ti riau a, a thla a timuang sawt bawk a. Rei vakloah chuan a muhil ta bawrh bawrh a.

A mei chhemna atanga yard sawmna vela hlaah chuan Sean-a chu thawm ngaithlain a ding vang vang a. Chulai hmun chu hmun dang aiin a reh zawk hle a. Enge a chhan ni ang le?

Mi thenkhat chuan mihring hlimna, lungngaihna te leh hlauhna te hian an chenna thin an la luah zui reng thin niin an ring a. Helai hmun pawh hi a cheng hmasa te hlauhna, lungngaihnain a la luah lum reng em ni ang?

Chutiang thil a ngaihtuah lai chuan a piah lungpui bula mihring hlimthla niawm tak han che vel hi a hmu ta thut mai a. Mahse chu thil chu a bo leh nghal daih a. A piah atang chuan Montero-a khan, "Kei pawh ka hmu ve asin, 'Midang' zinga pakhat a ni ngei ang," a ti a.

*******************

Mêl tlemte chauh an kal tihah chuan Juan-a chuan a sakawr a pawt ding ta a. Tlangsang vak lo, hnim hring duah that deuh mai na hmuna kal an ni a. Tlang chhip an lawn chhuak tep tawh ni hian Eileen-i chuan a hria a. Juan-a chuan, "Kan sakawrte hi hetah hian an him ang," a han ti a.

"Kein kan kal dawn em ni?" Eileen-i chuan a lo ti a.

"Tawite chauh," Juan-a chuan a ti a, a chawl dat a. "Senora, rangkachak chu tlemte chauh anih ka ring. In duh khawp a tlinglo maithei a ni. Rangkachakin in tan enge awmzia a neih leh in tan enge a tangkaina ka hre ve lo a," a han ti a. Eileen-i chuan, "Khawvar hma in kan kir leh hman angem?" tiin putar chu a han zawt a.

Ani chuan, "I ngaihtuah deuh em ni?" a lo ti ve thung a. Eileen-i chuan, "Sean-a kha pa chak tak leh râl rêl thiam tak mai a ni a, mahse midang ho kha an tam em a ni," a ti niah niah a.

"Amah mai a ni dawn hleinem,"

"Mariana leh Jesus kha an awm ve a, anni kha em ni i sawi?"

"Midang ho mawle,"

"Midang ho maw?"

Juan-a chuan, "Senora, i la naupang em em a, kei erawh hi chu upa lutuk mai ka ni thung. Tunge sawlai hmun leh helai hmun ang hmun khawharah hian eng ang mi nge 'midang' awm tih tunge hre thei ang? Keini ang kum zat chhut hleihtheih loh khawpa upa ho hi chuan anni ho chu nangni ho ai chuan kan hnaih zawk a ni," a ti a.

"I thusawi chu ka hrethiam lo tawp mai," Eileen-i chuan a lo ti a.
Juan-a chuan, "Mi thenkhat chuan helai hmun leh anni ho kan hnutchhiahna hmun kha a hrâng an ti a, mahse ramhuai ho chêt dan chu a hrâng leh rapthlak zawnga chêt hi a ni," a ti ta zel a.

Eileen-i chu a ngawi reng a. Juan-a bawk chuan, "Rilru hi ngaihruatna atanga rawn chhuak a ni a. Ngaihruatna awmtirtu chu hriat phak loh khawpa ril a ni. Mihring chuan thil a hriain a hmu a, chu chu a rilruah a châm a. Chutiang thil chuan hlauhna, rilru hahna leh inlak hran daih duhna te a hringchhuak thin," a han ti leh a.

Eileen-i chuan, "Juan, i thusawi kalhmangah Indian i ang lo riauin ka hria," a lo ti a. Juan-a chuan, "Indian chu enge anih? Indian ho chuan engtin nge thu an sawi? Chuvangin chutiang lam zawng i sawi lo teh ang. Ka sawi tawh ang khan kei chu ka chipui, helai ram luah hmasatute zinga la dam chhun ka ni," a ti ta a.

*********************

A dâra kutin a rawn khawih avangin Mariana-i muhil lai chu a rawn harh hlawl a. A bulah chuan Sean-a a lo thingthi a, "Lo thu teh khai, an lo kal tlatin ka hria," a han ti a.

