HIGH LONESOME (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

HIGH LONESOME (COMPLETED)

Unread post by Rozami pachuau » October 15th, 2018, 6:56 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 1
(Rozami Pachuau)

(A ziaktu, Louis L'Amour chanchin tlangpui zep tel lawk teh ang, a lehkhabu ziah hrang hrang kan la hrut kual hmel tlat.)

Louis L’Amour hi a hming pum chu Louis Dearborn L’Amour a ni a, French leh Irish thlah pawlh a ni. Hemi avang hi a ni àwm e, a lehkhabu ziahah hian a changtute zingah Irish mi an tam ṭhin hle.

Louis L’Amour hian an thlahtute chanchin hi North America-a an rawn luh tirh vêl, kum 1600 bawr vêl thleng khan a chhui lêt thei a ni. North Dakota bial, Jamestown khua-a piang a ni a. Ram thar bawha an thlahtute khawsak dan nasa takin a chhui kir a, a pu pa, Seoux ral do mi hovin a lu vun an hihsak chungchang thlengin a chhui chhûak a ni.

Awm hle hle thei lo chi tih takah Louis L’ Amour chuan kum 15 mi a nihin an in leh lo a chhuahsan a, hna hrang hrang - lawng pu, thing kittu, sai pu (Sai enkawltu), bawng vun liptu, thil lai chhûaktu leh hna dang a thawk kual a. Indopui pahnihna hun lai khan Tank Destroyer Officer-ah a ṭang nghe nghe a ni.

Hetia a vah kual vêlnaah hian bungraw phur lawng (freighter)-in khawvel a hêl chhûak a. Arab-ho lawng puanzar nei chi 'Dhou’ an tih chu Red Sea-ah a khalh ṭhin a; West Indies-ah lawng chhiat tawhnaah a tel a, Mojave thlalerah chaw lo, tui lovin eng emaw chen a vahvaih phah a ni.

Professional Boxer niin vawi 59 inbeihnaah vawi 51 a chak a; Journalist niin Lecturer a ni bawk. Lehkha a chhiar hnem êm êm a, lehkhabu chi hrang hrang a khawn khâwm nasa êm êm bawk a, a mi mal library-ah chuan lehkhabu 17000 zet a awm a ni.

Louis L’Amour lehkhabu ziah an chhuah hmasak ber chu, ‘HONDO' tih a ni a, Mizo ṭawng pawhin chhuah a nih tawh nghe nghe kha. A lehkhabu ziah hi copy maktaduai 230 zet hralh chhuah a ni tawh a, a lehkhabu hi lehkhabu hralh tla ber berte zinga mi an ni zel a ni. A lehkhabu ziah 45 chu Cinema film-ah leh Television Movie-ah siam an ni tawh.

A lehkhabu kawm chhah chi (Hand Cover) a siam zingah, 'The Lonesome Gods,' 'The Walking Drum,' 'Jubal Sackett,' 'Last of the Breed' leh 'The Hounted Mesa'-te chu a lar zualte an ni. Ama mi mal chanchin a ziahna, 'Education of a Wandering Man' chu 1989 khan khawvêla lehkhabu hralh tla ber a ni. A lehkhabu ṭhenkhat chu Drama-ah te changin tape recorder-a ngaihthlâk theih tur chia siam an ni bawk.

Honours leh Award eng emaw zat a dawng a. Kum 1983 khan United States ro rel khawl, Congress chuan, 'Congressional Gold Medal' an hlan a, he Award hi a dawng hmasa bertu a ni nghe nghe. Kum 1984 khan U.S. President, Ronald Reagan chuan, 'Medal of Freedom' a hlan bawk.

Louis L’Amour hi June 10, 1988 khan a thi a, a hna thawh chu a nupui Kathy leh a fate, Beau leh Angeligue te chuan an chhunzawm zel a ni.

*****************************

Thla chu Gunsight Hills tlang dung phena a tlâk hniam ruai ruai lai chuan sakawr chung chuang pahnihte chu zawi muangin lui kam aṭang chuan an rawn chhûak chho va.

Zan chu a reh ṭhup mai a, khauchherte chauh chu an hram bengchheng a; chutah, thlang lama sakawr dahna ina sakawr pakhat chuan a hnar a rawn lèn a, a lu chu rawn dâk chhovin a beng a han tun hruk hruk a.

Thirdengpa chauh chuan sakawr lo kal thawm chu a lo hria a, a mit chu a han meng a. Amah chu Indian-ho nena inbeihnaah te pawh lo hrât khawkheng ve tawh ṭhin a nih avangin chu sakawr kal thawm chu a han ngaithla vung vung a; ngaihsam tak chuan chutiang zan tlai tawhah chu sakawr chung chuangpa chuan eng a ti ni maw a ti mai a; mahse, a mut a chhuah êm avang chuan chu sakawr chung chuang pawh chu a theihnghilh zûi leh ta mai a.

Chu sakawr chung chuangpa chu kawtthlerah chuan a rawn lût chho va; mahse, dawrkai dawr lian hnung lam kil sir thimtham hnuaiah chuan a ding ta zâwk a.

Considine-a chu han hmuh mai mai rual hi a ni lo va, an lo hmuh pawh chu a inring lo reng a ni. Considine-a chuan tu ma hmuh hauh lova a duhna-a kal mai dan hi a hre reng a ni.

Sakawr chung chuang pahnihte chu an kal zel a, a tawpah chuan Bank kawt chu an va thleng phei ta a. An pahnih chuan an chhuk thla nghâl a, rifle an keng ve ve a.

An han chhuk thlâk fel chiah chuan Dutch-a chuan zawi muangin a sakawr chuan kawtthler chu a rawn kân ve a, chu bank in thim laiah chuan a rawn chhuk ve ta a. A rawn chhuk pah chuan a kutin fimkhur deuh mai hian thei ṭin hi a hum a, ṭin tê tak tê mai hi a ni a; mahse, Dutch-a chuan ngai sang leh duat àwm fahran hian a keng a.

Dutch-a'n chu thei ṭin, kil khata a rawn ken phei Iai chuan bank kawngkhar chu chhung lam aṭangin Considine-a chuan a rawn hawng ta a.

“Bur hlui mai mai a nih hi, a hlauhthawnpui awm lo vang.”

Dutch-a chuan thimtham hnuaiah chuan a kal pel a, pa buk rit tak mai si-ah chuan a inzo thoh thoh hle mai a; chutah, thir thingrem (safe) hmaah chuan a han ṭhu tung ta a.

Considine-a chuan kawtthler rûak huai mai chu vâwi khat dang han bih leh zawk turin kawngkhar lam chu a va pan a; chutih lai chuan, a hnung lamah pakhat chuan hna a lo thawk mawlh mawlh tawh a.

Hardy-a chuan cigarette a ṭan a, a hnung lam chu a han hawi zauh a. Considine-a ai chuan a naupang zâwk a, chen erawh chu a chen ve thuak a; mahse, tlangval cher, ria deuh, fei fat mai hi a ni tih a mei zûk êng phat phat avang chuan a lang thei a.

Kiow-a thung chu a che lo va, a ṭawng bawk hek lo. Pa tawi deuh mem mawm, tan ṭha tak mai, Colorada aṭanga Sonora thlenga man tuma an mi zawn hûai hûai, thlah chanve-a suak hi a ni.

Considine-a chuan safe thir thingrem, pawisa dahnaa Dutch-a hna lo thawk mawlh mawlh lai chu a va pan leh a. Chu thir verhnaa safe hnip lai deuh tur a kher mawlh mawlh lai chuan a chalah chuan thlan a rawn bawl chhûak ṭawk ṭawk a. A kaw hmasa ber, chu safe kawngkhar chung lam kila mi chu a kher thûk viau tawh a.

“I hlauthawng deuh elo?”

“Hlauthawng lo ve.”

Dutch-a chu mistiri thiam tak, a hna thawh pawh chhuang tak mai hi a ni a. Ama bâwng ni lo a kawl ṭeuh avangin Texas tan inah pawh a lo tang tawh a, chutiang safe hawn dan chu tan ina a tan laia a zir thiam a ni. Tunah chuan a aia thiam zâwk, Misissippi khaw thlang lamah chuan an awm tawh lo va; mahse, a hmanhmawh ngai lo reng reng a, “Pawih hren kang pawhin zawi muangin an tia lawm,” ti chi hi a ni.

Minute eng emaw zat a ral ta a...

Kawtthler chhak lam khawi laiah emaw chuan kawngkhar a lo ri a; chutah; tui pump ri hi an hria a, tui chu ṭin rûakah hian a inchhung ri hawk hawk a.

Mahni dinhmunah chuan inring rengin an lo nghâk ṭhap mai a. Dutch-a chuan a thir verhna rit tak mai chu chhûatah chuan a han dah rih a; chutah, chhak lam kawtthlerah chuan kawngkhar chu a invaw ri leh ṭhuai a, a reh leh ta vang vang a.

Dutch-a chuan a han verh zûi leh a; chutah; a hna thawh chu enin a han kun hnai a, a hmaiah chuan thlan chu a rawn luang thla leh kuang kuang a; mahse, hmanhmawh chuang hauh lo hian a hna chu a thawk zawm leh ta zel a.

Considine-a chuan a lo hmanhmawhpui hle mai a, second tin chu an tan a hlauhawm deuh deuh mai a ni si a. Hêng western khawpui chanchin te hi chu a hre vek a, pa sang tak tak awm khâwm an ni tih pawh a hria a ni.

A entir nan, he khawpuia Banker hi... Civil War hun lai khan Union Army-ah Colonel a lo ni tawh ṭhin a; chutah, Mexico nena indonaah khan Lieutenent a ni leh a; chutah, Indian hote lo bei tawh ṭhinin, ramsial te pawh a lo pel tawh ṭhin a.

Kawtthler lehlama saloon nghâktupa lah saw, buffalo hunter hmingthang zet mai lo ni tawh a ni bawk a.

General Store neitupa lah saw, Civil war hun chhung khan an Regiment-ah chuan an pa themthiam chhuan tawlawl lo ni tawh a ni bawk a. Wyoming leh Nebraska-ahte pawh Indian-ho lo bei nek tawh a ni bawk nen.

Khawpui pumpui chu chutiang mi deuh vek chu an ni mai a. Dik takin chu khawpui chhungah chuan mipa inti ve lem tawh chu silai la hmang ngai lo chu mi pathum pawh hmuh tur an awm lo hial ang.

Chutih laia khawthlang mite chu silai chelek mi deuh vek an ni e tiin sawi ila kan ti sual tam pui lo ang e; mahse, tualchhung mite chuan, gunmen leh outlaw-hote'n an rawn tih buai lem loh chuan anmahni awm awmin an awmtir ve mai a. Chutiang bawkin saloon ṭawp deuh nulate leh nawh chi zawrhna ina KS hote pawh chu...

Thimthamah chuan rannung thlâwk hi a vi hlarh hlarh a, khawi lai thingbukah emaw chuan chhimbuk hi a hram bawk a.

Considine-a chuan kawngkhar biang chu nghengin pawn lam thãwm a awm leh awm loh chu a lo ngaihthla ran a. Ã tâwk tak ni chuan a inhria a, chutiang tih tum chin tawh reng reng chuan âtna kawng khat zawng an nei deuh zel a ni.

Eng vangin nge rûkru-ah pawh chuan a lo ṭan tâk reng reng? Rûkru han tih ringawt pawh chu a lo hûat ṭhin nen khan! Pawisa kha an tlachham a, khawpuia ni tlem azawng han fawr ve an duh bawk si a; chuti chuan bâwng tlem azawng an ru a, an mi hriat zawng hnenah an va hralh ta mai kha a ni a.

Chumi hnu chuan an ti leh ta fo mai a; a vâwi lina-ah chuan mi'n an lo hmu a, tlanchhiat pahin inbeihna a awm a; chutah, a tih theih chhun la awm chu khawpui chhuahsan a lo ni ta mai a.

A rawn ûmtute 'posse' hma-ah tlanchhe zelin Kansas lam a rawn thleng a; chuta ṭang chuan eng eng emawin a zûi zel a; tunah hei, bank safe an verh ta chu a ni a.

Kum li chhung chu suahsual rawng hi a lo bawl tawh a; mahse, a hlâwk lem lo kher mai. Bâwng vennaa a hlawh aiin a ṭha deuh tih lek chauh mai a ni si a; bâwng kha chu veng tha ta hle hle sela chuan mite'n thah leh man tumin an ûm lo mai tur hi a ni a.

Dutch-a chu a han chawl rih a, a thlansa te chu a han huih pâwk pâwk a, a kaw kher hmasak zâwk kha chu a zo tawh a.

Considine-a chuan sahbawn siam chawp hian safe kawngkhar sira khi vêl chu a lo zut mam a. Chutah, Dutch-a chuan a hmanrua chuan kaw dang a han ker ṭan leh ta a, kahpathirin a zuk verhna lai chu a var sar mai a.

Thosi hian Considine-a nghawngah chuan a rawn seh a, ani chuan anchhe lawh pahin a lo beng hlum a. Hardy-a chu a si sup a, Considine-a chuan Dutch-a koki-ah chuan a han khawih thuai a, a verhna chu a tawp ta chawt a. Chu hun han reh ta vawng vawngah chuan bank sana lian han chek tluk tluk pawh chu a hriat theih a.

An piah lawk kawtthlerah chuan mi pahnih, mut chhûak deuh maia sakawr chunga chuangin an lo kal a, kawtthler chu an rawn kân a; rifle kaw hmawr pahnihin a tin zûi reng lai chuan hre hauh lovin thimtham hnuaiah chuan an kal liam leh ta a.

Minute khat zet zawt an liam hnu chuan Considine-a chuan Dutch-a chu a han be leh zoh a, ani chuan a thil verh chu a chhunzawm leh ta a, hawi pawh a rawn hawi chhûak ve hauh lo.

Considine-a chu a hmanhmawh hle tawh mai a, a ka chu a ro halh a, hlauh pawh a hlauthawng a ni. A buaithlâkna ber chu, miin thil sual a tih chuan mi tin mai chu a hmelma an ni ta vek mai hi a ni. Vantlang hmelma i lo ni ta a; chu aia la pawi leh zâwk chu vantlang chu i hmelma an lo ni ta hi a ni.

Kawtthler lamah chuan nghâkhlel takin sakawr chuan a ke a han per leh a; chutah, Hardy-a chuan cigarette dang a han ṭan kai leh a; Dutch-a chuan a thil verh pawh chu a zo tawh a, a sir vêlah chuan sahbawn chuan a chul mam leh mek a. Chutah, chu sahbawn chu a verh kûakah chuan a hnawih a, chutah chuan hrui dawt (fuse), tawi ang tek tawk chu a vuah ta a.

Considine-a chuan mattress hlui, kawmchar lam aṭanga a rawn lâk Iuh chuan safe (tangka thir thingrem) lianpui chu a han kam a. Kawmawl hlui pui pui, sakawr in aṭanga an rawn lâk luh chuan safe chu an khuh ta hlun mai a.

Chutih lai chuan Dutch-a chuan darthlalang a nghawr keh lohna turin bank tukverh zawng zawngte chu a lo hawng ve bawk a, a nghawr thãwmin mi muhil a tih harh loh pawhin darthlalang han keh tla ri vêl chuan mi a tih thawh duh ṭhin avangin an fimkhur hle a ni.

Considine-a chuan kawngkhar chu a va pan a, Kiow-a lu chung aṭang chuan Hardy-a chu a han melh a, “I inpeih maw?” a han ti a.

Anni pahnih chuan an inpeih a ni tih entir nan an ban an lo phar a, sakawrte chu an hruia lo vuan turin Kiow-a pawh chu a va chhûak ta a.

Considine-a chu a han lehhawi a, “Khai le, Dutchman,” a ti ta a.

Pawn lama lo nghâktute chu an rifle nen chuan an lo inralring a, Kiow-a chuan sakawrte chu a lo be mawlh mawlh a. Dutch-a chuan a cigarette a ṭan kai a, chu chuan fuse chu a han dep ta a; a si sar sar a, in chhunga mi pahnihte pawh chu pawnah an tlan chhûak thuai a, bang chu phenin an lo nghâk ta a.

Chhimbuk chu a han hram leh kûk a; mahse, a hram thawm pawh chu bank chhung lama rawn ri deuh dut chuan a Iàn ta zâwk a ni.

Dutch-a leh Considine-a chuan Safe chu an pan nghâl thuai a, zen rim a nam rum rum a, safe kawngkhar chu inhawngin a kilhna-ah chuan a lo uai dawr dawr a.

Considine-a chuan safe chhunga mi chu chhûatah chuan a han bun a; chutah, anchhia a han lawh zûi nghâl hlak a.

Rangkachak ip rit takte chu an lo awm tawh awzawng lo mai! Thleng, pawisa nawia khat chauh chu a lo awm ta mai a, chu chu Dutch-a ip lo keu kauah chuan a han chhung lût a. Chutah, pawhdawhte chu a han pawt dâwk a, pawisa nawi tê tê chauh chu a hmu ta mai a, dollar tlang tlem azawng chauh hi a lo awm a.

Kawtthler thlang lampang khawi laiah emaw chuan kawngkhar hi a rawn inhawng ri a, Hardy-a chuan chu lam chu a han kâp nghâl thawr a, a silai ri chuan chu kawtthler zim tê chu a khãwk raih raih a. Au thãwm a rawn awm a, chu chu buffalo silai riin a rawn zûi nghâl dawt a, Kiow-a chuan a Winchester chuan a lo chhang ve nghâl zat a.

