HIGH LONESOME (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: HIGH LONESOME Chapter 5

Unread post by Rozami pachuau » October 22nd, 2018, 4:55 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 6
(Rozami Pachuau)

A hma kawtthler tawpah chuan Pete Runyon-a in chu a awm a; Mary nena an chenna in chu! An kawtkai pal chu an lo hnawih thar sar mai a, chutah chuan pangpar te chu a par chiai a, an bathlar hungnaah chuan rose zam chite hi an zam chhek bawk a.

Tunah chuan amah en turin mite chu an in aṭangin an lo chhûak ta phak phak a. Emporium kawta mite pawh chu an rawn ding chhûak a, pa pakhat, hmui hmul buang thur zuah hian, “Hey! Considine, awm hlen i tum em?" tiin a rawn au lung lung a.

Considine-a chuan a sakawr chu a han pawt ding a, “Hiya, Matt, i va la thau cheu ve!” tiin a lo au lêt ve a.

“Heta lo hmuh leh che pawh kan lo ring tawh hlei nem."

Considine-a chuan a mei zûk Iai chu kawtthlerah chuan a han paih a, Runyon-a tukverhah chuan puanzar phe zeuh a hmu ta em ni? A nui ṭhu a, “Engah maw? Khawpuiah hian ṭhiante ka nei ve bawk alawm. Matt, Pete Runyon-a hmu turin ka lo kal a ni. A vanglai tak a ni tih pawh ka rawn hria asin,” a ti ta lung lung a.

Ni chu a han en a, hun a ngah tawh vak lovin a inhria a, kawtthler tawp lam chu panin, gate var bulah chuan a va chhuk ta a. A lukhum chu la thlain a jeans-a vaivut kai te chu a han hem khu sawt sawt a. A chhung lamah chuan a chi-ai deuh tlat mai a; mahse, a paukhauhna hlui kha a rawn chhûak leh a, a tum chu hlen ngei a tum tlat a ni.

Mary kha a thutak ngel ngawl hle ṭhin a, tunah pawh chutiang mi chu a la ni ngei ang. Gate a hawn pah chuan an in chu a han thlir vung vung a, chu in chu a faiin a thianghiim a, a mawi kher reuh mai.

Mary chuan a duh ang tak a nei ta niin a hria a. Mary chuan mipa han phuar ngheh dan chu a hre hle mai a, chu tak chu Pete-a tan pawh a ṭha a ni ang. Thâwk leh khatah, Pete Runyon-a a neihsan aṭanga a hmasa ber a nihna, Considine-a chuan ama thu thua a la awm thei chu lawmawm a ti tain a thaw huai mai a. A ṭhianpa angin, 'Thaibawi Association-ah' chuan member a ni ve ngai dawn lo a ni.

A sakawr khenna ri chhur chhur chung chuan bathlarah a lawn kai ta a. Screen kawngkhar hi a lo awm a, kawngkhar chhung zâwk chu a lo inhawng hiau a, a Iût ta a. Pindan tê tak tê, Brussels zampher phah, ṭhutnate pawh fai leh nalh tak mai hi a lo ni a. Zah pawh a zahawm kher mai, chu pindan chu.

Pindan chhung chu Mary kut chhûak liau liau a ni a, Considine-a chuan a ṭhianpa Runyon-a chu a khawngaih rum rum zâwk mai. Engtiang takin nge a nun chu a lo tih danglam tawh ni le?

“Awm in awm em?”

A au ring bawk a ni ang, in chhung chu a âw chuan a khãwk rum rum mai a.

Mary Runyon-i chu pindanah chuan a rawn lang nghâl vat a; a tawp nghâl chat mai a. A in chhung hnathawh kawr chu a inhmeh reuh kher mai a, a sam chu hnung lamah hian a ṭawn khâwm laih a.

"Hello, Mary.”

Chu nu hmel chu a dáng zovin a a kut khing hnih chuan a kawrfual hâk chu a han chul mam thawk thawk a, a lungawi loh chuan chu chu a tih dan fo a ni tih pawh a hria a.

Eng nge i duh?”

A aw chu a hriam hrêk hrâwkin, lo lawmna ṭawngkam reng pawh a awm hauh lo va. Ni..., chutiang chu Mary ngei chu a ni. A pasal duh chu a nei tawh a, in leh lo a nei tawh bawk a, ani lo kir leh chu invauna, thil hlauhawm mai a ni ta a ni.

“Khawiah nge Pete-a?”

“Inah a awm lo.”

Mary chuan a inhrukna taihren chu lain a kut ro sa chu a han hru ro leh nawk nawk a, “Hetah eng nge i rawn tih reng reng? Engati nge i kal bo hlen theih hlawl loh?” a ti tan tan a.

“Hun hlui; hmanlai chanchin te pawh kan sawi ho leh ang chu ka ti, Mary,” ruh deuh hian a nui ṭhu mai a.

Mary chu a sen ap ap a, a thinrim ta deuh hle a, “Kal bo daih rawh! Min rawn ti buai tawh suh!” a ti ta hlaih hlaih a.

Considine-a chu a la chechang ta chuang lo va, tun hi a hun harsa lai ber chu a ni. Banga sana lian inkhai chu a han melh zoh a, “Ka cham dawn hlei nem. Pete-a ka rawn hmu zawk mai dawn a ni,” a ti ta a.

“I cham chuan i hmu narawh ang, a hlau dawn lo che!”

“Pete-a'n maw? Pete Runyon-a chuan tu mah, eng mah a hlau ngai reng hlei nem. Silai nen ka thal thei reng a ni tih a hriat pawhin a hlau ngai chuang hlei nem.”

Considine-a chuan pindan chhung chu a han en thûak thûak a, “Aw le, i thlung nghet hle a ni ang Mary. I kâwng chilh hruia i thlun ngheh hle loh chuan hetiang pindanah a tawm khur reng lo vang. Mary...,” a mitah tak chuan a han en a, “Thlahdul deuh rawh Mary, i thlun ngheh lûattuk chuan a in hreng hlum mai ang. Hrui sei deuh hlekin thlung langin; chutah, a la hmangaih viau che a nih chuan amah a inthlung nghet mai zâwk ang,” a ti ta a.

Mary chuan, “Pete-a chu chutiang a ni awzawng lo. Mawh phurhna nei a ni asin. He khawpuiah hian nihna a nei a ni. Nang ang mai maia thêulêu a ni ve awzawng lo e aw! Nang hi, eng nge i nih ve mai mai? Hmun tinah...," a ti hlak hlak a.

Considine-a chuan Mary thu sawi chu dik a ti kher mai; mahse, a hnawl liam mai a. Ni, a dik khawp mai, khawiah mah, tu hnenah mah, eng mah nihna a nei lo. Chutah, Lennie kha a hre chhûak zawk mai a, eng emaw chu nihna a nei a ni leh zâwk ang, tlem tê taI chu, tu hnenah emaw chuan....

“I sawi dik lo a ni, Mary. Kei pawhin nula chu ka nei ve asin,” a ti ta hlawl mai a.

Mary chu a meng kal mai a. Hmeichhe fel tak mai a ni a, a Ian dan aṭang chuan a in chhung pawh a vawng fel êm êm mai a. A hmel pawh a chhe hauh lo va, hetianga an awm zel chuan Pete-a chu Mayor pawh, eng emaw tak pawh a la ni maithei a ni.

Mary chuan, “Chu nula chuan i silai lâksak chein khua leh tui zahawm takah a chhuah che a ngai a nih chu; chuti lo zawng, a tan eng mah i man lo vang!” a ti ta a.

“Pete-a angin maw? Ka nupui chuan a pasal áwma arsi tar ve a, a ṭhian ṭha ber pawh khawpui aṭanga ûm chhûak turin i duh ve a ni hlawm ang!”

“Chutiangin Pete-a'n ûm chhuah che a duh awzawng Io tih chu nangmah pawhin i hria alawm! Khatiang thil a lo nih tâk si-ah chuan a thinur tlat si alawm.”

“Chutah, nang puanhnuai chein!” Considine-a chuan a han ti zoh a.

Mary Runyon-i chu a thimrim ta tak tak a, “Chhûak vat rawh! Ka in aṭang hian chhûak rawh! Hmuh leh ngai tawh loh che ka inbeisei!" a ti ta chiam mai a.

Considine-a chu a inher nghut a, in aṭang chuan a chhûak ta a. Pawn ni êngah chuan a va ding leh vung vung a. Aw le, a thil va tih tâk chuan eng nge a rawn thlen theih ang le? A duh tâwk chiah chu Pete-a va tih thinrim a, insualpui theih chu a ni tawp mai a, tih pawh a va ti thinrim mahna....

Mahse, a chhung rilah chuan mak intihna, inthiam lohna lian pui mai chuan a kam run mai a. Pete Runyon-a nena insual chu a thil duh loh ber mai a ni zâwk si a. Dik tak chuan, ṭhian kawm a, inngeih taka va hmuh leh kha a châk êm êm chu a ni zâwk si.

Ran rual eng zât chhinchhiahna nge an lo chhut dun tawh? Hmun khata thawk dunin, Indian leh ran rual rûk hmanghote pawh vâwi eng zât nge an lo ûm darh dun tawh? Kawr thûk leh kham aṭang tein ran eng zât nge an lo chhan chhuah dun tawh? Zu dawra insualna-ahte pawh vawi eng zât nge an lo ṭan dun tawh?

A sakawr lakam hrui chu a la a, a zinah chuan a han chuang kai leh a; chutih lai chuan Mary chu a lo tlan a, a kawr banah chuan a rawn pawt ta dawr dawr mai a, "Considine, eng ang pawhin nang chuan min lo ngai ta pawh ni la, Pete-a chu ti na suh ang che aw...,"

A kutah chuan a rawn vuan a, “Khawngaih takin kalsan hram rawh!“ a ti ta lawm lawm a.

Considine-a chuan chu nu hmai phiar ṭeuh chu mak ti takin a zuk en a, a bulah chuan a chhuk a, “Engah maw Mary? I hmangaih tak zet a ni ti raw?” a ti ta a.

Mary chu a hawi ta ha mai a, “Aw... aw... Considine, ka hmangaih a ni. Ka tan chuan engkim a ni," a ti ta tawp mai a.

Khai aw! Considine-a chuan tih ngaihna tak pawh a hre ta lo va, a rilru chu a inkap ṭeuh mai a, a thil tum tawhah chuan han tawlh kir leh thei a ni tawh si lo.

Chutah zawng, dam thluam hian, “Mary, Pete-a nen chuan thil tenau tak tih fihlim tur kan nei tlat a ni. Mahse, tun hma pawhin Pete-a nen chuan kan lo insual fo tawh ṭhin alawm, chutiang lek tur chu a ni. Min hneh pawh a ni thei; keiin ka hneh zâwk pawh a ni thei; mahse, thil pakhat chauh erawh chu ka tiam ang che. Mary, chu chauh chu tiam theih che ka neih chu a ni - a lakah silai ka hmang hauh lo vang,” a ti ta a.

Considine-a chuan a kalsan ta a. Mary chuan a en zûi vawng vawng a; chutah, a pawnfen hmawr fual chu chawi kangin a tlan ta lâwp lâwp a.

Tunah chuan kawtthlerah sakawr tawlailir a tam tawh hle mai a, sakawr pawh sawmli dawn lai chu a lo inthlung khâwm tawh a, tûk dang aiin kawtthlerah chuan mi pawh an tam tawh zâwk a; chuvangin, thu chu a darh ta a ni tih Considine-a chuan a hre mai a. Hun dang chu ni se, mi insual tur en tumin amah ngei pawh chu a thawk chhûak ve ngei ang. Chutiang chu khawthlang mite awm dan chu a ni.

A chhuk a, a sakawr chu pawh zih leh mai theih turin a thlung a; a lukhum chu a phawk a, a han khum ṭha leh phawt a; bank lam chu a va mitsir rulh a, tu mah a kawtah chuan an ding lo va, tu mah lût leh chhûak pawh awmin an lang tawh lo.

Mary Runyon-i chu Mrs O'Beirne-i hnenah a tlan tih erawh chu a hre lo. Mary chuan hmanhmawh tak hian, “Pete-a i lo hmu em? Considine-a'n a zawng em ni?” a va ti hlawp hlawp a.

Mrs O‘Beirne-i chuan a lo bih zawk chauh a, “Khai khai, Pete-a chu ngaihtuah duh suh, tih tur chu a hre mai ang. Ani zawng, rem hre tak a nia,” a lo ti mai si a.

Considine-a chu Sheriff pisa bulah chuan a va ding ta a. Bank tukverha sana-ah chuan dar sawm pakhat leh a chanve a ni a, tunah chuan a hmanhmawh ta tak zet a ni; Pete-a lah chu pa tih thinrim harsa zet mai a ni si a.

Khawi laiah emaw chuan sakawr pheikhawk thir han chhut rîk ṭhuai ṭhuai thawm hi a hria a, chu chu Pete-a a ni ngei ang. Thir den te hi a châk zawng tak mai a ni ṭhin a, a thiam reng bawk a.

Thâwk leh khatah, Sheriff pisa hnung lam aṭang chuan Mary aw a hre ta a. "Pete, Pete, Considine-a, khaw chhungah a awm!"

"Tunah a la awm a maw?”

“Pete, buaina siam a tum a ni. A tum tih ka hre mai! Pete, lo sual ve duh hauh suh aw; Jail-ah khung ringawt mai rawh,” Mary chuan a ti ta hlawp hlawp mai a.

Pete-a chu a nui ta hawk hawk a, “Khai khai, Mary, tu mahin insualpui loh te chuan Considine-a Jail-ah an khung thei lo tih te chu i hria alawm! Eng nge ka tih theih i beisei bik?” a lo ti mai si a.

In hnung lam aṭang chuan Pete Runyon-a chu a lo chhûak ta a. An mitmeng chu a intâwk ta!

Considine-a chuan a va pan hnai a, kut thinga va chibai lawp lawp chu a duh zâwk a; chu a duhna chu a thup hram hram a. He pa kher hi chu a mi duh zawng tak mai a ni a, a ṭhian a ni a; mahse, kha bank pawisa kha a mamawh tlat mai si!

Runyon-a chuan, “Eng nge i duh, Considine? Min rawn tlawh naran mai chu a ni lo vang chu maw?” a ti ta a.

“Vantlang hmaa han hnek thal der mai che hi tlawh naran i tih leh tih loh a thu a ni mai alawm!” Considine-a chuan a ti bui bui mai a.

Mite chuan an thu sawi chu hriat loh hlau tak hian an rawn zim luai luai a. Considine-a chuan mi hriat hlau deuh tak chung hian kawtthler chhak lam chu a han mitsir leh zauh a, Bank bul lawka sakawr aṭanga mi pakhat chhuk chiah chu a han hmu a, chu pa chu Dutch-a a ni.

Pete chuan, “I lo kir leh hi a ngai kher em ni a?" a han ti a.

“Ngai teh reng e. Jensen-a sakawr dahna kawt zawl diaka i hmai rawn phum a ngai tlat si alawm!”

Mary chu Pete-a hnungah chuan a han hmu a, chu vang chuan awlsam taka tih thinrima inbeih ṭan nghal mai theihna turin, “Chutah, i nupui kha a mipa naupang chhuan tawlawl hmai berh vek chu han hmuhtir pawh ka duh ve reng reng a ni!" a han tih zawm leh nghâl zat a.

Pete Runyon-a chu a sen up up a; mahse, eng vang nge ni ang tih chu hriat tumin, mak a ti deuh viau mai bawk si a.

Considine-a chuan a lo hlauthawng hle mai bawk a. Runyon-a chu a inngaihtuah vaih chuan pa fing tak mai a ni tih a hre bawk si a, inngaihtuah hun a neihtir vaih chuan Runyon-a chuan thil awm dan chu a man thei mai dawn a ni.

Considine-a vek chuan, “Engtizia nge ni ta le, Pete? Pawnfen phenah i tawm ta mai dawn em ni? Nupui neih hnuah chuan i dul a kiarin thlûak pawh i tlachham ta tiin i pha mai dawn elo maw?” a han ti leh ta a.

Runyon-a hmai chu a phiar ta tup mai a, “Ka tlanchhe ngai lo tih chu nang pawhin i hre chiang alawm,” a rawn ti ta a.

Considine-a chuan nuihzat àwm tak hian, “I nupui neih hma chuan ni reng e. In nu chuan i ki a phawisak ta che em ni, Pete?” a han ti leh a. Chutah zet zawng, Runyon-a hmel chu a dur ta khup mai a, kuttum hum ruhin hma lam pên chanve chu a rawn rap phei ta a.

Considine-a chu a han hnungtawlh hrut a, “Hetah chuan ni lo ve Pete, kan inbeihna hmun ṭhin ngeiah khan le. Khatah khan vâwi khat kha chu i vannei deuh hlek a; tun ṭum chu i vanneihnain a tlin tawh dawn lo!” a han ti a.

Considine-a chuan mipui lam hawiin, “In Sheriff hi ka sawp hrep dawn a nia, a tlanchhia a nih loh chuan,” a ti ta nghut a. Chutah, a han inher vut a, sakawr huang lam pan chuan kawtthlerah chuan a chhuk thla ta a. Dar sawm pakhat leh minute sawmli chiah a ni.

Bank kawtah chuan pa pakhat hi mit hliahna Iukhum thlâwk chi khum hian a ding a. Chu pa chu Epperson-a ni tur a ni. Epperson-a chuan insual chu a en châk zawng tak a ni tlat!

Considine-a chuan jacket chu a sakawr zin ki-ah chuan a han bang a, a sakawr chu kawtthlerah chuan a kai thla a, mipui chuan an zûi dul dul mai a. Pete-a leh Mary han inhnial laih laih thawm chu a hre thei a; mahse, din pawh a ding duh chuang lo va, a hlawhtiing ngei tur a ni. A hlawhtlin ngei chu a ngai a ni.

