THE FIRST FAST DRAW (COMPLETED)

Western cowboy Re-type, lehlin leh mizo phuahchawp dahna

Moderator: writers

Rozami pachuau
Posts: 305
Joined: March 17th, 2018, 7:40 pm

Re: THE FIRST FAST DRAW Chapter 11

Unread post by Rozami pachuau » December 19th, 2018, 1:50 pm

THE FIRST FAST DRAW
AUTHOR : LOUIS L'AMOUR
PUBLISHED BY : H.V. Pub.
Chapter - 12 (Last chapter)
(Rozami Pachuau)

Cullen Baker chuan a dinhmun derthawnzia leh a thlen chin apiang chu hlauhawm hlira khat a nih dan te pawh a hre chiang êm êm a, a fimkhur ngiang reng a ni. Thi ve ngei dawna inhriatna lian tak a nei reng mai lehnghâl a; chutiang chuan a la awm ngai lo reng reng a ni.

Sakawr chu a chak bawk a, a kal thoh thoh mai a. Jefferson leh Lake Caddo hnungchhawn zawngin hmar lam a pan ta zel a. Texas ramri chu thlang lamah a awm a, a awmna lai chu Louisiana leh Arkansas inri-na vêl lai tak a ni. Baker Greek a kân hnu chuan khawthlang lam hawiin a sakawr chu a kaltir leh ta thung a.

Kawng pangngai pawh zawh lovin Caddo leh Cherokea-ho ram chhuahna kawngṭum biru tak tak hlir chu a zawh a; lui pakhat a kân hnuah lui kamah chuan fimkhur takin a lawn kai ta a. Kawng lai takah chuan thingṭang, a hnah pawh la hring hluah mai hi a lo awm nuai a, chu lam hawi chuan thui vak lo chu a kal leh ta a.

Kawng sira lung pathum inrem chu a hmu ta a; lung inrem kil thum nei chuan thing hmun lam chu a kâwk a. Chu chu an pawlho chinchang inhrilh dan a ni a; mahse, thang pawh a ni thei tho tih erawh chu a hriain, a sakawr chu Cullen chuan a pawt ding ta rih a.

Chhimbuk hram dan hian a han kuk dat dat phawt a, a ngawi deuh va, a han ti nawn leh a; rei lo têah, thing hmun lam aṭang chuan uṭawk hram ri ang hian a rawn chhawn ta a. Matt Kirby chuan chutiang rannung hram chu a tak tak ang thawthangin a thiam ṭhin reng a ni.

Cullen chuan amah an rawn pan hun chu a nghâk ta zâwk a. Fimkhur leh inring takin a mit a len kual ruai a, rei lo têah Kirby leh mi dang pakhat, chu ngaw aṭang chuan an rawn inzûi chhûak ta a. Kirby rawn hruai-pa chu Cullen chuan a hmuh ngai pawh a la ni lo va.

Kirby chuan, “Hei hi Joe leh Buck-ate nu unaunu fapa a nih hi. Ani hi chu a hlauhthawnawm lo ve,” tiin Cullen chu a han hmelhriattir nghâl a.

Chu pa chu anmahni ang tiat zeta lian leh thawmhnaw chhe tak inbel hi a ni a. Cullen chuan a sakawr saddle bag aṭang chuan kawr leh kekawr hlui, ama lo hâk tawh ṭhin chu a rawn phawrh a, “Hêng hi kei chuan ka duh tâwk ka ha tawh a, nei ve tawh rawh,” tih pahin a pe ta a.

Chu pa chuan zak tih hriat tak hian, “Ka lawm hle mai; keiniho zawng sum lamah kan hul deuh a ni, thlai man lah chu a tla hniam nasa si a,” a ti ve luam a.

“He laiah eng nge i rawn tih ve reng reng?”