Considine-a chu a rawn ding chhûak a, “Eng mah a awm lo. Kal vat mai ang,” a ti ta a.

Dutch-a chuan chhûat lai chu pên thumah hian a rawn hmang phei a, a kil lama a sakawr thlunnaah chuan a kun phei chawn chawn a; Considine-a chu kawmchar lamah a tlan phei bawk a, kawngkhar kalh chhut chhiat nana a hman, lungral ha-ah chuan a inpal thlu ṭhelh nghe nghe a. Kawtthler lam atang chuan silai a ri zawt zawt tawh a.

In kil lama Considine-a a rawn tlan phei chuan Hardy-a chu a sakawrah a lo chuang hman tawh a; Kiow-a chuan a sakawr lakam chu lo vuanin kawtthler lam chu a lo kâp zawt zawt a.

“Khai le!” Considine-a chuan a ti ta a. Indian-pa chu a sakawrah chuan a chuang kai a, an pali chuan kawmkar thim lam chu an chuh ta a.

Tukverh hi a rawn inhawng a, rifle hmawr hi a rawn inrawlh lang a; mahse, Dutch-a chuan a pûakruk .44 muin tukverh chu a va kâp keh sawk mai a; na tia ṭe thawm hian a zui nghâl a, rifle chu pawn lamah chuan a tla ta thlawrh mai a.

Sakawr chung chuang Outlaw palite chu Willow thing hmunah chuan an tlan darh a, lui chu an kan a; chutah, chhim lam panin an tlan ta zel a. Rawn ûm zûi tur chuan mite chu an inhawr khâwm rih phawt a ngai ang tih hriain tlan pawh an tlan chak duh lo a ni. An hnung lam khaw chhung aṭang chuan silai tlem azawng chuan an rawn kâp zûi a; mahse, Willow thing hmuna lui an kâna an lan theih tâk loh avangin an rawn kâp zûi zel ta lo a ni.

Outlaw-ho chu ngil takin mel hnih vêl an tlan phawt a, chumi hnuah ding lamah ngil taka pengin lui an zuk thleng leh a; chu chu lungpui tohlâwt hnuaiah hian an kân a; chutah, luiah bawk chuan an lût thla leh ta a. Lui dung chu fing hnih vêl an han zawh thla leh phawt a, a kam lehlam lung hmunah an per kai leh ta a. Chutiang hmuna hnu-hma chu chhui harsa tak tawh a ni a, an kal dan chu a ki-kiau êm avangin pa naran tan chuan han chhui hleih theih chi pawh a ni lo reng a ni.

“Eng nge kan an?"

Hardy-a chu an zinga naupang ber a ni a, bank rawk tawh napui chu an hlâwk hle ring zel mai mi a ni a; inrawkna rem ruat ṭha ber berte pawh eng mah lo a ni fo a ni tih chu a zir tur la neih chu a ni.

“Rangkachak chu an lo la fai hman vek tawh, a vaiin. Pawisa nawi chu cheng zahnih emaw duang chu a awm ang.”

“Hrep tak chuan!”

A tua mah chu an ṭawng thâ pawh a tho ta lo va, Bank rûak pawhin safe bomb chhiat chu a duh dawn loh avangin tualchhung mite chuan an rawn ûm zûi ngei mai dawn si a. Khawthlang khawpuiah te chuan han rîk deuh hlut pawh a khàt tawh avangin mite chuan silai han hmeh puahna tur hun remchang an neih tawh phawt chuan thawh chhuah chu an châk zek zek ang tih Considine-a chuan a hria a ni.

Posse (a ûmtu) an han inko khâwm ang a, tualchhung paho lah chu hranghlui hrât khawkheng ṭhalh an ni bawk si nen; mahse, Considine-a chuan chinchang a hriat êm avangin darkar li hnu, khaw var chian hnuah chauh chuan an la rawn ûm thei dawn a ni.

Khawfing chah dawn thlengin an kal zel a; chutah, lui kam hmun chengker kar deuhah hian bûk tê tak tê pakhat, a bang lehlam pawh tla bal tawh hi a lo awm a, chutah chuan an in nghahtir, sakawr pali thlunna hi a lo awm bawk a.

Dutch-a chuan coffee a siam a; tûkṭhuan an buatsaih lai chuan Kiow-a chuan an sakawr hman hlui aṭangte chuan a zin-te chu a la thla a, chûng an sakawr hman chàuh tawhte chu an mawngah chuan a beng thawr a, a chhuah ta a. Chûng sakawrte chu phalna la lova an hawhte an ni a, tlang dunga an in lamah chuan an tlan haw leh mai dawn a ni. Sakawr, lo nghâktute-ah chuan an zin-te chu a phah ta thung a.

An mei chhem chu ai pahin coffee an in a, tu mah chu an ṭawng tha peih hlawm lo. Hausak lawihna tura an thil ruahman chu eng mah a ni ta si lo va, tunah chuan a ngai rengin an la pachhe ta tho a ni.

Nat erawh chu tu mah an na lo va, tu mah pawh an ti na hek lo niin an inhria a. An tlan chhuah kha second tlem azawngin tlai deuh chu ni sela, an zinga pahnih emaw, pakhat emaw chu an thi ngeiin an inring a; an lo inralring lâwk êm a, tu mah na an awm lo a ni.

Hardy-a beidawng chuan, “Aw le, Jesse James-a te pawh khan an ṭum hnih rawknaah emaw kha chuan pawisa sen pawh an hmuh bîk loh kha!” a han ti thla rawk a.

Tu mahin an chhàn tâk lohvah chuan, “Mahse..., Missiouri-a pûk pakhatah chuan dollar maktaduai khat zet a phum bo ni àwmin an sawi a, hmuh fuh ka châk kher mai,” a han ti zûi a.

Dutch-a chuan, “Âwihawm loh pui pui a nih chu i sawi. Kum sawm paruk zet Outlaw a nih chhung khan James-a pawlte chuan dollar nûai li (4,00,000) bâk an ru chhûak hlei nem! Chu pawh chu an pawla mi paruk aṭanga sawm pahnih vêl zelin an la insem ta a ni a. An hun tam zâwk kha chu rethei reng rengin an khawsa zâwk a ni,” a ti a. “An safe reng reng pawh kha a awlsam lutuk a, a in-àwm tâwk vêl lek a ni!” a han ti zûi a.

Coffee chu an in zo va, an tho ta sang sang a. Dutch-a chuan coffee fê chu leih buain mei chu a han chhir hlum a; eng mah an theihnghilh lo tih an han inen fel tê tê a, chumi hnu chuan sakawrah chuangin hma lam an pan leh ta a.



Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 16th, 2018, 8:37 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 2
(Rozami Pachuau)

Considine-a chu a chau hle mai a, thing hnuaia han mut hahdam rih chu a châk hle a, Obaro khaw lam te chu a ngaihtuah rum rum mai a. Obaro chu ngaihtuah loh tak tak lai pawh hi a nei ngai meuh lo reng a ni.

Chu khawpui chu khawthlang lam chhima awm hi a ni a, chu khawpui lo awm ṭanna - ran vulhna hming, '0 Bar 0' hming chawia khawpui hming sak a ni a. A tir chuan ran vulhna a ni phawt a; chutah, zin vêivak sakawr tawlailir chawlhna hmun; chutah, supply point; a tawpah chuan khawpui a rawn ding chhûak ta a ni.

Chu Ranch-ah chuan Considine-a chu ran rual vengin a lo thawk tawh ṭhin a; kum te a lo kal zel a, chutah chuan ṭhiante a nei a; chutah, nula leh mangman chu...

Pete Runyon-a chu a ṭhianpa a ni a, an pawlah chuan hotupa niin, ani chu a aihnah phahpui, engkima a sangawi zawnpui ṭhin a ni. Rim takin hna an thawk dun a, an infiam dunin a chang phei chuan insualnaah te pawh an tel dun a, a tam zâwk chu an pahniha insual nan an hmang ṭhin nghe nghe a ni.

Chutih hun lai chuan, chûng lai tlang dung vêlah chuan ran rual, chhinchhiahna nei lote chu an tla ve dum dum ṭhin a. Khawpuia kal an duh chang chuan chûng ran rual, chhinchhiahna nei lote chu an khalh khâwm a, an va hralh mai ṭhin a; ran rual, tu ta mah ni lo chu an tla ve fo ṭhin reng a ni.

Chutah, indona a lo chhûak a, mipate chu indonaa an kal bo avangin ran rual, chhinchhiahna nei lote chu an lo pung ta tual tual a; a hnuah phei chuan tu ta bîk nge tih pawh chhui theih a nih tawh ṭhin loh avangin ran vulhtu lian deuh deuhte chuan anmahni ta-ah an chhiar ta mai ṭhin a. Chutiang hralh rûk an hman avang chuan Considine-a leh Runyon-a chu an hna thawhna aṭangin an bàn a, tlang dung aṭang chuan an hnawt chhûak ta a.

Chumi thlasik chhung chuan anni pahnih chu, ran rual an ruk khâwm ringin an khawsa a. A tir chuan chhinchhiahna nei lote chu an han khalh khâwm a; hun a lo rei deuh a, a chhinchhiahna awm leh awm lo pawh chu an pawisa ta mang bàr lo va, a chhinchhiahna neite pawh an man khâwm ta tho mai ṭhin a.

Chutah, Pete Runyon-a chu Sheriff hna chelh turin a in-candidate ta a, an thlang ta nghe nghe a; tichuan, nula chu nupuiah a nei ta a.

Zan hnih hnuah chuan Considine-a chuan tuizem dahna dawhkan sang aṭangin Denver & Rio Grande rel lo kal chu a lo nghâk a. Relah chuan a ban kai a, khualzin pindan pahnih chhungah chuan 'Thawhlawm' a khawn phei a; chutah, a sakawrin a lo nghahna lai hmunah chuan rel tlan lai aṭang chuan a zuang chhûak leh a; chawlhkar khat hnuah chuan chu rel bawk chu a lo kir lehlam a lo suam leh ta a.

Ramri chhim Iamah pawh Poker inkhelhnaah pa pakhat chu a va that a, chutah chuan Kiow-a leh Dutch-ate hi a rawn zawm ve ta a; thla li hnuah Hardy-a hian anniho chu a rawn zawm ve leh ta a ni.

Obaro khawpuiah chuan rangkachak ngah ṭen ṭawn tak mai bank hi a awm a, tu mahin an rawk ngai loh avangin a khaw chhunga mite pawh chuan an chhuang hle nghe nghe a. Vâwi thum chu suam an lo tum tawh ṭhin a; mahse; suam tumtute chu a lêtin Boot Hill-a phum bovin an awm leh mai ṭhin a. Mi pasarih chu chutah chuan an phum tawh a, amah Considine-a ngei pawh chu rûkru phum botute zinga a lo tel ve tawh ṭhin avangin chu Boot Hill chanchin chu a hre hneh hle a ni.

Chu khawpuia dawr leh pisa awm reng rengah chuan rifle emaw, laiphir emaw hi an inchhawp vek a, mikhual tu pawhin chu bank chu va pan sela, an ringhlel nghâl ringawt mai a. Chu 'Bank of Obaro' suam tumtute reng reng chuan rifle mu sur an tàwn a ngai ngei ngei mai a ni. A khuaa mite lah chu an themthiam tlang hlawm hle mai bawk si.

An pali chuan an kal zel a, Dutch-a chuan thil dang daih a lo ngaihtuah ve a. Considine-a nena thawh dun chu duhna riau pakhat a nei a, tluang taka an tawlh bo leh thei mai ṭhin chu a ni. Hmanhmawh phili pawhin an tlanchhe ngai lo.

Considine-a chuan a thil tih reng rengte chu ngaihtuah lâwk hmasa dim diam veka ti a ni ṭhin a, a rawn ûmtute chu a bum hneh ṭhin hle a ni.

A hmasa berin Considine-a chuan a rawn ûmtute chu a han châi chau hmasa phawt a; chutah, an sakawrte an chauh hnu chuan ani chuan sakawr thar a lo inchhawp leh zaih si ṭhin a, a bâk chu ûm zûi ngaihna an hre tawh lo mai ṭhin a ni.

“Khawi lamah nge ni zel ang?” Hardy-a chuan a han ti a.

Considine-a chuan, “Honey-a hmunah,” tiin a lo chhang mai a.

Kiow-a chuan a lukhum hma lam chu a han kuai hniam a, Honey hmun chu Obaro aṭanga hla vak a ni lo va, Kiow-a chuan Obaro chu a duh zawng a ni lo a ni. Chu khua chu Pete Runyon-a khawpui a ni a. Pete-a chu Sheriff fing leh paukhauh zet mai a ni a; amah chu outlaw lo ni tawh ṭhin a nih avangin deh a har lehzual a, chu chu khawpui mite pawh chuan an hria a ni.

Hardy-a chuan, “Chu, Obaro i ngaihtuah deuh elo?” a han ti a. “Engah nge ka ngaihtuah loh ang?” ani lah chuan a lo ti mai si a. Chutah zawng Hardy-a chuan, 'Sakawr chùan theih loh a awm ngai lo va, sakawrin a paih thlâk theih loh, a chunga chuang pawh a awm ngai lo,' tih ngaihtuahin a nui ta vur vur a.

Dutch-a chuan a mit chu a han siai sun a. Chu khawpui Obaro chuan Pete Runyon-a Sheriff-a an neih chhung chuan, sakawr chùan thiam tak tan pawh chuan khirh tak tur niin a hria a ni.

*********************

Sand Tank Mountains-ah chuan kil khawhar tak mai, khualzin pangngaiina an hriat ve loh hmun hi a awm a. Khawi lai aṭangin emaw Table Top Peak a lo Ian veleh, khualzin chinchang hria chuan tlang ro vêk vûk lam panin kalkawng pangngai aṭang chuan a her kawi a ngai a.

Lungpui leh cacti hmun kal tlangin sakawr chung chuang chuan lui kawr ruam a lût thla ang a; chuta ṭanga kawng rau chu zûiin luikawr ruam kam chhip chu chùanin cirque an tih mai, lui ruam inkhai chu a lût thla thei ang.

Chu lai hmun chu zim tê mai a ni a; mahse, chutah chuan hnim hring ṭha êm êm mai hi a duah hluah hluah a, tui thianghlim tak mai chu a luang her her mai bawk a. A chung lam chu Sidar thingte'n an zar hliah khup mai bawk a, chu lai hmunah chuan tu ma hmuh lohvin mi tam tâwk tak an inkulh thei a ni. A ram chinchang hre ve lote chuan chu lai hmun chu hnaih pawh an rawn hnaih ve ngai lo.

Chu lai hmun aṭang chuan kawngṭum pathum hian Sand Tanks ram rothap pui mai chu a pan leh a, chûng lai ramah chuan a chinchang hria, Outlaw hnu pawh han chhui ngaihna vak a awm lo a ni.

Vantlang indona a lo chhuah khan chu lai hmun hria, mi tlem azawngte chu thah an ni emaw, an thi bo zo emaw a ni tawh a. Chu hmun kilkhãwr ṭha tak mai chu a chang changa Apache emaw, Pima-in emaw an tlawh zawk ṭhin tih mai loh chu tu mah pawhin an hre tawh lo.

Mahse, Dave Spanyer-a chuan a la hre reng a ni, chu lai hmun him leh khawhar tak mai chu tlawh zawk zawk chang a nei ṭhin a. Amah chu pa hmul thep thup, rothap pui mai, hun leh buainaina a lo hrual phiar fuat tawh hi a ni a. Chu zotui thiang chu a rawn pan ve mek a; tunah hi chuan a fanu, nula tawh pawh chu a rawn hruai tel ve ta a ni.

A fanu Lennie pawh chu be chuang hauh lovin lungpui rawn tohlâwt lam chu a pan phei zel a; chu lungpui rawn tohlâwt sir phenah chuan a kawi leh zoh a, chu box canyon (kawr thûk inkhar khep) chhung chu a lût ta a.

Spanyer-a chuan, “Kha thing hnungah khan zotui thiang tak a luang asin,” a han ti a.

Lennie chuan, “Pa, a va han mawi êm! A va han mawi tak êm!” a lo ti chung mai a.

A pa chuan, “Chhuk langin, coffee han buatsaih rawh khai. Thing ka han fawm ang e,” a ti a; mahse, a fanu thil sawi khan a hip ta riau mai a. A vêl chu a han thlir kual a, hnim chu a hring duah nghulh mai si a; chutah, Sidar leh thing dang lo dingte chuan a zar hliah duah mai bawk si a, lungpui chungah te chuan an hlim dulh mai a.

Spanyer-a chuan, "Tun hmain chutiang rengin ka lo ngaihtuah ngai lo asin, Lennie. He lai hmun hi kei pawhin a mawi tak zetin ka hria,” a ti ve ta a.

Lungpui ko bur maiin pûk ang deuh hlek a siamna hmun lai chu a pan phei a, chutah chuan chu lungpui rawn tohlâwta thil ziakte chu kum sawm panga lai ni tawh mah sela, chhiar a la awlsam hle a.

HETAH HIAN
BURT CARNOVAN A ZAL E
SILAI-A THI A NI - 1866

Spanyer-a chuan, “Silaiin a nung a; silaiin a thi a ni. Pa ṭha tak a ni ṭhin... Pa ṭha tak mai," a ti nuah nuah a.

“Tu maw?”

Spanyer-a chu lungawi lo tak mai hian a han inher a, a hriat loha hnung lam aṭanga mi'n an rawn barakhaih thut hi a hûat zawng tak mai a ni ṭhin reng a. Hmanlai deuh kha chuan tu mahin an barakhaih thei ngai lo va, rattler rul pawhin, chinghnia pawhin, Apache pawhin...