Mariana-i chuan, "Midang ho maw?" a ti a, an mei chhemna lungalhthei vâm sen ham mai chu a en a. "Kan bihruk a ngai a ni. Helaiah hian tute nge awm a, engzat nge kan nih an hriat hi ka duh lo a ni," a han ti a
Mariana-i chu a tho thuai a. A sakawr zin leh kawmawl chu hmun thim lam a panpui a. Sean-a chuan a sakawr zin leh kawmawl chu a laksak a, sakawr zin chu Mariana-i sakawrah a bel mawlh mawlh a. "I sakawr hi kal hlatsan lutuk suh ang che. Thil chhe ber a thleng anih chuan sakawrah chuang vat la, a chak thei ang berin Los Angeles i pan anga, Pio Pico-a hnenah thil awmdan engkim i hrilh dawn nia," a ti zung zung a.

Thimtham hnuaiah chuan a pilbo zui nghal a. Thlanglam kawrruam atang chuan sakawrin lung a rah ri leh han che vel thawm hi a rawn ri chhuak a. A huhoin an rawn kal a, pakua annih loh pawhin sawm chu an ni ang. An tam lam hrat a ni.

Sean-a tanhmun lakna chu a fuh kher mai. A bul vela thing leh lungpuite chuan an hliah tha hle a ni. A veilam yard sawmhnih vela hlaah chuan a sakawr nen Mariana-i a awm a. Montero-a pawh a bibo tawh a, mahse ani chu a ngaihtuah lo. A hun dik takah a rawn lang mai ang.

Hmalam panin muangchangin an rawn kal zel a. Russel-a chuan, "Meikhu rim ka hria," a han ti a. An zinga pakhat chuan, "Saw, mei an chhem alawm. A thi tep tawh anih saw," a han ti ve leh a.

Sean-a chuan dam thlap hian, "In rawn kal hnai tawk tawh e. Khatah khan ding tawh rawh u," a rawn ti ta a.

"Tunge i nih?"

"Sean Mulkerin ka ni. Engmah hlawhchhuah tur nei siloin in rawn thleng thui hle mai,"

Wooston-a chuan sehchilh deuh nuaih hian, "Kan la hria ang chu," a han ti a.

Michado-a chuan, "Mariana de la Cruz-i khawiah nge a awm?" a han ti ve thung a. Sean-a chuan, "Thu tlukna a siam tawh. Neih che a duh lo a ni," a lo ti hmiah a.

Ngeiawm zet hian Michado-a chu a han nui a, "Ani in thu tlukna a siam thei hleinem. A pami in amah neih phalna min pe a, chu chu a tawk chiah. Dân tan chhan kan nei a ni, Gringo," pawr zet hian a han ti a. (Gringo = Mexican hoin American ho an koh duhdahna)

Sean-a chuan, "Dân chu ka palzut ngai hleinem. Dik taka lekkawh anih phawt chuan. Min man chu beisei duh suh. Engti kawng pawhin min ko el mahla pawi ka ti lo. Kei pawh hi nangmah tluk zeta Mexican ka ni. Nang chu i nu Greek mi a ni mai pawh a," a han ti let ve a.

"I tawng hnem hle mai, Gringo,"

"Thil tam tak ka hria. In zavai khan in chanchin ka hre vek,"

Michado-a chuan, "Khawnge hmeichhia chu a awm?" tih pahin invuakna savun hruihrual 'whip' hi a han lek chhuak a. "Hei hi a tan liau liau a ka rawn ken a ni," a han ti lung lung a.

An han inzar pharh deuh a, Sean-a chu a nui hak a. "Michado, i bul hnaia awm an duh lo anih kha. A thi hmasa tur i nih an ring a ni ngei ang," a han ti a.

"Ka hlau chhete hleinem," Michado-a chuan a han ti nghut a.

Sean-a chuan, "Michado, i chhaw kher mai. Nangmah duh lova tlanbo santu che nula pakhat vanga thih i duh em ni ? A atthlak lutuk. Ka thurawn che chu kalbo a ni," a han ti a.

Wooston-a chuan ring fe hian, "Senora?" tiin a han au a.

Sean-a chuan, " A tawng tur chu keimah chauh hi ka ni. Chu chu kan remruat dan a ni," a lo ti a.

Wooston-a chuan, "Senora, rangkachak chu min pe mai la, in zavaiin hlim takin in kal thei ang. Chu chu ka tiam a che u," a han ti lung lung a.

Sean-a chuan,"Rukru thusawi a ngaithla duhin i ring em ni ?" hmusit aw zet hian a lo ti a.

Wooston-a chuan,"Rukru ah min puh a ni maw ?" a ti vin ta hlur mai a.