Larson-a sakawr chaw pekna hmunah chuan inherin, a sakawr chu awlsam taka thlen theihna tur hmunah a dah a; chutih lai chuan Runyon-a lo tâwk tur chuan a rawn inher leh nghâl a, a dang chu a ro hulh mai a, a pum chu a rûak hle bawk a.

'A kut ding lam saw veng fimkhur rawh,’ tiin a inhriih lâwk a. 'A kut ding lam saw veng la, per sawn per sawn ringawt phawt mai rawh. Inrinna hun pe miah suh.'

Mrs O’Beirne-i chuan a kailawna dingin Mary chu a lo be mawlh mawlh a, “Tunah, lo pawi ti reng reng suh. An insual mai dawn alawm. An inhnek dawn a ni mai a, kei pawhin ka va en ve dawn asin,” a lo ti mawlh mawlh a.

“Mahse, Pete...,” tiin Mary chuan hnial a lo tum a.

“Insual mai mai te chu mipa tan a na tak tak ngai hlei nem! Mary Runyon, lo inrawlh ve duh reng reng suh."

Mrs O’Beirne chuan Considine-a chu a rawn en vung vung a, “Saw nau saw, chhungkaw ṭha tak aṭanga lo chhûak ni si; a naupan laiin a chhungte kha Apache hovin that mang vek lo sela chuan thil ṭha zâwk a rawn chhuah thei tur a nia te ka lo ti ve fo ṭhin asin maw le...,” a ti ta a.

Pete Runyon-a chuan a kawrchung leh a silai te chu a hlip thla tawh a, palah chuan a khai a; chutah, a rawn inher a, Considine-a chu a rawn pan phei ta a. Mahse, eng emaw tak hi mak tih a nei a, eng emaw tak hian a awm a ti nuam lo ta tlat mai a.

Considine-a chuan ṭan a lo la a, rang deuhin a zuang phei a, Pete Runyon-a ka-ah chuan a beng ta thawr mai a....

*************************

Dutch-a chu bank kawtah chuan a chhuk a, bank-ah chuan a lût ta a. Pa lian pui, thatchhe tak leh thau tak a ni ringawt a, a luh pah chuan kawngka bula sakawr huang lam thlira lo ding, banker leh cashier chu a han su thawi thuak nghe nghe a. Corral (sakawr huang pal) lamah leh kawtthlerah reng reng chuan mi pawh an awm tawh lo.

Dutch-a chuan rangkachak tangka dollar sawmhnih tlang hi a rawn phawrh chhûak a, “Hei hi thleng nawi ka duh a ni, Mister,” a han ti a.

Hreh tak chung chuan kawngka aṭangin Cashier chu a rawn lût ve a; chutih lai tak chuan sakawr paw deuh khial khual pahnih chunga chuang hian pa pahnih hi bank kawtah chuan an rawn ding ve a. Pakhat chu a chhuk a, tukverh aṭang chuan Dutch-a chuan Hardy-a, kawngkhar pana lo kal mek chu a va hmu thei a.

Banker chu kawngkhar aṭang chuan a rawn lehhawi a, “Hrep tak hlawm chuan! Sumdawng hausa tak a nih loh teh chuan, ka...,” a ti hman chauh a, Hardy-a chuan a hnungah silai hmawrin a rawn hawlh ta a.

Chutih lai tak chuan Dutch-a pawh chuan cashier chu silaiin a lo tin ve nghâl a, an pahnih chuan Hardy-a ven tura dahin Dutch-a chu thirlen daidanna piah Iamah chuan a lût phei ta a.

Rang leh zei tak mai hian rangkachak tangkate chu a rût khâwm hlawih hlawih a, a ip kenah chuan a dah zel a. Kawtthler thlang lampangah chuan au thãwm nen hlim fahran mai hian an khek chul hlawm mai a.

Hun chu pawng ren loh ringawt lovin; tim chuang hauh lovin Dutch-a chuan rangkachak tangka chu a rût mawlh mawlh zel a, a tawpah saiip chu ṭawn phui tlatin chhûatah chuan a nghat a.

Banker leh cashier chu an phuar hlawm a, an ka an hnawh ta a; chutah, ip chu khaiin an pahnih chuan kawtthlerah an chhûak a, Kiowa-a'n a lo nghahnaah chuan.

Hardy-a chuan, “Dutch, an insual chu ka va en ve châk kher mai!" a ti ta a.

"Kei takin a nia en châk ni!”

Kawtthler pakhatnaah chuan kal pangngai hian an han kal phawt a, kawmkar, an lo thlan Iâwk lamah chuan an kal zel a, vaivut zingah chuan an tlan auh auh zel a. Chutah, tlang an rawn chuan kai chuan an tlan chak ṭan ta a. Tlang aṭang chuan an zuk lehhawi zawr a, rawn ûmtu an awm hauh lo va.

Hardy-a chuan, "A hneh ka beisei. A rawn tlan chhuah ve theih ngei pawh ka beisei tlat," a han ti a.

“Thei teh reng ang.”

Kiow-a chuan eng mah a sawi ve lo va, a tangka ip khai chu a duh chu a ni mai a, Mexico ram lam daih chu a lo ngaihtuah hman tawh a. Considine-a chuan tunah chuan khawpui a rawn chhuahsan ve tawh ang a, an zinga sakawr chak ber nei a nih avangin a rawn ûm phâk ve thuai ang chu.

**************************

Ralkhat hla tak mai tlang chhîpah chuan zawhna zâwt hian mei khu a inpak chhûak chho laih laih a, khawthlang lam hla taka mei khu dang chuan a lo chhang a.

Pasalṭha sen, hang tlawrh hlep hlupho chu an sakawr bumro pui pui chunga chuangin, tlang, lungpui sang pui pui aṭang chuan mupui ang maiin an rawn bir thla a, khawthlang lam panin an tlan ta zel a.

Mei khu chhànna mei khu vek chuan sakawr pakhat kaiin mi pahnih lo kal thu chu a rawn hrilh a. A awlsam lutuk dawn a ni, awlsam tak a ni ang....

An hmai te chu an hnawih rang ruai mai a. An hmai ṭial karah chuan an rawn meng thîp sun mai a, an sakawr pang chu nghet taka an khûpa chep chungin khawthlang lam an pan ta a....



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 23rd, 2018, 5:00 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 7
(Rozami Pachuau)

Ka-a han inben thawr mai chu a huatthla lâk dan Considine-a chuan a hre vek tawh a. Chu aia mipa ve tawh lem han intih thinrim dan dang chu a awm vak lo hle a ni. Runyon-a pawh chuan a ngaihtuah lungkham lam kha chu a theihnghilh nghâl hmiah mai a, kut hum ruhin a rawn tawlh lût ve ta nghâl a.

Considine-a chuan Runyon-a lo thawk phei chu lo chãngin a kuttum vei lam chuan a lo hnek lêt nghâl dawp a; mahse, Pete-a chu a lo la kal zel a, a kun thut a, a ding lam chuan a rawn vai ve ta fua mai a.

Considine-a chuan a lo hmu lâwk a; mahse, Pete-a chu a rang kher mai, Considine-a bek bawrah chuan a rawn tuk nghek mai a, ani chu a pai ta chawn chawn a. Mipui chu an lo au hluah hluah a, anni pahnih chu an inhnek thum ta zawt zawt mai a.

Considine-a chuan lung a rap hrual palh hlauh a, a ãwn ta chawn chawn a, chu tak chu Runyon-a kut vei lam chuan a bekah bawk a rawn tuk fuh leh a; ani chuan lo inven a tum sa teh nain Runyon-a chuan a rawn veh kuaI a, a kut ding lam thung chuan Considine-a dulah a rawn hnek leh ta dawp mai a.

Considine-a chu a kun hnâwp a; mahse, Pete-a aia rang chuan a rawn mar leh zawt a, a khabe kualah a va hnek no chawk mai a. Runyon-a chu hnung lam zawngin vaivutah a thal hawl hawl a, Considine-a chuan a lo thawh leh hun nghâkin hawihhawm tak hian a lo tawlh hnunsan a.

Runyon-a chu lu hai muai muai chungin a rawn tho leh a, Considine-a'n a rawn bawh zûi mai lo chu mak pawh a ti kher mai! Tichuan, Considine-a'n a ngaihthah mai chu mak ti tak chungin zawi muang hian a rawn tho leh ṭual ṭual a. A ṭhianpa insual chu a lo hmu tawh ṭhin a, mi a hnek thlûk tawh reng rengin an rawn thawh chian leh hma, thawh chanve vêlah hian a va tuk thlu leh zûi ngei ngei ṭhin kha a ni si a, a ngaihna a hre lo hle a ni.

Runyon-a biang ruh chu a pilh sen vur mai a, a kam sir chu a kak thi bawk a. Tunah chuan fimkhur a ngai ta ngiang mai, hlauhawm pawh a hlauhawm ta zâwk bawk a. An inhêl kual a, fimkhur takin ke an chhep a, an inhlau tawn tawh bawk.

Pete Runyon-a chu a rum ta kher mai! Hlauhawm lah a hlauhawm. Feet ruk leh inches hniha sang, Considine-a nena inchen chiah hi a ni a, Considine-a rih lam pound za leh sawmriat panga ai chuan pound sawm panga zetin a la rit zâwk a ni.

Pete-a chuan a rawn bawh phei a, a nghawngah chuan a kuttum ding Iamin a rawn ṭhuai a, chu chu a vei lamin a han bawh zûi leh nghâl zat a. Dingdihlipin an inbei tawh a, an inṭhuai a, an inhnek chawrh chawrh bawk a, dawp dawp mai a! Considine-a chu a tawlh kir chawn chawn a, a ka-ah chuan thisen chu a tem al ve ta lup a.

Chutia thisen an inchhuah tâkah chuan Considine-a chu a thimrim ve ta deuh tak tak a, Pete-a lu-ah chuan a kuttum vei lamin a han tuk lawih mai a. Chutah, a khabe-ah a kuttum ding lamin a han dawm zûi leh zat a, ani chu mipui zingah chuan a pai lût ta chawn chawn mai a. Considine-a chu thâwk lain a han hnungtawlh leh hret a, hun eng zât nge kal tawh le?

Runyon-a chu a rawn thawk chhûak leh a, a vei lam a rawn vai vung nghâl a; Considine-a chuan lo manin a han inlet thut a, thâwk leh khatah, a koki-ah chuan a phih liam dâwk zawk mai a. Mahse, Pete-a chu Considine-a nen chuan an lo inbei tawh ṭhin a, chuvangin, a tih dan tur chu a lo hre lâwk a, vaivutah chuan a lum let phei ta tawp tawp a.

Runyon-a chu a rawn ding chhûak leh a, Considine-a chu a va bawh phei leh a, an pahnih chuan an inchum tawn dun ta nawk nawk mai a, an thlan a tlâk zuih thleng chuan! A entute lah chu an lo au thler nasa mai si.

Chutih lai chuan Pete-a chuan a ding lamin a han hnek fuh ve leh ta a. Considine-a chu a leng lawp mai a, na fe hian leiah a tla ta thlawrh a, thawh leh tumin a han lum tawp tawp a.

Hun eng zât nge kal tawh ang le? Hmanhmawh lo taka hun renchem chung si chuan a tho chhûak leh a, a kut chu a han nuai nawk nawk a, a bei phei leh ta a. Runyon-a hmuiah chuan a hneksak leh a, pal te chu an su dun ta dawt dawt a. Kil lam aṭanga thawk phei lehin Considine-a chuan a ding lam thungin a han hnek leh a; ani pawhin a khabe vei lamah a rawn lawk fuh ve nghâl a.

An han innawr leh ta tak tak a, an inpawm chilh; chutah, Pete-a chuan Considine-a chu leiah a theh thal ve ta tawp mai a. A thal chiang hle nâin ani chuan hnuai lamah a ke a rawlh hman a, mipuiin tho leh vat tura an auh ruih ruih lai chuan thâwk a han la huam huam a.

Considine-a lu chu a kiu ruai ruai tawh mai a. Mipui au thãwm ri leh lu ruh kiu chuai chuai chu thãwm thuhmun ni mai àwm hian a hriat pawlh tawh a. A han tho va, chu tak chu Pete-a chuan a rawn nangching phei a, Considine-a chuan a kuttum ding lamin a khabe ruh takah chuan a lo dawm siah mai a, leiah chuan Runyon-a chu a thal ta dèr mai a.

Pete-a chu bâwngpa, hreipuia cheh thlûk ang mai hian vaivut zingah chuan a thal ta reng mai a. Considine-a chu a inngaihtuah buai ta.... Pete-a chu a thihdan hlauh mai chuan, a hote, bank aṭanga an lo chhuah lai chuan mipuite chu kawtthlerah an lo vâk darh hman ang tih a hlau a ni. Chu chauh mai chu Pete-a a sual chhan chu a ni si a.

Thi hnuanga thaw hlawp hlawp chungin hma lam a pan a; chutih lai tak chuan Runyon-a chu a rawn tho chhûak thut mai a, bawkkhup chung hian a rawn tho a, Considine-a khupah chuan a rawn tauh ta bur mai a. Considine-a chu a tlu ve nghâl hnawk a, an inkuah a, leiah an lum dun ta thial thial mai a. An inham a, an inthai bawk a, mipui lah chu an au dur dur bawk a.

An han inthlah leh a, an rawn tho chhûak rual leh a, an inbei zûi chu a ni leh nghâl mai a. An thinrim pawh ni tawh chuang lovin nuam tih vanga inbei an ni tawh zâwk a. Dingdihlipin an inveh a, an innawr a, an han inlawk leh sawk ṭhin a, vaivut chu an pal khu rum rum bawk a.

Tunah chuan an nui ṭhen ṭhu tawh mai a. Considine-a'n thinrim êm êm anga beih a tumna pawh chu a bo zo ta vek mai a. He pa lian pui mai, a sualpui hi a mi duh zawng tak mai a ni a, a ṭhian kawm ngeih tak a ni Iehnghâl bawk nen; chuti chung chung chuan Runyon-a dulah chuan a kut ding lamin a va hnek leh ta dawp a.

Runyon-a chu a nguk hruih a, a rawn inla mar thuai a, Considine-a khabe hnuaiah chuan a luin a rawn tauh chho ta nghek mai a. Considine-a chu a intauh rawp a, leiah a tlu ta thlawrh a. A han tho chhûak leh chu a kut ding lam hian a hmuiah a rawn hnek leh chawrh a, vaivutah chuan thisen a han chhâk ṭhawt a, a lu ruh chu a ri ring nasa tawh mai a. An han inbum zauh a, a kut ding lamin Pete-a chu a han hnek ṭhingṭhi leh ta rawp mai a.

Pete-a chu muangchangin a rawn tho leh ṭual ṭual a, a kuttum khing hnih chu a han hum ruh a, a rawn bei phei leh ta a. An hah tawh hle a, an inkuah a, an insâwi lâwp lâwp tawh mai a, an thaw huam huam bawk a.

Considine-a chu a chau tawh kher mai. Pete-a chu eng nge maw a an ve tih a hre hauh lo nain ani erawh chu a chau tawh kher mai.

Pete-a pawh chu a chau ve viau tawh a ni, a pilh phung mai a. Considine-a chuan a han bum leh zauh a; mahse, Pete-a chu a lo thle hman a, amah zawk chu a ṭhingṭhi ta rawp a.

Hun eng zât nge kal tawh? Eng chen nge an insual tawh?

A ke te chu rit bur hian a hre tawh a, a ban te lah chu a hik mup tawh a. A han bei phei leh a; thâwk leh khatah, vûakna hruihrual hi a rawn ving ta fua mai a. An sirah chuan Mary chu a han hmu zawr a, ani chuan vûakna hruihrual hi a keng a, rawn hlap leh tur chuan ṭan a lo la mek a. Considine-a ban lo vai lai tak a ni hlauh chuan a nat tur ang aiin a chhanhim ta zâwk a ni.

Mary chuan, “Pete, Pete Runyon! A tâwk tawh! Ti tawp tawh rawh! Chuti lo chu, khawpui hi ka chhuahsan daih dawn. Nang pawh ka kalsan daih ang che!” a rawn ti ta tawn tawn mai a.

Pete-a chuan hnial tumin a han inher a, Considine-a chuan a hmai thi nuau chu a kuta hruin, “Engtizia nge ni ta Pete? Mi bansan ta mai elo?” a han ti a.

Mary chuan a lam chu a rawn hawi a; mahse, a tawng chhuah hmain mi dangte chu an karah an rawn tla ta a, “Kal leh tawh rawh Considine, i duh ang ngeiin i rawn sual tawh alawm, in inhneh tâwk a ni e,” an rawn ti ta a.

Considine-a chuan mi lu chungah chuan Pete-a chu a han en a, a hmelah chuan mak ti hmel deuh bawk kha a han hmu leh a, a ban a phar chhûak a, “Kan bei ṭha dun kher mai Pete! Dam takin le, Ka lawm e...,” a ti ta a. A sakawr rah kaina chu a han rap ṭhelh khut khut a, chutah a chuang kai a, “Hmanhmawh lutuk lovin,” a han inti sup a.

Bank a kal peih lai chuan a kawngkhar inkharah chuan, 'CHAW FÂKIN AN CHHÛAK' tih hi a lo intar a. Chu chuan Epperson-a tih chauh lo chu a lo dang rih dawn a ni. Ani chu bank-ah a lo kir leh ngei ang a; mahse, mi dangte nen insual thu chu sepin an inkawm rih phawt ang.

Considine-a lu chu a na tluk tluk a, a khabe te chu a sil ṭhum bawk a. Vaivutah chuan thisen chu a han pik puat a, anchhia a han lawh zûi a, anchhe lawha a han àn zawng pawh chuan a na tho mai. Kan Pete-a hrep chuan a hnek na thei fu mai. Vanneihthlâk takin a kut chu a la him pial a, vùn zawng a vung ve nâ a, ruh tliak a awm lo. Tichuan, a kut khawng ṭhem ṭhum chu ti reh turin a han elh nawk nawk a.