A fanu a han hmuh tâkah chuan a thinrimna pawh chu a zûai leh ta rawih rawih a. A ka reh chu a nu ang mai a ni a, mipa-ina an han en nawn leh chawk ṭhin ang chi hi...

Damn it! Naupang mai a lo ni tawh lo tawp mai! A rawn nula chak hle mai si a, chu chuan a ti lungngai a ni. Hetiang hi zawng hmeichhe naupang enkawl len dan tur a ni lo. Mipa naupang emaw sakawr notê emaw chu ni sela, a enkawl len dan tur pawh a hre tur hi a ni a; mahse, Lennie chûan a hmeichhe nihna leh a hmeichhe chêt dan chúan a barakhaih deuh fo mai a ni.

"Heta pa, an phum hi maw le.”

“I hriat zawng a ni elo, pa?”

"Keima phum alawm.”

Thing ṭang tla ro te leh thing zung ro te chu a chhar khâwm ta a.

“Pa, kan kalna turah chuan ṭhenawm dangte kan nei ve ang em le?”

"Ka ring."

A pa chuan a han melh zoh a. A lungleng aw chuan a ti lungngai deuh a, “I khua a har ṭhin ti raw, Lennie? Tunah chuan ṭhenawmte pawh i mamawh ta a ni ti raw?” a han ti a.

Bâwng vulhna hmuna fanute, ṭhian kawm lova kawl reng mai chu thil dik pawh a ni lo reng a. Mi dangte pawl ve a, hmeichhe dangte hnen aṭanga thil zir te pawh a ngai a. Mipa te, mipa pangngai te pawh kawm ve a ngai a, chutiang chu amah hruai turin a mamawh a ni.

A ṭhianpa, Burt-a chu pa pangngai ṭha tak a ni ṭhin a. Angel phei zawng a ni hauh lo mai tih chu Pathianin a hria a; mahse, silai nen chuan che rang hle mah sela, hmeichhe chungah chuan nun ṭha tak mai a ni tih pawh a hria a. Phawi ran pawh a phawi rang nangiang mai; mahse, tu pawhin a aia phawi rang zâwk chu a tâwk dawn lo tih a hre thei lo a ni; a nih loh leh, a silai chu a tlawlh palh hlauh ang tih pawh...

Rei fe hnuah, a fanu chu a kawmawla a inkhuh hlãn hnu chuan ani chuan thingthu chu a han ṭhelh a, thingthu chu mût reng turin a duh lo a ni.

A han mut ve chuan Spanyer-a chuan a gunbelt chu a ban phâk maiah a dah a, a khawih phâk mai tur hian a silai kawm lam chu a inchhawn a. Sidar zar chung lama arsi pe chuai mai chu a thlir vung vung a; chutah, a maimitchhing ta a...

Spanyer-a chu a han meng kâwk a, mei chu a lo la de ser ser chauh a, hlauhawm a hnai a ni tih hriatna mak tak mai chu a han nei a, thãwm ngaithlain chechang hauh lovin a awm ta a.

Thla pawh a rawn chhûak tawh a, thingbuk hian a hliah deuh hlek a. A tir chuan tui luang ri her her chauh hi a hria a; chutah, amah rawn ti thotu thãwm chu a hre ta a.

Sakawr chung chuangte...

A rawn tho chhûak a, a boot chu a han inthawlh a, “Lennie?”

"Ka hria asin, pa.”

Tak chuan! Hmeichhia mai a ni si, a harhvang ve kher mai! Hmeichhia mah ni sela, a pa aṭanga a lo inzir tawh avangin hlauhawm chu a hria a ni.

A pain mi pakhat a that lai! Chu pa chuan ṭawngkam mawi lo deuha a tih avanga a pa'n a that lai pawh chu a lo hmu ve tawh a ni. A pa chuan, “Inha sawk sawk la, sakawr kha lo enkawl rawh,” a lo ti a.

Lennie chuan a pawnfen chu a han ban a, kawmawl hnuai aṭang chuan a inthawlh lût ta a. A pa ang mai chuan a inpeih rang a, sakawr lo bengchheng tur va khap tur chuan a va pan ta a.

Dave Spanyer-a chuan kawngṭum chu chiang deuhin a va hmu thei a. A awmna aṭang chuan yards zathum chin chu a lo veng thei vek a; mahse, kum kha leh chen kha posse-in an lo ûm tawh ngai lo a ni a; chutah, outlaw tu mah he lai hmun han hre tur a hre bawk si lo.

Sakawr chung chuang pali...

Zankhuain an lo kal ni tur hi a ni. A pahnihna-in a sakawr a chùan dan chu a lo hmuh tawh ṭhin ni tlat hian a hre ta a, a taksa lian pui mai a han chùan kulh kho dan chu...

Dutch-a! Sakawr pahnihna-a rawn chuangin... Dutch-a'n pawl a zawm tawh phawt chu a pawl nghet a ni ang. Dutch-a hruai thei tawh phawt chu pa tak tak zet a ni ngei tur a ni.

Kawngṭum an rawn zawh ṭham ṭham chu a thlir reng a, thla êng aṭang mai pawh chuan an sakawr chuannate chu cowboy naran sakawr mai ai chuan a ṭha zâwk hle a ni tih pawh a hmu thei a. Box Canyon luhna inhawng aṭang chuan an la hla deuh a, hetah hian an lo kal ve dawn em ni ang?

Dutch-a a nih ngai chuan, ani chuan he lai hmun hi chu a hria a ni. Hetah hian an lo kal dawn nge ni a, Obaro an pan tlang zel dawn?

“Sakawr zin i phah ang,” Lennie hnenah chuan a han ti sur sur a.

A sakawr hnungah chuan a zin chu a han vawm kai thlawp a; chutah, a dulah a zuk suih leh dawn a, a sakawr chuan sakawr dang rim, thliin a rawn chhem phei chu lo hriain a phin ta dur dur mai a. Chutah zawng, inrin mai a ṭul ta!

A rifle chu a la a, kun hniam khunin a lo nghâk ta a....

A rehin a reh ta tlawk tlawk mai a. Hei zet chu, pa pakhat mai hna chu a ni hauh lo mai. A ngaihtuahna hria ni àwm takin Lennie chuan a sakawr zin-a rifle chu a lo la ve thuai a, chu lai kawkek chhuahna lam chu a pan phei ta a.

*********************

Hnung lam aṭanga chu kawkek luhna pakhat bula lungpui zingah chuan Considine-a chu a ding a, nulain ṭanhmun a la lai chu a lo thlir reng a.

A han chêt dan aṭang reng khan hmeichhia a ni tih chu a va hre nghâl thei mai a, tunah phei chuan khaw rawn eng zel nen a hmu chiang leh thei ta deuh a. A rawn kal chhûak a, rifle-a rawn tin chungin nula chu a han inher hret a.

“A ṭha e, ṭhian ka nia...,” Considine-a chuan a han ti a.

“I nih ka ring lo!” nula chuan a lo ti hmak a. Chu nula mitmeng erawh chu a phâwkin, mak a ti hle mai tih chu lang thei a.

Hnung lam aṭanga Dutch-a'n, “Dave, i thi daih tawh emaw ka tia sin le!” a tih ri chu a hre thei a. Dutch-a chu a rawn hawi kir a, “Lo lût rawh u, ṭhiante u. He hranghlui hi chu ka hriat zawng a ni e,” a ti ta a.

Considine-a chuan nula chu a han en vang vang a, nula hmel ṭha zet mai, hmelṭha tling zan mai hi a ni a. “Chu, i hria em? Ṭhian kan nih chu. Dutch-a chuan i pa a hria a nih chu,” a han ti a.

Nula chuan chhum hmak hian, “Ka pa chuan ka kawm loh tur mi pawh tam tak a hre tho alawm. Chuvangin, ka hmaah kal la, fimkhur hle rawh; chuti lo zawng, i ṭhian chuan ṭhian phum tur a nei mai dawn a nia!” a lo ti leh a.

Considine-a chu pa sang pui, ruhkawl lian tak hi a ni a. A hmel, hàng deuh lam chu a duh chuan nelawm hmel tak, hmel ṭha tak hi a ni a, a han nuih phei chuan a hmel chu êng chhûak ta vek hian a lang a. A nui ta suk a, “Kan pahnihin kan lût rual ang chu le. A ṭha zâwk lawm ni?” a ti ta a.

Dutch-a chuan nula lu chung lama Considine-a chu rawn en pahin, “Pa dik a ni e. Spanyer-a nen hi chuan lo inpawl nel tawh ṭhin kan ni,” a rawn ti a.

Dutch-a chuan a lu chu Considine-a lam hawiin a rawn thle phei a, “Dave, hei hi Considine-a a nih hi,” a han ti a.

“Ka lo hre tawh ṭhin.”

Chu pa chuan a rawn melh zuk a; chutah, a fanu lam chu a hawi leh thuai a, “Hei hi Lennie a nih hi, ka fanu a ni. California lam kan pan dawn a ni,” tiin a hrilh ta a.

Dave Spanyer-a chu pa dàr thluang deuh, a kum aia lang upa zâwk hi a ni a; mahse, pa hmel bumro tak, chinchang hre tak mai, pa zuam sual awl tak mai hi a ni reuh a.

Considine-a chuan chutiang chu a mi hriat zawng a ni a, a tam zâwkte chu tlang ram mi leh ro hlu zawnga hma taka khawthlang rawn pante kha an ni a, harsa taka khawsain nun khawhar tak, anmahni theihna chhawrin an lo khawsa tawh ṭhin a ni.

Dutch-a chuan, “Chu, lo neitu tu emaw pasalah i neihtir dawn em ni?” a han ti a.

“Outlaw chu a nei hauh lo vang. Chu chu i sawi tum a nih chuan...,” an inbiakna hre ve phâk lo, Considine-a melh pah chuan Spanyer-a chuan a han ti a. Chutah, “Ani nena inzûi saw in nih chuan Obaro lam chu pan lo law law mai ula a ṭha zâwk ang," a han ti zûi a.

“Amah saw i hre chiang lo a nih saw,” Dutch-a chuan a lo ti a.

Spanyer-a chuan, “Pete Runyon-a ka hria alawm," tih pahin an sakawr pana a fanu kal chu a han en a. Tunah chuan khua pawh a var tawh a, kal chhuah a hun ta hle mai. “Chu, ka hrilh lâwk lo che chu ti suh ang che,” a han ti zûi leh a.

An kal ta zel chu Spanyer-a chuan a en zûi vung vung a, Lennie pawh chu a bulah a lo kal ve ta a.

Dave Spanyer-a chuan, “Sawtiang mi lak aṭang saw chuan inthiar fihlim ang che, Lennie. Ṭhatna reng an nei lo a nia. Aw le, anmahni nihna kawngah an ṭha lo ka tihna phei zawng a ni hauh Io va, saw Dutch-a saw, hun rei tak ka lo hre tawh a; chutah, Considine-a pawh saw, mi tinin amah chu an hria alawm,” a ti a, khaw dang a hawisan ta nghâl a.

Anni outlaw-ho chu an thang thangin thang teh se. Ani zawngin tunah chuan California ram ni ênga sakawr te vulh a, thei huan siam te a thlang zâwk a ni.

“A hmelṭha ti raw, pa. Pa sang pui kha ka tihna a nih chu.”

“Chutiang sawi suh! Chutiang zawng reng rengin ngai suh! I tih chi a ni lo,” Spanyer-a chuan a lo ti hlur mai a.

Considine-a chu Obaro hnaih lam emaw pawha a kal leh tâ chu a ã let der a ni. Pete Runyon-a, Sheriff a nih chhung chuan chu khawpui bank chu tu mahin an la khawih ngai lo va, khawih pawh an khawih loh hmel a ni. Amah bâkah ani chuan pa rothap pui pui a kawl ṭeuh bawk a ni si a.

Dave Spanyer-a chuan California ram lampang chu a ngaihtuah ta zâwk a. A kalna tur hmun chu a hria a, vâwi khat a zin tawh avangin hriat pawh a hre chiang thawkhat a. San Jacintos sira hmun tê tak tê pakhat, Aqua Caliente an tih hmun chu a ni a, chu lai hmunah chuan hun rei fe chu a lo biru bo tawh a ni.

Outlaw ṭumkawng han zawh chu la tlangval theng thawng lai chuan nuam ve angreng tak mai a ni a; mahse, upat lama la zawh zûi zel chu âtthlâk mai a ni tawh a ni.

Indian-ho hnen aṭang chuan ram a lei ang a, chu chu tui lâka letin thei huan siam a tum a ni. Chu lai hmunah chuan tu mahin an hriat zûi tawh loh a ring a, a hlâwk dan azir zelin sakawr te pawh vulh a tum a ni. Chutih hunah chuan mite chuan a hmanlai outlaw nun kha chu an lo theihnghilh tawh dawn a ni.

“Khângho kha outlaw an ni ti raw, an ni em?” a fanu chuan a ti leh a.

Ani chuan, “Ni se; ni suh se, a pawi hlei nem. Ngaihtuah lo ringawt mai rawh,” tiin a fanu chu a zilh zûi leh a.

Sakawra an han chuan kai hnu chuan Spanyer-a chuan, “Thil hriat tam lutuk hi tum teh suh. Tu mah i hmu lo va, tu ma chanchin pawh i hre lo, chu chu a tâwk mai,” a ti a.

Dave Spanyer-a chuan Considine-ate aṭang chuan a hma lam kalkawng chu a ngaihtuah ta zâwk a. Indian-ho ram a ni a, mahni maia kal tlang tum chu a âtthlâk hle a ni; mahse, Indian tu mahin ani ai chuan chu lai ram chu an hre chiang bîk lo va; chutah, a ṭul a nih chuan chutiang ram thlelera nun dan pawh chu a hria a ni.

Lennie a han hruai ve chu a thàp sang hle mai a; mahse, an lo kalna lam ramah chuan eng mah neih a nei tawh si lo va; chutah, mite'n an hre chhûak tawh bawk si nen, Outlaw fanu tan chuan nun chu a khirhkhan dawn êm mai a! Mahse, California ram lamah erawh chuan... Aw le, amah ang mi tam tak pawhin chu lai ramah chuan awmhmun an lo bengbel tawh alawm...

A Winchester rifle chu hum run chungin Lennie hma deuh zelah chuan a kal a. Chu thlaler chu reh tlawk tlawkin lang mah se mi bum thei tak a ni tih pawh a hria a. Thil a kal ṭhat zel chuan chhunah Pozo Redondo an thleng thei ang a, chutah chuan dawrkai a awm a, thlalera an kal leh hmain an châkkhaite chu a lei a ngai dawn a ni.

Considine-a leh a outlaw pawlte chu hnaivaiah an awm ve si avangin Obaro lama kal loh chu ṭha zâwk dawnin a hria a. Dutch-a nena an inkungkaih dan kha tute'n emaw hria an lo awm ang a, rinhlelh an kai ve thei dawn a ni.

Ni chu tlang pangah chuan a rawn chuang kai ta a, khua pawh a lum ta hle mai a. An hma lam hnim ṭawi li liai karah te chuan eng mah reng reng hi che eih pawh a awm lo va; chutah thâwk leh khatah, sakawr hnu a hmu ta a.

Sakawr ke thir khen loh pali hnu hian an kawng chu a rawn kân a, an hma darkar eng emaw zatah khan... Dave Spanyer-a chuan an lo kal tawhna hnu lam chu a han hawi kir leh vung vung a; mahse, eng mah a va hmu ta chuang lo va.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 16th, 2018, 8:38 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 2
(Rozami Pachuau)

Considine-a chu a chau hle mai a, thing hnuaia han mut hahdam rih chu a châk hle a, Obaro khaw lam te chu a ngaihtuah rum rum mai a. Obaro chu ngaihtuah loh tak tak lai pawh hi a nei ngai meuh lo reng a ni.

Chu khawpui chu khawthlang lam chhima awm hi a ni a, chu khawpui lo awm ṭanna - ran vulhna hming, '0 Bar 0' hming chawia khawpui hming sak a ni a. A tir chuan ran vulhna a ni phawt a; chutah, zin vêivak sakawr tawlailir chawlhna hmun; chutah, supply point; a tawpah chuan khawpui a rawn ding chhûak ta a ni.

Chu Ranch-ah chuan Considine-a chu ran rual vengin a lo thawk tawh ṭhin a; kum te a lo kal zel a, chutah chuan ṭhiante a nei a; chutah, nula leh mangman chu...

Pete Runyon-a chu a ṭhianpa a ni a, an pawlah chuan hotupa niin, ani chu a aihnah phahpui, engkima a sangawi zawnpui ṭhin a ni. Rim takin hna an thawk dun a, an infiam dunin a chang phei chuan insualnaah te pawh an tel dun a, a tam zâwk chu an pahniha insual nan an hmang ṭhin nghe nghe a ni.

Chutih hun lai chuan, chûng lai tlang dung vêlah chuan ran rual, chhinchhiahna nei lote chu an tla ve dum dum ṭhin a. Khawpuia kal an duh chang chuan chûng ran rual, chhinchhiahna nei lote chu an khalh khâwm a, an va hralh mai ṭhin a; ran rual, tu ta mah ni lo chu an tla ve fo ṭhin reng a ni.

Chutah, indona a lo chhûak a, mipate chu indonaa an kal bo avangin ran rual, chhinchhiahna nei lote chu an lo pung ta tual tual a; a hnuah phei chuan tu ta bîk nge tih pawh chhui theih a nih tawh ṭhin loh avangin ran vulhtu lian deuh deuhte chuan anmahni ta-ah an chhiar ta mai ṭhin a. Chutiang hralh rûk an hman avang chuan Considine-a leh Runyon-a chu an hna thawhna aṭangin an bàn a, tlang dung aṭang chuan an hnawt chhûak ta a.

