JOHN WALDEN (Completed)

Western cowboy Re-type, lehlin leh mizo phuahchawp dahna

Moderator: writers

Ngaia
Site Admin
Posts: 25813
Joined: April 30th, 2016, 4:07 pm

Re: JOHN WALDEN BY Khawlhring Vanlalvena 1 - 6

Unread post by Ngaia » September 27th, 2018, 8:01 pm

JOHN WALDEN
(The way to El-paso)

Author - Khawlhring Vanlalvena

Re-typed by Ruatmawia Jahau

Bung 7 (a)

How Joel Become the Wanted

Kum 1885 march thla chu khawlum vanglai tak ani a. San Antonio zing ni chhuak pawh chu a rum nghal rut mai a. Chutihlai chuan San Antonio khaw Rancher pakhat Joel Hardy-a fapa duhawm tak, kum 17mi lek, tlangval hmelṭha leh nunnem tak chuana chunga thil lo thleng tur chu hre lawk hauh lovin a mutui barh barh hle a. Joel Dickens a hi tlangval hmelṭha leh pian nalh, zen thlarh mai leh mi nun ngil tak a ni a. A rilru a chak em em a, a hmel pawisawilo tak chu ngun takaen chuan mi huaisen tak ani tih a hriattheih a. Joel Dickens a hian a pa hi a hmangaih em em a, a duat em em bawk a, chutiang bawkin a pa Joel Hardy a pawhin a fapa neihchhun chu a duat ve em em bawk a ni.

Joel Dickens a chuan tumah thah leh draw pui nei ngai lo mahse puakruk phawi chu a rang em em a. Puakruk te hi chu 'ka vaibel' ti khawpin a chulnel ve a. Joel a hiam thil hlauh pakhat chiah a nei a, chu chu pawisawilo chunga kutthlak a ni.

Joel Dickens-a hian dan hi a hlau lo reng reng a. Dan chu misual te thiam loh chantir tur a siam chauh anih avangin a tan chuan a hlauhawm loh reng a ni. Tin, Joel-a hian US rama mihring lar lutuk mai, John Walden an tih pawh hi hlauhna chhete mah a nei lova, a chhan chu midik tak te tan chuan ṭhian ṭha tak a ni tlat a.

Tichuan Joel Dickens-a chuan a chunga thil rapthlak tak lo thleng tur pawh chu hre lawk hauh lovin a pindana zing ni chhuak rum rut maiin a rawn chhun en ruih tawh pawh chuan mumang ram lanah a la cheng a, a la muhil barh barh mai a. Chutia tui taka a mithilh lai chuan an sitting room lama in hau thawm chuan a ti harh ta zawk mai a. Joel-an a ngaihthlak chian deuh chuan a pa leh an awmpui tlangval(a pa farnu fa; a ni fapa) te an ni tih a hre mai a. He tlangval hi Doherty-a a ni. A naupan lai aṭanga insual hrat anih avangin a biang veilam lawh ser phah kuau mai a, chu chu tun tlengin ala ser ta reng a.

Doherty-a hi mi awm ṭha duh vak lo a ni a, Joel-a phei chuan an in aṭanga hnawhchhuah daih duh chang pawh a tam mai. Mahse a pa, Joel Hardy a hian a duat angreng hle lawi si a, hnawhchhuah em chu a remti ṭhin lo mai pawh a.

Joel Hardy a leh Doherty a te inhnial chu an thawm a ring tial tial a, an rawl aṭang chuan an thinrim hle tih pawha hriat mai a. Mahse Joel-a chuan nidangah pawh an inhnial zauh zauh tawh ṭhin avang leh a hma ni a hna a lo thawh hah deuh avang chuan ngaihṭhatlohna pawh a nei chuang hauh lova, muthilh leh a tum ta mai a.

Chutia muthilh leh a tum lai tak chuan silai a puak ri ta ṭhuai a, inhnial thawm pawh chu a tawp ta hmiah bawk a. Chhuata mihring tlu ri chawrh thawm pawh Joel-a chuan a hria a. Chuveleh a zuang tho ve zawk a, a khum lu a gunbelt chu a la lawk a, a thawmhnaw dang te pawh a inbel mawlh mawlh a, sitting room lamah chuan a phei ve ta a.

Chutah a pa chu chhauatah thi hnuangin a lo tlu reng mai a. A mit pawh chu khaw hmulo tih hriat takin a meng kuau ringawt a. Joela chuan Doherty a kah a ni tih pawh a hre mai a. Doherty a chu um turin kawngkaah chuan tlanchhuah mai a han tum a. Mahse kawngka chu pawn lamah a lo inkalh tlat mai hi a lo ni a. Tichuan Joel-a chu hmanhmawh takin tukverh atang chuan a zuang chhuak ta a. Chutah hla tak a Doherty-a, sakawr chungchuanga tlan liam mek chu a va hmu ta a. Vawihnih chu an kap zui ve thuai thuai na a, mahse a hlat em avangin a fuh chuang lo, tichuan Doherty-a chu a pilbo zui ta a.

Chutah Joela chu a thinrim em em a, an awmpui tlangvalin a pa athahsak mai kha a tuar thiam thlawt lo ani. Doherty a chu umzui char char mai a duh a, mahse apa ruang bawihsawm a ngai bawk si. Tichuan tukverhah bawk a zuang lut leh ta a. Tukverh a a zuan luh chiah chuan sheriff pakhat chuan Joela chu a lo tin teu mai a. Chu sheriff chuan, "Joel, ipa thattu a man i ni," a tih khum ta mai lehnghal a. Joela thinrim sosang ta lutuk chuan engmah pawh ngaihtuah chang lo chuan a sir lamah a bawk rawp a, chutih rual chuan a puakruk a phawi dawk zawk a, sheriff chu a kap ta pawp mai a. Joela thinrim lutuk khawhmuh pawh fiah tawh lo hial chuan a mi kah chu Sheriff a ni tih lam reng a lo hre lova, tichuan Doherty a mawlh kha hre reng a. A lo tlanbo hman ang tih hlau chuan a pa ruang pawh ngaihsak ta lovin a in siam a, sakawr chunga chuangin a tlanliamna lamah chuan a lim phei ve nghal ta pur pur a.

Doherty a chu a hmu pha tawh lo, mahse uisathiamin a hnuchhui lai a chawlhsan ngailo ang bawkin sakawr hnu chu a chhui zel a, hnuchhui pah a ni bawk a, a tlanchak thei ta bawk lova. Mahse a hnu chhui lai chuan khawthlang lam a pan tih a hriat veleh, hnu pawh chhui set set lo chuan khawthlang lam panin a tlan ve ta sauh sauh va. Rei tak a tlan hnuah hla taka vaivut khu laih laih chu a hmu ta a. Chulam pan chuan a tlan ta ngat ngat a. Joela chuan sakawr tawlailir pu hnenah chuan mi pakhat sakawr chungchuang hmai ser kuau mai a hmuh leh hmuh loh a zawt a, a ni lah chuan a hmuh loh thu in a lo chhang si a. Tichuan khawthlang lam pan bawkin Joela chu a tlan leh ta ngat ngat a.

Chaw fak hun velah chuan khaw pakhat a thleng ta hlawl mai a. Chu khua chu khaw te tak te hi a ni a, saloon pawh pahnih khat chu a awm ve a. Joela pawh chu saloon pakhat kawtah chuan a ding ta a. Saloon chhunga a zuk luh chuan cowboy tlem te hian card an lo khel a. Joel a chuan Doherty a hmel hmuh a in beisei teh lul nen, a hmu ta hauh lo mai a. Whisky no hnih a lem khalh khalh a, bar nghaktu hnenah chuan Doherty a pian hmang vel chu a han sawifiah zung zung a, chumi chu a hmuh leh hmuh loh a zawt zui nghal bawk a.

Bar nghak tu chuan, "I lo thlen hma lawk khan i mi sawi ang hmelpu chu ka saloonah hian a lo lut a, awm pawh awm rei lovin a chhuak leh nghal vat," a lo ti ta a.
Joela chuan, "Khawi lam nge a pan?" a lo ti vat a.
Bar nghak tu chuan, "Khawi lam nge a pan chiah chu ka hre lova, mahse a chhuah hnu lawk chuan sakawr tlan thawm a awm nghal a, sakawr tlan thawm ah chuan khawthlang lam kawt chhuah a pan niin ka hria," a ti leh ta a.

Joela chuan saloon a chhuahsan hnu chuan khawthlang lam panin a tlan ta ngat ngat a. Amah tawk zawnga mi lokal a piang hnenah a mi zawn hmel pu chu an hmuh leh hmuh loh a zawt zel a. Anni pawh chuan an hmuh thu an lo hrilh ve thei zel a. Joela chuan a sakawr chu a tlanchak tir sauh sauhva. Khawthim hma ngeia um phak a tum tlat a, mahse ni tlak dawn ruai ah pawh a la umpha ta hauh lo mai a.

Ni a tla dawn suar suar tih chuan Dead Wood City ah a lut ta hlawl mai a. Dead Wood city chu khawpui lian tak a ni a, saloon leh hotel pawh tam tak a awm a. Joela chu saloon pakhat kawt a thlen chuan a sakawr aṭangin a chhuk a, Doherty a zawn pahin saloon chhungah chuan a lut ta a. Whisky a in pah te chuan a mit a len kual reng a. Doherty a awm reng a hmu lo a. A mi hmuh duh ber a hmuh loh avangin saloon chu a chhuahsan leh ta a.

Chutiang hlirin Doherty zawng chuan salokn tinah a lut lawr zel a. Kawtthlera a mi hmuh te chu chik takin a enzui zel a. Mahse rei tak a zawn hnuah pawh a hmu ta chuang lo a. Mahse Joela chu chutimaia beidawng chi a ni lo tlat! Dead Wood City ah a awm lo pawh a ni maithei a. A awm loh pawhin a zan a zana zawn zui zel chu a tum tho a ni. Nilenga cha ei lo a nih avangin a ril pawh a ṭam ta hle a, hotel pakhatah chuan pumpui hnawh puar turin a lut ta a.

Eng pawh nise hmarthlang lam pan a kal chu a tum ta a. Ni a lo sang zel a, chu thlaler hmun chu a lum hulh hulh ta mai a. Joela chu a mangang ta kher mai. Beidawn mai erawh chu a tum chuang lo. Rei ngial a kal leh hnu chuan a sakawr chu a chau leh ta hle a, a tui pai la awm chhun chu a intir leh ta a. Tih tham a bang ta hauh lo mai a, duhtawkin in ta se amah pawh chuan a in zo thei hial tawh ang. Amah pawh chu a tuihal ve tawh hle a, mahse a ni aiin a sakawr chuan a mamawh zawk tih hriain tlem te chauh a in s, a sakawr chauh leh huna a in atan a khek ta a.

Thlaler vaivut te chu thliin a rawn chhem khu luih luih a, chung chuan a rawn bawh huk huk ṭhin a. Rei tâwk a kal leh hnu chuan a sakawr pawh chu a chau leh ta a, a tui neih chhun chhun chu a in zawh tir ta vek a. Hmarthlang lam pan chuan abkal leh ta ṭauh ṭauh mai a.

Rei pawh a kal leh hma chuan Joela sakawr chu a chau leh tavtlat mai a, tui pek tur lah a nei tawh si lo. An hmalam hla takah chuan thing hmun ni awm tak, dum deuh ruih hi Joela chuan a hmu ta a. Chulam chu a sakawr pawh a kawh hmuh nghal a. Kal hram hram tur chuan a fuih mawlh mawlh a. A sakawr pawh chuan a pu fuihna chu hre ve niawm takin a kal leh ta boh boh a. Mahse rei a kal thei tawh mawlh silo. A chil phuan te chua tla buah buah tawh a, Joela chuan a sakawr chu a lainat hle a, ṭanpui ngaihna vak lah a hre si lo. A ṭanpui theihna awm chhun chu a sakawr chung aṭanga chhuk a ke a kal a ni mai a. A sakawr hah zia chu hriain ke in a kal ve ta a. Thing hmun ngaw ni awm tak lam pan chuan an kal dun ta ṭauh ṭauh mai a, a sakawr chu a kai zel bawk a.

Ke a thui tak an kal hnu chuan a thil hmuh chu ramngaw zau tak hi a lo ni tih a hre thei ta a. Chutah chuan tui a awm ngei pawh a ring a ni. Lo awm ve ngei tak ang maw? A sakawr chu a thaw huam huam a, a pu pawh zui peih lo chuan a bawk ta rup mai a, ramngaw lah chu an hnaih hle tawh si a. Joela chuan a sakawr chu an fuih leh ngial ṭhin a, mahse chu pawh chu a hre tawh lo. An hma a hnim hring dup te chu peh hmuar hmuar a chak tih hriat fe hian a thlir ve ṭawk ṭawk ringawt a. Mahse.. thabrengba nei ta lo. A mengbpual pup pup a, a thi chu a ni zui ta der mai a.

Joela chuan a sakawr engmah hre tawh lo chu lainat fe hian a en vawng vawng a, an hma lawkah duh tawkabtui in tur a awm mai thei si a, chumi hmun pawh thleng zo lo va a thi ta mai chu a lainat kher mai. A mah vang liau liauva thi a ni tih te a han ngaihtuah phei chuan amah leh amah chu anchhia te a inlawh leh ang bawrh bawrh ṭhin a. A sakawr engmah hre tawh lo chu mittui tla zawih zawihin a thlir reng ringawt a. A chungah engmah tih theih a neih loh zia hria in a hma lawka hnim hring dup lam pan chuan a kal ta sauh sauh zawk a. A thawmhnaw lah chu vaivutin a bawh paw thur a, eng rawng nge tih hriat hleih theih pawh a ni ta lo.

Thlaler vaivut sa hulh hulh ah chuan a ke a pil thawih thawih a, pheikhawk a bun chung pawhin a ke te chu a sa vur tawh a. Harsa ti tak chungin hnim hring dup awmna chu a thleng thei ta hram a. A chau leh tui hal lutuk chu a thaw huam huam a, tichuan tui in tur zawngin ramngaw ah chuan a lut ta a. Amah enthla reng tu Red Indian an awm tih reng a silo. A j
kiang lawk lawk hnim buk kar aṭang te chuan fei in an tin fur mai si a.