Chu pa chuan mak ti hmel deuh hian Cullen chu a en hu a, “Ka naute an that a, kan that lêt ve ang chu, kan dàn a ni miau alawm‚” a ti ta chheu mai a.

“Haw leh mai la, i tan a ṭhat zâwk ka ring; buaina bâk eng mah i hlawh chhûak lo vang.”

“Ka haw mai thei lo. Ka pa ngaih dan pawh a ni a, kei pawhin a dikin ka hria. Tinney-te unau nen khan seilian za kan ni a, anmahni thattute zalh bo an nih ve hma chuan ka unaute boral tâ hi pawm dam mai harsa ka ti a ni.”

“Haw zâwk mai la a ṭhat ka va ring e!” Cullen chuan a la ti ta cheu a.

Chutih lai chuan Bob Lee leh Longley-te chu thing hmun aṭang chuan an rawn lang ve ta hlawl a, an hmel aṭang pawhin an chau hle ni hian a lang a.

Bob Lee chuan an bul vêl ngaw thim ruih lam thlir pah chuan, “He lai hmun hian min ti ral ṭi duk mai a, nuam ka ti ve ngai lo,” a ti chhûak ta hlawl a.

“Mexico lam chu em ni pan zai i rel tâk a?”

“Uh...; huh...‚ Ranch neih ka tum a ni,” tih pahin Bob Lee chuan cigar a phawrh a, “Chihuahua-ah khuan ṭhian ka nei nual a, ka nupui chu nakinah ka la chah mai ang,” a han tih zawm Ieh a.

“Kei pawhin khawthlang lam pan chu ka tum ve mek....”

An titi kalphung chu a danglam ta hle mai.

Chu lai hmun chu tu mahin nuam an ti lo va, thla tam tak thihna nen an lo inkhing tawh a; tunah, inthiar fihlim theihna hun an han nei a, a hma ai maha nuam tih lohnain an khat tawh zâwk lawi bawk si!

Hlauh neih hi dâwihzep vang a ni vek lo tih hi Cullen chuan a hre chiang tawh a; hlau chung chung pawha hma lam sut kûak theih hi a pawimawh ber zâwk chu a ni. Anni ang mihringte hi chuan vawi duai lo silai an lo hmachhawn tawh a, an vai chuan silai hlauhawmzia pawh an hre chiang vek a ni.

Tunah hian tlansan theihna hun an nei ta a, Cullen pawh chuan muangchanin sâwtna a nei dawn lo tih a hriat avangin Matt Kirby coffee rawn pêk chu a han lem khawlh a, chutih pah chuan, “He lai hmun hi ka kalsan thuai dawn,” a ti ta a.

Lee leh Longley chuan Cullen chu an en vang vang a; Kirby chuan mei chu a hawlh a hawlh a, an ṭhianzaho chuan a ngaihna hre lo zet hian a en tawn sek ringawt mai a.

Lee chuan, “Min nghah deuh theih chuan Fannin County thlengin kan kal dun thei ang," a han ti leh a.

“Bob, nang chu ni ila, Fannin County lam chu ka pan hauh lo vang.”

“Ka nupui hmuh a ngai a ni."

“Nangmah kal kher lovin lehkha thawn mai rawh. Mexico pan nghâl la, i hnunga Loredo a awm hma chuan chawl hauh suh. Bob, Texas hi kan chhuahsan vek a hun a ni, ka sawi lam chu hawi kir lovin pan nghâl zâwk rawh. Ka mi hriat zingah chuan a nikhua ber i ni a, thil sâwt tawh lo avangin i thisen i seng thlawn tur a ni lo vang."

“Hetianga i hlauhthawnna ṭawngkam hi ka vawi khat hriatna a la ni àwm e.”

Cullen chuan a bula Bill Longley lo ding chu a han en a, “Bill, nang pawhin i silai dah rawh; i la thih phah ngei ngei ang,” a han ti leh a.

Longley chuan, “Mipa tan chuan thih hun a awm alawm,” a lo ti ve charh charh a.