Khawpui in tawp ber chu a hnuchhawn tawh a, a sakawr pawh chak vak lovin a tlan tir auh auh a. Khawpui aṭanga lang phâk lo a thlen chuan a sakawr chu chak deuh zâwkin mel chanve vêl thleng a tlantir ta a. A han lehhawi a; chu tlang dung aṭang chuan vâwi hnih a lehhawi leh a, rawn ûmtu hmel reng reng a hmu lo.

A duh ang ngeiin thil chu a fel a, a rem rûat chu a hlawhtling ta niin a hria a; mahse, a thil tih chu chhuanna reng a nei chuang lo. A sakawr chu a han tlan chak tir leh ta a, kawr ruam a thlen hma chuan Dutch-a chu a va hmu hman tawh a, ani chuan amah chu a lo nghah avangin. Kawng ṭhenkhatah chuan Dutch-a chu arpui ang deuh a ni.

Considine-a chu a sakawr aṭangin a han chhuk a, rang takin Hardy-a chuan sakawr thlâkna tur chu a rawn kai nghâl vat a.

Dutch-a chuan Considine-a hmai chu a han thlêk vang vang a, “Eng nge a an le?” a han ti a.

Considine-a chuan a lo en zawk chauh a, chutah, “A hnek na khawp mai ka tih reng kha,” a'n ti a.

An sakawrah chuan an chuang a, an kal Ieh ta zel a. An kalkawng tur chu a hmaa an lo duan lâwk vek tawh a nih avangin an tih tur pawh an hre mai a. An sakawr hmante chu an chhuah a, kar lovah Honey Chavez-a hmun emaw, a lâkna ranch emaw chu an thleng leh mai dawn a ni.

Ṭiaupho nem tak chu kal tlangin lui kam âwih deuhah hian an chho a; chutah, tlang chu an chuang chhûak ta a.

Hardy-a chuan, “Nichin deuh khan mei khu ka hmu,” a han ti a. Hardy-a chu naupang mai a la ni a, eng emaw sawi tur hi chu a hre deuh zel a ni.

“Kan la hmu zûi zel ang."

Considine-a chu taksa leh riIru-ah a chau hle mai a. An tum ang chuan an ti thei ta chu a ni a, tunah chuan tlan bo daih an hmabâk tawh a ni; an thil tih erawh chu a chhuang lo kher mai! Hnung lam chu a han thlir kir leh a, eng mah a hmu chuang lo va; mahse, tunah chuan an hre chhûak tawh ngei ang.

An insual chhan chu Pete Runyon-a chuan a hre tawh ngei ang a, a thin pawh a rim hle dawn a ni. Mi dangte pawh an thinrim ang, a ṭhente erawh chuan fiamthu ṭha tak niin ngai mah sela, rawn ûm zûi chu a ṭhulh dawn chuang lo a ni. An lo kâp a nih phei chuan a tua-te pawhin an thih phah maithei a ni.

A sakawr pên zawng chuan a hmai chu a na tluk tluk mai a, a pilh nuau a, a vung chur bawk a, a pilhah chuan thlantui chu a rawn luang lût a, a thîp kher mai! Mahse, chûng zawng zawngte pawh chu a thil lo tih tâk nena khaikhin ralah chuan eng mah lo mai a niin a hria a ni.

************************

Mei khu han hmu hmasa bertu chu Dutch-a a ni a, “Saw... Eng tihna nge ni ta ang le?” tiin an hma lama mei khu chho luih luih chu a han kâwk a.

Hardy-a chuan, “Ka rin chu a ni êm lo vang chu maw? Kha dawrah khan ka nula thlalâk ka theihnghilh daih asin maw le...,” a ti ta a.

Zawi deuh zâwka kal pahin an rifle te chu a pai aṭangin an phawi ta sang sang a. Considine-a chu sir lam chuhin hma lam hretah a kal ta a; lehlam sirah chuan Kiow-a chuan hnung lam a chuh thung a. Chutianga insem darh chuan chak tâwk takin dawr awmna lam chu an pan ta a.

Dawr chu a lo kang fai vek tawh! In sak pakhata chirh bang te chauh chu a lo kang bang a, Honey-a'n a sak ṭhat hma ang deuh kha a ni àwm e.

Hardy-a chuan, “Mei pawh a la alh hliah hliah a, thui vak chu an la thleng hman hauh lo vang,” a han ti a.

Kiow-a chuan leia thisen tling chu kâwkin, “A that! Chavez-a'n hei, pa pakhat a that,” a ti ta chul a.

Considine-a chuan a han hêl kual pap pap a. Indian-ho chu an kal leh vek tawh a, dan pangngaiin, an mitthi leh an hliamte nen.

Hardy-a chuan, “A lo bei ve nasa a ni. Hetiangin a lo bei ve thei ang tih reng ka hre lo. Thil awm dan aṭang hian pathum emaw chu a that ve ngei ang le, pahnih pawh a hliam a ni,” a ti a.

Honey Chavez-a ruang let reng chu hmu mah se han phumna hun pawh an nei lo va. Mahse, chu chu Chavez-a pawh khan a hre thiam tho ang, a rawn ûm zûitute, posse hovin phum tawh mai rawh se.

Hmanhmawh takin an kal chhûak leh ta a. Tunah chuan eng mah khawtlaina chhan tur a awm tawh lo. A hmasain khawthlang lam panin; chutah, chhim lam panin thlalerah; chutah, ramri lam pan zûi zelin....

Indian sakawr ke thir khen lohte chuan Lennie-te pafa hnu chu an chhui zûi a ni tih an hniak aṭang chuan an hmu thei a. Apache-ho chuan chûng an hnute chu hmuin pakhat chu hmeichhia a ni tih an hre ngei dawn a ni. Hnu chhuitu ṭha tak chuan a eng zâwkah nge a chùan tih pawh a hre thei ngei ang.

Dave Spanyer-a chu pa namai a nih loh avangin ani pawhin thil awm dan chu a hai bîk hauh lo vang. Dutch-a chuan chu putar thu sawi aṭang chuan Lennie chuan mipa dang tam tak ai chuan rifle a hmang thiam zâwk a ni tih a hria a ni.

Khua chu a lum kher mai a, borûak pawh a ûap churh mai. An sakawrte chu renchemin chak vak lovin an kal zel a, an lo rûat Iâwk tawh angin anmahni tla khawp chauh tui awmna lam panin an kal zel a. Van chu a rûak huai mai a, chhum them pawh a lang lo.

Considine-a chuan ip-a an rangkachak tangka ken reng reng chu a ngaihtuah lo va. Chu tlang dunga nula hlir chu a ngaihtuah a ni, nula leh a pa chu! An kar khawi laiah emaw chuan Apache-ho chu an tla zep a ni si a.

*************************

A hma darkar fe tawhah chuan Dave Spanyer-a chuan a hun tawng khirh tak maiah chuan duh thlanna harsa tak mai chu a lo thlang tawh a. Chumi hma chuan hun rei fe chu a inngaihtuah a, a hma zana thil awm dan te chu a han ngaihtuah chhûak leh a.

Lennie kum ang zât nulain an thlen tawh chuan rin tâwk tawh mai tur an ni. A chungah chuan eng pawh lo thleng ta ni sela, engtin nge ni ang? A fanu chu amaha a inngaihtuah ve chu a ngai tho tho tawh dawn a ni. Chutah, mipa chanchin a hriat theih dan ber tur chu anmahni kawm aṭangin a ni a; chumi bâkah, mi sawi dan a hriat tawhah te reng reng chuan Considine-a chu Gentleman dik tak niin an sawi vek bawk si a.

Thâwk leh khatah, "Pa nih ka tling zan lo a ni ang, hmeichhe chanchin hi ka lo la hre chiang lo êm mai a; i nu erawh kha chu a danglam a ni. Mi enkawl dan pawh a thiam a; keimah zâwkin thil ṭha lo ka ti lui ṭalh mai ṭhin pawh a ni. Lennie, i mi hriat thiam ka ngai a ni,” a ti chhûak ta hlawl mai a.

Ani chuan engtin mah a chhàn loh avangin chu tlai lam ni sa rum rut mai hnuaia an kal zelnaah chuan sawi zawm zel tur a han ngaihtuah vang vang a, “I nu kha zawng la dam chu ni se, a tih dan tak pawh a hre tur hi a ni a. Mi ṭha tak pasala nei a, in ṭha tak bengbel turin a duh ngei ang che. Chu chu kei pawhin ka duh dan che chu a ni,” a ti chhut chhut a.

Thlaler leh tlang lam te chu a thlir vung vung a; a rifle-a vaivut kai chu a han hru fai a; sahdah a hmuam leh a, mit len ṭhat viau loh chuan silai a rawn rîk emaw, thal a rawn thlâwk emaw hma loh chuan Apache-ho chu an awm leh an awm loh hriat harsa tak a ni si a.

Mahse, a fanu Lennie bawk chu a lungkham ber mai a, han hrilh hriat thiam chu a duh a ni. A tawpah chuan, “Infawh leh thil dang ai pawhin mipa hmangaihnaah chuan thil dang a awm a ni,” a ti ta hlawl mai a.

“Ka hria alawm, pa....”

Chutah, Spanyer-a chuan, “Thing hlim a awm leh hunah kan chawl leh lawk dawn nia,” a ti ta a. Eng tikah nge tlanchhiat a ngaih dawn tih pawh hriat a nih loh avangin an sakawrte chu an remchem a ngai a ni.

Thâwk leh khatah, an hma chiahah chuan an kalkawng rawn tan tlanga thlaler aṭanga hnu lo chhûak, chhim chhak lam pan hi an hmu ta thut mai a. Sakawr, thir pheikhawk bun lo, an hnu chu darkar khata upa pawh la ni lo hi a ni a.

Spanyer-a chuan an hnu chu a han bih vung vung a, an pan lam chu a han thlir zûi leh a; mahse, eng mah a hmu si lo. “Min hmu chu a ni ngei ang, kan fimkhur a ngai ta a nih hi,” a ti ta chut chut a.

“Pa?”

“Huh?”

“Anni kha; Considine-a leh mi dangte kha, an thil tum kha an tih theih i ring em?"

“Hre lo le.”

"He lam hi an rawn pan ve ang em?”

"Mexico lam hmanhmawh takin an pan ang. Mi sawi ka hriat danin Considine-a chuan thlaler chinchang chu Apache leh Pima ai mahin a hre zâwk a ni.”

"Amah kha ka mi duh zawng tak a ni.”

“Theihnghilh daih rawh, amah pawh i hmu leh tawh kher lo vang. Mahse, a rawn beisei deuh viau che chuan ka that ang.”

Dave Spanyer-a chu hnung lam hawiin a sakawrah chuan a han inher a; mahse, thlaler ram chu a rûak huai ringawt mai a. Vaivut khu eih pawh a hmu lo va; mahse, eng emaw tak lungkham chu a nei tlat mai a, a sakawr aṭang chuan a inher awl lo mai a. Miin an la enthla ru reng nia a hriat hian chutiang chuan a awm ṭhin reng a ni.

Eng mah chu a hmu thei lo va; mahse, tunah chuan harsatnaah an lût ta a ni tih erawh chu a hria a. Chu chu a hmuh kher pawh a ngai lo ve, khâng hnu-hma te kha a la thar êm mai a, engtia tih tur nge ni ang?

Dave Spanyer-a chuan a rin thu mai pawh a ni lo. Apache-ho chuan an rawn zûi che a nih phawt chuan buaina i tâwk a ni mai, buaina chi hrang hrang! An rawn bei che pawh a ni thei; an lo lambun che pawh a ni thei; a enga mah chu an ti lo pawh a ni thei tho bawk a ni.

A nih leh, Considine-a leh a pawlte kha rawn tlan chhûak thei ni ta ang sela, he lam kawng hi an rawn zawh ngei ang a; chutah, anni chu lo nghâk ta zâwk sela; chu zawng, a tum si lo. Him taka an rawn tlan chhuah theih reng reng pawh a ring lo a ni. A ṭha ber chu, kal zel mai chu a ni. Ṭan lo khawh vena hmun remchang a hmu ve mai ang chu....

“Pa, ka nu hi engtin nge i tawn a?”

Apache-ho hlir a lo ngaihtuah avang chuan a fanu zawhna chuan a ti phu zawk mai a. “Oh, a pasal nen khawthlang lamah hian an lo chhuk ve a; a pasal chu a damlo a, a thi ta a. Kei ka lo awm hnai bawk si a, eng nge chutia mahni chauha awm ta chu a khawsa thei em tih te en turin ka va tlawh ve a....

"I nu kha chu Lady dik tak a ni. Lehkha thiam..., nang pawh sikula kal tir tur chein thu min tiam tir a ni. Eng nge kei teh lulah hian a hmuh pawh ka hre Io. Chutih lai chuan ka la naupang a, hmuhsitawm tak pawh ka la ni lo pawh a ni ang; mahse, i nu chu mi dang ka hriat zawng zawngte aiin ka zah zâwk a ni. Hlim pawh kan hlim dun ṭhin teh asin,” a ti ta a.

A sawi pah chuan a hawi vêl ruai a, eng mah pawh a hmaih chuang lo va. Chutah, zawi sup hian, “Lennie, kha Winchester kha a pai aṭangin la chhûak rawh, fimkhur a ṭul ta a ni. Buaina su turin inpeih rawh le!” a ti ta a.

“Indians em ni, pa?”

A sakawr chu ram sakawr sâwizawi hnu hi a ni a, rattler rul chu a ke hnuai sirah chuan a lo awm reng niin! A han rîk tâk chhek chhekah chuan chu sakawr chu a zuang thut a, tlan chungin a han ṭum a.

Sakawr chu lungpui zingah chuan a zuang Iût a, chak fahran hian a tlan ta vak mai a. Lungpui lian pui mai hi tlan hêlin a rawn filawr chu a tauh ta a.

Chutah zet chuan inven theih a ni ta lo. Chu sakawr chu a ter ut ut a, a ke-a din a tum hram hram a; mahse, ding zo lovin a tlu a, lung te nen chuan an lum thla ta a.

Anchhia lawh ṭhawt pahin Spanyer-a chuan a sakawr chuan a ûm zûi nghâl vat a, lung lum leh a fanu khek ṭhat chu a hre zûi bawk a.

Lungpui tlan hualin a zuang thla vat a; tlan titih, tawlh titih hian Lennie bul chu a zuk thleng ve ta nghâl vat a. Ani chu a rawn tho chhûak tawh a, a khur dar dar a, a pilh deuh nin nian bawk a; mahse, na vakin a lang lo. A rifle chu a lo la chelh ran a, ani chu tlan pelin Spanyer-a chuan a sakawr chu a zuk pan ta a.

A zuk thlen hma chuan a ke ruh a tliak a ni tih chu a hre nghâl mai a, han beisei tur a awm ta lo! A ke ruh chu a tliak a; chutah, rul, mi chuk na êm êm chuan a lo hliam hman tawh si a. Sakawr phurh, ip chu a han la thla a, a zin chu a phelh a, chutiang huna silai hmeh puah chu duh lovin a zuk kun thuai a, Bowie chemtê chuan a hrawkah a zai ta a.

Lennie chuan a rawn pan dawn a; mahse, a pa chuan a lo hnar a, chhum zet hian, “A kal tawh. A ke a tliak a, rulin a chuk bawk a ni. A thi tho tho dawn a, ka that ta mai a ni,” a lo ti a.

Lennie mittui chu a rawn hnam chhûak ta a, "A ṭhat teh lul nen khan...," a ti ta tlawk tlawk a.

A pa chuan a fanu lungchhe tak han hnem nan chuan, “Mai mai a, i ã tâ em ni? Khatiang te chu sakawr thlûak khingbai, thlunglu chauh ti lian mai, a mei pawh hmunphiaha hman chi lek, tu tan mah ṭhatna nei lo a nih kha!” a han ti a. Mahse, amah pawh chu a kiai suk a, “Mahse, kan ngai hle dawn zawng a ni," a ti ta a.

Tunah chuan sakawr pakhat chauh nen mel za tam kal tur a la awm bawk si a, chu pawh thlaler ramah....

Kawng an han chuan chhuah leh hnu chuan Spanyer-a chuan, “Sakawr pakhat kan la nei alawm. Chuang rawh le,” a ti ta a.

Lennie chuan thlaler khaw lum hnuaiah chuan a mit chu a han siai sak a, a pa rilru ti buaitu chu a hria a; mahse, tih theih a nei ngang si lo. Ani chu tel lo sela, a pa chuan hun remchang pawh a nei thei zâwk tur hi a ni a...

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 24th, 2018, 8:12 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 8
(Rozami Pachuau)

Dave Spanyer-a chuan silai a neih loh lai pawh a hre pha tawh lo va, a mamawh hun chuan a hmang mai a ni. A rawn chawr chhuahna leh a rawn seilenna ramah chuan silai chu loh theih loh hi a ni ringawt mai a.

Eng lai mahin Dave Spanyer-a chu Indian-ho hlat takah a awm ngai reng reng lo va, a kawlh ber berte hnaiha khawsa reng a nih avangin an chanchin pawh a hre hneh hle a ni.

Indian tan chuan indo chu an hlimna a ni mai a. Indo leh sakawr rûk, sa pelh chu an pasalṭhatna, an hming ṭhatna leh an hausakna a ni mai a. Sakawr rûk thiam tak chu sa pel mi ṭha tak ai chuan an la hlu ta zâwk a ni. Indo tur emaw, sakawr ru tur emaw chuan Indian chu mel tam tak an kal ṭhin.

An awm dan chu Dave Spanyer-a chuan a hre thiam a, an zingah pawh sa te lo pel fo tawhin a ṭul hunah chuan do pawh a do mai a. Apache-ho zingah chuan nun rawnna hian awmzia a nei lo reng reng a ni tih pawh a hria a, innghaisakna chuan Indian-ho chu a ti hlim zâwk ṭhin a ni. Hmelma an man pawhin khawngaihna reng reng an nei ngai lo.