Sean-a chuan, "Rukru i nih si loh chuan engvang in nge hetah hian i rawn kal ?" a lo tih khum a.

Russel-a chuan, "Amah chauh niin ka hria. That ila a ni mai," a rawn ti chhuak ta thut a.

Hmun thim laiah chuan Mariana-i chuan lung pahnih hi a han chhu ri kauh a. Rifle kau ri ang chiah hian a ri a.

Chhaklam lungpui karah chuan rifle kau ri tih hriat tak hi a han ri zui rak a.

Sean-a chuan, "Kha in lo hria em ? Keimah chauh chu ka ni lo ania. Mahse tullo zeta thih in duh chuan lokal rawh u. In chetsawn hmain heta tang hian pahnih chu ka that thei che u ania," a rawn ti ta a.

Michado-a chu a awm a nuamlo kher mai. A awmna lai chu hmun fai lai, thla engin a chhun en uar mai a ni a. Thawm rawn chhuahna lai lah chu hmuh hleih theih pawh a ni silo.

Michado-a chuan a sakawr chu a pawt her a, "I kalsawn rih ang u. Khua a var tep tawh a, an tlan thei chuanglo ang," midangho hnenah chuan a han ti a.

Muangchangin kawrruam lam pan chuan an let leh ta a. Yard za leh sawmnga vela hla an thlen hnu chuan an ding ta a. Michado-a chuan, "Hetah hian i nghak ang u," a han ti a.

Russel-a chuan, "Tunah pawh hian kan that thei reng alawm. Tute tehchiam nge awm ang? Hmeichhe pahnih, putar leh Mulkerin-a an ni mai a, enge thil harsa awm?" a han ti tûn tûn a.

Michado-a chuan Russel-a chu a han en a, "Â lutuk teh suh, Russel, Sean Mulkerin-a hi indo mi, silai kah thiam chung chuang deuh mai a ni tih ka hria a ni. An hmeithainu, Senora an tih pawh kha silai kah thiam lutuk niin an sawi. Midang pakhat erawh kha chu eng nge a an ang ka hre lo," a han ti a.

Silva chuan, "Montero-a pawh in silai kah a thiam khawp mai," a lo ti a, chutah, "Pa huaisen tak mai a ni a, thlarau ang maia thawm neiloin a che vel thei a ni," a han ti leh a.

Mi pakhat hi a lo nui chhuak hawk a. Wooston-a chu a inher vut a, "Tunge nui kha?" a ti khur khur a. Pakhat te te in a han melhkual a, mahse tuman an chhanglo a. Silva bawk chuan, "Old one an tih pawh hi thlarau a ni maithei. Tunge a nilo tih sawi thei?" a han ti leh a.

Russel-a chuan nûr deuh nung chung hian, "Amah kan hmuh hunah kan la hria ang chu. Thlarauin thisen a neih leh neih loh kan la hre dawn a ni," a ti nghut nghut a.

Lungtum hi lungpuiah a insawh ri dawt dawt a. Wooston-a chuan, "Silva, nang mei han chhem teh. Kan nghah chhungin coffee i in teh ang u," a han ti a.

Fernandez-a chuan, " An kalsawn leh mai i hlau lo em ni ?" a lo ti a.

Wooston-a chuan, "An duh leh kalsawn sela, kan zawng hmu leh mai dawn alawm," a lo ti sam et a. Chutah, "Rangkachak kha helai hnaiah hian a awm anih ka ring ta tlat mai," a han ti leh a.

Russell-a chuan,"Kan awmna hmun hi khawilai nge ni reng reng a ?" a lo ti a. Wooston-a chuan, "Chutiang lam ngaihtuah a ngai lo. Kan thah chimih hunah kan kir leh mai dawn alawm. Kan kawng zawh lah kha bo dawn hek lo," a ti mai a.

An chhaklam lungpui kar atang chuan nui thawm a rawn ri chhuak a. Chutiang anga nui thawm chu an la hre ngai hauh lo, mahse nui thawm erawh chu a ni tlat si.

Lungpui a insir khup mai a, a thangkhawk avang chuan a lang rapthlak ta riau em ni ang ? Nge an ngaihruatna mai mai zawk ?

Russell-a chuan midang ho chu a han melh kual a. Wooston-a chuan bawngsa rep a thial nuau nuau a, Michado chuan cigar a tan mek a. Tomas-a chuan Russell-a chu a han en a, a chhungrilah a nui ru a. Chu American pa rorum tak mai chuan an thawm hriat chu a hlau ru tih a hria a ni. Michado-a hmel erawh chu chhete pawhin a danglam chuang lo.