Joela rilru ah chuan a dangro lutuk tihhnawnna tur tui bak ngaihtuah anei tawh lo. Thui tak ngaw kara a kal leh hnu chuan a duhthusam ang ngeiin tui chu ta a. Luite tuithiang tak chu a luang her her a, han chen bawrh bawrh theihna turin li te a lo awm ve pam bawk a. Joela hlim lutuk, tuia zuan thlak nghal mai a tum lai takin a hma lawk thingah chuan thal a rawn bur ta chat mai le! Joela chuan chutiang thil chu a rin phak bak a ni. Rang lutuk maiin a hnunglamah a i her zawk a, a kutah puakruk a lo hum hman reng tawh a. Mahse a han hawi vel ruai pawhin thal rawn kap tu awm reng a hmu ta si lo. Khawiah nge kah tur tih pawh hre lo chuan a bul vel hnimbuk chu a tin kual ta vel mai mai a. Chutia a ngaihna hre lova a hawi vel ruai lai chuan a bul vel hnim buk chu a rawn che ta luai luai mai a. Anmahni chu a hmu thei chuang si lova, a hawina lam apiang mai,a hnunglam chenin a che luai luai mai si a. Joela chuan a mah chu an hual bet tlat tih a hre ta a.

Joela mak ti lutuk chuan a mitvai anih te a ring hial a. Mahse, a mit vai mai mai a nili tih hriat takin a bul lawk a thal bur vah pawh chu a la che dar dar si a. Chutia a din reng lai chuan a sir kil tin aṭang chuan a sir kil tin mai aṭang chuan Red Indian pasalṭha ho chu an rawn zuang chhuak ta sup sup mai a. An rawn din hnaih ṭuai ṭuai a, Joela chuan han kah thluk phawk phawk mai chu chak hle mahse a pistol ah chuan mu ruk chauh a awm si a, anni ho lah chu an tam hle lehnghal si a.

Mahse, a puakruk paih thlak mai chu a la tum bik hauh lo. A hma zawna an hotupa ber lo kal phei chhut chhut chu a tin ve ta teu mai a. An hotupa chu palian leh sek ṭelṭul, a hami te chu hnawih sen nuauvin archang a tawn ngauh bawk a.

Red Indian lalpa chuan Joela chu a rawn pan phei zel a, a ni lahin kut khur hlek lovin a lo tin ve ran reng a. Red Indian Lalpa in Joela bul a lo thlen chuan, "Ding rawh," tiin Joela chu a au ta ṭhat a. Mahse chupa chuan din mai chu a tum bik hauh lo. Sapṭawng a thiam lo nge, a luhlul hrim hrim, Joela chuan zamna nei map lovin a la tin ve ran reng a. A awmna aṭanga pen nga emaw lek a lo thlemg ta tih chuan a puakruk chu a kau ta rap mai a. Red Indian lalpa hnenah chuan, "Thih i duh loh chuan min rawn hnaih tawh suh," tiin a vau leh ta chheu chheu mai a.

Joela chuan a ti mai mai lo a ni tih hria in Red Indian lalpa pawh chu a ding ve ta chawt a, sapṭawng chu a lo thiam ve na meuh mai. Indian ho chuan an rawn pan hnai tuau tuau a, an fei te chuan an chhun lo chauh hi a ni ta mai a.

Mahse Joela chuan feia rawn tintute pawh chu hmu lo ang maiin an hotu chauh chu a en reng a, a la tin reng bawk a. "Ka thi dawn a nih chuab kei aiin i thi hmasa ang," ti a vau leh pah chuan Indian lalpa chu a pan hnai leh ta hruau hruau mai a. Indian lalpa pawh chuan hlau hmel reng reng a pu bik hauh lo. Joel an puakruka tin chunga a pan hriau hriau lai pawh chuan mit khap miah lovin a en ve run reng a, a hnung tawlh bawk hek lo.

Joela chuan Indian pa la tin reng chung chuan, "Engvangin nge min lo tih buai?" a han tih pawh chuan a ni chuan engtinmah chhang lovin a la en ta reng a. Chutah Joela vek chuan, "Engvangin nge min tih buai?" vin ṭhak hian a n ti nawn leh a.

Chutah indian lalpa chuan aw thum chher chhur, sapṭawng pai deuh hian, "Ka ramchhungah phalna la lova i lo luh a vangin," a ti ta nghut a.

Joela chuan, "Heihi i ram a ni tih pawh ka hre lo," a ti velh sak a. Indian pa chuan engtinmah chhang ta chuang lo chuan a en run reng ringawt a. Duh se chuan a hote cbu thu a pe ang a, Joela chu an chhun hlum thuai mai dawn a ni. Mahse Joela pawh hian a thih hma in an hotupa chu a kaphlum ve hman ngei ang tih pawh a chiang a.

Joela chuan Indian lalpa hnenah chuan, "I ram chhungah hian buaina siam tuma lokal ka ni lova,thlalera ka vakvaiin helai hmun hi ka rawn thleng tawp mai a ni. Tunah hian ka haw lo che a, thah che pawh ka duh bawk lo. Min chhuah lehnghal la i pawi ka sawi bawk hek lovang," a ti ta a. Indian lalpa eraw chuan engtin mah a chhang lova.

Joela thawmhna inbela vaivut kai paw thurte chu chik taka en chungin, "I ti dik a ni, tunah chuan i kal leh thei tawh ang," a tita nghut a. Chumi hnu chuan a hote henah thu a pe nghal a, anni ho pawh chuam Joela chu an tawlh hlat san veleh ta mai a.

Chutah Joela pawh chuan a puakruk chu a paiah khungin tui awmna lam chu a pan ve leh ta a. A gunbelt a phelh a, tuiah chuan a zuang lut ta bawrh mai a. A taksa sa huam huam te pawh chu a dai ve ta sawng sawng a. Chutah tui rawn khawhthla teu teu chu a ka a dawhin duhtawkin a in ta khawlh khawlh a. Tui aṭanga a han chhuah leh hnu chuan a han hawi vel a, Red Indian ho pawh chu hmuh tur reng reng an lo awm tawh lova, an bo duak mai a ni.

A thawmhnaw huh far thluah thluah te chu hlipin a fu thei ang ber chuan a sawr a, a ha leh ta mawlh mawlh mai a, a ril a rawn ṭam leh ta hle a, chulai lui kam velah chuan kamrah eng ilo zawngin a vak kual ta a. Nakinah chuan theipui rah hmin tuar chu a hmu ta hlauh mai a. Duh tawka a ei puar hnu chuan riahna tur a zawng leh ta a.

Ni a tla ṭep tawh a, ngaw chhung phei chu a thim mup tawh a. Chutah Joela chuan puk pakhat a bel ta a. A rim tawngkhawng tawh bawk a, a muhil nghal bawrh bawrh a.

Chutia tui taka a muthilh bawrh bawrh lai chuan a riahna puk chhungah chuan red indian pahnih chu thawmdim em em in an lo lut a, a puakruk chu an laksak a, an ṭhut bet ta hmiah a, a kut chu an hnung khirh ta tlat mai le! Joela an harh chhuah meuh chuan indian pahnih te chuan anblo hnungkhirh mawlh mawlh mek hi a lo ni reng tawh mai a.

Tichuan indian pahnih te chuan Joela chu kut hnung khirh chungin an lalpa hnenah an hruai haw ta a. Joela hmai chu an tuam tlat avang leh zan thim tham hnuai a an kal bawk avangin Joela chuan khawi lam nge an pan tih reng a hre lo. Joela a tluk palh chang pawhin ṭha takin an kai tho veleh mai zel a. Chutia an dim em avang chuan Joela pawhin thahbtuma hruai annih a ring ta bik lova, engmah hlauhthawnna pawh nei chuang lo chuan a zui ve ta zel a.

Rei tak an kal hnuah Joela chuan mi ṭawng ri nawk nawk chu a hre ta a. Reiloteah amah hruaitu te lawh chuan a hmai an tuamna chu an phelh sak ta a. Joela chuan a hmai tuamna an phelh hnu pawh chuan an awmna chu a hre lo chiang kher mai. Ama ṭhutthleng lianpuiah Red indian lalpa chu a lo ṭhu vung mai a. Joela chuan a thil hmuh chu mak a ti hle mai a, a han inngaihtuah chian deuh hnu chuan a awmna chu Red Indian lalpa inchhung a ni tih a hre ta a.

Red Indian lalpa chuan Joela chu a lo nuih vur vur a, hrethiam lo zetin Joela chuan, "Engvangin nge hetah min hruai?" a ti ta ṭhat a.
Indian lalpa chuan la nuih vur vur reng chung hian, "Min hlau elo? Thah che ka tum hleinem," a lo ti ve mai a.
Joela chuan, "Min thah in tum loh chuan ka muhil lai min tih buai kha enge a ṭulna?" a ti leh kha kha a.
Indian lalpa chuan, "Nichina i chetdan kha ka lawm riau ani. Mingo dang, ka ram chhunga lo lut te hi chu tumah ka dim ngai lova, nang erawh chu i danglam riau a ni. Mingo ho hi chu dawtsawi hmang leh mi bum ching tak an ni a, nang pawh hi ka ringhlel deuh tkat che a, ka kalsan tak hnu che khan ka hote zinga pahnih ka enthlak ruk tir che a, thilsual tih i tum loh zia min rawn hrilh a, tichuan ka inah hruai luh ve che ka duh a, i muhil lai ka rawn man tir ta mai che a ni," a ti ta chuar chuar a.
Joela chuan, "Chuti anih a hnu, ka kut phuarna te hi phelh ta che," a ti a.
Lalpa chuan, "Hmanhmawh mah ta che, " tih pahin chhiahhlawh pakhat hi a ko a, Joela kut phuarna chu a phelh nghal mawlh mawlh a. Indian lalpa chuan Joela chu ṭhutna a kawhhmuh a, chutah chuan a ni pawh a ṭhu ve ta a.

Reiloteah chhiahhlawh pakhat a lo lut a, an lalpa chu zah takin chibai a rawn buk a, anmahni ṭawngin engemaw hi a sawi a. Chhiahhlawh chu a chhuak leh vat a, reiloteah chaw lwh sa kanro tui tak hi a rawn chawilut ta a.

Joela chuan Indian laloa chu mak ti fe hianan en ta hau mai a, chutah, "Mingo ho hi in haw viau ṭhin emaw ka ti a sin," a ti ta hial a.

Indian lalpa pawh chuan nuih deuh sun sun pah hian, "Nang chu i danglam tlat tih ka hria ani. Kan rawn hual lai che a i chetdan kha ka ngaisang riau a ni. Nangmah ang hi mingo ka la tawng ngai lo reng reng a, chuvangin ka hnenah hian cheng ve ta che," tiin a sawm zui ta hial a.

Joela chuan mak a ti zual hle a, Indian lalpa hnenah chuan, "Ka tihbuai che i ring lovem ni?" a ti hau mai a.

A ni chuan, "Min tih buai pawh tum la i thei chuang lovang, i thi rang viau ang. Thlalera i kal kha kan lo hmu reng che a, i sakawr i rawn kalsan lai leh i tuihal vanga i thaw hlawi hlawi te kha ka hmu reng a, rinhlelhna che ka nei hauh lo a ni. Mahse engti tura he lam a lo kal nge i nih tih chu min hrilh tur a ni ang," ti in a ngen ta a.

Chutah Joela pawh chuan a pa that tu a zawn thu te, a la hmuh loh avanga a zan a zana Dead Wood City a chhuahsan thu te, a mi zawn a vanga thlalera a vahvaih ṭan thu te leh a sakawrin a thihsan tak hnua ramngaw lama a rawn vah luh tak dan te thleng chuan a hrilh ta vek a. Indian lalpa chuan ngun takin a lo ngaithla reng a. Joelan achanchin a sawi zawng zawng te chu rinhlelhna a nei lo tih a hmel aṭang pawh chuan a lang mai a.

Joela chuan indian ho chaw chu tui ti takin a ei ta bawrh bawrh a, chaw a ei lai te chuan an ti ti pah reng bawk a.

Indian ho hnena a cham chhungin Joela chuan insualdan chi hrang hrang a zir ta a. Chemte hman dan leh hreite hmandan thlengin Indian lalpa chuan a zirtir ṭhin a. Indian ho hnena thlakhat lai mai cham hnu chuan a phuba lakn hna thawk ṭan leh tawh turin ramhnuai ngaw chu a chhuahsan leh ta a. Ngaw aṭanga a chhuah dawn chuan Indian pasalṭha rualin an thlah ngat a, hlawhtling taka a tum hlen ngei tura duhsakna an hlan hnu chuan an kir san ta a.

**



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 27th, 2018, 8:01 pm

Bung 7 (b)

Joela chu Indian lalpa in sakawr a pek chunga chuang chungin khaw hnai ber chu a pan ta a. Khaw chhunga a va luh chuan kawngsir leh bang vela lehkha in tar chuai mai chu a hmu a, a han chhiar a. Chung lehkha in tar a han hmuh meuh chuan Joela thinlung chu chemte a vih ang maiin a na ta ngawih ngawih mai a ni. A khaw hmuh te chu a fiah lo ruai a, tunah zet chuan thi leh dam kara leng a lo ni ta reng mai le!

Saloon bang vela lehkha intarah chuan hetiang hian a lo inziak a, 'Joel Dickens, San Antonio khua a rancher pakhat Joel Hardy a fapa chuan a pa Joel Hardy leh Sheriff a thah avangin amah man thei tu apiang hnenah dollar singkhat pek anni ang,' tih hi!!

Chu thu a vang chuan Joela chu a bing chuk chuk a, a hmangaih em em a pa thattu a an puh ta mai chu na a ti a, a pa thattu chunga phuba lak ngei tumin a zawng a, a nunna a chan phah lek lek laiin a pa leh Sherigf thattu a puh a lo ni ta si!! Chuvelh a dinhmun an thlir chuan khaw chhunga awm reng chu a tan a hrisel lo tih a hria a, rang mangkhengin khaw chhung chu a chhuahsan leh ta vawn vawn mai a.

Kawngah te chuan thil awmdan te chu a chhuikir leh ṭhin a, a pa thattu a an puhna chhan tur awm te chu a ngaihtuah a, thil awm thei tak a ni bawk si. Mahse engtiklai khan nge Sheriff a thah ang tih a ngaihtuah chhuak thei hrih lo a ni.

Thui fe a kal hnu chuan Sheriff that tu a nihna awm chu a ngaihtuah chhuak ta a. A pa ruang bula amah lo kah tum tu, amah zawkin a kah hlum tak kha Sheriff a nih ngei a ring ta a ni. A lo ni chiah bawk a. Court ah pawh ding se, a pa thah chungchangah kha chuan a in sawifel thei mai in a ring a, mahse Sheriff thah tel kher kher erawh chuan thil a ti hnawk zo ta vek mai a. Dan mi(law-man) thattu te chungah ngaihdamna a awm si lo. Court hmaah chuan amah va inlanin thiamthu sawi ta se an lo awih meuh angem? A thusawi chu a dik ngei a ni tih fiahna anei der si lo. Atan chuan Dan chu thil hlauhawm tawpkhawk a ni ve ta! Engtiklai mahin Dan hlau ngai lova, tunah chuan Dan hlau reng rengin a khawsa ve ta a, Dan hlauva a tlanchhiat a tul dawn ta a ni.