Apache chuan huaisenna leh chakna thahrui te hi an ngai sang a, fin vervêkna pawh hi an ngai sang tho bawk a ni. A zawng a za-a sawiah chuan Dave Spanyer-a chuan a mi hriat, mi ngo tam takte ai chuan Indian-ho tam tak chu a ngai sang zâwk a. Anni chu a lo do tawh ṭhinin anni pawhin an lo do tawh ṭhin a; chutia inbei reng reng chu ni mah se inzah tawnna an nei tlat si a ni.

Apache hmelma beih dawn chuan ṭanhmun lâk thiam hi thil awlai a ni lo. Apache chuan thlaler ram te chu a hre hneh êm êm a, ramhnuaia rawlrala inbeih chu a duhthusam a ni a; mahse, Dave Spanyer-a pawh chu Apache-ho tluk bawkin Gila chhim lam ram leh Salt River Valley-te hre chiang êm êmtu a ni ve tho a ni.

Eng emaw chen chu an zûiin an lo ngaichang tawh a ni tih pawh a hria a, tunah chuan khawi laiah nge an beih ang tih chauh chu an ngaihtuah a ni tawh ang. Tunah hi chuan eng ang mi nge a nih pawh an hre tawh ngei ang a, ramhnuaiah chuan mi mizia hi Apache-hote chuan an hre awl êm êm a ni si a; chuvangin, mi pakhat chauh a ni na chungin Dave Spanyer-a chu pa namai a ni lo tih an hre ngei tawh bawk ang a, huphurh pawh an huphurh deuh pawh chu a ni ve maithei a ni.

Inbeih hun a lo thlen chuan Dave Spanyer-a chuan ṭanhmun remchang lâk a duh a, ngun taka a lo tin zâwn theihna aṭanga ṭanhmun lo lâk chu a duh a ni. Zan chu a hla vak tawh lo va, ṭanhmun remchang an hmuh theih vaih chuan, eng emaw hun chhung chu Indian-ho chu an lo dang thei ngei ang a, tichuan, zanah an tlan chhûak thei dawn a ni.

Packsaddle Mountain chu chhim lamah a awm a, Castle Dome pûk chu han thlen phâk rual a la ni rih si Io. Chutah, High Lonesome-a kawr thûk tak kha a han hre chhûak a, chutah chuan lungpui Iian pui puite a insir khup a, chu ngei chu an hmelmate lo bei tura an ṭanhmun lâkna tur hmun niin a hre ta a.

Apache-ho chuan dan naranin khawthlang lamah chuan chumi bâk ram chu an rawn pel ngai zen zen lo va, an hmelma Papogoes leh Pimas-te chu chhim lamah chuan an awm a; chutah, chhim lamah leh hmar lamah chuan an awm bawk avangin.

Spanyer-a chuan ni chu a han thlir vung vung a, ni tlâk hma chuan a tlem berah pawh darkar hnih chu a la awm ang. Ring deuh mai hian, “High Lonesome kan pan ang,” a ti chhûak ta lawng a.

"Pa...?"

"Huh?”

“Considine-a kha mi sual a ni em?"

Dave Spanyer-a chuan, chu chu fimkhur deuhin a ngaihtuah ta a. A tir chuan mi sual a ni tih han hrilh mai chu a tum a; mahse, Apache-hote chu a fanu chuan a ngaihtuah vanga chu thil chu a zâwt a nih ringin, a hnemna te pawh a ni thei zâwk mahna tih chu a ngaihtuah leh ta zâwk a. Eng pawh ni sela, Considine-a chu mipa dang tam takte ai chuan a tha zâwk reng rengin a hre bawk si a. A tawpah chuan, “Ni lo ve. A nih ka ring lo. Outlaw chu a ni a; mahse, mihring pianphungah chuan mi ṭha tak a ni,” tiin a chhang ta a.

Chutah, mak tak maiin Lennie chuan a kut zungṭangin a banah chuan a rawn vuan a, eng emaw chen chu a pa banah vuan zelin, a sirah chuan a kal ta a. Chutiang dûatna pawh la tawng ngai zen zen lo, a fanu rawn tual lennaa thil mak a tih tak tak chauh hmu ṭhin Spanyer-a rilru chu a khawih ta êm êm mai a.

An bul vêlah chuan thlaler awm dan kalhmang chu a lo danglam ta deuh a, vaivut var dur serh surh te kha a lo thûk ta zâwkin, lungte pawh chu a lo dum ta zâwk a. Hmun khawi lai laiah emaw chuan hmanlaia tlang kangin a rawn phuh chhuah tawh vaivut leh lungte chu a awm a.

Joshua thingte chu hnah pawh nei lovin borûakah chuan khen beh ni mai àwm hian an phar zar de du a. An ding lamah chuan lungpui hrawl zet mai, mam hun mai, mel chanve zeta sei; chung lamah pawh feet 2-a tam taka rawn ko bur mai, hun, ni leh ruah leh vaivutin a lo tuai mam tawh hi a ding luah mai bawk a.

A thil la hriat rengna chu Spanyer-a chuan a han sawm khâwm ta a. High Lonesome Canyon thlen hma chiah chuan Box Canyon, kawra pûk inhung ang deuh hlek hi a awm a, chu chu an tawmna tur chu a ni ang. Chuta ṭang chuan thui tak a thlir theih a, lungpui phen turte pawh a remchang a ni.

Spanyer-a chu tlang aṭang chuan vei lamah ngil takin a han peng a, lungpui hmun an va chhûak ta hlawl a. Chutiang lungpui hrawl pui pui insir khup awmna zelah chuan khawthlang lam an pan leh ta a.

Thâwk leh khatah Spanyer-a chuan, “Considine-a te ang chuan inthununna hi an ngaithei Io va; mahse, mi tinin inthununna hi kan mamawh si a ni. Miin an thunun lo a nih pawhin amah tal a inthunun tur a ni. Khawi laiah emaw khan Considine-a chu a peng sual ta a, amah ngeiin peng dik lam chu a thlang leh tur a ni ang. Mahse, chu chu amah ngeiin a tih tur a ni," a ti ta a.

“Nang chuan chutiang chuan i ti a....”

“I Ma (nu) tel lo chuan.... Aw le, ani tel lo kha chuan chu chu ka tih pawh ka ring ngai lo.”

“Considine-a chuan a ti thei ngei ang,” hlauhthawnna nei hauh lo hian Lennie chuan a han ti a.

A pa chuan, “A chang chuan mipa hian nawr kan mamawh a ni. Amaha a tih bâka pawn lam puihna,” a ti a.

“Pa, kan sakawr a bai."

Dave Spanyer-a chuan thihna kut vâwt nguaiin a rawn khawih zawk ni ta mai hian a inhria a. En pawh en ṭha duh vak lo leh hlau ru deuh tak hian a han inher a, sakawr chu ngun taka bih chungin hma lamah a kai phei a, an sakawr buang chu a ke a lo bai chiah mai.

Thing hlimah chuan a han ding zawk a, ṭhu tung meuhin a ke chu a zuk endik ta a. A thir pheikhawk bun chu a lo bal chhia a lo ni a, a chanve lai chu a lo tla bo tawh a. A chanve la bet chu a han kar thla leh a; chutah, a chemtê chuan a ke hnuai chu a zut mam ta a.

An kal zel a, Joshua thing hmunah chuan an lût ta a. Ni chu a sa kher mai a, a lum huam huam ringawt mai a, eng mah hi han che eih pawh a awm lo va, hnim hring reng reng pawh, laiking bel rawh tak ngial pawh hmuh tur a awm lo.

Chutah, thâwk leh khatah, an kalkawng turah chuan sazupui hi a rawn zuang chhûak zawk a; anmahni chu hmu thutin sir lamah a tlan leh ta nghâl vat a. Chumi rual chuan Spanyer-a chuan a silai a phawi a, lungpui phenah chuan a bet phei ve ta a.

Lennie chu bawk turin a han nem a, sakawr pawh phen tur awmna lamah a kal phei ta nghâl a. A han ngaithla vung vung a, eng mah thawm reng reng a awm bawk si lo va, a pûakruk chu a paiah thun lehin a sakawr zina rifle chu a pai aṭangin a hnûk dâwk ta a.

“Saw laiah sawn eng emaw chu a awm a ni. Hetiang khaw lumah eng emaw hlauh a neih loh chuan sazupui a zuang mai mai ngai lo!” a ti ta bul bul a.

A Winchester chuan kah mai inpeih rengin a han ṭhu tung a, a rifle cheng chu thawm nei lovin a kau de de a; a lu a han her dawn lai tak chuan lungpuia moccasins pheikhawk han rah ri inhrut hraih hi a hre ta a. A vei lamah a inher vut a, Indian-pain a rawn zuan lai tak chuan a hnungzang chu lungpuiah chuan a bet thlawp a.

Spanyer-a kutah chuan Winchester chu a rawn zuang chhûak zawk a; chutah, chu Apache hrawk chu silaimu chuan a verh ta sawr a, a nghawng chu a kaw darh hawk mai a, chu silai ri chuan ralkhata tlang pang chu a thangkhawk ta rum rum mai a.

Mitthi ruang lo per thla nawlhah chuan Lennie chu a lo ip chawih mai a, an bul maiah a rawn tla si a. Chu Apache chu la tlangval tak mai hi a ni a, a tlangval thinlung hmanhmawh chuan hranghlui pasalṭha a tawng palh ta a ni.

A reh ruih mai a. Mi dang, a bul hnaiah awm ve an awm em? Nge ni a, he tlangval hi a lo kal hmasa bîk?

Chu Indian chuan Winchester rifle a keng a, Mexican silaimu paina iptê hian a khat ṭanin kartut a pai bawk a. Spanyer-a chuan silaimute chu a phawrh chhûak a, ama iptêah chuan a thun ta a; a Winchester erawh chu a hlui hle tawh a, a la lawk a, lungpuiah chuan a vaw tliak hmawk a, a paih ta daih a.

Lennie chuan Indian chu a han melh zauh a, “A la naupan hmel kher mai!” a'n ti sap a.

Spanyer-a chuan, “Khati bâk kha chuan a upa tawh chuang lo vang,” ro hulh hian a lo ti a.

Spanyer-a chu a dawh thei a, khawi laiah emaw chuan a hmelmate chu an awm ngei mai; chuvangin, han tawlh sawn leh mai chu a tum rih lo a ni. Tichuan, inngaihtuahin a han ṭhu leh rih ren rawn a.

Sakawr chu a hum ngei tur a ni ang. Chaw leh tui leh thir pheikhawk thar a neih chuan a ṭha leh mai ang a, an kalna turah chuan sakawr chu an mamawh ngei mai dawn a ni. Chutah, lungpui chu an kal pelh chuan ṭiauvut zingah an kal leh tawh ang a, rah rîk pawh a awm leh tawh lo vang. Mel khat an la kal leh chuan High Lonesome luhna chu an theng ṭan tawh dawn a ni.

Indian-ho an awm ve tlat si avangin hmun him tak zawng a ni dawn chuang hauh lo va; mahse, ṭanhmun khawh nan erawh an hmang thei dawn a ni.

Naktûk zet chu, ni a rei dawn kher mai a!

****************************

Ni tlâk, lungpui hlim a la Ian theih lai si chuan Considine-a chuan sakawr thi a hmu ta a, a ke a tliak a, a hrawkah zai hlum a ni tih pawh a hria a.

Chu sakawr thi chu an han en vang vang hlawm a, han hrilh fiah pawh a ngai vak chuang lo. Kha mite pafa khan hun harsatthlâk tak mai an thleng ṭan ta tih chu a hriat mai a ni.

Thlaler ram chhengchhe karah Apache hovin an ûm bawk si chuan sakawr nei lo chuan eng an ang dawn hauh lo tih chu an hre chiang hle a. Indian-ho pawh chu lo awm lo pawh ni sela, sakawr pakhat rinchhana han chuan dun chu thil tih chi a ni hauh lo.

Eng ang pawhin miin a hnu lo kalsan ta ang sela, a hnu-hma aṭang chuan eng ang mi nge a nih tih chu mi chinchang hria leh chîk ngun tan chuan a hriat theih zel a ni. Mi tu mah hi khawvelah hian mahnia ding kan awm lo va, mi kan han hrut zeuh pawh hian eng emaw hnu-hma zawng a awm zel ṭhin a ni. Chutiang bawk chuan Lennie Spanyer-i hnu-hma chuan mi pakhat, a hming Considine-aah chuan hnutchhiah a nei ta tlat mai!

Chu mite pali chuan an rangkachak tangka rûk chhuah chu phur ṭeuh chungin chu sakawr thi leh rampalaileng thlaler hmuna hnu-hma te chu an han en vang vang a, ngaih dan an nei ṭheuh a; sawi chhuah erawh an tan a ṭul kher lo. Chûng mite chu mi kam tam zawk zawk pawh an ni lo va, thil awm dan chu an hre thiam vek mai a ni.

Chûng mite chuan an thinlung chhung takah chuan pawi tihna, lungngaihna tak an nei ṭheuh a, Lennie khan a nungchang, a ngaihno beina, a zawlaidi khan an thinlungah amah ngainatna a lo hnutchhiah tawh si a. Outlaw mah ni se, mi sual zawk zawk leh mi khawngaihna nei lo erawh zawng an ni si lo. Lennie hlauhawmna tawn chu anni pawhin an rilruin an ṭawmpui ve vek a. Lennie chu an ngaihzawng, an farnu, an nupuia an neih ṭheuh, an mangannaah mai pawh ni sela..., a lo ni si a.

“Hmeichhe sakawr zâwk kha a ni.”

Dutch-a chuan awm nuam lo zet hian aw a han thian a, “Hun kan khawh ral mai mai a ni, kal zel ila a ṭha zâwk ang,” a lo ti hluk a.

An kal leh ta a, an hmaah chuan a hmaa mite sakawr kaih hnu chu an hmu zûi ta zel a. Spanyer-a chu an hriat ṭheuh angin, pa rem hria leh fing tak a ni a, tih dan tur chu a hre zel ang; chuti lo zawng, khawi lai Apache Indian inah emaw chuan Lennie lu vun leh sam nalh tak mai kha a la inbang hnap mai dawn si....

Hardy-a chuan tãwi tuk hian, “Kan inrawlh vena tur a nih loh hi. Sonora kawnga ka Mexican nula kha ka ngai tawh êm a nia,” a han ti a.

Considine-a chuan, “Pedregosas-a tui awmna, Tinaja kha a hla tawh vak lo va, kal zel ang,” a lo ti a.

Tichuan, chu Tinaja lam an panna kawngah chuan an kalkawng pangngai kha chu an kalsan ta a. Lennie leh Dave Spanyer-a chu hnuchhawnin chhim lamah Mexican ramri chu an pan ta zel a.

Ni tlâk hma chuan mei khu an hmu leh a, van lam hawia mei khu ding chho larh mai hi. Chu mei khu chu chiang deuh mai hian vawi hnih a han inpak chho laih laih a, chu zet zawngin an thin a ti dam thei ta lo.

Thlalerah chuan khua hi a thim tawh vek chuan a thim thut mai a. An chungah chuan bãk hi a leng luap luap a; arsite an rawn lang a; hla feah chuan sihal an û chuah chuah a, ri dang awm chhun chu an sakawr pen ri leh an sakawr zin chik nghur nghur chu a ni tawh mai a ni.

Hardy-a chu a inthup hlei thei tawh lo va, “Cheng singruk a tling ngei ang, rangkachak hlira cheng singruk!” a ti chhûak ta phawng mai a.

Tu mahin an chhang lo va. Pa ruh ṭheh ṭhawh pali an ni a, pa pali, silai nena nung ṭhah mai; eng tikah emaw chuan silai bawka thi tur! An zinga pakhat chu Mexico hmeichhe duh nei a ni a; pakhat chuan zu no han dawm vang vang mai chu a thlahlel ber a; pakhat leh chu Indian thlah a ni a, ani chuan eng mah duh pawh a nei chuang lo. Pakhat leh dang chuan eng nge a duh chu a hre tlat lo; tunah erawh chuan a hre dawn ta niin a lang a, a hlauthawng a ni.

Thâwk leh khatah, Kiow-a chu a ding ta chawt a, “Vaivut; sakawr an kal,” a han ti a.

An ding nghâl ṭhap a, an lo ngaithla a, Spanyer-ate pafa hnu chu darkar eng emaw zata upa a ni tawh a, mi ngo dang, chu laiah chuan kal ve an awm bawk si lo va; chuvangin, Indian-ho an ni ngei tur a ni. Khawi lai hnaivaiah emaw bûk an khuar a ni ang.

“Tam tak! Indona rammu rùal!”

“Chu chu engtin nge i hriat theih?” Hardy-a chuan a lo ti a.

“A rimah. An inhnawih rimah! Damdawi rim nei," Kiow-a chuan thãwp sut hian a ti leh a.

An han ngaithla leh deuh vang vang a, an ding ṭhap mai a. An sakawr pakhat chuan nghâkhlel takin a ke a per tloh tloh a, khua a lo thim chuan thlaler pawh chu a vâwt ruih tawh a, thlaler chu ni a tlâk tawh chuan a vâwt hma êm êm a ni.

A tawpah chuan an kal leh ta zel a, an han din leh chuan darkar eng emaw zat hnuah lungpui hmun, ṭan khawh theihna hmun hi a lo awm ta a. A tûka an kal zel dan tur chu fimkhur taka rem an ruat a ngai a ni. Tui an hmuh theihna hmun tur Tinaja chu tlem tê chauh a awm a, pakhat kal pelh palh pawhin thih mai theihna ram a ni.

Mei pawh an chhem chuang lo va, an chêt zawnga an thuamhnaw hâk han innawk ri tih mai loh chu thawm pawh an nei hek lo. Chumi zan chuan an pheikhawk pawh an phelh lo va, an gunbelt leh lukhum te chauh tih loh chu an silai te chu ban phâk maiah an dah bawk a.