Chumi thlasik chhung chuan anni pahnih chu, ran rual an ruk khâwm ringin an khawsa a. A tir chuan chhinchhiahna nei lote chu an han khalh khâwm a; hun a lo rei deuh a, a chhinchhiahna awm leh awm lo pawh chu an pawisa ta mang bàr lo va, a chhinchhiahna neite pawh an man khâwm ta tho mai ṭhin a.

Chutah, Pete Runyon-a chu Sheriff hna chelh turin a in-candidate ta a, an thlang ta nghe nghe a; tichuan, nula chu nupuiah a nei ta a.

Zan hnih hnuah chuan Considine-a chuan tuizem dahna dawhkan sang aṭangin Denver & Rio Grande rel lo kal chu a lo nghâk a. Relah chuan a ban kai a, khualzin pindan pahnih chhungah chuan 'Thawhlawm' a khawn phei a; chutah, a sakawrin a lo nghahna lai hmunah chuan rel tlan lai aṭang chuan a zuang chhûak leh a; chawlhkar khat hnuah chuan chu rel bawk chu a lo kir lehlam a lo suam leh ta a.

Ramri chhim Iamah pawh Poker inkhelhnaah pa pakhat chu a va that a, chutah chuan Kiow-a leh Dutch-ate hi a rawn zawm ve ta a; thla li hnuah Hardy-a hian anniho chu a rawn zawm ve leh ta a ni.

Obaro khawpuiah chuan rangkachak ngah ṭen ṭawn tak mai bank hi a awm a, tu mahin an rawk ngai loh avangin a khaw chhunga mite pawh chuan an chhuang hle nghe nghe a. Vâwi thum chu suam an lo tum tawh ṭhin a; mahse; suam tumtute chu a lêtin Boot Hill-a phum bovin an awm leh mai ṭhin a. Mi pasarih chu chutah chuan an phum tawh a, amah Considine-a ngei pawh chu rûkru phum botute zinga a lo tel ve tawh ṭhin avangin chu Boot Hill chanchin chu a hre hneh hle a ni.

Chu khawpuia dawr leh pisa awm reng rengah chuan rifle emaw, laiphir emaw hi an inchhawp vek a, mikhual tu pawhin chu bank chu va pan sela, an ringhlel nghâl ringawt mai a. Chu 'Bank of Obaro' suam tumtute reng reng chuan rifle mu sur an tàwn a ngai ngei ngei mai a ni. A khuaa mite lah chu an themthiam tlang hlawm hle mai bawk si.

An pali chuan an kal zel a, Dutch-a chuan thil dang daih a lo ngaihtuah ve a. Considine-a nena thawh dun chu duhna riau pakhat a nei a, tluang taka an tawlh bo leh thei mai ṭhin chu a ni. Hmanhmawh phili pawhin an tlanchhe ngai lo.

Considine-a chuan a thil tih reng rengte chu ngaihtuah lâwk hmasa dim diam veka ti a ni ṭhin a, a rawn ûmtute chu a bum hneh ṭhin hle a ni.

A hmasa berin Considine-a chuan a rawn ûmtute chu a han châi chau hmasa phawt a; chutah, an sakawrte an chauh hnu chuan ani chuan sakawr thar a lo inchhawp leh zaih si ṭhin a, a bâk chu ûm zûi ngaihna an hre tawh lo mai ṭhin a ni.

“Khawi lamah nge ni zel ang?” Hardy-a chuan a han ti a.

Considine-a chuan, “Honey-a hmunah,” tiin a lo chhang mai a.

Kiow-a chuan a lukhum hma lam chu a han kuai hniam a, Honey hmun chu Obaro aṭanga hla vak a ni lo va, Kiow-a chuan Obaro chu a duh zawng a ni lo a ni. Chu khua chu Pete Runyon-a khawpui a ni a. Pete-a chu Sheriff fing leh paukhauh zet mai a ni a; amah chu outlaw lo ni tawh ṭhin a nih avangin deh a har lehzual a, chu chu khawpui mite pawh chuan an hria a ni.

Hardy-a chuan, “Chu, Obaro i ngaihtuah deuh elo?” a han ti a. “Engah nge ka ngaihtuah loh ang?” ani lah chuan a lo ti mai si a. Chutah zawng Hardy-a chuan, 'Sakawr chùan theih loh a awm ngai lo va, sakawrin a paih thlâk theih loh, a chunga chuang pawh a awm ngai lo,' tih ngaihtuahin a nui ta vur vur a.

Dutch-a chuan a mit chu a han siai sun a. Chu khawpui Obaro chuan Pete Runyon-a Sheriff-a an neih chhung chuan, sakawr chùan thiam tak tan pawh chuan khirh tak tur niin a hria a ni.

*********************

Sand Tank Mountains-ah chuan kil khawhar tak mai, khualzin pangngaiina an hriat ve loh hmun hi a awm a. Khawi lai aṭangin emaw Table Top Peak a lo Ian veleh, khualzin chinchang hria chuan tlang ro vêk vûk lam panin kalkawng pangngai aṭang chuan a her kawi a ngai a.

Lungpui leh cacti hmun kal tlangin sakawr chung chuang chuan lui kawr ruam a lût thla ang a; chuta ṭanga kawng rau chu zûiin luikawr ruam kam chhip chu chùanin cirque an tih mai, lui ruam inkhai chu a lût thla thei ang.

Chu lai hmun chu zim tê mai a ni a; mahse, chutah chuan hnim hring ṭha êm êm mai hi a duah hluah hluah a, tui thianghlim tak mai chu a luang her her mai bawk a. A chung lam chu Sidar thingte'n an zar hliah khup mai bawk a, chu lai hmunah chuan tu ma hmuh lohvin mi tam tâwk tak an inkulh thei a ni. A ram chinchang hre ve lote chuan chu lai hmun chu hnaih pawh an rawn hnaih ve ngai lo.

Chu lai hmun aṭang chuan kawngṭum pathum hian Sand Tanks ram rothap pui mai chu a pan leh a, chûng lai ramah chuan a chinchang hria, Outlaw hnu pawh han chhui ngaihna vak a awm lo a ni.

Vantlang indona a lo chhuah khan chu lai hmun hria, mi tlem azawngte chu thah an ni emaw, an thi bo zo emaw a ni tawh a. Chu hmun kilkhãwr ṭha tak mai chu a chang changa Apache emaw, Pima-in emaw an tlawh zawk ṭhin tih mai loh chu tu mah pawhin an hre tawh lo.

Mahse, Dave Spanyer-a chuan a la hre reng a ni, chu lai hmun him leh khawhar tak mai chu tlawh zawk zawk chang a nei ṭhin a. Amah chu pa hmul thep thup, rothap pui mai, hun leh buainaina a lo hrual phiar fuat tawh hi a ni a. Chu zotui thiang chu a rawn pan ve mek a; tunah hi chuan a fanu, nula tawh pawh chu a rawn hruai tel ve ta a ni.

A fanu Lennie pawh chu be chuang hauh lovin lungpui rawn tohlâwt lam chu a pan phei zel a; chu lungpui rawn tohlâwt sir phenah chuan a kawi leh zoh a, chu box canyon (kawr thûk inkhar khep) chhung chu a lût ta a.

Spanyer-a chuan, “Kha thing hnungah khan zotui thiang tak a luang asin,” a han ti a.

Lennie chuan, “Pa, a va han mawi êm! A va han mawi tak êm!” a lo ti chung mai a.

A pa chuan, “Chhuk langin, coffee han buatsaih rawh khai. Thing ka han fawm ang e,” a ti a; mahse, a fanu thil sawi khan a hip ta riau mai a. A vêl chu a han thlir kual a, hnim chu a hring duah nghulh mai si a; chutah, Sidar leh thing dang lo dingte chuan a zar hliah duah mai bawk si a, lungpui chungah te chuan an hlim dulh mai a.

Spanyer-a chuan, "Tun hmain chutiang rengin ka lo ngaihtuah ngai lo asin, Lennie. He lai hmun hi kei pawhin a mawi tak zetin ka hria,” a ti ve ta a.

Lungpui ko bur maiin pûk ang deuh hlek a siamna hmun lai chu a pan phei a, chutah chuan chu lungpui rawn tohlâwta thil ziakte chu kum sawm panga lai ni tawh mah sela, chhiar a la awlsam hle a.

HETAH HIAN
BURT CARNOVAN A ZAL E
SILAI-A THI A NI - 1866

Spanyer-a chuan, “Silaiin a nung a; silaiin a thi a ni. Pa ṭha tak a ni ṭhin... Pa ṭha tak mai," a ti nuah nuah a.

“Tu maw?”

Spanyer-a chu lungawi lo tak mai hian a han inher a, a hriat loha hnung lam aṭanga mi'n an rawn barakhaih thut hi a hûat zawng tak mai a ni ṭhin reng a. Hmanlai deuh kha chuan tu mahin an barakhaih thei ngai lo va, rattler rul pawhin, chinghnia pawhin, Apache pawhin...

A fanu a han hmuh tâkah chuan a thinrimna pawh chu a zûai leh ta rawih rawih a. A ka reh chu a nu ang mai a ni a, mipa-ina an han en nawn leh chawk ṭhin ang chi hi...

Damn it! Naupang mai a lo ni tawh lo tawp mai! A rawn nula chak hle mai si a, chu chuan a ti lungngai a ni. Hetiang hi zawng hmeichhe naupang enkawl len dan tur a ni lo. Mipa naupang emaw sakawr notê emaw chu ni sela, a enkawl len dan tur pawh a hre tur hi a ni a; mahse, Lennie chûan a hmeichhe nihna leh a hmeichhe chêt dan chúan a barakhaih deuh fo mai a ni.

"Heta pa, an phum hi maw le.”

“I hriat zawng a ni elo, pa?”

"Keima phum alawm.”

Thing ṭang tla ro te leh thing zung ro te chu a chhar khâwm ta a.

“Pa, kan kalna turah chuan ṭhenawm dangte kan nei ve ang em le?”

"Ka ring."

A pa chuan a han melh zoh a. A lungleng aw chuan a ti lungngai deuh a, “I khua a har ṭhin ti raw, Lennie? Tunah chuan ṭhenawmte pawh i mamawh ta a ni ti raw?” a han ti a.

Bâwng vulhna hmuna fanute, ṭhian kawm lova kawl reng mai chu thil dik pawh a ni lo reng a. Mi dangte pawl ve a, hmeichhe dangte hnen aṭanga thil zir te pawh a ngai a. Mipa te, mipa pangngai te pawh kawm ve a ngai a, chutiang chu amah hruai turin a mamawh a ni.

A ṭhianpa, Burt-a chu pa pangngai ṭha tak a ni ṭhin a. Angel phei zawng a ni hauh lo mai tih chu Pathianin a hria a; mahse, silai nen chuan che rang hle mah sela, hmeichhe chungah chuan nun ṭha tak mai a ni tih pawh a hria a. Phawi ran pawh a phawi rang nangiang mai; mahse, tu pawhin a aia phawi rang zâwk chu a tâwk dawn lo tih a hre thei lo a ni; a nih loh leh, a silai chu a tlawlh palh hlauh ang tih pawh...

Rei fe hnuah, a fanu chu a kawmawla a inkhuh hlãn hnu chuan ani chuan thingthu chu a han ṭhelh a, thingthu chu mût reng turin a duh lo a ni.

A han mut ve chuan Spanyer-a chuan a gunbelt chu a ban phâk maiah a dah a, a khawih phâk mai tur hian a silai kawm lam chu a inchhawn a. Sidar zar chung lama arsi pe chuai mai chu a thlir vung vung a; chutah, a maimitchhing ta a...

Spanyer-a chu a han meng kâwk a, mei chu a lo la de ser ser chauh a, hlauhawm a hnai a ni tih hriatna mak tak mai chu a han nei a, thãwm ngaithlain chechang hauh lovin a awm ta a.

Thla pawh a rawn chhûak tawh a, thingbuk hian a hliah deuh hlek a. A tir chuan tui luang ri her her chauh hi a hria a; chutah, amah rawn ti thotu thãwm chu a hre ta a.

Sakawr chung chuangte...

A rawn tho chhûak a, a boot chu a han inthawlh a, “Lennie?”

"Ka hria asin, pa.”

Tak chuan! Hmeichhia mai a ni si, a harhvang ve kher mai! Hmeichhia mah ni sela, a pa aṭanga a lo inzir tawh avangin hlauhawm chu a hria a ni.

A pain mi pakhat a that lai! Chu pa chuan ṭawngkam mawi lo deuha a tih avanga a pa'n a that lai pawh chu a lo hmu ve tawh a ni. A pa chuan, “Inha sawk sawk la, sakawr kha lo enkawl rawh,” a lo ti a.

Lennie chuan a pawnfen chu a han ban a, kawmawl hnuai aṭang chuan a inthawlh lût ta a. A pa ang mai chuan a inpeih rang a, sakawr lo bengchheng tur va khap tur chuan a va pan ta a.

Dave Spanyer-a chuan kawngṭum chu chiang deuhin a va hmu thei a. A awmna aṭang chuan yards zathum chin chu a lo veng thei vek a; mahse, kum kha leh chen kha posse-in an lo ûm tawh ngai lo a ni a; chutah, outlaw tu mah he lai hmun han hre tur a hre bawk si lo.

Sakawr chung chuang pali...

Zankhuain an lo kal ni tur hi a ni. A pahnihna-in a sakawr a chùan dan chu a lo hmuh tawh ṭhin ni tlat hian a hre ta a, a taksa lian pui mai a han chùan kulh kho dan chu...

Dutch-a! Sakawr pahnihna-a rawn chuangin... Dutch-a'n pawl a zawm tawh phawt chu a pawl nghet a ni ang. Dutch-a hruai thei tawh phawt chu pa tak tak zet a ni ngei tur a ni.

Kawngṭum an rawn zawh ṭham ṭham chu a thlir reng a, thla êng aṭang mai pawh chuan an sakawr chuannate chu cowboy naran sakawr mai ai chuan a ṭha zâwk hle a ni tih pawh a hmu thei a. Box Canyon luhna inhawng aṭang chuan an la hla deuh a, hetah hian an lo kal ve dawn em ni ang?

Dutch-a a nih ngai chuan, ani chuan he lai hmun hi chu a hria a ni. Hetah hian an lo kal dawn nge ni a, Obaro an pan tlang zel dawn?

“Sakawr zin i phah ang,” Lennie hnenah chuan a han ti sur sur a.

A sakawr hnungah chuan a zin chu a han vawm kai thlawp a; chutah, a dulah a zuk suih leh dawn a, a sakawr chuan sakawr dang rim, thliin a rawn chhem phei chu lo hriain a phin ta dur dur mai a. Chutah zawng, inrin mai a ṭul ta!

A rifle chu a la a, kun hniam khunin a lo nghâk ta a....

A rehin a reh ta tlawk tlawk mai a. Hei zet chu, pa pakhat mai hna chu a ni hauh lo mai. A ngaihtuahna hria ni àwm takin Lennie chuan a sakawr zin-a rifle chu a lo la ve thuai a, chu lai kawkek chhuahna lam chu a pan phei ta a.

*********************

Hnung lam aṭanga chu kawkek luhna pakhat bula lungpui zingah chuan Considine-a chu a ding a, nulain ṭanhmun a la lai chu a lo thlir reng a.

A han chêt dan aṭang reng khan hmeichhia a ni tih chu a va hre nghâl thei mai a, tunah phei chuan khaw rawn eng zel nen a hmu chiang leh thei ta deuh a. A rawn kal chhûak a, rifle-a rawn tin chungin nula chu a han inher hret a.

“A ṭha e, ṭhian ka nia...,” Considine-a chuan a han ti a.

“I nih ka ring lo!” nula chuan a lo ti hmak a. Chu nula mitmeng erawh chu a phâwkin, mak a ti hle mai tih chu lang thei a.

Hnung lam aṭanga Dutch-a'n, “Dave, i thi daih tawh emaw ka tia sin le!” a tih ri chu a hre thei a. Dutch-a chu a rawn hawi kir a, “Lo lût rawh u, ṭhiante u. He hranghlui hi chu ka hriat zawng a ni e,” a ti ta a.

Considine-a chuan nula chu a han en vang vang a, nula hmel ṭha zet mai, hmelṭha tling zan mai hi a ni a. “Chu, i hria em? Ṭhian kan nih chu. Dutch-a chuan i pa a hria a nih chu,” a han ti a.

Nula chuan chhum hmak hian, “Ka pa chuan ka kawm loh tur mi pawh tam tak a hre tho alawm. Chuvangin, ka hmaah kal la, fimkhur hle rawh; chuti lo zawng, i ṭhian chuan ṭhian phum tur a nei mai dawn a nia!” a lo ti leh a.

Considine-a chu pa sang pui, ruhkawl lian tak hi a ni a. A hmel, hàng deuh lam chu a duh chuan nelawm hmel tak, hmel ṭha tak hi a ni a, a han nuih phei chuan a hmel chu êng chhûak ta vek hian a lang a. A nui ta suk a, “Kan pahnihin kan lût rual ang chu le. A ṭha zâwk lawm ni?” a ti ta a.

Dutch-a chuan nula lu chung lama Considine-a chu rawn en pahin, “Pa dik a ni e. Spanyer-a nen hi chuan lo inpawl nel tawh ṭhin kan ni,” a rawn ti a.