Joela chuan kalna lam tur pawh a hre ta lo. Red Indian ho hnenah kir leh dawn se, anni lahin hlawhtling tak a phuba la turin duhsakna an hlan tawh kha a ni si a. Hlawhchhama an hmel va hmuh leh si chu a zak tawh si. Tih chi a ni tawh lo, atan chuan mihring te chu hmelma hlauhawm ber an chang zo ta.

A luman it in mi tam takin an rawn zawng tawh dawn a, tunah pawh an zawng mek tawh mai thei. Phuba a lak hmain amah zawk an that hman ang tih mawlh a hlau ta a ni. Doherty a awmna lah hre bawk silova. Atan chuan khawchhunga awm ve pawh chu a hlauhawm tak meuh tawh a, in humhimna zawng a ramsa ang maia ramhnuaia awm a ngai dawn ta a ni. Tichuan khawchhunga awm ngam lovin ramsa hlauhawm pui pui te chenna hmunah chuan riah run a rem a lo ngai ta a ni.

Chutia ramhnuaia a awm lai chuan ti hian a ngaihtuah chhuak ta a. Dik lo taka an puhna lak a ta, ṭanpuia chhan chhuak ṭhin tu, John Walden chu zawn chhuah a, ani chuan a lo ṭanpui duh mial takin tiin Walden a zawn chu a tum ta a. Waldena chuan alo ṭanpui duh ang em? Misualah lo ngaiin amah chu a lo that mai lovang maw.? Mahse kawng dang a awm tawh thlawt si lo. Eng thil pawh lo thleng dawn se huaisen taka Waldena zawn chhuah hmasak phawt chu a tum ta a ni.

Waldena chu khawiah nge a awm tak ang? A zawnna lamah hian Bounty hunter hovin an lo man hlauh mai angem? Chung zawmg zawngte ngaihtuah chungin a chenna hmun chu a chhuahsan ta tawp mai a.

Khaw pakhatah a va kal a, chu khuaah chuan Waldena a awm leh awm loh putar pakhat a va zawt a a ni lah chuan Waldena chu a bo vang vang thu a lo hrilh leh zel si! Chu thu an hriat phei chuan Joela chu a mangang takzet tawh a. A thi tawh em ni ang le? A thi tawh a nih hlauh chuan a tan tlanchhiat ngar ngar mai loh chu tih theih a nei ta lo. Mahse beidawng lova zawn zel chu a rilruk ta a.

Khaw hrang hrangah a zawng zel a, chutia a kalna lamah te pawh chuan amah thah tum tu te chu a tawng zauh zauh ṭhin a. Mahse Pathian a lamah a ṭang a ni chek ang, thihna ngei tur awm takah te pawh nungdamin a chhuak leh hlauh zel a. Waldena lah chu hmuh theih a la ni ta lova, a zawh a piang te lahin thi tawh ngaihin an ngai zel mai bawk si.

Waldena zawng chuanTexas ram zawng zawng chu a fang chhuak deuhthaw hial a. Waldena zawnga kum hnih dawn lai mai a vah vel hnu chuan ramngaw ah hian chhawl buk, mihring luah lai tih hriat zet hi a hmu ta a. Mahse bukah chuan tumah a hmu si lo. (Hei hi Waldena buk ngeia a luh a, Waldena putar thuama a inthuam laia a rawn auh a, amah Waldena nen ngeia an intawn na kha ani. Mahse Waldena a ni tih a hre si lo.)

Waldena buk anih ngei ringin a aw rawl tawp tawp chuan Waldena chu a ko ta nghek nghek nghek mai a. Vawinga lai mai a koh hnu pawh chuan chhanna reng reng a hmu thei ta si lova, beidawng lutuk chuan a ṭawngṭai ta ringawt mai a. A ṭawngṭai zawh chuan a sakawr awmna lam pan mai a han tum a, chutih lai chuan lam pana putar sam ṭuak var vo tawh mai lo kal chu hmu ta a, rang lutukin a vir zawk a, a puakruk a phawi nghal zawk a.

Waldena hmuh a inbeisei laia putar mai a han hmu mai chu a ngaihdan a ni lo kher mai. A tan chuan mihring zawng zawng hi hlauhawm an ni vek tawh a, putar pawh hlauhawm an nih theih tlat avangin. chu putar lah chuan a khel tawn tawn ah puarkuk a pai fual hnalh mai lehnghal a. A puakruk kawm lah chu a hnum hlarh ve ve si a, Joela tan chuan hlauh loh chi rual a ni hauh lo reng a. Joela chuan a silai a tin reng chungin putar hnenah chuan kir leh turin thu a pe ta a. Chu putar pawh chuan a ban chu dang taka phar chungin a lo kalna lamah bawk chuan a kirsan ve leh ta mai a.

Joela chuan putarin a bam phar chunga a kirsan leh mek lai chuan dimte in a sakawr chu a kai a, buk hnunglam kawng zim te ah chuan a pilbo ta a. Joela chuan chu putar chu a mi zawn mek Waldena a ni tih reng a hre si lo. Hria se chuan a hma ah bawkkhupin chibai a buk duh hial ang. Mahse a hriat miau loh avangin puakruka tinin a vau kir ta kha a ni si a.

Joela chu a beidawng ta takzet mai. Waldena hmuh a lo inbeisei laia putar sam ṭuak bum tawh a hmu ta mai chu a ngaihna a hre lo hle a ni. Waldena chua thi tawh tak tak ngei anih a ring ta hial a. Ti chuan Santa Fe khaw lam panin kawng ṭum chu a zawh ta zel a, Santa Fe panna lamlian a thlen dawn ṭep chuan amah chang tu an awm nge awm lo tih fiahin a fimkhur em em a. A sakawr aṭang ten a chhuk vel thul, tumah chang tu an awmlo ni a a hriat hnu chuan Santa Fe lam pan chuan a sakawr chu a tlan tir ta a. A hnungah putar khan a rawn um ve zel tih pawh hrelo chuan a tlan zel a, Santa Fe khua chu a lut ta hlawl mai a.

Saloon bang vela ama luman zawrhna lehkha in tar chuai te chu pawisakna reng a nei tawh lo. Engmah hlauh nei map lovin saloon ah chuan a lut ta a. Kawmchar bang ngheng chuan Whisky a tlak pawp pawp a, amah rawn zui tu putarin saloon chhung a rawn rah ve chiah lai pawh chu a lo hmu lo reng reng a. Chutah chuan ani Joela chuan amah hmachhawn tu a tawn tak a, a kah hlum hnu a a nunna a rawn chhanhim sak a, puakruk rawn lek khu vang vang leh nui var var chunga a rawn pan tak kha ni!

Joela chuan cbu putar chu engtiklai khan nge saloonah a rawn luh tih reng a hre lova putar, amah rawn pan tu chu hlau deuh lek lek hian a en ha a. Joela chuan hlauh tur nge hlauh loh tur tih pawh a hre tawh lo. A en hau ringawt a, chu putar chu puakruk phawi mai inpeih rengin a lo hmachhawn a. Mahse rawn tih buai reng a tum lo tih a hriat hnu chuan lawm takin chibai a buk ta zawk a.

Joela chuam putarina a nunna a rawn chhanhimsak avang chuan lawmthu hrilh mawlh mawlh chungin saloon chu a chhuahsan ta a. A sakawrah a zuamgkai nawlh a, chu khua chu a chhuahsan zui ta nghal a. Putar khan, 'I mi zawn chu ila hmu ngei ang,' a tih tak mai dan te kha a ngaihtuah pah nauh nauh a. Engtin nge Waldena a zawng tih a lo hriat? Ramhnuaia a auh vak vak te kha a lo hre ve a ni ngei ang tih a ring ta a. Mahse engtinnge Waldena a chu a la hmu ngeiang tih a sawi mai theih?!!

Putar kha hmuh leh a, thu zawh fiah a tum ta a. Tichuan putar chenna buk kha a pan leh ta nal nal a. Bukah chuan a lo nghak ta a. Mahse nilenga a nghah hnu pawh chuan a la rawn lang t achuang lova. Zanah a lo haw ringin zankhua in a nghak leh a. A ril te a lo ṭam ta hle a, putar eitur neih la bang eng eng emaw te chu a ei ta bawrh bawrh a.

Ni hnih a nghah hnu pawhin a rawnblang ta hauh si lo a. A bei a dawng a, putar khan a bum a nih a ring ta rum rum mai a. Kum hnih dawn lai a zawn pawha a hmuh zawh loh Waldena chu a thi tawh a nih ngei a ring ve ta a.

Joela beidawng mangang lutuk chuan pawisak reng a nei tawh lo. Dawta a lu zuartu Texas Governor chu thah a tum chher mai le. A pa phuba a lak hma ngei a dawta a lu zuar tu Texas Governor chu thah a tum ta bur mai le. Engvangin nge engmah pawh hre chiang si lova dollar singkhat laia a lu a lo zawrh ngawt mai. A pa thattu chu amah ngei pawhin a haw em em a, thah ngei tumin a zawnf a ni si a. Chutihlaiin dan pawh hlau ngai lo khawp a mi dik, nun zalen tak kha dan hlau reng rengin a siam ta si! Mahni inchhung lum pawh luah ngam lovin thosi karah ramhnuaiah a cheng a, thawmhnaw 8nbel tur ṭha pawh a nei tawh lo. Buhchangrum thlahlel ve ngawih ngawih chungin ramhnuI thingrah leh hnep hnawl a ring a, a vakvai a, a luman it vangin mi tam takin an zawng a, ralṭi reng rengin a hun a hmang zova, Texas ram zau takah chuan ṭanpui tu pawh hmu zo lovin kumhnih dawn lai a vakvai ta si. Dan pawna an hnawh chhuahna lak aṭanga chhan chhuak turin John Waldena a zawng a, a ni chu a lo thi tawh anih phei chuan atan damin enge awmzia a neih? A vahvaihna ram a zau lutuk ta a ni.

Heng zawng zawnga bultumtu chu an awmpui Doherty kha ni bawk mahse, thil hre chiang lova a lu lo zuar ngawttu, Texas Governor chu thah ngei a tum nghet ta a ni. Tlangval nunnem lutuk ṭhin kha dawt a puhna avangin tualthah chakna leh thisen chhuah chakna hlirin a bual ã zo ta! Engmah pawisak a nei tawh lo. A awmna ngaw aṭang chuan Governor awmna San Antonio lam pan chuan a in khalh chhuah ta teuh teuh mai le. Santa Fe lam pan in a kal a, Santa Fe aṭangin relin San Antonio lam panin a tlan ta per per mai a.

Nileng zankhua zak zak a nihnih an tlan hnu chuan San Antonio khawpui chu a lut ta hlawl mai a. San Antonio khawpui an hmuh meuh chuan Joela lung chu a chhe hle zawk a. A pianna leh hlim taka a lo chettlat ve na khua, a pa lu nghahna khua ngeiah chuan a lut ta si a. Tun hmaa khaw neitu ni ṭhin kha tunah chuan mikhual a ni ta! Mikhual mai pawh ni lovin Luman bei a ni tlat! Chung zawng zawng a han ngaihtuah chuan Texas Governor a thah chakna chu a rawn sosang tulh tulh mai a. Relin station a thlen a mi an chhuk sup sup tawh pawh chuan chhuk ve nachang alo hre mai lova. A thinrim lutuk chuan Governor kah thal tawl mai ringawt chu a ngaihtuah a ni. Rel conductor in chhuk tura a rawn tih chuam a phu zawk a, inthiam lo deuhvin thupha a chawi luam a, a chhuk ve ta a.

Stationa a awmlai chuan Governor in pan nghal nal nal mai chu a nap a, mahse kgaw en laia chet chu vanduai palh a hlauva, fimkhur thu hla ah tlen nghah leh chu a tum ta a. Governor hmuh a chakna chuan a tha a ti za zek zek tawh a. A puakruk te chu a phawi leh deuh ziau ṭhin a. Governor thisen chhuah a chakna chuan a bual hneh em em tawh a. Tichuan hotel lam a pan ta a. Horel khualchhawn hnenaj chuan a hming ni lo chu a sawi ve zaih a. Pindan no 4 ah chuan a thleng ta a. Thawmhnaw engmah a nei lova, a thawmhnaw neih chhun chu a khel dinglam panga puakruk uai fual hnalh leh, a boot rawng chhunga chemte a thuhruk, hriam zet mai, Indian lalpa in a pek kha a ni mai a, a bak chu a thawmhnaw inbel lai chu a ni leh mai.

Heti em em a rethei chu a nih ngai loh kha! Ranch zau tak a nei a, bawng rual tam tak a nei bawk a, chung an bawng rual vulh aṭang chuan thlatin pawisa tam tawk an la lut ṭhin a nih kha le! Chungte chu khawnge an awm zawh tak ang? Phuba la tura ke a pen mek laiin annlo in sem zo vek mai em ni zawk? Chu-a-chhap-ah a lu an lo zuar vei maw. Joela thinrim lutuk chu chhuat laiah chuan a vei sek mai a. A han per leh ṭhuai ṭhuai ṭhin a, darthlalangah a han in en aa, a puakruk te chu an phawi chhin vel ṭhin a, a rang hle tih chu a inhre ṭhin a, mahse tun ang em em hian a lo phawirang tih chu a in hre lo hial a ni.

Joela chuan Governor chu thah hmaa tih-thlabar nan lehkha thawn a chak zek zek ta mai a. Lo hre lawkin amah vengtute lo awm se, hma tel siah siah mai te chu a chak et et tawh a. Governor chu a thih hma ngeia thlabar taka siam ve ngat a chak tlat tawh a ni.

Tichuan Governor lehkha tur chu hetiang hian a ziak ta chhel mai le!

Pu Duhtak, Governor,
Dawta min puhin ka lu i zuar a, chu ka lubi zawrhna ngei chuan i lu ka rawn thleng dawn a, tunah ka rawn pan che. Eng anga vengtu tam pawh nei mah la, ka kut aṭanga him theih chu in beisei duh ting suh. Zaninah emaw nqktukah emaw nakumah emaw a ni mai thei. I tan lo inrin reng a finthlak ber ang. Thingzara ka taksa an khai hma ngei hian kan in tawng dawn tih xhu lo hre ringawt mai rawh.

Tawk phawt se.

Dated, San Antonio Joel Dickens
The 5th Nov 1887 San Antonio

Chu lehkha chu a thlep ṭha a, envelope ah a khung a, lehkhaip pawnah chuan Governor address dik tak a ziak a.

Joela chuan zankhua mai a hotela awm ringawt chu a hreh hle mai a. Kum hnih dawn lai kal taa thlamuang tak a alo chenna in chu va tlawh a chak ta riau mai a. A lo ram cek tawh a ring a, mahse an ṭhenawm nu, amah duat em em ṭhin tu tal va hmuh chu a tum ta a. (he nu hi Walden an a va tlawh kha ani.) Joela hi hnute hne lai anih aṭangin a nu in a boral san a, unau pakhatmah a nei lom an ṭhenawm nu hian a chawi tlei a, a ma fa ang tak takin a hmangaih a, Joela pawhin a nu hmuh theih chhun a ni a, a ngaina hle a ni.