Chung lamah chuan arsi a tlêp ṭhut mai a, Kiow-a chu a awm hle hle thei ngang lo va, a tawpah chuan zawi tê hian, “Thingtuah kang rim, an awmna a hnai!” a han ti su su a, tu mahin an chhang chuang lo va.

Considine-a chuan pa pahnih a hmuhte kha a la hre reng a, an lu ruh an hem keh thlenga mei chhem chunga a letlinga an mi khaite kha!

Dutch-a pawh chuan a thil hmuh pakhat a lo ngaihtuah ve mek a. Pa pakhat, nghawng chîm hmawka fanghmir kaw so thur mai bula an phum kha!

Considine-a chu a chau hle nâin a mut a chhûak hauh lo, “Lo mu ula, ral vengin ka lo awm phawt ang e,” a ti a, a kawmawl chu a dàra bâtin an bul mai lungpui lian deuh mai nghenchhen chuan a ṭhu ta a.

An piah khawi laiah emaw chuan tu emaw chuan ‘Thamnosma’ ṭang a thliak a, chu Indian dawi thing rim chu a chhe kher mai. A kawmawl hnuaiah chuan meizial a han ṭan a, a kuta a mei de hup tut chung chuan a pak talh talh a. Sakawrte chuan hlobet an pet mawlh mawlh a, sakawr rim leh thamnosma rim leh ama kawr hâk lai bal rim te chu a nam rum rum a. Zin kawngah chuan kawr hâk lai tak ngial pawh han sûkna hun leh hmun a awm meuh si lo a ni.

Eng vangin nge Lennie chu tunah tak chuan a ngaihtuah tâk ni le? Eng vangin nge chu nula ria chum bat mai, inkhaithli zeih zawih, biang sen chât rem rawm, kawr da lam ha kha a lo awm ve hlauh ni le? A han fawh tâk mai aṭang khan em ni, chuti êm êma a vei tâk ni?

Pa inngaihtuah vak mi pawh a ni ngai lo va, a chhanna lah a hre hek lo. A mei chu a han hip leh raih raih a; chutah, vaivutah chuan a nawr hlum ta a. A tho va, sakawr zingah chuan a va phei a, lungpui piah lamah chuan phei zelin thãwm a va ngaithla vung vung a, thawm eng mah reng a awm lo.

Khawchhak lam kawl a rawn en ṭan riai ruai tâkah chuan Dutch-a chu a va kai tho ta a, ngawi rengin chu pa lianpui mai chu a rawn tho chhûak a, Considine-a chu a mu ve ta thung a, a muhil nghâl ta mai a.

Darkar khat pawh la tling ṭhathum lova a han thawh leh chuan, Dutch-a chuan mei dêt set set chauhin coffee a lo chhuang so tawh a; Hardy-a chuan a sakawr zin chu a lo phah mek a; Kiow-a chu zingah chuan khawiah emaw a lo vâk chhûak a.

Considine-a chuan a sakawr leh Kiow-a sakawrte chu an zin a phah ve ve a; chutah, coffee in tur chuan mei bul chu a pan ve ta a.

Lungpui karah chuan rawn lûtin Kiow-a chu a lo kir leh a, mei bulah chuan a rawn ṭhu ve a, “Sawm pali an ni. Lu vun thar pawh an khai,” a rawn ti a. An rilrua thil awm chu zawh hlauthawng siin an en ṭhap mai a.

Kiow-a bawk chuan, “Sam sei awm lo, hmeichhia tel lo...,” a han ti leh a. Mei zûk ṭan kaiin coffee chu a'n in khawlh khawlh a, “Tunah chuan an kal tawh; mahse, hnu an chhui. Vawiinah lu vun dang an la beisei,” a ti ta a.

Dutch-a chuan, “Dave-a chu mi ã a ni lo. Indian-ho chuan a hnu an chhui a ni tih a hre khawp ang,” a lo ti a.

Hardy-a chuan, “Kha Pete Runyon-a kha, min rawn ûm zûi ngei àwm si a, kan kal leh vat a ṭha ang,” a lo ti ve bawk a.

Chu thlasik tûk thiang tak mai chu thiang fahran hian a rawn êng chhûak ta kulh a. Lungpui te chu an la lang chiang êm êm a, tlang te pawh chu rawn hnai ta kâwk hian a lang a, van lam hawia mei khu ding tak han inpak chho talh talh ralkhata lo lang chauh chuan ngeng a chhun a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 25th, 2018, 6:57 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 9
(Rozami Pachuau)

Khua a rawn thim tâk tak zetah chuan Dave Spanyer-a chuan lungpui phen aṭang chuan sakawr chu a rawn kai chhûak ta a, a zin chu a hnawksak lek chauh a nih tawh avangin a paih tawh a, la kir leh hun te a awm a, la lâk leh atan a hnutchhiah a ni.

Packsaddle Mountain toh lurh mai chu an hnuchhawn veleh chuan thim zingah chuan vei lamah a han peng ta a, thui chu a hmu thei lo nain kalkawng riruang chu chêt sual lohna tâwkin a lang thei a. An hmaa tlangte chu a lang dum khual ringawt mai a.

Lennie chuan a rawn zûi ve zel a, a theihna hmun apiangah ṭiauvut chung chu an zawh zel a, Indian-ho chuan hnimhnah han hrut ri mai pawh an hriat awl êm avangin an kalkawnga hnimhnah an hrut tur lo awm chhunte pawh chu dim têin an kuai kul zel zâwk a.

Borûak rawn hnawng ta deuh chuap chuan kawr thûka kawkek chu an thleng dawn hnai ta a ni tih a rawn hriattir a, borûak vâwt chu kawr thûk aṭanga rawn thaw chho ṭhin a nih avangin. Chu canyon, kawr thûka kawkek awmna lam kawng chu an thlen hunah chuan thim pawh a lo thim leh zual sauh tawh ang a, chûng lung bang sang pui puite chu feet zanga laia sang te an nih hlawm avangin.

Ruahsur hnua tui lianin ṭiauvut chu a tih ngheh deuh avangin kal vêl pawh a awlsam hle a; hnu erawh chu a lang chiang duh deuh dawn a ni. A fanu chuan eng mah sawisel pawh a neih hauh loh avangin Spanyer-a chu a lawm rilru hle mai a, Lennie chu nula hrisel tel tawl, thothang ṭha tak mai, rampalailenga han kal vêl pawh thei tak mai hi a ni a, mipa tam tak ai chuan rifle pawh a hmang thiam zâwk a ni.

Luikawr dunga mel hnih vêl an rawn luh hnuah chuan an chawl ta rih a. Chu Canyon chhungah chuan khua a la thim hle nain khawfing a chat ṭep tawh a, an kal chhuah aṭang khan mel ruk/sarih vêl zet an kal tawh a ni.

Dave Spanyer-a chuan tlang lam chu kâwkin, “Khi laiah khian bûk tê tak tê leh pûk a awm ṭhin a, mi ṭhenkhatin bihrûk nana an hman ṭhin a ni; tui pawh a awm,” a han ti a.

Thimtham hnuaiah chuan eng emaw ni hi a han zuang a, sakawr chuan a ke a khawng ta hlawk hlawk a. Thâwk leh khatah, chu zan thim hnuaiah chuan a rawn zuang chhûak a, thing rote chu a ri rak rak a, hnim chu a ri phei san san a; sakawr chuan a lu a tun hru hru a, Spanyer-a chuan a hruiah chuan a vuan tlat a, chumi hnu chuan a ngawi leh ta a.

Spanyer-a chuan, “Tlang ram sakeibaknei! Kan rim a hriat hmain sakawr rim kha a hria a ni ngei ang,” tiin a fanu chu a han hrilh a.

Luikawr chu a rawn zim ta deuh a, a bang te pawh chu a sang zual ta deuh a, an lawn chho ṭan ta a. Eng emaw chen an lawn hnu chuan chu luikawr chu a rawn zau leh hawk a, lui ruam rai hi an va thleng a, chutah chuan khup thleng thleng hian hlobet a lo ṭo a, tui rim te pawh an hre ta a.

Spanyer-a chuan, “Chawl rih teh ang. Khua han var phawt sela, kan pan lam tur chu ka hre chiang thei mai ang,” a ti ta a.

A ban, a khûp chunga daha lukham chung hian Lennie chu a ṭhu tawm khar a. Kha sakawr chung chuang, pa sang pui mai, pên zangkhai zet mai kha a han ngaihtuah a....

Outlaw ni lovin, thing kittu emaw, bâwng vengtu emaw hi ang mah zâwkin a hria a. Zanriah ani'n a lo chhum laia thing ekin emaw, a ban sek tung mai a han hlim a, ṭin-a a ban vêl han sil sur sur emaw ang hian a mitthlaah a han inhmuhtir a. Outlaw pawh angin a hre lo.

Eng nge...? A nu pawhin a pa a neih chuan, a pa chuan a nun dan kawng te chu a thlâk ve mai alawm. Khawthlang lamah pawh a lo la kal ve maithei a, California ram an thlen hun chuan, a pa ranch hnaihah awmhmun benbelna tur hmun a zawng ve phawt ang chu....

Mahse, chutiang tur zawngin a ngai phal hlawl lo. A thinlung chhungril takah chuan chu tlangval chu, chu tlangval chauh chu a hmangaih ta a ni tih a inhre si a; mahse, outlaw nupui han ni thei tur chu a ni lo tih pawh a inhre bawk si!

Sikul a chhuahsan aṭanga a lo tih fo ṭhin tawh a nih avangin; a pa chuan a lo zirtir tawh bawk nen, harsatna hmunah pawh zinvah vêl te, khawsak harsa deuha nun te pawh chu a ti thei zel a ni tih chu a hria a; mahse, a duh zâwk erawh chu, in, ran vulhna ṭha tak mai, hlobet duah hluah hluahna, a bula lui luang ri her her leh a kama a pangpar chin vul chik chek te chu a ni.

A pa chuan, “Tunah chuan kan kal leh tawh ang. Thil awm dan ka chian thei tawh e,” a han ti a.

Pa rin tlâk tak zawng a ni. A pa chu tar deuh tawh mah se, pa naran ai chuan la chak tak mai hi a ni a, a thothang pawh la ṭha tak a ni. Silai rawih ngaihna hmunah phei chuan a han ter pha tur hi awmin a hre meuh lo.

An kal leh ta zel a, tunah chuan tlang lamah an lawn chho tawh a, hmun ṭhenkhatah chuan sakawr chunga chùan pawh a harsa hle a. Lennie pawh chuan thâwk a han la leh halh halh ṭhin a, a pa chu engtia lawn zung zung thei bîk nge a nih chu mak a ti hle mai a, thahrui phiar tulh ni mai àwm hi a ni a.

A tawpah chuan lungpui kara kawkek, pûk chu an han thleng chho ta hlawl a. Chutah chuan tui pawh a lo tling kal a, mesquite, cottonwood leh willow thing te hian a hlim duai a, chûng lungpui intiang khâwm hmawr lam aṭang chuan an vêl ram zawng zawng chu a lang thei a.

Spanyer-a chuan, “Min rawn hmu lo maithei a ni,” tih pahin a fanu chu a han melh zoh a, “Muthilh ka mamawh a ni. Lennie, i lo meng thei ang em?” tiin a han zâwt a.

Lennie erawh chu a mut a chhûak lo va, harh kar chunga inngaihtuah veng veng chu a duh zâwk a. Apache-ho chu hla taka awm ni hian an lang a, Considine-a aia hla daih zâwka awm niin!

Eng nge a hming hmasa zâwk ni ang le? 'Considine-a' ti chauha an koh kha a hria a ni si a; amah a hriat rengna chu hunin a la rawn her liam ang a, a lo chuai deuh deuh ang a; chutah, a la theihnghilh mai ang!

Mahse, Lennie chuan amah theihnghilh chu a duh si lo! Hmu leh ngai dawn tawh lo pawh ni sela, a hriat rengna chu a rûk têa vawn ṭhat khiau a tum zâwk a ni.

Thil dang chu tlem tê chauh a awm a ni. Sikul a kal lai chuan Lennie chu thiam thei hle ṭhin mah se naupang hlim lo tak a ni ṭhin a. A nu chu chiang lo deuh chuan a hre riai ruai a, nu pian nalh, hmel ṭha leh zaidam tak a ni tih erawh chu a hria a; mahse, a nu thih lai chuan ṭhiante hnena a zin bo lai tak a lo ni hlauh si a.

A pa chu pa buluk tak, khermei tak a ni ṭhin a, thil engkim chian mi a ni tih pawh a hria a. Sakawrte leh bawng rual enkawl dan te chu a thiam hle bawk a, mi rual pawl tak a ni tih pawh a hria a ni. A pa chu mite pawhin an zah a, hlauh pawh an hlau a ni.

Socorro-a eng emaw laia an chen lai kha chuan a pa chu mi tinin an zah a, Sheriff, Banker leh ran vulhtute pawhin. A pa chuan tu mah a rinchhan a ngai lo va, a kâwnga silai inkhai chu mi tinin an zah a ni. Mahse, chu silai vang chauh pawh chu a ni lo, a pa chuan amah leh amah pawh a inzahin a inngai sang a ni.

‘A mitmeng vâwt ruih mai te chuan mi a ti khup zal zal thei a ni’ tia an sawi ṭhin te pawh a lo hre fo tawh a, ama nihphung hrim hrimah chuan pa ṭha tak mai a ni a; mahse, thil dik lo te chu tiin sawi pawh a sawi ve fo ṭhin a ni. A pa chu thlaler mi hrât khawkheng leh ramvachal a ni a, a duh duh hunah a muhil thei zel mai a, tunah pawh hian ṭiaupho chungah chuan inkualin a muhil bawrh bawrh mai a ni.

Vawi tam fe chu a ṭhutna aṭanga tho chhûakin Lennie chu a hawi vêl ṭhin a; mahse, hnuai lama mite rawn hmuh loh tur chuan a che vêl chu a inthup thiam hle a, a pa hnen aṭangin chutiang fimkhur dan chi hrang hrangte chu a lo zir tawh ṭhin a ni.

Khua chu a rawn var chiang ta tak tak a, a pa erawh chu a la muhil reng a, a han bih hnai a, Lennie chuan a pa chu a lo tar tawh hle tih chu a han hmu a, a upat deuh tawh avangin a fanu han chen kualna tur hmun buatsaihsak tumin a thawk chhûak a ni reng a.

A han hawi kual leh lai tak chuan Indian pakhat hi a sakawra lo ṭhu a hmu ta thut mai a, a awmna chu yards za ai pawhin a tam lo va, chu Indian chuan an awmna lam chu a rawn hawi phei vang vang mai a.

***************************

Considine-a chu Kiow-a rual chuan a kal ve zel a, Apache chu mi dang pahnih hmaah chuan ram va chian turin a lo kal hmasa a ni. Mahse, tunah chuan kawngpui kha an zawh tawh lo va, khawthlang lam hawiin an peng tawh a.

Considine-a chuan chiang lo ruai hian, Yuma Indian tlangval pakhatin Apache nula nupuiah a ru a, an zinga pasalṭha hming thang a nih tâk thu an sawi te chu a lo hre tawh a. Chutiang chu a nih tak zet chuan phuba la turin Apache-ho chuan khawthlang ram chuti chen chen chu an rawn thleng ta niin a ring a ni.

Sakawr chung chuang palite chuan kawng rau chu an zawh dawn chauh tih chuan sakawr thir pheikhawk chhia kha an hmu ve ta a. Chuta ṭang chuan an hmaa mite pahnih chuan sakawr chu a kaihin an kai ta a ni tih pawh an hnu aṭang chuan a lang a ni.

Considine-a chuan Spanyer-a leh Lennie chu ngaihtuah zûi pawh a tum tawh lo va, engtin emaw chuan an dam khawchhûak thei hram ang chu maw, a ti ve tawh mai a. Zanin chuan anniho chu Castle Dome-a pûkah khan riah an tum a ni.

Dome khaw thlang lama tlang kar kalkawng chuan a piaha lui phairuam chu a pawh phei a; chutah, chhak lam sira Silver Creek chu zawh leh tur a ni a, chutah chuan tui chu hmun hnih vêlah emaw chuan a awm a. Khawthlang lam hrut a, chûng tuite chu pehhêl ṭha zâwkin a lang a; mahse, tui chu an la mamawh dawn bawk si a ni.

An hnu aṭang chuan Spanyer-a sakawr kaih chu a bai nasa hle a ni tih a hre thei a, tlanchhiat a ngaih phei chuan an tan tih ngaihna a awm der dawn lo tih pawh a hria a. Anchhia a han inlawh hlak a; tu mahin an rawn enin eng mah an sawi chuang lo va, sakawr hnu chu an hmu ve vek a, an hre thiam ve vek tho a ni.

Hardy-a chuan a hmaia thlan luang zuih chu a han hru a, a sakawr zinah chuan a han insâwi rem deuh hlek a.

Eng lai pawhin an mit chu an len vêl reng a. An dam chhunga pawisa an la neih phâk ngai loha tam sum an keng a, chutiang zât zât chu neih pawh an neih leh ngai an inring bawk hek lo.

Hardy-a chuan, “Obaro-a an hmel put dan tur han hmuh theih chu ka châk kher mai!” a rawn ti chhûak hlawl mai a. Tu mahin an chhang lo, chumi ni zet chuan obaro-a Bank rawk chu, ve mai mai lek niin a lang ta a ni.

Hardy-a chuan mi dangte chu a han melh a; anni erawh chuan an lo ngaihsak vak lo. Sonora an thlen hun chuan Obaro bank rawktute zinga an puipa chu a ni tih nulaho chu a la hrilh ngei mai dawn a; chutah zet zawng, anni chuan lo ngai sangin a thu an lo ngaithla tawh ang! Mahse, amah leh amah pawh chu a inhneh thei chuang meuh lo chu a ni, chu bank rawk chuan pawimawhna a nei ta meuh lo ni hian a hre ve ta a.