Cullen chuan a kut a phar chhûak a, “Dam takin kan ti mai a ni ang chu, Bob,” a ti ta a.

“Adios, ṭhianpa.”

Longley pawh chuan nawi tak hian, “Khawthlang lamah chuan kan la inhmu dawn nia, min lo ngaihven deuh a ni ang chu,” a han ti ve a.

“Teh reng mai.”

Cullen chuan a coffee in bang chu a leih bua a, no chhung chu a han bih vang vang a; chutah, a no chu a paih a, a sakawrah chuan a lawn ta a.

A ṭhiante hnungchhawn zawng chuan che miah lovin a han ṭhu vang vang a. Tun hi an inhmuh hnuhnun ber tur a ni tawh maithei a, a ngaihtuahna pawh a vâk thui vang vang hle mai. Chutah, muangchangin a sakawr chu a kaltir ta a.

Longley chuan, “Chaw tal ei phawt àwm,” a lo ti a.

Kirby chuan‚ “A hmabâk a thim vek tawh a nih kha, in hmu thiam mai lawm ni? Ka piin mahni thih hun tur hre lâwk te chu ti khan an awm ṭhin a tia lawm,” a lo ti a.

Bob Lee chuan, “Thil âwihawm loh tak a nih chu. Fannin lam ka pan dawn, i lo kal ve dawn em, Bill?" tih pahin a no rûak chu leiah chuan a dah a.

Bob Lee-te pahnih kal hnu chuan Cullen-a thawmhnaw pêk-pa chuan a mit a han nuai chawt chawt a, “I mut a chhûak em? Kei chu ka chau khawp mai,” Kirby hnenah chuan a han ti a.

Cullen chu a kal dîng nghâl mai lo va‚ yard tlem têah a sakawr chu a dintir leh a. Bob Lee ang bawkin chu lai hmun chu nuam tih lohna riau a nei ve a, Bob Lee-te kal sawn thawm pawh chu a hre reng a ni.

Kirby-a'n, “Mu la; ka mut chhuah ve hunah ka kai tho ang che,” a tih ri te pawh chu a hre thei a. Chumi hnu chuan muangchangin a sakawr chu a kaltir leh ta a.

Khua a var pawh chuan chawl lovin a la kal zel a; mahse, a sakawr nen chuan an chauh putû tawh êm avangin an chawl ta a.

Cullen-a muhil a rawn harh chuan a silai a endik nghâl zung zung a, ni san tawh dan aṭang chuan darkar tam fe chu a muhil hman a ni tih pawh a hre mai a. A bul vêl ram chu ngun takin a han en kual leh phawt a, thing pakhat bul khuar lai deuhvah chuan mei a chhem ta a.

Coffee a chhuang a, bawng sa rep a chhum bawk a; chutah, thing hmuna kawngṭum kal lût raih chu ngun takin a han bel chiang ta dan dan a.

Chu kawng chu ramsa bâkin an hmang tawh ngai meuh lo tih a hre thei mai a. Hman laiin Caddo Indian-ho chuan an lo hmang tawh thin a; mahse, tunah chuan hmangtu, zawhtu an awm mumal tawh loh avangin a hnim chuk tawh a ni.

Chu lai kawng chu a hma pawha chu lai ram a kalsanna kawng a ni a; tunah, Barlow leh sipaihote'n an zawng reng a, tan in aṭanga a chhuah avang pawh khan man leh ngei pawh an tum ang tih a chiang a ni. Mahse, Cass Country a chhuahsan tawh avangin Barlow chêttlatna hmun pawimawh zual chu a pel ta reng reng a ni.

Thingkung pakhatah hian sava pakhat, Mockingbird a thlâwk kual pap pap a, thawm a reh vawng vawng kher mai. Sa leh coffee a ei zawh hnu chuan uluk takin mei chu a ti hlum leh ta vat a.