Joela chuan zanriah a eikham hnu in lehkha ziak chu a keng a, hotel chu a chhuahsan ta a. Tichuan amah lo chawi lian tu hnenah chuan fimkhur tak chungin a kal ta a. Kalkawng pangaiah pawh kal ngam lovin a thim lai zelah a kal a.

Hla tak aṭangin an in chu a va hmu ta a, tumah luah tu an awm lo tih hriat takin a lo thim ṭhiap a. An in a ham hmuh meuh chuan Joela hnuk chu a ulh ṭeuh mai a. Mahse atan fimkhur tluk a awm si lova, ṭap hman a ni lova, lungchhe hman a ni hek lo.

An ṭhenawmte in a va thlen chuan lo reh ṭhiap a, mahse an awm tih hriat deuhin sathau khawmvar a lo in chhi eng teng teng a. Joela chuan in chu a hel a, in hnung thim laiah chuan a sakawr chu a thlung a, tukverh aṭangin a lut ta a.

Chu inah chuan nu pakhat a lo awm a, sitting roomah lehkha alo chhiar melh melh a. Joela a han hmuh chuan makna ti hle tih a hmelah chuan alang mai a. A mak ti hmel chu a reh leh vat a, hlim em em in a kuah ta chung chung a, a fawp ngawih ngawih bawk a.

Chutiang tak chuan hlim mahse a hmelah chuan hlauhthawn ruk a nei tlat a ni. A hlauh rukna a hmela lo lang chu Joela chuan ahmu thuai a, "Enge hlauh i neih?" a ti ta a.
"Thlamuang taka ka awm theih i ring em ni? I lo kal hma lawk pah khan nangmahnzawngin mi pahnih an lo kal asin,"
"Khawnge an awm?"
"An chhuak leh vat, khawiah nge an awm ka hre lo,"

Chutah Joela chuan a pa thattu chu Doherty a nih thu te, Sheriff that tu a lo nih tak dan te, a pa thattu a zawn lai mek a a lu an lozawrh thu a hriat dan te, amah chhanchhuak tura John Walden a zawn a a hmuh loh thu te, Waldena chu thi tawh a a ngaih thu te nen engkim mai chu a hrilh ta zung zung a. A hmelah chuan a beidawng takzet a ni tih pawh a lang thei a.

Mahse a nu chuan, (A nu ti tawh mai ang) "Mangang mah ta che, John Walden chu a la thi hleinem," a ti ta a.
Chuvelh Joela chu mak tiin a meng phawk nasa ta mai a, "John Walden chu a la thi lo tih engtin nge i hriat?" a ti ta ha a.
"Nizan hmasa pawh khan kan inah hian a lo lut a lawm," tiin a nu chuan achhang a.
A nu hnenah chuan,"Waldena chuan min thah tumin em ni min zawn?" a ti leh ta hau mai a, mak a ti kher mai le!
"A tirha chuan keipawhin chu chu ka rindan ani a, mahse nangmah thah tum ani lo tih ka hre leh thuai a ni."
"Engtin nge i hriat?"
"Amahin a sawi a lawm,"
"Mahse dawt a hrilh che pawh ani thei a sin," Joela chuan a n ti leh ṭalh a.
"Dawt a sawi lovang, ka mi rin zawng tak a ni. I pa thattu pawh in awmpui Doherty anih zawk ngei a ring ve tlat a sin."

Joelan chu thu an hriat chuan beiseina thar a nei leh ta! Tualthah chakna hlira khat tawh kha nunnemna leh dawhtheihna in a rilru a thlak leh ta a. Aw zaidam tak hian, "Ka nu, tunah khawiah nge a awm?" a ti ta diam diam a.
A nu chuan, "A awmna chunka hre hauh lo mai. Kan in a chhuahsan dawn lai chuan thlaphang hauh lo turin min chah a, 'Joela chu ka chhan chhuak ngei ang' a ti a, a chhuak leh ta mai a ni," a ti leh a.

Chutia an inbiak mawlh mawlhnlai chuan sakawr ke pen ri an hre ta a. Chuveleh rang mangkhengin Joela chu bedroom lamha atlan lut vat a, pindan puanzar phenah chuan puakruk phawi sa rengin a biru ta a. Reilote ah kailawnah chuan ke pen thawm a lo awm a, mi pahnih an lo lut ta a. A hmasa zawk chuan ulhbun phir a keng a, a hnunga mi chuan rifle a keng thung a. An silai chu kah mai inpeih at in a cheng an kuai sa reng a,m. Joela nu chu hlau ?"aw lek lek hian, "Enge in duh a lo ti a.

A hmasa zawk chuan, "Joela hnu kan rawn chhui a, hetah hian kan rawn chhui lut a ni. Thu dik tak i sawi loh chuan i thi a ni nghal mai," a rawn ti ta mai a.
"Joela chu a lo kal ngei mai a, amhse a chhuak leh tawh,"
"Dawt sawi reng reng suh kan lo luh dawn pawhin in inbe thawm kan hria ani,"
"Ka fapa nen alawm kan inbiak. In awih loh leh bedroom saw va en ula in hre mai ang," Joela nu chuan a lo ti ve mai a. Joela hi a nu hia a ring tawk em em a, an va luh vaih chuan an pahnih hian alo that nghal thei dawn tih pawh a ringhlel hauh lo a ni.

Bounty Hunter te chuan silai chu kau sa rengin bedroom chu an pan phei ta chhut chhut mai a. A hmasa zawk chunn pindan puanzar chu a theh hlim lawp a, a pen lut ta a.

Pakhat zawk chuan thinrim em em in, "Engah nge dawt min hrilh? Tumah an awm hauh hleinem," tih pahin Joela nu awmna lamah chuan a kir leh a. Chutah chiah chuan Joela chet duh hun alo thleng ve ta.

Khum hnuai ṭang chuan arawn tawlh chhuak hriau hriau a a hnung zawka mi tukkhumah tak chuan a chemte a vawm lut ta thawih mai a. Aw rawl pawh chhuah miah lovin ahma lamah chuan atlu ta hnawk a. Chupa tlu tur chuan a ṭhianpa chu a va delh a, chuveleh a ni chu a rawn vir let zawk a. Joela puakruk a puak nghal ṭhuai a, chupa chaldar takah chuan a verh ta sawt mai a. A rifle ken lai paih hnawkin a hnunglamah tluta thlawrh mai a.

Joela chuananu bulah chuan aphei vat a, "Pindan en tura rawn tirh luh nachang i hria chu a lawmawm hle mai," a ti a.

Anu chuan Joela chu a kuah chawt a, "Ka fapa, ka va han hlauthawng tak em! I zalen hmain i boral hmanang tih mawlh ka lo hlauthawng hman a sin. John Walden an ṭanpui che a tum si a, in in hmuh hmaa i boral ka hlau takzet a ni. Tunah tlanbo nghal vat rawh," a ti ta a. A ni pawh chuan a nu thusawi chu a dik tih a hre mai a. Tukverhah bawk a chhuak leh a. In chu a kal hual a, hlauhawm a awm tawh lo tih a hriat chuan In kawt lam aṭangin a mi thah ruang te chu a hnuk chhuak a, kawnglaiah tak a mut ve ve a, an kawrawmah chuan lehkha them a bel ve ve bawk a, 'Joela thah tum tu te chan tur chu heti hi a ni.. Joel Dickens,' tih hi a tar a.

A vawn thluk pa tukkhuma chemte bur vu chu a phawi a, a hrukfai hnu chuan a boot chhungah a thawlh lut leh ta a.

Joela chu fimkhur leh inring em em rengin hotelah chuan chawlh kar khat lai a cham a, pawnah pawh a leng chhuak ngam lo. Waldena hmuh pawh a tan thil awlai lo tak a ni a, amah thah um tu te an kat nuk mai si a.

Chawlhkar hnih hnuah chuan saloon pakhatah a tek lut ve ta nawlh mai a, fimkhur takin amah thah tum an awm leh awm loh a thlir kual thiak thuak a. Ṭhutna awlah chan a ṭhu ve ta a. Tumah amah hretu pawh a hmuh loh avangin a lawm hle nghe nghe a.

Joela bul lawk a cowboy pahnih te chuan whisky an in karh karh a. ELPASO vela Waldena inlar leh tak thu te chu an sawi sap sap a, an sawi zawi hle na a Joela atan chuan rilrunkhawih lutuk a ni pha tho mai. Joela chuan hrethiam awm lo fe hian, "Tuna in thusawinkhan ka veng averh riau mai ka ti, John Waldena chu a thi tawh ani lawm ni? " a han ti ve sap a..

Pakhat chuan, "United States ah hian nangmah maiin emni i awm? Tun thleng thlenga Waldena inlar leh tak thu pawh i hriatloh ni?" a ti deuh ha a. Joela chuan Elpaso khuaa va kal a, Waldena va zawn chhuah chu a rilruk ta a. Mahse Elapaso leh San Antonio inkar chua hla hle si a, sakawrantlan thlen huphurhawm a ni si a, rel chuamna tur pawisa lah a nei si lo. Tichuan pawisa tuak ngah leh zet a Elpaso lam pan chu a tum ta a. Thlakhat lai rangkachak laih chhuahna hmuna a inhlawh hnu chuan Relin Elpaso chu a pan ve ta a.

Elpaso khua va luh chuan a lo ropui hle a. Joela chuan Waldena hmuh hma a thih mai chu a hlau a ni. Tin, Waldena a inlar thu an sawu aṭang khan thlakhat lai a ral leh tawh si a. Waldena va hmuhloh mai pawh chu a hlauva, mahse hmuh in beisei tak chungin saloon pakhatah chuan a tek lut ve leh ta nawlh mai a.

******

JOHN WALDEN
(The way to El paso)

Bung 7 (c)

Joela leh Waldena Elpaso khua a an intawn dan.

Waldena chuan Morrisa ranch aṭang chuan Elpaso chu a pan ta a. Ni lah chu a tla dawn suar suar tawh a. Kawngah pawh kal ṭha ngam lovin a kual zawngin Elpaso chu a hel a, zanriah ei hun velah khua chu a lut ta a. Amah thah tum tu outlaw an lo awm mai ang tih hlauvin a thim lai a piang chu a chuh zel a. Rel station lam a pan a, station sira sakawr enkawltu inah chuan a lut ta a.

Sakawr pu hnenah chuan, "Ka sakawr kha ṭha takin i lo enkawl ang chu maw..?" a han ti a.

Putar chuan, "Ka enkawl ṭha ngiang mai," tih pahin sakawr huang aṭangin Billy chu a rawn kai chhuak ta a. Chik nghur nghur chungin a pu chu a rawn pan ta thoh thoh a.

Waldena chuan sakawr pu hnenah chuan, "Ka kalsan dawn lai che khan ka sakawr zin sirah ka thawmhnaw leh rifle kha ka dah ax i lo kawl ṭha ang chu maw?" a han ti leh a. A ni pawh chuan buk nghut pahin Waldena bag leh rifle chu a rawn la vat a, Waldena chuan Tucson aṭanga a sakawr rawn ken chu putar hnenah chuan a hnutchhiah ta nghal a.

Chutah Waldena chu sakawr huang hnunglam thim laiah chuan a inthlak danglam leh te te a, a putar nihna ngai bawk kha a inbel leh ta a. Tunah chuan tlangval puakruk phawirang leh chak zet kha putar a ni leh ta.

A in thlak danglam hnua sakawr enkawltu hmaa a inlan leh chuan a ni pawhin a lo hrelo chiang kher mai, "Ka pu, Enge i duh?" a lo ti hu a. Chutah Waldena kha a ni tih a hre chhuak leh thuai a, "Nangmah lek hi ilo ni maw, puakruk phawirang deuh tia an lo sawi kha? Waldena lo ni reng che in," a ti leh ta a, a nui ta huah huah a.

Waldena chuan, "Engtizia nge zanin chu mi an va reh teh ṭhiap ve?" a han ti a.

Putara chuan, "Elpaso aṭanga Lone Wood Bank a dah tur pawisa tam tham tak misualin an lo rawk pek a, a um turin an kal ṭeuh alawm mawle! Mahse, khawchhunga awm ho pawh saloon ti lun tham chu an awm tho ang," a ti a.

Chu thu chuan Waldena thin chu a khei leh ta zak mai a. A nupui hnena zan dar sawm hmaa a haw loh tur thu a hrilh lawk te kha a ngaihtuah chhuak leh a. Putar hnenah chuan, "Bank pawisa chu vengtu an awm lovem ni?" a han ti leh a.

Putar chuan, "Pahnih an awm a, pakhat zawk chu kan marshal hi a ni a, pakhat zawk chu bank hnathawk a ni," tiin a chhang ta a.
"Marshal leh bank hnathawk chu an that ve ve em?"
"That ve ve chiah lo, mahse marshal chu mitthi tluk a ni ber e,"
"Enge i sawi awmzia?"
"Misualin an lo lambun a, sakawr tawlailir khalh tu chu an kaphlum nghal a, bank a hnathawk a pawh chu an phuar hlawm a, a ka hnawh chungin Elpaso khuaah an rawn kir tir leh a. Misualte chuan bank hnathawk te hnena an sawi dan chuan Marshal chu khaihlum an tum a ni awm e," a ti ta a.

Thil awmdan chuan Waldena chu a ti buai map mai a, Morris a leh Kenny a chu an in ṭhianṭha viau a, Tucson khaw bank pawh an rawk dun a ni si a, mahse tunah Kenny a chu thah tumin an man leh bawk si. Bank rawk tute kha chu Morris a leh Kenny a leh Dennis Hocka an ni chiang a, mahse tuna sakawr tawlailir suam tute hi tu te nge ni ta ang??

Waldenan a ngaihtuah vang vang hnu chuan thil imsuihkhawm dan chu a hethiam ta! Tawlailir suam tute hi Morrisa leh a hote an ni leh chiang mai. Marshal Kennya nen an in thurual leh pek a ni ang. Kenny a chu thah tum niawm takin an man vel anga, tumah hmutu an awm lo tih veleh an chhuah leh anga, chung pawisa te chu an insem tawh mai dawn a ni. Mipui ho lah chuan Marshal chu misual ho kut a thi ah an ngai mai dawn a ni. An thil ruahman dan chu a fing kher mai. Mahse Waldena chuan tudang ring lovin chutiang ngaihdan chu a nei hmiah mai a ni. A ngaihdan chu a lo diklo let der ve thei bawk. Mahse Waldena hian Morris a inti leh Kenny a inti hi a hriatchian tawh em avangin an intiamrual leh anih a ring nghet bur tawh a.

Zan dar 6 leh 30 chauh ala ni bawk a, Waldena chuan whisky han tauh rih tumin saloon pakhatah chuan a lut ta a. Sakawr enkawltu sawi angbkhan saloon chu alo lun hle thova.