Dutch-a chuan a lu chu Considine-a lam hawiin a rawn thle phei a, “Dave, hei hi Considine-a a nih hi,” a han ti a.

“Ka lo hre tawh ṭhin.”

Chu pa chuan a rawn melh zuk a; chutah, a fanu lam chu a hawi leh thuai a, “Hei hi Lennie a nih hi, ka fanu a ni. California lam kan pan dawn a ni,” tiin a hrilh ta a.

Dave Spanyer-a chu pa dàr thluang deuh, a kum aia lang upa zâwk hi a ni a; mahse, pa hmel bumro tak, chinchang hre tak mai, pa zuam sual awl tak mai hi a ni reuh a.

Considine-a chuan chutiang chu a mi hriat zawng a ni a, a tam zâwkte chu tlang ram mi leh ro hlu zawnga hma taka khawthlang rawn pante kha an ni a, harsa taka khawsain nun khawhar tak, anmahni theihna chhawrin an lo khawsa tawh ṭhin a ni.

Dutch-a chuan, “Chu, lo neitu tu emaw pasalah i neihtir dawn em ni?” a han ti a.

“Outlaw chu a nei hauh lo vang. Chu chu i sawi tum a nih chuan...,” an inbiakna hre ve phâk lo, Considine-a melh pah chuan Spanyer-a chuan a han ti a. Chutah, “Ani nena inzûi saw in nih chuan Obaro lam chu pan lo law law mai ula a ṭha zâwk ang," a han ti zûi a.

“Amah saw i hre chiang lo a nih saw,” Dutch-a chuan a lo ti a.

Spanyer-a chuan, “Pete Runyon-a ka hria alawm," tih pahin an sakawr pana a fanu kal chu a han en a. Tunah chuan khua pawh a var tawh a, kal chhuah a hun ta hle mai. “Chu, ka hrilh lâwk lo che chu ti suh ang che,” a han ti zûi leh a.

An kal ta zel chu Spanyer-a chuan a en zûi vung vung a, Lennie pawh chu a bulah a lo kal ve ta a.

Dave Spanyer-a chuan, “Sawtiang mi lak aṭang saw chuan inthiar fihlim ang che, Lennie. Ṭhatna reng an nei lo a nia. Aw le, anmahni nihna kawngah an ṭha lo ka tihna phei zawng a ni hauh Io va, saw Dutch-a saw, hun rei tak ka lo hre tawh a; chutah, Considine-a pawh saw, mi tinin amah chu an hria alawm,” a ti a, khaw dang a hawisan ta nghâl a.

Anni outlaw-ho chu an thang thangin thang teh se. Ani zawngin tunah chuan California ram ni ênga sakawr te vulh a, thei huan siam te a thlang zâwk a ni.

“A hmelṭha ti raw, pa. Pa sang pui kha ka tihna a nih chu.”

“Chutiang sawi suh! Chutiang zawng reng rengin ngai suh! I tih chi a ni lo,” Spanyer-a chuan a lo ti hlur mai a.

Considine-a chu Obaro hnaih lam emaw pawha a kal leh tâ chu a ã let der a ni. Pete Runyon-a, Sheriff a nih chhung chuan chu khawpui bank chu tu mahin an la khawih ngai lo va, khawih pawh an khawih loh hmel a ni. Amah bâkah ani chuan pa rothap pui pui a kawl ṭeuh bawk a ni si a.

Dave Spanyer-a chuan California ram lampang chu a ngaihtuah ta zâwk a. A kalna tur hmun chu a hria a, vâwi khat a zin tawh avangin hriat pawh a hre chiang thawkhat a. San Jacintos sira hmun tê tak tê pakhat, Aqua Caliente an tih hmun chu a ni a, chu lai hmunah chuan hun rei fe chu a lo biru bo tawh a ni.

Outlaw ṭumkawng han zawh chu la tlangval theng thawng lai chuan nuam ve angreng tak mai a ni a; mahse, upat lama la zawh zûi zel chu âtthlâk mai a ni tawh a ni.

Indian-ho hnen aṭang chuan ram a lei ang a, chu chu tui lâka letin thei huan siam a tum a ni. Chu lai hmunah chuan tu mahin an hriat zûi tawh loh a ring a, a hlâwk dan azir zelin sakawr te pawh vulh a tum a ni. Chutih hunah chuan mite chuan a hmanlai outlaw nun kha chu an lo theihnghilh tawh dawn a ni.

“Khângho kha outlaw an ni ti raw, an ni em?” a fanu chuan a ti leh a.

Ani chuan, “Ni se; ni suh se, a pawi hlei nem. Ngaihtuah lo ringawt mai rawh,” tiin a fanu chu a zilh zûi leh a.

Sakawra an han chuan kai hnu chuan Spanyer-a chuan, “Thil hriat tam lutuk hi tum teh suh. Tu mah i hmu lo va, tu ma chanchin pawh i hre lo, chu chu a tâwk mai,” a ti a.

Dave Spanyer-a chuan Considine-ate aṭang chuan a hma lam kalkawng chu a ngaihtuah ta zâwk a. Indian-ho ram a ni a, mahni maia kal tlang tum chu a âtthlâk hle a ni; mahse, Indian tu mahin ani ai chuan chu lai ram chu an hre chiang bîk lo va; chutah, a ṭul a nih chuan chutiang ram thlelera nun dan pawh chu a hria a ni.

Lennie a han hruai ve chu a thàp sang hle mai a; mahse, an lo kalna lam ramah chuan eng mah neih a nei tawh si lo va; chutah, mite'n an hre chhûak tawh bawk si nen, Outlaw fanu tan chuan nun chu a khirhkhan dawn êm mai a! Mahse, California ram lamah erawh chuan... Aw le, amah ang mi tam tak pawhin chu lai ramah chuan awmhmun an lo bengbel tawh alawm...

A Winchester rifle chu hum run chungin Lennie hma deuh zelah chuan a kal a. Chu thlaler chu reh tlawk tlawkin lang mah se mi bum thei tak a ni tih pawh a hria a. Thil a kal ṭhat zel chuan chhunah Pozo Redondo an thleng thei ang a, chutah chuan dawrkai a awm a, thlalera an kal leh hmain an châkkhaite chu a lei a ngai dawn a ni.

Considine-a leh a outlaw pawlte chu hnaivaiah an awm ve si avangin Obaro lama kal loh chu ṭha zâwk dawnin a hria a. Dutch-a nena an inkungkaih dan kha tute'n emaw hria an lo awm ang a, rinhlelh an kai ve thei dawn a ni.

Ni chu tlang pangah chuan a rawn chuang kai ta a, khua pawh a lum ta hle mai a. An hma lam hnim ṭawi li liai karah te chuan eng mah reng reng hi che eih pawh a awm lo va; chutah thâwk leh khatah, sakawr hnu a hmu ta a.

Sakawr ke thir khen loh pali hnu hian an kawng chu a rawn kân a, an hma darkar eng emaw zatah khan.... Dave Spanyer-a chuan an lo kal tawhna hnu lam chu a han hawi kir leh vung vung a; mahse, eng mah a va hmu ta chuang lo va.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 17th, 2018, 8:17 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 3
(Rozami Pachuau)

Wildhorse Mesa bulṭhutah chuan tuikhur a awm a, a vêlah chuan cottonwoods thing upa tak tak tawhte hi a ding a, a hlim dulh hlawm a. Hmanlai deuh chuan sazukte pawhin chu sih chu an rawn tlàn ṭhin a; mahse, tunah chuan an rawn tlan ngai tawh lo; chu lai thing hlim hnuaiah chuan sakawr tawlailir zinvâk chawlhna hmun, dawr leh saloon inzawm chu pa pakhat, Honey Chavez-a chuan a hawn tâk avangin.

Chu rama Chavez-a a lo kal tirh chuan chûng thlalera khuai te chu lain, khawizu te chu a zuar ṭhin a. Chuta ṭang chuan a hming hmasa chu an lo phuah ta a ni.

Chu dawr in chu feet sawmriata sei, feet sawmhniha zau hi a ni a. Chu in chu chirha zut phui a ni a, amah rawn ep zawng chuan in hlui tawh tak, ‘Plaza’ an tih mai hi a awm a, chu chu khualzinte riahna in a ni ṭhin a; tah chuan thil tàr, hlui tawh tak mai, KHUM - CHENG HNIH tih intar hi a awm bawk a.

Honey Chavez-a chu pa thau pui mai, butu deuh, langsar lo deuh mai hi a ni nachungin chu lai vêIa thil chu hriat loh a hleih pawh hi a nei mang lo va, mi thu sawi ngaithla ngun tak mai leh a thil hriat aṭanga hlâwkna nei ṭhin mi a nih avangin.

A lan dan ang lo tak maiin vâwi tam tak chu Apache-ho nena inbeihnaah te pawh hming Io chher tawh a ni a; dan naran erawh chuan a kawm ngeih hlawm hle a. Thil dangah chuan buchip deu roh mah se, Honey Chavez-a chuan ṭhatna tak pakhat a nei a, chu chu ṭawng tam loh hun a hria chu a ni.

Chu dawr kawt atang chuan kalkawng te chu a lang chiang hle a. Dawr hnung lamah chuan tlang lian pui, to lurh mai hi a awm a; dawr hma lamah thung chuan thlaler ram kal tlangna kawng a kaw ruih a, hla tak mai, hla tak zet maiah chuan tlang dumpawl ruih hi a va lang thei bawk a.

Considine-a chuan chu ‘Plaza’-ah chuan a pawlte chu a rawn hruai thleng a, rawn chhukin, an sakawrte chu an thlung ta a.

Chavez-a chuan a dawr kawta ding chuan a dul thak a hiat hauh hauh a, a lo thlir reng a, “Obaro in va rawn hnaih deuh ve?” a lo ti a.

Considine-a chuan a hai der tlat a. Mi tinin Pete Runyon-a nena an inkungkaihna chu hriain Obaro-a a rawn kir leh chuan thil lo thleng thei pawh chu an hre vek bawk a ni.

Considine-a chuan an rawn kal tawhna lam chu a han thlir kir vung vung a, Dave Spanyer-a leh a fanu hmel àwm reng reng chu an la rawn lang hauh lo va. Chu lam chu beisei titih deuh tak hian a thlir reng a. Kha nula kha, nula hmel ṭha tak mai niin a hria a; chutah, a pa kha hranghlui, pa tar bumro pui mai a ni a; mahse, anmahni mai chuan Apache ram chu an kân tur niin a hre lo a ni.

A bulah chuan Dutch-a chu a va ding ve a, “Ngaihtuah duh suh, Considine. Kha putar kha, ã lo tak a nia,” a ti a.

“Khâng sakawr hnute kha i hmu a maw?”

“Ani pawhin a hmu ve tho ang.”

Kiow-a chuan sakawrte chu tui a va intir a, sakawr huangah a dah lût a. Considine-a chuan ngaihtuah dîng deuh chung chuan a lo thlir reng a; Kiow-a erawh hi chuan eng mah han lungkham êm êm leh ngaihtuah dîng vak a neih ngai loh avangin a vannei hlein a hria a ni.

Considine-a chuan ring deuh mai hian, “Ka buaina ber chu ka inngaihtuah nasa lutuk hi a ni,” a ti chhûak ta phawng mai a.

Dutch-a chuan a thlunglu lian pui mai chu a lo bu nghut a, “Kan hna-ah hi chuan i ṭha ber alawm, Considine; mahse, i mi vak lo a ni. Kei hi chu ka thawh àwm tak hi a han ni nghâl zaih mai a; nang erawh chu, i tih chi a ni ve lo a ni. A chhan chu, i rilru nen a inmil ve lo a ni. Mi dangte i ngaihtuah lutuk a, mi dangte sa himna tur a nih dawn phawt chuan hrehawm tawrh pawh i peih zel mai si a. Chu vang chuan a ni, fimkhur taka rem i rûat ṭhin ni; chu vang bawk chuan a ni, tunah pawh Spanyer-a leh a fanu chu i ngaihtuah êm êm ni,” a ti ta a.

“Nih pawh a ni ta ve ang,” Considine-a chuan a lo ti mai a.

Chu chu a dik ta ve ang, tuna an zinga he lai hmuna a awm vena chhan pawh hi. Obaro Bank a ngaihtuah vang chauh a ni. Chavez-a lam chu a hawi ta a, “Khawpuiah i kal hnai em?” tiin a han zâwt a.

“Chawlhkar hnih a ni tawh ang; kar thum emaw ni zâwk ni."

"Va kal la, va en fel vêl la a ṭha ang.”

Honey Chavez-a chuan a kutphah thau pui chu a kekawrah chuan a han hru a, a mit chu awm nuam lo deuh hian a han lèn vêl a. Kawng khatah chuan Considine-a chu a hlau a ni. Chu pa lian pui mai, ngawichawi tak chu silai nen chuan pa hlauhawm pui mai hi a ni roh reng a; mahse, Chavez-a chuan Runyon-a pawh chu a hlau ve tho bawk si a ni.

Chavez-a leh outlaw-ho chuan sumdawnna lama inkungkaihna tak hi an nei a. Outlaw tu pawh hetah hian rawn chawlin, mamawh leiin, chinchang an rawn ngaichang thei a, an chanchin chu mi dang hnenah a chhûak leh dawn chuang lo tih pawh an hria a ni. Chu lai hmun chu hmun him a ni a; mahse, Chavez-a chu mi ã a ni lo va, Sheriff Pete Runyon-a kawng lo dal loh hram hram chu a thil tum a ni.

A mitmeng val kiau kuau chuan Considine-a chu a han en a, “Chu chu i hna alawm; mahse, he thil hi i ngaihtuah chiang ngût maw? A buaithlâk mai tur a nia...,” a ti ta a.

Considine-a hmelah chuan lungawi Iohna hi a rawn lang a, “Chu, i kal dawn nge; keimah ka kal dawn?" a ti ta a.

Chutah zawng, Chavez-a chuan a kekawr chu a han pawt chhing a, "Ka kal ang chu. Supply lâk tur ka neih avangin mi pawh an lo beisei tawh ang. Ka theih ang ang chu ka va thlir vêl ang e,” a ti ta a.

A sakawr, pal bula inthlung, tho bawm noh noh chu a pan ta a. ‘Teh reng mai, Considine-a chuan bank chu va rawkin kal pawh a kal zel thei ang. Mahse, heta awm reng tur hi ka ni si a, Sheriff Runyon-a chuan mi rawn zawng ngei ang le,’ a ti rilru nauh nauh a.

Runyon-a chuan rawn zawng chhûakin a rawn hnawt chhûak ngei ang le. A tlem berah pawh... Mahse, Considine-a thu zawm loh chu a ngaingam bawk si lo va, a sakawrah chuan a chuang a, a kal chhûak ta a. Pa inngaihtuah nasa tak chu a ni tak zet mai!

Considine-a chu dawr chhungah chuan a Iût a, mi dangte pawh chuan an rawn zûi lût ve ta a. Chanchinbu hi lain Chavez-a ṭhutthlengah chuan a ṭhu ta a.

Khawi lai aṭang khan nge a lo kal sual tâk le? Obaro khuaa Mary’n amah aia Runyon-a a thlan tâk aṭang khan em ni le? Nge ni a, khami hma pawh khan kawng dang chu a lo zawh ve ṭan tawh reng reng?

Heta rawn kal chu thil âtthlâk tak zawng a ni nain pawisa an mamawh si a; an pawisa mamawh lah chu Obaro bank-ah a awm tlat bawk si a. Rangkachak tangka tlem azawng a neih phawt chuan chak takin ramri lam an pan thei tawh dawn a ni; Apache-ho an pal tlang theih chuan. Ûm zûi theih pawh an ni dawn lo, Apache-ho chuan a rawn ûmtute kalkawng chu an lo dan dawn si avangin...

Chu chu a thil chhût pakhat chu a ni. Obaro chu khawpui hmawr a ni a, chuta chhungkaw inbengbelte chuan an nupui fanau te leh an in leh lo te chu ven lohin an kalsan hlat duh a ring lo a ni.

Inthahna pawh a awm tur a ni lo. Obaro bank chu rawk a, han nuihsawh deuh chu a duh a ni mai a; inthah kher erawh chu a duh lo va. Chutah chuan mi hûat zawng pawh a nei hran lo va; chuvangin, tu mah kut thlâk a duh lo a ni. An pawisa chu i rûksak a nih chuan an rawn ûm zui ngei ang che ang a; mahse, an zinga mi i thah vaih erawh chuan i hnu an chhuiin tawpin tai a nei lo vang.

Obaro khawpui chu eng anga paukhauh tur nge a nih tih chu tu mahin an sawi thei lo. Chu khawpui chu khawpui hlui tawh tak... Dik takin, kum sawmpali chiaha upa a ni tawh a, kum sawm dang pawh a la ding leh a ni thei bawk.

Chu khua an han awm chilh tirh, a kum khatnaah chuan Apache-hovin vawi kua ngawt an rawn bei a; a kum hnihnaah pawh vawi sawm pali zet an rawn suam bawk a. An ran rualte chu ûm darhin a khaw hmawr fem te an hãl a, an khaw din tirh kum rei lo te chhung chuan khawpui chhung mel thum hùama mipa leh hmeichhia, sawmhnih paruk zet an that a; an bank erawh chu tu mahin an la rawk hauh lo thung.

Considine-a chuan Runyon-a chu bum a, an bank rawksak dan tur chu a han ngaihtuah chuan a nui ta ṭhu a.

Runyon-a chu kuttuma inbeih ralah chuan amah hnek thlutu leh ngamtu awm chhun a ni a, a tawp dawn thleng kha chuan hneh pawh an inhneh tâwk hial reng a ni.