An mitte chuan kalkawng dunga hnu-hma chu an en pah zel a. Putar pakhat chuan sakawr ke bai kaiin Indian-ho ram chu nula pakhat a tawn tlangpui dawn a ni. An thil ngaihtuah chu hre tlang vekin Dutch-a chuan, “Min ûmtu; posse chuan an la rawn ṭanpui thei ang chu,” a rawn ti chhûak phawng a.

Hardy-a chuan inti hlim lui tak chung hian, “Kan hnu an chhuina aṭang pawhin an kian phah ang chu,” a lo ti ve a.

An pali chuan ngawi rengin an kal leh ta zel a. An chau tawh viau a, an paw khual hlawm tawh bawk si a, a nin pawh an ning tawh hle a ni.

An hnungah chuan anmahni rawn ûmtute; posse chu an awm a; hma lamah Indian-ho rammu; chhim lamah chuan mi hiptu ramri, an thlen theih vaih chuan an himna ngei tur chu!

Thâwk leh khatah, an hma yards sawmnga vêla hlaah chuan hnim zing aṭangin varung rual khat hi an rawn ṭeh chhûak hak mai a, vei lamah an tlan ta a.

Kawngṭum rûak huai tawh aṭang chuan vaivut a khu ta chum chum a, Indian palite chu an tlan bo a, an lang ta lo va. Chûng varung han ṭeh hak aṭang chuan chinchang an hre nghâl mai a, hlauhawm lo tawng fo tawh an nih avangin inràwn leh inzawh a ngai lo.

Daidul ro char tawh hnar lamah chuan Considine-a chuan a rifle chu kah peih renga keng chung hian hmelma zawngin a mit a len vêl ruai a.

Dutch-a chu a chhak lam yards sawmnga emaw vêlah chuan a chho bawk a. Mi dangte chu hmuh tur an awm tawh lo, chutiang khawp chuan an insem darh rang ve tho a ni.

Rei vak lo chhung chu eng mah thãwm pawh awm lovin a reh ṭhiap mai a.

Considine-a chuan Indian-ho zawngin chu ni eng tak hnuaiah chuan a mit a han siai sur sur a; chutah, rifle a lo ri ta thawr a. Silai ri chu anmahni sir aṭanga lo chhûak hi a ni a, chu chu rang zetin dawrzawn khat lai tur hian a rawn chhang nghâl a.

Hardy-a chu Considine-a hnung lam aṭang chuan a rawn chhûak phei a, a nui vur vur a, “Kan Kiow-a zet chu! Mi dang ka hriat tawh zawng zawng aiin a mit a var zâwk, pakhat chu a thal ngei ang tih ka thàp ngam che,” a rawn ti a. A rifle chu a han la thla a, Considine-a bulah chuan a rawn vâk phei a, “Khâng varung an han darh hakah khan Kiow-a chu an awmna aṭanga feet sawm vêl leka hlaah a awm tawh a, lungpui a phen a ni,” a han tih zawm leh a.

Dutch-a chu a la rawn lang ve hauh lo va, Kiow-a chuan a han kâp leh thawr a; mahse, tu mahin an rawn chhang ta lo va.

Considine-a chuan a mita a thlan lo luang lût tur chu a kut hnungin a han hru a, lei chu a sa huam mai a, a kamis pawh thlanin a huh zui a.

Kiow-a chuan a han kâp leh dawt a; chutah, Indian pakhat hi a rawn lang zawr a, a rifle chu a hma lamah a rawn paih lawk a, hnimbuk zingah chuan a let thla ta tawp a.

A han reh vang vang rih a, ni leh ṭiaupho leh an kawr bal rim chauh chu an hriat theih awm chhun a ni rih mai.

Thâwk leh khatah an rawn khek chhûak chul a, Indian paruk vêl lai hian ṭiaupho aṭang chuan Kiow-a bihrûkna lam chu an rawn bawh phei ta a. Anni pathum chuan an lo kâp a, Indian pahnih chu an tlu ta tawp tawp a.

Considine-a chuan a rifle chuan a han kâp nawn leh ṭhuai a, chumi zûi chuan Daidul aṭang chuan Dutch-a pawhin a rawn kâp ve ta nghâl a.

Kiow-a chuan Apache-ho chu a ṭhiante kah mai theih turin a lo tawktarh hi a lo ni a, anni chu an tlanchhe tawh emaw Indian-ho chuan an ti ni ngei tur a ni.

Eng mah dang thleng awm lovin a han reh leh vawng vawng a; chutah, ama sakawra chuangin Kiow-a chu a lo lang ta a. A han ding a, a han hawi vêl a, anni pathumte pawh chuan an sakawrte chu an kai a, an rawn pan ve ta a.

Dutch-a chu a hmai pilh avangin a thi nuau mai a, “Silaimu sawh khãwkin a per alawm maw le!” a rawn ti a, chu chauh chu an inhliamna awm chhun chu a ni.

Indian-ho chu pakhat mah an va hmu ta lo va, an mitthite thlengin; mahse, thisen erawh chu a lo awm nual a.

Kiow-a chuan, “Pahnih, pathum pawh, maithei,” a ti a.

Apache-ho chu inbeih thiam tak mai an ni a, an fing hle bawk a ni. Tun hi chu han inbeihna hun leh hmun pawh a la ni lo hle mai a; mahse, hêng Apache-ho hi chu Spanyer-a leh Lennie zûitute kha an ni hauh lo va, tui a harsat avanga inbawk hrang neuh neuh an ni hlawmin a lang.

Kiow-a chuan, “Hetah hian an lo kal a ni. Hetah tui a awm,” a ti chhat chhat a. Tuikhur ro tawh hi a han kâwk a, chu tui chu va panin a han hâi deuh hlek a, ṭiauvut chu rawn hnawng chhûakin tui chu a rawn tling ta nghâl a. An in a, pakhat khatin an sakawrte chu an in tir ta liam liam a.

Kiow-a chuan, “Khatiang hmunah tui a awm fo a ni. Mahse, ruahsur hnuah chuan a awm ngei ngei,” a han ti a.

Vanah chuan chhum tlem azawng hi a rawn leng ta delh delh a; mei khu erawh chu a awm hauh lo thung a. Thâwk leh khatah Dutch-a chuan, “Saw laiah sawn bihrûkna, bûk hlui a awm tak asin, High Lonesome tlang lamah khian," a ti ta thut a.

“Pete Runyon-a pawhin chu chu a hria alawm.”

“A lo kal zel i la ring a maw?” Hardy-a chuan a lo ti a.

Considine-a chuan hnung lam chu a han hawi a, “Lo la kal zel ang. Pa luhlul tak mai a nia,” a han ti a.

A nih leh, Castle Dome-a pûk chu a hria em?"

“Ka ring lo; hriat pawh chu a hre mahna!”

Dutch-a chuan mei zûk tur a han zial a, “Hranghlui chauhin an hria a ni. Considine-a pawh ka hrilh alawm,” tih pahin a meizial chu a han nuai hlãwm a, a chilin a liak huh zoh zoh a, “Spanyer-a erawh chuan a hria a, High Lonesome-a mi pawh a hria a ni," a'n ti zûi zat a.

Kiow-a chuan, “Ding lamah kan kal ang. Saw tlang piahah sawn,” a ti a, ni êngah chuan a meng zim sun mai a.

An hmaah chuan mipa pakhat leh hmeichhe pakhat kea kal hnu a awm a, chumi rap pherh zul chuan Indian-ho hnu a awm bawk a. Dutch-a chuan chu hnu chu a en vung vung a, chutah, a thlan tla zul hnuaiah chuan a mit a han khap fuk fuk a.

Considine-a chuan High Lonesome tlang lam chu a thlir chho vung vung a....

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 26th, 2018, 5:08 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 10
(Rozami Pachuau)

Lennie chuan a pa a kaih thawh hma chuan sakawr chunga Indian kha a lo bo leh daih tawh a. A pa chuan, “Pawi ti suh, i lo hmu chu a ṭha a nih chu,” a lo ti mai a.

Dave Spanyer-a chuan a muthilh hma khan êng riai ruaiah a dinhmun chu a lo thlithlai hmasa daih tawh a. Sir tin aṭangin an rawn pawh phei a ni tih pawh a hria a; mahse, sir hnih aṭang chuan lo daltu an awm loh deuh avangin chu lam aṭanga an rawn beih chu a ring a ni. Mahse, an rawn beih runpui erawh chu an rin loh lam aṭanga lo kal tur niin a ngai a, inthup thiam tak an nih avangin Apache-ho chuan mi dang zawng aiin rawlrala inbeih chu an thiam zâwk a ni.

Chumi bâkah, phen tur awm meuh lo rama cheng an nih avangin chutiang rama hnehtu chan chang tur chuan an inzir nasa êm êm bawk a ni. Putar chuan a rawn beih theihna lai tur àwm deuh hmun khatah Lennie chu a dah a, ani chuan hmun khat dang chu a chãng bawk a, vanneihthlâk takin an tawmna khurah chuan an sakawr pawh chu a dah ve theih hlauh a.

A han ngawi vung vung a, chutah, “Kha Considine-a kha.... I tan chuan pasal tur ṭha tak pawh a ni maithei a ni,” a ti ta a.

Lennie mittui chu a rawn parawl ta kiang a. Chutih lai tê chuan tun hma zawng aiin Spanyer-a chuan a fanu chu a hnaih ta zâwk a.

Lennie chuan Considine-a chu hmuh leh reng a inbeisei phâk tawh lo nain kha hun rei lo tê an han inhmuh dun hun chhung kha hmangaihna a rawn hriat ṭanna hun a ni a, a hmangaih tak zet a ni.

Thâwk leh khatah, chu thu tlem tê mai chuan Dave Spanyer-a leh a fanu daidangtu chu a su pawp ta a. A fanu lah chuan a mitthla tê têin chu mite pahnih chu a han inhmuh duntir a, chûng mipa pahnih a hmangaihte chu, amah nen chuan....

Chu tlang lian pui mai panga lungpui tohlâwt ṭo ber burte chu thlirin chu pa putar, zangkul kheu kho, chau tak mai, a pa chu a han ngaihtuah ta a. Chu pa, a nu thih hnu chuan khawharna chauh lo chu eng mah pawh hriat nei tawh lo chu! Engtin emaw chuan, engtin emaw tak chuan a pa chu duat taka enkawl zel a tum tlat a ni.

An piah hnimbuk zingah chuan che eih pawh a awm reng reng lo va. Lennie chuan a rifle chu kah peih ran hian a hum a, sa te chu a lo kâp ve tawh ṭhin a, chu pawh chu ei atan chauh; mihring erawh chu a la kâp ngai hauh lo a ni. Mihring kâpa silai han hmeh puah chu hlauhna riau pawh a nei a; mahse, rei lo tê hnuah chuan amah ngei pawh an thah mai theih avangin chu chu loh theih loh a ni tlatin a hre leh bawk si.

A mit chu lènin an piah lungpui kar te, hnimbuk kar te chu a melh a, 'Mit sir hian thil che a hmuh ran theih ber e,' an tih pawh a hria a; mahse, che eih pawh a hmu si lo. Chumi hnu lawk chuan leia thil han che hret hi hmuin a inhre tlat a, ngun lehzuala a han bih chuan kephah buang deuh hi hnimbukah chuan a lo inhnûk lût zal zal a. Lennie chuan a hlat zawng chu ngun taka ngaihtuahin a rilruin a teh vêl a, hnimbuk chu a tin ta ran ran a.

Chuti maia rang taka tawlh sawn leh mai turah chuan a dah loh avangin a ke hmuhna ding lam hret hnimbuk chu ngun zetin a han tin zâwn ta a. Thâwk a han la raih raih a, tlem a han thaw chhûak leh hret a; chutah, a target-ah chuan rifle hmawr chu a han ti ngil ta a. Rifle hmawr chu a khur hlak hlak a, chu chu a han ti ngil leh rih a; chutah, zawi kal raihin a hmet ta a, rifle chu a kut aṭang chuan a zuang ta lawp a.

Kephah lo lang chu a khawng nghâl awrh a; chutah, tawi tê chu a han inhnûk lût leh a, a ngaiin a awm ta reng a.

“Pakhat chu! Pa.”

“I ti ṭha e.”

Indian pathum hi a rualin an rawn tho chhûak ṭhawt a, a lam pan chuan an rawn tlan ta a. Ani chuan rang mangkhengin; rang lutukin a lo kâp zawt zawt a, an pathum chuan hnimbukah an bibo leh ta a. An tawmna hmasa aṭanga fit sawmngaa rawn hnai hretah hian Spanyer-a chu a awm a, hawi pawh a rawn hawi hauh lo va.

Chutah, thâwk leh khatah, a hmaa eng mah awm hauh lova a lanna lai aṭang khan thlalerah chuan an rawn tlan chhûak ta a. Ani chuan fimkhur takin a lo kâp a, vawi khat, vawi hnih, vawi thum chu. Pakhat chu a tlu ngei mai a, pakhat dang pawh; maithei.

A mita thlan lo luang thla chu a han hûi a, eng mah hmuh theihah chuan a awm ta lo va, khawi lamah mah, eng mah! Awm zawng an awm ngei mai; an lang lo mai pawh a ni. Spanyer-a chu a tui a hãl kher mai a, a dang chu a ro hulh a; mahse, a chechang ngam der rih si lo. Han bibo hlen daih tur chi chu an ni si lo va, an rawn hnaih phei tial tial dawn a ni.

Ni chu a han en a, a la hma hle mai si a, eng chen nge an lo chàn tawh ni le? Rin thuin han che zeuh chu a han kâp leh a, an thil tih dan chu a hria a ni tih hriattir turin hmun inral kah fe fe chu a han hawl zûi leh a. Chutah zet zawng, chumi nia ni tla chu a hmu leh ngai dawn tawh lo hian a inhre ta a.

Aw le, nun harsa tak kar ni mah sela, a dam rei tawh bawk alawm. A rilru kaptu chu Lennie chu a ni zâwk a, hei aia ṭha hi a phu a ni. Lungpui hual chhunga khawhar taka thih mai aia ṭha chu - silaimu-a thih mai! A fanu tan chuan silaimu hum a tum avangin.

Apache-hovin khawngaihna nei hauh lo leh mualpho taka an sawisak ai chuan ama kut ngeia a fanu chu kah hlum mai a tum avangin. Chu chu a lakah a ba a ni. Nun a lo pe tawh a, a nun humhim pawh chu a tum sa teh a; mahse, chu chu a hlawhchham a nih si chuan thihna pawh chu amahin la pêk a tum a ni.

A thlirna avang chuan a mitmeng pawh chu a sen khuih tawh mai a. Chutiang dinhmuna Lennie a han dintir ta chu mi eng ang hrep nge maw a nih le? Pa eng ang nge maw a lo nih hrep le? Ani chuan thih a lo inrin dan phei zawng a ni a; mahse, Lennie zawng a la naupang a, nun a ṭan ve dawn chauh chu a ni si.

Nimin lekah khan, darkar tam pawh la ni lovah khan mipa pakhat chu duhawm deuhin a lo melh ve lek chauh a la ni a. Ani, a pa lah chuan a thil lo mangman chu a tih chhiatsak theih a ni si. Ani; Dave Spanyer-a, pasalṭha hrât khawkheng, outlaw hranghlui chuan chutiang mangman chu a awmzia a hria a, amah ngei pawhin chutiang mangman chu a lo nei ve tawh ṭhin kha a ni si a.

Chutah, Lennie tan pawh mangman a neihsak a ni. Pasal ṭha tak neihtir a, in leh lo ṭha tak bengbeltir turin. A kekawrah chuan a kut thlan zul chu a han tât hul a, “I ṭha maw, Lennie?” tiin a han zâwt a.

Lennie chuan, “Ṭha e, pa,” a lo ti a.

“Zan lo thlen thlenga kan lo la dan theih chuan heta ṭang hian tawlh chhûakin kan kal bo thei ang.”

A ni maithei; a rinawm chiah lo a ni. Chuti thleng thlenga dam chu beisei pawh a beiseiawm lo a ni. Chûng Indian-ho chu dawh thei tak zawng an ni a; mahse, hmeichhe man hmasatu nih chu an châkin an inchuh ṭheuh ngei dawn si a. “I kah apiang kha fuh sak zel tum rawh,” a han ti ngawt a.

Chutah, a thih pawha a rilru ti lawmtu atan, “Nichin khan ka lo chhang run lutuk deuh che pawh a ni ang. Considine-a chu mi ṭha tak a niin ka hria asin, khawthlang lamah pawh a lo kal ve ka beisei,” a ti ta a.

“Ka lawm e, pa.”

Lungpui leh hnimbuk te chu a han melh ve leh a, "Ka chungah chuan a ṭha khawp asin. A ṭha tak zet a ni. Ka..., min duh ve ngei ka ring," Lennie chuan a ti ta a.

“A duh ngei tur che a ni.”

Spanyer-a chu a ngawi ta a. Aw le, eng vangin nge a nih loh ang? Mâkpa a nei dawn a nih chuan engah nge Considine-a chu a nih loh ang? Considine-a chu a hre thiam ang a, an inhre thiam tawn ang. “A duh teh reng ang che! Ka hmu tlang vek a ni,” a ti ta a.

Eng mah han che eih pawh chu a awm leh ta rih chuang lo va; mahse, sawtah sawn awm zawng an awm si a ni.

Dave Spanyer-a chuan a nupui thi ta kha a han ngaihtuah a. Ani chuan tunah hian a rawn thlir ve reng ang em le? Mitthite chuan minungte khawsak dan hi an hre ve ang em? Chutiang thil chu tun hmain a lo la ngaihtuah êm êm ngai lo va.

Pathîan! Ni chu a va han sa teh reng êm! Tunah chuan a sang tawh hle a, phen tur lah a awm si lo va, ni chuan a em tlawk tlawk mai si!

“California chu ram lian pui a ni a. Lennie, tah chuan hmun kan nei ve ang a. Ka han ngaihtuah a, Mexico lamah pawh thu ka thawn theih ka inring a, kha tlangval kha min rawn tlawh turin kan sawm ang chu."