Saloon chhunga lo awm te chuan kawngka a putar ni mai awm tak lo lut chu hmu awm pawhin an lang lova. Waldena chu bang hnung chhawn zawngin ṭhutna awlah chuan a ṭhu ta a. Chutah Whisky no a dawm chiah tihah kawmchar lama card khel mek, taangval hmelṭha tak chu a va hmu ta a. Tunge ni ang? Joel Dickens ngei kha a ni. Waldena zawngin Elpaso a rawn thleng a, a ni pawhin a zawng bawk a, mahse a aia ṭul dang neih avangin a la zawng tak tak hman lo zawk a ni. In zawng ve ve engtin tak in hmelhriat ang maw? Waldena chuan Joela a ni tih a hre chiang em em a, a ni erawh chuan Waldena a ni ang tih rin ngaihna reng a hre si lo.

Joela chuan card a khelh laia putar lo lut chu a melh leh ralh ṭhin a, a la hre ve reng tih a chiang a. Waldena a ni tih hre ngat se chu kut thing meuh in chibai a rawn buk tur hi a ni a. He putar hian a nunna alo chhanhim sak tawh a nih kha.

Saloon kawngkhar chu a rawn in hawng ta ṭual ṭual a, Gunfighter tih hriat zet chu a lo lut a, a hnungah midang an rawn inzui lut leh duah duah a, an rawn luh kim meuh chuan pasarih lai an ni. Chung ho chuan Joela lam chu an pan ding nghal nalh a.

Joela pawh chuan lo hmuh hmaih bik hek lo, a ṭhuthmun aṭang chuan a rawn ding chhuak auhva, a lam pana lo kal phei te chu a lo hmachhawn ta teu mai a. Mahse chuti khawpin a dinhmun chu hlauhawm mahse hlau leh zam hmel a pu tlat lo. Waldena pawh chuan Joela dinhmun derthawn zia chu a hre chiang kher mai. A chhan chhuah hmaa an thah mai chu a phal bik i khaw lo mai!

Chung ho chu Joela hmaah chuan an inzar pharh ta sung sung a. Rawn lut hmasa ber chuan Joela chu a vau ta a, "Joel, tunah hian i luman chu kan tel dawn a ni. Mi pasarih kan ni a, i pistol khan mu paruk chiah a pai a, in pe vat maila i tan a ṭha ang," a ti a.

Joela chuan zam bik map lovin, "Ka tana ṭha tur min duh pui a nih chuan chhuak leh nghal ula a ni mai," a ti ve ta khauh mai a.
"Fiamthu hun a ni lo, i inpe dawn nge i puakruk kha i chuh zawk dawn?"
"Thingzara khaihlum ai chuan silaia kah hlum ka duh zawk,"

Chu veleh Waldena chu a rawn inrawlh ve ta a, "Mi pakhat leh mi pasarih, mipa inbeih dan ava ang lo ve," tih pahin Joela lamah chuan a pen phei ta chhek chhek mai le! Chutah Joela dinglamah chuan ava ding kak ve ta hah mai a.

Bounty Hunter te chuan thinrim hachang ṭhial rap rap chungin, "Nang putar kha, thih i duh loh chuan lo inthiar fihlim rawh," an ti ta tuar mai a.

Waldena(putar) chuan, "Joela luman hi a mal a khawm thei in awm chuan in bei chhin thei ang, thih a hlau hleinem," a ti ta chhek mai a.

Chutah Bounty hunter ho chuan, "Thih i hlauh loh chuan.." tih leh an silai chuh chu an rual ta mai a.

Chu veleh Joela leh Waldena kawng zawn aṭang chuan a rawn de chhuak ta zawk mai a. Vawithum ve ve an hmet puak a, a vawilina chuan mi pakhat chu an kah rawn a ni ta ber a. Bounty hunter ho chu an che hman lo kher mai. Chutah Joela chuan putar hnenah chuan, "Ka nunna vawihnih min chhanhim sak ta! I chungah lawmthu sawi tur ka ngah ta khawp mai," a ti sap a.

Chutah Joela beng bul chênah a va hrilh ru a, "Waldenan a zawng che," putar chuan a va ti sa sa a.

Chu veleh Joela chu a meng phawk hra a, "Tunah khawnge a awm?" a ti vat a.

Putar chuan, "Mi rawn zui la i hmu mai ang," a tih chuan Joela pawhin rinhlelhna nei miah lovin a zui ve nghal mai a. Waldena chuan a mi zawn chu a hmu tawh a, Joela erawh chuan a zui chhuah mek chu Waldena a ni tih reng a la hre si lo.

Joela chuan, "Khawilam nge min pan pui dawn?" a ti a.
Putar chuan, "Waldena awmnaah ka hruai dawn che mawle," a lo ti mai a.
Joela chuan, "Sakawr pawh ka nei ve hleinem, San Antonio aṭangin relin ka rawn kal a..," a ti a.
Waldena chuan, "Keiman ka nei alawm, rei tak chu kan chuang dun thei mai ang," a ti a, a sakawr dahna chu an pan ta a.

Billy a chungah chuan an pahnihin an chuang ta a. Joela chu a hma zawkah a ṭhu a, Joela chuan, "Khawilam kawng nge kan zawh dawn?" an tih chuan Morris a ranch lam chu kawh zauh pahin Waldena chuan a sakawr chu a pan tir ta a.

Khua an chhuahsan lai chuan 7:30 chiah a ni a, hetihlaia Waldena hlim dan tur zia hi! A kawppui ber Morgan a aahin a theih loh san si a, chutihlaia amah tluk zet a puakruk phawi rang a kawp pui dawn ta a ni si a.

Km khat vel an kal hnuah Joela chuan, "Santa Fe a kan inhmuh hnu khan khawiah nge i kal?" a han ti a.
Waldena chuan, "San Antonio ka pan nghal," a ti mai a.
"Ramhnuaia i bukah khan ni hnih ngawt hmuh che beiseiin ka nghak che asin,"
"Engatan nge min tih?"
"Ka mi zawn ka la hmuhngei tur thu mi hrilh a, Waldena ka zawn lai mek anih si avangin a awmna i hriat ka ring a, a chanchin zawh chian che ka duh a ni,"
"Outlaw i ni si a, Waldena chuan a lo man mai che i hlau lovem ni?"
"Hlau ve thove, mahse thil awmzia ka hrilh vek hnuah chuan min puih duh ka ring tlat alawm. Min puih duh lohva min man a tum te anih hlauh chuan a tawpna ni a thleng ve dawn tihna a ni mai,"

Chu thu chuan waldena chu a ti sa zak mai a, mahse Joela thusawi chu a dik chiah tih a hre bawk si. Ani aiin a phawirang bik hauhlo tih saloon chhungah khan a hre tawh si a, mahse thil awmzia hrelo ni awm takin Joela hnenah chuam, "Thil awmzia i tih chu eng thil nge?" a ti ta a.

Joela chuan a pa thattu anih loh zia te, sheriff pawh kha a duh vang renga that anih loh zia leh Sheriff a ni tih pawh a hriat loh thu te, apa that tu pawh an awmpui Doherty a anih thu chenin a hrilh fai ta vek a.

Waldena chuan, "Tual thattu i nih loh zia leh tualthattu chu Doherty a anih thu chu Waldena pawhin a hre daih tawh asin," a han tih chuan Joela pawhin hawi let meuhvin a hnunga putar ni mai awm chu a en he haw a, samnleh hmuihmul pawh ṭuak bum tawh a ni si a. Walswna a ni tih remg a la hre hauh lo.

Rei tak ṭawng lova an kal leh hnu chuan Joela chuan, "Waldena awmna chu kan thleng dawn tawh em?" a han ti a.

Chutah Waldena chuan, "I thleng daih tawh alawm," a ti ta mai a. Joela chuan chu chhanna chu a ngaihna a hrelo hle mai a. A hnunga chuang ve putar chu en tuma a han leh hawi meuh chuan putar sam ṭuak bum kha alo ni ta awzawng lo mai le! Waldena diktak, puakruk phawirang hmingthang tak kha alo ni reng mai. Phawk ho hian mak ti em em in Joela chuan a en reng a, "Lemchan ilo thiam ngei mai, engatinge kan in hmuh hmassak berbkhan i inpuan mai loh?" a ti ta hlut mai a. A lawm lutuk leh mak ti chu sakawr aṭang chuan a tla ṭhelh nghe nghe a.

Waldena lah chuan, "Ka hriat ngailoh hnena ka inpuan mai chuan ka lem chanin awmzia a nei nang," a lo ti liam mai si a.

Joela chua Waldena hnenah ngen ti tih zawk mah hian, "Min ṭanpui duh tak tak ang maw?" a ti ve ngat a.

Waldena chuan, "Ṭanpui duh tehreng mai, mahse chuti mai chuan ka ṭanpui nghal thei lovang che. In awmpui tlangval Doherty a kha man chhuah hmasak phawt angai," a han ti ta a.

Joela chuan, "Tunah khawiah nge a awm tih reng ka hre lova, zawn hmuh a har viau ang," lungngaih hmel deuh hian a ti chuai ta raih mai a.

Waldena erawh chuan, "Kan hmu thuai mai thei a ni. Doherty a chu hmu leh la i la hria angem?" a han ti a.

Joela chuan khawvel hi vawi sawm pawh hel chhuak mahse Doherty a kha chu ka hai lo chiang viau ang," a ti a. A aw aṭang chuan a thinrim hle tih pawh a hriat theih mai a.

Waldena chuan, "A ṭha a nih chu, ka hriat sual hle loh chuan tuna kan pan mek hi Doherty a in a nih ngei ka beisei," a han ti leh a.

Joela chuan, "Ka hmuh hun chuan ava han chak dawn lo rua ngai em!" a ti nang nang a.

Waldena thung chuan, "I hmuh hunah chuan kut i thlak tur a ni lo. I khawih hlum mai chuan Court hmaa thiam chan tir tur che i nei dawn lo tihna ani ang a, i nun dan ngai bawk in i nung leh dawn tihna ani mai," a ti ta tlat thung a.

Morris a(Doherty) in lam pan chuan Billy chu an kal chak tir sauh sauh a, Joela chuan, "Nang nen intawng har deuh ila chuan kan Governor chuan a nunna a chan ngei ang. Tunah pawh hian keimah min hlauvin a ralmuang lo tawh teh ang chu," a ti ta phawng mai a.

Waldena chuan, "Chu!!! Governor chu thah i tum tihna em ni?" alo ti vat a.

Joela chuan, "Tum tehreng mai. Mahse ka tum lai velin kan ranch hlui lam ka va tlawh a, kan ṭhenawm nu in keimah min chhan chhuah tuma Walden an mi zawn thu min lo hrilh ta hlauh va, chuti ni si a keiin Governor ka lo thah leh si chuan ka che hnawk zo vek dawn a, ka insum leh hram zawk a ni," a lo ti a.

"Engatinge Governor chu thah i duh mai a?"
"Thil hrechiang uk si lova ka lu a lo zawrh vangin,"
"Thah i tum tih chu a hria em ni?"
"Tunah chuan a hre tawh ngei ang,"
"Engtin nge a hriat theih mai ang,"
"Keiman ka hrilh mawle. Lehkha ka thawn a, chu lehkhaah chuan fimkhur taka awm reng turin ka zilh deuh hlak a ni," Joela chuan a ti duh lek fang a.

Chutia an titi bawrh bawrh lai chuan Morris a ram chhung chu an lo lut der tawh a. Fimkhur takin Morris a in chu an pan ta zel a.

#######

Bung 8 (The action Joel Dickens and John Walden)
Lo chang rawh le....

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 28th, 2018, 6:39 pm

JOHN WALDEN
(The way to El-paso)

Author - Khawlhring Vanlalvena

Re-typed by - Ruatmawia Jahau

Bung 8

Action of Joel Dickens and John Walden

Anmahni chang tu an awm hlauh takin tih thu ah Joel-a leh Walden-a chuan Morris-a In chu an pan phei ta hriau hriau a. Chu In aṭang chuan bati eng a rawn chhuak raih bawk a. In bul an va thlen chuan sakawr aṭangin dim te hian an chhuk a, sakawr huanga sakawr an dah fel hnu chuan thawm dim em em in inchhungah chuan an in zui lut ta a.

Sitting room-ah chuan tumah an lo awm lova, bedroom kawngkhar chu dim te in an han keuva. Khumah chuan Kelly Corn-i chu lungngai awm fe hian a lo mu bam a. A ṭah nasat em avangin a mit te chu a sen ram a, a hmel chu a dâng bai mai bawk a. A hrehawm tawrh chu reilote la ni mahse a tuarna tih a lang reng mai a.

Walden-a te a rawn hmuh takah chuan hlim em em in a rawn tho vat a, "E, in lo kal chu ka van lawm em! Walden, i ṭhianpa hi khawia mi nge?" a ti nghal sawt sawt a.

Walden-a chuan, "Joel Dickens a nih hi. Morris-a chu a lo kir tawh em?" tiin a chhawn let ve zat a.

Walden-an Morris-a hming an lam rik veleh a hmela hlimna zawng zawng chu a bo leh nghal duak mai a. Lungngaih hmel deuh hian, "A lo la kir lo, Walden, khawngaih takin min ṭanpui hram rawh u aw.." tiin a ngen ta chul mai a.
"Ka thu i awih dawn phawt chuan ṭanpui tehreng ang," a ti ta a.
"Min ṭanpui duh dawn chuan Awih tehreng e," tiin a tiam ve nghal zat a, a lungngai hmel pawh a ziaawm leh ta deuh huai a.

Chutah Walden-a chuan lehkhapuan leh pen a dil ta a. Morris-a lehkha tur chu a ziak ta a; bank rawk tu Dennis Hock-a ziak ang in:-

Ṭhian duhtak,

Tunah chuan keichu mithi tluk ka ni ta. Tucson khaw bank kan rawk chungchang kha ila hre reng anga, khami kan thiltih avang khan Texas rama mi hlauhawm ber mai chuan ka hnu a rawn chhui ta a, tunah hian keichu man chhuahin ka awm ta ani. Mi rawn chhui chhuak tu John Walden chuan ka wanted hming ngeiin mi rawn ko nalh thei a, nang pawh tunah chuan a rawn chhui ve mek che a, i nihna diktak a hre tawh bawk. I wanted hming Jack Morris a nih te, Joel-a pa thattu i nih te pawh a hre vek tawh a, tunah hian nangmah bei tur che in a rawn thawk mek tih hria ang che. Tin he lehkha i hmuh rual rual hian hlauhawmna in a hual mek che tih i hre reng dawn nia.

Dam takin le, hremhmunah ka lo nghak ang che.