An pahnih chuan dawrzawn chanve vêl lai chu an inhnek thlu dun nghe nghe a, an pahnih chuan an thi hnuang tawh a; mahse, a tawpah chuan Runyon-a chan chu ṭha zâwkin a kuttum ding lamin Considine-a chu a hnek thlu ta kha a ni a.

Pete Runyon-a nen chuan an inchen a; mahse, a ai chuan a rit zâwk a. Pa lian pui e ti lo chuan pa inzo tak mai, che rang fahran mai leh insual dan pawh thiam zet mai hi a ni a, tun hma te pawhin an lo insual tawh ṭhinin an lo inhneh tâwk fo tawh a ni. An insual tàwp ber pawh hlimhlawp thil tenau vang mai mai leka insual an ni a, Mary an inchuh vang a ni deuh ber. Chutah, Runyon-a chu a tlawm ta a ni.

Runyon-a nena han insual leh chu Considine-a châk leh duh tak chu a ni a; mahse, chutiang tihna hun a awm dawn lo. He thil hi ngun taka ngaihtuah a ngai a ni.

Pawisa an neih tawh chuan ramri lam panin an tlan chiam mai ang a; mahse, tun aṭang chuan Considine-a chuan tàwp a tum tawh a ni. Ranch tê ren rawn a lei ang a; Basques-ho, hna thawk turin a ruai ang a, kut hna thawkin pawisa a chaw chhûak tawh ang.

Dawrah chuan thil eng eng emaw a tam ve viau a. Winchester tharte pawh a intung ṭhut a, Spencers pahnih emaw vêl, a hlui hi a awm bawk a, pûakruk tharte pawh a awm ve ṭhat a, ramri-a sumdawnna hmuna mamawh chu a kim thawkhat hle niin a lang.

Dutch-a chuan chhang keih mawlh mawlh chungin Considine-a ṭhutna chu a rawn pan a, barrel chungah chuan a rawn ṭhu ve a, “A harsa deuh dawn nâ a, kan hlawhtling êm ang chu maw...?” a rawn ti a.

Chutiang chuan Dutch-a chuan tun hma pawhin a lo ngaihtuah fo tawh ṭhin a. Thla tam fe kal tâ khan Obaro chu a lo tlawh tawh a, chutah chuan rei lo te a chawl nghe nghe a.

Tu mahin an lo hre lo bawk a, khawpuiah chuan mi titi ngaithlain a vâk vêl a; Bank-ah chuan pawisa thleng nawi turin a lût a, an safe (tangka thingrem) pawh chu a hmu nghe nghe a, hawn pawh harsa tur zawng a ni lo, a hawn theih mai ang.

Khawpui chhungah chuan Runyon-a leh Considine-a insual thu chu an la sawi fo ṭhin a, an insual leh vaih chnan Runyon-a chu a vannei fo tawh bîk lo vang tia ngai pawl pawh an tam a ni.

An pali zingah chuan Considine-a chauh chu khawpui mite chuan an lo hmelhriat dawn a; chuvangin, mi dangte chu thil lo va en thlithlai turin an lût thei thung dawn a ni. Rinhlelh an kaina chhan tur a awm lo. Chu chu, chhun laiin nge bank chu suam an duh a, zana rawk zâwk tih thil thu-ah a ni.

Considine-a chu a tho va, “Lo titi hlawm ula, ka ngaih dan ka la rawn sawi ve ang e,” a ti ta a. Pawnah chhûakin kalkawng lo luhna lam chu a han thlir vang vang a.

Ni chu a sa kher mai a. Ralkhatah chuan laiking bel rawh te hi a awm mam mam a; van erawh chu a thiang kûk a; ralkhat lam chu a ro vûk mai a, kalkawng hla fe-ah chuan sakawr chung chuang mi pahnih lo kal nal nal hi a hmu ta a. Chu mite chu Dave Spanyer-a leh a fanu kha an ni ngei tawh ang; tu nge a hming a tih kha? Lennie....

Nulain amah a han en khan, a mitmengah chuan finna riau, hriatna leh eng emaw bîk riau hi awmin a hre tlat a. Kha nula khan a melh no satliah mai pawh ni lovin eng emaw tak hi a awm ringawt mai hian a hria a; mahse, tun ang hun hi chu nula ngaihtuahna hun a ni lo!

Dave Spanyer-a te ang, hranghlui, paukhauh pui mai chu a pa a nih lehnghâl lek si phei chuan.... Mi sawi dan chuan, chu pa pui chu outlaw pawh lo ni ve tawhin, mi pawh sawm chuang zet that tawhin an sawi a. Chu phei chu an uar pawh a ni thei e, chûng lai ram vêlah zawng thil sawi uar hi an ching êm mai a; mahse, chu pa chu pa tawh khirh zet mai zawng a ni reng reng.

Considine-a chu dilah chuan a va kal a; ṭinin in tur tui a han khai a, thing hnuai hlimah chuan va inphelhin a inbual ta a. A kamis hlui chu dahin, kamis thar la tur chuan dawr lam chu a pan phei leh ta a.

Dawr a va thlen chuan Dave Spanyer-a leh Lennie pawh chuan kawt an rawn thleng ve nghâl a. Chu nula chuan, chu pa dar pharh hlai tak mai, tihrawla phêk tun mai chu a rawn en vang vang a; chutah, a mitah...

Considine-a chu dawrah chuan a lût a, kawr senduk deuh, a kilhna tle ṭhut mai hi a va thlang chhûak a, a ha ta a. A rawn chhuah leh chuan Spanyer-a chuan sakawrte chu a lo dah fel mek a.

Spanyer-a chu Lennie hruaiin bathlarah a rawn chuang kai a, nula chuan Considine-a chu en loh hram hram tum ni àwm takin a lang a. Ani chuan nula hleitling thlerh thlawrh, hmel ṭha fahran mai niin a lo hre leh a. A kawr hâk chu te deuh mah se a taksa pianhmang nalhna chu a bo chuang lovin a hria a ni.

Spanyer-a chuan, “Khawiah nge Honey-a hi?” a han ti a.

"Obaro-ah a kal.”

In chhungah chuan an lût a, a hnu deuhah Considine-a pawh chu a lût ve ta a.

Kiow-a chuan chemtê hi a lo sep lauh lauh a; an lo luh veleh chuan a hmawrah a vuan chat a, banga calendar-a chumi ni chiahah chuan a vawm bur ta chat a. Chemtê chu a bur khur char char mai a.

June 25, 1881 a ni.

Link:
BBcode:
HTML:
Hide post links
Show post links

Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 18th, 2018, 8:28 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 4
(Rozami Pachuau)

Khua chu a la lum ta reng a. Pawnah chuan Lailen sava hi a rawn lang a, lamlianah chuan a mei a su hliau hliau a; chutah, a tlan ta zai zai a.

Lamlian dungah chuan sakawr tawlailir, mi pahnih khalh hi a rawn tlan a; mahse, chawl lovin Obaro lam a pan ta zel a.

Dutch-a chuan Lennie chu enin, “Chhungkua i nei tih reng ka lo hre ngai lo, Dave. Chutah, nula lehnghâl phei chu,” a han ti a.

Spanyer-a chuan chhuang àwm tak hian, “Texas-ah sikul a kal daih alawm. Nang leh keiina kan hriat ve bâk hi a zir a ni,” a lo ti a.

“Awmhmun benbelna tur zawng tawh mai la a ṭha ang, Dave. Tun ang hun te zawng, hmeichhe hruaia zin vêivahna hun pawh a nih loh hi.”

“Eng kan ti lo vang,” Spanyer-a chuan a han ti zet a; chutah, lungawi lo deuh àwm tak hian, “Obaro va tlawh ka duh a ni; mahse, tunah chuan tlawh lo ila a ṭha zâwk ang. Nangni nena inkawp hi emaw min lo ti ang a, tlanchhiat a ṭul leh dah ang e,” a ti ta nghoh nghoh a.

Considine-a chu pawnah chuan a lo chhûak leh a, a rawn kal pelh lai chuan Lennie chuan a lo thlir vang vang a, rawn biak a tum hauh lo chûan a khei deuh hlek a. A chanchin chu a hre châk hle mai a, a ngawichawiin a rum hmel hle mai si...

Spanyer-a chuan a en zûi vung vung a, “An sawi anga ṭha hi a ni em?” a han ti a.

Dutch-a chu a lo bu nghut a, “Teh reng mai; an sawi aiin a ṭha zâwk maw le, Dave. Chutah, an vaiin ka hmu hlawm tih pawh i hriat kha. Hardin, Courtwright, Allison, Hickok, Stoudenmire, Pick Higgins leh mi dangte pawh,” a ti ta a.

“Chuti a nih si chuan, engah nge Obaro-ah chuan a va luh a, Runyon-a chu a va kah thal tawp mai loh?”

“Runyon-a chu silai nen chuan a tham lo ang, chu chu an pahnih pawhin an hria a ni; mahse, kuttuma chin a duh a ni. Chu chu an insual dun ṭhin dan pawh a ni.”

“A ã a nih chu. A ã let der a nih chu!”

“lnkàwm fo ṭhin an ni a, ṭhian bul an ni.”

Spanyer-a chuan a dar a chhin ta uk a, “Hell, chuti a nih chuan a dang ta daih a nih chu,” a ti ta a.

Considine-a chu pal hungna bulah chuan a ding vung vung a. Eng a ti ta nge ni? Chutianga a awm reng reng chu a la hre ngai lo va, a thin te a rim ut ut zâwk a. Eng emaw, awm hle hle theih lohna riau hi a nei tlat a, han puh tur ber a hre chiah si lo. Obaro bul maia a awm vang chu em ni ang? Mary awmna chu a hlat vak loh avang em ni zâwk? Nge ni a, amah chu thil dang a hriat lohin a rawn zem zâwk?

Ruah sùr hlim a nih avangin thlaler tuikhur ‘tinajas’-ah te chuan tui a tling tawh ang a, Mexico lam an panna kawngah pawh harsatna an nei lo vang chu. Honey Chavez-a chuan Box Canyon-ah khan an sakawr thlâkna tur a lo dah ang a, chutah chuan inthlâkin ûm phâk an har hle tawh dawn a ni. Chutiang lam chu Considine-a chuan a ngaihtuah ta vang vang a.

Thil awm dan a han chhût a han chhûtin, anmahni rawn ûmtute 'posse' chuan tui an neih zel dawn loh avangin an rawn ûm thui thei dawn lo a ni. Mahse, kawng tluanin hlauhawm chu a awm reng tho dawn a, Indian-ho insingsak lai a nih avangin. Eng le khaw le, chu ram aṭang chuan him tak chuan an tlan chhuah theih mai chu a ring tlat a ni.

Khawpui chhung lam harsatna erawh chu a la awm ta a ni. Kawngpui aṭanga mipui an hip bo theih dawn loh chuan Obaro-a chutianga inral thuama han Iût ta ṭhuau ṭhuau chu mite'n an lo ringhlel ngei mai dawn si a; mahse chu chu, tih fel theih dan kawng awm dawn tlatin a hre ta a ni.

Honey chavez-a chu a lo kir leh thuai tawh dawn a, Honey-a chu a hriat chian êm avangin. Considine-a chuan an mamawh thil zawng zawng chu rawn hre turin a lo beisei a ni.

Chutah, Mary lam chu a ngaihtuah leh thung a. A tir kha chuan a haw deuh hle nain, Mary chu thlang thiam a ti angreng hle zâwk a. Pete-a chuan awmhmun pawh a lo bengbel tawh a; Sheriff a ni a; ran rual pawh tlem azawng chu a vulh bawk a, Obaro leh a chheh vêl ramah pawh mi pawimawh tak a lo ni tawh bawk si a.

Mary chu nula sang tak, dáng deuh hi a ni a. Sam buang theng thawng, fin hmel tak a ni a, a hmel pawh a ṭha hle a ni; mahse, a hmel awm dan chiah mitthla thei turin Considine-a chuan a hre chiang tawh tlat lo. Chu chu ho hlein a hria a; mahse, a han ngaihtuah chiam ṭhin pawhin a hre chhûak zo ngang si lo!

A lo hmangaih tak zet a ni ang em? Nge ni a, a ṭhianpa a neih tâk avangin a thîk vêl mai mai lek? Mite chuan khuareiin a hnem ṭhin an ti a; mahse, khuarei chu rûkru pawh a ni ve tho a ni. A hriat rengna pawh chu a rûksak zo ta!

Hei hi dan pawn lama a chêtna hnuhnung ber chu a ni tawh ang. Tun hi ramri pana a tlan hnuhnung ber pawh a ni tawh dawn a ni. Ani chuan Mexican ranch chu a enkawl tawh ang a; mi dangte chu an duh duhin awm ta zel ang hmiang!

Thli chuan a ke bul vêla thinghnah rote chu a rawn chhem darh ar ar a, ani chu a dâk chhûak vat a, thli chu a rawn thaw vâwt deuh ruih tawh a, ralkhat tlang lamah chuan khawpui a ri dur dur a.

Darkar khat hnu, ni tlâk dawn sûar sûarah chuan Honey Chavez-a chu a lo thleng leh ta a. Considine-a chuan a va pan a, a ip rit tak chu a han chawi thlâksak a.

Honey-a chu rawn chhukin a sakawr chu a han hnungchhawn a, “Khawchhak lamah Apache-hovin mi pahnih an that a, an in pawh an hal,” a rawn ti a. Chutah, dawr lam chu hawiin, “Tute nge, in chhunga mite saw?” a han tih zawm a.

“Dave Spanyer-a leh a fanu.”

“Spanyer?”

Chavez-a chuan ani chu rang deuhin a han en a, “In zinga tel ve em ni a nih a?” a ti ta a.

Considine-a chuan, “Ani chuan a bansan tawh alawm. A fanu hruaiin California lam an pan dawn a ni,” tiin a lo chhang a.

“Tunlai te chu hmeichhe hruaia han zinna mi a ni hlei nem maw le.”

“Aw le, chanchin chu?” Considine-a chuan a ti ta a.

Honey Chavez-a chuan, “Thil laih chhuahna chuan bank-ah rangkachak tangka singthum a dah. A vai chuan chumi lêt hnih lai chu a awm ang," a han ti a.

Khawpui a rawn ri dur dur a, thli chuan vaivut a lèn khu vêl chûk chûk a. Rei lo tê chhung chu ruah a han sur a, an pahnih chuan Chavez-a sakawr nen chhêk in lam panin an kal ta a.

Considine-a chuan, “Khawpuia lût tur chuan mi hriat loh sakawr pali kan mamawh ang. Kan ta chu Box Canyon-ah kan hnutchhiah ang a; chutah, i tate chu kan chhuah leh hnuin kan hmang leh ang,” a han ti a.

“A ṭha alawm," tih pahin Chavez-a chuan a sakawr zin chu a phelh thla mawlh mawlh a, “Runyon-a pawh ka rawn hmu a, a ṭhat hmel khawp mai,” a ti a.

Pete Runyon-a chuan eng tik ni-ah emaw chuan Considine-a chu a lo la kir leh ang a, chutih hunah chuan an la inbei leh dawn a ni tih hre rengin a lo inring ngei ang. Chutiang zawngah chuan Pete-a chu a inpeih reng ṭhin a ni.

Considine-a chuan, kham kar kawng tê reuh tea a sakawr rah a pial ṭum a, kawng thlanga a tlâk thlâk a, Pete Runyon-a hruihrual rawn vung fuain khàma a tla hlum tur a rawn chhan chhuah lai te kha a han hre chhûak leh vawng vawng a, chumi ṭum chuan a thi teuh kher mai.

Runyon-a chuan thil dangahte pawh a nun chu a lo chhanhim tawh ṭhin a, chutiang bawkin ani pawhin Runyon-a nun chu a lo chhanhim ve tawh bawk ṭhin a. An ni tin hna thawh ang leka an ngaih avang leh an pawm avangin chutiang thu te chu sawi pawh an sawi chhûak zen zen lo va; fiamthu an sawi chang chauh lo phei chuan.

Dawr chhung lama Lennie Spanyer-i nui ri mawi tak mai chu Considine-a chuan a han hria a, tu emaw hi a bia a ni, Hardy-a pawh a ni thei e. Chutih lai chuan a thîkthu chu a chhe thut mai a, mak pawh a inti hle mai a. Mary bâk kha chu chutiang reng rengin hmeichhia tu mah a lo ngaihtuah tawh ngai lo a ni si a. Hmeichhia te chu a tawng ngai lo pawh ni chuang lovin; hmeichhia phei zawng an tam mai a, ramri hnuai lamah te a ni ber a; mahse, chutiangin a lo ngaihtuah ngai lo a ni.

Ruah chu a rawn sur thut a, a sur ta buan buan mai a, anni pahnih chu dawr chhung lam pan chuan an tlan phei chawn chawn a. Dawr bathlarah chuan an ding dun a, ruah a sur rei a nih phei chuan an thil tih tum chu a khawlo zo vek thei dawn ni hian a lang a.

Minute khat vêl hnu chuan Chavez-a chuan, "Rangkachak chu chhiarin, ipah an lo thun lût mek a ni," a ti a.

"Thil dang hriat i va nei em?"

"Thil awm dan hriat ka duh avangin Runyon-a nen in insual thu kha ka han sawi thar leh a; chutah, an inhnial ta hlawm a, ṭan lam an nei deuh fur a ni."

“Ka hming i sawi Iang rêng rêng em?"

“Sawi lang lovin ka... inhria.”