An han ngawi dun vang vang a.

“I ṭha maw, Lennie?”

“Aw, pa; mahse...," A fanu rifle ri chuan a rawn zawm nghâl ta zat a.

Rang deuhin vawi thum a han kâp nghâl a; chutah, rattler rul pawh a him tham lo vang tihna tur hial hnimbuk aṭang hian Indian pakhat chu a rawn vâk chhûak ta a. Spanyer-a chuan a rawn din chhuah hma hma chuan a áwmah tak a lo kâp dawt mai a, zen rim chu a nam rum rum mai a. Chutah, hlauhna! Ni e, amahah chuan hlauhna; hlauhthawnna rim a rawn hre ta a ni.

“Thah i nei em?” tiin a han zâwt a.

“Nei lo.”

“Saw laiah sawn pakhat chu an hloh leh tawh e."

Dave Spanyer-a chuan rul tleng anga tlengin an tuithawl chu a va la a, a han in pawp a, a lem hma chuan a kamsir vêl chu a han hawl nawk nawk a. Tui chu in sek mai a châk hle a, a insum hram hram a, tuithawl chu a dah leh ta a. Hlauhna leh ṭan khauhna hian mi a ti tuihal thei a, han inbeih tak tak hnuah phei chuan khawiah nge a luh zozai tih tur khawpa tui in khawlh khawlh mai hi a awl ṭhin reng a ni.

Spanyer-a chuan ni chu a han en a, chhun thleng an la daih chuan an vannei a ni tawh mai ang. Lennie ṭanhmun lam chu a han thlir a, ani chu a ṭha e; mahse, an sakawr neih chhun chu a lo thal reng tawh a, silai muin a fuh a, a chalchang a lo tal tawp vêl chiah hi a lo ni a. Aw le, eng pawh ni se, zana kaih chhuah zawng a harsa tho ang.

Mahse, Spanyer-a chuan rûak ta huai hian a inhria a, ke ringawt chuan engtin nge chu thlaler zau pui mai chu an sut tlang tâk ang? Yuma an thlen hma pawhin kawng chin chu a la thui vang vang kher mai si. A rifle chu a han keng kang a, an piah lam hnimbuk vêl te chu a han tin nawn kual a, engtia rei nge an la awh ang? Darkar khat..., darkar hnih?

***********************

Considine-a chuan ram chin chu a han thlir vang vang a, Dutch-a chuan, “Tunah chuan a hla tawh lo ve. Pûk chu ni tlâk rualin kan lût thei tawh ang,” a han ti a. An han kal ṭan leh a; chutah, hla tak maiah chuan silai ri an hre ta a, an ding chawt a, khawng auh hian an ngaithla vang vang hlawm a.

Silai chu a ri nawn ta zawt zawt a, a han reh deuh a, a ri nawn leh ta dawp a. Dutch-a chuan mi dang pawh en lovin chil a han pik puat a, “High Lonesome tlangah an awm a nih ngei chu! Chumi hmun chu ka hria,” a han ti churh a.

Silai chu a ri leh thawr a; chutah, a rawn ri nawn leh dawt dawt a, a hnuhnung zâwk chu Indian-ho silai ri ni ngei tur hi a ni.

Outlaw-ho chu an ding khâwm laih a, tlang lam chu an thlir vang vang hlawm a. Hardy-a chuan ramri lam chu a han thlir a, an hnaih tawh nen chuan le. La rawn ûm zûi zel pawh ni sela, chhim Iama an pen tawh chuan rawn ûm zûi zel ngaihna a awm tawh dawn chuang lo a ni.

Dollar singruk.... Rangkachak hlir hlak!

Considine-a chuan tlang lam chu a han thlir vung vung a, chhung lamah chuan thawrawng, rûak vek ni hian a inhre tawh mai a. Kha putar, luhlul pui hrep tak kha! Hetiang hmuna mahni fanu te luhpui ta chu, eng nge maw a hriat ni hrep tak le!

Mahse, a hria! Spanyer-a chu a tlan bo dawn a ni. Ama nihna an hriat lohna hmun khawi laiah emaw a fanu chu hruai a duh a ni. A fanu tan chuan nun kawng ṭha tak dinsak a tum a ni; mahse, tunah erawh chuan beisei a awm ta lo. Chu lai kawngpui pawh ni silo hmunah chuan an dang bet a nih chuan chhan chhuah chu a beisei awm ta lo. Eng mah beisei awm a awm ta lo.

Anmahni rawn ûmtute; posse chu tunah chuan an rawn hnai ve tawh ang a, sakawr chuangtlai te pawh an rawn keng mahna! Chutiang kawngah chuan Runyon-a chu rem hre tak a ni, zanah pawh chawl chuang lovin an lo kal zel ngei ang. Mahse, he lai hmun posse hovin an rawn thlen ve chuan Spanyer-a leh Lennie chu an awm tawh dawn lo a ni.

Hardy-a chuan, “Tunah chuan ramri pawh a hla tawh lo ve. Kha Mex nula han hlim phar vêl tur chu!” a han ti a.

High Lonesome-a bihrûkna hlui kha chu ṭanhmun ṭha tak chu a ni, khati chen chen an thlen hman chuan. Mahse, mi pali/panga tan chauha ṭanhmun ṭha a ni; pahnih tan chuan ni lovin; pathum.... Aw le, pathum tan pawh a inven theih ang.

Considine-a chuan kha nula sakruang vâwt ngi ngiai a han pawm kha a la hre reng a, a mitmeng mawi tak mai, dam diai mai te kha.... Chu nulain amah ring êm êm, ring tâwk êm êm maia a han melh te kha! Eng nge amahah chuan rinna a neih? Engah nge mipa chu nia a rin reng? Engtin nge amah Considine-a, outlaw-ah chuan rinna a nghah theih?

Thâwk leh khatah, a sakawr zina rangkachak tangka ip khaina hrui chu a han phih chat ta hmawk mai a, chu ip chu Dutch-a lamah a vawrh phei lâwp a, “He laiah hian kan inṭhen tawh ang!” a ti nghut a, “Nangni chu ramri lam panin kal zel rawh u, ṭhiante u. Kei zawng, mi ã ka nih hi,” a ti ta a. A sakawr dum lian pui chu a han pawt her a, High Lonesome tlang lam pan chuan chak zet maiin a lim ta pur pur mai a.

Vaivut chu a khu rum rum a, kar lovah vaivut khu chu borûakah a zam ral ta riai riai a. Chu sakawr ke chhep ri zàwi ta raih raih chu an ngaithla ṭhap hlawm a. Dutch-a chuan, “Leh mai mai ṭhin a, kan mi ã thlûak thawrawnga zet chu! An zingah a va zuang lût ringawt dawn a nih kha; khatiang kha Apache-ho beih dan tur a ni hlei nem!” a ti nung nung mai a.

Chutih lai chuan Kiow-a chuan a rifle chu a lo nuai fai mawlh mawlh a, eng mah pawh a sawi ve lo va. Kiow-a hi chuan eng mah hi a sawi ngai lo reng a ni. Pa dik tak mai, la tlangval ver vawr, hmai bial deuh, meng dum kul mai hi a ni a.

Dutch-a chuan a sakawr lakam chu a han la a, “A ṭha e; tunah, ramri panin chhim lamah,” a ti ta a. Kiow-a chuan a han en vang vang a, a rifle chu a sakawr zina a paiah chuan a khung lût leh ta a.

Hardy-a chuan, “An zinga a zuan luh vaih chuan Pathianin Apache-ho chu a chhan fe a ngai ngei ang!” a lo ti a.

Dutch-a chuan a sakawr chu pên li emaw lek hi a han pêntir chhut chhut a; a rawn inher leh thut a, Considine-a ip pêk kha Hardy-a lamah chuan a vawrh phei ve ta lâwp a. Ama ip ken lai chuan a zûi ve nghâl a, a sakawr chu a han kheng zuang lawp a, chhim lam pan ta lo chuan tlang lamah a lawn chho ta zâwk a. Lawn chhohna kawng chu a chhe hle a; mahse, Considine-a thlen rual vêl chuan a thlen ve mai a inbeisei a ni.

****************************

Considine-a chuan a sakawr chu mel chanve vêl chak takin a han tlantir phawt a; chumi hnu chuan a tlan zàwi leh ta deuh a. Chutiang khaw lum hnuaia theih patawpa sakawr tlantir vak mai chu thih pawh an thih phah thei a, sakawr ṭha tak chu a mamawh nasa mai a ni tih a hre reng a.

A lo kal dawn a ni tih an hriat chian ngei loh chuan chu luikawr (Canyon)-ah chuan lo lambun ngaihna a awm lo va, an hnung lam aṭanga rawn beih chu Apache-ho chuan an lo beisei dawn bawk lo a ni.

A Winchester chu a kut ding lamin a chelh run a, fimkhur zet hian a kal zel a. A hma lamah chuan rifle ri thawr hi a hre leh ta a, a lam hnai deuh aṭang chuan silai ri tam fe hian a zui nghâl bawk a. Thâwk leh khatah, a lawn chhoh harsa lai tawp ber chu chak deuh mai hian a kai chho a, a sakawr chu phul hlobet zingah an lo bihrûkna lam pan chuan a tlantir ta a.

A han ri leh dawp a, a sakawr rahnaa ding chungin a han pawt her leh a. Chu mite pafa chuan bihrûkna hmun chu an lo la thleng chiah lo a ni. Saw laiah sawn an awm, lungpui inbialna luihah sawn!

Indian pakhat hi lungpui sir aṭang chuan a rawn chhûak a, a rifle chu a koki-ah a nghat a; Considine-a'n a rifle a lek chhoh ve hma chuan chu Indian-pa chu an rawn kâp thlu tawp a, lungpui zing hlobet karah chuan a tla thla ta a.

Mak ti takin Considine-a chuan a han thlir chho a, lui kam hmun phihrit taka Dutch-a lo chhuk thla chu a hmu ta a. Dutch-a chuan, “Tlan chungin pan rawh le, ka lo veng ang che,” tiin a rawn au a.

Considine-a chuan a rifle chu a paiah a han thun leh sawk sawk a, a pûakruk a phawi a, a sakawr dum hrawl pui mai chu a kheng lim ta zawk mai a. A hnung lamah chuan Dutch-a Winchester chu a lo pûak zawt zawt bawk a. A hma chiahah chuan amah kah tuma Indian pakhatin a rifle a rawn lek kawh chiah chu a va hmu a, a hmeh puah hmain chu sakawr dum lian pui mai chuan a chil zûi ta a, a kephah ṭihbaiawm zet chuan chu pa chu a rap ta hrep mai a.

Tlan pahin Considine-a chuan a silai a hmet pûak zawt zawt a, Indian pakhat tla thlawrh chu a hmu thei a; chutah, pakhat dang a tla leh thlawrh a; mahse, a sakawr dun thahrui chuan a daih ta lo va, a tlu sawp ta a ni tih chu a hre ta a.

A sakawr ke rahchhan aṭang chuan a inkheng dâwk a; a sakawr, leia a tlûk tâk thlawrhah chuan a sakawr zin iptê leh silaimu te chu a la ta thuai thuai a. A bula Indian lo tlan chhûakin amah a rawn pan chu a va hmu zawr a, a awmna hma lam lungpui inhung bialna lai aṭang chuan chu pa chu silaimuin a rawn deng thlu nghâl thlawrh a.

Considine-a chuan a sakawr aṭanga a tlâkna lai hmun chu an lo chhinchhiah ngei ang tih pawh a hria a; chuvangin, hlobet zingah chuan chechang lovin a bawk phêk rih a, a hnung lamah chuan Dutch-a silai ri zawt zawt pawh chu a hre thei a.

Thâwk leh khatah, inkahna ri chu a reh hmiah mai a, zen rim chu a nam rum rum a, a reh hian a reh fel ta hmiah a. Chechang chuang lovin a la bawk phêk rih a, a bawhna lei rim chu a hre ram ram a, creosote hnim rim te nen chuan. Chutah zet chuan Considine-a chuan nun a la thlahlel a ni tih a inhre ta a ni.

Dutch-a silai ri pawh chu a reh ve hmiah bawk a, chu pa lian pui chu an that ta mai em ni ang? Chu zawng a nih a ring lo, chuti maia han thah theih tur mi chu Dutch-a chu niin a hre lo va, a thi har kher ang! Silaimuin a tih buai ve loh, khuai pakhat hian a bula cactus par zu chu a vi kual hlarh hlarh a.

Considine-a chu a han let thawk a; a pûakruk mu chu a kâp rûak a; a thun leh nghâl zat a, a Winchester mu pawh a thun belh leh bawk a. Chu Winchester-ah chuan mu sawm pasarih a thun theih a, a vaiin a mamawh dawn a ni.

A lu chu a han kan a, a dinhmun chiah chu hriat chian a châk hle a; mahse, a inbeng kang ngam chiah si lo. Hetiang hunah tawh hi chuan a che hmasa sa an thi hmsa mai ṭhin a ni si a; thih chu a la duh bawk si lo va, thih chu a hreh hle a ni.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 29th, 2018, 6:14 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 11
(Rozami Pachuau)

Kiow-a chu a sakawr zinah chuan ngawi rengin a ṭhu a, a lo nghâk chawt ringawt mai a. Chutah, Hardy-a chu a han mitsir rulh a, “Considine-a hnung i zûi tawh ṭhin a ni lawm ni?” fiah fahran hian a ti ta kâwk a.

Hardy-a chuan, “Chu vang chuan alawm a chan pual pawh hi ka lo enkawlsak dawn ni. Dama a rawn chhuah leh theih chuan a la duh leh dawn si a,” tiin a lo chhang a.

“Huaisenna i tlachham a ni ka tih fo reng ṭhin kha!” Kiow-a chuan a ti ta nghut a.

Hardy-a chuan chu thlah chanve-pa chu a melh ta reng a. Kiow-a chuan a nuihzat hle tih a hria a; mahse, chu thilah chuan hûatna erawh awmin a lang lo. Thil lo thleng ngei tur nia a hriat chu Kiow-a chuan a la nghâk rih mai a ni.

Hardy-a chuan vâwt ta sung sung leh chhung lama rûak vek hian a inhria a. Apache-ho nena inbeih awmzia a hria a, a nunga mi an man phei chuan an tih dan chu a lo hmu tawh a; hemi hma pawh hian a lo bei tawh ṭhin a, a bul ngeiah pawh a ṭhiante chu an lo that tawh ṭhin a ni. Chutiang a han ngaihtuah ringawt mai pawh chuan a awm a nuam lo sung sung a, a hlau a ni.

Considine-a chu mi ã a ni a; mahse, Considine-a leh kha nula inkarah khan thil awm a awm pawh a ni thei e, an inmelh dan kha a lo hmu ve tawh a ni. Saddle bag chu a han la khâwm a, Kiow-a lamah chuan a vawrh phei ta nawlh a, “Hmun li-ah ṭhen la, min lo nghâk rawh!” tih pahin a sakawr chu a kai her dawrh a, Dutch-a tlanna lam pan chuan a tlan ve leh ta a.

Kiow-a chu a nui kuk kuk a, a ṭhiante chuan chutianga a nui chu an la hre ngai lo reng reng a ni. Ip chu a sakawrah chuan a ṭawn khâwm a, a sakawr chu tlang lam a pan chhohtir ta a. Inngaihtuah chungin, a hmanhmawh ve hauh lo. Tunah chuan mi ngo lam ai chuan Indian a nihna chu a lang tawh zâwk a, a thil tih tur pawh a hria a ni. Mahse, tlang chhîp a han thlen chuan a nui ta hawk hawk a.

Pathian pawh a nei lo va, laichin a nei hek lo. Nupui a nei lo va, unau lah a nei bawk hek lo. Mi dang a fin ve lai pawhin amah hian a tal hrang deuh reng ṭhin a. Mahse, insual chu a phurna zawng tak a ni a, indo mite pawh a mi duh zawng an ni a, Hardy-a pawh kha a ṭhiante hnenah kal ve ta lo sela chuan a that ngei dawn tih pawh a inhria a ni.

High Lonesome lan theihna hmun, tlang chhîp a thlen chuan a zuk thlir thla a, eng mah reng hmuh tur a awm chuang lo va, chu chawhnu chu a lum huam ringawt mai a ni. Hlobet awm chhun te pawh chu an che eih bawk si lo va; chutih lai chuan lungpui inbial kara rifle ngul han de zawr hi ni êngah chuan a hmu ta a.

A thlir reng a, nula chu a zuk hmu ta a, dam zawng a la dam a ni. Chutah, mipa pawh kha, ani pawh; mahse, Considine-a emaw, Dutch-a emaw, Hardy-a emaw pawh chu a zuk hmu lo reng reng a. A sakawr lakam chu a thlah dul a, tlangah chuan a chhuk thla ta a.

Pa beng leih lawih, thlaler ram nena a tisa rawng pawh inrem fahran mai, a sakawr zina inrem thlap maia chuang chu, a sakawr nen chuan pumkhat ni mai àwm hian a lang a. A Winchester chu a taksa rem zaih hian a kuah bet a, a mitmeng dum kal mai chu a hawl vêl ruai a, a nghawng leh a áwmah te chuan thlan a rawn chhûak ṭuam ṭuam a.

Thâwk leh khatah a han nui leh kuk kuk a, a hmai chu hnawih ran ruai mai hi a duh a, eng nge Indian a ni alawm; chutah, indo tura rammua thawk a ni bawk si a. A sombrero lukhum parh chu a han phih dâk deuh hlek a, a sakawr chu hmun awlsam deuh laiah a chhukthlâktir a; chutih lai chuan Indian pahnih, hnimbuk biru laia inhnaih taka lo biru chu a hmu ta a.