I ṭhian -- Dennis Hock (Jefferson)

Walden-a chuan lehkha chu a ziak a, a thlep a, Kelly-i hnenah chuan a pe ta a. "Morris-a lo haw hunah kha lehkha kha i lo pe ang a, lehkha i pek veleh Choka lamah i lut nghal tur a ni," tiin a hrilh nghal a.

Kelly chuan, "I sawi ang chiah chuan ka ti ang e," tuh pahin lehkha chu a la ta a.

Walden-a leh Joel-a chu bedroom-ah an lut dun ta a. Morris-a lo haw hun chu an chang ta a ni. Joel-a chuan, "He inah hian enge ka tih dawn chiah pawh ka la hre ve tlat lo?" tiin Waldena chu a han zawt sa sa a.

Walden-a chuan Morris-a chanchin zawng zawng, outalw hruaitu Jack Morris-a a nih thu te, Tucson khaw bank rawk tu a nih thu te, Elpaso aṭanga Lone Wood bank a dah tur pawisa tamtak phur tu sakawr tawlailir rawk tu a nih thu te, putar pakhat thata a fanu a neih luihsak(Kelly-i) thu te leh Morris-a inti hi Doherty-a a nih ngei a rin thute chu a hrilh fai ta vek a.

Joel-a chuan, "Awle, tunah chuan kan thil tih tur chu ka hre chiang ta, ka chak zawng tak a ni mai. Kelly Corn-i hi ama duh thu a pasal nei a ni lo i ti em ni kha(h)?" a han ti leh a.

"Ni e, Morris-a hian tihluihna in a nei chauh a ni. He nula hmelṭha tak mai chhanchhuah pawh hi ka chak ve reng reng mai," a ti ta sarh sarh a.

Chutia thil awmzia an inhrilh vel lai chuan sakawr ke pen ri an hre ta a. An ṭawng pawh a tawp ve nghal chawt a. Sakawr ke pen ri pawh chu lo hnai zelin Morris-a in zawn a thlen chuan pakhat aai a ni lo tih pawh a hriat theih a.

Reiloteah kawngkhar a rawn in hawng a, pa pakhat a lo lut a, mi pahnihin an rawn zui lut a. A hnuhnung bera lo lut chu Gunfighter tih a hriat hle a, Morris-a bodyguard a ni tih pawh Walden-a chuan a hre mai a. An pahnih chuan puanzar phen aṭangin an lo emthla reng a. Joel-an Morris-a a han hmuh meuh chuan thinrimna hlirin a khat ta! Kumhnih dawn lai vahvaih tir tu, wanted nih tir tu, a pa thata puh tu, mihring hlau reng reng a awm tir tu Doherty-a ngei chu inchhungah a raqn lut ta si a. Amah zang hian ani lawm ni thlaler a thi lek leka avahvaih kha!

Joel-a thinrim lutuk chu a insangmar ṭeuh a, mahse Walden-a thu lova inlan ringawt chu a duh si lo. Walden-a chuana beng bul te ah, "Doherty-a chu a ni em?" a'n ti sap a.

Joel-a chuan ṭawngkam khat mahin a chhang lo, thinrimna hlirin a khat a, a ṭawng chhuak thei lo. Walden-a chhanna atan chuan a puakruk kawm chu a zut heuh heuh ringawt a. Walden-a pawh chuan Joel-a chetdan aṭang chuan Doherty-a ani nge tih a hrechiang ta a. Joel-a hmela thinrimna hlir lo lang te chu a hmuh hmaih hek lo.

Mi pathum te chu sitting room ah chuan an ṭhu hova, hlauhawmin a hual vel tih reng hre lovin whisky an thli kauh kauh hlawm a. Morris-a chuan a ṭhianpa hnenah chuan, "Kan hlawhtlin lawm nan" tih pahin an no ve ve chu chawi kangin an inkhak tir bap a, chutah nui vur vur chungin an in ta a.

Morris-a ṭhianpa chu Walden-a chuan ahrechiang kher mai. El-paso khaw marshal Kenny-a ngei kha a ni tih chu tuma hrilh angai lo. An remruatna pawh a fing kher mai. Marshal chuan bank pawisa phur chu a hruai a, anni lahin rinhlelhna reng an nei si lo. Marshal chuan a ṭhian Morris-a leh outlaw rualte thurualpuiin an lo lambun a, chutah amah chu thah tum niawm takin an kap vel a, bank hnathawk chu thil awmzia sawi thei turin an chhuah hlauhva. Bank hnathawk chuan mipui ho hnenah Marshal chu misual hovin thah turin an man tih thu a sawi a, anni ho lah chuan rinhlelhna nei miah lovin Marshal chu thi tawh ah an ngai nghal mai a ni. An remruatna chu a fing hle mai, mahse Walden-a chuan a hmakhalh tho mai.

Whisky an in ho lai chuan Morris-a chuan phur fe hian an aawisa ruk zawng zawng te chu dawhkanah a bun ta ruih mai a. Chutihlai chuan eisiamna pindan aṭangin Kelly-i chu a lo kal a, Walden-a lehkha ziah kha Morris-a chu a pe ta a. Morris-a chuan phun nungbnung chung hian, "Tun ang hunah te eng lehkha nge lo thleng ta?" tih pahin lehkha ip chu a hawng a, a keu pharh a, a chhiar ta a.

Lehkha a chhiar zawh meuh chuan a hmel chu hlauhna hlirin a khat ta a. A hlim chhung a rei lo kher mai. Aw vin fe hian, "Lehkha hi tu rawn ken nge?" a ti ta tuar mai a.

Kelly-i chuan choka aṭang chuan hlau tih hriat tak hian, "Ka hriat ngai pawh an ni lo," aw khur dar dar hian a rawn ti a.

Morris-a chuan, "Lehkha rawn keng tu te chu tunah khawiah nge an awm?" a han ti leh ṭhat a.

Chutah aw thum chhuk hian pindan aṭang chuan, "Heta hi kan awm," tih pah chuan pindan puanzar chu a rawn in hlim nghal lawp mai a. Walden-a te pahnih chuan puakruk kausa hum reng chung hian an rawn lamg dun ta ṭhawt mai a.

Walden-a bawk chuan, "Doherty, ka ṭhianpa nen hian han in hmelhriat ve ula," a ti ta chhek mai a. Joel-a leh Doherty-a chu an inhrechiang dun bawk a, in hmelhriat hranpa an ngai lo kher mai.

Morris-a Gunman rawih chuan a puakruk an chuh ve khanglang pek a le, Walden-a leh Joel-a puakruk chu a puak rual ṭhawt a, a thal rang kher mai. Chutah Walden-an Kenny-a chu a tin a, Joel-an Morris-a chu a tin ve thung a. Chutah Joel-a chuan thinrim hachang ṭhial rap rap chungin, "Doherty, mi tlanbosan tawh dawn lo tih hi hre rawh. Nangmah vangin ka lumanah dollar singkhat an chhiar a, ka pa phuba laksak tur ringawt pawhin i tan thihna a tling a ni a, keima phuba nen phei chuan..." a han ti a, a thinrim lutuk chu a ṭawng khur dar dar thei hial a ni.

Walden-a pawh chuan Marshal chu a vau ve chhak chhak nghal bawk a, "Wilton, marshal badge phen aṭang outlaw pawl i din a, i hming lem atan 'Kenny' i in vuah chawp bawk a, i hming lem hian keimahah chuan kori a tu lo khawp mai," a ti ta siah siah a.

Kenny-a leh Morris-a te chuan tunah zet chuan ṭawng ngaihna reng anbhre tawh lo. An puakruk chuh ngam lovin sang takah an phar ta a. Chuveleh Walden-a chuan an gunbelt chu a phelh sak a, an ke a phuar leh a, pawnchhia in an ka a hnawhsak ta hmiah bawk a. Joel-a chuan pistolin a la tin tau mai si a.

An pahnih chuan an chhipsamah ṭhamin Walden-a chuan an pahnih chuan dimna nei map lovin pawnah chuan a hnuk chhuak ta bawp bawp mai a. Joel-an hnunglamah chhawmin dim baksak lovin a chhir pah ṭhuai ṭhuai a. An na ti lutuk chu an ṭhen chawk chawk a, au thei lah anni hek lo, chutah sakawr huang aṭang sakawr pahnih an kai chhuak a, sakawr tawlailir an la chhuak bawk a, an pahnih chuan dimna nei map lovin Morris-a in ti Doherty-a leh Kenny inti Wilton-a te chu an theh kai dunta ṭhuai mai a.

Chutah Walden-a chu tawlailir chhungah lutin Doherty-a ka a hnawhna chu a phawrh a, a puakruk dawt a rawlh ta ran mai a, a kau nghal rap bawk a, "Doherty, tunah thudik tak sawi itan a hrisel ber ang," a ti ta chher chher mai a.

Doherty-a pawh chuan, "I zawhna apiang diktaka chhan zel ka tum ang e," a ti khur ta dur dur mai a.

Chutah Waldena chuan Outlaw camp awmna chu a zawt ṭan ta a. A ni pawh chuan a hrilh ta vek a. Walden-a vek chuan, "Dawt i sawi vaih chuan i mawhphurh a ni tih hria ang che," tih pahin Doherty-a ka chu a hnawh sak leh ta hmiah mai a.

Walden-a chu a chhuk a, inchhungah chuan a lut leh a, dawhkana pawisa vum hnur mai chu bag pakhat chhungah a hui lut ta burh a, bedroomah a lut leh a, Doherty-a thingrem a han hawn chuan Tucson kha bank aṭanga an ruk tih hriay reng mai, pawisa chu a lo awm leh ruih bawk a. Chung zawng zawng te nen chuan pawisa chu put tham lawih hi a ni a.

Chutia Walden-a che vel lai chu hmuhnawm ti takin Kelly-i leh Joel-a te chuan in kuah rial chungin an lo thlir thung a. Walden-an Joel-a te inkuah rial an hmuh chuan a nui sak a, an vawikhat inhmuhna mai a si a, chuti tak a an inngaina nghal thei chu mak pawh a ti a ni. A thik deuh ta mai em ni? Hnai lo mai, ani chuan Lucy Kane, tleirawl malvar hai mai a nei ve thova, engah nge Joel-a te chu a thik mai bik tehlul ang ni?

Tichuan thlasik zan khawthiang vuk maiah chuan Doherty-a in chu an chhuahsan ta vek a. Walden-a chuan tawlailir chu a khalh a, a hnungah chuan Joel-a leh Kelly-i chu inkuah rial chungin sakawr pakhat chungah an ṭhu dun bawk a. Walden-a chu a han leh hawi a, Joel-a leh Kelly-i chu tudang ngai lovin indim tak, indim lo angreng tak si hian an lo inkeih dun mawlh mawlh mai a. Chutah zet zawng Walden-a chuan mal bik riauvin a inhria a, a hmangaih Lucy kha a hrechhuak a, a ni khan lo hmangaih ve reng tak maw? tih te ngaihtuah pah neuh neuh chungin tawlailir chu a khalh sauh sauh zel a.

El-paso khua chu an thleng ta a chawl muang miah lovin El-paso khua chu an tan tlang a, hmarlam zawnga kalin Morgan-a te ranch lam chu an pan ta ngat ngat a.

Morgan-a te ranch an va thlen chuan zan dar 12 a ri ṭep tawh a. Gate veng chuan a lo hmuh chuan a ti ding a, mahse WAlden-a te a hmuh takah chuan hlim em emin hung chhungah chuan a luh tir ta a.

Walden-a chuan tawlailir chu a ti dinga, Doherty-a leh Wilton-a te chu a theh thla ṭhuai ṭhuai mai a. Gate vengtu pawh chuan Walden-a mi man te chu a lo thlir ve reng a. Tutenge an nih tih erawh chu a hre mai lo. A han enchian chuan pakhat chu El-paso khaw Marshal a ni tih a hre ta a. Walden-a hnenah chuan, "Pakhat hi chu marshal Kenny-a a ni lawm ni?" a ti ta hau mai a.

Waldem-a chuan, "Marshal chu ani na meuh mai e, mahse Kenny ni lovin Wilton a ani a," a han tih chuan Gate vengtu chu a ner nang nang a. Walden-a vek chuan, "Tikhan zanin chu an pahnih khan inlo kawl dawn nia," a ti ta a. Gate vengtu pawh chuan phur fahran maiin a ṭhiante chu a kai thova, Walden-an outlaw hotu lawk pahnih a man thu chu a hrilh ta lawng lawng mai a.

Bunkhouse aṭangin cowboy ho chu an mutkawr nen an rawn zuang chhuak ta sup sup a. Walden-a an hmuh leh avang chuan an hlim hle tih an hmel aṭang pawh chuan a hriat kher mai. Tawlailir hnungah sakawr pakhat chunga nula leh tlangval chuang dun erawh chu an melh hrek hrek hlawm a. Walden-a hnenah chuan, "Morgan-a i rawn hruai ve nange?" an ti ta a.

Walden-a chuan, "Tucson khuaah a cham rih, thlakhat hnuah chuan a lo haw ve leh mai ang," a ti mai a.

Cowboy ho ri laih laih thawmah Lucy chu a rawn harh ve a, pawnah a rawn chhuak ve thuai a, a mutkawr sendang pan tak chhanah a pian nalh zia chu a lang chiang kher mai. Sakawr in lama cowboy ho an rik luih luih lai chuan Walden-a chu a rawn pan a, insumna nei miah lovin a awmah a rawn bei nghal thaawp a, "Bonny, (John) i lo kir leh chu ka van lawm em! Min kalsan tawh suh," a ti malh malh nghal a.

Lucy ngenna chu chhan har a ti kher mai. A hma lawk khan mal em em in a inhria a, Lucy hian sirah a hnawl mai te a lo hlau rum rum kha a ni a, mahse tunah sira a hnawl loh zia chua hriat a, kalsan tawh lo turin a ngen zawk a ni.

Walden-a chuan Lucy chu duat takin a chul heuh heuh a, "Lucy, tunah chuan tihtur ka ngah em mai, ka awmpui hman rih tlat lo che a ni. Nakin lawkah zanin ngeiah ka rawn kir leh ang," a ti ta a. Lucy kuahna chu phelhin Cowboy ho awmna chu a pan ta a.

Cowboy ho hnenah chuan hruizen tam tawk a dil thung a, an ni pawh chuan a telin an rawn pe a, "Engatan nge i tih?" tiin an zawt hial a.

Walden-a chuan, "Mihring.. a, mihrimg pawh tling lo, sa zu hlinna tur a nih hi," a tih san mai a. Chutah pawnchhe tam tawk a dil leh a, an ni pawh chuan a chhan hriatpui miah lo mahse thuawih takin an rawn pe leh mai a. Walden-a chuan hruizen leh pawnchhia chu bagah chuan a hnawh ta mawlh mawlh mai a. A leng bak chu Joel-a lamah chuam a theh phei a, a ni chuan a lo chawng chat a, sawi set set lovin bagah a hnawb ve mai a.