Bawng vulhna rama dawrkai pakhat ni ve mai àwm hi a ni reng a. In chunga ruah a sur buan buan lai chuan Kiow-a chu dawhkana lalṭin bulah chuan a ṭhu a, lehkhaden hi a sam mawlh mawlh a.

Dutch-a leh Spanyer-a chu sir kil khatah chuan an ṭhu bawk a, an hmanlai nun te chu an sawi dun a. Mi pahnihte an lo luh chuan Hardy-a chuan Chavez-a chu kil khatah zûi pheiin a va hnial lung lung a.

A han Ian dan ringawtah chuan cowboy-ho, ruah sur ban nghâka tawm khâwm ni mai àwm hi an ni a. Mahse, a tûkah chuan hun khirhkhan tak mai chuan a rawn hmûak dawn a; hun hlauhawm tak mai, sakawr ke chhep ri te a awm ang a, silai ri te pawh a awm a ni thei e. A tûkah chuan Obaro khawpuiah chuan an lût dawn a, chu khawpui, Outlaw-hote tan pawha ṭihbaiawm tak maiah chuan!

Considine-a chuan Kiow-a lehkhaden han sam vêl chu a thlir reng a, a nal zaih zaih kher mai! Chu thlah chanve hmai ser nung chu a tle hlarh mai a.

Honey Chavez-a chuan a dawr dawhkan aṭang chuan thil fun hi a rawn la thla a, Lennie hnenah chuan a han pe a.

“Kha, eng nge ni ta?" Spanyer-a chuan a lo ti vut a.

Chavez-a chuan a dar thau pui mai chu sàn uk pahin, "Hei, Hardy-a thil pêk a nih kha," tiin a chhang a.

Spanyer-a chu a tum ta hmuk a, chu thil fun chu a han phelh chuan a hmaa Lennie-i'n a puan duh zawng a en kha a han hâi lang ta a. Rang takin chu thil fun chu Chavez-a hnenah a pe leh vat a; chutah, Hardy-a lam chu a rawn hawi phei a, “Ka fanuin puan a mamawh a nih chuan keima'n ka lei mai ang. Nangni ang chi chuan in tawh zeuhah pawh bawlhhlawh in ti kai zel ang. A hnaih pawh rawn hnaih reng reng suh, i hria em?” a ti ta a.

“La zam mai mai rawh, Putar!”

Hardy-a chu a ṭawng fimkhur lo kher mai a, ‘Putar’ a tih chu a han ti lang deuh hrawih nghe nghe a.

Spanyer-a hmai chu a thial ta urh mai a, “Mai mai chuan! Nang, ui notê chumchiap mai!” a ti ta a.

Chutah zawng, Hardy-a chuan a silai a chuh ta nghâl mai a; mahse, Dutch-a chu a lo ṭuan rang kher mai. Hardy-a kutah chuan a lo man vat a, an karah chuan a tla zep ta vat a. Hady-a chuan a kut chu a han phih laih laih a; mahse, Spanyer-a silai chuan a lo tin reng tawh mai a.

Dutch-a chuan, "I tan chuan a rang lutuk a ni. Hardy, theihnghilh mai rawh,” a lo ti a

Hardy-a chu chechang lovin a ding ta ran a. Dutch-a koki chung lamah chuan mitmeng zim sun mai, putar mitmeng vâwt ruih mai chu a han hmu a; khawngaihna tel reng reng lo mitmeng chu a hmu tlang nghâl a, a chhung lamah chuan tawmimna tak a nei ta a.

Mi, tu mah hlauh a nei lo nâin thihna chu a hmachhawn a, a hre thiam ve bawk a ni. Dutch-a a lo inrawlh avang chauha him a ni tih pawh a inhria a, chumi hma lam chuan chutiang renga silai phawi rang chu hmuh pawh a la hmu ngai lo; Considine-a tih chauh lo chu!

Lennie chuan, “Tih nat che a tum lo ve, a han ti fiam ve mai mai a nih kha,” a lo ti a.

“I pindan lamah kal vat rawh!” tiin Spanyer-a chuan lu lei bukin in piah tã zâwk chu a han kâwk a.

Lennie biang chu a sen tan tan a; mahse, thu âwih takin a kal ve mai bawk a. Spanyer-a pawhin silai chu a páiah a khung leh ta a, a mitmeng vâwt ruih chuan a han en lawr dun dun hlawm a; chutah, ani pawh chuan a fanu chu a zûi ve ta a.

Hardy-a chu second eng emaw chhung chu a han ding vang vang a. Chutah, “Ka lawm e, ka lawm e, Dutch,” a rawn ti chhûak ta a.

Dutch-a chuan, “Theihnghilh rawh,” a lo ti mai a, a han chhunzawm leh a, “Kha pa kha chu tar mah ni se, paukhauh zet mai a nia. Kei ngei pawhin silai thawh ralah chuan ka cho ngam dèr lo asin,” a ti ta a.

Kiow-a chuan a lehkhaden te chu a la sam ta mial mial a, rawn bengkhawn ve àwm pawhin a lang lo va. Dutch-a chuan a kawmawl a la a, Plaza lam chu a pan ta a, a hnu deuhah Hardy-a pawhin a zûi ve ta a. A tûka an thil tih tur chu hriain an vai chuan an khauh deuh fur hlawm mai a ni.

A pindanah chuan a kawmawl hnuaia muin Lennie chuan a chung lam thim ṭhup chu mit khap lo lek hian a thlir vang vang a. Khami inkahna thleng ṭep kha a ngaihtuah a ni lo va, a ngaihtuah zâwk chu Considine-a kha a ni zâwk!

Amah ang rêng rêng kha mipa a la hmu ngai lo va, hmel ṭha si, ngawichawi si, mahni inrin tâwkna nei bawk si.... Outlaw pawh chu lo ni ta teh reng mah se, a pa pawh chuan a zah hle niin a hre tlat a, Dave Spanyer-a chuan mi tlem tê chauh zah a nei a ni si a.

A hmaa tlang kar, outlaw-ho bihrûkna hmuna an inhmuh hnu khan a pa chuan, “Mi ṭha a ni lo, Lennie. Considine-a thil ngaihtuah pawh hi thil âtthlâk tak a ni. Anmahniin an thih phah ringawt ang a, eng mah dang a ni lo vang,” tiin a lo hrilh tawh kha a ni a.

Muhil thei lovin a tal a tal a, muthilh chu a han tum sa teh ṭhin a. Ruah chu sur mah sela khua a lum tho a, tui chu pawn lamah chuan a far kauh kauh a, an pindan vêl te chu a hnawng rim chhe churh mai a. A han let leh thawk ṭhin a, a tawpah chuan a ṭhu chhûak ta nge nge a.

A pa chu a muhil a, thimtham hnuaiah chuan khawngaih àwm deuh hian a han en phei a. Tum zawng a tum nangiang mai; mahse, a fanu han enkawl dan tur leh han dûat vêl dan tur chu a hre ngang lo zawng a ni. Dûat chu a duh ve si..., chutiang chu Considine-a kha a ni ve ang em?

A pa chu tih thawh hlau tak chungin a kawr pan diar, mutnaa a hâk ṭhin chu ha chungin kawngkhar lam chu a pan phei ta a. A pa chu a han melh leh zeuh a; chutah, kawngkhar chu a hawng dek dek a, bathlarah chuan a chhûak phei ta a.

Pindan ûp tak ai kha chuan pawn chu a vâwt nuam kher mai. Tualzawl chu kal tlangin an sakawr dahna lam chu a va pan a, a naupan têt laia a tuihâwk dài nuam tih ṭhinzia te kha hre rengin tui chu a dai phei barh barh a, a têt lai pawhin a khawhar chang chuan sakawrte hi panin an hnen aṭang chuan inhnemna a zawng ṭhin reng a ni.

Kawl a lo phe zuai zuai a, hla takah khawpui chu a ri dur dur a, chhum chung lamah chuan thla a lo chhûak tawh a, ram vêl chu a paw deuh chiai a. Chhêk in lam chu panin a chhungah chuan a lût ta a.

Sakawrte chuan an beng an lo tun hru hru a, hlau der àwm takin an hnar an lo ti ri suk suk hlawm a, an mitmeng tle rute chu êng riai ruai karah chuan a hmu thei a. A han be se se a, ama sakawr bîk nghawngah chuan a han chul a.

A sakawr lu chu a rawn dâk chhûak thut a, Lennie chuan chhêk in chhunga Considine-a lo Iût ve chu a hmu ta a, hlau tak mai hian a sakawr chu a lo phèn chawih chawih a.

Ani chuan dam thluam hian, “Tun ang hunah i vâk chhûak tur a ni lo asin, Lennie. Hei hi Apache ram a nih hi,” a rawn ti ta a, a ṭawngkam chu a dam êm avangin Lennie hlauhna pawh chu a reh ta duak a.

“In chhung kha a lumin a ûp êm atin a ni.”

“Ka hria; mahse, Apache-ho chinchang chu hriat harsa tak a ni asin. Zana insual chu an duh lo nain an vâk vêl ṭhulh chuang lo a ni."

Lennie chuan chhan ngaihna pawh a hre lo va, a ding zum reng ringawt mai a, a rilru tak chuan lo biak ve sawt sawt a, an kar dangtu chu han tih chah a; hmeichhia a ni a, a tan chuan a inphal a ni tih han hrilh hriat pawh chu a châk kher mai a. Mipa tlem azawng chu a lo be ve tawh a; mahse, chûngte chu a pa ṭhiante, a aia upa tak takte chu an ni mai a.

Considine-a chuan ngui hmel tak hian, “Rawn be tur che pawh ka ni lo. Nang anga nula ṭha rawn be tur chi mipa hi chu ka ni lo,” a ti ta a.

“Ka..., ka duh che asin!" Lennie chuan tim deuh hian a ti ta a. Mipa, hriat pawh a la hriat ṭhan ngai si loh hnena chutiang a han sawi ta chu a sen ap ap mai a. Chutiang chu mipa hnena a sawi vâwi khatna a la ni a, mak pawh a inti reng a ni.

“Outlaw ka ni asin.”

“Ka hria.”

Inhnaih tak maia inhmatawnin an ding dun ta ran mai a. In chung lam chu ruahin a rawn chhu ri leh tlak tlak a, ralkhat hla deuhah chuan khawpui a la ri dar dar a, Lennie chu a khur ta hlak hlak mai a. Ani chuan, “Vâwt i ti a nih kha, lût leh tawh la a ṭha ang,” a han ti a.

Mahse, nula chuan kal zai reng a la rel si lo. Chutah zawng, Considine-a chuan a pawm nawlh a, a hmuiah chuan dûat tak mai hian a han fâwp ta a. Ani chu a khur char char a, a hlau a; mahse, nuam chu a ti bawk si a, pawm nghet sauh sauh sela a duh zâwk a ni.

Pawn lamah chuan ruah chu a si seng seng a, eng emaw hi a rawn che ta a. Considine-a chuan hnung lam chu a han dap a, sakawr chaw thai khâwmna suahdur chu a han khawih fuh a, nula chu a thlah nâ a, a la tawlh sawn hla chuang lo va.

“A hnu-ah eng nge i tih leh ang?" Lennie chuan a han ti sa sa a.

“Mexico lam ka pan ang,” Considine-a chuan a ti a.

Lennie chuan Mexico chu a hria a, a pa chuan, 'Buaina neite chu Texas ramah an kal ṭhin a; tunah erawh chuan Mexico ram an pan tawh zâwk ṭhin a ni,’ tiin a lo hrilh tawh a, a pian hma chuan chu lai ramah chuan a nu leh pa te chu an khawsa a ni.

“I lo kir leh ang em?”

“Maithei; mahse, ka ring chiah lo.”

Considine-a chuan a ngaithla reng a; mahse, thãwm chu a hre nawn leh ta chuang lo. Thãwm eng emaw chu hriat a nei reng em ni? A han ngaihtuah vang vang a, ruahsur bâk kha thãwm dang eng emaw chu hriatna a nei tIat a ni.

Suahdur chu Iain a inher a, hmeichhia a ngaihtuah êm avang khan a silai pawh a rawn keng lo a ni tih a han inhriat chuan amah leh amah chu anchhia a han inlawh hlak a.

Thâwk leh khatah, pa pakhat hi chhêk in chhungah chuan a rawn lût a, anni chu a rawn hmachhawn ta a.

Dave Spanyer-a a ni. A kutah chuan silai a hum a, Lennie lam hawiin a lu a han lei luk a, “Nang kha! I pindanah lût vat rawh!” a han ti a. A rawn kal pelh lai chuan seh chilh deuh tak hian, “Inha vat la, kan chhûak nghâl ang,” a ti ta a.

Considine-a chu suahdur hum chungin a la ding reng a; mahse, chu pa chu hûatna eng mah a neih si loh avangin chu suahdur chu hman a tum chuang lo va, chu pa rawn ngaih dan tur chu a hriat thiampui a ni.

Spanyer-a chuan “Ka hmuh leh che chuan..., silai rawn pai tawh ang che!” a ti ta nghut a.

Considine-a chuan zàwi ruih hian, “I ngai sual mai mai a ni. Eng mah ṭha lo a awm lo ve. Sakawr va kàwm turin a chhûak a, chu chu keiin Indian-ho an lo awm ang tih ka hlau mai a ni,” a ti dam thluam a.

“Ka sawi chu i hria alawm!”

Dave Spanyer-a chu kawngkhar lamah chuan a tawlh hnung leh a, a chhûak leh ta a. Chutah zawng, thimtham Ieh ruahsur mai a ni ta....

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Rozami pachuau
Posts: 305
Joined: March 17th, 2018, 7:40 pm

Unread post by Rozami pachuau » October 19th, 2018, 8:42 pm

HIGH LONESOME
AUTHOR : LOUIS L'AMOUR
PUBLISHER : C. THANGZUALA
Chapter - 5
(Rozami Pachuau)

Thlaler ram khaw var ang reng reng chu khawi dang mah a awm lo va, tunah chuan ruahtui chu a luang ral zo tawh a, thlaler ram chu niin a rawn em vaivut leh thur mai turin hnutchhiah a ni leh ta. Thlaler hnimhnah te chauh chu an hring deuh nghulh a, an zung te chuan tuihal tak maiin ruahtui lo tla chhun chu an zûk ngawih ngawih mai a ni.

Chumi tûk zing chuan ramsate leh savate hnu chu ruah nan hlim ṭiauvutah chuan a lang chiang hle a; mahse, sakawr leh mihring hnute chu a awm ve hauh lo.

Dave Spanyer-a mitmeng vâwt ruih mai chuan tlang lam chu a thlir vung vung a, Indian-hovin a kal chhûak chu lo hmuin inhrilhna mei khu an chhuah em tih a thlir a ni.

Pa lungngai thei tak mai hi a ni roh a. Lennie kha a han vin thut mai a, chu chu tunah chuan a inchhir leh tawh zâwk a. Mahse, a fanu chu naupang ni tawh lovin nula a lo ni ve tawh a, mipa ngaihtuah rual te pawh a lo ni ve tawh tih kha a han theihnghilh thut a ni mai a.

‘Lady’ tih hi a rilru-ah a lo lang a. Ni e, a nupui kha ‘Lady’ dik tak mai a ni a, chutiang chu ni ve turin Lennie pawh chu a duh a ni.

Lennie chu a chungah a thinrim a, chu chu a pa pawhin hria sela a duh a ni. Kawng engkimah a nu chhun deuh mai kha a ni a. A nu kha chuan a thinrim pawh a ti lang ṭhin a; han áng bawrh bawrh chi erawh chu a ni lo. Chutiang bawkin Lennie pawh chuan a thinrim tawh chuan a hmai chu a zangthal ha a, a mit chuan a hma zâwn chu a en kal mai ṭhin a ni.

Spanyer-a chuan, “Mi ṭha tak tak pawh an awm a. Ka fanu chuan Gunfighter chu pasalah nei lo sela ka duh a ni," a han ti a.

“Ka nu pawhin chutiang chiah chu alawm a neih,”

Lennie chhanna chuan a pa chu a ti ngawi ta a. A nu chuan a nei a, chu chu a pa chuan a lo insiam ṭhatna a ni ta a. A nun bumro tak aṭang chuan mi pangngaiah a rawn chhuah ta a. An awmho chhunga an nun tawi tê, an khawsakho lai te chu a hre chhûak vawng vawng ṭhin a ni.

Duh lo chungin Spanyer-a chuan Considine-a chu a han ngaihtuah lêt leh a; duh lo chung bawkin chu pa chu a ngaisang rilru tlat bawk si a ni. Dutch-a'n a chunga mi a dah tawh reng reng chu mi tak tak fe an ni ngei tur a ni.

Chutah, Kiow-a pawh chu. Vâwi khat chauh lo chu Kiow-a chu a maltlat ṭhin hi a ni a; chutih lai chuan an pawl chuan Obaro bank rawk an phiar lai a ni a, an pawl zinga a dam chhûak awm chhun chu Kiow-a chauh chu a ni.

Considine-a chuan outlaw hmel pawh pu ve lovin a hria a. Gentleman dik tak ni zâwk àwm hmel hi a pu a, mi dangte lakah chuan danglamna riau hi a nei tlat a ni. Dave Spanyer-a, mi chinchang hria chuan chutiang chu a ngaih dan a ni.

Eng pawh ni sela, chu pa chu outlaw a ni ta reng reng mai a. An inhmuh leh pawh a rinawm tawh kher lo va, anniho khan Obaro bank rawk an tum kha an bawh zûi dawn a nih lek phei chuan Spanyer-a chuan an inhmuh leh ngai a ring tawh lo.