A awmna chu Willow Bluff aṭanga mel thum emaw chauh a ni tawh a. Thawm a reh êm avang chuan hla taka thil riva pawh a hriat theih a, thil han ri deuh ṭhak a hriat chuan ngun lehzualin a han ngaithla a, ramsain thingṭang a rah tliah a ni ang han ti dawn se, ramsa chuan thingṭang, tliak mai thei an rap palh ngai dèr tlat si lo.

Cullen chuan a sakawr saddle chu a phah sawk sawk a, a chuang kai vat a, hmanhmawh lutuk lovin a kal sawntir ta vat a.

Kawngpui lun ber chu mel tam fea hla a la ni a; mahse, chu lo pawh chu Willow Bluff pàwhtu kawng a awm tho a, a kawng zawh mek chu tu ma zawh ve ngai loh leh hnim chuk mai a nih avangin a kal ang tih tu mahin han rin mai ngaihna pawh a awm dawn lo a ni.

Cullen chuan pûakruk kah leh phawi tih angreng vêl chu Jail-a a tan chhung tih loh kha chu a la zir zûi ta reng tho va, tunah phei chuan Fort Worth-a Dud Butler a thah lai ai daih khan a rang tawh zâwk tih pawh a inhria a ni.

A khat tâwkin a sakawr a ti ding a, ngaw lampangah chuan thawm riva a awm leh awm loh ngun takin a ngaithla zel a, hmun him thlen dawn aruaia buai khawbaw palh mawlh chu a hlauh ber a nih avangin a fimkhur tak zet a ni.

Sulphur lui kam a thlen leh chuan chawhnu dar hnih vêl a ni a; chu lui, tui lang thei lo chin hnuai lamah chuan thingzung leh thing hnawk a tam avangin tan palh mai a hlauhawm êm êm a, a ṭhen lai phei chu a thûk thut thut bawk ṭhin nen. Lawnga inthiar kaina lai chu lui mawng lam, mel eng emaw zâta hla a la ni a, Cullen sakawr dintirna lai chu Caddo hovin lui an kânna lai leh Willow Bluff aṭanga mel hnih vêla hla a la ni.

Cullen chuan a kalna tur lai chu hêl phawt a, hmar lam aṭanga pawh phei leh ṭha berin a hre ta a. A chhan chu hre chiah thei lo mah se, chu ngaw chu a lan ang ngawta rûak ni lova rinna a nei tlat a, a fimkhurin a mit pawh a lèn ngun hle a ni.

Katy chuan tu pawh a rawn hruai thei a, a va inlan hmain tu nge a rawn hruai tih chu hriat hmasak phawt chu himthlâk ber dawnin a la hre leh zel a; chu bâkah, a rûka rawn zûitu pawh an awm thei bawk a ni.

Cullen chuan rei lo tê chhungin a sakawr chu Sulphur lui a dai kaitir ta a. A kam lehlamah chuan kawng chu hmun hnihah a inṭhen phawk a, hmun khat chu White Cotton lamah a ni a; pakhat zâwk chu hmar thlang lamah a ni. Hmar lam, Dalby Spring aṭanga kawngṭum lo kal nen a infin leh chiah a ni.

Cullen chuan kawng pawh chu zawh lovin, ramhnuai lam aṭangin Willow Bluff chu a pan ta a. Ngaw chu a reh ruih a, borûak chu a hnim ruih hian a hriat a, rilru nawm lohna hlira a khah avangin Texas ram chu chak taka tlan chhuahsan vang vang mai a châk tawh hle a ni.

A hnuai ding lam deuh aṭanga Willow Bluff a lan theih hnu chuan thing zingah a sakawr aṭangin a chhuk ta a; ṭhu chungin mei a han zial phawt a; thing ṭawih rim a nam rum rum a.