Walden-a chuan Lucy chu a pan a, "Lucy, Kelly hi kan rawn kir leh hma chu lo awmpui rawh," a han ti a.
Lucy chuan, "Tehreng mai, i thu vek a lawm," nuih seih pah chuan a lo ti ve mai a.

Walden-a chuan Lucy'n a melh ralh chu a hmuh hmaih hauh lo, an fawp zauhva, chutah tawlailirah chuan a lawn leh ta a, Walden-a leh Joel-a chu outlaw ho camp panin an inkhalh chhuak leh ta pur pur mai a.

Doherty-an outlaw ho camp panna kawng a hrilh chu an va thleng ta a. Walden-a chuan a sakawr chu a pawt ding a, tawlailir aṭanga chhukin an thang hlana lo kal bo miah lo turin kawngsirah chuan a thlung ta a. Tichuan outlaw ho camp panin Joel-a nen chuan sakawr pakhat chungah an chuang leh ta auh auh mai a.

Outalw ho camp panna chu an zawh ta ngar ngar a, reife an kal hnu chuan ngaw karah an lut ta a. Ngaw chhung chu thim mup mahse Billy chuan a hai lo kher mai. Lei hnim dun dun chungin a pute chu a kalpui zut zut zel a.

Ngaw chhung thuife an kal hnu chuan Billy chu rim hriat nei ni awm taka hnar len vut vut chungin a ding ta chut a. Chuveleh Walden-a te chu an zuangthla vat a, an pistol an phawi nghal zawk a. Fimkhur takin ke lawng chuam chuan an veh phei ta hriau hriau mai a. Thui pawh an kal hma in an hma lawka mei eng chu an hmu ta a. Mei engah chuan outaaw ralveng pakhat hi a vei thauh thauh bawk a.

Anni pahnih chuan fimkhur em em in mei eng lam chu an pan phei zela, ralveng chu hlam nga velin an la hlat tihah an ding ta a. Walden-a chuan a boot kara chemte chu a phawi a, a vawm ta fua mai a, ralvengtula tukkhumah tak chuan a tkum thawih a, rawl chhuah hman miah lovin a tlu ta hual mai a.

Chuveleh an tlanphei nghal vat a, chupa ruang chu an hnuk sawn a, sakawr awmna lamah chuan an zalh ta a. Outalw buk lamah chuan an phek phei ta hriau hriau mai a. Walden-a chuan zawite hiam, "Ti hian ral veng angin lo awm la, buk chhungah sawn ka va lut anga, a lo chhuak a piang chu i pistol kawm khan i lo chhu thlu tawp zel dawn nia, silai hmeh puah erawh zawng a chi loh ang a ti sa sa a.

An meichhem chu Walden-a chuan a thaidarh vek a, a thim ta hmiah mai le. Chutah bukah chuan a lut den den a, outlaw pawhat chu a va sawi anwk nawk a, "Ṭhianpa, i duty a hun e," a ti a. Chupa chu hreh hmel zet hian an rawn thova, in nuai chut chut chungin buk pawnah chuan a chhuak ta a.

Chupa chu Walden-a chah lawk ang ngeiin Joel-a chuan a lo chhu tlu tawl mai a, thawm chhuah lo chuan Joel-a chuan pawnchhiain a ka a hnawhnghal hmak a, hruizenin a phuar nghal mawlh mawlh a.

Walden-a chuan Midang pakhat an bum leh a, chupa pawh chu pawna a chhuah veleh a hmaa mi ang bawkin Joel-a chuan a lo tukthlu leh hmiah mai a. Chutiang zelin sawm lai chu a bum chhuak sṭ pakhatina lo ṭingmit hmiah zel a.

Walden-an pakhat a han kai harh leh a, chupa thung chuan, "Tunge mi khawih?" a lo ti hluk a.
Walden-a chuan, "I duty a hun e," a han tih chuan, "Ka duty zo chiah a lawm, zan khatah vawihnih hnih ka duty ngai hleinem," a tih tak zel avamg chuan tihdan ngaihtuah a ṭul ta tlat! Walden-a chuan a chemte a phawi a, tlum thawihin a chum ta hmawk mai a.

Walden-a chum hlum pa bula mi chu alo harh veleh ta si, "Ral ral ral" tiin a a u ta chul mai a. Chupa ngei pawh chu a au reilo kher mai. Walden-a chemte chu a lum leh thawih a, mahse chupa authawm avang chuan outlaw dangte chu an rawn tho ta sung sung a. A thim em avangin an in hmu hlei thei si lo. Walden-a pawh chuan an tho ri sung sung chauh chu a hria a, kah tur ber a hmu thei tlat lo. Buk chhunga awm reng chu a hrisel lo tih hriain Walden-a chuan kawngka lam pan a tum a. A thim avangin a awmna lai hre thei tawh hek lo, a rinna lai lah chu a ni der si lo. A tihngaihna hrelo chuan bang chu a tlawh hawng ṭhuai a, tah chuan a zuang chhuak ta nawlh a.

Pawn a thlen veleh a bawk nghal rawp a, Joel-an a kap ang tih a hlauh avangin, "Joel, keimah ka nia," a ti pah ṭhawt a. Outlaw ho chuan an silai an kau ri rup rup hlawm a. A thim si a, inhmuh theih lah a ni si lo. Walden-a chuan an hlawhchham a hnai hle ani tih a hria a, hlawhtlinna kawng awmchhun chu buk hal hluah a, a lo tlanchhuak hmasa apiang kah chu a ni ta. Mahse hal turin tunge nawalh nawt ngam ang.? Nawh en chu thihna ani tih lah a hrechiang em em mai si a. Chutah buk bang vel chu chhawl leh buhpawl vek a ni tih a hre chhuak ta thut mai a.

Chutah a pistol kawhmawr leh buhpawl chu a insiktir ta sauh sauh a, a hmetpuak ta ṭhuai mai a. Chu veleh a let nghal tawp tawp a, a piah deuh thimgbul phenah chuan a biru ta a. A hisap ang ngeiin a pistol a hmeh puah chiah khan zen rawn zit phat khan buhpawl chu a kangkai ta a. Buhpawl leh chhawl te chu a ro ṭha tawh bawk a, reiloteah a alh t hluah mai a.

Outlaw ho chu ṭe chul chungin an rawn zuang chhuak a, ṭe chul chungin meialh engah chuan an tlan kawi zawr zawr mai a. A rawn tlan chhuakte chu Joel-a chuan lungpui phen aṭangin a lo kap thlu nghauh nghauh mai a. Pawn lama rawn tlan chhuak chu Walden-a chuan thingbul phen aṭang chuan a lo thal ve leh ṭhuai ṭhuai mai bawk si. Buk bang hnim karah chuan an tlan lut ta nuk nuk a, Walden-a chuan a pistol a kap ruak ta.

Pakhat zawk a phawi leh a, a hmet puak zui nghal zawt zawt a, chutah an sahimna zawnga tlanchhuak te chu an tlu leh ta phawk phawk a. A tawpa tawpah mi panga la dam te chuan an ban sang taka pharin an silai an paihthla ta nge nge a.

Joel-a chu a bihrukna lungpui phen aṭanga lo chhuak in an silai te chu a rawn khawm ta nghauh nghauh va, chuti chung chuan Walden-an a kah thluk te chu la dam an awm takin tiin a pistolin a tin kual ve reng a. Mahse tumah che eih pawh an awm ta lo.

Chutah outlaw la damte chu an ṭingmit ta vek a, an inkah hmaa an kutthlak takte zawng nen anmahni sakawrah ṭheuh phuarhlawm tlat chungin an dah ta a. Ngaw kar aṭang chuan an kai chhuak ta duah duah a. An sakawr tawlailir dahna an va thlen chuan outlaw ho chu an sakawr aṭangin an hlangthla a, tawlailirah chuan an vawm khawm ta ruih mai a. (For a few dollars more te pawh min ti hre chhak zawk mai-Rj)

Joel-a chuan tawlailir chu a khalh thung a, hma a hruai ta nghal a. Walden-a chuan hnu a dawl a, An hnathawhah an hlawhtlin em avang chuan rilru hlim takin a faifuk hlerh hlerh a. Lucy Kane i te ranch lam pan chuan an in khalh ta pur pur a.

Lucy te ranch an va thlen chuan khua a var der tawh a, gate chhungah chuan an inkhalh lut ta a. Joel-a te pahnih chuan an mi man te chu sakawr huangah anbhnuk lut nawk nawk hlawm a. An hnuh luh kim chuan pawn lam aṭangi an kalh hnan ta hmak a. Lucy te inchhungah chuan mutmu tuah ve tawh turin an lut ta a.

Joel-a chuan pindan hrang hrang chu a enkual dan dan a, chutah Lucy-i riahna pindanah chuan alut ta a, kawngkhar chu a kalh nghal hmak a. Walden-a pawh chu mikhual pindan ruakah chuan a lut ve a, outlaw hote an man fai vek tawh bawk a, sakawr in a riah leh kher kher a ṭulna a hre tawh bik lova, a thawmhnaw chu a phelh mawlh mawlh a, khumah chuana let ve nghal tawp a. A pistol erawh chu a mu thun khah diamin lukham hnuaiah a dah thung a.

Walden-a chu a hma zankhua maia sakawr chunga a lo chuan tawh bawk avangin a mutui hle a ni ang, zing ni chhuah ut tawh pawh chuan a la hnar sek sek mai. Cowboy ho chaw eikham hnathawka an liam vek tawh pawh chuan a la harh ta chuangblo fova.

Fehrehsan vel a lo nih chuan Walden-a pawhin mut a kham ve ta a ni ang, a rawn harh ve ta hlawl mai a. Chutihlai chuan a mutna kawngkhar chu a rawnin hawng de de a rang zetina lukham hnuaia a pistol chu a la vat a, hum ran chungin a puan chuan a in khuh ta a. Tunge a riahna pindana rawn luh tum ve ngawt chu tiin inring tak leh arpui mitmen deuh suar suar chung hian a en reng a. Chutah a rinloh deuhin Lucy chu thawm dim takin a lo lut ta ṭhem ṭhem a, Walden-a chuan mak a ti kher mai. Lucy chuan enge a rawn tih dawn? Amah that tur nise pistol emaw chemte emaw a keng awm si a.!

Lucy chuan eng nge tih a tum teh reng tih hriat tumin a nghar-mut ta a. Lucy lahin chhunglam aṭangin kawngkhar chu a kalh leh hmiah a, Walden-a lamah chuan a phei ta dën dën a.

Lucy hi kut ruak ringawt chuan a rawn lut hauh lo mai. Khawvela ralthuam hlauhawm ber, lal leh mi huaisen tak tak te pawh tukdawl theitu hmanrua a rawn paipawn tlat a sin! Chutah Walden-a awmah chuan a bei thlawp a, lung chim takin a fawp ta vawng vawng mai a. "Oh, Bonny, min hmangaih ve lovem ni? Kan inṭhen ṭep tawh si a, nang lah tui takin ila muhil bawrh bawrh thei si. Aw ka duhlai, kei chuan zan mu reng ka chhing theilo a sin," a ti a.(John tih hmingpu hi Bonny tiin an ko ve chawk a ni. Amak reuh mai mai -Rj) Walden-a chu a harh ve tawh a ni tih reng a hre lo. Muhil biakin a be mawlh mawlh a.

Lucy chuan duhthawh takin a fawp mawlh mawlh a, a muhil reng emaw tiin a hmangaih thu chu an hlan leh ta malh malh a, "Duhlai, tuna i buanga ka fawh te hi rawn hreve la ka van ti em! I muthilh lai ko chuan kei tejlul hian i chungah tih theih lah ka nei ve si lo. I ṭangnema ka bei lai te hian duhten min han pawm ve la aw," a ti ngaih mai a.

Walden-a pawh chu a insum reng thei ta bik lo. Thawklehkhatah Lucy chu a rawn pawm ve chawt a, fawh ve mai an tum a, mahse Lucy chuan a lo duh ta awzawng lo mai. Engatinge Lucy chuan Walde-a pawm chu a duh tak tlat loh?
Tun maiah pawh khan a pawm hle hle a beisei thu a sawi a ni lawm ni? Mahse chuti teh thuta Walden-an a rawn kuah chu a hrethiam lovin a ngaitheilo a ni. Muhil biakin a bia a, a ni lah a muhil si lo.

Lucy chu a zak ngawih ngawih a, "Walden, i zak lawm ni? Min thlah rawh," tih pah chuan a chum taih taih a.

Walden-a lah chuam a pawm nghet sauh sauh a, "Zahte chu sawi teh suh, ka pindanah i lo lut a, ka chungah i rawn bawk a, min rawn fawp mawlh mawlh a, chutah ka lo kuah ve vang che in ka zak ang maw? I thusawi zawng zawng te kha ka hre vek ṭang der reng reng suh," a ti ve tlat mai si a, a ngawngah a kuah bet a, a fawp ve ta mawlh mawlh a.

Lucy zak leh hlim bawk si chu a sen ap ap a. Walden-an a fawh lai te pawh chuan ṭan ngaihna reng a hre tawh bik lo. Lungchim tak chuan a fawp let ve ta nge nge a.

Rei tawk an infawh hnu chuan Lucy chuan a hmui chu a la sawn ta a, "Ka lo luh lai khan ngatinge i lo muthilh der reng reng," a ti ta ngawt a.

Walden-a chuan, "Ka muthilh der loh chuan engmah sawi ngam dawn si hek lo che," a ti ve ta khauh a.

Chutah Lucy chuan Waldena awma bei thlem pah chuan, "Bonny, min kalsan tawh suh aw, kumkhuaa i kianga awm hi ka duh ani," a han tih chuan Waldena chuan chhan ngaihna reng a hre lova, duat taka kuah pah chuan a chul heuh heuh ringawt a.

Walden-a, hmeichhe hmaa la nem ngai reng reng lo pawh Lucy hmaah chuan a zawr nem hnup tawh mai a. Texas rama mi rura leh hmingthang, outlaw ho in an hlauh em em hmel pawh a pu tawh lo. Lucy chuan zawi te te hian, "Hmangaihna awmzia hi ka lola hre ngai lova, ka nu hnenah a awmzia min hrilh turin ka ngen ṭhin a, ka nu chuan min hrilhfiah ngaihna reng a hre si lo. Mahse nang i rawn lan takah kha chuan ka hriat ngai hauh loh chu hrilhfiahin a awm ta ani. A awmzia hrilhfiah tura ka nu hnena ka ngen chu nangin ngawi rengin mi rawn hrilhfiah ta a ni. I rawn lan chiah aṭang khan ka thinlung chu hmangaihnaa hliamin a awm a, chu hliam ti dam tur chuan nang chauh lo chu tumah an awm lo," khur der der chung chuan a ti sep sep a. Walden-a erawh chuan engmah a la sawi ve chuang lova.