Mei chu a alh ta hluah hluah a, an awm pawh a nuam ta deuh sawt a. Wooston-a chuan, "Naktukah kan tawhchilh ang. Rangkachak pawh kawl an nei ngei ang," a ti bul bul a.

Sean-a chuan Mariana-i awmna lam chu a pan thla a. A bul a zu thlen chuan, "A hun takah i che a ni. A tihzia kher mai," tiin a han fak luam a.

Mariana chuan," Midangho pawh kha mawle, mahse khawnge maw an awm tak le ?" a lo ti a.

Thawm hriat tur lah chu a awm hauh si lo va. Rei vak lovah Montero-a pawh alo lang ve ta a. "Coffee i lum ang u," a rawn ti nghal chawt a.

Mariana-i chuan, "Mahse, Senora te kha! An thawm ka hria a ni. Helai hnaiah hian an awm ve ngei ang!" a lo ti a.

Montero-a chuan, "Senorita, thil engemaw hriat i nei a nih chu. I thawm hriat chu enge anih ? Tunge hria a i rin ?" a ti mai a.

Sean-a chuan, "Naupangte ka nih laiin Vaquero hovin Juan-a chanchin mak tak an sawi thin a. Indian ho chuan an damloh emaw, hliam an tawrh emaw apianga an pan thin a ni a. California mi thenkhat pawhin an pan ve bawk thin niin an sawi," a han ti a.

"A lo tidam thin em ni ?"

"Tidam thin e."

Sean-a chuan meiling chu a thai vam a, thing a han tuah belh a, "Tumkhat chu mi pahnih sual deuh mai hian rangkachak chungchang an hriat avangin an zui ru a, an tum ber chu a awmna dawp chhuah a ni," a han ti leh a.

"Enge chu mite chu an chanchin ni ta ?"

"Enge an chungah thleng tih tuman an hre lo. An ruang chhar a ni a, mahse an taksaah pem hlek pawh hmuh tur a awm miah lo a ni awm e."

Coffee an lum a, sarep nen an hmeh a.

Montero-a chuan, "Khua a var dawn ta. Kalsawn a hun ta e," a han ti a.

Sean-a chuan, "Senora leh Juan-a kha engtinnge ni ang ?" a lo ti a.

Montero-a chuan, "Min rawn zawng hmu ve mai ang," a ti mai a.

Montero-a chuan an coffee in ban chuan an meichhem chu a leih mit a. Bel chu luite ah chuan a zuk chiah dai a. A rawn let leh lam chu vawilehkhatah a rawn tlan phei ta thut a. Silaimu hian a bul lawka lungpui chu a rawn deng khem hlawk mai a.

Sean-a chuan a colt rifle chu a vuan chawt a. Lungpui awmna lamah chuan a tlan phei ta a. Mihring hlimthla che zeuh hi a hmu a, a rifle chu a hmet puak thuai a. A fuh lo tih a hre nghal a.

Montero-a chu thing hmunah chuan a tlan lut ta a. Rei vak lovah Montero-a chuan Sean-a chu a rawn pawh phei a, "Sakawrte pawh ka peih fel tawh a, Senora awmna lam hnaihah kan insawn a tul a ni," a rawn ti a.

Sean-a chuan, "A tha e," a ti a. Mihring tawmna nia a hriat, lungpui lam hawi chuan a silai chu a han hmet puak thuai a, a tlan sawn a, a silai chu a han hmet puak leh a.

Sakawra lawnin thing hmun atang chuan an tlan chhuak a, kawr zim zet hi an zawh a. Yard za engemaw zat an tlan hnu chuan Juniper leh Manzanits thing to na hmun hi an thleng ta a. Reiloteah far thing hmun an thleng ta a. Tlang pumpui mai chu far thing chuan a khuh chhuak vek a.

Montero-a chuan hma a hruai a, chak takin ngaw kar kawngah chuan an tlan zel a, kawr ruam leh tuihawk hawrh kuak kawrte engemaw zat an tlanpelh hnu chuan tlang chhip chu an lawn chhuak ta a.

Montero-a chuan an piah lam chu a kawk a, "Saw saw Sepse lui kha a ni a, ka chungah eng thil emaw a lo thleng anih chuan chhim lam in pan zel dawn nia," a ti a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)