Dave Spanyer-a chuan a vêl ram chu a han thlir vung vung a, California ram an thlen theih phawt chuan thlai chin pawh a la tlai lutukin a ring lo va.

"Ka pa!"

Spanyer-a chu mak tia phâwk hru hian a rawn dâk chhûak a.

“Saw ta saw, mei khu!”

A fanu kawhna lam chu a han thlir a, tlang pang piah deuh tak aṭang chuan mei khu hi dîng deuh mai hian a khu chho laih laih a, a khu han bial chho laih laih chu a thlir reng a. A sakawr zin aṭanga lehhawiin a han thlir kir a, hnung lamah chuan chutiang bawka mei khu dang chu a hmu leh ta a, nizan an riahna aṭanga hmar lampangah khan a ni.

“Chaw i ei teh ang. Eina hun dang kan nei lo maithei a ni,” a ti ta thut a.

An piah lama lungpuite chu a han thlir leh vung vung a, chu laiah chuan phèn tur remchang pawh a awm maithei a ni. A Winchester rifle chu a sakawr zina a pai aṭang chuan a han phawi a, lungpui lam chu an pan ta zel a.

Lungpui hmun chu a'n hêl kual phawt a; chutah, kal kualin a lawn chho ta a. Chu laiah chuan tu mah an awm lo tih a han chian hnuah chauh Lennie chu a ko chho ve ta a. A nu kha hre rengin a sakawr aṭang chuan a hlang thla a, an ei tur funte chu a la thla leh a; a tlem tham êm avang chuan zahpui deuhin, “A tam lo hle mai,” a han ti sup a.

Fanu hruai si chuan chu ai chuan a keng tam tur a ni; mahse, a fanu chuan ei tur lam chu ngaihsak lo zâwkin, amah, a pa chu a ni a hmangaih chu tih a han hre chhûak ta a. An nei tam emaw, a tlem emaw, a pa kalna apiangah chuan zûi ve zel a huam a ni tih rawn hriat chhuahna a neih chuan a lung chu a ti chhe ta a.

Mahse, sikula lehkha lo zir tawh te a nih avang chu emaw ni dawn ni, Lennie bulah chuan a awm dam zân thei hauh lo mai a. Ani chu sikul-a lût ve azeng pawh a ni lo va, tlem azawng chu a ziakin a chhiar ve thei ṭâwk tâwk chauh a ni a.

Hmeichhe awm dan pawh a hre tlem hle a; tunah, a fanu chu a nula tawh lehnghâl si a; ani lah chuan han enkawl dan tur chu a hre lo kher mai si a, chu chuan a rilru a ti buaiin a ti lungngai bawk a ni.

Spanyer-a chuan thing nawi ro tlem azawng a han fawm khâwm a, mi mei chhemna hlui lo hnutchhiahah chuan mei chu a han nun ve ta a. Chu lungpui kar aṭang chuan anmahni awmna lam rawn pana mi lo kal chu chiang takin an lo hmu thei dawn a ni.

An thing tuah chu a ro ṭhat êm avangin a alh tang tang a, khûk pawh a khu lo va, borûak chu a ti lum hlek chauh a. Chutia mei a vil lai chuan Considine-a bawk kha a ngaihtuah zûi leh ta a.

Gunfighter emaw, Sheriff emaw, outlaw emaw pawhin anmahni chi tawh phawt chu an hre lo hlum hlak ngai lo va, an ran rual khalhnaah te, an zin vêivahna-ah te leh zu dawra an titi-naah te, mi dangte chanchin chu an sawi ṭhin a ni. Chutiang chuan Dave Spanyer-a pawh chuan Considine-a chu a hriatna pawh a rei tawh a, a silai pai dan te, a mi thah zât te leh mi eng ang nge a ni tih te pawh a hria a ni.

Gunfighter ṭhenkhat - Earps, Hickok, Billy the Kid, John Ringo leh Wes Hardin-ate chu mipui mit la-a thil ti an nih avangin an hmingthang pherh hrep a, anmahni tlukpui; mahse, hmingthang ve lo, tam tak an awm ve tho a ni. Bâwng khalhna kawng lamah chuan Johny Bull, Joe Phy, Luke Short, Longhair Jim Courtright, Jeff Milton, Dallas Stoudenmire, King Fisher leh Ben Thompson-te hi a hmingthang zualte chu an ni.

Chutia rawng a bawl lai chuan chutiang zawng zawngte chu Dave Spanyer-a chuan a ngaihtuah khâwm a. Considine-a chuan a dikna chu a hmingthan phah a, rawn ding chhûak a, silaimu chu silaimu bawka chhang ve mi a ni.

Spanyer-a khawvêl zim tê maiah chuan chutiang chuan mihring a chher a; mahse, chutiang nun chuan tawpna pakhat chauh a nei a ni. Silai keng chungin a thi emaw, lung inah a tang emaw.... Spanyer-a chuan chutiang ang gunfighter reng reng chu a fanu neihtir a tum hauh lo a ni.

Chutianga a ngaihtuah lai la la chuan Pete Runyon-a ngei pawh chu outlaw leh gunfighter nih fawmin a lo khawsa tawh ṭhin a; tunah chuan Law officer leh khua Ieh tui mi zah kai a lo ni ta zâwk a ni tih te chu a han ngaihtuah tel ve leh a. Khawthlang mite chuan ngaihdamna an nei sangin, dâwt sawi Ieh dâwihzepna chauh lo chu an ngaidam thei vek zel ni mai hian a hre ta a.

Coffee rim a han nam tâk ram ramah chuan sazu tê tak tê mai hi a rawn tawlh hnai hriau hriau a. Lennie chuan biscuit them chu a tuai thla a, a han theh pheisak a; chu sazu tê tak tê chu hlauvin a zuang dawrh a, feet sarih laia hla chu! Chutah, a ding chat a, a rawn hawi kir Ieh a, an rawn ûm zûi chuang lo tih a hmuh chuan a lo kal hnai leh ta hriau hriau a. Chu biscuit them tê chu a rawn hnim da da a, a ke pahnih chuan a la kang a, tui ti deuhin a ei ta melh melh mai a.

Chutah chuan rei chawl lovin an kal Ieh ta zel a. Vâwi khat chu kalkawng sir lungpui hlim aṭang chuan rattler rul hi a lo inthing ri char char a, an chung lamah chuan mulukawlh pakhat hi a thlâwk kual pup pup bawk a.

Spanyer-a chuan a mi kalsan tâkte kha a han ngaihtuah zûi a, ring deuh hian, “Aw le, an vanneih hle a ṭul ang!” a ti chhûak ta phawng mai a.

Lennie chuan a rawn en zauh a, tute nge a sawite chu tih pawh zawh ngaiin a hre lo va, anmahni chu ani pawhin a lo ngaihtuah ve lai tak mai a ni a. A bîk takin Considine- a chalsam kir lo tla chhap kha....

"Pa?"

Ani chuan a fanu lam chu a hawi leh a, tunah chuan a fanu thinrim pawh a reh daih tawh a ni tih chu a va hmu a. Lennie chuan, “An thil tum kha ti theiin i ring em?” a han ti a.

Spanyer-a chuan a dan pangngai, muangchang deuh mai bawk hian a han ngaihtuah vung vung a, Obaro khawpui awm dan te a han chhût a; chutah, amah Considine-a kha a han ngaihtuah leh tê tê a. A hnu deuhah chuan, “Ti thei tur an awm ngai a nih chuan ani kha a ni mai,” a han ti chut a.

Tichuan, “A buaithlâkna lai tur chu ka nausen te, chu chu a tànna tur chauh a ni. Chumi hnuah chuan an rawn ûm ang a, an tlan ang a; mahse, tlan chhuah chu harsa tak a ni ang. Miin dan pawn lamah a kut a vilik tawh chuan mi zawng zawng hi a hmelma an ni tawh mai ṭhin a ni.

"Chutah, eng mah hlâwkna tak tak a awm chuang lo a ni. Rinawmna chu pawn lama i hnâwl chuan hlâwkna a awm tak tak tawh ngai chuang lo. Outlaw tam takte chu an han inchhût meuh chuan an nun dan hrehawm nen, hlâwk an inti lo hle ṭhin a ni.

"Vâwi khat chu outlaw lian tham deuh ka hre tawh a; mi tinin fing leh rem hria-a an sawi huai huai chu! Mahse, chu pa pawh chuan a puitlin hun chhung, hmun thuma ṭhena hmun khat chu lung in tan nan a lo hmang zo tawh a. Chutah, khai hlum theihna tur a chungah pahnih ngawt a innghat a; chutah, outlaw dangte leh ṭhenrualte chàwm hlàwmin a khawsa tawh a ni,” a ti ta a.

Dave Spanyer-a chuan kawlkil lam chu a han thlir leh vang vang a, thlaler khua chu a lum sa huam mai a. Chhim thlang lamah chuan mei khu hi dîng deuh hian a khu chho laih laih a...

*************************

Considine a chuan a silver sana Iian pui chu a han en vung vung a, “Nangniho chu darkar khat, minute sawmhniha a la rîk lohah chiah hian khawpuiah chuan in lo Iût ang a, minute sawm chhung hun ka tiam thei che u; minute sawm panga pawh a ni maithei,” a ti ta a.

Hardy-a chuan a'n melh zauh a, “In va insual rei dawn ve,” a lo ti a.

“Pa bumro tak a ni reng a ni,” tiin Considine-a chu a nui suk a, “Kei pawh ka bumro ve a ngai a ni,” a han ti zûi a.

A sakawr zinah chuan a chuang kai a, “Silai kah loh tur; a ṭul êm êm a nih chauh loh chuan. Silai in kah rîk vaih chuan khawthlang lama pa themthiam ber berte in chhaih kawlh dawn a ni lek mai. Ka hria alawm, ka lo inthemthiampui tawh ṭhin hlawm a ni,” a ti a.

A kal chhûak ta chu a han lehhawi leh a, anni chuan ban an rawn vai a. Chutah zet zawng, a hruai luhna hmun chu a han ngaihtuah a, mi ṭha tak tak an nih vêi nen chuan..., mi ṭha tak tak, rorum tak.

Lennie kha a han ngaihtuah zûi leh ta a. Chu nula chu a hmu chauh emaw kha a ni si a, chutiang taka a rilru a han la thei mai chu mak a ti kher mai! Chutah zet zawng, chutiang êm chuan Mary chu a lo vei ngai lutuk hauh lo a ni tih a inhre chhûak ta a! A la naupang deuh a, Mary chu a hmuh theih chinah chuan nula hmel ṭha ber a lo ni bawk si a, chu vang mai lek chauh chu em ni ta ang?

Khawpui a hnaih deuh tâkah chuan a han kal zàwi deuh a, hmuh tur tam vak pawh a awm lem lo va. Kawtthler sei pui pui pathum a awm a, chûng chu kawtthler tlem azawngin a tan tlang a; Bank chu langsar takah, kawtthler laili-ah chuan a awm a ni mai a; sakawr dahna in chu kawtthler lehlam tawpah chuan a awm bawk a.

Mite'n khawpui chu a rawn Iût a ni tih an hriat chuan an insual leh chu an ring ngei dawn a, a en turin mi tin chu an rawn thawk chhûak dawn a ni.

A tih tur hmasa ber chu khawpuiah chuan a rawn lût leh ta tih hriattir chu a ni.

A pahnihna-ah chuan Pete Runyon-a chu ṭha tâwk taka tih thinrim chu a ni leh mai. Pete-a chu pa thlûak vâwt reih rawih, thil eng pawh ngun taka en thlithlai mi a nih avangin chu chu a awlsam vak dawn lo!

Mary.... Ni, Mary chu a hmu hmasa tur a ni. Chu chuan Pete-a chu a ti thinrim ngei ngei ang, tih thinrim theih a nih dawn phawt chuan!

An insual thu a than vaih chuan mi chu rang deuhin an rawn pung khâwm tawh mai dawn a. Sakawr dahna pal hung lama an insual chuan mi tin mai chu a ko pung ang a; chutah, mi pakhat emaw chauh chu bank-ah chuan a lo awm tawh dawn a, Bank rawk hun chhung chu minute nga lo liam a ni lo vang. Rang takin an che ang a, an insual bàn hma chuan a hote chu an lo tlan chhûak leh hman daih tawh dawn a ni.

Eng emaw a lo thlen thut a, silai a puah palh hlauh erawh chuan, a entute chu an kal kiang mai dawn a; chumi hunah erawh chuan ama hriat dana ṭha ber ang angin khua aṭang chuan a tlan chhûak ve mai tawh tur a ni ang. Mahse, Pete-a chuan lo ringhlelin thil awmzia chu lo hre thiam ta hlauh sela, engtin nge ni ta ang?

Considine-a chuan silai chu a han phawrh a, a cylinder chu a ti vir a, a saddle bag-a silai reserve ken chu a han endik leh a.

A sakawr chuanna chu dang a ti hle mai a; mahse, Honey Chavez-a chuan a neih ṭhat ber niin a sawi bawk si. Anmahni sakawrte khân Box Canyon-ah khan an lo nghâk dawn a ni a; chutah chuan an sakawrte chu an thlâk leh ang a, sakawr tharlamin chhim lam an pan dîng tawh mai dawn a ni.

A rem rûat chu a tlawlh ang tih hlauhawmna lai dang a la awm ta cheu a. A hun lo laiin silai pai, mi tu emaw pawh bank-ah chuan a lo luh a hlauhawm a; tu emawin bank chu chhuahsan a, a lo luh leh thu pawh chu; a nih loh leh, tu emaw pawh rifle nen, in chhawng hnihna tukverh khawi laiah emaw chuan a lo awm reng thei bawk a ni.

Runyon-a chuan an insualnaah chuan hnek fuhin a hnek thidang der maithei bawk. A nih loh leh, ani pawhin Runyon-a chu chutianga a hnek thihdan palh mai chuan a ṭha dawn lo bawk. An insual chhung chûan a tlem berah minute sawm emaw chhung tal chu a awh ngei tur a ni.

Khawthlang lam chu a han hawi a, mei khu chho hlat hlat hi a hmu ta a. Thinrim deuh mai hian anchhia a han lawh hlak a, chu lam kawngah chuan Dave Spanyer-a leh a fanu kha an zin chhûak ta a ni si a. Chutah, ama harsatna lam bawk chu a ngaihtuah zûi leh ta rih a.

Entir nan, O’ Beirne-i.... Chu nu chuan eng mah hi hmaih a nei Io tih mai tur hi a ni a; chutah, laiphir a kawl run reng mai bawk si nen. Vawi khat pawh, a laiphir chu sawi hat hat tling khawpin Indian-ho lakah a lo chelek tawh nghe nghe a, chu nu chu han ngaihzam mai mai theih rual pawh a ni lo. A pasal thih aṭang phei chuan kekawrtlawn hain ama bâwng rualte ngei chu hlingin a chhinchhiahna te pawh amah ngeiin a chhu a ni.

Considine-a chuan a lukhum parh chu a hmai Ian theihna turin dâk fein a phih chho a, khawpui hmawr a rawn thlen chuan mei zûk tur a han zial ta a. A dang chu a ro hulh a, a pumin a hnawh um mai bawk a. A sakawr zinah chuan a han chuang ngil deuh a, sakawr huang pal hung chu a han kal kual a; chutah, kawtthlerah a rawn chhûak Ieh ta a.

A chunga thlâwk ang maiin a suangtuahna chuan chu khawpui zau tak mai chu mitthlain a han inhmuhtir a. Khawpui chu hetah hian a inpharh a, Spanyer-a leh a fanu chuan khawthlang lam an pan a; an hnungah chuan he lam kawng hi rawn zawhin Hardy, Dutch leh Kiow-ate chu an lo lût ve thuai dawn a, chûngte chu ama mawh phurhna vek ni hian a hria a.

Obaro-ah chuan Wanted List a awm ve lo va. Hun rei tak kal tawhah khan khâng rel te kha chu rawk a ni tih chu an hre ngei mai; mahse, chu chu a chianna a awm chuang lo. Chuvangin, khawpuiah chuan zalen takin a lût thei a ni.

Chu khua chu a lo chen tawhna ṭhin a nih avangin a mi chengte pawh a hria a, an bank chu a rawk vaih chuan an theih ang chen chen chu an ûm dawn a ni tih pawh a hria a, a theih chuan an man ang a, a theih chuan thah pawh an that mai ang. Mahse, a rûk tak chuan anmahni khua leh tuia mi ngeiin a ni an bank chu rawk thei tiin an chhuang zâwk dawn a ni.

Invengthawng takin kawtthlerah chuan a kal zel a, ngaihtuah mang lovin a lukhum chu a han pawt thla leh a. Emporium kawtah chuan mi tlem azawng hi an lo ṭhu khâwm tal tal a, Mrs O’Beirne chuan a kailawn chu a lo phiat hoh hoh a.

Kawtthlerah chuan arpui hian eng emaw hi a lo chuk thing lâwp lâwp a, ui pakhat hi vaivut lum chungah a lo mu dar dar a. Pakhat khatin a thil hmuhte chu a chian zel a, a hmel an hmuh theih nan a lukhum chu a han kai dâk leh a, amah an lo hriat a, khawpuiah chuan a lo lût a ni tih an hriat vek chu a duh a ni.

Dawr pakhat zâwn chu a thleng a, a chhung aṭang chuan pa pakhat a lo chhûak thuai a, chu pa chuan a rawn en ta vung vung a. Chutah, “Doc, ka thil hmuh saw i hmu ve em?” tiin a au ta a. Khawi laiah emaw chuan kawngkhar hi a han inkhar ri dawt a. Considine-a chu khawpuiah a lo lût leh ta....

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)