Willow Bluff hmunah chuan zu rui tlu tur ni thei mai àwm, in hlui chhe fahran tawh mai hi a ding a, tuichhunchhuah leh sakawr dahna huang tla bal tawh tak a awm bawk a. Hla vak lo, hmar lamah chuan Sulphur lui kam chu a lang thei a.

Cullen chuan a mit leh beng chhi reng chungin a tawmna aṭang chuan a bul vêl ram chu ngun takin a thlir kual a; a pum te chu rûak ruih hian a hria a; a chang leh Katy chu lo kal duh tak tak pawhin a han ring lo leh thut ṭhin a.

Rei pawh a awm hma chuan sakawr chung chuang pathum hi in lam pana an kal a hmu ta a. Chu mite chu Katy, Lacy leh John Tower-te an lo ni hlauh mai a, thuam phur tur sakawr pakhat an hruai tel bawk a. Tower chu a sakawr aṭang chuan a chhuk a, hmeichhe pahnihte chu a pui nghâl vat a.

Cullen chu che chhûak nghâl mai lovin a awmna ngaiah chuan a la ṭhu ta rih a, minute sawm (10) ral hnu àwm vêl thleng a ṭhut leh pawha eng mah thil ṭha lo lam a hmuh tâk loh avang chuan a tho va, a sakawr chu a kai a, âwihpang lamah chuan a chhuk thlâkpui ta a.

Katy chuan a lo hmuh veleh tlanin a rawn pan nghâl a, “Cullen, i thi tawh emaw kan lo ti tawh asin; Warren khan that tâ che angin a insawi si a,” a ti ta zung zung a.

Cullen chu a tirah chuan a bangbo hle a; mahse, thil awmzia chu an hrilh fiah ta thuai a.

Tower-ate, chu lai hmun lama lo kal leh Warren chu an intâwk a, chutah chuan Warren chuan phili tak chung hian Cullen-a a thah thu a lo hrilh ta mai hi a lo ni a.

Tower chuan, “Tu maw i thah?" âwih lo deuh hian a han ti a.

Warren chuan, meng dava leh phi deuh ruai chung hian, “Cullen Baker ka that tawh,” a la ti ta cheu a.

John Tower chuan, “Nang ang mi dâwihzep hian Cullen Baker chu i that a maw?” âwih lo zeta a han tih leh ngat pawhin that ang chuan a la insawi ta zel tho va.

Warren chuan aw làwi leh aw-ki sang zâwk hian, “Chutiangin min ti suh! Cullen Baker chu keima thah a ni," a han ti nawn leh a, a nui zûi ta hawk hawk a.

A awm dan chuan Katy pawh a ti ṭhawng hle a, Warren awm dan chu thil eng emaw ruih a nei hi ang hlein a hria a, “Ka that ngei alawm; a inngai ropui lutuk a, mi pakhat nen hnim zingah an lo awm a, an pahnihin ka that ta a ni. Cullen chuan a kawr hâk thin pangngai kha a ha a, a chunga thil thleng pawh a hre hman lo vang.... A ṭhian, Kirby an tih kha chu a rawn tho leh a, ka...," a ti zûi bawrh bawrh a.

Tower chuan thinur avanga hmai var pap hian, “Mi mu lai i that a ni maw? Ka...,” a han ti a.

Katy chuan, “A that hauh lo vang tih ka chiang e,” tiin a rawn sawi zawm ve zat bawk a.

Warren chuan, “Mi chhaw nu, i la hre thiam na cheu nge? A thi tawh, taksa ṭawih ral mai tur a ni ta; chuvangin, amah ngaia kun tlawk tlawk pawh a ṭul tawh lo. Kei hian ka that a ni, keimah ngei hian! Tunah chuan ka chanchin a ni an sawi ve tawh ang ni, Cullen Baker-a thattu ka nih avangin,” a ti ngat ngat zel mai a.

Tower thinrim lutuk chuan, “Ka that mai teh ang che,” a ti ram ve ta hmak a.