Lucy mangang lutuk chuan, "Walden, min hmangaih ve lovem ni?" a ti ta ngawih ngawih mai a, a ngui riai ta mai le! Walden-a lah chuan chhan ngaihna hre der si lo, 'Ka hmangaih che' han tih chu a harsa viau em ni? Mahse a hrawkah chuan engemaw hnawjtu a awm tlat a, a ṭawng chhuak thei lo nge, a ṭawng duh lo hrim hrim?

Lucy chuan beidawng deuh hian, "Walden, i tan tlinna reng ka nei lovm ni? Ka thinlung, tuma hliam la tawk ngailo chu i rawn hliam sauh sauh a, min ngaihsakna nei hauh lovin min kalsan leh mai i tum em ni? A pawi love, a pawi lo, nang chunhlim takin liam la, kei hmeichhe khawngaihthlak tak hi min rawn ngaihtuah reng reng suh ang che. Khawiah pawh awm ila ka thinlung chhungril bera ka hmangaihna hi chuan thli ang mai ii i kalna apiangah a umzui zel dawn che tih hi chu i hre reng dawn nia. Nangin sirah min hnawl mah la, thlangkhuan dima zamual ka liam hnu thleng pawhin ka hmangaihna che hi chu a chuai chuang lovang tih hi hre bawk ang che," a ti ta zel a, a mittui chu a tla ta zawih zawih mai a.

Lucy mittui luangliam chu Walden-a biangah te chuan a luang ve ta ngiah ngiah a. Walden-a chuan chu nula aw tliang mawi tak mai chunhnar harsa a ti ngei mai. Amah hmangaih let ve turin mittui sur zung zungin a ngen a, a hmangaih let ve theilo anih chuan umzui a tum hauh lo tih a hriat laiin a hmangaihna erawh chuan a umzui zel dawn si a. Walden-an a hmangaih ve ki a nih pawhin pasal dang neih a pawi ti hauh lo tih a lang chiang a, mahse pasal a neih hnuah pawh Walden-a chu a la hmangaih reng dawn anih chu!

Walden-a chuan Lucy i ṭawngkam chu a han ngaihtuah ṭhin a, thu inmil lo tak, mahse in mil thlap si a ni vek mai. A thusawi reng reng chuan hmangaih let ve turin a sawm a, a hnawl nghal chu a ni bawk tih pawh a hria. Chu ṭawngkam chuan Walden-a chu a cho hliah hliah mai a ni. Hmangaih let ve turin a a sawm a, a theilo anih chuan umzui chu a tum hauh bawk lo.

Walden-a chuan Lucy beidawng leh inhnit hlap hlap hmel chu a en ṭhin a, minit tin mai chuan a duhawm tial tialin a hria a. Lucy chu a hmangaih ve em em a, mahse a dinhmunah hmeichhe ngaihtuah chi a ni rih si lo. In leh lo pawh a nei lova, misual ho beih nana a pistol, rang tak taka phawi mi ani mai a, he nula duhawm lutuk te ang han hruai zel na chi a ni mawlh lo.

Chutah Lucy chu a pawm bet ta thlawp a, "Lucy, bawihte, khawvela hmeichhe sang tamtak ai pawhin ka tan i mawi ber, 'ka hmangaih che' tih hian ka hmangaihna che chu a tilang zo lo mai pawh ni lovin a ti nep zo hial dawnin ka hria," tih pahin a fawp ta vawng vawng a.

Walden-a chuan Lucy chan tur chu a dawn ṭhin a, a nu in a thihsan tawh a, a nau lah outlaw ho beih a thlang zawkin an in a chhuahsan si. A pa lah a damchhunga enkawl ngai tur a ni ta bawk. Chutihlaiin a hmangaih berin a lo hmangaih let ve loj phei chuan... Engkimah a hriatthiampui em em a, chu chuan khawngaihna a neig tir a, chu chuan lainatna, lainatna chuan hmangaihna tuifinriat zau takah a hruai lut ta a ni. Hmangaihna tuipui fawn hlup hlup chuan a rawn khuh ṭhin a. Walden-a leh Lucy chu nghet taka in kuah chialin hmangauhna tuifinriat thuk takah an pil dun ta vawng vawng mai a.

##########

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 28th, 2018, 6:40 pm

JOHN WALDEN
(The way to El-paso)

Author - Khawlhring Vanlalvena

Re-typed by - Ruatmawia Jahau

Bung 9

Walden-a leh Joel-a chu El-paso aṭangin San Antonio panin rel ah an chuang ta a. An bulah chuan an mi man 15 lai mai chu an let phung bawk a. Joel-a chuan, "Walden, wanted ka ni a, court ah ka din a ngai ngei dawn si a, thiam ka chan si loh chuan ka thihna hmun ka pan mek tihna a ni lek lovang maw?" a han ti a.
Walden-a lah chuan, "Thiam i chan loh miau chuan thi tur chu i ni mai dawn lawm ni?" a ti awlsam then a.
"Chuti chu San Antonio ka pan a ṭulna aawm em ni?"
"Thiam i chan loh chuan tih thil mai a nia. Thiam i chang maithei asin,"
"Tualthah thu pahnihah mawh ka phur a, ka tan chuan thiam chan a harsa viau lovang maw?"
"I pa kha i thah a ni lo a ni lawm ni?"
"A dik alawm mahse sheriff ka that tlat si a,"
"I sheriff thah kha misual ani lovang tih i sawi thei em ni? Lawman pawh nise misual a nih miau chuan Dan in a humhalh chuang lo,"

Chu thu a hriat chuan Joel-a chuan mak tih hmel fe hian, "Sheriff kha misual i tihna em ni?"
a ti hau mai a.
Walden-a chuan, "Chutiang vel chu a ni. I sheriff thah kha ka ringhlel tlat a i kah hnu khan ala thi mai lova, amah hmu tu mipui ho hnenah chuan silai ri hriaa kawngkhar chhu chhia a inchhunga lut angin a in sawi a, mahse ka enchiang a, chutiang chhia awm pawhin a lang tlat lo. Engpawhnise Sheriff leh Doherty a inthurualin i pa kha an that pawh a ni mahna! Doherty-a kan man tel bawk a, amah hian a sawifel vek mai ang," a ti awlsam leh ta then a.

"Nih phei chu ani viau a, mahse ka la thaamuang thei zan chuang lo," Joel-a chuan a ti leh hram a.

Walden-a chuan, "Lungngai reng reng suh, United State hian pawisawilo te chunga kutthlak theihna dan a nei lo reng reng. Court a i din hunah pawh thuhretuah ka ding ang a. Khaihlum tur che a an rem pawh pawhin keimah min khaihlum hmasak phawt a ngai ang. Zam reng reng suh. Kei hi mihring ka nih chhung chuan an khaihlum hauh lovang che," a ti ta hmiah mai a. Joel-a pawh a thlamuang sawt hian a lang a.

Walden-a te cguanna rel chu nikhat leh zankhat chawl lovin a tlan a, a nihnihna tur chhun lai takah San Antonio khawchhung chu an lut ta ruau ruau mai a.

Station an thlen chuan Walden-a te chuan an mi man te chu an kai chhuak duah duah a. Joel-a chuan, "Khawilam nge kan pan dawn?" a han ti a.
Walden-a chuan, "Governor chenna in" a lo ti mai a.
"Governor chu a office ah a awm dawn lawm ni?"
"Governor hmuh hma in tihtur ka nei tlat alawm," Walden-an a tih takah chuan Joel-a chuan a ngaihna a hrelo kher mai. Governor in a kal tum si, mahse Governor hmuh tum ni si lo, eng tak chu ti dawn ni maw?

Governor in an va thlen chuan a nupui a lo awm a, Walden-a te a rawn hmuh chuan engemaw sawi tum hian a han ang zuau a, mahse engmah a sawi hma chuan Walden-a chuan a samah a ṭham lawk a, a kutah kawl a buntir ta hmiah mai a. Walden-a chuan, "Engmah sawi suh ngawi rengin min zui ringawt mai rawh,"a ti zui hmiah a, pawnah chuan a hruai chhuak ta a. Joel-an an mi man te chu a kai duah duah a, Walden-a chuan a hnung berah Governor nupui chu a rawn hruai bawk a.

Governor office a thlen chuan an lo veng uluk hle mai a, Joel-a lehkhathawn kha Governor chuan a lo hmu tawh ngei tih pawh a chiang hle mai a.

Gate vengtu chuan Joel-a chu rifle in a lo tin nghal a. Hnunglam aṭangin Walden-a chuan, "Thih i duh loh chuan Joel-a kha chhuah rawh," a rawn ti tuar a. Gate vengtu chuan rawn vau tu chu ava en a, Walden-a ava hmuh chuan a phu chiang kher mai, "Walden, i thil tih hi i hrechiang maw? Joel-a hi Wanted ani tih i hria em?" a rawn ti ve sak sak mai a.

Walden-a chuan, "I hrilh ka ngai lo mai thei, Joel-a kha misual chu ni se pistol pai chungin hetah ka rawn hruai i ring reng reng em ni? Mister," a ti leh ta chhak mai si a. Gate vengtu pawh chuan hriat belh zel chu a ngam awm loh tih hriain Joel-a chu a chhuah ta a.

Givernor chamber chu an thlemh ta! Eng thil tak thleng ang maw? Governor room chhung luhna kawngkhar bula dar hmehrik chu Joel-a chuan a hmet ri a. Governor chuan, "Lo lut rawh," tiin a lo chhawn a. Chutah Joel-a chu Governor pindanah chuan a pen lut ta chhek chhek mai a, an mi man hote chu a kai lut duah duah bawk a..

Governorin Joel-a a han hmuh meuh chuan a phu chiang kher mai. Outlaw tamtak hnungkhirh tlat chungin ala hruailut leh ta nghal. Governor hlau lutuk leh mak ti bawk si chu a khur nghal zawih zawih a, aw lai ruai hian, "Nang.... nang... Jo..el.." a ti a, sawi pawh a sawi zawm thei mang lova.

Joel-a lah chuan in kuangkuah chunga Governoren in a lo nuih var var mai si a, "Ni e, i hre dik e, dawta i puh Joel-a kha ka ni. Ka love letter kha i lo hmu tawh ang chu maw? 'Thingzara ka taksa an khai hma ngeiin kan intawng ang' ka tih reng kha," a ti ta a. Governor mangang lutuk chu awmngaihna remg hre lovin a thlan te chua tla bawrh bawrh tawh mai a.

Chutuhlai chuan kawngka aṭang minWalden-a a rawn pen lut ve mek a, Governor in a lo hmuh chuan thlamuang ta huai hian a lang a, "Walden, i thiltih hi enge a awmzia?" a ti ta hu mai a.

Walden-a chuan,"Ka sawi tawh reng kha, 'Joel-a chua khela pistol pai fual hnalh hnalh chungin ka rawn hruai ang,' tih kha ka hrilh che ani lawm ni?" a ti sam et a.

Governorin Walden-a hnunga a nupui kawl bun chunga ding a han hmuh zet chuan a ṭhutna aṭangin a tho chhuak awk a, thinrim fe hian, "Walden, kha kha ka nupui anih kha," a ti ta tuar a..

Walden-a chuan rang lutukin a pistol a phawi zawk a, Governor nupui chu a tin ta teu mai a. Governor mak ti leh hlau lutuk chuan, "Ka nupui hian enge tihsual a neih?" khur dur dur chung chuan a ti leh ta a.

Walden-a chuan, "El-paso pana ka kal dawn a i thil sawi kha i hre tawh na'nge?" a ti ta mai a.
"Thu kansawi ṭeuh si a.. a eng ber kha nge?"
"Hmeichhe laka fimkhur tur leh hmeichhia zawng zawng chu hmelma anga en turin min hrilh a ni lawm ni? Ka hmelma a ni," a ti ta tlat mai a. A pistol chu a kau ta rap mai a.Governor mangang hlau thlabar chu a meng a ruai tawh mai a, "Walden, khawngaih takin ti lul suh," tiin a au lawm lawm a. Governor thlaphang hmel an hmuh chuan Walden-a nuihza lutuk insum zo lo chu a nui ta kiah kiah mai a. Chutah a pistol chu a paiah a khung a, Governor nupui pawh chu a chhuah ta a.

Walden-a chuan, "Ka pi, ka hmuh lai ngei in i pasal saw va kuah la, va fawp ngawih ngawih rawh, i tih duh loh chuan in pa saw Joel-a kutah ka hlan dawn a nia," a ti leh ta tlat mai a. Governor nupui chuan awih lo angreng tak leh hlau deuh bawk si chuan a pasal chu a va kuah a, a fawp ve ta mai bawk a. Walden-a leh Joel-a te nuih za lutuk chu an nui ta nghek nghek mai a.

Governor chuan, "Walden, i ki fiam duh dan hrep chu ka nuih pawh a za phiangsen love," a ti nuah nuah a, anni lah chu an la nui ta kiah kiah mai si a.

A tawpah Walden-a chuan thutak hmel fe hian, "Ka pu, ka fiam mai mai lo che asin. Nang pawhin hmeichhia zawng zawng hmelma anga i en theilo ang bawk hian kei pawhin Texas tleitiri ka tawng ve ta asin! I thu min chah atthlak zia pawh i hre tawh ang chu. Awle, tunah chuan Texas bawlhhlawh chu ka thianfai thawkhat ta a, i hmuh ang hian outlaw tam fe chu ka rawn hruai a, Joel-a ṭanpuina zarah a tam zawk chu kan that bawk. Tin Joel-a hi case nei lai anih avangin a hma aia uluk zawka a case chhui sak leh tur che in ka rawn duh bawk che a. Joel-a pa leh Sheriff thattu diktak hre tura chhui nawn leh tur chein ka ngen nghal che ani. Hei kan mi man zinga outlaw hotupa Jack Morris a hian Joel-a pa thattu chu ahrilh theih che ka ring.

"Joel-a hi a case i chinfel hma chu i kuta dah ka remti bawk lova. Tanina tan lailawk pawh ka remti bawk hek lo. Ka kutah a awm anga, a thihna tur in rel anih pawhin Joel-a ni lovin John Walden a in khaihlum dawn nia.

"Tin, thu pakhat, nupui neih hnaih pawh ka tum maithei a, ram leh hnam tana hmun hlauhawm tamtak kara ka lu ka lo rawlh vena laiah chhuan tur neilo mah ila ka nupui neihna tur chungchanga ka mamawh zualpui phuhrukna tal chu ka la rawn ngen dawn che a ni.

"Awle, hei, kan mi man te hi a hremna tur chu i kutah awm selaṭ an lu man pawh dollar sang tam tak mah ni se keini chuan dollar khat pawh kan tel lo mai anga, hrem annih a, thilsual ti leh thei tawh ngailo tura dahṭhat khabkan tana lawmman hlu ber chu a ni mai e," tiin Governor hnenah chuan thu a delhkilh ta hmak a....

A TAWP TA

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)