A mitmeng tle chu an rawn hmu palh ang tih hlauvin anmahni lam pawh chu hawi ngam chiah lovin a ding ta a. A rifle chu a dàrah a chuktuah chho a, a mit lehlam chu siaiin lehlam chuan chu Indian hnungzang chu silai kaw hmawr tho chuan a han en zâwn ta a. Pakhat chu a han tin zâwn phawt a; chutah, pakhat leh pawh chu. Tho hian an rawn vir a, a’n vai kiang leh rih a, a sakawr chùan, a ke rin chhan zâwk chu a han thlâk a, ani chuan a la tin ta veng veng mai a.

A sakawrin a han din remchan leh chuan a rifle chu a han tin zâwn ṭha leh ta a, a hmeh perna chu a han kuai pan pan a, chu rifle chu nung ta phut ang mai hian a zuang ta dawrh mai a.

Indian-pa chu a ṭe tuarh a, a awrawl han rãk chu a râpthlâk zâwk hle mai. Pakhat zâwk pawh chu a rawn zuang tho vat a; mahse, rifle chuan a lo tin zâwn hman reng tawh avangin silaimu chuan a hrawk chu a deng phirsi ta vek mai a.

Kiow-a chuan a rifle chhu a dah thla leh zal zal a, a sakawr chu tlang aṭang chuan muang fan raih hian a chhukthlâkpui ta a.

*****************************

Considine-a chuan lei chu a tlawh chhan a, a khûp khing lehlam chu muangchangin a han khai chho va, ṭiauvutah chuan a ke hmawr chu a tlawh phum a, hnimbuk leh an bihrûkna bula lungpui lo hnai ber inhlat lam chu a hisap chhin ta a.

A hnung lama rifle ri dur chu a han hria a, chu chu Dutch-a rifle a ni ngei ang. Khawi lai hmun hla deuh hlekah emaw chuan silai ri dang a hre leh a; chutah, a dang leh. Chutah zet zawng, lum ta pup pup hian a inhria a, chu chu Hardy-a emaw, Kiow-a emaw an ni ngei ang.

A ke hmawr chu a han chhir thûk zual sauh a, a innem kang thut a, hma lamah chuan chak zet hian a tlan ta chiam mai a. Chak zetin pên li a han pên a; chutah, lei chu a deng thlawrh a; vawi li a han lum tawp tawp a, a beng bulah chuan silaimu chu a rawn ving fur fur mai a.

Considine-a chu che hauh lovin a mu thlawp a, thâwk leh thahrui thar a han sawm khâwm a. A chung lam leh vei lam, a hma lam deuh hretah chuan silai ri chu a han hria a; mahse, lungpui hnunga a bihrûkna chuan che eih pawh a hliah vek si a. Thlan leh vaivutin a thang zul tawh a, a vun te chu a thakin a sa nuai nuai tawh mai a.

Ni chuan a hnung chu a rawn em tlawk tlawk mai si a, a rifle chu hma lamah rawlh chhûakin target a han zawng a. Tunah chuan lungpui sir aṭangin Lennie leh a pa lo tawmna hmun chu a va hmu thei ta det det a. Vawi khat a han tlan leh zawr a, a hma chiaha lungpui chu silaimu chuan a rawn deng sawk mai a; a tawlh hnung leh thuai a, lung keh si per chuan a hmai chu a ti thip vek tawh bawk a.

A han nghâk leh vang vang a, rei tak chhung chu thãwm awm lovin a reh ta vang vang a. Chu chu indonaah chuan a harsat lai ber hun chu a ni reng a ni - nghah chu! Eng nge lo thleng tur tih leh hmun dangah pawh eng nge thleng ta tih pawh hre hauh lova nghah ngawt mai chu!

An thi zo ta vek em ni ang? Lennie chu a thi ta em ni ang? Spanyer-a chu a thi tawh em ni? A nih leh, Dutch-a kha?

A silai humna kut buang ther thur chu a han en a, kut chak tak mai, hruihrual hmang thiam tak leh ran rual chhinchhiahna pawh chhu thiam tak, hreipui leh thing zaina te, hmanraw engkim lo hmang tawh ṭhin kut chu! Chu kut chuan a sa ṭhain a ti chhe thei a, mak inti takin a tih chhiat lamah a ṭangkai zâwk niin a hre ta a ni.

Chutah, eng mah nei lo - ama puala in pawh; lei, acre khat, sakawr tak ngial pawh. A sakawr dum hrawl pui lah kha hnung lamah a thi tawh kha a ni si a. Chutih lai chuan silai a rawn ri leh dawt dawt a, silaia kah chhuah ang dawrh mai chuan a tlan leh ta a. Chu silai ri chuan Indian-ho, mi dangte pawh chu khaw dang a hawitir rih lawk a ring a ni.

A tlan pah chuan a hma chiaha Indian pakhat rawn ding chhûak hi a han hmu zawr a, chu tak chu a hrawkah a Winchester kaw hmawr chuan a han chhun chho ta sawk mai a, chu Indian hrawk chu a kaw nghâl hawk mai a. A rifle chu a let a, a kawm bul lam chuan chu Indian lu ruh chu a chhu zûi leh nghek a, thlûak per chuai khawp hian!

Chu Apache, sual hmel zet mai leh sa ṭha nulh mai chu a awp rawk a, a ruang chu Considine-a chuan a zuan kahlen phei nghâl a; lungpui chung lam hi a kut chuan a han ham a, a invawrh kai lawp a, a phen lehlamah chuan a zuang thla dawrh a; a han ṭum chiah chu Dave Spanyer-a chuan a dulah rifle-in a lo hawlh reng tawh mai a.

Spanyer-a chuan Considine-a chu a hmuh leh vaih chuan a that ngei ngei ang ti khan a lo sawi tawh kha a ni a.

Eng emaw chhung chu an han inen ren rawn a; chutah zawng, Dave Spanyer-a chuan a rifle chu a khai uai thla ta a. A chungah eng pawh lo thleng se, chu pa chuan a fanu chu a nei ang. Thâwk leh khatah, a chhungril chuan chu chu thil ṭha niin a hre ta a. Chu pa chu tlâk zânin a hre ta a, “Chair han pawt hnai ve rawh, ka fapa. Kan kham khawp tur chu a awm e,” a ti ta a.

Considine-a chu a nui ta vur vur a, “Teh reng mai, Dave. Mahse, ṭhiante pawh an lo la kal asin, Indian-hovin an lo dang thei ta a nih loh chuan,” a ti ve ta a.

Dutch-a chuan a rawn dawt leh a. Ani zawng, a sakawrin chak mangkhenin a rawn tlan a; lungpui hniam lai deuh chu a rawn zuan kahlen dawrh a, leiah chuan a rawn thal ta hawl hawl mai a. A nghawngah chuan kak inrin ruak hi a awm a, a kawr ban chu a thlerin a thi zul bawk a.

Spanyer-a chuan dûat tak maiin a lo en a, “Buaina aṭang chuan i fihlim thei ngang lo chu a ni maw? Hetiang rengin tu mah ka lo la lawm ngai lo a ni,” a ti ta tawp a.

Dutch-a chu lungpui phen lehlamah chuan a phei a, silaimu hren khâwm ṭhût, Bandolier hi a keng phei nghâl a, ṭanhmun a han khawh a, a inring zûi ve leh ta nghâl a.

Chutah, Canyon hmar lam aṭang chuan Hardy-a a rawn thawk ve leh ta thung a. Amah chu an hmu thei lo nain a sakawr aṭangin an lo hre mai a. A sakawr chu a chau tawh hle a, hnarkaw var hawk hawk khawpin a rawn tlan a. Indian-ho tih dan angin a sakawr pang lehlam sirah chuan a bet tlat mai a, kut khing khat leh a ke khing khat chauh ring chuan.

An lo bihrûkna lungpui hual chu sakawr chuan a rawn tlan pel dawn anga a Ian lai tak chuan Hardy-a chuan a thlah a; ani chu a zuang lâwp a, a boot khing lehlam chu amahin a thlawk per daih bawk a, an lo bihrûkna khurah chuan a rawn tla lût ta tawp a.

Chutah, a mawza ṭet hnuang chu a han melh a, Lennie lam hawi chuan a rawn nui vur vur a, “Chhung nu te thawm ṭhattir a ngai leh dawn ta pek a nih hi!” a han ti zûi a. A inher a, lungpui phen tur lamah chuan a rawn bai phei ta loh loh a.

Tunah chuan chu lungpui awm khâwm phen aṭang chuan pa pali-in pawn lam chu an chhawng tawh a, an rawn kah leh chu an nghâk ta ran mai a; mahse, a reh hian a reh tlawk tlawk rih a.

High Lonesome-a lui kam ruam, thleng dar anga awm chu a mawi kher mai a. Hun rei tak ata tawh outlaw-ho chuan tawmkûkah an lo hmang tawh ṭhin a. Tui a awm a, hnim hring a awm a, ramsate pawh an awm ngei ang tih a rin ngam a ni.

Hun te a rawn ralmuan zel hunah chuan, tu emaw chuan chu laiah chuan ranch rawn siamin, in te pawh a la rawn sa ngeiin a rinawm a, chu lai hmunah chuan naupangte pawh la rawn infiamin an la nui dar dar ngei ang chu. Chûng hun chu Apache-hovin an kalsan hunah emaw, an inrem hunah emaw a la ni ang. Chutih hunah chuan mite chu silai ringin an nung tawh dawn lo a ni.

“Mei khu!” Spanyer-a chuan a rawn ti chhûak ta thut a.

A kawhna lam chu an han thlir a, mei khu ding deuh mai chu van sang takah hian a chho vang vang a; a han khu bawr leh laih a; chutah, a bawr leh laih a, Indian-ho dang inkoh khâwmna, ral that turin an inko pung a ni.

An hnung lamah chuan thing ṭang rah rîk ang hi a lo awm a, mi pakhat ang maiin an hawi rual ṭhat hlawm a.

Lennie chuan mei a lo chhem chu niin, “Coffee in in duh ṭheuhin ka ring a, sa pawh tlem chu a la awm,” a lo ti a.

Considine-a chuan a han melh zauh hnu chuan khaw dang a hawi leh thuai a, a hrawk chu a tâwt um mai a. Dave Spanyer-a fanu chiah chiah chu a ni. Wagon tlan bawp bawp naupang, Indian nena an inbeihna awmzia pawh hre pha vek, eng nge an chunga lo thleng tur pawh hre pha; mahse coffee, ngawi rengin a lo lum a nih chu! Hmeichhe hna; mahse, a rifle chu a ban phâk mai turah chuan a dah reng a.

Mipa reng reng, chutiang hmeichhia duh lo chu tu nge awm ang? Hnunga rawn zûitu chauh ni lo; harsat Ieh mangan hun, hun khirh berah pawh sira rawn ding ngam, rem rawn ruatpui ngamtu, chan tur ang ang rawn chanpui vetu, an nun rawn thu khâwmtu chu!

*************************

Tlang pang sang fe maiah chuan a sakawr thukru tlat hian Kiow-a chu hnimbukah a tawm khar mai a. A sakawr a hnutchhiah hnu chuan a vahin a rawn vâk a, a sakawr zin, a tuithawl leh a rifle erawh chu a la rawn keng zel a. Lungpui awm lohna, phaitual hnim tlem azawng ṭona hmun chu a rawn thleng thla a; chutah, lei hmel awmzia chu lungpui sen niau nuau chuan a rawn thlâk thleng a, a tana inthup rem zet mai a nih avangin a rawn vâk thûk ta zel a ni.

A awmna aṭang chuan a ṭhianteho bihrûkna hmun chu a zuk hmu thei a; mahse eng mah erawh chu a hmu thei lo. A chang changin Indian-ho chu a hmu zeuh zeuh bawk a.

Khua chu a tlai ta viau mai a, chawhnu lam ni a her tawh a; mahse, ni chu a la sain khua pawh a la lum ngiang mai. Chumi zawhah zan a lo thleng dawn a, Kiow-a chuan a nghâk thei a ni. Nghah chu Indian-in a thil zir hmasak berte zinga mi a ni si a.

Tunah chuan Kiow-a chu Indian siar siar hi a ni tawh a; a chang chuan a mi ngo thisen nihna chu a rawn lantir ve zeuh zeuh bawk ṭhin. Pa awlsam tak, eng pawh ei thei zel mai, zu pawh in zeuh zeuh, a hmuh fuh chang chuan hmeichhia te pawh duh ve zel mai; a hmuh loh chuan ngaihtuah buai zûi lem lo hi a ni a. Thil engkim hian tawp hun a nei tih a hria a, chuvangin, a nghâk chawt chawt mai a ni.

Chu lai hnim tlem tê awmna hmuna han mut veng veng mai chu nuam pawh a ti kher mai. Ni a lum ṭha si, a ṭanhmun a ṭha bawk si, inbeihna erawh chu a la rawn awm leh thuai dawn a, a beih ve duh dawn phawt chuan....

Chu duh thlanna chu a hma fe aṭang tawh khan a lo nei tawh a, a taksaa lo awm, a thisena rawn zam chhûak, a ruha intuh hi a ni ringawt mai. Inbeihna hlek a awm tawh chuan a phur berah a ṭang thei zel mai a; mahse, ral bei mi dik tak a nih avangin inbeih hun a awm a, inbeih loh hun pawh a awm tih chu a hre chiang êm êm thung.

A tawmna hmun aṭang chuan Indian-ho chu a that ṭeuh thei; mahse a hun a la thleng lo mai a ni. A nghâk thei a, a hun a lo thlen hunah chuan a ṭul chu a la ti mai dawn a ni.

A iptê aṭang chuan bâwng sa rep tlang hi a phawrh a, a sir chu a han pet thla hlawk a, a ṭhial ta a. A awmna hmun chu vana mulukawlh lengte chauh chuan an rawn hmu thei a, anni lah chuan an la rawn ngaihven rih si lo; tunah rih chuan....

Tunah chuan thlaler borûak pawh a rawn vâwt ṭan deuh tawh a, Indian-ho ko belh tura mei khu han chhûak laih laih pawh chu a lo hmu ve reng a; mahse, a sa rep ṭhial lai chauh lo chu eng mah dang ngaihtuah hmel pawh a pu chuang lo.

A ṭhianteho bihrûkna hmun aṭang chuan mei khu hi a rawn zam chhûak ve ngiai ngiai a. Chuti a nih chuan hmeichhia kha a la dam chu a ni phawt mai, mipaho chuan chutiang hunah tawh chuan rawngbawl awzawng an ngaihtuah dawn si lo va. Chu chu hmeichhe hna a ni tlat si a; hmeichhia, harsatna leh hun khirh tak hnuaiah pawh a mipate theihnghilh lo mi leh a hna thawh tur pawh thlahthlam lo mi chu! Chu hmeichhia chu ‘Squaw’ ṭha tak a ni ngei ang.

Kiow-a chuan hmangaihna thu chu a hre ve phâk lo. A mite chuan hla te chu an nei ve ngei mai a; mahse, chûngte chu indona hla a ni. Lehkhabu pawh an nei lo va, hmangaihna lam sawina reng reng ziak pawh an nei hek lo. Hmeichhia chu a taksa lan dan leh a hna thawh dan aṭangin man a man leh man loh chu a hre mai a; mahse, eng emaw hriatna chu a awm a ni; hmeichhia bîk riauvin a rawn hnaih che chuan!

Chutiang hriatna chu vawi tam tak a lo nei ve tawh ṭhin a. Vawi khat chu Mexico nula pakhat lakah; vawi khat dang leh chu rei tak a ni tawh a, Navajo nula, an ina rei tak chhung a chamnaah. A han kalsan meuh chuan mak taka bo ta map mai hian inhriatna a nei ta a. A ngai riau mai a; mahse, a kir leh chuan a thang bo hlanin chu nula chu savawmin a lo seh hlum daih tawh mai a.

Savawmin a seh hlumna hmunah chuan kalin eng emaw chhung chu a ding vang vang a; mei a han zu hlat hlat a; sakawrah a chuang kai a, a kal bo ta daih a. Chu lam ram reng reng chu tlawh pawh a tlawh leh tawh ngai lo.

A ril a ṭam avangin mi bâwngte chu a ru ṭan ta a. A ṭamchhawl laiin phaituala bawng tlahlang a hmuh chu a talh a; chu chu cowboy pahnihin an rawn hmu a, silai an chuh ta a. Mahse, anni chu an che muang deuh a, pakhat chuan a silai a phawi zawh hmain a sakawr aṭang chuan a tla nghâl a, pakhat chuan a áwma silaimu pai chungin an ranch in chu a thleng leh thei hram àwm e.

Chutah zawng, posse rualin an rawn ûm ta a, ani chu tlan kualin an lo thlen leh hmain an ranch in chu a lo thlen khalh a; an kawtkaiah chuan an bâwng thau ber chu a lo talh leh a, an thukah ngei chuan a lo chhuang so tluk tluk mai a. Chutah, a mamawh ang ang chu a la a, Winchester rifle thar leh a mu za zet, Navajo kawmawl pahnih nen.

Kum sawm a ral hnuin Considine-a hi a hmu ta a. Amah aia a ṭuan ran avang leh a phawi ran zâwk avang te, hnu chhui thiam tak a nih avang te leh sakawr chung chuan thiam tak a nih avangin a ngai hlu ta êm êm a, a hnung a zûi ve ta a ni. Chu bâkah, Considine-a chu pa ngawichawi tak, mahni inring tâwk leh mi fimkhur thiam tak a ni bawk a, chu chu Kiow-a ngaihsan zawng tak mai a ni si a.

Tunah chuan chu lai hmun chu a rawn thim ṭan ta a. Indian-ho chu ngaihtuah lo se chuan hmun mawi tak mai hi a ni a; mahse, Kiow-a chu Indian a ni a, Indian-ho chu a theihnghilh thei si lo a ni.

Khaw thim hun a nghah chhung chuan Indian-ho bihrûkna laite chu a mal malin a lo chhinchhiah hman vek tawh a. A tam zâwk chu tunah chuan an inhawr khâwm tawh ang a; a ṭhente chu an awmna ngaiah an la awm reng dawn a, chu chuan Kiow-a chu a ti lawm a ni.

Arsi rawn lang ṭante chu a thlir reng a; chutah, a tho chhûak ve ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)