“Ni lo ve, eng mah a hre thiam ve lo a nih hi,” tiin Katy chuan a lo khap bet hram hram zâwk a. Warren en chung chuan, "Hêng lai ramah chuan buaina ching fel tura silai nena hmelmate hmachhawn ngam a ni an ngaih san ni. Inthah ngawt avangin ngaih san an hlawh lo va; dikna ṭan ngamna hi a ni zâwk! Cullen Baker chu that tak tak pawh ni la, i thah avang ngawt chuan ngaih san i nih phah dawn lo va; mi muhil lai kâp hlumtu anga hmusit taka en i ni zâwk dawn a ni," a tih khum ta salh salh a.

Chumi hnu chuan an kalsan ta daih a. Warren chu mi ã ang maiin an hnungah chuan a nui vur vur a, Katy chuan a thu sawi a âwih theih loh avang chuan mak pawh a ti lêt thung a ni. Tichuan, anni pathum chuan Willow Bluff chu an rawn pan ta zel a lo ni.

An piah maiah chuan lui a luang ri hawk hawk a, Cullen leh Katy chu an inen vawng vawng a, sawi ngai lovin an rilru chu an inman dun nghâl vek a. Cullen chuan ani a neih chuan eng dang mah thlâkhlelh tur a nei tawh dawn lo tih pawh a chiang a ni.

Tower chuan Lacy lam chu enin, “Sawi duh ka neih chu ka hmangaih che tih hi a ni. Lacy, Texas-ah hian nangmah zawngin ka lo kal a, Terence-a nupui i nih lai pawh khan ka hmangaih daih tawh che a ni. Ani kha thah erawh chu ka duh reng reng lo; mahse, i hnena ka sawi tawh ang khan ka tum reng vang ni lovin ka kutah a thi palh ta a ni zâwk,” a han ti a.

Cullen leh Katy chu lungawi êm êm hian an inkuah vawng vawng a, hmangaihna thu an infah tawn mawlh mawlh bawk a. Lacy'n, “John, khawthlang lam i pan ve mai ang hmiang,” a tih ri chu an ṭawng dun sep sep karah chuan an hre thei a.

Cullen chuan a fimkhurna chu a la thlahthlam chuang hauh lo tih hriat tak hian a han dâk chhûak a; chutah le, thing hmun bul, tuichhunchhuah kianga inpeih at tawh tih hriat taka Chance Thorne leh Barlow-te, an hote pahnih nen an lo ding reng tawh mai chu a va hmu ta thut a. Inhlat tak taka ding an nih avangin an rilru puthmang pawh hai rual lohvin a hriat theih nghâl a ni.

Chu veleh Cullen chuan rang deuhvin Katy chu a nawr sawn nghâl dawrh a.

An awmna piah lawka mi palite hmachhawn zawngin John Tower pawh chu a lo ding fel ve hman chiah bawk a.

Cullen chuan, “John, silai hmeh puah a ngai dawn a ang hle mai,” zawi sap hian a han ti a. An pahniha a thi zâwka an ṭan vaih chuan Lacy Ieh Katy-te chan tur pawh an hmu tlang nghâl vek a ni.

Cullen vek chuan zawi tê bawk hian, “Barlow leh Thorne saw ka tum ang a; a dangte saw nangin i lo buaipui ve dawn nia aw, John?” a han ti leh sap a.

“Nia maw le; mahse, a ṭha ṭha i chang zo bîk dawn a nih chu,” John Tower chuan a lo ti ve mai a.

Chutah, Barlow chuan nui sawng chung hian, “I thlan Iaih sâ kha hnaih deuh ila chuan, nangmah ngeiin luah ta zâwk la a ṭhat dawn nen!" a han ti nuah nuah a, a rawn pan hnai pah hrat hrat bawk a.

An inkar chu fit sawmthum (30) chauh a ni ta. Chance chuan mitmeng bawlhhlawh zet hian Katy chu a en reng a, “Min hmusit ṭhin hle a; he laiah hian in chungah eng pawh thleng se, tu mahin an hre chhûak leh tawh hauh lo vang,” a han tih khum a, a nui zûi huk huk a.

Barlow pawh chuan, “Han sawisak deuh che pawh ka châk hle a, Cullen; mahse, hêng hmeichhiate hian min lo nghâkhlel hle tawhin a rinawm si a, mipa dik tak chêt dan chu an hre thuai tawh dawn a ni. Tunah hian kan that dawn che a ni," a lo ti khur khur a.

“Eng nge ni le?”

Ṭawng tuitam tawh lovin Cullen chuan a theih anga rangin a pûakruk chu a chuh ta thut a. Thla tam fe lo inzir tawh a ni bawk a, a kutah chuan pûakruk chu mahnia nunna nei ang hrimin a rawn chawr chhûak nawlh a ni ber a, a pûak nghâl ṭhuai bawk a.

Silaimu chuan kun ngawih khawpin Barlow dulah chuan a va verh sawr a; chutah, a kahna ngai deuhthaw-ah a mu hnihna chu a thun leh nghâl zat a, Barlow chu a tlu hlawm ta nawk a.

Cullen chuan Chance Thorne lam chu a hawi zûi leh nghâl zat a, silaimu hian a rawn thawi thuak a; Cullen silaimu erawh chuan Chance Thorne chu a nâkah a va verh pawp a, a mu hnihna chuan a beng hnuai chiah, a nghawngah a verh khaw phawr bawk a, thisen chik pûat pûat chungin a tlu ve ta nawk nawk a.

Cullen chuan Tower chu mahni invai veng ve thei tâwk nia a ngaih avangin Barlow chu a pan phei ta nghâl a.

Ani chuan thawh a lo tum mek a, a dam rei dawn tawh lo tih chu a hmel lan dan aṭang chuan a inhria tih a hriat theih mai a; dula silaimu lût hna thawh a pai lehnghâl bawk nen. Thinrim hmel deuh hian, "Bob Lee pawh a thi tawh! A in aṭanga Mexico a pan tur Peacock-hovin an lo lambun a. Bickerstaff pawh Alvarado-ah kah hlum a ni a, tunah nang pawh hi ka that ve dawn che!" tih pahin a pûakruk chu lek kan a la tum ve ta cheu va; mahse, Cullen chuan a lo pet thlâksak nghâl lâwp a.

Chance Thorne thi tur pawh chu, thisenin hnim a bual sen nguai zingah chuan vial ngawlh ngawlh chung leh thei leh thei lo hian‚ "Ka... duh... ka ... duh...,” a han ti hram a, a zal a ni zûi ta mai a. A mit chuan khua a hmu tawh lo tih hriat tak hian van lam a melh chho ru a, a duh chu eng nge tih pawh a sawi chhuah theih tâk loh avangin hriat hman hram Cullen chuan a châk hle a ni.

Lacy chuan John Tower kawr ban chu pawt thler kâwkin, a banbul, silaimu thawina chu a lo tuamsak ve mawlh mawlh a. Tower-a bitum pahnihte pawh chu piah deuhvah chuan eng tikah mah tho leh ngai tawh lo turin an thal ve reng bawk a.

Katy chuan, “Warren khan that ni àwm chein a insawi thlarawk a; mahse, i inlan Ieh Ioh chuan mi pawhin thu dikah an pawmsak mai dawn a; chuvangin, 'Cullen Baker' tih hming hi thlâk la, kan tan a ṭha zâwkin ka ring,” tin thuràwn ṭha tak a siam ta hlauh a.

Tichuan, mi nung palite chuan khawthlang lam panin, mitthi ruang palite chu an kalsan ta a, hlim tak leh thlamuang takin an kal ta diah diah a.

A TAWP TA.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)